== Бытие == === 1 === 1 В начале сотвори Бог небо и землю. 2 Земля же бе невидима и неустроена, и тма верху бездны, и Дух Божий ношашеся верху воды. 3 И рече Бог: да будет свет. И бысть свет. 4 И виде Бог свет, яко добро, и разлучи Бог между светом и между тмою. 5 И нарече Бог свет день, а тму нарече нощь. И бысть вечер, и бысть утро, день един. 6 И рече Бог: да будет твердь посреде воды, и да будет разлучающи посреде воды и воды. И бысть тако. 7 И сотвори Бог твердь, и разлучи Бог между водою, яже бе под твердию, и между водою, яже бе над твердию. 8 И нарече Бог твердь небо. И виде Бог, яко добро. И бысть вечер, и бысть утро, день вторый. 9 И рече Бог: да соберется вода, яже под небесем, в собрание едино, и да явится суша. И бысть тако. И собрася вода, яже под небесем, в собрания своя, и явися суша. 10 И нарече Бог сушу землю, и собрания вод нарече моря. И виде Бог, яко добро. 11 И рече Бог: да прорастит земля былие травное, сеющее семя по роду и по подобию, и древо плодовитое творящее плод, емуже семя его в нем, по роду на земли. И бысть тако. 12 И изнесе земля былие травное, сеющее семя по роду и по подобию, и древо плодовитое творящее плод, емуже семя его в нем, по роду на земли. И виде Бог, яко добро. 13 И бысть вечер, и бысть утро, день третий. 14 И рече Бог: да будут светила на тверди небесней, освещати землю и разлучати между днем и между нощию: и да будут в знамения и во времена, и во дни и в лета, 15 и да будут в просвещение на тверди небесней, яко светити по земли. И бысть тако. 16 И сотвори Бог два светила великая: светило великое в начала дне, и светило меншее в начала нощи, и звезды: 17 и положи я Бог на тверди небесней, яко светити на землю, 18 и владети днем и нощию, и разлучати между светом и между тмою. И виде Бог, яко добро. 19 И бысть вечер, и бысть утро, день четвертый. 20 И рече Бог: да изведут воды гады душ живых, и птицы летающыя по земли, по тверди небесней. И бысть тако. 21 И сотвори Бог киты великия, и всяку душу животных гадов, яже изведоша воды по родом их, и всяку птицу пернату по роду. И виде Бог, яко добра. 22 И благослови я Бог, глаголя: раститеся и множитеся, и наполните воды, яже в морях, и птицы да умножатся на земли. 23 И бысть вечер, и бысть утро, день пятый. 24 И рече Бог: да изведет земля душу живу по роду, четвероногая и гады, и звери земли по роду. И бысть тако. 25 И сотвори Бог звери земли по роду, и скоты по роду их, и вся гады земли по роду их. И виде Бог, яко добра. 26 И рече Бог: сотворим человека по образу Нашему и по подобию, и да обладает рыбами морскими, и птицами небесными, (и зверми) и скотами, и всею землею, и всеми гады пресмыкающимися по земли. 27 И сотвори Бог человека, по образу Божию сотвори его: мужа и жену сотвори их. 28 И благослови их Бог, глаголя: раститеся и множитеся, и наполните землю, и господствуйте ею, и обладайте рыбами морскими, (и зверми) и птицами небесными, и всеми скотами, и всею землею, и всеми гадами пресмыкающимися по земли. 29 И рече Бог: се, дах вам всякую траву семенную сеющую семя, еже есть верху земли всея: и всякое древо, еже имать в себе плод семене семеннаго, вам будет в снедь: 30 и всем зверем земным, и всем птицам небесным, и всякому гаду пресмыкающемуся по земли, иже имать в себе душу живота, и всяку траву зелену в снедь. И бысть тако. 31 И виде Бог вся, елика сотвори: и се добра зело. И бысть вечер, и бысть утро, день шестый. === 2 === 1 И совершишася небо и земля, и все украшение их. 2 И соверши Бог в день шестый дела Своя, яже сотвори: и почи в день седмый от всех дел Своих, яже сотвори. 3 И благослови Бог день седмый, и освяти его: яко в той почи от всех дел Своих, яже начат Бог творити. 4 Сия книга бытия небесе и земли, егда бысть, в оньже день сотвори Господь Бог небо и землю, 5 и всякий злак селный, прежде даже быти на земли, и всякую траву селную, прежде даже прозябнути: не бо одожди Господь Бог на землю, и человек не бяше делати ю: 6 источник же исхождаше из земли и напаяше все лице земли. 7 И созда Бог человека, персть (взем) от земли, и вдуну в лице его дыхание жизни: и бысть человек в душу живу. 8 И насади Господь Бог рай во Едеме на востоцех, и введе тамо человека, егоже созда. 9 И прозябе Бог еще от земли всякое древо красное в видение и доброе в снедь: и древо жизни посреде рая, и древо еже ведети разуметелное добраго и лукаваго. 10 Река же исходит из Едема напаяти рай: оттуду разлучается в четыри начала. 11 Имя единей Фисон: сия окружающая всю землю Евилатскую: тамо убо есть злато. 12 Злато же оныя земли доброе: и тамо есть анфракс и камень зеленый. 13 И имя реце вторей Геон: сия окружающая всю землю Ефиопскую. 14 И река третия Тигр: сия проходящая прямо Ассириом. Река же четвертая Евфрат. 15 И взя Господь Бог человека, егоже созда, и введе его в рай Сладости, делати его и хранити. 16 И заповеда Господь Бог Адаму, глаголя: от всякаго древа, еже в раи, снедию снеси: 17 от древа же, еже разумети доброе и лукавое, не снесте от него: а в оньже аще день снесте от него, смертию умрете. 18 И рече Господь Бог: не добро быти человеку единому: сотворим ему помощника по нему. 19 И созда Бог еще от земли вся звери селныя и вся птицы небесныя, и приведе я ко Адаму видети, что наречет я: и всяко еже аще нарече Адам душу живу, сие имя ему. 20 И нарече Адам имена всем скотом, и всем птицам небесным, и всем зверем земным. Адаму же не обретеся помощник подобный ему. 21 И наложи Бог изступление на Адама, и успе: и взя едино от ребр его, и исполни плотию вместо его. 22 И созда Господь Бог ребро, еже взя от Адама, в жену, и приведе ю ко Адаму. 23 И рече Адам: се, ныне кость от костей моих и плоть от плоти моея: сия наречется жена, яко от мужа своего взята бысть сия. 24 Сего ради оставит человек отца своего и матерь и прилепится к жене своей, и будета два в плоть едину. 25 И беста оба нага, Адам же и жена его, и не стыдястася. === 3 === 1 Змий же бе мудрейший всех зверей сущих на земли, ихже сотвори Господь Бог. И рече змий жене: что яко рече Бог: да не ясте от всякаго древа райскаго? 2 И рече жена змию: от всякаго древа райскаго ясти будем: 3 от плода же древа, еже есть посреде рая, рече Бог, да не ясте от него, ниже прикоснетеся ему, да не умрете. 4 И рече змий жене: не смертию умрете: 5 ведяше бо Бог, яко в оньже аще день снесте от него, отверзутся очи ваши, и будете яко бози, ведяще доброе и лукавое. 6 И виде жена, яко добро древо в снедь и яко угодно очима видети и красно есть, еже разумети: и вземши от плода его яде, и даде мужу своему с собою, и ядоста. 7 И отверзошася очи обема, и разумеша, яко нази беша: и сшиста листвие смоковное, и сотвориста себе препоясания. 8 И услышаста глас Господа Бога ходяща в раи по полудни: и скрыстася Адам же и жена его от лица Господа Бога посреде древа райскаго. 9 И призва Господь Бог Адама и рече ему: Адаме, где еси? 10 И рече Ему: глас слышах Тебе ходяща в раи, и убояхся, яко наг есмь, и скрыхся. 11 И рече ему Бог: кто возвести тебе, яко наг еси, аще не бы от древа, егоже заповедах тебе сего единаго не ясти, от него ял еси? 12 И рече Адам: жена, юже дал еси со мною, та ми даде от древа, и ядох. 13 И рече Господь Бог жене: что сие сотворила еси? И рече жена: змий прельсти мя, и ядох. 14 И рече Господь Бог змию: яко сотворил еси сие, проклят ты от всех скотов и от всех зверей земных: на персех твоих и чреве ходити будеши, и землю снеси вся дни живота твоего: 15 и вражду положу между тобою и между женою, и между семенем твоим и между семенем тоя: той твою блюсти будет главу, и ты блюсти будеши его пяту. 16 И жене рече: умножая умножу печали твоя и воздыхания твоя: в болезнех родиши чада, и к мужу твоему обращение твое, и той тобою обладати будет. 17 И Адаму рече: яко послушал еси гласа жены твоея и ял еси от древа, егоже заповедах тебе сего единаго не ясти, от него ял еси: проклята земля в делех твоих, в печалех снеси тую вся дни живота твоего: 18 терния и волчцы возрастит тебе, и снеси траву селную: 19 в поте лица твоего снеси хлеб твой, дондеже возвратишися в землю, от неяже взят еси: яко земля еси, и в землю отидеши. 20 И нарече Адам имя жене своей Жизнь, яко та мати всех живущих. 21 И сотвори Господь Бог Адаму и жене его ризы кожаны, и облече их. 22 И рече Бог: се, Адам бысть яко един от Нас, еже разумети доброе и лукавое: и ныне да не когда прострет руку свою и возмет от древа жизни и снест, и жив будет во век. 23 И изгна его Господь Бог из рая Сладости делати землю, от неяже взят бысть. 24 И изрину Адама, и всели его прямо рая Сладости: и пристави Херувима, и пламенное оружие обращаемое, хранити путь древа жизни. === 4 === 1 Адам же позна Еву жену свою, и заченши роди Каина и рече: стяжах человека Богом. 2 И приложи родити брата его, Авеля. И бысть Авель пастырь овец, Каин же бе делаяй землю. 3 И бысть по днех, принесе Каин от плодов земли жертву Богу: 4 и Авель принесе и той от первородных овец своих и от туков их. И призре Бог на Авеля и на дары его: 5 на Каина же и на жертвы его не внят. И опечалися Каин зело, и испаде лице его. 6 И рече Господь Бог Каину: вскую прискорбен был еси? И вскую испаде лице твое? 7 Еда аще право принесл еси, право же не разделил еси, не согрешил ли еси? Умолкни: к тебе обращение его, и ты тем обладаеши. 8 И рече Каин ко Авелю брату своему: пойдем на поле. И бысть внегда быти им на поли, воста Каин на Авеля брата своего и уби его. 9 И рече Господь Бог ко Каину: где есть Авель брат твой? И рече: не вем: еда страж брату моему есмь аз? 10 И рече Господь: что сотворил еси сие? Глас крове брата твоего вопиет ко Мне от земли: 11 и ныне проклят ты на земли, яже разверзе уста своя прияти кровь брата твоего от руки твоея: 12 егда делаеши землю, и не приложит силы своея дати тебе: стеня и трясыйся будеши на земли. 13 И рече Каин ко Господу Богу: вящшая вина моя, еже оставитися ми: 14 аще изгониши мя днесь от лица земли, и от лица Твоего скрыюся, и буду стеня и трясыйся на земли, и будет, всяк обретаяй мя убиет мя. 15 И рече ему Господь Бог: не тако: всяк убивый Каина седмижды отмстится. И положи Господь Бог знамение на Каине, еже не убити его всякому обретающему его. 16 И изыде Каин от лица Божия и вселися в землю Наид, прямо Едему. 17 И позна Каин жену свою, и заченши роди Еноха. И бе зиждяй град, и именова град во имя сына своего Енох. 18 Родися же Еноху Гаидад: и Гаидад роди Малелеила: и Малелеил роди Мафусала: Мафусал же роди Ламеха. 19 И взя себе Ламех две жены: имя единей Ада и имя вторей Селла. 20 И роди Ада Иовила: сей бяше отец живущих в селениих скотопитателей. 21 И имя брату его Иувал: сей бяше показавый певницу и гусли. 22 Селла же и тая роди Фовела: сей бяше млатобиец, ковачь меди и железа: сестра же Фовелова Ноема. 23 Рече же Ламех своим женам: Ада и Селла, услышите глас мой, жены Ламеховы, внушите моя словеса: яко мужа убих в язву мне и юношу в струп мне: 24 яко седмицею отмстися от Каина, от Ламеха же седмьдесят седмицею. 25 Позна же Адам Еву жену свою: и заченши роди сына, и именова имя ему Сиф, глаголющи: воскреси бо ми Бог семя другое, вместо Авеля, егоже уби Каин. 26 И Сифу бысть сын: именова же имя ему Енос: сей упова призывати имя Господа Бога. === 5 === 1 Сия книга бытия человеча, в оньже день сотвори Бог Адама, по образу Божию сотвори его, 2 мужа и жену сотвори их и благослови их: и нарече имя ему Адам, в оньже день сотвори их. 3 Поживе же Адам лет двесте тридесять и роди сына по виду своему и по образу своему, и нарече имя ему Сиф. 4 Быша же дние Адамовы, яже поживе, по еже родити ему Сифа, лет седмь сот, и роди сыны и дщери. 5 И быша вси дние Адамовы, яже поживе, лет девять сот и тридесять: и умре. 6 Поживе же Сиф лет двесте пять и роди Еноса. 7 И поживе Сиф, по еже родити ему Еноса, лет седмь сот и седмь, и роди сыны и дщери. 8 И быша вси дние Сифовы лет девять сот и дванадесять: и умре. 9 И поживе Енос лет сто девятьдесят и роди Каинана. 10 И поживе Енос, по еже родити ему Каинана, лет седмь сот и пятьнадесять, и роди сыны и дщери. 11 И быша вси дние Еносовы лет девять сот и пять: и умре. 12 И поживе Каинан лет сто седмьдесят и роди Малелеила. 13 И поживе Каинан, по еже родити ему Малелеила, лет седмь сот и четыредесять, и роди сыны и дщери. 14 И быша вси дние Каинановы лет девять сот и десять: и умре. 15 И поживе Малелеил лет сто шестьдесят пять и роди Иареда. 16 И поживе Малелеил, по еже родити ему Иареда, лет седмь сот и тридесять, и роди сыны и дщери. 17 И быша вси дние Малелеиловы лет осмь сот и девятьдесят пять: и умре. 18 И поживе Иаред лет сто шестьдесят два и роди Еноха. 19 И поживе Иаред, по еже родити ему Еноха, лет осмь сот, и роди сыны и дщери. 20 И быша вси дние Иаредовы лет девять сот и шестьдесят два: и умре. 21 И поживе Енох лет сто шестьдесят пять и роди Мафусала. 22 Угоди же Енох Богу, и поживе Енох, по еже родити ему Мафусала, лет двесте, и роди сыны и дщери. 23 И быша вси дние Еноховы лет триста шестьдесят пять. 24 И угоди Енох Богу, и не обреташеся, зане преложи его Бог. 25 И поживе Мафусал лет сто осмьдесят седмь и роди Ламеха. 26 И поживе Мафусал, по еже родити ему Ламеха, лет седмь сот осмьдесят два, и роди сыны и дщери. 27 И быша вси дние Мафусаловы, яже поживе, лет девять сот и шестьдесят девять: и умре. 28 И поживе Ламех лет сто осмьдесят осмь и роди сына, 29 и нарече имя ему Ное, глаголя: сей упокоит нас от дел наших и от печали рук наших, и от земли, юже прокля Господь Бог. 30 И поживе Ламех, по еже родити ему Ноа, лет пять сот и шестьдесят пять, и роди сыны и дщери. 31 И быша вси дние Ламеховы лет седмь сот и пятьдесят три: и умре. 32 И бе Ное лет пяти сот, и роди сыны три, Сима, Хама, Иафефа. === 6 === 1 И бысть егда начаша человецы мнози бывати на земли, и дщери родишася им: 2 видевше же сынове Божии дщери человечи, яко добры суть, пояша себе жены от всех, яже избраша. 3 И рече Господь Бог: не имать Дух Мой пребывати в человецех сих во век, зане суть плоть: будут же дние их лет сто двадесять. 4 Исполини же бяху на земли во дни оны: и потом, егда вхождаху сынове Божии к дщерем человеческим, и раждаху себе: тии бяху исполини, иже от века, человецы именитии. 5 Видев же Господь Бог, яко умножишася злобы человеков на земли: и всяк помышляет в сердцы своем прилежно на злая во вся дни: 6 и помысли Бог, яко сотвори человека на земли, и размысли. 7 И рече Бог: потреблю человека, егоже сотворих, от лица земли, от человека даже до скота, и от гад даже до птиц небесных: зане размыслих, яко сотворих я. 8 Ное же обрете благодать пред Господем Богом. 9 Сия же бытия Ноева: Ное человек праведен совершен сый в роде своем, Богу угоди Ное. 10 Роди же Ное три сыны, Сима, Хама, Иафефа. 11 Растлеся же земля пред Богом, и наполнися земля неправды. 12 И виде Господь Бог землю, и бе растленна: яко растли всяка плоть путь свой на земли. 13 И рече Господь Бог Ною: время всякаго человека прииде пред Мя, яко исполнися земля неправды от них: и се, Аз погублю их и землю. 14 Сотвори убо себе ковчег от древ (негниющих) четвероуголных: гнезда сотвориши в ковчезе, и посмолиши его внутрьуду и внеуду смолою. 15 И тако сотвориши ковчег: трех сот лактей долгота ковчега, и пятидесяти лактей широта, и тридесяти лактей высота его. 16 Собирая сводом сотвориши ковчег, и в лакоть свершиши его свыше: дверь же ковчега сотвориши от страны: обиталища двокровна и трекровна сотвориши в нем. 17 Аз же, се, наведу потоп, воду на землю, погубити всяку плоть, в нейже есть дух жизни под небесем: и елика суть на земли, скончаются. 18 И поставлю завет Мой с тобою: внидеши же в ковчег ты и сынове твои, и жена твоя и жены сынов твоих с тобою. 19 И от всех скотов и от всех гад, и от всех зверей, и от всякия плоти, два два от всех введеши в ковчег, да питаеши с собою: мужеский пол и женский будут. 20 От всех птиц пернатых по роду, и от всех скотов по роду, и от всех гадов ползающих по земли по роду их, два два от всех внидут к тебе, питатися с тобою, мужеский пол и женский. 21 Ты же возми себе от всех брашен, яже имате ясти, и собереши к себе, и будут тебе и оным брашно. 22 И сотвори Ное вся елика заповеда ему Господь Бог, тако сотвори. === 7 === 1 И рече Господь Бог к Ною: вниди ты и весь дом твой в ковчег, яко тя видех праведна предо Мною в роде сем: 2 от скотов же чистых введи к себе седмь седмь, мужеский пол и женский: от скотов же нечистых два два, мужеский пол и женский: 3 и от птиц небесных чистых седмь седмь, мужеский пол и женский: и от всех птиц нечистых две две, мужеский пол и женский, препитати семя по всей земли: 4 еще бо дний седмь, Аз наведу дождь на землю четыредесять дний и четыредесять нощей: и потреблю всякое востание, еже сотворих, от лица всея земли. 5 И сотвори Ное вся, елика заповеда ему Господь Бог. 6 Ное же бе лет шести сот, и потоп водный бысть на земли. 7 Вниде же Ное и сынове его, и жена его и жены сынов его с ним в ковчег, воды ради потопа. 8 И от птиц чистых и от птиц нечистых, и от скот чистых и от скот нечистых, (и от зверей,) и от всех гадов пресмыкающихся по земли, 9 два два внидоша к Ною в ковчег, мужеский пол и женский, якоже заповеда (Господь) Бог Ною. 10 И бысть по седми днех, и вода потопная бысть на земли. 11 В шестьсотное лето в житии Ноеве, втораго месяца, в двадесять седмый день месяца, в день той разверзошася вси источницы бездны, и хляби небесныя отверзошася: 12 и бысть дождь на землю четыредесять дний и четыредесять нощей. 13 В день той вниде Ное, Сим, Хам, Иафеф, сынове Ноевы, и жена Ноева, и три жены сынов его с ним в ковчег. 14 И вси зверие земнии по роду, и вси скоти по роду, и всякий гад движущийся на земли по роду, и всякая птица пернатая по роду своему, 15 внидоша к Ною в ковчег два два, мужеский пол и женский, от всякия плоти, в нейже есть дух животный: 16 и входящая мужеский пол и женский от всякия плоти, внидоша к Ною в ковчег, якоже заповеда Господь Бог Ною: и затвори Господь Бог ковчег отвне его. 17 И бысть потоп четыредесять дний и четыредесять нощей на земли, и умножися вода и взя ковчег, и возвысися от земли: 18 и возмогаше вода, и умножашеся зело на земли, и ношашеся ковчег верху воды. 19 Вода же возмогаше зело зело на земли: и покры вся горы высокия, яже бяху под небесем: 20 пятьнадесять лактей горе возвысися вода, и покры вся горы высокия. 21 И умре всякая плоть движущаяся по земли птиц и скотов и зверей, и всякий гад движущийся на земли, и всякий человек, 22 и вся елика имут дыхание жизни, и все еже бе на суши умре. 23 И потребися всякое востание, еже бяше на лицы всея земли, от человека даже до скота и гадов и птиц небесных, и потребишася от земли: и оста Ное един, и иже с ним в ковчезе. 24 И возвысися вода над землею дний сто пятьдесят. === 8 === 1 И помяну Бог Ноа, и вся звери, и вся скоты, и вся птицы, и вся гады пресмыкающыяся, елика беху с ним в ковчезе: и наведе Бог дух на землю, и преста вода. 2 И заключишася источницы бездны и хляби небесныя: и удержася дождь от небесе. 3 И вспять пойде вода идущая от земли: и умаляшеся вода по сте пятидесятих днех. 4 И седе ковчег в месяц седмый, в двадесять седмый день месяца, на горах Араратских. 5 Вода же уходящи умаляшеся даже до десятаго месяца: и в десятый месяц, в первый день месяца явишася верси гор. 6 И бысть до четыредесятих днех отверзе Ное оконце ковчега, еже сотвори, 7 и посла врана (видети, аще уступила вода от лица земли): и изшед не возвратися, дондеже изсяче вода от земли. 8 И посла голубицу по нем видети, аще уступила вода от лица земли: 9 и не обретши голубица покоя ногама своима, возвратися к нему в ковчег, яко вода бяше по всему лицу всея земли: и простер руку свою, прият ю и внесе ю к себе в ковчег. 10 И премедлив еще седмь дний, паки посла голубицу из ковчега. 11 И возвратися к нему голубица к вечеру, и имеяше сучец масличен с листвием во устех своих: и позна Ное, яко уступи вода от лица земли. 12 И премедлив еще седмь дний других, паки посла голубицу, и не приложи возвратитися к нему потом. 13 И бысть в первое и шестьсотное лето жития Ноева, в первый день перваго месяца, изсяче вода от лица земли: и откры Ное покров ковчега, егоже сотвори, и виде, яко изсяче вода от лица земли. 14 В месяц же вторый, в двадесять седмый день месяца изсше земля. 15 И рече Господь Бог Ноеви, глаголя: 16 изыди из ковчега ты и жена твоя, и сынове твои и жены сынов твоих с тобою: 17 и вся звери, елицы суть с тобою, и всяку плоть от птиц даже до скотов, и всяк гад движущийся по земли изведи с собою: и раститеся и множитеся на земли. 18 И изыде Ное и жена его, и сынове его и жены сынов его с ним, 19 и вси зверие, и вси скоти, и вся птицы и вси гади движущиися по роду своему на земли изыдоша из ковчега. 20 И созда Ное жертвенник Господеви: и взя от всех скотов чистых и от всех птиц чистых и вознесе во всесожжение на жертвенник. 21 И обоня Господь воню благоухания. И рече Господь Бог размыслив: не приложу ктому прокляти землю за дела человеческая, зане прилежит помышление человеку прилежно на злая от юности его: не приложу убо ктому поразити всякую плоть живущую, якоже сотворих: 22 во вся дни земли сеятва и жатва, зима и зной, лето и весна, день и нощь не престанут. === 9 === 1 И благослови Бог Ноа и сыны его и рече им: раститеся и множитеся, и наполните землю и обладайте ею: 2 и страх и трепет ваш будет на всех зверех земных (и на всех скотех земных,) на всех птицах небесных и на всех движущихся по земли и на всех рыбах морских: в руце вашы вдах (я). 3 И всякое движущееся, еже есть живо, вам будет в снедь: яко зелие травное дах вам все. 4 Точию мяса в крови души да не снесте. 5 Крови бо вашей, душ ваших, от руки всякаго зверя изыщу (ея): и от руки человека брата изыщу ея. 6 Проливаяй кровь человечу, в ея место его пролиется: яко во образ Божий сотворих человека. 7 Вы же раститеся и множитеся, и наполните землю, и множитеся на ней. 8 И рече Бог Ноеви и сыном его с ним, глаголя: 9 се, Аз поставляю завет Мой вам и семени вашему по вас, 10 и всякой души живущей с вами от птиц и от скот и всем зверем земным, елика с вами (суть) от всех изшедших из ковчега: 11 и поставлю завет Мой с вами: и не умрет всяка плоть ктому от воды потопныя, и ктому не будет потоп водный, еже истлити всю землю. 12 И рече Господь Бог Ноеви: сие знамение завета, еже Аз даю между Мною и вами, и между всякою душею живою, яже есть с вами, в роды вечныя: 13 дугу Мою полагаю во облаце, и будет в знамение завета (вечнаго) между Мною и землею. 14 И будет егда наведу облаки на землю, явится дуга Моя во облаце: 15 и помяну завет Мой, иже есть между Мною и вами, и между всякою душею живущею во всякой плоти, и не будет ктому вода в потоп, яко потребити всяку плоть. 16 И будет дуга Моя во облаце: и узрю ю, еже помянути завет вечный между Мною и землею, и между всякою душею живущею во всякой плоти, яже есть на земли. 17 И рече Бог Ноеви: сие знамение завета, егоже положих между Мною и между всякою плотию, яже есть на земли. 18 Быша же сынове Ноевы изшедшии из ковчега, Сим, Хам, Иафеф: Хам же бяше отец Ханаань. 19 Трие сии суть сынове Ноевы: от сих разсеяшася по всей земли. 20 И начат Ное человек делатель (быти) земли, и насади виноград: 21 и испи от вина, и упися, и обнажися в дому своем. 22 И виде Хам отец Ханаань наготу отца своего, и изшед вон поведа обема братома своима. 23 И вземше сим и Иафеф ризу, возложиша (ю) на обе раме свои, и идоша вспять зряще, и покрыша наготу отца своего: и лице их вспять зря, и наготы отца своего не видеша. 24 Истрезвися же Ное от вина, и разуме елика сотвори ему сын его юнейший, 25 и рече: проклят (буди) Ханаан отрок: раб будет братиям своим. 26 И рече: благословен Господь Бог Симов: и будет Ханаан отрок раб ему: 27 да распространит Бог Иафефа, и да вселится в селениих Симовых, и да будет Ханаан раб ему. 28 Поживе же Ное по потопе лет триста пятьдесят. 29 И быша вси дние Ноевы лет девять сот пятьдесят: и умре. === 10 === 1 Сия же (суть) бытия сынов Ноевых, Сима, Хама, Иафефа. И родишася им сынове по потопе. 2 Сынове Иафефовы: Гамер и Магог, и Мадай и Иован, и Елиса и Фовел, и Мосох и Фирас. 3 Сынове же Гамеровы: Асханас и Рифаф и Форгама. 4 Сынове же Иовани: Елиса и Фарсис, Китийстии и Родийстии. 5 От сих разделишася острови языков (всех) в земли их: кийждо по языку в племенех своих и в народех своих. 6 Сынове же Хамовы: Хус и Месраин, Фуд и Ханаан. 7 Сынове Хусовы: Сава и Евила, и Савафа и Регма, и Савафака. Сынове же Регмановы: Сава и Дадан. 8 Хус же роди Неврода: сей начат быти исполин на земли: 9 сей бе исполин ловец пред Господем Богом: сего ради рекут: яко Неврод исполин ловец пред Господем. 10 И бысть начало царства его Вавилон и Орех, и Архад и Халанни на земли Сеннаар. 11 От земли тоя изыде Ассур: и созда Ниневию, и Роовоф град, и Халах. 12 И Дасем между Ниневиею и между Халахом: сей есть град великий. 13 Месраин же роди Лудиима и Неффалима, и Енеметиима и Лавиима, 14 и Патросониима и Хасмониима, отнюдуже изыде Филистиим, и Гаффориима. 15 Ханаан же роди Сидона первенца (своего) и Хеттеа, 16 и Иевусеа и Аморреа, и Гергесеа 17 и Евеа, и Арукеа и Асеннеа, 18 и Арадиа и Самареа, и Амафию. И посем разсеяшася племена Хананейская: 19 и быша пределы Хананейстии от Сидона даже приити до Герара и Газы, идуще даже до Содома и Гоморры, до Адамы и Севоима, даже до Даса. 20 Сии сынове Хамовы в племенех своих, по языком своим, в странах своих и в народех своих. 21 И Симу родися и тому, отцу всех сынов Еверовых, брату Иафефа старейшаго. 22 Сынове Симовы: Елам и Ассур, и Арфаксад и Луд, и Арам и Каинан. 23 И сынове Арамли: Ос и Ул, и Гатер и Мосох. 24 И Арфаксад роди Каинана, Каинан же роди Салу, Сала же роди Евера. 25 И родистася Еверу два сына: имя единому Фалек: во дни бо его разделися земля: и имя брату его Иектан. 26 Иектан же роди Елмодада и Салефа, и Сармофа и Иараха, 27 и Одорра и Евила и Декла, 28 и Евала и Авимаила и Совева, 29 и Уфира и Евила и Иовава: вси сии сынове Иектановы. 30 И бысть селение их от Маси даже приити до Сафира, горы восточныя. 31 Сии сынове Симовы, в племенех своих, по языком их, в странах их и в народех их. 32 Сия племена сынов Ноевых по родом их, по языком их: от сих разсеяшася острови языков на земли по потопе. === 11 === 1 И бе вся земля устне едине, и глас един всем. 2 И бысть внегда поити им от восток, обретоша поле в земли Сеннаарстей и вселишася тамо. 3 И рече человек ближнему своему: приидите, сотворим плинфы и испечем их огнем. И бысть им плинфа в камень, и брение вместо мела. 4 И рекоша: приидите, созиждем себе град и столп, егоже верх будет даже до небесе: и сотворим себе имя, прежде неже разсеятися нам по лицу всея земли. 5 И сниде Господь видети град и столп, егоже созидаша сынове человечестии. 6 И рече Господь: се, род един, и устне едине всех, и сие начаша творити: и ныне не оскудеют от них вся, елика аще восхотят творити. 7 Приидите, и сошедше смесим тамо язык их, да не услышат кийждо гласа ближняго (своего). 8 И разсея их оттуду Господь по лицу всея земли: и престаша зиждуще град и столп. 9 Сего ради наречеся имя его Смешение, яко тамо смеси Господь устна всея земли, и оттуду разсея их Господь по лицу всея земли. 10 И сия бытия Симова: и бяше Сим сын ста лет, егда роди Арфаксада, во второе лето по потопе: 11 и поживе Сим, повнегда родити ему Арфаксада, лет пять сот и роди сыны и дщери: и умре. 12 И поживе Арфаксад лет сто тридесять пять и роди Каинана: 13 и поживе Арфаксад, повнегда родити ему Каинана, лет триста тридесять и роди сыны и дщери: и умре. И поживе Каинан лет сто тридесять и роди Салу: и поживе Каинан, повнегда родити ему Салу, лет триста тридесять и роди сыны и дщери: и умре. 14 И поживе Сала лет сто тридесять и роди Евера: 15 и поживе Сала, повнегда родити ему Евера, лет триста тридесять и роди сыны и дщери: и умре. 16 И поживе Евер лет сто тридесять четыри и роди Фалека: 17 и поживе Евер, повнегда родити ему Фалека, лет триста седмьдесят и роди сыны и дщери: и умре. 18 И поживе Фалек лет сто тридесять и роди Рагава: 19 и поживе Фалек, повнегда родити ему Рагава, лет двесте девять и роди сыны и дщери: и умре. 20 И поживе Рагав лет сто тридесять два и роди Серуха: 21 и поживе Рагав, повнегда родити ему Серуха, лет двесте седмь и роди сыны и дщери: и умре. 22 И поживе Серух лет сто тридесять и роди Нахора: 23 и поживе Серух, повнегда родити ему Нахора, лет двесте и роди сыны и дщери: и умре. 24 И поживе Нахор лет седмьдесят девять и роди Фарру: 25 и поживе Нахор, повнегда родити ему Фарру, лет сто двадесять девять и роди сыны и дщери: и умре. 26 И поживе Фарра лет седмьдесят и роди Аврама и Нахора и Аррана. 27 Сия же бытия Фарры: Фарра роди Аврама и Нахора и Аррана. Арран же роди Лота: 28 и умре Арран пред Фаррою отцем своим в земли, в нейже родися, в стране Халдейстей. 29 И пояста Аврам и Нахор себе жены: и имя жене Аврамли Сара, и имя жене Нахорове Мельха, дщи Арраня: сей есть отец Мельхин и отец Есхин. 30 Бяше же Сара неплоды и не раждаше детей. 31 И поят Фарра Аврама сына своего и Лота сына Арраня, сына сына своего, и Сару сноху свою, жену Аврама сына своего: и изведе я из земли Халдейския ити на землю Ханаанску: и приидоша даже до Харрана и вселишася тамо. 32 Быша же вси дние Фаррины в земли Харрани лет двесте пять: и умре Фарра в Харране. === 12 === 1 И рече Господь Авраму: изыди от земли твоея, и от рода твоего, и от дому отца твоего, и иди в землю, юже ти покажу: 2 и сотворю тя в язык велий, и благословлю тя, и возвеличу имя твое, и будеши благословен: 3 и благословлю благословящыя тя, и кленушыя тя проклену: и благословятся о тебе вся племена земная. 4 И иде Аврам, якоже глагола ему Господь, и идяше с ним Лот: Аврам же бе лет седмидесяти пяти, егда изыде от (земли) Харран. 5 И поят Аврам Сару жену свою, и Лота сына брата своего, и вся имения своя, елика стяжаша, и всякую душу, юже стяжаша в Харране: и изыдоша поити в землю Ханааню. 6 И пройде Аврам землю в долготу ея даже до места Сихем, до дуба Высокаго: Хананее же тогда живяху на земли (той). 7 И явися Господь Авраму и рече ему: семени твоему дам землю сию. И созда тамо Аврам жертвенник Господу явльшемуся ему. 8 И отступи оттуду в гору на восток (лицем) прямо Вефилю, и постави тамо кущу свою в Вефили при мори, и Агге к востоком: и созда тамо жертвенник Господу, и призва во имя Господа (явльшася ему). 9 И воздвижеся Аврам, и шед ополчися в пустыни. 10 И бысть глад на земли: и сниде Аврам во Египет вселитися тамо, яко одоле глад на земли. 11 Бысть же егда приближися Аврам внити во Египет, рече Аврам Саре жене своей: вем аз, яко жена добролична еси: 12 будет убо егда увидят тя Египтяне, рекут, яко жена его есть сия: и убиют мя, тебе же снабдят: 13 рцы убо, яко сестра ему есмь, да добро мне будет тебе ради, и будет жива душа моя тебе ради. 14 Бысть же егда вниде Аврам во Египет, видевше Египтяне жену его, яко добра бяше зело, 15 и видеша ю князи фараони и похвалиша ю пред фараоном, и введоша ю в дом фараонов. 16 И Авраму добре бяше ея ради: и быша ему овцы и телцы и ослы, и рабы и рабыни, и мски и велблюды. 17 И мучи Господь казньми великими и лютыми фараона и дом его Сары ради жены Аврамли. 18 Призвав же фараон Аврама, рече ему: что сие сотворил еси мне, яко не поведал ми еси, яко жена твоя есть? 19 Вскую рекл еси, яко сестра ми есть? И поях ю себе в жену. И ныне се, жена твоя пред тобою: поемь ю отиди. 20 И заповеда фараон мужем о Авраме, проводити его и жену его, и вся, елика быша его, и Лота с ним. === 13 === 1 Изыде же Аврам от Египта сам и жена его, и вся, елика его, и Лот с ним в пустыню. 2 Аврам же бяше богат зело скоты и сребром и златом. 3 И иде отнюдуже прииде, в пустыню до Вефила, до места, идеже бе ему куща первее, между Вефилем и между Агге, 4 на место жертвенника, идеже сотвори его первее: и призва тамо Аврам имя Господне. 5 И Лоту ходящу со Аврамом бяху овцы, и волы, и кущы. 6 И не вмещаше их земля жити вкупе, яко имения их бяху многа: и не можаху жити вкупе. 7 И бысть распря между пастухи скота Аврамля и между пастухи скота Лотова: Хананее же и Ферезее тогда живяху на земли (той). 8 Рече же Аврам Лоту: да не будет распря между мною и тобою, и между пастухи твоими и между пастухи моими, яко человецы братия мы есмы: 9 не се ли вся земля пред тобою есть? Отлучися ты от мене: аще ты на лево, аз на десно: аще же ты на десно, аз на лево. 10 И возвед Лот очи свои, виде всю окрестную страну Иорданскую, яко вся напаяема бяше водою, прежде неже низвратити Богу Содом и Гоморр, яко рай Божий, и яко земля Египетска, даже приити до Зогора: 11 и избра себе Лот всю окрестную страну Иорданскую, и отиде Лот от востока: и разлучистася кийждо от брата своего. 12 Аврам же вселися в земли Ханаанстей, Лот же вселися во граде окрестных стран и вселися в Содоме. 13 Человецы же сущии в Содоме зли и грешни пред Богом зело. 14 Бог же рече Авраму, повнегда разлучитися Лоту от него: воззри очима твоима и виждь от места, идеже ты ныне еси, к северу, и ливе, и к востоку, и морю: 15 яко всю землю, юже ты видиши, тебе дам ю и семени твоему во веки, 16 и сотворю семя твое, яко песок земный: аще кто может исчести песок земный, то и семя твое изочтет: 17 востав проиди землю в долготу ея и в широту: яко тебе дам ю и семени твоему во век. 18 И отселився Аврам, пришед вселися у дуба Мамврийскаго, иже бяше в Хевроне: и созда ту жертвенник Господу. === 14 === 1 Бысть же в царство Амарфала царя Сеннаарска, и Ариох царь Елласарск, и Ходоллогомор царь Еламск, и Фаргал царь языческий 2 сотвориша рать с Валлою царем Содомским и с Варсою царем Гоморрским, и с Сеннааром царем Адамы и с симовором царем Севоимским, и с царем Валаки: сия есть Сигор. 3 Вси сии совещашася на юдоль Сланую: сие есть море Сланое. 4 Дванадесять лет тии работаша Ходоллогомору: третияго же надесять лета отступиша. 5 И в четвертое надесять лето, прииде Ходоллогомор, и цари иже с ним, и изсекоша Исполинов сущих во Астарофе и в Карнаине, и языки крепки вкупе с ними, и омеов, иже в Сави граде, 6 и Хорреов, иже в горах Сиирских, даже до Теревинфа Фарана, иже есть в пустыни. 7 И возвратившеся приидоша ко источнику Судному, иже есть Кадис: и ссекоша вся князи Амаликовы, и Аморреов живущих во Асасанфамаре. 8 Изыде же царь Содомский и царь Гоморрский, и царь Адаманский и царь Севоимский, и царь Валаки, сия есть Сигор: и ополчишася противу их на брань во юдоли Сланой, 9 на Ходоллогомора царя Еламска и Фаргала царя языческа, и Амарфала царя Сеннаарска и Ариоха царя Елласарска: четыри цари на пять. 10 Юдоль же Сланая имяше кладязи смоляныя. И побеже царь Содомский и царь Гоморрский, и падоша тамо: оставшиися же бежаша в горняя (и одержаша я). 11 Взяша же вся конныя Содомския и Гоморрския и вся брашна их, и отидоша. 12 Взяша же и Лота сына брата Аврамова и имение его, и отидоша: бе бо в Содомех живый. 13 Пришед же един от уцелевших, возвести Авраму пришелцу, иже живяше у дуба Мамврийскаго, Аморреа брата Есхоля и брата Авнаня, иже беша союзницы Аврамовы. 14 Слышав же Аврам, яко пленен бысть Лот братаничь его, сочте домочадцы своя триста и осмьнадесять, и погна вслед их даже до Дана. 15 И нападе на ня нощию сам и отроцы его (с ним): и порази их и гони их даже до Ховала, иже есть ошуюю Дамаска: 16 и возврати вся конныя Содомския, и Лота сына брата своего возврати, и вся имения его, и жены, и люди. 17 Изыде же царь Содомский в сретение ему, повнегда возвратитися ему от сеча Ходоллогоморскаго, и царей сущих с ним, в юдоль Савину: сие же бяше поле царево: 18 и Мелхиседек царь Салимский изнесе хлебы и вино: бяше же священник Бога Вышняго. 19 И благослови Аврама, и рече: благословен Аврам Богом Вышним, иже созда небо и землю: 20 и благословен Бог Вышний, Иже предаде враги твоя под руки тебе. И даде ему десятину Аврам от всего. 21 Рече же царь Содомский ко Авраму: даждь ми мужы, а кони возми себе. 22 Рече же Аврам к царю Содомску: воздвигну руку мою ко Господу Богу Вышнему, иже сотвори небо и землю: 23 аще от нити до ременя сапожнаго возму от всего твоего, да не речеши, яко аз обогатих Аврама: 24 кроме сих, яже снедоша отроцы, и части мужей, иже ходиша со мною, Есхол, Авнан, Мамврий: сии да возмут части (своя). === 15 === 1 По глаголех же сих, бысть слово Господне ко Авраму в видении нощию, глаголя: не бойся, Авраме: Аз защищаю тя, мзда твоя многа будет зело. 2 Глагола же Аврам: Владыко Господи, что ми даси? Аз же отпущаюся безчаден: сын же масек домочадицы моея, сей Дамаск Елиезер. 3 И рече Аврам: понеже мне не дал еси семене, домочадец же мой наследник мой будет. 4 И абие глас Господень бысть к нему, глаголющий: не будет сей наследник твой, но иже изыдет из тебе, той будет наследник тебе. 5 Изведе же его вон и рече ему: воззри на небо и изочти звезды, аще возможеши исчести я. И рече: тако будет семя твое. 6 И верова Аврам Богу, и вменися ему в правду. 7 Рече же к нему: Аз (есмь) Бог изведый тя от страны Халдейския, яко дати тебе землю сию наследствовати. 8 И рече: Владыко Господи, по чесому уразумею, яко наследити ю имам? 9 Рече же к нему: возми Мне юницу трилетну и козу трилетну и овна трилетна, и горлицу и голубя. 10 Взя же он вся сия и раздели я на полы, и положи я противолична едина ко другому: птиц же не раздели. 11 Слетеша же птицы на телеса растесаная их: и седе близу их Аврам. 12 Заходящу же солнцу, ужас нападе на Аврама, и се, страх темен велий нападе нань. 13 И речено бысть ко Авраму: ведый увеси, яко преселно будет семя твое в земли не своей, и поработят я, и озлобят я, и смирят я лет четыриста: 14 языку же, емуже поработают, сужду Аз: по сих же изыдут семо со имением многим: 15 ты же отидеши ко отцем твоим в мире, препитан в старости добрей: 16 в четвертем же роде возвратятся семо: не бо исполнишася греси Аморреов до ныне. 17 Егда же бысть солнце на западе, пламень бысть: и се, пещь дымящися, и свещы огненны, яже проидоша между растесании сими. 18 В день той завеща Господь Авраму завет, глаголя: семени твоему дам землю сию от реки Египетския даже до реки великия Евфрата: 19 Кенеов и Кенезеов и Кедмонеов, 20 и Хеттеов и Ферезеов и Рафаинов, 21 и Аморреов и Хананеов, и Евеов и Гергесеов и Иевусеов. === 16 === 1 Сара же жена Аврамля не раждаше ему: бяше же ей раба Египтяныня, ейже имя Агарь. 2 Рече же Сара ко Авраму: се, заключи мя Господь, еже не раждати: вниди убо к рабе моей, да чада сотворю от нея. Послуша же Аврам гласа Сарина. 3 И поимши Сара жена Аврамля Агарь Египтяныню рабу свою, по десяти летех вселения Аврамля в земли Ханаани, даде ю в жену Авраму мужу своему. 4 И вниде ко Агари, и зачат: и виде, яко во чреве имать, и укорена бысть госпожа (ея) пред нею. 5 И рече Сара ко Авраму: обида ми от тебе: аз дах рабу мою в недро твое: она же видевши, яко во чреве имать, укорена бых пред нею: суди Бог между мною и тобою. 6 Рече же Аврам к Саре: се, раба твоя в руку твоею: твори ей, якоже ти есть угодно. И озлоби ю Сара: и отбеже от лица ея. 7 И обрете ю Ангел Господень у источника воды в пустыни, у источника на пути Сур. 8 И рече ей Ангел Господень: Агарь, рабо Сарина, откуду идеши и камо грядеши? И рече: от лица Сары госпожи моея аз бегу. 9 Рече же ей Ангел Господень: возвратися к госпоже своей и покорися под руку ея. 10 И рече ей Ангел Господень: умножая умножу семя твое, и не сочтется от множества. 11 И рече ей Ангел Господень: се, ты во чреве имаши и родиши сына, и наречеши имя ему Исмаил: яко услыша Господь смирение твое: 12 сей будет селный человек: руце его на всех, и руки всех на него, и пред лицем всея братии своея вселится. 13 И призва Агарь имя Господа глаголющаго к ней: Ты Бог призревый на мя: яко рече: ибо предо мною видех явльшагося мне. 14 Сего ради прозва кладязь той: Кладязь, идеже предо мною видех: се между Кадисом и между Варадом. 15 И роди Агарь Авраму сына, и нарече Аврам имя сыну своему, егоже роди ему Агарь, Исмаил. 16 Аврам же бе лет осмидесяти шести, егда роди Агарь Авраму Исмаила. === 17 === 1 Бысть же Авраму лет девятьдесят девять: и явися Господь Авраму и рече ему: Аз есмь Бог твой, благоугождай предо Мною и буди непорочен: 2 и положу завет Мой между Мною и между тобою: и умножу тя зело. 3 И паде Аврам на лицы своем, и рече ему Бог, глаголя: 4 и Аз се, завет Мой с тобою, и будеши отец множества языков: 5 и не наречется ктому имя твое Аврам, но будет имя твое Авраам: яко отца многих языков положих тя: 6 и возращу тя зело зело, и положу тя в народы, и царие из тебе изыдут: 7 и поставлю завет Мой между Мною и между тобою, и между семенем твоим по тебе в роды их, в завет вечен, да буду тебе Бог и семени твоему по тебе: 8 и дам тебе и семени твоему по тебе землю, в нейже обитаеши, всю землю Ханааню во одержание вечное, и буду им Бог. 9 И рече Бог ко Аврааму: ты же завет Мой соблюдеши, ты и семя твое по тебе в роды их. 10 И сей завет, егоже соблюдеши между Мною и вами, и между семенем твоим по тебе в роды их: обрежется от вас всяк мужеск пол, 11 и обрежете плоть крайнюю вашу, и будет в знамение завета между Мною и вами. 12 И младенец осми дний обрежется вам, всяк мужеский пол в родех ваших: и домочадец, и купленый от всякаго сына чуждаго, иже несть от семене твоего: обрезанием обрежется домочадец дому твоего и купленый. 13 И будет завет Мой на плоти вашей в завет вечен. 14 Необрезаный же мужеский пол, иже не обрежет плоти крайния своея в день осмый, погубится душа та от рода своего: яко завет Мой разори. 15 И рече Бог Аврааму: Сара жена твоя не наречется имя ея Сара, но Сарра будет имя ей: 16 благословлю же ю и дам тебе от нея чадо: и благословлю е, и будет в языки, и царие языков из него будут. 17 И паде Авраам на лице свое, и посмеяся, и рече в мысли своей, глаголя: еда столетному (мужу) родится сын? Еда и Сарра девятидесяти лет (сущи) родит? 18 Рече же Авраам к Богу: Исмаил сей да живет пред Тобою. 19 Рече же Бог ко Аврааму: воистинну, се, Сарра жена твоя родит тебе сына, и наречеши имя ему Исаак: и поставлю завет Мой с ним в завет вечен, да буду ему в Бога и семени его по нем. 20 О Исмаиле же се послушах тебе: и се благослових его, и возращу его, и умножу его зело: дванадесять языки родит: и дам его в язык велий. 21 Завет же Мой поставлю со Исааком, егоже родит тебе Сарра, во время сие, в лето второе. 22 Сконча же (Бог) глаголя к нему, и взыде Бог от Авраама. 23 И поя Авраам Исмаила сына своего, и вся домочадцы своя и вся купленыя, и весь мужеск пол мужей, иже в дому Авраамли, и обреза плоть крайнюю их во время дне того, якоже глагола ему Бог. 24 Авраам же девятидесяти девяти лет бяше, егда обреза плоть крайнюю свою. 25 Исмаил же сын его бяше лет трехнадесяти, егда обреза плоть крайнюю свою. 26 Во время (же) дне онаго обрезася Авраам и Исмаил сын его, 27 и вси мужие дому его, и домочадцы (его) и куплении от инородных языков, и обреза я. === 18 === 1 Явися же ему Бог у дуба Мамврийска, седящу ему пред дверми сени своея в полудни. 2 Воззрев же очима своима, виде, и се, трие мужие стояху над ним: и видев притече в сретение им от дверей сени своея: и поклонися до земли 3 и рече: Господи, аще убо обретох благодать пред Тобою, не мини раба Твоего: 4 да принесется вода и омыются ноги ваши, и прохладитеся под древом: 5 и принесу хлеб, да ясте, и посем пойдете в путь свой, егоже ради уклонистеся к рабу вашему. И рекоша: тако сотвори, якоже глаголал еси. 6 И потщася Авраам в сень к Сарре и рече ей: ускори и смеси три меры муки чисты, и сотвори потребники. 7 И тече Авраам ко кравам, и взя телца млада и добра, и даде рабу, и ускори приготовити е. 8 И взя масло, и млеко, и телца, егоже приготова: и предложи им, и ядоша: сам же стояше пред ними под древом. 9 Рече же к нему: где Сарра жена твоя? Он же отвещав, рече: се, в сени. 10 Рече же: (се) возвращаяся прииду к тебе во время сие в часы, и родит сына Сарра жена твоя. Сарра же услыша пред дверми сени сущи за ним. 11 Авраам же и Сарра стара (беста,) заматеревшая во днех: и престаша Сарре бывати женская. 12 Разсмеяся же Сарра в себе, глаголющи: не у было ми убо доселе, господин же мой стар. 13 И рече Господь ко Аврааму: что яко разсмеяся Сарра в себе, глаголющи: еда истинно рожду? Аз же состарехся. 14 Еда изнеможет у Бога слово? В сие время возвращуся к тебе в часы, и будет Сарре сын. 15 Отречеся же Сарра, глаголющи: не разсмеяхся: убояся бо. И рече ей: ни, но разсмеялася еси. 16 Воставше же оттуду мужие, воззреша на лице Содома и Гоморра: Авраам же идяше с ними, провождая их. 17 Господь же рече: еда утаю Аз от Авраама раба Моего, яже Аз творю? 18 Авраам же бывая будет в язык велик и мног, и благословятся о нем вси языцы земнии: 19 вем бо, яко заповесть сыном своим и дому своему по себе, и сохранят пути Господни творити правду и суд, яко да наведет Господь на Авраама вся, елика глагола к нему. 20 Рече же Господь: вопль Содомский и Гоморрский умножися ко Мне, и греси их велицы зело: 21 сошед убо узрю, аще по воплю их грядущему ко Мне совершаются: аще же ни, да разумею. 22 И обратившеся оттуду мужие, приидоша в Содом: Авраам же еще бяше стояй пред Господем. 23 И приближився Авраам, рече: погубиши ли праведнаго с нечестивым, и будет праведник яко нечестивый? 24 Аще будут пятьдесят праведницы во граде, погубиши ли я? Не пощадиши ли всего места пятидесяти ради праведных, аще будут в нем? 25 Никакоже Ты сотвориши по глаголу сему, еже убити праведника с нечестивым, и будет праведник яко нечестивый: никакоже, Судяй всей земли, не сотвориши ли суда? 26 Рече же Господь: аще будут в Содомех пятьдесят праведницы во граде, оставлю весь град и все место их ради. 27 И отвещав Авраам, рече: ныне начах глаголати ко Господу моему, аз же есмь земля и пепел: 28 аще же умалятся пятьдесят праведницы в четыредесять пять, погубиши ли четыредесяти пятих ради весь град? И рече: не погублю, аще обрящу тамо четыредесять пять. 29 И приложи еще глаголати к Нему, и рече: аще же обрящутся тамо четыредесять? И рече: не погублю ради четыредесяти. 30 И рече: что, Господи, аще возглаголю? Аще же обрящется тамо тридесять? И рече: не погублю тридесятих ради. 31 И рече: понеже имам глаголати ко Господу: аще же обрящутся тамо двадесять? И рече: не погублю, аще обрящутся тамо двадесять. 32 И рече: что, Господи, аще возглаголю еще единою? Аще же обрящутся тамо десять? И рече: не погублю десятих ради. 33 Отиде же Господь, яко преста глаголя ко Аврааму: и Авраам возвратися на место свое. === 19 === 1 Приидоста же два Ангела в Содом в вечер: Лот же седяше пред враты Содомскими. Видев же Лот, воста в сретение им и поклонися лицем на землю 2 и рече: се, господие, уклонитеся в дом раба вашего и почийте, и омыйте ноги вашя, и обутреневавше отидете в путь свой. Реша же: ни, но на стогне почием. 3 И принуди я, и уклонишася к нему, и внидоша в дом его: и сотвори им учреждение, и опресноки испече им, и ядоша. 4 Пред спанием же мужие града Содомляне оыдоша дом, от юноши даже до старца, весь народ вкупе: 5 и иззываху Лота, и глаголаху к нему: где суть мужие вшедшии к тебе нощию? Изведи я к нам, да будем с ними. 6 Изыде же Лот к ним в преддверие, двери же затвори за собою. 7 Рече же к ним: никакоже, братие, не дейте зла: 8 суть же ми две дщери, яже не познаша мужа: изведу их к вам, и творите им, якоже угодно есть вам: точию мужем сим не сотворите обиды, того бо ради внидоша под кров дому моего. 9 Реша же ему: отиди отсюду: пришел еси (семо) обитати, еда ли и суд судити? Ныне убо тя озлобим паче, нежели оных. И насилствоваша мужа Лота зело, и приближишася разбити двери. 10 Простерше же мужие руки, вовлекоша Лота к себе в храмину, и двери храмины заключиша: 11 мужы же, сущыя пред дверми дому, поразиша слепотою от мала даже до велика: и разслабишася ищуще дверий. 12 Реша же мужие к Лоту: суть ли тебе зде зятие или сынове или дщери? Или аще кто тебе ин есть во граде, изведи (я) от места сего: 13 яко мы погубляем место сие, понеже возвысися вопль их пред Господем, и посла нас Господь истребити его. 14 Изыде же Лот и глагола к зятем своим, поимшым дщери его, и рече: востаните и изыдите от места сего, яко погубляет Господь град. Возмнеся же играти пред зятьми своими. 15 Егда же утро бысть, понуждаху Ангели Лота, глаголюще: востав, поими жену твою и две дщери твоя, яже имаши, и изыди, да не и ты погибнеши со беззаконми града. 16 И смутишася, и взяша Ангели за руку его, и за руку жену его, и за руки двух дщерей его, понеже пощаде и Господь. 17 И бысть егда изведоша я вон, и реша: спасая спасай твою душу: не озирайся вспять, ниже постой во всем пределе (сем): в горе спасайся, да не когда купно ят будеши. 18 Рече же Лот к ним: молюся, Господи, 19 понеже обрете раб Твой милость пред Тобою, и возвеличил еси правду Твою, юже твориши на мне, еже жити души моей: аз же не возмогу спастися в горе, да не когда постигнут мя злая, и умру: 20 се, град сей близ еже убежати ми тамо, иже есть мал, и тамо спасуся: не мал ли есть? И жива будет душа моя Тебе ради. 21 И рече ему: се, удивихся лицу твоему, и о словеси сем, еже не погубити града, о немже глаголал еси: 22 потщися убо спастися тамо: не возмогу бо сотворити дела, дондеже внидеши тамо: сего ради прозва имя граду тому Сигор. 23 Солнце взыде над землю, Лот же вниде в Сигор. 24 И Господь одожди на Содом и Гоморр жупел, и огнь от Господа с небесе. 25 И преврати грады сия, и всю окрестную страну, и вся живущыя во градех, и вся прозябающая от земли. 26 И озреся жена его вспять, и бысть столп слан. 27 Востав же Авраам заутра (иде) на место, идеже стояше пред Господем, 28 и воззре на лице Содома и Гоморра, и на лице окрестныя страны, и виде: и се, восхождаше пламень от земли, аки дым пещный. 29 И бысть егда преврати Бог вся грады страны тоя, помяну Бог Авраама и изсла Лота от среды превращения, егда преврати Господь грады, в нихже живяше Лот. 30 Изыде же Лот от Сигора, и седе в горе сам, и две дщери его с ним: убояся бо жити в Сигоре: и вселися в пещеру сам и дщери его с ним. 31 Рече же старейшая к юнейшей: отец наш стар, и никтоже есть на земли, иже внидет к нам, якоже обычно всей земли: 32 гряди убо, упоим отца нашего вином и преспим с ним, и возставим от отца нашего семя. 33 Упоиша же отца своего вином в нощи оней: и вшедши старейшая, преспа со отцем своим тоя нощи: и не поразуме он, егда преспа и егда воста. 34 Бысть же наутрие, и рече старейшая к юнейшей: се, (аз) преспах вчера со отцем нашим: упоим его вином и в сию нощь, и вшедши преспи с ним, и возставим от отца нашего семя. 35 Упоиша же и в ту нощь отца своего вином: и вшедши юнейшая преспа со отцем своим: и не поразуме он, егда преспа и егда воста. 36 И зачаша обе дщери Лотовы от отца своего: 37 и роди старейшая сына и нарече имя ему Моав, глаголющи: от отца моего. Сей отец Моавитом даже до нынешняго дне. 38 Роди же юнейшая сына и нарече имя ему Амман, глаголющи: сын рода моего. Сей отец Амманитом до нынешняго дне. === 20 === 1 И пойде оттуду Авраам на землю полуденную и вселися между Кадисом и между Суром: и обита в Герарех. 2 Рече же Авраам о Сарре жене своей, яко сестра ми есть: убояся бо рещи, яко жена ми есть, да не когда убиют его мужие градстии ея ради. Посла же Авимелех царь Герарский и взя Сарру. 3 И прииде Бог ко Авимелеху нощию во сне и рече ему: се, ты умираеши жены ради сея, юже поял еси: сия же есть сожителствующая мужу. 4 Авимелех же не прикоснуся ей и рече: Господи, язык неведущий и праведен погубиши ли? 5 Не сам ли ми рече: сестра ми есть? И сия ми рече: брат ми есть? Чистым сердцем и в правде рук сотворих сие. 6 Рече же ему Бог во сне: и Аз познах, яко чистым сердцем сотворил еси сие, и пощадех тя, да не согрешиши ко Мне: сего ради не попустих ти коснутися ея: 7 ныне же отдаждь жену мужу, яко пророк есть, и помолится о тебе, и жив будеши: аще же не отдаси, веждь, яко умреши ты и вся твоя. 8 И воста рано Авимелех, и призва вся отроки своя, и глагола словеса сия вся во ушы их: убояшася же вси человецы зело. 9 И призва Авимелех Авраама и рече ему: что сие сотворил еси нам? Еда что согрешихом тебе, яко навел еси на мя и на царство мое грех велик? Дело, еже никтоже сотвори, сотворил еси мне. 10 И рече Авимелех Аврааму: что умыслив, сотворил еси сие? 11 Рече же Авраам: рекох бо: негли несть благочестия на месте сем: и убиют мя жены ради моея: 12 ибо истинно сестра ми есть по отцу, а не по матери: бысть же ми в жену: 13 и бысть егда изведе мя Бог от дому отца моего, и рех ей: правду сию сотвориши ми: во всяко место, идеже аще приидем, тамо рцы о мне, яко брат ми есть. 14 Взя же Авимелех тысящу дидрахм (сребра), и овцы, и телцы, и рабы, и рабыни, и даде Аврааму: и отдаде ему Сарру жену его. 15 И рече Авимелех Аврааму: се, земля моя пред тобою: идеже аще тебе угодно есть, вселися. 16 Сарре же рече: се, дах тысящу дидрахм брату твоему: сия будут тебе в честь лица твоего, и всем, яже суть с тобою, и во всем истинствуй. 17 Помолися же Авраам Богу, и исцели Бог Авимелеха и жену его и рабыни его, и начаша раждати: 18 яко заключая заключи Господь от внеуду всяка ложесна в дому Авимелеха, Сарры ради жены Авраамли. === 21 === 1 И Господь посети Сарру, якоже рече: и сотвори Господь Сарре, якоже глагола. 2 И заченши Сарра роди Аврааму сына в старости, во время, якоже глагола ему Господь: 3 и нарече Авраам имя сыну своему рождшемуся ему, егоже роди ему Сарра, Исаак: 4 обреза же Авраам Исаака во осмый день, якоже заповеда ему Бог. 5 Авраам же бе ста лет, егда бысть ему Исаак сын его. 6 Рече же Сарра: смех мне сотвори Господь: иже бо аще услышит, обрадуется со Мною. 7 И рече: кто возвестит Аврааму, яко млеком питает отроча Сарра, яко родих сына в старости моей? 8 И возрасте отроча, и отдоено бысть: и сотвори Авраам учреждение велие, в оньже день отдоися Исаак сын его. 9 Видевши же Сарра сына Агари Египтяныни, иже бысть Аврааму, играюща со Исааком сыном своим, 10 и рече Аврааму: изжени рабу сию и сына ея: не наследит бо сын рабы сея с сыном моим Исааком. 11 Жесток же явися глагол сей зело пред Авраамом о сыне его Исмаиле. 12 И рече Бог Аврааму: да не будет жестоко пред тобою о отроце и о рабыни: вся елика аще речет тебе Сарра, слушай гласа ея: яко во Исааце наречется тебе семя: 13 сына же рабыни сея в язык велик сотворю его, яко семя твое есть. 14 Воста же Авраам заутра и взя хлебы и мех воды, и даде Агари: и возложи на плещы ея отроча и отпусти ю. Отшедши же заблуждаше в пустыни, у кладязя Клятвеннаго: 15 оскуде же вода из меха: и поверже отроча под елию единою. 16 Отшедши же седяше прямо ему издалече, якоже дострелити из лука: рече бо: да не вижду смерти детища моего. И седе прямо ему издалече. Воскричав же отроча, восплакася: 17 услыша же Бог глас отрочате от места, идеже бяше: и воззва Ангел Божий Агарь с небесе и рече ей: что есть, Агарь? Не бойся: услыша бо Бог глас отрочища от места, идеже есть: 18 востани и поими отроча, и ими рукою твоею его: в язык бо велик сотворю его. 19 И отверзе Бог очи ея, и узре кладязь воды живы: и иде, и налия мех воды, и напои отроча. 20 И бяше Бог со отрочатем, и возрасте, и вселися в пустыни, и бысть стрелец. 21 И поселися в пустыни Фаран: и поят ему мати его жену от земли Египетския. 22 Бысть же в то время, и рече Авимелех, и Охозаф невестоводитель его, и Фихол воевода силы его, ко Аврааму, глаголя: Бог с тобою во всех, яже твориши: 23 ныне убо кленися ми Богом, не обидети мене, ниже семене моего, ниже имене моего: но по правде, юже сотворих с тобою, сотвориши со мною и земли, идеже ты вселился еси на ней. 24 И рече Авраам: аз кленуся. 25 И обличи Авраам Авимелеха о кладязех водных, яже отяша отроцы Авимелеховы. 26 И рече ему Авимелех: не ведех, кто сотвори тебе вещь сию: ниже ты ми поведал еси, ниже аз слышах, токмо днесь. 27 И взя Авраам овцы и юнцы и даде Авимелеху: и завещаста оба завет. 28 И постави Авраам седмь агниц овчих единых. 29 И рече Авимелех Аврааму: что суть седмь агницы овец сих, яже поставил еси едины? 30 И рече Авраам: яко седмь сих агниц возмеши у мене, да будут ми во свидетелство, яко аз ископах кладязь сей. 31 Сего ради наименова имя месту тому кладязь Клятвенный: яко тамо клястася оба 32 и завещаста завет у кладязя Клятвеннаго. Воста же Авимелех, и Охозаф невестоводитель его, и Фихол воевода силы его, и возвратишася в землю Филистимску. 33 И насади Авраам ниву у кладязя Клятвеннаго, и призва ту имя Господа, Бога вечнаго. 34 Обита же Авраам в земли Филистимстей дни многи. === 22 === 1 И бысть по глаголех сих, Бог искушаше Авраама и рече ему: Аврааме, Аврааме. И рече: се аз. 2 И рече: поими сына твоего возлюбленнаго, егоже возлюбил еси, Исаака, и иди на землю Высоку и вознеси его тамо во всесожжение, на едину от гор, ихже ти реку. 3 Востав же Авраам утро, оседла осля свое: поят же с собою два отрочища и Исаака сына своего: и растнив дрова во всесожжение, востав иде, и прииде на место, еже рече ему Бог, в третий день. 4 И воззрев Авраам очима своима, виде место издалече. 5 И рече Авраам отроком своим: сядите зде со ослятем: аз же и детищь пойдем до онде, и поклонившеся возвратимся к вам. 6 Взя же Авраам дрова всесожжения и возложи на Исаака сына своего: взя же в руки и огнь, и ножь, и идоста оба вкупе. 7 Рече же Исаак ко Аврааму отцу своему: отче. Он же рече: что есть, чадо? Рече же: се, огнь и дрова, где есть овча еже во всесожжение? 8 Рече же Авраам: Бог узрит Себе овча во всесожжение, чадо. Шедша же оба вкупе, 9 приидоста на место, еже рече ему Бог: и созда тамо Авраам жертвенник и возложи дрова: и связав Исаака сына своего, возложи его на жертвенник верху дров. 10 И простре Авраам руку свою, взяти ножь, заклати сына своего. 11 И воззва и Ангел Господень с небесе, и рече: Аврааме, Аврааме. Он же рече: се, аз. 12 И рече: да не возложиши руки твоея на отрочища, ниже да сотвориши ему что: ныне бо познах, яко боишися ты Бога, и не пощадел еси сына твоего возлюбленнаго Мене ради. 13 И воззрев Авраам очима своима виде, и се, овен един держимый рогама в саде савек: и иде Авраам, и взя овна, и вознесе его во всесожжение вместо Исаака сына своего. 14 И нарече Авраам имя месту тому: Господь виде: да рекут днесь: на горе Господь явися. 15 И воззва Ангел Господень Авраама вторицею с небесе, 16 глаголя: Мною Самем кляхся, глаголет Господь, егоже ради сотворил еси глагол сей и не пощадел еси сына твоего возлюбленнаго Мене ради: 17 воистинну благословя благословлю тя, и умножая умножу семя твое, яко звезды небесныя, и яко песок вскрай моря: и наследит семя твое грады супостатов, 18 и благословятся о семени твоем вси языцы земнии, занеже послушал еси гласа Моего. 19 Возвратися же Авраам ко отроком своим, и воставше идоша купно ко кладязю Клятвенному: и вселися Авраам у кладязя Клятвеннаго. 20 Бысть же по глаголех сих, и поведаша Аврааму, глаголюще: се, роди Мелха и та сыны брату твоему Нахору, 21 Окса первенца, и Вавкса брата его, и Камуила отца Сирска, 22 и Хазада, и Азава, и Фалдеса, и Елдафа, и Вафуила: 23 Вафуил же роди Ревекку: осмь сии сынове, ихже роди Мелха Нахору брату Авраамлю: 24 и наложница его, ейже имя Ревма, роди и сия Тавека, и Таама, и Тохоса, и Моха. === 23 === 1 Бысть же житие Саррино лет сто двадесять седмь. 2 И умре Сарра во граде Арвоце, иже есть в раздолии: сей есть Хеврон в земли Ханаанстей. Прииде же Авраам рыдати по Сарре и плакати. 3 И воста Авраам от мертвеца своего и рече сыном Хеттеовым, глаголя: 4 преселник и пришлец аз есмь у вас, дадите ми убо стяжание гроба между вами, да погребу мертвеца моего от мене. 5 Отвещаша же сынове Хеттеовы ко Аврааму, глаголюще: ни, господине: 6 послушай же нас: царь от Бога ты еси в нас: во избранных гробех наших погреби мертвеца твоего: никтоже бо от нас возбранит гроба своего от тебе, еже погребсти мертвеца твоего тамо. 7 Востав же Авраам поклонися народу земли, сыном Хеттеовым, 8 и рече к ним Авраам, глаголя: аще имате в души вашей, яко погребсти мертвеца моего от лица моего, послушайте мене и рцыте о мне Ефрону Саарову: 9 и да даст ми пещеру Сугубую, яже есть его, сущую на части села его: сребром достойным да даст ми ю у вас в стяжание гроба. 10 Ефрон же седяше посреде сынов Хеттеовых. Отвещав же Ефрон Хеттейский ко Аврааму, рече слышащым сыном Хеттеовым и всем приходящым во град, глаголя: 11 у мене буди, господине, и послушай мене: село и пещеру яже в нем, тебе даю: пред всеми гражданы моими дах тебе, погреби мертвеца твоего. 12 И поклонися Авраам пред народом земли 13 и рече Ефрону во ушеса пред всем народом земли: понеже по мне еси, послушай мене: сребро села возми у мене, и погребу мертвеца моего тамо. 14 Отвеща же Ефрон Аврааму, глаголя: 15 ни, господине: слышах бо, яко земля четырех сот дидрахм сребра: но что было бы сие между мною и тобою? Ты же мертвеца твоего погреби. 16 И послуша Авраам Ефрона, и даде Авраам Ефрону сребро, еже глагола во ушеса сынов Хеттеовых, четыре ста дидрахм сребра искушена купцами. 17 И бысть село Ефроново, еже бе в Сугубей пещере, еже есть лицем к Мамврии, село и пещера яже бе в нем, и всякое древо, иже бе на селе, и все еже есть в пределех его окрест, 18 Аврааму (бысть) в стяжание пред сыны Хеттеовыми и пред всеми приходящими во град. 19 По сих погребе Авраам Сарру жену свою в пещере селней Сугубей, яже есть противу Мамврии: сия есть Хеврон в земли Ханаанстей. 20 И утверждено есть село и пещера, яже бе на нем, Аврааму в стяжание гроба от сынов Хеттеовых. === 24 === 1 Авраам же бяше стар, заматеревший во днех: и Господь благослови Авраама во всех. 2 И рече Авраам рабу своему старейшему дому своего, обладающему всеми его: положи руку твою под стегно мое, 3 и заклену тя Господем Богом небесе и Богом земли, да не поймеши сыну моему Исааку жены от дщерей Хананейских, с нимиже аз живу в них: 4 но токмо на землю мою, идеже родихся, пойдеши, и ко племени моему, и поймеши жену сыну моему Исааку оттуду. 5 Рече же к нему раб: еда убо не восхощет ити жена вслед со мною на землю сию, возвращу ли сына твоего в землю, от неяже изшел еси? 6 Рече же к нему Авраам: внемли себе, да не возвратиши сына моего онамо. 7 Господь Бог небесе и Бог земли, Иже поя мя из дому отца моего и от земли, в нейже родихся, Иже глагола мне и Иже кляся мне, глаголя: тебе дам землю сию и семени твоему, Той послет Ангела Своего пред тобою, и поймеши жену сыну моему Исааку оттуду: 8 аще же не восхощет жена поити с тобою в землю сию, чист будеши от заклятия моего: точию сына моего не возврати тамо. 9 И положи раб руку свою под стегно Авраама господина своего, и кляся ему о словеси сем. 10 И взя раб десять велблюд от велблюд господина своего, и от всех благ господина своего с собою, и востав иде в Месопотамию во град Нахоров: 11 и постави велблюды вне града у кладязя воднаго под вечер, егда исходят (жены) почерпати воды, 12 и рече: Господи, Боже господина моего Авраама, благоустрой предо мною днесь, и сотвори милость с господином моим Авраамом: 13 се, аз стах у кладязя воднаго, дщери же живущих во граде исходят почерпати воды: 14 и будет девица, ейже аз реку: преклони водонос твой, да пию, и речет ми: пий ты, и велблюды твоя напою, дондеже напиются: сию уготовал еси рабу Твоему Исааку: и по сему увем, яко сотворил еси милость с господином моим Авраамом. 15 И бысть прежде неже скончати ему глаголющу во уме своем, и се, Ревекка исхождаше, яже родися Вафуилу, сыну Мелхи жены Нахора, брата же Авраамля, держащи водонос на рамех своих: 16 девица же бяше доброзрачна зело: дева бе, муж не позна ея. Сошедши же на кладязь, наполни водонос свой и взыде. 17 Тече же раб во сретение ей и рече: напой мя мало водою от водоноса твоего. 18 Сия же рече: пий, господине. И потщася, и сня водонос на мышца своя, и напои его, дондеже напися. 19 И рече: и велблюдом твоим налию, дондеже вси напиются. 20 И потщася, и испраздни водонос в поило: и тече паки на кладязь почерпнути воды, и влия велблюдом всем. 21 Человек же выразумеваше ю и помолчеваше, да уразумеет, аще благоустрои Бог путь ему, или ни. 22 Бысть же егда престаша вси велблюды пиюще, взя человек усерязи златы весом по драхме и два запястия на руки ея: десять златниц вес их. 23 И вопроси ю и рече: чия еси дщерь? Повеждь ми, аще есть у отца твоего место нам витати? 24 Она же рече ему: дщерь Вафуилева есмь (сына) Мелхина, егоже роди Нахору. 25 И рече ему: и плевы и сена много у нас, и место витати. 26 И благословив человек, поклонися Господу 27 и рече: благословен Господь Бог господина моего Авраама, Иже не остави правды Своея и истины от господина моего: и мене благоустрои Господь в дом брата господина моего. 28 И текши девица в дом матере своея, поведа по глаголом сим. 29 Ревекце же бяше брат, емуже имя Лаван: и тече Лаван к человеку вон на кладязь. 30 И бысть егда виде усерязи, и запястия на руку сестры своея, и егда слыша словеса Ревекки сестры своея, глаголющия: сице глагола мне человек: и прииде к человеку, стоящу ему у велблюд у кладязя, 31 и рече ему: гряди, вниди благословенный от Господа, почто стоиши вне? Аз же уготовах храмину и место велблюдом. 32 И вниде человек в дом, и разседла велблюды, и даде плевы и сено велблюдом, и воду умыти нозе его, и ноги мужем, иже бяху с ним: 33 и предложи им хлебы ясти, и рече: не ям, дондеже возглаголю словеса моя. И рече: глаголи. 34 И рече: раб Авраамль есмь аз: 35 Господь же благослови господина моего зело, и возвысися: и даде ему овцы и телцы, сребро и злато, рабы и рабыни, и велблюды и ослы: 36 и роди Сарра, жена господина моего, сына единаго господину моему, состаревшемуся ему, и даде ему елика имяше: 37 и закля мя господин мой, глаголя: не поймеши жены сыну моему от дщерей Хананейских, в нихже аз обитаю в земли их: 38 но в дом отца моего пойдеши, и в племя мое, и поймеши жену сыну моему оттуду: 39 рех же (аз) господину моему: а егда не восхощет жена со мною ити? 40 И рече ми: Господь Бог, Емуже благоугодих пред ним, он послет Ангела Своего с тобою и благоустроит путь твой, и поймеши жену сыну моему от племене моего и от дому отца моего: 41 тогда будеши чист от заклинания моего: егда бо дойдеши в племя мое, и не дадят ти, и будеши чист от заклинания моего: 42 и пришед днесь на кладязь, рекох: Господи, Боже господина моего Авраама, аще Ты благоустрояеши путь мой, в оньже ныне аз иду: 43 се, аз стах у кладязя воднаго, и дщери граждан исходят почерпати воды: и будет девица, ейже аще аз реку: напой мя от водоноса твоего мало водою: 44 и речет ми: и ты пий, и велблюдом твоим влию: сия (будет) жена, юже уготова Господь рабу Своему Исааку: и по сему уразумею, яко сотворил еси милость господину моему Аврааму. 45 И бысть прежде неже скончати мне глаголющу во уме своем, абие Ревекка исхождаше держащи водонос на раму, и сниде на кладязь, и почерпе воды: и рекох ей: напой мя. 46 И потщавшися сня водонос с себе на мышцу свою и рече: пий ты, и велблюды твоя напою. И напихся, и велблюды моя напои. 47 И вопросих ю и рекох: чия еси дщерь? Повеждь ми. Она же рече: дщерь Вафуилева есмь сына Нахорова, егоже роди ему Мелха. И дах ей усерязи, и запястия на руце ея, 48 и благоволив поклонихся Господу: и благослових Господа Бога господина моего Авраама, Иже благоустрои мя на пути истины пояти дщерь брата господина моего сыну его: 49 аще убо сотворите вы милость и правду к господину моему: аще же ни, поведите ми: да обращуся или на десно, или на лево. 50 Отвещавша же Лаван и Вафуил, рекоста: от Господа прииде дело сие: не возможем ти противу рещи зло или благо: 51 се, Ревекка пред тобою: поемь ю, иди: и да будет жена сыну господина твоего, якоже глагола Господь. 52 Бысть же егда услыша раб Авраамль словеса сия, поклонися до земли Господу. 53 И изнес раб сосуды златы и сребряны и ризы, даде Ревекце: и дары даде брату ея и матери ея. 54 И ядоша и пиша и той и мужие, иже бяху с ним, и почиша. И востав заутра, рече: отпустите мя, да отиду к господину моему. 55 Реша же братия ея и мати: да пребудет девица с нами яко десять дний, и посем пойдет. 56 Он же рече к ним: не держите мя, Господь бо благоустрои путь мой во мне: отпустите мя, да иду к господину моему. 57 Они же реша: призовем девицу и вопросим ея изоуст. 58 И призваша Ревекку и реша ей: пойдеши ли с человеком сим? Она же рече: пойду. 59 И отпустиша Ревекку сестру свою, и имения ея, и раба Авраамля, и иже с ним быша. 60 И благословиша Ревекку и реша ей: сестра наша еси, буди в тысящы тем, и да наследит семя твое грады супостат. 61 Воставши же Ревекка и рабыни ея, вседоша на велблюды и поидоша с человеком. И поим раб Ревекку, отиде. 62 Исаак же прехождаше сквозе пустыню у кладязя Видения: сам же живяше на земли на полудне. 63 И изыде Исаак поглумитися на поле к вечеру, и воззрев очима своима, виде велблюды идущыя. 64 И воззревши Ревекка очима своима, виде Исаака: и изскочи с велблюда. 65 И рече рабу: кто есть человек оный, иже идет по полю во сретение нам? Рече же раб: сей есть господин мой. Она же вземши ризу летнюю, облечеся. 66 И поведа раб Исааку вся словеса, яже сотвори. 67 Вниде же Исаак в дом матере своея, и поя Ревекку, и бысть ему жена: и возлюби ю, и утешися Исаак по Сарре матери своей. === 25 === 1 Приложив же Авраам, поя жену, ейже имя Хеттура: 2 роди же ему Зомврана и Иезана, и Мадала и Мадиама, и Иесвока и Соиена. 3 Иезан же роди Савана и Фамана и Дедана. Сынове же Дедани быша: Рагуил и Навдеил, и Асуриим и Латусиим и Лаомим. 4 Сынове же Мадиамли: Ефар и афир, и Енох и Авида и Елдага. Вси сии быша сынове Хеттурины. 5 Даде же Авраам вся своя имения Исааку сыну своему: 6 сыном же наложниц своих даде Авраам дары и отпусти я от Исаака сына своего, еще жив сый, к востоку на землю восточную. 7 Сия же лета дний жития Авраамля, елика поживе, лет сто седмьдесят пять: 8 и ослабев умре Авраам в старости добрей, старец исполнен дний, и приложися к людем своим. 9 И погребоша его Исаак и Исмаил два сынове его в пещере Сугубей, на селе Ефронове сына Саарова Хеттеанина, еже есть прямо Мамврии, 10 на селе и в пещере, юже притяжа Авраам от сынов Хеттеовых: тамо погребоша Авраама и Сарру жену его. 11 Бысть же по умертвии Авраамли, благослови Бог Исаака сына его: и вселися Исаак у кладязя Видения. 12 Сия же бытия Исмаила сына Авраамля, егоже роди Агарь Египтяныня, раба Саррина, Аврааму: 13 и сия имена сынов Исмаилих, по именом родов его: первенец Исмаилов Наваиоф, и Кидар и Навдеил, и Массам 14 и Масма, и Дума и Масси, 15 и Ходдан и Феман, и Иетур и Нафес и Кедма. 16 Сии суть сынове Исмаили: и сия имена их в скиниях их и в селех их: дванадесять князи в языцех их. 17 И сия лета жития Исмаилова, сто тридесять седмь лет: и ослабев умре, и приложися к роду своему. 18 Вселися же от Евилата даже до Сура, иже есть в лице Египту, даже доити ко Ассириом: пред лицем всех братий своих вселися. 19 И сия бытия Исаака сына Авраамля: Авраам роди Исаака. 20 Бяше же Исаак лет четыредесяти, егда поя Ревекку дщерь Вафуила Сирина от Месопотамии Сирския, сестру Лавана Сирина, себе в жену. 21 Моляшеся же Исаак Господеви о Ревекце жене своей, яко неплоды бяше: послуша же его Бог, и зачат во утробе Ревекка жена его. 22 Играста же младенца в ней, и рече: аще тако ми хощет быти, почто ми сие? И иде вопрошати Господа. 23 И рече ей Господь: два языка во утробе твоей суть, и двои людие от утробы твоея разлучатся: и людие людий превзыдут, и болший поработает меншему. 24 И исполнишася дние родити ей, и бяху сей близнята во утробе ея: 25 изыде же сын первенец чермен, весь, яко кожа, космат: и нарече имя ему Исав: 26 и посем изыде брат его, рука же его придержася пяте Исавове: и нарече имя ему Иаков. Исааку же бе шестьдесят лет, егда роди их Ревекка. 27 Возрастоша же юноши: и бысть Исав человек ведый ловити, селный: Иаков же бысть человек нелукав, живый в дому. 28 И возлюби Исаак Исава, яко ловитва его бяше брашно ему: Ревекка же любляше Иакова. 29 Свари же Иаков варение: и прииде Исав с поля изнемог, 30 и рече Исав Иакову: напитай мя варением сочива сего, яко изнемогаю. Сего ради прозвася имя ему Едом. 31 И рече Иаков Исаву: отдаждь ми днесь первенство свое. 32 Рече же Исав: се, аз иду умрети, и вскую ми первенство сие? 33 И рече Иаков ему: кленися ми днесь. И кляся ему, и отдаде Исав Иакову первенство свое. 34 Иаков же даде Исаву хлеб и варение сочевно: яде же и пи, и востав отиде: и нивочтоже вмени себе Исав первенство. === 26 === 1 Бысть же глад на земли, кроме глада бывшаго прежде во время Авраамле. Отиде же Исаак ко Авимелеху царю Филистимску в Герар: 2 явися же ему Господь и рече: не ходи во Египет, вселися же в земли, в нейже ти реку, 3 и обитай в земли той, и буду с тобою, и благословлю тя: тебе бо и семени твоему дам всю землю сию и поставлю клятву Мою, еюже кляхся Аврааму отцу твоему: 4 и умножу семя твое, яко звезды небесныя, и дам семени твоему всю землю сию: и благословятся о семени твоем вси языцы земнии: 5 понеже послуша отец твой Авраам Моего гласа и соблюде заповеди Моя и повеления Моя, и оправдания Моя и законы Моя. 6 Вселися же Исаак в Герарех. 7 Вопросиша же мужие места того о Ревекце жене его, и рече: сестра ми есть. Убояся бо рещи, яко жена ми есть, да не когда убиют его мужие места того Ревекки ради, понеже бе доброзрачна. 8 Бысть же много время тамо: и приникнув Авимелех царь Герарский окном, виде Исаака играюща с Ревеккою женою своею. 9 Призва же Авимелех Исаака и рече ему: убо жена твоя есть? Почто рекл еси, яко сестра ми есть? Рече же ему Исаак: рех бо, да не умру ея ради. 10 Рече же ему Авимелех: что сие сотворил еси нам? Вмале не бысть некто от рода моего с женою твоею, и навел бы еси на ны неведение. 11 Заповеда же Авимелех всем людем своим, глаголя: всяк, иже прикоснется мужу сему, или жене его, смерти повинен будет. 12 Сея же Исаак в земли той, и приобрете в то лето стократный плод ячменя: благослови же его Господь. 13 И возвысися человек, и преуспевая болший бываше, дондеже велик бысть зело. 14 Быша же ему скоти овец и скоти волов и земледелия многа. Позавидеша же ему Филистимляне: 15 и вся кладязи, яже ископаша раби отца его, во время отца его, заградиша я Филистимляне и наполниша тыя землею. 16 Рече же Авимелех ко Исааку: отиди от нас, яко силнейший сотворился еси от нас зело. 17 И отиде оттуду Исаак и обита в дебри Герарстей, и вселися тамо. 18 И паки Исаак ископа кладязи водныя, яже ископаша раби Авраама отца его, и заградиша тыя Филистимляне, по умертвии Авраама отца его: и прозва им имена, по именам, имиже прозва Авраам отец его. 19 И ископаша раби Исааковы в дебри Герарстей, и обретоша тамо кладязь воды живы. 20 И пряхуся пастырие Герарстии с пастырми Исааковыми, глаголюще: наша есть вода. И прозва имя кладязю тому Обида: обидяху бо его. 21 Отшед же оттуду Исаак, ископа кладязь другий. Пряхуся же и о том: и прозва имя ему Вражда. 22 Отшед же оттуду, ископа кладязь другий. И не пряхуся о том, и прозва имя ему Пространство, глаголя: яко ныне распространи Господь нам и возрасти нас на земли. 23 Взыде же оттуду ко кладязю Клятвенному: 24 и явися ему Господь в ту нощь и рече: Аз есмь Бог Авраама отца твоего, не бойся, с тобою бо есмь: и благословлю тя, и умножу семя твое Авраама ради отца твоего. 25 И созда тамо жертвенник, и призва имя Господне: и постави тамо скинию свою: ископаша же тамо раби Исааковы кладязь в дебри Герарстей. 26 И Авимелех прииде к нему от Герар, и Охозаф невестоводитель его, и Фихол воевода сил его. 27 И рече им Исаак: вскую приидосте ко мне? Вы же возненавидесте мене и отсласте мя от себе. 28 Они же реша: видевше узрехом, яко бе Господь с тобою, и рехом: буди клятва между нами и между тобою, и завещаим с тобою завет, 29 да не сотвориши с нами зла, якоже не возгнушахомся тобою мы, и якоже сотворихом тебе добро, и отпустихом тя с миром: и ныне благословен ты от Господа. 30 И сотвори им пир, и ядоша и пиша. 31 И воставше заутра, клятся кийждо ближнему: и отпусти я Исаак, и отидоша от него здравы. 32 Бысть же в той день, и пришедше раби Исааковы поведаша ему о кладязе, егоже ископаша, и рекоша: не обретохом воды. 33 И прозва его Клятва. Сего ради прозва имя граду оному кладязь Клятвенный, даже до днешняго дне. 34 Бяше же Исав лет четыредесяти: и поя жену Иудифу, дщерь Веоха Хеттеина, и Васемафу, дщерь Елона Хеттеина. 35 И быша противящеся Исаакови и Ревекце. === 27 === 1 Бысть же, повнегда состаретися Исаакови, и притупишася очи его еже видети: и призва Исава сына своего старейшаго, и рече ему: сыне мой. И рече: се, аз. 2 И рече Исаак: се, состарехся, и не вем дне скончания моего: 3 ныне убо возми орудие твое, тул же и лук, и изыди на поле, и улови ми лов: 4 и сотвори ми снеди, якоже люблю аз: и принеси ми, да ям, яко да благословит тя душа моя, прежде даже не умру. 5 Ревекка же слыша глаголюща Исаака ко Исаву сыну своему. Изыде же Исав на поле уловити лов отцу своему. 6 Ревекка же рече ко Иакову сыну своему меншему: се, аз слышах отца твоего беседующа ко Исаву брату твоему, глаголюща: 7 принеси ми лов, и сотвори ми снеди, да ядый благословлю тя пред Господем, прежде неже умрети ми: 8 ныне убо, сыне мой, послушай мене, якоже аз заповедаю ти: 9 и шед во овцы, поими мне оттуду два козлища мягка и добра, и сотворю я снеди отцу твоему, якоже любит: 10 и внесеши отцу твоему, и будет ясти, яко да благословит тя отец твой, прежде даже не умрет. 11 Рече же Иаков к Ревекце матери своей: Исав брат мой есть муж космат, Аз же муж гладкий: 12 да не како осяжет мя отец мой, и буду пред ним яко презираяй, и наведу на себе клятву, а не благословение. 13 Рече же ему мати: на мне клятва твоя, чадо: точию послушай гласа моего, и шед принеси ми. 14 Шед же взя и принесе матери, и сотвори мати его снеди, якоже любляше отец его. 15 И вземши Ревекка одежду Исава сына своего старейшаго добрую, яже бысть у нея в дому, облече оною Иакова сына своего меншаго, 16 и кожицами козлячими обложи мышцы его, и нагое выи его: 17 и даде снеди и хлебы, яже сотвори, в руце Иакову сыну своему. 18 И внесе отцу своему и рече: отче. Он же рече: се, аз: кто еси ты, чадо? 19 И рече Иаков отцу: аз Исав первенец твой, сотворих, якоже рекл ми еси: востав сяди и яждь от лова моего, яко да благословит мя душа твоя. 20 Рече же Исаак сыну своему: что сие, еже скоро обрел еси, о чадо? Он же рече: еже даде Господь Бог твой предо мною. 21 Рече же Исаак Иакову: приближися ко мне, и осяжу тя, чадо, аще ты еси сын мой Исав, или ни. 22 Приближися же Иаков ко Исааку отцу своему, и осяза его и рече: глас убо глас Иаковль, руце же руце Исавове. 23 И не позна его: бесте бо руце его, яко руце Исава брата его космате. И благослови его 24 и рече: ты ли еси сын мой Исав? Он же рече: аз. 25 И рече: принеси ми, и ям от лова твоего, чадо, да благословит тя душа моя. И принесе ему, и яде, и принесе ему вино, и пи. 26 И рече ему Исаак отец его: приближися ко мне и облобызай мя, чадо. 27 И приближився лобыза его: и обоня воню риз его, и благослови его и рече: се, воня сына моего, яко воня нивы исполнены, юже благослови Господь: 28 и да даст тебе Бог от росы небесныя и от тука земли, и множество пшеницы и вина: 29 и да поработают тебе языцы, и да поклонятся тебе князи, и буди господин брату твоему, и поклонятся тебе сынове отца твоего: проклинаяй тя проклят, благословляяй же тя благословен. 30 И бысть по еже престати Исааку благословляющу Иакова сына своего: и бысть егда изыде Иаков от лица Исаака отца своего, и Исав брат его прииде с ловитвы. 31 Сотвори же и той снеди и принесе отцу своему, и рече отцу: да востанет отец мой, и да яст от лова сына своего, яко да благословит мя душа твоя. 32 И рече ему Исаак отец его: кто еси ты? Он же рече: аз есмь сын твой первенец Исав. 33 Ужасеся же Исаак ужасом велиим зело и рече: кто убо уловивый мне лов и принесый ми? И ядох от всех, прежде неже приити тебе, и благослових его, и благословен будет. 34 Бысть же егда услыша Исав глаголы отца своего Исаака, возопи гласом велиим и горьким зело, и рече: благослови убо и мене, отче. 35 Рече же ему: пришед брат твой с лестию, взя благословение твое. 36 И рече (Исав): праведно наречеся имя ему Иаков: запя бо мя се уже вторицею, и первенство мое взя, и ныне взя благословение мое. И рече Исав отцу своему: не оставил ли еси (и) мне благословения, отче? 37 Отвещав же Исаак, рече Исаву: аще господина его сотворих тебе, и всю братию его сотворих рабы ему, пшеницею и вином утвердих его: тебе же что сотворю, чадо? 38 Рече же Исав ко отцу своему: еда едино есть благословение у тебе, отче? Благослови убо и мене, отче. Умилившуся же Исааку, возопи гласом велиим Исав и восплакася. 39 Отвещав же Исаак отец его, рече ему: се, от тука земли будет вселение твое, и от росы небесныя свыше: 40 и мечем твоим жити будеши, и брату твоему поработаеши: будет же (время) егда низложиши и отрешиши ярем его от выи твоея. 41 И враждоваше Исав на Иакова о благословении, имже благослови его отец его. Рече же Исав во уме своем: да приближатся дние плача отца моего, да бых убил Иакова брата моего. 42 Возвещена же быша Ревекце словеса Исава сына ея старейшаго: и пославши призва Иакова сына своего юнейшаго и рече ему: се, Исав брат твой грозит тебе убити тя: 43 ныне убо, чадо, послушай моего гласа, и востав бежи в Месопотамию к Лавану брату моему в Харран, 44 и поживи с ним дни некия, дондеже отвратится ярость и гнев брата твоего от тебе, 45 и забудет яже ему сотворил еси, и пославши приведу тя оттуду, да не когда безчадна буду от обоих вас в день един. 46 Рече же Ревекка ко Исааку: стужих си жизнию моею дщерей ради сынов Хеттейских: аще поймет Иаков жену от дщерей земли сея, то вскую ми жити? === 28 === 1 Призвав же Исаак Иакова, благослови его и заповеда ему, глаголя: да не поймеши жены от дщерей Хананейских: 2 востав отбежи в Месопотамию в дом Вафуила отца матере твоея, и поими себе оттуду жену от дщерей Лавана брата матере твоея: 3 Бог же мой да благословит тя и возрастит тя и умножит тя, и будеши в собрания языков: 4 и да даст тебе благословение Авраама отца моего, тебе и семени твоему по тебе наследити землю обитания твоего, юже даде Бог Аврааму. 5 Посла же Исаак Иакова: и отиде в Месопотамию к Лавану сыну Вафуила Сирина, к брату же Ревекки матере Иаковли и Исавли. 6 Виде же Исав, яко благослови Исаак Иакова и посла в Месопотамию сирскую пояти оттуду себе жену, егда благослови его и заповеда ему, глаголя: да не поймеши жены от дщерей Хананейских. 7 И послуша Иаков отца и матере своея, и отиде в Месопотамию сирскую. 8 Видев же Исав, яко злы суть дщери Хананейския пред Исааком отцем его, 9 отиде Исав ко Исмаилу и взя Маелефу дщерь Исмаила сына Авраамля, сестру Навеофову, жену к женам своим. 10 И отиде Иаков от кладязя Клятвеннаго и иде в Харран, 11 и обрете место и успе тамо, зайде бо солнце: и взя от камения места (того) и положи в возглавие себе, и спа на месте онем. 12 И сон виде: и се, лествица утверждена на земли, еяже глава досязаше до небесе, и Ангели Божии восхождаху и низхождаху по ней: 13 Господь же утверждашеся на ней и рече: Аз есмь Бог Авраама отца твоего и Бог Исаака, не бойся: земля, идеже ты спиши на ней, тебе дам ю и семени твоему: 14 и будет семя твое яко песок земный, и распространится на море, и ливу, и север, и на востоки: и благословятся о тебе вся колена земная и о семени твоем: 15 и се, Аз есмь с тобою, сохраняяй тя на всяком пути, аможе аще пойдеши, и возвращу тя в землю сию: яко не имам тебе оставити, дондеже сотворити ми вся, елика глаголах тебе. 16 И воста Иаков от сна своего и рече: яко есть Господь на месте сем, аз же не ведех. 17 И убояся и рече: яко страшно место сие: несть сие, но дом Божий, и сия врата небесная. 18 И воста Иаков заутра, и взя камень, егоже положи тамо в возглавие себе: и постави его в столп, и возлия елей верху его. 19 И прозва Иаков имя месту тому Дом Божий: Уламлуз же бе имя граду первее. 20 И положи Иаков обет, глаголя: аще будет Господь Бог со мною и сохранит мя на пути сем, в оньже аз иду, и даст ми хлеб ясти, и ризы облещися, 21 и возвратит мя здрава в дом отца моего, и будет Господь мне в Бога: 22 и камень сей, егоже поставих в столп, будет ми дом Божий, и от всех, яже ми даси, десятину одесятствую та Тебе. === 29 === 1 И востав Иаков на нозе, иде в землю восточную к Лавану сыну Вафуила Сирина, брату же Ревекки матере Иаковли и Исавли. 2 Узре же, и се, кладязь на поли: и бяху тамо три стада овец, почивающе при нем: от того бо кладязя напаяхуся стада. Камень же велий бяше над устием кладязя. 3 И собирахуся тамо вся стада: и отваляху камень от устия кладязя и напаяху овцы: и паки полагаху камень на устии кладязя на месте своем. 4 Рече же им Иаков: братия, откуду есте вы? Они же реша: от Харрана есмы. 5 Рече же им: знаете ли Лавана сына Нахорова? Они же реша: знаем. 6 Рече же им: здравствует ли? Они же реша: здравствует. И се, Рахиль дщи его идяше со овцами. 7 И рече Иаков: еще есть дне много, не у час собирати скота: напоивше овцы, шедше пасите. 8 Они же реша: не можем, дондеже соберутся вси пастуси и отвалят камень от устия кладязя, и напоим овцы. 9 Еще ему глаголющу к ним, и се, Рахиль дщи Лаваня грядяше со овцами отца своего: она бо пасяше овцы отца своего. 10 Бысть же яко узре Иаков Рахиль дщерь Лавана брата матере своея и овцы Лавана брата матере своея, и приступив Иаков отвали камень от устия кладязя: 11 и напои овцы Лавана брата матере своея, и целова Иаков Рахиль, и возопив гласом своим, восплакася: 12 и поведа Рахили, яко брат отца ея есть и яко сын Ревеккин есть. И текши поведа отцу своему по словесем сим. 13 Бысть же яко услыша Лаван имя Иакова сына сестры своея, тече во сретение ему и объемь его лобза, и введе его в дом свой. И поведа Лавану вся словеса сия. 14 И рече ему Лаван: от костей моих и от плоти моея еси ты. И бе с ним месяц дний. 15 Рече же Лаван Иакову: понеже брат мой еси ты, да не поработаеши мне туне: повеждь ми, что мзда твоя есть? 16 У Лавана же бесте две дщери: имя старейшей Лиа, имя же юнейшей Рахиль. 17 Очи же Лиины болезненны: Рахиль же бе добра видом и красна взором зело. 18 Возлюби же Иаков Рахиль. И рече: поработаю тебе седмь лет за Рахиль дщерь твою меншую. 19 Рече же ему Лаван: лучше ми тебе дати ю, нежели иному отдати мужеви: со мною живи. 20 И работа Иаков за Рахиль седмь лет: и быша пред ним яко малы дни, занеже любяше ю. 21 Рече же Иаков Лавану: даждь ми жену мою, понеже совершишася дние, да вниду к ней. 22 Собра же Лаван вся мужы места того, и сотвори брак. 23 И бысть вечер, и поемь Лаван Лию дщерь свою, введе ко Иакову: и вниде к ней Иаков. 24 Даде же Лаван Лии дщери своей Зелфу рабыню свою, ей в рабу. 25 Бысть же заутра, и се, бяше Лиа, и рече Иаков Лавану: что сие сотворил ми еси? Не Рахили ли ради работах у тебе? Вскую же обидел мя еси? 26 Отвеща же Лаван: несть тако в нашем месте вдати меншую прежде старейшия. 27 Скончай убо седмины сея, и дам ти и сию за дело, еже делаеши у мене еще седмь лет другия. 28 Сотвори же Иаков тако: и исполни седмины сея: и даде ему Лаван Рахиль дщерь свою ему в жену. 29 Даде же Лаван Рахили дщери своей Валлу рабу свою, ей в рабу. 30 И вниде (Иаков) к Рахили: возлюби же Рахиль паче, неже Лию: и работа ему седмь лет другия. 31 Видев же Господь Бог, яко ненавидима бяше Лиа, отверзе ложесна ея: Рахиль же бяше неплоды. 32 И зачат Лиа и роди сына Иакову: нарече же имя ему Рувим, глаголя: яко призре Господь на мое смирение и даде ми сына: ныне убо возлюбит мя муж мой. 33 И зачат паки Лиа и роди сына втораго Иакову и рече: зане услыша Господь, яко ненавидима есмь, и придаде ми и сего. И нарече имя ему Симеон. 34 И зачат еще и роди сына и рече: в нынешнее время у мене будет муж мой, родих бо ему три сыны. Сего ради нарече имя ему Левий. 35 И заченши еще роди сына и рече: ныне еще сие исповем Господу. Сего ради нарече имя ему Иуда, и преста раждати. === 30 === 1 Видевши же Рахиль, яко не роди Иакову, и поревнова Рахиль сестре своей и рече Иакову: даждь ми чада: аще же ни, умру аз. 2 Разгневався же Иаков на Рахиль, рече ей: еда вместо Бога аз есмь, Иже лиши тя плода утробнаго? 3 Рече же Рахиль Иакову: се, раба моя Валла: вниди к ней, и да родит на коленах моих, и чадо сотворю и аз от нея. 4 И даде ему Валлу рабу свою ему в жену: и вниде к ней Иаков. 5 И зача Валла раба Рахилина и роди Иакову сына. 6 И рече Рахиль: суди ми Бог и послуша гласа моего, и даде ми сына. Сего ради прозва имя ему Дан. 7 И зачат еще Валла раба Рахилина и роди сына втораго Иакову. 8 И рече Рахиль: подя мя Бог, и сравнихся с сестрою моею, и возмогох. И прозва имя его Неффалим. 9 Виде же Лиа, яко преста раждати, и взя Зелфу рабу свою и даде ю Иакову в жену: и вниде к ней. 10 И зачат Зелфа раба Лиина и роди Иакову сына. 11 И рече Лиа: благо мне случися. И нарече имя ему Гад. 12 И зачат еще Зелфа раба Лиина и роди Иакову сына втораго. 13 И рече Лиа: блажена аз, яко ублажат мя жены. И прозва имя ему Асир. 14 Иде же Рувим в день жатвы пшеницы и обрете яблока мандрагорова на поли, и принесе я к Лии матери своей. Рече же Рахиль к Лии сестре своей: даждь ми от мандрагоров сына твоего. 15 Рече же Лиа: не доволно ли тебе, яко взяла еси мужа моего? Еда и мандрагоры сына моего возмеши? Рече же Рахиль: не тако: да будет сея нощи с тобою за мандрагоры сына твоего. 16 Прииде же Иаков с поля в вечер, и изыде Лиа во сретение ему и рече: ко мне внидеши днесь: наяла бо тя есмь за мандрагоры сына моего. И бысть с нею тоя нощи. 17 И послуша Бог Лию, и заченши роди Иакову сына пятаго. 18 И рече Лиа: даде ми Бог мзду мою, зане дах рабу мою мужу моему. И прозва имя ему Иссахар, еже есть мзда. 19 И зачат еще Лиа и роди сына шестаго Иакову. 20 И рече Лиа: дарова ми Бог дар добр в нынешнее время: возлюбит мя муж мой: родих бо ему шесть сынов. И прозва имя ему Завулон. 21 И посем роди дщерь, и прозва имя ей Дина. 22 Помяну же Бог Рахиль, и услыша ю Бог, и отверзе утробу ея: 23 и заченши, роди Иакову сына. И рече Рахиль: отя Бог укоризну мою. 24 И нарече имя ему Иосиф, глаголющи: да придаст ми Бог сына другаго. 25 Бысть же яко роди Рахиль Иосифа, рече Иаков Лавану: отпусти мя, да иду на место мое и в землю мою: 26 отдаждь ми жены моя и дети моя, ихже ради работах тебе, да отиду: ты бо веси работу, юже работах ти. 27 Рече же ему Лаван: аще обретох благодать пред тобою: усмотрих бо, яко благослови мя Бог пришествием твоим: 28 раздели мзду свою у мене, и дам ти. 29 Рече же Иаков: ты веси, яже работах тебе, и колико бе скота твоего у мене: 30 мало бо бе елико твоего у мене и возрасте во множество: и благослови тя Господь пришествием моим: ныне убо когда сотворю и аз себе дом? 31 И рече к нему Лаван: что ти дам? Рече же ему Иаков: не даси ми ничтоже: аще сотвориши ми глагол сей, паки пасти имам овцы твоя, и сохраню: 32 оыди вся овцы твоя ныне и разлучи оттуду всякую овцу пелесую во овцах, и всяку беловатую и пеструю в козах, будет ми мзда (и будет мое): 33 и послушает мене правда моя во утрешний день, яко есть мзда моя пред тобою: все еже аще не будет пестро и беловатое в козах, и пелесо во овцах, за украденое будет мною. 34 Рече же ему Лаван: буди по словеси твоему. 35 И разлучи в той день козлы пестрыя и беловатыя, и вся козы пестрыя и беловатыя, и все еже бе пелесо во овцах, и все еже бяше белое в них: и даде в руце сыном своим: 36 и разстави путем трех дний, и между ими и между Иаковом: Иаков же пасяше овцы Лавановы оставшыяся. 37 Взя же Иаков себе жезл стиракинов зеленый, и орехов, и яворовый: и острога я Иаков пестрением белым, сострогая кору: являшеся же на жезлах белое, еже острога, пестро. 38 И положи жезлы, яже острога, в поилных корытех воды: да егда приидут овцы пити, пред жезлы пришедшым им пити, зачнут овцы по жезлом: 39 и зачинаху овцы по жезлом, и раждаху овцы беловатыя и пестрыя и пепеловидныя пестрыя. 40 Агницы же разлучи Иаков и постави прямо овцам овна беловатаго и всякое пестрое во агнцах: и разлучи себе стада по себе, и не смеси сих со овцами Лавановыми. 41 Бысть же во время, в неже зачинаху овцы во чреве приемлющя, положи Иаков жезлы пред овцами в корытех, еже зачинати им по жезлом: 42 егда же раждаху овцы, не полагаше: быша же неназнаменаныя Лавановы, а знаменаныя Иаковли. 43 И разбогате человек зело зело: и быша ему скоти мнози, и волове, и раби, и рабыни, и велблюды, и ослы. === 31 === 1 Слыша же Иаков словеса сынов Лавановых, глаголющих: взя Иаков вся яже отца нашего, и от сущих отца нашего сотвори всю славу сию. 2 И виде Иаков лице Лаване, и се не бяше к нему, яко вчера и третияго дне. 3 Рече же Господь ко Иакову: возвратися в землю отца твоего и в род твой, и буду с тобою. 4 Послав же Иаков, призва Лию и Рахиль на поле, идеже бяху стада, 5 и рече им: вижду аз лице отца вашего, яко несть ко мне, якоже вчера и третияго дне: Бог же отца моего бе со мною: 6 и вы сами весте, яко всею силою моею работах отцу вашему: 7 отец же ваш обиде мя и измени мзду мою десяти агнцев, но не даде ему Бог зла сотворити мне. 8 Аще сице речет: пестрыя, будет твоя мзда: и родятся вся овцы пестрыя. Аще же речет: белыя, будет твоя мзда: и родятся вся овцы белыя. 9 И отя Бог вся скоты отца вашего и даде я мне. 10 И бысть егда зачинаху овцы во чреве приемлющя, и видех очима моима во сне: и се, козлы и овны восходяще бяху на овцы и козы, беловатыя и пестрыя и пепеловидныя пестрыя. 11 И рече ми Ангел Божий во сне: Иакове. Аз же рех: что есть? 12 И рече: воззри очима твоима и виждь козлы и овны восходящыя на овцы и козы, белыя и пестрыя и пепеловидныя пестрыя: видех бо, елика тебе Лаван творит: 13 Аз есмь Бог явивыйся тебе на Месте Божии, идеже помазал Ми еси тамо столп, и обетовал Ми еси тамо обет: ныне убо востани и изыди от земли сея, и иди в землю рождения твоего, и буду с тобою. 14 И отвещавши Рахиль и Лиа, рекосте ему: еда есть нам еще часть или наследие в дому отца нашего? 15 Не яко ли чужыя вменихомся ему? Продаде бо нас и снеде снедию сребро наше: 16 все богатство и слава, юже отя Бог от отца нашего, нам будет и чадом нашым: ныне убо, елика тебе рече Бог, твори. 17 Востав же Иаков, взя жены своя и дети своя на велблюды, 18 и забра вся имения своя и вся стяжания, яже притяжа в Месопотамии, и вся своя, еже отити ко Исааку отцу своему в землю Ханаанскую. 19 Лаван же отиде острищи овцы своя: украде же Рахиль идолы отца своего. 20 Утаи же Иаков от Лавана Сирина, не поведати ему, яко уходит, 21 и отбеже сам, и вся яже его, и прейде реку, и взыде на гору Галаад. 22 Поведася же Лавану Сирину в третий день, яко бежа Иаков: 23 и поим сыны и братию свою с собою, гна вслед его путем седмь дний: и достиже его на горе Галаад. 24 Прииде же Бог к Лавану Сирину нощию во сне и рече ему: блюди себе, да не когда возглаголеши ко Иакову зла. 25 И постиже Лаван Иакова: Иаков же постави кущу свою на горе: Лаван же разстави братию свою на горе Галаад. 26 Рече же Лаван Иакову: что сотворил еси? Вскую тайно ушел еси и окрал еси мя, и отвел дщери моя, яко пленницы оружием? 27 И аще бы ми поведал еси, отпустил бых тя с веселием и с мусикиею, и тимпаны и гусльми: 28 и не сподобихся целовати детей моих и дщерей моих: ныне же несмысленно сотворил еси: 29 и ныне рука моя может озлобити тя. Но Бог отца твоего вчера рече ко мне, глаголя: блюди себе, да не когда возглаголеши ко Иакову зла. 30 Ныне убо отшел еси: желанием бо возжелал еси отити в дом отца твоего: вскую украл еси боги моя? 31 Отвещав же Иаков рече к Лавану: понеже убояхся: рех бо, да не како отимеши дщери твоя от мене, и вся моя. 32 И рече Иаков: у негоже аще обрящеши боги твоя, да не будет жив пред братиею нашею: узнавай, что есть твоего у мене, и возми. И не позна у него ничтоже: не ведяше же Иаков, яко Рахиль жена его украде я. 33 Вшед же Лаван, оыска в кущи Лиине, и не обрете. И изыде из кущи Лиины, и оыска кущу Иаковлю и в кущи двоих рабынь, и не обрете. Вниде же и в кущу Рахилину. 34 Рахиль же взя идолы и положи оныя под седло велблюже и седе на них, 35 и рече отцу своему: не имей себе тяжко, господине: не могу востати пред тобою, яко обычная женская ми суть. Иска же Лаван по всей кущи, и не обрете идолов. 36 Разгневася же Иаков и пряшеся с Лаваном. Отвещав же Иаков рече Лавану: кая неправда моя? И кий грех мой, яко погнал еси вслед мене, 37 и яко оыскал еси вся сосуды дому моего? Что обрел еси от всех сосудов дому твоего? Положи зде пред братиею твоею и братиею моею, и да разсудят между обема нама: 38 се, двадесять лет аз есмь с тобою: овцы твоя и козы твоя не быша без плода: овнов овец твоих не поядох: 39 звероядины не принесох к тебе: аз воздаях тебе от мене самаго татбины денныя и татбины нощныя: 40 бых во дни жегомь зноем, и студению в нощи, и отхождаше сон от очию моею: 41 се, мне двадесять лет аз есмь в дому твоем, работах тебе четыренадесять лет двух ради дщерей твоих и шесть лет за овцы твоя, и преобидел еси мзду мою десятию агницами: 42 аще не бы Бог отца моего Авраама, и страх Исаака был мне, ныне тща отпустил бы мя еси: смирение мое и труд руку моею увиде Бог, и обличи тя вчера. 43 Отвещав же Лаван, рече ко Иакову: дщери дщери моя и сынове сынове мои, и скоти скоти мои, и вся елика ты видиши моя суть и дщерей моих: что сотворю им днесь, или чадом их, яже родиста? 44 Ныне убо гряди, завещаим завет аз и ты: и будет во свидетелство между мною и тобою. Рече же ему Иаков: се, никтоже с нами есть: виждь, Бог свидетель между мною и тобою. 45 И взем Иаков камень, постави его в столп. 46 Рече же Иаков братии своей: соберите камение. И собраша камение и сотвориша холм: и ядоша, и пиша тамо на холме. Рече же ему Лаван: холм сей свидетелствует между мною и тобою днесь. 47 И прозва его Лаван холм Свидетелства: Иаков же прозва холм Свидетель. 48 Рече же Лаван ко Иакову: се, холм сей и столп, егоже поставих между мною и тобою, свидетелствует холм сей и свидетелствует столп сей: сего ради прозвася имя холм Свидетелствует, 49 и Видение, еже рече: да видит Бог между мною и тобою, яко отидем друг от друга: 50 аще смириши дщери моя, аще поймеши жены над дщери моя виждь, никтоже с нами есть видяй: Бог свидетель между мною и между тобою. 51 И рече Лаван Иакову: се, холм сей свидетель и столп сей: 52 аще бо аз не прейду к тебе, ниже ты да прейдеши ко мне холма сего и столпа сего со злобою: 53 Бог Авраамль и Бог Нахоров да судит между нама. И кляся Иаков страхом отца своего Исаака, 54 и пожре Иаков жертву на горе и воззва братию свою: ядоша же и пиша и спаша на горе. 55 Востав же Лаван заутра, лобыза сыны и дщери своя и благослови я: и возвратився Лаван, отиде на место свое. === 32 === 1 И Иаков иде в путь свой. И воззрев виде полк Божий воополчившийся: и сретоша его Ангели Божии. 2 Рече же Иаков, егда виде их: полк Божий сей. И прозва имя месту тому Полки. 3 Посла же Иаков послы пред собою ко Исаву брату своему в землю Сиир, в страну Едом, 4 и заповеда им глаголя: тако рцыте господину моему Исаву: тако глаголет раб твой Иаков: у Лавана обитах и умедлих даже до ныне: 5 и быша ми волове и ослы и овцы, и раби и рабыни: и послах поведати господину моему Исаву, дабы обрел раб твой благодать пред тобою. 6 И возвратишася послы ко Иакову, глаголюще: ходихом ко брату твоему Исаву, и се, сам идет во сретение тебе, и четыриста мужей с ним. 7 Убояся же Иаков зело и в недоумении бе: и раздели люди сущыя с собою, и волы и велблюды и овцы на два полка, 8 и рече Иаков: аще приидет Исав на един полк и изсечет и, будет вторый полк во спасении. 9 Рече же Иаков: Бог отца моего Авраама и Бог отца моего Исаака, Господи Боже, Ты рекий ми: иди в землю рождения твоего, и благо тебе сотворю: 10 довлеет ми от всея правды и от всея истины, юже сотворил еси рабу Твоему: с жезлом бо сим преидох Иордан сей, ныне же бех в два полка: 11 изми мя от руки брата моего, от руки Исава: яко боюся аз его, да не когда пришед убиет мя и матерь с чады: 12 ты же рекл еси: благо тебе сотворю и положу семя твое яко песок морский, иже не изочтется от множества. 13 И спа тамо нощи тоя, и взя, яже имяше дары, и посла Исаву брату своему: 14 коз двести, козлов двадесять, овец двести, овнов двадесять, 15 велблюдов дойных, и жребят их тридесять, волов четыредесять, юнцов десять, ослов двадесять и жребят десять: 16 и даде их рабом своим, (коеждо) стадо особо, и рече рабом своим: идите предо мною, и разстояние творите между стадом и стадом. 17 И заповеда первому глаголя: аще тя срящет Исав брат мой и вопросит тя глаголя: чий еси, и камо идеши, и чия сия, яже пред тобою идут? 18 Речеши: раба твоего Иакова: дары посла господину моему Исаву: и се, сам за нами (идет). 19 И заповеда первому, и второму, и третиему, и всем предидущым вслед стад сих глаголя: по словеси сему глаголите Исаву, егда обрящете его вы, 20 и рцыте: се, раб твой Иаков идет за нами: рече бо: укрощу лице его дарами предидущими его, и посем узрю лице его: негли бо приимет лице мое? 21 И предидяху дары пред лицем его, сам же преспа тоя нощи в полце. 22 Востав же тоя нощи, поя обе жены (своя) и обе рабыни и единонадесять сынов своих, и прейде брод Иавок: 23 и взя их, и прейде поток, и преведе вся своя. 24 Остася же Иаков един. И боряшеся с ним Человек даже до утра. 25 Виде же, яко не может противу ему: и прикоснуся широте стегна его: и отерпе широта стегна Иаковля, егда боряшеся с Ним. 26 И рече ему: пусти Мя: взыде бо заря. Он же рече: не пущу Тебе, аще не благословиши мене. 27 Рече же ему: что ти имя есть? Он же рече: Иаков. 28 И рече ему: не прозовется ктому имя твое Иаков, но Исраиль будет имя твое: понеже укрепился еси с Богом и с человеки силен будеши. 29 Вопроси же Иаков и рече: повеждь ми имя Твое. И рече: вскую сие вопрошаеши ты имене Моего? Еже чудно есть. И благослови его тамо. 30 И прозва Иаков имя месту тому Вид Божий: видех бо Бога лицем к лицу, и спасеся душа моя. 31 Возсия же ему солнце, егда прейде Вид Божий: он же хромаше стегном своим. 32 Сего ради не ядят сынове Израилевы жилы, яже отерпе, яже есть в широте стегна, даже до дне сего: понеже прикоснуся широте стегна Иаковли жилы, яже отерпе. === 33 === 1 Воззрев же Иаков очима своима, виде: и се, Исав брат его идый, и четыриста мужей с ним. И раздели Иаков дети Лии и Рахили и двум рабыням, 2 и постави обе рабыни и сыны их в первых, Лию же и дети ея позади, а Рахиль и Иосифа в последних: 3 сам же изыде первее пред ними и поклонися до земли седмижды, дондеже приближися к брату своему. 4 И притече Исав во сретение ему: и объемь его, припаде на выю его и облобыза его: и плакастася оба. 5 И воззрев Исав, виде жены и дети и рече: что сии тебе суть? Он же рече: дети, имиже помилова Бог раба твоего. 6 И приступиша рабыни и дети их и поклонишася: 7 и приступи Лиа и дети ея и поклонишася: посем же приступи Рахиль и Иосиф и поклонистася. 8 И рече: что сия тебе суть, полцы сии вси, яже сретох? Он же рече: да обрящет раб твой благодать пред тобою, господине. 9 Рече же Исав: суть мне многа, брате: да будут тебе твоя. 10 И рече Иаков: аще обретох благодать пред тобою, приими дары от руку моею: сего ради видех лице твое, яко бы аще кто видел лице Божие: и возблаговолиши о мне: 11 приими благословение мое, еже принесох тебе, яко помилова мя Бог, и суть ми вся. И принуди его, и взя. 12 И рече: воставше пойдем прямо. 13 Рече же ему: господин мой весть, яко дети мои юны, овцы же и говяда бременны у мене: аще убо пожену я един день, измрет весь скот: 14 да предидет господин мой пред рабом своим: аз же укреплюся на пути умедлением шествия моего, еже предо мною, и якоже возмогут ити дети, дондеже прииду к господину моему в Сиир. 15 И рече Исав: оставлю с тобою от людий сущих со мною. Он же рече: вскую сие? Довлеет, яко обретох благодать пред тобою, господине. 16 Возвратися же Исав в том дни путем своим в Сиир: 17 и Иаков пойде в Кущы, и постави себе тамо храмины, и скоту своему сотвори кущы: сего ради нарече имя месту тому Кущы. 18 И прииде Иаков в салим град Сикимск, иже есть в земли Ханаанстей, егда прииде от Месопотамии Сирския, и ста пред лицем града: 19 и купи часть села, идеже постави кущу свою тамо, у Еммора отца Сихемля, стома агнцы: 20 и постави тамо жертвенник, и призва Бога Израилева. === 34 === 1 Изыде же Дина дщи Лиина, юже роди Иакову, познати дщери обитателей. 2 И виде ю Сихем сын Емморов Хорреанин, князь тоя земли: и поим ю, бысть с нею и смири ю: 3 и внят душею Дине дщери Иаковли, и возлюби девицу, и глагола к ней по мысли девицы. 4 Рече же Сихем ко Еммору отцу своему, глаголя: поими мне отроковицу сию в жену. 5 Иаков же слыша, яко оскверни сын Емморов Дину дщерь его: сынове же его бяху со скоты его на поли: премолча же Иаков, дондеже приити им. 6 Изыде же Еммор отец Сихемль ко Иакову глаголати к нему. 7 Сынове же Иаковли приидоша с поля: егда же услышаша, смутишася мужие, и жалостно им бысть зело, яко не лепо сотвори во Израили, быв со дщерию Иаковлею: и не будет сице. 8 И рече им Еммор, глаголя: Сихем сын мой избра душею дщерь вашу: дадите убо ю в жену ему: 9 и сосватайтеся с нами: дщери вашя дадите нам, и дщери нашя поимите сыновом своим, 10 и у нас населитеся: и се, земля пространна пред вами: населитеся и куплю дейте на ней, и притяжите на ней. 11 Рече же Сихем ко отцу ея и ко братиям ея: да обрящу благодать пред вами, и еже аще речете, дадим: 12 умножите вено зело, и дам, якоже речете ми: и дасте ми отроковицу сию в жену. 13 Отвещаша же сынове Иаковли Сихему и Еммору отцу его с лестию, и глаголаша к ним, яко оскверниша Дину сестру их. 14 И рекоста им Симеон и Левий, братия Динины (сынове Лии): не возможем сотворити глагола сего, дати сестру нашу человеку, иже имать крайнюю плоть необрезанну: есть бо укоризна нам: 15 токмо в сем уподобимся вам и вселимся у вас, аще будете якоже мы и вы, егда обрежете весь мужеск пол: 16 и дадим дщери нашя вам, и от дщерей ваших поймем себе жены и вселимся у вас, и будем яко един род: 17 аще же не послушаете нас, еже обрезатися, поимше дщерь нашу отидем. 18 И угодна быша словеса пред Еммором и пред Сихемом сыном Емморовым: 19 и не премедли юноша сотворити глагол сей: любяше бо дщерь Иаковлю. Сей же бяше славнейший всех, иже в дому отца его. 20 Прииде же Еммор и Сихем сын его пред врата града своего и глаголаста к мужем града своего, рекуще: 21 человецы сии мирни суть, с нами да населятся на земли и да куплю деют на ней: земля же се пространна пред ними: дщери их да поймем себе в жены, и дщери нашя дадим им: 22 в сем точию уподобятся нам человецы, еже жити с нами, яко быти людем единем: внегда обрезати нам весь мужеск пол, якоже и тии обрезани суть: 23 и скоти их и четвероногая, и имения их не наша ли будут? Точию в сем уподобимся им, и вселятся с нами. 24 И послушаша Еммора и Сихема сына его вси исходящии из врат града своего и обрезаша плоть крайнюю свою, всяк мужеск пол. 25 Бысть же в третий день, егда бяху в болезни, взяша два сына Иаковля Симеон и Левий, братия Динины, кийждо свой мечь, и внидоша во град безопасно и изсекоша весь мужеск пол: 26 Еммора же и Сихема сына его усекнуша острием меча, и взяша Дину от дому Сихема и изыдоша. 27 Сынове же Иаковли внидоша к побиенным и разграбиша град, в немже оскверниша Дину сестру их: 28 и овцы их и говяда их и ослы их, и елика бяху во граде, и елика бяху на поли, взяша: 29 и вся чада их и вся сосуды их и жены их плениша: и разграбиша, елика бяху во граде, и елика бяху в домех. 30 Рече же Иаков к Симеону и Левии: ненавистна мя сотвористе, яко злу мне быти всем живущым на земли, в Хананеах и Ферезеах, аз же мал есмь числом: и собравшеся на мя изсекут мя, и истреблен буду аз и дом мой. 31 Они же рекоша: аки блудницу ли возимеют сестру нашу? === 35 === 1 Рече же Бог ко Иакову: востав взыди на место Вефиль, и живи тамо, и сотвори тамо жертвенник Богу явльшемуся тебе, егда бежал еси от лица Исава брата твоего. 2 Рече же Иаков дому своему и всем иже с ним: поверзите боги чуждыя, иже с вами, от среды вас и очиститеся, и измените ризы своя: 3 и воставше взыдем в Вефиль и сотворим тамо жертвенник Богу послушавшему мене в день скорбения, Иже бе со мною и спасе мя на пути, в оньже ходих. 4 И вдаша Иакову боги чуждыя, иже бяху в руках их, и усерязи яже во ушесех их: и скры я Иаков под теревинфом иже в Сикимех: И погуби я до днешняго дне. 5 И воздвижеся Израиль от Сикимов, и бысть страх Божий на градех, иже окрест их: и не гнаша вслед сынов Израилевых. 6 Прииде же Иаков в Лузу, яже есть в земли Ханаанстей, яже есть Вефиль, сам и вси людие, иже бяху с ним, 7 и созда тамо жертвенник, и прозва имя месту тому Вефиль: тамо бо явися ему Бог, егда бежаше он от лица Исава брата своего. 8 Умре же Девора, доилица Ревеккина, и погребоша ю ниже Вефиля под дубом, и прозва имя ему дуб плача. 9 Явися же Бог Иакову еще в Лузе, егда прииде от Месопотамии Сирския, и благослови его Бог 10 и рече ему Бог: имя твое не прозовется ктому Иаков, но Израиль будет имя тебе. И нарече имя ему Израиль. 11 Рече же ему Бог: Аз Бог твой: расти и множися: языцы и собрания языков будут от тебе, и царие из чресл твоих изыдут: 12 и землю, юже дах Аврааму и Исааку, тебе дах ю, тебе будет, и семени твоему по тебе дам землю сию. 13 Взыде же Бог от него от места, идеже глагола с ним: 14 и постави Иаков столп на месте, идеже глагола с ним Бог, столп каменный, и пожре на нем жертву и возлия на него елей: 15 и прозва Иаков имя месту тому, идеже глагола с ним Бог, Вефиль. 16 (Востав же (Иаков) от Вефиля, и постави кущу свою далее столпа Гадер.) бысть же егда приближися к хаврафе приити до земли Ефрафа, роди Рахиль и возбедствова в рождении: 17 бысть же внегда жестоко ей родити, рече ей баба: дерзай, ибо сей тебе есть сын. 18 Бысть же егда оставляше ю душа, умираше бо, прозва имя ему Сын Болезни моея: отец же прозва имя ему Вениамин. 19 Умре же Рахиль, и погребоша ю на пути ипподрома Ефрафы: сия есть Вифлеем: 20 и постави Иаков столп на гробе ея: сей есть столп над гробом Рахилиным даже до дне сего. 21 Изыде же оттуду Израиль и постави кущу свою за столпом Гадер. 22 Бысть же егда вселися Израиль в земли той, иде Рувим и спа с Валлою, наложницею отца своего Иакова. И слыша Израиль, и зло явися пред ним. Беша же сынове Иаковли дванадесять. 23 Сынове Лиины: Рувим, первенец Иаковль, Симеон, Левий, Иуда, Иссахар, Завулон. 24 Сынове же Рахилины: Иосиф и Вениамин. 25 Сынове же Валлы, рабы Рахилины: Дан и Неффалим. 26 Сынове же Зелфы, рабы Лиины: Гад и Асир. Сии сынове Иаковли, иже родишася ему в Месопотамии Сирстей. 27 Прииде же Иаков ко Исааку отцу своему (еще живу сущу ему) в Мамврию, во Град Польный: сей есть Хеврон в земли Ханаанстей, идеже обита Авраам и Исаак. 28 Быша же дние Исааковы, яже поживе, сто осмьдесят лет: 29 и ослабев Исаак умре, и приложися к роду своему стар исполнь дний: и погребоста его Исав и Иаков, сынове его. === 36 === 1 Сии же родове Исавли, сей есть Едом. 2 Исав же поя себе жены от дщерей Хананейских: Аду, дщерь Елома Хеттеина, и Оливему, дщерь Ананю сына Севегона Евеина, 3 и Васемафу, дщерь Исмаилю, сестру Навеофову. 4 Роди же Ада Исаву Елифаса, и Васемаф роди Рагуила, 5 и Оливема роди Иеуса и Иеглома и Кореа: сии сынове Исавли, иже быша ему в земли Ханаанстей. 6 Поя же Исав жены своя и сыны своя и дщери своя, и вся телеса дому своего и вся имения своя и вся скоты, и вся, елика притяжа, и вся, елика приобрете в земли Ханаанстей, и отиде Исав из земли Ханаанския от лица Иакова брата своего: 7 бяху бо имения их многа, еже жити вкупе: и не можаше земля обитания их вместити их, от множества имений их. 8 Вселися же Исав на горе Сиир: Исав той есть Едом. 9 Сии же родове Исава, отца Едомля, на горе Сиир: 10 и сия имена сынов Исавлих: Елифас, сын Ады, жены Исавли, и Рагуил, сын Васемафы, жены Исавли. 11 Быша же Елифасу сынове: Феман, Омар, Софар, Гофом и Кенез. 12 Фамна же бяше наложница Елифаса, сына Исавля, и роди Елифасу Амалика: сии сынове Ады, жены Исавли. 13 Сии же сынове Рагуиловы: Нахоф, Заре, Соме и Мозе: сии быша сынове Васемафы, жены Исавли. 14 Сии же сынове Оливемы дщере Анани сына Севегоня, жены Исавли: роди же Исаву Иеуса и Иеглома и Кореа. 15 Сии старейшины сына Исавля, сынове Елифаса, первенца Исавля: старейшина Феман, старейшина Омар, старейшина Софар, старейшина Кенез, 16 старейшина Корей, старейшина Гофом, старейшина Амалик: сии старейшины Елифаса в земли Идумейстей, сии сынове Адины. 17 И сии сынове Рагуила, сына Исавля: старейшина Нахоф, старейшина Заре, старейшина Соме, старейшина Мозе: сии старейшины Рагуиловы в земли Едомстей, сии сынове Васемафы, жены Исавли. 18 Сии же сынове Оливемы, жены Исавли: старейшина Иеус, старейшина Иеглом, старейшина Корей: сии старейшины Оливемы, дщере Анани, жены Исавли, 19 сии сынове Исавли и сии старейшины их, сии суть сынове Едомли. 20 Сии же сынове Сиира Хорреова жившаго на земли: Лотан, Совал, Севегон, Ана 21 и Дисон, и Асар и Рисон: сии старейшины Хорреова сына Сиира в земли Едомстей. 22 Быша же сынове Лотани: Хорри и Еман, сестра же Лотаня Фамна. 23 Сии же сынове Соваловы: Голам и Манахаф, и Гевил и Софар и Омар. 24 И сии сынове Севегони: Аие и Ана: сей есть Ана, иже обрете иаминь в пустыни, егда пасяше подяремники Севегона, отца своего. 25 Сии же сынове Анани: Дисон и Оливема, дщи Ананя. 26 Сии же сынове Дисоновы: Амада и Асван, и Ифран и Харран. 27 Сии же сынове Асаровы: Валаам и Зукам, и Укам и Укан. 28 Сии же сынове Рисоновы: Ос и Аран. 29 Сии же старейшины Хорриовы: старейшина Лотан, старейшина Совал, старейшина Севегон, старейшина Ана, 30 старейшина Дисон, старейшина Асар, старейшина Рисон: сии старейшины Хорриовы во областех их в земли Едомли. 31 И сии царие царствовавшии во Едоме, прежде царствования царей во Израили: 32 и царствова во Едоме Валак, сын Веоров: имя же граду его Деннава. 33 Умре же Валак, и царь бысть по нем Иовав, сын Зарин от Восорры. 34 Умре же Иовав, и царь бысть по нем Асом от земли Феманони. 35 Умре же Асом, и бысть царь по нем Адад сын Варадов, иже изсече Мадиама на поли Моавли: имя же граду его Гетфем. 36 Умре же Адад, и царь бысть по нем Самада от Массеккаса. 37 Умре же Самада, и царь бысть по нем Саул из Роовофа, иже есть близ реки. 38 Умре же Саул, и царь бысть по нем Вааленнон, сын Аховорь. 39 Умре же Вааленнон сын Аховорь, и царь бысть по нем Арад, сын Варадов: и имя граду его Фогор, имя же жене его Метевеиль, дщерь Матраифа, сына Мезоовля. 40 Сия имена старейшин Исавлих в племенех их, по месту их, во странах их и в языцех их: старейшина Фамна, старейшина Гола, старейшина Иефер, 41 старейшина Оливема, старейшина Ила, старейшина Финон, 42 старейшина Кенез, старейшина Феман, старейшина Мазар, 43 старейшина Магедиил, старейшина Зафой: сии старейшины Едомли, живущии в земли притяжания их: сей Исав отец Едомль. === 37 === 1 Вселися же Иаков в земли, идеже обита Исаак, отец его, в земли Ханаани. 2 Сии же роди Иаковли. Иосиф же бяше седминадесяти лет, пасый овцы отца своего с братиею своею, юн сый, с сынми Валлы и с сынми Зелфы, жен отца своего: нанесоша же на Иосифа злу клевету ко Израилю отцу своему. 3 Иаков же любляше Иосифа паче всех сынов своих, яко сын в старости ему бысть: и сотвори ему ризу пестру. 4 Видевше же братия его, яко любит его отец паче всех сынов своих, возненавидеша его и не можаху глаголати к нему ничтоже мирно. 5 Видев же Иосиф сон, поведа и братии своей 6 и рече им: послушайте сна сего, егоже видех: 7 мнех вас вяжущих снопы среде поля: и воста мой сноп и ста прямо, ваши же снопы обратившеся поклонишася моему снопу. 8 Реша же ему братия его: еда царствуя царствовати будеши над нами, или господствуя господствовати будеши над нами? И приложиша еще ненавидети его снов ради его и ради словес его. 9 Виде же сон другий и поведа его отцу своему и братии своей, и рече: се, видех другий сон: аки бы солнце и луна и единонадесять звезд покланяхуся мне. 10 И запрети ему отец его и рече ему: что сон сей, егоже еси видел? Еда пришедше приидем аз и мати твоя и братия твоя поклонитися тебе до земли? 11 Позавидеша же ему братия его: отец же его соблюде слово сие. 12 Отидоша же братия его пасти овцы отца своего в Сихем. 13 И рече Израиль ко Иосифу: еда братия твоя не пасут в Сихеме? Гряди да послю тя к ним. Рече же ему: се, аз. 14 Рече же ему Израиль: шед, виждь, аще здравствуют братия твоя и овцы, и повеждь ми. И посла его от юдоли Хеврони. И прииде в Сихем: 15 и обрете его человек заблуждающа на поли: вопроси же его человек глаголя: чесого ищеши? 16 Он же рече: братии моея ищу: повеждь ми, где пасут. 17 Рече же ему человек: отидоша отсюду: слышах бо их глаголющих: пойдем в Дофаим. И иде Иосиф вслед братии своея и обрете я в Дофаиме. 18 Предузреша же его издалече, прежде приближения его к ним, и зле умыслиша убити его: 19 рече же кийждо к брату своему: се, сновидец оный идет: 20 ныне убо приидите, убием его и ввержим его во един от рвов, и речем: зверь лют снеде его: и узрим, что будут сония его. 21 Слышав же Рувим, отя его из рук их и рече: не убием его на души. 22 Рече же им Рувим: не пролийте крове, вверзите его во един от рвов сих, иже в пустыни, руки же не возложите на него: (тщашеся бо) яко да изымет его от рук их и отдаст его отцу своему. 23 Бысть же егда прииде Иосиф к братии своей, совлекоша со Иосифа ризу пеструю, яже на нем, 24 и поемше его ввергоша в ров: ров же тощь, воды не имяше. 25 И седоша ясти хлеб, и воззревше очима видеша, и се, путницы Исмаилтяне идяху от Галаада, и велблюды их полны фимиама и ритины и стакти: идяху же везуще во Египет. 26 Рече же Иуда ко братии своей: кая польза, аще убием брата нашего и скрыем кровь его? 27 Грядите продадим его Исмаилтяном сим: руце же наши да не будут на нем, яко брат наш и плоть наша есть. Послушаша же братия его. 28 И мимоидоша человецы Мадиамстии купцы: и извлекоша и возведоша Иосифа из рова, и продаша Иосифа Исмаилтяном на двадесять златниц. И поведоша Иосифа во Египет. 29 Возвратися же Рувим к рову и не узре Иосифа в рове: и растерза ризы своя, 30 и прииде ко братии своей и рече: отрочища несть, аз же камо иду ктому? 31 Вземше же ризу Иосифову, заклаша козлище от коз и помазаша ризу кровию: 32 и послаша ризу пеструю, и принесоша ко отцу своему и рекоша: сию обретохом: познавай, аще риза сына твоего есть, или ни? 33 И позна ю и рече: риза сына моего есть: зверь лют снеде его: зверь восхити Иосифа. 34 И растерза Иаков ризы своя, и возложи вретище на чресла своя, и плакашеся сына своего дни многи. 35 Собрашася же вси сынове его и дщери и приидоша утешити его: и не хотяше утешитися, глаголя: яко сниду к сыну моему сетуя во ад. И плакася о нем отец его. 36 Мадиане же продаша Иосифа во Египет Пентефрию евнуху фараонову, архимагиру. === 38 === 1 Бысть же в то время, отиде Иуда от братии своея и прииде к человеку некоему Одолламитину, емуже имя Ирас: 2 и виде тамо Иуда дщерь человека Хананейска, ейже имя Сава: и поят ю, и вниде к ней: 3 и заченши роди сына, и нарече имя ему Ир: 4 и заченши еще роди сына и нарече имя ему Авнан: 5 и приложивши роди сына (третияго) и нарече имя Силом: сия же бе в Хасве, егда роди сих. 6 И поя Иуда жену Иру первенцу своему, ейже имя Фамарь. 7 Бысть же Ир первенец Иудин зол пред Господем: и уби его Бог. 8 Рече же Иуда Авнану: вниди к жене брата твоего и совокупися с нею, и возстави семя брату твоему. 9 Познав же Авнан, яко не ему будет семя, бысть егда вхождаше к жене брата своего, проливаше (семя) на землю, еже не дати семене брату своему: 10 зло же явися пред Богом, яко сотвори сие: и умертви и сего. 11 Рече же Иуда Фамари, невестце своей (по смерти дву сынов своих): седи вдовою в дому отца твоего, дондеже велик будет Силом, сын мой. Рече бо (во уме си): да не когда умрет и сей, якоже и братия его. Отшедши же Фамарь, седяше в дому отца своего. 12 Умножишася же дние, и умре Сава жена Иудина. И утешився Иуда, взыде к стригущым овцы его сам, и Ирас пастырь его Одолламитин, во Фамну. 13 И возвестиша Фамари невестце его, глаголюще: се, свекор твой восходит во Фамну стрищи овцы своя. 14 Она же свергши ризы вдовства с себе, облечеся в ризу летнюю и украсися, и седе пред враты Енани, яже суть на пути Фамны: ведяше бо, яко велик бысть Силом: сей же не даде ея ему в жену. 15 И видев ю Иуда, возмне ю блудницу быти: покры бо лице свое, и не позна ея. 16 Уклонися же к ней путем и рече ей: попусти ми внити к себе. Не позна бо, яко невестка ему есть. Она же рече: что ми даси, аще внидеши ко мне? 17 Он же рече: аз тебе послю козлище коз от овец моих. Она же рече: аще даси ми залог, дондеже пришлеши. 18 Он же рече: кий залог тебе дам? Она же рече: перстень твой и гривну, и жезл иже в руце твоей. И даде ей, и вниде к ней, и зача во утробе от него. 19 И воставши отиде, и сверже ризу летнюю с себе и облечеся в ризы вдовства своего. 20 Посла же Иуда козлище от коз рукою пастыря своего Одолламитина взяти залог от жены, и не обрете ея. 21 Вопроси же мужей места того и рече им: где есть блудница бывшая во Енане на распутии? И реша: не бе зде блудница. 22 И возвратися ко Иуде и рече: не обретох: и человецы места того глаголют: несть зде блудницы. 23 Рече же Иуда: да имать та: но да не когда посмеются нам: аз убо послах козлище сие, ты же не обрел еси. 24 Бысть же по трех месяцех, поведаша Иуде, глаголюще: соблуди Фамарь невестка твоя, и се, во утробе имать от блуда. Рече же Иуда: изведите ю, и да сожгут ю. 25 Она же ведома посла к свекру своему, глаголющи: от человека, егоже сия суть, аз во утробе имам. И рече: познай, чий перстень и гривна и жезл сей. 26 Позна же Иуда и рече: оправдася Фамарь паче мене, яко не дах ея Силому сыну моему. И не приложи ктому познати ю. 27 Бысть же егда раждаше, и беста близнята во утробе ея. 28 Бысть же в рождении ея, един произнесе руку: вземши же баба навяза на руку его червлень, глаголющи: сей изыдет первый. 29 Егда же вовлече руку, и абие изыде брат его. Она же рече: что пресечеся тебе ради преграждение? И прозва имя ему Фарес. 30 И посем изыде брат его, емуже бе на руце его червлень: и прозва имя ему Зара. === 39 === 1 Иосиф же приведен бысть во Египет. И купи его Пентефрий евнух фараонов архимагир, муж Египтянин, от рук Исмаилтян, иже приведоша его тамо. 2 И бяше Господь со Иосифом: и бяше муж благополучен, и бысть в дому господина своего Египтянина. 3 Ведяше же господин его, яко Господь бе с ним, и елика творит, Господь благоустрояет в руку его. 4 И обрете Иосиф благодать пред господином своим и благоугоди ему: и постави его над домом своим, и вся, елика быша ему, даде в руки Иосифовы. 5 Бысть же егда постави его над домом своим и над всеми, елика имеяше, и благослови Господь дом Египтянина Иосифа ради: и бысть благословение Господне на всем имении его в дому и в селех его. 6 И предаде вся, елика быша ему, в руки Иосифовы: и не ведяше от сущих у себе ничтоже, кроме хлеба, егоже ядяше сам: и бяше Иосиф добр образом и красен взором зело. 7 И бысть по словесех сих, и возложи жена господина его очи своя на Иосифа и рече: пребуди со мною. 8 Он же не хотяше и рече жене господина своего: аще господин мой не весть мене ради ничтоже в дому своем, и вся, елика суть ему, вдаде в руце мои, 9 и ничто есть выше мене в дому сем, ниже изято бысть от мене чтолибо, кроме тебе, понеже ты жена ему еси: и како сотворю глагол злый сей и согрешу пред Богом? 10 Егда же Иосифу глаголаше день от дне, и не послушаше ея еже спати и быти с нею. 11 Бысть же сицевый некий день, и вниде Иосиф в дом делати дела своя, и никтоже бяше от сущих в дому внутрь: 12 и ухвати его за ризы, глаголющи: лязи со мною. И оставив ризы своя в руках ея, убеже и изыде вон. 13 И бысть егда виде, яко оставль ризы своя в руках ея, бежа и изыде вон: 14 и воззва сущих в дому и рече им глаголющи: видите, введе нам отрока Евреина наругатися нам: вниде ко мне, глаголя: преспи со мною: и возопих гласом великим: 15 и егда услыша он, яко возвысих глас мой и возопих, оставль ризы своя у мене, отбеже и изыде вон. 16 И удержа ризы у себе, дондеже прииде господин в дом свой. 17 И поведа ему по словесех сих, глаголющи: вниде ко мне отрок Евреин, егоже ввел еси к нам, поругатися мне, и рече ми: да буду с тобою: 18 егда же услыша, яко воздвигох глас мой и возопих, оставль ризы своя у мене, отбеже и изыде вон. 19 И бысть егда услыша господин его глаголы жены своея, елика рече к нему, глаголющи: сице сотвори ми отрок твой: и разгневася яростию, 20 и взем господин Иосифа, вверже его в темницу, в место, идеже узники царевы держатся тамо в твердыни. 21 И бяше Господь со Иосифом, и возлия на него милость, и даде ему благодать пред началным стражем темничным: 22 и вдаде старейшина стражей темницу в руце Иосифу и всех вверженых в темницу: и вся, елика творяху тамо, той бе творяй. 23 Старейшина же стражей темничных ничтоже бе ведый его ради: вся бо быша в руках Иосифовых, занеже Господь бяше с ним: и елика той творяше, Господь благопоспешаше в руку его. === 40 === 1 Бысть же по словесех сих, согреши старейшина винарск царя Египетска и старейшина житарск господину своему царю Египетскому. 2 И разгневася фараон на оба евнухи своя, на старейшину винарска и на старейшину житарска, 3 и вверже их в темницу во узилище, в место, идеже Иосиф ввержен бяше. 4 И вручи их старейшина темницы Иосифу, и предста им: и беста дни (некия) в темнице, 5 и видеста оба сон во едину нощь: видение же сонное старейшины винарска и старейшины житарска, иже беста царя Египетска, суще в темнице, бяше сие. 6 Вниде же к ним Иосиф заутра и виде их, и бяху смущени: 7 и вопрошаше евнухов фараоних, иже быша с ним в темнице, у господина своего, глаголя: что, яко лица ваша уныла днесь? 8 Они же реша ему: сон видехом, и разсуждаяй его несть. Рече же им Иосиф: еда не Богом изявление их есть? Поведите убо мне. 9 И поведа старейшина винарск сон свой Иосифу и рече: во сне моем бяше виноград предо мною: 10 в винограде же три леторасли, и той цветущь произнесе отрасли, зрелы грозды лозныя: 11 и чаша фараонова в руце моей: и взях грезн, и изжах оный в чашу, и дах чашу в руку фараоню. 12 И рече ему Иосиф: сие разсуждение сему: три леторасли три дни суть: 13 еще три дни, и помянет фараон сан твой, и паки поставит тя в старейшинство твое винарско, и подаси чашу фараону в руку его по сану твоему первому, якоже был еси виночерпчий: 14 но помяни мя тобою, егда благо ти будет, и сотвориши надо мною милость, и да помянеши о мне фараону, и изведеши мя от твердыни сея: 15 яко татьбою украден бых из земли Еврейския, и зде ничто зло сотворих, но ввергоша мя в ров сей. 16 И виде старейшина житарск, яко прямо разсуди, и рече Иосифу: и аз видех сон, и мняхся три кошницы хлебов держати на главе моей: 17 в кошнице же верхней от всех родов, яже фараон яст, дело хлебенное, и птицы небесныя ядяху тая от кошницы, яже на главе моей. 18 Отвещав же Иосиф, рече ему: сие разсуждение его: три кошницы три дние суть: 19 еще три дние, и отимет фараон главу твою от тебе и повесит тя на древе, и изядят птицы небесныя плоть твою от тебе. 20 Бысть же в день третий, день рождения бяше фараоня, и творяше пир всем отроком своим: и помяну старейшинство старейшины винарска и старейшинство старейшины житарска, посреде отрок своих: 21 и постави старейшину винарска в старейшинство его: и подаде чашу в руку фараоню: 22 старейшину же житарска повеси (на древе), якоже сказа има Иосиф. 23 И не помяну старейшина винарск Иосифа, но забы его. === 41 === 1 Бысть же по двою лету дний, фараон виде сон: мняшеся стояти при реце: 2 и се, аки из реки исхождаху седмь крав добры видом и избранны телесы, и пасяхуся по брегу: 3 другия же седмь крав изыдоша по сих из реки, злы видом и телесы худы, и пасяхуся с кравами по брегу речному: 4 и поядоша седмь кравы злыя и худыя телесы седмь крав добрых видом и избранных телесы: (и сия невидимы быша, яко внидоша в чресла их). Воста же фараон. 5 И виде сон вторый: и се, седмь класи исхождаху из стеблия единаго избранны и добры: 6 друзии же седмь класи тонцыи, истончени ветром, израстаху по них: 7 и пожроша седмь класи тонцыи и истончени ветром седмь класов избранных и полных. Воста же фараон, и бяше сон. 8 Бысть же заутра, и возмутися душа его: и послав, созва вся сказатели Египетския и вся мудрыя его: и поведа им фараон сон свой: и не бяше сказуяй того фараону. 9 И рече старейшина винарск к фараону, глаголя: грех мой воспоминаю днесь: 10 фараон разгневася на рабы своя и вверже нас в темницу в дому архимагира, мене и старейшину житарска: 11 и видехом сон оба единыя нощи аз и он, кийждо свой сон видехом: 12 бяше же тамо с нами юноша, отрок Евреин архимагиров, и поведахом ему, и разсуди нам: 13 бысть же, якоже сказа нам, тако и случися, мне паки быти во своем старейшинстве, а оному повешену. 14 Послав же фараон, призва Иосифа: и изведоша его из твердыни, и остригоша его, и измениша ризы ему, и прииде к фараону. 15 Рече же фараон Иосифу: сон видех, и сказуяй его несть: аз же слышах о тебе глаголющих, яко слышав сны разсуждаеши тыя. 16 Отвещав же Иосиф фараону, рече: без Бога не отвещается спасение фараону. 17 Рече же фараон Иосифу, глаголя: во сне моем мняхся стояти на брезе речнем: 18 и аки из реки исхождаху седмь кравы добры видом и избранны телесы, и пасяхуся по брегу: 19 и се, другия седмь крав исхождаху вслед их из реки, злы и недобры видом и худы телесы, яковых не виде таковых во всей земли Египетстей хуждших: 20 и изядоша седмь кравы злыя и худыя седмь крав первых добрых и избранных: 21 и внидоша во утробы их, и не явишася, яко внидоша во утробы их: и обличия их зла быша, яко и исперва. Востав же, (паки) уснух, 22 и видех паки во сне моем, и аки седмь класи исхождаху из единаго стеблия полны и добры: 23 друзии же седмь класи тонцыи и ветром истончени изницаху вслед их: 24 и пожроша седмь класи тонцыи и ветром истончени седмь класов добрых и полных. Рех убо сказателем, и не бысть поведаяй мне того. 25 И рече Иосиф фараону: сон фараонов един есть: елика Бог творит, показа фараону: 26 седмь кравы добрыя седмь лет суть: и седмь класи добрии седмь лет суть: сон фараонов един есть: 27 и седмь кравы худыя, яже изыдоша по сих, седмь лет суть, и седмь класи тонцыи и истончени ветром седмь лет суть: будут седмь лет глада: 28 слово же еже рех фараону, елика Бог творит, показа фараону: 29 се, седмь лет приходит, обилность многа во всей земли Египетстей: 30 приидут же седмь лет глада по сих, и забудут сытости будущия во всем Египте, и погубит глад землю, 31 и не познается обилие на земли от глада будущаго по сих: силен бо будет зело: 32 повторися же сон фараону дважды, яко истинно будет слово еже от Бога, и ускорит Бог сотворити оно: 33 ныне убо усмотри человека мудра и смыслена и постави его над землею Египетскою: 34 и да сотворит фараон и поставит местоначалники по земли, и да собирают пятую часть от всех плодов земли Египетския седми лет обилных, 35 и да соберут всякую пищу седми лет грядущих добрых сих: и да соберется пшеница под руку фараоню, пища во градех да хранится: 36 и будет пища соблюдена земли на седмь лет гладных, яже имут быти в земли Египетстей, да не потребится земля в гладе. 37 Угодно же бысть слово пред фараоном и пред всеми рабы его. 38 И рече фараон всем рабом своим: еда обрящем человека сицеваго, иже имать Духа Божия в себе? 39 Рече же фараон Иосифу: понеже показа Бог тебе вся сия, несть человека мудрейша и смысленнейша паче тебе: 40 ты будеши в дому моем, и уст твоих да послушают вси людие мои, разве престолом аз более тебе буду. 41 Рече же фараон Иосифу се, поставляю тя днесь над всею землею Египетскою. 42 И снем фараон перстень с руки своея, возложи его на руку Иосифову, и облече его в ризу червлену, и возложи гривну злату на выю его, 43 и всади его на колесницу свою вторую, и проповеда пред ним проповедник: и постави его над всею землею Египетскою. 44 Рече же фараон Иосифу: аз фараон: без тебе не воздвигнет руки своея никтоже во всей земли Египетстей. 45 И нарече фараон имя Иосифу Псонфомфаних: и даде ему Асенефу, дщерь Петефриа жреца Илиопольскаго, ему в жену. 46 Иосиф же бяше лет тридесяти, егда предста фараону царю Египетскому. Изыде же Иосиф от лица фараоня и пройде всю землю Египетскую. 47 И сотвори земля в седми летех обилну жатву. 48 И собра всякую пищу седми лет, в нихже бяше обилность в земли Египетстей: и положи пищу во градех: пищы поль града, сущих окрест его, положи в нем. 49 И собра Иосиф пшеницу яко песок морский многу зело, дондеже не можаху исчести: без числа бо бяше. 50 Иосифу же беста два сына, прежде пришествия седми лет гладных, ихже роди ему Асенефа, дщерь Петефриа жреца Илиопольска: 51 нарече же Иосиф имя первенцу Манассиа, (глаголя:) яко забыти мне сотвори Бог вся болезни моя, и вся, яже отца моего. 52 Имя же второму нарече Ефраим, (глаголя:) яко возрасти мя Бог в земли смирения моего. 53 Минуша же седмь лет обилных, яже быша в земли Египетстей, 54 и начаша седмь лет гладных приходити, якоже рече Иосиф. И бысть глад по всей земли: во всей же земли Египетстей быша хлебы. 55 И взалка вся земля Египетская: возопи же народ к фараону о хлебех. Рече же фараон всем Египтяном: идите ко Иосифу, и еже речет вам, сотворите. 56 И глад бяше на лицы всея земли. Отверзе же Иосиф вся житницы, и продаяше всем Египтяном: 57 и вся страны прихождаху во Египет, куповати ко Иосифу: обдержаше бо глад всю землю. === 42 === 1 Видев же Иаков, яко купля есть (пшеницы) во Египте, рече сыном своим: почто не радите? 2 Се, слышах, яко есть пшеница во Египте: идите тамо и купите нам мало пищи, да живи будем и не умрем. 3 Идоша же братия Иосифовы десять купити пшеницы во Египет. 4 Вениамина же, брата Иосифова, не отпусти с братиею его, рече бо: да не когда случится (на пути) ему зло. 5 Приидоша же сынове Израилевы купити с приходящими: бяше бо глад в земли Ханаанстей. 6 Иосиф же бяше князь земли: сей продаяше всем людем земли (тоя). Пришедше же братия Иосифовы, поклонишася ему лицем до земли. 7 Видев же Иосиф братию свою, позна: и отчуждашеся их, и глаголаше им жестоко, и рече им: откуду приидосте? Они же реша: от земли Ханаанския купити пищи. 8 Позна же Иосиф братию свою: они же не познаша его. 9 И помяну Иосиф сны своя, яже виде он: и рече им: соглядатаи есте, соглядати путий страны (сея) приидосте. 10 Они же реша: ни, господине, раби твои приидохом купити пищи: 11 вси есмы сынове единаго человека: мирницы есмы, не суть раби твои соглядатаи. 12 Рече же им: ни, но пути земли (сея) приидосте соглядати. 13 Они же реша: дванадесять есмы братия раби твои в земли Ханаани: и се, менший (от нас) со отцем нашим днесь, а другаго несть. 14 Рече же им Иосиф: сие есть, еже рекох вам, глаголя, яко соглядатаи есте: 15 в сем явитеся: тако ми здравия фараоня, не изыдете отсюду, аще брат ваш менший не приидет семо: 16 послите от себе единаго, и возмите брата вашего: вы же держими будите, дондеже яве будут словеса ваша, аще истинствуете, или ни: аще же ни, тако ми здравия фараоня, воистинну соглядатаи есте. 17 И даде я под стражу на три дни. 18 Рече же им в день третий: сие сотворите, и живи будете: Бога бо аз боюся: 19 аще мирницы есте, брат ваш да удержится един под стражею: сами же идите и отвезите купленую пшеницу вашу, 20 и брата вашего меншаго приведите ко мне, и верна будут словеса ваша: аще же ни, умрете. И сотвориша тако. 21 И рече кийждо к брату своему: ей, во гресех бо есмы брата ради нашего, яко презрехом скорбение души его, егда моляшеся нам, и не послушахом его: и сего ради прииде на ны скорбение сие. 22 Отвещав же Рувим, рече им: не рех ли вам, глаголя: не преобидите детища? И не послушасте мене: и се, кровь его взыскуется. 23 Тии же не ведеша, яко разумеет Иосиф: толмачь бо между ими бяше. 24 Отвратився же от них, проплакася Иосиф: и паки прииде к ним и рече им. И поя Симеона от них, и связа его пред ними. 25 Повеле же Иосиф наполнити сосуды их пшеницы и возвратити сребро их комуждо во вретище свое и дати им брашно на путь. И бысть им тако. 26 И возложивше пшеницу на ослы своя, отидоша оттуду. 27 Отрешив же един вретище свое дати пищу ослом своим, идеже сташа, и виде узол сребра своего, и бе верху устия вретищнаго. 28 И рече братии своей: возвращено ми есть сребро, и се, сие во вретищи моем. И ужасеся сердце их: и возмятошася, друг ко другу глаголюще: что сие сотвори Бог нам? 29 Приидоша же ко Иакову, отцу своему, в землю Ханааню и поведаша ему вся случившаяся им, глаголюще: 30 глагола муж господин земли (оныя) к нам жестоко и вверже нас в темницу, аки соглядаюших землю: 31 рехом же ему: мирницы есмы, несмы соглядатаи: 32 дванадесять братия есмы, сынове отца нашего: единаго несть, а менший со отцем нашим днесь в земли Ханаани: 33 рече же нам муж господин земли (тоя): по сему увем, яко мирницы есте: брата единаго оставите зде у мене, а купленую пшеницу дому вашему вземше отидите 34 и приведите ко мне брата вашего меншаго: и увем, яко не соглядатаи есте, но яко мирницы есте: и брата вашего отдам вам, и куплю творите в земли. 35 Бысть же егда испраздняху вретища своя, и бяше узол сребра во вретищи коегождо их: и видеша узлы сребра своего сами и отец их, и убояшася. 36 Рече же им Иаков отец их: мене безчадна сотвористе: Иосифа несть, Симеона несть, и Вениамина ли поймете? На мя быша сия вся. 37 Рече же Рувим отцу своему, глаголя: двоих сынов моих убий, аще не приведу его к тебе: даждь его в руце мои, и аз приведу его к тебе. 38 Он же рече: не пойдет сын мой с вами, яко брат его умре, и той един оста: и случится ему зло на пути, в оньже аще пойдете, и сведете старость мою с печалию во ад. === 43 === 1 Глад же одоле на земли. 2 Бысть же егда скончаша пшеницу ядуще, юже принесоша из Египта: и рече им отец их: паки шедше купите нам мало пищи. 3 Рече же ему Иуда, глаголя: клятвою засвидетелствова нам муж господин земли (тоя) глаголя: не узрите лица моего, аще брат ваш менший не приидет с вами: 4 аще убо послеши брата нашего с нами, пойдем и купим тебе пищи: 5 аще же не послеши брата нашего с нами, не пойдем: муж бо рече нам, глаголя: не узрите лица моего, аще брат ваш менший не приидет с вами. 6 Рече же Израиль: почто зло сотвористе ми, поведавше мужу, яко есть вам брат? 7 Они же реша: вопрошая вопроси нас муж и рода нашего, глаголя: аще еще отец ваш жив есть, и аще есть вам брат? И поведахом ему по вопросу сему: еда ведехом, яко речет нам: приведите брата вашего? 8 Рече же Иуда ко Израилю, отцу своему: отпусти отрочища со мною: и воставше пойдем, да живи будем и не умрем, и мы и ты и имение наше: 9 аз же возму его: от руку моею взыщи его: аще не приведу его к тебе, и поставлю его пред тобою, грешен буду к тебе вся дни: 10 аще бо быхом не умедлили, уже возвратилися бы дважды. 11 Рече же им Израиль отец их: аще тако есть, сие сотворите: возмите от плодов земных в сосуды своя и донесите человеку дары, ритину, мед, фимиама же и стакти, и теревинф и орехи: 12 и сребро сугубо возмите в руце свои, и сребро обретенное во вретищах ваших возвратите с собою, да не како неведение есть: 13 и брата своего поимите, и воставше идите к мужу: 14 Бог же мой да даст вам благодать пред мужем и отпустит брата вашего единаго, и Вениамина: аз бо якоже обезчадех, обезчадех. 15 Вземше же мужие дары сия, и сребро сугубое взяша в руце свои, и Вениамина: и воставше приидоша во Египет, и сташа пред Иосифом. 16 Виде же их Иосиф, и Вениамина брата своего единоматерня, и рече строителю дому своего: введи мужы (сия) в дом, и заколи от скота, и уготовай: со мною бо ясти имут мужие (сии) хлеб в полудне. 17 Сотвори же человек, якоже рече Иосиф, и введе мужы в дом Иосифов. 18 Видевше же мужие, яко введоша их в дом Иосифов, реша: сребра ради возвращеннаго во вретищах наших первее, вводят ны, еже бы оклеветати нас и нанести на ны, да поймут нас в рабы, и ослы нашя. 19 Приступивше же к человеку сущему над домом Иосифовым, рекоша ему при вратех дому, 20 глаголюще: молим тя, господине: приидохом первее купити пищи: 21 бысть же егда приидохом на стан и отрешихом вретища своя, и се, сребро коегождо во вретищи его: тое сребро наше весом возвратихом ныне руками нашими: 22 и сребро другое принесохом с собою купити пищи: не вемы, кто вложи сребро во вретища наша. 23 Рече же им: мир вам, не бойтеся: Бог ваш и Бог отец ваших даде вам сокровища во вретищах ваших: а сребро ваше за приятое имею. И изведе к ним Симеона: 24 и принесе воду омыти нозе им, и даде пажити ослом их. 25 Уготоваша же дары, дондеже приидет Иосиф в полудне: слышаша бо, яко тамо имать обедати. 26 Прииде же Иосиф в дом: и принесоша ему дары, яже имяху в руках своих, в дом: и поклонишася ему лицем до земли. 27 И вопроси их: здрави ли есте? И рече им: здрав ли есть отец ваш, старец, егоже рекосте, еще ли жив есть? 28 Они же рекоша: здрав есть раб твой, отец наш, еще жив есть. И рече: благословен человек оный Богу. И приникше поклонишася ему. 29 Воззрев же очима своима Иосиф, виде Вениамина брата своего единоматерня и рече: сей ли есть брат ваш юнейший, егоже рекосте ко мне привести? И рече: Бог да помилует тя, чадо. 30 Возмутися же Иосиф: подвижеся бо утроба его о брате своем, и искаше плакати: вшед же в ложницу, плакася тамо. 31 И умыв лице, изшед удержася и рече: предложите хлебы. 32 И предложиша ему единому, и оным особно, и Египтяном, иже с ним ядяху, особно: не можаху бо Египтяне ясти хлеба со Евреи: мерзость бо есть Египтяном (всяк пастух овчий). 33 Седоша же прямо ему первенец по старейшинству своему и менший по меншеству своему, и дивляхуся мужие кийждо ко брату своему: 34 и взяша части от него к себе: вящшая же бысть часть Вениаминова паче всех частей пятерицею, неже оных: пиша же и упишася с ним. === 44 === 1 И заповеда Иосиф домостроителю своему, глаголя: наполните вретища мужем пищи, елико могут понести: и вложите комуждо сребро верху устия вретища: 2 и чашу мою сребряную вложите во вретище меншаго, и цену пшеницы его. Бысть же по словеси Иосифову, якоже рече. 3 Утро возсия, и мужие отпустишася сами, и ослята их. 4 Изшедше же они из града, не отидоша далече: и рече Иосиф домостроителю своему: востав гони вслед мужей и постигни их, и рцы им: что яко воздасте (ми) злая за благая? 5 Вскую украдосте чашу мою сребряну? Не сия ли есть, из неяже пиет господин мой? Он же и волхвованием волхвует в ней: злая совершисте, яже сотвористе. 6 Обрет же их, рече им по словесем сим. 7 Они же реша ему: вскую глаголет господин словеса сия? Не буди рабом твоим сотворити по словеси сему: 8 аще сребро, еже обретохом во вретищах наших, возвратихом к тебе от земли Ханаани, како быхом украли из дому господина твоего сребро или злато? 9 У негоже аще обрящеши чашу от раб твоих, да умрет: и мы будем раби господину нашему. 10 Он же рече: и ныне, якоже глаголете, тако будет: у негоже аще обрящется чаша, будет мой раб, вы же будете чисти. 11 И потщашася, и сверже кийждо вретище свое на землю, и отверзоша кийждо вретище свое. 12 Изыска же от старейшаго зачен, дондеже прииде до меншаго, и обрете чашу во вретищи Вениамини. 13 И растерзаша ризы своя, и возложиша кийждо вретище свое на осля свое, и возвратишася во град. 14 Вниде же Иуда и братия его ко Иосифу, еще ему сущу ту, и падоша пред ним на землю. 15 Рече же им Иосиф: что дело сие сотвористе? Не ведасте ли, яко несть волхвователь человек, якоже аз? 16 Рече же Иуда: что отвещаем господину, или что возглаголем, или чим оправдимся? Бог же обрете неправду рабов твоих: се, мы есмы раби господину нашему, и мы, и у негоже обретеся чаша. 17 Рече же Иосиф: не буди ми сотворити глагол сей: муж, у негоже обретеся чаша, той будет ми раб: вы же поидите в целости ко отцу своему. 18 Приступив же к нему Иуда, рече: молю тя, господине, да речет раб твой слово пред тобою, и не прогневайся на раба твоего, яко ты еси по фараоне: 19 господине, ты вопрошал еси рабов твоих, глаголя: аще имате отца, или брата? 20 И рехом господину: есть нам отец стар, и отрочищь на старость менший ему, а брат его умре, он же един остася у матере своея, отец же возлюби его. 21 Ты же рекл еси рабом твоим: приведите его ко мне, да вижду его. 22 И рехом господину: не возможет отрочищь оставити отца своего: аще же оставит отца, умрет. 23 Ты же рекл еси рабом твоим: аще не приидет брат ваш менший с вами, не приложите ктому видети лица моего. 24 Бысть же егда приидохом к рабу твоему отцу нашему, поведахом ему словеса господина нашего, 25 рече же нам отец наш: идите паки и купите нам мало пищи. 26 Мы же рекохом: не возможем ити: но аще брат наш менший идет с нами, пойдем: ибо не возможем видети лице мужа, брату нашему меншему не сущу с нами. 27 Рече же раб твой, отец наш к нам: вы весте, яко двоих роди мне жена: 28 и отиде един от мене, и рекосте, яко зверем снеден бысть, и не видех его даже до ныне: 29 аще убо поймете и сего от лица моего, и случится ему зло на пути, и сведете старость мою с печалию во ад. 30 Ныне убо аще пойду к рабу твоему, отцу же нашему, и отрочища не будет с нами: (душа же его связана есть с душею сего,) 31 и будет егда увидит он не суща отрочища с нами, умрет: и сведут раби твои старость раба твоего, отца же нашего, с печалию во ад: 32 раб бо твой от отца взя отрочища, глаголя: аще не приведу его к тебе и поставлю его пред тобою, грешен буду ко отцу вся дни. 33 Ныне убо пребуду тебе раб вместо отрочища, раб господину: отрочищь же да идет с братиею своею: 34 како бо пойду ко отцу, отрочищу не сущу с нами? Да не вижду злых, яже обрящут отца моего. === 45 === 1 И не можаше Иосиф удержатися всем предстоящым ему, но рече: отослите всех от мене. И не предстояше ни един Иосифу, егда познавашеся братии своей. 2 И испусти глас с плачем: слышаша же вси Египтяне, и слышано бысть в дому фараонове. 3 Рече же Иосиф братии своей: аз есмь Иосиф: еще ли отец мой жив есть? И не могоша братия отвещати ему: смутишася бо. 4 Рече же Иосиф братии своей: приближитеся ко мне. И приближишася. И рече: аз есмь Иосиф, брат ваш, егоже продасте во Египет: 5 ныне убо не скорбите, ниже жестоко вам да явится, яко продасте мя семо: на жизнь бо посла мя Бог пред вами: 6 сие бо второе лето глад на земли, и еще пять лет оста, в нихже не будет орания, ни жатвы: 7 посла бо мя Бог пред вами оставити вам останок на земли и препитати ваш останок велий: 8 ныне убо не вы посласте мя семо, но Бог: и сотвори мя яко отца фараону и господина всему дому его и князя всей земли Египетстей: 9 потщавшеся убо, взыдите ко отцу моему и рцыте ему: сия глаголет сын твой Иосиф: сотвори мя Бог господина всей земли Египетстей: сниди убо ко мне и не умедли: 10 и вселишися в земли Гесемли аравийстей, и будеши близ мене ты и сынове твои, и сынове сынов твоих, овцы твоя и волове твои, и елика суть твоя: 11 и препитаю тя тамо, еще бо пять лет будет глад на земли, да не погибнеши ты и сынове твои, и вся имения твоя. 12 Се, очи ваши видят, и очи Вениамина брата моего, яко уста моя глаголющая к вам: 13 возвестите убо отцу моему всю славу мою сущую во Египте, и елика видите: и ускоривше, приведите отца моего семо. 14 И напад на выю Вениамина, брата своего, плакася над ним, и Вениамин плакася на выи его. 15 И облобызав всю братию свою, плакася над ними: и по сих глаголаша к нему братия его. 16 И пронесеся глас в дому фараонове, глаголюще: приидоша братия Иосифова. Возрадовася же фараон и раби его. 17 Рече же фараон ко Иосифу: рцы братии своей: сие сотворите: наполните сосуды вашя (пшеницы) и идите в землю Ханааню, 18 и вземше отца вашего и имения ваша, приидите ко мне: и дам вам от всех благ Египетских, и снесте тук земли: 19 ты же заповеждь сия: взяти им колесницы от земли Египетския, детем их и женам их: и поимше отца своего, приидите: 20 и не пощадите очима сосудов ваших: вся бо благая Египетская вам будут. 21 Сотвориша же тако сынове Израилевы: даде же им Иосиф колесницы по повелению фараона царя (Египетска), и даде им брашно на путь: 22 и всем даде сугубы ризы, Вениамину же даде триста златниц и пятеры ризы пременныя: 23 и отцу своему посла такожде, и десять ослов везущих от всех благ Египетских, и десять мсков везущих хлебы на путь отцу его. 24 И отпусти братию свою. И отидоша. И рече им: не гневайтеся на пути. 25 Изыдоша же из Египта и приидоша в землю Ханааню ко Иакову отцу своему 26 и поведаша ему глаголюще: яко сын твой Иосиф жив есть, и он владеет над всею землею Египетскою. И ужасеся в мысли Иаков: не вероваше бо им. 27 Глаголаша же ему вся реченная от Иосифа, елика рече им. Узрев же колесницы, яже посла Иосиф, еже взяти его, оживе дух Иакова, отца их, 28 и рече Израиль: велико ми есть (сие), аще еще Иосиф сын мой жив есть: шед узрю его, прежде неже умрети ми. === 46 === 1 Востав же Израиль сам и вся сущая его, прииде ко кладязю Клятвенному и пожре жертву Богу отца своего Исаака. 2 Рече же Бог ко Израилю в видении нощию, глаголя: Иакове, Иакове. Он же рече: что есть? 3 Он же рече ему: Аз есмь Бог отцев твоих, не убойся изыти во Египет: в язык бо велий сотворю тя тамо: 4 и Аз сниду с тобою во Египет, и Аз возведу тя до конца: и Иосиф возложит руки своя на очи твои. 5 Воста же Иаков от кладязя Клятвеннаго, и взяша сынове Израиля отца своего, и стяжание, и жены своя на колесницы, яже посла Иосиф, взяти его: 6 и вземше имения своя и все стяжание, еже стяжаша в земли Ханаанстей, внидоша во Египет Иаков и все семя его с ним: 7 сынове и сынове сынов его с ним, дщери и дщери дщерей его, и все семя свое введе во Египет. 8 Сия же имена сынов Израилевых вшедших во Египет купно со Иаковом отцем своим: Иаков и сынове его: первенец Иаковль Рувим. 9 Сынове же Рувимли: Енох и Фаллос, Асрон и Харми. 10 Сынове же Симеони: Иемуил и Иамин, и Аод и Ахин, и Саар и Саул, сын Хананитидин. 11 Сынове же Левиини: Гирсон, Кааф и Мерарий. 12 Сынове же Иудины: Ир и Авнан, и Силом и Фарес и Зара: умроша же Ир и Авнан в земли Ханаани. Быша же сынове Фаресу: Есром и Иемуил. 13 Сынове же Иссахаровы: Фола и Фуа, и Асум и Самвран. 14 Сынове же Завулони: Серед и Аллон и Ахоил. 15 Сии сынове Лиини, ихже роди Иакову в Месопотамии Сирстей, и Дину дщерь его: всех душ сынов и дщерей тридесять три. 16 Сынове же Гадовы: Сафон и Ангис, и Саннис и Фасован, и Аидис и Ароидис и Ареилис. 17 Сынове же Асировы: Иемна и Ессуа, и Иеул и Вариа, и Сара сестра их. Сынове же Вариины: Ховор и Мелхиил. 18 Сии сынове Зелфины, юже даде Лаван Лии, дщери своей, яже роди сих Иакову, шестьнадесять душ. 19 Сынове же Рахили, жены Иаковли: Иосиф и Вениамин. 20 Быша же сынове Иосифу в земли Египетстей, ихже роди ему Асенефа, дщи Петефриа жреца Илиопольска, Манассию и Ефрема. Быша же сынове Манассиины, ихже роди ему наложница Сира, Махира. Махир же роди Галаада. Сынове же Ефраима, брата Манассиина: Суталаам и Таам. Сынове же Суталаамли, Едом. 21 Сынове же Вениамини: Вала и Ховор и Асфил. Быша же сынове Валовы: Гира и Ноеман, и Анхис и Рос, и Мамфим и Офимим. Гира же роди Арада. 22 Сии сынове Рахилины, ихже роди Иакову, всех душ осмьнадесять. 23 Сынове же Дановы: Асом. 24 Сынове же Неффалимли: Асиил и Гони, и Иссаар и Селлим. 25 Сии сынове Валлины, юже даде Лаван Рахили дщери своей, яже роди сих Иакову: всех душ седмь. 26 Всех же душ вшедших со Иаковом во Египет, яже изыдоша из чресл его, кроме жен сынов Иаковлих, всех душ шестьдесят шесть. 27 Сынове же Иосифовы, иже быша ему в земли Египетстей, душ девять: всех душ дому Иаковля, яже приидоша со Иаковом во Египет, душ седмьдесят пять. 28 Иуду же посла пред собою ко Иосифу срести его у Иройска града в земли Рамессийстей. 29 Впряг же Иосиф колесницы своя, изыде во сретение Израилю, отцу своему, ко Ироону граду: и явився ему, нападе на выю его и плакася плачем великим. 30 И рече Израиль ко Иосифу: да умру отныне, понеже видех лице твое: еще бо ты еси жив. 31 Рече же Иосиф ко братии своей: шед повем фараону и реку ему: братия моя и дом отца моего, иже быша в земли Ханаани, приидоша ко мне: 32 они же суть мужие пастуси, мужие бо скотопитателие быша: и скоты, и волы, и вся своя приведоша: 33 аще убо призовет вас фараон и речет вам: что дело ваше есть? 34 Рцыте: мужие скотопитателие есмы, раби твои, издетска даже до ныне, и мы и отцы наши: да вселитеся в земли Гесем аравийстей: мерзость бо есть Египтяном всяк пастух овчий. === 47 === 1 Пришед же Иосиф, поведа фараону глаголя: отец мой и братия моя, и скоти и волове их, и вся сущая их приидоша из земли Ханаани: и се, суть в земли Гесем. 2 От братий же своих поя пять мужей и постави их пред фараоном. 3 И рече фараон к братиям Иосифовым: что дело ваше? Они же реша фараону: пастуси овчии, раби твои, и мы и отцы наши отдетска и доселе. 4 Рекоша же фараону: обитати в земли приидохом, несть бо пажити скотом раб твоих: одоле бо глад на земли Ханаани: ныне убо да вселимся раби твои в земли Гесем. 5 И рече фараон Иосифу, глаголя: отец твой и братия твоя приидоша к тебе: 6 се, земля Египетская пред тобою есть: на лучшей земли посели отца твоего и братию твою, да вселятся в земли Гесем: аще же веси, яко суть в них мужие сильнии, постави их старейшины скотом моим. (приидоша же во Египет ко Иосифу Иаков и сынове его: и услыша фараон царь Египетский). 7 Введе же Иосиф Иакова отца своего и постави его пред фараоном, и благослови Иаков фараона. 8 Рече же фараон ко Иакову: колико лет дний жития твоего? 9 И рече Иаков фараону: дние лет жития моего, яже обитаю, сто тридесять лет: малы и злы быша дние лет жития моего: не достигоша во дни лет жития отец моих, яже дни обиташа. 10 И благословив Иаков фараона, отиде от него. 11 И всели Иосиф отца своего и братию свою, и даде им обдержание в земли Египетстей, на лучшей земли, в земли Рамессийстей, якоже повеле фараон. 12 И деляше Иосиф пшеницу отцу своему и братии своей и всему дому отца своего по числу лиц. 13 Пшеницы же не бяше во всей земли, одоле бо глад зело: скончавашеся же земля Египетская и земля Ханааня от глада. 14 Собра же Иосиф все сребро обретшееся в земли Египетстей и в земли Ханаани, за пшеницу, юже куповаху, и размеряше им пшеницу, и внесе Иосиф все сребро в дом фараонов. 15 И оскуде все сребро от земли Египетския и от земли Ханаанския: приидоша же вси Египтяне ко Иосифу, глаголюще: даждь нам хлебы, и вскую умираем пред тобою? Скончася бо сребро наше. 16 Рече же им Иосиф: пригоните скоты вашя, и дам вам хлебы за скоты вашя, аще скончася сребро ваше. 17 Пригнаша же скоты своя ко Иосифу, и даде им Иосиф хлебы за кони и за овцы, и за волы и за ослы, и прекорми их хлебами за вся скоты их в том лете. 18 Прейде же то лето, и приидоша к нему во второе лето и рекоша ему: да не како погибнем от господина нашего? Аще бо скончася сребро наше, и имение и скоты пред тобою, господине, и не остася нам пред господином нашим, точию едино тело и земля наша: 19 да не умрем убо пред тобою, и земля опустеет, купи нас и землю нашу хлебами: и будем мы и земля наша раби фараону: даждь семя, да посеем и живи будем, и не умрем, и земля не опустеет. 20 И купи Иосиф всю землю Египетскую фараону: продаша бо Египтяне землю свою фараону, ибо одоле им глад: и бысть земля фараону. 21 И люди поработи ему в рабы, от края предел Египетских даже до краев, 22 кроме земли жреческия токмо, тоя бо не купи Иосиф: даянием бо даде в дар жерцем фараон, и ядяху даяние, еже даде им фараон: сего ради не продаша земли своея. 23 Рече же Иосиф всем Египтяном: се, купих вас и землю вашу днесь фараону: возмите себе семена и сейте на земли: 24 и будут плоды ея, и да дасте пятую часть фараону, четыри же части будут вам самем в семена земли и на препитание вам и всем сущым в домех ваших. 25 И рекоша: оживил ны еси, обретохом благодать пред господином нашим, и будем раби фараону. 26 И устави им Иосиф заповедь даже до сего дне на земли Египетстей пятую часть даяти фараону, кроме земли жреческия: та точию не бяше фараоня. 27 Вселися же Израиль в земли Египетстей, на земли Гесем, и наследствоваше ю: и возрастоша, и умножишася зело. 28 Поживе же Иаков в земли Египетстей седмьнадесять лет: и быша дние Иаковли лет жизни его, сто четыредесять седмь лет. 29 Приближишася же дние Израилю еже умрети, и призва сына своего Иосифа и рече ему: аще обретох благодать пред тобою, подложи руку твою под стегно мое и сотвориши надо мною милость и истину, еже не погребсти мене во Египте, 30 но да почию со отцы моими: и изнесеши мя из Египта, и погребеши мя во гробе их. Он же рече: аз сотворю по словеси твоему. 31 Рече же: кленися мне. И клятся ему. И поклонися Израиль на конец жезла его. === 48 === 1 Бысть же по глаголех сих, и поведано бысть Иосифу, яко отец твой изнемогает: и поим два сына своя, Манассию и Ефрема, прииде ко Иакову. 2 Поведаша же Иакову, глаголюще: се, сын твой Иосиф грядет к тебе. И укрепився Израиль седе на одре, 3 и рече Иаков ко Иосифу: Бог мой явися мне в Лузе, в земли Ханаани, и благослови мя 4 и рече ми: се, Аз возращу тя и умножу тя, и сотворю тя в собрания языков: и дам ти землю сию и семени твоему по тебе во одержание вечное. 5 Ныне убо два сына твоя, иже быша тебе в земли Египетстей прежде пришествия моего к тебе во Египет, мои суть: Ефрем и Манассиа, аки Рувим и Симеон будут мне: 6 сыны же, яже аще родиши по сих, будут тебе: во имя братии своея призовутся ко жребиям оных: 7 аз же егда идях от Месопотамии Сирския, умре Рахиль мати твоя в земли Ханаани, приближающуся ми ко ипподрому Хаврафы земли, еже приити во Ефрафу: и погребох ю на пути ипподрома: сей есть Вифлеем. 8 Видев же Израиль сыны Иосифовы, рече: что тебе сии? 9 Рече же Иосиф отцу своему: сынове мои суть, яже даде ми Бог зде. И рече Иаков: приведи ми я, да благословлю их. 10 Очи же Израилю тяжко видеста от старости, и не можаше видети: и приближи их к нему, и лобза их, и объят я. 11 И рече Израиль ко Иосифу: се, лица твоего не лишихся, и се, показа ми Бог и семя твое. 12 И отведе их Иосиф от колен его, и поклонишася ему лицем до земли. 13 Поим же Иосиф два сына своя, Ефрема в десницу, прямо левицы Израиля, Манассию же в левую, прямо десницы Израилевы, приближи их к нему. 14 Простер же Израиль руку десную, возложи на главу Ефремлю, сей же бяше менший, а левую на главу Манассиину, пременив руце, 15 и благослови я и рече: Бог, Емуже благоугодиша отцы мои пред ним, Авраам и Исаак, Бог, Иже питает мя измлада даже до дне сего, 16 Ангел, иже мя избавляет от всех зол, да благословит детища сия, и прозовется в них имя мое, и имя отец моих, Авраама и Исаака, и да умножатся во множество многое на земли. 17 Видев же Иосиф, яко возложи отец его руку десную свою на главу Ефремлю, тяжко ему явися: и прия Иосиф руку отца своего отяти ю от главы Ефремли на главу Манассиину, 18 и рече Иосиф отцу своему: не тако, отче: сей бо (есть) первенец, возложи руку десную твою на главу его. 19 И не хотяше, но рече: вем, чадо, вем: и сей будет в люди, и сей вознесется: но брат его менший болий его будет, и семя его будет во множество языков. 20 И благослови я в том дни, глаголя: в вас благословится Израиль, глаголюще: да сотворит тя Бог якоже Ефрема и яко Манассию. И постави Ефрема вышше Манассии. 21 Рече же Израиль Иосифу: се, аз умираю, и будет Бог с вами, и возвратит вас от земли сея на землю отец ваших: 22 аз же даю ти Сикиму избранную свыше братии твоея, юже взях из руки Аморрейски мечем моим и луком. === 49 === 1 Призва же Иаков сыны своя и рече им: соберитеся, да возвещу вам, что срящет вас в последния дни: 2 соберитеся и послушайте мене, сынове Иаковли, послушайте Израиля, послушайте отца вашего. 3 Рувим, первенец мой, ты крепость моя и начало чад моих: жесток терпети и жесток упорник: 4 досадил еси яко вода, да не воскипиши: возшел бо еси на ложе отца твоего, тогда осквернил еси постелю, идеже возшел еси. 5 Симеон и Левий братия совершиста обиду от воли своея: 6 в совет их да не приидет душа моя, и к собранию их да не прилепятся внутренняя моя: яко во гневе своем избиста человеки, и в похоти своей пререзаста жилы юнца: 7 проклята ярость их, яко упорна, и гнев их, яко ожесточися: разделю их во Иакове и разсею их во Израили. 8 Иудо, тебе похвалят братия твоя, руце твои на плещу враг твоих: поклонятся тебе сынове отца твоего: 9 скимен львов Иуда: от леторасли, сыне мой, возшел еси: возлег уснул еси яко лев и яко скимен: кто возбудит его? 10 Не оскудеет князь от Иуды и вождь от чресл его, дондеже приидут отложеная Ему, и Той чаяние языков: 11 привязуяй к лозе жребя свое и к винничию жребца осляте своего, исперет вином одежду свою и кровию гроздия одеяние свое: 12 радостотворны очи его паче вина, и белы зубы его паче млека. 13 Завулон при мори вселится, и той на пристанищи кораблей, и прострется даже до Сидона. 14 Иссахар доброе возжела, почивая посреде пределов, 15 и видев покой, яко добр, и землю, яко тучна, подложи рамы свои на труд, и бысть муж земледелец. 16 Дан судити имать люди своя, яко и едино племя во Израили, 17 и да будет Дан змий на пути, седяй на распутии, угрызая пяту конску: 18 и падет конник вспять, спасения ждый Господня. 19 Гад, искушение искусит его: он же искусит того при ногах. 20 Асир, тучен его хлеб, и той даст пищу князем. 21 Неффалим стебль распущающаяся, издаяй во отрасли доброту. 22 Сын возращен Иосиф, сын возращен мой ревностный, сын мой юнейший, ко мне обратися: 23 на негоже советующе укоряху и наляцаху нань господие стреляний, 24 и сотрошася с крепостию луки их, и разслабеша жилы мышцей рук их, рукою сильнаго Иакова: оттуду укрепися Израиль от Бога отца твоего, 25 и поможе тебе Бог мой, и благослови тя благословением небесным свыше и благословением земли и имущия вся: благословения ради сосцев и ложесн, 26 благословения отца твоего и матере твоея: преодоле паче благословения гор пребывающих и благословения холмов вечных: будут на главе Иосифове и на версе (главы) братий, имиже обладаше. 27 Вениамин волк хищник, рано яст еще и на вечер дает пищу. 28 Вси сии сынове Иаковли дванадесять: и сия глагола им отец их, и благослови их: коегождо по благословению его благослови их, 29 и рече им: аз прилагаюся к людем моим: погребите мя со отцы моими в пещере, яже есть в селе Ефрона Хеттеанина, 30 в пещере Сугубей, яже прямо Мамврии в земли Ханаани, юже стяжа Авраам пещеру у Ефрона Хеттеанина в стяжание гроба. 31 Тамо погребоша Авраама и Сарру жену его, тамо погребоша Исаака и Ревекку жену его, тамо погребоша Лию, 32 в стяжании села и пещеры, яже есть в нем у сынов Хеттеовых. 33 И преста Иаков завещая сыном своим, и возложив Иаков нозе свои на одр умре, и приложися к людем своим. === 50 === 1 И припад Иосиф на лице отца своего, плакася (горько) о нем и облобыза его: 2 и повеле Иосиф рабом своим погребателем погребсти отца своего. И погребоша погребателие Израиля. 3 И исполнишася ему четыредесять дний: тако бо исчисляются дние погребения: и плакася его Египет седмьдесят дний. 4 Егда же преидоша дние плача, глагола Иосиф ко вельможам фараоновым, глаголя: аще обретох благодать пред вами, рцыте о мне во ушы фараону, глаголюще: 5 отец мой закля мя прежде скончания (своего), глаголя: во гробе, егоже ископах себе в земли Ханаани, тамо мя погреби: ныне убо возшед погребу отца моего и возвращуся. И рекоша фараону по словеси Иосифову. 6 И рече фараон ко Иосифу: взыди, погреби отца твоего, якоже закля тя. 7 И взыде Иосиф погребсти отца своего. И совзыдоша с ним вси раби фараони и старейшины дому его, и вси старейшины земли Египетския, 8 и весь дом Иосифов и братия его, и весь дом отца его и сродницы его: овцы же и волы оставиша в земли Гесем. 9 И совзыдоша с ним и колесницы и конницы, и бысть полк велик зело. 10 И приидоша на Гумно Атадово, еже есть об он пол Иордана, и рыдаша его рыданием велиим и крепким зело: и сотвори плачь отцу своему седмь дний. 11 И видеша жителие земли Ханаанския плачь на Гумне Атадове и реша: плачь велик сей есть Египтяном. Сего ради наречеся имя месту тому плачь Египетск, еже есть об он пол Иордана. 12 И сотвориша ему тако сынове его, якоже заповеда им. 13 И взяша его сынове его в землю Ханааню и погребоша его в пещере Сугубей, юже стяжа Авраам пещеру в стяжание гроба от Ефрона Хеттеанина, прямо Мамврии. 14 И возвратися Иосиф во Египет, сам и братия его и вси совозшедшии погребсти отца его. 15 Видевше же братия Иосифовы, яко умре отец их, реша: да не когда воспомянет злобу нашу Иосиф и воздаянием воздаст нам за вся злая, яже показахом ему. 16 И пришедше ко Иосифу рекоша: отец твой закля прежде кончины своея, глаголя: 17 тако рцыте Иосифу: остави им неправду и грех их, яко лукавая тебе показаша: и ныне приими неправду рабов Бога отца твоего. И плакася Иосиф, глаголющим им к нему. 18 И пришедше к нему рекоша: се, мы тебе раби. 19 И рече к ним Иосиф: не бойтеся, Божий бо есмь аз: 20 вы совещасте на мя злая, Бог же совеща о мне благая, дабы было якоже днесь, и препиталися бы людие мнози. 21 И рече им: не бойтеся, аз препитаю вас и домы вашя. И утеши их, и глагола им по сердцу их. 22 И вселися Иосиф во Египте сам и братия его и весь дом отца его: и поживе Иосиф лет сто десять. 23 И виде Иосиф Ефремли дети до третияго рода: и сынове Махира сына Манассиина родишася при бедрех Иосифовых. 24 И рече Иосиф братии своей, глаголя: аз умираю, посещением же посетит вас Бог и изведет вас от земли сея в землю, о нейже клятся Бог отцем нашым Аврааму, Исааку и Иакову. 25 И закля Иосиф сыны Израилевы, глаголя: в посещении, имже посетит вас Бог, совознесите и кости моя отсюду с вами. 26 И скончася Иосиф сый лет ста десяти: и погребоша его, и положиша в раце во Египте. == Исход == === 1 === 1 Сия имена сынов Израилевых, входящих во Египет вкупе со Иаковом отцем их, кийждо со всем домом своим внидоша: 2 Рувим, Симеон, Левий, Иуда, 3 Иссахар, Завулон и Вениамин, 4 Дан и Неффалим, Гад и Асир: Иосиф же бяше во Египте. 5 Бяше же всех душ изшедших из Иакова седмьдесят пять. 6 Умре же Иосиф, и вся братия его, и весь род оный: 7 сынове же Израилевы возрастоша и умножишася, и мнози быша и укрепишася зело зело: умножи же их земля. 8 Воста же царь ин во Египте, иже не знаше Иосифа, 9 рече же языку своему: се, род сынов Израилевых великое множество и укрепляется паче нас: 10 приидите убо, прехитрим их, да не когда умножатся: и егда аще приключится нам брань, приложатся и сии к супостатом, и одолевше нам изыдут из земли (нашея). 11 И пристави над ними приставники дел, да озлобят их в делех. И создаша грады тверды фараону: Пифо, и Рамесси, и он, иже есть Илиополь. 12 По елику же их смиряху, толико множайшии бываху и укрепляхуся зело зело. И гнушахуся Египтяне сынми Израилевыми, 13 и насилие творяху Египтяне сыном Израилевым нуждею, 14 и болезненну тем жизнь творяху в делех жестоких брением и плинфоделанием, и всеми делы, яже в полях, во всех делех, имиже порабощаху их с нуждею. 15 И рече царь Египетский бабам Еврейским: единей их имя Сепфора и имя вторей Фуа, 16 и рече (им): егда бабите Евреаныням, и суть к рождению, аще убо мужеский пол будет, убивайте его: аще же женский, снабдевайте его. 17 Убояшася же бабы Бога, и не сотвориша, якоже повеле им царь Египетский, и живляху мужеский пол. 18 Призва же царь Египетский бабы и рече им: что яко сотвористе вещь сию, и оживляете мужеский пол? 19 Рекоша же бабы фараону: не яко жены Египтяныни, тако и жены Евреаныни: раждают бо прежде неже внити к ним бабам, и раждаху. 20 Благо же творяше Бог бабам, и множахуся людие и укрепляхуся зело. 21 И понеже бояхуся бабы Бога, сотвориша себе жилища. 22 Заповеда же фараон всем людем своим, глаголя: всяк мужеский пол, иже родится Евреом, в реку ввергайте, и всяк женский пол снабдевайте и жив. === 2 === 1 Бяше же некто от племене Левиина, иже поя от дщерей Левииных, и имяше ю: 2 и зача во чреве и роди мужеский пол. Видевше же его лепа, крыша его три месяцы: 3 и понеже не можаху его ктому крыти, взя ему мати его ковчежец ситовый и помаза и клеем и смолою, и вложи отроча в него, и положи его в лучице при реце: 4 и наблюдаше сестра его издалеча, да уведает, что будет ему. 5 Сниде же дщерь фараонова измытися на реку, и рабыни ея прохождаху при реце. И видевши ковчежец в лучице, пославши рабыню, взя и. 6 Отверзши же, видит отроча плачущееся в ковчежце, и пощаде е дщерь фараоня, и рече: от детей Еврейских сие. 7 И рече сестра его дщери фараонове: хощеши ли, призову ти жену кормилицу от Еврей, и воздоит ти отроча? 8 И рече ей дщерь фараонова: иди. Шедши же отроковица, призва матерь отрочате. 9 Рече же к ней дщерь фараонова: соблюди ми отроча сие и воздой ми е: аз же дам ти мзду. Взя же отроча жена и дояше е. 10 Возмужавшу же отрочати, введе е ко дщери фараонове, и бысть ей в сына, и нарече имя ему Моисей, глаголющи: от воды взях его. 11 Бысть же во дни многия оны, велик быв Моисей, изыде к братиям своим, сыном Израилевым. Разумев же болезнь их, виде человека Египтянина биюща некоего Евреанина от братии его сынов Израилевых. 12 Обозревся же семо и овамо, ни когоже виде: и поразив Египтянина, скры его в песце. 13 Изшед же во вторый день, виде два мужа Евреанина биющася и глагола обидящему: чесо ради ты биеши искренняго? 14 Он же рече: кто тя постави князя и судию над нами? Еда убити мя ты хощеши, имже образом убил еси вчера Египтянина? Убояся же Моисей и рече: аще сице явлен бысть глагол сей? 15 Услыша же фараон глагол сей и искаше убити Моисеа. Отиде же Моисей от лица фараонова и вселися в земли Мадиамстей: пришед же в землю Мадиамскую седе при кладязе. 16 Священнику же Мадиамскому беша седмь дщерей, пасущих овцы отца своего Иофора: пришедшя же черпаху, дондеже наполниша корыта, напоити овцы отца своего Иофора. 17 Пришедше же пастырие изгнаша я. Востав же Моисей избави их, и налия им и напои овцы их. 18 Приидоша же к Рагуилу отцу своему. Он же рече им: что яко ускористе приити днесь? 19 Оныя же рекоша: человек Египтянин избави нас от пастырей, и начерпа нам и напои овцы нашя. 20 Он же рече дщерем своим: и где есть? И вскую сице остависте человека? Призовите убо его, да яст хлеб. 21 Вселися же Моисей у человека: и даде Сепфору дщерь свою Моисею в жену. 22 Во чреве же заченши жена роди сына, и нарече Моисей имя ему Гирсам, глаголя: яко пришлец есмь в земли чуждей. Еще же заченши роди сына втораго, и нарече имя ему Елиезер, глаголя: Бог бо отца моего помощник мой и избави мя из руки фараоновы. 23 По днех же многих тех, умре царь Египетский, и возстенаша сынове Израилевы от дел и возопиша, и взыде вопль их к Богу от дел. 24 И услыша Бог стенание их: и помяну Бог завет Свой иже ко Аврааму и Исааку и Иакову, 25 и призре Бог на сыны Израилевы, и познан бысть ими. === 3 === 1 Моисей же бяше пасый овцы Иофора тестя своего, священника Мадиамска: и гнаше овцы в пустыню, и прииде в гору Божию Хорив. 2 Явися же ему Ангел Господнь в пламени огненне из купины: и видит, яко купина горит огнем, купина же не сгараше. 3 Рече же Моисей: мимошед увижду видение великое сие, яко не сгарает купина. 4 Егда же виде Господь, яко приступает видети, воззва его Господь из купины, глаголя: Моисее, Моисее. Он же рече: что есть, Господи? 5 Он же рече: не приближайся семо: изуй сапоги от ног твоих: место бо, на немже ты стоиши, земля свята есть. 6 И рече ему: Аз есмь Бог отца твоего, Бог Авраамов и Бог Исааков и Бог Иаковль. Отврати же Моисей лице свое: благоговеяше бо воззрети пред Бога. 7 Рече же Господь к Моисею: видя видех озлобление людий Моих, иже во Египте, и вопль их услышах от дел приставников: уведех болезнь их, 8 и снидох изяти их от руку Египетску, и извести я из земли тоя, и ввести их в землю благу и многу, в землю кипящую млеком и медом, в место Хананейско и Хеттейско, и Аморрейско и Ферезейско, и Гергесейско и Евейско и Иевусейско: 9 и се, ныне вопль сынов Израилевых прииде ко Мне, и Аз видех тугу, еюже Египтяне стужают им: 10 и ныне гряди, да послю тя к фараону царю Египетскому, и изведеши люди Моя, сыны Израилевы из земли Египетския. 11 И рече Моисей к Богу: кто есмь аз, яко да пойду к фараону царю Египетскому, и яко да изведу сыны Израилевы от земли Египетския? 12 Рече же Бог к Моисею, глаголя: яко буду с тобою: и сие тебе знамение, яко Аз тя посылаю: внегда извести тебе люди Моя из Египта, и помолитеся Богу в горе сей. 13 И рече Моисей к Богу: се, аз пойду к сыном Израилевым и реку к ним: Бог отец наших посла мя к вам: и аще вопросят мя, что имя Ему, что реку к ним? 14 И рече Бог к Моисею, глаголя: Аз есмь Сый. И рече: тако речеши сыном Израилевым: Сый посла мя к вам. 15 И рече Бог паки к Моисею: тако речеши сыном Израилевым: Господь Бог отец наших, Бог Авраамов и Бог Исааков и Бог Иаковль, посла мя к вам: сие Мое есть имя вечное и память родов родом: 16 пришед убо собери старцы сынов Израилевых и рцы к ним: Господь Бог отец наших явися мне, Бог Авраамов и Бог Исааков и Бог Иаковль, глаголя: присещением присетих вас, и елика случишася вам во Египте: 17 и рече: изведу вас от озлобления Египетскаго в землю Хананейску и Хеттейску, и Аморрейску и Ферезейску, и Гергесейску и Евейску и Иевусейску, в землю кипящую млеком и медом: 18 и послушают гласа твоего, и внидеши ты и старейшины Израилевы к фараону царю Египетскому, и речеши к нему: Господь Бог Еврейский воззва нас: да пойдем убо путем трех дний в пустыню, да пожрем Господу Богу нашему: 19 Аз же вем, яко не отпустит вас фараон царь Египетский пойти, аще не рукою крепкою: 20 и простер руку Мою, поражу Египтяны всеми чудесы Моими, яже сотворю в них: и по сих отпустит вы, 21 и дам благодать людем сим пред Египтяны: егда же пойдете, не отидете тщы: 22 но да испросит жена от соседы и подруги своея сосуды сребряны и златы, и ризы: и украсите сыны вашя и дщери вашя, и оберите Египтян. === 4 === 1 Отвеща же Моисей и рече: аще не уверуют ми, ниже послушают гласа моего, рекут бо, яко не явися тебе Бог, что реку к ним? 2 И рече к нему Господь: что сие есть в руце твоей? Он же рече: жезл. 3 И рече: поверзи его на землю. И верже и на землю, и бысть змий: и отбеже Моисей от него. 4 И рече Господь к Моисею: простри руку и ими за хвост. Простер убо руку, взя за хвост, и бысть жезл в руце его. 5 Да уверуют ти, яко явися тебе Господь Бог отец твоих, Бог Авраамов и Бог Исааков и Бог Иаковль. 6 Рече же ему Господь паки: вложи руку твою в недро твое. И вложи руку в недро свое, и изят ю от недра своего, и бысть рука его прокажена яко снег. 7 И рече паки ему Господь: вложи руку твою в недро твое. И вложи руку свою в недро свое, и изят ю от недра своего, и бысть паки в румянстве плоти своея. 8 Аще же не уверуют тебе, ниже послушают гласа знамения перваго, уверуют тебе ради гласа знамения втораго: 9 и будет аще не уверуют тебе двема знамениями сими, ниже послушают гласа твоего, да возмеши от воды речныя, и пролиеши на сухо: и будет вода, юже возмеши от реки, кровию на сусе. 10 Рече же Моисей ко Господу: молюся ти, Господи: недоброречив есмь прежде вчерашняго и третияго дне, ниже отнележе начал еси глаголати рабу Твоему: худогласен и косноязычен аз есмь. 11 И рече Господь к Моисею: кто даде уста человеку? И кто сотвори нема и глуха, и видяща и слепа? Не Аз ли Господь Бог? 12 И ныне иди, и Аз отверзу уста твоя и устрою тебе, еже имаши глаголати. 13 Рече же Моисей: молюся ти, Господи, избери могуща иного, егоже послеши. 14 И разгневався яростию Господь на Моисеа, рече: не се ли брат твой Аарон Левитин? Вем, яко глаголя возглаголет он вместо тебе: и се, той изыдет во сретение тебе, и узрев тя, возрадуется в себе: 15 и речеши к нему, и вдаси словеса Моя во уста его: Аз же отверзу уста твоя и уста его, и устрою вам яже имате творити: 16 и той возглаголет от тебе к людем, и той будет уста твоя: ты же будеши ему в тех, яже к Богу: 17 и жезл сей обращенный в змию, возми в руку твою, сим сотвориши знамения. 18 Пойде же Моисей, и возвратися ко Иофору тестю своему и рече: пойду и возвращуся ко братии моей, иже во Египте, и увижду, аще еще живи суть. И рече Иофор к Моисею: иди здрав. По днех же оных многих, умре царь Египетский. 19 И рече Господь к Моисею в земли Мадиамстей: иди, отиди во Египет: измроша бо вси ищущии души твоея. 20 Поим же Моисей жену свою и отрочата, всади я на ослята, и возвратися во Египет. И взя Моисей жезл, иже от Бога, в руку свою. 21 Рече же Господь к Моисею: идущу тебе и возвращающуся во Египет, зри вся чудеса, яже дах в руце твои, да сотвориши Я пред фараоном: Аз же ожесточу сердце его, и не отпустит людий: 22 ты же возглаголеши фараону: сия глаголет Господь Бог Еврейский: сын Мой первенец Израиль: 23 рех же тебе: отпусти люди Моя, да Ми послужат: аще убо не хощеши отпустити их, блюди убо, Аз убию сына твоего первенца. 24 Бысть же на пути на стану, срете его Ангел Господнь и искаше его убити. 25 И вземши Сепфора камень, обреза конечную плоть сына своего, и припаде к ногам его и рече: ста кровь обрезания сына моего. 26 И отиде от него Ангел, занеже рече: ста кровь обрезания сына моего. 27 Рече же Господь ко Аарону: изыди во сретение Моисею в пустыню. И иде, и срете его в горе Божии: и целовастася оба. 28 И поведа Моисей Аарону вся словеса Господня, яже посла, и вся знамения, яже заповеда ему. 29 Иде же Моисей и Аарон, и собраша вся старцы сынов Израилевых: 30 и глагола им Аарон вся словеса сия, яже глагола Бог к Моисею: и сотвори знамения пред людьми. 31 И вероваша людие, и возрадовашася, яко посети Бог сыны Израилевы и яко призре на их скорбение: и преклоншеся людие поклонишася. === 5 === 1 И по сих вниде Моисей и Аарон к фараону и реша ему: сия глаголет Господь Бог Израилев: отпусти люди Моя, да праздник сотворят Мне в пустыни. 2 Рече же фараон: кто есть, Егоже послушаю гласа, яко отпустити имам сыны Израилевы? Не вем Господа, и Израиля не отпущу. 3 И глаголют ему: Бог Еврейский призва нас: пойдем убо путем трех дний в пустыню, да пожрем Господу Богу нашему, да не когда случится нам смерть или убийство. 4 И рече им царь Египетский: вскую, Моисей и Аарон, развращаете люди моя от дел их? Идите кийждо вас на дела своя. 5 И рече фараон: се, ныне умножишася людие сии на земли: убо не дадим почити им от дел. 6 Заповеда же фараон приставником дел людских и книгочиям, глаголя: 7 не ктому приложите даяти плев людем к плинфоделанию, якоже вчера и третияго дне: но сами да идут и собирают плевы себе: 8 и урок плинфоделания, еже они творят, на кийждо день наложите им: не уемлите ничтоже: праздни бо суть: сего ради возопиша, глаголюще: да пойдем, и пожрем Богу нашему: 9 да отягчатся дела людий сих, и да пекутся о них, и не помыслят о словесех суетных. 10 Понуждаху же их приставницы и книгочия и глаголаху людем, рекуще: сия глаголет фараон: не ктому даю вам плев: 11 сами вы шедше собирайте себе плевы, идеже аще обрящете: ибо не будет уято от урока вашего ничтоже. 12 И разыдошася людие по всей земли Египетстей собирати тростие на плевы. 13 Приставницы же понуждаху их, глаголюще: совершайте дела ваша урочная на всяк день, якоже и егда плевы даяхом вам. 14 И биени быша книгочия рода сынов Израилевых, иже быша приставлени над ними от приставников фараоновых, глаголюще: почто не совершисте урока вашего плинфеннаго, якоже вчера и третияго дне, такожде и днесь? 15 Вшедше же книгочия сынов Израилевых, возопиша к фараону, глаголюще: почто ты тако твориши рабом твоим? 16 Плев не дают рабом твоим, и плинфы нам глаголют творити: и се, раби твои мучими суть: обидиши убо людий твоих. 17 И рече им: праздни, праздни есте: сего ради глаголете: да идем, пожрем Богу нашему: 18 ныне убо шедше делайте плев бо не дам вам, урок же делания плинфеннаго да отдаете. 19 Видяху же книгочии сынов Израилевых себе во злых, глаголюще: не оставите плинфоделания урочнаго дню. 20 Сретоша же Моисеа и Аарона, идущих во сретение им, исходящым им от фараона, 21 и реша им: да видит Бог и судит вам, яко огнусисте дух ваш пред фараоном и пред рабы его, дати мечь в руки его убити нас. 22 Возвратися же Моисей ко Господу и рече: молютися, Господи, почто озлобил еси люди сия? И вскую послал еси мя? 23 И отнележе внидох к фараону, глаголати Твоим именем, (он) озлоби люди сия, и не избавил еси людий Твоих. === 6 === 1 И рече Господь к Моисею: се, узриши, что сотворю фараону: рукою бо крепкою отпустит их и мышцею высокою изженет их от земли своея. 2 Глагола же Бог к Моисею и рече ему: Аз Господь, 3 и явихся Аврааму, и Исааку, и Иакову, Бог Сый их, и имене Моего Господь не явих им: 4 и поставих завет Мой с ними, яко дати им землю Ханаанску, землю пришелствия их, на нейже и обитаху: 5 Аз же услышах стенание сынов Израилевых, имже Египтяне поработиша их, и помянух завет Мой: 6 иди, рцы сыном Израилевым глаголя: Аз Господь, и изведу вас от насилия Египетска, и избавлю вас от работы (их), и отиму вас мышцею высокою и судом великим, 7 и прииму вы Себе в люди, и буду вам Бог: и уразумеете, яко Аз Господь Бог ваш, изведый вас от земли Египетския и от насилия Египетска: 8 и введу вас в землю, на нюже прострох руку Мою, дати ю Аврааму и Исааку и Иакову: и дам ю вам в наследие, Аз Господь. 9 Глагола же Моисей тако сыном Израилевым, и не послушаша Моисеа от малодушия и от дел жестоких. 10 Рече же Господь к Моисею, глаголя: 11 вниди, глаголи фараону царю Египетскому, да отпустит сыны Израилевы из земли своея. 12 Рече же Моисей пред Господем глаголя: се, сынове Израилевы не послушаша мене, и како послушает мене фараон? Аз же несловесен есмь. 13 Рече же Господь к Моисею и Аарону и завеща им внити к фараону царю Египетскому, да отпустит сыны Израилевы от земли Египетския. 14 И сии старейшины домов отечеств их: сынове Рувима, первенца Израилева, Енох и Фаллос, Асрон и Харми: сие племя Рувимово. 15 Сынове же Симеоновы: Иемуил и Иамин, и Аод и Ахин, и Саар и Саул, иже от Финиссины: сия рождения сынов Симеоновых. 16 И сия имена сынов Левииных по сродством их: Гирсон, Кааф и Мерари: лет же жития Левиина сто тридесять седмь. 17 Сии же сынове Гирсони: Ловени и Семей: домове рождения их. 18 Сынове же Каафовы: Амврам и Иссаар, Хеврон и Озиил: лет же жития Каафова сто тридесять три. 19 Сынове же Мерарины: Мооли и Омуси: сии домове рождения Левиина по сродством их. 20 И поя Амврам Иохаведу, дщерь брата отца своего, себе в жену, и роди ему Аарона и Моисеа и Мариамь сестру их: лет же жития Амврамова сто тридесять седмь. 21 Сынове же Иссааровы: Коре и Нафек и Зехри. 22 Сынове же Озииловы: Мисаил и Елисафан и Сегри. 23 Поя же Аарон Елисавету, дщерь Аминадавову, сестру Наассонову, себе в жену, и роди ему Надава и Авиуда, и Елеазара и Ифамара. 24 Сынове же Кореовы: Асир и Елкана и Авиасар: сия рождения Кореова. 25 И Елеазар, сын Ааронов, поя от дщерей Футииловых себе в жену, и роди ему Финееса: сия старейшинства отечества левитска по сродством их. 26 Сей Аарон и Моисей, имже рече Бог извести сыны Израилевы из земли Египетския с силою их. 27 Сии суть, иже глаголаста к фараону царю Египетскому, еже извести сыны Израилевы от земли Египетския: сей Аарон и Моисей, 28 в оньже день глагола Господь к Моисею в земли Египетстей. 29 И рече Господь к Моисею глаголя: Аз Господь: глаголи к фараону царю Египетскому, елика Аз глаголю к тебе. 30 И рече Моисей пред Господем: се, аз худогласен есмь, и како послушает мене фараон? === 7 === 1 И рече Господь к Моисею, глаголя: се, дах тя Бога фараону, и Аарон брат твой будет твой пророк: 2 ты же возглаголеши ему вся, елика тебе заповедаю: Аарон же брат твой возглаголет к фараону, да отпустит сыны Израилевы от земли своея: 3 Аз же ожесточу сердце фараоново и умножу знамения Моя и чудеса в земли Египетстей: 4 и не послушает вас фараон, и возложу руку Мою на Египет и изведу с силою Моею люди Моя сыны Израилевы от земли Египетския, со отмщением великим: 5 и уведят вси Египтяне, яко Аз есмь Господь, простирая руку Мою на Египет, и изведу сыны Израилевы от среды их. 6 Сотвори же Моисей и Аарон, якоже заповеда им Господь, тако сотвориша. 7 Моисей же бе осмидесяти лет, Аарон же брат его осмидесяти трех лет, егда глаголаста к фараону. 8 И рече Господь к Моисею и Аарону глаголя: 9 и аще речет к вам фараон, глаголя: дадите нам знамение или чудо: и речеши Аарону брату твоему: возми жезл и повержи на землю пред фараоном и пред рабы его, и будет змий. 10 Вниде же Моисей и Аарон пред фараона и пред рабы его, и сотвориша тако, якоже заповеда им Господь: и поверже Аарон жезл пред фараоном и пред рабы его, и бысть змий. 11 Созва же фараон мудрецы Египетския и волхвы: и сотвориша и волсви египетскии чарованиями своими такожде: 12 и повергоша кийждо жезл свой, и быша змиеве: и пожре жезл Ааронов оных жезлы. 13 И укрепися сердце фараоне, и не послуша их, якоже глагола им Господь. 14 И рече Господь к Моисею: отягчися сердце фараоне, еже не отпустити людий: 15 иди к фараону заутра: се, той исходит на воды, и буди сретая его на брезе речнем: и жезл обращейся в змия возми в руку твою, 16 и речеши к нему: Господь Бог Еврейский посла мя к тебе, глаголя: отпусти люди Моя, да Ми послужат в пустыни: и се, не послушал еси доселе: 17 сия глаголет Господь: по сему увеси, яко Аз Господь: се, аз ударю жезлом, иже в руце моей, по воде речней, и преложится в кровь: 18 и рыбы, яже в реце изомрут, и возсмердится река, и не возмогут Египтяне пити воды от реки. 19 Рече же Господь к Моисею: рцы Аарону брату твоему: возми жезл твой в руку твою, и простри руку твою на воды Египетския и на реки их и на кладязи их и на езера их и на всякое собрание вод их, и будет кровь, и бысть кровь по всей земли Египетстей, в древесех же и в камениих. 20 И сотвориша тако Моисей и Аарон, якоже заповеда им Господь: и взем Аарон жезл свой, удари воду речную пред фараоном и пред рабы его, и преложи всю воду речную в кровь: 21 и рыбы яже в реце изомроша, и возсмердеся река, и не можаху Египтяне пити воды от реки, и бяше кровь по всей земли Египетстей. 22 Сотвориша же и волсви Египетстии волхвованиями своими такожде: и ожесточися сердце фараоново, и не послуша их, якоже рече Господь. 23 Возвратився же фараон вниде в дом свой, и не положи себе и сего во уме. 24 Ископаша же вси Египтяне окрест реки, да пиют воду: и не можаху пити воды от реки. 25 И исполнишася седмь дний, по ударении Господни в реку. === 8 === 1 И рече Господь к Моисею: вниди к фараону и речеши к нему: сия глаголет Господь: отпусти люди Моя, да Ми послужат: 2 аще же не хощеши ты отпустити, се, Аз побиваю вся пределы твоя жабами: 3 и изрыгнет река жабы, и излезшя внидут в домы твоя и в клети ложниц твоих, и на постели твоя и в домы рабов твоих и людий твоих, и в теста твоя и в пещы твоя, 4 и на тя и на рабы твоя и на люди твоя возлезут жабы. 5 Рече же Господь к Моисею: рцы Аарону брату твоему: простри рукою твоею жезл твой на реки и на кладязи и на езера, и изведи жабы на землю Египетскую. 6 И простре Аарон руку на воды Египетския и изведе жабы: и излезоша жабы и покрыша землю Египетскую. 7 Сотвориша же и волсви Египетстии волхвованиями своими такожде и изведоша жабы на землю Египетскую. 8 Призва же фараон Моисеа и Аарона и рече: помолитеся о мне ко Господу, да отженет от мене жабы и от людий моих: и отпущу люди, и пожрут Господви. 9 Рече же Моисей к фараону: определи мне, когда помолюся о тебе и о рабех твоих и о людех твоих, да погибнут жабы от тебе и от людий твоих и от домов ваших, точию в реце да останутся. 10 Он же рече: заутра. Рече убо: якоже рекл еси, да увеси, яко несть иного разве Господа: 11 и отженутся жабы от тебе и от домов ваших и от сел, и от рабов твоих и от людий твоих, точию в реце останутся. 12 Изыде же Моисей и Аарон от фараона, и возопи Моисей ко Господу о определении жаб, якоже совеща с фараоном. 13 Сотвори же Господь, якоже рече Моисей: и изомроша жабы от домов и от сел и от нив их: 14 и собраша я в стоги стоги, и возсмердеся земля. 15 Видев же фараон, яко бысть отрада, отяготися сердце его, и не послуша их, якоже рече Господь. 16 И рече Господь к Моисею: рцы Аарону: простри рукою жезл твой и удари в персть земную, и будут скнипы в человецех и в скотех, и на фараоне и на доме его и рабех его, и весь песок земный станет скнипами во всей земли Египетстей. 17 Простре убо Аарон рукою жезл и удари в персть земную: и быша скнипы в человецех и в скотех, и во всякой персти земной быша скнипы во всей земли Египетстей. 18 Твориша же и волсви волхвованми своими такожде извести скнипы, и не возмогоша: и быша скнипы в человецех и скотех. 19 Реша убо волсви фараону: перст Божий есть сие. И ожесточися сердце фараоново, и не послуша их, якоже рече Господь. 20 Рече же Господь к Моисею: востани заутра и стани пред фараоном, и се, он изыдет на воду, и речеши ему: сия глаголет Господь: отпусти люди Моя, да Ми послужат в пустыни: 21 аще же не хощеши отпустити людий Моих, се, Аз посылаю на тя и на рабы твоя, и на люди твоя и на домы вашя песия мухи: и наполнятся домове Египетстии песиих мух и в земли, на нейже суть: 22 и прославлю в той день землю Гесемску, на нейже людие Мои сташа, на нейже не будет тамо песиих мух, да увеси, яко Аз есмь Господь, Бог всея земли: 23 и положу разлучение между людьми Моими и людьми твоими: во утрии же будет знамение сие на земли. 24 Сотвори же Господь тако: и прииде песиих мух множество в домы фараоновы и в домы рабов его и во всю землю Египетску, и погибе земля от песиих мух. 25 Воззва же фараон Моисеа и Аарона, глаголя: шедше пожрите жертву Господу Богу вашему в земли сей. 26 И рече Моисей: не может се тако быти, хулно бо се Египтяном: не положим требу Господу Богу нашему: аще бо положим требу по хулению Египетску пред ними, камением побиют ны: 27 путем триех дний пойдем в пустыню и пожрем Господу Богу нашему, якоже рече Господь нам. 28 И рече фараон: аз отпущаю вы, и пожрите Господу Богу вашему в пустыни: но не далече простирайтеся ити: помолитеся убо и о мне ко Господу. 29 Рече же Моисей: се, аз изыду от тебе и помолюся ко Господу Богу, и отидут песия мухи от тебе и от рабов твоих и от людий твоих заутра: да не приложиши еще, фараоне, прельстити, еже не отпустити людий пожрети Господу. 30 Изыде же Моисей от фараона и помолися Богу. 31 Сотвори же Господь, якоже рече Моисей, и отя песия мухи от фараона и от рабов его и от людий его, и не остася ни едина. 32 И отяготи фараон сердце свое и во время сие, и не восхоте отпустити людий. === 9 === 1 Рече же Господь к Моисею: вниди к фараону и речеши ему: сия глаголет Господь Бог Еврейский: отпусти люди Моя, да послужат Мне: 2 аще убо не восхощеши отпустити людий Моих, но и еще их удержиши: 3 се, рука Господня будет на скоты твоя в полях и на кони, и на ослы и на велблюды, и на говяда и на овцы, смерть велика зело: 4 и дивна сотворю Аз во время оно между скоты Египетскими и между скоты сынов Израилевых: и не умрет от всех скотов сынов Израилевых ни едино. 5 И даде Бог предел глаголя: во утрие сотворит Господь глаголгол сей на земли. 6 И сотвори Господь глаголгол сей на утрии, и измре весь скот Египетский: от скота же сынов Израилевых не умре ни едино. 7 Видев же фараон, яко не умре от всех скотов сынов Израилевых ни едино, отягчися сердце фараону, и не отпусти людий. 8 Рече же Господь к Моисею и Аарону, глаголя: возмите вы полны руце пепела пещнаго, и да разсыплет Моисей к небеси пред фараоном и пред рабы его: 9 и да будет прах по всей земли Египетстей, и будут на человецех и на скотех гнойнии струпи, горящии на человецех и на скотех по всей земли Египетстей. 10 И взя пепел пещный пред фараоном, и разсыпа его Моисей к небеси: и быша гнойнии струпи, горящии на человецех и на скотех, 11 и не можаху волсви стояти пред Моисеом струпов ради: быша бо струпи на волсвех и на всей земли Египетстей. 12 Ожесточи же Господь сердце фараоново, и не послуша их, якоже повеле Господь Моисею. 13 И рече Господь к Моисею: востани заутра и стани пред фараоном, и рцы к нему: сице глаголет Господь Бог Еврейский: отпусти люди Моя, да послужат Мне: 14 в сей бо час Аз испущу вся казни Моя в сердце твое и рабов твоих и людий твоих: да увеси, яко несть ин, якоже Аз, во всей земли: 15 ныне бо пустив руку Мою, поражу тя и люди твоя умерщвлю, и потребишися от земли: 16 и сего ради пощаден еси доселе, да покажу на тебе крепость Мою, и яко да проповестся имя Мое по всей земли: 17 еще ли убо ты востаеши на людий Моих, еже не отпустити их? 18 Се, Аз одождю в сей же час заутра град мног зело, яков не бяше во Египте, от негоже дне создася, даже до дне сего: 19 ныне убо потщися собрати скот твой, и елика ти суть на поли: вси бо человецы и скоти, елицы аще обрящутся на полях и не внидут в дом, падет же на ня град, измрут. 20 Иже убояся слова Господня от рабов фараоновых, собра скоты своя в домы: 21 а иже не вня мыслию слову Господню, остави скоты на полях. 22 Рече же Господь к Моисею: простри руку твою на небо, и будет град по всей земли Египетстей, на человеки и на скоты и на всю траву земную. 23 Простре же Моисей руку на небо, и Господь даде громы и град, и течаше огнь по земли, и одожди Господь град по всей земли Египетстей: 24 бяше же град и огнь горящь со градом, град же мног зело зело, яков не бысть во Египте, отнележе быша люди в нем. 25 Порази же град во всей земли Египетстей от человека до скота, и всяку траву яже на поли порази град, и вся древа яже на полях сотре град: 26 токмо в земли Гесемстей, идеже бяху сынове Израилевы, не бысть град. 27 Послав же фараон, призва Моисеа и Аарона и рече им: согреших ныне: Господь праведен аз же и людие мои нечестиви: 28 помолитеся убо о мне ко Господу, и да престанут быти громи Божии и град и огнь на земли, и отпущу вы, и ктому не приложите медлити. 29 Рече же ему Моисей: егда изыду из града, простру руце мои на небо ко Господу, и громи престанут, и град и дождь не будет ктому, да увеси, яко Господня есть земля: 30 ты же и раби твои, вем, яко еще не убоястеся Господа. 31 Лен же и ячмень побит есть, ячмень бо испущаше класы, а лен семя: 32 пшеница же и жито не побиты, поздны бо бяху. 33 Изыде же Моисей от фараона из града и простре руце свои ко Господу, и громове престаша, и град и дождь не укану на землю ктому. 34 Видев же фараон, яко преста дождь и град и громи, приложи согрешати еще, и отягчи сердце свое и рабов своих: 35 и ожесточися сердце фараоново и рабов его, и не отпусти сынов Израилевых, якоже глагола Господь к Моисею. === 10 === 1 Рече же Господь к Моисею глаголя: вниди к фараону: Аз бо ожесточих сердце его и рабов его, да и еще приидут знамения сия на них: 2 яко да повесте во ушеса чад ваших и чадом чад ваших, елико наругахся Египтяном, и знамения Моя, яже сотворих в них, и увесте, яко Аз Господь. 3 Вниде же Моисей и Аарон пред фараона и реста ему: сия глаголет Господь Бог Еврейский: доколе не хощеши усрамитися Мене? Отпусти люди Моя, да послужат Ми: 4 аще же не хощеши ты отпустити люди Моя, се, Аз наведу в сей час заутра пруги многи на вся пределы твоя, 5 и покрыют лице земли, и не возможеши видети земли, и поядят весь останок земли оставшийся, егоже остави вам град, и изядят всяко древо растущее вам на земли: 6 и наполнятся домове твои и домове рабов твоих, и вси домове по всей земли Египетстей: ихже никогдаже видеша отцы твои, ни прадеды их, от негоже дне быша на земли, даже до дне сего. И уклонився Моисей, изыде от фараона. 7 Рекоша же раби фараоновы к нему: доколе нам сия будет мука? Отпусти люди, да послужат Господу Богу своему: или видети хощеши, яко погибнет Египет? 8 И возвратиша Моисеа и Аарона пред фараона, и рече им фараон: идите и послужите Господу Богу вашему: кто же и кто суть идущии? 9 И рече Моисей: с юнотами нашими и с старцы пойдем, с сынми и дщерьми, и со овцами и волами нашими: будет бо праздник Господа Бога нашего. 10 И рече им фараон: да будет тако, Господь с вами: якоже отпущаю вас, еда и стяжание ваше? Видите, яко лукавство обретается в вас: 11 не тако: но да идут мужие и да послужат Богу: сего бо сами просите. И изгнаша их от лица фараонова. 12 Рече же Господь Моисею: простри руку твою на землю Египетскую, и да взыдут прузи на землю Египетскую, и снедят всю траву земную и весь плод древесный, егоже остави град. 13 И воздвиже Моисей жезл на небо, Господь же наведе ветр южный на землю во весь той день и во всю нощь: утро бысть, и ветр южный взя пруги, 14 и наведе я на всю землю Египетскую: и нападоша на вся пределы Египетския мнози зело: прежде сих не быша сицевии прузи, и по сих не будут тако, 15 и покрыша лице земное, и истле земля: и снедоша всю траву земную и весь плод древесный, иже остася от града: не остася зелено ничтоже на древех и во всей траве польней, по всей земли Египетстей. 16 Потщася же фараон призвати Моисеа и Аарона, глаголя: согреших пред Господем Богом вашим и к вам: 17 простите убо мой грех еще ныне и помолитеся Господу Богу вашему, да отимет от мене смерть сию. 18 Изыде же Моисей от фараона и помолися ко Господу: 19 и премени Господь от моря ветр велик и взя пруги, и вверже их в море Чермное: и не остася ни един пруг на всей земли Египетстей. 20 И ожесточи Господь сердце фараоново, и не отпусти сынов Израилевых. 21 Рече же Господь Моисею: простри руку твою на небо, и да будет тма по земли Египетстей, осязаемая тма. 22 Простре же Моисей руку свою на небо, и бысть тма, мрак, буря по всей земли Египетстей три дни: 23 и не виде никтоже брата своего три дни, и не воста никтоже от одра своего три дни, всем же сыном Израилевым бяше свет во всех (жилищах), в нихже пребываху. 24 И призва фараон Моисеа и Аарона, глаголя: идите, послужите Господу Богу вашему: токмо овцы и волы оставите: стяжание же ваше да идет с вами. 25 И рече Моисей: ни: но и ты нам даси всесожжения и жертвы, яже сотворим Господу Богу нашему: 26 и скот наш пойдет с нами, не оставим и копыта: от них бо возмем на службу Господу Богу нашему: мы же не вемы, чим послужим Господу Богу нашему, дондеже дойдем тамо. 27 Ожесточи же Господь сердце фараоново, и не восхоте отпустити их: 28 и рече ему фараон: отиди от мене, внемли себе ктому, да не приложиши видети лица моего: в оньже бо день аще явишися мне, умреши. 29 Рече же Моисей: якоже рекл еси, ктому не явлюся пред лицем твоим. === 11 === 1 Рече же Господь к Моисею: еще едину язву Аз наведу на фараона и на Египет, и по сих отпустит вы отсюду: егда же отпустит вы со всем, изженет вас изгнанием: 2 глаголи убо отай во ушы людем, и да испросит кийждо у соседа, и жена у соседы своея сосуды сребряны и златы, и ризы. 3 Господь же даде благодать людем Своим пред Египтяны, и даша им. Человек же Моисей велик бысть зело пред Египтяны и пред фараоном, и пред рабы его и пред очима всех людий. 4 И рече Моисей: сия глаголет Господь: в полунощи Аз вниду посреде Египта. 5 И измрет всяк первенец в земли Египетстей, от первенца фараонова, иже седит на престоле, и даже до первенца рабыни, яже у жернов, и до первенца всякаго скота: 6 и будет вопль велик по всей земли Египетстей, яков не бе, и таков ктому не будет. 7 Во всех же сынех Израилевых не поскомлет пес языком своим, от человека до скота: да узриши елико прославится Господь между Египтяны и сынми Израилевыми: 8 и приидут вси отроцы твои сии ко мне и поклонятся мне, глаголюще: отиди ты, и вси людие твои, ихже ты отводиши: и по сих отиду. Изыде же Моисей от фараона со гневом. 9 И рече Господь к Моисею: не послушает вас фараон, да умножая умножу знамения Моя и чудеса в земли Египетстей. 10 Моисей же и Аарон сотвориша вся знамения и чудеса сия пред фараоном: и ожесточи Господь сердце фараоново, и не восхоте отпустити сынов Израилевых от земли Египетския. === 12 === 1 Рече же Господь к Моисею и Аарону в земли Египетстей, глаголя: 2 месяц сей вам начало месяцей, первый будет вам в месяцех лета: 3 рцы ко всему сонму сынов Израилевых, глаголя: в десятый месяца сего да возмет кийждо овча по домом отечеств, кийждо овча по дому: 4 аще же мало их есть в дому, яко не доволным быти на овча, да возмет с собою соседа ближняго своего по числу душ: кийждо доволное себе сочтет на овча: 5 овча совершенно, мужеск пол, непорочно и единолетно будет вам, от агнец и от козлищ приимете: 6 и будет вам соблюдено даже до четвертагонадесять дне месяца сего: и заколют то все множество собора сынов Израилевых к вечеру, 7 и приимут от крове и помажут на обою подвою и на прагах в домех, в нихже снедят тое, 8 и снедят мяса в нощи той печена огнем и опресноки с горьким зелием снедят: 9 не снесте от них сурово, ниже варено в воде, но печеное огнем, главу с ногами и со утробою: 10 не оставите от него до утрия и кости не сокрушите от него, останки же от него до утра огнем сожжете: 11 сице же снесте е: чресла ваша препоясана, и сапози ваши на ногах ваших, и жезлы ваши в руках ваших, и снесте е со тщанием: Пасха есть Господня: 12 и пройду землю Египетскую сея нощи, и убию всякаго первенца в земли Египетстей, от человека до скота, и во всех бозех Египетских сотворю отмщение: Аз Господь: 13 и будет кровь вам в знамение на домех, в нихже вы будете тамо, и узрю кровь и покрыю вы, и не будет в вас язвы, еже погибнути, егда поражу землю Египетскую: 14 и будет вам день сей в память, и празднуйте той праздник Господу во вся роды вашя: законно вечно празднуйте его: 15 седмь дний опресноки ядите, от перваго же дне измите квас из домов ваших: всяк, иже снесть кисло, погибнет душа та от Израиля, от дне перваго даже до дне седмаго: 16 и первый день наречется свят, и седмый день нарочит свят да будет вам: всякаго дела работна да не сотворите в них, разве елика (снести) сотворятся всякой души, сия точию да сотворятся вам: 17 и сохраните заповедь сию: в сей бо день изведу силу вашу от земли Египетския: и сотворите день сей в роды вашя, законно вечно: 18 начинающе в четвертыйнадесять день перваго месяца, с вечера да снесте опресноки, до двадесять перваго дне месяца, до вечера: 19 седмь дний квас да не явится в домех ваших: всяк, иже аще снесть квасно, погубится душа та от сонма сынов Израилевых и в пришелцех и в жителех тоя земли: 20 всякаго кваснаго да не ясте, во всех же домех ваших да ясте опресноки. 21 Созва же Моисей вся старцы сынов Израилевых и рече им: шедше поимите себе овча по сродством вашым и пожрите пасху: 22 возмите же кисть иссопа, и омочивше в кровь, яже близ дверий, помажите праги, и на обою подвою, от крове, яже есть близ дверий: вы же да не изыдете кийждо из дверий дому своего до заутрия: 23 и мимо пройдет Господь избити Египтяны, и узрит кровь на празе и на обою подвою, и минет Господь двери, и не попустит погубляющему внити в домы вашя убивати: 24 и сохраните слово сие законно себе и сыном вашым до века: 25 аще же внидете в землю, юже даст Господь вам, якоже глагола, сохраните служение сие, 26 и будет егда возглаголют вам сынове ваши: что есть служение сие? 27 И рцыте им: жертва пасха сия Господу, Иже покры домы сынов Израилевых во Египте, егда поби Египтяны, домы же нашя избави. И преклоншеся людие поклонишася. 28 И отшедше сотвориша сынове Израилевы, якоже заповеда Господь Моисею и Аарону, тако сотвориша. 29 Бысть же в полунощи, и Господь порази всякаго первенца в земли Египетстей, от первенца фараонова седящаго на престоле, до первенца пленницы, яже в рове, и до первенца всякаго скотска. 30 Воста же фараон нощию, и вси раби его, и вси Египтяне, и бысть вопль велик по всей земли Египетстей, ибо не бысть дом, в немже не бе мертвеца. 31 И призва фараон Моисеа и Аарона в нощи и рече им: востаните и отидите от людий моих, и вы, и сынове Израилевы: идите и послужите Господу Богу вашему, якоже глаголете: 32 и овцы и говяда вашя поимше идите, благословите же и мене. 33 И нуждаху Египтяне людий со тщанием изринути их от земли: рекоша бо, яко вси мы измрем. 34 Взяша же людие муку свою прежде вскисения теста своего, и ввязавше в ризы, (возложиша) на рамы своя. 35 Сынове же Израилевы сотвориша, якоже заповеда им Моисей: и испросиша от Египтян сосуды сребряны и златы, и ризы: 36 и даде Господь благодать людем Своим пред Египтяны: и даша им, и обраша Египтян. 37 Воздвигошася же сынове Израилевы от Рамессы в Сокхоф до шести сот тысящ пеших мужей, кроме домочадства: 38 и пришелцы мнози изыдоша с ними, и овцы, и волы, и скоти мнози зело. 39 И испекоша тесто, еже изнесоша из Египта, опресноки не кислы, не вскисоша бо: ибо изгнаша их Египтяне, и не возмогоша помедлити, ниже брашна сотвориша себе на путь. 40 Обитания же сынов Израилевых, иже обиташа в земли Египетстей и в земли Ханаани сии и отцы их, лет четыреста тридесять. 41 И бысть по четырех стех и тридесяти летех, изыде вся сила Господня от земли Египетския в нощи. 42 Стражба есть Господу, еже извести их от земли Египетския: оная нощь самая стражба Господу, яко всем сыном Израилевым быти в роды их. 43 И рече Господь к Моисею и Аарону: сей закон Пасхи: всяк иноплеменник да не яст от нея, 44 и всякаго раба или купленаго обрежеши его, и тогда да яст от нея: 45 пришлец или наемник да не яст от нея: 46 в дому единем да снестся: не оставите от мяс на утрие, и не изнесите мяс вон из дому, и кости не сокрушите от него: 47 весь сонм сынов Израилевых сотворит сие: 48 аще же кто приидет пришлец к вам сотворити Пасху Господню, обрежеши его всяк мужеский пол, и тогда приступит сотворити ю, и будет аки житель земли тоя: всяк же необрезаный да не яст от нея: 49 закон един да будет тоя земли жителю и пришелцу пришедшему в вас. 50 И сотвориша сынове Израилевы, якоже заповеда Господь Моисею и Аарону, тако сотвориша. 51 И бысть в день он, изведе Господь сыны Израилевы от земли Египетския с силою их. === 13 === 1 И рече Господь к Моисею глаголя: 2 освяти Ми всякаго первенца перворожденнаго, разверзающаго всякая ложесна в сынех Израилевых от человека до скота, яко Мне есть. 3 Рече же Моисей к людем: помните день сей, в оньже изыдосте от земли Египетския, из дому работы: рукою бо крепкою изведе вас Господь отсюду: и не ядите квасна, 4 понеже в днешний день исходите в месяце плодов новых: 5 и будет, егда введет тя Господь Бог твой в землю Хананейску и Хеттейску, и Аморрейску и Евейску, и Иевусейску и Гергесейску и Ферезейску, еюже клятся ко отцем твоим, дати тебе землю точащую млеко и мед, и сотвориши службу сию сего месяца: 6 шесть дний ядите опресноки, в седмый же день праздник Господу, 7 опресноки ядите седмь дний: да не явится тебе квасное, ниже будет тебе квас во всех пределех твоих, 8 и возвестиши сыну твоему в день он, глаголя: сего ради сотворил Господь Бог мне, егда исхождах из Египта: 9 и будет тебе знамение на руце твоей, и воспоминание пред очима твоима, яко да будет закон Господнь во устех твоих, рукою бо крепкою изведе тя Господь Бог из Египта: 10 и сохраните закон сей по временом уставленым, от дний до дний, 11 и будет егда введет тя Господь Бог твой в землю Хананейску, якоже кляся отцем твоим, и даст ю тебе: 12 и отлучиши всякое разверзающее ложесна, мужеск пол Господу: всякое разверзающее ложесна от стад или от скот твоих, елика будут тебе, мужеск пол освятиши Господу: 13 всякое разверзающее утробу ослю премениши овцею: аще же не премениши, искупиши е: и всякаго первенца человеча сынов твоих да искупиши: 14 аще же вопросит тя сын твой по сих, глаголя: что сие? И речеши ему: яко рукою крепкою изведе нас Господь из земли Египетския, из дому работы, 15 егда бо ожесточися фараон отпустити нас, изби Господь всякаго первенца в земли Египетстей, от первенца человеча до первенца скотия: сего ради аз в жертву приношу всякое разверзающее ложесна, мужеск пол Господу, и всякаго первенца сынов моих искуплю, 16 и будет в знамение на руце твоей, и непоколебимо пред очесы твоими: рукою бо крепкою изведе тя Господь из Египта. 17 Егда же отпусти фараон люди, не поведе их Бог путем земли Филистимския, яко близ бяше, ибо рече Бог: да не когда раскаются людие, видевше рать, и возвратятся во Египет. 18 И обведе Бог люди путем, иже в пустыню к Чермному морю. Пятаго же рода изыдоша сынове Израилевы от земли Египетския. 19 И взя Моисей кости Иосифовы с собою: клятвою бо закля Иосиф сыны Израилевы, глаголя: присещением присетит вас Господь, и изнесете отсюду кости моя с собою. 20 Воздвигшеся же сынове Израилевы от Сокхофа, ополчишася во Офоме при пустыни. 21 Бог же вождаше их, в день убо столпом облачным, показати им путь, нощию же столпом огненным, светити им: 22 и не оскуде столп облачный во дни и столп огненный нощию пред всеми людьми. === 14 === 1 И рече Господь к Моисею глаголя: 2 рцы сыном Израилевым, и обратившеся да ополчатся прямо придворию, между Магдолом и между Морем, прямо Веельсепфону: пред ними ополчишися при мори: 3 и речет фараон людем своим о сынех Израилевых: заблуждают сии по земли, затвори бо их пустыня: 4 Аз же ожесточу сердце фараоново, и поженет созади их, и прославлюся в фараоне и во всем воинстве его: и уразумеют вси Египтяне, яко Аз есмь Господь. И сотвориша тако. 5 И возвещено бысть царю Египетскому, яко бежаша людие, и превратися сердце фараоново и рабов его на люди, и рекоша: что сие сотворихом, отпустивше сыны Израилевы, да не работают нам? 6 Впряже убо фараон колесницы своя, и вся люди своя собра с собою: 7 и поят шесть сот колесниц избранных, и вся кони Египетския, и тристаты над всеми. 8 И ожесточи Господь сердце фараона царя Египетскаго и рабов его, и погна созади сынов Израилевых. Сынове же Израилевы исхождаху рукою высокою. 9 И погнаша Египтяне вслед их, и обретоша их ополчившихся при мори: и вся кони и колесницы фараоновы, и конницы, и воинство его прямо придворию, противу Веельсепфона. 10 И фараон приближашеся. Воззревше же сынове Израилевы очима, видеша: и се, Египтяне ополчишася вслед их: и убояшася зело, и возопиша сынове Израилевы ко Господу 11 и рекоша к Моисею: за еже не быти гробом во Египте, извел еси нас умертвити в пустыни: что сие сотворил еси нам, извед нас из Египта? 12 Не сей ли бяше глагол, егоже рекохом к тебе во Египте, глаголюще: остави нас, да работаем Египтяном: лучше бо бяше нам работати Египтяном, нежели умрети в пустыни сей. 13 Рече же Моисей к людем: дерзайте, стойте и зрите спасение еже от Господа, еже сотворит нам днесь: имже бо образом видесте Египтян днесь, не приложите ктому видети их в вечное время: 14 Господь поборет по вас, вы же умолкните. 15 И рече Господь к Моисею: что вопиеши ко Мне? Рцы сыном Израилевым, и да путешествуют, 16 ты же возми жезл твой и простри руку твою на море, и расторгни е: и да внидут сынове Израилевы посреде моря по суху: 17 и се, Аз ожесточу сердце фараоново и всех Египтян, и внидут вслед их: и прославлюся в фараоне и во всем воинстве его, и в колесницах и в конех его, 18 и уведят вси Египтяне, яко Аз есмь Господь, егда прославляюся в фараоне и в колесницах и в конех его. 19 Взятся же Ангел Божий ходяй пред полком сынов Израилевых и пойде созади их, взятся же и столп облачный от лица их и ста созади их. 20 И вниде посреде полка Египетска и посреде полка сынов Израилевых и ста: и бысть тма и мрак, и прииде нощь, и не смесишася друг с другом во всю нощь. 21 Простре же Моисей руку на море, и возгна Господь море ветром южным сильным всю нощь, и сотвори море сушу, и разступися вода. 22 И внидоша сынове Израилевы посреде моря по суху, и вода им стена бысть одесную и стена ошуюю. 23 Погнаша же Египтяне и внидоша вслед их, и всяк конь фараонов, и колесницы, и всадники посреде моря. 24 Бысть же в стражу утреннюю, и воззре Господь на полк Египетский в столпе огненнем и облачнем, и смяте полк Египетский, 25 и связа оси колесниц их, и ведяше их с нуждею. И рекоша Египтяне: бежим от лица Израилева, Господь бо поборает по них на Египтяны. 26 И рече Господь к Моисею: простри руку твою на море, и да совокупится вода и да покрыет Египтяны, колесницы же и всадники. 27 Простре же Моисей руку на море, и устроися вода ко дню на место: Египтяне же бежаша под водою, и истрясе Господь Египтяны посреде моря: 28 и обратившися вода покры колесницы и всадники и всю силу фараонову, вшедши вслед их в море: и не оста от них ни един. 29 Сынове же Израилевы проидоша по суху посреде моря: вода же им стена (бысть) одесную и стена ошуюю, 30 и избави Господь Израиля в день он из руки Египетския: и видеша сынове Израилевы Египтян измерших при краи моря. 31 Виде же Израиль руку великую, яже сотвори Господь Египтяном, и убояшася людие Господа и вероваша Богу и Моисею угоднику Его. 32 Тогда воспе Моисей и сынове Израилевы песнь сию Господви, и рекоша глаголюще: === 15 === 1 Поим Господви, славно бо прославися: коня и всадника вверже в море: 2 Помощник и Покровитель бысть мне во спасение: Сей мой Бог и прославлю Его, Бог отца моего и вознесу Его: 3 Господь сокрушаяй брани, Господь имя Ему, 4 колесницы фараоновы и силу его вверже в море, избранныя всадники тристаты потопи в Чермнем мори, 5 пучиною покры их, погрязоша во глубине яко камень: 6 десница Твоя, Господи, прославися в крепости, десная Твоя рука, Господи, сокруши враги: 7 и множеством славы Твоея стерл еси сопротивных, послал еси гнев Твой, пояде я яко стеблие, 8 и духом ярости Твоея разступися вода: огустеша яко стена воды, огустеша и волны посреде моря: 9 рече враг: гнав постигну, разделю корысть, исполню душу мою, убию мечем моим, господствовати будет рука моя: 10 послал еси духа Твоего, покры я море, погрязоша яко олово в воде зелней: 11 кто подобен Тебе в бозех, Господи, кто подобен Тебе? Прославлен во святых, дивен в славе, Творяй чудеса: 12 простерл еси десницу Свою, пожре я земля, 13 наставил еси правдою Твоею люди Твоя сия, яже избавил еси, утешил еси крепостию Твоею во обитель святую Твою: 14 слышаша языцы и прогневашася, болезни прияша живущии в Филистиме: 15 тогда потщашася владыцы Едомстии и князи Моавитстии, прият я трепет: растаяша вси живущии в Ханаане: 16 да нападет на ня страх и трепет: величием мышцы Твоея да окаменятся, дондеже пройдут людие Твои, Господи, дондеже пройдут людие Твои сии, яже стяжал еси: 17 введ насади я в гору достояния Твоего, в готовое жилище Твое, еже соделал еси, Господи, святыню, Господи, юже уготовасте руце Твои: 18 Господь царствуяй веки, и на век, и еще: 19 егда вниде конница фараонова с колесницами и всадники в море, и наведе на них Господь воду морскую: сынове же Израилевы проидоша сушею посреде моря. 20 Взя же Мариам пророчица, сестра Ааронова, тимпан в руце свои, и изыдоша вся жены вслед ея со тимпаны и лики: 21 преднача же им Мариам, глаголющи: поим Господви, славно бо прославися: коня и всадника вверже в море. 22 Поят же Моисей сыны Израилевы от моря Чермнаго и веде их в пустыню Сур: и идяху три дни в пустыни, и не обретаху воды пити. 23 Приидоша же в Мерру, и не можаху пити воды от Мерры, горька бо бе: сего ради наречеся имя месту тому Горесть. 24 И роптаху людие на Моисеа, глаголюще: что пием? 25 Возопи же Моисей ко Господу, и показа ему Господь древо, и вложи е в воду, и усладися вода: тамо положи ему оправдания и судбы, и тамо его искуси, 26 и рече: аще слухом услышиши глас Господа Бога твоего, и угодная пред ним сотвориши, и внушиши заповедем Его, и сохраниши вся оправдания Его: всяку болезнь, юже наведох Египтяном, не наведу на тя: Аз бо есмь Господь Бог твой исцеляяй тя. 27 И приидоша во Елим, и бяху тамо дванадесять источников вод, и седмьдесят стеблий финиковых: и ополчишася тамо при водах. === 16 === 1 Воздвигошася же от Елима, и прииде весь сонм сынов Израилевых в пустыню Син, яже есть между Елимом и между Синою. В пятый же надесять день втораго месяца изшедшым им от земли Египетския, 2 возропта весь сонм сынов Израилевых на Моисеа и Аарона, 3 и рекоша к ним сынове Израилевы: о дабы быхом измерли мы уязвени от Господа в земли Египетстей, егда седяхом над котлы мясными и ядохом хлебы до сытости: яко изведосте ны в пустыню сию уморити весь сонм сей гладом. 4 Рече же Господь к Моисею: се, Аз одождю вам хлебы с небесе: и изыдут людие, и соберут доволное дню, на (всяк) день, яко да искушу их, аще пойдут в законе Моем, или ни. 5 И будет в день шестый, и уготовят, еже внесут, и да будет сугубо, еже собираша на всяк день. 6 Рече же Моисей и Аарон ко всему сонму сынов Израилевых: в вечер (сей) увесте, яко Господь изведе вы от земли Египетския, 7 и заутра узрите славу Господню, внегда услышати Господу роптание ваше на Бога: мы же что есмы, яко ропщете на ны? 8 И рече Моисей: егда даст Господь вам в вечер мяса ясти и хлебы заутра до сытости, понеже услыша Господь роптание ваше, имже ропщете на ны: мы же что есмы? Не на нас бо роптание ваше, но точию на Бога. 9 И рече Моисей ко Аарону: глаголи ко всему сонму сынов Израилевых: приидите пред Бога, услыша бо роптание ваше. 10 Егда же глаголаше Аарон всему сонму сынов Израилевых, и обратишася в пустыню, и слава Господня явися во облаце, 11 и рече Господь к Моисею глаголя: 12 слышах роптание сынов Израилевых: рцы к ним глаголя: к вечеру да снесте мяса и заутра насытитеся хлебов, и увесте, яко Аз есмь Господь Бог ваш. 13 Бысть же вечер, и приидоша крастели и покрыша полк. Заутра же бысть спадшей росе около полка, 14 и се, на лицы пустыни мелко яко кориандр, бело аки лед на земли. 15 Узревше же то сынове Израилевы, реша друг ко другу: что есть сие? Не ведяху бо, что бяше. Рече же Моисей к ним: сей хлеб, егоже даде Господь вам ясти: 16 сей глаголгол, егоже завеща Господь: соберите от него кийждо на домашния, гомор поглавно по числу душ ваших, кийждо вас с домашними своими соберите. 17 И сотвориша тако сынове Израилевы, и собраша ов много, ов же мало: 18 и измеривше гомором, не преизбыточествова иже много, и иже мало, не мнее прият: кийждо на домашних своих собраша. 19 И рече Моисей к ним: никтоже да оставит на утрие от него. 20 И не послушаша Моисеа, но оставиша нецыи от него на утрие, и воскипе червми и возсмердеся. И оскорбися на них Моисей. 21 И собираша оное рано рано, кийждо надлежащее себе: егда же огреваше солнце, растаяваше. 22 Бысть же в день шестый, собраша потребное сугубо, два гомора комуждо. Приидоша же вси князи сонма и поведаша Моисею. 23 Рече же Моисей к ним: сие слово есть, еже глагола Господь: суббота покой свят Господу заутра: елика аще печете, пецыте, и елика аще варите, варите, все же избыточное оставите в скрове на утрие. 24 И оставиша от того до утрия, якоже заповеда им Моисей: и не возсмердеся, ниже червь бысть в нем. 25 Рече же Моисей: ядите днесь, есть бо суббота покой Господу: днесь не обрящете на поли: 26 шесть дний собирайте, в седмый же день суббота: яко не будет в нем. 27 Бысть же в седмый день, изыдоша нецыи от людий собирати, и не обретоша. 28 Рече же Господь Моисеови: доколе не хощете послушати заповедий Моих и закона Моего? 29 Зрите: Господь бо даде вам субботу день сей: сего ради Той даде вам в день шестый хлеба на два дни: седите кийждо вас в дому своем у себе, никтоже да исходит от места своего в день седмый. 30 И субботствоваша людие в день седмый. 31 И прозваша сынове Израилевы имя тому манна: бяше же яко семя кориандрово бело, вкус же его аки мука с медом. 32 Рече же им Моисей: сей глаголгол, егоже завеща Господь: наполните гомор от манны в скров в роды вашя: да видят хлеб, егоже ядосте вы в пустыни, егда изведе вас Господь от земли Египетския. 33 И рече Моисей ко Аарону: возми стамну златую едину и вложи в ню гомор полный от манны, и положиши тую пред Богом в соблюдение в роды вашя. 34 Якоже заповеда Господь Моисею, положи ю Аарон пред свидением в соблюдение. 35 Сынове же Израилевы ядоша манну лет четыредесять, дондеже приидоша в землю обитаемую, и ядоша манну, дондеже приидоша во страну Финикийскую: 36 гомор же десятая часть трех мер бяше. === 17 === 1 И воздвижеся весь сонм сынов Израилевых от пустыни Син по полком своим словом Господним и ополчишася в Рафидине. Не бяше же воды людем пити, 2 и хуляху людие Моисеа, глаголюще: даждь нам воду, да пием. И рече им Моисей: что хулите мя? И что искушаете Господа? 3 Возжаждаша же тамо людие воды и роптаху на Моисеа, глаголюще: вскую сие? Извел еси нас из Египта уморити нас и чада наша и скоты жаждею? 4 Возопи же Моисей ко Господу глаголя: что сотворю людем сим? Еще мало, и побиют мя камением. 5 И рече Господь к Моисею: пойди пред людьми сими, и поими с собою от старец людских, и жезл, имже пресекл еси море, возми в руку твою, и пойди: 6 Аз же стану тамо прежде пришествия твоего у камене в Хориве: и удариши в камень, и изыдет из него вода, и да пиют людие. Сотвори же Моисей тако пред сыны Израилевыми, 7 и прозва имя месту тому Искушение и Похуление, хулы ради сынов Израилевых, и занеже искусиша Господа, глаголюще: аще есть в нас Господь, или ни? 8 Прииде же Амалик и воева на Израиля в Рафидине. 9 Рече же Моисей ко Иисусу: избери себе мужы сильны и изшед ополчися на Амалика заутра: и се, аз стану на верху горы, и жезл Божий в руце моей. 10 И сотвори Иисус, якоже рече ему Моисей, и изшед ополчися на Амалика: Моисей же и Аарон и Ор взыдоша на верх горы. 11 И бысть егда воздвизаше Моисей руце, одолеваше Израиль: егда же опускаше руце, одолеваше Амалик: 12 руце же Моисеовы тяжки беша: и вземше камень, подложиша ему, и седяше на нем: Аарон же и Ор поддержаста руце ему, един отсюду, а другий оттуду: и быша Моисеови руце укреплены до захождения солнца: 13 и преодоле Иисус Амалика и вся люди его убийством меча. 14 Рече же Господь к Моисею: впиши сие на память в книги и вдай во ушы Иисусу, яко пагубою погублю память Амаликову от поднебесныя. 15 И созда Моисей олтарь Господу и прозва имя ему Господь Прибежище мое: 16 яко рукою тайною ратует Господь на Амалика от рода в род. === 18 === 1 Услыша же Иофор, иерей Мадиамский, тесть Моисеов, вся, елика сотвори Господь Израилю Своим людем, яко изведе Господь Израиля из Египта: 2 и поя Иофор, тесть Моисеов, Сепфору, жену Моисеову, по отпущении ея, 3 и два сына ея: имя единому от них Гирсам, глаголя: пришлец бых в земли чуждей, 4 и имя второму Елиезер, глаголя: Бог бо отца моего помощник мой и избави мя из руки фараони. 5 И прииде Иофор, тесть Моисеов, и сынове и жена к Моисею в пустыню, идеже ополчися при горе Божией. 6 Возвестиша же Моисею, глаголюще: се, Иофор, тесть твой, идет к тебе, и жена твоя, и оба сына твоя с ним. 7 Изыде же Моисей во сретение тестю своему и поклонися ему и целова его, и приветствоваша друг друга: и введе их Моисей в кущу. 8 И поведа Моисей тестю своему вся, елика сотвори Господь фараону и всем Египтяном Израиля ради, и весь труд бывший им на пути, и яко избави их Господь от руки фараони и от руки Египетския. 9 Ужасеся же Иофор о всех благих, яже сотвори им Господь, яко избави их Господь от руки Египетския и от руки фараони, 10 и рече Иофор: благословен Господь, яко избави люди Своя из руки Египетския и из руки фараони: 11 ныне уведех, яко велик Господь паче всех богов, сего ради, яко налегоша на них. 12 И взя Иофор тесть Моисеов всесожжения и жертвы Богу: прииде же Аарон и вси старцы Израилевы ясти хлеба с тестем Моисеовым пред Богом. 13 И бысть на утрие, седе Моисей судити люди: стояху же пред Моисеом вси людие от утра до вечера. 14 Видев же Иофор вся, елика творяше людем, рече: что сие, еже ты твориши людем? Почто ты един седиши, вси же людие предстоят тебе от утра до вечера? 15 Рече же Моисей тестю: понеже приходят людие ко мне просити суда от Бога: 16 егда бо бывает им распря, и приходят ко мне, разсуждаю коемуждо и сказую им повеления Божия и закон Его. 17 Рече же тесть Моисеов к нему: не право ты твориши глагол сей: 18 трудом утрудишися несносным и ты, и вси людие сии, иже суть с тобою: тяжек тебе глагол сей, не возможеши творити ты един: 19 ныне убо послушай мене и присоветую тебе, и будет Бог с тобою: буди ты людем в тех яже к Богу, и донесеши словеса их к Богу, 20 и засвидетелствуй им повеления Божия и закон Его, и повеждь им пути Его, имиже пойдут, и дела, яже сотворят: 21 ты же усмотри себе от всех людий мужы сильны, Бога боящыяся, мужы праведны, ненавидящыя гордости, и поставиши их над ними тысященачалники и стоначалники, и пятьдесятоначалники и десятоначалники и писмовводители, 22 и судят людий по вся часы: слово же неудоборешителное донесут к тебе: малыя же суды да судят они, и облегчат тя и спомогут тебе: 23 аще слово сие сотвориши, укрепит тя Бог, и возможеши настоятелствовати, и вси людие сии приидут во свое место с миром. 24 Послуша же Моисей гласа тестя своего и сотвори вся, елика рече ему: 25 и избра Моисей мужы сильны от всего Израиля, и сотвори я над ними тысященачалники и стоначалники, и пятьдесятоначалники и десятоначалники и писмовводители: 26 и суждаху людем по вся часы: всякое же слово неудоборешителное доносиша к Моисею, всякое же слово легкое суждаху сами. 27 Отпусти же Моисей тестя своего, и отиде в землю свою. === 19 === 1 Месяца же третияго изшествия сынов Израилевых от земли Египетския, в сий день приидоша в пустыню Синайскую: 2 и воздвигошася от Рафидина и приидоша в пустыню Синайскую, и ополчися тамо Израиль прямо горы. 3 Моисей же взыде на гору Божию, и воззва его Бог от горы глаголя: сия возглаголеши дому Иаковлю и повеси сыном Израилевым: 4 сами видесте, елика сотворих Египтяном, и подях вас яко на крилех орлих и приведох вас к Себе: 5 и ныне аще слухом послушаете гласа Моего и сохраните завет Мой, будете Ми людие избранни от всех язык: Моя бо есть вся земля: 6 вы же будете Ми царское священие и язык свят: сия словеса да речеши сыном Израилевым. 7 Прииде же Моисей и призва старцы людския и предложи им вся словеса сия, яже завеща им Бог. 8 Отвещаша же вси людие единодушно и рекоша: вся, елика рече Бог, сотворим и послушаем. Донесе же Моисей словеса сия к Богу, 9 и рече Господь к Моисею: се, Аз прииду к тебе в столпе облачне, да услышат людие глаголюща мя к тебе и да тебе веруют во веки. Поведа же Моисей словеса людий ко Господу. 10 Рече же Господь Моисею: сошед засвидетелствуй людем и очисти я днесь и утре, и да исперут ризы, 11 и да будут готовы в день третий: в третий бо день снидет Господь на гору Синайскую пред всеми людьми: 12 и устроиши люди окрест глаголя: внемлите себе не восходити на гору и ни чимже коснутися ея: всяк прикоснувыйся горе смертию умрет: 13 не коснется ей рука, камением бо побиется или стрелою устрелится, аще скот, аще человек, не будет жив: егда же гласи и трубы и облак отидет от горы, сии взыдут на гору. 14 Сниде же Моисей с горы к людем, и освяти я, и испраша ризы своя: 15 и рече людем: будите готови, три дни не входите к женам. 16 Бысть же в третий день бывшу ко утру, и быша гласи и молния и облак мрачен на горе Синайстей, глас трубный глашаше зело: и убояшася вси людие, иже в полце: 17 изведе же Моисей люди во сретение Богу из полка, и сташа под горою. 18 Гора же Синайская дымяшеся вся, схождения ради Божия на ню во огни, и восхождаше дым, яко дым пещный: и ужасошася вси людие зело. 19 Быша же гласи трубнии происходяще крепцы зело: Моисей глаголаше, Бог же отвещаваше ему гласом. 20 Сниде же Господь на гору Синайскую на верх горы, и воззва Господь Моисеа на верх горы, и взыде Моисей: 21 и рече Бог к нему глаголя: сошед засвидетелствуй людем, да не когда приступят к Богу уразумети, и падут от них мнози: 22 жерцы же приступающии ко Господу Богу да освятятся, да не когда погубит от них Господь. 23 И рече Моисей к Богу: не возмогут людие взыти на гору Синайскую: Ты бо завещал еси нам глаголя: определи гору и освяти ю. 24 И рече ему Господь: иди, сниди и взыди ты и Аарон с тобою: жерцы же и людие да не нудятся взыти к Богу, да не когда погубит от них Господь. 25 Сниде же Моисей к людем и поведа им. === 20 === 1 И глагола Господь вся словеса сия к Моисею глаголя: 2 Аз есмь Господь Бог твой, изведый тя от земли Египетския, от дому работы: 3 да не будут тебе бози инии разве Мене. 4 Не сотвори себе кумира и всякаго подобия, елика на небеси горе и елика на земли низу, и елика в водах под землею: 5 да не поклонишися им, ни послужиши им: Аз бо есмь Господь Бог твой, Бог ревнитель, отдаяй грехи отец на чада до третияго и четвертаго рода ненавидящым Мене, 6 и творяй милость в тысящах любящым Мя и хранящым повеления Моя. 7 Не возмеши имене Господа Бога твоего всуе: не очистит бо Господь приемлющяго имя Его всуе. 8 Помни день субботный, еже святити его: 9 шесть дний делай и сотвориши (в них) вся дела твоя: 10 в день же седмый, суббота Господу Богу твоему: да не сотвориши всякаго дела в онь ты и сын твой и дщерь твоя, и раб твой и раба твоя, и вол твой и осля твое и всякий скот твой, и пришлец обитаяй у тебе: 11 зане в шести днех сотвори Господь небо и землю, море и вся яже в них, и почи в день седмый: сего ради благослови Господь день седмый и освяти его. 12 Чти отца твоего и матерь твою, да благо ти будет и да долголетен будеши на земли блазе, юже Господь Бог твой дает тебе. 13 Не убий. 14 Не прелюбы сотвори. 15 Не укради. 16 Не послушествуй на друга своего свидетелства ложна. 17 Не пожелай жены искренняго твоего, не пожелай дому ближняго твоего, ни села его, ни раба его, ни рабыни его, ни вола его, ни осла его, ни всякаго скота его, ни всего, елика суть ближняго твоего. 18 И вси людие зряху глас и свещы, и глас трубный и гору дымящуюся: и убоявшеся вси людие сташа издалече, 19 и рекоша Моисею: глаголи ты с нами, и да не глаголет к нам Бог, да не когда умрем. 20 Рече же им Моисей: дерзайте: искушения бо ради прииде Бог к вам, яко да будет страх Его в вас, да не согрешаете. 21 Стояху же вси людие издалече: Моисей же вниде во мрак, идеже бяше Бог. 22 Рече же Господь к Моисею: сия речеши дому Иаковлю и возвестиши сыном Израилевым: вы видесте, яко с небесе глаголах к вам: 23 не сотворите себе сами богов сребряных и богов златых не сотворите самым себе: 24 олтарь из земли сотворите Ми и пожрете на нем всесожжения ваша и спасителная ваша, и овцы и телцы вашя, на всяком месте, идеже нареку имя Мое тамо, и прииду к тебе и благословлю тя: 25 аще же олтарь от камений сотвориши Ми, да не устроиши их тесаных: сечиво бо твое аще возложиши на них, то осквернятся: 26 да не взыдеши по степенем ко олтарю Моему, яко да не открыеши срамоты твоея на нем. === 21 === 1 И сия оправдания, яже да положиши пред ними: 2 аще стяжеши раба Евреина, шесть лет да поработает тебе, в седмое же лето отпустиши его свободна туне: 3 аще сам един внидет, то един и изыдет: аще же жена внидет с ним, то и жена отидет с ним: 4 аще же господин даст ему жену, и родит ему сыны или дщери, жена и дети да будут господину его, сам же един да отидет. 5 Аще же отвещав раб речет: возлюбих господина моего и жену мою и дети моя, не отхожду свободен: 6 да приведет его господин его пред судище Божие, и тогда приведет его пред двери на праг, и да провертит ему ухо господин его шилом, и да поработает ему во веки. 7 Аще же кто продаст свою дщерь в рабыню, да не отидет, якоже отходят рабыни: 8 аще не угодит пред очима господина своего, юже он взяти в жену обеща, да отпустит ю: языку же чуждему господин да не продаст ея, понеже отверже ю: 9 аще же сыну своему обещал ю, по обыкновению дщерей да сотворит ей: 10 аще же другую поймет себе, потребных и одежд и союбщения ея да не лишит: 11 аще же сих трех не сотворит ей, да отидет без сребра туне. 12 И аще кого кто ударит, и умрет, смертию да умрет (и той): 13 аще же не хотя, но Бог предаде в руце его, дам тебе место, в неже убежит тамо убивый: 14 аще же кто приложит убити ближняго своего лестию и прибегнет ко олтарю, от олтаря Моего да возмеши того умертвити. 15 Иже биет отца своего или матерь свою, смертию да умрет. 16 Иже злословит отца своего или матерь свою, смертию да умрет. 17 Аще кто кого украдет от сынов Израилевых, и соодолев сему продаст его, и обрящется у него, смертию да скончается. 18 Аще же сварятся два мужа, и ударит един другаго каменем или пястию, и не умрет, но сляжет на одре: 19 аще востав человек походит вне о жезле, неповинен будет ударивый его: точию за неделание его да даст цену и на цельбу. 20 Аще же кто ударит раба своего или рабу свою жезлом, и умрет от руки его, судом да отмстится: 21 аще же преживет день един или два, да не мстится: сребро бо его есть. 22 Аще же биются два мужа, и поразят жену непраздну, и изыдет младенец ея неизображен, тщетою да отщетится: якоже наложит муж жены тоя, подобающее да отдаст: 23 аще же изображен будет, да даст душу за душу, 24 око за око, зуб за зуб, руку за руку, ногу за ногу, 25 жжение за жжение, язву за язву, вред за вред. 26 Аще же кто исткнет око рабу своему или око рабыни своей и ослепит, свободны да отпустит я за око их: 27 аще же зуб рабу своему или зуб рабе своей избиет, свободны да отпустит я за зуб их. 28 Аще же вол убодет мужа или жену, и умрет, камением да побиется вол той, и да не снедят мяса его, господин же вола неповинен будет: 29 аще же вол бодлив будет прежде вчерашняго и третияго дне, и возвестят господину его, и не заключит его, и убиет мужа или жену: вол камением да побиется, и господин его купно да умрет: 30 аще же окуп наложится ему, да даст окуп за душу свою, елико наложат ему: 31 аще же сына или дщерь убодет, по сему же суду да сотворят ему: 32 аще же раба или рабу убодет вол, сребра тридесять дидрахм да даст господину их, и вол камением да побиется. 33 Аще же кто отверзет яму или ископает яму и не покрыет ея, и впадется в ню телец или осля, 34 господин ямы отдаст (цену), сребро даст господину их: умершее же ему да будет. 35 Аще же чий вол убодет вола ближняго, и умрет, да продадут вола живаго, и да разделят цену его, и вола умершаго да разделят: 36 аще же знаемь есть вол, яко бодлив есть прежде вчерашняго и третияго дне, и глаголаша господину его, и той не заключит его: да отдаст вола за вола, мертвый же ему да будет. === 22 === 1 Аще же кто украдет телца или овцу, и заколет или продаст, пять телцев да воздаст за телца и четыри овцы за овцу. 2 Аще же в подкопании обрящется тать, и язвен умрет, несть ему убийство: 3 аще же взыдет солнце над ним, повинен есть, умрет за него: аще же не имать имения, да продастся за татьбу: 4 аще же ят будет, и обрящется в руце его украденое от осляте до овцы живо, сугубо да отдаст я. 5 Аще же кто потравит ниву или виноград, и пустит скот свой пастися на чужей ниве, да даст от нивы своея по плоду его: аще же всю ниву потравит, лучшая нивы своея и лучшая винограда своего да отдаст. 6 Аще же изшед огнь обрящет терние и запалит гумно, или класы, или ниву, да отдаст, иже возже огнь. 7 Аще же кто даст другу сребро или сосуд сохранити, и украдется из дому мужа того, аще обрящется украдый, да воздаст сугубо: 8 аще же не обрящется украдый, да приидет господин дому пред бога и да кленется, яко поистинне не слукавствова он о всем положении дружнем. 9 По всей реченней неправде, о теляти и о осляти и о овце, и о ризе и о всей гибели нанесенней, что убо ни было бы, пред богом да приидет суд обоих, и обвиненный богом да отдаст сугубо ближнему. 10 Аще же кто даст другу осля или телца, или овцу, или всяк скот хранити, и умрет или погибнет, или пленено будет, и никтоже увесть, 11 клятва да будет Божия между обоими, яко поистинне не слукавствова он о всем ближняго положении, и тако приимет господин его, и да не отдаст: 12 аще же украдено будет от него, да отдаст господину: 13 аще же зверь снеде, да ведет его на звероядину, и не отдаст: 14 аще же кто испросит у друга, и погибнет, или умрет, или пленится, господин же его не будет с ним, отдаст: 15 аще же господин его будет с ним, да не отдаст: аще же наемник есть, да будет ему вместо мзды его. 16 Аще же прельстит кто не обручену девицу, и будет с нею, веном да отвенит ю, (и поймет ю) себе в жену: 17 аще же возбраняя возбранит и не восхощет отец ея дати ю ему в жену, сребро да воздаст отцу, елико есть вено девическо. 18 Волхвом живым быти не попустите. 19 Всякаго со скотом бывающа смертию убиете его. 20 Иже жертву приносит богом, смертию да потребится, но точию Господу единому. 21 И пришелца не озлобите, ниже оскорбите его: пришелцы бо бесте в земли Египетстей. 22 Всякия вдовы и сироты не озлобите: 23 аще же злобою озлобите Я, и возстенавше возопиют ко мне, слухом услышу глас их 24 и разгневаюся яростию, и побию вы мечем, и будут жены вашя вдовы, и чада ваша сироты. 25 Аще же даси сребро взаем брату нищему иже у тебе, не буди его понуждаяй, ниже наложиши ему лихвы. 26 И аще заложит в залог ризу друг твой, до захождения солнца отдаси ему: 27 есть бо сия покровение ему, сия едина риза стыдения его, в чем спати будет: аще убо возопиет ко Мне, услышу его: милостив бо есмь. 28 Богов да не злословиши и князю людий твоих да не речеши зла. 29 Начатки от гумна и от точила твоего да не косниши принести (Мне): первенцы сынов твоих да даси Мне: 30 тако сотвориши телцу твоему, и овце твоей, и ослу твоему: седмь дний да будет у матери, в осмый же день да отдаси оное Мне. 31 Люди святи будете Ми, и мяса звероядиннаго да не снесте, псом повержете е. === 23 === 1 Да не приимеши слуха суетна, да не приложишися с неправедным быти свидетель неправеден: 2 да не будеши со многими на злобу, да не приложишися ко множеству уклонитися со множайшими, яко превратити суд, 3 и нищаго да не помилуеши на суде. 4 Аще же срящеши говядо врага твоего или осля его заблуждающее, обратив да отдаси ему: 5 аще же узриши осля врага твоего падшее под бременем его, да не мимоидеши е, но да воздвигнеши е с ним. 6 Да не превратиши суда нищему в суде его. 7 От всякаго слова неправеднаго да отступиши: неповинна и праведна да не убиеши, и не оправдиши нечестиваго даров ради, 8 и да не возмеши даров: дары бо ослепляют очи видящым и погубляют словеса праведна. 9 И пришелца не оскорбляйте, ни стужите (ему): вы бо весте душу пришелчу, понеже сами бесте пришелцы в земли Египетстей. 10 Шесть лет да сееши землю твою и да собереши плоды ея: 11 в седмое же оставление да сотвориши и опустиши ю, и да ясти будут убозии языка твоего, останки же да снедят зверие дивии: тако да сотвориши винограду твоему и масличию твоему. 12 В шесть дний да сотвориши дела твоя, в седмый же день покой: да почиет вол твой и осел твой, и да почиет сын рабы твоея и пришлец. 13 Вся, елика глаголах вам, сохраните, имен же богов инех не поминайте, ниже да слышатся изо уст ваших. 14 Три краты в лете сотворите Ми праздник: 15 праздник опресноков сохраните творити, седмь дний ядите опресноки, якоже заповедах тебе, во время месяца новых плодов, в той бо изшел еси из Египта, да не явишися предо Мною тощь: 16 и праздник жатвы первородных жит сотвориши от дел твоих, яже посееши на ниве твоей: и праздник скончания при исходе лета в собрании дел твоих, яже от нив твоих. 17 Три краты в лете да явится всяк мужеск пол твой пред Господем Богом твоим. 18 Егда бо изжену языки от лица твоего и разширю пределы твоя, да не пожреши на квасе крове жертвы Моея, ниже да долежит тук праздника Моего до утрия. 19 Начатки первых жит земли твоея да внесеши в дом Господа Бога твоего. Да не свариши ягняте во млеце матере его. 20 И се, Аз послю Ангела Моего пред лицем твоим, да сохранит тя на пути, яко да введет тя в землю, юже уготовах тебе: 21 вонми себе и послушай Его, и не ослушайся Его: не обинется бо тебе, имя бо Мое есть на Нем: 22 аще слухом послушаеши гласа Моего и сотвориши вся, елика Аз заповедаю тебе, и сохраниши завет Мой, будете Ми люди избранни от всех язык: Моя бо есть вся земля, вы же будете Ми царское священие и язык свят. Сия словеса да речеши сыном Израилевым. Аще слухом послушаеши гласа Моего и сотвориши вся, елика реку тебе, враг буду врагом твоим и сопротивлюся сопротивником твоим. 23 Пойдет бо Ангел Мой наставляяй тя и введет тя ко Аморрею и Хеттею, и Ферезею и Хананею, и Гергесею и Евею и Иевусею, и потреблю их (от лица вашего): 24 да не поклонишися богом их, ниже послужиши им: да не сотвориши по делом их, но разорением разориши и сокрушением сокрушиши капища их, 25 и да послужиши Господу Богу твоему: и благословлю хлеб твой и вино твое и воду твою, и отвращу болезнь от вас. 26 Не будет безчаден, ниже неплоды на земли твоей: число дний твоих исполняя исполню. 27 И страх послю ведущий тя, и устрашу вся языки, в няже ты входиши к ним, и дам вся сопротивники твоя в бегуны: 28 и послю шершни пред тобою, и изжену Аморреи и Евеи, и Иевусеи и Хананеи и Хеттеи от тебе: 29 не изжену их в лете единем, да не будет земля пуста, и мнози будут на тя звери земнии: 30 помалу помалу изжену их от тебе, дондеже возрастеши и наследиши землю. 31 И положу пределы твоя от Чермнаго моря до моря Филистимля, и от пустыни до реки великия Евфрата, и предам в руце ваши седящих на земли и изжену их от тебе: 32 да не смесишися с ними, и с боги их да не завещаеши завета, 33 и да не останутся на земли твоей, да не сотворят тя согрешити ко Мне: аще бо поработаеши богом их, сии будут тебе в соблазн. === 24 === 1 И Моисею рече: взыди ко Господу ты и Аарон, и Надав и Авиуд и седмьдесят старец Израилевых, и да поклонятся издалече Господу: 2 и да приступит Моисей един к Богу, они же да не приступят: и людие с ними да не взыдут. 3 Прииде же Моисей и поведа людем вся словеса Божия и оправдания. Отвещаша же вси людие гласом единым, глаголюще: вся словеса, яже глагола Господь, сотворим и послушаем. 4 И написа Моисей вся словеса Господня: обутрев же Моисей заутра, созда олтарь под горою, и дванадесять камений в дванадесять племен Израилевых: 5 и посла юношы сынов Израилевых, и принесоша всесожжения, и пожроша жертву спасения Господу Богу телцы. 6 Взем же Моисей половину крове, влия в чашы, половину же крове возлия на олтарь, 7 и взем книгу завета, прочте людем во ушы. И рекоша: вся, елика глагола Господь, сотворим и послушаем. 8 Взем же Моисей кровь, окропи люди и рече: се, кровь завета, егоже завеща Господь к вам о всех словесех сих. 9 И взыде Моисей и Аарон, и Надав и Авиуд и седмьдесят от старец Израилевых, 10 и видеша место, идеже стояше Бог Израилев: и под ногама Его яко дело камене сапфира, и яко видение тверди небесныя чистотою. 11 И от избранных Израилевых не повредися ни един: и явишася на месте Божии, и ядоша, и пиша. 12 И рече Господь к Моисею: взыди ко Мне на гору и стани тамо, и дам ти скрижали каменныя, закон и заповеди, яже написах законоположити им. 13 И востав Моисей и Иисус предстоявый ему, взыдоша на гору Божию 14 и старцем реша: пождите в молчании зде, дондеже возвратимся к вам: и се, Аарон и Ор с вами: аще кому случится суд, да идут к ним. 15 И взыде Моисей на гору, и покры облак гору, 16 и сниде слава Божия на гору Синайскую, и покры ю облак шесть дний. И воззва Господь Моисеа в день седмый из среды облака: 17 обличие же славы Господни, яко огнь пламенуя на версе горы, пред сыны Израилевы. 18 И вниде Моисей в среду облака и взыде на гору, и бе тамо на горе четыредесять дний и четыредесять нощей. === 25 === 1 И рече Господь к Моисею, глаголя: 2 рцы сыном Израилевым, и да возмут Ми начатки от всех, яже угодна будут сердцу их, да возмете начатки Моя. 3 Сей же есть начаток, егоже возмете от них: злато и сребро и медь, 4 и синету и багряницу, и червленицу сугубу (пряденую), и виссон сканый, и власы козия, 5 и кожы овни очервленены, и кожы сини, и древа негниющая, 6 и елей в свещение, фимиам во елей помазания и в сложение фимиама, 7 и камени Сардийския, и камени в ваяние на епомиду и подир. 8 И да сотвориши Ми освящение, и явлюся в вас: 9 и сотвориши ми по всему, елика Аз покажу тебе на горе, образ скинии и образ всех сосудов ея: сице да сотвориши. 10 И сотвориши кивот свидения от древ негниющих, двою лактий и пол в долготу, и лактя и пол в широту, и лактя и пол в высоту: 11 и позлатиши его златом чистым, внутрьуду и внеуду позлатиши его, и сотвориши верху его венец злат витый окрест: 12 и слиеши ему четыри колца злата, и возложиши на четыри страны его, два колца на едину страну, и два на другую страну. 13 Сотвориши же носила от древа негниюща и позлатиши я златом чистым: 14 и вложиши носила в колца, яже на странах кивота, носити ими кивот: 15 в колцах кивота да будут носила не зыблющеся: 16 и вложиши в кивот свидения, яже дам тебе. 17 И да сотвориши очистилище покров от злата чиста, двою лактий и пол в долготу, лактя же и пол в широту: 18 и сотвориши два херувима злата изваянна, и возложиши я от обоих стран очистилища: 19 да сотворятся херувими, един от страны сея и другий от страны другия очистилища, и сотвориши два херувима на обоих странах: 20 да будут херувими распростирающе крила верху, соосеняюще крилами своими над очистилищем, и лица их ко другъдругу, на очистилище будут лица херувимска: 21 и да возложиши очистилище на кивот верху, и в кивот да вложиши свидения, яже дам тебе. 22 И познан буду тебе оттуду, и возглаголю тебе с верху очистилища между двема херувимы, иже суть над кивотом свидения, и по всем, елика аще заповем тебе к сыном Израилевым. 23 И сотвориши трапезу от древ негниющих, двою лактий в долготу, и лактя в широту, и лактя и пол в высоту: 24 и позлатиши ю златом чистым, и сотвориши ей витое обложение златое окрест, и сотвориши ей венец длани окрест, 25 и сотвориши витое обложение венцу окрест. 26 И сотвориши четыри колца злата, и возложиши четыри колца на четыри страны ног ея под венец: 27 и да будут колца на влагалища носилам, яко воздвизати ими трапезу. 28 И сотвориши носила ея от древ негниющих, и позлатиши я златом чистым, и воздвизатися будет на них трапеза. 29 И сотвориши блюда ея и фимиамники, и возливалники и чашы, имиже возливати будеши: от злата чиста да сотвориши я. 30 И возлагати будеши на трапезу хлебы предложения предо Мною присно. 31 И да сотвориши светилник от злата чиста, изваян да сотвориши светилник: стебль его и ветви, и чашы и крузи и крины от него да будут: 32 шесть же ветвий исходящих от стран, три ветви светилника от страны его единыя и три ветви светилника от страны вторыя: 33 и три чашы во образ ореха, на единей ветви круг и крин: тако шести ветвам исходящым от светилника: 34 и на светилнике четыри чашы во образ ореха, на единей ветви крузи и крины его: 35 круг под двема ветвми от него, и круг под четырми ветвми от него: тако шести ветвам исходящым от светилника: и на светилнике четыри чашы во образ ореха: 36 крузи и ветви от него да будут: весь изваян от единаго злата чиста. 37 И да сотвориши светил его седмь, и поставиши светила его, и светити будут от единаго лица его: 38 и щипцы его, и подставы его от злата чиста сотвориши: 39 талантом злата чиста да сотвориши вся сосуды сия. 40 Виждь, да сотвориши по образу показанному тебе на горе. === 26 === 1 Скинию же да сотвориши от десяти опон от виссона сканаго и синеты, и багряницы и червленицы сканыя: херувимы делом тканым да сотвориши я. 2 Долгота опоны единыя двадесять и осмь лактий, и широта четырех лактий, опона едина да будет: мера таяжде да будет всем опонам. 3 Пять же опон да будут взаим придержащяся едина от другия, и пять опон да будут содержащяся друга о друзей. 4 И да сотвориши им петли из синеты у края опоны единыя, от единыя страны в сложение: и сице сотвориши на краю опоны внешния к сложению второму. 5 Пятьдесят же петлей сотвориши единей опоне, и пятьдесят петлей да сотвориши от края опоны по сложению вторыя, лицем к лицу сходящыяся между собою каяждо. 6 И сотвориши пятьдесят крючков златых и совокупиши опоны едину ко друзей крючками: и будет скиния едина. 7 И да сотвориши опоны власяныя в покров над скиниею, единонадесять опон сотвориши их. 8 Долгота опоны единыя да будет тридесяти лактий, и четырех лактий широта опоны единыя: таяжде мера да будет единонадесяти опонам. 9 И совокупиши пять опон вкупе, и шесть опон вкупе: и усугубиши опону шестую ко входу скинии. 10 И да сотвориши петлей пятьдесят на краи опоны единыя, яже среде по сложению, и пятьдесят петлей да сотвориши на краи опоны совокупляющияся вторыя. 11 И сотвориши крючков медяных пятьдесят: и совокупиши крючки с петлями, и да совокупиши опоны, и будет едино. 12 И да подложиши излишнее от опон скинии: полуюпоною оставшеюся да покрыеши излишнее опон скинии: да прикрыеши созади скинии. 13 Лакоть (един) от сего, и лакоть (един) от другаго, от излишняго опон, в долготу опон скинии: да будет покрывающее на стране скинии, сюду и сюду да покрывает. 14 И да сотвориши покров скинии от кож овних червленых, и прикрывала от кож синих сверху. 15 И да сотвориши столпы скинии от древ негниющих: 16 десяти лактий (в высоту) да сотвориши столп един, лактя же единаго и пол широта столпа единаго: 17 два закройца (на краях) столпу единому, противу стояща другъдругу: тако сотвориши всем столпом скинии. 18 И да сотвориши столпы скинии, двадесять столпов от страны яже к северу: 19 и четыредесять стоялов сребряных да сотвориши двадесятим столпом: два стояла единому столпу на обоих краех его и два стояла другому столпу на обоих краех его: 20 и в стране вторей южней двадесять столпов: 21 и четыредесять стоялов им сребряных: два стояла столпу единому на обоих краех его и два стояла столпу другому на обоих краех его. 22 И созади скинии по стране яже к морю да сотвориши шесть столпов, 23 и два столпа сотвориши во углах скинии созади. 24 И будут равни от долу: по томужде да будут равни от глав в состав един: тако да сотвориши обоим двум углам: равни да будут. 25 И да будут осмь столпы и стояла их сребряна шестьнадесять: два стояла единому столпу и два стояла другому столпу, на обоих краех его. 26 И да сотвориши вереи от древ негниющих: пять верей столпу единому от единыя страны скинии, 27 и пять верей столпу единому вторей стране скинии, и пять верей столпу заднему стране скинии, яже к морю: 28 и верея средняя посреде столпов да проходит от единыя страны в другую страну. 29 И столпы да позлатиши златом: и колца сотвориши злата, в няже вложиши вереи: и позлатиши вереи златом. 30 И возставиши скинию по образу показанному тебе на горе. 31 И да сотвориши завесу от синеты и багряницы, и червленицы сканыя и виссона пряденаго: делом тканым да сотвориши ю херувимы. 32 И возложиши ю на четыри столпы негниющыя позлащены златом: и верхи их златы, и стояла их четыри сребряна. 33 И повесиши завесу на столпех, и внесеши тамо внутрь завесы кивот свидения: и разделяти будет завеса вам посреде святилища и посреде Святая святых, 34 и закрыеши завесою кивот свидения во Святая святых. 35 И поставиши трапезу вне завесы, и светилник прямо трапезы на стране скинии, яже к югу: и трапезу поставиши на стране скинии, яже к северу. 36 И да сотвориши закров в дверех скинии от синеты и багряницы, и червленицы сканыя и виссона сканаго, делом пестрящаго. 37 И да сотвориши завесе пять столпов от древ негниющих, и позлатиши их златом, и верхи их златы: и да слиеши им пять стоял медяных. === 27 === 1 И да сотвориши олтарь от древ негниющих, пяти лакот в долготу и пяти лакот в широту: четвероуголен да будет олтарь, и трех лактий высота его. 2 И да сотвориши роги на четырех углех: из него да будут роги, и покрыеши я медию. 3 И да сотвориши венец олтарю: и покров его, и фиалы его, и вилицы его, и кадилник его, и вся сосуды его да сотвориши медяны. 4 И да сотвориши ему огнище на подобие мрежи медяно: и сотвориши огнищу четыри колца медяна на четыри страны, 5 и подложиши я под огнище олтаря снизу, и будет огнище до среды олтаря. 6 И да сотвориши олтарю носила от древес негниющих, и окуеши я медию, 7 и вложиши носила в колца: и да будут носила олтарю по бокам, еже подимати его. 8 Тощь, дощатый сотвориши его: по показанному тебе на горе, тако сотвориши его. 9 И да сотвориши двор скинии: на стране, яже к югу, завесы двора из виссона сканаго: долгота сто лакот стране единей: 10 и столпы их двадесять, и стояла их двадесять медяна, и крючки их, и верхи их сребряны. 11 Такожде на стране, яже к северу, завесы сто лакот в долготу, и столпы их двадесять, и стояла их двадесять медяна, и крючки их, и верхи столпов, и стояла их посребрена сребром. 12 Широта же двора, яже к морю, опоны пятьдесят лакот: столпы их десять, и стояла их десять. 13 И широта двора, яже к востоку, завесы пятьдесят лактий: столпы их десять, и стояла их десять. 14 И пятьнадесять лакот высота опон стране единей: столпы их три, и стояла их три: 15 и стране вторей опон пятьнадесять лакот высота: столпы их три, и стояла их три. 16 И вратам двора завеса двадесять лакот в высоту, от синеты и багряницы, и червленицы сканыя и виссона сканаго пестрением швенным: столпы их четыри, и стояла их четыри. 17 Вси столпы двора окрест окованы сребром, и верхи их сребряны, и стояла их медяна. 18 Долгота же двора сто на сто, и широта пятьдесят на пятьдесят, и высота пяти лактий от виссона сканаго: и стояла их медяна. 19 И все устроение, и вся орудия, и гвозди двора медяны. 20 И ты заповеждь сыном Израилевым, и да возмут тебе елей от масличия без дрождей чист изжат в светение, да горит светилник всегда. 21 В скинии свидения вне завесы, яже над заветом, возжигати будет его Аарон и сынове его, от вечера даже до утра, пред Господем, законно вечно в роды вашя от сынов Израилевых. === 28 === 1 И ты приведи к себе Аарона, брата твоего, и сыны его от сынов Израилевых, да священнодействуют Мне Аарон и Надав, и Авиуд и Елеазар и Ифамар, сынове Аарони. 2 И да сотвориши ризу святу Аарону брату твоему в честь и славу. 3 И ты возглаголи ко всем премудрым умом, ихже наполних духа мудрости и смышления: и да сотворят ризу святу Аарону, в нейже имать священнодействовати Мне во святилищи. 4 И сия суть ризы, ихже сотворят: наперсник и ризу верхнюю, и долгую ризу и ризу тресновиту, и наглавие и пояс: и да сотворят ризы святы Аарону и сыном его, во еже священнодействовати Мне. 5 И сии да возмут злато и синету, и багряницу и червленицу и виссон, 6 и да сотворят ризу верхнюю от виссона сканаго, дело тканно пестрящаго. 7 Две ризы верхния да будут ему придержащяся едина друзей, на обе стране связаныя. 8 И ткание риз верхних, еже есть на них, по сотворению их да будет от злата чиста и синеты, и багряницы и червленицы пряденыя и виссона сканаго. 9 И возмеши два каменя, камене смарагда, и изваяеши на них имена сынов Израилевых: 10 шесть имен на камени единем и шесть имен прочиих на камени друзем по родом их, 11 дело каменныя хитрости: ваянием печати изваяеши оба каменя имены сынов Израилевых. 12 И положиши оба каменя на раменах верхния ризы: камени в память суть сыном Израилевым: и воздвигнет Аарон имена сынов Израилевых пред Господем на оба рамена своя в память о них. 13 И да сотвориши щитцы от злата чиста, 14 и да сотвориши две тресновицы от злата чиста, смешены цветами, дело плетения: и возложиши тресновицы сплетеныя на щитцы по нарамником их сопреди. 15 И да сотвориши слово судное, дело пестрящаго: по составу ризы верхния да сотвориши сие от злата и синеты, и багряницы и червленицы пряденыя и виссона сканаго: 16 сотвориши е четвероуголно: да будет сугубо, пяди долгота его и пяди широта, 17 и нашиеши на нем швение каменное в четыри ряда. Ряд камений да будет: сардий, топазий и смарагд, ряд един: 18 и ряд вторый, анфракс и сапфир и иаспис: 19 и ряд третий, лигирий и ахат и амефист: 20 и ряд четвертый, хрисолиф и вириллий и онихий: объяты златом, исплетены в злате да будут по ряду своему. 21 И камение да будут от имен двунадесяти сынов Израилевых пред Господем: на дву раменах его дванадесять по именам их и по родом их, изваяни печатми, коегождо по имени да будут в дванадесять племен. 22 И да сотвориши на слове тресны сплетены, делом верижным, от злата чиста. 23 И да сотвориши на словеси два колца злата: и возложиши два колца злата на оба края словесе. 24 И возложиши тресны и чепи златы на два колца от обоих краев словесе. 25 И два края двух тресн наложиши на две чепочки, и возложиши на рамена верхних риз лицем ко другъдругу. 26 И сотвориши два колца злата, и возложиши на обе страны словесе на край от края задняго верхних риз, отвнутрь. 27 И сотвориши два колца злата, и возложиши на оба рамена верхния ризы снизу его, лицем по согбению свыше соткания верхних риз. 28 И стягнеши слово колцами, яже на нем, с колцами верхних риз сложеными, из синеты плетеными во ткание верхних риз, да не низпускается слово с верхних риз. 29 И да возмет Аарон имена сынов Израилевых на слове суднем на персех, входящь во святое на память пред Богом. И да положиши на словеси суднем тресны: плетения на оба края словесе возложиши, и оба щита возложиши на обе раме нарамника на лице. 30 И да возложиши на слово судное явление и истину: и да будет на персех Аарону, егда внидет в святое пред Господа: и да носит Аарон суды сынов Израилевых на персех пред Господем всегда. 31 И да сотвориши ризу внутреннюю подир всю синю. 32 И да будет устие посреде его, ожерелие имущо кругом устия делом тканым, сгиб сошвен от него, да не раздерется. 33 И да сотвориши на омете ризнем снизу, аки шипка цветущаго, пугвицы из синеты и багряницы, и червленицы пряденыя и виссона сканаго, на омете ризы кругом: в тойже образ пугвицы златы, и звонцы между сими окрест. 34 При пугвице злат звонец, и цвет на омете ризнем, кругом. 35 И да будет Аарону, егда служит, слышан глас его, входящу во святое пред Господа, и исходящу, да не умрет. 36 И да сотвориши дщицу злату чисту: и изобразиши на ней образ печати, Святыня Господня, 37 и да возложиши ю на синету сканую, и да будет на увясле, спреди увясла да будет, 38 и да будет на челе Аарони: и отимет Аарон согрешения святых, елика освятят сынове Израилевы от всякаго даяния святых своих, и да будет на челе Аарони всегда приято ими пред Господем. 39 И тресны риз от виссона: и сотвориши клобук виссонный, и пояс да сотвориши дело пестрящаго. 40 И сыном Аароновым да сотвориши ризы и поясы, и клобуки да сотвориши им в честь и славу: 41 и облечеши в ня Аарона брата твоего и сыны его с ним, и да помажеши их, и исполниши руце их и освятиши их, да Ми священнодействуют. 42 И да сотвориши им надраги льняны покрывати стыдения плоти их, от бедр даже до стегн будут, 43 и да имать Аарон и сынове его, егда входят в скинию свидения, или егда приходят служити к жертвеннику святыни: и да не наведут на ся греха, да не умрут: законное вечное (да будет) ему и семени его по нем. === 29 === 1 И сия суть, яже сотвориши им: освятиши я, яко священнодействовати им Мне: да возмеши же телца единаго от говяд и овна два непорочна: 2 и хлебы пресны смешены с елеем, и опресноки помазаны елеем: из муки пшеничны сотвориши я: 3 и да вложиши я в кош един, и принесеши я в коши, и телца и два овна. 4 И Аарона и сыны его приведеши пред двери скинии свидения, и измыеши я водою: 5 и взем ризы святыя, облечеши Аарона брата твоего, и в хитон подир, и в ризу верхнюю, и в слово: и совокупиши ему слово к нарамнику: 6 и возложиши на главу его клобук: и возложиши дщицу освящение на увясло: 7 и да возмеши от елеа помазания, и да возлиеши и на главу его и помажеши его. 8 И сыны его приведеши и облечеши я в ризы: 9 и опояшеши я поясы, и возложиши на них клобуки, и будет ими священство мне во веки: и совершиши руце Аарони и руце сынов его. 10 И да приведеши телца пред двери скинии свидения, и возложат Аарон и сынове его руце свои на главу телца пред Господем у дверий скинии свидения. 11 И да заколеши телца пред Господем у дверий скинии свидения: 12 и да возмеши от крове телчи и помажеши на рогах олтаревых перстом твоим: останок же весь крове пролиеши у стояла олтарнаго: 13 и да возмеши весь тук, иже на утробе, и препонку печени, и обе почки, и тук иже на них, и возложиши на олтарь: 14 мяса же телча, и кожу, и мотыла да сожжеши на огни вне полка: за грех бо есть. 15 И овна да поймеши единаго, и да возложат Аарон и сынове его руки своя на главу овню: 16 и заколеши его, и взем кровь пролиеши у олтаря окрест: 17 и овна да разсечеши на уды и измыеши внутренняя и ноги в воде, и возложиши на разсеченныя части со главою: 18 и вознесеши всего овна на олтарь, всесожжение Господу в воню благоухания: жертва Господу есть. 19 И да поймеши овна втораго, и возложит Аарон и сынове его руки своя на главу овню: 20 и заколеши его, и возмеши от крове его, и возложиши на край ушесе Аароня деснаго и на край руки десныя и на край ноги десныя, и на край ушес сынов его десных и на край рук их десных и на край ног их десных: 21 и да возмеши от крове, яже на олтари, и от елеа помазания, и да воскропиши на Аарона и на ризу его, и на сыны его и на ризы сынов его с ним: и освятится сам и ризы его, и сыны его и ризы сынов его с ним: кровь же овню да пролиеши у олтаря окрест. 22 И да возмеши от овна тук его, и тук покрывающий утробу его, и препонку печени, и обе почки, и тук иже на них, и рамо десное: есть бо совершение сие: 23 и хлеб един с елеем, и опреснок един от коша опресноков, предложенных пред Господем: 24 и возложиши вся на руки Аарони и на руки сынов его, и отделиши я отделение пред Господем: 25 и да возмеши я от рук их, и вознесеши на олтарь всесожжения в воню благоухания пред Господем: приношение есть Господу. 26 И да возмеши грудь от овна совершения, яже есть Аарону, и отделиши ю отделение пред Господем, и будет тебе в часть: 27 и освятиши грудь отделение, и рамо отлучения, еже отделися, и яже отяся от овна совершения от Аарона и от сынов его, 28 и будет Аарону и сыном его законно вечно от сынов Израилевых: есть бо отделение сие, и отятие будет от сынов Израилевых от жертв спасителных сынов Израилевых, отделение Господу. 29 И ризы святы, яже суть Аарону, да будут сыном его по нем, помазатися им в них и совершити руки своя. 30 Седмь дний да облачится в ня иерей великий, иже вместо его от сынов его, иже внидет в скинию свидения служити во святилищи. 31 И овна совершения да возмеши и испечеши мяса на месте святе, 32 и да ядят Аарон и сынове его мяса овня, и хлебы, яже в коши у дверий скинии свидения: 33 да ядят сия, имиже освятишася в них, совершити руки своя, освятити я: и иноплеменник да не снест от них, суть бо свята. 34 Аще же останется от мяс жертвы совершения и от хлебов до утрия, да сожжеши останки огнем: да не снедятся, освящение бо есть. 35 И сотвориши Аарону и сыном его тако по всем, елика заповедах тебе: седмь дний совершиши руце их. 36 И телца греха ради да сотвориши в день очищения: и да очистиши олтарь, егда освящаеши на нем: и помажеши его, яко освятити его. 37 Седмь дний очистиши олтарь и освятиши его, и будет олтарь святая святых: всяк прикасаяйся олтарю освятится. 38 И сия суть, яже сотвориши на олтари: агнца единолетна непорочна два на всяк день на олтари присно жертву непрестанную: 39 агнца единаго да сотвориши рано, и втораго агнца да сотвориши в вечер: 40 и десятую часть муки пшеничны с елеем смешены, в четвертую часть ина, и возлияние четвертую часть меры ина вина единому овну. 41 И агнца втораго да сотвориши в вечер, якоже утреннюю жертву, и возлияние его: сотвориши в воню благоухания приношение Господу. 42 Жертву всегдашнюю в слухи и в роды вашя пред дверми скинии свидения пред Господем, в нихже познан буду тебе тамо, якоже глаголати к тебе. 43 И завещаю тамо сыном Израилевым, и освящуся во славе Моей, 44 и освящу скинию свидения и олтарь, и Аарона и сыны его освящу, священнодействовати Мне, 45 и нарекуся в сынех Израилевых, и буду им Бог: 46 и уведят, яко Аз есмь Господь Бог их, изведый их из земли Египетския, нарещися им и быти им Бог. === 30 === 1 И да сотвориши олтарь кадилный от древ негниющих: 2 и сотвориши и лактя в долготу и лактя в широту, четвероуголен да будет, и двою лактий в высоту: от него да будут роги его. 3 И позлатиши златом чистым огнище его, и стены его около, и роги его: и да сотвориши ему витый венец злат около. 4 И два колца злата чиста да сотвориши под витым венцем его на обою углу, да сотвориши на обоих странах: и будут колца носилам, якоже подимати оный ими. 5 И да сотвориши носила от древес негниющих, и позлатиши я златом: 6 и да положиши его прямо завесы, сущия у кивота свидения, в нихже познан буду тебе оттуду. 7 И да кадит над ним Аарон фимиамом сложеным благовонным рано рано: егда устрояет светила, да кадит над ним: 8 и егда вжигает Аарон светила с вечера, да кадит над ним: фимиам всегдашний присно пред Господем в роды их: 9 и да не принесеши над него фимиама инаго: приношения, жертвы и возлияния да не пролиеши на него. 10 И да очистит над ним Аарон у рогов его единою в лето: от крове очищения грехов умилостивления единою в лето да очистит его в роды их: святое святых есть Господу. 11 И рече Господь к Моисею, глаголя: 12 аще возмеши исчисление сынов Израилевых в пресмотрении их, и дадят кийждо искупление за душу свою Господу, и не будет в них падения в пресмотрении их. 13 И сие есть, еже дадят, елицы аще приступят в пресмотрение, полдидрахмы, еже есть по дидрахме святей: двадесять цат дидрахма: пол же дидрахмы, дань Господу. 14 Всяк входяй в пресмотрение от двадесяти лет и вышше, да дадут дань Господу: 15 богатый да не приложит, и нищий да не умалит от полудидрахмы, егда дают дань Господу (от сынов Израилевых), еже умоляти о душах ваших. 16 И да возмеши сребро дани от сынов Израилевых, и даси е на соделание скинии свидения: и да будет сыном Израилевым память пред Господем, еже умоляти о душах ваших. 17 И рече Господь Моисею, глаголя: 18 сотвори умывалницу медяну и стояло ей медяно, еже умыватися, и да поставиши ю между скиниею свидения и между олтарем, и да влиеши в ню воду: 19 и да умывает Аарон и сынове его из нея руки своя и ноги водою: 20 егда входят в скинию свидения, да омыются водою, и не умрут: или егда приходят ко олтарю служити и приносити всесожжения Господу, 21 умыют руце и нозе водою, егда входят в скинию свидения, да не умрут, и да будет им законно вечно, ему и родом его по нем. 22 И рече Господь к Моисею, глаголя: 23 и ты возми ароматы, цвет смирны избранныя пять сот сиклев, и киннамома благовонна пол сего, двести пятьдесят, и трости благовонныя двести пятьдесят, 24 и касии пять сот сиклев святаго, и елеа от маслин (меру) ин, 25 и сотвориши сей елей помазание святое, миро помазателное художеством мироварца: елей помазание святое будет, 26 и да помажеши от него скинию свидения, и кивот скинии свидения, 27 и вся сосуды ея, и светилник и вся сосуды его, и олтарь кадилный, 28 и олтарь всесожжения и вся его сосуды, и трапезу и вся ея сосуды, и умывалницу и стояло ея, 29 и освятиши я, и будут святая святых: всяк прикасаяйся им освятится: 30 и Аарона и сыны его помажеши, и освятиши я священнодействовати Мне: 31 и сыном Израилевым да речеши, глаголя: елей масть помазания свят да будет сей вам в роды вашя: 32 плоть человеча да не помажется (им), и по сложению сему да не сотворите сами себе иного сице: свят есть и освящение будет вам: 33 иже аще сотворит сице, и иже аще даст от него иноплеменнику, потребится от людий своих. 34 И рече Господь к Моисею: возми себе ароматы, стакти, ониха и халвана благовонна и ливана чистаго: все то в равну меру да будет: 35 и да сотворят в нем фимиам мироварный, дело мироварца смешеное, чисто, дело сто: 36 и раздробиши от сих по тонку, и положиши прямо свидению в скинии свидения, отюнудуже познан буду тебе тамо: святое святых будет вам фимиам: 37 по сложению сему да не сотворите себе сами, освящение будет вам от Господа: 38 иже аще сотворит сице, еже обоняти от него, погибнет душа того от людий своих. === 31 === 1 И рече Господь к Моисею, глаголя: 2 се, нарекох именем Веселеила сына Урии, сына Орова, от племене Иудина, 3 и наполних его Духом Божиим премудрости и смышления и ведения, во всяком деле разумети 4 и архитектонствовати, делати злато и сребро и медь, и синету и багряницу, и червленицу прядену и виссон сканый, 5 и каменное дело, и различная древоделства делати во всех делех: 6 и Аз дах его и Елиава сына Ахисамахова от племене Данова, и всякому смысленному сердцем дах смысл, и потрудятся, и сотворят вся, елика заповедах тебе: 7 скинию свидения и кивот завета, и очистилище еже верху его, и утварь скинии, 8 и жертвенники, и трапезу и вся сосуды ея, и светилник чистый и вся сосуды его, 9 и умывалницу и стояло ея, 10 и ризы служебныя Аароновы и ризы сынов его, еже священнодействовати Мне, 11 и елей помазания, и фимиам сложения святаго: по всем, елика заповедах тебе, сотворят. 12 И рече Господь к Моисею, глаголя: 13 и ты заповеждь сыном Израилевым, глаголя: смотрите и субботы Моя сохраните: есть бо знамение между Мною и вами в роды вашя, да увесте, яко Аз Господь освящаяй вас: 14 и сохраните субботу, яко свята сия есть Господу и вам: осквернивый ю смертию умрет: всяк, иже сотворит в ню дело, потребится душа та от среды людий своих: 15 шесть дний да сотвориши дела, в день же седмый суббота, покой свят Господу: всяк, иже сотворит дело в седмый день, смертию умрет: 16 и да сохранят сынове Израилевы субботы держати я в роды их: 17 завет вечен во Мне и в сынех Израилевых, знамение есть во мне вечное: яко в шести днех сотвори Господь небо и землю, в седмый же день преста, и почи. 18 И даде (Бог) Моисею, егда преста глаголя ему на горе Синайстей, две скрижали свидения, скрижали каменны написаны перстом Божиим. === 32 === 1 И видевше людие, яко умедли Моисей снити с горы, восташа людие на Аарона и глаголаша ему: востани и сотвори нам боги, иже пойдут пред нами: Моисей бо сей человек, иже изведе нас от земли Египетския, не вемы, что бысть ему. 2 И рече им Аарон: измите усерязи златыя, яже во ушесех жен ваших и дщерей, и принесите ко мне. 3 И изяша вси людие усерязи златы, яже во ушесех жен их, и принесоша ко Аарону. 4 И взя от рук их и слия их делом литым, и сотвори им телца литаго. И рекоша: сии бози твои, Израилю, иже изведоша тя из земли Египетския. 5 И видев Аарон, созда олтарь прямо ему, и проповеда Аарон, глаголя: праздник Господнь утре. 6 И обутреневав наутрие, вознесе всесожжения и принесе жертву спасения. И седоша людие ясти и пити и восташа играти. 7 И рече Господь к Моисею глаголя: иди скоро, сниди отсюду, беззаконноваша бо людие твои, ихже извел еси из земли Египетския: 8 преступиша с пути скоро, егоже заповедал еси им: сотвориша себе телца, и поклонишася ему, и пожроша ему, и реша: 9 сии бози твои, Израилю, иже изведоша тя из земли Египетския: 10 и ныне остави Мя, и возярився гневом на ня, потреблю их, и сотворю тя в язык велик. 11 И помолися Моисей пред Господем Богом и рече: вскую, Господи, яришися гневом на люди Твоя, ихже извел еси из земли Египетския крепостию великою и мышцею Твоею высокою? 12 Да не когда рекут Египтяне, глаголюще: с лукавством изведе их погубити в горах и потребити их от земли: утоли гнев ярости Твоея и милостив буди о злобе людий Твоих, 13 помянув Авраама и Исаака и Иакова, Твоя рабы, имже клялся еси Собою, и рекл еси к ним, глаголя: зело умножу семя ваше, яко звезды небесныя множеством, и всю сию землю, юже рекл еси дати семени их, и обладают ею во веки. 14 И умилостивися Господь о зле, еже рече сотворити людем Своим. 15 И возвратився Моисей, сниде с горы: и две скрижали свидения в руку его, скрижали каменны написаны от обою страну их, сюду и сюду быша написаны: 16 и скрижали дело Божие быша, и написание, написание Божие изваяно на скрижалех. 17 И услышав Иисус глас людий кричащих, рече к Моисею: глас ратный в полце. 18 И рече Моисей: несть глас начинающих одолевати, ниже глас начинающих бежати, но глас начинающих напиватися вином аз слышу. 19 И егда приближашеся к полку, узре телца и лики: и возярився гневом Моисей, поверже из руку своею обе скрижали, и сокруши я под горою: 20 и взем телца, егоже сотвориша, сожже его во огни и сотре его подробну, и разсыпа его по воде, и напои ею сыны Израилевы. 21 И рече Моисей Аарону: что сотвориша тебе людие сии, яко навел еси на них грех велик? 22 И рече Аарон к Моисею: не гневайся, господине: ты бо веси людий сих устремление. 23 Глаголаша бо ми: сотвори нам боги, иже пойдут пред нами: Моисей бо сей человек, иже изведе ны от Египта, не вемы, что бысть ему: 24 и рекох им: иже имать злато, измите: и изяша, и даша мне, и ввергох е во огнь, и излияся телец сей. 25 Видев же Моисей люди, яко разделишася, раздели бо их Аарон в порадование супостатом их: 26 ста же Моисей во вратех полка и рече: аще кто есть Господнь, да идет ко мне. Снидошася убо к нему вси сынове Левиины. 27 И рече им: сия глаголет Господь Бог Израилев: препояшите кийждо свой мечь при бедре и пройдите, и возвратитеся от врат до врат сквозе полк, и убийте кийждо брата своего и кийждо ближняго своего и кийждо соседа своего. 28 И сотвориша сынове Левиины, якоже глагола им Моисей: и паде от людий в той день до трех тысящ мужей. 29 И рече им Моисей: наполнисте руки вашя днесь Господу, кийждо в сыне своем и в брате своем, да дастся на вас благословение. 30 И бысть на утрие, рече Моисей к людем: вы согрешисте грех велик: и ныне взыду к Богу, да умолю о гресе вашем. 31 И возвратися Моисей ко Господу и рече: молюся ти, Господи: согрешиша людие сии грех велик и сотвориша себе боги златы: 32 и ныне, аще убо оставиши им грех их, остави: аще же ни, изглади мя из книги Твоея, в нюже вписал еси. 33 И рече Господь к Моисею: аще кто согреши предо Мною, изглажу его из книги Моея: 34 ныне же иди, сниди и возведи люди сия на место, еже рех тебе: се, Ангел Мой предидет пред лицем твоим: в оньже день присещу, наведу на них грех их. 35 И порази Господь люди за сотворение телца, егоже сотвори Аарон. === 33 === 1 И рече Господь к Моисею: предиди, взыди отсюду ты и людие твои, ихже извел еси от земли Египетския на землю, еюже кляхся Аврааму и Исааку и Иакову, глаголя: семени вашему дам ю: 2 и послю купно Ангела Моего пред лицем твоим, и изженет Хананеа, Аморреа и Хеттеа, и Ферезеа и Гергесеа, и Евеа и Иевусеа: 3 и введу тя в землю текущую млеком и медом: Сам бо не пойду с тобою, яко людие жестоковыйнии суть, да не убию тебе на пути. 4 И услышавше людие слово сие страшное, восплакашася в плачевных (ризах). 5 И рече Господь к Моисею: глаголи сыном Израилевым: вы людие жестоковыйнии, блюдитеся, да не язву другую наведу на вы и потреблю вы: ныне убо сымите ризы славы вашея и утварь, и покажу, яже сотворю вам. 6 И отяша сынове Израилевы утварь свою и ризы от горы Хорива. 7 И взем Моисей кущу свою, потче ю вне полка, далече от полка, и прозвася скиния свидения: и бысть, всяк взыскуяй Господа исхождаше в скинию, яже вне полка. 8 Егда же вхождаше Моисей в скинию вне полка, стояху вси людие смотряще кийждо пред дверми кущи своея, и зряху отходящу Моисею даже внити ему в скинию. 9 Егда же вниде Моисей в скинию, сниде столп облачный и ста пред дверми скинии, и глагола (Господь) Моисею. 10 И видяху вси людие столп облачный стоящь пред дверми скинии: и ставше вси людие, поклонишася кийждо из дверий кущи своея: 11 и глагола Господь к Моисею лицем к лицу, якоже аще бы кто возглаголал к своему другу, и отпущашеся в полк: слуга же Иисус, сын Навин, юноша не исхождаше из скинии. 12 И рече Моисей ко Господу: се, Ты мне глаголеши: изведи люди сия: Ты же не явил ми еси, кого послеши со мною: Ты же мне рекл еси: вем тя паче всех и благодать имаши у Мене: 13 аще убо обретох благодать пред Тобою, яви ми Тебе самаго, да разумно вижду тя, яко да обрет буду благодать пред Тобою, и да познаю, яко людие Твои язык велик сей. 14 И глагола (ему Господь): Аз Сам предиду пред тобою и упокою тя. 15 И рече к Нему Моисей: аще Сам Ты не идеши с нами, да не изведеши мя отсюду: 16 и како ведомо будет воистинну, яко обретох благодать у Тебе аз же и людие Твои, точию идущу Ти с нами? И прославлен буду аз же и людие Твои паче всех язык, елицы суть на земли. 17 Рече же Господь к Моисею: и сие тебе слово, еже рекл еси, сотворю: обрел бо еси благодать предо Мною, и вем тя паче всех. 18 И глагола Моисей: покажи ми славу Твою. 19 И рече (Господь к Моисею): Аз предиду пред тобою славою Моею и воззову о имени Моем, Господь пред тобою: и помилую, егоже аще милую, и ущедрю, егоже аще щедрю. 20 И рече: не возможеши видети лица Моего: не бо узрит человек лице Мое, и жив будет. 21 И рече Господь: се, место у Мене, и станеши на камени: 22 егда же прейдет слава Моя, и положу тя в разселине камене, и покрыю рукою Моею над тобою, дондеже мимоиду: 23 и отиму руку Мою, и тогда узриши задняя Моя: лице же Мое не явится тебе. === 34 === 1 И рече Господь к Моисею: истеши себе две скрижали каменны, якоже и первыя, и взыди ко Мне на гору: и напишу на скрижалех словеса, яже бяху на скрижалех первых, яже сокрушил еси: 2 и буди готов заутра, и взыдеши на гору Синайскую и предстанеши Мне тамо на версе горы: 3 и да никтоже взыдет с тобою, ниже да явится на всей горе: и овцы и говяда да не пасутся близ горы тоя. 4 И истеса две скрижали каменны, якоже и первыя: и утренневав Моисей заутра, взыде на гору Синайскую, якоже завеща ему Господь: и взя Моисей с собою две скрижали каменныя. 5 И сниде Господь во облаце, и предста ему тамо Моисей, и призва именем Господним. 6 И мимоиде Господь пред лицем его и воззва: Господь, Господь Бог щедр и милостив, долготерпелив и многомилостив и истинен, 7 и правду храняй, и творяй милость в тысящы, отемляй беззакония и неправды и грехи, и повиннаго не очистит, наводяй грехи отцев на чада, и на чада чад, до третияго и четвертаго рода. 8 И потщався Моисей, приник на землю, поклонися Богу 9 и рече: аще обретох благодать пред Тобою, да идет Господь мой с нами: людие бо жестоковыйнии суть: и отимеши ты грехи нашя и беззакония наша, и будем Твои. 10 И рече Господь к Моисею: се, Аз полагаю тебе завет пред всеми людьми твоими, и сотворю славная, яже не быша по всей земли и во всех языцех: и узрят вси людие, в нихже еси ты, дела Господня, яко чудна суть, яже Аз сотворю тебе: 11 внемли ты вся, елика Аз заповедаю тебе: се, Аз изжену пред лицем вашим Аморреа и Хананеа, и Хеттеа и Ферезеа, и Евеа и Гергесеа и Иевусеа: 12 внемли себе, да не когда завещаеши завет седящым на земли, в нюже внидеши, да не будет соблазн в вас: 13 капища их разорите и кумиры их сокрушите, и дубравы их посецыте, и изваяная богов их сожжите огнем, 14 не бо поклонитеся богом иным: ибо Господь Бог ревниво имя, Бог ревнив есть: 15 да не когда завещаеши завет седящым на земли, и соблудят вслед богов их, и пожрут богом их, и призовут тя, и снеси от жертв их: 16 и поймеши от дщерей их сыном твоим, и от дщерей твоих даси сыном их, и соблудят дщери твоя вслед богов их, и сынове твои соблудят вслед богов их: 17 и богов слияных да не сотвориши себе: 18 и праздник опресночный да сохраниши: седмь дний да яси опресноки, якоже заповедах тебе, во время в месяце новых плодов: в месяце бо новых плодов изшел еси от земли Египетския: 19 всяко разверзающее ложесна мужеск Мне пол (да будет), всяко первородное телца и первородное овцы: 20 и первородное осляте искупиши овцею: аще же не искупиши е, цену да даси его: всякаго первенца от сынов твоих да искупиши, да не явишися предо Мною тощь: 21 в шесть дний да делаеши, в седмый же день да почиеши, от сеятвы и жатвы да почиеши, 22 и праздник седмиц да сотвориши ми, начало жатвы пшеницы, и праздник собрания посреде лета: 23 в три времена лета да явится всяк мужеск пол твой пред Господем Богом Израилевым: 24 егда бо изжену языки от лица твоего и разширю пределы твоя, никтоже возжелает земли твоея, егда приидеши явитися пред Господем Богом твоим в три времена лета: 25 да не заколеши с квасом крове жертв Моих, и да не прележит до утрия жертва праздника Пасхи: 26 первородная жит земли твоея да внесеши в дом Господа Бога твоего: да не свариши агнца во млеце матере его. 27 И рече Господь к Моисею: напиши себе словеса сия, в словесех бо сих положих тебе завет и Израилю. 28 И бе тамо Моисей пред Господем четыредесять дний и четыредесять нощей: хлеба не яде и воды не пи: и написа (Моисей) на скрижалех словеса сия завета, десять словес. 29 Сходящу же Моисею с горы Синайския, и обе скрижали в руку Моисеову: сходящу же ему с горы, и Моисей не ведяше, яко прославися зрак плоти лица его, егда глаголаше с ним. 30 И виде Аарон и вси сынове Израилевы Моисеа, и бяше прославлен зрак плоти лица его: и убояшася приступити к нему. 31 И воззва их Моисей, и обратишася к нему Аарон и вси князи сонма: и глагола Моисей к ним. 32 И по сих приидоша к нему вси сынове Израилевы: и заповеда им вся, елика глагола к нему Господь на горе Синайстей. 33 И егда преста глаголя к ним, возложи на лице свое покров. 34 Егда же вхождаше Моисей пред Господа глаголати к Нему, снимаше покров, дондеже исхождаше: и изшед глаголаше ко всем сыном Израилевым, елика заповеда ему Господь. 35 И видеша сынове Израилевы лице Моисеово, яко прославися: и возлагаше Моисей покров на лице свое, дондеже внидет глаголати с Ним. === 35 === 1 И собра Моисей весь сонм сынов Израилевых и рече к ним: сия словеса, яже глагола Господь творити я: 2 шесть дний сотвориши дела, в день же седмый почиеши, свята суббота, покой Господу: всяк творяй дело в ню, да умрет: 3 да не возгнетите огня во всех домех ваших в день субботный: Аз Господь. 4 И рече Моисей ко всему сонму сынов Израилевых, глаголя: сие слово, еже завеща Господь глаголя: 5 возмите от себе самих участие Господу: всяк по воли сердца своего да принесет начатки Господу, злато, сребро, медь, 6 синету, багряницу, червленицу сугубу спрядену, и виссон сканый и волну козию, 7 и кожы овни очервлены, и кожы сини, и древеса негниюща, 8 и елей во свещение, и фимиам в елей помазания, и в сложение фимиама: 9 и камени сардийски, и камени в ваяние на ризу верхнюю и на подир: 10 и всяк премудрый сердцем в вас шед да делает вся, елика заповеда Господь: 11 скинию и завесы, и покровы и разворы, и колки и вереи, и столпы и стояла: 12 и кивот свидения и носила его, и очистилище его и завесу, (и опоны двора, и столпы его, и камени смарагдовы, и фимиам и елей помазания,) 13 и трапезу и носила ея, и вся сосуды ея, и хлебы предложения, (и олтарь и вся сосуды его,) 14 и светилник света и вся сосуды его, и светила его и елей светилный, 15 и олтарь кадилный и носила его, и елей помазания, и фимиам сложения, и завесу дверий скинии, 16 и олтарь всесожжения, и огнище его медяно и носила его, и вся сосуды его, и умывалницу, и стояло ея, 17 и опоны двора, и столпы его и стояла его, и завесу дверий двора, 18 и колки скинии, и колки двора, и ужы их: 19 и ризы святыя Аарона жерца, и ризы, в нихже служити имут во святем, и ризы сыном Аароновым священства (и елей помазания, и фимиам сложения). 20 И изыде весь сонм сынов Израилевых от Моисеа. 21 И принесоша кийждо, яже возлюби сердце их, и якоже возмнеся души их, принесоша участие Господу на вся дела скинии свидения, и на вся сосуды ея, и на вся ризы святилища: 22 и принесоша мужие от жен своих, кийждо, якоже помысли умом, принесоша печати и усерязи, и перстни и пленицы, и мониста и всяк сосуд злат: и вси елицы принесоша участие злата Господу, 23 и всяк у негоже обретеся синета и багряница, и червленица и виссон, и кожы сини и кожы сини очервлены, (и кожы козия) принесоша: 24 всяк отделяяй участие, сребро и медь, принесоша участия Господу: и у нихже обретошася древеса негниющая, на вся соделования сосудов принесоша: 25 и всяка жена мудрая умом рукама прясти, принесе пряденая, синету и багряницу и червленицу и виссон: 26 и вся жены, имже возлюбися во уме их, хитростию спрядоша волну козию: 27 и князи принесоша камени смарагдовы и камени на совершение ризе верхней, и на слово, 28 и на сложение, и на елей помазания, и на сложение фимиама: 29 и всяк муж, или жена, имже наносяше ум их, вшедшим творити вся дела, елика заповеда Господь творити я Моисеом, принесоша сынове Израилевы участие Господу. 30 И рече Моисей сыном Израилевым: се, нарече Бог именем Веселеила сына Уриина, сына Орова, от племене Иудина, 31 и наполни его Духа Божия, премудрости и разума, и умений всех, 32 архитектонствовати во всех делесех древоделания, творити злато и сребро и медь, 33 и ваяти камени, и делати древо, и творити по всему делу премудрости: 34 и преуспевати даде во уме ему и Елиаву Ахисамахову, от племене Данова: 35 и наполни их премудрости, ума, еже разумети творити вся дела святыни, ткания и пестрения ткати червленицею и багряницею и виссоном, творити всякое дело художества различна. === 36 === 1 И сотвори Веселеил и Елиав, и всяк мудрый умом, емуже дана есть премудрость и хитрость в них, разумети творити вся дела, яже ко святыни надлежащая, по всем, елика заповеда Господь. 2 И призва Моисей Веселеила и Елиава и вся имущыя премудрость, имже даде Бог разум в сердцы, и вся волею хотящыя приходити к делам, еже совершати я: 3 и взяша от Моисеа вся участия, яже принесоша сынове Израилевы на вся дела святыни творити я: и тии приимаху еще приносимая от приносящих заутра заутра. 4 И прихождаху вси мудрии, иже творяху дела святыни, кийждо по своему делу, еже сами делаху: 5 и рекоша Моисею, яко много приносят людие свыше дел, елика заповеда Господь сотворити. 6 И повеле Моисей, и проповеда в полце, глаголя: муж и жена ктому да не делают на начатки святыни. И возбранени быша людие ктому приносити. 7 И дела быша им доволна на строение творити, и преизбыша. 8 И сотвори всяк премудрый в делающих ризы святыни, яже суть Аарону иерею, якоже заповеда Господь Моисею. И сотвориша ризу верхнюю от злата и синеты, и багряницы и червленицы прядены и виссона сканаго: и изрезаша дщицы златы аки власы, еже соткати с синетою и с багряницею, и с червленицею пряденою и с виссоном сканым: дело тканое сотвориша е. Ризы верхния придержащыяся от обоих стран, дело тканно, между собою сплетено: от него сотвориша е по его творению, от злата и синеты, и багряницы и червленицы спрядены и виссона сканаго, якоже заповеда Господь Моисею. И сотвориша оба камени смарагдовы состеганы вервию и обложены златом, изваяны и вырезаны ваянием печати, от имен сынов Израилевых: и возложиша я на рамена ризы верхния камение в память сынов израилевых, якоже заповеда Господь Моисею. И сотвориша слово, дело тканно пестротою, по делу ризы верхния, от злата и синеты, и багряницы и червленицы спрядены и виссона сканаго, четвероуголно сугубо сотвориша логион пяди в долготу, и пяди в широту, сугубо: и сшиста на нем швением по три камени четырми ряды: ряд камений: сардий и топазий и смарагд, ряд един: и ряд вторый, анфракс и сапфир и иаспис: и ряд третий, лигирий и ахат и амефист: и ряд четвертый, хрисолиф и вириллий и онихий, окованы около златом и всаждени в злате: и камение бяху от имен сынов Израилевых дванадесять, по именам их изваяно в печати, кийждо своим именем в дванадесять племен. И сотвориша над логионом тресны сплетены, дело плетеное от злата чиста: и сотвориша два щитца злата и два колца злата, и возложиша два колца злата на оба конца логиона: и вложиша плетеницы златы в колца, со обоих стран логиона, и в два сложения две плетеницы, и возложиша на два щитца: и возложиша на рамена ризы верхния, противу лицем к лицу. И сотвориша два колца злата, и возложиша на два крила на край логиона, и на край созади верхния ризы, внутрьуду: и сотвориша два колца злата, и положиша на оба рамена ризы верхния с низу его на лице по согбению свыше состава ризы верхния: и стягнуша логион колцами, яже на нем, с колцами верхния ризы сложеными, из синеты сплетенными, во ткание ризы верхния, да не низпускается логион от ризы верхния, якоже заповеда Господь Моисею. И сотвориша исподнюю ризу, яже под верхнюю, дело тканно, все синее: ожерелие же во внутренней ризе, на среде швенно, сплетено, ометы имущо около ожерелие неразлучено. И сотвориша на омете ризы внутренния долу яко процветающаго шипка пугвицы от синеты и багряницы, и червленицы прядены и виссона сканаго. И сотвориша звонцы златы, и возложиша звонцы на ометы ризы внутренния окрест между пугвицами: звонец злат и пугвица на омете внутренния ризы окрест, к служению, якоже повеле Господь Моисею. И сотвориша ризы виссонныя дело тканно, Аарону и сыном его, и клобуки из виссона, и увясло из виссона, и надраги из виссона сканаго, и поясы их из виссона и синеты, и багряницы и червленицы прядены, дело пестрящаго, якоже заповеда Господь Моисею. И сотвориша дщицу злату, отделение святыни от злата чиста, и написаша на ней писмена изваяна печатию: освящение Господу: и возложиша ю на омет синь, еже бы лежати на увясле свыше, якоже заповеда Господь Моисею. === 37 === И сотвориша скинии десять опон: двадесять и осмь лакот долгота единыя опоны, таяжде бяше всем, и четырех лакот широта опоны единыя. И сотвориша завесу от синеты и багряницы, и червленицы спрядены и виссона сканаго, дело швенно херувимы: и возложиша ю на четыри столпы негниющыя позлащены златом, и верхи их златы, и стояла их четыри сребряна. И сотвориша завесу дверем скинии свидения от синеты и багряницы, и червленицы спрядены и виссона сканаго, дело швенно херувимы, и столпы их пять и крючки их: и главицы их и верхи их позлатиша златом, и стояла их пять медяна. И сотвориша двор к югу, опоны двора из виссона сканаго, сто на сто: и столпы их двадесять, и стояла их двадесять медяна: и страна к северу, сто на сто: и страна к югу, сто на сто, и столпы их двадесять, и стояла их двадесять медяна: и страна к морю, опоны пятидесят лактей, столпы их десять, и стояла их десять: и страна к востоку пятидесят лактей, опоны пятинадесяти лактей, яже созади, и столпы их три, и стояла их три. И на вторей задней стране сюду и сюду у дверий двора, опоны пятинадесяти лактей: столпы их три, и стояла их три. Вся опоны скинии из виссона сканаго, и стояла столпов их медяна, и петли их сребряны, и главицы их посребрены сребром, и столпы их посребрены сребром, вси столпи двора. И завеса дверий двора дело пестрящаго, из синеты и багряницы, и червленицы прядены и виссона сканаго: двадесяти лактей долгота, и высота и широта пяти лактей, равны опонам двора: и столпы их четыри, и стояла их четыри медяна, и петли их сребряны, и главицы их посребрены сребром: и вси колки двора около медяны, и тии посребрены сребром. И сие сочинение скинии свидения, якоже заповедано бысть Моисею, служению быти левитов чрез Ифамара сына Аароня иереа: и Веселеил, сын Уриев, от племене Иудина, сотвори, якоже заповеда Господь Моисею, и Елиав, сын Ахисамахов, от племене Данова, иже созидаше тканыя вещи и швеныя и пестрыя, еже ткати из червленицы и виссона. === 38 === И сотвори Веселеил кивот и позлати его златом чистым внутрьуду и внеуду, и сотвори ему злат обвод обоюду: и слия ему четыри колца злата на четыри страны его: два на стране единей, и два на стране друзей, широки носилам, яко носити его ими. И сотвори очистилище над кивотом от злата чиста, и два херувима златы: херувима единаго на стране очистилища, и херувима втораго на стране вторей очистилища, осеняющыя крилами своими над очистилищем. И сотвори трапезу предложения от злата чиста, и слия ей четыри колца злата: два колца на стране единей, и два колца на стране вторей, широки яко носити носилами в них. И носила кивоту и трапезе сотвори, и позлати их златом. И сотвори сосуды трапезе, блюда и фимиамники, и чашы златы и возливалники, имиже возливати будет, от злата. И сотвори светилник, еже светити, златый, крепок стеблом, и ветви от обоих стран его: и от ветвий его отрасли исходящыя, три от единыя и три от вторыя страны, равны друг другу: и светила их, яже на верху их, во образ ореха, от них: и цветцы от них, (и крузи их,) да будут светила на них: и цветец седмый, иже на краю светила, на верху свыше, крепкий весь злат: и седмь светил на нем златых, и щипцы его златыя, и подставы их златы. Сей посребри столпы и слия столпом колца злата, и позлати вереи златом, и позлати столпы завесе златом, и сотвори петли златы: сей сотвори и крючки скинии златы, и крючки двора, и крючки на распрострение завесы сверху медяны: сей слия главицы сребряны скинии, и главицы медяны дверий скинии, и двери двора, и петли сотвори сребряны на столпах: сей посребри их: сей сотвори колки скинии и колки двора медяны. сей сотвори олтарь медян из кадилниц медяных, яже быша мужем вскрамолившымся с Кореовым сонмищем: сей сотвори вся сосуды олтаря и кадилник его, и стояло его и чашы, и вилицы его медяны: сей сотвори олтарю окрест обложение делом мрежным, снизу огнища под ним даже до среды его, и положи на нем четыри колца от четырех стран обложения олтаря медяны, широки носилам, еже носити олтарь на них: сей сотвори елей помазания святый, и сложение фимиама, дело чистое мироварца: сей сотвори умывалницу медяну и стояло ея медяно из зерцал постниц, яже постишася у дверий скинии свидения, в оньже день постави ю: и сотвори умывалницу, да омывают из нея Моисей и Аарон и сынове его руце свои и нозе, входящым им в скинию свидения: или егда приходят ко олтарю служити, омывахуся из нея, якоже заповеда Господь Моисею. === 39 === Все злато, еже соделано бысть в деле по всякому деланию святых, бяше злата начатков двадесять девять талантов и седмь сот тридесять сиклев, по сиклю святому: и сребра участие от исчисленных мужей сонма, сто талантов и тысяща седмь сот седмьдесят пять сиклев: драхма едина с главы пол сикля, по сиклю святому: всяк приходяй к пресмотрению от двадесяти лет и вышше, на шестьдесят тем и на три тысящы пять сот и пятьдесят. И быша сто талант сребра на слияние ста главиц скинии и на главицы завесныя, сто главиц на сто талант, талант на главицу: и тысящу седмь сот седмьдесят пять сиклев сотвори на петли столпам, и позлати главицы их, и украси я. И медь участия, седмьдесят талант и две тысящы и четыреста сиклев. И сотвориша из нея стояла дверная скинии свидения, и стояла двора окрест, и стояла дверий двора, и колки скинии, и колки двора окрест, и обложение медяно окрест олтаря, и вся сосуды олтаря, и вся орудия скинии свидения. И сотвориша сынове Израилевы, якоже заповеда Господь Моисею, тако сотвориша. От избывшаго же злата участия сотвориша сосуды, еже служити в них пред Господем: и от оставшия синеты и багряницы, и червленицы и виссона, сотвориша ризы служебныя Аарону, еже служити в них во святилищи. И принесоша ризы к Моисею, и скинию и сосуды ея, и вереи ея и столпы и стояла ея, и кивот завета и носила его, и олтарь и вся сосуды его, и елей помазания и фимиам сложения, и светилник чистый и светила его, светила вжигания и елей светения: и трапезу предложения и вся сосуды ея, и хлебы предложенныя: и ризы святыя, яже суть Аарони, и ризы сынов его на жречество: и опоны двора, и столпы, и стояла его, и завесу дверий скинии и дверий двора: и вся сосуды скинии и вся орудия ея: и покровцы кожы овни очервлены, и покровы кожы синия, и прочих опоны: и колки, и вся орудия на дела скинии свидения: елика заповеда Господь Моисею, тако сотвориша сынове Израилевы все устроение. И виде Моисей вся дела, и бяху сотворена та, якоже заповеда Господь Моисею, тако сотвориша я, и благослови их Моисей. === 40 === 1 И рече Господь к Моисею, глаголя: 2 в день первый месяца перваго, в новомесячие поставиши скинию свидения: 3 и да положиши кивот свидения, и покрыеши кивот завесою: 4 и внесеши трапезу, и предложиши предложение ея: и внесеши светилник, и поставиши светила его: 5 и положиши олтарь златый, в каждение пред кивотом свидения, и возложиши покров завесы над дверию скинии свидения: 6 и олтарь приношений поставиши у дверий скинии свидения, 7 и поставиши умывалницу между скиниею свидения и между олтарем, и влиеши в ню воду: 8 и поставиши двор окрест и даси завесу дверий двора: 9 и возмеши елей помазания и помажеши скинию и вся яже в ней, и освятиши ю и вся сосуды ея, и будут свята: 10 и да помажеши олтарь приношений и вся сосуды его, и освятиши олтарь, и будет олтарь святый святых: 11 и помажеши умывалницу и стояло ея и освятиши ю: 12 и да приведеши Аарона и сынов его пред двери скинии свидения и измыеши их водою: 13 и да облечеши Аарона в ризы святыя и помажеши его, и освятиши его, и да жрет Мне: 14 и сыны его да приведеши и облечеши я в ризы, 15 и да помажеши я, якоже помазал еси отца их, да жрут Мне: и будет, еже быти им помазанию жречества во век, в роды их. 16 И сотвори Моисей вся, елика заповеда ему Господь, сице сотвори. 17 И бысть в первый месяц во второе лето исходящым им от Египта, в новомесячии ста скиния. 18 И постави Моисей скинию, и подложи стояла ея, и возложи главицы, и вложи разворы, и постави столпы, 19 и простре опоны на скинию, и возложи покрывало скинии на ню с верху, якоже заповеда Господь Моисею: 20 и взем свидения, вложи в кивот, и подстави ноги под кивотом, и возложи очистилище над кивотом: 21 и внесе кивот в скинию, и возложи покров завесы, и закры кивот свидения, якоже заповеда Господь Моисею: 22 и постави трапезу в скинии свидения, на страну скинии свидения, яже к северу, внеуду завесы скинии: 23 и возложи на ню хлебы предложения пред Господем, якоже заповеда Господь Моисею: 24 и постави светилник в скинии свидения прямо трапезы, на страну скинии, яже к югу: 25 и постави свещники его пред Господем, якоже заповеда Господь Моисею: 26 и постави олтарь златый в скинии свидения противу завесы, 27 и покади над ним фимиамом сложения, якоже заповеда Господь Моисею: 28 и положи завесу дверий скинии, 29 и олтарь приношений постави у дверий скинии покрова свидения, и вознесе на нем всесожжение и жертву, якоже заповеда Господь Моисею: 30 и сотвори умывалницу между скиниею свидения и между жертвенником, 31 и влия в ню воду, да умывают от нея Моисей и Аарон и сынове его руки своя и ноги, входящым им в скинию свидения: 32 или приходяще к жертвеннику служити, умывахуся от нея, якоже заповеда Господь Моисею: 33 и постави двор окрест скинии и олтаря и положи завесу двора. И сконча Моисей вся дела. 34 И покры облак скинию свидения, и славы Господни исполнися скиния, 35 и не можаше Моисей внити в скинию свидения, яко осеняше над нею облак, и славы Господни исполнися скиния: 36 егда же восхождаше облак от скинии, воздвизахуся сынове Израилевы со имением своим: 37 аще же не взыде облак, не воздвизахуся даже до дне, в оньже взыдет облак: 38 облак бо Господнь бяше над скиниею в день, и огнь бяше над нею в нощь пред всем Израилем во всех путешествиих их. == Левит == === 1 === 1 И воззва Господь Моисеа, и рече ему из скинии свидения, глаголя: 2 глаголи сыном Израилевым, и речеши к ним: человек от вас аще принесет дары Господу, от скотов и от говяд и от овец да принесете дары вашя: 3 аще всесожжение дар его, от говяд мужеск пол непорочен принесет, пред двери скинии свидения да принесет е приятно пред Господем, 4 и да возложит руку на главу приношения, приятно ему, умилостивити о нем: 5 и да заколют телца пред Господем: и да принесут сынове Аароновы жерцы кровь, и да пролиют кровь на олтарь окрест, иже у дверий скинии свидения, 6 и одравше всесожжение, да раздробят е на уды, 7 и да возложат сынове Аарони жерцы огнь на олтарь, и да вскладут дрова на огнь: 8 и да вскладут сынове Аарони жерцы раздробленая, и главу, и тук на дрова сущая на огни яже на олтари, 9 утробу же и ноги да измыют водою: и да возложит жрец вся на олтарь: приношение есть жертва, воня благоухания Господу. 10 Аще же от овец дар свой Господви (принесет) от агнец и от козлищ во всесожжение, мужеск пол непорочен да принесет и, 11 и да возложит руку на главу его, и да заколют е в стране олтаря к северу пред Господем: и да пролиют сынове Аарони жерцы кровь его на олтарь окрест: 12 и да раздробят его на уды, и главу, и тук его, и да вскладут я жерцы на дрова сущая на огни яже на олтари, 13 и утробу и ноги измыют водою: и принесет жрец вся, и да возложит на олтарь: приношение есть жертва, воня благоухания Господу. 14 Аще же от птиц приношение принесет дар свой Господу, и принесет от горлиц или от голубов дар свой, 15 и да принесет и жрец ко олтарю, и да отторгнет главу его, и да возложит жрец на олтарь и исцедит кровь у стояла олтаря: 16 и да отлучит гортань с перием, и извергнет ю от олтаря на восток на место пепела: 17 и да изломит его от крил, и да не разделит: и да возложит е жрец на олтарь на дрова, яже на огни: приношение есть жертва, воня благоухания Господу: === 2 === 1 Аще же душа принесет дар жертву Господу, мука пшенична да будет дар его, и да возлиет на ню елей, и возложит на ню ливан: жертва есть: 2 и да принесет ю к сыном Аароним жерцем, и возмет от нея полну горсть муки пшеничны с елеем и весь ливан ея, и да возложит жрец память ея на олтарь: жертва воня благоухания Господу: 3 и останок от жертвы Аарону и сыном его: святое святых от жертв Господних. 4 Аще же принесет дар жертву печену в пещи от муки пшеничны, хлебы пресны спряжены с елеем и опресноки помазаны елеем. 5 Аще же жертва от сковрады дар твой, мука пшенична смешена со елеем, пресна да будут: 6 и да разломиши я на укрухи, и возлиеши на на елей: жертва есть Господу. 7 Аще же жертву от огнища дар твой, мука пшенична с елеем да сотворена будет: 8 и принесет жертву, юже аще сотворит от сих Господу, и да принесет к жерцу: 9 и приступив ко олтарю, да отимет жрец от жертвы память ея, и да возложит жрец на олтарь: приношение воня благовония Господу: 10 останок же от жертвы Аарону и сыном его: святая святых от приношений Господу. 11 Всяку жертву, юже аще приносите Господу, не сотворите квасну: всяк бо квас и всяк мед да не принесете от него, еже приносити Господу дар. 12 От начатков да принесете я Господу: на олтарь же да не вознесутся в воню благовония Господу. 13 И всяк дар жертвы вашея солию да осолится: да не отставите соли завета Господня от жертв ваших, во всяком даре вашем да принесете Господу Богу вашему соль. 14 Аще же принесеши жертву от начатков жит Господу, новы спряжены зелены класы истлачены Господу, и принесеши жертву от начатков жит: 15 и да возлиеши на ню елей, и да возложиши на ню ливан: жертва есть: 16 и да вознесет жрец память ея от спряженых с елеем, и весь ливан ея: принос есть Господу. === 3 === 1 Аще же жертва спасения дар его Господу, аще убо от говяд е принесет, аще мужеск пол или женск, непорочен да принесет и пред Господа: 2 и возложит руце свои на главу дара, и да заколет и пред Господем у дверий скинии свидения: и да возлиют сынове Аарони жерцы кровь на олтарь всесожжений окрест, 3 и да принесут от жертвы спасения принос Господу, тук покрывающий утробу, и весь тук иже на утробе, 4 и обе почки, и тук иже на них и иже на стегнах, и препонку, яже на печени, с почками отимет: 5 и да вознесут я сынове Аарони жерцы, на олтарь во всесожжения на дрова сущая на огни, яже на олтари: принос воня благовония Господу. 6 Аще же от овец дар его жертва спасения Господу, мужеск пол или женск, непорочен да принесет, 7 аше агнца принесет дар свой, да приведет его пред Господа, 8 и да возложит руку на главу дара своего, и да заколет его у дверий скинии свидения: и да пролиют сынове Аарони жерцы кровь на олтарь окрест, 9 и да принесет от жертвы спасения принос Господу, тук и чресла чиста с лядвиями да отлучит и: и весь тук покрывающий утробу, и весь тук иже на утробе, 10 и обе почки, и тук иже на них, иже на стегнах: и препонку, яже на печени, с почками отемь, 11 да вознесет жрец на олтарь: воня благоухания, принос Господви. 12 Аще же от козлов дар его Господу, да принесет пред Господа: 13 и возложит руце на главу его, и да заколют е пред Господем у дверий скинии свидения: и да пролиют сынове Аарони жерцы кровь на олтарь около: 14 и да вознесет от него принос Господу тук покрывающий утробу, и весь тук иже на утробе, 15 и обе почки, и весь тук, иже на них, иже на стегнах, и препонку, яже на печени, с почками отлучит: 16 и да вознесет жрец на олтарь, принос воня благовония Господу: весь тук Господу. 17 Законное в веки в роды вашя, во всяком обитании вашем: всякаго тука и всякия крове да не ясте. === 4 === 1 И рече Господь к Моисею, глаголя. 2 Рцы к сыном Израилевым, глаголя: душа аще согрешит пред Господем не хотящи от всех повелений Господних, ихже не леть есть творити, и сотворит едино что от них: 3 аше убо архиерей помазанный согрешит, во еже людем согрешити, и да приведет о гресе своем, имже согрешил, телца от говяд непорочна Господви от гресе: 4 и да приведет телца к дверем скинии свидения пред Господа, и да возложит руку свою на главу телца пред Господем, и да заколет телца пред Господем: 5 и взем жрец помазанный совершен руками от крове телца, и да внесет ю в скинию свидения, 6 и да омочит жрец перст в крови, и да покропит от крове седмижды перстом пред Господем, у завесы святыни: 7 и да возложит жрец от крове телчи на роги олтаря фимиама сложения иже пред Господем, иже есть в скинии свидения, и всю кровь телчу да излиет у стояла олтаря всесожжений, иже есть у дверий скинии свидения, 8 и весь тук телца, иже от гресе, да отимет от него, тук покрывающий утробу, и весь тук иже на утробе, 9 и обе почки, и тук иже на них, иже есть на стегнах, и препонку, яже на печени, с почками отимет е, 10 якоже отемлется оное от телца жертвы спасения, и да вознесет жрец на олтарь приношения: 11 и кожу телчу, и всю его плоть со главою, и с крайними частми, и со утробою, и с мотылы: 12 и да изнесут всего телца вне полка на место чисто, идеже изсыпают пепел, и да сожгут его на дровах огнем: на месте изсыпания пепела да сожжен будет. 13 Аще же весь сонм сынов Израилевых согрешит не хотящь, и утаится глагол от лица сонма, и сотворят едину от всех заповедий Господних, еяже не леть есть творити, и согрешат, 14 и увестся им грех, имже согрешиша в нем: и да приведет сонм телца от волов непорочна от гресе, и приведет и пред двери скинии свидения: 15 и да возложат старцы сонма руки своя на главу телца пред Господем, и да заколют телца пред Господем, 16 и да внесет жрец помазанный от крове телчи в скинию свидения, 17 и да омочит жрец перст свой в крови телчи, и да покропит седмижды пред Господем, пред завесою святыни: 18 и от крове да возложит жрец на роги олтаря фимиамов сложения, иже есть пред Господем, иже есть в скинии свидения: и всю кровь да излиет у стояла олтаря приношений, иже есть у дверий скинии свидения, 19 и весь тук его да возмет от него, и вознесет на олтарь: 20 и сотворит телцу сему, якоже сотвори телцу, иже о гресе, тако сотворится: и да помолится от них жрец, и оставится им грех: 21 и да изнесут телца всего вне полка, и да сожгут телца, якоже сожгоша телца перваго: грех (бо) сонма есть. 22 Аще же князь согрешит, и сотворит едину от всех заповедий Господа Бога своего, не хотя, иже не леть есть творити, и согрешит, и преступит, 23 и увестся ему грех, имже согреши в нем: да принесет дар свой козла от коз мужеск пол непорочен греха ради, 24 и возложит руку свою на главу козла: и да заколют его на месте, идеже закалают всесожжения пред Господем: о гресе (бо) есть: 25 и да возложит жрец от крове, яже от гресе, перстом на роги олтаря всесожжений, и всю кровь его да излиет у стояла олтаря всесожжений, 26 и весь тук его вознесет на олтарь, якоже тук жертвы спасения: и да помолится о нем жрец греха ради его, и оставится ему. 27 Аще же душа едина согрешит не хотящи от людий земли, внегда сотворити едину от всех заповедий Господних, еже не леть есть творити, и согрешит, 28 и увестся ему грех, имже согреши в нем, и да принесется дар свой козу от коз женск пол непорочну, да принесет греха ради, имже согреши: 29 и да возложит руку свою на главу греха своего: и заколют козу, яже греха ради, на месте, идеже закалают всесожжения: 30 и да возмет жрец от крове ея перстом, и да возложит на роги олтаря всесожжений, и всю кровь ея излиет у стояла олтаря: 31 и весь тук да отимет, якоже отемлется тука от жертвы спасения, и да вознесет жрец на олтарь в воню благовония Господу: и да помолится жрец о нем, и оставится ему. 32 Аше же овцу принесет дар свой греха ради, женск пол непорочен да принесет ю: 33 и да возложит руку свою на главу яже о гресе, и да заколют ю греха ради на месте, на немже закалают всесожжения (на месте святе): 34 и взем жрец от крове, яже о гресе, перстом своим, да возложит на роги олтаря всесожжения: и всю кровь ея да излиет у стояла олтаря всесожжения, 35 и весь тук ея да отимет, якоже отемлется тук овцы от жертвы спасения: и да возложит его жрец на олтарь на всесожжение Господне: и да помолится за него жрец о гресе, имже согреши, и оставится ему. === 5 === 1 Аще же душа согрешит, и услышит глас клятвы, и сей свидетель или виде или сведа, аще не возвестит, приимет грех. 2 Душа она, яже аще прикоснется ко всякой вещи нечистей, или мертвечине, или звероядине нечистей, или мертвечинам гнусностей нечистых, или мертвечинам скотов нечистых, и мертвечине гад нечистых, и забыв их осквернится: 3 или прикоснется нечистоте человечи, от всякия нечистоты его, ейже прикоснувся осквернится, и забудет, посем же увесть, повинен будет греху. 4 Душа беззаконная, аще обещает устнама своима зле или добре сотворити, по всем, елика изречет человек с клятвою, и утаится его пред очесы, и сей увесть, и согрешит едино что от сих, 5 и исповесть грех, имже согреши противу себе: 6 и да принесет Господу о гресе, имже согреши, женск пол, от овец агницу, или козу от коз греха ради: и да помолится о нем жрец греха ради его, имже согреши, и оставится ему грех. 7 Аще же не может рука его доволства имети на овцу, да принесет греха ради своего, имже согреши, две горлицы, или два птенца голубина Господу, един греха ради и един во всесожжение: 8 и принесет я к жерцу, и приведет жрец еже за грех прежде, и да отторгнет жрец главу его созади, но да не отлучит: 9 и да покропит от крове, яже за грех, на стену олтаря, останок же крове да исцедит на стояло олтаря: о гресе бо есть: 10 и вторым да сотворит всесожжение, якоже подобает, и да помолится от нем жрец греха ради его, имже согреши, и оставится ему. 11 Аще же не обрящет рука его супруга горлиц, или двух птенцев голубиных, и принесет дар свой за грех, десятую часть меры ефимуки пшеничны за грех: да не возлиет на ню елеа, ниже да возложит на ню ливана, понеже о гресе есть: 12 и да принесет ю к жерцу, и взем жрец о нея полну горсть в память его, возложит на жертвенник всесожжения Господня: о гресе (бо) есть: 13 и да помолится о нем жрец греха ради его, имже согреши отединаго сих, и оставится ему: останок же будет жерцу, якоже жертва муки пшеничны. 14 И рече Господь к Моисею, глаголя: 15 душа яже аще забудет забвением, и согрешит не хотящи от святынь Господних, и да принесет о преступлении своем Господу овна непорочна от овец, емуже цена сребра сиклев, по сиклю святых, о немже согреши: 16 и еже согреши от святых, да отдаст е, и пятую часть приложит нань, и даст е жерцу: и жрец да помолится о нем овнов преступления его, и оставится ему. 17 И душа яже аше согрешит, и сотворит едину от всех заповедий Господних, ихже не леть есть творити, и не уведе, и согрешит, и приимет грех свой, 18 и да принесет овна непорочна от овец, ценою сребра греха ради, к жерцу и да помолится о нем жрец, о неведении его, егоже не веде, и сам не ведяще, и оставится ему: 19 согреши бо согрешением пред Господем. === 6 === 1 И рече Господь к Моисею, глаголя: 2 душа яже аще согрешит, и презрев презрит заповеди Господня, и солжет к другу о вдании, или о общине, или о хищении, или преобиде чим ближняго, 3 или обрете погубленое, и солжет о нем, и кленется в неправду о единем от всех, яже аще сотворит человек яко согрешити в них: 4 и будет егда согрешит и преступит, и отдаст похищеное, еже похити, или обиду, еюже преобиде, или вдание, еже вдано бысть ему, или погибшее, еже обрете: 5 от всякия вещи, еяже ради кляся в неправду, и да отдаст самое то истое, и пятую часть свою приложит ктому: егоже есть, тому да отдаст, в оньже день обличится: 6 и о преступлении своем да принесет Господу овна от овец непорочна, ценою в немже прегреши: 7 и да помолится жрец о нем пред Господем, и оставится ему за едино от всех, яже сотвори и преступи в нем. 8 И рече Господь к Моисею, глаголя: 9 заповеждь Аарону и сыном его, глаголя: сей закон всесожжения: сие всесожжение на горении его на олтари всю нощь до заутра, и огнь олтаря да горит на нем, и не угасает: 10 и да облечется жрец в срачицу льняну, и надраги льняны да возвлечет на тело свое, и да изнесет принос, егоже аще изжжет огнь всесожжения от олтаря, и да поставит близ олтаря: 11 и да совлечет ризы своя, и да облечется в ризы ины, и да изнесет принос вне полка на место чисто: 12 и огнь на олтари да горит на нем и не угасает: и да возжжет на нем жрец дрова по вся утра, и да возкладет нань всесожжение, и да возложит нань тук спасения: 13 и огнь всегда да горит на олтари, не угасает: 14 сей закон жертвы, юже принесут сынове Аарони жерцы пред Господем, прямо олтаря: 15 и да возмет от него (жрец) горсть муки пшеничны жертвенныя с елеем ея и со всем ливаном ея, сущими на жертве: и да вознесет на олтарь принос в воню благовония, в память ея Господу: 16 оставшееся же от нея снест Аарон и сынове его: пресна да снедятся в месте святе, в притворе скинии свидения да снедят я: 17 да не испечется квасна: часть сию дах им от приносов Господних: святая святых суть, якоже еже о гресе, и якоже еже о преступлении: 18 всяк мужеск пол жреческ да снедят ю: законно вечно в роды вашя от принос Господних: всяк, иже аще прикоснется им, освятится. 19 И рече Господь к Моисею, глаголя: 20 сей дар Аарону и сыном его, егоже принесут Господу в день, в оньже аще помажеши его: десятую часть меры ефи муки пшеничны в жертву всегда, пол ея заутра и пол ея в вечер: 21 на сковраде в елеи да сотворится, спряжену да принесет ю витую жертву от укрухов, жертву в воню благовония Господу: 22 жрец помазанный, иже вместо его от сынов его, да сотворит ю: законно вечно, все да совершится: 23 и всяка жертва жреческа всесожженна да будет и да не снестся. 24 И рече Господь Бог Моисею, глаголя: 25 рцы Аарону и сыном его, глаголя: сей закон согрешения: на месте, на немже закалают всесожжения, да закалают яже греха ради пред Господем: святая (бо) святых суть: 26 жрец приносяй ю да снест ю: в месте святе да снестся, в притворе скинии свидения: 27 всяк прикасайся мяс ея освятится: и емуже аще воскропится от крове ея на ризу, яже аще воскропится на ню, да исперется на месте святе: 28 и сосуд глинян, в немже варится, да разбиется: аще же в медян сосуде сварится, да изтрет его, и измыет водою: 29 всяк мужеск пол в жерцех да снест ю: святая (бо) святых суть Господу: 30 и вся, яже от гресе аще принесутся от крове их в скинию свидения, ко очищению во святыни, да не снедятся, огнем да сожгутся. === 7 === 1 И сей закон овна иже о преступлении: святая святых суть: 2 на месте, на немже закалают всесожжение, да заколют овна иже о преступлении пред Господем, и кровь да пролиют на стояла олтаря окрест: 3 и весь тук его да принесет от него, и чресла, и весь тук покрывающий утробу, и весь тук иже на утробе, 4 и обе почки, и тук иже на них, иже на стегнах, и препонку, яже на печени, с почками да отимет я: 5 и вознесет я жрец на олтарь, принос в воню благовония Господу: о преступлении (бо) есть: 6 всяк мужеск пол от жрец да снест я, на месте святе да снедят я: святая святых суть: 7 якоже греха ради, тако и преступления ради, закон един их: жрец иже помолится о нем, ему да будет: 8 и жрец приносяй всесожжение человечо, кожа всесожжения, еже приносит он, ему да будет: 9 и всяка жертва, яже сотворится в пещи, и всяка, яже сотворится на огнищи, или на сковраде, жерцу, иже приносит ю, тому да будет: 10 и всяка жертва спряжена с елеем, и яже не спряжена, всем сыном Аароним комуждо равно да будет. 11 Сей закон жертвы спасения, юже принесут Господу: 12 аще убо похваления ради принесет ю, и принесет на жертву хваления хлебы от муки пшеничны пряжены в елеи, и опресноки помазаны елеем, и муку пшеничну смешену с елеем: 13 с хлебы квасными да принесет дар свой на жертву хваления спасителнаго: 14 и да принесет един от всех даров своих участие Господу: жерцу возливающему кровь жертвы спасения, тому да будет: 15 и мяса жертвы хваления спасителнаго тому да будут, и в оньже день принесутся, да снедятся: да не оставят от него на утрие: 16 и аще обет будет, или вольный пожрет дар свой, в оньже аще день жертву свою принесет, да снестся, и на утрие: 17 и оставшееся от мяс жертвы до дне третияго на огни да сожжется: 18 аще же ядый снест от мяс в день третий, не приимется приносящему ю, ниже вменится ему: осквернение есть: душа же, яже аще снест от них, грех приимет: 19 и мяса, яже аще прикоснутся всякому нечисту, да не снедятся, на огни да сожгутся: всяк чистый да снест мяса: 20 душа же, яже аще снест от мяс жертвы спасения, яже есть Господу, и нечистота его на нем, погибнет душа она от людий своих: 21 всякой вещи нечистей, или от нечистоты человечи или от четвероногих нечистых, или всякой мерзости нечистей, и снест от мяс жертвы спасения, яже есть Господня, погибнет душа та от людий своих. 22 И рече Господь к Моисею, глаголя: 23 рцы сыном Израилевым, глаголя: всякаго тука говяжа и овча и козия да не снесте: 24 и тук мертвечинен и звероядный да сотворится на всяко дело, в ядении же да не снестся: 25 всяк ядый тук от скотов, от нихже принесет дар Господу, погибнет душа та от людий своих: 26 всякия крове да не снесте во всех селениих ваших и от скотов и от птиц: 27 всяка душа, яже аще снест кровь, погибнет душа та от людий своих. 28 И рече Господь к Моисею, глаголя: 29 и сыном Израилевым речеши, глаголя: приносяй жертву спасения Господу да принесет дар свой Господу, и от жертвы спасения: 30 руце его да принесут принос Господу: тук иже на грудех, и препонку печени да принесет я, якоже возложити дар пред Господа: 31 и да вознесет жрец тук иже на грудех, на олтарь, и груди да будут Аарону и сыном его, 32 и рамо десное да дастся участие жерцу от жертв спасения вашего: 33 приносящему кровь спасения и тук от сынов Аароновых, тому да будет рамо десное во участие: 34 грудь бо возложения и рамо участия взях от сынов Израилевых от жертв спасения вашего, и дах я Аарону жерцу и сыном его, законно вечно от сынов Израилевых. 35 Сие помазание Аароне и помазание сынов его от приносов Господних, в оньже день приведе я жрети Господу: 36 якоже заповеда Господь дати им, в оньже день помаза я от сынов Израилевых: законно вечно в роды их. 37 Сей закон всесожжений и жертвы, и о гресе и о преступлении, и совершении и жертве спасения: 38 якоже заповеда Господь Моисею на горе Синайстей, в оньже день заповеда сыном Израилевым приносити дары своя пред Господа, в пустыни Синайстей. === 8 === 1 И рече Господь к Моисею, глаголя: 2 поими Аарона и сыны его, и ризы его, и елей помазания, и телца иже за грех, и два овна, и кошницу опресноков, 3 и весь сонм собери пред двери скинии свидения. 4 И сотвори Моисей, якоже повеле ему Господь: и собра сонм пред двери скинии свидения. 5 И рече Моисей к сонму: сие есть слово, еже завеща Господь сотворити. 6 И приведе Моисей Аарона и сыны его и измы я водою:: 7 и облече его в срачицу, и опояса его поясом, и облече его в исподнюю ризу, и возвлече нань верхнюю ризу: 8 и опояса его по устроению ефуда, и стисне его им: и возложи нань слово, и возложи на слово явление и истину: 9 и возложи увясло на главу его, и возложи на увясло против лица его дщицу златую освященную святую, якоже повеле Господь Моисею. 10 И взя Моисей от елеа помазания, 11 и воскропи от него на олтарь седмижды, и помаза олтарь и освяти его и вся сосуды его, и умывалницу и стояло ея, и освяти я, и помаза скинию и вся сосуды ея, и освяти ю, 12 и возлия Моисей от елеа помазания на главу Аароню, и помаза его, и освяти его. 13 И приведе Моисей сыны Аарони, и облече я в срачицы, и опояса я поясы, и возложи на ня клобуки, якоже повеле Господь Моисею. 14 И приведе Моисей телца иже за грех, и возложи Аарон и сынове его руки на главу телца иже за грех, 15 и закла его ю взя Моисей от крове, и возложи на роги олтаря окрест перстом, и очисти олтарь: и кровь пролия на стояло олтаря, и освяти его, еже молитися у него. 16 И взя Моисей весь тук иже на утробе, и препонку яже на печени, и обе почки, и тук иже на них, и вознесе Моисей на олтарь: 17 телца же и кожу его, и мяса его и мотылы его, сожже я огнем вне полка, якоже повеле Господь Моисею. 18 И приведе Моисей овна иже во всесожжение, и возложи Аарон и сынове его руки своя на главу овню. 19 И закла Моисей овна, и пролия Моисей кровь на олтарь окрест: 20 овна же раздроби на уды его, и вознесе Моисей главу и уды и тук, и утробу и ноги измы водою: 21 и вознесе Моисей всего овна на олтарь: всесожжение есть в воню благовония: принос есть Господу, якоже заповеда Господь Моисею. 22 И приведе Моисей овна втораго, овна совершения: и возложи Аарон и сынове его руки своя на главу овню, 23 и закла его: и взя Моисей от крове его, и возложи на край уха Аароня деснаго, и на край руки его десныя, и на край ноги его десныя. 24 И приведе Моисей сыны Аарони, и возложи Моисей от крове на край ушес их десных, и на край рук их десных, и на край ног их десных: и пролия Моисей кровь на олтарь окрест: 25 и взя Моисей тук и чресла, и тук иже на утробе, и препонку печени, и обе почки, и тук иже на них, и рамо десное, 26 и от кошницы совершения, яже есть пред Господем, и взя хлеб един пресный, и хлеб елеен един, и опреснок един, и возложи на тук, и рамо десное: 27 и возложи вся на руце Аарони и на руце сынов его, и вознесе я участие пред Господа. 28 И взя Моисей от рук их и вознесе на олтарь на всесожжение совершения, еже есть воня благоухания: принос есть Господу. 29 И взем Моисей грудь, отлучи ю возложение пред Господем от овна совершения: и бысть Моисею в масть, якоже заповеда Господь Моисею. 30 И взя Моисей от елеа помазания и от крове яже на олтари, и воскропи на Аарона и на ризы его, и на сыны его и на ризы сынов его с ним: и освяти Аарона и ризы его, и сыны его и ризы сынов его с ним. 31 И рече Моисей Аарону и сыном его: сварите мяса во дворе скинии свидения на месте святе, и тамо да снесте я, и хлебы иже в кошнице совершения, якоже заповедано бысть мне глаголя: Аарон и сынове его да снедят я: 32 и останок мяс и хлебов на огни да сожжете: 33 и из дверий скинии свидения да не изыдете седмь дний, дондеже день скончается, день совершения вашего: в седмь бо дний совершит руки вашя: 34 якоже сотвори в день сей, в оньже заповеда Господь сотворити, яко молитися о вас: 35 и у дверий скинии свидения седите седмь дний, день и нощь, и сохраните повеления Господня, да не умрете: тако бо заповеда мне Господь Бог. 36 И сотвори Аарон и сынове его вся словеса, яже завеща Господь Моисею. === 9 === 1 И бысть в день осмый, призва Моисей Аарона и сыны его и старцы Израилевы, 2 и рече Моисей ко Аарону: возми себе телца от говяд греха ради и овна на всесожжение, непорочны, и принеси я пред Господа: 3 и старцем Израилевым речеши, глаголя: возмите козла от коз единаго от гресе, и овна, и телца и агнца единолетна, в приношение, непорочны: 4 и телца от говяд, и овна на жертву спасения пред Господа, и муку пшеничну спряжену с елеем: зане днесь Господь явится в вас. 5 И взяша, якоже заповеда Моисей пред скиниею свидения: и прииде весь сонм, и сташа пред Господем. 6 И рече Моисей: сие слово, еже рече Господь, сотворите, и явится в вас слава Господня. 7 И рече Моисей Аарону: приступи ко олтарю и сотвори еже греха ради твоего, и всесожжение твое, и помолися о себе и о доме твоем: и сотвори дары людския, и помолися о них, якоже заповеда Господь Моисею. 8 И приступи Аарон ко олтарю, и закла телца, иже греха ради его. 9 И принесоша сынове Аарони кровь к нему: и омочи перст свой в кровь, и возложи на роги олтаря, и кровь излия у стояла олтаря: 10 и тук, и обе почки, и препонку печени, яже греха ради, возложи на олтарь, якоже заповеда Господь Моисею: 11 мяса же и кожу сожже на огни вне полка, 12 и закла всесожжение. И принесоша сынове Аарони кровь к нему: и пролия на олтарь окрест. 13 И всесожжение принесоша к нему по удам: сия и главу возложи на олтарь, 14 и измы утробу и ноги водою, и возложи во всесожжение на олтарь. 15 И принесе дар людский: и взя козла, иже греха ради людска, и закла его, и очисти его, якоже и перваго, 16 и принесе всесожжение, и сотвори е, якоже достоит. 17 И принесе жертву, и наполни руце от нея, и возложи на олтарь кроме всесожжения утренняго, 18 и закла телца и овна жертвы спасения людска. И принесоша сынове Аарони кровь к нему: и пролия на олтарь окрест. 19 И тук телчий, и овняя чресла, и тук покрывающий утробу, и обе почки, и тук иже на них, и препонку печени: 20 и возложи туки на груди, и вознесе туки на олтарь: 21 и груди и рамо десное отя Аарон участие пред Господем, якоже повеле Господь Моисею. 22 И воздвиг Аарон руце к людем, благослови я: и сниде сотворив приношение греха ради, и всесожжение, и яже о спасении. 23 И вниде Моисей и Аарон в скинию свидения, и изшедше благословиста вся люди. И явися слава Господня всем людем: 24 и изыде огнь от Господа, и пояде яже на олтари, и всесожжения и туки. И видеша вси людие, и ужасошася, и падоша на лице. === 10 === 1 И вземше два сына Аароня, Надав и Авиуд, кийждо свою кадилницу, вложиста в ня огнь и возложиста нань фимиам, и принесоста пред Господа огнь чуждь, егоже не повеле има Господь. 2 И изыде огнь от Господа, и пояде я, и умроста пред Господем. 3 И рече Моисей ко Аарону: сие есть, еже рече Господь, глаголя: в приближающихся Мне освящуся и во всем сонме прославлюся. И умилися Аарон. 4 И призва Моисей Мисаила и Елисафана, сыны Озиилевы, сыны брата отца Аароня, и рече им: приступите и возмите братий своих от лица святых вне полка. 5 И приступиша, и взяша их в ризах их, (и изнесоша) вне полка, якоже рече Моисей. 6 И рече Моисей ко Аарону и Елеазару и Ифамару, сыном его оставшымся: глав ваших не открывайте и риз ваших не раздирайте, да не умрете, и на весь сонм будет гнев: кратия же вашя весь дом Израилев да плачутся запаления, имже запалишася от Господа: 7 и из дверий скинии свидения не исходите, да не умрете: елей бо помазания, иже от Господа, на вас есть. И сотвориша по словеси Моисеову. 8 И рече Господь ко Аарону, глаголя: 9 вина и сикера не пийте, ты и сынове твои с тобою, егда входите в скинию свидения, или приступающым вам ко олтарю, да не умрете: (и будет сие) законно вечно в роды вашя: 10 отлучити между вещми святыми и между сквернавыми, и между нечистыми и между чистыми, 11 и устроити сыном Израилевым вся законная, яже глагола Господь к ним рукою Моисеовою. 12 И рече Моисей ко Аарону, и Елеазару и Фамару, сыном, его оставшымся: возмите жертву оставшуюся от приносов Господних и ядите опресноки у олтаря: яко святая святых суть: 13 и ядите я на месте святе: законно бо тебе есть, и законно сыном твоим, сие от приносов Господних: сице бо ми заповеда Господь: 14 и груди участия и рамо участия ядите на месте святе ты и сынове твои, и дом твой с тобою: законно бо тебе, и законно сыном твоим дадеся от жертв спасении сынов Израилевых: 15 рамо участия и груди участия в приносех тучных да принесут, участие еже приносити пред Господа: и да будет тебе и сыном твоим и дщерем твоим с тобою законно вечно, якоже повеле Господь Моисею. 16 И козла, иже греха ради, взыскуя взыска Моисей: и сей сожжен бяше. И разгневася Моисей на Елеазара и Ифамара, сыны Аарони оставльшыяся, глаголя: 17 почто не снедосте на месте святе, еже греха ради, яко святая святых суть, сие даде вам ясти, да отимете грех сонма и помолитеся о них пред Господем: 18 не внесеся бо от крове его в святое: пред лицем внутрь да ясте е на месте святе, якоже повеле мне Господь. 19 И рече Аарон к Моисею, глаголя: аще днесь принесоша яже греха ради своего и всесожжения своего пред Господа, и случишася мне сицевая, и снем, яже греха ради, днесь, еда угодно будет Господу? 20 И слыша Моисей, и угодно ему бысть. === 11 === 1 И рече Господь к Моисею и Аарону, глаголя: 2 рцыте сыном Израилевым, глаголюще: сии скоти, ихже имате ясти от всех скотов, иже на земли: 3 всяк скот раздвояющь копыто и пазнокти имеющь на двое, и отрыгаяй жвание в скотех, сия да ясте: 4 токмо от сих да не снесте от отрыгающих жвание и от раздвояющих копыта и делящих пазнокти: велблюда, яко сей износит жвание, но пазноктей не делит на двое, нечист сей вам: 5 и хирогриля, яко износит жвание, а пазноктей не делит, нечист сей вам: 6 и заяца, иже отрыгает жвание, но пазноктей не делит на двое, нечист сей вам: 7 и свинии, яко делит пазнокти на двое и копыто раздвояет, но не отрыгает жвания, нечиста сия вам: 8 от мяс их да не ясте и мертвечине их да не прикасаетеся, нечиста сия вам. 9 И сия да ясте от всех, яже в водах: вся, имже суть перия и чешуя в водах, и в морях и в езерах, сия да ясте: 10 и всем, Имже несть перие ни чешуи в водах, и в морях и в езерах, от всех, яже износят воды, и всяка душа живущая в воде, скверна есть, и скверна да будут вам: 11 от мяс их да не ядите и мертвечины их гнушайтеся: 12 и вся, имже несть перия и чешуи, иже в водах, скверна сия суть вам. 13 И сих гнушайтеся от птиц, и да не ясте их, гнусни суть: орла и грифа и морскаго орла, 14 и неясыти и иктина и подобных сим: 15 и струфа и совы, и сухолапля и подобных им: 16 и всякаго врана и подобных ему: и ястреба и подобных ему: 17 и врана нощнаго и лилика и ивина, 18 и порфириона и пелекана и лебедя, 19 и еродиа и харадриона и подобных ему: и вдода и нощнаго нетопыря. 20 И вся гады птичия, иже ходят на четырех, мерзость есть вам: 21 но сия да ясте от всех гад птичных, иже ходят четвероножны, иже имут голени выше плесну своею, скакати ими по земли: 22 и сия да ясте от сих: вруха и подобная ему, и аттака и подобная ему, офиомаха и еже подобно к нему, и акриду и подобная ей: 23 и всяк гад от птиц, имже суть четыри ноги, мерзость есть вам, и в сих да не осквернитеся: 24 всяк прикасаяйся мертвечине их нечист будет до вечера: 25 и всяк вземляй мертвечину их да измыет ризы своя и нечист будет до вечера. 26 Во всех скотех, иже раздвояет копыто и пазнокти имеет, а жвания не отрыгает, нечиста да будут вам: всяк прикасаяйся мертвечине их нечист будет даже до вечера: 27 и всяк иже ходит на лапах, во всех зверех, иже ходят на четырех, нечиста будут вам: всяк прикасаяйся мертвечине их нечист будет до вечера: 28 и вземляй мертвечину их да исперет ризы своя и нечист будет до вечера: нечиста сия будут вам. 29 И сия вам нечиста от гад плежущих по земли: ласица и мыш и крокодил земный, 30 мигали и хамелеон, и халавотис и ящер и кроторыя: 31 сии нечисти вам от всех гад плежущих по земли: всяк прикасаяйся мертвечине их нечист будет до вечера. 32 И всяко, в неже аше впадет от них нечто от мертвечины их, нечист будет всяк сосуд древян, или риза, или кожа, или вретище: всякий сосуд, в немже творится дело, в воде погрузится и нечист будет до вечера, и по сих чист будет: 33 и всяк сосуд глинян, в оньже аще впадет от сих внутрь, елика суть в нем, нечиста будут, и сосуд да разбиется. 34 И всяка снедь юже ясте, на нюже аще возлиется вода, нечиста будет вам: и всякое питие, еже пиете во всяком сосуде, нечисто будет (вам): 35 и все, еже аще впадет в не от мертвечины их, нечисто будет: пещи и огнища да сокрушатся, нечиста сия суть и нечиста будут вам. 36 Кроме источник водных и поток, и собраний водных, будут чисти: а иже прикасается мертвечинам их, нечист будет. 37 Аще же впадет от мертвечины их на всяко семя семянное, еже сеется, чисто будет: 38 аще же возлиется вода на всяко семя, и впадет от мертвечины их на не, нечисто будет вам. 39 Аще же умрет от скота, егоже вам ясти, прикасаяйся мертвечине его, нечист будет до вечера: 40 и ядый от мертвечин сих да исперет ризы своя и нечист будет до вечера: и вземляй мертвечину их да измыет ризы своя и измыется водою, и нечист будет до вечера. 41 И всяк гад плежущий по земли мерзость вам есть сие, да не снестся. 42 И всяко ходящее на чреве, и всяко ходящее на четырех всегда, и (всяко) многоножное во всех гадех, иже плежут по земли, да не снесте е, яко мерзость вам есть: 43 и да не омерзите душ ваших во всех гадех плежущих по земли, и да не осквернитеся ими, и да не будете нечисти в них, 44 яко Аз есмь Господь Бог ваш: и да освятитеся и будете святи, яко свят есмь Аз Господь Бог ваш: и да не оскверните душ ваших во всех гадех движущихся по земли, 45 яко Аз есмь Господь, изведый вас из земли Египетския, да буду вам Бог, и будете святи, яко свят есмь Аз Господь. 46 Сей закон о скотех и о птицах, и всякой души движущейся в водах и всякой души пресмыкающейся по земли, 47 разлучити между нечистыми и между чистыми, и научити сыны Израилевы между оживляющими ядомая и между оживляющими не ядомая. === 12 === 1 И рече Господь к Моисею, глаголя: 2 глаголи сыном Израилевым и речеши к ним, глаголя: жена, яже аще зачнет и родит мужеск пол, нечиста будет седмь дний: по днем (естественнаго) разлучения скверны ея, нечиста будет: 3 и в день осмый да обрежет плоть конечную его: 4 и сидети будет тридесять и три дни в крови нечистей своей: всякой вещи святей да не прикоснется и в святилище да не внидет, дондеже скончаются дние очищения ея. 5 Аще же женск пол родит, и нечиста будет четыренадесять дний по (естественней) скверне ея, и шестьдесят и шесть дний сидети будет в крови нечистоты своея. 6 И егда исполнятся дние очищения ея о сыне ея или дщери, да принесет агнца непорочна единолетна во всесожжение, и птенца голубина или горлицу греха ради, пред двери скинии свидения к жерцу, 7 и да принесет е пред Господа: и помолится о ней жрец и очистит ю от тока крове ея: сей закон раждающия мужеск пол или женск. 8 Аще же не обрящет рука ея доволнаго на агнца, и да возмет две горлицы или два птенца голубина, единаго на всесожжение и другаго греха ради: и помолится о ней жрец, и очистится. === 13 === 1 И рече Господь к Моисею и Аарону, глаголя: 2 человеку емуже аще будет на кожи плоти его струп знамения или блеск, и будет на кожи плоти его язва прокажения, да приведется ко Аарону жерцу или ко единому от сынов его жерцов: 3 и узрит жрец язву на кожи плоти его, и влас в язве изменится в бело, и взор язвы умален от кожи плоти его, язва проказы есть: и узрит жрец, и осквернит его. 4 Аще же и блеск бел будет на кожи плотней его, и не менший будет взор его от кожи, и влас его не изменися во влас бел, и той есть темен, и отлучит жрец язву на седмь дний: 5 и узрит жрец язву в день седмый, и се, язва пребывает пред ним, и не изменися язва на кожи, и отлучит его жрец на другия седмь дний: 6 и узрит его жрец в седмый день вторицею, и се, язва потемне, и не изменися язва на кожи, и очистит его жрец: знамение бо есть: и измыв ризы своя, чист будет. 7 Аще же изменяющееся изменится знамение на кожи, повнегда видети его жерцу еже очистити его, и явится второе жерцу: и узрит его жрец, и се, изменися знамение в кожи, 8 и да осквернит его жрец: проказа бо есть. 9 И язва прокажения аще будет на человеце, и приидет к жерцу: 10 и узрит жрец, и се, струп бел на кожи, и сей изменил влас бел, и от здравыя плоти живыя в струпе: 11 проказа ветха есть на кожи плоти его, и осквернит его жрец и отлучит его, яко нечист есть. 12 Аще же процветая процветет проказа на кожи, и покрыет прокажение всю кожу язвою, от главы да ногу его, по всему взору жерцову: 13 и узрит жрец, и се, покрыло прокажение всю кожу плоти его, да очистит жрец язву: яко вся изменися в бело, чист есть. 14 И в оньже день аще явится на нем плоть жива, осквернится: 15 и узрит жрец плоть здраву, и осквернит его плоть здрава, яко нечиста есть, прокажение есть. 16 Аще же составится плоть здрава, и изменится в бело, и приидет к жерцу: 17 и узрит жрец, и се, изменися язва в бело, и очистит жрец язву, чист есть. 18 И тело аще будет на кожи его болячка гнойна, и исцелеет, 19 и будет на месте болячки струп бел, или блеск белеющься или рдящься, и явится жерцу: 20 и узрит жрец, и се, взор нижае кожи, и влас его изменися в бело, и осквернит его жрец, яко блеск прокажения есть, на болячке процвете. 21 Аще же увидит жрец, и се, несть в нем влас бел, и не нижае есть от кожи плотския, и сей есть темен, и отлучит его жрец на седмь дний. 22 Аще ли разсыпанием разсыплется по кожи, и осквернит его жрец, блеск прокажения есть, на болячке процвете. 23 Аще ли на месте своем пребывает блеск и не разсыпается, струп болячки есть, и очистит его жрец. 24 И плоть аще будет на кожи его жжение огнено, и будет на кожи его исцелевшее от жжения блещащееся бело или червлено или пробелующееся: 25 и узрит его жрец, и се, пременися влас бел в блещащийся, и взор ему нижае от кожи, прокажение есть, во жжении процвете, и осквернит его жрец, язва прокажения есть. 26 Аще же увидит его жрец, и се, несть на блещащемся влас бел, и не нижае есть от кожи, само же темно, и отлучит его жрец на седмь дний: 27 и узрит его жрец в день седмый, и аще разсыпанием разсыплется по кожи, и осквернит его жрец: язва прокажения есть, бо гной процвете. 28 Аще же на месте пребудет блещание и не разсыплется по кожи, сие же темно есть, струп сожжения есть, да очистит его жрец: образ бо сожжения есть. 29 Мужу же или жене, аще будет на них язва прокажения на главе или на браде, 30 и узрит жрец язву, и се, обличие ея глубочае кожи, в нейже влас желтуяся тонок, и осквернит его жрец: вред есть, прокажение главы или прокажение брады есть. 31 И аще увидит жрец язву вреда, и се, не будет обличие нижае кожи, и влас желтуяся не будет в нем, да отлучит жрец язву вреда на седмь дний: 32 и узрит жрец язву в день седмый, и се, не разсыпася вред, и влас желтуяся несть в нем, и обличие вреда несть нижае кожи: 33 и острижет кожу, вред же да не острижется, и отлучит жрец вред на седмь дний второе: 34 и узрит жрец вред в день седмый, и се, не разсыпася вред по кожи по острижении его, и обличие вреда несть нижае кожи, и очистит его жрец, и измыв ризы, чист будет. 35 Аще же разсыпанием разсыплется вред по кожи по очищении его: 36 и узрит его жрец, и се, не разсыпася вред по кожи, да не присетит жрец о власе желтеющемся, яко нечист есть. 37 Аще же пред ним будет на месте вред, и влас черн явится в нем, исцеле вред, чист есть, и очистит его жрец. 38 Мужу же или жене, аще будут на кожи плоти его блещания блещащая белеющаяся: 39 и увидит жрец, и се, на кожи плоти его блещания и блещащая белеющаяся, лишай есть, процвете на кожи плоти его, чист есть. 40 Аще же кому облезе глава, плешив есть, чист есть: 41 аще же спреди облезе глава, взлыс есть, чист есть: 42 аще же будет на плеши его или на взлысине его блеск бел или червленуяся, прокажение процветающее на плеши его или на взлысине его: 43 и увидит его жрец, и се, обличие блеска бело или червлено на плеши его или на взлысине его, яко обличие прокажения на кожи плоти его: 44 человек прокажен есть, осквернением осквернит его жрец, на главе его блеск его. 45 И прокажен, на немже есть язва, ризы его да будут раздраны, и глава его не покровена, и около уст своих да обвиется, и нечист прозовется: 46 вся дни, в няже будет на нем язва, нечист сый, нечист будет: отлучен да седит, вне полка да будет ему пребывание. 47 И риза аще будет на ней язва прокажения, на ризе сукняне, или на изгребийней, 48 или на прядене, или на кроках, или на льнех, или на волне, или на кожи, или на всякой кожи деланей, 49 и явится язва зелена или червленуяся на кожи, или на ризе, или на пряденех, или на кроках, или на всяком деле кожанем, язва прокажения есть, и покажет жерцу: 50 и увидит жрец язву, и отлучит жрец язву на седмь дний. 51 И да увидит жрец язву в день седмый: аще же разсыпася язва по ризе, или по прядене, или по кроках, или по кожи, по всему елика творятся кожы в делании, прокажение исто есть язва, нечист есть: 52 да сожжет ризу, или прядения, или кроки, или на волне, или на льне, или на всяком сосуде кожане, на немже аще будет язва: понеже прокажение исто есть, на огни да сожжется. 53 Аще ли узрит жрец, и не разсыплется язва по ризе, или по прядене, или по кроках, или по всякому сосуду кожану: 54 и повелит жрец, и измыет, на немже будет язва, и да отлучит жрец язву на другия седмь дний: 55 и увидит жрец по измытии его язву, и аще не изменила язва лица своего, и язва не разсыпася, нечисто есть, на огни да сожжется: утвердися бо на ризе, или на прядене, или на кроках. 56 И аще увидит жрец, и будет темна язва по испрании ея, да отторгнет е от ризы, или от прядена, или от крок, или от кожи. 57 И аще явится еще на ризе или на прядене, или на кроках, или на всяком сосуде кожане, прокажение процветающее есть, на огни да сожжется, на немже есть язва. 58 И риза, или прядено, или кроки, или всяк сосуд кожан, еже исперется, и отступит от него язва, и измыется второе, и чисто будет. 59 Сей закон язве прокажения ризы сукняны, или изгребийны, или прядены, или куделныя, или всякаго сосуда кожана, во еже очистити е, или осквернити е. === 14 === 1 И рече Господь к Моисею, глаголя: 2 сей закон прокаженному, в оньже день аще очистится, и приведется к жерцу: 3 и да изыдет жрец вне полка, и узрит жрец, и се, исцеле язва прокажения от прокаженнаго: 4 и повелит жрец, да возмутся очищенному два птичища жива чиста и древо кедрово, и соскана червленица и иссоп: 5 и повелит жрец, да заколют птичище едино в сосуд глинян, над водою живою, 6 и живое птичище да возмет, и древо кедрово и соскану червленицу и иссоп, и да омочит их и птичище живое в крови закланаго птичища над водою живою: 7 и да воскропит на очистившагося от прокажения седмижды, и чист будет: и да отпустит птичище живое на поле: 8 и да исперет очистивыйся ризы своя и да острижет вся власы своя и да измыется водою, и чист будет: и по сих да внидет в полк и да пребудет вне дому своего седмь дний. 9 И будет в день седмый, обриются вси власы его, глава его и брада и брови, и всяк влас его да обриется: и да измыет ризы своя, и да омыется тело его водою, и чист будет. 10 И в день осмый да возмет два агнца единолетна непорочна и овцу едину единолетну непорочну, и три десятины муки пшеничны на жертву смешаныя с елеем и меру елеа едину: 11 и да поставит жрец очищаяй человека очищаемаго и сия пред Господем, у дверий скинии свидения: 12 и возмет жрец агнца единаго и приведет его преступления ради, и чашу елеа, и отлучит я жрец во отлучение пред Господем: 13 и заколют агнца на месте идеже закалают всесожжения и яже греха ради, на месте святе: есть бо еже греха ради, якоже и преступления ради есть жерцу: святая святых суть: 14 и возмет жрец от крове яже преступления ради, и возложит жрец на обушие уха очищаемаго деснаго, и на край руки его десныя, и на край ноги его десныя: 15 и взем жрец от чаши елеа, возлиет на руку левую свою: 16 и да омочит жрец перст свой десный в елей, иже есть в руце его левей, и да воскропит от елеа перстом седмижды пред Господем: 17 оставшийся же елей, иже в руце его, да возложит жрец на обушие уха очищаемаго деснаго, и на край руки его десныя, и на край ноги его десныя, на место крове яже преступления ради: 18 оставшийся же елей, иже в руце жерца, да возложит жрец на главу очищенному: и помолится о нем жрец пред Господем: 19 и сотворит жрец еже греха ради, и помолится жрец от очищающемся от греха своего: и по сем заколет жрец всесожжение: 20 и вознесет жрец всесожжение и жертву на олтарь пред Господем, и помолится о нем жрец, и очистится. 21 Аще же убог есть, и рука его не достигнет, да возмет агнца единолетнаго единаго, в оньже преступил на отлучение, яко помолитися о нем, и десятину муки пшеничны смешаны с елеем в жертву, и чашу елеа едину, 22 и два горличища, или два птенца голубина, елика обрете рука его, и да будет един греха ради, и другий во всесожжение: 23 и да принесет я в день осмый, во еже очистити его, к жерцу, пред двери скинии свидения пред Господа: 24 и взем жрец агнца иже преступления ради, и чашу елеа, возложит я возложение пред Господем, 25 и заколет агнца иже преступления ради, и возмет жрец от крове яже преступления ради, и возложит на обушие уха очищаемаго деснаго, и на край руки его десныя, и на край ноги его десныя: 26 и от елеа возлиет жрец на руку свою левую, 27 и воскропит жрец перстом своим десным от елеа, иже в руце его левей, седмижды пред Господем: 28 и возложит жрец от елеа сущаго в руце его на обушие уха очищаемаго деснаго, и на краи руки его десныя, и на край ноги его десныя, на месте крове яже преступления ради: 29 оставшееся же от елеа, еже есть в руце жерца, да возложит на главу очистившемуся: и помолится о нем жрец пред Господем, 30 и сотворит едину от горлиц, или от птенцев голубиных, якоже обрете рука его, 31 едину греха ради, и другую во всесожжение с жертвою: и помолится жрец о очищаемем пред Господем. 32 Сей закон в немже есть язва прокажения, и не обретающему рукою во очищение свое. 33 И рече Господь к Моисею и Аарону, глаголя: 34 егда внидете в землю Ханаанску, юже Аз даю вам в притяжание, и дам язву прокажения в домех земли притяжанныя вам: 35 и приидет, егоже дом, и повесть жерцу глаголя: аки язва является в дому моем. 36 И повелит жрец испразднити сосуды дому, прежде неже внити жерцу видети язву, и да не будут нечиста вся яже в дому. По сих же внидет жрец соглядати дом: 37 и узрит жрец язву, и се, язва на стенах дому удолия зеленеющаяся или червленеющаяся, и обличие их худее стен: 38 изшед жрец из дому к дверем дому, и отлучит жрец дом на седмь дний. 39 И возвратится жрец в седмый день, и узрит дом, и се, разсыпася язва по стенам дому: 40 и повелит жрец, да изимут камение, на нихже есть язва, и да изнесут е вон из града на место нечисто: 41 и да постружут извнутри дом окрест, и изсыплют персть состроганую вне града на место нечисто: 42 и да возмут камение ино острогано, и вложат я вместо камения: и персть ину да возмут, и помажут дом. 43 Аще же паки найдет язва, и явится в дому но изнесении камения и по острогании дому и по помазании, 44 и внидет жрец, и узрит аще разсыпася язва в дому, прокажение пребывающее есть в дому, нечист есть: 45 и разорят дом, и древа его и камение его и всю персть дому изнесут вне града, на место нечисто. 46 И входяй в дом вся дни, в няже есть отлучен, нечист будет до вечера: 47 и спяй в дому да исперет ризы своя и нечист будет до вечера: и ядый в дому да исперет ризы своя и нечист будет до вечера. 48 Аще же пришедый внидет жрец, и увидит: и се, разсыпанием не разсыпася язва в дому но помазании дому, да очистит жрец дом, яко исцеле язва: 49 и возмет очистити дом, два птичища жива чиста и древо кедрово, и соскану червленицу и иссоп: 50 и да заколет птичище едино в сосуд глинян над водою живою: 51 и возмет древо кедрово и соскание червленое, и иссоп и птичище живое, и да омочит е в кровь птичища закланаго над водою живою, и да окропит ими в дому седмижды: 52 и очистит дом кровию птичищною и водою живою, и птичищем живым и древом кедровым, и иссопом и сосканою червленицею: 53 и да отпустит птичище живое вне града на поле и помолится о доме, и чист будет. 54 Сей закон о всякой язве прокажения и вреда, 55 и прокажения ризы и дому, 56 и струпа, и знамения, и блещащагося, 57 и поведати в оньже день нечисто, и в оньже день очистится: сей закон прокажения. === 15 === 1 И рече Господь к Моисею и Аарону, глаголя: 2 глаголи сыном Израилевым и речеши к ним: мужу, мужу, емуже аще будет излияние от тела его, излияние его нечисто есть. 3 И сей закон нечистоты его: изливаяй семя из тела своего, от излияния, имже составлено есть тело его излиянием, сия нечистота его в нем: вся дни излияния тела его, имже составлено тело его излиянием его, нечистота его есть: 4 всяко ложе, на немже аше ляжет изливаяй семя, нечисто есть: и всяк сосуд, на немже аще сядет верху его изливаяй семя, нечист будет: 5 и человек, иже аще прикоснется ложа его, да исперет ризы своя и да омыет тело свое водою, и нечист будет до вечера: 6 и седяй на сосуде, на немже аще сядет верху его изливаяй семя, да исперет ризы своя и да омыется водою, и нечист будет до вечера: 7 и прикоснувыйся к плоти изливающаго семя да исперет ризы своя и да омыется водою, и нечист будет до вечера. 8 Аще же плюнет изливаяй семя на чистаго, да исперет ризы своя и да измыется водою, и нечист будет до вечера: 9 и всяко седло ослее, на неже аще всядет верху его изливаяй семя, нечисто будет до вечера: 10 и всяк прикоснувыйся всем, яже суть под ним, нечист будет до вечера: и вземляй я да исперет ризы своя и омыется водою, и нечист будет до вечера: 11 и еликим аще коснется изливаяй семя и рук своих не омыет водою, да исперет ризы своя и омыет тело водою, и нечист будет до вечера: 12 и сосуд глинян, емуже аще прикоснется изливаяй семя, да разбиется: а сосуд древяный да измыется водою, и чист будет. 13 Аще же очистится изливаяй семя от излияния своего, и изчислит себе седмь дний на очищение свое, и исперет ризы своя и омыет тело свое водою живою, и чист будет: 14 и в день осмый да возмет себе два горличища или два птенца голубина, и да принесет я пред Господа к дверем скинии свидения, и даст я жерцу: 15 и сотворит я жрец един греха ради, и другий во всесожжение: и да помолится о нем жрец пред Господем о излиянии его. 16 И человек, емуже аще изыдет от ложа его семя, и да омыет водою все тело свое, и нечист будет до вечера: 17 и всяка риза и всяка кожа, на нейже аще будет ложе семенное, да измыется водою, и нечиста будет до вечера. 18 И аще ляжет муж с женою своею на ложи семене, да измыются водою, и нечисты будут до вечера. 19 И жена яже аще будет кровь точащи, и будет течение ея в телеси ея, седмь дний да будет в скверне своей: и всяк прикасаяйся ей нечист будет до вечера: 20 и все, на немже аще седит в течении своем, нечисто будет, и всяко, на неже аще присядет (она), нечисто будет: 21 и всяк, иже аще прикоснется ложа ея, да исперет ризы своя и да измыет водою тело свое, и нечист будет до вечера: 22 и всяк прикасаяйся всякому сосуду, на немже аще сядет, да исперет ризы своя и да измыется водою, и нечист будет до вечера: 23 аще же на ложи ей сущей, или на сосуде, на немже аще сядет (она), егда прикоснется кто ей, нечист будет до вечера. 24 Аще же кто будет на ложи с нею, и будет нечистота ея на нем, нечист будет седмь дний: и всяко ложе, на немже аще ляжет, нечисто будет. 25 И жена аще точит течение крове дни многи, не во время скверны ея, аше и течет по осквернении ея, вся дни течения нечистоты ея, якоже дни скверны ея, нечиста будет: 26 и всяко ложе, на немже аще ляжет вся дни течения ея, по ложи скверны ея будет ей: и всяк сосуд, на немже аще сядет, нечист будет по нечистоте скверны ея: 27 и всяк прикасаяйся ей нечист будет, да исперет ризы своя и омыет водою тело свое, и нечист будет до вечера. 28 Аще же очистится от течения своего, да сочтет себе седмь дний, и по сих чиста будет: 29 и во осмый день да возмет себе два горличища или два птенца голубина, и принесет я к жерцу к дверем скинии свидения, 30 и да сотворит жрец, един греха ради и другий во всесожжение, и да помолится о ней жрец пред Господем о течении нечистоты ея. 31 И благоговейны сотворите сыны Израилевы от нечистот их: и да не умрут нечистоты ради своея, внегда осквернити им скинию Мою яже в них. 32 Сей закон изливающему семя, и аще кому изыдет из него ложе семенное, якоже осквернитися в нем, 33 и точащей кровь в скверне своей, и изливающему семя во излиянии своем мужеску полу или женску, и мужу, иже аще поспит со сквернавою. === 16 === 1 И глагола Господь к Моисею, по умертвии двух сынов Аароних, егда принесоста огнь чуждий пред Господа и скончастася. 2 И рече Господь к Моисею: глаголи Аарону, брату твоему, да не входит по вся часы в святое внутрь завесы, пред лице очистилища, еже есть над кивотом свидения, и да не умрет: во облаце бо явлюся над очистилищем: 3 сице внидет Аарон в святое: с телцем от говяд греха ради, и со овном на всесожжение, 4 и в ризу льняну освящену да облечется, и надраги льняны да будут на теле его, и поясом льняным да опояшется, и клобук льнян да возложит, ризы святы суть: и да омыет водою все тело свое, и да облечется в ня: 5 и от сонма сынов Израилевых да возмет два козла от коз греха ради, и овна единаго во всесожжение, 6 и да приведет Аарон телца, иже греха ради своего, и да помолится о себе и о доме своем, 7 и да возмет два козла, и поставит я пред Господем у дверий скинии свидения: 8 и да возложит Аарон на оба козла жребия: жребий един Господу и жребий другий отпущению. 9 И да приведет Аарон козла, на немже паде жребий Господу, и да принесет греха ради: 10 и козла, на немже паде жребий отпущения, да поставит его жива пред Господем, яко помолитися над ним и яко отпустити его во отпущение, и да отпустит его в пустыню: и возмет козел на ся беззакония их в землю непроходиму. 11 И да приведет Аарон телца, иже греха ради своего, и да помолится о себе и о доме своем: и да заколет телца, иже греха ради своего. 12 И да возмет кадилник полн углия огненна от олтаря, иже пред Господем, и да наполнит руце фимиама сложения чиста, и да принесет внутрь завесы: 13 и да возложит фимиам на огнь пред Господем, и покрыет дым фимиамный очистилище еже на свидениих, и не умрет. 14 И да возмет от крове телца, и да воскропит перстом на очистилище на востоки: пред лицем очистилище да воскропит седмижды от крове перстом своим. 15 И да заколет козла иже греха ради, иже за люди, пред Господем: и да внесет от крове его внутрь завесы, и да сотворит крови его, якоже сотвори крови телчи, и да воскропит кровию его на очистилище прямо очистилищу, 16 и очистит святое от нечистот сынов Израилевых и от неправд их, о всех гресех их: и тако сотворит скинии свидения сотворенней в них посреде нечистоты их. 17 И всяк человек да не будет в скинии свидения, егда входит молитися во святое, дондеже изыдет: и да помолится о себе и о доме своем и о всем сонме сынов Израилевых. 18 И изыдет ко олтарю, иже есть пред Господем, и помолится на нем, и да возмет от крове телца и от крове козла, и возложит на роги олтаря окрест: 19 и да воскропит перстом своим нань седмижды от крове, и очистит его и освятит его от нечистот сынов Израилевых. 20 И совершит очищая святое и скинию свидения и олтарь, и от жерцех очистит, и приведет козла живаго: 21 и да возложит Аарон обе руце свои на главу козла живаго, и да исповесть на нем вся беззакония сынов Израилевых и вся неправды их и вся грехи их: и возложит я на главу козла живаго, и отпустит рукою человека уготованнаго в пустыню: 22 и возмет козел на ся неправды их в землю непроходиму: и да отпустит козла в пустыню. 23 И да внидет Аарон в скинию свидения, и да совлечет ризы льняны, в няже оболчен бяше, входящу ему во святое, и положит я тамо: 24 и омыет тело свое водою на месте святе и да облечется в ризы своя, и изшед да сотворит всесожжение свое и всеплодие людское, и да помолится о себе и о доме своем, и о людех якоже и о жерцех: 25 и тук иже грехов ради да вознесет на олтарь. 26 И отпустивый козла отпущенаго во отпущение да исперет ризы своя и да омыет плоть свою водою, и по сих да внидет в полк. 27 И телца иже греха ради, и козла иже греха ради, ихже кровь внесеся на очищение во святое, да изнесут я вне полка и да сожгут я на огни, и кожы их и мяса их и мотыла их: 28 сожигаяй же я да исперет ризы своя и да омыет тело свое водою, и по сем да внидет в полк. 29 И будет сие вам законное вечное: в месяц седмый, в десятый день месяца, покорите душы вашя, и всякаго дела да не сотворите, ни туземец, ни пришлец прилежай в вас: 30 в той бо день помолится о вас, еже очистити вас от всех грехов ваших пред Господем, и чисти будете: 31 суббота суббот покой да будет сия вам, и покорите душы вашя, законно вечно. 32 Помолится жрец, егоже аще помажут и егоже аще совершат руце его, еже жрети ему по отце своем, и да облечется в ризу льняну свою, ризу святу, 33 и да очистит Святое святаго и скинию свидения, и олтарь да очистит, и о жерцех и о всем сонме да помолится. 34 И будет сие вам законное вечное, еже молитися о сынех Израилевых о всех гресех их, единою в лето да сотворится, якоже заповеда Господь Моисею. === 17 === 1 И рече Господь к Моисею, глаголя: 2 глаголи Аарону и сыном его и ко всем сыном Израилевым, и речеши к ним: сие слово еже заповеда Господь, глаголя: 3 человек человек от сынов Израилевых или от пришелец, иже прилежат в вас, иже аще заколет телца или овцу или козу в полце, и иже аще заколет вне полка 4 и пред двери скинии свидения не принесет, якоже сотворити е во всесожжение или спасение Господу приятно, в воню благовония: и иже аще заколет вне и пред двери скинии свидения не принесет его, яко принести дар Господу пред скинию Господню: и вменится человеку тому кровь: кровь пролиял, да потребится душа она от людий своих: 5 яко да принесут сынове Израилевы жертвы своя, елики аще сии заколют на поли, и да принесут я ко Господу к дверем скинии свидения к жерцу, и пожрут я в жертву спасения Господу. 6 И да возлиет жрец кровь на олтарь окрест пред Господем у дверий скинии свидения: и да вознесет тук в воню благоухания Господу: 7 и да не пожрут ктому жертв своих суетным, имже сами блудодействуют вслед их: законное вечное будет вам в роды вашя. 8 И речеши к ним: человек человек от сынов Израилевых или от сынов пришелцов прилежащих в вас, иже аще сотворит всесожжение или жертву, 9 и к дверем скинии свидения не принесет сотворити е Господви, потребится душа та от людий своих. 10 И человек человек от сынов Израилевых или от пришелец прилежащих в вас, иже аще яст всякую кровь, и утвержу лице Мое на душу ядущую кровь, и погублю ю от людий своих: 11 зане душа всякия плоти кровь его есть, и Аз дах ю вам у олтаря умоляти от душах ваших: кровь бо его вместо души умолит. 12 Сего ради рекох сыном Израилевым: всяка душа от вас да не снест крове, и пришлец прилежащий в вас да не снест крове. 13 И человек человек от сынов Израилевых или от пришлец прилежащих в вас, иже аще уловит ловитву зверя или птицу, еже ястся: пролиет кровь ея, и покрыет ю землею: 14 душа бо всякия плоти кровь его есть. И рекох сыном Израилевым: крове всякия плоти да не снесте, яко душа всякия плоти кровь его есть: всяк ядый ю потребится: 15 и всяка душа яже яст мертвечину или звероядину, от туземец или от пришелец, да исперет ризы своя и да омыет тело водою, и нечист будет до вечера, по сем же чист будет: 16 аше же не исперет риз своих, ни омыет тела водою, то приимет беззаконие свое. === 18 === 1 И рече Господь к Моисею, глаголя: 2 глаголи сыном Израилевым и речеши к ним: Аз Господь Бог ваш: 3 по делом земли Египетския, в нейже обитасте, да не сотворите, и по начинанием земли Ханаанския, в нюже Аз веду вы тамо, не сотворите, и по законом их не ходите: 4 судбы Моя сотворите, и повеления Моя сохраните и ходите в них: Аз Господь Бог ваш: 5 и сохраните вся повеления Моя и вся судбы Моя, и сотворите я: Сотворивый та человек жив будет в них: Аз Господь Бог ваш. 6 Человек человек ко всякому ближнему плоти своея да не приступит открыти срамоты: Аз Господь. 7 Срамоты отца твоего и срамоты матере твоея да не открыеши: мати бо твоя есть, да не открыеши срамоты ея. 8 Срамоты жены отца твоего да не открыеши: срамота отца твоего есть. 9 Срамоты сестры твоея яже от отца твоего или от матере твоея, в дому рожденныя или вне рожденныя, да не открыеши срамоты их. 10 Срамоты дщере сына твоего или дщере дщере твоея, да не открыеши срамоты их, яко твоя срамота есть. 11 Срамоты дщере жены отца твоего да не открыеши, единоотча сестра ти есть, да не открыеши срамоты ея. 12 Срамоты сестры отца твоего да не открыеши, своя бо отцу твоему есть. 13 Срамоты сестры матере твоея да не открыеши, своя бо матери твоей есть. 14 Срамоты брата отца твоего да не открыеши и к жене его да не внидеши, сродник бо ти есть. 15 Срамоты невестки твоея да не открыеши, жена бо сына твоего есть, да не открыеши срамоты ея. 16 Срамоты жены брата твоего да не открыеши, срамота брата твоего есть. 17 Срамоты жены и дщере ея, да не открыеши, дщере сына ея, и дщери дщере ея да не поймеши открыти срамоты их, ближнии бо ти суть, нечестие есть. 18 Сестру жены твоея да не поймеши в наложницу, открыти срамоту ея пред нею, еще живе сущей ей. 19 И к жене во отлучении нечистоты ея да не внидеши открыти срамоты ея. 20 И к жене ближняго твоего да не даси ложа семене твоего, осквернитися с нею. 21 И от семене твоего да не даси служити Молоху, да не оскверниши имене Святаго: 22 и с мужеским полом да не ляжеши женским ложем, мерзость бо есть. 23 И всякому четвероногому да не даси ложа своего в семенение, осквернитися с ним: и жена да не станет ко всякому четвероногому снитися, гнусно бо есть. 24 Не оскверняйтеся во всех сих: во всех бо сих осквернишася языцы, ихже Аз отжену пред лицем вашим: 25 и осквернися земля, и воздах неправду им ея ради: и возненавиде земля седящих на ней. 26 И сохраните вся законы Моя и вся повеления Моя, и не сотворите от всех гнусностей сих, туземец и прибывший пришлец в вас: 27 вся бо сия гнусности сотвориша человецы земнии, бывшии прежде вас, и осквернися земля. 28 И да не вознегодует на вас земля, внегда осквернити вам ю, имже образом вознегодова на языки иже прежде вас: 29 яко всяк, иже аще сотворит от всех гнусностей сих, потребятся душы творящыя сие от людий своих. 30 И сохраните повеления Моя, яко да не сотворите от всех закон гнусных, иже беша прежде вас: и да не осквернитеся в них, яко Аз Господь Бог ваш. === 19 === 1 И рече Господь к Моисею, глаголя: 2 глаголи всему сонму сынов Израилевых, и речеши к ним: святи будите, якоже Аз свят (есмь) Господь Бог ваш. 3 Вийждо отца своего и матере своея да боится, и субботы Моя сохраните: Аз Господь Бог ваш. 4 Не последуйте идолом, и богов слияных не сотворите себе: Аз Господь Бог ваш. 5 И аще пожрете жертву спасения Господу, приятну вам пожрите: 6 в оньже день аще пожрете, (в той день) да снестся, и на утрие: и аще останется до третияго дне, на огни да сожжется: 7 аще же ли ядением сястся в день третий, не жертвенно есть, не приимется: 8 и иже яст е, грех приимет, яко святая Господня оскверни: и потребятся душы ядущыя от людий своих. 9 И пожинающым вам жатву земли вашея, да не скончаете жатвы вашея, нивы твоея пожинания: и падающих клас от жатвы твоея да не собереши: 10 и винограда твоего вторицею да не обереши, ниже грезн винограда твоего да собереши: нищему и пришелцу да оставиши я: Аз есмь Господь Бог ваш. 11 Не украдите, ни солжите, ниже да оклеветает кийждо ближняго. 12 И не кленитеся именем Моим в неправде, и да не оскверните имене святаго Бога вашего: Аз Господь Бог ваш. 13 Да не обидиши ближняго: и да не отимеши, и да не прележит мзда наемника твоего у тебе до утрия. 14 Зла да не речеши глухому, и пред слепым да не положиши претыкания: и да убоишися Господа Бога твоего: Аз Господь Бог ваш. 15 Не сотворите неправды в суде: да не приимеши лица нищаго, ниже почудишися лицу могущаго: по правде да судиши ближнему твоему. 16 Да не ходиши лестию во своем языце, и не востанеши на кровь ближняго твоего: Аз Господь Бог ваш. 17 Да не возненавидиши брата твоего во уме твоем, обличением да обличиши ближняго твоего: и не приимеши ради его греха. 18 И да не отмщает рука твоя, и да не враждуеши на сыны людий своих, и возлюбиши ближняго своего яко сам себе: Аз Господь Бог ваш. 19 Закон Мой сохраните: и скота твоего да не смесиши со скотом инаго рода, и винограда твоего да не насадиши различна: и ризы из двух (вещей) сотканыя гнусныя да не возложиши на ся. 20 И аще кто будет с женою ложем семене, и сия бяше раба хранима мужу, и ценою не искуплена или свобода не дана ей, наказаны да будут: не умрут, яко не свободися: 21 и да приведет за преступление свое Господу к дверем скинии свидения овна преступления, 22 и да помолится о нем жрец овном преступления пред Господем о гресе имже согреши, и оставится ему грех, егоже сотвори. 23 Егда же внидете в землю, юже Господь Бог ваш дает вам, и насадите всяко древо снедное, и очистите нечистоту его, плод его три лета нечист да будет вам, да не снестся: 24 в лето же четвертое будет всяк плод его свят, похвален Господу: 25 в лето же пятое да снесте плод его, прибыток вам плоды его: Аз Господь Бог ваш. 26 Не ядите на горах, и не вражите, и ни сряща смотрите от птиц. 27 Не сотворите обстрижения кругом от влас глав ваших, ниже бриете брад ваших. 28 И кроения не сотворите на теле вашем о души: и язв настреканных да не сотворите в вас: Аз Господь Бог ваш. 29 Да не оскверниши дщере твоея еже блудити ей: и да не прелюбы деет земля, и наполнится земля беззаконий. 30 Субботы Моя сохраните, и от святых Моих убойтеся: Аз Господь. 31 Не последуйте утробным баснем, и к волхвом не прилепитеся, осквернитися в них: Аз Господь Бог ваш. 32 Пред лицем седаго востани и почти лице старчо, и да убоишися Господа Бога твоего: Аз Господь Бог ваш. 33 Аще же кто приидет к вам пришлец в землю вашу, не стужите ему: 34 якоже туземец будет в вас пришлец, иже приидет к вам, и возлюбиши его яко сам себе: яко (и вы) пришелцы бесте в земли Египетстей: Аз Господь Бог ваш. 35 Не сотворите неправды в суде, в мерах и в весах и в мерилех: 36 мерила праведна и весы праведны и мера праведна да будет в вас: Аз есмь Господь Бог ваш, изведый вас от земли Египетския. 37 И сохраните весь закон Мой и вся повеления Моя, и сотворите я: Аз Господь Бог ваш. === 20 === 1 И рече Господь к Моисею, глаголя: 2 рцы сыном Израилевым, глаголя: аще кто от сынов Израилевых, или от прибывших пришелцев во Израили, иже аще даст от семене своего Молоху, смертию да умрет: людие земли да побиют его камением: 3 и Аз утвержу лице Мое на человека того и погублю его от людий его, яко от семене своего даде Молоху, да осквернит святыню Мою и осквернит имя освященных Мне. 4 Аще же презрением презрят туземцы земли очима своима от человека того, внегда дати ему от семене своего Молоху, еже не убити его: 5 и утвержу лице Мое на человека того и на сродники его, и погублю его и всех единомыслящих с ним, еже соблуждати ему со идолы от людий своих. 6 И душа яже аще последует утробным баснем или волхвом, яко соблудити вслед их, утвержу лице Мое на душу ту и погублю ю от людий ея. 7 И будете святи, яко Аз свят Господь Бог ваш. 8 И сохраните повеления Моя и сотворите я: Аз Господь освящаяй вас. 9 Человек человек, иже аше зло речет отцу своему или матери своей, смертию да умрет: отцу своему или матери своей зле рече, повинен будет. 10 Человек человек, иже аще прелюбы содеет с мужнею женою, или кто прелюбы содеет с женою ближняго своего, смертию да умрут прелюбодей и прелюбодейца. 11 И иже аще пребудет с женою отца своего, срамоту отца своего открыл есть, смертию да умрут оба, повинни суть. 12 И аще кто будет с невесткою своею, смертию да умрут оба, нечествоваша бо, повинни суть. 13 И аще кто будет с мужеским полом ложем женским, гнусность сотвориша оба, смертию да умрут, повинни суть: 14 иже аще поймет жену и матерь ея, беззаконие есть, огнем да сожгут его и оныя, и не будет беззаконие в вас. 15 И иже аще даст ложе свое четвероножному, смертию да умрет, четвероножное же убиете. 16 И жена яже аше приступит ко всякому скоту, еже быти с ним, да убиете жену и скот, смертию да умрут, повинни суть. 17 Иже аще поймет сестру свою от отца своего или от матере своея, и увидит срамоту ея, и она увидит срамоту его, укоризна есть, да потребятся пред сыны рода их: срамоту сестры своея откры, грех приимут. 18 И муж иже будет с женою сквернавою и открыет срамоту ея, течение ея откры, и она откры течение крове своея, да потребятся оба от рода их. 19 И срамоту сестры отца твоего и сестры матере твоея да не открыеши: ужичество бо откры, грех понесут. 20 Иже аще будет со сродницею своею, срамоту сродства своего откры, безчадни измрут. 21 И человек иже аще поймет жену брата своего, нечистота есть: срамоту брата своего открыл есть, безчадни измрут. 22 И сохраните вся повеления Моя и вся судбы Моя и сотворите я, и не вознегодует на вас земля, в нюже Аз введу вы тамо вселитися на ней. 23 И не ходите в законы языческия, ихже Аз изгоню от вас: яко сия вся сотвориша, и возгнушахся ими. 24 И рех к вам: вы наследите землю их, и Аз дам вам ю в притяжание, землю текущую медом и млеком, Аз Господь Бог ваш, отлучивый вас от всех язык. 25 И отлучите себе между скоты чистыми и между скоты нечистыми, и между птицами чистыми и нечистыми: и не оскверните душ ваших в скотех и в птицах и во всех гадех земных, яже Аз отлучих вам в нечистоте, 26 и будете Ми святи, яко Аз свят есмь Господь Бог ваш, отлучивый вас от всех язык быти Моими. 27 И муж или жена иже аще будет от них чревобасник или волшебник, смертию да умрут оба: камением да побиете их, повинни суть. === 21 === 1 И рече Господь к Моисею, глаголя: рцы жерцем сыном Аароним, и речеши им: над душами да не осквернятся в языце своем, 2 но разве в дому ближняго своего, над отцем и материю, и сынами и дщерьми, над братом 3 и над сестрою своею девою, яже есть ближняя ему, не дана мужу, над сими да осквернятся: 4 да не осквернится внезапу в людех своих, во осквернение свое. 5 И да не обриете главы по мертвем, и обличия брады да не обриют, и на плотех своих да не сотворят язв: 6 святи да будут Богу своему и не осквернят имене Бога своего: жертвы бо Господни дары Бога своего сами приносят, и будут святи. 7 Жены блудницы и осквернены да не поймут, и жены изгнаныя от мужа ея да не поймут: яко святи суть Господу Богу своему: 8 и да освятиши его: дары Господа Бога вашего сей приносит, свят будет: яко свят Аз есмь Господь Бог ваш освящая их. 9 И дщерь человека жерца аще осквернится, еже соблудити, имя отца своего сия оскверняет: огнем да сожжется. 10 И жрец великий от братий своих, емуже возлиян на главу елей помазания, и совершенный, еже облачитися в ризы, главы да не открыет, и риз своих да не раздерет, 11 и ко всякой души умершей да не приидет: над отцем своим и над материю своею да не осквернится, 12 и от святых да не изыдет, и да не осквернит имене святаго Бога своего, яко святый елей помазания Бога его на нем: Аз Господь. 13 Сей в жену деву от рода своего да поймет: 14 вдовицы же и изгнаныя, и оскверненыя и блудницы, сих да не поймет: но девицу от племене своего да поймет в жену: 15 и да не осквернит семене своего в людех своих: Аз Господь Бог освящаяй его. 16 И рече Господь к Моисею, глаголя: 17 рцы ко Аарону, глаголя: человек от рода твоего в родех ваших, аще коему будет на нем порок, да не приступит приносити дары Бога своего: 18 всяк человек, емуже аще будет на нем порок, да не приступит: человек слеп, или хром, или корносый, или ухорезан, 19 или человек, емуже есть сокрушение руки или сокрушение ноги, 20 или горбат, или гноеточив очима, или бельмоочен, или человек, на немже суть красты дивия, или лишаи, или единоятрный: 21 всяк, емуже аще будет на нем порок от семене Аарона жерца, да не приступит принести жертв Богу твоему, зане порок на нем: даров Божиих да не приступит приносити: 22 дары Бога своего святая святых, и от святых да снест: 23 обаче к завесе да не приступит, и ко олтарю да не приближится, яко порок имать: и да не осквернит святилища Бога своего, яко Аз Господь освящаяй их. 24 И глагола Моисей ко Аарону и сыном его, и ко всем сыном Израилевым. === 22 === 1 И рече Господь к Моисеовы, глаголя: 2 рцы Аарону и сыном его, да внимают от святынь сынов Израилевых, и да не осквернят имене святаго Моего, елика они освящают Ми: Аз Господь. 3 Рцы им: в роды вашя всяк человек, иже аще приступит от всякаго семене вашего ко святым, елика аще освятят сынове Израилевы Господу, и нечистота его на нем будет, потребится душа оная от Мене: Аз Господь Бог ваш. 4 И человек от семене Аарона жерца, и сей прокажен, или семя изливает, от святых да не снест, дондеже очистится: и прикасаяйся всякой нечистоте души, или человек, емуже аще изыдет от его ложа семя, 5 или иже аще прикоснется всякому гаду нечисту, иже осквернит его, или человеку, иже осквернит его, по всякой нечистоте его: 6 душа, яже аще прикоснется их, нечиста будет до вечера: да не снест от святых, аще не омыет тела своего водою, 7 и зайдет солнце, и чист будет: и тогда да снест от святых, яко хлеб его есть. 8 Мертвечины и звероядины да не снест, еже осквернитися ему в них: Аз Господь. 9 И да сохранят повеления Моя, да не приимут сих ради греха, и измрут за них, аще осквернят их: Аз Господь Бог освящаяй их. 10 И всяк иноплеменник да не снест святынь: приселник иереев или наемник да не снест святынь. 11 Аще же жрец пристяжет душу пристяжаную сребром, сия да снест хлебы его: и домочадцы его, и сии да снедят хлебы его. 12 И дщерь человека жерца, аще посягнет за мужа иноплеменника, сия от начатков святых да не снест. 13 И дщерь жерца аще будет вдова или отпущена, плода же не будет ей, возвратится в дом отца своего, по юности своей, от хлебов отца своего да снест: всяк же иноплеменник да не снест от них. 14 И человек, иже аще яст святая по неведению, и да приложит пятую свою часть ко истому, и да даст сие жерцу святое. 15 И да не осквернят святынь сынов Израилевых, ихже они отделяют Господу: 16 и да не наведут на себе беззаконие преступления, внегда ясти им святыню их, яко Аз Господь освящаяй их. 17 И рече Господь к Моисею, глаголя: 18 глаголи Аарону и сыном его и всему сонму Израилеву и речеши к ним: человек человек от сынов Израилевых, или от пришлец прилежащих к ним во Израили, иже аще принесет дары своя по всякому исповеданию своему, или по всякому изволению своему, елика аще принесут Господу на всесожжение, 19 приятны вам непорочны мужеск пол от стад волов, или от овен и от коз: 20 всех, елика аще имут порок на себе, да не принесут Господу, понеже неприятно будет вам. 21 И человек иже аще принесет жертву спасения Господу, отлучив обет или по изволению, или в праздники вашя, от стад волов или от овец, непорочно да будет в приятие, всяк порок да не будет на нем: 22 слепо, или сокрушено, или язык урезан имущо, или червиво, или крастово, или лишаво, да не принесут тех Господу, и в жертву не дадите от них на олтарь Господви: 23 и телца или овцу ухорезну, или безхвостну, в заколение сотвориши я себе (по изволению), в обет же твой да не приимется: 24 емуже суть ятра сокрушена, и емуже раздавлена, и изрезана, и исторжена, да не принесете сих Господу, и в земли вашей да не сотворите. 25 И от руки иноплеменника да не принесете даров Богу вашему от всех сих, яко вреждения суть на них, порок на них, не приимутся сия от вас. 26 И рече Господь к Моисею, глаголя: 27 телец, или овча, или козля, егда родится, да будет седмь дний под материю своею, в день же осмый и далее принесется в дар, принос Господу: 28 и телца и овчате вкупе с материю да не заколете в един день, 29 аше же пожреши жертву обет радования Господви, приятно вам пожрите е: 30 сия в тойже день да снестся, да не оставите от мяс на утрие: Аз есмь Господь. 31 И сохраните заповеди Моя и сотворите я: Аз Господь: 32 и не оскверните имене Святаго, и освящуся посреде сынов Израилевых: Аз Господь освящаяй вас, 33 изведый вы из земли Египетския, яко быти вам в Бога: Аз Господь. === 23 === 1 И рече Господь к Моисею, глаголя: 2 глаголи сыном Израилевым и речеши к ним: праздницы Господни, яже наречете нарочитыя святыя, сии суть праздницы Мои: 3 в шесть дний да сотвориши дела, и в день седмый суббота, покой нареченный свят Господви, всякаго дела да не сотворите: суббота есть Господви во всем обитании вашем. 4 Сии праздницы Господу наречены святи, яже наречете сия во времена их: 5 в первем месяце в четвертыйнадесять день месяца, между вечерними, Пасха Господу: 6 и в пятыйнадесять день месяца перваго праздник опресноков Господу: седмь дний опресноки да ясте. 7 И день первый наречен свят будет вам: всякаго дела работня не сотворите: 8 и да принесете всесожжения Господу седмь дний, и день седмый наречен свят будет вам: всякаго дела работня не сотворите. 9 И рече Господь к Моисею, глаголя: 10 глаголи сыном Израилевым и речеши к ним: егда внидете в землю, юже Аз даю вам, и пожнете жатву ея, и принесете снопы начаток жатвы вашея к жерцу, 11 и вознесет сноп пред Господа приятен вам: на утрие перваго дне субботы да вознесет его жрец. 12 И сотворите в день, в оньже аще принесете сноп, овча непорочно единолетно во всесожжение Господу: 13 и жертву его две десятины муки пшеничны спряжены в елеи: жертва Господу, в воню благовония Господу: и возлияние его вина четвертую часть ина. 14 И хлеба, и пряженых класов новых да не снесте, даже до того дне самаго, дондеже принесете вы дары Богу вашему: законно вечно в роды ваша во всем населении вашем. 15 И сочтите себе от наутрия суббот, от дне, в оньже аще принесете снопы возложения, седмь седмиц целых 16 даже до наутрия последния седмицы да сочтете пятьдесят дний, и да принесете жертву нову Господу. 17 От вселения вашего да принесете хлебы возложение, два хлеба: от двух десятин муки пшеничны да будут, квашены да испекутся от первых плодов Господу: 18 и да принесете со хлебами седмь агнцев непорочных единолетных, и телца единаго от стад, и овна два непорочна: и будут во всесожжение Господу, и жертвы их, и возлияния их, жертва воня благовония Господу. 19 И сотворите козла от коз единаго о гресе, и два агнца единолетна в жертву спасения с хлебами первых жит. 20 И да возложит я жрец с хлебами первых жит, возложение пред Господем со обема агнцы: свята будут Господу, жерцу иже приносит я, тому да будут. 21 И прозовете сей день, нарочит свят будет вам: всякаго дела работня не сотворите в онь: законно вечно в роды вашя во всем населении вашем. 22 И егда жнете жатву земли вашея, не потребите останка жатвы нивы своея, егда жнете, и от падающих от жатвы вашея да не собереши: нищему и пришелцу оставиши я: Аз Господь Бог ваш. 23 И рече Господь к Моисею, глаголя: 24 рцы сыном Израилевым, глаголя: месяца седмаго, в первый день месяца, да будет вам покой, память труб: наречен свят будет вам: 25 всякаго дела работня не сотворите, и принесете всесожжение Господу. 26 И рече Господь к Моисею, глаголя: 27 и в десятый день седмаго месяца сего день очищения, наречен свят да будет вам: и смирите душы вашя, и принесите всесожжение Господу: 28 всякаго дела не сотворите в самый день сей: есть бо день очищения сей вам, Їмолити о вас пред Господем Богом вашим: 29 всяка бо душа, яже не покорится в день той, потребится от людий своих: 30 и всяка душа, яже сотворит дело в самый день сей, погибнет душа та от людий своих: 31 всякаго дела не сотворите, законно вечно в роды вашя, во всех селениих ваших. 32 Субботы суббот будут вам: и смирите душы вашя, от девятаго дне месяца от вечера, даже до десятаго дне месяца, до вечера, субботствуйте субботы вашя. 33 И рече Господь к Моисею, глаголя: 34 рцы сыном Израилевым, глаголя: в пятыйнадесять день месяца седмаго сего, праздник кущей седмь дний Господу: 35 и день первый наречен свят будет: всякаго дела работня не сотворите: 36 седмь дний да принесете всесожжения Господу: и день осмый наречен свят будет вам, и принесете всесожжения Господу: исходное есть, всякаго дела работня не сотворите. 37 Сии праздницы Господни, яже наречете нарочиты святы, еже приносити приносы Господу: всесожжения и жертвы их, и возлияния их от дне до дне, 38 кроме суббот Господних и кроме даров ваших, и кроме всех обетов ваших и кроме благовольных ваших, яже аще дадите Господу. 39 И в пятыйнадесять день месяца седмаго сего, егда скончаете жита земли, празднуйте Господу седмь дний: в день первый покой, и в день осмый покой: 40 и да возмете себе в день первый плод древа красен, и ветвь финическую, и ветви древа частыя, и вербы, и агновы ветви от потока, и возвеселитеся пред Господем Богом вашим седмь дний в лето: 41 законно вечно в роды вашя, в месяц седмый празднуйте его: 42 в кущах да пребудете седмь дний: всяк туземец во Израили да пребудет в кущах: 43 яко да уведят роды вашя, яко в кущах вселих сыны Израилевы, внегда извести мне их из земли Египетския: Аз Господь Бог ваш. 44 И поведа Моисей праздники Господни сыном Израилевым. === 24 === 1 И рече Господь к Моисею, глаголя: 2 заповеждь сыном Израилевым, да возмут ти елей от масличия чист исцежен в светение, да горит светило всегда, 3 вне завесы в скинии свидения, и возжигати будут его Аарон и сынове его от вечера до заутра пред Господем непрестанно, законно вечно в роды вашя: 4 на светилнице чистем возжигати будете светила пред Господем даже до утра. 5 И возмете муки пшеничны, и сотворите от нея дванадесять хлебов: дву десятин да будет хлеб един: 6 и возложите их на два положения, по шести хлебов едино положение на трапезе чисте пред Господем: 7 и возложите на едино положение ливан чист и соль, и да будут хлебы в память предлежащыя пред Господем: 8 в день субботы да предлагаются пред Господем всегда от сынов Израилевых, завет вечный: 9 и да будут Аарону и сыном его, и да снедят я на месте святе, суть бо святая святых: сие им от жертв Господу в закон вечный. 10 И изыде сын жены Израилтяныни, и сей бе сын Египтянина в сынех Израилевых: и пряхуся в полце иже от Израилтяныни и муж Израилтянин: 11 и нарек сын жены Израилтяныни имя (Господне) прокля. И приведоша его к Моисею. Имя же матере его Саломииф, дщерь Давриина, от племене Данова. 12 И ввергоша его в темницу, разсудити о нем повелением Господним. 13 И рече Господь к Моисею, глаголя: 14 изведи клявшаго вне полка, и да возложат вси слышавшии руце свои на главу его, и да побиют его камением весь сонм: 15 и сыном Израилевым глаголи и речеши к ним: человек человек, иже аще прокленет Бога своего, грех приимет: 16 нарицаяй же имя Господне смертию да умрет: камением да побиют его весь сонм израильский: аще туземец, или пришлец, егда наречет имя Господне, да умрет: 17 и человек, иже аще поразит всяку душу человечу, и умрет, смертию да умрет: 18 и иже аще ударит скота, и умрет, да воздаст душу вместо души: 19 и аще кто сотворит порок ближнему, якоже сотвори ему, такожде и ему да сотворят: 20 изломление за изломление, око за око, зуб за зуб: якоже сотворил порок человеку, такожде да сотворят и ему: 21 иже аше ударит человека, и умрет смертию да умрет: 22 оправдание едино будет пришелцу и туземцу, яко Аз есмь Господь Бог ваш. 23 И глагола Моисей к сыном Израилевым, и изведоша клявшаго вне полка, и побиша его камением весь сонм: и сынове Израилевы сотвориша, якоже заповеда Господь Моисею. === 25 === 1 И рече Господь к Моисею на горе Синайстей, глаголя: 2 глаголи сыном Израилевым и речеши к ним: егда внидете в землю, юже Аз даю вам, и почиет земля, юже Аз даю вам, субботы Господу. 3 Шесть лет да сееши ниву твою, и шесть лет да режеши виноград твой и собереши плод его: 4 в седмое же лето суббота, покой да будет земли, суббота Господня: нивы твоея сеяти и винограда твоего резати не будеши, 5 и сама собою произрастающая нивы твоея да не пожнеши, и винограда отлучения твоего да не собереши: лето покоя будет земли. 6 И будут субботы земли яди тебе, и рабу твоему и рабыни твоей, и наемнику твоему и обиталнику прилежащему к тебе, 7 и скотом твоим и зверем сущым на земли твоей да будет всяк плод его в снедь. 8 И исчислиши себе седмь лет покоя, седмь лет седмижды: и будут тебе седмь седмин лет, четыредесять девять лет. 9 И возвестите трубным гласом во всей земли вашей месяца седмаго в десятый день месяца: в день очищения возвестите трубою во всей земли вашей. 10 И освятите лето, пятьдесятое лето, и разгласите оставление на земли всем живущым на ней: лето оставления знамение сие будет вам: и да отидет кийждо вас в притяжание свое, и кийждо во отечество свое отидете. 11 Оставления знамение сие будет вам, лето пятьдесятое, лето будет вам: ни сеяти, ниже жати будете, еже само произникнет на ней, и да не объемлеши освященных (Богу) ея: 12 яко оставления знамение есть, свято да будет вам: от нив ядите плоды ея: 13 и в лето оставления знамения сего да возвратится кийждо в притяжание свое. 14 Аще же отдаси куплею ближнему твоему, или аще притяжеши от ближняго твоего, да не оскорбляет человек ближняго: 15 по числу лет по знамении, да притяжеши от ближняго, по числу лет плодов да продастся тебе. 16 Якоже аще более лет, умножит притяжание его, и якоже аще мнее лет, уменшит притяжание его: яко число плодов его, тако да продаст тебе. 17 Да не оскорбит человек ближняго, и да убоишися Господа Бога твоего: Аз Господь Бог ваш. 18 И сотворите вся оправдания Моя и вся суды Моя, сохраните же и сотворите я, и вселитеся на земли уповающе. 19 И даст земля плоды своя, и снесте в сытость, и вселитеся на ней уповающе. 20 Аще же речете: что ясти будем в седмое лето сие, аще не сеем, ни собираем плодов своих, 21 и послю благословение Мое вам в лето шестое, и сотворит плоды своя на три лета: 22 и посеете в лето осмое, и снесте от плодов ветхих даже до лета девятаго: дондеже приспеют плоды ея, снесте ветхая ветхих. 23 И земля да не продастся во утверждение: Моя бо есть земля, яко пришелцы и приселницы вы есте предо Мною: 24 и по всей земли одержания вашего, искуп дадите земли. 25 Аще же нищетствует брат твой, иже с тобою, и продаст от одержания своего, да приидет ужик ближний ему и искупит продание брата своего. 26 Аще же не будет кому ужика, и возможет рука его обрести доволен искуп его, 27 и исчислит лета продания его, и воздаст еже излише имать, человеку емуже продано бе оное, и возвратится во одержание свое. 28 Аще же не обрящет рука его доволное, еже отдати ему, да будет проданое купившему е даже до шестаго лета оставления, и изыдет во оставление, и возвратится во одержание свое. 29 Аще же кто продаст дом обитаемый во граде огражденнем, и будет искупление его, дондеже исполнится: лето дний будет искупление его. 30 Аще же не искупит, дондеже скончается лето все, да укрепится дом сущий во граде имущем ограждение в твердость купившему его, в роды его, и не возвратится во оставление. 31 Домы же иже на селех, имже несть окрест их ограждения, к селу земли да приложатся: искупуемы всегда да будут, и во оставление да возвратятся. 32 И гради левитстии, домы градов одержания их, искупуемы да будут всегда левитом. 33 И иже аще искупит от левит: и изыдет продание домов града одержания их во оставление, яко домы градов левитских одержание их, посреде сынов Израилевых. 34 И села отделеная градом их да не продадутся, яко одержание вечное сие их есть. 35 Аще же нищетствует брат твой, иже с тобою, и изнеможет руками у тебе, заступи его яко пришелца и приселника, да поживет брат твой с тобою: 36 да не возмеши от него лихвы, ниже более (данаго), и убоишися Бога твоего: Аз Господь: и поживет брат твой с тобою. 37 Сребра твоего да не даси ему в лихву, и ради прибытка не даси ему пищей твоих. 38 Аз Господь Бог ваш, изведый вы из земли Египетския, еже дати вам землю Ханаанску, яко быти Мне Богу вашему. 39 Аще же оубожает брат твой у тебе, и продастся тебе, да не поработает тебе работы рабския: 40 аки наемник или пришлец да будет тебе, даже до лета оставления делати будет у тебе, 41 и да изыдет от тебе, и дети его с ним в лето оставления, и да отидет в род свой, и во одержание отчее свое возвратится, 42 понеже раби Мои суть сии, ихже изведох из земли Египетския, да не продастся проданием рабиим: 43 да не отяготиши его трудом, и убоишися Господа Бога твоего. 44 И раб и рабыня, иже _ще будут у тебе от язык, иже окрест тебе суть, от тех да притяжете раба и рабыню. 45 И от сынов приселничих, иже суть в вас, от сих притяжете, и от сродников их, елицы аще будут в земли вашей, да будут вам во одержание, 46 и да разделите я детем вашым по вас, и да будут вам во одержание во век: братии же вашея, сынов Израилевых, кийждо брата своего да не отяготит его в трудех. 47 Аще же обрящет рука пришелца или приселника иже у тебе, и обнищав брат твой продастся к пришелцу или приселнику иже у тебе, или родившемуся от рода пришелча, 48 по продании ему, искуп да будет ему, един от братий его да искупит его: 49 брат отца его, или сын брата отца его, да искупит его, или от свойственных плоти племене его искупит его: аще же возможет рука его, искупит себе, 50 да сочтется с притяжавшим его, от лета в неже продася ему даже до лета оставления, и будет сребро продания его аки день наемника: от лета до лета да будет с ним. 51 Аще же кому множае лет будет, против тех отдаст искуп свой, от сребра продания своего. 52 Аще же мало останется от лет до лета оставления, и да сочтет ему по летом его, и отдаст искуп его аки наемник: 53 от года до года да будет с ним: да не отяготиши его трудом пред тобою. 54 Аше же не искупится по сим, да изыдет в лето оставления сам и дети его с ним: 55 яко Мои сынове Израилевы раби суть, отроцы Мои сии суть, ихже изведох из земли Египетския: Аз Господь Бог ваш. === 26 === 1 Не сотворите себе (образов) рукотвореных, ниже изваяных, ниже столпа поставите себе, ниже камене поставите в земли вашей во знамение, ко еже покланятися ему: Аз есмь Господь Бог ваш. 2 Субботы Моя сохраните, и от святых Моих убойтеся: Аз есмь Господь. 3 Аще в повелениих Моих ходите, и заповеди Моя сохранитеи сотворите я: 4 и дам дождь вам во время свое, и земля даст плоды своя, и древеса селная отдадят плод свой: 5 и постигнет вам млачение (жит) обрание вина, и обрание вина постигнет сеятву, и снесте хлеб ваш в сытость, и вселитеся с твердостию на земли вашей, и рать не пройдет сквозе землю вашу: 6 и дам мир в земли вашей, и уснете, и не будет устрашаяй вас: и погублю звери лютыя от земли вашея: 7 и рать сквозе землю вашу не пройдет, и поженете враги вашя, и падут пред вами убиением: 8 и поженут от вас пять сто, и сто вас поженет тмы, и падут врази ваши пред вами мечем: 9 и призрю на вас и благословлю вас, и возращу вас и умножу вас, и поставлю завет Мой с вами: 10 и снесте ветхая и ветхая ветхих, и ветхая от лица новых изнесете: 11 и поставлю завет Мой в вас, и не возгнушается душа Моя вами: 12 и похожду в вас, и буду вам Бог, и вы будете Ми людие: 13 Аз есмь Господь Бог ваш, изведый вас из земли Египетския, сущым вам рабом: и сокруших узы ярма вашего, и изведох вас со дерзновением. 14 Аше же не послушаете Мене, ниже сотворите повелений Моих сих, 15 но ни покоритеся им, и о судбах Моих вознегодует душа ваша, яко не творити вам всех заповедий Моих, яко разорити завет Мой, 16 и Аз сотворю сице вам, и наведу на вас скудость и красту, и желтяницу вреждающую очи ваша и душы вашя истаевающую: и посеете вотще семена ваша, и поядят я супостаты вашя: 17 и утвержу лице Мое на вас, и падете пред враги вашими, и поженут вы ненавидящии вас, и побегнете ни комуже гонящу вас. 18 И аще до сего не послушаете Мене, и приложу наказати вы язвами седмижды за грехи вашя: 19 и сокрушу досаждение гордыни вашея, и положу небо вам аки железно, и землю вашу аки медяну: 20 и будет вотще крепость ваша, и не даст земля ваша семене своего, и древа села вашего не дадут плода своего. 21 И аще по сих пойдете страною и не восхощете послушати Мене, приложу вам язв седмь по грехом вашым, 22 и послю на вы звери лютыя земныя, и изядят вы и потребят скоты вашя, и умалены сотворю вы, и пусты будут путие ваши. 23 И аще сими не накажетеся, но пойдете ко Мне страною, 24 пойду и Аз с вами в ярости страною, и поражу вы и аз седмижды грех ради ваших, 25 и наведу на вы мечь мстяй месть завета, и вбегнете в грады вашя: и послю на вы смерть, и предани будете в руце враг ваших: 26 внегда скорбети вам скудостию хлебов, и испекут десять жен хлебы вашя в пещи единей, и отдадят хлебы вашя весом, и ясти будете, и не насытитеся. 27 Аще же в сих не послушаете Мене и пойдете ко Мне страною, 28 и Аз пойду с вами в ярости страною, и накажу вы аз седмижды по грехом вашым: 29 и ясти будете плоти сынов ваших, и плоти дщерей ваших ясти имате, 30 и сотворю пустая капища ваша и потреблю древяная рукотворения ваша, и положу трупы вашя на трупех кумир ваших, и возненавидит вас душа Моя: 31 и сотворю грады вашя пусты, и опустошу святая ваша, и не обоняю вони жертв ваших: 32 и сотворю пусту аз землю вашу, и удивятся о ней врази ваши, живущии на ней: 33 и разсыплю вы в языки, и потребит вы находяй мечь, и будет земля ваша пуста, и грады ваши будут пусты. 34 Тогда возблаговолит земля субботы своя, во вся дни запустения своего, и вы будете в земли враг ваших: тогда воспразднует земля и возблаговолит субботы своя: 35 во вся дни опустения своего воспразднует, яже не празднова в субботах ваших, егда живясте на ней. 36 И оставльшымся от вас вложу страх в сердца их в земли враг их, и поженет их глас листа летяща, и побегнут яко бежащии от рати, и падут ни кимже гоними. 37 И презрит брат брата аки на рати, ни кому нападающу, и не возможете противустати врагом вашым: 38 и погибнете в языцех, и потребит вас земля враг ваших. 39 И оставльшиися от вас истлеют за грехи своя и за грехи отец своих, в земли враг своих истают, 40 и исповедят грехи своя и грехи отец своих, яко преступиша и презреша Мя, и яко ходиша предо Мною страною: 41 и Аз пойду с ними в ярости страною и погублю их в земли врагов их: тогда усрамится сердце их необрезаное и тогда познают грехи своя:: 42 и помяну завет Иаковль и завет Исааков, и завет Авраамль помяну, 43 и землю помяну, и земля останется от них. Тогда приимет земля субботы своя, внегда опустети ей их ради: и они приимут своя беззакония, ихже ради презреша судбы Моя, и о повелениих Моих вознегодова душа их: 44 обаче сущым им в земли врагов своих, не презрех их, ниже вознегодовах о них, яко потребити я и разорити завет Мой иже к ним: Аз бо есмь Господь Бог их. 45 И помяну завет их первый, егда изведох их из земли Египетския, из дому работы пред языки, еже быти Мне Богу их: Аз есмь Господь. 46 Сия судбы Моя и повеления Моя, и закон, егоже даде Господь между Собою и между сыны Израилевы, на горе Синайстей, рукою Моисеовою. === 27 === 1 И рече Господь к Моисею, глаголя: 2 глаголи сыном Израилевым и речеши к ним, глаголя: человек, иже аще обещает обет, яко цену души своея Господу, 3 да будет цена мужеска полу от двадесяти лет до шестидесяти лет, да будет цена его пятьдесят дидрахм сребра весом святым, 4 женска же полу да будет цена тридесять дидрахм: 5 аще же от пяти лет до двадесяти лет, да будет цена мужеску полу двадесять дидрахм, женску же полу десять дидрахм: 6 от месяца же единаго до пяти лет, да будет цена мужеска полу пять дидрахм сребра, женска же полу три дидрахмы сребра: 7 аще же от шестидесяти лет и вышше, аще убо мужеск пол будет, да будет цена его пятьнадесять дидрахм сребра, аще же женск пол, десять дидрахм. 8 Аще же убог будет ценою своею, да станет пред жерцем, и да оценит его жрец: якоже может рука обещавшагося, тако оценит его жрец. 9 Аще же от скотов приносимых от них дар Господу, иже аще даст от сих Господу, будет свято. 10 Да не пременит добра злым, ниже зла добрым: аще же изменяя изменит оный скот скотом, да будет и той и пременение свята. 11 Аще же всяк скот нечист, от нихже не приносится дар Господу, да поставит скота пред жерцем, 12 и оценит его жрец между добрым и между злым: и якоже оценит его жрец, тако да будет. 13 Аще же искупуя искупит его, да приложит пятую часть к цене его. 14 И человек, иже аще освятит дом свой свят Господу, и оценит его жрец между добрым и между злым: якоже оценит его жрец, тако да станет. 15 Аще же освятивый его искупит дом свой, да приложит к сему пятую часть сребра цены его, и будет ему. 16 Аще же от нив одержания своего освятит человек Господу, и да будет цена его по сеянию его, за спуд ячменя пятьдесят дидрахм сребра. 17 Аще же от лета оставления освятит ниву свою, по цене ея да станет. 18 Аще же напоследок по оставлении освятит ниву свою, да причтет ему сребро жрец к летом оставшымся даже до лета оставления, и отимется от цены его 19 аще же искупит ниву освятивый ю, да приложит пятую часть сребра к цене ея, и да будет ему. 20 Аще же не искупит нивы, и отдаст ниву человеку иному, не ктому да искупит ю: 21 но да будет нива минувшу лету оставления, свята хвална Господу, якоже земля отлученая: жерцу да будет во одержание его. 22 Аще же от нивы, юже стяжа, яже несть от села одержания его, освятит Господу, 23 да сочтет ему жрец останок цены от лета оставления, и да отдаст цену в той день святу Господу: 24 и в лето оставления да отдастся нива человеку, от негоже притяжа ю, егоже бе одержание земли. 25 И всяка цена да будет весами святыми, двадесять пенязей будет дидрахма. 26 И всяк первенец, иже аще родится в скоте твоем, да будет Господу, и да не освятит его никтоже: аще телец, аше овча, Господу есть. 27 Аще же от четвероножных нечистых, да пременит по цене его, и да приложит пятую часть его к сему, и да будет ему: аще же не искупится, да продастся по цене его. 28 Всяк же обет, егоже аше обещает человек Господу от всех, елика ему суть, от человека даже до скота, и от нив одержания его, не продастся, ниже искупится всякий обет свят святых будет Господу. 29 И всяк обет, иже аще обещан будет от человек, не искупится, но смертию да умертвится. 30 Всяка десятина земли, от семене земнаго и от плода древянаго Господу есть, свято Господу. 31 Аще же искупуя искупит человек десятину свою, пятую часть его да приложит к нему, и да будет ему. 32 И всяка десятина волов и овец, и всяко, еже аще приидет в число под жезл десятое, будет свято Господу. 33 Не премениши добраго злым, ниже добрым злаго: аще же пременяя премениши е, то и пременение его будет свято, да не искупится, 34 сия суть заповеди, яже заповеда Господь Моисею к сыном Израилевым на горе Синайстей. == Числа == === 1 === 1 И глагола Господь к Моисею в пустыни Синайстей, в скинии свидения, в первый день месяца втораго, втораго лета изшедшым им от земли Египетския, глаголя: 2 возмите сочтение всего сонма сынов Израилевых по сродством их, по домом отечества их, по числу имен их, по главам их: 3 всяк мужеск пол от двадесяти лет и вышше, всяк исходяй с силою Израилевою, соглядайте их с силою их, ты и Аарон созирайте их: 4 и с вами да будут с силою своею кийждо, кийждо по племени коегождо от князей, по домом отечеств да будут. 5 И сия имена мужей, иже станут с вами: от Рувима Елисур сын Седиуров, 6 от Симеона Саламиил сын Сурисадаев, 7 от Иуды Наассон сын Аминадавль, 8 от Иссахара Нафанаил сын Согаров, 9 от Завулона Елиав сын Хелонь, 10 от сынов Иосифовых, иже от Ефрема, Елисам сын Семиудов, от Манассии Гамалиил сын Фадассуров, 11 от Вениаминя Авидан сын Гадеониев, 12 от Дана Ахиезер сын Амисадаев, 13 от Асира Фагаиил сын Ехранов, 14 от Гада Елисаф сын Рагуилов, 15 от Неффалима Ахирей сын Енань. 16 Сии нареченнии сонма князи от племен, по отечествам их, тысященачалницы Израилевы суть. 17 И поя Моисей и Аарон мужы сия нареченныя именем. 18 И весь сонм собраша в первый день месяца втораго лета, и соглядаша я по родом их, по отечествам их, по числу имен их, от двадесяти лет и вышше, всяк мужеск пол по главам их, 19 якоже повеле Господь Моисею: и соглядашася сии в пустыни Синайстей. 20 И быша сынове Рувима, первенца Израилева, по сродством их, по сонмом их, по домом отечеств их, по числу имен их, по главам их, всяк мужеск пол от двадесяти лет и вышше, всяк исходяй с силою, 21 соглядание их от племене Рувимля четыредесять шесть тысящ и пять сот. 22 Сынов Симеоновых по сродством их, по сонмом их, по домом отечеств их, по числу имен их, по главам их, всяк мужеск пол от двадесяти лет и вышше, всяк исходяй с силою, 23 соглядание их от племене Симеоня пятьдесят девять тысящ и триста. 24 Сынов Иудиных по сродством их, по сонмом их, по домом отечеств их, по числу имен их, по главам их, всяк мужеск пол от двадесяти лет и вышше, всяк исходяй с силою, 25 соглядание их от племене Иудина седмьдесят четыри тысящы и шесть сот. 26 От сынов Иссахаровых по сродством их, по сонмом их, по домом отечеств их, по числу имен их, по главам их, всяк мужеск пол от двадесяти лет и вышше, всяк исходяй с силою, 27 соглядание их от племене Иссахарова пятьдесят и четыри тысящы и четыре ста. 28 От сынов Завулоних по сродством их, по сонмом их, по домом отечеств их, по числу имен их, по главам их, всяк мужеск пол от двадесяти лет и вышше, всяк исходяй с силою, 29 соглядание их от племене Завулоня пятьдесят седмь тысящ и четыре ста. 30 От сынов Иосифовых, сынов Ефремлих по сродством их, по сонмом их, по домом отечеств их, по числу имен их, по главам их, всяк мужеск пол от двадесяти лет и вышше, всяк исходяй с силою, 31 соглядание их от племене Ефремля четыредесять тысящ и пять сот. 32 От сынов Манассииных по сродством их, по сонмом их, по домом отечеств их, по числу имен их, по главам их, всяк мужеск пол их от двадесяти лет и вышше, всяк исходяй с силою, 33 соглядание их от племене Манассиина тридесять и две тысящи и двести. 34 От сынов Вениаминовых по сродством их, по сонмом их, по домом отечеств их, по числу имен их, по главам их, всяк мужеск пол их от двадесяти лет и вышше, всяк исходяй с силою, 35 соглядание их от племене Вениаминя тридесять и пять тысящ и четыре ста. 36 От сынов Гадовых, по сродством их, по сонмом их, по домом отечеств их, по числу имен их, по главам их, всяк мужеский пол их от двадесяти лет и вышше, всяк исходяй с силою, 37 соглядание их от племене Гадова четыредесять пять тысящ и шесть сот пятьдесят. 38 От сынов Дановых по сродством их, по сонмом их, по домом отечеств их, по числу имен их, по главам их, всяк мужеск пол их от двадесяти лет и вышше, всяк исходяй с силою, 39 соглядание их от племене Данова шестьдесят и две тысящы и седмь сот. 40 От сынов Асировых по сродством их, по сонмом их, по домом отечеств их, по числу имен их, по главам их, всяк мужеск пол их от двадесяти лет и вышше, всяк исходяй с силою, 41 соглядание их от племене Асирова четыредесять едина тысяща и пять сот. 42 От сынов Неффалимлих по сродством их, по сонмом их, по домом отечеств их, по числу имен их, по главам их, всяк мужеск пол их от двадесяти лет и вышше, всяк исходяй с силою, 43 соглядание их от племене Неффалимля пятьдесят и три тысящы и четыре ста. 44 Сие сочисление, еже соглядаша Моисей и Аарон и князи Израилевы, дванадесять мужей, муж един от племене единаго, по племени домов отечества их быша. 45 И бысть всего соглядания сынов Израилевых с силою их, от двадесяти лет и вышше, всяк исходяй ополчатися во Израили, 46 шесть сот тысящ и три тысящы и пять сот и пятьдесят. 47 Левити же от племене отечества их не сочислишася в сынех Израилевых. 48 И рече Господь к Моисею, глаголя: 49 виждь, племене Левиина да на сочислиши, и числа их да не приимеши среди сынов Израилевых: 50 и ты пристави левиты к скинии свидения и ко всем сосудом ея, и ко всем, елика суть в ней: да носят сии скинию и вся сосуды ея, и тии да служат в ней, и окрест скинии да ополчаются: 51 и внегда воздвизати скинию, да снимают ю левити, и внегда поставити скинию, да возставят: и иноплеменник приступаяй да умрет. 52 И да ополчаются сынове Израилевы, всяк в своем чине и всяк по своему старейшинству, с силою своею: 53 левити же да ополчаются сопротив, окрест скинии свидения, и не будет согрешения в сынех Израилевых, и да стрегут левити сами стражу скинии свидения. 54 И сотвориша сынове Израилевы по всем, елика заповеда Господь Моисею и Аарону, тако сотвориша. === 2 === 1 И рече Господь к Моисею и Аарону, глаголя: 2 человек держайся по чину своему, по знамениям, по домом отечеств своих, да ополчаются сынове Израилевы пред Господем, окрест скинии свидения да ополчаются сынове Израилевы. 3 И ополчающиися первии на восток чин полка Иудина с силою их, и князь от сынов Иудиных Наассон сын Аминадавль: 4 сила его согляданая седмьдесят и четыри тысящы и шесть сот. 5 И ополчающиися близ от племене Иссахарова, и князь сынов Иссахаровых Нафанаил сын Согаров: 6 сила его согляданая пятьдесят и четыри тысящы и четыре ста. 7 И ополчающиися близ от племене Завулоня, и князь сынов Завулоних Елиав сын Хелонь: 8 сила его согляданая пятьдесят седмь тысящ и четыре ста. 9 Всех сочтеных от полка Иудина сто осмьдесят шесть тысящ и четыре ста, с силою их первии да воздвизаются. 10 Чины полка Рувимля к югу с силою его, и князь сынов Рувимлих Елисур сын Седиуров: 11 сила его согляданая четыредесять и шесть тысящ и пять сот. 12 И ополчающиися близ его от племене Симеоня, и князь сынов Симеоних Саламииль сын Сурисадаин: 13 сила его сочтеная пятьдесят и девять тысящ и три ста. 14 И ополчающиися близ его от племене Гадова, и князь сынов Гадовых Елисаф сын Рагуиль: 15 сила его согляданая четыредесять и пять тысящ и шесть сот и пятьдесят. 16 Всех же сочтеных полка Рувимля сто пятьдесят едина тысяща и четыре ста и пятьдесят, с силою их втории да воздвизаются. 17 И да воздвигнется скиния свидения и полк левитский посреде полков: якоже ополчатся, тако и да воздвигнутся, кийждо держася по чину своему. 18 Чин полка Ефремля к морю с силою их, и князь сынов Ефремлих Елисама сын Емиудов: 19 сила его сочтеная четыредесять тысящ и пять сот. 20 И ополчающиися близ племя Манассиино, и князь сынов Манассииных Гамалиил сын Фадассуров: 21 сила его согляданая тридесять две тысящы и двести. 22 И ополчающиися близ от племене Вениаминя, и князь сынов Вениаминих Авидан сын Гадеониев: 23 сила его сочтеная тридесять пять тысящ и четыре ста. 24 Всех сочтеных полка Ефремля сто осмь тысящ и сто, с силою их гретии да воздвизаются. 25 Чин полка Данова к северу с силою их, и князь сынов Дановых Ахиезер сын Амисадаин: 26 сила его согляданая шестьдесят две тысящы и седмь сот. 27 И ополчающиися близ его племя Асирово, и князь сынов Асировых Фагаиил сын Ехранов: 28 сила его согляданая четыредесять едина тысяща и пять сот. 29 И ополчающиися близ племя Неффалимле, и князь сынов Неффалимлих Ахирей сын Енань: 30 сила его согляданая пятьдесят три тысящы и четыре ста. 31 Всех сочтеных полка Данова сто пятьдесят седмь тысящ и шесть сот, с силою их последнии да воздвизаются по чину своему. 32 Сие сочтение сынов Израилевых по домом отечеств их: вся соглядания полков с силами их шесть сот три тысящы и пять сот пятьдесят. 33 Левити же не соглядашася среди сынов Израилевых, якоже заповеда Господь Моисею. 34 И сотвориша сынове Израилевы вся, елика заповеда Господь Моисею: тако ополчахуся по чином своим, и тако воздвизахуся кийждо близ по сонмом своим, по домом отечеств своих. === 3 === 1 И сия рождения Аарона и Моисеа, в день в оньже глагола Господь Моисею на горе Синайстей: 2 и сия имена сынов Аароних: первенец Надав и Авиуд, и Елеазар и Ифамар: 3 сия имена сынов Аароних, жерцы помазаныя, имже совершишася руце их жрети: 4 и скончашася Надав и Авиуд пред Господем, приносящым им огнь чуждь пред Господем в пустыни Синайстей, и чад не бе им: и жречествоваху Елеазар и Ифамар со Аароном, отцем своим. 5 И рече Господь к Моисею, глаголя: 6 поими племя Левиино, и поставиши я пред Аароном жерцем, и да служат ему: 7 и да стрегут стражбы его и стражбы сынов Израилевых пред скиниею свидения, делати дела скинии: 8 и да хранят вся сосуды скинии свидения и стражбы сынов Израилевых по всем делом скинии: 9 и да даси левиты Аарону брату твоему и сыном его жерцем: в дар даны сии Мне суть от сынов Израилевых: 10 и Аарона и сыны его поставиши над скиниею свидения, и да хранят жречество свое, и вся яже у олтаря и внутрь завесы: иноплеменник же прикасаяйся умрет. 11 И рече Господь к Моисею, глаголя: 12 и се, Аз взях левиты от среды сынов Израилевых, вместо всякаго первенца, отверзающаго ложесна от сынов Израилевых: искупления их будут, и да будут Мне левити: 13 Мне бо всяк первенец: в оньже день побих всякаго первенца в земли Египетстей, освятих Себе всякаго первенца во Израили, от человека до скота Мне да будут: Аз Господь. 14 И рече Господь к Моисею в пустыни Синайстей, глаголя: 15 соглядай сынов Левииных по домом отечеств их по сонмом их, по рождению их: всяк мужеск пол от месяца единаго и вышше да соглядаете их. 16 И сочте их Моисей и Аарон повелением Господним, якоже повеле им Господь. 17 И бяху сии сынове Левиины от имен их: Гирсон, Кааф и Мерари. 18 И сия имена сынов Гирсоних по сонмом их: Ловени и Семей. 19 И сынове Каафовы по сонмом их: Амрам и Иссаар, Хеврон и Озиил. 20 И сынове Мерарины по сонмом их: Мооли и Муси: сии суть сонми Левитстии по домом отечеств их. 21 От Гирсона сонм Ловениин и сонм Семеинь: сии суть сонми Гирсоновы. 22 Соглядание их по числу всего мужеска полу, от месяца единаго и вышше, соглядание их седмь тысящ и пять сот. 23 И сынове Гирсоновы за скиниею да ополчаются к морю. 24 И князь дому отечества сонма Гирсоня Елисаф сын Даиль. 25 И стражба сынов Гирсоновых в скинии свидения, скиния и покров ея, и покров дверий скинии свидения, 26 и опоны двора, и завеса дверий двора, иже есть у скинии, и прочая всех дел его. 27 От Каафа сонм Амрамль един и сонм Иссааров един, и сонм Хевронь един и сонм Озиил един: сии суть сонми Каафовы: 28 по числу всяк мужеск пол от месяца единаго и вышше осмь тысящ и шесть сот, стрегущии стражбы Святых. 29 Сонми сынов Каафовых да ополчаются от страны скинии к югу, 30 и князь дому отечеств сонмов Каафовых Елисафан сын Озиил: 31 и стражба их кивот и трапеза, и светилник и олтари, и сосуды святаго, в нихже служат, и покров, и вся дела их. 32 И князь над князи левитскими Елеазар сын Аарона жерца, поставлен стрещи стражбы святых. 33 От Мерара же сонм Мооли и сонм Муси: сии суть сонми Мерарины, 34 соглядание их по числу, всяк мужеск пол от месяца единаго и вышше, шесть тысящ и двести. 35 И князь дому отечеств сонма Мерарина Суриил сын Авихеов: от страны скинии да ополчаются к северу, 36 соглядание стражбы сынов Мерариных главицы скинии и вереи ея, и столпы ея и стояла ея, и вся сосуды их и вся дела их, 37 и столпы двора окрест и стояла их, и колки их и верви их. 38 Ополчающиися сопреди скинии свидения на востоки Моисей и Аарон и сынове его, стрегуще стражбы святаго, в стражбах сынов Израилевых: и иноплеменник прикасаяйся да умрет. 39 Все соглядание левитов, ихже согляда Моисей и Аарон повелением Господним по сонмом их, всяк мужеск пол от месяца единаго и вышше, двадесять и две тысящы. 40 И рече Господь к Моисею, глагола: соглядай всякаго первенца мужеска полу сынов Израилевых от месяца единаго и вышше, и возми число их по имени, 41 и да поймеши Мне левиты за вся первенцы сынов Израилевых: Аз Господь: и скоты левитски вместо всех первенцев в скотех сынов Израилевых. 42 И согляда Моисей, якоже заповеда ему Господь, всякаго первенца в сынех Израилевых. 43 И быша вси первенцы мужескаго полу, по числу имен от месяца единаго и вышше, от соглядания их двадесять две тысящы двести и седмьдесят три. 44 И рече Господь к Моисею, глаголя: 45 поими левиты вместо всех первенцев сынов Израилевых, и скоты левитски вместо скотов их, и будут Мне левиты: Аз Господь: 46 и искуп дву сот седмидесяти трех, иже преизбывают сверх левитов от первенцов сынов Израилевых: 47 и да возмеши по пяти сикль на главу, по сиклю святому возмеши двадесять пенязей сикль, 48 и даси сребро Аарону и сыном его искуп от преизбывающих в них. 49 И взя Моисей сребро искупное от преизбывающих в них на искуп левитом: 50 от первенец сынов Израилевых взя сребра тысящу три ста шестьдесят пять сиклев, по сиклю святому. 51 И даде Моисей окуп от преизбывших Аарону и сыном его, повелением Господним, якоже заповеда Господь Моисею. === 4 === 1 И рече Господь к Моисею и Аарону, глаголя: 2 возми сочисление сынов Каафовых от среды сынов Левииных, по сонмом их, по домом отечеств их, 3 от двадесяти и пяти лет и вышше, даже до пятидесяти лет, всяк входяй служити, творити вся дела в скинии свидения. 4 И сия дела сынов Каафовых от среды сынов Левииных, по сонмом их, по домом отечеств их, в скинии свидения Святое Святых. 5 И да внидут Аарон и сынове его, егда воздвигнется полк, и да снимут завесу осеняющую, и да обвиют в ню кивот свидения, 6 и да покрыют его покровом кожаным синим, и да возложат нань одежду всю синетную сверху, и да вложат носила: 7 и на трапезе предложения да положат на ней одежду всю багряную и блюда, и кадилницы и чашы, и возливалницы, имиже возливают, и хлебы на ней всегда да будут: 8 и да возложат на ню одежду червлену, и да покрыют ю покровом кожаным синим, и да вложат носила ея: 9 и да возмут одежду синю, и покрыют светилник светящий и свещы его, и щипцы его и очищала его, и вся сосуды елеа его, имиже служат в них: 10 и да вложат его и вся сосуды его в покров кожан синий, и да возложат его на носила: 11 и на олтарь златый да положат одежду синю, и да покрыют его покровом кожаным синим, и да вложат носила его: 12 и да возмут вся сосуды служебныя, еликими служат в них во святых, и вложат во одежду синю, и да покрыют их покровом кожаным синим, и да возложат на носила: 13 и покров да возложат на олтарь, и покрыют его одеждою всею багряною: 14 и да возложат на него вся сосуды его, еликими служат на нем в них, и кадилники, и вилицы и чашы, и покров и вся сосуды олтаря, и да возложат на него покров кожан синь и да вложат носила его: и да возмут одежду багряну, и да покрыют умывалницу и стояла ея: и да вложат ю в покров кожаный синий, и да возложат на носила. 15 И совершат Аарон и сынове его, покрывающе святая и вся сосуды святыя, внегда воздвизатися полку: и по сих да внидут сынове Каафовы воздвизати, и да не прикоснутся святых, да не умрут. Сия да воздвизают сынове Каафовы в скинии свидения. 16 Надсмотритель Елеазар, сын Аарона жерца, елей светилный, и фимиам сложения, и жертва яже по вся дни, и елей помазания, надсмотрение всея скинии и елика суть в ней во святем, во всех делех. 17 И рече Господь к Моисею и Аарону, глаголя: 18 не потребите сонм племене Каафова от среды левитов: 19 сие сотворите им, и живи будут и не умрут: приходящым им ко Святым Святых, Аарон и сынове его да внидут и да устроят их коегождо по ношению его, 20 и да не внидут внезапу видети святая, и умрут. 21 И рече Господь к Моисею, глаголя: 22 возми сочисление сынов Гирсоних, и иже по домом отечеств их, по сонмом их и по племенем их, 23 от двадесяти и пяти лет и вышше, даже до пятидесяти лет, соглядайте я, всяк входяй служити и творити дела в скинии свидения. 24 Сия служба сонма Гирсонова, служити и воздвизати. 25 И да воздвигнет опоны скинии и скинию свидения, и покров ея и покров синий сущий сверх ея, и опону дверий скинии свидения, 26 и опоны двора, и завесу дверий двора, елика над скиниею свидения, и яже окрест олтаря, и прочая их, и вся сосуды служебныя, еликими служат в них, да сотворят. 27 По слову Аарона и сынов его да будет вся служба сынов Гирсоновых по всем службам их и по всем делам их: и да соглядаеши их по именам, вся носимая ими. 28 Сия служба сонма сынов Гирсоновых в скинии свидения, и стражба их рукою Ифамара, сына Аароня жерца. 29 Сынове Мерарины по сонмом их, по домом отечеств их, соглядайте их, 30 от двадесяти и пяти лет и вышше, даже до пятидесяти лет, соглядайте их, всяк входяй служити дела скинии свидения. 31 И сия хранения воздвизаемых ими, по всем делом их в скинии свидения: главицы скинии и вереи ея, и столпы ея и стояла ея, и покров и стояла их, и столпы их, и покров дверий скинии, 32 и столпы двора окрест и стояла их, и столпы завесы дверий двора и стояла их, и колки их и верви их, и вся сосуды их и вся служения их: по именам соглядайте их и вся сосуды стражбы воздвизаемых ими. 33 Сия служба сонма сынов Мерариных во всех делех их, в скинии свидения рукою Ифамара, сына Аароня жерца. 34 И согляда Моисей и Аарон и князи Израилевы сыны Каафовы по сонмом их, по домом отечеств их, 35 от двадесяти и пяти лет и вышше, даже до пятидесяти лет, всяк входяй служити и творити дела в скинии свидения. 36 И бысть соглядание их по сонмом их, две тысящы седмь сот пятьдесят. 37 Сие сочтение сонма Каафова, всех служащих в скинии свидения, якоже согляда Моисей и Аарон повелением Господним, рукою Моисеовою. 38 И соглядани быша сынове Гирсони по сонмом своим, по домом отечеств своих, 39 от двадесяти и пяти лет и вышше, даже до пятидесяти лет, всяк входяй служити и творити дела в скинии свидения. 40 И бысть соглядание их по сонмом их, по домом отечеств их, две тысящы шесть сот тридесять. 41 Сие соглядание сонма сынов Гирсоновых, всех служащих в скинии свидения, ихже соглядаша Моисей и Аарон по глаголу Господню, рукою Моисеовою. 42 Соглядани же быша сынове Мерарины по сонмом своим, по домом отечеств своих, 43 от двадесяти и пяти лет и вышше, даже до пятидесяти лет, всяк входяй служити на дела скинии свидения. 44 И бысть сочтение их по племеном их, по сонмом их, по домом отечеств их, три тысящы и двести. 45 Сие сочисление сонма сынов Мерариных, ихже согляда Моисей и Аарон по глаголу Господню, рукою Моисеовою. 46 Вси согляданнии левиты, ихже согляда Моисей и Аарон и князи сынов Израилевых, по сонмом их и по домом отечеств их, 47 от двадесяти и пяти лет и вышше, даже до пятидесяти лет, всяк входяй на дело дел, и к делам воздвизаемым в скинии свидения. 48 И быша согляданнии осмь тысящ пять сот осмьдесят. 49 Повелением Господним соглядаше их Моисей, мужа по мужу над делы их, и яже воздвизаху сии, и соглядани суть, якоже повеле Господь Моисею. === 5 === 1 И рече Господь к Моисею, глаголя: 2 повели сыном Израилевым, и да изгонят из полка всякаго прокаженнаго, и всякаго проливающаго семя, и всякаго нечистаго душею: 3 от мужеска полу до женска, изгоните вне полка, и да не осквернят полков своих, в нихже Аз пребываю. 4 И сотвориша сынове Израилевы тако, и изгнаша их вне полка: якоже глагола Господь Моисею, тако сотвориша сынове Израилевы. 5 И рече Господь к Моисею, глаголя: 6 рцы сыном Израилевым, глаголя: муж или жена, иже аще сотворит от всех грехов человеческих и презирая презрит Господа, и преступит душа она: 7 да исповесть грех, егоже сотвори, и да отдаст преступление истое, пятую часть его да приложит к тому, и да отдаст, емуже согреши. 8 Аще же несть человеку ужика, яко отдати ему преступление, преступление отдаемое Господу, жерцу да будет, кроме овна очищения, имже помолится о нем. 9 И всяк начаток, и вся освящаемая в сынех Израилевых, елика аще приносят Господу, жерцу самому да будут: 10 и коегождо освященая, тому да будут и муж аще даст жерцу, тому да будет. 11 И рече Господь к Моисею, глаголя: 12 глаголи сыном Израилевым и речеши к ним: мужа, мужа аще преступит жена его, и презирающи презрит его, 13 и будет кто с нею ложем семене, и утаится от очию мужа ея, и укрыется, она же будет осквернена, и свидетеля не будет на ню и сия несть ята, 14 и приидет на него дух ревнования, и возревнует к жене своей, она же осквернена есть, или приидет ему дух ревнования, и возревнует к жене своей, она же не будет осквернена, 15 и да приведет муж жену свою к жерцу, и да принесет дар за ню, десятую часть меры ефи муки ячныя: да не возлиет на ню елеа, ниже да возложит на ню ливана: жертва бо ревнования есть, жертва памяти воспоминающая грех. 16 И приведет ю жрец и поставит ю пред Господем: 17 и да возмет жрец воду живу чисту в сосуде глиняне, и от персти на земли сущия у скинии свидения, и взем жрец да всыплет в воду: 18 и да поставит жрец жену пред Господем, и да открыет главу жене, и да даст в руце ея жертву памяти, жертву ревнования: в руце же жерца да будет вода обличения клятвенная сия. 19 И да закленет ю жрец и речет жене: аще никтоже бысть с тобою, и неси преступила осквернитися под мужем твоим, невинна буди от воды обличения клятвенныя сея: 20 аще же преступила еси, мужата сущи, или осквернена еси, и даде кто тебе ложе свое, кроме мужа твоего. 21 И закленет жрец жену клятвами клятвы сея, и речет жрец жене: да даст тя Господь в клятву и проклятие среди людий твоих, внегда дати Господу стегну твоему отпасти и чреву твоему разсестися: 22 и внидет вода клятвенная сия во чрево твое, еже расторгнути утробу твою, и отпасти стегну твоему. И отвещает жена: 23 и да напишет жрец клятвы сия в книзе, и изгладит в воде обличения клятвеннаго: 24 и напоит жену водою обличения клятвенною, и внидет в ню вода клятвенная обличения. 25 И да возмет жрец от руки женски жертву ревнования, и да возложит жертву пред Господем, и да принесет ю ко олтарю: 26 и да возмет жрец горстию от жертвы память ея, и да принесет ю на олтарь, и по сем напоит водою жену. 27 И будет аше есть осквернена, и аще утаением утаися от мужа своего, и внидет в ню вода клятвенная обличения, и надмет чрево ея, и отпадет стегно ея, и будет жена в проклятие в людех своих: 28 аще же не будет осквернена жена, и чиста есть, и невинна будет, и плодствовати будет семя. 29 Сей закон ревнования, комулибо аще преступит жена, мужата сущи, и осквернится: 30 или человек, емуже аще найдет нань дух ревнования, и возревнует к жене своей, и поставит жену свою пред Господем, и да сотворит ей жрец весь закон сей: 31 и чист будет человек от греха, и жена та возмет грех свой. === 6 === 1 И рече Господь к Моисею, глаголя: 2 глаголи сыном Израилевым и речеши к ним: муж или жена, иже аше обещается зело обетом, еже очиститися чистотою Господу, 3 да воздержится от вина и сикера, и оцта винна и оцта от сикера да не пиет: и, елика делаются от грозд винных, да не пиет, и гроздия свежаго и сухаго да не снест. 4 Во вся дни обета своего от всех, елика бывают от винничины вина, от кости и до скорлупы да не пиете, ниже ясте от всего. 5 Во вся дни обета очищения своего бритва да не взыдет на главу его, дондеже скончаются дние, елики обещал есть Господу: свят будет растяй власы главы своея. 6 Во вся дни обета своего Господу, ко всякой душе скончавшейся да не внидет. 7 Над отцем и над материю, и над братом и над сестрою, да не осквернится над ними, умершым им, яко обет Бога его на главе его. 8 Вся дни обета его свят будет Господу. 9 Аше же кто смертию внезапу умрет у него, абие осквернится глава обета его, и обриет главу свою, в оньже день очистится, в день седмый да обриется, 10 и в день осмый да принесет два горличища или два птенца голубина к жерцу пред двери скинии свидения: 11 и да сотворит жрец едину греха ради, и другую во всесожжение, и да помолится о нем жрец, о нихже согреши, о души, и освятит главу свою в той день, в оньже освятися Господу, во дни обета своего. 12 И да приведет агнца единолетна в преступление, и дние прежнии да не будут ему в число, понеже осквернися глава обета его. 13 И сей закон обещавшагося, в оньже день скончает дни обета своего, да принесет сам к дверем скинии свидения: 14 и да приведет дар свой Господу агнца единолетна непорочна единаго во всесожжение, и агницу единолетну едину непорочну греха ради, и овна единаго непорочна во спасение, 15 и кош опресноков от муки пшеничны, хлебы смешаны с елеем, и опресноки помазаны елеем, и жертву их и возлияние их. 16 И да принесет жрец пред Господа, и да сотворит еже греха ради его, и всесожжение его, 17 и овна сотворит жертву спасения Господу на кошнице опресноков, и да сотворит жрец жертву его и возлияние его. 18 И да обриет обещавый пред дверми скинии свидения главу обета своего, и да возложит власы на огнь, иже есть под жертвою спасения: 19 и да возмет жрец рамо варено от овна, и хлеб един опресночный от кошницы, и опреснок един, и да возложит на руки обещавшемуся, по обритии главы его, 20 и да принесет я жрец возложение пред Господа: свято да будет жерцу на грудех возложения и на раме участия: и по сих обещавыйся да пиет вино. 21 Сей закон обещавшагося, иже аще обещает дар Господу о обете, кроме сих яже обрящет рука его: по силе обета его, егоже аще обещает, по закону очищения. 22 И рече Господь к Моисею, глаголя. 23 Рцы Аарону и сыном его, глаголя: сице благословите сыны Израилевы, глаголюще им: 24 да благословит тя Господь и сохранит тя: 25 да просветит Господь лице Свое на тя и помилует тя: 26 да воздвигнет Господь лице Свое на тя и даст ти мир: 27 и да возложат имя Мое на сыны Израилевы, и Аз Господь благословлю я. === 7 === 1 И бысть в день в оньже сконча Моисей, якоже поставити скинию, и помаза ю, и освяти ю и вся сосуды ея, и олтарь и вся сосуды его, и помаза я. 2 И приведоша князи Израилтестии дванадесять, князи домов отечеств своих, сии князи коегождо племене, сии предстоящии над согляданием: 3 и приведоша дары своя пред Господа шесть колесниц покрытых и дванадесять волов: колесницу едину от двоих князей, и телца от коегождо и приведоша пред скинию. 4 И рече Господь к Моисею, глаголя: 5 возми от них, и да будут на дела служебная скинии свидения: и даси я левитом, коемуждо по его служению. 6 И взем Моисей колесницы и волы, даде я левитом: 7 две колесницы и четыри волы даде сыном Гирсоним по службам ихже, 8 и четыри колесницы и осмь волов даде сыном Мерариным по службам их, чрез Ифамара, сына Аарона жерца: 9 и сыном Каафовым не даде, яко службы святаго имеют: на раменах да воздвизают я. 10 И принесоша князи на обновление олтаря в день, в оньже помаза его, и принесоша князи дары своя пред олтарь. 11 И рече Господь к Моисею: князь един на день, князь на день да принесут дары своя на обновление олтаря. 12 И бяше приносяй дар свой в первый день Наассон сын Аминадавль, князь племене Иудина: 13 и принесе дар свой, блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 14 фимиамник един десяти златник, полн фимиама: 15 телца единаго от волов, овна единаго, агнца единаго единолетна во всесожжение: 16 и козла от коз единаго греха ради: 17 и на жертву спасения юницы две, овнов пять, козлов пять, агниц единолетных пять: сей дар Наассона сына Аминадавля. 18 Во вторый день принесе Нафанаил сын Согаров, князь племене Иссахаря: 19 и принесе дар свой, блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 20 фимиамник един десяти златник, полн фимиама: 21 телца единаго от волов, овна единаго, агнца единаго единолетна во всесожжение: 22 и козла от коз единаго греха ради: 23 и на жертву спасения юницы две, овнов пять, козлов пять, агниц единолетных пять: сей дар Нафанаила сына Согарова. 24 В третий день князь сынов Завулоних, Елиав сын Хелонов: 25 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 26 фимиамник един десяти златник, полн фимиама: 27 телца единаго от волов, овна единаго, агнца единаго единолетна во всесожжение: 28 и козла от коз единаго греха ради: 29 и на жертву спасения юницы две, овнов пять, козлов пять, агниц единолетных пять: сей дар Елиава сына Хелонова. 30 В четвертый день князь сынов Рувимлих, Елисур сын Седиуров: 31 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 32 фимиамник един десяти златник, полн фимиама: 33 телца единаго от волов, овна единаго, агнца единаго единолетна во всесожжение: 34 и козла от коз единаго греха ради: 35 и на жертву спасения юницы две, овнов пять, козлов пять, агниц единолетных пять: сей дар Елисура сына Седиурова. 36 В пятый день князь сынов Симеоних, Саламиил сын Сурисадаиль: 37 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 38 фимиамник един десяти златник, полн фимиама: 39 телца единаго от волов, овна единаго, агнца единаго единолетна во всесожжение: 40 и козла от коз единаго греха ради: 41 и на жертву спасения юницы две, овнов пять, козлов пять, агниц единолетных пять: сей дар Саламиила сына Сурисадаиля. 42 В шестый день князь сынов Гадовых, Елисаф сын Рагуилев: 43 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 44 фимиамник един десяти златник, полн фимиама: 45 телца единаго от волов, овна единаго, агнца единаго единолетна во всесожжение: 46 и козла от коз единаго греха ради: 47 и на жертву спасения юницы две, овнов пять, козлов пять, агниц единолетных пять: сей дар Елисафа сына Рагуилева. 48 В седмый день князь сынов Ефремлих, Елисама сын Емиудов: 49 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 50 фимиамник един десяти златник, полн фимиама: 51 телца единаго от волов, овна единаго, агнца единаго единолетна во всесожжение: 52 и козла от коз единаго греха ради: 53 и на жертву спасения юницы две, овнов пять, козлов пять, агниц единолетных пять: сей дар Елисамы сына Емиудова. 54 В осмый день князь сынов Манассииных, Гамалиил сын Фадассуров: 55 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 56 фимиамник един десяти златник, полн фимиама: 57 телца единаго от волов, овна единаго, агнца единаго единолетна во всесожжение: 58 и козла от коз единаго греха ради: 59 и на жертву спасения юницы две, овнов пять, козлов пять, агниц единолетных пять: сей дар Гамалиила сына Фадассурова. 60 В девятый день князь сынов Вениаминих, Авидан сын Гадеонин: 61 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 62 фимиамник един десяти златник, полн фимиама: 63 телца единаго от волов, овна единаго, агнца единаго единолетна во всесожжение: 64 и козла от коз единаго греха ради: 65 и на жертву спасения юницы две, овнов пять, козлов пять, агниц единолетных пять: сей дар Авидана, сына Гадеонина. 66 В десятый день князь сынов Дановых, Ахиезер сын Амисадаин: 67 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 68 фимиамник един десяти златник, полн фимиама: 69 телца единаго от волов, овна единаго, агнца единаго единолетна во всесожжение: 70 и козла от коз единаго греха ради: 71 и на жертву спасения юницы две, овнов пять, козлов пять, агниц единолетных пять: сей дар Ахиезера сына Амисадаина. 72 В первыйнадесять день князь сынов Асировых, Фагаиил сын Ехрань: 73 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 74 фимиамник един десяти златник, полн фимиама: 75 телца единаго от волов, овна единаго, агнца единаго единолетна во всесожжение: 76 и козла от коз единаго греха ради: 77 и на жертву спасения юницы две, овнов пять, козлов пять, агниц единолетных пять: сей дар Фагаиила сына Ехраня. 78 Во вторыйнадесять день князь сынов Неффалимлих, Ахирей сын Енань: 79 дар его блюдо сребряно едино, вес его сто и тридесять сикль: чашу едину сребряну седмьдесят сикль, по сиклю святому: обоя полны муки пшеничны спряжены с елеем на жертву: 80 фимиамник един десяти златник, полн фимиама: 81 телца единаго от волов, овна единаго, агнца единаго единолетна во всесожжение: 82 и козла от коз единаго греха ради: 83 и на жертву спасения юницы две, овнов пять, козлов пять, агниц единолетных пять: сей дар Ахиреа сына Енаня. 84 Сие обновление олтаря, в оньже день помаза его, от князей сынов Израилевых, блюд сребряных дванадесять, чаш сребряных дванадесять, фимиамников златых дванадесять: 85 по святу и тридесяти сикль в коемждо блюде, и по седмидесяти сикль чаша едина: всего сребра в сосудех две тысящы четыреста сиклев, по сиклю святому: 86 фимиамников златых дванадесять полных фимиама, по десяти златник в коемждо фимиамнике, по сиклю святому: всего злата в фимиамницех сто и двадесять златник. 87 Всех говяд во всесожжение, телцов дванадесять, овнов дванадесять, агнцев единолетных дванадесять, и жертвы их и возлияния их: и козлов от коз дванадесять, греха ради: 88 всех говяд на жертву спасения, юниц двадесять четыре, овнов шестьдесят, козлов единолетных шестьдесят, агниц единолетных непорочных шестьдесят. Сие обновление олтаря, по исполненнии рук его и по помазании его. 89 Егда вхождаше Моисей в скинию свидения глаголати ему, и услыша глас Господа, глаголюща к нему свыше очистилища, еже есть над ковчегом свидения между двема херувимы: и глаголаше к нему. === 8 === 1 И рече Господь к Моисею, глаголя: 2 глаголи Аарону и речеши к нему: егда поставиши светила, от страны спреди светилника да светят седмь светила. 3 И сотвори тако Аарон: от единыя страны спреди светилника возжже светила его, якоже повеле Господь Моисею. 4 И сие устроение светилника: слияно злато стебль его и крины его, слияно все: по образу, егоже показа Господь Моисею, тако сотвори светилник. 5 И рече Господь к Моисею, глаголя: 6 поими левиты от среды сынов Израилевых, и да очистиши я: 7 и сице да сотвориши им очищение их: покропиши на них воду очищения, и да взыдет бритва на все тело их, и исперут ризы своя, и чисти будут: 8 и да возмут телца единаго от волов, и сего жертву муки пшеничны, спряжены с елеем, и телца единолетна от волов да возмеши греха ради: 9 и да приведеши левиты пред скинию свидения, и собереши весь сонм сынов Израилевых: 10 и приведеши левиты пред Господа, и да возложат сынове Израилстии руки своя на левиты: 11 и да отлучит Аарон левиты отдание пред Господа от сынов Израилевых, и да служат службы Господви: 12 левити же да возложат руки на главы телцев: и да сотвориши единаго от гресе и единаго во всесожжение Господу, умилостивити о них: 13 и поставиши левиты пред Господем и пред Аароном и пред сынми его, и отдаси я отдание Господу: 14 и да отлучиши левиты от среды сынов Израилевых, и будут Мне: 15 и по сих да внидут левиты делати дела скинии свидения: и да очистиши их, и отдаси я пред Господем: яко отдание отданы сии Мне суть от среды сынов Израилевых: 16 вместо отверзающих всяка ложесна первенцев всех от сынов Израилевых, приях я Себе: 17 яко Мне есть всяк первенец от сынов Израилевых, от человека до скота: в день в оньже поразих всякаго первенца в земли Египетстей, освятих я Себе, 18 и взях левиты вместо всякаго первенца сынов Израилевых, 19 и отдах левиты отданием Аарону и сыном его от среды сынов Израилевых делати дела сынов Израилевых в скинии свидения и умилостивляти о сынех Израилевых: да не будет язва на сынех Израилевых, внегда приступати им к святым. 20 И сотвори Моисей и Аарон и весь сонм сынов Израилевых левитом, якоже заповеда Господь Моисею о левитех, тако сотвориша им сынове Израилевы. 21 И очистишася левити и испраша ризы своя: и отдаде я Аарон отдание пред Господем, и помолися о них Аарон, очищения ради их. 22 И но сих внидоша левити служити службы своя в скинии свидения пред Аароном и пред сыны его: якоже повеле Господь Моисею о левитех, тако сотвориша им. 23 И рече Господь к Моисею глаголя: 24 сие есть еже о левитех: от двадесяти пяти лет и вышше, да внидут служити служение в скинии свидения: 25 и от пятидесяти лет да отстанут от служения и не служат ктому. 26 И да служат братия его в скинии свидения еже стрещи стражи, дел же да не делают. Тако сотвориши левитом в стражах их. === 9 === 1 И глагола Господь к Моисею в пустыни Синайстей, во второе лето изшедшым им из земли Египетския, в первый месяц, глаголя: 2 рцы да сотворят сынове Израилстии Пасху во время ея, 3 в четвертыйнадесять день месяца перваго к вечеру, и сотвориши ю во время ея: по закону ея и по уставу ея сотвориши ю. 4 И рече Моисей сыном Израилтеским сотворити Пасху. 5 И сотвориша Пасху, начинающуся первому месяцу в четвертыйнадесять день в пустыни Синайстей: якоже повеле Господь Моисею, тако сотвориша сынове Израилевы. 6 И приидоша мужие, иже бяху нечисти о души человечи, и не можаху сотворити Пасхи в той день: и приидоша пред Моисеа и Аарона в той день. 7 И рекоша мужие Онии к нему: мы нечисти есмы о души человечи: еда убо лишимся принести дар Господу во время свое посреде сынов Израилевых? 8 И рече Моисей к ним: станите ту, да яслышу, что повелит Господь о вас. 9 И рече Господь к Моисею, глаголя: 10 рцы сыном Израилевым, глаголя: человек человек, иже аще будет нечист о души человечи, или на пути далече, или в вас, или в родех ваших, и да сотворит Пасху Господу, 11 в месяц вторый, в четвертыйнадесять день (месяца) к вечеру да сотворят ю, со опресноки и с горьким зелием да снедят ю: 12 да не оставят от нея на утрие, и кости да не сокрушат от нея, по всему закону Пасхи да сотворят ю. 13 И человек, иже аще чист будет, и на пути далече несть, и оставит сотворити Пасху, потребится душа та от людий своих: яко дара Господви не принесе во время свое, грех свой приимет человек той. 14 Аще же приидет к вам пришлец в землю вашу и сотворит Пасху Господу, по закону Пасхи и по чину ея, тако сотворит ю: закон един да будет вам и пришелцу и туземцу. 15 И в день, в оньже поставися скиния, покры облак скинию и дом свидения: от вечера же бяше над скиниею аки вид огнен до заутрия: 16 тако бываше всегда: облак покрываше ю в день, и вид огнен нощию:, 17 и егда восхождаше облак от скинии, и по сих воздвизахуся сынове Израилтестии: и на месте, на немже стояше облак, тамо ополчахуся сынове Израилевы. 18 По повелению Господню да ополчаются сынове Израилевы и повелением Господним да воздвизаются: во вся дни, в няже осеняет облак над скиниею, да ополчаются сынове Израилевы: 19 и егда премедлит облак над скиниею дни многи, да стрегут сынове Израилтестии стражу Господню и да не воздвижутся: 20 и будет егда покрыет облак дни числа над скиниею, глаголголом Господним да ополчаются и повелением Господним да воздвижутся: 21 и будет егда пребудет облак от вечера до заутрия, и аще воздвигнется облак заутра, да воздвигнутся днем или нощию, 22 и аще воздвигнется облак, да пойдут: или день или месяц дний умножит облак осеняющь над нею, да ополчатся сынове Израилевы, и да не воздвизаются: во отступлении его, воздвизахуся: 23 яко повелением Господним да ополчаются и повелением Господним да воздвизаются: стражу Господню стрежаху по повелению Господню рукою Моисеовою. === 10 === 1 И рече Господь к Моисею, глаголя: 2 сотвори себе две трубы сребряны: кованы сотвориши я, и будут тебе на созвание сонма и возставляти полки: 3 и да вострубиши ими, и да соберется к тебе весь сонм пред двери скинии свидения 4 аще же единою трубою вострубят, да приидут к тебе вси князи и тысященачалники Израилтестии: 5 и вострубите в знамение, и воздвигнутся полцы ополчающиися на востоки: 6 и вострубите в знамение второе, и воздвигнутся полцы ополчающиися от юга: и вострубите в знамение третие, и да воздвигнутся полцы ополчающиися от моря: и вострубите в знамение четвертое, и воздвигнутся полцы ополчающиися от севера: знамением да вострубят в воздвижение их. 7 И егда соберете сонм, вострубите, не в знамение. 8 И сынове Аарони жерцы да вострубят трубами: и да будет вам законно вечно в роды вашя. 9 Аще же изыдете на брань в земли вашей к супостатом супротивящымся вам, и вострубите и назнаменуйте трубами, и воспомянетеся пред Господем и избавитеся от враг ваших. 10 И во днех веселия вашего и в праздницех ваших и в новомесячиих ваших вострубите трубами на всесожжения и на жертвы спасений ваших, и будет вам воспоминание пред Богом вашим: Аз Господь Бог ваш. 11 И бысть во второе лето, во вторый месяц, в двадесятый месяца, вознесеся облак от скинии свидения, 12 и воздвигошася сынове Израилевы со имениями своими от пустыни Синайския, и ста облак в пустыни Фарани. 13 И воздвигошася первии по гласу Господню рукою Моисеовою: 14 и воздвигоша знамя полка сынов Иудиных первии с силою своею: и над силою их Наассон сын Аминадавль: 15 и над силою племене сынов Иссахаровых Нафанаил сын Согаров: 16 и над силою племене сынов Завулоних Елиав сын Хелонь. 17 И сложиша скинию, и воздвигоша сынове Гирсони и сынове Мерарины, носящии скинию. 18 И воздвигоша знамя полка Рувимля с силою своею: и над силою их Елисур сын Седиуров: 19 и над силою племене сынов Симеоних Саламиил сын Сурисадаев: 20 и над силою племене сынов Гадовых Елисаф сын Рагуилев: 21 и воздвигошася сынове Каафовы, воздвизающии святая: и поставиша скинию, дондеже приидоша. 22 И воздвигоша знамя полка Ефремля с силою своею: и над силою их Елисама сын Емиудов: 23 и над силою племене сынов Манассииных Гамалиил сын Фадассуров: 24 и над силою племене сынов Вениаминих Авидан сын Гадеонин. 25 И воздвигоша знамя полка сынов Дановых, последнии всех полков с силою своею: и над силою их Ахиезер сын Амисадаев: 26 и над силою племене сынов Асировых Фагаиил сын Ехрань: 27 и над силою племене сынов Неффалимлих Ахирей сын Енань. 28 Сии полцы сынов Израилевых, и воздвигошася с силою своею. 29 И рече Моисей Иоваву сыну Рагуилеву Мадианитину, тестю Моисеову: воздвизаемся мы на место, о немже Господь рече: сие дам вам: пойди с нами, и сотворим тебе добро, яко Господь добрая глагола о Израили. 30 И отвеща к нему: не пойду, но в землю мою и в род мой иду. 31 И рече: не остави нас, понеже был еси с нами в пустыни, и будеши в нас старейшина: 32 и будет аще пойдеши с нами, и будут благая оная, елика благосотворит Господь нам, благосотворим и тебе. 33 И отидоша от горы Господни в путь трех дний: и кивот завета Господня предидяше пред ними в путь трех дний, соглядати им стана. 34 И бысть егда воздвизаху кивот, и рече Моисей: востани, Господи, и да разсыплются врази Твои, и да бежат вси ненавидящии Тебе. 35 И в поставлении (кивота) рече: возвращай, Господи, тысящы тем во Израили. 36 И облак Господнь бысть осеняющь над ними в день, егда воздвизахуся из полка. === 11 === 1 И быша людие ропщуще злая пред Господем: и слыша Господь и разгневася гневом, и разгореся в них огнь от Господа и потреби часть некую от полка. 2 И возопиша людие к Моисею: и помолися Моисей к Господу, и преста огнь. 3 И прозвася имя месту тому Запаление: яко разгореся в них огнь от Господа. 4 И общий народ иже в них похотеша похотением: и седше плакахуся сынове Израилевы и рекоша: кто ны напитает мясы? 5 Помянухом рыбы, яже ядохом в земли Египетстей туне, и огурцы и дыни, лук и червленый лук и чеснок: 6 ныне же душа наша изсохла, ничтоже точию манна пред очима нашима. 7 Манна же бяше аки семя кориандрово, и вид ея яко вид кристалла: 8 и исхождаху людие и собираху, и меляху в жерновах и толцаху в ступах, и варяху в горшках и творяху из нея потребники: и бяше вкус ея, яко вкус муки пряжены с елеем: 9 и егда схождаше роса на полк нощию, схождаше манна нань. 10 И услыша Моисей плачущихся их в сонмех своих, коегождо их пред своими дверми: и разгневася Господь гневом зело, и пред Моисеом бяше зло. 11 И рече Моисей ко Господу: вскую озлобил еси раба Твоего? И почто не обретох благодати пред Тобою, еже возложити устремление людий сих на мя? 12 Еда аз во утробе зачах вся люди сия? Или аз родих я? Яко глаголеши ми: возми их в недра твоя, якоже доилица носит доимыя, в землю, еюже клялся еси отцем их: 13 откуду мне мяса дати всем людем сим? Яко плачут на мя, глаголюще: даждь нам мяса, да ядим: 14 не возмогу аз един водити людий сих, яко тяжко мне есть слово сие: 15 аще же тако Ты твориши мне, то убий мя убиением, аще обретох благодать пред Тобою, да не вижу озлобления моего. 16 И рече Господь к Моисею: собери Ми седмьдесят мужей от старец Израилевых, ихже ты сам веси, яко тии суть старцы людстии и книгочия их: и да приведеши я ко скинии свидения, и да станут тамо с тобою: 17 и сниду и возглаголю тамо с тобою, и уйму от Духа, иже в тебе, и возложу на ня: да подимут с тобою устремление людий, и не будеши водити их ты един: 18 и людем речеши: очиститеся наутрие, и снесте мяса, яко плакастеся пред Господем, глаголюще: кто ны напитает мясы? Яко добро нам бысть во Египте: и даст Господь вам мяса ясти, и снесте мяса: 19 не един день ясти будете, ни два, ни пять дний, ни десять дний, ниже двадесять дний: 20 до месяца дний ясти будете, дондеже изыдет из ноздрий ваших: и будет вам в мерзость, яко не покористеся Господу, Иже есть в вас, и плакастеся пред Ним, глаголюще: вскую бе нам изыти из Египта? 21 И рече Моисей: шесть сот тысящ пеших людий, в нихже Аз есмь, и Ты рекл еси: мяса им дам ясти, и будут ясти месяц дний: 22 еда овцы и волы заколются им, и доволно будет им? Или вся рыбы морския соберутся им, и доволно будет им? 23 И рече Господь к Моисею: еда рука Господня не доволна будет? Ныне уразумееши, аще постигнет тя слово Мое, или ни. 24 И изыде Моисей и глагола людем словеса Господня: и собра седмьдесят мужей от старец людских, и постави я окрест скинии. 25 И сниде Господь во облаце и глагола к нему: и уя от Духа, иже на нем, и возложи на седмьдесят мужей старец: егда же препочи Дух на них, и пророчествоваша, и ктому не приложиша. 26 И осташася два мужа в полце: имя единому Елдад, и имя второму Модад: и препочи на них Дух. И сии беша от вписанных, и не приидоша ко скинии, и пророчествоваша в полце. 27 И притек юноша возвести Моисею, и рече, глаголя: Елдад и Модад пророчествуют в полцех. 28 И отвещав Иисус Навин, предстояй Моисею избранный ему, рече господи мой Моисею, запрети им. 29 И рече ему Моисей: еда ревнуеши ты мне? И кто даст всем людем Господним (быти) пророки, егда даст Господь Духа Своего на них? 30 И иде Моисей в полк сам и старцы Израилтестии. 31 И дух изыде от Господа, и изведе крастели из моря и наведе на полк день ходу отсюду и день ходу отюнуду, окрест полка яко на два лактя от земли. 32 И воставше людие весь день и всю нощь, и весь день наутрие, и собраша крастели: иже мало, собра десять спуд: и иссушиша себе сушаницы окрест полка. 33 И мяса бяху им еще в зубех их, прежде оскудения, и Господь разгневася зело на люди, и порази Господь люди язвою великою зело: 34 и прозвася имя месту тому Гробы Похотения: яко тамо погребоша людий похотевших. 35 (И) воздвигошася людие от Гробов Похотения во Асироф, и быша людие во Асирофе. === 12 === 1 И возглаголаста Мариам и Аарон на Моисеа жены ради Ефиопляныни, юже поя Моисей, ибо жену поя Ефиопляныню, 2 и рекоста: еда Моисею единому глагола Господь? Еда и нам не глаголаше? И услыша Господь. 3 И человек Моисей кроток зело паче всех человек сущих на земли. 4 И рече Господь внезапу к Моисею и Аарону и Мариаме: изыдите вы трие в скинию свидения. 5 И изыдоша трие в скинию свидения. И сниде Господь в столпе облачне ста над дверми скинии свидения: и призва Аарона и Мариам. И изыдоста оба. 6 И рече к ним: послушайте словес Моих: аще будет в вас пророк Господнь, в видении ему познаюся, и во сне возглаголю ему: 7 не тако якоже раб Мой Моисей, во всем дому Моем верен есть: 8 усты ко устом возглаголю ему яве, и не гаданием, и славу Господню виде: и почто не убоястеся глаголати на раба Моего Моисеа? 9 И гнев ярости Господни (бысть) на них. И отиде. 10 И облак отступи от скинии, и се, Мариам прокажена бысть яко снег: и воззре Аарон на Мариам, и се, прокажена. 11 И рече Аарон к Моисею: молю тя, господи, не возлагай на ны греха, понеже не ведяхом, яко согрешихом: 12 да не будет сия яко мертва, яко изверг извержен из ложесн матерних, и (се, уже) пояде пол плоти ея. 13 И возопи Моисей ко Господу, глаголя: Боже, молютися, исцели ю. 14 И рече Господь к Моисею: аще бы отец ея плюя заплевал в лице ея, не посрамится ли седмь дний? Да отлучится седмь дний вне полка, и по сих да внидет. 15 И отлучися Мариам вне полка на седмь дний: и людие не воздвигошася, дондеже очистися Мариам. === 13 === 1 И по сих воздвигошася людие от Асирофа и ополчишася в пустыни Фарани. 2 И рече Господь к Моисею, глаголя: 3 посли от себе мужы, и да соглядают землю Ханаанску, юже Аз даю сыном Израилевым во одержание: мужа единаго от племене, по сонмом отечеств их, да послеши их всякаго старейшину от них. 4 И посла я Моисей от пустыни Фарани глаголголом Господним: вси мужи старейшины сынов Израилевых сии, и сия имена их: 5 от племене Рувимля Самуил сын Закхуров: 6 от племене Симеоня Сафат сын Сурин: 7 от племене Иудина Халев сын Иефонниин: 8 от племене Иссахаря Игал сын Иосифль: 9 от племене Ефремля Авсис сын Навин: 10 от племене Вениаминя Фалтий сын Рафуов: 11 от племене Завулоня Гудиил сын Судин: 12 от племене Иосифля сынов Манассииных Гадди сын Сусин: 13 от племене Данова Амиил сын Гамалин: 14 от племене Асирова Сафур сын Михаиль: 15 от племене Неффалимля Навий сын Савинь: 16 от племене Гадова Гудиил сын Махииль. 17 Сия имена мужей, ихже посла Моисей соглядати землю: и прозва Моисей Авсиа сына Навина Иисус. 18 И посла я Моисей от пустыни Фарани соглядати земли Ханаанския, и рече к ним: взыдите пустынею сею, и взыдете на гору. 19 И узрите землю, какова есть, и люди седящыя на ней, аще сильни суть, или немощни, мало ли их есть, или много? 20 И какова земля, на нейже сии седят, добра ли есть, или зла? И какови гради, в нихже живут сии, ограждени ли суть, или не ограждени? 21 И какова земля, изюбилна ли, или не изюбилна? Суть ли на ней древеса, или ни? И укрепившеся, возмите от плодов земли. Дние же бяху весенни, предваряющии ягоды. 22 И шедше соглядаша землю от пустыни Син даже да Роова, до входов Емаф. 23 И идоша по пустыни, и приидоша до Хеврона: и тамо (живяше) Ахиман и Сессий и Феламин, роды Енаковы: и Хеврон создася седмию леты прежде Танина (града) Египетскаго. 24 И приидоша до дебри Гроздныя, и соглядаша ю: и урезаша оттуду ветвь, и грозд винограда един на ней, и воздвигоша ю на жердь, и от шипков, и от смоквей. 25 И место оно назваша дебрь Гроздная, грозда ради, егоже урезаша оттуду сынове Израилтестии. 26 И возвратишася оттуду, соглядавше землю по четыредесяти днех. 27 И ходивше приидоша к Моисею и Аарону и ко всему сонму сынов Израилевых в пустыню Фараню в Кадис: и поведаша им слово и всему сонму, и показаша им плод земный., 28 и поведаша ему, и рекоша: ходихом на землю, на нюже посылал еси нас, на землю кипящую млеком и медом, и сий плод ея: 29 кроме яко людие сильни зело, иже на ней живут, и гради утверждени ограждением велицы зело, и род Енаков видехом тамо: 30 и Амалик живет в земли к югу: и Хеттей и Евей, и Иевусей и Аморрей живут в горах: и Хананей живет при мори и при Иордане реце. 31 И утиши Халев люди пред Моисеом, и рече ему: никакоже, на восходя взыдем и приимем ю в наследие, яко сильни есмы преодолети им. 32 И человецы ходившии с ним рекоша: не идем, яко не можем изыти противу языку (сему), яко крепльший есть паче нас. 33 И изнесоша ужас земли, юже соглядаша, к сыном Израилевым, глаголюще: землю юже проидохом соглядающе, земля есть поядающи живущыя на ней, и вси люди, ихже видехом на ней, мужи превысоцыи: 34 и тамо видехом исполины, сыны Енаковы, и бехом пред ними яко прузи, и тако бехом пред ними. === 14 === 1 И взем весь сонм, даде глас: и плакахуся людие всю нощь ту: 2 и роптаху на Моисеа и Аарона вси сынове Израилтестии, и рекоша к ним весь сонм: 3 о дабы умерли быхом в земли Египетстей, или в пустыни сей да быхом умерли: и вскую вводит нас Господь в землю сию, еже пасти на брани? Жены нашя и дети наша будут в разграбление: ныне убо лучше есть нам возвратитися во Египет. 4 И рече друг ко другу: поставим себе старейшину, и возвратимся бо Египет. 5 И падоста Моисей и Аарон ниц пред всем сонмом сынов Израилевых. 6 Иисус же сын Навин и Халев сын Иефонниин от соглядавших землю, растерзаста ризы своя. 7 И рекоста ко всему сонму сынов Израилевых, глаголюще: земля, юже соглядахом, добра есть зело зело: 8 аще любит нас Господь, введет нас в землю ту и даст ю нам: земля же есть кипящая медом и млеком: 9 но от Господа не будите отступницы: вы же не убойтеся людий земли тоя, понеже в снедь нам есть: отступило бо время от них, Господь же с нами: не убойтеся их. 10 И рече весь сонм побити их камением: и слава Господня явися во облаце над скиниею свидения всем сыном Израилевым. 11 И рече Господь к Моисею: доколе преогорчевают Мя людие сии? И доколе не веруют Мне во всех знамениих, яже сотворих в них? 12 Поражу их смертию и погублю их: и сотворю тя и дом отца твоего в язык велик и мног паче нежели сей. 13 И рече Моисей ко Господу: иуслышат Египтяне, яко возвел еси крепостию Твоею люди Твоя сия от них: 14 но и вси живущии на земли сей слышаша, яко Ты еси Господь в людех сих, иже очима ко очесем являешися, Господи, и облак Твой ста над ними, и столпом облачным идеши Ты пред ними в день, и столпом огненным в нощи: 15 и потребиши люди сия аки единаго человека: и рекут вси языцы, елицы слышаша имя Твое, глаголюще: 16 занеже не возможе Господь людий Своих ввести в землю, о нейже клятся им, погуби их в пустыни: 17 и ныне да вознесется рука Твоя, Господи, якоже рекл еси, глаголя: 18 Господь долготерпелив и многомилостив и истинен, отемляй беззакония и неправды и грехи, и очищением не очистит повиннаго, отдая грехи отцев на чада, до третияго и четвертаго рода: 19 остави грех людем сим по велицей милости Твоей, якоже милостив был еси им от Египта даже до ныне. 20 И рече Господь к Моисею: милостив им есмь по словеси твоему: 21 но живу Аз, и присно живет имя Мое, и наполнит слава Господня всю землю: 22 яко вси мужие видящии славу Мою и знамения, яже сотворих во Египте и в пустыни сей, и искусиша Мя, се, десятое, и не послушаша гласа Моего, 23 истинно не узрят земли, еюже кляхся отцем их: разве чадом их, яже суть со Мною зде, иже не ведят добра и зла, всяк юноша не ведый, сим дам землю: вси же разгневавшии Мя не узрят ю: 24 раб же Мой Халев, яко бысть дух ин в нем, и возследова Мне, введу его в землю, в нюже ходил тамо, и семя его наследит ю: 25 Амалик же и Хананей живут во юдоли: утре возвратитеся и подвигнитеся вы в пустыню путем моря Чермнаго. 26 И рече Господь к Моисею и Аарону, глаголя: 27 доколе сонм сей злый? Яже они ропщут противу Мне, роптание сынов Израилевых, имже возропташа о вас, слышах: 28 рцы им: живу Аз, глаголет Господь: истинно, якоже глаголасте во ушы Мои, тако сотворю вам: 29 в пустыни сей падут телеса ваша, и все соглядание ваше, и сочтения ваша, от двадесяти лет и вышше, елицы ропташа на Мя: 30 аще вы внидете в землю, на нюже прострох руку Мою, вселити вас на ней, разве Халев сын Иефонниин и Иисус сын Навин: 31 и чада ваша, ихже ресте в разграблении быти, введу Я в землю, и наследят землю, от неяже вы отвергостеся: 32 и телеса ваша падут в пустыни сей: 33 сынове же ваши пасоми будут в пустыни четыредесять лет, и носити имут блужение ваше, дондеже потребятся телеса ваша в пустыни: 34 по числу дний, в нихже соглядасте землю, четыредесять дний, за день лето целое, понесете грехи вашя четыредесять лет, и увесте ярость гнева Моего: 35 Аз Господь глаголах вам: истинно тако сотворю сонму сему злому, воставшему на Мя: в пустыни сей потребятся, и тамо измрут. 36 И мужие, ихже посыла Моисей соглядати землю, и пришедше возропташа на ню к сонму, еже бы изнести словеса зла о земли, 37 и изомроша мужи, глаголавшии о земли зло, язвою пред Господем: 38 и Иисус сын Навин и Халев сын Иефонниин живы остастася от мужей тех ходивших соглядати землю. 39 И глагола Моисей словеса сия ко всем сыном Израилевым: и восплакашася людие зело, 40 и воставше заутра, взыдоша на верх горы, глаголюще: се, мы взыдем на место, еже рече Господь, яко согрешихом. 41 И рече Моисей: вскую вы преступаете слово Господне? Не благопоспешно будет вам: 42 не восходите: несть бо Господь с вами: и падете пред лицем враг ваших: 43 зане Амалик и Хананей тамо пред вами, и падете мечем, понеже отвратистеся, не покаряющеся Господу, и не будет Господь с вами. 44 И понудившеся взыдоша на верх горы: кивот же завета Господня и Моисей не двигнушася из среды полка. 45 И сниде Амалик и Хананей седяй в горе той, и сотроша их, и изсекоша их даже до Ермана: и возвратишася в полк. === 15 === 1 И рече Господь к Моисею, глаголя: 2 глаголи сыном Израилевым и речеши к ним: егда внидете в землю вселения вашего, юже Аз даю вам, 3 и сотворите принос Господу во всесожжение или жертву, еже возвеличити мольбу, или благовольну, или в праздники вашя в воню благовония Господу, аще убо от волов, или от овец: 4 и да принесет приносяй дар свой Господу жертву, муки пшеничны десятую часть ефи (меры), вмешены в елей четвертыя части ина (меры): 5 и вина на возлияние четвертую часть ина сотворите во всесожжение или в жертву: агнцу единому да сотвориши толико, принос воню благовония Господу. 6 И овну, егда творите его во всесожжение или в жертву, да сотвориши жертву муки пшеничны две десятины вмешаны в елеи, третию часть ина (меры): 7 и вина на возлияние третию часть ина принесете в воню благовония Господу. 8 Аще же творите от волов во всесожжение или в жертву, еже возвеличити мольбу, или во спасителное Господу, 9 и принесет с телцем принос муки пшеничны три десятины вмешаны в елей, пол ина (меры): 10 и вина на возлияние пол ина (меры), принос в воню благовония Господу. 11 Тако да сотвориши телцу единому, или овну единому, или агнцу единому от овец или от коз: 12 по числу их, яже аще сотворите, тако сотворите единому по числу их. 13 Всяк туземец да сотворит тако сицевая принести приношения в воню благовония Господу: 14 аще же пришлец в вас прибудет в земли вашей, или иже аще будет в вас в родех ваших, и сотворит принос в воню благовония Господу, якоже творите вы, тако да сотворит. 15 Сонме Господнь, закон един да будет вам и пришелцем прилежащым в вас, закон вечный в роды вашя: якоже вы, (тако) и пришлец да будет пред Господем: 16 закон един да будет и оправдание едино да будет вам и пришелцу прилежащему в вас. 17 И рече Господь к Моисею, глаголя: 18 глаголи сыном Израилевым и речеши к ним: егда внидете в землю, в нюже Аз ввожду вас тамо, 19 и будет егда ясте от хлебов земли (тоя), отложите участие во отделение Господу: начаток теста вашего, 20 хлеб отлучите участие оное: якоже участие от гумна, 21 тако отделите той хлеб, начаток теста вашего, и дадите Господу участие в роды вашя. 22 Егда же согрешите и не сотворите всех заповедий сих, ихже глагола Господь Моисею, 23 якоже повеле Господь Бог к вам рукою Моисеовою, от дне в оньже повеле Господь к вам, и потом в роды вашя, 24 и будет аще от очес сонма сотворится неволею, и да сотворит весь сонм телца единаго непорочна от волов во всесожжение, в воню благовония Господу, и жертву сего, и возлияние его по уставлению, и козла единаго от коз греха ради: 25 и да помолится жрец от всем сонме сынов Израилевых, и оставится им, яко нехотение есть: и сии принесоша дар свой, принесение Господу греха ради своего пред Господем, нехотений ради своих, 26 и оставится всему сонму сынов Израилевых и пришелцу прилежащему в вас, яко всем людем нехотенное. 27 Аще же душа едина не хотящи согрешит, да приведет козу едину единолетну греха ради: 28 и да помолится жрец о души нехотевшей и согрешшей нехотением пред Господем, и да помолится о ней, и оставится ей. 29 Населнику (земли) сынов Израилевых и пришелцу прилежащему в них, закон един да будет им, иже аще сотворит не хотящь. 30 И душа яже сотворит рукою гордости от туземец или от пришелцев, Бога сия разгневает, и потребится душа та от людий своих: 31 яко слово Господне презре и заповеди Его разсыпа, сотрением да сотрется душа та: и грех ея на ней. 32 И бяху сынове Израилевы в пустыни, и обретоша мужа собирающа дрова в день субботный, 33 и приведоша его обретшии собирающа дрова в день субботный к Моисею и Аарону и ко всему сонму сынов Израилевых, 34 и ввергоша его в темницу: не совещаша бо, что сотворят ему. 35 И рече Господь к Моисею, глаголя: смертию да умрет человек сей, да побиете его камением весь сонм вне полка. 36 И изведоша его весь сонм вне полка, и побиша его камением весь сонм вне полка, якоже глагола Господь Моисею. 37 И рече Господь к Моисею, глаголя: 38 глаголи сыном Израилевым и речеши им: и да сотворят себе рясны на воскрилиих риз своих в роды своя: и возложите на рясны воскрилий прядение синее, 39 и будет вам на ряснах: и узрите их, и воспомянете вся заповеди Господни и сотворите я, и не развратитеся вслед мыслей своих и вслед очес ваших, имиже вы соблудисте вслед их: 40 яко да помянете и сотворите вся заповеди Моя, и будете святи Богу вашему: 41 Аз Господь Бог ваш, изведый вас из земли Египетския, быти вам Бог: Аз Господь Бог ваш. === 16 === 1 И глагола Корей, сын Иссаара сына Каафа сына Левиина, и Дафан и Авирон, сынове Елиавли, и Авнан сын Фалефа сына Рувимля: 2 и восташа на Моисеа, и мужи сынов Израилевых двести и пятьдесят началницы сонма, сигклитики совета и мужи именити. 3 Совосташа на Моисеа и Аарона и реша к ним: довлеет вам, яко весь сонм вси святи, и в них Господь: и чесо ради востаете на сонм Господнь? 4 И слышав Моисей, паде ниц. 5 И глагола к Корею и ко всему сонму его, глаголя: согляда и позна Господь сущих Его и святых, и приведе к Себе: и ихже не избра Себе, не приведе к себе: 6 сие сотворите: возмите себе сами кадилники, Корей и весь сонм его, 7 и вложите огнь в ня, и вложите в ня фимиам пред Господем утре: и будет муж, егоже аще изберет Господь, сей свят: да довлеют вам сынове Левиины. 8 И рече Моисей Корею: послушайте мене, сынове Левиини: 9 еда мало есть сие вам, яко отлучи вас Бог от сонма Израилева и приведе вас к Себе служити службы в скинии Господни и стояти пред сонмом Господним, еже служити им? 10 И приведе тя и всю братию твою, сыны Левиины с тобою, и просите священствовати? 11 Тако ты и весь сонм твой собравшийся на Бога: и Аарон кто есть, яко ропщете нань? 12 И посла Моисей призвати Дафана и Авирона, сыны Елиавли. И реша: не идем: 13 еда мало се, яко извел еси ны из земли кипящия млеком и медом, еже погубити нас в пустыни, яко владееши нами? Князь еси: 14 и ты ли в землю кипящую медом и млеком ввел еси нас и дал еси нам часть села и винограда? Очи человек тех изткнул еси: не идем. 15 И отягча Моисей гневом зело и рече к Господу: не внемли на жертву их: ни единаго похотения от них приях, ниже озлобих кого от них. 16 И рече Моисей к Корею: освяти сонм твой, и будите готови пред Господа ты и Аарон и они заутра: 17 и возмите кийждо кадилник свой, и возложите на ня фимиам, и принесите пред Господа кийждо кадилник свой, двести и пятьдесят кадилников, и ты и Аарон кийждо кадилник свой. 18 И взяша кийждо свой кадилник, и возложиша на ня огнь, и вложиша в ня фимиам, и сташа пред дверми скинии свидения Моисей и Аарон. 19 И собра на ня Корей весь сонм свой пред дверми скинии свидения: и явися слава Господня всему сонму. 20 И рече Господь к Моисею и Аарону, глаголя: 21 отступите кийждо от среды сонма сего, и потреблю Я абие. 22 И падоста на лица своя и рекоста: Боже, Боже духов и всякия плоти: аще человек един согреши, на весь ли сонм гнев Господнь? 23 И рече Господь к Моисею, глаголя: 24 рцы сонму, глаголя: отступите окрест от сонма Кореева и Дафаня и Авироня. 25 И воста Моисей, и иде к Дафану и Авирону: и идоша с ним вси старцы Израилтестии. 26 И рече к сонму, глаголя: отступите от кущ человек жестокосердых сих, и не прикоснитеся ко всем, елика суть им, да не погибнете купно во всем гресе их. 27 И отступиша от кущ Кореа и Дафана и Авирона окрест: Дафан же и Авирон изыдоста и стаста пред дверми кущ своих, и жены их, и дети их и имение их. 28 И рече Моисей: в сем познаете, яко Господь посла мя сотворити вся дела сия, яко не от себе (аз творю сия): 29 аще смертию всех людий умрут сии, и аще по присещению всех человек посещение будет их, то не Господь посла мене: 30 но явно покажет Господь, и отверзши земля уста своя пожрет я и домы их, и кущы их и вся, елика суть их, и снидут живи во ад, и уведите, яко разгневаша человецы сии Господа. 31 Егда же преста глаголя вся словеса сия, разседеся земля под ногами их: 32 и разверзеся земля, и пожре я и домы их, и вся люди сущыя с Кореом, и скоты их: 33 и снидоша тии, и вся, елика суть их, живи во ад, и покры их земля, и погибоша от среды сонма: 34 и весь Израиль, и иже окрест их, отбегоша от вопля их, зане рекоша, глаголюще: да не пожрет нас земля. 35 И огнь изыде от Господа и пояде двести и пятьдесят мужей принесших фимиам. 36 И рече Господь к Моисею. 37 И ко Елеазару сыну Ааронову жерцу: соберите кадилники медяныя от среды изгоревших, и огнь чуждий сей разсыплите тамо, яко освятишася кадилницы грешных сих в душах их: 38 и сотворите я дщицы кованы, обложение у олтаря, яко принесошася пред Господа и освятишася, и быша в знамение сыном Израилевым. 39 И взя Елеазар сын Аарона жерца кадилники медяныя, елики принесоша изгоревшии, и обложиша я во обложение олтаря, 40 в память сыном Израилевым яко да никтоже приидет иноплеменник, иже несть от семене Аароня, еже возложити фимиам пред Господем, и да не будет, якоже Корей и советницы его, якоже глагола ему Господь рукою Моисеовою. 41 И возропташа сынове Израилтестии на утрие на Моисеа и Аарона, глаголюще: вы избисте люди Господни. 42 И бысть егда нападе сонм на Моисеа и Аарона, и устремишася к скинии свидения: 43 и покры оную облак, и явися слава Господня: и вниде Моисей и Аарон пред скинию свидения. 44 И рече Господь к Моисею и Аарону, глаголя: 45 уступите от среды сонма сего и потреблю я единицею . И падоста на лица своя. 46 И рече Моисей ко Аарону: возми кадилник, и вложи в него огнь от олтаря, и возложи нань фимиам, и понеси скоро в полк, и помолися о них: изыде бо гнев от лица Господня, и нача губити люди. 47 И взя Аарон, якоже глагола ему Моисей, и тече в сонм, уже бо начася пагуба в людех: и возложи фимиам, и помолися о людех: 48 и ста между мертвыми и живыми, и преста пагуба. 49 И бысть умерших в пагубе четыренадесять тысящ и седмь сот кроме умерших Кореа ради. 50 И возвратися Аарон к Моисею, к дверем скинии свидения, и преста пагуба. === 17 === 1 И рече Господь к Моисею, глаголя: 2 глаголи сыном Израилевым, и возми от них но единому жезлу, жезл от всех князей их, по домом отечества их, дванадесять жезлов, имя же коегождо напиши на жезле его, 3 и имя Аароне напиши на жезле Левиине: есть бо жезл един: по племени дому отечеств своих да дадят: 4 и да положиши их в скинии свидения, прямо свидению, в нихже явлюся тебе ту: 5 и будет человек, егоже аще изберу, жезл его прозябнет: и отиму от мене роптание сынов Израилевых, елика сии ропщут на вы. 6 И глагола Моисей сыном Израилевым: и даша ему вси князи их по жезлу, князя единаго жезл, по княжению, по домом отечеств их, дванадесять жезлов: и жезл Ааронь посреде жезлов их. 7 И положи Моисей жезлы пред Господем в скинии свидения. 8 И бысть на утрие, и вниде Моисей и Аарон в скинию свидения: и се, прозябе жезл Ааронь в дому Левиине, и израсти ветвь, и процветоша цвети, и израсти орехи: 9 и изнесе Моисей вся жезлы от лица Господня ко всем сыном Израилевым: и видеша, и взя кийждо жезл свой. 10 И рече Господь к Моисею: отложи жезл Ааронь пред свидением в сохранение, в знамение сынов ослушливых: и да престанет роптание их от Мене, и не измрут. 11 И сотвори Моисей и Аарон, якоже повеле Господь Моисею, тако сотвориша. 12 И рекоша сынове Израилевы к Моисею, глаголюще: се, потребихомся, погибохом, исчезохом: 13 всяк прикасаяйся ко скинии свидения Господня умирает: даже до конца ли умирающе погибнем? === 18 === 1 И рече Господь ко Аарону, глаголя: ты и сынове твои, и дом отца твоего с тобою, возмите грехи святых, ты же и сынове твои возмите грехи жречества вашего: 2 и братию твою, племя Левиино, сонм отца твоего приведи к себе, и да приложатся к тебе, и да служат тебе, и ты и сынове твои с тобою пред скиниею свидения, 3 и да блюдут стражбы твоя и стражбы скинии: токмо к сосудом святым и ко олтарю да не приступают, да не измрут и сии, и вы: 4 и приложатся к тебе и да блюдут стражбы скинии свидения по всем службам скинии, и иноплеменник да не приступит к тебе, 5 и соблюдете стражбы святых и стражбы олтаря, и не будет ктому гнева на сынех Израилевых: 6 и Аз взях братию вашу левиты от среды сынов Израилевых в дар данный Господу служити службы скинии свидения. 7 И ты и сынове твои с тобою сохраните жречество ваше по всему образу олтаря, и еже внутрь завесы, и да служите службы в дар жречества вашего: и иноплеменник приступаяй умрет. 8 И рече Господь ко Аарону: и се, Аз дах вам снабдение начатков моих от всех освященных Мне от сынов Израилевых: тебе дах я в честь, и сыном твоим по тебе законно вечно: 9 и сие да будет вам от освященных святых приношений, от всех даров их и от всех жертв их, и от всякаго преступления их и от всех грех их, елика отдают Мне, от всех святынь, тебе да будут и сыном твоим. 10 Во святем святых ядите я: всяк мужеский пол да яст я, ты и сынове твои: свята будут тебе. 11 И сие да будет вам от начатков даяний их, от всех возложений сынов Израилевых: тебе дах я, и сыном твоим и дщерем твоим с тобою, законно вечно: всяк чистый в дому твоем да яст я. 12 Всяк начаток елеа, и всяк начаток вина и пшеницы, начаток их, елика аще отдадят Господу, тебе дах я: первородная вся елика в земли их, елика аще принесут Господу, тебе да будут: 13 всяк чистый в дому твоем да яст я. 14 Всяко освященное в сынех Израилевых тебе да будет, 15 и всякое разверзающее всяка ложесна от всякия плоти, елика приносят Господу, от человека до скота, тебе да будут: но токмо искуплением искупятся первенцы человечестии, и первенцы скотов нечистых да искупятся: 16 и искуп его от единаго месяца, сценение пять сикль, по сиклю святому: двадесять медниц есть: 17 обаче первородная телцев и первородная овец и первородная коз да не искупятся: свята суть: и кровь их пролиеши у олтаря, и тук принесеши принос в воню благовония Господу. 18 И мяса тебе да будут, якоже и груди возложения: и по раму десному тебе да будут. 19 Всяко участие святых, елика аще отлучат сынове Израилтестии Господу, тебе дах и сыном твоим и дщерем твоим с тобою, законно вечно: завет соли вечныя есть пред Господем, тебе и семени твоему по тебе. 20 И рече Господь ко Аарону: в земли их да не наследиши наследия, и части да не будет тебе в них: яко Аз часть твоя и наследие твое посреде сынов Израилевых. 21 И сыном Левииным, се, дах всю десятину во Израили в жребий за службы их, елико служат тии служение в скинии свидения: 22 и да не приступают по сем сынове Израилтестии к скинии свидения прияти грех смертоносный: 23 и да служат левити сами службу скинии свидения, и тии возмут грехи их: законно вечно в роды их: и посреде сынов Израилевых да не наследят наследия: 24 яко десятины сынов Израилевых, елики аще отлучат Господу, участие дах левитом в жребий: сего ради рекох им: среди сынов Израилевых да не наследят жребия. 25 И рече Господь к Моисею, глаголя: 26 и левитом да глаголеши и речеши к ним: аще возмете десятину от сынов Израилевых, юже дах вам от них во жребий, и отделите вы от нея участие Господу, десятину от десятины ея, 27 и вменятся вам участия ваша яко пшеница от гумна и яко участие от точила: 28 тако отделите их и вы от всех участий Господних, от всех десятин ваших, елики аще возмете от сынов Израилевых, и дадите от них участие Господу, Аарону жерцу: 29 от всех даяний ваших отделите участие Господу, или от всех начатков освященное от него, 30 и речеши к ним: егда отделите начаток от него, и вменится левитом аки жито от гумна и яко участие от точила: 31 и ядите то во всяком месте вы и сынове ваши и домове ваши, яко мзда сия вам есть за службы вашя, яже в скинии свидения: 32 и не приимете за сие греха, яко аще отлучите начаток от него: и святынь сынов Израилевых не оскверните, да не умрете. === 19 === 1 И рече Господь к Моисею и Аарону, глаголя: 2 се, расположение закона, елика заповеда Господь, глаголя: глаголи сыном Израилевым, и да приведут к тебе юницу рыжу непорочну, яже не имать на себе порока, и на нюже не бе возложено иго: 3 и даси ю ко Елеазару жерцу: и да изведут ю вне полка на место чисто, и да заколют ю пред ним: 4 и да возмет Елеазар от крове ея и да покропит спреди скинии свидения от крове ея седмижды: 5 и да сожгут ю пред ним, и кожу ея и мяса ея и кровь ея с мотылы ея да сожгут: 6 и да возмет жрец древо кедрово, и иссоп, и соскание червленое, и да вложат в средину сожжения юницы: 7 и да измыет ризы своя жрец и да омыет тело свое водою, и потом да внидет в полк, и нечист будет жрец до вечера: 8 и иже сожигает ю, да исперет ризы своя и да омыет тело свое водою, и нечист будет до вечера: 9 и да соберет чистый человек пепел юницы и да изнесет вне полка на место чисто, и да будет сонму сынов Израилевых в сохранение: вода окропления очищение есть: 10 и собираяй пепел юницы да исперет ризы своя, и нечист будет до вечера: и да будет сыном Израилевым и пришелцем прилежащым посреде вас законно вечно. 11 Прикасаяйся мертвому всякия души человечи нечист будет седмь дний: 12 сей да очистится (сею водою) в день третий и в день седмый, и чист будет: аще же не очистится ею в день третий и в день седмый, нечист будет. 13 Всяк прикасаяйся мертвому от всякия души человечи, аще умрет, и не очистится, скинию Господню оскверни: потребится душа та от Израиля, яко вода окропления не воскропися нань, нечист есть, еще нечистота его на нем есть. 14 И сей закон: человек аще умрет в дому, всяк входяй в дом, и елика суть в дому, нечиста будут седмь дний. 15 И всяк сосуд непокровен, и елики обвязанием не обвязаны, нечисти суть. 16 И всяк иже аще прикоснется на поли язвенному, или мертвому, или кости человечи, или гробу, седмь дний нечист будет: 17 и да возмут нечистому от пепела сожженнаго очищения, и да возлиют нань воду живу в сосуд: 18 и да возмет иссоп и омочит в воду муж чист, и да воскропит на дом и на сосуды и на душы, елики суть тамо, и на коснувшася кости человечей, или язвенному, или мертвечине, или гробу: 19 и да воскропит чистый на нечистаго в день третий и в день седмый, и очистится седмаго дне: и да исперет ризы своя и да омыет тело свое водою, и нечист будет до вечера. 20 И человек, иже аше осквернится, и не очистит себе, потребится душа та от среды сонма, яко святая Господня осквернави , яко вода окропления не воскропися Нань, нечист есть. 21 И да будет вам законно вечно, и окропляяй водою окропления да исперет ризы своя, и прикасаяся воде окропления нечист будет до вечера. 22 И всякое, емуже прикоснется нечистый, нечисто будет: и душа прикасающаяся нечиста будет до вечера. === 20 === 1 И приидоша сынове Израилтестии, весь сонм, в пустыню Син, в месяц первый, и пребываху людие в Кадисе: и скончася ту Мариам, и погребеся тамо. 2 И не бяше воды сонму: и собрашася на Моисеа и Аарона, 3 и ропташа людие на Моисеа, глаголюще: о , дабы умерли быхом в погибели братии нашея пред Господем: 4 и вскую введосте сонм Господнь в пустыню сию, погубити ны и скоты нашы? 5 И вскую сие? Изведосте ны из Египта, еже приити (нам) на место злое сие, место, в немже не сеется, ни смокви, ни винограды, ниже яблоки, ниже вода есть пити. 6 И прииде Моисей и Аарон от лица сонма пред двери скинии свидения, и падоста ниц: и явися слава Господня над ними. 7 И рече Господь к Моисею, глаголя: 8 возми жезл твой и созови сонм ты и Аарон, брат твой, и рцыте ко каменю пред ними, и даст воды своя: и изведете им воды из камене, и напойте сонм и скоты их. 9 И взя Моисей жезл иже пред Господем, якоже повеле Господь. 10 И созва Моисей и Аарон сонм пред камень, и рече к ним: послушайте мене, непокоривии: еда из камене сего изведем вам воду? 11 И воздвиг Моисей руку свою, удари в камень жезлом дважды: и изыде вода многа, и напися сонм (весь) и скоты их. 12 И рече Господь к Моисею и Аарону: понеже не веровасте освятити Мя пред сынми Израилтескими, сего ради не введете вы сонма сего в землю, юже дах им: 13 сия вода Пререкания, яко возропташа сынове Израилтестии пред Господем, и освятися в них. 14 И посла Моисей послы от Кадиса к Царю Едомскому, глаголя: тако глаголет брат твой Израиль: ты веси весь труд обретший нас: 15 и снидоша отцы наши в Египет, и жихом во Египте дни многи, и озлобиша нас Египтяне и отцев наших: 16 и возопихом ко Господу, и услыша Господь глас наш, и послав Ангела, изведе ны из Египта: и ныне есмы в Кадисе граде, на конце предел твоих: 17 да прейдем сквозе землю твою: не пройдем сквозе села, ни сквозе винограды, ни пием воды в потоцех твоих: путем царским пойдем, не совратимся ни на десно, ни на лево, дондеже прейдем пределы твоя. 18 И рече к ним Едом: не пройдеши сквозе мене: аще же ни, ратию изыду противу тебе. 19 И рекоша к нему сынове Израилевы: под горою пройдем: аще же от воды твоея испием аз и скоты моя, дам цену тебе: но вещь сия ничтоже есть, под горою да пройдем. 20 Он же рече: не пройдеши сквозе мене. И изыде противу им Едом с народом тяжким и рукою крепкою. 21 И не восхоте Едом дати Израилю проити сквозе пределы своя, и уклонися Израиль от него. 22 И воздвигошася от Кадиса, и приидоша сынове Израилтестии, весь сонм, в гору Ор. 23 И рече Господь к Моисею и Аарону в горе Ор у предел земли Едомли, глаголя: 24 да приложится Аарон к людем своим, яко не внидете в землю, юже дах сыном Израилевым в наследие, понеже преогорчисте Мя у воды Пререкания: 25 возми Аарона брата твоего и Елеазара сына его, и возведи я на Ор гору пред всем сонмом: 26 и совлецы Аарону ризы его и облецы Елеазара сына его, и Аарон приложився да умрет тамо. 27 И сотвори Моисей, якоже повеле ему Господь: и возведе я на Ор гору пред всем сонмом, 28 и совлече Аарона с риз его, и облече в ня Елеазара сына его: 29 и умре Аарон тамо на версе горы: и сниде Моисей и Елеазар с горы. 30 И виде весь сонм, яко умре Аарон: и плакашася по Аароне тридесять дний весь дом Израилев. === 21 === 1 И услыша Хананей царь Арадский живый при пустыни, яко прииде Израиль путем Афаримским, и ратова противу Израиля, и взя от них плен. 2 И обещася Израиль обетом Господу и рече: аще мне предаси люди сия подручны, погублю их и грады их. 3 И услыша Господь глас Израилев и предаде Хананеа подручна ему: и опустоши его и грады его, и прозва има месту тому Запустение. 4 И воздвигшеся от Ора горы путем иже к морю Чермному, обыдоша землю Едомлю: и малодушествоваша людие на пути, 5 и роптаху людие на Бога и на Моисеа, глаголюще: вскую извел еси ны из Египта убити нас в пустыни, яко несть хлеба, ни воды? И душа наша негодует о хлебе сем тщем. 6 И посла Господь на люди змиев умерщвляющих, и угрызаху людий: и умроша люди мнози от сынов Израилевых. 7 И пришедше людие к Моисеови глаголаша: согрешихом, яко роптахом на Господа и на тя: помолися убо ко Господу, да отженет от нас змии. И помолися Моисей ко Господу о людех. 8 И рече Господь к Моисею: сотвори себе змию (медяну) и положи ю на знамя: и будет аще угрызет змия человека, всяк угрызенный видев ю жив будет. 9 И сотвори Моисей змию медяну и постави ю на знамени: и бысть егда угрызаше змия человека, и взираше на змию медяну, и оживаше. 10 И воздвигошася сынове Израилевы, и ополчишася во Овофе: 11 и воздвигшеся от Овофа, ополчишася во Ахалгеи об ону страну пустыни, яже есть пред лицем Моавитским, на восток солнца: 12 и оттуду воздвигошася, и ополчишася в дебри Заред: 13 и оттуду воздвигшеся, ополчишася об ону страну Арнона в пустыни, яже исходит от предел Аморрейских: есть бо Арнон предел Моавль между Моавом и между Аморреом. 14 Сего ради глаголется в книзе брань Господня: Зоову попали, и потоки Арнони, 15 и потоки устрои в селение Ир, и прилежит пределом Моавлим. 16 И оттуду (воздвигошася) ко Кладязю: сей есть кладязь, о немже рече Господь к Моисею: собери люди, и дам им воду пити. 17 Тогда воспе Израиль песнь сию у кладязя: начинайте ему: 18 кладязь, ископаша его князи, изсекоша его царие язычестии во царствии их, внегда обладати ими. И от кладязя (воздвигошася) в Манфанаил: 19 и от Манфанаила в Наадиил, и от Наадиила в Вамоф: 20 и от Вамофа в Напин, иже есть на поли Моавли, от верха Изсеченаго, зрящаго пред лице пустыни. 21 И посла Моисей послы к Сиону царю Аморрейску, словесы мирными глаголя: 22 да пройдем сквозе землю твою, путем пойдем: не уклонимся ни на села, ни на винограды, не испием воды от кладязь твоих: путем царским пойдем, дондеже пройдем пределы твоя. 23 И не даде Сион Израилю проити сквозе пределы своя: и собра Сион вся люди своя, и изыде ополчитися на Израиля в пустыню: и прииде во Иассан, и ополчися на Израиля. 24 И порази его Израиль убийством меча, и обладаше землею его от Арнона до Иавока, даже до сынов Амманих: яко Иазир пределы сынов Амманих суть. 25 И взя Израиль вся грады сия: и вселися Израиль во всех градех Аморрейских, во Есевоне и во всех подлежащих ему: 26 есть бо Есевон град Сиона царя Аморрейска: и сей повоева царя Моавля прежде и взя всю землю его от Ароира даже до Арнона. 27 Сего ради рекут приточницы: приидите во Есевон, да соградится и созиждется град Сион: 28 яко огнь изыде от Есевона и пламень от града Сиона, и пояде даже до Моава, и пожре столпы Арнонския: 29 горе тебе, Моаве, погибосте, людие Хамосовы: продани быша сынове их в заключение и дщери их пленницы царю Аморрейскому Сиону: 30 и семя их погибнет, Есевон даже до Девона: и жены их еще разожгоша огнь на Моава. 31 Вселися же Израиль во вся грады Аморрейски: 32 и посла Моисей соглядати Иазира: и взяша его и села его, и изгнаша Аморреа живущаго тамо: 33 и возвратившеся, приидоша путем в Васан. И изыде Ог, царь Васанский, противу им и вси людие его на брань во Едраин. 34 И рече Господь к Моисею: не убойся его, яко в руце твои предах его и вся люди его и всю землю его: и сотвориши ему, якоже сотворил еси Сиону царю Аморрейску, иже живяше во Есевоне. 35 И порази его и сыны его и вся люди его, даже не оста в них живый: и наследиша землю его. === 22 === 1 И воздвигшеся сынове Израилтестии, ополчишася на запады Моава у Иордана ко Иерихону. 2 И видев Валак сын Сепфоров вся, елика сотвори Израиль Аморрею, 3 и убояся Моав людий зело, яко мнози бяху, и оскорбе Моав от лица сынов Израилевых, 4 и рече Моав старейшинам Мадиамлим: ныне потребит сонм сей всех, иже окрест нас, якоже потребляет телец злак на поли. И Валак, сын Сепфоров, бяше царь Моавль в то время, 5 и посла послы к Валааму, сыну Веорову, во Фафуру яже есть у реки земли сынов людий его, призвати его, глаголя: се, людие изыдоша из Египта, и се, покрыша лице земли, и сии седят при одержании моем: 6 и ныне прииди, проклени мне люди сия, понеже крепльшии суть паче нас, аше возможем сих избити, и изжену их из земли: яко вем, ихже аще благословиши ты, благословени суть, и ихже аще прокленеши ты, прокляти. 7 И идоша старейшины Моавли и старейшины Мадиамли, и волхвования в руках их: и приидоша к Валааму и глаголаша ему словеса Валакова. 8 И рече к ним: препочийте зде нощь (сию), и отвещаю вам деяния, яже аще возглаголет Господь ко мне. И пребыша князи Моавли у Валаама. 9 И прииде Бог к Валааму и рече ему: что человецы сии у тебе? 10 И рече Валаам к Богу: Валак сын Сепфоров, царь Моавль, посла их ко мне, глаголя: 11 се, людие изыдоша из Египта и покрыша лице земли, и сии седят при одержании моем: и ныне прииди, проклени ми их, негли возмогу избити их и изгнати я от земли. 12 И рече Бог к Валааму: да не идеши с ними, ниже да кленеши людий: суть бо благословени. 13 И востав Валаам заутра, рече князем Валаковым: возвратитеся к господину своему: не попущает ми Бог ити с вами. 14 И воставше князи Моавли приидоша к Валаку и рекоша ему: не хощет Валаам приити с нами. 15 И приложи Валак еще послати князи множайшии и честнейшии сих. 16 И приидоша к Валааму и глаголаша ему: сия глаголет Валак, сын Сепфоров: молю тя, не обленися приити ко мне: 17 честне бо тя почту, и вся, елика аще речеши ми, сотворю тебе: и прииди, и проклени ми люди сия. 18 И отвеща Валаам и рече князем Валаковым: аще ми даст Валак полну храмину свою злата и сребра, не могу преступити слова Господа Бога, еже сотворити то мало или велико в разуме моем: 19 и ныне потерпите зде и вы нощь сию, и увем, что приложит Господь глаголати ко мне. 20 И прииде Бог к Валааму нощию и рече ему: аще звати тя приидоша человецы сии, востав иди вслед их, но слово, еже аше реку тебе, то да сотвориши. 21 И востав Валаам заутра, оседла осля свое и иде со князи Моавли. 22 И разгневася яростию Бог, яко иде сей: и воста Ангел Божий препяти ему на пути. Сей же седяше на осляти своем и два раба его с ним. 23 И узрев осел Ангела Божия супротив стояща на пути, и мечь извлечен в руце его, и совратися осел с пути и идяше на поле: и бияше (Валаам) осля жезлом своим, еже направити е на путь: 24 и ста Ангел Божий на броздах виноградных: ограждение отсюду, и ограждение отюнуду: 25 и узрев осел Ангела Божия, приложися ко ограде и прижме ногу Валааму ко ограде, и приложи еще бити его: 26 и приложи Ангел Божии, и шед свята в месте узком, в немже не бяше уклонитися ни на десно, ни на лево: 27 и видя осля Ангела Божия, паде под Валаамом: и разгневася Валаам, и бияше осля жезлом. 28 И отверзе Бог уста осляти, и рече Валааму: что сотворих тебе, яко се, в третие биеши мя? 29 И рече Валаам осляти: яко поругалося ми еси: и аще бых мечь имел в руку моею, пробол бых тя. 30 И рече осля Валааму: не аз ли ослица твоя, на нейже ты ездиши от юности своея до днешняго дне? Еда презорством презревши сотворих тебе сие? Он же рече: ни. 31 Отверзе же Бог очи Валааму, и узре Ангела Божия противостояща на пути, и мечь извлечен в руце его: и приклонився поклонися ему лицем своим. 32 И рече ему Ангел Божий: почто биеши осля твое сие в третие? И се, Аз приидох на препятие твое, яко неприятен путь твой предо Мною: и видя мя ослица, совратися от Мене се третие: 33 и аще бы не уклонилася от Мене, ныне тя убо убил бых, сию же сохранил бых. 34 И рече Валаам ко Ангелу Господню: согреших, не ведех бо, яко Ты мне противостоял еси на пути: и ныне аще Тебе не угодно, возвращуся. 35 И рече Ангел Божий к Валааму: иди ты с человеки: обаче слово, еже аще реку тебе, сие сохрани глаголати. И иде Валаам со князи Валаковы. 36 И услышав Валак, яко приходит Валаам, изыде во сретение ему во град Моавль, иже есть в пределех Арноних, иже есть на краи пределов. 37 И рече Валак к Валааму: не послах ли к тебе звати тя? Почто не пришел еси ко мне? Или не возмогу почтити тебе? 38 И рече Валаам к Валаку: се, прихожду к тебе ныне: мощен ли буду глаголати что? Слово, еже аще вложить Бог во уста моя, сие реку. 39 И иде Валаам с Валаком, и внидоша во Грады Селныя. 40 И закла Валак телцы и овцы, и посла Валааму и князем иже с ним. 41 И бысть заутра, и взяв Валак Валаама, возведе его на столп Ваалов, и показа ему оттуду часть некую людий. === 23 === 1 И рече Валаам к Валаку: созижди мне зде седмь требищ, и уготовай мне зде седмь телцев и седмь овнов. 2 И сотвори Валак, якоже рече ему Валаам: и вознесе телца и овна на требище. 3 И рече Валаам к Валаку: стани у требы своея, и пойду, аще явится мне Бог в сретение, и слово, еже мне укажет, повем тебе. И ста Валак у требы своея. 4 И Валаам иде вопросити Бога, и иде прямо: и явися Бог Валааму. И рече к нему Валаам: седмь требищ изготових и возложих телца и овна на требище. 5 И вложи Бог слово во уста Валааму и рече: возвратився к Валаку тако глаголи. 6 И возвратися к нему: он же стояше у всесожжений своих, и вси князи Моавли с ним: и бысть Дух Божий на нем. 7 И восприим притчу свою рече: от Месопотамии приведе мя Валак царь Моавль, от гор восточных, глаголя: гряди, проклени ми Иакова, и гряди, проклени ми Израиля: 8 что проклену, егоже не кленет Господь? Или что зло реку, егоже не злословит Бог? 9 Яко от верха гор узрю его и от холм проуразумею его: се, людие едини населятся и со языки не вменятся: 10 кто изследит семя Иаковле? И кто изочтет сонмы Израиля? Да умрет душа моя в душах праведных, и буди семя мое, якоже семя их. 11 И рече Валак к Валааму: что сотворил еси ми? На проклятие враг моих призвах тя, и се, благословил еси (я) благословением. 12 И рече Валаам к Валаку: не елика ли вложит Бог во уста моя, сие сохраню глаголати? 13 И рече к нему Валак: пойди еще со мною на место ино, с негоже не узриши их оттуду, но разве часть некую их узриши, всех же не узриши, и проклени ми их оттуду. 14 И поя его на стражу села, на верх Истесанаго, и созда тамо седмь требищ, и возложи телца и овна на требище. 15 И рече Валаам к Валаку: стани у требы своея, аз же пойду вопросити Бога. 16 И срете Бог Валаама, и вложи слово во уста ему и рече: возвратися к Валаку, и речеши сия. 17 И возвратися к нему: он же стояше у всесожжений своих, и вси князи Моавли с ним. И рече ему Валак: что глагола Господь? 18 И восприим притчу свою, рече: востани, Валак, и послушай, внуши свидетель, сыне Сепфоров: 19 не яко человек Бог колеблется, ниже яко сын человеческий изменяется: Той глаголаше, не сотворит ли? Речет, и не пребудет ли? 20 Се, благословляти приведен есмь: благословлю, и не отвращу: 21 не будет труда во Иакове, ниже узрится болезнь во Израили: Господь Бог его с ним, слава царская на нем: 22 Бог изведый его из Египта, якоже слава единорога в нем: 23 несть бо вражбы во Иакове, ниже волхвования во Израили: во время наречется Иакову и Израилю, что совершит Бог: 24 се, людие яко львичища востанут, и яко лев вознесется: не уснет, дондеже снест лов и кровь посеченых испиет. 25 И рече Валак к Валааму: ни клятвами мне клени их, ниже благословением благослови их. 26 И отвещав Валаам, рече к Валаку: не рех ли ти, глаголя: слово, еже аще возглаголет Бог, сие сотворю? 27 И рече Валак к Валааму: гряди, пойму тя на место ино, аще угодно будет Богу, и проклени ми их оттуду. 28 И поя Валак Валаама на верх Фогора, простирающася в пустыню. 29 И рече Валаам к Валаку: созижди мне зде седмь требищ, и уготовай мне зде седмь телцев и седмь овнов. 30 И сотвори Валак, якоже рече ему Валаам: и вознесе телца и овна на требище. === 24 === 1 И видев Валаам, яко добро есть пред Господем благословляти Израиля, не иде по обычаю своему в сретение волхвованием, и возврати лице свое в пустыню. 2 И возвед Валаам очи свои, узре Израиля ополчившася по племеном: и бысть Дух Божий на нем. 3 И восприим притчу свою рече: глаголет Валаам, сын Веоров, глаголет человек истинно зряй, 4 глаголет слушаяй словеса Крепкаго, иже видение Божие виде во сне: отверсты очи его: 5 коль добри доми твои, Иакове, и кущы твоя, Израилю: 6 яко дубравы осеняющыя и яко садие при реках, и яко кущы, яже водрузи Господь, и яко кедри при водах: 7 изыдет человек от семене его, и обладает языки многими: и возвысится паче Гога царство его, и возрастет царство его: 8 Бог изведе его из Египта, якоже слава единорога ему: пояст языки враг своих и толщы их измождит, и стрелами своими устрелит врага: 9 возлег почи яко лев и яко скимен: кто возбудит его? Благословящии тя благословени, и проклинающии тя прокляти. 10 И разгневася Валак на Валаама, и плесну руками своими, и рече Валак к Валааму: кляти тя врага моего призвах, и се, благословил еси их в третие: 11 ныне убо бежи на место свое: рекох, почту тя: и ныне лиши тя Господь славы. 12 И рече Валаам к Валаку: и послом твоим, ихже послал еси ко мне, не рекох ли, глаголя: 13 аще ми даст Валак храмину свою полну сребра и злата, не могу преступити слова Божия, еже сотворити е зло или добро от мене самаго: елика аще речет ми Бог, сия возглаголю? 14 И ныне, се, иду до места своего: гряди, присоветую тебе, что сотворят людие сии людем твоим, в последняя дни. 15 И восприим притчу свою рече: глаголет Валаам сын Веоров, глаголет человек истинно зряй, 16 слышай словеса Божия, умея умение Вышняго и видение Божие видевый во сне: отверсты очи его: 17 покажу ему, и не ныне: ублажаю, и не приближается: возсияет звезда от Иакова, и востанет человек от Израиля и погубит князи Моавитския, и пленит вся сыны Сифовы: 18 и будет Едом наследие, и будет наследие Исав враг его, и Израиль сотвори крепость: 19 и востанет от Иакова, и погубит спасаемаго от града. 20 И видев Амалика и восприим притчу свою, рече: начало языков Амалик, и семя их погибнет. 21 И видев Кенеона и восприим притчу свою, рече: сильно селение твое: и аще положиши на камени гнездо твое, 22 и аще будет Веору гнездо коварства, Ассириане пленят тя. 23 И видев Ога и восприим притчу свою, рече: горе, горе, кто жив будет, егда положит Бог сия? 24 И изыдут из рук Китиейских, и озлобят Ассура, и озлобят Евреов, и сами вкупе погибнут. 25 И востав Валаам отиде, возвратився на место свое: и Валак отиде к себе. === 25 === 1 И живяше Израиль в Саттиме, и осквернишася людие блужением со дщерми Моавли: 2 и призваша я в требы кумир своих, и ядоша людие требы их и поклонишася кумиром их: 3 и причастися Израиль Веельфегору, и разгневася яростию Господь на Израиля. 4 И рече Господь к Моисею: поими вся князи людския, и обличи я Господу прямо солнцу, и отвратится гнев ярости Господни от Израиля. 5 И рече Моисей к племенем Израилским: избийте кийждо ужика своего служившаго Веельфегору. 6 И се, человек от сынов Израилевых пришед приведе брата своего к Мадианитыне пред Моисеем и пред всем сонмом Израилевым: сии же плакахуся пред дверми скинии свидения. 7 И видев Финеес, сын Елеазара сына Аарона жерца, воста из среды сонма, и взем сулицу в руку, 8 вниде вслед человека Израилтянина в блудилище, и прободе обоих, и человека Израилтянина, и жену сквозе ложесна ея: и преста вред от сынов Израилевых. 9 И быша умершии язвою двадесять четыри тысящы. 10 И рече Господь к Моисею, глаголя: 11 Финеес сын Елеазара сына Аарона жерца утоли гнев Мой от сынов Израилевых, егда возревнова ревность Моя в них, и не потребих сынов Израилевых в ревности Моей: 12 тако рцы: се, Аз даю ему завет Мой мирный, 13 и будет ему и семени его по нем завет жречества вечный, понеже возревнова по Бозе своем и умилостиви о сынех Израилевых. 14 Имя же человеку Израилтянину, егоже уби с Мадианитынею, Замврий сын Салмонь, князь дому отечества сынов Симеоних: 15 и имя жене Мадианитыне прободеной Хазви, дщи Сура, князя рода Соммофова, дому отечества есть Мадиамля. 16 И рече Господь к Моисею, глаголя: рцы сыном Израилевым, глаголя: 17 враждуйте Мадианитом и бийте я: 18 зане враждуют вам сии лестию, елико прельщают вас Фогором и Хазвиею дщерию князя Мадиамля, сестрою своею прободеною, в день язвы Фогора ради. === 26 === 1 И бысть но язве, и рече Господь к Моисею и Елеазару жерцу, глаголя: 2 возми начало всего сонма сынов Израилевых от двадесяти лет и вышше, но домом отечеств их, всяк исходяй вооружитися во Израили. 3 И глагола Моисей и Елеазар жрец к ним во Аравофе Моавли при Иордане у Иерихона, глаголя: 4 от двадесяти лет и вышше, якоже заповеда Господь Моисею: и сынове Израилтестии изшедшии из Египта: 5 Рувим первенец Израилев. Сынове же Рувимли: Енох и сонм Енохов, Фаллу сонм Фаллов, 6 Асрону сонм Асронов, Харму сонм Хармиин. 7 Сии сонми Рувимли: и бысть соглядание их четыредесять три тысящы и шесть сот и тридесять. 8 И сынове Фалловы Елиав. 9 И сынове Елиавли Намуил и Дафан и Авирон: сии нарочитии сонму: сии суть воставше на Моисеа и Аарона в сонме Кореове в крамоле на Господа: 10 и отверзши земля уста своя пожре их и Кореа в смерти сонма его, егда пояде огнь двести и пятьдесят, и быша в знамение. 11 Сынове же Кореовы не измроша. 12 И сынове Симеони, сонм сынов Симеоних: Намуилу сонм Намуилов, Иамину сонм Иаминов, Иахину сонм Иахинов, 13 Заре сонм Зарин, Саулу сонм Саулов. 14 Сии сонми Симеони от соглядания их двадесять две тысящы и двести. 15 Сынове же Иудины Ир и Авнан и Силом, и Фарес и Зара: и умре Ир и Авнан в земли Ханаани. 16 И быша сынове Иудины по сонмом своим: Силому сонм Силомль, Фаресу сонм Фаресов, Заре сонм Зарин. 17 И быша сынове Фаресовы: Асрону сонм Асронов, Иамуилу сонм Иамуилов. 18 Сии сонми Иудины по согляданию их седмьдесят шесть тысящ и пять сот. 19 И сынове Иссахаровы по сонмом своим: Фоле сонм Фолин Фуеви сонм Фуин, 20 Иасуву сонм Иасувин, Амвраму сонм Амврамль. 21 Сии сонми Иссахаровы но согляданию их шестьдесят и четыри тысящы и четыреста. 22 Сынове Завулони по сонмом своим: Сареду сонм Саредин, Аллону сонм Аллонин, Аллилу сонм Аллилин. 23 Сии сонми Завулони по согляданию их шестьдесят тысящ и пять сот. 24 Сынове Гадовы по сонмом их: Сафону сонм Сафонин, Аггину сонм Аггинов, Сунину сонм Сунинов, 25 Азену сонм Азенин, Адду сонм Аддин, 26 Ароаду сонм Ароадин, Ариилу сонм Арииль. 27 Сии сонми сынов Гадовых но согляданию их четыредесять и четыри тысящы и пять сот. 28 Сынове Асировы по сонмом их: Иамину сонм Иаминов, Иесую сонм Иесуинь, 29 Вариаю сонм Вариаинь, Ховеру сонм Ховерин, Мелхиилу сонм Мелхиилин, 30 имя же дщери Асирове Сара, 31 сии сонми Асировы но согляданию их четыредесять три тысящи и четыреста. 32 Сынове Иосифли по сонмом их: Манассиа и Ефрем. 33 Сынове Манассиины: Махиру сонм Махирин: и Махир роди Галаада, Галааду сонм Галаадин. 34 И сии сынове Галаадины: Ахиезеру сонм Ахиезеров, Хелеку сонм Хелеков, 35 Есриилу сонм Есриилов, Сихему сонм Сихемль, 36 Симаеру сонм Симаерин, и Оферу сонм Оферов. 37 И Салпааду сыну Оферову не быша ему сынове, но токмо дщери. И сия имена дщерем Салпаадовым: Маала и Нуа, и Егла и Мелха и Ферса. 38 Сии сонми Манассиины по согляданию их пятьдесят и две тысящы и седмь сот. 39 И сии сынове Ефремли: Суфалу сонм Суфалин, Танаху сонм Танахин. 40 Сии сынове Суфаловы: Едену сонм Еденин. 41 Сии сонми Ефремли по согляданию их тридесять две тысящы и пять сот. Сии сонми сынов Иосифовых по сонмом их. 42 Сынове Вениамини по сонмом их: Валу сонм Валин, Асивиру сонм Асивиров, Иахирану сонм Иахиранин, Софану сонм Софанин. 43 И быша сынове Валу Адерь и Ноеман: 44 Адеру сонм Адерин, и Ноеману сонм Ноеманин. 45 Сии сынове Вениамини по сонмом их по согляданию их четыредесять и пять тысящ и шесть сот. 46 И сынове Дановы по сонмом их: Самею сонм Самеин: сии сонми Дановы но сонмом их. 47 Вси сонми Самеини по согляданию их шестьдесят четыри тысящы и четыреста. 48 Сынове Неффалимли по сонмом их: Асиилу сонм Асиилев, Гоину сонм Гоинин, 49 Иесрию сонм Иесриев, Селлиму сонм Селлимов. 50 Сии сонми Неффалимли по согляданию их четыредесять пять тысящ и четыреста. 51 Сие соглядание сынов Израилевых шесть сот едина тысяща и седмь сот тридесять. 52 И рече Господь к Моисею, глаголя: 53 сим разделится земля в наследие по числу имен: 54 множайшым да умножиши наследие, и малейшым да умалиши наследие их: коемуждо, якоже суть соглядани, да дастся наследие их: 55 по жребием да разделится земля именам, по племенем отечеств своих да наследят: 56 от жребия да разделиши наследие их между многими и малыми. 57 И сынове Левиини но сонмом их: Гирсону сонм Гирсонов, Каафу сонм Каафов, Мераре сонм Мерарин. 58 Сии сонми сынов Левииных: сонм Ловенин, сонм Хевронин, и сонм Мусин, и сонм Кореов. И Кааф роди Амрама. 59 Имя же жене Амрамли Иохавеф, дщи Левиина, яже роди сих Левии во Египте, и роди Амраму Аарона и Моисеа и Мариам сестру их. 60 И родишася Аарону Надав и Авиуд, и Елеазар и Ифамар. 61 И умре Надав и Авиуд, егда принесоста огнь чуждий пред Господем в пустыни Синайстей. 62 И быша от соглядания их двадесять три тысящы, всяк мужеск пол от единаго месяца и вышше: не быша бо соглядани посреде сынов Израилевых, яко не дадеся им жребий посреде сынов Израилевых. 63 И сие соглядание Моисеа и Елеазара жерца, иже соглядаша сынов Израилевых во Аравофе Моавли, у Иордана при Иерихоне. 64 И в сих не бяше человек от согляданых Моисеом и Аароном, ихже соглядаша сынов Израилевых в пустыни Синайстей. 65 Понеже рече Господь им: смертию измрут в пустыни. И не остася от них ни един, кроме Халева сына Иефонниина и Иисуса сына Навина. === 27 === 1 И пришедшя дщери Салпаада сына Оферова, сына Галаадова, сына Махирова, сонма Манассиина, сынов Иосифовых, и сия имена их: Маала и Нуа, и Егла и Мелха и Ферса, 2 и ставшя пред Моисеом и пред Елеазаром жерцем, и пред князи и пред всем сонмом у дверий скинии свидения, глаголаша: 3 отец наш умре в пустыни, и сей не бе среде сонма воставшаго на Господа в сонме Кореове, яко греха ради своего умре, и сынове не быша ему: 4 да не погибнет имя отца нашего от среды сонма своего, яко несть сына ему: дадите нам наследие посреде братии отца нашего. 5 И принесе Моисей суд их пред Господа. 6 И рече Господь к Моисею, глаголя: 7 право глаголаша дщери Салпаадовы: даяние да даси им одержание наследия посреде братий отца их, и да приложиши им жребий отца их: 8 и сыном Израилевым да речеши, глаголя: человек аще умрет, и не будет сына ему, дадите наследие его дщери его: 9 аще же дщери не будет ему, дадите наследие его брату его: 10 аще же не будут ему братия, дадите наследие брату отца его: 11 аще же не будут братия отца его, дадите наследие ужику ближнему его от племене его наследити яже его: и да будет сие сыном Израилевым оправдание суда, якоже заповеда Господь Моисею. 12 И рече Господь к Моисею: взыди на гору, яже об ону страну Иордана, сия гора Навав, и виждь землю Ханааню, юже Аз даю сыном Израилевым во одержание: 13 и узриши ю, и приложишися к людем своим и ты, якоже приложися Аарон брат твой на горе Ор: 14 понеже преступисте слово Мое в пустыни Син, внегда супротивитися сонму освятити Мя, не освятисте Мене у воды пред ними: сия есть вода Пререкания в Кадисе в пустыни Син. 15 И рече Моисей ко Господу: 16 да изберет Господь Бог духов и всякия плоти человека над сонмом сим, 17 иже изыдет пред лицем их, иже внидет пред лицем их, и иже изведет их и иже введет их, и да не будет сонм Господень, яко овцы не имущя пастыря. 18 И рече Господь к Моисею, глаголя: поими к себе Иисуса сына Навина, человека, иже имать Духа в себе: и да возложиши руце твои на него: 19 и поставиши его пред Елеазаром жерцем, и заповеждь ему пред всем сонмом, и заповеждь о нем пред ними: 20 и даси на него от славы твоея, яко да послушают его вси сынове Израилевы: 21 и пред Елеазаром жерцем да станет, и да вопросят от него суда явленных пред Господем: по словеси его да исходят, и по словеси его да входят сам и сынове Израилевы вкупе, и весь сонм. 22 И сотвори Моисей, якоже повеле ему Господь Бог: и взем Иисуса постави его пред Елеазаром жерцем и пред всем сонмом: 23 и возложи руце свои на него, и устрои его, якоже повеле Господь Моисею. === 28 === 1 И рече Господь к Моисею, глаголя: 2 заповеждь сыном Израилевым, и речеши к ним, глаголя: дары Моя, даяния Моя, приносы Моя, в воню благовония соблюдите приносити Мне на праздники Моя. 3 И да речеши к ним: сия приношения, яже принесете Господу, агнцев единолетных непорочных два на день во всесожжение выну: 4 агнца единаго сотворите рано, и агнца втораго сотворите в вечер: 5 и да сотвориши десятую часть ефи (меры) муки пшеничны на жертву, вмешану в елеи четвертую часть (меры) ина: 6 всесожжение непрестанное, якоже бысть в горе Синайстей, в воню благовония Господу. 7 И возлияние его четвертую часть (меры) ина агнцу единому: во святем да возлиеши возлияние сикеру Господу: 8 и агнца втораго сотвориши к вечеру: по жертве его и по возлиянию его да сотвориши, в воню благовония Господу. 9 И в день суббот приведете два агнца единолетна непорочна и две десятины муки пшеничны вмешаны в елеи на жертву и возлияние, 10 всесожжения субботы в субботах, на всесожжение всегдашнее и возлияние его. 11 И в новомесячиих да принесете во всесожжение Господу телца два от говяд и овна единаго, агнцев единолетных седмь непорочных: 12 три десятины муки пшеничны вмешаны в елеи телцу единому, и две десятины муки пшеничны вмешаны в елеи овну единому, 13 по десятине муки пшеничны вмешаны в елеи агнцу единому: жертву в воню благовония принос Господу. 14 Возлияние их от вина пол (меры) ина да будет телцу единому: и третия часть (меры) ина да будет овну единому: и четвертая часть (меры) ина да будет агнцу единому: сие всесожжение от месяца до месяца в месяцы лета. 15 И козла единаго от коз греха ради Господу на всесожжение присное сотворите и возлияние его. 16 И в месяце первем в четвертыйнадесять день месяца Пасха Господу: 17 и в пятыйнадесять день месяца сего праздник: седмь дний опресноки да ясте. 18 И день первый нарочит свят да будет вам: всякаго дела служебна да не сотворите. 19 И принесете всесожжения принос Господу, телца от волов два, овна единаго, агнцев единолетных седмь: непорочни будут вам. 20 И жертва их мука пшенична вмешана в елеи: три десятины телцу единому и две десятины овну единому да сотворите: 21 по десятине сотвориши агнцу единому, седми агнцем: 22 и козла единаго от коз греха ради, во еже умолити о вас. 23 Кроме всесожжения всегдашняго утренняго, еже есть всесожжение всегдашнее, сотворите сия. 24 По сему сотворите на (всяк) день, в седмь дний, дар, принос в воню благовония Господу: на всесожжение всегдашнее сотвориши возлияние его. 25 И день седмый нарочит свят да будет вам: всякаго дела служебнаго да не сотворите в онь. 26 И день новых (плодов), егда принесете Господеви жертву нову седмиц, нарочит свят будет вам: всякаго дела служебна да не сотворите. 27 И да принесете всесожжения в воню благовония Господу, телца от волов два, овна единаго, агнцев единолетных седмь непорочных. 28 Жертва их мука пшенична вмешана в елеи: три десятины телцу единому и две десятины овну единому: 29 по десятине агнцу единому, седми агнцем: 30 и козла единаго от коз греха ради, во еже умолити о вас. 31 Кроме всесожжения всегдашняго, и жертву их сотворите Мне, непорочни да будут вам, и возлияния их. === 29 === 1 И в месяц седмый, первый (день) месяца нарочит свят да будет вам: всякаго дела служебна да не сотворите: день знамения будет вам. 2 И сотворите всесожжения в воню благовония Господу, телца от волов единаго, овна единаго, агнцев единолетных седмь непорочных: 3 жертва их мука пшенична вмешана в елеи: три десятины телцу единому и две десятины овну единому: 4 по десятине агнцу единому, седми агнцем: 5 и козла от коз единаго греха ради, во еже умолити о вас: 6 кроме всесожжений новомесячия и жертвы их, и возлияния их, и всесожжение всегдашнее: и жертвы их и возлияния их, по уставу их, в воню благовония Господу. 7 И десятый день месяца сего нарочит свят да будет вам: и озлобите душы вашя, и всякаго дела служебна да не сотворите, 8 и принесете всесожжение в воню благовония Господу, приносы Господу: телца единаго от говяд, овна единаго, агнцев единолетных седмь: непорочны да будут вам: 9 жертва их мука пшенична вмешана в елеи: три десятины телцу единому и две десятины овну единому: 10 по десятине агнцу единому, на седмь агнцев: 11 и козла единаго от коз греха ради, во еже умолити о вас: кроме еже греха ради очищения, и всесожжение всегдашнее: жертва его и возлияние его, по уставу его в воню благовония принос Господу. 12 И пятыйнадесять день седмаго месяца сего нарочит свят да будет вам: всякаго дела служебна да не сотворите, и празднуйте той праздник Господеви седмь дний, 13 и принесите всесожжения принос в воню благовония Господу: в первый день телцев от говяд тринадесять, овна два, агнцев единолетных четыренадесять: непорочны да будут вам: 14 жертвы их мука пшенична вмешана в елеи: три десятины телцу единому, тремнадесяти телцем, и две десятины овну единому, на два овна: 15 по десятине агнцу единому, на четыренадесять агнцев: 16 и козла единаго от коз греха ради: кроме всесожжения всегдашняго, жертвы их и возлияния их. 17 И в день вторый телцев дванадесять, овна два, агнцев единолетных четыренадесять непорочных: 18 жертва их и возлияния их телцем и овном и агнцем по числу их, по уставу их: 19 и козла единаго от коз греха ради: кроме всесожжения всегдашняго, жертвы их и возлияния их. 20 В день третий телцев единнадесять, овна два, агнцев единолетных четыренадесять непорочных: 21 жертва их и возлияния их телцем и овном и агнцем по числу их, по уставу их: 22 и козла от коз единаго греха ради: кроме всесожжения всегдашняго, жертвы их и возлияния их. 23 В день четвертый телцев десять, овна два, агнцев единолетных четыренадесять непорочных: 24 жертвы их и возлияния их телцем и овном и агнцем по числу их, по уставу их: 25 и козла от коз единаго греха ради: кроме всесожжения всегдашняго, жертвы их и возлияния их. 26 В день пятый телцев девять, овна два, агнцев единолетных четыренадесять непорочных: 27 жертвы их и возлияния их телцем и овном и агнцем но числу их, по уставу их: 28 и козла от коз единаго греха ради: кроме всесожжения всегдашняго, жертвы их и возлияния их. 29 В день шестый телцев осмь, овна два, агнцев единолетных четыренадесять непорочных: 30 жертвы их и возлияния их телцем и овном и агнцем по числу их, по уставу их: 31 и козла от коз единаго греха ради: кроме всесожжения всегдашняго, жертвы их и возлияния их. 32 В день седмый телцев седмь, овна два, агнцев единолетных четыренадесять непорочных: 33 жертвы их и возлияния их телцем и овном и агнцем по числу их, по уставу их: 34 и козла от коз единаго греха ради: кроме всесожжения всегдашняго, жертвы их и возлияния их. 35 И в день осмый исход будет вам: всякаго дела служебна да не сотворите в онь, 36 и да принесете всесожжения в воню благовония Господу, телца единаго, овна единаго, агнцев единолетных седмь непорочных: 37 жертвы их и возлияния их телцу и овну и агнцем по числу их, по уставу их: 38 и козла от коз единаго греха ради: кроме всесожжения всегдашняго, жертвы их и возлияния их. 39 Сия сотворите Господу в праздники вашя, кроме обетов ваших, и вольная ваша, и всесожжения ваша, и жертвы вашя, и возлияния ваша, и спасителная ваша. === 30 === 1 И глагола Моисей сыном Израилевым по всем, елика заповеда Господь Моисею: 2 и глагола Моисей князем племен сынов Израилевых, глаголя: сие слово, еже повеле Господь. 3 Человек человек, иже аще обещает обет Господу, или закленется клятвою, или определит пределом о души своей, не осквернавит словесе своего: вся, елика изыдут из уст его, да сотворит. 4 Аще же обещает жена обет Господу, или определит определение в дому отца своего в юности своей, 5 и услышит отец ея обеты ея и определения ея, яже определи на душу свою, и премолчит отец ея, и да состоятся вся обеты ея, и вся определения, яже определи на душу свою, да пребудут ей. 6 Аще же возбранением возбранит отец ея, в оньже день услышит вся обеты ея и определения, яже определи на душу свою, не состоятся: и Господь очистит ю, яко возбрани отец ея. 7 Аще же посягла за мужа, и обеты ея на ней, по определении уст ея, елика определи на душу свою, 8 и услышит муж ея, и премолчит ей, в оньже день услышит, и тако состоятся вся обеты ея, и определения ея, яже определи на душу свою, да состоятся. 9 Аще же возбранением возбранит муж ея, в оньже день услышит вся обеты ея и определения ея, яже определи на душу свою, да не пребудут, яко муж возбрани ей: и Господь очистит ю. 10 И обет вдовицы и пущеницы, елика аще обещают на душу свою, да пребудут им. 11 Аще же в дому мужа ея обет ея или определение, еже на душу ея с клятвою, 12 и услышит муж ея, и премолчит ей, и не возбранит ей, и состоятся вся обеты ея, и вся определения ея, яже определи на душу свою да состоятся на ню. 13 Аще же отлучая отлучит муж ея, в оньже день услышит, вся елика изыдоша из уст ея по обетом ея и по определением ея яже на душу ея, не пребудут ей: муж бо ея отлучил есть, и Господь очистит ю. 14 Всяк обет и всяка клятва соуза во еже озлобити душу, муж ея поставит ей, и муж ея отимет. 15 Аще же молча премолчит ей день от дне, и поставит ей вся обеты ея, и определения яже на ней, поставит ей, яко умолча ей в день, в оньже услыша. 16 Аще же отлучая отлучит муж ея по дни, в оньже услыша, и приимет грех свой. 17 Сия оправдания, елика заповеда Господь Моисею, между мужем и между женою его, и между отцем и дщерию в юности ея, в дому отчи. === 31 === 1 И рече Господь к Моисею, глаголя: 2 отмсти месть сынов Израилевых от Мадианитов, и последи приложишися к людем своим. 3 И рече Моисей к людем, глаголя: вооружите от вас мужы и ополчитеся пред Господем на Мадиама, отдати отмщение от Господа Мадиаму: 4 тысящу от племене и тысящу от племене, от всех племен сынов Израилевых, послите ополчитися. 5 И сочтоша от тысящ Израилевых, по тысящи от племене, дванадесять тысящ вооруженых на брань. 6 И посла я Моисей тысящу от племене и тысящу от племене с силою их, и Финееса сына Елеазарова сына Аарона жерца: и сосуды святыя, и трубы знаменныя в руках их. 7 И ополчишася на Мадиама, якоже повеле Господь Моисею, и избиша весь мужеск пол: 8 и царей Мадиамских убиша вкупе с язвеными их, и Евина и Рокома, и Сура и Ура и ровока, пять царей Мадиамлих: и Валаама сына Веорова убиша мечем с язвеными их: 9 и плениша жен Мадиамлих и имения их, и скоты их и вся притяжания их, и силу их плениша: 10 и вся грады их, яже во обитаниих их, и веси их пожгоша огнем, 11 и взяша весь плен их и вся корысти их, от человека до скота: 12 и приведоша к Моисею и ко Елеазару жерцу и ко всем сыном Израилевым плен и корысти и имение в полк, во аравоф Моавль, иже есть у Иордана при Иерихоне. 13 И изыде Моисей и Елеазар жрец и вси князи сонма в сретение им вне полка. 14 И разгневася Моисей на надзирателей силы, тысященачалников и стоначалников идущих от ополчения брани. 15 И рече им Моисей: вскую жив остависте весь женск пол? 16 Тыя бо быша сыном Израилевым, по словеси Валаамлю, еже отступити и презрети слово Господне Фогора ради, и бысть язва в сонме Господни: 17 и ныне избийте всяк мужеск пол во всяком возрасте, и всяку жену, яже позна ложе мужеско, избийте: 18 и всяк возраст женск, яже не познаша ложа мужеска, живых оставите я: 19 и вы станите вне полка седмь дний: всяк убивый душу и прикоснувыйся убиеному да очистится в третий день и в день седмый, вы и плен ваш: 20 и всяку одежду, и всяк сосуд кожан, и всяко соделаное от козличины, и всяк сосуд древян очистите. 21 И рече Елеазар жрец к мужем силы приходящым от ополчения ратнаго: сие оправдание закона, еже заповеда Господь Моисею: 22 кроме сребра и злата, и меди и железа, и касситера и олова, 23 всяка вещь, яже пройдет сквозе огнь, и (огнем) очистится, но и водою очищения очистится: и вся, елика аще не пройдут сквозе огнь, да пройдут сквозе воду: 24 и исперите ризы вашя в день седмый, и очиститеся: и по сих внидете в полк. 25 И рече Господь к Моисею, глаголя: 26 возмите сочисление корыстей плена от человека до скота, ты и Елеазар жрец и князи отечеств сонма, 27 и разделите корысти между воины ходившими на брань и между всем сонмом, 28 и отлучите дань Господу от людий военных ходивших на брань, едину душу от пяти сот, от человек и от скотов, и от волов и от овец и от ослят, 29 и от половины их да возмете, и даси Елеазару жерцу начатки Господни: 30 и от половины сынов Израилевых да возмеши едино от пятидесяти человек, и от волов и от овец, и от ослят и от всех скотов, и даси я левитом, иже стрегут стражбы в скинии Господни. 31 И сотвори Моисей и Елеазар жрец, якоже повеле Господь Моисею. 32 И бысть множество плена, егоже плениша мужи воинстии, от овец шесть сот седмьдесят пять тысящ, 33 и волов седмьдесят две тысящы, 34 и ослов шестьдесят едина тысяща, 35 и душ человеческих от женска полу, яже не познаша ложа мужеска, всех душ тридесять две тысящы: 36 и бысть половина часть ходивших на брань, от числа овец триста тридесять седмь тысящ и пять сот: 37 и бысть дань Господу от овец шесть сот седмьдесят пять: 38 и волов тридесять шесть тысящ, и дань Господу седмьдесят и два: 39 и ослов тридесять тысящ пять сот, и дань Господу шестьдесят един: 40 и душ человеческих шестьнадесять тысящ, и дань от сих Господу тридесять две души. 41 И даде Моисей дань Господу, участие Божие Елеазару жерцу, якоже повеле Господь Моисею. 42 От половины сынов Израилевых, ихже раздели Моисей от мужей военных: 43 и бысть половина от сонма, от овец триста и тридесять седмь тысящ и пять сот: 44 и волов тридесять шесть тысящ: 45 ослов тридесять тысящ и пять сот: 46 и человечих душ шестьнадесять тысящ: 47 и взя Моисей от половины сынов Израилевых, едино от пятидесяти, от человек и от скотов, и даде я левитом стрегущым стражбы скинии Господни, якоже повеле Господь Моисею. 48 И приидоша к Моисею вси поставленнии над тысящами силы, тысященачалники и стоначалники, 49 и рекоша к Моисею: отроцы твои взяша сочтение от мужей воинских, иже суть у нас, и никтоже погибе от них: 50 и принесохом дар Господу, муж еже обрете, сосуд злат и обручие, и гривну и перстень, и усерязи и чепь златую, умолити о нас пред Господем. 51 И взя Моисей и Елеазар жрец злато от них, всяк сосуд соделан. 52 И бысть всего злата участие, еже отлучися Господу, шестьнадесять тысящ и седмь сот и пятьдесят сикль от тысященачалников и от стоначалников. 53 И мужи воинстии плениша кийждо себе. 54 И взяша Моисей и Елеазар жрец злато от тысященачалников и от стоначалников и внесоша е в скинию свидения, в память сынов Израилевых пред Господем. === 32 === 1 И скота множество бяше сыном Рувимлим и сыном Гадовым, много зело. И видеша страну Иазирову и страну Галаадову, и бяше место, место скотно. 2 И пришедше сынове Рувимли и сынове Гадовы рекоша к Моисею и ко Елеазару жерцу и ко князем сонма, глаголюще: 3 Атароф и Девон, и Иазир и Намра, и Есевон и Елеали, и Севама и Навав и Веан, 4 земля, юже предаде Господь пред сыны Израилевыми, земля скотопитателна есть, рабом же твоим скот есть. 5 И реша: аще обретохом благодать пред тобою, да дастся нам земля сия рабом твоим во одержание, и не преводи нас чрез Иордан. 6 И рече Моисей сыном Гадовым и сыном Рувимлим: братия вашя пойдут на брань, и вы ли сядете ту? 7 И вскую развращаете сердце сынов Израилевых, не прейти на землю, юже дает Господь им? 8 Не тако ли сотвориша отцы ваши, егда послах я от Кадис-Варни соглядати землю? 9 И взыдоша до дебри Грезновныя, и соглядаша землю, и отвратиша сердце сынов Израилевых, яко да не внидут в землю, юже даде им Господь? 10 И разгневася яростию Господь в день Он и клятся, глаголя: 11 аще узрят человецы сии изшедшии из Египта, от двадесяти лет и вышше, ведущии добро и зло, землю, еюже кляхся Аврааму и Исааку и Иакову: не последоваша бо вслед Мене, 12 точию Халев сын Иефонниин Отлученный и Иисус сын Навин, яко последоваша вслед Господа. 13 И разгневася яростию Господь на Израиля, и томи я в пустыни четыредесять лет, дондеже потребися весь род творящий злая пред Господем. 14 Се, востасте вместо отец ваших, сокрушение человек грешников, приложити еще к ярости гнева Господня на Израиля: 15 яко отвратитеся от Него, приложити еще оставити его в пустыни, и возбеззаконнуете на весь сонм сей. 16 И приидоша к нему и глаголаша: ограды овцам да соградим зде скотом своим, и грады имением нашым: 17 и мы вооружени пойдем на стражбу первии сыном Израилевым, дондеже введем я в место их: и да вселятся имения наша во градех утвержденых ради живущих на земли: 18 не возвратимся в домы нашя, дондеже разделятся сынове Израилтестии, кийждо в наследие свое: 19 и ктому не наследим в них об ону страну Иордана и далее, яко прияхом жребия нашя сию страну Иордана на востоки. 20 И рече к ним Моисей: аще сотворите по словеси сему, аще вооружитеся пред Господем на брань, 21 и прейдет всяк оружник ваш Иордан пред Господем на брань, дондеже потребится враг Его от лица Его, 22 и обладана будет земля пред Господем, и посем возвратитеся, и будете безвинни пред Господем и от Израиля: и будет земля сия вам во одержание пред Господем: 23 аще же не сотворите тако, согрешите пред Господем, и увесте грех ваш, егда вас постигнут злая: 24 и соградите вы себе грады имению вашему и ограды скотом вашым: и исходящее из уст ваших сотворите. 25 И рекоша сынове Рувимли и сынове Гадовы к Моисею, глаголюще: раби твои сотворят, якоже Господь наш повелел есть: 26 имение наше, и жены наши, и весь скот наш да будут во градех Галаадовых: 27 раби же твои прейдут вси вооружени и уготовани пред Господем на брань, якоже глаголет Господь. 28 И пристави им Моисей Елеазара жерца и Иисуса сына Навина, и князи отечеств племен сынов Израилевых. 29 И рече к ним Моисей: аще прейдут сынове Рувимли и сынове Гадовы с вами чрез Иордан, всяк вооружен на брань пред Господем, и обладаете землею пред собою, и дадите им землю Галаадову во одержание. 30 Аще ли не прейдут вооружени с вами на брань пред Господем, то предпослите имение их и жены их и скоты их прежде вас на землю Ханааню, и да наследят купно с вами в земли Ханаани. 31 И отвещаша сынове Рувимли и сынове Гадовы, глаголюще: елика глаголет Господь рабом Своим, тако сотворим мы: 32 прейдем вооружени пред Господем в землю Ханааню, и дадите нам во одержание страну сию Иордана. 33 И даде им Моисей сыном Гадовым и сыном Рувимлим и полуплемени Манассиину сынов Иосифовых царство Сиона царя Аморрейска и царство Ога царя Васанска, землю и грады с пределы ея, грады окрестныя земли. 34 И соградиша сынове Гадовы Девон и Атароф и Ароир, 35 и Софан и Иазир, и вознесоша их, 36 и Намрам и Вефаран грады тверды, и ограды овцам. 37 И сынове Рувимли соградиша Есевон и Елеали и Кариафаим, 38 и Навон и Веельмеон ограждены, и Севама: и прозваша по именом своим имена градом, яже соградиша. 39 И иде ур сын Махиров, внук Манассиев, в Галаад, и взя его, и погуби Аморреа живущаго в нем: 40 и даде Моисей Галаад Махиру сыну Манассиину, и вселися ту. 41 И Иаир сын Манассиев иде и взя села их, и прозваша я села Иаирова. 42 И Навав иде и взя Каафа и села его, и именова я Навоф от имене своего. === 33 === 1 И сии станове сынов Израилевых, егда изыдоша из земли Египетския с силою своею рукою Моисеовою и Ааронею. 2 И написа Моисей воздвижения их и станы их, по словеси Господню. И сии станове шествия их: 3 воздвигошася от Рамессы в месяц первый, в пятыйнадесять день перваго месяца: наутрие Пасхи изыдоша сынове Израилтестии рукою высокою пред всеми Египтяны: 4 и Египтяне погребаху умершыя от них вся, яже изби Господь всякаго первенца в земли Египетстей: и в бозех их сотвори отмщение Господь. 5 И воздвигшеся сынове Израилевы от Рамессы, ополчишася в Сокхофе: 6 и воздвигшеся от Сокхофа, ополчишася в Вуфане, иже есть часть некая пустыни: 7 и воздвигошася от Вуфана, и ополчишася во устии Ирофа, иже есть прямо Веельсепфону, и ополчишася прямо Магдолу: 8 и воздвигошася прямо Ирофу, и проидоша среди моря в пустыню: и идоша путем три дни в пустыни тии, и ополчишася в Горькостех. 9 И воздвигошася от Горькостей и приидоша в Елим: и в Елиме (быша) дванадесять источники вод, и седмьдесят стеблий фиников, и ополчишася у воды тамо. 10 И воздвигошася от Елима и ополчишася у моря Чермнаго: 11 и воздвигошася от моря Чермнаго и ополчишася в пустыни Син: 12 и воздвигошася от пустыни Син и ополчишася в Рафаке: 13 и воздвигошася от Рафака и ополчишася в Елусе: 14 и воздвигошася от Елуса и ополчишася в Рафидине: и не бысть тамо воды людем пити. 15 И воздвигошася от Рафидина и ополчишася в пустыни Сина: 16 и воздвигошася от пустыни Сина и ополчишася во гробех Похотения: 17 и воздвигошася от Гробов Похотения и ополчишася во Асирофе: 18 и воздвигошася от Асирофа и ополчишася в Рафаме: 19 и воздвигошася от Рафама и ополчишася в Ремнон-Фаресе: 20 и воздвигошася от Ремнон-Фареса и ополчишася в Лемвоне: 21 и воздвигошася от Лемвона и ополчишася в Рессане: 22 и воздвигошася от Рессана и ополчишася в Макеллафе: 23 и воздвигошася от Макеллафа и ополчишася во Арсафафе: 24 и воздвигошася от Арсафафа горы и ополчишася в Харадафе: 25 и воздвигошася от Харадафа и ополчишася в Макидофе: 26 и воздвигошася от Макидофа и ополчишася в Катаафе: 27 и воздвигошася от Катаафа и ополчишася во Фарафе: 28 и воздвигошася от Фарафа и ополчишася в Мафекке: 29 и воздвигошася от Мафекка и ополчишася во Аселмоне: 30 и воздвигошася от Аселмона и ополчишася в Масуруфе: 31 и воздвигошася от Масуруфа и ополчишася в Ванаккане: 32 и воздвигошася от Ванаккана и ополчишася в горе Гаддад: 33 и воздвигошася от горы Гаддад и ополчишася во Етевафе: 34 и воздвигошася от Етевафа и ополчишася во Евроне: 35 и воздвигошася от Еврона и ополчишася в Гесион-Гавере: 36 и воздвигошася от Гесион-Гавера и ополчишася в пустыни Син: и воздвигошася от пустыни Син и ополчишася в пустыни Фарани, яже есть Кадис: 37 и воздвигошася от Кадиса и ополчишася в горе Ор близ земли Едомли. 38 И взыде Аарон жрец на гору Ор повелением Господним, и умре тамо в четыредесятое лето изшествия сынов Израилевых из земли Египетския, месяца пятаго в первый день месяца. 39 И Аарон бяше ста двадесяти трех лет, егда умре в горе Ор. 40 И услыша Хананей царь Арадский, и сей живяше в земли Ханаани, егда вхождаху сынове Израилевы. 41 И воздвигошася от горы Ор и ополчишася в Селмоне: 42 и воздвигошася от Селмона и ополчишася в Финоне: 43 и воздвигошася от Финона и ополчишася во Овофе: 44 и воздвигошася от Овофа и ополчишася в Гаи, об ону страну предел Моавлих: 45 и воздвигошася от Гаи и ополчишася в Девон-Гаде: 46 и воздвигошася от Девон-Гада и ополчишася в Гелмон-Девлафаиме: 47 и воздвигошася от Гелмон-Девлафаима и ополчишася в горах Аваримлих прямо Нававу: 48 и воздвигошася от гор Аваримлих и ополчишася на западе Моавли, у Иордана при Иерихоне: 49 и воздвигошася от запада Моавля и ополчишася у Иордана, между Есимофом, до Велсаттима на запады Моава. 50 И рече Господь к Моисею в западе Моава у Иордана при Иерихоне, глаголя: 51 глаголи сыном Израилевым и речеши к ним: вы преходите Иордан в землю Ханааню, 52 и погубите вся живущыя на земли от лица вашего, и разрушите стражбы их, и вся идолы излиянныя их сокрушите я, и вся капища их разрушите, 53 и погубите вся живущыя на земли, и вселитеся в ню: вам бо дах землю их по жребию: 54 и наследите землю их жребием по племенам вашым: многим умножите одержание их, и малым умалите одержание их: в неже изыдет имя его, тамо да будет жребий его: по племенам отечествий ваших наследите: 55 аще же не погубите живущих на земли от лица вашего, будут, ихже оставите от них, остны во очесех ваших и стрелы в ребрах ваших, и совраждуют вам на земли, на нейже вы вселитеся: 56 и будет якоже умыслих сотворити онем, то сотворю вам. === 34 === 1 И рече Господь к Моисею, глаголя: 2 заповеждь сыном Израилевым, и речеши к ним: вы входите в землю Ханааню, сия будет вам в наследие, земля Ханааня с пределы ея: 3 и будет вам страна, яже к ливе от пустыни Син даже до Едома: и будут вам пределе к ливе, от края моря Сланаго от востоков, 4 и обыдут вас пределы от ливы до возшествия Акравиня, и пройдут Еннак, и будет исход его к ливе Кадис-Варни, и изыдет на село Арад, и пройдет Аселмона: 5 и обыдут пределы от Аселмона водотечу Египетскую, и будет исход море (великое): 6 и пределы морстии будут вам, море великое определит, сие будет вам пределы морстии: 7 и сие будет вам предел к северу: от моря великаго измерите сами себе при горе Гору: 8 и от горы Гору измерите сами себе, входяще во Емаф, и будут преход его пределы Садада: 9 и изыдут пределы Зефрона, и будет исход его Арсенаин: сие будет вам пределы от севера: 10 и измерите сами себе пределы восточныя от Арсенаина до Сепфамара: 11 и снидут пределы от Сепфамар-Вила от восток на источники, и снидут пределы Вилы, и пройдут на хребет моря Хенереф, от восток: 12 и снидут пределы на Иордан, и будет преход его море Сланое: сия будет земля вам, и пределы ея окрест. 13 И заповеда Моисей сыном Израилевым, глаголя: сия земля, юже приимете в наследие по жребию, якоже повеле Господь, дати ю девяти племеном и полуплемени Манассиину: 14 яко взя племя сынов Рувимлих и племя сынов Гадовых, по домом отечеств их, и пол племене Манассиина восприяша жребия своя: 15 два племена и пол племене прияша жребия своя за Иорданом при Иерихоне от полудня на востоки. 16 И рече Господь к Моисею, глаголя: 17 сия имена мужей, иже разделят вам землю: Елеазар жрец и Иисус Навин: 18 и по князю единому от племене возмете разделити вам землю. 19 И сия имена мужем: племене Иудина Халев сын Иефонниин, 20 племене Симеоня Саламиил сын Семиудов, 21 племене Вениаминя Елдад сын Хаслонь, 22 племене Данова князь Воккор сын Иеклинин, 23 сынов Иосифовых племене сынов Манассииных князь Аниил сын Суфидов, 24 племене сынов Ефремлих князь Камуил сын Сафтанов, 25 племене Завулоня князь Елисафан сын Харнахов, 26 племене сынов Иссахаровых князь Фалтиил сын Озаин, 27 племене сынов Асировых князь Ахиор сын Селемиин,, 28 племене Неффалимля князь Фадаил сын Амиудов. 29 Сим заповеда Господь разделити сыном Израилевым в земли Ханаани. === 35 === 1 И рече Господь к Моисею на западе Моавли у Иордана при Иерихоне, глаголя: 2 заповеждь сыном Израилевым, да дадят левитом от жребий одержания своего грады вселитися, и предградия градская окрест их да дадят левитом: 3 и будут им грады вселятися, и участия их да будут скотом их и всем четвероножным их: 4 и прилежащая градом, ихже дадите левитом, от стены града и вне, две тысящы лакот окрест: 5 и да измериши страну вне града, яже на восток, две тысящы лакот, и страну, яже к ливе, две тысящы лакот, и страну, яже к морю, две тысящы лакот, и страну, яже к северу, две тысящы лакот, и град посреде сего будет вам, и пределы градов: 6 и грады яже дадите левитом, шесть градов (да будут) убежных, ихже дадите убегати в ня убившему, и к сим четыредесять и два града: 7 всех градов дадите левитом четыредесять и осмь градов, сия и предградия их: 8 и грады, ихже дадите от одержания сынов Израилевых, от многих многа, а от малых мала: кийждо по наследию своему, еже наследят, да дадят от градов левитом. 9 И рече Господь к Моисею, глаголя: 10 глаголи сыном Израилевым и речеши к ним: вы преходите Иордан в землю Ханааню: 11 и разделите сами себе грады убежища да будут вам убегати в ня убийце, всяк убивый душу нехотяй: 12 и будут гради вам убежища от ужика крове, и да не умрет убивый, дондеже станет пред сонмом на суде: 13 и грады, яже дадите, шесть градов, убежища да будут вам. 14 Три грады дадите об ону страну Иордана, и три грады дадите в земли Ханаани: 15 убежище да будет сыном Израилевым, и пришелцу, и обиталнику иже в вас, да будут гради сии во убежище убегати тамо всякому убившему душу нехотением. 16 Аще же орудием железным убиет его, и умрет, убийца есть: смертию да умрет убийца. 17 Аще же камением из руки убиет его, и умрет от него, убийца есть: смертию да умрет убийца. 18 Аще же орудием древяным из руки, от негоже умрет, убиет его, и умрет, убийца есть: смертию да умрет убийца. 19 Ужик крове, сей да убиет убившаго: егда усрящет его, сей да убиет его. 20 Аще же вражды ради ринет его и вержет на него всяк сосуд по навету, и умрет, 21 или от ненависти поразил его рукою, и умрет, смертию да умрет убивый, убийца есть: смертию да умрет убиваяй: ужик крове да убиет убийцу, егда сретится с ним. 22 Аще же внезапу не вражды ради ринет его, или вержет на него всяк сосуд не по навету, 23 или всяким каменем, имже вержет не ведый, и падет на него, и умрет, он же враг его не бе, ниже ищяй зла ему творити, 24 и да судит сонм между убившим и между ужиком крове, по судбам сим, 25 и избавит сонм убившаго от ужика крове, и да возвратит его сонм во град убежища его, в оньже убежа, и да поживет тамо, дондеже умрет жрец великий, егоже помазаша елеем святым. 26 Аще же исходом изыдет убивый вне предел града, в оньже убежа тамо, 27 и обрящет его ужик крове вне предел града убежища его, и убиет ужик крове убившаго, несть повинен: 28 во граде бо убежания да живет, дондеже умрет жрец великий, и по умертвии жерца великаго да возвратится убивый в землю одержания своего. 29 И да будут сия вам во оправдание суда в роды вашя во всех селениих ваших. 30 Всякаго убившаго душу, пред свидетелми да убиеши убившаго: и свидетель един да не свидетелствует на смерть души. 31 И да не возмете искупа за душу от убившаго, повинна суща убиению: смертию бо умрет: 32 ниже да возмете искупа убежания во град убежища, да паки живет на земли, дондеже умрет жрец великий. 33 И да не убиете земли, на нейже вы обитаете: кровь бо сия убивает землю, и не очистится земля от крове пролиянныя на ней, но токмо кровию проливающаго: 34 и да не оскверните земли, на нейже живете, на нейже Аз вселяюся посреде вас: Аз бо есмь Господь вселяяйся посреде сынов Израилевых. === 36 === 1 И приидоша князи племене сынов Галаадовых, сына Махирова сына Манассиина от племене сынов Иосифовых, и глаголаша пред Моисеом и пред Елеазаром жерцем и пред князи домов отечеств сынов Израилевых, 2 и рекоша: господину нашему повеле Господь отдати землю наследия по жребию сыном Израилевым: и господину нашему заповеда Господь дати наследие Салпаада брата нашего дщерем его: 3 и будут единому от племен сынов Израилевых в жены, и отлучится жребий их от одержания отец наших, и приложится к наследию племене, имже будут в жены, и от жребия наследия нашего отлучится: 4 аще же будет оставление сынов Израилевых, и приложится наследие их к наследию племене, имже аще будут в жены, и от наследия племене отечества нашего отимется наследие их. 5 И заповеда Моисей сыном Израилевым по повелению Господню, глаголя: сице племя сынов Иосифовых глаголют: 6 сие слово, еже заповеда Господь дщерем Салпаадовым, глаголя: идеже угодно им, да будут в жены, токмо от сонма отечества своего да будут в жены, 7 и не превратится наследие сынов Израилевых от племене в племя ино: яко кийждо в наследии племене отечества своего женитися имут сынове Израилевы: 8 и всяка дщи, ужичествующая наследие от племен сынов Израилевых, единому сущих от сонма отца ея да будет жена: да ужичествуют сынове Израилевы кийждо наследие отца своего: 9 и не превратится жребий от племене в племя ино, но кийждо в наследии своем да женятся сынове Израилевы. 10 Якоже повеле Господь Моисею, тако сотвориша дщери Салпаадовы. 11 И быша Маала и Ферса, и Егла и Мелха и Нуа, дщери Салпаадовы, сыном братии своея, от сонма Манассиина сынов Иосифовых, быша в жены: 12 и бысть наследие их в племени сонма отца их. 13 Сия заповеди и оправдания и суды, яже заповеда Господь рукою Моисеовою на западе Моавли при Иордане прямо Иерихону. == Второзаконие == === 1 === 1 Сия словеса, яже глагола Моисей всему Израилю об ону страну Иордана, в пустыни на запады, близ Чермнаго моря, между Фараном и Тофолом, и Ловоном и Авлоном и златыми рудами: 2 единонадесяти дний от Хорива путь чрез гору Сиир даже до Кадис-Варни. 3 И бысть в четыредесятое лето, в первыйнадесять месяц, в первый день месяца глагола Моисей ко всем сыном Израилевым, по всему елико заповеда ему Господь к ним, 4 по убиении Сиона царя Аморрейска, жившаго во Есевоне, и Ога царя Васанска, жившаго во Астарофе и во Едраине, 5 об ону страну Иордана в земли Моавли, нача Моисей изясняти закон сей, глаголя: 6 Господь Бог наш глагола нам в Хориве, глаголя: да довлеет вам жити в горе сей: 7 обратитеся и воздвигнитеся вы, и внидите в гору Аморрейску, и ко всем населником Аравы, в гору и поле, и к югу и в приморскую землю Ханааню, и во Антиливан, даже до реки великия, реки Евфрата: 8 видите, предах пред вами землю, вшедше наследите землю, еюже клятся Господь отцем вашым, Аврааму и Исааку и Иакову, дати ю им и семени их по них. 9 И рекох к вам во время оно глаголя: не возмогу един водити вас: 10 Господь Бог ваш умножил вы есть, и се, есте днесь яко звезды небесныя множеством: 11 Господь Бог отец ваших да приложит вам, яко да будете тысящами сугубо, и да благословит вас, яко же глагола вам: 12 како возмогу един носити труды вашя и тяжести вашя и пререкания ваша? 13 Изберите себе мужы мудры и уметелны и смысленны в племенех ваших, и поставлю их над вами старейшины вам. 14 И отвещасте ми и рекосте: добро слово, еже глаголал еси сотворити. 15 И взях от вас мужы мудры и уметелны и смысленны, и поставих их владети над вами тысященачалники и стоначалники, и пятьдесятоначалники и десятоначалники, и писмовводители судиям вашым. 16 И заповедах судиям вашым во время оно, глаголя: разслушайте посреде братий ваших, и судите праведно посреде мужа и посреде брата его и посреде пришелца его: 17 да не познаете лица в суде, малому и великому судиши, и не устыдишися лица человеча, яко суд Божий есть: и речь, яже аще жестока будет у вас, донесете ю ко мне, и услышу ю. 18 И заповедах вам во время оно вся словеса, яже сотворите. 19 И воздвигшеся от Хорива, проидохом всю пустыню великую и страшную ону, юже видесте, путь горы Аморрейски, якоже заповеда нам Господь Бог наш: и приидохом до Кадис-Варни. 20 И рекох вам: приидосте до горы Аморрейски, юже Господь Бог наш дает вам: 21 видите, предаде Господь Бог ваш пред лицем вашим землю: вшедше наследите, якоже глагола Господь Бог отец ваших вам: небойтеся, ни ужасайтеся. 22 И приидосте ко мне вси и рекосте: да послем мужы пред нами, и да соглядают нам землю, и да поведят нам ответ, путь, имже дойдем ея, и грады, в няже внидем. 23 И угодно бысть слово предо мною, и поях от вас дванадесять мужей, мужа единаго от коегождо племене. 24 И обратившеся взыдоша на гору, и приидоша до дебри Грезновныя, и соглядаша ю: 25 и взяша в руце свои от плода земли и принесоша к нам, и глаголаху: блага земля, юже Господь Бог наш дает нам. 26 И не восхотесте взыти, но преслушасте глаголгол Господа Бога вашего: 27 и возроптасте в кущах своих и рекосте: ненависти ради изведе ны Господь из земли Египетския предати нас в руки Аморрейския, потребити нас: 28 камо мы взыдем? Братия же вашя отвратиша сердца ваша, глаголюще: язык велик и мног и крепчае нас, и грады велицы и ограждени даже до небесе, но и сыны Исполинов видехом тамо. 29 И глаголах к вам: не ужасайтеся, ниже убойтеся от них: 30 Господь Бог ваш предходяй пред лицем вашим, Той повоюет их с вами, по всему елико сотвори вам в земли Египетстей пред очима вашима, 31 и в пустыни сей, юже видесте: яко воспита тебе Господь Бог твой, якоже некий человек питает сына своего, по всему пути в оньже ходисте, дондеже приидосте на место сие. 32 И в словеси сем не веровасте Господеви Богу вашему, 33 иже предходит пред вами в путь избрати вам место, путеводя вас огнем нощию, показуя вам путь, имже ити по нем, и облаком во дни. 34 И услыша Господь (Бог) глас словес ваших, и разгневався клятся, глаголя: 35 аще узрит кто от мужей сих землю благую сию, еюже Аз кляхся отцем их, 36 разве Халев сын Иефонниин, сей узрит ю, и сему дам землю, на нюже взыде, и сыном его, понеже прилежит Господеви. 37 И на мя разгневася Господь вас ради, глаголя: ниже ты внидеши тамо: 38 Иисус сын Навин, иже стоит пред тобою, сей внидет тамо: сего укрепи, яко сей даст ю в наследие Израилю: 39 и отрочата ваша, о нихже глаголасте, яко в пленении имут быти, и всяко отроча младо, еже не весть днесь добра или зла, сии внидут тамо, и сим дам ю, и сии наследят ю: 40 и вы обратившеся ополчистеся в пустыню, путем к Чермному морю. 41 И отвещасте и рекосте мне: согрешихом пред Господем Богом нашим: мы шедше повоюем, по всему елико заповеда Господь Бог наш нам. И вземше кийждо орудия ратная своя и собравшеся взыдосте на гору. 42 И рече Господь ко мне: рцы им: не восходите, ниже ратуйте, несмь бо с вами, и да не будете сотрени пред враги вашими. 43 И глаголах к вам, и не послушасте мене: и преступисте слово Господне, и понудившеся взыдосте на гору. 44 И изыде Аморрей живущий на горе той противу вам, и прогна вас, аки бы пчелы творили, и уязвляху вас от Сиира даже до Ермы. 45 (И возвратистеся,) и седше плакасте пред Господем, и не послуша Господь гласа вашего, ниже внят вам: 46 и седесте в Кадисе дни многи, елики дни тогда седесте. === 2 === 1 И возвратившеся воздвигохомся в пустыню, путем моря Чермнаго, якоже глагола Господь ко мне: и обходихом гору Сиир дни многи. 2 И рече Господь ко мне: 3 довлеет вам обхождати гору сию: возвратитеся убо к северу: 4 и людем заповеждь, глаголя: вы пройдите сквозе пределы братии вашея, сынов Исавовых, живущих в Сиире, и убоятся вас и ужаснутся зело: 5 не сотворите с ними рати: не дах бо вам от земли их ниже стопы ноги, яко во жребий дах сыном Исавовым гору Сиир: 6 сребром пищу купите себе у них и ядите, и воду в меру возмите от них на цене и пийте: 7 ибо Господь Бог твой благослови тебе во всяком деле руку твоею: разумей, како прошел еси пустыню великую и страшную сию: се, четыредесять лет Господь Бог твой с тобою, и не востребовал еси словесе. 8 И минухом братию свою сыны Исавли, живущыя в Сиире, у пути Аравскаго от Елона и от Гесион-Гавера, и возвратившеся преидохом путь в пустыню Моавлю. 9 И рече Господь ко мне: не совраждуйтеся Моавитом и не сотворите с ними рати: не дах бо вам от земли их во жребий, сыном бо Лотовым дах Ароир наследити. 10 Оммины прежде седяху на ней, народ велик и мног и крепок якоже Енакими: 11 Рафаины глаголются и сии, якоже и Енакими: и Моавити прозывают я Оммины. 12 И в Сиире седяше Хорреи прежде, но сынове Исавовы потребиша я и искорениша я от лица своего: и вселишася вместо их, имже образом сотвори Израиль земли наследия своего, юже даде Господь им. 13 Ныне убо вы востаните и воздвигнитеся, и пройдите дебрь Заретову. 14 И дни, в няже отидохом от Кадис-Варни дондеже преидохом дебрь Заретову, тридесять и осмь лет, дондеже паде весь род мужей воинских от полка, якоже клятся им Господь Бог. 15 И рука Божия бяше на них, погубити я от полка, дондеже падоша. 16 И бысть внегда падоша вси мужи воинстии умирающе от среды людий, 17 и рече Господь ко мне, глаголя: 18 ты прейдеши днесь пределы Моавлими Ароир: 19 и пришедше близ сынов Амманих, не совраждуйтеся им и не сотворите с ними рати: не дам бо тебе от земли сынов Амманих во жребий, яко сыном Лотовым дах ю во жребий. 20 Земля Рафаинска возименуются: Рафаини бо на ней прежде живяху: Амманитяне же прозывают их Зоммин: 21 язык велик и мног и крепок, якоже и Енакими: и погуби я Господь от лица их, и прияша наследие и вселишася вместо их даже до сего дне: 22 якоже сотвориша сыном Исавовым живущым в Сиире, имже образом потребиша Хорреа от лица своего и наследиша их, и вселишася вместо их даже до сего дне: 23 и Евее живущии во Асирофе даже до Газы, и Каппадоки изшедшии из Каппадокии потребиша я, и вселишася вместо их. 24 Ныне убо востаните и воздвигнитеся, и прейдите вы дебрь Арноню: се, предах в руце твои Сиона царя Есевоня Аморрейска и землю его: начни наследовати, сотвори с ним рать днешний день: 25 начинай даяти трепет твой и страх твой пред лицем всех языков сущих под небесем, иже слышавше имя твое возмятутся, и болезнь приимут от лица твоего. 26 И послах послы от пустыни Кедамоф к Сиону царю Есевоню словесы мирными, глаголя: 27 да пройду сквозе землю твою: по пути пройду, не совращуся ни на десно, ни на лево: 28 пищу на цене даси ми, и ям: и воду на цене даси ми, и пию: точию ногама моима да прейду: 29 якоже сотвориша ми сынове Исавли живущии в Сиире и Моавити живущии во Ароире, дондеже прейду Иордан на землю, юже Господь Бог наш дает нам. 30 И не восхоте Сион цар Есевонь, да пройдем сквозе его, яко ожесточи Господь Бог наш дух его и укрепи сердце его, да предастся в руце твои якоже во днешний день. 31 И рече Господь ко мне: се, начах предаяти пред лицем твоим Сиона царе Есевоня Аморрейска и землю его, и начинай наследити землю его. 32 И изыде Сион царь Есевонь противу нам сам и вси людие его на брань во Иассу: 33 и предаде его Господь Бог наш пред лицем нашим в руце наши: и убихом его, и сыны его и вся люди его: 34 и одержихом вся грады его во оно время, и разорихом всяк град, ктому и жены их и дети их не оставихом живы: 35 токмо скот пленихом себе, и корысти градов взяхом. 36 Из Ароира, иже есть при устии водотечи Ариони, и град иже есть в дебри, и даже до горы Галаадовы, не бысть град уцелевый от нас: вся предаде Господь Бог наш в руце наши: 37 токмо в земли сынов Амманих не приступахом ко всем прилежащым к водотечи Иавокове и ко градом иже в горах, якоже повеле нам Господь Бог наш. === 3 === 1 И обратившеся взыдохом путем иже к Васану: и изыде Ог царь Васанский противу нам, сам и вси людие его с ним на брань во Едраим. 2 И рече Господь ко мне: не убойся его, яко в руце твои предах его, и вся люди его, и всю землю его: и сотвориши ему, якоже сотворил еси Сиону царю Аморрейску, иже живяше во Есевоне. 3 И предаде его Господь Бог наш в руце наши, и Ога царя Васанска, и вся люди его: и избихом его, дондеже не остася от него семя: 4 и одержахом вся грады его во время оно, не бысть града, егоже не взяхом от них: шестьдесят градов, вся пределы Аргова царя Ога в Васане, 5 вся грады тверды, стены высоки, врата и вереи, кроме градов ферезейских многих зело: 6 потребихом их, якоже сотворихом Сиону царю Есевоню, и потребихом вся грады, вкупе и жены их и чада: 7 и вся скоты, и корысти градныя пленихом себе, 8 и взяхом в то время землю от рук двух царей Аморрейских, иже быша об оны пол Иордана, от водотечи Арнони, даже и до горы Аермона. 9 Финикиане прозывают Аермон Саниором, Аморрей же прозва его Саниром. 10 Вси грады мисоровы, и весь Галаад, и весь Васан даже до Елхи и Едраима, грады царствия Огова в Васане: 11 яко точию Ог царь Васанский остася от Рафаинов: се, одр его одр железен, се, той есть в Краеградии сынов Аммановых: девять лакот долгота его и четыри лакти широта его лактем мужеским. 12 И землю ту наследихом во оно время от Ароира, иже есть у устия водотечи Ариони, и пол горы Галаадовы: и грады его дах Рувиму и Гаду: 13 и оставшее Галаадово, и все Васанское царство Огово дах полуплемени Манассиину, и весь предел Аргова, весь Васан оный, земля Рафаиня вменится. 14 И Иаир сын Манассиин взя вся пределы Аргова, даже до предел Гаргасинских и Махафинских: прозва я по имени своему Васан Авоф Иаир, даже до сего дне: 15 и Махиру дах Галаад, 16 и Рувиму и Гадови дах от Галаада даже до водотечи Арнони, среди водотечи предел, и даже до Иавока: водотеча предел сынов Амманих: 17 и арава и Иордан предел от Махенерефа и даже до моря Аравскаго, моря Сланаго, под асидофом Фазги от востока. 18 И повелех вам во время оно, глаголя: Господь Бог ваш даде вам землю сию во жребий: вооружени поидите пред лицем братии вашея сынов Израилевых, всяк сильный: 19 точию жены вашя и дети вашя и скоти вашя, вем, яко скот мног есть вам, да пребудут во градех ваших, яже дах вам: 20 дондеже упокоит Господь Бог наш братию вашу, якоже и вас, и наследят и сии землю, юже Господь Бог ваш дает им об ону страну Иордана: и возвратитеся кийждо в наследие свое иже дах вам. 21 И Иисусу заповедах во время оно, глаголя: очи ваши видеша вся, елика сотвори Господь Бог наш обоим царем сим, тако сотворит Господь Бог наш всем царством, ихже сквозе ты пройдеши тамо: 22 не убойтеся от них, яко Господь Бог наш Сам поборет по вас. 23 И молихся Господви во оно время, глаголя: 24 Господи Боже, Ты начал еси показовати Твоему рабу крепость Твою и силу Твою, и руку крепкую и мышцу высокую: кто бо есть бог на небеси или на земли, иже сотворит, якоже сотворил еси Ты, и по крепости Твоей? 25 Прешед убо увижду землю благую сию, яже об ону страну Иордана, гору сию благу и Антиливан. 26 И презре мя Господь вас ради, и не послуша мене, и рече Господь ко Мне: довлеет ти, не приложи к сему глаголати словесе сего: 27 взыди на верх горы Изсеченыя и воззри очима твоима к морю и северу, и югу и на востоки, и виждь очима твоима, яко не прейдеши Иордана сего: 28 и заповеждь Иисусу, и укрепи его, и утеши его: яко сей прейдет пред лицем людий сих, и сей разделит им в наследие всю землю, юже еси видел. 29 И пребыхом во юдоли близ дому Фогорова. === 4 === 1 И ныне, Израилю, послушай оправданий и судов, елика аз учу вас днесь делати, да поживете и умножитеся, и вшедше наследите землю, юже Господь Бог отец ваших дает вам в наследие: 2 да не приложите к словеси, еже аз заповедаю вам, ниже да отимете от него: сохраните заповеди Господа Бога нашего, елика аз заповедаю вам днесь. 3 Очи ваши видеша вся, елика сотвори Господь Бог наш Веельфегору: яко всяк человек иже иде вслед Веельфегора, потреби его Господь Бог наш от вас: 4 вы же, прилежащии Господеви Богу вашему, живете вси до днесь: 5 видите, показах вам оправдания и суды, якоже заповеда мне Господь Бог мой сотворити сице на земли, в нюже вы идете тамо, наследити ю: 6 и сохраните, и сотворите, яко сия премудрость ваша и смышление пред всеми языки, елицы аще услышат вся оправдания сия и рекут: се, людие премудрии и уметелны: язык великий сей. 7 Кий бо язык тако велий, емуже есть бог, приближаяйся ему, яко Господь Бог наш во всех, в нихже аще призовем Его? 8 И кий язык велик, емуже суть оправдания и суды правы по всему закону сему, егоже аз даю пред вами днесь? 9 Вонми себе и снабди душу твою зело, и не забуди всех словес, яже видеста очи твои, и да не отступят от сердца твоего вся дни живота твоего: и да наставиши сыны твоя и сыны сынов твоих, 10 в день в оньже стоясте пред Господем Богом вашим в Хориве в день собрания, егда рече Господь ко мне: собери ко Мне люди, и да слышат словеса Моя, да научатся боятися Мене вся дни, в няже сии живут на земли, и сыны своя да научат. 11 И приидосте, и стасте под горою: и гора горяше огнем даже до небесе, тма, мрак, и вихр. 12 И глагола Господь к вам на горе из среды огня: глас словес Его вы слышасте, и образа не видесте, токмо глас: 13 и возвести вам завет Свой, егоже заповеда вам творити, десять словес, и написа я на двоих скрижалех каменных: 14 и мне заповеда Господь во время оно, научити вас оправданием и судам, творити вам я на земли, в нюже вы входите тамо наследити ю. 15 И снабдите душы своя зело, яко не видесте всякаго подобия в день, в оньже глагола Господь к вам в горе Хориве из среды огня: 16 не беззаконнуйте, и не сотворите себе самим подобия ваянна, всякаго образа подобия мужеска пола или женска: 17 и подобия всякаго скота, иже есть на земли, подобия всякия птицы пернатыя, под небесем парящия: 18 подобия всякаго гада, иже плежет по земли: подобия всякия рыбы, елики суть в водах под землею: 19 да не когда воззрев на небо и видев солнце и луну и звезды, и всю красоту небесную, прельстився поклонишися им и послужиши им, яже раздели Господь Бог твой всем языком, иже под небесем. 20 Вас же взя Господь Бог и изведе вас от пещи железны из Египта, да будете Ему людие в жребий, якоже в днешний день. 21 И Господь Бог разгневася на мя о словесех ваших, и клятся, да не прейду Иордана сего и да не вниду в землю, юже Господь Бог твой дает тебе в наследие: 22 аз бо умру в сей земли, и не прейду Иордана сего, вы же прейдете и наследите землю благую сию. 23 Вонмите вы, да не когда забудете завета Господа Бога вашего, егоже завеща к вам, и да не сотворите сами себе изваянна подобия всех, яже заповеда тебе Господь Бог твой, 24 яко Господь Бог твой огнь потребляяй есть, Бог ревнитель. 25 Аще же родиши сыны и сыны сынов твоих, и умедлите на земли, и возбеззаконнуете, и сотворите изваянно подобие всякаго, и сотворите злое пред Господем Богом, вашим, еже раздражити Его, 26 засвидетелствую вам днесь небесем и землею, яко пагубою погибнете от земли, на нюже вы преходите чрез Иордан тамо наследити ю: не пребудете много дний на ней, но потреблением потребитеся: 27 и разсыплет вы Господь во всех языцех, и останетеся мали числом во языцех, в няже введет вы Господь тамо, 28 и послужите тамо богом иным, делом рук человеческих, древу и камению, иже не узрят и не услышат, ни ядят, ни обоняют: 29 и взыщете тамо Господа Бога вашего, и обрящете Его, егда взыщете Его от всего вашего сердца и от всея души вашея в скорби вашей. 30 И постигнут тя вся сия словеса в последняя дни, и обратишися к Господеви Богу твоему, и услышиши глас Его, 31 яко Бог щедр и милосерд Господь Бог твой, не оставит тебе, ниже потребит тебе, не забудет завета отец твоих, имже клятся им. 32 Вопросите дний первых, бывших прежде вас, от дне в оньже сотвори Бог человека на земли, и от края небесе даже до края небесе, аще бысть по словеси великому сему, аще слышано бысть сицево: 33 аще (кий) язык слыша глас Бога живаго глаголюща от среды огня, имже образом слышал еси ты, и жив был еси: 34 аще искуси бог вшед взяти себе язык от среды языка искушением, и знамении и чудесы, и бранию и рукою сильною, и мышцею высокою и видении великими, по всему елико сотвори Господь Бог наш во Египте пред тобою зрящим, 35 яко да разумееши ты, яко Господь Бог твой сей Бог есть, и несть разве Его. 36 От небесе слышан сотвори тебе глас Свой, еже научити тя, и на земли показа тебе огнь Свой великий, и глаголголы Его слышал еси из среды огня: 37 занеже возлюби отцы твоя, избра семя их по них вас, и изведе тя Сам силою Своею великою из Египта 38 потребити языки великия и крепчайшыя тебе пред лицем твоим, ввести тя, дати тебе землю их в наследие, якоже имаши днесь. 39 И увеси днесь, и обратишися умом, яко Господь Бог твой Сей Бог на небеси горе и на земли долу, и несть разве Его, 40 и да сохраниши заповеди Его и оправдания Его, елика аз заповедаю тебе днесь, да благо тебе будет и сыном твоим по тебе, яко да будете долголетни на земли, юже Господь Бог твой дает тебе вся дни. 41 Тогда отдели Моисей три грады об ону страну Иордана на восток солнца, 42 еже убегати тамо убийце, иже аще убиет ближняго не ведый, и сей не ненавидя его прежде вчера и третияго дне, и да вбегнет во един град от сих и жив будет: 43 Восор в пустыни в земли селней Рувиму, и Раммоф в Галааде Гадду, и Гавлон в Васане Манассии. 44 Сей закон, егоже предложи Моисей пред сыны Израилтескими: 45 сия свидения и оправдания и суды, елика глагола Моисей сыном Израилевым в пустыни, изшедшым им из земли Египетския, 46 об он пол Иордана, в дебри, близ дому Фогорова, в земли Сиона царя Аморрейска, иже живяше во Есевоне, егоже изби Моисей и сынове Израилевы, изшедшым им из земли Египетския. 47 И наследиша землю его и землю Ога царя Васанска, дву царей Аморрейских, иже бяху об он пол Иордана на восток солнца, 48 от Ароира, иже есть во устии водотечи Арнони и у горы Сиона, яже есть Аермон, 49 всю араву об ону страну Иордана, на восток солнца под асидофом Тесаным. === 5 === 1 И призва Моисей всего Израиля и рече к ним: слыши, Израилю, оправдания и суды, елика аз глаголю во ушы ваши во днешний день, и научитеся их, и сохраните творити я. 2 Господь Бог ваш завеща вам завет в Хориве: 3 не отцем вашым завеща Господь завет сей, но токмо вам: вы же зде вси живи днесь. 4 Лицем к лицу глагола Господь к вам на горе из среды огня, 5 и аз стоях между Господем и вами во время оно возвестити вам глаголголы Господня, яко убоястеся от лица огня и не взыдосте на гору, глаголя: 6 Аз есмь Господь Бог твой, изведый тя из земли Египетския, от дому работы: 7 да не будут тебе бози инии пред лицем Моим. 8 Да не сотвориши себе кумира, ни всякаго подобия, елика на небеси горе, и елика на земли низу, и елика в водах под землею, 9 да не поклонишися им, ниже послужиши им: яко Аз есмь Господь Бог твой, Бог ревнив, отдаяй грехи отцев на чада до третияго и четвертаго рода ненавидящым Мене, 10 и творяй милость в тысящах любящым Мене и хранящым повеления Моя. 11 Да не приимеши имене Господа Бога твоего всуе: не очистит бо Господь Бог твой приемлющаго имя Его всуе. 12 Снабди день субботный святити его, якоже заповеда тебе Господь Бог твой: 13 шесть дний делай, и да сотвориши вся дела твоя, 14 в день же седмый суббота Господу Богу твоему: да не сотвориши в онь всякаго дела, ты и сын твой и дщерь твоя, раб твой и раба твоя, вол твой и осел твой и всяк скот твой, и пришлец обитаяй у тебе, да почиет раб твой и раба твоя, и осел твой, якоже и ты: 15 и да помянеши, яко (и ты) раб был еси в земли Египетстей и изведе тя Господь Бог твой оттуду рукою крепкою и мышцею высокою: сего ради повеле тебе Господь Бог твой, еже хранити день субботный и святити его. 16 Чти отца твоего и матерь твою, якоже заповеда тебе Господь Бог твой, да благо ти будет и да долголетен будеши на земли, юже Господь Бог твой дает тебе. 17 Не убий. 18 Не прелюбодействуй. 19 Не укради. 20 Не послушествуй на ближняго твоего свидетелства ложна. 21 Не пожелай жены ближняго твоего, не пожелай дому ближняго твоего, ни села его, ни раба его, ни рабыни его, ни вола его, ни осляте его, ни всякаго скота его, ниже всех, елика ближняго твоего суть. 22 Сия словеса глагола Господь ко всему сонму вашему на горе из среды огня: тма, мрак, буря, глас велик, и не приложи: и написа я на двоих скрижалех каменных, и даде мне. 23 И бысть яко услышасте глас из среды огня, и гора горяше огнем, и приидосте ко мне вси началницы племен ваших и старейшины ваши, 24 и ресте: се, показа нам Господь Бог наш славу Свою, и глас Его слышахом из среды огня: во днешний день видехом, яко возглаголет Бог человеку, и жив будет: 25 и ныне да не измрем, яко потребит нас огнь великий сей, аще приложим мы слышати глас Господа Бога нашего ктому, и умрем: 26 кая бо плоть, яже слыша глас Бога жива, глаголюща из среды огня, якоже мы, и жива будет? 27 Приступи ты, и послушай вся, елика к тебе речет Господь Бог наш, и ты речеши к нам вся, елика речет Господь Бог наш к тебе, и услышим, и сотворим. 28 И услыша Господь глас словес ваших, глаголющым вам ко мне, и рече Господь ко мне: слышах глас словес людий сих, елика глаголаша к тебе: право вся, елика глаголаша: 29 кто даст еже быти тако сердцу их в них, яко боятися Мене и хранити заповеди Моя во вся дни, да благо будет им и сыном их во веки? 30 Гряди, рцы им: возвратитеся в в домы своя: 31 ты же зде стани со Мною, и возглаголю к тебе вся заповеди и оправдания и суды, еликим научиши их: и да сотворят сице в земли, юже Аз даю им в жребий: 32 и сохраните творити, якоже заповеда тебе Господь Бог твой: не совратитеся ни на десно, ни на лево, 33 по всему пути, егоже заповеда тебе Господь Бог твой ходити в нем, да тя упокоит, и благо тебе будет: и многи дни будете на земли, юже наследите. === 6 === 1 И сия заповеди и оправдания и суды, елика заповеда Господь Бог ваш научити вас творити тако на земли, в нюже вы входите тамо, наследити ю: 2 да боитеся Господа Бога вашего, хранити вся оправдания Его и заповеди Его, яже аз заповедаю тебе днесь, ты и сынове твои, и сыны сынов твоих, во вся дни живота твоего, да многи дни пребудете. 3 И послушай, Израилю, и снабди творити, да благо ти будет, и да умножитеся зело, якоже глагола Господь Бог отец ваших, дати тебе землю кипящую млеком и медом. И сия оправдания и суды, елика заповеда Господь (Бог) сыном Израилевым в пустыни, изшедшым им из земли Египетския. 4 Слыши, Израилю: Господь Бог наш Господь един есть. 5 И возлюбиши Господа Бога твоего от всего сердца твоего и от всея души твоея и от всея силы твоея. 6 И да будут словеса сия, яже Аз заповедаю тебе днесь, в сердцы твоем и в души твоей, 7 и да накажеши ими сыны твоя, и да возглаголеши о них седяй в дому и идый путем, и лежа и востая: 8 и навяжеши я в знамение на руку твою, и да будут непоколеблема пред очима твоима: 9 и да напишете я на празех храмине ваших и врат ваших. 10 И будет егда введет тя Господь Бог твой в землю, еюже клятся отцем твоим, Аврааму и Исааку и Иакову, дати тебе грады велики и добры, ихже не создал еси, 11 домы полны всяких благ, ихже не наполнил еси, потоки ископаны, ихже не ископал еси, винограды и маслины, ихже не насадил еси: и ядый и насытився, 12 вонми себе, да не разширится сердце твое, да не забудеши Господа Бога твоего, изведшаго тебе из земли Египетския, от дому работы. 13 Господа Бога твоего да убоишися, и тому единому послужиши, и к Нему прилепишися, и именем Его кленешися. 14 Да не ходите вслед богов иных, богов языческих, иже окрест вас: 15 яко Бог ревнив Господь Бог твой посреде тебе: да не разгневався яростию Господь Бог твой на тя, потребит тя от лица земли. 16 Да не искусиши Господа Бога твоего, якоже искушасте во Искушении. 17 Храня да сохраниши заповеди Господа Бога твоего, свидения Его и оправдания Его, елика заповеда тебе: 18 и да сотвориши угодное и благое пред Господем Богом твоим, да благо будет тебе, и внидеши и наследиши землю благую, еюже клятся Господь отцем вашым, 19 отгнати вся враги твоя от лица твоего, якоже глагола Господь. 20 И будет егда вопросит тя сын твой утре, глаголя: что суть свидения и оправдания и суды, елика заповеда Господь Бог наш нам? 21 И речеши сыну твоему: раби бехом фараону в земли Египетстей, и изведе нас Господь Бог оттуду рукою крепкою и мышцею высокою: 22 и даде Господь (Бог) знамения и чудеса велика и зла во Египте на фараона и на дом его и на силу его пред нами, 23 и нас изведе Господь Бог наш оттуду, да введет нас дати нам землю сию, еюже клятся Господь Бог наш отцем нашым, дати ю нам: 24 и заповеда нам Господь творити вся оправдания сия, боятися Господа Бога нашего, да благо будет нам во вся дни, да живем, якоже и днесь, 25 и милосердие будет нам, аще сохраним творити вся заповеди закона сего пред Господем Богом нашим, якоже заповеда нам. === 7 === 1 И будет егда введет тя Господь Бог твой в землю, в нюже входиши тамо наследити ю, и изженет языки великия и многия от лица твоего, Хеттеа и Гергесеа, и Аморреа и Хананеа, и Ферезеа и Евеа и Иевусеа, седмь языков великих и многих, и крепчае вас: 2 и предаст их Господь Бог твой в руце твои, и избиеши я, пагубою погубиши я, да не завещаеши к ним завета, ниже да помилуеши их, 3 ниже сватовства сотвориши с ними: дщери своея не даси сыну его, и дщере его да не поймеши сыну твоему: 4 отвратит бо сына твоего от Мене, и послужит богом инем: и разгневается Господь гневом на вы, и потребит тя вскоре. 5 Но сице да сотворите им: требища их разсыплете, и столпы их да сокрушите, и дубравы их да посечете, и ваяния богов их да сожжете огнем: 6 яко люди святи есте Господеви Богу вашему: и вас избра Господь Бог ваш, да будете Ему люди избранни паче всех языков, елицы на лицы земли. 7 Не яко мнози есте паче всех язык, предприя вас Господь и избра вас Господь, вы бо есте меншии от всех языков: 8 но яко возлюби Господь вас, и храня клятву, еюже клятся отцем вашым, изведе Господь вас рукою крепкою и мышцею высокою, и избави тя от дому работы, от руки фараона царя Египетска, 9 и да увеси, яко Господь Бог твой Сей Бог: Бог верный, храняй завет Свой и милость любящым Его и хранящым заповеди Его в тысящы родов: 10 и воздаяй ненавидящым Его в лице потребити я, и не умедлит ненавидящым, в лице воздаст им. 11 И да сохраниши заповеди и оправдания и суды сия, елика аз заповедаю тебе творити днесь. 12 И будет егда послушаете вся оправдания сия, и сохраните и сотворите я, сохранит и Господь Бог твой тебе завет и милость, якоже клятся отцем вашым, 13 и возлюбит тя, и благословит тя и умножит тя, и благословит плод чрева твоего и плод земли твоея, пшеницу твою и вино твое и елей твой, и стада волов твоих и паствы овец твоих на земли, юже клятся Господь отцем твоим дати тебе: 14 и благословен будеши паче всех язык и не будет в вас безчадный, ниже неплоды, и в скотех твоих: 15 и отимет Господь Бог твой от тебе всяко разслабление и всяку язю Египетскую злую, яже видел еси и елика веси: не возложит на тя, но возложит я на вся ненавидящыя тебе: 16 и ясти будеши вся корысти языков, яже Господь Бог твой дает тебе: да не пощадит их око твое, и да не послужиши богом их, яко претыкание тебе есть сие. 17 Аще же речеши во уме твоем: яко язык сей множае паче мене, како возмогу аз потребити я? 18 Не убоишися их: памятию да помянеши, елика сотвори Господь Бог твой фараону и всем Египтяном, 19 искушения великая, яже видеста очи твои, знамения она и чудеса великая, руку крепкую и мышцу высокую, якоже изведе тя Господь Бог твой: тако сотворит Господь Бог ваш всем языком, ихже ты боишися от лица их: 20 и шершни послет Господь Бог твой на них, дондеже потребятся оставшиися и сокрывшиися от тебе: 21 не повредишися от лица их: яко Господь Бог твой в тебе, Бог великий и крепкий: 22 и погубит Господь Бог твой языки сия от лица твоего, помалу малу: не возможеши погубити их вскоре, да не будет земля пуста, и умножатся зверие дивии на тя: 23 и предаст их Господь Бог твой в руце твои, и погубиши их погублением великим, дондеже искорените их: 24 и предаст цари их в руце твои, и погубите имя их от места онаго: ниже един постоит пред лицем твоим, дондеже погубиши их. 25 Ваяния богов их да сожжете огнем, да не похощеши злата и сребра взяти себе от них, да не когда согрешиши того ради, яко мерзость есть Господеви Богу твоему: 26 и да не внесеши мерзости в свой дом, и проклят будеши якоже сия: ненавидением да возненавидиши, и омерзением да омерзиши, яко проклятие есть. === 8 === 1 Вся заповеди, яже аз заповедаю вам днесь, снабдите творити, да живете, и умножитеся, и внидете, и наследите землю благую, еюже клятся Господь Бог отцем вашым. 2 И да помянеши весь путь, имже проведе тебе Господь Бог твой, сие четыредесятое лето в пустыни, да искусит тя и озлобит тя, и уразумеются яже в сердцы твоем, аще сохраниши заповеди Его или ни. 3 И озлоби тя, и гладом замори тя, и напита тя манною, еяже ты не уведел еси, ни отцы твои: да возвестит тебе, яко не от хлебе единем жив будет человек, но о всяком словеси исходящем из уст Божиих жив будет человек. 4 Ризы твоя не обетшаша на тебе: нозе твои не язвишася, се, четыредесять лет. 5 И уразумееши сердцем твоим, яко имже образом аще кий человек накажет сына своего, тако Господь Бог твой накажет тя. 6 И сохраниши заповеди Господа Бога твоего ходити в путех Его и боятися Его. 7 Господь бо Бог твой введет тя в землю благую и многу, идеже водотечи водныя и источники бездны исходящыя по полям и горам, 8 в землю пшеницы и ячменя, (идеже) виногради, смокви и щипцы, в землю масличия елеа и меда: 9 в землю на нейже не с нищетою снеси хлеб твой, и ничесого востребуеши на ней: в землю в нейже камение железно, и от гор ея ископаеши медь: 10 и ясти будеши, и насытишися, и благословиши Господа Бога твоего на земли блазей, юже даде тебе. 11 Вонми себе, не забуди Господа Бога твоего, еже не сохранити заповеди Его и судбы и оправдания Его, елика аз заповедаю тебе днесь: 12 да не когда ядый и насытився, и домы добры соградив и вселився в ня, 13 и волом твоим и овцам твоим умножившымся тебе, сребру и злату умножившымся тебе, и всем, елика тебе будут, умножившымся тебе, 14 вознесешися сердцем твоим, и забудеши Господа Бога твоего, изведшаго тя из земли Египетския, из дому работы: 15 проведшаго тя сквозе пустыню великую и страшную ону, в нейже змии угрызающыя, и скорпии, и жажда, в нейже не бяше воды: изведшаго тебе из камене несекома источник водный: 16 питавшаго тя манною в пустыни, еяже не ведел еси ты, ниже ведяху отцы твои, да озлобит тя и да искусит тя, и благо тебе сотворит на последок твой: 17 да не речеши в сердцы твоем: крепость моя и сила руки моея сотвори мне силу великую сию, 18 и помянеши Господа Бога твоего, яко Той даде тебе крепость, еже сотворити силу, и да уставит завет Свой, имже клятся отцем твоим, якоже днесь. 19 И будет аще забвением забудеши Господа Бога твоего, и пойдеши вслед богов иных, и послужиши им, и поклонишися им, засвидетелствую вам днесь небесем и землею, яко пагубою погибнете: 20 якоже и прочии языцы, яже Господь Бог погубляет от лица вашего, тако погибнете, занеже не послушасте гласа Господа Бога вашего. === 9 === 1 Слыши, Израилю, ты преходиши Иордан днесь, внити еже наследити языки великия и крепчайшы паче вас, грады велики и ограждены до небесе, 2 люди велики и многи и предолги, сыны Енаковы, яже ты веси, и ты слышал еси: кто противу станет сыном Енаковым? 3 И увеси днесь, яко Господь Бог твой Сей предидет пред лицем твоим: огнь попаляяй есть: Сей потребит я, и Сей отвратит я от лица твоего, и потребит я вскоре, якоже рече тебе Господь. 4 Не рцы в сердцы твоем, егда потребит Господь Бог твой языки сия пред лицем твоим, глаголя: правд ради моих введе мя Господь наследити землю благую сию: 5 не ради правды твоея, ниже преподобия ради сердца твоего ты входиши наследити землю их, но нечестия ради и беззакония языков сих Господь от лица твоего потребит я, и да уставит завет, имже клятся Господь отцем вашым, Аврааму и Исааку и Иакову: 6 и да увеси днесь, яко не ради правды твоея Господь Бог твой дает тебе землю благую сию наследити: яко людие жестоковыйнии есте. 7 Помни, не забуди, колико разгневасте Господа Бога своего в пустыни: от негоже дне изыдосте из земли Египетския, даже внидосте в место сие, не покаряющеся совершасте яже противу Господа: 8 и в Хориве разгневасте Господа, и разгневася Господь на вы, потребити вас, 9 восходящу мне на гору, взяти скрижали каменныя, скрижали завета, яже завеща Господь к вам: и пребых в горе четыредесять дний и четыредесять нощей: хлеба не ядох и воды не пих. 10 И даде ми Господь две скрижали каменны, написаны перстом Божиим, и на них бяху написана вся словеса, яже глагола Господь к вам в горе из среды огня в день собрания: 11 и бысть но четыредесяти днех и по четыредесяти нощех, даде ми Господь две скрижали каменны, скрижали завета, 12 и рече Господь ко мне: востани и сниди скоро отсюду, яко беззаконноваша людие твои, яже извел еси из земли Египетски: соступиша скоро с пути, егоже заповедал еси им, и сотвориша себе слияние. 13 И рече Господь ко мне: глаголах тебе единою и дважды, глаголя: видех люди сия, и се, людие жестоковыйнии суть: 14 остави Мя, да потреблю Я, и погублю имя их под небесем, и сотворю тя в язык велик и крепок и мног паче сих. 15 И возвратився снидох с горы, и гора горяше огнем: и две скрижали свидений во обою руку моею: 16 и видев, яко согрешисте пред Господем Богом вашим, и сотвористе себе телца слияна, и соступисте с пути скоро, егоже заповеда Господь вам творити, 17 и взем обе скрижали, повергох я из руку моею и сокруших их пред вами. 18 И молихся пред Господем второе, якоже и первое, четыредесять дний и четыредесять нощей, хлеба не ядох и воды не пих, всех ради грехов ваших, имиже согрешисте, творяще злое пред Господем Богом вашим, еже разгневати Его: 19 и боязнен бех гнева ради и ярости, яко разгневася Господь на вы, да потребит вас: и послуша мене Господь и в то время. 20 И на Аарона разгневася Господь зело, еже погубити его: и молихся и за Аарона во время оно. 21 И грех ваш, егоже сотвористе, телца, взях его и сожгох его на огни, и избих его и сотрох его зело, даже бысть дробен, и бысть яко прах, и изсыпах прах в водотечу сходящую с горы. 22 И в Запалении, и во Искушении, и во гробех Похотения разгневасте Господа Бога вашего. 23 И егда посла вас Господь от Кадис-Варни, глаголя: взыдите и наследите землю, юже Аз даю вам: и сопротивитися глаголголу Господа Бога вашего, и не веровасте Ему, и не послушасте гласа Его: 24 и не покаряющеся бысте Господу от дне, в оньже познася вам. 25 И молихся пред Господем четыредесять дний и четыредесять нощей, в няже молихся: рече бо Господь погубити вас. 26 И молихся Богу и рекох: Господи, Господи Царю богов, не погуби людий Твоих и наследия Твоего, еже избавил еси крепостию Твоею великою, яже извел еси из земли Египетския крепостию Твоею великою и рукою сильною и мышцею Твоею высокою: 27 помяни Авраама и Исаака и Иакова, рабы Твоя, имже клялся еси Собою: не призирай на жестокость людий сих, и на нечестие их и на грехи их: 28 да не когда рекут живущии на земли, отнюдуже извел еси нас, глаголюще: не могий Господь ввести их в землю, юже им обеща, и ненавидя их Господь, изведе погубити их в пустыни: 29 и сии людие Твои и жребий Твой, ихже извел еси из земли Египетския крепостию Твоею великою и мышцею Твоею высокою. === 10 === 1 Во оно время рече Господь ко мне: истеши себе две скрижали каменны якоже первыя, и взыди ко Мне на гору, и да сотвориши себе ковчег древян: 2 и напишу на скрижалех словеса, яже бяху на скрижалех первых, ихже сокрушил еси, и да вложиши я в ковчег. 3 И сотворих ковчег от древ негниюших, и истесах две скрижали каменны якоже и первыя, и взыдох на гору: и обе скрижали во юбою руку моею: 4 и написа на скрижалех по писанию первому десять словес, яже глагола Господь к вам на горе от среды огня, и даде я Господь мне. 5 И обратився снидох с горы, и вложих скрижали в ковчег, егоже сотворих: и беста ту, якоже повеле ми Господь. 6 И сынове Израилевы воздвигошася от Вирофа сынов Иакимлих в Мисадай: тамо умре Аарон, и погребен бысть ту, и бысть жрец Елеазар сын его вместо его. 7 Оттуду же воздвигошася в Гадгад, и от Гадгада до Етавафа, земли водотечи вод. 8 Во оно время отдели Господь племя Левиино носити ковчег завета Господня, предстояти пред Господем, служити и молитися и благословляти о имени Его до днешняго дне: 9 сего ради несть левитом части и жребия в братии их: Господь Сам жребий их, якоже рече им. 10 И аз стоях на горе четыредесять дний и четыредесять нощей, и послуша Господь мене и во время сие, и не восхоте Господь погубити вас. 11 И рече Господь ко мне: гряди, воздвигнися пред людьми сими, и да внидут и наследят землю, еюже кляхся отцем их, дати ю им. 12 И ныне, Израилю, что просит Господь Бог твой у тебе, точию еже боятися Господа Бога твоего и ходити во всех путех Его, и любити Его и служити Господу Богу твоему от всего сердца твоего и от всея души твоея, 13 хранити заповеди Господа Бога твоего и оправдания Его, елика аз заповедаю тебе днесь, да благо тебе будет? 14 Се, Господа Бога твоего небо и небо небесе, земля и вся елика суть на ней: 15 обаче отцы вашы произволи Господь любити их, и избра семя их по них, вас, паче всех язык, в день сей. 16 И обрежите жестокосердие ваше, и выи вашея не ожесточите ктому: 17 ибо Господь Бог ваш сей Бог богов и Господь господей, Бог великий и крепкий и страшный, иже не дивится лицу, ниже вземлет дара: 18 творяй суд пришелцу и сиру и вдовице, и любит пришелца дати ему хлеб и ризу. 19 И возлюбите пришелца: пришелцы бо бесте в земли Египетстей. 20 Господа Бога твоего да убоишися, и Тому (единому) послужиши, и к Нему прилепишися, и именем Его кленешися: 21 Той хвала твоя и Той Бог твой, иже сотвори тебе великая и славная сия, яже видесте очи твои: 22 в седмидесятих и пяти душах снидоша отцы твои во Египт: ныне же сотвори тя Господь Бог твой яко звезды небесныя множеством. === 11 === 1 И да возлюбиши Господа Бога твоего, и сохраниши стражбы Его и оправдания Его и заповеди Его и суды Его во вся дни. 2 И увесте днесь, яко не чада ваша, елицы не сведеша, ниже видеша наказания Господа Бога твоего и величества Его, и руки сильныя и мышцы высокия, 3 и знамений Его и чудес Его, елика сотвори посреде Египта фараону царю Египетску и всей земли его, 4 и елика сотвори силе Египетстей: колесницы их и кони их како потопи вода моря Чермнаго, пред лицем их, гонящым им вслед вас, и погуби их Господь Бог до днешняго дне: 5 и елика сотвори вам в пустыни, дондеже приидосте на место сие: 6 и елика сотвори Дафану и Авирону сыном Елиава сына Рувимля, яже отверзши земля уста своя пожре их, и домы их, и кущы их, и все их имение с ними, среди всего Израиля: 7 яко очи ваши видеста вся дела Господня великая, елика сотвори в вас днесь. 8 И сохраните вся заповеди Его, елики аз заповедаю вам днесь, да живете и умножитеся, и внидете и наследите землю, на нюже вы преходите чрез Иордан тамо наследити ю: 9 да многи дни будете на земли, еюже клятся Господь отцем вашым дати им и семени их по них землю кипящую млеком и медом. 10 Есть бо земля, на нюже вы идете тамо наследити ю, не яко земля Египетска есть, отнюдуже изыдосте, егда сеют семя и напаяют ю ногами своими, аки вертоград зелейный: 11 земля же, в нюже ты входиши тамо наследити ю, земля нагорная и равная, от дождя небеснаго напаяется водою: 12 земля, на нюже Господь Бог твой присещает всегда, очи Господа Бога твоего на ней от начала лета и до конца лета. 13 Аще же слухом послушаете всех заповедий Его, яже аз заповедаю тебе днесь, любити Господа Бога твоего и служити Ему от всего сердца твоего и от всея души твоея, 14 и даст дождь земли твоей во время ранный и поздный, и собереши жита твоя и вино твое и елей твой: 15 и даст пищу на селех скотом твоим. 16 И ядый и насытився, внемли себе, да не разширится сердце твое, и преступите, и послужите богом иным, и поклонитеся им: 17 и яростию разгневается Господь на вы и затворит небо, и не будет дождя, и земля не даст плода своего, и погибнете вскоре от земли благия, юже Господь даде вам. 18 И вложите словеса сия в сердца ваша и в душу вашу, и наважите я в знамение на руку вашу, и будут непоколебима между очима вашима, 19 и научите сим чада своя глаголати сия, седящу тебе в дому и идущу тебе в пути, и возлежащу ти и востающу ти: 20 и напишите я на празех домов ваших и врат ваших, 21 да умножатся дние ваши и дни сынов ваших на земли, еюже клятся Господь отцем вашым дати им, якоже дние неба на земли. 22 И будет аще слухом послушаете всех заповедий сих, яже аз заповедаю вам днесь творити, любити Господа Бога вашего и ходити во всех путех Его и прилепятися к Нему, 23 тогда изженет Господь вся языки сия от лица вашего, и одержите языки великия и крепкия паче вас. 24 Всякое место, на немже станет стопа ног ваших, вам будет: от пустыни и Антиливана, и от реки великия Евфрата, и даже до моря, еже на западе, будут пределы ваши: 25 никтоже противостанет пред лицем вашим: и трепет ваш и страх ваш возложит Господь Бог ваш на лице всея земли, на нюже аще взыдете, якоже глагола Господь к вам. 26 Се, Аз даю пред вами днесь благословение и клятву: 27 благословение, аще послушаете заповедий Господа Бога вашего, елики аз заповедаю вам днесь: 28 и клятву, аще не послушаете заповедий Господа Бога вашего, елики аз заповедаю вам днесь, и совратитеся с пути, егоже заповедах вам, идуще послужити богом иным, ихже не весте. 29 И будет егда введет тебе Господь Бог твой в землю, в нюже преходиши тамо наследити ю, да даси благословение на горе Гаризин и клятву на горе Гевал: 30 не се ли сия суть об ону страну Иордана, за путем иже на западе солнца, в земли Ханаана обитающаго на западе солнца близ Галгала у дуба Высокаго? 31 Вы бо преходите Иордан, вшедше наследити землю, юже Господь Бог ваш дает вам в жребий вся дни, и приимете ю, и вселитеся в ню: 32 и да сохраните творити вся заповеди Его и суды Его, яже аз даю пред вами днесь. === 12 === 1 И сия заповеди и суды, яже снабдите творити на земли, юже Господь Бог отец ваших дает вам в жребий во вся дни, в няже вы жити будете на земли: 2 пагубою погубите вся места, в нихже служиша тамо языцы богом своим, яже вы приимете, на горах высоких и холмех и под древом сеновным: 3 и да раскопаете требища их и сокрушите столпы их, и дубравы их ссечете, и ваяние богов их сожжете огнем, и погубите имя их от места того. 4 Да не сотворите тако Господу Богу вашему, 5 токмо на месте, идеже изберет Господь Бог ваш, во единем от племен ваших, нарещи имя Его тамо и призвати, и взыщете, и внидете тамо: 6 и принесете тамо всесожжения ваша, и жертвы вашя, и начатки ваши, и обеты ваши, и вольная ваша, и исповедания ваша, первенцы волов ваших и овец ваших, 7 и ясти будете тамо пред Господем Богом вашим и возвеселитеся о всех, на няже возложите руки вашя вы и домове ваши, якоже тя благословил есть Господь Бог твой. 8 Да не сотворите тамо всех, елика вы творите зде днесь, кийждо угодное пред собою: 9 не приидосте бо до ныне в покой и в наследие, еже Господь Бог ваш дает вам. 10 И егда прейдете Иордан и вселитеся на земли, юже Господь Бог ваш даст в наследие вам, и упокоит вас от всех враг ваших, иже окрест вас, и вселитеся со утверждением: 11 и будет место, иже изберет Господь Бог ваш призвати има Его тамо, ту принесете вся, елика аз заповедаю вам днесь: всесожжения ваша и жертвы вашя, и десятины вашя и начатки рук ваших, и всяк избран дар ваш, елика обещаете Господеви Богу вашему: 12 и возвеселитеся пред Господем Богом вашим вы и сынове ваши и дщери ваши, и рабы ваши и рабыни ваши, и левити, иже у врат ваших: яко несть им части ни жребия с вами. 13 Внемли себе, да не принесеши всесожжений твоих на всяком месте, еже аще узриши, 14 токмо на месте, еже изберет Господь Бог твой, в единем от племен твоих, тамо да принесеши всесожжения твоя и тамо сотвориши вся, елика аз заповедаю тебе днесь. 15 Но токмо всем желанием души твоея да пожреши, и снеси мяса по благословению Господа Бога твоего, еже даде тебе во всяком граде: нечистый при тебе и чистый вкупе да яст я, яко серну, или еленя. 16 Токмо крове да не снесте: на землю пролиете ю, аки воду. 17 Не возможеши ясти в градех твоих десятины пшеницы твоея и вина твоего и елеа твоего, первенцов волов твоих и овец твоих, и всех обетове, елики обещаете, и исповеданий ваших, и начатков рук ваших: 18 токмо пред Господем Богом твоим да снеси я на месте, еже изберет Господь Бог твой Себе, ты и сын твой и дщерь твоя, и раб твой и раба твоя, и левит, и пришлец иже во градех твоих, и возвеселишися пред Господем Богом твоим во всех, на няже возложиши руку твою. 19 Внемли себе, да не оставиши левитина во все время, дондеже еси жив на земли. 20 Аще же разширит Господь Бог твой пределы твоя, якоже глагола тебе, и речеши: снем мяса, аще вожделеет душа твоя, яко ясти мяса, во всем желании души твоея да снеси мяса. 21 Аще же далече отстоит место от тебе, иже изберет Господь Бог твой призывати имя Его тамо, и заколеши от волов твоих и от овец твоих, яже даст тебе Бог твой, якоже заповедах тебе, и снеси во градех твоих по желанию души твоея. 22 Якоже ястся серна и елень, тако да снеси е: нечистый при тебе, и чистый такожде да снест. 23 Вонми крепце, еже не ясти крове: кровь бо есть душа его: да на снестся душа с мясы: 24 да не снесте ея, на землю пролиете ю аки воду: 25 да не снеси ю, да благо тебе будет и сыном твоим по тебе во веки, аще сотвориши се, еже добро и угодно есть пред Господем Богом твоим. 26 Разве святая твоя, яже аще будут тебе, и обеты твоя взем да приидеши на место, еже изберет Господь Бог твой оное себе призвати имя Его тамо: 27 и сотвориши всесожжения твоя: мяса да вознесеши на олтарь Господа Бога твоего, кровь же жертв твоих да пролиеши пред степени олтаря Господа Бога твоего, мяса же да снеси. 28 Снабди и послушай, и да сотвориши вся словеса, яже Аз заповедаю тебе, да благо тебе будет и сыном твоим во веки, аще сотвориши добро и угодно пред Господем Богом твоим. 29 Аще же потребит Господь Бог твой языки, в няже входиши ты тамо, наследити землю их, от лица твоего, и приимеши ю в наследие, и вселишися в земли их: 30 внемли себе, да не взыщеши последовати им, по потреблении их от лица твоего, не взыщи богов их, глаголя: якоже творят языцы сии богом своим, сотворю и аз: 31 да не сотвориши Господу Богу твоему тако: мерзостна бо Господеви, яже возненавиде, сотвориша богом своим, яко сыны своя и дщери своя жгут огнем богом своим. 32 Всяко слово, еже аз заповедаю тебе днесь, сие снабди творити: да не приложиши к сему, ни отимеши от него. === 13 === 1 Аще же востанет в тебе пророк, или видяй соние, и даст тебе знамение или чудо, 2 и приидет знамение или чудо, еже рече к тебе, глаголя: идем да послужим богом иным, ихже не весте: 3 да не послушаете глагол пророка того, или видящаго сон той: яко искушает Господь Бог твой вас, иже уведети, аще любите Господа Бога вашего всем сердцем вашим и всею душею вашею: 4 вслед Господа Бога вашего ходите, и Того бойтеся, и заповеди Его сохраните, и гласа Его послушайте, и Тому служите, и к Нему прилепитеся: 5 и пророк той или видяй сон да умрет: глагола бо, иже прельстити тя от Господа Бога твоего изведшаго тя из земли Египетския, избавльшаго тя из работы, еже совратити тя с пути, егоже заповеда тебе Господь Бог твой ходити по нему: и погубите сами злое от вас самих. 6 Аще же помолит тя брат твой от отца твоего или от матере твоея, или сын твой, или дщерь твоя, или жена твоя яже на лоне твоем, или друг твой, равен души твоей, отай глаголя: идем и послужим богом иным, ихже не видел еси ты и отцы твои, 7 от богов языков, иже окрест вас, близ сущих тебе, или дальних от тебе, от конца земли до конца земли, 8 да не соизволиши ему и не послушаеши его, и да не пощадит его око твое, и не возлюбиши его, ниже прикрыеши его: 9 возвещая да возвестиши о нем, и рука твоя да будет на нем в первых убити его, и руки всех людий послежде: 10 и побиют его камением, и умрет, яко взыскал есть отвратити тебе от Господа Бога твоего, изведшаго тя из земли Египетския, от дому работы: 11 и весь Израиль услышав убоится, и не приложит ктому сотворити по словеси сему злому еже в вас. 12 Аще же услышиши в единем от градов твоих, яже Господь Бог дает тебе, вселитися тамо, глаголющих: 13 изыдоша мужи беззаконнии от вас и отвратиша вся живущыя во граде их, глаголюще: идем, да послужим богом иным, ихже не весте, 14 и да взыщеши и вопросиши и обыщеши зело, и се, истинно слово яве, сотворися мерзость сия в вас: 15 убивая да убиеши вся живущыя во граде онем убийством меча, проклятием проклените его, и вся яже в нем, 16 и вся корысти его собереши на распутия его, и зажжеши град огнем, и вся корысти его всенародно пред Господем Богом твоим, и будет пуст во веки, не возградится по сем: 17 и да ничтоже прилепится от проклятия руце твоей, да отвратится Бог от ярости гнева Своего: и даст тебе милость и помилует тя, и умножит тя, якоже глагола тебе, якоже клятся Господь отцем твоим, 18 аще послушаеши гласа Господа Бога твоего, еже хранити вся заповеди Его, яже аз заповедаю тебе днесь, творити доброе и угодное пред Господем Богом твоим. === 14 === 1 Сынове есте Господа Бога вашего: да не нарезуетеся и не возложите плеши между очима вашима над мертвым: 2 яко людие святи есте Господеви Богу вашему, и вас избра Господь Бог ваш быти вам людем избранным Ему от всех языков иже на лицы земли. 3 Да не снесте всякия мерзости. 4 Сия скоты ядите: телца от говяд и агнца от овец и козла от коз: 5 еленя и серну, и буйвола и ланя, и зубря и онагра и сайгака. 6 Всяк скот на двое деля пазнокти, и копыто на двое копыта, и отрыгая жвание в скотех, да ясте. 7 И сих да не снесте от отрыгающих жвание и от делящих пазнокти на двое, но копыт не раздвояющих: велблюда и заяца и хирогрилля: яко отрыгают жвание сии, но копыт не раздвояют, нечиста сия вам суть. 8 И свинии, яко на двое делит пазнокти и копыта раздвояет, и сия жвания не отрыгает, нечиста сия вам есть: от мяс их да не ясте, и мертвечинам их да не прикоснетеся. 9 И сия да ясте от всех яже в воде: вся, имже суть перие и чешуя, ядите. 10 И всех, имже несть перия, на чешуи, да не ясте: нечиста суть вам. 11 Всяку птицу чисту да ясте. 12 И сих да не ясте от них: 13 орла и грифа и орла морскаго, 14 и неясыти и иктина и подобных сим: 15 и врана и врабия, и выпелицы и сухолапля, и ястреба и подобных сим: 16 и врана нощнаго и лилика и подобных сим: 17 и еродиа и лебедя, и ивина и катаракта, и вдода 18 и нощнаго нетопыря, и сыча и теслоноса, и харадриона и подобных сим, и порфириона. 19 Вся гады птичия нечиста суть вам: да не ясте от них. 20 Всяку птицу чисту да ясте. 21 Всякия мертвечины да не ясте: приселнику, иже во градех твоих, да дасте, и да яст, или да продасте страннику: яко людие святи есте Господеви Богу вашему. Да не свариши ягняте во млеце матере его. 22 Десятины да даси от всего плода семене своего, плод нив твоих от года до года, 23 и да снеси я пред Господем Богом твоим на месте, идеже изберет Господь Бог твой призывати имя Его тамо: да принесеши десятину пшеницы твоея и вина твоего и елеа твоего, и первенцы волов твоих и овец твоих, да научишися боятися Господа Бога твоего вся дни. 24 Аще же далече будет путь от тебе и не возможеши донести их, яко далече место от тебе, еже изберет Господь Бог твой призывати имя Его тамо, яко да благословит тя Господь Бог твой: 25 и продаси сие на цене, и возмеши сребро в руку твою, и пойдеши на место, иже изберет Господь Бог твой, 26 и даси сребро за все, на неже пожелает душа твоя, на волы и овцы, или на вино, или на сикеру, или на все, егоже желает душа твоя, и да снеси тамо пред Господем Богом твоим, и возвеселишися ты и дом твой. 27 И левит иже во градех твоих, не оставивши его, яко несть ему части ни жребия с тобою: 28 по трех летех да изнесеши всю десятину жит твоих в лето оно, да положиши ю во градех твоих: 29 и приидет левит, яко несть ему части ни жребия с тобою, и пришлец, и сирота и вдова, яже во градех твоих, да ядят и насытятся: да благословит тя Господь Бог твой во всех делех твоих, яже аще сотвориши. === 15 === 1 В седмое лето да сотвориши отпущение. 2 И сице заповедь отпущения: да оставивши весь долг твой, имже должен ближний тебе, и от брата своего не истяжеши, яко наречеся отпущение Господу Богу твоему. 3 От чуждаго да истяжеши, елика суть твоя у него: брату же твоему отпущение да сотвориши долга твоего. 4 Яко не будет у тебе недостаточен: сего ради словесе благословением благословит тя Господь Бог твои в земли, юже тебе Господь Бог дает во жребий прияти ю. 5 Аще же слухом послушаете гласа Господа Бога вашего хранити и творити вся заповеди сия, яже аз заповедаю тебе днесь, яко Господь Бог твой благословил тя есть, якоже глагола тебе, 6 и взаим даси языком многим, ты же не займеши, и обладати будеши ты языки многими, тобою же не возобладают. 7 Аще же брат от братии твоея будет тебе недостаточен во единем от градов твоих в земли, юже Господь Бог твои дает тебе, да не отвратиши сердца твоего, ниже сожмеши руки твоея пред братом твоим требующим: 8 отверзая да отверзеши руку твою ему, и взаим да даси ему, елико просит, и елико ему не достанет. 9 Внемли себе: да не будет слово тайно в сердцы твоем беззакония, глаголя: близ есть седмое лето, лето отпущения, и возлукавнует око твое брату твоему требующему, и не даси ему, и возопиет на тя ко Господу, и будет тебе грех велик: 10 даянием да даси ему, и взаим да даси ему, елико воспросит, якоже требует: и не опечалися в сердцы своем, дающу ти ему, яко сего ради слова благословит тя Господь Бог твой во всех делех твоих, и во всем, на неже возложиши руку твою: 11 ибо не оскудеет недостаточный от земли твоея, сего ради аз заповедаю тебе творити слово сие, глаголя: отверзая отверзи руце твои брату твоему нищему и просящему на земли твоей. 12 Аще же продастся тебе брат твой Евреанин, или Евреаныня, да поработает тебе шесть лет, и в седмое да отпустиши его свободна от себе: 13 егда же пустиши его свободна от себе, да не отпустиши его тща: 14 напутное ему да уготовиши от овец твоих и от пшеницы твоея и от вина твоего: якоже благослови тя Господь Бог твой, да даси ему, 15 и помяни, яко раб и ты был еси в земли Египетстей, и свободи тя Господь Бог твой оттуду: сего ради аз заповедаю тебе творити слово сие. 16 Аще же речет к тебе: не отиду от тебе, яко возлюбих тя и дом твой, яко добро есть есть у тебе: 17 да возмеши шило, и провертиши ему ухо пред дверми у степени, и будет ти раб во веки: и рабе твоей сотвориши такожде. 18 Да не будет жестоко пред тобою, отпущаемым им от тебе свободным, понеже годовую мзду наемничу работа тебе шесть лет: и благословит тя Господь Бог твой во всем, еже твориши. 19 Всяко первородное, еже родится от волов твоих и от овец твоих, мужеск пол да освятиши Господеви Богу твоему: да не делаеши первородным телцем твоим и да не стрижеши первенца во овцах твоих. 20 Пред Господем Богом твоим да яси я от лета до лета, на месте, идеже изберет Господь Бог твои, ты и дом твой. 21 Аще же будет на нем порок, хромота, или слепота, и всякий порок зол, да не пожреши его Господу Богу твоему. 22 Во градех твоих да снеси я: нечистый и чистый у тебе такожде да яст, яко серну или еленя. 23 Токмо крове да не снесте: на землю проливай ю аки воду. === 16 === 1 Храни месяц новых (плодов), и да сотвориши Пасху Господеви Богу твоему, яко в месяце новых изшел еси из Египта нощию. 2 И да пожреши Пасху Господеви Богу твоему, овцы и говяда на месте, еже изберет Господь Бог твой призывати имя Его тамо. 3 Да не снеси в ню кваснаго: седмь дний да яси в ню опресноки, хлеб озлобления, яко со тщанием изыдосте из Египта, да поминаете день исхода вашего от земли Египетския вся дни жития вашего: 4 да не явится тебе квасно во всех пределех твоих седмь дний, и да не преноществует от мяс, яже пожреши в вечер в первый день, до утрия. 5 Не возможеши жрети Пасхи ни в единем от градов твоих, яже Господь Бог твой дает тебе: 6 но токмо на месте, еже изберет Господь Бог твой призывати имя Его ту, тамо пожреши Пасху в вечер при захождении солнца, во время в неже изшел еси из земли Египетския: 7 и свариши, и испечеши, и снеси на месте, идеже изберет Господь Бог твой: и возвратишися заутра, и пойдеши в дом твой. 8 Шесть дний да яси опресноки, в седмый же день исходный праздник Господеви Богу твоему: да не сотвориши в нем всякаго дела, кроме яже суть души. 9 Седмь седмиц всецелых да сочтеши себе: в начало же твоего серпа на жатву начни исчисляти седмь седмиц, 10 и да сотвориши праздник седмиц Господеви Богу твоему, якоже рука твоя может, елика даст тебе, якоже благослови тя Господь Бог твой. 11 И возвеселишися пред Господем Богом твоим ты и сын твой и дщерь твоя, и раб твой и раба твоя, и левит иже во градех твоих, и пришлец, и сирота и вдова, яже в вас, на месте, идеже изберет Господь Бог твой призывати имя Его тамо: 12 и помянеши, яко раб был еси (ты) в земли Египетстей, и сохраниши и сотвориши заповеди сия. 13 Праздник кущей да сотвориши себе седмь дний, егда собереши от нивы твоея и от точила твоего: 14 и да возвеселишися в празднице твоем ты и сын твой и дщи твоя, раб твой и раба твоя, и левит и пришлец, и сирота и вдова, яже во градех твоих: 15 седмь дний да празднуеши Господеви Богу твоему на месте, еже изберет Господь Бог твой призывати имя Его тамо: аще же благословит тя Господь Бог твой во всех плодех твоих и во всяком деле рук твоих, и будеши веселяся. 16 В три времена лета да явится всяк мужеск пол пред Господем Богом твоим, на месте, еже изберет Господь Бог твой: в праздник опресноков, и в праздник седмиц, и в праздник кущей: да не явишися пред Господем Богом твоим тощь: 17 кийждо по силе рук своих, по благословению Господа Бога твоего, еже даде тебе. 18 Судии и книгочии поставиши себе во всех градех твоих, яже Господь Бог твой дает тебе по племенам, и да судят людем суд праведный: 19 да не уклонят суда, ниже познают лице, ниже да возмут даров: дары бо ослепляют очи мудрых и отмещут словеса праведных. 20 Праведне праведное гоните, да поживете, и вшедше наследите землю, юже Господь Бог твой дает вам. 21 Да не насадиши себе дубравы: всякаго древа близ олтаря Господа Бога твоего да не сотвориши себе, 22 да не поставиши себе капища, еже возненавиде Господь Бог твой. === 17 === 1 Да не пожреши Господеви Богу твоему телца или овчате, на немже есть порок, всяк глагол зол: яко мерзость Господеви Богу твоему есть. 2 Аще же обрящется у тебе во единем от градов твоих, яже Господь Бог твои дает тебе, муж или жена, иже сотворит лукавое пред Господем Богом твоим, преступити завет Его: 3 и шедше послужат богом иным и поклонятся им, солнцу, или луне, или всякому яже от красоты небесныя, ихже не повелех тебе: 4 и возвестится тебе, и взыщеши зело, и се, истинно бысть слово, мерзость сотворися сия во Израили: 5 да изведеши человека того, или жену ту, иже сотвориша дело злое сие, пред двери, и побиете их камением, и да умрут. 6 При двою свидетелех или при трех да умрет: умираяй да не умрет при единем свидетели: 7 и рука свидетелей да будет на нем в первых, умертвити его, и рука всех людий послежде: и измите злое от вас самех. 8 Аще же неудоборешимо слово у тебе в суде между кровию и кровию, и между судом и судом, и между язвою и язвою, и между прением и прением, словеса судная в градех твоих, и востав взыдеши на место, еже изберет Господь Бог твой призвати имя Его тамо: 9 и приидеши к жерцем левитом, и к судии, иже будет в тыя дни, и взыскавше возвестят тебе суд: 10 и сотвориши по словеси, еже возвестят тебе от места, еже изберет Господь Бог твой призывати имя Его тамо, и да сохраниши зело творити вся, елика законоположатся тебе: 11 по закону и по суду, егоже рекут тебе, сотвориши, да не уклонишися от словесе, еже известят тебе, ни на десно, ни на лево. 12 И человек, иже сотворит в гордости, еже не послушати жерца предстоящаго служити во имя Господа Бога твоего, или судии, иже в тыя дни будет, да умрет человек той, и да измеши злое от Израиля: 13 и вси людие услышавше убоятся, и не будут нечествовати ктому. 14 Аще же внидеши в землю, юже Господь Бог твой дает тебе в жребий, и приимеши ю, и вселишися на ней, и речеши: поставлю князя над собою, якоже и прочии языцы, иже окрест мене: 15 поставляя да поставиши над собою князя, егоже изберет Господь Бог твой, от братии твоея да поставиши над собою князя, не возможеши поставити над собою князя человека чуждаго, яко не брат твой есть. 16 Обаче да не умножит себе коней, ниже да возвратит людий во Египет, яко да не умножит себе коней: Господь же рече вам: не приложите возвратитися путем сим ктому: 17 и да не умножит себе жен, да не превратится сердце его: и сребра и злата да не умножит себе зело. 18 И будет егда сядет на престоле власти своея, да напишет себе второзаконие сие в книзе от жерцев левитов, 19 и будет с ним, и да чтет ю во вся дни жития своего, да научится боятися Господа Бога своего и хранити вся заповеди сия и оправдания сия, творити я: 20 да не возвысится сердце его от братии его, да не преступит от заповедий ни на десно, ни на лево яко да будет многа лета во власти своей, той и сыны его с ним, в сынех Израилевых. === 18 === 1 Да не будет жерцем левитом всему племени Левиину части ниже жребия со Израилем: приношения Господу жребий их, да ядят я: 2 жребий же да не будет ему в братии его: Господь Сам жребий его, якоже рече ему. 3 И сей суд жерцев, яже от людий, от приносящих жертвы, аще телца, аще овцу: и даси жерцу рамо, и челюсти, и утробу: 4 и начатки пшеницы твоея и вина твоего и елеа твоего, и начаток стрижения овец твоих да даси ему: 5 яко того избра Господь Бог твой от всех племен твоих предстояти пред Господем Богом твоим, служити и благословити во имя Господне, той и сынове его во вся дни. 6 Аще же приидет левит от единаго градов ваших, от всех сынов Израилевых, идеже той обитает, якоже желает душа его, на место, еже изберет Господь, 7 да служит имени Господа Бога вашего, якоже и вся братия Его левити предстоящии тамо пред Господем: 8 часть отделеную да яст, кроме продажи яже по отечеству. 9 Аще же внидеши в землю, юже Господь Бог твой дает тебе, да не навыкнеши творити по мерзостем языков тех: 10 да не обрящется в тебе очищая сына своего и дщерь свою огнем, волхвуя волхвованием и чаруяй и птицеволшебствуяй, 11 чародей обавая обаванием, утробоволхвуяй и знаменосмотритель, и вопрошаяй мертвых: 12 есть бо мерзость Господеви Богу твоему всяк творяй сия: сих бо ради мерзостей потребит я Господь Бог твой от лица твоего. 13 Совершен да будеши пред Господем Богом твоим. 14 Языцы бо сии, ихже ты наследиши, сии чарований и волхвований послушают: тебе же не тако даде Господь Бог твой. 15 Пророка от братии твоея, якоже мене, возставит тебе Господь Бог твой, Того послушайте: 16 по всему, елико просил еси от Господа Бога твоего в Хориве в день собрания, глаголюще: да не приложим слышати гласа Господа Бога нашего, и огня великаго сего не увидим по сем, да не измрем. 17 И рече Господь ко мне: право вся, елика глаголаху к тебе: 18 Пророка возставлю им от среды братии их, якоже тебе: и вдам слово Мое во уста Его, и возглаголет им, якоже заповедаю Ему: 19 и человек той, иже не послушает словес Его, елика возглаголет Пророк оный во имя Мое, Аз отмщу от него: 20 обаче пророк, иже вознечествует глаголати во имя Мое слово, егоже не повелех ему глаголати, и иже аще возглаголет во имя богов инех, да умрет пророк той. 21 Аще же речеши в сердцы своем: како познаем слово, егоже не глагола Господь? 22 Елика аще возглаголет пророк во имя Господне, и не сбудется, и не случится слово сие, егоже не рече Господь: в нечестии глагола Пророк той, не убойтеся его. === 19 === 1 Егда же погубит Господь Бог твой языки, ихже Господь Бог твой дает тебе землю, и наследиши их и вселишися во градех их и в домех их, 2 три грады да отлучиши себе среди земли твоея, юже Господь Бог твой дает тебе в наследие. 3 Уготови себе путь, и на трое раздели пределы земли твоея, юже разделяет тебе Господь Бог твой: и да будет убежище тамо всякому убийце. 4 Сие же да будет заповедание убийце, иже аще убежит тамо, и жив будет: иже аще убиет ближняго своего не ведя, и сей не ненавиде его прежде вчерашняго дне и третияго, 5 и иже аще пойдет с подругом своим в лес собирати дрова, и поползнется рука его с секирою секущаго дрова, и спадши секира с топорища улучит подруга его, и умрет, сей да убежит во един от градов сих, и жив да будет: 6 да не погнав ужик крове вслед убившаго, яко разгорится сердце ему, и постигнет его, аще должайший будет путь, и убиет душу его, и умрет: и сему несть суд смертный, понеже не бе ненавидя его прежде вчерашняго и третияго дне: 7 сего ради заповедаю аз тебе слово сие, глаголя: три грады да отлучиши себе. 8 Аще же разширит Господь Бог твой пределы твоя, якоже клятся отцем твоим, и даст тебе Господь всю землю, юже рече дати отцем твоим, 9 аще послушаеши творити вся заповеди сия, яже аз заповедаю тебе днесь, любити Господа Бога твоего, ходити во всех путех Его вся дни: и да приложиши себе еще три грады к сим трием градом, 10 и да не пролиется кровь безвинна в земли твоей, юже Господь Бог твой дает тебе в жребий, и да не будет в тебе крови повинен. 11 Аще же будет у тебе человек ненавидяй ближняго своего, и навет сотворит нань, и востанет нань, и поразит душу его, и умрет, и вбегнет во един от градов сих, 12 да послют старейшины града того, и возмут его оттуду, и да предадят его в руце ужиков крове, и да умрет: 13 да не пощадит его око твое, и да очистиши кровь неповинную от Израиля, и благо будет тебе. 14 Да не предвижеши пределов ближняго своего, яже поставиша отцы твои в наследии твоем, еже наследовал еси в земли, юже Господь Бог твой дает тебе во жребий. 15 Да не пребудет свидетель един во свидетелство на человека по всякой обиде и по всякому преступлению и по всякому греху, имже аще согрешит: при устех двою свидетелей и при устех триех свидетелей да станет всяк глагол. 16 Аще же востанет свидетель неправеден на человека, глаголя на него нечестие, 17 да станут оба человека, имже есть пря, пред Господем и пред жерцы и пред судиями, иже будут в тыя дни, 18 и да испытают их судии прилежно, и се, свидетель неправеден свидетелствова неправду, воста на брата своего: 19 да сотворите ему, якоже и он умысли сотворити супротив брата своего, и измите злое от вас самех: 20 да и прочии услышавше убоятся, и не приложат ктому творити словесе злаго сего в вас: 21 да не пощадит его око твое: душу за душу, око за око, зуб за зуб, руку за руку, ногу за ногу, якоже аще кто даст порок на ближняго своего, сице воздастся ему. === 20 === 1 Аще же изыдеши на брань на враги твоя, и узриши кони и всадники и люди множайшыя тебе, да не убоишися их: яко Господь Бог твой с тобою, изведый тя из земли Египетския. 2 И будет егда приближишися к рати, и приступив жрец да возглаголет к людем и речет к ним: 3 послушай, Израилю, вы исходите днесь на рать ко врагом вашым: да не ослабеет сердце ваше, ни убойтеся, ниже устрашитеся и не уклонитеся от лица их: 4 яко Господь Бог ваш идый пред вами споборствует вам на враги вашя и спасет вас. 5 И да рекут книгочия к людем, глаголюще: кий человек создавый храмину нову, и не обнови ея? Да идет, и да возвратится в дом свой, да не умрет на рати, и человек ин обновит ю: 6 и кии человек, иже насади виноград, и не веселися от него? Да идет, и возвратится в дом свой, да не умрет на рати, и человек ин возвеселится от него: 7 и кий человек, иже обручи себе жену, и не понял ю? Да идет, и возвратится в дом свой, да не умрет на рати, и ин человек поймет ю. 8 И да приложат книгочия глаголати к людем, и да рекут: кий человек страшлив и слаб сердцем? Да идет, и возвратится в дом свой, да не устрашит сердца брата своего, аки сердце свое. 9 И будет егда умолкнут книгочия глаголюще к людем, и поставят воеводы воинства вожды людий. 10 Аще же приидеши ко граду воевати нань, и воззовеши я с миром: 11 аще убо мирное отвещают ти, и отверзут тебе (град), вси людие обретшиися во граде да будут тебе дань дающе и послушающии тебе: 12 аще же не покорятся тебе, и сотворят с тобою рать, да обсядеши его, 13 дондеже предаст я Господь Бог твой в руце твои: да избиеши всяк мужеск пол в нем убийством меча, 14 кроме жен и имения, и вся скоты, и вся елика суть во граде, и все стяжание да плениши себе, и да снеси весь плен врагов твоих, яже Господь Бог твой дает тебе. 15 Тако да сотвориши всем градом, иже суть далече от тебе зело, иже не суть от градов языков сих, ихже Господь Бог дает тебе наследити землю их: 16 от них да не оставите жива всякаго дыхания: 17 но и проклятием проклените их, Хеттеа и Аморреа, и Хананеа и Ферезеа, и Евеа и Иевусеа и Гергесеа, якоже заповеда тебе Господь Бог твой: 18 да не научат вас творити всякия мерзости своя, елики твориша богом своим, и согрешите пред Господем Богом вашим. 19 Аще же обсядеши град един дни многи воевати его в приятие себе, да не истребиши садовия его, возложив железо нань, но токмо да яси плод от них, самого же да не посечеши: еда древо, еже в дубраве, человек есть, иже внити от лица твоего в забрала? 20 Но древо, еже веси, яко не ястся плод его, сие потребиши и посечеши, и сотвориши лествицы на град, иже творит на тя рать, дондеже предастся. === 21 === 1 Аще же обрящется убиеный на земли, юже Господь Бог дает тебе наследити, лежащь на поли, и не ведят убившаго и: 2 да изыдут старцы и судии твои и да измерят до градов, иже окрест убиенаго: 3 и будет град приближаяйся убиеному, и да возмут старейшины града того юницу от говяд, еюже не делано, и яже ярма не понесе: 4 и да изведут старейшины града того юницу в дебрь суху, яже не оранна, ниже насеяна, и да пресекут жилы юницы в дебри: 5 и да приступят жерцы Левити: яко сих избра Господь Бог твой предстояти Ему и благословляти во имя Его: и во устех их да будет всякое прекословие и всякая язва: 6 и вси старейшины града того, приближающиися убиеному, да омыют руце над главою юницы, ейже пресечены суть жилы в дебри, 7 и отвещавше да рекут: руце наши не пролияша крове сея, и очи наши не видеша: 8 милостив буди людем Твоим Израилю, ихже извел еси, Господи, из земли Египетския, да не будет кровь неповинна на людех Твоих Израили: и очистится им кровь: 9 ты же отимеши кровь неповинну от среды себе, аще сотвориши доброе и угодное пред Господем Богом твоим. 10 Аще же изыдеши на брань противу врагом твоим, и предаст я Господь Бог твой в руце твои, и плениши плен от них, 11 и узриши в плене добру обличием, и возлюбиши ю, и поймеши ю себе в жену, 12 и введеши ю внутрь в дом твой, и да обриеши главу ея, и да обрежеши ногти ея, 13 и да совлечеши ризы пленныя ея с нея: и да сядет в дому твоем, и да плачется отца своего и матере своея месяц дний: и но сем внидеши к ней, и совокупишися с нею, и будет тебе жена. 14 И будет аще не восхощеши ея, да отпустиши ю свободну, продажею же да не продаси ея на цене: да не отринеши ея, понеже смирил еси ю. 15 Аще же будут мужу две жены, едина от них люба, и другая не люба, и породят ему любая и нелюбая, и будет сын перворожденный от нелюбимыя: 16 и будет в оньже день разделит сыном своим имение свое, не возможет первенцем быти сын любимыя, презрев сына нелюбимыя первенца: 17 но сына нелюбимыя за первенца да признает, и даст ему сугубо от всего, еже обрящется ему, яко сей есть начало чад его, и сему достоит первенство. 18 Аще же кому будет сын непокорив и грубитель, не послушаяй гласа отца своего и гласа матере своея, и накажут его, и не послушает их, 19 да возмут его отец его и мати его, и да изведут его пред старейшины града своего и пред врата места своего, 20 и да рекут к мужем града своего: сын наш сей непокорив есть и грубитель и не слушает речи нашея, сластолюбствуя пиянствует: 21 и да побиют его мужие града того камением, и да умрет: и измите злое от себе самих, да и прочии слышавше убоятся. 22 Аще же будет на ком грех, суд смертный, и да умрет, и повесите его на древе, 23 да не пренощует тело его на древе, но во гробе погребите его в тойже день: яко проклят есть от Бога всяк висяй на древе: и да не оскверните земли, юже Господь Бог твой дает тебе во жребий. === 22 === 1 Видев телца брата твоего или овцу его заблуждающыя на пути, да не презриши я: но возвращением возвратиши я к брату твоему, и да отдаси ему. 2 Аще же несть близ тебе брат твой, ниже увеси его, собери я внутрь дому твоего, и да будут у тебе, дондеже взыщет их брат твой, и отдаси их ему. 3 Такожь сотвориши осляти его, и тако да сотвориши ризе его, и тако да сотвориши всему погубленому брата твоего: елика аще погибнут от него, и обрящеши я, да не возможеши пренебрещи я. 4 Аще увидиши осля брата твоего или телца его падшыя на пути, да не презриши я: возставляя да возставиши я с собою. 5 Да не будет утварь мужеска на жене, ни да облачится муж в ризу женску: яко мерзость есть Господеви Богу твоему всяк творяй сия. 6 Аще же улучиши гнездо птичие пред лицем твоим на пути, или на древе некоем, или на земли, и в нем птенцы или яица, и мати седит на птенцех или яицех, да не возмеши матере со птенцы: 7 отпущением да отпустиши матерь, птенцы же возмеши себе, да благо тебе будет и долгоденствен будеши. 8 Аще же созиждеши дом нов, и сотвориши ограждение дому твоему, и да не сотвориши убийства в дому твоем, аще падет падый от него. 9 Да не насееши винограда твоего различна, да не освятится плод, и семя, еже насееши с плодом винограда твоего. 10 Да не ореши юнцем и ослятем вкупе. 11 Ниже да облечешися в ризу разноличну от льна и волны вкупе ткану. 12 Тресны да сотвориши себе на четырех краях одежды своея, в нюже облечешися. 13 Аще же кто поймет жену и будет с нею, и возненавидит ю, 14 и наложит на ню обвинителная словеса, и нанесет на ню имя злое, и возглаголет: жену сию поях, и пришед к ней, не обретох ю девицею: 15 и взем отец девицы и матерь, да изнесут девическая отроковицы пред старейшины ко вратом, 16 и речет отец отроковицы ко старейшинам: дщерь мою сию дах мужу сему в жену, и ныне возненавидев ю сей, 17 возлагает ей обвинителная словеса, глаголя: не обретох дщере твоея девою: и се, девическая дщере моея: и да разгнут ризы пред старейшины града онаго, 18 и да возмут старейшины града онаго мужа того и накажут его, 19 и да обвинят его стом сиклей, и дадят отцу отроковицы, яко изнесе имя зло на девицу Израилтеску, и (паки) да будет ему жена: не возможет отпустити ю во вся лета. 20 Аще же будет воистинну слово сие, и не обрящутся девическая отроковице, 21 и да изведут девицу пред врата дому отца ея, и побиют ю камением мужие градстии, и да умрет, яко сотвори безумие в сынех Израилевых, оскверни дом отца своего: и измите злое от себе самих. 22 Аще же обрящется человек лежай с женою мужатою, убийте обоих, человека лежащаго с женою и жену: и измите злое от Израиля. 23 Аще же будет дева обрученая мужу, и обрет ю человек (другий) во граде, будет с нею, 24 изведите обоих пред врата града их, и побийте (обоих) камением, и да умрут: отроковицу, понеже не вопила во граде, и мужа, понеже обиде жену ближняго своего: и измите злое от себе самих. 25 Аще же на поли обрящет человек деву обрученую, и насиловав будет с нею, убийте человека единаго бывшаго с нею: 26 а отроковице ничтоже сотворите: несть бо деве греха смертнаго: якоже аще кто бы востал на ближняго своего, и убил бы душу его, тако сие дело: 27 понеже на селе обрете ю, возопи отроковица обрученая, и не бе помогаяй ей. 28 Аще же кто обрящет отроковицу деву, яже несть обручена, и насиловав будет с нею, и обличится: 29 да даст человек бывый с нею отцу отроковицы пятьдесят дидрахм сребра, и тому да будет жена, понеже обиде ю: не возможет отпустити ю во все время. 30 Да не поймет человек жены отца своего, и да не открыет покровения отца своего. === 23 === 1 Да не входит каженик и скопец в сонм Господень. 2 Ниже да внидет блудородный во храм Господень до десятаго рода. 3 Да не внидет Амманитин и Моавитин в храм Господень: и даже до десятаго рода да не входит в храм Господень, и даже до века, 4 понеже не сретоша они вас с хлебы и водою на пути, исходящым вам из земли Египетския, и яко наяша на тя Валаама сына Веорова от Месопотамии, да тя прокленет: 5 и не восхоте Господь Бог твой послушати Валаама, и обрати Господь Бог твой клятвы в благословение, зане возлюби тя Господь Бог твой: 6 да не совещаеши мирная им и полезная им во вся дни твоя во веки. 7 Да не возгнушаешися Идумеанином, яко брат твой есть: да не возгнушаешися Египтянином, яко пришлец был еси в земли его: 8 сынове аще родятся им, в роде третием да внидут в храм Господень. 9 Аще же изыдеши ополчитися на враги твоя, и да сохранишися от всякаго слова зла. 10 Аще будет у тебе человек, иже не будет чист от излияния его нощию, и да изыдет вне полка, и да не внидет в полк: 11 и егда будет к вечеру, да омыет тело свое водою, и зашедшу солнцу да внидет в полк. 12 И место тебе да будет вне полка, и изыдеши тамо вон: 13 и рылец да будет тебе за поясом твоим, и будет егда сядеши вне, и да ископаеши им (яму), и навратив покрыеши стыдение твое в ней: 14 яко Господь Бог твой ходит в полце твоем избавляти тя и предати враги твоя в руце твои пред лицем твоим: и да будет полк твой свят, и да не явится у тебе стыдение вещи, и отвратится от тебе. 15 Да не предаси раба господину его, иже прииде к тебе от господина своего: 16 с тобою да обитает, с вами да живет во всяком месте, идеже угодно будет ему: да не оскорбиши его. 17 Да не будет блудница от дщерей Израилевых, и да не будет блудник от сынов Израилевым. 18 Да не принесеши мзды блудничи, ниже цене песии в дом Господа Бога твоего на всяк обет, яко мерзость суть Господеви Богу твоему и обоя. 19 Да не даси брату твоему в лихву сребра и в лихву пищей и в лихву всякия вещи, емуже аще взаим даси: 20 чуждему да даси в лихву, брату же твоему да не даси в лихву, да благословит тя Господь Бог твой во всех делех твоих на земли, в нюже входиши тамо наследити ю. 21 Аще же обещаеши обет Господеви Богу твоему, да не умедлиши воздати его, яко взыская взыщет Господь Бог твой от тебе, и будет на тебе грех: 22 аще же не восхощеши обещати, несть ти греха. 23 Исходящая на уст твоих сохрани и сотвори, имже образом обещал еси Господеви Богу твоему дар, егоже глаголал еси устами твоими. 24 Аще же внидеши на ниву ближняго своего, и собереши в руце свои класы, а серпа да не возложиши на ниву ближняго. 25 Аще же внидеши в виноград ближняго своего, да яси гроздие, елико души твоей насытитися, в сосуд же да не вложиши. === 24 === 1 Аще же кто поймет жену и поживет с нею, и будет аще не обрящет благодати пред ним, яко обрете в ней срамное дело, да напишет ей книгу отпущения и вдаст в руце ея, и да отпустит ю из дому своего, 2 и отшедши будет (жена) мужу иному: 3 и аще возненавидит ю муж вторый, и напишет ей книгу отпущения и даст ей в руце ея, и отпустит ю из дому своего, или умрет муж ея вторый, иже бе ю поял себе в жену: 4 не возможет муж первый, отпустивый ю, возвратив пояти ю себе в жену, по осквернении ея, яко гнусно есть пред Господем Богом твоим: и да не осквернавите земли, юже Господь Бог ваш дает вам в наследие. 5 Аще же кто поймет жену внове, да не идет на брань, и да не наложится ему ни каяже вещь: неповинен будет в дому своем лето едино, да веселит жену свою, юже поял есть. 6 Да не возмеши в залог жерновных каменей, яко душу сей дает в залог. 7 Аще же ят будет человек крадый душу от братии своея сынов Израилевых, и насилием продает ю, да умрет тать той, и измите злое от вас самих. 8 Внемли себе в язве проказы, и храни зело творити по всему закон, егоже возвестят вам жерцы левити: якоже заповедах вам, да храните творити: 9 помяни, елика сотвори Господь Бог твой Мариаме на пути, исходящым вам из Египта. 10 Аще же долг есть на ближнем твоем, долг каковый либо, да не внидеши в дом его взяти залог его: 11 вне станеши, и человек той, на немже есть долг твой, изнесет залог вон. 12 Аще же человек убог есть, да не преноществует залог его у тебе: 13 отданием да отдаси ризу его до захождения солнца, и да почиет в ризе своей, и благословит тя, и будет тебе милость пред Господем Богом твоим. 14 Да не лишиши мзды убогаго и требующаго от братии твоея, или от пришлец иже во градех твоих: 15 в той же день да отдаси мзду ему, да не зайдет солнце ему, яко убог есть, и в том имать надежду, и да не возопиет на тя к Господеви, и будет тебе грех. 16 Да не умрут отцы за сыны, и сынове да не умрут за отцы: кийждо за свой грех да умрет. 17 Не уклониши суда пришелцу и сиру и вдове, и да не вземлеши в залог ризы вдовичи, 18 и помянеши, яко раб (и ты) был еси в земли Египетстей, и свободи тя Господь Бог твой оттуду: сего ради аз тебе заповедаю творити сие слово. 19 Аще же пожнеши ниву твою на селе твоем, и забудеши сноп на ниве твоей, да не возвратишися взяти его: пришелцу и убогу, и сиру и вдове да будет, да благословит тя Господь Бог твой во всех делех руку твоею. 20 Аще же масличие собираеши, да не возвратишися останков собрати яже за тобою: пришелцу и сиру и вдове да будут: и воспомянеши, яко раб был еси в земли Египетстей: сего ради аз тебе заповедаю творити слово сие. 21 Аше же обираеши виноград твой, да не собираеши останков яже за тобою: пришелцу и сиру и вдове да будут: 22 и помянеши, яко раб был еси в земли Египетстей: сего ради аз тебе заповедаю творити сие слово. === 25 === 1 Аще же будет пря между человеки, и приидут на суд, и да судят, и оправдят праваго, и осудят нечестиваго: 2 и будет, аще достоин есть ран нечестивый, да поставиши его пред судиями, и да биют его пред ними по нечестию его: 3 и числом четыредесять ран да наложат ему, и да не приложат к сему: аще же приложат паче ран сих бити его множае, срам будет брату твоему пред тобою. 4 Да не обротиши вола молотяща. 5 Аше же живут братия вкупе, и умрет един от них, семене же не будет ему, да не будет жена умершаго иному мужу несродну: брат мужа ея да внидет к ней и поймет ю себе в жену, и да поживет с нею: 6 и будет очроча, еже аще родится, да поставится во имя умершаго, и не погибнет имя его от Израиля. 7 Аще же не восхощет человек пояти жены брата своего, да приидет жена ко вратом пред старейшины и речет: не хощет брат мужа моего возставити имя брата своего во Израили, не восхоте брат мужа моего: 8 и да призовут его старейшины града того и рекут ему, и став речет: не хощу пояти ю: 9 и приступивши жена брата его к нему пред старейшины, и изует сапог его един от ноги его, и да плюнет на лице его, и отвещавши речет: сице да сотворят человеку, иже не созиждет дому брата своего во Израили: 10 и прозовется имя его во Израили дом изутаго из сапога. 11 Аще же биются человека два вкупе, человек с братом своим, и приступит жена единаго от них отяти мужа своего от руки биющаго и, и простерши руку свою, имет за ятра его, 12 да отсечеши руку ея: да не пощадит око твое ея. 13 Да не будет во влагалищи твоем мерило и мерило, великое и малое, 14 да не будет в дому твоем мера и мера, велика и мала: 15 мерило истинно и праведно да будет тебе, и мера истинна и праведна да будет тебе, да многи дни будеши на земли, юже Господь Бог твой дает тебе в жребий, 16 яко мерзость Господеви Богу твоему всяк творяй сия, всяк творяй неправду. 17 Помяни, елика тебе сотвори Амалик на пути, исходящу тебе из Египта: 18 како сопротивоста тебе на пути и посече задний полк твой утружден за тобою: ты же алчен был еси и утружден: и не убояся Бога: 19 и будет егда упокоит тя Господь Бог твой от всех враг твоих, иже окрест тебе на земли, юже Господь Бог твой дает тебе в жребий, еже наследити ю, да погубиши имя Амаликово от земли, яже под небесем, и да не забудеши. === 26 === 1 И будет аще внидеши в землю, юже Господь Бог твой дает тебе в жребий еже наследити ю, и вселишися на ней, 2 и да возмеши от начатка плодов земли твоея, юже Господь Бог твой дает тебе в жребий, и вложиши в кошницу, и пойдеши на место, еже изберет Господь Бог твой призывати имя Его тамо: 3 и приидеши к жерцу, иже будет в тыя дни, и речеши к нему: возвещаю днесь Господеви Богу твоему, яко внидох в землю, еюже клятся Господь отцем нашым дати нам: 4 и да возмет жрец от руку твоею кошницу и да положит ю пред олтарем Господа Бога твоего: 5 и отвещав речеши пред Господем Богом твоим: Сирию остави отец мой и сниде во Египте и обита тамо в числе малем, и бысть тамо в язык велик и во множество много и велико: 6 и озлобиша нас Египтяне, и смириша ны, и возложиша на ны дела жестокая: 7 и возопихом ко Господу Богу отец наших, и услыша Господь вопль наш и виде смирение наше и труд наш и скорбь нашу, 8 и изведе ны Господь из Египта Сам крепостию Своею великою и рукою сильною и мышцею высокою, и в видениих великих и в знамениих и в чудесех, 9 и введе ны в место сие, и даде нам землю сию, землю кипящую медом и млеком: 10 и ныне се, принесох начатки от плодов земли, юже дал ми еси, Господи, землю кипящую медом и млеком. И оставиши е пред Господем Богом твоим, и поклонишися тамо пред Господем Богом твоим, 11 и возвеселишися о всех благих, яже даде тебе Господь Бог твой, и дом твой, и левит, и пришлец иже у тебе. 12 Егда же совершиши одесятити всю десятину плодов земли твоея в лето третие, вторую десятину да даси левиту и пришелцу и сироте и вдове, и ядят во градех твоих и насытятся: 13 и речеши пред Господем Богом твоим: очистих святая из дому моего, и дах я левиту и пришелцу и сироте и вдове, по всем заповедем Твоим, яже заповедал еси мне: не преступих заповеди Твоея и не забых, 14 и не ядох в болезни моей от них, не принесох от них в нечистое, ниже дах от них умершему: послушах гласа Господа Бога моего, сотворих, якоже заповедал еси мне: 15 призри с небесе от храма святаго Твоего, и благослови люди Твоя Израиля и землю, юже дал еси им якоже клялся еси отцем нашым, дати нам землю кипящую медом и млеком. 16 В сей день заповеда тебе Господь Бог твой сотворити вся оправдания сия и судбы: и сохраните и сотворите я от всего сердца вашего и от всея души вашея. 17 Господа избрал еси днесь быти тебе в Бога, и ходити во всех путех Его и хранити оправдания и заповеди и судбы Его, и послушати гласа Его. 18 И Господь избра вас днесь, да будете Ему люди избраннии, якоже рече тебе, хранити вся заповеди Его, 19 и быти тебе вышше всех язык, иже сотвори тя именита и хвальна и славна, быти вам людем святым Господу Богу вашему, якоже глагола. === 27 === 1 И заповеда Моисей и старейшины сынов Израилевых, глаголя: сохраните вся заповеди сия, елики аз заповедаю вам днесь. 2 И будет в оньже день прейдете Иордан на землю, юже Господь Бог твой дает тебе во жребий, и поставиши себе камение велико и обелиши я мелом, 3 и напишеши на каменех тех вся словеса закона сего, егда прейдете Иордан, егда внидете в землю, юже Господь Бог твой дает тебе, землю кипящую медом и млеком, якоже рече Господь Бог отец твоих тебе. 4 И будет егда прейдете Иордан, да поставите камение сие, яже аз повелеваю вам днесь, в горе Гевал, и побелиши их мелом: 5 и да созиждеши тамо олтарь Господеви Богу твоему, олтарь от камения: да не возложиши на них железа: 6 камением всецелым да созиждеши олтарь Господеви Богу твоему и вознесеши на нем всесожжения Господеви Богу твоему, 7 и пожреши жертву спасения: и яси, и насытишися тамо, и возвеселишися пред Господем Богом твоим, 8 и напишеши на камениих сих весь закон сей яве зело. 9 И глагола Моисей и жерцы левити всему Израилю, глаголюще: молчи и слыши, Израилю, в день сей стался еси в люди Господеви Богу твоему: 10 и да послушаеши гласа Господа Бога твоего, и да сотвориши вся заповеди Его и оправдания Его, яже аз заповедаю тебе днесь. 11 И заповеда Моисей людем в той день, глаголя: 12 сии да станут благословляти люди на горе Гаризин, прешедше Иордан: Симеон, Левий, Иуда, Иссахар, Иосиф и Вениамин: 13 и сии да станут на клятву на горе Гевал: Рувим, Гад и Асир, Завулон, Дан и Неффалим. 14 И отвещавше рекут левити всему Израилю гласом великим: 15 проклят человек, иже сотворит изваяние и слияние, мерзость Господеви, дело рук художника, и положит е в сокровении. И отвещавше вси людие рекут: буди. 16 Проклят безчестяй отца своего или матерь свою. И рекут вси людие: буди. 17 Проклят прелагаяй пределы ближняго своего. И рекут вси людие буди. 18 Проклят прельщаяй слепаго в пути. И рекут вси людие: буди. 19 Проклят, иже уклонит суд пришелцу и сироте и вдове. И рекут вси людие: буди. 20 Проклят лежай с женою отца своего, яко открыл есть покровение отца своего. И рекут вси людие: буди. 21 Проклят лежай со всяким скотом. И рекут вси людие: буди. 22 Проклят лежай с сестрою своею, дщерию отца своего или дщерию матере своея и рекут вси людие: буди. 23 Проклят лежай с тещею своею. И рекут вси людие: буди. Проклят лежай с сестрою жены своея. И рекут вси людие: буди. 24 Проклят бияй ближняго с лестию. И рекут вси людие: буди. 25 Проклят, иже возмет дары поразити душу крове неповинныя. И рекут вси людие: буди. 26 Проклят всяк человек, иже не пребудет во всех словесех закона сего, еже творити я. И рекут вси людие: буди. === 28 === 1 И будет егда прейдете Иордан в землю, юже Господь Бог ваш дает вам, аще слухом послушаете гласа Господа Бога вашего хранити и творити вся заповеди Его, яже аз заповедаю тебе днесь, и даст тя Господь Бог твой вышше всех язык земли: 2 и приидут на тя вся благословения сия и обрящете тя. Аще слухом послушаеши гласа Господа Бога твоего, 3 благословен ты во граде и благословен ты на селе, 4 благословена исчадия чрева твоего и плоды земли твоея, и стада волов твоих и паствы овец твоих, 5 благословены житницы твои и останцы твои, 6 благословен ты внегда входити тебе и благословен ты внегда исходити тебе. 7 Да предаст тебе Господь Бог враги твоя, сопротивящыяся тебе, сокрушены пред лицем твоим: путем единем изыдут на тя и седмию путьми побежат от лица твоего. 8 Да послет Господь на тя благословение в хранилищах твоих и на вся, на няже возложиши руку твою на земли, юже Господь Бог твой дает тебе. 9 Да возставит тя Господь Бог твой Себе люд свят, якоже клятся отцем твоим. Аще послушаеши гласа Господа Бога твоего и ходити будеши в путех Его, 10 и узрят тя вси языцы земнии яко имя Господа (Бога твоего) призвася на тя, и убоятся тебе, 11 и умножит тя Господь Бог твой во благая во исчадиех утробы твоея и во исчадиех скотов твоих, и в плодех земли твоея, на земли твоей, юже клятся Господь отцем твоим дати тебе. 12 Да отверзет тебе Господь сокровище Свое благое, небо, иже дати дождь земли твоей во время свое, да благословит вся дела рук твоих: и даси взаим языком многим, ты же не одолжишися: и обладаеши ты многими языки, тобою же не возобладают. 13 Да поставит тя Господь Бог твой во главу, а не в хвост: и будеши тогда выше, и не будеши ниже, аще послушаеши заповедий Господа Бога твоего, елика аз заповедаю тебе днесь хранити и творити: 14 да не преступиши от всех словес, яже аз заповедаю тебе днесь, на десно ниже на лево, ходити вслед богов иных служити им. 15 И будет аще не послушаеши гласа Господа Бога твоего хранити и творити вся заповеди Его, елики аз заповедаю тебе днесь, и приидут на тя вся клятвы сия и постигнут тя: 16 проклят ты во граде и проклят ты на селе, 17 прокляты житницы твои и останки твои, 18 проклята исчадия утробы твоея и плоды земли твоея, стада волов твоих и паствы овец твоих, 19 проклят ты внегда входити тебе и проклят ты внегда исходити тебе. 20 Да послет тебе Господь скудость и глад и истребление на вся, на няже возложиши руку твою, елика аще сотвориши, дондеже потребит тя и дондеже погубит тя вскоре, злых ради начинаний твоих, зане оставил еси Мя. 21 Да прилепит Господь к тебе смерть, дондеже потребит тя от земли, в нюже ты входиши тамо наследити ю. 22 Да поразит тя Господь неимением и огневицею, и стужею и жжением, и убийством и ветром тлетворным и бледостию, и поженут тя, дондеже погубят тя. 23 И будет небо над главою твоею медяно и земля под тобою железна. 24 Да даст Господь дождь земли твоей прах, и персть с небесе снидет на тя, дондеже сокрушит тя и дондеже погубит тя. 25 Да даст тя Господь на изсечение пред враги твоими: путем единем изыдеши к ним и седмию пути побежиши от лица их, и будеши в разсеяние во всех царствах земных, 26 и будут мертвецы ваши снедь птицам небесным и зверем земным, и не будет отгоняяй. 27 Да поразит тя Господь вредом Египетским в седалищах и крастою дивиею и свербом, яко не мощи тебе исцелитися. 28 Поразит тя Господь неистовством и слепотою и изступлением ума, 29 и будеши осязаяй в полудни, якоже осязает слепый во тме, и не исправит путий твоих: и будеши тогда обидим и расхищаемь во вся дни, и не будет помогаяй тебе. 30 Жену поймеши, и ин муж возимеет ю: дом созиждеши, и не поживеши в нем: виноград насадиши, и не обереши его: 31 телец твой заклан пред тобою, и не снеси от него: осля твое отято от тебе, и не отдастся тебе: овцы твоя отданы (будут) врагом твоим, и не будет тебе помогаяй: 32 сынове твои и дщери твоя отданы (будут) языку иному, и очи твои узрят истаевающе на сия, и не возможет рука твоя: 33 плоды земли твоея и вся труды твоя пояст язык, егоже не веси, и будеши обидимь и сокрушаем во вся дни, 34 и будеши изумлен, видений ради очес твоих, яже узриши. 35 Да поразит тя Господь вредом злым на коленах и на голенех, яко не мощи исцелитися тебе от стоп ног твоих даже до верха (главы) твоея. 36 Да отведет тя Господь и князи твоя, яже поставиши себе, в язык, егоже не веси ты и отцы твои, и послужиши тамо богом иным, древу и камению, 37 и будеши тамо в гадание и в притчу и повесть во всех языцех, в няже введет тя Господь (Бог) тамо. 38 Семя много изнесеши на поле, и мало внесеши, яко поядят я прузи: 39 виноград насадиши и возделаеши, и вина не испиеши, ниже возвеселишися от него, яко пояст я червь: 40 маслины будут тебе во всех пределех твоих, и елеем не помажешися, яко истечет маслина твоя: 41 сыны и дщери родиши, и не будут тебе, отидут бо в плен: 42 вся древесная твоя и вся жита земли твоея потребит ржа: 43 пришлец, иже есть у тебе, взыдет над тя выше выше, ты же низидеши низу низу: 44 сей взаим даст тебе, ты же ему взаим не даси: сей будет глава, ты же будеши хвост. 45 И приидут на тя вся клятвы сия, и поженут тя и постигнут тя, дондеже потребят тя и дондеже погубят тя: яко не послушал еси гласа Господа Бога твоего, еже хранити заповеди Его и оправдания Его, елика заповеда тебе. 46 И будут на тебе знамения и чудеса, и в семени твоем до века, 47 понеже не послужил еси Господеви Богу твоему с веселием и благим сердцем, множества ради всех (благих), 48 и послужиши врагом твоим, яже послет Господь Бог твой на тя с гладом и жаждею, и наготою и оскудеением всех: и возложит ярем железен на выю твою, дондеже сокрушит тя. 49 И наведет Господь на тя язык издалеча от края земли аки устремление орле, язык, егоже не уразумееши глагола, 50 язык безстуден лицем, иже не удивится лицу старчу и юна не помилует: 51 и пояст плоды скотов твоих и плоды земли твоея, яко не оставит тебе пшеницы, ни вина, ни елеа, стад волов твоих и паств овец твоих, дондеже погубит тя: 52 и сокрушит тя во всех градех твоих, дондеже разорятся стены твоя высокия и крепкия, на нихже ты уповаеши, во всей земли твоей: и озлобит тя во всех градех твоих, яже даде тебе Господь Бог твой. 53 И снеси чада утробы твоея, плоть сынов и дщерей твоих, ихже даде тебе Господь Бог твой, в тесноте твоей и в скорби твоей, еюже оскорбит тя враг твой. 54 Юный в вас и младый зело позавидит оком своим брату своему и жене яже на лоне его, и оставшымся чадом, яже аще останутся ему: 55 яко дати единому их от плотей чад своих, ихже ял еси, понеже ничто остася ему в тесноте и скорби твоей, еюже оскорбят тя врази твои во всех градех твоих. 56 И юная в вас (жена) и млада зело, еяже не обыче нога ея ходити по земли юности ради и младости, позавидит оком своим мужу своему иже на лоне ея, и сыну и дщери своей, 57 и блоне своей изшедшей из чресл ея, и чаду своему еже аще родит: снест бо я тайно, скудости ради всех в тесноте и скорби своей, еюже оскорбит тя враг твой во всех градех твоих. 58 Аще не послушаете творити вся словеса закона сего, написанная в книзе сей, еже боятися имене чуднаго и чуднаго сего, Господа Бога твоего, 59 и удивит Господь язвы твоя и язвы семене твоего, язвы великия и дивныя, и болезни злыя и известныя, 60 и обратит на тя всю болезнь Египетскую злую, еяже ты боялся еси от лица их, и прилепятся к тебе: 61 и все разслабление, и всю язву ненаписанную и всю писаную в книзе закона сего наведет Господь на тя, дондеже потребит тя: 62 и останетеся в числе малем, вместо того егда бысте яко звезды небесныя множеством, яко не послушасте гласа Господа Бога вашего. 63 И будет, якоже возвеселися Господь о вас благотворити вам и умножити вас, тако возвеселится Господь о вас потребити вас: и возметеся от земли, в нюже вы входите тамо наследити ю, 64 и разсеет тя Господь Бог твой во вся языки, от края земли даже до края ея, и послужиши тамо богом иным, древу и камению, ихже не знал еси ты и отцы твои: 65 но и во языцех онех не упокоит тя, ниже будет стояния стопе ноги твоея: и даст тебе Господь тамо сердце печальное и оскудевающая очеса и истаявающую душу: 66 и будет живот твой висящь пред очима твоима, и убоишися во дни и в нощи, и не будеши веры яти житию твоему: 67 заутра речеши: како будет вечер? И в вечер речеши: како будет утро? От страха сердца твоего, имже убоишися, и от видении очес твоих, имиже узриши: 68 и возвратит тя Господь Бог во Египет в кораблех, и на пути егоже рекох, не приложите ксему видети его: и продани будете тамо врагом вашым в рабы и в рабыни, и не будет купующаго. === 29 === 1 Сия словеса завета, яже завеща Господь Моисею уставити сыном Израилевым в земли Моавли, кроме завета, егоже завеща им в Хориве. 2 И призва Моисей вся сыны Израилевы и рече к ним: вы видесте вся, елика сотвори Господь в земли Египетстей пред вами фараону и всем слугам его и всей земли его, 3 искушения великая, яже видеста очи твои, знамения и чудеса великая оная, руку крепкую и мышцу высокую: 4 и не даде Господь Бог вам сердца разумети и очес видети и ушес слышати, даже до дне сего: 5 и водил вас четыредесять лет по пустыни: не обетшаша ризы вашя, и сапози ваши не сотрошася на ногах ваших: 6 хлеба не ядосте, вина и сикера не писте, да познаете, яко Сей Господь Бог ваш: 7 и приидосте до сего места: и изыде Сион царь Есевонский и Ог царь Васанский во сретение нам на брань, 8 и поразихом их на брани, и прияхом землю их: и дах ю во жребий Рувиму и Гаду и полуплемени Манассиину. 9 И сохраните творити вся словеса завета сего творити я, да разумеете вся, елика сотворите. 10 Вы стасте вси днесь пред Господем Богом вашим, племеноначалницы ваши и старейшины ваши, и судии ваши и писмовводители ваши, всяк муж Израилтеск, 11 и жены вашя и чада ваша, пришлец иже посреде полка вашего, от древосечца вашего даже до водоносца вашего, 12 еже прейти в завет Господа Бога вашего и в клятвы Его, елика завещает Господь Бог твой к тебе днесь: 13 да поставит тя Себе в люди, и Той будет тебе Бог, якоже тебе рече и якоже клятся отцем твоим, Аврааму и Исааку и Иакову. 14 И не вам единем аз завет сей и клятву сию завещаваю, 15 но и зде сущым с вами днесь, пред Господем Богом вашим, и не сущым с вами зде днесь. 16 Яко вы весте, како жихом в земли Египетстей и како проидохом посреде языков, ихже преидосте, 17 и видесте мерзости их и кумиры их, древо и камение, сребро и злато, яже суть у них. 18 Еда кто есть в вас муж или жена, или отечество или племя, егоже сердце уклонися от Господа Бога вашего, ити еже служити богом языков оных? Еда кий есть в вас корень горе прорастающь в желчи и горести? 19 И будет аще услышит словеса клятвы сея и похвалится в сердцы своем, глаголя: преподобно мне да будет, яко в прельщении сердца моего пойду, да не погубит грешник безгрешнаго (с собою): 20 не восхощет Бог милостив быти ему, но тогда разгорится гнев Господень и ревность Его на человека того: и прилепятся ему вся клятвы завета сего, писанныя в книзе закона сего: и потребит Господь имя его от поднебесныя, 21 и отлучит его Господь на злая от всех сынов Израилевых, по всем клятвам завета написаннаго в книзе закона сего. 22 И речет род ин, сынове ваши, иже востанут по вас, и чуждый иже приидет от земли далекия, и узрят язвы земли оныя и недуги ея, яже посла Господь на ню, 23 жупел и соль сожженную: вся земля ея не насеется, ни прозябнет, ниже возникнет на ней всяк злак: якоже опровержеся Содом и Гоморр, Адама и Севоим, яже опроверже Господь в ярости и гневе Своем. 24 И рекут вси языцы: почто сотвори Господь сице земли сей? Кая ярость гнева великая сия? 25 И рекут: яко оставиша завет Господа Бога отец своих, егоже завеща отцем их, егда изведе их от земли Египетския, 26 и шедше послужиша богом иным, и поклонишася им, ихже не ведяху, и не даде им ничтоже ни един: 27 и разгневася яростию Господь на землю ту, еже навести на ню по всем клятвам завета, писанным в книгах закона сего: 28 и изят их Господь от земли их яростию и гневом, и прогневанием великим зело, и изверже их в землю ину якоже ныне. 29 Тайная Господеви Богу нашему, нам же явленная и чадом нашым во веки, творити вся словеса закона сего. === 30 === 1 И будет егда приидут на тя вся словеса сия, благословение и клятва, юже дах пред лицем твоим, и приимеши в сердце твое во всех языцех, в няже расточит тя Господь Бог твой тамо, 2 и обратишися ко Господу Богу твоему, и послушаеши гласа Его по всем, елика аз заповедаю тебе днесь, ты и сын твой, от всего сердца твоего и от всея души твоея, 3 и исцелит Господь грехи твоя и помилует тя, и паки соберет тя от всех языков, в няже разсыпа тя Господь Бог тамо. 4 Аще будет разсеяние твое от края небесе даже до края небесе, оттуду соберет тя Господь Бог твой и оттуду возмет тя, 5 и введет тя Господь Бог твой оттуду в землю, юже наследиша отцы твои, и наследиши ю: и благо тебе сотворит, и умножит тя паче отец твоих 6 и очистит Господь сердце твое и сердце семене твоего, любити Господа Бога твоего от всего сердца твоего и от всея души твоея, да живеши ты: 7 и даст Господь Бог твой клятвы сия на враги твоя и на ненавидящыя тя, иже изгнаша тя: 8 и ты обратишися и послушаеши гласа Господа Бога твоего и сотвориши заповеди Его, елики аз заповедаю тебе днесь. 9 И благословит тя Господь Бог твой во всяком деле руку твоею, в плодех утробы твоея и в плодех скотов твоих и в житех земли твоея, яко обратится Господь Бог твой возвеселитися о тебе во благих, якоже возвеселися от отцех твоих: 10 аще послушаеши гласа Господа Бога твоего хранити и творити вся заповеди Его и оправдания Его и суды Его, написанныя в книзе закона сего: аще обратишися ко Господу Богу твоему от всего сердца твоего и от всея души твоея. 11 Яко заповедь сия, юже аз заповедаю тебе днесь, не тяжка есть, ниже далече есть от тебе: 12 не на небеси есть, глаголя: кто взыдет от нас на небо и возмет ю нам, и услышавше ю сотворим? 13 Ниже об ону страну моря есть, глаголяй: кто прейдет нам на юну страну моря и возмет ю нам, и услышавше ю сотворим? 14 Близ тебе есть глагол зело, во устех твоих и в сердцы твоем и в руку твоею, творити его. 15 Се, дах пред лицем твоим днесь жизнь и смерть, благо и зло. 16 Аще послушаеши заповедий Господа Бога твоего, яже аз заповедаю тебе днесь, любити Господа Бога твоего, ходити во всех путех Его и хранити оправдания Его и заповеди Его и суды Его, и поживеши, и умножишися, и благословит тя Господь Бог твой на всей земли, в нюже входиши наследити ю тамо. 17 И аще превратится сердце твое, и не послушаеши, и заблудив поклонишися богом иным и послужиши им, 18 возвещаю вам днесь, яко погибелию погибнете, и не многодневни будете на земли, юже Господь Бог дает тебе, в нюже вы преходите Иордан тамо наследити ю. 19 Засвидетелствую вам днесь небом и землею: живот и смерть дах пред лицем вашим, благословение и клятву: и избери живот, да живеши ты и семя твое, 20 любити Господа Бога твоего, послушати гласа Его и прилепитися к Нему: яко сие живот твой, и долгота дний твоих, жити на земли, еюже клятся Господь Бог отцем твоим, Аврааму и Исааку и Иакову, дати им. === 31 === 1 И сконча Моисей глаголя вся словеса сия ко всем сыном Израилевым 2 и рече к ним: ста и двадесяти лет аз есмь днесь: не возмогу ксему входити и исходити: Господь же рече ко мне: не прейдеши Иордана сего: 3 Господь Бог твой предидый пред лицем твоим, Той потребит языки сия от лица твоего, и наследиши их: и Иисус предидый пред лицем твоим, якоже глагола Господь: 4 и сотворит им Господь, якоже сотвори Сиону и Огу, двум царем Аморрейским, иже быша об он пол Иордана, и земли их, якоже потреби их 5 и предаде их Господь в руце ваши: и сотворите им, якоже заповедах вам: 6 мужайся и крепися, не бойся, ни ужасайся, ни устрашайся от лица их: яко Господь Бог твой, Сей предидый с вами, и не отступит от тебе, ниже оставит тя. 7 И призва Моисей Иисуса и рече ему пред всем Израилем: мужайся и крепися: ты бо внидеши пред лицем людий сих в землю, юже клятся Господь отцем вашым дати им, и ты в наследие разделиши ю им: 8 и Господь, идый с тобою, не отступит от тебе, ниже оставит тя: не бойся, ни ужасайся. 9 И вписа Моисей вся словеса закона сего в книгу и даде жерцем сыном Левииным, воздвижущым ковчег завета Господня, и старцем сынов Израилевых. 10 И заповеда им Моисей в той день, глаголя: по седми летех во время лета оставления, в праздник кущей? 11 Егда сходится весь Израиль явитися пред Господем Богом твоим на месте, еже изберет Господь, читайте закон сей пред всем Израилем во ушы их: 12 соберите люди, мужы и жены и дети, и пришелца, иже во градех ваших, да услышат и научатся боятися Господа Бога вашего, и послушают творити вся словеса закона сего: 13 и сынове их, иже не ведят, услышат и научатся боятися Господа Бога вашего во вся дни, елики поживут на земли, на нюже вы преходите Иордан тамо наследити ю. 14 И рече Господь к Моисею: се, приближишася дние смерти твоея: призови Иисуса, и станите пред дверми скинии свидения, и заповем ему и иде Моисей и Иисус ко скинии свидения, и счаста пред дверми скинии свидения. 15 И сниде Господь в столпе облачне, и ста у дверий скинии свидения: и ста столп облачный у дверий скинии свидения. 16 И рече Господь к Моисею: се, ты почиеши со отцы твоими, и воставше людие сии соблудят вслед богов чуждих земли, в нюже входят сии тамо, и оставят Мя, и разорят завет Мой, егоже завещах им: 17 и разгневаюся яростию на ня в той день, и оставлю я, и отвращу лице Мое от них, и будут в снедь: и обрящут я зла многа и скорби, и рекут в день той: понеже несть Господа Бога в нас, постигнуша ны злая сия: 18 Аз же отвращением отвращу лице Мое от них в той день, злоб ради всех яже сотвориша, яко обратишася к богом чуждим: 19 и ныне напишите словеса песни сея, и научите ей сыны Израилевы, и вложите ю во уста их, да будет Мне песнь сия во свидетелство в сынех Израилевых: 20 введу бо их в землю благую, еюже кляхся отцем их, дати им землю кипящую медом и млеком, и ядят, и насытившеся утолстеют, и обратятся к богом чуждим, и послужат им, и разгневают Мя, и разорят завет Мой, егоже завещах им: 21 и будет егда постигнут их многа зла и скорби, и противостанет песнь сия пред лице их свидетелствующи, яко не забвена будет от яст их и от уст семене их: Аз бо вем злобу их, елика творят днесь зде, прежде введения их в землю благую, еюже кляхся отцем их. 22 И написа Моисей песнь сию в той день и научи ей сыны Израилевы и заповеда Моисей Иисусу сыну Навину и рече ему: 23 мужайся и крепися: ты бо введеши сыны Израилевы в землю, еюже клятся им Господь, и Той будет с тобою. 24 Егда же сконча Моисей пиша вся словеса закона сего в книгу даже до конца, 25 и заповеда левитом воздвижущым ковчег завета Господня, глаголя: 26 вземше книгу закона сего, положите ю от страны ковчега завета Господа Бога вашего, и будет тамо вам во свидетелство: 27 яко аз вем рвение твое и выю твою жестокую: еще бо мне живу сущу с вами днесь, преогорчающе бысте Господа, кольми паче по смерти моей? 28 Соберите ко мне племеноначалники вашя и старцы вашя, и судии вашя и книговводители вашя, да возглаголю во ушы их вся словеса сия и засвидетелствую им небом и землею: 29 вем бо, яко по скончании моем беззаконием собеззаконнуете и уклонитеся от пути, егоже (аз) заповедах вам, и срящут вас злая в последния дни, яко сотворите злое пред Господем Богом, прогневати Его в делех рук ваших. 30 И глагола Моисей во ушеса всего сонма Израилева словеса песни сея даже до конца: === 32 === 1 Вонми, небо, и возглаголю, и да слышит земля глаголы уст моих, 2 да чается яко дождь вещание мое, и да снидут яко роса глаголи мои, яко туча на троскот и яко иней на сено: 3 яко имя Господне призвах, дадите величие Богу нашему. 4 Бог, истинна дела Его, и вси путие Его суд: Бог верен, и несть неправды в Нем: праведен и преподобен Господь. 5 Согрешиша, не Того чада порочная: роде строптивый и развращенный, 6 сия ли Господеви воздаете, сии людие буии и не мудри? Не Сам ли сей Отец твой стяжа тя, и сотвори тя, и созда тя? 7 Помяните дни вечныя, разумейте лета рода родов: вопроси отца твоего, и возвестит тебе, старцы твоя, и рекут тебе. 8 Егда разделяюще Вышний языки, яко разсея сыны Адамовы, постави пределы языков по числу ангел Божиих, 9 и бысть часть Господня, людие Его Иаков, уже наследия Его Израиль: 10 удовли его в пустыни, в жажди зноя в безводне: обыде его и наказа его, и сохрани его яко зеницу ока: 11 яко орел покры гнездо свое, и на птенцы своя возжеле: простер криле свои и прият их, и подят их на раму своею. 12 Господь един вождаше их, и не бе с ними бог чуждь: 13 возведе я на силу земли, насыти их жит селных: ссаша мед из камене и елей от тверда камене, 14 масло кравие и млеко овчее с туком агнчим и овним сынов юнчих и козлих, с туком пшеничным, и кровь гроздову пияху вино. 15 И яде Иаков и насытися, и отвержеся возлюбленный: уты, утолсте, разшире: и остави Бога сотворшаго его, и отступи от Бога спаса своего. 16 Прогневаша Мя о чуждих, и в мерзостех своих преогорчиша Мя. 17 Пожроша бесовом, а не Богу, богом, ихже не ведеша: нови и секрати приидоша, ихже не ведеша отцы их. 18 Бога рождшаго тя оставил еси и забыл еси Бога питающаго тя. 19 И виде Господь, и возревнова, и раздражися за гнев сынов их и дщерей, 20 и рече: отвращу лице Мое от них и покажу, что будет им напоследок, яко род развращен есть, сынове, имже несть веры в них: 21 тии раздражиша Мя не от бозе, прогневаша Мя во идолех своих: и Аз раздражу их не о языце, от языце же неразумливе прогневаю их: 22 яко огнь возгорится от ярости Моея, разжжется до ада преисподняго, снест землю и жита ея, попалит основания гор: 23 соберу на них злая, и стрелы Моя скончаю в них: 24 тающе гладом и снедию птиц, и горб неисцелен: зубы зверий послю в на, с яростию пресмыкающихся по земли: 25 отвне обезчадит их мечь, и от храмов их страх: юноша с девою, ссущее с совершенным старцем. 26 Рех: разсею их, уставлю же от человек память их: 27 токмо за гнев врагов, да не долголетствуют, и да не налягут супостати, да не рекут: рука наша высока, и не Господь сотвори сия вся: 28 яко язык погубивый совет есть, и несть в них художества, не смыслиша разумети: 29 сия вся да приимут во грядущее лето. 30 Како поженет един тысящы, и два двигнета тмы, аще не Бог отдаде их, и Господь предаде их? 31 Не суть бо бози их, яко Бог наш: врази же наши неразумливи. 32 От виноградов бо Содомских виноград их, и розга их от Гоморры: грозд их грозд желчи, грозд горести их: 33 ярость змиев вино их, и ярость аспидов неисцельна. 34 Не сия ли вся собрашася у Мене и запечатлешася в сокровищах Моих? 35 В день отмщения воздам, во время егда соблазнится нога их: яко близ день погибели их, и предстоят готовая вам: 36 яко судити имать Господь людем Своим, и о рабех Своих умолен будет: виде бо их разслабленны и истаявшя во время и изнемогшя. 37 И рече Господь: где суть бози их, на нихже уповаша, 38 ихже тук жертв их ядясте, и пиясте вино треб их? Да воскреснут и помогут вам, и будут вам покровители. 39 Видите, видите, яко Аз есмь, и несть Бог разве Мене: Аз убию и жити сотворю: поражу и Аз исцелю, и несть иже измет от руку Моею: 40 яко воздвигну на небо руку Мою, и кленуся десницею Моею, и реку: живу Аз во веки: 41 яко поострю якоже молнию мечь Мой, и приимет суд рука Моя, и воздам месть врагом и ненавидящым Мя воздам: 42 упою стрелы Моя от крове, и мечь Мой снест мяса от крове язвеных и пленения, от глав князей языческих. 43 Возвеселитеся, небеса, купно с Ним, и да поклонятся Ему вси Ангели Божии: возвеселитеся, языцы, с людьми Его, и да укрепятся ему вси сынове Божии: яко кровь сынов Своих отмщает и отмстит, и воздаст месть врагом и ненавидящым Его воздаст: и очестит Господь землю людий Своих. 44 И написа Моисей песнь сию в той день, и научи ей сыны Израилевы: и вниде Моисей к людем и глагола вся словеса закона сего во ушы людем, сам и Иисус Навин. 45 И сконча Моисей глаголя словеса сия вся всему Израилю, 46 и рече к ним: внемлите сердцем вашим вся словеса сия, яже аз засвидетелствую вам днесь, яже да заповесте сыном вашым, хранити и творити вся словеса закона сего, 47 яко не тщетно слово сие вам, зане сия жизнь ваша, и ради слова сего долги дни будете на земли, на нюже вы преходите Иордан тамо наследити ю. 48 И рече Господь к Моисею в день сей, глаголя: 49 взыди на гору Аварим, сия гора Навав, яже есть в земли Моавли прямо Иерихону, и виждь землю Ханааню, юже аз даю сыном Израилевым во обдержание: 50 и скончайся тамо на горе, на нюже восходиши, и приложися к людем твоим, якоже умре Аарон брат твой на горе Ор и приложися к людем своим: 51 понеже не покористеся словеси Моему в сынех Израилевых у воды Пререкания Кадис в пустыни Син, понеже не освятисте Мене в сынех Израилевых: 52 яко прямо узриши землю, и тамо не внидеши, юже даю сыном Израилевым. === 33 === 1 И сие благословение, имже благослови Моисей человек Божий сыны Израилевы прежде скончания своего, 2 и рече: Господь от Синаи прииде, и явися от Сиира нам, и приспе от горы Фарани, и прииде со тмами святых, одесную Его ангели с ним, 3 и пощаде люди Своя: и вси освященнии под руками Твоими, и сии под Тобою суть. 4 И прия от словес Его закон, егоже заповеда нам Моисей, наследие сонму Иаковлю: 5 и будет в Возлюбленнем князь, собравшымся князем людским купно с племены Израилевыми. 6 Да живет Рувим, и да не умрет, и Симеон да будет мног числом. 7 И сие Иуде: услыши, Господи, глас Иудин и в люди его вниди: руце его поборют по нем, и помощник на враги его да будеши. 8 И Левию рече: дадите Левию явленная Его, и истину Его мужу преподобну, егоже искусиша Искушением, укориша его у воды Пререкания: 9 глаголяй отцу своему и матери своей: не видех тебе: и братии своея не позна, и сынов своих не уведе: сохрани словеса Твоя и завет Твой соблюде: 10 явят оправдания Твоя Иакову и закон Твой Израилю: возложат фимиам во гневе Твоем всегда на олтарь Твой: 11 благослови, Господи, крепость его и дела руку его приими: порази чресла воставших на него врагов его, и ненавидящии его да не востанут. 12 И Вениамину рече: возлюбленный Господем уповаяй вселится (в Нем), и Бог осеняет его во вся дни, и посреде рамен Его почи. 13 И Иосифови рече: от благословения Господня земля его, от красот небесных и росы, и от бездн источников низу, 14 и во время плодов солнечных обращений, и от схождений месячных, 15 и от верха гор начала, и от верха холмов вечных, 16 и по времени земли исполнения: и приятная Явившемуся в купине, да приидут на главу Иосифу, и на версе прославивыйся в братии. 17 Первородный юнца доброта его, рози единорога рози его: ими языки избодет вкупе даже до края земли: сия тмы Ефремовы, и сия тысящи Манассиины. 18 И Завулону рече: возвеселися, Завулоне, во исходе твоем, и Иссахаре в селениих твоих: 19 языки потребят: и призовете тамо, и пожрете тамо жертву правды: яко богатство морское воздоит тя, и купли от язык при мори живущих. 20 И Гаду рече: благословен разширяяй Гада: яко лев почи, сокрушивый мышцу и князя: 21 и виде начатки своя, яко тамо разделися земля, князей собранных вкупе с началники людскими: правду Господь сотвори и суд Свой со Израилем. 22 И Дану рече: Дан, скимен львов, и изскочит от Васана. 23 И Неффалиму рече: Неффалиму насыщение приятных, и да насытится благословением от Господа: море и юг наследит. 24 И Асиру рече: благословен от чад Асир, и будет приятен братии своей: омочит в елей ногу свою: 25 железо и медь сапог его будет, и аки дни твоя крепость твоя. 26 Несть якоже Бог Возлюбленнаго: восходяй на небо помощник твой, и великолепый в тверди: 27 и покрыет тя Божие начало, и под крепостию мышцей вечных: и отженет от лица твоего врага, глаголя: да погибнеши: 28 и вселится Израиль уповая един на земли Иаковли в вине и пшенице: и небо ему облачно росою. 29 Блажен еси, Израилю: кто подобен тебе, людие спасаемии от Господа? Защитит помощник твой, и мечь хвала твоя: и солжут тебе врази твои, и ты на выю их наступиши. === 34 === 1 И взыде Моисей от аравофа Моавля на гору Навав, на верх Фазга, яже есть прямо Иерихону: и показа ему Господь всю землю Галаадску даже до Дана, 2 и всю землю Неффалимлю, и всю землю Ефремову и Манассиину, и всю землю Иудину даже до моря последняго, 3 и пустыню и окрестная (села) Иерихона, град Фиников даже до Сигора, 4 и рече Господь к Моисею: сия земля, еюже кляхся Аврааму и Исааку и Иакову, глаголя: семени вашему дам ю: и показах ю очесем твоим, и тамо не внидеши. 5 И скончася тамо Моисей раб Господень в земли Моавли словом Господним. 6 И погребоша его в земли Моавли близ дому Фогорова. И не уведа никтоже погребения его даже до дне сего. 7 Моисею же бе сто и двадесять лет, егда скончася: не отемнесте очи его, ни истлеста устне его. 8 И плакашася сынове Израилевы Моисеа во Аравофе Моавли у Иордана близ Иерихона тридесять дний. И скончашася дние плача сетования о Моисей. 9 И Иисус сын Навин наполнися духа разума: возложи бо Моисей руце свои на него. И послушаша его сынове Израилевы, и сотвориша якоже заповеда Господь Моисею. 10 И не воста ктому пророк во Израили якоже Моисей, егоже позна Господь лицем к лицу, 11 во всех знамениих и чудесех, егоже посла Господь сотворити я в земли Египетстей фараону и рабом его и всей земли его, 12 дивная великая, и руку крепкую (и мышцу высокую), яже сотвори Моисей пред всем Израилем. == Иисус Навин == === 1 === 1 И бысть по скончании Моисеа раба Господня, и рече Господь Иисусу сыну Навину, служителю Моисеову, глаголя: 2 Моисей раб Мой скончася: ныне убо востав прейди Иордан ты и вси людие сии в землю, юже Аз даю им: 3 всякое место, по немуже прейдете стопою ног ваших, вам дам е, якоже глаголах Моисею: 4 пустыню и Антиливан сей даже до реки великия реки Евфрата, всю землю Ефеоню, и даже до моря последняго: от запада солнца будут пределы ваши: 5 не супротивится человек пред вами во вся дни живота твоего, и якоже бех с Моисеом, тако буду и с тобою: и не оставлю тебе, ниже презрю тя: 6 крепися и мужайся: ты бо разделиши людем сим землю, еюже кляхся отцем вашым дати им: 7 крепися убо, и мужайся зело, хранити и творити, якоже тебе заповеда Моисей раб Мой, и не уклонися от них ни на десно, ни на лево, да смыслиши во всех, яже твориши: 8 и да не отступит книга закона сего от уст твоих, и да поучаешися в ней день и нощь, да уразумееши творити вся писанная: тогда благоуспееши и исправиши пути твоя, и тогда уразумееши: 9 се, заповедаю тебе: крепися и мужайся, ни ужасайся, ниже убойся: яко с тобою Господь Бог твой во всех, аможе аще пойдеши. 10 И заповеда Иисус книгочиям людским, глаголя: 11 внидите посреде полка людий и заповедайте людем, глаголюще: уготовайте брашно, яко еще три дни, и вы прейдете Иордан сей, вшедше прияти землю, юже Господь Бог отец ваших дает вам в причастие. 12 И Рувиму и Гаду и полуплемени Манассиину рече Иисус: 13 помяните слово, еже заповеда вам Моисей раб Господень, глаголя: Господь Бог ваш упокои вас и даде вам землю сию: 14 жены ваши и дети ваши и скоти ваши да живут на земли, юже даде вам Моисей у Иордана: вы же прейдете вооружени пред братиею вашею, всяк крепок, и споборствуете им, 15 дондеже упокоит Господь Бог ваш братию вашу, якоже и вас, и наследят и сии землю, юже Господь Бог ваш дает им: и отидете кийждо в наследие свое, и наследите е, еже даде вам Моисей об Ону страну Иордана от востоков солнца. 16 И отвещавше Иисусу, реша: вся, елика заповеси нам, сотворим, и во всякое место, аможе послеши нас, пойдем: 17 по всем, елика слушахом Моисеа, тебе послушаем: токмо да будет Господь Бог наш с тобою, якоже бе с Моисеем: 18 человек же, иже аще не покорится тебе и иже не послушает словес твоих, якоже заповеси ему, да умрет: точию крепися и мужайся. === 2 === 1 И посла Иисус сын Навин из Саттина два юношы соглядати втай, глаголя: взыдите и видите землю и Иерихон. И шедша два юношы внидоста во Иерихон и внидоста в дом жены блудницы, ейже имя Раав: и витаста тамо. 2 И поведаша царю Иерихонскому, глаголюще: се, мужие внидоша семо (в сию нощь) от сынов Израилевых соглядати землю. 3 И посла царь Иерихонский и рече к Рааве, глаголя: изведи мужы вшедшыя в дом твой нощию: соглядати бо землю приидоша. 4 И поемши жена два мужа, сокры их: и рече им, глаголющи: приидоша ко мне мужие, но не вем откуду быша: 5 егда же врата затворяху в сумраки, и мужие изыдоша: не вем камо поидоша: пожените скоро вслед их, аще постигнете их. 6 Она же возведе я на храмину и сокры я в паздере льняне собранем у нея на храмине. 7 И мужие гнаша вслед их путем ко Иордану к преходом, и врата затворены быша. 8 И бысть егда изыдоша женущии вслед их, и сии прежде неже уснути им, и она взыде к ним на храмину и рече к ним: 9 вем, яко предаде Господь землю (сию) вам: нападе бо страх ваш на ны, и ужасошася вси обитающии на земли от лица вашего: 10 слышахом бо, яко изсуши Господь Бог море Чермное пред лицем вашим, егда исхождасте из Египта, и елика сотвористе двоим царем Аморрейским, иже быша об ону страну Иордана, Сиону и Огу, ихже потребисте: 11 и слышавше мы ужасохомся в сердцы нашем, и не ста ктому дух ни во единем от нас от лица вашего: яко Господь Бог ваш, Бог на небеси горе и на земли доле: 12 и ныне кленитеся мне Господем Богом (вашим), яко аз творю милость вам, да сотворите и вы милость в дому отца моего, и дадите ми знамение истинно: 13 и оживите дом отца моего, и матерь мою, и братию мою, и сестры моя, и вся, елика суть им, и измите душы нашя от смерти. 14 И рекоша ей мужие: душа наша вместо вас на смерть, аще ныне не объявиши нас. Она же рече: и будет егда предаст Господь вам град (сей), сотворите мне милость и истину. 15 И свеси их на верве окном: яко дом ея при стене, и при стене сия живяше: 16 и рече им: отидите в гору, да не срящут вас гонящии, и скрыйтеся тамо три дни, дондеже возвратятся гонящии вслед вас: и по сих отидете в путь ваш. 17 И реша к ней мужие: неповинни есмы клятве сей твоей, еюже закляла еси нас: 18 се, мы входим в часть града, и поставиши знамение, вервь червлену, сию да обяжеши у окна, имже спустила еси нас: отца же твоего и матерь твою, и братию твою и весь дом отца твоего да собереши к себе в дом твой: 19 и будет всяк, иже аще изыдет из дверий дому твоего вон, сам себе повинен будет, мы же неповинни (будем) клятве твоей сей: и елицы аще с тобою будут в дому твоем, мы будем повинни, аще рука прикоснется их: 20 аще же кто нас обидит, или открыет словеса наша сия, будем неповинни клятве твоей сей, еюже закляла еси нас. 21 И рече им: по словеси вашему тако да будет. И отпусти их, и отидоша: и привяза вервь червлену у окна. 22 И отидоша, и проидоша в гору, и пребыша тамо три дни, дондеже возвратишася гнавшии. И искаша гонящии по всем путем, и не обретоша. 23 И возвратистася два юношы и снидоста с горы: и преидоста (Иордан) ко Иисусу сыну Навину, и поведаста ему вся случившаяся има: 24 и реста ко Иисусу: яко предаде Господь Бог наш в руце наши всю землю, и убояшася вси живущии на земли той от нас. === 3 === 1 И воста заутра Иисус, и воздвигошася из Саттина, и приидоша до Иордана той и вси сынове Израилевы, и сташа тамо прежде неже прейти. 2 И бысть по триех днех, проидоша книгочия чрез полк, 3 и заповедаша людем, глаголюще: егда узрите кивот завета Господа Бога нашего, и жерцы нашя, и левиты воздвизающыя его, да воздвигнетеся и вы от мест ваших и пойдете вслед его: 4 но подалее да будет между вами и оным, елико две тысящы лакот станете: не приближитеся к нему, да увесте путь, по немуже пойдете: не ходисте бо путем тем ни вчера, ни третияго дне. 5 И рече Иисус к людем: очиститеся наутрие, яко заутра сотворит в вас Господь чудная. 6 И рече Иисус к жерцем: воздвигните кивот завета Господня и предидите пред людьми. И взяша жерцы кивот завета Господня и идоша пред людьми. 7 И рече Господь ко Иисусу: в сей день начинаю возвышати тя пред всеми сынми Израилевыми, да уведят, якоже бех с Моисеом, тако буду и с тобою: 8 и ныне заповеждь жерцем воздвизающым кивот завета, глаголя: егда внидете на часть воды Иордана, и во Иордане станете. 9 И рече Иисус сыном Израилевым: приступите семо, и слышите слово Господа Бога вашего: 10 в сих увесте, яко Господь живяй в вас и потребляяй потребит от лица вашего Хананеа и Хеттеа, и Ферезеа и Евеа, и Гергесеа и Аморреа и Иевусеа: 11 се, кивот завета Господа всея земли преходит Иордан: 12 изберите себе дванадесять мужей от сынов Израилевых, единаго от коегождо племене, 13 и будет егда почиют нози жерцев воздвизающих кивот завета Господа всея земли в воде Иордана, вода Иорданова оскудеет, вода же низтекущая станет. 14 И бысть егда воздвигнушася людие от кущ своих прейти Иордан, жерцы же воздвигоша кивот завета Господня пред людьми: 15 егда же внидоша жерцы воздвижуще кивот завета Господня во Иордан, и нози жерцев воздвизающих кивот завета Господня омочишася в части воды Иордана, Иордан же наполняшеся во вся краи своя, якоже во дни жатвы пшеницы: 16 и сташа воды текущыя свыше, ста огустение едино отлучившееся далече зело зело от Адами града даже до страны Кариафиарима: низтекущая же низтече в море Аравско, в море Сланое, дондеже до конца оскуде. 17 И людие стояху прямо Иерихону. И сташа жерцы воздвизающии кивот завета Господня на сусе посреде Иордана: и вси сынове Израилевы прехождаху по суху, дондеже скончаша вси людие преходяще Иордан. === 4 === 1 И егда скончаша вси людие преходяще Иордан, и рече Господь к Иисусу, глаголя: 2 поими дванадесять мужей от людий, мужа единаго от коегождо племене, 3 повели им, глаголя: возмите от среды Иордана, идеже стояша нози жречестии, готовых дванадесять каменей, и изнесше я с собою, положите в полце вашем, идеже станете тамо в нощи. 4 И призвав Иисус дванадесять мужей славных от сынов Израилевых, единаго от коегождо племене, рече им: 5 идите предо мною пред лицем Господним в средину Иордана: и взем оттуду кийждо камень един да возложит на рамена своя, по числу племен (сынов) Израилевых: 6 да будут вам сии в знамение посреде вас лежаще всегда, да егда вопросит тебе утро сын твой, глаголя: что суть камение сие вам? 7 И ты возвестиши сыну твоему, глаголя: яко оскуде Иордан река от лица кивота завета Господа всея земли, егда прехождаше его, и изсяче вода Иорданова: и будут вам камение сие в память сынов Израилевых даже до века. 8 И сотвориша тако сынове Израилевы, якоже заповеда Господь Иисусу: и вземше дванадесять каменей от среды Иордана, якоже заповеда Господь Иисусу в скончании прехождения сынов Израилевых, и принесоша их с собою в полк, и положиша их тамо. 9 Постави же Иисус и другия дванадесять каменей в самем Иордане на месте, идеже стояху нози жерцев воздвизающих кивот завета Господня, и суть тамо даже до сего дне. 10 Стояху же жерцы воздвизающии кивот завета Господня во Иордане, дондеже сконча Иисус вся, елика заповеда Господь Иисусу поведати людем, по всем, елика заповеда Моисей Иисусу: и потщашася людие, и преидоша. 11 И бысть егда скончаша вси людие преходити (Иордан), прейде и кивот завета Господня, и камение пред ними. 12 И преидоша сынове Рувимли и сынове Гадовы и пол племене Манассиина устроены пред сынми Израилевы, якоже заповеда им Моисей: 13 четыредесять тысящ вооружени на рать преидоша пред Господем на брань ко граду Иерихону. 14 В той день возвеличи Господь Иисуса пред всем родом Израилевым: и бояхуся его, якоже бояхуся Моисеа, елико время поживе. 15 И рече Господь ко Иисусу, глаголя: 16 заповеждь жерцем, воздвизающым кивот завета свидения, изступити из Иордана. 17 И заповеда Иисус жерцем, глаголя: изыдите из Иордана. 18 И бысть егда изыдоша жерцы воздвизающии кивот завета Господня от среды Иордана, и поставиша ноги на сусе, и устремися вода Иорданова на место и пойде якоже вчера и третияго дне по всему краю. 19 И людие взыдоша от Иордана в десятый день перваго месяца: и ополчишася сынове Израилевы в Галгалех на стране, яже на восток солнца от Иерихона. 20 И дванадесять камения сия, яже взя от Иордана, постави Иисус в Галгалех, и рече к сыном Израилевым, глаголя: 21 егда вопросят вас сынове ваши, глаголюще: что суть камение сие? 22 Возвестите сыном вашым: яко по суху прейде Израиль Иордан сей, 23 изсушившу Господу Богу вашему воду Иорданю пред ними, дондеже преидоша, якоже сотвори Господь Бог ваш Чермному морю, еже изсуши Господь Бог ваш пред вами, дондеже преидохом: 24 да уведят вси языцы земнии, яко рука Господня крепка есть, и вы да чтете Господа Бога вашего во всякое время. === 5 === 1 И бысть егда услышаша царие Аморрейстии, иже бяху об ону страну Иордана, и царие Финическии, иже бяху близ моря, яко изсуши Господь Бог Иордан реку пред сыны Израилевыми, внегда преходити им, и истаяша мысли их, и ужасошася, и не бяше в них смышления ни единаго от лица сынов Израилевых. 2 В сие же время рече Господь Иисусу: сотвори себе ножи каменны от камене остраго, и сед обрежи сыны Израилевы второе. 3 И сотвори Иисус себе ножи каменны остры и обреза сыны Израилевы на месте нареченнем Холм обрезания. 4 И тако обреза Иисус сыны Израилевы: елицы тогда родишася на пути, и елицы тогда не обрезани быша от изшедших из Египта, всех сих обреза Иисус: вси людие изшедшии из Египта мужеска полу, вси мужие ратнии измроша в пустыни на пути, внегда изыдоша из Египта: 5 яко обрезани быша вси людие изшедшии, вси же людие, иже родишася в пустыни на пути, егда изыдоша из Египта, не обрезани быша: 6 четыредесять бо и два лета хождаше Израиль в пустыни Мавдаритиде: сего ради не обрезани быша мнози от тех воинов изшедших из земли Египетския, не послушавшии заповедий Господних, имже и определи Господь не видети земли, еюже клятся Господь отцем их дати нам землю кипящую медом и млеком: 7 вместо же сих постави сыны их, ихже обреза Иисус, яко скончаныя плоти бяху им, яко родишася на пути не обрезани: 8 обрезавшеся же покой имяху тамо седяще в полце, дондеже исцелишася. 9 И рече Господь Иисусу: в днешний день отях поношение Египетско от вас. И нарече имя месту тому Галгала, даже до сего дне. 10 И ополчишася сынове Израилевы в Галгалех и сотвориша Пасху в четвертыйнадесять день месяца от вечера на западе на поли Иерихонстем, 11 и ядоша от пшеницы земли оноя опресноки и новая: 12 в той день преста манна, повнегда ядоша от пшеницы земли, и ктому не бысть сыном Израилевым манны: но ядоша от плодов земли Финическия в лето оное. 13 И бысть егда бяше Иисус у Иерихона, и воззрев очима своима, виде человека стояща пред ним, и мечь его обнажен в руце его. И приступив Иисус, рече ему: наш ли еси, или от сопостат наших? 14 Он же рече ему: аз архистратиг силы Господни, ныне приидох (семо). И Иисус паде лицем своим на землю и поклонися ему, и рече: господи, что повелеваеши рабу твоему? 15 И рече архистратиг Господень ко Иисусу: иззуй сапог с ногу твоею: место бо, на немже ты стоиши, свято есть. И сотвори Иисус тако. 16 Иерихон же заключен и огражден бысть от лица сынов Израилевых: и никтоже из него исхождаше, ниже вхождаше. === 6 === 1 И рече Господь ко Иисусу: се, Аз предаю тебе в руце Иерихон и царя его, и сущыя в нем, сильны крепостию: 2 и обходите град окрест вси мужие крепцыи единою (на день), тако сотворите шесть дний: 3 и седмь жерцы да возмут седмь труб рожаных пред кивотом: и в седмый день оыдите град седмижды, и жерцы да вострубят в трубы рожаны: 4 и будет егда вострубите трубою рожаною, внегда услышати вам глас трубы, да воскликнут вси людие: и воскликнувшым им, падут сами стены града во основании своем, и внидут вси людие устремившеся кийждо прямо себе во град. 5 И вниде Иисус сын Навин к жерцем сынов Израилевых и рече им глаголя: возмите кивот завета Господня, и седмь жерцы да возмут седмь труб рожаных пред лицем кивота Господня. 6 И рече им глаголя: повелите людем оыти и окружити град, и воини да предидут вооружени пред кивотом Господним. 7 И бысть егда рече Иисус к людем, и седмь жерцы имуще седмь труб священных да предидут такожде пред Господем, и да вострубят доброгласно: и кивот завета Господня вслед по них да идет: 8 воини же да предидут напреди, и жерцы трубяще в трубы, и последующии созади кивота завета Господня бяху идуще и трубяще трубами. 9 Людем же заповеда Иисус, глаголя: не вопите, ниже да слышит кто гласа вашего, ниже да изыдет из уст ваших слово до дне, в оньже повелю вам сам воскликнути, и тогда воскликните. 10 И обшед кивот завета Божия окрест града (единою), абие иде в полк, и ста тамо. 11 Во вторый же день воста Иисус заутра, и воздвигоша жерцы кивот завета Господня. 12 И жерцы седмь носящии седмь труб предидяху пред кивотом Господним и трубиша трубами, и воини вооружени идяху, и прочии людие вслед кивота завета Господня идуще, и жерцы вострубиша трубами рожаными. 13 И обыдоша град в день вторый единою, и поидоша паки в полк: сице творяху шесть дний. 14 И бысть в седмый день, восташа в востание утреннее, и обыдоша град в той день седмижды. 15 И бысть во обхождении седмем вострубиша жерцы трубами, и рече Иисус к сыном Израилевым: воскликните, предаде бо Господь вам град: 16 и будет град сей проклят, и вся, елика суть в нем, Господу сил: токмо Раав блудницу снабдите ю, и вся, елика суть в дому ея, яко сокры прелагатаи, ихже посылахом: 17 но вы соблюдитеся от клятвы, да не когда помысливше вы возмете от клятвы, и сотворите полк сынов Израилевых клятву, и потребите ны: 18 злато же все и сребро, и медь и железо свято да будет Господу: в сокровище Господне да внесется. 19 И вострубиша жерцы трубами: егда же услышаша людие глас трубный, воскликнуша вси купно людие гласом великим и сильным: и падоша вся стены града окрест, и внидоша вси людие во град, кийждо противу себе, и прияша град. 20 И прокля и Иисус, и елика быша во граде, от мужеска полу и до женска, от юноши и до старца, и от телца до овцы и до осляте, все под мечь. 21 И двоим юношам соглядавшым землю рече Иисус: внидите в дом жены блудницы, и изведите ю оттуду, и вся, елика суть ея, якоже клястеся ей. 22 И внидоста два юношы соглядавшии град в дом жены, и изведосте Раав блудницу, и отца ея и матерь ея, и братию ея и все сродство ея, и вся елика быша ей, изведоста и постависта я вне полка Израилева. 23 И град сожгоша огнем со всем, еже бе в нем, кроме злата и сребра, меди и железа, яже отдаша в дом Господень внести Господеви. 24 И Раав блудницу и весь дом ея отеческий остави живы Иисус, и обитати сотвори во Израили даже до дне сего, понеже сокры прелагатаи, ихже посла Иисус соглядати Иерихона. 25 И прокля Иисус в той день, глаголя: проклят человек пред Господем, иже поставит и созиждет град сей Иерихон: на первенце своем оснует его, и на меншем своем поставит врата его. И сице сотвори Азан, иже от Вефиля: на Авироне первенце своем основа и, и на меншем спасенем постави врата его. 26 И бяше Господь со Иисусом, и бе имя его по всей земли. === 7 === 1 И прегрешиша сынове Израилевы прегрешением великим, и взяша от клятвы: взя бо Ахар сын Хармии, сына Замврии, сына Зары, от племене Иудина, от клятвы. И разгневася Господь яростию на сыны Израилевы. 2 И посла Иисус мужы от Иерихона в Гай, иже есть противу Вифавн на восток Вефиля, и рече им, глаголя: шедше соглядайте землю. И идоша мужие и соглядаша Гай. 3 И возвратишася ко Иисусу и рекоша ему: да не идут вси людие, но яко две тысящы или три тысящы мужей да идут и да воюют Гай: да не ведеши тамо всех людий, мало бо есть их (тамо). 4 И идоша от людий тамо, аки три тысящы мужей, и побегоша от лица мужей Гайских: 5 и убиша от них мужие Гайстии яко тридесять и шесть мужей, и отгнаша их от врат, дондеже сокрушиша их на стремнине: и ужасеся сердце людий, и бысть яко вода. 6 И растерза Иисус ризы своя, и паде на земли на лице свое пред Господем даже до вечера, сам и старцы Израилевы: и посыпаша персть на главы своя. 7 И рече Иисус: молюся, Господи Господи, вскую преведе раб Твой люди сия чрез Иордан предати их Аморреом на погубление? От, да быхом пребыли и вселилися у Иордана: 8 Господи, что реку? Понеже отврати Израиль выю свою пред враги своими: 9 и услышав Хананей и вси живущии на земли обыдут нас и потребят нас от земли: и что сотвориши имени Твоему великому? 10 И рече Господь ко Иисусу: востани, вскую ты пал еси на лице твое? 11 Согрешиша людие и преступиша завет Мой, егоже завещах к ним, и украдше от клятвы, скрыша в сосудех своих: 12 сего ради не могут сынове Израилевы стати пред лицем врагов своих, но хребет обратят пред враги своими, яко клятвою сташася: не приложу ксему быти с вами, аще не измете клятвы от себе самих: 13 востав очисти люди и рцы: очиститеся на утро: яко сия глаголет Господь Бог Израилев: клятва есть в вас, не возможете стати пред враги вашими, дондеже измете от себе самих клятву: 14 и соберитеся вси заутра по племеном (вашым), и будет племя, еже покажет Господь, да приведете по сонмом: и сонм, егоже покажет Господь, да приведете по домом: и дом, егоже покажет Господь, да приведете по мужем: 15 и иже обличится, да сожжется огнем, сам и вся елика суть его, яко преступи завет Господень и сотвори беззаконие во Израили. 16 И воста Иисус заутра, и приведе людий по племеном: и обличися племя Иудино. 17 И приведеся по сонмом, и обличися сонм Зараин: и приведеся сонм Зараин по мужем, и обличися дом Замвриин. 18 И приведеся дом его по мужем, и обличися Ахар сын Хармиин сына Замвриина, сына Зараня, от племене Иудина. 19 И рече Иисус Ахару: сыне мой, даждь славу днесь Господу Богу Израилеву, и даждь Ему исповедание, и исповеждь ми, что сотворил еси, и не утай от мене. 20 И отвеща Ахар Иисусу и рече: поистинне аз согреших пред Господем Богом Израилевым: сице и сице сотворих: 21 видех в плене ризу красну и добру и двести дидрахм сребра, и сосуд един злат, пятьдесят дидрахм вес его: и помыслив на ня взях: и се, сия сокровенна суть в земли в кущи моей, и сребро сокровенно под ними. 22 И посла Иисус послы, и идоша в кущу в полк: и сия бяху сокровенна в кущи его, и сребро под ними, 23 и изнесоша я из кущи, и принесоша ко Иисусу и к старцем Израилевым, и положиша я пред Господем. 24 И взя Иисус Ахара сына Зараня, и сребро и ризу и сосуд златый, и возведе его в дебрь Ахор, и сыны его и дщери его, и телцы его и ослята его и вся овцы его, и кущу его и вся имения его, и весь Израиль по нем: и возведе я (со всем) во емек Ахор. 25 И рече Иисус Ахару: почто потребил еси нас? Да потребит тя Господь, якоже и днесь. И побиша его камением весь Израиль, и сожгоша вся огнем, и наметаша их камением, 26 и наметаша на нем громаду камения велику. И преста Господь от ярости гнева Своего. Сего ради прозвася имя месту тому емек Ахор даже до дне сего. === 8 === 1 И рече Господь ко Иисусу: не бойся, ниже ужасайся: поими с собою вся мужы воинския, и востав взыди в Гай: се, предах в руце твои царя Гайска и землю его, и люди его и град его: 2 и да сотвориши Гаю и царю его, якоже сотворил еси Иерихону и царю его: и плен его и скоты его да плениши себе: устрой же себе подсаду граду за собою. 3 И воста Иисус и вси мужие воинстии, да внидут в Гай: и избра Иисус тридесять тысящ мужей воинских сильных крепостию и посла их нощию, 4 и заповеда им, глаголя: вы скрыйтеся за градом: не далече будите от града зело, и будите вси готови: 5 аз же и вси людие иже со мною приступим ко граду: и будет егда изыдут живущии в Гаи в сретение нам, якоже и прежде, и побегнем от лица их: 6 и егда изыдут вслед нас, отторгнем их от града: и рекут: бежат сии от лица нашего, якоже и прежде: 7 вы же востанете от подсады, и пойдете во град, и предаст его Господь Бог наш в руце ваши: 8 и будет егда возмете град, запалите его огнем, по словеси сему сотворите: се, заповедаю вам. 9 И посла их Иисус, и идоша в подсаду: и седоша между Вефилем и между Гаием, от моря Гаиа. 10 И востав Иисус заутра, согляда люди: и взыде сам и старцы Израилтестии пред людьми в Гай. 11 И вси людие воинстии с ним взыдоша, и идуще приидоша сопротив града от востоков: и подсады града от моря. 12 И ополчишася от севера Гаиа, и (бысть) дебрь между ими и между Гаием. И взя яко пять тысящ мужей, и положи их на подсаду между Вефилем и Гаием от запада Гаиа. 13 И поставиша людие весь полк от севера града, а прочая его от моря града. И пойде Иисус в нощь ону посреде дебри. 14 И бысть егда увиде царь Гайский, потщася, и воста рано и изыде в сретение им прямо на брань, сам и вси людие его с ним во время, пред лицем подсады: он же не ведяше, яко подсада ему есть за градом (его). 15 И увиде, и отиде Иисус и весь люд от лица их, и побеже путем пустыни, 16 и укрепися весь люд гнати вслед их, и погнаша вслед сынов Израилевых, и отступиша от града. 17 (И) не остася никтоже в Гаи и Вефили, иже не погна вслед Израиля: и оставиша град отверст, и гнаша вслед Израиля. 18 И рече Господь ко Иисусу: простри руку твою с копием, еже в руце твоей, на град, зане в руку твою предах его: и подсады востанут вскоре от места своего. И простре Иисус руку свою и с копием на град. 19 И подсады восташа скоро от места своего: и изыдоша, егда простре руку, и внидоша во град, и взяша его: и потщавшеся запалиша град огнем. 20 И озревшеся обитатели Гайстии вспять себе, узреша дым восходящь от града до небесе, и ктому не имеша камо побегнути, семо или овамо: людие же бегущии в пустыню обратишася на гонящих. 21 Иисус же и весь Израиль увидеша, яко взяша подсады град, и яко восходит дым градный до небесе: и обратившеся избиша мужей Гайских. 22 И сии изыдоша из града противу им, и быша посреде полка Израилева, сии отсюду и сии отюнуду: и избиша их, дондеже не остася ни един от них цел, ни убежа. 23 И царя Гайска яша жива, и приведоша его ко Иисусу. 24 И бысть егда престаша сынове Израилевы секуще всех сущих в Гаи и сущих на полях и на горе исхода, идеже гониша их, и падоша вси острием меча на ней до конца: и обратися Иисус в Гай и посече их мечем. 25 И быша вси падшии в той день от мужеска полу и до женска дванадесять тысящ, вси живущии в Гаи. 26 Иисус же не обрати руки своея, юже простре с копием, дондеже прокля всех обитающих в Гаи. 27 Кроме скотов (их) и имения, яже во граде онем, вся плениша себе сынове Израилевы по повелению Господню, якоже повеле Господь Иисусу. 28 И запали град Иисус огнем: землю необитаему во век положи его даже до сего дне. 29 И царя Гайска повеси на древе сугубем: и бяше на древе до вечера: и заходящу солнцу повеле Иисус, и сняша тело его с древа, и повергоша и в ров пред враты града: и насыпа над ним громаду велику камения даже до сего дне. 30 Тогда созда Иисус олтарь Господу Богу Израилеву на горе Гевал, 31 якоже заповеда Моисей раб Господень сыном Израилевым, и якоже написася в законе Моисеове, олтарь от камений всецелых, на нихже не возложися железо: и вознесе тамо всесожжения Господу и жертву спасения. 32 И написа Иисус на камениих вторый закон, закон Моисеов, егоже написа пред сыны Израилевыми. 33 И весь Израиль, и старцы их и судии их и книгочия их предходяху сюду и сюду пред кивотом, и жерцы и левити воздвизаша кивот завета Господня, пришелец же и туземец: иже быша половина их близ горы Гаризин, и половина их близ горы Гевал, якоже заповеда Моисей раб Господень благословити людий Израилевых в первых. 34 И по сих тако прочте Иисус вся словеса закона сего, благословения и клятвы, по всему написанному в законе Моисеове. 35 Не бяше словесе от всех, яже заповеда Моисей Иисусу, егоже не прочте Иисус во уши всего сонма сынов Израилевых, мужем и женам, и детем и пришелцем приходящым ко Израилю. === 9 === 1 Егда же услышаша вси царие Аморрейстии, иже об ону страну Иордана, иже в горней и иже в равней, и иже во всем примории моря великаго и иже при Антиливане, и Хеттеи и Аморреи, и Гергесеи и Хананеи, и Ферезеи и Евеи и Иевусеи, 2 снидошася вкупе сещися со Иисусом и со Израилем единомысленно. 3 И живущии в холме в Гаваоне слышаша вся, елика сотвори Господь Иерихону и Гаю, 4 и сотвориша и сии с лукавством, и шедше уготоваша брашна и уготовашася: и вземше вретища ветха на ослы своя, и мехи вина ветхи и разседшыяся завязаны: 5 и сапоги ветхи и заплачены на ногу их, и ризы обветшаны на них, и хлебы брашна их беша пресохли и сплеснели и сдроблени. 6 И приидоша ко Иисусу в полк Израилев в Галгалы, и рекоша ко Иисусу и всему Израилю: от земли дальния приидохом, и ныне завещайте нам завет. 7 И рекоша сынове Израилевы к Хоррею: виждь, не посреде ли нас живеши, и како тебе завещаю завет? 8 И рекоша ко Иисусу: раби есмы твои. И рече к ним Иисус: откуду есте? И откуду приидосте? 9 И рекоша к нему: от дальния земли зело приидохом раби твои во имя Господа Бога твоего: слышахом бо имя Его и вся, елика сотвори во Египте, 10 и вся, елика сотвори двоим царем Аморрейским, иже быша об ону страну Иордана, Сиону царю Есевонску и Огу царю Васанску, иже живяше во Астарофе и во Едраине. 11 И слышавше рекоша к нам старцы наши и вси живущии на земли нашей, глаголюще: возмите себе брашно на путь и идите противу им, и рцыте к ним: раби есмы ваши, и ныне завещайте нам завет: 12 сии хлебы наши, теплыя на путь взяхом их от домов наших, в оньже день изыдохом приити к вам: ныне же пресхоша и быша содроблени: 13 и сии меси вина, ихже налияхом новы, и сии разседошася: и ризы нашя сия и обувища наша обетшаша от долгаго пути зело. 14 И взяша князи брашно их, а Господа не вопросиша. 15 И сотвори Иисус с ними мир, и устави к ним завет, еже снабдети их: и кляшася им князи сонма. 16 И бысть по триех днех по завещании к ним завета, услышаша, яко близ их суть и яко посреде их живут. 17 И восташа сынове Израилевы и внидоша во грады их в третий день: гради же их (бяху) Гаваон и Кефира, и Вирот и град Иарим. 18 И не сотвориша с ними рати (Иисус и) сынове Израилевы, яко кляшася им вси князи сонма Господем Богом Израилевым. И ропташа весь сонм Израилев на князей. 19 И рекоша вси князи всему сонму: мы кляхомся им Господем Богом Израилевым, и ныне не возможем коснутися их: 20 сие сотворим им, еже живити их, и снабдим их, и не будет на нас гнева клятвы ради, еюже кляхомся им. 21 И рекоша им князи: да живут сии, и будут древосечцы и водоносцы всему сонму. И сотвори весь сонм, якоже рекоша им князи. 22 И созва их Иисус и рече им, глаголя: почто прельстисте мя, глаголюще: далече есмы от тебе зело? Вы же населницы есте от живущих в нас: 23 и ныне прокляти есте: и не оскудеет от вас раб, ниже древосечец, ниже водоносец мне и Богу моему. 24 И отвещаша Иисусу, глаголюще: понеже возвестися нам (рабом твоим), елика заповеда Господь Бог твой Моисею рабу Своему, дати вам землю сию и потребити нас и вся живущыя на ней от лица вашего, сего ради убояхомся зело от душах наших от лица вашего, и сотворихом дело сие: 25 и ныне, се, мы подручни вам, якоже угодно есть вам, и якоже вам мнится, творите нам. 26 И сотвориша им сице: и избави я Иисус в той день от руку сынов Израилевых, и не убиша их. 27 И постави я Иисус в той день древосечцы и водоносцы всему сонму и олтарю Божию. Сего ради быша живущии в Гаваоне древосечцы и водоносцы олтарю Божию, даже до днешняго дне, и на месте еже аще изберет Господь. === 10 === 1 Егда же услыша Адонивезек царь Иерусалимский, яко взя Иисус Гай и потреби его, якоже сотвори Иерихону и царю его, тако сотвори и Гаю и царю его, и яко сами вдашася живущии в Гаваоне ко Иисусу и ко Израилю, и быша в них, 2 и убояшася сами в себе зело: ведяху бо, яко град бяше велик Гаваон, яко един от великих градов, и вси мужие иже в нем крепцы. 3 И посла Адонивезек царь Иерусалимский к Еламу царю Хевронску и Фераану царю Иеримуфску, и ко Афию царю Лахисску, и к Давиру царю Одолламску, глаголя: 4 приидите, взыдите ко мне и помозите ми, да повоюем Гаваона: вдашася бо сами ко Иисусу и к сыном Израилевым. 5 И собрашася и взыдоша пять царей Иевусейских: царь Иерусалимский и царь Хевронский, и царь Иеримуфский и царь Лахисский и царь Одолламский, сами и вси людие их, и обседоша Гаваона и воеваша на него. 6 И послаша живущии в Гаваоне ко Иисусу в полк Израилев в Галгалы, глаголюще: не отрешай руки твоея от раб твоих: взыди к нам скоро и помози нам, и изми нас: яко собрани суть на ны вси царие Аморрейстии, живущии в горней. 7 И взыде Иисус от Галгал, сам и вси людие воинстии с ним, всяк сильный крепостию. 8 И рече Господь ко Иисусу: не убойся их, яко в руце твои предах я: не останет от них ни един пред вами. 9 И прииде на них Иисус внезапу: всю бо нощь иде от Галгал. 10 И ужаси я Господь от лица сынов Израилевых: и сокруши я Господь сокрушением великим в Гаваоне: и погнаша я путем восхода Вифоронска, и сечаху их даже до Азика и до Макида. 11 Внегда же бежати им от лица сынов Израилевых до восхода Вифоронска, и Господь верже на ня камение великое града с небесе даже до Азика, и бысть множае умерших от града каменна, неже убиенных от сынов Израилевых мечем на брани. 12 Тогда глагола Иисус ко Господу, в оньже день предаде Господь Бог Аморреа под руку Израилеву, егда сокруши их в Гаваоне, и сокрушишася от лица Израилева: и рече Иисус: да станет солнце прямо Гаваону, и луна прямо дебри Елон. 13 И ста солнце и луна в стоянии, дондеже отмсти Бог врагом их. Не сие ли есть писано в книгах Праведнаго: и ста солнце посреде небесе и не идяше на запад в совершение дне единаго? 14 И не бысть день таковый ниже прежде, ниже последи, еже послушати Богу тако гласа человеча, яко Господь споборствова Израилю. 15 И возвратися Иисус и весь Израиль с ним в полк в Галгалы. 16 И убегоша пять царие сии и скрышася в пещере яже в Макиде. 17 И поведаша Иисусу, глаголюще: обретошася пять царие скрывшиися в пещере яже в Макиде. 18 И рече Иисус: привалите камение велие ко устию пещеры и приставите над ними мужы стрещи их: 19 вы же не стойте зде, гоняще вслед врагов ваших, и постигните останок их, и не дадите внити им во грады их, предаде бо я Господь Бог наш в руце наши. 20 И бысть егда преста Иисус и вси сынове Израилевы секуще их сечением великим зело даже до конца, и уцелевшии от них внидоша во грады тверды. 21 И возвратишася вси людие в полк ко Иисусу в Макиду здрави, и не возскомле никтоже от сынов Израилевых языком своим. 22 И рече Иисус: отверзите устие пещеры и изведите ко мне пять царей сих из пещеры. 23 И сотвориша тако, и изведоша к нему пять царей из пещеры: царя Иерусалимска и царя Хевронска, и царя Иеримуфска и царя Лахисска и царя Одолламска. 24 И егда изведоша их ко Иисусу, и созва Иисус всего Израиля и началники воинския ходящыя с ним, глаголя к ним: приступите и наступите ногами вашими на выи царей сих. И приступивше наступиша ногами своими на выи их. 25 И рече к ним Иисус: не бойтеся их, ни ужасайтеся: мужайтеся и крепитеся, яко сице сотворит Господь всем врагом вашым, ихже вы повоюете. 26 И уби я Иисус, и повеси я на пяти древесех: и быша висяще на древах даже до вечера. 27 И бысть при захождении солнца, повеле Иисус, и сняша я с древес, и ввергоша я в пещеру, в нюже вбегоша тамо: и завалиша камением великим пещеру до днешняго дне. 28 Взяша же и Макиду в той день, и избиша ю острием меча и царя ея, и потребиша их и все дышущее еже бяше в ней: и не остася никтоже в ней цел и избегший. И сотвориша царю Макидску, якоже сотвориша царю Иерихонску. 29 И отиде Иисус и весь Израиль с ним от Макиды в Левну, и облеже Левну. 30 И предаде ю Господь в руце Израилю: и взяша ю и царя ея, и избиша ю острием меча, и все дышущее в ней: и не остася в ней ни един цел и избегший. И сотвориша царю ея, якоже сотвориша царю Иерихонску. 31 И отиде Иисус и весь Израиль с ним от Левны в Лахис, и облеже его, и воеваше нань. 32 И предаде Господь Лахис в руце Израилевы: и взя его в день вторый, и избиша его острием меча (и все дышущее в нем), и потребиша его, якоже сотвориша Левне. 33 Тогда взыде Орам царь Газерск, помогаяй Лахису: и порази его Иисус острием меча, и люди его, дондеже не остася от них ни един цел и избегший. 34 И отиде Иисус и весь Израиль с ним от Лахиса во Аглон, и облеже и, и воева на него. 35 И предаде и Господь в руце Израилю: и взя и в той день, и изби и острием меча, и все дышущее в нем уби, и сотвори ему якоже и Лахису. 36 И отиде Иисус и весь Израиль с ним в Хеврон, и обсяде и: 37 и взя его, и порази его острием меча, и царя его, и вся веси его, и вся дышущая елика бяху в нем: не бе уцелевый: якоже сотвориша Аглону, потребиша и и все дышущее, елика в нем бяху. 38 И обратися Иисус и весь Израиль с ним в Давир: и обседше и, 39 взяша его и царя его и вся веси его, и поразиша и мечем, и потребиша и и все дышущее в нем, и не оставиша в нем ни единаго уцелевша: якоже сотвориша Хеврону и царю его, тако сотвориша Давиру и царю его, и якоже сотвориша Левне и царю ея. 40 И порази Иисус всю землю горную и Нагев, и равную и Асидоф, и вся цари его: не оставиша в нем ни единаго уцелевша: и все дышущее потребиша, якоже заповеда Господь Бог Израилю. 41 И изби их Иисус от Кадис-Варни даже до Газы, и всю землю Госом даже до Гаваона: 42 и вся цари сия и землю их взя Иисус единою: яко Господь Бог Израилев помогаше Израилю. 43 И возвратися Иисус и весь Израиль с ним в полк в Галгалы. === 11 === 1 Егда же услыша Иавин царь Асорск, посла ко Иоваву царю Мадонску, и к царю Семеронску и к царю Ахиавску, 2 и к царем иже в Сидоне велицем и в горней, и в Араву прямо Хенерефу, и на поляну, и в Нафеддор, 3 и к приморским Хананеам от восток, и к приморским Аморреом и Хеттеом, и Ферезеом и Иевусеом, иже на горе, и Евеом, и иже под Аермоном, в землю Массифа. 4 И изыдоша сии и царие их с ними, людие мнози, яко песок иже при краи моря множеством, и кони и колесницы многи зело. 5 И снидошася вси царие сии, и приидоша вкупе, и ополчишася при воде Маррон воевати на Израиля. 6 И рече Господь ко Иисусу: не убойся от лица их, яко заутра в сей час Аз предам их язвенных пред сыны Израилевы: конем их жилы пресечеши и колесницы их да сожжеши огнем. 7 И прииде Иисус и вси людие воинстии с ним на них к воде Марронстей внезапу, и нападоша на ня в горней. 8 И предаде их Господь под руце Израилевы: и секуще их, прогнаша даже до Сидона великаго и до Масрефоф-Маима и до поль Массифских к востоком: и изсекоша их, дондеже не остася в них ни един цел и избегший. 9 И сотвори им Иисус, якоже заповеда ему Господь: конем их жилы пресече и колесницы их сожже огнем. 10 И обратися Иисус в то время, и взя Асор, и царя его уби мечем: Асор бо бе прежде обладающий всеми царствы сими: 11 и изби все дышущее, еже в нем бысть, острием меча, и потребиша вся, и не остася в нем все дышущее: и Асор запалиша огнем. 12 И вся грады царств сих и вся цари их взя Иисус и изби я мечем, и потреби их, якоже повеле им Моисей раб Господень. 13 Но вся грады крепки не запали Израиль, точию Асор един запали Иисус. 14 И вся корысти их и вся скоты их плениша себе сынове Израилевы: людий же всех потребиша мечем, дондеже погубиша их, и не оставиша от них ни единаго дышущаго. 15 Якоже повеле Господь Моисею рабу Своему, тако Моисей заповеда Иисусу: и тако сотвори Иисус, не преступи ни единаго же от всех, яже заповеда Господь Моисею. 16 И взя Иисус всю землю горную и всю землю нагев, и всю землю Госомску, и равную, и яже на запад, и гору Израилеву, и поля яже при горе, 17 от горы Хелха, и яже восходит к Сеиру, и даже до Валгада, и поле Ливана под горою Аермон: и вся цари их взя и изби. 18 И многи дни сотвори Иисус с цари сими брань: 19 и не бе ни единаго града, егоже не предаде Господь сыном Израилевым, кроме Евеа обитающаго в Гаваоне: всех взяша бранию: 20 яко Господем бысть укрепитися их сердцу, сопротивитися на брани противу Израиля, да потребят их, яко да не дастся им милость, но да потребятся, якоже глагола Господь к Моисею. 21 И прииде Иисус в то время, и потреби (вся) Енакимы от горныя, от Хеврона и от Давира и от Анова, и от всея горы Израилевы и от всея горы Иудины, с грады их, и потреби я Иисус: 22 не остася ни един Енаким от сынов Израилевых, но точию в Газе и в Гефе и во Асидофе осташася. 23 И взя Иисус всю землю, якоже заповеда Господь Моисею: и даде ю Иисус в наследие Израилю, разделением по племеном их. И преста земля воюема быти. === 12 === 1 И сии царие земли, ихже избиша сынове Израилевы и наследиша землю их об ону страну Иордана, от восток солнца, от дебри Арнонския даже до горы Аермон, и всю землю араву от восток: 2 Сиона царя Аморрейска, иже живяше во Есевоне, обладаяй от Ароира, иже есть в дебри Арнонстей от страны дебри, и пол (земли) Галаада даже до Иавока, (идеже) пределы сынов Аммоних: 3 и арава даже до моря Хенереф на востоки, и даже до моря арава, моря Солищнаго от восток, путем иже ко Вифсимофу, и от Фемана иже под Асидоф-Фасгою: 4 и Ог царь Васанский остася от Исполинов, иже обита во Астарофе и во Едраине, 5 обладаяй от горы Аермон, и от Селхи, и всею землею Васан даже до предел Гесури, и Махафи, и пол Галаада до предел Сиона царя Есевонска. 6 Моисей раб Господень и сынове Израилевы поразиша я: и даде ю Моисей раб Господень в наследие Рувиму и Гаду и полплемени Манассиину. 7 И сии царие Аморрейстии, яже изби Иисус и сынове Израилевы об ону страну Иордана, при мори Валгад на поли Ливана, и даже до горы Алок, восходящих в Сиир: и даде ю Иисус племеном Израилевым в наследие по жребию их, 8 на горе и на поли, и во Араве и во Асидофе, и в пустыни и во нагеве, Хеттеа и Аморреа, и Хананеа и Ферезеа, и Евеа и Иевусеа: 9 царя Иерихонска и царя Гайска, иже есть близ Вефиля, 10 царя Иерусалимска, царя Хевронска, 11 царя Иеримуфска, царя Лахисска, 12 царя Еглонска, царя Газерска, 13 царя Давирска, царя Гадерска, 14 царя Ермафска, царя Адерска, 15 царя Левнска, царя Одолламска, 16 царя Макидска, царя Вефилска, 17 царя Апфуска, царя Оферска, 18 царя Афекска, царя Хесаромска, 19 царя Самвронска, царя Фувска, 20 царя Маронска, царя Ахсафска, 21 царя Фанахска, царя Магдедонска, 22 царя Кедесска, царя Иеконама Хермела, 23 царя Адорска Нафеддоря, 24 царя Гоимска Гелгеля, царя Ферска. Вси сии царие тридесять един. === 13 === 1 Иисус же состареся прошед дни. И рече Господь ко Иисусу: ты состарелся еси денми, и земля остася многа в наследие: 2 и сия земля оставшаяся: пределы Филистимли, Гесури и Хананей, 3 от Необитаемыя, яже от лица Египта даже до предел Аккаронских ошуюю Хананеов, причисляется пятим областем Филистимским: Газеу и Азотию, и Аскалониту и Гетфею, и Аккарониту и Евею: 4 от Феман и всей земли Ханаанстей прямо Газе, и Сидонии даже до Афека, даже до предел Аморрейских: 5 и всю землю Гавли Филистимлю, и весь Ливан от восток солнца, от Галгал под горою Аермон даже до входа Емаф: 6 всяк обитающий в горней от Ливана даже до Масрефофмаима, всех Сидонян Аз потреблю от лица Израилева: но раздай ю во жребий Израилю, якоже заповедах тебе: 7 и ныне раздели землю сию в наследие девяти племеном и полплемени Манассиину от Иордана даже до моря великаго, к западу солнца даси ю: море великое предел будет. 8 Дву же племеном и полуплемени Манассиину, Рувиму и Гаду, даде Моисей об ону страну Иордана: к востоком солнца даде им Моисей раб Господень, 9 от Ароира, иже есть на устии водотечи Арнони, и град иже посреде дебри, и весь Мисор от Медавана: 10 вся грады Сиона царя Аморрейска, иже царствова во Есевоне, даже до предел сынов Аммоних: 11 и Галаад, и пределы Гесури, и Махафи, всю гору Аермон, и всю Васанитску до Елхи: 12 все царство Огово в Васанитиде, иже царствова во Астарофе и во Едраине: сей остася (един) от Исполинов, и уби его Моисей, и потреби. 13 И не потребиша сынове Израилевы Гесура и Махафа и Хананеа: и живяше царь Гесури и Махафи в сынех Израилевых даже до сего дне. 14 Токмо племени Левиину не дадеся наследие: Господь Бог Израилев, сам наследие их, якоже рече им Господь. И сие разделение, еже раздели Моисей сыном Израилевым (по племеном их) во Аравофе Моавли об ону страну Иордана противу Иерихона. 15 И даде Моисей племени сынов Рувимлих по сонмом их: 16 и быша им пределы от Ароира, иже есть прямо дебри Арнонския, и град, иже есть в дебри Арнонстей, 17 и всю землю Мисорску даже до Есевона, и вся грады иже суть в мисоре, и Девор, и Вамоф-Ваал, и домы Веелмони, 18 и Иасса и Кедимофа и Мифааф, 19 и Кариафем и Севама, и Сарф и Сиор на горе Енак, 20 и Веффогор и Асидоф-Фасга и Вифсимуф, 21 и вся грады Мисорски, и все царство Сиона царя Аморрейска, егоже уби Моисей самаго, и старейшины Мадиамли, и Евиа и Рокома, и Сура и Ура и ровека, князи Сиорския, и живущих на земли (той): 22 и Валаама сына Веорова волхва убиша мечем сынове Израилевы в сражении. 23 Быша же пределы Рувимли, Иордан предел. Сие наследие сынов Рувимлих по сонмом их, грады их и села их. 24 Даде же Моисей сыном Гадовым по сонмом их, 25 и быша им пределы Иазир: вси гради Галаади и полземли сынов Аммоних до Ароира, иже есть пред лицем Раввафа: 26 и от Есевона до Рамофа к Масфе, и Вотаниму, и Манаиму до предел Давировых, 27 и во емеке Вифарам и Вифнамра, и Сохоф и Сафон, и прочее царство Сиона царя Есевонска: и Иордан определяет даже до страны моря Хенереф, об ону страну Иордана от восток. 28 Сие наследие сынов Гадовых по сонмом их и по градом их и селам их. 29 И даде Моисей полуплемени Манассиину по сонмом их, 30 и быша пределы их от Манаима, и все царство Васанско, и все царство Ога царя Васанска, и вся веси Иаира, яже суть в Васанитиде, шестьдесят градов: 31 и пол Галаада, и во Астарофе, и во Едраине, грады царства Огова в Васанитиде: и дашася сыном Махировым, сыном Манассииным, и половине сынов Махировых по сонмом их. 32 Сии суть, имже даде наследие Моисей об ону страну Иордана во Аравофе Моавли, прямо Иерихона на востоки. 33 Племени же Левиину не даде Моисей наследия: понеже Сам Господь Бог Израилев наследие Его есть, якоже глагола им. === 14 === 1 И сии наследовавшии от сынов Израилевых в земли Ханаанстей, имже разделиша ю в наследие Елеазар жрец и Иисус сын Навин и князи отечеств племен сынов Израилевых: 2 по жребием наследиша, якоже заповеда Господь Моисеом дати девяти племеном и полплемени (Манассиину), 3 даде бо Моисей наследие дву племеном и полплемени Манассиину об ону страну Иордана: левитом же не даде жребия в них: 4 занеже быша сынове Иосифовы два племена, Манассиино и Ефремле: и не дадеся части в земли левитом, но токмо грады обитати, и предградия скотом их, и скоты их. 5 Якоже заповеда Господь Моисею, тако сотвориша сынове Израилевы и разделиша землю. 6 И приидоша сынове Иудины ко Иисусу в Галгалы. И рече к нему Халев Иефонниин Кенезей: ты веси слово, еже глагола Господь к Моисею человеку Божию о мне и о тебе в Кадис-Варни: 7 четыредесяти бо лет бех, егда посла мя Моисей раб Господень от Кадис-Варни соглядати землю: и отвещах ему слово по сердцу его: 8 братия моя ходившии со мною превратиша сердце людий, аз же приложихся последовати Господеви Богу моему: 9 и клятся Моисей в той день, глаголя: земля, на нюже возшел еси, тебе будет в жребий и чадом твоим во век, яко приложился еси последовати Господу Богу моему: 10 и ныне препита мя Господь, якоже рече, сие четыредесять и пятое лето, отнележе глагола Господь слово сие к Моисею, и хождаше Израиль в пустыни: и ныне се, ми днесь осмьдесят и пять лет: 11 еще есмь днесь могий, якоже егда посла мя Моисей: тако и ныне могу входити и исходити на брань: 12 и ныне прошу у тебе горы сея, якоже рече Господь в день он, яко ты слышал еси слово сие в день оный: ныне же Енакими тамо суть, грады тверды и велицы: аще убо будет Господь со мною, потреблю их, якоже рече ми Господь. 13 И благослови его Иисус, и даде Хеврон Халеву сыну Иефонниину, сыну Кенезеину в жребий. 14 Сего ради бысть Хеврон Халеву Иефонниину Кенезеину в жребий даже до дне сего: понеже возследова повелению Господа Бога Израилева. 15 Имя же Хеврону прежде бяше Град Аргов: Митрополь Енакимлян сей. И почи земля от брани. === 15 === 1 И быша пределы сынов Иудиных по сонмом их, от предел Идумейских, от пустыни Син к ливу даже до Кадис к югу: 2 и быша пределы их от полудне до части моря Сланаго, от верха клонящагося к югу, 3 и проходят прямо восхождению Акраввим, и обходят Сена, и восходят от юга до Кадис-Варни: и исходят из Есрона, и восходят во Аддару, и исходят на запады Кадис, обходят Аккарки, 4 и исходят во Асемону, и преходят даже до дебри Египетския: и будет исход пределов его к морю. Сии суть пределы их от юга. 5 И пределы от восток, все море Сланое даже до части Иордана, и пределы их к северу, и от верха моря, и от части Иордански: 6 восходят пределы (тии) в Вифаглу и преходят от севера к Вефару, и восходят пределы к камени Веора сына Рувимля, 7 и восходят пределы к Девиру дебри Ахоровы, и нисходят до Галгалы, яже есть прямо схождению Адоммин, иже есть к югу дебри, и восходит предел к воде источника Солнечна, и будет исход его источник Рогиль: 8 и восходят пределы в дебрь Енном, созади Иевуса от полудне, сей есть Иерусалим: и исходят пределы на верх горы, яже есть пред лицем дебри Енном к морю, яже есть от части земли Рафаин к северу: 9 и преходит предел от верха горы ко источнику воды Наффо и преходит к горе Ефрони, и изведет предел в Ваал, сей есть Град Иарим: 10 и обыдет предел от Ваала к морю и прейдет в гору Сиир, и прейдет созади града Иарима от севера, сей есть Хасалон: и снидет ко граду Солнечну и прейдет к югу: 11 и преходит предел созади Аккарона до севера, и преходят пределы в Сакхарон, и прейдут гору земли Валаани, и преходят ко Иавнилу, и будет исход пределов к морю, и пределы их от моря, море великое определит. 12 Сии пределы сынов Иудиных окрест по сонмом их. 13 И даде (Иисус) Халеву сыну Иефонниину часть посреде сынов Иудиных повелением Божиим, и даде ему Иисус Град Арвок, отца Енакова: сей есть Хеврон. 14 И потреби оттуду Халев сын Иефонниин три сыны Енаковы, Сусиа и Фолмаи и Ахима: 15 и взыде оттуду Халев на живущих в Давире: имя же прежде бяше Давиру Град Писмен. 16 И рече Халев: иже аще возмет кто Град Писмен и возобладает им, дам ему Асхань дщерь мою в жену. 17 И взя его Гофониил сын Кенеза, брата Халевова, юнейший: и даде ему Асхань дщерь свою в жену. 18 И бысть внегда отходити ей, и совеща с ним, глаголющи: попрошу у отца моего села. И воззва со осляти. И рече ей Халев: что ти есть? 19 И рече ему: даждь ми благословение, яко в землю полуденную отдал еси мя: даждь ми Голаф-Маим. И даде ей Халев Голаф-Маим вышний и Голаф нижний. 20 Сие наследие племене сынов Иудиных по сонмом их: 21 быша же гради их гради племене сынов Иудиных к пределом едомлим в пустыни, Кавсеил и Едраим и Иагур, 22 и Кина и Димона и Адада, 23 и Кедес и Асор и Ифнаксиф, 24 и Телем и Валоф, 25 и Асор Новый и Град Асером (сей есть Асор): 26 Амам и Самаа и Модада, 27 и Асергадда и Веффалеф, 28 и Асарсула и Вирсавее (и села их и предградия их): 29 и Ваала и Авим и Асем, 30 и Елфолад и Хесил и Ерма, 31 и Сикелег и Ведевина и Сансанна, 32 и Лавоф и Селеим, и Аин и Реммон: всех градов двадесять и девять, и села их. 33 В напольней, Есфаол и Сараа, и Асна (и Рамен), 34 и Зано и Ингоним, и Фаффуа и Инаим, 35 и Иеримуф и Одоллам, (и Немра) и Сохо и Азика, 36 и Сагарим и Адиафаим, и Гадира и села ея: гради четыренадесять и веси их. 37 Сеннам и Адаса и Магдалгад, 38 и Далаан и Масфа и Иекфаил, 39 и Лахис и Васхаф и Еглом, 40 и Хаввон и Ламас и Хафлос, 41 и Гадироф и Виф-Дагон, и Нома и Макида: гради шестьнадесять и веси их. 42 Левна и Афер и Асан, 43 и Иеффа и Асенна и Несив, 44 и Кеила и Ахзев, и Мариса (и Едом): гради девять и веси их. 45 Аккарон и села его и предградия его. 46 (И) от Аккарона, иемне и вси елики суть близ Асдофа, и веси их: 47 Асдоф и веси его и предградия его: Газа и веси ея и предградия ея, даже до водотечи Египетския, и море великое определяет. 48 И в горней, Сафир и Иефер и Сохо, 49 и Ренна, Град Писмен (сей есть Давир), 50 и Анов и Есфемо и Аним, 51 и Госом и Хилуон и Гилон: градов единонадесять и веси их. 52 Ерев и Есан и Рума, 53 и Ианум и Веф-Фапфуе и Афака, 54 и Хаммата и Град Арво (сей есть Хеврон) и Сиор: градов девять и села их. 55 Маон и Хермел, и Зиф и Иетта, 56 и Иездраель и Иекдаам и Зано, 57 Аким и Гаваа и Фамна: гради десять и веси их. 58 Алул и Вефсур и Гедор, 59 и Мароф и Вефанон и Елфекен: гради шесть и веси их: Феко и Ефрафа (сей есть Вифлеем): и Фагор и Етам, и Кулон и Татами, и Сорис и Карем, и Галлим и Вефир и Манохо: градов единонадесять и веси их. 60 Кариаф-Ваал (сей Град Иарим) и Аревва: гради два, и села их и предградия их. 61 Ваддаргис и Вифарава, (и) Мадон и Сохоха, 62 и Невсан и град Соли и Ингадди: гради шесть и веси их. 63 И Иевусей обиташе во Иерусалиме, и не возмогоша сынове Иудины погубити их: и обиташа Иевусее с сынми Иудиными во Иерусалиме даже до дне онаго. === 16 === 1 И быша пределы сынов Иосифовых от Иордана иже ко Иерихону от восток, и восходят от Иерихона в горную пустыню в Вефиль, 2 и исходят от Вефиля в Лузу, и преходят к пределом Ахиатарофа: 3 и прейдут к морю к пределом Иефалтимским, даже до предел Вефорона нижняго и даже до Газера, и будет исход их к морю. 4 И наследствоваша сынове Иосифовы Ефрем и Манассий, 5 и быша пределы сынов Ефремлих по сонмом их: и быша пределы наследия их от восток Атароф и Адар, даже до Вефорона вышняго и Газары, 6 и преходят пределы к морю в Махфоф от севера, и идут на восток во Финаф-Силом, и прейдут от восток во Ианоха, 7 и от Ианоха снидут во Атароф и в Наарафа и веси их: и приходят ко Иерихону и исходят ко Иордану, 8 и от Тапфу пойдут пределы к морю к водотечи Кана, и будет исход его к морю. Сие наследие племене сынов Ефремлих по сонмом их. 9 И грады отлученныя сыном Ефремлим посреде наследия сынов Манассииных, вси гради и веси их. 10 И не погуби Ефрем Хананеа живущаго в Газере: и обиташа Хананее посреде Ефрема, дающе ему дани до днешняго дне, дондеже взыде фараон царь Египетский, и взя град, и запали его огнем: и Хананеев и Ферезеев и живущих в Газере избодоша: и даде его фараон в вено дщери своей. === 17 === 1 И быша пределы племене сынов Манассииных, яко сей первенец Иосифу, Махирови первенцу Манассиину, отцу Галаадову, (сей бо бысть муж храбр) в Галаадитиде и Васанитиде. 2 И быша сыном Манассииным прочым по сонмом их: сыном Ахиезеровым и сыном Елековым и сыном Есриилевым, и сыном Сехемовым и сыном Семираеловым и сыном Оферовым: сии суть сынове Манассиины, сына Иосифова, мужеск пол по племеном своим. 3 И Салпааду сыну Оферову, сына Галаадова, сына Махирова, сына Манассиина, не быша сыны, но токмо дщери: и сия имена дщерем Салпаадовым: Маала и Нуа, и Егла и Мелха и Ферса. 4 И сташа пред Елеазаром жерцем и пред Иисусом сыном Навиным и пред князи, глаголющя: Бог заповеда рукою Моисеовою дати нам наследие посреде братии нашея. И дадеся им наследие повелением Господним, жребий в братии отца их. 5 И паде жребий Манассию поле лавеково кроме земли Галаадовы и Васани, яже есть об ону страну Иордана, 6 понеже дщери сынов Манассииных наследиша жребий посреде братий своих: земля же Галаадова бысть сыном Манассииным прочым. 7 И быша пределы сынов Манассииных от Асир-Махфофа, и данаф, яже есть пред лицем Сихема, и идут пределы на Иамин и на Иасиф ко источнику Фаффоф. 8 Манассию будет земля Фаффоф: и Фаффоф над пределы Манассииными сыном Ефремлим: 9 и снидут пределы к дебри Кана на юг по дебри Иарим: Теревинф Ефрему посреде града Манассиина. И пределы Манассиины к северу на водотечь, и будет исход его море: 10 от юга Ефрему, и к северу Манассии, и будет море предел им: и ко Асиру совокупятся к северу, и Иссахару от восток. 11 И будет Манассию (предел) между Иссахаром и между Асиром Вефсан и веси их, и Иевлаам и веси его, и живущыя в Доре и веси его, и живущыя в ендоре и веси его, и живущыя в Магедде и веси его, и живущыя в Танахе и веси его, и третия часть Нафефа и веси его. 12 И не возмогоша сынове Манассиины потребити градов сих: и нача Хананей жити в земли сей. 13 И бысть егда укрепишася сынове Израилевы, и сотвориша Хананеов послушных, потреблением же не потребиша их. 14 Противореша же сынове Иосифовы Иисусу, глаголюще: почто наследствовал еси нас жребием единым и ужем единым? Аз же люд мног есмь, и благослови мя Бог (даже доселе). 15 И рече им Иисус: аще люд мног еси, взыди в дубраву и отреби себе тамо место в земли Ферезеа и Рафаима, аще утесняет тя гора Ефремля. 16 И реша сынове Иосифовы: не доволно нам горы Ефремли: и конь преизбранный и железо всему Хананею живущему в земли емек, в Вефсане и в весех ея, и во юдоле Иезраель. 17 И рече Иисус к сыном Иосифовым, Ефрему и Манассию, глаголя: аще люд мног еси и силу велику имаши, не будет ти жребий един: 18 зане дубрава будет тебе, понеже дубрава есть, и отребиши ю, и будет тебе, и концы ея, егда потребиши Хананеа, аще конь преизбранный ему есть: (и сам силен,) ты бо пресилиши его. === 18 === 1 И собрася весь сонм сынов Израилевых в Силом, и водрузиша тамо скинию свидения: и земля одержася от них. 2 И осташася сынове Израилевы, иже не наследиша наследия своего седмь племен. 3 И рече Иисус сыном Израилевым: доколе вы разслабляетеся внити наследити землю, юже даде вам Господь Бог отец ваших? 4 Дайте от вас по три мужы от племене, и послю их, и воставше да пройдут землю и да опишут ю предо мною, якоже есть лепо разделити ю. И приидоша к нему. 5 И раздели им на седмь частей: Иуда да поставит предел своим от лива, и сынове Иосифли да поставят предел своим от севера: 6 вы же разделите землю на седмь частей, и принесите ко мне семо, и изнесу вам жребий пред Господем Богом вашим: 7 несть бо части у вас сыном Левииным, зане жречество Господне часть их: Гад же и Рувим и полплемене Манассиина взяша наследие свое об ону страну Иордана на востоки, еже даде им Моисей раб Господень. 8 И воставше мужие поидоша. И заповеда Иисус мужем идущым описати землю, глаголя: идите и обыдите землю, и опишите ю, и приидите ко мне, и изнесу вам зде жребий пред Господем в Силоме. 9 И идоша мужие, и обыдоша землю и соглядаша ю, и описаша ю по градом ея на седмь частей в книгу, и принесоша ко Иисусу в полк в Силом. 10 И верже им Иисус жребий пред Господем в Силоме: и раздели тамо землю Иисус сыном Израилевым по разделению их. 11 И изыде жребий племене сынов Вениаминовых первый по сонмом их: и изыдоша пределы жребия их посреде сынов Иудиных и посреде сынов Иосифовых. 12 И быша пределы их от севера: от Иордана взыдут пределы созади Иерихона к северу и взыдут к горе к морю, и будет исход его Мавдарит Вефавн: 13 и пройдут оттуду пределы Лузы созади Лузы от юга: сия есть Вефиль: и снидут пределы сии от Атароф-Аддар на горную, яже есть к ливу Вефорон нижний, 14 и прейдут пределы, и обыдут к стране зрящи к морю от ливы, от горы к лицу Вефорон Лива, и будет исход его в Кариаф-Ваал: сей есть Кариафиарим, Град сынов Иудиных. Сия есть часть яже к морю. 15 И часть яже к ливу от части Кариаф-Ваал: и пройдут пределы морския в Гаин, на источник воды Наффоновы, 16 и снидут пределы на страну горы, яже есть пред лицем дубравы, сына Енома, яже есть от части емек Рафаин от севера, и снидут к Геенному созади Иевуса от юга, и снидут на источник Рогиль, 17 и пройдут сквозе от севера, и пройдут на источник Самеса, и пройдут на Галилоф, иже есть прямо к восходу Едомим: и снидут на камень Ваан сынов Рувимлих, 18 и пройдут созади вефаравы от севера, и снидут ко араве, 19 и снидут с Аравы (на) пределы созади Вефагла от севера, и будет исход пределов на холм моря Сланаго от севера в страну Иорданову от ливы. Сии пределы суть от юга: и Иордан определит ю от страны востока. 20 Сие наследие сынов Вениаминовых, пределы его окрест по сонмом их. 21 И быша грады племене сынов Вениаминовых по сонмом их, Иерихо и Вифагла и Амеккасис, 22 и Вефарава и Семрим и Вифил, 23 и Авим и Афара, и Афра (и Екарен), 24 и Кафираммин и Афни и Гаваа: грады дванадесять и веси их: 25 Гаваон и Рама и Вироф, 26 и Масфа и Хефира и Амоса, 27 и Рекем и Иерфаил и Фарала, 28 и Силалеф и Иевус (сей есть Иерусалим), и Гавааф и Град Иарим: грады тринадесять и веси их. Сие наследие сынов Вениаминовых по сонмом их. === 19 === 1 И изыде вторый жребий Симеону, племени сынов Симеоновых по сонмом их, и бысть наследие их посреде жребия сынов Иудиных. 2 И бысть жребий их Вирсавее и Савее и Молада, 3 и Асерсуал и Вафул, и Велвола и Асом, 4 и Елфулад и Ерма, 5 и Секелаг и Вефаммаргасвоф, и Асерсусим 6 и Вефалваф, и села их: грады тринадесять и веси их. 7 Аин и Реммоф, и Еефер и Асам, грады четыри и веси их: 8 и вся предградия, яже окрест градов сих даже до Ваалферирраммоф, идущих во Иамеф к ливу. Сие наследие племен сынов Симеоновых по сонмом их. 9 От жребия Иудина наследие племене сынов Симеоновых, яко бысть часть сынов Иудиных болшая нежели их: и наследиша сынове Симеоновы посреде жребия их. 10 И изыде жребий третий Завулону по сонмом их: и будут пределы наследия их до Сарида: 11 и восходят пределы их к морю и Мариле, и дойдут к Давасефу, и снидутся в дебрь, яже есть к лицу Иекнама, 12 и обратятся от Сарида противу от востоков Самес на пределы Хасалоф-Фавор, и пройдут к Даврафу, и взыдут к Иафаги: 13 и оттуду обыдут супротив на востоки в Гефаефер, во град Касим, и пройдут на Реммонам Мафарим Аннуа, 14 и обыдут пределы к северу на Еннафоф, и будет исход их к Гаю Иеффаил, 15 и Каттаф и Наалол, и Семрон и Иадила и Вифлеем: грады дванадесять и веси их. 16 Сие наследие племене сынов Завулоновых по сонмом их, грады их и веси их. 17 И Иссахару изыде жребий четвертый, сыном Иссахаровым по сродством их, 18 и быша пределы их Иезраель и Ахаселоф и Сунам, 19 и Аферарим и Сиан, (и Ренаф) и Анахареф, 20 и Раввоф и Кесион и Аеме, 21 и Рамаф и Инганним, и Инадда и Веффасис: 22 и снидутся пределы к Фавору и к Сасимафу к морю, и вефсмас, и будет его исход предел Иордан: грады шестьнадесять и веси их. 23 Сие наследие племене сынов Иссахаровых по сонмом их, грады и предградия их. 24 И изыде жребий пятый племене сынов Асировых по сонмом их, 25 и быша пределы их Хелкаф и Ооли, и Ватне и Ахсаф, 26 и Елимелех и Амад и Масал: и приближатся к Кармилу к морю, и Сиору и Лаванафу, 27 и обратятся от восток солнца в Виф-Дагон, и приближатся к Завулону, и в Гай Иеффаил к северу, (и внидут пределы Асафа) в Виф-Аемек, и да идут по долине Аниила, и пройдут в Хавол ошуюю, 28 и Ахран и Роов, и Аммон и Кана, даже до Сидона великаго: 29 и возвратятся пределы в Раму, и даже до града тверда Тириан, и возвратятся пределы до Сусы, и будет исход его море, и от ужа в Ахзиф, 30 и Амма и Афек и Раов: грады двадесять два и веси их. 31 Сие наследие племене сынов Асировых по сонмом их, грады их и веси их. 32 И Неффалиму изыде жребий шестый, сыном Неффалимлим по сонмом их, 33 и быша пределы их Меелеф и Милон, и Весенаним и Арме, и Накев и Иавнил, даже до Лаккун: и быша исходи их Иордан: 34 и возвратятся пределы к морю в Азаноф-Фавор, и пройдут оттуду во Икок, и приткнутся к Завулону от юга, и Асиру приближатся к морю, и ко Иуде Иордан от восток солнца. 35 И грады ограждени Тириан, Тир и Амаф, и Реккаф и Хенероф, 36 и Адами и Рама и Асор, 37 и Кедес и Едраи и источник Асор, 38 и Иарион и Магдалиил, Оран и Вефанаф и Фасмус: грады девятьнадесят и веси их. 39 Сие наследие племене сынов Неффалимлих по сродству их, грады и предградия их. 40 И Дану и племени сынов Дановых по сонмом их изыде жребий седмый, 41 и быша пределы их Сараа и Есфаол и грады Самес, 42 и Саламинь и Еалон и Иефла, 43 и Елон и Фамна и Аккарон, 44 и Елфеко и Гавафон и Ваафоф, 45 и Иуф и Ваниварак и Гефреммон, 46 и от моря Иераконска, и Ираккон, предел близ Иоппы, и изыде предел сынов Дановых от них. 47 И изыдоша сынове Дановы и воеваша Ласем, и взяша его и поразиша его острием меча: и обиташа в нем, и нарекоша имя его Ласендан, по имени Дана отца своего. И Аморрей остася жити во Еломе и в Саламине: и отяготе рука Ефремля на них, и быша им данницы. 48 Сие наследие племене сынов Дановых по сонмом их, грады их и веси их. И не истребиша сынове Дановы Аморреа озлобляющаго их на горе, и не даяху им Аморрее исходити на юдоль, и утесниша от них предел части их. 49 И совершиша разделяти землю в пределех ея: и даша сынове Израилевы жребий Иисусу сыну Навину повелением Господним среде себе, 50 и даша ему град, егоже проси, Фамнаф-Сараи, иже есть в горе Ефраим: и созда град, и вселися в нем. 51 Сия разделения, яже разделиша Елеазар жрец и Иисус Навин и князи отечеств в племенех Израилевых по жребиям в Силоме пред Господем, у дверий скинии свидения. И скончаша делити землю. === 20 === 1 И рече Господь ко Иисусу, глаголя: 2 рцы сыном Израилевым, глаголя: дадите грады убежений, яже рекох к вам Моисеом: 3 убежище убийце поразившему душу неволею: и будут вам грады убежище, и не умрет убийца от ужика крове, дондеже предстанет пред сонмом на суд. 4 И (аще кто) убегнет во един от градов сих, и станет во вратех града, и исповесть во уши старцем града того словеса своя: и приимут его сонм к себе, и дадят ему место жити с ними: 5 и егда поженет ужик крове вслед его, и не дадут убившаго в руце его: яко не ведый уби ближняго своего и не ненавидя той его от вчера и третияго дне: 6 и да вселится в той град, дондеже станет пред лицем сонма на суд, и дондеже умрет жрец великий, иже будет в тыя дни: тогда да обратится убийца, и внидет во град свой и в дом свой, и во град, отнюдуже избеже. 7 И отделиша Кедес в Галилеи, в горе Неффалимли, и Сихем в горе Ефремли, и Град Арво (сей есть Хеврон) в горе Иуде: 8 и об ону страну Иордана ко Иерихону на восток, даша Восор в пустыни в поли от племене Рувимля, и Рамоф в Галааде от племене Гадова, и Голан в Васанитиде от племене Манассиина: 9 сии грады избраны быша всем сыном Израилевым и пришелцу прилежащему в них, еже убежати тамо всякому убивающему душу неволею, да не умрет от руку ужика крове, дондеже станет пред сонмом на суд. === 21 === 1 И приидоша старейшины отечеств сынов Левииных к Елеазару жерцу и ко Иисусу сыну Навину и к старейшинам отечеств от племен сынов Израилевых, 2 и реша к ним в Силоме в земли Ханаани, глаголюще: заповеда Господь рукою Моисеовою дати нам грады еже обитати, и окрестная их предградия скотом нашым. 3 И даша сынове Израилевы левитом от участий своих по повелению Господню грады сия и окрестная предградия их. 4 И изыде жребий сонму Каафову, и бысть сыном Аароним жерцем левитом от племене Иудина и от племене Симеоня и от племене Вениаминя по жребием грады тринадесять: 5 и сыном Каафовым оставшымся от (сродства) племене Ефремова и от племене Данова и от полуплемене Манассиина по жребию грады десять: 6 и сыном Гирсоним от племене Иссахарова и от племене Асирова, и от племене Неффалимля и от полуплемене Манассиина (еже) в Васане, по жребию грады тринадесять: 7 и сыном Мерариным по сонмом их, от племене Рувимля и от племене Гадова и от племене Завулоня, по жребию грады дванадесять. 8 И даша сынове Израилевы левитом грады сия и окрестная их, якоже заповеда Господь Моисею, по жребию. 9 И даде племя сынов Иудиных и племя сынов Симеоновых и племя сынов Вениаминовых грады сия: и нарекоша по имени. 10 И быша сыном Аароновым от сонма Каафова сынов Левииных, яко сим бысть жребий первый. 11 И даде им Кариафарвок, Митрополь сынов Енаковых (сей есть Хеврон в горе Иудине), и окрестная их. 12 И села града (сего) и веси его даде Иисус Халеву сыну Иефонниину во обдержание его. 13 И сыном Аарона жерца даде град убежище убившему Хеврон и отлученная яже к нему: 14 и Левну и отлученная яже к ней: и Иефер и отлученная яже к нему: и Есфемо и отлученная яже к нему: 15 и Олон и отлученная яже к нему: и Давир и отлученная яже к нему: 16 и Аин и отлученная ему: и Иетта и отлученная ему: и Вефсамис и отлученная ему: грады девять от дву племен сих. 17 И от племене Вениаминя Гаваон и отлученная ему: и Гавее и окрестная его: 18 и Анафоф и окрестная его: и Алмон и окрестная его: грады четыри. 19 Вси грады сынов Аароновых жерцев, грады тринадесять и окрестная их. 20 И сонмом сынов Каафовых левитом, оставлшымся от сынов Каафовых, и бысть град пределов их от племене Ефремова. 21 И даша им град убежище убившему Сихем и окрестная его в горе Ефремли: и Газер и окрестная его: 22 и Кавсаим и окрестная его: и Вефорон и окрестная его: грады четыри. 23 И от племене Данова Елфеко и окрестная его: и Гавефон и окрестная его: 24 и Елон и окрестная его: и Гефреммон и окрестная его: грады четыри. 25 И от полуплемене Манассиина Фаанах и окрестная его: и Вефсам и окрестная его: града два. 26 Вси грады десять и окрестная их сонмом сынов Каафовых оставлшымся. 27 И сыном Гирсоним сродником левитским, от полуплемене Манассиина, грады отлученныя убившым, Голан в Васанитиде и окрестная его: и Веесфера и окрестная его: града два. 28 И от племене Иссахарова Кисион и окрестная его: и Девраф и окрестная его: 29 и Иермоф и окрестная его: и Источник Писмен и окрестная его: грады четыри. 30 И от племене Асирова Масаал и окрестная его: и Авдон и окрестная его: 31 и Фелкаф и окрестная его: и Роов и окрестная его: грады четыри. 32 И от племене Неффалимова град определенный убившему Кедес в Галилеи и окрестная его: и Емафдор и окрестная его: и Ноеммон и отлученная его: грады три. 33 Вси грады Гирсоновы по сонмом их, грады тринадесять и отлученная их. 34 И сонму сынов Мерариных левитом прочым, от племене сынов Завулоних, Иекнаам и окрестная его: и Карфа и окрестная его: 35 и Дамна и окрестная его: и Наалол и окрестная его: грады четыри. 36 И об ону страну Иордана ко Иерихону от племене Рувимова даде град убежище убившему Восор в пустыни Мисор и окрестная его: и Иазир и окрестная его: 37 и Гедсон и окрестная его: и Масфа и окрестная его: грады четыри. 38 И от племене Гадова град убежища убившему Рамоф в Галааде и окрестная его: и Манаим и окрестная его: 39 и Есевон и окрестная его: и Иазир и окрестная его: грады четыри. 40 Вси грады сыном Мерариным по сонмом их, оставлшихся от племене Левиина, и быша пределы их грады дванадесять. 41 Вси грады левитстии посреде обдержания сынов Израилевых четыредесять и осмь градов и окрестная их, окрест градов сих: 42 град и окрестная окрест града: тако всем градом сим. И соверши Иисус разделивый землю в пределех ея: и даша сынове Израилевы часть Иисусу повелением Господним: даша ему град, егоже проси: Фамнасахар даша ему на горе Ефремове. И созда Иисус град, егоже проси, и вселися в нем. И взя Иисус ножы каменныя, имиже обрезова сыны Израилевы, родившыяся на пути в пустыни, яко не обрезашася в пустыни, и положи я во Фамнасахаре. 43 И даде Господь Израилю всю землю, юже клятся дати отцем их: и наследиша ю и вселишася в ней. 44 И упокои Господь их окрест, якоже клятся отцем их: не воста никтоже противу им от всех врагов их: и вся враги их предаде им Господь в руки их. 45 Не оскуде слово (ни едино) от всех глаголгол благих, яже рече Господь сыном Израилевым: вся собышася. === 22 === 1 Тогда созва Иисус сыны Рувимли и сыны Гадовы и полплемене Манассиина, и рече им: 2 вы слышасте вся, елика заповеда вам Моисей раб Господень, и послушасте гласа моего, по всему елика заповедах вам: 3 не остависте братии вашея в сия дни и множайшыя, даже до дне сего: сохранисте заповедь Господа Бога вашего: 4 ныне же упокои Господь Бог ваш братию вашу, якоже рече им: ныне убо возвратившеся отидите в домы вашя и в землю обдержания вашего, юже даде вам Моисей раб Господень об ону страну Иордана: 5 но сохраните зело творити заповеди и закон, егоже заповеда вам Моисей раб Господень, любити Господа Бога вашего и ходити во всех путех Его, хранити заповеди Его и прилежати Ему и служити Ему от всего сердца вашего и от всея души вашея. 6 И благословив их Иисус отпусти их: и отидоша в домы своя. 7 И полу (племене) Манассиину даде Моисей (обдержание) в Васане, и половине даде Иисус с братиею их у Иордана к морю. И егда отпусти их Иисус в домы их, и благослови их: 8 и со имением многим отидоша в домы своя: и скоты многи зело, и сребро и злато, и медь и железо, и ризы многи зело, и разделиша плен врагов своих с братиею своею. 9 И возвратившеся отидоша сынове Рувимли и сынове Гадовы и полплемене Манассиина от сынов Израилевых, от Силома земли Ханаани, отити в землю Галаадску, в землю обдержания своего, юже наследиша по повелению Господню рукою Моисеовою. 10 И приидоша в Галилоф Иорданск, иже есть в земли Ханаани: и создаша сынове Рувимли и сынове Гадовы и полплемене Манассиина тамо олтарь у Иордана, олтарь велик еже видети. 11 И услышаша сынове Израилевы глаголющих: се, создаша сынове Рувимли и сынове Гадовы и полплемене Манассиина олтарь у пределов земли Ханаани, в галилофе у Иордана об ону страну сынов Израилевых. 12 И услышаша сынове Израилевы, и собрашася вси сынове Израилевы в Силон, еже возшедше воевати их. 13 И послаша сынове Израилевы к сыном Рувимлим и к сыном Гадовым и к полуплемени Манассиину в землю Галаадску Финееса сына Елеазара, сына Аарона жерца, 14 и десять князей с ним: князь един от дому отечества, от всех племен сынов Израилевых: мужие князи домов отечеств их, иже суть тысященачалницы Израилевы. 15 И приидоша к сыном Рувимлим и к сыном Гадовым и к полуплемени Манассиину в землю Галаадову, и реша к ним, глаголюще: 16 сия глаголет весь сонм Господень: кое прегрешение сие, имже согрешисте пред Господем Богом Израилевым, отвратитися днесь от Господа Бога Израилева, создавше себе требище, еже отступником вам быти днесь от Господа? 17 Еда мал вам грех Фогоров, яко не очистихомся от него даже до сего дне? И бысть язва в сонме Господни: 18 и вы отвратистеся днесь от Господа: и будет егда отступите днесь от Господа, и заутра на всем Израили будет гнев Господень: 19 и ныне аще мала вам земля обдержания вашего, прейдите вы в землю обдержания Господня, идеже пребывает скиния Господня, и наследите среде нас, и не будите отступницы от Господа, и от нас не отступите, за еже создати вам требище кроме олтаря Господа Бога нашего: 20 не се ли Ахар сын Заранов прегрешением прегреши от проклятия, и бысть на весь сонм Израилев гнев? Аще и един бяше, но не един умре грехом своим. 21 И отвещаша сынове Рувимли и сынове Гадовы и полплемене Манассиина, и реша тысященачалником Израилевым, глаголюще: 22 Бог бог, Господь есть, и Бог бог Господь Сам весть, и Израиль сам познает, аще во отступлении прегрешихом пред Господем, да не избавит нас во днешний день: 23 и аще создахом себе требище, еже отступити нам от Господа Бога нашего, или вознести нам нань жертву всесожжений, или еже сотворити на нем жертву спасения, Сам Господь взыщет: 24 но ради благоговения глагола сотворихом сие, глаголюще: да не рекут заутра чада ваша чадом нашым, глаголюще: что вам и Господеви Богу Израилеву? 25 И пределы постави Господь между вами и нами, сынове Рувимли и сынове Гадовы, Иордан, и несть вам части Господни: и отчуждят сынове ваши сынов наших, яко да не служат Господу: 26 и рекохом сотворити сице, еже создати требище сие, не приношений ради, ниже жертв ради, 27 но да будет свидетелство сие между вами и нами и между роды нашими по нас, еже служити службу Господеви пред ним в приношениих наших и в жертвах наших и в жертвах спасений наших: и да не рекут чада ваша заутра чадом нашым: несть вам части Господни. 28 И рекохом: аще будет когда, и возглаголют к нам или к родом нашым заутра и рекут: зрите подобие жертвенника Господня, егоже сотвориша отцы наши, не приношения ради, ниже жертв ради, но свидетелство есть между нами и между вами и между сыны нашими: 29 да не будет убо нам отступити от Господа, еже отвратитися во днешний день от Господа, еже сотворити нам жертвенник приношением и жертвам саламин и жертве спасения, кроме олтаря Господа Бога нашего, иже есть пред скиниею Его. 30 И услышавше Финеес жрец и вси князи сонма, и тысященачалницы Израилевы, иже быша с ним, словеса сия, яже глаголаша сынове Рувимли и сынове Гадовы и полплемене Манассиина, и угодно им бысть сие. 31 И рече Финеес жрец сыном Рувимлим и сыном Гадовым и полуплемени Манассиину: днесь познахом, яко с нами есть Господь, иже не погрешисте пред Господем прегрешения, но днесь избависте сыны Израилевы от руки Господни. 32 И возвратися Финеес жрец и князи отечеств от сынов Рувимлих и от сынов Гадовых и от полуплемене Манассиина от земли Галаадовы в землю Ханааню к сыном Израилевым: и отвещаша им словеса сия. 33 И угодно бысть слово сие сыном Израилевым, и благословиша Бога сынове Израилевы и рекоша: ктому да не изыдем к ним на брань потребити землю сынов Рувимлих и сынов Гадовых и полуплемене Манассиина. И вселишася на ней. 34 И нарече Иисус требище сынов Рувимлих и сынов Гадовых и полуплемене Манассиина и рече: яко свидение есть между ими, яко Господь бог Бог их есть. === 23 === 1 И бысть по днех мнозех, егда упокои Господь Бог Израиля от всех врагов его иже окрест, и Иисус состареся прошед дни. 2 И созва Иисус вся сыны Израилевы и старейшины их, и князи их и судии их и книгочия их, и рече к ним: аз состарехся и проидох дни: 3 вы же видесте вся, елика сотвори Господь Бог ваш всем языком сим от лица вашего, зане Господь Бог наш споборствовавый нам: 4 видите, яко низвергох вам языки оставшыяся вам сия во жребиих племеном вашым, от Иордана вся языки потребих, и от моря великаго, еже определит на запад солнца: 5 Господь же Бог ваш Сам потребит их от лица вашего, дондеже погибнут, и послет на ня звери дивия, дондеже потребит их и цари их от лица вашего, и наследите землю их, якоже глагола вам Господь Бог ваш: 6 укрепитеся убо зело хранити и творити вся написанная в книгах закона Моисеова, да не уклонитеся от него на десно или на лево: 7 яко да не внидете во языки оставшыяся сия, и имена богов их да не возименуются в вас, ниже да кленетеся ими, ниже да послужите им, ниже поклонитеся им: 8 но токмо Господу Богу вашему прилепитеся, якоже твористе до сего дне: 9 и потреби Господь от лица вашего языки велики и сильны, и никто противоста вам до сего дне: 10 един от вас прогна тысящы, яко Господь Бог ваш споборствоваше вам: 11 и сохраните зело любити Господа Бога вашего: 12 аще бо отвратитеся и приложитеся ко оставшымся языком сим, иже с вами, и браки сотворите с ними, и смеситеся с ними, и они с вами, 13 ведением уведите, яко не приложит Господь потребити языки сия от лица вашего: и будут вам в сети и в соблазны, и в гвоздия в пятах ваших и в стрелы во очесех ваших, дондеже погибнете от земли благия сея, юже даде вам Господь Бог ваш: 14 аз же днесь отхожду в путь, якоже и вси иже на земли: и познаете всем сердцем вашим и душею вашею, яко ни едино слово отпаде от всех словес благих, яже рече Господь Бог ваш к вам: вся приходят вам, и не разнствова от них ни едино слово: 15 и будет, имже образом приходят на вас вся словеса добрая, яже глагола Господь Бог к вам, тако наведет Господь на вы вся словеса злая, дондеже потребит вы от земли благия сея, юже даде вам Господь Бог ваш: 16 внегда преступите завет Господа Бога вашего, егоже заповеда вам, и шедше послужите богом иным и поклонитеся им: и разгневается яростию Господь на вы, и погибнете скоро от земли благия, юже даде Господь вам. === 24 === 1 И собра Иисус вся племена Израилева в Сихем, и созва старейшины Израилевы и князи их, и судии их и книгочия их, и сташа пред Господем Богом. 2 И рече Иисус ко всем людем, глаголя: сия глаголет Господь Бог Израилев: об ону страну реки жиша отцы ваши исперва, Фара отец Авраамов и отец Нахоров, и служиша богом иным: 3 и поях отца вашего Авраама от об ону страну реки, и водих его во всей земли Ханаанстей: и умножих семя его, и дах ему Исаака: 4 Исааку же дах Иакова и Исава и дах Исаву гору Сиир наследие ему: Иаков же и сынове его снидоша во Египет, и быша тамо в язык велик и крепок и мног, и озлобиша их Египтяне: 5 и послах Моисеа и Аарона, и поразих Египта во знамениих, яже сотворих в них, и по сем изведох вас, 6 и изведох отцы вашя из Египта, и внидосте в море Чермное: и погнаша Египтяне вслед отец ваших на колесницах и на конех в море Чермное: 7 и возопихом ко Господу, и даде облак и мглу между нами и между Египтяны, и наведе на них море, и покры их: и видеша очеса ваша, елика сотвори Господь в земли Египетстей: и бысте в пустыни дни многи: 8 и приведе вас в землю Аморреов живущих об ону страну Иордана, и ополчишася на вы: и предаде я Господь в руки вашя, и наследисте землю их, и потребисте их от лица вашего: 9 и воста Валак сын Сепфоров, царь Моавль, и ополчися противу Израиля, и послав призва Валаама сына Веорова кляти вас: 10 и не восхоте Господь Бог погубити тя, но благословением благослови вас и избави вас от рук их: 11 и преидосте Иордан и приидосте во Иерихон, и бишася с вами живущии во Иерихоне, Аморрей и Ферезей, и Хананей и Хеттей, и Гергесей и Евей и Иевусей, и предаде их Господь в руки вашя: 12 и посла пред вами шершни, и изгна от лица вашего два царя Аморрейска, не оружием твоим, ниже луком твоим, 13 и даде вам землю, о нейже не трудистеся на ней, и грады, ихже не создасте, и пожисте в них, и винограды и масличие, ихже не насадисте вы, ядосте: 14 и ныне убойтеся Господа, и послужите Ему в правде и правоте: и отвержите боги чуждыя, имже служиша отцы ваши об ону страну реки и во Египте, и служите Господеви: 15 аще же не угодно вам служити Господеви, изберите сами себе днесь, кому послужите, или богом отец ваших, иже быша об ону страну реки, или богом Аморрейским, в нихже вы живете на земли их: аз же и дом мой служити будем Господеви, яко свят есть. 16 И отвещавше людие, реша: не буди нам оставити Господа, еже служити богом иным: 17 Господь бо Бог наш Той Бог есть, Той изведе нас и отцы нашы от земли Египетския, от дому работы, иже сотвори пред очима нашима знамения велия, и сохрани нас во всем пути, по немуже идохом, и во всех языцех, ихже сквозе проидохом: 18 и изгна Господь вся языки и Аморреа живущаго на земли от лица нашего: но и мы послужим Господеви, Сей бо есть Бог наш. 19 И рече Иисус к людем: не возможете служити Господеви Богу, яко Бог свят есть и ревнитель сей: не оставит грех ваших и беззаконий ваших: 20 егда оставите Господа и послужите богом чуждим, и пришед озлобит вас и потребит вас, вместо еже благо сотвори вам. 21 И рекоша людие ко Иисусу: ни, но Господеви послужим. 22 И рече Иисус к людем: свидетели вы сами на ся, яко вы избрасте служити Господеви Самому. И рекоша: свидетели мы. 23 И ныне отвержите боги чуждыя, иже суть в вас, и исправите сердца ваша ко Господу Богу Израилеву. 24 И рекоша людие ко Иисусу: Господеви Богу нашему послужим, и гласа Его послушаем. 25 И завеща Иисус завет к людем в день он, и даде им закон и суд в Сихеме, пред скиниею Господа Бога Израилева. 26 И вписа Иисус словеса сия в книгу закона Божия: и взя камень велий, и постави его под теревинфом, иже есть пред Господем. 27 И рече Иисус к людем: се, камень сей будет вам во свидение: яко сей слыша вся глаголголанная от Господа, елика глагола к вам днесь, и сей будет вам во свидение в последния дни, и егда солжете Господеви Богу вашему. 28 И отпусти Иисус люди, коегождо в места своя. 29 И послужи Израиль Господеви во вся дни Иисусовы и во вся дни старцев, иже препроводиша время со Иисусом и иже видеша вся дела Господня, елика сотвори Израилю. 30 И бысть по сих, и умре Иисус сын Навин раб Господень, (пожив) сто и десять лет. 31 И погребоша его в пределех жребия его во Фамнасахаре, в горе Ефремли, от севера горы Гаасовы, и положиша тамо с ним во гробе, в немже погребоша его, ножы каменныя, имиже обреза сыны Израилевы в Галгалех (Иисус), егда изведе их из Египта, якоже повеле Господь: и тамо суть даже до дне сего. 32 И кости Иосифовы изнесоша сынове Израилевы из Египта и закопаша их в Сихемех, в части села, еже притяжа Иаков от Аморрей живущих в Сихемех стом агниц, и даде ю Иосифу в часть. 33 И бысть по сих, и Елеазар сын Ааронов архиерей скончася: и погребен бысть в Гаваафе Финееса сына своего, егоже даде ему в горе Ефремове. 34 В той день вземше сынове Израилевы кивот Божий, обношаху с собою: и Финеес жречествова вместо Елеазара отца своего, дондеже умре и погребеся в Гаваафе своем. 35 Сынове же Израилевы отидоша кийждо в место свое и в свой град. 36 И почитаху сынове Израилевы Астарту и Астарофа и боги языков сущих окрест их. И предаде их Господь в руки Еглому царю Моавлю, и облада ими лет осмьнадесять. == Книга Судей == === 1 === 1 И бысть по скончании Иисусове, и вопрошаху сынове Израилевы Господа, глаголюще: кто взыдет нам к Хананею воевода, ратовати на них? 2 И рече Господь: Иуда взыдет: се, дах землю в руку его. 3 И рече Иуда к Симеону брату своему: взыди со мною в жребий мой, и ополчимся на Хананеа: и пойду и аз с тобою в жребий твой. И пойде с ним Симеон. 4 И взыде Иуда, и предаде Господь Хананеа и Ферезеа в руце их: и избиша их в Везеце до десяти тысящ мужей. 5 И обретоша Адонивезека в Везеце, и секошася с ним: и избиша Хананеа и Ферезеа. 6 И побеже Адонивезек: и гнаша вслед его, и яша его, и отсекоша краи рук его и краи ног его. 7 И рече Адонивезек: седмидесяти царем обсекох краи рук их и краи ног их, и быша собирающе (от крупиц) под трапезою моею: якоже убо сотворих, тако воздаде ми Бог. И приведоша его во Иерусалим, и умре тамо. 8 И воеваша сынове Иудины на Иерусалим, и взяша его, и поразиша его острием меча, и град сожгоша огнем. 9 И по сих снидоша сынове Иудины воевати на Хананеа живущаго в горней к югу и в равней. 10 И пойде Иуда на Хананеа живущаго в Хевроне. И изыде Хеврон со страны: имя же бе Хеврону прежде Кариафарвок-Сефер: и убиша Сесина и Ахимана и Фолмиа, роды Енаковы. 11 И взыдоша оттуду к живущым в Давире: имя же Давиру бе прежде Кариафсефер, Град Писмен. 12 И рече Халев: иже аще поразит Град Писмен и возмет его, дам ему Асхань дщерь мою в жену. 13 И взя его Гофониил сын Кенеза брата Халевова юнейший, и даде ему Халев Асхань дщерь свою в жену. 14 И бысть внегда отходити ей, и подвиже ю Гофониил просити у отца своего села, и ропташе (седящи) на осляти, и вопияше со осляти: на землю южную отдал мя еси. И рече ей Халев: что ти есть? 15 И рече ему Асхань: даждь ми благословение: яко на землю южную отдал еси мя, да даси мне и исходища водная. И даде ей Халев по сердцу ея исходища вышних и исходища нижних. 16 И сынове Иофора Кинеева, ужика Моисеова, взыдоша от града Финическа к сыном Иудиным в пустыню сущую на юг Иуды ко исходу Аредову, и поидоша, и вселишася с людьми. 17 И пойде Иуда с Симеоном братом своим, и изби Хананеа живущаго в Сефефе, и потребиша его: и прозваша имя граду Потребление. 18 И взя Иуда Газу и предел ея, и Аскалона и предел его, и Аккарон и предел его, и Азот и окрестная его. 19 И бяше Господь со Иудою. И взя гору, яко не возмогоша потребити живущих во юдоли, зане Рихав противоста им, и колесницы железныя бяху там. 20 И даша Халеву Хеврон, якоже глагола Моисей: и наследствова тамо три грады сынов Енаковых, и изгна оттуду три сыны Енаковы. 21 И Иевусеа живущаго во Иерусалиме не изгнаша сынове Вениаминовы, и живяше Иевусей с сынми Вениамини во Иерусалиме даже до сего дне. 22 И взыдоша сынове Иосифли и сии в Вефиль: и Господь бяше с ними. 23 И ополчишася, и соглядаша (сынове Иосифовы) Вефиль: имя же бе прежде граду Луза. 24 И видеша стрегущии мужа исходящаго из града, и яша его и рекоша ему: покажи нам вход во град, и сотворим с тобою милость. 25 И показа им вход градный: и поразиша град острием меча, мужа же и сродство его отпустиша. 26 И отиде муж в землю Хеттиим, и созда тамо град, и прозва имя ему Луза: сие имя ему даже до дне сего. 27 И не разори Манассий Вефсана, иже есть Скифский град, ниже дщерей его, ниже окрестных (предел) его, ниже Фанаха, ниже дщерей его, ниже живущих в Доре, ниже дщерей его, ниже живущих во Иевламе, ниже окрестных его, ниже дщерей его, и живущих в Магеддоне, ниже окрестных его и дщерей его. И нача Хананей жити на земли сей. 28 И бысть егда укрепися Израиль, и сотвори Хананеа данника: изгнанием же не изгна его. 29 И Ефрем не изгна Хананеа живущаго в Газере: и живяше Хананей среде его в Газере, и бысть ему в данника. 30 И Завулон не изгна живущих в Хевроне и живущих во Аммане: и вселися Хананей посреде их и бысть ему данник. 31 И Асир не изгна живущих во Акхоре, (и бысть ему данник,) ни живущих в Доре, ни живущих в Сидоне, ни живущих в Далафе и во Ахазиве, и во Елве и во Афеке и в Роове. 32 И вселися Асир посреде Хананеа живущаго на земли (той), зане не возможе изгнати его. 33 И Неффалим не изгна живущих в Вефсамисе, ниже живущих в Вефанахе: и вселися Неффалим среде Хананеа живущаго на земли (сей): живущии же в Вефсамисе и в Вефанахе быша ему данницы. 34 И утесни Аморрей сыны Дановы в горе, яко не попусти им низходити во юдоль. 35 И нача Аморрей жити в горе Чрепней, идеже медведи и лисицы, в Мирсиноне и в Салавине: и отяготе рука дому Иосифля на Аморреа, и бысть ему данник. 36 И предел Аморрейский идумей от восхода Акравиня, от Камене и выше. === 2 === 1 И взыде Ангел Господень от Галгал к месту Плача и к Вефилю и к дому Израилеву, и рече к ним: сия глаголет Господь: изведох вас из Египта, и введох вас в землю, еюже кляхся отцем вашым дати вам: и рекох: не разорю завета Моего, иже с вами, во веки: 2 и вы не завещайте завета с седящими на земли сей, ниже богом их да поклонитеся, но изваянная их сокрушите, и олтари их раскопайте: и не послушасте гласа Моего, яко сия сотвористе: 3 и Аз рех: не приложу преселити людий, ихже рех изгнати, ниже отиму их от лица вашего, и будут вам в терние, и бози их будут вам в соблазн. 4 И бысть егда глагола Ангел Господень словеса сия ко всем сыном Израилевым, и воздвигоша людие глас свой, и восплакашася. 5 И сего ради прозвася имя месту тому Плачь: и пожроша тамо Господеви. 6 И отпусти Иисус люди, и отидоша сынове Израилевы кийждо в домы своя и кийждо в наследие свое наследити землю. 7 И работаша людие Господеви во вся дни Иисусовы и во вся дни старейшин, елицы пожиша многи дни со Иисусом, елицы разумеша все дело Господне великое, еже сотвори Израилю. 8 И скончася Иисус сын Навин раб Господень, сын ста и десяти лет. 9 И погребоша его в пределех наследия его в Фамнафаресе, в горе Ефремли, от севера горы Гаас: 10 и весь род он приложишася ко отцем своим. И воста род другий по сих, иже не познаша Господа и дела, еже сотвори во Израили. 11 И сотвориша сынове Израилевы злое пред Господем и послужиша Ваалу, 12 и оставиша Господа Бога отец своих, изведшаго их из земли Египетски, и поидоша вслед богов иных, от богов языческих, Иже окрест их, и поклонишася им: и разгневаша Господа, 13 и оставиша Его, и послужиша Ваалу и Астартом. 14 И разгневася яростию Господь на Израиля и предаде его в руки пленяющих, и плениша их: и отдаде их в руки врагов их, иже окрест их, и не возмогоша ктому противостати пред лицем врагов своих, во всех в нихже прохождаху. 15 И рука Господня бяше на них во злая, якоже глагола Господь и якоже клятся Господь им, и озлоби их зело. 16 И возстави (им) Господь судии, и избави их Господь от руки пленяющих я. 17 Но и судий не послушаша, яко соблудиша вслед богов иных и поклонишася им, и разгневаша Господа: и уклонишася с пути скоро, по немуже ходиша отцы их послушати заповедий Господних: не сотвориша тако. 18 И яко возстави им Господь судий, и бяше Господь с судиею, и спасе я от руки врагов их во вся дни судии: яко умилися Господь от воздыхания их, от лица воюющих на ня и озлобляющих я. 19 И бысть егда умираше судия, и отвращахуся, и паки растлевахуся паче отец своих, идуще вслед богов иных служити им и покланятися им: не отвергоша начинаний своих и не отступиша от путий своих жестоких. 20 И разгневася яростию Господь на Израиля и рече: понеже остави род сей завет Мой, егоже заповедах отцем их, и не послушаша гласа Моего, 21 и Аз не приложу изгнати мужа от лица их от сих языков, ихже остави Иисус сын Навин на земли и умре, 22 еже искушати в них Израиля, аще сохранят путь Господень ходити в нем, якоже сохраниша отцы их, или ни. 23 И остави Господь языки сия не истребити их вскоре, и не предаде их в руку Иисусову. === 3 === 1 И сия языки, яже остави Господь, да искусит ими Израиля, вся неведущыя браней Ханаанских, 2 токмо ради родов сынов Израилевых, еже научити я брани, обаче иже прежде их не уведаша их: 3 пять воеводств иноплеменнических, и всего Хананеа и Сидония, и Евеа живущаго в Ливане от горы Ваал-Ермон до Лавоемафа. 4 И бысть да искусит ими Израиля, да увесть, аще послушают заповедий Господних, яже заповеда отцем их рукою Моисеовою. 5 И сынове Израилевы обиташа посреде Хананеа и Хеттеа, и Аморреа и Ферезеа, и Евеа и Гергесеа и Иевусеа, 6 и пояша дщери их себе в жены, и дщери своя даша сыном их, и послужиша богом их. 7 И сотвориша сынове Израилевы злое пред Господем и забыша Господа Бога своего, и послужиша Ваалу и Дубравам. 8 И разгневася яростию Господь на Израиля и предаде их в руки Хусарсафема царя Месопотамии Сирския: и работаша сынове Израилевы Хусарсафему лет осмь. 9 И возопиша сынове Израилевы ко Господу. И возстави Господь спасителя Израилю, и спасе их, Гофониила, сына Кенеза брата Халевова юнейшаго его. 10 И бысть на нем Дух Господень, и суди Израиля. И изыде на рать к Хусарсафему: и предаде Господь в руце его Хусарсафема царя Сирска, и укрепися рука его над Хусарсафемом. 11 И бысть в покои земля четыредесять лет. И умре Гофониил сын Кенезов. 12 И приложиша сынове Израилевы сотворити злое пред Господем: и укрепи Господь Еглома царя Моавля на Израиля, занеже сотвориша злое пред Господем. 13 И собра к себе вся сыны Аммони и Амаликовы: и иде, и порази Израиля, и взя град Финическ. 14 И работаша сынове Израилевы Еглому царю Моавлю лет осмьнадесять. 15 И возопиша сынове Израилевы ко Господу: и возстави им Господь спасителя, Аода сына Гираня, сына Иемениина, мужа ободесноручна: и послаша сынове Израилевы дары рукою его Еглому царю Моавлю. 16 И сотвори себе Аод нож обоюдуостр, на пядь едину долгота его, и припояса его под ризу по бедре десней своей. 17 И иде, и принесе дары Еглому царю Моавлю: Еглом же муж добротелесен бе зело. 18 И бысть егда сконча Аод принося дары, и отсла носящих дары: 19 и Еглом обратися от идол иже в Галгалех. И рече Аод: слово мне есть к тебе тайно, царю. И рече Еглом к нему: молчи. И отсла от себе всех предстоящих пред ним. 20 И Аод вниде к нему. Сей же седяше в горнице летней своей един. И рече Аод: слово Божие мне к тебе, царю. И воста Еглом со престола близ его. 21 И бысть егда воста, и простре Аод руку левую свою, и извлече нож, иже над стегном его десным, и вонзе во чрево егломово: 22 и втисне и рукоять за острием, и заключи тук за острием, яко не извлече ножа из чрева его, (и изыде лайно). 23 И изыде Аод в притвор, и пройде стрегущих, и затвори двери горницы за собою и заключи, 24 и сам изыде. И раби его приидоша и узреша, и се, двери горницы заключены, и реша: еда у потребы седит во отлучении ложа? 25 И преждаша дондеже посрамишася: и се, не бысть отверзаяй двери горницы. И взяша ключь, и отверзоша: и се, господин их лежит на земли мертв. 26 И Аод спасеся внегда смущахуся, и не бе помышляющаго о нем: а он прейде идолы, и спасеся в Сетирофе. 27 И бысть егда прииде Аод в землю Израилеву, и воструби рогом в горе Ефремли: и снидоша с ним с горы сынове Израилевы, и той пред ними. 28 И рече к ним: идите вслед мене, яко предаде Господь Бог враги нашя Моавляны в руки нашя. И идоша вслед его, и предвзяша преходы Иордана Моавля, и ни единому мужу попустиша преити. 29 И избиша Моава в то время яко десять тысящ мужей, вся воины, иже в них, и всякаго мужа сильна: и ни един муж спасеся. 30 И пременися Моав в той день под руку Израилеву, и бысть в покои земля осмьдесят лет: и суди их Аод дондеже умре. 31 И по нем воста Самегар сын Анафов: и изби иноплеменников шесть сот мужей ралом воловым: и спасе и сей Израиля. === 4 === 1 И приложиша сынове Израилевы сотворити злое пред Господем: и Аод умре. 2 И отдаде их Господь в руку Иавина царя Ханаанска, иже царствова во Асоре. И воевода силы его Сисара, и той живяше во Арисофе языков. 3 И возопиша сынове Израилевы ко Господу, яко девять сот колесниц железных бяше ему: и той озлоби Израиля зело лет двадесять. 4 И Деввора, жена пророчица, жена Лафидофова, сия судяше Израилю в то время: 5 и сия живяше под Фиником Деввора между Рамою и между Вефилем, в горе Ефремли: и восхождаху сынове Израилевы к ней тамо на суд. 6 И посла Деввора, и призва Варака сына Авинеемля из Кедеса Неффалимова, и рече к нему: не заповеда ли тебе Господь Бог Израилев? И пойдеши в гору Фавор, и поймеши с собою десять тысящ мужей от сынов Неффалимлих и от сынов Завулоних: 7 и приведу к тебе в водотечь Кисонь Сисару воеводу силы Иавини, и колесницы его, и множество (вой) его, и предам его в руки твоя. 8 И рече к ней Варак: аще пойдеши со мною, пойду, и аще не пойдеши со мною, не пойду: яко не вем дне, в оньже благоустроит Господь Ангела со мною. 9 И рече Деввора к нему: идущи пойду с тобою: обаче веждь, яко не будет тебе слава на пути, в оньже ты идеши: понеже в руку женску предаст Господь Сисару. И воста Деввора и пойде с Вараком до Кадиса. 10 И воззва Варак Завулона и Неффалима до Кадиса, и поидоша вслед его десять тысящ мужей, и иде с ним Деввора. 11 И Хавер Киней отлучися от Кены и от сынов Иовава, ужика Моисеова: и потче кущу свою под дубом Почивающих, иже есть при Кедесе. 12 И возвестиша Сисаре, яко взыде Варак сын Авинеемль на гору Фавор. 13 И созва Сисара вся колесницы своя, девять сот колесниц железных, и вся люди иже с ним, от Арисофа языков в водотечь Кисонь. 14 И рече Деввора к Вараку: востани, яко сей день, в оньже предаде Господь Сисару в руку твою, зане Господь изыдет пред тобою. И сниде Варак с горы Фавор, и десять тысящ мужей вслед его. 15 И сотре Господь Сисару и вся колесницы его и весь полк его острием меча пред Вараком. И сниде Сисара с колесницы своея и побеже ногами своими. 16 И Варак гоняй вслед колесниц его и вслед полка, даже до Дубравы языков. И паде весь полк Сисарин острием меча: не остася ни един. 17 И Сисара убеже ногами своими в кущу Иаили, жены Хавера Кинеева: яко мир бяше между Иавином царем Асорским и между домом Хавера Кинеева. 18 И изыде Иаиль во сретение Сисаре и рече к нему: уклонися, господине мой, уклонися ко мне, не бойся. И уклонися к ней в кущу: и покры его одеждею своею. 19 И рече Сисара к ней: напой мя мало воды, яко возжаждах. И отреши мех млечный, и напои его, и покры его. 20 И рече к ней Сисара: стани во дверех кущи, и будет аще кто приидет к тебе, и вопросит тя, и речет: есть ли зде муж? И речеши: несть. 21 И взя Иаиль, жена Хаверова, кол кущный, и взя млат в руку свою, и вниде к нему тихо, и водрузи кол во скрании его, и пронзе до земли: и сей утруждся спаше, и издше. 22 И се, Варак гоняй Сисару. И изыде Иаиль во сретение ему и рече ему: прииди, и покажу тебе мужа, егоже ты ищеши. И вниде к ней, и се, Сисара лежаше мертв, и кол во скрании его. 23 И покори Господь Бог в той день Иавина царя Ханааня пред сыны Израилевыми: 24 и хождаше рука сынов Израилевых ходящи, и ожесточися на Иавина царя Ханаанска, дондеже истребиша его. === 5 === 1 И воспе Деввора и Варак сын Авинеемов в той день, и рече: 2 внегда начати вождом во Израили, и в произволении людий, благословите Господа. 3 Услышите, царие, и внушите, князи: аз Господеви воспою и пою Богу Израилеву. 4 Господи, во исходе Твоем от Сиира, внегда воздвизатися Тебе от села Едомова, земля потрясеся, и небо возмутися, и облацы искапаша воду: 5 горы подвигошася от лица Господа Елои, тая Сина от лица Господа Бога Израилева. 6 Во дни Самегара сына Анафова, во дни Иаили, оскудеша путие, и идоша в пути кривы, и идоша в пути развращенны: 7 оскудеша живущии во Израили, оскудеша дондеже воста Деввора, дондеже воста мати во Израили: 8 избраша боги новы, яко хлеб ячен, тогда воеваша грады князей: щит не явися, ниже копие в четыредесяти тысящах во Израили. 9 Сердце мое на учиненная во Израили: сильнии людий, благословите Господа. 10 Ездящии на ослятех белых в полудне, и седящии на судищи, и ходящии на пути сонмов, провещайте. 11 Глас плещущих посреде веселящихся: тамо дадят правду. Господи, правды укрепи во Израили: тогда разыдошася во грады своя людие Господни. 12 Востани, востани, Деввора: востани, востани, глаголи с песнию: востани, Вараче, и плени плен твой, сыне Авинеемль. 13 Тогда возвеличися сила Его: Господь смири мне крепльшыя мене. 14 Людие Ефремли утомиша их в долине: брат твой Вениамин в людех твоих: от мене Махир снидоша взыскующии, и от Завулона укрепляющиися в скиптре повествования писменника. 15 И началницы во Иссахаре с Девворою и Вараком: тако Варак отпусти пеших своих в долину, в разделения Рувимова, велика испытания сердца. 16 Вскую ми седиши посреде мосфафемов, слышати звиздание воставающих проити в разделения Рувимля? Велия испытания сердца. 17 Галаад, об ону страну Иордана вселися: и Дан, вскую обитаеши в кораблех? Асир обита при брезех морских, и в разделениих своих вселися. 18 Завулон, людие укориша душу свою на смерть: и Неффалим на высотах села. 19 И приидоша к нему царие, и ополчишася, тогда воеваша царие Ханаанстии во Фанаахе, у воды Магеддо: множества сребра не взяша. 20 От небесе ополчишася звезды, от чина своего ополчишася с Сисарою. 21 Водотечь Кисонов изверже их, водотечь Кадимин, водотечь Кисонов: поперет его душа моя сильная. 22 Тогда отсекошася копыта конская от топтания сильных его. 23 Проклинайте Мазора, рече Ангел Господень, проклятием проклените живущих в нем, яко не приидоша в помощь Господню, в помощь (Господню) в сильных. 24 Да благословится в женах Иаиль, жена Хавера Кинеева, от жен в кущи да благословится: 25 воды проси у нея, и даде ему млеко в чаши: преимущих принесе масло кравие: 26 руку свою левую к колу простре, и десницу свою ко млату работающих, и уби Сисару: разби главу его, и порази, прободе скрания его: 27 между ногама ея повалися: паде утружден, и умре посреде ног ея, и тамо паде бедне. 28 Оконцем взираше мати Сисарина, окном сквозе решетку, что замедли колесница его приити? Вскую умедлиша стопы колесниц его? 29 Мудрии началствующии ея отвещаша ей, и сама отвещаваше словеса своя себе: 30 не обрящут ли его разделяюща корысти, удружающа другом на главу мужа сильна? Корысти шаров Сисаре, корысти шаров различия, шары испещренных, сия выи его корысти. 31 Тако да погибнут вси врази Твои, Господи: и любящии Его, якоже восток солнца в силе своей. 32 И бысть в покои земля четыредесять лет. === 6 === 1 И сотвориша сынове Израилевы злое пред Господем, и предаде их Господь в руку Мадиамлю седмь лет. 2 И укрепися рука Мадиамля на Израиля: и сотвориша себе сынове Израилевы от лица Мадиамля ограды в горах и в пещерах и в твердынех. 3 И бысть егда сеяше муж Израилев, и восхождаше Мадиам и Амалик и сынове восточнии, и восхождаху на него, 4 и ополчахуся на них, и разоряху плоды земныя, дондеже внити в Газу: и не оставляху бытия жизненнаго во Израили, и стад и телца и осла: 5 яко сами и скоти их восхождаху, и кущы их преношаху, и прихождаху яко прузи множеством, и самем и велблюдом их не бяше числа: и прихождаху на землю Израилеву разорити ю. 6 И обнища Израиль зело от лица Мадиамля. 7 И возопиша сынове Израилевы ко Господу: и бысть егда возопиша сынове Израилевы ко Господу Мадиама ради, 8 и посла Господь мужа пророка к сыном Израилевым, и рече им: сия глаголет Господь Бог Израилев: Аз есмь изведый вас из Египта, и изведох вас из дому работы: 9 и избавих вас от руки Египетския и от руки всех стужающих вам: и изгнах я от лица вашего, и дах вам землю их, 10 и рекох вам: Аз есмь Господь Бог ваш, не убойтеся богов Аморрейских, в нихже вы живете в земли их: и не послушасте гласа Моего. 11 И прииде Ангел Господень, и седе под дубом, иже есть во Ефрафе, иже бысть Иоаса отца Езри. И Гедеон сын его млачаше пшеницу на гумне его, бежати от лица Мадиамля. 12 И явися ему Ангел Господень и рече к нему: Господь с тобою, сильный крепостию. 13 И рече к нему Гедеон: во мне, Господи мой: и аще есть Господь с нами, и вскую обретоша ны вся злая сия? И где суть вся чудеса Его, елика поведаша нам отцы наши, глаголюще: не из Египта ли изведе нас Господь? И ныне отверже нас Господь и предаде нас в руку Мадиамлю. 14 И воззре на него Ангел Господень и рече ему: иди в крепости твоей сей, и спасеши Израиля от руки Мадиамли: и се, послах тя. 15 И рече к нему Гедеон: во мне, Господи, в чесом спасу Израиля? Се, тысяща моя хуждша в Манассии, и аз есмь мний в дому отца моего. 16 И рече к нему Господь: понеже Аз буду с тобою, и избиеши Мадиама яко мужа единаго. 17 И рече к Нему Гедеон: и аще обретох благодать пред очима Твоима, и да сотвориши мне днесь знамение, яко Ты глаголеши со мною: 18 не отиди отсюду, дондеже приити мне к Тебе, и принесу жертву мою, и пожру пред Тобою. И рече: Аз есмь, премедлю, дондеже обратишися ты. 19 И Гедеон вниде, и сотвори козлище от коз, и четверть ифи муки опресноков, и мяса вложи в кошницу, и юху влия в горнец: и изнесе к Нему под дуб, и поклонися. 20 И рече к нему Ангел Господень: возми мяса и хлебы пресныя, и положи у камене онаго, и юху близ излий. И сотвори тако. 21 И простре Ангел Господень конец жезла, иже в руце его, и прикоснуся мясом и хлебом пресным: и возгореся огнь из камене, и пояде мяса и опресноки: и Ангел Господень отиде от очей его. 22 И виде Гедеон, яко Ангел есть Господень, и рече Гедеон: увы мне, Господи, Господи, яко видех Ангела Господня лицем к лицу. 23 И рече ему Господь: мир тебе, и не бойся, не умреши. 24 И созда тамо Гедеон жертвенник Господу, и назва его Мир Господень, даже до дне сего, еще сущу ему во Ефрафе отца Езри. 25 И бысть в ту нощь, и рече ему Господь: возми телца упитаннаго (от скотов) отца твоего, и телца втораго седми лет, и разориши олтарь Ваалов, иже есть отца твоего, и дубраву, яже у него, да посечеши: 26 и да соградиши олтарь Господеви Богу твоему явившемуся тебе на верху (горы) маози во предчинии: и да поймеши телца втораго и вознесеши всесожжения на древех дубравы, юже посечеши. 27 И поя Гедеон десять мужей от рабов своих, и сотвори, якоже заповеда ему Господь. И бысть яко убояся дому отца своего и мужей града, еже сотворити во дни, и сотвори нощию. 28 И обутреневаша мужие градстии заутра: и се, раскопан олтарь Ваалов, и дубрава яже у него посечена, и видеша телца втораго вознесена на всесожжение на олтарь новосогражденный. 29 И рече муж к ближнему своему: кто сотвори вещь сию? И вопрошаху и искаху, и познаша, яко Гедеон сын Иоасов сотвори вещь сию. 30 И рекоша мужие градстии ко Иоасу: изведи сына твоего, и да умрет, яко раскопа олтарь Ваалов и яко посече дубраву яже над ним. 31 И рече Иоас к мужем воставшым на него: еда вы ныне суд глаголете о Ваале? Или вы его спасете? Иже аще кто сотвори обиду, да умрет до заутрия: аще Бог есть, да мстит себе, яко раскопа олтарь его. 32 И прозва его в той день Иероваалом, глаголя: да отмстит на нем Ваал, яко раскопа олтарь его. 33 И весь Мадиам и Амалик и сынове востоков снидошася вкупе, и преидоша (реку), и ополчишася в долине Иезраель. 34 И Дух Божий укрепи Гедеона, и воструби рогом, и возопи Авиезер вслед его. 35 И посла послы ко всему Манассию, и созвася и сей вслед его. Посем посла послы во Асир и в Завулон и в Неффалим, и взыдоша во сретение им. 36 И рече Гедеон к Богу: аще Ты спасаеши рукою моею Израиля, якоже глаголал еси, 37 се, аз положу руно овчее на гумне: и аще будет роса на руне точию, и по всей земли суша, уразумею, яко спасеши рукою моею Израиля, якоже глаголал еси. 38 И бысть тако: и урани Гедеон наутрие, и исцеди руно, и истече роса из руна, исполнен окрин воды. 39 И рече Гедеон к Богу: да не разгневается ярость Твоя на мя, и возглаголю еще единою, и искушу еще единою руном: да будет суша на руне токмо, и по всей земли да будет роса. 40 И сотвори Бог тако в нощи той: и бысть суша на руне токмо, и по всей земли бысть роса. === 7 === 1 И обутренева Иероваал, сей есть Гедеон, и вси людие иже с ним, и ополчишася у источника Арад: и полк Мадиамль и Амаликов бяше ему с севера на холме Мосе Гавааф-Аморе в долине. 2 И рече Господь к Гедеону: мнози людие иже с тобою, сего ради не предам Мадиама в руку их, да не когда похвалится Израиль на Мя, глаголя: рука моя спасе мя: 3 и ныне рцы во ушы людем, глаголя: кто боязлив и ужастив, да возвратится и да отидет от горы Галаадовы. И возвратишася от людий двадесять две тысящы, и десять тысящ осташася. 4 И рече Господь к Гедеону: еще людие мнози суть: сведи я на воду, и искушу тебе их тамо: и будет егоже аще реку тебе, сей да идет с тобою, той да пойдет с тобою: и всяк егоже аще реку тебе, сей да не пойдет с тобою, той да не пойдет с тобою. 5 И сведе люди на воду, и рече Господь к Гедеону: всяк иже полочет языком своим от воды, якоже лочет пес, да поставиши его особь: и всяк иже на колену падет пити, отлучи его особь. 6 И бысть число в горстех локавших языком триста мужей: и вси оставшии людие преклонишася на колена своя пити воду. 7 И рече Господь к Гедеону: треми сты мужей локавшими воду спасу вас, и предам Мадиама в руку твою: и вси людие да пойдут, кийждо на место свое. 8 И взяша себе брашно от людий в руку свою и роги своя: и всякаго мужа Израилтеска отпусти коегождо в кущу свою, а триста мужей удержа: полк же Мадиамль бяше ниже его в долине. 9 И бысть в ту нощь, и рече к нему Господь: востав сниди отсюду скоро в полк, яко предах их в руку твою: 10 и аще боишися ты снити, сниди ты и Фара раб твой в полк, 11 и услышиши, что возглаголют: и по сем укрепятся руце твои, и снидеши в полк. И сниде сам и Фара раб его в часть пятьдесятников, иже быша в полце. 12 И Мадиам и Амалик и вси сынове востоков стояху в долине яко прузи множеством, и велблюдом их не бяше числа, но бяху яко песок на краи морстем множеством. 13 И вниде Гедеон, и се, муж поведаше сон подругу своему, и рече: сей сон егоже видех, и се, тесто хлеба ячна валяющееся в полце Мадиамли, и привалися к кущи Мадиамли, и поби ю, и преврати ю, и паде куща. 14 И отвеща подруг его и рече: несть (сие тесто), но мечь Гедеона сына Иоасова мужа Израилева: предаде Бог в руку его Мадиама и весь полк. 15 И бысть яко услыша Гедеон поведание сна и разсуждение его, и поклонися Господеви, и возвратися в полк Израилев и рече: востаните, яко предаде Господь в руки нашя полк Мадиамль. 16 И раздели триста мужей на три началства, и вдаде роги в руце всем, и водоносы тщы, и свещы среде водоносов, 17 и рече им: мене смотрите, и такожде творите: и се, аз вниду в часть полка, и будет якоже сотворю, такожде сотворите: 18 и аз вострублю рогом, и вси иже со мною, да вострубите и вы в роги окрест всего полка, и да речете: (мечь) Богу и Гедеону. 19 И вниде Гедеон и сто мужей иже с ним в часть полка в начале стражи средния: и убужением возбудиша стрегущих, и вострубиша в роги, и сразиша водоносы иже в руках их. 20 И вострубиша три началства в роги и сокрушиша водоносы, и удержаша в левых руках своих свещы, и в десных руках их роги, в няже трубити: и возопиша: мечь Господеви и Гедеону. 21 И сташа кийждо о себе окрест полка: и смятеся весь полк, и возопиша, и побегоша. 22 И вострубиша в триста рогов: и положи Господь мечь мужа на подруга его во всем полце, и пробеже полк до Вифасетта, и собрася до страны Авелмаула и к Тавафу. 23 И возопиша мужие Израилтестии от Неффалима и от Асира и от всего Манассии, и погнаша вслед Мадиама. 24 И посла послы Гедеон во всю гору Ефремлю, глаголя: снидите во сретение Мадиаму и удержите им воду до Вефира и Иордана. И воззва всяк муж Ефремль, и предотяша воду до Вефира и Иордана, 25 и яша два князя Мадиамля, Орива и Зива: и убиша Орива в Суре, и Зива убиша во Иакефзиве: и погнаша Мадиама, и главу Орива и Зива принесоша к Гедеону от оноя страны Иордана. === 8 === 1 И рекоша к Гедеону мужие Ефремли: что сие сотворил еси нам, яко не позвал еси нас, егда ходил воевати на Мадиама? И пряхуся с ним сильно. 2 И рече к ним (Гедеон): что сотворих ныне якоже вы? Не лучше ли гроздец Ефремль, нежели обрание винограда Авиезерова? 3 В руку вашу предаде Господь князи Мадиамли, Орива и Зива: и что возмогох сотворити якоже вы? Тогда утолися дух их от него, егда глагола им слово сие. 4 И прииде Гедеон ко Иордану, и прейде сам и иже с ним триста мужей, алчни и утруждени гоняще. 5 И рече мужем Сокхофским: дадите хлебы на пищу мужем сим иже со мною, яко алчни суть: аз же гоню вслед Зевеа и Салмана, царей Мадиамских. 6 И рекоша князи Сокхофстии: еда рука Зевеа и Салмана ныне в руце твоей, яко дадим воем твоим хлебы? 7 И рече Гедеон: не тако: но егда предаст Господь Зевеа и Салмана в руку мою, аз сотру плоти вашя тернием пустынным и волчцами. 8 И взыде оттуду во Фануил и глагола к ним такожде. И отвещаша ему мужие Фануили, якоже отвещаша ему мужие Сокхофстии. 9 И рече Гедеон мужем Фануилским, глаголя: егда возвращуся с миром, раскопаю столп сей. 10 И Зевей и Салман быша в Каркаре, и полк их с ними до пятьнадесяти тысящ (мужей) оставшихся от всего полка сынов восточных: и умерших бяше сто и двадесять тысящ мужей держащих оружие. 11 И взыде Гедеон путем живущих в кущах от востоков прямо Навы и Иегевала: и изби полк, полк же бяше надежен. 12 И побегоста Зевей и Салман: и гна вслед их, и поима оба царя Мадиамля, Зевеа и Салмана, и весь полк их смяте. 13 И возвратися Гедеон сын Иоасов от рати прежде восхода солнца, 14 и ят отрочища от мужей Сокхофских и вопроси его: и вписа от него имена князей Сокхофских и старейшин их, седмидесяти и седми мужей. 15 И прииде Гедеон ко князем Сокхофским и рече им: се, Зевей и Салман, ихже ради укористе мя, глаголюще: еда рука Зевеа и Салмана ныне в руце твоей, яко дадим мужем твоим утруждшымся хлебы? 16 И поя князи и старейшины града, и терние от пустыни и волчцы, и сотре ими мужы Сокхофски: 17 и столп Фануилев раскопа, и изби мужы градския. 18 И рече к Зевею и Салману: какови мужие, ихже избисте в Фаворе? И реша: якоже ты, тако они, подобен ты еси им, яко подобие сынов царевых. 19 И рече Гедеон: братия моя и сынове матере моея суть: жив Господь, аще бысте живили их, не убил бых вас. 20 И рече Иеферу первенцу своему: востав убий их. И не извлече отрочищь меча своего: зане убояся, яко млад бяше. 21 И рече Зевей и Салман: востани убо ты, и сопротивися нам: зане яко муж сила его. И воста Гедеон, и уби Зевеа и Салмана: и взя украшения, яже на выях велблюдов их. 22 И рекоша мужие Израилстии ко Гедеону: владей нами и ты, и сынове твои, и сынове сынов твоих, яко ты спасл еси нас от руки Мадиамли. 23 И рече к ним Гедеон: не возобладаю аз вами, и не возобладает сын мой вами: Господь да владеет вами. 24 И рече к ним Гедеон: попрошу у вас прошения, и да даст мне всяк муж усерязь от плена своего: яко усерязи златы (мнози) и бяху им, зане Исмаилтяне бяху. 25 И рекоша: дающе дадим. И простре ризу, и ввергоша ту мужие по и усерязю от плена своего. 26 И бысть вес усерязь златых, ихже испроси, тысяща и седмь сот сикль злата, кроме плениц и монист (енфофовых), и риз багряных, яже на царех Мадиамлих, и кроме чепей златых, яже на выях велблюдов их. 27 И сотвори от них Гедеон ефуд, и постави его во граде своем во Ефрафе. И соблуди весь Израиль по нем тамо: и бысть Гедеону и всему его дому в соблазн. 28 И смирися Мадиам пред сыны Израилевыми, и не приложиша воздвигнути главы своея. И бысть в покои земля четыредесять лет, во дни Гедеоновы. 29 И иде Иероваал сын Иоасов, и седе в дому своем. 30 И Гедеону быша седмьдесят сынов, изшедшии от чресл его, яко жены бяху многи ему. 31 И подложница его яже в Сикиме и сия роди ему сына, и нарече имя ему Авимелех. 32 И умре Гедеон сын Иоасов в старости блазе, и погребеся во гробе Иоаса отца своего, во Ефрафе, отца Езриева. 33 И бысть егда умре Гедеон, и совратишася сынове Израилевы и соблудиша вслед Ваалима, и сотвориша себе со Ваалверифом завет, да им будет бог: 34 и не воспомянуша сынове Израилевы Господа Бога своего, избавльшаго их из руки всех враг их окрестных: 35 и не сотвориша милости с домом Иеровааловым, сей есть Гедеон, по всей благостыни его, юже сотвори со Израилем. === 9 === 1 И пойде Авимелех сын Иероваалов в Сихем ко братии матере своея и глагола к ним и ко всему сродству дому отца матере своея, глаголя: 2 глаголите во ушы всех мужей Сихемских: что лучше вам, еже владети вами седмидесяти мужем всем сыном Иеровааловым, или владети вами мужу единому? И помяните, яко кость ваша и плоть ваша есмь аз. 3 И глаголаша братия матере его о нем во ушы всех мужей Сихемских вся словеса сия. И уклонися сердце их вслед Авимелеха, рекоша бо: брат наш есть. 4 И даша ему седмьдесят сребреник от дому Ваалверифа: и ная ими Авимелех мужей праздных и скитающихся, и поидоша вслед его. 5 И вниде в дом отца своего во Ефрафу, и изби братию свою, сыны Иеровааловы, седмьдесят мужей, на камени единем, и остася Иоафам сын Иеровааль юнейший, зане скрыся. 6 И собрашася вси мужие Сихемстии и весь дом Маалов, и поидоша, и поставиша Авимелеха царем у дуба стана, иже в Сихемех. 7 И поведаша Иоафаму, и пойде, и ста на версе горы Гаризин: и воздвиже глас свой, и воззва, и рече им: послушайте мене, мужие Сихемстии, и да услышит вас Бог. 8 Идуще идоша древа помазати себе царя и реша масличине: буди нам царь. 9 И рече им масличина: еда оставивши тучность мою, юже во мне прослави бог и человецы, пойду владети древами? 10 И рекоша древа смоковнице: прииди, царствуй над нами. 11 И рече им смоковница: еда оставивши мою сладость и плод мой благий, пойду владети древами? 12 И рекоша древа к лозе виноградней: прииди, буди нам царь. 13 И рече им лоза виноградная: еда оставивши вино мое, веселящее бога и человеки, пойду владети древами? 14 И рекоша вся древа тернию: прииди, буди нам царь. 15 И рече терние ко древам: аще по истине помазуете себе царя мене над вами, приидите и внидите под сень мою: аще ли же ни, да изыдет огнь из терния и пояст кедры Ливанския. 16 И ныне аще по истине и по совершенству сотвористе, и постависте Авимелеха царем, и аще благо сотвористе со Иероваалом и с домом его, и аще по воздаянию руки его сотвористе ему, 17 якоже воева отец мой по вас, и поверже душу свою в страну, и избави вас от руки Мадиамли: 18 и вы востасте на дом отца моего днесь и избисте сыны его, седмьдесят мужей, на единем камени, и постависте царем Авимелеха сына рабыни его над мужи Сикимскими, яко брат ваш есть: 19 и аще по истине и по совершенству сотвористе со Иероваалом и домом его днесь, благословени вы будите, и возвеселитеся о Авимелесе, и той о вас да возвеселится: 20 аще же ни, да изыдет огнь от Авимелеха и пояст мужы Сикимски и дом Мааллонь: и да изыдет огнь от мужей Сикимских и от дому Мааллоня и да пояст Авимелеха. 21 И избеже Иоафам, и побеже, и пойде в Виру, и вселися тамо от лица Авимелеха брата своего. 22 И облада Авимелех во Израили три лета. 23 И посла Бог дух зол между Авимелехом и между мужи Сикимскими: и возгнушашася мужие Сикимстии домом Авимелеховым, 24 еже навести неправду седмидесяти сынов Иероваалих и крови их возложити на Авимелеха брата их, иже уби их, и на мужы Сикимски, яко укрепиша руце его избити братию свою: 25 и поставиша нань мужие Сикимстии подсады на версех гор, и разграбляху всех идущих к ним на пути. И возвестися сие Авимелеху. 26 И прииде Гаал сын Аведов и братия его, и преидоша в Сикиму, и уповаша на него мужие Сикимстии: 27 и изыдоша на село, и обраша винограды своя, и изгнетоша, и сотвориша лики: и ходиша во храм богов своих, и ядоша и пиша, кленуще Авимелеха. 28 И рече Гаал сын Аведов: кто есть Авимелех, и кто есть сын Сихемль, яко да поработаем ему? Не сын ли Иеровааль, и Зевул страж его раб его с мужи Еммора отца Сихемля? И почто имамы работати ему? 29 И кто даст люди сия в руку мою? И преставлю Авимелеха, и реку ко Авимелеху: умножи силу твою, и изыди. 30 И услыша Зевул князь града словеса Гаала сына Аведова, и разгневася яростию: 31 и посла послы ко Авимелеху отай, глаголя: се, Гаал сын Аведов и братия его приидоша в Сихему, и се, сии обседят на тя град: 32 и ныне востани нощию ты и людие иже с тобою, и засяди до заутрия на селе: 33 и будет рано, егда взыдет солнце, обутрееши и протягнешися ко граду: и се, той и людие иже с ним изыдут к тебе, и сотвориши ему, елико возможет рука твоя. 34 И воста Авимелех и вси людие, иже с ним, нощию, и заседоша на Сихем на четыри части. 35 И бысть заутра, и изыде Гаал сын Аведов и ста пред дверию врат градских. И воста Авимелех и людие, иже с ним, от засады. 36 И виде Гаал сын Аведов люди и рече к Зевулу: се, народ людий исходит с верхов гор. И рече к нему Зевул: стень гор ты видиши яко мужы. 37 И приложи еще Гаал глаголати и рече: се, людие исходят при мори от высоты земли, и полк един идет путем дубравы Маоненим. 38 И рече к нему Зевул: и где суть ныне уста твоя глаголющая: кто есть Авимелех, яко поработаем ему? Не сии ли суть людие, яже ты уничтожил еси? Изыди убо ныне, и ополчися противу их. 39 И изыде Гаал пред мужы Сихемски, и ополчися противу Авимелеху: 40 и погна его Авимелех, и побеже от лица его: и падоша язвеннии мнози даже до врат градских. 41 И вниде Авимелех во Ариму: и Зевул изгна Гаала и братию его, да не живут в Сихеме. 42 И бысть наутрие, и изыдоша и людие на поле, и поведаша Авимелеху: 43 и взя людий, и раздели их на три части, и засяде на селе: и виде, и се, людие изыдоша из града, и воста на ня, и изби их. 44 И Авимелех и началницы, иже с ним, протягошася и сташа у дверий врат градских: и две части пролияшася на вся, яже на селе, и избиша я. 45 Авимелех же добываше града весь день той, и взя град, и люди иже в нем изби, и разори град, и посея в нем соль. 46 И услышаша сие вси мужие столпа Сихемля и внидоша в твердь дому (бога) Вефилвериф. 47 И возвестися Авимелеху, яко собрашася вси мужие столпа Сихемска. 48 И взыде Авимелех на гору Селмон сам и вси людие, иже с ним: и взя Авимелех секиру в руку свою, и усече ветвь от древа, и воздвиже ю, и возложи на раму свою: и рече людем иже с ним: еже видесте мя творяща, сотворите скоро якоже и аз. 49 И усекоша вси людие ветвия и взяша, и поидоша вслед Авимелеха, и возложиша на твердыню, и запалиша на них твердыню огнем: и изомроша вси людие столпа Сихемска до тысящи мужей и жен. 50 И иде Авимелех в Фивис и обсяде его, и взя его: 51 и столп бе тверд среде града, и вбегоша ту вси мужие и жены и вси старейшины града, и заключишася и взыдоша на кров столпа: 52 и прииде Авимелех до столпа, и супротивишася ему: и приступи Авимелех ко вратом столпа, еже запалити его огнем: 53 и сверже жена едина уломок жерновный на главу Авимелеха, и сокруши ему темя: 54 и возопи скоро Авимелех ко отроку носящему сосуды его и рече ему: извлецы мечь твой и убий мя, да не рекут, яко жена уби его. И прободе его отрок его, и умре. 55 И видеша мужие Израилстии, яко умре Авимелех: и отидоша кийждо на свое место. 56 И воздаде Бог зло Авимелеху, еже сотвори отцу своему, убив седмьдесят братий своих: 57 и всяку злобу мужей Сихемлих обрати Бог на главы их: и взыде на ня клятва Иоафама сына Иеровааля. === 10 === 1 И воста по Авимелесе спасти Израиля Фола сын Фуи, сын брата отца его, муж от Иссахара: и сей живяше в Самире в горе Ефремове, 2 и суди Израиля лет двадесять три, и умре, и погребен быти в Самире. 3 И воста по нем Иаир Галаадитин, и суди Израиля лет двадесять два: 4 и быша ему сынове тридесять два ездящии на тридесяти двух ослех: и грады им тридесять два: и прозываху их грады Иаировы, даже до днесь, иже суть в земли Галаадове: 5 и умре Иаир, и погребен бысть в Камоне. 6 И приложиша сынове Израилевы творити злое пред Господем и послужиша Ваалимам и Астарофам и богом Сирским и богом Сидонским и богом Моавлским и богом сынов Аммоних и богом иноплеменников: и оставиша Господа и не работаша Ему. 7 И разгневася Господь яростию на Израиля и предаде их в руку Филистимску и в руку сынов Аммоних. 8 И озлобиша, и сокрушиша сынов Израилевых в то время осмьнадесять лет, всех сынов Израилевых, иже об ону страну Иордана в земли Аморреа иже в Галааде. 9 И преидоша сынове Аммони Иордан воевати на Иуду и Вениамина и на дом Ефремов: и оскорблени быша сынове Израилевы зело. 10 И возопиша сынове Израилевы ко Господу, глаголюще: согрешихом Тебе, яко оставихом Бога нашего и работахом Ваалиму. 11 И рече Господь к сыном Израилевым: не от Египта ли и от Аморреа и от сынов Аммоних и от Филистима 12 и от Сидонян и от Амалика и от Мадиама, иже стужиша вам, и возописте ко Мне, и спасох вы от руки их? 13 Вы же остависте Мене и работасте богом иным: сего ради не приложу спасти вас: 14 идите и возопийте к богом, ихже избрасте себе, и тии да спасут вы во время скорби вашея. 15 И реша сынове Израилевы ко Господу: согрешихом, сотвори ты нам по всему, елико угодно пред очима Твоима: точию избави нас в сей день. 16 И извергоша боги чуждыя от среды себе и послужиша Господеви единому: и сжалеся душа Его о утруждении Израилеве. 17 И взыдоша сынове Аммони, и ополчишася в Галааде: и собрашася и сынове Израилевы, и ополчишася в Массифе. 18 И реша людие князи Галаадстии кийждо ко ближнему своему: муж, иже начнет битися с сынми Аммоновыми, той будет князь всем живущым в Галааде. === 11 === 1 И бяше Иеффай Галаадитянин силен крепостию: и той бысть сын жены блудницы, яже роди Галааду Иеффая. 2 И роди жена Галаадова сынов ему: и возмужаша сынове жены и изгнаша Иеффая, и рекоша ему: не наследиши в дому отца нашего, яко сын жены блудныя еси ты. 3 И отбеже Иеффай от лица братии своея и вселися в земли Тов: и собирахуся ко Иеффаю мужие праздни, и хождаху с ним. 4 И бысть по днех сих, и воеваша сынове Аммони на Израиля. 5 И егда воеваша сынове Аммони на Израиля, и поидоша старейшины Галаадовы пояти Иеффая от земли Тов, 6 и рекоша ко Иеффаю: прииди и буди нам началник, и ополчимся на сыны Аммони. 7 И рече Иеффай старейшинам Галаадским: не вы ли возненавидесте мя, и изгнасте мя из дому отца моего, и отпустисте мя от себе? И почто приидосте ко мне ныне, егда нужду возиместе? 8 И рекоша старейшины Галаадстии ко Иеффаю: сего ради ныне приидохом к тебе, да пойдеши с нами, и ополчимся на сыны Аммони: и будеши нам князь всем живущым в Галааде. 9 И рече Иеффай ко старейшинам Галаадовым: аще возвращаете мя ополчитися на сыны Аммони, и предаст их Господь предо мною, и аз вам буду ли князь? 10 И рекоша старейшины Галаадстии ко Иеффаю: Господь да будет послух между нами, аще по слову твоему тако не сотворим. 11 И пойде Иеффай со старейшинами Галаадскими, и поставиша его людие над собою главу и князя: и глагола Иеффай вся словеса своя пред Господем в Массифе. 12 И посла Иеффай послы к царю сынов Аммоних, глаголя: что мне и тебе, яко пришел еси ко мне воевати на земли моей? 13 И рече царь сынов Аммоних к послом Иеффаевым: яко взя Израиль землю мою, егда изыде из Египта, от Арнона даже до Иавока и до Иордана: и ныне возврати ю с миром, и отиду. 14 И возвратишася послы ко Иеффаю. И приложи еще Иеффай, и посла послы к царю сынов Аммоних, и рекоша ему: 15 тако глаголет Иеффай: не взя Израиль земли Моавли и земли сынов Аммоних, 16 понеже егда исхождаше из Египта, пойде Израиль по пустыни до моря Чермнаго, и прииде до Кадиса: 17 и посла Израиль послы к царю Едомску, глаголя: да прейду сквозе землю твою: и не послуша царь Едомск: такожде посыла и к царю Моавску, и не восхоте: и седе Израиль в Кадисе: 18 и иде пустынею, и обыде землю Едомлю и землю Моавлю, и прииде на востоки солнца земли Моавли, и ополчися об ону страну Арнона, и не вниде в пределы Моавли, яко Арнон бяше предел Моавль: 19 и посла Израиль послы к Сиону царю Аморрейску, царю Есевонску, и рече к нему Израиль: да прейдем по земли твоей до места нашего: 20 и не восхоте Сион Израилю преити по пределом своим, и собра Сион вся люди своя, и ополчися во Иасе, и воева на Израиля: 21 и предаде Господь Бог Израилев Сиона и вся люди его в руки Израиля, и изби их: 22 и наследова Израиль всю землю Аморреа живущаго на земли той: и взя весь предел Аморрейск от Арнона даже до Иавока, и от пустыни до Иордана: 23 и ныне Господь Бог Израилев изгна Аморреа от лица людий Своих Израиля, и ты ли хощеши наследити его? 24 Ни, но елико даде в наследие тебе Хамос бог твой, сия да наследиши: а всех, ихже изгна Господь Бог наш от лица нашего, сия мы наследим: 25 и ныне еда лучший еси ты Валака сына Сепфорова, царя Моавля? Не бранию ли боряшеся со Израилем, или воюя воева его? 26 Егда вселися Израиль во Есевоне и в пределех его, и во Ароире и в пределех его, и во всех градех, иже у Иордана, триста лет, и почто не избавил еси их во время оно? 27 Аз же не согреших тебе, и ты твориши со мною зло, воюя на мя: да судит Господь судяй днесь между сыны Израилевыми и между сыны Аммони. 28 И не послуша царь сынов Аммоних словес Иеффаевых, яже посылаше к нему. 29 И бысть на Иеффаи Дух Господень, и прейде Галаада и Манассию, и прейде Стражбу Галаадову, и от Стражбы Галаадовы иде на ону страну сынов Аммоних. 30 И обеща Иеффай обет Господеви и рече: аще преданием предаси сыны Аммони в руку мою, 31 и будет исходяй, иже аще изыдет из врат дому моего во сретение мне, егда возвращуся с миром от сынов Аммоних, и будет Господеви, и вознесу его во всесожжение. 32 И прииде Иеффай к сыном Аммоним воевати на ня: и предаде я Господь в руце его 33 и изби их от Ароира, дондеже приити в Мениф, двадесять градов, и даже до Авеля Виноградов, язвою великою зело. И покорени быша сынове Аммони пред лицем сынов Израилевых. 34 И прииде Иеффай в Массифу в дом свой: и се, дщерь его исхождаше во сретение его с тимпаны и лики: и сия бяше единородна ему возлюбленна: и не бе ему сына, ни другия дщере, кроме ея. 35 И бысть егда увиде ю сам, растерза ризы своя и рече: о, дщи моя, смущающи смутила мя еси: и ты ныне в претыкание была еси пред очима моима: аз бо отверзох уста моя на тя ко Господу и не возмогу вспять возвратити. 36 И рече к нему: отче, аще отверзл еси уста твоя ко Господу, сотвори мне, якоже изыде изо уст твоих, занеже сотвори тебе Господь месть врагом твоим от сынов Аммоних. 37 И рече ко отцу своему: сотвори, отче мой, сие слово: остави мя два месяца, да пойду и взыду на горы и плачуся девства моего аз и другини мои. 38 И рече: иди. И отпусти ю на два месяца: и иде сама и другини ея, и плакася девства своего на горах. 39 И бысть в конце двою месяцу, и возвратися ко отцу своему: и сотвори на ней обет свой, имже обещася: и сия не позна мужа. И бысть в повеление во Израили: 40 от дний до дний исхождаху дщери Израилевы плакати о дщери Иеффая Галаадитина четыри дни в лете. === 12 === 1 И собрашася мужие Ефремли и приидоша в Сефину, и реша Иеффаю: почто ходил еси ополчитися на сыны Аммони, и нас не позвал еси ити с тобою? Дом твой с тобою сожжем огнем. 2 И рече к ним Иеффай: имех прю аз и людие мои, и сынове Аммони оскорбиша мене зело: и воззвах вас, и не избависте мене от руки их: 3 и видех, яко не бяше спасающаго, и положих душу мою в руку мою, и приидох к сыном Аммоним, и предаде я Господь в руку мою: и вскую приидосте ко мне днесь, ополчити ли ся на мя? 4 И собра Иеффай вся мужы Галаадски и ополчися на Ефрема: и избиша мужие Галаадстии Ефрема, понеже глаголаху: уцелевшии от Ефрема, вы Галаад среде Ефрема и среде Манассии. 5 И засяде Галаад проходы у Иордана Ефремовы. И бысть егда реша уцелевшии от Ефрема: прейдем: и рекоша им мужие Галаадстии: еда ли от Ефрема вы? И реша: несмы. 6 И реша им: рцыте, клас. И не управиша рещи тако: и имаху их, и закалаху у преходов Иорданих: и падоша в то время от Ефрема четыредесять и две тысящы. 7 И суди Иеффай Израилеви лет шесть: и умре Иеффай Галаадитин, и погребен бысть во граде своем в Галааде. 8 И суди по нем Израилеви Есевон от Вифлеема: 9 и быша ему тридесять сыны и тридесять дщери, яже отдаде вон (мужем), и тридесять жен приведе сыном своим отвне: и суди Израилеви седмь лет: 10 и умре Есевон, и погребен бысть в Вифлееме. 11 И суди по нем Израилеви Елон Завулонянин десять лет: 12 и умре Елон Завулонянин, и погребен бысть во Елиме в земли Завулони. 13 И суди по нем Израилеви Авдон сын Еллихов Фарафонитин: 14 и быша ему четыредесять сынове и тридесять внуцы, ездящии на седмидесяти ослех: и суди Израилеви осмь лет: 15 и умре Авдон сын Еллихов Фарафонитин, и погребен бысть в Фарафоне, в земли Ефремли, в горе Амаликове. === 13 === 1 И приложиша еще сынове Израилевы творити зло пред Господем: и предаде я Господь в руку Филистимску четыредесять лет. 2 И бяше муж един от Сараи, от племене Данова, имя же ему Маное: и жена ему бяше неплоды и не раждаше. 3 И явися Ангел Господень к жене и рече к ней: се, ты неплоды и не раждала еси, и зачнеши и родиши сына: 4 и ныне блюдися, и не пий вина и сикера, и не яждь всякаго нечистаго: 5 яко се, ты во утробе приимеши и родиши сына: и железо на главу его не взыдет, яко назорей Богови будет сие отроча от чрева: и сей начнет спасати Израиля из руки Филистимли. 6 И вниде жена и рече мужу своему, глаголющи: человек Божий прииде ко мне, и образ его яко образ Ангела Божия, страшен зело: и вопрошах его, откуду еси? И имене своего не поведа ми, 7 и рече мне: се, ты во утробе зачнеши и родиши сына: и ныне не пий вина, ни сикера, и не яждь всякаго нечистаго, яко назорей Богу будет отрочищь от утробы даже до дне смерти своея. 8 И помолися Маное ко Господу и рече: во мне, Господи, человек Божий, егоже послал еси, да приидет еще к нам и наставит ны, что сотворим отрочати раждающемуся. 9 И послуша Бог молитвы Маноевы: и прииде паки Ангел Божий к жене, сия же седяше на селе, и Маное муж ея не бяше с нею. 10 И потщася жена, и текши скоро поведа мужу своему, и рече к нему: се, явися мне муж, иже приходил в день он ко мне. 11 И востав иде Маное вслед жены своея, и прииде к мужу и рече ему: ты ли еси муж глаголавый к жене (моей)? И рече Ангел: аз. 12 И рече Маное: ныне убо да приидет слово твое, кий будет суд отрочате, и что дела его? 13 И рече Ангел Господень к Маною: от всех, яже глаголах к жене, да сохранится: 14 от всего, еже исходит из винограда, да не яст, и вина и сикера да не пиет, и всякаго нечистаго да не яст: и вся, елика заповедах ей, да хранит. 15 И рече Маное ко Ангелу Господню: да удержим тя зде, и сотворим пред тобою козлище от коз. 16 И рече Ангел Господень к Маною: аще мя понудиши, не буду ясти хлеба твоего: но аще сотвориши всесожжение Господеви, то вознеси е. Не ведяше бо Маное, яко Ангел Господень той. 17 И рече Маное ко Ангелу Господню: что имя твое? Да егда сбудется слово твое, прославим тя. 18 И рече ему Ангел Господень: почто сие вопрошаеши имене моего? И то есть чудно. 19 И взя Маное козлища от коз и жертву, и вознесе на камень Господеви чудная творящему: Маное же и жена его зряста. 20 И бысть егда пламень взыде выше олтаря даже до небесе, и взыде Ангел Господень в пламени олтаря: Маное же и жена его смотряста, и падоста лицем своим на землю. 21 И не приложи ктому Ангел Господень явитися Маною и жене его. Тогда уведе Маное, яко Ангел Господень есть. 22 И рече Маное к жене своей: смертию умрем, яко Бога видехом. 23 И рече ему жена его: аще бы хотел Господь умертвити нас, не бы взял от рук наших всесожжения и жертвы, и не бы показал нам сих всех, и не бы слышана сия сотворил нам якоже ныне. 24 И роди жена сына, и нарече имя ему Сампсон. И возмужа отроча, и благослови е Господь: 25 и нача Дух Господень ходити с ним в полце Данове, посреде Сараи и посреде Есфаола. === 14 === 1 И сниде Сампсон во Фамнафу и виде жену во Фамнафе от дщерей Филистимских, и угодна бысть пред ним. 2 И взыде и поведа отцу своему и матери своей, и рече: жену видех во Фамнафе от дщерей Филистимских, и ныне поимите ю мне в жену. 3 И рече ему отец его и мати его: еда несть дщерей от братии твоея и от всех людий моих жены, яко ты идеши пояти жену от дщерей иноплеменников необрезанных? И рече Сампсон ко отцу своему: сию поими мне, яко та угодна есть пред очима моима. 4 Отец же его и мати его не разумеша, яко сие от Господа есть, яко отмщения он ищет от Филистимлян: в то бо время владяху Филистимляне сыны Израилевыми. 5 И сниде Сампсон и отец его и мати его во Фамнафу, и приидоша до винограда Фамнафа: и се, львичищь рыкающь во сретение ему. 6 И сниде на него Дух Господень, и растерза его яко козлища от коз, и ничтоже бяше в руку его: и не поведа отцу своему и матери своей, еже сотвори. 7 И поидоша и рекоша жене, и угодна бысть пред очима Сампсона. 8 И возвратися по днех пояти ю, и обратися видети труп львов, и се, рой пчел во устех львовых и мед: 9 и изя его от уст его в руце свои, и идяше идый и ядый: и пойде ко отцу своему и матери своей, и даде им, и ядоша: и не поведа им, яко от уст львовых изя сей мед. 10 И сниде отец его к жене, и сотвори Сампсон тамо пир седмь дний, яко тако творят юношы: 11 и бысть внегда боятися им его, приставиша к нему тридесять другов, и быша с ним: 12 и рече им Сампсон: предлагаю ныне вам гадание, и аще отгадающе поведите мне сие в седмь дний пира и обрящете, дам вам тридесять поняв и тридесять риз одежд: 13 аще же не возможете сие поведати мне, дадите вы мне тридесять поняв и тридесять риз изменных. И рекоша ему: предложи гадание твое, и услышим е. 14 И глагола им: от ядущаго ядомое изыде, и от крепкаго изыде сладкое. И не могоша поведати гадания до трех дний. 15 И бысть в день четвертый, и рекоша жене Сампсонове: прельсти мужа своего, и да повесть тебе гадание, да не сожжем тя и дом отца твоего огнем: или оубожити призвасте ны? 16 И плакася жена Сампсонова пред ним и рече: разве возненавидел еси мене и не возлюбил еси мене, яко гадания, еже еси предложил сыном людий моих, не поведал еси его мне. И рече ей Сампсон: се, отцу моему и матери моей не поведах сего, и тебе ли повем? 17 И плакася пред ним седмь дний, в няже бе им пир. И бысть в день седмый, и поведа ей, яко стужи ему: и та поведа сыном людий своих. 18 И рекоша ему мужие градстии в день седмый прежде зашествия солнца: что слаждше меда? И что креплее льва? И рече им Сампсон: аще не бысте орали юницею моею, не бысте уведали гадания моего. 19 И нападе на него Дух Господень, и сниде во Аскалон, и изби тамо тридесять мужей, и взя ризы их, и даде ризы поведавшым гадание. И разгневася яростию Сампсон, и взыде в дом отца своего. 20 Жена же Сампсонова иде за инаго мужа, иже бысть един от другов его. === 15 === 1 И бысть по днех во дни жатвы пшеницы, и посети Сампсон жену свою, несый козлище от коз, и рече: да вниду к жене моей в ложницу. И не даде ему отец ея внити. 2 И рече отец ея, глаголя: рех, яко ненавидя возненавидел еси ю, и отдах ю единому от другов твоих: не се ли сестра ея меншая добрейши ея есть? Да будет тебе ныне вместо ея. 3 И рече ему Сампсон: чист есмь ныне от Филистимлян, яко сотворю аз с ними зло. 4 И пойде Сампсон, и ят триста лисиц, и взя свещы, и связа ошиб ко ошибу, и устрои едину свещу между двема ошибома: 5 и разжже огнь в свещах, и пусти я в нивы Филистимски: и запали нивы от гумен и даже до класов простых и до винограда и масличия. 6 И рекоша иноплеменницы: кто сотвори сия? И рекоша: Сампсон зять Фамнафеев, яко взя жену его и даде ю единому от другов его. И взыдоша иноплеменницы и сожгоша ю и дом отца ея огнем. 7 И рече им Сампсон: аще и сотвористе вы тако ей, аз не благоизволю, но отмщение мое единому комуждо вас сотворю, и посем почию. 8 И порази их голени до бедр язвою велиею: и сниде, и вселися у водотечи в пещере камене Итама. 9 И изыдоша Филистимляне, и ополчишася во Иуде, и разсеяшася в Лехи. 10 И рече им всяк муж Иудин: почто приидосте на ны? И рекоша иноплеменницы: связати Сампсона приидохом и сотворити ему, якоже сотвори нам. 11 И снидоша три тысящы мужей от Иуды к пещере камене Итама и рекоша к Сампсону: не веси ли, яко владеют нами Филистимляне? И вскую сия сотворил еси нам? И рече им Сампсон: якоже ми сотвориша, тако сотворих им. 12 И рекоша ему: связати тебе приидохом и предати тя в руце иноплеменником. И рече им Сампсон: кленитеся мне, да не убиете мене вы. 13 И рекоша ему, глаголюще: ни, но токмо соузом свяжем тя и предадим тя в руки их, смертию же не умертвим тебе. И связаша его двема ужы новыми и изведоша его от камене того. 14 И той прииде до Челюсти: иноплеменницы же воскликнуша и текоша противу ему. И сниде на него Дух Господень, и быша ужя на мышцах его яко изгребие, егда зажжется огнем: и разрешишася узы его от руку его: 15 и обрете челюсть ослю повержену, и простре руку свою, и взя ю: и изби ею тысящу мужей. 16 И рече Сампсон: челюстию ослею потребляя потребих их, яко челюстию ослею избих тысящу мужей. 17 И бысть егда преста глаголя, и поверже челюсть от руки своея: и нарече место тое Избиение Челюстное. 18 И возжажда зело, и возопи ко Господу, и рече: Ты благоволил еси в руце раба Твоего спасение великое сие, и ныне умираю жаждею, и впаду в руки необрезанных. 19 И разверзе Бог язву на Челюсти, и изыде из нея вода, и пи: и возвратися дух его, и оживе: сего ради прозвася имя ей Источник призывающаго, иже есть в Челюсти, даже до дне сего. 20 И суди Израилю во дни Филистимлян двадесять лет. === 16 === 1 И иде Сампсон в Газу, и виде тамо жену блудницу и вниде к ней. 2 И поведаша Газяном, глаголюще: прииде Сампсон семо. И обыдоша и подседоша ему всю нощь у врат градных, и утаишася всю нощь, глаголюще: дондеже осветает утро, и убием его. 3 И спа Сампсон до полунощи: и воста в полунощи, и восхити двери у врат града со обеими вереями, и подя оныя с заворою, и возложи я на рамена своя, и вознесе я на верх горы, яже пред лицем Хеврона, и положи их тамо. 4 И бысть по сем, и возлюби жену от водотечи Сориховы: имя же ей Далида. 5 И взыдоша к ней князи иноплеменничи и рекоша ей: прельсти его, и виждь, в чем есть крепость его великая, и чим преможем его, и свяжем его, яко смирити его: и мы тебе дадим кийждо тысящу и сто сребреников. 6 И рече Далида к Сампсону: повеждь ми ныне, в чем крепость твоя (тако) великая, и чим свяжешися и смиришися? 7 И рече ей Сампсон: аще свяжут мя седмию тятивами сырыми неистлевшими, и изнемогу, и буду яко един от человек. 8 И принесоша ей князи от иноплеменник седмь тятив мокрых неистлевших, и связа его ими: 9 и подсада ему седяше в храмине. И рече ему: иноплеменницы на тя, Сампсоне. И расторже тятивы, аки бы кто расторгнул соскание изгребий, егда коснется ему огнь: и не уведася крепость его. 10 И рече Далида к Сампсону: се, прельстил еси мя, глаголя ко мне лжу: ныне убо повеждь ми, чим свяжешися? 11 И рече к ней: аще вяжуще свяжут мя ужы новыми, имиже не делано, и изнемогу, и буду яко един от человек. 12 И взя Далида ужы новы и связа его ими, и рече ему: иноплеменницы на тя, Сампсоне. Подсада же седяше в храмине. И расторже я от руку своею аки нить. 13 И рече Далида к Сампсону: даже до ныне прельщал мя еси и глаголал ко мне лжу: повеждь ми убо, чим свяжешися? И рече ей: аще сплетеши седмь плениц влас главы моея спрядением и вбиеши колом в стену, и буду немощен яко един от человек. 14 И успи Далида его на коленех своих, и бысть внегда уснути ему, взя Далида седмь плениц влас главы его и сплете спрядением и вонзе колом в стену, и рече: иноплеменницы на тя, Сампсоне. И возбну от сна своего и исторже кол сплетением из стены, и не уведася крепость его. 15 И рече к нему Далида: како глаголеши, возлюбих тя, и сердце твое несть со мною? Се, третие прельстил еси мя, и не поведал еси мне, в чем крепость твоя великая. 16 И бысть егда стужи ему словесы своими по вся дни, и убеди его, и изнеможе даже до умертвия. 17 И поведа ей все сердце свое, и рече к ней: железо не взыде на главу мою, яко назорей есмь аз Господу от утробы матере моея: аще убо обриюся, отступит от мене крепость моя, и изнемогу, и буду якоже вси человецы. 18 И виде Далида, яко поведа ей все сердце свое, посла и призва князи иноплеменничи, глаголющи: взыдите еще единою, яко поведа ми все сердце свое. И взыдоша к ней вси князи иноплеменничи, и принесоша сребро в руках своих. 19 И успи Далида Сампсона на коленех своих: и призва стригача, и остриже седмь плениц влас главы его: и нача смирятися, и отступи крепость его от него. 20 И рече Далида: иноплеменницы на тя, Сампсоне. И возбудися от сна своего и рече: изыду якоже и прежде, и отрясуся. И не разуме, яко Господь отступи от него. 21 И яша его иноплеменницы, и избодоша ему очи, и введоша его в Газу, и оковаша его путы медяны: и бяше меля в храмине темничней. 22 И начаша власы главы его расти по острижении. 23 И князи иноплеменничи собрашася пожрети жертву велику Дагону богу своему и возвеселитися, и рекоша: предаде бог наш в руки нашя Сампсона врага нашего. 24 И видеша его людие, и похвалиша бога своего, яко реша: предаде бог наш в руки нашя врага нашего, опустошившаго землю нашу, и иже умножи язвенных наших. 25 И бысть егда возблажа сердце их, и рекоша: призовите Сампсона из дому темничнаго, и да играет пред нами. И призваша Сампсона из дому темничнаго, и играша пред ними: и заушаху его, и поставиша его между столпы. 26 И рече Сампсон ко юноши держащему его за руку: остави мене, да осяжу столпы, на нихже дом сей утвержден есть, и опруся на них. Юноша же сотвори тако. 27 Дом же бяше полн мужей и жен, и тамо вси князи иноплеменничи: на крове же том до трех тысящ мужей и жен, зряще ругаемаго Сампсона. 28 И воззва Сампсон ко Господу и рече: Адонаи Господи, Господи Сил, помяни мя ныне, и укрепи мя еще единою, Боже, да воздам мщение едино за два ока моя Филистимом. 29 И объя Сампсон оба столпа средния, на нихже храмина бяше утверждена, и опреся на них, держя един рукою десною, а другий левою. 30 И рече Сампсон: да умрет душа моя со иноплеменники. И преклонися крепостию, и паде храмина на князи и на вся люди иже в ней: и бысть мертвых, ихже умертви Сампсон при смерти своей, множае неже ихже умертви в животе своем. 31 И снидоша братия его и весь дом отца его, и взяша его: и взыдоша, и погребоша его между Сараи и между Есфаолом во гробе Маноя отца его. И сей суди Израилю лет двадесять. (и воста по Сампсоне Емегар сын Енань, и уби от иноплеменников шесть сот мужей кроме скота, и спасе и он Израиля.) === 17 === 1 И бысть муж от горы Ефремли, и имя ему Миха: 2 и рече матери своей: тысяща и сто сребреников иже украдены у тебе, и заклинала мя еси и глаголала еси во ушы мои: се, сребро у мене, аз взях е. И рече мати его: благословен сын мой Господеви. 3 И отдаде тысящу и сто сребреников матери своей. И рече мати его: освящающи освятих сребро Господеви от руки моея, тебе сынови моему сотворити (кумир) изваян и слиян, и ныне отдам е тебе. 4 И отдаде сребро матери своей. И взя мати его двести сребреников и даде их среброделю, и сотвори тое (кумир) изваян и слиян: и бысть в дому Михи. 5 И дом Михин ему дом Божий. И сотвори ефуд и ферафин: и наполни руку единому от сынов своих, и бысть ему жрец. 6 В тыя же дни не бяше царя во Израили: кийждо муж, еже право видяшеся пред очима его, творяше. 7 И бысть юноша от Вифлеема Иудина и от рода племене Иудина, и сей левитин, и обиташе тамо: 8 и пойде сей муж от града Вифлеема Иудина обитати, идеже обрящет место: и прииде до горы Ефремли и даже до дому Михина, еже сотворити путь свой. 9 И рече ему Миха: откуду идеши? И рече ему левитин: аз есмь от Вифлеема Иудина, и иду обитати, идеже обрящу место. 10 И рече ему Миха: седи со мною и буди ми отец и жрец, и аз дам тебе сребреников десять в год и двои ризы, и яже на житие тебе. 11 И пойде левит, и нача обитати у мужа. И бысть юноша ему яко един от сынов его. 12 И наполни Миха руку левитину, и бысть ему юноша жрец, и бяше в дому Михи. 13 И рече Миха: ныне уведех, яко благосотворит мне Господь, яко бысть мне левитин жрец. === 18 === 1 В тыя дни не бяше царя во Израили: и в тыя дни племя Даново искаше себе наследия вселитися, яко не паде ему наследие до дний оных среде племен сынов Израилевых. 2 И послаша сынове Дановы от сонмов своих пять мужей от части своея, мужы сильны от Сараи и Есфаола, соглядати землю и изследити ю, и рекоша к ним: идите и изследите землю. И приидоша до горы Ефремли, до дому Михина, и сташа тамо в дому Михи. 3 И тии познаша глас юноши левитина, и уклонишася тамо, и рекоша ему: кто тя приведе семо? И что твориши в месте сем? И что тебе зде? 4 И рече им: сице и сице сотвори мне Миха, и ная мя, и бых ему жрец. 5 И рекоша ему: вопроси убо Бога, и увемы, аще благопоспешится путь наш, в оньже мы идем. 6 И рече им жрец: идите с миром: пред Господем путь ваш, в оньже идете. 7 И идоша пять мужие и приидоша в Лаис: и видеша людий живущих в нем, седящих со упованием по обычаю Сидонян, в тишине и надежде, и не бе устрашаяй, или посрамляяй словесе на земли, наследник истязуяй сокровища: зане далече бяху от Сидонян, и не имяху словесе с киим либо человеком. 8 И приидоша пять мужей ко братии своей в Сараю и Есфаол и рекоша братии своей: что вы седите? 9 И реша: востаните, и взыдем на ня, зане видехом землю, и се, блага зело, и вы молчите: не обленитеся ити и внити еже наследити землю: 10 и егда приидете, внидете в люди живущыя со упованием, а земля пространна: яко предаде ю Бог в руки вашя, место на немже несть скудости во всем еже на земли. 11 И воздвигошася оттуду от племене Данова, от Сараи и Есфаола, шесть сот мужей препоясани во оружие ополчения, 12 и взыдоша и ополчишася в Кариафиариме во Иуде: сего ради наречеся место то полк Данов и до сего дне: се созади Кариафиарима. 13 И преидоша оттуду в гору Ефремлю и приидоша до дому Михина. 14 И отвещаша пять мужей ходившии соглядати землю Лаис и рекоша ко братии своей: разуместе ли, яко есть в дому сем ефуд и ферафин, и изваяно и слияно? И ныне уведите, что сотворите. 15 И уклонишася тамо и внидоша в дом юноши левитина, в дом Михин, и вопросиша его в мире. 16 И шесть сот мужей препоясани во оружие ополчения своего, стояще у дверий вратных, иже от сынов Дановых. 17 И взыдоша пять мужей ходивших соглядати землю: и вшедше тамо взяша изваяно, и ефуд и ферафин, и слияное: жрец же стояше у дверий вратных, и шесть сот мужей препоясани во оружие воинско: 18 и сии внидоша в дом Михин и взяша ефуд и ферафин, и слияно и изваяно. И рече к ним жрец: что вы творите? 19 И реша ему: умолчи, положи руку твою на уста твоя и пойди с нами, и буди нам отец и жрец: еда уне есть тебе быти жерцу единаго мужа дому, нежели быти жерцу племени и дому и сонма Израилева? 20 И возблажа сердце жреческо, и взя ефуд и ферафин, и изваяное и слияное, и вниде посреде людий. 21 И возвратишася и отидоша, и пустиша пред собою чада и притяжание свое честное. 22 Удалившымся же им от дому Михина, и се, Миха и мужие иже в жилищах, яже с домом Михиным быша, воззваша и постигоша сыны Дановы, 23 и возопиша к сыном Дановым: и обратиша сынове Дановы лица своя и реша к Михе: что есть тебе, яко воззвал еси? 24 И рече Миха: яко изваяное мое, еже сотворих, взясте, и жерца, и поидосте: и что мне еще? И что сие глаголете мне: что вопиеши? 25 И рекоша ему сынове Дановы: да не услышится ныне глас твой вслед нас, да не востанут на вы мужие лютою душею, и положиши душу твою и душу дому твоего. 26 И идоша сынове Дановы в путь свой. И виде Миха, яко сильнейшии суть паче его, и возвратися в дом свой. 27 И сынове Дановы взяша, елика сотвори Миха, и жерца, иже бяше у него, и приидоша в Лаис, к людем молчащым и уповающым надеждею, и избиша их острием меча, и град сожгоша огнем: 28 и не бяше избавляяй, яко далече бяху от Сидонян, и словесе не бяше им с человеком: и сей (град бысть) во удолии Дому Роовля: и соградиша град и вселишася в нем, 29 и нарекоша граду имя Дан, во имя Дана отца своего, иже родися Израилю: и бяше прежде имя граду Лаис. 30 И поставиша себе сынове Дановы изваяное: Ионафан же сын Гирсонь сын Манассиин, той и сынове его бяху жерцы племени Данову до дне преселения земли: 31 и поставиша себе изваяное, еже сотвори Миха, во вся дни, в няже бяше дом Божий в Силоме. === 19 === 1 И бысть в тыя дни не бяше царя во Израили: и бысть муж левитин живый во стране горы Ефремовы, и поя себе жену подложницу от Вифлеема Иудина: 2 и разгневася нань подложница его, и отиде от него в дом отца своего в Вифлеем Иудин, и бе тамо четыри месяцы: 3 и воста муж ея и иде вслед ея глаголати в сердце ея, обратити ю к себе и привести паки к себе: и отрок его с ним, и двое ослят: она же введе его в дом отца своего: 4 и виде его отец отроковицы и изыде с веселием во сретение его, и удержа его тесть его отец отроковицы, и пребысть с ним три дни, и ядоша и пиша, и спаша тамо. 5 И бысть в день четвертый, и обутреша заутра, и воста поити. И рече отец отроковицы к зятю своему: укрепи сердце твое укрухом хлеба, и по сем пойдете. 6 И седоша, и ядоша оба вкупе и пиша. И рече отец отроковицы к мужу: иди ныне и преспи, и возблажает сердце твое. 7 И воста муж поити: и понуди его тесть его, и седе, и пребысть тамо. 8 И воста рано в пятый день да идет. И рече отец отроковицы: укрепи убо сердце твое хлебом, и пребуди дондеже преклонится день. И ядоша и пиша оба. 9 И воста муж да идет сам и подложница его и отрок его. И рече ему тесть его отец отроковицы: се, уже преклонися день к вечеру, пребуди зде, и возблажает сердце твое, и обутреете утро в путь ваш, и отидеши в селение свое. 10 И не изволи муж пребыти, и воста и отиде: и прииде даже прямо Иевусу, сей есть Иерусалим, и с ним двое ослят с бремены, и подложница его с ним. 11 И приидоша до Иевуса, и день преклонися к вечеру зело: и рече отрок ко господину своему: гряди убо, да уклонимся во град сей Иевус и пребудем в нем. 12 И рече к нему господин его: не уклонимся во град чуждь, в немже несть от сынов Израилевых, но прейдем до Гаваона. 13 И рече ко отроку своему: гряди, да приступим ко единому от мест Гаваонских и пребудем в Гаваоне или в Раме. 14 И минуша, и идоша, и зайде им солнце близ Гаваона, иже есть Вениаминь: 15 и уклонишася тамо внити превитати в Гаваоне, и внидоша и седоша на стогнах града: и не бе муж вводяй их в дом превитати. 16 И се, муж стар идяше с дела своего из поля в вечер, и сей муж от горы Ефремли, и той обиташе в Гаваоне: и мужие места сынове Вениамини. 17 И возвед очи свои, виде мужа путника на стогнах градных, и рече муж старец: камо идеши и откуду грядеши? 18 И рече к нему: грядем мы от Вифлеема Иудина даже до стран горы Ефремли, отюнудуже аз есмь: и ходих до Вифлеема Иудина, и иду аз в дом мой: и несть мужа вводящаго мя в дом: 19 а плевы и пища ослятом нашым есть, и мне хлеб и вино есть, и отроковице и отроку: рабом твоим несть скудно ни коея вещи. 20 И рече муж стар: мир тебе: и весь недостаток твой на мне, обаче на стогнах не лязи. 21 И введе его в дом свой, и даде место ослятом его: и омыша ноги своя, и ядоша и пиша. 22 Егда же возвеселися сердце их, и се, мужие градстии сынове беззаконников обыдоша дом биюще в двери, и реша мужу господину дому старцу, глаголюще: изведи мужа иже вниде в дом твой, да познаем его. 23 И изыде к ним муж господин дому и рече: ни, братия, не сотворите зла мужу сему повнегда внити ему в дом мой, и не сотворите безумия сего: 24 се, дщерь моя дева, и подложница его: изведу их, и смирите их, и сотворите им еже благо пред очима вашима: а мужу сему не сотворите словесе безумия сего. 25 И не изволиша мужие послушати его. И взя муж подложницу его и изведе ю к ним вон: и познаша ю и ругашася над нею всю нощь даже до утра, и отпустиша ю, егда взыде денница. 26 И прииде жена к заутрию, и паде у дверий дому, идеже бяше муж ея, до разсветания. 27 И воста муж ея заутра, и отверзе двери дому и изыде поити в путь свой: и се, жена его подложница лежаше при дверех дому, и руце ея на преддверии. 28 И рече к ней: востани, да идем. И не отвеща ему, бяше бо мертва. И возложи ю на осля, и воста муж и пойде на место свое. 29 И прииде в дом свой, и взя нож, и взя подложницу свою, и раздроби ю по удесем ея на дванадесять частей, и посла я во вся племена Израилева. 30 И бысть всяк видящий глаголаше: не бысть, ни видено бе сице от дне изшествия сынов Израилевых от земли Египетския даже до дне сего. И заповеда мужем, ихже посла, глаголя: сице глаголите ко всему Израилю: аще бысть по словеси сему? Уставите сами себе о ней совет и глаголите. === 20 === 1 И изыдоша вси сынове Израилевы, и собрашася весь сонм яко един муж, от Дана и до Вирсавии, и земля Галаадска к Господеви в Массифу, 2 и сташа пред лицем Господним вся племена Израилева в сонме людий Божиих, четыреста тысящ мужей пеших воздвизающих оружия. 3 И услышаша сынове Вениамини, яко взыдоша сынове Израилевы в Массифу, и рекоша сынове Израилевы: глаголите, где бысть злоба сия? 4 И отвеща муж левитин, муж жены умореныя, глаголя: в Гаваон Вениаминь приидох аз и подложница моя витати: 5 и восташа на мя мужие Гаваонстии и обыдоша мя во дворе нощию, и хотеша мя убити, и подложницу мою обидеша и обругаша, и умре: 6 и взях подложницу мою и раздробих ю, и послах ю во вся пределы наследия Израилева, яко сотвориша безумие во Израили: 7 се, вси вы сынове Израилевы, дадите себе слово и совет зде. 8 И восташа вси людие яко един муж, глаголюще: не отидет муж в селение свое, и не возвратится муж в дом свой: 9 и ныне слово сие, еже сотворим Гаваону: взыдем на него по жребию, 10 токмо возмем по десяти мужей от ста во всех племенех Израилевых, и сто от тысящи, и тысяща от тмы, взяти брашно людем исходящым в Гаваю Вениаминю, сотворити ему по всему согрешению, еже сотвори во Израили. 11 И собрашася вси мужие Израилевы ко граду, яко един муж из градов исходяще, 12 и послаша племена Израилева мужей во все племя Вениамине, глаголюще: кая злоба сия бывшая в вас? 13 И ныне дадите мужей беззаконных, иже в Гаваи, сынов велиаловых, и умертвим их, и очистим зло от Израиля. И не изволиша сынове Вениамини послушати гласа братии своея сынов Израилевых. 14 И собрашася сынове Вениамини от градов своих в Гаваю, изыти на брань к сыном Израилевым. 15 И сочтошася сынове Вениамини от градов в той день двадесять и пять тысящ мужей воздвизающих оружия, кроме живущих в Гаваи: 16 ихже сочтеся седмь сот мужей избранных от всех людий ободесноручных: сии вси пращницы мещуще камение ко власу и не погрешающе. 17 И всех мужей Израилевых сочтеся, кроме сынов Вениаминовых, четыреста тысящ мужей воздвизающих оружие: вси сии мужие воини. 18 И восташа, и взыдоша в Вефиль, и вопросиша Бога, и рекоша сынове Израилевы: кто от нас взыдет в начале воевати на сыны Вениамини? И рече Господь: Иуда в начале да взыдет вождь. 19 И восташа сынове Израилевы заутра и ополчишася на Гаваю. 20 И изыде всяк муж Израилев на брань с Вениамином, и сразишася с ними мужие Израилевы на брани у Гаваи. 21 И изыдоша сынове Вениаминовы из Гаваи, и избиша во Израили в той день двадесять две тысящы мужей на земли. 22 И укрепися всяк муж Израилев, и приложиша снитися на брань на место, идеже снидошася в день первый. 23 И взыдоша сынове Израилевы и плакашася пред Господем до вечера, и вопросиша Господа, глаголюще: аще приложим еще приступити на брань к сыном Вениаминим братиям нашым? И рече Господь: взыдите к ним. 24 И приидоша сынове Израилевы к сыном Вениаминим в день вторый. 25 И изыдоша сынове Вениамини противу им от Гаваи в день вторый, и избиша еще от сынов Израилевых осмьнадесять тысящ мужей на земли: сии вси воздвизающии оружие. 26 И взыдоша вси сынове Израилевы и вси людие, и приидоша в Вефиль, и плакашася, и седоша тамо пред Господем, и постишася в той день даже до вечера: 27 и вознесоша всесожжение спасения пред Господем, яко тамо кивот завета Господа Бога во дни оны, 28 и Финеес сын Елеазара сына Аароня предстоя пред ним в тыя дни. И вопросиша сынове Израилевы Господа, глаголюще: аще приложим взыти еще на брань к сыном Вениаминим братиям нашым, или оставим? И рече Господь: взыдите, заутра предам их в руки вашя. 29 И поставиша сынове Израилевы подсаду окрест Гаваи. 30 И взыдоша сынове Израилевы к сыном Вениаминим в день третий: и ополчишася на Гаваю яко единою и единою. 31 И изыдоша сынове Вениамини противу людем и протягошася из града, и начаша убивати людий уязвленых, якоже первое и второе на путех, от нихже есть един сходяй в Вефиль, а другий в Гаваю на селе, яко тридесять мужей во Израили. 32 И рекоша сынове Вениамини: падают пред нами якоже и прежде. И сынове Израилевы рекоша: побежим и отторгнем их от града на пути. И сотвориша тако. 33 И вси мужие Израилевы восташа от места своего и снидошася в Ваал-Фамаре: подсада же Израилева нахождаше от места своего от запада Гаваи. 34 И приидоша противу Гаваи десять тысящ мужей избранных от всего Израиля, и брань бяше тяжка: и тии не разумеша, яко постизает их зло. 35 И порази Господь Вениамина пред сыны Израилевыми: и избиша сынове Израилевы от Вениамина в той день двадесять пять тысящ и сто мужей: сии вси воздвизаху оружие. 36 И видеша сынове Вениамини, яко поражени суть. И даша место сынове Израилевы Вениамину, понеже уповаша на подсаду, юже подсадиша у Гаваи: 37 и подвижеся подсада, и устремися на Гаваю, и избиша весь град острием меча. 38 И Израилтяне имяху знамение с подсадою брани, явити знамение дыма из града. 39 И возвратися Израиль на брань, и Вениамин нача убивати язвеных во Израили до тридесяти мужей, яко рекоша: паки падением падают пред нами, якоже и первая брань. 40 И знамение взыде наипаче над градом, аки столп дыма: и озреся Вениамин вспять, и се, взыде скончание града до небеси. 41 И муж Израилев возвратися: и потщашася мужие Вениамини, видеша бо, яко постиже их зло, 42 и побегоша пред сыны Израилевыми на путь пустыни, брань же постиже их, и иже из градов избиваша их среде себе: 43 и побиваху Вениамина, и гнаша его от Нуа вслед его до Гаваи без опочивания, и поразиша его даже противу Гаваи на восток солнца. 44 И падоша от Вениамина осмьнадесять тысящ мужей, сии вси мужие сильнии. 45 И озрешася оставшии, и побегоша в пустыню к каменю Реммоню: и пожаша от них сынове Израилевы по стезям яко стеблие пять тысящ мужей, и гнаша вслед их до Гадаама и избиша от них две тысящы мужей. 46 И быти всех падших от Вениамина в той день двадесять пять тысящ мужей воздвизающих оружие, вси сии мужие сильнии. 47 И озрешася оставшии, и вбегоша в пустыню к каменю Реммоню шесть сот мужей, и седеша в камени Реммони четыри месяцы. 48 Сынове же Израилевы возвратишася к сыном Вениаминим, и избиша я оружием от града вне, даже и до скота, и все еже обретеся во всех градех, и грады вся обретшыяся пожгоша огнем. === 21 === 1 И сынове Израилевы кляшася в Массифе, глаголюще: муж от нас да не даст Вениамину дщере своея в жену. 2 И приидоша людие в Вефиль и седеша тамо до вечера пред Богом: и воздвигоша глас свой, и плакашася плачем велиим, и рекоша: 3 вскую, Господи Боже Израилев, бысть сице днесь во Израили, еже оскудети от Израиля племени единому? 4 И бысть на утрия, и обутреша людие, и соградиша тамо олтарь, и вознесоша всесожжение спасения, и рекоша сынове Израилевы: 5 кто не взыде в сонм от всех племен Израилевых ко Господу? Яко велика клятва бяше не вшедшым ко Господу в Массифу, глаголюще: смертию да умрет. 6 И умилишася сынове Израилевы о Вениамине брате своем, и рекоша: изсечено днесь едино племя от Израиля: 7 что сотворим оставшымся о женах? И мы кляхомся Господем не дати им от дщерей наших в жены. 8 И рекоша: кто един от племен Израилевых, иже не взыде ко Господу в Массифу? И се, ни един прииде в полк от Иависа Галаадова в сонм. 9 И соглядаша людий, и се, не бяше тамо мужа от живущих во Иависе Галаадове. 10 И послаша тамо сонм дванадесять тысящ мужей от сынов силы и заповедаша им, глаголюще: идите и избийте живущыя во Иависе Галаадове оружием жены и народы: 11 и сие сотворите: всяк мужеский пол и всяку жену, познавшую ложе мужеско, побиете: девицы же снабдите. И сотвориша тако. 12 И обретоша от живущих во Иависе Галаадове четыре ста отроковиц дев, яже не познаша ложа мужеска: и приведоша я в полк в Силом, иже есть в земли Ханаани. 13 И послаша весь сонм и глаголаша к сыном Вениаминовым, иже в камени Реммони, и призваша их с миром. 14 И возвратися Вениамин к сыном Израилевым в то время, и даша им сынове Израилевы жены, яже живо сохраниша от дщерей Иависа Галаадова: и угодно бысть им тако. 15 И людие умилишася о Вениамине, яко сотвори Господь истребление в племенех Израилевых. 16 И рекоша старейшины сонма: что сотворим оставшым о женах? Яко погибе от Вениамина жена: 17 и како будет наследие уцелевших от Вениамина, да не погибнет племя от Израиля? 18 И мы не возможем дати им жен от дщерей наших, яко кляшася сынове Израилевы, глаголюще: проклят даяй жену Вениамину. 19 И рекоша: се, праздник Господень в Силоме от дний во дни, иже есть от севера Вефиля, на восток солнца на пути восходящем от Вефиля в Сихем, и от юга Левоны. 20 И заповедаша сыном Вениаминим, глаголюще: идите и засядите в виноградех, 21 и узрите, и се, егда изыдут дщери живущих в Силоме плясати в лики, да изыдете из виноградов и восхитите муж жену себе от дщерей Силомлих, и идите на землю Вениаминю: 22 и будет егда приидут отцы их или братия их судитися к нам, и речем им: помилуйте нас ими, яко не взя муж жены своея в полце: понеже вы не дали есте им яко жребий, согрешисте. 23 И сотвориша тако сынове Вениамини, и пояша жены по числу своему от пляшущих, яже восхитиша: и отидоша и возвратишася в наследие свое, и создаша грады и вселишася в них. 24 И отидоша оттуду сынове Израилевы в то время, муж во племя свое и в род свой: и изыде оттуду муж в наследие свое. И в тыя дни не бяше царя во Израили: муж еже угодно пред очима его, творяше. == Книга Руфь == === 1 === 1 И бысть внегда судяху судии, бысть глад на земли. И иде муж от Вифлеема Иудина обитати в селе Моавли, сам и жена его, и два сыны его: 2 имя же мужеви Елимелех, имя же жене его Ноемминь и имя двема сынома его Маалон и Хелеон, Ефрафейстии от Вифлеема Иудина. И приидоша в село Моавле, и беша тамо. 3 И умре Елимелех муж Ноемминин, и остася она и оба сыны ея: 4 и пояста себе жены Моавитския: имя единей Орфа и имя вторей Руфь: и жиша тамо до десяти лет. 5 И умроста оба сыны ея, Маалон и Хелеон, и остася жена от мужа своего и от обоих сынов ея. 6 И воста она и обе снохи ея, и возвратишася с села Моавля: зане услыша на селе Моавли, яко присети Господь людий Своих дати им хлебы. 7 И отиде от места, идеже бе, она и обе снохи ея с нею, и идяху в путь возвратитися в землю Иудину. 8 И рече Ноемминь обема снохама своима: идите убо, возвратитеся каяждо в дом отца своего: да сотворит Господь с вами милость, якоже сотвористе со умершими и со мною: 9 да даст Господь Бог вам обрести покой коейждо в дому мужа своего. И целова я: они же воздвигоша гласы своя и плакашася, 10 и рекоша ей: ни, но идем с тобою в люди твоя. 11 И рече Ноемминь: обратитеся убо, дщери мои, вскую идете со мною? Или еще мне сынове во утробе моей, и будут вам мужи? 12 Возвратитеся убо, дщери мои и отидите, яко состарехся, и не буду мужу: аще же бых и рекла, яко у мене есть надежда, да буду мужу и рожду сыны, 13 вы ли пождете их, дондеже возрастут? И вы ли удержитеся, да не будете иному мужу? Ни, дщери мои, яко горько бысть мне паче вас, яко изыде на мя рука Господня. 14 И воздвигоша гласы своя, и плакаша паки. И целова Орфа свекровь свою, и возвратися в люди своя, Руфь же последова ей. 15 И рече Ноемминь к Руфе: се, возвратися ятровь твоя к людем своим и к богом своим, возвратися убо и ты вслед ятрове своея. 16 И рече Руфь: не срящи мене то, еже оставити тебе или обратитися мне от тебе, но идеже идеши ты, и аз пойду, и идеже водворишися ты, водворюся и аз: людие твои людие мои, и Бог твой Бог мой: 17 и идеже аще умреши, умру и тамо погребуся: тако да сотворит мне Господь, и сия да приложит, яко смерть разлучит между мною и тобою. 18 Видевши же Ноемминь, яко укрепися она ити с нею, умолче глаголати к ней ктому. 19 Идосте же обе, дондеже приидосте в Вифлеем. И бысть егда приидосте они в Вифлеем, и возгласи весь град о них, и рекоша: еда сия есть Ноемминь? 20 И рече к ним: не зовите убо мене Ноемминь, но зовите мене Горька: яко исполни мя горести Вседержитель зело: 21 аз исполнь отидох, и ныне тщу мя возврати Господь: и вскую мя нарицаете Ноемминь, Господь смири мя и Вседержитель озлоби мя? 22 И возвратися Ноемминь и Руфь Моавитиня сноха ея с нею, обращающыяся с села Моавля: и приидосте в Вифлеем в начале жатвы ячменя. === 2 === 1 И бе муж знаемый мужу Ноемминю: муж же силен от рода Елимелехова, имя же ему Вооз. 2 И рече Руфь Моавитиня к Ноеммини: да иду убо на ниву и соберу класы вследствующи, идеже аще обрящу благодать пред очима его. Рече же ей: иди, дщи (моя). 3 И иде, и пришедши собираше на ниве вследствующи жателем: и прииде по случаю в часть нивы Воозовы, иже от сродства Елимелехова. 4 И се, Вооз прииде от Вифлеема и рече жнущым: Господь с вами. И реша ему: да благословит тя Господь. 5 И рече Вооз отроку своему стоящему над жатели: чия отроковица сия? 6 И отвеща отрок стояй над жнущими, и рече: отроковица Моавитиня есть, пришедшая с Ноемминою от села Моавля: 7 и рече: да соберу ныне и сложу в снопех по следу жнущих: и прииде, и ста от утра даже и до вечера, и ни мало почи на ниве. 8 И рече Вооз к Руфе: слыши, дщи, не ходи собирати на ниву ину, и ты да не отидеши отсюду: но зде прилепися ко отроковицам моим, 9 и очи твои да будут на ниве, идеже жнут, и да ходиши вслед их: се, заповедах отроком не коснутися тебе: и егда возжаждеши, и да идеши к сосудом, и пиеши отнюдуже черплют отроцы. 10 И паде (отроковица) ниц и поклонися до земли, и рече ему: что яко обретох благодать пред очима твоима, еже познати мя, аз же есмь странна? 11 И отвеща Вооз и рече к ней: возвещением возвестися мне, елика сотворила еси со свекровию твоею по умертвии мужа твоего, и како оставила еси отца твоего и матерь твою и землю рождения твоего, и пришла еси в люди, ихже не ведала от вчера и третияго дне: 12 да воздаст Господь дело твое, и да будет мзда твоя исполнь от Господа Бога Израилева, к Немуже пришла еси уповати под крилома Его. 13 Она же рече: обретох благодать пред очима твоима, господине мой, яко утешил мя еси, и яко глаголал еси в сердце рабы твоея, и се, аз буду яко едина от рабынь твоих. 14 И рече ей Вооз: уже час ясти, приближися убо семо, да яси хлеб мой, и омочи укрух твой во оцет. И сяде Руфь от страны жателей: и подаде ей Вооз пряжмо, и яде и насытися, и оста: 15 и воста собирати. И заповеда Вооз отроком своим, глаголя: среде снопов да собирает, и не посрамите ю: 16 и носяще носите ей, и отлагающе отлагайте ей от снопов, и оставите ю собирати и ясти, и не возбраните ей. 17 И собира до вечера на ниве, и измлати еже собра, и бысть яко ифи мера ячменя: 18 и взя, и прииде во град. И виде свекровь ея еже собра: и иземши Руфь от недр своих, даде свекрови своей, еже оставила, от нихже насытися. 19 И рече к ней свекровь ея: где еси собирала днесь, и где работала? Да будет благословен познавый тя. И поведа Руфь свекрови своей, где работала, и рече: имя мужу Вооз, у негоже работах днесь. 20 Рече же Ноемминь снохе своей: благословен есть Господем, яко не остави милости своея с живыми и со умершими. И рече ей Ноемминь: ужик есть нам муж той, и есть от ужик наших. 21 И рече Руфь ко свекрови своей: и мне убо рече: ко отроковицам моим пристани, дондеже скончают всю жатву, яже есть мне. 22 И рече Ноемминь к Руфе снохе своей: благо, дщи, яко ходила еси со отроковицами его, и не сопротивятся тебе на иней ниве. 23 И приста Руфь ко отроковицам Воозовым собирати (класы), дондеже скончася жатва ячменя и пшеницы: и седе со свекровию своею. === 3 === 1 Рече же ей Ноемминь свекровь ея: дщи (моя), не поищу ли тебе покоя, да благо ти будет? 2 И ныне Вооз не ужик ли нам, идеже со отроковицами его была еси? Се, той веет на гумне ячмень сея нощи: 3 ты же измыйся, и помасти лице твое, и облецыся в ризы твоя (светлыя), и изыди на гумно: не явися мужу, дондеже скончает ясти и пити: 4 и будет внегда уснути ему, и познаеши место, где ляжет, тамо да внидеши, и открыеши у ног его, и ляжеши: и той повесть тебе, яже имаши творити. 5 И рече Руфь к ней: вся елика речеши мне, сотворю. 6 И иде на гумно, и сотвори по всему, елика заповеда ей свекровь ея. 7 И яде Вооз и пи, и возблажа сердце его, и иде спати со страны стога: она же прииде втай, и откры яже у ног его, и ляже. 8 И бысть в полунощи, ужасеся муж и возмятеся, и се, жена лежит у ног его: 9 и рече (ей Вооз): кто еси ты? Она же рече: аз есмь Руфь раба твоя, да возложиши крило твое на рабу твою, яко ужик ты еси. 10 И рече Вооз: благословена ты Господем Богом, дщи, яко разблажила еси милость твою последнюю паче первыя, еже не ити тебе вслед юнот, аще убог, аще богат: 11 и ныне, дщи, не бойся: вся елика речеши, сотворю тебе: весть бо все племя людий моих, яко жена силы ты еси: 12 и ныне поистинне ужик есмь аз: но еще есть ужик ближший мене: 13 прележи сию нощь, и будет заутра аще приимет тя, то благо: да поймет: аще ли не восхощет пояти тебе, то поиму тя аз, жив Господь: прележи до заутрия. 14 И лежа у ног его до заутрия: она же воста, прежде неже познати мужу подруга своего. И рече Вооз: да не увестся, яко приходила жена на гумно. 15 И рече ей: принеси покрывало еже на тебе, и держи е. Она же держа е, и намери ей шесть мер ячменя, и заде ей: и иде во град. 16 И прииде Руфь ко свекрови своей. Она же рече ей: что есть, дщи? И поведа ей вся, елика сотвори ей муж. 17 И рече ей: шесть мер сих ячменя даде ми, глагола бо ко мне: да не идеши тща ко свекрови своей. 18 Она же рече: седи, дщи, дондеже увеси, како падет слово: не умолчит бо муж, дондеже совершится слово днесь. === 4 === 1 И Вооз прииде ко вратом и седе тамо: и се, ужик мимоидяше, о немже глагола Вооз. И рече ему Вооз: уклонився сяди зде. Он же уклонися и седе. 2 И поя Вооз десять мужей от старейшин града, и рече: сядите зде. И седоша. 3 И рече Вооз ужику: часть села, яже есть брата нашего Елимелеха, яже дадеся Ноеммине возвратившейся от села Моавля: 4 аз же рекох: явлю тебе сие во ухо твое, глаголя, пристяжи пред седящими и пред старейшины людий моих: и аще ужичествуеши, ужичествуй: аще же не ужичествуеши, повеждь ми, да ведаю: яко несть разве тебе еже ужичествовати ближший, и аз есмь по тебе. Он же рече: аз есмь, ужичествую. 5 И рече Вооз: в день в оньже пристяжеши село от руки Ноеммини, и от Руфы Моавитяныни жены умершаго, и сию достоит ти пояти, да возставиши имя умершаго в наследие его. 6 И рече ужик: не возмогу ужичествовати себе, да не разсыплю наследия моего: ужичествуй себе ты ужичество мое, аз бо не возмогу ужичествовати. 7 И сие управление бысть прежде во Израили о ужичествовании и о пременении, еже укрепити всякое слово: и иззуваше муж сапог свой, и даяше подругу своему ужичествующу ужичество его: и сие бяше свидетелство во Израили. 8 И рече ужик Воозу: пристяжи себе ужичество мое. И иззув сапог свой, даде ему. 9 И рече Вооз старейшинам и всем людем: свидетеле вы днесь, яко пристяжах днесь вся, яже Елимелехова, и вся елика суть Хелеонова и Маалонова, от руки Ноеммини: 10 ксему же Руфь Моавитяныню жену Маалоню поемлю себе в жену возставити имя умершаго в наследие его, да не погибнет имя умершаго от братии его и от племене людий его: свидетеле вы днесь. 11 И отвещаша вси людие иже у врат: свидетеле есмы. И старейшины реша: да даст Господь жене твоей, входящей в дом твой, якоже Рахили и яко Лии, яже создаша обе дом Израилев, и сотвориша силу во Ефрафе, и будет имя в Вифлееме: 12 и буди дом твой якоже дом Фаресов, егоже роди Фамарь Иуде, от семене твоего даст тебе Господь от рабы сея чада. 13 И поя Вооз Руфь, и бысть ему жена, и вниде к ней: и даде ей Господь зачати, и роди сына. 14 И рекоша жены к Ноеммине: благословен Господь, Иже не разсыпа ужика твоего днесь, и прозовется имя твое во Израили, 15 и будет тебе во обращающаго душу и в прекормление старости твоея, яко сноха твоя, возлюбившая тебе, роди сына, яже есть блага тебе паче седми сынов. 16 И взя Ноемминь отроча, и положи е на лоне своем, и бысть ему кормилица. 17 И прозваша соседи имя его, глаголюще: родися сын Ноеммине. И нарекоша имя ему Овид: сей есть отец Иессеа, отца Давидова. 18 И сия родства Фаресова: Фарес роди Есрома: 19 Есром же роди Арама: Арам же роди Аминадава: 20 Аминадав же роди Наассона: Наассон же роди Салмона: 21 Салмон же роди Вооза: Вооз же роди Овида: 22 Овид же роди Иессеа: Иессей же роди Давида. == Первая книга Царств == === 1 === 1 И бысть человек от Армафем Сифы, от горы Ефремли, и имя ему Елкана сын Иеремииль, сына Илиина, сына Фокеля в Насиве от Армафема от горы Ефремли: 2 и сему две жены (быша): имя единей Анна и имя вторей Феннана: и бяху Феннане дети, Анне же не бяше отрочате. 3 И восхождаше человек от дне до дне из града своего Армафема покланятися и жрети Господу Богу Саваофу в Силом. И тамо бе Илий и два сына его Офни и Финеес, жерцы Господни. 4 И бысть день, и пожре Елкана и даде Феннане жене своей и сыном ея и дщерем ея части: 5 Анне же даде часть едину, яко не бе ей чада, обаче Анну любляше Елкана паче Феннаны. И Господь затвори ложесна ея: 6 занеже не даде ей Господь чада по скорби ея и по сетованию оскорбления ея, и сетоваше сего ради, яко затвори Господь утробу ея не дати ей чада. 7 Тако творяше от года до года, внегда приходити ей в дом Господень: (укоряше ея тако,) и сетоваше, и плакаше, и не ядяше. 8 И рече ей Елкана муж ея: Анна. И рече ему: се, аз, господи. И рече ей: что ти есть, яко плачешися? И почто не яси? И почто биеши сердце твое? Несмь ли аз тебе добрее паче десяти чад? 9 И воставши Анна по ядении их в Силоме, и ста пред Господем. Илий же жрец седяше на престоле, при празе двери храма Господня. 10 И та умиленна душею, и помолися Господу и плачущи проплака, 11 и обеща обет Господу, глаголющи: Адонаи Господи Елои Саваоф, аще призирая призриши на смирение рабы Твоея и помянеши мя, и даси рабе Твоей семя мужеско, то дам е пред Тобою в дар до дне смерти его: и вина и пиянственнаго не испиет, и железо не взыдет на главу его. 12 И бысть егда умножи молящися пред Господем, Илий же жрец смотряше на уста ея. 13 И та глаголаше в сердцы своем, токмо устне ея двизастеся, а глас ея не слышашеся: и мняше ю Илий пияну сущу. 14 И рече ей Илий: доколе пияна будеши? Отими вино твое и иди от места Господня. 15 И отвеща Анна и рече: ни, господи: жена в жесток день аз есмь, вина и пиянства не пих, но изливаю пред Господем душу мою: 16 не даждь рабы твоея во дщерь погибели, яко от множества глумления моего и от множества сетования моего истаях даже доселе. 17 И отвеща Илий и рече к ней: иди с миром, Бог Израилев да даст ти все прошение твое, еже просила еси от Него. 18 И рече Анна: обрете раба твоя благодать пред очима твоима. И иде жена в путь свой, и вниде во обитель свою, и яде с мужем своим и пи, и лице ея не испаде ктому. 19 И утреневаша заутра, и поклонишася Господу, и идоша путем своим. И вниде Елкана в дом свой во Армафем и позна Елкана жену свою Анну: и помяне ю Господь, и зачат. 20 И бысть во время дний, и роди Анна сына и нарече имя ему Самуил: и рече: яко от Господа Бога Саваофа испросих его. 21 И взыде человек Елкана и весь дом его в Силом пожрети жертву дний и обеты своя и вся десятины земли своея. 22 Анна же не взыде с ним, яко рече мужеви своему: дондеже взыдет отроча, и аще отдою е, тогда явится лицу Господню и пребудет тамо до века. 23 И рече ей Елкана муж ея: твори благое пред очима твоима, седи дондеже отдоиши е: но да утвердит Господь (слово твое), изшедшее из уст твоих. И седе жена, и млеком питаше сына своего, дондеже отдои его. 24 И взыде с ним в Силом, егда отдои его, с телцем трилетным и с хлебы и со ефи муки пшеничны и мехом вина: и внидоша в дом Господень в Силом, и отроча с ними. 25 И приведоша е пред Господа: и закла отец его жертву, юже творяше от дний на дни Господеви: и приведоша отроча, и закла телца. И приведе Анна мати отроча ко Илию 26 и рече: во мне, господи, да живет душа твоя, господине мой, аз жена стоявшая пред тобою, о сем помолитися Господу: 27 о отрочати сем молихся, и даде ми Господь прошение мое, еже просих у Него: 28 и аз отдаю е Господеви во вся дни живота его на служение Господеви. И поклонися тамо Господеви. === 2 === 1 И помолися Анна и рече: утвердися сердце мое в Господе, вознесеся рог мой в Бозе моем, разширишася уста моя на враги моя, возвеселихся о спасении Твоем: 2 яко несть свят яко Господь, и несть праведен яко Бог наш, и несть свят паче Тебе: 3 не хвалитеся и не глаголите высокая в гордыни, ниже да изыдет велеречие из уст ваших: яко Бог разумов Господь, и Бог уготовляяй начинания Своя: 4 лук сильных изнеможе, и немощствующии препоясашася силою: 5 исполненнии хлеба лишишася, и алчущии пришелствоваша землю: яко неплоды роди седмь, и многая в чадех изнеможе: 6 Господь мертвит и живит, низводит во ад и возводит, 7 Господь убожит и богатит, смиряет и высит, 8 возставляет от земли убога и от гноища воздвизает нища посадити его с могущими людий, и престол славы дая в наследие им: 9 даяй молитву молящемуся и благослови лета праведнаго, яко не в крепости силен муж: 10 Господь немощна сотвори сопостата Его, Господь свят: да не хвалится премудрый премудростию своею, и да не хвалится сильный силою своею, и да не хвалится богатый богатством своим: но о сем да хвалится хваляйся, еже разумети и знати Господа, и творити суд и правду посреде земли: Господь взыде на небеса и возгреме: той судит концем земли, праведен сый, и даст крепость царем нашым и вознесет рог христа Своего. 11 И оставиша его тамо пред Господем и отидоша во Армафем в дом свой: отроча же бе служа лицу Господню пред лицем Илии жерца. 12 Сынове же Илии жерца (быша) сынове погибелнии, не ведуще Господа, 13 ни оправдания жреческа пред людьми всеми жрущими. И прихождаше отрок жреческ, егда варятся мяса, и удица трезубна в руку его, 14 и влагаше ю в коноб великий, или в медяный сосуд, или горнец, и все еже вонзеся на удицу, взимаше е себе жрец: и тако творяху всему Израилеви приходящему пожрети Господеви в Силоме. 15 И прежде каждения тука, прихождаше отрок жреческ и глаголаше мужеви жрущему: даждь мяса испещи жерцу, и не возму от тебе мяса варенаго от коноба. 16 И глаголаше муж жряй: да покадится первее тук, якоже подобает, и тогда возмеши себе от всех, еже хощет душа твоя. И рече: ни, ныне даждь: аще же не даси, возму силою. 17 И бе пред Господем грех отроков велий зело, яко отметаху жертву Господню. 18 И Самуил бе служа пред Господем, отрочищь сый опоясан во ефуд льнян. 19 И хламиду малу сотвори ему мати его, и приношаше ему от дний во дни, егда восхождаше с мужем своим пожрети жертву дний. 20 И благослови Илий Елкану и жену его, глаголя: да воздаст ти Господь семя от жены сея за дар, егоже даровал еси Господеви. И отиде человек в место свое. 21 И посети Господь Бог Анну, и зача, и роди еще три сыны и дщери две. И возвеличися отрок Самуил пред Господем. 22 Илий же состареся зело: и услыша, яже творяху сынове его всем сыном Израилевым, и яко бываху с женами предстоящими у дверий скинии свидения, 23 и рече им: почто творите по глаголу сему, егоже аз слышу из уст всех людий Господних (о вас)? 24 Ни, чада, ни: яко не благ слух, егоже аз слышу о вас: не творите тако, яко не добры слухи, яже аз слышу, еже не работати людем Богу: 25 аще согрешая согрешит муж мужеви, помолятся о нем ко Господу: аще же Господеви согрешит, кто помолится о нем? И не послушаста гласа отца своего, яко хотяй восхоте Господь погубити я. 26 Отрок же Самуил хождаше предуспевая, и бе благ пред Господем и человеки. 27 И прииде человек Божий ко Илию и рече: сия глаголет Господь: открываяся открыхся в дому отца твоего, сущым им в земли Египетстей рабом в дому фараони, 28 и избрах дом отца твоего от всех домов Израилевых Мне служити, еже восходити ко олтарю Моему и кадити кадилом и носити ефуд, и дах дому отца твоего вся, яже огня жертвенная сынов Израилевых, в снедь: 29 и почто ты воззрел еси на фимиам Мой и на жертву Мою безстудным оком, и прославил сыны твоя паче Мене, еже благословляти начаток всякия жертвы Израилевы предо Мною? 30 Сего ради сия глаголет Господь Бог Израилев, глаголя: рекох, дом твой и дом отца твоего прейдет предо Мною до века: а ныне глаголет Господь: никакоже Мне, зане токмо прославляющыя Мя прославлю, и уничижаяй Мя безчестен будет: 31 се, дние идут, и потреблю семя твое и семя дому отца твоего, и не будет старца в дому твоем во вся дни, 32 и узриши державу Мою во всех, имиже разблажает Израиля, и не будет старца в дому твоем во вся дни: 33 и мужа не истреблю тебе от олтаря Моего, во еже оскудети очесем его и истаяти души его: и вси прочии дому твоего падут оружием мужеским: 34 и сие тебе знамение, еже приидет на оба сына твоя сия Офни и Финееса: в день един умрут оба: 35 и возставлю Себе жерца верна, иже вся яже в сердцы Моем и яже в души Моей сотворит, и созижду ему дом верен, и предидет пред христом Моим во вся дни: 36 и будет всяк оставшийся в дому твоем приидет поклонитися ему с цатою сребра и хлебом единым, глаголя: приими мя к единому от священнослужений твоих, еже ясти хлеб. === 3 === 1 И отрочищь Самуил бе служа Господеви пред Илием иереем, и глаголгол Господень бе честен в тыя дни, не бе видение посылаемо. 2 И бысть в день он, и Илий спаше на месте своем, и очи его начаста тяжце быти, и не можаше зрети: 3 и прежде неже угасе светилник Божий, и Самуил спаше в церкви Господни, идеже кивот Божий, 4 и воззва Господь: Самуиле, Самуиле. И рече: се, аз. 5 И тече ко Илию и рече: се, аз, яко звал мя еси. И рече (Илий): не звах тебе, возвратися и спи. И возвратися и спа. 6 И приложи Господь и воззва еще: Самуиле, Самуиле. И воста Самуил и иде ко Илию вторицею, и рече: се, аз, яко звал мя еси. И рече: не звах тебе, чадо мое, возвратися, спи. 7 Самуил же в то время еще не познаваше Бога, прежде откровения ему гласа Господня. 8 И приложи Господь призвати Самуила третицею: и востав, и иде ко Илию и рече: се, аз, яко звал мя еси. И разуме Илий, яко Господь призывает отрочища, и рече: возвратися и спи, чадо: 9 и будет аще воззовет тя Зовый, и речеши: глаголи, Господи, яко слышит раб Твой. И иде Самуил, и спа на месте своем. 10 И прииде Господь и ста и воззва его якоже первое и второе: Самуиле, Самуиле. И рече Самуил: глаголи (Господи), яко слышит раб Твой. 11 И рече Господь к Самуилу: се, Аз творю глаголголы Моя во Израили, яко всякому слышащему сия пошумит во обоих ушесех его: 12 в день той воздвигну на Илиа вся, елика глаголах на дом его: начну и скончаю: 13 и возвестих ему, яко отмщу Аз на доме его до века в неправдах сынов его, о нихже ведяше, яко злословиста Бога сынове его, и не наказа их: 14 и сего ради кляхся дому Илиину, яко не очистится неправда дому Илиина в кадилах и жертвах его до века. 15 И спа Самуил до утра, и утренева заутра, и отверзе двери храма Господня. Самуил же убояся поведати видения Илию. 16 И рече Илий к Самуилу: Самуиле чадо. И рече: се, аз. 17 И рече (Илий): что глаголгол глаголголанный к тебе? Не скрый убо от мене: сия да сотворит тебе Бог и сия да приложит, аще утаиши от мене слово от всех словес глаголголанных к тебе во ушеса твоя. 18 И поведа Самуил Илию вся словеса, и не утаи от него (ни единаго глаголгола). И рече Илий: Господь Сам, еже благо пред Ним, да сотворит. 19 И возвеличен бысть Самуил, и Господь бе с ним, и не паде от всех словес его на земли (ни един глагол). 20 И разумеша вси Израилтяне от Дана даже и до Вирсавии, яко верен Самуил Господу во пророцех. 21 И приложи Господь явитися в Силоме, яви бо Ся Господь Самуилу: и уверися Самуил пророк быти Господеви во всем Израили, от конца до конца земли. Илий же состареся зело, и сынове его ходяще хождаху, и лукав путь их пред Господем. === 4 === 1 И бысть во дни оны, и собрашася иноплеменницы противу Израиля на брань: и изыде Израиль во сретение им на брань, и ополчишася во Авенезере, и иноплеменницы ополчишася во Афеце: 2 и сразишася иноплеменницы на брани со Израилтяны, и преклонися брань, и падоша мужие Израилевы пред иноплеменники, и убиени быша в брани на селе четыри тысящы мужей. 3 И приидоша людие в полк, и реша старейшины Израилевы: почто порази нас Господь днесь пред иноплеменники? Возмем кивот Бога нашего от Силома, и изыдет посреде нас и спасет ны от руки враг наших. 4 И послаша людие в Силом, и взяша оттуду кивот Господа седящаго на херувимех: и (быша) тамо оба сына Илиина с кивотом Божиим, Офни и Финеес. 5 И бысть егда прииде кивот Господень в полк, и возопи весь Израиль гласом великим, и возшуме земля. 6 И услышаша иноплеменницы глас вопля и реша: что сей вопль великий в полце Еврейсте? И уразумеша, яко кивот Господень прииде в полк. 7 И убояшася иноплеменницы и реша: сии бози приидоша к ним в полк: горе нам, изми ны, Господи, днесь: яко не бысть тако вчера и третияго дне: 8 горе нам, кто ны измет от руки богов крепких сих? Сии суть бози, побившии Египта всякими язвами и в пустыни: 9 укрепитеся и будите в мужы, иноплеменницы, яко да не поработаете Евреом, якоже поработаша нам, будите убо в мужы и бийтеся с ними. 10 И бишася с ними: и падоша мужие Израилевы пред иноплеменники, и побеже кийждо в селение свое, и бысть язва велика зело: и паде от Израиля тридесять тысящ чинов: 11 и кивот Божий взят бысть, и оба сыны Илиины умроша, Офни и Финеес. 12 И тече муж от брани Иеминей, и прииде в Силом в день он, и ризы своя растерзав, и персть бе на главе его. 13 И прииде, и се, Илий седяше на престоле своем у дверий, смотря на путь, яко бе сердце его во ужасе (велице) о кивоте Божии. И человек вниде во град возвещая: и возопи весь град гласом великим: 14 и слыша Илий глас вопля и рече: что есть глас вопля сего? И человек потщався вниде и поведа Илию. 15 И бе Илий девятидесяти осми лет, и очи его изнемогоста, и не видяше. 16 И рече Илий мужем предстоящым себе: что глас вопля сего? И муж потщався вниде ко Илию и рече ему: аз есмь пришедый из полка, и аз прибежах от брани днесь. И рече Илий: что бывший глагол, чадо? 17 И отвеща отрочищь и рече: побежаша мужие Израилевы от лица иноплеменников, и язва велия бысть в людех, и оба сыны твоя умроша, и кивот Божий взят есть. 18 И бысть егда помяну о кивоте Божии, и паде (Илий) с престола взнак близ дверий, и сокрушися хребет его, и умре, яко стар бе человек и тяжек: и той суди Израилеви четыредесять лет. 19 И сноха его жена Финеесова заченшая родити, и слыша весть, яко взят бысть кивот Божий и яко умре свекор ея и муж ея, и восплакася (горько), и роди, яко обратишася на ню болезни ея. 20 И во время, внегда умираше, реша ей жены предстоящыя ей: не бойся, яко сына родила еси. И не отвеща, и не разуме сердце ея. 21 И нарече отрочища Уехавоф: и реша о кивоте Божии и о свекре ея и о мужи ея: преселися слава от Израиля, яко взятся кивот Господень, и яко умре свекор ея и муж ея. 22 И рече: преселися слава Израилева, яко взят бысть кивот Божий. === 5 === 1 И взяша иноплеменницы кивот Божий и изнесоша его от Авенезера во Азот: 2 и взяша иноплеменницы кивот Господень и внесоша его в храм Дагонов, и поставиша его близ Дагона. 3 И обутреневаша Азотяне наутрие и внидоша в храм Дагонов: и увидеша, и се, Дагон паде на землю на лице свое пред кивотом Божиим. И воздвигоша Дагона, и поставиша его на месте своем. 4 И бысть егда восташа заутра, и се, Дагон лежаше лицем на земли пред кивотом завета Господня: глава же Дагонова и обе плесне ног его отяты на празе особо каяждо, и обе длани рук его лежаще при дверех, точию труп Дагонов остася. 5 Того ради не вступают жерцы Дагоновы и вси входящии в храм Дагонов на праг дому Дагонова во Азоте даже до дне сего: яко преступающе преступают. 6 И отяготе рука Господня на Азоте, и наведе на них, и воскипе им на седалищах их, во Азоте и в пределех Его, и посреде страны его умножишася мышы: и бысть смущение смерти велико во граде. 7 И видеша мужие Азотстии, яко тако (бысть), и глаголаша: яко не пребудет кивот Бога Израилева с нами, яко жестока рука Его на ны и на Дагона бога нашего. 8 И пославше собраша воевод иноплеменничих к себе и глаголаша: что сотворим кивоту Бога Израилева? И реша Гефее: да прейдет кивот Бога Израилева к нам в Геф. И прейде кивот Бога Израилева в Геф. 9 И бысть по прешествии его, и бысть рука Господня на граде, мятеж велий зело: и порази мужы града от мала до велика, и порази их на седалищах их. И сотвориша Гефее себе седалища (злата), 10 и отпустиша кивот Божий во Аскалон. И бысть егда вниде кивот Бога Израилева во Аскалон, и возопиша Аскалонитяне глаголюще: почто возвратисте кивот Бога Израилева к нам, уморити ны и люди нашя? 11 И послаша и собраша вся воеводы иноплеменничи и реша: отпустите кивот Бога Израилева, и да поставится на месте своем, и да не уморит нас и людий наших. Яко бысть мятеж смерти во всем граде тяжек зело, егда вниде кивот Бога Израилева тамо. 12 И живущии и не умершии уязвишася на седалищах, и взыде вопль града до небесе. === 6 === 1 И бе кивот Господень на селе иноплеменников седмь месяц: и воскипе земля их мышами. 2 И призваша иноплеменницы жерцев и волхвов и обаянников своих, глаголюще: что сотворим кивоту Господню? Скажите нам, како послем его на место его? 3 И реша: аще отпущаете вы кивот завета Господа Бога Израилева, да не послете его тща, но отдающе отдадите Ему за муки (дары), и тогда исцелитеся, и умилостивится вам: еда ли не отступит рука Его от вас? 4 И глаголаша: что Ему за муки отдадим? И реша: по числу воевод и иноплеменничих пять седалищ златых и пять мышей златых, яко прегрешения в вас и в князех ваших и в людех: 5 и сотворите подобие седалищ ваших и подобие мышей ваших, растлевающих землю, и воздадите славу Богу (Израилеву), яко да облегчит руку Свою от вас и от богов ваших и от земли вашея: 6 и почто отягощаете сердца ваша, якоже отягчи Египет и фараон сердце свое? Не егда ли поругася им, отпусти их, и отидоша? 7 И ныне возмите и сотворите колесницу нову едину и две кравы первородившыя без телят, на нихже не бяше ярмо: и впрязите кравы в колесницу, а телята их возвратите вспять в дом: 8 и возмите кивот Господень, и возложите и на колесницу, и сосуды златыя отдадите Ему за муки, и положите в ковчежце от страны его: и отпустите его, да идет: 9 и узрите, аще путем пределов своих пойдет в Вефсамис, той сотвори нам зло великое сие: аще же ни, то уразумеем, яко не рука его прикоснуся нас, но приключение сие бысть нам. 10 И сотвориша иноплеменницы тако, и взяша две кравы первородившыя, и впрягоша я в колесницу, телята же их затвориша в доме: 11 и возложиша кивот Господень на колесницу, и ковчежец, и мышы златыя, и подобия седалищ своих: 12 и управишася кравы на пути в путь Вефсамский, на пути имже идяху, и труждахуся, и не совращахуся на десно, ниже на шуе: и воеводы иноплеменничи идяху вслед его даже до предел Вефсамских. 13 И иже в Вефсамисе жняху жатву пшеницы во юдоли: и возведоша очи свои, и видеша кивот Господень, и возвеселишася во сретение ему. 14 И колесница вниде в село Осиево сущее в Вефсамисе, (и ста тамо,) и поставиша тамо при нем камень велий: и иссекоша древеса колесничная, и кравы вознесоша на всесожжение Господу. 15 Левити же вознесоша кивот Господень, и ковчежец иже с ним, и яже в нем сосуды златы, и положиша на камени велицем: мужие же Вефсамстии вознесоша всесожжения и пожроша жертву в той день Господу. 16 И пять воевод иноплеменничи зряху, и возвратишася во Аккарон в день той. 17 И сия седалища златая, яже воздаша иноплеменницы за муку Господу: Азотско едино, Газско едино, Аскалонско едино, Гефско едино, Аккаронско едино. 18 И златыя мышы по числу всех градов иноплеменничих пяти воевод, от града утвержена и даже до веси ферезеовы и до камене великаго, на немже положиша кивот завета Господня, иже есть даже до сего дне, на селе Осии Вефсамиситянина. 19 И не порадовашася сынове Иехониины в мужех Вефсамских, яко видеша кивот Господень: и уби в них пятьдесят тысящ и седмьдесят мужей. И плакашася людие, яко порази Господь людий язвою великою зело. 20 И реша мужие иже от Вефсамиса: кто возможет поити пред Господем Богом святым сим? И к кому взыдет кивот завета Господня от нас? 21 И послаша послы к живущым в Кариафиариме, глаголюще: возвратиша иноплеменницы кивот Господень, снидите и вознесите его к себе. === 7 === 1 И приидоша мужие Кариафиаримстии и взяша кивот завета Господня, и внесоша его в дом Аминадавль иже на холме: и Елеазара сына его освятиша сохраняти кивот завета Господня. 2 И бысть от негоже дне бе кивот в Кариафиариме, умножишася дние, и быти двадесять лет: и воззре весь дом Израилев вслед Господа. 3 И рече Самуил ко всему дому Израилеву, глаголя: аще всем сердцем вашим вы обращаетеся ко Господу, отимите боги чуждыя от среды вас, и Дубравы, и уготовайте сердца ваша ко Господу, и поработайте Ему единому, и избавит вас от руки иноплеменничи. 4 И отвергоша сынове Израилевы Ваалима и дубравы Астарофа, и поработаша Господу единому. 5 И рече Самуил: соберите ко мне всего Израиля в Массифаф, и помолюся о вас ко Господу. 6 И собрашася людие в Массифаф, и почерпаху воду и проливаху пред Господем на землю: и постишася в той день, и реша: согрешихом пред Господем. И судяше Самуил сыны Израилевы в Массифафе. 7 И услышаша иноплеменницы, яко собрашася вси сынове Израилевы в Массифаф, и взыдоша воеводы иноплеменничи на Израиля. И слышаша сынове Израилевы и убояшася от лица иноплеменник: 8 и реша сынове Израилевы к Самуилу: не премолчи о нас вопия ко Господу Богу нашему, да избавит ны от руки иноплеменничи. И рече Самуил: не буди мне еже отступити от Господа Бога моего и не вопити о вас с молением. 9 И взя Самуил ягня едино ссущее, и принесе е на всесожжение со всеми людьми Господеви: и возопи Самуил ко Господу о Израили, и послуша его Господь. 10 И бяше Самуил возносяй всесожжение, и иноплеменницы приближишася на брань на Израиля: и возгреме Господь гласом велиим в день он на иноплеменники, и смятошася и падоша пред Израилем: 11 и изыдоша мужие Израилевы от Массифафа, и погнаша иноплеменников, и биша их даже до подолия Вефхор. 12 И взя Самуил камень един и постави его между Массифафом и между Ветхим: и нарече имя ему Авенезер, сиречь камень помощи, и рече: до зде поможе нам Господь. 13 И смири Господь иноплеменники, и не приложиша ктому ити в пределы Израилевы: и бысть рука Господня на иноплеменников во вся дни Самуиловы. 14 И отдашася грады, ихже взяша иноплеменницы от сынов Израилевых, и отдаша их Израилю, от Аккарона даже до Гефа, и пределы Израиля свободишася от руки иноплеменничи: и бе мир между Израилем и между Аморреем. 15 И судяше Самуил Израилю во вся дни живота своего. 16 И хождаше от года до года, и окрест Вефиля и Галгалы и Массифафа, и суждаше Израиля во всех священных сих. 17 Бяше же ему возвращение во Армафем, яко тамо бяше дом его: и судяше тамо Израиля, и созда тамо олтарь Господеви. === 8 === 1 И бысть егда состареся Самуил, и постави сыны своя судити Израилеви. 2 И сия имена сыном его: первенец Иоиль, и имя второму Авиа, судии в Вирсавеи. 3 И не поидоша сынове его путем его: и уклонишася вслед лихоимания, и приимаху дары, и развращаху суды. 4 И собрашася мужие Израилевы, и приидоша к Самуилу во Армафем 5 и реша ему: се, ты состарелся еси, сынове же твои не ходят по пути твоему: и ныне постави над нами царя, да судит ны, якоже и прочии языки. 6 И бысть лукав глагол пред очима Самуиловыма, яко реша: даждь нам царя, да судит ны. И помолися Самуил ко Господу. 7 И рече Господь Самуилу: послушай гласа людий, якоже глаголют к тебе, яко не тебе уничижиша, но Мене уничижиша, еже не царствовати Ми над ними: 8 по всем делом, яже сотвориша Ми, от негоже дне изведох их из земли Египетски до днешняго дне, и оставиша Мя, и послужиша богом иным, тако тии творят и тебе: 9 и ныне послушай гласа их: обаче засвидетелствуя засвидетелствуеши им и возвестиши им правду цареву, иже царствовати будет над ними. 10 И рече Самуил вся словеса Господня к людем просящым от него царя, 11 и глагола (им): сие будет оправдание царево, иже царствовати имать над вами: сыны вашя возмет и поставит я колесничники своя, и на кони всадит их, и предтекущих пред колесницами его: 12 и поставит я себе сотники и тысящники и жателми жатвы своея, и оымут оыманием гроздия его, и творити орудия воинская его и орудия колесниц его: 13 и дщери вашя возмет в мироварницы и в поварницы и в хлебницы: 14 и села ваша и винограды вашя и масличины вашя благия возмет и даст рабом своим: 15 и семена ваша и винограды вашя одесятствует и даст скопцем своим и рабом своим: 16 и рабы вашя и рабыни вашя и стада ваша благая и ослы вашя отимет и одесятствует на дела своя: 17 и пажити вашя одесятствует, и вы будете ему раби: 18 и возопиете в день он от лица царя вашего, егоже избрасте себе, и не услышит вас Господь в день он, яко вы сами избрасте себе царя. 19 И не восхотеша людие послушати Самуила и реша ему: ни, но царь да будет над нами, 20 и будем и мы якоже вси языцы: и судити имать нас царь наш, и изыдет пред нами, и поборет поборением о нас. 21 И слыша Самуил вся глаголы людий и глагола я во ушы Господеви. 22 И рече Господь к Самуилу: послушай гласа их, и постави им царя. И рече Самуил к мужем Израилевым: да идет кийждо вас во свой град. === 9 === 1 И бе муж от сынов Вениаминовых, емуже имя Кис, сын Авиилов, сына Иаредова, сына Вахирова, сына Афекова, сына мужа Иеминеова, муж силен крепостию. 2 И сему бе сын, имя ему Саул, добровеличен, муж благ: и не бе в сынех Израилевых благ паче его, от рамен и выше высок паче всех людий. 3 И заблудиша ослята Киса отца Саулова. И рече Кис к Саулу сыну своему: возми с собою единаго от отрок, и воставше идите и поищите ослят. 4 И проидоша гору Ефремлю, и проидоша землю Селха, и не обретоша: и проидоша землю Сегалимлю, и не бе: и проидоша землю Иаминю, и не обретоша. 5 И пришедшым им в землю Сифову, и рече Саул ко отроку своему иже с ним: гряди и возвратимся, да не како отец мой оставя ослята, печется о нас. 6 И рече ему отрок: се, зде человек Божий во граде сем, и человек славен: все еже аще речет приходящым к нему, будет им: и ныне пойдем тамо, да возвестит нам путь наш, имже пойдем. 7 И рече Саул отроку своему иже с ним: се, пойдем, и что принесем к человеку Божию? Яко хлебы оскудеша от вретищ наших, и ктому несть у нас, еже внести к человеку Божию от имения нашего. 8 И приложи отрок отвещати Саулу и рече: се, обретается в руце моей четвертая часть сикля сребра, и даси человеку Божию, и возвестит нам путь наш. 9 Прежде бо во Израили сице глаголаше кийждо, егда кто идяше вопрошати Бога: гряди, да идем к прозорливцу: яко пророка нарицаху людие прежде прозорливцем. 10 И рече Саул отроку своему: добр глагол твой: гряди, да идем. И идоша во град, идеже бе человек Божий. 11 Восходящым же им на восход града, и се, обретоша девиц изшедших почерпсти воды, и реша им: есть ли зде прозорливец? 12 И отвещаша им девицы, глаголющя: есть, се пред лицем вашим: ныне же потщитеся, яко дне ради грядет во град, яко жертва днесь людем в ваме: 13 и егда внидете во град, тако обрящете его во граде, прежде неже взыти ему в ваму ясти: яко не имут ясти людие, дондеже внидет сей, яко той благословит жертву, и по сих ядят страннии: и ныне взыдите, яко дне ради обрящете его. 14 И взыдоша во град. Имже входящым среди града, и се, Самуил изыде во сретение им, еже взыти в ваму. 15 И Господь откры во ухо Самуилу днем единым прежде пришествия к нему Сауля, глаголя: 16 якоже время сие, утро послю к тебе мужа от племене Вениаминова, и да помажеши его царя над людьми Моими Израилем, и спасет люди Моя от руки иноплеменничи: яко призрех на смирение людий Моих, яко взыде вопль их ко Мне. 17 И виде Самуил Саула, и Господь рече к нему: се, человек, о немже рекох ти: сей будет в людех Моих царствовати. 18 И приближися Саул к Самуилу посреде града и рече: возвести ми, который дом прозорливца. 19 И отвеща Самуил Саулу и рече: аз сам есмь: взыди предо мною в ваму, и яждь со мною днесь, и отпущу тя заутра, и вся яже в сердцы твоем возвещу ти: 20 и о ослятех твоих заблудивших днесь третий день, не помышляй в сердцы своем о них, ибо обретошася: и кому красная Израилева? Не тебе ли и дому отца твоего? 21 И отвеща Саул и рече: не сын ли есмь аз мужа иеминеа, меншаго скиптра племене Израилева? И племене малейшаго от всего скиптра Вениаминова? И отечество мое меншее паче всех отечеств Вениаминовых? И вскую глаголал еси ко мне по глаголу сему? 22 И поят Самуил Саула и отрока его, и введе я во обиталище, и даде им тамо место в первых званых, яко в седмидесяти мужех. 23 И рече Самуил повару: даждь ми часть, юже дах ти, и о нейже рех ти положити ю у себе. 24 И взя повар плече, и предложи е Саулови. И рече Самуил Саулу: се, избыток, предложи пред ся и яждь, яко во свидетелство предложися тебе паче иных, прикоснися. И яде Саул с Самуилом в той день. 25 И сниде от вамы во град, и постлаша Саулови на горнице, и спа. 26 И бысть егда приближашеся утро, и воззва Самуил Саула на горнице, и рече: востани, и отпущу тя. И воста Саул, и изыде сам и Самуил вон. 27 Имже исходящым в часть града, и рече Самуил к Саулу: рцы юноши, да предидет пред нами: а ты стани якоже днесь, и слышан сотворю тебе глаголгол Божий. === 10 === 1 И взя Самуил сосуд с елеем, и возлия на главу его, и лобыза его, и рече ему: не помаза ли тебе Господь на царство людем Своим иже во Израили? И ты царствовати будеши в людех Господних, и ты спасеши я от руки враг их окрест: и сие тебе знамение, яко помаза тя Господь над наследием Своим в князя: 2 егда отидеши днесь от мене, обрящеши два мужа при гробех Рахилиных в пределех Вениаминих в Силоме, в Вакалафе скачущих зелно, и рекут тебе: обретошася ослята, ихже ходисте искати: и се, отец твой отверже глагол о ослятех и зело печется вас ради, глаголя: что сотворю о сыне моем? 3 И отидеши оттуду, и далее приидеши до дубравы Фавора, и обрящеши тамо три мужы восходящыя к Богу в Вефиль, единаго ведуща трое козлят, а другаго несуща три вретища хлебов, а третияго несуща мех вина: 4 и вопросят тя яже о мире, и дадут ти два начатка хлебов, и возмеши от рук их: 5 и по сих да взыдеши на холм Божий, идеже есть собрание иноплеменник, тамо началницы иноплеменничи: и будет егда внидеши тамо во град, срящеши лик пророков исходящих от вамы, и пред ними свирели и тимпаны, и сопели и гусли, и тии прорицающии: 6 и снидет на тя Дух Господень, и воспророчествуеши с ними, и обратишися в мужа иного: 7 и будет егда приидут знамения сия на тя, твори вся, елика обрящет рука твоя, яко Бог с тобою: 8 и снидеши прежде мене в Галгалы, и се, аз сниду к тебе вознести всесожжение и пожрети жертвы мирны: седмь дний пождеши, дондеже прииду к тебе, и покажу ти, что сотвориши. 9 И бысть внегда отвратити ему плещы своя отити от Самуила, преложи ему Бог сердце на ино. И приидоша вся знамения сия в день он. 10 И взыде оттуду на холм, и се, лик пророческий противу ему: и взыде нань Дух Божий, и прорицаше среде их. 11 И быша вси видевшии его вчера и третияго дне, и видеша, и се, той посреде пророк прорицаяй. И реша людие кийждо ко искреннему своему: что сие бывшее сыну Кисову? Еда и Саул во пророцех? 12 И отвеща некто от них и рече: и кто отец ему? Не Кис ли? И сего ради бысть в притчу: еда и Саул во пророцех? 13 И сконча пророчествуя, и прииде оттуду на холм. 14 И рече ужик его к нему и ко отрочищу его: камо ходисте? И реша: ослят искати, и видехом, яко несть их, и внидохом к Самуилу. 15 И рече ужик к Саулу: возвести ми ныне, что ти рече Самуил? 16 И рече Саул ужику своему: вестию возвести ми, яко обретошася ослята. Словесе же о царстве не возвести ему, еже рече Самуил. 17 И заповеда Самуил всем людем приити ко Господу в Массифаф. 18 И рече Самуил к сыном Израилевым: сия рече Господь Бог Израилев, глаголя: Аз изведох отцы вашя сыны Израилевы из Египта, и изях вы от руки фараона царя Египетскаго и от всех царств оскорбляющих вы: 19 и вы днесь уничижисте Бога вашего, Иже Сам есть спасаяй вы от всех зол ваших и скорбей ваших, и ресте: ни, но царя да поставиши над нами: и ныне станите пред Господем по хоругвам вашым и по племенем вашым и по тысящам вашым. 20 И приведе Самуил вся колена Израилева, и паде жребий на хоругвь Вениаминю. 21 И приведе хоругвь Вениаминю по племенам, и паде жребий на племя Маттариино: и приведоша племя Маттариино по мужем, и паде жребий на Саула сына Кисова: и искаху его, и не обреташеся. 22 И вопроси Самуил еще Господа, глаголя: аще приидет семо муж еще? И рече Господь: се, той сокрыся в сосудех. 23 И тече Самуил, и взя его оттуду, и постави его посреде людий: и бысть вышше всех людий, от рамен и вышше. 24 И рече Самуил ко всем людем: видесте ли, егоже избра себе Господь, яко несть подобен ему во всех вас? И познаша вси людие и реша: да живет царь. 25 И рече Самуил к людем оправдания царствия, и написа в книзе, и положи пред Господем. 26 И отпусти Самуил вся люди, и идоша кийждо во своя си, и Саул иде в дом свой в Гаваю: и идоша с ним сынове сил, ихже коснеся Господь сердец их, с Саулом. 27 Сынове же погибелнии реша: кто спасет нас, сей ли? И безчествоваша его, и не принесоша ему даров. === 11 === 1 И бысть аки по месяце, и взыде Наас Аманитянин, и ополчися на Иавис Галаадский. И реша вси мужие Иависстии к Наасу аманитянину: положи нам завет, и поработаем ти. 2 И рече к ним Наас Аманитянин: сей завет положу вам, изверчу комуждо вас око десное, и положу поношение на Израиля. 3 И реша ему мужие Иависа Галаадскаго: остави нам седмь дний, да послем вестники во вся пределы Израилевы: и аще не будет спасающаго нас, изыдем к вам. 4 И приидоша вестницы в Гаваю к Саулу и поведаша словеса сия во ушы людий: и воздвигоша вси людие глас свой и плакашася. 5 И се, Саул прииде по заутрии от села, и рече Саул: что яко плачут людие? И поведаша ему глаголы мужей Иависских. 6 И сниде Дух Господень на Саула, егда услыша словеса сия, и разгневася на них зело: 7 и взя две кравы, и раздроби я на уды, и посла во вся пределы Израилевы руками вестников, глаголя: иже не будет идый вслед Саула и вслед Самуила, по сему сотворят говядом его. И сниде ужас Господень на Израилтян, и изыдоша яко един муж. 8 И сочте их в Везеце, в ваме, и бысть всех мужей Израилтеских шесть сот тысящ, и мужей Иудиных седмьдесят тысящ. 9 И рече вестником пришедшым: сия поведите мужем Иависа Галаадскаго: заутра будет вам спасение восходящу солнцу. И приидоша вестницы во град и возвестиша мужем Иависским: и возрадовашася, 10 и реша мужие Иависстии к Наасу аманитянину: утро изыдем к вам, и сотворите нам, еже благо пред очима вашима. 11 И бысть по заутрии, и Саул раздели люди на три начала: и внидоша посреде полка в стражу утреннюю, и бияху сынов Аммонитских, дондеже разогреся день: и бысть, и оставшиися разбегошася, и не осташася ни два от них вкупе. 12 И реша людие к Самуилу: кто есть рекий, яко да Саул не воцарится над нами? Предаждь мужей, и избием их. 13 И рече Саул: да не умрет ни един в днешний день, яко днесь сотвори Господь спасение во Израили. 14 И рече Самуил к людем, глаголя: приидите да идем в Галгалы и обновим тамо царство. 15 И идоша вси людие в Галгалы, и помаза тамо Самуил Саула на царство пред Господем в Галгалех. И пожроша тамо жертвы и мирная пред Господем, и возвеселися тамо Саул и вси мужие Израилевы зело. === 12 === 1 И рече Самуил ко всем мужем Израилевым: се, послушах гласа вашего о всех, елика ми ресте, и поставих над вами царя: 2 и се, ныне царь предходит пред вами, аз же состарехся и седети буду, и сынове мои се с вами: и аз се, ходих пред вами от юности моея и даже до днешняго дне: 3 се, аз, отвещайте на мя пред Господем и пред христом Его, еда у кого телца взях, или осля, или кого от вас насилствовах, или кого утесних, или от руку некоего приях мзду, или обущу? Извещайте на мя, и возвращу вам. 4 И реша к Самуилу: не обидел еси нас, ниже насилствовал еси нам, ниже утеснил еси нас, ниже взял еси от руки чиея что. 5 И рече Самуил к людем: свидетель есть Господь в вас, и свидетель христос Его днесь в сей день, яко ничтоже обретосте в руку моею. И реша людие: свидетель. 6 И рече Самуил к людем, глаголя: свидетель Господь сотворивый Моисеа и Аарона и изведый от земли Египетския отцы нашя: 7 и ныне предстаните, и разсуждуся с вами пред Господем и возвещу вам вся оправдания Господня, яже сотвори вам и отцем вашым: 8 егда вниде Иаков и сынове его во Египет, и смириша их Египтяне: и возопиша отцы наши ко Господу, и посла Господь Моисеа и Аарона, и изведе отцы нашя из Египта и всели их на месте сем: 9 и забыша Господа Бога своего, и вдаде я в руце Сисаре архистратигу Иавина царя Асорска, и в руки иноплеменничи, и в руки царя Моавска, и воеваша их: 10 и возопиша ко Господу и реша: согрешихом, яко оставихом Господа и поработахом Ваалиму и Дубравам, и ныне изми ны от рук враг наших, и поработаем Тебе: 11 и посла Господь Иероваала и Варака и Иеффая и Самуила, и изят вы из рук враг ваших окрестных, и обитасте уповающе: 12 и весте, яко Наас царь сынов Аммоних прииде на вы, и ресте: ни, но царь да царствует над нами: егда Господь Бог царствова над вами: 13 и се, ныне царь, егоже избрасте и егоже просисте: и се, даде Господь над вами царя: 14 аще убоитеся Господа и поработаете Ему, и послушаете гласа Его и не воспротивитеся устом Господним, и будете и вы и царь царствуяй над вами вслед Господа ходяще: то рука Господня не будет на вас: 15 аще же не послушаете гласа Господня и воспротивитеся устом Господним, будет рука Господня на вас и на царя вашего: 16 и ныне станите и видите глаголгол сей великий, егоже сотворит Господь пред очима вашима: 17 несть ли жатва пшеницы днесь? Призову Господа, и даст громы и дождь, и уразумеете и увидите, яко злоба ваша велика, юже сотвористе пред Господем, испросивше себе царя. 18 И призва Самуил Господа, и даде Господь гром и дождь в той день: и убояшася вси людие зело Господа и Самуила, 19 и реша вси людие к Самуилу: помолися о рабех твоих ко Господу Богу твоему, да не умрем: яко приложихом ко всем грехом нашым злобу, просяще себе царя. 20 И рече Самуил к людем: не бойтеся: вы сотвористе всю злобу сию: токмо не уклонитеся от последования Господня и поработайте Господу всем сердцем вашим, 21 и не преступите вслед ничтоже сущих, иже не пособствуют и не изимут, яко ничтоже суть: 22 понеже не отринет Господь людий Своих имене ради Своего великаго, яко кротце Господь прият вас Себе в люди: 23 и да никакоже ми согрешити Господу, оставити еже молитися о вас ко Господу, и поработаю Господеви и покажу вам путь благ и прав, 24 токмо бойтеся Господа и работайте Ему во истине и всем сердцем вашим, яко видите яже великая сотвори Господь с вами: 25 и аще злобою зло сотворите, то вы и царь ваш погибнете. === 13 === 1 Сын единаго лета Саул, егда нача царствовати, и два лета царствова над Израилем. 2 И избра себе Саул три тысящы мужей от мужей Израилевых, и быша с Саулом две тысящы в Махмасе и в горе Вефили, и тысяща беша со Ионафаном в Гаваи Вениаминове: и останок людий отпусти коегождо во своя селения. 3 И порази Ионафан насива иноплеменника иже в холме. И услышаша иноплеменницы, и Саул воструби трубою во всю землю, глаголя: отвергошася раби. 4 И слыша весь Израиль глаголющих, яко порази Саул насива иноплеменника, и омерзе Израиль во иноплеменницех. И собрашася людие вслед Саула в Галгалех. 5 И иноплеменницы собрашася на брань на Израиля: и приидоша на Израиля тридесять тысящ колесниц и шесть тысящ конник и множество людий, яко песок иже при мори: и шедше ополчишася в Махмасе противу Вефорону на юг. 6 И видеша мужие Израилевы, яко не могоша противу стати, и скрышася людие в вертепех и в оградех и в камениих и в пропастех и во рвах: 7 и преходяще преидоша Иордан в землю Гадову и Галаадску. И Саул бяше еще в Галгалех, и вси людие ужасошася, иже бяху с ним. 8 И ждаше седмь дний по свидетелству, якоже рече Самуил, и не прииде Самуил в Галгалы: и разсеяшася людие его от него. 9 И рече Саул: приведите, яко да сотворю всесожжение и мирная. И вознесе всесожжение. 10 И бысть егда соверши вознося всесожжение, и се, Самуил прииде: и Саул изыде на сретение ему благословитися им. 11 И рече Самуил: что сотворил еси? И рече Саул: видех, яко отидоша людие от мене, и ты не пришел еси, якоже определил еси свидетелством дний, иноплеменницы же собрашася в Махмас, 12 и рех: ныне приидут иноплеменницы ко мне в Галгалы, и лица Господня не умолих: и не удержахся, и вознесох всесожжение. 13 И рече Самуил к Саулу: безумие бысть тебе, понеже не сохранил еси заповеди моея, юже заповеда ти Господь: яко ныне уготовал бы Господь царство твое во Израили до века: 14 и ныне царство твое не станет тебе, и изыщет Господь Себе человека по сердцу Своему, и повелит ему Господь властелину быти над людьми Своими, яко не сохранил еси, елика заповеда тебе Господь. 15 И воста Самуил и иде от Галгал в путь свой: и останок людий идоша вслед Саула на сретение людем ратным. Имже приходящым от Галгал в Гаваю Вениаминову, и сочте Саул люди обретшыяся с ним яко шесть сот мужей. 16 Саул же и Ионафан сын его и людие обретшиися с ними седоша в Гаваи Вениаминове и плакашася: иноплеменницы же ополчишася в Махмасе. 17 И изыдоша губящии от села иноплеменников тремя началы: начало едино зрящее путь Гофера на землю Совалю: 18 и начало едино зрящее путь Вефоронь: и начало едино зрящее путь Гаваи, клонящийся к Гаисавим пустыни. 19 И ковачь железа не обреташеся во всей земли Израилеве, яко реша иноплеменницы, да не сотворят Еврее меча и копия. 20 И хождаху вси сынове Израилевы в землю иноплеменничу ковати кийждо своя косы и орудия своя, и кийждо секиры своя и серпы своя. 21 И притупишася вся орудия приспевшей жатве, секиры и серпы, поправления же има не бысть. 22 И бысть во дни брани Махмасския, и не обретеся меча и копия в руках всех людий, иже с Саулом и со Ионафаном: точию у Саула и Ионафана сына его. 23 И изыдоша от стана иноплеменнича об ону страну Махмаса. === 14 === 1 И бысть во един день, и рече Ионафан сын Саулов отрочищу носящему оружие его: гряди, и прейдем в мессаву иноплеменников иже на оней стране. И отцу своему не возвести сего. 2 И Саул седяше на верху холма под древом яблонным еже в Магдоне, и бяше с ним яко шесть сот мужей. 3 И Ахиа сын Ахитов, брата Иохаведова, сына Финеесова, сына Илии, иерей Божий в Силоме нося ефуд: и людие не ведяху, яко отиде Ионафан. 4 Посреде же прехода, идеже хотяше Ионафан прейти в стан иноплеменничь, бысть камень острый отсюду и камень острый отюнуду: имя единому Васес и другому Сенна: 5 камень един стояше от севера противу Махмаса, и камень вторый от юга противу Гаваи. 6 И рече Ионафан ко отрочищу носящему оружие его: гряди, прейдем в мессаву необрезанных сих, негли что сотворит нам Господь, яко несть Господу не удобно спасти во многих или в малых. 7 И рече ему носяй оружие его: твори все, на неже сердце твое склоняется: се, аз с тобою есмь, якоже сердце твое сердце мое. 8 И рече Ионафан: се, мы прейдем к мужем и явимся к ним: 9 аще сия рекут к нам: помедлите тамо, дондеже возвестим вам: то постоим сами на месте своем и не пойдем к ним: 10 аще же к нам сице рекут: взыдите к нам: то взыдем, яко предаде их Господь в руки нашя: сие нам знамение (да будет). 11 И внидоста оба в мессаву иноплеменников. И глаголаша иноплеменницы: се, Еврее исходят из разселин своих, идеже скрышася. 12 И отвещаша мужие мессавли ко Ионафану и к носящему оружие его, и реша: взыдите к нам, и явим вам глагол. И рече Ионафан к носящему оружие его: гряди по мне, яко предаде их Господь в руки Израилевы. 13 И взыде Ионафан (ползущь) на руках и на ногах своих, и носяй оружие его за ним. И узреша иноплеменницы лице Ионафане, и порази их: и носяй оружие его идяше вслед его. 14 И бысть язва первая, еюже порази Ионафан и носяй оружие его, яко двадесять мужей копийцами и каменовержением и кремением полевым. 15 И бысть ужас в полце и на селе: и вси людие иже в мессаве и губящии ужаснушася, и тии не хотяху братися: и вострепета земля, и бысть ужас от Господа. 16 И видеша соглядатае Сауловы в Гаваи Вениамини, и се, полк смятеся семо и онамо. 17 И рече Саул людем сущым с ним: разсмотрите ныне и видите, кто отиде от вас. И разсмотриша, и се, не обретеся Ионафан и носяй оружие его. 18 И рече Саул ко Ахии: принеси ефуд, яко бе кивот Божий в той день с сынми Израилевыми. 19 И бысть егда глаголаше Саул ко иерею, и шум в полце иноплеменничи ходя идяше и множашеся. И рече Саул ко иерею: пригни руки твоя. 20 И изыде Саул и вси людие иже с ним, и изыдоша до сечи. И се, бысть оружие коегождо на ближняго своего, (и бысть) мятеж велик зело. 21 Но и раби, иже быша со иноплеменники вчера и третияго дне, вшедшии в полк, обратишася и тии еже быти им со Израилтяны сущими с Саулом и со Ионафаном. 22 И вси Израилтяне скрывшиися в горе Ефремли услышаша, яко отбегоша иноплеменницы: приложишася и тии вслед их на брань. 23 И спасе Господь в той день Израиля: брань же пройде даже до Вамофа: и вси людие бяху с Саулом, яко десять тысящ мужей, и бе брань разсыпана во весь град на горе Ефремли. 24 И Саул сотвори безумие велие в день той, и закля люди, глаголя: проклят человек, иже ясти будет хлеб даже до вечера, дондеже отмщу врагом моим. И не вкусиша людие вси хлеба: 25 и вся земля обедаше: и се, бяше дубрава пчелная пред лицем села: 26 и внидоша людие во пчелник, и се, исхождаху глаголюще: (яко истече мед,) и не бе возвращающаго руки своея ко устом своим, яко убояшася людие клятвы Господни. 27 Ионафан же не слышаше, егда заклинаше отец его люди: и простре конец жезла своего, иже в руку ему, и омочи его в соте медвене, и обрати руку свою во уста своя, и прозреша очи его. 28 И рече един от людий, глаголя: кленый прокля отец твой люди, глаголя: проклят человек, иже ясти будет хлеб в день сей: и изнемогоша людие. 29 И уразуме Ионафан и рече: смути отец мой землю: виждь, яко прозреша очи мои, егда вкусих мало от меда сего: 30 о, дабы яли ядуще днесь людие от корыстей врагов своих, ихже обретоша, множайшая бы днесь язва была во иноплеменницех. 31 И поразиша в день той от иноплеменников множае нежели в Махмасе: и утрудишася людие зело. 32 И устремишася людие на корысти, и пояша людие стада и буйволы и говяда: и закалаху на земли, и ядоша людие с кровию. 33 И возвестиша Саулу, глаголюще: согрешиша людие ко Господу, ядуще с кровию. И рече Саул: от гефема привалите мне семо камень велий. 34 И рече Саул: шедше к людем рцыте им: да принесет кийждо семо телца своего и кийждо овцу свою, и да заколют на камени сем, и ядите я, и не согрешайте Господу ядуще с кровию. И приведоша нощию вси людие свое кийждо, еже имяше в руце своей, и закалаху тамо. 35 И созда Саул тамо олтарь Господу: сей нача Саул созидати олтарь Господу. 36 И рече Саул: снидем вслед иноплеменник нощию, и расхитим их, дондеже заря будет, и не оставим от них мужа. И реша: все еже благо пред очима твоима, твори. И рече иерей: приступим семо к Богу. 37 И вопроси Саул Бога: сниду ли вслед иноплеменников? Предаси ли их в руки Израилтяном? И не отвеща ему Господь в день той. 38 И рече Саул: приведите семо вся колена Израилева, и уразумейте и увеждьте, на ком бысть грех сей днесь, 39 яко жив Господь спасый Израиля, яко аще ответ будет на Ионафана сына моего, смертию да умрет. И не бе отвещающаго от всех людий. 40 И рече Саул всему Израилю: вы станите на едину страну, аз же и Ионафан сын мой станем на другую страну. И реша людие к Саулу: еже благо пред тобою, твори. 41 И рече Саул: Господи Боже Израилев, что яко не отвещал еси рабу Твоему днесь? Или моя есть, или сына моего Ионафана неправда? Господи Боже Израилев, даждь знамение: и аще речеши сия, даждь ныне людем Твоим Израилю, даждь ныне преподобие. И паде жребий на Ионафана и Саула, и людие изыдоша. 42 И рече Саул: верзите жребий на мя и на Ионафана сына моего: егоже объявит Господь, смертию да умрет. И реша людие к Саулу: несть сей глагол. И преможе Саул люди, и вергоша о нем и Ионафане сыне его, и паде на Ионафана жребий. 43 И рече Саул ко Ионафану: возвести ми, что сотворил еси? И возвести ему Ионафан и рече: вкушая вкусих мало меду омочив конец жезла, иже в руку моею, и се, аз умираю. 44 И рече ему Саул: сия да сотворит ми Бог, и сия да приложит ми, яко смертию умреши днесь. 45 И реша людие к Саулу: еда днесь умрет сотворивый спасение сие велие во Израили? Не буди то, жив Господь, аще падет влас главы его на землю, яко милость Божию сотвори в день сей. И помолишася людие о Ионафане в день той, и не умре. 46 И не иде Саул вслед иноплеменников: иноплеменницы же отидоша в место свое. 47 И Саул укрепися царствовати во Израили, и побеждаше окрест вся враги своя в Моаве и в сынех Аммоних и в сынех Едомлих и в Вефоре и в царствии Сувани и во иноплеменницех: и аможе аще обращашеся, спасашеся. 48 И сотвори силу, и победи Амалика, и избави Израиля из руки попирающих его. 49 И беша сынове Сауловы Ионафан и Иисуй и Мелхисуе: имена же двою дщерию его, имя первородней Мерова и имя вторей Мелхола: 50 имя же жене его Ахиноома, дщерь Ахимаасова: и имя старейшине вой его Авенир сын Нира сына ужика Саулова: 51 Кис же отец Саулов, и Нир отец Авениров сын иамина сына Авиилева. 52 И бе брань крепка на иноплеменники во вся дни Сауловы: и видев Саул всяка мужа сильна и всяка мужа сына силы, собираше их к себе. === 15 === 1 И рече Самуил к Саулу: посла мя Господь помазати тя на царство в людех Его во Израили: и ныне послушай гласа словес Господних: 2 сия рече Господь Саваоф: ныне отмщу, яже сотвори Амалик Израилю, егда срете его на пути, восходящу ему от Египта: 3 и ныне ты иди, и поразиши Амалика и Иерима, и вся яже суть его, и не снабдиши от них (ничтоже), и искорениши его: и прокленеши его и вся сущая его, и не пощадиши его: и да убиеши от мужеска полу и до женска и от юнош и до ссущих млеко, и от говяд до овец и от велблюд до ослят. 4 И собра люди Саул и сочте я в Галгалех двесте тысящ пеших и десять тысящ от Иуды в полцех: 5 и прииде Саул до градов Амаликовых и засяде в потоце. 6 И рече Саул ко Кинеови: иди и уклонися от среды Амалика, да не погублю тя с ним, ты бо сотворил еси милость с сынми Израилевыми, егда исхождаху из Египта. И уклонися Киней от среды Амалика. 7 И порази Саул Амалика от Евилы даже до Сура, иже пред лицем Египта: 8 и ят Агага царя Амаликова жива, и вся люди изби, и Иерима уби мечем. 9 И сохрани Саул и вси людие Агага царя жива и благая от стад и буйволов, и снедей (и одежд), и виноградов и от всех благих: и не хотяху искоренити я, точию хуждшее и уничиженое истребиша. 10 И бысть глаголгол Господень к Самуилу, глаголя: 11 раскаяхся, яко помазах Саула на царство, понеже отвратися от Мене и словес Моих не соблюде. И опечалися Самуил и вопияше ко Господу всю нощь. 12 И воста рано Самуил, и идяше на сретение Израилтяном рано. И возвестиша Самуилу, глаголюще: идет Саул в Кармил, и се, воздвиже руку себе, и возврати колесницу, и сниде в Галгалы. И прииде Самуил к Саулу, и се, той возношаше всесожжение Господу, первая от корыстей, ихже взя от Амаликов. 13 И прииде Самуил к Саулу, и рече ему Саул: благословен ты Господу, сотворих бо вся, елика (ми) глагола Господь. 14 И рече Самуил: и кий глас стад сих во ушию моею, и глас говяд, егоже аз слышу? 15 И рече Саул: от Амалика пригнах я, ихже сохраниша людие лучшая от стад и от волов, еже пожрети я Господу Богу твоему, прочая же избих. 16 И рече Самуил к Саулу: потерпи, и возвещу ти, яже глагола Господь ко мне нощию. 17 И рече ему (Саул): глаголи. И рече Самуил к Саулу: еда не мал был еси ты пред Ним, и не властелина ли тя постави хоругви колена Израилева? И помаза тя Господь на царство Израилево: 18 и посла тя Господь путем и рече тебе: иди и искорени Амалика, и погуби согрешших предо Мною, и воюй их, дондеже скончаеши их: 19 и почто не послушал еси гласа Господня по всему, елико глагола тебе, но устремился еси на корысти и сотворил еси лукавое пред Господем? 20 И рече Саул к Самуилу: послушах гласа людий и идох путем, имже посла мя Господь, и приведох Агага царя Амаликова, и Амалики искорених: 21 и взяша людие корысти от стад и буйволы, первая от истребляемых на пожрение Господу Богу нашему в Галгалех. 22 И рече Самуил: еда угодны Господу всесожжения и жертвы, якоже послушати гласа Господня? Се, послушание паче жертвы благи, и покорение паче тука овня: 23 якоже грех есть чарование, тако (грех есть) противление, и якоже грех есть идолопоклонение, тако непокорение: понеже уничижил еси глаголгол Господень, и уничижит тя Господь не быти тебе царем во Израили. 24 И рече Саул к Самуилу: согреших, яко преступих слово Господне и глагол твой, убояхся бо людий и послушах гласа их: 25 и ныне возми грех мой и возвратися со мною, да поклонюся Господу Богу твоему. 26 И рече Самуил к Саулу: не возвращуся с тобою, яко уничижил еси глаголгол Господень, и уничижит тя Господь не быти тебе царем во Израили. 27 И отврати Самуил лице свое еже отити: и ят Саул за воскрилие ризы его и раздра е. 28 И рече ему Самуил: раздра Господь царство Израилево от руку твоею днесь, и даст е ближнему твоему, лучшему паче тебе, 29 и разделится Израиль на двое: и не обратится, ниже раскается Святый Израилев, занеже не яко человек есть, еже раскаятися Ему, запретит, и не пребудет. 30 И рече Саул: согреших, но прослави мя ныне пред старейшины Израилевы и пред людьми моими, и возвратися со мною, и поклонюся Господу Богу твоему. 31 И возвратися Самуил вслед Саула, и поклонися Саул Господу. 32 И рече Самуил: приведите ми Агага царя Амаликова. И прииде к нему Агаг трепеща, и рече Агаг: тако ли горька смерть? 33 И рече Самуил ко агагу: якоже обезчадствова жен оружие твое, тако обезчадится в женах мати твоя. И закла Самуил Агага пред Господем в Галгалех. 34 И отиде Самуил во Армафем: и Саул отиде в дом свой в Гаваю. 35 И не приложи Самуил ктому видети Саула даже до дне смерти своея, понеже плакаше Самуил о Сауле, занеже раскаяся Господь, яко постави Саула царя во Израили. === 16 === 1 И рече Господь к Самуилу: доколе ты плачеши о Сауле, Аз же уничижих его, не царствовати во Израили? Наполни рог твой елеа и прииди, послю тя ко Иессею до Вифлеема, яко узрех в сынех его Себе царя. 2 И рече Самуил: како пойду? И услышит Саул, и убиет мя. И рече Господь: юницу от волов возми в руце твои и речеши: пожрети Господеви иду: 3 и призовеши Иессеа и сыны его к жертве: и Аз ти покажу, яже сотвориши, и помажеши Ми, егоже ти реку. 4 И сотвори Самуил вся, елика рече ему Господь: и прииде в Вифлеем, и ужасошася старейшины града о пришествии его и реша: мир ли вход твой, о, прозорливче? 5 И рече: мир: пожрети Господу приидох: освятитеся и возвеселитеся днесь со мною. И освяти Иессеа и сыны его, и призва я к жертве. 6 И бысть внегда внити им, и виде Елиава и рече: сей ли пред Господем помазанник Его? 7 И рече Господь Самуилу: не зри на лице его, ниже на возраст величества его, яко уничижих его: понеже не тако зрит человек, яко зрит Бог: яко человек зрит на лице, Бог же зрит на сердце. 8 И призва Иессей Аминадава и представи его пред лице Самуила. И рече (Самуил): ниже сего избра Господь. 9 И приведе Иессей Саммаа. И рече: и сего не избра Господь. 10 И приведе Иессей седмь сынов своих пред Самуила. И рече Самуил ко Иессею: не избра Господь от сих. 11 И рече Самуил ко Иессею: не достало ли уже детей? И рече Иессей: еще есть един мал, и сей пасет на пажити. И рече Самуил ко Иессею: посли и приведи его, яко не возляжем, дондеже приидет той семо. 12 И посла, и введе его: и той чермен, добрыма очима, и благ взором Господеви. И рече Господь к Самуилу: востани и помажи Давида, яко сей благ есть. 13 И прия Самуил рог со елеем и помаза его посреде братии его. И ношашеся Дух Господень над Давидом от того дне и потом. И воста Самуил и отиде во Армафем. 14 И Дух Господень отступи от Саула, и давляше его дух лукавый от Господа. 15 И реша отроцы Сауловы к нему: се, ныне дух лукавый от Господа давит тя: 16 да рекут раби твои ныне пред тобою, и взыщут господину нашему мужа знающа пети в гусли: и внегда будет дух лукавый на тебе, и тогда да поет в гусли своя, и благо ти будет, и упокоит тя. 17 И рече Саул ко отроком своим: посмотрите ми мужа добре поюща и введите его ко мне. 18 И отвеща един от отрок его и рече: се, видех сына Иессеова из Вифлеема, и той весть пение, и муж разумен, и борец, и мудр в словеси, и муж благ видом, и Господь с ним. 19 И посла Саул вестники ко Иессею, глаголя: отпусти ко мне Давида сына твоего, иже у стада твоего. 20 И взя Иессей бремя хлебов и мех вина и козля от коз едино, и посла к Саулу рукою Давида сына своего. 21 И вниде Давид к Саулу, и предстояше пред ним, и возлюби его зело Саул, и бысть ему носяй оружие его. 22 И посла Саул ко Иессею, глаголя: да предстоит Давид предо мною, яко обрете благодать пред очима моима. 23 И бысть внегда быти духу лукаву на Сауле, и взимаше Давид гусли и играше рукою своею, и отдыхаше Саул, и благо ему бяше, и отступаше от него дух лукавый. === 17 === 1 И собираша иноплеменницы полки своя на брань, и собрашася в Сокхофе Иудейстем, и ополчишася среде Сокхофа и среди Азика во Афесдоммине. 2 Саул же и мужие Израилевы собрашася и ополчишася во удоли Теревинфа и устрояхуся на брань противу иноплеменником. 3 И иноплеменницы стояху на горе отсюду особь, Израиль же стояше на горе отюнуду, и удоль между ими бяше. 4 И изыде муж силен из полка иноплеменнича, имя ему Голиаф от Гефа, высота его шесть лакот и пядь: 5 и шлем медян на главе его, и в броню кольчату той оболчен бяше: и вес брони его пять тысящ сикль меди и железа: 6 и поножы медяны верху голений его, и щит медян на плещах его: 7 и ратовище копия его аки орудие ткущих, и копие его шесть сот сикль железа: и носяй оружие его идяше пред ним. 8 И ста и возопи пред полки Израилевыми и рече им: почто изыдосте, ополчитися ли на брань противу нам? Несмь ли аз иноплеменник, вы же Еврее Сауловы? Изберите себе мужа, и да снидет ко мне: 9 и аще возможет со мною братися и одолеет ми, будем вам раби: аще же аз возмогу одолети ему, будете вы нам раби и поработаете нам. 10 И рече иноплеменник: се, аз днесь уничижих полк Израилев в сей день: дадите ми мужа, иже поборется со мною един. 11 И слыша Саул и весь Израиль глаголы иноплеменничи сия и ужасошася и убояшася зело. 12 Давид же Ефрафеев, сей бе от Вифлеема Иудина, имя же отцу его Иессей, емуже бе осмь сынов. Во дни же Сауловы бе муж той состареся в мужех. 13 И идоша три сыны Иессеевы старейшии на брань с Саулом: имена же сынов его пошедших на брань, Елиав первородный его, и вторый Аминадав, и третий Самма. 14 Давид же бе юнейший, и три болшии его идоша вслед Саула. 15 Давид же возвратився от Саула, отиде пасти овцы отца своего в Вифлеем. 16 И прихождаше иноплеменник утро и в вечер, являяся пред Израилем четыредесять дний. 17 И рече Иессей Давиду сыну своему: возми убо братиям твоим меру ефи муки и десять хлеб сих, и иди в полк, и даждь братиям твоим: 18 и десять сыров от млека сего, и даждь тысящнику: и братию свою посети в мире, и еликих аще требуют, увеси, субботствовати же будеши со мною. 19 Саул же и вси людие бяху во удоли дуба ратующеся со иноплеменники. 20 И воста Давид рано, овцы же остави со стражею, и взя, и отиде, якоже заповеда ему отец его Иессей: и прииде на место, идеже исхождаху сильнии на брань и вопияху в полцех. 21 Занеже вооружашеся Израиль противу иноплеменником, и иноплеменницы вооружахуся противу Израиля. 22 И положи Давид бремя свое в руках стража, и тече в полк, и пришед вопроси братию свою в мире. 23 Глаголющу же ему с ними, и се, муж месейский, емуже имя Голиаф, Филистимлянин от Гефы, изыде от полков иноплеменничих и глагола по словесем сим, и услыша Давид. 24 И вси мужие Израилевы егда увидеша мужа, и бежаша от лица его и убояшася зело. 25 И реша мужие Израилтестии: видесте ли мужа сего восходяща, яко поносити Израиля прииде? И аще будет муж, иже убиет его, обогатит его царь богатством велиим, и дщерь свою даст ему, и дом отца его сотворит свободен во Израили. 26 И рече Давид к мужем стоящым с ним, глаголя: что сотворите мужу, иже убиет иноплеменника онаго и отимет поношение от Израиля? Яко кто есть иноплеменник необрезанный сей, иже поносит полку Бога живаго? 27 И рекоша ему людие по словеси сему, глаголюще: тако сотворится мужу, иже убиет его. 28 И услыша Елиав брат его болший, внегда глаголати ему к мужем: и разгневася яростию Елиав на Давида и рече: почто семо пришел еси? И кому оставил еси малыя овцы оны в пустыни? Вем аз гордость твою и злобу сердца твоего, яко видения ради брани пришел еси. 29 И рече Давид: что сотворих ныне? Несть ли речь? 30 И отвратися от него ко иному и рече по словеси сему. И отвещаша ему людие по словеси прежнему. 31 И слышаны быша глаголы, ихже глагола Давид, и возвестиша пред Саулом: и пояша его людие и приведоша его пред Саула. 32 И рече Давид к Саулу: да не ужасается сердце господину моему о сем, раб твой пойдет и поборется со иноплеменником сим. 33 И рече Саул к Давиду: не возможеши пойти ко иноплеменнику сему братися с ним, яко ты детищь еси, сей же муж борец есть от юности своея. 34 И рече Давид к Саулу: егда пасяше раб твой отца своего стадо, и егда прихождаше лев или медведица и восхищаше от стада овцу едину: 35 и аз вслед его исхождах и поражах его, и исторгах из уст его (взятое): и аще воспротивляшеся ми, то взем за гортань его, поражах и умерщвлях его: 36 и льва и медведицу бияше раб твой, и будет иноплеменник необрезанный сей яко един от сих: не поиду ли, и поражу его, и отиму днесь поношение от Израиля? Понеже кто необрезанный сей, иже уничижи полк Бога жива? 37 И рече Давид: Господь иже изят мя от руки львовы и от руки медведицы, той измет мя от руки иноплеменника сего необрезаннаго. И рече Саул к Давиду: иди, и да будет Господь с тобою. 38 И облече Саул Давида одеждею, и шлем медян возложи на главу его, 39 и препояса Давида оружием своим верху одежды его. Давид же походив (во оружии) семо и овамо, утрудися, яко не обыче. И рече Давид Саулу: не могу ити в сих, яко не обыкох. И взяша от него сия. 40 И взя палицу свою в руку свою, и избра себе пять камений гладких от потока, и вложи я в тоболец пастырский егоже ношаше, и пращу свою имый в руце своей, и иде к мужу иноплеменнику. 41 И идяше иноплеменник приближаяся к Давиду, и носяй оружие его пред ним (идяше). 42 И виде Голиаф иноплеменник Давида и обезчествова его, зане той детищь бе, и чермен и леп очима. 43 И рече иноплеменник к Давиду: еда пес аз есмь, яко ты идеши противу мене с палицею и камением? И рече Давид: ни, но и хуждший пса. И прокля иноплеменник Давида боги своими. 44 И рече иноплеменник к Давиду: гряди ко мне, и дам плоть твою птицам небесным и зверем земным. 45 И рече Давид иноплеменнику: ты идеши на мя с мечем и с копием и щитом, аз же иду на тя во имя Господа Бога Саваофа, Бога ополчения Израилева, егоже ты уничижил еси днесь: 46 и предаст тя Господь днесь в руце мои, и убию тя, и отиму главу твою от тебе, и дам тело твое и телеса полка иноплеменнича в день сей птицам небесным и зверем земным: и уразумеет вся земля, яко есть Господь Бог во Израили, 47 и уразумеет весь сонм сей, яко не мечем ни копием спасает Господь, яко Господня брань, и предаст Господь вас в руки нашя. 48 И воста иноплеменник и иде во сретение Давиду. И ускори Давид и тече на сражение во сретение иноплеменнику. 49 И простре Давид руку свою в тоболец, и изя из него камень един, (и вложи в пращу,) и верже пращею, и порази иноплеменника в чело его, и унзе камень под шлемом его в чело его, и паде (Голиаф) на лицы своем на землю. 50 И укрепися Давид над иноплеменником пращею и каменем, и порази иноплеменника, и умертви его: оружия же не бе в руце Давидове. 51 И тече скоро Давид, и ста над ним, и взя мечь его, и извлече его от недр его, и умертви его, и отсече им главу его. И видеша иноплеменницы, яко умре сильный их, и бежаша. 52 И восташа мужие Израилевы и Иудины и воскликнуша, и погнаша созади их даже до входа Гефова и до врат Аскалонских: и падоша уязвленни (мнози) иноплеменницы по пути врат и даже до Гефа и Аккарона. 53 И возвратишася мужие Израилевы гнавшии вслед иноплеменник, и потопташа полки их. 54 И взя Давид главу иноплеменника и внесе ю во Иерусалим, и оружие его положи во храмине своей. 55 И егда виде Саул Давида исходяща во сретение иноплеменника, рече ко Авениру князю силы: чий есть сын юноша сей, Авенире? И рече Авенир: да живет душа твоя, царю, яко не вем. 56 И рече царь: вопроси убо ты, чий есть сын юноша сей? 57 Егда же возвратися Давид по убиении иноплеменника, взя его Авенир и приведе его пред Саула: глава же иноплеменнича бе в руце его. 58 И рече к нему Саул: чий еси сын, юноше? И рече Давид: сын раба твоего Иессеа от Вифлеема. === 18 === 1 И бысть егда преста глаголати к Саулу, и душа Ионафана с душею Давидовою спряжеся, и возлюби его Ионафан от души своея. 2 И поят его Саул во дни оны и не даде ему возвратитися в дом отца его. 3 И завеща Ионафан и Давид завет, понеже возлюби его от души своея: 4 и совлече Ионафан ризу свою верхнюю и даде ю Давиду, и ины одежды своя даже до меча своего и до лука своего и до пояса своего. 5 И хождаше Давид разумно во всех, аможе аще посылаше его Саул: постави же его Саул над мужи воинскими, и угоден бе пред очима всех людий и пред слугами Сауловыми. 6 И бысть, внегда входити им, егда возвратися Давид от победы над иноплеменником: и изыдоша (девы) ликовствующыя во сретение Саула царя от всех градов Израилевых поющя и скачущя в тимпанех с радостию и с гусльми. 7 И исхождаху жены ликующя и глаголющя: победи Саул с тысящами своими, а Давид со тмами своими. 8 И разгневася Саул зело, и лукавы явишася глаголы пред очима сауловыма о словеси сем. И рече Саул: Давиду даша тмы, мне же даша тысящы: и чего ему (несть), точию царства? 9 И бе Саул подзирая Давида от дне онаго и потом. 10 И бысть от утрешняго дне, и нападаше дух лукавый от Бога на Саула, и прорицаше посреде дому своего: и Давид пояше рукою своею (в гусли), якоже и по вся дни: копие же в руце Саули: 11 и взя Саул копие и рече: поражу Давида к стене. И уклонися Давид от лица его дважды. 12 И убояся Саул от лица Давидова, яко Господь бе с ним, а от Саула отступи: 13 и отстави его Саул от себе, и постави его себе тысященачалника: и исхождаше и вхождаше пред людьми. 14 И бе Давид во всех путех своих смысля, и Господь бе с ним. 15 И виде Саул, яко той смыслит зело, и бояшеся от лица его. 16 Весь же Израиль и Иуда любляху Давида, яко той вхождаше и исхождаше пред лицем людий. 17 И рече Саул к Давиду: се, дщи моя болшая Меров, сию тебе дам в жену, токмо буди ми в сына силы и поборай брани Господни. И Саул рече: да не будет рука моя на нем, но да будет рука иноплеменнича. 18 И рече Давид к Саулу: кто аз есмь? И кое житие сродства отца моего во Израили, яко да буду зять царский? 19 И бысть во время, егда даней быти подобаше Мерове дщери Саулове Давиду, сия дадеся Адриилу Молафитскому в жену. 20 И возлюби Мелхола дщерь Саулова Давида: и возвестися Саулу, и угодно бысть пред очима его слово. 21 И рече Саул: дам ему ю, и будет ему в соблазн. И бе на Саула рука иноплеменнича. И рече Саул к Давиду: в силах будеши ми зять днесь. 22 И заповеда Саул отроком своим, глаголя: рцыте вы тайно Давиду, глаголюще: се, благоволит о тебе царь, и вси отроцы его любят тя, и ты буди зять царю. 23 И глаголаша отроцы Сауловы во ушы Давиду глаголы сия. И рече Давид: еда легко пред очима вашима, еже быти (ми) зятем царю? Аз бо есмь муж смирен и не славен. 24 И возвестиша отроцы Саулу сия словеса, яже глагола Давид. 25 И рече Саул: тако рцыте Давиду: не хощет царь с богатством (зятя), но токмо во сте краенеобрезаний иноплеменнических отмстити врагом царевым. Саул бо мысляше вдати Давида в руце иноплеменником. 26 И возвестиша отроцы Сауловы глаголы сия Давиду, и угодна быша словеса сия пред очима Давидовыма, еже быти в зятя царю. 27 И не по мнозех днех, воста Давид и иде сам и мужие его с ним, и уби от иноплеменник двести мужей: и принесе краенеобрезания их царю и вдаде я ему, и бысть зять царю, и вдаде ему царь Мелхолу дщерь свою в жену. 28 И виде Саул, яко Господь есть с Давидом, и весь Израиль любит его: 29 и приложи Саул оттоле паче боятися Давида. И бысть Саул враждуя на Давида во вся дни. 30 И исхождаху князи иноплеменничи, и бысть от начала исхождения их, Давид разумен бе паче всех слуг Сауловых, и почтеся имя его зело. === 19 === 1 И глагола Саул к Ионафану сыну своему и ко всем отроком своим, да умертвят Давида. Ионафан же сын Саулов любяше Давида зело. 2 И возвести Ионафан Давиду, глаголя: отец мой Саул ищет тя убити: сохранися убо заутра рано, и скрыйся, и сяди втайне: 3 и аз изыду, и стану при отце моем на селе, идеже еси ты: и аз возглаголю отцу моему о тебе, и узрю, что будет, и возвещу тебе. 4 И глагола Ионафан о Давиде благая к Саулу отцу своему, и рече к нему: да не согрешает царь на раба своего Давида, яко не согреши пред тобою, и дела его блага суть зело: 5 и положи душу свою в руце своей и победи иноплеменника, и сотвори Господь спасение велико всему Израилю, и вси видеша и возрадовашася: и почто согрешаеши в кровь неповинну, еже убити Давида туне? 6 И послуша Саул гласа Ионафаня: и клятся Саул, глаголя: жив Господь, яко не умрет (Давид). 7 И призва Ионафан Давида и возвести ему вся глаголы сия, и введе Ионафан Давида к Саулу, и бе пред ним яко вчера и третияго дне. 8 И приложися брань быти на Саула, и укрепися Давид, и победи иноплеменники, и изби язвою великою зело, и бежаша от лица его. 9 И бысть от Бога дух лукавый на Сауле, и той в дому своем седяше, и копие в руце его, Давид же играше руками своими: 10 и искаше Саул копием поразити Давида, и отступи Давид от лица Сауля, и удари Саул копием в стену: Давид же отшед спасеся в нощь ту. 11 И посла Саул вестники в дом Давидов стрещи его, еже убити его рано. И возвести Давиду Мелхола жена его, глаголющи: аще ты не спасеши души твоея в нощь сию, заутра умреши. 12 И свеси Мелхола Давида оконцем, и отиде, и убежа, и спасеся: 13 и прият Мелхола тщепогребалная, и положи на одре, и печень козию положи на возглавии его, и покры я ризами. 14 И посла Саул вестники, да имут Давида, и рекоша, яко болен есть. 15 И посла Саул, да оглядают Давида, глаголя: принесите его на одре ко мне, еже умертвити его. 16 И приидоша слуги, и се, тщепогребалная на одре и козия печень при возглавии его. 17 И рече Саул к Мелхоле: почто тако обманула мя еси, и отпустила еси врага моего, и гонзе мене? И рече Мелхола Саулу: сам ми рече: отпусти мя: аще же ни, погублю тя. 18 И Давид убежа и спасеся, и иде к Самуилу во Армафем и поведа ему вся, елика сотвори ему Саул. И идоста Давид и Самуил и седоста в Навафе в Раме. 19 И возвестиша Саулу, глаголюще: се, Давид в Навафе в Раме. 20 И посла слуги Саул яти Давида, и видеша собор пророков, и Самуил стояше настоятель над ними: и бысть Дух Божий на слугах Саулих, и начаша прорицати. 21 И возвестиша Саулу, и посла другия слуги, и прорицати начаша и тии. И приложи Саул послати слуги третия, и начаша и тии прорицати. 22 И разгневася гневом Саул, и иде и сам во Армафем, и прииде даже до кладязя гумна, еже есть в Сефе, и вопроси и рече: где есть Самуил и Давид? И реша: се, в Навафе в Раме. 23 И иде оттуду в Наваф (иже) в Раме: и бысть и на нем Дух Божий, и идяше идый и прорицая, дондеже приити ему в Наваф иже в Раме. 24 И совлече ризы своя и прорицаше пред ними: и паде наг весь день той и всю нощь. Того ради глаголаху: еда и Саул во пророцех? === 20 === 1 И отбеже Давид от Навафа (иже) в Раме и прииде ко Ионафану и рече: что сотворих? И что неправда моя? И что согреших пред отцем твоим, яко ищет души моея? 2 И рече ему Ионафан: никакоже, ты не умреши: се, не имать сотворити отец мой глагола велика, или мала, и не открыет уха моего: и что яко скрыет отец мой глагол сей от мене? Не буди сие. 3 И отвеща Давид Ионафану и рече: ведая ведает отец твой, яко обретох благодать пред очима твоима, и глаголет: да не познает сего Ионафан, негли не восхощет: но жив Господь и жива душа твоя, зане якоже рекох, исполнися между мною и между отцем твоим даже до смерти. 4 И рече паки Ионафан к Давиду: чесого желает душа твоя, и что сотворю тебе? 5 И рече Давид ко Ионафану: се, новомесячие заутра, и аз седя не сяду с царем ясти, и послеши мя, и скрыюся на поли до вечера дне третияго: 6 и аще смотря усмотрит мя отец твой, и речеши: прося упросися от мене Давид отити до Вифлеема града своего, яко жертва дний тамо всему племени: 7 аще тако речет: благо: мир рабу твоему: аще же жестоко отвещает тебе, разумей, яко совершися злоба от него: 8 и да сотвориши милость с рабом твоим, яко ввел еси в завет Господень раба твоего с собою: и аще есть неправда в рабе твоем, умертви мя ты, а ко отцу твоему почто тако имаши мя вводити? 9 И рече Ионафан: никакоже (буди) тебе: егда аще разумевая уразумею, яко совершися злоба отца моего, еже приити на тебе, аще и не будеши во градех твоих, аз возвещу тебе. 10 И рече Давид ко Ионафану: кто возвестит ми, аще отвещает отец твой жестоко? 11 И рече Ионафан к Давиду: иди, и пребуди на поли. И идоста оба на поле. 12 И рече Ионафан к Давиду: Господь Бог Израилев весть, яко искушу отца моего во время (сие) заутра, или третияго дне, и сие, аще благо будет о Давиде, и не имам послати к тебе на поле и возвестити сия во ушы твои: 13 сия да сотворит Бог Ионафану и сия да приложит, аще не возвещу злая на тя, и открыю ухо твое, и отпущу тя, и отидеши в мире: и будет Господь с тобою, якоже бе со отцем моим: 14 и аще убо еще жив буду аз, да сотвориши милость со мною: 15 и аще смертию умру, да не отимеши милости твоея от дому моего до века: 16 аще же ни, егда искоренит Господь враги Давидовы, коегождо от лица земли, да обрящется имя Ионафане в дому Давидове, и изыщет Господь враги Давидовы. 17 И приложи Ионафан еще клятися Давиду, яко возлюби душу любящаго его. 18 И рече Ионафан к нему: заутра новомесячие, и присмотрен будеши, яко праздно усмотрено будет место твое: 19 ты же премедлиши три дни и пребудеши на месте твоем, идеже скрыешися в день делания, и сядеши при Ергаве онем: 20 и аз утрою стрелами стреляя, и стрелю вергая до амаггариа: 21 и се, послю отрока, глаголя: иди и обрящи ми стрелу: и аще реку отроку: зде стрела от тебе, и зде, возми ю: и ты гряди ко мне, яко мир тебе, и несть о тебе слова, жив Господь: 22 аще же тако реку юноши: тамо стрела от тебе и далее: иди, яко отсла тя Господь: 23 и глагол егоже аз и ты глаголахом, се, Господь свидетель между тобою и мною до века. 24 И скрыся Давид на поли, и прииде новомесячие, и прииде царь на трапезу ясти, 25 и седе царь на месте своем якоже и всегда на престоле при стене, и предвари Ионафана, и седе Авенир от страны Сауловы, и усмотрено бысть (праздно) место Давидово. 26 И не глагола Саул ничтоже в той день, помысли бо, случай видится, нечисту быти, яко не очистися. 27 И бысть наутрие месяца в день вторый, и усмотрено бысть праздно место Давидово, и рече Саул ко Ионафану сыну своему: что яко не прииде сын Иессеев ни вчера, ни днесь на трапезу? 28 И отвеща Ионафан к Саулу и рече ему: упросися от мене Давид до Вифлеема града своего ити, 29 и рече: отпусти мя ныне (в Вифлеем), яко жертва колена нашего во граде, и заповедаша мне братия моя: и ныне аще обретох благодать пред очима твоима, да пойду ныне и узрю братию мою: сего ради не прииде на трапезу цареву. 30 И разгневася гневом Саул на Ионафана зело и рече ему: сыне девок блудниц, не вем ли, яко сообщник еси ты сыну Иессееву в срамоту твою и в срамоту откровения матере твоея? 31 Яко во вся дни, в няже сын Иессеев жити имать на земли, не уготовится царство твое: ныне убо послав, поими юношу, яко сын смерти есть сей. 32 И отвеща Ионафан Саулу отцу своему и рече: за что умирает? Что сотвори? 33 И верже Саул копием на Ионафана, еже умертвити его. И позна Ионафан, яко совершися злоба сия от отца его, да умертвит Давида: 34 и вскочи Ионафан от трапезы во гневе ярости, и не яде хлеба в день вторый месяца, яко сокрушися о Давиде, зане соверши (злобу) на него отец его. 35 И бысть заутра, и изыде Ионафан на село, якоже совещася о свидении с Давидом, и отрок мал с ним. 36 И рече отроку: тецы, и обрящи ми стрелы, имиже аз стреляю. И отрок тече, и он стрели стрелою за него. 37 И прииде отрок до места стрелы, идеже стрелил Ионафан. И возопи Ионафан вслед отрока и рече: тамо стрела от тебе и далее. 38 И паки возопи Ионафан вслед отрока своего, глаголя: потщися скоро, и не стой. И собра отрок Ионафану стрелы и принесе их к господину своему. 39 Отрок же не уведе ничесоже, токмо Ионафан и Давид ведеста вещь. 40 И отда Ионафан оружие свое отроку своему и рече отроку своему: поиди и отнеси во град. 41 И егда отиде отрок, и Давид воста от Ергава, и паде на лице свое, и поклонися ему трижды, и облобыза кийждо друг друга, и плакася кийждо о друг друзе до скончания велика. 42 И рече Ионафан Давиду: иди с миром, и якоже кляхомся мы оба именем Господним, глаголюще: Господь да будет свидетель между мною и тобою и между семенем моим и между семенем твоим до века. 43 И воста Давид и отиде. Ионафан же вниде во град. === 21 === 1 И прииде Давид в Номву ко Авимелеху иерею: и ужасеся Авимелех о пришествии его и рече ему: что яко ты един, и никтоже с тобою? 2 И рече Давид иерею: царь заповеда ми глагол днесь и рече ко мне: никтоже да уразумеет глагола, егоже ради аз посылаю тя и о немже аз заповедаю ти: и отроки оставих на месте глаголемем еммоним: 3 и ныне аще суть у тебе пять хлебы, даждь ми елико имаши. 4 И отвеща иерей Давиду и рече: не суть хлебы прости у мене, но точию хлебы у мене священнии: аще сохранени отроцы суть токмо от жены, снедят. 5 И отвеща Давид иерею и рече ему: и (мы) от жен воздержахомся вчера и третияго дне: отнележе изыдох аз на путь, быша вси отроцы очищени, и сей путь нечист, но освятится днесь сосуд ради моих. 6 И даде ему Авимелех иерей хлебы предложения, яко тамо не бе хлеба, но токмо хлебы лица, иже взяты от лица Господня, еже предложитися хлебу теплому, в оньже день взя их. 7 И бе тамо един от отрок Сауловых в день он удержан пред Господем, и имя ему Доик Сирин, (старейшина от пастырь Сауловых,) пасый мски Сауловы. 8 И рече Давид ко Авимелеху: виждь, аще есть зде у тебе копие или мечь, яко меча моего и оружия моего не взях с собою, яко царево повеление внезапу ми бысть. 9 И рече иерей: се, мечь Голиафа иноплеменника, егоже ты убил еси во юдоли Ила, и той обвит бяше в ризу за ефудом: аще той хощеши взяти, возми себе, несть бо инаго зде кроме сего. И рече Давид: се, несть якоже той: даждь ми его. И даде его ему. 10 И воста Давид, и убеже в той день от лица Саулова, и прииде Давид ко Анхусу царю Гефску. 11 И реша отроцы Анхусовы к нему: не сей ли Давид царь земли? Не сему ли изыдоша (жены) ликующыя, глаголющя: победи Саул с тысящами своими, и Давид со тмами своими? 12 И положи Давид глаголы сия в сердцы своем, и убояся зело от лица Анхуса царя Гефска. 13 И измени лице свое пред ним, и притворися в день той, и бияше во врата града, яко в тимпан, и падаше на руки своя, и паде у врат града, и слины своя точаше по браде своей. 14 И рече Анхус ко отроком своим: се, видесте мужа неистова, почто его введосте ко мне? 15 Еда не имею аз неистовых, яко введосте его, да беснуется предо мною? Сей да не внидет в дом мой. === 22 === 1 И отиде Давид оттуду, и спасеся, и прииде в пещеру Одолламску: и слышавше братия его и дом отца его, приидоша к нему тамо. 2 И собрашася к нему всяк иже в нужде, и всяк должник, и всяк печальный душею, и бе ими обладаяй, и бяше с ним яко четыреста мужей. 3 И отиде Давид оттуду в Массифаф Моавитский и рече к царю Моавитску: да будут ныне отец мой и мати моя у тебе, дондеже познаю, что сотворит мне Бог. 4 И умоли лице царя Моавитска, и пребываху у него по вся дни, сущу Давиду во области той. 5 И рече Гад пророк к Давиду: не седи во области сей: иди, и да внидеши в землю Иудину. И иде Давид и пришед седе в граде Сарих. 6 И слыша Саул, яко познан бысть Давид, и мужие иже с ним: и Саул седяше на холме под дубравою яже в Раме, и копие в руку его, и вси отроцы его предстояху ему. 7 И рече Саул ко отроком своим предстоящым ему: слышите ныне, сынове Вениаминовы, аще воистинну всем вам даст сын Иессеев села и винограды и поставит вас всех в сотники и тысящники: 8 яко вси согласистеся на мя, и несть открываяй во ухо мое, егда положи завет сын мой с сыном Иессеовым, и несть от вас ни един боляй о мне и возвещаяй во ушы мои, яко воздвиже сын мой раба моего на мя врага, якоже день сей? 9 И отвеща Доик Сирин приставленый над мсками Сауловыми и рече: видех сына Иессеева пришедша в Номву ко Авимелеху сыну Ахитову иерею: 10 и вопрошаше о нем Бога, и брашно вдаде ему, и мечь Голиафа иноплеменника вдаде ему. 11 И посла царь призвати Авимелеха сына Ахитова, и вся сыны отца его иереи от Номвы. И приидоша вси к царю. 12 И рече Саул: слыши ныне, сыне Ахитов. И рече: се, аз, глаголи, господине. 13 И рече ему Саул: почто совещался еси на мя ты и сын Иессеев, яко вдал еси ему хлеб и мечь, и вопрошал еси о нем Бога положити его на мя во врага, якоже день сей? 14 И отвеща Авимелех царю и рече: и кто во всех рабех твоих верен якоже Давид, и зять царев, и князь всем заповедем твоим, и славен в дому твоем? 15 Еда днесь начах вопрошати о нем Бога? Никако: да не возложиши, царю, на раба твоего словесе сего, и на весь дом отца моего, яко не ведяше раб твой во всех сих словесе мала, или велика. 16 И рече царь Саул: смертию умреши, Авимелех, ты и весь дом отца твоего. 17 И рече царь скороходцем предстоящым пред ним: приведите и избийте иереи Господни, яко рука их с Давидом, и понеже познаша, яко бежит той, и не возвестиша во ушию моею. И не хотяху отроцы царевы возложити рук своих на иереи Господни. 18 И рече царь Доику: обратися ты, и устремися на иереи. И обратися Доик Сирин, и уби иереев Господних в той день, триста пять мужей, всех носящих ефуд: 19 и Номву град иерейский погуби острием оружия от мужеска полу и до женска, от отрока и до ссущаго, и телца и осла и овчате. 20 И угонзе един сын Авимелеха сына Ахитова, имя ему Авиафар, и бежа вслед Давида. 21 И возвести Авиафар Давиду, яко изби Саул вся иереи Господни. 22 И рече Давид ко Авиафару: ведях в день той, яко тамо бе Доик Сирин, яко возвещая возвестит Саулу: аз есмь виновен о душах дому отца твоего: 23 седи со мною, не бойся, яко идеже аще взыщу души моей место, взыщу и души твоей, яко сохранен будеши ты у мене. === 23 === 1 И возвестиша Давиду, глаголюще: се, иноплеменницы облегоша Кеиль, и расхищают и попирают плоды. 2 И вопроси Давид Господа, глаголя: аще пойду и избию иноплеменники сия? И рече Господь: иди, и победиши иноплеменники сия, и спасеши Кеиль. 3 И реша мужие Давидовы к нему: се, мы зде во Иудеи боимся, и како будет, аще идем в Кеиль, в плен иноплеменников внидем? 4 И приложи еще Давид вопросити Господа. И отвеща ему Господь и рече ему: востани и сниди в Кеиль, яко Аз предаю иноплеменники в руце твои. 5 И иде Давид и мужие его с ним в Кеиль, и брашася со иноплеменники: и бежаша (иноплеменницы) от лица его, и взя скоты их, и порази их язвою великою, и спасе Давид живущыя в Кеиле. 6 И бысть егда бежа Авиафар сын Авимелехов к Давиду, и той с Давидом в Кеиль сниде, имый ефуд в руце своей. 7 И возвестися Саулу, яко прииде Давид в Кеиль. И рече Саул: предаде его Бог в руце мои, яко заключися вшед в град (имущь) врата и вереи. 8 И заповеда Саул всем людем на брань снити в Кеиль, яти Давида и мужы его. 9 И уведе Давид, яко не премолкает злобы о нем Саул, и рече Давид ко Авиафару жерцу: принеси ефуд Господень. 10 И рече Давид: Господи Боже Израилев, слышав услыша раб Твой, яко ищет Саул приити на Кеиль растлити град мене ради: 11 аще заключится? И ныне аще снидет Саул, якоже слыша раб Твой? Господи Боже Израилев, возвести рабу Твоему. И рече Господь: заключится. 12 И рече Давид: аще предадят мя иже в Кеиле, и мужы моя в руки Саули? И рече Господь: предадят. 13 И воста Давид и мужие его с ним, яко четыреста, и изыдоша из Кеилы, и идоша, аможе хотяху. И возвестиша Саулу, яко угонзе Давид из Кеилы: и остави ити. 14 И седе Давид в Масереме в пустыни во узинах, и седяше в пустыни на горе Зиф, в земли знойне: и искаше его Саул во вся дни, и не предаде его Бог в руце его. 15 И виде Давид, яко исходит Саул искати его: и Давид бяше на горе знойне, в дубраве Зиф. 16 И воста Ионафан сын Саулов и иде к Давиду в дубраву, и утверди руце его во Господе, 17 и рече к нему: не бойся, яко не имать обрести тебе рука отца моего Саула, и ты имаши царствовати во Израили, и аз буду по тебе другий, и Саул отец мой уведа тако. 18 И положиста оба завет пред Господем: и седяше Давид в дубраве, а Ионафан отиде в дом свой. 19 И изыдоша Зифее от знойныя земли к Саулу на холм, глаголюще: не се ли Давид скрыся у нас в Мессаре во узинах в дубраве на холме Ехелатсте, иже одесную Иесемона? 20 И ныне все еже по души цареве ко исхождению, да снидет (убо) к нам: заключиша бо его в руки царевы. 21 И рече им Саул: благословени вы Господеви, яко поболесте о мне: 22 идите ныне, и уготовите еще, и познайте место его, идеже будет нога его вскоре, тамо идеже ресте, да не како прехитрит: 23 и видите и уразумейте о всех местех, идеже той крыется, и возвратитеся ко мне на готово, и иду с вами: и будет, аще есть на земли, изыскати имам его во всех тысящах Иудиных. 24 И восташа Зифее, и идоша пред Саулом: Давид же и мужие его бяху в пустыни Маон к западу одесную Иесемона. 25 И иде Саул и мужие его искати Давида. И возвестиша Давиду, и сниде ко каменю иже в пустыни Маон. И услыша Саул, и погна вслед Давида в пустыню Маон. 26 И идяше Саул и мужие его от страны горы отсюду, Давид же бе и мужие его от страны горы отюнуду: и бе Давид укрываяся ити от лица Сауля, а Саул и мужие его ополчишася на Давида и на мужы его яти их. 27 И прииде вестник к Саулу глаголя: потщися и иди, яко нападоша иноплеменницы на землю твою. 28 И возвратися Саул не гнати вслед Давида, и иде противу иноплеменником: сего ради наречеся место оно Камень Разделенный. === 24 === 1 И воста Давид оттуду и седе во узинах Енгадди. 2 И бысть егда возвратися Саул вспять от иноплеменник, и возвестиша ему, глаголюще: се, Давид в пустыни Енгадстей. 3 И взя Саул с собою три тысящы мужей избранных от всего Израиля и иде искати Давида и мужей его прямо лицу саддеем: 4 и прииде до стад пасомых на пути, и бе тамо вертеп: и Саул вниде испразднитися, Давид же и мужие его во внутренних вертепа седяху. 5 И реша мужие Давидовы к нему: се, день сей, о немже рече Господь тебе предати врага твоего в руце твои, и сотвориши ему якоже угодно пред очима твоима. И воста Давид, и отреза воскрилие одежды Саули отай. 6 И бысть по сих, и вострепета Давиду сердце его, яко отреза воскрилие одежды Саули: 7 и рече Давид к мужем своим: никакоже ми от Господа, аще сотворю глагол сей господину моему христу Господню, еже нанести руку мою нань, яко христос Господень есть сей. 8 И увеща Давид мужы своя словесы и не даде им воставшым убити Саула. И воста Саул, и сниде на путь. 9 И изыде Давид вслед его из вертепа: и возопи Давид вслед Саула, глаголя: господине царю. И озреся Саул вслед себе, и преклонися Давид лицем своим до земли, и поклонися ему. 10 И рече Давид к Саулу: почто слушаеши словес людий глаголющих: се, Давид ищет души твоея? 11 Се, днесь видеста очи твои, яко предаде тя Господь днесь в руце мои в вертепе, и не восхотех убити тебе, и пощадех тя, и рех: не нанесу руки моея на господа моего, яко помазанник Господень сей есть: 12 и се, воскрилие одежды твоея в руце моей, аз отях воскрилие одежды твоея, и не убих тебе: и уразумей, и виждь днесь, яко несть злобы в руце моей, ниже нечестия и презорства, ниже согреших к тебе, а ты ищеши души моея изяти ю: 13 да судит Господь между мною и тобою, и да защитит мя Господь от тебе: рука же моя не будет на тя, 14 якоже глаголется притча древняя: от беззаконник изыдет преступление: рука же моя не будет на тя: 15 и ныне ты, царю Израилев, вслед кого исходиши? Кого ты гониши? Вслед ли пса умерша и вслед блохи единыя? 16 Да будет Господь судия и отмститель между мною и тобою, да видит Господь и судит суд мой, и осудит мя от руки твоея. 17 И бысть, егда сконча Давид глаголы сия, глаголя к Саулу, и рече Саул: твой ли глас сей, чадо Давиде? И воздвиже Саул глас свой и восплакася. 18 И рече Саул к Давиду: праведен еси ты паче мене, яко ты воздал ми еси благая, аз же тебе воздах злая: 19 и ты возвестил ми еси днесь, яже сотворил ми благая, яко заключи мя Господь в руки твоя днесь, и не убил мя еси: 20 и якоже аще кто обрел бы врага своего в печали, и отпустил бы его в путь благ, и Господь воздаст ему благая, якоже ты сотворил еси днесь: 21 и ныне се, аз вем, яко царюя царствовати имаши, и стати имать в руце твоей царство Израилево: 22 и ныне кленися ми Господем, яко не искорениши семене моего по мне и не погубиши имене моего от дому отца моего. 23 И клятся Давид Саулу. И отиде Саул на место свое, Давид же и мужие его взыдоша в мессеру тесную. === 25 === 1 И умре Самуил, и собрашася весь Израиль, и плакашася его, и погребоша его в дому его во Армафеме. И воста Давид, и сниде в пустыню Маоню. 2 И бе человек в Маоне и стада его на Кармиле, и человек велик зело: и сему овец три тысящы и коз тысяща: и бысть егда стрижаше стада своя на Кармиле: 3 имя же человеку Навал и имя жене его Авигеа: и жена его блага смыслом и добра взором зело, муж же ея человек жесток и лукав в начинаниих и человек зверонравен. 4 И услыша Давид в пустыни, яко стрижет Навал на Кармиле стада своя. 5 И посла Давид десять отроков и рече отроком: взыдите на Кармил и идите к Навалу и вопросите его именем моим с миром, 6 и рцыте сия: здрав ли еси ты и дом твой, и вся твоя здрава ли суть? 7 И ныне се, услышах, яко стригут тебе ныне пастуси твои, иже беша с нами в пустыни, и не возбранихом им, и не повелехом им ничесоже во вся дни, егда беша на Кармиле: 8 вопроси отроков твоих и возвестят ти: и да обрящут отроцы твои благодать пред очима твоима, яко в день благ приидохом: даждь убо ныне еже обрящет рука твоя отроком твоим и сыну твоему Давиду. 9 И приидоша отроцы Давидовы и глаголаша словеса сия к Навалу, по всем глаголом сим именем Давидовым. 10 И возскочи Навал и отвеща отроком Давидовым и рече: кто Давид? И кто сын Иессеов? Днесь умножени суть раби отходяще кийждо от лица господина своего: 11 и возму ли хлебы моя и вино мое и закланая моя, яже заклах стригущым моя овцы, и дам ли оная мужем, ихже не вем откуду суть? 12 И возвратишася отроцы Давидовы путем своим, и возвращшеся приидоша и возвестиша Давиду по глаголом сим. 13 И рече Давид мужем своим: препояшитеся кийждо оружием своим. И препоясашася оружием своим, и сам Давид препоясася мечем своим, и идоша вслед Давида, яко четыреста мужей, а двести их осташася у сосудов. 14 И Авигеи жене Навалове поведа един отрок, глаголя: се, присыла Давид послы от пустыни благословити господина нашего, он же отвратися от них: 15 мужие же блази (беша) нам зело, не возбраняху нам, ниже повелеваху нам что во вся дни, в няже бехом с ними: 16 и сущым нам на селе, аки стена беша окрест нас, и в нощи и во дни, по вся дни в няже бехом с ними пасуще стада: 17 и ныне разумей и виждь ты, что сотвориши, яко совершися злоба на господина нашего и на дом его, и сей сын губитель, и не возможно глаголати к нему. 18 И потщася Авигеа, и взя двести хлебов и два сосуда вина и пять овец устроеных и пять мер муки чистыя и кошницу гроздия и двести вязаниц смоквей, и возложи на ослята, 19 и рече ко отроком своим: поидите предо мною, и се, аз вслед вас иду. Мужу же своему не возвести. 20 И бысть, вседшей ей на ослицу и сходящей в подгорие, и се, Давид и мужие его идяху сопротиву ея, и срете их. 21 И рече Давид: воистинну всуе вся навалова сохраних в пустыни, и ничесоже повелех взяти от всех яже его, и воздаде ми злая за благая: 22 сия да сотворит Бог Давиду и сия да приложит, аще до утра оставлю от всех Наваловых даже до мочащагося к стене. 23 И увиде Авигеа Давида, и потщася и скочи со осляте, и паде пред Давидом на лице свое, и поклонися ему до земли, 24 и паде на ноги его и рече: во мне, господине мой, неправда моя: да глаголет ныне раба твоя во ушы твои, и послушай словес рабы твоея: 25 да не возложит ныне господин мой сердца своего на человека гибелнаго сего, яко по имени своему той есть: Навал имя ему, и безумие с ним: аз же раба твоя не видех отроков господина моего, ихже послал еси: 26 и ныне, господине мой, жив Господь и жива душа твоя, якоже возбрани тебе Господь еже не приити на кровь неповинну и спасти тебе руку твою: и ныне да будут якоже Навал врази твои и ищущии господину моему зла: 27 и ныне возми благословение сие, еже принесе раба твоя господину моему, и даждь отроком предстоящым господину моему: 28 отими ныне неправду рабы твоея, яко творя сотворит Господь дом верен господину моему, яко на брани господина моего Господь споборет, и злоба не обрящется в тебе никогдаже: 29 и аще востанет человек гоняй тя и ищай души твоея, и будет душа господина моего привязана соузом жизни у Господа Бога, и душу врагов твоих поразиши пращею посреде пращи: 30 и будет егда сотворит Господь господину моему вся, елика глаголаше благая о тебе, и повелит тебе Господь (быти) вождем во Израили, 31 и не будет тебе сие мерзость и соблазн сердцу господина моего, еже излияти кровь неповинную туне и спасти руку свою себе: и да благо сотворит Господь господину моему, и воспомянеши рабу твою, еже благосотворити ей. 32 И рече Давид ко Авигеи: благословен Господь Бог Израилев, иже посла тя днесь на сретение ми, 33 и благословен совет твой, и благословена ты удержавшая мя в день сей ити на пролитие крове, и спасти ми руку мою: 34 обаче жив Господь Бог Израилев, иже возбрани ми днесь зло сотворити тебе: зане аще бы не потщалася и не пришла еси на сретение мне, тогда рех: аще останется Навалу до утренняго света мочащийся к стене. 35 И прия Давид от руку ея вся, яже принесе ему, и рече ей: иди с миром в дом свой: виждь, послушах гласа твоего и приях лице твое. 36 И прииде Авигеа к Навалу: и се, у него пир в дому его, яко пир царев: и сердце навалово весело в нем, и той пиян до зела. И не возвести Авигеа Навалу глагола ни велика ни мала до света утренняго. 37 И бысть заутра, егда истрезвися Навал от вина, поведа ему жена его вся глаголы сия, и умре сердце его в нем, и той бысть яко камень. 38 И бысть яко десять дний, и порази Господь Навала, и умре. 39 И услыша Давид и рече: благословен Господь, иже суди суд поношения моего от руки Навали, и раба Своего удержа от руки злых, и злобу Навалю обрати Господь на главу его. И посла Давид и глагола ко Авигеи пояти ю себе в жену. 40 И приидоша отроцы Давидовы ко Авигеи в Кармил, и реша ей, глаголюще: Давид посла нас к тебе, да тя поймет себе в жену. 41 И воста и поклонися до земли лицем и рече: се, раба твоя в рабыню умывати ноги отроком твоим. 42 И воста Авигеа, и вседе на осля, и пять девиц идяху вслед ея, и пойде вслед отроков Давидовых, и бысть ему в жену. 43 И Ахинааму поят Давид от Иезраеля, и бесте ему обе жены. 44 Саул же даде Мелхолу дщерь свою жену Давидову Фалтию сыну Амисову иже от Роммы. === 26 === 1 И приидоша Зифее от знойныя к Саулу на холм, глаголюще: се, Давид скрыся у нас на холме Ехелаф, прямо Иессемону. 2 И воста Саул, и сниде в пустыню Зиф, и с ним три тысящы мужей избранных от Израиля, искати Давида в пустыни Зиф. 3 И ополчися Саул на холме Ехелаф иже прямо Иессемону при пути, Давид же седяше в пустыни. И виде Давид, яко идет Саул вслед его в пустыню, 4 и посла Давид соглядатаи, и разуме, яко идет Саул готов из Кеиля: 5 и воста Давид отай, и вниде в место, идеже почиваше Саул, и тамо бяше Авенир сын Ниров, первый воевода его, и Саул спаше в колеснице царстей, и людие ополчившеся окрест его. 6 И отвеща Давид и рече ко Авимелеху Хеттеину и ко Авессе сыну Саруину брату Иоавлю, глаголя: кто внидет со мною к Саулу в полк? И рече Авесса: аз вниду с тобою. 7 И внидоста Давид и Авесса в люди нощию: и се, Саул спяй сном в колеснице царстей, и копие его водружено в землю при главе его, Авенир же и воини его спаху окрест его. 8 И рече Авесса к Давиду: заключи Господь днесь врага твоего в руце твои, и ныне поражу его копием в землю единожды, и не повторю ему. 9 И рече Давид ко Авессе: не убивай его, яко кто прострет руку свою на христа Господня, и неповинен будет? 10 И рече Давид: жив Господь, аще не Господь поразит его, или день его приидет, и умрет, или на брань снидет и погибнет: 11 да не будет ми от Господа нанести руку мою на христа Господня: и ныне возми копие от возглавия его и сосуд водный, и отидем мы о себе. 12 И взя Давид копие и сосуд водный от возглавия его, и отидоста о себе: и не бе иже бы видел или разумел, и не бяше востающаго, вси бо спаху, яко сон крепок от Господа нападе на ня. 13 И прейде Давид на он пол и ста на версе горы издалеча, и мног бе путь между ими. 14 И воззва Давид к людем, и Авениру рече глаголя: не отвещаеши ли, Авенире? И отвеща Авенир и рече: кто ты еси зовый мя? 15 И рече Давид ко Авениру: не муж ли еси ты? И кто, якоже ты, во Израили? И почто не храниши господина твоего царя? Яко вниде един от людий убити господина твоего царя: 16 и не благо сие (зело), еже сотворил еси: жив Господь, яко сынове смерти вы, не хранящии господа своего царя христа Господня: и ныне виждь, где есть копие царево и сосуд водный, яже беша при главе его? 17 И позна Саул глас Давидов и рече: твой ли глас сей, чадо Давиде? И рече Давид: аз раб твой, господи царю. 18 И рече Давид: почто гониши раба твоего, господи царю? Яко что (ти) согреших? И кая обретеся во мне неправда? 19 И ныне да послушает господь мой царь глаголов раба своего: аще Бог поощряет тя на мя, да будет благовонна жертва твоя: аще же сынове человечестии, прокляти сии пред Господем, яко изгнаша мя днесь не утвердитися в жребии Господни, глаголюще: пойди, работай богом чуждим: 20 и ныне да не падет кровь моя на землю пред лицем Господним, яко изыде царь Израилев искати души моея, и гонит якоже нощный вран по горам. 21 И рече Саул: согреших: возвратися, чадо Давиде, яко ктому не сотворю ти зла, зане честна душа моя пред очима твоима в день сей: безумно сотворих, и погреших много зело. 22 И отвеща Давид и рече: се, копие царево, да приидет отрок един и возмет е: 23 и Господь да возвратит коемуждо по правде его и по вере его: якоже предаде тя Господь днесь в руце мои, и не восхотех нанести руки моея на христа Господня: 24 и се, якоже возвеличися душа твоя днесь во очию моею, тако да возвеличится душа моя пред Господем, и да покрыет мя и измет мя от всякия печали. 25 И рече Саул к Давиду: благословен ты, чадо, и творяй сотвориши и могий возможеши. И отиде Давид в путь свой, а Саул возвратися на место свое. === 27 === 1 И рече Давид в сердцы своем, глаголя: ныне впаду в день един в руки Саули, и не будет ми благо, аще не спасуся в земли иноплеменничи, и престанет Саул искати мене во всяком пределе Израилеве, и спасуся из руки его. 2 И воста Давид и шесть сот мужей иже с ним, и иде ко Агхусу сыну Аммахову царю Гефску. 3 И пребысть Давид у Агхуса в Гефе, сам и мужие его вси и дом его, и Давид и обе жены его, Ахинаам Иезраилитыня и Авигеа жена Навала Кармилскаго. 4 И возвестиша Саулу, яко отбеже Давид в Геф, и не приложи ктому (Саул) искати его. 5 И рече Давид ко Агхусу: аще обрете раб твой благодать пред очима твоима, да даси ми место во единем от градов иже на селе, и сяду тамо: и вскую седит раб твой во граде царственнем с тобою? 6 И даде ему Агхус в день той Секелаг: сего ради бысть царю Иудейску Секелаг до днешняго дне. 7 И бысть число дний, в няже седяше Давид на селе иноплеменничи, четыри месяцы. 8 И восхождаше Давид и мужие его и нападаху на всякаго Гессера и на Амаликита, и се, земля населяшеся от Ламсура и до земли Египетския: 9 и поражаше Давид землю, и не оставляше в живых мужеска полу и женска: и взимаху стада, и буйволицы и ослята, и велблюды и ризы, и возвращающеся прихождаху ко Агхусу. 10 И рече Агхус к Давиду: на кого нападосте ныне? И рече Давид ко Агхусу: к югу Иудеи и к югу Иесмеги и к югу Кенезиа: 11 и мужеска полу и женска не оставлях в живых еже вводити в Геф, глаголя: да не возвестят в Гефе на нас, глаголюще: сия творит Давид. И сие оправдание его во вся дни, в няже седяше Давид на селе иноплеменничи. 12 И уверися Давид Агхусу зело, глаголя: омерзением омерзе в людех своих во Израили, и будет ми раб во веки. === 28 === 1 И бысть во дни оны, и собрашася иноплеменницы в полки своя изыти братися со Израилтяны. И рече Агхус к Давиду: разумея разумей, яко со мною изыдеши на брань ты и мужие твои. 2 И рече Давид ко Агхусу: тако ныне уразумееши, яже сотворит раб твой. И рече Агхус к Давиду: темже началника хранителей телу (моему) поставлю тя во вся дни. 3 И Самуил умре, и рыдаше по нем весь Израиль, и погребоша его во Армафеме во граде его: и Саул изби чревобасники и волхвы земли своея. 4 И собрашася иноплеменницы и приидоша и ополчишася в Сонаме: и собра Саул вся мужы Израилевы, и ополчишася в Гелвуе. 5 И виде Саул полки иноплеменничи, и убояся, и ужасеся сердце его зело. 6 И вопроси Саул Господа, и не отвеща ему Господь ни во сне, ни во явлениих, ни во пророцех. 7 И рече Саул отроком своим: поищите ми жены волшебницы, и пойду к ней, и вопрошу ея. И реша отроцы его к нему: се, жена волшебница во Аендоре. 8 И прикрыся Саул и облечеся в ризы ины, и иде сам и два мужа с ним, и прииде нощию к жене и рече ей: поволхвуй ми чревоволшебством, и возведи ми, егоже реку ти. 9 И рече ему жена: се, ныне ты сам веси, елика сотвори Саул, како истреби чревобасники и волхвы от земли, и вскую ты ловиши душу мою, еже умертвити ю? 10 И клятся ей Саул, глаголя: жив Господь, аще срящет тя неправда о словеси сем. 11 И рече жена Саулу: кого возведу ти? И рече Саул: Самуила возведи ми. 12 И виде жена Самуила, и возгласи гласом велиим, и рече жена к Саулу: почто мя прельстил еси? И ты еси Саул. 13 И рече ей царь: не бойся, рцы кого видела еси? И рече ему жена: боги видех восходящыя от земли. 14 И рече ей: что познала еси? И рече ему (жена): (видех) мужа стара восходяща от земли, и сей оболчен одеянием долгим. И уразуме Саул, яко сей Самуил (есть), и преклони лице свое на землю и поклонися ему. 15 И рече ему Самуил: почто понудил еси мя взыти ми? И рече Саул: скорблю зело, яко иноплеменницы воюют на мя, и Бог отступи от мене, и не услыша мене ктому ни в руках пророческих, ни во снех, ни во явлениих: и ныне призвах тя, да скажеши ми, что сотворю. 16 И рече Самуил: почто вопрошаеши мя, а Господь отступи от тебе и бысть со ближним твоим? 17 И сотвори Господь тебе, якоже глагола Господь рукою моею, и исторгнет Господь царство твое из руку твоею и вдаст е ближнему твоему Давиду, 18 понеже не послушал еси гласа Господня и не исполнил еси гнева ярости Его на Амалике, глагола ради того сотвори тебе Господь в день сей: 19 и предаст Господь Израиля с тобою в руки иноплеменничи, и заутра ты и сынове твои падут с тобою, и полк Израилев предаст Господь в руки иноплеменничи. 20 И потщася Саул, и паде стоящь на землю, и убояся зело от словес Самуиловых, и не бысть ктому крепости в нем: яко не яде хлеба во весь день той и во всю нощь ту. 21 И вниде жена к Саулу, и виде его, яко смятеся зело, и рече к нему: се, ныне послуша раба твоя гласа твоего, и положих душу мою в руце мои, и послушах словес, яже ми глаголал еси: 22 и ныне послушай гласа рабы твоея, и положу пред тобою укрух хлеба, и яждь, и будет в тебе крепость, яко идеши в путь. 23 И не хотяше ясти: и понудиша его отроцы его и жена, и послуша гласа их, и воста от земли, и седе на седалищи. 24 Жене же бяше юница питомая в дому: и потщася, и закла ю: и взя муку и смеси, и испече опресноки, 25 и принесе пред Саула и пред отроки его: и ядоша, и восташа и отидоша в нощь ону. === 29 === 1 И собраша иноплеменницы вся полки своя во Афек, Израилтяне же ополчишася во Аендоре иже во Иезраели. 2 И воеводы иноплеменничи предидяху со стами и тысящами, Давид же и мужие его идяху в последних со Агхусом. 3 И реша воеводы иноплеменничи кто суть идущии сии? И рече Агхус к воеводам иноплеменничим: не сей ли Давид раб Саула царя Израилева, иже бысть с нами дний сие второе лето? И не обретох в нем ничтоже, от дне в оньже прииде ко мне даже до сего дне. 4 И прискорбни быша о нем воеводы иноплеменничи и глаголаша ему: возврати мужа, и да возвратится на место свое, идеже поставил еси его тамо, и да не идет с нами на брань, и да не будет наветник в полцех: и чим примирится сей господину своему? Не главами ли мужей сих? 5 Не сей ли есть Давид, емуже изыдоша с лики, глаголюще: победи Саул с тысящами своими, и Давид со тмами своими? 6 И призва Агхус Давида и рече ему: жив Господь, яко прав ты и благ пред очима моима, и вход твой и исход твой со мною в полце, и яко не обретох в тебе злобы, отнележе еси пришел ко мне до днешняго дне, но пред очима воевод не благ еси ты: 7 и ныне возвратися и иди с миром, и да не сотвориши зла пред очима воевод иноплеменничих. 8 И рече Давид ко Агхусу: что сотворих ти? И что обрел еси в рабе твоем, от негоже дне бех пред тобою, и даже до сего дне, да не иду воевати врагов господина моего царя? 9 И отвеща Агхус Давиду: вем, яко благ ты пред очима моима яко Ангел Божий, но воеводы иноплеменничи глаголют: да не идет с нами на брань: 10 и ныне востани рано ты и отроцы господина твоего ходящии с тобою и идите на место, идеже поставих вас, и словесе пагубна да не положиши на сердцы твоем, яко благ еси ты предо мною: и востаните рано в путь, егда разсветает вам, и идите. 11 И урани Давид сам и мужие его отити и стрещи земли иноплеменничи, и иноплеменницы взыдоша на брань во Иезраель. === 30 === 1 И бысть приходящу Давиду и мужем его к Секелагу в день третий, и Амалик нападе на южную страну и на Секелаг, и порази Секелаг и сожже его огнем: 2 жен же и всех сущих в нем от мала до велика не умертвиша мужа ни жены, но плениша, и отидоша в путь свой. 3 И прииде Давид и мужие его во град, и се, сожжен бяше огнем, жены же их и сынове их и дщери их пленени быша. 4 И воздвиже Давид и мужие его глас свой и плакашася дондеже не бе в них силы ктому плакатися. 5 И жены обе Давидовы пленени быша, Ахинаам Иезраилитыня, и Авигеа бывшая жена Навала Кармилскаго. 6 И оскорбе Давид зело, яко совещашася людие камением побити его, яко скорбна бяше душа всех людий коегождо о сынех своих и о дщерех своих. И укрепися Давид о Господе Бозе своем, 7 и рече Давид ко Авиафару иерею сыну Авимелехову: принеси ефуд. И принесе Авиафар ефуд к Давиду. 8 И вопроси Давид Господа, глаголя: пожену ли вслед полчища сего? И постигну ли их? И рече Господь: гони, яко постизая постигнеши их и избавляя избавиши. 9 И иде Давид сам и шесть сот мужей с ним, и приидоша даже до потока Восорска, прочии же осташася: 10 и гна с четырми сты мужей, двести же мужей осташася, иже седоша об он пол потока Восорска. 11 И обретоша мужа Египтянина на селе, и яша его, и приведоша его к Давиду, и даша ему хлеба, и яде, и напоиша его водою: 12 и даша ему часть смоквей, и яде, и укрепися дух его в нем, яко не яде хлеба и не пи воды три дни и три нощы. 13 И рече ему Давид: откуду еси, и чий еси ты? И рече отрок Египтянин: аз есмь раб мужа Амаликитянина, и остави мя господин мой, яко изнемогох днесь уже третий день: 14 и мы ходихом на юг до Хелефи и на Иудейския страны и на Гелвуй, и Секелагу пожгохом огнем. 15 И рече ему Давид: доведеши ли мя до полчища сего? И рече: кленися ми Богом, яко не убиеши мя и не предаси мя в руце господину моему, и доведу тя до полчища сего. 16 (И клятся ему Давид:) и приведе его онамо, и се, тии разсеяни быша по лицу всея земли, ядуще и пиюще и празднующе о всех корыстех великих, яже взяша от земли иноплеменничи и от земли Иудины. 17 И прииде на них Давид, и изби их от утра даже до вечера и наутрие: и не спасеся от них муж, разве четыреста отрок, иже вседоша на велблюды и убежаша. 18 И отя Давид вся елика взяша Амаликиты, и обе жены своя отя, 19 и не погибе им от мала даже до велика, и от корыстей, и даже до сынов и дщерей и даже до всех, яже взяша, и вся возврати Давид: 20 и взя Давид вся стада и паствины, и погна пред пленом: и плен оный нарицашеся сей плен Давидов. 21 И прииде Давид к двема стом мужем оставшымся ити вслед Давида, ихже посади на потоце Восорсте, и изыдоша на сретение Давиду и на сретение людем иже с ним: и прииде Давид до людий, и вопросиша его о мирных. 22 И отвещаша вси мужие пагубнии и лукавнии от мужей ратных ходивших с Давидом и реша: яко не гониша с нами, не дадим им от плена, егоже взяхом, но токмо кийждо жену свою и чада своя да возмут и возвратятся. 23 И рече Давид: не сотворите, братия моя, тако, повнегда предаде Господь нам и сохрани нас, и предаде Господь полчище сие нашедшее на ны в руки нашя: 24 и кто послушает ваших словес сих? Яко не менши нас суть: понеже по части исходящаго на брань, тако будет часть седящаго при сосудех, по томужде разделятся. 25 И бысть от дне того и выше, и бысть в повеление и на оправдание Израилю даже до дне сего. 26 И прииде Давид в Секелаг, и посла старейшинам от корыстей Иудиных и искренним своим, глаголя: се, вам благословение от корыстей врагов Господних, 27 сущым в Вефсуре и в Раме южней и в Гефоре, 28 и во Ароире и во Аммаде, и во Сафе и во Есфифе и в Гефе, 29 и в Кинане и в Сафеце, и в Фимафе и в Кармиле, и сущым во градех Иеремиила и во градех Кенезия, 30 и сущым во Иеримуфе и во Вирсавеи и в Номве, 31 и сущым в Хевроне, и во вся места, яже пройде Давид тамо сам и мужие его. === 31 === 1 И иноплеменницы воеваху на Израиля, и бежаша мужие Израилевы от лица иноплеменнича, и падаху язвеннии на горе Гелвуе. 2 И снидошася иноплеменницы с Саулом и с сынми его, и убиша иноплеменницы Ионафана и Аминадава и Мелхисуа, сыны Сауловы. 3 И отяготе брань на Саула, и обретоша его копейницы мужие стрелцы, и уязвен бысть (Саул) во утробу. 4 И рече Саул к носящему оружие его: изсуни мечь твой и прободи мя им, да не приидут необрезаннии сии и избодут мя, и поругаются мне. И не хотяше носяй оружие его, яко убояся зело. И взя Саул мечь свой и паде на него. 5 И виде носяй оружие его, яко умре Саул, и паде и той на мечь свой и умре с ним. 6 И умре Саул и трие сынове его, и носяй оружие его, и вси мужие его в день той купно. 7 И видеша мужие Израилстии, иже об он пол юдоли и иже об он пол Иордана, яко бежаша мужие Израилстии, и яко умре Саул и сынове его, и оставиша грады своя и бежаша: и приидоша иноплеменницы и вселишася в них. 8 И бысть на утрие, и приидоша иноплеменницы обнажити мертвых, и обретоша Саула и три сыны его падшыя на горе Гелвуе, 9 и обратиша его, и сняша оружие его, и отсекоша главу его, и послаша в землю иноплеменничу окрест возвещающе идолом их и людем их: 10 и положиша оружие его у Астарта, тело же его воткнуша на стене Вефсамли. 11 И услышаша живущии во Иависе Галаадитийстем, яже сотвориша иноплеменницы Саулу, 12 и восташа вси мужие сильнии, и идоша всю нощь, и взяша тело Саулово и тело Ионафана сына его с стены Вефсамски, и принесоша я во Иавис, и сожгоша я тамо: 13 и взяша кости их, и погребоша я в дубраве яже во Иависе, и постишася седмь дний. == Вторая книга Царств == === 1 === 1 И бысть егда умре Саул, и Давид возвратися победив Амалика, и пребысть Давид в Секелазе дни два. 2 И бысть в третий день, и се, муж прииде от полка людий Сауловых, ризы же его (бяху) раздраны, и персть на главе его: и бысть егда вниде к Давиду (отрок), и пад на земли поклонися ему. 3 И рече ему Давид: откуду ты пришел еси? И рече ему: от полка Израилева аз избегох. 4 И рече ему Давид: что слово сие? Возвести ми. И рече: яко побегоша людие от брани, и падоша мнози от людий, и измроша, и Саул и Ионафан сын его умре. 5 И рече Давид отроку возвестившему ему: како знаеши, яко умре Саул и Ионафан сын его? 6 И рече отрок возвещаяй ему: по случаю приидох в гору Гелвуйскую, и се, Саул нападаше на копие свое, и се, колесницы и вельможи собрашася нань: 7 и обозреся вспять (Саул) и виде мя, и призва мя, и рех: се, аз: 8 и рече ми: кто ты еси? И рех: Амаликитин есмь аз: 9 и рече ми: прииди убо на мя и убий мя, яко объят мя тма лютая, яко еще душа моя во мне: 10 и стах над ним, и убих его: ведех бо, яко не будет жив по падении своем: и взяв венец царский, иже бе на главе его, и нарамницу, яже бе на плещу его, и принесох сия к господину моему семо. 11 И емься Давид за ризы своя, и раздра я, и вси мужие иже с ним раздраша ризы своя, 12 и рыдаша и плакашася, и постишася до вечера о Сауле, и о Ионафане сыне его, и о людех Иудиных и о доме Израилеве, яко избиени быша мечем. 13 И рече Давид отроку возвестившему ему: откуду ты еси? И рече: сын мужа пришелца Амаликитина есмь аз. 14 И рече ему Давид: како не убоялся еси воздвигнути руку твою погубити христа Господня? 15 И призва Давид единаго от отрок своих и рече: иди, убий его. И уби его, и умре. 16 И рече ему Давид: кровь твоя на главе твоей, яко уста твоя на тя возвещаша, глаголюще: яко аз убих христа Господня. 17 И плакася Давид плачем сим о Сауле и о Ионафане сыне его, 18 и рече еже научити сыны Иудины стрелянию. Се написано в книзе Праведнаго. 19 И рече: воздвигни столп, Израилю, над умершими на высоких твоих язвеными: како падоша сильнии? 20 Не возвещайте в Гефе, ниже поведайте на исходищих Аскалоних, да не возвеселятся дщери иноплеменничи, ни да возрадуются дщери необрезанных. 21 Горы Гелвуйския, да не снидет роса ниже дождь на вас: и села начатков (житных), яко тамо повержен бысть щит сильных: щит Саулов не быти помазан елеем: 22 от крове язвеных и от тука сильных лук Ионафанов не возвратися тощь вспять, и мечь Саулов не возвратися тощь: 23 Саул и Ионафан возлюбленнии и прекраснии неразлучни, благолепни в животе своем, и в смерти своей не разлучишася: паче орлов легцы и паче львов крепцы: 24 плачите по Сауле, дщери Израилевы, иже вас облачаше в червленицы со украшением вашим, и возлагаше украшение злато на ризы вашя: 25 како падоша сильнии посреде брани? Ионафане, до смерти на высоких твоих язвен еси: 26 болезную о тебе, брате мой Ионафане, красный ми зело, удивися любовь твоя от мене паче любве женския: 27 како падоша сильнии, и погибоша оружия бранная? === 2 === 1 И бысть по сих, и вопроси Давид Господа, глаголя: вниду ли в един от градов Иудиных? И рече Господь к нему: и вниди. И рече Давид: камо вниду? И рече: в Хеврон. 2 И иде тамо Давид в Хеврон, и обе жены его, Ахинаам Иезраилитыня и Авигеа (бывшая) жена Навала Кармилскаго, 3 и мужие иже с ним кийждо, и домове их, и начаша жити во градех Хевронских. 4 И приидоша мужие от Иудеи и помазаша тамо Давида, да царствует над домом Иудиным. И возвестиша Давиду, глаголюще: яко мужие Иависа Галаадититскаго погребоша Саула. 5 И посла Давид послы к старейшинам Иависа Галаадититскаго и рече к ним Давид: благословени вы Господу, яко сотвористе милость сию над господином вашим Саулом, христом Господним, и погребосте его и Ионафана сына его: 6 и ныне да сотворит Господь с вами милость и истину: и аз сотворю с вами сие благое, понеже сотвористе глагол сей: 7 и ныне да укрепятся руки вашя, и да будете сынове сильнии, яко умре господин ваш Саул, мене же помаза дом Иудин, да царствую над ними. 8 И Авенир сын Ниров, началный воевода Саулов, взя Иевосфеа сына Сауля, и изведе его из полка в Манаем, 9 и воцари его над Галаадитиею и над Фасириею и над Иезраилем и над Ефремом и над Вениамином и над всем Израилем. 10 Четыредесять лет Иевосфею бе сыну Саулову, егда нача царствовати над Израилем, и два лета царствова, кроме дому Иудина, иже бысть за Давидом. 11 И быша дние, в няже Давид царствова в Хевроне над домом Иудиным, седмь лет и шесть месяц. 12 И изыде Авенир сын Ниров и отроцы Иевосфеа сына Сауля из Манаема в Гаваон. 13 И Иоав сын Саруиев и отроцы Давидовы изыдоша от Хеврона и сретошася с ними у потока Гаваоня купно, и седоша сии над потоком отсюду, и тии оттуду. 14 И рече Авенир ко Иоаву: да востанут ныне отроцы и да поиграют пред нами. И рече Иоав: да востанут. 15 И восташа и преидоша от отрок Вениаминовых, числом дванадесять Иевосфеа сына Сауля, и от отрок Давидовых дванадесять: 16 и взя кийждо рукою за главу искренняго своего, и мечь его в ребра искренняго его, и падоша вкупе: и наречеся имя месту тому Часть Наветников, яже есть в Гаваоне. 17 И бысть брань жестока зело в той день: и паде Авенир и мужие Израилстии пред отроки Давидовы. 18 И быша тамо три сынове Саруиевы, Иоав и Авесса и Асаил: Асаил же бе легок ногама своима, яко едина серна от сущих на селе. 19 И погна Асаил вслед Авенира, и не уклонися ни на десно ни на лево, но вслед Авенира: 20 и озреся Авенир назад себе и рече: ты ли еси сам, Асаиле? И рече: аз есмь. 21 И рече ему Авенир: уклонися ты на десно или на шуее, и возми себе единаго от отрок, и возми себе все оружие его. И не восхоте Асаил уклонитися от него. 22 И приложи еще Авенир глаголати ко Асаилу: отступи от мене, да не поражу тя о землю: и како явлю лице мое ко Иоаву? 23 И где суть сия? Возвратися ко Иоаву брату твоему. И не хотяше отступити. И удари его Авенир копием созади в лядвия: и пройде копие сквозе его, и паде тамо и умре пред ним: и бысть всяк приходяй до места, идеже паде Асаил и умре, и остановляшеся. 24 И погнаша Иоав и Авесса вслед Авенира, и солнце заходяше: и тии приидоша даже до холма Амма, иже есть пред лицем Гаи, путь пустыни Гаваони. 25 И собрашася сынове Вениаминовы за Авениром и быша в снитии единем, и сташа на версе холма единаго. 26 И воззва Авенир ко Иоаву и рече: еда в победу пояст мечь? Или не веси, яко горька будут последняя? И доколе не речеши людем возвратитися созади братий наших? 27 И рече Иоав: жив Господь, яко, аще бы не рекл еси, тогда от утра бы людие мои престали гоняще кийждо вслед брата своего. 28 И воструби Иоав трубою, и сташа вси людие, и не погнаша вслед Израилтян, и не приложиша ктому ратовати. 29 Авенир же и мужие его идоша на запад всю нощь ону, и преидоша Иордан, и проидоша всю страну ту, и приидоша в Полк. 30 И Иоав возвратися вспять от Авенира, и собра вся люди, и исчислиша отрок Давидовых (падших) девятьнадесять мужей, и Асаила. 31 Отроцы же Давидовы убиша сынов Вениаминих мужей Авенировых триста и шестьдесят мужей. 32 И взяша Асаила, и погребоша его во гробе отца его в Вифлееме. И иде Иоав и мужие его с ним всю нощь, и осветоша в Хевроне. === 3 === 1 И бысть брань на много между домом Саулим и между домом Давидовым, и дом Давидов возвышашеся и укрепляшеся, дом же Сауль идяше и изнемогаше. 2 И родишася Давиду в Хевроне сынов шесть: и бе первородный ему Амнон от Ахинаамы Иезраилитыни, 3 и вторый ему сын Далуиа от Авигеи Кармилския, и третий Авессалом сын Маахи дщере Фолми царя Гессирска, 4 четвертый Адониа сын Аггифы, и пятый Сафатиа от Авиталы, 5 и шестый Иефераам от Еглы жены Давидовы: сии родишася Давиду в Хевроне. 6 И бысть внегда быти брани между домом Саулим и между домом Давидовым, и бяше Авенир держа дом Саулов. 7 И Саулова подложница бе, ейже бе имя Ресфа, дщерь Иоля. И вниде к ней Авенир, и рече Иевосфей сын Сауль ко Авениру: что яко вшел еси к подложнице отца моего? 8 И разгневася зело Авенир о словеси сем на Иевосфеа и рече ему Авенир: еда песия глава есмь аз? Сотворих днесь милость дому Саула отца твоего и братии и знаемым, и не отступих в дом Давидов, и ищеши на мне ты о неправде жены днесь? 9 Сия да сотворит Бог Авениру и сия да приложит ему, зане якоже клятся Господь Давиду, тако сотворю ему в сей день, 10 еже отяти царство от дому Сауля и воздвигнути престол Давидов во Израили и во Иуде от Дана даже до Вирсавии. 11 И не возможе ктому Иевосфей отвещати Авениру словесе от боязни, яже к нему. 12 И посла Авенир к Давиду послы в Фелам, идеже бе, абие, глаголя: положи завет твой со мною, и се, рука моя с тобою, еже возвратити ми к тебе весь дом Израилев. 13 И рече Давид: добре, аз положу с тобою завет, токмо словесе единаго прошу у тебе, глаголя: не имаши видети лица моего, аще не приведеши Мелхолы дщере Саули, приходящу ти видети лице мое. 14 И посла Давид ко Иевосфею сыну Саулю вестники, глаголя: отдаждь мне жену мою Мелхолу, юже взях за сто необрезаний иноплеменничих. 15 И посла Иевосфей, и взят ю от мужа ея от Фалтиила сына Селлимова. 16 И идяше муж ея с нею плачася даже до Варакима. И рече к нему Авенир: иди, возвратися. И возвратися. 17 И рече Авенир к старейшинам Израилевым, глаголя: вчера и третияго дне искасте Давида, да царствует над вами: 18 и ныне сотворите, якоже Господь глагола о Давиде, глаголя: рукою раба Моего Давида спасу люди Моя Израиля от руки иноплеменничи и от руки всех врагов их. 19 И глагола Авенир во ушы Вениамину: и иде Авенир глаголати во ушы Давидовы в Хеврон вся, елика угодна беша пред очима Израилевыма и пред очима всего дому Вениаминя. 20 И прииде Авенир к Давиду в Хеврон, и с ним двадесять мужей. И сотвори Давид пир Авениру и мужем его иже с ним. 21 И рече Авенир к Давиду: востану ныне и пойду и соберу к господину моему царю всего Израиля, и положу с ним завет, и царствовати имаши всеми, ихже желает душа твоя. И посла Давид Авенира, и иде с миром. 22 И се, отроцы Давидовы и Иоав идяху от исхода и корысть многу несяху с собою, и Авенир уже не бе с Давидом в Хевроне, яко отслан бяше, и отиде с миром. 23 Иоав же и все воинство его прииде: и возвестиша Иоаву, глаголюще: прихождаше Авенир сын Ниров к Давиду, и отсла его, и отиде с миром. 24 И вниде Иоав к царю и рече: что сие сотворил еси? Се, прихождаше Авенир к тебе, и почто отпустил еси его, и отиде с миром? 25 Или не веси злобы Авенира сына Нирова, яко слукавствовати к тебе прииде, и уразумети исход твой и вход твой, и уведати вся елика твориши ты? 26 И возвратися Иоав от Давида, и посла послы вслед Авенира, и возвратиша его от кладязя Сеирамска: Давид же не ведяше. 27 И возврати Авенира в Хеврон, и соврати его Иоав на страну от врат глаголати к нему лукавно: и удари его в лядвия, и умре в крови Асаила брата Иоавля. 28 И услыша Давид по сих и рече: чист есмь аз и царство мое от Господа и отныне и до века от крове Авенира сына Нирова: 29 да снидет на главу Иоавлю и на весь дом отца его, и да не оскудеет от дому Иоавля изливаяй семя, и прокаженный, и держайся жезла, и падаяй оружием, и умаленный хлебами. 30 Иоав же и Авесса брат его наблюдаху Авенира, понеже уби Асаила брата их в Гаваоне на брани. 31 И рече Давид ко Иоаву и ко всем людем его: раздерите ризы вашя и препояшитеся вретищы, и рыдайте о Авенире. Сам же царь Давид идяше вслед одра. 32 И погребоша Авенира в Хевроне. И воздвиже царь глас свой и плакася над гробом его, и вси людие плакаша о Авенире. 33 И плакася царь над Авениром и рече: еда смертию Навала умре Авенир? 34 Руце твои не связаны, нозе твои не во оковах: не приступил еси якоже Навал, пред сынми неправды пал еси. И собрашася вси людие плакатися его, 35 и приидоша вси людие предложити Давиду ясти хлебы еще сущу дни. И клятся Давид, глаголя: сия да сотворит ми Бог и сия да приложит, яко аще не зайдет солнце, не имам вкусити хлеба ни иного чего. 36 И познаша вси людие, и угодна быша пред ними вся, елика сотвори царь пред людьми. 37 И разумеша вси людие и весь Израиль в той день, яко не бысть от царя убийства Авениру сыну Нирову. 38 И рече царь отроком своим: не весте ли, яко властелин велик паде в сей день во Израили? 39 И яко аз есмь ближний днесь и возставлен в царя? Мужие же сии сынове Саруины жесточайшии мене суть: да воздаст Господь творящему лукавная по злобе его. === 4 === 1 И слыша Иевосфей сын Сауль, яко умре Авенир сын Ниров в Хевроне, и ослабеша руце его, и вси мужие Израилевы изнемогоша. 2 И два мужа старейшины полков Иевосфеа сына Сауля: имя единому Ваана и имя другому Рихав, сынове Реммона Вирофейскаго от сынов Вениаминих: яко Вироф вменяшеся в сынех Вениаминих. 3 И отбегоша Вирофее в Гефем, и беша тамо живуще до днешняго дне. 4 И Ионафану сыну Саулю сын бе хром ногама, сын пяти лет: и той, егда прииде возвещение о Сауле и Ионафане сыне его от Иезраеля, и взят его пестунница его, и бежа: и бысть тщащейся ей на отшествие, и паде, и охроме, имя же ему Мемфивосфей. 5 И поидоста сынове Реммона Вирофейскаго, Рихав и Ваана, и внидоста во время зноя дневнаго в дом Иевосфеов, и той почиваше на одре в полудне: 6 и се, вратник дому очищаше пшеницу и воздрема и спаше, Рихав же и Ваана братия утаившася внидоста в дом: 7 Иевосфей же почиваше на одре своем в ложнице своей: и биста его, и умертвиста его, и отяста главу его, и взяста главу его, и отидоста путем иже на запад всю нощь: 8 и принесоста главу Иевосфеову к Давиду в Хеврон и реста к царю: се, глава Иевосфеа сына Саулова врага твоего, иже искаше души твоея, и даде Господь господину нашему царю отмщение врагов его, якоже день сей, от Саула врага твоего и от семене его. 9 И отвеща Давид Рихаву и Ваане брату его, сыном Реммона Вирофейскаго, и рече има: жив Господь, иже избави душу мою от всякия скорби: 10 ибо возвестивый мне, яко умре Саул и Ионафан, и той бяше аки благовествуяй предо мною, и ях его и убих его в Секелазе, емуже должен бех дати дар: 11 и ныне мужие лукавии убиша мужа праведна в дому его на одре его, и ныне взыщу крове его от руки вашея и искореню вас от земли. 12 И заповеда Давид отроком своим, и убиша их, и отсекоша руце их и нозе их, и повесиша их над источником в Хевроне, и главу Иевосфеову погребоша во гробе Авенира сына Нирова (в Хевроне). === 5 === 1 И приидоша вся племена Израилева к Давиду в Хеврон и глаголаша ему: се, кости твоя и плоть твоя мы есмы: 2 и вчера и третияго дне Саулу сущу царю над нами, ты был еси вводяй и изводяй Израиля, и рече Господь к тебе: ты упасеши люди Моя Израиля и ты будеши вождь людем Моим Израилю. 3 И приидоша вси старейшины Израилевы к царю в Хеврон, и положи им царь Давид завет в Хевроне пред Господем: и помазаша Давида на царство над всем Израилем. 4 Сын тридесяти лет Давид внегда воцаритися ему, и царствова четыредесять лет: 5 седмь лет и месяцей шесть царствова в Хевроне над Иудою, и тридесять три лета царствова над всем Израилем и Иудою во Иерусалиме. 6 И пойде Давид и вси мужие его во Иерусалим ко Иевусею, живущему на земли той. И реша Давиду: не внидеши семо, яко восташа хромии и слепии глаголюще: яко не внидет Давид семо. 7 И взя Давид крепость Сионю: сия есть град Давидов. 8 И рече Давид в день той: всяк поражаяй Иевусеа да касается мечем и хромых и слепых и ненавидящих души Давидовы. Сего ради рекут: слепии и хромии не внидут в дом Господень. 9 И седе Давид в крепости, и наречеся сия град Давидов: и созда той град около от Краеградия, и дом свой. 10 И идяше Давид идый и величаемь, и Господь Вседержитель с ним. 11 И посла Хирам царь Тирский послы к Давиду, и древа кедрова, и древоделей, и каменоделателей, и создаша дом Давиду. 12 И уразуме Давид, яко уготова его Господь в царя над Израилем, и яко вознесеся царство его людий Его ради Израиля. 13 И поят Давид еще жены и подложницы от Иерусалима по пришествии своем от Хеврона: и быша Давиду еще сынове и дщери. 14 И сия имена родившымся ему во Иерусалиме: Самус и Совав, и Нафан и Соломон, 15 и Евеар и Елисуе, и Нафек и Иефие, 16 и Елисама и Елидае и Елифалаф, Самае, Иесиваф, Нафан, Галамаан, Иеваар, Феисус, Елифалаф, Нагеф, Нафек, Ианафан и Леасамис, Ваалимаф, Елифааф. 17 И услышаша иноплеменницы, яко помазася Давид царь над Израилем, и взыдоша вси иноплеменницы искати Давида. И услыша Давид, и сниде в крепость. 18 Иноплеменницы же приидоша и соединишася во юдоли Титанстей. 19 И вопроси Давид Господа, глаголя: взыду ли ко иноплеменником? И предаси ли я в руце мои? И рече Господь к Давиду: взыди, яко предая предам иноплеменники в руце твои. 20 И прииде Давид с Вышних Сечей и посече иноплеменники тамо. И рече Давид: изсече Господь враги моя иноплеменники предо мною, якоже пресекаются воды. Сего ради наречеся имя места того Свыше Сечей. 21 И оставиша тамо (иноплеменницы) боги своя, и взя их Давид и мужие иже с ним (и рече Давид сожещи их во огни). 22 И приложиша паки приити иноплеменницы и собрашася на юдоли Титанстей. 23 И вопроси Давид Господа: взыду ли ко иноплеменником? И предаси ли их в руце мои? И рече ему Господь: не исходи на сретение им, но уклонися от них, и приступиши к ним близ дубравы плача: 24 и будет, егда услышиши глас шума от дубравы плача, тогда снидеши к ним, яко тогда изыдет Господь пред тобою сещи на брани иноплеменники. 25 И сотвори Давид, якоже заповеда ему Господь, и изби иноплеменники от Гаваона даже до земли Газира. === 6 === 1 И собра Давид еще всякаго юношу от Израиля, яко седмьдесят тысящ. 2 И воста и иде Давид и вси людие, иже с ним, и от князей Иудиных, на восход, еже вознести оттуду кивот Божий, над нимже призвася имя Господа Сил, седящаго на херувимех над ним: 3 и возложиша кивот Господень на колесницу нову, и отвезоша его из дому и Аминадавля иже на холме: Оза же и братия его сынове Аминадавли везяху колесницу с кивотом (Господним): 4 и братия его идяху пред кивотом (Божиим), 5 Давид же и сынове Израилевы (идяху) пред Господем, играюще во органы устроенныя в крепости, и в пениих и в гуслех, и в свирелех и в тимпанех, и в кимвалех и в цевницах, 6 и приидоша до гумна Нахорова. И простре Оза руку свою на кивот Божий придержати его, и ятся за него, понеже превращаше его телец. 7 И разгневася гневом Господь на Озу и порази его тамо Бог, и умре тамо у кивота Господня пред Богом. 8 И опечалися Давид, понеже порази Господь поражением Озу: и наречеся место то поражение Озино и до сего дне. 9 И убояся Господа Давид в день той, глаголя: како внидет ко мне кивот Господень? 10 И не хотяше Давид, да приидет к нему кивот завета Господня во град Давидов: и уклони его Давид в дом Аведдара Гефеанина. 11 И стояше кивот Господень в дому Аведдара Гефеанина месяцы три, и благослови Господь весь дом Аведдаров и вся, яже его. 12 И возвестиша царю Давиду, глаголюще: благослови Господь дом Аведдаров и вся, яже его, кивота ради Божия. И иде Давид, и взя кивот Божий из дому Аведдарова во град Давидов в веселии: 13 и беша с ним несуще кивот Господень седмь ликов, и жертва телец и агнцы: 14 и Давид бряцаше во органы устроены пред Господем, и оболчен бысть Давид во одежду изящну: 15 и Давид и весь дом Израилев несяху кивот Господень с воплем и со гласом трубным. 16 И бысть кивоту приносиму ко граду Давидову, и Мелхола дщи Саулова приницаше оконцем и виде царя Давида скачуща и играюща пред Господем, и уничижи его в сердцы своем. 17 И внесоша кивот Господень, и поставиша его на месте его посреде скинии, юже постави ему Давид: и вознесе Давид всесожигаемая пред Господа и мирная, 18 и соверши Давид возносяй всесожжения и мирная, и благослови люди о имени Господа Сил, 19 и раздели всем людем на всю силу Израилеву от Дана даже до Вирсавии, и от мужа даже до жены, коемуждо по укруху хлеба, и по части печенаго мяса, и по сковрадному млину. И отидоша вси людие, кийждо в дом свой. 20 И возвратися Давид благословити дом свой, и изыде Мелхола дщи Саулова на сретение Давиду, и благослови его и рече: коль прославися днесь царь Израилев, иже открыся днесь пред очима рабынь рабов своих, якоже открывается открывшийся един от пляшущих? 21 И рече Давид к Мелхоле: пред Господем плясати буду: и благословен Господь, иже избра мя паче отца твоего и паче всего дому его, поставити мя властелина над людьми Своими над Израилем, и буду играти и плясати пред Господем: 22 и открыюся еще такожде и буду непотребен пред очима твоима, и с рабынями, о нихже рекла еси, непрославлену быти ми. 23 И у Мелхолы дщере Саули не бысть детища до дне смерти ея. === 7 === 1 И бысть егда сяде царь в дому своем, и Господь унаследи его окрест от всех врагов его окрестных, 2 и рече царь к Нафану пророку: се, ныне аз живу в дому кедровем, кивот же Божий стоит посреде скинии. 3 И рече Нафан к царю: вся елика суть в сердцы твоем, иди и твори, яко Господь с тобою. 4 И бысть в нощи той, и бысть слово Господне к Нафану, глаголя: 5 иди и рцы рабу Моему Давиду: сия глаголет Господь: не ты созиждеши Мне дом, еже обитати Мне: 6 яко не обитах в дому, от негоже дне изведох сыны Израилевы из земли Египетския до дне сего, но бех ходя во обиталищи и в кущи, 7 во всех идеже хождах во всем Израили: аще глаголя глаголах ко единому колену Израилеву, емуже заповедах пасти люди Моя Израиля, глаголя: почто не создасте Ми дому кедрова? 8 И ныне сия речеши рабу Моему Давиду: сице глаголет Господь Вседержитель: поях тя от пажити овчия на властелинство людем Моим Израилю, 9 и бех с тобою во всех, аможе ходил еси, и искорених вся враги твоя от лица твоего, и сотворих тя именита по имени великих иже на земли, 10 и положу место людем Моим Израилю, и насажду их, и вселятся о себе сами, и не попекутся ктому: и не приложит сын неправды обидети их, якоже исперва, 11 и от дний в няже поставих судии в людех Моих во Израили: и упокою тя от всех враг твоих: и возвестит ти Господь, яко созиждеши дом Ему: 12 и будет егда исполнятся дние твои, и уснеши со отцы твоими, и возставлю семя твое по тебе, иже будет от чрева твоего, и уготовлю царство его: 13 той созиждет дом имени Моему, и управлю престол его до века: 14 Аз буду ему во отца, и той будет Ми в сына: и аще приидет неправда его, и обличу его жезлом мужей и язвами сынов человеческих: 15 милости же Моея не отставлю от него, якоже отставих от тех, ихже отставих от лица Моего: 16 и верен будет дом его и царство его до века предо Мною: и престол его будет исправлен во век. 17 По всем словесем сим и по всему видению сему, тако глагола Нафан ко Давиду. 18 И вниде царь Давид и седе пред Господем и рече: кто есмь аз, Господи мой, Господи? И что дом мой, яко возлюбил мя еси даже до сих? 19 И мала сия пред Тобою суть, Господи мой, Господи, и глаголал еси о доме раба Твоего вдалеко: сей же закон человека, Господи мой, Господи: 20 и что приложит Давид еще глаголати к Тебе? И ныне Ты веси раба Твоего, Господи мой, Господи, 21 и раба Твоего ради сотворил еси и по сердцу Твоему сотворил еси все величество сие, сказати рабу Твоему, 22 величия ради Твоего, Господи мой, Господи: несть бо ин якоже Ты, и несть Бога разве Тебе во всех, яже слышахом ушима нашима: 23 и кто якоже людие Твои Израиль язык ин на земли? Яко настави их Бог, еже избавити Себе людий, еже положити Тебе имя, еже сотворити величие и просвещение, еже изринути тебе от лица людий Твоих, ихже избавил еси Себе от Египта, языки и селения, 24 и уготовал еси Себе люди Твоя Израиля в люди до века, и Ты, Господи, был еси им в Бога: 25 и ныне, Господи мой, Господи, слово, еже глаголал еси о рабе Твоем и о доме его, увери до века, якоже глаголал еси, сотвори: 26 и ныне да возвеличится имя Твое до века, глаголя: Господь Вседержитель Бог над Израилем, и дом раба Твоего Давида да будет исправлен пред Тобою: 27 яко Ты Господь Вседержитель Бог Израилев, отверзл еси ухо рабу Твоему, глаголя: дом созижду тебе: сего ради обрете раб Твой сердце свое еже помолитися к Тебе молитвою сею: 28 и ныне, Господи мой, Господи, Ты еси Бог, и словеса Твоя будут истинна, и глаголал еси о рабе Твоем благая сия, 29 и ныне начни и благослови дом раба Твоего, еже быти ему во век пред Тобою, яко Ты, Господи мой, Господи, глаголал еси, и от благословения Твоего да благословится дом раба Твоего, еже быти во век пред Тобою. === 8 === 1 И бысть по сих, и порази Давид иноплеменники и победи их, и взя Давид отлученное от руки иноплеменничи. 2 И порази Давид Моава, и размери их ужами, положив их на земли: и быша два ужа на умерщвление, и два ужа на оживление: и бысть Моав Давиду в раба дающа дань. 3 И порази Давид Адраазара сына Раава царя Сувска, идущу ему поставити руку свою на реце Евфрате: 4 и предвзя Давид от него тысящу колесниц и седмь тысящ конник и двадесять тысящ мужей пешцев, и разруши Давид вся колесницы, и остави себе от них сто колесниц. 5 И прииде Сириа Дамаскова помощи Адраазару царю Сувску, и порази Давид от Сирии двадесять две тысящы мужей, 6 и постави Давид стражу в Сирии, яже под Дамаском, и бысть Сириа Давиду в рабы дающыя дань: и спасе Господь Давида во всех, аможе хождаше. 7 И взя Давид гривны златыя, яже быша на отроцех Адраазара царя Сувска, и принесе я во Иерусалим: и взя их Сусаким царь Египетск, егда взыде во Иерусалим во дни Ровоама сына Соломоня. 8 И от Метевака и от избранных градов Адраазаровых взя Давид медь многу зело, из неяже сотвори Соломон море медяно и столпы, и умывалницы и вся сосуды. 9 И услыша Фоа царь Имафский, яко порази Давид всю силу Адраазарову, 10 и посла Фоа Иеддурама сына своего к царю Давиду вопросити его яже о мире, и благословити его, понеже победи Адраазара и уби его, зане сопротивляяся бе Адраазару: и в руку его быша сосуды сребряны и сосуды златы и сосуды медяны: 11 и сия освяти царь Давид Господу со сребром и златом, еже освяти от всех градов, имиже возоблада, 12 от Идумеи и от Моава, и от сынов Аммоних и от иноплеменник, и от Амалика и от корыстей Адраазара сына Раава, царя Сувска. 13 И сотвори Давид (себе) имя: и егда возвращашеся, порази Идумею в Гевелеме, до осминадесять тысящ: 14 и постави во Идумеи Давид стражу, во всей Идумеи, и быша вси Идумеане раби царю Давиду: и спасе Господь Давида во всех, аможе хождаше. 15 И царствова Давид над всем Израилем, и бе Давид творяй суд и правду над всеми людьми своими. 16 И Иоав сын Саруин над воинствы (его), и Иосафат сын Ахилудов над памятописанми, 17 и Садок сын Ахитов и Ахимелех сын Авиафарь жерцы, и Саса книжник, 18 и Ванеа сын Иодаев советник, и Хелефий и Фелетий, и сынове Давидовы началницы двора быша. === 9 === 1 И рече Давид: есть ли еще оставшийся в дому Саули, и сотворю с ним милость Ионафана ради? 2 И от дому Сауля бе отрок, и имя ему Сива: и призваша его к Давиду, и рече к нему царь: ты ли еси Сива? И рече: аз раб твой. 3 И рече царь: остася ли от дому Сауля еще муж, и сотворю с ним милость Божию? И рече Сива к царю: еще есть сын Ионафанов, хром ногама. 4 И рече царь: где есть? И рече Сива к царю: се, в дому Махира сына Амииля от Лодавара. 5 И посла царь Давид, и взя его из дому Махира сына Амииля от Лодавара. 6 И прииде Мемфивосфей сын Ионафана сына Саулова к царю Давиду, и паде на лицы своем и поклонися ему. И рече ему Давид: Мемфивосфее. И рече: се, раб твой. 7 И рече ему Давид: не бойся, яко творя сотворю с тобою милость Ионафана ради отца твоего, и возвращу тебе вся села Саула деда твоего, и ты яждь хлеб на трапезе моей всегда. 8 И поклонися ему Мемфивосфей и рече: кто есмь аз раб твой, яко призрел еси на пса умершаго подобнаго мне? 9 И призва царь Сиву отрочища Сауля, и рече ему: вся елика суть Сауля и весь дом его дах сыну господина твоего: 10 и делай ему землю ты и сынове твои и раби твои, и да приносиши сыну господина твоего хлебы, да яст: и Мемфивосфей сын господина твоего да яст хлеб всегда на трапезе моей. У Сивы же бяху пятьнадесять сынов и двадесять рабов. 11 И рече Сива к царю: по всем, елика заповеда господин мой царь рабу своему, тако сотворит раб твой. И Мемфивосфей ядяше на трапезе Давидове, якоже един от сынов царевых. 12 И Мемфивосфею сын бе мал, и имя ему Миха, и все обитание дому Сивина раби бяху Мемфивосфеовы. 13 И Мемфивосфей живяше во Иерусалиме, яко на трапезе цареве ядяше всегда: и той бяше хром обема ногама своима. === 10 === 1 И бысть по сих, и умре царь сынов Аммоних, и царствова сын его Аннон вместо его. 2 И рече Давид: сотворю милость со Анноном сыном Наасовым, имже образом сотвори отец его милость со мною. И посла Давид утешити его рукою рабов своих о отце его. И приидоша отроцы Давидовы в землю сынов Аммоних. 3 И реша старейшины сынов Аммоних ко Аннону господину своему: еда прославления ради отца твоего пред тобою посла к тебе Давид утешители? Не да испытают ли град, и соглядают его, еже разрушити его, посла Давид рабы своя к тебе? 4 И взя Аннон отроки Давидовы, и остриже половину брад их, и обреза одеяния их половину даже до чресл их, и отпусти их. 5 И возвестиша Давиду о мужех, и посла в сретение им, яко беша мужие тии обезчещени зело. И рече царь: седите во Иерихоне, дондеже возрастут брады вашя, и возвратитеся. 6 И видеша сынове Аммони, яко посрамлени быша людие Давидовы: и послаша сынове Аммони, и наяша Сирию Вефраамлю, и Сирию Сувску и Роовлю двадесять тысящ пешцев, и царя Амалика Мааха тысящу мужей, и Истова дванадесять тысящ мужей. 7 И слыша Давид, и посла Иоава и всю силу сильных. 8 И изыдоша сынове Аммони, и устроиша брань пред враты града: Сириа же Сувска и Роов, и Истов и Амалик, едини (сташа) на селе. 9 И виде Иоав, яко бысть на него противное лице брани сопреди и созади, и избра от всех юнош Израилевых, и устрои их противу Сириан, 10 останок же людий даде в руце брату своему Авессе и устрои я противу сынов Аммоних, 11 и рече (Иоав ко Авессе): аще укрепится Сириа паче мене, и будете мне на спасение: аще же укрепятся сынове Аммони паче тебе, и будем спасати тя: 12 мужаимся и укрепимся о людех наших и о градех Бога нашего, и Господь сотворит благое пред очима Своима. 13 И прииде Иоав и людие его с ним на брань на Сирию, и побегоша от лица его. 14 И видеша сынове Аммони, яко бежаша Сириане, и бежаша от лица Авессы и внидоша во град. И возвратися Иоав от сынов Аммоних, и прииде во Иерусалим. 15 И видеша Сириане, яко падоша пред Израилем, и собрашася вкупе. 16 И посла Адраазар, и собра Сирианы, иже об он пол реки Халамака, и приидоша во Елам: и Совак старейшина силы Адраазаровы пред ними. 17 И возвестиша Давиду, и собра всего Израиля, и прейде Иордан, и прииде во Елам. И устроишася Сириане на Давида, и брашася с ним, 18 и бежаша Сириане от лица Израилтян. И отя Давид от Сирии седмь сот колесниц и четыредесять тысящ конник, и Совака старейшину силы его уби, и умре тамо. 19 И видеша вси царие раби Адраазаровы, яко падоша пред Израилем, и пребегоша ко Израилю и работаша им: и убояшася Сириане спасати ктому сынов Аммоних. === 11 === 1 И бысть по возвращении лета, во время исхождения царей (на брань), и посла Давид Иоава и отроки своя с ним, и всего Израиля: и расточиша сыны Аммони и обседоша окрест Раввафа, и Давид седе во Иерусалиме. 2 И бысть при вечере, и воста Давид от ложа своего, и хождаше на крове дому царскаго, и увиде жену с крова мыющуюся: жена же взором добра велми: 3 и посла Давид, и взыска жену, и рече: не сия ли Вирсавиа дщерь Елиавля, жена Урии Хеттеанина? 4 И посла Давид слуги, и взя ю, и вниде к ней, и преспа с нею: и та бе очистилася от нечистоты своея, и возвратися в дом свой. 5 И зачат жена во чреве: и пославши возвести Давиду и рече: се, аз есмь во чреве имущая. 6 И посла Давид ко Иоаву, глаголя: посли ко мне Урию Хеттеанина. И посла Иоав Урию к Давиду. 7 И прииде Уриа и вниде к нему, и вопроси его Давид о мире Иоава и о мире людий и о мире брани. 8 И рече Давид ко Урии: иди в дом твой, и умый нозе твои. И изыде Уриа из дому царева, и иде вслед его снедь царева. 9 И спа Уриа пред враты дому царева с рабы господина своего, а не иде в дом свой. 10 И возвестиша Давиду, глаголюще: яко не ходи Уриа в дом свой. И рече Давид ко Урии: не с пути ли пришел еси? Почто не вшел еси в дом твой? 11 И рече Уриа к Давиду: кивот Божий и Израиль и Иуда пребывают в кущах, и господин мой Иоав и раби господина моего на лицы сел пребывают, аз же вниду ли в дом мой ясти и пити и спати с женою моею? Како? Жива душа твоя, аще сотворю глагол сей. 12 И рече Давид ко Урии: поседи зде и днесь, и заутра отпущу тя. И пребысть Уриа во Иерусалиме в той день и во утрешний. 13 И призва его Давид, и яде пред ним и пияше, и упои его, и отиде в вечер спати на ложе свое с рабы господина своего, в дом же свой не иде. 14 И бысть утро, и написа Давид писание ко Иоаву, и посла рукою Урииною. 15 И написа в писании, глаголя: введи Урию противу брани крепкия и возвратитеся вспять от него, да язвен будет и умрет. 16 И бысть егда стрежаше Иоав у града, и постави Урию на месте, идеже ведяше, яко мужие сильни тамо. 17 И изыдоша мужие из града и бияхуся со Иоавом: и падоша от людий от рабов Давидовых, умре же и Уриа Хеттеанин. 18 И посла Иоав, и возвести Давиду вся словеса, яже о брани, глаголати к царю. 19 И заповеда (Иоав) послу, глаголя: егда скончаеши вся речи, яже от брани, к царю глаголати, 20 и будет аще разгневается царь и речет ти: почто приближистеся ко граду на брань? Не ведасте ли, яко стреляти будут с стены? 21 Кто уби Авимелеха сына Иеровааля сына Нирова? Не жена ли верже нань уломком жернова с стены, (и урази его,) и умре в Фамасе? Почто приступасте к стене? И речеши: и раб твой Уриа Хеттеанин (убиен бысть, и) умре. 22 И иде посол Иоавль к царю во Иерусалим, и прииде, и возвести Давиду вся, елика глагола ему Иоав, вся глаголы брани. И разгневася Давид на Иоава и рече к послу: почто приближистеся ко граду битися? Не ведасте ли, яко язвени будете со стены? Кто уби Авимелеха сына Иеровааля? Не жена ли верже нань уломок жернова со стены, и умре в Фамасе? Почто приближистеся к стене? 23 И рече посол к Давиду: яко укрепишася на ны мужие и изыдоша на ны на село, и гонихом я до врат града: 24 и стреляша стрелцы со стены на рабы твоя, и умроша от отрок царских, и раб твой Уриа Хеттеанин умре. 25 И рече Давид к послу: сице да речеши ко Иоаву: да не будет зло пред очима твоима слово сие, яко овогда убо сице, овогда же инако поядает мечь: укрепи брань твою на град, и раскопай и: и укрепи его. 26 И услыша жена Уриина, яко умре Уриа муж ея, и рыдаше по мужи своем. 27 И прейде плачь, и посла Давид, и введе ю в дом свой, и бысть ему жена, и роди ему сына. И зол явися глагол, егоже сотвори Давид, пред очима Господнима. === 12 === 1 И посла Господь Нафана пророка к Давиду. И вниде к нему (и рече ему: отвещай ми, царю, ныне суд сей:) и рече ему: два мужа беста во единем граде, един богат, а другий убог: 2 и у богатаго стада бяху и буйволи мнози зело, 3 у убогаго же ничтоже бе, но токмо агница едина мала, юже стяжа и снабде, и вскорми ю, и возрасте с ним и с сынами его вкупе: от хлеба его ядяше и от чаши его пияше, и на лоне его почиваше, и бе ему яко дщерь: 4 и прииде некто с пути к мужу богатому, и не восхоте взяти от стад своих и от буйволиц своих на сотворение обеда путнику пришедшу к нему: но взя агницу убогаго, и уготова ю на обед мужу пришедшу к нему. 5 И разгневася гневом зело Давид на мужа (того), и рече Давид к Нафану: жив Господь, яко сын смерти есть муж сотворивый сие: 6 и агницу возвратит седмерицею за сие, яко сотворил глагол сей, и за сие, яко не пощаде. 7 И рече Нафан к Давиду: ты еси муж сотворивый сие: сия глаголет Господь Бог Израилев: Аз есмь помазавый тя в царя над Израилем, и Аз есмь избавивый тя от руки Сауловы: 8 и дах ти дом господина твоего и жены господина твоего на лоно твое, и дах ти дом Израилев и Иудин: и аще мало ти есть, приложу тебе к сим: 9 и что яко презрел еси слово Господне, еже сотворити лукавое пред очима Его? Урию Хеттеанина убил еси мечем, и жену его поял еси себе в жену, и того убил еси мечем сынов Аммоних: 10 и ныне не отступит мечь от дому твоего до века: зане уничижил Мя еси и поял еси жену Урии Хеттеанина в жену себе: 11 сия глаголет Господь: се, Аз воздвигну на тя злая от дому твоего, и возму жены твоя пред очима твоима и дам ближнему твоему, и будет спати со женами твоими пред солнцем сим: 12 яко ты сотворил еси втайне, Аз же сотворю глаголгол сей пред всем Израилем и пред солнцем сим. 13 И рече Давид к Нафану: согреших ко Господу. И рече Нафан к Давиду: и Господь отя согрешение твое, не умреши: 14 обаче яко поощряя изострил еси врагов Господних глаголом сим, и сын твой родивыйся тебе смертию умрет. 15 И отиде Нафан в дом свой. И сокруши Господь детище, еже роди жена Уриина Давиду, и разболеся. 16 И взыска Давид Бога о детищи, и постися Давид постом, и вниде и водворися, и лежаше на земли: 17 и внидоша к нему старейшины дому его воздвигнути его от земли, и не восхоте, и не яде с ними хлеба. 18 И бысть в день седмый, и умре отроча. И убояшася раби Давидовы поведати ему, яко умре отроча, реша бо: се, егда отроча еще живо бяше, глаголахом к нему, и не послуша гласа нашего: и како речем к нему, яко умре отроча, и сотворит злая? 19 И разуме Давид, яко отроцы его шепчут, и позна Давид, яко умре отроча. И рече Давид отроком своим: умре ли отроча? И реша: умре. 20 И воста Давид от земли, и умыся и помазася, и измени ризы своя, и вниде в дом Божий, и поклонися ему, и вниде в дом свой, и проси ясти хлеба, и предложиша ему хлеб, и яде. 21 И реша отроцы его к нему: что глагол сей, егоже сотворил еси отрочате ради, яко еще сущу отрочати живу, постился еси и плакал и бдел еси: егда же умре отроча, востал, и ял еси хлеб, и пил еси? 22 И рече Давид: егда бе отроча еще живо, постихся и плаках, яко рех: кто весть, помилует ли мя Господь и живо будет отроча? 23 Ныне же умре, почто мне поститися? Еда возмогу возвратити е ктому? Аз имам ити к нему, тое же не возвратится ко мне. 24 И утеши Давид Вирсавию жену свою, и вниде к ней и спа с нею, и зача и роди сына, и нарече имя ему Соломон: и Господь возлюби его. 25 И посла рукою Нафана пророка, и нарече имя ему Иеддеди словом Господним. 26 Иоав же воева в Раввафе сынов Аммоних и взя град царства. 27 И посла Иоав вестники к Давиду и рече: воевах на Равваф и взях град вод: 28 и ныне собери останок людий и ополчися на град, и приими его, да не аз возму град, и наречется имя мое на нем. 29 И собра Давид вся люди, и пойде в Равваф, и ополчися нань, и взя его: 30 и взя венец Молхома царя их с главы его, талант злата вес его, и от камения драга, и бе на главе Давидове, и корысть изнесе из града многу зело: 31 и люди сущыя в нем изведе, и положи на пилы и на трезубы железны и секиры железны, и превождаше их сквозе пещь плинфяну. И тако сотвори всем градом сынов Аммоних. И возвратися Давид и весь Израиль во Иерусалим. === 13 === 1 И бысть по сих, и у Авессалома сына Давидова бе сестра добра взором зело, имя же ей Фамарь, и возлюби ю Амнон сын Давидов: 2 и скорбяше Амнон, яко и разболетися (ему) сестры своея ради Фамары, зане дева бяше сия, и не удобно бе пред очима Амнонима что сотворити ей. 3 И бе Амнону друг, имя же ему Ионадав, сын Самаа брата Давидова, и Ионадав муж мудр зело. 4 И рече ему (Ионадав): что ти, яко ты тако болиши, сыне царев, утро утро? И не возвещаеши ми? И рече ему Амнон: Фамару сестру Авессалома брата моего аз люблю. 5 И рече ему Ионадав: лязи на постели твоей и разболися, и внидет отец твой видети тя, и речеши к нему: да приидет ныне Фамарь сестра моя, и да ми даст ясти, и да сотворит пред очима моима снедь, да увижду и вкушу от рук ея. 6 И ляже Амнон и разболеся: и вниде царь видети его. И рече Амнон к царю: да приидет ныне Фамарь сестра моя ко мне и да испечет два пряжма пред очима моима, и имам ясти от руку ея. 7 И посла Давид к Фамаре в дом, глаголя: иди ныне в дом Амнона брата твоего и сотвори ему снедь. 8 И иде Фамарь в дом Амнона брата своего, и той лежаше. И взя тесто, и смеси, и устрои пред очима его, и испече пряжма: 9 и взя сковраду и изложи пред него, и не восхоте ясти. И рече Амнон: изжените вся мужы от мене. И изгнаша вся мужы от него. 10 И рече Амнон к Фамаре: внеси ми снедь во внутреннюю храмину, и ям от руку твоею. И взя Фамарь пряжма, яже испече, и внесе Амнону брату своему во внутреннюю храмину, 11 и представи ему да яст. И ят ю, и рече ей: гряди, лязи со мною, сестро моя. 12 И рече ему: ни, брате мой, не обругай мене, понеже не сотворится тако во Израили, не сотвори безумия сего: 13 и аз камо скрыю безчестие мое? И ты будеши яко един от безумных во Израили: и ныне глаголи к царю, да не отлучит мене от тебе. 14 И не восхоте Амнон послушати гласа ея, и преодоле ей, и смири ю, и преспа с нею. 15 И возненавиде ю Амнон ненавистию великою зело, яко велиим ненавидением возненавиде ю паче любве, еюже любляше ю, и рече ей Амнон: востани и отиди. 16 И рече ему Фамарь: (ни, брате,) яко злоба болши есть последняя паче первыя, юже сотворил еси со мною, еже отслати мене. И не восхоте Амнон слышати гласа ея. 17 И призва отрока своего, приставника дому своего, и рече ему: отсли ныне сию от мене вон, и заключи двери вслед ея. 18 И бе риза на ней испещрена, понеже тако облачахуся дщери царевы, сущыя девицы, во одежды своя. И изведе ю вон слуга его и затвори двери вслед ея. 19 И взя Фамарь пепел, и насыпа на главу свою, и одежду испещренную растерза на себе, и возложи руце свои на главу свою, и идущи идяше и вопияше. 20 И рече к ней Авессалом брат ея: еда Амнон брат твой бысть с тобою? И ныне, сестро моя, умолчи, яко брат твой есть: не полагай на сердцы твоем еже глаголати слово сие. И седе Фамарь вдовствующи в дому Авессалома брата своего. 21 И слыша царь Давид вся словеса сия, и разгневася зело, и не опечали духа Амнона сына своего, понеже любляше его, яко первенец бе ему. 22 И не глагола Авессалом со Амноном ни о добре, ни о зле, понеже возненавиде Авессалом Амнона того ради, понеже Фамару сестру его обругал. 23 И бысть по двух летех дний, и беша стригуще (овцы) Авессаломовы (раби) в Веласоре близ Ефрема: и призва Авессалом вся сыны царевы. 24 И прииде Авессалом ко царю и рече: се, ныне стригут рабу твоему, да идет убо царь и отроцы его с рабом твоим. 25 И рече царь ко Авессалому: ни, сыне мой, да не пойдем вси мы, и да не отяготим тя. И нуждаше его: и не восхоте (царь) ити, и благослови его. 26 И рече Авессалом к нему: аще же ни, поне да идет с нами Амнон брат мой. И рече ему царь: почто идет с тобою Амнон? 27 И принуди его Авессалом, и отпусти с ним Амнона и вся сыны царевы. И сотвори Авессалом пир, якоже творит пир царь. 28 И заповеда Авессалом отроком своим, глаголя: видите егда возблажает сердце Амноне от вина, и реку вам: поразите Амнона, и умертвите его: не убойтеся, яко не аз ли есмь повелеваяй вам? Мужайтеся и будите в сыны силы. 29 И сотвориша отроцы Авессаломли Амнону, якоже заповеда им Авессалом. И восташа вси сынове царевы, и вседе кийждо на мска своего, и бежаша. 30 И бысть, сущым им на пути, и слух дойде до Давида, глаголя: изби Авессалом вся сыны царевы, и не избысть от них ни един. 31 И воста царь, и растерза ризы своя, и ляже на земли, и вси отроцы его предстоящии ему растерзаша ризы своя. 32 И рече Ионадав, сын Самаа брата Давидова, и рече: да не речет господин мой царь, яко вся отроки сыны царевы уби, но Амнон есть един убиен, яко той из уст Авессалому не исхождаше, отнележе обруга сестру его Фамару: 33 и ныне да не полагает господин мой царь словесе на сердцы своем, глаголя: вси сынове царевы умроша: яко Амнон един умре. 34 И побеже Авессалом. И воздвиже отрок страж очеса своя и виде: и се, людие мнози идуще путем вслед его со страны гор в низхождение. И прииде страж и возвести царю и рече: мужы видех от пути Оронска со страны горы. 35 И рече Ионадав ко царю: се, сынове царевы приходят: по словеси раба твоего, тако бысть. 36 И бысть егда сконча глаголя, и се, сынове царевы приидоша и воздвигоша глас свой и плакаша: и сам царь и вси отроцы его плакаша плачем великим зело. 37 И Авессалом убеже, и прииде ко Фолму сыну Емиуда, царю Гедсурску, в землю Хамаахадску. И плакаше Давид царь о сыне своем вся дни. 38 И Авессалом убеже, и иде в Гедсур, и бе тамо три лета. 39 И остави царь Давид изыти вслед Авессалома, яко утешися о Амноне, яко умре. === 14 === 1 И разуме Иоав сын Саруин, яко сердце царево преклонися ко Авессалому. 2 И посла Иоав в Фекою, и взя оттуду жену мудру и рече к ней: сетуй ныне, и облецыся в ризы сетования, и не помажися елеем, и будеши яко жена сетующая о умершем дни многи: 3 и внидеши ко царю и речеши к нему по глаголу сему. И положи Иоав словеса своя во уста ея. 4 И вниде жена Фекоитяныня ко царю и паде на лицы своем на землю, и поклонися ему, и рече: спаси, царю, спаси мя. 5 И рече ей царь: что ти есть? Она же рече: издавна вдова жена аз есмь, и умре муж мой: 6 и рабе твоей два сына, и бистася оба на селе, и не бысть кто бы их разлучил, и нападе един на брата своего, и умертви его: 7 и се, воста все отечество на рабу твою и реша: дай убившаго брата своего, и умертвим его вместо души брата, егоже уби, и погубим и наследника вашего: и угасят искру мою оставшуюся, яко не оставити мужу моему останка и имене на лицы земли. 8 И рече царь к жене: иди здрава в дом свой, и аз заповедаю о тебе. 9 И рече жена Фекоитяныня ко царю: на мне беззаконие, господи мой царю, и на дому отца моего, царь же и престол его неповинен. 10 И рече царь: кто глаголяй к тебе, и приведеши его ко мне, и не приложит ктому коснутися ему? 11 И рече жена: да воспомянет ныне царь Господа Бога своего, внегда умножити ужика крове, еже растлити, и не имут погубити сына моего. И рече (царь): жив Господь, аще и влас падет сыну твоему с главы на землю. 12 И рече жена: да глаголет ныне раба твоя ко господину моему царю слово. Он же рече: глаголи. 13 И рече жена: почто помыслил еси тако о людех Божиих? Еда от уст царевых слово сие аки преступление, еже не возвратити царю отриновеннаго своего? 14 Яко смертию умрем, и яко вода низходящая на землю, яже не соберется, и приимет Бог душу, и помышляяй спасти от Него отриновеннаго: 15 и ныне яко приидох глаголати ко царю господину моему глагол сей, яко увидят мя людие, и речет раба твоя: да глаголет убо ко господину моему царю, негли сотворит царь слово рабы своея, 16 яко услышит царь: да измет рабу свою из рук мужей ищущих погубити мя и сына моего от участия Божия: 17 и речет раба твоя: да будет ныне слово господа моего царя на жертву: якоже бо Ангел Божий, тако господь мой царь, еже слышати благое и злое: и Господь Бог твой будет с тобою. 18 И отвеща царь и рече к жене: никакоже да утаиши от мене глагола, о немже аз вопрошу тя. И рече жена: да глаголет убо господь мой царь. 19 И рече царь: еда рука Иоавля о всем сем с тобою? И рече жена к царю: да живет душа твоя, господи мой царю, аще есть одесную или ошуюю от всех, яже глагола господин мой царь, яко раб твой Иоав той заповеда мне, и той вложи во уста рабе твоей вся словеса сия: 20 за еже приити лицу глагола сего, еже сотвори раб твой Иоав слово сие: господин же мой царь мудр, якоже мудрость Ангела Божия, еже разумети вся, яже на земли. 21 И рече царь ко Иоаву: се, ныне сотворих ти по словеси твоему сему: иди, возврати отрока Авессалома. 22 И паде на лицы своем Иоав на землю, и поклонися, и благослови царя. И рече Иоав: днесь позна раб твой, яко обретох благодать пред очима твоима, господи мой царю, яко сотвори господин мой царь слово раба своего. 23 И воста Иоав и иде в Гедсур, и приведе Авессалома во Иерусалим. 24 И рече царь: да возвратится в дом свой, лица же моего да не видит. И возвратися Авессалом в дом свой, лица же царева не виде. 25 И якоже Авессалом не бе муж во всем Израили хвален зело: от пяты ноги его и до верха его не бе в нем порока: 26 и внегда стрищи ему главу свою, и бысть от начала дний до дний в няже стрижашеся, яко тяжко бяше ему от них, и стригущься весяше власы главы своея двести сиклей по сиклю царскому. 27 И родишася Авессалому три сыны и дщерь едина, и имя ей Фамарь: сия бе жена добра зело взором, и бысть жена Ровоаму сыну Соломоню, и роди ему Авию. 28 И седяше Авессалом во Иерусалиме два лета дний, и лица царева не виде. 29 И посла Авессалом ко Иоаву, дабы послати его ко царю, и не восхоте приити к нему: и посла второе к нему, и не восхоте приити. 30 И рече Авессалом ко отроком своим: видите, часть на селе Иоавли близ мене, его тамо ячмень, идите и запалите его огнем. И запалиша раби Авессаломли часть (Иоавлю) огнем. И приидоша раби Иоавли к нему раздравше ризы своя, и реша: пожгоша раби Авессаломли часть твою огнем. 31 И воста Иоав и прииде ко Авессалому в дом, и рече к нему: почто сожгоша раби твои часть мою огнем? 32 И рече Авессалом ко Иоаву: се, посылах к тебе, глаголя: иди семо, и послю тя ко царю, глаголя: почто приидох из Гедсура? Лучше ми бе быти еще тамо: и ныне се, лица царева не видех: аще же есть во мне неправда, то умертви мя. 33 И вниде Иоав ко царю и возвести ему. И призва Авессалома, и прииде ко царю, и поклонися ему, и паде лицем своим на землю пред лицем царевым, и облобыза царь Авессалома. === 15 === 1 И бысть по сих, и сотвори себе Авессалом колесницы и кони и пятьдесят муж текущих пред ним: 2 и воставаше рано Авессалом, и стояше при самем пути врат: и бысть всяк муж, емуже бяше пря, прииде пред царя на суд, и возопи к нему Авессалом, и глаголаше ему: от коего града ты еси? И рече ему муж: от единаго колен Израилевых раб твой. 3 И рече к нему Авессалом: се, словеса твоя блага и удобна, но слушающаго несть ти от царя. 4 И рече Авессалом: кто мя поставит судию на земли, и ко мне приидет всяк муж имеяй прю и суд, и оправдаю его? 5 И бысть егда приближашеся муж поклонитися ему, и простираше руку свою, и приимаше его, и целоваше его. 6 И сотвори Авессалом по глаголу сему всему Израилю приходящым на суд к царю и приусвои Авессалом сердца сынов Израилевых. 7 И бысть от конца четыредесяти лет, и рече Авессалом ко отцу своему: пойду ныне и воздам обеты моя, яже обещах Господу в Хевроне: 8 зане обет обеща раб твой, егда жих в Гедсуре Сирийстем, глаголя: аще возвращая возвратит мя Господь во Иерусалим, и послужу Господу. 9 И рече ему царь: иди с миром. И востав иде в Хеврон. 10 И посла Авессалом соглядатаи во вся колена Израилева, глаголя: егда услышите вы глас трубы рожаны, и рцыте: воцарися царь Авессалом в Хевроне. 11 И идоша со Авессаломом двести мужей от Иерусалима позвани: и идяху в простоте своей, и не разумеша всякаго глагола. 12 И посла Авессалом, и призва Ахитофела Галамонийскаго, советника Давидова, от града его Голамы, егда жряше жертвы. И бысть смятение крепко: и людий множество идущих со Авессаломом. 13 И прииде вестник к Давиду, глаголя: бысть сердце мужей Израилевых со Авессаломом. 14 И рече Давид всем отроком своим сущым с ним во Иерусалиме: востаните, и бежим, яко несть нам спасения от лица Авессаломля: ускорите ити, да не ускорит и возмет нас, и наведет на нас злобу, и избиет град острием меча. 15 И реша отроцы царевы к царю: вся елика заповесть господь наш царь, се, мы отроцы твои. 16 И изыде царь и весь дом его ногами своими, и остави царь десять жен подложниц своих хранити дом. 17 И изыде царь и вси отроцы его пеши и сташа в Дому Сущем Далече: 18 и вси отроцы его от обою страну его идяху, и вси Хелефее и вси Фелефее и вси Гефее, шесть сот мужей шедше пеши от Гефа предидяху пред лицем царевым. 19 И рече царь ко Еффею Геффеину: почто и ты идеши с нами? Возвратися и живи с царем, яко чуждь еси ты, и яко преселился еси ты от места твоего: 20 аще вчера пришел еси, и днесь ли подвигну тя ити с нами? И аз иду, аможе пойду: иди и возвратися, и возврати братию твою с тобою, и Господь да сотворит с тобою милость и истину. 21 И отвеща Еффей к царю и рече: жив Господь, и жив господин мой царь, яко на месте, идеже будет господин мой царь, или в смерти, или в животе, тамо будет раб твой. 22 И рече царь ко Еффею: гряди, и прейди со мною. И прейде Еффей Геффеин и царь и вси отроцы его и весь народ иже с ним. 23 И вся земля плакашеся гласом великим. И вси людие прехождаху по потоку Кедрску, и царь прейде чрез поток Кедрский, и вси людие и царь идяху к лицу пути пустыннаго. 24 И се, и Садок иерей и вси левити с ним, носяще кивот завета Господня от Вефары: и поставиша кивот Божий: и Авиафар взыде, дондеже престаша вси людие исходити из града. 25 И рече царь к Садоку: возврати кивот Божий во град, и да станет на месте своем: аще обрящу благодать пред очима Господнима, и возвратит мя, и покажет ми его и лепоту его: 26 и аще тако речет: не благоволих в тебе: се, аз есмь, да сотворит ми по благому пред очима Своима. 27 И рече царь Садоку иерею: видите, ты возвращаешися во град с миром и Ахимаас сын твой и Ионафан сын Авиафаров, два сыны ваши с вами: 28 видите, аз вселяюся во аравоф пустынный, дондеже приидет ми слово от вас, еже возвестити ми. 29 И возврати Садок и Авиафар кивот Божий во Иерусалим, и седе тамо. 30 И Давид восхождаше восходом на гору Елеонскую восходя и плачася, и покрыв главу свою, и сам идяше босыма ногама: и вси людие иже с ним покрыша кийждо главу свою, и восхождаху восходяще и плачущеся. 31 И возвестиша Давиду глаголюще: и Ахитофел в мятежницех со Авессаломом. И рече Давид: разруши совет Ахитофелев, Господи, Боже мой. 32 И бе Давид грядый даже до роса, идеже поклонися Богу. И се, на сретение ему (изыде) Хусий первый друг Давидов, растерзав ризы своя, и персть на главе его. 33 И рече ему Давид: аще пойдеши со мною, и будеши ми в тягость: 34 аще же возвратишися во град и речеши Авессалому: минуша братия твоя, и царь за мною мину отец твой, и ныне раб твой есмь, царю, пощади мя жива быти: раб бех отца твоего тогда и доселе, ныне же аз твой раб: и разруши ми совет Ахитофелев: 35 и се, с тобою тамо Садок и Авиафар иерее: и будет всяк глагол, егоже услышиши из уст царских, и скажеши Садоку и Авиафару иереем: 36 се, тамо с ними два сына их, Ахимаас сын Садоков и Ионафан сын Авиафаров: и послите рукою их ко мне всяк глагол, егоже аще услышите. 37 И вниде Хусий друг Давидов во град, и Авессалом тогда вхождаше во Иерусалим. === 16 === 1 И Давид прейде мало что от роса, и се, Сива отрок Мемфивосфеов в сретение ему: и супруг ослят оседланых, и на них двести хлебов, и сто гроздий, и сто фиников, и мех вина. 2 И рече царь к Сиве: что сия тебе? И рече Сива: ослята на яждение дому цареву, а хлебы и финики на снедение отроком, и вино пити ослабевшым в пустыни. 3 И рече царь: и где сын господина твоего? И рече Сива ко царю: се, седит во Иерусалиме, яко рече: днесь возвратят ми весь дом Израилев царство отца моего. 4 И рече царь к Сиве: се, тебе вся елика суть Мемфивосфеова. И рече Сива поклонився: да обрящу благодать пред очима твоима, господи мой царю. 5 И прииде Давид царь до Вафирима, и се, оттуду муж исхождаше от рода дому Сауля, имя же ему Семей сын Гирань: изыде же исходя и проклиная 6 и камением метая на Давида и на вся отроки царя Давида: и вси людие и вси сильнии одесную и ошуюю царя бяху. 7 И тако рече Семей проклиная его: изыди, изыди, мужу кровей и мужу беззаконный: 8 возврати на тя Господь вся крови дому Сауля, понеже воцарился еси вместо его: и даде Господь царство в руце Авессалома сына твоего: и се, ты в злобе твоей, яко муж кровей ты. 9 И рече Авесса сын Саруин ко царю: почто проклинает пес умерший сей господина моего царя? Ныне пойду, и отиму главу его. 10 И рече царь ко Авессе: что мне и вам, сынове Саруины? Оставите его, и тако да проклинает, яко Господь рече ему проклинати Давида: и кто речет: почто сотворил еси тако? 11 И рече Давид ко Авессе и ко всем отроком своим: се, сын мой изшедый из чрева моего ищет души моея, а кольми паче сын Иеминиев: оставите его проклинати мя, яко рече ему Господь: 12 негли призрит Господь на смирение мое, и возвратит ми благая вместо клятвы Его во днешний день. 13 И идяше Давид и вси мужие его путем: а Семей идяше со страны горы близ его идый и проклиная, и камением меща со страны его, и перстию сыпая. 14 И прииде царь и вси людие иже с ним утруждени, и препочиша ту. 15 Авессалом же и вси мужие Израилевы внидоша во Иерусалим, и Ахитофел с ним. 16 И бысть егда прииде Хусий первый друг Давидов ко Авессалому: и рече Хусий ко Авессалому: да живет царь. 17 И рече Авессалом к Хусию: сия ли милость твоя со другом твоим? Почто не отшел еси со другом твоим? 18 И рече Хусий ко Авессалому: ни, но вслед (иду), егоже избра Господь и людие сии и вси мужие Израилевы, того есмь, и с тем буду: 19 и второе, кому аз поработаю? Не пред сыном ли его? Якоже работах пред отцем твоим, тако буду и пред тобою. 20 И рече Авессалом ко Ахитофелу: дадите себе совет, что сотворим? 21 И рече Ахитофел ко Авессалому: вниди к подложницам отца твоего, яже остави стрещи дом свой, и услышат вси Израилтяне, яко посрамил еси отца твоего, и возмогут руки всех сущих с тобою. 22 И поставиша Авессалому шатер на палате, и вниде Авессалом к подложницам отца своего пред очима всех Израилтян. 23 И совет Ахитофелев, егоже совещаваше во дни первыя, имже образом вопросил бы кто Бога о словеси, тако всяк совет Ахитофелев, и иже Давиду, и иже Авессалому. === 17 === 1 И рече Ахитофел ко Авессалому: изберу ныне себе дванадесять тысящ мужей и востану, и пожену вслед Давида нощию, 2 и найду на него, и той утружден и ослаблен руками, и устрашу его, и побежат вси людие иже с ним, и убию царя единаго: 3 и возвращу вся люди к тебе, имже образом обращается невеста к мужеви своему: ты бо токмо души единаго мужа ищеши, всем же людем будет мир. 4 И угодно слово бысть пред очима Авессаломлима и пред очима всех старейшин Израилевых. 5 И рече Авессалом: призовите же и Хусиа Арахиина, и услышим что из уст его. 6 И вниде Хусий ко Авессалому, и рече Авессалом к нему, глаголя: по глаголу сему глагола Ахитофел: сотворим ли по словеси его? Аще же ни, ты глаголи. 7 И рече Хусий ко Авессалому: не благ совет сей, егоже совеща Ахитофел единою сие. 8 И рече Хусий: ты веси отца твоего и мужей его, яко сильни суть зело, и гневливи душами своими, яко медведица чад лишеная на селе, и аки вепрь свирепый на поли: и отец твой муж борец, и не даст почити людем: 9 се бо, той ныне скрыся на некоторем холме или на некоторем месте: и будет внегда напасти на них в начале, и услышит слушаяй, и речет: бысть сокрушение в людех иже за Авессаломом: 10 и той сын силы, емуже сердце якоже сердце льву таящо истает: понеже весть весь Израиль, яко силен отец твой, и сынове силы вси иже с ним: 11 тако советуя аз усоветовах, и собираяся соберется к тебе весь Израиль от Дана и до Вирсавии, аки песок иже при мори во множестве, и лице твое идущее посреде их: 12 и приидем к нему на едино место, идеже обрящем его тамо, и ополчимся на него, якоже спадает роса на землю, и не оставим в нем и в мужех его иже с ним ни единаго: 13 и аще во град соберутся, и возмет весь Израиль ко граду тому ужы, и совлечем его в поток, дондеже не останется тамо ниже камень. 14 И рече Авессалом и вси мужие Израилтестии: благ совет Хусиа Арахиина паче совета Ахитофелева. И Господь заповеда разорити совет Ахитофелев благий, яко да наведет Господь на Авессалома злая вся. 15 И рече Хусий арахиин ко Садоку и Авиафару иереем: тако и тако советова Ахитофел Авессалому и старейшинам Израилевым: и аз тако и тако советовах: 16 и ныне послите скоро и возвестите Давиду, глаголюще: не пребуди нощь сию во Аравофе пустыни, но пойти потщися, да не како пожерт будет царь и вси людие иже с ним. 17 И Ионафан и Ахимаас стояста на студенце Рогили, и иде рабыня и поведа има: и тии идоста и возвестиста Давиду царю, яко не могоста явитися еже внити во град. 18 И виде их отрочищь и поведа Авессалому. И идоста оба скоро и приидоста в дом мужа в Ваурим: и тому ров на дворе, и снидоста тамо. 19 И взя жена, и положи покров на устии рова, и суши на нем арафоф, и не познася глагол. 20 И приидоша отроцы Авессаломли к жене в дом и реша: где Ахимаас и Ионафан? И рече им жена: преидоста вмале воду. И искаша, и не обретоша, и возвратишася во Иерусалим. 21 Бысть же по отшествии их, и излезоста из рова, и идоста, и возвестиста Давиду царю и глаголаста ему: востаните, и прейдите скоро воду, яко сице совеща на вы Ахитофел. 22 И воста Давид и вси людие иже с ним и преидоша Иордан до света заутра, и ни един не оста, иже бы не прешел Иордана. 23 И Ахитофел виде, яко не сбыстся совет его, и оседла осля свое, и воста, и отиде в дом свой, во град свой: и заповеда дому своему, и удавися, и умре, и погребен бысть во гробе отца своего. 24 И Давид прейде в Манаим, Авессалом же прейде Иордан сам и вси мужие Израилтестии с ним. 25 И Амессая постави Авессалом вместо Иоава над силою: Амессай же сын мужа, емуже имя Иефер Иезраилитин, сей вниде ко Авигеи дщери Иессеине, сестре Саруии матере Иоавли. 26 И ополчися Авессалом и весь Израиль в земли Галаадстей. 27 И бысть егда вниде Давид в Манаим, и Уесвий сын Наасов от Раввафа сынов Аммоних, и Махир сын Амииль иже из Лодавара, и Верзеллий Галаадитин из Рогеллима, 28 принесоша десять постель устроеных и конобов десять и сосуды скуделны и пшеницу и ячмень и муку и пшено и боб и сочевицу 29 и мед и масло и овцы и сыры кравия, и принесоша Давиду и людем иже с ним ясти: быша бо людие гладни и утруждени и жаждни в пустыни. === 18 === 1 И согляда Давид всех людий сущих с ним, и постави над ними тысященачалники и сотники. 2 И посла Давид третию часть людий под рукою Иоавлею и третию часть под рукою Авессы сына Саруина брата Иоавля, и третию часть под рукою Еффеа Геффеина, и рече Давид к людем: шед изыду и аз с вами. 3 И реша: не изыди, яко аще бегством побегнем, не положат на нас сердца: и аще умрем пол нас, не положат на нас сердца, понеже ты аки мы десять тысящ: и ныне лучше, яко останеши во граде на помощь нам. 4 И рече им царь: еже угодно пред очима вашима, сотворю. И ста царь при вратех: и вси людие исхождаху стами и тысящами. 5 И заповеда царь Иоаву и Авессе и Еффееви, глаголя: пощадите ми отрока Авессалома. И вси людие слышаша заповедающа царя всем князем о Авессаломе. 6 И изыдоша вси людие в дубраву сопротив Израилю: и бысть брань в дубраве Ефремли. 7 И падоша тамо людие Израилевы пред отроки Давидовыми, и бысть сокрушение велико в той день, яко двадесять тысящ мужей. 8 И бысть тамо брань разсыпана по лицу всея земли: и умножи дубрава поядати людий, паче неже их пояде мечь в той день. 9 И набежа Авессалом на отроки Давидовы: Авессалом же бе седяй на мске своем, и вбежа (с ним) меск в чащу дуба великаго, и обвишася власы главы его на дубе, и повисе между небом и землею, меск же под ним пройде. 10 И виде муж един и возвести Иоаву, и рече: се, видех висяща Авессалома на дубе. 11 И рече Иоав мужу возвестившему ему: аще видел еси, почто не убил еси его тамо на землю? И аз дал бых тебе пятьдесят сикль сребра и пояс един. 12 И рече муж Иоаву: аще ты вложиши в руце мои и тысящу сикль сребра, то не возложу руки моея на сына царева, яко при ушесах наших заповеда царь тебе и Авессе и Еффееви, глаголя: соблюдите ми отроча Авессалома, 13 не сотворити души его неправды: и всяко слово не утаится пред царем, ты же стоиши сопротивно. 14 И рече Иоав: сие аз начну, не тако пребуду пред тобою. И взя Иоав три стрелы в руце свои, и вонзе я в сердце Авессалому. И еще ему живу сущу на дубе, 15 и обступиша десять отрок носящии оружие Иоавле, и поразиша Авессалома, и умертвиша его. 16 И воструби Иоав трубою рожаною, и возвратишася людие не гнати вслед Израиля, яко щадяше Иоав людий. 17 И взя Иоав Авессалома, и вверже его в пропасть велику в дубраве, и складе над ним купу камения велику зело. И вси Израилтяне бежаша кийждо в селения своя. 18 Авессалом же еще жив сый, взя и постави себе столп во юдоли царстей, рече бо, яко несть ми сына на память имене моего: и нарече столп именем своим и нарече его рука Авессаломля, даже до днешняго дне. 19 И Ахимаас сын Садоков рече ко Иоаву: потеку ныне и возвещу царю, яко суди ему Господь от руки врагов его. 20 И рече ему Иоав: неси муж ты возвещаяй благо днесь, но возвестиши в день другий: в днешний же день не добро возвещение, понеже сын царев умре. 21 И рече Иоав Хусию: шед повеждь царю елика видел еси. И поклонися Хусий Иоаву и отиде. 22 И приложи еще Ахимаас сын Садоков и рече ко Иоаву: что будет, аще и аз теку вслед Хусиа? И рече Иоав: почто ты хощеши тещи, сыне мой? Гряди, несть тебе возвещение в пользу идущему. 23 И рече Ахимаас: что бо аще потеку? И рече ему Иоав: тецы. И бежаше Ахимаас путем равным и предвари Хусиа. 24 Давид же седяще посреде двою врат. И изыде страж на кров врат ко стене, и воздвиже очи свои, и виде, и се, муж текий един пред ним. 25 И возопи страж и сказа цареви. И рече царь: аще един есть, благо возвещение во устех его. И идяше идый и приближаяся. 26 И виде страж мужа другаго текуща, и возопи к дверем и рече: се, муж и другий текущь един. И рече царь: и той есть благо возвещаяй. 27 И рече страж: аз вижду течение перваго, яко течение Ахимааса сына Садокова. И рече царь: муж благ сей, и возвестие благое приидет. 28 И возопи Ахимаас и рече ко царю: мир. И поклонися царю лицем своим на землю и рече: благословен Господь Бог твой, иже затвори мужей воздвигших руки своя на господина моего царя. 29 И рече царь: мир ли отрочищу Авессалому? И рече Ахимаас: видех множество велико веселящееся, егда отпущаше раб царев Иоав раба твоего, и не разумех что тамо. 30 И рече царь: возвратися, и стани зде. И шед ста созади. 31 И се, Хусий вслед его прииде и рече царю: возвещается благо господину моему царю, яко суди тебе Господь днесь от руки всех востающих на тя. 32 И рече царь к Хусию: мир ли отрочищу Авессалому? И рече Хусий: да будут, якоже отрочищь, врази господина моего царя, и вси елицы восташа нань злобою. 33 И смятеся царь, и взыде на горницу яже на вратех, и плакася: и тако глаголаше, егда плакаше: сыне мой, Авессаломе, сыне мой, сыне мой, Авессаломе: кто даст смерть мне вместо тебе? Аз вместо тебе, Авессаломе, сыне мой, сыне мой, сыне мой Авессаломе. === 19 === 1 И поведаша Иоаву, глаголюще: се, царь плачет и рыдает о Авессаломе. 2 И бысть спасение в той день в рыдание всем людем, услышаша бо людие в той день, глаголюще: яко печален есть царь о сыне своем. 3 И украдахуся людие в той день еже входити во град, якоже украдаются людие посрамленнии, внегда бегати им на брани. 4 И царь покры лице свое: и возопи царь гласом великим, глаголя: сыне мой, Авессаломе, Авессаломе, сыне мой. 5 И вниде Иоав к царю в дом и рече: посрамил еси днесь лица раб твоих всех иземших тя днесь и душу сынов твоих и дщерей твоих и душу жен твоих и подложниц твоих, 6 еже любити ненавидящыя тебе и ненавидети любящыя тя: и явил еси днесь, яко не суть тебе князи, ниже отроцы: но разумех днесь, яко аще бы Авессалом жив был, мы вси днесь мертвы быхом были, яко тогда право было бы пред очима твоима: 7 и ныне востав изыди и глаголи в сердца рабов твоих, яко о Господе кляхся, яко аще не изыдеши днесь, не останет ни един муж с тобою в нощь сию: и разумей в себе, яко зло ти есть сие паче всех зол, яже приидоша на тя от юности твоея до ныне. 8 И воста царь и седе при дверех. И возвестиша всем людем глаголюще: се, царь седит в дверех. И внидоша вси людие пред лице царево пред двери: мужие же Израилевы бежаша во селения своя. 9 И пряхуся вси людие во всех коленах Израилевых, глаголюще: царь Давид избави ны от всех враг наших, и се, изя нас от руки иноплеменничи, и ныне бежа от земли и от царства своего и от Авессалома: 10 Авессалом же, егоже помазахом над нами, умре на брани: и ныне что вы молчите, еже возвратити царя? И глагол всего Израиля прииде ко царю. 11 И царь Давид посла ко Садоку и ко Авиафару иереом, глаголя: рцыте старейшинам Иудиным, глаголюще: почто бысте последнии, еже возвратити царя в дом его? Слово же всего Израиля прииде к царю в дом его: 12 братия моя вы, кости моя и плоть моя вы есте, то почто бысте последнии, еже возвратити царя в дом его? 13 И Амессаю рцыте: неси ли кость моя и плоть моя ты? И ныне сия ми да сотворит Бог и сия да приложит, аще не будеши князь силы предо мною во вся дни вместо Иоава. 14 И преклони сердца всех мужей Иудиных яко мужа единаго. И послаша к царю, глаголюще: возвратися ты и вси раби твои. 15 И возвратися царь и прииде до Иордана, и мужие Иудины приидоша в Галгалы еже изыти на сретение царю, превести царя чрез Иордан. 16 И ускори Семей сын Гирань сына Иеминиева, иже от Ваурима, и сниде с мужми Иудиными во сретение царю Давиду, 17 и тысяща мужей с ним от Вениамина, и Сива отрок дому Сауля, и пятьнадесять сынов его с ним, и двадесять рабов его с ним: и управиша на Иордан путь пред царем, 18 и послужиша служением о преведении цареве. И прейде преход еже превести дом царев и сотворити правое пред очима его. И Семей сын Гирань паде на лицы своем пред царем, егда прехождаше Иордан, 19 и рече ко царю: да не вменит господин мой беззакония, и не помяни елика неправдова раб твой в день он, в оньже господин мой царь исхождаше из Иерусалима, еже содержати царю в сердцы своем: 20 понеже разуме раб твой, яко аз согреших, и се, аз приидох днесь первее всего Израиля и дому Иосифля, еже снити ми на сретение господину моему царю. 21 И отвеща Авесса сын Саруин и рече: сего ли ради не умертвится Семей, яко прокля христа Господня? 22 И рече Давид: что мне и вам, сынове Саруины, яко бысте мне днесь в навет? Днесь не умертвится муж от Израиля, понеже не вем ли, яко днесь царствую аз над Израилем? 23 И рече царь и Семею: не умреши. И клятся ему царь. 24 И се, Мемфивосфей сын Ионафана сына Сауля сниде на сретение царю, и не омы ног своих, и не обреза ногтей, ниже управи брады своея, и риз своих не измы от дне того, в оньже изыде царь, до дне в оньже той возвратися с миром. 25 И бысть егда вниде во Иерусалим на сретение царю, и рече ему царь: что яко не пошел еси со мною, Мемфивосфее? 26 И рече к нему Мемфивосфей: господи мой царю, пренебреже мене раб мой, яко рече раб твой ему: оседлай ми осля, и всяду на не, и пойду с царем, яко хром раб твой: 27 и оболга раба твоего ко господину моему царю: и господин мой царь яко Ангел Божий, и сотвори благое пред очима твоима: 28 яко не бе весь дом отца моего, разве мужие (повиннии) смерти господину моему царю, и посадил еси раба твоего с ядущими на трапезе твоей: и кое есть мне еще оправдание, и возопити мне еще к царю? 29 И рече ему царь: почто глаголеши еще словеса твоя? Рех тебе и Сиве: разделите себе села. 30 И рече Мемфивосфей к царю: и вся да возмет, повнегда приити господину моему царю в мире в дом свой. 31 И Верзеллий Галаадитин сниде из Рогеллима, и прейде с царем Иордан, еже превести его чрез Иордан. 32 И Верзеллий муж стар зело, сын осмидесяти лет, и той препита царя, егда живяше в Манаиме, яко муж бе велий зело. 33 И рече царь к Верзеллию: ты прейдеши со мною, и препитаю старость твою со мною во Иерусалиме. 34 И рече Верзеллий к царю: колицы дни лет живота моего, яко да взыду с царем во Иерусалим? 35 Сын осмидесяти лет аз днесь есмь: еда уразумею посреде блага и посреде лукава? Или уразумеет еще раб твой, еже ям, или еже пию? Или услышу глас еще поющих и воспевающих? И вскую будет еще раб твой в тяжесть господину моему царю? 36 Мало прейдет раб твой Иордан с царем: и почто воздает ми царь воздаяние сие? 37 Да возвратится ныне раб твой, и умру во граде моем, у гроба отца моего и матере моея: и се, раб твой сын мой Хамаам прейдет с господем моим царем, и сотвори ему благое пред очима твоима. 38 И рече царь: со мною да прейдет Хамаам, и аз сотворю ему благое пред очима моима, и вся елика изберет себе у мене, сотворю тебе. 39 И преидоша вси людие Иордан, и царь прейде, и целова царь Верзеллиа и благослови его, и отпусти его в дом его. 40 И прейде царь в Галгалы, и Хамаам прейде с ним, и вси людие Иудины провождаху царя и пол людий Израилевых. 41 И се, вси мужие Израилевы приидоша к царю и реша к царю: что яко украдоша тебе братия нашя мужие Иудины, и преведоша царя и дом его чрез Иордан, и вси мужие Давидовы с ним? 42 И отвещаша вси мужие Иудины к мужем Израилевым и реша: зане ближний нам царь: и почто тако разгневастеся от словеси сем? Еда яди ядохом от царя? Или дары даде нам, Или дани отя от нас? 43 И отвещаша мужие Израилстии к мужем Иудиным и реша: десять рук мы у царя, и в Давиде есмы паче тебе, и первенец аз, нежели ты: и почто сице укоряеши мя? И не вменися слово мое прежде мене Иуде возвратити царя мне? И отягча слово мужей Иудиных паче словес мужей Израилевых. === 20 === 1 И тамо бяше сын беззаконный, имя же ему Савей, сын Вохоров, муж Иеминиов, и воструби трубою рожаною и рече: несть нам части в Давиде, ниже наследия нам в сыне Иессееве: (возвратитеся,) мужие Израилтестии, в селения ваша. 2 И отступиша вси мужие Израилевы от Давида вслед Савеа сына Вохорова: мужие же Иудины прилепишася к царю своему от Иордана даже и до Иерусалима. 3 И вниде Давид в дом свой во Иерусалим, и взя царь десять жен подложниц своих, яже остави стрещи дом, и даде их в дом стражбы: и препита их, и (оттоле) не вниде к ним: и беша храними до дне смерти своея, вдовски живущя. 4 И рече царь ко Амессаю: созови ми мужы Иудины в три дни, ты же зде стани. 5 И пойде Амессай созвати мужей Иудиных, и умедли от времене, в неже повеле ему Давид. 6 И рече Давид ко Авессе: ныне зло сотворит нам Савей сын Вохорь паче Авессалома: и ныне ты поими с собою отроки господина своего, и пожени вслед его, да не како обрящет себе грады тверды и застенится от очес наших. 7 И изыдоша вслед его Авесса и мужие Иоавли, и Хереффи и Фелеффи и вси сильнии, и изыдоша из Иерусалима гнати вслед Савеа сына Вохорова. 8 И тии (бяху) у камене великаго, иже в Гаваоне, и Амессай вниде пред ними: Иоав же препоясан ризами одеяния своего, и верху того препоясан мечем припряженым при чреслех его в ножнах его, и егда отиде, и мечь изсунуся и паде. 9 И рече Иоав Амессаю: здрав ли еси, брате? И взя Иоав рукою десною за браду Амессаеву лобзати его: 10 Амессай же не побрежеся меча, иже в руце Иоавли: и удари его Иоав мечем в чресла его, и излияся чрево его на землю, и не повтори ему, и умре (Амессай). Иоав же и Авесса брат его гнаста вслед Савеа сына Вохоря. 11 И муж ста над ним от отрок Иоавлих и рече: кто хощет (быти) Иоавль, и кто Давидов, вслед Иоава (да идет). 12 Амессай же мертв валяшеся в крови посреде пути. И виде муж, яко остановляхуся над ним вси людие, и соврати Амессая с пути на село, и возложи на него ризу, понеже видяше всякаго приходяща над ним стоявша: 13 и бысть егда принесе от пути, преидоша вси мужие Израилевы вслед Иоава, еже гнати вслед Савеа сына Вохоря. 14 И сей пройде вся колена Израилева во Авель и во Вефмаху: и вси в Харре, и вси грады собрашася, и идоша вслед его, 15 и приидоша и ополчишася на него окрест во Авели и во Вефмахе: и насыпаша землю ко граду, и ста на предстении: и вси людие иже со Иоавом помышляху низложити стену (градскую). 16 И возопи жена мудрая со стены и рече: слышите, слышите, рцыте ныне Иоаву, да приближится до зде, и возглаголю к нему. 17 И приближися к ней (Иоав), и рече жена: ты ли еси Иоав? Он же рече: аз. И рече ему: послушай словес рабы твоея. И рече Иоав: послушаю, аз есмь. 18 И рече глаголющи: слово глаголаша в первых, глаголюще: вопрошаемь вопрошен бысть во Авели и в Дане, аще оскудеша, яже положиша вернии Израилевы: вопрошающе да вопросят во Авели, и тако рече, аще оскудеша: 19 аз есмь мирная утверждений Израилевых, ты же ищеши умертвити град и матерь градов Израилевых: и почто потопляеши достояние Господне? 20 И отвеща Иоав и рече: милостив мне, милостив мне, аще потоплю и аще разрушу: 21 не тако слово, яко муж с горы Ефремли, Савей сын Вохорь имя ему, и воздвиже руку свою на царя Давида: дадите ми того единаго, и отиду от града. И рече жена ко Иоаву: се, глава его свержется к тебе со стены. 22 И вниде жена ко всем людем и глагола ко всему граду мудростию своею, отяти главу Савеа сына Вохоря. И отсекоша главу Савеа сына Вохоря, и свергоша ю ко Иоаву. И Иоав воструби в трубу, и разыдошася мужие от града вси в селения своя. Иоав же возвратися во Иерусалим ко царю. 23 И (бе) Иоав над всею силою Израилевою, и Ванеа сын Иодаев над Хереффи и над Фелеффи, 24 Адонирам же над данми, и Иосафат сын Ахилуфов воспоминаяй, 25 и Суса книгочий, Садок же и Авиафар иерее, 26 Ирас же Иаринь бысть жрец Давидов. === 21 === 1 И бысть глад на земли во дни Давидовы три лета, лето по лету. И вопроси Давид лица Господня и рече Господь: над Саулом и над домом его обида в смерти кровей его, понеже умертви Гаваониты. 2 И призва царь Давид Гаваониты и рече к ним: и Гаваонитяне не суть сынове Израилевы, но токмо от остатков Аморрейских, и сынове Израилевы кляшася им: Саул же взыска поразити я, внегда поревновати ему по сынех Израилевых и Иудиных. 3 И рече Давид ко Гаваонитяном: что сотворю вам? И чим умолю, да благословите достояние Господне? 4 И реша ему Гаваонитяне: несть нам сребра или злата со Саулом и с домом его, и несть нам мужа умертвити от всего Израиля. И рече: что вы глаголете, и сотворю вам? 5 И реша ко царю: мужа, иже соверши над нами и погна ны, иже умысли потребити ны, потребим его, да не будет во всех пределех Израилевых: 6 дадите нам седмь мужей от сынов его, и повесим их на солнце Господеви в Гаваоне Саули избранных Господних. И рече царь: аз дам. 7 И пощаде царь Мемфивосфеа, сына Ионафаня сына Сауля, клятвы ради Господни, яже посреде их и посреде Давида и посреде Ионафана сына Сауля. 8 И взя царь два сына Ресфы дщере Аиа, подложницы Саули, ихже роди Саулу, Ермониа и Мемфивосфеа, и пять сынов Мелхолы дщере Саули ихже роди Есдриилу сыну Верзеллиа Моулафиева, 9 и даде их в руки Гаваонитом. И повесиша я на солнце на горе пред Господем, и падоша тамо сии седмь вкупе: тии же умроша во днех жатвы первых, в начале жатвы ячменя. 10 И взя Ресфа дщи Аиина вретище, и потче е себе при камени, в начале жатвы ячменя дондеже снидоша на них воды Божия с небесе, и не даде птицам небесным днем почити на них, ниже зверем земным нощию. 11 И поведаша Давиду вся елика сотвори Ресфа дщерь Аиа, подложница Сауля. И истлеша, и взя я Дан сын Иой, иже от исчадий исполиновых. 12 И иде Давид, и взя кости Саули и кости Ионафана сына его от мужей сынов Иависа Галаадскаго, иже украдоша их от стогны Вефсани, зане повесиша их тамо иноплеменницы в день, в оньже поразиша иноплеменницы Саула в Гелвуи. 13 И вознесе Давид кости Саули оттуду и кости Ионафана сына его, и собра кости повешеных на солнце: 14 и погребоша кости Саули и кости Ионафана сына его, и кости повешеных на солнце, в земли Вениаминове, при Краи во гробе Киса отца его, и сотвориша вся елика заповеда царь. И послуша Бог земли по сих. 15 И бысть паки брань иноплеменником со Израилтяны. И сниде Давид и отроцы его с ним, и бишася со иноплеменники: и утрудися Давид. 16 И Иесвий, иже бе от внук Рафаних, (у негоже) бе вес копия его триста сикль веса медяна, и той бе препоясан оружием, и хотяше поразити Давида. 17 И поможе ему Авесса сын Саруин, и избави Давида Авесса, и порази иноплеменника, и умертви его. Тогда кляшася мужие Давидовы, глаголюще: не изыдеши ктому с нами на брань, да не угасиши светилника Израилева. 18 И бысть по сих еще брань в Гефе со иноплеменники: тогда порази Совохей иже от Асофы собранныя внуки Гигантовы. 19 И бысть паки брань в Роме со иноплеменники: и порази Елеанан сын Ариоргима Вифлеемлянин Голиафа иже от Геффеа, и древо копия его бысть аки навой ткущих. 20 И бысть паки брань в Гефе: и бе муж от мадона, и персты рук его и персты ног его по шести, числом двадесять четыри: и той родися от Рафы, 21 и уничижи Израиля: и уби его Ионафан сын Сафая брата Давидова. 22 Четыри сии родишася внуцы Гигантовы рафе в Гефе, и падоша от руку Давидову и от руку рабов его. === 22 === 1 И глагола Давид ко Господу словеса песни сея в день, в оньже избави и Господь из руки всех враг его и из руки Сауловы, 2 и рече песнь: Господи, каменю мой и утверждение мое, и избавляяй мя мне: 3 Бог мой, хранитель мой будет мне, уповая буду на Него: защитник мой и рог спасения моего, Заступник мой и прибежище мое спасения моего, от неправеднаго спасеши мя. 4 Хвальнаго призову Господа, и от враг моих спасуся: 5 яко одержаша мя болезни смертныя и потоцы беззакония смятоша мя, 6 болезни смертныя обыдоша мя, предвариша мя жестокости смертныя. 7 Внегда скорбети ми призову Господа, и к Богу моему воззову, и услышит от храма святаго Своего глас мой, и вопль мой внидет во ушы Его. 8 И смятеся и трепетна бысть земля, и основания небесе смятошася и подвигошася, яко прогневася на ня Господь: 9 взыде дым гневом Его, и огнь из уст Его пояст: углие возгорешася от Него, 10 и преклони небеса и сниде, и мрак под ногама Его, 11 и вседе на Херувимы и лете, и явися на крилу ветреню, 12 и положи тму закров Свой: окрест Его селение Его, темноту вод огусти во облацех воздушных: 13 от сияния пред Ним разгорешася углие огненнии. 14 И возгреме с небесе Господь, и Вышний даде глас Свой, 15 и посла стрелы, и расточи их: и блесну молнию, и устраши я: 16 и явишася источницы морстии, и открышася основания вселенныя от запрещения Господня, от дохновения духа гнева Его: 17 посла с высоты и прият мя, извлече мя от вод многих: 18 избави мя от враг моих сильных и от ненавидящих мя, яко укрепишася паче мене: 19 предвариша мя в день печали моея. И бысть Господь утверждение мое, 20 и изведе мя на широту, и избави мя, яко благоволи во мне. 21 И воздаде ми Господь по правде моей, и по чистоте руку моею воздаде ми, 22 яко сохраних пути Господни и не нечествовах от Бога моего, 23 яко вся судбы Его предо мною, и оправдания Его не отступиша от мене, 24 и буду непорочен Ему, и сохранюся от беззакония моего. 25 И воздаст ми Господь по правде моей и по чистоте руку моею пред очима Его. 26 С преподобным преподобен будеши, и с мужем неповинным неповинен будеши: 27 и со избранным избран будеши, и со строптивым развратишися: 28 люди же смиренныя спасеши, и очи гордых смириши. 29 Яко Ты просвещаеши светилник мой, Господи, и Господь просветит ми тму мою: 30 яко Тобою потеку препоясан, и о Бозе моем прелезу стену. 31 Крепок, непорочен путь Его: глаголгол Господень державен, разжжен: защитник есть всем уповающым на Него. 32 Яко кто крепок разве Господа? И кто творец разве Бога нашего? 33 Крепок укрепляяй мя силою, и положи непорочен путь мой: 34 положивый нозе мои яко елени, и на высоких поставляяй мя: 35 научаяй руце мои на брань, и положивый лук медян мышца моя. 36 И дал ми еси защищение спасения моего, и кротость Твоя умножи мя. 37 Разширил еси стопы моя подо мною, и не позыбнустеся голени мои. 38 Пожену враги моя и потреблю я, и не возвращуся дондеже скончаю их: 39 и сокрушу их, и не востанут, и падут под ногама моима. 40 И укрепиши мя силою на брань, подклониши востающыя на мя под мя. 41 И враги моя дал ми еси хребет, ненавидящыя мя, и умертвил еси их: 42 возопиют, и несть помощника, ко Господу, и не услыша их: 43 и истних я яко прах земный, яко брение путий истончих я. 44 И избавиши мя от пререкания людий моих, сохраниши мя в главу языков. И людие, ихже не ведях, работаша ми. 45 Сынове чуждии солгаша ми, в слух уха услыша мя: 46 сынове чуждии отвержени будут, и вострепещут во градех своих. 47 Жив Господь, и благословен хранитель мой, и вознесется Бог мой, хранитель спасения моего. 48 Крепкий Господь даяй отмщения мне и наказуяй люди под мя, 49 и изводяй мя от враг моих, и от востающих на мя вознесеши мя, от мужа неправедна избавиши мя. 50 Сего ради исповемся Тебе, Господи, во языцех, и имени Твоему воспою: 51 величаяй спасения царя Своего, и творяй милость христу Своему Давиду и семени его до века. === 23 === 1 И сия словеса Давидова последняя. Верен Давид сын Иессеов, и верен муж, егоже возстави Господь в христа Бога Иаковля, и благолепны псалмы Израилевы. 2 И Дух Господень глагола во мне, и слово Его на языце моем. 3 Глаголет Бог Израилев: мне глагола хранитель Израилев притчу: рех в человецех: како удержите страх Божий? 4 И во свете Божии утреннем, и возсия солнце заутра, не прейде от сияния, и яко от дождя злачна от земли. 5 Не тако бо дом мой с Крепким: завет бо вечен положи ми, готов во всяком времени сохранен: яко все спасение мое и все хотение во Господе, яко не имать прозябнути беззаконный. 6 Якоже терние извержено вси сии, яко не возмутся рукою, 7 и муж не потрудится в них: и множество железа, и древо копийное, и огнем сожжет, и попалятся в срамоту свою. 8 Сия имена сильных Давидовых: Иевосфей Хананеанин князь третияго есть: адинон асоней, сей обнажи мечь свой на осмь сот воинов (и победи) единою. 9 И по нем Елеазар, сын отца брата его, в триех сильных братиях, сей бе со Давидом (во сирране) внегда поносити ему во иноплеменницех: и иноплеменницы собрашася тамо на брань, 10 и изыдоша мужие Израилевы противу лица их, и той воста и убиваше иноплеменники, дондеже утрудися рука его и прильпе рука его к мечу: и сотвори Господь спасение велико в той день: и людие обратишася вслед его токмо совлачати. 11 И по нем Самаиа сын Асы, Арухейский: и собрашася иноплеменницы во Фирию: и бе тамо часть села исполнь лящи: и людие бежаша от лица иноплеменнича: 12 и ста аки столп посреде части, и исхити ю, и порази иноплеменники: и сотвори Господь спасение велико. 13 И снидоша три князи от тридесятих, и приидоша в касон к Давиду в вертеп Одоллам: и чинове иноплеменник ополчишася во юдоли Рафаинстей. 14 И Давид тогда бе во обдержании, и стан иноплеменническ бе тогда в Вифлееме. 15 И возжада Давид и рече: кто напоит мя водою из рова, иже в Вифлееме при вратех? Стан же бе тогда иноплеменничь в Вифлееме. 16 И расторгоша трие сильнии ополчение иноплеменничо, и почерпоша воды из рова Вифлеемскаго, иже при вратех: и взяша, и приидоша ко Давиду, и не восхоте пити ея: и возлия ю Господу 17 и рече: милостив мне, Господи, еже сотворити сие, кровь ли мужей пошедших в душах своих пити имам? И не восхоте пити ея. Сия сотвориша трие сильнии. 18 И Авесса брат Иоавль сын Саруин, сей бе князь в триех, и сей воздвиже копие свое на триста язвеных, и тому имя есть в триех. 19 От триех оных славный, и бысть им князь, и даже до триех не прииде. 20 И Ванеа сын Иодаев, муж сей премног в делех, от Кавасаила, и сей уби два сына Ариила Моавскаго: и той сниде, и уби льва посреде рова в день снежен: 21 и той порази мужа Египтянина, мужа красна, в руце же Египтянина копие яко древо лествицы корабленыя: и сниде к нему со палицею, и исторже копие из руку Египтянина, и уби его копием его: 22 сия сотвори Ванеа сын Иодаев, и тому имя в триех сильных, 23 от триех славный, и ко трием не прииде: и постави его Давид над таинники своими. 24 И сия имена сильных Давида царя: Асаил брат Иоавль, сей в тридесятих: Елеанан сын отца брата его от Вифлеема: 25 Семоф Ародиин: 26 Хеллис Келофийский: Ира сын Еккиса Фекоитскаго: 27 Авиезер Анафофитский: Савухей иже от Асофиты: 28 Еллон Алонитский: моей Нетофафитянин: 29 Ели сын Ваань, иже от Нетофафит: Еффи сын Ривань от Гаваона сынов Вениаминих: 30 Ванеас Фарафонитский: Урий от Наалгеа: 31 Ариил сын Аравофитянина: Заор Варсамитский: 32 Елеаса сын Салавонитский: Васей гонитский: 33 Ионафан сын Самана Ароритскаго: Ахиан сын Арати Арафурскаго: 34 Елифалаф сын Маахиавль: Елиав сын Ахитофела Гелонитскаго: 35 Асараи Кармилский: Урем сын Асви: 36 и Гала сын Нафанов: и Ваан сын Агарин: 37 Елли Амманитский: Гелорей Вирофийский, носяй оружие Иоава сына Саруина: 38 Ирас Еффирский: Гарев Иерфейский: и Уриа Гефейский. 39 Всех тридесять и седмь. === 24 === 1 И приложи Господь гневу разгоретися во Израили, и подвиже в них Давида, глаголя: иди и изочти Израиля и Иуду. 2 И рече царь ко Иоаву князю силы иже с ним: пройди ныне вся колена Израилева и Иудина, от Дана даже и до Вирсавии, и сочти люди, и да увем число людем. 3 И рече Иоав ко царю: да приложит Господь Бог твой к людем твоим, якоже быти им сторицею, и очи господина моего царя да увидят: и господин мой царь почто помышляет о словеси сем? 4 И превозможе слово царево ко Иоаву и ко князем силы. И изыде Иоав и князи крепости пред царем сочести люди Израилевы. 5 И преидоша Иордан, и ополчишася во Ароире одесную града иже посреде дебри Гад и Елиезер. 6 И приидоша в Галаад и в землю Фавасон и Истон и в Дасу, и внидоша в Данидан и обыдоша Сидон, 7 и приидоша во Мапсар Тирский и во вся грады Евеины и в Хананеины, и идоша на юг Иуды в Вирсавию, 8 и обыдоша всю землю, и приидоша во Иерусалим, скончавше девять месяц и двадесять дний. 9 И даде Иоав число сочтеных людий царю: и бе Израиля числом осмь сот тысящ сильных держащих оружие, и мужей Иудиных пять сот тысящ мужей борцев. 10 И убояся сердце Давидово по счислении людий, и рече Давид ко Господу: согреших зело, яко сотворих глагол сей: и ныне, Господи, отими беззаконие раба Твоего, яко обуях зело. 11 И воста Давид заутра: и слово Господне бысть ко Гаду пророку прозорливцу, глаголя: 12 иди и рцы Давиду, глаголя: тако глаголет Господь: трое Аз наведу на тя, и избери себе едино от сих, и сотворю ти. 13 И вниде Гад к Давиду, и поведа, и рече ему: избери себе быти: или приидут тебе три лета глада на землю твою: или три месяцы бегати имаши пред враги твоими, и будут гоняще тя: или три дни быти смерти в земли твоей: ныне убо разумей и виждь, что отвещаю Пославшему мя. 14 И рече Давид ко Гаду: тесна ми суть отвсюду зело три сия: да впаду убо в руце Господни, яко многи суть щедроты Его зело: в руце же человечи да не впаду. И избра себе Давид смерть и дни жатвенныя пшеницы. 15 И даде Господь смерть во Израили от утра до часа обедняго, и начася язва быти в людех, и умроша от людий Господних от Дана и до Вирсавии седмьдесят тысящ мужей. 16 И простре Ангел Божий руку свою на Иерусалим погубити его, и раскаяся Господь о зле, и рече Ангелу погубляющему люди: доволно ныне, отими руку твою. И Ангел Господнь бе стоя пред гумном Орны Иевусеанина. 17 И рече Давид ко Господу, егда виде Ангела биюща люди, и рече: се, аз есмь согрешивый, аз есмь пастырь зло сотворивый, а сии овцы что сотвориша? Да будет ныне рука Твоя на мне и на дому отца моего. 18 И прииде Гад к Давиду в день той и рече ему: взыди, и постави Господеви олтарь на гумне Орны Иевусеанина. 19 И взыде Давид по глаголу Гада пророка, имже образом заповеда ему Господь. 20 И преклонися Орна, и виде царя и отроки его восходящыя выше его, и изыде Орна, и поклонися царю на лицы своем на земли, 21 и рече Орна: что яко прииде господин мой царь к рабу своему? И рече Давид: купити у тебе гумно (приидох), на создание олтаря Господня, и престанет язва от людий. 22 И рече Орна к Давиду: да приимет и вознесет господин мой царь Господу (Богу) еже благо пред очима его: се, волове во всесожжение, и колеса и сосуди волов на дрова. 23 Вся даде Орна царю. И рече Орна к царю: Господь Бог твой да благословит тя. 24 И рече царь ко Орне: ни, но токмо купуя куплю от тебе ценою, и не вознесу Господу Богу моему всесожжения туне. И купи Давид гумно и волы на пятидесяти сиклех сребра. 25 И созда тамо Давид олтарь Господеви: и вознесе всесожжения и мирная. И приложи Соломон ко олтарю последи, зане мал бе прежде. И послуша Господь земли, и отят язву от Израиля. == Третья книга Царств == === 1 === 1 И царь Давид бысть стар прешед дни, и одеваху его ризами (многими), и не согревашеся. 2 И реша отроцы его ему: да поищут господину нашему царю девицы юныя, и предстоит цареви, и будет греющи его, и да лежит с ним, и согреется господин наш царь. 3 И искаша отроковицы добрыя от всего предела Израилева, и обретоша Ависагу Сумантяныню, и приведоша ю ко царю. 4 И бе отроковица добра видением зело: и бысть греющи царя и служаше ему: царь же не позна ея. 5 И Адониа сын Аггифин вознесеся, глаголя: аз имам царствовати. И сотвори себе колесницы и конники, и пятьдесят мужей еже ходити пред ним. 6 И не возбрани ему отец его никогда, глаголя: почто сие ты сотворил еси? И бе той красен зраком зело, и того роди по Авессаломе. 7 И беша совети его со Иоавом сыном Саруиным и со Авиафаром иереом, и помогаху вслед Адонии. 8 Садок же иерей и Ванеа сын Иодаев, и Нафан пророк и Семей, и Рисий и сынове сильнии Давидовы не быша по Адонии. 9 И пожре Адониа овцы и телцы и агнцы при камени Зоелефе, иже бе близ источника Рогиля: и призва всю братию свою, сыны царевы, и вся мужы Иудовы, отроки царевы: 10 Нафана же пророка и Ванеа и сильных и Соломона брата своего не зва. 11 И рече Нафан ко Вирсавии матери Соломони, глаголя: не слышала ли еси, яко воцарися Адониа сын Аггифин, господин же наш Давид не весть: 12 ныне убо совещаю ти совет, и избавиши душу свою и душу сына твоего Соломона: 13 гряди, вниди к царю Давиду и речеши к нему, глаголющи: не ты ли, господи мой царю, клялся еси рабе твоей, глаголя: яко Соломон сын твой имать царствовати по мне, и той сядет на престоле моем? И что яко воцарися Адониа? 14 И се, еще глаголющей тебе тамо со царем, и аз вниду вслед тебе и дополню словеса твоя. 15 И вниде Вирсавиа ко царю в ложницу. И царь стар зело, и Ависаг Сумантяныня бяше служащи царю. 16 И приклонися Вирсавиа и поклонися цареви. И рече царь: что ти есть? 17 Она же рече: господи мой царю, ты клялся еси пред Господем Богом твоим рабе твоей, глаголя: яко сын твой Соломон имать царствовати по мне, и той сядет на престоле моем: 18 и се, ныне Адониа царствует, ты же, господи мой царю, не веси: 19 и пожре телцы и агнцы и овцы во множестве, и созва вся сыны царевы, и Авиафара жерца и Иоава князя силы, Соломона же раба твоего не призва: 20 ты же, господи мой царю, очи всего Израиля к тебе: да возвестиши им, кто сядет на престоле господина моего царя по нем: 21 и будет егда уснет господин мой царь со отцы своими, и буду аз и сын мой Соломон грешни. 22 И се, еще ей глаголющей с царем, и Нафан пророк прииде. 23 И возвестиша царю, глаголюще се, Нафан пророк. И вниде пред лице царево, и поклонися царю пред лицем его до земли, 24 и рече Нафан: господи мой царю, ты ли рекл еси: Адониа да царствует по мне, и той да сядет на престоле моем? 25 Яко сниде днесь и закла телцы и агнцы и овцы во множестве, и созва вся сыны царевы и князи сильных, и Авиафара иереа: и се, суть ядуще и пиюще пред ним, и реша: да живет царь Адониа: 26 и мене самаго раба твоего, и Садока иереа, и Ванеа сына Иодаева, и Соломона раба твоего не зва: 27 от господина ли царя моего бысть глагол сей? И не сказал еси рабу твоему, кто сядет на престоле господина моего царя по нем? 28 И отвеща царь Давид и рече: призовите ми Вирсавию. И вниде (Вирсавиа) пред царя и ста пред лицем его. 29 И клятся царь и рече: жив Господь, иже избави душу мою от всея печали: 30 якоже бо кляхтися пред Господем Богом Израилевым, глаголя: яко Соломон сын твой воцарится по мне, и той сядет на престоле моем вместо мене, яко тако сотворю ему в днешний день. 31 И преклонися Вирсавиа лицем на землю, и поклонися царю и рече: да живет господин мой царь Давид во веки. 32 И рече царь Давид: призовите мне Садока жерца и Нафана пророка, и Ванеа сына Иодаева. И внидоша пред царя. 33 И рече им царь: поимите с собою рабы господина вашего, и всадите сына моего Соломона на мска моего, и ведите его к Гиону, 34 и да помажет его тамо Садок иерей и Нафан пророк в царя над Израилем, и вострубите трубою рожаною и речете: да живет царь Соломон: 35 и изыдите вслед его, и внидет, и сядет на престоле моем, и той воцарится вместо мене: и аз заповедах, да будет властелин над Израилем и Иудою. 36 И отвеща Ванеа сын Иодаев царю и рече: буди тако: да утвердит Господь Бог глагол сей господина моего царя: 37 якоже бе Господь со господином моим царем, тако да будет и с Соломоном, и да возвеличит престол его паче престола господина моего царя Давида. 38 И сниде Садок иерей и Нафан пророк, и Ванеа сын Иодаев, и Хереффи и Фелеффи, и всадиша Соломона на мска царя Давида, и возведоша его к Гиону: 39 и взя Садок иерей рог с елеем от скинии, и помаза Соломона, и воструби трубою рожаною, и реша вси людие: да живет царь Соломон. 40 И взыдоша вси людие вслед его и ликоваша в лицех, и веселяхуся веселием великим, и разседеся земля от гласа их. 41 И слыша Адониа и вси званнии его, и тии скончаша уже ядуще. И слыша Иоав глас трубы рожаны и рече: кий глас есть града шумяща? 42 И еще Ему глаголющу, и се, Ионафан сын Авиафара иереа прииде. И рече Адониа: вниди, яко муж силы ты еси, и благая возвести. 43 И отвеща Ионафан и рече: известно, господин наш царь Давид постави Соломона царем: 44 и посла с ним царь Садока иереа и Нафана пророка, и Ванеа сына Иодаева, и Хереффи и Фелеффи, и всадиша его на мска царева: 45 и помазаша его Садок иерей и Нафан пророк на царство в Гионе, и взыдоша оттуду веселящеся, и возшуме град: сей глас, егоже слышасте: 46 и седе Соломон на престоле царстем: 47 и внидоша раби царевы благословити господина нашего царя Давида, глаголюще: да ублажит Бог имя Соломона сына твоего паче имене твоего, и да возвеличит престол его паче престола твоего: и поклонися царь на одре своем, 48 и сице рече царь: благословен Господь Бог Израилев, Иже даде днесь от семене моего седяща на престоле моем, и очи мои видят. 49 И ужасошася ужасом, и восташа вси званнии Адониевы, и отиде кийждо путем своим. 50 И Адониа убояся от лица Соломоня, и воста и отиде, и ятся за рог олтаря. 51 И возвестиша Соломону, глаголюще: се, Адониа убояся царя Соломона, и держится за рог олтаря, глаголя: да кленетмися днесь царь Соломон, яко не убиет раба своего оружием. 52 И рече Соломон: аще будет сын силы, ни влас главы его упадет на землю: аще же злоба обрящется в нем, умрет. 53 И посла царь Соломон, и сведоша его со олтаря. И вниде, и поклонися царю Соломону. И рече ему Соломон: иди в дом свой. === 2 === 1 И приближишася Давиду дние умрети ему, и заповеда Соломону сыну своему, глаголя: 2 аз отхожду в путь всея земли: ты же крепися, и буди муж совершен, 3 и сохрани завет Господа Бога твоего, еже ходити во всех путех Его, хранити заповеди Его и оправдания Его, и судбы Его и свидения Его, писанная в законе Моисеове: да разумееши яже сотвориши по всем, елика заповедах тебе: 4 да утвердит Господь слово Свое, еже рече о мне, глаголя: аще сохранят сынове твои пути своя, еже ходити предо Мною во истине всем сердцем своим и всею душею своею, глаголя: не искоренится тебе муж с престола Израилева: 5 и ты веси, елика сотвори мне Иоав сын Саруин, елика сотвори двема воеводама сил Израилевых, Авениру сыну Нирову и Амессаю сыну Иеферову, и уби их, и излия крови брани в мире, и даде кровь неповинных на поясе своем, иже на чреслех его, и на сапозе своем сущем на нозе его: 6 и сотвориши по мудрости твоей, и не сведеши старости его с миром во ад: 7 сыном же Верзеллии Галаадитина сотвориши милость, и да будут с ядущими трапезу твою: яко тако приближишася мне, внегда бежати мне от лица Авессалома брата твоего: 8 и се, с тобою Семей сын Гирань сын Иемениин от Ваурима, и той прокля мя проклятием горьким, в день в оньже исхождах в Полки: и той сниде на сретение ми на Иордан, и кляхся ему о Господе, глаголя: не убию тя оружием: 9 и да не обезвиниши его, яко муж мудр еси ты, и увеси что сотвориши ему, и сведеши старость его с кровию во ад. 10 И успе Давид со отцы своими, и погребен бысть во граде Давидове. 11 И бысть дний, в няже царствова Давид во Израили, четыредесять лет: в Хевроне царствова седмь лет, во Иерусалиме же тридесять три лета. 12 И Соломон седе на престоле Давида отца своего сын дванадесяти лет, и уготовася царствие его зело. 13 И вниде Адониа сын Аггифин к Вирсавии матери Соломони, и поклонися ей. Она же рече: мир ли вход твой? И рече: мир. 14 И рече: слово мне к тебе. И рече ему: глаголи. 15 И рече ей: ты веси, яко мне бе царство, и на мя весь Израиль положи лице свое, еже царствовати, и обратися царство, и бысть брату моему, яко от Господа бысть ему: 16 и ныне прошения единаго аз прошу от тебе, не отврати лица своего. И рече ему Вирсавиа: глаголи. 17 И рече к ней: рцы к Соломону царю, яко не имать отвратити лица своего от тебе, и дабы ми дал Ависагу Сумантяныню в жену. 18 И рече Вирсавиа: добре, аз имам глаголати о тебе к царю. 19 И вниде Вирсавиа пред царя Соломона глаголати ему о Адонии. И воста царь на сретение ей, и поклонися ей, и седе на престоле своем: и поставиша престол другий матери цареве, и седе одесную его, 20 и рече ему: прошения мала единаго аз прошу у тебе, не отврати лица моего. И рече к ней царь: проси, мати моя, яко не отвращуся от тебе. 21 И рече: даждь Ависагу Сумантяныню Адонии брату твоему в жену. 22 И отвеща царь Соломон и рече матери своей: вскую ты просиши Ависаги Сумантяныни Адонии? Еще проси ему и царства, яко той брат мой болший мене, и ему Авиафар иерей, и ему Иоав сын Саруин воевода друг. 23 И клятся царь Соломон Господем, глаголя: сия да сотворит мне Бог и сия да приложит, яко на душу свою глагола Адониа слово сие: 24 и ныне жив Господь, Иже уготова мя, и посади мя на престоле отца моего Давида, и Той сотвори ми дом, якоже глагола Господь, яко днесь умрет Адониа. 25 И посла царь Соломон рукою Ванеа сына Иодаева, и уби его, и умре Адониа в той день. 26 И Авиафару иерею рече царь: тецы ты во Анафоф на село твое, яко муж смерти еси ты в днешний день, но не умерщвлю тебе, яко носил еси кивот завета Господня пред отцем моим (Давидом), и яко озлоблен был еси во всех, имиже озлоблен бе отец мой. 27 И изгна Соломон Авиафара, еже не быти ему иереем Господним, якоже сбытися словеси Господню, еже глагола на дом Илиев в Силоме. 28 И слух дойде до Иоава сына Саруина, яко Иоав последова Адонии, и в след Соломонь не уклонися. И бежа Иоав в скинию Господню, и ятся рогов олтаревых. 29 И возвестиша Соломону, глаголюще: яко бежа Иоав в скинию Господню, и се, держится рогов олтаревых. И посла царь Соломон ко Иоаву, глаголя: что ти бысть, яко убежал еси во олтарь? И рече Иоав: яко убояхся от лица твоего, и бежах ко Господу. И посла Соломон Ванеа сына Иодаева, глаголя: иди, и убий его, и погреби его. 30 И прииде Ванеа сын Иодаев ко Иоаву в скинию Господню, и рече ему: сия глаголет царь: изыди. И рече Иоав: не изыду, но да зде умру. И возвратися Ванеа сын Иодаев и рече царю, глаголя: сия глагола Иоав и сия отвеща мне. 31 И рече ему царь: иди и сотвори ему, якоже рече, и убий его, и погреби его, и отими днесь кровь, юже туне пролия Иоав, от мене и от дому отца моего: 32 и возврати Господь кровь неправды его на главу его, якоже нападе на два мужа праведна и блага паче его, и уби их оружием: и отец мой Давид не разуме крове их, Авенира сына Нирова, воеводу Израилева, и Амессая сына Иеферова, воеводу Иудина: 33 и возвратися кровь их на главу его и на главу семене его во веки: Давиду же и семени его, и дому его, и престолу его мир да будет до века от Господа. 34 И взыде Ванеа сын Иодаев и нападе на него, и уби его, и погребе его в дому его в пустыни. 35 И постави царь Соломон Ванеа сына Иодаева вместо его над воинством: царство же управляшеся во Иерусалиме. И Садока иереа даде Соломон царь во иереа перваго вместо Авиафара. (1) и даде Господь смысл Соломону и премудрость многу зело, и широту сердца, якоже песок иже при мори: (2) и исполнися разума Соломон паче разума всех древних сынов и паче всех мудрых Египетских. И поят дщерь фараоню, и введе ю во град Давидов, дондеже сконча себе здати дом свой, и дом Господень в первых, и стену Иерусалима окрест: (3) в седмь лет сотвори и сконча. (4) и бяше у Соломона седмьдесят тысящ (мужей) носящих бремена, и осмьдесят тысящ каменосечцев в горе. И сотвори Соломон море, и подкрепления, и бани великия, и столпы, и источник дворный, и море медяное: (5) и созда краеградие, и забрала над ним, и разсече град Давидов. (6) тако дщи фараоня прейде от града Давидова в дом свой, егоже созда ей: (7) тогда созда краеградие. И Соломон возношаше трижды в лето всесожжения и мирная на олтарь, егоже созда Господеви, и кадяше пред Господем, и соверши дом. И сии старейшины приставлени над делами Соломоними, (8) три тысящы и шесть сот приставник за людьми делающими дело. И созда (9) Ассур, и Магдон и Газер, и Вефорон вышний и Валалаф: обаче по создании дому Господня и стены Иерусалимския окрест, по сих созда грады сия. И еще жив сый Давид, заповеда Соломону глаголя: (10) се, с тобою Семей сын Гирань, сын семене Иемениина, от Хеврона: сей кляше мя клятвою укоризненною, в день в оньже идох в Полки: и той сниде в сретение ми на Иордан, и кляхся ему Господем, глаголя, яко не умерщвлю его оружием: и ныне да не обезвиниши его, яко муж смыслен еси ты, и разумееши яже сотвориши ему, и сведеши старость его с кровию во ад. 36 И послав царь Соломон, призва Семеа и рече ему: созижди себе дом во Иерусалиме и седи тамо, и не исходи оттуду никаможе: 37 и будет в день исхода твоего, и прейдеши поток Кедрский, разумея разумей, яко смертию умреши: кровь твоя будет на главе твоей. И заклят его царь в день той. 38 И рече Семей к царю: благ глагол, егоже глаголал еси, господи мой царю: тако сотворит раб твой. И седе Семей во Иерусалиме три лета. 39 И бысть по триех летех, и бежаста два раба Семеина ко Агхусу сыну Маахаину, царю Гефску. И возвестиша Семею, глаголюще: се, раби твои во Гефе. 40 И воста Семей, и оседла осля свое, и иде во Геф ко Агхусу взыскати рабы своя: и пойде Семей, и приведе рабы своя от Гефа. 41 И возвестиша Соломону, глаголюще: яко Семей ходи из Иерусалима в Геф и возврати рабы своя. 42 И посла царь и призва Семеа и рече к нему: не заклях ли тя Господем, и засвидетелствовах тебе, глаголя: в оньже аще день изыдеши из Иерусалима и пойдеши на десно или на шуее, разумея разумей, яко смертию умреши? И рекл ми еси: благ глагол, егоже слышах: 43 и что яко не сохранил еси клятвы Господни и заповеди, юже заповедах на тя? 44 И рече царь к Семею: ты веси всю злобу твою, юже весть сердце твое, яже сотворил еси Давиду отцу моему: и возврати Господь злобу твою на главу твою: 45 и царь Соломон благословен, и престол Давидов будет готов пред Господем во веки. 46 И заповеда царь Соломон Ванею сыну Иодаеву: и изыде, и уби его, и умре (Семей). === 3 === 1 Егда же царство утвердися в руце Соломона, сватовство сотвори Соломон с фараоном царем Египетским: и поят дщерь фараоню и введе ю во град Давидов, дондеже сконча здати дом свой и дом Господень и стену Иерусалима окрест. 2 Обаче людие тогда бяху жруще на высоких, яко не бе создан дом Господеви даже до дне онаго. 3 И возлюби Соломон Господа, ходити в заповеданиих Давида отца своего, токмо на холмех жряше и кадяше. 4 И воста Соломон, и иде в Гаваон пожрети тамо, яко тамо бе высота велия: тысящу всесожжения вознесе на жертвеннице в Гаваоне. 5 И явися Господь Соломону во сне нощию и рече ему: проси что хощеши себе. 6 И рече Соломон: Ты сотворил еси с рабом Твоим Давидом отцем моим милость велию, якоже ходи пред Тобою истиною и правдою и правым сердцем с Тобою, и сохранил еси ему милость великую сию, еже дати сыну его седети на престоле его, якоже днесь: 7 и ныне, Господи Боже мой, Ты дал еси раба Твоего вместо Давида отца моего: и аз есмь отрочищь мал, и не вем исхода моего и входа моего: 8 раб же Твой посреде людий Твоих, ихже избрал еси людий многих, иже не изочтутся от множества: 9 и даси рабу Твоему сердце смыслено слышати и судити люди Твоя в правде, еже разумевати посреде добра и зла: яко кто может судити людем Твоим тяжким сим? 10 И угодно бысть слово сие пред Господем, яко испроси Соломон глагол сей. 11 И рече Господь к нему: занеже просил еси от мене глагола сего, и не просил еси от мене дний многих, и не просил еси богатства, ниже просил еси душ враг твоих, но испросил еси себе разума, еже слышати суд: 12 се, сотворих по глаголу твоему, се, дах ти сердце смыслено и мудро: якоже ты, не бысть муж прежде тебе и по тебе не востанет подобен тебе: 13 и яже не просил еси, дах тебе, и богатство и славу, якоже ты, не бысть муж подобен тебе в царех во вся дни твоя: 14 и аще пойдеши путем Моим сохранити заповеди Моя и повеления Моя, якоже хождаше Давид отец твой, и умножу дни твоя. 15 И возбудися Соломон, и се, сновидение. И воста, и иде во Иерусалим, и ста пред лицем жертвенника, пред лицем кивота завета Господня в Сионе, и вознесе всесожжения и сотвори мирная, и сотвори пир велий себе и всем отроком своим. 16 Тогда явистеся две жене блуднице пред царем и стасте пред ним. 17 И рече жена едина: во мне, господи мой: аз и жена сия жихоме в дому единем и родихоме в дому: 18 и бысть по третием дни рождения моего, и роди и жена сия: и бехом купно, и не бе никтоже с нами, кроме обоих нас в дому: 19 и умре сын жены сея в нощи, яко лежа на нем: 20 и воста в полунощи, и взя отроча мое от объятий моих, и успи е на лоне своем, а отроча свое умершее положи на лоне моем: 21 и востах заутра накормити отроча мое, и обретох и мертво: и се, разсмотрих его рано, и се, не бе сын мой, егоже родих: 22 и рече другая жена: ни, но се есть сын мой живый, се же есть сын твой умерый. И прястеся пред царем. 23 И рече има царь: ты глаголеши, яко сей сын мой живый, сын же сея мертвый: и ты глаголеши: ни, но живый есть сын мой, твой же сын умерший. 24 И рече царь: принесите ми мечь. И принесоша мечь пред царя. 25 И рече царь: разсецыте отроча ссущее живое на двое, и дадите половину его сей, и другую половину оней. 26 И отвеща жена, еяже бе сын живый, и рече ко царю, понеже смятеся утроба ея о сыне ея, и рече: во мне, господи мой, дадите ей отроча живое, смертию же не умертвите его. И та рече: да не будет ни мне, ни тебе, но пресецыте е. 27 И отвеща царь и рече: дадите детище живо жене рекшей: дадите сей е, смертию же не умертвите его: сия мати его. 28 И слыша весь Израиль суд сей, имже суди царь, и убояшася от лица царева, разумеша бо, яко разум Божий в нем еже творити оправдания. === 4 === 1 И бе царь Соломон царствуяй над Израилем. 2 И сии старейшины иже беша с ним: 3 Азариа сын Садоков, жрец: Елиаф и Ахиа сынове Сивины, книгочии: и Иосафат сын Ахилудов, напоминатель: 4 и Ванеа сын Иодаев над силою: и Садок и Авиафар, иерее: 5 и Азариа сын Нафань над настоятелми: и Завуф сын Нафань друг царев: 6 и Ахисар бе строитель, и Елиав сын Сафатов над отечеством: и Адонирам сын Авдонов над даньми. 7 И у Соломона бяху дванадесять приставник над всем Израилем, еже подаяти царю и дому его: по месяцу в лете бываше един, еже подаяти, 8 и сия имена их: Вен сын Оров на горе Ефремли, един: 9 сын Дакарь во Махемате и во Висаламине и Вефсамисе и Елоне, даже до Вефанана, един: 10 сын Седов во Аравофе, сего Сохо и вся земля Оферова: 11 сына Аминадавля вся Неффадор: Тефаф дщи Соломоня бе ему в жену, един: 12 Вана сын Ахилуфов во Ифаанахе и Магеддо и весь Дом Саныи, иже при Сесафане под Езраелем, и от Вифсана даже до Савелмаула, даже до Маевер Лукам, един: 13 сын Наверов в Равофе Галаадстем: сему область Ергав в Васане, шестьдесят градов великих огражденных стенами, и вереи медяны, един: 14 Ахинадав сын Саддов во Маанаиме: 15 Ахимаас в Неффалиме: и сей поят Васемафу дщерь Соломоню в жену, един: 16 Ваана сын Хусиин во Асире и во Ваалофе, един: 17 Иосафат сын Фаруев во Иссахаре, 18 Семей сын Илы во Вениамине, 19 Гавер сын Адаев в земли Галааде, в земли Сиона царя Есевонска и Ога царя Васанска, и Насиф един в земли Иудове. 20 Иуда и Израиль мнози аки песок иже при мори во множестве, ядуще и пиюще и веселящеся. 21 И Соломон бе началствуяй во всех царствах, от реки земли Филистимския и даже до предел Египетских, (и бяху) приносяще дары и работающе Соломону во вся дни живота его. 22 И сия потребная Соломону в день един: тридесять мер муки семидалныя и шестьдесят мер муки смешаныя, 23 десять телцев избранных и двадесять волов тучных и сто овец, кроме еленей и серн и птиц, избранна от избранных тучна. 24 Понеже бе началствуяй во всех об он пол реки от Фапсы и даже до Газы, над всеми царми об он пол реки, и мир бе ему от всех стран окрест. 25 И живяху Иуда и Израиль безпечально, кийждо под виноградом своим и под смоковницею своею, ядуще и пиюще, от Дана и даже до Вирсавии, во вся дни Соломона. 26 И бяше у Соломона четыредесять тысящ кобылиц в колесницы и двадесять тысящ конник. 27 И тако подаяху приставники царю Соломону, и вся повеленная на трапезу цареву, кийждо в месяц свой, не пременяюще словесе: 28 и ячмень и плевы конем, и колесницами привозяху на место, идеже бе царь, кийждо по чину своему. 29 И даде Господь смысл и мудрость Соломону многу зело, и широту сердца, яко песок иже при мори: 30 и умножися мудрость Соломонова зело, паче смысла всех древних человек и паче всех смысленных Египетских: 31 и умудрися паче всех человек, и умудрися паче Гефана Езраилитнна и Емана, и Халкада и Дарды, сына Самадова, и прославися имя его во всех странах окрест. 32 И изглагола Соломон три тысящы притчей, и быша песни его пять тысящ: 33 и глагола о древех, от кедра иже в Ливане и даже до иссопа исходящаго из стены: и глагола о скотех и о птицах и о гадех и о рыбах. 34 И прихождаху вси людие слышати премудрость Соломоню: и приимаше дары от всех царей земных, елицы слышаху премудрость его. === 5 === 1 И посла Хирам царь Тирский отроки своя к Соломону: услыша бо, яко помазаша его на царство вместо Давида отца его, яко любяше Хирам Давида во вся дни. 2 И посла Соломон к Хираму, глаголя: 3 ты веси отца моего Давида, яко не возможе создати дому имени Господа Бога моего, от лица противных, окруживших его, дондеже даде я Господь под стопы ног его: 4 и ныне упокои Господь Бог мой мне окрест, несть наветника, ниже сопротивника лукаваго: 5 и се, аз глаголю создати дом имени Господа Бога моего, якоже глагола Господь Бог к Давиду отцу моему, глаголя: сын твой, егоже дам вместо тебе на престол твой, той созиждет дом имени Моему: 6 и ныне заповеждь, да насекут ми древ от Ливана, и се, раби мои с рабы твоими, и мзду трудов твоих дам ти по всему елика речеши, понеже ты веси, яко несть нам ведущаго древа сещи, якоже Сидоняне. 7 И бысть егда услыша Хирам словеса Соломоня, возрадовася зело и рече: благословен Бог днесь, Иже даде Давиду сына разумна над людьми сими многими. 8 И посла Хирам к Соломону, глаголя: слышах о всех, ихже ради послал еси ко мне: аз сотворю все хотение твое о древах кедровых и певговых: 9 слуги мои изнесут я от Ливана к морю, и аз положу я в складения на место, идеже возвестиши мне, и довезу я тамо: и ты возмеши, и сотвориши хотение мое, еже дати хлебы дому моему. 10 И бе Хирам дая Соломону кедры и певги и всю волю его. 11 И даде Соломон Хираму двадесять тысящ мер пшеницы, и пищу дому его, и двадесять тысящ мер елеа чистаго: по сему даваше Соломон Хираму на всяко лето. 12 И Господь даде Соломону премудрость, якоже глагола ему. И бе мир между Хирамом и между Соломоном, и положиша завет между собою. 13 И взя царь дань от всего Израиля, и бе дань тридесять тысящ мужей. 14 И посла я в Ливан, десять тысящ на месяц в премену: месяц быша в Ливане и два месяца в дому своем: и бяше Адонирам над данию. 15 И бяше Соломону седмьдесят тысящ носящих бремена и осмьдесят тысящ секущих камение в горе, 16 кроме старейшин приставленых над делами Соломоними, три тысящы и шесть сот приставник делающих дела. 17 И заповеда царь, и взяша камение великое, камение честное на основание храма, и камение нетесаное. 18 И истесаша сынове Соломони и сынове Хирамли и каменосечцы Гевалстии: и изготовиша камения и древа в три лета. === 6 === 1 И бысть в четыредесятное и в четвертосотное лето исхода сынов Израилевых из Египта, в лето четвертое, в месяц вторый, царствующу царю Соломону над Израилем, и созда храм Господеви. 2 И храм, егоже созда Соломон царь Господеви, (бяше) шестьдесят лакот долгота его, и двадесяти лакот широта его, и тридесяти лакот высота его: 3 и притвор, иже пред лицем храма, двадесяти лакот долгота его в широту дому, и десяти лакот широта его пред лицем дому: и созда храм, и соверши его. 4 И сотвори храму окна преклонены сокровены. 5 И созда на стене дому притворы около храма и давира. 6 И сотвори бока около, бок иже с низу, пяти лакот широта его, и средний шести лакот широта, и третий седми лакот широта его: понеже разстояние дому сотвори окрест внеуду храма, яко да не досязают стен храма. 7 И храму зиждему сущу, камением краесекомым нетесаным создася: млат же, и теслица, и всякое орудие железно не слышася в храме, егда созидатися ему. 8 И двери бока нижняго под стеною храма десною, и извиенный восход до средины, а от средины до трекровных. 9 И созда храм, и соверши его: и обстави храм дсками кедровыми. 10 И сотвори вязания окрест всего храма, пять лакот в высоту его, и связа вязание древом кедровым. 11 И бысть слово Господне к Соломону, глаголющее: 12 храм сей егоже ты созидаеши, аще пойдеши по заповедем Моим, и судбы Моя сотвориши, и сохраниши вся повеления Моя, еже пребывати в них, утвержу слово Мое с тобою, еже глаголах Давиду отцу твоему, 13 и вселюся посреде сынов Израилевых, и не оставлю людий Моих Израиля. 14 И созда Соломон храм, и сконча его. 15 И созда стены храму внутрь древом кедровым, от земли храма и даже до стен и даже до верха: около обстави содержащая древами внутрьуду и укрепи внутрь храма боками певговыми. 16 И созда двадесяти лакот от края стены бок един от земли даже до верха: и сотвори ему внутрь от давира стену до Святая святых. 17 И четыредесяти лакот бяше храм: сей (есть) храм внутреннейший. 18 И от кедра во храме внутрь постави плетение и дщицы и ваяния вся кедрова: камень не являшеся. 19 Пред лицем давира, посреде храма внутрь уготова поставити тамо кивот завета Господня. 20 И пред лицем давира двадесяти лакот долгота, и двадесяти лакот широта, и двадесяти лакот высота его, и объят его златом чистым: и сотвори олтарь кедровый: и повлече Соломон храм внутрь златом чистым, и пригвозди гвоздми златыми пред лицем давира, и объят и златом. 21 И весь храм объят златом до скончания всего храма. 22 И все внутрь давира покры златом. 23 И сотвори в давире два херувима от древ кипарисных, десять лакот мерою величество: 24 и пяти лакот крило херувима единаго, и пяти лакот крило его второе, десяти лакот от края крила его до края крила его: 25 и десяти лакот такожде (мера) херувиму второму, мера едина совершение едино обоим херувимом: 26 и высота херувима единаго десять лакот, такожде и второму херувиму. 27 И постави оба херувима посреде храма внутренняго: и простираху крила своя, и досязаше крило едино до стены храма, и крило другаго херувима досязаше до стены вторыя: и крила их яже бяху посреде храма, касашеся крило с крилом: 28 и объяты быша херувимы златом. 29 И на всех стенах храма около ваяния написа подобием херувимов, и финики, и изваянна произницающая внутрьуду и внеуду. 30 И помост храма из внутрьуду и внеуду объят златом. 31 И входу давира сотвори двери от древ смерчиих, и праги пятеричны, 32 и двои двери от древ певговых, и изваяния на них изваяна, херувимы, и финики, и дщицы простертыя, и объят я златом, и бяше златом устроено до херувимов и до фиников. 33 И тако сотвори вратом храма: и праги от древ смерчиих, притворы четверогубо. 34 И на обоих дверях древа певгова: два затвора дверь едина и вереи их, и два затвора дверь вторая вращающаяся в себе, 35 (на нихже сотвори) изваянныя херувимы и финики, и дщицы простертыя, и объятыя златом свешеным на изображение. 36 И созда двор внутренний: в три ряда нетесаных, и ряд тесанаго кедра около. 37 В лето четвертое основа храм Господень в месяце зии, во вторый месяц. 38 Во единонадесятое лето в месяце Вул, сей месяц осмый, совершися храм по всему словеси своему и по всему устроению своему: и созда его в седмь лет. === 7 === 1 И дом свой созда Соломон треминадесять леты, и соверши Соломон весь дом свой. 2 И созда дом древом Ливанским, сто лакот долгота его, и тридесять лакот высота его, и пятьдесят лакот широта его, и три ряды столпов кедровых, и рамена кедрова столпом. 3 И покры дсками кедровыми дом свыше над странами столпов: и число столпов четыредесять и пять, 4 по пятинадесяти ряд: и окон три ряда, и камара над камарою трегубо. 5 И вся двери и камары четвероуголны притворени: от дверий над дверми трегубо. 6 И елам столпов, пятьдесят лакот в долготу, и тридесять лакот в широту привязани ко Еламу пред лицем их: и столпи и толстота пред лицем того елама. 7 И елам престолов идеже судити, елам судилища, и покры и от земли даже до верха дщицами кедровыми. 8 И дом в немже живяше, двор един распростерт сим по делу сему: и дом созда дщери фараони, юже взя Соломон, по еламу сему. 9 Вся сия бяху от каменей драгоценных изваяна от разстояния внутрьуду, и от основания до крова. 10 И внеуду ко двору великому основаному камением драгим великим, камением десяти лакот и осми лакот, 11 и с верху честным камением, по тойже мере несеченых, и кедрами. 12 Окрест двора великаго три ряда нетесаных, и ряд тесанаго кедра: и созда двор храма внутреннейший притвора дому Сущаго пред лицем храма. 13 И посла царь Соломон в Тир, и взя Хирама от Тира, 14 сына жены вдовицы, и той бе от колена Неффалимля: и отец его бе муж Тирин, делатель меди, и исполнен художества и разума и ведения, еже делати всяко дело медяное. И приведоша его ко царю Соломону: и сотвори вся дела: 15 и слия два столпа еламу храма, осминадесяти лакот высота столпа, и окрест мера его четыренадесятих лакот окружаше его толстота столпа: четырех перстов вглубления: такожде бе и вторый столп: 16 и два возложения сотвори, лежати на главах столпов излиянная от меди: пяти лакот высота возложения единаго, и пяти лакот высота возложения втораго: 17 и сотвори две мрежи еже покрыти возложения столпов: и мрежу возложению единому, и мрежу возложению второму: 18 и дело висимо, два ряда яблок медяных сомрежены, дело висимо, ряд над рядом: такожде сотвори возложению второму: 19 и возложения на главах столпов, подобна крину, якоже во еламе, четырех лакот: 20 и строение над обоими столпами, и свыше стран возложение строения, и яблоков двести рядов около на вторей главе. 21 И постави столпы во еламе храма: и постави столп един и нарече имя ему Иахун, и постави столп вторый и нарече имя ему Воос. 22 И на главах столпов дело криново, и сконча дело столпов. 23 И сотвори море лияно десять лакот от края до края его, кругло окрест его: пять лакот высота его, и объятие его тридесять лактей окружаше е окрест: 24 и подкрепления под краем его окрест, окружаху е десять лакот около: два ряда подкреплений слиты во слиянии его стояща. 25 И дванадесять волов под морем, три зрящии на север, и три зрящии на юг, и три на запад, и три на восток, и вся задняя их внутрьуду, и море верху их. 26 И устие его бяше яко устие потиря прозябающаго крина, и толстота его на длань. 27 И сотвори десять мехонофов медяных, пять лакот долгота мехонофа единаго, и четыри лакти широта его, и шесть лакот высота его: 28 и сие дело мехонофов, споеное о себе и споеное посреде произницающих: 29 и на споениих их посреде произницающих львы и волы и херувимы, и над произницающими, такожде и свыше и снизу львов и волов места, дело низхождения: 30 и четыри колеса медна и мехонофу коемуждо, и придержания медяна, и четыри части их, и рамена их под умывалницами, и рамена слияная об ону страну коегождо прилежаще. 31 И уста его внутрь главы, и выше единаго лактя, и уста его кругла: дело такожде лактя единаго и пол лактя: и на устах его изваяния, и междустолпия их четвероуголна, а не кругла. 32 И четыри колеса под междустолпиями, и руце в колесех в мехонофе: и высота единаго колеса лакоть и пол. 33 И дело колес, яко дело колес колесницы: руце их и выи их, и хребты их и делания их вся лияна. 34 Четыри рамена на четырех углех мехонофа единаго, и от мехонофа рамена его. 35 И на главе мехонофа пол лактя величество его, кругло окрест над главою мехонофовою: и начало рук его и спаяния его от него: и отверзашеся в началех рук своих. 36 И спаяния его подобия херувимов и львов и фиников стоящая, держащееся коеждо противу лица его внутрь и окрест. 37 По томужде сотвори вся десять мехонофы, по чину единому и по мере единей, мера едина всем. 38 И сотвори десять конобов медяных вмещающих по четыредесяти мер во един коноб, мерою четырех лактей: коноб един на коемждо мехонофе, от десяти мехонофов. 39 И постави пять мехонофов по десней стране храма на восток, и пять по левей стране храма: и море от страны храма одесную на востоки в угле полуденнем. 40 И сотвори Хирам конобы и теплицы и фиалы: и сконча Хирам вся дела творя, яже творяше цареви Соломону во храме Господни: 41 столпа два, и обвития столпов над главами столпов два: и мрежи две, еже покрывати оба обвития изваяных, яже на столпех суть: 42 яблоков медяных четыреста обема мрежема, два ряда яблоков мрежи единей, покрывати оба обвития мехонофа, яже на обоих столпех: 43 и мехонофов десять и конобов десять на мехонофе: 44 и море едино, и волов дванадесять под морем: 45 и конобы и теплицы и фиалы, и вся сосуды, яже сотвори Хирам царю Соломону во храме Господни: и столпов четыредесять и осмь дому царева и дому Господня: вся дела царева, яже сотвори Хирам, быша медяна вся. 46 Близ Иордана слия их царь в толстоте земли, между Сокхофом и между Сирамом. 47 Не бе веса меди, от неяже творяше вся дела сия, от множества зело, не бе предела весу меди. 48 И даде царь Соломон вся сосуды, яже сотвори во храм Господень: олтарь златый и трапезу, на нейже хлебы приношения, златую, 49 и свещники пять одесную и пять ошуюю пред лицем давира (Святая святых) златыя спаяны, и лампады, и светилники, и щипцы златыя, 50 и преддверие, и гвоздие, и фиалы и блюда и кадилницы златы спаяны: и вереи врат дому внутренняго Святаго Святых, и двери храма златыя. 51 И совершися дело, еже сотвори Соломон во храме Господни: и внесе Соломон святая Давида отца своего и вся святая Соломонова, сребро и злато, и сосуды даде в сокровище храма Господня. === 8 === 1 И собра царь Соломон вся старейшины Израилевы, вся начала колен, старейшины отечеств сынов Израилевых к себе во Сион, еже пренести кивот завета Господня от града Давидова: той есть Сион. 2 И собрашася ко царю Соломону вси людие Израилевы в месяц Афаним в праздник: сей есть месяц седмый. 3 И приидоша вси старейшины Израилевы, и взяша иерее кивот, 4 и вознесоша кивот Господень, и скинию свидения, и вся сосуды святыя яже во скинии свидения: и вознесоша я иерее и левити. 5 Царь же Соломон и весь собор Израилский, собравшеся к нему, с ним пред кивотом жряху волы и овцы несочтенны, безчисленны от множества. 6 И внесоша иерее кивот завета Господня на место его во давир храма, во Святая Святых, под крила херувимов. 7 Херувими бо беша распростерше криле над местом кивота: и окрываху херувими над кивотом и над святыми его сверху. 8 И обдержаста освященая: и зряхуся главы освященных от святых к лицу давира, и не являхуся вне. 9 Не бе в кивоте токмо две скрижали каменны, скрижали завета, ихже положи Моисей в Хориве, яже завеща Господь со сынами Израилевыми, внегда исходити им от земли Египетския. 10 И бысть егда изыдоша иерее из святилища, и облак исполни храм Господень, 11 и не можаху иерее стати служити от лица облака, яко исполни слава Господня храм. 12 Тогда рече Соломон: Господь рече еже обитати во мгле, 13 аз же создах дом имени Твоему свят Тебе и готов, и престолу твоему, еже обитати Тебе в нем во веки. 14 И обрати царь лице свое и благослови царь всего Израиля: весь же собор Израилев стояше. 15 И рече (царь): благословен Господь Бог Израилев днесь, Иже глагола усты Своими о Давиде отце моем и рукама Своима исполни, глаголя: 16 от дне в оньже изведох люди Моя Израиля из Египта, не избрах града от всех племен Израилевых на создание храму, еже быти имени Моему тамо: но избрах во Иерусалиме быти имени Моему тамо: и избрах Давида быти ему властелину над людьми Моими Израилем: 17 и бысть на сердцы отцу моему Давиду, еже создати храм имени Господа Бога Израилева, 18 и рече Господь к Давиду отцу моему: понеже взыде на сердце твое еже создати храм имени Моему, добре сотворил еси, яко бысть на сердцы твоем: 19 обаче ты не созиждеши храма, но разве сын твой, иже изыде из чресл твоих, той созиждет храм имени Моему: 20 и возстави Господь глаголгол Свой егоже глагола: и востах вместо Давида отца моего, и седох на престоле Израилеве, якоже глагола Господь, и создах храм имени Господа Бога Израилева, 21 и поставих тамо место кивоту, в немже есть тамо завет Господень, егоже завеща Господь со отцы нашими во извождении их из земли Египетския. 22 И ста Соломон пред лицем олтаря Господня пред всем собором Израилевым и воздвиже руце свои на небо, 23 и рече: Господи Боже Израилев, несть якоже Ты Бог на небеси горе и на земли низу, храняй завет и милость рабу Твоему ходящему пред Тобою всем сердцем своим, 24 яже сохранил еси рабу Твоему Давиду отцу моему: ибо глаголал еси усты Твоими и рукама Твоима совершил еси, якоже день сей: 25 и ныне, Господи Боже Израилев, сохрани рабу Твоему Давиду отцу моему, яже рекл еси ему, глаголя: не оскудеет муж от лица Моего седяй на престоле Израилеве, токмо аще сохранят чада твоя пути своя, еже ходити предо Мною, якоже ходил еси предо Мною: 26 и ныне, Господи Боже Израилев, да уверится глаголгол Твой, егоже рекл еси Давиду отцу моему: 27 яко аще истинно вселится Бог с человеки на земли? Аще небо и небо небесе не довлеют Ти, кольми паче храм сей, егоже создах имени Твоему? 28 И да призриши на молитву мою, Господи Боже Израилев, послушати молитвы, еюже молится раб Твой пред тобою к Тебе днесь, 29 да будут очи Твои отверсты на храм сей день и нощь, на место о немже рекл еси: будет имя Мое тамо на услышание молитвы, еюже молится раб Твой на месте сем день и нощь: 30 и услышиши молитву раба Твоего и людий Твоих Израиля, о нихже помолятся на месте сем: и ты услышиши на месте обиталища Твоего на небеси, и сотвориши и помилуеши: 31 елика аще согрешит кийждо ко искреннему своему, и аще приимет на него клятву еже кляти его, и приидет, и исповесть пред лицем олтаря Твоего в храме сем: 32 и Ты услышиши от небесе, и сотвориши суд людем Твоим Израилю: осудити беззаконнаго, дати путь его на главу его, и оправдити праведнаго, дати ему по правде его: 33 егда падут людие Твои Израиль пред враги, яко согрешат Ти, и обратятся к Тебе, и исповедятся имени Твоему, и помолятся и возглаголют молитву к Тебе в храме сем: 34 и Ты услышиши с небесе, и милостив будеши о согрешениих людий Своих Израиля, и возвратиши я в землю, юже дал еси отцем их: 35 внегда заключитися небеси и не быти дождю, яко согрешат Ти, и помолятся на месте сем, и исповедятся имени Твоему, и от грех своих обратятся, егда смириши их: 36 и услышиши с небесе, и милостив будеши о гресех раба Твоего и людий Твоих Израиля: яко явиши им путь благий ходити по нему, и даси дождь на землю, юже дал еси людем Твоим в достояние: 37 глад аще будет, смерть аще будет, егда будет возжжение, гусеницы, ржа аще будет, и аще оскорбят я врази их в единем от градов их: все противное, всяка болезнь, 38 всяка молитва, всяко моление аще будет всякому человеку от людий Израилевых, егда познает кийждо болезнь сердца своего, и воздвигнет руце свои в храме сем: 39 и Ты услышиши от небесе, от готоваго жилища Твоего, и милостив будеши, и сотвориши, и даси коемуждо по путем его, якоже увеси сердце его, яко Ты един токмо веси всех сердца сынов человеческих: 40 да боятся Тебе вся дни, в няже поживут на земли, юже дал еси отцем нашым: 41 и чуждему, иже несть от людий Твоих Израиля, той аще приидет от земли издалеча ради имене Твоего, зане услышат имя Твое велико, и руку Твою крепкую, и мышцу Твою высокую, 42 и приидет, и помолится на месте сем: 43 и ты услышиши с небесе от готоваго жилища Твоего, и сотвориши по всем, в еликих аще призовет Тя чуждий, яко да уразумеют вси людие земнии имя Твое и убоятся Тебе, якоже людие Твои Израиль, и разумеют, яко имя Твое наречеся на храме сем, егоже создах: 44 егда изыдут людие Твои на брань на враги своя, путем имже возвратиши я, и помолятся именем Господним путем града, егоже избрал еси Себе, и ко храму, егоже аз создах имени Твоему: 45 и ты услышиши с небесе молитву их и моления их, и сотвориши оправдание им: 46 яко согрешат Ти, яко несть человек, иже не согрешит, и разгневаешися на ня, и предаси я пред враги, и попленят их пленящии в землю далече, или близ, 47 и обратят сердца своя в земли, аможе преселишася, и обратятся, и помолятся Тебе в земли преселения своего, глаголюще: согрешихом, беззаконновахом, неправдовахом: 48 и обратятся ко Тебе всем сердцем своим и всею душею своею в земли враг своих, аможе превел еси их, и помолятся к Тебе по пути земли своея, юже дал еси отцем их, и ко граду, егоже избрал еси, и ко храму, егоже создах имени Твоему: 49 и услышиши от небесе, от готоваго жилища Твоего молитву их и моление их, и сотвориши оправдание им, 50 и милостив будеши неправдам их, имиже согрешиша Ти, и по всем отметанием их, имиже отвергошася Тебе, да даси их в щедроты пред пленившими их, и ущедрят я: 51 яко людие Твои и наследие Твое суть, ихже извел еси из земли Египетския от среды пещи железныя: 52 и да будут уши Твои и очи Твои отверсты на молитву раба Твоего и к молению людий Твоих Израиля, послушати их о всех, о нихже призовут Тя, 53 яко Ты избрал еси я Себе в наследие от всех людий земли, якоже глаголал еси рукою раба Твоего Моисеа, внегда извести Тебе отцы нашя из земли Египетския, Господи Господи. Тогда глагола Соломон о храме, егда соверши созидати его: солнце познано сотвори на небеси: Господь рече пребывати во мгле: созижди храм Мой, храм благолепный себе, еже пребывати в новости: не сие ли писано в книгах песни? 54 И бысть егда сконча Соломон моляся ко Господу всею молитвою и молением сим, и воста от лица олтаря Господня припад на колена своя, и руце свои возде на небо, 55 и ста, и благослови весь собор Израилев, гласом велиим глаголя: 56 благословен Господь (Бог) днесь, Иже даде покой людем Своим Израилю, по всем елика глагола: не пременися слово ни едино во всех словесех Его благих, имиже глагола рукою Моисеа раба Своего: 57 да будет Господь Бог наш с нами, якоже бе со отцы нашими: да не оставит нас, ниже да отвратит нас, 58 преклонити сердца наша к Нему, еже ходити во всех путех Его и хранити вся заповеди Его и повеления Его и оправдания Его, яже заповеда отцем нашым: 59 и да будут словеса сия, имиже молихся пред Господем Богом нашим днесь, приближающеся Господу Богу нашему день и нощь, еже творити оправдания рабу Твоему и оправдания людем Твоим Израилю во вся дни: 60 яко да разумеют вси людие земли, яко Господь Бог Той Сам Бог, и несть инаго, 61 и да будут сердца наша совершенна ко Господу Богу нашему преподобно ходити в повелениих Его и хранити заповеди Его, якоже день сей. 62 И царь и вси сынове Израилевы пожроша жертву пред Господем. 63 И пожре царь Соломон жертвы мирныя, яже пожре Господу, волов двадесять две тысящы и овец сто и двадесять тысящ. И обнови царь храм Господень и вси сынове Израилевы. 64 В той день освяти царь (Соломон) средину двора, яже пред лицем храма Господня: яко сотвори тамо всесожжение и дары, и жертвы и тучная мирных, яко олтарь медяный, иже пред Господем, мал бе, еже не возмощи вместити всесожжения даров и жертвы мирных. 65 И сотвори Соломон праздник в той день, и весь Израиль с ним, собор велий, от входа Емафа даже до реки Египта, пред Господем Богом нашим, у храма, егоже созда, ядый и пия и веселяся пред Господем Богом нашим седмь дний, 66 и во осмый день распусти люди. И благословиша царя, и идоша кийждо в домы своя, радующеся веселым сердцем о благих, яже сотвори Господь Давиду рабу Своему и Израилю людем Своим. === 9 === 1 И бысть егда сконча Соломон зиждяй храм Господень и дом царев и всякое дело свое Соломон, елика восхоте сотворити, 2 и явися Господь Соломону вторицею, якоже явися ему в Гаваоне, 3 и рече к нему Господь: услышах глас молитвы твоея и моления твоего, имже молился еси предо Мною: сотворих ти по всей молитве твоей, и освятих храм сей, егоже создал еси, еже положити имя Мое тамо во веки, и будут очи Мои ту и сердце Мое во вся дни: 4 и ты аще пойдеши предо Мною, якоже ходи Давид отец твой в преподобии сердца и в правоте, и еже творити по всем, яже заповедах ему, и повеления Моя и заповеди Моя сохраниши: 5 и возставлю престол царствия твоего во Израили во веки, якоже глаголах к Давиду отцу твоему, глаголя: не оскудеет ти муж властелин во Израили: 6 аще же отвращающеся отвратитеся вы и чада ваша от Мене и не сохраните заповедий Моих и повелений Моих, яже даде Моисей пред вами, и пойдете и поработаете богом иным и поклонитеся им: 7 и изрину Израиля из земли, юже дах им, и храм сей, егоже освятих имени Моему, отвергу от лица Моего: и будет Израиль в погубление и во глаголание всем людем: 8 и дом сей будет высокий, всяк преходяй сквозе его ужаснется, и возсвищет и речет: чесо ради сотвори Господь тако земли сей и храму сему? 9 И рекут: понеже оставиша Господа Бога своего, иже изведе отцы их из Египта, из дому работы, и прияша боги чуждыя, и поклонишася им, и поработаша им, сего ради наведе на ня Господь зло сие. 10 И бысть по двадесяти летех, в няже созда Соломон два домы, храм Господень и дом царев, 11 Хирам царь Тирский помогаше Соломону древы кедрскими и древы певговыми и златом и всем хотением его: тогда даде Соломон Хираму двадесять градов в земли Галилейстей. 12 И изыде Хирам из Тира и пойде в Галилею видети грады, яже даде ему Соломон: и не быша ему угодни, 13 и рече: что гради сии, яже дал ми еси, брате? И нарече я предел (Хавуль), до днешняго дне. 14 И принесе Хирам Соломону сто и двадесять талант злата. 15 Сие же есть число даяния еже принесе царь Соломон, да созиждет храм Господень и дом царев, и Мелон и стену Иерусалимску и Краеградие еже оградити стену града Давидова, и Асур и Магедо и Газер. 16 Фараон царь Египетский взыде и взя Газер и сожже и огнем, и Ханаана живущаго во граде том погуби: и даде его в дар дщери своей, жене Соломони. 17 И согради Соломон Газер и Вефорон нижний, 18 и Валааф и Фамор в пустыни. 19 И вся грады крепкия, иже быша Соломону, и вся грады, идеже бяху колесницы, и вся грады, идеже бяху конницы его, и все еже бысть угодно царю Соломону, созда во Иерусалиме, и в Ливане и во всей земли царства своего. 20 Всех людий оставшихся от Аморреа и Хеттеа, и Ферезеа и Хананеа, и Евеа и Иевусеа и Гергесеа, не сущих от сынов Израилевых, 21 сынов их оставшихся по них на земли, ихже не возмогоша сынове Израилевы потребити их, царь Соломон поработи их даяти дань даже до дне сего: 22 от сынов же Израилевых не даде в работу Соломон, яко тии бяху мужие храбрии, и отроцы его, и князи его, и тристаты его, и воеводы колесниц его, и конницы его. 23 И бяху старейшины приставленным над делы царя Соломона, пять сот пятьдесят повелевающии людем делающым дело. 24 Дщерь же фараона прейде из града Давидова в дом свой, егоже созда ей Соломон, тогда созда Мелон. 25 И приношаше Соломон трижды в год всесожжения и мирныя жертвы на олтарь, егоже созижде Господу, и кадяше фимиам пред Господем: и соверши храм. 26 И сотвори царь Соломон корабль в Гасионе Гаверстем, иже при Елафе, при устии моря Последняго, в земли Едомстей. 27 И посла Хирам на корабли от отрок своих мужы корабелники управляти ведущих море со отроки Соломони: 28 и приидоша в Софир, и взяша оттуду злата четыре ста и двадесять талант и принесоша царю Соломону. === 10 === 1 И царица Савска услыша имя Соломоне и имя Господне, и прииде искусити его притчами: 2 и прииде во Иерусалим с силою тяжкою зело: и на велблюдех привезоша ароматы и злата много зело, и камение драгое: и вниде к Соломону и глагола ему вся, елика име на сердцы своем. 3 И возвести ей Соломон вся глаголы ея: и не бе слово презрено от царя, егоже не возвести ей. 4 И виде царица Савска весь смысл Соломонь и дом егоже созда, 5 и снеди Соломони, и жилища отроков его, и предстояние служащих ему, и облачение его, и виночерпцы его, и всесожжения его, яже приношаше во храме Господни, и вне себе бысть, 6 и рече к Соломону царю: истинна суть словеса, яже слышах в земли моей, 7 о словесех твоих и о смысле твоем: и не ях веры глаголющым ми, дондеже приидох семо, и видеста очи мои: и се, несть ни пол того, якоже ми поведаша: приложил еси премудрость и благая к сим паче всякаго слуха, егоже слышах в земли моей: 8 блаженны жены твоя, блажени отроцы твои сии, иже предстоят пред тобою всегда, слышаще всякий смысл твой: 9 буди Господь Бог твой благословен, иже восхоте тя дати на престол Израилев, понеже возлюби Господь Израиля утвердити во веки и постави тя царя над ними творити суд в правде и в судбах их. 10 И даде Соломону сто и двадесять талант злата, и ароматы многи зело, и камение драгое: не приидоша еще таковыя ароматы во множестве, яже даде царица Савска царю Соломону. 11 И корабль Хирамль приносящь злато из Софира, (и) принесе древа нетесана многа зело, и камение драгое. 12 И сотвори царь древом нетесаным подпоры храму Господню и дому цареву, и сопели и гусли певцем: не приидоша по сем таковая древеса нетесаная на земли, ниже видена быша где даже до дне сего. 13 И царь Соломон даде царице Савстей вся, елика восхоте и елики проси у него, кроме всех, яже даде ей рукама своима Соломон царь, и возвратися, и отиде в землю свою, сама и вси отроцы ея. 14 И бе вес принесеннаго злата Соломону во едино лето шесть сот и шестьдесят и шесть талант злата, 15 кроме даней от подданных и от купцов и от всех царей странных и от воевод земных. 16 И сотвори царь Соломон триста копий златых кованных, по триста златых во едино копие вдела: 17 и триста щитов кованных златых, по три литры злата бяше на коемждо щите: и даде я царь во храм дубравы Ливанския. 18 И сотвори царь престол от костей слоновых велий и позлати его златом искушеным: 19 шесть степеней престолу, и образы телцов престолу созади, и верх престола кругл бе созади его, и руце сюду и сюду на престоле седалища, и два льва стояща при руках, 20 и дванадесять львы стояще ту на шести степенех сюду и сюду: не бяше тако во всяком царстве. 21 И вси сосуди, иже бяху при царе Соломоне, злати беша, и умывалницы златы и вси сосуди в храме дубравы Ливанския златокованны: не бяше сребра, понеже за ничто бе сребро во дни Соломони: 22 корабль бо Фарсийский царю Соломону на мори с корабли Хирамлими, единою во триех летех прихождаше цареви корабль из Фарсиса и приношаше злато и сребро, и зубы слоновы, и пифики и павы, и камение точеное и тесаное. 23 И возвеличися Соломон паче всех царей земных и богатством и смыслом. 24 И вси царие земстии искаху видети лице Соломона, еже бы услышати смысла его, егоже даде ему Господь в сердцы его: 25 и тии приношаху кийждо дары своя, и сосуды златы и сребряны, и ризы, стакти и сладкости, и кони и мски на всякое лето. 26 И собра Соломон колесницы и кони, и бяху Соломону четыредесять тысящ кобылиц в колесницы, и дванадесять тысящ конных: и постави я во градех колесниц, а (друзии бяху) у царя во Иерусалиме: и бе властелин всем царем от реки и до земли иноплеменник и до предел Египта. 27 И сложи царь злато и сребро во Иерусалиме якоже камение, и кедры сложи якоже черничие, еже на поли во множестве. 28 И привождаху Соломону кони от Египта и от Фекуя купцы царстии и куповаху от Фекуя променою. 29 И прихождаху колесницы из Египта за шесть сот сребреник, и конь за сто пятьдесят сребреник: такожде и ко всем царем Хеттимским и Сирийским по морю исхождаху. === 11 === 1 И царь Соломон бе женолюбив, и поя жены чуждыя, и дщерь фараоню, Моавитяныни, Амманитяныни, и Аморреаныни, 2 от язык, ихже отрече Господь сыном Израилевым: не входите в ня, и тии да не входят в вас, да не отвратят душ ваших вслед идол своих: к тем прилепися Соломон любити, 3 и быша ему жен началных седмь сот, и подложниц триста. 4 И бысть в время старости Соломони, и совратиша жены чуждия сердце его вслед богов иных, и не бе сердце его совершенно с Господем Богом его, якоже сердце Давида отца его, 5 и хождаше Соломон вслед Астарта мерзости Сидонския и вслед царя их, идола сынов Аммоних. 6 И сотвори Соломон лукавое пред Господем: и не хождаше вслед Господа, якоже Давид отец его. 7 Тогда созда Соломон высоко (капище) Хамосу, идолу Моавлю, и царю их, идолу сынов Аммоних, и Астарте, мерзости Сидонстей, на горе яже пред Иерусалимом: 8 и тако сотвори всем женам своим чуждим, яже кадяху и жряху идолом своим. 9 И разгневася Господь на Соломона, яко уклони сердце свое от Господа Бога Израилева, и явльшагося ему дважды 10 и заповедавшаго ему дважды о словеси сем, весма не ходити ему вслед богов инех, но хранити и творити яже заповеда ему Господь Бог, 11 и рече Господь к Соломону: понеже быша сия с тобою, и не сохранил еси заповедий Моих и повелений Моих, яже заповедах тебе, раздирая раздеру царство твое из руку твоею и дам е рабу твоему: 12 обаче во дни твоя не сотворю сих Давида ради отца твоего: от руки же сына твоего отиму е: 13 токмо всего царства не возму, скипетр един дам сыну твоему Давида ради раба Моего и Иерусалима ради града, егоже избрах. 14 И воздвиже Господь противника на Соломона Адера Идумеанина от семене царска во Идумеи. 15 И бысть егда искорени Давид Едома, егда иде Иоав воевода вой погребати побиенныя, изсече всяк мужеск пол во Идумеи: 16 яко шесть месяц седяше тамо Иоав и весь Израиль во Идумеи, дондеже изби всяк мужеск пол в Идумеи: 17 и избеже Адер сам и вси мужие Идумейстии от отроков отца его с ним, и внидоша во Египет: Адер же бяше отрочищь мал. 18 И восташа мужие из града Мадиамска, и приидоша в Фаран, и взяша мужей с собою и приидоша к фараону царю Египетскому. И вниде Адер к фараону, и даде ему (царь) дом, и пищу определи ему, и землю даде ему. 19 И обрете Адер благодать пред очима фараонима зело, и даде ему в жену сестру жены своея, сестру Фекемины болшую. 20 И роди ему сестра Фекемины Адеру Ганивафа сына своего, и воскорми его Фекемина посреде сынов фараоних, и бе Ганиваф посреде сынов фараоних. 21 И Адер услыша бо Египте, яко успе Давид со отцы своими, и яко умре Иоав воевода воинству, и рече Адер к фараону: отпусти мя, да возвращуся в землю мою. 22 И рече фараон Адеру: чим ты не доволен еси у мене? И се, ты просишися отити в землю свою? И рече ему Адер: яко отпущая да отпустиши мя. И возвратися Адер в землю свою. 23 И воздвиже Господь противника Соломону Разона, сына Елиадаева, иже убеже от Ададезера царя Сувска, господина своего. 24 И собрашася к нему мужие, и бе воевода полка мятежнаго, егда убиваше я Давид: и идоша в Дамаск, и седоша в нем, и воцаришася в Дамасце. 25 И бе стужая Израилеви во вся дни Соломони: сия злоба Адера: и отягчи Израиля и воцарися в земли Едомстей. 26 И Иеровоам сын Наватов, Ефрафянин от Сариры, сын жены вдовицы, раб Соломонов, и воздвиже руце на царя Соломона. 27 И сия вина, яко воздвиже руце на царя Соломона: царь Соломон созидаше Краеградие и ограждаше стеною град Давида отца своего: 28 Иеровоам же человек крепок силою. И виде Соломон отрока, яко муж дел есть, и постави его над бременами дому Иосифова. 29 И бысть во время оно, и Иеровоам изыде из Иерусалима, и обрете его Ахиа Силонитянин пророк на пути, и соврати его с пути: и бе Ахиа облечен в ризу нову: и (беста) оба едины на поли. 30 И взя Ахиа за ризу свою новую, яже бе на нем, и раздра ю на дванадесять жребий, 31 и рече Иеровоаму: приими себе десять жребий, яко тако глаголет Господь Бог Израилев: се, Аз отторгаю царство из руки Соломони, и дам ти хоругвий десять: 32 и две хоругви будут ему, раба ради Моего Давида и Иерусалима ради града, егоже избрах Себе от всех колен Израилевых, 33 занеже остави Мя и поклонися Астарте мерзости Сидонстей и Хамосу и кумиром Моавлим и царю их претыканию сынов Аммоних, и не пойде по путем Моим, еже творити угодная предо Мною, якоже Давид отец его: 34 и не отиму царства всего от руку его, понеже защищая защищу его во вся дни живота его, Давида ради раба Моего, егоже избрах, иже сохрани заповеди Моя и оправдания: 35 и отиму царство от руки сына его, и дам ти десять хоругвий, 36 сыну же его дам две хоругви, яко да будет престол рабу Моему Давиду во вся дни предо Мною во Иерусалиме граде, егоже избрах Себе на положение имени Моему тамо: 37 и прииму тя, и воцаришися, в нихже желает душа твоя, и ты будеши царь над Израилем: 38 и будет аще сохраниши вся, елика заповедаю ти, и пойдеши по путем Моим, и сотвориши угодная предо Мною, хранити заповеди Моя и повеления Моя, якоже сотвори Давид раб Мой, и буду с тобою, и созижду ти дом верен, якоже создах Давиду, и дам ти Израиля: 39 и озлоблю род Давидов за сия, но не во вся дни. 40 И искаше Соломон убити Иеровоама. И воста Иеровоам, и убежа во Египет к Сусакиму царю Египетску, и бе во Египте, дондеже Соломон умре. 41 И прочая словес Соломоних, и вся елика сотвори, и весь смысл его, не се ли, сия писана быша в книзе словес Соломоних? 42 И дние, в няже царствова Соломон во Иерусалиме над всем Израилем, четыредесять лет. 43 И успе Соломон со отцы своими: и погребоша его во граде Давида отца его, и воцарися Ровоам сын его вместо его. === 12 === 1 И иде царь Ровоам в Сикиму, яко в Сикиму прииде весь Израиль воцарити его. 2 И бысть егда услыша Иеровоам сын Наватов, сущу ему еще во Египте, яко убегл бе от лица Соломона, и возвратися Иеровоам из Египта: 3 и послаша, и призваша его. И прииде Иеровоам и весь сонм Израилев, и рекоша людие к царю Ровоаму глаголюще: 4 отец твой отягчи ярем наш, ты же ныне облегчи от работы отца твоего жестокия и от ярма его тяжкаго, егоже возложи на ны, и поработаем ти. 5 И рече к ним: отидите (и пребудите) до третияго дне, и возвратитеся ко мне. И идоша. 6 И возвести Ровоам царь старейшинам, иже быша предстояще пред Соломоном отцем его, еще живу ему сущу, глаголя: како вы мыслите, да отвещаю людем сим слово? 7 И реша ему, глаголюще: аще в днешний день будеши раб людем сим и поработаеши им, и речеши им словеса блага, и будут ти раби во вся дни. 8 И пренебреже совет старейшин, яже совещаша ему, и советова со отроки воспитанными с ним предстоявшими пред лицем его, 9 и рече им: что вы совещаваете? И что отвещаю людем сим, иже реша ко мне, глаголюще: облегчи наш ярем, егоже возложи отец твой на ны? 10 И глаголаша к нему отроцы воспитаннии с ним и реша ему: сице да глаголеши людем сим, иже реша к тебе, глаголюще: отец твой отягчи ярем наш: ты же ныне облегчи от нас: сия речеши к ним: юность моя толстее чресл отца моего: 11 и ныне отец мой наложи на вы ярем тяжек, аз же приложу к ярму вашему: отец мой наказа вы ранами, аз же накажу вы скорпионами. 12 И прииде весь Израиль к царю Ровоаму в день третий, якоже рече им царь, глаголя: возвратитеся ко мне в день третий. 13 И отвеща царь к людем жестоко: и остави царь Ровоам совет старейшин, яже совещаша ему, 14 и рече к ним по совету отроков, глаголя: отец мой отягчи ярем ваш, аз же приложу к ярму вашему: отец мой наказа вы ранами, аз же накажу вы скорпионами. 15 И не послуша царь людий, яко бе превращение от Господа, яко да утвердит глаголгол Свой, егоже глагола рукою Ахии Силонитянина о Иеровоаме сыне Наватове. 16 И виде весь Израиль, яко не послуша царь гласа их, и отвещаша людие царю, глаголюще: кая нам часть в Давиде? И несть нам наследия в сыне Иессеове: бежи, Израилю, в кровы своя: ныне паси дом твой, Давиде. И отиде Израиль в кровы своя. 17 Над сынми же Израилевыми, иже живяху во градех Иудиных, воцарися Ровоам над ними. 18 И посла царь Ровоам Адонирама, иже над данию, и поби его камением весь Израиль, и умре. Царь же Ровоам потщася взыти на колесницу убежати во Иерусалим. 19 И отложися Израиль от дому Давидова даже до днесь. 20 И бысть егда услыша весь Израиль, яко возвратися Иеровоам от Египта, и послаша, и призваша его на собор, и воцариша его над Израилем: и не бе вслед дому Давидова, токмо хоругвь Иудина и Вениаминова. 21 И Ровоам вниде во Иерусалим и собра весь сонм Иудин и хоругвь Вениаминю, сто и двадесять тысящ юношей, творящих брань, ратовати на дом Израилев, еже возвратити царство Ровоаму сыну Соломоню. 22 И бысть слово Господне ко Самею человеку Божию, глаголя: 23 рцы к Ровоаму сыну Соломоню царю Иудину и ко всему дому Иудину и Вениаминову и ко оставшымся людем, глаголя: 24 тако глаголет Господь: не восходите, ниже ратуйте на братию вашу, на сыны Израилевы: но возвратитеся кийждо в домы своя, яко от Мене бысть глаголгол сей. И послушаша словесе Господня, и престаша ити по глаголголу Господню. 25 И созда Иеровоам Сикиму в горе Ефремли, и вселися в ней, и изыде оттуду, и созда Фануила. 26 И рече Иеровоам в сердцы своем: се, ныне возвратится царство в дом Давидов, 27 аще взыдут людие сии вознести жертву в храме Господни во Иерусалим, и обратится сердце людий ко Господу и господину своему, к Ровоаму царю Иудину, и убиют мя, и возвратятся к Ровоаму царю Иудину. 28 И усоветова царь, и сотвори две юницы златы, и рече к людем: довлеет вам восходити во Иерусалим: се, бози твои, Израилю, изведшии тя из земли Египетския. 29 И постави едину в Вефили, а другую в Дане. 30 И бысть слово сие на согрешение, и идяху людие пред лицем юницы единыя даже до Дана, и оставиша храм Господень. 31 И сотвори капища на высоких, и сотвори жерцов часть от людий, иже не беша от сынов Левииных. 32 И сотвори Иеровоам праздник в осмый месяц в пятыйнадесять день месяца, по празднику, иже в земли бе Иудине, и взыде на олтарь, егоже сотвори в Вефили, жрети юницам, яже сотвори, и постави в Вефили жерцы на высоких, яже сотвори. 33 И взыде на олтарь, егоже сотвори в Вефили, в осмый месяц, в пятыйнадесять день в праздник, егоже состави по сердцу своему: и сотвори праздник сыном Израилевым, и взыде на олтарь еже пожрети. === 13 === 1 И се, человек Божий прииде от Иуды по словеси Господню в Вефиль, и Иеровоам стояше на олтари своем жрети хотя: 2 и воззва ко олтарю словом Господним и рече: олтарю, олтарю, сице глаголет Господь: се, сын раждается дому Давидову, Иосиа имя ему, и пожрет на тебе жерцы, иже на высоких жрущыя на тебе, и кости человеческия сожжет на тебе. 3 И даст в день той чудо, глаголя: сей глаголгол, егоже рече Господь, глаголя: се, олтарь разсядется, и излиется тук иже на нем. 4 И бысть егда услыша царь Иеровоам словеса человека Божия воззвавшаго ко олтарю иже в Вефили, и простре царь руку свою от олтаря, глаголя: имите его. И се, усше рука его, юже простре нань, и не можаше возвратити ю к себе: 5 и олтарь разседеся, и излияся тук от олтаря, по чудеси, еже даде человек Божий словом Господним. 6 И рече царь Иеровоам человеку Божию: помолися ныне пред лицем Господа Бога твоего, дабы возвратилася рука моя ко мне. И помолися человек Божий пред лицем Господним, и возвратися рука царя к нему, и бысть якоже прежде. 7 И глагола царь к человеку Божию: вниди со мною в дом, и обедай, и дам ти дар. 8 И рече человек Божий к цареви: аще даси ми пол дому твоего, не вниду с тобою, ниже ям хлеба, ниже пию воды на месте сем, 9 яко тако заповеда ми Господь словом, глаголя: ни яждь хлеба, ни пий воды, ниже возвратися путем, имже шел еси. 10 И отиде путем иным, и не возвратися путем, имже прииде во Вефиль. 11 И пророк един стар живяше в Вефили, и приидоша сынове его и поведаша ему вся дела, яже сотвори человек Божий в день той в Вефили, и словеса, яже глагола цареви, поведаша отцу своему. 12 И рече к ним отец их, глаголя: киим путем иде? И показаша ему сынове его путь, имже иде человек Божий изшедый от Иуды. 13 И рече сыном своим: оседлайте ми осля. И оседлаша ему осля, и вседе на не, 14 и иде вслед человека Божия, и обрете его под дубом седяща, и рече ему: ты ли еси человек Божий пришедый от Иуды? И рече ему: аз. 15 И рече ему: гряди со мною, и яждь хлеб. 16 И рече ему: не могу возвратитися с тобою, ниже ям хлеба, ни пию воды на месте сем, 17 яко тако заповеда ми Господь словом, глаголя: не яждь хлеба тамо, ниже пий воды тамо, и да не возвратишися путем тем, имже шел еси. 18 И рече к нему: и аз пророк есмь якоже ты, и Ангел глагола ко мне словом Господним, глаголя: возврати его к себе в дом твой, да снест хлеба и пиет воду. И солга ему, 19 и возврати его: и яде хлеб, и пи воду в дому его. 20 И бысть им седящым на трапезе, и бысть слово Господне ко пророку возвращшему его. 21 И рече к человеку Божию пришедшему от Иуды, глаголя: сице глаголет Господь: понеже преогорчил еси глаголгол Господень и не сохранил еси заповеди, юже заповеда тебе Господь Бог твой, 22 и возвратився ял еси хлеб и пил еси воду на месте сем, о немже рече к тебе, глаголя: да не яси хлеба и не пиеши воды: сего ради не внидет во гроб тело твое со отцы твоими. 23 И бысть по ядении хлеба и по питии воды, и оседла осля тому пророку, и возвратися, и отиде: 24 и обрете его лев на пути, и умертви его: и бе тело его повержено на пути, и осел стояше над ним, и лев стояше близ телесе (его): 25 и се, мужие мимоидуще, и видеша мертва повержена на пути и льва стояща близ мертваго: и приидоша, и поведаша во граде, в немже живяше пророк старый. 26 И услыша (сие пророк) возвративый его с пути и рече: человек Божии сей есть, иже преступи глаголгол Божий, и предаде его Господь льву, и сокруши его, и умертви его по глаголголу Господню, егоже рече ему. 27 И повеле сыном своим, глаголя: оседлайте ми осля. И оседлаша. 28 И пойде, и обрете тело его повержено на пути, и осел и лев стояста над телом, и не снеде лев телесе человека Божия и не сокруши осла. 29 И взя пророк тело человека Божия, и возложи е на осля, и возврати е пророк, и вниде во град погребсти его, 30 и положи тело его во гробе своем, и рыдаше по нем: увы, брате. 31 И бысть по рыдании о нем, и рече к сыном своим, глаголя: аще умру, погребите мя во гробе сем, идеже человек Божий погребен есть, при костех его положите мя, да спасутся кости моя с костьми его, 32 яко сбудется глагол, егоже глагола словом Господним о олтари, иже во Вефили, и о домех высоких, иже в Самарии. 33 И по глаголе сем не обратися Иеровоам от злобы своея, и возвратися, и сотвори от части единыя людий жерцы высоких: иже хотяше, исполняше руку свою, и бываше жрец на высоких. 34 И бысть глагол сей в прегрешение дому Иеровоамлю, и на испровержение, и на изчезновение от лица земли. === 14 === 1 Во время оно разболеся Авиа сын Иеровоамль. 2 И рече Иеровоам к жене своей: востани и измени ризы своя, да не познают, яко ты жена Иеровоамова, и иди в Силом: се бо, тамо Ахиа пророк: той глагола мне еже царствовати над людьми сими: 3 и возми в руце твои человеку Божию десять хлебов, и опресноки чадом его, и гроздие и сосуд меда, и иди к нему: той возвестит ти, что будет отрочати. 4 И сотвори тако жена Иеровоамля: и воста и иде в Силом, и вниде в дом Ахиин: человек же стар бяше еже видети, и притупистася очи его от старости его. 5 И рече Господь ко Ахии: се, жена Иеровоамова входит вопрошати тя о сыне своем, яко болезнует: по сему и по сему да глаголеши к ней. И бысть внегда внити ей, и она странноявляшеся. 6 И бысть егда услыша Ахиа шум ног ея, входящей ей во врата, и рече: вниди, жено Иеровоамова, почто ты тако странноявляешися? Аз бо есмь посланник к тебе жесток: 7 шедши рцы Иеровоаму: сия глаголет Господь Бог Израилев: понеже толико вознесох тя от среды людий, и дах тя вожда над людьми Моими Израилем, 8 и раздрах царство от дому Давидова, и дах е тебе, ты же не был еси якоже раб Мой Давид, иже сохрани заповеди Моя, и иже хождаше вслед Мене всем сердцем своим, еже творити всякую правоту пред очима Моима, 9 и излукавствовал еси, еже творити паче всех елицы быша пред лицем твоим, и пошел еси и сотворил еси себе боги чужды и слияны, еже раздражити Мя, и отвергл Мя еси назад себе: 10 сего ради се, Аз навожду злая на дом Иеровоамов, и потреблю Иеровоамля мочащаго к стене, держащагося и оставленаго во Израили, и истреблю дом Иеровоамов, якоже истребляется гной, дондеже скончатися ему: 11 умерших Иеровоамлих во граде снедят пси, и умершаго на селе снедят птицы небесныя, яко Господь глагола: 12 ты же воставши иди в дом твой: внегда входити ногама твоима во град, умрет детищь, 13 и восплачется по нем весь Израиль, и погребут его, яко той един внидет Иеровоаму во гроб, яко обретеся в нем глагол благ о Господе Бозе Израилеве в дому Иеровоамли: 14 и возставит Господь Себе царя над Израилем, иже поразит дом Иеровоамов в сей день: а что, и ныне? 15 И поразит Господь Бог Израиля, якоже колеблется трость на воде: и истребит Израиля свыше земли благия сея, юже даде отцем их, и завеет их за ону страну реки, понеже сотвориша дубравы своя, прогневляюще Господа, 16 и предаст Господь Израиля за грехи Иеровоамли, иже согреши и иже во грех введе Израиля. 17 И воста жена Иеровоамля и прииде во Сариру. И бысть егда вниде в преддверие дому, и детищь умре. 18 И погребоша его, и плакашася его весь Израиль по словеси Господню, еже глагола рукою раба Своего Ахии пророка. 19 И останок словес Иеровоамовых, елика ратоваше и елика царствоваше, се, сия написана в книзе словес дний царей Израилевых. 20 И дние, в нихже царствова Иеровоам, двадесять два лета: и успе со отцы своими, и воцарися Нават сын его вместо его. 21 Ровоам же сын Соломонов царствова над Иудою: бе четыредесяти и единаго лета, егда нача царствовати, и седмьнадесять лет царствова во Иерусалиме граде, егоже избра Господь положити имя Свое тамо от всех племен Израилевых. И имя матере его Наама Амманитяныня. 22 И сотвори Ровоам лукавое пред Господем: и раздражи Его о всех, яже сотвориша отцы их, о гресех их, имиже согрешиша: 23 и создаша сии себе высокая, и столпы, и капища на всяцем холме высоцем и под всяцем древом сеновным: 24 и смешение бе в земли их, и сотвориша от всех мерзостей языческих, яже отя Господь от лица сынов Израилевых. 25 И бысть в лето пятое царствующаго Ровоама, взыде Сусаким царь Египетский на Иерусалим 26 и взя вся сокровища дому Господня и сокровища дому царева, и копия златая, яже взя Давид из руки отроков Адраазара царя Сувскаго и внесе я во Иерусалим: вся сия взя, и щиты златыя, яже сотвори Соломон, и внесе я во Египет. 27 И сотвори царь Ровоам щиты медяныя вместо тех, и постави над ними властели от предходящих пред ним, иже храняху врата дому царева: 28 и бысть егда вхождаше царь в дом Господень, и ношаху оныя предходящии, и паки возвращаху тыя во оружехранилище предходящих. 29 Прочая же словес Ровоамлих, и вся яже сотвори, не се ли, сия писана суть в книзе словес дний царства Иудина? 30 И брань бе между Ровоамом и между Иеровоамом во вся дни. 31 И успе Ровоам со отцы своими, и погребен бысть со отцы своими во граде Давидове. И воцарися Авиа сын его вместо его. === 15 === 1 И во осмоенадесять лето царства Иеровоама сына Наватова, воцарися Авиа сын Ровоамль над Иудою, 2 и три лета царствова во Иерусалиме. Имя же матере его Мааха, дщи Авессаломля. 3 И хождаше во всех гресех отца своего, яже сотвори пред ним, и не бе сердце его совершено с Господем Богом его, якоже сердце Давида отца его: 4 яко Давида ради остави ему Господь Бог его останок во Иерусалиме, да возставит по нем чада его и утвердит Иерусалим, 5 понеже сотвори Давид правое пред Господем и не уклонися от всех, яже заповеда ему вся дни живота его, кроме слова Урии Хеттеанина. 6 И брань бе между Ровоамом и между Иеровоамом во вся дни живота их. 7 И прочая словес Авииных, и вся яже сотвори, не се ли, сия написана в книзе слов дний царей Иудиных? И брань бе между Авиею и между Иеровоамом. 8 И успе Авиа со отцы своими в двадесятое лето Иеровоама, и погребоша его со отцы его во граде Давидове. И воцарися Аса сын его вместо его. 9 И в лето двадесятое Иеровоама царя Израилева, царствоваше Аса над Иудою, 10 и четыредесять и едино лето царствова во Иерусалиме. Имя же матере его Ана, дщи Авессаломля. 11 И сотвори Аса правое пред Господем, якоже Давид отец его, 12 и отя скверная от земли, и искорени вся изваянная, яже сотвориша отцы его, 13 и Ану матерь свою отстави еже не владети ей, понеже сотвори сонмище в Дубраве своей: и изсече Аса Гай ея и сожже огнем в потоце Кедрстем: 14 высоких же не искорени, обаче сердце Асы бе совершенно пред Господем во вся дни его: 15 и внесе столпы отца своего, и столпы своя внесе во храм Господень сребряны и златы, и сосуды. 16 И брань бе между Асою и между Ваасом царем Израилевым во вся дни их. 17 И взыде Вааса царь Израилев на Иуду и созда Раму, яко не быти на исхождение и вхождение Асе царю Иудину. 18 И взя Аса все сребро и злато обретшееся в сокровищах дому Господня и в сокровищах дому царева и даде я в руце отрок своих: и посла их царь Аса ко сыну Адерову сыну Таверема во Рамман, ко сыну Азаила, царя Сирскаго, живущаго в Дамасце, глаголя: 19 положи завет между мною и тобою, и между отцем моим и отцем твоим: се, послах ти дары, сребро и злато: прииди, разруши завет твой, иже со Ваасою царем Израилевым, да отидет от мене. 20 И послуша сын Адеров царя Асы, и посла воеводы сил своих на грады Израилевы, и поразиша Аина и Дана, и Авеля, Дому Маахиина, и весь Хеннереф, даже до всея земли Неффалимли. 21 И бысть яко услыша Вааса, и остави созидати Раму, и возвратися во Ферсу. 22 Царь же Аса заповеда всему Иуде во енакиме, и взяша камение из Рамы и древа ея, имиже основа Вааса, и созда в них царь Аса всяк Холм Вениаминь и Стражбища. 23 Прочая же словес Асиных, и вся сила его, и вся яже сотвори, и грады яже созда, не се ли, сия писана суть в книзе словес дний царей Иудиных? Обаче во время старости своея начат болети ногама своима: 24 и успе Аса со отцы своими, и погребен бысть во граде Давида отца своего. И воцарися Иосафат сын его вместо его. 25 Нават же сын Иеровоамль нача царствовати над Израилем во второе лето Асы царя Иудина, и царствова над Израилем два лета, 26 и сотвори лукавое пред Господем, и хождаше путем отца своего и во гресех его, имиже согрешити сотвори Израилю. 27 И обседе его Вааса сын Ахиин в дому Велаана сына Ахиина, и уби его во Гавафоне иноплеменничи: Нават же и весь Израиль обседоша Гавафон. 28 И умертви его Вааса в лето третие Асы царя Иудина, и воцарися вместо его. 29 И бысть егда воцарися, изби весь дом Иеровоамль и не остави ничтоже от всего дыхания Иеровоамля, дондеже искорени их по глаголу Господню, егоже глагола рукою раба Своего Ахии Силонитскаго, 30 грех ради Иеровоамлих, иже согреши, иже введе во грех Израиля, и в прогневании его, имже прогнева Господа Бога Израилева. 31 И прочая словеса Навата, и вся яже сотвори, не се ли, сия писана суть в книзе словес дний царей Израилевых? 32 И бяше брань между Асою (царем Иудиным) и Ваасою царем Израилевым во вся дни их. 33 И в третие лето Асы царя Иудина царствова Вааса сын Ахиин над всем Израилем во Ферсе двадесять и четыре лета, 34 и сотвори лукавое пред Господем, и иде путем Иеровоама сына Наватова, и во гресех его, имиже в согрешение приведе Израиля. === 16 === 1 И бысть слово Господне рукою Иуа сына Ананиева ко Ваасе, глаголя: 2 понеже вознесох тя от земли и дах тя властеля над людьми Моими Израилем, и пошел еси путем Иеровоамлим и ввел еси в грех люди Моя Израиля, еже прогневати Мя суетными их: 3 се, Аз отвергу наследие Ваасы и наследие дому его, и сотворю дом твой яко дом Иеровоама сына Наватова: 4 умершаго Ваасова во граде снедят его пси, и умершаго на поли снедят его птицы небесныя. 5 И прочая словес Ваасовых, и вся яже сотвори, и сильная его, не се ли, суть писана в книзе словес дний царей Израилевых? 6 И успе Вааса со отцы своими, и погребен бысть во Ферсе, и воцарися Ила сын его вместо его. 7 И рукою Иуа сына Анании пророка глагола Господь на Ваасу и на дом его всю злобу, юже сотвори пред Господем, еже прогневати Его делами рук своих, быти ему якоже и дому Иеровоамлю, и о еже ему поражену быти. 8 В лето двадесять шестое Асы царя Иудина, царствова Ила сын Ваасин над Израилем во Ферсе два лета. 9 И воздвиже (Господь) на него отроки его, и Замвриа воеводу половины конников: и Ила бе во Ферсе упиваяся, и пиян сый в дому Арсы домостроителя во Ферсе: 10 и вниде Замврий, и порази его, и умертви его, в лето двадесять седмое Асы царя Иудина, и воцарися вместо его. 11 И бысть царствующу ему, внегда сести ему на престоле его, и изби весь дом Ваасов: не остави ему мочащаго к стене, и ужиков его, и друга его. 12 И изби Замврий весь дом Ваасов по глаголу Господню, егоже глагола на дом Ваасов и ко Иую пророку, 13 о всех гресех Ваасовых и Илы сына его, яко сотвори согрешити Израилю, еже разгневати Господа Бога Израилева суетными их. 14 Прочая же словес Илы, яже сотвори, не се ли, сия писана в книзе словес дний царей Израилевых? 15 В лето двадесять седмое Асы царя Иудина царствова Замврий седмь дний во Ферсе: и бе полк Израилев на Гавафон иноплеменнический. 16 И слышаша людие сущии в полце, глаголющих: превратися Замврий и порази царя. И поставиша царем во Израили Амвриа воеводу, иже над воями во Израили в день он в полце. 17 И взыде Амврий и весь Израиль с ним от Гавафона и обседе Ферсу. 18 И бысть егда увиде Замврий, яко предвзят бысть град его, и вниде во внутренний дом царский, и зажже над собою дом царев огнем, и умре 19 за грехи своя, яже сотвори, сотворения ради лукаваго пред Господем, еже ходити путем Иеровоама сына Наватова, и во гресех его, яже сотвори, яко введе во грех Израиля. 20 И прочая словес Замврииных, и наветы его, яже совеща, не се ли, сия суть писана в книгах словес дний царей Израилевых? 21 Тогда разделишася людие Израилстии, пол людий бысть за Фамнием сыном Гонафовым, яко да царствует он, и пол людий бысть со Амврием. 22 Людие же сущии по Амврии превозмогоша людий бывших со Фамнием сыном Гонафовым и умре Фамний и Иорам брат его во время оно, и воцарися Амврий по фамнии. 23 В лето тридесять первое Асы царя Иудина царствова Амврий во Израили дванадесять лет, во Ферсе же шесть лет царствова. 24 И купи Амврий гору Семерон у Семира господина горы двема таланты сребра, и созда гору, и нарече имя горе, юже созда, во имя Семира господина горы оныя, гора Семирон. 25 И сотвори Амврий лукавое пред Господем, и прелукавнова паче всех бывших пред ним: 26 и хождаше по всем путем Иеровоама сына Наватова и во гресех его, имиже введе во грех Израиля, еже разгневати Господа Бога Израилева в суетных их. 27 И прочая словес Амвриевых, и вся яже сотвори, и вся сила его, не се ли, сия писана в книзе словес дний царей Израилевых? 28 И успе Амврий со отцы своими, и погребен бысть в Самарии. И воцарися Ахаав сын его вместо его. 29 Ахаав же сын Амвриев воцарися над Израилем в лето тридесять осмое Асы царя Иудина: царствова же Ахаав сын Амвриев над Израилем в Самарии двадесять два лета: 30 и сотвори Ахаав лукавое пред Господем, и прелукавнова паче всех бывших прежде его: 31 и не бе ему доволно, еже ходити во гресех Иеровоама сына Наватова, и взя жену Иезавель дщерь Иефеваала царя Сидонскаго: и иде, и нача служити Ваалу, и поклонися ему, 32 и постави требище Ваалу в дому мерзостей его, егоже созда в Самарии: 33 и сотвори Ахаав дубраву: и приложи Ахаав творити прогневания, еже разгневати Господа Бога Израилева и душу свою погубити: злодействова паче всех царей Израилевых бывших прежде его. 34 Во дни же его созда Ахиил Вефилянин Иерихон: на Авироне первороднем своем основа его, и на Сегуве юнейшем своем постави двери его, по глаголу Господню, егоже глагола рукою Иисуса сына Навина. === 17 === 1 И рече Илиа пророк Фесвитянин, иже от фесвии Галаадския, ко Ахааву: жив Господь Бог сил, Бог Израилев, Емуже предстою пред Ним, аще будет в лета сия роса и дождь, точию от уст словесе моего. 2 И бысть глагол Господень ко Илии: 3 иди отсюду на восток и скрыйся в потоце Хорафа прямо лицу Иорданову: 4 и будеши пити от потока воду, и враном заповедах препитати тя тамо. 5 И сотвори Илиа по глаголу Господню, и седе при потоце Хорафове прямо лицу Иорданову: 6 и вранове приношаху ему хлебы и мяса заутра, и хлебы и мяса к вечеру, и от потока пияше воду. 7 И бысть по днех, и изсше источник, яко не бе дождя на землю, 8 и бысть глагол Господень ко Илии глаголя: 9 востани и иди в Сарепту Сидонскую, и пребуди тамо: се бо, заповедах тамо жене вдовице препитати тя. 10 И воста и иде в Сарепту Сидонскую, и прииде ко вратом града: и се, тамо жена вдова собираше дрова. И возопи Илиа вслед ея и рече ей: принеси ныне ми мало воды в сосуде, и испию. 11 И иде взяти. И возопи вслед ея Илиа и рече ей: приими убо мне и укрух хлеба в руце своей, да ям. 12 И рече жена: жив Господь Бог твой, аще есть у мене опреснок, но токмо горсть муки в водоносе и мало елеа в чванце: и се, аз соберу два поленца, и вниду, и сотворю е себе и детем моим, и снемы е, и умрем. 13 И рече к ней Илиа: дерзай, вниди и сотвори но глаголу твоему: но сотвори ми оттуду опреснок мал прежде, и принеси ми, себе же и чадом своим да сотвориши послежде, 14 яко тако глаголет Господь Бог Израилев: водонос муки не оскудеет, и чванец елеа не умалится до дне, дондеже даст Господь дождь на землю. 15 И иде жена, и сотвори по глаголу Илиину, и даде ему, и яде той, и та, и чада ея. 16 И от того дне водонос муки не оскуде, и чванец елеа не умалися, по глаголу Господню, егоже глагола рукою Илииною. 17 И бысть по сих, и разболеся сын жены госпожи дому, и бе болезнь его крепка зело, дондеже не остася в нем дух его. 18 И рече ко Илии: что мне и тебе, человече Божий? Вшел еси ко мне воспомянути неправды моя и уморити сына моего. 19 И рече Илиа к жене: даждь ми сына твоего. И взят его от недра ея, и вознесе его в горницу, идеже сам почиваше, и положи его на одре своем. 20-22 И возопи Илиа ко Господу и рече: увы мне, Господи, свидетелю вдовы, у неяже аз ныне пребываю, Ты озлобил еси еже уморити сына ея. И дуну на отрочища трижды, и призва Господа и рече: Господи Боже мой, да возвратится убо душа отрочища сего в онь. И бысть тако: и возопи отрочищь, и сведе его с горницы в дом, и даде его матери его. И рече Илиа: виждь, жив есть сын твой. 23 И рече жена ко Илии: се, уразумех, яко человек Божий еси ты, и глагол Господень во устех твоих истинен. === 18 === 1 И бысть по днех мнозех, и глагол Господень бысть ко Илии в лето третие глаголя: иди и явися Ахааву, и дам дождь на лице земли. 2 И иде Илиа ко Ахааву явитися, и бе глад крепок в Самарии. 3 И призва Ахаав Авдиа строителя дому: и Авдий бе бояся Господа зело. 4 И бысть егда нача избивати Иезавель пророки Господни, и взя Авдий сто мужей пророки и скры я по пятидесяти во двоих вертепех и кормяше их хлебом и водою. 5 И рече Ахаав ко Авдию: гряди, и прейдем на землю, и на источники водныя, и на вся потоки, да негли како обрящем былие и прекормим кони и мски, да не изгибнут от скот. 6 И разделиша себе путь ити по нему: Ахаав иде путем единым един, и Авдий иде путем другим един. 7 И бе Авдий един на пути: и прииде Илиа на сретение ему един. И Авдий потщася, и паде на лице свое и рече: ты ли еси сам, господи мой Илие? 8 И рече Илиа ко Авдию: аз есмь: иди и повеждь господину твоему, глаголя: се, Илиа. 9 И рече Авдий: что согреших аз, яко предаеши раба твоего в руце Ахаавли еже умертвити мя? 10 Жив Господь Бог твой, аще есть язык или царство, аможе не посла господин мой искати тебе: и реша, несть: и закля царство и страны его, яко не обрете тебе: 11 и ныне ты глаголеши ми: иди, возвести господину твоему: се, Илиа: 12 и будет егда аз отиду от тебе, и Дух Господень возмет тя в землю, еяже не вем, и вниду возвестити Ахааву, и не обрящет тебе, и убиет мя: раб же твой есть бояйся Господа от юности своея: 13 или не возвестися тебе господину моему, яже сотворих, егда убиваше Иезавель пророки Господни, и сокрых пророки Господни сто мужей, по пятидесяти в вертепе, и кормих их хлебом и водою? 14 И ныне ты глаголеши ми: иди, повеждь господину твоему: се, Илиа: и убиет мя. 15 И рече Илиа: жив Господь Сил, емуже предстою пред Ним, яко днесь покажуся ему. 16 И иде Авдий во сретение Ахааву и возвести ему. И ускори Ахаав и иде во сретение Илии. 17 И бысть егда узре Ахаав Илию, и рече Ахаав ко Илии: ты ли еси развращаяй Израиля? 18 И рече Илиа: не развращаю аз Израиля, но разве ты и дом отца твоего, егда остависте вы Господа Бога вашего и идосте вслед Ваала: 19 и ныне посли и собери ко мне всего Израиля на гору Кармилскую, и пророки студныя Вааловы четыреста и пятьдесят, и пророков дубравных четыреста, ядущих трапезу Иезавелину. 20 И посла Ахаав во весь Израиль, и приведе вся пророки на гору Кармилскую. 21 И приведе ко всем им Илию, и рече им Илиа: доколе вы храмлете на обе плесне вашы? Аще есть Господь Бог, идите вслед Его: аще же Ваал есть, то идите за ним. И не отвещаша людие словесе. 22 И рече Илиа к людем: аз остах пророк Господень един: и пророцы Вааловы четыреста и пятьдесят мужей, и пророков дубравных четыреста. 23 (И рече Илиа:) да дадят нам два вола, и да изберут себе единаго, и да растешут и (на уды), и возложат на дрова, и да не возгнетят огня: и аз растешу вола другаго, и возложу на дрова, и огня не возгнещу: 24 и да призовете имена богов ваших, и аз призову имя Господа Бога моего: и будет Бог, Иже аще послушает огнем, Той есть Бог. И отвещаша вси людие и реша: добр глагол (Илиин), егоже глагола (да будет тако). 25 И рече Илиа пророком студным: изберите себе юнца единаго, и сотворите вы прежде, яко вас есть множество: и призовите имена богов ваших, и огня не возгнещайте. 26 И пояша юнца, и сотвориша (тако), и призываху имя Ваалово от утра до полудне, и реша: послушай нас, Ваале, послушай нас. И не бе гласа, ни послушания. И ристаху около жертвенника, егоже сотвориша. 27 И бысть в полудне, и поругася им Илиа Фесвитянин и рече: зовите гласом великим, яко бог есть, яко непраздность ему есть, и негли что ино строит, или спит сам, и востанет. 28 И зовяху гласом великим, и крояхуся по обычаю своему ножами, и мнози бишася бичми, до пролития крове своея, 29 и прорицаху, дондеже прейде вечер: и бысть егда прииде время взыти жертве, и не бе гласа, ниже послушания. И рече Илиа Фесвитянин пророком студным, глаголя: отступите ныне, да и аз сотворю жертву мою. И отступиша тии, и умолкнуша. 30 И рече Илиа к людем: приступите ко мне. И приступиша вси людие к нему. 31 И взя Илиа дванадесять камений по числу колен Израилевых, якоже глагола к нему Господь, глаголя: Израиль будет имя твое. 32 И созда камение во имя Господне, и изцели олтарь раскопанный, и сотвори море вмещающее две меры семене окрест олтаря. 33 И воскладе дрова на олтарь, егоже сотвори, и растеса на уды всесожегаемая, и возложи на дрова, и воскладе на олтарь. 34 И рече Илиа: принесите ми четыри водоносы воды, и возливайте на всесожжение и на полена. И сотвориша тако. И рече: удвойте. И удвоиша. И рече: утройте. И утроиша. 35 И прохождаше вода окрест олтаря, и море исполнися воды. 36 И возопи Илиа на небо и рече: Господи Боже Авраамов и Исааков и Иаковль, послушай мене, Господи, послушай мене днесь огнем, и да уразумеют вси людие сии, яко Ты еси Господь един Израилев, и аз раб Твой, и Тебе ради сотворих дела сия: 37 послушай мене, Господи, послушай мене огнем, и да разумеют вси людие сии, яко Ты еси (един) Господь Бог, и Ты обратил еси сердца людий сих вслед Тебе. 38 И спаде огнь от Господа с небесе, и пояде всесожегаемая, и дрова, и воду, яже в мори, и камение и персть полиза огнь. 39 И падоша вси людие на лице свое и реша: воистинну Господь Бог Той есть Бог. 40 И рече Илиа к людем: поимайте пророки Вааловы, да ни един скрыется от них. И яша их, и веде я Илиа на поток Киссов, и закла их тамо. 41 И рече Илиа ко Ахааву: взыди, и яждь и пий, яко глас есть дождевнаго хождения. 42 И взыде Ахаав ясти и пити. Илиа же взыде на Кармил, и преклонися на землю, и положи лице свое между коленома своима, 43 и рече отрочищу своему: взыди и воззри на путь морский. И взыде, и воззре отрочищь, и рече: несть ничтоже. И рече Илиа: и ты обратися седмижды. 44 И обратися отрочищь седмижды: и бысть в седмое, и се, облак мал, аки след ноги мужеския, возносящь воду из моря. И рече: взыди и рцы Ахааву: впрязи колесницу твою и сниди, да не постигнет тебе дождь. 45 И бысть до зде и до зде, и небо примрачися облаки и духом, и бысть дождь велий. И плакася, и иде Ахаав до Иезраеля. 46 И рука Господня бысть на Илии, и стягне чресла своя, и тече пред Ахаавом во Иезраель. === 19 === 1 И возвести Ахаав Иезавели жене своей вся, елика сотвори Илиа, и яко изби пророки оружием. 2 И посла Иезавель ко Илии и рече: аще ты еси Илиа, аз же Иезавель: сия да сотворят ми бози и сия да приложат ми, яко в сей же час утро положу душу твою, якоже душу единаго от них. 3 И убояся Илиа, и воста, и отиде души ради своея, и прииде в Вирсавию землю Иудину, и остави отрочище свое тамо, 4 сам же иде в пустыню дне путь, и прииде, и седе под смерчием, и проси души своей смерти, и рече: довлеет ныне (ми), возми убо от мене душу мою, Господи, яко несмь аз лучший отец моих. 5 И ляже, и успе под садом: и се, Ангел Господень коснуся ему и рече ему: востани, яждь и пий. 6 И воззре Илиа: и се, у возглавия его опреснок ячменный и чванец воды. И воста, и яде и пи, и возвратився успе. 7 И обратися Ангел Господень вторицею, и коснуся ему, и рече ему: востани, яждь и пий, яко мног от тебе путь. 8 И воста, и яде и пи: и иде в крепости яди тоя четыредесять дний и четыредесять нощей до горы Божия Хорив. 9 И вниде тамо в пещеру, и вселися в ней. И се, глагол Господень к нему и рече: что ты зде, Илие? 10 И рече Илиа: ревнуя поревновах по Господе (Бозе) Вседержители, яко оставиша Тя сынове Израилевы: олтари Твоя раскопаша, и пророки Твоя избиша оружием, и остах аз един, и ищут души моея изяти ю. 11 И рече: изыди утро и стани пред Господем в горе: и се, мимо пойдет Господь, и дух велик и крепок разоряя горы и сокрушая камение в горе пред Господем, (но) не в дусе Господь: и по дусе трус, и не в трусе Господь: 12 и по трусе огнь, и не во огни Господь: и по огни глас хлада тонка, и тамо Господь. 13 И бысть яко услыша Илиа, покры лице свое милотию своею, и изыде и ста пред вертепом. И се, к нему бысть глас и рече: что ты зде, Илие? 14 И рече Илиа: ревнуя поревновах по Господе Бозе Вседержители, яко оставиша завет Твой сынове Израилевы, и олтари Твоя раскопаша, и пророки Твоя избиша оружием, и остах аз един, и ищут души моея изяти ю. 15 И рече Господь к нему: иди, возвратися путем своим, и изыдеши на путь пустыни Дамасковы, и помажеши Азаила на царство Сирийское, 16 и Ииуа сына Намессиина помажеши на царство над Израилем, и Елиссеа сына Сафатова от Авелмаула помажеши вместо себе пророка: 17 и будет спасаемаго от оружия Азаилева убиет Ииуй, и спасаемаго от оружия Ииуина убиет Елиссей: 18 и оставиши во Израили седмь тысящ мужей, вся колена, яже не преклониша колена Ваалу, и всяка уста, яже не молишася ему. 19 И иде оттуду, и обрете Елиссеа сына Сафатова, и сей оряше двеманадесятьма супругома волов пред ним, и той сам по двоюнадесяти супруг. И прииде Илиа к нему, и поверже милоть свою на него. 20 И остави Елиссей волы, и тече вслед Илии, и рече: (молю тя,) да облобыжу отца моего и матерь мою, и иду вслед тебе. И рече ему Илиа: иди, возвратися, яко сотворих тебе. 21 И возвратися от него: и взя супруги волов, и закла, и испече я в сосудех воловных, и даде людем, и ядоша. И воста, и иде вслед Илии, и служаше ему. === 20 === 1 И сын Адеров царь Сирский собра всю силу свою, и возшед обседе Самарию, и с ним тридесять два царя и вси конницы и колесницы: и взыдоша, и обседоша Самарию, и ратоваша на ню: 2 и посла ко Ахааву царю Израилеву во град и рече к нему: сице глаголет сын Адеров: 3 сребро твое и злато твое мое есть, и жены твоя и чада твоя добрая моя суть. 4 И отвеща царь Израилев и рече: якоже глаголал еси, господи мой царю, твой есмь аз и вся моя. 5 И возвратишася послы и реша: сице глаголет сын Адеров: аз посылах к тебе, глаголя: сребро и злато твое и жены твоя и чада твоя даждь мне: 6 яко в сей час утро послю рабы моя к тебе, и изыщут дом твой и домы отрок твоих, и будут вся желаемая очес их, на нихже аще возложат руки своя, и возмут. 7 И призва царь Израилев вся старейшины земли и рече: знайте ныне и видите, яко той зле просит, яко присла ко мне (глаголя) о женах моих и о сынех моих и о дщерех моих: сребра моего и злата моего не возбраних ему. 8 И реша ему старейшины и вси людие: не послушай, ни восхощи (дати). 9 И рече послом сына Адерова: рцыте господину вашему: вся, ихже ради посылал еси к рабу твоему прежде, сотворю, сего же глагола не могу сотворити. И отидоша мужие (адеровы) и возвестиша ему слово. 10 И паки посла к нему сын Адеров, глаголя: сия да сотворят ми бози и сия да приложат, аще доволна будет персть Самарии горстем всех людий пешцев моих. 11 И отвеща царь Израилев и рече: доволно: да не хвалится слячен, якоже прямый. 12 И бысть егда отвеща ему слово сие, бе пиющь сам и вси царие, иже бяху с ним в кущах: и рече отроком своим: сотворите вал. И Сотвориша вал над градом. 13 И се, пророк един прииде к Ахааву царю Израилеву и рече: сия глаголет Господь: видиши ли весь народ сей великий? Се, Аз дам его днесь в руце твои, и уразумееши, яко Аз (есмь) Господь. 14 И рече Ахаав: в чем? И рече: сице глаголет Господь: во отроцех князей градских. И рече Ахаав: кто начнет брань? И рече: ты. 15 И сочте Ахаав отроки князей градских, и бысть их двести тридесять и два: и по сих сочте люди вся сыны силы, седмь тысящ. 16 И изыде в полудне: и сын Адеров пиян бе зело в Сокхофе сам и царие (иже с ним), тридесять два царя помощника ему. 17 И изыдоша отроцы воевод градских в первых. И посла сын Адеров, и возвестиша царю сирскому, глаголюще: мужие изыдоша из Самарии. 18 И рече им: аще на мир изыдоша, поимите их живых: и аще на брань изыдоша, живых поимите их, да не исходят из града. 19 И тии изыдоша из града отроцы воевод градских, и сила вслед их. 20 И порази кийждо противнаго себе, и удвои кийждо противнаго себе. И бежа Сириа: и погна их Израиль, и гонзе токмо сын Адеров царь Сирский на кони конника. 21 И изыде царь Израилев, и взя вся кони и колесницы, и порази язвою великою в Сирии. 22 И прииде пророк к царю Израилеву и рече: укрепися и разумей, и виждь, что сотвориши, яко преходящу лету сему, сын Адеров, царь Сирийский, приидет на тя. 23 И отроцы царя Сирийска реша ему: Бог гор Бог Израилев, а не Бог юдолий, сего ради укрепися паче нас: аще же сразимся с ними на равнине, истинно укрепимся паче их: 24 по глаголу же сему сотвори: распусти цари коегождо на место свое, и постави вместо их воеводы, 25 и пременим тебе силу вместо силы падшия у тебе, и кони вместо коней, и колесницы вместо колесниц, и сразимся с ними на равнине, и укрепимся паче их. И послуша гласа их и сотвори тако. 26 И бысть минувшу лету тому, и сочте сын Адеров Сирию, и взыде во Афеку на брань на Израиля. 27 И сынове Израилевы сочислишася и изыдоша во сретение им. И ополчишася Израилтяне противу им, аки два стада коз: Сириане же наполниша землю. 28 И прииде человек Божий и рече к царю Израилеву: сице глаголет Господь: понеже рече Сириа: Бог гор Господь Бог Израилев, и не Бог юдолий той, и дам силу великую сию в руку твою, и уразумееши, яко Аз Господь. 29 И ополчишася тии противу им седмь дний. И бысть в день седмый, и приближися брань, и порази Израиль Сириан, сто и двадесять тысящ пешцев во един день. 30 И бежаша оставшиися во Афеку град, и паде стена на двадесять седмь тысящ мужей оставшихся: сын же Адеров бежа и вниде в дом ложа, в чертог. 31 И реша к нему отроцы его: се, ныне вемы, яко царие дому Израилева милостиви суть: да возложим ныне вретища на чресла наша и ужа на выи нашя, и изыдем ко царю Израилеву, да негли оживит душы нашя. 32 И препоясашася во вретища по чреслом своим, и возложиша ужя на выи своя, и приидоша к царю Израилеву и реша: раб твой сын Адеров глаголет: да живет душа моя. И рече: аще есть еще жив, брат ми есть. 33 И мужие за знак и в залог прияша слово от уст его, и реша: брат твой сын Адеров. И рече: идите и приведите его. И изыде к нему сын Адеров. И возведоша его к нему на колесницу. 34 И рече к нему: грады, яже взя отец мой от отца твоего, отдам тебе: и на исход сотвориши я себе в Дамасце, якоже положи отец мой в Самарии, и аз в завете пущу тя. И положи ему завет и отпусти его. 35 И человек един от сынов пророчих рече ко ближнему своему по словеси Господню: бий мя ныне. И не восхоте человек бити его. 36 И рече к нему: понеже не послушал еси гласа Господня, се, ты отидеши от мене, и поразит тя лев. И отиде от него, и обрете его лев и порази его. 37 И обрете человека инаго и рече: бий мя ныне. И би его человек, и поразив сокруши его. 38 И иде пророк и предста царю Израилеву на пути и покры покрывалом очи свои. 39 И бысть егда мимоидяше царь, и сей возопи ко царю и рече: раб твой изыде на войну брани, и се, муж приведе ко мне мужа и рече ко мне: сохрани мужа сего: аще же отрешився отскочит, и будет душа твоя вместо души его, или талант отдаси сребра: 40 и бысть яко озреся раб твой семо и овамо, и сего не бысть. И рече к нему царь Израилев: се, суд твой при мне, сам себе убил еси. 41 И ускори и отя покрывало от очес своих. И позна его царь Израилев, яко от пророк сей есть. 42 И рече к нему: тако глаголет Господь: понеже испустил еси ты мужа пагубнаго из руки твоея, и будет душа твоя вместо души его, и людие твои вместо людий его. 43 И отиде царь Израилев к дому своему смущен и разслаблен, и прииде в Самарию. === 21 === 1 И бысть по глаголех сих, и виноград един бе у Навуфеа Иезраилитянина при гумне Ахаава царя Самарийска. 2 И рече Ахаав к Навуфею, глаголя: даждь ми виноград твой, и будет ми во вертоград зелий, яко близ есть сей дому моего, и дам ти вместо сего виноград ин добр паче сего: аще же угодно пред тобою, дам ти сребро измену винограда сего, и будет ми во вертоград зелий. 3 И рече Навуфей ко Ахааву: да не будет мне от Господа Бога моего дати наследие отец моих тебе. 4 И прииде Ахаав в дом свой смущен и оскорблен о словеси, еже глагола к нему Навуфей Иезраилитянин, и рече: не дам тебе наследия отец моих. И бысть дух Ахаавль смущен, и успе на одре своем и покры лице свое и не яде хлеба. 5 И вниде Иезавель жена его к нему и рече к нему: что дух твой есть смущен, и не яси ты хлеба? 6 И рече к ней (Ахаав): яко глаголах Навуфею Иезраилитянину глаголя: даждь ми виноград твой за сребро: и аще хощеши, дам ти виноград ин вместо его: и рече: не дам ти наследия отец моих. 7 И рече к нему Иезавель жена его: ты ли ныне твориши тако, царю Израилев? Востани и яждь хлеб и молча буди, аз же дам ти виноград Навуфеа Иезраилитянина. 8 И написа книгу на имя Ахаавле, и запечата ю печатию его, и посла книгу к старейшинам и свободным живущым с Навуфеем. 9 И писано бяше в книзе тако: поститеся постом и посадите Навуфеа и в начале людий: 10 и посадите два мужа сыны законопреступных противу ему, и да засвидетелствуют о нем, глаголюще, яко (не) благослови Бога и царя: и да изведут его и побиют камением, и да умрет. 11 И сотвориша тако мужие града его старейшии и свободнии живущии во граде его, якоже посла к ним Иезавель, и якоже писано бяше в книгах, яже посла к ним: 12 и нарекоша пост, и посадиша Навуфеа в начале людий, 13 и приидоста два мужа сынове законопреступных и седоста противу его, и засвидетелствоваша на него мужие отступницы Навуфеовы пред людьми, глаголюще: сей (не) благослови Бога и царя. И изведоша его вон из града и побиша его камением, и умре. 14 И послаша ко Иезавели, глаголюще: камением побиен бысть Навуфей и умре. 15 И бысть егда услыша Иезавель глаголющих, яко побиен Навуфей и умре, и рече Иезавель ко Ахааву: востани, наследуй виноград Навуфеа Иезраилитянина, иже не взя у тебе сребра, и уже несть Навуфей жив, но умре. 16 И бысть егда услыша Ахаав, яко убиен бысть Навуфей Иезраилитянин, и раздра ризы своя и облечеся во вретище. И бысть по сих, и воста и сниде Ахаав в виноград Навуфеа Иезраилитянина наследити его. 17 И рече Господь ко Илии Фесвитянину, глаголя: 18 востани и сниди на сретение Ахааву царю Израилеву, иже в Самарии, се бо, сей в винограде Навуфееве, яко сниде тамо наследити его: 19 и речеши ему, глаголя: сице глаголет Господь: понеже ты убил еси (Навуфеа) и приял еси в наследие (виноград его), сего ради тако глаголет Господь: на месте, идеже полизаша свинии и пси кровь его, тамо полижут и кровь твою, и блудницы измыются в крови твоей. 20 И рече Ахаав ко Илии: обрел ли еси мя, враже мой? И рече Илиа: обретох: понеже ты всуе продан еси сотворити лукавое пред Господем, во еже разгневати Его: 21 сице глаголет Господь: се, Аз наведу на тя злая и попалю задняя твоя, и искореню Ахаавля мочащагося к стене, и содержимыя и оставшихся во Израили: 22 и предам дом твой якоже дом Иеровоама сына Наватова, и якоже дом Ваасы сына Ахиина, о прогневаниих, имиже прогневал Мя еси, и грешити сотворил еси Израиля. 23 И ко Иезавели рече Господь, глаголя: пси снедят ю в предградии Иезраеля: 24 умершаго Ахаавля во граде снедят пси, и умершаго его на поли снедят птицы небесныя: 25 и в суете ты еси, Ахааве, иже продан бысть сотворити лукавое пред Господем, яко преврати его Иезавель жена его. 26 И омерзися зело, еже ходити вслед мерзостей, яже сотвори Аморрей, егоже истреби Господь от лица сынов Израилевых. 27 И бысть егда услыша Ахаав словеса сия, умилися от лица Господня, и идяше плачася, и раздра ризы своя, и препоясася вретищем по телу своему и постися: и бе облечен во вретище от дне, в оньже уби Навуфеа Иезраилитянина, и хождаше скорбен. 28 И бысть глагол Господень рукою раба его Илии о Ахааве, 29 и рече Господь: видел ли еси, яко умилися Ахаав от лица Моего? Сего ради не наведу зла во днех его: но во днех сына его наведу зло на дом его. === 22 === 1 И седе три лета, и не бе брани между Сириею и между Израилем. 2 И бысть в лето третие, и сниде Иосафат царь Иудин к царю Израилеву. 3 И рече царь Израилев ко отроком своим: весте ли, яко моя есть Реммафа Галаадская, и мы молчим взяти ю от руки царя Сирийска? 4 И рече царь Израилев ко Иосафату: взыдеши ли с нами в Реммафу Галаадскую на брань? И рече Иосафат: якоже аз, такожде и ты: якоже людие мои, людие твои: якоже кони мои, кони твои. 5 И рече Иосафат царь Иудин к царю Израилеву: вопросите убо днесь Господа. 6 И собра царь Израилев вся пророки яко четыреста мужей, и рече царь им: взыду ли в Реммафу Галаадскую на брань, или оставлю? И реша: взыди, яко дая предаст Господь в руки царевы. 7 И рече Иосафат к царю Израилеву: несть ли зде пророка Господня, и вопросили быхом Господа им? 8 И рече царь Израилев ко Иосафату: еще есть един муж на вопрошение им Господа, и аз возненавидех его, яко не глаголет о мне добре, но злая, Михеа сын Иемвлаань. И рече царь Иосафат Иудин: не глаголи, царю, тако. 9 И призва царь Израилев скопца единаго и рече: скоро иди по Михею сына Иемвлааня. 10 Царь же Израилев и Иосафат царь Иудин седяста кийждо на престоле своем вооружени во вратех Самарийских, и вси пророцы прорицаху пред ними. 11 И сотвори себе Седекиа сын Ханаань рога железна и рече: тако глаголет Господь: сими рогами избодеши Сирию, дондеже скончается. 12 И вси пророцы прорицаху тако, глаголюще: взыди в Реммафу Галаадскую, и наставит тя, и предаст Господь в руце твои царя Сирийскаго. 13 И посол шед призвати Михею, рече ему, глаголя: се, ныне вси пророцы усты едиными глаголют добрая о цари, буди убо и ты в словесех твоих по словесем единаго от сих и глаголи добрая. 14 И рече Михеа: жив Господь, яко яже речет Господь ко мне, сия возглаголю. 15 И прииде ко царю. И рече ему царь: Михее, взыду ли в Реммафу Галаадскую на брань, или оставлю? И рече ему: взыди, и благопоспешит Господь в руки царевы. 16 И рече ему царь: еще аз дважды заклинаю тя, да речеши истину пред Господем. 17 И рече Михеа: не тако: видех всего Израиля разсеяна по горам якоже стада, имже несть пастыря: и рече Господь: не Господь ли сим в Бога? Да возвратится кийждо в дом свой с миром. 18 И рече царь Израилев ко Иосафату царю Иудину: не рех ли тебе, яко не проричет сей ми добрая, но токмо злая? 19 И рече Михеа: не тако: не аз: слыши глагол Господень: не тако: видех Господа Бога Израилева седящаго на престоле Своем, и все воинство небесное стояше окрест Его одесную Его и ошуюю Его: 20 и рече Господь: кто прельстит Ахаава царя Израилева, и взыдет и падет в Реммафе Галаадстей? И рече сей тако, и сей тако: 21 и изыде дух, и ста пред Господем, и рече: аз прельщу и: 22 и рече к нему Господь: в чем? И рече: изыду и буду дух лжив во устех всех пророк его: и рече: прельстиши и возможеши: изыди и сотвори тако: 23 и се, ныне даде Господь дух лжив во уста всех пророк твоих сих, и Господь глагола на тя злая. 24 И приступи Седекиа сын Ханаань, и порази Михею в лице и рече: каковый сей прейде Дух Господень от мене, еже глаголати в тебе? 25 И рече Михеа: се, ты узриши в день он, егда внидеши в ложницу сокровища твоего, еже скрытися ту. 26 И рече царь Израилев: поимите Михею, и возвратите его ко Аммону князю града и ко Иоасу сыну цареву, 27 и рцыте, да посадят его в темницу, и да кормят его хлебом печальным и водою печальною, дондеже возвращуся в мире. 28 И рече Михеа: аще возвращаяся возвратишися в мире, то не глагола Господь мною. И рече: слышите, людие вси. 29 И взыде царь Израилев и Иосафат царь Иудин с ним в Реммафу Галаадскую. 30 И рече царь Израилев ко Иосафату царю Иудину: прикрый мя, и вниду в сечь, и ты облецыся в ризу мою. И прикрыся царь Израилев и вниде в сечь. 31 Царь же Сирский заповеда князем колесниц своих тридесятим и двум, глаголя: не бийтеся ни с великим ни с малым, но токмо с царем Израилевым единым. 32 И бысть егда узреша воеводы колесниц Иосафата царя Иудина, и реша: видится царь Израилев сей. И обступиша его еже сразитися с ним: и возопи Иосафат. 33 И бысть егда узреша воеводы колесниц, яко несть царь Израилев той, и возвратишася от него: 34 и наляче лук един муж приметно, и порази царя Израилева между легким и щитом. И рече (царь) всаднику своему: обрати руки твоя, и изведи мя от брани, яко язвен есмь. 35 И умножися брань в той день, и царь бе стоя на колеснице противу Сириан от утра даже до вечера, и лияшеся кровь из язвы в недра колесницы, и умре в вечер, и изливашеся кровь от язвы даже до недр колесницы. 36 И ста проповедник о западе солнца, глаголя: кийждо вас да идет во свой град и во свою землю, яко умре царь. 37 И приидоша в Самарию, и погребоша в Самарии царя. 38 И омыша кровь с колесницы на источнице Самарийстем, и полизаша свинии и пси кровь его, и блудницы измышася в крови его, по глаголу Господню, егоже глагола. 39 Прочая же словес Ахаавлих, и вся яже сотвори, и храм слоновый, егоже созда, и вся грады, яже сотвори, не се ли, сия писана быша в книзе словес дний царей Израилевых? 40 И успе Ахаав со отцы своими, и воцарися Охозиа сын его вместо его. 41 И Иосафат сын Асы воцарися над Иудою в четвертое лето Ахаава царя Израилева. 42 Иосафат сын тридесяти пяти лет (бе), егда нача царствовати, и двадесять пять лет царствова во Иерусалиме. Имя же матери его Азува, дщи Салаиля. 43 И хождаше по всем путем Асы отца своего, не уклонися от него, творя правое пред очима Господнима, токмо высоких не разори: еще людие жряху и кадяху на высоких. 44 И умирися Иосафат с царем Израилевым. 45 Прочая же словес Иосафатовых, и силы его, елика сотвори, не се ли, писана суть в книзе словес дний царей Иудиных? 46 И прочее мерзости, еже остася во дни Асы отца его, отя от земли. 47 И царя не бе во Едоме поставленнаго. 48 Царь же Иосафат сотвори корабли Фарсийския, еже ити во Офир по злато, но не поидоша, зане сокрушишася корабли во Асеон-Гавере. 49 Тогда рече Охозиа сын Ахаавль ко Иосафату: да идут раби мои с рабы твоими в кораблех. И не восхоте Иосафат. 50 И умре Иосафат со отцы своими, и погребен бысть у отец своих во граде Давида отца своего. И воцарися Иорам сын его вместо его. 51 И Охозиа сын Ахаавов воцарися над Израилем в Самарии, в лето седмоенадесять Иосафата царя Иудина, и царствова над Израилем в Самарии лета два, 52 и сотвори лукавое пред Господем, и нача ходити по путем отца своего Ахаава и по пути Иезавели матере своея, и во гресех дому Иеровоама сына Наватова, иже введе во грех Израиля: 53 и поработа Ваалу, и поклонися ему, и разгнева Господа Бога Израилева, по всем бывшым прежде его. == Четвертая книга Царств == === 1 === 1 И отступи Моав от Израиля, по умертвии Ахаавли. 2 Охозиа же паде из окна, еже в горнице его в Самарии, и разболеся, и посла послы и рече к ним: идите и вопросите у Ваала сквернаго бога Аккаронска, аще жив буду от болезни моея сея? И идоша вопрошати его ради. 3 И Ангел Господень рече ко Илии Фесвитянину, глаголя: востав, иди на сретение послом Охозии царя Самарийска и речеши к ним: или несть Бога во Израили, яко грядете вопрошати Ваала сквернаго бога во Аккароне? 4 И сего ради сице глаголет Господь одр, на негоже возшел еси ту, не имаши слезти с него, яко ту смертию умреши, и иде Илиа и рече к ним. 5 И возвратишася послы к нему, и рече к ним: что яко возвратистеся? 6 И реша к нему: муж изыде в сретение нам и рече к нам: идите возвратитеся к царю пославшему вы и глаголите к нему: сице глаголет Господь: или нему Бога во Израили, яко вы грядете вопрошати Ваала сквернаго бога во Аккароне? Сего ради от одра, на негоже возшел еси, не имаши слезти с него, яко ту смертию умреши. 7 И рече к ним царь, глаголя: каков взором бяше муж той вшедый в сретение вам и глаголавый вам словеса сия? 8 И реша к нему: муж космат и поясом усменным препоясан о чреслех своих. И рече царь: Илиа Фесвитянин сей есть. 9 И посла к нему стареишину пятьдесятника и пятьдесят мужей его. И взыде и прииде к нему: и се, Илиа бе седя верху горы. И глагола пятьдесятник к нему и рече: человече Божии, царь зовет тя, сниди. 10 И отвеща Илиа и рече к пятьдесятнику: аще есмь человек Божий аз, то да снидет огнь с небесе и снест тя и пятьдесят твоих (с тобою). И сниде огнь с небесе и снеде его и пятьдесят мужей его. 11 И приложи царь послати к нему другаго пятьдесятника и пятьдесят (мужей) с ним. И возшед, и глагола пятьдесятник к нему и рече: человече Божий, сице глаголет царь: потщався сниди. 12 И отвеща Илиа и глагола к нему и рече: аще человек Божий аз есмь, то да снидет огнь с небесе, и да снест тя и пятьдесят (мужей) с тобою. И сниде огнь с небесе и снеде его и пятьдесят мужей его. 13 И приложи царь еще послати стареишину, пятьдесятника третияго, и пятьдесят мужей с ним. И прииде к нему пятьдесятник третий, и поклонися на колена своя пред Илиею, и моли его, и глагола к нему и рече: человече Божий, пощади душу мою и душу раб твоих сих пятьдесят пред очима твоима: 14 се, сниде огнь с небесе и пояде два пятьдесятника первыя с пятиюдесятми их: и ныне да пощадится душа рабов твоих пред очима твоима. 15 И глагола Ангел Господень ко Илии и рече: сниди с ним, не убойся от лица их. И воста Илиа и сниде с ним к царю, 16 и глагола к нему и рече: сице глаголет Господь: что яко послал еси послы вопрошати Ваала сквернаго бога во Аккароне, аки бы не был Бог во Израиле, еже вопросити от Него словесе? Сего ради от одра, наньже возшел еси ту, не имаши слезти с него яко смертию умреши. 17 И умре по глаголу Господню, егоже глаголгола Илиа. И царствова Иорам брат Охозиин вместо его, понеже не име сына Охозиа, в лето второе Иорама сына Иосафата царя Иудина. 18 И прочая словес Охозииных, елика сотвори, не се ли, сия писана в книгах словес дний царей Израилевых? === 2 === 1 И бысть внегда взяти Господу Илию в вихре яко на небо и идяше Илиа и Елиссей от Галгал. 2 И рече Илиа ко Елиссею: седи убо зде, яко Господь посла мя до Вефиля и рече Елиссей: жив Господь и жива душа твоя, аще оставлю тя и приидоста в Вефиль. 3 И приидоша сынове пророчестии, иже в Вефили, ко Елиссею и реша к нему: разумееши ли, яко взимает Господь днесь господина твоего верху главы твоея (от тебе)? И рече: и аз уразумех, молчите. 4 И рече Илиа ко Елиссею: сяди убо зде, яко Господь посла мя во Иерихон. И рече Елиссей: жив Господь и жива душа твоя, аще оставлю тя. И приидоста во Иерихон. 5 И приближишася сынове пророков, иже во Иерихоне, ко Елиссею и реша ему: разумееши ли, яко днесь вземлет Господь господина твоего свыше главы твоея (от тебе)? И рече: ибо и аз уразумех, молчите. 6 И рече ему Илиа: седи зде, яко Господь посла мя до Иордана. И рече Елиссей: жив Господь и жива душа твоя, аще оставлю тебе. И поидоста оба, 7 и пятьдесят мужей от сынов пророческих, и сташа противу издалеча: и сии оба стаста при Иордане. 8 И прият Илиа милоть свою, и свит ю, и удари ею в воду, и разступися вода сюду и сюду: и проидоста оба по суху. 9 И бысть преходящема има, и рече Илиа ко Елиссееви: проси, что сотворю ти прежде неже взят буду от тебе. И рече Елиссей: да будет убо дух, иже в тебе, сугуб во мне. 10 И рече Илиа: ожесточил еси просити: аще узриши мя вземлема от тебе, будет ти тако: аще ли не (узриши), и будет. 11 И бысть идущема има, идяста и глаголаста: и се, колесница огненная и кони огненнии, и разделиша между обема. И взят бысть Илиа вихром яко на небо. 12 И Елиссей зряше и вопияше: отче, отче, колесница Израилева и конница его. И не увиде его ктому: и ятся (Елиссей) за ризы своя, и растерза я в два растерзания, 13 и взя милоть Илину Елиссей падшую верху его, и возвратися Елиссей, и ста на брезе Иорданове. 14 И прият (Елиссей) милоть Илиину, яже паде верху его, и удари в воду, и не разступися вода. И рече: где Бог Илиин Аффо? И удари Елиссей воды (вторицею), и разступишася сюду и сюду, и прейде Елиссей по суху. 15 И видеша его сынове пророчестии, иже во Иерихоне сопротив, и реша: почи дух Илиин на Елиссеи. И приидоша на сретение ему и поклонишася ему до земли, 16 и реша к нему: се, ныне со отроки твоими пятьдесят мужей сынов сильных: шедше да взыщут господина твоего, еда како Дух Господень взя, и поверже его на Иордане, или на единей от гор, или на единем от холмов и рече Елиссей: не посылайте. 17 И принудиша его, и дондеже устыдеся, и рече: послите. И послаша пятьдесят мужей, и искаша три дни, и не обретоша его, 18 и возвратишася к нему: и той седяше во Иерихоне. И рече Елиссей к ним: не глаголах ли к вам, не идите? 19 И реша мужие града ко Елиссею: се, жилище града благо, якоже ты, господине, видиши, но воды злы и земля неплодна. 20 И рече Елиссей: принесите ми водонос нов, и всыплите в онь соль. И взяша, и принесоша к нему. 21 И изыде Елиссей на исходища водная, и всыпа ту соль, и рече: сице глаголет Господь: изцелих воды сия, не будет от них ктому смерти и неплодства. 22 И изцелеша воды до дне сего, по глаголу Елиссееву, егоже глагола. 23 И взыде оттуду во Вефиль. И восходящу ему путем, и дети малы изыдоша из града, и ругахуся ему, и реша ему: гряди, плешиве, гряди. 24 И озреся вслед их, и виде я, и проклят я именем Господним. И се, изыдоша две медведицы из дубравы и растерзаша от них четыредесять два отрочища. 25 И иде оттуду в гору Кармилскую, и оттуду возвратися в Самарию. === 3 === 1 И Иорам сын Ахаавов воцарися над Израилем в Самарии, в лето осмоенадесять Иосафата царя Иудина, и царствова лет дванадесять, 2 и сотвори лукавое пред очима Господнима: обаче не якоже отец его и не якоже мати его: и разруши капища Ваалова, яже сотвори отец его: 3 обаче ко греху Иеровоама сына Наватова, иже введе во грех Израиля, прилепися и не отступи от него. 4 И Моса царь Моавль бе нокид и даяше дань царю Израилеву, сто тысящ агнцев и сто тысящ овнов с рунами. 5 И бысть по умертвии Ахаавли и отвержеся царь Моавль царя Израилева. 6 И изыде царь Иорам во дни оны от Самарии и согляда Израиля, 7 и иде, и посла ко Иосафату царю Иудину, глаголя: царь Моавль отвержеся мене: идеши ли со мною на брань на Моава? И рече: взыду: сице мне, якоже и тебе: якоже людие мои, людие твои: якоже кони мои, кони твои. 8 И рече: киим путем взыдем? И рече: путем пустыни Едомския. 9 И иде царь Израилев и царь Иудин и царь Едомль, и идоша путем седмь дний: и не бе полку воды и скотом сущым с ними. 10 И рече отроком своим царь Израилев: о, яко созва Господь три сия цари идущыя предати их в руце Моавли. 11 И рече Иосафат к нему царь Иудин: есть ли зде пророк Господень, и вопросим Господа им? И отвеща един отрок царя Израилева и рече: зде есть Елиссей сын Сафатов, иже возливаше воду на руце Илиине. 12 И рече Иосафат: есть с ним глагол Господень. И сниде к нему царь Израилев и Иосафат царь Иудин и царь Едомль. 13 И рече Елиссей ко царю Израилеву: что мне и тебе? Иди ко пророком отца твоего и ко пророком матере твоея. И рече ему царь Израилев: еда созва Господь три цари, еже предати я в руце Моавли? 14 И рече Елиссей: жив Господь Сил емуже предстою пред Ним, яко аще бых не лице Иосафата царя Иудина аз приял, то воззрел ли бых на тя, и видел ли бых тя? 15 И ныне приведи ми певца. И бысть егда воспеваше певец, и бысть на нем рука Господня, 16 и рече: тако глаголет Господь: сотворите поток сей рвами рвами, 17 яко тако глаголет Господь: не узрите духа, и ниже увидите дождя: и поток сей наполнится воды, и пиете вы и стяжания ваша и скоти ваши: 18 и легко сие пред очима Господнима, и предам Моава в руки вашя, 19 и поразите всяк град тверд, и всяко древо благо низложите, и всяк источник воды заградите, и всяку часть благу разбиете камением. 20 И бысть заутра восходящей жертве, и се, воды идяху путем Едомским, и исполнися воды земля. 21 И вси Моавитяне услышаша, яко взыдоша тридесяти царя братися с ними. И возопиша отвсюду препоясаннии оружием и реша: ох: и сташа у предела. 22 И ураниша заутра, и солнце возсия на воды: и виде Моав сопротив воды чермны яко кровь, 23 и рече: кровь сия есть от оружия: и бишася царие, и уби муж искренняго своего: и ныне (гряди) на корысти, Моаве. 24 И внидоша в полк Израилев, Израилтяне же восташа. И избиша Моавлян: и побегоша от лица их: и внидоша входяще и биюще Моава, 25 и грады разбиша, и всяку часть благу навергоша мужие камением, и наполниша ю, и всяк источник заградиша, и всяко древо благо изсекоша, донележе оставиша камение стен разбиено: и обступиша пращницы и разбиша его. 26 И виде царь Моавль, яко укрепися над ним брань, и взя с собою седмь сот мужей со обнаженным оружием, еже просещися ко царю Едомску: и не возмогоша. 27 И поят сына своего первенца, егоже воцари вместо себе, и вознесе его во всесожжение на стене: и бысть раскаяние великое во Израили: и отступиша от него и возвратишася в землю свою. === 4 === 1 И жена едина от сынов пророчих возопи ко Елиссею, глаголющи: раб твой муж мой умре, ты же веси, яко раб твой бе бояся Господа: и заимодавец прииде взяти два сына моя себе в рабы. 2 И рече Елиссей: что сотворю ти? Повеждь ми, что имаши ныне в дому? Она же рече: несть у рабы твоея ничтоже в дому, токмо мало елеа, имже помажуся. 3 И рече к ней: иди, испроси себе сосуды отвне от всех сосед твоих, сосуды праздны, не умали: 4 и вниди, и затвори дверь за собою и за сынома твоима, и влиеши (от елеа твоего) во вся сосуды сия, и наполненное возмеши. 5 И отиде от него и сотвори тако, и затвори дверь за собою и за сынома своима: та приношаста к ней, она же вливаше: 6 и бысть егда наполнишася вси сосуды, и рече сынома своима: приближита ми еще сосуд. И реста ей: несть еще сосуда. И ста елей. 7 И прииде и возвести человеку Божию. И рече Елиссей: иди и продаждь сей елей, и заплати лихву твою, и ты и сына твоя жити будете от оставшаго елеа. 8 И бысть во един день, и прейде Елиссей в Соман, и ту жена велия и удержа его снести хлеба: и бысть ему входити и исходити множицею, и уклоняшеся тамо ясти хлеба. 9 И рече жена к мужу своему: се, ныне разумех, яко человек Божий свят сей мимо ходит нас присно: 10 сотворим убо ему горницу, место мало, и поставим ему тамо одр и трапезу, и престол и свещник: и будет внегда входити ему к нам, и уклоняется тамо. 11 И бысть во един день, и вниде тамо, и уклонися в горницу, и спа тамо. 12 И рече ко Гиезию отрочищу своему: призови ми Соманитяныню сию. И призва ю, и ста пред ним. 13 И рече ему: рцы убо ей: се, удивила еси нас всем попечением сим: что подобает сотворити тебе? Аще есть тебе слово к царю или ко князю силы? Она же рече: (несть,) посреде людий моих аз есмь живущи. 14 И рече ко Гиезию: что подобает сотворити ей? И рече Гиезий отрочищь его: воистинну сына несть у нея и муж ея стар. 15 И рече призови ю. И призва ю, и ста при дверех. 16 И рече Елиссей к ней: во время сие, якоже час сей живущи, ты зачнеши сына. Она же рече: ни, господине, не солжи рабе твоей. 17 И зачат во чреве жена, и роди сына во время сие, якоже час сей живущи, якоже глагола к ней Елиссей. 18 И возмужа отрочищь. И бысть, егда изыде ко отцу своему, к жнущым, 19 и рече ко отцу своему: глава моя, глава моя (болит). И рече ко отроку: неси его к матери его. 20 И несе его к матери его, и лежаше на колену ея до полудне, и умре. 21 И вознесе его, и положи его на одре человека Божия: и затвори его, и изыде, и призва мужа своего, и рече ему: 22 посли ми убо единаго от отрок, и едино от ослят, и теку до человека Божия, и возвращуся. 23 И рече: что яко ты идеши к нему днесь? Не нов месяц, ниже суббота. Она же рече: мир. 24 И оседла осля, и рече ко отрочищу своему: веди, и иди, да не удержиши мене, еже всести, якоже реку тебе: гряди, и иди, и прииди к человеку Божию на гору Кармилскую. 25 И иде, и прииде до человека Божия в гору Кармилскую. И бысть яко виде ю Елиссей грядущую, и рече ко Гиезию отрочищу своему: се, убо Соманитяныня оная: 26 ныне тецы во сретение ея и речеши ей: мир ли тебе? И тече во сретение ей и рече ей: мир ли тебе? Мир ли мужу твоему, мир ли отрочищу твоему? Она же рече: мир. 27 И прииде ко Елиссею на гору, и ятся за нозе его. И приближнся Гиезий отринути ю. И рече Елиссей: остави ю, яко душа ея болезненна в ней, и Господь укры от мене и не возвести мне. 28 Она же рече: еда просих сына у господина моего, яко рекох: не прельсти мене? 29 И рече Елиссей ко Гиезию: препояши чресла твоя и возми жезл мой в руце твои, и иди, яко аще обрящеши мужа, да не благословиши его, и аще благословит тя муж, не отвещай ему: и возложи жезл мой на лице отрочища. 30 И рече мати отрочища: жив Господь и жива душа твоя, аще оставлю тебе. И воста Елиссей и иде вслед ея. 31 И Гиезий иде пред нею, и возложи жезл на лице отрочища, и не бе гласа, и не бе слышания. И возвратися во сретение его и поведа ему глаголя: не воста отрочищь. 32 И вниде Елиссей в храмину, и се, отрочищь умерый положен на одре его. 33 И вниде Елиссей в дом и затвори дверь за двою собою, и помолися Господу. 34 И взыде, и ляже на отрочищи, и положи уста своя на устех его, и очи свои на очи его, и руце свои на руце его, и плесне свои на плесну его: и слячеся над ним, и дуну на него, и согреся плоть отрочища. 35 И обратися, и походи в храмине сюду и сюду: и взыде, и слячеся над отрочищем седмижды, и отверзе отрочищь очи свои. 36 И возопи Елиссей ко Гиезию и рече: призови ми Соманитяныню сию. И призва ю, и вниде к нему. И рече Елиссей: приими сына твоего. 37 И вниде жена, и паде на ногу его, и поклонися ему до земли: и прият сына своего, и изыде. 38 И Елиссей возвратися в Галгалы. И бе глад в земли той, и сынове пророчи седяху пред ним. И рече Елиссей отрочищу своему: настави коноб велий и свари варение сыном пророчим. 39 И изыде един на село собрати зелия дивия: и обрет виноград на селе, и набра в нем яблока дивияго полну ризу свою, и всыпа в котел на сварение, яко не разумеша, 40 и принесе мужем ясти. И бысть ядущым им от варения, и се, возопиша и реша: смерть в конобе, человече Божий. И не могоша ясти. 41 И рече: возмите муки и всыплите в коноб. И рече Елиссей ко Гиезию отрочищу своему: изнеси людем, да ядят. И не бысть ктому злаго глагола в конобе. 42 И муж прииде от Вефариса и принесе к человеку Божию первородных двадесять хлебов ячменных и смоквы. И рече: дадите людем, да ядят. 43 И рече отрок его: что дам сие сту мужем? И рече: даждь людем я, да ядят, яко сице глаголет Господь: будут ясти, и останет. 44 И ядоша, и оста по глаголу Господню. === 5 === 1 И Нееман князь силы Сирийския бе муж велий пред господином своим и дивен лицем, яко им даде Господь спасение Сирии: и муж бе силен крепостию прокажен. 2 И из Сирии изыдоша воини и плениша юнотку малу от земли Израилевы: и бе пред женою Неемановою (служа) 3 и рече госпоже своей: о, дабы господин мой был у пророка Божия, иже в Самарии, той бы очистил его и проказы его. 4 И вниде и возвести господину своему и рече: тако и тако глагола юнотка, яже от земли Израилевы. 5 И рече царь Сирийский ко Нееману: иди, вниди, и послю писание ко царю Израилеву. И пойде, и взя в руце свои десять талант сребра и шесть тысящ златник и десять изменяемых риз. 6 И внесе писание к царю Израилеву глаголя: и ныне егда приидет писание сие к тебе, се, послах к тебе Неемана раба моего, да очистиши его от проказы его. 7 И бысть егда прочте писание царь Израилев, раздра ризы своя и рече: еда аз Бог есмь, еже мертвити и животворити, яко сей посла и мне, да очищу мужа от проказы его? Прочее разумейте и видите, яко се ищет вины ко мне. 8 И бысть егда услыша Елиссеи, яко раздра ризы своя царь Израилев, и посла к царю Израилеву, глаголя: почто раздрал еси ризы твоя? Да приидет ко мне ныне Нееман, и да разумеет, яко есть пророк во Израили. 9 И прииде Нееман на конех и на колесницех и ста при дверех дому Елиссеева. 10 И посла Елиссей посланника к нему, глаголя: шед измыйся седмижды во Иордане, и возвратится плоть твоя к тебе, и очистишися. 11 И разгневася Нееман, и отиде, и рече: се, убо глаголах, яко изыдет ко мне, и станет, и призовет во имя Бога своего, и возложит руку свою на место, и очистит проказу: 12 не благи ли Авана и Фарфар реки Дамасковы паче Иордана и всех вод Израилевых? Не шед ли измыюся в них и очишуся? И уклонися и отиде во гневе. 13 И приближишася отроцы его и реша ему: аще бы велие слово глаголал пророк тебе, не бы ли сотворил еси? А яко рече к тебе: измыйся, и очистишися. 14 И сниде Нееман, и погрузися во Иордане седмижды, по глаголу Елиссееву: и возвратися плоть его яко плоть отрочате млада, и очистися. 15 И возвратися ко Елиссею сам и все ополчение его, и прииде и ста пред ним и рече: се, ныне разумех, яко несть Бога во всей земли, но токмо во Израили: и ныне приими благословение от раба твоего. 16 И рече Елиссей: жив Господь, Емуже предстах пред ним, аще прииму. И понуждаше его взяти, и не послуша. 17 И рече Нееман: аще ли не (хощеши взяти), то даждь рабу твоему время, супруг мсков, от земли сея червленыя: яко и сотворит отселе раб твой всесожжения и жертвы богом иным, но Господу единому, 18 по глаголу сему и о словеси сем: и очистит Господь раба твоего, егда внидет господин мой в дом Ремманов на поклонение тамо: и той почиет на руку моею, и поклонюся в дому Реммани, внегда кланятися ему в дому Реммани, и очистит Господь раба твоего по словеси сему. 19 И рече Елиссей ко Нееману: иди с миром. И отиде от него на Хаврафа земли. 20 И рече Гиезий отрочищь Елиссеев: се, пощаде господин мой Неемана Сирянина сего, еже не взяти от руки его, яже принесе: жив Господь, яко имам тещи вслед его, и возму от него нечто. 21 И тече Гиезий во след Нееманов. И виде его Нееман текуща вслед себе, и возвратися с колесницы на сретение ему и рече: мир ли? 22 И рече Гиезий: мир: господин мой посла мя, глаголя: се, ныне приидоста ко мне два отрочища от горы Ефремли от сынов пророчих: даждь убо има талант сребра и две премены риз. 23 И рече Нееман: возми два таланта сребра. И взя два таланта во два мешца и две премены риз, и возложи на два отрочиша своя, и несоста пред ним: 24 и приидоша в сумраки, и взя от рук их и сокры во храмине, и отпусти мужы. 25 И сам вниде и предста господину своему. И рече к нему Елиссей: откуду (пришел еси), Гиезие? И рече Гиезий: не исходил раб твой никаможе. 26 И рече к нему Елиссей: не ходило ли сердце мое с тобою, и видех, егда возвращашеся муж с колесницы своей во сретение тебе? И ныне взял еси сребро и ризы взял еси, да купиши за них вертограды и маслины и винограды, и овцы и волы, и отроки и отроковицы: 27 и проказа Нееманова да прильпнет к тебе и к семени твоему во веки. И изыде от лица его прокажен яко снег. === 6 === 1 И реша сынове пророчи ко Елиссею: се, убо место, идеже мы живем противу тебе, тесно нам: 2 да идем ныне до Иордана, и да возмем оттуду кийждо муж по бервну единому и сотворим себе ту обиталища пребывати тамо. И рече: идите. 3 И рече един кротце: гряди и сам с рабы твоими. И рече: аз пойду. 4 И иде с ними: и приидоша ко Иордану, и секоша древа: 5 и егда един отсекаше бервно, и се, железо спаде с топорища и впаде в воду. И возопи: о, господине, и сие заемное. 6 И рече человек Божий: где паде? И показа ему место. И отсече древо и вверже и тамо: и всплыве железо. 7 И рече: возми себе. И простре руку свою и взят е. 8 И царь Сирский бе воюя на Израиля, и совеща со отроки своими, глаголя: на месте некоем сокровеннем ополчуся. 9 И посла Елиссей ко царю Израилеву, глаголя: блюдися не преити на место сие, яко ту Сиряне залягоша. 10 И посла царь Израилев на место, о немже рече ему Елиссей, и соблюдеся оттуду не единою, ниже дважды. 11 И смутися душа царя Сирска о словеси сем: и призва отроки своя и рече и ним: не возвестите ли мне, кто предает мя царю Израилеву? 12 И рече един от отрок его: ни, господине мой царю: яко пророк Елиссей, иже во Израили, возвещает царю Израилеву вся словеса, яже аще глаголеши в сокровищи ложницы твоея. 13 И рече: идите, видите, где сей, и послав возму его. И возвестиша ему, глаголюще: се, есть в Дофаиме. 14 И посла тамо кони и колесницы и силу тяжку: и приидоша нощию и окружиша град. 15 И урани раб Елиссеев востати, и изыде: и се, сила обступи град, и кони и колесницы. И рече отрок его к нему: о, господине, что сотворим? 16 И рече Елиссей: не бойся, яко множае иже с нами, нежели с ними. 17 И помолися Елиссей и рече: Господи, отверзи ныне очи отрока, да узрит. И отверзе Господь очи его, и виде: и се, гора исполнь коней, и колесница огненна окрест Елиссеа. 18 И снидоша к нему: и помолися Елиссей ко Господу и рече: порази убо язык сей невидением. И порази их невидением по глаголу Елиссееву. 19 И рече к ним Елиссей: не сей путь и не сей град: грядите по мне, и отведу вы к мужу, егоже ищете. И отведе их в Самарию. 20 И бысть егда внидоша в Самарию, и рече Елиссей: отверзи убо, Господи, очи их, и да видят. И отверзе Господь очи их, и видеша: и се, бяху посреде Самарии. 21 И рече царь Израилев ко Елиссею, егда увиде я: аще поражу я поражением, отче? 22 И рече Елиссеи: да не поразиши: еда ли пленил еси их мечем твоим и луком твоим, да избиеши? И предложи им хлебы и воду, да ядят и да пиют и да отидут ко господину своему. 23 И предложи им предложение велие, и ядоша и пиша, и отпусти я, и идоша ко господину своему: и не приложиша ктому воини приходити из Сирии в землю Израилеву. 24 И бысть по сих, и собра сын Адеров царь Сирийский все ополчение свое, и взыде и обседе Самарию. 25 И бысть глад велик в Самарии: и се, обседоша ю, дондеже бысть глава ослова за пятьдесят сикль сребра, и четвертая часть меры гноя голубинаго за пять сикль сребра. 26 И бысть царь Израилев обходяй по стенам: и жена (некая) возопи к нему, глаголющи: спаси мя, господине мой царю. 27 И рече ей: аще тебе не спасает Господь, како аз спасу тя? Еда от гумна или от точила? 28 И рече ей царь: что ти есть? И рече: сия жена ко мне рече: даждь сына твоего, да съядим его днесь, а утро моего сына съядим: 29 и испекохом сына моего и снедохом его: и рех к ней в день вторый: даждь сына твоего, и съядим его: и скры сына своего. 30 И бысть егда услыша царь Израилев словеса жены, раздра ризы своя и сам хождаше по стене, и видеша людие вретище на плоти его внутрь. 31 И рече царь: сия да сотворит ми Бог и сия да приложит ми, аще будет глава Елиссеева на нем днесь. 32 Елиссей же седяше в дому своем, и старцы седяху с ним. И посла царь мужа пред лицем своим. И прежде даже приити посланному к нему, и той рече ко старцем: не весте ли, яко посла сын убийцы сей, да отсечет главу мою? Видите, егда приидет вестник, заключите двери и стисните его во дверех: не топот ли ног господина его вслед его? 33 И еще ему глаголющу с ними, и се, вестник сниде к нему и рече: се, сие зло от Господа: что потерплю Господеви ксему? === 7 === 1 И рече Елиссей: слышите слово Господне, сице глаголет Господь: якоже час сей, утро мера муки пшеничны будет за сикль един, и две меры ячменя за сикль един во вратех Самарии. 2 И отвеща тристат, на егоже руку царь почиваше, и рече и Елиссею: се, аще отверзет Господь и хляби небесныя, то не будет глагол сей. И Елиссей рече: се, ты узриши очима твоима, и оттуду не имаши ясти. 3 И бяху четыре мужа прокажени при вратех града. И рече муж ко искреннему своему: что мы седим зде дондеже умрем? 4 Аще речем: внидем во град, то глад есть во граде, и умрем тамо: аще же седим зде, то и тако умрем: и ныне идем и внидем в полк Сирийский: аще живят ны, живи будем: аще ли умертвят ны, то умрем. 5 И восташа в сумраце ити в полк Сирийский и внидоша среде полка Сирийска, и се, не бе мужа ту. 6 И Господь слышан сотвори полку Сирийску глас колесниц и глас коней и глас силы великия. И рече муж ко брату своему: се, ныне наял есть на нас царь Израилев цари Хеттейски и цари Египетския приити на ны. 7 И восташа, и бежаша в сумраце, и оставиша сени своя и кони своя и ослы своя, якоже быша во стану, и бежаша души ради своея. 8 И внидоша прокаженнии сии до среды полка, и внидоша в сень едину, и ядоша и пиша, и взяша оттуду сребро и злато и одежды, и отидоша, и скрыша: и возвратишася, и внидоша в другую сень, и взяша оттуду, и отидоша, и скрыша. 9 И рече муж ко искреннему своему: не тако мы творим: день сей день благоговещения есть, мы же молчим и медлим до света утренняго, и обрящем беззаконие: и ныне приидем и внидем, и возвестим в дому цареве. 10 И внидоша, и возопиша ко вратом града и возвестиша им, глаголюще: внидохом в полк Сирийский, и се, не бысть ту мужа, ни гласа человеча, но токмо кони привязани, и ослята, и сени их якоже суть. 11 И возопиша вратницы, и возвестиша в дому цареве внутрь. 12 И воста нощию царь и рече ко отроком своим: возвещу вам ныне, яже сотвориша нам Сириане: разумеша, яко гладни есмы, и изыдоша из стана, и сокрышася на селе, глаголюще: яко изыдут из града, и имем я живы и во град внидем. 13 И отвеща един от отрок его и рече: да возмут ныне пять коней оставших, иже осташася зде, се, суть у толикаго множества Израилева оставшиися, и послем тамо, и узрим. 14 И взяша два всадника коней: и посла царь Израилев вслед царя Сирска, глаголя: идите и видите. 15 И идоша вслед их даже до Иордана, и се, весь путь исполнен одежд и оружия, яже повергоша Сириане, внегда устрашится им. И возвратишася посланнии, и возвестиша царю. 16 И изыдоша людие, и разграбиша весь стан Сирский. И бысть мера муки пшеничны за сикль един и две меры ячменя за сикль, по глаголу Господню. 17 И царь пристави тристата, на егоже руце царь почиваше, у врат: и попраша его людие во вратех, и умре, якоже глагола человек Божий, иже глагола, егда посланный прииде к нему. 18 И бысть якоже рече Елиссей к царю глаголя: две меры ячменя за сикль един, и мера муки пшеничны за сикль: и будет якоже сей час заутра во вратех Самарии. 19 И отвеща тристат Елиссею и рече: аще Господь отверзет хляби небесныя, не будет глагол сей. И рече Елиссей: се, узриши очима твоима, и оттуду и не имаши ясти.. 20 И бысть тако, и попраша его людие во вратех, и умре. === 8 === 1 И глагола Елиссей к жене, еяже воскреси сына, глаголя: востани и иди ты и дом твой, и обитай идеже аще можеши обитати, яко призва Господь глад на землю, и приидет на землю седмь лет. 2 И воста жена, и сотвори но глаголу Елиссееву, и пойде сама и дом ея, и обита на земли иноплеменничи седмь лет. 3 И бысть но скончании седми лет, и возвратися жена от земли иноплеменничи во град, и прииде возопити к царю о доме своем и о селех своих. 4 И глагола царь ко Гиезию отроку Елиссеа человека Божия глаголя: повеждь ми ныне вся великая, яже сотвори Елиссей. 5 И бысть ему поведающу цареви, яко жива сотвори сына умершаго: и се, жена, еяже воскреси Елиссей сына ея, вопиющи ко цареви о доме своем и о селех своих, и рече Гиезий: господине царю, сия жена и сей сын ея, егоже жива сотвори Елиссей. 6 И вопроси царь жену: и поведа ему. И даде ей царь скопца единаго, глаголя возврати вся, яже ея суть, и вся плоды села ея, от да, в оньже остави землю, даже до ныне. 7 И прииде Елиссей в Дамаск. И сын Адеров царь Сирский разболеся, и возвестиша ему, глаголюще: прииде человек Божий до зде. 8 И рече царь ко Азаилу: приими в руку свою дар, и иди во сретение человеку Божию, и вопроси Господа им, глаголя: аще ли жив буду от болезни сея? 9 И иде Азаил на сретение ему, и взя дар в руку свою, и вся благая Дамаскова, бремя четыредесять велблюдов, и прииде, и ста пред ним, и рече ко Елиссею: сын твой, сын Адеров, царь Сирский, посла мя к тебе вопросити, глаголя: буду ли жив от болезни моея сея? 10 И рече к нему Елиссей: иди и рцы ему: живя поживеши: но показа ми Господь, яко смертию умрет. 11 И предста лицу его, и возложи (руки) даже до постыдения, и плакася человек Божий. 12 И рече Азаил: что яко господин мой плачет? И рече: вем елика сотвориши сыном Израилевым зла: крепости их сожжеши огнем, и избранныя их избиеши мечем, и младенцы их разбиеши, и во чреве имеющыя их расторгнеши. 13 И рече Азаил: кто есть раб твой, пес мертвый, яко сотворит глагол сей? И рече Елиссей: показа ми тя Господь царствующа над Сириею. 14 И отиде от Елиссеа и вниде ко господину своему. И рече ему (царь): что ти рече Елиссей? Отвеща: рече ми Елиссей, живя поживеши. 15 И бысть во утрии, и взя одеяло, и намочи в воде, и обложи на лице его, и умре: и воцарися Азаил вместо его. 16 В лето пятое Иорама сына Ахаава царя Израилева и Иосафата царя Иудина, воцарися Иорам сын Иосафатов царь Иудин: 17 сын тридесяти и двою лету бе, внегда воцаритися ему, и осмь лет царствова во Иерусалиме, 18 и ходи в пути царей Израилевых, якоже сотвори дом Ахаавль, бе бо дщи Ахаавля жена ему, и сотвори лукавое пред Господем. 19 И не хотяше Господь потребити Иуды, Давида ради раба Своего, якоже рече дати ему светилник и сыном его во вся дни. 20 Во дни его отвержеся Едом из под руки Иудины и постави над собою царя. 21 И взыде Иорам в Сиор, и вся колесницы яже с ним. И бысть ему воставшу, и изби Едома обступившаго окрест его, и князи колесниц, и бежаша людие в селения своя. 22 И отступи Едом из под руки Иудины да дне сего: тогда отвержеся Ловна во время оно. 23 И прочая словес Иорамлих, и вся елика сотвори, не се ли, сия писана в книзе словес дний царей Иудиных? 24 И успе Иорам со отцы своими, и погребен бысть со отцы своими во граде Давида отца своего: и царствова Охозиа сын его вместо его. 25 В лето второенадесять Иорама сына Ахаавля царя Израилева, царствовати нача Охозиа сын Иорама царя Иудина: 26 сын двадесяти двух лет бысть Охозиа, егда нача царствовати, и лето едино царствова во Иерусалиме. Имя же матери его Гофолиа, дщерь Амвриа царя Израилева. 27 И хождаше по путем дому Ахаавля, и сотвори лукавое пред Господем, якоже дом Ахаавль: зять бо бе дому Ахаавля. 28 И иде со Иорамом сыном Ахаавлим на брань, на Азаила царя иноплеменнича в Рамоф Галаадский, и уязвиша Сиряне Иорама. 29 И возвратися царь Иорам целитися во Иезраель от язв, имиже уязвиша его в Рамофе, егда ратоваше той на Азаила царя Сирска, и Охозиа сын Иорамль царь Иудин сниде видети Иорама, сына Ахаавля, во Иезраель, яко боляше той. === 9 === 1 Елиссей пророк призва единаго от сынов пророчих и рече ему: препояши чресла своя, и возми сосуд елеа сего в руку твою, и иди в Рамоф Галаадский: 2 и внидеши тамо, и узриши тамо Ииуа сына Иосафата сына Намессиева, и внидеши, и изведеши его от среды братии его, и введеши его во внутреннюю клеть: 3 и возмеши сосуд елеа, и возлиеши на главу его, и рцы: сице глаголет Господь: помазах тя в царя над Израилем: и отверзеши двери, и да бежиши, и да не пребудеши тамо. 4 И иде отрочищь пророк в Рамоф Галаадский: 5 и вниде, и се, князи силы седяху, и рече: слово ми есть к тебе, о, княже. И рече Ииуй: к кому от всех нас? И рече: к тебе, княже. 6 И воста и вниде в дом: и возлия елей на главу его и рече ему: сице глаголет Господь Бог Израилев: помазах тя в царя над людьми Господними, над Израилем. 7 И да потребиши дом Ахаава господина твоего от лица Моего, и отмстиши кровь рабов Моих пророков и кровь всех рабов Господних от руки Иезавелины. 8 И от руки всего дому Ахаавля, и потребиши от дому Ахаавля мочащагося к стене, и содержащагося, и оставльшагося во Израили: 9 и предам дом Ахаавль, якоже дом Иеровоама сына Наватова и якоже дом Ваасы сына Ахиина: 10 и Иезавель снедят пси в части Иезраеля, и не будет погребающаго ю. И отверзе двери и убежа. 11 Ииуй же изыде ко отроком господина своего. И реша ему: мир ли? Что яко вниде неистовый сей к тебе? И рече им: вы весте мужа и суесловие его. 12 И реша: не правда, (аще не возвестиши?) возвести убо нам. И рече Ииуй к ним: тако и тако рече ко мне, глаголя: сице глаголет Господь: помазах тя в царя над Израилем. 13 И слышавше текоша спешно, и взя кийждо ризы своя, и положиша под ним, понеже на единем от степений седяше, и вострубиша в рог и реша: воцарися Ииуй. 14 И возвратися Ииуй сын Иосафата сына Намессиева ко Иораму. Иорам же сам стрежаше в Рамофе Галаадстем и весь Израиль от лица Азаила царя Сирийска. 15 И возвратися Иорам царь целитися во Иезраели от язв, имиже уязвиша его Сиряне, егда брашеся со Азаилом царем Сирийским. И рече Ииуй: аще есть душа ваша со мною, да не изыдет из града беглец, ити и возвестити во Иезраели. 16 И вседе на коня, и пойде Ииуй, и сниде во Иезраель, яко Иорам царь Израилев целяшеся во Иезраели от стреляний, имиже устрелиша его Арамины в Рамофе на брани со Азаилом царем Сирским, яко той бе силен и муж силы, и лежаше тамо. И Охозиа царь Иудин прииде видети Иорама. 17 И страж взыде на столп во Иезраели, и виде прах Ииуев, егда ити ему и рече: прах аз вижу. И рече Иорам: всади мужа на конь и посли противу им, и да речет: мир ли? 18 И иде всадник конный на сретение ему и рече: тако глаголет царь: мир ли? И рече Ииуй: что тебе и миру? Обратися вслед мене. И возвести страж, глаголя: прииде посланный до них и не возвратися. 19 И посла всадника коннаго втораго, и прииде к нему и рече: тако рече царь: мир ли? И рече Ииуй: что тебе и миру? Возвратися вслед мене. 20 И возвести страж, глаголя: прииде до них и не возвратися: и вождь ведяше Ииуа сына Намессиина, яко в премене бысть. 21 И рече Иорам: впрязите. И впрягоша колесницу: и изыде Иорам царь Израилев и Охозиа царь Иудин, кийждо на колеснице своей, и изыдоста на сретение Ииуа, и обретоста его и части Навуфеа Иезраилитина. 22 И бысть яко увиде Иорам Ииуа, и рече мир ли, Ииуе? И рече Ииуй что тебе и миру? Еще блуды Иезавели матери твоея, и чарове ея многия. 23 И обрати Иорам руки своя и бежа, и рече ко Охозии: лесть, Охозие. 24 И наляче Ииуй рукою своею лук и устрели Иорама посреде плещу его, и изыде стрела сквозе сердце его: и преклонися на колена своя. 25 И рече Ииуй к Вадекару тристату своему: возми и верзи его на части села Навуфеа Иезраилитина, яко помню, аз и ты вседшии на колесницы идохом вслед Ахаава отца его, и Господь рече о нем пррочество сие, глаголя: 26 не видех ли крове Навуфеевы и крове сынов его вчера, рече Господь? И воздам ему на части сей, рече Господь: и ныне убо взем поверзи его на части сей по глаголу Господню. 27 И Охозиа царь Иудин виде, и побеже путем вефган и гна по нем Ииуй и рече: и сего (не имам оставити). И порази его на колеснице егда идяше в Гай, иже есть Иевлаам и убежа в Магеддон, и умре тамо. 28 И возложиша его отроцы его на колесницу и везоша его во Иерусалим, и погребоша его во гробе его во граде Давидове. 29 И в первоенадесять лето Иорама царя Израилева воцарися Охозиа над Иудою. 30 И прииде Ииуй во Иезраель (град). Иезавель же услыша, и намаза лице свое и украси главу свою, и приниче окном. 31 И Ииуй вхождаше во град и рече: мир ли Замврию, убийце господина своего? 32 И воззре лицем своим на окно и виде ю и рече: кто ты еси? Сниди ко мне. И преклонистася к нему два скопца. 33 И рече Ииуй: сверзита ю. И свергоста ю, и окропишася кровию ея стены и кони, и попраша ю. 34 И вниде Ииуй, и яде и пи, и рече: осмотрите ныне проклятую сию, и погребите ю, яко дщерь царева есть. 35 И идоша погребсти ю, и не обретоша от нея ничто ино, токмо лоб и ноги и длани рук. 36 И возвратишася и возвестиша ему. И рече: слово Господне, еже глагола рукою раба Своего Илии Фесвитянина, глаголя: в части Иезраеля снедят пси плоть Иезавелину: 37 и будет труп Иезавелин аки гной на лицы села в части Иезраеля, яко не рещи им: сия есть Иезавель. === 10 === 1 И Ахааву беша седмьдесят сынове во Самарии. И написа писание Ииуй и посла в Самарию ко князем Самарийским и к старейшинам и ко кормителем сынов Ахаавлих, глаголя: 2 и ныне егда приидет писание сие к вам, и с вами сынове господина вашего, и с вами колесницы и кони, и грады тверды и оружия: 3 и узрите благаго и праваго в сынех господина вашего, и поставите его на престоле отца его, и да воюете о доме господина вашего. 4 И убояшася зело и реша: се, два царя не возмогоста стати противу лицу его, и како мы станем? 5 И послаша иже над домом и иже над градом, и старейшины, и кормителе ко Ииую, глаголголюще: отроцы мы твои, и елика аще речеши к нам, сотворим: не воцарим мужа, благое пред очима твоима сотворим. 6 И написа к ним Ииуй писание второе, глаголя: аще вы мои и гласа моего вы послушаете, возмите главы мужей сынов господина вашего и принесите ко мне, якоже час утро, во Иезраель. И бе сынов царевых седмьдесят мужей, сии началницы града вскормиша их. 7 И бысть егда прииде к ним писание, и взяша сыны царевы и заклаша их седмьдесят мужей, и возложиша главы их в кошницы и послаша их к нему во Иезраель. 8 И прииде вестник, и возвести ему, глаголя: принесоша главы сынов царевых. И рече: положите я в два холма при вратех града до заутра. 9 И бысть заутра, и изыде и ста во вратех града, и рече ко всем людем: праведни вы: се, аз есмь, обратихся на господина моего и убих его: и кто порази всех сих? 10 Видите убо, яко не падет от глагола Господня на землю, егоже глагола Господь на дом Ахаавль: и Господь сотвори, елика глагола рукою раба Своего Илии. 11 И изби Ииуй всех оставшихся в дому Ахаавли во Иезраели, и вся вельможы его, и знаемыя его, и жерцы его, яко не остатися его останку. 12 И воста и иде в Самарию сам, в Вефакад пастырский при пути. 13 И Ииуй обрете братию Охозии царя Иудина и рече: кто вы? И реша: братия Охозиины мы, и снидохом поздравити сыны царевы и сыны обладающия. 14 И рече: поимите я живы. И взяша их живых, и заклаша их в Вефакаде, четыредесять два мужа: и не остави мужа от них. 15 И иде оттуду, и обрете Ионадава сына Рихавля на пути во сретение себе, и благослови его. И рече к нему Ииуй: аще есть сердце твое с сердцем моим право, якоже сердце мое с сердцем твоим? И рече Ионадав: есть. И рече Ииуй: и аще есть, даждь руку твою. И даде руку свою. И возведе его к себе на колесницу 16 и рече к нему: гряди со мною и виждь, внегда ревновати мне по Господе саваофе. И посади его на колесницу свою. 17 И вниде в Самарию, и изби всех оставшихся Ахаавлих в Самарии, дондеже истребити ему по глаголу Господню, егоже глагола ко Илии. 18 И собра Ииуй вся люди и рече к ним: Ахаав поработа Ваалу мало, Ииуй же поработает ему много: 19 и ныне вся пророки Вааловы, вся рабы его и жерцы его призовите ко мне, муж да не потаится, яко жертва велика Ваалу: и всяк иже потаится, не будет жив. И Ииуй сотвори лестию, да погубит рабы Вааловы. 20 И рече Ииуй: освятите жертву Ваалу и служение. И проповедаша. 21 И посла Ииуй во весь Израиль и рече, глаголя: и ныне вси раби Вааловы, и вси жерцы его, и вси пророцы его, да никтоже останется, яко жертву велику творю: иже останется, не будет жив и приидоша вси раби Вааловы, и вси жерцы его, и вси пророцы его: не остася муж, иже не прииде: и внидоша во храм Ваалов, и наполнися храм Ваалов от края да края. 22 И рече Ииуй к сущым над домом одежд: изнесите одежды всем рабом Вааловым. И изнесе им ризохранитель. 23 И вниде Ииуй и Ионадав сын Рихавль в храмину Ваалову и рече рабом Вааловым: испытайте и видите, аще есть с вами от рабов Господних, и вышлите всех рабов Господних обретшихся тамо. И бысть якоже глагола Ииуй, яко не бе от рабов Господних, но токмо едини раби Вааловы. 24 И вниде сотворити жертвы и всесожжения и Ииуй постави себе вне осмьдесят мужей и рече: муж иже аще угонзет от мужей, ихже аз извожду в руки вашя, душа его вместо души его. 25 И бысть егда сконча творяй всесожжения, и рече Ииуй предтекущым и тристатом: вшедше избийте их, да не изыдет от них муж. И избиша их острием меча и повергоша предтекущии и тристаты, и идоша даже до града храма Ваалова: 26 и изнесоша кумир Ваалов и сожгоша его: 27 и разбиша кумиры Вааловы, и низвергоша дом Ваалов, и определиша его на афедрон даже до дне сего. 28 И погуби Ииуй храм Ваалов от Израиля. 29 Обаче от грехов Иеровоама сына Наватова, иже введе в грех Израиля, не отступи Ииуй от последования их: юницы златыя, яже в Вефили и в Дане. 30 И рече Господь ко Ииую: за сия, елика ублажил еси сотворити правое пред очима Моима, и вся елика по сердцу Моему сотворил еси дому Ахаавлю, сынове твои до четвертаго рода сядут на престоле во Израили. 31 И Ииуй не сохрани ходити в законе Господни всем сердцем своим: не отступи от грехов Иеровоама сына Наватова, иже в грех введе Израиля. 32 Во дни оны нача Господь посецати во Израили: и порази их Азаил во всех пределех Израилевых, 33 от Иордана на восток солнца, всю землю Галаадску и Гаддииску, и Рувимову и Манассиину, от Ароира, иже есть при устии потока Арнонска, и Галаад и Васан. 34 И прочая словес Ииуевых, и вся яже сотвори, и вся сила его, и совещания, яже совеща, не се ли, сия написана в книзе словес дний царей Израилевых? 35 И успе Ииуй со отцы своими, и погребоша его в Самарии. И воцарися Иоахаз сын его вместо его. 36 И дний бяше, в няже Ииуй царствова над Израилем в Самарии, двадесять осмь лет. === 11 === 1 И Гофолиа мати Охозиина виде, яко умре сын ея, и воста и погуби все семя царево. 2 Иосавееф же дщи царя Иорама, сестра Охозиина, поя Иоаса сына брата своего, и украде его от среды сынов царевых избиеных, того и доилицу его в клети постельней, и утаи его от лица Гофолиина, и не умертвиша его: 3 и бе с нею крыемь в дому Господни шесть лет: и Гофолиа бе царствующи в земли той. 4 И в седмое лето посла Иодай жрец, и поят стоначалники хорримски и расимски, и возведе я к себе в дом Господень, и завеща им завет Господень, и закля их пред Господем: и показа им Иодай сына царска, 5 и заповеда им, глаголя: сие слово, еже сотворите: третия часть от вас да снидет в субботу, и да стрежете стражбу дому царева во вратех, 6 и третия часть у дверий Пути, и третия часть у врат созади протекаюшнх, и да устрежете стражбу дому: 7 и две части в вас, всяк исходяй в субботу, и да хранят стражбу дому Господня при цари: 8 и обступите царя около, кийждо оружие свое имый в руце своей, и входяй в садироф и да умрет: и будите с царем, егда входити ему и исходити. 9 И сотвориша стоначалницы вся, елика заповеда Иодай смысленый: и поя кийждо мужы своя, и входящыя в субботу со исходяшими в субботу, и внидоша ко Иодаю жерцу. 10 И даде жрец сотником копия и щиты царя Давида, яже быша в дому Господни: 11 и быша в руках воевод и предтекущих, и сотвориша сотницы и предходящии по всему, елико заповеда им жрец. И собра жрец Господень вся люди земли в дом Господень: и сташа предтекущии, кийждо их оружие имый в руце своей, от страны дому десныя, даже да страны дому шуия жертвенныя, и дому царева около: 12 и изведе сына царева, и возложи на него венец (царский) и свидение, и воцари его, и помаза его. И восплескаша руками и реша: да живет царь. 13 И услыша Гофолиа глас предтекущих людий, и вниде к народу в дом Господень, 14 и виде, и се, царь стояше на столпе по обычаю: и бяху пред царем певцы и трубы, и вси людие земли радующеся и трубяще в трубы. И раздра Гофолиа ризы своя и возопи: измена, измена. 15 И заповеда Иодай жрец стоначалником и властелем силы, и рече к ним: изведите ю вон из полков, и входяй вслед ея смертию да умрет от оружия: понеже рече жрец, да не умрет в дому Господни. 16 И возложиша на ню руце, и изведоша ю скопцы путем исхода коней дому царева, и умре ту. 17 И завеща Иодай завет между Господем и между царем и между людьми, яко быти им в люди Господни: и между царем и между людьми. 18 И внидоша вси людие земли в дом Ваалов и разбиша его, и жертвенники его и образы его сокрушиша добре, и Мафана жерца Ваалова убиша пред лицем жертвенников. И постави жрец властели в дому Господни, 19 и взя стоначалники, и хоррима и расима, и вся люди земли, и изведе царя от дому Господня: и внидоша путем врат предтекущих дому царева, и посадиша его на престоле цареве. 20 И возрадовашася вси людие земли, и град умолче: и Гофолию умертвиша мечем в дому цареве. 21 Сын седми лет Иоас егда нача царствовати. === 12 === 1 В лето седмое Ииуа воцарися Иоас, и четыредесять лет царствова во Иерусалиме. Имя же матере его Савиа от Вирсавеи. 2 И сотвори Иоас правое пред Господем во вся дни, в няже просвети его Иодай иерей: 3 обаче высоких не преставиша, и тамо еще людие жряху и кадяху на высоких. 4 И рече Иоас к жерцем: все сребро святых вносимое в дом Господень, сребро оценения, муж сребро взявый оценения, все сребро, еже аще взыдет на сердце мужа внести в дом Господень, 5 да возмут себе жерцы, муж от продания своего, и тии да укрепят ведек дому во всех, идеже аще обрящется ведек. 6 И бысть в двадесять третие лето царя Иоаса, не укрепиша жерцы ведека храма: 7 и призва царь Иоас Иодая жерца и жерцы, и рече к ним: что яко не укреписте ведека храма? И ныне не приимайте сребра от продажей ваших, яко на ведек храма дасте е. 8 И совещашася жерцы не приимати сребра от людий и не укрепляти ведека храма. 9 И взя Иодай жрец кивот един, и сотвори в нем скважню, и положи его при олтари одесную входящих мужей в дом Господень: и влагаху тамо жерцы хранящии дверь все сребро приносимое в дом Господень. 10 И бысть егда увидеша, яко много сребра в ковчезе, и взыде писчий царев, и жрец великий, и сребросечцы и открыша, и сочтоша сребро обретшееся в дому Господни: 11 и даша сребро уготованное в руце творящих дела на сосуды дому Господня: и раздаша древоделем и делателем зиждущым в дому Господни, 12 и стеноделателем, и художником, и секущым камения на купление древес, и камения тесанаго на строение ведека дому Господня, на вся елика иждивена быша на утверждение храма. 13 Обаче не творишася храму Господню двери сребряны, гвоздие, фиалы и трубы, ни вси сосуды златы, и сосуды сребряны от сребра принесеннаго в дом Господень: 14 понеже творящым дела дадеся сие, и утвердиша тем дом Господень. 15 И не сочитаху мужей, имже даяху сребро в руки, даяти творящым дела, зане верно творяху. 16 Сребро за грехи и сребро за преступление, елико внесено бысть в дом Господень, жерцем бысть. 17 Тогда взыде Азаил царь Сирский и воева на Геф, и взя его Азаил и разби его: и обрати Азаил лице свое взыти на Иерусалим. 18 И взя Иоас царь Иудин вся святая, елика освяти Иосафат и Иорам и Охозиа, отцы его и царие Иудины, и святая его, и все злато обретшееся в сокровищих дому Господня и дому царева, и посла Азаилу царю Сирску, и отиде от Иерусалима. 19 И прочая словес Иоасовых, и вся елика сотвори, не се ли, сия писана в книзе словес дний царей Иудиных? 20 И восташа отроцы его, и совещаша всяк совет, и убиша Иоаса в доме Маллони, иже в Саале. 21 И Иезехар сын Иемуафов, и Иезевуф сын Сомиров, раби его убиша его, и умре, и погребоша его со отцы его во граде Давидове. И воцарися Амессиа сын его вместо его. === 13 === 1 В лето двадесять третие Иоаса сына Охозиина царя Иудина царствова Иоахаз сын Ииуев над Израилем в Самарии седмьнадесять лет, 2 и сотвори лукавое пред очима Господнима, и иде вслед грехов Иеровоама сына Наватова, иже в грех введе Израиля и не остася злобы тоя. 3 И разгневася Господь гневом на Израиля, и вдаде их в руце Азаилу царю Сирску и в руце сына Адера, сына Азаилева, во вся дни. 4 И помолися Иоахаз лицу Господню, и услыша его Господь, яко виде скорбь Израилеву, понеже оскорби их царь Сирский. 5 И даде Господь спасение Израилю, и избыша от руку Сирску: и вселишася и сынове Израилевы в селения своя якоже и вчера и третияго дне: 6 обаче не отступиша от грехов дому Иеровоама сына Наватова, иже и в грех введе Израиля, в нем ходяху: и дубрава стояше в Самарии. 7 Яко не осташася Иоахазу людие, но токмо пятьдесят конник, и десять колесниц, и десять тысящ пешцев, яко изгубил их царь Сирский, и положи я яко прах на попрание. 8 И прочая словес Иоахазовых, и вся елика сотвори, и силы его, не сия ли писана в книзе словес дний царей Израилевых? 9 И успе Иоахаз со отцы своими, и погребоша его в Самарии: и воцарися Иоас сын его вместо его. 10 В лето тридесять седмое Иоаса царя Иудина царствова Иоас сын Иоахазов над Израилем в Самарии шестьнадесять лет, 11 и сотвори лукавое пред очима Господнима: и отступи от всех грехов Иеровоама сына Наватова, иже в грех введе Израиля, в том хождаше. 12 И прочая словес Иоасовых и вся елика сотвори, и силы его, яже сотвори со Амессием царем Иудиным, не сия ли писана в книзе словес дний царей Израилевых? 13 И успе Иоас со отцы своими, Иеровоам же седе на престоле его: и погребен бысть Иоас в Самарии с царми Израилевыми. 14 И Елиссей разболеся болезнию своею, от неяже умре. И прииде к нему Иоас царь Израилев, и плакася над лицем его, и рече: отче, отче, колесница Израилева и кони его. 15 И рече ему Елиссей возми лук и стрелы. И взя к себе лук и стрелы. 16 И рече царю: возложи руку свою на лук. И возложи Иоас руку свою на лук, и Елиссей возложи руки своя на руки царевы, 17 и рече: отверзи окно еже на восток. И отверзе. И рече Елиссей: стрели. И стрели (царь). И рече Елиссей: стрела спасения Господня и стрела спасения на Сирию, и победиши Сирию во Афеке даже до скончания. 18 И рече ему Елиссей: возми лук. И взя. И рече царю Израилеву: удари на землю. И удари царь трижды, и ста. 19 И оскорбе человек Божий о нем и рече: аще бы ударил еси пятищи или шестищи, тогда бы еси поразил Сирию до скончания, ныне же победиши Сирию трижды. 20 И умре Елиссей, и погребоша его. Воини же Моавли приидоша в землю наставающу лету тому. 21 И бысть им погребающим мужа, и се, видеша воинов, и повергоша мужа во гробе Елиссеове: (и впаде тело человека мертва,) и прикоснуся костем Елиссеовым, и оживе и воста на ноги своя. 22 Азаил же оскорбляше Израиля во вся дни Иоахазовы. 23 И помилова и Господь, и ущедри я, и призре на ня завета ради Своего, иже со Авраамом и Исааком и Иаковом, и не восхоте Господь потребити их, ниже отверже их от лица Своего. 24 И умре Азаил царь Сирский, и воцарися Адер сын его вместо его. 25 И возвратися Иоас сын Иоахазов, и взя грады от руки Адера сына Азаилева, ихже взя от руку Иоахаза отца его в брани: трижды победи его Иоас, и возврати грады Израилевы. === 14 === 1 В лето второе Иоаса сына Иоахаза царя Израилева, и воцарися Амессиа сын Иоасов, царь Иудин: 2 сын двадесяти пяти лет бе, внегда царствовати ему и двадесять пять лет царствова во Иерусалиме. Имя же матере его Иоадина от Иерусалима. 3 И сотвори правое пред очима Господнима, обаче не якоже Давид отец его: по всем, елика сотвори отец его Иоас, сотвори, 4 токмо высоких не разруши: еще людие жряху и кадяху на высоких. 5 И бысть егда утвердися царство в руку его, и изби рабы своя убившыя отца его: 6 сынов же убийц тех не изби, якоже писано в книзе закона Моисеова, якоже заповеда Господь, глаголя: да не умирают отцы за сыны, и сынове да не умирают за отцы, но токмо кийждо за своя грехи да умрет. 7 Сей порази Едома в Гемеле десять тысящ и взя Камень и на брани, и нарече имя ему Иефоил до днешняго дне. 8 Тогда посла Амессиа послы ко Иоасу сыну Иоахаза сына Ииуа царя Израилева, глаголя: прииди, да видимся в лице. 9 И посла Иоас царь Израилев ко Амессии царю Иудину, глаголя: терн, иже в Ливане, посла к кедрови сущему в Ливане, глаголя: даждь дщерь твою сыну моему в жену: и приидоша зверие лужнии, иже в Ливане, и попраша терние:: 10 побивая поразил еси Идумею, и вознесе тя сердце твое, прославися седя в дому твоем, и почто любопришися в злобе твоей? И падеши ты, и Иуда с тобою. 11 И не послуша Амессиа. И взыде Иоас царь Израилев, и видестася лицем той и Амессиа царь Иудин в Вефсамисе Иудине. 12 И паде Иуда пред лицем Израилевым, и побеже кийждо в домы своя. 13 И Амессию сына Иоасова, сына Охозии, царя Иудина, ят Иоас сын Иоахазов царь Израилев в Вефсамисе: и прииде во Иерусалим, и разби стену Иерусалиму от врат Ефремлих до врат уголных, на четыреста лакот: 14 и взя сребро и злато, и вся сосуды обретеныя в дому Господни и в сокровищах дому царева, и сыны смесившихся, и возвратися в Самарию. 15 И прочая словес Иоасовых, елика сотвори в силе своей, якоже брася со Амессиею царем Иудиных, не сия ли писана в книзе словес дний царей Израилевых? 16 И успе Иоас со отцы своими и погребен бысть в Самарии с цари и Израилевыми. И воцарися Иеровоам сын его вместо его. 17 И поживе Амессиа сын Иоасов, царь Иудин, по умертвии Иоаса сына Иоахаза царя Израилева пятьнадесять лет. 18 И прочая словес Амессиевых, и вся елика сотвори, не сия ли писана в книзе словес дний царей Иудиных? 19 И восташа на него полки во Иерусалиме: и убеже в Лахисы, и послаша вслед его в Лахисы, и убиша его ту: 20 и взяша его на кони, и погребен бысть со отцы своими во Иерусалиме во граде Давидове. 21 И пояша вси людие Иудины Азарию, и той сын шестинадесяти лет, и поставиша его царем вместо отца его Амессии: 22 той созда Елоф, и возврати его Иуде по умертвии царя со отцы его. 23 В лето пятоенадесять Амессии сына Иоаса царя Иудина, царствова Иеровоам сын Иоасов над Израилем в Самарии четыредесять и едино лето, 24 и сотвори лукавое пред Господем: не отступи от всех грехов Иеровоама сына Наватова, иже в грех введе Израиля: 25 той приврати предел Израилев от входа Емафова даже и до моря аравитскаго, по глаголу Господа Бога Израилева, егоже глагола и рукою раба Своего Ионы, сына Амафиина, пророка, иже от Гефаховера, 26 яко виде Господь смирение Израилево горько зело, и мало содержимых, и умаленных, и оставленых, и не бе помогающаго им. 27 И не глагола Господь искоренити семене Израилева под небесем: и спасе я рукою Иеровоама сына Иоасова. 28 И прочая словес Иеровоамовых, и вся елика сотвори, и силы его, елика повоева, и како возврати Дамаск и Емаф Иуде во Израили, не сия ли писана в книзе словес дний царей Израилевых? 29 И успе Иеровоам со отцы своими, со цари Израилевыми: и воцарися Захариа сын его вместо его. === 15 === 1 В лето двадесять седмое Иеровоама царя Израилева воцарися Азариа сын Амессии царя Иудина: 2 сын шестинадесяти лет бе, егда нача царствовати, и пятьдесят два лета царствова во Иерусалиме. Имя же матере его Иехелиа от Иерусалима. 3 И сотвори правое пред очима Господнима по всему, елика сотвори отец его Амессиа, 4 обаче высоких не разори: еще людие жряху и кадяху на высоких. 5 И коснуся Господь царя, и бысть прокажен до дне смерти своея: и царствова в дому апфусоф. И Иоафам сын царев бе над домом судя людем земли тоя. 6 И прочая словес Азарии, и вся елика сотвори, не сия ли написана в книзе словес дний царей Иудиных? 7 И успе Азариа со отцы своими, и погребоша его со отцы его во граде Давидове. И воцарися Иоафам сын его вместо его. 8 В лето тридесять осмое Азарии царя Иудина царствова Захариа сын Иеровоамль над Израилем в Самарии шесть месяц. 9 И сотвори лукавое пред очима Господнима, якоже сотвориша отцы его, не отступи от всех грехов Иеровоама сына Наватова, иже в грех введе Израиля. 10 И востаста нань Селлум сын Иависов и Кевлаам, и поразиста его, и умертвиста его: и воцарися Селлум вместо его. 11 И прочая словес Захариевых, се, суть написана в книзе словес дний царей Израилевых. 12 Сие слово Господне, еже глагола ко Ииую, рекий: сынове четвертии сядут тебе и на престоле Израилеве. И бысть тако. 13 И Селлум сын Иависов воцарися во Израили: и в лето тридесять девятое Азарии царя Иудина, царствова Селлум месяц дний в Самарии. 14 И взыде Манаим сын Гаддиин от Ферсилы, и прииде в Самарию, и уби Селлума сына Иависова в Самарии, и умертви его, и воцарися вместо его. 15 И прочая словес Селлумовых, и совещание его, имже совещася, се, суть писана в книзе словес дний царей Израилевых. 16 Тогда порази Манаим и Ферсу, и вся, яже в ней, и пределы ея от Ферсы, понеже не отверзоша ему, и разби ю и всех, иже в ней, и имущих во чреве разсече. 17 В лето тридесять девятое Азарии царя Иудина, царствова Манаим сын Гаддиин над Израилем десять лет в Самарии, 18 и сотвори лукавое пред очима Господнима, (во вся дни своя) не отступи от всех грехов Иеровоама сына Наватова, иже в грех введе Израиля. 19 Во дни его взыде Фула царь Ассирийский на землю (Израилеву), и Манаим даде Фуле тысящу талант сребра, да будет рука его с ним, (еже укрепити царство в руку его). 20 И возложи Манаим дань на Израиля, на всех сильных, дати царю Ассирийску пятьдесят сикль сребра мужу коемуждо: и возвратися царь Ассирийск, и не ста тамо в земли. 21 И прочая словес Манаимовых, и вся елика сотвори, не се ли, сия написана в книзе словес дний царей Израилевых? 22 И успе Манаим со отцы своими, и воцарися Факиа сын его вместо его. 23 В лето пятьдесятое Азарии царя Иудина, царствова Факиа сын Манаимль над Израилем в Самарии лета два, 24 и сотвори лукавое пред очима Господнима, и отступи от грехов Иеровоама сына Наватова, иже в грех введе Израиля. 25 И воста на него Факей сын Ромелиин, тристат его, и уби его в Самарии близ дому царева, со Арговом и со Арием, и с ним (бяху) пятьдесят мужей от Галаадитов, и умертви его, и воцарися вместо его. 26 И прочая словес Факиевых, и вся елика сотвори се, суть, писана в книзе словес дний царей Израилевых. 27 В лето пятьдесят второе Азарии царя Иудина, царствова Факей сын Ромелиин над Израилем в Самарии двадесять лет, 28 и сотвори лукавое пред очима Господнима, не отступи от всех грехов Иеровоама сына Наватова, иже в грех введе Израиля. 29 Во дни Факеа царя Израилева прииде Фелгаффелласар царь Ассирийский, и взя Аин и Авелвефмааха, и Аоха и Кенезу, и Асора и Галаад и Галилею, всю землю Неффалимлю, и приведе я ко Ассирианом. 30 И воста Осиа сын Илы на Факеа сына Ромелиина, и порази его, и умертви его, и воцарися вместо его в двадесятое лето Иоафама сына Азариина. 31 И прочая словес Факеевых, и вся елика сотвори, се, сия написана в книзе словес дний царей Израилевых. 32 В лето второе Факеа сына Ромелиина царя Израилева воцарися Иоафам, сын Азарии царя Иудина: 33 сын двадесяти пяти лет бе, егда нача царствовати, и шестьнадесять лет царствова во Иерусалиме. Имя же матере его Иеруса дщи Садокова. 34 И сотвори правое пред очима Господнима, по всему елика сотвори отец его Азариа, 35 обаче высоких не разори: еще людие жряху и кадяху на высоких. Той созда двери храму Господню вышния. 36 И прочая словес Иоафамовых, и вся елика сотвори, не сия ли написана в книзе словес дний царей Иудиных? 37 Во дни оны начат Господь посылати на Иуду Раассона царя Сирска и Факеа сына Ромелиина. 38 И успе Иоафам со отцы своими, и погребен бысть со отцы своими во граде Давида отца своего. И воцарися Ахаз сын его вместо его. === 16 === 1 В лето седмоенадесять Факеа сына Ромелиина, воцарися Ахаз сын Иоафама царя Иудина: 2 сын двадесяти лет бе Ахаз, егда нача царствовати, и шестьнадесять лет царствова во Иерусалиме, и не сотвори правое пред очима Господа Бога своего верно, якоже Давид отец его, 3 и ходи в пути Иеровоама сына Наватова царя Израилева, ксему и сына своего преведе сквозе огнь по мерзостем языков, ихже отят Господь от лица сынов Израилевых: 4 и жряше и кадяше на высоких и на холмех и под всяким древом частым. 5 Тогда взыде Раассон царь Сирск и Факей сын Ромелиин царь Израилев во Иерусалим на брань, и воеваста на Ахаза, и не можаста (ему) одолети. 6 Во время оно возврати Раассон царь Сирский Елаф Сирии и изгна Иудеев из Елафа, и Идумее приидоша во Елаф и вселишася тамо даже до дне сего. 7 И посла Ахаз послы к Фелгаффелласару царю Ассирийску, глаголя: раб твой и сын твой аз есмь, взыди и отими мя от руки царя Сирска и от руки царя Израилева, воставших на мя. 8 И взя Ахаз злато и сребро обретшееся в сокровищих дому Господня и в сокровищих дому царева, и посла царю Ассирийску дары. 9 И послуша его царь Ассирийский: и взыде царь Ассирийский в Дамаск, и взя его, и пресели его, и Раассона царя уби. 10 И иде царь Ахаз на сретение Фелгаффелласару царю Ассирийску в Дамаск, и виде жертвенник в Дамасце: и посла царь Ахаз ко Урии иерею подобие жертвенника, и начертание, и все творение его. 11 И созда Уриа иерей жертвенник по всем, елика посла царь Ахаз от Дамаска. 12 И прииде царь Ахаз из Дамаска и виде жертвенник, и взыде на него, 13 и покади всесожжение свое и жертву свою и возлияние свое, и пролия кровь мирных на жертвенник, 14 олтарь же медяный, иже пред Господем, принесе от лица дому Господня, и от среды жертвенника и от среды дому Господня: и постави его о едину страну жертвенника к северу. 15 И заповеда царь Ахаз Урии иерею, глаголя: на жертвеннице велицем приношаяй всесожжения утренняя, и жертву вечернюю, и всесожжения царева, и жертву его, и всесожжения всех людий, и жертву их, и возлияния их, и всяку кровь всесожжения, и всяку кровь жертвенную излиеши на нем: олтарь не медян да будет мне на утро. 16 И сотвори Уриа иерей по всем, елика заповеда ему царь Ахаз. 17 И изсече Ахаз царь споения подставов, и пренесе от них умывалницу, и море низложи от волов медяных, иже беша под ним, и положи е на подставе каменнем: 18 и основание седалища создано в дому Господни, и вход царев внешний обрати в дом Господень, от лица царя Ассирийска. 19 И прочая словес Ахазовых, елика сотвори, не сия ли написана в книзе словес дний царей Иудиных: 20 и успе Ахаз со отцы своими, и погребен бысть со отцы своими во граде Давидове. И воцарися Езекиа сын его вместо его. === 17 === 1 В лето второенадесять Ахаза царя Иудина, царствова Осиа сын Илы в Самарии над Израилем девять лет, 2 и сотвори лукавое пред очима Господнима, обаче не якоже царие Израилевы, иже беша прежде его. 3 И взыде нань Саламанассар царь Ассирийск . И бысть ему Осиа раб и даваше ему дань. 4 И обрете царь Ассирийск во Осии неправду, занеже посла послы к Сигору царю Египетску и не принесе дани царю Ассирийску лета того. И осади его царь Ассирийский и связа его в храмине темничней. 5 И прииде царь Ассирийск во всю землю (его), и взыде в Самарию, и воева ю три лета. 6 В лето девятое Осии взя царь Ассирийский Самарию, и заведе Израилтян во Ассирию, и посели их на Алаи и на Аворе, реках Гозанских, и в пределех Мидских. 7 И (сие) бысть, яко согрешиша сынове Израилевы Господу Богу своему изведшему их из земли Египетския, из под руки фараона царя Египетска, и убояшася богов инех, 8 и ходиша по преданием языков, ихже истреби Господь от лица сынов Израилевых, и царие Израилевы елицы сотвориша, 9 и елицы сокрыша сынове Израилевы словеса, не тако на Господа Бога своего: и создаша себе высокая во всех градех своих, от столпа стрегущих даже до града тверда, 10 и поставиша себе кумиры и Дубравы на всяцем холме высоце и под всяким древом чащным, 11 и кадяху тамо на всех высоких, якоже языцы, яже удали Господь от лица их, и сотвориша общники, и начаша яве прогневляти Господа, 12 и послужиша идолом, о нихже рече им Господь: не сотворите глагола сего Господеви. 13 И засвидетелствова Господь во Израили и во Иуде, и руками всех пророк Своих всякаго прозорливаго, глаголя: обратитеся от путий ваших лукавых, и сохраните заповеди Моя и оправдания Моя, и весь закон, егоже заповедах отцем вашым, елика послах им руками раб Моих пророков. 14 И не послушаша, и ожесточиша выю свою паче выи отец своих, иже не вероваша Господу Богу своему: 15 и отвергоша завет Его и оправдания, яже завеща отцем их и свидений Его, елика засвидетелствова им, не сохраниша, и идоша вслед суетных и осуетишася, и вслед языков сущих окрест их, о нихже заповеда Господь их, еже не сотворити по сему: 16 и оставиша заповеди Господа Бога своего и сотвориша себе две юницы слиты, и сотвориша дубравы, и поклонишася всей силе небесней и послужиша Ваалу: 17 и превождаху сыны своя и дщери своя чрез огнь, и волхвоваху волхвованием и вражаху: и продашася, еже творити лукавое пред очима Господнима, еже прогневати Его. 18 И разгневася Господь на Израиля зело и отрину их от лица Своего, и не остася, токмо едино колено Иудино. 19 И Иуда такожде не сохрани заповедий Господа Бога своего: и хождаху по оправданием Израилевым, яже сотвориша, и отвергошася Господа. 20 И разгневася Господь на все семя Израилево и поколеба я, и даде я в руки расхищающым я дондеже отверже я от лица Своего. 21 Яко отторжеся Израиль от дому Давидова, и поставиша себе царя Иеровоама сына Наватова: и отрину Иеровоам Израиля от Господа и введе их во грех великий. 22 И хождаху сынове Израилевы по всему греху Иеровоамлю, егоже сотвори: не отступиша от него, 23 дондеже отверже Господь Израиля от лица Своего, якоже глагола Господь рукою всех раб Своих пророков. И преселен бысть Израиль от земли своея во Ассирианы, даже до дне сего. 24 И приведе царь Ассирийский из Вавилона иже от Хуфы и от Аиа, и от Емафа и Сепфаруима, и вселени быша во градех Самарийских вместо сынов Израилевых, и наследиша Самарию и вселишася во градех ея. 25 И бысть в начале седения их, не убояшася Господа, и пусти на ня Господь львы, и бяху убивающе я. 26 И реша царю Ассирийску, глаголюще: языки, ихже превел и пресадил еси во градех Самарийских, не разумеша суда Бога земли, и посла Господь на них львы, и се, суть убивающе их, яко не разумеша суда Бога земли. 27 И заповеда царь Ассирийский глаголя: отведите тамо единаго жерца от плененых, да идут и да вселятся тамо, и да просветит их судом Бога земли. 28 И отведоша единаго от жерцев ихже взяша от Самарии, и седе в Вефили, и бе просвещая жрец их, яко да убоятся Господа. 29 И беша творяще кийждо язык боги своя: и поставиша я во храмех на высоких, ихже сотвориша Самаряне, кийждо язык во градех своих, в нихже живяху. 30 И мужие Вавилонстии сотвориша Сокхоф Вениф, и мужие Хуфовы сотвориша Гигель, и мужие Емафовы сотвориша Асимаф, 31 и Евее сотвориша Авлазер и Фарфак и Сепфаруим, егда сожигаху сыны своя огнем Андрамелеху и Анемелеху, богом Сепфаруимским. 32 И бяху боящеся Господа: и вселиша мерзости своя во храмех на высоких, ихже сотвориша в Самарии, кийждо язык во граде, в немже живяху. 33 И беша боящеся Господа и сотвориша себе жерцы в высоких, и сотвориша себе в храмине высоких и Господа бояхуся, и идолом своим служаху по обычаю языков отюнудуже преселиша их. 34 Даже до дне сего тии творяху по обычаю их: не бояхуся Господа, и не творяху по оправданием их, и по суду их, и по закону, и по заповеди, юже заповеда Господь сыном Иаковлим, идеже и нарече имя ему Израиль. 35 И положи Господь с ними завет и заповеда им, глаголя: не убойтеся богов иных и не поклонитеся им, и не послужите им и не пожрите им: 36 но токмо Господеви, иже изведе вы из земли Египта крепостию великою и мышцею высокою: Того убойтеся, и Тому поклонитеся, и Тому пожрите: 37 и оправдания Его, и суды Его, и закон Его, и заповеди, яже написа вам творити, храните во вся дни, и не убойтеся богов иных: 38 и завета, егоже завеща с вами, не забывайте: и не убойтеся богов иных, 39 но токмо Господа и вашего убойтеся, и Той измет вы от всех враг ваших. 40 И не послушаша сего, но по обычаем своим преждним твориша. 41 И бяху языцы сии боящеся Господа, и изваянным своим служаще: такожде и сынове их и сынове сынов их, якоже сотвориша отцы их, тако творят и до сего дне. === 18 === 1 И бысть в лето третие Осии сына Илы царя Израилева, воцарися Езекиа сын Ахаза царя Иудина: 2 сын двадесяти пяти лет бе егда нача царствовати, и двадесять девять леть царствова во Иерусалиме. Имя же матере его Авуфа дщи Захариина. 3 И сотвори правое пред очима Господнима, по всем елика сотвори отец его Давид: 4 той разруши высокая, и сокруши вся капища, и искорени дубравы и змию медяную, юже сотвори Моисей, яко и до дний тех сынове Израилевы беху кадяще ей: и назва имя ей Неестан. 5 На Господа Бога Израилева упова, и но нем не бысть подобен ему в царех Иудиных и в бывших прежде его: 6 и прилепися Господеви, не отступи от Него, и сохрани заповеди Его, елики заповеда Моисей: 7 и бе Господь с ним, и во всех, яже творяше, смысляше. И сопротивися царю Ассирийскому и не поработа ему: 8 той победи иноплеменники даже до Газы и до предел ея, от столпа стрегущих и даже и града тверда. 9 И бысть в лето четвертое царя Езекии, сие же лето седмое Осии, сыну Илы, царю Израилеву, взыде Саламанассар царь Ассирийск на Самарию и обседе ю, 10 и взя ю при концы триех лет, в шестое лето Езекиево, сие лето девятое Осии царя Израилева, и пленена бысть Самариа. 11 И преведе царь Ассирийский Самаряны во Ассирию, и посади я на Алаи и на Аворе, реках Гозанских, и в пределех Мидских: 12 понеже не послушаша гласа Господа Бога своего и преступиша завет Его, вся елика заповеда Моисей раб Господень, и не послушаша, и не сотвориша. 13 И в четвертоенадесять лето царя Езекии, взыде Сеннахирим царь Ассирийский на грады Иудины твердыя и взят я. 14 И посла Езекиа царь Иудин послы к царю Ассирийску в Лахис, глаголя: согреших, возвратися от мене: еже аще возложиши на мя, то понесу. И возложи царь Ассирийский на Езекию царя Иудина триста талант сребра и тридесять талантов злата. 15 И даде Езекиа все сребро обретшееся в дому Господни и в сокровищих дому царева. 16 Во время оно ссече Езекиа царь Иудин двери храма Господня и утвержения, яже позлати Езекиа царь Иудин, и даде их царю Ассирийску. 17 И посла царь Ассирийск Фарфана и Равосаиа и Рапсака от Лахиса на Иерусалим к царю Езекии с силою тяжкою зело. И взыдоша, и приидоша ко Иерусалиму, и сташа у водотечи купели вышния, яже есть на пути села белилнаго, 18 и возопиша ко Езекии. И изыде к ним Елиаким сын Хелкиев строитель, и Сомнас книгочий, и Иоас сын Сафатов воспоминатель. 19 И рече к ним Рапсак: рцыте ныне ко Езекии: сице глаголет царь великий, царь Ассирийский: что упование сие, на неже уповаеши? 20 Рекл еси: токмо словеса устен, совет и сила на брань: ныне убо на кого надежду отвергл еси мене? 21 Ныне с, надеешися ты на жезл тростяный сломленый сей, на Египет ли? Наньже аще опрется муж, внидет в руку его и пронзет ю: тако фараон царь Египетский всем надеющымся нань: 22 и аще мне речете: на Господа Бога надеемся: не той ли сей, егоже и отстави Езекиа высокая его и жертвенники его, и рече Иуде и Иерусалиму: поклонитеся пред жертвенником сим во Иерусалиме? 23 И ныне соединитеся с господином моим царем Ассирийским, и дам тебе две тысящы коней, аще можеши имети всадники на ня: 24 и како отвратиши лице топарха единаго от рабов господина моего малейших, и уповал еси сам на Египет, на колесницы и кони? 25 И ныне убо еда без Господа взыдохом на место сие, еже потребити и рече бо Господь ко мне: взыди на землю сию и потреби ю. 26 И рече Елиаким сын Хелкиин и Сомнас и Иоас ко Рапсаку: глаголи ныне ко отроком твоим сирски, яко слышим мы, а не глаголи к нам иудейски, и почто глаголеши во ушы людий, иже на стене? 27 И рече к ним Рапсак: еда к господину твоему и к тебе посла мя господин мой глаголати словеса сия? Не к мужем ли седящым на стене, еже ясти им гной свой и пити им сечь свою с вами вкупе? 28 И ста Рапсак, и возопи гласом великим иудейски, и глагола, и рече: слышите словеса великаго царя Ассирийска: 29 сице глаголет царь: да не возносит вас царь Езекиа словесы, понеже не возможет вас изяти из руки моея: 30 и да не обнадеживает вас Езекиа Господем, глаголя: изимая измет вы Господь, и не имать предатися град сей в руце царя Ассирийска: 31 не послушайте Езекии, яко сице глаголет царь Ассирийский: сотворите со мною благословение и изыдите ко мне, и да пиет муж от винограда своего, и муж вкусит от смоквей своих, и да пиет воду от рова своего, 32 дондеже прииду и поиму вы в землю (такову) якоже земля ваша, земля пшеницы и вина, и хлебов и виноградов, земля масличин елеа и меда, и живи будете и не умрете: и не послушайте Езекии, яко прельщает вы, глаголя: Господь ны избавит: 33 еда избавляюще избавиша бози языков кийждо их свою страну из руки царя Ассирийска? 34 Где есть бог Емафа и Арфада? Где есть бог Сепфаруима, Ана и Ава? Еда избавиша Самарию из руку моею? 35 Кто во всех бозех земных, иже избавиша земли и от руки моея? И како измет Господь Иерусалима из руки моея? 36 И умолкоша людие и не отвещаша ему слова, яко заповеда им царь глаголя: не отвещайте ему. 37 И вниде Елиаким сын Хелкиин строитель, и Сомнас книгочий, и Иоас сын Сафатов воспоминатель ко Езекии, раздравше ризы своя, и возвестиша ему словеса Рапсакова. === 19 === 1 И бысть егда услыша царь Езекиа, и раздра ризы своя, и облечеся во вретище, и вниде в дом Господень. 2 И посла Елиакима строителя, и Сомнаса книгочиа и старейшины жерцев облечены во вретище ко Исаии пророку сыну Амосову. 3 И реша ему: сице глаголет Езекиа: день скорби и обличения и прогневания день сей, яко приидоша сынове даже до болезнорождения, и крепости несть раждающей: 4 аще како послушает Господь Бог твой всех словес Рапсаковых, егоже и посла царь Ассирийский господин его поносити Богу живому и хулити словесы, ихже слыша Господь Бог твой, и приими молитву о останце обретающемся. 5 И приидоша отроцы царя Езекии и ко Исаии. 6 И рече им Исаиа: сице рцыте господину вашему: тако глаголет Господь: не убойся от лица словес, ихже слышал еси, имиже похулиша Мя отроцы царя Ассирийска: 7 се, Аз даю ему духа, и услышит возвещение и возвратится в землю и свою: и низложу его оружием в земли и его. 8 И возвратися Рапсак и обрете и царя Ассирийска воююща на Ловну: услыша бо, яко отступи от Лахиса. 9 И слыша о Фараке цари Ефиопстем, глаголя: се, изыде ратоватися с тобою. И возвратися и посла послы ко Езекии, глаголя: тако рцыте Езекии царю Иудейску: 10 да не возносит тя Бог твой, на негоже ты надеешися глаголя: не имать предан быти Иерусалим в руце и царя Ассирийска: 11 се, ты слышал еси вся, елика и сотвориша царие Ассирийстии всем землем, еже прокляти их, и ты ли избудеши? 12 Еда избавляюще избавиша их и бози языков, ихже расточиша отцы и мои, Гозану и Харану, и Фаресу и сыны Едомли, иже во Фалассаре? 13 Где есть царь Емафов и царь и Арфадов? И где есть царь града Сепфаруима, Ана и Ава? 14 И прият царь Езекиа книги от руки послов и прочте я: и вниде в храм Господень, и разгну их Езекиа пред Господем, 15 и молися Езекиа пред Господем и рече: Господи Боже Израилев, седяй на Херувимех, Ты еси и Бог един бо всех царствиих земли, Ты сотворил еси небо и землю: 16 приклони, Господи, ухо Твое и услыши мя: отверзи, Господи, очи Твои и виждь, и услыши словеса Сеннахирима, яже посла поношая Тебе Богу живу: 17 яко поистинне, Господи, опустошиша царие Ассирийстии языки, 18 и даша боги их на огнь, яко не бози беша, но дела руку человечу, древа и камения, и погубиша я: 19 и ныне, Господи Боже наш, спаси ны из руки его, и уразумеют вся царствия земли, яко Ты еси Господь Бог един. 20 И посла Исаиа сын Амосов ко Езекии, глаголя: тако глаголет Господь Бог Сил, Бог Израилев: слышах, о нихже молился еси ко Мне, о Сеннахириме царе Ассирийсте. 21 Сие слово, еже глагола Господь на него: уничижи тя и поругася тебе девица и дщи Сионя, над тобою главою своею покива дщи Иерусалимля: 22 кому поносил еси, и кого похулил еси? И на кого вознесл еси глас, и воздвигл еси на высоту очи твои? На Святаго Израилева. 23 Рукою послов твоих поносил еси Господу, и рекл еси: со множеством колесниц моих взыду аз на вышнюю часть горы Ливанския, и усеку величество от кедр ея и избранныя кипарисов ея, и прииду в средину чащи Кармилския: 24 аз изсуших, и пиях воды чуждыя, и опустоших стопами ног моих вся реки окрестныя: 25 еда не слышал еси? Издавна ю сотворих, от дний первых создах ю и принесох ю: и бысть в холмы преселников воююших грады тверды: 26 и живущии в них изнемогоша рукою, сотрясошася и постыдешася, быша (яко) трава селная, или злачно былие, злак иже на зданиих, и попрания противу стоящаго: 27 и седение твое, и исход твой, и вход твой разумех, и гнев твой на Мя, 28 занеже разгневался еси на Мя и шум твой вниде во ушы Мои, и вложу удицу Мою в ноздри твоя и бразду во устне твои, и возвращу тя по пути, имже пришел еси. 29 И сие тебе знамение, (Езекие): яждь в сие лето прозябающая самородная, и в лето второе прозябающая, и в лето третие сейте семена и жните, садите винограды, и да ясте плод их: 30 и приложит спасшееся дому Иудова, оставшееся, корень доле, и сотворит плод горе, 31 яко из Иерусалима изыдет останок, и спасаемый из горы Сиони: ревность Господа Сил сотворит сие. 32 Сего ради тако глаголет Господь (Сил) на царя Ассирийска: не имать внити во град сей, и не имать устрелити нам стрелы, и не достигнет к нему щит, и не имать осыпати его землею: 33 но путем, имже прииде темже возвратится, и во град сей не имать внити, глаголет Господь, 34 и защищу град сей, еже спасти его Мене ради и Давида ради раба Моего. 35 И бысть в нощь ону, и сниде Ангел Господнь и уби от полка Ассирийскаго сто осмьдесят и пять тысящ. И восташа заутра, и се, вся трупия мертва. 36 И воста, и отиде, и возвратися Сеннахирим царь Ассирийский, и вселися в Ниневию. 37 И бысть ему кланяющуся во храме Месераха бога своего, и Адрамелех и Сарасар сынове его убиста его мечем: сами же бежаста в землю Араратску. И воцарися Асордан сын его вместо его. === 20 === 1 Во днех онех разболеся Езекиа (царь) да смерти. И вниде к нему Исаиа пророк сын Амосов и рече к нему: тако глаголет Господь: заповеждь дому твоему, умреши бо ты и не будеши жив. 2 И обрати Езекиа лице свое ко стене и помолися ко Господу, глаголя: 3 Господи помяни ныне, яко истиною ходих пред Тобою и сердцем совершенным, и угодная пред очима Твоима сотворих. И плакася Езекиа плачем великим. 4 И бяше Исаиа еще посреде двора, и бысть слово Господне к нему, глаголя: 5 возвратися и рцы Езекии вожду людий Моих: тако глаголет Господь Бог Давида отца твоего: услышах молитву твою и видех слезы твоя: се, Аз изцелю тя, и в день третий взыдеши в дом Господень: 6 и приложу к летом твоим лет пятьнадесять, и от руки царя Ассирийска избавлю тя и град сей, и защищу град сей Мене ради и Давида ради раба Моего. 7 И рече Исаиа: да возмут перевясло смоквей и да положат на вред, и изцелеет. 8 И рече Езекиа ко Исаии: кое знамение, яко изцелит мя Господь и взыду в дом Господень в день третий? 9 И рече Исаиа: сие знамение от Господа, яко сотворит Господь слово, еже глагола: (хощеши ли да) пойдет стень десять степений, или возвратится десять степений? 10 И рече Езекиа: удобно стени уклонитися десять степений: ни, но да возвратится стень на десять степений вспять. 11 И возопи Исаиа пророк ко Господу, и возвратися стень по числу назад десять степений. 12 Во время оно посла Мародах Валадан, сын Валаданов, царь Вавилонский, книги и дары ко Езекии: слыша бо, яко разболеся (царь) Езекиа. 13 И порадовася Езекиа о них, и показа им весь дом свой сокровищный, сребро и злато, и ароматы и елей добрый, и дом сосудов и елика обретошася в сокровищих его: и не бе места, егоже не показа им Езекиа в дому своем и во всей области своей. 14 И вниде Исаиа пророк ко Езекии царю и рече к нему: что глаголаша мужие сии, и откуду приидоша к тебе? И рече Езекиа: от земли дальния приидоша ко мне, от Вавилона. 15 И рече: что видеша в дому твоем? И рече Езекиа: вся, елика в дому моем, видеша: несть в дому моем, егоже им не показах, но и яже в сокровищих моих (видеша). 16 И рече Исаиа ко Езекии: слыши слово Господне: 17 се, дние грядут, рече Господь, взята будут вся, яже в дому твоем, и вся, яже собраша отцы твои до дне сего, внидут в Вавилон: и не останется слово, еже рече Господь. 18 И сынове твои, иже изыдут из тебе, ихже родиши, возмутся и будут скопцы в дому царя Вавилонскаго. 19 И рече Езекиа ко Исаии: благо слово Господне еже глагола: да будут мир во дни моя. 20 И прочая словес Езекиевых, и вся сила его, и елика сотвори, источник и водотечь, и введе воду во град, не се ли, сия написана в книзе словес дний царей Иудиных? 21 И успе Езекиа со отцы своими, и погребен бысть во граде Давидове. И воцарися Манассиа сын его вместо его. === 21 === 1 Сын дванадесяти лет Манассиа, егда нача царствовати, и пятьдесят пять лет царствова во Иерусалиме. Имя матере его Офовиа. 2 И сотвори лукавое пред очима Господнима, и хождаше вслед мерзостей языков, ихже отрину Господь от лица сынов Израилевых: 3 и обратися, и созда высокая, иже разори отец его Езекиа, и воздвиже жертвенник Ваалу, и сотвори дубравы, яже сотвори Ахаав царь Израилев, и поклонися всей силе небесней и поработа им: 4 и созда олтарь в дому Господни, якоже рече Господь: во Иерусалиме положу имя Мое. 5 И сотвори олтарь всей силе небесней на дву двору дому Господня: 6 и провождаше сыны своя чрез огнь, и вражаше, и волшвения творяше, и сотвори капища, и волшебницы умножи творити лукавое пред очима Господнима, еже прогневати Его: 7 и постави изваяное Дубравы в храме, о немже рече Господь к Давиду и к Соломону сыну его: в храме сем и во Иерусалиме, егоже избрах от всех колен Израилевых, и положу ту имя Мое на веки, 8 и не приложу подвигнутися нозе Израилеве от земли, юже дах отцем их, аще тии соблюдут вся елика заповедах, по всей заповеди, юже заповеда им раб Мой Моисей. 9 И не послушаша, и прельсти их Манассиа, еже сотворити лукавое пред очима Господнима паче язык, яже истреби Господь от лица сынов Израилевых. 10 И глагола Господь рукою рабов Своих пророков, глаголя: 11 за сия, елика сотвори Манассиа царь Иудин мерзости сия лукавыя, паче всех яже сотвориша Аморрее, иже прежде сего быша, и введе во грех и Иуду, в кумирех своих: 12 не тако: сице глаголет Господь Бог Израилев: се, Аз наведу злая на Иерусалим и на Иуду, яко всякому слышащему пошумят обоя уха его, 13 и простру на Иерусалим меру Самарийскую и весы дому Ахаавля: и истреблю Иерусалима, якоже изглаждается алавастр изглаждаемый и превращается в лице свое: 14 и изрину останки достояния Моего и предам их в руки врагов их, и будут в расхищение и в плен всем врагом своим: 15 понеже сотвориша лукавое пред очима Моима и быша прогневляюще Мя от дне, в оньже изведох отцы их от земли Египетския, и до дне сего. 16 Еще же кровь неповинную излия Манассиа многу зело, дондеже наполни Иерусалиму уста до уст, кроме грехов его, имиже во грех введе Иуду, сотворити лукавое пред очима Господнима. 17 И прочая словес Манассииных, и вся елика сотвори, и грех его, имже согреши, не сия ли написана в книзе словес дний царей Иудиных? 18 И успе Манассиа со отцы своими, и погребен бысть в вертограде дому своего, в вертограде Озы. И воцарися Аммон сын его вместо его: 19 сын двадесяти дву лет бе Аммон, егда нача царствовати и два лета царствова во Иерусалиме. Имя же матери его Месоллам, дщи Арусова из Иетевы. 20 И сотвори лукавое пред очима Господнима, якоже сотвори Манассиа отец его, 21 и хождаше по всему пути, имже ходи отец его, и поработа кумиром, имже поработа отец его, и поклонися им: 22 и остави Господа Бога отец своих, и не ходи путем Господним. 23 И восташа отроцы Аммоновы нань и умертвиша царя в дому его. 24 Людие же земли (тоя) избиша всех воставших на царя Аммона, и воцариша людие земли тоя Иосию сына его вместо его. 25 И прочая словес Аммоновых, елика сотвори, не се ли, сия написана и в книзе словес дний царей Иудиных? 26 И погребоша его во гробе его в вертограде Озине. И воцарися Иосиа сын его вместо его. === 22 === 1 Сын осми лет бе Иосиа, егда нача царствовати, и тридесять едино лето царствова во Иерусалиме. Имя же матери его Иедида, дщи Едеева, от Васурофа. 2 И сотвори правое пред очима Господнима, и хождаше во всех путех Давида отца своего, не совратися ни на десно, ни на шуее. 3 И бысть во осмоенадесять лето царства Иосиина, в седмый месяц, посла царь Сафана, сына Езелиина, сына Месолламля, книгочию дому Господня, глаголя: 4 взыди к Хелкии жерцу великому и запечатлей сребро внесеное в дом Господень, еже собраша стрегущии врат от людий, 5 и да дадут е в руки творящих дела приставником в храме Господни: да дадят е творящым дела в дому Господни, еже подкрепляти разселины храма, 6 древоделем и каменосечцем и покупающым древа и камение тесаное на утверждение разселин храма. 7 Обаче не сочисляху их о сребре даемем им, яко верно тии творяху. 8 И рече Хелкиа жрец великий ко Сафану книгочию: книгу закона (Божия) обретох в дому Господни. И даде Хелкиа книгу Сафану, и прочте ю. 9 И вниде в дом Господень и царю Иосии, и возвести царю слово и рече: слияша раби твои сребро обретшееся в дому Господни, и даша е приставницы в руки творящым дела в храме Господни. 10 И рече Сафан книгочия к царю, глаголя книгу закона даде ми Хелкиа жрец. И прочте ю Сафан пред царем. 11 И бысть яко услыша царь словеса книги законныя, и раздра ризы своя, 12 и заповеда царь Хелкии жрецу и Ахикаму сыну Сафаню, и Аховору сыну Михеину и Сафану книгочию и Асаию рабу цареву, глаголя: 13 приидите, испросите Господа о мне и о всех людех и о всем Иуде, и о словесех книги обретшияся сея, яко велик гнев Господень разжженый на нас, понеже не послушаша отцы наши словес книги сея, еже творити по всем написанным на ны. 14 И иде Хелкиа жрец и Ахикам, и Аховор и Сафан и Асаиас ко Олдаме пророчице, жене Селима сына Фекуева, сына Араса ризохранителя: и сия живяше во Иерусалиме в масене: и глаголаша к ней по сему. 15 И рече им: сице глаголет Господь Бог Израилев: рцыте мужеви пославшему вы ко мне: 16 тако глаголет Господь: се, Аз наведу злая на место сие и на живущыя в нем, вся словеса книжная, яже прочте царь Иудин: 17 понеже оставиша Мя и кадяху богом другим, яко да прогневают Мя делесы рук своих, и разжжется ярость Моя на место сие и не угаснет: 18 и ко царю Иудину пославшему вас вопросити Господа, сице рцыте ему: тако глаголет Господь Бог Израилев: словеса, яже слышал еси, 19 за сия, яко умягчися сердце твое и смирился еси пред лицем Господним, услышав елика глаголах на место сие и на живущыя в нем, еже быти в погубление и в проклятие, и раздрал еси ризы твоя, и плакался предо Мною, и Аз убо услышах, глаголет Господь: 20 сего ради Аз приложу тя ко отцем твоим, и соберешися во гроб твой в мире, и не узриши очима твоима всех злых, яже Аз имам навести на место сие и на живущыя в нем. === 23 === 1 И возвестиша сия глаголы цареви: и посла царь, и собра к себе вся старейшины Иудины и Иерусалимляны, 2 и вниде царь в дом Господень, и вси мужие Иудины и вси живущии во Иерусалиме с ним, и жерцы, и пророцы, и вси людие от мала и до велика, и прочте во ушеса их вся словеса книги завета обретшияся в дому Господни: 3 и ста царь у столпа и завеща завет пред Господем, еже ходити вслед Господа и хранити заповеди Его и свидения Его и оправдания Его всем сердцем и всею душею, еже возставити словеса завета сего, яже писана в книзе сей. И сташа вси людие в завете. 4 И заповеда царь Хелкии жерцу великому и жерцем вторым и стрегущым врат изнести от храма Господня вся сосуды сотвореныя Ваалу и Дубраве и всей силе небесней, и сожже и вне Иерусалима в Садимофе Кедрсте и изверже прах их в Вефиль: 5 и сожже хомаримы, ихже даша царие Иудины, и кадяху в высоких и во градех Иудиных и во окрестных Иерусалима, и кадящих Ваалу, и солнцу, и луне, и планетам и всей силе небесней: 6 и изнесе кумир из храма Господня вне Иерусалима на поток Кедрск, и сожже его в потоце Кедрсте, и истни в прах, и вверже прах их в гробы сынов людских: 7 и разруши храм кадисимов, иже бе в храме Господни, идеже жены прядяху ризы кумиру: 8 и возведе вся жерцы от градов Иудиных, и оскверни высокая, идеже кадяху жерцы, от Гаваи да Вирсавеи: и разруши храм врат, иже бе при дверех врат Иисуса князя граднаго, иже ошуюю входящым дверми града. 9 Обаче не вхождаху жерцы высоких ко олтарю Господню во Иерусалиме, но токмо ядяху опресноки посреде братии своея. 10 И оскверни Тафефа, иже в дебри сынов Еномлих, еже не превести мужу сына своего и мужу дщере своея Молоху сквозе огнь: 11 и сожже кони, ихже даша царие Иудины солнцу во входе храму Господня, при влагалищи Нафана, царева скопца во Фаруриме: и колесницу солнечную сожже огнем: 12 и олтари, яже на крове горницы Ахазовы, яже сотвориша царие Иудины и олтари, иже созда Манассиа во двою двору храма Господня, раскопа царь, и сверже оттуду, и всыпа прах их в поток Кедрск: 13 и храм, иже пред лицем Иерусалима, одесную горы Мосфаф, егоже созда Соломон царь Израилев Астарте мерзости Сидонстей и Хамосу мерзости Моавли и Молхолу мерзости сынов Аммоних, оскверни царь: 14 и сокруши столпы, и искорени дубравы, и наполни места их костми человеческими: 15 и олтарь иже во Вефили высокий, егоже сотвори Иеровоам сын Наватов, иже в грех введе Израиля, и олтарь той высокий раскопа, и сокруши камение его, и истни в прах, и сожже кумиры. 16 И восклонися Иосиа, и виде гробы сущыя во граде тамо, и посла, и взя кости от гроб, и сожже на олтари, и оскверни его по глаголу Господню, егоже глагола человек Божий, егда стояше Иеровоам в праздник пред олтарем: и обращься возведе очи свои на гроб человека Божия глаголавшаго словеса сия. 17 И рече: что могила сия, юже аз вижду? И реша ему мужие града: гроб сей человека Божия есть, иже прииде от Иуды и проглагола словеса сия, яже сотворил еси ныне над олтарем, иже в Вефили. 18 И рече: оставите его, да не подвижет ни един муж костей его. И оставиша кости его с костьми пророка пришедшаго от Самарии. 19 Еще и вся храмы высоких сущих во градех Самарийских, яже сотвориша царие Израилевы прогневляюще Господа, отверже Иосиа, и сотвори им вся дела, яже сотвори в Вефили, 20 и закла вся жерцы высоких сущыя тамо пред олтарми, и сожже на них кости человечи, и возвратися во Иерусалим. 21 И заповеда царь всем людем, глаголя: сотворите пасху Господеви Богу нашему, якоже писано в книзе завета сего: 22 яко не бысть пасха сия от дний судий, иже судиша Израилеви, и во всех днех царей Израилевых и царей Иудиных: 23 но токмо во осмоенадесять лето царя Иосии бысть пасха Господу во Иерусалиме. 24 Еще и волшебники, и вражбиты, и ферафимы, и кумиры, и вся мерзости бывшыя в земли Иудине и во Иерусалиме, искорени царь Иосиа, да утвердит словеса законная писанная в книзе, юже обрете Хелкиа жрец в храме Господни. 25 Подобен ему не бысть пред ним царь, иже обратися к Господеви всем сердцем своим и всею душею своею и всею силою своею по всему закону Моисеову, и по нем не воста подобен ему. 26 Обаче не отвратися Господь от ярости гнева Своего великаго, имже возярися гневом на Иуду, на прогневания, имиже прогнева Его Манассиа, 27 и рече Господь: еще и Иуду отрину от лица Моего, якоже отринух Израиля, и град сей отвергу, егоже избрах, Иерусалима, и храм, о немже рех: будет имя Мое ту. 28 И прочая словес Иосиевых, и вся елика сотвори, не сия ли написана в книзе словес дний царей Иудиных? 29 Во днех же его взыде фараон Нехао царь Египетск на царя Ассирийска на реку Евфрат: и изыде царь Иосиа на сретение ему, и уби его Нехао царь в Магеддоне, егда его узре. 30 И взяша его отроцы его мертва из Магеддона и принесоша его во Иерусалим, и погребоша его во гробе его во граде Давидове. И пояша людие земли тоя Иоахаза сына Иосиина и помазаша его, и воцариша его вместо отца его. 31 Сын двадесяти и триех лет бе Иоахаз, внегда нача царствовати и три месяцы царствова во Иерусалиме. Имя же матери его Амитала, дщи Иеремии из Ловны. 32 И сотвори лукавое пред очима Господнима, по всем елика сотвориша отцы его. 33 И пресели его фараон Нехао в Ревлаам в землю Емаф, да не царствует во Иерусалиме, и возложи дань на землю ту сто талант сребра и сто талант злата. 34 И постави царем фараон Нехао над ними Елиакима, сына Иосии царя Иудина, вместо Иосии отца его, и премени имя ему Иоаким: Иоахаза же взя и введе во Египет и умре тамо. 35 И сребро и злато даде Иоаким фараону, обаче написа землю даяти сребро по словеси фараоню: муж по оценению своему даяше сребро и злато от людий земли тоя даяти фараону Нехао. 36 Сын бе двадесяти и пяти лет Иоаким, егда нача царствовати, и единонадесять лет царствова во Иерусалиме. Имя же матери его Иелдаф, дщи Фадаиля, от Румы. 37 И сотвори лукавое пред очима Господнима, по всем елика сотвориша отцы его. === 24 === 1 Во днех его взыде Навуходоносор царь Вавилонский, и бысть ему Иоаким раб три лета, и отвратися, и отвержеся его. 2 И посла Господь ему единопоясники Халдейския и единопоясники Сирийския, поясники сынов Аммоних, и посла их в землю Иудову на побеждение по словеси Господню, еже глагола рукою рабов Своих пророков. 3 Обаче прииде по гневу Господню на Иуду, еже отставити его от лица Своего грех ради Манассииных, по всем елика сотвори, 4 и кровь неповинную пролия, и наполни Иерусалим крове неповинныя, сего ради не восхоте Господь умилостивитися. 5 И прочая словес Иоакимовых, и вся елика сотвори, не се ли, сия написана в книзе словес дний царей Иудиных? 6 И успе Иоаким со отцы своими, и воцарися Иехониа вместо его. 7 И не приложи ксему царь Египетский изыти из земли своея, яко взя царь Вавилонский от потока Египетска даже до реки Евфрата, вся елика быша царя Египетска. 8 Сын осминадесяти лет Иехониа, егда нача царствовати, и три месяцы царствова во Иерусалиме. Имя же матере его Несфа, дщи Еланасфана, от Иерусалима. 9 И сотвори лукавое пред очима Господнима, по всему елико сотвори отец его. 10 И в время то взыде Навуходоносор царь Вавилонскими на Иерусалим, и бысть град во облежении. 11 И прииде Навуходоносор царь Вавилонский на град Иерусалим, и отроцы его около обседяху град. 12 И изыде Иехониа царь Иудин ко царю Вавилонскому, сам и отроцы его, и мати его, и князи его, и скопцы его, и взя его царь Вавилонский в осмое лето царства своего. 13 И изнесе вся сокровища оттуду сущая во храме Господни и сокровища дому царева, и сокруши вся сосуды златыя, яже сотвори Соломон царь Израилев во храме по глаголу Господню, 14 и пресели Иерусалимляны и вся князи, и сильныя крепостию, плена десять тысящ пленив, и всякаго древоделя, и художники: и никтоже остася, токмо убозии земли тоя: 15 и преведе Иехонию в Вавилон, и матерь цареву, и жены царевы, и скопцы его, и крепкия земли тоя введе на преселение из Иерусалима в Вавилон: 16 и вся мужы силы, седмь тысящ, и древодель и художников тысящу, вси сильнии творящии брань, и введе их царь Вавилонский в преселение в Вавилон. 17 И постави царем Вавилонский царь Ватфанию сына его и вместо его, и преложи имя ему Седекиа. 18 Сын двадесяти и единаго лета Седекиа, внегда нача царствовати, и единонадесять лет царствова во Иерусалиме. Имя же матере его Амитала, дщи Иеремиина, от Ловны. 19 И сотвори лукавое пред очима Господнима, по всему елика сотвори Иоаким, 20 яко ярость бе Господня на Иерусалиме и на Иуде, дондеже отверже я от лица Своего. И отвержеся Седекиа царя Вавилонска. === 25 === 1 И бысть в лето девятое царства его, в месяц десятый, прииде Навуходоносор царь Вавилонский и вся сила его на Иерусалим: и обступи его отвсюду, и создаша окрест его бойницы. 2 И бысть град во облежении до первагонадесять лета царства Седекиина, девятаго дне месяца: 3 и превозможе во граде глад, и не бысть хлеба людем земли тоя: 4 и разседеся град, и вси мужие воинстии изыдоша нощию путем врат, яже посреде стен, яже суть у вертограда царева, и Халдее окрест града (беша). И побеже (царь Седекиа) путем пустынным: 5 и погна сила Халдейская вслед царя, и яша его во Аравофе Иерихонстем, и вся сила его разсыпася от него: 6 и пояша царя и поведоша его к царю Вавилонску в Ревлафу: и глагола с ним суд: 7 и сыны Седекиины закла пред очима его, и очи Седекиины избоде, и связа его узами, и отведе его во Вавилон. 8 В месяц же пятый, в седмый день месяца, сие лето девятоенадесять Навуходоносора царя Вавилонска, прииде Навузардан архимагир, раб царя Вавилонскаго, во Иерусалим 9 и зажже храм Господень и дом царев, и вся домы Иерусалимли и вся домы великия сожже архимагир: 10 и стены Иерусалимли окрест раскопа сила Халдейская. 11 И останок людий избывших во граде и впадших, иже отпадоша ко царю Вавилонску, и прочее и утверждение пренесе Навузардан воевода. 12 И от нищих земли тоя остави архимагир винограды блюсти и вертограды. 13 И столпы медяны в храме Господни, и подставы, и море медное сущее во храме Господни сокрушиша Халдее, и взяша медь их во Вавилон: 14 и конобы, и котлы и фиалы, и кадилницы, и вся сосуды медяныя, в нихже служаху, взяша: 15 и кадилницы, и фиалы златыя и сребряныя взя архимагир, 16 столпы два, и моря едино, и подставы, яже сотвори Соломон храму Господню: не бе веса меди всех сосудов. 17 Осминадесяти лакот бысть высота столпа единаго, и глава медяна на нем: и высота главе три лакти, и на главе мрежи и шипки окрест, вся медяна: по сему же и столп вторый со мрежею. 18 И поят архимагир Сареа жерца перваго и Софонию жерца втораго, и три стражы вратныя: 19 и от града взя скопца единаго, иже бе приставник над мужи военными, и пять мужей предстоящих пред лицем царевым, обретшихся во граде, и книгочиа князя силы, иже строяше люди земли тоя, и шестьдесят мужей людий земли тоя обретшихся во граде: 20 и поят я Навузардан архимагир, и приведе я к царю Вавилонскому в Ревлафу. 21 И порази их царь Вавилонский, и умори я в Ревлафе, в земли Емафове. И преселися Иуда свыше земли своея. 22 И людие оставшиися в земли Иудове, ихже остави Навуходоносор царь Вавилонский, и постави над ними Годолию, сына Ахикамля, сына Сафаня. 23 И услышаша вси князи силы сами и мужие их, яко постави царь Вавилонский Годолию, и приидоша к Годолии в Массифу, и Исмаил сын Нафаниин, и Иоанан сын Карифов, и Сараиа сын Фанамафов Нетофафитский, и Иезониа сын Махаффов, сами и мужие их (приидоша). 24 И клятся им Годолиа и мужем их и рече им: не бойтеся пришествия Халдеев: седите на земли и работайте царю Вавилонскому, и добро будет вам. 25 И бысть в месяц седмый, прииде Исмаил сын Нафаниин сына Елисамля от семене царска, и десять мужей с ним, и порази Годолию, и умре, и Иудеев и Халдеев, иже с ним бяху в Массифе. 26 И восташа вси людие, от мала и до велика, и князи сил, и внидоша во Египет, яко убояшася от лица Халдейска. 27 И бысть в лето тридесять седмое преселения Иоахина царя Иудина, в дванадесятый месяц, в двадесять седмый день месяца, вознесе Евилмародах царь Вавилонский, в лето царства своего, главу Иоахина царя Иудина, и изведе его из дому темницы его, 28 и глагола с ним благая, и даде престол ему свыше престолов царей, иже бяху с ним в Вавилоне: 29 и измени ризы его темничныя, и ядяше хлеб с ним всегда, во вся дни живота своего. 30 И пища его от дому царска давана бяше, и все изобилие во дни его, во вся дни живота его. == Первая книга Паралипоменон == === 1 === 1 Адам, Сиф, Енос, 2 Каинан, Малелеил, Иаред, 3 Енох, Мафусал, Ламех, 4 Ное, Сим, Хам, Иафеф. 5 Сынове Иафефовы: Гамер и Магог и Мадай, Иован, Елиса и Фовел, и Мосох и Фирас. 6 Сынове же Гамеровы: Асханаз и Рифаф и Форгама. 7 Сынове же Иовани: Елиса и Фарсис, и Хеттим и Доданим. 8 Сынове же Хамовы: Хус и Месраим, Фуд и Ханаан. 9 Сынове же Хусовы: Сава и Евила, и Савафа и Регма и Севефаха. Сынове же Регмановы: Сава и Дадан. 10 Хус же роди Неврода: сей нача быти исполин ловец на земли. 11 Месраим же роди Лодиима и Анамиима, и Лавиима и Неффосеимы, 12 и Фафероимы и Патросониимы, и Хаслоимы, от нихже изыдоша Филистими, и Каффориимы. 13 Ханаан же роди Сидона первенца своего и Хеттеа, 14 и Иевусеа и Аморреа, и Гергесеа 15 и Евеа, и Арукеа и Асенеа, 16 и Арадиа и Самареа и Амафиа. 17 Сынове же Симовы: Елам и Ассур, и Арфаксад и Луд и Арам. Сынове же Арамли: Уз и Ул, и Гефер и Мосох. 18 Арфаксад же роди Каинана, Каинан же роди Салу, Сала же роди Евера. 19 Еверу же родистася два сына: имя единому Фалек, яко бо дни его разделена бысть земля, и имя брату его Иектан. 20 Иектан же роди Елмодада и Салефа, и Асермофа и Иадера, 21 и Адорама и Узала, и Деклу 22 и Гамаала, и Авимеила и Саву, 23 и Уфира и Евилата и Иоава: вси сии сынове Иектановы. 24 Сынове же Симовы: Арфаксад, Каинан, Сала, 25 Евер, Фалек, Рагав, 26 Серух, Нахор, Фара, 27 Аврам, той есть Авраам. 28 Сынове же Авраамли: Исаак и Исмаил. 29 Сии же роди их: первенец Исмаилов Наваиоф и Кидар, и Навдеил и Мавсан, 30 и Масма и Идума, и Массий и Ходдад, и Феман 31 и Иетур, и Нафес и Кедма: сии суть сынове Исмаили. 32 Сынове же Хеттуры подложницы Авраамовы, и роди ему Зомврана и Иезана, и Мадала и Мадиама, и Иесвока и Суеа. Сынове же Иезани: Сава и Дедан. Сынове же Дедановы: Рагуил и Навдеил, и Ассуриим и Латусиим и Асомин. 33 Сынове же Мадиамли: Гефар и Офер, и Енох и Авида и Елдад: вси тии сынове Хеттурини. Роди же Авраам Исаака. 34 Сынове же Исааковы Исав и Израиль. 35 Сынове же Исавовы: Елифаз и Рагуил, и Иевул и Иеглом и Корей. 36 Сынове Елифазовы: Феман и Омар, и Софар и Гофам и Кенез. Фамна же подложница Елифазова роди ему Амалика. 37 Сынове же Рагуилевы: Нахеф и Заре, и Сомме и Мозе. 38 Сынове же Сиировы: Лотан и Совал, и Севегон и Ана, и Дисон и Асар и Рисон. 39 Сынове же Лотани: Хорри и Еман, и сестре Лотаня Фамна. 40 Сынове же Совали: Адуар и Манааф, и Увал и Саифи и онан. Сынове же Севегони: Аиа и Онам. 41 Сынове же Анани: Дисон и Еливама, дщи Ананя, двое. Сынове же Дисоновы: Амада и Есеван, и Ефран и Харран. 42 Сынове же Асаровы: Валаам и Занан и Илакан, и сынове Дисони: Ос и Арран. 43 И сии царие их, иже царствоваша в земли Едомли, прежде неже бысть царь над сыны Израилевыми: Валак сын Веоров, и имя граду его Деннава: 44 умре же Валак, и царствова вместо его Иовав, сын Зарин, от Восорры. 45 И умре Иовав, и царствова вместо его Асом от земли Феманони. 46 И умре Асом, и царствова вместо его Адад, сын Варадов, иже порази Мадиама на поли Моавли: и имя граду его Гетфем. 47 И умре Адад, и царствова вместо его Самаа от Мессеккаса. 48 И умре Самаа, и царствова вместо его Саул от Роовофа, иже близ реки. 49 Умре же Саул, и царствова вместо его Валаеннон сын Аховоров. 50 И умре Валаеннон, и царствова вместо его Адад сын Варадов, егоже граду имя бе Фогор и имя жене его Метевеиль, дщерь Матраифа. 51 И умре Адад, и начаша быти князи Едомли: князь Феман, князь Алуа, князь Иефаф, 52 князь Еливама, князь Ила, князь Финон, 53 князь Кенез, князь Феман, князь Вамаил, 54 князь Гамесил, князь Арераман. Сии быша князи Едомстии. === 2 === 1 Сынове же Израилевы сии суть: Рувим, Симеон, Левий, Иуда, Иссахар, Завулон, 2 Дан, Иосиф, Вениамин, Неффалим, Гад и Асир. 3 Сынове Иудины: Ир, Авнан и Силом: сии трие родишася ему от дщере Савы Хананитяныни. Бысть же Ир первенец Иудин лукав пред Господем: и уби его. 4 Фамарь же невестка его роди ему Фареса и Зару. Всех сынов Иудиных пять. 5 Сынове же Фаресовы: Есром и Иемуил. 6 Сынове же Зарины: Замврий и Ифам, и Емуан и Калхад и Даралей: всех пять. 7 Сынове же Хармиины Ахар, иже смути Израиля, иже сложися на проклятие. 8 И сынове Ифамли Азариа. 9 Сынове же Есромовы, иже родишася ему: Иерамеил и Арам и Халови. 10 Арам же роди Аминадава, Аминадав же роди Наассона, князя дому Иудину, 11 Наассон же роди Салмона, и Салмон роди Вооза, 12 и Вооз роди Овида, и Овид роди Иессеа. 13 Иессей же роди первенца своего Елиава, и втораго Аминадава, и третияго Самеа, 14 и четвертаго Нафанаила, и пятаго Реила, 15 и шестаго Асака, и седмаго Давида. 16 И сестры их быша: Саруиа и Авигеа. Сынове же Саруины: Авесса и Иоав и Асаил, трие сии. 17 Авигеа же роди Амессу, егоже отец бысть Иофор Исмаилтянин. 18 И Халев сын Есромов поя жену Азуву и Иериофу. И сии сынове ея: Иасар и Сував и Ардон. 19 И умре Азува, и взя себе Халев жену Ефрафу, яже роди ему Ора, 20 Ор же роди Урию, и Уриа роди Веселеила. 21 По сем же вниде Есром ко дщери Махира отца Галаадова, и сей поя ю, сый в летех шестидесяти пятих: и роди ему Сегува. 22 Сегув роди Иаира, и беша ему двадесять три грады в земли Галаадстей. 23 Взя же Гедсур и Арам веси Иаировы, Канаф и села его, шестьдесят градов. Вси тии сынове Махира отца Галаадова. 24 И по умертвии Есрома вниде Халев во Ефрафу, жена же Есромля Авиа, и роди ему Асдома отца Фекоева. 25 И беша сынове Иерамеила первенца Есромля: Рам первенец и Ваана, и Арам и Асом брат его. 26 И бе жена ина Иерамеилу, именем Атара, яже бысть мати Унамля. 27 И быша сынове Рама первенца Иерамеиля: Маас и Иамин и Акор. 28 И быша сынове Унамли Саммаа и Еддай. Сынове же Саммаины Надав и Ависур. 29 И имя жене Ависурове Авигеа: и роди ему Озва и Моддиа. 30 Сынове же Надавли Салад и Апфаин: и умре Салад не имый чад. 31 И сынове Апфаини Иесий: и сын Иесиев Сосан: и сынове Сосани Дадай. 32 Сынове же Дадаини: Ахисама и Иефер и Ионафан: и умре Иефер не имый чад. 33 Сынове же Ионафани Фалеф и Заза. Тии быша сынове Иерамеили. 34 Сосан же не име сынов, но точию дщери, и имяше Сосан раба Египтянина, именем Иераа: 35 и даде Сосан дщерь свою Иераю рабу своему в жену, и роди ему Еффеа, 36 Еффей же роди Нафана, и Нафан роди Заведа, 37 Завед же роди Офлада, Офлад же роди Иовида, 38 Иовид же роди Ииуа, Ииуй роди Азарию, 39 Азариа же роди Хеллиса, и Хеллис роди Елеаса, 40 Елеас же роди Сосомаиа, и Сосомай роди Саллума, 41 Саллум же роди Иекомию, и Иекомиа роди Елисама. 42 Сынове же Халева брата Иерамеиля, Мариса первенец его: той отец Зифов: и сынове Марисы отца Хевронова. 43 И сынове Хеврони: Корей и Фафуй, и Реком и Самаа. 44 Самаа же роди Раема, отца Иеркаанова, Иеркаан же роди Саммаа. 45 Сын же Саммаин Маон, и Маон отец Вефсуров. 46 Гефа же подложница Халевова роди Арана и Мосаа и Газера: Аран же роди Газиза. 47 Сынове же Аддаини: Регма и Иоафам, и Гирсом и Фалет, и Гефа и Сегав. 48 И подложница Халевова Моха роди Севера и Фархана. 49 Роди же Сагаф отца Мадминаева, и Саула отца Мадевина, и отца Аговдаева, и дщи Халевова Асха. 50 Сии бяху сынове Халевовы, сынове Ора первенца Ефрафова: Совал, отец Кариафиаримов, 51 и Соломон отец Вифлеемов, и Арим отец Вефгедоров. 52 Быша же сынове Совалу отцу Кариафиаримлю: Араа и Есий, и Амманиф 53 и Умасфае, и Кариафиарим и Мифифим, и Исамафим и Исамареим: от тех изыдоша Сарафее и Есфаголее. 54 Сынове же Соломони: Вифлеем и Нетофат и Атароф, дому Иоавля, и половина Манафиев Исараи, 55 отечества Писарей обитающих во Иависе, Фаргафиим и Самафиим и Сохафим: сии суть Кинее, иже приидоша от Емафа, отца дому Рихавля. === 3 === 1 Сии же быша сынове Давидовы, иже родишася ему в Хевроне: перворожденный Амнон от Ахинаамы Иезраилитиды: вторый Далуиа от Авигеи Кармилския: 2 третий Авессалом сын Маахи, дщере Фоломиа царя Гесурска: четвертый Адониа сын Аггифин: 3 пятый Сафатиа от Авиталы: шестый Иефраам от Аглаи жены его: 4 шесть родишася ему в Хевроне, идеже царствова седмь лет и шесть месяц: и тридесять три лета царствова во Иерусалиме. 5 И сии родишася ему во Иерусалиме: Самаа и Совав, и Нафан и Соломон, четыри от Вирсавии дщере Амииловы: 6 и Евар и Елисама, и Елифалет 7 и Нагис, и Нафек и Иафие, 8 и Елисама и Елиадак и Елифалет, девять. 9 Вси сынове Давидова кроме сынов подложничих и Фамары сестры их. 10 Сынове же Соломони: Ровоам, Авиа сын его, Аса сын его, Иосафат сын его, 11 Иорам сын его, Охозиа сын его, Иоас сын его, 12 Амасиа сын его, Озиа сын его, Иоафам сын его, 13 Ахаз сын его, Езекиа сын его, Манассиа сын его, 14 Амон сын его, Иосиа сын его. 15 Сынове же Иосиины: первенец Иоахаз, вторый Иоаким, третий Седекиа, четвертый Селлум. 16 Сынове же Иоакимовы: Иехониа сын его, Седекиа сын его. 17 Сынове же Иехониины: Асир, Салафииль сын его, 18 Мелхирам, Фадаиа и Анесар, и Иезекиа и Осамон и Савадиа. 19 Сынове же Салафиилевы: Зоровавель и Семей. Сынове же Зоровавелевы: Мосоллам и Ананиа, и Салимин сестра их, 20 и Асувеа и Оел, и Варахиа и Асадиа и Асовед, пять. 21 Сынове же Ананиины: Фалтиас, и Иесиа сын его, Рафал сын его, Орна сын его, Авдиа сын его, Сехениа сын его, 22 и сын Сехениин Самеа. И сынове Самеины: Хаттус и Иоил, и Верриа и Ноадиа и Саф, шесть. 23 И сынове Ноадиины: Елионей и Езекиа и Езрикам, трие. 24 Сынове Елионеевы: Уадиа и Елиасевон, и Фадаиа и Акаум, и Иоанан и Далеа и Анан, седмь.. === 4 === 1 Сынове же Иудины: Фарес, Есром и Хармий, и Ор и Сувал, 2 и Рада сын Суваль. Сувал же роди Иефа, Иеф же роди Ахимеа и Лаада: сии родове Арафиины. 3 И сии сынове Етановы: Иезраиль и Иесман и Иевдан: имя же сестре их Есиадесфон. 4 И Фануил отец Гедоров, и Езер отец Осань: сии сынове Ора первенца Ефрафа, отца Вефлаемля. 5 Ассуру же отцу Фекоеву бысте две жене: Халла и Маара: 6 роди же ему Маара Ахаза и Афера, и Фемана и Аасфира: вси сии сынове Маарины. 7 И сынове Хеллани: Сереф и Саар и Есфанам. 8 Кое же роди Енова и Совива и рождение брата Рихава, сына Иаримля. 9 Бысть же Иавис честнейший братии своея: и мати его нарече имя его в болезни. 10 И призва Иавис Бога Израилева, глаголя: аще благословляя благословиши мене и распространиши пределы моя, и будет рука Твоя со мною, и сотвориши мя во уразумение, еже не смирити мя. И даде ему Бог вся, елика просих есть. 11 Халев же отец Асхань роди Махира: сый отец Ассафонов. 12 И Ассафон роди Сафрефу и Фессию, и Фана отца града Нааса, брата Селома Кенезиина и Ахазова: сии мужие Рихавли. 13 Сынове же Кенезиины: Гофониил и Сараиа. Сынове же Гофониилевы Афаф. 14 Манафай же роди Гофора, и Сараиа роди Иорама, отца Гисасариимля, зане художницы быша. 15 Сынове же Халева сына Иефонниина Ир, Ила и Наам. Сынове же Илы Кенез. 16 Сынове же Амелимли: Зиф и Зефа, и Фириа и Есерил. 17 Сынове же Еврины: Иефер, Морад, и Афер и Иамон: и роди Иефер Марона, и Семею, и Иесву отца Гедорова и отца Есфамоня. 18 Жена же его сия Адиа роди ему Иареда отца Гедоря, и Авера отца Сохоня, и Ехфииля, отца Заноня. Сии же сынове Веффии дщере фараоновы, юже поят Морил. 19 И сынове жены Идумеаныни, сестры Ханема и Далиа отца Кеила, и Симеон отец Иомамов. И сынове Наимовы отца Кеилова: Гармий и Есфемоний иже из Махафы. 20 Сынове же Симеони: Амнон и Рамнон сын Анань и Фимнон. И сынове Еси: Зохаф, и сынове Зохафовы. 21 Сынове Силома, сына Иудина: Ир отец Лихавль, и Лаада отец Марисань: и племя дому делателей виссона в дому Есовы, 22 и Иоаким, и мужие Хозива и Иоас и Сараф, иже вселишася в Моаве: и возврати их Аведир в Мафукиим. 23 Сии скудельницы обитающии во атаиме и гадире с царем, и в царстве его укрепишася и вселишася тамо. 24 Сынове Симеони: Намуил и Иамин и Иарив, Саре, Саул. 25 Салем сын его, масан сын его, Масма сын его, 26 Амуил сын его, Савуд сын его, Закхур сын его, Семей сын его. 27 Сынове же Семеины шестьнадесять и дщерей шесть. Братиям же их не быша сынове мнози, и вся племена их не умножишася якоже сынове Иудины, 28 и обитаху в Вирсавеи и саваде, и Монаде и во Есерсуале, 29 и в Валааи и во Асеме, и во Фоладе 30 и в Вафуиле, и в Ерме и в Сикелаи, 31 и во Вефмаримофе и во Имисусеосине и в дому Варусеоримли: сии грады их даже до царя Давида, 32 и села их: Етам и Ин, Рамнон и Фоккан и Есар, градов пять. 33 И вся веси их окрест градов сих, даже до Ваала: сие обдержание их и разделение их. 34 Мосовав же и Иемолох, и Иосиа сын Амасиев, 35 и Иоиль и Ииуй сын Асавиев, сын Сараев, сын Асииль, 36 и Елионай и Иокава, и Иасуиа и Асеа, и Иедиил и Исмаил и Ванеа 37 и Зуза сын Сафеиев, сына Алоня, сына Иедиина, сына Семриня, сына Самеина. 38 Сии произшедшии во именех князей, в родех своих и в домех отечеств своих умножишася во множество, 39 и поидоша да внидут в Герары даже до восток дебри взыскати пажити скотом своим: 40 и обретоша пажити премноги и благи: и земля пространна пред ними, и мир и покой, зане прежде обитаху от сынов Хамовых тамо. 41 И приидоша сии написаннии имены во дни Езекии царя Иудина и побиша жителей их и обитание, ихже обретоша ту, и искорениша их даже до дне сего: и вселишася вместо их, яко пажить скотом их бяше тамо. 42 От сих же от сынов Симеоних идоша в гору Сиир мужей пять сот, и Фалтиа и Ноадиа, и Рафаиа и Озиил, сынове Иесы, князи их: 43 и побиша останки оставшыяся от Амалика, и вселишася тамо даже до дне сего. === 5 === 1 Сынове же Рувима первенца Израилева: яко той первенец: и внегда ему взыти на ложе отца своего, даде благословение его сыну своему Иосифу, сыну Израилеву, и не бысть (той) вменен в первенство, 2 яко Иуда силен крепостию и в братии своей, и в вожда из него, и благословение Иосифу. 3 Сынове Рувима первенца Израилева: Енох и Фаллус, Асрон и Хармий. 4 Сынове Иоилевы: Семей и Ванеа сын его. Сынове же Гога сына Семеина: 5 сын его Миха, сын его Риха, сын его Ваал, 6 Векра сын его, егоже пресели Фаглафалласар царь Ассирииский: сей бысть князь колена Рувимова. 7 И братия его во отечестве своем, в исчислениих своих, по родом их, князь Иоиль и Захариа, 8 и Валек сын Азузов, сын Саммы, сын Иоилев: той обита во Ароире и в Наване и Веелмаоне, 9 и противу востока обита даже до входа пустыни, от реки Евфрата, яко скот их мног в земли Галаадстей. 10 Во дни же Саула возведоша брань противу Агарян: и падоша в руках их обитающии в жилищах своих вси к востоку Галаадску. 11 Сынове Гадовы прямо их обиташа в земли Васани до Селха: 12 Иоиль первенец, и Сафам вторый, и Ианин книжник Васанский. 13 И братия их, по домом отечеств их: Михаил и Мосоллам, и Савей и Иора, и Иохан и Иовиа и Овид, седмь. 14 Сии сынове Авихаила сына Рувиина, и Адди, сына Галаадова, сына Михаилова, сына Иессеина, сына Иедаина, сына Вузова, 15 брата сына Авдиилова, сына Гуниина, князь дому отечеств их. 16 Обиташа в Галааде, в Васане и в весех их и во всех окрестных Саронских, даже до исхода. 17 Вси сии сочтени быша во дни Иоафама царя Иудина и во дни Иеровоама царя Израилева. 18 Сынове Рувимовы и Гадовы и полплемене Манассиина (биша) сынове сильни, мужие носяще щиты и мечы и напрязающе луки и научени брани, четыредесять и четыри тысящы и седмь сот и шестьдесят, исходящии на ополчение. 19 И твориша брань со Агаряны и Итуреаны, и Нафисеаны и Надавеаны, 20 и укрепишася над ними: и предашася в руце их Агаряне и вся обитания их, зане к Богу воззваша во брани, и услыша их, зане уповаша на Него. 21 И плениша имения их, велблюдов пятьдесят тысящ, и овец двести пятьдесят тысящ, и ослов две тысящы, и душ человеческих сто тысящ: 22 ранении же мнози падоша, зане (бысть) от Бога брань: и вселишася вместо их даже до преселения. 23 И полплемене Манассиина вселишася в земли от Васана даже до Ваала Ермоня и Санира и горы Аермонски: и сии в Ливане умножишася. 24 И сии (быша) князи дому отечеств их: Гофер и Иеси, и Елиил и Иеремиа, и Иодуиа и Иедиил, мужие сильни в крепости, мужие именитии, князи по домом отечеств своих. 25 И оставиша Бога отец своих и соблудиша вслед богов людий земли, ихже потреби Бог от лица их: 26 и воздвиже Бог Израилев дух Фула царя Ассирийска и дух Фаглафалласара царя Ассирийска, и пресели Рувима и Гада и полплемене Манассиина, и введе их во Аллан и Иовор, и во Аран и на реку Гозан, даже до дне сего. === 6 === 1 Сынове Левии: Герсон, Кааф и Мерари. 2 Сынове же Каафовы: Амрам и Иссаар, Хеврон и Озиил. 3 Сынове же Амрамли: Аарон и Моисей и Мариам. Сынове же Аароновы: Надав и Авиуд, Елеазар и Ифамар. 4 И Елеазар роди Финееса, и Финеес роди Авиуда, 5 и Авиуд роди Воккиа, и Воккий роди Озию, 6 Озиа же роди Сареа, и Сарей роди Мариофа, 7 Мариоф же роди Амарию, Амариа же роди Ахитова, 8 Ахитов же роди Садока, и Садок роди Ахимааса, 9 Ахимаас же роди Азарию и Азариа роди Иоанана, 10 Иоанан же роди Азарию, той есть Азариа, иже священствова в дому, егоже созда Соломон во Иерусалиме. 11 Роди же Азариа Амарию, и Амариа роди Ахитова, 12 Ахитов же роди Садока, и Садок роди Селлума, 13 и Селлум роди Хелкию, и Хелкиа роди Азарию, 14 и Азариа роди Сареа, и Сарей роди Иоседека. 15 Иоседек же изыде, егда пресели Господь Иуду и Иерусалима рукою Навуходоносора в Вавилон. 16 Сынове же Левиини: Герсон, Кааф и Мерари. 17 И сия имена сынов Герсоних: Ловений и Семей. 18 Сынове же Каафовы: Амрам и Иссаар, Хеврон и Озиил. 19 Сынове же Мерарины: Мооли и Муси. И сии роди Левиини по отечеством их. 20 Герсонови: Ловений сын его, Иеф сын его, Семна сын его, 21 Иола сын его, Аддо сын его, Зара сын его, Иефри сын его. 22 Сынове Каафовы: Иссаар сын его, Аминадав сын его, Корей сын его, Асир сын его, 23 Елкана сын его, Ависаф сын его, Асир сын его, 24 Кааф сын его, Уриил сын его, Озиа сын его, Саул сын его. 25 Сынове же Елкановы: Амаси сын его, Амиоф сын его, 26 Елкана сын его, Суфий сын его, и Нааф сын его, 27 Елиав сын его, Иеремеил сын его, Елкана сын его, Самуил сын его. 28 Сынове же Самуили: первенец его Иоиль и вторый Авиа. 29 Сынове же Мерарины: Мооли сын его, Ловений сим его, Семей сын его, Озиа сын его, 30 Саммаа сын его, Ананий сын его, Асаиа сын его. 31 Сии же суть, ихже постави Давид над певцы в дому Господни, егда постави кивот: 32 и бяху служаще пред скиниею дому свидения в пении, дондеже созда Соломон дом Господень во Иерусалиме, и стояху по чину своему в служении своем. 33 И сии предстоящии и сынове их от сынов Каафовых: Еман певец сын Иоиля, сына Самуилева, 34 сына Елканова, сына Еремеилева, сына Елиавля, сына Наафова, 35 сына Суфова, сына Елканаева, сына Амиофова, сына Амасова, 36 сына Елканова, сына Иоилева, сына Азариева, сына Сафаниева, 37 сына Маафова, сына ассерова, сына Авиасафова, сына Асирова, сына Кореова, 38 сына аминадавова, сына Исаарова, сына Каафова, сына Левиина, сына Израилева: 39 и брат его Асаф, иже стояша одесную его: Асаф сын Варахии, сына Самааева, 40 сына Михаилова, сына Масилова, сына Мелхиева, 41 сына Афаниева, сына Зараева, сына Адаиева, 42 сына Ифамова, сына Земмина, сына Семеиева, 43 сына Иеефова, сына Герсонова, сына Левиина. 44 Сынове же Мерарины братия их ошуюю: Ефам сын Хусии, сына Авдиина, сына Малохова, 45 сына Савиева, сына Амасиева, сына Хелкиева, 46 сына Амасиева, сына Ваниина, сына Семирова, 47 сына Моолиина, сына Мусиева, сына Мерарина, сына Левиина. 48 Братия же их по домом отечеств их, левитяне даны во всякое дело служения скинии дому Божия: 49 и Аарон и сынове его кадяху над олтарем всесожжений и над олтарем фимиама во всякое дело Святых Святым, и да молятся за Израиля по всему, елика повеле Моисей раб Божий. 50 Сии же сынове Аарони: Елеазар сын его, Финеес сын его, Авиуд сын его, 51 Вокхий сын его, Озий сын его, Сарей сын его, 52 Мариоф сын его, Амариа сын его, Ахитов сын его, 53 Садок сын его, Ахимаас сын его. 54 И сия обитания их, по селам их и в пределех их, сыном Аароним племени Каафову, тем бо бысть жребий: 55 и даша им Хеврон в земли Иудине и подградия его окрест его: 56 и села града и веси его даша Халеву сыну Иефонниину. 57 Сыном же Аароним даша грады убежищ: Хеврон и подградия его, и Ловну и подградия ея, и Алом и окрестная его, 58 и Келом и окрестная его, и Давир и окрестная его, 59 и Асан и подградия его, и Вефсамис и подградия его, и Вефсур и подградия его: 60 от колена же Вениаминова Гаваон и подградия его, и Еламоф и подградия его, и еламвей и подградия его, и Анафоф и подградия его: всех градов их тринадесять, градов по племенем их. 61 И сыном Каафовым оставшымся от племене рода, от полуплемене Манассиина, даша по жребию десять градов. 62 И сыном Герсоним по племенем их от колена Иссахарова и от колена Асирова, и от колена Неффалимова и от колена Манассиина в Васане, грады тринадесять. 63 И сыном Мерариным по племенем их от колена Рувимова и от колена Гадова и от колена Завулоня даша по жребию градов дванадесять. 64 Даша же сынове Израилевы левитом грады и подградия их. 65 Даша же по жребию от колена сынов Иудиных и от колена сынов Симеоних и от колена сынов Вениаминих грады сия, ихже назваша имены (своими). 66 И от племен сынов Каафовых, и быша грады пределов их от колена Ефремова: 67 и даша им грады убежищ: Сихем с подградиями его в горе Ефремове и Газер с подградиями его, 68 и Екмаан с подградиями его, и Вефорон и подградие его, 69 и Елон с подградиями его, и Гефремон с подградиями его: 70 и от половины колена Манассиина Анеир и подградия его, и Иевлаам и подградная его, по племени сыном Каафовым оставшымся. 71 Сыном Герсоним от отечеств полуплемене Манассиина Гавлон от Васана и подградная его, и Асироф с подградными его: 72 и от колена Иссахарова Кедес с подградными его, и Надар с подградными его, 73 и Рамоф и подградная его, и Енан с подградными его: 74 и от колена Асирова Масию с подградными его, и Рамоф и подградие его, 75 и Акак и подградие его, и Роов с подградными его: 76 и от колена Неффалимля Кадис в Галилеи и подградная его, и Хамоф с подградными его, и Кариафаим и подградная его. 77 И сыном Мерариным оставшымся от колена Завулоня Реммон и подградная его, и Фавор с подградными его, 78 и за Иорданом Иерихон противу востока Иорданова: от колена Рувимова Восор в пустыни с подградными его, и Есса с подградными его, 79 и Кадимоф и подградная его, и Моапсаф с подградными его: 80 и от колена Гадова Раммоф Галаадский и подградная его, и Наим с подградными его, 81 и Есевон с подградными его, и Иазир с подградными его. === 7 === 1 И сии сынове Иссахаровы: Фола и Фуа, и Ясув и Сомврам, четыре. 2 Сынове же Фолы: Озий и Рафеа, и Иериил и Амин, и Иаффам и Самуил, князи по домом отечеств их, иже от колена Фолина, крепцы силою по родом их, ихже число во дни Давидовы двадесять и две тысящы и шесть сот. 3 Сынове же Озиины Иезрий, и сынове Иезриины Михаил и Авдиа, и Иоиль и Иесиа, пять всех князей. 4 И с ними по родом их, по домом отечеств их, препоясани и сильни ко ополчению на брань, тридесять и шесть тысящ: много бо имеша жен и сынов. 5 Братия же их во всех племенех Иссахаровых крепцы силою, осмьдесят и седмь тысящ сочтение всех их. 6 Сынове же Вениаминовы: Валай и Ховор и Иедиил, три. 7 Сынове же Вллаевы: Есевон и Озиа, и Озиил и Иеримуф и Уриа, пять князей домов отечеств их, крепцы силою, и число их двадесять и две тысящы и тридесять четыре. 8 Сынове же Ховоровы: Замириа и Иоав, и Елиезер и Елиана, и Амариа и Иеримуф и Авиа и Анафоф и Елмефем: вси сии сынове Ховоровы. 9 Сочтение же их по родом их, князи домов отечеств их, крепцы силою, двадесять тысящ и двести. 10 Сынове же Иедиилевы Валаам, и сынове Валаамовы Иеос и Вениамин, и Аоф и Аханаан, и Зифан и Фарсис и Асаир: 11 вси сии сынове Иедиилевы, князи племен крепчайшии силою, седмьнадесять тысящ и двести ко ополчению с силою исходящии. 12 И Сафан и Ифан, сынове Иеримуфовы, Есуд сын его, 13 Неффалим сын его, и Есиил и Гоини, и Иесер и Селлим, сынове его, Валаам сын его. 14 Сынове Манассии: Езриил, егоже роди наложница его Сира, роди же ему и Махира отца Галаадова. 15 Махир же поят жену Офирови и Сафинови, и имя сестре его Мооха, имя же второму Салпаад. Родишажеся Салпааду дщери. 16 И роди Мооха жена Махирова сына и нарече имя его Фарес: и имя брату его Сороор: и сынове его Улам и Ракам. 17 Сынове же Уламовы Валаам: сии сынове Галаада сына Махирова сына Манассиева. 18 Сестра же его Малехеф роди Иесуда и Авиезера и Маалу. 19 Беху же сынове Семира: Аим и Сихем, и Докиим и Ениам. 20 Сынове же Ефремли Фусалам, и Раам сын его, и Фаам сын его, и Елаад сын его, и Фаа сын его, 21 и Завад сын его, и Софела сын его, и Езер и Езлада. Убиша же их мужие Гефстии, иже родишася в земли той: зане изыдоша взяти скоты их. 22 И плакася Ефрем отец их многи дни: и приидоша братия его, да утешат его. 23 И вниде к жене своей: и зача во чреве, и роди сына, и нарече имя его Вариа, яко в злых дому его рожден есть. 24 Дщи же его Сараа, и бо оных оставшихся: и созда Вефорон нижний и вышний и Садру. 25 Рафай же сын его, и Расеф и Фалай сынове его, и Фаан сын его, 26 и Ладан сын его, и Амиуд сын его, Елисама сын его, 27 Рун сын его, Иосий сын его. 28 И одержание их и обитание их Вефиль и веси его противу востока Наараня, и к западней стране Газера и веси его, и Сихем и веси его даже до Газы и веси ея, 29 и даже до предел сынов Манассииных, Вефсан и веси его, Фанаах и веси его, и Магеддон и веси его, Дор и веси его: в тех вселишася сынове Иосифа сына Израилева. 30 Сынове Асировы: Иамна и Есуд, и Иесуе и Вариа, и Сарреа сестра их. 31 Сынове же Вариевы Ховер и Мелхиил: сей отец Завефов. 32 И Ховер роди Иафлета и Сомира, и Хофана и Сулу сестру их. 33 И сынове Иафлетовы: Фасех и Амамааф и Асоаф: сии сынове Иафлетовы. 34 Сынове же Сомировы: Ихиур, Равгоа и Иава и Арам. 35 Сынове же Асуда брата его: Софа и Иамна, и Елим и Алам. 36 Сынове Софовы: Суе, Ариафер и Суан, и Ворин и Имрам, 37 и Васар и Иуд, и Самма и Селимван, и Иефран и Веера. 38 Сынове же Иеферовы: Иефон и Фасфа и Арей. 39 Сынове же Олани: Орех и Аниил и Расиа. 40 Вси сии сынове Асировы, вси князи домов отечества избраннии и крепцы силою, князи, воеводы: сочтение их во время брани на ополчение двадесять шесть тысящ мужей. === 8 === 1 Вениамин же роди Валу первенца своего, и Азвила втораго, и Диеру третияго, 2 и Науила четвертаго, и Рафу пятаго. 3 Быша же сынове Вале: Адир, Гира и Авиуд, 4 и Ависуй и Ноаман, и Ахиа 5 и Гира, и Сефуфам и Урам. 6 Сии сынове Аоди, сии суть князи племен обитающым в Гаваи, ихже преселиша в Мануаф: 7 и Нааман и Ахиа, и Гира, тойже иглаам, и (Гира) роди Азана и Нуа. 8 И Сеорим роди на поли Моавли, повнегда отпустити ему Осиму и Вааду жены своя: 9 роди же от Валы жены своея Иовава и Самию, и Мису и Мелхома, 10 и Иоаса и Сехию и Мармию: сии сынове его князи отечеств: 11 от Осимы же роди Амитова и Елифаада. 12 Сынове же Елифаадовы: Евер и Мисоам и Самиил: той созда Анон и Лодон и веси их, еод и веси его: 13 Вериа же и Сама. Сии князи племенем живущим во Еламе, и тии изгнаша живущих в Гефе. 14 И братия их Сосил и Иеримоф, 15 и Завадиа и Орид, и Авад 16 и Мосоллам, и Иесфа и Иезиа, сынове Вериины. 17 И Завадиа и Мосоллам, и Азаки и Авер, 18 и Иассий и Самари, и Иезелиа и Иовав, сынове Елфаали. 19 И Иаким и Хезрий, и Завдий 20 и Елиоинай, и Салафий и Елиил, 21 и Адаиа и Вареа и Самараф, сынове Семеины. 22 И Иесфан и Авер, и Елеил (и Адриа), 23 и Авдон и Зехрий, и Анан 24 и Ананиа, и Илам и Анафафиа, 25 и Иефадиа и Фануил, сынове Сосиковы. 26 И Самоас и Сареа, и Ефниа 27 и Иарасиа, и Илиа и Зехриа, сынове Иеромоимли. 28 Сии князи отечеств по племенем их: началницы сии обиташа во Иерусалиме. 29 В Гаваоне же вселися Иеиль отец Гаваона и имя жене его Мааха: 30 сын же его первенец Авдон, и Сур и Кис, и Ваел и Надав, и Нир 31 и Геддор и Аиуй и братия его, и Саур и Махелод. 32 Махелод же роди Самаа. Сии же обиташа прямо братии своей во Иерусалиме с братиею своею. 33 Нир же роди Киса, и Кис роди Саула, Саул же роди Ионафана и Мелхисуа, и Аминадава и Иесваала. 34 Сын же Ионафанов Мемфиваал (или Мемфивосфей): и Мемфиваал роди Миху. 35 Сынове же Михины: Фифоф и Малоф, и Фарес и Хааз. 36 Хааз же роди Иаду, Иада же роди Салемефа и Асмофа и Замвриа, Замврий же роди Месу, 37 Меса же роди Ваану: Рафеа сын его, Еласа сын его, Асаил сын его. 38 Асаилу же шесть сынов, и сия имена их: Езрикам первенец его, и Исмаил и Азариа, и Авдиа и Сараиа и Анан: вси тии сынови Асаилевы. 39 Сынове же Асена брата его: Улам первенец его, и Иесус вторый, и Елифас третий. 40 Быша же сынове Уламли мужие крепцы силою, напрязающе лук и умножающе сыны и сыны сынов, сто пятьдесят. Вси сии от сынов Вениаминих. === 9 === 1 И весь Израиль сочтен есть: и се, суть писаны в книзе царей Израилевых и Иудиных со преселившимися в Вавилон за беззакония своя, имиже беззаконноваша. 2 И иже обиташа первее во одержаниих своих во градех Израилевых, священницы и левити и вданнии (на служение). 3 И во Иерусалиме обиташа от сынов Иудиных и от сынов Вениаминих и от сынов Ефремлих и Манассииных: 4 Уфий сын Амиуды сына Амвриина, сына Амвраимова, сына Ваниина, сына сынов Фареса сына Иудина: 5 и от Силона Асаиа первенец его и сынове его: 6 от сынов же Зары Иеил и братия их шесть сот и девятьдесят. 7 И от сынов Вениаминих: Сахом сын Васоллама, сына Одуиева, сына Сануина: 8 и Иевнаа сын Иеровоамов и Елав: и сии сынове Озии сына Махирова: и Мосоллам сын Сафатии, сына Рагуилева, сына Иеваня. 9 Братия же их по родом их девять сот пятьдесят шесть, вси мужие князи племенем по домом отечеств своих. 10 От священник же Иодаиа и Иоарим, и Иоаким 11 и Азариа сын Хелкии, сына Мосолламова, сына Садокова, сына Марариофова, сына Ахитова началника дому Божия: 12 и Адиам сын Иероамль, сына Фасгора, сына Мелхиаева, и Маасий сын Адиила, сына Езирова, сына Мосолламля, сына Маселимофова, сына Еммарова. 13 Братия же их князи по домов отечеств своих, тысяща и седмь сот и шестьдесят, сильни крепостию к деланию служения в дому Божии. 14 От левит же Самеиа сын Асувов, сына Езрикамова, сына Савиева от сынов Мерариных, 15 Ваквакар же и Арис, и Гареа и Мафаниа сын Михаев, сына Зехри, сына Асафова: 16 и Авдиа сын Самеа, сына Галилова, сына Идифуня, и Варахиа сын Ассы, сына Елканова, иже обита во дворех Нетофафовых. 17 Дверницы же: Селлум и Акум, и Телмон и Емман, и братия их: Селлум князь. 18 И даже доселе во вратех царских к востоку: сия врата на ополчения сынов Левииных. 19 И Селлум сын Кореа, сына Авиасафова, сына Кореова: и братия его по дому отечеств их, Кореане над делами служения стрегуще стражбы скинии: а отцы их над полком Господним, стрегуще входа. 20 Финеес же сын Елеазаров бысть вождь их пред Господем, и сии с ним. 21 Захариа сын Мосолламов, дверник врат скинии свидения. 22 Вси избраннии дверницы над враты двести дванадесять, сии в селех своих сочтени: сих постави Давид и Самуил провидец в вере их. 23 И сии и сынове их (быша) при вратех дому Господня и в дому скинии стрещи почередно. 24 По четырем ветром быша двери к востоку, к западу, к северу, к югу. 25 Братия же их, иже живяху в селех своих, прихождаху по седми днех от времене даже до времене (на премену тем): 26 понеже четырем дверником сильным вверени быша двери: и левити быша над хранилищи, и над сокровищи дому Божия ополчахуся, 27 и окрест дому Божия живяху: яко на них бе стражба их: и сии над ключами, еже утро утро отверзати двери святилища. 28 От тех же (бяху) над сосуды служения, по числу бо вношаху сосуды и по числу изношаху я. 29 От тех же поставлени над сосуды и над всеми сосуды святыми, и над мукою пшеничною и вином и елеем, и фимиамом и ароматы. 30 От сынов же священнических беша мироварцы, миро соделоваху из аромат. 31 И Маттафиа от левит, сей первенец Селлуму Кореанину, емуже вверена дела жертвы сковрадныя великаго жерца: 32 и Ванеа Каафитянин от братий их над хлебы предложения, еже уготовляти в субботы и субботы. 33 И сии псалмопевцы князи отечеств левитских, определени почередно во храминах, повседневно, яко да день и нощь свое служение отслуживают. 34 Сии князи отечеств левитских по племенем своим, началницы сии пребываху во Иерусалиме. 35 В Гаваоне же живяше отец Гаваонь Иеиль: и имя жене его Мааха: 36 и сын первенец его Авдон, и Сур и Кис, и Ваель и Нир, и Надав 37 и Гедор, и братия его Аиун и Зехриа и Макелоф. 38 Макелоф же роди Саму: и сии вселишася посреде братий своих во Иерусалиме с братиями своими. 39 Нир же роди Киса, и Кис роди Саула, и Саул роди Ионафана и Мелхисуа, и Аминадава и Иесваала. 40 Сын же Ионафань Мемфиваал: и Мемфиваал роди Миху. 41 Сынове же Михи: Филоф и Мелхиил, и Фараа и Хааз. 42 Хааз же роди Иаду, Иада же роди Алефа и Асмофа и Замвриа: Замврий же роди Месу, 43 Меса же роди Ваану: Рафеа сын его, Еласа сын его, Асаил сын его. 44 Асаилу же (быша) шесть сынов, и сия имена их: Езрикам первенец его, и Исмаил и Азариа, и Авдиа и Анан и Аса: сии сынове асаиловы. === 10 === 1 Филистими же воеваша противу Израиля, и бежаша мужие Израилевы от лица иноплеменническа и падоша ранени на горе Гелвуи. 2 И погнаша иноплеменницы вслед Саула и вслед сынов его: и убиша иноплеменницы Ионафана и Аминадава и Мелхисуа, сынов Сауловых. 3 И отягчися брань на Саула, и обретоша его стрелцы в луках и в трудех, и изнеможе от стрел. 4 И рече Саул к носящему оружие его: извлецы мечь твой и прободи мя им, да не когда приидут необрезаннии сии и поругаются мне. И не восхоте носяй оружие его, яко убояся зело. И взя Саул мечь и нападе нань. 5 И виде носяй оружие его, яко умре Саул, и нападе и он на мечь свой и умре. 6 И умре Саул и три сына его в день он: и весь дом его купно умре. 7 И видеша вси мужие Израилевы, иже во юдоли, яко побежа Израиль, и яко умре Саул и сынове его, и оставиша грады своя и побегоша: и приидоша иноплеменницы и вселишася в них. 8 И бысть заутра, и приидоша иноплеменницы совлачати падших корысти, и обретоша Саула и сынов его падших на горе Гелвуи: 9 и обнажиша его, и взяша главу его и оружие его, и послаша в землю иноплеменничу, да обносится (и покажется) идолом их и людем: 10 оружия же их положиша в капищи бога своего: и главу его поткнуша в капищи Дагонове. 11 И услышаша вси живущии во Иависе Галаадстем вся, яже Филистими сотвориша Саулу и сыном его и Израилю: 12 и восташа от Галаада вси мужие крепцыи, и приидоша и взяша труп Саулов и труп сынов его, и принесоша их во Иавис, и погребоша кости их под дубом во Иависе: и постишася седмь дний. 13 И умре Саул за беззакония своя, имиже беззаконнова Господеви по словеси Господню, понеже не сохрани, яко вопроси Саул волшебницы еже вопросити, и отвеща ему Самуил пророк. 14 И не взыска Господа Саул: сего ради уби его и возврати царство его Давиду сыну Иессееву. === 11 === 1 И собрася весь Израиль к Давиду в Хеврон, глаголюще: се, кости твоя и плоть твоя мы: 2 вчера же и третияго дне, егда еще царствоваше Саул, ты был еси изводяй и вводяй Израиля, и тебе рече Господь Бог твой: ты упасеши люди Моя Израиля, и ты будеши князь над людьми Моими Израилем. 3 И приидоша вси старейшины Израилевы ко царю в Хеврон: и утверди Давид с ними завет в Хевроне пред Господем: и помазаша Давида в царя над Израилем по словеси Господню, (еже глагола) рукою Самуиловою. 4 И иде царь Давид и весь Израиль во Иерусалим, сей есть Иевус, идеже бяху Иевусее жителие земли. 5 Рекоша же Давиду, иже обиташа в Иевусе: не внидеши семо. И взя Давид крепость Сионю, яже есть град Давидов. 6 Рече же Давид: всяк иже убиет Иевусеа в первых, будет князь и воевода. И взыде нань прежде Иоав сын Саруиев и бысть князем. 7 И седе Давид во обдержании: сего ради именова е град Давидов. 8 И созда град окрест от Маала даже да окружения: Иоав же прочее града сострои: и воева и взя град. 9 Преспеваше же Давид идый и растый, и Господь Вседержитель бе с ним. 10 Сии же князи сильных Давидовых, иже помогаху ему в царстве его со всем Израилем, да царь будет по словеси Господню, над Израилем, 11 и сие число крепких Давидовых: Иесваал сын Ахамань, первый между тридесятми: той извлече мечь свой единожды на триста язвеных во едино время. 12 И по нем Елеазар, сын Додеа Ахохии: сей бе между треми сильными: 13 сей бе с Давидом в Фасодомине, идеже иноплеменницы собрани быша на брань, и бе часть нивы полна ячменя, и людие побегоша от лица иноплеменнича: 14 и ста посреде части и защити ю, и изби иноплеменники, и сотвори Господь спасение велие (людем Своим). 15 Снидоша же тии трие от тридесяти князей на камень ко Давиду в пещеру Одолламлю, а полк иноплеменничь стояше во юдоли Гигантов. 16 Давид же бе тогда в крепости, полк же иноплеменничь бе тогда в Вифлееме. 17 И возжада Давид и рече: кто напоит мя водою от кладязя Вифлеемска, иже есть во вратех? 18 И трие тии проторгошася сквозе полк иноплеменничь и почерпоша воду из кладязя, иже в Вифлееме, иже бе во вратех, и взяша и принесоша к Давиду, да пиет. И не восхоте Давид пити ея и возлия ю Господеви 19 и рече: милостив ми Бог, еже сотворити глагол сей: аще кровь мужей сих испию в душах их, понеже душами своими принесоша. И не восхоте пити ея. Сие сотвориша трие сильнии. 20 И Авесса брат Иоавль, той бе первый в триех: сей извлече мечь свой противу триех сот мужей во един час и уби их, и той бе посреде триех именит: 21 от триех между двема преславный, и бе им началник, обаче ко трием первым не достиже. 22 И Ванеа сын Иодаев, сын мужа крепкаго, многа дела его, от Каваслила: той уби двоих Ариилов Моавских, и той сниде и уби льва у кладязя во время снега: 23 и той уби мужа Египтянина, емуже возраст бе пять лакот, и в руце Египтянина копие яко вратило ткущих: и сниде к нему Ванеа с жезлом, и восхити копие из руки Египтянина и уби его копием его: 24 сия сотвори Ванеа сын Иодаев, и бе именит посреде триех сильных: 25 над тридесятию бе славен сей, а ко трием не достиже: и постави его Давид над отечеством своим. 26 И сильнии сил: Асаил, брат Иоавль, Елеанан, сын Додоев от Вифлеема, 27 Саммоф Аддитянин, Хелкий Афелонин, 28 Орей сын от Киса Фекуйский, Авиезер Анафофский, 29 Совохай Асофийский, Илий Ахойский, 30 Воорай сын Нетофафиев, Еллаф сын Ваинака Нетофафийскаго, 31 Ифай сын Ривеин от холма Вениаминя, Ванеа сын Фарафониев, 32 Урий от Неали, Галсавиил Аравефийский, 33 Азмоф Варсамийский, Елиава Саламийский, 34 Ирас Гоинийский, Ионафан сын Саги Арарийский, 35 Ахиам сын Сахара Арарийскаго, Зифаал сын Орин, 36 Афер Мехурафинский, Ахиа Фелонийский, 37 Асарай Мармелинский, Ноорай сын Авдиев, 38 Иоиль брат Нафанов, Мавар сын Тараиев, 39 Селлик Аммониин, Наарей Вирофин, иже носил оружие Иоава сына Саруиева, 40 Ира Иефериин, Гарив Фериин, 41 Уриа Хетфейский, Вазаф сын Оолиев, 42 Адина сын Саха, Рувима князь, и у него тридесять, 43 Анан сын Маахин, и Иосафат Фафаин, 44 Озиа Астарофин, Самма и Иеил сынове Хофана Арариина, 45 Иедиил сын Саамерин, и Иозае брат его Фосаин, 46 Иелиил Маоин, и Арива, и Осоиа сын его, Енаам, и Иефема Моавитский, 47 Елиил, и Овид, и Иесиил Месовиев. === 12 === 1 И сии приидоша ко Давиду в Сикелаг, егда еще обдержимь бяше от лица Саула сына Кисова: и сии от сильных помогающе во брани, 2 напрязающе лук десными и шуими руками, и пращницы каменем и стрелами, от братий Сауловых от (колена) Вениамина: 3 князь Ахиезер, и Иоас сын Самаа Гавафита, и Иезиил, и Фалиф, сынове Замофовы, и Варахиа, и Ииуа Анафофитин, 4 и Самаиа Гаваонитин, сильный посреде тридесятих и над тридесятию, и Иеремиа, и Иезекииль, и Иоаннан, и Иозаваф Гадарафитин, 5 Елиозий, и Иеримуф, и Ваалиа, и Самариа, и Сафатиа Аруфин, 6 Елкана, и Иесиа, и Иелиил, и Иезаар, и Иесваам, Коритяне, 7 и Иоила, и Завадиа, сынове Иероамли, и иже от Гедора. 8 И от Гадди прибегоша к Давиду, (егда таяшеся) в пустыни, мужие крепцы и бойцы нарочити, держащии щиты и копия: лица же их яко лица львова, и легцы яко серны на горах скоростию: 9 Азер в первых, Авдиа вторый, Алиад третий, 10 Масман четвертый, Иеремиа пятый, 11 Иеффиа шестый, Елиил седмый, 12 Иоанан осмый, Ельзавель девятый, 13 Иеремиа десятый, Махавенай первыйнадесять. 14 Сии от сынов Гадовых князи воинстии, един над стом малый, великий же над тысящею: 15 сии иже преидоша Иордан месяца перваго: и сей наполнен во всех брезех своих: и изгнаша всех, иже живяху в юдолех от восток даже до запад. 16 Приидоша же от сынов Вениаминих и Иудиных на помощь Давиду. 17 И изыде Давид во сретение им и рече им: аще мирно приидосте ко мне, да будет сердце мое такожде к вам: аще же предати мя супостатом моим не во истине руки, да видит Бог отец наших и судит. 18 И облече дух Амасию князя над тридесятию, и рече: иди, Давида сыне Иессеев, и людие твои: мир, мир тебе, и мир помощником твоим, яко тебе помогает Бог твой. И восприят их Давид и постави их князей сил. 19 И от Манассии прибегоша к Давиду, егда идяху иноплеменницы на Саула на брань, и не поможе им Давид, яко совет быти у воевод иноплеменничих, глаголющих: с главами мужей сих обратится ко господину своему Саулу. 20 И егда идяше Давид в Сикелаг, прибегоша к нему от Манассии Еднай и Иозаваф, и Иавнил и Михаил и Иосафаф и Елиу и Салафий, князи над тысящами у Манассии: 21 сии даша помощь Давиду на полчище геддуров, вси бо крепцы силою: и беша крепцы началницы в воинстве силою. 22 Зане на всяк день прихождаху к Давиду на помощь ему, в силу велику, аки сила Божия. 23 И сия имена князей воинства, иже приидоша ко Давиду в Хеврон, да возвратят царство Саулово к нему по словеси Господню: 24 сынове Иудины носящии щиты и копия шесть тысящ и осмь сот, крепцы ко ополчению: 25 от сынов Симеоних, крепцы силою на ополчение седмь тысящ и сто: 26 от сынов Левииных четыри тысящы и шесть сот: 27 и Иодда князь от колена Аароня, и с ним три тысящы и седмь сот: 28 и Садок, отрок крепкий силою, и дому отца его князи двадесять два: 29 от сынов же Вениаминих братий Сауловых три тысящы, и еще болшая часть их наблюдаше стражбу дому Сауля: 30 и от сынов Ефремлих двадесять тысящ и осмь сот крепцы силою, мужие именитии по домом отечеств их: 31 и от полуплемене Манассиина осмьнадесять тысящ, и иже нарекошася именем, да поставят царем Давида: 32 от сынов Иссахаровых мужие учени, иже познаваху времена разсуждению, что сотворити имать Израиль, в начала их двести, и вся братия их с ними: 33 и от Завулона исходящии ко ополчению брани, со всякими оружии бранными, пятьдесят тысящ, в помощь Давиду не с праздными руками: 34 и от Неффалима князей тысяща, и с ними в щитах и с копиями тридесять и седмь тысящ: 35 и от сынов Дановых ополчающиися на брань двадесять осмь тысящ и шесть сот: 36 и от Асира исходящии помощи в брани четыредесять тысящ: 37 и со оныя страны Иордана от сынов Рувимовых и от Гадовых и от полуплемене Манассиина во всем оружии браннем сто и двадесять тысящ. 38 Вси сии мужие браннии управлени ко ополчению сердцем мирным: и приидоша в Хеврон, да поставят царя Давида над всем Израилем: и прочии от Израиля едино сердце бяху, да царь будет Давид. 39 Быша же ту с Давидов три дни, ядуще и пиюще, уготоваша бо им братия их. 40 И иже близ их бяху даже до Иссахара и Завулона и Неффалима, приношаху им на ослех и велблюдех, и мсках и волех пищу, муку, перевясла смоквей и гроздие сухое, вино и елей, и волы и овны во множестве, радость бо бысть во Израили. === 13 === 1 И сотвори совет Давид (со князи) и тысящники, и сотники и всеми началники, 2 и рече Давид ко всему собранию Израилеву: аще угодно вам, и от Господа Бога нашего благопоспешится, да послем к братиям нашым оставшымся во всей земли Израилеве, и с ними священницы и левити, во градех обдержания их, да соберутся к нам, 3 и да принесем кивот Бога нашего к нам, не взыскахом бо его во дни Саули. 4 И отвеща все собрание, да тако будет, зане угодно бысть слово сие всем людем. 5 И собра Давид всего Израиля от предел Египетских даже до входа Имафова, еже внести кивот Божий от Града Иарима. 6 И принесе его Давид: и весь Израиль взыде во град Давидов, иже бяше Иудин, еже вознести тамо кивот Господа Бога седяща на Херувимех, идеже призвано есть имя Его: 7 и постави кивот Божий на колесницу нову из дому Аминадавля: Оза же и братия его ведяху колесницу: 8 Давид же и весь Израиль играху пред Богом всею силою и в песнех и в гуслех, и псалтири и тимпанех, и кимвалех и в трубах: 9 и приидоша ко гумну Хидоню: и простре Оза руку свою, да поддержит кивот, юнец бо уклони его: 10 и прогневася Господь гневом на Озу и порази его ту, того ради, яко простре руку свою (и прикоснуся) кивоту, и умре ту пред Богом. 11 И оскорбися Давид, яко пресече Господь пресечением Озу, и нарече место то пресечение Озане, даже до дне сего. 12 И убояся Давид Бога в той день, глаголя: како внесу ко мне кивот Божий? 13 И не возврати Давид кивота к себе во град Давидов, но возврати и в дом Аведдара Гефеина: 14 и пребываше кивот Божий в дому Аведдарове три месяцы, и благослови Бог Аведдара и вся, яже имеяше. === 14 === 1 И посла Хирам царь Тирский послы к Давиду, и древа кедровл, и здателей стен, и древоделей, да созиждут ему дом. 2 И позна Давид, яко уготова его Господь царем над Израилем, яко воздвижеся в высоту царство его, ради людий его Израиля, 3 и поят Давид еще жены во Иерусалиме: и родишася ему еще сынове и дщери. 4 И сия имена их, иже родишася ему во Иерусалиме: Саммаа и Совав, Нафан и Соломон, 5 и Иеваар и Елисуй и Елифааф 6 и Нагеф, и Нафаг и Иафие, 7 и Елисама и Валиада и Елифалет. 8 И услышаша иноплеменницы, яко помазан бысть Давид в царя над всем Израилем, и изыдоша вси иноплеменницы взыскати Давида. И услыша Давид и изыде противу их. 9 Иноплеменницы же приидоша и разлияшася во юдоли Исполинов. 10 И вопроси Давид Бога, глаголя: аще взыду на иноплеменники, и предаси ли их в руки моя? И рече ему Бог: взыди, и предам их в руки твоя. 11 И изыде во Ваал-Фарасин, и порази их тамо Давид. И рече Давид: разсече Бог враги моя рукою моею, якоже разсечение воды. Сего ради нарече имя месту тому Фарасин, Разсечение. 12 И оставиша тамо боги своя иноплеменницы, ихже Давид повеле сожещи огнем. 13 И приложиша еще иноплеменницы, и разлияшася еще во юдоли Исполинов. 14 И вопроси паки Давид Бога. И рече ему Бог: не исходи за ними: отвратися от них, и приидеши на них прямо грушей: 15 и будет егда услышиши глас шума верхов грушей, тогда изыдеши на брань, яко изыде Бог пред тобою, да поразит полки иноплеменнически. 16 И сотвори Давид, якоже повеле ему Бог: и порази полки филистимов от Гаваона даже до Газира. 17 И прославися имя Давидово во всех странах, и Господь даде страх его на вся языки. === 15 === 1 И сотвори себе домы во граде Давидове, и уготова место кивоту Божию, и сотвори ему скинию. 2 Тогда рече Давид: не леть есть, (да от всякаго) носится кивот Божий, но токмо от левит, понеже избра их Господь носити кивот Господень и служити Ему даже до века. 3 И собра Давид весь Израиль во Иерусалим, да внесется кивот Божий на место, еже уготова ему. 4 И собра Давид сынов Аароновых и левиты: 5 от сынов Каафовых Уриил началник и братия его, сто двадесять: 6 от сынов Мерариных Асаиа началник и братия его, двести пятьдесят: 7 от сынов Герсоних Иоиль началник и братия его, сто тридесять: 8 от сынов Елисафаних Семеиа началник и братия его, двести: 9 от сынов Хевроновых Елиил началник и братия его, осмьдесят: 10 от сынов Озиилевых Аминадав началник и братия его, сто дванадесять. 11 И призва Давид Садока и Авиафара священники, и левиты Уриила, Асаиа и Иоиля, и Семеиана и Елиила и Аминадава, 12 и рече к ним: вы, началницы отечеств левитских, освятитеся вы и братия ваша, и принесите кивот Господа Бога Израилева (на место), идеже уготовах ему: 13 яко прежде вам не готовым сущым, раздели Господь Бог наш в нас, яко не взыскахом Его по разсуждению. 14 И освятишася священницы и левити, да внесут кивот Господа Бога Израилева. 15 И взяша сынове левитстии кивот Божий, якоже повеле Моисей словом Божиим по писанию, рамены своими на носилех. 16 И рече Давид началником левитским: поставите братию свою певцев во органех, песнех мусикийских, псалтирех, в гуслех и кимвалех, да возгласят в высоту гласом веселия. 17 И поставиша левити Емана сына Иоилева: и от братий его Асафа сына Варахиина: и от сынов Мерариных, братий его, Ефана сына Кисеова: 18 и с ними братия их, втории (чином), Захариа и Озиил, и Семирамоф и Иеиил, и Ананий и Елиав, и Ванеа и Маасиа, и Маттафиа и Елифала, и Макениа и Авдедом, и Иеиил и Озиа, дверницы. 19 И певцы Еман, Асаф и Ефам в кимвалы медяны (возглашающе) в слышание: 20 Захариа же и Озиил, и Семирамоф и Иеиил, и Ананий и Елиав, и Маасиа и Ванеа со гусльми тайны пояху: 21 и Маттафиа и Елифала, и Макениа и Авдедом, и Иеиил и Озиа в кимвалех пояху, еже превзыти: 22 и Хонениа началник левитский, началник пений, зане разумен бе: 23 и Варахиа и Елкана дверницы кивота: 24 и Совениа и Иосафат, и Нафанаил и Амасиа, и Захариа и Ванай и Елиезер священницы трубящии трубами пред кивотом Божиим: и Авдедом и Иеиа дверницы кивота Божия. 25 И бе Давид и старейшины Израилевы и тысящницы идущии, еже изнести кивот завета Господня из дому Авдедомля с веселием. 26 И бысть егда укрепляше Бог левиты носящыя кивот завета Господня, и пожроша седмь телцев и седмь овнов: 27 Давид же бяше одеян ризою виссонною, и вси левити, носящии кивот завета Господня, певцы же и Хонениа началник песней поющих, на Давиде же бе ефуд виссонный. 28 И весь Израиль провождаше кивот завета Господня с восклицанием и гласом трубным, и с трубами и кимвалы, глашающе в гусли и кифары. 29 И бысть егда прииде кивот завета Господня даже до града Давидова, и Мелхола дщи Сауля смотряше во окно, и виде царя Давида скачуща и играюща и уничижи его в сердцы своем. === 16 === 1 Принесоша убо кивот Божий и поставиша его посреде скинии, юже водрузи ему Давид, и принесоша всесожжения и спасителная пред Господем. 2 И соверши Давид вознося всесожжения и спасителная, и благослови люди во имя Господне, 3 и раздели всякому мужу Израилску, от мужа даже до жены, мужу хлеб един печеный, (и часть печена мяса,) и пряженый со елеем семидал: 4 постави же пред лицем кивота завета Господня от левит, еже служити и возглашати (дела Его), и исповедати и хвалити Господа Бога Израилева: 5 Асаф началник, и другий по нем Захариа, Иеиил и Семирамоф, и Иеиил и Маттафиа, и Елиав и Ванеа и Авдедом: Иеиил же во органех и псалтири и гуслех, Асаф же в кимвалех возглашая: 6 и Ванеа и Озиил священницы (трубиша) выну в трубы пред кивотом завета Божия. 7 В той день устрои Давид в начале хвалити Господа рукою Асафа и братии его. 8 Песнь. Исповедайтеся Господеви и призывайте Его во имени Его, знаема сотворите людем начинания Его: 9 пойте Ему и воспойте Ему, поведите вся чудеса Его, яже сотвори Господь: 10 хвалите имя святое Его, да возвеселится сердце ищущее благоволения Его: 11 взыщите Господа и укрепитеся, взыщите лица Его выну: 12 помяните чудеса Его, яже сотвори, знамения и судбы уст Его, 13 семя Израилево, раби Его, сынове Иаковли, избраннии Его. 14 Той Господь Бог наш, во всей земли судбы Его. 15 Помянем во век завет Его, слово Его, еже заповедал в тысящы родов, 16 еже завеща Аврааму, и клятву Свою Исааку: 17 и постави е Иакову в повеление, Израилю в завет вечен, 18 глаголя: тебе дам землю Ханааню, уже достояния вашего. 19 Внегда быти им малым числом, яко умалишася и преселишася в ню, 20 и преидоша от языка в язык и от царствия к людем иным, 21 не остави мужа обидети их, и обличи о них цари: 22 не прикасайтеся помазанным Моим, и во пророцех Моих не лукавнуйте. 23 Воспойте Господеви, вся земля, возвестите от дне на день спасение Его, 24 возвестите во языцех славу Его, во всех людех чудеса Его, 25 яко велий Господь и хвален зело, страшен есть над всеми боги. 26 Яко вси бози языков идоли: Господь же наш небеса сотвори. 27 Слава и величество пред лицем Его, крепость и похвала в месте Его святем. 28 Дадите Господеви, отечествия языков, дадите Господеви славу и крепость, 29 дадите Господеви славу имени Его: возмите дары и принесите пред лице Его, и поклонитеся Господеви во дворех святых Его. 30 Да убоится от лица Его вся земля, да исправится земля и да не подвижится: 31 да возвеселятся небеса и да возрадуется земля, и да рекут во языцех: Господь царствует. 32 Да возгласит море и исполнение его, и древа польская, и вся яже на них. 33 Тогда возвеселятся древа дубравная пред лицем Господним, яко прииде судити земли. 34 Исповедайтеся Господеви, яко благ, яко в век милость Его, 35 и глаголите: спаси ны, Боже, Спасителю наш, и собери нас, и изми нас от язык, да хвалим имя святое Твое, и хвалимся во хвалениих Твоих. 36 Благословен Господь Бог Израилев от века даже и до века. И рекут вси людие: аминь. И восхвалиша Господа. 37 И оставиша тамо пред кивотом завета Господня Асафа и братию его, да служат пред кивотом выну по вся дни: 38 и Авдедом и братия его, шестьдесят осмь: и Авдедом сын Идифунь и Осай (поставлени) во дверники: 39 Садока же священника и братию его священниками пред скиниею Господнею в вышних иже в Гаваоне, 40 да возносят всесожжения Господеви на олтари всесожжений выну утро и вечер, и по всем яже писана суть в законе Господни, елика повеле сыном Израилевым рукою Моисеа раба Божия: 41 и с ними Еман и Идифум и прочии избраннии кийждо званием своим еже хвалити Господа, яко в век милость Его: 42 и с ними трубы и кимвалы еже возглашати, и органы пений Божиих: сынове же Идифумли во вратех (стояху). 43 И идоша вси людие кийждо в дом свой, и Давид возвратися, да благословит дом свой. === 17 === 1 И бысть егда обиташе Давид в дому своем, и рече Давид к Нафану пророку: се, аз живу в дому кедрове, кивот же завета Господня под кожами. 2 И рече Нафан к Давиду: все еже в сердцы твоем твори, яко Бог с тобою есть. 3 И бысть нощи тоя, и бысть слово Господне к Нафану, глаголя: 4 иди и рцы Давиду рабу Моему: сия рече Господь: не созиждеши ты Мне дому, еже обитати Ми в нем: 5 яко не обитах в дому от дне, в оньже изведох Израиля (от земли Египетския), даже до дне сего, но бых в скинии и в шатре: 6 во всех аможе ходих со всем Израилем, аще глаголя глаголах коему колену Израилеву, имже повелех да пасут люди Моя, глаголя: чесо ради не создасте Мне дому кедрова? 7 И ныне тако рцы рабу Моему Давиду: сия рече Господь Вседержитель: Аз изях тя от паствы, егда последовал еси стаду, еже быти тебе вождем над людьми Моими Израилем, 8 и бых с тобою во всех, идеже ходил еси, и потребих вся враги твоя от лица твоего, и сотворих тебе имя якоже имя великих, иже на земли: 9 и дах место людем Моим Израилю, и насадих я, и обитают в нем, и не возскорбят ктому: ни сынове беззакония приложат смирити их якоже от начала 10 и от дний, в няже дах судии людем Моим Израилю, и смирих вся враги твоя, и возращу тя, и дом созиждет ти Господь: 11 и будет егда исполнятся дние твои и почиеши со отцы твоими, и воздвигну семя твое по тебе, еже будет от чрева твоего, и возставлю царство его: 12 той созиждет Мне дом, и укреплю престол его даже до века: 13 Аз буду ему во отца, и той будет Мне в сына: и милость Мою не отиму от него, якоже отях от бывших прежде тебе: 14 и уверю его в дому Моем и во царствии его даже до века, и престол его будет исправлен до века. 15 По всем словесем сим и по всему видению сему тако глаголал есть Нафан к Давиду. 16 И прииде царь Давид, и седе пред Господем, и рече: кто есмь аз, Господи Боже мой? И что дом мой, яко возлюбил мя еси до века? 17 И сия мала суть пред Тобою, Боже, и глаголал еси на дом раба Твоего (еще) издалеча, и призрел еси на мя яко видение человека, и возвысил мя еси, Господи Боже: 18 что приложит еще Давид к Тебе еже прославити? И ты раба Твоего веси: 19 Господи, раба Твоего ради сотворил еси все величие сие и по сердцу Твоему, еже знаема сотворити вся величия Твоя: 20 Господи, несть подобен Тебе, и несть Бога разве Тебе, по всем елика слышахом ушима нашима, 21 и несть, якоже людие Твои Израиль, язык еще на земли, яко пойде Бог избавити люди Себе, еже положити имя Себе велие и славное, еже изгнати от лица людий Твоих, ихже избавил еси от Египта, языки: 22 и дал еси люди Твоя Израиля Тебе в люди даже до века, и Ты, Господи, был еси им в Бога: 23 и ныне, Господи, слово Твое, еже глаголал еси рабу Твоему и на дом его, да уверится до века: и сотвори якоже глаголал еси, 24 и да уверится и возвеличится имя Твое даже до века, глаголющих: Господи, Господи Вседержителю, Боже Израилев, и дом Давида раба Твоего да будет исправлен пред Тобою: 25 Ты бо, Господи Боже мой, отверзл еси ухо раба Твоего создати ему дом, сего ради обрете раб Твой (дерзновение) молитися пред лицем Твоим: 26 и ныне, Господи, Ты еси Сам Бог, и глаголал еси к рабу Твоему благая сия: 27 и ныне начни благословити дом раба Твоего, да будет во веки пред Тобою: яко Ты, Господи, благословил еси, и благослови во веки. === 18 === 1 И бысть по сих, и порази Давид иноплеменники, и прогна их: и взя Геф и веси его от руки иноплеменничи. 2 И порази Давид Моава, и бяху Моавити раби Давиду приносяще ему дань. 3 И порази Давид Адраазара царя Сувска во Емафе, идущу ему поставити руку свою над рекою Евфратом: 4 и взя от него Давид тысящу колесниц и седмь тысящ конник и двадесять тысящ мужей пешцев, и разби Давид вся колесницы, и остави от них сто колесниц, (ихже удержа себе). 5 И прииде Сир от Дамаска, да помощь даст Адраазару царю Сувску, и порази Давид от Сировых двадесять две тысящы мужей: 6 и постави Давид стражу в Сирии, яже близ Дамаска, и бяху Давиду в рабы приносяще дани: и спасе Господь Давида во всех, в нихже хождаше. 7 И взя Давид гривны златыя, ихже имеша раби Адраазаровы, и принесе я во Иерусалим. 8 И из Метавефа и от избранных градов Адраазаровых взя Давид меди много зело, из неяже сотвори Соломон море медяно, и столпы, и сосуды медяныя. 9 И услыша Фоа царь Емафский, яко порази Давид всю силу Адраазара царя Сувска, 10 и посла Адурама сына своего к царю Давиду, да вопросит его, яже о мире, и благословити его о сем, яко победи Адраазара и порази его, понеже муж противен бяше Фоа Адраазару. 11 И вся сосуды златыя и сребряныя и медяныя, и сия освяти царь Давид Господу со сребром и златом, яже взя от всех язык, от Идумеи и Моава, и от сынов Аммоних и от иноплеменник и от Амалика. 12 Авесса же сын Саруиев порази Идумею во юдоли Сланей, осмьнадесять тысящ: 13 и постави во юдоли стражу, и беша вси Идумеане раби Давиду. И спасаше Господь Давида во всех, в нихже хождаше. 14 И воцарися Давид над всем Израилем, и бе творя суд и правду всем людем своим. 15 Иоав же сын Саруиев (бысть) над воинством, и Иосафат сын Ахилудов памятописец, 16 и Садок сын Ахитов и Авимелех сын Авиафаров священницы, и Суса книгочий, 17 и Ванеа сын Иодаев над Херефием и над Фелефием: сынове же Давидовы первии преемницы царевы. === 19 === 1 И бысть по сих, умре Наас царь сынов Аммоних, и воцарися Амам сын его вместо его. 2 И рече Давид: сотворю милость со Ананом сыном Наасовым, якоже сотвори отец его милость со мною. И посла Давид послы на утешение ему о отце его. И приидоша отроцы Давидовы в землю сынов Аммоних ко Анану, да утешат его. 3 И рекоша началницы сынов Аммоних ко Анану: еда прославляя Давид отца твоего пред тобою, посла к тебе утешители? Никако: но да испытают град и соглядают землю, приидоша к тебе отроцы его. 4 И взя Анан рабов Давидовых, и обри их, и отреза от риз их половину даже до чресл, и отпусти их. 5 И приидоша возвестити Давиду о мужех: и посла во сретение им, яко быша обезчещени зело. И рече царь: седите во Иерихоне, дондеже возрастут брады вашя, и возвратитеся. 6 И видеша сынове Аммони, яко посрамлени быша людие Давидовы, и посла Анан и сынове Аммони тысящу талант сребра, да наймут себе от Сирии Месопотамски, и от Сирии Мааха, и от Сувы колесницы и конники: 7 и наяша себе тридесять две тысящы колесниц и царя Мааха и людий его: и приидоша и ополчишася прямо Мидаве: и сынове Аммони собрашася от градов своих и приидоша на брань. 8 И услыша Давид, и посла Иоава и все воинство сильных. 9 И изыдоша сынове Аммони и ополчишася на брань при вратех градских: царие же пришедшии ополчишася особно на поли. 10 И виде Иоав, яко бысть на него противное лице брани сопреди и созади, и избра от всех юнош Израилевых и устрои их противу Сира, 11 и останок людий даде в руце брату своему Авессе, и ополчишася противу сынов Аммоних. 12 И рече: аще укрепится Сир паче мене, то будеши мне во спасение: аще же сынове Аммони укрепятся паче тебе, то аз спасу тя: 13 мужайся, и укрепимся о людех наших и о градех Бога нашего, и Господь, еже благо пред очима его, сотворит. 14 И ополчися Иоав и вси людие, иже с ним, противу Сирян на брань, и побегоша от них. 15 Сынове же Аммони видеша, яко побегоша Сиряне, и побегоша и они от лица Авессы и от лица Иоава брата его, и внидоша во град: Иоав же возвратися во Иерусалим. 16 И виде Сир, яко победи его Израиль, и посла послы: и изведоша Сира, иже бе за рекою, Софак же первоначалник тысящником силы Адраазаровы пред ними. 17 И возвещено бысть Давиду, и собра весь Израиль, и прейде Иордан, и прииде на них, и ополчися противу их: и ополчися Давид противу Сира на брань и воева нань. 18 И убеже Сир от лица Израилева, и уби Давид от Сира седмь тысящ колесниц и четыредесять тысящ пешцев, и Софака первоначалника силы уби. 19 И видеша раби Адраазаровы, яко падоша от лица Израилева, и прибегоша к Давиду, и служаху ему: и не восхоте Сир помогати сыном Аммоним ктому. === 20 === 1 И бысть в находящее лето во время исхождения царей (ко брани), и собра Иоав всю силу воинства, и опустоши землю сынов Аммоних: приидоша же и обседоша Равваф. Давид же пребываше во Иерусалиме: Иоав же порази Равваф и разори его. 2 Взя же Давид венец Молхома царя их от главы его, и обретеся вес в нем талант злата, и в нем камень драгий, и бе на главе Давидове: плены же градски взя многи зело, 3 и людий сущих в нем изведе и претре пилами и орудии железными и разсецающими: тако сотвори Давид всем градом сынов Аммоних, и возвратися Давид и вси людие его во Иерусалим. 4 И бысть по сем, и начася еще брань в Газере со иноплеменники: тогда порази Совохай Усафитянин Сафута от сынов Исполиновых и смири его. 5 И бысть еще брань противу иноплеменник, и порази Елеанан сын Иаиров Лаомиа, брата Голиафа Гефейскаго, емуже древо копия его яко навой ткущих. 6 И бысть еще брань в Гефе, и бе муж зело велик, по шести имеющь перстов, всех двадесять четыре, и сей бе от колена Исполинов, 7 и поноси Израиля: и порази его Ионафан сын Саммаа брата Давидова. 8 Сии родишася Рафаю в Гефе, всех их бе четыри исполины, и падоша рукою Давидовою и рукою рабов его. === 21 === 1 Воста же диавол на Израиля и подусти Давида, да сочислит Израиля. 2 И рече царь Давид ко Иоаву и к началником силы: идите и сочтите Израиля от Вирсавеи даже до Дана, и принесите ко мне, да познаю число их. 3 И рече Иоав: да приложит Господь к людем Своим, якоже сии сторицею, и очи господина моего царя да видят: не вси ли господину моему царю раби суть? И почто хощет сего господин мой? Дабы не вменилося в грех Израилю. 4 Но слово царево преможе Иоава: и пойде Иоав, и обыде всего Израиля, и прииде во Иерусалим. 5 И даде Иоав Давиду число сочтения людий: и обретеся всего Израиля тысяща тысящ и сто тысящ мужей и носящих оружия: и от сынов Иудиных четыре ста и седмьдесят тысящ мужей носящих оружие: 6 Левии же и Вениамина не сочте среде их, понеже вознегодова о словеси цареве Иоав. 7 И не угодно явися пред Богом повеление сие, и порази Израиля. 8 Рече же Давид ко Богу: согреших зело, яко сотворих вещь сию: и ныне молю, отими беззаконие раба Твоего, яко обезумихся зело. 9 И рече Господь ко Гаду пророку Давидову, глаголя: 10 иди и рцы к Давиду, глаголя: тако глаголет Господь: трие Аз наведу на тя, избери себе едино от них, и сотворю тебе. 11 И прииде Гад к Давиду и рече ему: 12 сице глаголет Господь: избери себе, (еже хощеши,) или три лета глада, или три месяцы бегати тебе от лица враг твоих, и оружие враг твоих постигнет тя, или три дни мечь Господень, и смерть на землю, и Ангел Господень убиваяй во всем наследии Израилеве: ныне убо разсмотри, что отвещаю Пославшему мя со словом. 13 И рече Давид ко Гаду: тесна ми суть три сия зело: но лучше ми есть впасти в руце Господни, зане многи щедроты Его зело, в руки же человеческия да не впаду. 14 И посла Господь смерть во Израиля, и падоша от Израиля седмьдесят тысящ мужей. 15 И посла Бог Ангела во Иерусалим, да избиет его. И егда избиваше, виде Господь и раскаяся о зле, и рече Ангелу избивающему: довлеет ти, отими руку твою. Ангел же Господень стояше на гумне Орны Иевусеанина. 16 И возведе Давид очи своя, и виде Ангела Господня стояща между землею и небом, и мечь его извлечен в руку его, простерт на Иерусалим. И паде Давид и старейшины (Израилевы) облеченнии во вретище на лице свое, 17 и рече Давид к Богу: не аз ли повелех сочислити люди? Аз есмь, иже согреших, и зло творя зло сотворих, сия же овцы что сотвориша? Господи Боже мой, да будет рука Твоя на мне и на дому отца моего, а не на людех Твоих в погубление, Господи. 18 Ангел же Господень рече Гаду, еже глаголати к Давиду: да взыдет и созиждет олтарь Господу Богу на гумне Орны Иевусеанина. 19 И взыде Давид по словеси Гадову, еже глагола именем Господним. 20 И обратися Орна и виде царя, и четыри сынове его с ним крыющиися. Орна же бе (в то время) млатя на гумне пшеницу. 21 И прииде Давид ко Орне, и обратися Орна, и узре Давида, и пойде от гумна, и поклонися Давиду лицем на землю. 22 Рече же Орне Давид: даждь мне место гумна твоего, да созижду на нем олтарь Господеви, на сребре достойне даждь ми е, и престанет язва от людий. 23 Рече же Орна к Давиду: возми себе, и да сотворит господин мой царь, еже угодно пред ним: се, даю телцы на всесожжение, и плуг на дрова, и пшеницу в жертву, вся (добровольно) даю. 24 И рече царь Давид Орне: ни, но куплею куплю, сребром достойным, понеже не возму Господеви, яже суть твоя, еже вознести всесожжение туне Господеви. 25 И даде Давид Орне за место то сикль златых весом шесть сот. 26 И созда ту Давид олтарь Господеви, и вознесе всесожжения и спасителная и воззва ко Господу, и услыша его во огни от небесе на олтарь всесожжения, и потреби всесожжение. 27 И рече Господь ко Ангелу: и вложи мечь во влагалище его. 28 Во время оно, егда виде Давид, яко услыша его Господь на гумне Орны Иевусеанина, и пожре ту жертвы. 29 И скиния Господня, юже сотвори Моисей в пустыни, и олтарь всесожжения во время оно бысть в вышнем, еже в Гаваоне. 30 И не возможе Давид ити пред него, еже вопросити Бога, понеже устрашен бысть от лица меча Ангела Господня. === 22 === 1 Рече же Давид: се есть дом Господа Бога, и сей олтарь на всесожжения Израилю. 2 И рече Давид собрати вся пришелцы, иже на земли Израилеве, и постави каменосечцев сещи камения тесаная, да созиждется дом Божий. 3 Железо же много на гвозди дверем и вратом на спаяние уготова Давид, и меди множеству не бе числа: 4 и древам кедровым не бе числа: яко принесоша Сидоняне и Тиряне древ кедровых множество Давиду. 5 И рече Давид: Соломон сын мой детищь млад, дом же еже созидати Господеви в величество высоко, во имя и в славу во всю землю, уготовлю ему. И уготова Давид (всего) множество прежде скончания своего. 6 И призва Давид Соломона сына своего и заповеда ему, да созиждет дом Господу Богу Израилеву. 7 Рече же Давид к Соломону: чадо, мне бяше в сердцы, да созижду дом имени Господа Бога моего: 8 и бысть слово Господне ко мне, глаголющее: многи крови пролиял еси и многи брани сотворил еси, не созиждеши дому имени Моему, яко многи крови пролиял еси на землю предо Мною: 9 се, сын родится тебе, сей будет муж покоя, и упокою его от всех враг его окрест, зане Соломон имя ему, и мир и покой дам ему над Израилем во дни его: 10 той созиждет дом имени Моему, и той будет Мне в сына, и Аз буду ему во отца: и исправлю престол царства его во Израили до века: 11 ныне убо, сыне мой, будет Господь с тобою и благопоспешит, и созиждеши дом Господу Богу твоему, якоже глагола о тебе: 12 да даст же тебе премудрость и разум Господь и да укрепит тя над Израилем, еже хранити и творити закон Господа Бога твоего: 13 тогда благопоспешит, аще сохраниши творити заповеди и судбы, яже повеле Господь Моисеови, (да учит) Израиля: мужайся и крепися, не бойся, ниже устрашися: 14 и се, аз по убожеству моему уготовах на дом Господень злата талантов сто тысящ, и сребра тысяща тысящ талантов, медь же и железо, емуже несть веса, понеже множество есть, и древа и камения уготовах, и к сим да приложиши: 15 и с тобою Господь, и приложиши ко множеству творящих дела, художницы, и строителие камений, и древоделе, и всяк мудрец во всяцем деле, 16 в злате и сребре, в меди и железе несть числа: востани убо и твори, и Господь с тобою. 17 И повеле Давид всем началником Израилевым, да помогают Соломону сыну его, глаголя: 18 не Господь ли с вами? И даде вам покой окрест, зане даде в руки вашя живущих на земли, и покорена земля пред Господем и пред людьми Его: 19 ныне убо дадите сердца ваша и душы вашя еже взыскати Господа Бога вашего, и востаните и созидайте святыню Господу Богу вашему, да внесется кивот завета Господня и сосуды святыя Богови в дом созидаемый имени Господню. === 23 === 1 И Давид стар и исполнен дний, и воцари Соломона сына своего вместо себе над Израилем: 2 и собра всех князей Израилевых, и священников, и левитов: 3 сочтени же быша левити, от тридесяти лет и вышше, и бысть число их по главам их, мужей тридесять и осмь тысящ: 4 от сих избрани на дела дому Господня двадесять четыри тысящы, и книгочей и судий шесть тысящ, 5 и четыри тысящы дверников, и четыри тысящы поющих Господеви во органы, ихже сотвори ко хвалению Господню. 6 И раздели их Давид на чреды сыном Левииным, Гирсону, Каафу и Мераре: 7 и Гирсону и Леадану и Семею. 8 Сынове Леадани: началник Иеиил и Зефоф и Иоиль, трие. 9 Сынове же Семеовы: Саломиф и Азаил и Арам, трие: сии началницы отечеств Леаданих. 10 И сыном Семеовым Иеф и Зизай, и Иоас и Вериа: тии сынове Семеовы четыре. 11 Бе же Иеф первый и Зизай вторый: Иоас же и Вариа не иместа многих сынов и быста в дому отечества в причтение едино. 12 Сынове Каафовы: Амврам и Иссаар, Хеврон, Озиил, четыри. 13 Сынове Амврамли: Аарон и Моисей: отлучен же бысть Аарон еже освящати Святая Святых, той и сынове его во веки, и да кадит фимиамом пред Господем, служит Ему и молится во имя Его до века. 14 Моисей же человек Божий и сынове его причтени суть в колено Левиино. 15 Сынове Моисеовы: Гирсам и Елиезер. 16 Сынове Гирсамли, Суваил началник. 17 Быша же сынове Елиезеру, Равиа началник: и не беша Елиезеру сынове инии: сынове же Равиини умножени суть зело. 18 Сынове Иссааровы, Саллумоф началник. 19 Сынове Хеврони: Иериав первый, Амариа вторый, Иазиил третий Иезекиа четвертый. 20 Сынове же Озиили: Миха первый, и Иессиа вторый. 21 Сынове Мерарины: Мооли и Муси. 22 Сынове моолиевы: Елеазар и Кис. Умре же Елеазар, и не быша ему сынове, но токмо дщери: и пояша их сынове Кисовы братия их. 23 Сынове Мусиины: Мооли и Едер и Иаримоф, трие. 24 Сии сынове Левиини по домом отечеств их, началницы отечеств их, по согляданию их, по числу имен их, по главам их, иже творяху дела служения дому Господня, от двадесяти лет и вышше. 25 Рече бо Давид: покой даде Господь Бог людем Своим Израилю, и вселися во Иерусалиме даже да века, 26 и левити не быша носяще скинию и вся сосуды ея к служению ея. 27 По повелению бо Давидову последнему есть число сыновом Левииным от двадесяти лет и вышше: 28 зане постави их под руку сыном Аароним, еже служити в дому Господни во дворех и в притворех, и во очищении всех святынь, и в делех служения дому Божия, 29 и над хлебами предложения, и над мукою пшеничною жертвы, и над пряжмами опресночными, и над сковрадою, и над печеным, и над всяким весом и мерою, 30 и еже стояти, утро хвалити и исповедатися Господеви, такожде и к вечеру, 31 и над всеми возносимыми всесожжении Господеви в субботы, и в новомесячиих, и в праздницех, по числу, по чину их выну Господеви, 32 и да сохранят стражбы скинии свидения, и стражу святилища, и стражбы сынов Аароних братий своих, да служат в дому Господни. === 24 === 1 И сыном Аароним разделения: сынове Аарони: Надав и Авиуд, и Елеазар и Ифамар. 2 И умроста Надав и Авиуд прежде отца своего, и сынове не быша има: и священствова Елеазар и Ифамар, сынове Аарони. 3 И раздели их Давид, и Садок от сынов Елеазаровых, Ахимелех же от сынов Ифамаровых по сочислению их, по служению их и по домом отечеств их. 4 И обретошася сынове Елеазаровы множайшии в началники сил, нежели сынове Ифамаровы: и раздели их сыном Елеазаровым в началники в домы отечеств шестьнадесять, и сыном Ифамаровым по домом отечеств их, осмь. 5 Раздели же их по жребием между ими, понеже бяху началницы святилища и началницы Божии в сынех Елеазаровых и в сынех Ифамаровых: 6 описа же их Самаиа сын Нафанаиль писарь от левит пред царем и князи и Садоком священником и Ахимелехом сыном Авиафара, и началницы отечеств священников и левитов дому отечества, един ко Елеазару и един ко Ифамару. 7 И изыде жребий первый Иоариму, Иедию вторый, 8 Хариву третий, Сеориму четвертый, 9 Мелхию пятый, Меиамину шестый, 10 Аккосу седмый, Авии осмый, 11 Иисую девятый, Сехении десятый, 12 Елиасиву единонадесятый, Иакиму дванадесятый, 13 Оффаю тринадесятый, Иесваалу четыренадесятый, 14 Велгии пятыйнадесять, Еммиру шестыйнадесять, 15 Иефию седмыйнадесять, Афессию осмыйнадесять, 16 Феттию девятыйнадесять, и Езекиилю двадесятый, 17 Ахину двадесять первый, Гамуилу двадесять вторый, 18 Далеию двадесять третий, Иеилю двадесять четвертый. 19 Сие сочисление их по служению их входити в дом Господень по чину своему, рукою Аарона отца их, якоже повеле Господь Бог Израилев. 20 И сыном Левииным прочиим: сыном Амврамлим Соваил, сыном Соваилим Иадаиа, 21 сыном Равииным началник Иесиа, 22 сыном Иасарииным Саломоф, сыном Саломофовым Иаф: 23 сынове Иедиуа: Иериав первый, Амадиа вторый, Иазиил третий, Иекмоам четвертый. 24 Сыном Озиилим Миха, сынове Михины Самир: 25 брат Михин Исиа, сын Исиин Захариа. 26 Сынове Мерарины: Мооли и Муси, сын Озиин Вонний: 27 сынове Мерарины Озиа: сынове его Иесома и Закхур и Иовфи: 28 Моолию Елеазар (и Ифамар). Умре же Елеазар, не беша ему сынове. 29 Кису сын Кисов Иерамеил. 30 Сынове Мусины: Мооли и Едер и Еримоф. Сии сынове левитстии по домом отечеств своих. 31 Прияша же и тии жребия, якоже и братия их сынове Аарони, пред Давидом царем и Садоком и Ахимелехом и началники отечеств священнических и левитских: патриарси Аарони, якоже и братия его юнейшии. === 25 === 1 И постави Давид царь и князи силы над делы сыны Асафовы и Емани и Идифумовы, иже провещаваху в гуслех и псалтирех и кимвалех, и бысть число их по главам мужей творящих дела своя. 2 Сынове Асафовы: Закхур и Иосиф, и Нафаниа и Асиил: сынове Асафовы держащеся Асафа пророка близ царя. 3 Идифуму сынове Идифумли: Годолиа и Сури, и Исеа и Семей, и Асавиа и Маттафиа, шесть по отце своем Идифуме в гусли бряцающе исповедание и хваление Господеви. 4 Еману сынове Емани: Вукиа и Мафаниа, и Озиил и Суваил, и Иеримуф и Ананиа, и Анан и Елиафа, и Годоллафий и Ромамфиезер, и Савах и Маллифий, а Офир и Мазиоф. 5 Вси сии сынове Емана бряцающаго царю в словесех Божиих, да вознесется рог. Даде же Бог Еману сынов четыренадесять и три дщери: 6 вси сии со отцем своим воспевающе в дому Божии в кимвалех и во псалтирех и гуслех, в служение дому Божия близ царя, и Асаф и Идифум, и Еман. 7 Бысть же число их со братиею их научени пению Господню и всех разумеющих (пения) двести осмьдесят и осмь. 8 Вергоша же и сии жребия чреды дневныя, по малу и по велику совершенных и учащихся. 9 И изыде жребий первый сынов его и братии его Асафу Иосифову, Годолиа: вторый иниа, сынове его и братия его дванадесять: 10 третий Закхур, сынове его и братия его дванадесять: 11 четвертый Иезрий, сынове его и братия его дванадесять: 12 пятый Нафан, сынове его и братия его дванадесять: 13 шестый Вукиа, сынове его и братия его дванадесять: 14 седмый Иериил, сынове его и братии его дванадесять: 15 осмый Иосиа, сынове его и братия его дванадесять, 16 девятый Матфаниа, сынове его и братии его дванадесять: 17 десятый Семеиа, сынове его и братия его дванадесять: 18 первыйнадесять Езриил, сынове его и братия его дванадесять: 19 вторыйнадесять Асавиа, сынове его и братия его дванадесять: 20 третийнадесять Суваил, сынове его и братии его дванадесять: 21 четвертыйнадесять Матфафиа, сынове его и братии его дванадесять: 22 пятыйнадесять Иеримуф, сынове его и братия его дванадесять: 23 шестыйнадесять Ананиа, сынове его и братия его дванадесять: 24 седмыйнадесять Иесвак, сынове его и братия его дванадесять: 25 осмыйнадесять Ананиа, сынове его и братия его дванадесять: 26 девятыйнадесять Меллифий, сынове его и братия его дванадесять: 27 двадесятый Елиафа, сынове его и братия его дванадесять: 28 двадесять первый Иефир, сынове его и братия его дванадесять: 29 двадесять вторый Годоллафий, сынове его и братия его дванадесять: 30 двадесять третий Меазоф, сынове его и братия его дванадесять: 31 двадесять четвертый Рометфиезер, сынове его и братия его дванадесять. === 26 === 1 Разделение же дверников: сынове Кореовы, Моселлемиа сын Кореов от сынов Асафовых. 2 Сынове же Моселлемии: Захариа первенец и Иадиил вторый, Завадиа третий и Иафанаил четвертый, 3 Олам пятый, Ионафан шестый, Елионай седмый, Авдедом осмый. 4 Авдедому же сынове: Самиа первенец, Иозаваф вторый, Иоаф третий, Сахар четвертый, Рофануил пятый, 5 Амиил шестый, Иссахар седмый, Фелафий осмый, яко благослови его Бог. 6 Семею же сыну его рождени суть сынове первенца началницы в дому отечестем его, бяху бо сильни. 7 Сынове Семеиевы: Офни и Рафаил, и Овид и Елзавад и Ахиа, сынове сильни, Елиу и Савахиа и Исваком. 8 Вси тии от сынов Авдедомлих, сии и сынове их и братия их труждающеся крепко в делании, вси шестьдесят два Авдедому. 9 Моселлемию же сынове и братия осмьнадесять, сильнии. 10 Осе же от сынов Мерариных сынове Стрегущии начало, понеже не бысть ему первенец: и постави его отец его в началника разделения втораго: 11 Хелкиа вторый, Тавелиа третий, Захариа четвертый: вси сии сынове и братия Осины тринадесять. 12 Сии разделени суть в дверницы, да началствуют над сильными чреды, якоже и братия их служити в дому Господни. 13 И метнуша жребия на коегождо мала и велика по домом отечеств своих на каяждо врата: 14 и паде жребий сущих на востоки Селемию и Захарии. Сынове соазовы мелхии метнуша жребия, и паде жребий к северу. 15 Авдедому к югу прямо дому Есефима. 16 Во второе Осе к западу по вратех притвора восхождения, стража противу стражи. 17 Ко востоку по шести на день: к северу четыре на день: к полудни на день четыре: и к дому совета по два пременяющеся. 18 И Осе к западу по вратех притвора три, стражба противу стражбы восхождения к востоком, по шести на день, и на север по четыре, и к югу четыре, и к дому совета два пременяющеся, и к западу четыре, и к стези два пременяющеся. 19 Сия разделения дверником сыном Кореовым и сыном Мерариным. 20 Левити же братия их (беша) над сокровищи дому Господня и над сокровищи святынь. 21 Сынове Ладановы, сии сынове Герсони: Ладану началницы отечеств Ладаних, Герсону Иеиил. 22 Сынове Иеиили Земеф и Иоиль братия над сокровищи дому Господня, 23 Амвраму и Иссаару, Хеврону и Озиилу. 24 Суваил же сын Гирсама сына Моисеова настоятель над сокровищи. 25 Брату же его Елиезеру Равиа сын его, и Иосиа и Иорам, и Зехрий и Саломоф. 26 Той Саломоф и братия его над всеми сокровищи святыми, ихже освяти Давид царь и началницы отечеств, тысящницы и сотницы и вождеве силы, 27 яже взя из градов и от корыстей, и освяти я на пособление зданию дому Господня. 28 И над всеми, яже освяти Богу Самуил пророк и Саул сын Кисов, и Авенир сын Ниров и Иоав сын Саруиев, все еже освятиша рукою Саломофовою и братии его. 29 Иссаарию Хонениа и сынове его делания внешняго над Израилем, к наказанию и суждению. 30 Хеврону Асавиа и братия его сынове сильнии, тысяща и седмь сот над созиранием Израиля за Иорданом противу запада, на всякую службу Господню и на делание царево. 31 Хеврону Уриа началник Хевронитов по родом их, по отечеством, в четыредесятое лето царства Давидова сочтени суть, и обретени мужие сильни в них во Иазире Галаадитстем. 32 И братия его сынове сильнии, две тысящы седмь сот, началницы отечеств, и постави их Давид царь над Рувимом и Гадом и над половиною колена Манассиина, во всякое повеление Господне и слово царево. === 27 === 1 Сынове же Израилевы но числу своему, началницы отечеств, тысящницы и сотницы и книгочии служащии царю, и на всякое слово царево по разделением, и на всякое слово входящаго и исходящаго, месяц от месяца, во вся месяцы лета разделение едино, двадесять четыре тысящы. 2 И над первым разделением в первый месяц бысть Извоаз сын Завдиилов, в разделении его двадесять четыре тысящы: 3 от сынов Фаресовых, началник всем князем воинства месяца перваго. 4 И над разделением месяца втораго Додай Екхотский и над разделением его, и Макеллоф вождь, и в разделении его двадесять четыре тысящи, князи силы. 5 Третий месяца третияго Ванеа сын Иодаев, иже священник началный, и в разделении его двадесять четыре тысящы: 6 сей Ванеа крепчайший между тридесятми, и над тридесятми: и над разделением его Завад сын его. 7 Четвертый месяца четвертаго Асаил брат Иоавль, и Завадиа сын его и братия, и в полце его двадесять четыре тысящы. 8 Пятый пятаго месяца началник Самаоф сын Иезраев, и в полце его двадесять и четыре тысящы. 9 Шестый месяца шестаго Одуиа сын Еккисов Фекуитянин, и в полце его двадесять и четыре тысящы. 10 Седмый месяца седмаго Хеллис иже от Фалуса, от сынов Ефремлих, и в полце его двадесять и четыре тысящы. 11 Осмый месяца осмаго Совохай Усафитянин, от колена Зараина, и в полце его двадесять и четыре тысящы. 12 Девятый месяца девятаго Авиезер, иже от Анафофа, от земли Вениамини, и в полце его двадесять и четыре тысящы. 13 Десятый месяца десятаго Меирай, иже от Нетофафита, от колена Зараина, и в полце его двадесять и четыре тысящы. 14 Первыйнадесять месяца первагонадесять Ванаиа, иже от Фарафона, от сынов Ефремлих и в полце его двадесять и четыре тысящы. 15 Вторыйнадесять месяца вторагонадесять Холдиа, иже от Нетофафита, от колена Гофониилева, и в полце его двадесять и четыре тысящы. 16 И над племены Израилевыми, Рувиму вождь Елиезер, сын Зехриев: Симеону Сафатиа, сын Мааха: 17 Левию Асавиа, сын Камуилев: Аарону Садок: 18 Иуде Елиав от братий Давидовых: Иссахару Амри, сын Михаилов: 19 Завулону Самаиа, сын Авдиев: Неффалиму Иеримоф, сын Озииль: 20 Ефрему Осий, сын Озазиев: полуплемени Манассиину Иоиль, сын Фадеев: 21 полуплемени Манассиину сущему в земли Галаадстей Иаддай сын Завадиин: сыном Вениаминим Иасиил, сын Авениров: 22 Дану Азариил, сын Иорамов. Сии быша началницы племеном Израилевым. 23 Не хоте же Давид счести их от двадесятилетнаго и нижае: зане рече Господь умножити Израиля, яко звезды небесныя. 24 Иоав же сын Саруиев нача сочитати люди, и не соверши: сего ради бысть гнев Божий на Израиля: и не внесеся сочисление в книгу словес царя Давида. 25 Над сокровищи же царскими бысть Асмоф сын Одиилев: и над сокровищи, иже на нивах и в селех, и в весех и в столпех, Ионафан сын Озиев: 26 и над земледелатели землю делающими Ездрай сын Хелувов: 27 и над селы Семей Армафейский: и над сокровищами виноградными Замвдиа сын Сефамиев: 28 над маслинами же и над черничием, иже бяху на полях, Валанан Гедоритянин: над сокровищи елеа Иоас: 29 над скоты же, иже пасяхуся в Сароне, Сатрай Саронитянин: и над волы, иже во юдолех, Софат сын Адаин: 30 над велблюды же Увиа Исмаилтянин: над ослы же Иадиа, иже от Марафона: 31 и над овцами Иоас Агаритин. Вси тии началницы имений Давида царя. 32 Ионафан же дядя Давидов (бысть) советник, муж мудр и книжен сый: и Иеиль сын Ахаманиев бе с сынами царевыми. 33 Ахитофел советник царев, и Хусиа первейший друг царев, 34 и по (нем) Ахитофеле бысть (близ)) Иодай сын Ванеин и Авиафар: и Иоав началный воевода царев. === 28 === 1 Собра же Давид вся началники Израилевы, началники судий и колен, и вся началники полков, почредно стрегущих царя, и началники тысящей и сотней, и стражы сокровищ, и сущыя над имениями своими и над всем стяжанием царевым, и сынов своих со евнухами, и сильныя и храбрыя воинства во Иерусалим. 2 И воста Давид царь посреде собрания и рече: слышите мя, братия моя и людие мои: бысть мне на сердцы создати дом упокоения кивоту завета Господня и подножие ног Господа (Бога) нашего, и уготовах на созидание потребная: 3 Бог же рече: не созиждеши мне дому еже именовати имя Мое в нем, зане человек воин еси ты и крови пролиял еси: 4 и избра Господь Бог Израилев мене от всего дому отца моего, да буду царь над Израилем во веки, и во Иуде избра царство, и от дому Иудина дом отца моего: и от сынов отца моего во мне благоволи, еже быти ми царю над всем Израилем: 5 от сынов же моих всех, сыны бо мне многи даде Господь, избра Соломона сына моего, да седит на престоле царства Господня, над Израилем: 6 и рече мне Бог: Соломон сын твой созиждет дом Мой и двор Мой, зане того избрах Мне в сына быти, и Аз буду ему во Отца 7 и укреплю царство его даже до века, аще укрепится хранити заповеди Моя и судбы Моя, якоже и днесь: 8 ныне убо пред лицем всего собрания Господня и во ушы Бога нашего, храните и взыщите вся заповеди Господа Бога нашего, да наследите землю благу и оставите в наследие сыном вашым по вас даже до века: 9 и ныне, Соломоне, сыне мой, да знаеши Бога отец твоих и служи Ему сердцем совершенным и душевною волею, вся бо сердца испытует Господь и всяко помышление разумеет: аще взыщеши Его, обрящеттися: аще же оставиши Его, оставит тя в конец: 10 ныне убо виждь, яко избра тя Господь, да созиждеши ему дом во освящение, крепися и соверши. 11 Даде же Давид Соломону сыну своему начертание храма и домов его, и камар его, и горниц, и полагалищ внутренних, и дому очищения, 12 и подобие, еже помысли духом своим, дворов дому Господня, и всех камар окрест в сокровищих дому Господня, и влагалищ святынь, 13 и виталищ, и дневных чред иерейских и левитских, во вся дела служения дому Господня, и влагалищ служебных сосудов службы дому Господня: 14 и меру веса их златых и сребряных, 15 светилников вес даде ему и свещников. 16 Даде ему подобне вес трапезы предложения, кияждо трапезы златыя, такожде и сребряных, 17 и удиц, и возлиялниц, и фиал златых, и вес златых и сребряных, и кадилниц златых, коегождо веса: 18 и жертвенника фимиамов от злата чиста вес оказа ему, и подобие колесницы херувимов простирающих крила и осеняющих над кивотом завета Господня. 19 Вся писанная рукою Господнею даде Давид Соломону, по сущему в нем разуму дела изображения. 20 И рече Давид Соломону сыну своему: укрепляйся и мужайся и твори: не бойся, ниже страшися, зане Господь Бог мой с тобою, не отступит от тебе, ниже оставит тя, дондеже совершиши ты все дело служения дому Господня: и се, подобие храма и дому Его, и камар Его, и горниц, и полагалищ внутренних, и дому очищения, и подобие дому Господня: 21 и се, дневныя чреды иереев и левитов во всяко служение Дому Господня, и с тобою во всяцем действе, и всяк усердный в мудрости во всяцем художестве, и князи, и вси людие во вся словеса твоя. === 29 === 1 И рече Давид царь ко всему собранию: Соломон сын мой, егоже избра себе Господь, юн и млад, а дело велико, занеже не человеку уготовится здание, но Господу Богу: 2 всею силою уготовах на дом Бога моего злато, сребро, медь, железо, древа, камение мраморное, и множество камений многоценных и различных, и всякое честное камение, и камений парийских много: 3 и еще внегда благоволити ми в дому Бога моего, есть у мене еже приготовах злато и сребро, и се, дах в дом Бога моего, в высоту, кроме оных, яже уготовах на дом святых: 4 три тысящи талант злата Суфирска и седмь тысящ талант сребра искушена к позлащению стен святилища, 5 идеже дело златое златом, а идеже сребряное сребром, и на всякое дело рукою художников: и кто благоволяй исполнити руку свою днесь Господу? 6 И обещаша усердно началницы отечеств и князи сынов Израилевых, и тысящницы и сотницы, и началницы дел и икономы царевы, 7 и даша на дела дому Господня злата талант пять тысящ, и златник десять тысящ, и сребра талант десять тысящ, и меди талант осмьнадесять тысящ, железа же сто тысящ талант: 8 и у нихже обретеся камение, даша во влагалище дому Господня, под руку Иеииля Герсонина. 9 И возвеселишася людие о усерднем подаянии, понеже всем сердцем приношаху Господу, и Давид царь возвеселися зело: 10 и благослови царь Давид Господа пред всем множеством, глаголя: благословен еси, Господи Боже Израилев, Отец наш, от века и до века: 11 Тебе, Господи, величество, и сила, и слава, и одоление, и исповедание, и крепость, яко Ты всеми, иже на небеси и на земли, владычествуеши: от лица Твоего трепещет всяк царь и язык: и Тебе, Господи, царство и великолепие во всех и во всяцем начале: 12 от Тебе богатство и слава, Ты над всеми началствуеши, Господи, начало всякаго начала, и в руку Твоею крепость и власть, и в руку Твоею милость, Вседержителю, возвеличити и укрепити вся: 13 и ныне, Господи, исповедаемся Тебе и хвалим имя хваления Твоего: 14 и кто аз есмь, и кто людие мои, яко возмогохом сия Тебе благовольне обещати? Твоя бо суть вся, и от твоих дахом Тебе: 15 пришелцы бо есмы пред Тобою и преселницы, якоже вси отцы наши: дние наши яко сень на земли, и несть постояния: 16 Господи Боже наш, ко всему множеству сему, еже уготовах, да созиждется дом имени святому Твоему, от руку Твоею суть, и Тебе вся: 17 и вем, Господи мой, яко Ты еси испытуяй сердца, и правду любиши: в простоте сердца моего произволих сия вся, и ныне людий Твоих, иже зде обретошася, видех с радостию Тебе произволивших (принести дары): 18 Господи Боже Авраама и Исаака и Израиля отец наших, сохрани сия в воли сердца людий Твоих во веки, и исправи сердца их к Тебе: 19 Соломону же сыну моему даждь сердце благо, да хранит заповеди Твоя и свидения Твоя и повеления Твоя, и к совершению привести здание дому Твоего. 20 И рече Давид всему собранию (людий): благословите Господа Бога нашего. И благословиша все собрание Господа Бога отец своих: и преклонше колена поклонишася Господу и царю. 21 И пожре Давид жертвы Господу, и вознесе всесожжения Богу на утрие перваго дне, телец тысящу, овнов тысящу, агнец тысящу, и возлияния их, и жертвы множество от всего Израиля. 22 И ядоша и пиша пред Господем в день той с великим веселием: и поставиша царем второе Соломона сына Давидова, и помазаша его Господу в царя, и Садока же во архиереа. 23 И седе Соломон на престоле Господни в царя, вместо Давида отца своего, и благоугоден бысть: и покорися ему весь Израиль. 24 Князи и сильнии и вси сынове царя Давида отца его повинушася ему. 25 И возвеличи Господь Соломона над всем Израилем и даде ему славу царства, еяже ни един царь име прежде его. 26 И Давид сын Иессеев царствова над всем Израилем четыредесять лет, 27 в Хевроне седмь лет, а во Иерусалиме лет тридесять три, 28 и умре в старости блазе, исполнь дний, в богатстве и славе, и воцарися Соломон сын его вместо его. 29 Прочая же словеса царя Давида первая и последняя написана суть в словесех Самуила видящаго и в словесех Нафана пророка и в словесех Гада провидящаго, 30 о всем царстве его и крепости его, и времена яже быша при нем и во Израили и во всех царствах земных. == Вторая книга Паралипоменон == === 1 === 1 И укрепися Соломон сын Давидов на царстве своем, и Господь Бог его (бе) с ним и возвеличи его в высоту. 2 И рече Соломон ко всему Израилю, тысящником и сотником, и судиям и всем началником пред Израилем. 3 И иде Соломон и все множество в вышний Гаваон, идеже бе скиния свидения Божия, юже сотвори Моисей раб Божий в пустыни. 4 Кивот же Господень принесе Давид от Града Кариафиарима на место, еже уготова ему Давид, яко водрузи ему скинию во Иерусалиме. 5 И олтарь медян, егоже содела Веселеил сын Урии сына Орова, ту бе пред скиниею Господнею и взыска его Соломон и вся церковь. 6 Вознесе же ту Соломон на олтари медянем пред Господем, иже в скинии свидения, и принесе на нем тысящу всесожжений. 7 В ту нощь явися Господь Соломону и рече ему: проси (что хощеши) да дам тебе. 8 Рече же Соломон к Богу: Ты сотворил еси с Давидом отцем моим милосердие велико и поставил мя еси царя вместо его: 9 и ныне, Господи Боже, да исполнится слово Твое к Давиду отцу моему, Ты бо мене сотворил царя над людьми многими, якоже прах земный: 10 ныне даждь мне премудрость и разум, да вниду и изыду пред людьми твоими сими, кто бо может судити сих людий Твоих многих? 11 И рече Бог к Соломону: понеже бысть сие в сердцы твоем, и не попросил еси богатства имений, ниже славы, ниже душ противящихся тебе, и дний многих не просил еси, но просил еси себе премудрости и разума, да судити можеши люди Моя, над нимиже поставих тя царя, 12 премудрость и разум даю тебе, богатство же и имения и славу дам тебе, яко не бысть в царех преждебывших тебе подобен тебе, и по тебе такожде не будет. 13 Прииде же Соломон от вышняго Гаваона во Иерусалим пред скинию свидения и царствова над Израилем. 14 И собра Соломон колесницы и конники, и быша ему тысяща и четыреста колесниц и дванадесять тысящ конник: и остави их во градех колесничных, людие же с царем во Иерусалиме. 15 И положи царь сребро и злато во Иерусалиме яко камение, кедры же во Иудеи яко черничие, еже на поли во множестве. 16 Исхождение же коней Соломоновых из Египта ценою купцов царских, иже хождаху и куповаху. 17 И восхождаху и привождаху из Египта колесницу едину за шесть сот сребреник, и коня за сто и пятьдесят сребреник: такожде и от всех царств Хеттейских и от царей Сирийских рукама их приводима бываху. === 2 === 1 И повеле Соломон созидати дом имени Господню и дом царству своему. 2 И собра царь Соломон седмьдесят тысящ мужей носящих времена и осмьдесят тысящах каменосечцев в горах, приставленных же над ними три тысящы и шесть сот. 3 И посла Соломон к Хираму царю Тирску, глаголя: якоже сотворил еси с Давидом отцем моим и послал еси ему кедры, да созиждет себе дом, в немже ему обитати, 4 и се, аз сын его созидаю дом имени Господа Бога моего, да освяшу его Ему, еже кадити пред Ним фимиам ароматов и предложение всегда, и возносити всесожжения выну, утро и к вечеру, и в субботы, и в новомесячиих, и в праздницех Господа Бога нашего: во век сие бо Израили: 5 и дом, егоже аз созидаю, велик, велик бо есть Господь Бог наш паче всех богов, 6 и кто возможет создати Ему дом? Аще бо небо и небо небесе не могут вместити славы Его: и кто аз, созидаяй Ему дом? Но токмо еже кадити фимиам пред Ним: 7 ныне убо посли мне мужа мудра, иже весть дела творити в злате и сребре, и меди и железе, и порфире и в червлени и в синете, и иже знает ваяти ваяние, с мудрыми, иже у мене во Иудеи и во Иерусалиме, яже уготова Давид отец мой: 8 и посли ми древа кедрова и аркевфова и певгова от Ливана, вем бо аз, яко раби твои умеют сещи древа от Ливана: 9 и се, раби твои с рабы моими пойдут, да уготовают мне древа многа, дом бо, егоже аз созидаю, велик и преславен: 10 и се, делателем, иже секут древа, дах в пищу рабом твоим пшеницы мер двадесять тысящ и ячменя мер двадесять тысящ, и вина мер двадесять тысящ и елеа мер двадесять тысящ. 11 Рече же Хирам царь Тирский чрез писание и посла к Соломону, глаголя: понеже возлюби Господь люди Своя, постави тя над ними царя. 12 И рече Хирам: благословен Господь Бог Израилев, иже сотвори небо и землю, иже даде Давиду царю сына премудра и учена, и умна и разумна, иже созиждет дом Господу и дом царству своему: 13 и ныне послах тебе мужа мудра и сведуща разум, Хирама раба моего: 14 матерь его от дщерей Дановых, отец же его муж Тирянин, иже весть делати в злате и сребре, и в меди и в железе, и в камениих и в древах, и ткати в порфире и в синете и в виссоне и в червленице, и ваяти всякую резь, и разумети всяко разумение, елика аще даси ему, с мудрыми твоими и с мудрыми господина моего Давида, отца твоего: 15 и ныне пшеницу и ячмень, и елей и вино, яже обещал еси, господине мой, посли рабом твоим, 16 мы же будем сещи древа от Ливана на всяку потребу твою и послем я плотами по морю Иоппийскому, ты же приведеши я во Иерусалим. 17 И собра Соломон всех мужей пришелцев, иже бяху в земли Израилеве, по сочтению, имже сочте их Давид отец его, и обретени суть сто пятьдесят три тысящы и шесть сот: 18 сотвори же от них седмьдесят тысящ бременоносцев и осмьдесят тысящ каменосечцев, три тысящы и шесть сот приставники над делами людскими. === 3 === 1 И нача Соломон созидати дом Господень во Иерусалиме, на горе Амориа, на месте, еже уготова Давид на гумне Орны Иевусеанина: 2 нача же созидати в месяц вторый лета четвертаго царства своего. 3 И сице нача Соломон созидати дом Божий: в долготу лакот, размер первый, лакот шестьдесят, в широту же лакот двадесять: 4 и притвор пред лицем дому, долгота по лицу широты дому, лакот двадесять, высота же лакот сто двадесять и позлати его внутрь златом чистым. 5 Дом же великий окры дсками кедровыми и позлати златом чистым: извая же на нем подобия фиников и яко мрежицы промежь себе сплетающяся, 6 и украси храм камением драгим славно, и позлати златом, еже от Фаруима . 7 И позлати дом и стены его, и врата и праги, и окна и двери златом, и извая херувимы на стенах. 8 Сотвори же дом Святая Святых, долгота его по лицу широты дому, лакот двадесять, широта такожде двадесять лакот, и позлати и златом чистым на херувимех, талант шесть сот. 9 И вес гвоздий, вес гвоздя единаго пятьдесят сикль злата, и горницу позлати златом. 10 И сотвори в дому Святая Святых Херувима два, дело от древ негниюших и позлати их златом. 11 И криле херувимов, долгота двадесять лакот, и едино крило лакот пяти, прикасающееся стене дому, 12 и другое крило пяти лакот, прикасающееся крилу херувима другаго: 13 криле же херувимов сих распростерте на лакот двадесять, тии же стояху на нозех своих, лица же их (зряще) к дому. 14 Сотвори же завесу от синеты и багряницы, и червленицы и виссона, и сотка на ней херувимы. 15 И сотвори пред храмом столпа два, лакот тридесять пять в высоту, и главы их пять лакот. 16 И сотвори чепи в давире и положи на главах столпов, и шипков сотвори сто, ихже положи на мрежи. 17 И постави столпы пред лицем храма, единаго одесную, а другаго ошуюю: и нарече имя сущему одесную Исправление, имя же сущему ошуюю Крепость. === 4 === 1 Сотвори же и олтарь медян, двадесять лакот в долготу и двадесять лакот в широту и десять лакот в высоту. 2 И сотвори море (медяно) слияно, десять лакот от устия до устия его, кругло окрест, и пяти лакот в высоту, и округлость его тридесяти лактей: 3 и подобие телцев под ним окрест окружающих е: десять лакот обдержаху умывалницу окрест: два рода слияша телцев в слиянии их, 4 имже сотвориша их дванадесять телцев, иже трие сматряху к северу и трие к западу, и трие к полудню и трие к востоку, и море на них (наставлено), задняя же их бяху внутрь (под морем): 5 и толстота его дланная, и устие его яко устие потира, изваянна яко отрасли крина, вмещающее три тысящы мер: и соверши. 6 Сотвори же омывалниц десять и постави пять одесную и пять ошуюю, да омывают в них вся приносимая на всесожжения и очищают в них, море же, да омываются священницы в нем. 7 Сотвори же и подсвещник златых десять по мере их и постави я в храм пять одесную и пять ошуюю. 8 И сотвори столов десять и постави в храм пять одесную и пять ошуюю, и фиал златых сотвори сто. 9 И сотвори двор священником и двор великий, и двери двора и вереи их помедяны медию. 10 И море постави от угла дому одесную аки к востоку прямо. 11 Сотвори же Хирам удицы мясныя, и кадилницы, и сковраду жертвенную, и вся сосуды его: и соверши Хирам творити всякое дело, еже сотвори Соломону царю в дому Божии: 12 столпа два, и на них окружилия, и венцы на главах дву столпу, и мрежице две, еже покрывати главы венцев иже суть над главами столпов: 13 и звонцев златых четыреста в две мрежи, и два ряда шипков во мрежи единей, еже покрывати два окружилия венцев, иже суть верху столпов: 14 и подставов сотвори десять, и умывалницы сотвори на подставах, 15 и море едино и волов дванадесять под ним, 16 и котлы, и удицы мясныя и вся сосуды их, яже сотвори Хирам и принесе царю Соломону в дом Господень от меди чистыя. 17 Во стране Иордана слия их царь, в толщи земней, между Сокхофом и между Саридафом. 18 И сотвори Соломон вся сосуды сия многочисленны зело, понеже не оскуде тягость меди. 19 Сотвори же Соломон вся сосуды дому Божия, и олтарь злат, и трапезы, и на них хлебы предложения, 20 и подсвещники, и светилники света, да светят пред Святая святых по чину, от злата чиста, 21 и щипцы их, и светилники их, и фиалы, и чашицы, и кадилницы от злата чиста, 22 и двери храма внутренния яже во Святая Святых и двери дому храма златыя. И совершися все дело еже сотвори Соломон в дому Господни. === 5 === 1 И внесе Соломон святая Давида отца своего, сребро и злато и вся сосуды, и даде в сокровище дому Господня. 2 Тогда собра Соломон вся старейшины Израилевы и вся началники колен, вожды отечеств сынов Израилевых во Иерусалим, да вознесут кивот завета Господня от града Давидова, иже есть Сион. 3 И собрашася ко царю вси мужие Израилевы в праздник, сей есть месяц седмый. 4 И приидоша вси старейшины Израилевы, и взяша вси левити кивот 5 и внесоша его и скинию свидения и вся сосуды святыя, иже в скинии, и внесоша его священницы и левити. 6 Царь же Соломон и весь сонм сынов Израилевых, и боящиися и собрании пред кивотом, жряху телцы и овцы безчисленны и несочисляемы от множества. 7 И внесоша священницы кивот завета Господня на место его, еже есть молитвенник храма, во Святая Святых, под криле херувимов. 8 И бяху херувими распростерше крила своя над местом кивота, и покрываху херувими над кивотом и над носилами его свыше. 9 И длиннее бяху носила, и видяхуся главы носил от святых в лице молитвенника, и не видяхуся вне, и быша тамо даже до настоящаго дне. 10 Ничтоже бе в кивоте, токмо две скрижали, ихже положи Моисей в Хориве, егда закон даде Господь сыном Израилевым, исходящым им из земли Египетския. 11 И бысть исходящым священником от святых, вси бо священницы, иже ту обретошася, освящени быша и не бяху расположени в дневную чреду, 12 левити же и певцы вси с сынми Асафовыми, со Еманом, Идифумом, и с сынми их и с братиями их, облечени в ризы льняны, в кимвалех и псалтири и гуслех (возглашаху) стояще пред олтарем, и с ними жерцев сто двадесять трубяще трубами: 13 и бысть един глас в трублении и в псалмопении и в возглашении гласом единым еже хвалити и исповедатися Господеви. И егда воздвигоша глас в трубах и кимвалех и органех песней, и глаголаху: исповедайтеся Господеви, яко благ, яко в век милость Его: и дом исполнися облака славы Господни, 14 и не могоша священницы стати служити от лица облака, наполни бо слава Господня дом Божий. === 6 === 1 Тогда рече Соломон: Господь рече обитати во мгле, 2 аз же создах дом имени Твоему Святый Тебе, и уготован еже обитати Тебе во веки. 3 И обрати царь лице свое и благослови все собрание Израилево, и все собрание Израилево предстояше, и рече: 4 благословен Господь Бог Израилев, якоже глагола усты Своими ко Давиду отцу моему, и руками Своими соверши, глаголя: 5 от дне, в оньже изведох люди Моя от земли Египетския, не избрах града от всех колен Израилевых, да созиждется в нем дом имени Моему ту, ниже избрах мужа быти вождем над людьми Моими во Израили: 6 но избрах Иерусалима, да будет имя Мое в нем, и избрах Давида быти над людьми Моими Израилем: 7 и бысть на сердцы Давида отца моего создати дом имени Господа Бога Израилева: 8 и рече Господь ко Давиду отцу моему: понеже бысть на сердцы твоем создати дом имени Моему, добре сотворил еси, яко бысть на сердцы твоем, 9 обаче ты не созиждеши Мне дому, но сын твой, иже изыдет из чресл твоих, той созиждет дом имени Моему: 10 и соверши Господь слово сие, еже глагола, и бых вместо Давида отца моего, и седох на престоле Израилеве, якоже глагола Господь, и создах дом имени Господа Бога Израилева, 11 и поставих в нем кивот, в немже есть завет Господень, егоже завеща Израилю. 12 И ста пред олтарем Господним, пред всем множеством Израилевым, и простре руце свои: 13 сотвори бо Соломон стояло медяно и постави его посреде двора святилища, пять лакот долгота его и пять лакот широта его и три лакти высота его: и ста на нем, и паде на колена своя пред всем множеством Израилевым, и простре руки своя на небо и рече: 14 Господи Боже Израилев, несть подобен Тебе Бог на небеси и на земли, сохраняяй завет и милость с рабы Твоими, иже ходят пред Тобою всем сердцем своим, 15 яже сохранил еси рабу Твоему Давиду отцу моему, елика рекл еси ему глаголя, и глаголал еси усты Твоими и руками Твоими совершил еси, якоже день сей: 16 и ныне, Господи Боже Израилев, сохрани рабу Твоему Давиду отцу моему, яже рекл еси ему глаголя, и глаголал еси усты Твоими и исполнил еси якоже в день сей, глаголя: не оскудеет тебе муж от лица Моего седяй на престоле Израилеве, токмо аще сохранят сынове твои пути Моя ходити в законе Моем, якоже ходил еси предо Мною: 17 и ныне, Господи Боже Израилев, да укрепится слово Твое, еже глаголал еси рабу Твоему Давиду: 18 убо истинно ли Бог обитати будет с человеки на земли? Аще небо и небо небесе не довлеют Ти, и кольми паче дом сей, егоже создах? 19 И призри на моление раба Твоего и на молитву мою, Господи Боже мой, еже услышати молитвы моя и моление, имже раб Твой молится пред Тобою днесь, 20 еже быти очесем Твоим отверстым на дом сей день и нощь, на место сие, о немже глаголал еси, да призовется имя Твое тамо, еже услышати молитву, еюже раб Твой молится на месте сем: 21 и послушати мольбу раба Твоего и людий Твоих Израиля, елика аще помолятся на месте сем и ты услышиши на месте жилища Твоего с небесе, и услышиши, и милостив будеши: 22 аще согрешит муж ко искреннему своему и приимет на него клятву еже клясти его, и приидет и прокленет пред олтарем в дому сем, 23 и Ты услыши от небесе и суди рабом Твоим, еже воздати беззаконному, и воздати пути его на главу его, и оправдити праведнаго, воздая ему по правде его: 24 и аще одолени будут людие Твои Израиль от враг, аще согрешат Тебе и обратятся, и исповедятся имени Твоему, и помолятся пред Тобою в храме сем, 25 и Ты услыши с небесе и милостив буди грехом людий Твоих Израиля и возврати их в землю, юже дал еси им и отцем их: 26 егда заключиши небо, и не будет дождя, яко согрешат Тебе, и помолятся на месте сем, и восхвалят имя Твое, и обратятся от грех своих, егда смириши их, 27 и Ты услыши с небесе и милостив буди грехом рабов и людий Твоих Израиля, яко явиши им путь благ, по немуже пойдут, и даждь дождь на землю Твою, юже дал еси людем Твоим в наследие: 28 глад аще будет на земли, губителство аще будет, воздуха растление и иктер, прузи и гусеницы аще будут, и аще оскорбит их враг пред градами их, всякою язвою и всякою болезнию, 29 и всяка молитва, и всяко моление, еже аще будет всякому человеку и всем людем Твоим Израилю, аще познает человек язву свою и грех свой и прострет руце свои в дому сем, 30 и Ты услыши с небесе от готоваго жилища Твоего, и очести, и даждь коемуждо по путем его, якоже веси по сердцу его, Ты бо един веси сердца сынов человеческих, 31 яко да боятся Тебе, еже ходити бо всех путех Твоих вся дни, в няже живут на лицы земли юже дал еси отцем нашым: 32 и всяк чуждии, иже несть от людий Твоих Израиля, и приидет от земли дальния ради имене Твоего великаго и ради руки Твоея сильныя и мышцы Твоея высокия, и приидет и помолится на месте сем, 33 и Ты услыши с небесе от готоваго жилища Твоего, и сотвориши по всему, елико призовет Тя чуждий, да уведят вси людие земли имя Твое и убоятся Тебе, якоже людие Твои Израиль, и познают, яко имя Твое призвано есть на дом сей, егоже создах: 34 аще же изыдут людие Твои на брань противу супостат своих по пути, имже послеши их, и помолятся Тебе по пути града сего, егоже избрал еси Себе, и дому, егоже создах имени Твоему, 35 да услышиши с небесе молитву их и моление их, и сотвориши оправдание их: 36 зане согрешат Тебе, яко несть человек, иже не согрешит, и поразиши их, и предаси их в руки врагов их, и пленят их пленяющии в землю врагов, в землю дальнюю или ближнюю, 37 и обратят сердце свое в земли их, в нюже пленени будут, и тамо обратятся, и помолятся Тебе в пленении своем, глаголюще: согрешихом, беззаконновахом, неправдовахом, 38 и обратятся к Тебе всем сердцем своим и всею душею своею в земли пленивших я, идеже плениша их, и помолятся путем земли своея, юже дал еси отцем их, и града, егоже избрал еси, и дому, егоже создах имени Твоему: 39 да услышиши с небесе от готоваго жилища Твоего молитву их и моление их, и сотвориши суд, и милостив буди людем Твоим согрешившым Ти: 40 и ныне, Господи, да будут отверсте очи Твои, и уши Твои внятне к молению места сего: 41 и ныне востани, Господи Боже, в покой Твой, Ты и кивот крепости Твоея: священницы Твои, Господи Боже, да облекутся во спасение, и преподобнии Твои возвеселятся во благих: 42 Господи Боже, да не отвратиши лица христа Твоего, помяни щедроты Давида раба Твоего. === 7 === 1 И егда соверши Соломон моляся, и огнь сниде с небесе и пояде всесожжения и жертвы и слава Господня исполни дом: 2 и не можаху священницы внити в храм Господнь во время оно, яко исполни слава Господня дом Господень. 3 И вси сынове Израилевы видяху сходящь огнь и славу Господню на дом, и падоша ниц на землю на помост постлан камением, и поклонишася, и восхвалиша Господа, яко благ, яко во век милость Его. 4 Царь же и вси людие пожроша жертвы пред Господем. 5 И пожре царь Соломон жертву волов двадесять и две тысящы, овец сто и двадесять тысящ, и освяти дом Божий царь и вси людие. 6 Священницы же стояху на стражах своих, и левити во органы пояху песни Господни, яже сотвори Давид царь к похвалению Господа: (яко благ,) яко во век милость Его, песни Давидовы (поюще) руками своими: и священницы пояху трубами пред ними, и весь Израиль стояше. 7 Освяти же Соломон среднее двора, иже пред церковию Господнею, принесе бо ту всесожжения и туки мирных, яко олтарь медян, егоже сотвори Соломон, не можаше вместити всесожжений и жертв и туков. 8 И сотвори Соломон праздник во время оно седмь дний, и весь Израиль с ним, собрание велико зело от входа во Емаф даже до потока Египетска: 9 сотвори же в день осмый торжество, понеже освящению олтаря сотвори седмь дний праздник. 10 И в день двадесять третий месяца седмаго отпусти людий в жилище их веселящихся и радующихся о благих, яже сотвори Господь Давиду и Соломону и Израилю людем Своим. 11 И соверши Соломон дом Господень и дом царев: и вся, елика восхоте в сердцы своем Соломон творити в дому Господни и в дому своем, благопоспешися. 12 И явися Господь Соломону нощию и рече ему: услышах моление твое и избрах место сие мне в дом жертвы: 13 аще заключу небо, и дождь не излиется, и аще повелю пругом поясти древо, и аще послю губителство на люди Моя, 14 и аще посрамлени будут людие Мои, на нихже призвано есть имя Мое, и помолятся, и взыщут лица Моего, и отвратятся от путий своих злых: и Аз услышу с небесе и милостив буду грехом их, и изцелю землю их: 15 и ныне очи Мои будут отверсте, и уши Мои послушне к молению места сего: 16 и ныне избрах и освятих дом сей, да будет на Мое ту даже до века, и будут очи Мои и сердце Мое ту вся дни: 17 ты же аще ходити будеши предо Мною, якоже ходил Давид отец твой, и сотвориши по всем, яже повелех тебе, и повеления Моя и судбы Моя сохраниши: 18 и воздвигну престол царства твоего, якоже завещах Давиду отцу твоему глаголя: не отимется от тебе муж вождь во Израили: 19 аще же отвратитеся вы и оставите повеления Моя и заповеди Моя, яже предах вам, и пойдете и послужите богом иным и поклонитеся им, 20 исторгну вас от земли, юже дах вам: и дом сей, егоже освятих имени Моему, отвергу от лица Моего и предам его в притчу и в повесть всем языком: 21 и дом сей высокий (в притчу), всяк мимоходяй его ужаснется и речет: почто сотвори Господь тако земли сей и дому сему? 22 И отвещают: яко оставиша Господа Бога отец своих, иже изведе их от земли Египетския, и прияша боги чуждыя, и поклонишася им, и поработаша им, и сего ради наведе на них вся сия злая. === 8 === 1 И бысть по двадесяти летех, в нихже созда Соломон дом Господень и дом свой, 2 и грады яже даде Хирам Соломону, созда оны Соломон и всели ту сыны Израилевы. 3 И прииде Соломон во Емаф-Сува и одержа его. 4 И созда Федмор в пустыни и вся грады крепкия, яже созда во Емафе. 5 Сострои же Вефорон вышний и Вефорон нижний, грады укреплены стенами, вратами и вереями: 6 и Валааф, и вся грады крепкия, иже быша Соломону, и вся грады колесниц и грады конник, и елика восхоте Соломон по желанию создати бо Иерусалиме и в Ливане и во всем царстве своем. 7 Весь народ оставшийся от Хеттеа и Аморреа, и Ферезеа и Евеа и Иевусеа, иже не бяху от племене Израилева, 8 но беша от сынов их оставшихся по них на земли, ихже не избиша сынове Израилевы, подведе их Соломон в дань даже до дне сего. 9 От сынов же Израилевых не даде Соломон в рабы царству своему: тии бо бяху мужие ратницы и князи, и сильнии и началницы колесниц и конник его. 10 И сии началницы предстоящих царю Соломону, двести пятьдесят приставницы над делы людскими. 11 Дщерь же Фараоню преведе Соломон от града Давидова в дом, егоже созда ей, рече бо: да не обитает жена моя в дому Давида царя Израилева, понеже освящен есть, аможе вниде кивот Господень. 12 Тогда вознесе Соломон всесожжения Господеви на олтарь, егоже созда Господеви пред храмом, 13 по словеси от дне до дне возносити, по повелению Моисееву, в субботы и в новомесячия и в праздники, трижды в год, в праздник опресноков и в праздник седмиц и в праздник кущей. 14 И постави по разсуждению Давида отца своего разделения священником и по служением их: и левиты над стражами их, да хвалят и служат пред священники по чину единаго коегождо дний: и дверницы по разделением их, по вратом и вратом: тако бо повеле Давид человек Божий. 15 Не преступиша заповедий царевых о священницех и левитех по всякому словеси, и в сокровищих. 16 И уготовася всяко делание от дне, в оньже основа, до дне, в оньже соверши Соломон дом Господень. 17 Тогда иде Соломон в Гасионъгавер и во Елаф, иже при мори в земли Идумейстей. 18 И посла Хирам рукою слуг своих корабли и рабы знающыя морския проходы, и хождаху с рабы Соломоними в Софир, и взяша оттуду четыреста и пятьдесят талант злата и принесоша ко царю Соломону. === 9 === 1 Царица же Савска услыша имя Соломоново и прииде искусити его гаданьми во Иерусалиме с силою тяжкою зело: и велблюды носящии ароматы и злата множество и камения драгаго: и прииде к Соломону и глагола ему вся, елика беша в сердцы ея. 2 И возвести ей Соломон вся словеса ея, и не прейде слово, егоже бы не возвестил ей. 3 И виде царица Савска премудрость Соломоню, и дом егоже созда, 4 и яди столов его, и седалища рабов его, и состояние служебников его и ризы их, и виночерпчия его и украшение их, и всесожжения, яже жряше в дому Господни, и вне себе бысть. 5 Рече же ко царю: истинно есть слово, еже слышах в земли моей о словесех твоих и о премудрости твоей: 6 и не веровах словесем их, дондеже приидох, и видеста очи мои, и се, не возвестиша мне половины множества премудрости твоея: приложил еси ко слышанию яже слышах: 7 блажени мужие твои и блажени раби твои сии, иже предстоят пред тобою на всяко время и слышат премудрость твою: 8 да будет Господь Бог твой благословен, иже благоволи в тебе, еже дати тя на престол Свой царя Господу Богу твоему: зане возлюби Господь Бог твой Израиля, еже утвердити его во век, и постави тя над ними царя, да сотвориши суд и правду. 9 Даде же царю сто двадесять талант злата и ароматы многи зело и камение драгое, и не быша ароматы таковы яко сия, яже даде царица Савска царю Соломону. 10 Но и раби Хирамовы с рабы Соломоними приношаху злато Соломону драгое. 11 И сотвори Соломон царь от древ певговых степени в дом Господень и в дом царев, и гусли и псалтири песней, и никогдаже видена быша в земли Иудине прежде такоая. 12 Царь же Соломон даде царице Савстей вся по желанию ея, ихже просила, кроме всех яже принесе царю Соломону, и возвратися в землю свою. 13 Бе же вес злата приносимаго к Соломону на всяко лето шесть сот шестьдесят шесть талант злата, 14 кроме мужей подданных и купцов, иже приношаху, и всех царей Аравских и властелей земли, иже вси приношаху злато и сребро царю Соломону. 15 Сотвори убо царь Соломон двести щитов златых тягненых, шесть сот златник чистых бяху во единем щите: 16 и триста щитов златых тягненых, по триста златник бяше во единем коемждо щите, и положи я царь в дому древа Ливанова. 17 Сотвори же царь престол от слоновых зубов велик, и позлати его златом чистым, 18 и шесть степений у престола позлащени златом, и мышчицы две туду и сюду над престолом седалища, и два льва стояща близ мышчцей, 19 и дванадесять львов стоящих тамо на шести степенех от обоих стран: и не бысть таков престол во всяцем царстве. 20 Вси же сосуди царя Соломона бяху златы, и вси сосуди дому дубравы Ливанския златом окружены, сребро бо во днех Соломоних ни во что вменяшеся: 21 зане корабль царев хождаше в Фарсис с рабы Хирамовыми, единицею в лета три прихождаше корабль от Фарсиса ко царю, полн злата и сребра и зубов слоновых и обезян. 22 И возвеличися Соломон паче всех царей земных богатством и мудростию. 23 Вси же царие земстии желаху видети лице Соломоне и слышати премудрость его, юже даде Бог в сердце его: 24 и приношаху ему кийждо дары своя, сосуды сребряны и златы, и одеяния и стакту, и сладости, кони и мски, на всякое лето. 25 И бяху царю Соломону четыредесять тысящ кобылиц к колесницы и дванадесять тысящ конник, и постави их во градех колесничных и со царем во Иерусалиме. 26 И быть вождь всех царей от реки (Евфрата) даже до земли иноплеменник и даже до предел Египетских. 27 И даде царь злато и сребро во Иерусалиме яко камение, и кедры яко черничие, еже (раждается) в полях множество. 28 И приводяху кони Соломону от Египта и от всея земли. 29 И прочая словеса Соломоня первая и последняя, се, сия писана суть в словесех Нафана пророка и в словесех Ахии Силониты и в видениих Иоиля видящаго, противу Иеровоама сына Наватова. 30 И царствова Соломон во Иерусалиме над всем Израилем четыредесять лет. 31 И успе Соломон со отцы своими, и погребоша его во граде Давида отца его. И воцарися Ровоам сын его вместо его. === 10 === 1 И прииде Ровоам в Сихем, зане в Сихем весь Израиль снидеся поставити его царем. 2 И бысть егда услыша Иеровоам сын Наватов, иже бе во Египте, яко убеже от лица Соломона царя, и обита Иеровоам во Египте, и возвратися Иеровоам от Египта. 3 И послаша и призваша его. И прииде Иеровоам и все собрание Израилево ко царю Ровоаму, глаголюще: 4 отец твой ожесточи иго наше, ты же ныне ослаби от работы отца твоего жестокия и от ига его тяжкаго, еже возложи на нас, и послужим тебе. 5 И рече им: поидите даже до триех дний и приидите ко мне. И отидоша людие. 6 И собра царь Ровоам старейшины, иже стояху пред Соломон отцем его, егда еще живяше, глаголя: каков вы даете совет отвещати людем сим? 7 И реша ему: аще днесь будеши во благое людем сим, и благоугодиши, и речеши им словеса благая, то послужат тебе во вся дни. 8 И остави совет старейшин, егоже совещаша ему: и советоваше со юношами, иже с ним воспитани бяху и стояху пред ним, 9 и рече к ним: что вы собетуете, да отвещаю людем сим, иже реша мне, глаголюще: облегчи иго, еже наложи на ны отец твой? 10 И отвещаша ему отроцы воспитаннии с ним, глаголюще: тако речеши людем, ихже рекоша тебе, глаголюще: отец твой отягчи иго наше, ты же облегчи нам: тако отвещай к ним: менший перст мой толстее есть чресл отца моего: 11 отец мой наложи вам тяжкое иго, аз же (тягости) приложу на иго ваше: отец мой бил вас бичми, аз же буду бити вас скорпионами. 12 И прииде Иеровоам и вси людие к Ровоаму в день третий, якоже повеле им царь, глаголя: возвратитеся ко мне в день третий. 13 И отвеща царь жестоко, и остави царь Ровоам совет старейшин, и рече к ним по совету юнош, глаголя: 14 отец мой отяготи иго ваше, аз же приложу к нему: отец мой бил вас бичми, аз же бити буду вы скорпионами. 15 И не послуша царь людий, яко бе превращение от Бога, глаголя: возстави Господь слово Свое, еже глагола рукою Ахии Силониты о Иеровоаме сыне Наватове 16 и о всем Израили, зане не послуша царь их. И отвещаша людие ко царю, глаголюще: кая нам часть в Давиде и наследие в сыне Иессееве? Возвратися в жилища твоя, Израилю, ныне смотри дому твоего, Давиде. И иде весь Израиль в жилища своя. 17 Мужие же Израилевы, иже обитаху во градех Иудиных, воцариша над собою Ровоама. 18 И посла царь Ровоам к ним Адонирама бывша над даньми, и камением побиша его сынове Израилевы, и умре. И услыша царь Ровоам, и потщася взыти на колесницу, и побеже во Иерусалим. 19 И отвержеся Израиль от дому Давидова даже до дне сего. === 11 === 1 Прииде же Ровоам во Иерусалим, и созва (весь) дом Иудин и Вениаминь, сто осмьдесят тысящ избранных юношей творящих брань, и воеваше противу Израиля и Иеровоама, да обратит к себе царство. 2 И бысть слово Господне к Самею человеку Божию, глаголя: 3 глаголи к Ровоаму сыну Соломоню, царю Иудину, и ко всему Израилю, иже есть во Иуде и Вениамине: 4 сия рече Господь: не восходите, ниже ополчайтеся противу братии вашея: возвратитеся кийждо в дом свой, зане от Мене бысть глаголгол сей. И послушаша слова Господня, и возвратишася, и не поидоша противу Иеровоама. 5 Обита же Ровоам во Иерусалиме и созда грады стенаты во Иудеи: 6 сострои же Вифлеем и Етам, и Фекуе 7 и Вефсур, и Сокхоф и Одоллам, 8 и Геф и Марисан, и Зиф 9 и Адурем, и Лахис и Азику, 10 и Салаю и Елон и Хеврон, иже есть Иудин и Вениаминь, грады крепкия: 11 и укрепи их стенами, и постави в них началники, житохранилища, и елей и вино, 12 во всяцем граде щиты и копия, и укрепи их во множестве зело, и быста под ним Иуда и Вениамин. 13 Священницы же и левиты, иже бяху во всем Израили, собрашася к нему от всех предел: 14 яко оставиша левити селения одержания своего и поидоша ко Иуде во Иерусалим, понеже изгна их Иеровоам и сынове его, еже не служити Господеви: 15 и постави себе жерцы на высоких, и идолом, и суетным, и телцем, ихже сотвори Иеровоам. 16 И изгна их от всех колен Израилевых, иже вдаша сердце свое, да взыщут Господа Бога Израилева: и приидоша во Иерусалим пожрети Господу Богу отец своих: 17 и укрепиша царство Иудино. И укрепися Ровоам сын Соломонь в три лета, хождаше бо по путем Давида и Соломона отца своего лета три. 18 И взя себе Ровоам жену Моолафу, дщерь Иеримофа сына Давидова, и Авигею дщерь Елиава сына Иессеова. 19 И роди ему сыны: Иеуса и Самориа и Заама. 20 По сих же поя себе Мааху дщерь Авессаломлю, и роди ему Авию и Иеффиа, и Зизу и Салимофа. 21 И возлюби Ровоам Мааху дщерь Авессаломлю паче всех жен своих и подложниц своих, яко жен осмьнадесять име и подложниц шестьдесят: и роди двадесять осмь сынов и шестьдесят дщерей. 22 И постави в началника Ровоам Авию сына Маахина и князем над всею братиею его, того бо и царем сотворити помышляше. 23 И возрасте паче всех братий своих во всех пределех Иудиных и Вениаминих и во градех крепких, и даде им пищи множество много, и многих взыска жен. === 12 === 1 И бысть егда устроися царство Ровоамово, и укрепися, остави заповеди Господни, и весь Израиль с ним. 2 И бысть в лето пятое царства Ровоамля взыде Сусаким царь Египетский на Иерусалим, зане согрешиша пред Господем, 3 с тысящию и двема сты колесниц и шестьдесят тысящ конник, и не бе числа народу пришедшему с ним от Египта, Ливиане, Троглодитяне и Ефиопляне: 4 и взяша грады крепкия, иже бяху во Иуде, и приидоша даже до Иерусалима. 5 Самеа же пророк вниде к Ровоаму и к началником Иудиным, иже собрани бяху во Иерусалим от лица Сусакимова, и рече к ним: сия рече Господь: вы остависте Мя, и Аз оставлю вас в руку Сусакима. 6 И посрамишася началницы Израилевы и царь и рекоша: праведен Господь. 7 Егда же виде Господь, яко смиришася, и бысть слово Господне к Самею, глаголя: смиришася, не разорю их, и дам им вмале спасение, и не уканет ярость Моя на Иерусалим, 8 обаче будут в рабы, да познают работу Мою и работу царства земли. 9 И взыде Сусаким царь Египетский во Иерусалим, и взя сокровища, яже в дому Господни, и сокровища, яже в дому цареве, вся взя: и взя щиты златыя, ихже сотвори Соломон. 10 И сотвори царь Ровоам щиты медяны вместо их. И постави на ним Сусаким царь Египетский началников предходящих стрегущих врата царева: 11 и бысть внегда входити царю в дом Господень, вхождаху стрегущии и предходящии, и обращающеся восхождаху предходящии ко оружехранителнице своей. 12 И егда смирися той, отвратися от него ярость Господня, а не в разорение в конец: ибо и во Иуде бяху словеса блага. 13 И укрепися царь Ровоам во Иерусалиме и царствова: четыредесяти же и единаго лета бысть Ровоам, егда царствовати нача, и седмьнадесять лет царствова во Иерусалиме, во граде, егоже избра Господь, да именуется имя Его ту от всех колен Израилевых. Имя же матери его Ноома Амманитыня. 14 И сотвори лукавое, яко не исправи сердца своего, да взыщет Господа. 15 Словеса же Ровоамова первая и последняя не се ли, суть писана в словесех Самеа пророка и Адда провидящаго, и деяния его? И воеваше Ровоам и Иеровоам во вся дни. 16 И умре Ровоам и погребен бысть со отцы своими во граде Давидове. И воцарися Авиа сын его вместо его. === 13 === 1 В лето осмоенадесять царства Иеровоамля воцарися Авиа над Иудою: 2 три лета царствова во Иерусалиме. Имя же матери его Мааха дщерь Уриилева от Гаваона. И бе брань между Иеровоамом и между Авиею. 3 И ополчися Авиа в силе воинския силы, в четырех стах тысящах мужей сильных: Иеровоам же устрои сопротиву его брань во осми стах тысящах мужей военных крепких силою. 4 Ста же Авиа на горе Сомори, яже есть на горе Ефремли, и рече: слышите Иеровоам и весь Израиль: 5 или не весте, яко Господь Бог Израилев даде царство Давиду над Израилем во веки и сыновом его в завет вечен? 6 И воста Иеровоам сын Наватов, раб Соломона сына Давидова, и отвержеся от господина своего: 7 и собрашася к нему мужие пагубнии, сынове законопреступнии, и воста противу Ровоама сына Соломонова, Ровоам же бе юнейший и сердцем страшлив, и не возможе противостати лицу его: 8 и ныне вы глаголете противостати лицу царства Господня в руце сынов Давидовых: и вы мнози зело, и с вами телцы златии, ихже сотвори вам Иеровоам в боги: 9 не извергосте ли священников Господних сынов Аароних и левитов, и сотвористе себе жерцы от людий всея земли, приходяй наполнити руку свою телцем от волов и овнами седмию, и сотворися жерцем не сущему богу: 10 мы же Господа Бога нашего не оставихом, и священницы Его служат Господу, сынове Аарони и левити, 11 и по чредам своим жрут Господу всесожжения утро и пред вечером, и фимиам сложения, и предложения хлебов на трапезе чистей, и светилник златый, и свещники возжжения возжизати к вечеру: мы бо храним стражбы Господа Бога отец наших, вы же Его остависте: 12 и се, с нами в начале Господь, и священницы Его, и трубы знаменования, еже знаменати противу вам: сынове Израилевы, не ратуйте противу Господа Бога отец ваших, понеже не благопоспешится вам. 13 Иеровоам же обрати подсаду приити ему созади, и бысть противу Иуды (сам), подсада же созади. 14 И обратися Иуда, и се, ему брань сопреди и созади, и возопиша ко Господу, и священницы вострубиша трубами: 15 и возопиша мужие Иудины. И бысть вопиющым мужем Иудиным, и Господь порази Иеровоама и Израиля пред Авиею и Иудою: 16 и бежаша сынове Израилевы от лица Иуды, и предаде их Господь Бог в руки их: 17 и порази их Авиа и людие его язвою великою, и падоша ранени от Израиля пять сот тысящ мужей крепких. 18 И смиришася сынове Израилевы в день той, и укрепишася сынове Иудины, яко уповаша на Господа Бога отец своих. 19 Погна же Авиа вслед Иеровоама и взя от него грады: Вефиль и села его, и Иесину и села ея, и Ефрон и села его. 20 И не возможе ктому противитися Иеровоам во вся дни Авии, и порази его Господь: и умре. 21 Авиа же укрепися, и поят себе жен четыренадесять, и роди двадесять два сына и шестьнадесять дщерей. 22 Прочая же словеса Авиева и деяния его и словеса его писана в книзе Адды пророка. === 14 === 1 И успе Авиа со отцы своими, и погребоша его во граде Давидове. И воцарися Аса сын его вместо его во дни же Асы почи земля Иудина лет десять. 2 И сотвори Аса благое и правое пред Господем Богом своим: 3 и отверже олтари чуждых и высокая, и сокруши идолы и посече дубравы: 4 и повеле Иуде, да взыщет Господа Бога отец своих и да сотворит закон Его и заповеди: 5 и изверже из всех градов Иудиных олтари и идолы, и царствова в мире. 6 И созда грады крепки в земли Иудине, зане в покои бысть земля, и не бе ему брани в лета сия, мир во Господь даде ему. 7 Рече же Иуде: созиждем грады сия, и сотворим стены и столпы, и врата и вереи, дондеже землею господствуем: зане якоже взыскахом Господа Бога нашего, взыска и нас, и воздаде нам мир окрест, и благопоспешствова нам. 8 И бысть сила Асе оруженосцев носящих щиты и копия в земли Иудине триста тысящ, в земли же Вениамини щитников и стрелцев двести осмьдесят тысящ: вси сии воини сильнии. 9 Изыде же противу их Зарай Ефиоплянин с силою в тысящы тысящей, и колесниц триста, и прииде даже до Мариса. 10 И изыде Аса противу ему и устрои брань в дебри на север Мариса. 11 И возопи Аса ко Господу Богу своему и рече: Господи, не изнеможет у Тебе спасати во многих и в малых, укрепи нас, Господи Боже наш, яко на Тя уповахом и о имени Твоем изыдохом на множество многое сие: Господи Боже наш, Ты еси Бог, да не превозможет противу Тебе человек. 12 И порази Господь Ефиопы пред Асою и Иудою и бежаша Ефиопи: 13 и погна их Аса и людие его даже до Гедора: и падоша Ефиопи, даже не быти в них останку, яко сотрени быша пред Господем и пред силою Его, и плениша корысти многи: 14 и изсекоша веси их окрест Гедора, велик бо страх Господень объят их, и плениша вся грады их, зане многи корысти быша в них: 15 и кущы скотския и амазонов изсекоша, и взяша скота множество и велблюды, и возвратишася во Иерусалим. === 15 === 1 Азариа же сын Ададов, бысть на нем Дух Божий: 2 и изыде во сретение Асе и всему Иуде и Вениамину и рече ему: услышите мя, Аса и весь Иуда и Вениамин: Господь с вами, яко бысте с Ним: и аще взыщете Его, обрящется вам, аще же оставите Его, оставит вас: 3 мнози дние (будут) во Израили без Бога истиннаго и без священника учащаго и без закона: 4 егда же обратятся в печали ко Господу Богу Израилеву и взыщут Его, и обрящется им: 5 и во время оно не будет мир исходящему и входящему, яко ужас Господень на всех обитающих на земли 6 и ополчится язык на язык и град противу града, яко Господь смутит их во всяцей печали: 7 и вы укрепитеся, и да не ослабеют руки вашя, есть бо мзда делу вашему. 8 И егда услыша Аса словеса сия и пророчество Азарии пророка, укрепися и отя вся идолы от всея земли Иудины и Вениамини и от градов, ихже содержаше Иеровоам в горе Ефремли, и освяти олтарь Господень, иже бе пред храмом Господним: 9 собра же (всего) Иуду и Вениамина и пришелцев обитающих с ним от Ефрема и от Манассии и от Симеона, мнози бо к нему прибегоша от Израиля, егда увидеша, яко Господь Бог его с ним. 10 И собрашася во Иерусалим в месяц третий, в лето пятоенадесять царства Асы, 11 и пожроша Господу в день той от корыстей, ихже приведоша, волов седмь сот и овец седмь тысящ, 12 и поидоша в завете, еже искати Господа Бога отец своих всем сердцем и всею душею своею: 13 и (рече): всяк, иже аще не взыщет Господа Бога Израилева, да умрет от юнаго даже до старейшаго, от мужа даже до жены. 14 И кляшася Господу гласом великим в восклицании и в трубах и в рожаных. 15 И возрадовася весь Иуда о клятве, яко от всея души кляшася, и всею волею взыскаша Его, и обретеся им, и даде им Господь покой окрест. 16 И Мааху матерь свою отлучи, да не служит Астарту, и сокруши идола и сожже в потоце Кедрстем. 17 Токмо высоких не отстави, еще бо бяху во Израили, но сердце Асы бе совершенно во всех днех его: 18 и внесе святая Давида отца своего и святая своя в дом Божий, сребро и злато и сосуды. 19 И брань не бысть ему даже до тридесять пятаго лета царства Асина. === 16 === 1 И в лето тридесять осмое царства Асина, взыде Вааса царь Израилев на Иуду и стенами укрепи Раму, да не даст входа и исхода Асе царю Иудину. 2 И взя Аса сребро и злато от сокровищ дому Господня и дому царева, и посла ко (Венададу) сыну Адера царя Сирска, живущему в Дамасце, глаголя: 3 положи завет между мною и тобою и между отцем моим и отцем твоим: се послах тебе сребро и злато: прииди и отжени от мене Ваасу царя Израилева, и да отидет от мене. 4 И послуша сын Адеров царя Асы и посла началники воев своих на грады Израилевы, и порази Аинона и Дана, и Авелмаина и вся окрестная Неффалимля. 5 И бысть егда услыша Вааса царь Израилев, остави ктому созидати Раму и остави дело свое. 6 Аса же царь взя всего Иуду и взя камение от Рамы и лес ея, яже на создание уготова Вааса, и созда из них Гаваю и Масфу. 7 И во время оно прииде Ананий пророк ко Асе царю Иудину и рече ему: понеже имел еси упование на царя Сирска, а не уповал еси на Господа Бога твоего, того ради спасеся сила царя Сирскаго от руку твоею: 8 не Ефиопи ли и Ливиане бяху на тя в силе мнозе, в дерзости колесниц и конник во множество зело? И егда уповал еси на Господа, предаде их в руку твою: 9 очи бо Господни назирают всю землю, еже укрепити сущих сердцем совершенным к Нему: буе сотворил еси сие, (сего ради) отныне будет на тя брань. 10 Разгневася же Аса на пророка и всади его в темницу, понеже прогневася о сем: и уби Аса от людий во время то (многих). 11 И се, словеса Асы, первая и последняя, писана суть в книзе царей Иудиных и Израиля. 12 И разболеся Аса в лето тридесять девятое царства своего ногама, болезнию зелнейшею: и ниже в немощи своей взыска Господа, но врачев. 13 Успе же Аса со отцы своими, и умре в лето четыредесять первое царства своего: 14 и погребоша его во гробе, егоже ископа себе во граде Давидове, и положиша его на одре, и наполниша ароматами и родами миров благоуханных, и сотвориша ему погребение велико зело. === 17 === 1 И воцарися Иосафат сын его вместо его, и укрепися Иосафат над Израилем: 2 расположи же силу во всех градех Иудиных крепких и постави воеводы во градех Иудиных и во градех Ефремовых ихже побра прежде Аса отец его. 3 И бысть Господь со Иосафатом, яко хождаше в путех Давида отца своего первых и не взыска идолов, 4 но Господа Бога отца своего взыска и пойде в повелениих отца своего, а не по делом Израилевым: 5 и укрепи Господь царство в руку его, и даша вся Иудеа дары Иосафату, и бысть ему богатство и слава многа. 6 И вознесеся сердце его в пути Господни, и ктому изя высокая и дубравы от земли Иудины. 7 В третие же лето царства своего посла началники своя и сынов сильных Авдию и Захарию, и Нафанаила и Михеа, да учат во градех Иудиных: 8 и с ними левити Самеа и Нафаниа, и Завдиа и Асиил, и Семирамоф и Ионафан, и Адониа и Товиа и Товадониа левити, и с ними Елисама и Иорам жерцы: 9 учаху же во Иудеи, имеюще книгу закона Господня, и прохождаху грады Иудины и учаху люди. 10 И бысть страх Господень на всех царствах земных окрест Иуды, и не воеваша противу Иосафата. 11 И от иноплеменник Иосафату дары приношаху сребро и дани: Арави же привождаху ему овнов овчих седмь тысящ и седмь сот, и козлов седмь тысящ седмь сот. 12 И бе Иосафат предуспевая велик в высоту и созда во Иудеи домы и грады крепки. 13 И многа дела быша ему во Иудеи: и мужие ратницы крепцы сильнии во Иерусалиме. 14 И сие число их по домом отечеств их: и во Иуде тысященачалницы Еднас вождь и с ним сынове сильнии силы триста тысящ: 15 и по нем Иоанан началник и с ним двести осмьдесят тысящ: 16 по немже Амасиа, сын Захариин, усердсвуяй Господу и с ним двести тысящ мужей сильных. 17 И от Вениаминя сильнии силы Елиад, и с ним держащих лук и щиты двести тысящ сильных: 18 и по нем Иозавад, и с ним сто осмьдесят тысящ, сильнии ко брани. 19 Сии служащии царю, кроме оных, ихже постави царь по градом крепким во всей Иудеи. === 18 === 1 И бысть Иосафату богатство и слава многа, и поят жену в дому Ахаавли. 2 И сниде при концы лет ко Ахааву в Самарию: и закла ему Ахаав овны и волы многи, и людем сущым с ним, и увещаваше его, да снидет с ним в Рамоф Галаадский. 3 И рече Ахаав царь Израилев ко Иосафату царю Иудину: пойдеши ли со мною в Рамоф Галаадский? И рече ему: якоже аз, тако и ты: и якоже людие твои, тако и людие мои с тобою на брань. 4 И рече Иосафат царю Израилеву: вопроси убо днесь Господа. 5 И собра царь Израилев пророков четыреста мужей и рече к ним: пойду ли в Рамоф Галаадский на брань, или удержуся? И реша: взыди, и предаст Бог в руку цареву. 6 Рече же Иосафат: несть ли зде пророка Господня еще, да от него вопросим? 7 И рече царь Израилев ко Иосафату: есть еще муж един, имже вопросити Господа, но аз ненавижду его, понеже не прорицает мне во благая, зане вси дние его во злая: сей Михеа сын Иемвлин . Рече же Иосафат: не глаголи, царю тако. 8 И призва царь Израилев единаго от евнух и рече ему: (призови) скоро Михею сына Иемвлина. 9 Царь же Израилев и Иосафат царь Иудин кийждо седяше на престоле своем, и облечена красотою царскою, седяста же на пространстве близ врат Самарийских, и вси пророцы пророчествоваху пред нима. 10 И сотвори себе Седекиа сын Ханаань роги железны и рече: сия глаголет Господь: сими избодеши Сирию, дондеже скончается. 11 И вси пророцы прорицаху тако, глаголюще: взыди в Рамоф Галаадский и предуспееши, и предаст Господь в руку цареву. 12 Вестник же, шедый призвати Михею, рече ему: се, рекоша пророцы единеми усты благая о цари да будут убо и твоя словеса, якоже единаго от них, и да речеши благая. 13 И отвеща Михеа: жив Господь, яко еже аще речет Бог ко мне, сие возглаголю. 14 И прииде ко царю, и рече ему царь: Михее, имам ли ити Рамоф Галаадский на брань, или удержуся? И отвеща: взыди и предуспееши, и предадутся (врази) в руки вашя. 15 И рече ему царь: колико крат заклинаю тя, да не глаголеши мне, токмо истину во имя Господне. 16 И рече Михеа: видех всего Израиля расточена по горам яко овцы, имже несть пастыря: и рече Господь: не имут сии вожда, да возвратятся кийждо в дом свой в мире. 17 И рече царь Израилев ко Иосафату: не рех ли тебе, яко не прорицает о мне благая, но токмо злая? 18 И рече Михеа: не тако: слышите слово Господне: видех Господа седяща на престоле Своем, и вся сила небесная предстояше одесную Его и ошуюю Его: 19 и рече Господь: кто прельстит Ахаава царя Израилева, да взыдет и падет в Рамофе Галаадстем? И глаголаше един тако, и ин рече тако: 20 и изыде дух, и ста пред Господем, и рече: аз прельщу его: емуже Господь, в чем, рече, (прельстиши)? 21 И рече: изыду и буду дух лжив во устех всех пророков его: рече же (Господь): прельстиши и превозможеши, изыди и сотвори тако: 22 и ныне се, Господь даде духа лжива во уста всем пророком твоим сим, и Господь глагола о тебе злая. 23 И приступи Седекиа сын Ханаань, и удари Михею в ланиту и рече ему: коим путем пройде Дух Господень от мене, еже глаголати к тебе? 24 Рече же Михеа: се, узриши в день той, егда внидеши в ложницу из ложницы, да укрыешися. 25 И рече царь Израилев: возмите Михею, и отведите ко Еммиру началнику града и ко Иоасу князю сыну цареву, 26 и рцыте: сия глаголет царь: вверзите сего в темницу, и да яст хлеб печали и воду печали, дондеже возвращуся в мире. 27 Рече же Михеа: аще возвращаяся возвратишися в мире, не глагола Господь мною. И рече: слышите, вси людие. 28 И взыде царь Израилев и Иосафат царь Иудин в Рамоф Галаадский. 29 Рече же царь Израилев ко Иосафату: прикрыюся и вниду во брань, ты же облецыся в ризы моя. И прикрыся царь Израилев и вниде во брань. 30 Царь же Сирский повеле вождем колесниц своих, глаголя: не устремляйтеся на мала и на велика, но токмо на самаго царя Израилева. 31 И бысть егда увидеша началницы колесниц Иосафата, глаголаша: царь Израилев есть сей. И обыдоша его воююще. Иосафат же возопи ко Господу, и Господь послуша его, и отврати их Бог от него. 32 И бысть егда увидеша воеводы колесниц, яко не бяше царь Израилев, оставиша его. 33 И муж наляче лук приметно и порази царя Израилева между легким и персями. И рече возатаю своему: обрати руку твою и изведи мя от брани яко изнемогох. 34 И скончана бысть брань в день той, и царь Израилев бе стоя на колеснице своей противу Сириом даже до вечера, и умре заходящу солнцу. === 19 === 1 И возвратися Иосафат царь Иудин в дом свой мирно во Иерусалим. 2 И изыде во сретение ему Ииуй сын Ананиин пророк и рече к нему: царю Иосафате, нечестиву ли даеши помощь, или ненавидимому от Господа дружиши? И рече ему Ииуй: сего ради бысть на тя гнев Господень: 3 но токмо дела благая обретошася в тебе, зане отял еси кумиры от земли Иудины и исправил еси сердце твое взыскати Господа. 4 И вселися Иосафат во Иерусалиме, и паки изыде к людем от Вирсавеи даже до горы Ефремли, и возврати их ко Господу Богу отец своих. 5 И постави судии во всех градех Иудиных крепких, во всяцем граде, 6 и рече судиям: видите, что вы творите, не человеческий бо вы суд творите, но Господень, и с вами словеса суда: 7 и ныне да будет страх Господень на вас, и храните и творите, яко несть у Господа Бога нашего неправды, ниже дивления лицу, ни приятия мзды. 8 Во Иерусалиме же постави Иосафат левитов и священников и отценачалников от Израиля в суд Господень, да судят живущих во Иерусалиме. 9 Повеле же им, глаголя: тако творите во страсе Господни, во истине и сердцем совершенным: 10 всякую распрю, яже приидет к вам, братий ваших обитающих во градех своих, между кровию крове, и между повелением и заповедию, и оправданьми и судбами, разсудите им, да не согрешают Господеви, и не приидет гнев на вас и на братию вашу: тако творите и не согрешите: 11 и се Амариа, священник вождь над вами во всяко слово Господне: и Завдиа сын Исмаиль вождь в дому Иудине во всякому слову цареву: и книжницы и левити пред вами: укрепитеся и творите, и будет Господь со благим. === 20 === 1 По сих же приидоша сынове Моавли и сынове Аммони и с ними от Амманитов ко Иосафату на брань. 2 Приидоша же и сказаша Иосафату, глаголюще: идет противу тебе велико множество от об он пол моря от Сирии, и се, стоят во Асасан-Фамаре, иже есть Енгадди. 3 И убояся, и вдаде Иосафат лице свое взыскати Господа, и проповеда пост во всей Иудеи. 4 И собрася весь Иуда взыскати Господа: и от всех градов Иудиных приидоша ко умолению Господню. 5 И ста Иосафат в собрании Иуды во Иерусалиме, в дому Господни пред лицем двора новаго, 6 и рече: Господи Боже отец наших, не Ты ли еси Бог на небеси горе, и Ты владычствуеши всеми царствы язык, и в руку Твоею есть крепость силы, и кто противостанет Тебе? 7 Не Ты ли еси Бог наш искоренивый живущыя на земли сей от лица людий Твоих Израиля, и дал еси ю семени Авраамлю возлюбленному Твоему во веки? 8 И вселишася на ней, и устроиша в ней святыню имени Твоему, глаголюще: 9 аще нападут на ны злая, мечь, суд, губителство, глад, станем пред домом сим и пред Тобою, яко призвано имя Твое в дому сем, и возопием к Тебе от скорбей наших, и услышиши и спасеши: 10 и ныне се, сынове Аммони и Моавли и гора Сиир, сквозе яже не изволил еси Израилю проити, егда исхождаху от земли Египетския, но уклонишася от них и не избиша их: 11 и се, ныне сии нападают на ны исходяще изгонити нас от наследия нашего, еже предал еси нам. 12 Господи Боже наш, не судиши ли им? В нас бо несть толика крепость, да можем сему множеству сопротивитися, еже нападе на ны, и не вемы что соделати имамы им: но токмо очи наши к Тебе. 13 И весь Иуда стояше пред Господем, и чада их, и жены их. 14 Бе же Иозиил сын Захариин, сынов Ванеа, сынов Елеила, сынов Мафаниа левитина, от сынов Асафовых, и бысть на нем Дух Господень посреде народа, 15 и рече: слышите, весь Иуда и обитающии во Иерусалиме, и ты, царю Иосафате: сия рече Господь вам: не бойтеся, ниже ужасайтеся от лица народа сего многаго, несть бо ваше ополчение, но Божие: 16 заутра изыдите противу их: се, восходят по восходу Ассис, и обрящете их на краи реки противу пустыни Иериил: 17 не ваше есть воевати: сия разумейте и узрите сие спасение Господне с вами, Иудо и Иерусалиме: не убойтеся, ни ужасайтеся заутра изыти противу их, и Господь с вами. 18 И преклонься Иосафат на лице свое, и весь Иуда, и обитающии во Иерусалиме, падоша пред Господем поклонитися Господеви. 19 И восташа левити от сынов Каафовых и от сынов Кореовых, хвалити Господа Бога Израилева гласом великим в высоту. 20 И заутра восташа рано и изыдоша в пустыню Фекое. И внегда исходити им, ста Иосафат (посреде их), и возопи и рече: услышите мя, мужие Иудины и вси обитающии во Иерусалиме: веруйте в Господа Бога нашего и уверитеся: веруйте пророку Его, и благопоспешится вам. 21 И советова с людьми, и постави псалмопевцы, и хвалящих исповедатися, и хвалити святая, внегда изыти пред силою, и глаголаху: исповедайтеся Господеви, яко благ, яко в век милость Его. 22 Егда же начаша хваления и исповедания, обрати Господь воевати сынов Аммоних на Моава и гору Сиир, изшедших на Иуду, и поражени быша. 23 И восташа сынове Аммони и Моавли на обитающих в горе Сиири, да побиют их и сокрушат: и егда скончаша обитающих в Сиире, восташа друг на друга, да потребятся. 24 Иуда же прииде на созирание от пустыни, и воззре, и виде множество: и се, вси мертви падше на землю, и не бе спасыйся. 25 И изыде Иосафат и людие его взяти корысти их, и обретоша скота много, и одежды, и корысти, и сосуды дражайшыя и плениша их: и быша собирающе корысти их три дни, яко многи бяху. 26 Дне же четвертаго собрахуся во удоль благословения, ибо тако благословиша Господа: сего ради прозваша место то удоль благословения даже до сего дне. 27 И возвратишася вси мужие Иудины во Иерусалим и Иосафат вождь их с веселием великим: яко возвесели их Господь о вразех их. 28 И внидоша во Иерусалим со псалтирми и гусльми и трубами в дом Господень. 29 И бысть страх Господень на вся царства земная, внегда услышати им, яко порази Господь враги Израилевы. 30 И умирися царство Иосафатово, и даде ему Господь покой окрест. 31 И царствова Иосафат над Иудою, сый лет тридесяти пяти, егда царство прия и двадесять пять лет царствова во Иерусалиме. Имя же матери его Азува, дщи Салиина. 32 И хождаше в путех отца своего Асы, и не уклонися от них творити правое пред Господем: 33 обаче высокая еще бяху, и еще людие не управиша сердца своего ко Господу Богу отец своих. 34 Прочая же деяния Иосафатова первая и последняя, се, писана суть во словесех Ииуа сына Ананиина, иже написа книгу царей Израилевых. 35 И по сих сообщися Иосафат царь Иудин со Охозиею царем Израилевым, и сей беззаконнова, 36 занеже сотвори, и отиде к нему, да сотворят корабли, еже ити во Фарсис: и сотвори корабли в Гасион-Гавере. 37 И пророчествова Елиезер сын Додиа от Марисиса на Иосафата, глаголя: понеже возимел еси любовь со Охозиею, сокруши Господь дело твое, и сокрушишася корабли твоя и не возмогоша поити во Фарсис. === 21 === 1 И успе Иосафат со отцы своими, и погребен бысть с ними во граде Давидове. И воцарися Иорам сын его вместо его. 2 И братия его сынове Иосафатовы шесть: Азариа и Иеил, и Захариа и Азариа, и Михаил и Сафатиа: вси сии сынове Иосафата царя Иудина. 3 И даде им отец их многи дары: сребро и злато, и оружие со грады крепкими во Иудеи, царство же даде Иораму, понеже сей бе первенец. 4 И воста Иорам на царство свое, и укрепися, и изби всю братию свою мечем и некиих от началник Израилевых. 5 Тридесяти и дву лет бе Иорам, егда нача царствовати, и осмь лет царствова во Иерусалиме, 6 и хождаше по путем царей Израилевых, якоже содела дом Ахаавль: дщи бо Ахаавля бысть жена его: и сотвори злое пред Господем. 7 И не хоте Господь искоренити дому Давидова ради завета, егоже завеща с Давидом, и якоже рече ему, дати ему светилник и сыном его во вся дни. 8 Во днех онех отступи Едом от Иуды и постави себе царя. 9 И пойде Иорам с началники своими, и вся конница с ним: и бысть, и воста нощию, и порази Едома, иже обыде окрест его, и началники колесниц: и побегоша людие в селения своя. 10 И отступи от Иуды Едом даже до сего дне тогожде времене и Ловна отступи из под руки его, зане остави Господа Бога отец своих: 11 ибо той сотвори высокая бо градех Иудиных, и блудити сотвори обитающих во Иерусалиме и прельсти Иуду. 12 И прииде к нему писание от Илии пророка, глаголя: сия рече Господь Бог Давида отца твоего: понеже не ходил еси по пути Иосафата отца твоего и в путех Асы царя Иудина, 13 и ходил еси в путех царей Израилевых, и блудити сотворил еси Иуду и обитающих во Иерусалиме, якоже соблуди дом Ахаавль, и братию твою, сыны отца твоего, лучшх тебе избил еси, 14 се, Господь поразит тя язвою великою с людьми твоими и с сынми твоими и с женами твоими и со всем имением твоим: 15 ты же будеши в язве лютей, в болезни чрева, дондеже изыдут внутренняя твоя с язвою от дний во дни. 16 И воздвиже Господь на Иорама иноплеменники и Аравов и сопределныя Ефиопы: 17 и взыдоша на Иуду, и преодолеша, и плениша вся сокровища, яже обретоша в дому цареве, и сынов его и дщери его и жены его, и не остася ему сын, токмо Охозиа менший сынов его. 18 И по сих всех порази его Господь чрева болезнию неизцельною. 19 И бысть от дний во дни, и егда прииде время дний два дни, и изыде чрево его с болезнию, и умре в разслаблении лютем. И не сотвориша ему людие по обычаю погребения, якоже погребение отцем его. 20 Тридесяти двою лет бяше, егда царствовати нача, и осмь лет царствова во Иерусалиме: ходи же не хвально, и погребоша его во граде Давидове, обаче не во гробех царских. === 22 === 1 Поставиша же царем обитающии во Иерусалиме Охозию сына его меншаго вместо его: всех бо старших избиша нашедшии на них разбойницы Арави и Алимазоняне, и воцарися Охозиа сын Иорамов царь Иудин: 2 двадесяти дву лет сый Охозиа царствовати нача, и едино лето царствова во Иерусалиме. И имя матери его Гофолиа дщи Амвриина. 3 И сей ходил есть по пути дому Ахаавля, мати бо его бе советница, да грешит: 4 и сотвори лукавое пред Господем якоже дом Ахаавов, сии бо быша ему советницы по смерти отца его, в погубление ему, 5 и в советех их хождаше: и пойде со Иорамом сыном Ахаава царя Израилева на брань противу Азаила царя Сирска в Рамоф Галаадский. И поразиша стрелцы Иорама. 6 И возвратися Иорам изцелитися во Иезраель от ран, имиже раниша его Сиряне в Рамофе, внегда братися ему со Азаилем царем Сирским. Охозиа же сын Иорамль царь Иудин сниде посетити Иорама сына Ахаавля во Иезраель, разболеся бо. 7 И от Бога бысть превращение Охозии, да приидет ко Иораму: и внегда приити ему, изыде с ним Иорам противу Ииуа сына Намессиина, егоже помаза Господь на дом Ахаавль. 8 И бысть егда отмсти Ииуй дому Ахаавлю, и обрете началники Иудины и братию Охозиину, служащих Охозии, и уби их: и уби Ииуй Иорама, и убежа Охозиа. 9 И рече Ииуй, еже взыскати Охозию: и яша его врачующася в Самарии и приведоша его ко Ииуеви, и уби его, и погребоша его: реша бо, яко сын Иосафатов есть, иже взыска Господа всем сердцем своим. И не бысть в дому Охозиине восприяти силу о царстве. 10 И Гофолиа мати Охозиина виде, яко умре сын ея, и воста и погуби все семя царское в дому Иудине. 11 И взя Иосавееф дщи царева Иоаса сына Охозиина, и украде его от среды сынов царевых, егда убиваху их, и даде его и кормилицу его в храмину постельнюю, и скры его Иосавееф дщерь царя Иорама, сестра Охозиина, жена Иодаа архиереа, и скры его от лица Гофолиина, и не уби его. 12 И бысть с ними в дому Божии сокрыт шесть лет, и царствова Гофолиа на земли. === 23 === 1 В лето же седмое укрепися Иодай, и взя сотники, Азарию сына Иорамля и Исмаила сына Иоананя, и Азарию сына Овидова и Амасию сына Адиева и Елисафана сына Захариина с собою в дом Господень. 2 И обыдоша Иудею, и собраша левиты от всех градов Иудиных и началники отечеств Израилевых, и приидоша во Иерусалим. 3 И завеща все собрание Иудино завет в дому Божии со царем: и показа им сына царева и рече им (Иодай): се, сын царев да воцарится, якоже глагола Господь о доме Давидове: 4 и ныне слово сие, еже сотворите: третия часть от вас да изыдет в субботу, священников и левитов, и во врата входов, 5 и третия часть в дому цареве, и третия часть во вратех средних, и вси людие (да будут) во дворех дому Господня: 6 и никтоже да внидет в дом Господень, токмо священницы и левити и иже служат от левит: тии внидут, яко освящени суть, вси же людие да держат стражу Господню: 7 левити же да ходят окрест царя, кийждо имея оружие свое в руку своею, и входяй в церков да убиется, и да будут со царем, входящу ему и исходящу. 8 И сотвориша левити и весь Иуда по всему, елика повеле им Иодай жрец: и взяша кийждо мужы своя от начала субботы даже до исхода субботы: занеже не остави Иодай жрец службы дневныя. 9 И даде Иодай священник сотником по чину поставленным мечы и щиты и броня, яже бяху царя Давида в дому Божии, 10 и постави вся люди, коегождо во оружии его, от десныя страны церкве даже до левыя страны олтаря и церкве, над царем окрест: 11 и изведе сына царева, и возложиша на него диадиму и свидения, и поставиша его царем, и помаза его Иодай жрец и сынове его и рекоша да живет царь. 12 И услыша Гофолиа глас людий текущих и исповедающих и хвалящих царя, и вниде ко царю в церковь Господню, 13 и виде, и се, царь стояше на степени своем, на входе же князи и трубы, и началницы окрест царя: и вси людие земли возрадовашася и вострубиша трубами, и поюще во органы певцы, и хваляще хвалою. И растерза Гофолиа ризы своя, и возопи и рече: нападающе нападаете. 14 Изыде же Иодай архиерей, и повеле сотником и началником силы и рече им: изрините ю вон из церкве, и изыдите вслед ея, и да убиется мечем. Рече бо священник да не умрет в дому Господни. 15 И даша ей ослабу на мало, дондеже пройде врата конник дому царева и убиша ю тамо. 16 И завеща Иодай завет между собою и всеми людьми и царем, да быша были людие Господни. 17 И внидоша вси людие земли в дом Ваалов и разориша его, и олтари его и идолы его сокрушиша, и Матфана жерца Ваалова убиша пред олтарем его. 18 И вручи Иодай жрец дела дому Господня в руку священников и левитов, и возстави дневныя чреды жерцев и левитов, яже раздели Давиде в дому Господни, и вознесе всесожжения Господеви, якоже писано есть в законе Моисеове, в радости и пениих по расположению Давидову: 19 и постави придверники во вратех дому Господня, и да не внидет нечист во всяцей вещи: 20 и взя отечеств началники, и сильныя, и началники людий, и вся люди земли, и возведоша царя от дому Господня, и вниде вратами внутренними в дом царев, и посадиша царя на престоле царстем. 21 И возвеселишася вси людие земстии и град упокоися, и Гофолиа убиена есть мечем. === 24 === 1 Седми лет бе Иоас, егда царствовати нача, и четыредесять лет царствова во Иерусалиме. Имя же матери его Савиа от Вирсавеи. 2 Сотвори же Иоас угодное пред Господем во вся дни Иодаа священника. 3 И поят ему Иодай жены две, и родиша сыны и дщери. 4 И бысть по сих, и взыде на сердце Иоасу, да возновит дом Господень. 5 И собра священники и левиты и рече им: идите во грады Иудины, и соберите от всего Израиля сребро ко обновлению храма Господня от лета до лета, и поспешно сотворите. Левити же не потщашася. 6 И призва царь Иоас Иодаа началника и рече ему: почто не надсматрял еси левитов, еже принести от Иуды и от Иерусалима, еже уставлено есть от Моисеа человека Божия, егда собра Израиля в скинию свидения? 7 Гофолиа бо бе нечестива, и сынове ея разориша дом Божий, яко святая дому Господня сотвориша Ваалиму. 8 И повеле царь, да сотворят ковчежец и поставят при вратех Господних извне, 9 и да проповедят во Иудеи и во Иерусалиме, приносити Господу, якоже устави Моисей раб Божий над Израилем в пустыни. 10 И даша вси началницы и вси людие, и вношаху и влагаху в ковчежец, дондеже наполнися. 11 И бысть егда приношаху ковчежец к настоятелем царевым руками левитскими, и егда увидеша, яко умножися сребро, и прихождаше писарь царев и настоятель великаго жерца, и выбираху из ковчежца, и (паки) поставляху на место его: тако творяху от дне до дне, и собраша сребра много. 12 И вдаде е царь и Иодай жрец творящым дела на дело дому Господня: и наимаху каменосечцы и древодели, да устрояют дом Господень, и ковачы железу и меди, да укрепят дом Господень. 13 И творяху творящии дела, и взыде долгота дел руками их, и возставиша дом Господень в состояние (прежнее) его, и укрепиша. 14 Егда же совершиша, принесоша ко царю и ко Иодаю останок сребра, из негоже сотвориша сосуды в дом Господень, сосуды в служение всесожжений, и кадилницы златыя и сребряныя, и приношаху всесожжения в дому Господни непрестанно, во вся дни Иодаевы. 15 И состареся Иодай исполнен дний, и умре сый ста тридесяти лет внегда скончатися ему: 16 и погребоша его во граде Давидове со царми, понеже сотвори благое со Израилем и с Богом и с домом Его. 17 И бысть по скончании Иодаеве, внидоша началницы Иудины и поклонишася царю: тогда послуша их царь. 18 И оставиша церковь Господа Бога отец своих и служаху Астарте и истуканным: и бысть гнев (Господень) на Иуду и Иерусалим в день той. 19 И посла к ним пророки, да обратятся ко Господу, и не послушаша: и засвидетелствова им, и не покоришася. 20 И Дух Божий облече Азарию священника сына Иодаева, и ста пред людьми и рече им: сия глаголет Господь: почто преступаете повеления Господня? Не поспешится вам, яко остависте Господа, и оставит вас. 21 И нападоша на него и побиша и камением по повелению Иоаса царя, во дворе дому Господня. 22 И не воспомяну Иоас царь милосердия, еже сотвори Иодай отец его с ним, но уби сына его: иже, егда умираше, рече: да видит и судит Господь. 23 И бысть по скончании лета, воста на него сила Сирская, и прииде на Иуду и на Иерусалим, и убиша вся началники в людех в церкви, и весь плен их послаша ко царю в Дамаск: 24 зане в малых мужех прииде сила Сирская, и Бог предаде в руце их силу многу зело, зане оставиша Господа Бога отец своих: и на Иоаса сотвори суд. 25 И по отшествии их от него, оставлену ему сущу в болезнех великих, и нападоша на него раби его за кровь священника сына Иодаева, и убиша его на постели его, и умре: и погребоша его во граде Давидове, но не погребоша его во гробех царских. 26 Нападшии же на него, Завед сын Семаафов Амманитянин и Иозавед сын Самарифов Моавитянин, 27 и сынове его вси, и приступиша к нему пять. И прочая словес его, се, написана в летописце царстем. И воцарися Амасиа сын его вместо его. === 25 === 1 Двадесяти пяти лет бысть Амасиа, егда царствовати нача, и двадесять девять лет царствова во Иерусалиме. Имя же матери его Иоадаень от Иерусалима. 2 И сотвори правое пред Господем, обаче не сердцем совершенным. 3 И бысть егда утвердися царство в руце его, и умертви рабы своя иже убиша царя отца его. 4 Сынов же их не изби по заповедем закона Господня, якоже писано есть в книзе закона Моисеова, якоже повеле Господь, глаголя: не умрут отцы за сыны, и сынове не умрут за отцы, но кийждо во гресе своем умрет. 5 И собра Амасиа дом Иудин, и постави их по домом отечеств их в тысящники и сотники, во всей Иудеи и Вениамине: и сочте их от двадесяти лет и вышше, и обрете их триста тысящ сильных исходити на брань, держащих копия и щиты. 6 Еще же ная от Израиля сто тысящ храбрых в силе, за сто талант сребра. 7 И прииде человек Божий к нему, глаголя: о, царю да не изыдет с тобою сила Израилева, несть бо Господь со Израилем, со всеми сыны Ефремли: 8 яко аще мниши укрепитися с ними, в бегство обратит тя Господь пред враги, зане от Господа есть укрепитися и в бегство обратитися. 9 Рече же Амасиа к человеку Божию: и что сотворю о сте талантах, яже дах силе Израилеве? И рече человек Божий: имать Господь дати тебе множае сих. 10 И отлучи Амасиа силу пришедшую к нему от Ефрема, отити на место свое. И разгневашася зело на Иуду, и возвратишася во страну свою во гневе ярости. 11 И Амасиа укрепися, и взя люди своя и иде во удоль Сланую, и порази тамо сынов Сиир десять тысящ. 12 И десять тысящ живых яша сынове Иудины, и приведоша их на верх некоторыя стремнины, и свергоша их стремглав с высоты стремнины, и вси разседошася. 13 Сынове же силы, ихже отсла Амасиа, да не идут с ним на брань, нападоша на грады Иудины от Самарии даже до Вефорона: и убиша от них три тысящы, и плениша плен мног. 14 И бысть егда возвратися Амасиа поразив Идумею, и принесе себе богов сынов Сиир, и постави в боги себе, и покланяшеся им и сам кадяше им. 15 И бысть гнев Господень на Амасию, и посла к нему пророка, и рече ему: почто взыскал еси богов людских, иже не избавиша людий своих от руку твоею? 16 И бысть егда той глаголаше к нему, и отвеща ему: еда советника царева поставих тя? Внемли, да не биен будеши. И умолча пророк и рече: вем, яко восхоте Господь потребити тя, занеже сотворил еси сие зло) и не послушал еси совета моего. 17 И совеща Амасиа царь Иудин, и посла ко Иоасу сыну Иоахаза сына Ииуева, ко царю Израилеву, глаголя: прииди, да увидимся между собою в лице. 18 И посла Иоас царь Израилев ко Амасии царю Иудину, глаголя: терн, иже в Ливане, посла ко кедру ливанску, глаголя: даждь дщерь твою сыну моему в жену, и се, приидут зверие, иже в дубраве Ливанстей: и приидоша зверие и потопташа терн: 19 рекл еси: се, поразих Идумею, и воздвизается сердце твое в гордыню: ныне седи в дому твоем, и почто совещаваеши себе лукавое? Падеши ты и Иуда с тобою. 20 И не послуша Амасиа, зане от Господа бысть, да предастся в руки Иоасу, яко взыска богов Идумейских. 21 И взыде Иоас царь Израилев, и явистася друг другу, той и Амасиа царь Иудин, в Вефсамисе, иже есть Иудин. 22 И паде Иуда пред лицем Израилевым, и бежа кийждо в жилище свое. 23 И Амасию царя Иудина сына Иоасова, сына Охозиина, ят Иоас царь Израилев в Вефсамисе, и введе его во Иерусалим, и разори стены Иерусалимли от врат Ефремлих даже до врат угла на четыреста лакот: 24 и все злато и сребро, и вся сосуды обретшыяся в дому Господни и у Авдедома, и сокровища дому царева, и сынов залога, и возврати в Самарию. 25 И поживе Амасиа сын Иоасов, царь Иудин, по умертвии Иоаса сына Иоахазова царя Израилева пятьнадесять лет. 26 Прочая же словеса Амасиина первая и последняя, не се ли, писана суть в книзе царей Иудиных и Израилевых? 27 И во время егда Амасиа отступи от Господа, и нападоша на него нападением, и побеже из Иерусалима в Лахис. И послаша вслед его в Лахис, и убиша его ту. 28 И взяша его на конех и погребоша его со отцы его во граде Давидове. === 26 === 1 И взяша вси людие Иудины (сына его) Озию, он же бе лет шестинадесяти, и поставиша его царем вместо Амасии отца его. 2 Той созда Елаф, той возврати его Иуде по успении царя со отцы его. 3 Шестинадесяти лет бысть Озиа, егда царствовати нача, и пятьдесят два лета царствова во Иерусалиме. Имя же матери его Иехелиа от Иерусалима. 4 И сотвори правое пред Господем по всем, елика сотвори Амасиа отец его, 5 и бе взыская Господа во дни Захарии разумеющаго во страсе Господни, и во дни его взыска Господа, и благопоспеши ему Господь. 6 И изыде, и ополчися противу иноплеменников, и разори стены Гефски и стены Иавнира и стены Азота и созда грады Азотски и во иноплеменницех. 7 И укрепи его Господь противу иноплеменников и противу Аравов, иже обитаху в камениих, и противу Минеов. 8 И даша Минее дары Озии, и прослы имя его даже до входа Египетскаго, понеже укрепися до высоты. 9 Созда же Озиа столпы во Иерусалиме и над враты угла и над враты юдольными и над углами, и укрепи их: 10 и устрои столпы в пустыни, и ископа кладязи многи, понеже имяше многи скоты на поли и в пустыни, и делатели виноградов на горах и на Кармиле, бе бо муж любоземледелен. 11 Бысть же Озии сила творящая брань, и исходящая к ополчению на брань, и входящая на ополчение в число: и бе число их под рукою Иеиля писаря и Маасии судии и под рукою Анании наместника царска. 12 Все число отечеств началников сильных на брань две тысящы шесть сот, 13 и с ними силы военныя триста седмь тысящ и пять сот: сии творяху брань в силе крепце, помогающе царю противу супостат. 14 Уготова же им Озиа всей силе щиты и копия, и шлемы и броня, луки же и пращы на метание камения. 15 И сотвори во Иерусалиме хитрости ухищреныя вымыслом, еже быти им на столпех и на углех, да мещут стрелы и камения велия: и слышано бысть устроение его до далеча, понеже удивлен бысть ищя помощи (от Господа), дондеже укрепися. 16 И егда укрепися, вознесеся сердце его на пагубу (свою): и обиде Господа Бога своего, и вниде в церковь Господню покадити над олтарем фимиамов. 17 И вниде по нем Азариа священник и с ним священницы Господни осмьдесят, сынове сильнии. 18 И сташа противно Озии царю и рекоша ему: несть твое, Озие, да кадиши фимиамом Господеви, но токмо священником сыном Аароним освященным кадити: изыди из святилища, яко отступил еси от Господа: и не вменится тебе сие во славу от Господа Бога. 19 И прогневася Озиа, и в руку его кадилница еже кадити во храме: и внегда разярися он на жерцы Господни, и проказа взыде на чело егоже пред священники в дому Господни, на олтари фимиамнем. 20 И обратися к нему Азариа архиерей и священницы, и се, той прокажен на челе своем, и изгнаша его оттуду, ибо и сам тщашеся изыти, яко обличи его Господь. 21 Бысть же Озиа царь прокажен даже до дне смерти своея и седяше в дому отлучене прокажен, понеже отторжен бысть от дому Господню: Иоафам же сын его бе над царством его судя людем земли. 22 Прочая же словеса Озии первая и последняя написана у Исаии сына Амосова пророка. 23 И успе Озиа со отцы своими, и погребоша его со отцы его в поли царских гробов, зане реша, яко прокажен бысть. И воцарися Иоафам сын его вместо его. === 27 === 1 Сын двадесяти и пяти лет бяше Иоафам, егда царствовати нача, и шестьнадесять лет царствова во Иерусалиме. Имя же матере его Иеруса, дщи Садокова. 2 И сотвори правое пред Господем по всем, яже сотвори Озиа отец его, обаче не вниде в церковь Господню, и еще людие согрешаху. 3 Той созда врата дому Господня высокая, и на стене Офли созда многа: 4 и грады созда на горах Иудиных, и в дубравех дворы и столпы. 5 И той ополчися противу царя сынов Аммоних и одоле его: и даяху ему сынове Аммони на всякое лето по сту талант сребра и десять тысящ кор (мер) пшеницы и десять тысящ ячменя: сия ему приношаше царь сынов Аммоних на лето, в первое лето и второе и третие. 6 И укрепися Иоафам, яко уготова пути своя пред Господем Богом своим. 7 Прочая же словеса Иоафамля, и брань, и деяния его, се, писана в книзе царей Иудиных и Израилевых. 8 Сын двадесяти и пяти лет бяше, егда царствовати нача, и шестьнадесять лет царствова во Иерусалиме. 9 Успе же Иоафам со отцы своими и погребен бысть во граде Давидове. И воцарися Ахаз сын его вместо его. === 28 === 1 Сын двадесяти и пяти лет бе Ахаз, егда царствовати нача, и шестьнадесять лет царствова во Иерусалиме: и не сотвори правое пред Господем, якоже Давид отец его. 2 И пойде по путем царей Израилевых: ибо и изваянная сотвори, 3 и идолом их пожре в земли Веенномли и проведе сынов своих сквозе огнь по мерзостем языков, ихже потреби Господь от лица сынов Израилевых: 4 и кадяше на высоких и на холмех и под всяким древом дубравным. 5 И предаде его Господь Бог его в руце царя Сирска и порази его, и плени от них плен мног, и приведе в Дамаск, и в руки царя Израилева предаде его, и порази его язвою великою. 6 И уби Факей сын Ромелиев царь Израилев от Иуды во един день сто двадесять тысящ мужей крепких силою, егда оставиша Господа Бога отец своих. 7 И уби Зехрий муж силен от Ефрема Маасию сына царева и Езрикама началника дому его и Елкана наместника царева. 8 Плениша же сынове Израилевы от братии своих триста тысящ жен, сынов и дщерей: и плен мног плениша от них, и принесоша корысти в Самарию. 9 И бе тамо пророк Господень, именем Одид, иже изыде во сретение воем грядущым в Самарию и рече им: се, гнев Господа Бога отец ваших противу Иуды, и предаде их в руки вашя, и убисте их во гневе, и даже до небесе достиже (ваше немилосердие): 10 и ныне сынов Иудиных и Иерусалимлих вы глаголете покорити в рабы и рабыни: не се ли, аз есмь с вами, свидетелствовати Господу Богу вашему? 11 И ныне послушайте мене и возвратите плен, егоже пленисте от братий ваших, яко гнев ярости Господни на вас. 12 И восташа началницы от сынов Ефремлих, Азариа сын Иоанан и Варахиа сын Васаллимофов, и Езекиа сын Селлумов и Амасиа сын Елдаев на грядущих от брани, 13 и рекоша им: не введите плена семо к нам, зане согрешим Господу, вы хощете приложити ко грехом нашым и к безумию нашему, велик бо грех наш, и гнев ярости Господни на Израили. 14 И оставиша воини плен и корысти пред началники и пред всем множеством. 15 И восташа мужие реченнии по имени и взяша плененых, и всех нагих облекоша от корыстей, и одеяша их и обуша их, и даша ясти и пити им и помазатися, и всадиша на подяремника всякаго немощнаго, и отвезоша их во Иерихон град финический ко братии их, и возвратишася в Самарию. 16 Во время оно посла царь Ахаз ко царю Ассурску, прося помощи себе и в том, 17 понеже Идумеане нападоша и поразиша Иуду и плениша плен: 18 и иноплеменницы нападоша на грады напольныя и от полуденныя Иудеи и взяша Вефсамис, и яже в дому Господни, и яже в дому царстем, и князей, и даша царю Аилон и Гадироф, и Сохоф и веси его, и Гамзон и веси его, и Фамну и веси ея, и вселишася тамо. 19 Яко смири Господь Иудею ради Ахаза царя Иудина, понеже отступи отступлением от Господа. 20 И прииде на него Фелгафелласар царь Ассурский, и озлоби его, и пресели, иже бяху в Дамасце, в Мидию, из Сирии же пресели в Дамаск пребывати. 21 И взя Ахаз сущая в дому Господни и яже в дому царстем и у началников, и даде царю Ассурску: и не бысть на помощь ему, но токмо к печали его. 22 И приложи отступити от Господа и рече царь Ахаз: 23 взышу богов Дамасковых биющих мя. И рече: бози царя Сирска, тии укрепляют их, сим убо пожру, и будут ми в помощь. Тии же быша к падению его и всего Израиля. 24 И остави Ахаз сосуды дому Господня и сокруши их, и заключи врата дому Божия, и сотвори себе требища во всех углех Иерусалима, 25 и во всех градех Иудиных сотвори высокая, еже кадити богом чуждим, и разгнева Господа Бога отец своих. 26 Прочая же словеса его и деяния его первая и последняя, се, писана суть в книзе царей Иудиных и Израилевых. 27 И успе Ахаз со отцы своими, и погребоша его во граде Давидове, ибо не внесоша его во гробы царей Израилевых. И воцарися Езекиа сын его вместо его. === 29 === 1 И Езекиа нача царствовати сый двадесяти и пяти лет, и двадесять девять лет царствова во Иерусалиме. Имя же матери его Авиа, дщерь Захариина. 2 Сотвори же правое пред Господем по всем, яже сотвори Давид отец его. 3 И бысть егда ста на царстве своем в месяц первый, отверзе двери дому Господня и обнови их, 4 и введе священники и левиты, и постави их на стране яже к востоку, 5 и рече им: послушайте мя, левити, ныне очиститеся и очистите дом Господа Бога отец наших, и изрините нечистоту из святилища: 6 яко отступиша отцы наши и сотвориша лукавое пред Господем Богом нашим, и оставиша Его, и отвратиша лице свое от скинии Господни, и даша хребет, 7 и заключиша врата храма, и погасиша светилники, и фимиамом не кадиша, и всесожжений не принесоша во святилищи Богу Израилеву: 8 и разгневася яростию Господь на Иуду и на Иерусалим, и предаде их во ужас и погубление и на звиздание, якоже вы видите очима вашима: 9 и се, поражени быша отцы наши мечем, и сынове наши и дщери нашя и жены нашя в пленении в земли не своей, якоже и ныне суть: 10 ныне убо положите на сердца ваша, еже завещати завет с Господем Богом Израилевым, и отвратит гнев ярости Своея от нас: 11 и ныне не пренебрегайте, яко вас избра Господь стояти пред Ним, служити Ему, и да будете Ему служаще и кадяще. 12 И восташа левити, Маал сын Амасиев и Иоиль сын Захариев от сынов Каафовых, и от сынов Мерариных Кис сын Авдиев и Азариа сын Илаелилов, и от сынов Гедсоних Иоадад сын Земмань и Иоадам, сии сынове Иоахаини: 13 от сынов Елисафаних Самарий и Иеиил, и от сынов Асафовых Захариа и Матфаниа, 14 и от сынов Еманих Иеиил и Семей, от сынов же Идифумлих Самафиа и Озиил: 15 собраша же братию свою и освятишася по заповеди цареве повелением Господним, да очистят дом Божий: 16 и внидоша священницы внутрь церкве Господни, да очистят ю, и извергоша всю нечистоту обретенную в дому Господни и во дворе дому Господня: и вземше левити, изнесоша к потоку Кедрску вон. 17 И начаша в первый день новомесячия перваго месяца очищати, и в день осмый того месяца внидоша во храм Господень, и очистиша церковь Господню во осми днех, и в день шестыйнадесять месяца перваго совершиша. 18 И внидоша внутрь ко Езекии царю и рекоша: очистихом вся, яже в дому Господни, олтарь всесожжения и сосуды его, и трапезу предложения со всеми сосуды ея, 19 и вся сосуды, яже оскверни царь Ахаз в царство свое во отступлении своем, уготовахом и очистихом, и се, суть пред олтарем Господним. 20 И воста рано Езекиа царь, и собра началники града, и взыде в дом Господень, 21 и вознесе телцев седмь и овнов седмь, агнцев седмь и козлов от коз седмь за грех, за царство и за святилище и за Израиля, и рече сыном Аароним священником, да взыдут на олтарь Господень жрети телцев. 22 И заклаша телцев, и взяша кровь священницы и излияша на олтарь: и заклаша овнов и кровь на олтарь возлияша: и заклаша агнцев и облияша кровию олтарь: 23 и приведоша козлов, иже за грех, пред царя и церковь, и возложиша руки своя на них, 24 и пожроша их священницы, и покропиша кровию их пред олтарем, и помолишася о всем Израили: зане рече царь, о всем Израили всесожжение и яже о гресе. 25 Постави же левиты в дому Господни с кимвалы и псалтирми и гусльми, по заповеди Давида царя и Гада провидца царю и Нафана пророка, яко по заповеди Господней повеление (бысть) рукою пророков Его. 26 Сташа же левити со органы Давидовы и священницы с трубами. 27 И повеле Езекиа, да вознесут всесожжение на олтарь: и егда начаша возносити всесожжение, начаша хвалы пети Господеви и трубити при органех Давида царя Израилева. 28 И вся церковь покланяшеся, и певцы пояху, и трубы трубяху, дондеже совершися всесожжение. 29 Егда же скончаша приношение, преклонися царь и вси иже бяху с ним и поклонишася Господеви. 30 Повеле же Езекиа царь и князи левитом, да восхвалят Господа словесы Давидовыми и Асафа пророка: иже восхвалиша в веселии, и падоша, и поклонишася Господеви. 31 И отвеща Езекиа и рече: ныне исполнисте руки вашя Господу, приведите и принесите жертвы хваления в дом Господень. И принесе (все) собрание жертвы и хвалы в дом Господень, и всяк усердный сердцем всесожжения. 32 И бысть число всесожжения, еже принесе собрание, телцев седмьдесят, овнов сто, агнцев двести, вся сия во всесожжение Господеви: 33 освященных же телцев шестьсот, овец три тысящы. 34 Но священницы не мнози бяху и не можаху одирати кож всесожжения, и помогоша им братия их левити, дондеже исполнися дело и дондеже освятишася жерцы, левити бо усерднее освятишася, нежели священницы: 35 всесожжения же много в туках совершения спасения, и возлияний всесожжения: и исправися дело в дому Господни. 36 Возвеселися же Езекиа и вси людие, яко уготова Бог людем, понеже внезапу бысть слово. === 30 === 1 Посла же Езекиа ко всему Израилю и Иуде, и написа послания ко Ефрему и Манассии, да приидут к дому Господню во Иерусалим сотворити пасху Господу Богу Израилеву. 2 И усоветова царь и князи и все множество во Иерусалиме сотворити пасху во вторый месяц: 3 не возмогоша бо сотворити во время свое, яко священницы не очистишася доволни, и людие не у собрашася во Иерусалим. 4 И угодно бысть слово цареви и всему множеству. 5 И поставиша слово, да пройдет проповедь во весь Израиль от Вирсавеи даже до Дана, да приидут сотворити пасху Господу Богу Израилеву во Иерусалиме, мнози бо не сотвориша по писанию. 6 И поидоша гонцы с посланьми от царя и от началников во весь Израиль и Иудею по повелению цареву, глаголюще: сынове Израилевы, обратитеся ко Господу Богу Авраамлю и Исаакову и Иаковлю, и обратите спасшихся, иже избыша от руки царя Ассурска, 7 и не будите якоже отцы ваши и братия ваша, иже отступиша от Господа Бога отец своих, и предаде их в погубление, якоже вы видите: 8 и ныне не ожесточите сердец ваших, якоже отцы ваши: дадите славу Господу Богу и внидите во святилище Его, еже освяти во век, и служите Господу Богу вашему, и отвратит от вас гнев ярости Своея: 9 понеже егда обратитеся вы ко Господу, братия ваша и чада ваша будут в щедротах пред всеми пленившими их, и возвратит в землю сию, зане милостив и щедр Господь Бог наш, и не отвратит лица Своего от нас, аще обратимся к Нему. 10 И бяху гонцы проходяще от града во град, на горе Ефремли и Манассиине, даже и до Завулона: и быша яко посмеяваеми и поругаеми. 11 Но мужие от Асира и от Манассии и от Завулона устыдишася и приидоша в Иерусалим и во Иудею. 12 И бысть рука Господня дати им сердце едино приити, еже сотворити по повелению цареву и князей слово Господне. 13 И собрашася во Иерусалим людие мнози, да сотворят праздник опресноков в месяц вторый, сонм мног зело. 14 И восташа, и разориша олтари, иже во Иерусалиме, и вся, в нихже кадяху идолом, испровергоша и ввергоша их в поток Кедрский, 15 и пожроша пасху в четвертыйнадесять день месяца втораго: священницы же и левити умилишася и освятишася, и принесоша всесожжения в дом Господень: 16 и сташа в чине своем по обычаю своему, по заповеди Моисеа человека Божия, и священницы приемляху кровь от руку левитску. 17 Понеже мног народ освящен не бысть, левити же бяху жруще пасху всякому, иже не можаше освятитися Господу: 18 понеже болшая часть людий от Ефрема и Манассии, и Иссахара и Завулона освященна не бысть, но ядоша пасху не по писанию. 19 И помолися Езекиа о них глаголя Господь Бог благ да умилостивится о всяцем сердцы направившемся еже взыскати Господа Бога отец своих, а не по очищению святынь. 20 И услыша Господь Езекию и изцели люди. 21 И сотвориша сынове Израилевы обретшиися во Иерусалиме праздник опресноков седмь дний в веселии велице хваляще Господа на всяк день, левити же и священницы во органы Господу. 22 И глагола Езекиа ко всякому сердцу левитов, иже имех разум благ ко Господу: и скончаша праздник опресноков седмь дний жруще жертву спасения и исповедающеся Господу Богу отец своих. 23 И усоветова весь собор купно сотворити ины седмь дний (праздника): и сотвориша седмь дний иных в веселии. 24 Понеже Езекиа царь Иудин даде начатки всему народу тысящу телцев и седмь тысящ овец: началницы же даша людем телцев тысящу и овец десять тысящ, и освятишася священников множество. 25 И возрадовася вся церковь, священницы и левити, и все множество Иудино и обретшиися из Иерусалима, и пришелцы пришедшии от земли Израилевы и обитающии во Иудеи. 26 И бысть веселие велие во Иерусалиме: яко от дний Соломона, сына Давидова царя Израилева, не бысть таковый праздник во Иерусалиме. 27 И восташа священницы и левити и благословиша людий, и услышан бысть глас их, и прииде моление их в жилище святое Его на небо. === 31 === 1 Егда же сия вся совершишася, изыде весь Израиль обретшийся во градех Иудиных, и сокрушиша идолы и посекоша дубравы, и разориша высокая и требища от всея Иудеи и Вениамина, и от Ефрема и от Манассии в конец: и возвратися весь Израиль, кийждо во одержание свое и во грады своя. 2 И устави Езекиа чреды священников и левитов, и чреды коегождо по служению его, священников и левитом, во всесожжение и в жертву спасения, и дабы хвалили и исповедалися и служили во вратех во дворех дому Господня. 3 Часть же царева бысть от имения его во всесожжение утреннее и вечернее, и всесожжения в субботы и в новомесячия и в праздники писанныя в законе Господни. 4 И заповеда людем живущым во Иерусалиме дати часть священником и левитом, да укрепятся во служении дому Господня. 5 И егда устави слово, даша много сынове Израилевы начаток пшеницы и вина и елеа и меда, и вся яже родит земля, и десятины вся принесоша зело много сынове Израилевы и Иудины. 6 И иже обитаху во градех Иудиных, и тии принесоша десятины от телцев и овец, и десятины от коз, и посвятиша Господу Богу своему, и внесоша и положиша купы многи. 7 Месяца третияго начаша купам полагати основания, и месяца седмаго и совершиша их. 8 И вниде Езекиа и началницы, и видеша купы, и благословиша Господа и люди Его Израиля. 9 Вопроси же Езекиа священников и левитов о купах. 10 И отвеща к нему Азариа священник началный в дому Садоков и рече отнележе начаша приносити начатки в дом Господень, ядохом и пихом, и оставихом даже до множества, яко благослови Господь люди Своя, и оставихом еще множество сие. 11 И повеле Езекиа еще уготовити житницы в дому Господни: и уготоваша. 12 И внесоша тамо начатки и десятины верно: над ними же бе настоятель Хонениа левит, и Семей брат его вторый, 13 и Иеиил и Озиа, и Наеф и Асаил, и Иеримоф и Иозавад, и Елиил и Самахиа, и Мааф и Ванаиа, и сынове его приставлени рукою Хонении и Семеа брата его, якоже повеле Езекиа царь и Азариа началник дому Господня. 14 И Корей сын Иемнаин левит, дверник к востоку над даяньми, еже даяти начатки Господни и Святая святых, 15 рукою Одома и Вениамина, и Иисуса и Семеа, и Амариа и Сехониа, рукою священников верно, даяти братии своей по чредам, малу и велику, 16 кроме рожденных мужеска полу от лет триех и вышше, всем, иже вхождаху в церковь Господню по числу дний на день, в службу чред расположения их. 17 Сие разделение священников по домом отечеств: и левити в чредах своих, от двадесяти лет и вышше, по чином, в разделениих. 18 Всякому рожденному жен их и сынов их и дщерей их во все множество, понеже верно освятиша святое. 19 И сыновом Аароним священствующым в селех, и иже от градов их во всяцем граде и граде, мужие иже именовани суть по имени, даяти часть всякому мужеску полу во священницех и всякому сочисляемому в левитех. 20 И сотвори тако Езекиа во всей Иудеи, и сотвори благое и правое и истинное пред Господем Богом своим, 21 и во всяцем деле, еже нача делати в дому Господни, и в законе и в повелениих взыска Бога своего всем сердцем своим и сотвори, и благопоспешися ему. === 32 === 1 И по словесех сих и по истине сей, прииде Сеннахирим царь Ассирийский, и прииде на Иудею, и ополчися на грады крепкия хотя взяти их. 2 И виде Езекиа, яко прииде Сеннахирим, и лице его воевати на Иерусалим: 3 и советова со старейшины своими и с сильными, да заключат воды источников, иже беша вне града: и соизволиша ему. 4 И собра много людий, и заключи воды источников и поток текущь посреде града, глаголя: да не приидет царь Ассирийский, и обрящет вод много, и укрепится. 5 И укрепися Езекиа, и созда вся стены, яже быша разсыпаны, и столпы, и отвне предстение ино, и укрепи разрушенная града Давидова, и уготова оружия многа: 6 и постави началники бранем над людьми, и собрашася к нему на площадь врат дебри, и глагола в сердца их глаголя: 7 укрепитеся и мужайтеся и не устрашайтеся, ниже ужасайтеся от лица царя Ассирийска и от лица всего множества, еже с ним: яко множайшии с нами суть неже с ним: 8 с ним мышца плотская, с нами же Господь Бог наш, еже спасати и поборати на брани нашей. И укрепишася людие словесы Езекии царя Иудина. 9 И по сих посла Сеннахирим царь Ассирийский рабы своя во Иерусалим, сам же со всеми вои своими обстояше Лахис, и посла ко Езекии царю Иудину и ко всему Иуде, иже во Иерусалиме, глаголя: 10 сия глаголет Сеннахирим царь Ассирийский: на что вы уповаете и седите во обстоянии во Иерусалиме? 11 Ни ли Езекиа прельщает вас, да предаст вы в смерть и в глад и жажду, глаголя: Господь Бог наш спасет нас от руки царя Ассирийска? 12 Не сей ли есть Езекиа, иже разори олтари Его и вышняя Его, и повеле Иуде и живущым во Иерусалиме, глаголя: олтарем пред олтарем сим покланяйтеся и в нем кадите фимиам? 13 Или не весте сего, что аз сотворих и отцы мои всем людем земли? Еда могуще возмогоша бози языков всея земли избавити люди своя от руки моея? 14 Кто во всех бозех языков сих, ихже искорениша отцы мои? Еда возмогоша избавити люди своя от руки моея, и како может Бог ваш избавити вас от руки моея? 15 Ныне убо да не прельщает вас Езекиа и да не творит вас уповати по сему, и не веруйте ему: аще бо ни един бог всякаго языка и царства возможе избавити люди своя от руки моея и от руку отец моих, то ниже Бог ваш возможет избавити вас от руки моея. 16 И ина (многа) глаголаша раби его противу Господа Бога и противу Езекии раба Его. 17 И послания написа поношая Господа Бога Израилева, и рече Нань, глаголя: якоже бози язык земли не могоша избавити людий своих от руки моея, тако ниже Бог Езекиин избавит люди Своя от руки моея. 18 И возопи воплем великим языком Иудейским к людем, иже седяху на стенах Иерусалимлих, да устрашит их и ужасит, и возмет град: 19 и глагола на Бога Иерусалимля, якоже и на богов людий земли, дела рук человеческих. 20 И помолися Езекиа царь и Исаиа сын Амосов пророк о сих, и возопиша на небо. 21 И посла Господь Ангела, и порази всех мужей храбрых и бранников, и началников и воевод в полцех царя Ассирийска: и возврати лице его со стыдом на землю его, и прииде в дом бога своего, и сынове его изшедшии из чрева его погубиша его мечем. 22 И спасе Господь Езекию и обитающих во Иерусалиме от руки Сеннахирима царя Ассирийска и от руку всех, и подаде им покой окрест. 23 И мнози приношаху дары Господу во Иерусалим и даяния Езекии царю Иудину, и возвышен бысть пред очесы всех языков по сих. 24 Во днех оных разболеся Езекиа даже до смерти и помолися ко Господу: и услыша его и даде ему знамение. 25 И не по воздаянию, еже даде ему, воздаде Езекиа, но вознесеся сердце его, и бысть на него гнев и на Иуду и на Иерусалим. 26 И смирися Езекиа от высоты сердца своего сам и живущии во Иерусалиме, и не прииде на них гнев Господень во дни Езекиины. 27 И бысть Езекиеви богатство и слава многа зело: и сокровища себе собра сребра и злата и камения честнаго, и ароматы, и оружия хранилницы, и сосуды драгоценны, 28 и житницы жит, пшеницы и вина и елеа, и села, и ясли всякому скоту, и ограды стадом, 29 и грады, яже созда себе, и строения овцам и волом множество: зане даде ему Господь собрания многа зело. 30 Той Езекиа загради исход воды Геона вышняго и проведе ю в низ к полудню града Давидова. И преуспе Езекиа во всех делех своих. 31 И тако послом князей от Вавилона, иже послани бяху к нему, да вопросят его о чудеси, еже случися на земли, остави его Господь, да искусит его уведати, яже в сердцы его. 32 Прочая же словес Езекииных, и щедроты его, се, писана суть в пророчестве Исаии пророка сына Амосова и в книзе царей Иудиных и Израилевых. 33 И успе Езекиа со отцы своими, и погребоша его на восходех гробов сынов Давидовых: и славу и честь даша ему в смерти его весь Иуда и живущии во Иерусалиме. И воцарися Манассиа сын его вместо его. === 33 === 1 Дванадесяти лет бе Манассиа, егда царствовати нача, и пятьдесят пять лет царствова во Иерусалиме: 2 сотвори же лукавое пред Господем по всем мерзостем языческим, ихже истреби Господь от лица сынов Израилевых: 3 и возврати и созда высокая, яже раскопа Езекиа отец его, и сострои кумиры Ваалиму, и сотвори дубравы, и поклонися всему воинству небесному, и послужи им, 4 и созда олтари в дому Господни, о немже глагола Господь: во Иерусалиме будет имя Мое во веки: 5 созда же жертвенники всему воинству небесному во двою дворех дому Господня. 6 Той же проведе чада своя чрез огнь во удоли Веенномли и вражаше (со жребии), и последоваше гаданием, и волхвованием служаше, и имеяше чревоволшебники и обаянники, и многа лукавая сотвори пред Господем, да прогневает Его: 7 истуканы же и слиянны образы сотвори и постави в дому Божии, о немже глагола Бог к Давиду и к Соломону сыну его: в дому сем и во Иерусалиме, егоже избрах от всех колен Израилевых, положу имя Мое во век, 8 и не приложу подвигнути ногу Израилеву от земли, юже предах отцем их, токмо аще сохранят сотворити вся, яже повелех им, по всему закону и повелением и судбам, рукою Моисеовою. 9 И прельсти Манассиа Иуду и живущих во Иерусалиме, да сотворят лукавое паче всех язык, ихже испроверже Господь от лица сынов Израилевых. 10 И глагола Господь к Манассии и к людем его, и не послушаша. 11 И наведе Господь на них началники воев царя Ассирийска, и яша Манассию во узах, и связаша его оковы ножными, и отведоша в Вавилон. 12 И егда озлоблен бысть, взыска лице Господа Бога своего, и смирися зело пред лицем Бога отец своих, 13 и помолися к Нему и послуша его, и услыша вопль его, и возврати его во Иерусалим на царство его: и позна Манассиа, яко Господь Той есть Бог. 14 И по сих созда стену вне града Давидова от Ливы к югу в потоце и ко входу врат Рыбных, исходящым вратами сущими окрест в высоту, и возвыси зело: и постави началники воем во всех градех Иудиных стенатых, 15 и отят боги чуждыя и идолы от дому Господня, и вся олтари, яже созда в горе дому Господня и во Иерусалиме, и изверже вся вон из града. 16 И паки воздвиже олтарь Господень, и пожре на том жертву спасения и хваления, и заповеда Иуде, да служат Господу Богу Израилеву. 17 Но еще людие жряху на высоких, обаче Господу Богу своему. 18 Прочая же словес Манассииных, и молитва его, яже к Богу, и словеса провидящих, иже глаголаху к нему во имя Господа Бога Израилева, 19 се, во словесех молитвы его, и яко услыша его, и вси греси его и отступления его, и места, на нихже созида высокая, и сотвори тамо Дубравы и изваянная, прежде неже обратитися ему, се, писана суть во словесех провидящих. 20 Успе же Манассиа со отцы своими, и погребоша его в саду дому его. И воцарися вместо его сын его Амон. 21 Двадесяти дву лет бе Амон, егда царствовати нача, и два лета царствова во Иерусалиме, 22 и сотвори лукавое пред Господем, якоже творяше Манассиа отец его, и всем идолом, ихже сотвори Манассиа отец его, пожре Амон и послужи им: 23 и не смирися пред Господем, якоже смирися Манассиа отец его, зане сын его Амон умножи грехи. 24 И нападоша нань раби его и убиша его в дому его. 25 И убиша людие земли нападших на царя Амона, и поставиша людие земли царя Иосию сына его вместо его. === 34 === 1 Осми лет бысть Иосиа, егда царствовати нача, и тридесять едино лето царствова во Иерусалиме, 2 и сотвори правое пред Господем, и ходи в путех Давида отца своего, и не уклонися ни на десно, ни на лево. 3 И во осмое лето царства своего, и той еще сый отрок, нача взыскати Господа Бога отца своего Давида: и во второенадесять лето царства своего нача очищати Иудею и Иерусалим от высоких и лесов, и от капищ и от истуканных. 4 И разориша пред лицем его олтари Ваалимли, и высокая, яже на них: и посече дубравы и истуканныя, и слиянная сокруши и истни, и растопи и поверже пред лицем гробов жрущих им: 5 и кости жерцев сожже на олтарех их, и очисти Иуду и Иерусалим, 6 и во градех Манассииных и Ефремлих и Симеоних даже до Неффалима, и в местех их окрест: 7 и олтари размета и лесы, и идолы разсече в частицы, и вся высокая изсече от всея земли Израилевы, и возвратися во Иерусалим. 8 И во осмоенадесять лето царства своего, егда очищена бысть земля и церковь Господня, посла Сафана сына Еселиева и Амесию началника града и Иоаса сына Иоахазова памятописца своего, да утвердят дом Господа Бога своего. 9 И приидоша ко Хелкии священнику великому, и даша сребро принесенное в дом Господень, еже собраша левити хранящии дверь от руки Манассиины и Ефремли, и от началников и от всех прочих во Израили, и от сынов Иудиных и Вениаминих и обитающих во Иерусалиме, 10 и даша оное в руце творящих дела, приставницы в дому Господни, и даша е творящым дела, иже творяху в дому Господни да, обновят и укрепят храм: 11 и даша тектоном и домоздателем, да купят камение четвероуголное и древа на бервна на покрытие домов, ихже разориша царие Иудины. 12 И мужие верно творяху в делех, и над ними надзирателе Иеф и Авдиа левити от сынов Мерариных, и Захариа и Мосоллам от сынов Каафовых надзирати, и всяк левитин, и всяк знаяй во органы пети: 13 и над носящими бремена и над всеми творящими дела, всяким деланием: и от левит беша писареве и судии и дверницы. 14 И внегда износити им сребро принесенное в церковь Господню, обрете Хелкиа священник книгу закона Господня, (яже дана бысть) рукою Моисеовою. 15 И отвеща Хелкиа и рече к Сафану писарю: книгу закона обретох в дому Господни. И даде Хелкиа книгу Сафану. 16 И принесе Сафан книгу ко царю, и возвести еще ко царю слово, глаголя: все сребро дано в руки рабов твоих творящих дела: 17 и слияша сребро обретенное в дому Господни, и даша в руки надзирателей и в руки творящих дело. 18 И возвести Сафан писарь слово царю, глаголя: книгу даде ми Хелкиа священник. И прочте ю Сафан пред царем. 19 И бысть егда услыша царь словеса закона, и растерза ризы своя. 20 И повеле царь Хелкиеви и Ахикаму сыну Сафанову и Авдону сыну Михееву, и Сафану писарю и Асаию рабу цареву, глаголя: 21 идите и молитеся Господу за мя и за всякаго оставшагося во Израили и Иуде, о словесех книги, яже обретена есть, велик бо гнев Господень разгореся на нас, понеже не послушаша отцы наши словес Господних, еже творити по всем написанным в книзе сей. 22 И иде Хелкиа, и имже повеле царь, ко Олдане пророчице, жене Селлима сына Фекуева, сына Есерии ризохранителя, хранящей заповеди, яже обиташе во Иерусалиме в масане, и глаголаша ей по сим. 23 И та отвеща им: сия рече Господь Бог Израилев: глаголите мужу, иже посла вас ко мне: сия рече Господь: 24 се, Аз наведу злая на место сие и на обитающих в нем вся словеса, яже писана суть в книзе прочтенней пред царем Иудиным, 25 зане оставиша Мя и кадяху богом чуждим, да прогневают Мя во всех делех рук своих: и разгореся ярость Моя на место сие и не угасится: 26 и ко царю Иудину, иже посла вас ко Господу помолитися, тако глаголите ему: сия рече Господь Бог Израилев: словеса, яже слышал еси, 27 и сокрушися сердце твое, и смирился еси пред лицем Моим, егда услышал еси словеса Моя на место сие и на обитающих в нем, и смирился еси предо Мною, и растерзал еси ризы твоя, и плакал еси предо Мною, и Аз услышах, рече Господь: 28 се, приложу тя ко отцем твоим, и приложишися ко гробом твоим в мире, и не узрят очи твои всякаго зла, яже Аз наведу на место сие и на обитающих в нем. И возвестиша царю слово. 29 И посла царь, и собра старейшины Иудины и Иерусалимли. 30 И взыде царь в дом Господень и вси мужие Иудины и живущии во Иерусалиме, и священницы и левити, и вси людие от мала даже до велика: и читаше во ушеса их вся словеса книги завета обретенныя в дому Господни. 31 И ста царь на столпе, и завеща завет пред Господем ходити пред Господем, хранити заповеди Его и свидения Его и повеления Его всем сердцем и всею душею, еже творити словеса завета написанная в книзе сей. 32 И постави всех, иже обретени бяху во Иерусалиме и Вениамине, и сотвориша обитающии во Иерусалиме завет в дому Господа Бога отец своих. 33 И отя Иосиа вся мерзости от всея земли, яже бе сынов Израилевых, и сотвори всех обретшихся во Иерусалиме и во Израили служити Господу Богу своему во вся дни своя, и не уклонися от Господа Бога отец своих. === 35 === 1 И сотвори Иосиа во Иерусалиме пасху Господу Богу своему, и пожре пасху в четвертыйнадесять день месяца перваго: 2 и постави священники на стражах их, и укрепи их на дела дому Господня, 3 и рече левитом сильным во всем Израили, да освятятся Господу и поставят кивот святый в дому Господни. И поставиши кивот святый во храме, егоже созда Соломон сын Давида царя Израилева. И рече царь: несть вам на раменах носити ничтоже: ныне убо служите Господу Богу вашему и людем Его Израилю, 4 и уготовайтеся по домом отечеств ваших и по чредам вашым, по писанию Давида царя Израилева и рукою Соломона сына его, 5 и стойте во храме по разделением домов отечеств ваших во братии вашей сынех людских, и по части дому отечества в левитех: 6 и пожрите пасху и святая уготовайте братии вашей, еже сотворити по словеси Господню, (еже глагола) рукою Моисеовою. 7 И даде начатки Иосиа сыном людским овцы и агнцы и козлы от коз, вся на пасху, и всех обретеных в число тридесять тысящ, и волов три тысящы, сия от царева имения. 8 И началницы его даша начатки людем и священником и левитом: даде же и Хелкиа и Захариа и Иеиил началницы священником дому Господня, и даша на пасху овец и агнцев и козлищ две тысящы шесть сот и волов триста. 9 Хонениа же и Ванеа, и Самеа и Нафанаил брат его, и Асавиа и Иеиил и Иозавад, началницы левитов, даша левитом на пасху пять тысящ овец и волов пять сот. 10 И уготовано бысть служение, и сташа священницы в чине своем и левити по разделением своим по повелению цареву, 11 и пожроша пасху, и пролияша священницы рукама своима кровь, и левити одираху кожы: 12 и уготоваша всесожжения предати им по разделению, по домом отечеств сыном людским, принести Господеви всесожжения, якоже писано есть в книзе закона Моисеова: тако и заутра: 13 и испекоша пасху на огни по чину, и святая свариша в медницах и в котлех, и предуспе им, и разделиша всем сыном людским: 14 себе же и священником потом уготоваша, яко в возношении всесожегаемых и туков даже до нощи священницы (быша не праздни), и левити уготоваша им и братии их сыном Аароним. 15 И певцы сынове Асафовы (стояху) в чине своем по повелению Давида, и Асафа и Емана и Идифума пророков царевых: и началницы и дверницы всех врат, имже не бе возможно отлучитися от службы святых, понеже братия их левити уготоваша им (брашна). 16 И управися и уготовася вся служба Господня в день той, да сотворят пасху и принесут всесожжения на олтарь Господень по повелению царя Иосии. 17 И сотвориша сынове Израилевы, иже обретени бяху, пасху во время то и праздник опресноков седмь дний. 18 И не бысть пасхи подобныя той во Израили от дний Самуила пророка, и вси царие Израилева не сотвориша пасхи, юже сотвори Иосиа и священницы и левити, и весь Иуда и Израиль, иже обретен бысть, и обитающии во Иерусалиме, Господу. 19 Во осмоенадесять лето царства Иосиина сия пасха празднована бысть. 20 По сих всех, ихже сотвори Иосиа в дому, и басночревных и волхвующих, и кумирницы и идолы и дубравы, яже бяху во Иерусалиме и во Иудеи, пожже огнем царь Иосиа, да утвердит глаголы закона писанныя в книзе, юже обрете Хелкиа жрец в дому Господни: подобен ему не бысть пред ним, иже бы обратился ко Господу всем сердцем своим и всею душею своею и всею крепостию своею по всему закону Моисеову, и по нем не воста подобен ему. Обаче не отвратися Господь от гнева ярости Своея великия, еюже разгневася яростию Господь на Иудею, всех ради разгневаний ея, имиже прогнева Манассиа. И рече Господь: и Иуду убо отрину от лица Моего, якоже отринух дом Израилев, и отвергох град, егоже избрах, Иерусалим, и храм, о немже рех: будет имя Мое тамо. И изыде фараон Нехао царь Египетский на царя Ассирийскаго на реку Евфрат, еже ратовати его в Хархамисе. И изыде во сретение ему Иосиа царь. 21 И посла к нему послы, глаголя: что мне и тебе, царю Иудин? Не противу тебе днесь иду воевати, но на место брани моея: и Бог рече потщатися мне: внемли ты о Бозе иже со мною, да не убиет тя. 22 И не возврати Иосиа лица своего от него, но ратовати его укрепися, ниже послуша словес Нехаовых, яже от уст Божиих, но иде, да воюет на поли Магеддо. 23 И устрелиша стрелцы в царя Иосию. И рече царь отроком своим: изведите мене (от брани), яко изнемогох зело. 24 И сведоша его отроцы его с колесницы, и в другую колесницу посадиша его, яже бяше ему, и привезоша его во Иерусалим, и умре и погребен бысть со отцы своими: и весь Иуда и Иерусалим плакаша о Иосии. 25 И Иеремиа возрыда по Иосии, и глаголаша вси князи и княгини плачь по Иосии даже до днесь: и даша его в повеление Израилю, и се, писано есть в рыданиих. 26 Прочая же словеса Иосиина и упование его бяху писана в законе Господни: 27 дела же его, первая и последняя, се, писана суть в книзе царей Израилевых и Иудиных. === 36 === 1 И взяша людие земли Иоахаза сына Иосиина, и помазаша его, и поставиша его царем вместо отца его во Иерусалиме. 2 Двадесяти триех лет бысть Иоахаз, егда царствовати нача, и три месяцы царствова во Иерусалиме. Имя же матере его Амитал, дщерь Иеремиина от Ловны. И сотвори лукавое пред Господем по всем, яже сотвориша отцы его. (и плени Иоахаза,) и окова его фараон Нехао в Девлафе в земли Ефамли, еже не царствовати ему во Иерусалиме, 3 и преведе его царь во Египет, и возложи дань на землю (Израилеву) сто талант сребра и талант злата. 4 И постави фараон Нехао Елиакима сына Иосиина царем над Иудою и Иерусалимом вместо Иосии отца его, и премени имя его Иоаким. Иоахаза же брата его взя фараон Нехао и введе его во Египет, и умре тамо: сребро же и злато даде фараону. Тогда нача земля поддана быти, еже даяти сребро по словеси фараонову: и кийждо по силе истязаше сребро и злато от людий земли, еже даяти фараону Нехао. 5 Двадесяти пяти лет бе Иоаким, егда царствовати нача, и единонадесять лет царствова во Иерусалиме. Имя же матере его Зехора, дщерь Нириева от Рамы. Сотвори же лукавое пред Господем по всем, елика сотвориша отцы его. Во дни его прииде Навуходоносор царь Вавилонский на землю, и бе ему служа три лета и отступи от него. И посла Господь на них Халдеи и разбойники Сирския и разбойники Моавитския, и сынов Аммоновых и Самарийских, и по словеси сем отступиша по словеси Господню, (еже глагола) усты рабов Своих пророков. Обаче ярость Господня бе на Иуде, еже отринути его от лица Своего, грех ради Манассииных во всех, яже сотвори, и в крови неповинней, юже излия Иоаким, и наполни Иерусалим крове неповинныя. Но не восхоте Господь искоренити их. 6 И взыде на него Навуходоносор царь Вавилонский, и окова его оковами медяными, и приведе его в Вавилон: 7 и часть сосудов дому Господня пренесе в Вавилон и постави я во храме своем в Вавилоне. 8 Прочая же словес Иоакимовых, и вся, яже содела, не се ли, сия писана в книзе словес дний царей Иудиных? И успе Иоаким со отцы своими и погребен бысть в Ганозане со отцы своими. И воцарися Иехониа сын его вместо его. 9 Осминадесяти лет бе Иехониа, егда царствовати нача, и три месяцы и десять дний царствова во Иерусалиме, и сотвори лукавое пред Господем. 10 Егда же лету круг вращашеся, посла Навуходоносор царь, иже и введе его в Вавилон с предрагими сосуды дому Господня, а царем постави Седекию брата отцу его над Иудою и Иерусалимом. 11 Двадесять едино лето бысть Седекии, егда царствовати нача, единнадесять лет царствова во Иерусалиме: 12 и сотвори лукавое пред Господем Богом своим, и не усрамися лица Иеремии пророка от уст Господних, 13 егда от царя Навуходоносора отвержеся, иже закля его пред Богом: и ожесточи выю свою и сердце свое укрепи, да не обратится ко Господу Богу Израилеву. 14 И вси славнии Иудины и священницы и людие земли умножиша еже преступити преступления мерзостей языческих, и оскверниша дом Господень, иже во Иерусалиме. 15 И посылаше Господь Бог отец их к ним рукою пророков Своих утренюя и посылая вестники Своя, понеже щадяше людий Своих и святилища Своего: и тии поношаху послом Божиим, 16 и уничижаху словеса Его, и ругахуся пророком Его, дондеже сниде гнев Господень на люди Его, дондеже не бысть изцеления. 17 И наведе на них царя Халдейска, и поби младенцы их мечем в дому святыни его: и не пощаде Седекии и дев их не помилова, и старцы их изведе, и всех предаде в руки их, 18 и вся сосуды дому Божия великия и малыя, и сокровища церкве Господни, и вся сокровища царева и вельмож, вся внесе в Вавилон: 19 и зажже дом Господень и разори стену Иерусалимлю, и столпы его сожже огнем и всяк сосуд драгий истни: 20 и пресели оставшихся в Вавилон, и быша ему и сыном его в рабы даже до царства Мидскаго, 21 да исполнится слово Господне устами Иеремии, донележе прия земля субботы своя субботствовати во вся дни запустения своего: субботствова до совершения седмидесяти лет. 22 В лето первое Кира царя Персскаго, повнегда исполнитися словесем Господним усты Иеремии, воздвиже Господь дух Кира царя Персскаго, и повеле проповедати во всем царствии своем писанием, глаголя: 23 сия глаголет Кир царь Персский: вся царства земли даде ми Господь Бог небесный, и Той заповеда мне создати Себе дом во Иерусалиме, иже есть во Иудеи: кто в вас от всех людий Его? Да будет Бог его с ним, и да взыдет. Молитва Манассии царя Иудейска, егда пленен держашеся во Вавилоне. Господи Вседержителю, Боже отец наших, Авраамов и Исааков и Иаковль и семене их праведнаго [а], сотворивый небо и землю со всею лепотою их и связавый море словом повеления Твоего, заключивый бездну и запечатствовавый ю страшным и славным именем Твоим, егоже вся боятся, и трепещут от лица силы Твоея, яко никтоже постоит пред великолепием славы Твоея, и нестерпимь гнев, [б] еже на грешники, прещения Твоего. [в] Безмерна же и неизследованна милость обещания Твоего: [г] Ты бо еси Господь, вышний, благоутробен, долготерпелив и многомилостив и каяйся о злобах человеческих. Ты, Господи, по множеству благости Твоея обещал еси покаяние [д] и оставление согрешившым Тебе, и множеством щедрот Твоих определил еси покаяние грешником во спасение. Ты убо, Господи Боже сил, не положил еси покаяние праведным [е] Аврааму и Исааку и Иакову, не согрешившым Тебе, но положил еси покаяние мне грешному, зане согреших паче числа песка морскаго: умножишася беззакония моя, Господи, умножишася беззакония моя, и несмь достоин воззрети и видети высоту небесную от множества неправд моих. Слячен есмь многими узами железными [з], во еже не возвести главы моея, и несть ми ослабления: зане прогневах ярость Твою и лукавое пред Тобою сотворих [и]: не сотворивый воли Твоея и не сохранивый повелений Твоих, поставих мерзости и умножих претыкания. И ныне приклоняю колена сердца, требуя от Тебе благости [к]. Согреших, Господи, согреших, и беззакония моя аз вем, но прошу моляся: ослаби ми, Господи, ослаби ми, и не погуби мене со беззаконии моими, ниже в век враждовав соблюдеши зол моих, ниже осудиши мя в преисподних земли: зане Ты еси, Боже, Бог кающихся, и на мне явиши всю благость Твою: яко недостойна суща спасеши мя по мнозей милости Твоей, и восхвалю Тя выну во днех живота моего [л]: яко Тя поет вся сила небесная, и Твоя есть слава во веки веков. Аминь. == Первая книга Ездры == === 1 === 1 В лето первое Кира царя Персскаго, да исполнится слово Господне от уст Иеремииных, воздвиже Господь дух Кира царя Персскаго, и повеле проповедати во всем царствии своем, и писаньми, глаголя: 2 сия глаголет Кир царь Персский: вся царства земная даде мне Господь Бог небесный, и Той повеле ми, да созижду Ему дом во Иерусалиме, иже во Иудеи: 3 кто в вас от всех людий Его? И будет Бог его с ним, и да взыдет во Иерусалим, иже во Иудеи, и да созиждет дом Богу Израилеву, Той есть Бог, Иже во Иерусалиме: 4 и всяк оставшийся от всех мест, идеже той обитает, и да помогут ему мужие от места его сребром и златом, и сосуды и скоты, с добровольными обещании (принесут) в церковь Божию, яже во Иерусалиме. 5 И восташа князи отечеств Иудиных и Вениаминих и священницы и левити, и вси, имже воздвиже Бог дух их, да взыдут созиданию церкве Господни, яже во Иерусалиме: 6 и вси, иже бяху окрест, помогоша рукам их сосуды сребрбяными, златом, потребными, и скотами, и драгими вещми, кроме добровольных. 7 И царь Кир изнесе сосуды церкве Господни, ихже взя Навуходоносор из Иерусалима и положи тыя в церкви бога своего: 8 изнесе же тыя Кир царь Персский рукою Мифридата Гасваринова, и сочте тыя Сасавассару князю Иудейску. 9 И сие число их: умывалниц златых тридесять, умывалниц же сребряных тысяща, ножей двадесять девять, 10 и чаш златых тридесять, и сребряных двойных четыреста десять, и сосудов иных тысяща: 11 всех сосудов златых и сребряных пять тысящ и четыреста, вся взя с собою Сасавассар от преселения Вавилонскаго во Иерусалим. === 2 === 1 Сии же суть сынове страны, иже взыдоша от плена преселения, ихже пресели Навуходоносор царь Вавилонский в Вавилон: и возвратишася во Иерусалим и Иудею кийждо муж во град свой. 2 Иже приидоша с Зоровавелем: Иисус, Неемиа, Сараиа, Реелиа, Мардохей, Валасан, Масфар, Вагуй, Реум, Ваана. Сие число мужем людий Израилевых: 3 сынове Фаресовы две тысящы сто седмьдесят и два, 4 сынове Сафатиевы триста седмьдесят два, 5 сынове Аресовы седмь сот седмьдесят пять, 6 сынове Фааф-Моавли от сынов Иисуевух и Иоавлих две тысящы осмь сот дванадесять, 7 сынове Еламли тысяща двести пятьдесят четыри, 8 сынове Зафуевы девять сот четыредесять пять, 9 сынове Закхани седмь сот шестьдесят, 10 сынове Вануевы шесть сот четыредесять два, 11 сынове Ваваевы шесть сот двадесять три, 12 сынове Авгадовы тысяща двести двадесять два, 13 сынове Адоникамовы шесть сот шестьдесят шесть, 14 сынове Вагуевы две тысящы пятьдесят шесть, 15 сынове Адины четыриста пятьдесят четыри, 16 сынове Атировы, иже бяху от Езекии, девятьдесят осмь, 17 сынове Вассуевы триста двадесять три, 18 сынове Иоравовы сто дванадесять, 19 сынове Асумли двести двадесять три, 20 сынове Гаверовы девятьдесят пять, 21 сынове Вефлаемли сто двадесять три, 22 сынове Нетофаевы пятьдесят шесть, 23 сынове Анафофовы сто двадесять осмь, 24 сынове Азмофовы четыредесять три, 25 сынове Кариафиаримли, Хафира и Вироф, седмь сот четыредесять три, 26 сынове от Рамы и Гаваи шесть сот двадесять един, 27 мужей Махмаских сто двадесять два, 28 мужей Вефилских и Гайских четыреста двадесять три, 29 сынове от Навы пятьдесят два, 30 сынове Магевисовы сто пятьдесят шесть, 31 сынове Иламаровы тысяща двести пятьдесят четыри, 32 сынове Ирамли триста двадесять, 33 сынове Лиддоновы, Лодадидовы и Оновы седмь сот двадесять пять, 34 сынове Иерихони триста четыредесять пять, 35 сынове Сеннааевы три тысящы шесть сот тридесять. 36 Священницы же: сынове Иедуевы в дому Иисуеве девять сот седмьдесят три, 37 сынове Еммировы тысяща пятьдесят два, 38 сынове Фассуровы тысяща двести четыредесять седмь, 39 сынове Иремли тысяща седмьнадесять. 40 Левити же сынове Иисуевы и Кадмиили от сынов Одуиевых седмьдесят четыри. 41 Певцы же сынове Асафовы сто двадесять осмь. 42 Сынове дверников: сынове Селлумли, сынове Атироы, сынове Телмоновы, сынове Акувовы, сынове Атитовы, сынове Соваиевы, всех сто тридесять девять. 43 Нафинее: сынове Суавли, сынове Суфатовы, сынове Тавваофли, 44 сынове Кирасовы, сынове Сирсавли, сынове Фадонины, 45 сынове Лавановы, сынове Агавовы, сынове Акувовы, 46 сынове Агавовы, сынове Селамиины, сынове Анановы, 47 сынове Геддилины, сынове Гааровы, сынове Раиаевы, 48 сынове Расоновы, сынове Некодовы, сынове Газемли, 49 сынове Азоковы, сынове Фасиевы, сынове Расиины, 50 сынове Асенаевы, сынове Мунниновы, сынове Нефусимли, 51 сынове Ваквуковы, сынове Акуфаевы, сынове Ануровы, 52 сынове Васалофовы, сынове Мидановы, сынове Арсановы, 53 сынове Варкосовы, сынове Сисарины, сынове Фемавли, 54 сынове Нафиевы, сынове Атифовы. 55 Сынове слуг Соломоновых: сынове Сотаевы, сынове Сефирины, сынове Фадуровы, 56 сынове Иеалаевы, сынове Дерконовы, сынове Геддилины, 57 сынове Сафатиевы, сынове Аттилевы, сынове Фахерафовы, сынове Асевоимли, сынове Имеевы: 58 вси нафанимовы и сынове слуг Соломоновых триста девятьдесят два. 59 И сии, иже восхождаху от Фелмелеха, Фелариса, Херув, Идан, Еммир, и не могоша сказати дому отечества своего и семене своего, от Израиля ли быша: 60 сынове Далаиевы, сынове Товиевы, сынове Некодаевы, шесть сот пятьдесят два: 61 и от сынов священнических сынове Оваиевы, сынове Аккусовы, сынове Верзеллаевы, иже поя от дщерей Верзеллаа Галаадитина жену и наречеся именем их: 62 тии искаша писания роду своему и не обретоша, и изгнани суть от священства. 63 И рече Аферсафа им, да не ядят от святаго святых, дондеже востанет священник со изявлением и истиною. 64 Все же множество купно яко четыри тмы две тысящы триста шестьдесят, 65 кроме рабов их и рабынь их, сих седмь тысящ триста тридесять седмь: и сии певцы и певницы двести. 66 Коней их седмь сот тридесять шесть, мсков их двести четыредесять пять, 67 велблюдов их четыреста тридесять пять, ослов их шесть тысящ седмь сот двадесять. 68 И от князей отечеств, егда вхождаху тии в церковь Господню, яже во Иерусалиме, добровольно принесоша в дом Божий, поставити его на основании его: 69 по силе своей даша в росход дела, злата драхм шестьдесят тысящ и тысящу, и сребра мнас пять тысящ, и одеяний священнических сто. 70 И седоша священницы и левити, и иже от людий, и певцы и дверницы и нафинимляне во градех своих, и весь Израиль во градех своих. === 3 === 1 Пришедшу же месяцу седмому, и бяху сынове Израилевы во градех своих, и собрашася людие аки человек един во Иерусалим. 2 И воста Иисус сын Иоседеков и братия его священницы, и Зоровавель сын Салафиилев и братия его, и создаша олтарь Богу Израилеву, да принесут на нем всесожжения, якоже писано есть в законе Моисеа человека Божия. 3 И уготоваша олтарь на основании его, понеже страх бе на них от людий земных, и вознесоша на том всесожжение Господеви утро и в вечер: 4 и сотвориша праздник кущей, якоже писано, и всесожжения на всяк день числом по повелению, дело дне в день свой: 5 и посем всесожжения непрестанная и в новомесячия и во вся праздники Господеви освященныя, и о всяцем добровольно приносящем со усердием Господеви. 6 От перваго дне месяца седмаго начаша возносити всесожжения Господеви, дом же Господень не бе еще основан. 7 И вдаша пенязи каменосечцем и древоделем, пищу же и питие и елей Сидоняном и Тиряном, да принесут древа кедрова от Ливана к морю Иоппийскому, якоже соизволи Кир царь Персский о них. 8 И в лето второе, внегда приити им к дому Божию во Иерусалим, месяца втораго нача Зоровавель сын Салафиилев и Иисус сын Иоседеков, и прочии от братии их священницы и левити, и вси, иже приидоша от пленения во Иерусалим, и поставиша левитов от двадесяти лет и вышше над творящими дела во храме Господни. 9 И ста Иисус и сынове его и братия его, Кадоил и сынове его, сынове Иудины, якоже муж един да единодушно настоят над творящими дела в дому Божии, сынове Инададовы, сынове их и братия их левити. 10 И основаша созидающе дом Господень: и сташа священницы во украшении своем со трубами, и левити сынове Асафовы, в кимвалех да хвалят Господа, по уставу Давида царя Израилева: 11 и вопияху в песнех и исповедании Господеви, яко благ, яко в век милость Его над Израилем: и вси людие возглашаху гласом великим хваление Господу при основании дому Господня. 12 И мнози от священников и левит, и князи отечеств и старейшины, иже видеша дом преждний на основании своем, и сей дом пред очесы своими, плакаху гласом велиим: и народ возглашающь, в веселии возвышаху: 13 и не можаху людие познати гласа восклицания веселящихся от гласов плача народнаго, понеже людие восклицаху гласом великим, и глас велик слышашеся издалеча. === 4 === 1 И услышаша врази Иудины и Вениамини, яко сынове преселения созидают церковь Господу Богу Израилеву, 2 и приступиша к Зоровавелю и ко князем отечеств и рекоша им: созиждем с вами, понеже, якоже и вы, ищем Бога вашего и Ему мы жрем жертву от дний Асарадана царя Ассурска приведшаго ны семо. 3 И рече им Зоровавель и Иисус и прочии князи отечеств Израилевых: несть нам и вам создати дом Богу нашему, понеже мы сами особно созиждем Господу Богу нашему, якоже повеле нам Кир царь Персский. 4 И быша людие земли (тоя) ослабляюще руки людий Иудейских, и препинаху им в созидании, 5 и наимаху на них советников, да разорят совет их, во вся дни Кира царя Персскаго и даже до царства Дариа царя Персскаго. 6 В царство же Ассуира, (иже есть Артаксеркс,) в начале царства его, написаша свиток на живущих во Иудеи и во Иерусалиме. 7 И во дни Арфасафана написа в мире Мифридат и Тавеил со прочими сослужители ко Артаксерксу царю Персскому: написа писмоносец писание Сирским языком и претолковано. 8 Реум Валтаам и Сампса книгочий написаста послание едино на Иерусалим ко Артаксерксу царю: 9 тако судил Реум Валтаам и Сампса книгочий и прочии сослужителие наши, Динее, Афарсафахее, Тарфалее, Арфасее, Архиее, Вавилоняне, Сусанахее, Савее, Еламите 10 и прочии от язык, ихже преведе Ассенафар великий и преславный и всели их во градех Самарийских и прочих об он пол реки. 11 Сие есть сказание послания, еже послаша к нему, ко Артаксерксу царю: раби твои, мужие, иже за рекою: 12 ведомо да будет царю, яко Иудее, иже взыдоша от тебе к нам, приидоша во Иерусалим град отступный и лукавый, егоже созидают: и стены его состроены суть, и основание его возвысиша: 13 ныне убо ведомо да будет царю, яко, аще град сей создан будет, и стены его совершатся, дани не будут тебе, ниже (летняго воздаяния) дадут: и сие царем зло творит, 14 и посрамощения царева не леть нам видети: сего ради послахом и возвестихом царю, 15 да разсмотрено будет в книзе памятописней отцев твоих, и обрящеши в книзе памятописней и познаеши, яко град он отступный есть и обидящь царей и страны, и убежища слуг бывают посреде его от дний древних, сего ради и град той опустошен есть: 16 ведомо убо творим царю, яко, аще град той создан будет и стены его совершатся, то не будет ти мира. 17 И посла царь ко Реуму Валтааму и Сампсаю книгочию и ко прочым сослужителем их обитающым в Самарии и прочым за рекою Мир 18 и рече: писмоносец, егоже посласте к нам, призван пред мене, 19 и от мене повелено есть, и соглядахом и обретохом, яко град той от дний древних на царей возносится, отступления и убежища бывают в нем: 20 и царие крепцы быша во Иерусалиме и обладаху всею страною, яже за рекою, дани же многи и часть давашеся им: 21 и ныне повелите мужем оным престати от дела, и град оный да не созидается ктому: 22 яко да от повеления сего опасни будете нерадение творити о сем, да не когда умножится погибель на зло царем. 23 Тогда писмоносец Артаксеркса царя прочте свиток пред Реумом Валтаамом и Сампсаем книгочием и сослужителми их: и идоша тщателно во Иерусалим и во Иудею, и удержаша их мышцею сильною. 24 Тогда преста дело дому Божия, еже во Иерусалиме, и не творяшеся даже до лета втораго царства Дариа царя Персскаго. === 5 === 1 Пророчествова же Аггей пророк и Захариа сын Аддов прорицание ко Иудеом, иже бяху во Иудеи и Иерусалиме, во имя Бога Израилева на них. 2 Тогда востаста Зоровавель сын Салафиилев и Иисус сын Иоседеков и начаста здати дом Божий, иже во Иерусалиме: и с нима пророцы Божии помогающе има. 3 В то время прииде к ним Фафанай князь сущий за рекою и Сафарвузанай и сослужителие их, и сия рекоша им: кто даде вам власть созидати дом сей и стены сия возставляти? 4 Тогда сия рекоша им: кая суть имена мужей созидающих град сей? 5 И очи Божии на пленение Иудино, и не возбраниша им, дондеже послание к Дарию отнесено, и тогда послася с писмоносцем о сем. 6 Изявление послания, еже посла Фафанай князь об он пол реки и Сафарвузанай и сослужителие их Афарсахее, иже бяху за рекою, Дарию царю: 7 словесы послаша к нему, и сия писана в нем: Дарию царю мир всяк: 8 ведомо да будет царю, яко ходихом во Иудейскую страну к дому Бога великаго, и той созидается камением избранным, и древа ставятся в стенах, дело же то со тщанием строится и благопоспешается в руках их: 9 тогда вопросихом старейшин тех и тако рекохом им: кто даде вам власть дом сей созидати и стены сия возставляти? 10 И о именех их вопросихом их, да возвестим тебе, яко да напишем тебе имена мужей, иже суть началницы их: 11 и сицева словеса отвещаша нам глаголюще: мы есмы раби Бога небесе и земли, и созидаем дом, иже бысть устроен прежде сего за лета многа, и царь Израилев великий созда его и соверши его им: 12 егда же прогневаша отцы наши Бога небеснаго, предаде их в руки Навуходоносора царя Вавилонскаго Халдеанина, и дом сей разори и люди преведе в Вавилон: 13 но в лето первое Кира царя, Кир царь Вавилонский постави повеление, да дом Божий сей созиждется, 14 и сосуды дому Божия златыя и сребряныя, яже Навуходоносор взя из дому, иже во Иерусалиме, и отнесе я в храм Вавилонский, изнесе тыя Кир царь от храма Вавилонскаго и даде их Саванасару хранителю, иже над сокровищем, 15 и рече ему: вся сосуды сия возми и иди, и постави их в дому, иже есть во Иерусалиме, на место их: 16 тогда Саванасар той прииде и постави основание дому Божия во Иерусалиме, и от того времене даже доныне созидается, и еще не совершен есть: 17 и ныне аще (видится) царю благо, да посмотрит в дому сокровища царя Вавилонскаго, да увеси, яко от царя Кира бысть повеление созидати дом Божий сей, иже во Иерусалиме, и уведав о сем царь да послет к нам. === 6 === 1 Тогда Дарий царь повеле, и искаша во книгохранителницах, идеже сокровище лежит в Вавилоне. 2 И обретеся во Амафе граде Мидийстем в палате главизна едина, и сие писано бе в ней на память: 3 в лето первое Кира царя, Кир царь царь повеле о доме Божии, иже во Иерусалиме: дом да созиждется, и место, идеже жрут жертвы: и положи меру высоты лакот шестьдесят, широта его лакот шестьдесят: 4 и стены каменныя твердыя три, и стена древяная едина, иждивение же от дому царева да дастся: 5 и сосуди дому Божия златии и сребрянии, ихже Навуходоносор взя от дому, иже во Иерусалиме, и пренесе их в Вавилон, да отдадутся и внесутся в дом, иже во Иерусалиме, на место, идеже и поставлени бяху в дому Божии: 6 ныне убо дадите, князие сущии за рекою, Сафарвузанай и сослужителие их Афарсахее, иже за рекою, далече отидите оттуду: 7 ныне оставите дело дому Божия: князие Иудейстии и старейшины их дом Божий той да созидают на месте своем: 8 и от мене повелено бысть, да не когда что сотворите противно старейшинам Жидовским в созидании дому Божия онаго: и от имений царских даней сущих за рекою прилежно на иждивение да дается мужем тем, еже бы не престало дело то: 9 и еже аще оскудеет, и телцы и овны и агнцы, во всесожжения Богу небесному, пшеница, соль, вино, елей, по словеси священников, иже во Иерусалиме, да дается им по вся дни, еже аще воспросят, 10 да будут приносящии благоухания Богу небесному и да молятся о жизни царя и сынов его: 11 и от мене уставлено повеление, да всяк человек, иже преступит повеление сие, возмется древо от дому его, и воздвижен обесится на нем, и дом его мне будет взят: 12 и Бог, Егоже обитает имя тамо, да низвратит всякаго царя и люди, иже прострут руку свою пременити или разорити дом Божий, иже есть во Иерусалиме: аз Дарий поставих повеление, с прилежанием да будет. 13 Тогда Фафанай князь страны заречныя, Сафарвузанай и сослужебницы его, якоже посла Дарий царь, тако сотвориша тщателно. 14 Старейшины же Иудейстии созидаху и левити по пророчеству Аггеа пророка и Захарии сына Аддова. И создаша и совершиша по повелению Бога Израилева и по повелению Кира и Дариа и Артаксеркса царей Персских, 15 и совершиша дом той даже до дне третияго, месяца Адара, иже есть в лето шестое царства Дариа царя. 16 Сотвориша же сынове Израилевы, священницы и левити, и прочии сынов преселения обновление дому Божия в радости, 17 и принесоша на обновление дому Божия телцев сто, овнов двести, агнцев четыреста, козлов от коз за грехи всего Израиля дванадесять, по числу колен Израилевых: 18 и поставиша священников в чинех своих и левиты в частех своих на служение дому Божия во Иерусалиме, якоже писано есть в книзе Моисеове. 19 И сотвориша сынове преселения пасху в четвертыйнадесять день месяца перваго: 20 очищени бо бяху священницы и левити даже до единаго вси чисти, и пожроша пасху всем сыном преселения и братии их священником и себе самым. 21 И ядоша сынове Израилевы пасху, иже от преселения, и всяк отлучивыйся от осквернения языков земли к ним, еже взыскати Господа Бога Израилева. 22 И сотвориша праздник опресночный седмь дний в веселии, яко возвесели их Господь и обрати сердце царя Ассурска к ним, укрепити руки их в делех дому Бога Израилева. === 7 === 1 По сих же словесех, в царство Артаксеркса царя Персскаго, взыде Ездра сын Сареа, сына Азариева, сына Хелкиева, 2 сына Селлумля, сына Саддукова, сына Ахитовля, 3 сына Самариева, сына Есриева, сына Мареофова, 4 сына Зараиева, сына Езеиева, сына Воккиева, 5 сына Ависуева, сына Финеесова, сына Елеазарова, сына Аарона священника перваго: 6 сей Ездра взыде от Вавилона и сей писец скор в законе Моисеове, егоже даде Господь Бог Израилю. И даде ему царь, яко рука Господа Бога его на нем бе во всех, яже искаше он. 7 И взыдоша от сынов Израилевых и от священников и от левитов, и певцы и придверницы и нафиними во Иерусалим, в лето седмое Артаксеркса царя, 8 и приидоша во Иерусалим месяца пятаго: сие есть лето седмое царево: 9 зане в первый день месяца перваго той нача восходити от Вавилона, и в первый день месяца пятаго приидоша во Иерусалим, яко рука Бога его блага на нем бе: 10 Ездра бо уготова сердце свое, да взыщет закона (Господня) и да творит и учит во Израили повелением и судбам. 11 И сие есть сказание послания еже даде царь Артаксеркс Ездре священнику, писцу книги словес заповедий Господних и повелений Его во Израили: 12 Артаксеркс царь царей Ездре священнику, писцу закона Господа Бога небеснаго: да совершится слово и ответ: 13 от мене повелено есть, да кийждо, иже имать усердие благо во царстве моем от людий Израилевых и от священников и от левитов поити во Иерусалим, с тобою да идет: 14 от лица царева и седми советников его послан еси, да посетиши Иудею и Иерусалим в законе Бога их, сущем в руку твоею, 15 и да отнесеши в дом Господень сребро и злато, еже царь и советницы его со усердием даша Богу Израилеву, Иже во Иерусалиме обитает, 16 и все злато и сребро, еже аще обрящеши во всей области Вавилонстей, с добровольным даянием людским и священников, волею приносящих в дом Божий, иже во Иерусалиме: 17 и всякий доход той усердно впиши в книгу сию: телцы, овны, агнцы, и жертвы их и возлияния их: и принеси та на олтарь дому Бога вашего, иже есть во Иерусалиме: 18 и аще что тебе и братии твоей благо возмнится от оставшагося сребра и злата сотворити, якоже угодно Богу вашему, сотворите: 19 и сосуды, иже даны тебе в службу дому Божия, вдаждь пред Богом во Иерусалиме: 20 и прочыя потребы дому Бога твоего, еже аще возмнится тебе дати, да даси из домов сокровища царева 21 и от мене аз Артаксеркс царь уставих повеление всем хранителем сокровищ, иже суть за рекою, да все, еже аще воспросит от вас Ездра священник и писец закона Бога небеснаго, готово да будет: 22 сребра даже до ста талант, и пшеницы даже до ста мер, и вина даже до ста бочек, и елеа даже до ста чванов, а соли без записания: 23 все, еже есть по воли Бога небеснаго, да будет в дому Бога небеснаго: вонмите, да не кто прострет руку на дом Бога небеснаго, да не когда будет гнев на царство царево и сынов его: 24 и вам знаемо творим сие, от всех священников и левитов, певцев, дверников, нафинимов и слуг дому Божия дань да не будет тебе, ниже имейте власти порабощати их: 25 ты же, Ездра, по премудрости Бога твоего, яже в руце твоей, постави книжники и судии, да судят вся люди, иже суть за рекою, всем знающым закон Бога твоего, и не ведающему ведати сотворите: 26 и всяк, иже не сотворит закона Бога твоего и закона царева усердно, суд да будет сотворен на него, аще в смерть, или в наказание, или во отщетение живота, или в темницу. 27 Благословен Господь Бог отец наших, иже даде сице в сердце царево, да прославит дом Господень, иже во Иерусалиме, 28 и на мя уклони милосердие пред очима царя и советников его и всех князей царевых сильных: и аз укреплен бых, яко рука Божия благая на мне, и собрах от Израиля князей взыти со мною. === 8 === 1 И сии князие отечеств их вождеве, иже взыдоша со мною в царство Артаксеркса царя Вавилонска: 2 от сынов Финеесовых Гирсон, от сынов Ифамарих Даниил, от сынов Давидовых Аттус, 3 от сынов Саханииных, от сынов Форосовых Захариа, и с ним мужей сто пятьдесят, 4 от сынов Фааф-Моава Елиана сын Сараиев, и с ним двести мужей, 5 и от сынов Зафоисовых Ехениа сын Азиилев, и с ним триста мужей, 6 и от сынов Адиных Овин сын Ионафанов, и с ним пятьдесят мужей, 7 и от сынов Едамлих Исаиа сын Афелиин, и с ним седмьдесят мужей, 8 и от сынов Сафатиевых Завдиа сын Михаилов, и с ним осмьдесят мужей, 9 и от сынов Иоавлих Авдиа сын Иеиилев и с ним двести осмьнадесять мужей, 10 и от сынов Вааниевых Селимуф сын Иосефиев, и с ним сто шестьдесят мужей, 11 и от сынов Вавиевых Захариа сын Вавиев, и с ним двадесять осмь мужей, 12 и от сынов Азгадовых Ионан сын Икатанов, и с ним сто десять мужей, 13 и от сынов Адоникамлих последнии, и сия имена их: Едифалаф, Иеиил и Самаиа, и с ним шестьдесят мужей, 14 и от сынов Вагуаевых Уфай и Завуд, и с ними седмьдесят мужей. 15 Собрах же их к реце текущей ко Евии, и пребыхом ту три дни: исках же в людех и во священницех, и от сынов Левииных не обретох тамо. 16 И послах ко Елеазару, Ариилу, Семеию и к Маонану, и Иериву и Елнафаму, и Нафану и Захарии и Месолламу, и ко Иоариму и Елнафану, премудрых, 17 и изведох их ко Адаю началнику на месте Касфиа и вложих во уста их словеса глаголати ко Адаю и братии его афинимом на месте Касфии, привести нам поющих в дом Бога нашего. 18 И приидоша к нам, понеже рука Бога нашего бе блага на нас, муж сахон от сынов Моолиевых сына Левиина, сына Израилева, и Саравиа, и сынове его и братия его осмьнадесять: 19 и Асевиа, и Исаиа от сынов Мерариных и братия его и сынове его двадесять: 20 и от нафинимов, ихже даде Давид и князие ко службе левитом, нафинимов двести двадесять, вси собрашася по именом. 21 И проповедах тамо пост близ реки Ауи, еже смиритися пред Господем Богом нашим, просити от Него пути праваго нам и чадом нашым и всему стяжанию нашему: 22 устыдехся бо испросити от царя силы и конник защитити нас от врага на пути, понеже рехом царю глаголюще: рука Бога нашего есть на всех ищущих Его во благое и крепость Его, ярость же Его на всех оставляющих Его. 23 Постихомся же и молихомся Богу нашему о сем, и услыша нас. 24 И отлучих от князей священнических дванадесять, Сараию, Асавию и с ними от братии их десять: 25 возвеснх же им сребро и злато и сосуды начатков дому Бога нашего, яже вознесе царь и советницы его и князие его, и весь Израиль обретаяйся, 26 и дах весом в руки их сребра талантов шесть сот пятьдесят, и сосудов сребряных сто, и злата сто талант, 27 и чаш златых двадесять, драхм тысящу, и сосуды меди светлыя добрыя различныя, драгоценныя яко злато, 28 и рекох им: вы святи Господу Богу, и сосуди святи и сребро и злато, еже волею вдано есть Господу Богу отец наших: 29 бдите и стрегите, дондеже весом отдадите пред князи священников и левитов и пред князи отечеств Израилевых во Иерусалиме, во скиниих дому Господня. 30 И прияша священницы и левити вес сребра и злата и сосудов, да вознесут во Иерусалим в дом Бога нашего. 31 И воздвигохомся от реки Ауи во вторыйнадесять день месяца перваго, да идем во Иерусалим: и рука Бога нашего бе на нас и избави нас от рук вражиих и ратников на пути, 32 и приидохом во Иерусалим и пребыхом ту три дни. 33 И бысть в день четвертый, отдахом весом сребро и злато и сосуды в дому Бога нашего под руку Маримофа сына Урии священника, и с ним Елеазар сын Финеесов, и с ними Иозавад сын Иисусов и Ноадиа сын Ванаиев левити, 34 по числу и весу вся: и написан бысть весь вес. 35 Во время то, иже приидоша от пленения сынове преселения, принесоша всесожжения Богу Израилеву, телцев дванадесять за всего Израиля, овнов девятьдесят шесть, агнцев седмьдесят седмь, козлов за грехи дванадесять, вся во всесожжение Господу. 36 И даша повеление царево правителем царским и князем, иже за рекою: и прославиша людий и дом Божий. === 9 === 1 И егда совершена быша сия, приступиша ко мне князие, глаголюще: не отлучишася людие Израилевы и священницы и левити от людий земных, (но) в мерзостех их (суть), иже суть Хананее, Еффее, Ферезее, Иевусее, Аммонитяне, Моавитяне и Мосеритяне и Аморреане, 2 понеже пояша от дщерей их себе и сыном своим, и смесися семя святое с людьми земными, и рука князей и воевод в преступлении сем в начале. 3 И егда услышах словеса сия, раздрах ризы моя, и вострепетах, и терзах власы главы моея и брады моея, и седох тужа. 4 И собрашася ко мне вси боящиися слова Бога Израилева за преступление пришедших от пленения, и аз седях прискорбен даже до жертвы вечерния. 5 И в жертву вечернюю востах от сетования моего, и внегда раздрах ризы моя, и трепетах, и преклоних колена моя, и прострох руце мои ко Господу Богу моему 6 и рекох: Господи Боже мой, стыждуся и срамляюся воздвигнути лице мое к Тебе, яко беззакония наша умножишася паче глав наших, и прегрешения наша возрастоша даже до небесе: 7 от дний отец наших в преступлении велицем есмы даже до дне сего, и в беззакониих наших предани есмы мы и царие наши и священницы наши и сынове наши в руку царей языческих, в мечь и в пленение, и в расхищение и в стыдение лица нашего, якоже в день сей: 8 и ныне умилостивися над нами Бог наш, еже оставити ны во спасение и дати нам твердость на месте святыни Его, еже просветити очеса наша и дати оживление малое в работе нашей: 9 яко раби есмы, и в работе нашей не остави нас Господь Бог наш: и преклони на нас милосердие пред цари Персскими, дати нам живот, еже воздвигнути им дом Богу нашему и возставити запустевшая его, и дати нам ограждение во Иудеи и Иерусалиме: 10 и ныне что речем, Боже наш, по сем? Яко оставихом повеления Твоя, 11 яже дал еси нам рукою раб Твоих пророков, глаголя: земля, на нюже вы входите наследити ю, земля нечиста есть, по нечистоте людий языческих, в мерзостех их, имиже наполниша ю от уст даже до уст во сквернениих своих, 12 и ныне дщерей ваших не дадите сыном их и дщерей их не приемлите сыновом вашым, и не ищите мира их и блага их даже до века, яко да укрепитеся и снесте благая земли, и наследие дадите сыновом вашым даже до века: 13 и по всех, яже приидоша на нас в делех наших злых и гресе нашем велицем, понеже несть якоже Бог наш, иже избавил еси нас от беззаконий наших и дал еси нам спасение: 14 зане обратихомся разорити заповеди Твоя и смеситися с людьми земными: не прогневайся на нас даже до скончания, еже не быти останку и спасаемому: 15 Господи Боже Израилев, праведен еси Ты, яко остахомся спасени, якоже день сей: се, мы пред Тобою есмы вси в беззакониих наших, понеже не возможно стати пред Тобою сего ради. === 10 === 1 И егда моляшеся Ездра и егда исповедашеся плачущь и моляся пред домом Божиим, собрашася к нему от Израиля собрание велие зело, мужие и жены и отроцы яко плакахуся людие и вознесоша плачь. 2 И отвеща Сехениа сын Иеилев от сынов Иламлих и рече Ездре: мы преступихом пред Богом нашим и пояхом жены чуждия от людий земли, и ныне есть упование Израилю о сем: 3 и ныне завещаем завет Богу нашему, да отвержем вся жены и рожденых от них, якоже хощет: востани и устраши их заповедьми Бога нашего, и по закону да будет: 4 востани, понеже на тебе есть глагол, и мы с тобою: укрепися и сотвори. 5 И воста Ездра, и закля князи, священники и левиты и всего Израиля, да сотворят по словеси сему. И кляшася. 6 И воста Ездра от лица дому Божия и иде в сокровищный дом Ионана сына Елисувова и седе тамо: хлеба не яде и воды не пи, плакаше бо о преступлении пришедших от пленения. 7 И послано бысть слово во Иудею и во Иерусалим всем сыновом преселения, да соберутся во Иерусалим: 8 всяк, иже аще не приидет в три дни, по совету князей и старейшин, возмется все имение его, и той отлучен будет от сонмища преселения. 9 И собрашася вси мужие Иудины и Вениамини во Иерусалим треми денми: сей есть месяц девятый: в двадесятый день месяца седоша вси людие пред домом Божиим трепещуще о словеси и от зимы. 10 И воста Ездра священник и рече к ним: вы преступисте и взясте жены иноплеменнически, еже приложити ко греху Израилеву: 11 и ныне дадите хвалу Господу Богу отец наших, и сотворите угодное пред Ним, и отлучитеся от людий земли и от жен иноплеменнических. 12 И отвещаша все множество гласом великим и реша: по словеси твоему к нам сотворим: 13 обаче людие мнози суть, и время зимнее, и несть мощно стояти вне: и дело несть дне единаго или двух, зело бо много согрешихом во словеси сем: 14 да поставятся князие наши во всем множестве и во всех градех наших, иже пояша жены иноплеменничи, да приидут во времена повеленная, и с ними старейшины от всякаго града и судии, еже отвратити гнев ярости Бога нашего от нас словесе ради сего. 15 Обаче Ионафан сын Асаилев и Иасса сын Фекуев со мною о сем, и Месоллам и Савафай левитин помагаяй им. 16 И сотвориша тако сынове преселения: и разыдошася Ездра священник и мужие князие отечеств в домы, и вси по именом, яко обратишася в день первый месяца десятаго, да взыщут глагола: 17 и совершиша во всех мужех, иже пояша жены иноплеменничи, даже до дне перваго месяца перваго. 18 И обретени суть от сынов священнических иже введоша жены иноплеменничи, от сынов Иисуса сына Иоседекова и братия его Маасиа и Елиезер, и Иарим и Гадалиа: 19 и даша руки своя изгонити жены своя, и согрешившии принесоша от овец о преступлении своем овна: 20 и от сынов Еммировых Ананий и Завдиа: 21 и от сынов Ирамлих Маасиа и Еллиа, и Самиа и Иеиил и Озиа: 22 и от сынов Фассуровых Елиоинай, Маасиа и Исмаил, и Нафанаель и Иозавад и Иласа: 23 и от левитов Иозавад и Фамуй и Колиа, тойже и Колит, и Фефеиа, и Иуда и Елиезер: 24 и от певцев Елисав: и от дверник Солмин и Телмин и Одуа: 25 и от Израиля, от сынов Форосовых Рамиа и Азиа, и Мелхиа и Мелмин, и Елиазар и Асавиа и Ванеа: 26 и от сынов Иламовых Матфаниа и Захариа, и Иаиил и Авдий, и Иеримоф и Илиа: 27 и от сынов Зафуевых Елионай, Елисув, Мафанай и Армоф, и Завад и Озиза: 28 и от сынов Вавеиных Ионан, Ананиа и Завуй и Фали: 29 и от сынов Вануевых Мосоллам, Маллух, Адаиа, Иасув и Саал и Римоф: 30 и от сынов Фааф-Моавлих Еднеа и Халил и Ванаиа, Маасиа, Матфаниа, Веселеил и Вануй и Манассии: 31 и от сынов Ирамовых Елиезер, Иесиа, Мелхиа, Самаиа, Семеон, 32 Вениамин, Малух, Самариа: 33 и от сынов Асимовых Метфанаиа, Мафафа, Завад, Елифалет, Иерами Манассий, Семей: 34 и от сынов Ванииных Моодиа, Амрам и Уил, 35 Ванаиа, Вадаиа, Хелиа, 36 Уаниа, Маримоф и Елиасив, 37 Матфаниа Мафанай. 38 И сотвориша сынове Вануиевы и сынове Семеины, 39 и Салемиа и Нафан и Адаиа, 40 Махнада, Авусесей, 41 Аруесриил и Самариа, 42 Селлум, Амариа, Иосиф: 43 от сынов Навуиных Иеиил, Мафафиа, Завад, Зевенай, Иадай и Иоиль и Ванеа. 44 Вси тии пояша жены иноплеменнически, и родиша от них сыны. == Книга Неемии == === 1 === 1 Словеса Неемии сына Ахалиина. И бысть в месяце Хаселев, двадесятаго лета, и аз бех в Сусан-Авире. 2 И прииде (ко мне) Ананиа един от братий моих с мужи Иудовы, и вопросих их о спасшихся, иже осташася от пленения, и о Иерусалиме. 3 И рекоша ми: оставшиися от пленения тамо во стране, во озлоблении велице и в поношении, и стены Иерусалимския разорены, и врата его сожжена огнем. 4 И бысть егда услышах словеса сия, седох и плаках и рыдах дни (многи), и бех постяся и моляся пред лицем Бога небеснаго, 5 и рекох: молю Тя, Господи Боже небесный, крепкий, великий и страшный, храняй завет и милосердие любящым Тя и хранящым заповеди Твоя: 6 да будут уши Твои внемлюще и очи Твои отверсте, еже слышати молитву раба Твоего, еюже аз молюся пред Тобою днесь, день и нощь, о сынех Израилевых рабех Твоих: и исповедаюся о гресех сынов Израилевых, имиже согрешихом пред Тобою, и аз и дом отца моего согрешихом: 7 преступлением преступихом Тебе и не сохранихом заповедий (твоих) и повелений и судеб, яже повелел еси Моисею рабу Твоему: 8 помяни убо слово, еже заповедал еси Моисею рабу Твоему глаголя: аще преступите вы, Аз расточу вы в люди, 9 и аще обратитеся ко Мне и сохраните заповеди Моя и сотворите я, аще будет разсеяние ваше до конца небесе, оттуду соберу вы и введу вы в место, еже избрах вселитися имени Моему тамо: 10 и тии раби Твои и людие Твои, ихже искупил еси силою Твоей великою и рукою Твоею крепкою: 11 молю, Господи, да будет ухо Твое внемлющее на молитву раба Твоего и на молитву рабов Твоих хотящих боятися имене Твоего: и благопоспеши убо рабу Твоему днесь, и даждь его в щедроты пред мужем сим. И аз бых виночерпчий царев. === 2 === 1 И бысть в месяце Нисане лета двадесятаго Артаксеркса царя, и вино бе предо мною: и взях вино и дах царю, и не бе ин пред ним. 2 И рече ми царь: чесо ради лице твое прискорбно есть, а неси болезнуяй? И несть сие, разве скорбь сердца. И убояхся зело 3 и рекох царю: царю, во веки живи: како не быти прискорбну лицу моему, понеже град, дом гробов отец моих опусте, и врата его сожжена суть огнем. 4 И рече ми царь: почто о сем ты вопрошаеши? И помолихся Господу Богу небесному 5 и рекох ко царю: аще царю видится благо, и аще угоден будет раб твой пред тобою, да послеши мене во Иудею, во град гробов отец моих, и возсозижду его. 6 Рече же ми царь, и наложница седяше близ его: до коего времене будет путь твой, и когда возвратишися? И угодно бысть пред лицем царевым, и посла мя, и положих ему время. 7 И рекох царю: аще царю видится благо, даждь мне послание ко воеводам стран за рекою, да преведут мене, дондеже прииду во Иудею, 8 и послание ко Асафу стражу дубравы царевы, да даст ми древа покрыти врата столпа дому, и на стены градныхя, и на дом, в оньже вниду. И даде ми царь, якоже рука Божия благая (бе) со мною. 9 И приидох ко воеводам стран за рекою и дах им послание царево: посла же царь со мною началники силы и конницы. 10 И услыша Санаваллат Аронитин и Товиа раб Аммонитин, и зло има бысть, яко прииде человек взыскати блага сыновом Израилевым. 11 И приидох во Иерусалим и бых ту три дни. 12 И востах нощию аз и мужие не мнози со мною, и ни комуже возвестих, что Бог дает в сердце мое сотворити со Израилем, и скота не бе со мною, токмо скот, на немже аз седях. 13 И внидох во врата Юдоли нощию, ко устию источника Смоковничнаго и ко вратом Гнойным, и бых размышляя о стене Иерусалимстей разореней и о вратах его пояденых огнем. 14 И приидох ко вратом Источника и ко купели цареве, и не бысть места скоту, на немже седях, да пройдет. 15 И взыдох на стену потока нощию, и размышлях о стене, и бех во вратех Юдоли, и возвратихся. 16 Стрегущии же не ведяху, камо ходих и что аз творю, и Иудеом и священником, и честным и воеводам и прочым творящым дела даже до тогда не сказах. 17 И рекох им: вы видите озлобление сие, в немже есмы, како Иерусалим опустошен, и врата его предана огню: приидите, и созиждем стены Иерусалима, и не будем ктому в поношение. 18 И сказах им руку Божию, яже есть блага со мною, и словеса царева, яже глагола мне, и рекох: востанем и созиждем. И укрепишася руцы их во благое. 19 И услыша Санаваллат Аронитин и Товиа раб Аммонитин и Гисам Аравитин, и посмеяшася нам, и приидоша к нам, и уничижиша, и рекоша: что дело сие, еже вы творите? Еда вы противу царя отметаетеся? 20 И воздах им слово и рекох к ним: Бог Небесе, Той благопоспешит нам, и мы раби Его чистии, (востанем) и созиждем: вам же несть части и правды и памяти во Иерусалиме. === 3 === 1 И воста Елиасув священник великий и братия его священницы, и создаша врата Овчая: сии освятиша их и поставиша двери их и даже до столпа Ста Лакот освятиша их, даже до столпа Анамеиля. 2 И близ его созидаша мужие Иерихонстии, и близ их созида Закхур сын Аманиин. 3 Врата же Рыбная созидаша сынове Асанаевы: сии покрыша их и поставиша двери их и заворы их и вереи их. 4 И близ их созидаше из Рамофы сын Уриин, сына Аккосова: и близ его созидаше Мосоллам сын Варахиин, сына Мазевиля: и близ их созидаше Садок сын Ваанаев: 5 и близ их созидаша Фекоими, сильнии же их не положиша выи своея в дело Господа Бога своего. 6 И врата старая созидаше Иоида сын Фасеков и Месуллам сын Васодиев: тии покрыста их и постависта двери их и заворы и вереи их. 7 И близ их созидаша Малтиа Гаваонитин и Еварон Миронофит, мужие от Гаваона и Масфы, даже до престола князя (иже бысть) об он пол реки. 8 И близ его созида Озиил сын Арахиев златарь: и близ его созида Ананиа сын Рокеима, и возставиша Иерусалим даже до стены широкия. 9 И близ их созидаше Рафаиа сын Сурин, началник половины окрестныя страны Иерусалимли. 10 И близ их созидаше Иедеа сын Еромафов, и противу дому его: и близ его созида Аттуф сын Асаваниин. 11 И вторую часть созидаше Мелхиа сын Ирамов и Асув сын Фааф-Моавль, и даже до столпа Пещнаго. 12 И близ его созидаше Саллум сын Аллоисов, началник половины страны окрестныя Иерусалимли, той и дщери его. 13 Врата Юдоли созидаша Анун и обитающии в Заноне: тии создаша их и поставиша двери их и заворы их и вереи их, и тысяща лакот в стене даже до врат Гнойных. 14 И врата Гнойная созидаше Мелхиа сын Рихавль, началник окрестныя страны Вифакрамския, той и сынове его, и покрыша их и поставиша двери их и заворы их и вереи их. 15 И врата Источника созидаше Соломон сын Халезеов, началник страны Масфы: той созда их и покры их, и постави двери их и заворы их и вереи их, и стену купели Силоамли ко вертограду цареву и даже до степеней низходящих от града Давидова. 16 По немже созидаше Неемиа сын Завухов, началник половины страны Вифсуровы, даже до вертограда гроба Давидова и даже до купели устроеныя и даже до дому сильных. 17 По нем созидаша левити, Раум сын Ванаимль: по нем созидаше Асавиа, началник половины страны Кеилы на стране своей, 18 и по нем созидаша братия их, Веней сын Инададов, началник половины окрестныя страны Кеилы. 19 И созидаше близ его Азур сын Иисусов, началник Масфы, меру вторую столпа восхода касающагося углу. 20 И по нем созидаше Варух, сын Завуев, меру вторую от угла даже до врат дому Елиасува священника великаго. 21 По нем созидаше Мерамоф сын Урии, сына Аккосова, меру вторую от врат дому Елиасувова даже до конца дому Елиасувова. 22 И по нем созидаша священницы, мужие от поля (иорданска). 23 И по нем созидаста Вениамин и Асув противу домов своих: и по нем созидаше Азариа сын Маасиев, сына Ананиина, близ дому своего. 24 По нем созидаше Ваней сын Ададов меру вторую от дому Азарии даже до угла и даже до уклонения. 25 Фалах сын Узаин противу угла и столпа возвышенаго из дому царева высоко, иже во дворе темничнем: и по нем Фадаиа сын Форосов. 26 И нафиними обиташа во Офале, даже до вертограда врат Водных ко востоком и даже до столпа, иже бе возвышен. 27 И по них созидаша Фекоими меру вторую от страны столпа великаго и высокаго даже до стены Офлы. 28 Вышше врат Конских созидаша священницы, един кийждо противу дому своего. 29 И по нем созидаше Саддук сын Еммирь противу дому своего: и по нем созидаше Самаиа сын Сехениев, страж врат восточных. 30 По нем созидаше Ананиа сын Селемиев и Аном сын Селефов шестый меру вторую: по нем созидаше Месуллам сын Варахиев противу сокровищницы своея. 31 По нем созидаше Мелхиа сын Сарефиев даже до дому нафинимля и щиты продающих, противу врат Судных, и даже до горницы угла. 32 И посреде врат Овчих созидаша ковачи и щитопродавцы. === 4 === 1 И бысть егда услыша Санаваллат, яко мы созидаем стены, и зло ему вменися, и разгневася зело, и посмеяшеся Иудеом, 2 и рече пред братиею своею, иже бяху сила Соморов, и рече: что Иудее сии созидают свой град? Еда жрети будут? Или возмогут? Или днесь изцелят камение, повнегда быти им в прах земли сожженным? 3 И Товиа Амманитянин близ его прииде и рече им: еда пожрут, или ясти имут на месте своем? Не взыдет ли лисица и разорит стену каменей их? 4 И рече Неемиа: услыши, Боже наш, яко сотворени есмы в посмеяние, 5 и обрати поношение их на главу их, и даждь их в посмеяние в землю пленения, 6 и не покрый беззакония их. 7 Бысть же егда услыша Санаваллат и Товиа, и Аравляне и Амманите, яко взыде отрасль стен Иерусалимских, зане начаша разселины заграждати, и зло им явися зело. 8 И собрашася вси вкупе, да приидут и ополчатся на Иерусалим и разорят его. 9 И молихомся ко Богу нашему и поставихом стражы на стене противу их день и нощь от лица их. 10 Рече же Иуда: истомлена есть сила (от) враг, и земля многа есть, и мы не можем созидати стены. 11 И рекоша оскорбляющии нас: не познают и не увидят, дондеже приидем посреде их и убием их, и престати сотворим делу. 12 И бысть егда приидоша Иудее, иже обитаху близ их, и реша нам: восходят от всех язык на ны. 13 И поставих в нижайших местех созади стен в закровении, и поставих люди по племеном с мечи их и с сулицами их и с луками. 14 И видех, и востах, и рекох ко честным и к воеводам и ко прочым людем: не убойтеся от лица их, помяните Господа Бога нашего великаго и страшнаго, и ополчитеся за братию вашу, за сыны вашя и дщери вашя, жены вашя и домы вашя. 15 Бысть же егда услышаша врази наши, яко ведомо бысть нам, и разори Бог совет их: и возвратихомся вси мы на стены, кийждо ко делу своему. 16 И бысть от дне того, пол вчиненых делаху дело, и половина их уготована бысть ко брани с сулицами и щитами, и луки и бронями, и началницы созади всего дому Иудина. 17 Созидающии стену и носящии бремена со оружием: единою рукою своею творяху дело, а другою держаху мечь. 18 Созидающым же единому коемуждо мечь бысть опоясан при бедре его, и созидаху, и трубяху трубами близ их. 19 И рекох ко честным и ко старейшинам и ко прочым людем: дело велико есть и пространно, и мы разлучени есмы на стене далече кийждо от брата своего: 20 на месте идеже услышите глас трубный, тамо тецыте к нам, и Бог наш ополчится о нас. 21 И мы быхом творяще дело, и пол нас держаху сулицы от восхода зари утренния даже до восхода звезд. 22 Во время же то рекох людем: кийждо со отроком своим да пребывает в среде Иерусалима: и будет вам нощь на стражу, а день на делание. 23 Аз же и братия мои и отроцы и мужие стражи, иже бяху созади мене, не снимахом одеяний наших тамо ни един от нас. === 5 === 1 И бысть вопль людий и жен их велик на братию свою Иудеи. 2 И быша нецыи глаголюще: сынове наши и дщери нашя мнози суть нам, и да возмем (за цену) пшеницу и ядим и живи будем. 3 И быша нецыи глаголюще: села наша и винограды нашя и домы нашя мы да дадим в залог, и возмем пшеницу, и ясти будем. 4 И быша нецыи глаголюще: взаим взяхом сребро на дани царевы, дадим села наша и винограды нашя и домы нашя: 5 и ныне якоже плоть братий наших, плоть наша, якоже сынове их, сынове наши: и се, мы порабощаем сыны нашя и дщери нашя в рабы, и суть от дщерей наших порабощены, и несть силы в руках наших (откупити) и села наша и винограды нашя у вельмож. 6 И оскорбех зело, егда услышах вопль их и словеса сия. 7 И усоветова сердце мое во мне, и воспретих державным и началным и рекох им: лихвы ли кийждо от брата своего истяжет, юже вы истязуете? И собрах противу им собрание велико 8 и рекох им: мы искупихом братию нашу Иудеов, проданых языком, по силе нашей: вы же продасте братию вашу, и отдадутся нам? И умолчаша, и не обретоша что отвещати. 9 И рекох: не добро дело, еже вы творите: тако не во страсе Бога нашего (ходяще) убежите ли от поношения языков врагов наших? 10 И аз и братия моя и знаемии мои взаим дахом им пенязи и пшеницу: оставим убо лихоимство сие: 11 возвратите же им днесь села их и винограды их и маслины их и домы их, и от сребра пшеницу и вино и елей отдадите им. 12 И рекоша: отдадим и от них не взыщем, тако сотворим, якоже ты глаголеши. И призвах священников и заклях их сотворити по словеси сему. 13 И отрясох одежду мою и рекох: тако да истрясет Бог всякаго мужа, иже не исполнит слова сего, от дому его и от трудов его, и да будет тако оттрясен и тощь. И рече все множество: аминь. И восхвалиша Бога. И сотвориша людие по глаголу сему. 14 От дне того, в оньже повеле (царь) мне быти вождем их в земли Иудине, от лета двадесятаго и даже до лета тридесять втораго Артаксеркса царя, лет дванадесять, аз и братия моя оброку их не ядохом. 15 И оброков первых, имиже прежде мене отягчиша их, и прияша от них в хлебе и в вине, по сих сребра (на всяк день) дидрахм четыредесять: и служебницы их обладаша людьми. Аз же не сотворих тако ради страха Божия. 16 И в деле стены сия созидах: и села не стяжах, и вси отроцы мои собрани бяху тамо на дело. 17 Иудей же и началников сто пятьдесят мужей, и приходящии к нам от язык, иже окрест нас, при трапезе Моей. 18 И бе уготовано мне на всяк день: телец един и овец шесть избранных и козел быша мне (и птицы), и между десяти дний всем вина много: и с сими хлеба господству моему не взысках, зане тяжка работа на людех сих. 19 Помяни мя, Боже мой, во благо по всем, елика сотворих людем сим. === 6 === 1 Бысть же егда услыша Санаваллат и Товиа и Гисам Аравийский и прочии врази наши, яко создах стену, и не остася в них скважня: и аз даже до времене онаго дверий не поставих во вратех: 2 и посла Санаваллат и Гисам ко мне, глаголюща: прииди, и соберемся вкупе в весех на поли Оно (глаголемем). Тии же помышляста мне сотворити злое. 3 И послах к нима послов, глаголя: дело велико аз творю и не могу снити, да не престанет дело: егда же совершу е, взыду к вама. 4 И посласта ко мне, якоже глагол сей, четырижды, и послах к нима по сим. 5 И присла ко мне Санаваллат пятое отрока своего, и послание отверсто в руку его, и бе написано в нем: 6 во языцех услышано есть, и Гисам рече, яко ты и Иудее мыслите отступити, сего ради ты созидаеши стену, и ты да будеши им в царя: 7 и к сим пророки поставил еси себе, да будеши во Иерусалиме царем над Иудою: и ныне возвестятся царю словеса сия: и сего ради ныне прииди, да сотворима совет вкупе. 8 И послах к нему, глаголя: не сотворися по словесем сим, якоже ты глаголеши, зане от сердца твоего ты лжеши в сих: 9 яко вси страшат нас, глаголюще: ослабеют руцы их от дела сего, и не сотворится: и ныне укрепих руки моя. 10 И аз внидох в дом Семеа сына Далаиева, сына Метавеилева, и той заключен, и рече: да соберемся в дом Божий посреде его и заключим двери его, яко приходят нощию, да убиют тя. 11 И рекох: кто есть муж, яков аз, и убежит? Или кто яко аз, иже внидет в дом, и жив будет? Не вниду. 12 И уразумех, и се, Бог не посла его: яко пророчествова слово на мя. 13 И Товиа и Санаваллат наяста на мя народ, да устрашуся, и сотворю тако, и согрешу, и да буду им во имя зло, яко да поносят ми. 14 Помяни, Боже, Товию и Санаваллата по делом их сим, и Ноадиа пророка и прочих пророк, иже страшаху мя. 15 И совершися стена в двадесять пятый месяца Елула в пятьдесят и два дни. 16 И бысть егда услышаша вси врази наши, и убояшася вси языцы, иже окрест нас, и нападе страх велик пред очи их, и познаша, яко от Господа Бога нашего совершено бысть дело сие. 17 И во дни оны от многих державных Иудиных послания прихождаху к Товии, и Товиина (послания) прихождаху к ним. 18 Мнози бо во Иудеи кляшася ему, яко зять бе Сехении сына Ираева: и Ионафан сын его поя дщерь Месулама сына Варахиина в жену. 19 И словеса его быша глаголющии ко мне, и словеса моя быша износящии ему. И послание посла Товиа, да устрашит мене. === 7 === 1 И бысть егда создася стена, и поставих двери, и сочтох придверники и певцы и левиты: 2 и повелех Анании брату моему и Анании началнику дому, иже во Иерусалиме: той бо бе яко муж истинен и бояйся Бога паче прочих: 3 и рекох има: да не отверзутся врата Иерусалимская, дондеже взыдет солнце: и еще им бдящым, да заключатся врата и засунута да будут засовами: и постави стражы от обитающих во Иерусалиме, кийждо во стражи своей и кийждо противу дому своего. 4 Град же бысть широк и велик, и людий мало в нем, и не бяху домы создани. 5 И даде Бог в сердце мое, и собрах честных и князей и народ в собрание: и обретох книгу сочисления тех, иже взыдоша первее, и обретох написано в ней: 6 и тии сынове страны возшедшии от пленения преселения, ихже пресели Навуходоносор царь Вавилонский, и возвратишася во Иерусалим и Иудею, кийждо муж во град свой, 7 с Зоровавелем и Иисусом и Неемиею, Азариа и Веелма, Наеман, Мардохей, Ваасан, Маасфараф, Ездра, Вогуиа, Инаум, Ваана, Масфар, мужие людий Израилевых: 8 сынове Форосовы две тысящы сто седмьдесят два, 9 сынове Сафатиевы триста седмьдесят два, 10 сынове Ираевы шесть сот пятьдесят два, 11 сынове Фааф-Моавли сынов Иисусовых и Иоавлих две тысящы шесть сот и осмьнадесять, 12 сынове Еламовы тысяща двести пятьдесят четыри, 13 сынове Соффуевы осмь сот четыредесять пять, 14 сынове Заханевы седмь сот шестьдесят, 15 сынове Вануиевы шесть сот четыредесять осмь, 16 сынове Вереиевы шесть сот двадесять осмь, 17 сынове Гетадовы две тысящы триста двадесять два, 18 сынове Адоникамли шесть сот шестьдесят седмь, 19 сынове Вагуиевы две тысящы шестьдесят седмь, 20 сынове Идини шесть сот пятьдесят четыри, 21 сынове Атировы и сынове Езекиевы девятьдесят осмь, 22 сынове Исамиевы триста двадесять осмь, 23 сынове Васеиевы триста двадесять четыри, 24 сынове Арифовы сто дванадесять, сынове Асеновы двести двадесять три, 25 сынове Гаваони девятьдесят пять, 26 сынове Вефалеимли сто двадесять три, сынове Атофовы пятьдесят шесть, 27 сынове Анафофовы сто двадесять осмь, 28 сынове Азамофовы, мужие Вифовы, четыредесять два, 29 мужие Кариафиаримли, Кафировы и Вирофовы седмь сот четыредесять три, 30 мужие Арама и Гаваа шесть сот двадесять един, 31 мужие Махимасовы сто двадесять два, 32 мужие Вефили и Аиевы сто двадесять три, мужие анавиа другаго сто пятьдесят два, 33 сынове Мегевосовы сто пятьдесят шесть, 34 мужие Иламаевы тысяща двести пятьдесят два, 35 сынове Ирамли триста двадесять, 36 сынове Иериховы триста четыредесять пять, 37 сынове Лодовы, Адидовы и Оновы седмь сот двадесять един, 38 сынове Ананини три тысящы девять сот тридесять: 39 священницы, сынове Иодаевы в дому Иисусове девять сот седмьдесят три, 40 сынове Еммировы тысяща пятьдесят два, 41 сынове Фассеуровы тысяща двести четыредесять седмь, 42 сынове Ирамовы тысяща седмьнадесять: 43 левити, сынове Иисуса Кадмиильскаго от сынов Удуилих седмьдесят четыри: 44 певцы, сынове Асафовы сто двадесять осмь: 45 дверницы сынове Селлумли, 46 сынове Атировы, сынове Телмони, сынове Аккувовы, сынове Атитовы, сынове Савиины сто тридесять осмь: 47 нафиними, сынове Илаевы, сынове Асефовы, сынове Заваофовы, 48 сынове Кирасовы, сынове Сисаины, сынове Фадони, сынове Лавани, сынове Агавовы, сынове Акувовы, 49 сынове Утаевы, сынове Китаровы, сынове Гавовы, сынове Селмеини, сынове Анановы, 50 сынове Садеины, сынове Гааровы, сынове Рааиины, 51 сынове Раасони, сынове Некодовы, 52 сынове Гизамли, сынове Озины, сынове Фессовы, 53 сынове Висиины, сынове Меиноновы, сынове Нефосаины, 54 сынове Ваквуковы, сынове Ахифовы, сынове Арурины, 55 сынове Васалофовы, сынове Мидаевы, сынове Адасани, 56 сынове Варкуевы, сынове Сисарафовы, сынове Фимаевы, 57 сынове Нисиины, сынове Атифовы: сынове рабов Соломоновых, 58 сынове Сутеины, сынове Сафаратовы, сынове Феридины, 59 сынове Лелилины, сынове Доркони, сынове Гадаили, сынове Фарахасовы, 60 сынове Саваини, сынове Иммини: 61 вси Нафиними и сынове слуг Соломоновых триста девятьдесят два. 62 И сии взыдоша от Фелмефа, Феласар, Харув, Ирон, Иемир, и не могоша сказати домов отечеств своих и семене своего, от Израиля ли быша: 63 сынове Далеаевы, сынове Вуаевы, сынове Товиины, сынове Некодаевы, шесть сот четыредесять два: 64 и от священник сынове Авиевы, сынове Аккосовы, сынове Верзеллаины, яко пояша от дщерей Верзеллаа Галаадитина жены и прозвашася по имени их. 65 Сии искаша писания своего родословия, и не обретоша, и извержени суть от священства. 66 Рече же Аферсафа им, да не ядят от святая святых, дондеже востанет священник изявляяй. 67 И бысть весь собор единодушно аки четыредесять две тысящы триста шестьдесят, 68 кроме рабов их и рабынь их, ихже бяху седмь тысящ триста тридесять седмь: и певцы и певницы двести тридесять шесть. 69 Кони (их) седмь сот тридесять шесть, мски их двести четыредесять пять, велблюды их четыре ста тридесять пять, ослы их шесть тысящ седмь сот двадесять. 70 И от части началников отечеств даша в дело Аферсафе, даша в сокровище златых тысящу, фиал пятьдесят и риз жреческих тридесять. 71 И от началников отечеств даша в сокровище дела злата драхм двадесять тысящ и сребра мнас две тысящы и триста. 72 И даша прочии людие злата драхм двадесять тысящ и сребра мнас две тысящы и двести, и риз священнических шестьдесят седмь. 73 И седоша священницы и левити и дверницы и певцы и прочий народ и нафиними и весь Израиль во градех своих. === 8 === 1 И прииде месяц седмый, сынове же Израилевы бяху во градех своих: и собрашася вси людие яко муж един на пространство, еже пред враты Водными, и рекоша Ездре писарю, да принесет книгу закона Моисеова, егоже заповеда Господь Израилю. 2 И принесе Ездра священник закон пред множество от мужей даже до жен, и всем, иже можаху разумети слышаще, в день первый месяца седмаго, 3 и чте в нем (явно на пространстве, еже пред враты Водными), от утра даже до полудне, пред мужи и женами, и сии бяху разумеюще, и уши всех людий ко книзе закона. 4 И ста Ездра писец на степени древянем, егоже сотвориша к народовещанию, и сташа близ его Матфафиа и Самеа, и Ананиа и Уриа, и Хелкиа и Маасиа одесную его, ошуюю же Фадаиа и Мисаил, и Мелхиа и Осам, и Асавадма и Захариа и Месоллам. 5 И разгну Ездра книгу пред всеми людьми, яко той бе над людьми, и бысть егда разгибаше ю, сташа вси людие. 6 И благослови Ездра Господа Бога великаго, и отвещаша вси людие и реша аминь, воздвигше руце свои, и преклонишася и поклонишася Господеви лицем на землю. 7 Иисус же и Ванаиа и Саравиа, Акан, Саватей, Камптас, Азариа, Иозавадан, Анифанес и левити бяху вразумляюще людий в законе: людие же стояху на стоянии своем. 8 И чтоша в книзе закона Божия, и поучаше Ездра и изясняше ко разумению Господню, и разумеша людие чтение. 9 Рече же Неемиа и Ездра священник и писец, и левити и толкующии людем, и реша всем людем: день свят есть Господу Богу нашему, не рыдайте и не плачите. Понеже плакаша вси людие, егда услышаша словеса закона. 10 И рече им: идите и ядите тучная и пийте сладкая, и послите части не имущым, яко свят есть день Господеви нашему, и не печалитеся, ибо радость Господня сия есть сила наша. 11 Левити же молчание творяху во всех людех, глаголюще: молчите, яко день свят есть, и не тужите. 12 И отидоша вси людие ясти и пити, и послати части, и сотворити веселие велико, яко разумеша словеса, имже научиша их. 13 И в день вторый собрашася князие отечеств со всеми людьми, священницы и левити ко Ездре писцу, да протолкует всем словеса законная. 14 И обретоша писано в законе, егоже заповеда Господь рукою Моисеовою, да обитают сынове Израилевы в кущах в праздник месяца седмаго, 15 и да проповедят трубами во всех градех их и во Иерусалиме. И рече Ездра: изыдите на гору, и принесите ветви масличны, и ветви древес кипарисных, и ветви мирсинныя, и ветви финиковы, и ветви древес дубравных, сотворити кущы по писаному. 16 И изыдоша людие, и принесоша, и сотвориша себе кущы кийждо на крове своем и во дворех своих, и во дворех дому Божия и на пространстве врат Водных и на пространстве врат Ефремлих. 17 И сотвориша весь сонм возвративыйся от пленения кущы, и седоша в кущах, яко не сотвориша от дний Иисуса сына Навина тако сынове Израилевы даже до дне того. И бысть веселие велико. 18 И читаху в книзе закона Божия на всяк день, от дне перваго даже до дне последняго. И сотвориша праздник седмь дний, и в день осмый собрание по обычаю. === 9 === 1 В день же двадесять четвертый месяца сего собрашася сынове Израилевы в посте и во вретищих, и персть на главах их. 2 И отлучишася сынове Израилевы от всякаго сына чужда, и исповедаху грехи своя и беззакония отец своих. 3 И сташа на стоянии своем и чтоша в книзе закона Господа Бога своего четверицею в день, и бяху исповедающеся Господеви и покланяющеся Господу Богу своему. 4 И сташа на степени левитов Иисус и сынове Кадмиили, Саханиа сын Саравиин, сынове Ханани, и возопиша гласом великим ко Господу Богу своему, 5 и рекоша левити, Иисус и Кадмиил: востаните, благословите Господа Бога нашего от века даже до века: и благословят имя славы Твоея, и вознесут во всяцем благословении и хвале. 6 И рече Ездра: Ты еси Сам Господь един, Ты сотворил еси небо и небо небесе и вся вои их, землю и вся, елика на ней суть, моря и вся, яже в них, и Ты оживляеши вся, и вои небеснии покланяются Тебе: 7 Ты еси Господь Бог, ты избрал еси Аврама и извел еси его от страны Халдейския, и положил еси имя ему Авраам, 8 и обрел еси сердце его верно пред Тобою, и завещал еси с ним завет дати ему землю Хананейску и Хеттейску, и Аморрейску и Ферезейску, и Иевусейску и Гергесейску, и семени его: и утвердил еси словеса Твоя, яко праведен еси: 9 и видел еси озлобление отец наших во Египте, и вопль их услышал еси на мори Чермнем, 10 и дал еси знамения и чудеса во Египте на фараона и на вся рабы его и на вся люди земли его: познал бо еси, яко возгордешася на них, и сотворил еси Себе имя, якоже день сей: 11 и море расторгл еси пред ними, и проидоша посреде моря по суху, и гонители их ввергл еси в глубину, яко камень в воде зелней: 12 и в столпе облачне водил еси их во дни и в столпе огненне в нощи, еже осветити им путь, по немуже идоша: 13 и на гору Синайскую сшел еси, и глаголал еси к ним с небесе, и дал еси им судбы правы и закон истинный, повеления и заповеди благи: 14 и субботу святую Твою явил еси им, заповеди, повеления и закон повелел еси им рукою Моисеа раба Твоего: 15 хлеб же с небесе дал еси им во алчбе их в пищу им, и воду из камене извел еси им в жажди их, и рекл еси им, да внидут и наследят землю, на нюже простерл еси руку Твою дати им: 16 тии же и отцы наши возгордешася и ожесточиша выя своя и не послушаша заповедий Твоих, 17 и не восхотеша слышати, и не воспомянуша чудес Твоих, яже сотворил еси им: и ожесточиша выю свою, и даша начало возвратитися на работу свою во Египет: Ты же, Боже, милостив и щедр, долготерпелив и многомилостив, и не оставил еси их: 18 еще же сотвориша себе и телца слияна и рекоша: сии бози изведоша нас из Египта: и сотвориша раздражения велия: 19 Ты же в щедротах Твоих многих не оставил еси их в пустыни, столп облачный не уклонил еси от них во дни, еже наставити их на путь, и столп огненный в нощи, еже осветити им путь по немуже идоша, 20 и Дух Твой благ дал еси, еже научити их, и манны Твоея не лишил еси от уст их, и воду дал еси им в жажди их, 21 и четыредесять лет препитал еси их в пустыни, ничтоже им оскуде: одеяния их не состарешася, и сапози их не раздрашася: 22 и дал еси им царства, и люди разделил еси им, и наследиша землю Сиона царя Есевонска и землю Ога царя Васанска: 23 и умножил еси сыны их яко звезды небесныя, и ввел еси их в землю, о нейже глаголал еси отцем их внити и наследити ю: 24 (и внидоша сынове их) и наследиша землю: и сокрушил еси пред ними обитающих в земли Хананейстей, и дал еси их в руку их, и цари их и люди земли, да сотворят им якоже угодно пред ними: 25 и взяша грады высокия, и одержаша домы полны всех благих, кладязи ограждены камением, винограды и маслины и всяко древо снедное во множество, и ядоша и насытишася, и утолстеша и разширишася во благости Твоей велицей: 26 и изменишася и отступиша от Тебе, и повергоша закон Твой созади плоти своея, и пророки Твоя избиша, иже засвидетелствоваху им, да обратятся к Тебе, и сотвориша хулы велики: 27 и дал еси их в руку оскорбляющих я, и озлобиша их: и во бремя печали своея возопиша к Тебе, и Ты с небесе Твоего услышал еси, и по щедротам Твоим многим дал еси им спасителей, и спасл еси их от рук враг их: 28 и егда упокоишася, возвратишася сотворити лукавое пред Тобою: и оставил еси их в руках враг их, и обладаша ими: и паки возопиша к Тебе, Ты же от небесе услышал еси, и избавил еси их в щедротах Твоих мнозех, 29 и засвидетелствовал еси им, да обратятся к закону Твоему: они же возгордешася и не послушаша, но в заповедех Твоих и в судбах Твоих согрешиша, яже сотворив человек жив будет в них: и даша плещы непокоривыя, и выю свою ожесточиша, и не послушаша: 30 и продолжил еси на них лета многа, и засвидетелствовал еси им Духом Твоим и рукою пророк Твоих, и не вняша, и предал еси их в руку людий земных: 31 в милосердиих же Твоих многих не сотворил еси их в скончание, ниже оставил еси их, яко Бог силен еси и милостив и щедр: 32 и ныне, Боже наш крепкий, великий, державный и страшный, храняй завет Твой и милость Твою, да не явится мал пред Тобою всяк труд, иже обрете нас и цари нашя, и началники нашя и священники нашя, и пророки нашя и отцы нашя и вся люди Твоя, от дний царей Ассурских и даже до дне сего: 33 и Ты праведен во всех, яже приидоша на нас, яко истину сотворил еси, мы же согрешихом: 34 и царие наши и началницы наши, и священницы наши и отцы наши не сотвориша закона Твоего и не внимаша повелением Твоим и свидением Твоим, имиже засвидетелствовал еси им, 35 и тии во царствии Твоем и во благостыни Твоей мнозе, юже дал еси им, и в земли широцей и тучней, юже дал еси пред ними, не послужиша Тебе и не отвратишася от начинаний своих лукавых: 36 се, мы днесь есмы раби, и земля, юже дал еси отцем нашым ясти плод ея и благая ея, се, есмы раби на ней: 37 и плоды ея мнози царем, имже предал еси нас за грехи нашя, и телесы нашими владычествуют и скоты нашими, якоже угодно им, и в печали велицей есмы: 38 и во всех сих мы полагаем завет верен и пишем, и печатают вси началницы наши, левити наши и священницы наши. === 10 === 1 И в печатлеющих быша сии: Неемиа Артасаста сын Ахалиев и Седекиа 2 сын Араиев, и Азариа и Иеремиа, 3 Фасур, Амариа, Мелхиа, 4 Аттус, Севаниа, Маллух, 5 Ирам, Мерамоф, Авдиа, 6 Даниил, Ганафон, Варух, 7 Месуллам, Авиа, Миамин, 8 Маазиа, Велгаи, Самаиа: сии священницы. 9 Левити же: Иисус сын Азариин, Ваней от сынов Инададовых, Кадмиил 10 и братия его Саваниа, Одуиа, Калитан, Фелиа, Анан, 11 Миха, Роов, Асевиа, 12 Закхор, Саравиа, Севаниа, 13 Одуа, сынове Вануини. 14 Началницы людий: Форос, Фааф-Моав, Илам, Зафуиа, 15 сынове Ванниины Азгад, Вивай, 16 Ананиа, Вагой, Идин, 17 Атир, Езекиа, Азур, 18 Одувиа, Исам, Висий, 19 Ариф, Анафоф, Новай, 20 Мегафис, Месуллам, Изир, 21 Месозевил, Садук, Иеддуа, 22 Фалтиа, Анан, Анаиа, 23 Осиа, Ананиа, Асув, 24 Адой, Фалаа, Совик, 25 Раум, Ессавана, Маасиа 26 и Аиа, Енан, Инам, 27 Малух, Ирам, Ваана. 28 И прочии от людий, священницы, левити, дверницы, певцы, нафиними и всяк приходяй от людий земских ко закону Божию, жены их, сынове их, дщери их, всяк ведяй и разумеяй, 29 укрепляхуся над братиею своею, и заклинаша их, и внидоша в клятву и в роту, еже ходити в законе Божии, иже дан есть рукою Моисеа раба Божия, да сотворят и сохранят вся заповеди Господни и судбы Его и повеления Его, 30 и еже не дати дщерей наших людем земским, и дщерей их не возмем сыновом нашым: 31 людие же земли носящии продаемая и вся купуемая во дни субботы продавати, не купим от них в субботы, ни в день святый: и оставим лето седмое, и даяние всех рук. 32 И поставим над нами заповедь даяти нам третию часть дидрахмы на лето, на дело дому Бога нашего, 33 на хлебы предложения и на жертвы повседневныя, и во всесожжение присное суббот, новомесячий, в праздники и во святая, и яже о гресех, помолитися за Израиля, и на дела дому Бога нашего. 34 И жребий метнухом о ношении древес, священницы и левити и людие, носити в дом Бога нашего, по домом отечеств наших, от времене до времене, от лета до лета возжигати на олтари Господу Богу нашему, якоже писано есть в законе, 35 и приносити первородная земли нашея и первородная плода всякаго древа, от лета до лета, в дом Господень, 36 и первенцы сынов наших и скотов наших, якоже писано есть в законе, и первенцы волов наших и стад наших приносити в дом Бога нашего, священником служащым в дому Бога нашего: 37 и начатки жит наших и плод всякаго древа, вина и елеа, приносити будем священником в сокровище дому Божия, и десятину земли нашея левитом, и тии левити десятину приемлют во всех градех дел наших. 38 Будет же священник сын Ааронов с левиты в десятинах левитов, и левити имут приносити десятую часть десятины в дом Бога нашего в сокровище дому Божия, 39 яко в сокровища принесут сынове Израилевы и сынове левитстии начатки пшеницы и вина и елеа, и тамо (будут) сосуди святии, и священницы и служителие и дверницы и певцы, и не оставим дому Бога нашего. === 11 === 1 И вселишася началницы людий во Иерусалиме, и прочии людие метнуша жребия взяти единаго от десяти, да пребывает во Иерусалиме граде святем, и девять частей во градех. 2 И благословиша людие всех мужей, иже сами произволиша обитати во Иерусалиме. 3 И сии началницы страны, иже обиташа во Иерусалиме: и во градех Иудиных обиташе кийждо во одержании своем, во градех своих Израилевых, священницы и левити, и нафинее и сынове рабов Соломоновых. 4 И во Иерусалиме обиташа от сынов Иудиных и от сынов Вениаминих. От сынов Иудиных Афаиа сын Озиин, сын Захариин, сын Самариин, сын Сафатиев, сын Масеиль и от сынов Фаресовых, 5 и Маасиа, сын Варухов, сын Халазов, сын Озиев, сын Адаиев, сын Иоаривль, сын Захариев, сын Силониев: 6 вси сынове Фаресовы, иже обиташа во Иерусалиме, четыреста шестьдесят осмь мужие крепцы. 7 Сии же сынове Вениамини: Силон сын Месулаев, сын Иоадов, сын Фадаиев, сын Колиев, сын Маасиев, сын Ефииль, сын Иессиев, 8 и по нем Гевеил, Силиев, девять сот двадесять осмь. 9 И Иоиль сын Зехрин настоятель над ними, и Иуда сын Асанаев, от града, вторый. 10 От священников: и Иадиа сын Иоаривль, Иахинь, 11 Сареа сын Елхиев, сын Месуламов, сын Саддуков, сын Мариофов, сын Етофов, началник дому Божия, 12 и братия их делающе дело церкве осмь сот двадесять два: и Адаиа сын Иероамль, сына Фалалиина, сына Намасова, сына Захариина, сына Фасефурова, сына Мелхиина, 13 и братия его началницы отечеств двести четыредесять два: и Амесай сын Езрииль, сына Сакхиева, сына Масаримофова, сына Еммирова, 14 и братия его сильнии во бранех сто двадесять осмь: и настоятель их Сохриил, сын Великих. 15 И от левит: Самаиа сын Асува, сына Езрикама, сына Асавии, сына Вонни, 16 и Саввафей, и Иосавад над делами дому Божия внешняго и от началников левитских, 17 и Матфаниа, сын Михаев, сын Зехриев, сына Асафова, началник хваления, и Иуда молитвы, и Вокхиа вторый от братий своих, и Авдиа сын Самеа сына Галелова, сына Идифунова: 18 всех левитов во граде святем двести осмьдесят четыре. 19 И дверницы: Акув, Теламин и братия их, стрегущии врат, сто седмьдесят два. 20 Прочии же от Израиля иерее же и левити во всех градех Иудеи кийждо в наследии своем. 21 И нафинее, иже обиташа во Офле, Сиай и Гесф от нафинеев. 22 И началник левитов во Иерусалиме Озий сын Ваниин сына Савиева, сына Матфаниева, сына Михаева, от сынов Асафовых поющих над делом дому Божия, 23 яко заповедь царева (бе) им: и пребываше верно над певцами оброк коегождо дне в день свой. 24 И Фафеа, сын Массизавилов от сынов Зариных, сына Иудина, при руце цареве всякия потребы ради людий. 25 И при дворех, иже на селех их: и от сынов Иудиных обиташа в Кариафарвоце и в селех его, и в Девоне и в селех его, и в Кафсеиле и в селех его, 26 и во Иисусе, и в Моладе, и в Веффалате, 27 и во Асерсоале, и в Вирсавеи и в селех ея, 28 и в Секелаге, и Мавне и в селех ея, 29 и в Ремаоне, и в Саре, и во Иеримуфе, 30 и в Заннои, и во Одолламе и в селех их, и в Лахисе и в селех его, и во Азике и в селех ея: и ополчишася в Вирсавеи даже до дебри Еннон. 31 И сынове Вениамини от Гаваи и Магмаса и Вефиля и от весей его, 32 и во Анафофе, в Нове, во Ании, 33 во Асоре, в Раме, в Гефаиме, 34 в Адоде, в Севоиме, в Навалате, 35 в Лидде и во Оногиарасим. 36 И от левитов части Иудины и Вениамини. === 12 === 1 И сии суть священницы и левити, возшедшии с Зоровавелем сыном Салафиилевым и Иисусом: Сараиа, Иеремиа, Ездра, 2 Амариа, Малух, Аттуй, 3 Сехениа, Реум, Маримоф, 4 Адаиа, Генафон, Авиа, 5 Миамин, Маадиа, Велга, 6 Семиа, Иоиарив, Идиа, 7 Салуй, Амук Хелкиа, Одуиа: сии началницы священников и братия их во дни Иисуса. 8 И левити: Иисус, Вануй, Кадмиил, Саравиа, Иодай и Матфаниа, при руках той, и братия их в чредныя служения: 9 и Ваквакиа и Анай, братия их, прямо их во чреды дневныя. 10 Иисус же роди Иоакима, Иоаким роди Елиасива, Елиасив роди Иодаа, 11 Иодай же роди Ионафана, и Ионафан роди Адуа. 12 Во дни же Иоакима беху братия его священницы и началницы отечеств: Сараии Амариа, Иеремии Ананиа, 13 Ездре Месуллам, Амарии Иоанан, 14 Амалуху Ионафан, Сехении Иосиф, 15 Аресу Еднас, Мариофу Елкей, 16 Аддаю Захариа, Ганафону Месуллам, 17 Авии Зехрий, Миамину Маадай, Фелетию, 18 Валгасу Самуей, Семии Ионафан, 19 Иоариву Матфанай, Едию Озий, 20 Салаию Калаиа, Амеку Авед, 21 Елкии Асавиа, Иедии Нафанаил. 22 Левити во дни Елиасива, Иоада и Иоа, и Иоанан и Идуа, написани началницы отечеств, и священницы в царство Дариа Персскаго. 23 И сынове Левии началницы отечеств писани в книзе словес дний и даже до дний Иоанана сына Елисуева. 24 И началницы левитом Асавиа и Саравиа и Иисус, и сынове Кадмииловы и братия их пред ними в песнех хвалити и исповедовати, по заповеди Давида человека Божия, по чредам от дне до дне. 25 Матфаниа и Ваквакиа, Авдиа, Месуллам, Телмон, Акув, стрегущии дверницы стражу, внегда собрати ми дверники. 26 Во дни Иоакима сына Иисусова, сына Иоседекова, и во дни Неемии и Ездры священника и книгочии, 27 и во обновлении стены Иерусалимския, взыскаша левитов в местех их да возведут их во Иерусалим сотворити обновление и веселие во хвалении и песнех, в кимвалех и псалтирех и гуслех. 28 И собрашася сынове поющих и от страны окрестныя во Иерусалим, и от сел Нетофатиевых, 29 и от Дому (Галгал) и от стран (Гева и Азмавет), яко села создаша себе певцы окрест Иерусалима: 30 и очистишася священницы и левити, и очистиша людий и врата и стену. 31 И возведох началников Иудиных на стену, и поставих два клироса велика, хвалы ради, и проидоша от десныя страны на стену ко вратом Гнойным. 32 И идоша за ними Осаиа и половина началников Иудиных, 33 и Азариа и Ездра и Месуллам, 34 Иуда и Вениамин, и Самаиа и Иеремиа: 35 и от сынов священничих с трубами Захариа сын Ионафанов, сын Самаии, сын Мафаниин, сын Михаин, сын Закхуров, сын Асафов, 36 и братия его Самаиа и Озиил, Гелол, Маиа, Нафанаил и Иуда и Ананий, еже хвалити в песнех Давида человека Божия: 37 и Ездра книгочий пред ними при вратех Источника, хвалити прямо их. И взыдоша на лествицы града Давидова, на восход стены выше дому Давидова и даже до врат Водных к востоку. 38 И клирос вторый хвалу воздающих идяше сопротив их, и аз по нем, и половина людий по стене, верху столпа Фануримля и даже до стены пространнейшия, 39 и на врата Ефраима, и на врата старая, и на врата Рыбная, и на столп Анамеиль, и на столп Емаф, и даже до врат Овчих. 40 И сташа на вратех Стражи, сташа же два клироса хваляща в дому Божии, и аз и половина воевод со мною, 41 и священницы Елиаким, Маасиа, Миамин, Михеа, Елиона, Захариа, Ананиа с трубами, 42 и Маасиа и Семеиа, и Елеазар и Озиа, и Иоанан и Мелхиа, и Елеамий и Иезур. И слышани быша певцы и Иезриа, и соглядани, и восхвалиша. 43 И пожроша в день той жертвы великия и возвеселишася, яко Бог возвесели их вельми: и жены их и чада их радовахуся, и слышано бысть веселие то во Иерусалиме издалеча. 44 И поставиша в день той мужей над сокровищными хранилищи, на начатки и десятины, и да собирают сими началниками от градов части священником и левитом, яко веселие бе во Иудеи, во священницех и в левитех предстоящих, 45 и стрежаху стражу Бога своего, и хранение очищения, и певцев и дверников, по повелению Давида и Соломона сына его. 46 Яко во дни Давидовы Асаф от начала первый в певцех и в песнех и хвалении Богу, 47 и весь Израиль во дни Зоровавеля и во дни Неемии даяху оброк певцем и дверником от дне до дне и освящаху левитом, левити же освящаху сыновом Аароним. === 13 === 1 В день той чтено бысть в книзе Моисеове во слышание людем, и обретеся написано в ней: да не имут внити Амманитяне и Моавитяне в церковь Божию даже до века, 2 понеже не сретоша сынов Израилевых со хлебом и водою и наяша на них Валаама на проклятие их: и обрати Бог наш проклятство на благословение. 3 И бысть егда слышаху закон, и отлучиша всех чуждих от Израиля. 4 И прежде сего Елиасив священник живяше в сокровищнем дому Бога нашего, сродник Товиин, 5 и сотвори ему сокровищный дом велик: таможе бяху прежде приносяще жертву и ливан, и сосуды и десятину пшеницы и вина и елеа, уставленая левитом и певцем и дверником, и начатки священническия. 6 Во всех же сих не бых во Иерусалиме, понеже в лето тридесять второе Артаксеркса царя Вавилонскаго приидох ко царю: и по скончании дний испросих от царя 7 и приидох во Иерусалим, и уразумех зло, еже сотвори Елиасив Товии, сотворити ему сокровищный дом во дворе дому Божия, 8 и зло явися ми зело: и извергох вся сосуды дому Товиева вон из дому сокровищнаго, 9 и рекох, и очистиша сокровищный дом: и возвратих онамо сосуды дому Божия, жертву и ливан. 10 И познах, яко части левитския не быша даны, и побегоша кийждо на село свое левити и певцы творящии дело. 11 И пряхся со стратигами и рекох: чесо ради оставлен бысть дом Божий? И собрах их и поставих оных во стояниих своих. 12 И весь Иуда принесоша десятину пшеницы и вина и елеа в сокровища под руку Селемии священника и Садока писца и фадаии от левит, 13 и при них Анан сын Закхуров, сын Матфаниев, яко верни искушени суть над ними разделяти братиям своим. 14 Помяни мя, Боже, того ради, и да не погибнет милость моя, юже сотворих в дому Господа Бога моего и в чинех его. 15 Во днех тех видех во Иуде топчущих точило в субботу, и носящих снопы, и возлагающих на ослы и вино, и гроздие, и смоквы, и всякое бремя, и носящих во Иерусалим во дни субботныя: и засвидетелствовах им в день продаяния их. 16 И Тиряне обиташа в нем приносяще рыбы, и вся продаемая продающе в субботы сыновом Иудиным и во Иерусалиме. 17 И обличих сынов Иудиных свободных и рекох им: что сия вещь злая, юже вы творите, и скверните день субботный? 18 Не сия ли сотвориша отцы ваши, и наведе на них Бог наш и на нас вся злая сия, и на град сей, и вы прилагаете гнев на Израиля, скверняще субботу? 19 Бысть же егда поставишася врата во Иерусалиме прежде субботы, и рекох, и запроша двери и повелех, да не отверзают их даже по субботе: и от отрок моих поставих над враты, да ни един вносит бремя в день субботный. 20 И сташа вси и творяху куплю вне Иерусалима единощи и дващи. 21 И засвидетелствовах о них и рекох им: что вы пребываете пред стеною? Аще вторицею сие сотворите, простру руку мою на вас. И от времене того не приидоша в субботу. 22 И рекох левитом, иже бяху очищени, дабы приходили хранити врат и святити день субботный. И сих ради помяни мя, Боже, и прости ми по множеству милости Твоея. 23 И во днех онех видех Иудеев поемших жены Азотския, Амманитяны, Моавитския, 24 и сынове их от полу глаголаху азотским языком и не умеяху глаголати иудейски: 25 и запретих им, и проклях их, и поразих от них мужей, и оплеших их, и заклях их Богом, аще дадите дщери вашя сыновом их и аще поймете от дщерей их сыновом вашым и себе: 26 не тако ли согреши Соломон царь Израилев? И во языцех мнозех не бысть царь подобен ему, и возлюблен Богу бе, и постави его Бог царем над всем Израилем, и того прельстиша жены чуждия: 27 и мы послушаем ли вас творити всяко зло сие, согрешити Богу нашему, еже пояти жены иноплеменничи? 28 И от сынов Иоада сына Ельтува священника великаго, зятя Санаваллатова Уранитина, и изгнах его от мене. 29 Помяни им, Боже, за осквернение священства и завета священническа и левитска. 30 И очистих их от всякия чуждия нечистоты, и поставих чреды священником и левитом, комуждо по делу его, 31 и даяние древес во временех уставленых и первородных. Помяни мя, Боже наш, во благое. == Вторая книга Ездры == === 1 === 1 И сотвори Иосиа пасху во Иерусалиме Господу своему, и пожре пасху четвертагонадесять дне перваго месяца, 2 поставляя священники по чредам в ризы одеянны в церкви Господни: 3 и рече левитом священнослужителем Израилевым, да освятят себе Господеви на поставление святаго кивота Господня в дому, егоже созда Соломон сын Давидов царь: 4 не будет вам взяти его на раменах и ныне служите Господу Богу вашему и пецытеся о языцех Его Израили, и уготовайтеся по отечеством и племеном вашым по писанию Давида царя Израилева и по величеству Соломона сына его: 5 и станите в церкви по участию началства отеческаго вашего левитскаго, иже пред братиею вашею сынми Израилевыми, 6 по чину пожрите пасху, и жертвы уготовайте братиям вашым, и сотворите пасху по заповеди Господни данней Моисею. 7 И даде Иосиа людем обретшымся (тамо) агнцев и овнов тридесять тысящ, телцев три тысящы: сия от царских дана суть по обещанию людем и священником и левитом.. 8 И даде Хелкиа и Захариа и Сиил приставницы святилища жерцем на пасху овец две тысящы шесть сот, телцев триста. 9 И Иехониа, и Самеа, и Нафанаил брат, и Асавиа, и Охиил, и Иорам тысященачалницы даша левитом на пасху овец пять тысящ, телцев седмь сот. 10 И сим бывшым, благолепно сташа священницы и левити, имеюще опресноки, по племеном 11 и по частеначалством отцев, пред людьми приносити Господу по писанным в книзе Моисеове, и тако во утрие. 12 И испекоша пасху огнем, якоже подобаше, и жертвы свариша в сосудех медяных и в конобех со благовонием, и принесоша всем, иже от народа. 13 И по сих уготоваша себе и священником братиям своим сыновом Аароним. 14 Иерее бо возношаху тучная до конца часа, а левити уготоваша себе и жерцем братии своей, сыном Аароним. 15 Священнопевцы же сынове Асафовы бяху в чину своем по заповеди Давидове: и Асаф, и Захариа, и Еддинус иже бяше от царя. 16 И вратари при киихждо дверех: да не преступает кийждо своея чреды, братия бо их левити уготоваша им. 17 И совершишася жертвы Господни в той день сотворити пасху 18 и принести жертвы на жертвенник Божий по повелению царя Иосии. 19 И обретшиися во время то пасху и праздник опресночный дний седмь. 20 И не принесеся пасха такова во Израили от времене Самуила пророка, 21 и вси царие Израилевы не праздноваша таковыя пасхи, какову сотвори Иосиа, и священницы и левити, и Иудее и весь израиль обретшийся во обитании своем во Иерусалиме. 22 Во осмоенадесять лето царствующу Иосии празднована бысть пасха сия. 23 И управлена быша дела Иосиева пред Господем его сердцем полным благочестия: 24 и яже о нем, писана суть в прежних временех, о согрешивших и нечествовавших противу Господа паче всякаго языка и царства и имиже оскорбиша Его в разуме: и словеса Господня восташа на Израиля. 25 И по всему деянию сему Иосиину, случися фараону царю Египетскому идущу брань воздвигнути в Харкамисе при Евфрате: и изыде сопротиву ему Иосиа. 26 И посла царь Египетский к нему, глаголя: что мне и тебе есть, царю Иудин? 27 Несмь на тя послан от Господа Бога, на Евфрат бо брань моя есть: и ныне Господь со мною есть, и Господь поспешаяй ми есть, отступи от мене и не сопротивляйся Господеви. 28 И не возвратися Иосиа на колесницу свою, но ратовати его усиловашеся, не внемля словесем Иеремии пророка от уст Господних: 29 но постави противу его брань на поли Магеддонстем. И снидоша началницы ко царю Иосии. 30 И рече царь отроком своим: изведите мя от брани, изнемогох бо зело. И абие изведоша его отроцы его из ополчения. 31 И взыде на колесницу вторую свою, и пришед во Иерусалим жизнь свою премени, и погребен во отчем гробе. 32 И во всей Иудеи плакаша о Иосии: и рыдаше Иеремиа пророк о Иосии, и председящии со женами плакаху его даже до сего дне. И издадеся сие быти всегда на весь род Израилев. 33 Сия же вписана суть в книзе повестей о царех Иудиных, и коеждо сотвореное деяния Иосиина, и славы его, и разума его в законе Господни: яже прежде сотвореная от него, и яже ныне, писана суть в книзе царей Израилевых и Иудиных. 34 И вземше сущии от языка Иоахаза сына Иосиина, поставиша царем вместо Иосии отца его, суша двадесяти триех лет. 35 И царствова над Иудою и над Иерусалимом месяцы три: и отстави его царь Египетский, да не царствует во Иерусалиме. 36 И наложи на народ (Иудин) сребра талант сто и злата един талант. 37 И постави царь Египетский Иоакима брата его царем Иудеи и Иерусалиму. 38 И связа Иоаким вельможы, Заракина же брата своего емь изведе из Египта. 39 Лет же бяше двадесяти пяти Иоаким, егда царствовати нача в земли Иудине и Иерусалиме: и сотвори лукавое пред Господем. 40 На негоже изыде Навуходоносор царь Вавилонский, и связа его медяными узами, и приведе в Вавилон: 41 и священныя сосуды Господни взем Навуходоносор и принес положи в Вавилоне во храме своем. 42 А яже о нем глаголанная, и о нечистоте его и о злочестии, писана суть в книзе времен царских. 43 И воцарися Иоаким сын его вместо его: егда же поставлен бысть, бяше лет осминадесяти: 44 царствова же месяцы три и дний десять во Иерусалиме, и сотвори лукавое пред Господем. 45 И по лете послав Навуходоносор, пресели его в Вавилон вкупе со священными сосуды Господними, 46 и постави Седекию царя Иудеи и Иерусалиму, суща лет двадесяти единаго: царствова же лет единонадесять, 47 и сотвори лукавое пред Господем и не устыдеся от словес реченных Иеремиею пророком от уст Господних. 48 И заклят бысть от царя Навуходоносора именем Господним, и клявся отступи, и ожесточив свою выю и сердце свое, преступи законная Господа Бога Израилева. 49 И князие людий и священников многая беззакония сотвориша, и преступиша паче всех нечистот всех языков, и оскверниша дом Господень освященный во Иерусалиме. 50 И посла Бог отец их чрез ангела Своего призвати их, яко щадяше и и жилище Свое: 51 тии же поругашася посланным Его: и в оньже день глагола Господь, бяху ругающеся пророком Его, 52 дондеже прогневан Той на язык Свой за злочестия, повеле изыти на них царем Халдейским: 53 тии убиша юнош их мечем окрест святаго дому их: и не пощадеша юноши и девы, и старца и младенца, 54 но всех предаде в руки их: и вся священныя сосуды Господни малыя и великия, и сосуды кивота Господня, и царския ковчеги вземше принесоша в Вавилон: 55 и сожгоша дом Господень, и разориша стены Иерусалима, и столпы его сожгоша огнем, 56 и скончаша вся честнейшая его в ничтоже, и оставшихся от меча отведоша и Вавилон: 57 и беша раби ему и сыном его даже до царства Персскаго, во исполнение словес Господних от уст Иеремииных: 58 дондеже благоизволит земля субботы своя, во все время опустения своего субботствовати будет во исполнение лет седмидесяти. === 2 === 1 Царствующу Киру Персскому перваго лета, во исполнение слова Господня усты Иеремииными, 2 воздвиже Господь дух Кира царя Персскаго, и проповеда во всем царстве своем, и купно писаньми, глаголя: 3 сия глаголет Кир царь Персский: (Господь) мене постави царя вселенней, Господь Израилев, Господь Вышний, 4 и назнамена мне создати Ему дом во Иерусалиме, иже во Иудеи: 5 аще убо кто есть в вас от языка Его, да будет Господь его с ним: и возшед во Иерусалим, иже во Иудеи, да созиждет дом Господа Израилева: Сей Господь, иже вселися во Иерусалиме: 6 елицы убо окрест мест обитают, да помогут ему, иже суть на месте том, и златом и сребром, 7 даянием с конми и скоты и иными по обещанию предлагаемыми во святилище Господне, еже во Иерусалиме. 8 И стоящии началницы коленом отечеств Иудиных и колена Вениаминова, и священницы и левити, и вси, ихже дух воздвиже Господь взыти, создати дом Господень, иже во Иерусалиме, 9 и иже окрест их, помогоша во всем златом и сребром, конми и скоты и обетами многими зело, ихже чувство воздвижено бысть. 10 И Кир царь изнесе священныя сосуды Господни, ихже пренесе Навуходоносор (царь Вавилонский) из Иерусалима и постави их во идолнице своей: 11 и изнесе тыя Кир царь Персский и предаде я Мифридату сокровищехранителю своему, 12 той же предаде Сасавассару властителю Иудейскому. 13 Ихже сие число бе: возливалниц златых тысяща, и возливалниц сребряных тысяща, кадилниц сребряных двадесять девять, фиал златых тридесять, сребряных две тысящы четыре ста и десять, и иных сосудов тысяща: 14 всех же сосудов пренесеных златых и сребряных пять тысящ четыре ста шестьдесят девять. 15 Принесени же Сасавассаром вкупе с теми, иже от пленения из Вавилона во Иерусалим. 16 Во временех же Артаксеркса царя Персскаго, восписаша ему на обитающих во Иудеи и Иерусалиме Вилемос и Мифридат, и Тавеллий и Рафим, и Веелтефм и Самеллий писец, и прочии соучиненнии, обитающии в Самарии и во иных местех, нижеписанное послание: 17 царю Артаксерксу господину отроцы твои, Рафим писец случаев и Самеллий писец, и прочии от совета их и судии, иже в Килисирии и Финикии: 18 и ныне знаемо да будет господину царю, яко Иудее, иже взыдоша от вас, к нам пришедшии во Иерусалим град отметный и строптивый, созидают торжища его, и составляют стены его, и храм воздвизают: 19 аще убо град той созиждется и стены совершены будут, не токмо дани не потерпят даяти, но и царем воспротивятся: 20 а понеже действуются яже о храме, право быти разсуждаем не презрети сего, 21 но знаемо сотворити господину нашему царю, да аще возмнится тебе, да взыщется в книгах отец твоих, 22 и обрящеши в летописцех писано о тех, и познаеши, яко град той бяше отметник и царей и грады смущающь, 23 и Иудее отступницы, и ополчение сотворяюще в нем от века, еяже ради вины и град той опустошен бысть: 24 ныне убо знаемо ти творим, господине царю яко аще град сей создан будет и стены его возставлены будут, исходу тебе ктому не будет в Килисирию и Финикию. 25 Тогда восписа царь Рафиму пишущему случаемая и Веелтефму и Самеллию писцу и прочым, соучиненым и обитающым в Самарии и Сирии и Финикии, сия писаная: 26 чтох послание, еже посласте ко мне: повелех убо взыскати, и обретено есть, яко град той есть от начала царем противляющься, 27 и человецы отступления и ополчение в нем сотворяюще, и царие крепцы и жестоцы быша во Иерусалиме, обладающе и дани налагающе на Килисирию и Финикию: 28 ныне убо повелех возбранити человеком оным созидати град и предусмотряти, да ничтоже боле сих сотворят, 29 ни да происходят бо множайшая лукавства, во еже царем труд творити. 30 Тогда прочетше от царя Артаксеркса написанная Рафим и Самеллий писец и с ними соучиненнии, впрягше потщанно приидоша во Иерусалим с конники и народным ополчением, 31 и начаша созидающих удержавати: и упразднися созидание храма, иже во Иерусалиме, даже до втораго лета царства Дариа царя Персскаго. === 3 === 1 И воцарився Дарий сотвори вечерю велику всем, иже под ним, и всем, иже от дому рода его, и всем вельможам Мидским и Персским, 2 и всем сатрапом, и наместником, и воеводам, иже под ним от Индии даже до Ефиопии на сто двадесять седмь воеводств. 3 И егда ядоша и пиша, и насытившеся возвратишася, тогда Дарий царь вниде в ложницу свою, и поспа и возбудися. 4 Тогда трие юноши телеснии стражы, иже стрежаху тело царево, рекоша друг ко другу: 5 рцем кийждо от нас едино слово: и иже превозможет, и егоже явится слово мудрейше другаго, даст ему царь Дарий дары великия и почести великия, 6 и порфирою одеян будет, и во злате пити и на злате спати, и колесницу златоуздну, и кидар виссонный, и гривну окрест выи, 7 и вторый сядет по Дарии ради премудрости своея, и сродник Дариев наречется. 8 И тогда написавше кийждо свое слово запечаташа и подложиша под возглавие Дариа царя, 9 и рекоша: егда востанет царь, дадут ему писание, и егоже разсудит царь и три вельможи Персстии, яко слово его мудрейше есть, тому да дастся победа, якоже писано есть, 10 един написа: сильнее есть вино, 11 другий написа: сильнее есть царь. 12 Третий написа: сильнее суть жены, паче же всех побеждает истина. 13 Егда же воста царь, вземше писания даша ему, и прочте. 14 И послав созва всех вельможей Персских и Мидских и сатрапов, и воевод и наместников и ипатов, 15 и седе в советней палате, и прочтено бысть писание пред ними. 16 И рече: призовите юнош, и тии известят словеса своя. И призвани быша и внидоша. 17 И рече им: возвестите нам о тех, яже писана суть. И нача первый, иже глагола о крепости вина, 18 и рече сице: о, мужие, коль премогает вино! Всех человек пиющих его прельщает: 19 ум царев и сираго творит ум един, и раба и свободнаго, и убогаго и богатаго, 20 и всяк ум превращает в безстрашие и веселие, и не памятует всякия печали и всякаго долга: 21 и вся сердца сотворяет богата, и не памятует царя, ниже вельможи, и вся по талантом глаголати творит: 22 и не памятуют, егда пиют, угождати другом и братии, и не много потом извлачат мечы: 23 и егда от вина востанут, не помнят, яже сотвориша: 24 о, мужие не премогает ли вино, еже тако понуждает творити? И умолча глаголавый сице. === 4 === 1 И нача вторый глаголати, рекий о крепости царстей: 2 о, мужие! Не премогают ли человецы, землю и море обдержаще, и вся, яже в них? 3 Царь же премогает и господствует всеми и владычествует ими, и все, еже речет им, творят: 4 аще речет им творити брань ко друг другу, творят: и аще послет их на супостаты, идут и истрывают горы и стены и столпы, 5 убивают и убиваеми бывают, и царева словесе не преступают: аще же победят, царю приносят вся, и елика аще пленят, и ина вся: 6 и елицы не воюют, ниже ополчаются, но делают землю, паки, егда сеют, зажинающе приносят цареви, 7 и един другаго понуждающе, приносят дань царю: 8 и той сам един есть: аще речет убити, убивают: аще речет отпустити, отпускают: речет поразити, поразят: 9 речет разорити разорят: речет созидати, созидают: речет, посецыте, посецают: речет насадити, насаждают: 10 и вси людие его и силы его слушают единаго: и к сим той возлежит, яст и пиет и спит: 11 тии же стрегут окрест его и не могут отити, кийждо творити дел своих, ниже преслушают его: 12 о, мужие! Како не превозмогает царь, егоже тако слушают? И умолча. 13 Третий же, иже рече о женах и о истине, той есть Зоровавель, нача глаголати: 14 о, мужие! Не велик ли есть царь и мнози человецы, и вино не премогает ли? Кто же есть властвуяй ими или кто господствуяй ими? Не жены ли? 15 Жены родиша царей и всех людий, иже господствуют над морем и землею: 16 и от тех рождени суть, и тыя воздоиша тех, иже насадиша винограды, от которых вино творится: 17 и тыя творят ризы (красны) человеком, и тыя творят славу человеком, и не могут человецы быти без жен: 18 и аще соберут злато и сребро и всяку вещь красну, и увидят жену едину добру зраком и красотою, 19 и вся сия оставльше, на ню внемлют, и отверстыми усты зрят ю, и вси оныя желают паче злата и сребра и всякия вещи предрагия: 20 человек отца своего оставляет, иже воспита его и свою страну, и ко своей жене прилепляется, 21 и с женою оставляет душу, и ниже отца памятует, ни матере, ниже страны: 22 и отсюду подобает вам разумети яко жены властвуют вами: не болезнуете ли, и труждаетеся, и вся женам даете и приносите? 23 И вземлет человек оружие свое, и исходит на путь творити разбой, (убийства,) и татьбу и на море плавати и на реки, 24 и льва видит, и во мрак входит: и егда украдет и похитит и корысть обрящет, ко возлюбленней своей приносит: 25 и паче любит человек жену свою, нежели отца и матерь: 26 и мнози обезумишася от лиц женских и раби быша ради тех, 27 и мнози погибоша и прельстишася и согрешиша ради жен: 28 и ныне не веруете ли мне? Не велик ли есть царь во власти своей? Не вся ли страны не смеют прикоснутися ему? 29 Видех его и Апаминю, дщерь Вартака дивнаго, наложницу цареву, седящую одесную царя 30 и отемлющую диадиму со главы царевы и возлагающу на себе, и по ланите бияше царя левою рукою: 31 и кроме сих царь отверстыми усты зряше на ню: и аще посмеется пред ним, смеется и он: аще же разгневана будет нань, ласкает ю, дондеже примирится ему: 32 о, мужие, не сильны ли жены, яко сице творят? 33 И тогда царь и вельможи смотряху друг на друга. И нача глаголати о истине: 34 о, мужие, не сильны ли жены? Велика земля, и высоко небо, и быстро течением солнце, яко обращается на крузе небеснем и паки притекает на место свое во един день: 35 не велик ли, иже сия творит? И истина велика и крепчае паче всех: 36 вся земля истину призывает, и небо оную благословляет, и вся дела трясутся и трепещут (ея), и несть с нею обиды ни единыя: 37 обидит вино, обидит царь, обидит жены, неправедни вси сынове человечестии, и неправедна вся дела их сицевая, и несть в них истины, и во своей неправости погибают: 38 истина же пребывает и возмогает во век, и живет и обладает во век века, 39 и несть у нея приятия лица, ниже различия, но правая творит и от всех неправедных и лукавых огребается, и вси благоволят в делех ея, 40 и несть в суде ея ничтоже неправедно: и сия крепость и царство, и власть и величество всех веков: благословен Бог истины. 41 И преста глаголати. И вси людие тогда возопиша и рекоша: велика есть истина и премогает. 42 Тогда царь рече ему: проси еже хощеши, множае писаных, и дам тебе, понеже обретен еси мудрейший, и близ мене да сядеши, и сродник мой наречешися. 43 Тогда рече царю: помяни обещание твое, имже обещал еси создати Иерусалим в день, в оньже царство твое приял еси, 44 и вся сосуды взятыя из Иерусалима отпустити, ихже отлучи Кир, егда заклятся изсещи Вавилон, и обеща послати тамо: 45 ты же обещал еси создати храм, егоже сожгоша Идумее, егда опустошена бысть Иудеа от Халдеи: 46 и ныне сие есть, еже прошу от тебе, господи царю и о том молю тя, и сие есть величество, еже от тебе: молю убо, да сотвориши обещание, еже обещал еси Царю Небесному сотворити из уст твоих. 47 Тогда востав царь Дарий, облобыза его и написа о нем послание ко всем правителем и воеводам, и наместником и вельможам, да проводят его и всех сущих с ним восходящих созидати Иерусалим: 48 и всем наместником, иже бяху в Килисирии и Финикии и иже в Ливане, написа послание, да привозят древа кедрова от Ливана во Иерусалим и да созидают с ним град: 49 писа же и всем Иудеом восходящым от царства во Иудею о свободе, да всяк сильный и вельможа, и наместник и правитель не приходит ко вратом их, 50 и всю страну, юже обдержат, безданну быти им: и Идумее да оставят села Иудейская, имиже обладают: 51 и на созидание храма даяти по всякое лето талант двадесять, дондеже созиждется: 52 и на жертвенник всесожжения приносити на всяк день, якоже имеют заповедь, иных талант седмьнадесять, да приносят десять на коеждо лето: 53 и всем приходящым от Вавилона созидати град, да будет свобода им и сыном их, и всем священником приходящым. 54 Написа же и подаяние, и священническую ризу (повеле дати), в нейже служат. 55 И левитом писа даяти оброк даже до дне, в оньже совершится дом и Иерусалим созиждется. 56 И всем стрегущым града писа, даяти им жребии и оброки. 57 И отпусти вся сосуды, яже отлучи Кир от Вавилона, и вся елика рече Кир сотворити, и он повеле творити и послати во Иерусалим. 58 И егда изыде юноша (сей), воздвиг лице на небо прямо Иерусалиму, благослови Царя Небеснаго, глаголя: 59 от Тебе победа и от Тебе премудрость, и Твоя слава, и аз раб Твой: 60 благословен еси, иже дал еси мне премудрость, и Тебе исповемся, Господи Боже отец наших. 61 И прия послания, и изыде, и прииде в Вавилон, и возвести братии своей всем. 62 И благословиша Бога отец своих, яко даде им ослабу и отпущение, 63 да взыдут и созиждут Иерусалим и храм, идеже именовано есть имя Его в нем. И радовахуся с мусикиею и веселием дний седмь. === 5 === 1 По сих же избрани суть изыти началницы домов отечеств по племеном их, и жены их, и сынове их, и дщери их, и раби их, и рабыни их, и скоти их: 2 и Дарий царь посла с ними конники тысящу, дондеже возведут их во Иерусалим с миром и с мусикиею, с тимпаны и трубами: 3 и вся братия их бяху играюще, и сотвори их взыти вкупе с ними. 4 И сия суть имена мужей, иже взыдоша по отечеством своим и по коленом в части началств своих: 5 священницы сынове Финееса, сына Аароня, Иисус сын Иоседека Сареова и Иоаким сын Зоровавеля сына Салафиилева, от дому Давидова, от рода Фаресова, колена же Иудина, 6 иже глаголаше при Дарии цари Персстем словеса премудра, во второе лето царства его, месяца Нисана, перваго месяца. 7 Суть же сии от Иудеи изшедшии от плена преселения, ихже пресели Навуходоносор царь Вавилонский в Вавилон, 8 и возвратишася во Иерусалим и во прочую Иудею, кийждо во свой град, иже приидоша с Зоровавелем и Иисусом, Неемиею, Захариею, Рисеем, Енинием, Мардохеем, Веелсаром, со Асфарасом, с Реелием, с Роимом с Вааном, началники их. 9 Число сущих от языка и началницы их: сынове Форосовы две тысящы и сто седмьдесят два, сынове Сафатовы четыреста седмьдесят два, 10 сынове Аресовы седмь сот пятьдесят шесть, 11 сынове Фааф-Моавли две тысящы осмь сот и дванадесять, 12 сынове Иламовы тысяща двести пятьдесят четыре, сынове Зафуины девять сот четыредесять пять, сынове Корвеовы седмь сот пять, сынове Ваниины шесть сот четыредесять осмь, 13 сынове Виваины шесть сот двадесять три, сынове Садасовы три тысящы двести двадесять два, 14 сынове Адоникамовы шесть сот шестьдесят седмь, сынове Вагоины две тысящы шестьдесят шесть, сынове Адинуевы четыре ста пятьдесят четыре, 15 сынове Атирезекиевы девятьдесят два, сынове Килановы и Азитасовы шестьдесят седмь, сынове Азурановы четыре ста тридесять два, 16 сынове Ананиевы сто един, сынове Аромовы тридесять два, сынове Вассаевы триста дванадесять три, сынове Арсифурифовы сто два, 17 сынове Метировы три тысящи пять, сынове от Вефломонов сто двадесять три, 18 иже от Нетофаи пятьдесят пять, иже от Анафофа сто пятьдесят осмь, иже от Вефсамоса четыредесять два, 19 иже от Кариафиарима двадесять пять, иже из Кафиры и Вирофа седмь сот четыредесять три, иже из пиры седмь сот, 20 иже Хадиасовы и Амидиевы четыре ста двадесять два, иже от Кирама и Гаввиса шесть сот двадесять един, 21 иже от Макалона сто двадесять два, иже от Витолиа пятьдесят два, сынове Нифисовы сто пятьдесят шесть, 22 сынове Каламолалуевы и Онусовы седмь сот дванадесять пять, сынове Иереховы триста четыредесять пять, 23 сынове Анаасовы три тысящы триста тридесять. 24 Жерцы: сынове Иеддуа, сына Иисуева, с сыны Санасивовыми девять сот седмьдесят два, сынове от Мируфа тысяща пятьдесят два, 25 сынове Фасарони тысяща четыредесять седмь, сынове Хармиевы тысяща седмьнадесять. 26 Левити же: сынове Иесуевы и Кадмииловы, и Ваннуевы и Судиевы, седмьдесят четыре. 27 Священнопевцы: сынове Асафовы сто четыредесять осмь. 28 Дверницы же: сынове Салумовы, сынове Аттаровы, сынове Толмановы, сынове Дакувиевы, сынове Титаевы, сынове Самиевы, всех сто тридесять девять. 29 Священнослужителие: сынове Исавовы, сынове Асифаевы, сынове Таваофовы, сынове Кирасовы, сынове Судовы, сынове Фалеевы, сынове Лаванаевы, сынове Аграваевы, 30 сынове Акуаевы, сынове Утаевы, сынове Китавовы, сынове Агаваевы, сынове Сиваиевы, сынове Анани, сынове Кафуаевы, сынове Геддуровы, 31 сынове Иаировы, сынове Десановы, сынове Ноиваевы, сынове Хасеваевы, сынове Газираевы, сынове Озиевы, сынове Финоевы, сынове Асараевы, сынове Васфаиевы, сынове Асанаевы, сынове Меаниевы, сынове Нафисиевы, сынове Акувовы, сынове Акифаевы, сынове Асуровы, сынове Фаракимовы, сынове Васалофовы, 32 сынове Меедаевы, сынове Куфаевы, сынове Хареевы, сынове Харкусовы, сынове Асирари, сынове Фомиевы, сынове Насифовы, сынове Атифаевы. 33 Сынове отрок Соломоновых: сынове Асапфионовы, сынове Фарираевы, сынове Иеилевы, сынове Лозони, сынове Издаилевы, сынове Сафифовы, 34 сынове Агиаевы, сынове Фахарефовы, сынове Савиины, сынове Сарофиевы, сынове Масиасовы, сынове Гаровы, сынове Аддусовы, сынове Сувасовы, сынове Афераевы, сынове Варадисовы, сынове Сафатовы, сынове Алломовы. 35 Всех священнослужителей и сынов отрок Соломоновых триста седмьдесят два. 36 Сии возшедшии от Фермелефа и Фелерсаса, вождь их Хараафаларь и Ааларь, 37 и не могоша возвестити отечеств своих и родов, яко от Израиля ли суть: сынове Ладана сына Ванова, сынове Некодановы, шесть сот пятьдесят два: 38 и от жерцев творящии жречество, и не обретошася: сынове Авдиины, сынове Аккосовы, сынове Аддуса, поемшаго Авгию жену от дщерей Верзеллеевых, и прозван бысть во имя его: 39 и сих взыскану бывшу родословному писанию и не обретену, отлучени суть от священства. 40 И рече им Неемиа и Атфариа, да не причащаются святынь, дондеже востанет архиерей облечен во изявление и истину. 41 Вси же бяху от Израиля, от двунадесяти лет и выше, кроме рабов и рабынь, четыредесять две тысящы триста шестьдесят: раби сих и рабыни седмь тысящ триста четыредесять седмь, певцы и певицы двести четыредесять пять: 42 велблюд четыре ста тридесять пять, коней седмь тысящ тридесять шесть, мсков двести четыредесять пять, подяремник пять тысящ пять сот двадесять пять. 43 И от настоятелей по отечеством, егда приидоша во храм Божий, иже во Иерусалиме, обещаша воздвигнути храм на месте его по силе своей 44 и даяти во святое сокровище на дела злата мнас тысящу и сребра мнас пять тысящ и риз священнических сто. 45 И вселишася священницы и левити, и иже (изыдоша) от народа во Иерусалим и во страну, и священнопевцы, и дверницы, и весь Израиль в селех своих. 46 Настоящу же седмому месяцу и сущым сыном Израилевым коемуждо во своих, собрашася единодушно во двор первых врат восточных. 47 И востав Иисус сын Иоседеков и братия его священницы и Зоровавель сын Салафиилев и братия его, уготоваша олтарь Богу Израилеву, 48 да возносят на нем всесожжения по чину, якоже в книзе Моисеа человека Божия писана суть, 49 и собрашася к ним от иных народов земли, и воздвигнуша жертвенник на месте своем, яко во вражде бяху с ними, и премогоша их вси языцы земстии: и приношаху жертвы по времени и всесожжения Господеви, утреннее и вечернее. 50 И сотвориша кущей потчения праздник, якоже повелено в законе, и жертвы на всяк день, якоже подобаше, 51 и по сих приношения непрестанная, и жертвы субботния и новомесячныя и праздников всех освященных. 52 И елицы обещаша обет Богу от новомесячия седмаго месяца, начаша приносити жертвы Богу, храм же Господень не бысть еще создан. 53 И даша сребро каменосечцем и делателем пищу и питие с радостию, и даша карры Сидоняном и Тиряном, да привозят им от Ливана древа кедрова, да приведут судна во Иоппийское пристанище, по повелению, еже писано бысть им от Кира царя Персскаго. 54 И во второе лето пришед во храм Божии во Иерусалим, месяца втораго, нача Зоровавель сын Салафиилев и Иисус сын Иоседеков и братия их, и священницы, левити и вси, иже приидоша от пленения во Иерусалим, 55 и основаша храм Божий в новомесячии втораго месяца втораго лета, егда приидоша во Иудею и во Иерусалим, 56 и поставиша левиты от двадесяти лет на дела Господня: и ста Иисус и сынове его и братия и Кадмиил брат, и сынове Мадиавуни, и сынове Иодаа Илиадуева с сынми и братиями, вси левити единодушно дела призирателие, творяще дела в дому Господни, и создаша делателие дом Господень. 57 И сташа священницы облечени в ризы с мусикиею и трубами, и левити сынове Асафовы имеюще кимвалы, восхваляюще Господа и благословяще, по Давиду царю Израилеву, 58 и пояху песньми благословяще Господа, яко благость Его и слава во веки во всем Израили. 59 И вси людие вострубиша и возгласиша гласом великим, восхваляюще Господа о воздвижении дому Господня. 60 И приидоша от священников, левитов и предстоятелей по отечеством своим старейшины, иже видеша прежний дом, к сему созиданию с плачем и воплем великим, 61 и мнози со трубами и радостию гласа велия, 62 яко людем не слышати труб плача ради людскаго, народ бо бысть трубящь зело, яко далече слышатися. 63 И услышавше врази колена Иудина и Вениаминова, приидоша познати, кий глас трубный? 64 И познаша, яко сущии от пленения созидают храм Господу Богу Израилеву. 65 И приступльше к Зоровавелю и Иисусу и к началником отечеств, рекоша им: да созидаем вкупе с вами: 66 тако бо, якоже вы, слушаем Господа вашего и Ему жрем от дний Асвасарефа царя Ассирийскаго, иже пресели нас зде. 67 И рече им Зоровавель и Иисус и началницы отечеств Израилевых: несть вам и нам созидати дом Господу Богу нашему: 68 мы бо сами созиждем Господу Богу Израилеву по чину, якоже повеле нам Кир царь Персский. 69 Языцы же земстии стужающе сущым во Иудеи и пакости творяще, не попущаху созидати, 70 и козни и людий наводяще и крамолы творяще возбраниша совершити дело созидания во все время жизни Кира царя, и препятие сотвориша созиданию лета два, даже до Дариева царства. === 6 === 1 Во второе же лето царства Дариева пророчества Аггей и Захариа сын Аддов, пророцы, ко Иудеем, иже во Иудеи и во Иерусалиме, именем Господа Бога Израилева к ним. 2 Тогда став Зоровавель сын Салафиилев и Иисус сын Иоседеков, начаста созидати дом Господень, иже во Иерусалиме, сущым с ними пророком Господним помагающым им. 3 В то время прииде к ним Сисинний воевода Сирийский и Финикийский и Сафравузан и друзие его, и рекоша им: 4 чиим повелением вы дом сей созидаете, и кров сей, и ина вся совершаете? И кто суть строителие, иже сия созидают, 5 и имеша благодать посещения бывшаго на пленение от Господа старейшины Иудейстии: 6 и не возбраниша им созидати, дондеже возвестится Дарию о сих и отвещано будет. 7 Образ же послания, еже писаша Дарию и послаша: Сисинний воевода Сирийский и Финикийский и Сафравузан и друзие, иже в Сирии и Финикии воеводы, царю Дарию радоватися: 8 вся знаема да будут господину нашему царю, яко пришедше во страну Иудейску и вшедше во Иерусалим град, обретохом от пленения старейшин Иудейских во Иерусалиме граде 9 созидающих дом Господу велик, нов от каменей тесаных драгих, полагающе древа в стенах, 10 и дела та с прилежанием творятся, и преспевает дело в руках их и во всей славе и прилежании совершается: 11 тогда вопросихом старейшин оных, глаголюще: чиим повелением вы созидаете дом сей и дела та основаете? 12 Вопросихом убо их, да ведомо сотворим тебе и напишем ти человек предстателей, и имен писания испросихом от оных предстателей: 13 тии же отвещаша нам, глаголюще: мы есмы раби Господа, иже сотвори небо и землю, 14 и созидашеся сей дом прежде лет многих от царя Израилева великаго и крепкаго, и совершися, 15 и понеже отцы наши прогневавше согрешиша к Богу Израилеву небесному, предаде их в руки Навуходоносора царя Вавилонскаго, царя Халдейска, 16 дом же той разоривше сожгоша и людий плениша в Вавилон: 17 в первое же лето царствующу Киру царю над страною Вавилонскою, писа царь Кир дом той созидати, 18 и священныя сосуды златыя и сребряныя, ихже изнесе Навуходоносор из дому, иже во Иерусалиме, и постави я во своем капищи, паки изнесе та Кир царь от храма, иже в Вавилоне и предаде их Зоровавелю и Санавассару воеводе, 19 и повелено бысть ему отнести вся сия сосуды и возложити во храм, иже во Иерусалиме, и храм Господень сей созидати на месте его: 20 тогда Санавассар оный пришед, положи основания дому Господня, иже во Иерусалиме, и от онаго даже доныне зиждемый не прия совершения: 21 ныне убо, аще угодно тебе, о, царю, да поищется в царских книгохранилницах Кировых (яже в Вавилоне), 22 и аще обретено будет с повелением Кира царя бывшее строение дому Господня, иже во Иерусалиме, и судится от господина царя нашего, да возвестится о тех нам. 23 Тогда царь Дарий повеле искати в царских книгохранилницах сущих в Вавилоне, и обретено бысть во Екватанех, во граде сущем во стране Мидийстей, место едино (в летописце), в немже написана бяху сия: 24 в лето первое царствующу Киру, царь Кир повеле дом Господень, иже во Иерусалиме, созидати, идеже жряху огнем непрестанным, 25 егоже высота лакот шестьдесят, широта лакот шестьдесят, с домами каменей тесаных треми и с домом древяным того места новым единым, и расходы даяти из дому Кира царя: 26 и священныя сосуды дому Господня златыя же и сребряны, ихже взя Навуходоносор из дому (Господня), иже во Иерусалиме, и отнесе в Вавилон, возвратити в дом, иже во Иерусалиме, идеже бяху прежде, да поставятся тамо. 27 Повеле же (царь) прилежати Сисиннию воеводе Сирийску и Финикийску и Сафравузану и клевретом его и учиненным в Сирии и Финикии началником, да не приступают к месту, оставят же отроку Господню Зоровавелю, началнику же Иудейскому, и старейшинам Иудейским дом Господень оный созидати на месте его. 28 И аз повелех всячески созидати и прилежати, да помогают сущым от пленения Иудеом, дондеже совершится храм Господень: 29 и от дани Килисирийския и Финикийския прилежно собрание даяти сим человеком на жертву Господню, Зоровавелю епарху, на юнцы и овны и агнцы, 30 такожде и пшеницу и соль, и вино и елей, всегда на всяко лето, якоже священницы, иже во Иерусалиме, рекут иждивати на всяк день, без сомнения: 31 да приносятся возлияния Вышнему Богу за царя и отроки его, и да молят за их живот: 32 и да возвестится, елицы аще преступят что от предписанных или презрят, да возмется древо от своих ему, и на том да обесится, имения же его царю припишутся: 33 сих ради и Господь, Егоже имя призывается тамо, да истребит всякаго царя и язык, иже руку свою прострет возбранити, или озлобити дом Господень оный, иже во Иерусалиме: 34 аз царь Дарий повелех прилежно. === 7 === 1 Тогда Сисинний епарх Килисирийский и Финикийский, и Сафравузан, и друзие, последующе от Дариа царя повелением, 2 настояху священным делом, прилежнее содействующе старейшинам Иудеев и священноначалником: 3 и благопоспешна бяху священная дела, прорицающым Аггею и Захарии пророком. 4 И совершиша сия по заповеди Господа Бога Израилева и с повелением Кира и Дариа и Артаксеркса царей Персских: 5 и совершен бысть дом святый даже до третияго и двадесятаго дне месяца Адара, шестаго лета Дариа царя. 6 И сотвориша сынове Израилевы и священницы и левити и прочии, иже бяху от пленения, приставленнии, по написанным в книзе Моисеове, 7 и принесоша во обновление святилища Господня юнцев сто овнов двести, агнцев четыре ста, 8 козлов за грехи всего Израиля дванадесять по числу, от племеноначалников Израилевых дванадесяти. 9 И сташа священницы и левити по племеном одеяни в ризы, над делы Господа Бога Израилева, по книзе Моисеове, и вратари над киимиждо дверми, 10 и содеяша сынове Израилевы с сущими от пленения пасху в четвертыйнадесять день перваго месяца, егда освятишася священницы и левити. 11 Вси же сынове пленения не вкупе очистишася, понеже левити вси вкупе очистишася 12 и пожроша пасху всем сыновом пленения и братиям их священником и себе сами. 13 И ядоша сынове Израилевы, иже от пленения, вси отлучившиися от мерзостей языков земли, ищуще Господа, 14 и праздноваша праздник опресноков седмь дний, веселящеся пред Господем, 15 понеже обрати совет царя Ассирийскаго к ним, еже укрепити руки их на дела Господа Бога Израилева. === 8 === 1 И по сих, царствующу Артаксерксу царю Персскому, приступи Ездра сын Сариин, Езериев, Хелкиев, Салумов, 2 Садуков, Ахитов, Амариев, Езиев, Мемерофов, Зареев Сауиев, Воккаев, Ависумов, Финеесов, Елеазаров, Аарона перваго священника: 3 той Ездра взыде от Вавилона, яко книгочий благоразумен сый в законе Моисеове, даннем от Господа Бога Израилева, 4 и даде ему царь славу, обретшему благодать пред ним, над всеми достоинствы его. 5 И взыдоша вкупе с ним от сынов Израилевых, и священников и левитов, и священнопевцев и вратарей и рабов церковных во Иерусалим, 6 лета седмаго царствующу Артаксерксу в пятый месяц: то лето седмое царю: изшедше бо из Вавилона в новомесячии перваго месяца, приидоша во Иерусалим по данному им поспеху в путь от Господа: 7 ибо Ездра многое сведение обдержаше, дабы ничто оставити сущих от закона Господня и от заповеди, еже научити всего Израиля всем оправданием и судбам. 8 Прииде же написанное повеление от Артаксеркса царя ко Ездре священнику и чтецу закона Господня, егоже есть списание подлежащее: 9 царь Артаксеркс Ездре священнику и чтецу закона Господня радоватися: 10 человеколюбно аз судив, повелех хотящым от языка Иудейскаго с волею благою, и от священник и левит, и иже суть в царствии нашем, ити с тобою во Иерусалим: 11 елицы убо вожделеют, да соберутся и пойдут с тобою, якоже угодно мне и седми другом моим советником: 12 да увидят деемая во Иудеи и Иерусалиме, якоже есть в законе Господни, 13 и да вносят дары Господу Израилеву, ихже обещах аз и друзи во Иерусалим, и все злато и сребро, еже обретено будет во стране Вавилонстей, Господу во Иерусалим, с дарованным от языка во святилище Господа Бога их, еже во Иерусалим: 14 да соберется злато и сребро на юнцы и овны и агнцы, и яже тем последуют, 15 да приносят жертвы Господу на олтарь Господа Бога их, иже во Иерусалиме: 16 и вся елика хощеши с братиею твоею сотворити златом и сребром, соверши по воли Бога твоего, 17 и священныя сосуды Господни, иже даны суть тебе, к делу дому Господа Бога твоего, иже во Иерусалиме, да положиши пред Господем Богом твоим, иже во Иерусалиме: 18 и прочая, елика аще тебе потребна будут к делом храму Бога твоего, да даси от царскаго сокровища: 19 и аз царь Артаксеркс повелех стражем сокровища Сирийскаго и Финикийскаго, да, елико напишет Ездра священник и чтец закона Господа Бога Вышняго, прилежно дают ему, даже до сребра талант ста, 20 такожде и до пшеницы спудов ста и вина до мер ста: 21 и ина премнога вся по закону Божию да совершатся с поспешением Богу Вышнему, да не востанет гнев на царство царево и сынов его: 22 вам же глаголю, да всем священником и левитом, и священнопевцем и вратником, и рабом церковным и писцем церкве тоя, ни едина дань, ниже ина тягота будет, и ни едину власть имети налагати что на них: 23 ты же, Ездро, по премудрости Божией, постави судии и началники, да судят во всей Сирии и Финикии всех ведущих закон Бога твоего, а неведущих учи: 24 и вси елицы преступят закон Бога твоего и царский тщателно да накажутся, или смертию, или казнию, или сребра лишением, или изгнанием. 25 И рече Ездра книгочий: благословен един Господь Бог отец моих, иже даде сия в сердце царево прославити дом Его, иже во Иерусалиме, 26 и мене почте пред царем и советниками и всеми други и вельможи его: 27 и аз благодерзостен бых по помощи Господа Бога моего, и собрах от Израиля мужы, да вкупе взыдут со мною. 28 И сии предводителие по своим отечеством и началством, иже изыдоша со мною из Вавилона в царство Артаксеркса царя: 29 от сынов Финеесовых Гирсон, от сынов Ифамаровых Гамалиил, от сынов Давидовых Латтус, сын Сехениев, 30 от сынов Форосовых Захариа и с ним описанных мужей сто пятьдесят, 31 от сынов Фааф-Моавлих Елиаониа Зареов и с ним мужей двести, 32 от сынов Зафоевых Сехениа Езеилев и с ним мужей триста, от сынов Адиних Овиф Ионафуев и с ним мужей двести пятьдесят, 33 от сынов Иламовых Иесиа Гофолиев и с ним мужей седмьдесят, 34 от сынов Сафатиевых Зараиа Михаилов и с ним мужей седмьдесят, 35 от сынов Иоавлих Авадиа Иезилов и с ним мужей двести дванадесять, 36 от сынов Ваниевых Ассалимоф сын Иосафиев и с ним мужей сто шестьдесят, 37 от сынов Вавиевых Захариа Виваиев и с ним мужей двадесять осмь, 38 от сынов Астафовых Иоанн Акатань и с ним мужей сто десять, 39 от сынов Адоникамовых последнии, и сия суть имена их: Елифала сын Иеуилев и Самеа и с нима мужей седмьдесят, 40 от сынов Вагоевых Уфий Истакуров и с ним мужей седмьдесят. 41 И собрах их к реце яже нарицается Феран, и ополчихомся три дни зде, и пресмотрих их. 42 И от сынов священничих и от левитских не обрет тамо, 43 послах ко Елеазару и Идуилу, и Маазману и Алнафану, и Мамею и Самею и Иориву, Нафану, Еннатану, Захарии и Месулламу, предводителем и ученым, 44 и рекох им, да приидут к Доддею вожду, иже на месте сокровищехранилницы, 45 заповедав им рещи Доддею и братии его и сущым на месте сокровищехранителем, да послют к нам священствовати имущих в дому (Господа) Бога нашего. 46 И приведоша к нам державною рукою Господа Бога нашего мужы учены от сынов Моолиа сына Левиина, сына Израилева, Асевевию и сынов его и братию осмьнадесять, 47 и Асевию и Аннуа и Осеа брата от сынов Ханунеевых, и сынов их мужей двадесять: 48 и от церковных служителей, ихже даде Давид и началницы к деланию левитом, церковных служителей двести двадесять: всех же имена знаменованна суть в писании. 49 И обещах ту пост юношам пред Господем Богом нашим, 50 да взыщем от Него благ путь нам и сущым с нами чадом нашым и скотом. 51 Усрамихбося просити от царя пеших и конников и проводников ради охранения нам от супостат, 52 рекохом бо царю, яко сила Господа нашего будет со ищущими Его на всякое управление. 53 И паки помолихомся Господу Богу нашему о сих и милостива получихом. 54 И отлучих от племеноначалников и священников мужей дванадесять Есеврию и Ассамию и с ними от братии их мужей десять, 55 и извесих им сребро, злато и сосуды священныя дому Бога нашего, яже дарова царь и советницы его и вельможи и весь Израиль: 56 и извесив предах им сребра талант шесть сот пятьдесят, и сосуд сребряных талант сто, и злата талант сто, и сосудов позлащенных двадесять, и сосудов медяных от избранныя меди блещащихся златовидных, сосудов дванадесять, 57 и рекох им: и вы святи есте Господу, и сосуди святи, и злато и сребро обещанное Господу Богу отец наших: 58 бдите и храните, дондеже воздадите вы вся племеноначалником священников и левитов и началником отечеств Израилевых во Иерусалиме в сосудохранителнице дому Бога нашего. 59 И приемше священницы и левити сребро и злато и сосуды во Иерусалим, внесоша во храм Господень. 60 И воздвигшеся от реки Феры в дванадесятый день перваго месяца, внидохом во Иерусалим с крепкою рукою Господа нашего, яже с нами: и избави нас Господь от исхода пути от всех враг, и приидохом во Иерусалим. 61 И егда бысть тамо третий день, в четвертый день измереное злато и сребро предано в дом Господа Бога нашего Мармофе сыну Уриину священнику, 62 и с ним (бе) Елеазар сын Финеесов, и быста с нима Иосавад сын Иисусов и Моиф Саванниев сын, левитяне: вся по числу и весу, и написан бысть весь вес их в той час. 63 Пришедшии же от пленения принесоша жертвы Богу Израилеву юнец дванадесять за весь Израиль, овен девятьдесят шесть, агнец седмьдесят два, козлов за спасение дванадесять вся в жертву Господню. 64 И отдаша повеления царева царевым строителем и епархом Килисирии и Финикии, и почтоша язык и храм Господень. 65 И совершившымся сим, приступиша ко мне предводителие, глаголюще: 66 не отлучися род Израилев и началницы, и священницы и левити от иноплеменных языков земли и от нечистот их, от язык Хананеов и Хеттеов, и Ферезеов и Иевусеов, и Моавитов и Египтян и Идумеов: 67 сопрягошася бо со дщерьми их, и тии и сынове их, и смесися семя святое со иноплеменными языки земскими, и причастницы быша предводителие и вельможи беззакония сего от начала вещи. 68 И абие, егда услышах сия, раздрах одеяния и священную ризу, и терзах власы главы и брады, и седех скорбен и печален, 69 и собрашася ко мне, елицы тогда подвизахуся во слове Господа Бога Израилева, мне плачущу о беззаконии, и седех скорбен даже до вечерния жертвы: 70 и востах от поста, раздрана имеющь одеяния и священную ризу, преклонив колена и простер руце ко Господу, рекох: 71 Господи, постыдехся и усрамихся пред лицем Твоим, 72 греси бо наши умножишася выше глав наших, и безумия наша воздвигошася даже до небесе, 73 еще от времен отец наших, и есмы в велице гресе даже до дне сего: 74 и ради грех наших и отец наших предани есмы со братиями нашими и с царьми нашими и со священники нашими царем земным в мечь и пленение и в грабление со стыдением даже до днешняго дне: 75 и ныне колико бысть нам милосердие от Тебе, Господи Боже, еже оставити нам корень и имя на месте святыни Твоея 76 и еже открыти светилник нам в дому Господа Бога нашего, дати нам пищу во время работы нашея: и егда служихом, не быхом оставлени от Господа Бога нашего, 77 но постави нас во благодати пред цари Персскими дати нам пищу, 78 и прославити храм Господа нашего, и воздвигнути опустошенный Сион, дати нам твердыню во Иудеи и Иерусалиме: 79 и ныне что речем, Господи, имеюще сия? Преступихом бо повеления Твоя, яже дал еси рукою отроков Твоих пророков, глаголя: 80 яко земля, в нюже ходите наследити, земля осквернена есть скверною иноплеменных земли, и нечистотою своею наполниша ю, 81 и ныне дщерей ваших не сопрязите сыном их, и дщерей их не приемлите сыновом вашым, 82 и не взыщите мира имети с ними во все время, да укрепившеся ядите благая земли и достояние разделяете сыновом вашым даже до века: 83 и яже случаются нам, вся бывают ради дел наших лукавых и великих грех наших: Ты бо, Господи, облегчил еси грехи нашя 84 и дал еси нам сицевый корень, и паки обратихомся преступити закон Твой, еже смеситися с нечистотою язык земских: 85 не прогневался ли еси на ны погубити нас, дондеже не останется корень и семя и имя наше? 86 Господи Боже Израилев, истинен еси, остахомся бо корень до днешняго дне: 87 се, ныне есмы пред Тобою во беззакониих наших, несть бо стати еще пред Тобою в сих. 88 И егда моляся Ездра исповедашеся, плачущь на земли ниц простерт пред храмом, собрашася к нему от Иерусалима народ мног зело, мужие и жены, и юноши и юноты: плачь бо бысть велик в том множестве. 89 И возопив Иехониа Иеилев от сынов Израилевых, рече: Ездро, мы согрешихом ко Господу Богу, пояхом жены иноплеменничи от язык земли: и ныне есть пред тобою весь Израиль: 90 в том да будет нам клятва пред Господем, еже изгнати всех жен наших, яже от иноплеменных, со чады их, якоже судися тебе, и елицы повинуются закону Господню: 91 востав совершай, к тебе пристоит дело, и мы с тобою мужественно сотворим. 92 И востав Ездра, закля племеноначалников священнических и левитских всего Израиля сотворити по сим. И кляшася. === 9 === 1 И востав Ездра от притвора храма, иде в сосудохранилницу Иоанана сына Елиасивова, 2 и водворився тамо не вкушаше хлеба, ниже воды пияше, рыдая о беззакониих великих народа. 3 И бысть проповедание во всей Иудеи и Иерусалиме всем, иже бяху от пленения, еже собратися во Иерусалим: 4 и елицы не приидут в два или три дни, по суду председящих старейшин возмется имение их, и той чуждь будет от множества бывшаго в пленении. 5 И собрашася вси, иже бяху от колена Иудина и Вениаминова, в три дни во Иерусалим, сей месяц девятый, в двадесятый день месяца, 6 и седоша все множество на пространствии церковнем, дрожаще ради зимы настоящия. 7 И востав Ездра рече им: вы беззаконно сотворили есте, и поясте себе жены иноплеменничи, да приложите грехи ко Израилю: 8 и ныне дадите исповедание и славу Господу Богу отец наших 9 и сотворите волю Его, и отлучитеся от язык земных и от жен иноплеменных. 10 И возопи все множество и рекоша гласом великим: тако, якоже рекл еси, сотворим: 11 но множество велико есть, и время зимно, и не можем стояти без покрова, а дело несть нам единаго дне, ни дву, много бо в сих согрешихом: 12 да предстанут же и предводителие народа, и вси, иже с нами обитают, елицы имеют жен иноплеменных, да приидут обретше время, 13 и от всякаго места старейшины и судии, дондеже разрешится гнев Господень от нас, дела сего. 14 Ионафас сын Азаилев и Езекиа Фокануев сын Прияста по сему, и Месуллам и Левис и Савватий вкупе содействоваша има: 15 и сотвориша по всему сему бывшии от пленения. 16 И избра себе Ездра священник мужы началники отечеств их всех по имени, и седоша вкупе в новомесячии десятаго месяца испытати дело то. 17 И приведено бысть ко окончанию о мужех, иже имяху жены иноплеменничи, даже до новомесячия перваго месяца. 18 И обретошася от иереев собравшиися имуще жен иноплеменничих: 19 от сынов Иисуса сына Иоседекова и братии его Мафила и Елеазар, и Иорив и Иоадан, 20 и возложиша руки, да изгонят жены своя, и во умилостивление овны за неведение свое: 21 и от сынов Еммировых Ананиа и Завдей, и Ианин и Самиа, и Иереил и Азариа, 22 и от сынов Фесуровых Елионас, Масиа, Исмаил и Нафанаил, и Окидил и Салоа: 23 и от левит Иозавад и Семей, и Колий (сей есть Калита) и Фафей, и Иуда и Иона: 24 от священнопевцев Елиаксур, Вакхур: 25 от дверник Саллум и Толван: 26 от Израиля, от сынов Форосовых Иерма, Иеддиа и Мелхиа, и Маил и Елеазар, и Асивиа и Ваанеа, 27 от сынов Илаевых Матфаниа, Захариа и Иереил, и Иеримоф и Аидиа, 28 и от сынов Замофовых Елиада, Елисим, Офониа, Иаримоф, Сават и Сардей, 29 и от сынов Виваевых Иоанн и Ананиа, и Иозавад и Емафий, 30 от сынов Маниевых Олам, Мамух, Иеддей, Иасув и Иасаил и Иеримоф, 31 и от сынов Аддиевых Наафий и Моосиа, Лакун и Наид, и Матфаниа и Сесфил, и Валнуй и Манассиа, 32 и от сынов Ананих Елиона и Иасей, и Мелхиа и Саввей и Симон Хосамей, 33 и от сынов Асомовых Алтаней и Матфий, и Ванеа и Елифалат, и Манассиа и Семей, 34 и от сынов Ваанииных Иеремиа, Момдий, Исмаир, Иуил, Мавдай и Педиа и Анос, Равасион и Иенасив и Мамнитанаим, Елиасий, Вануй, Елиалий, Самий, Селемиа, Нафаниа, и от сынов Озораевых Сесий, Езрил, Азаил, Самат, Замврий, Иосиф, 35 и от сынов Ефмы Мазитиа, Завадаиа, Идаий, Иуил, Ванеа: 36 вси сии пояша себе жены иноплеменничи и отпустиша их со чады. 37 И вселишася священницы и левити, и иже (бяху) от Израиля во Иерусалиме и во стране, в новомесячии седмаго месяца, и сынове Израилевы во обителех своих. 38 И собрася все множество единодушно на пространство, еже ко востоку врат священных, 39 и рекоша Ездре архиерею и чтецу, да принесет закон Моисеов, преданный от Господа Бога Израилева. 40 И принесе Ездра архиерей закон всему множеству, от мужа даже до жены, и всем священником слышати закон в новомесячии седмаго месяца, 41 и чтяше на пространстве, еже пред священными враты церковными, от утра даже до полудне пред мужми же и женами: и даша все множество чувства в закон. 42 И ста Ездра священник и чтец закона на древянем амвоне, иже соделан бысть: 43 и сташа при нем Маттафиа, Самуй, Ананиа, Азариа, Уриа, Езекиа, Валасам одесную, 44 ошуюю же Фалдей и Мисаил, Мелхиа, Аофасув, Навариа, Захариа. 45 И взем Ездра книгу закона пред всем множеством, председяше бо во славе пред всеми, 46 и егда толковаше закон, вси прямо стояху. И благослови Ездра Господа Бога Вышняго, Бога Саваофа Вседержителя. 47 И возгласи весь народ: аминь. И воздвигше горе руки и припадше на землю, поклонишася Господу. 48 Иисус и Ануй, и Саравиа и Иадин и Иакув, Саватиа, Автей, Меаней и Калита, Азариа и Иозавд, и Ананиа и Виата, левити, учаху закону Господню и ко множеству чтяху закон Господень, внушающе купно чтение. 49 И рече Атфарат Ездре архиерею и чтецу, и левитом, иже учаху множество, глаголя: 50 день сей свят есть Господу, и вси плакаху, егда слышаху закон. (и рече Ездра:) 51 шедше убо ядите тучная и пийте сладкая и послите неимущым: 52 свят бо день Господень, и не скорбите, Господь бо прославит вас. 53 И левити повелеша всему сонму, глаголюще: день сей свят Господеви, не скорбите. 54 И идоша вси ясти и пити и веселитися и дати неимущым, да радуются (зело) много: 55 еще бо содержаша словеса, имже научишася, и собрашася. == Книга Товита == === 1 === 1 Книга словес Товита, сына Товиилева, сына Ананиилева, сына Адуилева, сына Гаваилева, от семене Асиилева, от племене Неффалимля, 2 иже пленен бе во дни Енемессара Сара царя Ассирийска от Фисвы, яже есть одесную Кидиа Неффалимля в Галилеи выше Асира. Аз Товит путем истины ходих и правды вся дни живота моего 3 и милостыни многи творих братии моей и языку моему, шедшым со мною во страну Ассирийскую в Ниневию: 4 и егда бех во стране моей в земли Израилеве, юнеишу ми сущу, все племя Неффалима отца моего отступи от дому Иерусалимля, избраннаго от колен Израилевых, еже жрети всем коленом: и освящен бысть храм обитания Вышнему и создан бысть во вся роды века: 5 и вся колена купно отступившая жряху Ваалове юнице, и дом Неффалима отца моего: 6 аз же един хождах многажды во Иерусалим в праздники, якоже писано есть всему Израилю в повелении вечне, начатки и десятины плодов и первострижения имеяй, 7 и даях я иереем сыном Аароним ко олтарю: от всех плодов десятину даях сыном Левииным служащым во Иерусалиме, и вторую десятину продаях, и хождах и иждивах я во Иерусалиме на коеждо лето, 8 третию же даях, имже подобаше, якоже заповеда Деввора мати отца моего,зане сир остах от отца моего. 9 И егда бых муж, поях Анну жену от семене отечества нашего, и родих от нея Товию. 10 И егда пленени быхом в Ниневию, вся кратия моя и иже от рода моего ядоша от хлебов языческих: 11 аз же соблюдох душу мою еже не ясти, 12 яко памятствовах Бога всею душею моею. 13 И даде Вышний благодать и доброту пред Енемессаром, и бых его купец: 14 и идох в Мидию и вдах Гаваилу брату Гавриеву в Рагах Мидийских сребра десять талант. 15 И егда умре Енемессар, воцарися Сеннахирим сын его вместо его, и путие его непостоянни быша, и ктому не возмогох ити в Мидию. 16 И во днех Енемессара милостыни многи творих братии моей: 17 хлебы моя даях алчущым и одеяние нагим, и аще коего от рода моего видех умерша и извержена вне стены Ниевии, погрбах его: 18 и аще коего убиваше Сеннахирим царь, егда прииде бежай от Иудеи, погребах их отай: многих бо уби в ярости своей: и искома бываху от царя телеса, и не обретахуся. 19 Шед же един от сущих в Ниневии, сказа царю о мне, яко погребаю их. И скрыхся. Уедав же, яко ищут мя убити, убоявся отидох: 20 и разграблена быша вся имения моя, и не остася ми ничтоже, кроме Анны жены моея и Товии сына моего. 21 И не преидоша дние пятьдесят, донележе убиста его два сына его и бежаста в горы Араратския: и воцарися Сахердан сын его вместо его, и постави Ахиахара Анаила, сына брата моего, над всем сочислением царствия своего и над всем устроением. 22 И проси Ахиахар о мне, и приидох в Ниневию. Ахиахар же бе вииочерпчий и над перстнем, и управитель и сочислитель, и постави его Сахердан вторым: бе же сын брата моего. === 2 === 1 Егда же приидох в дом мой, и отдана бысть мне Анна жена моя и Товиа сын мой, в праздник пятьдесятницы, иже есть свят седмь седмиц, бысть обед добр мне, и возлегох, еже ясти. 2 И узрех снеди многи и рех сыну моему: иди и приведи, егоже аще обрящеши от братии нашея нищаго, иже помнит Господа, и се, ожидаю тебе. 3 И пришед рече: отче, един от рода нашего удавлен повержен есть на торжищи. 4 И аз, прежде неже вкусити ми, взях его в некий дом, донележе зайде солнце: 5 и возвратився умыхся и ядох хлеб мой в скорби, 6 и помянух пророчество Амоса, якоже рече: обратятся дние ваши в плачь, и вся веселия ваша в сетование: 7 и плакахся: и егда зайде солнце, поидох и ископав погребох его. 8 Ближнии же посмевахуся, глаголюще: еще не боится убиен быти за дело сие: и бежа, и се, паки погребает мертвыя. 9 И в ту нощь, егда погребох, возвратихся и легох осквернен при стене двора, и лице мое откровено бе: 10 не видех же, яко врабия на стене суть, и очесем моим отверстым сущым, испустиша врабия теплое на очеса моя, и быша бельма на очесех моих: и идох ко врачем и не пользоваша мя: Ахиахар же питаше мя, дондеже отидох во Елимаиду. 11 А жена моя Анна волну прядяше в домех женских 12 и посылаше господием: даяху же ей и они мзду, придавше и козля. 13 Егда же прииде ко мне, нача вопити: и рех ей: откуду козля? Не украдено ли есть? Отдаждь е господием: не бо лепо есть ясти краденое. 14 Она же рече: дар дадеся ми над мзду. И не веровах ей и глаголах отдати е господием, и стыдяхся пред нею. Она же отвещавши рече ми: где суть милостыни твоя и правды твоя? Се, ведома вся с тобою. === 3 === 1 И опечалився плаках, и молихся с болезнию, глаголя: 2 праведен еси, Господи, и вся дела Твоя, и вси путие Твои милость и истниа, и суд истинен и праведен Ты судиши во век: 3 помяни мя и призри на мя да не отмщаеши ми грехи моя и неведения моя и отец моих, имиже согрешиша пред Тобою: 4 преслушаша бо заповеди Твоя и дал еси нас в расхищение и пленение и смерть и в притчу поношения всем языком, в няже расточихомся: 5 и ныне многи судбы Твоя суть и истинны, творите со мною о гресех моих и отец моих, яко не сотворихом повелений Твоих, не бо ходихом во истине пред Тобою: 6 и ныне, якоже угодно пред Тобою, сотвори со мною: повели отяти дух мой, яко да разрешуся и буду земля, понеже уне есть ми умрети, нежели живу быти, зане поношения лжива слышах, и печаль есть многа во мне: повели отрешитися ми от нужды уже на вечное место, да не отвратиши лица Твоего от мене. 7 В тойже день случися дщери Рагуилевей Сарре бо Екватанех Мидии, и той поносимей быти от рабынь отца ея: 8 ако бяше дана седми мужем, и Асмодей лукавый демон уби их, прежде даже быти им с нею яко с женами: и реша ей: не разумееши ли убивающи твоих мужей? Уже седмь имела еси, и ни единаго их нареклася еси: 9 что нас биеши? Аще измроша, иди с ними, да не видим твоего сына или дщере во век. 10 Сия слышавши опечалися зело, яко удавитися, и рече: едина убо есмь отцу моему: аще сотворю сие, укоризна ему будет, и старость его низведу с болезнию во ад. 11 И моляшеся при оконцы и рече: благословен еси, Господи Боже мой, и благословено имя Твое святое и честное во веки: да благословят Тя вся дела Твоя во век: 12 и ныне, Господи, очи мои и лице мое ко Тебе дах: 13 рех да разрешиши мя от земли и да не слышу аз ктому поношения: 14 ты веси, Господи, яко чиста есмь от всякаго греха мужня 15 и не оскверних имене моего ниже имене отца моего в земли пленения моего: единородна есмь отцу моему, и несть ему отрочища, иже наследит его, ниже брата ближняго, ниже сущаго ему сына да соблюду мя тому в жену: уже погибоша ми седмь: вскую ми жити? И аще не угодно есть Тебе убити мя, повели призрети на мя и помиловати мя, да не ктому слышу поношение. 16 И услыша Господь молитву обоих пред славою великаго Рафаила, 17 и послан бе изцелити обоих, Товиту очистити бельма и Сарру дщерь Рагуилеву дати Товии сыну Товитову в жену, и связати Асмодеа лукаваго демона, зане Товии подоает наследити ю. В то время возвратився Товит, вниде в дом свой, а Сарра дщи Рагуилева сниде от горницы своея. === 4 === 1 В день он воспомяну Товит о сребре, еже вдаде Гаваилу в Рагах Мидийских, 2 и рече в себе: аз просих смерти, что не зову Товии сына моего, да ему объявлю, прежде даже умрети ми? 3 И призвав его рече: чадо, аще умру, погреби мя, и да не презираеши матере твоея: чти ю вся дни живота твоего и твори еже угодно ей, и да не опечаляеши ея: 4 помяни, чадо, яко многа бедстгвия виде о тебе во чреве: егда умрет, поогреби ю при мне во единем гробе: 5 вся дни, чадо, Господа Бога нашего помни, и да не похощеши согрешати и преступати заповеди Его: правду твори вся дни живота твоего, и да не ходиши путем неправды, 6 зане творящу ти истину благопоспешества будут в делех твоих и всем творящым правду: 7 от имений твоих твори милостыню, и да не зазрит твое око, внегда творити ти милостыню: да не отвращаеши лица твоего от всякаго нищаго, и от тебе не отвратится лице Божие: 8 якоже тебе будет по множеству, твори от них милостыню: аще мало тебе будет, по малому да не боишися творити милостыню: 9 залог бо добр сокровищствуеши тебе на день нужды, 10 зане милостыня от смерти избавляет и не оставляет ити во тму: 11 дар бо добр есть милостыня всем творящым ю пред Вышним: 12 внемли себе, чадо, от всякаго блудодеяния, и жену первее поими от семене отец твоих: да не поймеши жены чуждия, яже несть от племене отца твоего, зане сынове пророков есмы: Ное, Авраам, Исаак, Иаков отцы наши от века: помяни, чадо, яко сии вси пояша жены от братии своих и благословени быша в чадех своих, и семя их наследит землю: 13 и ныне, чадо, люби братию твою и не возносися сердцем твоим паче братий твоих и сынов и дщерей людий твоих, пояти тебе от них жену, зане в гордыни погибель и развращение много, и в непотребстве умаление и убожество велико, ибо непотребство мати есть глада: 14 мзда всякаго человека, иже аще работати будет у тебе, да не премедлит, но отдаждь ему абие: аще послужиши Богу, воздастся тебе: внемли тебе, чадо, во всех делех твоих и буди наказан во всем житии твоем, 15 и еже ненавидиши, да ни комуже твориши: вина в пиянство да не пиеши и да не ходит с тобою пиянство в пути твоем: 16 от хлеба твоего даждь алчущему и от одяний твоих нагим: все, еже аще преизбудет тебе, твори милостыню, и да не зазрит твое око, внегда творити ти милостыню: 17 иждивай хлебы твоя при гробе праведных, грешником же да не даси: 18 совета у всякаго премудраго ищи, и да не небрежеши о всяцем совете полезнем: 19 и на всякое время благослови Господа Бога и от Него проси, яко да путие твои прави будут, и вся стези и совети твои да благоуспеют, зане всяк язык не имет совета, но Сам Господь дает вся благая, и егоже аще восхощет, смиряет, якоже хощет: и ныне, чадо, помяни заповеди моя, и да не изгладятся от сердца твоего: 20 и ныне объявляю тебе десять талант сребра, яже вдах Гаваилу сыну Гавриину в Рагах Мидийских: 21 и не бойся, чадо, яко обнищахом: суть тебе многа, аще уоишися Бога и отступиши от всякаго греха и сотвориши, еже угодно пред Ним. === 5 === 1 И отвешав Товиа, рече ему: отче, сотворю вся, елика заповедал еси ми: 2 но како возмогу взяти сребро, а не знаю его? 3 И даде ему рукописание и рече ему: ищи себе человека, иже пойдет с тобою, и дам ему мзду, дондеже жив есмь, и шед возми сребро. 4 И иде искати человека, и обрете Рафаила, иже бе Ангел, и не ведяше: 5 и рече ему: могу ли пойти с тобою в Раги Мидииския, и известен ли еси о местех? 6 И рече ему Ангел: пойду с тобою, и путь вем, и у Гаваила брата нашего живях. 7 И рече ему Товиа: пожди мя, и реку отцу моему. 8 И рече ему: иди и не косни. 9 И вшед рече отцу: се, обретох, иже пойдет со мною сей же рече: пригласи его ко мне, да увем, коего племене есть, и аще верен есть, еже ити с тобою. 10 И призва его: и вниде, и приветствоваста друг друга. 11 И рече ему Товит: брате, от коего племене и от коего отечества еси ты? Скажи ми. 12 И рече ему: племене и отечества ты ищеши? Или наемника, иже спутьшествует с сыном твоим? И рече ему Товит: хощу брате, ведати род твой и имя. 13 Он же рече: аз Азариа Анании великаго от братии твоея. 14 И рече ему: благо пришел еси, брате, и на мя да не гневаешися, яко взысках племя твое и отечество твое уведати, и ты еси брат мой от добра и блага рода: знах бо аз Ананию и Ионафана сынов Семеа великаго, яко ходихом купно во Иерусалим кланятися, приносяще первородная и десятины плодов, и не заблудиша в заблуждении братии нашея: от корене великаго еси, брате: 15 но рцы мне, кую тебе имам мзду дати? Драхму на день и нуждная тебе якоже и сынови моему: 16 и еще приложу тебе над мзду, аще здрави возвратитеся. 17 И благоизволиста тако. И рече к Товии: готов буди к пути, и да благоспешится вама. И уготова сын его, яже к пути. И рече ему отец его: иди с человеком сим: обитаяй же на небеси Бог благоустроит путь ваш, и Ангел Его да спутьшествует вама. И изыдоста оба отити, и пес отрочища с нима. 18 Плакася же Анна мати его и рече к Товиту: почто отпустил еси чадо наше? Или не жезл руки нашея есть, внегда входите ему и исходити пред нама? 19 Сребро сребром да не возвратится, но уметы сына нашего да будет: 20 яко бо дадеся нама жити от Господа, сие доволно есть нама. 21 И рече ей Товит: не печалися, сестро, здрав приидет, и очи твои узрят его: 22 Ангел бо благ спутьшествовати будет ему и благоуспеется путь его, и возвратится здрав. === 6 === 1 И преста плакати. 2 Она же шедша путем, приидоста в вечер ко Тигру реце и пребыста тамо. 3 Отрочищь же сниде омытися и изскочи рыба от реки и хотяше пожрети отрочища. 4 Ангел же рече ему: возми рыбу. И ят рыбу отрочищь и изверже ю на землю. 5 И рече ему Ангел: разрежи рыбу, и взяв сердце и печень и желчь, положи сохранно. 6 И сотвори отрочищь, якоже рече ему Ангел: рыбу же испекша, снедоста: и идоста оба, донелиже прилижистася ко Екватаном. 7 И рече отрочищь Ангелу: Азариа брате, что есть сердце и печень и желчь рыбия? 8 И рече ему: сердце и печень, аще кого смущает демон или дух зол, сим подобает курити пред человеком или женою, и ктому не будет смущатсия: 9 желчь же, помазати человека, иже имать бельма на очесех, и изцелеет. 10 Егда же приближистася ко Раге, 11 рече Ангел отрочищу: брате, днесь пребудем у Рагуила, и он сродник твой есть, и есть ему дщерь единородна именем Сарра: 12 возглаголю о ней, еже датися тебе ей в жену, зане тебе надлежит наследие ея, и ты един еси от рода ея: отроковица же красна и умна есть: 13 и ныне послушай мя, и возглаголю отцу ея, и егда возвратимся от Раг, сотворим брак: понеже вем Рагуила, яко не даст ея мужу иному по закону Моисеову, или повинен будет смерти, зане наследие тебе подобает прияти, нежели всякому человеку. 14 Тогда рече отрочищь Ангелу: Азариа брате, слышах аз, яко отроковица дана бе седми мужем, и вси в невестнице погибоша: 15 и ныне аз един есмь отцу и боюся, да не вшед умру якоже и прежднии, понеже демон любит ю иже не вредит ни когоже разве приходящих к ней: и ныне аз боюся да не умру и низведу живот отца моего и матере моея с печалию о мне во гроб их, и сын другий несть има, иже погребет я. 16 Рече же ему Ангел: не помниши ли словес, яже заповеда тебе отец твой, о еже взяти тебе жену от рода твоего? И ныне послушай мя, брате, понеже тебе будет в жену, а о демон ни единыя мысли имей, зане в нощь сию дастся тебе она в жену: 17 и аще внидеши в невестник, возмеши жераток фимиамный, и возложиши от сердца и от печени рыбныя и покуриши: 18 и обоняет демон, и отбежит и не возвратитися во век века: егда же приидеши к ней, востаните оба и возопийте к милостивому Богу, и спасет вас и помилует: не бойся, зане тебе сия уготована есть от века, и ты ю спасеши, и пойдет с тобою, и непщую, яко тебе будут от нея чада. И яко услыша Товиа сия, возлюби ю, и душа его прилепися зело ей. И приидоста во Екватаны. === 7 === 1 И приидоста в дом Рагуилев: Сарра же срете их и радостно приветствоваше их, а она ю: и введе их в дом. 2 И рече Рагуил Едне жене своей: коль подобен юноша Товиту сыну брата моего? 3 И вопроси их Рагуил: откуду есте, братия? И реста ему: от сынов Неффалимлих плененных в Ниневию. 4 И рече има: знаета ли Товита брата нашего? Она же реста: знаема. И рече има: здравствует ли? 5 Она же реста: и жив есть и здравствует. И рече Товиа: отец мой есть. 6 И изскочи Рагуил, и облобыза его, и плакася, 7 и благослови его, и рече ему: добраго и благаго человека сын. И слышав, яко Товит погуби очи свои, скорбен бысть и плакася: 8 и Една жена его и Сарра дщерь его плакастеся. И прияша их усердно, 9 и заклаша овна от овец, и предложиша снеди множайшыя. Рече же Товиа Рафаилу: Азариа брате, рцы, о нихже глаголал еси на пути, и да совершится дело. 10 И сообщи слово Рагуилу. И рече Рагуил к Товии: яждь, пий и благодушествуй, тебе бо достоит детище мое взяти: обаче объявлю тебе истину: 11 вдавах детище мое седми мужем, и егда вхождаху к ней, умираху под нощь: но ныне благодушествуй. И рече Товиа: не вкушу ничтоже зде, дондеже поставите и совещаетеся со мною. И рече Рагуил: поими ю отныне по обычаю: ты бо брат еси ея, и она твоя есть, милостив же Бог да благопоспешит вама во благая. 12 И призва Сарру дщерь свою, и емь руку ея, предаде ю Товии в жену и рече: се, по закону Моисеову поими ю и отведи ко отцу твоему и благослови их. 13 И призва Едну жену свою, и взем книгу, написа пнсание и запечатле. 14 И начаша ясти. 15 И призва Рагуил Едну жену свою и рече ей: сестро, уготови ин чертог и введи ю. 16 И сотвори, якоже рече: и введе ю тамо и плакася: и восприят слезы дщере своея и рече ей: 17 уповай, чадо, Господь небесе и земли да даст тебе радость вместо печали твоея тоя: уповай, дщи. === 8 === 1 Егда же окончаша вечерю, введоша Товию к ней. 2 Он же идый помяну словеса Рафаилова, и взя жераток фимиамный, и возложи сердце рыбие и печень, и покури: 3 егда же обоня демон воню, отбеже в вышняя Египта, и связа его Ангел. 4 Егда же заключена быста оба, воста Товиа от ложа и рече: востани, сестро, и помолимся, да помилует ны Господь. 5 И нача Товиа глаголати: благословен еси, Боже отец наших, и благословено имя Твое святое и славное во веки, да благословят Тя небеса и вся создания Твоя: 6 Ты сотворил еси Адама и дал еси ему помощницу Еву утверждение жену его: от тех родися человеческое семя: Ты рекл еси: не добро быти человеку единому, сотворим ему помощницу подобную ему: 7 и ныне, Господи, не блудодеяния ради аз поемлю сестру мою сию, но по истине: повели помиловану ми быти и с нею состаретися. 8 И рече с ним: аминь. 9 И спаста оба нощию, и востав Рагуил пойде и ископа гроб, глаголя: 10 еда и той умре? 11 И прииде Рагуил в дом свой 12 и рече Едне жене своей: посли едину от рабынь, и да видит, аще жив есть: аще же ни, да погребем его, и да никтоже увесть. 13 И вниде рабыня отверзши дверь, и обрете обоих спящих, 14 и изшедши возвести им, яко жив есть. 15 И благослови Рагуил Бога, глаголя: благословен еси Ты, Боже, во всяцем благословении чистем и святем: и да благословят Тя святии Твои и вся создания Твоя, и вси Ангели Твои и избранни Твои: да благословят Тя во веки: 16 благословен еси, яко возвеселил мя еси, и не бысть ми, якоже непщевах, но по мнозей милости Твоей сотворил еси с нами: 17 благословен еси, яко помиловал еси двоих единородных: сотвори има, Владыко, милость, соверши живот их во здравии с веселием и милостию. 18 Повеле же рабом засыпати гроб, 19 и сотвори им брак дний четыренадесять, 20 и рече ему Рагуил, прежде даже совершитися днем брака, с клятвою, да не изыдет, аще не исполнятся четыренадесять дние брака: 21 и тогда взем пол имений своих да пойдет со здравием ко отцу: прочая же, егда умру и жена моя. === 9 === 1 И призва Товиа Рафаила и рече ему: 2 Азариа брате возми с собою отрока и два велблюда, и пойди в Раги Мидииския ко Гаваилу, и принеси ми сребро, и самого приведи ми на брак, 3 понеже закля Рагуил не исходити ми, 4 а отец мой сочисляет дни, и аще премедлю много, скорбети будет зело. 5 И иде Рафаил, и пребысть у Гаваила, и даде ему рукописание: он же изнесе мешцы с печатьми и вдаде ему. 6 И обутреневаста купно и приидоста на брак. И благослови Товиа жену свою. === 10 === 1 И Товит отец его сочисляше кийждо день: и егда исполнишася дние пути, и не прихождаху, 2 рече Товит: еда како посрамлени суть? Или негли умре Гаваил, и никтоже ему дает сребра? 3 И скорбяше зело. 4 Рече же ему жена его: погибе отрочищь, понеже умедли. И нача плакастися его и рече: 5 несть попечения мне, чадо, понеже лишихся тя света очию моею. 6 Товит же глаголет ей: молчи, не печалися, здрав есть. 7 И рече ему молчи, не прельщай мене, погибе отрочищь мой. И исхождаше на всяк день на путь вне, имже отиде: и во дни хлеба не ядяше, в нощех же не преставаше плачущися Товии сына своего, донележе скончашася четыренадесять дние брака, в няже закля Рагуил пребыти ему тамо. Рече же Товиа Рагуилу: отпусти мя, зане отец мой и мати моя не ктому надеются видети мя. 8 Рече же ему тесть его: пребуди у мене, и Аз послю ко отцу твоему, и возвестят ему, яже о тебе. 9 И Товиа рече: ни, но отпусти мя ко отцу моему. 10 Востав же Рагуил, даде ему Сарру жену его и пол имений, рабы и скоты и сребро, 11 и благословив я отпусти, глаголя: да благопоспешит вам, чада, Бог Небесе прежде неже умрети ми. 12 И рече дщери своей: чти свекров твоих, тии ныне родителие твои суть, да слышу о тебе слух добр. И облобыза ю. И Една рече ко Товии: брате возлюбленне, да возвратит тя Господь Небесе и да даст ми видети твоя чада от Сарры дщере моея, да возвеселюся пред Господем: и се, вдаю тебе дщерь мою в залог, и да не опечаляеши ея. 13 По сих отиде Товиа благословя Бога, яко благопоспеши путь его: и благословяше Рагуила и Едну жену его, и идяше, дондеже приближитися им к Ниневии. === 11 === 1 И рече Рафаил ко Товии: не веси ли, брате, како оставил еси отца твоего? 2 Предтецем пред женою твоею и уготоваим дом: 3 возми же в руку желчь рыбию. И поидоста, и купно иде пес вслед их. 4 Анна же седяше обзирающи на пути сына своего. 5 И усмотри его грядуща и рече отцу его: се, сын мой грядет и человек пошедый с ним. 6 А Рафаил рече: вем аз, Товие, яко отверзет очи отец твой: 7 ты убо помажи желчию на очесех его, и угрызен отрет, и отверзет бельма, и узрит тя. 8 И притекши Анна нападе на выю сына своего и рече ему: видех тя, чадо, отныне да умру. И плакастася оба. 9 Товит же исхождаше ко дверем и преткнуся. Сын же его притече к нему 10 и подя отца своего и посыпа желчь на очеса отца своего, глаголя: дерзай, отче. 11 Егда же огрызена быша, отре очи свои, 12 и отртошася от углов очес его бельма, и видев сына своего, нападе на выю его 13 и плакася и рече: благословен еси, Боже, и благословено имя Твое во веки, и благословени вси святии Твои Ангели, 14 яко наказал еси и помиловал еси мя: се, вижду Товию сына моего. И вниде сын его радуяся, и возвести отцу своему величия бывшая ему в Мидии. 15 И изыде Товит во сретение невестки своея радуяся и благословя Бога, ко вратом Ниневии. И чудяхуся видящии его грядуща, яко прозре. 16 И Товит исповедашеся пред ними, яко помилова его Бог. И егда приближися Товит к Сарре невестце своей, благослови ю, глаголя: прииди здрава, дщи: благословен Бог, Иже приведе тя к нам, и отец твой и мати твоя. И бысть радость всем сущым в Ниневии братиям его. 17 И прииде Ахиахар, и Насвас сын брата его, 18 и бысть брак Товии с веселием дний седмь. === 12 === 1 И призва Товит Товию сына своего и рече ему: промысли, чадо мзду человеку ходившему с тобою: и приложити ему подобает. 2 И рече: отче, не буду обижден дав ему пол, яже принесох, 3 понеже приведе мя тебе здрава и жену мою изцели, и сребро мое принесе, и тебе такожде уврачева. 4 И рече старец: праведно есть ему. 5 И призва Ангела и рече ему: возми пол всех, яже принесосте, и пойди здрав. 6 Тогда призвав обоих тайно, рече има: благословите Бога и Тому исповедайтеся, и величие дадите Ему, и исповедайтеся Ему пред всеми живущими о сих, яже сотвори с вама: добро еже благословити Бога и возносити имя Его, словеса дел Божиих благочестно сказующе: и да не ленитеся исповедатися Ему: 7 тайну цареву добро хранити, дела же Божия открывати славно: добро творите, и зло не обрящет вы: 8 благо молитва с постом и милостынею и правдою: благо малое с правдою, нежели много с неправдою: добро творити милостыню, нежели сокровиществовати злато, 9 милостыня бо от смерти избавляет и тая очищает всяк грех: творящии милостыни и правды исполнятся жизни, 10 согрешающии же врази суть своего живота: 11 не утаю от вас всякаго словесе, рех бо: тайну цареву хранити добро, дела же Божия открывати славно: 12 и ныне, егда молился еси ты и невестка твоя Сарра, аз приношах память молитвы вашея пред Святаго, и егда погребал еси мертвыя, подобне присутствовах тебе, 13 и егда не ленился еси востати и оставити обед твой, да отшед покрыеши мертваго, не утаился еси мене благотворяй, но с тобою бех: 14 и ныне посла мя Бог изцелити тя и невестку твою Сарру: 15 аз есмь Рафаил, един от седми святых Ангелов, иже приносят молитвы святых и входят пред славу Святаго. 16 И смятостася оба и падоста на лице, зане убоястася. 17 И рече има: не бойтеся, яко мир вама будет, Бога же благословите во век: 18 яко не своею си благодатию, но волею Бога нашего приидох, сего ради благословите Его во век: 19 вся дни являхся вама, и не ядох, ниже пих, но видение вы зрясте: 20 и ныне исповедайтеся Богу, зане восхожду к Пославшему мя, и напишите вся, яже совершишася, в книгу. 21 И востаста и не ктому видеста его: 22 и исповедаста дела велия и чудная Божия, и како явися има Ангел Господень. === 13 === 1 И Товит написа молитву в радость и рече: благословен Бог живый во веки и царство Его, 2 зане Он наказует и милует, низводит во ад и возводит, и несть иже избежит руки Его: 3 исповедайтеся Ему, сынове Израилевы, пред языки, зане Той разсея нас в них, 4 тамо являйте величие Его, возносите Его пред всяким живущим, яко Той Господь наш и Бог, Той Отец наш во вся веки, 5 и наказовати имать нас в неправдах наших, и паки помилует и соберет ны от всех языков, идеже аще расточени будете в них: 6 аще обратитеся к Нему всем сердцем вашим и всею душею вашею творити пред Ним истину, тогда обратится к вам и не скрыет лица Своего от вас, и узрите, яже сотворит с вами: и исповедайтеся Ему всеми усты вашими, и благословите Господа правды и возносите Царя веков: аз в земли пленения моего исповедаюся Ему и сказую крепость и величие Его языку грешников: обратитеся, грешницы, и творите правду пред Ним: кто весть, аще благоволит о вас и сотворит милость вам? 7 Бога моего возношу, и душа моя Царя Небеснаго, и возвеселится о величии Его: 8 да возглаголют вси и да исповедятся Ему во Иерусалиме: 9 Иерусалиме, граде святый, накажет тя за дела сынов твоих и паки помилует сыны праведных: 10 исповедайя Господеви благо и благослови Царя веков, да паки скиния Его созиждется в тебе с радостию, и да возвеселит в тебе плененныя, и да возлюбит в тебе бедныя во вся роды века: 11 языцы мнози отдалеча приидут ко имени Господа Бога, дары в руках имуще и дары Царю Небесе, родове родов восхвалят тя и дадут радование: 12 прокляти вси ненавидящии тя, благословени будут вси любящии тя во век: 13 радуйся и веселися о сынех праведных, зане соберутся и возблагословят Господа праведных: 14 о, блажени любящии тя, возрадуются о мире твоем: блажени, елицы скорвеша о всех наказаниих твоих, зане о тебе возрадуются, видяще всю славу твою, и возвеселятся во век: 15 душа моя да благословит Бога Царя великаго, 16 яко наздан будет Иерусалим сапфиром и смарагдом и каменем честным, стены твоя и столпи и забрала златом чистым, 17 и стогны Иерусалимския вириллом и анфраксом и камением от Суфира утелются, 18 и рекут вся стогны его: аллилуиа и восхвалят, глаголюще: благословен Бог, Иже вознесе во вся веки. === 14 === 1 И преста исповедаяся Товит. 2 И бе лет осмидесяти осми, егда погуби зраки, и по летех осми прозре: и творяше милостыни, и приложи боятися Господа Бога и исповедатися Ему: 3 зело же состареся, и призва сына своего и шесть сынов его и рече ему: чадо, возми сыны твоя, се, состарехся и при исхождении от жития есмь: 4 пойди в Мидию, чадо, уверихся бо, елика глагола Иона пророк о Ниневии, яко разорится, в Мидии же будет мир паче даже до времене, и яко братия наша на земли расточатся от благия земли, и Иерусалим будет пуст, и дом Божий в нем сожжен будет и пуст будет до времене: 5 и паки помилует их Бог и возвратит их в землю, и созиждут дом, не яков первый, дондеже исполнятся времена века: и по сих возвратятся от пленений и созиждут Иерусалим честно, и дом Божий в нем созиждется во вся роды века зданием славным, якоже глаголаша о нем пророцы: 6 и вси языцы обратятся истинно боятися Господа Бога и опровергнут идолы своя, 7 и возблагословят вси языцы Господа, и людие Его исповедятся Богу, и вознесет Господь люди Своя, и возрадуются вси любящии Господа Бога во истине и правде, творяще милость братии нашей: 8 и ныне, чадо, отиди от Ниневии, яко всячески будут, яже глагола пророк Иона: 9 ты же сохрани закон и повеления и буди любомилостив и праведен, да тебе благо будет: 10 и погреби мя добре, и матерь твою со мною, и да не ктому пребудете в Ниневии: чадо, виждь, что сотвори Аман Ахиахару кормившему его, яко от света отведе его во тму, и елика воздаде ему: и Ахиахар убо спасеся, тому же воздаяние воздадеся, и той сниде во тму: Манассиа сотвори милосердие и спасеся от сети смертныя, юже потче ему: Аман же паде в сеть и погибе: 11 и ныне, чада, веждьте, что милостыня творит и правда избавляет. И сия глаголя, испусти душу свою на одре: бе же лет ста пятидесяти осми. И погребе его славно. 12 И егда умре Анна, погребе ю со отцем своим. Отиде же Товиа с женою своею и с сынми своими во Екватаны ко Рагуилу тестю своему, 13 и состареся честно, и погребе тестев своих славно, и наследи имение их и Товита отца своего: 14 и умре (сый) лет ста двадесяти седми во Екватанех Мидийских: 15 и слыша, прежде неже умрети ему, погубление Ниневии, юже плени Навуходоносор и Асуир: и возрадовася, прежде неже умре, о Ниневии. == Книга Иудифь == === 1 === 1 Лета вторагонадесять царства Навуходоносора, иже царствова над Ассирианы в Ниневии граде велицем, во дни Арфаксада, иже царствова над Мидяны во Екватанех 2 и созда во Екватанех окрест стены от каменей тесаных в широту лактей триех, а в долготу лактей шести, и сотвори высоту стены лактей седмидесяти, а широту ея лактей пятидесяти: 3 и столпы ея постави на вратех его лактей сто, и широту их основа на лактей шетьдесят: 4 и сотвори врата его врата воздвижена в высоту лактей седмьдесят, а широту их лактей четыредесять ко исходу сил сильных его и устроением пешцев его: 5 и сотвори брань во дни оны царь Навуходоносор на царя Арфаксада на поли велицем, еже есть в пределех Рагавлих. 6 И собрашася к нему вси живущии в горней и вси обитающии при Евфрате и Тигре и Идаспи и на поли Ариоха царя Елимеонска, и собрашася языцы мнози зело на ополчение сынов Хелеудих. 7 И посла Навуходоносор царь Ассирийский ко всем обитающым в Персиде и ко всем живущым к западом, обитающым в Киликии и Дамасце, и Ливане и Антиливане, и ко всем живущым на лицы примория, 8 и к сущым во языцех Кармила и в Галааде, и в вышней Галилеи и на велицем поли Есдрилона, 9 и ко всем сущым в Самарии и градех ея, и об он пол Иордана даже до Иерусалима и Ветани, и Хелла и Кадиса, и реки Египетския и Тафны, и Рамесси и всея земли Гесемския, 10 дондеже приити выше Таниса и Мемфиса, и ко всем обитающым во Египте, дондеже приити на пределы Ефиопии. 11 И ни во что вмениша вси обитающии по всей земли слово Навуходоносора царя Ассирийска, и не снидошася к нему на брань, понеже не бояшася его, но бысть пред ними аки муж един: и возвратиша посланников его тщих со безчестием от лица своего. 12 И разярися Навуходоносор на всяку землю сию зело, и клятся престолом и царством своим всячески отмстити всем пределом Киликии и Дамаска и Сирии, погубити мечем своим и вся живущыя в земли Моавли и сыны Аммони, и всю Иудею и всех сущих во Египте, дондеже приити на пределы двух морь. 13 И ополчися в силе своей на Арфаксада царя в лето седмоенадесять, и одоле на брани своей, и победи всю силу Арфаксадову и всю конницу его и вся колесницы его, 14 и возоблада градами его: и прииде даже до Екватан, и одержа столпы, и плени стогны его, и красоту его положи во уничижение его: 15 и взя Арфаксада на горах Рагавлих, и избоде его сулицами своими, и истреби его даже в день оный: 16 и возвратися с ними в Ниневию сам и все присовокупление его, множество мужей ратных многое зело, и бе тамо почивая и пиршествуя сам и сила его дний сто двадесять. === 2 === 1 И в лето осмоенадесять, и в двадесять вторый (день) перваго месяца, бысть слово в дому Навуходоносора царя Ассирийска, отмстити всяцей земли, якоже глаголаше. 2 И созва вся служители своя и вся вельможы своя, и сообщи с ними тайну совета своего, и соверши всю злобу земли от яст своих: 3 и тии судиша истребити всяку плоть, иже не последоваша словеси уст его. 4 И бысть, егда соверши совет свой, призва Навуходоносор царь Ассирийский Олоферна вождоначалника силы своея, втораго суща по нем, и рече к нему: 5 сия глаголет царь великий, господин всея земли: се, ты изыдеши от лица моего и возмеши с собою мужей уповающих в крепости своей, пешцев до тысящей сто двадесять, и множество коней со всадниками тысящей дванадесять, 6 и изыдеши бо сретение всей земли на запады, яко не повинушася глаголу уст моих: 7 и возвестиши им уготовляти землю и воду, яко изыду в ярости моей на них, и покрыю все лице земли ногами силы моея, и дам их в расхищение им: 8 и язвеннии их исполнят дебри и потоки их, и река наводняющаяся мертвыми их наполнится: 9 и приведу плен их до конец всея земли: 10 ты же изшед приодержиши мне всяк предел их, и отдадут тебе самих себе, и соблюдеши ми их на день обличения их: 11 непокаряющихся же не пощадит око твое, еже дати их на убиение и расхищение во всей земли твоей: 12 яко жив аз, и держава царства моего: глаголах и сотворю сия рукою моею: 13 ты же да не преступиши единаго коего от глагол господина твоего, но совершая да совершиши, якоже заповедах тебе, и да не укосниши сотворити сия. 14 И изыде Олоферн от лица господина своего, и созва вся вельможы и воеводы и началники силы Ассурския, 15 и изчисли избранных мужей на ополчение, якоже заповеда ему господин его, до дванадесять тем, и конников стрелцев дванадесять тысящей, 16 и устрои их, имже образом брани множество устроевается: 17 и взя велблюды и ослы и мски припасов ради своих множество много зело, и овцы и волы и козлы на уготование их, имже не бе числа, 18 и пищи всякому мужу во множестве, и злата и сребра из дому царева много зело: 19 и изыде сам и вся сила его в путь, еже предити царю Навуходоносору и покрыти все лице земли к западом колесницами и конницами и пешцами избранными своими: 20 и многое примешение яко прузи изыдоша с ними и яко песок земли, не бо бе числа от множества их. 21 И изыдоша из Ниневии путем триех дний на лице поля Вектилеф, и ополчишися от Вектилефа близ горы сущия ошуюю вышния Киликии. 22 И поя всю силу свою, пешцы и конники и колесницы своя, и отиде оттуду в горнюю, 23 и изсече Фуда и Луда, и поплени всех сынов Рассиса и сынов Исмаилевых сущих по лицу пустыни Хеллеонския к югу. 24 И прейде Евфрат, и пройде Месопотамию, и раскопа вся грады высокия сущыя при потоце Авроне, дондеже приити к морю: 25 и объят пределы Киликийския, и посече всех противостоящих себе: и прииде даже до предел Иафефовых, сущих к югу на лицы Аравии, 26 и обыде всех сынов Мадиамлих, и пожже селения их и плени стада их: 27 и сниде на поле Дамасково во днех жатвы пшениц, и пожже вся нивы их, а овчия и воловыя стада даде в погубление, и грады их поплени, и поля их опустоши, и порази вся юношы их острием меча. 28 И нападе страх и трепет его на всех живущих в примории, сущих в Сидоне и Тире и обитающих в Суре и Окине и на всех живущих во Иемнаане. И живущии во Азоте и Аскалоне убояшася его зело. === 3 === 1 И послаша к нему посланников словесы мирными, глаголюще: 2 се, мы отроцы Навуходоносора царя великаго повергаемся пред тобою, употреби нас, якоже угодно есть лицу твоему: 3 се, села наша, и всякое место наше, и все поле пшениц, и овчия и воловыя стада, и вся ограды селений наших, суть пред лицем твоим, употреби, якоже угодно тебе: 4 се, и гради наши, и живущии в них раби твои суть: шед срети их, якоже есть благо пред очима твоима. 5 И приидоша мужие ко Олоферну и возвестиша ему по словесем сим. 6 И сниде на поморие сам и сила его, и утверди стражею грады высокия и взя из них на споборение мужей избранных. 7 И прияша его тии и вся окрестная их с венцами и лики и тимпаны. 8 И разори вся пределы их, и дубравы их изсече. И бе заповедано ему истребити всех богов земли, яко да самому единому Навуходоносору послужат вси роди и вси языцы, и вся племена их да призывают его в Бога. 9 И прииде на лице Есдрилона близ Дотеи, яже есть противу великия пилы Иудеи, 10 и ополчися между Гаваем и Скифским градом, и бе тамо месяц дний, ко еже собрати всякий припас силы своея. === 4 === 1 И услышаша сынове Израилевы живущии во Иудеи вся, елика сотвори Олоферн языком, вождоначалник Навуходоносора царя Ассирийскаго, и имже образом расхити вся священная их и даде сия во истребление: 2 и убояшася зело от лица его, и о Иерусалиме и о храме Господа Бога своего смятошася, 3 понеже недавно изыдоша от пленения и недавно вси людие соврашася Иудейстии, и сосуди и олтарь и дом от осквернения освящена быша. 4 И послаша во всякий предел Самарии и Конии, и Вефорона и Велмена и Иерихона, и в Хову и Есору и во юдоль Салимскую, 5 и предприяша вся верхи гор высоких, и оградиша стенами сущыя в них села, и отложиша на пищу ко приуготовлению брани, яко недавно быша поля их пожата. 6 И писа Иоаким иерей великий, иже бе во днех онех во Иерусалиме, живущым во Ветилуи и Ветомесфеме, иже есть противу Есдрилоиа, на лицы поля сущаго близ Дофаима, 7 глаголя одержати восходы горния, ибо ими бе вход во Иудею, и бе удобно возбраняти их приходящих, тесну проходу сушу, яко всем мужем по два (проити). 8 И сотвориша сынове Израилевы, якоже повеле им Иоаким иерей великий и старейшинство всего сонма Израилева, иже седяху во Иерусалиме. 9 И возопиша всякий муж Израилев к Богу с прилежанием великим и смириша душы своя в прилежании велицем: 10 сами и жены их и младенецы их, и скоти их, и всякий пришлец и наемник, и сребром купленый их, возложиша вретища на чресла своя. 11 И всякий муж Израилев и жена, и дети, и живущии во Иерусалиме падоша пред лицем храма, и посыпаша перстию главы своя, и простроша вретища своя пред лицем Господним, 12 и олтарь вретищем одеяша, и возопиша к Богу Израилеву единодушно прилежно, еже не дати в расхищение младенцев их, и жен в пленение, и градов наследия их в разорение, и святая во осквернение и поношение, обрадование языком. 13 И услыша Господь глас их и призре на скорбь их. И бяху людие постящеся дни многи во всей Иудеи и Иерусалиме, пред лицем святых Господа Вседержителя. 14 И Иоаким иерей великий, и вси предстоящии пред Господем, иерее и служащии Господеви, вретищами препоясани о чреслех своих, приношаху всесожжение непрестанное и обеты и произвольная даяния людий: 15 и бе пепел на кидарех их, и вопияху ко Господу от всея силы, да посетит во благо весь дом Израилев. === 5 === 1 И возвещено бысть Олоферну вождоначалнику силы Ассурския, яко сынове Израилевы уготовашася на брань, и проходы горния заключиша, и оградиша стенами всякий верх горы высокия, и положиша на полях преткновения. 2 И разгневася яростию зело, и созва всех началников Моавлих и воевод сынов Аммоних и всех властелей помория, 3 и рече им: возвестите убо ми, сынове Ханаани, кто людие сии живущии в горней, и каковы, в нихже живут, гради, и множество силы их, и в чем держава их и крепость их, и кто поставлен над ними царь вождь воинства их? 4 И чесо ради сопротивишася, еже не изыти во сретение мне, паче всех живущих на западех? 5 И рече к нему Ахиор вождь всех сынов Аммоних: послушай убо, господине мой, слова от уст раба твоего, и возвещу тебе истину о людех сих, иже обитают в горней сей близ тебе живуще, и не изыдет ложь из уст раба твоего: 6 людие сии суть исчадия Халдеов 7 и вселишася первее в Месопотамии, понеже не восхотеша последовати богом отцев своих, иже беша в земли Халдейстей: 8 и отвратишася от пути отец своих и поклонишася Богу небесе, Богу, Егоже познаша: и изгнаша их от лица богов своих, и побегоша в Месопотамию и обиташа тамо дни многи: 9 и рече Бог их, да изыдут от пришелствия своего и да идут в землю Ханааню: и вселишася тамо, и умножишася златом и сребром и скоты многими зело: 10 и снидоша во Египет, покры бо лице земли Ханаани глад, и пришелствоваша тамо, дондеже прекормишася, и быша тамо во множество много, и не бе числа роду их: 11 и воста на них царь Египетский и прехитри их, и в труде и плинфе смири их, и положи их в рабы: 12 и возопиша к Богу своему, и порази всю землю Египетскую язвами, в нихже не бе изцеление, и изгнаша их Египтяне от лица своего: 13 и изсуши Бог Чермное море пред ними, 14 и веде их на путь Сины и Кадис-Варни, и изгнаша всех живущих в пустыни, 15 и вселишася в земли Аморреов, и всех Есевонитов истребиша крепостию своею, и прешедше Иордан наследиша всю горнюю: 16 и изгнаша от лица своего Хананеа и Ферезеа, и Иевусеа и Сихема и всех Гергесеов, и обиташа в ней дни многи: 17 и дондеже не согрешиша пред Богом своим, беша благая с ними, понеже Бог ненавидяй неправды с ними есть: 18 егда же отступиша от пути, егоже завеща им, истребишася во мнозех бранех на много зело, и пленени быша в землю не свою, и храм Бога их бысть в попрание, и гради их одержани быша от супостат: 19 и ныне обратившеся к Богу своему, взыдоша от разсеяния, идеже разсеяни быша тамо, и одержаша Иерусалим, идеже святилище их, и вселишася в горней, понеже бе пуста: 20 и ныне, владыко господине, аще убо есть безумие в людех сих, и согрешают к Богу своему, и разсмотрим сие, яко есть в них соблазн сей, и взыдем и повоюем их: 21 аще же несть беззакония в языце их, да прейдет господин мой, да не когда защитит Господь их и Бог их по них, и будем в поношение пред всею землею. 22 И бысте яко преста Ахиор глаголя словеса сия, и возропташа вси людие обстоящии шатер и предстоящии, и реша вельможи Олоферновы и вси живущии в примории и в Моаве посещи его: 23 не бо убоимся от сынов Израилевых: се бо, людие, в нихже несть силы, ниже могутства ко ополчению крепкому: 24 темже убо взыдим, и будут во снедь всему воинству твоему, владыко Олоферне. === 6 === 1 И егда утишися мятеж мужей сущих окрест заседания и рече Олоферн вождоначалник силы Ассурския ко Ахиору пред всем народом иноплеменников и ко всем сыном Моавлим: 2 и кто еси ты, Ахиоре, и наемницы Ефремли, яко пророчествовал еси в нас, якоже днесь, и рекл еси род Израилев не воевати, яко Бог их защищает их? И кто Бог, аще не Навуходоносор? Сей послет державу свою и истребит их от лица земли, и не избавит их Бог их: 3 но мы раби его поразим их яки человека единаго, и не претерпят крепости коней наших, 4 поперем бо их ими, и горы их упиются в крови их, и поля их исполнятся мертвыми их, и не постоит стопа ног их противу лица нашего, но погублением погибнут, глаголет царь Навуходоносор, господин всея земли, рече бо: не вотще будут глаголы словес его: 5 ты же, Ахиоре, наемниче Аммонь, иже глаголал еси словеса сия в день неправды твоея, не узриши ктому лица моего от дне сего, дондеже не отмшу роду сущих из Египта, 6 и тогда пройдет мечь воинства моего и народа рабов моих ребра твоя, и падеши в язвенных их, егда возвращуся: 7 и отведут тя раби мои в горнюю, и оставят тя во единем от градов восходов, 8 и не погибнеши дондеже истреблен будеши с ними: 9 и аще уповаеши сердцем твоим, яко не возмутся да не испадает твое лице: рех, и ничтоже отпадет от глаголов моих. 10 И повеле Олоферн рабом своим, иже предстояху в шатре его, яти Ахиора и отвсти его к Ветилуи и предати в руки сынов Израилевых. 11 И яша его раби его и изведоша его вне полка на поле, и воздвигошася от среды напольныя в горнюю и приидоша на источники, иже быша под Ветилуею. 12 И яко увидеша их мужие града на верху горы, взяша оружия своя и отидоша вне града на верх горы: и всякий муж пращник одержаша восход свой и метаху камением на них. 13 И подшедше под гору, связаша Ахиора и оставиша поверженна под коренем горы, и отидоша ко господину своему. 14 Снизошедше же сынове Израилевы от града своего сташа над ним, и разрешивше его введоша в Ветилую и поставиша его пред началниками града своего, 15 иже быша во днех тых, Озиа сын Михин от племене Симеоня, и Хаврий сын Гофониилев, и Хармий сын Мелхиилев. 16 И созваша всех старейшин града: и стекошася всякий юноша их и жены в собрание, и поставиша Ахиора посреде всего народа своего. И вопроси его Озиа о случившемся. 17 И отвещав возвести им глаголы заседания Олофернова и вся глаголы, елика глагола посреде князей сынов Ассурских, и елика велеречева Олоферн на дом Израилев. 18 И падше людие поклонишася Богу и возопиша, глаголюще: 19 Господи Боже Небесе, призри на гордыни их, и помилуй смирение рода нашего, и призри на лице освященных Тебе в день сей. 20 И утешиша Ахиора и похвалиша его зело. 21 И взя его Озиа из собрания в дом свой и сотвори пир старейшинам, и призываху Бога Израилева на помощь всю нощь ону. === 7 === 1 Во утрие же объяви Олоферн всему воинству своему и всем людем своим, иже приидоша на споборение ему, воздвигнутися к Ветилуи и восходы горния предвосприяти и творити брань противу сынов Израилевых. 2 И воздвижеся в день той всяк муж сильный их: а сила их мужей ратных, мужей пеших сто седмьдесять тысящ, и коиников тысящей дванадесять, кроме приуготовления и мужей, иже быша пешцы в них, множество много зело. 3 И ополчишася во юдоли близ Ветилуи при источнице, и протягошася в широту от Дофаима даже до Велфема, и в долготу от Ветилуи даже до Киамона, иже есть противу Есдрилоиа. 4 Сынове же Израилевы, яко увидеша их множество, смутишася зело, и рече кийждо ко ближнему своему: ныне полижут сии лице земли всея, и ниже горы высокия, ниже дебри, ниже холми снесут тяжесть их. 5 И вземше кийждо орудия ратная своя и возжегше огни на башнех своих, пребываша стрегуще всю нощь ону. 6 Во вторый же день изведе Олоферн всю конницу свою противу лица сынов Израилевых,иже быша в Ветилуи, 7 и усматриваше восходов града их, и на источники града их найде, и предвосприя их, и пристави к ним ополчения мужей ратных, а сам возвратися к людем своим. 8 И пришедше к нему вси началницы сынов Исавлих и вси вождеве людий Моавлих и воеводы примория реша: 9 да послушает убо словесе владыка наш, да не будет сокрушения в силе твоей: 10 народ бо сей сынов Израилевых не уповают на копия своя, но на высоты гор своих, в нихже они живут, не бо есть удобно приити верхами гор их: 11 и ныне, владыко, не ратуй на них, якоже бывает рать ополчения, и не падет от людий твоих муж един: 12 пребуди в полце твоем, соблюдаяй всякаго мужа от силы твоея, и да обдержат отроцы твои источник водный, иже исходит из корене горы, 13 зане оттуду напаяются вси живущии в Ветилуи: и погубит их жажда, и отдадят град свой, а мы и людие наши взыдем на близкия верхи гор и оиолчимся на них в предохранение, еже не изыти из града мужу единому: 14 и истают гладом сами и жены их и чада их и прежде неже приити мечу на них, падут на стогнах обитания своего: 15 и воздаси им воздаяние лукавое, понеже бозкрамолствоваша и не сретоша лица твоего в мире. 16 И угодна быша словеса их пред Олоферном и пред всеми слуги его, и уставиша сотворити, якоже глаголаша. 17 И воздвижеся полк сынов Аммоних, и с ними пять тысящей сынов Ассурских, и оиолчишася во юдоли и предвосприяша воды и источники вод сынов Израилевых. 18 И взыдоша сынове Исавли и сынове Аммони и ополчишася в горней противу Дофима, и послаша от себе к югу и востоку противу Екревила, иже есть близ Хуса, иже есть при потоце Мохмур: а прочее воинство Ассириов ополчишася на поли и покрыша все лице земли: и шатры и припасы их разставишася в народе мнозе, и быша во множество много зело. 19 Сынове же Израилевы возопиша ко Господу Богу своему, зане возмалодушествова дух их, яко обыдоша всех врази их, и не бе возможно избежати из среды их. 20 И пребысть окрест их все ополчение Ассурское, пешцы и колесницы и конницы их, дний тридесять четыре: и оскудеша всем живущым во Ветилуи вся приятелища их водная, 21 и рвы оскудеваша, и не имеяху пити в сытость воды дне единаго, зане мерою даваху им пити. 22 И смятошася младенцы их и жены их и юноши, изнемогаху от жажды и падаху на стогнах града и в проходех врат, и не бе крепости ктому в них. 23 И собрашася вси людие ко Озии и князем града, юноши и жены и отроцы и возопиша гласом великим и реша пред всеми старейшинами: 24 да судит Бог между нами и вами, яко сотвористе в нас неправду велию, не глаголюще мирная с сынми Ассурскими: 25 и ныне несть помощника нам, но продаде нас Бог в руце их, еже низверженым быти пред ними жаждею и погублением великим: 26 и ныне призовите их и отдадите град весь в расхищение людем Олоферновым и всей силе его: 27 лучше бо нам быти им в расхищение, будем бо в рабы, и жива будет душа наша, и не узрим смерти младенцев наших во очесех наших, и жен и чад наших изчезащих душами своими: 28 свидетелствуем вам небом и землею и Богом нашим и Господем отец наших, иже отмщает нам по грехом нашым и по грехом отец наших, да не сотворит по глаголом сим во днешний день. 29 И бысть плачь велий посреде собрания всех единодушно, и возопиша ко Господу Богу гласом великим. 30 И рече к ним Озиа: дерзайте, братия, претерпим еще пять дний, в нихже обратит Господь Бог наш милость Свою на нас, не бо оставит нас в конец: 31 аще же прейдут сии, и не приидет на нас помощь, сотворю по словесем вашым. 32 И распусти людий ко своему ополчению: и на стены и башни града своего отидоша, а жены и чада в домы их отсла. И быша во смирении мнозем во граде. === 8 === 1 И услыша во днех онех Иудиф дщерь Мерарии, сына Оксова, сына Иосифова, сына Озиилева, сына Елкиева, сына Ананиева, сына Гедеонова, сына Рафаинова, сына Акифонова, сына Илиева, сына Елиавова, сына Нафанаилева, сына Саламиилева, сына Саласадаиева, сына Иеилева. 2 И муж ея Манассиа, от племене ея и отечества ея, и умре во днех жатвы ячменя: 3 настояше бо над вяжущими снопы на поли, и зной прииде на главу его, и паде на одр и скончася во Ветилуи граде своем: и погребоша его со отцы его на селе сущем посреде Дофаима и Валамона. 4 И бе Иудиф в дому своем вдовствующи лета три и месяцы четыри. 5 И сотвори себе жилище на крове дому своего и возложи на чресло свое вретище, и бяху на ней ризы вдовства ея: 6 и постяшеся вся дни вдовства своего кроме предсубботий и суббот, и предновомесячий и новомесячий, и праздников и радований дому Израилева: 7 и бе добра видом и красна взором зело: и остави ей Манассиа муж ея сребро и злато, и отроки и отроковицы, и скоты и села, и пребываше над ними: 8 и не бе, иже бы нанесл ей глагол злый понеже бояшеся Бога зело. 9 И услыша глаголы людий злыя на началника, яко возмалодушествоваша о скудости вод: и слыша вся словеса Иудиф, яже глаголаше к ним Озиа, яко клятся им предати град по пяти днех Ассириом: 10 и пославши рабыню свою, приставницу всему имению ея, призва Озию и Хаврииа и Хармина, старейшин града своего. 11 И приидоша к ней, и рече к ним: послушайте убо мене, началницы живущих во Ветилуи, яко неправо слово ваше, еже глаголасте пред людьми в день сей, и устависте клятву, юже глаголасте между Богом и вами, и ресте предати град врагом нашым, аще не в тыя обратится Господь помощи нам: 12 и ныне кто есте вы, иже искусисте Бога во днешний день, и устависте кроме Бога посреде сынов человеческих? 13 И ныне Господа Вседержителя испытуете, и ничтоже познаете даже до века, 14 понеже глубины сердца человеческаго не изследите и словес мысли его не постигнете: и како Бога, иже сотвори вся сия, испытаете, и ум Его уведаете, и мысль Его познаете? Никакоже, братия, не прогневляйте Господа Бога нашего: 15 зане аще не восхощет в пяти днех помощи нам, Тои имать власть в киих хощет покрыти днех, или и истребити нас пред лицем врагов наших: 16 вы же не одолжайте советами Господа Бога нашего, зане не яко человеку Богу претити, ниже яко сына человеча судити: 17 сего ради ожидающе от Него спасения, призовем Его на помощь нашу, и послушает гласа нашего, аще будет Ему угодно: 18 ибо не воста в родех наших, ниже есть во днешний день, ниже племя, ниже отечество, ниже сонм, ниже град от нас, иже покланяются богом рукотворенным, якоже бысть в первых днех, 19 ихже ради предани быша под мечь и на расхищение отцы наши и падоша падением великим пред врагами нашими: 20 мы же инаго Бога не познахом разве Его, темже уповаем, яко не презрит нас, ниже от рода нашего: 21 понеже, внегда взятым быти нам, тако сядет вся Иудеа, и расхищена будут святая наша, и взущет осквернения их от уст наших, 22 и убиения братии нашея и пленение земли и опустение наследия нашего обратит на главу нашу во языцех, идеже аще поработаем тамо, и будем в соблазн и в поношение пред стяжавшими нас, 23 ибо не исиравится служба наша в благодать, но в безчестие положит ю Господь Бог наш: 24 и ныне, братия, покажем братии нашей, яко от нас зависит душа их, и святая и дом и олтарь утверждается на нас: 25 кроме сих всех возблагодарим Господеви Богу нашему, иже искушает нас, якоже и отцев наших: 26 помяните, елика сотвори со Авраамом, и еликими искушаше Исаака, и елика быша Иакову в Месопотамии Сирстей, пасущу овцы Лавана брата матере своея, 27 зане не якоже оных искуси во истязании сердца их, и нас не обиде, но в научение наказует Господь приближающихся Ему. 28 И рече к ней Озиа: вся, елика рекла еси, благим средцем глаголала еси, и несть, иже бы противостал словесем твоим, 29 понеже не ныне мудрость твоя явна есть, но от начала дний твоих ведают вси людие разум твой, како благо есть смышление сердца твоего: 30 но людие жаждаху зело и принудиша сотворити нас, якоже глаголахом им, и навести клятву на нас, еяже не преступим: 31 и ныне молися о нас, ибо жена благочестива еси, и послет Господь дождь во исполнение рвов наших, и оскудевати не будем ктому. 32 И рече к ним Иудиф: послушайте мене, и сотворю дело, еже прострется в роды родов сыном рода нашего: 33 вы станете при вратех в нощь сию, и изыду аз с рабынею моею, и во днех, по нихже ресте предати град врагом нашым, посетит Господь Израиля рукою моею: 34 вы же не исиытуйте дела моего, не бо реку вам, дондеже совершатся, яже аз творю. 35 И рече Озиа и началницы к ней: иди с миром, и Господь Бог пред тобою на отмщение врагов наших. 36 И возвращьшеся от жилища, идоща ко ополчением своим. === 9 === 1 Иудиф же паде на лице, и возложи персть на главу свою, и сложи, имже одевашеся, вретище. И бяше недавно приносимо во Иерусалиме в дому Господни кадило в вечер той, и возопи глсом великим Иудиф ко Господу и рече: 2 Господи, Боже отца моего Симеона, емуже дал еси в руку мечь во отмщение инородных, иже растлиша ложесна девича во осквернение и обнажиша недро в срамоту и оскверниша ложесна в поношение, 3 рекл бо еси: да не будет тако: и сотвориша, за яже дал еси князи их на убиение, и постелю их, яже ведяше прельщение их, в кровь, и поразил еси рабов о владыцех и владыки на престолех их, 4 и дал еси жены их в расхищение и дщери их в пленение и вся корысти их в разделение сыном возлюбленным от Тебе, иже и возревноваша ревностию Твоею и мерзишася осквернением крове своея и призваша Тя в помощника: Боже, Боже мой, и мене услыши вдову: 5 Ты бо сотворил еси, яже прежде оных и оная, и яже по сих и яже ныне, и грядущая проразумел еси, и собышася, яже мыслил еси, 6 и предсташа, яже уставил еси, и реша: се, есмы: вси бо путие Твои готови, и суд Твой во проразумении: 7 се бо, Ассириане умножишася в силе своей, вознесошася о кони и о всаднице, возвеличашася в мышце пешев, уповаша на щит и копие и лук и пращу, и не познаша, яко Ты еси Господь сокрушаяй брани: 8 Господь имя Тебе, Ты сокруши их крепость силою Твоею и низложи державу их яростию Твоею: усоветоваша бо омерзити святая Твоя, осквернити селение упокоения имене славы Твоея и опровергнути железом рог олтаря Твоего: 9 воззри на гордость их, посли гнев Твой на главы их, даждь в руку мою вдовию, юже умыслих, крепость, 10 порази раба от устен хитрости моея о князи и князя о рабе его, сокруши гордыню их рукою женскою: 11 не бо во множестве крепость Твоя, ниже могутство Твое в сильных, но смиренных еси Бог, малейших еси помощник, заступник немощных, отчаянных покровитель, ненадежных спаситель: 12 ей, ей, Боже отца моего и Боже наследия Израилева, Владыко небес и земли, Создателю вод, Царю всея твари Твоея, ты услыши моление мое 13 и даждь слово мое и хитрость в язву и рану их иже противу завета Твоего и дому освященнаго Твоего, и в верха Сионя и дому одержания сынов Твоих усоветоваша жестокая, 14 и сотвори во всем языце Твоем и во всем племени познание, еже ведати, яко Ты еси, Боже Бог всея силы и державы, и несть инаго защитника рода Израилева кроме Тебе. === 10 === 1 И бусть яко преста вопиющи ко Богу Израилеву и сконча вся глаголы сия, 2 и воста от повержения и призва рабыню свою и сниде в дом, в немже пребываше во дни субботния и в праздники своя, 3 и сложи вретище, имже одевашеся, и совлече ризы вдовства своего, и обмы тело водою и помазася миром богатым, и разчеса власы главы своея и возложи увясло на ню и облечеся в ризы веселия своего, имиже одевашеся во дни живота мужа своего Манассии: 4 и взя сандалия на ноги своя, и обложи мониста и цепки, и перстни и усерязи и все украшение свое, и украсися зело на прельщение очес мужеских, елицы аще увидят ю: 5 и даде рабыни своей оплетен сосуд вина и чванец елеа, и мешец наполни мукою и плетеницы смоквами и хлебы чистыми, и обви вся сосуды своя, и возложи на ню. 6 И изыдосте ко вратом града Ветилуи и обретосте стоящих при них Озию и старцев града Хаврина и Хармина. 7 Якоже увидеша ю, и бе изменено лице ея, и ризу премененну ея, и удивишася о красоте ея попремногу зело и реша ей: 8 Бог, Бог отец наших да даст тя в благодать и совершит начинания твоя в величие сынов Израилевых и возвышение Иерусалима. И поклонися Богу 9 и рече к ним: повелите отверсти ми врата града, и изыду ко совершению словес, ихже глаголасте со мною. И повелеша юношам отверсти ей, якоже глаголаше. 10 И сотвориша тако. И изыде Иудиф сама и рабыня ея с нею: назираху же ю мужие града, дондеже сниде с горы, дондеже прейде юдоль, и ктому не увидеша ея. 11 И идясте юдолию прямо. И срете ю первая стража Ассирийская, 12 и взяша ю и вопросиша: от коих еси? И откуду грядеши? И камо идеши? И рече: дщи есмь Евреов и убегаю от лица их, яко имут предани быти вам на поглощение: 13 и аз гряду пред лице Олоферна вождоначалника силы вашея, еже возвестити глаголы истины, и покажу пред лицем его путь, по немуже пойдет и возобладает всею горнею, и не погибнет от мужей его плоть едина,ниже дух жизни. 14 Якоже услышаша мужие глаголы ея и усмотриша лице ея, и бяше пред ними чудна красотою зело, и реша к ней: 15 спасла еси душу твою, потщавшися снити пред лице господина нашего: и ныне приступи ко шатру его, и от нас проводят тя, дондеже предадут тя в руце его: 16 аще же станеши пред ним, да не убоишися сердцем твоим, но возвести по глаголом твоим, и благо тебе сотворит. 17 И избраша от себе мужей сто и присовокупиша ей и рабыни ея, и ведоша я ко шатру Олофернову. 18 И бысть стечение во всем ополчении, разгласися бо по шатром пришествие ея: и пришедше окружаху ю, яко стояше вне шатра Олофернова, дондеже возвестиша ему о ней. 19 И чудяхуся о красоте ея и удивляхуся сыном Израилевым о ней, и реша кийждо ко ближнему ссвему: кто презрит людий сих, иже имут у себе жен таковых? Яко не добро есть оставити из них мужа единаго, иже оставлени бывше возмогут прехитрити всю землю. 20 И изыдоша спящии при Олоферне и вси служителие его и введоша ю в шатер. 21 И бе Олоферн опочивая на одре своем под завесою, яже бе от порфиры и злата и смарагда и камений многоценных втканных. 22 И возвестиша ему о ней, и изыде в предсение, и лампады сребряныя предидяху ему. 23 Егда же прииде пред лице его Иудиф и слуг его, дивишася вси о красоте лица ея. И падши на лице поклонися ему: и воздвигоша ю раби его. === 11 === 1 И рече к ней Олоферн: дерзай, жено, да не устрашаешися сердцем твоим, зане аз не озлобих человека, иже изволи служити царю Навуходоносору всея земли: 2 и ныне людие твои живущии в горней, аще бы не уничтожили мя, не воздвигл бых копия моего на них, но они сами себе сотвориша сия: 3 и ныне глаголи ми, чесо ради отшла еси от них и пришла еси к нам? Приходиши бо ко спасению: дерзай, в нощь сию жива будеши, и в прочее: 4 несть бо, иже обидит тя, но благо тебе сотворит, якоже бывает рабом господина моего царя Навуходоносора. 5 И рече к нему Иудиф: приими глаголы рабы твоея, и да проглаголет рабыня твоя пред лицем твоим, и не возвещу лжи госиодину моему в нощь сию: 6 и аще имаши последовати словесем рабыни твоея, совершенно дело сотворит с тобою Бог, и не отпадет господин мои от начинаний своих: 7 живет бо царь Навуходоносор всея земли, и живет держава его, иже посла тя во исправление всякия души, яко не токмо человецы тебе ради послужат ему, но и зверие польнии и скоти и птицы небесныя крепостию твоею живи будут о Навуходоносоре и всем доме его: 8 слышахом бо премудрость твою и хитрости души твоея, и возвестися всей земли, яко ты един благ во всем царстве и силен в разуме и чуден во ополчениих брани: 9 и ныне слово, еже изрече Ахиор в заседании твоем, слышахом глаголы его, яко снабдеша его мужие града Ветилуи, и возвести им вся, елика изглагола он у тебе: 10 сего ради, владыко господине, да не преступаеши словесе его, но положи его в твоем сердцы, яко истинно есть: не бо отмщается род наш, не превозмогает мечь на них, аще не согрешат к Богу своему: 11 и ныне да не будет господин мой отвержен и недействителен, и нападет смерть на лице их, и постигнет их согрешение, имже раздражат Бога своего, когда либо аще сотворят безместие: 12 понеже бо оскудеша им брашна, и умалися вся вода, восхотеша устремитися на скоты своя, и вся, елика определи им Бог в законех Своих не ясти, умыслиша употребляти: 13 и начатки пшеницы, и десятины вииа и елеа, яже соблюдаху освятивше иереом предстоящым во Иерусалиме пред лицем Бога нашего, судиша иждивати, имже ниже руками подобаше прикасатися кому от людий: 14 и послаша во Иерусалим, яко и тамо живущии сотвориша сия, да принесут им разрешение от старейшин: 15 и будет, егда возвестится им, и сотворят, дадутся тебе в погубление в день той: 16 темже аз раба твоя, познавши сия вся, отбегох от лица их: и посла мя Бог творити с тобою дела, о нихже ужаснется вся земля, елицы аще услышат сия, 17 зане раба твоя благочестива есть и служащи нощию и днем Богу Небесе: и ныне пребуду у тебе, господине мой, и да исходит раба твоя в нощи в дебрь и молится к Богу: и возвестит ми, егда сотворят согрешения своя: 18 и пришедши возвещу тебе, и изыдеши со всею силою твоею, и несть, иже воспротивится тебе от них: 19 и поведу тя сквозе Иудею, дондеже приити прямо Иерусалима, и положу седалище твое посреде его, и поженеши их аки овцы, имже несть пастыря, и не возскомлет пес языком своим противу тебе: зане мне сия речена суть по предведению моему и возвещена ми, и послана есмь возвестити тебе. 20 И угодна быша словеса ея пред Олоферном и пред всеми слуги его, и дивишася о премудрости ея и реша: 21 несть таковыя жены от конца даже до конца земли в красоте лица и в разуме словес. 22 И рече к ней Олоферн: благо сотвори Бог пославый тя пред людьми, еже быти в руках наших державе, на уничиживших же господина моего погибели: 23 и ныне красна еси ты взором твоим и блага во словесех твоих: зане аще сотвориши, якоже глаголала еси, Бог твой будет мой Бог, и ты в дому царя Навуходоносора сядеши и будеши именита по всей земли. === 12 === 1 И повеле ввести ю, идеже положени быша сосуди сребрянии его, и повеле уготовити ей от пищей устроеваемых себе и от вина своего пити. 2 И рече Иудиф: не снем от них, да не будет соблазн, но от принесенных со мною мне подаваемо да будет. 3 И рече к ней Олоферн: аще же оскудеют сущая с тобою, откуду принесем тебе давати подобная сим? Несть бо с нами от рода твоего. 4 И рече Иудиф к нему: жива есть душа твоя, господине мой, яко не иждивет раба твоя сущих со мною, дондеже сотворит Господь рукою моею, яже устави. 5 И ведоша ю отроцы Олоферновы в шатер, и спа даже до полунощи: и воста о утренней стражи 6 и посла ко Олоферну, глаголющи: да повелит убо господин мой пущати рабу твою на молитву исходити. 7 И повеле Олоферн телохранителем не возбраняти ей. И пребысть в полку дни три: и исхождаше в нощи в дебрь Ветилуи и умывашеся во ополчении во источнице воды, 8 и яко взыде, моляшеся Господу Богу Израилеву, да управит путь ея ко возставлению сынов людий Своих: 9 и входящи чиста пребываше в шатре, донелиже приношаше пищу свою ко вечеру. 10 И бысть в день четвертый, сотвори Олоферн пир рабом своим единым, и не призва в послужение ни единаго от сущих при службах, 11 и рече Вагою евнуху, иже бяше приставник над всеми сущими его: шед убо увещай жену Евреиню, яже есть у тебе, еже приити к нам и ясти и пити с нами: 12 се бо, студно лицу нашему, аще жену сицевую оставим не беседовавше с нею, зане аще сея не призовем, посмеется нам. 13 И изыде Вагоа от лица Олофернова и вниде к ней и рече: да не обленится убо отроковица добрая сия, пришедши ко господину моему, прославитися пред лицем его и пити с нами в веселие вино и быти в день сей, яко дщи едина от сынов Ассуровых, яже предстоят в дому Навуходоносорове. 14 И рече к нему Иудиф: и кто есмь аз противоглаголющи господину моему? Зане все, еже будет пред очесы его угодно, потщавшися сотворю, и будет сие ми радование даже до дне смерти моея. 15 И воставши украсися одеянием и всяким украшением женским: и прииде раба ея и постла ей пред Олоферном долу ковры, ихже взя от Вагои ко повседневному употреблению своему, во еже ясти возлегшей на них: 16 и вшедши возлеже Иудиф. И изступи сердце Олоферново о ней, и подвижеся душа его: и бяше желателен зело, еже снитися с нею, и усмотреваше времене, еже обольстити ю, от негоже дне виде ю: 17 и рече к ней Олоферн: пий убо и буди с нами в веселии. 18 И рече Иудиф: буду убо пити, господине, яко возвеличися живот мой во мне днесь паче всех дний рождения моего. 19 И вземши яде и пи пред ним, яже уготова раба ея. 20 И возвеселися Олоферн о ней и пи вина много зело, елико не пи никогдаже в день един, отнелиже родися. === 13 === 1 Егда же позде бысть, потщашася раби его отити, и Вагоа заключи шатер отвне и отпусти предстоящих от лица господина своего, и отидоша к ложам своим, бяху бо вси утруждени, зане на мнозе пребысть пир. 2 Остася же Иудиф едина в шатре, и Олоферн повержен на ложи своем: бяше бо преисполнен вином. 3 И рече Иудиф рабе своей, да стоит вне ложницы ея и да смотрит исхода ея якоже по всяк день: рече бо, яко изыти имать на молитву свою: и Вагою глагола по словесем сим. 4 И отидоша вси от лица ея, и ни един остася в ложнице от мала даже до велика. И ставши Иудиф при одре его, рече в сердцы своем: Господи, Боже всея силы, призри в час сей на дела рук моих ко возвышению Иерусалима, 5 яко ныне время помоществовати наследию Твоему и совершити начинание мое ко сокрушению врагов, иже восташа на нас. 6 И приступивши к столпнику одра, иже бяше у главы Олоферновы, снят мечь его с него, 7 и приближившися ко одру, взя в горсть власы главы его и рече: укрепи мя, Господи Боже Израилев, в день сей. 8 И удари в выю его дважды силою своею, и отя главу его от него, 9 и отвали тело его от постели, и отя завесу от столпов: и по мале изыде и предаде рабыни своей главу Олофернову: 10 и вложи ю в мешец снедей своих. И изыдосте обе купно по обычаю своему на молитву: и прошедше полк, обыдосте дебрь оную, и взыдосте на гору Ветилуи, и приидосте ко вратом ея. 11 И рече Иудиф издалеча стрегущым на вратех: отверзите ныне, отверзите врата, с нами Бог, Бог наш, сотворити еще крепость во Израили и силу на враги, якоже и днесь сотвори. 12 И бысть яко услышаша мужие града того глас ея, потщашася снити ко вратом града своего и созваша старцев града. 13 И стекошася вси от мала даже до велика, яко паче чаяния бе им, еже приити ей, и отверзоша врата и восприяша их: и вжегше огнь во свещение, окружиша их. 14 Она же рече к ним гласом великим: хвалите Бога, хвалите: хвалите Бога, иже не отстави милости Своея от дому Израилева, но сокруши враги нашя рукою моею в нощь сию. 15 И иземши главу из мешца показа и рече им: се, глава Олоферна вождоначалника силы Ассурския, и се, завеса, за неюже лежаше во пиянствах своих, и порази его Господь рукою женскою: 16 и жив есть Господь, иже сохрани мя в пути моем, имже ходих, яко прельсти его лице мое в пагубу его, и не сотвори греха со мною во осквернение и срамоту. 17 И ужасошася вси людие зело, и падше поклонишася Богу, и реша единодушно: благословен еси, Боже наш, уничтоживый в день сей враги людий Твоих. 18 И рече ей Озиа: благословена ты еси, дщи, Богом Вышним паче всех жен яже на земли, и благословен Господь Бог, Иже созда небеса и землю, Иже управи тя на сокрушение главы князя врагов наших: 19 яко не отстанет надежда твоя от сердца человек, поминающих крепость Божию, даже до века: 20 и да сотворит тебе сия Бог в возношение вечное, еже посещати тя во благих, за еже не пощадела еси души твоея смирения ради рода нашего, но пособствовала еси падению нашему, в правоте ходивши пред Богом нашим. И реша вси людие: буди, буди. === 14 === 1 И рече к ним Иудиф: послушайте убо мене, братия, и вземше главу сию повесите ю на забрале стены вашея: 2 и будет егда возсияет утро, и взыдет солнце на землю, приимете кождо орудия бранная ваша, и изыдете всяк муж сильный вне града, и дадите воеводу над ними, аки сходяще на поле ко первей стражи сынов Ассуровых, и не снидете: 3 и вземше сии всеоружия своя, пойдут ко ополчению своему, и возбудят воеводы силы Ассуровы, и стекутся ко шатру Олофернову, и не окрящут его, и нападет на них страх, и побегнут от лица вашего: 4 и возследовавшии вам, и вси живущии во всем пределе Израилстем, постилайте я по путем их: 5 прежде же еже сотворити сия, призовите мне Ахиора Амманитина, да видев познает уничтожающаго дом Израилев, и сего яко на смерть посланнаго к нам. 6 И призваша Ахиора из дому Озиина. Егда же прииде и виде главу Олофернову в руце мужа единаго в собрании людий, паде на лице, и разслабися дух его. 7 Егда же подяша его, припаде к ногама Иудифы, и поклонися лицу ея, и рече: благословена ты во всяцем селении Иудине и во всяцем языце, иже услышавше имя твое смятутся: 8 и ныне возвести ми, елика сотворила еси во днех сих. И возвести ему Иудиф посреде людии вся, елика сотвори, от негоже дне изыде, дондеже глаголаше им. 9 Егда же преста глаголющи, воскликнуша людие гласом великим и дадоша глас веселый во граде своем. 10 Видев же Ахиор вся, елика сотвори Бог Израилев, верова Богу зело, и обреза плоть крайнюю свою, и приложися к дому Израилеву даже до дне сего. 11 Егда же денница взыде, свесиша главу Олофернову со стены: и восприят всяк муж Израилев оружия своя, и изыдоша полками на восходы горы. 12 Сынове же Ассуровы, яко увидеша их, разослаша к вождем своим: они же приидоша к воеводам и тысящником и ко всякому князю своему, 13 и приидоша к шатру Олофернову, и реша сущему над всеми его: возбуди убо господина нашего, зане дерзнуша раби сходити к нам на брань, да истребятся в конец. 14 И вниде Вагоа и толкну во двор шатра, мняше бо спати его со Иудифою. 15 Егда же никтоже послушаше, растворив вниде в ложницу и обрете его при празе повержена мертва, и глава его отята бысть от него: 16 и возопи гласом великим с плачем и стенанием и воплем крепким, и раздра ризы своя: 17 и вниде в шатер, идеже бе Иудиф обитающи, и не обрете ея, и изскочи к людем и возопи: 18 отвергошася раби, сотвори студ едина жена Еврейская на дом царя Навуходоносора: зане се, Олоферн долу, и главы несть на нем. 19 Егда же услышаша сия глаголы князие силы Ассуровы, раздраша ризы своя, и смятеся душа их зело, и бысть их крик и вопль зело посреде полка. === 15 === 1 И егда услышаша в шатрех сущии, ужасошася о бывшем, 2 и нападе на ня страх и трепет, и не бе человека пребывающа пред лицем ближняго ктому, но истекше единодушно бежаху по всякому пути поля и нагорныя: 3 и иже ополчившиися в горней окрест Ветилуи обратишася в бегство: и тогда сынове Израилевы всяк муж ратник от них устремишася на них. 4 И посла Озиа в Ветомасфем и Виваю, и Ховаю и Холу, и во всяк предел Израилев, вестники о совершившихся, и да вси потекут вслед врагов на погубление их. 5 Егда же услышаша сынове Израилевы, вси единодушно нападоша на них и секоша их даже до Ховы. Такожде же и иже из Иерусалима приидоша и из всея нагорныя: возвестиша бо им бывшая ополчению врагов их: и иже в Галааде и в Галилеи бодоша их язвою великою, дондеже минуша Дамаск и пределы его. 6 Прочии же живущии во Ветилуи, нападоша на полк Ассуров и плениша их и обогатишася зело. 7 Сынове же Израилевы возвратившеся от сечи, возобладаша прочими, и веси и села, яже в горней и напольней, возобладаша многими корыстьми: бе бо множество много зело. 8 Иоаким же иерей великий и старейшины сынов Израилевых живущии во Иерусалиме приидоша еже зрети благая, яже сотвори Господь Израилю, и еже видети Иудиф и глаголати с нею мир. 9 Егда же приидоша к ней, благословиша ю вси единодушно и реша к ней: ты возвышение Израилево| ты радование велико Израилево| ты слава велия рода нашего| 10 сотворила еси вся сия рукою твоею, сотворила еси благая со Израилем, и да благоволит о них Бог: благословена буди у Вседержителя Господа в вечное время. И реша вси людие: буди. 11 И пленяху вси людие полк чрез дний тридесять, и даша Иудифе шатер Олофернов и вся сребряныя сосуды, и одры и умывалницы, и вся устроения его. И приемши она возложи на мска своего, и впряже колесницы, и сложи я на ня. 12 И притече всякая жена Израилска еже видети ю, и благословиша ю и сотвориша ей лик от себе. И взя копия цветами украшенная в руце свои и даде женам сущым с нею: 13 и увенчася маслиною сама и яже с нею, и идяше пред всеми людьми в лице, ведущи всех жен. И последоваше всяк муж Израилев вооружени с венцы и песньми во устах своих. 14 И нача Иудиф исповедание сие во всем Израили, и возглашаху вси людие хваление сие. === 16 === 1 И рече Иудиф: начните Богу моему в тимпанех, пойте Господеви моему в кимвалех, красно воспойте Ему песнь нову, возносите и призывайте имя Его: 2 яко Бог сокрушаяй брани Господь, яко во ополчениих Его посреде людий изят мя из руки гонящих мя: 3 прииде Ассур из гор от севера, прииде во тмах силы своея, ихже множество загради источники, и конница их покры холмы: 4 рече пожещи пределы моя, и юношы моя убити мечем, и ссущыя моя положити в помост, и младенцы моя дати в расхищение, и девы моя пленити: 5 Господь Вседержитель опроверже их рукою жены, 6 не бо паде сильный их от юнош, ниже сынове титановы поразиша его, ниже высоцы исполини нападоша на него, но Иудиф дщи Мерарина добротою лица своего разслаби его: 7 совлечеся бо одеяния вдовства своего на возвышение бедствующих во Израили, помаза лице свое умащением 8 и увенча власы своя увяслом и прият одежду льняну в прельщение его: 9 сандалия ея похити око его, и доброта ея плени душу его, пройде мечь выю его: 10 устрашишася персы державы ея, и Миды дерзновением ея разседошася: 11 тогда воскликнуша смиреннии мои и возопиша немощнии мои, и устрашишася: вознесоша глас свой, и побеждени быша: 12 сынове отроковиц бодоша их и яко рабов беглецов уязвляху их, погибоша от ополчения Господа моего: 13 воспою Господеви моему песнь нову: Господи, велий еси и славен, дивен в крепости, непреборимый, 14 Тебе да работает всяка тварь Твоя: яко рекл еси, и быша: послал еси Духа Твоего, и созда: и несть, иже противостанет гласу Твоему: 15 горы бо от основании с водами подвигнутся, камение же от лица Твоего яко воск ратает: над боящимися же Тебе Ты умилостивляешися, 16 яко мало всяка жертва в воню благоухания, и малейший всяк тук во всесожжение Тебе: бояйся же Господа велик выну: 17 горе языком востающым на род мой: Господь Вседержитель отмстит им в день судный, дати огнь и червие на плоти их, и восплачутся в чувстве даже до века. 18 Егда же внидоша во Иерусалим, поклонишася Богу: и егда очистишася людие, принесоша всесожегаемая своя и произвольная своя и дары своя. 19 И возложи Иудиф вся сосуды Олоферновы, елики дадоша людие ей, и завесу, юже взя она от ложницы его, в дар Господу даде. 20 И бяху людие веселящеся во Иерусалиме пред лицем святых месяцы три, и Иудиф с ними пребысть. 21 По днех же сих возвратися кийждо во наследие свое: и Иудиф отиде во Ветилую, и пребываше над стяжанием своим, и бысть во время свое славна во всей земли. 22 И мнози желаша ея, и не позна муж ея вся дни живота ея, от негоже дне умре Манассиа муж ея и приложися к людем своим. 23 И произыде велика зело, и состареся в дому мужа своего лет ста пяти, и отпусти рабыню свою свободну, и умре во Ветилуи, и погребоша ю в пещере мужа ея Манассии. 24 И плакася ея дом Израилев дний седмь. И раздели имения своя прежде смерти своея всем ближним Манассии мужа своего и ближним рода своего. 25 И не бяше ктому устрашаяй сынов Израилевых во дни Иудифы и по смерти ея дни многи. == Книга Есфирь == === Предисловие === В лето второе царства Артаксеркса великаго, в первый день месяца Нисана, сон виде Мардохей сын Иаиров, Семеев, Кисеев, от племене Вениаминя, человек Иудеанин, обитаяй в Сусех граде, человек велик, служа во дворе цареве: бе же от плененных, ихже плени Навуходоносор царь Вавилонский от Иерусалима, со Иехониею царем Иудейским. И сицево его соние: и се, глас ужасный, громи и трус и смятение на земли: и се, два змиа велика произыдоста, готова оба между собою братися, и бысть глас их велик, и гласом их уготовася всяк язык на брань, да истребят язык праведных: и се, день тмы и мрака, скорбь и теснота, и озлобление и смятение велие на земли, и возмутися всяк язык праведен боящеся злобы их, и уготовашася на погибель, и возопиша ко Господу: от вопля же их бысть аки от малаго источника река велия, вода многа: и свет и солнце возсия, и смиреннии вознесошася и поядоша славных. И возбнув Мардохей видевый соние сие, и еже Бог восхоте сотворити, содержаше соние сие в сердцы, и во всяцем словеси хотяше разумети е даже до нощи. И пребываше Мардохей во дворе со Гавафом и Фарром двема евнухома царевыма, иже стрежаста двор: и слыша разглаголствия их, и советы их исиыта, и разуме, яко готовят руце свои возложити на царя Артаксеркса: и сказа царю о них. И испыта царь дву евнуху своею, и исповедавша повешена быста. И написа царь словеса сия на память, и Мардохей написа о словесех сих. И повеле царь Мардохею служити во дворе и даде ему дары за сие. И бе Аман Амадафов Вугеанин славен пред царем и восхоте озлобити Мардохеа и людий его дву ради евнуху цареву. === 1 === 1 И бысть по словесех сих во днех Артаксеркса: сей Артаксеркс от Индии обладаше сто двадесять седмию странами (даже до Ефиопии): 2 во дни же тыя, егда седе на престоле царь Артаксеркс в Сусех граде, 3 в третие лето царства своего, сотвори пир другом и прочым языком, и Персским и Мидским славным, и началным сатрапом, 4 и по сих, егда показа им богатство царства своего и славу веселия своего, во сто осмьдесят дний. 5 И егда исполнишася дние пира, сотвори царь пиршество языком обретшымся во граде (Сусех) на дний шесть во дворе дому царева, 6 украшеннем виссонными и зелеиыми завесами, простертыми на ужах виссонных и червленичных, на колцах златых и сребряных, на столпех мраморных и каменных: 7 ложа злата и сребряна, на помосте камене смарагдова, и пиннинска и паринска мрамора, и плащаницы пестротами различными разцвечены, окрест шипцы разсеяни: 8 сосуди злати и сребряни, и чаша анфракса (камене) предложенная, ценою талант тридесять тысящ: вино много и сладко, еже сам царь пияше: питие же сие не по уставленному закону бысть, тако бо восхоте царь и заповеда икономом сотворити волю свою и мужей. 9 И Астинь царица сотвори пир женам в дому цареве, идеже царь Артаксеркс. 10 В день же седмый развеселився царь, рече Аману и Вазану, и Фарре и Варазу, и Зафолфану и Аватазу и Фараву, седмим евнухом, иже служаху пред царем Артаксерксом, 11 привести (Астинь) царицу пред него, еже воцарити ю и возложити на ню венец царский и показати ю всем началствующым и языком красоту ея, зане прекрасна бе. 12 И не послуша его Астинь царица приити со евнухи. 13 И опечалися царь, и разгневася, и рече ближним своим: сице рече Астинь: сотворите убо о сем закон и суд. 14 И приступиша к нему Аркесей и Сарсофей и Малисеар, началницы Персстии и Мидстии, иже близ царя, первии седящии при цари, 15 и возвестиша ему по законом, како подобает сотворити царице Астини, яко не сотвори повеленных от царя чрез евнухи. 16 И рече Мухей ко царю и к боляром: не царя единаго обиде Астинь царица, но и вся князи и началники царевы, 17 ибо поведа им словеса царицы, и како противорече царю: 18 якоже убо противно рече царю Артаксерксу, сице и днесь госпожи жены прочыя князей Персских и Мидских, услышавшя царю реченная от нея, дерзнут такожде безчествовати мужеи своих: 19 аще убо угодно царю, да повелит царским повелением, и да напишется по законом Мидским и Персским, и инако да не будет, ниже да внидет ктому царица к нему, и царство ея да предаст царь жене лучшей ея: 20 и да будет услышан закон, иже от царя, егоже сотворит во царствии своем, и сице вся жены возложат честь на мужы своя от богата даже до убога. 21 И угодно бысть слово пред царем и началники, и сотвори царь, якоже рече ему Мухей, 22 и посла царь книги во все царство по странам по языку их, да будет страх им в жилищих их. === 2 === 1 И по словесех сих утолися царь от гнева, и не воспомяну ктому Астини, воспоминая, елика глагола и како осуди ея. 2 И реша слуги царевы: да изыщутся царю девицы нерастленны, красны зраком, и да поставит царь взыскатели во всех странах царствия своего, 3 и да изберут отроковиц девственных доброзрачных в Сусы град, в чертог женский, и да отдадутся евнухови цареву стражу жен, и да дадутся масти и прочыя потребы: 4 и жена, юже возлюбит царь, да будет царицею вместо Астини. И угодно бе царю слово, и сотвори тако. 5 И муж бе Иудеанин во граде Сусех, и имя ему Мардохей сын Иаиров, сына Семеина, сына Кисеова, от племене Вениаминя, 6 иже бяше пленен от Иерусалима Навуходоносором царем Вавилонским: 7 и бяше ему отроковица воспитана, дщерь Аминадава брата отцу его, и имя ей Есфирь. По преставлении же родителей ея, прия ю Мардохей во дщере место: и бяше девица красна и доброзрачна. 8 И егда услышано бысть повеление царево, собраны быша девицы многи во град Сусы, под руку Гаиеву, и приведена бысть Есфирь ко Гаию хранителю жен: 9 и угодна бысть ему отроковица и окрете благодать пред ним: и потщася дати ей масти и участие, и седмь девиц пристави к ней из дому царева, и снабдеваше ю и рабынь ея добре в дому женстем. 10 И не поведа Есфирь рода своего, ниже отечества, Мардохей бо заповеда ей не возвещати. 11 На всяк же день хождаше Мардохей по двору женскому, назирая, что Есфири случится. 12 Сие же бе время девиц входити ко царю, егда исполнятся дванадесять месяцей: тако бо наполняхуся дние украшения, шесть месяц во ароматех и в мастех женских, и шесть месяц намазующяся смирновым елеем, 13 и тогда вхождаху ко цареви: и емуже аще речет привести ю, входит с ним купно из дому женскаго даже до дому царева: 14 на вечер вхождаше и заутра возвращашеся в дом женский вторый, идеже Гай евнух царев хранитель жен, и не вхождаше паки ко царю, аще не будет позвана именем. 15 Егда же исполнися время Есфири дщери Аминадава, брата отца Мардохеова, (иже поял ю себе в дщере место,) внити ко цареви, ничтоже преступи от сих, яже заповеда ей евнух хранитель жен: бе бо Есфирь обретающая благодать пред всеми зрящими ю. 16 И вниде Есфирь ко царю Артаксерксу во вторыйнадесять месяц, иже есть Адар, в лето седмое царства его. 17 И возлюби царь Есфирь, и обрете благодать паче всех девиц, и возложи венец женский на главу ея. 18 И сотвори царь пир всем другом своим и силам седмь дний, и вознесе брак Есфирин, и сотвори отраду сущым во царствии его. 19 Мардохей же служаше во дворе (цареве). 20 Есфирь же не поведа рода своего, (ни людий своих): сице бо заповеда ей Мардохей боятися Бога и творити заповеди Его, якоже бе с ним, Есфирь же не измени обычая своего. 21 И опечалистася два евнуха царева началнейшии стражы тела его, яко предпочтен бысть Мардохей, и искаста убити Артаксеркса царя. 22 И возвестися слово Мардохею, и сказа Есфири: она же поведа царю, яже наветуют. 23 Царь же испыта дву евнуху, (и исповедаста,) и обеси их. И повеле царь вписати на память в царстей книгохранителнице о благодеянии Мардохеове в похвалу. === 3 === 1 И по сих прослави царь Артаксеркс Амана сына Амадафуина Вугеанина и вознесе его, и председяше вышше всех другов его: 2 и вси, иже во дворе (цареве), покланяхуся Аману: сице бо повеле царь творити. Мардохей же не кланяшеся ему. 3 И глаголаша сущии во дворе цареве Мардохею: мардохее, чесо ради не слушаеши глаголемых от царя? 4 По вся же дни глаголаху ему, и не послушаше их. И возвестиша Аману, яко Мардохей сопротивляется повелению цареву, и поведа им Мардохей, яко Иудеанин есть. 5 И уведав Аман, яко не кланяется ему Мардохеи, разгневася зело 6 и умысли погубити вся Иудеи, иже в царстве Артаксерксове: 7 и сотвори совет в лето второенадесять царства Артаксерксова, и меташе жребия день от дне и месяц от месяца, яко погубити во един день род Мардохеев: и паде жребий на четвертыйнадесять день месяца, иже есть Адар. 8 И рече (Аман) ко царю Артаксерксу, глаголя: есть язык разсеянный во языцех во всем царстве твоем: законы же их странни паче всех язык, и законов царских не слушают, и не пользует царю оставити их: 9 и аще годе есть цареви, да повелит погубити я: аз же запишу в сокровище царево десять тысящ талант сребра. 10 И снем царь перстень (с руки своея), даде в руце Аману, да запечатает писания написанная на Иудей. 11 И рече царь Аману: сребро убо имей ты себе, людем же твори, якоже хощеши. 12 И призвани быша писцы царевы в третийнадесять день месяца перваго, и написаша, якоже повеле Аман, к воеводам и началником по всем странам, от Индийския области даже и до Ефиопии, сто двадесяти седми странам, началствующым над языки по их языку, именем Артаксеркса царя. 13 И посла с писмоносцы писания в царство Артаксерксово, да побиют род Жидовский в день един месяца вторагонадесять, иже есть Адар, и да расхитят имения их. Списание же епистолии сицево бе: царь великий Артаксеркс началствующым от Индии даже до Ефиопии над сто двадесять седмию странами и местоначалником подданным. Над многими царствующь языки и обдержав всю вселенную, восхотех, не дерзостию области возносимь, но кротостию и тихостию всегда правя, безмятежно житие всегда устрояти подручных (наших), и царствие (свое) безмолвно и проходимо даже до конец соблюдая, обновити желаемый всем человеком мир. Вопросившу же ми советники моя, како бы возможно сие совершити, иже у нас целомудрием пресловутый и во благоволении неизменный и твердою верностию утвержденный и вторую честь по цари получивый Аман сказа нам, яко во всех по вселенней коленех смесися враждебный некий народ, законами сопротивный ко всякому языку и повеления царская всегда небрегущь, дабы не устроялося от нас благоуправляемое непорочно сообладание. Уразумевше убо, яко сей язык един сопротивляется всегда всякому человеку, уставление законов иностранное изменяет, и противяся нашым делом, горшая совершает злая, дабы царствие наше не получило благостояния: повелехом убо написанными к вам грамотами от Амана учиненаго над вещьми (царскими) и втораго отца нашего, всех со женами и чады погубити всекоренне вражиими мечьми без всякия милости и пощадения, в четвертыйнадесять день вторагонадесять месяца Адара, настоящаго лета, яко да бывшии древле и ныне врази во единем дни горько во ад сошедше, в прочее время тихо и безмолвно житие дадят нам до конца проходити. 14 Списания же епистолии посылахуся по странам, и повелено бысть всем языком готовым быти в нареченный день. 15 Приспе же дело и в Сусы: и царь убо и Аман пирующа наслаждастася, град же (Сусы) мятяшеся. === 4 === 1 Мардохей же разумев замышляемое, раздра ризы своя и облечеся во вретище и посыпася пепелом: и скочив в пространную улицу града, возопи воплем великим и горьким: взимается род ничтоже преступивый. 2 И прииде даже до врат царевых и ста: не леть бо бе ему внити во двор во вретище облечену и пепелом осыпану сущу. 3 И во всяцей стране, идеже показовахуся писания (царева), вопль бе и плачь и рыдание превелие Иудеом, вретище и пепел постилаху себе. 4 И внидоща рабыни и евнуси царицыны и возвестиша ей. И смятеся услышавши бывшее: и посла ризы облещи Мардохеа и сняти вретище его. И не послуша. 5 Есфирь же призва Ахрафеа скопца своего, предстоящаго ей, 6 и посла его уведати от Мардохеа истину. 7 Мардохей же сказа ему бывшее, и обещание, еже обеша Аман царю в сокровищный дом (положити) десять тысящ талант сребра, да погубит Иудей: 8 и списание (повеления) изданнаго в Сусех (граде) на погубление их даде ему, да покажет Есфири: и рече ему, заповедати ей ити молити царя и просити его о людех, поминаюши дни смирения твоего, како воспитана еси в руце моей, зане Аман вторый по цари глагола противу нам на смерть: призови Господа и глаголи царю о нас, да избавит нас от смерти. 9 Вшед же Ахрафей, поведа Есфири вся глаголы сия. 10 И рече Есфирь ко Ахрафею: иди к Мардохею и рцы: 11 понеже вси языцы царствия ведят, яко всяк муж или жена, иже аще внидет ко царвеи во внутренний дом не призван, несть ему спасения, точию к немуже аще прострет царь златый жезл, сей спасен будет: аз же несмь звана внити ко царю се уже тридесять дний. 12 И возвести Ахрафей Мардохею вся глаголы Есфирины. 13 И рече Мардохей ко Ахрафею: иди и рцы ей: Есфире, да не речеши в себе, яко ты едина спасешися во царствии паче всех Иудей: 14 зане аще преслушаеши в сие время, отинуду помощь и покров будет Иудеом, ты же и дом отца твоего погибнете: и кто весть, аще на сие время воцарилася еси? 15 И посла Есфирь пришедшаго к ней ко Мардохею, глаголющи: 16 шед собери Иудеи иже в Сусех, и поститеся о мне, и не ядите ниже пийте три дни день и нощь: аз же и служебницы моя (такожде) не имамы ясти: и тогда вниду ко царю кроме закона, аще и погибнути ми приключится. 17 И шед Мардохей сотвори, елика заповеда ему Есфирь, и помолися Господеви поминая вся дела Господня и рече: Господи, Господи Царю Вседержителю, яко во власти Твоей сие все есть, и несть противомудрствуяй Тебе, внегда восхощеши спасти Израиля: яко Ты сотворил еси небо и землю и все удивляемое в поднебесней и Господь еси всех, и несть, иже воспротивится Тебе Господеви: Ты вся веси, Ты знаеши, Господи, яко не в укоризне ни в гордости, ниже во тщелавии сотворих сие, еже не покланятися прегордому Аману, понеже благоволим бых лобзати и следы ног его спасения ради Израилева, но сие сотворих, да не воздам славы человеку паче славы Божя, и не поклонюся ни комуже, кроме Тебе Господа моего, и не сотворю сия в гордости: и ныне, Господи Боже, Царю, Боже Авраамов, пощади люди Твоя, яко назирают нам в погибель и вожделеша погубити еже из начала наследие Твое: не презри достояния Твоего, еже избавил еси Тебе от земли Египетския: услыши молитву мою, и умилосердися над жребием Твоим, и обрати рыдание наше в веселие, да живуще восхвалим имя Твое, Господи, и не погуби уст восхваляющих Тя, Господи. И весь Израиль возопи от крепости своея, яко смерть их пред очима их: и Есфирь царица притече ко Господу в подвизе смерти обдержима, и снемши ризы славы своея, облечеся в ризы тесноты и плача, и вместо многоценных мастей и благовонных пепелом и гноем посыпа главу свою, и плоть свою смири зело, и кождо место украшения веселия своего исполни растерзанными власы своими, и моляшеся Господу Богу Израилеву и рече: Господи мой, Царю наш, Ты еси един, помози ми единый и не имеющей помощи разве Тебе, яко беда моя в руце моей: аз слышах, Господи, от отца моего в племени отечества моего, яко Ты Господи, приял еси Израиля от всех язык и отцы нашя от всех праотец их в наследие вечное, и сотворил еси им, елика глаголал еси: и ныне согрешихом пред Тобою, и предал еси нас в руки враг наших, занеже славихом боги их: праведен еси, Господи: и ныне не доволни быша горестию работы нашея, но положиша руки своя на руки идол своих, исторгнути заповедь уст Твоих и погубити наследие Твое, и заградити уста хвалящих Тя и угасити славу храма Твоего и олтаря Твоего, и отверзти уста языком во угождения суетных и удивитися цареви плотскому во веки: не предаждь, Господи, скиптра Твоего сим, иже не суть, и да не посмеются в падении нашем, но обрати совет их на ня, наченшаго же на нас в притчу положи: помяни, Господи, познан буди во время скорби нашея и мене сподоби дерзновения: Царю богов и всякаго началства Содержителю, даждь слово благоугодно во уста моя пред львом, и премени сердце его в ненавидение воюющаго ны, во истребление его и с ним советующих: нас же изми рукою Твоею и помози ми единей и не имеющей ни когоже, токмо Тебе, Господи: всех разум имаши и веси, яко возненавидех славу беззаконных и гнушаюся ложа необрезанных и всякаго иноплеменника: Ты веси нужду мою, яко гнушаюся знамения гордости моея, еже есть на главе моей во днех видения моего, гнушаюся его, яко рубищ оскверненных, и не ношу его в день молчания моего: и не яде раба Твоя от трапезы Амановы, и не прославлях пира царева, ниже пиях вино требищ (идолских): и не возвеселися раба Твоя от дне пременения моего даже доныне, точию о Тебе, Господи Боже Авраамов: Боже, могий над всеми, услыши глас безнадежных, и избави нас от руки лукавнующих и изми мя от страха моего. === 5 === 1 И бысть по триех днех, егда преста молитися, совлечеся из риз прискорбных и облечеся в ризы славы своея: и бысть доброзрачна, призывающи всевидца Бога и Спасителя, и взя две рабыни с собою, и о едину убо опирашеся аки сладостьми обилующи, другая же последоваше, да облегчает ризы ея: и сия червленеющися добротою красоты своея, и лице ея осклабляющееся аки прелюбивейше, сердце же ея стеняше от страха. И прошедши вся двери, ста пред царем. Он же седяше на престоле царства своего, оболчен во все одеяние славы своея, весь во злате и камениих многоцвеных, и бяше страше зело: и возвед лице свое огневидно славою, зелною яростию воззре. И паде царица, и изменися лице ея со ослабленмем, и преклонися на главу рабыни предидущия. И премени Бог дух царев на кротость, и потщався сниде со престола своего и восприят ю во овятия своя, дондеже прииде в себе, и утеши ю глаголы мирными и рече ей: что ти есть, Есфире? Аз есмь брат твой, дерзай, не умреши: яко общее повеление наше есть, приступи. 2 И взем златый жезл (царь) возложи на выю ея и облобыза ю и рече: глаголи ми. И рече ему: видех тя, господине, яко Ангела Божия, и смятеся сердце мое от страха славы твоея, яко дивен еси, господине, и лице твое благодатей исполнено. Беседующи же она к нему, паде от ослабления. Царь же смятеся, и вси раби его утешаху ея. 3 И рече ей царь: что хощеши, Есфире? И что прошение твое? Будет ти даже и до полуцарства моего. 4 И рече Есфирь: день моего празднования днесь есть: аще убо угодно есть цареви, да приидет царь и Аман на пир, егоже сотворю днесь. 5 И рече царь: ускорите ити по Амана, да сотворим слово Есфирино. И приидоста оба на пир, егоже сотвори Есфирь. 6 На пиру же рече царь ко Есфири: что есть, Есфире царице? (и кая есть мысль прошения твоего? Дам ти и до полуцарства моего,) и будет елико просиши. 7 И рече Есфирь : прошение мое и моление: 8 аще обретох благодать пред царем, да приидет царь и Аман еще заутра на пир, егоже сотворю има, и заутра сотворю сие прошение. 9 И изыде Аман от царя зело радостен и весел: видев же Мардохеа Иудеанина во дворе (цареве не подвигнувшася и не кланяющатя пред ним), возярися зело: 10 и вшед в дом свой, призва други своя и Зосару жену свою 11 и показа им богатство свое и славу, еюже возвеличи его царь, и яко сотвори его перваго быти и правити царствие. 12 И рече Аман: не зва царица ни единаго на пир со царем, но точию мене, и наутрие зваше мя: 13 но сия не суть ми угодна, егда вижду Мардохеа Иудеанина во дворе (цареве). 14 И рече ему Зосара жена его и друзие: приготови древо лакот пятьдесят, и заутра речеши цареви, и да повешен будет Мардохей на древе: ты же вниди со царем на пир и веселися. И угоден бысть Аману глагол сей, и уготова древо. === 6 === 1 Господь же отя сон от царя в нощи оней. И повеле рабу своему принести книги памятныя дний прочитати ему: 2 и обрете писания написанная о Мардохеи, како поведа царю о двою евнуху царскую, внегда стрещи има, и умыслиста убити (царя) Артаксеркса. 3 И рече царь: кую славу или благодать сотворихом Мардохею? И рекоша отроцы царевы: ничтоже сотворил еси ему? 4 Вопрошающу же царю о благодеянии Мардохеове, се, Аман прииде во двор, и рече царь: кто есть во дворе? Аман же прииде рещи цареви, да повесит Мардохеа на древе, еже уготова. 5 И рекоша отроцы царевы: се, Аман стоит во дворе. И рече царь: призовите его. 6 И рече царь Аману: что сотворю мужу, егоже аз хощу прославити? Рече же в себе Аман: кого хощет царь прославити, разве мене? 7 Рече же царю: мужа, егоже хощет царь прославити, 8 да принесут отроцы царевы одежду виссонную, еюже царь облачается, и коня, на немже царь ездит, 9 и да дастся единому от другов царевых славных, и да облечет мужа, егоже царь любит, и да посадит его на коня и проповесть на улицах града, глаголя: тако будет всякому человеку, егоже царь прославит. 10 И рече царь Аману: добре рекл еси: тако сотвори Мардохею Иудеанину, угодно служащему во дворе (нашем), и да не изменится слово твое от сих, яже рекл еси. 11 И взя Аман одежду и коня, и облече Мардохеа, и возведе его на коня, и пройде по улицам града, и проповедаше (пред ним), глаголя: сице будет всякому человеку, егоже хощет цар прославити. 12 И возвратися Мардохеи во двор (царев): Аман же иде в дом свой скорбя преклонив главу. 13 И сказа Аман случившаяся ему Зосаре жене своей и другом своим. И реша ему друзие его и жена: аще от племене Иудейскаго Мардохей, начал еси смирятися пред ним, падая падеши, и не возможеши ему отмстити, яко Бог живый есть с ним. 14 И еще глаголющым им, приидоша евнуси, спешно зовуще Амана на пир, егоже уготова Есфирь. === 7 === 1 Вниде же царь и Аман пировати со царицею. 2 И рече царь Есфири во вторый день на пиру: что есть, Есфире царице? И что прошение твое? И что моление твое? И будет тебе до полуцарствия моего. 3 И отвещавши (Есфирь царица) рече: аще обретох благодать пред очима твоима, царю, да дастся душа моя прошению моему и людие мои молению моему: 4 продани бо есмы, аз же и людие мои, на погибель и расхищение и в работу, мы же и чада наша в рабы и рабыни, и небрегох: несть бо достоин клеветник двора царева. 5 И рече царь: кто есть сей, иже дерзну сотворити вещь сию? 6 И рече Есфирь: человек враг, Аман лукавый сей. Аман же смятеся от царя и царицы. 7 Царь же воста со гневом от пира (и иде) в вертоград: Аман же моляше царицу, видяше бо себе в бедах суща. 8 Возвратися же царь из вертограда, и Аман припаде к ложу, на немже бе Есфирь, моля царицу. И рече царь: егда и жену насилует в дому моем? Аман же слышав изменися лицем. 9 Рече же Вугафан един от скопцев, сей же ведяше о том древе, видев е в дому Аманове, егда призываше его на обед царский, и о сем испытав единаго от отрок, уразумев замышляемое, и рече ко царю: се, и древо уготова Аман Мардохею глаголавшему благая о цари, и стоит в дому Аманове возвышено на лакот пятьдесят. И рече царь: да повесится (Аман) на нем. 10 И повешен бысть Аман на древе, еже уготова Мардохею. И тогда царь утолися от ярости. === 8 === 1 И в той день царь Артаксеркс дарова Есфири, елика бяху Амана клеветника (Иудейска): и Мардохеи призван бысть от царя, поведа бо Есфирь, яко сродник есть ей. 2 И сня царь перстень свой, егоже отя у Амана, и даде Мардохееви. И постави Есфирь Мардохеа над всем имением Амановым, 3 и приложи глаголати ко царю, и припаде пред ногама его (и восплака), и моляше его отвратити злобу Аманову и мысль его, еюже помысли на Иудеи. 4 И простре царь Есфири жезл злат: воста же Есфирь и ста пред царем. 5 И рече Есфирь: аще угодно ти есть, и обретох благодать пред тобою, посли возвратити писания посланная от Амана, писаная на погубление Иудеов, иже обитают во (всем) царствии твоем: 6 како бо возмогу видети озлобление людий моих и како возмогу спастися в погибели отечества моего? 7 И рече царь Есфири: аще вся имения Аманова дах и даровах тебе, и того повесих на древе, яко руце вознесе на Иудеи, что еще просиши? 8 Напишите и вы именем моим, якоже угодно есть вам, и запечатайте перстнем моим: елика бо писана бывают царевым повелением и запечатаются перстнем моим, не возможно им противорещи. 9 И призвани быша писцы (царевы) в первый месяц, иже есть Нисан, в двадесять третий день тогожде месяца, и написаша о Иудеех, елика заповеда Мардохей, ко управителем и ко началником воевод от Индийския страны даже до Ефиопии, сто двадесять седми воеводам, во всякую страну по своему их языку. 10 Написана же быша велением царевым и запечатлешася перстнем его: и послаша писания чрез писмоносцы, 11 яко повеле им жити по законом их во всяцем граде, и да помогают им, и да сотворят соперником их и противником их, якоже хотят, 12 в день един по всему царству Артаксерксову, в третийнадесять день вторагонадесять месяца, иже есть Адар. 13 Списание же епистолии сице бе: царь великий Артаксеркс сущым от Индии даже до Ефиопии сто двадесяти и седмим началством странами обладающым и властелем нам доброжелателствующым, радоватися. Мнози множайшею благодетелствующих благостию частее чествуеми паче меры возгордешася, и не точию подчиненных нам ищут озлобити, но доволства не могуще снести, и своим благодетелем начинают коварствовати: и благодарение не токмо от человек отемлюще, но еще (по обычаю) не приявших благодеяний киченьми вознесшеся, вся присно назирающаго Бога ненавидящаго зла мнят избежати суда. Многажды же и многих от поставленных на властех, имже уверися другов устрояти дела, ласкателство кровей неповинных виновными поставляя, подверже неуврачеванным злым, злонравия ложным прельщением тех, иже прельщают незлобивое благосердие владеющих. Видети же леть есть нам взыскующым не толико от древних, якоже предахом, историй, елико от тех, яже суть при ногах непреподобно соделанная губителством недостойно владеющих. Сего ради внимати надлежит по сих, во еже царство безмятежно всем человеком с миром устроити, не употребляюще пременений, приходящая же пред очеса всегда с приличным предварением разсуждающе. Егда бо Аман Амадафуев Македонянин, истинно чуждь Персския крове и много отстоящь от нашея благости, страннолюбно приятый от нас, толикое человеколюбие, еже ко всякому языку имеем, получи, яко нарицатися ему отцем нашим, и покланяемому от всех, второе царскаго престола лице содержати: неумерителен же в гордости прилежно искал, како бы нас области и живота лишити, купно же нашего блюстителя и всегдашняго благодетеля Мардохеа и непорочную царства сообщницу Есфирь со всем их племенем многоплетенными хитростей прельщеньми ищущь на погубление: сими бо образы возмне нас лишив блюстителей взяти, и власть Персскую ко Македоняном пренести. Мы же Иудеов, от трегубителнаго сего в погубление преданных, обретаем не злотворных, но праведнейшими управляемых законы, и сущих сынов Вышняго, превеличайнаго живаго Бога, управляющаго нам же и прародителем нашым царствие в добрейшем состоянии. Добре убо сотворите не употребляюще от Амана Амадафуева посланных Писаний, понеже он сия соделавый при вратех Сусских со всем домом своим повешен есть, достойный ему вскоре суд воздавшему всеми владеющему Богу. Списание же епистолии сея предложивше на всяцем месте со дерзновением, оставите Иудеов употребляти своя законы, спомоществующе им, яко да во время скорби воставшым на них отмстят в третийнадесять день вторагонадесять месяца Адара в самый той день: в сей бо (день) всемогущий Бог вместо погубления избраннаго рода сотвори им веселие. И вы убо во именитых ваших праздницех знаменитый день со всякою радостию провождайте, да и ныне, и по сих спасение нам убо и доброжелателным Персом будет, наветующым же нас в память погубления. Всяк же град или страна, яже по сим не сотворит, всячески мечем и огнем с толиким потребится гневом, яко не токмо человеком непроходна, но и зверем и птицам во всякое время мерзостнейша оставится. И списания сия да предложатся очевидно во всем царстве, еже готовым быти всем Иудеом на сей день ратовати своих противных. 14 Конницы убо изыдоша спешно повеленная от царя совершити. Предлагашеся же повеление и в Сусех. 15 И Мардохей изыде облечен в царскую одежду и венец имущь златый, диадиму виссонную, червленую. Видевше же сущии в Сусех возрадовашася, 16 яко Иудеом бысть свет и веселие: 17 во (всяцем) граде и стране, идеже аще предлагашеся повеление радость и веселие бе Иудеом, пирование и утешение. И мнози от язык обрезовахуся и закон Иудейский приимаху, страха ради Иудейскаго. === 9 === 1 Во вторыйнадесять месяц, иже есть Адар, в третийнадесять день месяца приидоша писания от царя. 2 В той же день погибоша супостаты Иудеев: ни един бо сопротивися им бояся их. 3 Началствующии бо странам и властителие и царстии книгочия почитаху Иудей: 4 страх бо Мардохеев належаше на них. 5 Приложися бо повеление царево именоватися ему по всему царствию. 6 И в Сусех граде избиша Иудее пять сот мужей: 7 Фарсана, нестанна и Делфона, и Фасгана 8 и Фардафана, и Вареа и Сарвакана, 9 и Мармасима и Руфеа, и Арсеа и Завуфефама, 10 десять сынов Амана Амадафуева Вугеанина врага Иудеом, иже от Фармафеа, и разграбиша в той день (имения их): 11 и сказаша число избиенных царю в Сусех граде. 12 И рече царь ко Есфири: избиша Иудее в Сусе граде пять сот мужей, по окрестным же странам колико, мниши, погубиша? И чесого еще просиши, и будет ти? 13 И рече Есфирь ко царю: да дастся такожде Иудеом творити заутра, яко да повесят десять сынов Амановых. 14 И повеле царь тако быти, и попусти Иудеом вне града повесити телеса сынов Амановых. 15 И собрашася Иудее, иже в Сусех, в четвертыйнадесять деень Адара, и избиша мужей триста, и ничтоже разграбиша. 16 Прочии же Иудее, иже во царствии, собрашася и себе помогаху и почиша от браней: избиша бо от них пятьнадесять тысящ в третийнадесять Адара, и ничтоже расхитиша. 17 И почиша в четвертыйнадесять день тогожде месяца и провождаху той день упокоения с радостию и веселием. 18 Иудее же в Сусех граде собрашася и в четвертыйнадесять почиша: проводиша же и пятыйнадесять с радостию и веселием. 19 Сего ради Иудее разсеяннии во всяцей стране внешней провождают четвертыйнадесять день Адара благ с веселием, посылающе части кийждо ближнему: живущий же в митрополиях и в пятыйнадесять день Адара веселия благий провождают, посылающе части ближним. 20 Написа же Мардохей словеса сия в книгу и посла Иудеом, елицы беша в царствии Артаксерксове, близ и далече сущым, 21 уставити дни сия благи, еже провождати четвертыйнадесять и пятыйнадесять день Адара: 22 в сих бо днех почиша Иудее от враг своих: и месяц Адар, иже обратися им от плача в радость и от болезни во благий день, провождати весь во благих днех радости и веселия, посылающе части ко другом и нищым. 23 И прияша Иудее, якоже написа им Мардохей: 24 како Аман Амадафуев Македонянин ратоваше Иудеев, и како изнесе суд и жребий, еже погубити их, 25 и яко вниде ко царю, глаголя, да повесит Мардохеа: елика нача наводити на Иудеи злая, на него быша, и повешен бысть сам и чада его. 26 Сего ради нарекошася дние сии Фурим ради жребий, зане диалектом их жребии нарицаются фурим, ради словес епистолии сея, и елика пострадаша сих ради, и елика им приключишася. 27 Устави убо, и тако прияша Иудее на себе и на семя свое и на ириложившихся к ним, ниже иначе да употребляют: дние же сии памяти совершаеми по роду и роду, и граду и отечеству и стране. 28 Дние же сии Фурим да провождают во всякое лето, и память да не оскудеет от родов. 29 И написа Есфирь царица дщи Аминадавля и Мардохей Иудеанин, елика сотвориша во утверждение епистолии о днех Фурим. 30 И Мардохей и Есфирь царица устависта себе сами, и тогда устависта в посте своем совет свой. 31 И Есфирь слово постави во веки, и написано бысть в память. === 10 === 1 Написа же царь по всему царствию своему, еже на земли и на мори, 2 и силу свою, и мужественная исправления, богатство же и славу царствия своего: се, писана суть в книзе царей Персских и Мидских, на память. 3 Мардохей бо вторый бе по цари Артаксерксе, и велик бе во царствии и прославлен от Иудей и любимь, поведаше содеянная всему языку своему. И рече Мардохей: от Бога быша сия: помянух бо о сонии, еже видех о словесех сих, ниже бо премину от сих слово: малый источник, иже бысть река, и бе свет, и солнце, и вода многа. Есфирь есть река, юже поя царь и сотвори царицу: два же змиа, аз есмь и Аман: языцы же (суть), иже собрашася истребити имя Иудеов: язык же мой сей есть Израиль, вопивший ко Богу, и спасошася: и спасе Господь люди Своя и избави нас Господь от всех зол сих: и сотвори Бог знамения и чудеса велия, яже не быша во языцех. Сего ради сотвори два жребия, един людем Божиим и един всем языком: и изыдоста два жребия сия в час и время и в день суда пред Богом во всех языцех: и помяну Господь Бог люди Своя и оправда достояние Свое: и будут им дние сии (праздничнии) в месяц Адар, в четвертыйнадесять и пятыйнадесять день месяца тогожде, с собором и радостию и с веселием пред Богом, в род во веки в людех Своих Израили. В лето четвертое царствия Птоломеева и Клеопатры, внесе Досифей, иже глаголашеся быти священник и левит, и Птоломей сын его, предлежащую епистолию о (днех) Фурим, юже сказоваху, яко истолкова Лисимах сын Птоломеев, живый во Иерусалиме. == Книга Иова == === 1 === 1 Человек некий бяше во стране Авситидийстей, емуже имя Иов, и бе человек он истинен, непорочен, праведен богочестив, удаляяся от всякия лукавыя вещи. 2 Быша же ему сынове седмь и дщери три. 3 И бяху скоти его, овец седмь тысящ, велблюдов три тысящы, супруг волов пять сот, и ослиц пасомых пять сот, и слуг много зело, и дела велия бяху ему на земли: и бе человек оный благороднейший сущих от Восток солнца. 4 Сходящеся же сынове его друг ко другу, творяху пир на кийждо день, споемлюще вкупе и три сестры своя, ясти и пити с ними. 5 И егда скончавашеся дние пира, посылаше Иов и очищаше их, востая заутра, и приношаше о них жертвы по числу их, и телца единаго о гресе о душах их. Глаголаше бо Иов: негли когда сынове мои согрешиша и в мысли своей злая помыслиша противу Бога? Тако убо творяше Иов вся дни. 6 И бысть яко день сей, и се, приидоша Ангели Божии предстати пред Господем, и диавол прииде с ними. 7 И рече Господь диаволу: откуду пришел еси? И отвещав диавол Господеви, рече: обшед землю и прошед поднебесную, се, есмь. 8 И рече ему Господь: внял ли еси мыслию твоею на раба Моего Иова? Зане несть яко он на земли: человек непорочен, истинен, богочестив, удаляяся от всякия лукавыя вещи. 9 Отвеща же диавол и рече пред Господем: 10 еда туне Иов чтит Господа? Не Ты ли оградил еси внешняя его и внутренняя дому его, и яже вне всех сущих его окрест? Дела же руку его благословил еси и скоты его многи сотворил еси на земли: 11 но посли руку Твою и коснися всех, яже имать, аще не в лице Тя благословит, 12 тогда рече Господь диаволу: се, вся, елика суть ему, даю в руку твою, но самого да не коснешися. И изыде диавол от Господа. 13 И бысть яко день сей, сынове иовлевы и дщери его пияху вино в дому брата своего старейшаго. 14 И се, вестник прииде ко Иову и рече ему: супрузи волов оряху, и ослицы пасяхуся близ их: 15 и пришедше пленителие плениша их и отроки избиша мечем, и спасохся аз един и приидох возвестити тебе. 16 Еще сему глаголющу, прииде ин вестник и рече ко Иову: огнь спаде с небесе и пожже овцы и пастыри пояде подобне, спасохся же аз един и приидох возвестити тебе. 17 Еще сему глаголющу, прииде ин вестник и рече ко Иову: конницы сотвориша началства три и окружиша велблюды и плениша их и отроки избиша мечьми, спасохся же аз един и приидох возвестити тебе. 18 Еще сему глаголющу, ин вестник прииде, глаголя Иову: сыном твоим и дщерем твоим ядущым и пиющым у брата своего старейшаго, 19 внезапу ветр велик найде от пустыни и коснуся четырем углом храмины, и паде храмина на дети твоя, и скончашася: спасохся же аз един и приидох возвестити тебе. 20 Тако (услышав) Иов, востав растерза ризы своя и остриже власы главы своея, (и посыпа перстию главу свою,) и пад на землю, поклонися (Господеви) 21 и рече: сам наг изыдох от чрева матере моея, наг и отиду тамо: Господь даде, Господь отят: яко Господеви изволися, тако бысть: буди имя Господне благословено (во веки). 22 Во всех сих приключившихся ему ничтоже согреши Иов пред Господем, (ниже устнама своима,) и не даде безумия Богу. === 2 === 1 Бысть же яко день сей, и приидоша Ангели Божии предстати пред Господем, и диавол прииде посреде их предстати пред Господем. 2 И рече Господь диаволу: откуду ты грядеши? Тогда рече диавол пред Господем: прошед поднебесную и обшед всю землю, приидох. 3 И рече Господь ко диаволу: внял ли еси убо (мыслию твоею) рабу Моему Иову? Яко несть такова от сущих на земли: человек незлобив, истинен, непорочен, богочестив, удаляяся от всякаго зла, еще же придержится незлобия: ты же рекл еси имения его погубити вотще. 4 Отвещав же диавол Господеви, рече: кожу за кожу, и вся, елика имать человек, даст за душу свою: 5 обаче посли руку Твою и коснися костем его и плоти его, аще не в лице Тя благословит. 6 Рече же Господь диаволу: се, предаю ти его, токмо душу его соблюди. 7 Изыде же диавол от лица Господня и порази Иова гноем лютым от ногу даже до главы. 8 И взя (Иов) чреп, да острогает гной свой, и той седяше на гноищи вне града. 9 Времени же многу минувшу, рече к нему жена его: доколе терпиши глаголя: се, пожду время еще мало, чая надежди спасения моего? Се бо, потребися от земли память твоя, сынове твои и дщери, моего чрева болезни и труды, имиже вотще трудихся с болезньми: ты же сам в гнои червей седиши, обнощевая вне без покрова, и аз скитающися и служащи, место от места преходящи, и дом от дому, ожидающи солнца, когда зайдет, да почию от трудов моих и от болезней, яже мя ныне обдержат: но рцы глагол некий ко Господу и умри. 10 Он же воззрев рече к ней: вскую яко едина от безумных жен возглаголала еси? Аще благая прияхом от руки Господни, злых ли не стерпим? Во всех сих приключившихся ему, ничимже согреши Иов устнама пред Богом (и не даде безумия Богу). 11 Услышавше же трие друзие его вся злая нашедшая нань, приидоша кийждо от своея страны к нему: Елифаз Феманский царь, Валдад Савхейский властитель, Софар Минейский царь: и приидоша к нему единодушно утешити и посетити его. 12 Увидевше же его издалеча, не познаша, и возопивше гласом велиим восплакашася, растерзавше кийждо одежду свою и посыпавше перстию главы своя: 13 седеша при нем седмь дний и седмь нощей, и никтоже от них возглагола к нему словесе: видяху бо язву люту сущу и велику зело. === 3 === 1 Посем отверзе Иов уста своя и прокля день свой, 2 глаголя: 3 да погибнет день, в оньже родихся, и нощь оная, в нюже реша: се, мужеск пол: 4 та нощь буди тма, и да не взыщет ея Господь свыше, ниже да приидет на ню свет, 5 и да приимет ю тма и сень смертная, да приидет на ню сумрак: проклят буди день той 6 и нощь оная: да постигнет ю тма, да не будет во днех лета, ниже да вчислится во днех месяцей: 7 но нощь оная да будет болезнь, и да не приидет на ню веселие и радость, 8 но да прокленет ю проклинаяй той день, иже имать одолети великаго кита: 9 да померкнут звезды тоя нощи, да ожидает и на свет да не приидет, и да не видит денницы возсиявающия, 10 яко не затвори врат чрева матере моея: отяла бо бы болезнь от очию моею: 11 почто бо во утробе не умрох? Из чрева же изшед, и абие не погибох? 12 Почто же мя прияша на колена? Почто же ссах сосца? 13 Ныне убо уснув умолчал бых, уснув же почил бых 14 со царьми и советники земли, иже хваляхуся оружии, 15 или со князи, имже много злата, иже наполниша домы своя сребра, 16 или якоже изверг излазяй из ложесн матерних, или якоже младенцы, иже не видеша света: 17 тамо нечестивии утолиша ярость гнева, тамо почиша претружденнии телом, 18 вкупе же в веце сем бывшии не слышат гласа собирающаго дань: 19 мал и велик тамо есть, и раб не бояйся господина своего: 20 почто бо дан есть сущым в горести свет и сущым в болезнех душам живот, 21 иже желают смерти и не получают, ищуще якоже сокровища, 22 обрадовани же бывают, аще улучат (смерть)? 23 Смерть бо мужу покой, егоже путь сокровен есть, затвори бо Бог окрест его: 24 прежде бо брашен моих воздыхание ми приходит, слезю же аз одержимь страхом, 25 страх бо, егоже ужасахся, прииде ми, и егоже бояхся, срете мя: 26 ни умирихся, ниже умолчах, ниже почих, и найде ми гнев. === 4 === 1 Отвеща же Елифаз Феманитин, глаголя: 2 еда множицею глаголано ти бысть в труде? Тяжести же глагол твоих кто стерпит? 3 Аще бо ты научил еси многи и руце немощных утешил еси, 4 немощныя же воздвигл еси словесы, коленом же немощным силу обложил еси. 5 Ныне же прииде на тя болезнь и коснуся тебе, ты же возмутился еси. 6 Еда страх твой есть не в безумии, и надежда твоя и злоба пути твоего? 7 Помяни убо, кто чист сый погибе? Или когда истиннии вси из корене погибоша? 8 Якоже видех орющих неподобная, сеющии же я болезни пожнут себе, 9 от повеления Господня погибнут, от духа же гнева Его изчезнут. 10 Сила львова, глас же львицы, веселие же змиев угасе: 11 мраволев погибе, занеже не имеяше брашна, скимни же львовы оставиша друг другу. 12 Аще же глагол кий истинен бе во словесех твоих, ни коеже бы от сих тя сретило зло. Не приимет ли ухо мое предивных от него? 13 Страхом же и гласом нощным, нападающь страх на человеки, 14 ужас же мя срете и трепет, и зело кости моя стрясе: 15 и дух на лице ми найде: устрашишася же ми власи и плоти, 16 востах и не разумех, видех, и не бе обличия пред очима моима, но токмо дух тих и глас слышах: 17 что бо? Еда чист будет человек пред Богом? Или в делех своих без порока муж? 18 Аще рабом Своим не верует, и во Ангелех Своих стропотно что усмотре, 19 живущих же в бренных храминах, от нихже и мы сами от тогожде брения есмы, порази, якоже молие, 20 и от утра даже до вечера ктому не суть: занеже не могоша себе помощи, погибоша: 21 дхну бо на ня, и изсхоша, и понеже не имеяху премудрости, погибоша. === 5 === 1 Призови же, аще кто тя услышит, или аще кого от святых Ангел узриши. 2 Безумнаго бо убивает гнев, заблуждшаго же умерщвляет рвение. 3 Аз же видех безумных укореняющихся, но абие поядено бысть их жилище. 4 Далече да будут сынове их от спасения, и да сотрутся при дверех хуждших, и не будет изимаяй. 5 Иже бо они собраша, праведницы поядят, сами же от зол не изяти будут: изможденна буди крепость их. 6 Не имать бо от земли изыти труд, ни от гор прозябнути болезнь: 7 но человек раждается на труд, птенцы же суповы высоко парят. 8 Обаче же аз помолюся Богови, Господа же всех Владыку призову, 9 Творящаго велия и неизследимая, славная же и изрядная, имже несть числа: 10 дающаго дождь на землю, посылающаго воду на поднебесную: 11 возносящаго смиренныя на высоту и погибшыя воздвизающаго во спасение: 12 расточающаго советы лукавых, да не сотворят руце их истины. 13 Уловляяй премудрых в мудрости их, совет же коварных разори. 14 Во дни обымет их тма, в полудне же да осяжут якоже в нощи, 15 и да погибнут на брани: немощный же да изыдет из руки сильнаго. 16 Буди же немощному надежда, неправеднаго же уста да заградятся. 17 Блажен же человек, егоже обличи Бог, наказания же Вседержителева не отвращайся: 18 Той бо болети творит и паки возставляет: порази, и руце Его изцелят: 19 шестижды от бед измет тя, в седмем же не коснеттися зло: 20 во гладе избавит тя от смерти, на брани же из руки железа изрешит тя: 21 от бича языка скрыет тя, и не убоишися от зол находящих: 22 неправедным и беззаконным посмеешися, от дивиих же зверей не убоишися, 23 зане с камением дивиим завет твой: зверие бо дивии примирятся тебе. 24 Потом уразумееши, яко в мире будет дом твой, жилище же храмины твоея не имать согрешити: 25 уразумееши же, яко много семя твое, и чада твоя будут яко весь злак селный: 26 внидеши же во гроб якоже пшеница созрелая во время пожатая, или якоже стог гумна во время свезенный. 27 Се, сия сице изследихом: сия суть, яже слышахом: ты же разумей себе, аще что сотворил еси. === 6 === 1 Отвещав же Иов, рече: 2 аще бы кто веся извесил гнев мой, болезни же моя взял бы на мерило вкупе, 3 то песка морскаго тяжчайшии были бы: но, якоже мнится, словеса моя зла суть. 4 Стрелы бо Господни в теле моем суть, ихже ярость испивает кровь мою: егда начну глаголати, бодут мя. 5 Что бо? Еда вотще возревет дивий осел, разве брашна прося? Или возревет гласом вол, в яслех имеяй брашно? 6 Снестся ли хлеб без соли? Или есть вкус во тщих словесех? 7 Не может бо утишитися душа моя: смрад бо зрю брашна моя, якоже воню львову. 8 Аще бо дал бы, да приидет прошение мое, и надежду мою дал бы Господь. 9 Начен Господь да уязвляет мя, до конца же да не убиет мя. 10 Буди же ми град гроб, на егоже стенах скаках в нем: не пощажу: не солгах бо во словесех святых Бога моего. 11 Кая бо крепость моя, яко терплю? Или кое ми время, яко терпит моя душа? 12 Еда крепость камения крепость моя? Или плоти моя суть медяны? 13 Или не уповах на него? Помощь же от мене отступи, 14 отречеся от мене милость, посещение же Господне презре мя. 15 Не воззреша на мя ближнии мои: якоже поток оскудеваяй, или якоже волны преидоша мя: 16 иже мене бояхуся, ныне нападоша на мя: 17 якоже снег или лед смерзлый, егда истает теплоте бывшей, не ктому познавается, что бе: 18 тако и аз оставлен есмь от всех, погибох же и бездомок бых: 19 видите пути Феманския, на стези Савонския смотрящии, 20 и студа исполнени будут на грады и на имения надеющиися. 21 Ныне же и вы наидосте на мя немилостивно: убо видевше мой струп убойтеся. 22 Что бо? Еда что у вас просих, или вашея крепости требую, 23 да спасете мя от врагов, или из руки сильных избавите мя? 24 Научите мя, аз же умолчу: аще что погреших, скажите ми. 25 Но, якоже мнится, зла (суть) мужа истиннаго словеса, не от вас бо крепости прошу: 26 ниже обличение ваше словесы мя утолит, ниже бо вещания вашего словес стерплю. 27 Обаче яко на сира нападаете, наскачете же на друга вашего. 28 Ныне же воззрев на лица ваша, не солжу. 29 Сядите ныне, и да не будет неправедно, и паки ко праведному снидитеся. 30 Ибо несть в языце моем неправды, и гортань мой не разуму ли поучается? === 7 === 1 Не искушение ли житие человеку на земли, и якоже наемника повседневнаго жизнь его? 2 Или якоже раб бояйся господа своего и улучив сень? Или якоже наемник ждый мзды своея? 3 Такожде и аз ждах месяцы тщы, нощи же болезней даны ми суть. 4 Аще усну, глаголю: когда день? Егда же востану, паки: когда вечер? Исполнен же бываю болезней от вечера до утра. 5 Месится же мое тело в гнои червей, обливаю же грудие земли, гной стружа. 6 Житие же мое есть скоряе беседы, погибе же во тщей надежди. 7 Помяни убо, яко дух мой живот, и ктому не возвратится око мое видети благая. 8 Не узрит мене око видящаго мя: очи Твои на мне, и ктому несмь, 9 якоже облак очищен от небесе: аще бо человек снидет во ад, ктому не взыдет, 10 ни возвратится во свой дом, ниже имать его познати ктому место его. 11 Убо ниже аз пощажу уст моих, возглаголю в нужди сый, отверзу уста моя горестию души моея сотеснен. 12 Еда море есмь, или змий, яко учинил еси на мя хранение? 13 Рекох, яко утешит мя одр мой, произнесу же ко мне на едине слово на ложи моем: 14 устрашаеши мя сониями и видениями ужасаеши мя: 15 свободиши от духа моего душу мою, от смерти же кости моя. 16 Не поживу бо во век, да долготерплю: отступи от мене, тще бо житие мое. 17 Что бо есть человек, яко возвеличил еси его? Или яко внимаеши умом к нему? 18 Или посещение твориши ему по всяко утро и в покои судити его имаши? 19 Доколе не оставиши мене, ниже отпускаеши мя, дондеже поглощу слины моя в болезни? 20 Аще аз согреших, что Тебе возмогу соделати, сведый ум человечь? Почто мя еси положил прекословна Тебе, и есмь Тебе бременем? 21 Почто неси сотворил беззаконию моему забвения, и очищения греха моего? Ныне же в землю отиду, утренюяй же несмь ктому. === 8 === 1 Отвещав же Валдад Савхейский, рече: доколе глаголати будеши сия? 2 Дух многоглаголив во устех твоих. 3 Еда Господь обидит судяй? Или вся сотворивый возмятет правду? 4 Аще сынове твои согрешиша пред Ним, посла руку на беззакония их: 5 ты же утренюй ко Господу Вседержителю моляся: 6 аще чист еси и истинен, молитву твою услышит, устроит же ти паки житие правды: 7 будут убо первая твоя мала, последняя же твоя без числа. 8 Вопроси бо рода перваго, изследи же по роду отцев: 9 вчерашни бо есмы и не вемы, сень бо есть наше житие на земли: 10 не сии ли научат тя и возвестят ти и от сердца изнесут словеса? 11 Еда произничет рогоз без воды, или растет ситник без напаяния? 12 Еще сущу на корени, и не пожнется ли? Прежде напаяния всякое былие не изсыхает ли? 13 Тако убо будут последняя всех забывающих Господа: надежда бо нечестиваго погибнет: 14 не населен бо будет дом его, паучина же сбудется селение его. 15 Аще подпрет храмину свою, не станет: емшуся же ему за ню, не пребудет. 16 Влажный бо есть под солнцем, и от тления его леторасль его изыдет: 17 на собрании камения спит, посреде же кремения поживет: 18 аще поглотит место, солжет ему, не видел еси таковая, 19 яко превращение нечестиваго таково, из земли же инаго произрастит. 20 Господь бо не отринет незлобиваго: всякаго же дара от нечестиваго не приимет. 21 Истинным же уста исполнит смеха, устне же их исповедания. 22 Врази же их облекутся в студ: жилище же нечестиваго не будет. === 9 === 1 Отвещав же Иов, рече: 2 воистинну вем, яко тако есть: како бо будет праведен человек у Господа? 3 Аще бо восхощет судитися с Ним, не послушает Его, да не преречет ко единому словеси Его от тысящи. 4 Премудр бо есть мыслию, крепок же и велик: кто жесток быв противу Его, пребысть? 5 Обетшаяй горы, и не ведят, превращаяй я гневом: 6 трясый поднебесную из оснований, столпи же ея колеблются: 7 глаголяй солнцу, и не восходит, звезды же печатствует: 8 прострый един небо и ходяй но морю, яко по земли: 9 творяй Плиады и Еспера, и Арктура и сокровища южная: 10 творяй велия и неизследованная, славная же и изрядная, имже несть числа. 11 Аще приидет ко мне, не имам видети: и аще мимоидет мене, никако уразумех. 12 Аще возмет, кто возвратит? Или кто речет Ему: что сотворил еси? 13 Сам бо отвращает гнев, слякошася под Ним кити поднебеснии. 14 Аще же мя услышит, или разсудит глаголы моя? 15 Аще бо и праведен буду, не услышит мене, суду Его помолюся: 16 аще же воззову, и услышит мя, не иму веры, яко услыша глас мой. 17 Да не мглою мя потребит, многа же ми сотрения сотвори всуе, 18 не оставляет бо мя отдохнути, исполни же мя горести. 19 Понеже силен есть крепостию: кто убо суду Его воспротивится? 20 Аще бо буду праведен, уста моя нечестия сотворят: аще же буду непорочен, стропотен буду. 21 Аще бо нечестие сотворих, не вем душею моею: обаче отемлется ми живот. 22 Темже рех: велика и сильна губит гнев. 23 Яко лукавии смертию лютою погибнут, обаче праведным посмеваются. 24 Предана есть земля в руце нечестиваго, лица судий ея покрывает: аще же не Сам есть, кто есть? 25 Житие же мое есть легчае скоротечца: отбегоша и не видеша. 26 Или есть кораблем след пути, или орла летяща, ищуща яди? 27 Аще бо реку: забуду глаголя, приникнув лицем воздохну, 28 трясуся всеми удесы: вем бо, яко не безвинна мя оставиши. 29 Аще же нечестив есмь, почто не умрох? 30 Аще бо измыюся снегом и очищуся руками чистыми, 31 доволно во скверне омочил мя еси, возгнушася же мною одежда моя. 32 Неси бо человек, якоже аз, Емуже противопрюся, да приидем вкупе на суд. 33 О, дабы ходатай нам был, и обличаяй и разслушаяй между обема. 34 Да отимет от мене жезл, страх же Его да не смущает мене: 35 и не убоюся, но возглаголю, ибо тако не вем сам себе. === 10 === 1 Труждаюся душею моею, стеня испущу на мя глаголы моя, возглаголю горестию души моея одержимь 2 и реку ко Господеви: не учи мя нечествовати, и почто ми сице судил еси? 3 Или добро Ти есть, аще вознеправдую, яко презрел еси дела руку Твоею, совету же нечестивых внял еси? 4 Или якоже человек видит, видиши? Или якоже зрит человек, узриши? 5 Или житие Твое человеческо есть? Или лета Твоя яко дние мужа? 6 Яко истязал еси беззаконие мое и грехи моя изследил еси. 7 Веси бо, яко не нечествовах: но кто есть изимаяй из руку Твоею? 8 Руце Твои сотвористе мя и создасте мя: потом же преложив, поразил мя еси. 9 Помяни, яко брение мя создал еси, в землю же паки возвращаеши мя. 10 Или не якоже млеко измелзил мя еси, усырил же мя еси равно сыру? 11 Кожею же и плотию мя облекл еси, костьми же и жилами сшил мя еси: 12 живот же и милость положил еси у мене, посещение же Твое сохрани мой дух. 13 Сия имеяй в Тебе, вем, яко вся можеши, и невозможно Тебе ничтоже. 14 Аще бо согрешу, храниши мя, от беззакония же не безвинна мя сотворил еси. 15 Аще бо нечестив буду, люте мне, аще же буду праведен, не могу возникнути: исполнен бо есмь безчестия, 16 ловимь бо есмь аки лев на убиение: паки же преложив, люте убиваеши мя. 17 Обновляяй на мя испытание мое, гнева бо великаго на мя употребил еси и навел еси на мя искушения. 18 Почто убо мя из чрева извел еси, и не умрох, око же мене не видело бы, 19 и бых бы аки не был? Почто убо из чрева во гроб не снидох? 20 Или не мало есть время жизни моея? Остави мене почити мало, 21 прежде даже отиду, отнюдуже не возвращуся, в землю темну и мрачну, 22 в землю тмы вечныя, идеже несть света, ниже видети живота человеческаго. === 11 === 1 Отвещав же Софар Минейский, рече: 2 глаголяй много, и противоуслышит: или многоречив мнится быти праведен? Благословен рожденный от жены малолетен. 3 Не мног во словесех буди: несть бо противовещаяй ти. 4 Не глаголи бо, яко чист есмь делы и безпорочен пред Ним: 5 но како Господь возглаголет к тебе и отверзет устне Свои с тобою? 6 Потом возвестит ти силу премудрости, яко сугуб будет в сих, яже противу тебе: и тогда уразумееши, яко достойная тебе сбышася от Господа, имиже согрешил еси, 7 или след Господень обрящеши? Или в последняя достигл еси, яже сотвори Вседержитель? 8 Высоко небо, и что сотвориши? Глубочае же сущих во аде что веси? 9 Не должае ли меры земныя, или широты морския? 10 Аще же превратит вся, кто речет Ему: что сотворил еси? 11 Той бо весть дела беззаконных: видев же нелепая, не презрит. 12 Человек же инако обилует словесы: земный же рожденный от жены равен ослу пустынному. 13 Аще бо ты чисто положил еси сердце твое, воздеваеши же руце твои к Нему, 14 аще беззаконно что есть в руку твоею, далече сотвори е от тебе, неправда же в жилищи твоем да не вселится: 15 тако бо ти возсияет лице, якоже вода чиста: совлечешися же скверны, и не убоишися, 16 и труда забудеши, якоже волны мимошедшия, и не устрашишися. 17 Молитва же твоя, аки денница, и паче полудне возсияет ти жизнь: 18 уповая же будеши, яко будет ти надежда: от туги же и попечения явится ти мир: 19 упокоишися бо, и не будет боряй тя: пременяющиися же мнози имут просити тя, 20 спасение же оставит их: надежда бо их пагуба, очи же нечестивых истают. === 12 === 1 Отвещав же Иов, рече: 2 убо вы ли едини есте человецы, или с вами скончается премудрость? 3 И у мене сердце есть якоже и у вас. 4 Праведен бо муж и непорочен бысть в поругание: 5 во время бо определеное уготован бысть пасти от иных, домы же его опустошены быти беззаконными. Обаче никтоже да уповает, лукав сый, неповинен быти, 6 елицы разгневляют Господа, аки и истязания им не будет. 7 Но вопроси четвероногих, аще ти рекут, и птиц небесных, аще ти возвестят: 8 повеждь земли, аще ти скажет, и исповедят ти рыбы морския. 9 Кто убо не разуме во всех сих, яко рука Господня сотвори сия? 10 Не в руце ли Его душа всех живущих и дух всякаго человека? 11 Ухо бо словеса разсуждает, гортань же брашна вкушает. 12 Во мнозем времени премудрость, во мнозе же житии ведение. 13 У Него премудрость и сила, у Того совет и разум. 14 Аще низложит, кто созиждет? Аще затворит от человеков, кто отверзет? 15 Аще возбранит воду, изсушит землю: аще же пустит, погубит ю превратив. 16 У Него держава и крепость, у Того ведение и разум. 17 Проводяй советники пленены, судии же земли ужаси: 18 посаждаяй цари на престолех и обвязуяй поясом чресла их: 19 отпущаяй жерцы пленники, сильных же земли низврати: 20 изменяяй устне верных, разум же старцев уразуме: 21 изливаяй безчестие на князи, смиренныя же изцели: 22 открываяй глубокая от тмы, изведе же на свет сень смертную: 23 прельщаяй языки и погубляяй их, низлагаяй языки и наставляяй их: 24 изменяяй сердца князей земных, прельсти же их на пути, егоже не ведяху, 25 да осяжут тму, а не свет, да заблудят же яко пияный. === 13 === 1 Се, сия виде око мое, и слыша ухо мое, 2 и вем, елика и вы весте: и не неразумнее есмь вас. 3 Но обаче и аз ко Господу возглаголю, обличу же пред Ним, аще восхощет. 4 Вы бо есте врачеве неправеднии и целителе злых вси, 5 буди же вам онемети, и сбудется вам в премудрость. 6 Слышите же обличение уст моих, суду же устен моих вонмите. 7 Не пред Богом ли глаголете и пред Ним вещаете лесть? 8 Или уклонитеся, вы же сами судии будите. 9 Добро бо, аще изследит вас: аще бо вси творящии приложитеся к нему, обаче обличит вы. 10 Аще же и тай лицам удивитеся, 11 не движение ли Его смятет вас, боязнь же от Него нападет на вы? 12 Отидет же величание ваше равно пепелу, тело же бренно. 13 Умолчите, да возглаголю и почию от гнева. 14 Вземля плоти моя зубами, душу же мою положу в руце моей. 15 Аще мя убиет Сильный, понеже и нача, обаче возглаголю и обличу пред Ним: 16 и сие ми сбудется во спасение: не внидет бо пред Ним лесть. 17 Послушайте, послушайте глагол моих: возвещу бо вам слышащым. 18 Се, аз близ есмь суда моего, вем аз, яко праведен явлюся. 19 Кто бо есть судяйся со мною, да ныне умолчу и изчезну? 20 Двое же ми сотвориши, тогда от лица Твоего не скрыюся: 21 руку от мене отими, страх же Твой да не ужасает мя: 22 посем призовеши, аз же Тя послушаю, или возглаголеши, аз же Ти дам ответ. 23 Колицы суть греси мои и беззакония моя? Научи мя, кая суть? 24 Почто крыешися от мене? Мниши же мя противна суща Тебе? 25 Или яко лист движимь ветром убоишися? Или яко сену носиму ветром противляешимися? 26 Яко написал еси на мя злая, обложил же ми еси юностныя грехи: 27 положил же еси ногу мою в возбранение: сохранил же еси дела моя вся: в корения же ног моих пришел еси: 28 иже обетшают якоже мех, или якоже риза молием изядена. === 14 === 1 Человек бо рожден от жены малолетен и исполнь гнева: 2 или якоже цвет процветый отпаде, отбеже же яко сень, и не постоит. 3 Не и о сем ли слово сотворил еси, и сему сотворил еси внити на суд пред Тя? 4 Кто бо чист будет от скверны? Никтоже, 5 аще и един день житие его на земли: изочтени же месяцы его от Тебе, на время положил еси, и не преступит. 6 Отступи от него, да умолкнет и изберет житие якоже наемник. 7 Есть бо древу надежда: аще бо посечено будет, паки процветет, и леторасль его не оскудеет: 8 аще бо состареется в земли корень его, на камени же скончается стебло его, 9 от вони воды процветет, сотворит же жатву, якоже новосажденное. 10 Муж же умерый отиде, пад же человек, ктому несть. 11 Временем бо оскудевает море, река же опустевши изсше: 12 человек же уснув не востанет, дондеже не будет небо сошвено, и не возбудятся от сна своего. 13 Убо, о, дабы во аде мя сохранил еси, скрыл же мя бы еси, дондеже престанет гнев Твой, и вчиниши ми время, в неже память сотвориши ми. 14 Аще бо умрет человек, жив будет: скончав дни жития своего, потерплю, дондеже паки буду. 15 Посем воззовеши, аз же послушаю Тя: дел же руку Твоею не отвращайся: 16 изчислил же еси начинания моя, и ничтоже Тя мимоидет от грех моих: 17 запечатлел же ми еси беззакония в мешце, назнаменал же еси, аще что неволею преступих. 18 Обаче и гора падающи распадется, и камень обетшает от места своего: 19 камение огладиша воды, и потопиша воды взнак холмы земныя, и ожидание человеческо погубил еси. 20 Отринул еси его до конца, и отиде: изменил еси ему лице и испустил еси. 21 Многим же бывшым сыном его, не весть: аще же и мало их будет, не знает: 22 но плоти его болеша, душа же его о себе сетова. === 15 === 1 Отвещав же Елифаз Феманитин, рече: 2 еда премудрый даст ответ разумен на ветр, и наполни болезнию чрево, 3 обличая глаголы, имиже не подобает, и словесы, ихже ни кая польза? 4 Не и ты ли отринул еси страх? Скончал же еси глаголы таковы пред Господем? 5 Повинен еси глаголом уст твоих, ниже разсудил еси глаголы сильных. 6 Да обличат тя уста твоя, а не аз, и устне твои на тя возсвидетелствуют. 7 Что бо? Еда первый от человек рожден еси? Или прежде холмов сгустился еси? 8 Или строение Господне слышал еси? Или в советника тя употреби Бог? И на тя (единаго) ли прииде премудрость? 9 Что бо веси, егоже не вемы? Или что разумееши ты, егоже и мы (не разумеем)? 10 И стар и древен есть в нас, старший отца твоего деньми. 11 Мало, о нихже согрешил еси, уязвлен еси, вельми выше меры возглаголал еси. 12 Что дерзостно бысть сердце твое? Или что вознесостеся очи твои? 13 Яко ярость изрыгнул еси пред Господем, изнесл же еси изо уст такова словеса? 14 Кто бо сый человек яко будет непорочен? Или аки будущий праведник рожден от жены? 15 Аще во святых не верит, небо же нечисто пред Ним, 16 кольми паче мерзкий и нечистый муж, пияй неправды, якоже питие. 17 Возвещу же ти, послушай мене: яже ныне видех, возвещу ти, 18 яже премудрии рекут, и не утаиша отцы их, 19 имже единым дана бысть земля, и не найде иноплеменник на ня. 20 Все житие нечестиваго в попечении, лета же изочтена дана сильному, 21 страх же его во ушесех его: егда мнит уже в мире быти, тогда приидет нань низвращение: 22 да не верует отвратитися от тмы, осужден бо уже в руки железа, 23 учинен же есть в брашно неясытем: весть же в себе, яко ждет падения, день же темен превратит его, 24 беда же и скорбь оымет его, якоже военачалник напреди стояй падает, 25 яко вознесе руце на Господа, пред Господем же Вседержителем ожесточи выю, 26 тече же противу Ему укоризною в толщи хребта щита своего: 27 яко покры лице свое туком своим и сотвори омет на стегнах: (хвала же его укоризна). 28 Да вселится же во градех пустых, внидет же в домы ненаселенныя: а яже они уготоваша, инии отнесут. 29 Ниже обогатится, ниже останет имение его, не имать положити на землю сени, 30 ниже избежит тмы: прозябение его да усушит ветр, и да отпадет цвет его: 31 да не верит, яко стерпит, тщетная бо сбудутся ему. 32 Посечение его прежде часа растлеет, и леторасль его не облиственеет: 33 да оыман будет якоже недозрелая ягода прежде часа, да отпадет же яко цвет масличия. 34 Послушество бо нечестиваго смерть, огнь же пожжет домы мздоимцев: 35 во чреве же приимет болезни, сбудется же ему тщета, чрево же его понесет лесть. === 16 === 1 Отвещав же Иов, рече: 2 слышах сицевая многа, утешителие зол вси. 3 Что бо? Еда чин есть во словесех ветра? Или кую ти пакость сотворит, яко отвещаеши? 4 И аз якоже вы возглаголю: аще бы душа ваша подлежала вместо моея, тогда наскочил бых на вы словесы, покиваю же на вы главою моею. 5 Буди же крепость во устех моих, движения же устен не пощажу. 6 Аще бо возглаголю, не возболю ли язвою? Аще же и умолчу, чим менше уязвен буду? 7 Ныне же преутруждена мя сотвори, буя, согнивша, и ят мя. 8 В послушество бых, и воста во мне лжа моя, противно лицу моему отвеща. 9 Гневен быв низложи мя, возскрежета зубы на мя, стрелы разбойников Его нападоша на мя. 10 Остротою очес наскака, мечем порази мя в колена: вкупе же потекоша на мя: 11 предаде бо мя Господь в руки неправедных, нечестивым же поверже мя. 12 Мирствующа разсыпа мя, взяв мя за власы оборва, постави мя аки примету. 13 Обыдоша мя копиями бодуще во истесы моя, не щадяще: излияша на землю желчь мою, 14 низложиша мя труп на труп, текоша ко мне могущии, 15 вретище сошиша на кожу мою, и мощь моя на земли угасе. 16 Чрево мое сгоре от плача, на веждах же моих стень смертная, 17 неправедно же ни едино бе в руку моею: молитва же моя чиста. 18 Земле, да не покрыеши над кровию плоти моея, ниже да будет место воплю моему. 19 И ныне се, на небесех Послух мой, Свидетель же ми во вышних. 20 Да приидет моя мольба ко Господу, пред Нимже да каплет око мое. 21 Буди же обличение мужу пред Господем, и сыну человеческому ко ближнему его. 22 Лета же изочтеная приидоша, и путем, имже не возвращуся, пойду. === 17 === 1 Тлею духом носимь, прошу же гроба и не улучаю. 2 Молю болезнуя, и что сотворю? Украдоша же ми имение чуждии. 3 Кто есть сей? Рукою моею связан да будет. 4 Яко сердце их сокрыл еси от мудрости, сего ради да не вознесеши их. 5 Части возвестит злобы: очи же на сынех истаяста. 6 Положил же мя еси в притчу во языцех, смех же бых им. 7 Ослепоста бо от гнева очи мои, повоеван бых вельми от всех: 8 чудо объя истинных о сем, праведник же на беззаконника да востанет: 9 да содержит же верный путь свой, чистый же рукама да приимет дерзость. 10 Но обаче вси належите и приидите, не бо обретаю в вас истины. 11 Дние мои преидоша в течении, расторгошася же удове сердца моего. 12 Нощь в день преложих: свет близ от лица тмы. 13 Аще бо стерплю, ад ми есть дом, в сумраце же постлася ми постеля. 14 Смерть назвах отца моего быти, матерь же и сестру ми гной. 15 Где убо еще есть ми надежда, или благая моя узрю? 16 Или со мною во ад снидут, или вкупе в персть снидем. === 18 === 1 Отвещав же Валдад Савхейский, рече: 2 доколе не престанеши? Пожди, да и мы возглаголем. 3 И почто аки четвероножная умолчахом пред тобою? 4 Пребысть ти гнев. Что бо? Аще ты умреши, не населенна ли будет поднебесная? Или превратятся горы из оснований? 5 И свет нечестивых угаснет, и не произыдет их пламень: 6 свет его тма в жилищи, светилник же в нем угаснет: 7 да уловят меншии имения его, погрешит же его совет: 8 ввержена же бысть нога его в пругло, мрежею да повиется: 9 да приидут же нань пругла, укрепит нань жаждущих: 10 скрыся в земли уже его, и ятие его на стези. 11 Окрест да погубят его болезни: мнози же окрест ног его обыдут во гладе теснем: 12 падение же ему уготовано велико. 13 Поядены же да будут плесны ног его, красная же его да пояст смерть. 14 Отторжено же буди от жития его изцеление, да имет же его беда виною царскою. 15 Да вселится в храмине его в нощи его, посыпана да будут лепотная его жупелом: 16 под ним корения его да изсохнут, свыше же нападет пожатие его. 17 Память его да погибнет от земли, и (не) будет имя его на лицы внешнем: 18 да отринет его от света во тму: 19 не будет знаемь в людех его, ниже спасен в поднебесней дом его: 20 но в своих ему поживут инии, над ним воздохнуша последнии, первых же объя чудо. 21 Сии суть домове неправедных, сие же место неведущих Бога. === 19 === 1 Отвещав же Иов, рече: 2 доколе притрудну творите душу мою и низлагаете мя словесы? Уразумейте токмо, яко Господь сотвори мя сице. 3 Клевещете на мя, не стыдящеся мене належите ми. 4 Буди, яко воистинну аз прельстихся, и у мене водворяется погрешение, глаголати словеса, яже не подобаше, словеса же моя погрешают, и не во время: 5 буди же, яко на мя величаетеся, наскакаете же ми поношением: 6 разумейте убо, яко Господь есть иже смяте мя и ограду Свою на мя вознесе. 7 Се, смеюся поношению, не возглаголю: возопию, и нигдеже суд. 8 Окрест огражден есмь и не могу прейти: пред лицем моим тму положи, 9 славу же с мене совлече и отя венец от главы моея: 10 растерза мя окрест, и отидох: посече же яко древо надежду мою. 11 Люте же гнева употреби на мя и возмне мя яко врага. 12 Вкупе же приидоша искушения Его на мя, на путех же моих обыдоша мя наветницы. 13 Братия моя отступиша от мене, познаша чуждих паче мене, и друзие мои немилостиви быша: 14 не снабдеша мя ближнии мои, и ведящии имя мое забыша мя. 15 Соседи дому и рабыни моя, (яко) иноплеменник бых пред ними: 16 раба моего звах, и не послуша, уста же моя моляхуся: 17 и просих жену мою, призывах же лаская сыны подложниц моих: 18 они же мене в век отринуша, егда востану, на мя глаголют. 19 Гнушахуся мене видящии мя, и ихже любих, восташа на мя. 20 В кожи моей согниша плоти моя, кости же моя в зубех содержатся. 21 Помилуйте мя, помилуйте мя, о, друзие! Рука бо Господня коснувшаяся ми есть. 22 Почто мя гоните якоже и Господь? От плотей же моих не насыщаетеся? 23 Кто бо дал бы, да напишутся словеса моя, и положатся оная в книзе во век? 24 И на дщице железне и олове, или на камениих изваяются? 25 Вем бо, яко присносущен есть, иже имать искупити мя, 26 (и) на земли воскресити кожу мою терпящую сия, от Господа бо ми сия совершишася, 27 яже аз в себе свем, яже очи мои видеста, а не ин: вся же ми совершишася в недре. 28 Аще же и речете: что речем противу ему? И корень словесе обрящем в нем. 29 Убойтеся же и вы от меча: ярость бо на беззаконныя найдет, и тогда увидят, где есть их вещество. === 20 === 1 Отвещав же Софар Минейский, рече: 2 не тако мнех сия тебе рещи противу, и не разумеете паче нежели и аз. 3 Наказание срамления моего услышу, и дух от разума отвещавает ми. 4 Еда сих не уразумел еси от века, отнележе положен человек бысть на земли? 5 Веселие бо нечестивых падение страшно, обрадование же беззаконных пагуба. 6 Аще взыдут на небо дары его, жертва же его облаков коснется: 7 егда бо мнится уже утвержден быти, тогда в конец погибнет. Видевшии же его рекут: где есть? 8 Якоже сон отлетевый не обрящется, отлете же аки мечтание нощное. 9 Око призре, и не приложит, и ктому не познает его место его. 10 Сынов его да погубят меншии, и руце его возжгут болезни. 11 Кости его наполнишася грехов юности его и с ним на персти уснут. 12 Аще усладится во устех его злоба, скрыет ю под языком своим: 13 не пощадит ея, и не оставит ея, и соберет ю посреде гортани своего, 14 и не возможет помощи себе: желчь аспидов во чреве его. 15 Богатство неправедно собираемо изблюется, из храмины его извлечет его Ангел. 16 Ярость же змиеву да ссет, да убиет же его язык змиин. 17 Да не узрит отдоения скотов, ниже прибытка меда и масла кравия. 18 Вотще и всуе трудися, богатство, от негоже не вкусит, якоже клоки не сожваемы и не поглощаемы. 19 Многих бо немощных домы сокруши, жилище же разграби и не постави. 20 Несть спасения имению его, в вожделении своем не спасется. 21 Несть останка брашну его, сего ради не процветут ему благая. 22 Егда же мнит уже исполнь быти, оскорбится, всяка же беда нань приидет. 23 Аще како либо исполнит чрево свое, напустит нань ярость гнева, одождит на него болезни: 24 и не спасется от руки железа, да устрелит его лук медян, 25 и да пройдет сквозе тело его стрела: звезды же в жилищих его: да приидут нань страси, 26 и всяка тма на нем да пребудет: да пояст его огнь нераздеженый, да озлобит же пришлец дом его: 27 и да открыет небо беззакония его, и земля да востанет нань: 28 да извлечет дом его пагуба до конца, день гнева да приидет нань. 29 Сия часть человека нечестиваго от Господа и стяжание имений его от Надзирателя. === 21 === 1 Отвещав же Иов, рече: 2 послушайте, послушайте словес моих, да не будет ми от вас сие утешение: 3 потерпите ми, аз же возглаголю, таже не посмеетемися. 4 Что бо? Еда человеческо ми обличение? Или почто не возярюся? 5 Воззревшии на мя удивитеся, руку положше на ланите. 6 Аще бо воспомяну, ужаснуся: обдержат бо плоть мою болезни. 7 Почто нечестивии живут, обетшаша же в богатстве? 8 Семя их по души, чада же их пред очима. 9 Домове их обилнии суть, страх же нигде, раны же от Господа несть на них. 10 Говядо их не изверже: спасена же бысть их имущая во чреве и не лишися. 11 Пребывают же яко овцы вечныя, дети же их предиграют, 12 вземше псалтирь и гусли, и веселятся гласом песни. 13 Скончаша во благих житие свое, в покои же адове успоша. 14 Глаголют же Господеви: отступи от нас, путий Твоих ведети не хощем: 15 что достоин, яко да поработаем Ему? И кая польза, яко да взыщем Его? 16 В руках бо их бяху благая, дел же нечестивых не надзирает. 17 Обаче же и нечестивых светилник угаснет, найдет же им развращение, болезни же их оымут от гнева: 18 будут же аки плевы пред ветром, или якоже прах, егоже взя вихр. 19 Да оскудеют сыном имения его: воздаст противу ему, и уразумеет. 20 Да узрят очи его свое убиение, от Господа же да не спасется. 21 Яко воля его с ним в дому его, и числа месяцей его разделишася. 22 Не Господь ли есть научаяй разуму и хитрости? Тойже мудрых разсуждает. 23 Той умрет в силе простоты своея, всецел же благодушествуяй и благоуспеваяй, 24 утроба же его исполнена тука, мозг же его разливается. 25 Ов же умирает в горести души, не ядый ничтоже блага. 26 Вкупе же на земли спят, гнилость же их покры. 27 Темже вем вас, яко дерзостию належите ми, 28 яко речете: где есть дом княжь? И где есть покров селений нечестивых? 29 Вопросите мимоходящих путем, и знамения их не чужда сотворите. 30 Яко на день пагубы соблюдается нечестивый, и в день гнева Его отведен будет. 31 Кто возвестит пред лицем его путь его, и еже той сотвори, кто воздаст ему? 32 И той во гроб отнесен бысть, и на гробищих побде. 33 Усладися ему дробное камение потока, и вслед его всяк человек отидет, и пред ним безчисленнии. 34 Како же мя утешаете суетными? А еже бы мне почити от вас, ничтоже. === 22 === 1 Отвещав же Елифаз Феманитин, рече: 2 не Господь ли есть научаяй разуму и хитрости? 3 Ибо кое попечение Господу, аще ты был еси делы непорочен? Или (кая) польза, яко прост творити будеши путь твой? 4 Или опасение имея от тебе обличит тя и внидет с тобою в суд? 5 Еда злоба твоя есть не многа? Безчисленнии же твои суть греси? 6 В залог бо имал еси от братии твоея вотще, одежду же нагих отнимал еси, 7 ниже водою жаждущих напоил еси, но алчущих лишил еси хлеба: 8 удивлялся же еси неких лицу и повергал еси убогих на земли: 9 вдовицы же отпустил еси тщы и сироты озлобил еси. 10 Сего ради обыдоша тя сети, и поспеши на тя рать велика: 11 свет тебе тма бысть, уснувшаго же вода тя покры. 12 Еда на высоких живый не призирает? Укоризною же возносящихся смири. 13 И рекл еси: что разуме Крепкий? Или во мраце разсудит? 14 Облак покров Его, и неувидимь будет, и круг небесе обходит. 15 Еда стезю древнюю сохраниши, в нюже ходиша мужие неправедни, 16 иже яти быша прежде времене? Река текущая основания их, 17 глаголющии: что сотворит нам Господь? Или что нанесет на ны Вседержитель? 18 Иже исполнил есть домы их благими: совет же нечестивых далече от Него. 19 Видевше праведницы возсмеяшася, непорочен же глумляшеся им: 20 не погибе ли имение их, и останки их пояст огнь? 21 Буди убо тверд, аще претерпиши, потом плод твой будет во благих. 22 Приими же из уст Его изречение и восприими словеса Его в сердце твое. 23 Аще же обратишися и смириши себе пред Господем, и далече сотвориши от жилища твоего неправду, 24 и положен будеши на персти в камени, и якоже камень потока Офирска. 25 Будет убо тебе Вседержитель помощник от враг, чиста же сотворит тя якоже сребро разжжено, 26 потом дерзновение возимееши пред Богом, воззрев весело на небо. 27 Помольшуся же тебе к Нему, услышит тя, даст же ти обеты твоя воздати, 28 устроит же ти жилище правды, на путех же твоих будет свет: 29 яко смирил еси себе, тогда речеши: вознесеся, и поникша очима спасет, 30 избавит неповиннаго, и спасешися чистыма рукама твоима. === 23 === 1 Отвещав же Иов, рече: 2 вем убо, яко из руки моея обличение мое есть, и рука Его тяжка бысть паче моего воздыхания. 3 Кто убо увесть, яко обрящу Его и прииду ко кончине? 4 И реку мой суд, уста же моя исполню обличения, 5 уразумею же изцеления, яже ми речет, и ощущу, что ми возвестит. 6 И аще со многою крепостию найдет на мя, посем же не воспретит ми. 7 Истина бо и обличение от Него: да изведет же в конец суд мой. 8 Аще бо во первых пойду, ктому несмь: в последних же, како вем Его? 9 Ошуюю творящу Ему, и не разумех: обложит одесную, и не узрю. 10 Весть бо уже путь мой, искуси же мя яко злато. 11 Изыду же в заповедех Его, пути бо Его сохраних, и не уклонюся от заповедий Его 12 и не преступлю, в недрех же моих сокрых глаголголы Его. 13 Аще же и Сам судил тако, кто есть рекий противу Ему? Сам бо восхоте и сотвори. 14 Сего ради о Нем трепетен бых, наказуемь же попекохся о Нем: 15 сего ради от лица Его потщуся, поучуся и убоюся от Него. 16 И Господь умягчил сердце мое, и Вседержитель потщася о мне: 17 не ведех бо, яко найдет на мя тма, пред лицем же моим покрыет мрак. === 24 === 1 Почто же Господа утаишася часы, 2 нечестивии же предел преидоша, стадо с пастырем разграбивше? 3 Подяремника сирых отведоша и вола вдовича в залог взяша: 4 уклониша немощных от пути праведнаго, вкупе же скрышася кротцыи земли: 5 изыдоша же, яко осли на село, на мя, изступивше своего чина: сладок бысть хлеб им ради юных. 6 Ниву прежде времене не свою сущу пожаша, немощнии же виноград нечестивых без мзды и без брашна возделаша: 7 нагих многих успиша без риз, одежду же души их отяша: 8 каплями горскими мокнут, занеже не имеяху покрова, в камение облекошася: 9 восхитиша сироту от сосца, падшаго же смириша: 10 нагия же успиша неправедно, от алчущих же хлеб отяша: 11 в теснинах неправедно заседоша, пути же праведнаго не ведеша. 12 Уже из града и из домов своих изгоними бываху, душа же младенцев стеняше вельми: Бог же почто сих посещения не сотвори? 13 На земли сущым им, и не разумеша, пути же праведнаго не ведеша, ни по стезям его ходиша. 14 Разумев же их дела, предаде их во тму, и в нощи будет яко тать. 15 И око прелюбодея сохрани тму, глаголя: не узрит мя око: и покрывало лицу наложи. 16 Прокопа в нощи храмины, во днех же запечатлеша себе, не познаша света: 17 яко абие заутра им сень смерти, понеже познает мятеж сени смертныя. 18 Легок есть на лицы воды: проклята буди часть их на земли, да явятся же садовия их на земли суха: 19 рукоятие бо сирых разграбиша. 20 Потом воспомянен бысть ему грех, и якоже мгла росы изчезе: воздано же буди ему, еже содея, сокрушен же буди всяк неправдив яко древо неизцельно: 21 неплодней бо не добро сотвори и жены не помилова. 22 Яростию же низврати немощныя: востав убо не имать веры яти о своем житии. 23 Егда же разболится, да не надеется здрав быти, но падет недугом. 24 Многи бо озлоби высота его: увяде же яко злак в знои, или якоже клас от стебла сам отпад. 25 Аще же ни, кто есть глаголяй лжу ми глаголати, и положит ни во чтоже глаголы моя? === 25 === 1 Отвещав же Валдад Савхейский, рече: 2 что бо начало, аще не страх от Него, иже творит всяческая в вышних? 3 Да никтоже бо мнит, яко есть умедление воинством: и на кого не найдет навет от Него? 4 Како бо будет праведен человек пред Богом? Или кто очистит себе рожденный от жены? 5 Аще луне повелевает, и не сияет, звезды же нечисты суть пред Ним, 6 кольми паче человек гной, и сын человеческий червь. === 26 === 1 Отвещав же Иов, рече: 2 кому прилежиши, или кому хощеши помогати? Не сему ли, емуже многа крепость и емуже мышца крепка есть? 3 Кому совет дал еси? Не емуже ли вся премудрость? Кого поженеши? Не емуже ли превелия сила? 4 Кому возвестил еси глаголы? Дыхание же чие есть исходящее из тебе? 5 Еда исполини родятся под водою и соседми ея? 6 Наг ад пред Ним, и несть покрывала Пагубе. 7 Простираяй север ни на чемже, повешаяй землю ни на чемже, 8 связуяй воду на облацех Своих, и не расторжеся облак под нею: 9 держай лице престола, простирая над ним облак Свой: 10 повеление окружи на лице воды даже до скончания света со тмою. 11 Столпи небеснии прострошася и ужасошася от запрещения Его. 12 Крепостию укроти море, и хитростию его низложен бысть кит: 13 вереи же небесныя убояшася Его: повелением же умертви змиа отступника. 14 Се, сия части пути Его: и о капли слова услышим в Нем: силу же грома Его кто уведа, когда сотворит? === 27 === 1 Еще же приложив Иов, рече в притчах: 2 жив Господь, иже ми сице суди, и Вседержитель, Иже огорчи ми душу: 3 дондеже еще дыхание мое есть и дух Божий сущий в ноздрех моих, 4 не возглаголют устне мои беззакония, ниже душа моя поучится неправде. 5 Не буди мне правдивыми нарещи вас, дондеже умру: не изменю бо незлобия моего. 6 Правде же внимая, не оставлю ея, не свем бо себе злых соделавша. 7 Обаче же, дабы были врази мои, якоже низвращение нечестивых, и востающии на мя, якоже пагуба пребеззаконных. 8 И кая бо есть надежда нечестивому, яко ожидает? Надеяся на Господа спасется ли? 9 Или мольбу его услышит Бог? Или нашедшей ему беде, 10 еда имать кое дерзновение пред Ним? Или яко призвавшу ему, услышит ли Его? 11 Сего ради возвещу вам, что есть в руце Господни, и, еже есть у Вседержителя, не солжу. 12 Се, вси весте, яко тщетная ко тщетным прилагаете. 13 Сия часть человека нечестиваго от Господа: и жребий сильных приидет от Вседержителя на ня. 14 Аще мнози будут сынове их, на заколение будут: аще же и возмужают, нищы будут: 15 оставшиися же ему смертию умрут, и вдовиц их никтоже помилует. 16 Аще соберет якоже землю сребро, и якоже брение уготовит злато, 17 сия вся праведнии одержат, имения же его истиннии возмут: 18 будет же дом его яко молие, и яко паучина, яже снабде. 19 Богатый уснет и не приложит, очи свои отверзе, и несть. 20 Обыдоша его якоже вода болезни, нощию же ят его примрак. 21 Возмет же его вар, и отидет, и возвеет его от места его, 22 и вержет на него, и не пощадит, из руку его бежанием побежит: 23 восплещет нань рукама своима и с шумом возмет его от места своего. === 28 === 1 Есть бо сребру место, отюнудуже и бывает, и место злату, отюнудуже очищается. 2 Железо бо из земли раждается, медь же равно камению сечется. 3 Чин положи тме, и вся концы сам испытует, камык тмы и сень смерти. 4 Пресечение потока от праха: забывающии же путь правый изнемогоша, от человек подвигошася. 5 Есть земля, из неяже изыдет хлеб: под нею обратися яко огнь. 6 Место сапфира камение ея, и персть злато ему. 7 Стезя, не позна ея птица, и не узре ю око супово, 8 и не ходиша по ней сынове величавых, и не прейде по ней лев. 9 На несекоме камени простре руку свою, преврати же из корения горы: 10 бреги рек расторже, всякое же честное виде око мое: 11 глубины же рек откры и показа силу свою на свет. 12 Премудрость же откуду обретеся? И кое место есть ведения? 13 Не весть человек пути ея, ниже обретеся в человецех. 14 Бездна рече: несть во мне: и море рече: несть со мною. 15 Не дастся сокровище за ню, и не извесится сребро на изменение ея, 16 и не сравнится со златом Софирским, со ониксом честным и сапфиром: 17 не равно будет ей злато и кристаль, и изменение ея сосуди злати. 18 Превысокая и бисерие не помянутся, и притяжи премудрость паче внутреннейших: 19 не уравнится ей топазий Ефиопский, со златом чистым не сравнится. 20 Премудрость же откуду обретеся? И кое место есть разуму? 21 Утаися от всякаго человека, и от птиц небесных скрыся. 22 Пагуба и смерть рекосте: слышахом ея славу. 23 Бог благо позна ея путь: Сам бо весть место ея. 24 Ибо Сам поднебесную всю надзирает, ведый, яже на земли, вся, яже сотвори. 25 Ветров вес и воде меру егда сотворил, 26 тако видяй сочте, и путь в сотрясении гласов, 27 тогда виде ю и поведа ю, уготовав изследи 28 и рече человеку: се, благочестие есть премудрость, а еже удалятися от зла есть ведение. === 29 === 1 Еще же приложив Иов, рече в притчах: 2 кто мя устроит по месяцам преждних дний, в нихже мя Бог храняше, 3 якоже егда светяшеся светилник Его над главою моею, егда светом Его хождах во тме, 4 егда бех тяжек в путех, егда Бог посещение творяше дому моему, 5 егда бех богат зело, окрест же мене раби, 6 егда обливахуся путие мои маслом кравиим, горы же моя обливахуся млеком, 7 егда исхождах изутра во град, на стогнах же поставляшеся ми престол? 8 Видяще мя юноши скрывашася, старейшины же вси воставаша: 9 вельможи же преставаху глаголати, перст возложше на уста своя. 10 Слышавшии же блажиша мя, и язык их прильпе гортани их: 11 яко ухо слыша и ублажи мя, око же видев мя уклонися. 12 Спасох бо убогаго от руки сильнаго, и сироте, емуже не бе помощника, помогох. 13 Благословение погибающаго на мя да приидет, уста же вдовича благословиша мя. 14 В правду же облачахся, одевахся же в суд яко в ризу. 15 Око бех слепым, нога же хромым: 16 аз бых отец немощным, распрю же, еяже не ведях, изследих: 17 сотрох же членовныя неправедных, от среды же зубов их грабление изях. 18 Рех же: возраст мой состареется якоже стебло финиково, многа лета поживу. 19 Корень разверзеся при воде, и роса пребудет на жатве моей. 20 Слава моя нова со мною, и лук мой в руце моей пойдет. 21 (Старейшины) слышавшии мя внимаху, молчаху же о моем совете. 22 К моему глаголу не прилагаху, радовахуся же, егда к ним глаголах: 23 якоже земля жаждущая ожидает дождя, тако сии моего глаголания. 24 Аще возсмеюся к ним, не вериша: и свет лица моего не отпадаше. 25 Избрах путь их, и седех князь, и вселяхся якоже царь посреде храбрых, аки утешаяй печальных. === 30 === 1 Ныне же поругашамися малейшии: ныне учат мя от части, ихже отцев уничтожах, ихже не вменях достойными псов моих стад. 2 Крепость же рук их во что мне бысть? У них погибаше скончание. 3 В скудости и гладе безплоден: иже бежаху в безводное вчера сотеснение и бедность: 4 иже обхождаху былие в дебрех, имже былие бяше брашно, безчестнии же и похуленнии, скудни всякаго блага, иже и корение древес жваху от глада великаго. 5 Восташа на мя татие, 6 ихже домове беша пещеры каменны: 7 от среды доброгласных возопиют, иже под хврастием дивиим живяху: 8 безумных сынове и безчестных, имя и слава угашена на земли. 9 Ныне же гусли есмь аз им, и мене в притчу имут: 10 возгнушалися же мною отступивше далече, ни лица моего пощадеша от плюновения. 11 Отверз бо тул Свой уязви мя, и узду устам моим наложи. 12 На десную отрасли восташа, нозе свои простроша и путесотвориша на мя стези пагубы своея. 13 Сотрошася стези моя, совлекоша бо ми одежду. 14 Стрелами своими устрели мя: сотвори ми, якоже восхоте: в болезнех скисохся, обращаются же ми скорби. 15 Отиде ми надежда якоже ветр, и якоже облак спасение мое. 16 И ныне на мя излиется душа моя: и одержат мя дние печалей: 17 нощию же кости моя смятошася, жилы же моя разслабеша. 18 Многою крепостию ятся за ризу мою: якоже ожерелие ризы моея объя мя. 19 Вменяеши же мя равна брению, в земли и пепеле часть моя. 20 Возопих же к Тебе, и не услышал мя еси: сташа же и смотриша на мя. 21 Наидоша же на мя без милости, рукою крепкою уязвил мя еси: 22 вчинил же мя еси в болезнех и отвергл еси мя от спасения. 23 Вем бо, яко смерть мя сотрет: дом бо всякому смертну земля. 24 Аще бы возможно было, сам бых себе убил, или молил бых иного, дабы ми то сотворил. 25 Аз же о всяцем немощнем восплакахся, воздохнух же видев мужа в бедах. 26 Аз же ждах благих, и се, сретоша мя паче дние зол. 27 Чрево мое воскипе и не умолчит: предвариша мя дние нищеты. 28 Стеня ходих без обуздания, стоях же в соборе вопия. 29 Брат бых сиринам, друг же птичий. 30 Кожа же моя помрачися вельми, и кости моя сгореша от зноя. 31 Обратишася же в плачь гусли моя, песнь же моя в рыдание мне. === 31 === 1 Завет положих очима моима, да не помышлю на девицу. 2 И что удели Бог свыше, и наследие Всесильнаго от вышних? 3 Увы, пагуба неправдивому и отчуждение творящым беззаконие. 4 Не Сам ли узрит путь мой и вся стопы моя изочтет? 5 Аще ходих с посмеятели, и аще потщася нога моя на лесть, 6 стах бо на мериле праведне, виде же Господь незлобие мое. 7 Аще уклонися нога моя от пути, аще и вслед ока моего иде сердце мое, и аще рукама моима прикоснухся даров, 8 да посею убо, а инии да поядят, без корене же да бых был на земли. 9 Аще вслед иде сердце мое жены мужа инаго, и аще приседяй бых при дверех ея, 10 угодна убо буди и жена моя иному мужу, младенцы же мои смирени да будут: 11 ярость бо гнева не удержана, еже осквернити мужа инаго жену: 12 огнь бо есть горяй на вся страны, идеже найдет, из корения погубит. 13 Аще же презрех суд раба моего или рабыни, прящымся им предо мною: 14 что бо сотворю, аще испытание сотворит ми Господь? Аще же и посещение, кий ответ сотворю? 15 Еда не якоже и аз бех во чреве, и тии быша? Бехом же в томже чреве. 16 Немощнии же, аще когда чесого требоваху, не не получиша, вдовича же ока не презрех. 17 Аще же и хлеб мой ядох един и сирому не преподах от него: 18 понеже от юности моея кормих якоже отец, и от чрева матере моея наставлях: 19 аще же презрех нага погибающа и не облекох его: 20 немощнии же аще не благословиша мя, от стрижения же агнцев моих согрешася плещы их: 21 аще воздвигох на сироту руку, надеяся, яко многа помощь мне есть: 22 да отпадет убо рамо мое от состава, мышца же моя от лактя да сокрушится: 23 страх бо Господень объя мя, и от тягости Его не стерплю. 24 Аще вчиних злато в крепость мою и аще на камения многоценная надеяхся, 25 аще же и возвеселихся, многу ми богатству сущу, аще же и на безчисленных положих руку мою: 26 или не видим солнца возсиявшаго оскудевающа, луны же умаляющияся? Не в них бо есть: 27 и аще прельстися отай сердце мое, аще и руку мою положив на устах моих лобзах: 28 и сие ми убо в беззаконие превелие да вменится, яко солгах пред Богом Вышним. 29 Аще же обрадовахся о падении враг моих, и рече сердце мое: благоже, благоже: 30 да услышит убо ухо мое клятву мою, озлославлен же да буду от людий моих озлобляемь. 31 Аще же и многажды реша рабыни моя: кто убо дал бы нам от плотей его насытитися, зело мне благу сущу? 32 И вне не водворяшеся странник, дверь же моя всякому приходящему отверста бе. 33 Аще же и согрешая неволею, скрых грех мой: 34 не посрамихся бо народнаго множества, еже не поведати пред ними: аще же и оставих маломощнаго изыти из дверий моих тщим недром: (аще бы не убоялся). 35 Кто даст слушающаго мене? Руки же Господни аще бых не убоялся, писание же, еже имех на кого, 36 на плещах возложив аки венец, читах, 37 и аще не раздрав его отдах, ничтоже взем от должника: 38 аще на мя когда земля возстена, аще и бразды ея восплакашася вкупе: 39 аще и силу ея ядох един без цены, или аще и душу господина земли взем оскорбих: 40 вместо пшеницы да взыдет ми кропива, а вместо ячменя терние. === 32 === 1 И умолча Иов словесы. Умолчаша же и трие друзие его ктому пререковати Иову, бе бо Иов праведен пред ними. 2 Разгневася же Елиус сын Варахиилев Вузитянин, от ужичества Арамска Авситидийския страны, разгневася же на Иова зело, занеже нарече себе праведна пред Богом, 3 и на триех же другов разгневася зело, яко не возмогоша отвещати противу Иову и судиша его быти нечестива. 4 Елиус же терпяше дати ответ Иову, яко старейшии его суть деньми (друзие его). 5 И виде Елиус, яко несть ответа во устех триех мужей, и возярися гневом своим. 6 Отвещав же Елиус сын Варахиилев Вузитянин, рече: юнейший убо есмь леты, вы же есте старейшии: темже молчах, убоявся возвестити вам хитрость мою: 7 рех же: время есть глаголющее, и во мнозех летех ведят премудрость, 8 но дух есть в человецех, дыхание же Вседержителево есть научающее: 9 не многолетнии суть премудри, ниже старии ведят суд: 10 темже рех: послушайте мене, и возвещу вам, яже вем, внушите глаголы моя: 11 реку бо вам послушающым, дондеже испытаете словеса, и даже вас уразумею, 12 и се, не бе Иова обличаяй, отвещаяй противно глаголом его от вас: 13 да не речете: обретохом премудрость, Господеви приложившеся: 14 человеку же попустисте глаголати таковая словеса: 15 ужаснушася, не отвещаша ктому, обетшаша от них словеса: 16 терпех, не глаголах бо, яко сташа, не отвещаша, яко да отвещаю и аз часть. 17 Отвеща же Елиус, глаголя: 18 паки возглаголю, исполнен бо есмь словес: убивает бо мя дух чрева: 19 чрево же мое яко мех мста вряща завязан, или якоже мех коваческий расторгнутый: 20 возглаголю, да почию, отверз уста: 21 человека бо не постыждуся, но ниже бреннаго посрамлюся: 22 не вем бо чудитися лицу: аще же ни, то и мене молие изядят. === 33 === 1 Но послушай, Иове, словес моих и беседу мою внуши: 2 се бо, отверзох уста моя, и возглагола язык мой: 3 чисто сердце мое во словесех, разум же устну моею чистая уразумеет: 4 Дух Божий сотворивый мя, дыхание же Вседержителево поучающее мя: 5 аще можеши, даждь ми ответ к сим: потерпи, стани противу мене, и аз противу тебе. 6 От брения сотворен еси ты, якоже и аз: от тогожде сотворения есмы: 7 не страх мой тя смятет, ниже рука моя тяжка будет на тя. 8 Обаче рекл еси во ушы мои, и глас глагол твоих услышах, занеже глаголеши: 9 чист есмь аз, не согрешая, непорочен же есмь, ибо не беззаконновах: 10 зазор же на мя обрете и мнит мя, яко противника Себе: 11 вложи же ногу мою в древо и надсмотрял пути моя вся. 12 Како бо глаголеши, яко прав есмь, и не послуша мене? Вечен бо есть, иже над земными. 13 Глаголеши бо: чесо ради правды моея не услыша всяко слово? 14 Единою бо возглаголет Господь, второе же во сне, или в поучении нощнем, 15 или, яко егда нападает страх лют на человеки, во дреманиих на ложи: 16 тогда открыет ум человеческий, виденьми страха тацеми их устрашит, 17 да возвратит человека от неправды, тело же его от падения избави, 18 пощаде же душу его от смерти, еже не пасти ему на брани. 19 Паки же обличи его болезнию на ложи и множество костей его разслаби: 20 всякаго же брашна пшенична не возможет прияти, а душа его яди хощет, 21 дондеже согниют плоти его, и покажет кости его тощя: 22 приближися же на смерть душа его, и живот его во аде. 23 Аще будет тысяща Ангел смертоносных, един от них не уязвит его: аще помыслит сердцем обратитися ко Господу, повесть же человеку свой зазор, и безумие свое покажет, 24 заступит е, еже не впасти ему в смерть, обновит же тело его якоже повапление на стене, кости же его исполнит мозга: 25 умягчит же его плоть якоже младенца, и устроит его возмужавша в человецех. 26 Помолится же ко Господу и прият им будет, внидет же лицем веселым со исповеданием, воздаст же человеком правду свою. 27 Посем тогда зазрит человек сам себе, глаголя: яковая содевах? И не по достоинству истяза мя, о нихже согреших: 28 спаси душу мою, еже не внити во истление, и жизнь моя свет узрит. 29 Се, сия вся творит Крепкий (Бог) пути три с мужем: 30 но избави душу мою от смерти, да живот мой во свете хвалит его. 31 Внимай, Иове, и послушай мене, премолчи, и аз возглаголю: 32 и аще тебе суть словеса, отвещай ми: глаголи, хощу бо оправдитися тебе: 33 аще же ни, ты послушай мене, умолчи, и научу тя премудрости. === 34 === 1 Отвещав же Елиус, рече: 2 послушайте мене, премудрии: сведущии, внушите (доброе), 3 яко ухо словеса искушает, гортань же вкушает брашна. 4 Суд изберем себе, уразумеем посреде себе, что лучшее. 5 Яко рече Иов: праведен есмь, Господь отят ми суд, 6 солга же суду моему: насильна стрела моя без неправды. 7 Кто муж, якоже Иов, пияй поругание, якоже воду, 8 не согрешая, ниже нечествовав, ниже приобщився к творящым беззакония, еже ходити с нечестивыми? 9 Не рцы бо, яко несть посещения мужеви, и посещения ему от Господа. 10 Темже, разумивии сердцем, послушайте мене, не буди ми пред Господем нечествовати и пред Вседержителем возмутити правду: 11 но воздает человекови, якоже творит кийждо их, и на стези мужестей обрящет и. 12 Мниши же Господа нелепая сотворити, или Вседержитель смятет суд, иже сотвори землю? 13 Кто же есть творяй поднебесную и яже в ней всяческая? 14 Аще бо восхощет запретити и дух у Себе удержати, 15 умрет всяка плоть вкупе, всяк же человек в землю пойдет, отнюдуже и создан бысть. 16 Аще же не увещаешися, послушай сих, внуши глас глагол. 17 Виждь ты ненавидящаго беззаконная и губящаго лукавыя, суща, вечна, праведна. 18 Нечестив есть глаголяй цареви, закон преступаеши, нечестивейше, князем: 19 иже не постыдеся лица честнаго, ниже весть честь возложити сильным, удивитися лицам их. 20 Тще же им сбудется, еже возопити и молити мужа: зане употребиша беззаконно, безчестяще немощных. 21 Той бо зритель есть дел человеческих, утаися же от Него ничтоже от тех, яже творят: 22 ниже будет место укрытися творящым беззаконная: 23 яко не на мужа положит еще. 24 Господь бо всех видит, постизаяй неизследная, славная же и изрядная, имже несть числа, 25 сведый их дела, и обратит нощь, и смирятся. 26 Угаси же нечестивыя, видими же пред ним: 27 яко уклонишася от закона Божия, оправданий же Его не познаша, 28 еже вознести к Нему вопль нищих, и вопль убогих услышит. 29 И Той тишину подаст, и кто осудит? И сокрыет лице, и кто узрит Его? И на язык, и на человека вкупе, 30 иже поставляет царем человека лицемера за строптивость людий. 31 Яко к Крепкому глаголяй: взях, не отиму вместо залога: 32 без мене узрю, Ты покажи ми: аще неправду соделах, не имам приложити. 33 Еда от тебе истяжет ю, яко ты отринеши, яко ты избереши, а не аз ли? И что разумееши? Глаголи. 34 Темже смысленнии сердцем рекут сия, муж же премудр услыша глагол мой. 35 Иов же не в разуме глаголаше, словеса же его не в хитрости. 36 Обаче навыкни, Иове, не даждь еще ответа, якоже немудрии: 37 да не приложим на грехи нашя: беззаконие же на нас вменится, многая глаголющих словеса на Господа. === 35 === 1 Отвещав же еще Елиус, рече: 2 что сие мнил еси на суде? Ты кто еси, яко рекл еси: прав есмь пред Господем? 3 Или речеши: что сотворю согрешив? 4 Аз же ти дам ответ и трием другом твоим. 5 Воззри на небо и виждь: смотри же на облаки, коль высоки суть от тебе. 6 Аще согрешил еси, что сотвориши? Аще же и много беззаконновал еси, что можеши сотворити? 7 Понеже убо праведен еси, что даси Ему? Или что из руки твоея возмет? 8 Мужеви подобному тебе нечестие твое, и сыну человеческому правда твоя. 9 От множества оклеветаемии воззовут, возопиют от мышцы многих: 10 и не рече: где есть Бог сотворивый мя, устрояяй стражбы нощныя, 11 отделяяй мя от четвероногих земных и от небесных птиц? 12 Тамо воззовут, и не имаши услышати, и от досады злых. 13 Безместная бо видети не хощет Господь: Сам бо Вседержитель зритель есть творящих беззаконная, и спасет мя. 14 Судися же пред Ним, аще можеши похвалити Его, якоже есть и ныне. 15 Яко несть посещаяй гневом Своим, и не позна прегрешения коеголибо зело. 16 Иов же всуе отверзает уста своя, неведением словеса отягощает. === 36 === 1 Приложив же еще Елиус, рече: 2 пожди ми мало еще, да тя научу: еще бо у мене есть слово. 3 Приим хитрость мою отдалеча, делы же моими праведная реку воистинну: 4 и не неправедны глаголы без правды уразумееши. 5 Виждь же, яко Господь не отринет незлобиваго: 6 силен крепостию сердца нечестивых не оживит и суд нищым даст, 7 не отимет от правдиваго очес Своих, и со цари на престоле посадит их на победу, и вознесутся. 8 Связаннии в ручных узах яти будут ужами нищеты, 9 и возвестит им дела их и прегрешение их, яко укрепятся: 10 но правдиваго услышит, и рече, яко обратятся от неправды. 11 Аще услышат и поработают, скончают дни своя во благих и лета своя в благолепоте: 12 нечестивых же не спасет, зане не хотеша познати Господа и занеже учими не послушливи беша. 13 И лицемери сердцем возмутят ярость: не возопиют, яко связа их: 14 да умрет убо в юности душа их, житие же их уязвляемо Ангелы, 15 занеже оскорбиша недужна и немощна, суд же кротких изложит. 16 Еще же исторгну тя от уст вражиих: бездна, пролитие под нею, и сниде трапеза твоя исполнена тука. 17 Не оскудеет же от праведных суд: 18 ярость же на нечестивыя будет, нечестия ради даров их, ихже приимаху на неправде. 19 Да не уклонит тя волею ум от мольбы в беде сущих немощных и всех содержащих крепость. 20 Не привлецы нощи, еже взыти людем вместо их: 21 но сохранися, да не содееши зла: сих бо ради изят еси от нищеты. 22 Се, Крепкий удержит крепостию Своею: кто бо есть, якоже Той, силен? 23 И кто есть испытуяй дел Его? Или кто рекий: содея неправду? 24 Помяни, яко велия дела Его суть, имиже владеша мужие. 25 Всяк человек видит в себе, елицы уязвляеми суть человецы. 26 Се, Крепкий великий, и не увемы: число лет Его безконечное: 27 изочтенны же ему суть капли дождевныя, и излиются дождем во облак: 28 потекут обетшания, осениша же облацы над премногими людьми: время постави скоту, ведят же ложа чин. О всех сих не дивитлитися ум, и не изменяетлися ти сердце от тела? 29 И аще уразумеет простертие облака, равенство скинии Его: 30 се, простирает на ню свет и корения морская покры: 31 теми бо судит людем, даст пищу могущему. 32 На руку покры свет и заповеда о нем сретающему: 33 возвестит о нем другу своему Господь, стяжание, и о неправде. === 37 === 1 И от сих возмятеся сердце мое и отторжеся от места своего. 2 Послушай слуха во гневе ярости Господни, и поучение изо уст Его изыдет. 3 Под всем небом началство его, и свет его на крилу земли. 4 Вслед его возопиет гласом, возгремит гласом величия Своего, и не изменит их, яко услышит глас Его. 5 Возгремит Крепкий гласом Своим дивная: сотвори бо велия, ихже не ведахом. 6 Повелеваяй снегу: буди на земли, и буря дождя, и буря дождев могутства Его. 7 В руце всякаго человека знаменает, да познает всяк человек свою немощь. 8 Внидоша же зверие под кров и умолкоша на ложи. 9 Из хранилищ внутренних находят болезни, и от внешних стран студень. 10 И от дыхания Крепка даст лед: управляет же воду, якоже хощет, 11 и избранное устрояет облак: разженет облак свет Его, 12 и Сам окрестная превратит, якоже хощет, в дела их: вся, елика заповесть им, сия чиноположена суть от Него на земли, 13 аще в наказание, аще на землю свою, аще на милость обрящет и. 14 Внуши сия, Иове: стани учайся силе Господни. 15 Вемы, яко Господь положи дела Своя, свет сотворив из тмы. 16 Весть же различие облаков и велия падения злых. 17 Твоя же одежда тепла, почивает же на земли от юга. 18 Утверждения с Ним в древности, крепка якоже видение слития. 19 Чесо ради, научи мя, что речем Ему? И престанем многа глаголюще. 20 Еда книга, или книгочиа ми предстоит? Да стоящь сотворю человеку молчати. 21 Не всем же видимь свет: светлый есть в древностех, якоже еже от него на облацех. 22 От севера облацы златозарни: в сих велия слава и честь Вседержителева. 23 И не обретаем иного подобна крепости Его: иже судит праведно, мниши ли, яко не слышит Той? 24 Темже убоятся Его человецы: убоятся же Его и премудрии сердцем. === 38 === 1 Преставшу же Елиусу от беседы, рече Господь Иову сквозе бурю и облаки: 2 кто сей скрываяй от Мене совет, содержай же глаголы в сердцы, Мене же ли мнится утаити? 3 Препояши яко муж чресла твоя: вопрошу же тя, ты же Ми отвещай. 4 Где был еси, егда основах землю? Возвести ми, аще веси разум. 5 Кто положи меры ея, аще веси? Или кто наведый вервь на ню? 6 На чемже столпи ея утверждени суть? Ктоже есть положивый камень краеуголный на ней? 7 Егда (сотворены) быша звезды, восхвалиша Мя гласом велиим вси Ангели Мои. 8 Заградих же море враты, егда изливашеся из чрева матере своея исходящее: 9 положих же ему облак во одеяние, мглою же пових е: 10 и положих ему пределы, обложив затворы и врата: 11 рех же ему: до сего дойдеши и не прейдеши, но в тебе сокрушатся волны твоя. 12 Или при тебе составих свет утренний, денница же весть чин свой, 13 ятися крил земли, оттрясти нечестивыя от нея? 14 Или ты, брение взем, от земли создал еси животно, и глаголиваго сего посадил еси на земли? 15 Отял же ли еси от нечестивых свет, мышцу же гордых сокрушил ли еси? 16 Пришел же ли еси на источники моря, во следах же бездны ходил ли еси? 17 Отверзаются же ли тебе страхом врата смертная, вратницы же адовы видевше тя убояшася ли? 18 Навыкл же ли еси широты поднебесныя? Повеждь убо ми, колика есть? 19 В коей же земли вселяется свет, тме же кое есть место? 20 Аще убо введеши мя в пределы их, аще же ли и веси стези их? 21 Вем убо, яко тогда рожден еси, число же лет твоих много. 22 Пришел же ли еси в сокровища снежная, и сокровища градная видел ли еси? 23 Подлежат же ли тебе в час врагов, в день браней и рати? 24 Откуду же исходит слана, или разсыпается юг на поднебесную? 25 Кто же уготова дождю велию пролияние, и путь молнии и грома, 26 одождити на землю, на нейже несть мужа, пустыню, идеже человека несть в ней, 27 насытити непроходиму и ненаселену, и прозябнути исход злака? 28 Кто есть дождю отец? Кто же есть родивый капли росныя? 29 Из чиего чрева исходит лед? Слану же на небеси кто родил, 30 яже нисходит яко вода текущая? Лице нечестива кто устраши? 31 Разумел же ли еси соуз Плиад, и ограждение Орионово отверзл ли еси? 32 Или отверзеши знамения небесная во время свое? И вечернюю звезду за власы ея привлечеши ли? 33 Веси же ли пременения небесная, или бывающая вкупе под небесем? 34 Призовеши же ли облак гласом? И трепетом воды великия послушает ли тя? 35 Послеши же ли молнии, и пойдут? Рекут же ли ти: что есть? 36 Кто же дал есть женам ткания мудрость, или испещрения хитрость? 37 Кто же изчисляяй облаки премудростию, небо же на землю преклонил, 38 разлияся же яко земля прах, спаях же е, аки каменем, на четыри углы? 39 Уловиши же ли львам ядь, и душы змиев насытиши ли? 40 Убояшася бо на ложах своих и седят в дебрех уловляюще. 41 Кто же врану уготова пищу? Птичищи бо его ко Господу воззваша, облетающе брашна ищуще. === 39 === 1 Аще уразумел еси время рождения коз живущих на горах каменных? Усмотрил же ли еси болезнь при рождении еленей? 2 Изчислил же ли еси месяцы их исполнены рождения их, болезни же их разрешил ли еси? 3 Вскормил же ли еси детищы их вне страха, болезни же их отслеши ли? 4 Извергнут чада своя, умножатся в порождении, изыдут и не возвратятся к ним. 5 Кто же есть пустивый осла дивияго свободна, узы же его кто разрешил? 6 Положих же жилище его пустыню и селения его сланость: 7 смеяйся многу народу града, стужания же данническаго не слышай, 8 усмотрит на горах пажить себе и вслед всякаго злака ищет. 9 Похощет же ли ти единорог работати, или поспати при яслех твоих? 10 Привяжеши ли ремением иго его, и провлечет ти бразды на поли? 11 Надеешилися нань, яко многа крепость его? Попустиши же ли ему дела твоя? 12 Повериши же ли, яко воздаст ти семя? Внесет же ли ти в гумно? 13 Крило веселящихся нееласса, аще зачнет асида и несса? 14 Яко оставит на земли яица своя, и на персти согреет, 15 и забы, яко нога разбиет, и зверие селнии поперут: 16 ожесточися на чада своя, аки бы не ея, вотще трудися без страха, 17 яко сокры Бог ей премудрость и не удели ей в разуме: 18 во время же на высоту вознесет, посмеется коню и седящему на нем. 19 Или ты обложил еси коня силою, и облекл же ли еси выю его в страх? 20 Обложил же ли еси его всеюружием, славу же персей его дерзостию? 21 Копытом копая на поли играет и исходит на поле с крепостию: 22 сретая стрелы посмеявается и не отвратится от железа: 23 над ним играет лук и мечь, 24 и гневом потребит землю и не имать веры яти, дондеже вострубит труба: 25 трубе же вострубившей глаголет, благоже: издалеча же обоняет рать, со скаканием и ржанием. 26 И твоею ли хитростию стоит ястреб, распростер криле недвижимь, зря на юг? 27 Твоим же ли повелением возносится орел, неясыть же на гнезде своем седя вселяется, 28 на версе камене и в сокровене? 29 Тамо же сый ищет брашна, издалеча очи его наблюдают, 30 птичищи же его валяются в крови: идеже аще будут мертвечины, абие обретаются. 31 И отвеща Господь Бог ко Иову и рече: 32 еда суд со Всесильным укланяется? Обличаяй же Бога отвещати имать Ему. 33 Отвещав же Иов, рече Господеви: 34 почто еще аз прюся, наказуемь и обличаемь от Господа, слышай таковая ничтоже сый? Аз же кий ответ дам к сим? Руку положу на устех моих: 35 единою глаголах, вторицею же не приложу. === 40 === 1 Паки же отвещав Господь, рече ко Иову из облака: 2 ни, но препояши яко муж чресла твоя: вопрошу же тя, ты же Ми отвещай. 3 Не отвергай суда Моего: мниши ли Мя инако тебе сотворша, разве да явишися правдив? 4 Еда мышца ти есть на Господа, или гласом на Него гремиши? 5 Приими же высоту и силу, в славу же и в честь облецыся: 6 пусти же Ангелы гневом и всякаго укорителя смири, 7 величава же угаси и согной нечестивыя абие: 8 скрый же в землю вне вкупе и лица их безчестия исполни. 9 Исповем, яко может десница твоя спасти. 10 Но убо се, зверие у тебе, траву аки волове ядят: 11 се убо, крепость его на чреслех, сила же его на пупе чрева: 12 постави ошиб яко кипарис, жилы же его (яко уже) сплетены суть, 13 ребра его ребра медяна, хребет же его железо слияно. 14 Сиесть начало создания Господня: сотворен поруган быти Ангелы Его: 15 возшед же на гору стреминную, сотвори радость четвероногим в тартаре: 16 под всяким древом спит, при рогозе и тростии и ситовии: 17 осеняют же над ним древеса велика с леторасльми и ветви напольныя: 18 аще будет наводнение, не ощутит: уповает, яко внидет Иордан во уста его: 19 во око свое возмет его, ожесточився продиравит ноздри. 20 Извлечеши ли змиа удицею, или обложиши узду о ноздрех его? 21 Или вдежеши колце в ноздри его? Шилом же провертиши ли устне его? 22 Возглаголет же ли ти с молением, (или) с прошением кротко? 23 Сотворит же ли завет с тобою? Поймеши же ли его раба вечна? 24 Поиграеши же ли с ним, якоже со птицею, или свяжеши его яко врабия детищу? 25 Питаются ли же им языцы, и разделяют ли его Финикийстии народи? 26 Вся же плавающая собравшеся не подимут кожи единыя ошиба его, и корабли рыбарей главы его. 27 Возложиши же ли нань руку, воспомянув брань бывающую на теле его? И ктому да не будет. === 41 === 1 Не видел ли еси его, и глаголемым не удивился ли еси? Не убоялся ли еси, яко уготовася Ми? Кто бо есть противляяйся Мне, или кто противостанет Ми и стерпит, 2 аще вся поднебесная Моя есть? 3 Не умолчу его ради и словом силы помилую равнаго ему. 4 Кто открыет лице облечения его, в согбение же персей его кто внидет? 5 Двери лица его кто отверзет? Окрест зубов его страх, 6 утроба его щиты медяны, союз же его якоже смирит камень, 7 един ко другому прилипают, дух же не пройдет его: 8 яко муж брату своему прилепится, содержатся и не отторгнутся. 9 В чхании его возблистает свет: очи же его видение денницы. 10 Из уст его исходят аки свещы горящыя, и размещутся аки искры огненныя: 11 из ноздрей его исходит дым пещи горящия огнем углия: 12 душа же его яко углие, и яко пламы из яст его исходит.. 13 На выи же его водворяется сила, пред ним течет пагуба. 14 Плоти же телесе его сольпнушася: лиет нань, и не подвижится. 15 Сердце его ожесте аки камень, стоит же аки наковальня неподвижна. 16 Обращшуся же ему, страх зверем четвероногим по земли скачущым. 17 Аще срящут его копия, ничтоже сотворят ему, копие вонзено и броня: 18 вменяет бо железо аки плевы, медь же аки древо гнило: 19 не уязвит его лук медян, мнит бо каменометную пращу аки сено: 20 аки стеблие вменишася ему млатове, ругаетжеся трусу огненосному. 21 Ложе его остни острии, всяко же злато морское под ним, якоже брение безчисленно. 22 Возжизает бездну, якоже пещь медяну: мнит же море яко мироварницу 23 и тартар бездны якоже пленника: вменил бездну в прохождение. 24 Ничтоже есть на земли подобно ему сотворено, поругано быти Ангелы Моими: 25 все высокое зрит: сам же царь всем сущым в водах. === 42 === 1 Отвещав же Иов, рече ко Господу: 2 вем, яко вся можеши, невозможно же Тебе ничтоже. 3 Кто есть таяй от Тебе совет, щадяй же словеса и от Тебе мнится утаити? Кто же возвестит ми, ихже не ведех, велия и дивная, ихже не знах? 4 Послушай же мене, Господи, да и аз возглаголю: вопрошу же Тя, ты же мя научи: 5 слухом убо уха слышах Тя первее, ныне же око мое виде Тя: 6 темже укорих себе сам, и истаях, и мню себе землю и пепел. 7 Бысть же егда изглагола Господь вся глаголголы сия Иову, рече Господь ко Елифазу Феманитину: согрешил еси ты и оба друзие твои: не глаголасте бо предо Мною ничтоже истинно, якоже раб Мои Иов: 8 ныне же возмите седмь телцев и седмь овнов и идите ко рабу Моему Иову, и сотворит жертву о вас: Иов же раб Мой помолится о вас, понеже точию лице его прииму: аще бо не его ради, погубил бых убо вас: не глаголасте бо истины на раба Моего Иова. 9 Отиде же Елифаз Феманитин и Валдад Савхейский и Софар Минейский и сотвориша, якоже повеле им Господь. И отпусти грехи им Иова ради. 10 Господь же возрасти Иова: молящуся же ему и о друзех своих, отпусти им грехи их, и даде Господь сугубая, елика бяху прежде Иову во усугубление. 11 Услышаша же вси братия его и сестры его вся случившаяся ему, и приидоша к нему, и вси елицы знаху его первее: ядше же и пивше у него, утешиша его и дивишася о всех, яже наведе нань Бог: даде же ему кийждо агницу едину и четыре драхмы злата назнаменована. 12 Господь же благослови последняя Иовля, неже прежняя: бяху же скоти его, овец четыренадесять тысящ, велблюдов шесть тысящ, супруг волов тысяща, ослиц стадных тысяща. 13 Родишажеся ему сынове седмь и дщери три: 14 и нарече первую убо День, вторую же Кассию, третию же Амалфеев Рог: 15 и не обретошася подобны в лепоте дщерем Иовлевым в поднебесней: даде же им отец наследие в братии их. 16 Поживе же Иов по язве лет сто седмьдесят, всех же лет поживе двести четыредесять осмь. И виде Иов сыны своя и сыны сынов своих, даже до четвертаго рода. 17 И скончася Иов стар и исполнь дний. Писано же есть паки востати ему, с нимиже Господь возставит и. Тако толкуется от Сирския книги: в земли убо живый Авситидийстей, на пределех Идумеи и Аравии: прежде же бяше имя ему Иовав: взем же жену Аравляныню, роди сына, емуже имя Еннон: бе же той отца убо Зарефа, Исавовых сынов сын, матере же Восорры, якоже быти ему пятому от Авраама. И сии царие царствовавшии во Едоме, еюже и той обладаше страною: первый Валак сын Веоров, и имя граду его Деннава: по Валаце же Иовав, нарицаемый Иов: по сем Ассом бывший вождь от Феманитидийския страны: по сем Адад, сын Варадов, иже изсече Мадиама на поли Моавли, и имя граду его Гефем. Пришедшии же к нему друзие, Елифаз (сын Софань) от сынов Исавовых, царь Феманийский, Валдад (сын Амнона Ховарскаго) Савхейский властитель, Софар Минейский царь. == Псалтирь == === 1 === 1 Блажен муж, иже не иде на совет нечестивых, и на пути грешных не ста, и на седалищи губителей не седе: 2 но в законе Господни воля его, и в законе Его поучится день и нощь. 3 И будет яко древо насажденое при исходищих вод, еже плод свой даст во время свое, и лист его не отпадет: и вся, елика аще творит, успеет. 4 Не тако нечестивии, не тако: но яко прах, егоже возметает ветр от лица земли. 5 Сего ради не воскреснут нечестивии на суд, ниже грешницы в совет праведных. 6 Яко весть Господь путь праведных, и путь нечестивых погибнет. === 2 === 1 Вскую шаташася языцы, и людие поучишася тщетным? 2 Предсташа царие земстии, и князи собрашася вкупе на Господа и на Христа Его. 3 Расторгнем узы их и отвержем от нас иго их. 4 Живый на небесех посмеется им, и Господь поругается им. 5 Тогда возглаголет к ним гневом Своим и яростию Своею смятет я: 6 Аз же поставлен есмь Царь от Него над Сионом, горою святою Его, 7 возвещаяй повеление Господне. Господь рече ко Мне: Сын Мой еси Ты, Аз днесь родих Тя: 8 проси от Мене, и дам ти языки достояние Твое, и одержание Твое концы земли: 9 упасеши я жезлом железным, яко сосуды скудельничи сокрушиши я. 10 И ныне, царие, разумейте, накажитеся вси судящии земли. 11 Работайте Господеви со страхом, и радуйтеся Ему со трепетом. 12 Приимите наказание, да не когда прогневается Господь, и погибнете от пути праведнаго, егда возгорится вскоре ярость Его: блажени вси надеющиися Нань. === 3 === 1 Псалом Давиду, внегда отбегаше от лица Авессалома сына своего. 2 Господи, что ся умножиша стужающии ми? Мнози востают на мя, 3 мнози глаголют души моей: несть спасения ему в Бозе его. 4 Ты же, Господи, заступник мой еси, слава моя, и возносяй главу мою. 5 Гласом моим ко Господу воззвах, и услыша мя от горы святыя Своея. 6 Аз уснух, и спах, востах, яко Господь заступит мя. 7 Не убоюся от тем людий, окрест нападающих на мя. 8 Воскресени, Господи, спаси мя, Боже мой: яко Ты поразил еси вся враждующыя ми всуе, зубы грешников сокрушил еси. 9 Господне есть спасение, и на людех Твоих благословение Твое. === 4 === 1 В конец, в песнех, Псалом Давиду. 2 Внегда призвати ми, услыша мя Бог правды моея: в скорби распространил мя еси: ущедри мя и услыши молитву мою. 3 Сынове человечестии, доколе тяжкосердии? Вскую любите суету и ищете лжи? 4 И уведите, яко удиви Господь преподобнаго Своего. Господь услышит мя, внегда воззвати ми к Нему. 5 Гневайтеся, и не согрешайте, яже глаголете в сердцах ваших, на ложах ваших умилитеся: 6 пожрите жертву правды и уповайте на Господа. 7 Мнози глаголют: кто явит нам благая? Знаменася на нас свет лица Твоего, Господи. 8 Дал еси веселие в сердцы моем: от плода пшеницы, вина и елеа своего умножишася: 9 в мире вкупе усну и почию, яко Ты, Господи, единаго на уповании вселил мя еси. === 5 === 1 О наследствующем, Псалом Давиду. 2 Глаголы моя внуши, Господи, разумей звание мое. 3 Вонми гласу моления моего, Царю мой и Боже мой: яко к Тебе помолюся, Господи. 4 Заутра услыши глас мой: заутра предстану Ти, и узриши мя: 5 яко Бог не хотяй беззакония Ты еси: не приселится к Тебе лукавнуяй, 6 ниже пребудут беззаконницы пред очима Твоима: возненавидел еси вся делающыя беззаконие, 7 погубиши вся глаголющыя лжу: мужа кровей и льстива гнушается Господь. 8 Аз же множеством милости Твоея вниду в дом Твой, поклонюся ко храму святому Твоему, в страсе Твоем. 9 Господи, настави мя правдою Твоею, враг моих ради исправи пред Тобою путь мой. 10 Яко несть во устех их истины, сердце их суетно, гроб отверст гортань их, языки своими льщаху. 11 Суди им, Боже, да отпадут от мыслей своих: по множеству нечестия их изрини я, яко преогорчиша Тя, Господи. 12 И да возвеселятся вси уповающии на Тя, во век возрадуются, и вселишися в них: и похвалятся о Тебе любящии имя Твое. 13 Яко Ты благословиши праведника, Господи, яко оружием благоволения венчал еси нас. === 6 === 1 В конец, в песнех о осмем, псалом Давиду. 2 Господи, да не яростию Твоею обличиши мене, ниже гневом Твоим накажеши мене. 3 Помилуй мя, Господи, яко немощен есмь: изцели мя, Господи, яко смятошася кости моя, 4 и душа моя смятеся зело: и Ты, Господи, доколе? 5 Обратися, Господи, избави душу мою, спаси мя ради милости Твоея: 6 яко несть в смерти поминаяй Тебе, во аде же кто исповестся Тебе? 7 Утрудихся воздыханием моим, измыю на всяку нощь ложе мое, слезами моими постелю мою омочу. 8 Смятеся от ярости око мое, обетшах во всех вразех моих. 9 Отступите от мене, вси делающии беззаконие, яко услыша Господь глас плача моего, 10 услыша Господь моление мое, Господь молитву мою прият. 11 Да постыдятся и смятутся вси врази мои, да возвратятся и устыдятся зело вскоре. === 7 === 1 Псалом Давиду, егоже воспет Господеви о словесех Хусиевых, сына Иемениина. 2 Господи Боже мой, на Тя уповах, спаси мя от всех гонящих мя и избави мя: 3 да не когда похитит яко лев душу мою, не сущу избавляющу, ниже спасающу. 4 Господи Боже мой, аще сотворих сие, аще есть неправда в руку моею, 5 аще воздах воздающым ми зла, да отпаду убо от враг моих тощь: 6 да поженет убо враг душу мою, и да постигнет, и поперет в землю живот мой, и славу мою в персть вселит. 7 Воскресени, Господи, гневом Твоим, вознесися в концах враг Твоих, и востани, Господи Боже мой, повелением, имже заповедал еси, 8 и сонм людий обыдет Тя: и о том на высоту обратися. 9 Господь судит людем: суди ми, Господи, по правде моей и по незлобе моей на мя. 10 Да скончается злоба грешных, и исправиши праведнаго, испытаяй сердца и утробы, Боже, праведно. 11 Помощь моя от Бога, спасающаго правыя сердцем. 12 Бог судитель праведен и крепок, и долготерпелив, и не гнев наводяй на всяк день. 13 Аще не обратитеся, оружие Свое очистит, лук Свой напряже, и уготова и, 14 и в нем уготова сосуды смертныя, стрелы Своя сгараемым содела. 15 Се, боле неправдою, зачат болезнь и роди беззаконие: 16 ров изры и ископа и, и падет в яму, юже содела. 17 Обратится болезнь его на главу его, и на верх его неправда его снидет. 18 Исповемся Господеви по правде Его и пою имени Господа Вышняго. === 8 === 1 В конец, о точилех, Псалом Давиду. 2 Господи Господь наш, яко чудно имя Твое по всей земли, яко взятся великолепие Твое превыше небес. 3 Из уст младенец и ссущих совершил еси хвалу, враг Твоих ради, еже разрушити врага и местника. 4 Яко узрю небеса, дела перст Твоих, луну и звезды, яже Ты основал еси: 5 что есть человек, яко помниши его? Или сын человечь, яко посещаеши его? 6 Умалил еси его малым чим от Ангел, славою и честию венчал еси его: 7 и поставил еси его над делы руку Твоею, вся покорил еси под нозе его: 8 овцы и волы вся, еще же и скоты польския, 9 птицы небесныя и рыбы морския, преходящыя стези морския. 10 Господи Господь наш, яко чудно имя Твое по всей земли. === 9 === 1 В конец, о тайных сына, псалом Давиду. 2 Исповемся Тебе, Господи, всем сердцем моим, повем вся чудеса Твоя. 3 Возвеселюся и возрадуюся о Тебе, пою имени Твоему, Вышний. 4 Внегда возвратитися врагу моему вспять, изнемогут и погибнут от лица Твоего. 5 Яко сотворил еси суд мой и прю мою: сел еси на престоле, судяй правду. 6 Запретил еси языком, и погибе нечестивый: имя его потребил еси в век и в век века. 7 Врагу оскудеша оружия в конец, и грады разрушил еси: погибе память его с шумом. 8 И Господь во век пребывает, уготова на суд престол Свой: 9 и Той судити имать вселенней в правду, судити имать людем в правоте. 10 И бысть Господь прибежище убогому, помощник во благовремениих, в скорбех. 11 И да уповают на Тя знающии имя Твое, яко не оставил еси взыскающих Тя, Господи. 12 Пойте Господеви, живущему в Сионе, возвестите во языцех начинания Его: 13 яко взыскаяй крови их помяну, не забы звания убогих. 14 Помилуй мя, Господи, виждь смирение мое от враг моих, возносяй мя от врат смертных: 15 яко да возвещу вся хвалы Твоя во вратех дщере Сиони: возрадуемся о спасении Твоем. 16 Углебоша языцы в пагубе, юже сотвориша: в сети сей, юже скрыша, увязе нога их. 17 Знаемь есть Господь судбы творяй: в делех руку своею увязе грешник. 18 Да возвратятся грешницы во ад, вси языцы забывающии Бога. 19 Яко не до конца забвен будет нищий, терпение убогих не погибнет до конца. 20 Воскресени, Господи, да не крепится человек, да судятся языцы пред Тобою. 21 Постави, Господи, законоположителя над ними, да разумеют языцы, яко человецы суть. 22 Вскую, Господи, отстоя далече, презираеши во благовремениих, в скорбех? 23 Внегда гордитися нечестивому, возгарается нищий: увязают в советех, яже помышляют. 24 Яко хвалимь есть грешный в похотех души своея, и обидяй благословимь есть. 25 Раздражи Господа грешный: по множеству гнева своего не взыщет: несть Бога пред ним. 26 Оскверняются путие его на всяко время: отемлются судбы Твоя от лица его: всеми враги своими обладает. 27 Рече бо в сердцы своем: не подвижуся от рода в род без зла: 28 егоже клятвы уста его полна суть, и горести и льсти: под языком его труд и болезнь. 29 Приседит в ловителстве с богатыми в тайных, еже убити неповиннаго: очи его на нищаго призираете. 30 Ловит в тайне яко лев во ограде своей, ловит еже восхитити нищаго, восхитити нищаго, внегда привлещи и в сети своей. 31 Смирит его: преклонится и падет, внегда ему обладати убогими. 32 Рече бо в сердцы своем: забы Бог, отврати лице Свое, да не видит до конца. 33 Воскресени, Господи Боже мой, да вознесется рука Твоя, не забуди убогих Твоих до конца. 34 Чесо ради прогнева нечестивый Бога? Рече бо в сердцы своем: не взыщет. 35 Видиши, яко Ты болезнь и ярость смотряеши, да предан будет в руце Твои: тебе оставлен есть нищий, сиру Ты буди помощник. 36 Сокруши мышцу грешному и лукавому: взыщется грех его и не обрящется. 37 Господь царь во век и в век века: погибнете, языцы, от земли Его. 38 Желание убогих услышал еси, Господи, уготованию сердца их внят ухо Твое. 39 Суди сиру и смирену, да не приложит ктому величатися человек на земли. === 10 === 1 В конец, псалом Давиду. На Господа уповах, како речете души моей: превитай по горам, яко птица? 2 Яко се, грешницы налякоша лук, уготоваша стрелы в туле, состреляти во мраце правыя сердцем. 3 Зане яже Ты совершил еси, они разрушиша: праведник же что сотвори? 4 Господь во храме святем Своем. Господь, на небеси престол Его: очи Его на нищаго призираете, вежди Его испытаете сыны человеческия. 5 Господь испытает праведнаго и нечестиваго: любяй же неправду ненавидит свою душу. 6 Одождит на грешники сети: огнь и жупел, и дух бурен часть чаши их. 7 Яко праведен Господь и правды возлюби: правоты виде лице Его. === 11 === 1 В конец, о осмей, псалом Давиду. 2 Спаси мя, Господи, яко оскуде преподобный: яко умалишася истины от сынов человеческих. 3 Суетная глагола кийждо ко искреннему своему: устне льстивыя в сердцы, и в сердцы глаголаша злая. 4 Потребит Господь вся устны льстивыя, язык велеречивый, 5 рекшыя: язык наш возвеличим, устны наша при нас суть: кто нам господь есть? 6 Страсти ради нищих и воздыхания убогих ныне воскресну, глаголет Господь: положуся во спасение, не обинюся о нем. 7 Словеса Господня словеса чиста, сребро разжжено, искушено земли, очищено седмерицею. 8 Ты, Господи, сохраниши ны и соблюдеши ны от рода сего и во век. 9 Окрест нечестивии ходят: по высоте твоей умножил еси сыны человеческия. === 12 === 1 В конец, псалом Давиду. 2 Доколе, Господи, забудеши мя до конца? Доколе отвращаеши лице Твое от мене? 3 Доколе положу советы в души моей, болезни в сердцы моем день и нощь? Доколе вознесется враг мой на мя? 4 Призри, услыши мя, Господи Боже мой: просвети очи мои, да не когда усну в смерть: 5 да не когда речет враг мой: укрепихся на него. 6 Стужающии ми возрадуются, аще подвижуся. 7 Аз же на милость Твою уповах: возрадуется сердце мое о спасении Твоем: воспою Господеви благодеявшему мне и пою имени Господа Вышняго. === 13 === 1 Рече безумен в сердцы своем: несть Бог. Растлеша и омерзишася в начинаниих: несть творяй благостыню. 2 Господь с небесе приниче на сыны человеческия, видети, аще есть разумеваяй, или взыскаяй Бога. 3 Вси уклонишася, вкупе неключими быша: несть творяй благостыню, несть до единаго. 4 Ни ли уразумеют вси делающии беззаконие, снедающии люди моя в снедь хлеба? Господа не призваша. 5 Тамо убояшася страха, идеже не бе страх: яко Господь в роде праведных. 6 Совет нищаго посрамисте: Господь же упование его есть. 7 Кто даст от Сиона спасение Израилево? 8 Внегда возвратит Господь пленение людий Своих, возрадуется Иаков, и возвеселится Израиль. === 14 === 1 Господи, кто обитает в жилищи Твоем? Или кто вселится во святую гору Твою? 2 Ходяй непорочен и делаяй правду, глаголяй истину в сердцы своем: 3 иже не ульсти языком своим и не сотвори искреннему своему зла, и поношения не прият на ближния своя: 4 уничижен есть пред ним лукавнуяй, боящыяжеся Господа славит: кленыйся искреннему своему и не отметаяся: 5 сребра своего не даде в лихву и мзды на неповинных не прият. Творяй сия не подвижится во век. === 15 === 1 Сохрани мя, Господи, яко на Тя уповах. 2 Рех Господеви: Господь мой еси Ты, яко благих моих не требуеши. 3 Святым, иже суть на земли его, удиви Господь вся хотения Своя в них. 4 Умножишася немощи их, по сих ускориша: не соберу соборы их от кровей, ни помяну же имен их устнама моима. 5 Господь часть достояния моего и чаши моея: Ты еси устрояяй достояние мое мне. 6 Ужя нападоша ми в державных моих: ибо достояние мое державно есть мне. 7 Благословлю Господа вразумившаго мя: еще же и до нощи наказаша мя утробы моя. 8 Предзрех Господа предо мною выну, яко одесную мене есть, да не подвижуся. 9 Сего ради возвеселися сердце мое, и возрадовася язык мой: еще же и плоть моя вселится на уповании. 10 Яко не оставиши душу мою во аде, ниже даси преподобному Твоему видети истления. 11 Сказал ми еси пути живота: исполниши мя веселия с лицем Твоим: красота в деснице Твоей в конец. === 16 === 1 Молитва Давиду. Услыши, Господи, правду мою, вонми молению моему, внуши молитву мою не во устнах льстивых. 2 От лица Твоего судба моя изыдет: очи мои да видита правоты. 3 Искусил еси сердце мое, посетил еси нощию: искусил мя еси, и не обретеся во мне неправда. 4 Яко да не возглаголют уста моя дел человеческих, за словеса устен Твоих аз сохраних пути жестоки. 5 Соверши стопы моя во стезях Твоих, да не подвижутся стопы моя. 6 Аз воззвах, яко услышал мя еси, Боже: приклони ухо Твое мне и услыши глаголы моя. 7 Удиви милости Твоя, спасаяй уповающыя на Тя от противящихся деснице Твоей: 8 сохрани мя, Господи, яко зеницу ока: в крове крилу Твоею покрыеши мя 9 от лица нечестивых острастших мя: врази мои душу мою одержаша 10 тук свой затвориша, уста их глаголаша гордыню. 11 Изгонящии мя ныне обыдоша мя, очи свои возложиша уклонити на землю. 12 Объяша мя яко лев готов на лов и яко скимен обитаяй в тайных. 13 Воскресени, Господи, предвари я и запни им: избави душу мою от нечестиваго, оружие Твое 14 от враг руки Твоея, Господи, от малых от земли: раздели я в животе их, и сокровенных Твоих исполнися чрево их: насытишася сынов, и оставиша останки младенцем своим. 15 Аз же правдою явлюся лицу Твоему, насыщуся, внегда явитимися славе Твоей. === 17 === 1 В конец, отроку Господню Давиду, яже глагола Господеви словеса песни сея, в день, в оньже избави его Господь от руки всех враг его и из руки Саули: и рече: 2 возлюблю Тя, Господи, крепосте моя: 3 Господь утверждение мое, и прибежище мое, и Избавитель мой, Бог мой, Помощник мой, и уповаю на Него: Защититель мой, и рог спасения моего, и Заступник мой. 4 Хваля призову Господа и от враг моих спасуся. 5 Одержаша мя болезни смертныя, и потоцы беззакония смятоша мя: 6 болезни адовы обыдоша мя, предвариша мя сети смертныя. 7 И внегда скорбети ми, призвах Господа и к Богу моему воззвах: услыша от храма святаго Своего глас мой, и вопль мой пред Ним внидет во ушы Его. 8 И подвижеся и трепетна бысть земля, и основания гор смятошася и подвигошася, яко прогневася на ня Бог. 9 Взыде дым гневом Его, и огнь от лица Его воспламенится: углие возгореся от Него. 10 И приклони небеса и сниде, и мрак под ногама Его. 11 И взыде на Херувимы и лете, лете на крилу ветреню. 12 И положи тму закров Свой: окрест Его селение Его: темна вода во облацех воздушных. 13 От облистания пред Ним облацы проидоша, град и углие огненное. 14 И возгреме с небесе Господь, и Вышний даде глас Свой. 15 Низпосла стрелы и разгна я, и молнии умножи и смяте я. 16 И явишася источницы воднии, и открышася основания вселенныя от запрещения Твоего, Господи, от дохновения духа гнева Твоего. 17 Низпосла с высоты и прият мя, восприят мя от вод многих. 18 Избавит мя от врагов моих сильных и от ненавидящих мя: яко утвердишася паче мене. 19 Предвариша мя в день озлобления моего: и бысть Господь утверждение мое. 20 И изведе мя на широту: избавит мя, яко восхоте мя. 21 И воздаст ми Господь по правде моей, и по чистоте руку моею воздаст ми, 22 яко сохраних пути Господни и не нечествовах от Бога моего. 23 Яко вся судбы Его предо мною, и оправдания Его не отступиша от мене. 24 И буду непорочен с Ним и сохранюся от беззакония моего. 25 И воздаст ми Господь по правде моей и по чистоте руку моею пред очима Его. 26 С преподобным преподобн будеши, и с мужем неповинным неповинен будеши, 27 и со избранным избран будеши, и со строптивым развратишися. 28 Яко Ты люди смиренныя спасеши и очи гордых смириши. 29 Яко Ты просветиши светилник мой, Господи: Боже мой, просветиши тму мою. 30 Яко Тобою избавлюся от искушения, и Богом моим прейду стену. 31 Бог мой, непорочен путь Его: словеса Господня разжжена. Защититель есть всех уповающих на Него. 32 Яко кто Бог, разве Господа? Или кто Бог, разве Бога нашего? 33 Бог препоясуяй мя силою, и положи непорочен путь мой: 34 совершаяй нозе мои яко елени, и на высоких поставляяй мя: 35 научаяй руце мои на брань, и положил еси лук медян мышца моя: 36 и дал ми еси защищение спасения, и десница Твоя восприят мя: и наказание Твое исправит мя в конец, и наказание Твое то мя научит. 37 Уширил еси стопы моя подо мною, и не изнемогосте плесне мои. 38 Пожену враги моя, и постигну я, и не возвращуся, дондеже скончаются: 39 оскорблю их, и не возмогут стати, падут под ногама моима. 40 И препоясал мя еси силою на брань, спял еси вся востающыя на мя под мя. 41 И врагов моих дал ми еси хребет и ненавидящыя мя потребил еси. 42 Воззваша, и не бе спасаяй: ко Господу, и не услыша их. 43 И истню я яко прах пред лицем ветра, яко брение путий поглажду я. 44 Избавиши мя от пререкания людий: поставиши мя во главу языков: людие, ихже не ведех, работаша ми, 45 в слух уха послушаша мя. Сынове чуждии солгаша ми, 46 сынове чуждии обетшаша и охромоша от стезь своих. 47 Жив Господь, и благословен Бог, и да вознесется Бог спасения моего, 48 Бог даяй отмщение мне и покоривый люди под мя, 49 избавитель мой от враг моих гневливых: от востающих на мя вознесеши мя, от мужа неправедна избавиши мя. 50 Сего ради исповемся Тебе во языцех, Господи, и имени Твоему пою: 51 величаяй спасения царева и творяй милость христу Своему Давиду и семени его до века. === 18 === 1 В конец, псалом Давиду. 2 Небеса поведают славу Божию, творение же руку Его возвещает твердь. 3 День дни отрыгает глагол, и нощь нощи возвещает разум. 4 Не суть речи, ниже словеса, ихже не слышатся гласи их. 5 Во всю землю изыде вещание их, и в концы вселенныя глаголы их: в солнце положи селение свое: 6 и той яко жених исходяй от чертога своего, возрадуется яко исполин тещи путь. 7 От края небесе исход его, и сретение его до края небесе: и несть, иже укрыется теплоты его. 8 Закон Господень непорочен, обращаяй душы: свидетелство Господне верно, умудряющее младенцы. 9 Оправдания Господня права, веселящая сердце: заповедь Господня светла, просвещающая очи. 10 Страх Господень чист, пребываяй в век века: судбы Господни истинны, оправданны вкупе, 11 вожделенны паче злата и камене честна многа, и слаждшя паче меда и сота. 12 Ибо раб Твой хранит я: внегда сохранити я, воздаяние много. 13 Грехопадения кто разумеет? От тайных моих очести мя, 14 и от чуждих пощади раба Твоего: аще не обладают мною, тогда непорочен буду, и очищуся от греха велика. 15 И будут во благоволение словеса уст моих, и поучение сердца моего пред Тобою выну, Господи, помощниче мой и Избавителю мой. === 19 === 1 В конец, псалом Давиду. 2 Услышит тя Господь в день печали, защитит тя имя Бога Иаковля. 3 Послет ти помощь от Святаго, и от Сиона заступит тя. 4 Помянет всяку жертву твою, и всесожжение твое тучно буди. 5 Даст ти Господь по сердцу твоему, и весь совет твой исполнит. 6 Возрадуемся о спасении твоем, и во имя Господа Бога нашего возвеличимся: исполнит Господь вся прошения твоя. 7 Ныне познах, яко спасе Господь Христа Своего: услышит его с небесе святаго Своего: в силах спасение десницы его. 8 Сии на колесницах, и сии на конех: мы же во имя Господа Бога нашего призовем. 9 Тии спяти быша и падоша: мы же востахом и исправихомся. 10 Господи, спаси царя, и услыши ны, в оньже аще день призовем Тя. === 20 === 1 Псалом Давиду. 2 Господи, силою Твоею возвеселится царь, и о спасении Твоем возрадуется зело. 3 Желание сердца его дал еси ему, и хотения устну его неси лишил его. 4 Яко предварил еси его благословением благостынным, положил еси на главе его венец от камене честна. 5 Живота просил есть у Тебе, и дал еси ему долготу дний во век века. 6 Велия слава его спасением Твоим: славу и велелепие возложиши на него. 7 Яко даси ему благословение во век века: возвеселиши его радостию с лицем Твоим. 8 Яко царь уповает на Господа, и милостию Вышняго не подвижится. 9 Да обрящется рука Твоя всем врагом Твоим, десница Твоя да обрящет вся ненавидящыя Тебе. 10 Яко положиши их яко пещь огненную во время лица Твоего: Господь гневом Своим смятет я, и снесть их огнь. 11 Плод их от земли погубиши, и семя их от сынов человеческих. 12 Яко уклониша на Тя злая, помыслиша советы, ихже не возмогут составити. 13 Яко положиши я хребет: во избытцех Твоих уготовиши лице их. 14 Вознесися, Господи, силою Твоею: воспоем и поем силы Твоя. === 21 === 1 В конец, о заступлении утреннем, псалом Давиду. 2 Боже, Боже мой, вонми ми, вскую оставил мя еси? Далече от спасения моего словеса грехопадений моих. 3 Боже мой, воззову во дни, и не услышиши, и в нощи, и не в безумие мне. 4 Ты же во Святем живеши, хвало Израилева. 5 На Тя уповаша отцы наши: уповаша, и избавил еси я: 6 к Тебе воззваша, и спасошася: на Тя уповаша, и не постыдешася. 7 Аз же есмь червь, а не человек, поношение человеков и уничижение людий. 8 Вси видящии мя поругашамися, глаголаша устнами, покиваша главою: 9 упова на Господа, да избавит его, да спасет его, яко хощет его. 10 Яко Ты еси исторгий мя из чрева, упование мое от сосцу матере моея. 11 К Тебе привержен есмь от ложесн, от чрева матере моея Бог мой еси Ты. 12 Да не отступиши от мене, яко скорбь близ, яко несть помогаяй ми. 13 Обыдоша мя телцы мнози, юнцы тучнии одержаша мя: 14 отверзоша на мя уста своя, яко лев восхищаяй и рыкаяй. 15 Яко вода излияхся, и разсыпашася вся кости моя: бысть сердце мое яко воск таяй посреде чрева моего. 16 Изсше яко скудель крепость моя, и язык мой прильпе гортани моему, и в персть смерти свел мя еси. 17 Яко обыдоша мя пси мнози, сонм лукавых одержаша мя: ископаша руце мои и нозе мои. 18 Изчетоша вся кости моя: тии же смотриша и презреша мя. 19 Разделиша ризы моя себе, и о одежди моей меташа жребий. 20 Ты же, Господи, не удали помощь твою от мене: на заступление мое вонми. 21 Избави от оружия душу мою, и из руки песии единородную мою. 22 Спаси мя от уст львовых, и от рог единорожь смирение мое. 23 Повем имя Твое братии моей, посреде церкве воспою Тя. 24 Боящиися Господа, восхвалите Его, все семя Иаковле, прославите Его, да убоится же от Него все семя Израилево: 25 яко не уничижи, ниже негодова молитвы нищаго, ниже отврати лице Свое от мене, и егда воззвах к Нему, услыша мя. 26 От Тебе похвала моя, в церкви велицей исповемся Тебе: молитвы моя воздам пред боящимися Его. 27 Ядят убозии, и насытятся, и восхвалят Господа взыскающии Его: жива будут сердца их в век века. 28 Помянутся и обратятся ко Господу вси концы земли, и поклонятся пред Ним вся отечествия язык: 29 яко Господне есть царствие, и Той обладает языки. 30 Ядоша и поклонишася вси тучнии земли: пред Ним припадут вси низходящии в землю: и душа моя тому живет. 31 И семя мое поработает Ему: возвестит Господеви род грядущий: 32 и возвестят правду Его людем рождшымся, яже сотвори Господь. === 22 === 1 Господь пасет мя, и ничтоже мя лишит. 2 На месте злачне, тамо всели мя, на воде покойне воспита мя. 3 Душу мою обрати, настави мя на стези правды, имене ради Своего. 4 Аще бо и пойду посреде сени смертныя, не убоюся зла, яко Ты со мною еси: жезл Твой и палица Твоя, та мя утешиста. 5 Уготовал еси предо мною трапезу сопротив стужающым мне: умастил еси елеом главу мою, и чаша твоя упоявающи мя, яко державна. 6 И милость Твоя поженет мя вся дни живота моего, и еже вселитимися в дом Господень в долготу дний. === 23 === 1 Господня земля, и исполнение ея, вселенная и вси живущии на ней. 2 Той на морях основал ю есть и на реках уготовал ю есть. 3 Кто взыдет на гору Господню? Или кто станет на месте святем Его? 4 Неповинен рукама и чист сердцем, иже не прият всуе душу свою и не клятся лестию искреннему своему: 5 сей приимет благословение от Господа и милостыню от Бога Спаса своего. 6 Сей род ищущих Господа, ищущих лице Бога Иаковля. 7 Возмите врата князи ваша, и возмитеся врата вечная: и внидет Царь славы. 8 Кто есть сей Царь славы? Господь крепок и силен, Господь силен в брани. 9 Возмите врата князи ваша, и возмитеся врата вечная: и внидет Царь славы. 10 Кто есть сей Царь славы? Господь сил, Той есть царь славы. === 24 === 1 К Тебе, Господи, воздвигох душу мою, Боже мой, на Тя уповах, да не постыжуся во век, ниже да посмеютмися врази мои: 2 ибо вси терпящии Тя не постыдятся. 3 Да постыдятся беззаконнующии вотще. 4 Пути Твоя, Господи, скажи ми и стезям Твоим научи мя. 5 Настави мя на истину Твою и научи мя: яко Ты еси Бог спас мой, и Тебе терпех весь день. 6 Помяни щедроты Твоя, Господи, и милости Твоя, яко от века суть. 7 Грех юности моея и неведения моего не помяни: по милости Твоей помяни мя Ты, ради благости Твоея, Господи. 8 Благ и прав Господь, сего ради законоположит согрешающым на пути. 9 Наставит кроткия на суд, научит кроткия путем Своим. 10 Вси путие Господни милость и истина, взыскающым завета Его и свидения Его. 11 Ради имене Твоего, Господи, и очести грех мой, мног бо есть. 12 Кто есть человек бояйся Господа? Законоположит ему на пути, егоже изволи. 13 Душа его во благих водворится, и семя его наследит землю. 14 Держава Господь боящихся Его, и завет Его явит им. 15 Очи мои выну ко Господу, яко Той исторгнет от сети нозе мои. 16 Призри на мя и помилуй мя, яко единород и нищь есмь аз. 17 Скорби сердца моего умножишася, от нужд моих изведи мя. 18 Виждь смирение мое и труд мой, и остави вся грехи моя. 19 Виждь враги моя, яко умножишася, и ненавидением неправедным возненавидеша мя. 20 Сохрани душу мою и избави мя, да не постыжуся, яко уповах на Тя. 21 Незлобивии и правии прилепляхуся мне, яко потерпех Тя, Господи. 22 Избави, Боже, Израиля от всех скорбей его. === 25 === 1 Суди ми, Господи, яко аз незлобою моею ходих: и на Господа уповая не изнемогу. 2 Искуси мя, Господи, и испытай мя, разжжи утробы моя и сердце мое. 3 Яко милость Твоя пред очима моима есть, и благоугодих во истине Твоей. 4 Не седох с сонмом суетным, и со законопреступными не вниду. 5 Возненавидех церковь лукавнующих, и с нечестивыми не сяду. 6 Умыю в неповинных руце мои, и обыду жертвенник Твой, Господи, 7 еже услышати ми глас хвалы Твоея и поведати вся чудеса Твоя. 8 Господи, возлюбих благолепие дому Твоего и место селения славы Твоея. 9 Да не погубиши с нечестивыми душу мою и с мужи кровей живот мой, 10 ихже в руку беззакония, десница их исполнися мзды. 11 Аз же незлобою моею ходих: избави мя, Господи, и помилуй мя. 12 Нога моя ста на правоте: в церквах благословлю Тя, Господи. === 26 === 1 Господь просвещение мое и спаситель мой, кого убоюся? Господь защититель живота моего, от кого устрашуся? 2 Внегда приближатися на мя злобующым, еже снести плоти моя, оскорбляющии мя и врази мои, тии изнемогоша и падоша. 3 Аще ополчится на мя полк, не убоится сердце мое: аще востанет на мя брань, на него аз уповаю. 4 Едино просих от Господа, то взыщу: еже жити ми в дому Господни вся дни живота моего, зрети ми красоту Господню и посещати храм Святый Его. 5 Яко скры мя в селении Своем в день зол моих, покры мя в тайне селения Своего, на камень вознесе мя. 6 И ныне се, вознесе главу мою на враги моя: обыдох и пожрох в селении Его жертву хваления и воскликновения: пою и воспою Господеви. 7 Услыши, Господи, глас мой, имже воззвах, помилуй мя и услыши мя. 8 Тебе рече сердце мое: Господа взыщу, взыска Тебе лице мое, лица Твоего, Господи, взыщу. 9 Не отврати лица Твоего от мене и не уклонися гневом от раба Твоего: помощник мой буди, не отрини мене и не остави мене, Боже, Спасителю мой. 10 Яко отец мой и мати моя остависта мя, Господь же восприят мя. 11 Законоположи ми, Господи, в пути Твоем, и настави мя на стезю правую враг моих ради. 12 Не предаждь мене в душы стужающих ми: яко восташа на мя свидетеле неправеднии, и солга неправда себе. 13 Верую видети благая Господня на земли живых. 14 Потерпи Господа, мужайся, и да крепится сердце твое, и потерпи Господа. === 27 === 1 К Тебе, Господи, воззову, Боже мой: да не премолчиши от мене: да не когда премолчиши от мене, и уподоблюся низходящым в ров. 2 Услыши, Господи, глас моления моего, внегда молитимися к Тебе, внегда воздети ми руце мои ко храму святому Твоему. 3 Не привлецы мене со грешники, и с делающими неправду не погуби мене, глаголющими мир с ближними своими, злая же в сердцах своих. 4 Даждь им, Господи, по делом их и по лукавству начинаний их, по делом руку их даждь им, воздаждь воздаяние их им. 5 Яко не разумеша в дела Господня и в дела руку Его: разориши я и не созиждеши я. 6 Благословен Господь, яко услыша глас моления моего. 7 Господь помощник мой и защититель мой: на Него упова сердце мое, и поможе ми, и процвете плоть моя: и волею моею исповемся Ему. 8 Господь утверждение людий Своих и защититель спасений Христа Своего есть. 9 Спаси люди Твоя, и благослови достояние Твое, и упаси я, и возми я до века. === 28 === 1 Принесите Господеви, сынове Божии, принесите Господеви сыны овни, принесите Господеви славу и честь: 2 принесите Господеви славу имени Его: поклонитеся Господеви во дворе святем Его. 3 Глас Господень на водах, Бог славы возгреме, Господь на водах многих. 4 Глас Господень в крепости, глас Господень в великолепии. 5 Глас Господа, сокрушающаго кедры: и стрыет Господь кедры Ливанския, 6 и истнит я яко телца Ливанска: и возлюбленный яко сын единорожь. 7 Глас Господа, пресецающаго пламень огня. 8 Глас Господа, стрясающаго пустыню: и стрясет Господь пустыню Каддийскую. 9 Глас Господень, свершающий елени, и открыет дубравы: и в храме Его всякий глаголет славу. 10 Господь потоп населяет, и сядет Господь царь в век. 11 Господь крепость людем Своим даст, Господь благословит люди Своя миром. === 29 === 1 Псалом песни обновления дому Давидова. 2 Вознесу Тя, Господи, яко подял мя еси, и не возвеселил еси врагов моих о мне. 3 Господи Боже мой, воззвах к Тебе, и изцелил мя еси. 4 Господи, возвел еси от ада душу мою, спасл мя еси от низходящих в ров. 5 Пойте Господеви, преподобнии Его, и исповедайте память святыни Его: 6 яко гнев в ярости Его, и живот в воли Его: вечер водворится плачь, и заутра радость. 7 Аз же рех во обилии моем: не подвижуся во век. 8 Господи, волею Твоею подаждь доброте моей силу: отвратил же еси лице Твое, и бых смущен. 9 К Тебе, Господи, воззову, и к Богу моему помолюся. 10 Кая польза в крови моей, внегда сходити ми во истление? Еда исповестся Тебе персть? Или возвестит истину Твою? 11 Слыша Господь и помилова мя: Господь бысть помощник мой. 12 Обратил еси плачь мой в радость мне, растерзал еси вретище мое и препоясал мя еси веселием, 13 яко да воспоет Тебе слава моя, и не умилюся. Господи Боже мой, во век исповемся Тебе. === 30 === 1 В конец, псалом Давиду, изступления. 2 На Тя, Господи, уповах, да не постыжуся во век: правдою Твоею избави мя и изми мя. 3 Приклони ко мне ухо Твое, ускори изяти мя: буди ми в Бога защитителя и в дом прибежища, еже спасти мя. 4 Яко держава моя и прибежище мое еси Ты: и имене Твоего ради наставиши мя и препитаеши мя. 5 Изведеши мя от сети сея, юже скрыша ми: яко Ты еси защититель мой, Господи. 6 В руце Твои предложу дух мой: избавил мя еси, Господи Боже истины. 7 Возненавидел еси хранящыя суеты вотще: аз же на Господа уповах. 8 Возрадуюся и возвеселюся о милости Твоей, яко призрел еси на смирение мое, спасл еси от нужд душу мою 9 и неси мене затворил в руках вражиих, поставил еси на пространне нозе мои. 10 Помилуй мя, Господи, яко скорблю: смятеся яростию око мое, душа моя и утроба моя. 11 Яко изчезе в болезни живот мой, и лета моя в воздыханиих: изнеможе нищетою крепость моя, и кости моя смятошася. 12 От всех враг моих бых поношение, и соседом моим зело, и страх знаемым моим: видящии мя вон бежаша от мене. 13 Забвен бых яко мертв от сердца: бых яко сосуд погублен. 14 Яко слышах гаждение многих живущих окрест: внегда собратися им вкупе на мя, прияти душу мою совещаша. 15 Аз же на Тя, Господи, уповах, рех: Ты еси Бог мой. 16 В руку Твоею жребии мои: избави мя из руки враг моих и от гонящих мя. 17 Просвети лице Твое на раба Твоего: спаси мя милостию Твоею. 18 Господи, да не постыжуся, яко призвах Тя: да постыдятся нечестивии, и снидут во ад. 19 Немы да будут устны льстивыя, глаголющыя на праведнаго беззаконие, гордынею и уничижением. 20 Коль многое множество благости Твоея, Господи, юже скрыл еси боящымся Тебе, соделал еси уповающым на Тя, пред сыны человеческими: 21 скрыеши их в тайне лица Твоего от мятежа человеческа, покрыеши их в крове от пререкания язык. 22 Благословен Господь, яко удиви милость Свою во граде ограждения. 23 Аз же рех во изступлении моем: отвержен есмь от лица очию Твоею: сего ради услышал еси глас молитвы моея, внегда воззвах к Тебе. 24 Возлюбите Господа, вси преподобнии Его: яко истины взыскает Господь и воздает излише творящым гордыню. 25 Мужайтеся, и да крепится сердце ваше, вси уповающии на Господа. === 31 === 1 Блажени, ихже оставишася беззакония, и ихже прикрышася греси. 2 Блажен муж, емуже не вменит Господь греха, ниже есть во устех его лесть. 3 Яко умолчах, обетшаша кости моя, от еже звати ми весь день, 4 яко день и нощь отяготе на мне рука Твоя: возвратихся на страсть, егда унзе ми терн. 5 Беззаконие мое познах и греха моего не покрых, рех: исповем на мя беззаконие мое Господеви: и Ты оставил еси нечестие сердца моего. 6 За то помолится к Тебе всяк преподобный во время благопотребно: обаче в потопе вод многих к нему не приближатся. 7 Ты еси прибежище мое от скорби обдержащия мя: радосте моя, избави мя от обышедших мя. 8 Вразумлю тя, и наставлю тя на путь сей, в оньже пойдеши: утвержу на тя очи Мои. 9 Не будите яко конь и меск, имже несть разума: броздами и уздою челюсти их востягнеши, не приближающихся к тебе. 10 Многи раны грешному: уповающаго же на Господа милость обыдет. 11 Веселитеся о Господе и радуйтеся праведнии, и хвалитеся, вси правии сердцем. === 32 === 1 Радуйтеся, праведнии, о Господе: правым подобает похвала. 2 Исповедайтеся Господеви в гуслех, во псалтири десятоструннем пойте Ему: 3 воспойте Ему песнь нову, добре пойте Ему со восклицанием: 4 яко право слово Господне, и вся дела Его в вере. 5 Любит милостыню и суд Господь, милости Господни исполнь земля. 6 Словом Господним небеса утвердишася, и духом уст Его вся сила их: 7 собираяй яко мех воды морския, полагаяй в сокровищих бездны. 8 Да убоится Господа вся земля, от Негоже да подвижутся вси живущии по вселенней: 9 яко Той рече, и быша: Той повеле, и создашася. 10 Господь разоряет советы языков, отметает же мысли людий и отметает советы князей. 11 Совет же Господень во век пребывает, помышления сердца Его в род и род. 12 Блажен язык, емуже есть Господь Бог Его, людие, яже избра в наследие Себе. 13 С небесе призре Господь, виде вся сыны человеческия: 14 от готоваго жилища Своего призре на вся живущыя на земли: 15 создавый на едине сердца их, разумеваяй на вся дела их. 16 Не спасается царь многою силою, и исполин не спасется множеством крепости своея. 17 Ложь конь во спасение, во множестве же силы своея не спасется. 18 Се, очи Господни на боящыяся Его, уповающыя на милость Его: 19 избавити от смерти душы их, и препитати я в глад. 20 Душа же наша чает Господа, яко помощник и защититель наш есть: 21 яко о Нем возвеселится сердце наше, и во имя святое Его уповахом. 22 Буди, Господи, милость Твоя на нас, якоже уповахом на Тя. === 33 === 1 Псалом Давиду, внегда измени лице свое пред Авимелехом: и отпусти его, и отиде. 2 Благословлю Господа на всякое время, выну хвала Его во устех моих. 3 О Господе похвалится душа моя: да услышат кротцыи и возвеселятся. 4 Возвеличите Господа со мною, и вознесем имя Его вкупе. 5 Взысках Господа, и услыша мя и от всех скорбей моих избави мя. 6 Приступите к Нему и просветитеся, и лица ваша не постыдятся. 7 Сей нищий воззва, и Господь услыша и, и от всех скорбей его спасе и. 8 Ополчится Ангел Господень окрест боящихся Его и избавит их. 9 Вкусите и видите, яко благ Господь: блажен муж, иже уповает Нань. 10 Бойтеся Господа, вси святии Его, яко несть лишения боящымся Его. 11 Богатии обнищаша и взалкаша: взыскающии же Господа не лишатся всякаго блага. 12 Приидите, чада, послушайте мене, страху Господню научу вас. 13 Кто есть человек хотяй живот, любяй дни видети благи? 14 Удержи язык твой от зла и устне твои, еже не глаголати льсти. 15 Уклонися от зла и сотвори благо: взыщи мира и пожени и. 16 Очи Господни на праведныя, и уши Его в молитву их. 17 Лице же Господне на творящыя злая, еже потребити от земли память их. 18 Воззваша праведнии, и Господь услыша их и от всех скорбей их избави их. 19 Близ Господь сокрушенных сердцем, и смиренныя духом спасет. 20 Многи скорби праведным, и от всех их избавит я Господь. 21 Хранит Господь вся кости их, ни едина от них сокрушится. 22 Смерть грешников люта, и ненавидящии праведнаго прегрешат. 23 Избавит Господь душы раб Своих, и не прегрешат вси уповающии на Него. === 34 === 1 Суди, Господи, обидящыя мя, побори борющыя мя. 2 Приими оружие и щит и востани в помощь мою: 3 изсуни мечь и заключи сопротив гонящих мя: рцы души моей: спасение твое есмь Аз. 4 Да постыдятся и посрамятся ищущии душу мою, да возвратятся вспять и постыдятся мыслящии ми злая. 5 Да будут яко прах пред лицем ветра, и Ангел Господень оскорбляя их: 6 да будет путь их тма и ползок, и Ангел Господень погоняяй их: 7 яко туне скрыша ми пагубу сети своея, всуе поносиша души моей. 8 Да приидет ему сеть, юже не весть, и ловитва, юже скры, да обымет и, и в сеть да впадет в ню. 9 Душа же моя возрадуется о Господе, возвеселится о спасении Его. 10 Вся кости моя рекут: Господи, Господи, кто подобен Тебе? Избавляяй нища из руки крепльших его, и нища, и убога от расхищающих его. 11 Воставше на мя свидетеле неправеднии, яже не ведях, вопрошаху мя. 12 Воздаша ми лукавая воз благая, и безчадие души моей. 13 Аз же, внегда они стужаху ми, облачахся во вретище и смирях постом душу мою, и молитва моя в недро мое возвратится. 14 Яко ближнему, яко брату нашему, тако угождах: яко плачя и сетуя, тако смиряхся. 15 И на мя возвеселишася и собрашася: собрашася на мя раны, и не познах: разделишася, и не умилишася. 16 Искусиша мя, подражниша мя подражнением, поскрежеташа на мя зубы своими. 17 Господи, когда узриши? Устрой душу мою от злодейства их, от лев единородную мою. 18 Исповемся Тебе в церкви мнозе, в людех тяжцех восхвалю Тя. 19 Да не возрадуются о мне враждующии ми неправедно, ненавидящии мя туне и помизающии очима: 20 яко мне убо мирная глаголаху, и на гнев лести помышляху. 21 Разшириша на мя уста своя, реша: благоже, благоже, видеша очи наши. 22 Видел еси, Господи, да не премолчиши: Господи, не отступи от мене. 23 Востани, Господи, и вонми суду моему, Боже мой и Господи мой, на прю мою. 24 Суди ми, Господи, по правде Твоей, Господи Боже мой, и да не возрадуются о мне. 25 Да не рекут в сердцах своих: благоже, благоже души нашей: ниже да рекут: пожрохом его. 26 Да постыдятся и посрамятся вкупе радующиися злом моим: да облекутся в студ и срам велеречующии на мя. 27 Да возрадуются и возвеселятся хотящии правды моея: и да рекут выну, да возвеличится Господь, хотящии мира рабу Его. 28 И язык мой поучится правде Твоей, весь день хвале Твоей. === 35 === 1 В конец, отроку Господню Давиду. 2 Глаголет пребеззаконный согрешати в себе: несть страха Божия пред очима его: 3 яко ульсти пред ним обрести беззаконие свое, и возненавидети. 4 Глаголы уст его беззаконие и лесть: не восхоте разумети еже ублажити. 5 Беззаконие помысли на ложи своем: предста всякому пути неблагу, о злобе же не негодова. 6 Господи, на небеси милость Твоя, и истина Твоя до облак: 7 правда Твоя яко горы Божия, судбы Твоя бездна многа: человеки и скоты спасеши, Господи. 8 Яко умножил еси милость Твою, Боже: сынове же человечестии в крове крилу Твоею надеятися имут. 9 Упиются от тука дому Твоего, и потоком сладости Твоея напоиши я. 10 Яко у Тебе источник живота, во свете Твоем узрим свет. 11 Пробави милость Твою ведущым Тя и правду Твою правым сердцем. 12 Да не приидет мне нога гордыни, и рука грешнича да не подвижит мене. 13 Тамо падоша вси делающии беззаконие: изриновени быша, и не возмогут стати. === 36 === 1 Не ревнуй лукавнующым, ниже завиди творящым беззаконие. 2 Зане яко трава скоро изсшут, и яко зелие злака скоро отпадут. 3 Уповай на Господа и твори благостыню: и насели землю, и упасешися в богатстве ея. 4 Насладися Господеви, и даст ти прошения сердца твоего. 5 Открый ко Господу путь твой и уповай на Него, и Той сотворит. 6 И изведет яко свет правду твою и судбу твою яко полудне. 7 Повинися Господеви и умоли Его. Не ревнуй спеющему в пути своем, человеку творящему законопреступление. 8 Престани от гнева и остави ярость: не ревнуй, еже лукавновати, 9 зане лукавнующии потребятся, терпящии же Господа, тии наследят землю. 10 И еще мало, и не будет грешника: и взыщеши место его и не обрящеши. 11 Кротцыи же наследят землю и насладятся о множестве мира. 12 Назирает грешный праведнаго и поскрежещет нань зубы своими: 13 Господь же посмеется ему, зане прозирает, яко приидет день его. 14 Мечь извлекоша грешницы, напрягоша лук свой, низложити убога и нища, заклати правыя сердцем. 15 Мечь их да внидет в сердца их, и луцы их да сокрушатся. 16 Лучше малое праведнику, паче богатства грешных многа. 17 Зане мышцы грешных сокрушатся, утверждает же праведныя Господь. 18 Весть Господь пути непорочных, и достояние их в век будет. 19 Не постыдятся во время лютое и во днех глада насытятся, яко грешницы погибнут. 20 Врази же Господни, купно прославитися им и вознестися, изчезающе яко дым изчезоша. 21 Заемлет грешный и не возвратит: праведный же щедрит и дает. 22 Яко благословящии Его наследят землю, кленущии же Его потребятся. 23 От Господа стопы человеку исправляются, и пути Его восхощет зело. 24 Егда падет, не разбиется, яко Господь подкрепляет руку его. 25 Юнейший бых, ибо состарехся, и не видех праведника оставлена, ниже семене его просяща хлебы. 26 Весь день милует и взаим дает праведный, и семя его во благословение будет. 27 Уклонися от зла и сотвори благо, и вселися в век века. 28 Яко Господь любит суд и не оставит преподобных Своих: во век сохранятся: беззаконницы же изженутся, и семя нечестивых потребится. 29 Праведницы же наследят землю и вселятся в век века на ней. 30 Уста праведнаго поучатся премудрости, и язык его возглаголет суд. 31 Закон Бога его сердцы его, и не запнутся стопы его. 32 Сматряет грешный праведнаго и ищет еже умертвити его: 33 Господь же не оставит его в руку его, ниже осудит его, егда судит ему. 34 Потерпи Господа и сохрани путь Его, и вознесет тя еже наследити землю: внегда потреблятися грешником, узриши. 35 Видех нечестиваго превозносящася и высящася яко кедры Ливанския: 36 и мимо идох, и се, не бе, и взысках его, и не обретеся место его. 37 Храни незлобие и виждь правоту, яко есть останок человеку мирну. 38 Беззаконницы же потребятся вкупе: останцы же нечестивых потребятся. 39 Спасение же праведных от Господа, и защититель их есть во время скорби: 40 и поможет им Господь и избавит их, и измет их от грешник и спасет их, яко уповаша на Него. === 37 === 1 Псалом Давиду, в воспоминание о субботе. 2 Господи, да не яростию Твоею обличиши мене, ниже гневом Твоим накажеши мене: 3 яко стрелы Твоя унзоша во мне, и утвердил еси на мне руку Твою. 4 Несть изцеления в плоти моей от лица гнева Твоего, несть мира в костех моих от лица грех моих. 5 Яко беззакония моя превзыдоша главу мою, яко бремя тяжкое отяготеша на мне. 6 Возсмердеша и согниша раны моя, от лица безумия моего. 7 Пострадах и слякохся до конца, весь день сетуя хождах: 8 яко лядвия моя наполнишася поруганий, и несть изцеления в плоти моей. 9 Озлоблен бых и смирихся до зела, рыках от воздыхания сердца моего. 10 Господи, пред Тобою все желание мое, и воздыхание мое от Тебе не утаися. 11 Сердце мое смятеся, остави мя сила моя, и свет очию моею, и той несть со мною. 12 Друзи мои и искреннии мои прямо мне приближишася и сташа. 13 И ближнии мои отдалече мене сташа, и нуждахуся ищущии душу мою: и ищущии злая мне глаголаху суетная, и льстивным весь день поучахуся. 14 Аз же яко глух не слышах, и яко нем не отверзаяй уст своих: 15 и бых яко человек не слышай и не имый во устех своих обличения. 16 Яко на Тя, Господи, уповах, Ты услышиши, Господи Боже мой. 17 Яко рех: да не когда порадуютмися врази мои: и внегда подвижатися ногам моим, на мя велеречеваша. 18 Яко аз на раны готов, и болезнь моя предо мною есть выну. 19 Яко беззаконие мое аз возвещу и попекуся о гресе моем. 20 Врази же мои живут и укрепишася паче мене, и умножишася ненавидящии мя без правды: 21 воздающии ми злая воз благая оболгаху мя, зане гонях благостыню. 22 Не остави мене, Господи Боже мой, не отступи от мене: 23 вонми в помощь мою, Господи спасения моего. === 38 === 1 В конец, Идифуму, песнь Давиду. 2 Рех: сохраню пути моя, еже не согрешати ми языком моим: положих устом моим хранило, внегда востати грешному предо мною. 3 Онемех и смирихся, и умолчах от благ, и болезнь моя обновися. 4 Согреяся сердце мое во мне, и в поучении моем разгорится огнь: глаголах языком моим: 5 скажи ми, Господи, кончину мою и число дний моих, кое есть, да разумею, что лишаюся аз. 6 Се, пяди положил еси дни моя, и состав мой яко ничтоже пред Тобою: обаче всяческая суета всяк человек живый. 7 Убо образом ходит человек, обаче всуе мятется: сокровищствует, и не весть, кому соберет я. 8 И ныне кто терпение мое? Не Господь ли? И состав мой от Тебе есть. 9 От всех беззаконий моих избави мя: поношение безумному дал мя еси. 10 Онемех и не отверзох уст моих, яко Ты сотворил еси. 11 Отстави от мене раны Твоя: от крепости бо руки Твоея аз изчезох. 12 Во обличениих о беззаконии наказал еси человека, и истаял еси яко паучину душу его: обаче всуе всяк человек. 13 Услыши молитву мою, Господи, и моление мое внуши, слез моих не премолчи: яко преселник аз есмь у Тебе и пришлец, якоже вси отцы мои. 14 Ослаби ми, да почию, прежде даже не отиду, и ктому не буду. === 39 === 1 В конец, псалом Давиду. 2 Терпя потерпех Господа, и внят ми и услыша молитву мою: 3 и возведе мя от рова страстей и от брения тины, и постави на камени нозе мои и исправи стопы моя: 4 и вложи во уста моя песнь нову, пение Богу нашему. Узрят мнози и убоятся, и уповают на Господа. 5 Блажен муж, емуже есть имя Господне упование его, и не призре в суеты и неистовления ложная. 6 Многа сотворил еси Ты, Господи Боже мой, чудеса Твоя, и помышлением Твоим несть кто уподобится Тебе: возвестих и глаголах: умножишася паче числа. 7 Жертвы и приношения не восхотел еси, тело же свершил ми еси: всесожжений и о гресе не взыскал еси. 8 Тогда рех: се, прииду: в главизне книжне писано есть о мне: 9 еже сотворити волю Твою, Боже мой, восхотех, и закон Твой посреде чрева моего. 10 Благовестих правду в церкви велицей, се, устнам моим не возбраню: Господи, Ты разумел еси. 11 Правду Твою не скрых в сердцы моем, истину Твою и спасение Твое рех, не скрых милость Твою и истину Твою от сонма многа. 12 Ты же, Господи, не удали щедрот Твоих от мене: милость Твоя и истина Твоя выну да заступите мя. 13 Яко одержаша мя злая, имже несть числа: постигоша мя беззакония моя, и не возмогох зрети: умножишася паче влас главы моея, и сердце мое остави мя. 14 Благоволи, Господи, избавити мя: Господи, во еже помощи ми, вонми. 15 Да постыдятся и посрамятся вкупе ищущии душу мою, изяти ю: да возвратятся вспять и постыдятся хотящии ми злая. 16 Да приимут абие студ свой глаголющии ми: благоже, благоже. 17 Да возрадуются и возвеселятся о Тебе вси ищущии Тебе, Господи, и да рекут выну, да возвеличится Господь, любящии спасение Твое. 18 Аз же нищь есмь и убог, Господь попечется о мне: помощник мой и защититель мой еси ты, Боже мой, не закосни. === 40 === 1 В конец, псалом Давиду. 2 Блажен разумеваяй на нища и убога, в день лют избавит его Господь. 3 Господь да сохранит его и живит его, и да ублажит его на земли и да не предаст его в руки врагов его. 4 Господь да поможет ему на одре болезни его: все ложе его обратил еси в болезни его. 5 Аз рех: Господи, помилуй мя, изцели душу мою, яко согреших Ти. 6 Врази мои реша мне злая: когда умрет, и погибнет имя его? 7 И вхождаше видети, всуе глаголаше сердце его: собра беззаконие себе, исхождаше вон и глаголаше вкупе. 8 На мя шептаху вси врази мои, на мя помышляху злая мне. 9 Слово законопреступное возложиша на мя: еда спяй не приложит воскреснути? 10 Ибо человек мира моего, на негоже уповах, ядый хлебы моя, возвеличи на мя запинание. 11 Ты же, Господи, помилуй мя и возстави мя, и воздам им. 12 В сем познах, яко восхотел мя еси, яко не возрадуется враг мой о мне. 13 Мене же за незлобие приял, и утвердил мя еси пред Тобою в век. 14 Благословен Господь Бог Израилев от века и до века: буди, буди. === 41 === 1 В конец, в разум сынов Кореовых, псалом Давиду. 2 Имже образом желает елень на источники водныя, сице желает душа моя к Тебе, Боже. 3 Возжада душа моя к Богу крепкому, живому: когда прииду и явлюся лицу Божию? 4 Быша слезы моя мне хлеб день и нощь, внегда глаголатися мне на всяк день: где есть Бог твой? 5 Сия помянух, и излиях на мя душу мою: яко пройду в место селения дивна, даже до дому Божия, во гласе радования и исповедания, шума празднующаго. 6 Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего и Бог мой. 7 Ко мне самому душа моя смятеся: сего ради помянух Тя от земли Иордански и Ермониимски, от горы Малыя. 8 Бездна бездну призывает во гласе хлябий Твоих: вся высоты Твоя и волны Твоя на мне преидоша. 9 В день заповесть Господь милость Свою, и нощию песнь Его от мене, молитва Богу живота моего. 10 Реку Богу: заступник мой еси, почто мя забыл еси? И вскую сетуя хожду, внегда оскорбляет враг? 11 Внегда сокрушатися костем моим, поношаху ми врази мои, внегда глаголати им мне на всяк день: где есть Бог твой? 12 Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего и Бог мой. === 42 === 1 Суди ми, Боже, и разсуди прю мою: от языка не преподобна, от человека неправедна и льстива избави мя. 2 Зане Ты еси, Боже, крепость моя, вскую отринул мя еси? И вскую сетуя хожду, внегда оскорбляет враг? 3 Посли свет Твой и истину Твою: та мя настависта, и введоста мя в гору святую Твою и в селения Твоя. 4 И вниду к жертвеннику Божию, к Богу веселящему юность мою: исповемся Тебе в гуслех, Боже, Боже мой. 5 Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего и Бог мой. === 43 === 1 В конец, сынов Кореовых, в разум, псалом. 2 Боже, ушима нашима услышахом, и отцы наши возвестиша нам дело, еже соделал еси во днех их, во днех древних. 3 Рука Твоя языки потреби, и насадил я еси: озлобил еси люди и изгнал еси я. 4 Не бо мечем своим наследиша землю, и мышца их не спасе их, но десница Твоя и мышца Твоя и просвещение лица Твоего, яко благоволил еси в них. 5 Ты еси сам Царь мой и Бог мой, заповедаяй спасения Иаковля. 6 О Тебе враги нашя избодем роги, и о имени Твоем уничижим востающыя на ны. 7 Не на лук бо мой уповаю, и мечь мой не спасет мене: 8 спасл бо еси нас от стужающих нам, и ненавидящих нас посрамил еси. 9 О Бозе похвалимся весь день, и о имени Твоем исповемыся во век. 10 Ныне же отринул еси и посрамил еси нас, и не изыдеши, Боже, в силах наших. 11 Возвратил еси нас вспять при вразех наших, и ненавидящии нас расхищаху себе. 12 Дал еси нас яко овцы снеди, и во языцех разсеял ны еси. 13 Отдал еси люди Твоя без цены, и не бе множество в восклицаниих наших. 14 Положил еси нас поношение соседом нашым, подражнение и поругание сущым окрест нас. 15 Положил еси нас в притчу во языцех, покиванию главы в людех. 16 Весь день срам мой предо мною есть, и студ лица моего покры мя, 17 от гласа поношающаго и оклеветающаго, от лица вражия и изгонящаго. 18 Сия вся приидоша на ны, и не забыхом Тебе, и не неправдовахом в завете Твоем, 19 и не отступи вспять сердце наше: и уклонил еси стези нашя от пути Твоего, 20 яко смирил еси нас на месте озлобления, и прикры ны сень смертная. 21 Аще забыхом имя Бога нашего, и аще воздехом руки нашя к богу чуждему, 22 не Бог ли взыщет сих? Той бо весть тайная сердца. 23 Зане Тебе ради умерщвляемся весь день, вменихомся яко овцы заколения. 24 Востани, вскую спиши, Господи? Воскресени, и не отрини до конца. 25 Вскую лице Твое отвращаеши? Забываеши нищету нашу и скорбь нашу? 26 Яко смирися в персть душа наша, прильпе земли утроба наша. 27 Воскресени, Господи, помози нам, и избави нас имене ради Твоего. === 44 === 1 В конец, о изменяемых сыном Кореовым в разум, песнь о возлюбленнем. 2 Отрыгну сердце мое слово благо, глаголю аз дела моя Цареви: язык мой трость книжника скорописца. 3 Красен добротою паче сынов человеческих, излияся благодать во устнах Твоих: сего ради благослови Тя Бог во век. 4 Препояши мечь Твой по бедре Твоей, Сильне, 5 красотою Твоею и добротою Твоею: и наляцы, и успевай, и царствуй истины ради и кротости и правды: и наставит Тя дивно десница Твоя. 6 Стрелы Твоя изощрены, Сильне: людие под Тобою падут в сердцы враг Царевых. 7 Престол Твой, Боже, в век века: жезл правости жезл царствия Твоего. 8 Возлюбил еси правду и возненавидел еси беззаконие: сего ради помаза Тя, Боже, Бог Твой елеем радости паче причастник Твоих. 9 Смирна и стакти и касиа от риз Твоих, от тяжестей слоновых, из нихже возвеселиша Тя. 10 Дщери царей в чести Твоей: предста царица одесную Тебе, в ризах позлащенных одеяна преиспещрена. 11 Слыши, дщи, и виждь, и приклони ухо твое, и забуди люди твоя и дом отца твоего: 12 и возжелает Царь доброты твоея, зане Той есть Господь твой, и поклонишися Ему, 13 и дщи Тирова с дары: лицу Твоему помолятся богатии людстии. 14 Вся слава дщере Царевы внутрь: рясны златыми одеяна и преиспещрена. 15 Приведутся Царю девы вслед ея, искренния ея приведутся Тебе: 16 приведутся в веселии и радовании, введутся в храм Царев. 17 Вместо отец Твоих быша сынове Твои: поставиши я князи по всей земли. 18 Помяну имя Твое во всяком роде и роде: сего ради людие исповедятся Тебе в век и во век века. === 45 === 1 В конец, о сынех Кореовых, о тайных, псалом. 2 Бог нам прибежище и сила, помощник в скорбех обретших ны зело. 3 Сего ради не убоимся, внегда смущается земля, и прелагаются горы в сердца морская. 4 Возшумеша и смятошася воды их, смятошася горы крепостию его. 5 Речная устремления веселят град Божий: освятил есть селение свое Вышний. 6 Бог посреде его, и не подвижится: поможет ему Бог утро заутра. 7 Смятошася языцы, уклонишася царствия: даде глас Свой Вышний, подвижеся земля. 8 Господь сил с нами, заступник наш Бог Иаковль. 9 Приидите и видите дела Божия, яже положи чудеса на земли: 10 отемля брани до конец земли, лук сокрушит и сломит оружие, и щиты сожжет огнем. 11 Упразднитеся и разумейте, яко Аз есмь Бог: вознесуся во языцех, вознесуся на земли. 12 Господь сил с нами, заступник наш Бог Иаковль. === 46 === 1 В конец, о сынех Кореовых, псалом. 2 Вси языцы, восплещите руками, воскликните Богу гласом радования: 3 яко Господь Вышний страшен, Царь велий по всей земли: 4 покори люди нам и языки под ноги наша: 5 избра нам достояния свое, доброту Иаковлю, юже возлюби. 6 Взыде Бог в воскликновении, Господь во гласе трубне. 7 Пойте Богу нашему, пойте: пойте Цареви нашему, пойте. 8 Яко Царь всея земли Бог, пойте разумно. 9 Воцарися Бог над языки: Бог седит на престоле святем Своем. 10 Князи людстии собрашася с Богом Авраамлим: яко Божии державнии земли зело вознесошася. === 47 === 1 Псалом песни сынов Кореовых, вторыя субботы. 2 Велий Господь и хвален зело во граде Бога нашего, в горе святей Его, 3 благокоренным радованием всея земли: горы Сионския, ребра северова, град Царя великаго. 4 Бог в тяжестех его знаемь есть, егда заступает и. 5 Яко се, царие земстии собрашася, снидошася вкупе: 6 тии видевше тако, удивишася, смятошася, подвигошася: 7 трепет прият я тамо, болезни яко раждающия. 8 Духом бурным сокрушиши корабли Фарсийския. 9 Якоже слышахом, тако и видехом во граде Господа сил, во граде Бога нашего: Бог основа и в век. 10 Прияхом, Боже, милость Твою посреде людий Твоих. 11 По имени Твоему, Боже, тако и хвала Твоя на концах земли: правды исполнь десница Твоя. 12 Да возвеселится гора Сионская, и да возрадуются дщери Иудейския, судеб ради Твоих, Господи. 13 Обыдите Сион и обымите его, поведите в столпех его: 14 положите сердца ваша в силу его, и разделите домы его, яко да повесте в роде инем. 15 Яко Той есть Бог наш во век и в век века: Той упасет нас во веки. === 48 === 1 В конец, сыном Кореовым, псалом. 2 Услышите сия, вси языцы, внушите, вси живущии по вселенней, 3 земнороднии же и сынове человечестии, вкупе богат и убог. 4 Уста моя возглаголют премудрость, и поучение сердца моего разум. 5 Приклоню в притчу ухо мое, отверзу во псалтири ганание мое. 6 Вскую боюся в день лют? Беззаконие пяты моея обыдет мя. 7 Надеющиися на силу свою и о множестве богатства своего хвалящиися: 8 брат не избавит, избавит ли человек? Не даст Богу измены за ся, 9 и цену избавления души своея: и утрудися в век, 10 и жив будет до конца, не узрит пагубы. 11 Егда увидит премудрыя умирающыя, вкупе безумен и несмыслен погибнут, и оставят чуждим богатство свое. 12 И гроби их жилища их во век, селения их в род и род, нарекоша имена своя на землях. 13 И человек в чести сый не разуме, приложися скотом несмысленным и уподобися им. 14 Сей путь их соблазн им, и по сих во устех своих благоволят. 15 Яко овцы во аде положени суть, смерть упасет я: и обладают ими правии заутра, и помощь их обетшает во аде: от славы своея изриновени быша. 16 Обаче Бог избавит душу мою из руки адовы, егда приемлет мя. 17 Не убойся, егда разбогатеет человек, или егда умножится слава дому его: 18 яко внегда умрети ему, не возмет вся, ниже снидет с ним слава его. 19 Яко душа его в животе его благословится, исповестся тебе, егда благосотвориши ему. 20 Внидет даже до рода отец своих, даже до века не узрит света. 21 И человек в чести сый не разуме, приложися скотом несмысленным и уподобися им. === 49 === 1 Бог Богов Господь глагола, и призва землю от восток солнца до запад. 2 От Сиона благолепие красоты Его: 3 Бог яве приидет, Бог наш, и не премолчит: огнь пред Ним возгорится, и окрест Его буря зелна. 4 Призовет небо свыше, и землю, разсудити люди Своя. 5 Соберите Ему преподобныя Его, завещающыя завет Его о жертвах. 6 И возвестят небеса правду Его: яко Бог судия есть. 7 Услышите, людие Мои, и возглаголю вам, Израилю, и засвидетелствую тебе: Бог, Бог твой есмь Аз. 8 Не о жертвах твоих обличу тя, всесожжения же твоя предо Мною суть выну: 9 не прииму от дому твоего телцев, ниже от стад твоих козлов. 10 Яко Мои суть вси зверие дубравнии, скоти в горах и волове: 11 познах вся птицы небесныя, и красота селная со Мною есть. 12 Аще взалчу, не реку тебе: Моя бо есть вселенная и исполнение ея. 13 Еда ям мяса юнча? Или кровь козлов пию? 14 Пожри Богови жертву хвалы и воздаждь Вышнему молитвы твоя: 15 и призови Мя в день скорби твоея, и изму тя, и прославиши Мя. 16 Грешнику же рече Бог: вскую ты поведаеши оправдания Моя и восприемлеши завет Мой усты твоими? 17 Ты же возненавидел еси наказание и отвергл еси словеса Моя вспять. 18 Аще видел еси татя, текл еси с ним, и с прелюбодеем участие твое полагал еси: 19 уста твоя умножиша злобу, и язык твой сплеташе льщения: 20 седя на брата твоего клеветал еси и на сына матере твоея полагал еси соблазн. 21 Сия сотворил еси, и умолчах, вознепщевал еси беззаконие, яко буду тебе подобен: обличу тя и представлю пред лицем твоим грехи твоя. 22 Разумейте убо сия, забывающии Бога, да не когда похитит, и не будет избавляяй. 23 Жертва хвалы прославит Мя, и тамо путь, имже явлю ему спасение Мое. === 50 === 1 В конец, псалом Давиду, внегда внити к нему Нафану пророку, 2 егда вниде к Вирсавии жене Уриеве. 3 Помилуй мя, Боже, по велицей милости Твоей, и по множеству щедрот Твоих очисти беззаконие мое. 4 Наипаче омый мя от беззакония моего и от греха моего очисти мя: 5 яко беззаконие мое аз знаю, и грех мой предо мною есть выну. 6 Тебе единому согреших и лукавое пред Тобою сотворих: яко да оправдишися во словесех Твоих и победиши, внегда судити Ти. 7 Се бо, в беззакониих зачат есмь, и во гресех роди мя мати моя. 8 Се бо, истину возлюбил еси, безвестная и тайная премудрости Твоея явил ми еси. 9 Окропиши мя иссопом, и очищуся: омыеши мя, и паче снега убелюся. 10 Слуху моему даси радость и веселие: возрадуются кости смиренныя. 11 Отврати лице Твое от грех моих и вся беззакония моя очисти. 12 Сердце чисто созижди во мне, Боже, и дух прав обнови во утробе моей. 13 Не отвержи мене от лица Твоего и Духа Твоего Святаго не отими от мене. 14 Воздаждь ми радость спасения Твоего и Духом владычним утверди мя. 15 Научу беззаконныя путем Твоим, и нечестивии к Тебе обратятся. 16 Избави мя от кровей, Боже, Боже спасения моего: возрадуется язык мой правде Твоей. 17 Господи, устне мои отверзеши, и уста моя возвестят хвалу Твою. 18 Яко аще бы восхотел еси жертвы, дал бых убо: всесожжения не благоволиши. 19 Жертва Богу дух сокрушен: сердце сокрушенно и смиренно Бог не уничижит. 20 Ублажи, Господи, благоволением Твоим Сиона, и да созиждутся стены Иерусалимския: 21 тогда благоволиши жертву правды, возношение и всесожегаемая: тогда возложат на олтарь Твой телцы. === 51 === 1 В конец, разума Давиду, 2 внегда приити Доику Идумейску, и возвестити Саулу, и рещи ему: прииде Давид в дом Авимелехов. 3 Что хвалишися во злобе, сильне? Беззаконие весь день. 4 Неправду умысли язык твой: яко бритву изощрену сотворил еси лесть. 5 Возлюбил еси злобу паче благостыни, неправду неже глаголати правду: 6 возлюбил еси вся глаголы потопныя, язык льстив. 7 Сего ради Бог разрушит тя до конца: восторгнет тя, и преселит тя от селения твоего и корень твой от земли живых. 8 Узрят праведнии и убоятся, и о нем возсмеются и рекут: 9 се, человек, иже не положи Бога помощника себе, но упова на множество богатства своего, и возможе суетою своею. 10 Аз же яко маслина плодовита в дому Божии: уповах на милость Божию во век и в век века. 11 Исповемся Тебе в век, яко сотворил еси: и терплю имя Твое, яко благо пред преподобными Твоими. === 52 === 1 В конец, о Маелефе, разума Давиду. 2 Рече безумен в сердцы своем: несть Бог. Растлеша и омерзишася в беззакониих, несть творяй благое. 3 Бог с небесе приниче на сыны человеческия, видети, аще есть разумеваяй или взыскаяй Бога. 4 Вси уклонишася, вкупе непотребни быша: несть творяй благое, несть до единаго. 5 Ни ли уразумеют вси делающии беззаконие, снедающии люди моя в снедь хлеба? Господа не призваша. 6 Тамо устрашишася страха, идеже не бе страх: яко Бог разсыпа кости человекоугодников: постыдешася, яко Бог уничижи их. 7 Кто даст от Сиона спасение Израилево? Внегда возвратит Бог пленение людий Своих, возрадуется Иаков и возвеселится Израиль. === 53 === 1 В конец, в песнех разума Давиду, 2 внегда приити Зифеем и рещи Саулови: не се ли, Давид скрыся в нас? 3 Боже, во имя Твое спаси мя и в силе Твоей суди ми. 4 Боже, услыши молитву мою, внуши глаголы уст моих: 5 яко чуждии восташа на мя, и крепцыи взыскаша душу мою, и не предложиша Бога пред собою. 6 Се бо, Бог помогает ми, и Господь заступник души моей: 7 отвратит злая врагом моим: истиною Твоею потреби их. 8 Волею пожру Тебе, исповемся имени Твоему, Господи, яко благо: 9 яко от всякия печали избавил мя еси, и на враги моя воззре око мое. === 54 === 1 В конец, в песнех разума, Асафу, псалом. 2 Внуши, Боже, молитву мою и не презри моления моего: 3 вонми ми и услыши мя: возскорбех печалию моею, и смятохся 4 от гласа вражия и от стужения грешнича: яко уклониша на мя беззаконие и во гневе враждоваху ми. 5 Сердце мое смятеся во мне, и боязнь смерти нападе на мя: 6 страх и трепет прииде на мя, и покры мя тма. 7 И рех: кто даст ми криле яко голубине? И полещу, и почию. 8 Се, удалихся бегая и водворихся в пустыни. 9 Чаях Бога спасающаго мя от малодушия и от бури. 10 Потопи, Господи, и раздели языки их: яко видех беззаконие и пререкание во граде. 11 Днем и нощию обыдет и по стенам его: беззаконие и труд посреде его, и неправда: 12 и не оскуде от стогн его лихва и лесть. 13 Яко аще бы враг поносил ми, претерпел бых убо: и аще бы ненавидяй мя на мя велеречевал, укрылбыхся от него. 14 Ты же, человече равнодушне, владыко мой и знаемый мой, 15 иже купно наслаждался еси со мною брашен: в дому Божии ходихом единомышлением. 16 Да приидет же смерть на ня, и да снидут во ад живи: яко лукавство в жилищих их, посреде их. 17 Аз к Богу воззвах, и Господь услыша мя. 18 Вечер и заутра и полудне повем и возвещу, и услышит глас мой. 19 Избавит миром душу мою от приближающихся мне: яко во мнозе бяху со мною. 20 Услышит Бог, и смирит я сый прежде век: несть бо им изменения, яко не убояшася Бога. 21 Простре руку свою на воздаяние: оскверниша завет Его. 22 Разделишася от гнева лица Его, и приближишася сердца их: умякнуша словеса их паче елеа, и та суть стрелы. 23 Возверзи на Господа печаль твою, и Той тя препитает: не даст в век молвы праведнику. 24 Ты же, Боже, низведеши их в студенец истления: мужие кровей и льсти не преполовят дний своих. Аз же, Господи, уповаю на Тя. === 55 === 1 В конец, о людех от святых удаленых, Давиду в столпописание, внегда удержаша и иноплеменницы в Гефе, псалом. 2 Помилуй мя, Боже, яко попра мя человек: весь день боря стужи ми. 3 Попраша мя врази мои весь день: яко мнози борющии мя с высоты. 4 В день не убоюся, аз же уповаю на Тя. 5 О Бозе похвалю словеса Моя: на Бога уповах, не убоюся: что сотворит мне плоть? 6 Весь день словес моих гнушахуся: на мя вся помышления их на зло. 7 Вселятся и скрыют, тии пяту мою сохранят, якоже потерпеша душу мою. 8 Ни о чесомже отринеши я, гневом люди низведеши. 9 Боже, живот мой возвестих Тебе: положил еси слезы моя пред Тобою, яко и во обетовании Твоем. 10 Да возвратятся врази мои вспять, в оньже аще день призову Тя: се, познах, яко Бог мой еси Ты. 11 О Бозе похвалю глаголгол, о Господе похвалю слово. 12 На Бога уповах, не убоюся: что сотворит мне человек? 13 Во мне, Боже, молитвы, яже воздам хвалы Твоея: 14 яко избавил еси душу мою от смерти, очи мои от слез и нозе мои от поползновения: благоугожду пред Господем во свете живых. === 56 === 1 В конец, да не растлиши, Давиду в столпописание, внегда ему отбегати от лица Саулова в пещеру. 2 Помилуй мя, Боже, помилуй мя: яко на Тя упова душа моя, и на сень крилу Твоею надеюся, дондеже прейдет беззаконие. 3 Воззову к Богу Вышнему, Богу благодеявшему мне. 4 Посла с небесе и спасе мя, даде в поношение попирающыя мя: посла Бог милость Свою и истину Свою, 5 и избави душу мою от среды скимнов. Поспах смущен: сынове человечестии, зубы их оружия и стрелы, и язык их мечь остр. 6 Вознесися на небеса, Боже, и по всей земли слава Твоя. 7 Сеть уготоваша ногам моим, и слякоша душу мою: ископаша пред лицем моим яму, и впадоша в ню. 8 Готово сердце мое, Боже, готово сердце мое: воспою и пою во славе моей. 9 Востани, слава моя, востани, псалтирю и гусли: востану рано. 10 Исповемся Тебе в людех, Господи, воспою Тебе во языцех: 11 яко возвеличися до небес милость Твоя и даже до облак истина Твоя. 12 Вознесися на небеса, Боже, и по всей земли слава Твоя. === 57 === 1 В конец, да не растлиши, Давиду в столпописание. 2 Аще воистинну убо правду глаголете, правая судите, сынове человечестии. 3 Ибо в сердцы беззаконие делаете на земли, неправду руки вашя сплетают. 4 Очуждишася грешницы от ложесн, заблудиша от чрева, глаголаша лжу. 5 Ярость их по подобию змиину, яко аспида глуха и затыкающаго уши свои, 6 иже не услышит гласа обавающих, обаваемь обавается от премудра. 7 Бог сокрушит зубы их во устех их: членовныя львов сокрушил есть Господь. 8 Уничижатся яко вода мимотекущая: напряжет лук свой, дондеже изнемогут. 9 Яко воск растаяв отимутся: паде огнь на них, и не видеша солнца. 10 Прежде еже разумети терния вашего рамна, яко живы, яко во гневе пожрет я. 11 Возвеселится праведник, егда увидит отмщение: руце свои умыет в крови грешника. 12 И речет человек: аще убо есть плод праведнику, убо есть Бог судя им на земли. === 58 === 1 В конец, да не растлиши, Давиду в столпописание, внегда посла Саул и стреже дом его, еже умертвити его. 2 Изми мя от враг моих, Боже, и от востающих на мя избави мя: 3 избави мя от делающих беззаконие, и от муж кровей спаси мя. 4 Яко се, уловиша душу мою, нападоша на мя крепцыи: ниже беззаконие мое, ниже грех мой, Господи: 5 без беззакония текох и исправих: востани в сретение мое и виждь. 6 И Ты, Господи Боже сил, Боже Израилев, вонми посетити вся языки: да не ущедриши вся делающыя беззаконие. 7 Возвратятся на вечер, и взалчут яко пес, и обыдут град. 8 Се, тии отвещают усты своими, и мечь во устнах их: яко кто слыша? 9 И Ты, Господи, посмеешися им, уничижиши вся языки. 10 Державу мою к Тебе сохраню: яко Ты, Боже, заступник мой еси. 11 Бог мой, милость Его предварит мя: Бог мой, явит мне на вразех моих. 12 Не убий их, да не когда забудут закон Твой: расточи я силою Твоею и низведи я, защитниче мой, Господи, 13 грех уст их, слово устен их: и яти да будут в гордыни своей, и от клятвы и лжи возвестятся в кончине, 14 во гневе кончины, и не будут: и уведят, яко Бог владычествует Иаковом и концы земли. 15 Возвратятся на вечер, и взалчут яко пес, и обыдут град: 16 тии разыдутся ясти: аще ли же не насытятся, и поропщут. 17 Аз же воспою силу Твою и возрадуюся заутра о милости Твоей: яко был еси заступник мой и прибежище мое в день скорби моея. 18 Помощник мой еси, Тебе пою: яко Бог заступник мой еси, Боже мой, милость моя. === 59 === 1 В конец, о изменитися хотящих, в столпописание Давиду, в научение: 2 внегда сожже Средоречие Сирийское и Сирию Совалскую, и возвратися Иоав и порази Едома в дебри Солей дванадесять тысящ. 3 Боже, отринул ны еси и низложил еси нас, разгневался еси и ущедрил еси нас. 4 Стрясл еси землю и смутил еси ю: изцели сокрушение ея, яко подвижеся. 5 Показал еси людем Твоим жестокая: напоил еси нас вином умиления. 6 Дал еси боящымся Тебе знамение, еже убежати от лица лука. 7 Яко да избавятся возлюбленнии Твои, спаси десницею Твоею и услыши мя. 8 Бог возглагола во святем Своем: возрадуюся, и разделю Сикиму, и юдоль Жилищ размерю. 9 Мой есть Галаад, и Мой есть Манассий, Ефрем крепость главы Моея, Иуда царь Мой. 10 Моав коноб упования Моего: на Идумею простру сапог Мой: Мне иноплеменницы покоришася. 11 Кто введет мя во град ограждения? Или кто наставит мя до Идумеи? 12 Не Ты ли, Боже, отринувый нас? И не изыдеши, Боже, в силах наших? 13 Даждь нам помощь от скорби: и суетно спасение человеческо. 14 О Бозе сотворим силу: и Той уничижит стужающыя нам. === 60 === 1 В конец, в песнех, Давиду Псалом. 2 Услыши, Боже, моление мое, вонми молитве моей: 3 от конец земли к Тебе воззвах, внегда уны сердце мое: на камень вознесл мя еси, наставил мя еси, 4 яко был еси упование мое, столп крепости от лица вражия. 5 Вселюся в селении Твоем во веки, покрыюся в крове крил Твоих. 6 Яко Ты, Боже, услышал еси молитвы моя, дал еси достояние боящымся имене Твоего. 7 Дни на дни царевы приложиши, лета его до дне рода и рода. 8 Пребудет в век пред Богом: милость и истину его кто взыщет? 9 Тако воспою имени Твоему во веки, воздати ми молитвы моя день от дне. === 61 === 1 В конец, о Идифуме, псалом Давиду. 2 Не Богу ли повинется душа моя? От Того бо спасение мое. 3 Ибо Той Бог мой и спас мой, заступник мой: не подвижуся наипаче. 4 Доколе належите на человека? Убиваете вси вы, яко стене преклонене и оплоту возриновену. 5 Обаче цену мою совещаша отринути, текоша в жажди: усты своими благословляху, и сердцем своим кленяху. 6 Обаче Богови повинися, душе моя: яко от Того терпение мое. 7 Ибо Той Бог мой и спас мой, заступник мой: не преселюся. 8 О Бозе спасение мое и слава моя: Бог помощи моея, и упование мое на Бога. 9 Уповайте на Него, весь сонм людий: излияйте пред Ним сердца ваша, яко Бог помощник наш. 10 Обаче суетни сынове человечестии, лживи сынове человечестии в мерилех еже неправдовати: тии от суеты вкупе. 11 Не уповайте на неправду, и на восхищение не желайте: богатство аще течет, не прилагайте сердца. 12 Единою глагола Бог, двоя сия слышах, зане держава Божия, 13 и Твоя, Господи, милость: яко Ты воздаси комуждо по делом его. === 62 === 1 Псалом Давиду, внегда быти ему в пустыни Иудейстей. 2 Боже, Боже мой, к Тебе утренюю: возжада Тебе душа моя, коль множицею Тебе плоть моя, в земли пусте и непроходне и безводне. 3 Тако во святем явихся Тебе, видети силу Твою и славу Твою. 4 Яко лучши милость Твоя паче живот: устне мои похвалите Тя. 5 Тако благословлю Тя в животе моем и о имени Твоем воздежу руце мои. 6 Яко от тука и масти да исполнится душа моя, и устнама радости восхвалят Тя уста моя. 7 Аще поминах Тя на постели моей, на утренних поучахся в Тя: 8 яко был еси помощник мой, и в крове крилу Твоею возрадуюся. 9 Прильпе душа моя по Тебе: мене же прият десница Твоя. 10 Тии же всуе искаша душу мою: внидут в преисподняя земли: 11 предадятся в руки оружия, части лисовом будут. 12 Царь же возвеселится о Бозе: похвалится всяк кленыйся Им, яко заградишася уста глаголющих неправедная. === 63 === 1 В конец, псалом Давиду. 2 Услыши, Боже, глас мой, внегда молитимися к тебе: от страха вражия изми душу мою. 3 Покрый мя от сонма лукавнующих, от множества делающих неправду: 4 иже изостриша яко мечь языки своя, напрягоша лук свой, вещь горьку, 5 состреляти в тайных непорочна: внезапу состреляют его, и не убоятся. 6 Утвердиша себе слово лукавое: поведаша скрыти сеть, реша: кто узрит их? 7 Испыташа беззаконие: изчезоша испытающии испытания: приступит человек, и сердце глубоко. 8 И вознесется Бог: стрелы младенец быша язвы их, 9 и изнемогоша на ня языцы их: смутишася вси видящии их. 10 И убояся всяк человек: и возвестиша дела Божия, и творения Его разумеша. 11 Возвеселится праведник о Господе и уповает на Него: и похвалятся вси правии сердцем. === 64 === 1 В конец, псалом песни Давиду, песнь Иеремиева и иезекиилева, людий преселения, егда хотяху исходити. 2 Тебе подобает песнь, Боже, в Сионе, и Тебе воздастся молитва во Иерусалиме. 3 Услыши молитву мою: к Тебе всяка плоть приидет. 4 Словеса беззаконник премогоша нас: и нечестия наша Ты очестиши. 5 Блажен, егоже избрал еси и приял, вселится во дворех Твоих. Исполнимся во благих дому Твоего: свят храм Твой. 6 Дивен в правде, услыши ны, Боже, Спасителю наш, упование всех концей земли и сущих в мори далече: 7 уготовляяй горы крепостию Своею, препоясан силою: 8 смущаяй глубину морскую, шуму волн его кто постоит? Смятутся языцы, 9 и убоятся живущии в концах от знамений Твоих: исходы утра и вечера украсиши. 10 Посетил еси землю и упоил еси ю, умножил еси обогатити ю: река Божия наполнися вод: уготовал еси пищу им, яко тако (есть) уготование. 11 Бразды ея упой, умножи жита ея: в каплях ея возвеселится возсияющи. 12 Благословиши венец лета благости Твоея, и поля Твоя исполнятся тука: 13 разботеют красная пустыни, и радостию холми препояшутся. 14 Одеяшася овни овчии, и удолия умножат пшеницу: воззовут, ибо воспоют. === 65 === 1 В конец, песнь псалма воскресения. 2 Воскликните Господеви вся земля, пойте же имени Его, дадите славу хвале Его. 3 Рцыте Богу: коль страшна дела Твоя? Во множестве силы Твоея солжут Тебе врази Твои. 4 Вся земля да поклонится Тебе и поет Тебе, да поет же имени Твоему, Вышний. 5 Приидите и видите дела Божия, коль страшен в советех паче сынов человеческих. 6 Обращаяй море в сушу, в реце пройдут ногами: тамо возвеселимся о Нем, 7 владычествующем силою Своею веком: очи Его на языки призираете: преогорчевающии да не возносятся в себе. 8 Благословите, языцы, Бога нашего, и услышан сотворите глас хвалы Его, 9 положшаго душу мою в живот, и не давшаго во смятение ног моих. 10 Яко искусил ны еси, Боже, разжегл ны еси, якоже разжизается сребро. 11 Ввел ны еси в сеть, положил еси скорби на хребте нашем. 12 Возвел еси человеки на главы нашя: проидохом сквозе огнь и воду, и извел еси ны в покой. 13 Вниду в дом Твой со всесожжением, воздам Тебе молитвы моя, 14 яже изрекосте устне мои, и глаголаша уста моя в скорби моей. 15 Всесожжения тучна вознесу Тебе с кадилом, и овны, вознесу Тебе волы с козлы. 16 Приидите, услышите, и повем вам, вси боящиися Бога, елика сотвори души моей. 17 К Нему усты моими воззвах, и вознесох под языком моим. 18 Неправду аще узрех в сердцы моем, да не услышит мене Господь. 19 Сего ради услыша мя Бог, внят гласу моления моего. 20 Благословен Бог, Иже не отстави молитву мою и милость Свою от мене. === 66 === 1 В конец, в песнех, псалом песни Давиду. 2 Боже, ущедри ны и благослови ны, просвети лице Твое на ны и помилуй ны: 3 познати на земли путь Твой, во всех языцех спасение Твое. 4 Да исповедятся Тебе людие, Боже, да исповедятся Тебе людие вси. 5 Да возвеселятся и да возрадуются языцы: яко судиши людем правотою, и языки на земли наставиши. 6 Да исповедятся Тебе людие, Боже, да исповедятся Тебе людие вси. 7 Земля даде плод свой: благослови ны, Боже, Боже наш, 8 благослови ны, Боже: и да убоятся Его вси концы земли. === 67 === 1 В конец, псалом песни Давиду. 2 Да воскреснет Бог, и расточатся врази Его, и да бежат от лица Его ненавидящии Его. 3 Яко изчезает дым, да изчезнут: яко тает воск от лица огня, тако да погибнут грешницы от лица Божия: 4 а праведницы да возвеселятся, да возрадуются пред Богом, да насладятся в веселии. 5 Воспойте Богу, пойте имени Его: путесотворите Возшедшему на запады, Господь имя Ему: и радуйтеся пред Ним. 6 Да смятутся от лица Его, Отца сирых и судии вдовиц: Бог в месте святем Своем. 7 Бог вселяет единомысленныя в дом, изводя окованныя мужеством, такожде преогорчевающыя живущыя во гробех. 8 Боже, внегда исходити Тебе пред людьми Твоими, внегда мимоходити Тебе в пустыни, 9 земля потрясеся, ибо небеса кануша от лица Бога Синаина, от лица Бога Израилева. 10 Дождь волен отлучиши, Боже, достоянию Твоему, и изнеможе, Ты же совершил еси е. 11 Животная Твоя живут на ней: уготовал еси благостию Твоею нищему, Боже. 12 Господь даст глагол благовествующым силою многою: 13 царь сил возлюбленнаго, красотою дому разделити корысти. 14 Аще поспите посреде предел, криле голубине посребрене, и междорамия ея в блещании злата: 15 внегда разнствит Небесный цари на ней, оснежатся в Селмоне. 16 Гора Божия, гора тучная, гора усыренная, гора тучная. 17 Вскую непщуете, горы усыренныя? Гора, юже благоволи Бог жити в ней: ибо Господь вселится до конца. 18 Колесница Божия тмами тем, тысяща гобзующих: Господь в них в Синаи во святем. 19 Возшел еси на высоту, пленил еси плен: приял еси даяния в человецех, ибо непокаряющыяся, еже вселитися. 20 Господь Бог благословен, благословен Господь день дне: поспешит нам Бог спасений наших. 21 Бог наш Бог еже спасати: и Господня, Господня исходища смертная. 22 Обаче Бог сокрушит главы врагов Своих, верх влас преходящих в прегрешениих своих. 23 Рече Господь: от Васана обращу, обращу во глубинах морских: 24 яко да омочится нога твоя в крови, язык пес твоих от враг от него. 25 Видена быша шествия Твоя, Боже, шествия Бога моего Царя, иже во святем. 26 Предвариша князи близ поющих, посреде дев тимпанниц. 27 В церквах благословите Бога, Господа от источник Израилевых. 28 Тамо Вениамин юнейший во ужасе, князи Иудовы владыки их, князи Завулони, князи Неффалимли. 29 Заповеждь, Боже, силою Твоею: укрепи, Боже, сие, еже соделал еси в нас. 30 От храма Твоего во Иерусалим Тебе принесут царие дары. 31 Запрети зверем тростным: сонм юнец в юницах людских, еже затворити искушенныя сребром: расточи языки хотящыя бранем. 32 Приидут молитвенницы от Египта: Ефиопиа предварит руку свою к Богу. 33 Царства земная, пойте Богу, воспойте Господеви, 34 возшедшему на небо небесе на востоки: се, даст гласу Своему глас силы. 35 Дадите славу Богови: на Израили велелепота Его, и сила Его на облацех. 36 Дивен Бог во святых Своих: Бог Израилев, Той даст силу и державу людем Своим. Благословен Бог. === 68 === 1 В конец, о изменшихся, псалом Давиду. 2 Спаси мя, Боже, яко внидоша воды до души моея. 3 Углебох в тимении глубины, и несть постояния: приидох во глубины морския, и буря потопи мя. 4 Утрудихся зовый, измолче гортань мой: изчезосте очи мои, от еже уповати ми на Бога моего. 5 Умножишася паче влас главы моея ненавидящии мя туне: укрепишася врази мои, изгонящии мя неправедно: яже не восхищах, тогда воздаях. 6 Боже, Ты уведел еси безумие мое, и прегрешения моя от Тебе не утаишася. 7 Да не постыдятся о мне терпящии Тебе, Господи, Господи сил: ниже да посрамятся о мне ищущии Тебе, Боже Израилев. 8 Яко Тебе ради претерпех поношение, покры срамота лице мое. 9 Чуждь бых братии моей и странен сыновом матере моея: 10 яко ревность дому Твоего снеде мя, и поношения поносящих Ти нападоша на мя. 11 И покрых постом душу мою, и бысть в поношение мне: 12 и положих одеяние мое вретище, и бых им в притчу. 13 О мне глумляхуся седящии во вратех, и о мне пояху пиющии вино. 14 Аз же молитвою моею к Тебе, Боже: время благоволения, Боже: во множестве милости Твоея услыши мя, во истине спасения Твоего. 15 Спаси мя от брения, да не углебну: да избавлюся от ненавидящих мя и от глубоких вод. 16 Да не потопит мене буря водная, ниже да пожрет мене глубина, ниже сведет о мне ровенник уст своих. 17 Услыши мя, Господи, яко блага милость Твоя: по множеству щедрот Твоих призри на мя. 18 Не отврати лица Твоего от отрока Твоего, яко скорблю: скоро услыши мя. 19 Вонми души моей и избави ю: враг моих ради избави мя. 20 Ты бо веси поношение мое, и студ мой, и срамоту мою: пред Тобою вси оскорбляющии мя. 21 Поношение чаяше душа моя и страсть: и ждах соскорбящаго, и не бе, и утешающих, и не обретох. 22 И даша в снедь мою желчь, и в жажду мою напоиша мя оцта. 23 Да будет трапеза их пред ними в сеть и в воздаяние и в соблазн. 24 Да помрачатся очи их, еже не видети, и хребет их выну сляцы. 25 Пролий на ня гнев Твой, и ярость гнева Твоего да постигнет их. 26 Да будет двор их пуст, и в жилищих их да не будет живый. 27 Зане егоже Ты поразил еси, тии погнаша, и к болезни язв моих приложиша. 28 Приложи беззаконие к беззаконию их, и да не внидут в правду Твою. 29 Да потребятся от книги живых, и с праведными да не напишутся. 30 Нищь и боляй есмь аз: спасение Твое, Боже, да приимет мя. 31 Восхвалю имя Бога моего с песнию, возвеличу Его во хвалении: 32 и угодно будет Богу паче телца юна, роги износяща и пазнокти. 33 Да узрят нищии и возвеселятся: взыщите Бога, и жива будет душа ваша. 34 Яко услыша убогия Господь, и окованныя Своя не уничижи. 35 Да восхвалят Его небеса и земля, море и вся живущая в нем. 36 Яко Бог спасет Сиона, и созиждутся гради Иудейстии, и вселятся тамо и наследят и: 37 и семя рабов Твоих удержит и, и любящии имя Твое вселятся в нем. === 69 === 1 В конец Давиду, в воспоминание, во еже спасти мя Господу. 2 Боже, в помощь мою вонми: Господи, помощи ми потщися. 3 Да постыдятся и посрамятся ищущии душу мою. Да возвратятся вспять и постыдятся хотящии ми злая: 4 да возвратятся абие стыдящеся глаголющии ми: благоже, благоже. 5 Да возрадуются и возвеселятся о Тебе вси ищущии Тебе, Боже: и да глаголют выну, да возвеличится Господь, любящии спасение Твое. 6 Аз же нищь есмь и убог, Боже, помози ми: помощник мой и Избавитель мой еси Ты, Господи, не закосни. === 70 === 1 На Тя, Господи, уповах, да не постыжуся в век. 2 Правдою Твоею избави мя и изми мя: приклони ко мне ухо Твое и спаси мя. 3 Буди ми в Бога защитителя и в место крепко спасти мя: яко утверждение мое и прибежище мое еси Ты. 4 Боже мой, избави мя из руки грешнаго, из руки законопреступнаго и обидящаго: 5 яко Ты еси терпение мое, Господи, Господи, упование мое от юности моея. 6 В Тебе утвердихся от утробы, от чрева матере моея Ты еси мой покровитель: о Тебе пение мое выну. 7 Яко чудо бых многим: и Ты помощник мой крепок. 8 Да исполнятся уста моя хваления, яко да воспою славу Твою, весь день великолепие Твое. 9 Не отвержи мене во время старости: внегда оскудевати крепости моей, не остави мене. 10 Яко реша врази мои мне, и стрегущии душу мою совещаша вкупе, 11 глаголюще: Бог оставил есть его, пожените и имите его, яко несть избавляяй. 12 Боже мой, не удалися от мене: Боже мой, в помощь мою вонми. 13 Да постыдятся и изчезнут оклеветающии душу мою, да облекутся в студ и срам ищущии злая мне. 14 Аз же всегда возуповаю на Тя, и приложу на всяку похвалу Твою. 15 Уста моя возвестят правду Твою, весь день спасение Твое, яко не познах книжная. 16 Вниду в силе Господни: Господи, помяну правду Тебе единаго. 17 Боже мой, имже научил мя еси от юности моея, и доныне возвещу чудеса Твоя. 18 И даже до старости и престарения, Боже мой, не остави мене, дондеже возвещу мышцу Твою роду всему грядущему, 19 силу Твою и правду Твою, Боже, даже до вышних, яже сотворил ми еси величия: Боже, кто подобен Тебе? 20 Елики явил ми еси скорби многи и злы? И обращься оживотворил мя еси и от бездн земли возвел мя еси. 21 Умножил еси на мне величествие твое, и обращься утешил мя еси, и от бездн земли паки возвел мя еси. 22 Ибо аз исповемся Тебе в людех, Господи, в сосудех псаломских истину Твою, Боже: воспою Тебе в гуслех, Святый Израилев. 23 Возрадуетеся устне мои, егда воспою Тебе, и душа моя, юже еси избавил: 24 еще же и язык мой весь день поучится правде Твоей, егда постыдятся и посрамятся ищущии злая мне. === 71 === 1 Боже, суд Твой цареви даждь, и правду Твою сыну цареву: 2 судити людем Твоим в правде и нищым Твоим в суде. 3 Да восприимут горы мир людем и холми правду. 4 Судит нищым людским, и спасет сыны убогих, и смирит клеветника. 5 И пребудет с солнцем, и прежде луны рода родов. 6 Снидет яко дождь на руно, и яко капля каплющая на землю. 7 Возсияет во днех его правда и множество мира, дондеже отимется луна. 8 И обладает от моря до моря, и от рек до конец вселенныя. 9 Пред ним припадут Ефиопляне, и врази его персть полижут. 10 Царие Фарсийстии и острови дары принесут, царие Аравстии и Сава дары приведут: 11 и поклонятся ему вси царие земстии, вси языцы поработают ему. 12 Яко избави нища от сильна, и убога, емуже не бе помощника. 13 Пощадит нища и убога, и душы убогих спасет: 14 от лихвы и от неправды избавит душы их, и честно имя его пред ними. 15 И жив будет, и дастся ему от злата Аравийска: и помолятся о нем выну, весь день благословят его. 16 Будет утверждение на земли на версех гор: превознесется паче Ливана плод его, и процветут от града яко трава земная. 17 Будет имя его благословено во веки, прежде солнца пребывает имя его: и благословятся в нем вся колена земная, вси языцы ублажат его. 18 Благословен Господь Бог Израилев, творяй чудеса един, 19 и благословено имя славы Его во век и в век века: и исполнится славы Его вся земля: буди, буди. === 72 === 1 Коль благ Бог Израилев правым сердцем. 2 Мои же вмале не подвижастеся нозе: вмале не пролияшася стопы моя: 3 яко возревновах на беззаконныя, мир грешников зря: 4 яко несть восклонения в смерти их и утверждения в ране их: 5 в трудех человеческих не суть, и с человеки не приимут ран. 6 Сего ради удержа я гордыня их до конца: одеяшася неправдою и нечестием своим. 7 Изыдет яко из тука неправда их: преидоша в любовь сердца. 8 Помыслиша и глаголаша в лукавстве, неправду в высоту глаголаша: 9 положиша на небеси уста своя, и язык их прейде по земли. 10 Сего ради обратятся людие Мои семо, и дние исполнени обрящутся в них. 11 И реша: како уведе Бог? И аще есть разум в Вышнем? 12 Се, сии грешницы и гобзующии в век удержаша богатство. 13 И рех: еда всуе оправдих сердце мое и умых в неповинных руце мои, 14 и бых язвен весь день, и обличение мое на утрених? 15 Аще глаголах, повем тако: се, роду сынов Твоих, емуже обещахся: 16 и непщевах разумети: сие труд есть предо мною, 17 дондеже вниду во святило Божие и разумею в последняя их. 18 Обаче за льщения их положил еси им злая, низложил еси я, внегда разгордешася. 19 Како быша в запустение? Внезапу изчезоша, погибоша за беззаконие свое. 20 Яко соние востающаго, Господи, во граде Твоем образ их уничижиши. 21 Яко разжжеся сердце мое, и утробы моя изменишася: 22 и аз уничижен, и не разумех, скотен бых у Тебе. 23 И аз выну с Тобою: удержал еси руку десную мою, 24 и советом Твоим наставил мя еси, и со славою приял мя еси. 25 Что бо ми есть на небеси? И от Тебе что восхотех на земли? 26 Изчезе сердце мое и плоть моя, Боже сердца моего, и часть моя, Боже, во век. 27 Яко се, удаляющии себе от Тебе погибнут: потребил еси всякаго любодеющаго от Тебе. 28 Мне же прилеплятися Богови благо есть, полагати на Господа упование мое, возвестити ми вся хвалы Твоя, во вратех дщере Сиони. === 73 === 1 Вскую, Боже, отринул еси до конца? Разгневася ярость Твоя на овцы пажити Твоея? 2 Помяни сонм Твой, егоже стяжал еси исперва, избавил еси жезлом достояния Твоего, гора Сион сия, в нейже вселился еси. 3 Воздвигни руце Твои на гордыни их в конец, елика лукавнова враг во святем Твоем. 4 И восхвалишася ненавидящии Тя посреде праздника Твоего: положиша знамения своя знамения, и не познаша. 5 Яко во исходе превыше: яко в дубраве древяне секирами разсекоша 6 двери его вкупе, сечивом и оскордом разрушиша и. 7 Возжгоша огнем святило Твое: на земли оскверниша жилище имене Твоего. 8 Реша в сердцы своем южики их вкупе: приидите, и отставим вся праздники Божия от земли. 9 Знамения их не видехом: несть ктому пророка, и нас не познает ктому. 10 Доколе, Боже, поносит враг? Раздражит противный имя Твое до конца? 11 Вскую отвращаеши руку Твою и десницу Твою от среды недра Твоего в конец? 12 Бог же, Царь наш, прежде века содела спасение посреде земли. 13 Ты утвердил еси силою Твоею море: Ты стерл еси главы змиев в воде: 14 Ты сокрушил еси главу змиеву, дал еси того брашно людем Ефиопским. 15 Ты расторгл еси источники и потоки: Ты изсушил еси реки ифамския. 16 Твой есть день, и Твоя есть нощь: Ты совершил еси зарю и солнце. 17 Ты сотворил еси вся пределы земли: жатву и весну Ты создал еси я. 18 Помяни сия: враг поноси Господеви, и людие безумнии раздражиша имя Твое. 19 Не предаждь зверем душу исповедающуюся Тебе: душ убогих Твоих не забуди до конца. 20 Призри на завет Твой: яко исполнишася помраченнии земли домов беззаконий. 21 Да не возвратится смиренный посрамлен: нищь и убог восхвалита имя Твое. 22 Востани, Боже, суди прю Твою: помяни поношение Твое, еже от безумнаго весь день. 23 Не забуди гласа молитвенник Твоих: гордыня ненавидящих Тя взыде выну. === 74 === 1 В конец, да не растлиши, псалом песни Асафу. 2 Исповемыся Тебе, Боже, исповемыся Тебе и призовем имя Твое: повем вся чудеса Твоя. 3 Егда прииму время, Аз правоты возсужду. 4 Растаяся земля и вси живущии на ней, Аз утвердих столпы ея. 5 Рех беззаконнующым, не беззаконнуйте: и согрешающым, не возносите рога. 6 Не воздвизайте на высоту рога вашего и не глаголите на Бога неправду: 7 яко ниже от исход, ниже и запад, ниже от пустых гор. 8 Яко Бог судия есть: сего смиряет, и сего возносит. 9 Яко чаша в руце Господни, вина нерастворена исполнь растворения, и уклони от сея в сию: обаче дрождие его не истощися, испиют вси грешнии земли. 10 Аз же возрадуюся в век, воспою Богу Иаковлю: 11 и вся роги грешных сломлю, и вознесется рог праведнаго. === 75 === 1 В конец, в песнех, псалом Асафу, песнь ко Ассирианину. 2 Ведом во Иудеи Бог: во Израили велие имя Его. 3 И бысть в Мире место Его, и жилище Его в Сионе. 4 Тамо сокруши крепости луков, оружие и мечь и брань. 5 Просвещаеши ты дивно от гор вечных. 6 Смятошася вси неразумнии сердцем: уснуша сном своим, и ничтоже обретоша вси мужие богатства в руках своих. 7 От запрещения Твоего, Боже Иаковль, воздремаша вседшии на кони. 8 Ты страшен еси, и кто противостанет Тебе? Оттоле гнев Твой. 9 С небесе слышан сотворил еси суд: земля убояся и умолча, 10 внегда востати на суд Богу, спасти вся кроткия земли. 11 Яко помышление человеческое исповестся Тебе, и останок помышления празднует Ти. 12 Помолитеся и воздадите Господеви Богу нашему: вси, иже окрест Его, принесут дары 13 Страшному и отемлющему духи князей, страшному паче царей земных. === 76 === 1 В конец, о Идифуме, псалом Асафу. 2 Гласом моим ко Господу воззвах, гласом моим к Богу, и внят ми. 3 В день скорби моея Бога взысках рукама моима, нощию пред ним, и не прельщен бых: отвержеся утешитися душа моя. 4 Помянух Бога и возвеселихся, поглумляхся, и малодушствоваше дух мой. 5 Предваристе стражбы очи мои: смятохся и не глаголах. 6 Помыслих дни первыя, и лета вечная помянух, и поучахся: 7 нощию сердцем моим глумляхся, и тужаше дух мой: 8 еда во веки отринет Господь и не приложит благоволити паки? 9 Или до конца милость Свою отсечет, сконча глаголгол от рода в род? 10 Еда забудет ущедрити Бог? Или удержит во гневе Своем щедроты Своя? 11 И рех: ныне начах, сия измена десницы Вышняго. 12 Помянух дела Господня: яко помяну от начала чудеса Твоя, 13 и поучуся во всех делех Твоих, и в начинаниих Твоих поглумлюся. 14 Боже, во святем путь Твой: кто Бог велий, яко Бог наш? 15 Ты еси Бог творяй чудеса: сказал еси в людех силу Твою, 16 избавил еси мышцею Твоею люди Твоя, сыны Иаковли и Иосифовы. 17 Видеша Тя воды, Боже, видеша Тя воды и убояшася: смятошася бездны. 18 Множество шума вод: глас даша облацы, ибо стрелы Твоя преходят. 19 Глас грома Твоего в колеси, осветиша молния твоя вселенную: подвижеся и трепетна бысть земля. 20 В мори путие Твои, и стези Твоя в водах многих, и следы Твои не познаются. 21 Наставил еси яко овцы люди Твоя рукою Моисеовою и Ааронею. === 77 === 1 Внемлите, людие мои, закону моему, приклоните ухо ваше во глаголы уст моих. 2 Отверзу в притчах уста моя, провещаю ганания исперва. 3 Елика слышахом и познахом я, и отцы наши поведаша нам: 4 не утаишася от чад их в род ин, возвещающе хвалы Господни, и силы Его и чудеса Его, яже сотвори. 5 И воздвиже свидение во Иакове, и закон положи во Израили, елика заповеда отцем нашым сказати я сыновом своим, 6 яко да познает род ин, сынове родящиися, и востанут и поведят я сыновом своим: 7 да положат на Бога упование свое, и не забудут дел Божиих, и заповеди Его взыщут: 8 да не будут якоже отцы их, род строптив и преогорчеваяй, род иже не исправи сердца своего и не увери с Богом духа своего. 9 Сынове Ефремли наляцающе и стреляюще луки возвратишася в день брани: 10 не сохраниша завета Божия, и в законе Его не восхотеша ходити. 11 И забыша благодеяния Его и чудеса Его, яже показа им 12 пред отцы их, яже сотвори чудеса в земли Египетстей, на поли Танеосе: 13 разверзе море и проведе их: представи воды яко мех, 14 и настави я облаком во дни и всю нощь просвещением огня. 15 Разверзе камень в пустыни и напои я яко в бездне мнозе: 16 и изведе воду из камене и низведе яко реки воды. 17 И приложиша еще согрешати Ему, преогорчиша Вышняго в безводней: 18 и искусиша Бога в сердцах своих, воспросити брашна душам своим. 19 И клеветаша на Бога и реша: еда возможет Бог уготовати трапезу в пустыни? 20 Понеже порази камень, и потекоша воды, и потоцы наводнишася: еда и хлеб может дати? Или уготовати трапезу людем Своим? 21 Сего ради слыша Господь и презре, и огнь возгореся во Иакове, и гнев взыде на Израиля: 22 яко не вероваша Богови, ниже уповаша на спасение Его. 23 И заповеда облаком свыше, и двери небесе отверзе: 24 и одожди им манну ясти, и хлеб небесный даде им. 25 Хлеб ангельский яде человек: брашно посла им до сытости. 26 Воздвиже юг с небесе, и наведе силою Своею лива: 27 и одожди на ня яко прах плоти, и яко песок морский птицы пернаты. 28 И нападоша посреде стана их, окрест жилищ их. 29 И ядоша и насытишася зело, и желание их принесе им. 30 Не лишишася от желания своего: еще брашну сущу во устех их, 31 и гнев Божий взыде на ня, и уби множайшая их, и избранным Израилевым запят. 32 Во всех сих согрешиша еще и не вероваша чудесем Его: 33 и изчезоша в суете дние их, и лета их со тщанием. 34 Егда убиваше я, тогда взыскаху Его и обращахуся и утреневаху к Богу: 35 и помянуша, яко Бог помощник им есть, и Бог Вышний Избавитель им есть: 36 и возлюбиша Его усты своими, и языком своим солгаша Ему: 37 сердце же их не бе право с Ним, ниже уверишася в завете Его. 38 Той же есть щедр, и очистит грехи их, и не растлит: и умножит отвратити ярость Свою, и не разжжет всего гнева Своего. 39 И помяну, яко плоть суть, дух ходяй и не обращаяйся: 40 колькраты преогорчиша Его в пустыни, прогневаша Его в земли безводней? 41 И обратишася, и искусиша Бога, и Святаго Израилева раздражиша: 42 и не помянуша руки Его в день, в оньже избави я из руки оскорбляющаго: 43 якоже положи во Египте знамения Своя, и чудеса Своя на поли Танеосе: 44 и преложи в кровь реки их и источники их, яко да не пиют. 45 Посла на ня песия мухи, и поядоша я, и жабы, и растли я: 46 и даде рже плоды их, и труды их пругом. 47 Уби градом винограды их и черничие их сланою: 48 и предаде граду скоты их, и имение их огню. 49 Посла на ня гнев ярости Своея, ярость и гнев и скорбь, послание аггелы лютыми. 50 Путесотвори стезю гневу Своему, и не пощаде от смерти душ их, и скоты их в смерти заключи: 51 и порази всякое первородное в земли Египетстей, начаток всякаго труда их в селениих Хамовых. 52 И воздвиже яко овцы люди Своя, и возведе я яко стадо в пустыни: 53 и настави я на упование, и не убояшася: и враги их покры море. 54 И введе я в гору святыни Своея, гору сию, юже стяжа десница Его. 55 И изгна от лица их языки, и по жребию даде им (землю) ужем жребодаяния, и всели в селениих их колена Израилева. 56 И искусиша и преогорчиша Бога Вышняго, и свидений Его не сохраниша: 57 и отвратишася и отвергошася, якоже и отцы их: превратишася в лук развращен: 58 и прогневаша Его в холмех своих, и во истуканных своих раздражиша Его. 59 Слыша Бог и презре, и уничижи зело Израиля: 60 и отрину скинию Силомскую, селение еже вселися в человецех: 61 и предаде в плен крепость их, и доброту их в руки врагов: 62 и затвори во оружии люди Своя и достояние Свое презре. 63 Юношы их пояде огнь, и девы их не осетованы быша: 64 священницы их мечем падоша, и вдовицы их не оплаканы будут. 65 И воста яко спя Господь, яко силен и шумен от вина: 66 и порази враги своя вспять, поношение вечное даде им: 67 и отрину селение Иосифово, и колено Ефремово не избра: 68 и избра колено Иудово, гору Сионю, юже возлюби: 69 и созда яко единорога святилище Свое: на земли основа и в век. 70 И избра Давида раба Своего, и восприят его от стад овчих: 71 от доилиц поят его, пасти Иакова раба Своего, и Израиля достояние Свое. 72 И упасе я в незлобии сердца своего, и в разумех руку своею наставил я есть. === 78 === 1 Боже, приидоша языцы в достояние Твое, оскверниша храм святый Твой, 2 положиша Иерусалим яко овощное хранилище: положиша трупия раб Твоих брашно птицам небесным, плоти преподобных Твоих зверем земным: 3 пролияша кровь их яко воду окрест Иерусалима, и не бе погребаяй. 4 Быхом поношение соседом нашым, подражнение и поругание сущым окрест нас. 5 Доколе, Господи, прогневаешися до конца? Разжжется яко огнь рвение Твое? 6 Пролий гнев Твой на языки незнающыя Тебе, и на царствия, яже имене Твоего не призваша: 7 яко поядоша Иакова, и место его опустошиша. 8 Не помяни наших беззаконий первых: скоро да предварят ны щедроты Твоя, Господи, яко обнищахом зело. 9 Помози нам, Боже, Спасителю наш, славы ради имене Твоего: Господи, избави ны и очести грехи нашя имене ради Твоего. 10 Да не когда рекут языцы: где есть Бог их? И да увестся во языцех пред очима нашима отмщение крове раб Твоих пролитыя. 11 Да внидет пред Тя воздыхание окованных: по величию мышцы Твоея снабди сыны умерщвленных. 12 Воздаждь соседом нашым седмерицею в недро их поношение их, имже поносиша Тя, Господи. 13 Мы же людие Твои и овцы пажити Твоея исповемыся Тебе, Боже, во век, в род и род возвестим хвалу Твою. === 79 === 1 В конец, о изменшихся, свидение Асафу, псалом. 2 Пасый Израиля вонми: наставляяй яко овча Иосифа, седяй на Херувимех, явися: 3 пред Ефремом и Вениамином и Манассием воздвигни силу Твою, и прииди во еже спасти нас. 4 Боже, обрати ны, и просвети лице Твое, и спасемся. 5 Господи Боже сил, доколе гневаешися на молитву раб Твоих? 6 Напитаеши нас хлебом слезным, и напоиши нас слезами в меру. 7 Положил еси нас в пререкание соседом нашым, и врази наши подражниша ны. 8 Господи Боже сил, обрати ны, и просвети лице Твое, и спасемся. 9 Виноград из Египта пренесл еси: изгнал еси языки, и насадил еси и: 10 путесотворил еси пред ним, и насадил еси корения его, и исполни землю. 11 Покры горы сень его, и ветвия его кедры Божия: 12 простре розги его до моря, и даже до рек отрасли его. 13 Вскую низложил еси оплот его, и оымают и вси мимоходящии путем? 14 Озоба и вепрь от дубравы, и уединенный дивий пояде и. 15 Боже сил, обратися убо, и призри с небесе и виждь, и посети виноград сей: 16 и соверши и, егоже насади десница Твоя, и на сына человеческаго, егоже укрепил еси Себе. 17 Пожжен огнем и раскопан: от запрещения лица Твоего погибнут. 18 Да будет рука Твоя на мужа десницы Твоея и на сына человеческаго, егоже укрепил еси Себе, 19 и не отступим от Тебе: оживиши ны, и имя Твое призовем. 20 Господи Боже сил, обрати ны, и просвети лице Твое, и спасемся. === 80 === 1 В конец, о точилех, псалом Асафу. 2 Радуйтеся Богу помощнику нашему, воскликните Богу Иаковлю: 3 приимите псалом и дадите тимпан, псалтирь красен с гусльми: 4 вострубите в новомесячии трубою, во благознаменитый день праздника вашего: 5 яко повеление Израилеви есть, и судба Богу Иаковлю. 6 Свидение во Иосифе положи е, внегда изыти ему от земли Египетския: языка, егоже не ведяше, услыша. 7 Отят от бремене хребет его: руце его в коши поработасте. 8 В скорби призвал Мя еси, и избавих тя: услышах тя в тайне бурне: искусих тя на воде Пререкания. 9 Слышите, людие Мои, и засвидетелствую вам, Израилю, аще послушаеши Мене: 10 не будет тебе бог нов, ниже поклонишися богу чуждему. 11 Аз бо есмь Господь Бог твой, изведый тя от земли Египетския: разшири уста твоя, и исполню я. 12 И не послушаша людие Мои гласа Моего, и Израиль не внят Ми: 13 и отпустих я по начинанием сердец их, пойдут в начинаниих своих. 14 Аще быша людие Мои послушали Мене, Израиль аще бы в пути Моя ходил: 15 ни о чесомже убо враги его смирил бых, и на оскорбляющыя их возложил бых руку Мою. 16 Врази Господни солгаша ему, и будет время их в век: 17 и напита их от тука пшенична, и от камене меда насыти их. === 81 === 1 Бог ста в сонме богов, посреде же боги разсудит. 2 Доколе судите неправду, и лица грешников приемлете? 3 Судите сиру и убогу, смирена и нища оправдайте: 4 измите нища и убога, из руки грешничи избавите его. 5 Не познаша, ниже уразумеша, во тме ходят: да подвижатся вся основания земли. 6 Аз рех: бози есте, и сынове Вышняго вси: 7 вы же яко человецы умираете, и яко един от князей падаете. 8 Воскресени, Боже, суди земли: яко Ты наследиши во всех языцех. === 82 === 1 Песнь псалма Асафу. 2 Боже, кто уподобится Тебе? Не премолчи, ниже укроти, Боже: 3 яко се, врази Твои возшумеша, и ненавидящии Тя воздвигоша главу. 4 На люди Твоя лукавноваша волею, и совещаша на святыя Твоя. 5 Реша: приидите и потребим я от язык, и не помянется имя Израилево ктому. 6 Яко совещаша единомышлением вкупе, на Тя завет завещаша: 7 селения Идумейска и Исмаилите, Моав и Агаряне, 8 Гевал и Аммон и Амалик, иноплеменницы с живущими в Тире: 9 ибо и Ассур прииде с ними, быша в заступление сыновом Лотовым: 10 сотвори им яко Мадиаму и Сисаре, яко Иавиму в потоце Киссове: 11 потребишася во Аендоре, быша яко гной земный. 12 Положи князи их яко Орива и Зива, и Зевеа и Салмана, вся князи их, 13 иже реша: да наследим себе святилище Божие. 14 Боже мой, положи я яко коло, яко трость пред лицем ветра. 15 Яко огнь попаляяй дубравы, яко пламень пожигаяй горы: 16 тако поженеши я бурею Твоею, и гневом Твоим смятеши я. 17 Исполни лица их безчестия, и взыщут имене Твоего, Господи. 18 Да постыдятся и смятутся в век века, и посрамятся и погибнут. 19 И да познают, яко имя Тебе Господь, Ты един Вышний по всей земли. === 83 === 1 В конец, о точилех, сыном Кореовым, псалом. 2 Коль возлюбленна селения Твоя, Господи сил. 3 Желает и скончавается душа моя во дворы Господни: сердце мое и плоть моя возрадовастася о Бозе живе. 4 Ибо птица обрете себе храмину, и горлица гнездо себе, идеже положит птенцы своя, олтари Твоя, Господи сил, Царю мой и Боже мой. 5 Блажени живущии в дому Твоем: в веки веков восхвалят Тя. 6 Блажен муж, емуже есть заступление его у Тебе: восхождения в сердцы своем положи, 7 во юдоль плачевную, в место еже положи: ибо благословение даст законополагаяй. 8 Пойдут от силы в силу: явится Бог богов в Сионе. 9 Господи Боже сил, услыши молитву мою, внуши, Боже Иаковль. 10 Защитниче наш, виждь, боже, и призри на лице христа Твоего. 11 Яко лучше день един во дворех Твоих паче тысящ: изволих приметатися в дому Бога моего паче, неже жити ми в селениих грешничих. 12 Яко милость и истину любит Господь, Бог благодать и славу даст: Господь не лишит благих ходящих незлобием. 13 Господи Боже сил, блажен человек уповаяй на Тя. === 84 === 1 В конец, сыном Кореовым, псалом. 2 Благоволил еси, Господи, землю Твою, возвратил еси плен Иаковль. 3 Оставил еси беззакония людий Твоих, покрыл еси вся грехи их. 4 Укротил еси весь гнев Твой, возвратился еси от гнева ярости Твоея. 5 Возврати нас, Боже спасений наших, и отврати ярость Твою от нас. 6 Еда во веки прогневаешися на ны? Или простреши гнев Твой от рода в род? 7 Боже, Ты обращься оживиши ны, и людие Твои возвеселятся о Тебе. 8 Яви нам, Господи, милость Твою, и спасение Твое даждь нам. 9 Услышу, что речет о мне Господь Бог: яко речет мир на люди Своя, и на преподобныя Своя, и на обращающыя сердца к нему. 10 Обаче близ боящихся Его спасение Его, вселити славу в землю нашу. 11 Милость и истина сретостеся, правда и мир облобызастася: 12 истина от земли возсия, и правда с небесе приниче: 13 ибо Господь даст благость, и земля наша даст плод свой. 14 Правда пред Ним предидет, и положит в путь стопы своя. === 85 === 1 Приклони, Господи, ухо Твое, и услыши мя: яко нищь и убог есмь аз. 2 Сохрани душу мою, яко преподобен есмь: спаси раба Твоего, Боже мой, уповающаго на Тя. 3 Помилуй мя, Господи, яко к Тебе воззову весь день. 4 Возвесели душу раба Твоего: яко к Тебе взях душу мою. 5 Яко Ты, Господи, благ и кроток и многомилостив всем призывающым Тя. 6 Внуши, Господи, молитву мою и вонми гласу моления моего. 7 В день скорби моея воззвах к Тебе, яко услышал мя еси. 8 Несть подобен Тебе в бозех, Господи, и несть по делом Твоим. 9 Вси языцы, елики сотворил еси, приидут и поклонятся пред Тобою, Господи, и прославят имя Твое: 10 яко велий еси Ты и творяй чудеса, Ты еси Бог един. 11 Настави мя, Господи, на путь Твой, и пойду во истине Твоей: да возвеселится сердце мое боятися имене Твоего. 12 Исповемся Тебе, Господи Боже мой, всем сердцем моим и прославлю имя Твое в век: 13 яко милость Твоя велия на мне, и избавил еси душу мою от ада преисподнейшаго. 14 Боже, законопреступницы восташа на мя, и сонм державных взыскаша душу мою, и не предложиша Тебе пред собою. 15 И Ты, Господи Боже мой, щедрый и милостивый, долготерпеливый и многомилостивый и истинный, 16 призри на мя и помилуй мя: даждь державу Твою отроку Твоему и спаси сына рабы Твоея. 17 Сотвори со мною знамение во благо: и да видят ненавидящии мя, и постыдятся, яко Ты, Господи, помогл ми и утешил мя еси. === 86 === 1 Сыном Кореовым, псалом песни. 2 Основания его на горах святых: любит Господь врата Сионя паче всех селений Иаковлих. 3 Преславная глаголашася о тебе, граде Божий. 4 Помяну Раав и Вавилона ведущым мя: и се, иноплеменницы и Тир и людие Ефиопстии, сии быша тамо. 5 Мати Сион речет: человек и человек родися в нем, и Той основа и Вышний. 6 Господь повесть в писании людий и князей, сих бывших в нем. 7 Яко веселящихся всех жилище в тебе. === 87 === 1 Песнь псалма Сыном Кореовым, в конец, о Маелефе еже отвещати, разума Еману Израилтянину. 2 Господи Боже спасения моего, во дни воззвах и в нощи пред Тобою: 3 да внидет пред Тя молитва моя, приклони ухо Твое к молению моему. 4 Яко исполнися зол душа моя, и живот мой аду приближися. 5 Привменен бых с низходящими в ров: бых яко человек без помощи, 6 в мертвых свободь: яко язвеннии спящии во гробе, ихже не помянул еси ктому, и тии от руки Твоея отриновени быша. 7 Положиша мя в рове преисподнем, в темных и сени смертней. 8 На мне утвердися ярость Твоя, и вся волны Твоя навел еси на мя. 9 Удалил еси знаемых моих от мене: положиша мя мерзость себе: предан бых и не исхождах. 10 Очи мои изнемогосте от нищеты: воззвах к Тебе, Господи, весь день, воздех к Тебе руце мои. 11 Еда мертвыми твориши чудеса? Или врачеве воскресят, и исповедятся Тебе? 12 Еда повесть кто во гробе милость Твою, и истину Твою в погибели? 13 Еда познана будут во тме чудеса Твоя, и правда Твоя в земли забвенней? 14 И аз к Тебе, Господи, воззвах, и утро молитва моя предварит Тя. 15 Вскую, Господи, отрееши душу мою? Отвращаеши лице Твое от мене? 16 Нищь есмь аз, и в трудех от юности моея: вознесжеся смирихся и изнемогох. 17 На мне преидоша гневи Твои, устрашения Твоя возмутиша мя: 18 обыдоша мя яко вода весь день, одержаша мя вкупе. 19 Удалил еси от мене друга и искренняго, и знаемых моих от страстей. === 88 === 1 Разума Ефама Израилтянина. 2 Милости Твоя, Господи, во век воспою, в род и род возвещу истину Твою усты моими. 3 Зане рекл еси: в век милость созиждется: на небесех уготовится истина Твоя. 4 Завещах завет избранным Моим, кляхся Давиду рабу Моему: 5 до века уготоваю семя твое, и созижду в род и род престол твой. 6 Исповедят небеса чудеса Твоя, Господи, ибо истину Твою в церкви святых. 7 Яко кто во облацех уравнится Господеви? Уподобится Господеви в сынех Божиих? 8 Бог прославляемь в совете святых, велий и страшен есть над всеми окрестными Его. 9 Господи Боже сил, кто подобен Тебе? Силен еси, Господи, и истина Твоя окрест Тебе. 10 Ты владычествуеши державою морскою: возмущение же волн его Ты укрочаеши. 11 Ты смирил, еси, яко язвена, гордаго: мышцею силы Твоея расточил еси враги Твоя. 12 Твоя суть небеса, и Твоя есть земля: вселенную и исполнение ея Ты основал еси. 13 Север и море Ты создал еси: Фавор и Ермон о имени Твоем возрадуетася. 14 Твоя мышца с силою: да укрепится рука Твоя, и вознесется десница Твоя. 15 Правда и судба уготование престола Твоего: милость и истина предидете пред лицем Твоим. 16 Блажени людие ведущии воскликновение: Господи, во свете лица Твоего пойдут, 17 и о имени Твоем возрадуются весь день, и правдою Твоею вознесутся. 18 Яко похвала силы их Ты еси, и во благоволении Твоем вознесется рог наш: 19 яко Господне есть заступление, и Святаго Израилева царя нашего. 20 Тогда глаголал еси в видении сыновом Твоим, и рекл еси: положих помощь на сильнаго, вознесох избраннаго от людий Моих: 21 обретох Давида раба Моего, елеем святым Моим помазах его. 22 Ибо рука Моя заступит его, и мышца Моя укрепит его. 23 Ничтоже успеет враг на него, и сын беззакония не приложит озлобити его. 24 И ссеку от лица его враги его, и ненавидящыя его побежду: 25 и истина Моя и милость Моя с ним, и о имени Моем вознесется рог его: 26 и положу на мори руку его, и на реках десницу его. 27 Той призовет Мя: отец мой еси Ты, Бог мой и заступник спасения моего. 28 И Аз первенца положу его, высока паче царей земных: 29 в век сохраню ему милость Мою, и завет Мой верен ему: 30 и положу в век века семя его, и престол его яко дние неба. 31 Аще оставят сынове его закон Мой, и в судбах Моих не пойдут: 32 аще оправдания Моя осквернят, и заповедий Моих не сохранят: 33 посещу жезлом беззакония их, и ранами неправды их, 34 милость же Мою не разорю от них, ни преврежду во истине Моей: 35 ниже оскверню завета Моего, и исходящих от уст Моих не отвергуся. 36 Единою кляхся о святем Моем: аще Давиду солжу? 37 Семя его во век пребудет, и престол его яко солнце предо Мною, 38 и яко луна совершена в век, и свидетель на небеси верен. 39 Ты же отринул еси и уничижил, негодовал еси помазаннаго Твоего: 40 разорил еси завет раба Твоего, осквернил еси на земли святыню его: 41 разорил еси вся оплоты его, положил еси твердая его страх. 42 Расхищаху его вси мимоходящии путем, бысть поношение соседом своим. 43 Возвысил еси десницу стужающих ему, возвеселил еси вся враги его: 44 отвратил еси помощь меча его и не заступил еси его во брани: 45 разорил еси от очищения его, престол его на землю повергл еси: 46 умалил еси дни времене его, облиял еси его студом. 47 Доколе, Господи, отвращаешися в конец, разжжется яко огнь гнев Твой? 48 Помяни, кий мой состав: еда бо всуе создал еси вся сыны человеческия? 49 Кто есть человек, иже поживет и не узрит смерти, избавит душу свою из руки адовы? 50 Где суть милости Твоя древния, Господи, имиже клялся еси Давиду во истине Твоей? 51 Помяни, Господи, поношение раб Твоих, еже удержах в недре моем многих язык: 52 имже поносиша врази Твои, Господи, имже поносиша изменению христа Твоего. 53 Благословен Господь во век: буди, буди. === 89 === 1 Молитва Моисеа человека Божия. 2 Господи, прибежище был еси нам в род и род. 3 Прежде даже горам не быти и создатися земли и вселенней, и от века и до века Ты еси. 4 Не отврати человека во смирение, и рекл еси: обратитеся, сынове человечестии. 5 Яко тысяща лет пред очима Твоима, Господи, яко день вчерашний, иже мимо иде, и стража нощная. 6 Уничижения их лета будут: утро яко трава мимо идет, утро процветет и прейдет: на вечер отпадет, ожестеет и изсхнет: 7 яко изчезохом гневом Твоим, и яростию Твоею смутихомся. 8 Положил еси беззакония наша пред Тобою, век наш в просвещение лица Твоего. 9 Яко вси дние наши оскудеша, и гневом Твоим изчезохом: 10 лета наша яко паучина поучахуся: дние лет наших в нихже седмьдесят лет, аще же в силах, осмьдесят лет, и множае их труд и болезнь: яко прииде кротость на ны, и накажемся. 11 Кто весть державу гнева Твоего, и от страха Твоего ярость Твою изчести? 12 Десницу Твою тако скажи ми, и окованныя сердцем в мудрости. 13 Обратися, Господи, доколе? И умолен буди на рабы Твоя. 14 Исполнихомся заутра милости Твоея, Господи, и возрадовахомся и возвеселихомся: 15 во вся дни нашя возвеселихомся, за дни, в няже смирил ны еси, лета, в няже видехом злая. 16 И призри на рабы Твоя и на дела Твоя, и настави сыны их. 17 И буди светлость Господа Бога нашего на нас, и дела рук наших исправи на нас, и дело рук наших исправи. === 90 === 1 Живый в помощи Вышняго, в крове Бога небеснаго водворится, 2 речет Господеви: заступник мой еси и прибежище мое, Бог мой, и уповаю на Него. 3 Яко Той избавит тя от сети ловчи и от словесе мятежна: 4 плещма Своима осенит тя, и под криле Его надеешися: оружием обыдет тя истина Его. 5 Не убоишися от страха нощнаго, от стрелы летящия во дни, 6 от вещи во тме преходящия, от сряща и беса полуденнаго. 7 Падет от страны твоея тысяща, и тма одесную тебе, к тебе же не приближится: 8 обаче очима твоима смотриши и воздаяние грешников узриши. 9 Яко ты, Господи, упование мое: Вышняго положил еси прибежище твое. 10 Не приидет к тебе зло, и рана не приближится телеси твоему: 11 яко Ангелом Своим заповесть о тебе, сохранити тя во всех путех твоих. 12 На руках возмут тя, да не когда преткнеши о камень ногу твою: 13 на аспида и василиска наступиши, и попереши льва и змия. 14 Яко на Мя упова, и избавлю и: покрыю и, яко позна имя Мое. 15 Воззовет ко Мне, и услышу его: с ним есмь в скорби, изму его и прославлю его: 16 долготою дний исполню его и явлю ему спасение Мое. === 91 === 1 Псалом песни, в день субботный. 2 Благо есть исповедатися Господеви и пети имени Твоему, Вышний: 3 возвещати заутра милость Твою и истину Твою на всяку нощь, 4 в десятоструннем псалтири с песнию в гуслех. 5 Яко возвеселил мя еси, Господи, в творении Твоем, и в делех руку Твоею возрадуюся. 6 Яко возвеличишася дела Твоя, Господи: зело углубишася помышления Твоя. 7 Муж безумен не познает, и неразумив не разумеет сих. 8 Внегда прозябоша грешницы яко трава, и проникоша вси делающии беззаконие, яко да потребятся в век века: 9 Ты же вышний во век, Господи. 10 Яко се, врази Твои, Господи, яко се, врази Твои погибнут, и разыдутся вси делающии беззаконие. 11 И вознесется яко единорога рог мой, и старость моя в елеи мастите: 12 и воззре око мое на враги моя, и востающыя на мя лукавнующыя услышит ухо мое. 13 Праведник яко финикс процветет: яко кедр, иже в Ливане, умножится. 14 Насаждени в дому Господни во дворех Бога нашего процветут: 15 еще умножатся в старости мастите, и благоприемлюще будут. 16 Да возвестят, яко прав Господь Бог наш, и несть неправды в Нем. === 92 === 1 Господь воцарися, в лепоту облечеся: облечеся Господь в силу и препоясася: ибо утверди вселенную, яже не подвижится. 2 Готов престол Твой оттоле: от века Ты еси. 3 Воздвигоша реки, Господи, воздвигоша реки гласы своя: 4 возмут реки сотрения своя, от гласов вод многих. 5 Дивны высоты морския: дивен в высоких Господь. 6 Свидения Твоя уверишася зело. Дому Твоему подобает святыня, Господи, в долготу дний. === 93 === 1 Бог отмщений Господь, Бог отмщений не обинулся есть. 2 Вознесися, Судяй земли, воздаждь воздаяние гордым. 3 Доколе грешницы, Господи, доколе грешницы восхвалятся? 4 Провещают и возглаголют неправду, возглаголют вси делающии беззаконие? 5 Люди Твоя, Господи, смириша, и достояние Твое озлобиша: 6 вдовицу и сира умориша, и пришелца убиша, 7 и реша: не узрит Господь, ниже уразумеет Бог Иаковль. 8 Разумейте же, безумнии в людех, и буии некогда, умудритеся: 9 насаждей ухо, не слышит ли? Или создавый око, не сматряет ли? 10 Наказуяй языки, не обличит ли, учай человека разуму? 11 Господь весть помышления человеческая, яко суть суетна. 12 Блажен человек, егоже аще накажеши, Господи, и от закона Твоего научиши его: 13 укротити его от дний лютых, дондеже изрыется грешному яма. 14 Яко не отринет Господь людий Своих, и достояния Своего не оставит: 15 дондеже правда обратится на суд, и держащиися ея вси правии сердцем. 16 Кто востанет ми на лукавнующыя? Или кто спредстанет ми на делающыя беззаконие? 17 Аще не Господь помогл бы ми, вмале вселилася бы во ад душа моя. 18 Аще глаголах: подвижеся нога моя, милость Твоя, Господи, помогаше ми: 19 по множеству болезней моих в сердцы моем, утешения Твоя возвеселиша душу мою. 20 Да не пребудет Тебе престол беззакония, созидаяй труд на повеление. 21 Уловят на душу праведничу, и кровь неповинную осудят. 22 И бысть мне Господь в прибежище, и Бог мой в помощь упования моего: 23 и воздаст им Господь беззаконие их, и по лукавствию их погубит я Господь Бог. === 94 === 1 Приидите, возрадуемся Господеви, воскликнем Богу спасителю нашему: 2 предварим лице Его во исповедании, и во псалмех воскликнем Ему: 3 яко Бог велий Господь, и Царь велий по всей земли: 4 яко в руце Его вси концы земли, и высоты гор Того суть. 5 Яко Того есть море, и Той сотвори е, и сушу руце Его создасте. 6 Приидите, поклонимся и припадем ему, и восплачемся пред Господем сотворшим нас: 7 яко Той есть Бог наш, и мы людие пажити Его и овцы руки Его. Днесь аще глас Его услышите, 8 не ожесточите сердец ваших, яко в прогневании, по дни искушения в пустыни: 9 в оньже искусиша Мя отцы ваши, искусиша Мя, и видеша дела Моя. 10 Четыредесять лет негодовах рода того, и рех: присно заблуждают сердцем, тии же не познаша путий Моих: 11 яко кляхся во гневе Моем, аще внидут в покой Мой. === 95 === 1 Воспойте Господеви песнь нову, воспойте Господеви вся земля: 2 воспойте Господеви, благословите имя Его: благовестите день от дне спасение Его. 3 Возвестите во языцех славу Его, во всех людех чудеса Его. 4 Яко велий Господь и хвален зело, страшен есть над всеми боги. 5 Яко вси бози язык бесове: Господь же небеса сотвори. 6 Исповедание и красота пред Ним, святыня и великолепие во святиле Его. 7 Принесите Господеви, отечествия язык, принесите Господеви славу и честь. 8 Принесите Господеви славу имени Его: возмите жертвы и входите во дворы Его. 9 Поклонитеся Господеви во дворе святем Его: да подвижится от лица Его вся земля. 10 Рцыте во языцех, яко Господь воцарися: ибо исправи вселенную, яже не подвижится: судит людем правостию. 11 Да возвеселятся небеса, и радуется земля: да подвижится море и исполнение его: 12 возрадуются поля, и вся яже на них: тогда возрадуются вся древа дубравная 13 от лица Господня, яко грядет, яко грядет судити земли: судити вселенней в правду, и людем истиною Своею. === 96 === 1 Господь воцарися, да радуется земля, да веселятся острови мнози. 2 Облак и мрак окрест Его: правда и судба исправление престола Его. 3 Огнь пред Ним предидет и попалит окрест враги Его. 4 Осветиша молния Его вселенную: виде и подвижеся земля. 5 Горы яко воск растаяша от лица Господня, от лица Господа всея земли. 6 Возвестиша небеса правду Его, и видеша вси людие славу Его. 7 Да постыдятся вси кланяющиися истуканным, хвалящиися о идолех своих: поклонитеся Ему, вси ангели Его. 8 Слыша и возвеселися Сион, и возрадовашася дщери Иудейския, судеб ради Твоих, Господи: 9 яко Ты Господь вышний над всею землею, зело превознеслся еси над всеми боги. 10 Любящии Господа, ненавидите злая: хранит Господь душы преподобных Своих, из руки грешничи избавит я. 11 Свет возсия праведнику, и правым сердцем веселие. 12 Веселитеся, праведнии, о Господе, и исповедайте память святыни Его. === 97 === 1 Воспойте Господеви песнь нову, яко дивна сотвори Господь: спасе Его десница Его и мышца святая Его. 2 Сказа Господь спасение Свое, пред языки откры правду Свою. 3 Помяну милость Свою Иакову и истину Свою дому Израилеву: видеша вси концы земли спасение Бога нашего. 4 Воскликните Богови, вся земля, воспойте и радуйтеся и пойте. 5 Пойте Господеви в гуслех, в гуслех и гласе псаломсте, 6 в трубах кованых и гласом трубы рожаны: вострубите пред Царем Господем. 7 Да подвижится море и исполнение его, вселенная и вси живущии на ней. 8 Реки восплещут рукою вкупе, горы возрадуются 9 от лица Господня, яко грядет, яко идет судити земли: судити вселенней в правду, и людем правостию. === 98 === 1 Господь воцарися, да гневаются людие: седяй на Херувимех, да подвижится земля. 2 Господь в Сионе велик, и высок есть над всеми людьми. 3 Да исповедятся имени Твоему великому, яко страшно и свято есть. 4 И честь царева суд любит: Ты уготовал еси правоты, суд и правду во Иакове Ты сотворил еси. 5 Возносите Господа Бога нашего и покланяйтеся подножию ногу Его, яко свято есть. 6 Моисей и Аарон во иереех Его, и Самуил в призывающих имя Его: призываху Господа, и Той послушаше их. 7 В столпе облачне глаголаше к ним: яко храняху свидения Его и повеления Его, яже даде им. 8 Господи Боже наш, Ты послушал еси их: Боже, Ты милостив бывал еси им, и мщая на вся начинания их. 9 Возносите Господа Бога нашего и покланяйтеся в горе святей Его: яко свят Господь Бог наш. === 99 === 1 Воскликните Богови вся земля: 2 работайте Господеви в веселии, внидите пред Ним в радости. 3 Уведите, яко Господь Той есть Бог наш: Той сотвори нас, а не мы: мы же людие Его и овцы пажити Его. 4 Внидите во врата Его во исповедании, во дворы Его в пениих: исповедайтеся Ему, хвалите имя Его. 5 Яко благ Господь, в век милость Его, и даже до рода и рода истина Его. === 100 === 1 Милость и суд воспою Тебе, Господи: 2 пою и разумею в пути непорочне: когда приидеши ко мне? Прехождах в незлобии сердца моего посреде дому моего. 3 Не предлагах пред очима моима вещь законопреступную: творящыя преступление возненавидех. 4 Не прильпе мне сердце строптиво: уклоняющагося от мене лукаваго не познах. 5 Оклеветающаго тай искренняго своего, сего изгонях: гордым оком и несытым сердцем, с сим не ядях. 6 Очи мои на верныя земли, посаждати я со мною: ходяй по пути непорочну, сей ми служаше. 7 Не живяше посреде дому моего творяй гордыню: глаголяй неправедная не исправляше пред очима моима. 8 Воутрия избивах вся грешныя земли, еже потребити от града Господня вся делающыя беззаконие. === 101 === 1 Молитва нищаго, егда уныет и пред Господем пролиет моление свое. 2 Господи, услыши молитву мою, и вопль мой к Тебе да приидет. 3 Не отврати лица Твоего от мене: в оньже аще день скорблю, приклони ко мне ухо Твое: в оньже аще день призову Тя, скоро услыши мя. 4 Яко изчезоша яко дым дние мои, и кости моя яко сушило сосхошася. 5 Уязвлен бых яко трава, и изсше сердце мое, яко забых снести хлеб мой. 6 От гласа воздыхания моего прильпе кость моя плоти моей. 7 Уподобихся неясыти пустынней, бых яко нощный вран на нырищи. 8 Бдех и бых яко птица особящаяся на зде. 9 Весь день поношаху ми врази мои, и хвалящии мя мною кленяхуся. 10 Зане пепел яко хлеб ядях и питие мое с плачем растворях, 11 от лица гнева Твоего и ярости Твоея: яко вознес низвергл мя еси. 12 Дние мои яко сень уклонишася, и аз яко сено изсхох. 13 Ты же, Господи, во век пребываеши, и память Твоя в род и род. 14 Ты воскрес ущедриши Сиона: яко время ущедрити его, яко прииде время. 15 Яко благоволиша раби Твои камение его, и персть его ущедрят. 16 И убоятся языцы имене Господня, и вси царие земстии славы Твоея: 17 яко созиждет Господь Сиона и явится во славе Своей. 18 Призре на молитву смиренных и не уничижи моления их. 19 Да напишется сие в род ин, и людие зиждемии восхвалят Господа: 20 яко приниче с высоты святыя Своея, Господь с небесе на землю призре, 21 услышати воздыхание окованных, разрешити сыны умерщвленных: 22 возвестити в Сионе имя Господне и хвалу Его во Иерусалиме, 23 внегда собратися людем вкупе и царем, еже работати Господеви. 24 Отвеща Ему на пути крепости Его: умаление дний моих возвести ми: 25 не возведи мене во преполовение дний моих: в роде родов лета Твоя. 26 В началех Ты, Господи, землю основал еси, и дела руку Твоею суть небеса. 27 Та погибнут, Ты же пребываеши: и вся яко риза обетшают, и яко одежду свиеши я, и изменятся. 28 Ты же тойжде еси, и лета Твоя не оскудеют. 29 Сынове раб Твоих вселятся, и семя их во век исправится. === 102 === 1 Благослови, душе моя, Господа, и вся внутренняя моя, имя святое Его: 2 благослови, душе моя, Господа, и не забывай всех воздаяний Его: 3 очищающаго вся беззакония твоя, изцеляющаго вся недуги твоя, 4 избавляющаго от истления живот твой, венчающаго тя милостию и щедротами, 5 исполняющаго во благих желание твое: обновится яко орля юность твоя. 6 Творяй милостыни Господь и судбу всем обидимым. 7 Сказа пути Своя Моисеови, сыновом Израилевым хотения Своя. 8 Щедр и милостив Господь, долготерпелив и многомилостив. 9 Не до конца прогневается, ниже во век враждует: 10 не по беззаконием нашым сотворил есть нам, ниже по грехом нашым воздал есть нам. 11 Яко по высоте небесней от земли, утвердил есть Господь милость Свою на боящихся Его: 12 елико отстоят востоцы от запад, удалил есть от нас беззакония наша. 13 Якоже щедрит отец сыны, ущедри Господь боящихся Его. 14 Яко Той позна создание наше, помяну, яко персть есмы. 15 Человек, яко трава дние его, яко цвет селный, тако оцветет: 16 яко дух пройде в нем, и не будет, и не познает ктому места своего. 17 Милость же Господня от века и до века на боящихся Его, 18 и правда Его на сынех сынов, хранящих завет Его и помнящих заповеди Его творити я. 19 Господь на небеси уготова престол Свой, и царство Его всеми обладает. 20 Благословите Господа, вси Ангели Его, сильнии крепостию, творящии слово Его, услышати глас словес Его. 21 Благословите Господа, вся силы Его, слуги Его, творящии волю Его. 22 Благословите Господа, вся дела Его на всяком месте владычества Его: благослови, душе моя, Господа. === 103 === 1 Благослови, душе моя, Господа. Господи Боже мой, возвеличился еси зело: во исповедание и в велелепоту облеклся еси: 2 одеяйся светом яко ризою, простираяй небо яко кожу: 3 покрываяй водами превыспренняя Своя, полагаяй облаки на восхождение Свое, ходяй на крилу ветреню: 4 творяй ангелы Своя духи, и слуги Своя пламень огненный: 5 основаяй землю на тверди ея: не преклонится в век века. 6 Бездна яко риза одеяние ея, на горах станут воды: 7 от запрещения Твоего побегнут, от гласа грома Твоего убоятся. 8 Восходят горы, и низходят поля, в место еже основал еси им. 9 Предел положил еси, егоже не прейдут, ниже обратятся покрыти землю. 10 Посылаяй источники в дебрех, посреде гор пройдут воды. 11 Напаяют вся звери селныя, ждут онагри в жажду свою. 12 На тых птицы небесныя привитают: от среды камения дадят глас. 13 Напаяяй горы от превыспренних Своих: от плода дел Твоих насытится земля. 14 Прозябаяй траву скотом, и злак на службу человеком, извести хлеб от земли: 15 и вино веселит сердце человека, умастити лице елеем: и хлеб сердце человека укрепит. 16 Насытятся древа польская, кедри Ливанстии, ихже еси насадил: 17 тамо птицы вогнездятся, еродиево жилище предводителствует ими. 18 Горы высокия еленем, камень прибежище заяцем. 19 Сотворил есть луну во времена: солнце позна запад свой. 20 Положил еси тму, и бысть нощь, в нейже пройдут вси зверие дубравнии, 21 скимни рыкающии восхитити и взыскати от Бога пищу себе. 22 Возсия солнце, и собрашася, и в ложах своих лягут. 23 Изыдет человек на дело свое и на делание свое до вечера. 24 Яко возвеличишася дела Твоя, Господи: вся премудростию сотворил еси: исполнися земля твари Твоея. 25 Сие море великое и пространное: тамо гади, ихже несть числа, животная малая с великими: 26 тамо корабли преплавают, змий сей, егоже создал еси ругатися ему. 27 Вся к Тебе чают, дати пищу им во благо время. 28 Давшу Тебе им, соберут: отверзшу Тебе руку, всяческая исполнятся благости: 29 отвращшу же Тебе лице, возмятутся: отимеши дух их, и изчезнут и в персть свою возвратятся: 30 послеши духа Твоего, и созиждутся, и обновиши лице земли. 31 Буди слава Господня во веки: возвеселится Господь о делех Своих: 32 призираяй на землю и творяй ю трястися: прикасаяйся горам, и дымятся. 33 Воспою Господеви в животе моем, пою Богу моему, дондеже есмь: 34 да усладится Ему беседа моя, аз же возвеселюся о Господе. 35 Да изчезнут грешницы от земли, и беззаконницы, якоже не быти им. Благослови, душе моя, Господа. === 104 === 1 Исповедайтеся Господеви и призывайте имя Его, возвестите во языцех дела Его: 2 воспойте Ему и пойте Ему, поведите вся чудеса Его. 3 Хвалитеся о имени святем Его: да возвеселится сердце ищущих Господа: 4 взыщите Господа и утвердитеся, взыщите лица Его выну. 5 Помяните чудеса Его, яже сотвори, чудеса Его и судбы уст Его, 6 семя Авраамле раби Его, сынове Иаковли избраннии Его. 7 Той Господь Бог наш: по всей земли судбы Его. 8 Помяну в век завет Свой, слово, еже заповеда в тысящы родов, 9 еже завеща Аврааму, и клятву Свою Исааку: 10 и постави ю Иакову в повеление и Израилю в завет вечен, 11 глаголя: тебе дам землю Ханааню, уже достояния вашего. 12 Внегда быти им малым числом, малейшым и пришелцем в ней, 13 и преидоша от языка в язык и от царствия в люди ины: 14 не остави человека обидети их и обличи о них цари: 15 не прикасайтеся помазанным Моим, и во пророцех Моих не лукавнуйте. 16 И призва глад на землю: всяко утверждение хлебное сотры. 17 Посла пред ними человека: в раба продан бысть Иосиф. 18 Смириша во оковах нозе его, железо пройде душа его, 19 дондеже прииде слово Его: слово Господне разжже его. 20 Посла царь и разреши его: князь людий, и остави его. 21 Постави его господина дому своему и князя всему стяжанию своему, 22 наказати князи его яко себе и старцы его умудрити. 23 И вниде Израиль во Египет, и Иаков пришелствова в землю Хамову. 24 И возрасти люди Своя зело и укрепи я паче врагов их. 25 Преврати сердце их возненавидети люди Его, лесть сотворити в рабех Его. 26 Посла Моисеа раба Своего, Аарона, егоже избра себе: 27 положи в них словеса знамений Своих и чудес Своих в земли Хамове. 28 Посла тму и помрачи, яко преогорчиша словеса Его. 29 Преложи воды их в кровь и измори рыбы их. 30 Воскипе земля их жабами в сокровищницах царей их. 31 Рече, и приидоша песия мухи и скнипы во вся пределы их. 32 Положи дожди их грады, огнь попаляющь в земли их: 33 и порази винограды их и смоквы их, и сотры всякое древо предел их. 34 Рече, и приидоша прузи и гусеницы, имже не бе числа, 35 и снедоша всяку траву в земли их, и поядоша всяк плод земли их. 36 И порази всякаго первенца в земли их, начаток всякаго труда их: 37 и изведе я с сребром и златом: и не бе в коленех их боляй. 38 Возвеселися Египет во исхождении их: яко нападе страх их на ня. 39 Распростре облак в покров им, и огнь, еже просветити им нощию. 40 Просиша, и приидоша крастели, и хлеба небеснаго насыти я: 41 разверзе камень, и потекоша воды, потекоша в безводных реки: 42 яко помяну слово святое Свое, еже ко Аврааму рабу Своему. 43 И изведе люди Своя в радости и избранныя Своя в веселии. 44 И даде им страны язык, и труды людий наследоваша: 45 яко да сохранят оправдания Его и закона Его взыщут. === 105 === 1 Исповедайтеся Господеви, яко благ, яко в век милость Его. 2 Кто возглаголет силы Господни, слышаны сотворит вся хвалы Его? 3 Блажени хранящии суд и творящии правду во всякое время. 4 Помяни нас, Господи, во благоволении людий Твоих, посети нас спасением Твоим, 5 видети во благости избранныя Твоя, возвеселитися в веселии языка Твоего, хвалитися с достоянием Твоим. 6 Согрешихом со отцы нашими, беззаконновахом, неправдовахом: 7 отцы наши во Египте не разумеша чудес Твоих, ни помянуша множества милости Твоея: и преогорчиша восходяще в Чермное море. 8 И спасе их имене Своего ради, сказати силу Свою: 9 и запрети Чермному морю, и изсяче: и настави я в бездне яко в пустыни. 10 И спасе я из руки ненавидящих и избави я из руки врагов. 11 Покры вода стужающыя им: ни един от них избысть. 12 И вероваша словеси Его и воспеша хвалу Его. 13 Ускориша, забыша дела Его, не стерпеша совета Его: 14 и похотеша желанию в пустыни и искусиша Бога в безводней. 15 И даде им прошение их, посла сытость в душы их. 16 И прогневаша Моисеа в стану, Аарона святаго Господня. 17 Отверзеся земля и пожре Дафана и покры на сонмищи Авирона: 18 и разжжеся огнь в сонме их, пламень попали грешники. 19 И сотвориша телца в Хориве и поклонишася истуканному: 20 и измениша славу Его в подобие телца ядущаго траву. 21 И забыша Бога спасающаго их, сотворшаго велия во Египте, 22 чудеса в земли Хамове, страшная в мори Чермнем. 23 И рече потребити их, аще не бы Моисей избранный Его стал в сокрушении пред Ним, возвратити ярость Его, да не погубит их. 24 И уничижиша землю желанную, не яша веры словеси Его: 25 и поропташа в селениих своих, не услышаша гласа Господня. 26 И воздвиже руку Свою на ня, низложити я в пустыни, 27 и низложити семя их во языцех, и расточити я в страны. 28 И причастишася Веельфегору и снедоша жертвы мертвых: 29 и раздражиша Его в начинаниих своих, и умножися в них падение. 30 И ста Финеес и умилостиви, и преста сечь: 31 и вменися ему в правду, в род и род до века. 32 И прогневаша Его на воде Пререкания, и озлоблен бысть Моисей их ради: 33 яко преогорчиша дух его и разнствова устнама своима. 34 Не потребиша языки, яже рече Господь им. 35 И смесишася во языцех и навыкоша делом их: 36 и поработаша истуканным их, и бысть им в соблазн. 37 И пожроша сыны своя и дщери своя бесовом, 38 и пролияша кровь неповинную, кровь сынов своих и дщерей, яже пожроша истуканным Ханаанским: и убиена бысть земля их кровьми 39 и осквернися в делех их: и соблудиша в начинаниих своих. 40 И разгневася яростию Господь на люди Своя и омерзи достояние Свое: 41 и предаде я в руки врагов, и обладаша ими ненавидящии их. 42 И стужиша им врази их: и смиришася под руками их. 43 Множицею избави я: тии же преогорчиша Его советом своим, и смиришася в беззакониих своих. 44 И виде Господь, внегда скорбети им, внегда услышаше моление их: 45 и помяну завет Свой, и раскаяся по множеству милости Своея: 46 и даде я в щедроты пред всеми пленившими я. 47 Спаси ны, Господи, Боже наш, и собери ны от язык, исповедатися имени Твоему святому, хвалитися во хвале Твоей. 48 Благословен Господь Бог Израилев от века и до века. И рекут вси людие: буди, буди. === 106 === 1 Исповедайтеся Господеви, яко благ, яко в век милость Его. 2 Да рекут избавленнии Господем, ихже избави из руки врага, 3 и от стран собра их, от восток и запад, и севера и моря: 4 заблудиша в пустыни безводней, пути града обителнаго не обретоша: 5 алчуще и жаждуще, душа их в них изчезе. 6 И воззваша ко Господу, внегда скорбети им, и от нужд их избави я: 7 и настави я на путь прав, внити во град обителный. 8 Да исповедятся Господеви милости Его и чудеса Его сыновом человеческим: 9 яко насытил есть душу тщу, и душу алчущу исполни благ: 10 седящыя во тме и сени смертней, окованныя нищетою и железом, 11 яко преогорчиша словеса Божия, и совет Вышняго раздражиша. 12 И смирися в трудех сердце их, и изнемогоша, и не бе помагаяй. 13 И воззваша ко Господу, внегда скорбети им, и от нужд их спасе я: 14 и изведе я из тмы и сени смертныя, и узы их растерза. 15 Да исповедятся Господеви милости Его и чудеса Его сыновом человеческим: 16 яко сокруши врата медная, и вереи железныя сломи. 17 Восприят я от пути беззакония их: беззаконий бо ради своих смиришася. 18 Всякаго брашна возгнушася душа их, и приближишася до врат смертных. 19 И воззваша ко Господу, внегда скорбети им, и от нужд их спасе я: 20 посла слово Свое, и изцели я, и избави я от растлений их. 21 Да исповедятся Господеви милости Его и чудеса Его сыновом человеческим: 22 и да пожрут Ему жертву хвалы и да возвестят дела Его в радости. 23 Сходящии в море в кораблех, творящии делания в водах многих, 24 тии видеша дела Господня и чудеса Его во глубине. 25 Рече, и ста дух бурен, и вознесошася волны его: 26 восходят до небес и низходят до бездн: душа их в злых таяше: 27 смятошася, подвигошася яко пияный, и вся мудрость их поглощена бысть. 28 И воззваша ко Господу, внегда скорбети им, и от нужд их изведе я: 29 и повеле бури, и ста в тишину, и умолкоша волны его. 30 И возвеселишася, яко умолкоша, и настави я в пристанище хотения Своего. 31 Да исповедятся Господеви милости Его и чудеса Его сыновом человеческим: 32 да вознесут Его в церкви людстей, и на седалищи старец восхвалят Его. 33 Положил есть реки в пустыню и исходища водная в жажду, 34 землю плодоносную в сланость, от злобы живущих на ней. 35 Положил есть пустыню во езера водная и землю безводную во исходища водная. 36 И насели тамо алчущыя, и составиша грады обителны: 37 и насеяша села, и насадиша винограды, и сотвориша плод житен. 38 И благослови я, и умножишася зело: и скоты их не умали. 39 И умалишася и озлобишася от скорби зол и болезни: 40 излияся уничижение на князи их, и облазни я по непроходней, а не по пути. 41 И поможе убогу от нищеты и положи яко овцы отечествия. 42 Узрят правии и возвеселятся, и всякое беззаконие заградит уста своя. 43 Кто премудр и сохранит сия? И уразумеют милости Господни. === 107 === 1 Песнь, псалом Давиду. 2 Готово сердце мое, Боже, готово сердце мое: воспою и пою во славе моей. 3 Востани, слава моя, востани, псалтирю и гусли: востану рано. 4 Исповемся Тебе в людех, Господи, пою Тебе во языцех: 5 яко велия верху небес милость Твоя и до облак истина Твоя. 6 Вознесися на небеса, Боже, и по всей земли слава Твоя, 7 яко да избавятся возлюбленнии Твои: спаси десницею Твоею и услыши мя. 8 Бог возглагола во святем Своем: вознесуся и разделю Сикиму, и удоль Селений размерю. 9 Мой есть Галаад, и Мой есть Манассий, и Ефрем заступление главы Моея: Иуда царь Мой, 10 Моав коноб упования Моего: на Идумею наложу сапог Мой: мне иноплеменницы покоришася. 11 Кто введет мя во град ограждения? Или кто наставит мя до Идумеи? 12 Не Ты ли, Боже, отринувый нас, и не изыдеши, Боже, в силах наших? 13 Даждь нам помощь от скорби: и суетно спасение человеческо. 14 О Бозе сотворим силу, и Той уничижит враги нашя. === 108 === 1 Боже, хвалы моея не премолчи: 2 яко уста грешнича и уста льстиваго на мя отверзошася, глаголаша на мя языком льстивым, 3 и словесы ненавистными обыдоша мя, и брашася со мною туне. 4 Вместо еже любити мя, оболгаху мя, аз же моляхся: 5 и положиша на мя злая за благая, и ненависть за возлюбление мое. 6 Постави на него грешника, и диавол да станет одесную его: 7 внегда судитися ему, да изыдет осужден, и молитва его да будет в грех. 8 Да будут дние его мали, и епископство его да приимет ин: 9 да будут сынове его сири, и жена его вдова: 10 движущеся да преселятся сынове его и воспросят, да изгнани будут из домов своих. 11 Да взыщет заимодавец вся, елика суть его: и да восхитят чуждии труды его. 12 Да не будет ему заступника, ниже да будет ущедряяй сироты его: 13 да будут чада его в погубление, в роде единем да потребится имя его. 14 Да воспомянется беззаконие отец его пред Господем, и грех матере его да не очистится: 15 да будут пред Господем выну, и да потребится от земли память их: 16 занеже не помяну сотворити милость, и погна человека нища и убога, и умилена сердцем умертвити. 17 И возлюби клятву, и приидет ему: и не восхоте благословения, и удалится от него. 18 И облечеся в клятву яко в ризу, и вниде яко вода во утробу его и яко елей в кости его: 19 да будет ему яко риза, в нюже облачится, и яко пояс, имже выну опоясуется. 20 Сие дело оболгающих мя у Господа и глаголющих лукавая на душу мою. 21 И Ты, Господи, Господи, сотвори со мною имене ради Твоего, яко блага милость Твоя: 22 избави мя, яко нищь и убог есмь аз, и сердце мое смятеся внутрь мене. 23 Яко сень, внегда уклонитися ей, отяхся: стрясохся яко прузи. 24 Колена моя изнемогоста от поста, и плоть моя изменися елеа ради. 25 И аз бых поношение им: видеша мя, покиваша главами своими. 26 Помози ми, Господи Боже мой, и спаси мя по милости Твоей: 27 и да разумеют, яко рука Твоя сия, и Ты, Господи, сотворил еси ю. 28 Прокленут тии, и Ты благословиши: востающии на мя да постыдятся, раб же Твой возвеселится. 29 Да облекутся оболгающии мя в срамоту и одеждутся яко одеждою студом своим. 30 Исповемся Господеви зело усты моими и посреде многих восхвалю Его: 31 яко преста одесную убогаго, еже спасти от гонящих душу мою. === 109 === 1 Рече Господь Господеви моему: седи одесную Мене, дондеже положу враги Твоя подножие ног Твоих. 2 Жезл силы послет Ти Господь от Сиона, и господствуй посреде врагов Твоих. 3 С Тобою начало в день силы Твоея, во светлостех святых твоих: из чрева прежде денницы родих Тя. 4 Клятся Господь и не раскается: Ты иерей во век по чину Мелхиседекову. 5 Господь одесную Тебе сокрушил есть в день гнева Своего цари: 6 судит во языцех, исполнит падения, сокрушит главы на земли многих. 7 От потока на пути пиет: сего ради вознесет главу. === 110 === 1 Исповемся Тебе, Господи, всем сердцем моим в совете правых и сонме. 2 Велия дела Господня, изыскана во всех волях его: 3 исповедание и великолепие дело Его, и правда Его пребывает в век века. 4 Память сотворил есть чудес Своих: милостив и щедр Господь. 5 Пищу даде боящымся Его: помянет в век завет Свой. 6 Крепость дел Своих возвести людем Своим, дати им достояние язык. 7 Дела рук Его истина и суд, верны вся заповеди Его, 8 утвержены в век века, сотворены во истине и правоте. 9 Избавление посла людем Своим: заповеда в век завет Свой: свято и страшно имя Его. 10 Начало премудрости страх Господень, разум же благ всем творящым и: хвала Его пребывает в век века. === 111 === 1 Блажен муж бояйся Господа, в заповедех Его восхощет зело. 2 Сильно на земли будет семя его, род правых благословится: 3 слава и богатство в дому его, и правда его пребывает в век века. 4 Возсия во тме свет правым: милостив и щедр и праведен. 5 Благ муж щедря и дая: устроит словеса своя на суде, яко в век не подвижится. 6 В память вечную будет праведник. 7 От слуха зла не убоится: 8 готово сердце его уповати на Господа: утвердися сердце его, не убоится, дондеже воззрит на враги своя. 9 Расточи, даде убогим: правда его пребывает во век века: рог его вознесется в славе. 10 Грешник узрит и прогневается зубы своими поскрежещет и растает: желание грешника погибнет. === 112 === 1 Хвалите, отроцы, Господа, хвалите имя Господне. 2 Буди имя Господне благословено отныне и до века. 3 От восток солнца до запад хвально имя Господне. 4 Высок над всеми языки Господь: над небесы слава Его. 5 Кто яко Господь Бог наш? На высоких живый, 6 и на смиренныя призираяй на небеси и на земли: 7 воздвизаяй от земли нища, и от гноища возвышаяй убога: 8 посадити его с князи, с князи людий своих: 9 вселяя неплодовь в дом, матерь о чадех веселящуся. === 113 === 1 Во исходе Израилеве от Египта, дому Иаковля из людий варвар, 2 бысть Иудеа святыня Его, Израиль область Его. 3 Море виде и побеже, Иордан возвратися вспять: 4 горы взыграшася яко овни, и холми яко агнцы овчии. 5 Что ти есть, море, яко побегло еси, и тебе, Иордане, яко возвратился еси вспять? 6 Горы, яко взыграстеся яко овни, и холми яко агнцы овчии? 7 От лица Господня подвижеся земля, от лица Бога Иаковля: 8 обращшаго камень во езера водная и несекомый во источники водныя. 9 Не нам, Господи, не нам, но имени Твоему даждь славу о милости Твоей и истине Твоей: 10 да не когда рекут языцы: где есть Бог их? 11 Бог же наш на небеси и на земли, вся елика восхоте, сотвори. 12 Идоли язык сребро и злато, дела рук человеческих: 13 уста имут, и не возглаголют: очи имут, и не узрят: 14 ушы имут, и не услышат: ноздри имут, и не обоняют: 15 руце имут, и не осяжут: нозе имут, и не пойдут: не возгласят гортанем своим. 16 Подобни им да будут творящии я и вси надеющиися на ня. 17 Дом Израилев упова на Господа: помощник и защититель им есть. 18 Дом Ааронь упова на Господа: помощник и защититель им есть. 19 Боящиися Господа уповаша на Господа: помощник и защититель им есть. 20 Господь помянув ны благословил есть нас: благословил есть дом Израилев, благословил есть дом Ааронь, 21 благословил есть боящыяся Господа, малыя с великими. 22 Да приложит Господь на вы, на вы и на сыны вашя: 23 благословени вы Господеви, сотворшему небо и землю. 24 Небо небесе Господеви, землю же даде сыновом человеческим. 25 Не мертвии восхвалят Тя, Господи, ниже вси низходящии во ад: 26 но мы живии благословим Господа отныне и до века. === 114 === 1 Возлюбих, яко услышит Господь глас моления моего, 2 яко приклони ухо Свое мне: и во дни моя призову. 3 Объяша мя болезни смертныя, беды адовы обретоша мя: скорбь и болезнь обретох и имя Господне призвах: 4 о, Господи, избави душу мою: милостив Господь и праведен и Бог наш милует. 5 Храняй младенцы Господь: смирихся, и спасе мя. 6 Обратися, душе моя, в покой твой, яко Господь благодействова тя: 7 яко изят душу мою от смерти, очи мои от слез и нозе мои от поползновения. 8 Благоугожду пред Господем во стране живых. === 115 === 1 Веровах, темже возглаголах: аз же смирихся зело. 2 Аз же рех во изступлении моем: всяк человек ложь. 3 Что воздам Господеви о всех, яже воздаде ми? 4 Чашу спасения прииму и имя Господне призову: 5 молитвы моя Господеви воздам пред всеми людьми Его. 6 Честна пред Господем смерть преподобных Его. 7 О, Господи, аз раб Твой, аз раб Твой и сын рабыни Твоея: растерзал еси узы моя. 8 Тебе пожру жертву хвалы, и во имя Господне призову. 9 Молитвы моя Господеви воздам пред всеми людьми Его, 10 во дворех дому Господня, посреде тебе, Иерусалиме. === 116 === 1 Хвалите Господа, вси языцы, похвалите Его, вси людие: 2 яко утвердися милость Его на нас, и истина Господня пребывает во век. === 117 === 1 Исповедайтеся Господеви, яко благ, яко в век милость Его. 2 Да речет убо дом Израилев: яко благ, яко в век милость Его. 3 Да речет убо дом Ааронь: яко благ, яко в век милость Его. 4 Да рекут убо вси боящиися Господа: яко благ, яко в век милость Его. 5 От скорби призвах Господа, и услыша мя в пространство. 6 Господь мне помощник, и не убоюся: что сотворит мне человек? 7 Господь мне помощник, и аз воззрю на враги моя. 8 Благо есть надеятися на Господа, нежели надеятися на человека: 9 благо есть уповати на Господа, нежели уповати на князи. 10 Вси языцы обыдоша мя, и именем Господним противляхся им: 11 обышедше обыдоша мя, и именем Господним противляхся им: 12 обыдоша мя яко пчелы сот, и разгорешася яко огнь в тернии: и именем Господним противляхся им. 13 Отриновен превратихся пасти, и Господь прият мя. 14 Крепость моя и пение мое Господь, и бысть ми во спасение. 15 Глас радости и спасения в селениих праведных: десница Господня сотвори силу. 16 Десница Господня вознесе мя, десница Господня сотвори силу. 17 Не умру, но жив буду и повем дела Господня. 18 Наказуя наказа мя Господь, смерти же не предаде мя. 19 Отверзите мне врата правды: вшед в ня, исповемся Господеви. 20 Сия врата Господня: праведнии внидут в ня. 21 Исповемся Тебе, яко услышал мя еси и был еси мне во спасение. 22 Камень, егоже небрегоша зиждущии, сей бысть во главу угла: 23 от Господа бысть сей, и есть дивен во очесех наших. 24 Сей день, егоже сотвори Господь, возрадуемся и возвеселимся в онь. 25 О, Господи, спаси же: о, Господи, поспеши же. 26 Благословен грядый во имя Господне: благословихом вы из дому Господня. 27 Бог Господь, и явися нам: составите праздник во учащающих до рог олтаревых. 28 Бог мой еси Ты, и исповемся Тебе: Бог мой еси Ты, и вознесу Тя: исповемся Тебе, яко услышал мя еси и был еси мне во спасение. 29 Исповедайтеся Господеви, яко благ, яко в век милость Его. === 118 === 1 Блажени непорочнии в путь, ходящии в законе Господни. 2 Блажени испытающии свидения Его, всем сердцем взыщут Его. 3 Не делающии бо беззакония в путех Его ходиша. 4 Ты заповедал еси заповеди Твоя сохранити зело: 5 дабы исправилися путие мои, сохранити оправдания Твоя. 6 Тогда не постыжуся, внегда призрети ми на вся заповеди Твоя. 7 Исповемся Тебе в правости сердца, внегда научитимися судбам правды Твоея. 8 Оправдания Твоя сохраню: не остави мене до зела. 9 В чесом исправит юнейший путь свой? Внегда сохранити словеса Твоя. 10 Всем сердцем моим взысках Тебе: не отрини мене от заповедий Твоих. 11 В сердцы моем скрых словеса Твоя, яко да не согрешу Тебе. 12 Благословен еси, Господи: научи мя оправданием Твоим. 13 Устнама моима возвестих вся судбы уст Твоих. 14 На пути свидений Твоих насладихся, яко о всяком богатстве. 15 В заповедех Твоих поглумлюся, и уразумею пути Твоя. 16 Во оправданиих Твоих поучуся: не забуду словес Твоих. 17 Воздаждь рабу Твоему: живи мя, и сохраню словеса Твоя. 18 Открый очи мои, и уразумею чудеса от закона Твоего. 19 Пришлец аз есмь на земли: не скрый от мене заповеди Твоя. 20 Возлюби душа моя возжелати судбы Твоя на всякое время. 21 Запретил еси гордым: прокляти уклоняющиися от заповедий Твоих. 22 Отими от мене понос и уничижение, яко свидений Твоих взысках. 23 Ибо седоша князи и на мя клеветаху, раб же Твой глумляшеся во оправданиих Твоих: 24 ибо свидения Твоя поучение мое есть, и совети мои оправдания Твоя. 25 Прильпе земли душа моя: живи мя по словеси Твоему. 26 Пути моя возвестих, и услышал мя еси: научи мя оправданием Твоим. 27 Путь оправданий Твоих вразуми ми, и поглумлюся в чудесех Твоих. 28 Воздрема душа моя от уныния: утверди мя в словесех Твоих. 29 Путь неправды отстави от мене и законом Твоим помилуй мя. 30 Путь истины изволих и судбы Твоя не забых. 31 Прилепихся свидением Твоим, Господи, не посрами мене. 32 Путь заповедий Твоих текох, егда разширил еси сердце мое. 33 Законоположи мне, Господи, путь оправданий Твоих, и взыщу и выну: 34 вразуми мя, и испытаю закон Твой и сохраню и всем сердцем моим. 35 Настави мя на стезю заповедий Твоих, яко тую восхотех. 36 Приклони сердце мое во свидения Твоя, а не в лихоимство. 37 Отврати очи мои еже не видети суеты: в пути Твоем живи мя. 38 Постави рабу Твоему слово Твое в страх Твой. 39 Отими поношение мое, еже непщевах: яко судбы Твоя благи. 40 Се, возжелах заповеди Твоя: в правде Твоей живи мя. 41 И да приидет на мя милость Твоя, Господи, спасение Твое по словеси Твоему: 42 и отвещаю поношающым ми слово, яко уповах на словеса Твоя. 43 И не отими от уст моих словесе истинна до зела, яко на судбы Твоя уповах: 44 и сохраню закон Твой выну, в век и в век века. 45 И хождах в широте, яко заповеди Твоя взысках: 46 и глаголах о свидениих Твоих пред цари и не стыдяхся: 47 и поучахся в заповедех Твоих, яже возлюбих зело: 48 и воздвигох руце мои к заповедем Твоим, яже возлюбих, и глумляхся во оправданиих Твоих. 49 Помяни словеса Твоя рабу Твоему, ихже упование дал ми еси. 50 То мя утеши во смирении моем, яко слово Твое живи мя. 51 Гордии законопреступоваху до зела: от закона же Твоего не уклонихся. 52 Помянух судбы Твоя от века, Господи, и утешихся. 53 Печаль прият мя от грешник, оставляющих закон Твой. 54 Пета бяху мне оправдания Твоя на месте пришелствия моего. 55 Помянух в нощи имя Твое, Господи, и сохраних закон Твой. 56 Сей бысть мне, яко оправданий Твоих взысках. 57 Часть моя еси, Господи: рех сохранити закон Твой. 58 Помолихся лицу Твоему всем сердцем моим: помилуй мя по словеси Твоему. 59 Помыслих пути Твоя и возвратих нозе мои во свидения Твоя. 60 Уготовихся и не смутихся сохранити заповеди Твоя. 61 Ужя грешник обязашася мне, и закона Твоего не забых. 62 Полунощи востах исповедатися Тебе о судбах правды Твоея. 63 Причастник аз есмь всем боящымся Тебе и хранящым заповеди Твоя. 64 Милости Твоея, Господи, исполнь земля: оправданием Твоим научи мя. 65 Благость сотворил еси с рабом Твоим, Господи, по словеси Твоему: 66 благости и наказанию и разуму научи мя, яко заповедем Твоим веровах. 67 Прежде даже не смиритимися, аз прегреших: сего ради слово Твое сохраних. 68 Благ еси Ты, Господи: и благостию Твоею научи мя оправданием Твоим. 69 Умножися на мя неправда гордых: аз же всем сердцем моим испытаю заповеди Твоя. 70 Усырися яко млеко сердце их: аз же закону Твоему поучихся. 71 Благо мне, яко смирил мя еси, яко да научуся оправданием Твоим. 72 Благ мне закон уст Твоих паче тысящ злата и сребра. 73 Руце Твои сотвористе мя и создасте мя: вразуми мя, и научуся заповедем Твоим. 74 Боящиися Тебе узрят мя и возвеселятся, яко на словеса Твоя уповах. 75 Разумех, Господи, яко правда судбы Твоя, и воистинну смирил мя еси. 76 Буди же милость Твоя, да утешит мя, по словеси Твоему рабу Твоему: 77 да приидут мне щедроты Твоя, и жив буду, яко закон Твой поучение мое есть: 78 да постыдятся гордии, яко неправедно беззаконноваша на мя: аз же поглумлюся в заповедех Твоих. 79 Да обратят мя боящиися Тебе и ведящии свидения Твоя. 80 Буди сердце мое непорочно во оправданиих Твоих, яко да не постыжуся. 81 Изчезает во спасение Твое душа моя, на словеса Твоя уповах: 82 изчезоша очи мои в слово Твое, глаголюще: когда утешиши мя? 83 Зане бых яко мех на слане: оправданий Твоих не забых. 84 Колико есть дний раба Твоего? Когда сотвориши ми от гонящих мя суд? 85 Поведаша мне законопреступницы глумления, но не яко закон Твой, Господи. 86 Вся заповеди Твоя истина: неправедно погнаша мя, помози ми. 87 Вмале не скончаша мене на земли: аз же не оставих заповедий Твоих. 88 По милости Твоей живи мя, и сохраню свидения уст Твоих. 89 Во век, Господи, слово Твое пребывает на небеси. 90 В род и род истина Твоя: основал еси землю, и пребывает. 91 Учинением Твоим пребывает день: яко всяческая работна Тебе. 92 Яко аще бы не закон Твой поучение мое был, тогда убо погибл бых во смирении моем: 93 во век не забуду оправданий Твоих, яко в них оживил мя еси. 94 Твой есмь аз, спаси мя: яко оправданий Твоих взысках. 95 Мене ждаша грешницы погубити мя: свидения Твоя разумех. 96 Всякия кончины видех конец: широка заповедь Твоя зело. 97 Коль возлюбих закон Твой, Господи: весь день поучение мое есть. 98 Паче враг моих умудрил мя еси заповедию Твоею, яко в век моя есть. 99 Паче всех учащих мя разумех, яко свидения Твоя поучение мое есть. 100 Паче старец разумех, яко заповеди Твоя взысках. 101 От всякаго пути лукава возбраних ногам моим, яко да сохраню словеса Твоя: 102 от судеб Твоих не уклонихся, яко Ты законоположил ми еси. 103 Коль сладка гортани моему словеса Твоя: паче меда устом моим. 104 От заповедий Твоих разумех: сего ради возненавидех всяк путь неправды. 105 Светилник ногама моима закон Твой, и свет стезям моим. 106 Кляхся и поставих сохранити судбы правды Твоея. 107 Смирихся до зела: Господи, живи мя по словеси Твоему. 108 Вольная уст моих благоволи же, Господи, и судбам Твоим научи мя. 109 Душа моя в руку Твоею выну, и закона Твоего не забых. 110 Положиша грешницы сеть мне: и от заповедий Твоих не заблудих. 111 Наследовах свидения Твоя во век, яко радование сердца моего суть: 112 приклоних сердце мое сотворити оправдания Твоя в век за воздаяние. 113 Законопреступныя возненавидех, закон же Твой возлюбих. 114 Помощник мой и заступник мой еси Ты: на словеса Твоя уповах. 115 Уклонитеся от мене, лукавнующии, и испытаю заповеди Бога моего. 116 Заступи мя по словеси Твоему, и жив буду: и не посрами мене от чаяния моего: 117 помози ми, и спасуся, и поучуся во оправданиих Твоих выну. 118 Уничижил еси вся отступающыя от оправданий Твоих: яко неправедно помышление их. 119 Преступающыя непщевах вся грешныя земли: сего ради возлюбих свидения Твоя. 120 Пригвозди страху Твоему плоти моя: от судеб бо Твоих убояхся. 121 Сотворих суд и правду: не предаждь мене обидящым мя. 122 Восприими раба Твоего во благо, да не оклеветают мене гордии. 123 Очи мои изчезосте во спасение Твое и в слово правды Твоея: 124 сотвори с рабом Твоим по милости Твоей, и оправданием Твоим научи мя. 125 Раб Твой есмь аз: вразуми мя, и увем свидения Твоя. 126 Время сотворити Господеви: разориша закон Твой. 127 Сего ради возлюбих заповеди Твоя паче злата и топазиа. 128 Сего ради ко всем заповедем Твоим направляхся, всяк путь неправды возненавидех. 129 Дивна свидения Твоя: сего ради испыта я душа моя. 130 Явление словес Твоих просвещает и вразумляет младенцы. 131 Уста моя отверзох и привлекох дух, яко заповедий Твоих желах. 132 Призри на мя и помилуй мя, по суду любящих имя Твое. 133 Стопы моя направи по словеси Твоему, и да не обладает мною всякое беззаконие: 134 избави мя от клеветы человеческия, и сохраню заповеди Твоя. 135 Лице Твое просвети на раба Твоего и научи мя оправданием Твоим. 136 Исходища водная изведосте очи мои, понеже не сохраних закона Твоего. 137 Праведен еси, Господи, и прави суди Твои: 138 заповедал еси правду свидения Твоя, и истину зело. 139 Истаяла мя есть ревность Твоя: яко забыша словеса Твоя врази мои. 140 Разжжено слово Твое зело, и раб Твой возлюби е. 141 Юнейший аз есмь и уничижен: оправданий Твоих не забых. 142 Правда Твоя правда во век, и закон Твой истина. 143 Скорби и нужди обретоша мя: заповеди Твоя поучение мое. 144 Правда свидения Твоя в век: вразуми мя, и жив буду. 145 Воззвах всем сердцем моим, услыши мя, Господи: оправдания Твоя взыщу. 146 Воззвах Ти, спаси мя, и сохраню свидения Твоя. 147 Предварих в безгодии и воззвах: на словеса Твоя уповах. 148 Предваристе очи мои ко утру, поучитися словесем Твоим. 149 Глас мой услыши, Господи, по милости Твоей: по судбе Твоей живи мя. 150 Приближишася гонящии мя беззаконием: от закона же Твоего удалишася. 151 Близ еси Ты, Господи, и вси путие Твои истина. 152 Исперва познах от свидений Твоих, яко в век основал я еси. 153 Виждь смирение мое и изми мя: яко закона Твоего не забых. 154 Суди суд мой и избави мя: словесе ради Твоего живи мя. 155 Далече от грешник спасение, яко оправданий Твоих не взыскаша. 156 Щедроты Твоя многи, Господи: по судбе Твоей живи мя. 157 Мнози изгонящии мя и стужающии ми: от свидений Твоих не уклонихся. 158 Видех неразумевающыя и истаях: яко словес Твоих не сохраниша. 159 Виждь, яко заповеди Твоя возлюбих: Господи, по милости Твоей живи мя. 160 Начало словес Твоих истина, и во век вся судбы правды Твоея. 161 Князи погнаша мя туне: и от словес Твоих убояся сердце мое. 162 Возрадуюся аз о словесех Твоих, яко обретаяй корысть многу. 163 Неправду возненавидех и омерзих: закон же Твой возлюбих. 164 Седмерицею днем хвалих Тя о судбах правды Твоея. 165 Мир мног любящым закон Твой, и несть им соблазна. 166 Чаях спасения Твоего, Господи, и заповеди Твоя возлюбих. 167 Сохрани душа моя свидения Твоя и возлюби я зело. 168 Сохраних заповеди Твоя и свидения Твоя, яко вси путие мои пред Тобою, Господи. 169 Да приближится моление мое пред Тя, Господи: по словеси Твоему вразуми мя. 170 Да внидет прошение мое пред Тя: Господи, по словеси Твоему избави мя. 171 Отрыгнут устне мои пение, егда научиши мя оправданием Твоим. 172 Провещает язык мой словеса Твоя, яко вся заповеди Твоя правда. 173 Да будет рука Твоя еже спасти мя, яко заповеди Твоя изволих. 174 Возжелах спасение Твое, Господи, и закон Твой поучение мое есть. 175 Жива будет душа моя и восхвалит Тя: и судбы Твоя помогут мне. 176 Заблудих яко овча погибшее: взыщи раба Твоего, яко заповедий Твоих не забых. === 119 === 1 Ко Господу, внегда скорбети ми, воззвах, и услыша мя. 2 Господи, избави душу мою от устен неправедных и от языка льстива. 3 Что дастся тебе, или что приложится тебе к языку льстиву? 4 Стрелы сильнаго изощрены, со угльми пустынными. 5 Увы мне, яко пришелствие мое продолжися, вселихся с селении Кидарскими: 6 много пришелствова душа моя: с ненавидящими мира бех мирен: 7 егда глаголах им, боряху мя туне. === 120 === 1 Возведох очи мои в горы, отнюдуже приидет помощь моя. 2 Помощь моя от Господа, сотворшаго небо и землю. 3 Не даждь во смятение ноги твоея, ниже воздремлет храняй тя: 4 се, не воздремлет, ниже уснет храняй Израиля. 5 Господь сохранит тя, Господь покров твой на руку десную твою. 6 Во дни солнце не ожжет тебе, ниже луна нощию. 7 Господь сохранит тя от всякаго зла, сохранит душу твою Господь: 8 Господь сохранит вхождение твое и исхождение твое, отныне и до века. === 121 === 1 Возвеселихся о рекших мне: в дом Господень пойдем. 2 Стояще бяху ноги нашя во дворех твоих, Иерусалиме. 3 Иерусалим зиждемый яко град, емуже причастие его вкупе. 4 Тамо бо взыдоша колена, колена Господня, свидение Израилево, исповедатися имени Господню: 5 яко тамо седоша престоли на суд, престоли в дому Давидове. 6 Вопросите же яже о мире Иерусалима: и обилие любящым тя. 7 Буди же мир в силе твоей, и обилие в столпостенах твоих. 8 Ради братий моих и ближних моих глаголах убо мир о тебе. 9 Дому ради Господа Бога нашего взысках благая тебе. === 122 === 1 К Тебе возведох очи мои, Живущему на небеси. 2 Се, яко очи раб в руку господий своих, яко очи рабыни в руку госпожи своея: тако очи наши ко Господу Богу нашему, дондеже ущедрит ны. 3 Помилуй нас, Господи, помилуй нас, яко помногу исполнихомся уничижения: 4 наипаче наполнися душа наша поношения гобзующих и уничижения гордых. === 123 === 1 Яко аще не Господь бы был в нас, да речет убо Израиль: 2 яко аще не Господь бы был в нас, внегда востати человеком на ны, убо живых пожерли быша нас: 3 внегда прогневатися ярости их на ны, убо вода потопила бы нас. 4 Поток прейде душа наша: 5 убо прейде душа наша воду непостоянную. 6 Благословен Господь, иже не даде нас в ловитву зубом их. 7 Душа наша яко птица избавися от сети ловящих: сеть сокрушися, и мы избавлени быхом. 8 Помощь наша во имя Господа, сотворшаго небо и землю. === 124 === 1 Надеющиися на Господа, яко гора Сион: не подвижится в век живый во Иерусалиме. 2 Горы окрест его, и Господь окрест людий Своих, отныне и до века. 3 Яко не оставит Господь жезла грешных на жребий праведных, яко да не прострут праведнии в беззакония рук своих. 4 Ублажи, Господи, благия и правыя сердцем. 5 Уклоняющыяся же в развращения отведет Господь с делающими беззаконие: мир на Израиля. === 125 === 1 Внегда возвратити Господу плен Сионь, быхом яко утешени. 2 Тогда исполнишася радости уста наша, и язык наш веселия: тогда рекут во языцех: возвеличил есть Господь сотворити с ними. 3 Возвеличил есть Господь сотворити с нами: быхом веселящеся. 4 Возврати, Господи, пленение наше, яко потоки югом. 5 Сеющии слезами, радостию пожнут. 6 Ходящии хождаху и плакахуся, метающе семена своя: грядуще же приидут радостию, вземлюще рукояти своя. === 126 === 1 Аще не Господь созиждет дом, всуе трудишася зиждущии: аще не Господь сохранит град, всуе бде стрегий. 2 Всуе вам есть утреневати: востанете по седении ядущии хлеб болезни, егда даст возлюбленным Своим сон. 3 Се, достояние Господне сынове, мзда плода чревняго. 4 Яко стрелы в руце сильнаго, тако сынове оттрясенных. 5 Блажен, иже исполнит желание свое от них: не постыдятся, егда глаголют врагом своим во вратех. === 127 === 1 Блажени вси боящиися Господа, ходящии в путех Его: 2 труды плодов твоих снеси: блажен еси, и добро тебе будет. 3 Жена твоя яко лоза плодовита в странах дому твоего: 4 сынове твои яко новосаждения масличная окрест трапезы твоея. 5 Се, тако благословится человек бояйся Господа. 6 Благословит тя Господь от Сиона, и узриши благая Иерусалима вся дни живота твоего, 7 и узриши сыны сынов твоих: мир на Израиля. === 128 === 1 Множицею брашася со мною от юности моея, да речет убо Израиль: 2 множицею брашася со мною от юности моея, ибо не премогоша мя. 3 На хребте моем делаша грешницы, продолжиша беззаконие свое. 4 Господь праведен ссече выя грешников. 5 Да постыдятся и возвратятся вспять вси ненавидящии Сиона: 6 да будут яко трава на здех, яже прежде восторжения изсше: 7 еюже не исполни руки своея жняй, и недра своего рукояти собираяй: 8 и не реша мимоходящии: благословение Господне на вы, благословихом вы во имя Господне. === 129 === 1 Из глубины воззвах к Тебе, Господи: Господи, услыши глас мой. 2 Да будут уши Твои внемлюще гласу моления моего. 3 Аще беззакония назриши, Господи, Господи, кто постоит? Яко у Тебе очищение есть. 4 Имене ради Твоего потерпех Тя, Господи, потерпе душа моя в слово Твое: упова душа моя на Господа. 5 От стражи утренния до нощи, от стражи утренния да уповает Израиль на Господа: 6 яко у Господа милость, и многое у Него избавление: и Той избавит Израиля от всех беззаконий его. === 130 === 1 Господи, не вознесеся сердце мое, ниже вознесостеся очи мои: ниже ходих в великих, ниже в дивных паче мене. 2 Аще не смиреномудрствовах, но вознесох душу мою, яко отдоеное на матерь свою, тако воздаси на душу мою. 3 Да уповает Израиль на Господа отныне и до века. === 131 === 1 Помяни, Господи, Давида и всю кротость его: 2 яко клятся Господеви, обещася Богу Иаковлю: 3 аще вниду в селение дому моего, или взыду на одр постели моея: 4 аще дам сон очима моима, и веждома моима дремание, и покой скраниама моима: 5 дондеже обрящу место Господеви, селение Богу Иаковлю. 6 Се, слышахом я во Евфрафе, обретохом я в полях Дубравы: 7 внидем в селения Его, поклонимся на место, идеже стоясте нозе Его. 8 Воскресени, Господи, в покой Твой, Ты и кивот святыни Твоея. 9 Священницы Твои облекутся правдою, и преподобнии Твои возрадуются. 10 Давида ради раба Твоего, не отврати лице помазаннаго Твоего. 11 Клятся Господь Давиду истиною, и не отвержется ея: от плода чрева твоего посажду на престоле твоем. 12 Аще сохранят сынове твои завет Мой и свидения Моя сия, имже научу я, и сынове их до века сядут на престоле твоем. 13 Яко избра Господь Сиона, изволи и в жилище Себе. 14 Сей покой Мой во век века, зде вселюся, яко изволих и. 15 Ловитву его благословляяй благословлю, нищыя его насыщу хлебы: 16 священники его облеку во спасение, и преподобнии его радостию возрадуются. 17 Тамо возращу рог Давидови, уготовах светилник помазанному Моему. 18 Враги его облеку студом, на немже процветет святыня моя. === 132 === 1 Се, что добро, или что красно, но еже жити братии вкупе? 2 Яко миро на главе, сходящее на браду, браду Аароню, сходящее на ометы одежды его: 3 яко роса Аермонская сходящая на горы Сионския: яко тамо заповеда Господь благословение и живот до века. === 133 === 1 Се, ныне благословите Господа, вси раби Господни, стоящии в храме Господни, во дворех дому Бога нашего. 2 В нощех воздежите руки вашя во святая и благословите Господа. 3 Благословит тя Господь от Сиона, сотворивый небо и землю. === 134 === 1 Хвалите имя Господне, хвалите, раби Господа, 2 стоящии во храме Господни, во дворех дому Бога нашего. 3 Хвалите Господа, яко благ Господь: пойте имени Его, яко добро: 4 яко Иакова избра Себе Господь, Израиля в достояние Себе: 5 яко аз познах, яко велий Господь, и Господь наш над всеми боги: 6 вся, елика восхоте Господь, сотвори на небеси и на земли, в морях и во всех безднах. 7 Возводя облаки от последних земли, молнии в дождь сотвори, изводяй ветры от сокровищ Своих. 8 Иже порази первенцы Египетския от человека до скота: 9 посла знамения и чудеса посреде тебе, Египте, на фараона и на вся рабы его. 10 Иже порази языки многи и изби цари крепки: 11 Сиона царя Аморрейска и Ога царя Васанска, и вся царствия Ханаанска: 12 и даде землю их достояние, достояние Израилю людем Своим. 13 Господи, имя Твое в век, и память Твоя в род и род: 14 яко судити имать Господь людем Своим, и о рабех Своих умолится. 15 Идоли язык сребро и злато, дела рук человеческих: 16 уста имут, и не возглаголют: очи имут, и не узрят: 17 уши имут, и не услышат: ниже бо есть дух во устех их. 18 Подобни им да будут творящии я и вси надеющиися на ня. 19 Доме Израилев, благословите Господа: доме Ааронь, благословите Господа: доме Левиин, благословите Господа: 20 боящиися Господа, благословите Господа. 21 Благословен Господь от Сиона, живый во Иерусалиме. === 135 === 1 Исповедайтеся Господеви, яко благ: яко в век милость Его. 2 Исповедайтеся Богу богов: яко в век милость Его. 3 Исповедайтеся Господеви господей: яко в век милость Его. 4 Сотворшему чудеса велия единому: яко в век милость Его. 5 Сотворшему небеса разумом: яко в век милость Его. 6 Утвердившему землю на водах: яко в век милость Его. 7 Сотворшему светила велия единому: яко в век милость Его: 8 солнце во область дне: яко в век милость Его: 9 луну и звезды во область нощи: яко в век милость Его. 10 Поразившему Египта с первенцы его: яко в век милость Его: 11 и изведшему Израиля от среды их: яко в век милость Его: 12 рукою крепкою и мышцею высокою: яко в век милость Его. 13 Раздельшему Чермное море в разделения: яко в век милость Его: 14 и проведшему Израиля посреде его: яко в век милость Его: 15 и истрясшему фараона и силу его в море Чермное: яко в век милость Его. 16 Проведшему люди Своя в пустыни: яко в век милость Его. 17 Поразившему цари велия: яко в век милость Его. 18 И убившему цари крепкия: яко в век милость Его: 19 Сиона царя Аморрейска: яко в век милость Его: 20 и Ога царя Васанска: яко в век милость Его. 21 И давшему землю их достояние: яко в век милость Его: 22 достояние Израилю рабу Своему: яко в век милость Его. 23 Яко во смирении нашем помяну ны Господь: яко в век милость Его. 24 И избавил ны есть от врагов наших: яко в век милость Его: 25 даяй пищу всякой плоти: яко в век милость Его. 26 Исповедайтеся Богу небесному: яко в век милость Его. === 136 === 1 На реках Вавилонских, тамо седохом и плакахом, внегда помянути нам Сиона: 2 на вербиих посреде его обесихом органы нашя. 3 Яко тамо вопросиша ны пленшии нас о словесех песней, и ведшии нас о пении: воспойте нам от песней Сионских. 4 Како воспоем песнь Господню на земли чуждей? 5 Аще забуду тебе, Иерусалиме, забвена буди десница моя. 6 Прильпни язык мой гортани моему, аще не помяну тебе, аще не предложу Иерусалима, яко в начале веселия моего. 7 Помяни, Господи, сыны Едомския в день Иерусалимль глаголющыя: истощайте, истощайте до оснований его. 8 Дщи Вавилоня окаянная, блажен, иже воздаст тебе воздаяние твое, еже воздала еси нам: 9 блажен, иже имет и разбиет младенцы твоя о камень. === 137 === 1 Исповемся Тебе, Господи, всем сердцем моим, и пред ангелы воспою Тебе, яко услышал еси вся глаголы уст моих: 2 поклонюся ко храму святому Твоему и исповемся имени Твоему о милости Твоей и истине Твоей, яко возвеличил еси над всем имя Твое святое. 3 В оньже аще день призову Тя, скоро услыши мя: умножиши мя в души моей силою Твоею. 4 Да исповедятся Тебе, Господи, вси царие земстии, яко услышаша вся глаголголы уст Твоих: 5 и да воспоют в путех Господних, яко велия слава Господня: 6 яко высок Господь, и смиренныя призирает, и высокая издалеча весть. 7 Аще пойду посреде скорби, живиши мя: на гнев враг моих простерл еси руку Твою, и спасе мя десница Твоя. 8 Господь воздаст за мя: Господи, милость Твоя во век: дел руку Твоею не презри. === 138 === 1 Господи, искусил мя еси и познал мя еси: ты познал еси седание мое и востание мое. 2 Ты разумел еси помышления моя издалеча: 3 стезю мою и уже мое Ты еси изследовал и вся пути моя провидел еси. 4 Яко несть льсти в языце моем: се, Господи, Ты познал еси 5 вся последняя и древняя: Ты создал еси мя и положил еси на мне руку Твою. 6 Удивися разум Твой от мене, утвердися, не возмогу к нему. 7 Камо пойду от Духа Твоего? И от лица Твоего камо бежу? 8 Аще взыду на небо, Ты тамо еси: аще сниду во ад, тамо еси. 9 Аще возму криле мои рано и вселюся в последних моря, 10 и тамо бо рука Твоя наставит мя, и удержит мя десница Твоя. 11 И рех: еда тма поперет мя? И нощь просвещение в сладости моей. 12 Яко тма не помрачится от Тебе, и нощь яко день просветится: яко тма ея, тако и свет ея. 13 Яко Ты создал еси утробы моя, восприял мя еси из чрева матере моея. 14 Исповемся Тебе, яко страшно удивился еси: чудна дела Твоя, и душа моя знает зело. 15 Не утаися кость моя от Тебе, юже сотворил еси в тайне, и состав мой в преисподних земли. 16 Несоделанное мое видесте очи Твои, и в книзе Твоей вси напишутся: во днех созиждутся, и никтоже в них. 17 Мне же зело честни быша друзи Твои, Боже, зело утвердишася владычествия их: 18 изочту их, и паче песка умножатся: востах, и еще есмь с Тобою. 19 Аще избиеши грешники, Боже: мужие кровей, уклонитеся от мене. 20 Яко ревниви есте в помышлениих, приимут в суету грады Твоя. 21 Не ненавидящыя ли Тя, Господи, возненавидех, и о вразех Твоих истаях? 22 Совершенною ненавистию возненавидех я: во враги быша ми. 23 Искуси мя, Боже, и увеждь сердце мое: истяжи мя и разумей стези моя: 24 и виждь, аще путь беззакония во мне, и настави мя на путь вечен. === 139 === 1 Изми мя, Господи, от человека лукава, от мужа неправедна избави мя: 2 иже помыслиша неправду в сердцы, весь день ополчаху брани: 3 изостриша язык свой яко змиин: яд аспидов под устнами их. 4 Сохрани мя, Господи, из руки грешничи, от человек неправедных изми мя, иже помыслиша запяти стопы моя. 5 Скрыша гордии сеть мне и ужы, препяша сеть ногама моима: 6 при стези соблазны положиша ми. 7 Рех Господеви: Бог мой еси Ты, внуши, Господи, глас моления моего. 8 Господи, Господи, сило спасения моего, осенил еси над главою моею в день брани. 9 Не предаждь мене, Господи, от желания моего грешнику: помыслиша на мя, не остави мене, да не когда вознесутся. 10 Глава окружения их, труд устен их покрыет я. 11 Падут на них углия огненная, низложиши я во страстех, и не постоят. 12 Муж язычен не исправится на земли: мужа неправедна злая уловят во истление. 13 Познах, яко сотворит Господь суд нищым и месть убогим. 14 Обаче праведнии исповедятся имени Твоему, и вселятся правии с лицем Твоим. === 140 === 1 Господи, воззвах к Тебе, услыши мя: вонми гласу моления моего, внегда воззвати ми к Тебе. 2 Да исправится молитва моя яко кадило пред Тобою: воздеяние руку моею, жертва вечерняя. 3 Положи, Господи, хранение устом моим и дверь ограждения о устнах моих. 4 Не уклони сердце мое в словеса лукавствия, непщевати вины о гресех с человеки делающими беззаконие: и не сочтуся со избранными их. 5 Накажет мя праведник милостию и обличит мя, елей же грешнаго да не намастит главы моея: яко еще и молитва моя во благоволениих их. 6 Пожерты быша при камени судии их: услышатся глаголи мои, яко возмогоша. 7 Яко толща земли проседеся на земли, расточишася кости их при аде. 8 Яко к Тебе, Господи, Господи, очи мои: на Тя уповах, не отими душу мою: 9 сохрани мя от сети, юже составиша ми, и от соблазн делающих беззаконие. 10 Падут во мрежу свою грешницы: един есмь аз, дондеже прейду. === 141 === 1 Разума Давиду, внегда быти ему в вертепе молящемуся. 2 Гласом моим ко Господу воззвах, гласом моим ко Господу помолихся. 3 Пролию пред Ним моление мое, печаль мою пред ним возвещу. 4 Внегда изчезати от мене духу моему, и ты познал еси стези моя: на пути сем, по немуже хождах, скрыша сеть мне. 5 Сматрях одесную и возглядах, и не бе знаяй мене: погибе бегство от мене, и несть взыскаяй душу мою. 6 Воззвах к Тебе, Господи, рех: Ты еси упование мое, часть моя еси на земли живых. 7 Вонми молению моему, яко смирихся зело: избави мя от гонящих мя, яко укрепишася паче мене. 8 Изведи из темницы душу мою, исповедатися имени Твоему: мене ждут праведницы, дондеже воздаси мне. === 142 === 1 Господи, услыши молитву мою, внуши моление мое во истине Твоей, услыши мя в правде Твоей: 2 и не вниди в суд с рабом Твоим, яко не оправдится пред Тобою всяк живый. 3 Яко погна враг душу мою: смирил есть в землю живот мой: посадил мя есть в темных, яко мертвыя века. 4 И уны во мне дух мой, во мне смятеся сердце мое. 5 Помянух дни древния, поучихся во всех делех Твоих, в творениих руку Твоею поучахся. 6 Воздех к Тебе руце мои: душа моя яко земля безводная Тебе. 7 Скоро услыши мя, Господи, изчезе дух мой: не отврати лица Твоего от мене, и уподоблюся низходящым в ров. 8 Слышану сотвори мне заутра милость Твою, яко на Тя уповах: скажи мне, Господи, путь, в оньже пойду, яко к Тебе взях душу мою. 9 Изми мя от враг моих, Господи, к Тебе прибегох. 10 Научи мя творити волю Твою, яко Ты еси Бог мой: Дух Твой благий наставит мя на землю праву. 11 Имене Твоего ради, Господи, живиши мя правдою Твоею: изведеши от печали душу мою: 12 и милостию Твоею потребиши враги моя и погубиши вся стужающыя души моей: яко аз раб Твой есмь. === 143 === 1 Благословен Господь Бог мой, научаяй руце мои на ополчение, персты моя на брань. 2 Милость моя и прибежище мое, заступник мой и Избавитель мой, защититель мой, и на Него уповах: повинуяй люди моя под мя. 3 Господи, что есть человек, яко познался еси ему? Или сын человечь, яко вменяеши его? 4 Человек суете уподобися: дние его яко сень преходят. 5 Господи, преклони небеса, и сниди: коснися горам, и воздымятся: 6 блесни молнию, и разженеши я: посли стрелы Твоя, и смятеши я. 7 Посли руку Твою с высоты, изми мя и избави мя от вод многих, из руки сынов чуждих, 8 ихже уста глаголаша суету, и десница их десница неправды. 9 Боже, песнь нову воспою Тебе, во псалтири десятоструннем пою Тебе: 10 дающему спасение царем, избавляющему Давида раба Своего от меча люта. 11 Избави мя и изми мя из руки сынов чуждих, ихже уста глаголаша суету, и десница их десница неправды: 12 ихже сынове их яко новосаждения водруженая в юности своей, дщери их удобрены, преукрашены яко подобие храма: 13 хранилища их исполнена, отрыгающая от сего в сие: овцы их многоплодны, множащыяся во исходищих своих: волове их толсти: 14 несть падения оплоту, ниже прохода, ниже вопля в стогнах их. 15 Ублажиша люди, имже сия суть: блажени людие, имже Господь Бог их. === 144 === 1 Вознесу Тя, Боже мой, Царю мой, и благословлю имя Твое в век и в век века. 2 На всяк день благословлю Тя, и восхвалю имя Твое в век и в век века. 3 Велий Господь и хвален зело, и величию Его несть конца. 4 Род и род восхвалят дела Твоя и силу Твою возвестят: 5 великолепие славы святыни Твоея возглаголют и чудеса Твоя поведят: 6 и силу страшных Твоих рекут и величие Твое поведят: 7 память множества благости Твоея отрыгнут и правдою Твоею возрадуются. 8 Щедр и милостив Господь, долготерпелив и многомилостив. 9 Благ Господь всяческим, и щедроты Его на всех делех Его. 10 Да исповедятся Тебе, Господи, вся дела Твоя, и преподобнии Твои да благословят Тя: 11 славу царствия Твоего рекут и силу Твою возглаголют, 12 сказати сыновом человеческим силу Твою и славу великолепия царствия Твоего. 13 Царство Твое царство всех веков, и владычество Твое во всяком роде и роде: верен Господь во всех словесех Своих и преподобен во всех делех Своих. 14 Утверждает Господь вся низпадающыя и возставляет вся низверженныя. 15 Очи всех на Тя уповают, и Ты даеши им пищу во благовремении: 16 отверзаеши ты руку Твою и исполняеши всякое животно благоволения. 17 Праведен Господь во всех путех Своих и преподобен во всех делех Своих. 18 Близ Господь всем призывающым Его, всем призывающым Его во истине: 19 волю боящихся Его сотворит, и молитву их услышит, и спасет я. 20 Хранит Господь вся любящыя Его, и вся грешники потребит. 21 Хвалу Господню возглаголют уста моя: и да благословит всяка плоть имя святое Его в век и в век века. === 145 === 1 Хвали, душе моя, Господа: 2 восхвалю Господа в животе моем, пою Богу моему, дондеже есмь. 3 Не надейтеся на князи, на сыны человеческия, в нихже несть спасения. 4 Изыдет дух его, и возвратится в землю свою: в той день погибнут вся помышления его. 5 Блажен, емуже Бог Иаковль помощник его, упование его на Господа Бога своего, 6 сотворшаго небо и землю, море, и вся, яже в них: хранящаго истину в век, 7 творящаго суд обидимым, дающаго пищу алчущым. Господь решит окованныя: 8 Господь умудряет слепцы: Господь возводит низверженныя: Господь любит праведники. 9 Господь хранит пришелцы, сира и вдову приимет, и путь грешных погубит. 10 Воцарится Господь во век, Бог твой, Сионе, в род и род. === 146 === 1 Хвалите Господа, яко благ псалом: Богови нашему да усладится хваление. 2 Зиждай Иерусалима Господь: разсеяния Израилева соберет: 3 изцеляяй сокрушенныя сердцем и обязуяй сокрушения их: 4 изчитаяй множество звезд, и всем им имена нарицаяй. 5 Велий Господь наш, и велия крепость Его, и разума Его несть числа. 6 Приемляй кроткия Господь, смиряяй же грешники до земли. 7 Начните Господеви во исповедании, пойте Богови нашему в гуслех: 8 одевающему небо облаки, уготовляющему земли дождь: прозябающему на горах траву и злак на службу человеком: 9 дающему скотом пищу их, и птенцем врановым призывающым Его. 10 Не в силе констей восхощет, ниже в лыстех мужеских благоволит: 11 благоволит Господь в боящихся Его и во уповающих на милость Его. === 147 === 1 Похвали, Иерусалиме, Господа, хвали Бога твоего, Сионе: 2 яко укрепи вереи врат твоих, благослови сыны твоя в тебе. 3 Полагаяй пределы твоя мир, и тука пшенична насыщаяй тя: 4 посылаяй слово Свое земли, до скорости течет слово Его, 5 дающаго снег свой яко волну, мглу яко пепел посыпающаго, 6 метающаго голоть Свой яко хлебы: противу лица мраза Его кто постоит? 7 Послет слово Свое, и истает я: дхнет дух Его, и потекут воды. 8 Возвещаяй слово Свое Иакову, оправдания и судбы Своя Израилеви: 9 не сотвори тако всякому языку, и судбы Своя не яви им. === 148 === 1 Хвалите Господа с небес, хвалите Его в вышних. 2 Хвалите Его вси Ангели Его: хвалите Его, вся силы Его. 3 Хвалите Его, солнце и луна: хвалите Его вся звезды и свет. 4 Хвалите Его, небеса небес и вода, яже превыше небес. 5 Да восхвалят имя Господне: яко Той рече, и быша: Той повеле, и создашася. 6 Постави я в век и в век века: повеление положи, и не мимо идет. 7 Хвалите Господа от земли, змиеве и вся бездны: 8 огнь, град, снег, голоть, дух бурен, творящая слово Его: 9 горы и вси холми, древа плодоносна и вси кедри: 10 зверие и вси скоти, гади и птицы пернаты: 11 царие земстии и вси людие, князи и вси судии земстии: 12 юноши и девы, старцы с юнотами. 13 Да восхвалят имя Господне: яко вознесеся имя Того единаго, исповедание Его на земли и на небеси. 14 И вознесет рог людий Своих: песнь всем преподобным Его, сыновом Израилевым, людем приближающымся Ему. === 149 === 1 Воспойте Господеви песнь нову: хваление Его в церкви преподобных. 2 Да возвеселится Израиль о сотворшем его, и сынове Сиони возрадуются о Цари своем. 3 Да восхвалят имя Его в лице, в тимпане и псалтири да поют Ему. 4 Яко благоволит Господь в людех Своих, и вознесет кроткия во спасение. 5 Восхвалятся преподобнии во славе и возрадуются на ложах своих. 6 Возношения Божия в гортани их, и мечи обоюду остры в руках их: 7 сотворити отмщение во языцех, обличения в людех: 8 связати цари их путы, и славныя их ручными оковы железными: 9 сотворити в них суд написан. Слава сия будет всем преподобным Его. === 150 === 1 Хвалите Бога во святых Его, хвалите Его во утвержении силы Его: 2 хвалите Его на силах Его, хвалите Его по множеству величествия Его: 3 хвалите Его во гласе трубнем, хвалите Его во псалтири и гуслех: 4 хвалите Его в тимпане и лице, хвалите Его во струнах и органе: 5 хвалите Его в кимвалех доброгласных, хвалите Его в кимвалех восклицания. 6 Всякое дыхание да хвалит Господа. === 151 === Псалом особь писан, Давидов, и вне числа 150 псалмов, внегда единоборствоваше на Голиафа. 1 Мал бех в братии моей и юнший в дому отца моего: пасох овцы отца моего. 2 Руце мои сотвористе орган, и персты мои составиша псалтирь. 3 И кто возвестит Господеви моему? Сам Господь, Сам услышит: 4 Сам посла ангела Своего, и взят мя от овец отца моего, и помаза мя елеем помазания Своего. 5 Братия моя добри и велицы: и не благоволи в них Господь. 6 Изыдох в сретение иноплеменнику, и проклят мя идолы своими. 7 Аз же исторгнув мечь от него, обезглавих его и отях поношение от сынов Израилевых. == Притчи == === 1 === 1 Притчи Соломона сына Давидова, иже царствова во Израили, 2 познати премудрость и наказание и уразумети словеса мудрости, 3 прияти же извития словес и разрешения гаданий, уразумети же правду истинную и суд исправляти: 4 да даст незлобивым коварство, отрочати же юну чувство же и смысл. 5 Сих бо послушав, мудрый премудрее будет, а разумный строителство стяжет: 6 уразумеет же притчу и темное слово, речения же премудрых и гадания. 7 Начало премудрости страх Господень, разум же благ всем творящым его: благочестие же в Бога начало чувства, премудрость же и наказание нечестивии уничижат. 8 Слыши, сыне, наказание отца твоего и не отрини заветов матере твоея: 9 венец бо благодатей приимеши на твоем версе и гривну злату о твоей выи. 10 Сыне, да не прельстят тебе мужие нечестивии, ниже да восхощеши, 11 аще помолят тя, глаголюще: иди с нами, приобщися крове, скрыем же в землю мужа праведна неправедно: 12 пожрем же его якоже ад жива, и возмем память его от земли, 13 стяжание его многоценное приимем, исполним же домы нашя корыстей: 14 жребий же твой положи с нами: обще же влагалище стяжем вси, и мешец един да будет всем нам. 15 Не иди в путь с ними: уклони же ногу твою от стезь их: 16 нозе бо их на зло текут, и скори суть излияти кровь. 17 Не без правды бо простираются мрежи пернатым: 18 тии бо убийству приобщающеся, сокровищствуют себе злая: разрушение же мужей законопреступных зло. 19 Сии путие суть всех творящих беззаконная: нечестием бо свою душу отемлют. 20 Премудрость во исходех поется, в стогнах же дерзновение водит, 21 на краех же стен проповедуется, у врат же сильных приседит, во вратех же града дерзающи глаголет: 22 елико убо время незлобивии держатся правды, не постыдятся: безумнии же досады суще желателие, нечестивии бывше, возненавидеша чувство 23 и повинни быша обличением. Се, предложу вам моего дыхания речение, научу же вас моему словеси. 24 Понеже звах, и не послушасте, и простирах словеса, и не внимасте, 25 но отметасте моя советы и моим обличением не внимасте: 26 убо и аз вашей погибели посмеюся, порадуюся же, егда приидет вам пагуба, 27 и егда приидет на вы внезапу мятеж, низвращение же подобно бури приидет, или егда приидет вам печаль и градоразорение, или егда найдет на вы пагуба. 28 Будет бо егда призовете мя, аз же не послушаю вас: взыщут мене злии и не обрящут. 29 Возненавидеша бо премудрость, словесе же Господня не прияша: 30 ниже хотеша внимати моим советом, ругахуся же моим обличением. 31 Темже снедят своих путий плоды и своего нечестия насытятся: 32 ибо, зане обидеша младенцев, убиени будут, и истязание нечестивыя погубит. 33 Мене же слушаяй вселится на уповании и почиет без страха от всякаго зла. === 2 === 1 Сыне, аще приим глагол моея заповеди, скрыеши в себе, 2 послушает премудрости твое ухо, и приложиши сердце твое к разуму: приложиши же е в наказание сыну твоему. 3 Аще бо премудрость призовеши и разуму даси глас твой, чувство же взыщеши великим гласом, 4 и аще взыщеши ея яко сребра, и якоже сокровища испытаеши ю: 5 тогда уразумееши страх Господень и познание Божие обрящеши: 6 яко Господь дает премудрость, и от лица Его познание и разум: 7 и сокровищствует исправляющым спасение, защищает же шествие их, 8 еже сохранити пути оправданий, и путь благоговеинствующих Его сохранит. 9 Тогда уразумееши правду и суд и исправиши вся стези благия. 10 Аще бо приидет премудрость в твою мысль, чувство же твоей души добро быти возмнится. 11 Совет добр сохранит тя, помышление же преподобное соблюдет тя, 12 да избавит тя от пути злаго и от мужа, глаголюща ничтоже верно. 13 О, оставившии пути правыя, еже ходити в путех тмы! 14 О, веселящиися о злых и радующиися о развращении злем! 15 Ихже стези стропотны, и крива течения их, еже далече тя сотворити от пути права, 16 и чужда от праведнаго разума. Сыне, да тя не постигнет совет злый, 17 оставляяй учение юности, и завета Божественнаго забывый: 18 постави бо при смерти дом свой и при аде с земными деяния своя. 19 Вси ходящии по нему не возвратятся, ниже постигнут стезь правых: ни бо достигнут лет жизни. 20 Аще бо быша ходили в стези благия, обрели убо быша стези правы гладки: блази будут жителие на земли, незлобивии же останут на ней: 21 яко правии вселятся на земли, и преподобнии останут на ней. 22 Путие нечестивых от земли погибнут, пребеззаконнии же изринутся от нея. === 3 === 1 Сыне, моих законов не забывай, глаголы же моя да соблюдает твое сердце: 2 долготу бо жития и лета жизни и мир приложат тебе. 3 Милостыни и вера да не оскудевают тебе: обложи же я на твоей выи и напиши я на скрижали сердца твоего: и обрящеши благодать. 4 И промышляй добрая пред Господем (Богом) и человеки. 5 Буди уповая всем сердцем на Бога, о твоей же премудрости не возносися: 6 во всех путех твоих познавай ю, да исправляет пути твоя. 7 Не буди мудр о себе: бойся же Бога и уклоняйся от всякаго зла: 8 тогда изцеление будет телу твоему и уврачевание костем твоим. 9 Чти Господа от праведных твоих трудов и начатки давай ему от твоих плодов правды: 10 да исполнятся житницы твоя множеством пшеницы, вино же точила твоя да источают. 11 Сыне, не пренебрегай наказания Господня, ниже ослабевай от Него обличаемь: 12 егоже бо любит Господь, наказует, биет же всякаго сына, егоже приемлет. 13 Блажен человек, иже обрете премудрость, и смертен, иже уведе разум. 14 Лучше бо сию куповати, нежели злата и сребра сокровища: 15 честнейша же есть камений многоценных: не сопротивляется ей ничтоже лукаво, благознатна есть всем приближающымся ей: всяко же честное недостойно ея есть. 16 Долгота бо жития и лета жизни в деснице ея, в шуйце же ея богатство и слава: от уст ея исходит правда, закон же и милость на языце носит. 17 Путие ея путие добри, и вся стези ея мирны. 18 Древо живота есть всем держащымся ея, и воскланяющымся на ню, яко на Господа, тверда. 19 Бог премудростию основа землю, уготова же небеса разумом: 20 в чувстве Его бездны разверзошася, облацы же источиша росу. 21 Сыне, да не преминеши, соблюди же мой совет и мысль: 22 да жива будет душа твоя, и благодать будет на твоей выи: (будет же изцеление плотем твоим и уврачевание костем твоим:) 23 да ходиши надеяся в мире во всех путех твоих, нога же твоя не поткнется. 24 Аще бо сядеши, безбоязнен будеши, аще же поспиши, сладостно поспиши. 25 И не убоишися страха нашедшаго, ниже устремления нечестивых находящаго: 26 Господь бо будет на всех путех твоих и утвердит ногу твою, да не поползнешися. 27 Не отрецыся благотворити требующему, егда имать рука твоя помогати. 28 Не рцы: отшед возвратися, и заутра дам, сильну ти сущу благотворити: не веси бо, что породит день находяй. 29 Не соплетай на друга твоего зла, пришелца суща и уповающа на тя. 30 Не враждуй на человека туне, да не что на тя содеет злое. 31 Не стяжи злых мужей поношения, ни возревнуй путем их. 32 Нечист бо пред Господем всяк законопреступник и с праведными не сочетавается. 33 Клятва Господня в домех нечестивых, дворы же праведных благословляются. 34 Господь гордым противится, смиренным же дает благодать. 35 Славу премудрии наследят, нечестивии же вознесоша безчестие. === 4 === 1 Послушайте, дети, наказания отча и внемлите разумети помышление, 2 дар бо благий дарую вам: моего закона не оставляйте. 3 Сын бо бых и аз отцу послушливый, и любимый пред лицем матере, 4 иже глаголаша и учиша мя: да утверждается наше слово в твоем сердцы: храни заповеди, не забывай: 5 стяжи премудрость, стяжи разум: не забуди, ниже презри речения моих уст, ниже уклонися от глагол уст моих. 6 Не остави ея, и имется тебе: возжелей ея, и соблюдет тя. 7 Начало премудрости: стяжати премудрость, и во всем стяжании твоем стяжи разум. 8 Огради ю, и вознесет тя: почти ю, да тя оымет, 9 да даст главе твоей венец благодатей, венцем же сладости защитит тя. 10 Слыши, сыне, и приими моя словеса, и умножатся лета живота твоего, да ти будут мнози путие жития. 11 Путем бо премудрости учу тя, наставляю же тебе на течения правая: 12 аще бо ходиши, не запнутся стопы твоя: аще ли течеши, не утрудишися. 13 Имися моего наказания, не остави, но сохрани е себе в жизнь твою. 14 На пути нечестивых не иди, ниже возревнуй путем законопреступных. 15 На немже аще месте воя соберут, не иди тамо: уклонися же от них и измени: 16 не уснут бо, аще зла не сотворят: отимется сон от них, и не спят: 17 тии бо питаются пищею нечестия, вином же законопреступным упиваются. 18 Путие же праведных подобне свету светятся: предходят и просвещают, дондеже исправится день. 19 Путие же нечестивых темни: не ведят, како претыкаются. 20 Сыне, моим глаголом внимай, к моим же словесем прилагай ухо твое: 21 да не оскудеют ти источницы твои, храни я в сердцы твоем: 22 живот бо суть всем обретающым я и всей плоти их изцеление. 23 Всяцем хранением блюди твое сердце: от сих бо исходища живота. 24 Отими от себе строптива уста, и обидливы устне далече от тебе отрини. 25 Очи твои право да зрят, и вежди твои да помавают праведная. 26 Права течения твори твоима ногама и пути твоя исправляй. 27 Не уклонися ни на десно, ни на шуе: отврати же ногу твою от пути зла: 28 пути бо десныя весть Господь, развращени же суть, иже ошуюю. 29 Той же права сотворит течения твоя, и хождения твоя в мире поспешит. === 5 === 1 Сыне, моей премудрости внимай, к моим же словесем прилагай ухо твое, 2 да сохраниши мысль благую: чувство же моих устен заповедает тебе. 3 Не внимай злей жене: мед бо каплет от устен жены блудницы, яже на время наслаждает твой гортань: 4 последи же горчае желчи обрящеши, и изощренну паче меча обоюду остра: 5 безумия бо нозе низводят употребляющих ю со смертию во ад, стопы же ея не утверждаются: 6 на пути бо животныя не находит, заблужденна же течения ея и неблагоразумна. 7 Ныне убо, сыне, послушай мене и не отриновенна сотвори моя словеса: 8 далече от нея сотвори путь твой и не приближися ко дверем домов ея, 9 да не предаст иным живота твоего, и твоего жития немилостивым, 10 да не насытятся инии твоея крепости, твои же труды в домы чуждыя внидут, 11 и раскаешися на последок твой, егда иструтся плоти тела твоего, и речеши: 12 како возненавидех наказание, и от обличений уклонися сердце мое? 13 Не послушах гласа наказующаго мя, и ко учащему мя не прилагах уха моего: 14 вмале бех во всяцем зле посреде церкве и сонмища. 15 Сыне, пий воды от своих сосудов и от твоих кладенцев Источника: 16 да преизливаются тебе воды от твоего источника, во твоя же пути да происходят твоя воды. 17 Да будут тебе единому имения, и да никтоже чуждь причастится тебе. 18 Источник твоея воды да будет тебе твой, и веселися с женою, яже от юности твоея: 19 елень любве и жребя твоих благодатей да беседует тебе, твоя же да предидет тебе и да будет с тобою во всяко время: в дружбе бо сея спребываяй умножен будеши. 20 Не мног буди к чуждей, ниже объят буди объятии не твоея: 21 пред очима бо суть Божиима путие мужа, вся же течения его назирает. 22 Законопреступления мужа уловляют: пленицами же своих грехов кийждо затязается. 23 Сей скончавается с ненаказанными: от множества же своего жития извержется и погибает за безумие. === 6 === 1 Сыне, аще поручишися за твоего друга, предаси твою руку врагу. 2 Сеть бо крепка мужу свои устне, и пленяется устнами своих уст. 3 Твори, сыне, яже аз заповедую ти, и спасайся: идеши бо в руце злых за твоего друга: буди не ослабевая, поощряй же и твоего друга, егоже испоручил еси. 4 Не даждь сна твоима очима, ниже да воздремлеши твоима веждома, 5 да спасешися аки серна от тенет и яко птица от сети. 6 Иди ко мравию, о, лениве, и поревнуй видев пути его, и буди онаго мудрейший: 7 он бо, не сущу ему земледелцу, ниже нудящаго его имеяй, ниже под владыкою сый, 8 готовит в жатву пищу и многое в лето творит уготование. Или иди ко пчеле и увеждь, коль делателница есть, делание же коль честное творит: еяже трудов царие и простии во здравие употребляют, любима же есть всеми и славна: аще силою и немощна сущи, (но) премудростию почтена произведеся. 9 Доколе, о, лениве, лежиши? Когда же от сна востанеши? 10 Мало убо спиши, мало же седиши, мало же дремлеши, мало же объемлеши перси рукама: 11 потом же найдет тебе аки зол путник убожество: скудость же аки благий течец. Аще же не ленив будеши, приидет яко источник жатва твоя, скудость же аки злый течец (от тебе) отбежит. 12 Муж безумен и законопреступный ходит в пути не благи: 13 той же намизает оком и знамение дает ногою, учит же помаванием перстов. 14 Развращенно же сердце кует злая: на всякое время таковый мятежы составляет граду. 15 Сего ради внезапу приходит ему погибель, разсечение и сокрушение неизцельное. 16 Яко радуется о всех, ихже ненавидит Бог, сокрушается же за нечистоту души: 17 око досадителя, язык неправедный, руце проливающя кровь праведнаго, 18 и сердце кующее мысли злы, и нозе тщащыяся зло творити потребятся. 19 Разжизает лжы свидетель неправеден и насылает суды посреде братий. 20 Сыне, храни законы отца твоего и не отрини наказания матере твоея: 21 навяжи же я на твою душу присно и обяжи их о твоей выи. 22 Егда ходиши, води ю, и с тобою да будет: егда же спиши, да хранит тя, да востающу ти глаголет с тобою. 23 Зане светилник заповедь закона и свет, и путь жизни, и обличение, и наказание, 24 еже сохранити тя от жены мужаты и от наваждения языка чуждаго. 25 Сыне, да не победит тя доброты похоть, ниже уловлен буди твоима очима, ниже да совосхитишися веждами ея. 26 Цена бо блудницы, елика единаго хлеба: жена же мужей честныя душы уловляет. 27 Ввяжет ли кто огнь в недра, риз же (своих) не сожжет ли? 28 Или ходити кто будет на углиех огненных, ног же не сожжет ли? 29 Тако вшедый к жене мужатей не без вины будет, ниже всяк прикасайся ей. 30 Не дивно, аще кто ят будет крадый: крадет бо, да насытит душу свою алчущую: 31 аще же ят будет, воздаст седмерицею, и вся имения своя дав, избавит себе. 32 Прелюбодей же за скудость ума погибель души своей содевает, 33 болезни же и безчестие понесет: поношение же его не загладится во век: 34 исполнена бо ревности ярость мужа ея: не пощадит в день суда, 35 не изменит ни единою ценою вражды, ниже разрешится многими дарми. === 7 === 1 Сыне, храни моя словеса, моя же заповеди скрый у себе. Сыне, чти Господа, и укрепишися: кроме же Его не бойся иного. 2 Храни моя заповеди, и поживеши, словеса же моя яко зеницы очию: 3 обложи же ими твоя персты, напиши же я на скрижали сердца твоего. 4 Нарцы премудрость сестру тебе быти, разум же знаемь сотвори тебе, 5 да тя соблюдет от жены чуждия и лукавыя, аще тя словесы льстивыми облагати начнет: 6 оконцем бо из дому своего на пути приничущи, 7 егоже аще узрит от безумных чад юношу скудоумна, 8 проходящаго мимо угла в распутиих дому ея 9 и глаголющаго в темный вечер, егда упокоение будет нощное и мрачное: 10 жена же срящет его, зрак имущи прелюбодейничь, яже творит юных парити сердцам: воскрилена же есть и блудна, 11 в дому же не почивают нозе ея: 12 время бо некое вне глумится, время же на распутиих при всяцем угле приседит: 13 потом емши лобзает его, безстудным же лицем речет к нему: 14 жертва мирна ми есть, днесь воздаю обеты моя: 15 сего ради изыдох в сретение тебе, желающи лица твоего, обретох тя: 16 простиралами покрых одр мой, коврами же сугубыми постлах, иже от Египта, 17 шафраном посыпах ложе мое и дом мой корицею: 18 прииди и насладимся любве даже до утра, гряди и поваляемся в похоти: 19 несть бо мужа моего в дому, отиде в путь далече, 20 доволно сребра взя с собою, по многих днех возвратится в дом свой. 21 И прельсти его многою беседою, тенетами же устен (в блуд) привлече его. 22 Он же абие последова ей объюродев, и якоже вол на заколение ведется, и яко пес на узы, 23 или яко елень уязвлен стрелою в ятра: и спешит яко птица в сеть, не ведый, яко на душу свою течет. 24 Ныне убо, сыне, послушай мене и внимай глаголом уст моих, 25 да не уклонится в пути ея сердце твое, 26 и да не прельстишися в стезях ея: многих бо уязвивши низверже, и безчисленни суть, ихже убила есть: 27 путие адовы дом ея, низводящии в сокровища смертная. === 8 === 1 Темже ты премудрость проповеждь, да разум послушает тебе. 2 На высоких бо краех есть, посреде же стезь стоит: 3 при вратех бо сильных приседит, во входех же поется. 4 Вас, о, человецы, молю, и вдаю мой глас сыном человеческим. 5 Уразумейте, незлобивии, коварство, ненаказаннии же, приложите сердце. 6 Послушайте мене: честная бо реку и изнесу от устен правая. 7 Яко истине поучится гортань мой, мерзки же предо мною устны лживыя. 8 С правдою вси глаголы уст моих, ничтоже в них стропотно, ниже развращенно. 9 Вся права разумевающым, и права обретающым разум. 10 Приимите наказание, а не сребро, и разум паче злата искушена: избирайте же ведение паче злата чиста. 11 Лучши бо премудрость камений многоценных, всякое же честное недостойно ея есть. 12 Аз премудрость вселих совет, и разум и смысл аз призвах. 13 Страх Господень ненавидит неправды, досаждения же и гордыни, и пути лукавых: возненавидех же аз развращенныя пути злых. 14 Мой совет и утверждение, мой разум, моя же крепость. 15 Мною царие царствуют, и сильнии пишут правду: 16 мною вельможи величаются, и властитилие мною держат землю. 17 Аз любящыя мя люблю, ищущии же мене обрящут благодать. 18 Богатство и слава моя есть, и стяжание многих и правда. 19 Лучше есть плодити мене, паче злата и камения драга: мои же плоды лучше сребра избранна. 20 В путех правды хожду и посреде стезь оправдания живу, 21 да разделю любящым мя имение, и сокровища их исполню благих. Аще возвещу вам бывающая на всяк день, помяну, яже от века, изчести. 22 Господь созда мя (евр.: стяжа мя) начало путий Своих в дела Своя, 23 прежде век основа мя, в начале, прежде неже землю сотворити, 24 и прежде неже бездны соделати, прежде неже произыти источником вод, 25 прежде неже горам водрузитися, прежде же всех холмов раждает мя. 26 Господь сотвори страны и ненаселенныя, и концы населенныя поднебесныя. 27 Егда готовяше небо, с Ним бех, и егда отлучаше престол Свой на ветрех, 28 и егда крепки творяше вышния облаки, и егда тверды полагаше источники поднебесныя, 29 и егда полагаше морю предел его, да воды не мимо идут уст его, и крепка творяше основания земли, бех при нем устрояющи. 30 Аз бех, о нейже радовашеся, на всяк же день веселяхся пред лицем Его на всяко время, 31 егда веселяшеся вселенную совершив, и веселяшеся о сынех человеческих. 32 Ныне убо, сыне, послушай мене: и блажени, иже пути моя сохранят. 33 Услышите премудрость, и умудритеся, и не отмещите. 34 Блажен муж, иже послушает мене, и человек, иже пути моя сохранит, бдяй при моих дверех присно, соблюдаяй праги моих входов: 35 исходи бо мои исходи живота, и уготовляется хотение от Господа: 36 согрешающии же в мя нечествуют на своя души, и ненавидящии мя любят смерть. === 9 === 1 Премудрость созда себе дом и утверди столпов седмь: 2 закла своя жертвенная, и раствори в чаши своей вино, и уготова свою трапезу: 3 посла своя рабы, созывающи с высоким проповеданием на чашу, глаголющи: 4 иже есть безумен, да уклонится ко мне. 5 И требующым ума рече: приидите, ядите мой хлеб и пийте вино, еже растворих вам: 6 оставите безумие и живи будете, да во веки воцаритеся: и взыщите разума, да поживете и исправите разум в ведении. 7 Наказуяй злыя приимет себе безчестие, обличаяй же нечестиваго порочна сотворит себе (обличения бо нечестивому раны ему). 8 Не обличай злых, да не возненавидят тебе: обличай премудра, и возлюбит тя. 9 Даждь премудрому вину, и премудрейший будет: сказуй праведному, и приложит приимати. 10 Начало премудрости страх Господень, и совет святых разум: разумети бо закон, помысла есть благаго. 11 Сим бо образом многое поживеши время, и приложатся тебе лета живота твоего. 12 Сыне, аще премудр будеши, себе премудр будеши и искренним твоим: аще же зол будеши, един почерпнеши злая. Сын наказан премудр будет, безумный же слугою употребится. Иже утверждается на лжах, сей пасет ветры, той же поженет птицы парящыя: остави бо пути своего винограда, в стезях же своего земледелания заблуди, проходит же сквозе пустыню безводную и землю определенную в жаждех, собирает же рукама неплодие. 13 Жена безумная и продерзая скудна хлебом бывает, яже не весть стыдения, 14 седе при дверех дому своего, на столце яве на стогнах, 15 призывающая мимоходящих и исправляющих пути своя: 16 иже есть от вас безумнейший, да уклонится ко мне: и лишенным разума повелеваю, глаголющи: 17 хлебом сокровенным в сладость прикоснитеся и воду татьбы сладкую пийте. 18 Он же не весть, яко земнороднии у нея погибают и во дне ада обретаются. Но отскочи, не замедли на месте ея, ниже настави ока своего к ней: тако бо пройдеши воду чуждую и прейдеши реку чуждую: от воды же чуждия ошайся и от источника чуждаго не пий, да многое время поживеши, и приложатся тебе лета живота. === 10 === 1 Сын премудр веселит отца, сын же безумен печаль матери. 2 Не пользуют сокровища беззаконных, правда же избавит от смерти. 3 Не убиет гладом Господь душу праведную, живот же нечестивых низвратит. 4 Нищета мужа смиряет: руце же мужественных обогащаются. 5 Сын наказан премудр будет, безумный же слугою употребится: спасется от зноя сын разумный, ветротленен же бывает на жатве сын беззаконный. 6 Благословение Господне на главе праведнаго: уста же нечестивых покрыет плачь безвременный. 7 Память праведных с похвалами: имя же нечестивых угасает. 8 Премудр сердцем приимет заповеди: непокровенный же устнама остроптевая запнется. 9 Иже ходит просто, ходит надеяся: развращая же пути своя, познан будет. 10 Намизаяй оком с лестию собирает мужем печали: обличаяй же со дерзновением миротворит. 11 Источник жизни в руце праведнаго: уста же нечестиваго покрыет пагуба. 12 Ненависть воздвизает распрю: всех же нелюбопрителных покрывает любовь. 13 Иже от устен произносит премудрость, жезлом биет мужа безсердечна. 14 Премудрии скрыют чувство, уста же продерзаго приближаются сокрушению. 15 Стяжание богатых град тверд, сокрушение же нечестивых нищета. 16 Дела праведных живот творят, плодове же нечестивых грехи. 17 Пути жизни хранит наказание: наказанием же не обличеный заблуждает. 18 Покрывают вражду устне правыя: износящии же укоризну безумнейшии суть. 19 От многословия не избежиши греха: щадя же устне, разумен будеши. 20 Сребро разжженое язык праведнаго: сердце же нечестиваго изчезнет. 21 Устне праведных ведят высокая: безумнии же в скудости скончаваются. 22 Благословение Господне на главе праведнаго, сие обогащает, и не имать приложитися ему печаль в сердцы. 23 Смехом безумный творит злая: премудрость же мужеви раждает разум. 24 В погибели нечестивый обносится: желание же праведнаго приятно. 25 Преходящей бури, нечестивый изчезает, праведный же уклонився спасается во веки. 26 Якоже гроздие зеленое вред зубом и дым очима, тако законопреступление творящым е. 27 Страх Господень прилагает дни: лета же нечестивых умалятся. 28 Пребывает с праведными веселие, упование же нечестивых погибает. 29 Утверждение преподобному страх Господень, сокрушение же творящым злая. 30 Праведник во веки не поколеблется: нечестивии же не населят земли. 31 Уста праведнаго каплют премудрость, язык же неправеднаго погибнет: 32 устне мужей праведных каплют благодати, уста же нечестивых развращаются. === 11 === 1 Мерила льстивая мерзость пред Господем, вес же праведный приятен Ему. 2 Идеже аще внидет досаждение, тамо и безчестие: уста же смиренных поучаются премудрости. 3 Умираяй праведник остави раскаяние, удобна же бывает и посмеятелна нечестивых погибель. 4 Совершенство правых наставит их, и поползновение отрицающихся пленит их. Не упользуют имения в день ярости: правда же избавит от смерти. 5 Правда непорочнаго исправляет пути, нечестие же впадает в неправду. 6 Правда мужей правых избавит их, безсоветием же уловляются беззаконнии. 7 Скончавшуся мужу праведну, не погибнет надежда: похвала же нечестивых погибнет. 8 Праведный от лова убегнет, в негоже место предается нечестивый. 9 Во устех нечестивых сеть гражданом, чувство же праведных благопоспешно. 10 Во благих праведных исправится град, и в погибели нечестивых радование. 11 В благословении правых возвысится град, усты же нечестивых раскопается. 12 Ругается гражданом лишенный разума, муж же мудр безмолвие водит. 13 Муж двоязычен открывает советы в сонмищи, верный же духом таит вещы. 14 Умже и несть управления, падают аки листвие, спасение же есть во мнозе совете. 15 Лукавый злодействует, егда сочетавается с праведным, ненавидит же гласа утверждения. 16 Жена благодатна возносит мужу славу: престол же безчестия жена ненавидящая правды. Богатства ленивии скудни бывают, крепцыи же утверждаются богатством. 17 Души своей благотворит муж милостивый, погубляет же тело свое немилостивый. 18 Нечестивый творит дела неправедная: семя же праведных мзда истины. 19 Сын праведный раждается в живот: гонение же нечестиваго в смерть. 20 Мерзость Господеви путие развращенни, приятни же Ему вси непорочнии в путех своих. 21 В руку руце вложив неправедно, не без муки будет злых: сеяй же правду приимет мзду верну. 22 Якоже усерязь златый в ноздрех свинии, тако жене злоумней лепота. 23 Желание праведных все благое, надежда же нечестивых погибнет. 24 Суть, иже своя сеюще, множайшая творят: суть же и собирающе чуждая, умаляются. 25 Душа благословенна всякая простая: муж ярый неблагообразен. 26 Удержаваяй пшеницу оставит ю языком: продаяй пшеницу скупо, от народа проклят, благословение же Господне на главе подавающаго. 27 Творяй благая ищет благодати добры: ищущаго же злая постигнут его. 28 Надеяйся на богатство свое, сей падет: заступаяй же праведных, той возсияет. 29 Не сматряяй своего дому наследит ветры: поработает же безумный разумному. 30 От плода правды древо жизни прозябает: отемлются же безвременно души беззаконных. 31 Аще праведный едва спасается, нечестивый же и грешный где явится? === 12 === 1 Любяй наказание любит чувство: ненавидяй же обличения безумен. 2 Лучше обретый благодать от Господа Бога: муж же законопреступен премолчан будет. 3 Не исправится человек от беззаконнаго: корения же праведных не отимутся. 4 Жена мужественная венец мужу своему: якоже в древе червь, тако мужа погубляет жена злотворная. 5 Мысли праведных судьбы: управляют же нечестивии лести. 6 Словеса нечестивых льстива в кровь, уста же правых избавят их. 7 Аможе обратится нечестивый, изчезает: храмины же праведных пребывают. 8 Уста разумнаго хвалима бывают от мужа: слабосерд же поругаемь бывает. 9 Лучше муж в безчестии работаяй себе, нежели честь себе обложив и лишаяйся хлеба. 10 Праведник милует душы скотов своих: утробы же нечестивых немилостивны. 11 Делаяй свою землю исполнится хлебов: гонящии же суетная лишени разума. Иже есть сладостен в виннем пребывании, во своих твердынех оставит безчестие. 12 Желания нечестивых зла: корение же благочестивых в твердостех. 13 За грех устен впадает в сети грешник: избегает же от них праведник. Сматряяй кротко помилован будет, а сретаяй во вратех оскорбит душы. 14 От плодов уст душа мужа наполнится благих, воздаяние же устен его воздастся ему. 15 Путие безумных прави пред ними: послушает советов мудрый. 16 Безумный абие исповесть гнев свой: крыет же свое безчестие хитрый. 17 Явленную веру возвещает праведный: свидетель же неправедных льстив. 18 Суть, иже глаголюще уязвляют аки мечи: языцы же премудрых изцеляют. 19 Устне истинны исправляют свидетелство: свидетель же скор язык имать неправеден. 20 Лесть в сердцы кующаго злая: хотящии же мира возвеселятся. 21 Ничтоже неправедное угодно есть праведному: нечестивии же исполнятся злых. 22 Мерзость Господеви устне лживы: творяй же верно приятен Ему. 23 Муж разумивый престол чувствия: сердце же безумных срящет клятвы. 24 Рука избранных одержит удобь: льстивии же будут во пленении. 25 Страшное слово сердце мужа праведна смущает, весть же благая веселит его. 26 Разумив праведник себе друг будет: мысли же нечестивых некротки: согрешающих постигнут злая, путь же нечестивых прельстит я. 27 Не улучит льстивый ловитвы: стяжание же честное муж чистый. 28 В путех правды живот, путие же злопомнящих в смерть. === 13 === 1 Сын благоразумный послушлив отцу, сын же непокорливый в погибель. 2 От плодов правды снесть благий: душы же беззаконных погибают безвременно. 3 Иже хранит своя уста, соблюдает свою душу: продерзивый же устнама устрашит себе. 4 В похотех есть всяк праздный: руки же мужественных в прилежании. 5 Словесе неправедна ненавидит праведник: нечестивый же стыдится и не возимет дерзновения. 6 Правда хранит незлобивыя: нечестивыя же злы творит грех. 7 Суть богатяще себе, ничесоже имуще: и суть смиряющеся во мнозе богатстве. 8 Избавление мужа души свое ему богатство: нищий же не терпит прещения. 9 Свет праведным всегда, свет же нечестивых угасает: души льстивыя заблуждают во гресех, праведнии же щедрят и милуют. 10 Злый с досаждением творит злая: себе же знающии премудри (суть). 11 Имение поспешаемо со беззаконием умалено бывает, собираяй же себе со благочестием изобилствовати будет: праведный щедрит и дает. 12 Лучше начинаяй помогати сердцем обещающаго и в надежду ведущаго: древо бо жизни желание доброе. 13 Иже презирает вещь, презрен будет от нея: а бояйся заповеди, сей здравствует. 14 Сыну лукавому ничтоже есть благо: рабу же мудру благопоспешна будут дела, и исправится путь его. 15 Закон мудрому источник жизни: безумный же от сети умрет. 16 Разум благ дает благть: разумети же закон, мысли есть благия: путие же презирающих в погибели. 17 Всяк хитрый творит с разумом, безумный же прострет свою злобу. 18 Царь дерзостен впадет во злая, вестник же мудр избавит его. 19 Нищету и безчестие отемлет наказание: храняй же обличения прославится. 20 Желания благочестивых наслаждают душу, дела же нечестивых далече от разума. 21 Ходяй с премудрыми премудр будет, ходяй же с безумными познан будет. 22 Согрешающих постигнут злая, праведных же постигнут благая. 23 Благ муж наследит сыны сынов: сокровищствуется же праведным богатство нечестивых. 24 Праведнии насладятся в богатстве лета многа: неправеднии же погибнут вскоре. 25 Иже щадит жезл (свой), ненавидит сына своего: любяй же наказует прилежно. 26 Праведный ядый насыщает душу свою: душы же нечестивых скудны. === 14 === 1 Мудрыя жены создаша домы: безумная же раскопа рукама своима. 2 Ходяй право боится Господа: развращаяй же пути своя обезчестится. 3 Из уст безумных жезл досаждения: устне же мудрых хранят я. 4 Идеже несть волов, ясли чисты: а идеже жита многа, явна волу крепость. 5 Свидетель верен не лжет: разжизает же ложная свидетель неправеден. 6 Взыщеши премудрости у злых, и не обрящеши: чувство же у мудрых удобно. 7 Вся противна (суть) мужеви безумну: оружие же чувствия устне премудры. 8 Премудрость коварных уразумеет пути их: буйство же безумных в заблуждении. 9 Домове беззаконных требуют очищения, домове же праведных приятни. 10 Сердце мужа чувственно печаль души его: егда же веселится, не примешается досаждению. 11 Домове нечестивых изчезнут, селения же право творящих пребудут. 12 Есть путь, иже мнится человеком прав быти, последняя же его приходят во дно ада. 13 Ко веселием не примешавается печаль: последняя же радости в плачь приходят. 14 Путий своих насытится дерзосердый, от размышлений же своих муж благ. 15 Незлобивый веру емлет всякому словеси, коварный же приходит в раскаяние. 16 Премудр убоявся уклонится от зла, безумный же на себе надеявся смешавается со беззаконным. 17 Острояростный без совета творит, муж же мудрый многая терпит. 18 Разделяют безумнии злобу, коварнии же удержат чувство. 19 Поползнутся злии пред благими, и нечестивии послужат пред дверьми праведных. 20 Друзие возненавидят другов убогих: друзие же богатых мнози. 21 Безчестяй убогия согрешает, милуяй же нищыя блажен. 22 Заблуждающии (неправедницы) делают злая, милость же и истину делают благии. Не ведят милости и веры делателие злых: милостыни же и веры у делателей благих. 23 Во всяцем пекущемся есть изюбилие: любосластный же и безпечальный в скудости будет. 24 Венец премудрых богатство их, житие же безумных зло. 25 Избавит от злых душу свидетель верен, разжизает же лживая лестный. 26 Во страсе Господни упование крепости, чадом же Своим оставит утверждение (мира). 27 Страх Господень источник жизни, творит же укланятися от сети смертныя. 28 Во мнозе языце слава царю: во оскудении же людсте сокрушение сильному. 29 Долготерпелив муж мног в разуме, малодушный же крепко безумен. 30 Кроткий муж сердцу врачь: моль же костем сердце чувственно. 31 Оклеветаяй убогаго раздражает Сотворшаго и, почитаяй же Его милует нищаго. 32 Во злобе своей отринется нечестивый: надеяйжеся на Господа своим преподобием праведен. 33 В сердцы блазе мужа почиет премудрость, в сердцы же безумных не познавается. 34 Правда возвышает язык: умаляют же племена греси. 35 Приятен цареви слуга разумный, своим же благообращением отемлет безчестие. === 15 === 1 Гнев губит и разумныя: ответ же смирен отвращает ярость, а слово жестоко возвизает гневы. 2 Язык мудрых добрая свесть: уста же безумных возвещают злая. 3 На всяцем месте очи Господни сматряют злыя же и благия. 4 Изцеление языка древо жизни: храняй же его исполнится духа. 5 Безумный ругается наказанию отчу: храняй же заповеди хитрейший. Во мнозе правде крепость многа: нечестивии же от земли искоренятся. 6 В домех праведных крепость многа: плоды же нечестивых погибают. 7 Устне мудрых связуются чувством, сердца же безумных не тверда. 8 Жертвы нечестивых мерзость Господеви, обеты же правоходящих приятни Ему. 9 Мерзость Господеви путие нечестивых: гонящыя же правду любит. 10 Наказание незлобиваго познавается от мимоходящих: ненавидящии же обличения скончаваются срамно. 11 Ад и Пагуба явна пред Господем, како не и сердца человеков? 12 Не возлюбит ненаказанный обличающих его, с мудрыми же не побеседует. 13 Сердцу веселящуся, лице цветет: в печалех же сущу, сетует. 14 Сердце правое ищет чувства: уста же ненаказанных уразумеют злая. 15 На всяко время очи злых приемлют злая: добрии же безмолвствуют присно. 16 Лучше частица малая со страхом Господним, нежели сокровища велия без боязни. 17 Лучше учреждение от зелий с любовию и благодатию, нежели представление телцев со враждою. 18 Муж ярый устрояет брани, долготерпеливый же и будущую укрощает. Терпеливый муж угасит суды, нечестивый же воздвизает паче. 19 Путие праздных постлани тернием, мужественных же углаждени. 20 Сын премудр веселит отца, сын же безумен раздражает матерь свою. 21 Несмысленнаго стези скудны ума: муж же разумен исправляя ходит. 22 Отлагают помышления не чтущии сонмищ: в сердцах же советных пребывает совет. 23 Не послушает злый его, ниже речет полезно что и добро общему. 24 Путие живота помышления разумнаго, да уклонився от ада спасется. 25 Домы досадителей разоряет Господь, утверди же предел вдовицы. 26 Мерзость Господеви помысл неправедный, чистых же глаголы честны. 27 Губит себе мздоимец, ненавидяй же даров приятия спасется: милостынями и верами очищаются греси, страхом же Господним уклоняется всяк от зла. 28 Сердца праведных поучаются вере, уста же нечестивых отвещают злая: приятни пред Господем путие мужей праведных, имиже и врази друзие бывают. 29 Далече отстоит Бог от нечестивых, молитвы же праведных послушает: лучше малое приятие со правдою, нежели многа жита с неправдою: сердце мужа да мыслит праведная, да от Бога исправятся стопы его. 30 Видящее око добрая веселит сердце, слава же благая утучняет кости. 31 Слушаяй обличений живота посреде премудрых водворится. 32 Иже отметает наказание, ненавидт себе: соблюдаяй же обличения любит свою душу. 33 Страх Господень наказание и премудрость, и начало славы отвещает ей (, предидет же смиренным слава). === 16 === 1 Человеку предложение сердца: и от Господа ответ языка. 2 Вся дела смиреннаго явленна пред Богом, и укрепляяй духи Господь. 3 Приближи ко Господу дела твоя, и утвердятся помышления твоя. 4 Вся содела Господь Себе ради: нечестивии же в день зол погибнут. 5 Нечист пред Богом всяк высокосердый: в руку же руце влагаяй неправедно не обезвинится. 6 Начало пути блага, еже творити праведная, приятна же пред Богом паче, нежели жрети жертвы. 7 Ищай Господа обрящет разум со правдою: 8 праве же ищущии его обрящут мир. 9 Вся дела Господня со правдою: хранится же нечестивый на день зол. 10 Пророчество во устнех царевых, в судищи же не погрешат уста его. 11 Превеса мерила правда у Господа: дела же Его мерила праведная. 12 Мерзость цареви творяй злая: со правдою бо уготовляется престол началства. 13 Приятны царю устне праведны, словеса же правая любит Господь. 14 Ярость царева вестник смерти: муж же премудр утолит его. 15 Во свете жизни сын царев: приятнии же ему яко облак позден. 16 Угнеждения премудрости избраннее злата: вселения же разума дражайши сребра. 17 Путие жизни укланяются от злых: долгота же жития путие праведни. Приемляй наказание во благих будет, храняй же обличения умудрится. Иже хранит своя пути, соблюдает свою душу: любяй же живот свой щадит своя уста. 18 Прежде сокрушения предваряет досаждение, прежде же падения злопомышление. 19 Лучше кроткодушен со смирением, нежели иже разделяет корысти с досадительми. 20 Разумный в вещех обретатель благих, надеяйся же на Господа блажен. 21 Премудрыя и разумныя злыми наричут, сладции же в словеси множае услышани будут. 22 Источник животен разум стяжавшым, наказание же безумных зло. 23 Сердце премудраго уразумеет яже от своих ему уст, во устнах же носит разум. 24 Сотове медовнии словеса добрая, сладость же их изцеление души. 25 Суть путие мнящиися прави быти мужу, обаче последняя их зрят во дно адово. 26 Муж в трудех труждается себе и изнуждает погибель свою: строптивый во своих устах носит погибель. 27 Муж безумен копает себе злая и во устнах своих сокровищствует огнь. 28 Муж строптивый разсылает злая, и светилник льсти вжигает злым, и разлучает други. 29 Муж законопреступен прельщает други и отводит их в пути не благи. 30 Утверждаяй очи свои мыслит развращенная, грызый же устне свои определяет вся злая: сей пещь есть злобы. 31 Венец хвалы старость, на путех же правды обретается. 32 Лучше муж долотерпелив паче крепкаго, (и муж разум имеяй паче земледелца великаго:) удержаваяй же гнев паче вземлющаго град. 33 В недра входят вся неправедным: от Господа же вся праведная. === 17 === 1 Лучше укрух хлеба со сластию в мире, нежели дом исполнен многих благих и неправедных жертв со бранию. 2 Раб смыслен обладает владыки безумными, в братиих же разделит (имение) на части. 3 Якоже искушается в пещи сребро и злато, тако избранная сердца у Господа. 4 Злый послушает языка законопреступных, праведный же не внимает устнам лживым. 5 Ругайся убогому раздражает Сотворшаго его, радуяйся же о погибающем не обезвинится: милуяй же помилован будет. 6 Венец старых чада чад: похвала же чадом отцы их. Верному весь мир богатство, неверному же ниже пенязь. 7 Неприличны суть безумному устне верны, ниже праведному устне лживы. 8 Мзда благодатей наказание употребляющым: и аможе аще обратится, успеет. 9 Иже таит обиды, ищет любве: а иже ненавидит скрывати, разлучает други и домашния. 10 Сокрушает прещение сердце мудраго: безумный же биемь не чувствует (ран). 11 Прекословия воздвижет всяк злый: Господь же ангела немилостива послет нань. 12 Впадет попечение мужу смысленну: безумнии же размышляют злая. 13 Иже воздает злая за благая, не подвигнутся злая из дому его. 14 Власть дает словесем начало правды: предводителствует же скудости пря и брань. 15 Иже судит праведнаго неправедным, неправеднаго же праведным, нечист и мерзок у Господа. 16 Вскую бяше имение безумному? Стяжати бо премудрости безсердый не может. Иже высок творит свой дом, ищет сокрушения: остроптеваяй же учитися впадет во злая. 17 На всяко время друг да будет тебе, братия же в нуждах полезни да будут: сего бо ради раждаются. 18 Муж безумен плещет и радуется себе, якоже поручаяйся испоручит друга своего, на своих же устнах огнь сокровишствует. 19 Грехолюбец радуется сваром, а жестокосердый не усрящет благих. 20 Муж удобопреложный языком впадет во злая: сердце же безумнаго болезнь стяжавшему е. 21 Не веселится отец о сыне ненаказаннем: сын же мудр веселит матерь свою. 22 Сердце веселящеся благоиметися творит: мужу же печальну засышут кости. 23 Приемлющему дары неправедно в недра не предуспевают путие: нечестивый же укланяет пути правды. 24 Лице разумно мужа премудра, очи же безумнаго на концех земли. 25 Гнев отцу сын безумен, и болезнь рождшей его. 26 Тщеты творити мужу праведну не добро, ниже преподобно наветовати властем праведным. 27 Иже щадит глагол произнести жесток, разумен: долготерпеливый же муж премудр, лучше ищущаго науки. 28 Несмысленному вопросившу о мудрости, мудрость вменится: нема же кто себе творит, возмнится разумен быти. === 18 === 1 Вины ищет муж хотя отлучитися от другов, на всяко же время поносимь будет. 2 Не требует премудрости муж скудоумен, зане паче водится безумием. 3 Егда приидет нечестивый во глубину зол, нерадит: находит же ему безчестие и поношение. 4 Вода глубока слово в сердцы мужа, река же изскачущи и источник жизни. 5 Чудитися лицу нечестиваго не добро, ниже преподобно укланяти праведное на суде. 6 Устне безумнаго приводят его на зло, уста же его дерзостная призывают смерть. 7 Уста безумнаго сокрушение ему, устне же его сеть души его. 8 Ленивыя низлагает страх: души же мужей женам подобных взалчут. 9 Не изцеляяй себе во своих делех брат есть погубляющему себе самаго. 10 Из величества крепости имя Господне, к немуже притекающе праведницы возносятся. 11 Имение богату мужу град тверд, слава же его вельми присеняет. 12 Прежде сокрушения возносится сердце мужу и прежде славы смиряется. 13 Иже отвещает слово прежде слышания, безумие ему есть и поношение. 14 Гнев мужа укрощает раб разумный: малодушна же человека кто стерпит? 15 Сердце разумнаго стяжет чувствие, ушеса же мудрых ищут смысла. 16 Даяние человека распространяет его и с сильными посаждает его. 17 Праведный себе самаго оглаголник во первословии: егда же приложит супостат, обличается. 18 Прекословия утоляет молчаливый и во властех определяет. 19 Брат от брата помогаемь, яко град тверд и высок, укрепляется же якоже основаное царство. 20 От плодов уст муж насыщает чрево свое, и от плодов устен своих насытится. 21 Смерть и живот в руце языка: удержавающии же его снедят плоды его. 22 Иже обрете жену добру, обрете благодать, приял же есть от Господа тишину. 23 Иже изгоняет жену добрую, изгоняет благая: держай же прелюбодейцу безумен и нечестив. 24 С молении глаголет убогий, богатый же отвещает жестоко. 25 Муж любовен к дружбе, и есть друг прилепивыйся паче брата. === 19 === 1 Лучше есть убог ходяй в простоте своей, неже богатый строптив устны своими и несмыслен. 2 Идеже несть учения души, несть добро, и иже скор есть ногама, поткнется. 3 Неразумие мужа погубляет пути его, и Бога виновна творит в сердцы своем. 4 Богатство прилагает други многи: нищий же и от сущаго друга оставляемь бывает. 5 Свидетель лжив без муки не будет: оклеветаяй же неправедно не убежит ея. 6 Мнози угождают лицам царским: всяк же зол бывает в поношение мужеви. 7 Всяк, иже убогаго брата ненавидит, и от содружества далече будет. Мысль благая ведящым ю приближается, муж же мудр обрящет ю. Много творяй зла совершает злобу, а иже раздражает словесы, не спасется. 8 Стяжавый мудрость любит себе, а иже сохраняет разум, обрящет благая. 9 Свидетель лживый не без муки будет, а иже разжизает злобу, погибнет от нея. 10 Не пользует безумному сладость, и аще раб начнет с досаждением обладати. 11 Милостив муж долготерпит, похвала же его превосходит законопреступных. 12 Царево прещение подобно рыканию львову, и якоже роса злаку, тако тихость его. 13 Студ есть отцу сын безумен, и нечисты обеты от мзды блудницы. 14 Дом и имение разделяют отцы чадом: от Господа же сочетавается жена мужеви. 15 Страх содержит мужа женонравна: душа же празднаго взалчет. 16 Иже хранит заповеди, соблюдает свою душу, а нерадяй о своих путех погибнет. 17 Милуяй нища взаим дает Богови, по даянию же его воздастся ему. 18 Наказуй сына твоего, тако бо будет благонадежен: в досаждение же не вземлися душею твоею. 19 Злоумен муж много отщетится: аще же губитель есть, и душу свою приложит. 20 Слушай, сыне, отца твоего наказания, да мудр будеши в последняя твоя. 21 Многи мысли в сердцы мужа: совет же Господень во век пребывает. 22 Плод мужеви милостыня: лучше же нищь праведный, нежели богат лжив. 23 Страх Господень в живот мужеви: а безстрашный водворится на местех, идеже не наблюдается разум. 24 Скрываяй в недрех руце свои неправедно ниже ко устом своим принесет я. 25 Губителю раны приемлющу, безумный коварнее будет: аще же обличаеши мужа разумна, уразумеет чувство. 26 Безчествуяй отца и отреваяй матерь свою срамоту приимет и поношение. 27 Сын оставляяй хранити наказание отчее поучится словесем злым. 28 Выручаяй отрока несмыслена досаждает оправданию: уста же нечестивых пожрут суд. 29 Уготовляются невоздержным раны, и мучения подобне неразумным. === 20 === 1 Невинно вино, укоризненно же пиянство, и всяк пребываяй в нем не будет премудр. 2 Не разнствует прещение царево от ярости львовы: раздражаяй же его и примешаяйся ему согрешает в свою душу. 3 Слава мужу отвращатися от досаждения: всяк же безумен сими соплетается. 4 Поносимь ленивый не усрамляется, такожде и заемляй пшеницу в жатву. 5 Вода глубока совет в сердцы мужа: муж же премудр изчерплет ю. 6 Велика вещь человек, и драгая муж творяй милость: мужа же верна (велико) дело обрести. 7 Иже без порока живет в правде, блажены оставит дети своя. 8 Егда царь праведен на престоле сядет, не противится пред очима его ничтоже лукаво. 9 Кто похвалится чисто имети сердце? Или кто дерзнет рещи чиста себе быти от грехов? 10 Вес велик и мал, и мера сугуба, нечиста пред Господем обоя: 11 и творяй я в начинаниих своих запнется: юнота с преподобным, и правый путь его. 12 Ухо слышит, и око видит: Господня дела обоя. 13 Не люби клеветати, да не вознесешися: отверзи очи твои и насыщайся хлеба. 14 Зло, зло, речет стяжаваяй, и отшед тогда похвалится. 15 Есть злато и множество камений драгих, сосуд честен устне разумны. 16 Возми ризу его, яко испоручник бысть чуждыя, и за чуждую возми залог от него. 17 Сладок есть человеку хлеб лжи, но потом исполнятся уста его камения. 18 Помышление в совете уготовится, в правлении же творит брань. 19 Открываяй тайну ходит лестию: и прельщающему устнами своими не примешайся. 20 Злословящему отца или матерь угаснет светилник, зеницы же очес его узрят тму. 21 Часть поспешна в начале, в последних не благословится. 22 Не рцы: отмщу врагу: но потерпи Господа, да ти поможет. 23 Мерзость Господеви сугубый вес, и мерило лживо не добро пред ним. 24 От Господа исправляются стопы мужу: смертный же како уразумеет пути своя? 25 Сеть мужеви скоро нечто от своих освящати: по обете бо раскаяние бывает. 26 Веятель нечестивых есть царь мудр и наложит на ня коло. 27 Свет Господень дыхание человеком, иже испытает тайная утробы. 28 Милостыня и истина сохранение царю, и обыдут престол его в правде. 29 Лепота (есть) юным премудрость: слава же старым седины. 30 Раны и сокрушения сретают злых, язвы же в сокровищих чрева. === 21 === 1 Якоже устремление воды, тако сердце царево в руце Божией: аможе аще восхощет обратити, тамо уклонит е. 2 Всяк муж является себе праведен: управляет же сердца Господь. 3 Творити праведная и истинствовати угодна Богу паче, нежели жертв кровь. 4 Велемудрый во укоризне дерзосерд, светило же нечестивых греси. 5 Помышления тщаливаго во изюбилии, и всяк нерадивый в лишении. 6 Делаяй сокровища языком лживым суетная гонит в сети смертныя. 7 Всегубителство на нечестивыя устремляется: не хотят бо творити праведная. 8 К стропотным стропотныя пути посылает Бог: чиста бо и права дела Его. 9 Лучше жити во угле непокровеннем, нежели в повапленных с неправдою и в храмине общей. 10 Душа нечестиваго не помилуется ни от единаго от человеков. 11 Тщету приемлющу невоздержному, коварнейший будет незлобивый, разумеваяй же мудрый приимет разум. 12 Разумевает праведный сердца нечестивых и уничтожает нечестивыя в злых. 13 Иже затыкает ушеса своя, еже не послушати немощнаго, и той призовет, и не будет послушаяй его. 14 Даяние тайно отвращает гневы, щадяй же даров воздвизает ярость крепкую. 15 Веселие праведных творити суд: преподобный же нечист у злодеев. 16 Муж заблуждаяй от пути правды в сонмищи исполинов почиет. 17 Муж скуден любит веселие, любяй же вино и елей не обогатится. 18 Отребие же праведнику беззаконник. 19 Лучше жити в земли пусте, неже жити с женою сварливою и язычною и гневливою. 20 Сокровище вожделенно почиет во устех мудраго: безумнии же мужие пожирают е. 21 Путь правды и милостыни обрящет живот и славу. 22 Во грады крепки вниде премудрый и разруши утверждение, на неже надеяшася нечестивии. 23 Иже хранит своя уста и язык, соблюдает от печали душу свою. 24 Продерзый и величавый и горделивый губитель нарицается: а иже памятозлобствует, беззаконен. 25 Похоти лениваго убивают: не произволяют бо руце его творити что. 26 Нечестивый желает весь день похоти злыя, праведный же милует и щедрит нещадно. 27 Жертвы нечестивых мерзость Господеви: ибо беззаконно приносят я. 28 Свидетель ложный погибнет, муж же послушлив сохраняемь возглаголет. 29 Нечестив муж безстудно стоит лицем: правый же сам разумевает пути своя. 30 Несть премудрости, несть мужества, несть совета у нечестиваго. 31 Конь уготовляется на день брани: от Господа же помощь. === 22 === 1 Лучше имя доброе, неже богатство много, паче же сребра и злата благодать благая. 2 Богат и нищь сретоста друг друга, обоих же Господь сотвори. 3 Худог, видев лукаваго мучима крепко, сам наказуется: безумнии же мимошедше отщетишася. 4 Род премудрости страх Господень, и богатство и слава и живот. 5 Волчцы и сети на путех стропотных, храняй же свою душу избежит их. 6 Богатии убогими имут обладати, 7 и раби своим господем взаим дадут. 8 Сеявый злая пожнет злая, язву же дел своих совершит. 9 Мужа тиха и даятеля любит Господь, суету же дел его скончает. 10 Милуяй нищаго сам препитается: от своих бо хлебов даде убогому. Победу и честь устрояет даяй дары, обаче душу погубляет стяжавших. 11 Изжени от сонмища губителя, и изыдет с ним прение: егда бо сядет в сонмищи, всех безчестит. 12 Любит Господь преподобная сердца, приятни же Ему вси непорочнии в путех своих: устнама пасет царь (люди своя). 13 Очи Господни соблюдают чувство: презирает словеса законопреступный. 14 Вины ищет и глаголет ленивый: лев на стезях, на путех же разбойницы. 15 Яма глубока уста законопреступных: возненавиденый же от Господа впадется в ню. Суть путие злии пред мужем, и не любит возвратитися от них: возвратитися же подобает от пути стропотна и злаго. 16 Безумие висит на сердцы юнаго: жезл же и наказание далече (отгонит) от него. 17 Обидяй убогаго многая себе зла творит, дает же богатому во оскудение (себе). 18 Ко словесем мудрых прилагай твое ухо, и услыши моя словеса: свое же сердце утверди (к ним), да разумееши, яко добра суть. 19 И аще вложиши я в сердце твое, возвеслят тебе купно во твоих устнех. 20 Да будет ти на Господа надежда, и покажет ти путь Свой. 21 Ты же напиши я себе трижды, на совет и смысл и разум, на широте сердца твоего: учу бо тя истинному словеси, и разума благаго слушати на ответы словесем истинным предлагаемым тебе. 22 Не насильствуй нищаго, зане убог есть, и не досаждай немощному во вратех: 23 Господь бо имать судити его суд, и избавиши твою безбедную душу. 24 Не бывай друг мужу гневливу и со другом жестокосердым не соводворяйся: 25 да не когда научишися путем его и приимеши тенета души твоей. 26 Не вдавайся в поручение, стыдяся лица: 27 егда бо не будеши имети чим искупитися, возмут постелю, яже под ребры твоими. 28 Не прелагай предел вечных, яже положиша отцы твои. 29 Прозрителну человеку и острому в делех своих пред царьми подобает стояти, и не стояти пред мужми простыми. === 23 === 1 Аще сядеши вечеряти на трапезе сильнаго, разумно разумевай предлагаемая тебе, 2 и налагай руку твою, ведый, яко сицевая тебе подобает уготовити: 3 аще же несытнейший еси, не желай брашен его: сия бо имут живот ложен. 4 Не распростирайся убог сый с богатым, твоею же мыслию удаляйся. 5 Аще устремиши на него око твое, никогдаже явится: соделаны бо суть ему крила яко орлу, и обращается в дом настоятеля своего. 6 Не вечеряй с мужем завистливым, ниже похощеши пищей его: 7 имже бо образом аще кто поглотит власы, сице яст и пиет: ниже к себе да введеши его и снеси хлеб твой с ним: 8 изблюет бо его и осквернит словеса твоя добрая. 9 Во ушию безумнаго ничтоже глаголи, да не когда поругает разумная словеса твоя. 10 Не прелагай предел вечных и в стяжание сирот не вниди: 11 избавляяй бо их Господь крепок есть и разсудит суд их с тобою. 12 Даждь в наказание сердце твое, ушеса же твоя уготовай словесем чувственным. 13 Не преставай младенца наказовати: аще бо жезлом биеши его, не умрет (от него): 14 ты бо побиеши его жезлом, душу же его избавиши от смерти. 15 Сыне, аще премудро будет сердце твое, возвеселиши и мое сердце, 16 и пребудут в словесех твои устне к моим устнам, аще права будут. 17 Да не ревнует сердце твое грешником, но в страсе Господни буди весь день: 18 аще бо соблюдеши я, будут ти внуцы, и упование твое не отступит. 19 Слушай, сыне, и премудр бывай и исправляй мысли твоего сердца: 20 не буди винопийца, ниже прилагайся к сложением и купованием мяс: 21 всяк бо пияница и блудник обнищает, и облечется в раздранная и в рубища всяк сонливый. 22 Слушай, сыне, отца родившаго тя, и не презирай, егда состареется мати твоя. 23 Истину стяжи и не отрини мудрости и учения и разума. 24 Добре воспитовает отец праведен, о сыне же премудрем веселится душа его. 25 Да веселится отец и мати о тебе, и да радуется рождшая тя. 26 Даждь ми, сыне, твое сердце, очи же твои моя пути да соблюдают. 27 Сосуд бо сокрушен чуждий дом, и студенец тесен чуждий: 28 сей бо вскоре погибнет, и всякий законопреступник потребится. 29 Кому горе? Кому молва? Кому судове? Кому горести и свары? Кому сокрушения вотще? Кому сини очи? 30 Не пребывающым ли в вине? И не назирающым ли, где пирове бывают? 31 Не упивайтеся вином, но беседуйте ко человеком праведным, и беседуйте во проходех: аще бо на чашы и сткляницы вдаси очи твои, последи имаши ходити нажайший белилнаго древа: 32 последи же яко от змиа уязвен прострется, и якоже от кераста разливается ему яд. 33 Очи твои егда узрят (жену) чуждую, уста твоя тогда возглаголют стропотная: 34 и возляжеши яко в сердцы моря и якоже кормчий во мнозе волнении. 35 Речеши же: биша мя, и не поболех, и поругашася ми, аз же не разумех: когда утро будет, да шед взыщу, с нимиже снидуся? === 24 === 1 Сыне, не ревнуй мужем злым, ниже возжелей быти с ними: 2 лжам бо поучается сердце их, и болезни устне их глаголют. 3 С премудростию зиждется дом и с разумом исправляется. 4 С чувствием исполняются сокровища от всякаго богатства честнаго и добраго. 5 Лучше мудрый крепкаго, и муж разум имеяй земледелца велика. 6 Со управлением бывает брань, помощь же с сердцем советным. 7 Премудрость и мысль блага во вратех премудрых: смысленнии не укланяются от закона Господня, 8 но советуют в сонмищих. Ненаказанных сретает смерть, 9 умирает же безумный во гресех. Нечистота мужу губителю: 10 осквернится в день зол и в день печали, дондеже оскудеет. 11 Избави ведомыя на смерть и искупи убиваемых, не щади. 12 Аще же речеши: не вем сего: разумей, яко Господь всех сердца весть, и создавый дыхание всем, сей весть всяческая, Иже воздаст комуждо по делом его. 13 Яждь мед, сыне, благ бо есть сот, да насладится гортань твой: 14 сице уразумееши премудрость душею твоею: аще бо обрящеши, будет добра кончина твоя, и упование не оставит тебе. 15 Не приводи нечестиваго на пажить праведных, ниже прельщайся насыщением чрева: 16 седмерицею бо падет праведный и востанет, нечестивии же изнемогут в злых. 17 Аще падет враг твой, не обрадуйся ему, в преткновении же его не возносися: 18 яко узрит Господь, и не угодно Ему будет, и отвратит ярость Свою от него. 19 Не радуйся о злодеющих и не ревнуй грешным, 20 не пребудут бо внуцы лукавых, светило же нечестивых угаснет. 21 Бойся Бога, сыне, и царя, и ни единому же их противися: 22 внезапу бо истяжут нечестивых, мучения же обоих кто увесть? Слово сохраняяй сын кроме погибели будет: приемляй же прият оное. Ничтоже ложно от языка цареви да глаголется, и ни едина лжа от языка его да изыдет: меч (есть) язык царев, а не плотян: и иже аще предан будет, сокрушится: аще бо раздражится ярость его, со жилами человеки губит, и кости человеческия поядает и сожигает яко пламень, яко не ядомым быти птенцами орлими. Моих словес, сыне, бойся, и приим я покайся. 23 Сия же вам смысленным глаголю разумети: срамлятися лица на суде не добро. 24 Глаголяй нечестиваго, яко праведен есть, проклят от людий будет и возненавиден во языцех: 25 обличающии же лучшии явятся, на няже приидет благословение благо: 26 и устне облобызают отвещающыя словеса блага. 27 Уготовляй на исход дела твоя, и уготовися на село, и ходи вслед мене, и созиждеши дом твой. 28 Не буди свидетель лжив на твоего гражданина, ниже пространяйся твоима устнама. 29 Не рцы: имже образом сотвори ми, сотворю ему и отмщу ему, имиже мя преобиде. 30 Якоже нива муж безумный, и яко виноград человек скудоумный: 31 аще оставиши его, опустеет и травою порастет весь, и будет оставлен, ограды же каменныя его раскопаются. 32 Последи аз покаяхся, воззрех избрати наказание: 33 мало дремлю, мало же сплю и мало объемлю рукама перси: 34 аще же сие твориши, приидет предидущи нищета твоя и скудость твоя, яко благ течец. === 25 === 1 Сия притчи Соломони бывшыя нерасположенны, яже списаша друзие Езекии царя Иудейска. 2 Слава Божия крыет слово, слава же царева почитает повеления Его. 3 Небо высоко, земля же глубока: сердце же царево необличително. 4 Куй неискушенное сребро, и очистится чисто все. 5 Убивай нечестивыя от лица царева, и исправится в правде престол его. 6 Не гордися пред лицем царевым и на месте сильных не стани: 7 лучше бо ти есть, егда речет: взыди ко мне: нежели смиритися тебе пред лицем сильнаго. 8 Иже видеста очи твои, глаголи. Не впадай в тяжбу скоро, да не раскаешися послежди, егда тебе досадит друг твой. 9 Вступай вспять, не неради, да не поносит убо тебе друг: 10 свара же твоя и вражда твоя не отступит, но будет ти равна со смертию. Благодать и любы свобождает, в нихже утверди себе, да не в поношении будеши, но сохрани пути твоя добре устроены. 11 (Якоже) яблоко злато во усерязи сардийскаго камене, сице рещи слово при приличных ему. 12 И (якоже) во усерязь златый сардийский камень многоценный вяжется, (сице) слово премудро во ухо благопослушно. 13 Якоже исходище снега в жатву зноя пользует, тако вестник верен пославших его: душы бо употребляющих его пользует. 14 Якоже ветри и облацы и дождеве являющиися, тако и хвалящийся о даянии ложнем. 15 В долготерпении благополучие царем: язык же мякок сокрушает кости. 16 Мед обрет яждь умеренно, да не како пресыщен изблюеши. 17 Не учащай вносити ногу твою ко другу твоему, да не когда насыщься тебе, возненавидит тя. 18 Дреколь и мечь и стрела остра, тако и муж свидетелствуяй на друга своего свидетелство ложное. 19 Путь злаго и нога законопреступнаго погибнут в день зол. 20 Якоже оцет неполезен вреду и дым очима, тако припадшая страсть в телеси сердце оскорбляет. 21 Якоже молие в ризе и червие в древе, тако печаль мужу вредит сердце. 22 Аще алчет враг твой, ухлеби его: аще ли жаждет, напой его: 23 сие бо творя, углие огненное собираеши на главу его, Господь же воздаст тебе благая. 24 Ветр северный воздвизает облаки, лице же безстудно язык раздражает. 25 Лучше жити во угле непокрытем, неже во храмине общей со женою клеветливою. 26 Якоже вода студеная души жаждущей благоприятна, тако весть благая от земли издалеча. 27 Якоже аще кто источник заграждает и исходище воды губит, тако не лепо праведнику пасти пред нечестивым. 28 Ясти мед много не добро: почитати же подобает словеса славна. 29 Якоже град стенами разорен и не огражден, тако муж творяй что без совета. === 26 === 1 Якоже роса в жатву и якоже дождь в лете, тако несть безумному чести. 2 Якоже птицы отлетают и врабиеве, тако клятва суетная не найдет ни на когоже. 3 Якоже бичь коню и остен ослу, тако жезл языку законопреступну. 4 Не отвещай безумному по безумию его, да не подобен ему будеши: 5 но отвещай безумному по безумию его, да не явится мудр у себе. 6 От путий своих поношение творит, иже посла вестником безумным слово. 7 Отими шествие от глезн и законопреступление от уст безумных. 8 Иже привязует камень в пращи, подобен есть дающему безумному славу. 9 Терния прозябают в руце пияницы, и порабощение в руце безумных. 10 Многими волнуется всяка плоть безумных, сокрушается бо изступление их. 11 Якоже пес, егда возвратится на своя блевотины, и мерзок бывает, тако безумный своею злобою возвращься на свой грех. Есть стыд наводяй грех, и есть стыд слава и благодать. 12 Видех мужа непщевавша себе мудра быти, упование же имать безумный паче его. 13 Глаголет ленивый послан на путь: лев на путех, на стогнах же разбойницы. 14 Якоже дверь обращается на пяте, тако ленивый на ложи своем. 15 Скрыв ленивый руку в недро свое не возможет принести ко устом. 16 Мудрейший себе ленивый является, паче во изюбилии износящаго весть. 17 Якоже держай за ошиб пса, тако председателствуяй чуждему суду. 18 Якоже врачуемии мещут словеса на человеки, сретаяй же словом первый запнется: 19 тако вси коварствующии над своими други: егда же увидени будут, глаголют, яко играя содеях. 20 Во мнозех древех растет огнь: а идеже несть разгневляюща, умолкает свар. 21 Огнище углию, и дрова огневи: муж же клеветлив в мятеж свара. 22 Словеса ласкателей мягка: сия же ударяют в сокровища утроб. 23 Сребро даемо с лестию, якоже скудель вменяемо: устне гладки сердце покрывают прискорбно. 24 Устнама вся обещавает плачай враг, в сердцы же содевает лесть. 25 Аще тя молит враг велиим гласом, не веруй ему, седмь бо есть лукавствий в души его. 26 Таяй вражду составляет лесть: открывает же своя грехи благоразумный на сонмищих. 27 Изрываяй яму искреннему впадется в ню: валяяй же камень на себе валит. 28 Язык лжив ненавидит истины, уста же непокровенна творят нестроение. === 27 === 1 Не хвалися о утрии, не веси бо, что родит (день) находяй. 2 Да хвалит тя искренний, а не твоя уста, чуждий, а не твои устне. 3 Тяжко камень и неудобоносно песок, гнев же безумнаго тяжший обоего. 4 Безмилостивна ярость и остр гнев, но ничтоже постоит ревности. 5 Лучше обличения откровенна тайныя любве. 6 Достовернее суть язвы друга, нежели вольная лобзания врага. 7 Душа в сытости сущи сотам ругается: души же нищетней и горькая сладка являются. 8 Якоже егда птица отлетит от гнезда своего, тако человек порабощается, егда устранится от своих мест. 9 Миры и вином и фимиамы красуется сердце, растерзаваетжеся от бед душа. 10 Друга твоего или друга отча не оставляй: в дом же брата своего не вниди неблагополучно: лучше друг близ, неже брат далече живый. 11 Мудр буди, сыне, да веселится сердце твое, и отврати от себе понослива словеса. 12 Хитрый злым находящым укрывается: безумнии же нашедше тщету постраждут. 13 Отими ризу его, прейде бо досадитель, иже чуждая погубляет. 14 Иже аще благословит друга утро велиим гласом, от кленущаго ни чимже разнствовати возмнится. 15 Капли изгоняют человека в день зимен из дому его, тако и жена клеветливая из своего дому. 16 Север жесток ветр, именем же приятен нарицается. 17 Железо железа острит: муж же поощряет лице дружне. 18 Иже насаждает смоковницу, снесть плоды ея: а иже хранит господа своего, честен будет. 19 Якоже суть неподобна лица лицам, сице ниже сердца человеков. 20 Ад и Погибель не насыщаются: такожде и очи человечестии несыти. Мерзость Господеви утверждаяй очи, и ненаказаннии невоздержни языком. 21 Искушение сребру и злату раздежение: муж же искушается усты хвалящих его. Сердце беззаконника взыскует злая, сердце же право взыскует разума. 22 Аще биеши безумнаго посреде сонмища срамляя его, не отимеши безумия его. 23 Разумне разумевай души стада твоего, и да приставиши сердце твое ко твоим стадам. 24 Яко не во век мужеви держава и крепость, ниже предает от рода в род. 25 Прилежи о злацех сущих на поли и пожнеши траву, и собирай сено нагорное, 26 да имаши овцы на одеяние: почитай поле, да будут ти агнцы. 27 Сыне, от мене имаши речения крепка в жизнь твою и в жизнь твоих служителей. === 28 === 1 Бегает нечестивый ни единому же гонящу, праведный же яко лев уповая. 2 За грехи нечестивых судове востают: муж же хитрый угасит я. 3 Продерзый в нечестиих оклеветает нищыя, якоже дождь сильный не полезен: 4 тако оставившии закон хвалят нечестие, любящии же закон ограждают себе стену. 5 Мужие злии не уразумеют суда, ищущии же Господа уразумеют о всем. 6 Лучше нищь ходяй во истине, нежели богат ложь. 7 Хранит закон сын разумный: а иже пасет несытость, безчестит отца своего. 8 Умножаяй богатство свое с лихвами и прибытки милующему нищыя собирает е. 9 Укланяяй ухо свое не послушати закона и сам молитву свою омерзил. 10 Иже льстит правыя на пути злем, во истление сам впадет: беззаконнии же минуют благая и не внидут в ня. 11 Премудр у себе муж богатый, убогий же разумив презрит его. 12 Помощию праведных многа бывает слава, на местех же нечестивых погибают человецы. 13 Покрываяй нечестие свое не успеет во благая, поведая же обличения возлюблен будет. 14 Блажен муж, иже боится всех за благоговение, а жестосердый впадает во злая. 15 Лев алчен и волк жажден, иже тиранствует, нищь сый, над языком убогим. 16 Царь скуден уроком велик клеветник (бывает), а ненавидяй неправды долго лет поживет. 17 Мужа, иже в вине смертне, выручаяй беглец будет, а не утвержден. Наказуй сына, и возлюбит тя и даст лепоту твоей души, не послушает языка законопреступна. 18 Ходяй праведно помощь приимет, ходяй же в стропотны пути увязнет. 19 Делаяй свою землю насытится хлебов, гоняй же праздность насытится нищеты. 20 Муж веры достойный много благословится, злый же не без мучения будет. 21 Иже не срамляется лица праведных, не благ: таковый за укрух хлеба продаст мужа. 22 Тщится обогатитися муж завидлив, и не весть, яко милостивый возобладает им. 23 Обличаяй человечы пути благодать имать паче языком ласкающаго. 24 Иже отвергает отца или матерь и мнится не согрешати, сей сопричастник есть мужу нечестиву. 25 Неверный муж судит туне, а иже надеется на Господа, в прилежании будет. 26 Иже надеется на дерзо сердце, таковый безумен: а иже ходит в премудрости, спасется. 27 Иже дает убогим, не оскудеет: а иже отвращает око свое, в скудости будет мнозе. 28 На местех нечестивых стенят праведнии, в погибели же их умножатся праведнии. === 29 === 1 Лучше муж обличаяй, нежели муж жестоковыйный: внезапу бо палиму ему, несть изцеления. 2 Похваляемым праведным, возвеселятся людие: началствующым же нечестивым, стенят мужие. 3 Мужу любящу премудрость, веселится отец его: а иже пасет любодейцы, погубит богатство. 4 Царь праведен возвышает землю, муж же законопреступник раскоповает. 5 Иже уготовляет на лице своему другу мрежу, облагает ю на своя ноги. 6 Согрешающему мужу велия сеть: праведный же в радости и в веселии будет. 7 Умеет праведный суд творити убогим, а нечестивый не разумеет разума, и убогому несть ума разумевающаго. 8 Мужие беззаконнии сожгоша град, мудрии же отвратиша гнев. 9 Муж мудр судит языки, муж же злый гневаяйся посмеваемь бывает, а не устрашает. 10 Мужие кровей причастни возненавидят преподобнаго, правии же взыщут душу его. 11 Весь гнев свой произносит безумный: премудрый же скрывает по части. 12 Царю послушающу словесе неправедна, вси, иже под ним, законопреступницы. 13 Заимодавцу и должнику, друг со другом сошедшымся, посещение творит обема Господь. 14 Царю во истине судящему нищым, престол его во свидетелство устроится. 15 Язвы и обличения дают мудрость: отрок же заблуждаяй срамляет родители своя. 16 Многим сущым нечестивым мнози греси бывают, праведнии же, оным падающым, устрашаеми бывают. 17 Наказуй сына твоего, и упокоит тя и даст лепоту души твоей. 18 Не будет сказатель языку законопреступну, храняй же закон блажен. 19 Не накажется словесы раб жесток: аще бо и уразумеет, но не послушает. 20 Аще увидиши мужа скора в словесех, разумей, яко упование имать паче его безумный. 21 Иже ласкосерд будет от детства, поработится, на последок же болезновати будет о сем. 22 Муж гневливый воздвизает свар, муж же ярый открывает грехи. 23 Досаждение мужа смиряет, а смиренныя утверждает Господь в славе. 24 Иже сообщается татю, ненавидит своея души: аще же клятву предложенную слышавшии не возвестят, 25 убоявшеся и постыдевшеся человеков, преткнутся: надеявыйся же на Господа возвеселится. Нечестие мужу дает соблажнение: уповаяй же на Владыку спасется. 26 Мнози угождают лицам началников: от Господа же сбывается правда мужу. 27 Мерзость праведнику муж неправеден: мерзость же законопреступному путь правоведяй. === 30 === 1 Сия глаголет муж верующым Богови, и почиваю: 2 безумнее бо есмь от всех человек, и разума человеческаго несть во мне: 3 Бог же научи мя премудрости, и разум святых уразумех. 4 Кто взыде на небо и сниде? Кто собра ветры в недра? Кто возврати воду в ризу? Кто обдержа вся концы земли? Кое имя его? Или кое имя сыну его, да разумееши? 5 Вся бо словеса Божия раздежена: защищает же Сам благоговеющих Ему. 6 Не приложи ко словесем Его, да не обличит тя, и ложь будеши. 7 Двое прошу у Тебе: не отими от мене благодати прежде умертвия моего: 8 суетно слово и ложно далече от мене сотвори, богатства же и нищеты не даждь ми: устрой же ми потребная и самодоволная, 9 да не насыщься ложь буду и реку: кто мя видит? Или обнищав украду и кленуся именем Божиим. 10 Не предаждь раба в руце господина, да не когда прокленет тя, и изчезнеши. 11 Чадо зло кленет отца и матерь не благословит. 12 Чадо зло праведна себе судит, исхода же своего не измы. 13 Чадо зло высоки очи имать, веждома же своима возносится. 14 Чадо зло мечь зубы (своя) имать, и членовныя яко сечиво, еже губити и поядати смиренныя от земли и убогия их от человек. 15 Пиявица име три дщери, любовию возлюблены, и три сия не насытишася ея, и четвертая не удовлися рещи: доволно (ми есть). 16 Ад и похоть жены, и земля ненапоеная водою и вода и огнь не рекут: довлеет. 17 Око ругающееся отцу и досаждающее старости матерни, да исторгнут е вранове от дебрия и да снедят е птенцы орли. 18 Трие ми суть невозможная уразумети, и четвертаго не вем: 19 следа орла паряща (по воздуху) и пути змиа (ползуща) по камени, и стези корабля пловуща по морю и путий мужа в юности (его). 20 Таков путь жены блудницы: яже егда сотворит, и измывшися, ничтоже, рече, содеях нелепо. 21 Треми трясется земля, четвертаго же не может понести: 22 аще раб воцарится, и безумный исполнится пищею, и раба аще изженет свою госпожу, 23 и мерзкая жена аще ключится добру мужу. 24 Четыри же суть малейшая на земли, сия же суть мудрейша мудрых: 25 мравие, имже несть крепости и уготовляют в жатву пищу: 26 и хирогрилли, язык не крепок, иже сотвориша в камениих домы своя: 27 безцарни суть прузие, и воюют от единаго повеления благочинно: 28 ящерица, руками опирающися и удобь уловляема сущи, живет во твердех царевых. 29 Трие суть, яже благопоспешно ходят, четвертое же, еже добре проходит: 30 скимен львов крепчае зверей, иже не отвращается, ни устрашается скота, 31 и петель ходя в кокошех благодушен, и козел предводитель стаду, и царь глаголяй к народу во языце. 32 Аще вдаси себе в веселие и простреши руку твою со сваром, поруган будеши. 33 Мельзи млеко, и будет масло. Аще ли ноздри чешеши, изыдет кровь: аще же извлечеши словеса, изыдут судове и тяжбы. === 31 === 1 Моя словеса рекошася от Бога, царево пророчество, егоже наказа мати его: 2 что, чадо, (соблюдеши,) что речение Божие? Первородне, тебе глаголю, сыне: что, чадо моего чрева? Что, чадо моих молитв? 3 Не даждь женам твоего богатства и твоего ума и жития в последний совет. 4 С советом все твори, с советом пий вино: сильнии гневливи суть, вина да не пиют, 5 да напившеся не забудут мудрости и право судити немощным не возмогут. 6 Дадите сикера сущым в печалех и вино пити сущым в болезнех, 7 да забудут убожества и болезней не воспомянут ктому. 8 Сыне, отверзай уста твоя слову Божию и суди вся здраво: 9 отверзай уста твоя и суди праведно, разсуждай же убога и немощна. 10 Жену доблю кто обрящет, дражайши есть камения многоценнаго таковая: 11 дерзает на ню сердце мужа ея: таковая добрых корыстей не лишится: 12 делает бо мужу своему благая во все житие: 13 обретши волну и лен, сотвори благопотребное рукама своима. 14 Бысть яко корабль куплю дея, издалеча собирает себе богатство: 15 и востает из нощи, и даде брашна дому и дела рабыням. 16 Узревши село купи, от плодов же рук своих насади стяжание. 17 Препоясавши крепко чресла своя, утвердит мышцы своя на дело, 18 и вкуси, яко добро есть делати, и не угасает светилник ея всю нощь. 19 Лакти своя простирает на полезная, руце же свои утверждает на вретено, 20 и руце свои отверзает убогому, длань же простре нищу. 21 Не печется о сущих в дому муж ея, егда где замедлит: вси бо у нея одеяни суть. 22 Сугуба одеяния сотвори мужу своему, от виссона же и порфиры себе одеяния. 23 Славен бывает во вратех муж ея, внегда аще сядет в сонмищи со старейшины жительми земли. 24 Плащаницы сотвори и продаде Финикианом, опоясания же Хананеом. 25 Уста своя отверзе внимателно и законно и чин заповеда языку своему. 26 Крепостию и лепотою облечеся, и возвеселися во дни последния. 27 Тесны стези дому ея, брашна же леностнаго не яде. 28 Уста своя отверзе мудро и законно. 29 Милостыня же ея возстави чада ея, и обогатишася: и муж ея похвали ю: 30 многи дщери стяжаша богатство, многи сотвориша силу: ты же предуспела и превознеслася еси над всеми: 31 ложнаго угождения и суетныя доброты женския несть в тебе: жена бо разумная благословена есть: страх же Господень сия да хвалит. 32 Дадите ей от плодов устен ея, и да хвалимь будет во вратех муж ея. == Екклесиаст == === 1 === 1 Глаголы Екклесиаста, сына Давидова, царя Израилева во Иерусалиме. 2 Суета суетствий, рече Екклесиаст, суета суетствий, всяческая суета. 3 Кое изюбилие человеку во всем труде его, имже трудится под солнцем? 4 Род преходит и род приходит, а земля во век стоит. 5 И восходит солнце и заходит солнце и в место свое влечется, сие возсиявая тамо. 6 Идет к югу и обходит к северу, обходит окрест, идет дух и на круги своя обращается дух. 7 Вси потоцы идут в море, и море несть насыщаемо: на место, аможе потоцы идут, тамо тии возвращаются ити. 8 Вся словеса трудна, не возможет муж глаголати: и не насытится око зрети, ни исполнится ухо слышания. 9 Что было, тожде есть, еже будет: и что было сотвореное, тожде имать сотворитися: 10 и ничтоже ново под солнцем. Иже возглаголет и речет: се, сие ново есть: уже бысть в вецех бывших прежде нас. 11 Несть память первых, и последним бывшым не будет их память с будущими на последок. 12 Аз Екклесиаст бых царь над Израилем во Иерусалиме 13 и вдах сердце мое, еже взыскати и разсмотрити в мудрости о всех бывающих под небесем: яко попечение лукаво даде Бог сыном человеческим, еже упражднятися в нем. 14 Видех всяческая сотворения сотворенная под солнцем: и се, вся суетство и произволение духа. 15 Развращенное не может исправитися, и лишение не может изчислитися. 16 Глаголах аз в сердцы моем, еже рещи: се, аз возвеличихся и умножих мудрость паче всех, иже быша прежде мене во Иерусалиме, 17 и сердце мое вдах, еже ведети премудрость и разум: и сердце мое виде многая, премудрость и разум, притчи и хитрость: уразумех аз, яко и сие есть произволение духа: 18 яко во множестве мудрости множество разума, и приложивый разум приложит болезнь. === 2 === 1 Рекох аз в сердцы моем: прииди убо, да тя искушу в веселии, и виждь во блазе: и се, такожде сие суетство. 2 Смеху рекох: погрешение, и веселию: что сие твориши? 3 И разсмотрих, аще сердце мое повлечет аки вино плоть мою: и сердце мое настави мя в мудрости, и еже удержати веселие, дондеже увижду, кое благо сыном человеческим, еже творят под солнцем в число дний живота своего. 4 Возвеличих творение мое: создах ми домы, насадих ми винограды, 5 сотворих ми вертограды и сады и насадих в них древес всякаго плода, 6 сотворих ми купели водныя, еже напаяти от них прозябение древес: 7 притяжах рабы и рабыни, и домочадцы быша ми: и стяжание скота, и стад много ми бысть, паче всех бывших прежде мене во Иерусалиме: 8 собрах ми злато и сребро и имения царей и стран, сотворих ми поющих и поющыя, и услаждения сынов человеческих, виночерпцы и виночерпицы. 9 И возвеличихся, и приложихся мудрости паче всех бывших прежде мене во Иерусалиме: и мудрость моя пребысть со мною. 10 И все, егоже просиста очи мои, не отях от них и не возбраних сердцу моему от всякаго веселия моего, яко сердце мое возвеселися во всяцем труде моем. И сие бысть часть моя от всего труда моего. 11 И призрех аз на вся творения моя, яже сотвористе руце мои, и на труд, имже трудихся творити. И се, вся суета и произволение духа, и несть изюбилие под солнцем. 12 И призрех аз видети мудрость, лесть и безумие: яко кто человек, иже пойдет вслед совета, елика сотвори в нем? 13 И видех аз, яко есть изюбилие мудрости паче безумия, якоже изюбилие света паче тмы: 14 мудраго очи его во главе его, а безумный во тме ходит: и уведех и аз, яко случай един случится всем им. 15 И рех аз в сердцы моем: якоже случай безумнаго, и мне случится: и вскую умудрихся? Аз тогда излишше глаголах в сердцы моем, яко и сие суета, понеже безумный от избытка глаголет: 16 яко несть памяти мудраго с безумным во век, зане уже во днех грядущих вся забвена быша: и како умрет мудрый с безумным? 17 И возненавидех живот, яко лукавно мне сотворение сотворенное под солнцем: понеже всяческая суета и произволение духа. 18 И возненавидех аз всяческая мира и труд мой, имже аз труждаюся под солнцем, яко оставляю его человеку будущему по мне. 19 И кто весть, мудр ли будет или безумен? И обладати ли имать всем трудом моим, имже трудихся и имже мудрствовах под солнцем? И сие же суета. 20 И обратихся аз отрещися сердцу моему о всем труде, имже трудихся под солнцем: 21 яко есть человек, егоже труд в мудрости и в разуме и в мужестве: и человек, иже не потрудися о нем, даст ему часть свою. И сие суета и лукавство велие. 22 Яко бывает человеку во всем труде его и в произволении сердца его, имже той труждается под солнцем, 23 яко вси дние его болезней и ярости попечение ему, ибо в нощи не спит сердце его. И сие же суета есть. 24 Несть благо человеку, но (разве) еже яст и пиет и еже покажет души своей благо в труде своем: и сие видех аз, яко от руки Божия есть: 25 яко кто яст и пиет кроме Его? 26 Яко человеку благу пред лицем Его даде мудрость и разум и веселие, согрешающему же даде попечение, еже прилагати и собирати, во еже дати благому пред лицем Божиим: яко и сие суета и произволение духа. === 3 === 1 Всем время и время всяцей вещи под небесем: 2 время раждати и время умирати, время садити и время исторгати сажденое, 3 время убивати и время целити, время разрушати и время созидати, 4 время плакати и время смеятися, время рыдати и время ликовати, 5 время разметати камение и время собирати камение, время обымати и время удалятися от обымания, 6 время искати и время погубляти, время хранити и время отреяти, 7 время раздрати и время сшити, время молчати и время глаголати, 8 время любити и время ненавидети, время брани и время мира. 9 Кое изюбилие творящаго, в нихже сам трудится? 10 Видех попечение всяческое, еже даде Бог сыном человеческим, еже пещися в нем. 11 Всяческая, яже сотвори, добра (суть) во время свое, ибо всякий век дал есть в сердце их, яко да не обрящет человек сотворения, еже сотвори Бог от начала и даже до конца. 12 Уразумех, яко несть благо в них, но токмо еже веселитися и еже творити благо в животе своем: 13 ибо всяк человек, иже яст и пиет и видит благое во всем труде своем, сие даяние Божие есть. 14 Разумех, яко вся, елика сотвори Бог, сия будут во век: к тем несть приложити и от тех несть отяти, и Бог сотвори, да убоятся от лица Его: 15 бывшее уже есть, и елика имут быти, уже быша, и Бог взыщет гонимаго. 16 И еще видех под солнцем место суда, тамо нечестивый, и место праведнаго, тамо благочестивый. 17 И рех аз в сердцы моем: праведнаго и нечестиваго судит Бог: яко время всяцей вещи и на всяцем сотворении тамо. 18 Рех аз в сердцы моем о глаголании сынов человеческих, яко разсудит их Бог: и еже показати, яко сии скоти суть: 19 ибо и тем якоже случай сынов человеческих и случай скотский, случай един им: якоже смерть того, тако и смерть сего, и дух един во всех: и что излишше имать человек паче скота? Ничтоже: яко всяческая суета. 20 Вся идут во едино место: вся быша от персти и вся в персть возвращаются. 21 И кто весть дух сынов человеческих, аще той восходит горе? И дух скотский, аще низходит той долу в землю? 22 И видех, яко несть благо, но токмо еже возвеселится человек в творениих своих, яко сия часть его: понеже кто приведет его видети то, еже будет по нем? === 4 === 1 И обратихся аз и видех вся оклеветания бывающая под солнцем: и се, слезы оклеветанных, и несть им утешающаго, и от руки клевещущих на ня крепость, и несть им утешающаго. 2 И похвалих аз всех умерших, иже умроша уже, паче живых, елицы живи суть доселе: 3 и благ паче обоих сих, иже еще не бысть, иже не виде всякаго сотворения лукаваго сотвореннаго под солнцем. 4 И видех аз весь труд и всяко мужество сотворения, яко сие ревность мужа от подруга своего. И сие суета и произволение духа. 5 Безумный объят руце свои и снеде плоти своя. 6 Благо есть исполнение горсти покоя, паче исполнения двою горстию труда и произволения духа. 7 И обратихся аз и видех суетство под солнцем: 8 есть един, и несть втораго, ни сына, ниже брата несть ему, и несть конца всему труду его, ниже око его насыщается богатства. И кому аз труждаюся и лишаю душу мою от благостыни? И сие суета и попечение лукавно есть. 9 Блази два паче единаго, имже есть мзда блага в труде их: 10 яко аще падется един от них, воздвигнет другий причастника своего: и горе тому единому, егда падет и не будет втораго воздвигнути его. 11 И аще уснета два, тепло има будет, а един како согреется? 12 И аще укрепится един, два станета противу ему: и вервь треплетена не скоро расторгнется. 13 Благ отрок нищь и мудр, паче стара царя и безумна, иже не разуме внимати еще: 14 яко из дому юзников изыдет царствовати, понеже и в царстве своем родися нищь. 15 Видех всех живущих, ходящих под солнцем, с юным вторым, иже востанет вместо его. 16 Несть конца всем людем, всем, иже пред ними быша, ибо последнии не возвеселятся о нем: яко и сие суета и произволение духа. 17 Сохрани ногу твою, егда аще идеши в дом Божий, и близ (буди) еже слушати: паче даяния безумных жертва твоя, понеже не ведят, яко творят зло. === 5 === 1 Не скор буди усты твоими, и сердце твое да не ускоряет износити слово пред лицем Божиим, яко Бог на небеси горе, ты же на земли долу: сего ради да будут словеса твоя мала: 2 яко приходит соние во множестве попечения, тако и глас безумнаго во множестве словес. 3 Аще обещаеши обет Богу, не умедли отдати его, яко несть хотения в безумных: ты убо, елика аще обещаеши, отдаждь. 4 Благо тебе еже не обещаватися, нежели обещавшуся тебе, не отдати. 5 Не даждь устнам твоим еже во грех ввести плоть твою, и да не речеши пред лицем Божиим, яко неведение есть: да не прогневается Бог о гласе твоем и растлит творения рук твоих: 6 яко во множестве соний и суетствия, (тако) и словеса многа, темже Бога бойся. 7 Аще обиду нищаго и расхищение суда и правды увидиши во стране, не дивися о вещи: яко высокий над высоким надзиратель, и высоцыи над ними, 8 и изюбилие земли над всем есть царь села возделанна. 9 Любяй сребро не насытится сребра: и кто насладится во множестве его плода? И сие суета. 10 Во множестве блага умножишася ядущии е: и кое мужество имущему е? Яко начало еже видети очима своима. 11 Сон сладок работающему, аще мало или много снесть: а насытившагося богатство не оставляет уснути. 12 Есть недуг, егоже видех под солнцем, богатство хранимо от стяжателя во зло ему: 13 и погибнет богатство оно в попечении лукавне: и роди сына, и несть в руце его ничтоже: 14 якоже изыде из чрева матере своея наг, возвратится ити, якоже и прииде, и ничтоже возмет от труда своего, да понесет в руце своей. 15 И сие зол недуг: якоже бо прииде, тако и отидет, и кая польза ему, яко трудится на ветр? 16 Ибо вси дние его во тме и плачи и в ярости мнозе, и в недузе и во гневе. 17 Се, видех аз благое, еже есть изрядно, еже ясти и пити и видети благостыню во всем труде своем, имже трудился бы под солнцем, в число дний живота своего, яже дал есть ему Бог, яко сие часть его: 18 ибо всякому человеку, емуже дал есть Бог богатство и имения, и власть даде ему ясти от того и прияти часть свою и возвеселитися о труде своем, сие дар Божий есть: 19 яко не много памятствовати имать дни живота своего, понеже Бог облагает его попеченьми в веселии сердца его. === 6 === 1 Есть лукавствие, еже видех под солнцем, и много есть над человеком: 2 муж, емуже даст Бог богатство и имение и славу, и несть лишаяй души своей от всех, ихже вожделеет, и не даст ему Бог власти от него ясти, яко чуждь муж ясти имать от него. И сие суета и недуг зол есть. 3 Аще родит муж сто (чад) и лета многа поживет, и мнози будут дние лет его, и душа его не насытится от благостыни, и погребения не бысть ему, рех: благ паче его изверг, 4 яко в суете прииде и во тму идет, и во тме имя его покрыется: 5 и солнца не виде, ниже разуме, покой сему паче того: 6 и поживе тысящу лет сугубо, и благостыни не виде: еда не во едино место вся идут? 7 Весь труд человечь во уста его, и душа его не исполнится. 8 Яко кое изюбилие (человеку) мудрому паче безумнаго? Понеже нищь позна ходити противу живота. 9 Благо видение очию паче ходящаго душею. И се суетствие и произволение духа. 10 Аще что бысть, уже именовася имя его, и познася, еже есть человек и не возможет судитися с крепчайшим паче себе: 11 яко суть словеса многа умножающая суету. === 7 === 1 Что излишше человеку, яко кто весть, что благо человеку в животе (его) число дний живота суетства его? И сотвори я в сени: яко кто возвестит человеку, что будет по нем под солнцем? 2 Благо имя паче елеа блага, и день смертный паче дня рождения его. 3 Благо ходити в дом плача, нежели ходити в дом пира, понеже сие конец всякому человеку, и живый даст благо в сердцы его. 4 Блага ярость паче смеха, яко во злобе лица ублажится сердце. 5 Сердце мудрых в дому плача, а сердце безумных в дому веселия. 6 Благо еже слышати прещение премудра, паче мужа слышащаго песнь безумных: 7 якоже глас терния под котлом, тако смех безумных. И сие суета. 8 Яко клевета льстит мудраго и погубляет сердце благородствия его. 9 Блага последняя словес паче начала его: благ терпеливый паче высокаго духом. 10 Не тщися в дусе своем яритися, яко ярость в недре безумных почиет. 11 Да не речеши: что бысть, яко дние прежднии беша блази паче сих? Яко не в мудрости вопросил еси о сем. 12 Блага мудрость с наследием, паче же видящым солнце: 13 яко в сени его мудрость, якоже сень сребра, и изюбилие разума премудрости оживляет, иже от нея. 14 Виждь творения Божия: яко кто может украсити, егоже аще Бог превратит? 15 В день благостыни (Его) живи во блазе и виждь в день зла: виждь, и с ним согласно сие сотвори Бог, о глаголании, да не обрящет человек за Ним ничтоже. 16 Всяческая видех во днех суетствия моего: есть праведный погибаяй во своей правде, и есть нечестивый пребываяй во своей злобе. 17 Не буди правдив вельми, ни мудрися излишше, да не когда изумишися. 18 Не нечествуй много и не буди жесток, да не умреши не во время свое. 19 Благо ти есть держатися сего, и от сего не оскверни руки твоея, яко боящымся Бога поспешатся вся. 20 Премудрость поможет мудрому паче десяти обладающих во граде: 21 яко несть человек праведен на земли, иже сотворит благое и не согрешит. 22 И во вся словеса, яже возглаголют нечестивии, не вложи сердца своего, да не услышиши раба своего кленуща тебе: 23 яко многажды возлукавнует на тя, и обхождении многими озлобит сердце твое, якоже и ты клял еси иныя (многия). 24 Вся сия искусих в мудрости: рех, умудрюся: и сия удалися от мене 25 далече паче неже бех, и бездны глубина, кто обрящет ю? 26 Обыдох аз, и сердце мое, еже разумети, еже разсмотрити, и еже взыскати мудрость и разум, и еже разумети нечестиваго безумие и ожесточение и лесть: 27 и обретох аз ю, и реку горчайшу паче смерти жену, яже есть ловитва, и сети сердце ея, узы в руку ея: благий пред лицем Божиим изимется от нея, а согрешаяй ят будет от нея. 28 Се, сие обретох, рече Екклесиаст: едину единою еже обрести помысл, еже взыска душа моя, и не обретох: 29 и человека единаго от тысящ обретох, а жены во всех сих не обретох: 30 обаче се, сие обретох, еже сотвори Бог человека праваго, и сии взыскаша помыслов многих. Кто уведе мудрость? И кто весть разрешение глагола? === 8 === 1 Мудрость человека просветит лице его, а безстудный возненавиден будет лицем своим. 2 Уста царева сохрани, и о словеси клятвы Божия не скор буди. 3 От лица его пойдеши, не стани во словеси лукавне, яко все, еже (аще) восхощет, сотворит, 4 якоже царь обладаяй, и кто речет ему: что твориши? 5 Храняй заповедь не увесть глагола лукавна: и время суда весть сердце мудраго, 6 яко всяцей вещи есть время и суд: яко разум человека мног (есть) на нем, 7 яко несть ведящаго, что будущее: зане якоже будет, кто возвестит ему? 8 Несть человека владущаго духом, еже возбранити духу: и несть владущаго в день смерти, и несть посла в день брани: и не спасет нечестие сущаго в нем. 9 И все сие видех, и вдах сердце мое во все сотворение, еже сотворено есть под солнцем, вся, во еликих обладан есть человек над человеком, еже озлобити его. 10 И тогда видех нечестивыя во гробы внесены, и от святаго: и идоша и похвалени быша во граде, яко сице сотвориша. И сие суета. 11 Яко несть пререкания бывающаго творящым лукавое вскоре: сего ради уверися сердце сынов человеческих в них, еже сотворити лукавое. 12 Иже согреши, сотворил есть лукавое, оттоле, и от долготы их: ибо и вем аз, яко есть благо боящымся Бога, да боятся от лица Его, 13 и не будет благо нечестивому, и не продолжит дний в сени, иже несть бояйся от лица Божия. 14 Есть суета, яже сотворена есть на земли: яко суть праведнии, на нихже постизает яко творение нечестивых, и суть нечестивии, на нихже постизает яко творение праведных. Рех, яко и сие суета. 15 И похвалих аз веселие, яко несть благо человеку под солнцем, но токмо еже ясти и пити и еже веселитися: и то прибыток ему в труде его во днех живота его, ихже дал есть ему Бог под солнцем. 16 В нихже дах сердце мое, еже разумети мудрость и еже ведети попечение сотвореное на земли: яко и во дни и в нощи сна во очию своею несть видяй. 17 И видех вся творения Божия, яко не может человек изобрести творение сотвореное под солнцем: елика аще потрудится человек обрести, и не обрящет: и елика аще речет мудрый уразумети, не возможет обрести. Темже все сие вдах в сердце мое, и сердце мое все сие виде. === 9 === 1 Яко праведнии и мудрии и делания их в руце Божией, и любве же и ненависти несть ведяй человек: вся пред лицем их, суета во всех. 2 Случай един праведному и нечестивому, благому и злому, и чистому и нечистому, и жрущему и не жрущему: якоже благий, тако согрешаяй, якоже кленыйся, тако бояйся клятвы. 3 Сие лукаво во всяцем сотворенем под солнцем, яко случай един всем: и сердце сынов человеческих исполнися лукавствия, и прелесть в сердцах их и в животе их, и по сих к мертвым. 4 Понеже кто есть, иже приобщается ко всем живым? Есть надежда, яко пес живый, той благ паче льва мертва. 5 Понеже живии разумеют, яко умрут, мертвии же не суть ведущии ничтоже: и ктому несть им мзды, яко забвена есть память их, 6 и любовь их и ненависть их и рвение их уже погибе, и части несть им ктому во веки во всяцем творении под солнцем. 7 Прииди, яждь в веселии хлеб твой и пий во блазе сердцы вино твое, яко уже угодна Богу творения твоя. 8 Во всяко время да будут ризы твоя белы, и елей на главе твоей да не оскудеет. 9 И виждь житие с женою, юже возлюбил еси, во вся дни живота юности твоея, данныя ти под солнцем, вся дни суетствия твоего: яко сие часть твоя в животе твоем и в труде твоем, имже ты трудишися под солнцем. 10 Вся, елика аще обрящет рука твоя сотворити, якоже сила твоя, сотвори: зане несть сотворение и помышление и разум и мудрость во аде, аможе ты идеши тамо. 11 Обратихся и видех под солнцем, яко ни легким течение, ниже сильным брань, ниже самому мудрому хлеб, ниже разумным богатство, ниже ведущым благодать: яко время и случай случится всем сим. 12 Яко убо не разуме человек времене своего: якоже рыбы уловляемы во мрежи зле, и аки птицы уловляемы в сети: якоже сия, уловляются сынове человечестии во время лукаво, егда нападет на ня внезапу. 13 И сие видех, мудрость под солнцем, и велика есть во мне: 14 град мал, и мужей в нем мало, и приидет нань царь велик и окрест обляжет его, и соделает на него остроги велия, 15 и обрящет в нем мужа нищаго мудра, и сей спасет град мудростию своею, и человек не воспомяну мужа нищаго онаго. 16 И рех аз: блага мудрость паче силы, и мудрость нищаго уничижена, и словеса его не суть послушаема. 17 Словеса мудрых в покои слышатся, паче клича обладающих в безумии. 18 Блага мудрость паче орудий ратных: и согрешаяй един погубит благостыню многу. === 10 === 1 Мухи умершыя згнояют елеа сладость: честно малое мудрости паче славы велики безумия. 2 Сердце мудраго одесную его, сердце же безумнаго ошуюю его: 3 и в путь егда безумный идет, сердце его лишается, и яже помышляет, вся безумие суть. 4 Аще дух владеющаго взыдет на тя, места твоего не остави: яко изцеление утолит грехи велики. 5 Есть лукавство, еже видех под солнцем, аки невольно изыде от лица владеющаго: 6 вдан безумный в высоты велики, а богатии во смиренных сядут: 7 видех рабов на конех, и князей идущих яко рабов на земли. 8 Копаяй яму впадет в ню, и разоряющаго ограду угрызнет его змий. 9 Иземляй камение поболит от них, разсецаяй дрова беду приимет в них: 10 аще спадет сечиво, и сам лицем смятется: и силы укрепит, и изюбилие мужу мудрость. 11 Аще угрызнет змий не в шепте, и несть излишества обавающему. 12 Словеса уст премудраго благодать, устне же безумнаго потопят его: 13 начало словес уст его безумие, и последняя уст его прелесть лукава. 14 Безумный умножает словеса: не разуме человек, что бывшее и что будущее, что созади его, (и) кто возвестит ему? 15 Труд безумных озлобит их, иже не разуме ити во град. 16 Горе тебе, граде, в немже царь твой юн, и князи твои рано ядят. 17 Блаженна ты, земле, еяже царь твой сын свободных, и князи твои во время ядят в силе и не постыдятся. 18 В леностех смирится строп, и в празднестве рук прокаплет храмина. 19 Во смех творят хлеб и вино и елей, еже веселитися живущым: и сребра со смирением послушают всяческая. 20 И в совести убо твоей не клени царя, и в клети ложницы твоея не клени богатаго: яко птица небесная донесет глас твой, и имеяй криле возвестит слово твое. === 11 === 1 Посли хлеб твой на лице воды, яко во множестве дний обрящеши его. 2 Даждь часть седмим и осмим, яко не веси, что будет лукаво на земли. 3 Аще исполнятся облацы дождя, на землю изливают: и аще падет древо на юг, и аще на север, на месте, идеже падет древо, тамо будет. 4 Блюдый ветра не сеет, и сматряяй во облацех не пожнет. 5 В нихже несть ведый, кии путь духа, якоже кости во чреве раждающия: тако не уразумееши дел Божиих, елика сотворит всяческая. 6 В заутрии сей семя твое, и в вечер да не оставляет рука твоя: яко не веси, кое произыдет сие или оно, и аще обоя вкупе благая. 7 И сладко свет, и благо очима зрети солнце: 8 яко аще и многа лета поживет человек, и о всех сих возвеселится, и помянет дни тмы, яко мнози будут: все грядущее суета. 9 Веселися, юноше, во юности твоей, и да ублажит тя сердце твое во днех юности твоея, и ходи в путех сердца твоего непорочен и не в видении очию твоею: и разумей, яко о всех сих приведет тя Бог на суд: 10 и отстави ярость от сердца твоего, и отрини лукавство от плоти твоея: яко юность и безумие суета. === 12 === 1 И помяни Сотворшаго тя во днех юности твоея, дондеже не приидут дние злобы твоея, и приспеют лета, в нихже речеши: несть ми в них хотения: 2 дондеже не померкнет солнце и свет, и луна и звезды, и обратятся облацы созади дождя: 3 в день, в оньже подвигнутся стражие дому, и развратятся мужие силы, и упразднятся мелющии, яко умалишася, и помрачатся зрящии во скважнех: 4 и затворят двери на торжищи, в немощи гласа мелющия, и востанет на глас птицы, и смирятся вся дщери песни: 5 и на высоту узрят, и ужас на пути, и процветет амигдал, и отолстеют прузие, и разрушится каппарис: яко отиде человек в дом века своего, и обыдоша на торжищи плачущии: 6 дондеже не превратится уже сребряное, и не сокрушится повязка златая, и сокрушится водонос у источника, и сломится колесо в колии. 7 И возвратится персть в землю, якоже бе, и дух возвратится к Богу, иже даде его. 8 Суета суетствий, рече Екклесиаст, всяческая суета. 9 И лишшее, яко бысть Екклесиаст мудр, и яко научи разуму человека: и ухо изследит красоту притчей. 10 Много взыска Екклесиаст, еже обрести словеса хотения, и написаное правости, словеса истины. 11 Словеса мудрых якоже остны воловии и якоже гвоздие вонзено, иже от сложений дани быша от пастыря единаго. 12 И множае от них, сыне мой, хранися: творити книги многи несть конца, и учение многое труд плоти. 13 Конец слова, все слушай: Бога бойся и заповеди Его храни, яко сие всяк человек: 14 яко все творение приведет Бог на суд о всяцем погрешении, аще благо и аще лукаво. == Песнь песней == === 1 === 1 Да лобжет мя от лобзаний уст своих: яко блага сосца твоя паче вина, 2 и воня мира твоего паче всех аромат. Миро излияное имя твое: сего ради отроковицы возлюбиша тя. 3 Привлекоша тя: вслед тебе в воню мира твоего течем. Введе мя царь в ложницу свою: возрадуемся и возвеселимся о тебе, возлюбим сосца твоя паче вина: правость возлюби тя. 4 Черна есмь аз и добра, дщери Иерусалимския, якоже селения Кидарска, якоже завесы Соломони. 5 Не зрите мене, яко аз есмь очернена, яко опали мя солнце: сынове матере моея сваряхуся о мне, положиша мя стража в виноградех: винограда моего не сохраних. 6 Возвести ми, егоже возлюби душа моя, где пасеши? Где почиваеши в полудне? Да не когда буду яко облагающаяся над стады другов твоих. 7 Аще не увеси самую тебе, добрая в женах, изыди ты в пятах паств и паси козлища твоя у кущей пастырских. 8 Конем моим в колесницех фараоновых уподобих тя, ближняя моя. 9 Что украшены ланиты твоя яко горлицы, выя твоя яко монисты? 10 Подобия злата сотворим ти с пестротами сребра. 11 Дондеже (будет) царь на восклонении своем, нард мой даде воню свою. 12 Вязание стакти брат мой мне, посреде сосцу моею водворится: 13 грезн кипров брат мой мне в виноградех Енгаддовых. 14 Се, еси добра, искренняя моя, се, еси добра: очи твои голубине. 15 Се, еси добр, брат мой, и еще красен: одр наш со осенением, 16 преклади дому нашего кедровии, дски нашя кипарисныя. === 2 === 1 Аз цвет польный и крин удольный. 2 Якоже крин в тернии, тако искренняя моя посреде дщерей. 3 Яко яблонь посреде древес лесных, тако брат мой посреде сынов: под сень его восхотех и седох, и плод его сладок в гортани моем. 4 Введите мя в дом вина, вчините ко мне любовь: 5 утвердите мя в мирех, положите мя во яблоцех: яко уязвлена (есмь) любовию аз. 6 Шуйца его под главою моею, и десница его оымет мя. 7 Заклях вас, дщери Иерусалимли, в силах и крепостех села: аще возставите и возбудите любовь, дондеже восхощет. 8 Глас брата моего: се, той идет, скача на горы и прескача на холмы. 9 Подобен есть брат мой серне или младу еленю на горах вефильских. Се, сей стоит за стеною нашею, проглядаяй оконцами, приницаяй сквозе мрежи. 10 Отвещает брат мой и глаголет мне: востани, прииди, ближняя моя, добрая моя, голубице моя. 11 Яко се, зима прейде, дождь отиде, отиде себе: 12 цвети явишася на земли, время обрезания приспе, глас горлицы слышан в земли нашей: 13 смоквь изнесе цвет свой, виногради зреюще даша воню. Востани, прииди, ближняя моя, добрая моя, голубице моя, и прииди. 14 Ты, голубице моя, в покрове каменне, близ предстения: яви ми зрак твой, и услышан сотвори ми глас твой: яко глас твой сладок, и образ твой красен. 15 Имите нам лисы малыя, губящыя винограды: и виногради наши созревают. 16 Брат мой мне, и аз ему, пасый в кринах, 17 дондеже дхнет день, и двигнутся сени. Обратися, уподобися ты, брате мой, серне или младу еленю на горах юдолий. === 3 === 1 На ложи моем в нощех исках, егоже возлюби душа моя, исках его, и не обретох его: воззвах его, и не послуша мене. 2 Востану убо и обыду во граде и на торжищих и на стогнах, и поищу, егоже возлюби душа моя. Поисках его, и не обретох его: звах его, и не послуша мене. 3 Обретоша мя стрегущии, обходяще во граде: видесте ли, егоже возлюби душа моя? 4 Яко мало егда преидох от них, дондеже обретох, егоже возлюби душа моя: удержах его, и не оставих его, дондеже введох его в дом матере моея и в чертог заченшия мя. 5 Заклях вас, дщери Иерусалимския, в силах и в крепостех селных: аще подвижете и воздвижете любовь, дондеже аще восхощет. 6 Кто сия восходящая от пустыни, яко стебло дыма кадящее смирну и ливан, от всех благовоний мироварца? 7 Се, одр Соломонь, шестьдесят сильных окрест его от сильных Израилевых, 8 вси имуще оружия, научени на брань: муж, оружие его на бедре его от ужаса в нощех. 9 Одр сотвори себе царь Соломон от древес Ливанских. 10 Столпы его сотвори сребряны и восклонение его злато: восход его багрян, внутрь его камение постлано, любовь от дщерей Иерусалимских. 11 Дщери Сиони, изыдите и видите в цари Соломоне в венце, имже венча его мати его в день обручения его и в день веселия сердца его. === 4 === 1 Се, еси добра, ближняя моя, се, еси добра: очи твои голубине, кроме замолчания твоего: власи твои яко стада козиц, яже открышася от Галаада. 2 Зубы твои яко стада остриженых, яже изыдоша из купели, вся двоеплодны, и неродящия несть в них. 3 Яко вервь червлена устне твои, и беседа твоя красна: яко оброщение шипка ланиты твоя, кроме замолчания твоего. 4 Яко столп Давидов выя твоя, создан в Фалпиофе: тысяща щитов висит на нем, вся стрелы сильных. 5 Два сосца твоя яко два млада близнца серны, пасомая во кринах, 6 дондеже дхнет день, и подвигнутся сени. Пойду себе к горе смирней и к холму ливанску. 7 Вся добра еси, ближняя моя, и порока несть в тебе. 8 Гряди от Ливана, невесто, гряди от Ливана: прииди и прейди из начала Веры, от главы Санира и Аермона, от оград львовых, от гор пардалеов. 9 Сердце наше привлекла еси, сестро моя невесто, сердце наше привлекла еси единым от очию твоею, единым монистом выи твоея. 10 Что удобреста сосца твоя, сестро моя невесто? Что удобреста сосца твоя паче вина, и воня риз твоих паче всех аромат? 11 Сот искапают устне твои, невесто, мед и млеко под языком твоим, и благовоние риз твоих яко благоухание Ливана. 12 Вертоград заключен сестра моя невеста, вертоград заключен, источник запечатлен. 13 Леторасли твоя сад шипков с плодом яблочным, кипри с нардами, 14 нард и шафран, трость и киннамон со всеми древами ливанскими, смирна, алой со всеми первыми мирами, 15 источник вертограда, и кладязь воды живы и истекающия от Ливана. 16 Востани, севере, и гряди, юже, и повей во вертограде моем, и да потекут ароматы мои. === 5 === 1 Да снидет брат мои в вертоград свой и да яст плод овощий своих. Внидох в вертоград мой, сестро моя невесто: оымах смирну мою со ароматами моими, ядох хлеб мой с медом моим, пих вино мое с млеком моим. Ядите, ближнии, и пийте и упийтеся, братия. 2 Аз сплю, а сердце мое бдит: глас брата моего ударяет в двери: отверзи ми, сестро моя, ближняя моя, голубице моя, совершенная моя: яко глава моя наполнися росы, и власи мои капель нощных. 3 Совлекохся ризы моея, како облекуся в ню? Умых нозе мои, како оскверню их? 4 Брат мой посла руку свою сквозе скважню, и чрево мое вострепета от него. 5 Востах аз отверсти брату моему: руце мои искапаша смирну, персты мои смирны полны на руках заключения. 6 Отверзох аз брату моему: брат мой прейде. Душа моя изыде в слово его: взысках его, и не обретох его: звах его, и не послуша мене. 7 Обретоша мя стражие обходящии во граде: биша мя, язвиша мя, взяша верхнюю ризу от мене стражие стеннии. 8 Заклях вы, дщери Иерусалимския, в силах и в крепостех селных: аще обрящете брата моего, возвестите ему, яко уязвлена любовию аз есмь. 9 Что брат твой паче брата, добрая в женах? Что брат твой от брата, яко тако закляла еси нас? 10 Брат мой бел и чермен, избран от тем: 11 глава его злато избранно, власы его кудрявы, черны яко вран: 12 очи его яко голубицы на исполнениих вод, измовени во млеце, седящыя в наполнениих (вод): 13 ланиты его аки фиалы аромат, прозябающыя благовоние: устне его крины, каплющии смирну полну: 14 руце его обточены златы, наполнены фарсиса: чрево его сосуд слоновый на камени сапфирове: 15 лыста его столпи марморовы, основани на степенех златых: вид его яко Ливан, избран яко кедрове: 16 гортань его сладость, и весь желание: сей брат мой и сей ближний мой, дщери Иерусалимли. 17 Камо отиде брат твой, добрая в женах? Камо уклонися брат твой? И взыщем его с тобою. === 6 === 1 Брат мой сниде в вертоград свой, в места аромат, паствити в вертоградех и собирати крины. 2 Аз брату моему и брат мой мне, пасый в кринех. 3 Добра еси, ближняя моя, яко благоволение, красна яко Иерусалим, ужас яко вчиненны. 4 Отврати очи твои от мене, яко тии воскрилиша мя: власи твои, яко стада коз, яже взыдоша от Галаада: 5 зубы твои, яко стада остриженых, яже взыдоша от купели, вся близнята родящыя, и безчадныя несть в них: яко вервь червлена устне твои, и беседа твоя красна: 6 яко оброщение шипка ланиты твоя, кроме замолчания твоего. 7 Шестьдесят суть цариц и осмьдесят наложниц, и юнот, имже несть числа: 8 едина есть голубица моя, совершенная моя: едина есть матери своей, избранна есть родившей ю: видеша ю дщери и ублажиша ю, царицы и наложницы, и восхвалиша ю. 9 Кто сия проницающая аки утро, добра яко луна, избранна яко солнце, ужас яко вчиненны? 10 В вертоград орехов снидох видети в плодех потока, видети, аще процвете виноград и возрастоша шипки. 11 Тамо дам сосца моя тебе: не разуме душа моя, положи мя на колеснице Аминадавли. 12 Обратися, обратися, суламитино, обратися, обратися, и узрим в тебе. === 7 === 1 Что увидите у Суламитины? Приходящая яко лики полков, что украсишася стопы твоя во обутиих твоих, дщи Надавля? Чины бедру твоею подобни усеряземь, делу рук художника: 2 пуп твой чаша источена, не лишаемая мста: чрево твое яко стог пшеницы, огражден в кринах: 3 два сосца твоя, яко два млада близнецы серны: 4 выя твоя яко столп слоновый: очи твои яко езера во Есевоне, во вратах дщерей многих: нос твой яко столп Ливанский, сматряяй лице Дамаска: 5 глава твоя на тебе яко Кармил (гора), и заплетение главы твоея яко багряница, царь увязан в преристаниих. 6 Что украсилася еси, и что усладилася еси, любы, во сладостех твоих? 7 Сие величество твое: уподобилася еси финику, и сосца твоя грезном. 8 Рекох: взыду на финик, удержу высоту его: и будут сосцы твои яко грезнове винограда, и воня ноздрей твоих яко яблока: 9 и гортань твой яко вино благо, ходящее брату моему в правость, доволно устнам моим и зубом. 10 Аз брату моему, и ко мне обращение его. 11 Прииди, брате мой, и взыдем на село, водворимся в селех: 12 ураним в винограды, увидим аще процвете виноград, процветоша ли овощие, процветоша ли яблока? Тамо дам тебе сосца моя. 13 Мандрагоры даша воню, и при дверех наших вси плоды новии: до ветхих, брате мой, соблюдох ти. === 8 === 1 Кто даст тя, брате мой, ссуща сосцы матере моея? Обретши тя вне целую тя, и ктому не уничижат мене. 2 Пойму тя, введу тя в дом матере моея и в ложницу заченшия мя: тамо мя научиши: напою тя от вина с вонями строенаго, от воды яблок моих. 3 Шуйца его под главою моею, и десница его оымет мя. 4 Заклях вас, дщери Иерусалимския, в силах и в крепостех селных: аще подвижете и воздвижете любовь, дондеже аще восхощет. 5 Кто сия восходящая убелена и утвержаема о брате своем? Под яблонею возбудих тя: тамо роди тя мати твоя, тамо поболе тобою рождшая тя. 6 Положи мя яко печать на сердцы твоем, яко печать на мышце твоей: зане крепка яко смерть любы, жестока яко ад ревность: крила ея крила огня, (углие огненно) пламы ея. 7 Вода многа не может угасити любве, и реки не потопят ея. Аще даст муж все имение свое за любовь, уничижением уничижат его. 8 Сестра наша мала и сосцу не имать: что сотворим сестре нашей в день, в оньже аще глаголатися будет ей? 9 Аще стена есть, соградим на ней забрала сребряна: и аще дверь есть, напишем на ней дску кедрову. 10 Аз стена, и сосцы мои яко столпи: аз бех во очию их аки обретающая мир. 11 Виноград бысть Соломону во Вееламоне: даде виноград свой стрегущым: муж принесет в плоде его тысящу сребреник. 12 Виноград мой предо мною: тысяща Соломону и двести стрегущым плод его. 13 Седяй в вертоградех, и друзие внемлющии гласу твоему: глас твой внуши мне. 14 Бежи, брате мой, и уподобися серне или юнцу еленей, на горы ароматов. == Премудрость == === 1 === 1 Возлюбите правду, судящии землю: мудрствуйте о Господе в благостыни и в простоте сердца взыщите Его: 2 яко обретается не искушающым Его, является же не неверующым Ему. 3 Строптивая бо помышления отлучают от Бога: искушаемая сила обличает безумных. 4 Яко в злохудожну душу не внидет премудрость, ниже обитает в телеси повиннем греху: 5 святый бо Дух наказания отбежит льстива и отимется от помышлений неразумных и обличится от находящия неправды. 6 Человеколюбив бо дух премудрости и не обезвинит хульника от устен его: яко внутренних его свидетель есть Бог и сердца его испытатель истинен и языка слышатель: 7 яко Дух Господень исполни вселенную, и содержай вся разум имать гласа. 8 Сего ради вещаяй неправедная никтоже утаится, и не мимо идет его обличающь суд. 9 В советех бо нечестиваго истязание будет, словес же его слышание ко Господу приидет во обличение беззаконий его: 10 яко ухо рвения слышит вся, и молва роптаний не крыется. 11 Хранитеся убо от роптания неполезна и от оболгания щадите язык: яко вещание тайное тще не прейдет, уста же лжущая убивают душу. 12 Не вожделейте смерти в заблуждении живота вашего, ниже привлекайте погибели делами рук ваших: 13 яко Бог смерти не сотвори, ни веселится о погибели живых. 14 Созда бо во еже быти всем, и спасителны бытия мира, ни бо есть в них врачевания губителнаго, ниже аду царствия на земли. 15 Правда бо безсмертна есть: (неправда же смерти снабдение:) 16 нечестивии же рукама и словесы призваша ю, другиню вмениша ю и истаяша, и завет положиша с нею, яко достойни суть оноя части быти. === 2 === 1 Рекоша бо в себе помышляющии неправо: мал есть и печален живот наш, и несть изцеления в кончине человечесте, и несть познан возвративыйся от ада. 2 Яко самослучайно рождени есмы, и по сем будем якоже не бывше: понеже дым дыхание в ноздрех наших, и слово искра в движении сердца нашего: 3 ейже угасшей пепел будет тело, и дух наш разлиется яко мягкий воздух, 4 и имя наше забвено будет во время, и никтоже воспомянет дел наших: и прейдет живот наш яко следы облака, и яко мгла разрушится, разгнаная от лучь солнечных и теплотою его отягчившися. 5 Стени бо преход житие наше, и несть возвращения кончины нашея: яко запечатана есть, и никто возвращается. 6 Приидите убо и насладимся настоящих благих, и употребим создания, яко в юности скоро: 7 вина дражайшаго и мира (благовонна) исполнимся, и да не прейдет нас цвет жития: 8 увенчаим нас шипковыми цветы, прежде неже увянут: 9 ни един от нас лишен да будет нашего наслаждения, везде оставим знамение веселия, яко сия часть наша и жребий сей. 10 Насилие сотворим убогу праведному, не пощадим вдовицы, ниже старца устыдимся седин многолетных. 11 Да будет же нам крепость закон правды: некрепкое бо неполезно обретается. 12 Уловим же (лестию) праведнаго, яко непотребен нам есть и противится делом нашым, и поносит нам грехи закона и злославит нам грехи учения нашего: 13 возвещает нам разум имети Божий, и отрока Господня себе именует: 14 бысть нам на обличение помышлений наших: 15 тяжек есть нам и к видению, яко неподобно (есть) иным житие его, и отменны (суть) стези его: 16 в поругание вменихомся ему, и удаляетеся от путий наших яко от нечистот: блажит последняя праведных и славится отца имети (себе) Бога. 17 Увидим, аще словеса его истинна, и искусим яже сбудутся ему. 18 Аще бо есть истинный сын Божий, защитит его и избавит его от руки противящихся. 19 Досаждением и мукою истяжим его, да увемы кротость его и искусим беззлобство его: 20 смертию поносною осудим его, будет бо ему разсмотрение от словес его. 21 Сия помыслиша и прельстишася: ослепи бо их злоба их, 22 и не уведеша таин Божиих, ниже мзды уповаша преподобия, ниже присудиша чести душам непорочным. 23 Яко Бог созда человека в неистление и во образ подобия Своего сотвори его: 24 завистию же диаволею смерть вниде в мир: вкушают же ю, иже от ея части суть. === 3 === 1 Праведных не души в руце Божией, и не прикоснется их мука. 2 Непщевани быша во очию безумных умрети, и вменися озлобление исход их, 3 и еже от нас шествие сокрушение: они же суть в мире. 4 Ибо пред лицем человеческим аще и муку приимут, упование их безсмертия исполнено: 5 и вмале наказани бывше, великими благодетелствовани будут, яко Бог искуси их и обрете их достойны Себе: 6 яко злато в горниле искуси их, и яко всеплодие жертвенное прият я. 7 И во время посещения их возсияют, и яко искры по стеблию потекут: 8 судят языком и обладают людьми, и воцарится в них Господь во веки. 9 Надеющиися Нань уразумеют истину, и вернии в любви пребудут Ему, яко благодать и милость в преподобных Его и посещение во избранных Его. 10 Нечестивии же, яко помыслиша, приимут запрещение, иже нерадившии о праведнем и от Господа отступивше. 11 Премудрость бо и наказание уничижаяй окаянен, и праздно упование их, и труды безплодны, и неключима дела их: 12 жены их безумны и лукава чада их, проклято рождение их. 13 Яко блажена есть неплоды неоскверненая, яже не позна ложа во гресе, имети будет плод в посещении душ: 14 и евнух, иже не содела в руку (своею) беззакония, ниже помысли на Господа лукавая, дастся бо ему веры благодать избранна и жребий во храме Господни угоднейший. 15 Благих бо трудов плод благославен, и не отпадающь корень разума. 16 Чада же прелюбодеев несовершена будут, и от законопреступнаго ложа семя изчезнет: 17 аще бо долгоживотни будут, ни во чтоже вменятся, и безчестна на последок старость их: 18 аще же скоро скончаются, не будут имети упования, ниже в день суда утешения: 19 рода бо неправеднаго лютая окончания. === 4 === 1 Лучше безчадство со добродетелию: безсмертие бо есть в памяти ея, яко и пред Богом познается и пред человеки: 2 присущую бо подражают ю и желают отшедшия, и в веце венценосно чтится нескверных подвигов брань одолевши. 3 Многоплодно же нечестивых множество неключимо будет, и прелюбодейная насаждения не дадут корения в глубину, ниже крепко стояние сотворят: 4 аще бо и ветви на время процветут, не крепко возшедше от ветра поколеблются и от зелных ветров искоренятся: 5 сокрушатся ветви несовершенны, и плод их неключимь, оскомен в снедь, и ни во что потребен. 6 От беззаконных бо снов чада раждаемая свидетелие суть лукавствия на родители во испытании их. 7 Праведник же аще постигнет скончатися, в покои будет: 8 старость бо честна не многолетна, ниже в числе лет изчитается: 9 седина же есть мудрость человеком, и возраст старости житие нескверно. 10 Благоугоден Богови быв, возлюблен бысть, и живый посреде грешных преставлен бысть: 11 восхищен бысть, да не злоба изменит разум его, или лесть прельстит душу его. 12 Рачение бо злобы помрачает добрая, и парение похоти пременяет ум незлобив. 13 Скончався вмале исполни лета долга: 14 угодна бо бе Господеви душа его, сего ради потщася от среды лукавствия: 15 людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его. 16 Осудит же праведник умираяй живых нечестивых, и юность скончавшаяся скоро долголетную старость неправеднаго. 17 Узрят бо кончину премудраго и не уразумеют, что усоветова о нем и во что утверди его Господь: 18 узрят и уничижат его, Господь же посмеется им: 19 и будут посем в падение безчестно и во укоризну в мертвых в век: яко расторгнет их безгласны ниц и поколеблет их от оснований, и даже до последних опустеют и будут в болезни, и память их погибнет: 20 приидут в помышление грехов своих боязливии, и обличат их противу беззакония их. === 5 === 1 Тогда станет во дерзновении мнозе праведник пред лицем оскорбивших его и отметающих труды его: 2 видящии смятутся страхом тяжким и ужаснутся о преславнем спасении его, 3 и рекут в себе кающеся и в тесноте духа воздыхающе: сей бе, егоже имехом некогда в посмех и в притчу поношения. 4 Безумнии, житие его вменихом неистово и кончину его безчестну: 5 како вменися в сынех Божиих, и во святых жребий его есть? 6 Убо заблудихом от пути истиннаго, и правды свет не облиста нам, и солнце не возсия нам: 7 беззаконных исполнихомся стезь и погибели и ходихом в пустыни непроходимыя, пути же Господня не уведехом. 8 Что пользова нам гордыня, и богатство с величанием что воздаде нам? 9 Преидоша вся она яко сень и яко весть претекающая. 10 Яко корабль преходяй волнующуюся воду, егоже проходу несть стопы обрести, ниже стези шествия его в волнах: 11 или яко птицы, прелетающия по аеру, ни едино обретается знамение пути, язвою же смущаяй биемый дух легкий, и разсецаемый силою шумящею движением крил прелете, и посем ни едино знамение обретеся проходу в нем: 12 или яко стрелою испущеною на намереное место разсеченный аер внезапу в себе самем заключен бысть, яко не познатися проходу ея: 13 тако и мы рождени оскудехом и добродетели убо ни единаго знамения можем показати, во злобе же нашей скончахомся. 14 Ибо упование нечестиваго, яко прах от ветра подемлемый и яко пена мягка от бури расторгнена, и яко дым от ветра разливается и яко память пришелца единаго дне прейде: 15 праведницы же во веки живут, и во где мзда их, и попечение их у Вышняго: 16 сего ради приимут царствие благолепия и венец доброты от руки Господни, яко десницею покрыет их и мышцею защитит их. 17 Приимет всеюружие рвение Свое и вооружит тварь в месть врагом, 18 облечется в броня правды и возложит шлем суд нелицемерен, 19 приимет щит непобедимый преподобие, 20 поострит же напрасный гнев во оружие: споборет же с Ним мир на безумныя. 21 Пойдут праволучныя стрелы молниины, и яко от благокругла лука облаков на намерение полетят: 22 и от каменометныя ярости исполнь падут грады: вознегодует на них вода морская, реки же потопят нагло: 23 сопротив станет им дух силы, и яко вихор развеет их: 24 и опустошит всю землю беззаконие, и злодейство превратит престолы сильных. === 6 === 1 Слышите убо, царие, и разумейте: научитеся, судии концев земли: 2 внушите, содержащии множества и гордящиися о народех языков: 3 яко дана есть от Господа держава вам и сила от Вышняго, иже истяжет дела ваша и помышления испытает: 4 яко слузи суще царства Его не судисте право, ни сохранисте закона, ниже по воли Божией ходисте. 5 Страшно и скоро явится вам: яко суд жесточайший преимущым бывает, 6 ибо малый достоин есть милости, сильнии же сильне истязани будут. 7 Не щадит бо лица всех Владыка, ниже усрамится вельможи, яко мала и велика Сей сотвори, подобне же проразумевает о всех: 8 державным же крепко настоит испытание. 9 К вам убо, о, царие, словеса моя, да научитеся премудрости и не падете: 10 ибо сохраняющии преподобне преподобная преподобни будут, и иже научившиися сим, обрящут ответ. 11 Возжелейте убо словес моих, возлюбите и накажитеся. 12 Светла и не увядаема есть премудрость, и удобно видится от любящих ю, и обрящется от ищущих ю: 13 предваряет желающым предуведетися. 14 Утреневавый к ней не утрудится: приседящую бо обрящет при вратех своих. 15 Еже бо мыслити о ней, разума (есть) совершенство, и бдяй ея ради вскоре без печали будет: 16 яко достойных ея сама обходит ищущи, и на стезях показуется им благоприятно, и во всем провидении сретает их. 17 Начало бо ея истиннейшее наказания возжеление, 18 попечение же наказания любы, любы же хранение законов ея, 19 хранение же законов утверждение нерастления (есть), нерастление же творит близ быти Бога: 20 возжеление убо премудрости возводит к царству (вечному). 21 Аще убо наслаждаетеся престолами и скиптры, о, царие людий, почтите премудрость, да во веки царствуете. 22 Что же есть премудрость, и како бысть, возвещу, 23 и не утаю от вас таин, но от начала рождения изслежду, 24 и положу на свет разум ея и не преминую истины, 25 ниже завистию тающему спутьствую, яко сей не будет причастник премудрости. 26 Множество же премудрых спасение миру, и царь премудр утверждение людем. 27 Сего ради приимите наказание по словесем моим, и полезно будет вам. === 7 === 1 Есмь бо и аз человек смертен, подобен всем и земнороднаго внук первозданнаго: 2 и во чреве матерни изобразихся плоть, в десятомесячнем времени согустився в крови от семене мужеска и услаждения сном сошедшагося. 3 И аз рожден восприях общаго аера и на подобострастную землю спадох, первый глас подобный всем испустих плача: 4 в пеленах воскормлен есмь, и с (великим) прилежанием: 5 ни един бо царь ино име рождения начало, 6 един бо вход всем есть в житие, подобен же и исход. 7 Сего ради помолихся, и дан бысть мне разум: призвах, и прииде на мя дух премудрости. 8 Предсудих ю паче скиптров и престолов, и богатство ничтоже вмених ко сравнению тоя, 9 ниже уподобих ея каменю драгоценному, яко все злато пред нею песок малый, и яко брение вменится пред нею сребро: 10 паче здравия и красоты возлюбих ю и предизбрах ю вместо света имети, яко неугасаемо есть блистание ея. 11 Приидоша же мне благая вся вкупе с нею и безчислено богатство рукама ея: 12 и возвеселихся о всех, яко ими обладает премудрость: не ведех же ю родителницу быти сих. 13 Нелестне научихся, без зависти преподаю и богатства ея не сокрываю: 14 неоскудно бо есть сокровище человеком, еже употребившии к Богу послашася в содружение, дарами от наказания представлени. 15 Мне же даде Бог глаголати по разумению и мнети достойне о подаваемых, яко Той и премудрости предводитель есть и премудрых исправитель: 16 в руку бо Его и мы и словеса наша, и всякий разум и дел художество. 17 Сей бо даде мне о сущих познание неложное, познати составление мира и действие стихий, 18 начало и конец и средину времен, возвратов премены и изменения времен, 19 лет круги и звезд расположения, 20 естество животных и гнев зверей, ветров усилие и помышления человеков, разнство летораслем и силы корений. 21 И елика суть скрыта и явна, познах: всех бо художница научи мя Премудрость. 22 Есть бо в той дух разума свят, единородный, многочастный, тонкий, благодвижный, светлый, нескверный, ясный, невредителный, благолюбивый, остр, невозбранен, благоделателен, 23 человеколюбив, известный, крепкий, безпечальный, всесильный, всевидяй, и сквозе вся проходяй духи разумичныя, чистыя, тончайшыя. 24 Всякаго бо движения подвижнейша есть премудрость: достизает же и проницает сквозе всяческая ради (своея) чистоты. 25 Пара бо есть силы Божия и излияние Вседержителя славы чистое: сего ради ничтоже осквернено на ню нападает. 26 Сияние бо есть света присносущнаго и зерцало непорочно Божия действия и образ благостыни Его. 27 Едина же сущи всяческая может, и пребывающи в себе вся обновляет, и по родом в душы преподобных преходящи, други Божия и пророки устрояет: 28 ни когоже бо любит Бог, токмо сего, иже со премудростию пребывает. 29 Есть бо сия благолепнее солнца и паче всякаго расположения звезд: свету соравняема обретается первая: 30 сего бо преемлет нощь, премудрости же не одолеет злоба. === 8 === 1 Досязает же от конца даже до конца крепко и управляет вся благо. 2 Сию возлюбих и поисках от юности моея, и взысках невесту привести себе, и любитель бых красоты ея. 3 Благородство славит сожитие Божие имущи, и всех Владыка возлюби ю: 4 таибница бо есть Божия хитрости и обретателница дел Его. 5 И аще богатство есть вожделенное притяжание в животе, что премудрости богатейше, еюже делаются вся? 6 Аще же разум делает, кто ея от сущих лучший художник есть? 7 И аще правду любит кто, труды ея суть добродетели: целомудрию бо и разуму учит, правде и мужеству, ихже потребнее ничтоже есть в житии человеком. 8 Аще же и многаго искусства желает кто, весть древняя и быти хотящая разсмотряет: свесть извития словес и разрешения гаданий, знамения и чудеса проразумевает и сбытия времен и лет. 9 Судих убо сию привести мне к сожитию, ведый, яко будет ми советница благих и утешение попечений и печали. 10 Имети буду ради ея славу в народех и честь пред старцы, юн сый: 11 остр обрящуся в суде, и лица сильных удивятся мне: 12 молчащу ми потерпят и вещающу ми имут внимати, и глаголющу ми о мнозе, руку положат на уста своя. 13 Сея ради прииму безсмертие и память вечную сущым по мне оставлю: 14 управлю люди, и языцы покорятся ми: 15 убоятся мене слышавшии мучителие страшнии: во множестве явлюся благ и в брани крепок. 16 Вшед в дом мой упокоюся с нею: не бо имать горести сообщение ея, ни болезни сожитие тоя, но веселие и радость. 17 Сия помыслив во мне, печахся в сердцы моем, яко безсмертие есть в сродстве премудрости, 18 и в содружении ея услаждение благо, и в трудех руку ея богатство без оскудения, и в сообучении беседы ея разум, и благославие в приобщении словес ея, обхождах ишущь, да восприиму ю в себе. 19 Отрок же бех остроумен, душу же получих благу: 20 паче же благ сый приидох в тело нескверно. 21 Познав же, яко не инако одержу, аще не Бог даст, и сие же бе разума, еже ведети, чия есть благодать, приидох ко Господу и молихся Ему, и рекох от всего сердца моего: === 9 === 1 Боже отцев и Господи милости Твоея, сотворивый вся словом Твоим 2 и премудростию Твоею устроивый человека, да владеет сотворенными от Тебе тварьми, 3 и да управляет мир в преподобии и правде, и в правоте души суд да судит: 4 даждь мне Твоим престолом приседящую премудрость и не отрини мене от отрок Твоих: 5 яко аз раб Твой и сын рабыни Твоея, человек немощен и маловременен и умален в разуме суда и законов. 6 Аще бо кто будет и совершен в сынех человеческих, отсутствующей Твоей премудрости, ни во чтоже вменится. 7 Ты избрал мя еси царя людем Твоим и судию сыном Твоим и дщерем, 8 и рекл ми еси создати храм в горе святей Твоей и во граде обитания Твоего олтарь, подобием скинии (Твоея) святыя, юже предуготовал еси от начала. 9 И с Тобою премудрость ведущая дела Твоя и присутствующая тогда, егда мир творил еси, и ведущая, что есть угодно пред очима Твоима и что право в заповедех Твоих: 10 посли ю с небес святых и от престола славы Твоея посли ю: да сущи со мною трудится, и увем, что благоугодно есть пред Тобою: 11 весть бо она вся и разумеет, и наставит мя в делех моих целомудренне и сохранит мя во славе своей: 12 и будут приятна дела моя, и разсужду люди Твоя праведне, и буду достоин престолов отца моего. 13 Кто бо от человек познает совет Божий? Или кто помыслит, что хощет Бог? 14 Помышления бо смертных боязлива, и погрешителна умышления наша: 15 тело бо тленное отягощает душу, и земное жилище обременяет ум многопопечителен. 16 И едва разумеваем, яже на земли, и яже в руках обретаем со трудом: а яже на небесех, кто изследи? 17 Волю же Твою кто позна, аще бы не Ты дал еси премудрость и послал еси Духа святаго Твоего от высоты? 18 И тако исправишася стези сущих на земли, и яже Тебе угодна, научишася человецы 19 и премудростию спасошася. === 10 === 1 Сия первозданнаго отца миру единаго созданнаго сохрани и изведе его от греха его, 2 даде же ему крепость содержати всяческая. 3 Отступив же от нея неправедный во гневе своем со братоубийственными погибе яростьми: 4 егоже ради потопляему землю паки спасе премудрость, малым древом праведника соблюдши. 5 Сия и во единомыслии лукавства смешеных языков обрете праведника и сохрани его непорочна Богу, и в поболении о чаде крепка соблюде. 6 Сия праведнаго, погибающым нечестивым, избави бежащаго от огня низходяща на пять градов: 7 ихже еще свидетелство лукавствия дымящаяся стоит земля пуста, и несовершенными времены плодоносящая древеса, и неверныя души память стоящь столп слан. 8 Премудрость бо мимоходящии не токмо повредишася, еже не ведети блага, но и безумия своего оставиша житию память, да в нихже согрешиша, ниже утаитися возмогут. 9 Премудрость же служащих ей от болезней избави. 10 Сия бежащаго от гнева братня праведника настави на стези правы и показа ему царствие Божие и даде ему разум святых, почте его в трудех и умножи труды его. 11 Во обиде обдержащих его предста ему и обогати его, 12 сохрани его от враг, и от наветующих защити его, и подвиг крепок на победу даде ему, да увесть, яко всех сильнее есть благочестие. 13 Сия проданаго праведника не остави, но от греха избави его: сниде с ним в ров, 14 и во узах не остави его, дондеже принесе ему скиптр царствия и власть на мучащих его: лживых же показа, порок сотворших нань, и даде ему славу вечную. 15 Сия людей преподобных и семя непорочное избави от язык оскорбляющих: 16 вниде в душу раба Господня и воста противу царей страшных в чудесех и знамениих. 17 Воздаде преподобным мзду трудов их, настави их в путь дивен и бысть им в покров днем и в пламень звезд в нощи. 18 Преведе их но морю Чермному и проведе их сквозе воду многу: 19 враги же их потопи и из глубины бездны изрину их. 20 Сего ради праведнии взяша корысти нечестивых и воспеша, Господи, имя святое Твое, и одолетелницу руку Твою похвалиша единодушне: 21 яко премудрость отверзе уста немых и языки младенцем сотвори ясны. === 11 === 1 Управи дела их рукою пророка святаго: 2 проидоша пустыню необитанную и в непроходимых водрузиша кущы, 3 сопротивишася супостатом и отмстиша врагом: 4 возжадаша и призваша Тебе, и дана бысть им вода от камене несекомаго и изцеление жажды от камене жестока. 5 Имиже бо наказани быша врази их, 6 сими сии во оскудении суще благодетелствовани быша: 7 за источник убо приснотекущия реки, кровию излиянною смятенныя, 8 во обличение младенцеубийственнаго повеления, дал еси им изюбилну воду безнадежно, 9 показав тогда жаждею, како противных умучил еси. 10 Егда бо искушени быша и в милости наказани, познаша, како во гневе судимии нечестивии мучишася: 11 сих бо яко отец учащь искусил еси, онех же яко жесток царь осуждая истязал еси. 12 Отстоящии же и присутствующии такожде мучишася: 13 сугуба бо их прият печаль и стенание с памятию минувших. 14 Егда бо слышаху своими мучении благодействуемых оных, познаваху Господа: 15 егоже бо древле во отложении отвержена отрекошася смеющеся, при концы события удивишася, неподобною праведным томими жаждею. 16 За помышления же безумная неправды их, в нихже заблудивше почитаху безсловесная пресмыкающаяся и зверей худых, послал еси им множество безсловесных животных во отмщение, 17 да познают, яко имиже кто согрешает, сими и мучится. 18 Не неможаше бо всесильная рука Твоя, яже сотвори мир от безобразнаго вещества, послати на них множество медведей, или лютых львов, 19 или новосозданных ярости исполненых зверей незнаемых, или огненным дышущих духом, или злосмрадный произносящих дым, или страшныя из очей искры испускающих: 20 ихже не токмо вред можаше истребити я, но и зрак устрашающь погубити. 21 И без тех, единым духом пасти могоша, от суда гоними и развеяни от духа силы Твоея: но вся мерою и числом и весом расположил еси. 22 Еже бо много мощи, присутствует Тебе всегда, и державе мышцы Твоея кто сопротивится? 23 Понеже, якоже стражик в превесех, (тако) весь мир пред Тобою, и яко капля росы утренния, сходящия на землю. 24 Милуеши же всех, яко вся можеши, и презираеши грехи человеком в покаяние. 25 Любиши же сущая вся, и ни чесогоже гнушаешися, яже сотворил еси: ниже бо ненавидя что устроил еси. 26 Како же пребыло бы что, аще бы Ты не изволил еси? Или, еже не наречено от Тебе, сохранилося бы? 27 Щадиши же вся, яко Твоя суть, Владыко душелюбче! === 12 === 1 Нетленный бо дух Твой есть во всех. 2 Темже заблуждающих помалу обличаеши, и в нихже согрешают, воспоминая учиши, да пременившеся от злобы веруют в Тя, Господи. 3 И древних бо обитателей земли святыя Твоея возненавидев, 4 ради деяний злых волшвений, яже творяху, и жертв непреподобных, 5 и чадоубийц немилостивых, и утробоядцев человеческих плотей, и кровопийцев от среды святыни Твоея, 6 и родителей убивших душы безпомощныя, восхотел еси погубити руками отец наших: 7 да достойное приимет преселение отроков Божиих, яже у Тебе всех дражайшая земля. 8 Но и сих яко человеков пощадил еси, послал же еси предтекущыя воинства Твоего осы, яко да тех помалу истребят. 9 Не несилен еси во брани покорити нечестивых праведным, или зверем свирепым, или словом жестоким до единаго потребити: 10 судящь же помалу давал еси место покаянию, не неведяй, яко лукав род их и естественная злоба их, и яко не пременится помышление их во век. 11 Семя бо бе проклято от начала: ниже бояйся кого, отпущение даял еси грехом их. 12 Кто бо речет (Тебе): что сотворил еси? Или кто станет противу суду Твоему? Кто же истяжет Тя о языцех погибших, ихже Ты сотворил еси? Или кто в предстателство Тебе приидет, отмститель на неправедныя человеки? 13 Несть бо ин Бог разве Тебе, иже радиши о всех, да покажеши, яко не неправо судил еси. 14 Ниже царь, или мучитель противу Тебе воззрети может, о ихже погубил еси. 15 Праведен же сый, праведно вся управляеши, недолжнаго же мучитися осудити чуждо мниши Твоея силы. 16 Крепость бо Твоя правды начало и еже над всеми Твое владычество, всех щадети творит. 17 Крепость бо показуеши неверующым о совершенстве силы, а в ведущих дерзость обличаеши. 18 Ты же владычествуяй силою в кротости судиши и с великим щадением разсмотряеши нас: с Тобою бо есть, егда хощеши, еже мощи. 19 Научил же еси люди Твоя сицевыми делы, яко подобает праведному быти человеколюбцу, и благонадежны сотворил еси сыны Твоя, яко даеши о гресех покаяние. 20 Аще бо враги отроков Твоих и должных смерти с толиким мучил еси внятием и щадением, даяй времена и место, имиже бы изменилися от злобы: 21 с коликим прилежанием судил еси сыны Твоя, ихже отцем клятвы и заветы дал еси благих обещаний. 22 Нас убо наказуя, враги нашя тмами биеши, да благостыню Твою помышляем судяще, судими же чаем милости. 23 Отюнудуже и неправедных, во безумии поживших живот, свойственными их мерзостьми мучил еси, 24 ибо в путех заблуждения должае заблудиша, боги мняще, яже и во животных вражиих безчестна, аки младенцы безумнии прельстившеся. 25 Сего ради яко отроком несмысленным суд в поругание послал еси: 26 иже поруганьми прещения не наказавшеся, достойна суда Божия искусят. 27 В нихже бо тии страждуще негодоваху, в сих, ихже мняху быти боги, в тех мучими, видяще Егоже прежде отметахуся знати, 28 Бога истиннаго познаша: темже и конец осуждения прииде на ня. === 13 === 1 Суетни убо вси человецы естественне, в нихже обретается неведение о Бозе, и от видимых благ не возмогоша уразумети Сущаго, ни делом внемлюще познаша Хитреца: 2 но или огнь, или дух, или скор воздух, или круг звездный, или зелную воду, или светила небесная, строители миру боги (быти) возмнеша. 3 Ихже аще убо красотою услаждающеся, сия боги возмнеша, да уведят, колико сих Владыка есть лучший: красоты бо Родоначалник созда я. 4 Аще же силе и действию удивишася, да уразумеют от них, колико сотворивый сия сильнейший есть: 5 от величества бо красоты созданий сравнително Рододелатель их познавается. 6 Но обаче на сих есть уничижение мало, ибо сами сии негли прельщаются, Бога ищуще и хотяще обрести: 7 в делех бо Его живуще изследуют и увещаваются зраком, яко блага видимая. 8 Паки ниже сии прощения достойни: 9 аще бо толико возмогоша ведети, да возмогут уразумети век, сих же Владыку како скорее не обретоша? 10 Окаянни же суть, и в мертвых упования их, иже назваша боги дела рук человеческих, злато и сребро, хитрости умышление, и подобия животных, или камение неключимо, дело руки древния. 11 Аще же кто дровосечец тектон, угодное древо отсек, отешет благохудожне всю кору его, и хитрствуя благолепне сотворит угоден сосуд во употребление жития, 12 останки же дела на уготование брашна изнурив насытися: 13 останок же иже от них ни во что благопотребен, древо криво и сучия полно, приим извая с прилежанием праздности своея и искусством разума изобрази его, и уподоби его образу человечу, 14 или некоему животному ничтожному уподоби его, помазав шарами различными и очервленив вид его, и всяк порок, иже на нем есть, измазав, 15 и сотворив ему достойное его обитание, на стене постави е, укрепив железом. 16 Да не убо падет, предумысли о нем, ведый, яко не может помощи себе: ибо идол есть и требует помощи. 17 О стяжаниих же и о брацех и чадех своих моляся, не стыдится к бездушному глаголя, 18 и о здравии убо немощное призывает, и о животе мертвое молит, и в помощь неключимое призывает, 19 и о путешествии (просит) ниже ходити могущаго, и о притяжании и деянии и о рук подтверждении некрепкаго руками, мужества просит от того, еже всех есть немощнейшее. === 14 === 1 Плыти паки кто помыслив и сверепыя волны преходити, носящаго его корабля тленнейшее древо призывает: 2 оное бо желание пристяжаний умысли, хитрец же мудростию содела: 3 Твой же, Отче, устрояет промысл: яко дал еси и в мори путь и в волнах стезю крепкую, 4 показуя, яко силен еси от всякаго спасти, аще и без художества кто взыдет. 5 Хощеши же, да не будут праздна дела премудрости Твоея: сего ради и малейшему древу вверяют человецы душы (своя), и преходяще волны кораблецем избавлени суть. 6 И от начала бо, егда погибаху гордии исполини, упование мира в кораблеце избежавшее, остави веку семя рождения, рукою Твоею устроено. 7 Благословено бо древо, имже бывает правда. 8 Рукотворенное же проклято есть, и сотворивый е: яко ов убо содела, сие же тленное богом именовася. 9 В равне бо ненавидима суть Богу и нечествуяй, и нечестие его: 10 ибо сотвореное с сотворшим мучимо будет. 11 Сего ради и во идолех языческих будет казнь, яко в создании Божии в мерзость сотворени суть и в соблазны душам человеческим и в сеть ногам буих. 12 Начало бо блужения умышление идолов: изобретение же их тление живота. 13 Ниже бо быша от начала, ниже будут во веки: 14 тщеславием бо человеческим внидоша в мир, и сего ради краток их конец вменися. 15 Горьким бо плачем сетуя отец скоро восхищенаго чада образ сотворив, егоже тогда человека мертва, ныне яко бога почте: и предаде подручным тайны и жертвы: 16 потом временем возмогший нечестивый обычай, аки закон хранимь бысть, и мучителей повелением почитаема бяху изваянная: 17 ихже в лице не могуще чествовати человецы дальнаго ради обитания, издалеча лице изобразивше, явный образ почитаемаго царя сотвориша, яко да отстоящаго аки близ сущаго ласкают со прилежанием. 18 В продолжение же злочестия и не разумеющих принуди художниково любочестие. 19 Сей бо хотя угодити державствующему, произведе хитростию (своею) подобие на лучшее: 20 множество же человек, привлечено благообразием дела, прежде вмале чествованаго человека ныне в бога вмениша. 21 И сие бысть житию в прельщение, яко или злоключению, или мучителству послуживше человецы, несообщно Имя камению и древам обложиша. 22 Посем не доволно бе прельщатися о Божии разуме, но и в велицей живуще безумия брани, толикая злая мир именуют. 23 Ибо или детоубийственныя жертвы, или сокровенныя тайны, или неистовныя от иных законов пиршества творяше, 24 ниже жития, ниже браков чистых еще хранят: един же другаго или наветом убивает, или блудя оскорбляет. 25 Вся же смешена суть, кровь и убийство, татьба и лесть, растление, неверство, смятение, заклинание, молва благих, 26 благодати забвение, душам осквернение, рождению пременение, браков безчиние, прелюбодеяние и студодеяние. 27 Недостойных бо имене идолов служение начало всякаго зла, и вина и конец есть: 28 ибо или веселящеся неистовствуют, или пророчествуют ложная, или живут неправедне, или кленутся скоро. 29 На бездушныя бо идолы надеющеся, зле кленущеся казними быти не чают. 30 За обоя же на них приидет суд: понеже зле мудрствоваша о Бозе, внемлюще идолом, и неправедно кляшася лестию, презревше преподобие. 31 Не бо сила кленущих, но согрешающым суд находит всегда на преступление неправедных. === 15 === 1 Ты же Бог наш благ и истинен, долготерпелив и в милости управляяй вся. 2 Ибо аще согрешим, Твои есмы, ведуще державу Твою: и аще не согрешим, вемы, яко Тебе вменихомся. 3 Еже бо знати Тебе, всесовершена (есть) правда, и ведети державу Твою, корень есть безсмертия. 4 Ниже бо прельсти нас человеческое злохитрое умышление, ниже сеннописаных труд безплодный, вид изваян различными шары, 5 ихже зрак безумным приходит в похотение, и любят мертваго образа вид бездушный. 6 Злых любителие достойнии таковых надежд и творящии, и любящии, и чествующии. 7 Ибо скудельник, мягкую землю мнущь со трудом, делает ко служению нашему коеждо: но от тогожде брения созда и яже чистых дел служебныя сосуды, и сопротивныя, вся подобне: сих же обоих коегождо есть употребление, судия есть бреноделатель. 8 И злотрудник бога суетна от тогожде творит брения, иже мало прежде от земли сотворен быв, по мале идет, из неяже взят бысть, истязан о душевнем долзе. 9 Но есть ему прилежание, не яко имать трудитися, ниже яко краткоконечно житие имать: но ревнует златоделателем и сребролиятелем, и меди делателем подражает, и славу мнит, яко скверная делает. 10 Пепел бо есть сердце его, и земли хуждше упование его, и брения безчестнее живот его: 11 яко не уведе Создавшаго его, и вдохнувшаго ему душу действительную, и вдунувшаго дух животный. 12 Но вмениша игралище быти живот наш, и житие все упражнено на приобретение: ибо глаголют, яко подобает откуду либо, аще и от зла, приобретати. 13 Сей бо паче всех весть, яко согрешает, от вещества земленаго удобныя к сокрушению сосуды и изваяния содеваяй. 14 Вси же пребезумнейшии и окаяннейшии, паче души младенческия, врази людий Твоих обладавшии ими: 15 яко вся идолы язычески вмениша в боги, имже ниже очес употребление ко зрению, ниже ноздри в привлечение аера, ниже уши слышати, ниже персты рук во осязание, и ноги их праздны ко хождению. 16 Человек бо сотвори их, и духа взаим взяв созда их: ни един бо человек может себе подобна бога создати: 17 смертен же сый мертва делает рукама беззаконныма: лучший бо есть идолов своих: (яко) сей убо поживе, онии же никогда. 18 И животных мерзких чтут: безумная бо сравняемая иных суть хуждша. 19 Ниже елико вожделети яко в лицы животных блага суть, отбегоша же и Божия хвалы и благословения Его. === 16 === 1 Сего ради от подобных пострадаша достойне, и множеством зверей казнени быша. 2 Вместо мучения благо сотворил еси людем Твоим, в похотение желания странное вкушение, пищу уготовал еси крастели, 3 да они убо вожделевшии пищи, показанием посланых, и от нужнаго хотения отвратятся, сии же вмале скудни бывше, и странна приобщатся вкушения. 4 Подобаше бо на оных убо неизбежней нищете наити мучителствующих, сим же токмо показати, како врази их мучишася. 5 Ибо егда тем найде жесток зверей гнев, и угрызеньми сверепых истребляхуся змиев, 6 но не до конца пребысть гнев Твой: в наказание же вмале смущени быша, знамение имеюще спасения, на воспоминание заповеди закона Твоего: 7 обративыйся бо не (вещию) зримою целяшеся, но Тобою всех Спасителем. 8 И в сем же показал еси врагом нашым, яко Ты еси избавляяй от всякаго зла: 9 тех бо акриды и мухи побиша угрызением, и не обретеся цельба душам их, яко достойни бяху от таковых мучитися. 10 Сынов же Твоих ниже ядовитых змиев зубы одолеша: милость бо Твоя прихождаше и изцеляше их. 11 В память бо словес Твоих бяху усечени и скоро изцеляхуся, да не во глубину впадше забвения отлучатся Твоего благодеяния: 12 ниже бо зелие, ниже обязание изцели их, но слово Твое, Господи, изцеляющее вся. 13 Ты бо живота и смерти власть имаши, и низводиши даже до врат ада, и возводиши. 14 Человек же убивает убо злобою своею: изшедшаго же духа не возвратит, ниже паки призывает душу взятую. 15 Твоея же руки избежати невозможно есть: 16 отметающиися бо Тебе ведети нечестивии, в крепости мышцы Твоея биени быша странными дождьми и градами, и бурями гоними неизбежно, и огнем растаеваеми. 17 Преславное бо, в воде вся угашающей множае действоваше огнь: споборник бо есть мир о праведных. 18 Овогда бо убо укрощашеся пламень, да не сожжет посланных животных на нечестивыя: но сии зряще да ведят, яко от Божия суда страждут гонение. 19 Овогда же и между водою выше силы огненныя паляше, да беззаконныя земли порождения растлит. 20 Вместо же сих ангелскою пищею питал еси люди Твоя, и уготован хлеб с небесе послал еси им без труда, всякое услаждение в себе имеющь и ко всякому сличный вкушению. 21 Существо бо Твое сладость Твою ко сыном показоваше, и угождая единаго коегождо воли, якоже кто хотяше, превращашеся. 22 Снег же и лед терпяху огнь и не растаяваху: да уведят, яко плоды врагов истребляше огнь горящь во граде и в дождех блистающь: 23 тойже паки, да питаются праведнии, (огнь) и свою забы силу. 24 Творение бо, Тебе Творцу всех служащее, распростирается на муку противу неправедных и легчае творится во благодеяние ради на Тя надеющихя. 25 Сего ради и тогда во вся преобразуемое всех кормителнице благодати Твоей служаше к воли требующих: 26 да научатся сынове Твои, ихже возлюбил еси, Господи, яко не рождения плодов питают человека, но слово Твое Тебе верующих соблюдает. 27 Еже бо огнем нерастлено скоро от малыя лучи солнечныя греемое растаявашеся: 28 да знаемо будет (всем), яко подобает предварити солнце на благодарение Тебе и к востоку света Тебе поклонитися. 29 Неблагодарнаго бо упование яко зимный иней растает, и излиется яко вода неключима. === 17 === 1 Велицы бо суть суди Твои, (Господи,) и неизглаголанни: сего ради ненаказанныя души заблудиша. 2 Возмневше бо насильствовати язык святый беззаконнии, узницы тмы и долгою нощию связани, заключени под кровы, беглецы вечнаго Проведения лежаша. 3 Утаитися бо мняще в сокровенных гресех, мрачным забвения покрывалом расточени быша, ужасающеся люте и страшилищами возмущени: 4 ниже бо содержай их вертеп без страха сохрани, шумы же сходяще возмущаху их, и привидения дряхлая печальными лицами являхуся. 5 И огненная убо ни едина сила можаше освещати, ниже звезд светлии пламение просветити можаху в ту нощь страшную. 6 Являшеся же им токмо внезапный огнь страха исполнь: устрашаеми же невидимым оным призраком, мняху горшая быти видимая. 7 Волшебнаго же художества предлежаху посмеяния, и о премудрости величания обличение укоризненно: 8 обещающиися бо изгнати страхи и смущения от души болящия, сии посмеятелным страхом боляху. 9 Ибо аще и ничтоже их мятежное устрашаше, зверей преходами и змиев звизданьми подвижени погибаху трепетни, и аера отнюд неизбежнаго отрицающеся видети. 10 Боязливая бо злоба, своим свидетелством осуждаема, выну приемлет во ум лютая, содержима совестию. 11 Ничтоже бо есть страх, токмо лишение помощей сущих от помышления. 12 Внутрь же менше сущее чаяние, болшее мнит неведение вины подающия муку. 13 А иже в немощную поистинне нощь, и от немощнаго ада вертепов нашедшую, сном темже спящии, 14 ово убо страшилищами мечтаний гоними бяху, ово же души изчезаху преданием: внезапный бо им и нечаянный страх найде. 15 Потом тако, кто либо когда бе онамо, низпадый храняшеся в темнице без железа заключен: 16 аще бо земледелатель кто бысть, или пастырь, или трудов пустынных делатель, предят быв, неизбежную терпяше нужду: 17 единым бо ужем тмы вси бяху связани. Аще дух звиздаяй, или между частых древесных ветвей птичий глас сладкопеснивый, или сила водная текущи зелне, 18 или шум зелный низпадающих камений, или играющих животных течение невидимое, или рыкающих лютых зверей глас, или отзывающься от дебрей горских глас, разслабляху оных устрашающе. 19 Вся бо вселенная светлым просвещашеся светом, и невозбранными делы содержашеся: 20 на единых же оных простирашеся тяжкая нощь, образ будущаго их восприятия тмы: сами же себе быша тмы тяжчайшии. === 18 === 1 Преподобным же Твоим превелик бе свет: ихже убо глас слышаше, образа же не видяще, занеже убо и они (тогожде) не страдаху, ублажаху. 2 А яко не пакоствуют предобидимии, благодаряху, и еже пронестися, благодати моляху. 3 Сих ради столп огнегорящь, вожда убо неведомаго путьшествия, солнце же невредителное любочестнаго странствования подал еси. 4 Достойни бо они лишитися света и блюстися во тме, иже заключеных стрежаху сынов Твоих, имиже имяше нетленный закона свет веку датися. 5 Советовавших же их убивати младенцы преподобных, и единому отложену чаду и спасену, во обличение их отял еси множество чад, и купно погубил еси в воде зелней. 6 Оная бо нощь предуведена бысть отцем нашым, да твердо ведуще, имже клятвам вероваша, возблагодушествуют. 7 Восприято же бысть от людий Твоих спасение убо праведных, врагов же истребление: 8 имже бо наказал еси супостаты нашя, сим нас призвав прославил еси. 9 Сокровенно бо жряху преподобнии отроцы благих, и закон божественный единомыслием завещаша, таяжде подобно, благая же и бедственная восприимати святым, отцем уже предвоспевающым хвалу. 10 Противогласяше же несогласный врагов вопль, и плачевный слышашеся глас плачущих младенцев. 11 Подобною же местию раб купно с господином казнен бысть, и простый человек с царем таяжде пострада: 12 единодушно же вси во единем имени смертнем мертвых имеяху безчисленных: ниже бо ко погребению живии бяху доволни, понеже во единем мгновении честнейший род их истреблен бысть. 13 О всех бо не верующе ради чародеяний, а ради первенцев истребления, исповедаша людий сынов Божиих быти. 14 Тихому бо молчанию содержащу вся, и нощи во своем течении преполовляющейся, 15 всемогущее слово Твое, (Господи,) с небес от престолов царских жесток ратник в средину погибельныя земли сниде. 16 Мечь остр нелицемерное повеление Твое носяй, и став исполни вся смерти: и небесе убо касашеся, стояше же на земли. 17 Тогда внезапу привидения убо снов люте смутиша их, страси же наидоша нечаянни, 18 и ин инамо вержен еле жив, еяже ради вины умираше, объявляше: 19 сония бо, смутивше их, сие предвозвестиша: да не ведяще, егоже ради зле страждут, погибнут. 20 Прикоснуся же некогда и праведных искушение смерти, поражение во пустыни бысть множества: но не долго пребысть гнев. 21 Потщався бо муж непорочен предпоборствова, своея службы оружие, молитву и фимиама умилостивление принес, сопротив ста гневу и конец положи бедствованию, показав, яко Твой есть раб. 22 Одоле же поражающаго не силою телесною, ниже оружия действием, но словом покори наказующаго, клятвы отцев и заветы воспомянув. 23 Громадами бо уже падшым друг на друга мертвым, посреде став, пресече гнев и раздели к живым путь. 24 На одежди бо подира бе весь мир, и отцев славы на изваянии четырерядоваго камения, и величество Твое на диадиме главы его. 25 Сим уступил искореняяй и сих устрашися: бе бо токмо искушение гнева доволно. === 19 === 1 Нечестивым же до конца без милости ярость найде: предведе бо их и будущая, 2 яко тии отпустившии, еже отити, и со тщанием предпославше их, поженут вслед раскаявшеся: 3 еще бо в руках имеюще рыдания и сетующе над гробами мертвых, ин себе взяша помысл безумия, и ихже моляще изгнаша, сих аки беглецев гоняху. 4 Влечаше бо их к сему концу достойная нужда, и приключшихся забытие вложи, да и прочую к мучением принаполнят казнь: 5 и людие убо Твои преславное путьшествие прейдут, они же странну обрящут смерть. 6 Все бо творение во своем ему роде паки свыше преобразовашеся, служащее свойственным Твоим повелением, да отроцы Твои сохранятся невреждени. 7 Облак осеняяй полк их, и из преждебывшия воды открытие сухия земли явися, и из моря Чермнаго путь невозбранен, и поле злачное от волнения зелнаго: 8 имже весь язык пройде, Твоею рукою покровени, видяще дивная чудеса. 9 Якоже бо кони насытишася, и яко агнцы взыграшася, хваляще Тя, Господи, избавльшаго их: 10 воспомянуша бо еще, яже во обитании их, како убо вместо рождения животных изведе земля скнипы, вместо же рыб изрыгну река множество жаб. 11 Последи же видеша и новое рождение птиц, егда похотением подвигшеся, просиша сладостныя пищи. 12 Во утешение бо взыдоша им от моря крастели: и мучения грешным наидоша, не без бывших знамений силою молний: праведне бо пострадаша за своя злобы, 13 ибо лютейшее ненавидение странных совершиша: инии убо незнаемых не приемляху пришелцев, сии же благодетелей странных порабощаху. 14 И не токмо, но аще кое разсмотрение будет их: зане враждебно приемляху чуждых. 15 Сии же с празднествами приемше приобщившихся уже их обычаем, жесточайшими озлобиша трудами. 16 Побиени же быша и ослеплением, якоже онии при дверех праведника, егда великою обложени тмою, кийждо своих дверий прохода искаше. 17 Сами бо собою стихии пременяемы, якоже в гуслех гласы сличия имя пременяют, всегда храняще звук: еже есть видети от зрака бывших известно. 18 Земная бо в водная прелагахуся, и плавающая прехождаху на землю. 19 Огнь возмогаше в воде вышше своея силы, и вода угашающую силу забы. 20 Пламень вопреки удоботленных животных не вреди плотей в нем ходящих, ниже таяше ледовидный удоботаяй род сладостныя пищи. 21 По всему бо, Господи, возвеличил еси люди Твоя и прославил еси, и не презрел еси, во всяцем времени и месте предстояй. == Книга Сираха == === Предисловие === Понеже многая и великая нам чрез закон и пророки и иных последовавших им дана быша, о нихже подобает хвалити Израиля наказания и премудрости ради, и яко не токмо сами чтуще должни разумными быти, но да и иностранных возмогут прилежно учащеся пользовати, и глаголюще и пишуще: дед мой Иисус множайше себе вдав в чтение закона же и пророков и иных отеческих книг, и в сих доволное искусство стяжав, понудися и сам написати нечто от надлежащих к наказанию и премудрости, да прилежно учащиися, и сих причастницы бывше, много паче успеют в законнем житии. Будите убо умоленни, да со благоволением и вниманием чтете, и прощение подасте, аще в некиих возмнимся недоволни быти во истолковании люботрудно изобретенных речений: не равную бо силу имут та в себе, яже еврейски глаголема суть, егда преведутся на иный язык: не токмо же сия, но и самый закон и пророчества и прочыя книги не малое имеют разнство в себе чтомыя. В тридесять бо осмем лете при Евергете цари пришед во Египет и премедлив, обретох немалаго наказания свиток, за нуждейшее вмених сам привнести некое тщание и трудолюбие к преведению тоя книги, многое бдение и искусство привнес в разстоянии времене, к концу приводя книгу издати, и в преселении хотящым учитися, предуготовляющым нравы законно жителствовати. === 1 === 1 Всяка премудрость от Господа и с Ним есть во век. 2 Песка морскаго, и капли дождевныя, и дни века кто изочтет? 3 Высоту небесе и широту земли, и бездну и премудрость кто изследит? 4 Прежде всех создася Премудрость, и разум мудрости от века. 5 Источник премудрости слово Божие в вышних, и шествия ея заповеди вечныя. 6 Корень премудрости кому открыся? И коварства ея кто разуме? 7 Един есть премудр, страшен зело, седяй на престоле Своем, Господь. 8 Сам созда ю, и виде, и сочте ю, 9 и излия ю на вся дела Своя, 10 со всякою плотию по даянию Своему, и дарова ю любящым Его. 11 Страх Господень слава и похвала, и веселие и венец радости. 12 Страх Господень возвеселит сердце и даст веселие и радость и долгоденствие. 13 Боящемуся Господа благо будет на последок, и в день скончания своего обрящет благодать. Страх Господень дар от Господа и на стезях любления поставляет. 14 Любление Господа преславная премудрость, и имже является, разделяет Себе в ведение Его. 15 Начало премудрости боятися Господа, и с верными в ложеснех создася им: с человеки основание века угнезди и с семенем их уверится. 16 Исполнение премудрости еже боятися Господа, и упоит их от плодов ея: 17 весь дом их исполнит желаний своих и сосуды от жит ея. 18 Венец мудрости страх Господень, возцветаяй мир и здравие изцеления: обоя же суть дары Божии, и разширяет веселие любящым Его. 19 И виде и сочте ю: художество и ведение разума одожди, и славу держащих ю вознесе. 20 Корень премудрости еже боятися Господа, и ветви ея долгоденствие. 21 Страх Господень отреяет грехи: пребываяй же в нем отвращает гнев. 22 Не может ярость неправедная оправдитися: устремление бо ярости его падение ему. 23 До времене стерпит долготерпеливый, и последи воздаст ему веселие: 24 до времене скрыет словеса своя, и устне верных исповедят разум его. 25 В сокровищих премудрости притча ведения: мерзость же грешнику Богочестие. 26 Возжелев премудрости, соблюди заповеди, и Господь подаст ю тебе: 27 премудрость бо и наказание страх Господень, и благоволение Его вера и кротость. 28 Не сумневайся о страсе Господни и не приступи к Нему сердцем раздвоеным. 29 Не лицемерствуй пред усты человеческими и устнам твоим вонми. 30 Не возносися, да не падеши и наведеши души твоей безчестие, и открыет Господь тайная твоя и посреде сонма низложит тя: яко не приступил еси во истине ко страху Господню, и сердце твое исполнено лукавства. === 2 === 1 Чадо, аще приступаеши работати Господеви Богу, уготови душу твою во искушение: 2 управи сердце твое и потерпи, и не скор буди во время наведения: 3 прилепися Ему и не отступи, да возрастеши на последок твой. 4 Все елико аще нанесено ти будет, приими и во изменении смирения твоего долготерпи: 5 яко во огни искушается злато, и человецы приятни в пещи смирения. 6 Веруй Ему, и заступит тя, и управи пути твоя и уповай Нань. 7 Боящиися Господа, пождите милости Его и не уклонитеся, да не падете. 8 Боящиися Господа, веруйте Ему, и не имать отпасти мзда ваша. 9 Боящиися Господа, надейтеся на благая и на веселие века и милости. 10 Воззрите на древния роды и видите, кто верова Господеви и постыдеся? Или кто пребысть во страсе Его и оставися? Или кто призва Его, и презре и? 11 Зане щедр и милостив Господь, и оставляет грехи, и спасает во время скорби. 12 Горе сердцам страшливым и рукам ослабленым, и грешнику ходящу на две стези. 13 Горе сердцу ослаблену, яко не верует: сего ради покровено не будет. 14 Горе вам погубльшым терпение: и что сотворите, егда посетит Господь? 15 Боящиися Господа не сумневаются о глаголголех Его, и любящии Его сохранят пути Его. 16 Боящиися Господа поищут благоволения Его, и любящии Его исполнятся закона. 17 Боящиися Господа уготовят сердца своя и пред Ним смирят душы своя, (глаголюще:) 18 да впадем в руце Господни, а не в руце человечески, яко бо величество Его, тако и милость Его. === 3 === 1 Мене отца послушайте, чада, и сице творите, да спасетеся: 2 Господь бо прослави отца на чадех и суд матере утверди на сынех. 3 Чтый отца очистит грехи, 4 и яко сокровищствуяй прославляяй матерь свою. 5 Чтый отца возвеселится о чадех и в день мольбы своея услышан будет. 6 Прославляяй отца долгоденствовати будет, и послушаяй Господа упокоит матерь свою. 7 Бояйся Господа почтит отца и яко владыкам послужит родившым его. 8 Делом и словом чти отца твоего и матерь, да найдет ти благословение от них. 9 Благословение бо отчее утверждает домы чад, клятва же матерня искореняет до основания. 10 Не славися в безчестии отца твоего, несть бо ти слава отчее безчестие: 11 слава бо человеку от чести отца его, и поношение чадом мати в безславии. 12 Чадо, заступи в старости отца твоего и не оскорби его в животе его: 13 аще и разумом оскудевает, прощение имей и не обезчести его всею крепостию твоею. 14 Милость бо отча не забвена будет, и противу грехов присозиждется тебе: 15 в день скорби твоея воспомянет тя: якоже лед от зноя, тако растают греси твои. 16 Коль хулен оставляяй отца, и проклят Господем раздражаяй матерь свою. 17 Чадо, в кротости дела твоя препровождай, и человеком приятным возлюблен будеши. 18 Елико велик еси, толико смиряйся, и пред Господем обрящеши благодать. 19 Мнози суть высоцы и славни: но кротким открываются тайны, 20 яко велия сила Господня, и смиренными славится. 21 Вышших себе не ищи и крепльших себе не испытуй. 22 Иже ти повеленна, сия разумевай: несть бо ти потреба тайных. 23 Во избытцех дел твоих не любопытствуй: вящшая бо разума человеческаго показана ти суть: 24 многи бо прельсти мнение их, и мнение лукавно погуби мысль их. 25 И любяй бедство впадет в не: 26 сердце жестоко озлобится на последок: 27 сердце жестоко отяготится болезньми, и грешник приложит грехи на грехи. 28 В наведении величаваго несть изцеления: сад бо лукавствия вкоренися в нем. 29 Сердце разумиваго уразумеет притчу, и ухо слышателя вожделение премудраго. 30 Огнь горящь угасит вода, и милостыня очистит грехи. 31 Воздаяй благодати помнимь бывает по сих и во время падения своего обрящет утверждение. === 4 === 1 Чадо, живота нищаго не лиши и не отвращай очес от просящаго, 2 души алчущия не оскорби и не разгневай мужа в нищете его, 3 сердца раздраженаго не превозмути и не продолжай даяния требующему, 4 раба скорбяща не отрей и не отврати лица твоего от нищаго, 5 от требующаго не отврати очес и не даждь места человеку кляти тя: 6 кленущаго бо тя в горести души своея мольбу услышит Сотворивый его. 7 Приятна соборищу твори себе и князю смиряй главу твою, 8 приклони ухо твое к нищему и отвещай ему мирная в кротости, 9 изми обидимаго из руки обидящаго и не малодушествуй, егда судиши, 10 буди сирым яко отец и вместо мужа матери их: 11 и будеши яко сын Вышняго, и возлюбит тя паче неже мати твоя. 12 Премудрость сыны своя вознесе и заступает ищущих ея: 13 любяй ю любит жизнь, и утренюющии к ней исполнятся веселия: 14 держайся ея наследит славу, и идеже входит, благословит его Господь: 15 служащии ей послужат Святому, и любящих ю любит Господь: 16 слушаяй ея судити имать языки, и внимаяй ей вселится надеявся. 17 Аще уверуеши, наследиши ю, и во одержании будут роды его: 18 яко стропотно ходит с ним в первых, боязнь же и страх наведет нань 19 и помучит его в наказании своем, дондеже веру имет души его и искусит его во оправданиих своих, 20 и паки возвратится прямо к нему и возвеселит его 21 и открыет ему тайны своя: 22 аще заблудит, оставит его и предаст его в руце падения его. 23 Блюди время и хранися от лукаваго, 24 и о души твоей не постыдися: 25 есть бо стыд наводяй грех, и есть стыд слава и благодать. 26 Не приими лица на душу твою и не срамляйся о падении твоем. 27 Не возбрани словесе во время спасения: 28 в словеси бо познана будет премудрость, и наказание в глаголех языка. 29 Не пререкай противу истины и о ненаказании твоем срамляйся: 30 не стыдися исповедати грехи твоя и не воспящай быстрины речныя. 31 И не подстелися мужу бую и не обинися лица сильнаго. 32 Даже до смерти подвизайся о истине, и Господь Бог поборет по тебе. 33 Не буди скор языком твоим, ленив же и слаб в делех твоих. 34 Не буди яко лев в дому твоем и жестоконеистов в рабех твоих. 35 Не буди рука твоя простерта на взятие, а на отдаяние согбена. === 5 === 1 Не уповай на имения твоя и не и рцы: доволна ми суть. 2 Не последуй души твоей и крепости твоей, еже ходити в похотех сердца твоего, 3 и не рцы: кто мя преможет? Господь бо мстяй отмстит ти. 4 Не рцы: согреших, и что ми бысть? Господь бо есть долготерпелив. 5 О очищении безстрашен не буди, прилагати грехи на грехи, 6 не рцы: щедрота Его многа есть, множество грехов моих очистит: 7 милость бо и гнев у Него, и на грешницех почиет ярость Его. 8 Не медли обратитися ко Господу и не отлагай день от дне: 9 внезапу бо изыдет гнев Господень, и во время мести погибнеши. 10 Не уповай на имения неправедна: ни чимже бо упользуют в день наведения. 11 Не вей себе всяким ветром и не ходи всяким путем: сице грешник двоязычен. 12 Буди утвержден в разуме твоем, и едино буди слово твое. 13 Буди скор в слушании твоем, и с долготерпением отвещавай ответ. 14 Аще есть в тебе разум, отвещай искреннему: аще же ни, то буди рука твоя на устех твоих. 15 Слава и безчестие в беседе и язык человечь падение ему. 16 Не слови шепотник и языком твоим не уловляй: 17 на тати бо студ есть и зазор лукав над двоязычным. 18 О велице и о мале не неразумевай. === 6 === 1 И вместо друга не буди враг, имя бо лукаво студ и поношение наследит: сице грешник двоязычен. 2 Не возноси себе советом души твоея, да не расхищена будет аки юнец душа твоя: 3 листвие твое пояси и плоды твоя погубиши и оставиши себе яко древо сухо. 4 Душа лукава погубит стяжавшаго ю и порадование врагом сотворит его. 5 Гортань сладок умножит други своя, и язык доброглаголив умножит добры беседы. 6 Мирствующии с тобою да будут мнози, советницы же твои един от тысящ. 7 Аще стяжеши друга, во искушении стяжи его и не скоро уверися ему: 8 есть бо друг во время свое и не пребудет во время скорби твоея, 9 и есть друг пременяяйся во врага и свар поношения твоего открыет, 10 и есть друг общник трапезам и не пребудет во время скорби твоея: 11 и во благих твоих будет якоже ты и на рабы твоя дерзнет: 12 аще смирен будеши, будет на тя и от лица твоего скрыется. 13 От врагов твоих отлучися и от другов твоих внимай. 14 Друг верен кров крепок: обретый же его обрете сокровище. 15 Другу верну несть измены, и несть мерила доброте его. 16 Друг верен врачевание житию, и боящиися Господа обрящут его. 17 Бояйся Господа управляет дружбу свою, якоже бо сам, тако и искренний его. 18 Чадо, от юности твоея избери наказание, и даже до седин обрящеши премудрость. 19 Якоже оряй и сеяй приступи к ней и жди благих плодов ея: 20 в делании бо ея мало потрудишися и скоро ясти будеши плоды ея. 21 Коль стропотна есть зело ненаказанным, и не пребудет в ней безумный: 22 якоже камень искушения крепок будет на нем, и не замедлит отврещи ея. 23 Премудрость бо по имени ея есть и не многим есть явна. 24 Слыши, чадо, и приими волю мою, и не отвержи совета моего: 25 и введи нозе твои во оковы ея и в гривну ея выю твою: 26 подложи рамо твое и носи ю, и не гнушайся узами ея: 27 всею душею твоею приступи к ней и всею силою твоею соблюди пути ея. 28 Изследи и взыщи, и познана ти будет, и емься за ню не остави ея: 29 на последок бо обрящеши покой ея, и обратится тебе на веселие. 30 И будут ти пута ея на покой крепости и гривны ея на одеяние славы. 31 Красота бо злата есть на ней, и узы ея извитие иакинфово: 32 во одежду славы облечешися ею, и венец радости возложиши на ся. 33 Аще восхощеши, чадо, наказан будеши, и аще вдаси душу твою, хитр будеши: 34 аще возлюбиши слушати, приимеши, и аще приклониши ухо твое, премудр будеши. 35 Во множестве старейшин ставай, и аще кто премудр, тому прилепися. Всяку повесть божественную восхощи слышати, и притчи разума да не убежат тебе. 36 Аще узриши разумна, утренюй к нему, и степени дверий его да трет нога твоя. 37 Размышляй в повелениих Господних и в заповедех Его поучайся присно: Той утвердит сердце твое, и желание премудрости дано ти будет. === 7 === 1 Не твори зла, и не постигнет тя зло: 2 отступи от неправды, и уклонится от тебе. 3 Сыне, не сей на браздах неправды и не имаши пожати их седмерицею. 4 Не проси у Господа владычества, ниже от царя седалища славы. 5 Не оправдай себе пред Богом и пред царем не мудрися. 6 Не ищи, да будеши судия, егда не возможеши отяти неправды: да не когда убоишися лица сильнаго и положиши соблазн в правости твоей. 7 Не согрешай во множестве града и не низлагай себе в народе. 8 Не свяжи дважды греха, и во единем бо не неповинен будеши. 9 Не рцы: на множество даров моих воззрит, и приносящу ми Богу Вышнему, приимет. 10 Не малодушествуй в молитве твоей и милостыню творити не презри. 11 Не ругайся человеку сущу в горести души его: есть бо Смиряяй и Возносяй. 12 Не ори лжи на брата твоего, ниже другу тожде твори. 13 Не восхощи лгати всякия лжи: учащение бо ея не на благо. 14 Не буди велеречив во множестве старец и не повтори слова в молитве твоей. 15 Не возненавиди труднаго дела и земледелия от Вышняго создана. 16 Не привменяй себе ко множеству грешников. 17 Смири душу твою зело. 18 Помяни, яко гнев не замедлит, 19 понеже месть нечестиваго огнь и червь. 20 Не измени друга ни на что, ни брата присна на злате Софирстем. 21 Не отступай от жены премудры и благи, ибо благодать ея паче злата. 22 Не озлоби раба делающа во истине, ниже наемника вдающа душу свою. 23 Раба разумива да любит душа твоя, и не лиши его свободы. 24 Есть ли ти скот, призирай его, и аще ти будет потребен, да пребудет ти. 25 Суть ли ти чада, накажи я и преклони от юности выю их. 26 Суть ли ти дщери, внимай телу их и не являй веселаго к ним лица твоего. 27 Выдай дщерь, и будеши совершивый дело велико: и мужеви разумиву даждь ю. 28 Есть ли ти жена по души, не изжени ея. 29 Всем сердцем твоим прославляй отца твоего и матерних болезней не забуди: 30 помяни, яко тема рожден еси, и что има воздаси, якоже она тебе? 31 Всею душею твоею благоговей Господеви и иереи Его чти. 32 Всею силою (твоею) возлюби Сотворшаго тя и служителей Его не остави. 33 Бойся Господа и прослави иереа, и даждь часть ему, якоже заповедано ти: 34 начатки, и о согрешении, и даяние мышцей, и жертву святыни, и начаток святых. 35 И нищему простри руку твою, да совершится благословение твое. 36 Благодать даяния пред всяким живым (да будет), и над мертвецем не возбрани благодати. 37 Не устраняйся от плачущих и с сетующими сетуй. 38 Не ленися посещати боляща: сими бо возлюблен будеши. 39 Во всех словесех твоих поминай последняя твоя, и во веки не согрешиши. === 8 === 1 Не сварися с человеком сильным, и да не когда впадеши в руце его. 2 Не тяжися с человеком богатым, да не когда отяготит ти меру: 3 многих бо погуби злато, и сердца царская преклони. 4 Не сварися с человеком язычным и не накладай на огнь его дров. 5 Не играй с ненаказанным, да не приимут безчестия прародителие твои. 6 Не поноси человеку обращающуся от греха: помяни, яко вси есмы во епитимиах. 7 Не безчести человека в старости его: ибо и ты сам состареешися. 8 Не радуйся о мертвеце бывшем враждебнейшем тебе: помяни, яко вси умираем. 9 Не презри повести премудрых и в притчах их живи: 10 яко от них навыкнеши наказанию и служити вельможам удобно. 11 Не отступай от повести старцев: ибо тии навыкоша от отец своих: 12 яко от них навыкнеши разуму и во время потребно дати ответ. 13 Не возгнещай углия грешнику, да не сгориши огнем пламене его. 14 Не востани на лице досадителево, да не приседит яко наветник устом твоим. 15 Взаим не дай человеку крепльшу тебе, и аще даси, буди якоже погубивый. 16 Не поручайся выше силы твоея: и аще поручишися, яко воздаяй пецыся. 17 Не сварися со судиею: по разсуждению бо его будут судити ему. 18 С дерзым не ходи на путь, яко да не отяготится на тя: той бо сотворит по воли своей, и с буйством его погибнеши. 19 С яростивым не сварися и не иди с ним сквозе пустыню: пред очима бо его кровь яко ничтоже есть, и идеже несть помощи, тамо низложит тя. 20 С буим совета не твори: не возможет бо слова удержати. 21 Пред чужим не твори тайнаго: не веси бо, что родит ти. 22 Всякому человеку не являй сердца твоего, да не воздаст ти благодати ложныя. === 9 === 1 Не ревнуй жене недра твоего, ниже научи на тебе самаго учению лукаву. 2 Не даждь жене души твоея, еже превзыти ей над крепость твою. 3 Не сретай жены блудницы, да не како впадеши в сети ея. 4 К спевающей не примешайся, да не како увязнеши в начинаниих ея. 5 Девы не назирай, да не когда соблазнишися в красоте ея. 6 Не даждь блудницам души твоея, да не погубиши наследия твоего. 7 Не обзирай стогн града и в пустых его не заблуждай. 8 Отврати око твое от жены красныя и не назирай чуждыя доброты: 9 добротою женскою мнози прельстишася, и от сея похоть яко огнь разгарается. 10 С мужатицею отнюд не седи и не медли с нею в вине: 11 да не когда приклонится душа твоя на ню, и духом твоим поползнешися в пагубу. 12 Не оставляй друга стараго, новый бо несть точен ему: 13 вино новое друг нов: аще обетшает, с веселием испиеши его. 14 Не ревнуй славе грешника: не веси бо, кое будет превращение его. 15 Не соизволи изволением нечестивых: помяни, яко даже до ада не оправдятся. 16 Далече отступи от человека, иже имать власть убивати, и не убоишися страха смертна: 17 и аще приступиши, не согрешай, да не отимет живота твоего: 18 познавай, яко посреде сетей минуеши и по забралом града ходиши. 19 По крепости твоей разсмотряй искренняго и со премудрыми советуй. 20 С разумивыми буди размышление твое, и вся повесть твоя в законе Вышняго. 21 Мужие праведнии да вечеряют с тобою, и во страсе Господни буди хвала твоя. 22 От руки художников дело похвалено бывает, и вождь людий премудр в словеси своем. 23 Страшен во граде своем муж язычен, и дерзый в словеси своем возненавиден будет. === 10 === 1 Премудр судия наказует люди своя, и владычество разумиваго благочинно будет. 2 Якоже судия людий своих, тако и слузи его, и якоже владыка града, тако и вси живущии в нем. 3 Царь ненаказаный погубит люди своя: и град населится премудростию сильных. 4 В руце Господни власть земли, и потребнаго воздвигнет во время на ней. 5 В руце Господни благое шествие мужа, и на лицы книжника возложит славу Свою. 6 Во всяцей неправде не держи гнева на искренняго и не твори ни коего в делех досаждения. 7 Возненавидена пред Богом и человеки гордыня и от обоих сотворит неправедная. 8 Царство от языка в язык преводится, ради неправды и досаждения и имений льстивых. 9 Почто гордится земля и пепел? 10 Яко в животе извергох утробу его. 11 Долгую болезнь отсецает врачь: 12 и царь днесь, а утро умрет. 13 Ибо егда умрет человек, наследит гады и звери и червие. 14 Начало гордыни человеку отступление от Господа, и егда от Сотворшаго и отвращается сердце его: 15 яко начало греха гордыня, и держай ю изрыгнет скверну. 16 Сего ради обезслави Господь в наведениих зол и низврати их до конца: 17 престолы князей низложи Господь и посади кроткия вместо их, 18 корения языков гордых исторже Господь и насади смиренныя вместо их, 19 страны языков низврати Господь и погуби их до основания земли, 20 изсуши от них и погуби их и потреби от земли память их. 21 Не создана бысть человеком гордыня, ни гнев ярости рождением жен. 22 Семя честное кое? Семя человеческое. Семя честное кое? Боящиися Господа. 23 Семя безчестное кое? Семя человеческое. Семя безчестное кое? Преступающии заповеди. 24 Посреде братии старейшина их честен, и боящиися Господа пред очима Его. 25 Богат и славен и нищь, похвала их страх Господень. 26 Неправедно есть укоряти нища разумива, и не подобает славити мужа грешника. 27 Вельможа и судия и сильный славни будут, и несть от них ни един вящший боящагося Господа. 28 Рабу разумиву свободнии послужат, и муж хитр не поропщет наказуемь. 29 Не мудрися творити дела своего, и не слави себе во время туги твоея. 30 Лучше делаяй и изюбилуяй во всем, неже славяйся и лишаяйся хлеба. 31 Чадо, кротостию прослави душу твою и даждь ей честь по достоинству ея. 32 Согрешающаго на душу свою кто оправдит? И кто прославит безчествующа живот свой? 33 Нищий славимь есть вежества ради своего, и богатый славимь есть богатства ради своего. 34 Прославляемый же в нищете, а в богатстве кольми паче? Безславный же в богатстве, а в нищете кольми паче? === 11 === 1 Премудрость смиреннаго вознесет главу его и посреде вельмож посадит его. 2 Не похвали человека во красоте его, и не буди ти мерзок человек видением своим. 3 Мала есть в пернатых пчела, и начаток сладостей плод ея. 4 Во одеянии риз не похвалися и в день славы не превозносися: яко дивна дела Господня и тайна дела Его пред человеки. 5 Мнози мучителие седоша на земли, нечаемый же увязеся венцем. 6 Мнози сильнии укорени быша зело, и славнии предани быша в руки инех. 7 Первее неже испытаеши, не порицай, уразумей прежде и тогда запрещай. 8 Прежде неже услышиши, не отвещавай, и не влагайся в среду беседы. 9 О вещи, яже ти несть на потребу, не тяжися, и на суде грешников не седай. 10 Чадо, деяния твоя да не будут о мнозе: аще умножиши, не будеши неповинен, и аще се гониши, не постигнеши, и не утечеши бежащь. 11 Есть труждаяйся и потяся и тщася, и толико паче лишается. 12 Есть слаб и требуяй заступления, лишаяйся силы, и нищетою изюбилует: 13 и очи Господни призреста ему во благая, и воздвиже и от смирения его, и вознесе главу его, и дивишася о нем мнози. 14 Благая и злая, живот и смерть, нищета и богатство от Господа суть. 15 Даяние Господне пребывает благочестивым, и благоволение Его благопоспешится во век. 16 Есть богатяйся удержанием и скупостию своею, и сия часть мзды его, 17 внегда рещи ему: обретох покой и ныне ям от благ моих. 18 И не весть, кое время приидет, и оставит я инем, и умрет. 19 Стой в завете твоем и пребывай в нем, и в деле твоем обетшай. 20 Не дивися делом грешника, веруй же Господеви и пребывай в труде твоем: 21 яко удобно есть пред очима Господнима внезапу обогатити нищаго. 22 Благословение Господне на мзде благочестиваго, и в час скор процветет благословение Его. 23 Не рцы: кая ми потреба есть, и кая отныне будут ми благая? 24 Не рцы: доволна ми суть, и чим отселе озлоблен буду? 25 В день благих забвение злых, в день же злых не воспомянутся благая: 26 яко удобно есть пред Богом, в день смерти воздати человеку по делом его. 27 Озлобление времене забытие творит сладости, и в скончании человека открытие дел его. 28 Прежде смерти не блажи ни когоже, и в чадех своих познан будет муж. 29 Не всякаго человека вводи в дом твой: многи бо суть козни льстиваго. 30 Якоже рябка уловленая в клетце (обглядает), тако сердце гордаго, и якоже соглядник назирает падения: 31 доброе бо на зло обращая, подсаду творит и на добрыя детели возложит порок. 32 От искры огненныя умножается углие, и человек грешник на кровь приседит. 33 Блюдися от злодея, зло бо содевает, да не когда порок даст ти во век. 34 Всели чуждаго в дом твой, и развратит тя мятежем и чужда тя сотворит от твоих ти. === 12 === 1 Аще добро твориши, разумей, кому твориши, и будет благодать благим твоим. 2 Добро сотвори благочестивому, и обрящеши воздаяние, и аще не от него, то от Вышняго. 3 Не будет добро прилежащему во злых и не подающему милостыни. 4 Даждь благочестивому и не заступай грешника. 5 Добро сотвори смиренному и не даждь нечестивому: возбрани хлебы твоя и не даждь ему, да не теми тя преможет: 6 сугуба бо зла обрящеши во всех благих, яже аще сотвориши ему: яко и Вышний возненавиде грешники и нечестивым воздаст месть. 7 Даждь благому и не заступай грешника. 8 Не познан будет во благих друг и не скрыется во злых враг. 9 Егда во благих будет муж, врази его во печали суть, во злых же его и друг разлучится. 10 Не ими веры врагу твоему во веки: якоже бо медь ржавеет, тако и злоба его: 11 и аще смирится и пойдет поникнув, настави душу твою и хранися от него, и будеши ему яко очищено зерцало, и уразумееши, яко не до конца оторжаве: 12 не постави его при себе, да не когда изринув тя станет на месте твоем: не посади его одесную себе, да не поищет когда седалища твоего, и на последок уразумееши словеса моя и о глаголех моих умилишися. 13 Кто помилует обаянника змием усекнена и всех приступающих ко зверем? Такожде ходящаго с мужем грешником и примешающагося грехом его: 14 час с тобою пребудет, и аще уклонишися, не стерпит. 15 Устнама своима усладит враг, и много пошепчет и речет добро глаголя: очима своима прослезится, а сердцем своим усоветует вринути тя в ров, и егда обрящет время, не насытится крове. 16 Аще срящут тя злая, ту обрящеши его первее себе, 17 и яко помагаяй подсечет пяту твою: 18 покивает главою своею и восплещет рукама своима, и много пошепчет и изменит лице свое. === 13 === 1 Касаяйся смоле очернится, и приобщаяйся гордому точен ему будет. 2 Бремене паче себе не воздвижи, и крепльшу и богатейшу себе не приобщайся. 3 Кое причастие горнцу с котлом? Сей приразится, и той сокрушится. 4 Богатый обиду сотвори, и сам приразгневася: нищий же обидимь бысть, и сам приумолится. 5 Аще потребен будеши, употребляет тя: аще же лишен будеши, оставит тя. 6 Аще имаши, поживет с тобою и истощит тя, сам же не поболит. 7 Аще востребует тя, прельстит тя и возсмееттися и даст ти надежду, возглаголет ти добре 8 и речет ти: есть ли ти что потребно? И посрамит тя брашном своим, дондеже истощит тя дващи или трищи, и на последок поругаеттися. 9 Потом узрит тя и оставит тя и главою своею покивает на тя. 10 Внимай, да не заблудиши 11 и да не смиришися во веселии твоем. 12 Егда тя сильный призовет, отступай, и толико паче призовет тя. 13 Не приближайся, да не отриновен будеши, и не стой отдалече, да не забвен будеши. 14 Не належи беседовати с ним и не веруй множайшым словесем его: многою бо беседою искусит тя и яко смеяся испытает тайная твоя. 15 Немилостив есть не соблюдаяй словес и не пощадит (ослабити) озлобления твоего и уз. 16 Блюдися и внимай зело, яко с падением твоим ходиши: 17 слышай сия во сне твоем, бодрствуй. 18 Во всем житии люби Господа и призывай Его во спасение твое. 19 Всяко животно любит подобное себе, и всяк человек искренняго своего: 20 всяка плоть по роду собирается, и подобному себе прилепится муж. 21 Кое общение волку со агнцем? Тако грешнику со благочестивым. 22 Кий мир гиене со псом? И кий мир богатому со убогим? 23 Лов львов онагри в пустыни, такожде пажити богатым убозии. 24 Мерзость гордому смирение, сице мерзость богатому нищий. 25 Богат колебляйся подтверждается от другов: убогий же падый отреян будет от другов. 26 Богату поползнувшуся мнози заступницы, возглагола нелепая, и оправдаша его: 27 убогий поползнуся, и воспретиша ему, провеща разум, и не даша ему места. 28 Богатый возглагола, и вси умолчаша и слово его вознесоша даже до облак: 29 убогий возглагола, и реша: кто сей есть? И аще преткнется, низвратят его. 30 Добро есть богатство, в немже несть греха, и зла есть нищета во устех нечестиваго. 31 Сердце человеческо изменяет лице его, или на добро или на зло. 32 След сердца во благих лице веселое, и изобретение притчей размышление со трудом. === 14 === 1 Блажен муж, иже не поползнуся устнама своима и не уязвися печалию греха. 2 Блажен, емуже не зазре душа его, и иже не спаде от надежды своея. 3 Мужеви скупому не лепо есть богатство, и человеку завидливу на что имение? 4 Собираяй от души своея инем собирает, и во благих его инии насладятся. 5 Иже себе зол, кому добр будет? И не возвеселится во имении своем. 6 Завидящаго себе самому несть злейша: и сие воздаяние злобы его. 7 Аще и добро творит, в забытии творит и на последок изявит злобу свою. 8 Лукав (есть) завидяй оком, отвращаяй лице и презираяй душы. 9 Око лихоимца не насыщается части, и обида лукаваго изсушает душу. 10 Око лукаво завидливо и о хлебе, и на трапезе своей скудно. 11 Чадо, якоже имаши, добро твори себе, и приношения Господеви достойно приноси: 12 помяни, яко смерть не замедлит, и завет адов не показан ти бысть. 13 Прежде неже умреши ты, добро твори другу и по силе твоей простри и даждь ему. 14 Не лишися от дне добра, и часть желания блага да не прейдет тебе. 15 Не инем ли оставиши притяжания твоя и труды твоя, в разделение жребия? 16 Даждь и возми, и освяти душу твою: 17 яко несть во аде взыскати сладости. 18 Всяка плоть яко риза обетшает, завет бо от века: смертию умреши. 19 Яко лист расплощаяся на древе часте, ов убо спадает, другий же прозябает: такожде и род плоти и крови, ов убо умирает, ов же родится. 20 Всякое дело гниющее изчезает, и делаяй е с ним отидет. 21 Блажен муж, иже во премудрости умрет и иже в разуме своем поучается святыни: 22 размышляяй пути ея в сердцы своем, и в сокровенных ея уразумится. 23 Изыди вслед ея яко изследник и на путех ея приседи. 24 Приницаяй сквозе оконца ея и при дверех ея послушает. 25 Обитаяй близ дому ея и вбиет кол в стены ея, поставит скинию свою вскрай ея и обитати будет во обители благих, 26 положит чада своя в покрове ея и под ветвьми ея водворится, 27 покрыется ею от зноя и во славе ея обитати будет. === 15 === 1 Бояйся Господа сотворит сие, и держайся закона постигнет ю. 2 И срящет его яко мати, и яко жена девства приимет и: 3 ухлебит его хлебом разума и водою премудрости напоит и: 4 утвердится на ней и не преклонится, и до нея пристанет и не постыдится: 5 и вознесет его паче искренних его и посреде церкве отверзет уста его: 6 веселие и венец радости и имя вечно наследит. 7 Не постигнут ея человецы неразумивии, и мужие грешнии не узрят ея: 8 далече есть от гордыни, и мужие лживии не имут помянути ея. 9 Не красна похвала во устех грешника, яко не от Господа послана бысть: 10 премудростию бо речена будет хвала, и Господь благопоспешит ей. 11 Не рцы, яко Господа ради отступих: ихже бо возненавиде, да не сотвориши. 12 Не рцы, яко Сам мя прельсти: не требует бо мужа грешника. 13 Всяку мерзость возненавиде Господь, и несть любезна боящымся Его. 14 Сам из начала сотвори человека и остави Его в руце произволения его: 15 аще хощеши, соблюдеши заповеди и веру сотвориши благоволения. 16 Предложил ти огнь и воду, и на неже хощеши, простреши руку твою. 17 Пред человеком живот и смерть, и еже аще изволит, дастся ему. 18 Яко многа премудрость Господня: крепок силою и видяй вся: 19 и очи Его на боящихся Его, и Той познает всяко дело человеческо. 20 Не заповеда ни единому же нечествовати и не даде ослабы ни единому не согрешати. === 16 === 1 Не желай чад множества неключимых, ниже веселися о сынех нечестивых: егда умножатся, не веселися о них, аще несть страха Господня с ними. 2 Не веруй животу их и не належи на множество их: 3 лучше бо един праведник, нежели тысяща (грешник), 4 и умрети безчадному, нежели имети чада нечестива: 5 от единаго бо разумна населится град, колено же беззаконных запустеет. 6 Многа сицевая виде око мое, и крепльшая сих слыша ухо мое. 7 В соборищи грешных возгорится огнь, и во языце непокориве возгорится гнев. 8 Не умолен бысть (Бог) о древних исполинех, иже отступиша крепостию своею: 9 не пощаде о жилищи Лотове, имиже возгнушася за гордыню их: 10 не помилова языка погибельнаго, вознесшагося во гресех своих, 11 и тако шесть сот тысящ пешцев, сошедшихся в жестосердии своем. И аще будет един жестоковыйный в людех, дивно есть сие, аще неповинен будет. 12 Милость бо и гнев у Него, силен умолен быти и излияти гнев. 13 По мнозей милости Его, тако много и обличение Его: мужеви но делом его судит. 14 Не убежит хищением грешный, и терпение благовернаго не лишено будет. 15 Всяцей милостыни сотворит место: кийждо бо по делом своим обрящет. 16 Не рцы, яко от Господа скрыюся, еда свыше кто мя помянет? 17 В людех множайших не воспомянен буду, что бо есть душа моя в безчисленней твари? 18 Се, небо и небо небесе Божия, бездна и земля посещением Его подвигнутся: 19 вкупе горы и основания земли, егда воззрит на ня, трепетом стрясутся, 20 и о сих не размыслит сердце: 21 и пути Его кто постигнет? И бурю юже не узрит человек, множайшая же дел Его в сокровенных: 22 дела правды Его кто возвестит? Или кто стерпит? Далече бо завет. 23 Умаляяйся сердцем размышляет сия, а муж безумен и заблуждаяй размышляет буяя. 24 Послушай мене, чадо, и научися ведения, и на словеса моя внимай сердцем твоим: 25 изявляю в мериле наказание и со испытанием возвещу ведение. 26 Судом Господним дела Его из начала, и от сотворения Его раздели части их: 27 украси во век дела Своя, и начала их в роды их: ниже взалкаша, ниже утрудишася, и не престаша от дел своих. 28 Кийждо искренняго своего не оскорби, 29 и даже до века не воспротивятся глаголголу Его. 30 И по сих Господь на землю призре и исполни ю от благ Своих: 31 душа всякаго животна покры лице ея, и в ню возвращение их. === 17 === 1 Господь созда от земли человека, и паки возврати его в ню. 2 Дни числа и время даде им, и даде им власть над сущими на ней. 3 Якоже они сами, облече их крепостию, и по образу Своему сотвори я: 4 и положи страх его на всяцей плоти, еже властелствовати зверьми (и скоты) и птицами. 5 Помышление и язык и очи, уши и сердце даде им размышляти: 6 художеством разума исполни я и добрая и злая показа им. 7 Положил есть око Свое на сердцах их, показати им величество дел Своих, 8 да имя святыни Его восхвалят и да поведают величества дел Его. 9 Приложил им художество и закон живота даде в наследие им. 10 Завет вечный постави с ними и судбы Своя показа им. 11 Величество славы видеша очеса их, и славу гласа их слыша ухо их. 12 И рече им: внемлите от всякия неправды. И заповеда им комуждо о искреннем. 13 Путие их пред Ним выну, не укрыются от очию Его. 14 Комуждо языку устроил вожда, 15 и часть Господня Израиль есть. 16 Вся дела их яко солнце пред Ним, и очи Его выну на путех их: 17 не укрышася неправды их от Него, и вси греси их пред Господем. 18 Милостыня мужа яко печать с Ним, и благодать человечу яко зеницу соблюдет. 19 По сих востанет и воздаст им, и воздаяние их на главу их воздаст: 20 обаче кающымся дал есть возвращение и утеши изнемогающих терпением. 21 Обратися убо ко Господу и остави грехи: 22 помолися пред лицем и умали претыкания: 23 восходи к Вышнему и отвратися от неправды, и зело возненавиди мерзость. 24 Вышняго кто восхвалит во аде, вместо живых и дающих исповедание? 25 От мертвеца яко ничто сущаго погибает исповедание: 26 живый же и здравый восхвалит Господа. 27 Коль велика милость Господня и очищение обращающымся к Нему? 28 Не могут бо вся быти в человецех: 29 яко не безсмертен сын человеческий. 30 Что светлее солнца? И то изчезает: и зло помыслит плоть и кровь. 31 Силу высоты небесныя Той Сам назирает, человецы же вси земля и пепел. === 18 === 1 Живый во веки созда вся обще. Господь един оправдится: 2 никтоже доволен исповести дел Его, 3 и кто изследит величия Его? 4 Державу величества Его кто изочтет? И кто приложит исповедати милости Его? 5 Не леть умалити, ниже приложити, и не леть изследити чудес Господних. 6 Егда скончает человек, тогда начинает, и егда престанет, тогда усумнится. 7 Что есть человек? И что потреба его? Что благо его? И что зло его? 8 Число дний человеку много лет сто: яко капля морския воды и зерно песка, тако мало лет в день века. 9 Сего ради долготерпе Господь на них и излия на ня милость Свою. 10 Виде и позна низвращение их, яко зло, 11 сего ради умножи милосердие Свое. 12 Милость человеча на искренняго своего, милость же Господня на всяку плоть. 13 Обличаяй и наказуяй, и научаяй и обращаяй яко пастырь стадо свое: 14 приемлющих наказание милует и тщащихся о судбах Его. 15 Чадо, во благих не даждь порока, и во всяцем даянии печали словес. 16 Не устудит ли зноя роса? Тако лучше слово, нежели даяние. 17 Не се ли, слово паче даяния блага? Обоя же у мужа благодатна. 18 Буй неблагодарно поносит, и даяние завидливаго истаевает очи. 19 Прежде неже возглаголеши, увеждь, и прежде недуга врачуйся: 20 прежде суда испытай себе и в час посещения обрящеши очищение: 21 прежде даже в недуг не впадеши, смирися, и во время грехов покажи обращение. 22 Не воспятися воздати обет благовременно и не ожидай даже до смерти оправдатися: 23 прежде даже не помолишися, уготови себе, и не буди яко человек искушая Господа. 24 Помяни гнев в день скончания и время мести во отвращении лица: 25 помяни время глада во время сытости, нищету и убожество в день богатства. 26 От утра до вечера изменяется время, и вся скора суть пред Господем. 27 Человек премудр во всем опасен будет и во днех грехов вонмет о согрешении. 28 Всяк разумив позна премудрость, и обретшему ю даст исповедание. 29 Разумнии в словесех, и тии умудришася и умножиша притчи испытны. Воздержание души. 30 Вслед похотей твоих не ходи и от похотений своих возбраняйся: 31 аще даси души твоей благоволение желания, сотворит тя обрадование врагом твоим. 32 Не веселися о мнозей сладости и не связуйся союбщением ея. 33 Не буди нищь пиршествуяй от взаимства, и ничто ти будет в мешце. === 19 === 1 Делатель пиянивый не будет богат, и уничижаяй малая по мале упадет. 2 Вино и жены превратят разумивых, и прилагаяйся любодейцам дерзший будет: 3 молие и червие наследят его, и душа дерзостная измется. 4 Емляй скоро веру легок сердцем, и согрешаяй на душу свою согрешает. 5 Веселяйся сердцем о злонравии обличен будет, противляяйся же похотем венчает живот свой. 6 Обуздаваяй язык тихомирно поживет, и ненавидяй велеречия умалит порок. 7 Словесе никогдаже повтори, и ничтоже тебе умалится. 8 На друга и на врага не поведай, и аще не будет тебе греха, не открывай: 9 слыша бо у тебе, и соблюдет тя, и во время возненавидит тя. 10 Слышал ли еси слово, да умрет с тобою: не убойся, не расторгнет тебе. 11 От лица словесе поболит буй, якоже раждающая от лица младенца. 12 Стрела вонзена в стегно плоти, тако слово во чреве буяго. 13 Обличи друга, егда еще не сотворил, и аще сотворил, да не приложит ктому: 14 обличи друга, негли не рече, и аще рече единожды, да не повторит: 15 обличи друга, многажды бо бывает навет. 16 Не всякому словеси емли веры. 17 Есть поползаяйся словом, а не душею: и кто не согреши языком своим? 18 Обличи искренняго своего прежде прещения, и даждь место закону Вышняго. Всяка премудрость страх Господень, и во всяцей премудрости творение закона. 19 И несть премудрость ведение лукавства, и несть разума, идеже совет грешных. 20 Есть лукавство, и то мерзость, и есть безумен умаляяйся премудростию. 21 Лучше есть умаляяйся в разуме боязливый, нежели избыточествуяй мудростию и преступая закон. 22 Есть коварство испытно, и то неправедно, и есть развращаяй благодать извещати хотя суд. 23 Есть лукавствуяй поник чернотою, и внутренняя его исполнь льсти: 24 понича лицем и притворяяйся глух, идеже не познан бысть, предварит тя. 25 И аще немощию крепости возбранен будет согрешити, аще обрящет время, зло сотворит. 26 От зрака познан будет муж, и сретением лица познан будет умный. 27 Одеяние мужа и смех зубов и стопы человека возвестят, яже о нем. 28 Есть обличение, еже несть красно, и есть молчай, и той мудр. === 20 === 1 Коль добро есть обличити, нежели яритися тайно: и исповедаяйся от умаления возбранен будет. 2 Коль добро обличенному явити покаяние: 3 сей бо вольнаго избежит греха. 4 Желание скопчо растлит ли девицу? Такожде творяй нуждею суды. 5 Есть молчай обретаяйся премудр, и есть ненавидимь от многия беседы. 6 Есть молчай, не имать бо ответа: и есть молчай ведый время. 7 Человек премудр умолчит до времене: продерзый же и безумный превосходит время. 8 Умножаяй словеса мерзок будет, и восхищаяй власть возненавиден будет. 9 Есть благопоспешство во злых мужеви, и есть изобретение на умаление. 10 Есть даяние, еже ти не будет на пользу, и есть даяние, егоже отдание сугубо. 11 Есть умаление славы ради, и есть, иже от смирения вознесе главу. 12 Есть купуяй многая малым и возвращаяй я седмерицею. 13 Премудрый во словеси любезна сотворит себе: благодати же безумных излиются. 14 Даяние безумнаго не упользует ти, очи бо его вместо единаго мнози ко восприятию: 15 мало даст, а много поносити будет и отверзет уста своя яко проповедник: днесь взаим даст, а утро истяжет: ненавидимь человек таковый Господу и человеком. 16 Буй речет: несть ми друга и несть хвалы благим моим: ядущии хлеб мой льстиви языком. 17 Коликощи и колицы посмеются ему? 18 Поползновение на земли лучше неже от языка: тако падение злых со тщанием приидет. 19 Человек безблагодатен баснь безвременна: во устех ненаказанных присно будет. 20 От уст буяго отвержена будет притча: не имать бо ея рещи во время свое. 21 Есть возбраняемый согрешати от скудости, и в покои своем не умилится. 22 Есть погубляяй душу свою за стыд, и от лица безумна погубит ю. 23 Есть ради стыда обещаяйся другови, и приобрете его врага туне. 24 Порок зол человеку лжа, и во устех ненаказанных присно будет. 25 Уне есть тать, нежели присно лжай: оба же пагубу наследят. 26 Обычай человека лжива безчестие, и студ его присно с ним. 27 Премудрый словесы произведет себе, и человек мудрый угоден будет вельможам. 28 Делаяй землю вознесет стог свой, и угождаяй вельможам умилостивит о неправде (своей). 29 Мзда и дарове ослепляют очи премудрых, и якоже бразды на устех отвращают обличения. 30 Премудрость сокровена и сокровище не явлено, кая польза есть во обоих? 31 Лучше человек скрываяй буйство свое, нежели человек скрываяй премудрость свою. === 21 === 1 Чадо, согрешил ли еси, не приложи ктому, и о преждних твоих помолися. 2 Якоже от лица змиина, бежи от греха: аще бо приступиши к нему, угрызнет тя: 3 зубы львовы зубы его, убивающии душы человечи. 4 Яко мечь обоюду остр всяко беззаконие, ране его несть изцеления. 5 Прещение и досаждение опустошат богатство: тако и дом гордых запустеет. 6 Моление нищаго из уст до ушию его, и суд его со тщанием грядет. 7 Ненавидяй обличения последует грешнику, и бояйся Господа обратится сердцем. 8 Познан есть издалеча сильный языком, и разумивый весть, егда поползается. 9 Созидаяй дом свой имением чуждим, якоже собираяй камение на гроб себе. 10 Изгребия собрана соборище беззаконников, и кончина их пламень огнен. 11 Путь грешников углажден от камения, а на последок его ров адов. 12 Сохраняяй закон содержит помышление свое, 13 и совершение страха Господня премудрость. 14 Не накажется, иже не есть коварен: 15 есть бо коварство умножающее горесть. 16 Разум премудраго яко потоп умножится, и совет его яко источник живота. 17 Утроба буяго яко сосуд сокрушен и всякаго разума не удержит. 18 Слово премудро аще услышит разумный, восхвалит е и к нему приложит: услыша е буй, и не угодно ему бысть, и обрати е за плещы своя. 19 Повесть буяго яко бремя на пути: во устнах же разумнаго обрящется благодать. 20 Уста премудраго взыщутся в собрании, и словеса его размышлена будут в сердцы. 21 Якоже дом разорен, тако буяго премудрость, и разум неразумнаго неиспытны глаголы. 22 Пута на ногах неразумевающым наказания, и яко ручнии оковы на руце десней. 23 Буй во смехе возносит глас свой, муж же разумный едва тихо осклабится. 24 Якоже утварь златая мудрому наказание, и якоже обручь на десней мышце его. 25 Нога буяго скора в дом, человек же многоискусный усрамится от лица. 26 Безумный дверьми приничет во храмину, муж же наказан вне станет. 27 Ненаказание человеку слушати при дверех, мудрый же отяготится безчестием. 28 Устне многоречивых не своя си поведят, словеса же мудрых в мерилех станут. 29 Во устех буих сердце их, в сердцы же премудрых уста их. 30 Кленущу нечестивому сатану, сам кленет свою душу. 31 Сквернит свою душу шепотливый, и где либо жити имать, возненавиден будет. === 22 === 1 Камени нечистому уподобися ленивый, и всяк позвиждет о безчестии его: 2 калу воловию приложися ленивый, всяк вземляй его отрясет руку. 3 Студ отцу ненаказан сын, дщи же на умаление будет. 4 Дщерь мудрая наследит мужа своего, а несрамляющаяся печаль отцу. 5 Отца и мужа посрамляет продерзая, и от обою безчестие приимет. 6 Яко мусикиа во плачи безвременная повесть: раны же и наказание во всяко время премудрости. 7 Яко слепляяй чрепие, тако учай буяго и возбуждаяй спящаго от глубокаго сна: 8 поведает дремлющему поведаяй буему, и на концы речет: что есть? 9 Над мертвым плачися, изчезе бо свет: и над буим плачися, изчезе бо разум. 10 Сладчае плачися над мертвым, яко почил есть: буяго же лучше смерть, неже живот зол. 11 Сетование о мертвеце седмь дний, о буем же и нечестивем вся дни живота его. 12 Со безумным не множи словес и ко неразумиву не ходи: 13 хранися от него, да не приимеши труда и не осквернишися во отрясении его: 14 уклонися от него, и обрящеши покой, и не уныеши безумием его. 15 Паче олова что тяжчае бывает? И что ему имя, токмо буй? 16 Песок и соль и руду железа легчае понести, неже человека неразумива. 17 Сключение древяно связано на созидание храмины во трясении не расторгнется: такожде и сердце утверждено на размышлении совета во время страха не устрашится. 18 Сердце основано на размышлении разума, яко украшение песочное на тесаней стене. 19 Яко острози на высоте лежащии противу ветру не стерпят: 20 тако сердце страшливо во размышлении буяго противу всякому страху не стерпит. 21 Убодаяй око источит слезы, и убодаяй в сердце изявляет чувство. 22 Вергаяй камень на птицы отженет я: и иже поносит друга, разорит дружбу. 23 На друга аще извлечеши мечь, не отчаявайся, есть бо возврат (любве): 24 на друга аще отверзеши уста, не убойся, есть бо примирение: 25 кроме поношения и гордыни, и откровения тайны и язвы лестныя, сих бо ради отбежит всяк друг. 26 Веру стяжи в нищете со искренним, да во благих его вкупе возвеселишися: 27 во время скорби пребывай с ним, да в наследии его сонаследиши. 28 Прежде огня пещная пара и дым: тако прежде кровей укоризна. 29 Друга заступати не усрамлюся и от лица его не скрыюся: 30 аще ми приключатся и злая его ради, всяк слышай сохранится от него. 31 Кто даст ми во уста моя хранилище и на устне мои печать разумну, да не падуся от них, и язык мой да не погубит мя? === 23 === 1 Господи Отче и Владыко живота моего, не остави мене в совете их и не даждь ми впасти в ня. 2 Кто возложит на помышление мое раны и на сердце мое наказание премудрости, да о неразумиих моих не пощадят, и да не прейдут греси их? 3 Яко да не умножатся неведения моя и греси мои премнози да не будут, и падуся пред супостаты, и порадуетмися враг мой. 4 Господи Отче и Боже живота моего, не даждь возношения очима моима и вожделение отврати от мене. 5 Чрева похоть и блудодеяния да не оымут мя, и безстудней души не предаждь мене. 6 Послушайте, чада, наказания уст: храняй бо не ят будет устнама своима. 7 Устнама своима ят будет грешник, и клеветник и гордый поползнется в них. 8 Заклинанию не обучай уст своих 9 и клятися именем Святым не навыкай. 10 Якоже бо раб истязуемь часто от ран не умалится, такожде и кленыйся именем Святым всегда от греха не очистится. 11 Муж кленыйся много исполнится беззакония, и не отступит от дому его язва: 12 аще согрешит, грех его на нем, и аще презрит, сугубо согрешит: 13 и аще вотще кляся, не оправдится, исполнится бо дом его нападения. 14 Есть беседа облечена смертию: да не обрящется во наследии Иаковли: 15 от благочестивых бо вся сия отступят, и во грехи не впадутся. 16 В ненаказании неключимем не обучай уст своих: есть бо в нем слово греха. 17 Помяни отца твоего и матерь твою, посреде бо вельмож седиши: 18 да не како забвен будеши пред ними, и обычаем своим обуяеши и похощеши, дабы ты не родился, и день рождения твоего прокленеши. 19 Человек обучаяся словесем поношения во всех днех своих не научится. 20 Два вида умножают грехи и третий наводит гнев: 21 душа тепла, яко огнь горящь, не угаснет, дондеже поглощена будет: 22 человек блудник в теле плоти своея не престанет, дондеже возжжет огнь. 23 Человеку блудну всяк хлеб сладок, не престанет, дондеже умрет. 24 Человек преступаяй ложе свое, глаголя в души своей: кто мя видит? 25 Тма окрест мене, и стены закрывают мя, и никтоже мя видит, кого убоюся? Грехов моих не воспомянет Вышний. 26 И очи человечестии страх его: 27 и не разуме, яко очи Господни тмами тем крат светлейшии солнца суть, 28 прозирающии вся пути человеческия и разсматряющии в тайных местех: 29 прежде неже создана быша, вся уведена ему, такожде и по скончании. 30 Сей на путех града отмщен будет, и идеже не надеяшеся, ят будет. 31 Такожде и жена оставльшая мужа своего и приемлющая наследника от иного: 32 первое бо от закона Вышняго отступи, и второе мужу своему согреши, и третие блудом прелюбодействова, от чуждаго мужа чада сотвори: 33 сия пред собор изведена будет, и на чадех ея посещение будет: 34 не укоренятся чада ея в корень, и ветви ея не сотворят плода: 35 и оставит на клятву память свою, и поношение ея не потребится. 36 И уразумеют оставльшиися, яко ничтоже лучше страха Господня, и ничтоже сладчае, токмо внимати заповедем Господним. 37 Слава велия еже последовати Богу, долгота же дний еже прияту тебе быти от Него. === 24 === 1 Премудрость похвалит душу свою и посреде людий своих восхвалится. 2 В церкви Вышняго отверзет уста своя и прямо силе Его восхвалится: 3 аз из уст Вышняго изыдох и яко мгла покрых землю, 4 аз на высоких вселихся, и престол мой во столпе облачне, 5 круг небесный обыдох едина и во глубине бездны походих, 6 волну морскую и всю землю, и вся люди и язык стяжах, 7 со всеми сими покоя взысках, и во наследии чием водворюся? 8 Тогда заповеда ми Создатель всех, и Создавый мя препокои скинию мою и рече: 9 во Иакове вселися и во Израили наследствуй. 10 Прежде века из начала созда мя, и даже до века не оскудею. 11 Во скинии святей пред Ним послужих и тако в Сионе утвердихся: 12 во граде возлюбленнем такожде мя препокои, и во Иерусалиме власть моя: 13 и укоренихся в людех прославленных, в части Господни наследия Его. 14 Яко кедр вознесохся в Ливане и яко кипарис на горах Аермонских, 15 яко финикс возвысихся на брезех и яко сад шипковый во Иерихоне, 16 яко маслина благолепна на поли, и вознесохся яко явор: 17 якоже корица и яко аспалаф ароматов дах воню, и яко смирна избранна издах благоухание, 18 яко халвани и оникс и стакти, и яко ливаново курение во скинии. 19 Аз яко теревинф распрострох ветвия моя, и ветви моя ветви славы и благодати: 20 аз яко виноград прорастих благодать, и цвети мои плод славы и богатства. 21 Приступите ко мне, желающии мене, и от плодов моих насытитеся: 22 память бо моя сладка паче меда, и наследие мое паче сота медвена. 23 Ядущии мя еще взалчут, и пиющии мя еще вжаждутся: 24 слушаяй мене не посрамится и делающии у мене не согрешат. 25 Сия вся книга завета Бога Вышняго, 26 закон, егоже заповеда Моисей, наследие сонмом Иаковлим: 27 насыщая яко Фисон премудростию и яко Тигр во дни новоплодий, 28 исполняяй яко Евфрат разума и якоже Иордан во днех жатвы, 29 являяй яко свет наказание и якоже Гион во дни оымания вина. 30 Не сконча первый уразумети ея, такожде и последний не изследи ея: 31 ибо паче моря умножися размышление ея, и совет ея паче бездны велия. 32 И аз яко раскопание из реки и якоже водотечие изыдох в рай. 33 Рех: напою мой вертоград и упою себе луг: 34 и се, раскопание ми бысть рекою, и река моя бысть морем. 35 Понеже наказание яко утро просвещу и проявлю е даже до далече: 36 еще учение якоже пророчество излию и оставлю е в роды вечны. 37 Видите, яко не себе единому трудихся, но всем ищущым ея. === 25 === 1 Треми украсихся и стах красна пред Господем и человеки: 2 единомыслием братий и любовию искренних, и муж и жена между собою согласни. 3 Три же виды возненавиде душа моя, и зело ми омерзе живот их: 4 убога горда, и богата лжива, и стара прелюбодея умаляющагося умом. 5 Иже в юности не собрал еси, то како можеши обрести в старости твоей? 6 Коль есть красен сединам суд, и старейшым разумети совет? 7 Коль красна старым премудрость и славным разумение и совет? 8 Венец старцем многоразличное искусство, и похваление их страх Господень. 9 Девять помышлений ублажих в сердцы моем, а десятое изреку языком: 10 человек веселяйся о чадех, живяй и зряй падение врагов. 11 Блажен живяй со женою разумною, и иже языком (своим) не поползнуся, и иже не поработа недостойному себе. 12 Блажен, иже обрете мудрость и поведаяй во уши послушающих. 13 Коль велик, иже мудрость обрете, но несть паче боящагося Господа. 14 Страх Господень паче всего предуспе, держай его кому уподобится? 15 Всяка язва и не язва сердечная и всякое лукавство и не лукавство женское: 16 всякое нападение и не нападение ненавидящих, и всякое мщение и не отмщение врагов. 17 Несть главы паче главы змиины, и несть ярости паче ярости вражия. 18 Лучше жити со львом и змием, неже жити со женою лукавою. 19 Лукавство жены изменяет зрак ея и омрачает лице свое яко вретище: 20 посреде искренних своих возляжет муж ея, и слышав воздохнет горько. 21 Мала есть всяка злоба противу злобе женстей: жребий грешника спадет на ню. 22 Якоже восхождение по песку ногама стараго, тако жена язычна мужу молчаливу. 23 Не сматряй на красоту женскую и жены в похоть не пожелай. 24 Гнев и безстудие и срамота велика жена, аще обладает мужем своим. 25 Сердце смирено, и лице дряхло, и язва сердечна жена лукава: 26 руце немощныя и колена разслаблена, (жена) яже не блажит мужа своего. 27 От жены начало греха, и тою умираем вси. 28 Не даждь воде прохода, ни жене лукаве дерзновения: 29 аще не ходит под рукою твоею, отсецы ю от плоти твоея. === 26 === 1 Жены добрыя блажен есть муж, и число дний его сугубо. 2 Жена добляя веселит мужа своего и лета его исполнит миром. 3 Жена добра часть блага, в части боящихся Господа дана будет. 4 Богатаго же и убогаго сердце благо, во всяко время лице тихо. 5 От трех убояся сердце мое, и от лица четвертаго устрашихся: 6 предания града и собрания народа, и оболгания над смерть, вся тяжестна. 7 Болезнь сердца и сетование жена ревнива о жене, 8 и язва языка всем приобщающаяся. 9 Воловое иго движимо жена лукавна, держайся ея яко емляйся скорпии. 10 Гнев велик жена пиянчива, и студа своего не покрыет. 11 Блуд женский в возвышении очес и бровьми ея познан будет. 12 Над дщерию безстудною утверди стражу, да не попущение обретши употребит себе. 13 Вслед безстудна ока сохранися и не дивися, аще в тя согрешит: 14 яко жажден путник отверзет уста и от всякия воды ближния испиет, 15 прямо всякаго кола сядет и прямо стрелы отверзет тул. 16 Благодать женска возвеселит мужа ея, и кости его утучнит художество ея. 17 Даяние Господне жена молчалива, и несть искупа наказанныя души. 18 Благодать на благодати жена стыдлива, 19 и несть мерило всякое достойное воздержныя души. 20 Солнце восходящее на высоких Господних, 21 и доброта жены добрыя в красоте дому ея: 22 светилник сияя на свещнице святе, и доброта лица на возрасте постояннем. 23 Столпи злати на подстолпиих сребряных, и нозе красни на плеснах добре стоящих. 24 О двоих печально бысть сердце мое, и о третием ярость ми найде: 25 муж борец лишаяся за скудоту, и мужие разумиви аще отриновени будут: 26 возвращаяся от правды на грех, Господь уготовит его на мечь. 27 Едва измется купец от погрешения, и не оправдится корчемник от греха. === 27 === 1 За скудость мнози согрешиша, и ищай обогатети отвратит око. 2 Посреде собраных камений вонзется кол, и посреде продаяния и купли совершится грех. 3 Аще не держится страха Господня со тщанием, вскоре превратится дом его. 4 Трясением решета останет сметие: такожде отреби человечестии в помышлении его. 5 Сосуды скудельничи искушает пещь, и искушение человеческо в помышлении его. 6 Возделание древа являет плод его: тако слово помышления в сердцы человечестем. 7 Прежде беседы не похвали мужа: сия бо искушение (есть) человеков. 8 Аще гониши правду, постигнеши ю и облечешися в ню яко в подир славы. 9 Птицы с подобными себе обитают, и истина к творящым ю обратится. 10 Лев ловит лов, такожде и греси делающих неправду. 11 Повесть благочестиваго всегда премудрость: безумный же яко луна изменяется. 12 Посреде безумных блюди время, посреде же размышляющих учащай. 13 Повесть буих мерзость, и смех их во услаждении греха. 14 Беседа многокленущагося подимет власы, и свар его затчение ушес. 15 Пролитие крове свар гордых, и укоризна их слух тяжкий. 16 Открываяй тайная погубляет верность и не обрящет друга противу души своея. 17 Возлюби друга и уверися с ним: 18 аще же открыеши тайны его, не имаши гнати по нем. 19 Якоже бо погубит человек врага своего, тако погубиши дружбу искренняго: 20 и якоже птицу из руки твоея испустиши, тако испустил еси искренняго и не уловиши его: 21 не гонися за ним, яко далече отступи и избеже яко серна от сети. 22 Яко струп есть обязати, и клеветы есть измена: 23 открывый же тайная погуби верность. 24 Помизаяй оком кует зло, и никтоже его отставит от того: 25 пред очима твоима усладит уста своя и словесем твоим подивится, 26 последи же развратит уста своя и в словесех твоих даст соблазн. 27 Многая возненавидех и не обретох подобна ему, и Господь возненавидит его. 28 Вергаяй камень на высоту на главу свою вергает, и язва льстива раздерет струпы. 29 Ископоваяй ров впадется в онь, и распростираяй сеть увязнет в ней. 30 Творяй зло ввалится в не и не познает, откуду приидет ему. 31 Поругание и поношение гордых, и отмщение яко лев уловит их. 32 Сетию уловятся веселящиися о падении благоверных, и болезнь изнурит я прежде смерти их. 33 Гнев и ярость, и сия суть мерзость, и муж грешник одержан ими будет. === 28 === 1 Отмщаяй от Господа обрящет отмщение, и грехи своя соблюдаяй соблюдет. 2 Остави обиду искреннему твоему, и тогда помольшутися, греси твои разрешатся. 3 Человек на человека сохраняет гнев, а от Господа ищет изцеления: 4 над человеком подобным себе не имать милости, а о гресех своих молится: 5 сам сый плоть, хранит гнев: кто очистит грехи его? 6 Помяни последняя и престани враждовати, (помяни) истление и смерть и пребывай в заповедех. 7 Помяни заповеди и не гневайся на ближняго, 8 и завет Вышняго и презирай невежество. 9 Удаляйся от свара и умалиши грехи: 10 человек бо яр разжизает свар, и муж грешник возмятет други и посреде мирных вложит клевету. 11 Яково вещество огня, тако возгорится: якова крепость свара, такожде и огнь разгорится: 12 якова крепость человеча, такожде ярость его будет, и якоже богатство его, возвысит гнев свой. 13 Рвение скорое возжигает огнь, и свар наглый проливает кровь. 14 Аще подуеши на искру, возгорится: и аще плюнеши на ню, угаснет: обоя же изо уст твоих исходят. 15 Шепотника и двоязычника подобает клясти: многих бо мирных погубиша. 16 Язык трегубый многи потрясе и разлучи я от языка во язык, 17 и грады тверды разори и домы вельможей преврати: 18 язык трегубый жены доблия изгна и лиши я от трудов их: 19 внемляй ему не имать обрести покоя, ниже вселится со безмолвием. 20 Язва бичная струпы творит, язва же язычная сокрушает кости. 21 Мнози падоша острием меча, но не якоже падшии языком: 22 блажен, иже укрыется от него, иже не пройде в ярости его, иже не повлече ига его и узами его не связан бысть: 23 иго бо его иго железно, и узы его узы медяны: 24 смерть люта смерть его, и паче его лучше есть ад. 25 Не обладает благоверными, и в пламени его не сгорят. 26 Оставляющии Господа впадутся в онь, и в них возгорится и не угаснет: послан будет на ня яко лев, и яко пард погубит я. 27 Виждь, огради стяжание твое тернием, 28 сребро твое и злато твое свяжи, 29 и словесем твоим сотвори вес и меру, и устам твоим сотвори дверь и завору. 30 Внимай, да не како поползнешися им, ниже падеши прямо ловящему. === 29 === 1 Творяй милость взаим даст искреннему, и укрепляяй руку свою соблюдает заповеди. 2 Даждь взаим искреннему во время требования его и паки воздаждь искреннему во время: 3 утверди слово и уверися с ним, и во всяко время обрящеши потребу твою. 4 Мнози яко обретение возмнеша заимование и задаша труд помощником их: 5 дондеже возмет, облобызает руце его и на имение искренняго смирит глас: 6 и во время воздаяния провлечет время, и воздаст словеса уныния, и время обвинит. 7 Аще же возможет воздати, едва половину принесет и вменит е яко обретение: 8 аще же ни, лиши его имений своих и стяжа его врага туне: 9 клятвы и укоризны воздаст ему и вместо славы воздаст ему безчестие. 10 Мнози убо за лукавство отвергошася, и лишитися туне убояшася. 11 Обаче смиренному долготерпи и милостынею не продолжи его: 12 заповеди ради заступи нищаго, и по нищете его не отврати его тща. 13 Погуби сребро брата ради и друга, и да не оржавеет под каменем во пагубу. 14 Положи сокровище свое по заповедем Вышняго, и упользует тя паче нежели злато. 15 Затвори милостыню во клетех твоих, и та измет тя от всякаго озлобления: 16 паче щита тверда и паче копия тяжка, противу врагу поборет по тебе. 17 Муж благ споручник будет искреннему, и погубивый стыд оставит его. 18 Благодати споручника не забуди: даде бо душу свою за тя. 19 Доброе поручение отвращает грешник, неблагодарный же мыслию оставит избавльшаго и. 20 Поручение многих погуби благоуправляющих и поколеба их яко волна морская: 21 мужы сильны пресели, и заблудиша во языцех чуждих. 22 Грешник в поручение впадает, и гоняй дела чуждая впадет в суды. 23 Заступи искренняго по силе твоей, и внимай себе, да не впадеши. 24 Начало жития человеча вода и хлеб, и риза и дом покрываяй студ. 25 Лучше житие нищаго под кровом бервенным, нежели брашна добра в чуждих. 26 О мале и о велице доволен буди. 27 Живот зол из дому в дом, и аможе преселишися, не отверзеши уст своих: 28 угостиши и напоиши неблагодарных, и к сим зло услышиши: 29 приступи, пришелче, украси трапезу, и аще что в руце твоей, ухлеби мя: 30 изыди, пришелче, от лица славы, прииде бо мне в гости брат, и потреба дому. 31 Тяжка сия человеку имущу разум, запрещение храмины и поношение заимодавца. === 30 === 1 Любяй сына своего участит ему раны, да возвеселится в последняя своя. 2 Наказуяй сына своего насладится о нем и посреде знаемых о нем похвалится. 3 Учай сына своего раздражит врага и пред други о нем возрадуется. 4 Умре отец его, и аки не умре: подобна бо себе остави по себе. 5 Во житии своем виде и возвеселися о нем и при кончине своей не оскорбися: 6 противу врагом остави местника и другом воздающа благодать. 7 Угождаяй сыну обяжет струпы его, и о всяцем вопли возмятется утроба его. 8 Конь неукрощен свиреп бывает, и сын самовольный продерз будет. 9 Ласкай чадо, и устрашит тя, играй с ним, и опечалит тя. 10 Не смейся с ним, да не поболиши о нем и на последок стиснеши зубы твоя. 11 Не даждь ему власти в юности и не презри неведения его: 12 сляцы выю его в юности и сокруши ребра его, дондеже млад есть, да не когда ожестев не покориттися. 13 Накажи сына твоего и делай им, да не в безстудии его поткнешися. 14 Лучше нищь здрав и крепок в силе своей, нежели богат уранен телом своим. 15 Здравие и крепость лучше есть всякаго злата, и тело здравое, нежели богатство безчисленное. 16 Несть богатство лучше здравия телеснаго, и несть веселие паче радости сердечныя. 17 Лучше есть смерть паче живота горька или недуга долгаго. 18 Благая излиянная пред усты затворенными предложения брашен предлежащая у гроба. 19 Кая польза идолу от жертвы? Не имать бо ясти, ни обоняти: 20 тако гонимый от Господа, 21 зряй очима и стеняй, якоже евнух осязаяй девицу и воздыхаяй. 22 Не вдаждь в печаль душу твою и не оскорби себе советом твоим. 23 Веселие сердца живот человека, и радование мужа долгоденствие. 24 Люби душу твою и утешай сердце твое, и печаль от себе отрини далече: 25 многи бо печаль уби, и несть пользы в ней. 26 Рвение и ярость умаляют дни, и печаль прежде времене старость наводит. 27 Светло сердце и благо о брашне и о яди своей попечется. === 31 === 1 Бдение богатства растлевает плоти, и попечение его отгонит сон: 2 печаль бдения отторгает дремание, и недуг лют отимает сон. 3 Трудится богатый в собирании богатства и в покои насыщается сладостей своих: 4 трудится убогий во умалении жития, и в покои скудный бывает. 5 Любяй злато не оправдится, и гоняй растление сим насытится. 6 Мнози падоша злата ради, и бысть пагуба их прямо лицу их. 7 Древо претыкания есть всем жрущым ему, и всяк безумлив ят будет им. 8 Блажен богатый, иже обретеся без порока и иже вслед злата не иде. 9 Кто есть сей? И ублажим его, сотвори бо дивная в людех своих. 10 Кто искушен им и совершен бысть? И будет на похваление. 11 Кто могл преступити, и не преступи, и зло сотворити, и не сотвори? 12 Утвердятся благая его, и милостыни его исповесть собрание. 13 Сел ли еси при трапезе велицей, не разверзи на ней гортани твоего 14 и не рцы: много на ней есть. Помяни, яко зло есть око лукаво. 15 Лукавнее ока что есть создано? Сего ради о коей либо вещи слезит. 16 Идеже аще узриши, не простирай руки и не гнетися с ним в солило. 17 Разсуждай, яже суть искренняго, от тебе самаго, и о всяцей вещи размышляй. 18 Яждь яко человек предлежащее ти и не пресыщайся, да не возненавиден будеши. 19 Престани первый ради наказания и не пресыщайся, да не преткнешися: 20 и аще сядеши посреде многих, первее их не простри руки твоея. 21 Коль доволно человеку наказанному малое, и на одре своем не постраждет зла. 22 Сон здравый от чрева умеренна: воста заутра, и душа его с ним: 23 труд бдения и холера и чревоболение с мужем ненасытным. 24 И аще отяготился еси брашны, востани от трапезы и почиеши. 25 Послушай мене, чадо, и не уничижи мене, и на последок обрящеши словеса моя. 26 Во всех делех твоих буди тщателен, и всяк недуг не имать приступити к тебе. 27 Щедраго хлебами благословят устне, и послушество доброты его верно. 28 На скупаго в хлебех поропщет град, и послушество злобы его известно. 29 В вине не мужайся, многих бо погуби вино. 30 Пещь искушает железо в калении, тако вино сердца гордых во пиянстве. 31 Полезно вино животу человечу, аще пиеши е в меру его. 32 Кий живот побеждаемому вином? Сие бо на веселие человеком создано есть. 33 Радование сердца и веселие души вино пиемо во время прилично: 34 горесть души вино пиемо много в распри и клевете: 35 умножает пиянство ярость безумнаго на претыкание, умаляя крепость и сотворяя струпия. 36 В пире вина не обличай искренняго и не уничижи его в веселии его: 37 словесе поносна не рцы ему и не оскорби его во истязании. === 32 === 1 Старейшину ли тя поставиша, не возносися, но буди в них яко един от них: 2 попецыся ими, и тако сяди. И всю потребу твою сотворив возлязи, 3 да возвеселишися их ради и красоты ради приимеши венец. 4 Глаголи, старейшино, подобает бо ти, 5 испытною хитростию и не возбрани мусикии: 6 идеже слушание (будет), не изливай беседы и без времене не мудрися. 7 Печать анфракса на украшении злате, и сладкогласие мусикиев в пиршестве вина. 8 Во украшении златем печать смарагдова, сладкопение мусикиев по сладцем вине. 9 Глаголи, юноше, аще тебе есть потреба, едва дващи, аще вопрошен будеши: 10 сократи слово, малыми многая (изглаголи): буди яко ведый и вкупе молчя. 11 Посреде вельмож не равен творися и иному глаголющу не многослови. 12 Прежде грома предваряет молния, и прежде стыдливаго предваряет благодать. 13 Во время воставай, а не последи (иных), в дом отиди и не ленися: 14 тамо играй и твори помышления твоя, и не согрешай словом гордым. 15 И о сих благослови Сотворшаго тя и Упоевающаго тя от благ Своих. 16 Бояйся Господа приимет наказание, и утренюющии обрящут благоволение. 17 Ищай закона насытится его, и лицемерствуяй соблазнится о нем. 18 Боящиися Господа обрящут суд и оправдания яко свет возжгут. 19 Человек грешник укланяется от обличения и по воли своей обретает извинение. 20 Муж советный не презрит размышления, чуждый же и гордый не убоится страха и по сотворении своем без совета. 21 Без совета ничесоже твори, и егда сотвориши, не раскаявайся. 22 На пути падения не ходи и не претыкайся о камение: 23 не веруй пути, в немже не претыкаешися, и от чад своих хранися. 24 Во всяцем деле блазе веруй душею твоею, ибо сие есть соблюдение заповедий. 25 Веруяй закону внимает заповедем, и уповаяй на Господа не умалится. === 33 === 1 Боящагося Господа не срящет зло: аще и в напасть впадет, паки измет его. 2 Муж премудр не возненавидит закона, сумняйжеся в нем якоже в бури корабль. 3 Человек разумив веру имет закону, и закон ему верен, 4 яко вопрошение праведных. Приготови слово, и тако услышан будеши: сочетай наказание и тогда отвещай. 5 Коло колесничное утроба буяго, и якоже ось вертящаяся помышление его. 6 Конь на яждении яко друг лицемерен, под всяким яздящим ржет. 7 Почто день дне преспевает, и всяк свет дне лета от солнца? 8 Разумом Господним разлучистася, и измени время и праздники: 9 от них вознесе и освяти, и от них положи в число дний. 10 И человецы вси от персти, и от земли создан бысть Адам. 11 Множеством ведения Господь раздели я и измени пути их. 12 От них благослови и вознесе, и от них освяти и к Себе приближи, от них прокля и смири и соврати их от стояния их. 13 Яко брение скудельника в руце его, вси путие его по изволению его: тако человецы в руце Сотворшаго их, имже воздаст по суду Своему. 14 (Яко) противу злому благое и противу смерти живот, тако противу благочестиваго грешник. И сице воззри во вся дела Вышняго: двое двое, едино противу единому. 15 Аз же последний бдех и наследих якоже от начатка, якоже собираяй вслед оымателей виноградных. 16 Во благословение Господне достигох и яко обыматель наполних точило. 17 Разсмотрите, яко не себе единому трудихся, но всем ищущым наказания. 18 Послушайте мене, вельможи людий, и властелие собора, внушите. 19 Сыну и жене, брату и другу не даждь власти на себе в животе своем, 20 и не даждь иному имения своего, да не раскаешися требуяй их: 21 дондеже жив еси и дыхание в тебе, не измени себе всяцей плоти: 22 лучше бо есть, да тебе молятся чада твоя, нежели тебе зрети в руце чад твоих. 23 Во всех делех твоих буди преспевая и не даждь порока на славу твою. 24 В день скончания дний живота твоего и во время смерти твоея раздели наследие твое. 25 Пища и жезлие и бремя ослу: хлеб и наказание и дело рабу. 26 Накажи раба, и обрящеши покой: ослаби руку ему, и искати начнет свободы. 27 Иго и ремень выю прекланяют, и рабу лукаву узы и раны. 28 Вложи его в дело, да не празден будет, мнозей бо злобе научила праздность: 29 устрой его в делех, якоже подобает ему, и аще не послушает, всади его во оковы. 30 И не буди излишен над всякою плотию, и без суда не сотвори ничесоже. 31 Аще ти есть раб, да будет якоже ты, понеже кровию стяжал еси его: 32 аще ти есть раб, имей его якоже брата, понеже яко души твоея востребуеши его: 33 аще озлобиши его неправедно, и востав отбежит, киим путем поищеши его? (не веси.) === 34 === 1 Тщетны надежды и лживы (суть) неразумиву мужу, и сония вперяют безумных. 2 Якоже емляйся за стень и гоняй ветры, такожде емляй веру сном: 3 сие по сему видение снов, прямо лицу подобие лица. 4 От нечистаго что очистится, и от лживаго кая истина? 5 Волшебства и обаяния и сония суетна суть, и якоже раждающия сердцу мечтания бывают: 6 аще не от Вышняго послана будут на посещение, не вдаждь в ня сердца твоего: 7 многих бо прельстиша сония, и отпадоша надеющеся на ня. 8 Без лжи совершится закон, и премудрость во устех верных совершение. 9 Муж ученый уведа много, и многоискусный повесть разум. 10 Иже не искусися, мало весть: обходяй же страны умножит хитрость. 11 Много видех во обхождении моем, и вящшая словес моих разум мой: 12 многащи даже до смерти бедствовах, и спасен бых сих ради. 13 Дух боящихся Господа поживет, надежда бо их на Спасающаго я. 14 Бояйся Господа ни чего убоится и не устрашится, Той бо надежда ему. 15 Боящемуся Господа блаженна душа: чим одержится, и кто ему утверждение? 16 Очи Господни на любящыя Его: защищение силы и утверждение крепости, покров от вара и покров в полудне, хранение от претыкания и помощь от падения: 17 воздвизаяй душу и просвещаяй очи, изцеление даяй, живот и благословение. 18 Иже приносит жертву от неправды, приношение порочно, и не суть во благоволение дары беззаконных. 19 Не благоволит Вышний о приношении нечестивых, ни множеством жертв очистит грехи. 20 Яко жряй сына пред отцем его, тако приносяй жертвы от имения убогих. 21 Хлеб убогим живот убогих, лишаяй его человек кровей есть. 22 Убивает искренняго отемляй ему поживление, и проливает кровь лишаяй мзды наемника. 23 Един созидаяй, а другий разоряяй, что успеет более, токмо труд? 24 Единому молящуся, а другому проклинающу, коего глас услышит Владыка? 25 Омываяйся от мертвеца и паки прикасаяйся ему, кая польза ему от бани? 26 Тако человек постяйся о гресех своих и паки ходяй и таяжде творяй, мольбу его кто услышит, и что успе смирением своим? === 35 === 1 Соблюдаяй закон умножает приношения, приносит жертву спасения внимаяй заповедем. 2 Воздаяй благодать аки приносяй семидал, и творяй милостыню аки жряй жертву хваления. 3 Благоволение Господне еже отступити от лукавства, и очищение есть еже отступити от неправды. 4 Не явися пред Господем тощь: вся бо сия заповеди ради. 5 Приношение праведнаго утучняет олтарь, и благоухание его пред Вышним: 6 жертва мужа праведнаго приятна, и память ея не забвена будет. 7 Оком благим прослави Господа и не умали от начатка рук твоих: 8 во всяцем даянии весело имей лице твое и со веселием освяти десятину. 9 Даждь Вышнему по даянию Его, и оком благим приобретение руки: 10 яко Господь воздаяй есть и седмерицею воздаст ти. 11 Дара не умаляй, ибо не приимет, и не внимай жертве неправедней: 12 яко Господь судия есть, и несть у Него славы лица. 13 Не приимет лица на убога и молитву обидимаго услышит: 14 не презрит молитвы сираго, ни вдовицы, егда излиет прошение. 15 Не слезы ли вдовичи по ланитома текут, и вопль ея на наведшаго я? 16 Служай (Богу) во благоволении прият будет, и молитва его до облак дойдет: 17 молитва смиреннаго пройде облаки, и дондеже приближится, не утешится, 18 и не отступит, дондеже посетит Вышний, судит в правду и сотворит суд: 19 и Господь не замедлит, ниже имать долготерпети о них, дондеже сокрушит чресла немилостивых. 20 И языком воздаст месть, дондеже потребит множество досадителей и скиптры неправедных сокрушит: 21 дондеже воздаст человеку по деянием его, по делом человеческим и помышлением их: 22 дондеже разсудит судом люди Своя и возвеселит я милостию Своею. 23 Коль красна милость во время скорби его, якоже облацы дождевнии во время бездождия. === 36 === 1 Помилуй ны, Владыко, Боже всех, и воззри, 2 и наложи страх Твой на вся языки: 3 воздвигни руку Твою на языки чужды, и да узрят силу Твою. 4 Якоже пред ними освятился еси в нас, такожде пред нами возвеличися на них: 5 и да познают Тя, якоже и мы познахом Тя, яко несть Бога разве Тебе, Господи. 6 Обнови знамения и измени чудеса, 7 прослави руку и мышцу десную (Твою), воздвигни ярость и излий гнев, 8 изми сопостата и сотри врага, 9 поспеши время и помяни клятву, и да поведят величия Твоя. 10 Гневом огня пояден да будет спасаяйся, и озлобляющии людий Твоих да обрящут пагубу. 11 Сокруши главы князей вражиих, глаголющих: несть разве нас. 12 Собери вся колена Иаковля и наследствуй их якоже от начала. 13 Помилуй люди, Господи, нареченныя именем Твоим, и Израиля, егоже первенцем нарекл еси. 14 Ущедри град святыни Твоея, Иерусалим, место покоища Твоего. 15 Исполни Сиона взяти словеса Твоя, и от славы Твоея люди Твоя. 16 Даждь свидетелство сущым от начала тварем Твоим и воздвигни пророчествия сущая о имени Твоем: 17 даждь мзду терпящым Тебе, и пророцы Твои да уверятся. 18 Услыши, Господи, мольбы молитвенник Твоих, по благословению Аароню о людех Твоих, 19 и уразумеют вси сущии на земли, яко Ты Господь еси, Бог веков. 20 Всяко брашно яст чрево: есть же брашно брашна добрее. 21 Гортань вкушает брашна от лова, тако сердце разумиво словеса ложна. 22 Сердце строптиво даст печаль, и человек многоискусный воздаст ему. 23 Всякаго мужеска полу приимет жена: есть же дщерь дщере лучше. 24 Доброта женска веселит лице и над все желание человеческо предуспевает: 25 аще есть на языце ея милость и кротость, несть муж ея точен сыном человеческим. 26 Стяжавый жену начинает имети стяжание, помощника по себе и столпа покою. 27 Идеже несть ограды, расхищено будет имение, и идеже несть жены, воздохнет скитаяся: 28 кто бо поверит вооружену разбойнику преходящу от града во град? 29 Такожде и человеку не имущу гнезда и обитающу, идеже обвечеряет. === 37 === 1 Всяк друг речет: содружихся ему и аз. Но есть друг именем точию друг. 2 Печаль не пребывает ли до смерти, приятель и друг претворяяйся во врага? 3 О, лукаво помышление, откуду извалилося еси покрыти сушу лестию? 4 Приятель о веселии дружни срадуется, а во время скорби противен будет: 5 приятель со другом труждается чрева ради и противу брани возмет щит. 6 Не забуди друга в души твоей и не поминай его во имении твоем. 7 Всяк советник возносит совет, но есть совещаяй о себе самем. 8 От советника храни душу твою и разумей первее, что ему потреба: сам бо себе совещавает: 9 да не когда возложит на тя жребий и речет ти: добр путь твой: и станет прямо, видети, что сбудется тебе. 10 Не совещавай с подзирающим тя и от завидящих ти скрый совет: 11 со женою о ревнующей ей и со страшливым о брани, с купцем о мене и со купующим о продажи, со завидливым о благодарении 12 и с немилостивым о помиловании, с ленивым о всяцем деле 13 и с наемником годовым о совершении, с рабом ленивым о мнозе делании. 14 Не внемли сим о всяцем совещании, 15 но токмо с мужем благоговейным присно буди, егоже аще познаеши соблюдающа заповеди Господни, 16 иже душею своею по души твоей, и аще согрешиши, споболит с тобою. 17 И совет сердца устави, несть бо ти вернее его: 18 душа бо мужа возвещати некогда более обыче, нежели седмь блюстителие высоце седящии на стражи. 19 И о всех сих помолися Вышнему, да управит во истине путь твой. 20 Начаток всякаго дела слово, и прежде всякаго делания совет. 21 След изменения сердечна лице. Четыри части происходят: добро и зло, живот и смерть: и обладаяй ими всегда язык есть. 22 Есть муж хитр и наказатель многим, а своей души неключимь есть. 23 Есть умудряяйся в словесех ненавидимь: сей всякия пищи лишен будет: 24 не дана бо бысть ему от Господа благодать, яко всякия премудрости лишен бысть. 25 Есть премудр своей души, и плоды разума его во устех верны. 26 Муж премудр люди своя накажет, и плоды разума его верны. 27 Муж премудр исполнится благословения, и ублажат его вси зрящии. 28 Живот мужа в числе дний: а дние Израилевы безчисленни. 29 Премудрый во своих людех наследит веру, и имя его живо будет во век. 30 Чадо, в животе твоем искуси душу твою и виждь, что ей зло есть, и не даждь ей. 31 Ибо не вся всем на пользу, и не всяка душа во всем благоволит. 32 Не пресыщайся во всяцей сладости и не разливайся на (различие) брашна, 33 ибо во мнозех брашнах недуг будет, и пресыщение приближит даже до холеры: 34 пресыщением бо мнози умроша, внимаяй же приложит житие. === 38 === 1 Почитай врача противу потреб честию его, ибо Господь созда его: 2 от Вышняго бо есть изцеление, и от царя приимет дар. 3 Художество врача вознесет главу его, и пред вельможами удивимь будет. 4 Господь созда от земли врачевания, и муж мудрый не возгнушается ими. 5 Не от древа ли осладися вода, да познана будет сила Его? 6 И Той дал есть художество человеком, да славится в чудесех Своих: 7 теми уврачева и отят болезни их. 8 Мироварец сими состроит смешение, и не скончаются дела его, и мир от него есть на лицы земли. 9 Чадо, в болезни твоей не презирай, но молися Господеви, и Той тя изцелит: 10 отступи от прегрешения и направи руце, и от всякаго греха очисти сердце (твое): 11 даждь благоухание и память семидала и умасти приношение, акибы не первее приносяй: 12 и даждь место врачу, Господь бо его созда: и да не удалится от тебе, потребен бо ти есть. 13 Есть время, егда в руку его благоухание: 14 ибо и тии Господеви молятся, да управит им покой и изцеление ради оздравления. 15 Согрешаяй пред Сотворшим его впадет в руце врачу. 16 Чадо, над мертвецем источи слезы и якоже зле страждущь начни плачь: и якоже достоит ему, соскутай тело его и не презри погребения его. 17 Горек сотвори плачь и рыдание тепло, и сотвори сетование, якоже ему достоит, день един и два хуления ради, и утешися печали ради: 18 от печали бо смерть бывает, и печаль сердечная слячет крепость. 19 В нанесении пребывает и печаль, и житие нищаго в сердцы. 20 Не даждь в печаль сердца твоего, остави ю помянув последняя. 21 Не забуди, несть бо возвращения: и ему пользы не сотвориши, и себе озлобиши. 22 Помяни суд Его, яко сице и твой: мне вчера, а тебе днесь. 23 В покои мертвеца упокой память его, и утешися о нем во исходе духа его. 24 Премудрость книжника во благовремении празднества, и умаляяйся деянием своим упремудрится. 25 Чим умудрится держай орало и хваляйся остном, гоняй волы и обращаяйся в делех их, и повесть его в сынех юнчих? 26 Сердце свое даст возрыти бразды, и бдение его на насыщениих юниц. 27 Тако всяк древоделя и архитектон, иже нощи яко дни провождает, делая изваяния печатей, и прилежание его изменити различие: 28 сердце свое даст уподобити живописание, и бдение его еже совершити дело. 29 Такожде и ковачь седя близ наковални и соглядаяй дело железа: курение огня удручит тело его, и теплотою пещи утрудится: 30 глас млата обновит ухо его, и прямо подобию сосуда очи его: 31 сердце свое вдаст на скончание дел, и бдение его украсити до конца. 32 Такожде и скудельник седя на деле своем и вертя ногама своима коло, 33 иже в печали лежит выну на деле своем, изчисляемо все делание его: 34 мышцею своею вообразит брение и пред ногама преклонит крепость его: 35 сердце свое вдаст скончати сосуд, и бдение его очистити пещь. 36 Вси сии на руки своя надеются, и кийждо в деле своем умудряется. 37 Без тех не населится град, и не вселятся, ни походят и в соборище не возмутся: 38 на престоле же судий не сядут и завета суду не размыслят, ниже имут извещати наказания и суда, и в притчах не обрящутся: 39 но токмо зданием житейским прилежат, и моление их в делании художества. === 39 === 1 Точию вдаяй душу свою и размышляяй в законе Вышняго премудрости всех древних взыщет и во пророчествиих поучатися будет: 2 повести мужей именитых соблюдет и во извития притчей совнидет, 3 сокровенная притчей изыщет и в гадании притчей поживет, 4 посреде вельмож послужит и пред старейшину явится, 5 в земли чуждих язык пройдет, добро бо и зло в человецех искуси. 6 Сердце свое вдаст утреневати ко Господу сотворшему его и пред Вышним помолится, и отверзет уста своя на молитву и о гресех своих помолится. 7 Аще Господь велий восхощет, духом разума исполнится: 8 той одождит глаголы премудрости своея и в молитве исповестся Господеви, 9 той управит совет его и художество и в сокровенных его размышляти будет, 10 той известит наказание учения его и в законе завета Господня похвалится. 11 Восхвалят разум его мнози, и до века не погибнет: 12 не отидет память его, и имя его поживет в роды родов: 13 премудрость его поведят языцы, и хвалу его исповесть церковь. 14 Аще пребудет, приусвоит себе, и аще почиет, имя оставит паче тысящ. 15 Еще размыслив повем, и якоже луны полнота наполнихся. 16 Послушайте мене, преподобнии сынове, и прозябните яко шипки произрастающыя при потоце селнем, 17 и якоже Ливан дадите благовоние, 18 и процветите цвет яко крин, преподадите воню и воспойте песнь. 19 Благословите Господа во всех делех Его, дадите имени Его величие и исповедайтеся во хвалении Его, 20 в песнех устен и в гуслех, и сице рцыте во исповедании: 21 дела Господня вся яко добра зело, и всяко повеление во время свое будет. 22 И несть рещи: что сие? На что сие? Вся бо сия во время свое взыскана будут. 23 Словом Его ста вода яко стог, и глаголголом уст Его приятелища водная. 24 Повелением Его всякое благоволение, и несть, иже умалит спасение Его. 25 Дела всякия плоти пред Ним, и несть укрытися от очес Его: 26 от века на век призре, и ничтоже есть дивно пред Ним. 27 Несть рещи: что сие? На что сие? Вся бо на потребу их создана быша. 28 Благословение Его яко река покры и яко поток сушу напои: 29 сице гнев Его языцы наследят, яко преврати воду в сланость. 30 Путие Его преподобным прави, тако беззаконником претыкания. 31 Благая благим создана быша из начала, такожде грешным злая. 32 Начало всякия потребы в житие человеку, вода и огнь, и железо и соль, и семидал пшеницы и млеко и мед, кровь гроздова и масло и риза: 33 вся сия благочестивым во благая, сице и грешником превратятся во злая. 34 Суть дуси, иже создани быша на месть и яростию своею утвердиша раны им: 35 во время скончания излиют крепость и ярость Сотворшаго их совершат. 36 Огнь и град, и глад и смерть, вся сия создана быша на месть: 37 зубы зверей и скорпии, и ехидны и мечь отмщаяй в погибель нечестивых, 38 в заповедех Его возвеселятся, и на земли на потребу уготовятся, и во бременах своих не имут прейти слова. 39 Сего ради исперва утвердихся и размыслих и в писании оставих: 40 вся дела Господня блага, и всю потребу во время свое подаст: 41 и несть рещи: сие сего злее: вся бо во время на угождение будут. 42 И ныне всем сердцем и усты воспойте и благословите имя Господне. === 40 === 1 Непразднство велие создано бысть всякому человеку, и иго тяжко на сынех Адамлих, от дне исхода из чрева матере их до дне погребения в матерь всех. 2 Размышления их и страх сердечный, помышление чаяния, день скончания: 3 от седящаго на престоле славы и даже до смиреннаго на земли и пепеле, 4 от носящаго багряницу и венец и даже до одевающагося льняною, 5 ярость и зависть, и мятеж и молва, и страх смерти и вражда и рвение, и во время покоя на ложи сон нощный изменяет разум его: 6 мало яко ничтоже на покой, и от того во снех яко во днех блюдения: 7 возмущен видением сердца своего, яко избежав от лица брани, во время спасения своего воста, и дивяся ни при единем же страсе. 8 Со всякою плотию от человека даже до скота, и на грешных седмерицею к сим: 9 смерть и кровь, и рвение и оружие, наведения, глад и сокрушение и раны, 10 на беззаконных создана быша сия вся, и сих ради бысть потоп. 11 Вся, елика от земли, в землю возвращаются, и от воды, в море возвращаются. 12 Всяк дар и неправда истребится, а вера во век стояти будет. 13 Имение неправедных яко река изсхнет, и якоже гром велик в дождь возгремит. 14 Егда разгнет руце, возвеселится, тако преступающии до конца изчезнут. 15 Изчадия нечестивых не умножат ветвий, и корения нечистая на тверде камени: 16 злак над всякою водою и на брезе реки прежде всякия травы исторжен будет. 17 Благодать яко рай во благословениих, и милостыня во век пребывает. 18 Живот самодоволнаго делателя усладится, и паче обоих обретаяй сокровище. 19 Чада и созидание града утверждают имя, и паче обоих жена непорочна вменяется. 20 Вино и мусикиа веселят сердце, а паче обоих возлюбление премудрости. 21 Свирель и псалтирь услаждают песнь, а паче обоих язык сладкий. 22 Благодати и доброты возжелает око твое, а паче обоих злака семене. 23 Приятель и друг сретающася во время, а паче обоих жена с мужем. 24 Братия и помощь во время скорби, а паче обоих милостыня избавит. 25 Злато и сребро утвердят ногу, а паче обоих совет благоугоден будет. 26 Имение и крепость вознесут сердце, а паче обоих страх Господень: 27 несть во страсе Господни умаления и несть в нем лишения помощи: 28 страх Господень яко рай благословения, и паче всякия славы покры его. 29 Чадо, животом просливым не живи: лучше умрети, нежели просити. 30 Муж зря на чуждую трапезу, несть живот его в числе живота: опечалит душу свою чуждыми брашны: 31 муж же худог и наказан сохранится. 32 Во устех нестыдливаго прошение усладится, и во чреве его огнь возгорится. === 41 === 1 О смерте, коль горька твоя есть память человеку мирно во имениих своих живущу, 2 мужеви не пекущуся и благополучну во всех, и еще возмогающу прияти пищу. 3 О, смерте, добр суд твой есть человеку требующему и умаляющуся крепостию, 4 в последней старости сущему и пекущуся о всех, и неверствующу и погубившу терпение. 5 Не бойся суда смерти: помяни первая твоя и последняя, сей бо суд от Господа всяцей плоти. 6 И почто отмещешися благоволения Вышняго? Аще десять, аще сто, аще тысяща лет, 7 несть во аде обличения живота. 8 Чада бывают мерзка чада грешников, и живущая в селениих нечестивых: 9 чад грешных погибнет наследие, и с семенем их выну поношение. 10 Отца нечестива укорят чада, яко его ради поношение приимут. 11 Горе вам, мужие нечестивии, иже остависте закон Бога Вышняго: 12 и аще родитеся, на клятву родитеся: и аще умрете, в клятву разделени будете. 13 Вся, елика от земли, в землю пойдут: такожде нечестивии от клятвы в пагубу. 14 Сетование человеков в телесех их: имя же грешников неблагое потребится. 15 Пецыся о имени, то бо ти пребывает паче тысящ великих сокровищ злата. 16 Благаго жития число дний, и доброе имя во веки пребывает. 17 Наказание в мире соблюдите, чада: премудрость же сокровенна и сокровище неявленно, кая польза во обоих? 18 Лучше человек скрываяй буйство свое, нежели человек скрываяй премудрость свою. 19 Темже убо усрамитеся словес моих: 20 несть бо благо всяк срам сохраняти, и не вся всем в вере благоволятся. 21 Стыдитеся пред отцем и материю о блуде и пред сильным и властелином о лжи, 22 пред судиею и князем о согрешении, пред собором и людьми о беззаконии, 23 пред общником и другом о неправде, и на месте, идеже живеши, о татьбе, 24 и пред истиною Божиею и заветом, и от опертия лактей на трапезе, от прельщения взятия и даяния, 25 и от целующих о молчании, от видения жены блудницы и от отвращения сроднича лица, 26 от отятия части и даяния и от присмотрения жены мужаты и от обольщения рабыни своея, 27 и не приступи ко одру ея: 28 пред други о словесех поносных, и по даянии не поноси: 29 от повторения и слова слышания и от откровения словес тайных: и будеши стыдлив истинно и обретаяй благодать пред всяким человеком. === 42 === 1 Не стыдися о сих и не приими лица, еже согрешати: 2 о законе Вышняго и завете, и о суде, еже оправдати нечестиваго, 3 о словеси союбщника и о путницех, и о даянии наследия другов, 4 о истине мерила и весов, о стяжании многих и малых, 5 о различии продаяния купцев и о наказании мнозе чад, и еже рабу лукаву ребра окровавити. 6 На жене лукаве добро (есть) печать, и идеже многи руки, затвори. 7 Еже аще предаси, в число и меру, даждь и возми все писанием. 8 О наказании неразумива и буяго, и престарелаго судящагося с юными, и будеши наказан истинно и искушен пред всяким живущим. 9 Дщерь отцу сокровенно бдение, и попечение о ней отгоняет сон: во юности своей да не когда презреет и сожителствующи (с мужем), да не когда возненавидена будет: 10 в девстве да не когда осквернится и во отчих ея непраздна будет, и с мужем сущи да не когда преступит и сожителствующи да не когда неплоды будет. 11 Над дщерию безстудною утверди стражу, да не когда сотворит тя обрадование врагом, беседу во граде и отлученаго от людий, и посрамит тя в народе мнозе. 12 Не взирай на доброту всякаго человека и посреде жен не седи: 13 от риз бо исходит молие, и от жены лукавство женское. 14 Лучше злоба мужеска, нежели добродетелная жена, и жена посрамляющая в поношение. 15 Помяну убо дела Господня, и яже видех, повем: во словесех Господних дела Его: 16 солнце просвещая на вся призре, и славы Его исполнено дело его. 17 Не сотвори ли святым Господь поведати вся чудеса Его, яже утверди Господь Вседержитель, утвердитися всему во славе Его? 18 Бездну и сердце изследова и в коварствех их размысли: разуме бо Господь всяко ведение и призре на знамение века, 19 возвещая мимошедшая и будущая и открывая следы тайных: 20 не прейде Его всяко помышление, не утаися от Него ни едино слово. 21 Величия премудрости Своея украси: иже есть прежде века и во век, 22 ни приложися, ни умалися и не востребова ни единаго советника. 23 Коль вся дела Его вожделенна, и даже до искры есть видети. 24 Вся сия живут и пребывают во век во всех требованиих, и вся послушают. 25 Вся сугуба, едино противу единаго: и не сотвори ничтоже скудно. 26 Едино от единаго утверди благая: и кто насытится, зря славу Его? === 43 === 1 Слава высоты, твердь чистоты, зрак небесе в видении славы. 2 Солнце во явлении возвещающее во исходе сосуд дивен, дело Вышняго. 3 В полудни своем изсушает страну, и прямо вару его кто постоит? 4 (Аки) пещь дышущее в делех вара, трегубо солнце пожигающее горы: воскурения огненная издышущее и простирающее лучи омрачает очи. 5 Велий Господь сотворивый е, и словесы Своими ускори шествие. 6 И луна всем во свое время являет лета и знамение века. 7 От луны знамение праздника: светило умаляющееся до конца. 8 Месяц по имени своему есть, возрастающь дивно во изменении. 9 Сосуд ополчений на высоте, на тверди небесней сияющь. 10 Доброта небесе, слава звезд, красота светящися на высоких Господних: 11 словесы Святаго станут по чину и не имут ослабети в стражбах своих. 12 Виждь дугу и благослови Сотворшаго ю, зело прекрасна сиянием своим: 13 окружи небо окружением славы, руце Вышняго простросте ю. 14 Повелением Его потщася снег, и ускоряет молнию судбою Своею. 15 Сего ради отверзошася сокровища, и парят облацы яко птицы. 16 Величием Своим укрепи облаки, и сокрушишася камение градное: 17 и воззрением Его подвижутся горы, и волею Его возвеет юг. 18 Глас грома Его порази землю, и буря северова и вихорь ветра. 19 Яко птицы парящыя сыплет снег, и якоже прузи садящиися спадения его. 20 Доброте белости его подивится око, и о дожди его ужаснется сердце. 21 И слану яко соль на землю сыплет, и смерзшися бывает на концы остра. 22 Студен ветр северный возвеет, и смерзнется лед от воды: на всяцем собрании воднем обитати имать, и аки во броню облечется вода. 23 Пояст горы и пустыни пожжет, и угасит траву яко огнь. 24 Изцеление всех со тщанием мгла: роса сретающая от вара утишит. 25 Мыслию его преста бездна, и насади в ней (Господь) островы. 26 Плавающии по морю поведают бедство его, и слухом ушес наших чудимся, 27 и тамо (суть) преславна и чудна дела его, различие всякаго животнаго, создание китов. 28 Им благополучный конец свой получают и словом Его составляются всяческая. 29 Много имамы рещи, и не имамы постигнути, и скончание словес: все есть Той. 30 Славяще Его где укрепимся? Той бо велик паче всех дел Своих: 31 страшен Господь и велик зело, и чудно могутство Его. 32 Славяще Господа вознесите, елико аще можете, превзыдет бо и еще: 33 возносяще Его умножитеся крепостию: не трудитеся, не имате бо постигнути. 34 Кто виде Его и исповесть? И кто возвеличит Его, якоже есть? 35 Многа сокровена суть вящшая сих: малая бо видехом дел Его. 36 Вся бо сотвори Господь и благочестивым даде премудрость. === 44 === 1 Восхвалим убо мужы славны и отцы нашя в бытии. 2 Многу славу созда Господь в них величием Своим от века. 3 Господствующе во царствиих своих и мужие именити силою, советующе разумом своим, провещавшии во пророчествах, 4 старейшины людий в советех и в разуме писания людий: 5 премудрая словеса в наказании их, ищуще гласа мусикийска и поведающе повести во писаниих: 6 мужие богатии, обдаровани крепостию, мирно живуще в жилищих своих. 7 Вси сии в родех прославлени быша, и во днех их похвала. 8 Суть от них, иже оставиша имя, еже поведати хвалы: и суть, ихже несть памяти, и погибоша яко не сущии, и быша яко не бывше, и чада их по них. 9 Но сии мужие милостивии, ихже правды не забвены быша: 10 с семенем их пребудет доброе наследие, изчадия их в заветех: 11 остася семя их, и чада их по них: 12 до века пребудет семя их, и слава их не потребится: 13 телеса их в мире погребена быша, а имена их живут в роды. 14 Премудрость их поведят людие, и похвалу их исповесть церковь. 15 Енох угоди Господеви и преложися, образ покаяния родом. 16 Ное обретеся совершен, праведен, во время гнева бысть примирение: 17 сего ради бысть останок земли, егда бяше потоп. 18 Заветы вечнии положени быша с ним, да не потребится потопом всяка плоть. 19 Авраам великий отец множеству языков, и не обретеся подобный во славе его: 20 иже соблюде закон Вышняго и бысть в завете с Ним: 21 и на плоти его устави завет и во искушении обретеся верен: 22 сего ради клятвою постави с ним благословитися языком о семени его, 23 умножити его яко персть земли, и яко звезды возвысити семя его, и наследити им от моря до моря и от реки до края земли. 24 И о Исааце утверди сице Авраама ради Отца его благословение всех человеков и завет: 25 и почи на главе Иаковли. 26 Позна его благословении Своими и даде его в наследие, и раздели части его на колен дванадесять, 27 и изведе от него мужа милости, обретшаго благодать пред очесы всякия плоти. === 45 === 1 Возлюбленный Богом и человеки Моисей, егоже память во благословениих. 2 Уподобил есть его славе святых и возвеличи его во страсе врагов. 3 Во словесех его знамения устави и прослави его пред лицем царей: заповеда ему к людем своим и показа ему славу Свою: 4 в вере и кротости его освяти его, избра его от всякия плоти. 5 Слышан сотворил есть ему глас Свой и введе его во мглу, 6 и даде ему пред лицем заповеди, закон жизни и ведения, еже научити Иакова завету и судбам Его Израиля. 7 Аарона возвыси свята, подобна ему брата его от колена Левиина, 8 постави ему завет вечен и даде ему иерейство людий, ублажи его благоукрашением и препояса его одеждою славы, 9 облече его в совершение хваления и утверди его сосудами крепости, 10 остегнми и подиром и епомидою, 11 и окружи его шипки златыми и звонцы многими окрест, глашати глас во ступаниих его, слышан творити глас в церкви в память сыном людий Своих: 12 одеждою святою, со златом и иакинфом и порфирою, делом пестроделца, словом суда, явленьми истины, 13 истканною багряностию, делом художничим, камении многоценными, изваяньми печати, в связании злата, делом каменноделателя, на память в писании изваяннем по числу колен Израилевых: 14 венец злат верху кидара, изображение печати святыни, похвала чести, дело крепости, вожделения очес красима прекрасна. 15 Прежде его не быша таковая до века. 16 Не облечеся иноплеменник, точию сынове его и внучата его присно. 17 Жертвы их приносимы бяху по вся дни непрестанно дважды. 18 Исполни Моисей руце и помаза его елеем святым. 19 Бысть ему в завет вечен, и семени его во днех неба, служити Ему вкупе и священствовати, и благословляти люди Его именем Его. 20 Избра его от всех живых принести жертву Господеви, фимиам и благоухание на память, на очищение людем своим. 21 Даде ему заповеди Своя, власть в заветех судеб, научити Иакова свидением и в законе Его просветити Израиля. 22 Восташа нань чуждии, и возревноваша ему в пустыни мужие, иже при Дафане и Авироне, и сонм Кореов в ярости и гневе. 23 Виде Господь и не благоволи, и скончашася яростию гнева: 24 сотвори в них знамения, погубити я огнем пламене. 25 И приложи Ааронови славу и даде ему наследие: начатки первых жит раздели ему. 26 Хлеб в первых уготова на сытость: ибо жертвы Господни ясти будут, яже даде ему и семени его. 27 Обаче в земли людий не наследствит, и в людех не будет ему части: Сам бо часть его и наследие. 28 И Финеес сын Елеазаров третий во славе, егда ревноваше страху Господню, и ста в превращении людий благостию усердия души своея, и умоли о Израили. 29 Сего ради поставлен ему бысть завет мирен, предстателем быти святых и людем его, да будет ему и семени его священства величество во век. 30 И завет Давиду, сыну Иессеову от колена Иудова, наследство царя сына от сына единаго: достояние священства Аарону и семени его. 31 Да даст нам премудрость в сердцах наших судити людем Его в правду, да не потребятся благая их и слава их в роды их. === 46 === 1 Крепок на бранех Иисус Навин и преемник Моисеов бысть во пророчестве: 2 иже бысть по имени своему велик на спасение избранных его, мстити востающым (нань) врагом, яко да наследствит Израиля. 3 Коль прославлен бысть воздвижением рук своих, и внегда простираше мечь на грады. 4 Кто прежде его сице ста? Брани бо Господни той вождаше. 5 Не рукою ли его воспятися солнце, и един день бысть яко два? 6 Призва Вышняго Сильна, егда оскорбляху его врази окрест, и послуша его велий Господь: камением градным силы крепкия 7 устреми брань на языки, исхождением погуби противники, 8 да познают языцы всеюружие его, яко пред Господем брань его: ибо последова Могутному. 9 И во дни Моисеовы сотвори милость сей и Халев сын Иефонниин, стати противу врага, удержати люди от грех и утолити ропот лукавства: 10 и та два суща спасена быста от шести сот тысящ пешцев, ввести их в наследствие, в землю точащую млеко и мед. 11 И даде Господь Халеву крепость, и даже до старости пребысть у него, взыти ему на высоту земли, и семя его обдержа наследие: 12 яко да видят вси сынове Израилевы, яко добро ходити вслед Господа. 13 И судии кийждо именем своим, еликих не любодействова сердце, и елицы не отвратишася от Господа, и память их во благословениих: 14 кости их да процветут от места их, 15 и имя их пременяемо на сынех, прославленным бывшым им. 16 Возлюблен Господем своим Самуил пророк Господень устрои царство и помаза князи над людьми его: 17 законом Господним суди сонму, и посети Господь Иакова: 18 верою своею испытан бысть пророк, и познан бысть в вере своей верен видением. 19 И призва Господа Сильна, егда оскорбляху его врази его окрест, приношением агнца ссущаго млеко: 20 и возгреме с небесе Господь и гласом велиим услышан сотвори глас Свой: 21 и потреби Владыки Тирския, и вся князи Филистимския. 22 И прежде времене успения века свидетелствова пред Господем и христом Его: имения и до сапог от всякия плоти не взях: и не сотвори ему поношения (ни един) человек. 23 И по успении своем пророчествова и показа цареви кончину его: и вознесе от земли глас свой, пророчеством истребити беззаконие людий. === 47 === 1 И по сем воста Нафан пророчествовати во дни Давидовы. 2 Якоже тук отлучен от жертвы мирныя, тако Давид от сынов Израилевых. 3 Со львы играше яко с козлищи и с медведми яко со агнцы овчими. 4 Во юности своей не убил ли исполина, и отят поношение от людий, 5 егда простре руку с каменем из пращи низложити гордыню Голиафову? 6 Призва бо Господа Вышняго, и вдаде в десницу его крепость низложити человека сильна на брани, вознести рог людий своих. 7 Сице во тмах прослави его и восхвали его во благословениих Господних, внегда носити ему венец славы. 8 Потреби бо враги окрест и уничижи Филистимляны противники: даже доднесь сокруши им рог. 9 Во всяцем деле своем даде исповедание Святому Вышнему глаголом славы: 10 всем сердцем своим восхвали и возлюби Сотворшаго и. 11 И постави певцы прямо олтареви, и звуком их услаждати пение. 12 Даде во праздницех благолепие и украси времена даже до скончания, внегда воспевати им имя святое Его и от утра гласити во святилищи. 13 Господь отя грехи его и вознесе во век рог его, и даде ему завет царский и престол славы во Израили. 14 По сем воста сын разумичен и сего ради обита в пространстве: 15 Соломон воцарися во днех мира, яко Бог препокои окрест, да созиждет дом во имя Его и да уготовит святилище во век. 16 Коль преумудрился еси во юности своей и наполнился еси яко река разума. 17 Землю покры душа твоя, и исполнил еси притчами гаданий: 18 пройде имя твое во островы далече, и возлюблен был еси в мире твоем. 19 В песнех и паримиах и во притчах и во сказаниих удивишася тебе страны. 20 Именем Господа Бога, нареченнаго Бога Израилева, 21 собрал еси яко медь злато и яко олово умножил еси сребро. 22 Вдал еси бока твоя женам и поработился еси телом твоим: 23 дал еси порок славе твоей и осквернил еси семя твое, нанести гнев на чада твоя, и умилитися о безумии твоем: еже разделитися на двое царству, и от Ефрема начатися царству непокориву. 24 Господь же не оставит милости Своея и не растлит от дел Своих, ниже истребит избраннаго Своего изчадий и семя возлюбившаго Его не измет. 25 И Иакову даде останок, и Давиду от него корень. 26 И почи Соломон со отцы своими 27 и остави по себе от семене своего людем безумие, 28 и умаляющася разумом Ровоама, иже отстави люди от совета своего, 29 и Иеровоама сына Наватова, иже сотвори согрешити Израилю и даде Ефрему путь ко греху. 30 И умножишася греси их зело, отступити им от земли своея: 31 и всяко лукавство изыскаша, дондеже месть прииде на ня. === 48 === 1 И воста Илиа пророк яко огнь, и слово его яко свеща горяше: 2 иже нанесе на ня глад и ревностию своею умали я, 3 словом Господним удержа небо и сведе тако трижды огнь с небесе. 4 Коль прославился еси, Илие, чудесы твоими, и кто подобен тебе похвалитися? 5 Воздвигнув мертвеца от смерти и из ада словом Вышняго, 6 сведый цари в пагубу и прославленныя от одра их, 7 слышавый в Синаи обличение и в Хориве судбы отмщения, 8 помазуяй цари на воздаяние и пророки преемники по себе, 9 взявыйся вихром огненным на колеснице коней огненных, 10 вписан во обличения на времена, утолити гнев прежде ярости и обратити сердце отчее к сыну и устроити колена Иаковля. 11 Блажени видевшии тя и любовию украшеннии. 12 Ибо мы житием поживем. 13 Илиа, иже вихром покровен бысть, и Елиссей исполнися духа его и во дни своя не поколебася от князей, и не преможе его никтоже: 14 всяко слово не превзыде его, и во успении пророчествова тело его: 15 и в житии своем сотвори чудеса, и во умертвии дивна дела его. 16 Во всех сих не покаяшася людие и не отступиша от грех своих, дондеже пленени быша от земли своея и расточени быша по всей земли. 17 И остася людий мало, и князь в дому Давидове. 18 Нецыи убо от них сотвориша угодное, нецыи же умножиша грехи. 19 Езекиа утверди град свой и введе посреде его воду: ископа железом камень и созда источники водам. 20 Во днех его взыде Сеннахирим и посла Рапсака, и воздвиже руку свою на Сиона и возвеличися гордынею своею. 21 Тогда подвигошася сердца и руце их, и поболеша яко раждающыя. 22 И помолишася Господу милостивому, воздевше руки своя к Нему: 23 и Святый с небесе скоро услыша я и избави я рукою Исаииною: 24 порази полки Ассирийския, и сокруши я Ангел Его. 25 Сотвори бо Езекиа угодное Господеви и укрепися на путех Давида отца своего, яже заповеда Исаиа, пророк велий и верен в видении своем. 26 Во днех его воспятися солнце, и приложи жития цареви: 27 духом велиим виде последняя и утеши сетующыя в Сионе: 28 даже до века показа будущая и сокровеная, прежде неже приити им. === 49 === 1 Память Иосиева в сложение фимиама, и состроеное делом мироварника: 2 во всяцех устех яко мед усладится, и яко мусикиа в пире вина. 3 Той управлен бысть во обращение людий и отят мерзости беззакония, 4 исправи ко Господу сердце свое, во дни беззаконных укрепи благочестие. 5 Кроме Давида и Езекии и Иосии, вси прегрешиша прегрешением, 6 оставиша бо закон Вышняго: царие Иудины оскудеша, 7 даша бо рог свой инем и славу свою языку чуждему, 8 сожгоша избран град святыни и опустошиша пути его рукою Иеремииною: 9 озлобиша бо его, и той во чреве освящен бысть пророк искоренити и озлобити и погубити, такожде создати и насадити. 10 Иезекииль, иже виде видение славы, юже показа ему в колеснице херувимсте: 11 помяну бо враги в дожди, и благосотворити направляющым пути. 12 И обоюнадесяте пророков да процветут кости от мест своих: утеши бо Иакова и избавил я верою надежды. 13 Како возвеличим Зоровавеля? И сей яко печать на десней руце: 14 такожде Иисус сын Иоседеков: иже во дни своя создаста дом и воздвигоста церковь святу Господеви, уготовану во славу века. 15 И Неемии на мнозе (буди) память, воздвигшему нам стены падшыя и поставльшему двери и заворы и воздвигшему домы падшыя нашя. 16 Никтоже создан бысть таков, яко Енох на земли: той бо взят бысть от земли. 17 Ниже яко Иосиф бысть муж, вождь братии, утверждение людем, и кости его посещены быша. 18 Сим и Сиф прославлена быста в человецех, и паче всякаго животнаго в твари Адам. === 50 === 1 Симон сын Ониин иерей великий, иже в животе своем сострои дом и во дни своя утверди церковь. 2 И тем основана бысть высота сугуба, воздвижение высоко ограждения церковнаго. 3 Во дни его умалишася сосуди воднии, ров яко моря окружение. 4 Блюдый люди своя от падения и укрепивый град во обседении. 5 Коль прославлен бысть в сожителстве людий, во исходе дому катапетасмы? 6 Яко звезда утренняя посреде облаков, аки луна полна во днех своих, 7 яко солнце сияющее на церковь Вышняго, и аки дуга светящаяся на облацех славы: 8 яко цвет шипков во днех весенных, яко крин при исходищих воды, яко стебло ливаново во днех жатвы: 9 яко огнь и ливан на огнищи, 10 якоже сосуд злат искован, украшен всяким камением многоценным, 11 яко маслина износящая плоды и яко кипарис возрастаяй до облак. 12 Внегда взимати ему одежду славы и облачатися ему в совершение хваления, в восхождении олтаря Святаго прослави одежду святыни. 13 Внегда же приимати части от рук иерейских, и той стояше при огнищи олтаря: 14 окрест его венец братии, яко прозябение кедрско в Ливане, и окружиша его яко стеблие финиково: 15 и вси сынове Аарони во славе своей, и приношение Господне в руках их пред всем собором Израилевым. 16 И совершение служителей на олтарех, еже украсити приношение Вышняго Вседержителя, 17 простре на чашу возлияния руку свою, изгнете от крове гроздныя, возлия на основание олтаря в воню благоухания Вышнему всех Цареви. 18 Тогда возопиша сынове Аарони, трубами коваными вострубиша, услышан сотвориша глас велик на память пред Вышним. 19 Тогда вси людие обще приспеша и падоша ницы на земли поклонитися Господеви своему Вседержителю Богу Вышнему: 20 и восхвалиша певцы гласы своими, в велицем гласе усладися пение: 21 и помолишася людие Господу Вышнему молитвою пред Милостивым, дондеже совершися красота Господня, и службу свою скончаша. 22 Тогда сошед воздвиже руки своя на весь собор сынов Израилевых, дати благословение Господеви от устен своих и именем Его похвалитися. 23 И повтори поклонение прияти благословение от Вышняго. 24 И ныне благословение Бога всех, велия творящаго единаго всюду, возносящаго дни нашя от ложесн и творящаго с нами по милости Своей: 25 да даст нам веселие сердца, и да будет мир во дни нашя во Израили якоже дни века: 26 да уверит с нами милость Свою и во дни своя избавит ны. 27 Два языка омерзеста души моей, а третий несть язык: 28 седящии на горе Самарийстей и Филистимляне, и людие буи живущии в Сикимех. 29 Наказание разума и ведения начерта в книзе сей Иисус сын Сирахов, Иерусалимлянин, иже одожди премудрость от сердца своего. 30 Блажен, иже в сих поживет, и иже я положит в сердцы своем, упремудрится. 31 Аще бо сотворит сия, ко всем укрепится, яко свет Господень след его. === 51 === 1 Молитва Иисуса сына Сирахова. Исповемся Тебе, Господи Царю, и восхвалю Тебе, Бога Спаса моего, исповедаюся имени Твоему, 2 яко покровитель и помощник был еси ми 3 и избавил еси тело мое от пагубы и от сети клеветы язычныя, от устен делающих лжу, и на противящихся ми был еси помощник, 4 и избавил мя еси по множеству милости имене Твоего от скрежетания готовых снести мя, 5 из руки ищущих души моея, от многих скорбей, яже имех, 6 от стужания огненнаго окрест и от среды огня, идеже не сожегохся, 7 из глубины чрева адова и от языка нечиста и словесе ложна, ко царю от оболгания языка неправедна. 8 Приближися даже до смерти душа моя, 9 и живот мой бе близ ада преисподняго. 10 Обдержаша мя отвсюду, и не бе помогающаго: воззрех на помощь человечу, и не бе. 11 И помянух милость Твою, Господи, и деяние Твое, еже от века: 12 яко изимаеши терпящих Тя, (Господи,) и спасаеши их от рук вражиих. 13 И вознесох от земли моление мое и о избавлении от смерти помолихся: 14 и призвах Господа, Отца Господа моего, не оставити мене во дни скорби, во время гордых без помощи. 15 Восхвалю имя Твое непрестанно и воспою Тя во исповедании. И услышана бысть молитва моя. 16 Спасл бо мя еси от пагубы и изял еси мя от времене лукавна. 17 Сего ради исповемся Тебе, и восхвалю Тя, и благословлю имя Твое, Господи. 18 Еще юн сый, прежде неже странствовати ми, исках премудрости яве в молитве моей: 19 пред церковию молихся о ней, и даже до последних взыщу ея: от цвета, яко зреющаго грозда, 20 возвеселися сердце мое о ней: пойде нога моя в правости, от юности моея изследих ю. 21 Приклоних мало ухо мое и приях, и многое обретох себе наказание: 22 предуспеяние бысть ми в ней. 23 Дающему мне премудрость воздам славу. 24 Умыслих бо творити ю, и поревновах благому, и не постыжуся. 25 Боряшеся душа моя о ней, и в творении моем испытах: 26 руце мои воздех на высоту и неведения ея уразумех. 27 Душу мою направих к ней, 28 сердце стяжах с нею исперва, и во очищении обретох ю: сего ради не оставлен буду. 29 И утроба моя смятеся ищущи ея: темже стяжах благое стяжание. 30 Даде Господь язык ми мзду мою, и тем восхвалю Его. 31 Приближитеся ко мне, ненаказаннии, и водворитеся в дому наказания. 32 Почто лишаетеся, глаголете, в сих, и души вашя жаждут зело? 33 Отверзох уста моя и глаголах: стяжите себе без сребра (мудрость): 34 выю вашу подложите под иго, и да приимет душа ваша наказание: близ есть обрести ю. 35 Видите очима вашима, яко мало трудихся и обретох себе мног покой. 36 Приобщитеся наказанию многим числом сребра, и много злато пристяжете ею. 37 Да возвеселится душа ваша в милости Его, и да не постыдитеся в хвалении Его. 38 Делайте дело ваше прежде времене, и даст мзду вашу во время свое. == Книга пророка Исайи == === 1 === 1 Видение, еже виде Исаиа сын Амосов, еже виде на Иудею и на Иерусалим, в царство Озии и Иоафама, и Ахаза и Езекии, иже царствоваша во Иудеи. 2 Слыши, небо, и внуши, земле, яко Господь возглагола: сыны родих и возвысих, тии же отвергошася Мене. 3 Позна вол стяжавшаго и, и осел ясли господина своего: Израиль же Мене не позна, и людие Мои не разумеша. 4 Увы, язык грешный, людие исполнени грехов, семя лукавое, сынове беззаконнии, остависте Господа и разгневасте Святаго Израилева, отвратистеся вспять. 5 Что еще уязвляетеся, прилагающе беззаконие? Всякая глава в болезнь, и всякое сердце в печаль. 6 От ног даже до главы несть в нем целости: ни струп, ни язва, ни рана палящаяся: несть пластыря приложити, ниже елеа, ниже обязания. 7 Земля ваша пуста, гради ваши огнем пожжени, страну вашу пред вами чуждии поядают, и опусте низвращена от людий чуждих. 8 Оставится дщерь Сионя яко куща в винограде и яко овощное хранилище в вертограде, яко град воюемый. 9 И аще не бы Господь Саваоф оставил нам семене, яко Содома убо были быхом, и яко Гоморру уподобилися быхом. 10 Услышите слово Господне, князи Содомстии: внемлите закону Божию, людие Гоморрстии. 11 Что Ми множество жертв ваших, глаголет Господь? Исполнен есмь всесожжений овних и тука агнцев, и и крове юнцев и козлов не хощу. 12 Ниже приходите явитися Ми: кто бо изыска сия из рук ваших? Ходити по двору Моему не приложите. 13 И аще принесете Ми семидал, всуе: кадило мерзость Ми есть. 14 Новомесячий ваших и суббот и дне великаго не потерплю: поста и праздности, и новомесячий ваших и праздников ваших ненавидит душа Моя: бысте Ми в сытость, ктому не стерплю грехов ваших. 15 Егда прострете руки (вашя) ко Мне, отвращу очи Мои от вас: и аще умножите моление, не услышу вас: руки бо вашя исполнены крове. 16 Измыйтеся, (и) чисти будите, отимите лукавства от душ ваших пред очима Моима, престаните от лукавств ваших. 17 Научитеся добро творити, взыщите суда, избавите обидимаго, судите сиру и оправдите вдовицу, 18 и приидите, и истяжимся, глаголет Господь. И аще будут греси ваши яко багряное, яко снег убелю: аще же будут яко червленое, яко волну убелю. 19 И аще хощете и послушаете Мене, благая земли снесте: 20 аще же не хощете, ниже послушаете Мене, мечь вы пояст: уста бо Господня глаголаша сия. 21 Како бысть блудница град верный Сион полн суда? В немже правда почиваше, ныне же (в нем) убийцы. 22 Сребро ваше неискушено, корчемницы твои мешают вино с водою. 23 Князи твои не покаряются, общницы татем, любяще дары, гоняще воздаяние, сирым не судящии и суду вдовиц не внимающии. 24 Сего ради тако глаголет Владыка Господь Саваоф: горе крепким во Израили: не престанет бо ярость Моя на противныя, и суд врагом Моим сотворю: 25 и наведу руку Мою на тя, и разжегу в чистоту, непокаряющихся же погублю, и отиму всех беззаконных от тебе, и всех гордых смирю. 26 И приставлю судии твоя якоже прежде, и советники твоя яко от начала: и по сих наречешися град правды, мати градовом, верный Сион. 27 С судом бо спасется пленение его и с милостынею. 28 И сокрушатся беззаконнии и грешницы вкупе, и оставившии Господа скончаются: 29 занеже постыдятся о идолех своих, ихже сами восхотеша, и посрамятся о садех своих, ихже возжелеша. 30 Будут бо яко теревинф отметнувый листвия (своя), и яко вертоград не имый воды. 31 И будет крепость их яко стебль изгребия, и делания их яко искры огненныя, и сожгутся беззаконницы и грешницы вкупе, и не будет угашаяй. === 2 === 1 Слово бывшее от Господа ко Исаии сыну Амосову о Иудеи и о Иерусалиме. 2 Яко будет в последния дни явлена гора Господня, и дом Божий на версе гор, и возвысится превыше холмов: и приидут к ней вси языцы. 3 И пойдут языцы мнози и рекут: приидите, и взыдем на гору Господню и в дом Бога Иаковля, и возвестит нам путь Свой, и пойдем по нему. От Сиона бо изыдет закон, и слово Господне из Иерусалима: 4 и судити будет посреде язык и изобличит люди многи: и раскуют мечы своя на орала и копия своя на серпы, и не возмет язык на язык меча, и не навыкнут ктому ратоватися. 5 И ныне, доме Иаковль, приидите, пойдем светом Господним. 6 Остави бо люди Своя, дом Иаковль: зане якоже из начала наполнися страна их волхвований, якоже иноплеменников, и чада многа иноплеменнича родишася им. 7 Наполнися бо страна их сребра и злата, и не бяше числа сокровищ их: и наполнися земля их коней, и не бяше числа колесниц их: 8 и наполнися земля мерзостей дел рук их, и поклонишася тем, яже сотвориша персты их: 9 и преклонися человек и смирися муж, и не претерплю им. 10 И ныне внидите в камение и скрыйтеся в землю от лица страха Господня и от славы крепости Его, егда востанет сокрушити землю. 11 Очи бо Господни высоцы, человек же смирен: и смирится высота человеческая, и возиесется Господь един в день оный. 12 День бо Господа Саваофа на всякаго досадителя и горделиваго, и на всякаго высокаго и величаваго, и смирятся: 13 и на всяк кедр Ливанский высоких и превознесенных и на всяко древо желудя Васанска, 14 и на всякую гору высокую и на всякий холм высокий, 15 и на всякий столп высок и на всякую стену высокую, 16 и на всякий корабль морский и на всяко видение доброты кораблей. 17 И смирится всякий человек, и падется высота человеча, и вознесется Господь един в день оный. 18 И рукотвореная вся скрыют, 19 внесше в пещеры и в разселины камений и в вертепы земныя, от лица страха Господня и от славы крепости Его, егда востанет сокрушити землю. 20 В день бо оный изринет человек мерзости своя златыя и сребряныя, яже сотвориша, да покланяются суетным и нетопырем, 21 еже внити в вертепы твердаго камене и в разселины камений, от лица страха Господня и от славы крепости Его, егда востанет сокрушити землю. 22 Оставите (убо) вам человека, емуже есть дыхание в ноздрех его: яко в чем вменися сей? === 3 === 1 Се, Владыка Господь Саваоф отимет от Иерусалима и от Иудеи крепкаго и крепкую, крепость хлеба и крепость воды, 2 исполина и крепкаго, и человека ратника и судию, и пророка и смотреливаго, и старца 3 и пятьдесятоначалника, и дивнаго советника и премудраго архитектона и разумнаго послушателя. 4 И поставлю юношы князи их, и ругателие господствовати будут ими. 5 И нападати имут людие, и человек на человека, и человек на ближняго своего: приразится отроча к старцу, и безчестный к честному. 6 Яко имется человек брата своего, или домашняго отца своего, глаголя: ризу имаши, началовождь нам буди, и брашно мое под тобою да будет. 7 И отвещав в день оный речет: не буду твой началовождь, несть бо в дому моем ни хлеба, ни ризы: не буду началовождь людем сим. 8 Яко оставлен бысть Иерусалим, и Иудеа паде, и язык их со беззаконием, не покаряющься Господеви. 9 Сего ради ныне смирися слава их, и студ лица их противу ста им: грех же свой яко Содомский возвестиша и явиша. Горе души их, зане умыслиша совет лукавый на себе самих, 10 рекше: свяжем праведнаго, яко непотребен нам есть. Убо плоды дел своих снедят. 11 Горе беззаконному: лукавая бо приключатся ему по делом руку его. 12 Людие Мои, приставницы ваши пожинают вас, и истязающии обладают вами: людие Мои, блажащии вас льстят вы и стези ног ваших возмущают. 13 Но ныне устроится Господь на суд и поставит на суд люди Своя: 14 Сам Господь на суд приидет со старейшины людий и со князи их. Вы же почто запалисте виноград Мой, и разграбление убогаго в домех ваших? 15 Почто вы обидите людий Моих и лице убогих посрамляете? Глаголет Господь Саваоф. 16 Сия глаголет Господь: понеже вознесошася дщери Сиони и ходиша высокою выею и помизанием очес и ступанием ног, купно ризы влекущыя (по долу) и ногама купно играющыя: 17 и смирит Господь началныя дщери Сиони, и Господь открыет срамоту их. 18 В день он, и отимет Господь славу риз их и красоты их, и вплетения златая (на главе) и тресны ризныя, и луницы гривенныя 19 и срачицы тонкия, и красоту лица их и состроение красы славныя, и обручи и перстни, и мониста и запястия и художныя усерязи, 20 и багряницы и пребагряная, и утварь храмную 21 и светлая лаконская, и виссоны и синеты, и червленицы 22 и виссон со златом и синетою претыканы, и тончицы преиманы златом: 23 и будет вместо вони добрыя смрад, и вместо пояса ужем препояшешися, и вместо украшения златаго, еже на главе, плешь имети будеши дел твоих ради, и вместо ризы багряныя препояшешися вретищем: 24 и сын твой добрейший, егоже любиши, мечем падет, и крепцыи ваши мечем падут и смирятся: 25 и восплачутся хранилища утварей ваших, и останешися едина и о землю ударена будеши. === 4 === 1 И имутся седмь жен за мужа единаго, глаголющя: хлебы наш ясти будем и в ризы нашя одеватися, точию имя твое да наречется на нас, отими укоризну нашу. 2 В день оный возсияет Бог в совете со славою на земли, еже вознести и прославити останок Израиля. 3 И будет останок в Сионе и останок во Иерусалиме, святи нарекутся вси написаннии в жизнь во Иерусалиме: 4 яко отмыет Господь скверну сынов и дщерей Сионских и кровь Иерусалимску очистит от среды их духом суда и духом зноя. 5 И приидет Господь, и будет все место горы Сиони, и вся яже окрест ея осенит облак во дни, и яко дыма и света огненна горяща в нощи, всею славою покрыется: 6 и будет в сень от зноя и в покров и в сокровение от жестости и дождя. === 5 === 1 Воспою ныне Возлюбленному песнь Возлюбленнаго моего винограду моему: виноград бысть Возлюбленному в розе, на месте тучне: 2 и ограждением оградих и окопах, и насадих лозу избранну, и создах столп посреде его, и предточилие ископах в нем, и ждах, да сотворит гроздие, и сотвори терние. 3 И ныне, живущии во Иерусалиме и человече Иудин, судите между Мною и виноградом Моим. 4 Что сотворю еще винограду Моему, и не сотворих ему? Занеже ждах, да сотворит гроздие, сотвори же терние. 5 Ныне убо возвещу вам, что Аз сотворю винограду Моему: отиму ограждение его, и будет в разграбление: и разорю стену его, и будет в попрание. 6 И оставлю виноград Мой, и ктому не обрежется, ниже покопается, и взыдет на нем, якоже на лядине, терние: и облаком заповем, еже не одождити на него дождя. 7 Виноград бо Господа Саваофа, дом Израилев есть, и человек Иудин новый сад возлюбленный: ждах, да сотворит суд, сотвори же беззаконие, и не правду, но вопль. 8 Горе совокупляющым дом к дому и село к селу приближающым, да ближнему отимут что: еда вселитеся едини на земли? 9 Услышашася бо во ушесех Господа Саваофа сия: аще бо будут домове мнози, в запустение будут велицыи и добрии, и не будут живущии в них: 10 идеже бо возорют десять супруг волов, сотворит корчаг един, и сеяй артавас шесть сотворит меры три. 11 Горе востающым заутра и сикер гонящым, ждущым вечера: вино бо сожжет я: 12 со гусльми бо и певницами, и тимпаны и свирельми вино пиют, на дела же Господня не взирают и дел руку Его не помышляют. 13 Убо пленени быша людие мои, за еже не ведети им Господа, и множество бысть мертвых глада ради и жажди водныя. 14 И разшири ад душу свою и разверзе уста своя, еже не престати: и снидут славнии и велицыи и богатии и губителие их и веселяйся в нем: 15 и смирится человек, и обезчестится муж, и очи высокоглядающии смирятся. 16 И вознесется Господь Саваоф в суде, и Бог Святый прославится в правде: 17 и упасутся расхищеннии яко юнцы, и пустыни плененных агнцы поядят. 18 Горе привлачающым грехи яко ужем долгим, и яко ига юнична ременем беззакония своя, 19 глаголющым: скоро да приближатся, яже сотворит, да видим, и да приидет совет Святаго Израилева, да разумеем. 20 Горе глаголющым лукавое доброе, и доброе лукавое, полагающым тму свет, и свет тму, полагающым горькое сладкое, и сладкое горькое. 21 Горе, иже мудри в себе самих и пред собою разумни. 22 Горе крепким вашым, вино пиющым, и вельможам растворяющым сикер, 23 оправдающым нечестива даров ради, и еже есть праведное праведнаго вземлющым от него. 24 Сего ради якоже сгорит трость от углия огненнаго и сожжется от пламене разгоревшагося, корень их яко персть будет, и цвет их яко прах взыдет: не восхотеша бо закона Господа Саваофа, но слово Святаго Израилева раздражиша. 25 И возярися гневом Господь Саваоф на люди Своя, и наложи руку Свою на них, и порази их: и раздражишася горы, и быша трупи их яко гной посреде пути. И во всех сих не отвратися ярость Его, но еще рука Его высока. 26 Воздвигнет убо знамение во языцех сущих далече и позвиждет им от конец земли, и се, скоро легце грядут: 27 не взалчут, ни утрудятся, ни воздремлют, ни поспят, ни распояшут поясов своих от чресл своих, ниже расторгнутся ремени сапогов их: 28 ихже стрелы остры суть, и луцы их напряжени: копыта коней их яко тверд камень вменишася, колеса колесниц их яко буря. 29 Ярятся яко львове, и предсташа яко львичища: и имет, и возопиет яко зверь, и извержет, и не будет отемлющаго их. 30 И возопиет их ради в той день, яко шум моря волнующася: и воззрят на землю, и се, тма жестока в недоумении их. === 6 === 1 И бысть в лето, в неже умре Озиа царь, видех Господа седяща на престоле высоце и превознесенне, и исполнь дом славы Его. 2 И Серафими стояху окрест Его, шесть крил единому и шесть крил другому: и двема убо покрываху лица своя, двема же покрываху ноги своя и двема летаху. 3 И взываху друг ко другу и глаголаху: Свят, Свят, Свят Господь Саваоф: исполнь вся земля славы Его. 4 И взяся наддверие от гласа, имже вопияху, и дом наполнися дыма. 5 И рекох: о, окаянный аз, яко умилихся, яко человек сый и нечисты устне имый, посреде людий нечистыя устне имущих аз живу: и Царя Господа Саваофа видех очима моима. 6 И послан бысть ко мне един от Серафимов, и в руце своей имяше угль горящь, егоже клещами взят от олтаря, 7 и прикоснуся устнам моим и рече: се, прикоснуся сие устнам твоим, и отимет беззакония твоя и грехи твоя очистит. 8 И слышах глас Господа глаголюща: кого послю, и кто пойдет к людем сим? И рекох: се, аз есмь, посли мя. 9 И рече: иди и рцы людем сим: слухом услышите, и не уразумеете: и видяще узрите, и не увидите: 10 одебеле бо сердце людий сих, и ушима своима тяжко слышаша, и очи свои смежиша, да не когда узрят очима и ушима услышат, и сердцем уразумеют и обратятся, и изцелю я. 11 И рекох: доколе, Господи? И рече: дондеже опустеют гради, от еже ненаселеным быти, и домы, от еже ненаселеным быти, и домы от еже не быти человеком, и земля останется пуста. 12 И посем продолжит Бог человеки, и умножатся оставльшиися на земли. 13 И еще на ней есть десятина, и паки будет в расхищение якоже теревинф и яко желудь, егда испадет из плюски своея: семя свято стояние его. === 7 === 1 И бысть во дни Ахаза сына Иоафамля, сына Озии, царя Иудина, взыде Расин царь Арамль, и Факей сын Ромелиев, царь Израилев, на Иерусалим, воевати на него, и не возмогоша разорити его. 2 И возвестися в дому Давидове, глаголя: совещася Арам со Ефремом, и ужасеся душа его и душа людий его, якоже в дубраве древо ветром возколеблется. 3 И рече Господь ко Исаии: изыди во сретение Ахазу ты и оставыйся Иасув сын твой, к купели горняго пути села белилнича, 4 и речеши ему: блюди, еже молчати, и не бойся, ниже душа твоя да изнеможет от двою древу главень дымящихся сих: егда бо гнев ярости Моея будет, паки изцелю. 5 Сын же Арамль и сын Ромелиев яко совещаста совет лукавый на тя, глаголюще: 6 взыдем во Иудею, и собеседовавше с ними отвратим я к нам и воцарим в ней сына Тавеилева: 7 сия же глаголет Господь Саваоф: не пребудет совет сей, ниже сбудется, 8 но глава Араму Дамаск, и глава Дамаску Расин: но еще шестьдесят и пять леть, оскудеет царство Ефремово от людий, 9 глава же Ефремови Соморон, и глава Соморону сын Ромелиев: и аще не уверите, ниже имате разумети. 10 И приложи Господь глаголати ко Ахазу, рекий: 11 проси себе знамения от Господа Бога твоего во глубину, или в высоту. 12 И рече Ахаз: не имам просити, ниже искушу Господа. 13 И рече (Исаиа): слышите убо, доме Давидов: еда мало вам есть труд даяти человеком, и како даете Господеви труд? 14 Сего ради даст Господь Сам вам знамение: се, Дева во чреве зачнет и родит Сына, и наречеши имя Ему Еммануил: 15 масло и мед снесть, прежде неже разумети ему изволити злая, или избрати благое: 16 зане прежде неже разумети отрочати благое или злое, отринет лукавое, еже избрати благое, и оставится земля, еяже ты боишися, от лица двух царей. 17 Но наведет Господь на тя и на люди твоя и на дом отца твоего дни, иже еще не пришли, от дне в оньже отя Ефрема от Иуды, царя Ассирийска. 18 И будет в той день, позвиждет Господь мухам, яже владеют частию реки Египетския, и пчеле, яже есть во стране Ассирийстей: 19 и приидут вси и почиют в дебрех страны и в пещерах каменных, и во вертепех и во всяцей разселине и во всяцем древе. 20 В день оный обриет Господь бритвою наятою об ону страну реки царя Ассирийска, главу и власы ног, и браду отимет. 21 И будет в той день, кормити будет человек юницу от волов и две овце: 22 и будет от множества творения млечнаго, масло и мед снесть всяк оставыйся на земли. 23 И будет в той день, всяко место, идеже аще будет тысяща лоз винограда, по тысящи сикль, в лядину будет и в терние: 24 со стрелою и луком внидут тамо, яко лядиною и тернием будет вся земля: 25 и всяка гора оремая возорется, не найдет тамо страх: будет от лядины и от терния в паству овцам и в попрание волу. === 8 === 1 И рече Господь ко мне: приими себе свиток нов велик и напиши в нем писалом человечим, еже скоро пленение сотворити корыстей, приспе бо: 2 и свидетели мне сотвори верны человеки, Урию иереа и Захарию сына Варахиина. 3 И приступих ко пророчице, и во чреве зачат и роди сына. И рече Господь мне: нарцы имя ему: скоро плени, нагло расхити, 4 зане прежде неже разумети отрочати назвати отца или матерь, приимет силу Дамаскову, и корысти Самарийския пред царем Ассирийским. 5 И приложи Господь глаголати ко мне еще, глаголя: 6 понеже не восхотеша людие сии воды Силоамли текущия тисе, но восхотеша имети Рассона и сына Ромелиева царя над вами, 7 сего ради се, возводит Господь на вы воду реки сильну и многу, царя Ассирийска и славу его: и взыдет на всяку дебрь вашу, и обыдет всяку стену вашу, 8 и отимет от Иудеи человека, иже возможет главу воздвигнути, или могущаго что совершити: и будет полк его, во еже наполнити ширину страны Твоея, с нами Бог! 9 Разумейте, языцы, и покаряйтеся, услышите даже до последних земли: могущии, покаряйтеся: аще бо паки возможете, паки побеждени будете, 10 и иже аще совет совещаете, разорит Господь, и слово, еже аще возглаголете, не пребудет в вас, яко с нами Бог. 11 Тако глаголет Господь: крепкою рукою не покаряются хождению пути людий сих, глаголюще: 12 да не когда рекут: жестоко: все бо, еже аще рекут людие сии, жестоко есть: страха же их не убойтеся, ниже возмятитеся. 13 Господа Сил, Того освятите, и Той будет тебе в страх. 14 И аще будеши уповая на Него, будет тебе во освящение, а не якоже о камень претыкания преткнешися, ниже яко о камень падения: домове же Иаковли в пругле, и в раздолии седящии во Иерусалиме. 15 Сего ради изнемогут в них мнози, и падут, и сокрушатся, и приближатся, и яти будут человецы в твердыни суще. 16 Тогда явлени будут печатлеющии закон, еже не учитися. 17 И речет: пожду Бога отвращшаго лице Свое от дому Иаковля и уповая буду Нань. 18 Се, аз и дети, яже ми даде Бог: и будут знамения и чудеса в дому Израилеве от Господа Саваофа, иже обитает на горе Сион. 19 И аще рекут к вам: изыщите чревоволшебников и от земли возглашающих, тщесловующих, иже от чрева глашают, не язык ли к Богу своему взыщет? Что испытуют мертвыя о живых? 20 Закон бо в помощь даде, да рекут не якоже слово сие, заньже не леть дары даяти. 21 И приидет на вы жесток глад, и будет, егда взалчете, скорбни будете и зло речете князю и отечеству: 22 и воззрят на небо горе, и на землю низу призрят, и се, скудость тесна и тма, скорбь и теснота и тма, якоже не видети: и не оскудеет в тесноте сый даже до времене. === 9 === 1 Сие прежде испий, скоро твори, страно Завулоня и земле Неффалимля, и прочии при мори живущии, и об ону страну Иордана, Галилеа языков. 2 Людие ходящии во тме видеша свет велий: живущии во стране и сени смертней, свет возсияет на вы. 3 Множайшии людие, яже извел еси, в веселии Твоем: и возвеселятся пред тобою, якоже веселящиися в жатву, и якоже веселятся делящии корысти. 4 Зане отятся ярем лежай на них, и жезл, иже на выи их: жезл бо истязующих разсыпа Господь, якоже в день, иже на Мадиама. 5 Яко всякую одежду собранну лестию и ризу с примирением отдадут, и восхотят, да быша огнем сожжены были. 6 Яко отроча родися нам, Сын, и дадеся нам, егоже началство бысть на раме Его: и нарицается имя Его: велика совета Ангел, Чуден, Советник, Бог крепкий, Властелин, Князь мира, Отец будущаго века: приведу бо мир на князи, мир и здравие Ему. 7 И велие началство Его, и мира Его несть предела на престоле Давидове и на царстве его, исправити е и заступити его в суде и правде, отныне и до века: ревность Господа Саваофа сотворит сия. 8 Смерть посла Господь на Иакова, и прииде на Израиля: 9 и уразумеют вси людие Ефремовы и живущии в Самарии, в досаждении и высоцем сердцы глаголюще: 10 плинфы падоша, но приидите, изсечем камение и посечем черничие и кедры, и созиждем себе столп. 11 И разрушит Бог востающыя на гору Сионю, и враги его разсыплет: 12 Сирию от восток солнца и Еллины от запада солнца, поядающыя Израиля всеми усты. Во всех сих не отвратися ярость Его, но еще рука Его высока. 13 И людие не обратишася, дондеже язвени быша, и Господа не взыскаша. 14 И отят Господь от Израиля главу и ошиб, велика и мала, во един день: 15 старца и чудящихся лицам, сие начало: и пророка учаща беззаконная, сей ошиб. 16 И будут блажащии людий сих льстяще, и льстят, яко да поглотят я. 17 Сего ради о юношах их не возвеселится Господь, и сирот их и вдовиц их не помилует: яко вси беззаконнии и лукавии, и всякая уста глаголют неправду. Во всех сих не отвратися ярость Его, но еще рука Его высока. 18 И разгорится яко огнь беззаконие, и яко троскот сухий пояден будет огнем, и разгорится в чащах дубравных и пояст, яже окрест холмов вся. 19 За ярость гнева Господня сгоре вся земля, и будут людие яко огнем пожжени: человек брата своего не помилует, 20 но уклонится на десно, яко взалчет, и снесть от шуиих, и не насытится человек ядый плоти мышцы своея: снесть бо Манассий Ефремово, и Ефрем Манассиино, яко вкупе повоюют Иуду. 21 Во всех сих не отвратися ярость (Его), но еще рука Его высока. === 10 === 1 Горе пишущым лукавство: пишущии бо лукавство пишут, 2 укланяюще суд убогих, восхищающе суд нищих людий Моих, яко быти им вдовице в расхищение и сироте в разграбление. 3 И что сотворят в день посещения? Скорбь бо вам отдалече приидет. И к кому прибегнете, да поможет вам? И где оставите славу вашу, 4 еже не впасти в пленение? И под убиеными падут. И во всех сих не отвратися гнев Его, но еще рука Его высока. 5 Горе Ассирием, жезл ярости Моея и гнев есть в руку их. 6 Гнев Мой послю на язык беззаконен, и своих людий повелю сотворити корысти и пленение, и попрати грады и положити я в прах. 7 Сей же не тако помысли и душею не тако возмне: но отступит ум его, и еже потребити языки не малы. 8 И аще рекут ему: ты ли еси един князь? 9 И речет: не взях ли страны, яже выше Вавилона и Халани, идеже столп создан, и взях Аравию и Дамаск и Самарию? 10 Якоже сия взях, и вся княжения возму. Возрыдайте, изваянная во Иерусалиме и в Самарии: 11 якоже бо сотворих Самарии и рукотворенным ея, тако сотворю и Иерусалиму и кумиром его. 12 И будет, егда скончает Господь вся творя в горе Сиони и во Иерусалиме, наведет на ум великий на князя Ассирийска и на высоту славы очию его. 13 Рече бо: крепостию руки моея сотворю, и премудростию разума (моего) отиму пределы языков, и силу их пленю, 14 и сотрясу грады населеныя, и вселенную всю оыму рукою моею яко гнездо, и яко оставленая яица возму: и несть, иже убежит мене, или противу мне речет, и отверзет уста и глумит. 15 Еда прославится секира без секущаго ею? Или вознесется пила без влекущаго ю? Такожде аще кто возмет жезл, или древо: и не тако. 16 Но послет Господь Саваоф на твою честь безчестие, и на твою славу огнь горя возгорится. 17 И будет свет Израилев во огнь, и освятит его огнем горящим, и пояст яко сено вещество. 18 В той день угаснут горы и холми и дубравы, и пояст от души даже до плотей: и будет бежай, яко бежай от пламене горяща: 19 и оставльшиися от них будут в число, и отроча малое напишет я. 20 И будет в той день, не приложится ктому останок Израилев, и спасеннии Иаковли не будут ктому уповающе на обидевшыя их, но будут уповающе на Бога Святаго Израилева истиною. 21 И обратится останок Иаковль к Богу крепкому. 22 И аще будут людие Израилевы яко песок морский, останок их спасется: 23 слово бо совершая и сокращая правдою, яко слово сокращено сотворит Господь во всей вселенней. 24 Сего ради сия глаголет Господь Саваоф: не бойтеся, людие Мои, от Ассириан, живущии в Сионе, яко жезлом поразит тя: язву бо наводит на тя, еже видети путь Египта. 25 Еще бо мало, и престанет гнев, ярость же Моя на совет их: 26 и воздвигнет Бог Сил на ня язву, яко язву Мадиамлю на месте Скорби, и ярость Его на путь иже к морю, на путь иже во Египет: 27 и будет в той день, отимется иго его от рамене твоего и страх его от тебе, и согниет иго от рамен ваших. 28 Приидет бо во град Аггай, и прейдет в Магеддо, и в Махмасе положит сосуды своя. 29 И минет дебрь, и приидет во Аггай: страх приимет Раму град Саулов, 30 побегнет дщерь Галимля, услышится в Лаисе, услышится во Анафофе. 31 И ужасеся Мадемина и живущии во Гивиме. 32 Утешайте днесь еже на пути пребыти: утешайте рукою гору дщерь Сионю, и холми, иже во Иерусалиме: 33 се Владыка Господь Саваоф смятет славныя со крепостию, и высоции укоризною сокрушатся, и высоцыи смирятся, 34 и падут высоцыи мечем, Ливан же с высокими падется. === 11 === 1 И изыдет жезл из корене Иессеова, и цвет от корене его взыдет: 2 и почиет на нем Дух Божий, дух премудрости и разума, дух совета и крепости, дух ведения и благочестия: 3 исполнит его дух страха Божия: не по славе судити имать, ниже по глаголанию обличит, 4 но судит правдою смиренному суд и обличит правостию смиренныя земли, и поразит землю словом уст Своих и духом устен убиет нечестиваго: 5 и будет препоясан правдою о чреслех Своих и истиною обвит по ребрам Своим: 6 и пастися будут вкупе волк с агнцем, и рысь почиет со козлищем, и телец и юнец и лев вкупе пастися будут, и отроча мало поведет я: 7 и вол и медведь вкупе пастися будут, и вкупе дети их будут, и лев аки вол ясти будет плевы: 8 и отроча младо на пещеры аспидов и на ложе изчадий аспидских руку возложит: 9 и не сотворят зла, ни возмогут погубити ни когоже на горе святей Моей: яко наполнися вся земля ведения Господня, аки вода многа покры море. 10 И будет в день оный корень Иессеов, и востаяй владети языки, на того языцы уповати будут: и будет покой его честь. 11 И будет в день оный, приложит Господь показати руку Свою, еже возревновати по останку прочему людий, иже аще останет от Ассириов и от Египта, и Вавилона и от Ефиопии, и от Еламитов и от Востоков солнца, и от Аравии и от островов морских. 12 И воздвигнет знамение в языки, и соберет погибшыя Израилевы, и расточенныя Иудины соберет от четырех крил земли. 13 И отимется ревность Ефремова, и врази Иудины погибнут: Ефрем не возревнует Иуде, и Иуда не оскорбит Ефрема. 14 И полетят в кораблех иноплеменничих, море купно пленят, и сущих от Восток солнца, и Идумею: и на Моава первее руки возложат, сынове же Аммони первии покорятся. 15 И опустошит Господь море Египетское и возложит руку Свою на реку духом пресильным: и поразит на седмь дебрий, якоже преходити ю во обувении: 16 и будет прошествие людем Моим оставшым во Египте, и будет Израилю, якоже в день, егда изыде от земли Египетския. === 12 === 1 И речеши в день оный: благословлю и Тя, Господи, яко разгневался еси на мя, и отвратил еси ярость Твою (от мене), и помиловал мя еси. 2 Се, Бог мой спас мой, уповая буду на Него и не убоюся: зане слава моя и похвала моя Господь, и бысть ми во спасение. 3 И почерпите воду со веселием от источник спасения. 4 И речеши в день оный: хвалите Господа, воспойте имя Его, возвестите во языцех славная Его, поминайте, яко вознесеся имя Его. 5 Хвалите имя Господне, яко высокая сотвори: возвестите сия по всей земли. 6 Веселитеся и радуйтеся, живущии в Сионе, яко вознесеся Святый Израилев посреде тебе. === 13 === 1 Видение на Вавилона, еже виде Исаиа сын Амосов. 2 На горе польней воздвигните знамение, вознесите глас им, не бойтеся, поущайте рукою, отверзите, князи. 3 Аз повелеваю, освященни суть: и Аз веду их, исполини идут исполнити ярость Мою радующеся, вкупе и укаряюще. 4 Глас языков многих на горах, подобен языков многих, глас царей и языков собравшихся: Господь Саваоф заповеда языку оружеборцу 5 приити от земли издалеча, от края основания небесе, Господь и оружеборцы Его, растлити всю вселенную. 6 Рыдайте: близ бо день Господень, и сокрушение от Бога приидет: 7 сего ради всяка рука разслабеет, и всяка душа человеча убоится, 8 и смятутся послы, и болезни приимут я яко жены раждающия: и поскорбят друг ко другу, и ужаснутся, и лице свое яко пламень изменят. 9 Се бо, день Господень грядет неизцельный, ярости и гнева, положити вселенную (всю) пусту и грешники погубити от нея. 10 Звезды бо небесныя и орион и все украшение небесное света своего не дадят, и помрачится солнце возсиявающее, и луна не даст света своего. 11 И заповем всей вселенней злая и нечестивым грехи их, и погублю укоризну беззаконных и укоризну гордых смирю: 12 и будут оставшии честнии паче, нежели злато нежженое, и человек честен будет паче, нежели камень, иже от Суфира. 13 Разярится бо небо, и земля потрясется от оснований своих, за ярость гнева Господа Саваофа в день, в оньже приидет ярость Его. 14 И будут оставшии яко серна бежащая и яко овца заблудившая, и не будет собираяй, яко человеку в люди своя возвратитися, и человек во страну свою побегнет. 15 Иже бо аще пленится, поразится, и иже собрани суть, мечем падут. 16 И чада их пред ними разбиют, и домы их пленят, и жены их поймут. 17 Се, Аз возбуждаю на вы Мидов, иже сребра не вменяют, ниже злата требуют: 18 стреляния юношеская сокрушат, и чад ваших не помилуют, ниже пощадят чад твоих очи их. 19 И будет Вавилон, иже нарицается славный от царя Халдейска, якоже разсыпа Бог Содому и Гоморру, 20 не населится в вечное время, и не внидут в онь чрез многия роды, ниже пройдут его Аравляне, ниже пастуси почиют в нем. 21 И почиют тамо зверие, и наполнятся домове шума, и почиют ту сирини, и беси тамо воспляшут, 22 и онокентавры тамо вселятся, и вогнездятся ежеве в домех их. === 14 === 1 Скоро идет и не умедлит: и помилует Господь Иакова и изберет паки Израиля, и почиют на земли своей, и пришлец приложится к ним и приложится к дому Иаковлю, 2 и поймут их языцы и введут на место их, и наследят и умножатся на земли Божии в рабы и рабыни: и будут пленени пленившии я, и обладани будут обладавшии ими. 3 И будет в той день, упокоит тя Господь от болезни и ярости твоея и от работы жестокия, еюже работал еси им. 4 И приимеши плачь сей на царя Вавилонска и речеши в той день: како преста истязуяй и преста понуждаяй? 5 Сокруши Бог ярем грешников, ярем князей, 6 поразив язык яростию, язвою неизцельною, поражаяй язык язвою ярости, еюже не пощаде, почи уповающи. 7 Вся земля вопиет со веселием, 8 и древа ливанова возвеселишася о тебе и кедр ливанский: отнележе ты уснул еси, не взыде посекаяй нас. 9 Ад доле огорчися, срет тя: восташа с тобою вси Исполини обладавшии землею, подвизавшии от престолов своих всех царей языческих. 10 Вси отвещают и рекут тебе: и ты пленен еси, якоже и мы: и в нас вменен еси. 11 Сниде слава твоя во ад, многое веселие твое: под тобою постелют гнилость, и покров твой червь. 12 Како спаде с небесе денница восходящая заутра? Сокрушися на земли посылаяй ко всем языком. 13 Ты же рекл еси во уме твоем: на небо взыду, выше звезд небесных поставлю престол мой, сяду на горе высоце, на горах высоких, яже к северу: 14 взыду выше облак, буду подобен Вышнему. 15 Ныне же во ад снидеши и во основания земли. 16 Видевшии тя удивятся о тебе и рекут: сей человек раздражаяй землю, потрясаяй цари, 17 положивый вселенную всю пусту и грады ея разсыпа, плененых не разреши. 18 Вси царие языков успоша в чести, кийждо в дому своем. 19 Ты же повержен будеши в горах, яко мертвец мерзкий со многими мертвецы изсечеными мечем, сходящими во ад. 20 Якоже риза в крови намочена не будет чиста, такожде и ты не будеши чист, зане землю Мою погубил еси и люди Моя избил еси: не пребудеши в вечное время, семя злое. 21 Уготови чада твоя на убиение грехами отца твоего, да не востанут и наследят землю и наполнят землю ратьми. 22 И востану на ня, глаголет Господь Саваоф, и погублю имя их, и останок, и семя: сия глаголет Господь. 23 И положу Вавилона пуста, яко вогнездитися ежем, и будет ни во чтоже: и положу и брения пропасть в пагубу. 24 Сия глаголет Господь Саваоф: якоже глаголах, тако будет, и якоже совещах, тако пребудет, 25 еже погубити Ассириан на земли Моей и на горах Моих: и будут в попрание, и отимется от них ярем их, и слава их от рамен их отимется. 26 Сей совет, егоже совеща Господь на всю вселенную, и сия рука на вся языки вселенныя: 27 яже бо Бог Святый совеща, кто разорит? И руку Его высокую кто отвратит? 28 В лето, в неже умре Ахаз царь, бысть глагол сей: 29 не радуйтеся, вси иноплеменницы, сокрушися бо ярем биющаго вы: от семене бо змиина изыдут изчадия аспидов, и изчадия их изыдут змии парящии: 30 и упасутся убозии им, нищии же человецы в мире почиют: и потребит гладом семя твое, и останок твой избиет. 31 Восплачитеся, врата градов, да возопиют грады смятеннии, иноплеменницы вси, зане дым от севера идет, и несть, иже пребудет. 32 И что отвещают царие языков? Яко Господь основа Сиона, и тем спасутся смиреннии людий Его. === 15 === 1 Нощию погибнет Моавитска земля, нощию бо погибнет стена Моавитская. 2 Плачитеся о себе, погибнет бо и Дивон, идеже требище ваше: тамо взыдете плакатися над Нававом Моавитским. Плачитеся, на всяцей главе плешь, вся мышцы обсечены, 3 на стогнах его препояшитеся во вретища, и восплачитеся на храминах его и на улицах его и на стогнах его, вси возрыдайте с плачем. 4 Яко возопи Есевон и Елеала, даже до Иассы услышася глас их: сего ради чресла Моавитиды вопиют, душа ея увесть. 5 Сердце Моавитиды вопиет в ней даже до Сигора: юница бо есть трилетна. В возшествии же Луифа к тебе плачущеся взыдут путем Арониимлим: вопиет сотрение и трус. 6 Вода Немримля пуста будет, и трава ея оскудеет: травы бо зелены не будет. 7 Еда и сице спасется? Наведу бо на дебрь Аравлян, и возмут ю: 8 прейде бо вопль предел земли Моавитския до Агаллима, и плачь ея даже до Кладязя Елимля. 9 Вода бо Димоня наполнится крове: наведу бо на Димона Аравляны, и возму семя Моавле и Ариилево и останок Адаминь. === 16 === 1 Послю аки гады на землю: еда камень и пуст есть гора дщере Сиони? 2 Будеши бо аки птицы парящия птенец отятый, дщи Моавля, потом же Арнон множайше совещавай. 3 Сотворите покров плача ея присно: в полуденней тме бегут, ужаснушася: да не отведешися, 4 обитати будут в тебе беглецы Моавли: будут в покровение вам от лица гонящаго, яко отяся помощь твоя, и князь погибе попираяй от земли. 5 И исправится с милостию престол, и сядет на нем со истиною во скинии Давидове, судя и взыская суд и ускоряя правду. 6 Слышахом укоризну Моавлю, укоритель (бысть) зело, гордыню отях: не тако волхвование твое, не тако. 7 Восплачется Моав, в Моавитиде бо вси восплачутся: живущым же в Сефе помышления, и не усрамишися. 8 Поля Есевоня возрыдают, виноград Севамань: пожирающии языков, поперите винограды его, даже до Иазира: не совокупитеся, обходите пустыню, посланнии осташася, проидоша бо море. 9 Сего ради восплачуся яко плачем Иазировым о винограде Севамани: древа твоя посече Есевон и Елиала, яко на жатву твою и на оымание вина поперу, и вся падутся. 10 И отимется радость и веселие от виноградов, и в виноградех твоих не возрадуются, и не изгнетут вина в точилех, престало бо есть: 11 сего ради чрево мое на Моава аки гусли возгласит, и внутренняя моя аки стену обновил еси. 12 И будет в посрамление тебе, и яко утрудися Моав о требищих, и внидет в рукотворенная своя, да помолится, и не возмогут избавити его. 13 Сие слово еже глагола Господь на Моава, егда возглагола. 14 И ныне глаголю: в триех летех лет наемника обезчестится слава Моавля во всем богатстве мнозе, и оставится умален и нечестен. === 17 === 1 Се, Дамаск возмется от градов и будет в падение. 2 Оставлен в век, в ложе стадам и в покой, и не будет отгоняяй. 3 И ксему не будет укреплен, еже вбегнути тамо Ефрему: и ксему не будет царство в Дамасце, и останок Сирян погибнет: неси бо ты лучший от сынов Израилевых и славы их: сия глаголет Господь Саваоф. 4 Будет в той день помрачение славы Иаковли, и тучная славы его потрясутся. 5 И будет, якоже аще кто собирает жатву стоящую, и семя класов пожинает: и будет, якоже аще кто собирает класы в дебри Тверде. 6 И останется в ней стеблие, или аки зерна маслична две или три на версе высоце, или четыре или пять на ветвии ея останут: сия глаголет Господь Бог Израилев. 7 В той день уповая будет человек на Сотворшаго и, и очи его ко Святому Израилеву воззрят, 8 и не будут уповающе на требища, ниже на дела рук своих, яже сотвориша персты их, и не будут смотрити на Дубравы, ниже на мерзости их. 9 В той день будут гради твои оставлени, якоже оставиша Аморрее и Евее от лица сынов Израилевых: и будут пусти, 10 зане оставил еси Бога спаса твоего и Господа помощника твоего не помянул еси: сего ради насадиши сад неверен и семя неверно. 11 В оньже бо день аще насадиши, прельстишися: а еже аще заутра посееши, то процветет на жатву, во оньже день наследиши, и аки отец человечь наследие даси сыном твоим. 12 О, люте множеству языков многих! Аки море волнующееся, тако смятетеся, и хребет языков многих яко вода возшумит: 13 аки вода многа языцы мнози, аки (шум) воды многия нуждею носимыя: и отвержет его и далече поженет его, аки прах плевный веющих противу ветра, и яко прах колесный буря возносящая. 14 К вечеру, и будет плачь: прежде заутрия, и не будет: сия часть пленивших ны, и жребий наследивших нас. === 18 === 1 Горе корабелным крилам земли, яже об ону страну рек Ефиопских. 2 Посылаяй по морю послы в залог и послания книжная верху воды: пойдут бо вестницы легцы ко языку высоку и к людем странным и строптивым. Кто далее их? Язык безнадежен и попран. 3 Ныне реки земныя вся аки страна населена населится, страна их аки знамение от горы воздвигнется, аки глас трубы услышан будет. 4 Яко тако ми рече Господь: утверждение будет в Моем граде, аки свет зноя полуденнаго и аки облак росный в день жатвы будет. 5 Прежде жатвы, егда совершится цвет, и грезн произыдет по цвете недозрел: и отимет гроздие малое серпами и лозие отимет и посечет, 6 и оставит вкупе птицам небесным и зверем земным: и соберутся на ня птицы небесныя, и вси зверие земли нань приидут. 7 В то время принесутся дары Господу Саваофу от людий оскорбленых и отторженых и от людий великих, отныне и в вечное время: язык надеющься и попран, иже есть в части речней страны своея, на место, идеже имя Господа Саваофа, на гору Сионю. === 19 === 1 Се, Господь седит на облаце легце и приидет во Египет, и потрясутся рукотворенная Египетская от лица Его, и сердца их разслабнут в них. 2 И востанут Египтяне на Египтяны, и воюружится человек на брата своего, и всяк на ближняго своего, востанет град на град и закон на закон. 3 И возмятется дух Египтян в них, и совет их разсыплю, и вопросят богов своих и кумиров своих, и гласящих от земли и чревоволшебников. 4 И предам Египет в руце человеков властелей жестоких, и царие жестоцы обладати будут ими: сия глаголет Господь Саваоф. 5 И испиют Египтяне воду, яже при мори, а река оскудеет и изсхнет. 6 И оскудеют реки и ровенницы речнии: и изсхнет весь сонм водный, и во всяцем лузе тростнем и ситнем, 7 и злак зеленый весь иже окрест реки, и все сеемое при реце посхнет ветром растленно. 8 И возстенят рыбарие, и возстенят вси мещущии удицу в реку, и мещущии неводы и мещущии сети возрыдают. 9 И студ приимет делающих лен разчесаный и делающих виссон, и будут делающии я в болезни, 10 и вси творящии сикеру опечалятся и поболят душами. 11 И юродиви будут князи Танесовы: мудрии царевы советницы, совет их объюродеет. Како речете царю: сынове смысленых мы, сынове царей древних? 12 Где суть ныне мудрии твои, и да возвестят тебе и рекут: что совеща Господь Саваоф на Египет? 13 Оскудеша князи Танесовы, и вознесошася князи Мемфитстии, и прельстят Египта по племеном. 14 Господь бо раствори им дух прельщения, и прельстиша Египта всеми делесы своими, якоже прельщается пияный и купно блюющь. 15 И не будет Египтяном дела, еже бы сотворило главу и ошиб, и начало и конец. 16 В той день будут Египтяне аки жены во страсе и трепете от лица руки Господа Саваофа, юже Той возложит на ня. 17 И будет страна Иудейска во страх Египтяном: всяк, иже аще воспомянет ю им, убоятся совета ради, егоже совеща Господь Саваоф нань. 18 В той день будет пять градов во Египте, глаголющих языком Ханаанитским и кленущихся именем Господа Саваофа: град Аседек прозовется един град. 19 В той день будет жертвенник Господеви в земли Египетстей и столп в пределех его Господеви. 20 И будет в знамение во век Господеви в земли Египетстей: яко возопиют ко Господу на оскорбляющыя их, и послет им Господь человека, иже спасет я, судяй спасет я. 21 И познан будет Господь Египтяном: и уведят Египтяне Господа в той день и сотворят жертвы и дары, и обещают обеты Господеви и воздадят. 22 И поразит Господь Египтян язвою великою и изцелит их цельбою, и обратятся ко Господеви, и услышит их и изцелит их цельбою. 23 В той день будет путь от Египта ко Ассирианом, и внидут Ассириане во Египет, и Египтяне пойдут ко Ассирианом, и поработают Египтяне Ассирианом. 24 В той день будет Израиль третий во Египтянех и во Ассирианех, благословен на земли, 25 юже благослови Господь Саваоф, глаголя: благословени людие Мои, иже во Египте и иже во Ассириах, и наследие Мое Израиль. === 20 === 1 В лето, в неже вниде Танафан во Азот, егда послан бысть от Арны, царя Ассирийскаго, и воева на Азот и взя его, 2 тогда рече Господь ко Исаии сыну Амосову, глаголя: иди и сверзи вретище со чресл своих, и сандалия твоя иззуй с ног твоих, и сотвори сице, ходя наг и бос. 3 И рече Господь: якоже ходил раб Мой Исаиа наг и бос три лета, три лета будут знамения и чудеса Египтяном и Ефиопляном: 4 яко такожде отведет царь Ассирийск плен Египетск и Ефиопск, юношы и старцы, наги и босы, откровены во стыдение Египту. 5 И постыдятся побеждени Египтяне о Ефиоплянех, на нихже уповаху Египтяне, бяху бо им слава. 6 И рекут живущии на острове сем в день оный: се, мы бехом уповающе бежати к ним на помощь, иже не могоша спастися от царя Ассирийска, и како мы спасемся? === 21 === 1 Якоже буря сквозе пустыню проходит, от пустыни исходящая из земли, 2 страшно видение и жестоко поведася мне: преступаяй преступает, и беззаконнуяй беззаконствует: на мя Еламите, и послы Персстии на мя идут: ныне воздохну и утешу себе. 3 Сего ради наполнишася чресла моя разслабления, и болезни прияша мя аки раждающую: неправдовах еже не слышати, потщахся еже не видети. 4 Сердце мое заблуждает, и беззаконие погружает мя, душа моя стоит во страсе. 5 Уготовите трапезу, ядите, пийте: воставше, князи, уготовите щиты, 6 яко тако рече Господь ко мне: шед постави себе стража, и еже аще узриши, возвести. 7 И узрех всадники конныя два, всадника на осляти и всадника на велблюде. Послушай слушанием многим 8 и призови Урию на стражбу Господню. И рече: стоях выну день, и у полчища аз стоях всю нощь, 9 и се, сам грядет (муж) всадник двоконный, и отвещав рече: паде, паде Вавилон, и вси кумиры его и вся рукотворенная его сокрушишася на земли. 10 Послушайте, оставшиися, и болезнующии, услышите: еже слышах от Господа Саваофа, Бог Израилев возвести нам. 11 Ко мне зови от Сиира: стрегите забрала. 12 Стрегу заутра и нощию. Аще ищеши, ищи и у мене обитай. 13 В дубраве в вечер преспиши, или на пути Деданове. 14 Во сретение жаждущему воду принесите, живущии во стране Феманове, со хлебы сретайте бежащыя множества ради убиенных 15 и множества ради заблуждающих, и множества ради мечей и множества ради луков напряженных, и множества ради падших на сечи. 16 Яко сице рече Господь ко мне: еще лето (едино), якоже лето наемника, оскудеет слава сынов Кидарских, 17 и останок луков сильных сынов Кидарских будет мал, яко Господь Бог Израилев глагола. === 22 === 1 Что бысть тебе, яко ныне возлезосте вси на храмины тщетныя? 2 Наполнися град вопиющих, уязвленнии твои не мечьми уязвлени, ниже мертвецы твои умерщвлени ратию: 3 вси князи твои побегоша, и плененнии жестоце суть связани, и крепцыи в тебе далече отбежаша. 4 Сего ради рекох: оставите мене, да горце восплачуся: не належите утешати мя о сокрушении дщере рода моего: 5 яко день мятежа и пагубы и попрания, и смятение от Господа Саваофа: в дебри Сиони скитаются, от мала даже до велика скитаются по горам. 6 Еламите же взяша тулы, и всадницы человецы на конех, и собор ополчения. 7 И будут избранны дебри твоя, наполнятся колесниц, конницы же заступят врата твоя 8 и открыют врата Иудина, и воззрят в той день во избранныя домы града, 9 и открыют сокровенная домов краеградия Давидова, и узрят, яко множайшии суть, и яко отвратиша воду древния купели во град, 10 и яко разориша домы Иерусалимли на утверждение стене градней. 11 И сотвористе себе воду между двема стенама, внутрьуду купели древния, и не воззресте на Сотворившаго ю исперва, и Сограждшаго ю не видесте. 12 И призва Господь, Господь Саваоф в той день плачь и рыдание, и острижение и препоясание во вретища: 13 тии же сотвориша радость и веселие, закалающе телцы и жруще овцы, яко ясти мяса и пити вино, глаголюще: да ямы и пием, утре бо умрем. 14 И откровенна сия суть во ущию Господа Саваофа, яко не оставится вам той грех, дондеже умрете. 15 Сице глаголет Господь Саваоф: иди в кущу ко Сомнану строителю дому и рцы ему: 16 что ты зде, и что тебе зде, яко истесал еси себе зде гроб и сотворил еси себе на высоце гроб, и написал еси себе на камени кущу? 17 Се, ныне Господь Саваоф извержет и сотрет мужа, и отимет утварь твою и венец твой славный, 18 и повержет тя во страну велику и безмерну, и тамо умреши: и положит колесницу твою добрую в безчестие и дом князя твоего в попрание: 19 и извержешися от строителства твоего и от степене твоего. 20 И будет в той день, и призову раба Моего Елиакима сына Хелкиева 21 и облеку его во утварь твою, и венец твой дам ему и державу твою, и строителство твое дам в руце его, и будет яко отец живущым во Иерусалиме и живущым во Иудеи. 22 И дам ему славу Давидову, и обвладеет, и не будет противоглаголющаго: и дам ему ключь дому Давидова на рамо его, и отверзет, и не будет затворяющаго, и затворит, и не будет отверзающаго. 23 И поставлю его князя на месте верне, и будет на престоле славы дому отца своего. 24 И будет уповаяй на него всяк славный в дому отца его, от мала даже до велика: и будут зависяще на нем. 25 В той день, сия глаголет Господь Саваоф, подвигнется человек утвержден на месте верне, и отимется, и падет, и потребится слава, яже на нем, яко Господь глагола. === 23 === 1 Плачитеся, корабли Кархидонстии, яко погибе, и ктому не идут от земли Китиейския, отведеся пленен. 2 Кому подобни быша живущии во острове, купцы Финичестии, преходящии море? 3 В воде мнозе семя купеческо, аки жатве вносимей купцы язычестии. 4 Усрамися, Сидоне, рече море. Крепость же морская рече: не болех, ни породих, ни вскормих юнош, ниже вознесох девиц. 5 Егда же слышано будет во Египте, приимет я болезнь о Тире. 6 Идите в Кархидон, плачитеся, живущии во острове сем. 7 Не сие ли бе величание вам исперва, прежде неже предану быти ему? 8 Кто сия совеща на Тира? Еда хуждший есть, или не крепкий есть? Купцы его славнии князи земли. 9 Господь Саваоф совеща разсыпати всякую гордыню славных и обезчестити всякое славное на земли. 10 Делай землю твою, ибо корабли ктому не приидут от Кархидона. 11 И рука Твоя ктому не укрепеет по морю, разгневляющая царей. Господь Саваоф заповеда о Ханаане, еже погубити крепость его. 12 И рекут: ктому не приложите укаряти и обидети дщерь Сидоню: и аще отидеши ко Китииом, ниже тамо будет тебе покой: 13 и в землю Халдейску, но и та опустела от Ассириан, яко стена ея падеся. 14 Плачитеся, корабли Кархидонстии, яко погибе твердыня ваша. 15 И будет в той день, оставлен будет Тир седмьдесят лет, якоже время (единаго) царя, яко время человеческо: и по седмидесятих летех будет Тир яко песнь блудницы. 16 Возми гусли, обыди град, блудница забвеная, добре погуди, много воспой, да память твоя будет. 17 И будет по седмидесятих летех, присещение сотворит Бог Тиру, и паки возставится на прежднее и будет торжище всем царствам вселенныя на лицы земли. 18 И будет его купля и мзда свято Господеви, не им собрано будет, но живущым пред Господем, вся купля его, ясти и пити и наполнитися, и в сытость, на память пред Господем. === 24 === 1 Се, Господь разсыплет вселенную и опустошит ю, и открыет лице ея и расточит живущыя на ней. 2 И будут людие аки жрец, и раб аки господин, и раба аки госпожа: будет купуяй яко продаяй, и взаим емляй аки заимодавец, и должный аки емуже есть должен. 3 Тлением истлеет земля, и расхищением расхищена будет земля: уста бо Господня глаголаша сия. 4 Восплакася земля, и растленна бысть вселенная, восплакашася высоцыи земли. 5 Земля бо беззаконие сотвори живущих ради на ней, понеже преступиша закон и измениша заповеди, разрушиша завет вечный. 6 Сего ради проклятие пояст землю, яко согрешиша живущии на ней: сего ради убози будут живущии на земли, и останется человеков мало. 7 Восплачется вино, возрыдает виноград, возстенут вси радующиися душею. 8 Престало есть веселие тимпанов, преста высокодерзость и богатство нечестивых, престал есть глас гуслей: 9 усрамишася, не пиша вина, горька бысть сикера пиющым. 10 Опусте всяк град, заключит храм, еже не внити. 11 Плачитеся о вине всюду, престала есть радость вся земная, отиде вся радость земли. 12 И останут гради пусти, и домове оставлени погибнут. 13 Сия вся будут на земли среди языков: якоже аще кто отрясает масличину, тако отрясут их: и (якоже) аще останет от оымания винограда, 14 сии гласом возопиют: оставшиися же на земли возрадуются со славою Господнею, возмятется вода морская. 15 Сего ради слава Господня во островех будет морских, имя Господне прославлено будет. 16 Господи Боже Израилев, от крил земных чудеса слышахом, надежда благочестивому: и рекут: (горе хулящым, иже хулят закон,) горе преступником, иже преступают закон. 17 Страх и пропасть и сеть на вас живущих на земли. 18 И будет, бежай страха впадет в пропасть, и излазяй из пропасти имется в сеть: яко окна с небесе отверзошася, и потрясутся основания земная. 19 Мятежем возмятется земля, и скудостию оскудеет земля. 20 Преклонися и потрясеся земля аки овощное хранилище, и аки пиян и шумен падет и не возможет востати, преодоле бо на ней беззаконие. 21 И будет в той день, наведет Господь на утварь небесную руку и на цари земныя. 22 И соберут собрание ея и затворят в тверди и в темницы: мноземи роды будет посещение их. 23 И истает плинфа и падет стена, и устыдится луна и посрамится солнце: яко воцарится Господь в Сионе и во Иерусалиме и пред старейшины славен будет. === 25 === 1 Господи Боже мой, прославлю Тя, воспою имя Твое, яко сотворил еси чудная дела, совет древний истинный: да будет, Господи. 2 Яко положил еси грады в персть, грады твердыя, еже пасти основанием их, нечестивых град да не созиждется во век. 3 Сего ради благословят Тя людие нищии, и гради человеков обидимых возблагословят Тя. 4 Был бо еси всякому граду смиренному помощник, и изнемогающым за оскудение покров, от человек злых избавиши их: покров жаждущих, и дух человеков обидимых. 5 Аки человецы малодушнии жаждущии в Сионе, яко избавиши их от человек нечестивых, имже нас предал еси. 6 И сотворит Господь Саваоф всем языком: на горе сей испиют радость, испиют вино, 7 помажутся миром на горе сей: предаждь сия вся языком: той бо совет на вся языки. 8 Пожре смерть возмогши, и паки отят Господь Бог всякую слезу от всякаго лица: поношение людий отят от всея земли, уста бо Господня глаголаша (сия). 9 И рекут в день оный: се, Бог наш, Наньже уповахом, и спасет нас: Сей Господь, потерпехом Его, и возрадовахомся и возвеселихомся о спасении нашем. 10 Покой даст Бог на горе сей, и поперется Моавитида, якоже топчут ток колесницами. 11 И воздвигнет руце свои, якоже и той смири, еже погубити: и смирит гордыню его, на няже руце возложи. 12 И высоту убежища ограды твоея смирит, и обнизится даже до земли. === 26 === 1 В той день воспоют песнь сию в земли Иудейстей, глаголюще: се, град крепок, и спасение нам положит стену и ограждение. 2 Отверзите врата, да внидут людие хранящии правду и хранящии истину, 3 приемлющии истину и хранящии мир. 4 Яко на тя надеянием надеяшася, Господи, во век, Боже великий, вечный, 5 иже смирив низвел еси живущыя в высоких: грады крепкия разориши и обнизиши я даже до земли. 6 И поперут я ноги кротких и смиренных. 7 Путь благочестивых прав бысть, и приуготован путь благочестивых. 8 Путь бо Господень суд: уповахом на имя Твое и память, еяже желает душа наша. 9 От нощи утренюет дух мой к Тебе, Боже, зане свет повеления Твоя на земли: правде научитеся, живущии на земли. 10 Преста бо нечестивый: всяк, иже не научится правде на земли, истины не сотворит: да возмется нечестивый, да не видит славы Господни. 11 Господи, высока Твоя мышца, и не ведеша, разумевше же постыдятся: ревность приимет люди ненаказанныя, и ныне огнь супостаты пояст. 12 Господи Боже наш, мир даждь нам, вся бо воздал еси нам. 13 Господи Боже наш, стяжи ны: Господи, разве Тебе иного не вемы: имя Твое именуем. 14 Мертвии же живота не имут видети, ниже врачеве воскресят: сего ради навел еси и погубил еси, и взял еси всяк мужеск пол их. 15 Приложи им зла, Господи, приложи зла славным земли. 16 Господи, в скорби помянухом Тя, в скорби мале наказание Твое нам. 17 И яко болящая приближается родити и в болезни своей воскрича, тако быхом возлюбленному Твоему. 18 Страха ради Твоего, Господи, во чреве прияхом и поболехом, и родихом дух спасения Твоего, егоже сотворихом на земли: не падемся, но падутся вси живущии на земли. 19 Воскреснут мертвии и востанут иже во гробех, и возрадуются иже на земли: роса бо, яже от Тебе, изцеление им есть, земля же нечестивых падет. 20 Идите, людие мои, внидите во храмину вашу, затворите двери своя, укрыйтеся мало елико елико, дондеже мимоидет гнев Господень. 21 Се бо, Господь от святаго (места) наводит гнев на живущыя на земли: и открыет земля кровь свою и не покрыет избиеных. === 27 === 1 В той день наведет Господь мечь святый и великий и крепкий на драконта змиа бежаща, на драконта змиа лукаваго, и убиет драконта сущаго в мори. 2 В той день виноград добрый, желание пети над ним: 3 аз град крепкий, град воюемый, всуе напою его: пленен бо будет нощию, в день же падется стена его: несть того, иже не возмет его. 4 Кто мя приставит стрещи стеблие на ниве? Ради вражды сея отринух и. Убо сего ради сотвори Господь Бог вся, елика совеща. 5 И сгорех, возопиют живущии в нем: сотворим мир Ему, сотворим мир, 6 приходящая чада Иаковля: прозябнет и процветет Израиль, и наполнится вселенная плода его. 7 Еда якоже Той порази, и сам сице уязвится? И якоже сам уби, такожде убиен будет? 8 Сваряся и укоряя отпустит я: не Ты ли был еси помышляя духом жестоким, убити я духом ярости? 9 Сего ради отимется беззаконие Иаковле, и сие есть благословение его, егда отиму грех его, егда положат все камение требищ сокрушено аки прах дробный: и не пребудут древеса их, и кумиры их будут посечени, аки дубрава далече. 10 Обитающее стадо отпущенно будет, аки стадо оставленое: и будет много время в пажить, и тамо почиют стада. 11 И по времени не будет в нем всякаго злака, занеже изсхнет: жены грядущыя с позорища, приидите: не суть бо людие имуще смысла, сего ради не ущедрит Сотворивый я, ниже Создавый их помилует. 12 И будет в той день, заградит Господь от ровенника речнаго, даже до Ринокоруры (града): вы же соберите сыны Израилевы по единому. 13 И будет в той день, вострубят трубою великою, и приидут погубляемии во стране Ассирийстей и погубляемии во Египте, и поклонятся Господеви на горе святей во Иерусалиме. === 28 === 1 Горе венцу гордыни, наимницы Ефремовы, цвет отпадый от славы, на версе горы тучныя пиянии без вина. 2 Се, крепка и жестока ярость Господня, аки град низпущаемый не имый крова, насильно низпущаемый: якоже воды многое множество влекущее страну, земли сотворит покой рукама, 3 и ногама поперется венец гордыни, наимницы Ефремовы. 4 И будет цвет отпадый от надежды славы на версе горы высокия, аки ранний плод смоквин: видевый его, прежде взятия в руце свои, восхощет поглотити его. 5 В той день будет Господь Саваоф венец надежди, сплетеный славою оставшымся людем. 6 И оставятся духом судным на суд, и крепость возбраняющих погубляти. 7 Сии бо вином суть прельщени: прельстишася сикеры ради, жрец и пророк изступиша ума от сикеры, пожерты быша вином, потрясошася от пиянства сикеры, прельстишася: сие есть привидение. 8 Проклятие пояст сей совет, сей бо совет ради лихоимства. 9 Кому возвестихом злая и кому поведахом весть? Иже отдоении (суть) от млека, отторженнии от сосца. 10 Печали на печаль ожидай, надежды к надежди, еще мало, еще мало, 11 яко худостию устен, языком иным возглаголют людем сим, рекуще им: 12 сей покой алчному и сие сокрушение, и не восхотеша слышати. 13 И будет им слово Господа Бога, печаль к печали, надежда к надежди, еще мало, еще мало, да идут и падутся вспять и в беду впадут, и сокрушатся и пленени будут. 14 Сего ради услышите слово Господне, мужие озлобленнии и князи людий сущих во Иерусалиме. 15 Яко рекосте: сотворихом завет со адом и со смертию сложение: буря носима аще мимоидет, не приидет на нас: положихом лжу надежду нашу и лжею покрыемся. 16 Сего ради тако глаголет Господь: се, Аз полагаю во основание Сиону камень многоценен, избран, краеуголен, честен, во основание ему, и веруяй в онь не постыдится: 17 и положу суд в надежду, милость же моя на мерилех, и уповавшии вотще на лжу, яко не минет вас буря: 18 и не отимет от вас завета смертнаго, и надежда ваша, яже ко аду, не пребудет. Буря идущая аще найдет, будете ей в попрание: 19 егда мимоидет, возмет вас: яко по всяко утро преходити будет в день, и в нощи будет надежда зла. Научитеся слышати, утесняемии: 20 не можем ратовати, сами же изнемогаем, еже собратися нам. 21 Якоже гора на нечестивых востанет Господь, и будет (якоже) в дебри Гаваонстей, с яростию сотворит дела Своя, горести дело: ярость же Его чуждо употребится, и погубление Его странно. 22 И вы не радуйтеся, ниже да возмогут ваши узы: зане скончаны и сокращены вещи слышах от Господа Саваофа, яже сотворит над всею землею. 23 Внушите и слышите глас мой, внемлите и слышите словеса моя. 24 Еда весь день будет оряй орати? Или семя уготовит прежде возделания земли? 25 Не егда ли умягчит лице ея, тогда всеет мало чернухи и кимина, потом же сеет пшеницу и ячмень и просо в пределех твоих? 26 И научишися суду Бога твоего и возрадуешися. 27 Ибо не с жестокостию очищается чернуха, ниже коло колесничное обыдет кимина, но жезлом истрясается чернуха, кимин же со хлебом снестся. 28 Не во век бо Аз разгневаюся на вы, ниже глас гнева Моего поперет вас. 29 И сия от Господа Саваофа изыдоша чудеса: советуйте, вознесите тщетное утешение. === 29 === 1 Горе граду Ариилу, наньже Давид воева. Соберите жита от года до года, снесте бо вкупе с Моавом: 2 озлоблю бо Ариила, и будет крепость его и богатство Мне: 3 и обсяду тя аки Давид, и поставлю окрест тебе острог, и согражду столпы. 4 И смирятся словеса твоя до земли, и в землю внидут словеса твоя: и будет глас твой аки гласящих от земли, и ко земли изнеможет глас твой. 5 И будет яко персть от колесе богатство нечестивых, и аки прах летяй множество утесняющих тя, и будет аки черта внезапу от Господа Саваофа. 6 Присещение бо будет со громом и с трусом и гласом великим, буря несома и пламень огненный поядаяй. 7 И будет аки соние видяй во сне нощию, богатство всех языков, елицы воеваша на Ариила, и вси, иже воеваша на Иерусалима, и вси собраннии нань и озлобляющии его. 8 И будут аки во сне ядущии и пиющии, и воставшым, тощь их сон: и якоже во сне жаждай аки пияй, воспрянув же еще жаждет, душа же его вотще надеяся: тако будет богатство всех языков, елицы воеваша на гору Сионю. 9 Разслабейте и ужаснитеся, и упийтеся не сикером, ни вином, 10 яко напои вас Господь духом умиления, и смежит очи их и пророков их и князей их, видящих сокровенная. 11 И будут вам вся сия словеса, аки словеса книги запечатленныя сея, юже аще дадут человеку ведущему писания, глаголюще: прочти сие. И речет: не могу прочести, запечатленна бо. 12 И дастся книга сия в руце человеку не ведущему писания, и речется ему: прочти сие. И речет: не вем писания. 13 И рече Господь: приближаются Мне людие сии усты своими и устнами своими почитают Мя, сердце же их далече отстоит от Мене: всуе же почитают Мя, учаще заповедем человеческим и учением. 14 Сего ради се, Аз приложу, еже преселити люди сия, и преставлю я, и погублю премудрость премудрых и разум разумных сокрыю. 15 Горе творящым глубоко совет, а не Господем: горе в тайне совет творящым, и будут во тме дела их, и рекут: кто ны виде, и кто ны уразумеет, яже мы творим? 16 Не якоже ли брение скудельника вменитеся? Еда речет здание создавшему е: не ты мя создал еси? Или творение сотворшему: не разумно мя сотворил еси? 17 Не еще ли мало, и приложится Ливан, аки гора Хермель, и Хермель в дубраву вменится? 18 И услышат в день оный глусии словеса книги (сея), и иже во тме и иже во мгле очи слепых узрят. 19 И возрадуются нищии ради Господа в веселии, и отчаявшиися человецы исполнятся веселия. 20 Изчезе беззаконник, и погибе гордый, и потребишася вси беззаконнующии во злобе 21 и творящии согрешати человеки во слове: всем же обличающым во вратех претыкание положат, понеже совратиша в неправдах праведнаго. 22 Сего ради тако глаголет Господь на дом Иаковль, егоже определи от Авраама: не ныне постыдится Иаков, ниже ныне лице свое изменит Израиль: 23 но егда увидят чада их дела Моя, Мене ради освятят имя Мое и освятят Святаго Иаковля, и Бога Израилева убоятся. 24 И уразумеют заблуждающии духом смысл, и ропщущии научатся послушати, и языцы немотствующии научатся глаголати мир. === 30 === 1 Горе чада отступившая, сия глаголет и Господь: сотвористе совет не Мною и заветы не духом Моим, приложити грехи ко грехом: 2 идущии снити во Египет, Мене же не вопросиша, еже помощь имети от фараона и заступление от Египтян. 3 Будет бо вам покров фараонов в постыдение и уповающым на Египет укоризна: 4 яко суть в Тане старейшины его, и вестницы его зли. 5 Вотще потрудятся людий ради, иже не упользуют их, ниже на помощь, ниже на пользу, но на студ и на укоризну. 6 В печали и в тесноте лев и львичищь: оттуду аспиды и племя аспидов парящих, иже везяху на ослех и на велблюдех богатство свое ко языку, иже не поможет им в помощь, но на студ и укоризну. 7 Египтяне вотще и всуе успеют вам: возвести им, яко тщетно утешение ваше сие. 8 Ныне убо сед напиши сия на дске и в книгу: яко будут сия во дни времен и даже до века. 9 Яко людие непокориви суть, сынове лживии, иже не похотеша слышати закона Божия, 10 глаголюще пророком: не поведайте нам: и видения видящым: не глаголите нам, но нам глаголите и возвещайте нам иное прельщение 11 и совратите нас с пути сего: отимите от нас путь сей и отимите от нас суд Израилев. 12 Того ради сице глаголет Господь Святый Израилев: понеже не покористеся словесем сим и надеястеся на лжу, и яко пороптасте и уповающе бысте на слово сие, 13 сего ради будет вам грех сей, аки стена падающая внезапу града тверда пленена, егоже абие настоит падение: 14 и падение его будет яко сокрушение сосуда глиняна, от глины дробны, яко не можно обрести в них чрепа, имже огнь возмеши и в оньже влиеши воды мало. 15 Тако глаголет Господь, Господь Святый Израилев: егда возвратився воздохнеши, тогда спасешися и уразумееши, где еси был: егда уповал еси на суетная, тщетна крепость ваша бысть, и не хотесте послушати, 16 но рекосте: на конех побегнем. Того ради побегнете. И рекосте: на легких всадницы будем. Того ради легцы будут гонящии вас. 17 От гласа единаго побегнут тысяща, и от гласа пяти побегнут мнози, дондеже оставлени будете аки щогла на горе и яко знамя носяй на холме. 18 И паки пождет Бог, еже ущедрити вас, и сего ради вознесется еже помиловати вас: зане судия Господь Бог ваш есть, и где оставите славу вашу? Блажени вси пребывающии в Нем. 19 Зане людие святии в Сионе вселятся, Иерусалим же плачем восплакася: помилуй мя. Помилует тя, егда узре глас вопля твоего, послуша тебе. 20 И даст Господь вам хлеб печали и воду тесную, и ктому не приближатся к тебе льстящии тя: яко очи твои узрят прельщающих тя, 21 и ушеса твоя услышат словеса созади тебе прельщающих, иже глаголют: сей путь, поидим по нему или на десно, или на лево. 22 И отвержеши кумиры посребренныя, и позлащенныя раздробиши, и развееши яко воду жены месячныя, и аки мотыла отвержеши я. 23 Тогда будет дождь семени земли твоея, и хлеб жита земли твоея будет изюбилен и тучен, и напасутся скоти твои в той день на месте тучне и пространне. 24 Юнцы ваши и волове делающии землю наядятся плев смешенных со ячменем извеяным. 25 И будет на всяцей горе высоце и на всяцем холме вознесенне вода текущая в день оный, егда погибнут мнози, и егда падутся столпи: 26 и будет свет луны аки свет солнца, и свет солнечный будет седмерицею в той день, егда изцелит Господь сокрушение людий Своих и болезнь язвы твоея изцелит. 27 Се, имя Господне идет временем многим, горящая ярость Его: со славою слово устен Его, слово гнева полно, и гнев ярости яко огнь пояст: 28 и дух Его аки вода в дебри влекущи приидет даже до выи и разделится, еже смутити языки о прельщении суетнем, и поженет я прелесть тща, и возмет я пред лицем их. 29 Еда присно подобает вам радоватися и входити во святая Моя всегда, аки празднующым и яко веселящымся внити со сопелию в гору Господню к Богу Израилеву? 30 И слышану сотворит Господь славу гласа Своего, и ярость мышцы Своея показати, с яростию и гневом, и со пламенем поядающим возгремит зелно, и яко вода и град низходящь нуждею. 31 Гласом бо Господним побеждени будут Ассириане язвою, еюже аще поразит я. 32 И будет ему окрест, отюнудуже бе их надежда помощи, на нюже той уповаше: тии со тимпаны и гусльми ратовати будут нань от пременения. 33 Ты бо прежде дний истязан будеши: еда и тебе уготовася царствовати? Дебрь глубокую, древеса лежаща, огнь и древа многа, ярость Господня аки дебрь жупелом горящая. === 31 === 1 Горе сходящым во Египет помощи ради, уповающым на кони и на колесницы: суть бо многа, и конническое множество много зело: и не беша уповающе на Святаго Израилева, и Бога не взыскаша. 2 Тойже премудре наведе на них злая, и слово Его не отринется, и востанет на домы человеков злых и на надежду их тщетную, 3 Египтянина человека, а не Бога, конски плоти, и не будет помощи: Господь же наведет руку Свою на ня, и утрудятся помагающии, и вси вкупе погибнут. 4 Занеже тако рече мне Господь: якоже возревет лев, или львичищь о ловитве, юже имет, и возопиет над нею, дондеже наполнятся горы гласа его, и победишася и множества ярости убояшася: тако Господь Саваоф снидет на гору Сионю и на горы его воевати. 5 Якоже птицы парящыя, сице защитит Господь Саваоф о Иерусалиме, защитит и избавит, и снабдит и спасет. 6 Обратитеся, совещавающии глубок совет и беззаконен, сынове Израилевы: 7 яко в той день отвергут человецы рукотворенная своя сребряная и рукотворенная златая, яже сотвориша руки их. 8 И падет Ассур не мечем человеческим, ни мечь мужеский пояст его, и побегнет не от лица меча: юноты же будут в побеждение. 9 Камением бо оымутся яко острогом и побеждени будут, а бежай пленен будет. Сия глаголет Господь: (блажен,) иже имеет племя в Сионе и южики во Иерусалиме. === 32 === 1 Се бо, Царь праведный воцарится, и князи со судом владети начнут. 2 И будет человек сокрываяй словеса своя, и скрыется, аки от воды носимыя: и явится в Сионе яко река текущая славная в земли жаждущей. 3 И ксему не будут уповающе на человеки, но ушы вдадят на слышание, 4 и сердце изнемогших вонмет послушати, и языцы немотствующии скоро научатся глаголати мир: 5 и ксему не рекут юродивому владети, и ксему не рекут слуги твои: молчи. 6 Юрод бо юродивая изречет, и сердце его тщетная уразумеет, еже совершати беззаконная и глаголати на Господа прелесть, еже растлити душы алчныя и душы жаждущыя тщы сотворити. 7 Совет бо злых беззаконная совещавает, растлити смиренныя словесы неправедными и разсыпати словеса смиренных на суде. 8 Благочестивии же смысленне совещаша, и той совет пребудет. 9 Жены богатыя, востаните и услышите глас мой: дщери, с надеждею слышите словеса моя: 10 дня летняго память сотворите в болезни с надеждею: потребися оымание винное, преста сеяние, и (собирание) ктому не приидет. 11 Ужаснитеся, сжалитеся, уповавшыя, совлецытеся, наги будите, препояшите чресла своя во вретища 12 и в перси бийтеся о селе желаемем и о винограднем рождении. 13 На земли людий моих терние и былие возникнет, и от всего дому радость восхитится: град богат, 14 домове оставленнии, богатство града и домы вожделения оставят: и будут веси пещеры до века, радость ослом дивиим, паствы пастухов: 15 дондеже найдет на ны Дух от вышняго, и будет пустыня в Хермель, а Хермель в дубраву вменится. 16 И почиет в пустыни суд, и правда в Кармиле вселится: 17 и будут дела правды мир, и одержит правда покой, и уповающе будут до века: 18 и вселятся людие его во граде мира и обитати будут уповающе, и почиют с богатством. 19 Град же, аще снидет, то не на вы приидет: и будут живущии в дубравах уповающе, якоже сущии на полях. 20 Блажени сеющии при всяцей воде, идеже вол и осел попирает. === 33 === 1 Горе обидящым вас! Вас никтоже и изобидит, и отвергаяй вас не отвержет: пленени будут отметающии (вас) и предадятся, и яко молие в ризе, тако побеждени будут. 2 Господи, помилуй ны, на Тя бо уповахом: бысть племя непокаряющихся в пагубу, спасение же наше во время печали. 3 Гласом страха Твоего ужасошася людие от страха Твоего, и разсеяшася языцы. 4 Ныне же соберутся корысти вашя малаго и великаго: якоже аще кто соберет пруги, тако наругаются вам. 5 Свят Бог живый в вышних, наполнися Сион суда и правды. 6 В законе предадятся, в сокровищих спасение наше, тамо премудрость и хитрость и благочестие ко Господеви: сия суть сокровища правды. 7 Се, ныне во страсе вашем тии убоятся: ихже боястеся, возопиют от вас: вестницы бо послани будут горце плачущеся, просяще мира. 8 Опустеют бо сих путие: преста страх языков, и завет иже к ним вземлется, и не вмените их в человеки. 9 Восплакася земля, посрамлен Ливан, блато бысть Саронь: явлена будет Галилеа и Хермель. 10 Ныне воскресну, глаголет Господь, ныне прославлюся, ныне вознесуся. 11 Ныне узрите, ныне ощутите, тщетна будет крепость духа вашего: огнь вы пояст. 12 И будут языцы пожжени, аки терние на ниве разметано и пожжено. 13 Услышат дальнии, яже сотворих, (глаголет Господь,) уведят приближающиися крепость Мою. 14 Отступиша, иже в Сионе, беззаконницы, приимет трепет нечестивыя: кто возвестит вам, яко огнь горит? Кто возвестит вам место вечное? 15 Ходяй в правде, глаголяй правый путь, ненавидяй беззакония и неправды и руце оттрясаяй от даров: отягчаваяй ушы, да не услышит суда крове: смежаяй очи, да не узрит неправды, 16 сей вселится во высоце пещере камене крепкаго: хлеб ему дастся и вода его верна. 17 Царя со славою узрите, и очи ваши узрят землю издалеча, 18 душа ваша поучится страху Господню: где суть книгочии? Где суть совещавающии? Где есть изчитаяй питаемыя малы и велики люди? 19 Имже не совещаше, ниже ведяше глубокий глас имущаго, яко не слышати людем уничтоженым, и несть слышащему смысла. 20 Се, Сион град, спасение наше, очи твои узрят, Иерусалиме, граде богатый, кущы не поколеблются, ниже подвигнутся колие храмины его в вечное время, и ужя его не преторгнутся. 21 Яко имя Господне велико вам есть, место вам будет, реки и ровенницы широцы и пространни: не пойдеши по сему пути, ниже пойдет корабль пловущь: 22 Бог бо мой велик есть: не минет мене Господь судия наш, Господь князь наш, Господь царь наш, Господь Той нас спасет. 23 Прервашася ужя твоя, яко не укрепишася: щогла твоя преклонися, не распустит ветрил, не воздвигнет знамения, дондеже предастся на пленение: темже мнози хромии плен сотворят, 24 и не рекут: труждаемся, людие живущии в них, оставися бо им грех. === 34 === 1 Приступите, языцы, и услышите, князи: да слышит земля и живущии на ней, вселенная и людие, иже на ней. 2 Зане ярость Господня на вся языки и гнев на число их, еже погубити их и предати я на заклание. 3 И язвении их повергнутся и мертвецы, и взыдет их смрад, и намокнут горы кровию их: 4 и истают вся силы небесныя, и свиется небо аки свиток, и вся звезды спадут яко листвие с лозы, и якоже спадает листвие смоковницы. 5 Упися мечь Мой на небеси: се, на Идумею снидет и на люди пагубныя с судом. 6 Мечь Господень наполнися крове, растолсте туком, от крове козлов и агнцев и от тука козлов и овнов: яко жертва Господеви в Восоре, и заклание велие во Идумеи. 7 И падут с ними сильнии, и овны и юнцы, и упиется земля от крове и от тука их насытится: 8 день бо суда Господня, и лето воздаяния суда Сионя. 9 И обратятся дебри его в смолу, и земля его в жупел, 10 и будет земля его горящи яко смола днем и нощию, и не угаснет в вечное время, и взыдет дым ея высоце, в роды своя опустеет. 11 И во время много птицы и ежеве, совы и вранове возгнездятся в нем: и возложат нань уже землемерно пустыни, и онокентаври вселятся в нем. 12 Князи его не будут: царие бо и вельможи его будут в пагубу. 13 И возникнут во градех их терновая древеса и во твердынех его, и будут селения сирином и селища струфионом: 14 и срящутся беси со онокентавры и возопиют друг ко другу, ту почиют онокентаври, обретше себе покоища: 15 тамо возгнездится ежь, и сохранит земля дети его со утверждением: тамо елени сретошася и увидеша лица друг друга. 16 Числом преидоша, и един и них не погибе, друг друга не взыска, яко Господь заповеда им, и дух Его собра я. 17 И Той вержет им жребия, и рука Его раздели пастися: в вечное время наследите, в роды родов почиют в нем. === 35 === 1 Радуйся, пустыня жаждущая, да веселится пустыня и да цветет яко крин. 2 И процветет и возвеселится пустыня Иорданова: и слава Ливанова дадеся ей, и честь Кармилова, и узрят людие мои славу Господню и высоту Божию. 3 Укрепитеся, руце ослабленыя и колена разслабленая: 4 утешитеся, малодушнии умом укрепитеся, не бойтеся: се, Бог наш суд воздает и воздаст, Той приидет и спасет нас. 5 Тогда отверзутся очи слепых, и уши глухих услышат. 6 Тогда скочит хромый яко елень, и ясен будет язык гугнивых: яко проторжеся вода в пустыни и дебрь в земли жаждущей. 7 И безводная будет во езера, и на жаждущей земли источник водный будет: тамо будет веселие птицам, и селитва трости, и лузи. 8 И тамо будет путь чист, и путь свят наречется: и не прейдет тамо нечистый, ниже будет тамо путь нечист: разсеяннии же пойдут по нему и не заблудят. 9 И не будет тамо льва, ни от зверей злых не взыдет нань, ниже обрящется тамо, но пойдут по нему избавленнии: 10 и собраннии Господем обратятся и приидут в Сион с радостию, и радость вечная над главою их: над главою бо их хвала и веселие, и радость приимет я, отбеже болезнь и печаль и воздыхание. === 36 === 1 И бысть во четвертоенадесять лето царствующу Езекии, взыде Сеннахирим царь Ассирийск на грады тверды Иудейски и взя оныя. 2 И посла царь Ассирийск Рапсака от Лахиса во Иерусалим ко царю Езекии с силою великою, и ста у водоважды купели вышния на пути села Кнафеова. 3 И изыде к нему Елиаким сын Хелкиев домостроитель, и Сомнас книгочий, и Иоах сын Асафов памятописец. 4 И рече им Рапсак: рцыте Езекии: сия глаголет царь великий, царь Ассирийск: на что уповаеши? 5 Еда советом и словесы устными битва бывает? И ныне на кого уповаеши, яко не покаряешися мне? 6 Се, уповаеши на жезл тростян сокрушенный сей, на Египет, на негоже аще опрется муж, внидет в руку его и прободет ю: тако есть фараон царь Египетский, и вси уповающии на него: 7 аще же глаголете, на Господа Бога нашего уповаем: не сей ли есть, егоже разори Езекиа высокая и требища его, и заповеда Иуде и Иерусалиму: пред олтарем сим поклонитеся? 8 Ныне соединитеся господину моему царю Ассирийску, и дам вам две тысящы коней, аще можете дати вседающыя на них: 9 и како можете отвратити лице воеводы единаго? Раби суть, иже уповают на Египтян, на коней и всадников: 10 и ныне еда без Господа приидохом на страну сию, воевати на ню? Господь рече ко мне: взыди на землю сию и погуби ю. 11 И рече к нему Елиаким и Сомнас книгочий и Иоах: глаголи к рабом твоим сирски, разумеем бо мы, а не глаголи к нам иудейски: и вскую глаголеши во ушы человеком седящым на стене? 12 И рече к ним Рапсак: еда ко господину вашему, или к вам посла мя господин мой глаголати словеса сия? Не к человеком ли седящым на ограде, да ядят мотыла и пиют мочь с вами вкупе? 13 И ста Рапсак, и возопи гласом велиим иудейски и рече: слышите словеса царя великаго, царя Ассирийска: 14 сия глаголет царь: да не прельщает вас Езекиа словесы, не может избавити вас: 15 и да не глаголет вам Езекиа, яко избавит вы Бог, и не предастся град сей в руце царя Ассирийска: 16 не слушайте Езекии: сия глаголет царь Ассирийский: аще хощете благословени быти, изыдите ко мне и ядите кийждо виноград свой и смокви, и пийте от потока вашего, 17 дондеже прииду и поиму вы в землю, яже аки ваша земля, земля пшеницы и вина и хлебов и виноградов: 18 да не прельщает вас Езекиа, глаголя: Бог ваш избавит вы: еда избавиша бози язычестии, кийждо страну свою от руки царя Ассирийска? 19 Где есть бог Емафов и Арфафов? И где бог града Сепфарима? Еда возмогоша избавити Самарию от руки моея? 20 Кто от богов всех языков сих, иже избави землю свою от руки моея, яко избавит Бог Иерусалима от руки моея? 21 И умолкоша, и никтоже отвеща ему словесе, повеления ради царева, да никтоже отвещает. 22 И вниде Елиаким сын Хелкиев домостроитель, и Сомнас книгочий силы, и Иоах сын Асафов памятописец ко Езекии в растерзаных ризах и поведаша ему словеса Рапсакова. === 37 === 1 И бысть егда услыша царь Езекиа, растерза ризы и облечеся во вретище и вниде во храм Господень: 2 и посла Елиакима домостроителя, и Сомну книгочия, и старейшины жречески оболчены во вретища ко Исаии пророку сыну Амосову. 3 И рекоша ему: сия глаголет Езекиа: день печали и укоризны и обличения и гнева днешний день, понеже прииде болезнь раждающей, крепости же не имеет родити: 4 да услышит Господь Бог твой словеса Рапсакова, яже посла царь Ассирийский, господин его, укаряти Бога живаго и поносити словесы, яже слыша Господь Бог твой, и да помолишися ко Господеви Богу твоему о оставшихся сих. 5 И приидоша отроцы царя Езекии ко Исаии. 6 И рече им Исаиа: сице рцыте ко господину вашему: сия глаголет Господь: не убойся от словес, яже еси слышал, имиже укориша Мя послы царя Ассирийска: 7 се, Аз вложу в него дух, и услышав весть возвратится во страну свою и падет мечем на своей земли. 8 И возвратися Рапсак и обрете царя Ассирийскаго облежаща Ловну: и услыша царь Ассирийск, яко отиде от Лахиса, 9 и изыде Фарака царь Ефиопский воевати нань: и услышав возвратися и посла послы ко Езекии, глаголя: 10 сице рцыте Езекии царю Иудейску: да не прельщает Бог твой тебе, на Негоже уповая еси, глаголя, яко не предастся Иерусалим в руце царя Ассирийска: 11 или не слышал еси ты, что сотвориша царие Ассирийстии, како всю землю погубиша, и ты ли избавишися? 12 Еда избавиша сих бози язычестии, ихже погубиша отцы мои Гозан и Харран и Расем, иже суть во стране Феемафи? 13 Где суть царие Емафовы, и где Арфафовы, и где града Епфаруема, Анагугана? 14 И взя Езекиа книгу от послов и прочте ю, и вниде во храм Господень и отверзе ю пред Господем. 15 И помолися Езекиа ко Господеви, глаголя: 16 Господи Саваоф, Боже Израилев, седяй на Херувимех, Ты еси Бог един Царь всякаго царства вселенныя, Ты сотворил еси небо и землю: 17 приклони, Господи, ухо Твое, услыши, Господи, отверзи, Господи, очи Твои, призри, Господи, и виждь и слыши вся словеса Сеннахиримля, яже посла укаряти Бога живаго: 18 поистинне бо, Господи, пусту сотвориша царие Ассирийстии всю землю и страны их, 19 и ввергоша кумиры их во огнь, не беша бо бози, но дела рук человеческих, древа и камение, и погубиша я: 20 ныне же, Господи Боже наш, спаси ны от руки их, да уведят вся царствия земная, яко Ты еси (Господь) Бог един. 21 И послан бысть Исаиа сын Амосов ко Езекии и рече ему: сия глаголет Господь Бог Израилев: слышах, о нихже молился еси ко Мне о Сеннахириме цари Ассирийстем. 22 Сие слово, еже глагола о нем Бог: похули тя и поругася тебе девица дщи Сионя, на тя главою покива дщи Иерусалимля: 23 кого укорил и разгневал еси? Или к кому возвысил еси глас твой, и не воздвигл еси на высоту очес твоих? Ко Святому Израилеву! 24 Яко послами укорил еси Господа, ты бо рекл еси: множеством колесниц аз взыдох на высоту гор и на последняя Ливана, и посекох высоту кедра его и доброту кипарисову, и внидох в высоту части дубравныя 25 и положих мост, и опустоших воды и все собрание водное: 26 не слышал ли еси издревле сих, яже Аз сотворих? От древних дний совещах, ныне же показах опустошити языки в твердынех и живущыя во твердых градех: 27 опустих руце, и изсхоша и быша аки сухо сено на кровех и аки троскот: 28 ныне же покой твой и исход твой и вход твой Аз вем, 29 ярость же твоя, еюже разгневался еси, и огорчение твое взыде ко Мне, и вложу брозду в ноздри твоя, и узду во уста твоя, и возвращу тя путем, имже еси пришел. 30 Сие же тебе знамение: яждь сего лета, еже еси всеял, а во второе лето, еже от себе растет: а в третие насеявше пожнете и насадите винограды и снесте плоды их: 31 и будут оставшии во Иудеи, прорастят корение долу и сотворят в верх плод, 32 яко от Иерусалима будут оставшиися и спасшиися от горы Сиони: ревность Господа Саваофа сотворит сия. 33 Сего ради тако глаголет Господь на царя Ассирийска: не внидет в сей град, ниже пустит нань стрелу, ниже возложит нань щита, ниже оградит окрест его ограждения: 34 но путем, имже прииде, темже возвратится, и во град сей не внидет. Сия глаголет Господь: 35 защищу град сей, еже спасти его Мене ради и ради Давида раба Моего. 36 И изыде Ангел Господень и изби от полка Ассирийска сто осмьдесят пять тысящ. И воставше заутра, обретоша вся телеса мертва. 37 И отиде возвращься Сеннахирим царь Ассирийский и вселися во Ниневии. 38 И внегда покланятися ему и в дому Насараху отечествоначалнику своему, Адрамелех и Сарасар сынове его убиста его мечьми, сами же убежаста во Армению. И воцарися Асордан сын его вместо его. === 38 === 1 Бысть же в то время, разболеся Езекиа до смерти. И прииде к нему Исаиа пророк сын Амосов и рече к нему: сия глаголет Господь: устрой о доме твоем, умираеши бо ты и не будеши жив. 2 И обрати Езекиа лице свое ко стене и помолися ко Господеви глаголя: 3 помяни, Господи, како ходих пред Тобою со истиною и сердцем истинным, и угодная пред Тобою сотворих. И плакася Езекиа плачем великим. 4 И бысть слово Господне ко Исаии глаголя: 5 иди и рцы Езекии: тако глаголет Господь Бог Давида отца твоего: услышах молитву твою и видех слезы твоя, се, прилагаю к летом твоим лет пятьнадесять, 6 и от руки царя Ассирийска избавлю тя и град сей, и защищу о граде сем: 7 сие же тебе знамение от Господа, яко Бог сотворит глаголгол сей, якоже глагола: 8 се, аз возвращу сень степеней, имиже сниде солнце десять степеней дому отца твоего, возвращу солнце десять степеней, имиже сниде сень. И взыде солнце десять степеней, имиже сниде сень. 9 Молитва Езекии царя Иудейска, егда боле и воста от недуга своего. 10 Аз рекох в высоте дний моих: пойду во врата адова, оставлю лета прочая. 11 Рекох: ктому не узрю спасения Божия на земли живых, ктому не узрю спасения Израилева на земли, ктому не узрю человека со живущими: 12 остах от сродства моего, оставих прочее живота моего, изыде и отиде от мене аки разрушаяй кущу поткнувый: аки платно дух мой во мне бысть, ткателнице приближающейся отрезати. 13 В той день предан бых до заутра аки льву, тако сокруши вся кости моя: от дне бо до нощи предан бых. 14 Яко ластовица, тако возопию, и яко голубь, тако поучуся: изчезосте бо очи мои, еже взирати на высоту небесную ко Господу, Иже избави мя и отя болезнь души моея: 15 и Той сотвори путеводство во вся лета моя. 16 Господи, о той бо возвестися Тебе, и воздвигл еси дыхание мое, и утешився ожих. 17 Избавил бо еси душу мою, да не погибнет, и завергл еси за мя вся грехи моя. 18 Не похвалят бо Тебе, иже во аде, ни умершии возблагословят Тя, и не надеются, иже во аде, милости Твоея. 19 Живии же возблагословят Тя, якоже и аз: отднесь бо дети сотворю, яже возвестят правду Твою, 20 Господи спасения моего: и не престану благословя тя с песнию вся дни живота моего прямо дому Божию. 21 И рече Исаиа ко Езекии: возми от смоквий и сотри, и приложи пластырь на язву и здрав будеши. 22 И рече Езекиа: сие знамение, яко взыду в дом Божий. === 39 === 1 В то время посла Меродах Валадан сын Валаданов, царь Вавилонский, писания и послы и дары Езекии: слыша бо, яко болел есть до смерти и воста. 2 И обрадовася о них Езекиа радостию великою, и показа им дом ароматов и мира, и стакти и фимиама, и сребра и злата, и вся домы сосудов сокровищных, и вся елика бяху во сокровищих его: и не оста ничтоже, егоже не показа им Езекиа в дому своем и во всей области своей. 3 И прииде Исаиа пророк ко Езекии царю и рече к нему: что глаголют сии мужие, и откуду приидоша к тебе? И рече Езекиа: от земли далекия приидоша ко мне, от Вавилона. 4 И рече Исаиа: что видеша в дому твоем? И рече Езекиа: вся, елика в дому моем, видеша, и несть в дому моем, егоже бы не видели, но и яже в сокровищих моих. 5 И рече ему Исаиа: послушай словесе Господа Саваофа: 6 се, дние грядут, глаголет Господь, и возмут вся, яже в дому твоем, и елика собраша отцы твои даже до дне сего, в Вавилон прейдут, и ничесоже оставят: 7 рече Господь, яко и от чад твоих, ихже родил еси, поймут и сотворят каженики в дому царя Вавилонска. 8 И рече Езекиа ко Исаии: благо слово Господне, еже глагола: да будет ныне мир и правда бо дни моя. === 40 === 1 Утешайте, утешайте люди Моя, глаголет Бог: 2 священницы, глаголите в сердце Иерусалиму, утешайте и, яко наполнися смирение его, разрешися грех его, яко прият от руки Господни сугубы грехи своя. 3 Глас вопиющаго в пустыни: уготовайте путь Господень, правы сотворите стези Бога нашего: 4 всяка дебрь наполнится, и всяка гора и холм смирится, и будут вся стропотная в право, и острая в пути гладки. 5 И явится слава Господня, и узрит всяка плоть спасение Божие, яко Господь глагола. 6 Глас вопиющаго: возопий. И рекох: что возопию? Всяка плоть сено, и всяка слава человеча яко цвет травный: 7 изсше трава, и цвет отпаде, 8 глаголгол же Бога нашего пребывает во веки. 9 На гору высоку взыди, благовествуяй Сиону, возвыси крепостию глас твой, благовествуяй Иерусалиму: возвысите, не бойтеся. Рцы градом Иудиным: 10 се, Бог ваш, се, Господь, Господь со крепостию идет, и мышца Его со властию: се, мзда Его с Ним, и дело Его пред Ним: 11 аки пастырь упасет паству Свою, и мышцею Своею соберет агнцы, и имущыя во утробе утешит. 12 Кто измери горстию воду и небо пядию и всю землю горстию? Кто постави горы в мериле и холмы в весе? 13 Кто уразуме ум Господень, и кто советник Ему бысть, иже научает Его? 14 Или с ким советова, и настави И? Или кто показа Ему суд? Или путь разумения кто показа Ему? Или кто прежде даде Ему, и воздастся Ему? 15 Аще вси языцы, аки капля от кади, и яко претяжение веса вменишася, и аки плюновение вменятся? 16 Дубрава же Ливанова не доволна на сожжение, и вся четвероногая не доволна на всесожжение. 17 И вси языцы яко ничтоже суть, и в ничтоже вменишася. 18 Кому уподобисте Господа, и коему подобию уподобисте Его? 19 Еда образ сотвори древоделатель, или златарь слияв злато позлати его, или подобием сотвори его? 20 Древо бо негниющее избирает древоделатель и мудре ищет, како поставит образ его, и да не поколеблется. 21 Не разуместе ли, не слышасте ли, не возвестися ли вам исперва? Не разуместе ли основания земли? 22 Содержай круг земли, и живущии на ней аки прузи: поставивый небо яко камару и простер е, яко скинию обитати: 23 даяй князи аки ничтоже владети, и землю аки ничтоже сотвори. 24 Не насадят бо, ниже насеют, и не вкоренится в земли корение их: дхну на них ветр, и изсхоша, и буря аки стеблие возмет их. 25 Ныне убо кому Мя уподобисте, и вознесуся? Рече Святый. 26 Воззрите на высоту очима вашима и видите, кто сотвори сия вся: носяй по числу утварь Свою, и вся по имени прозовет от многия славы и в державе крепости Своея: ничтоже утаися и Тебе. 27 Еда бо речеши, Иакове, и что глаголал еси, Израилю: утаися путь мой от Бога, и Бог мой суд отя, и отступи? 28 И ныне не уразумел ли еси ни ли слышал еси? Бог вечный, Бог устроивый концы земли, не взалчет, ниже утрудится, ниже есть изобретение премудрости Его, 29 даяй алчущым крепость и неболезненным печаль. 30 Взалчут бо юнейшии, и утрудятся юноты, и избраннии не крепцы будут: 31 терпящии же Господа изменят крепость, окрылатеют аки орли, потекут и не утрудятся, пойдут и не взалчут. === 41 === 1 Обновляйтеся ко Мне, острови князи бо изменят крепость: да приближатся и да глаголют вкупе, тогда суд да возвещают. 2 Кто возстави от восток правду, призва ю к ногам своим, и пойдет? Даст пред языки, и цари ужасит: и повержет на землю мечы их, и аки стеблие отвержени луцы их, 3 и проженет я, и пройдет с миром путь ног его. 4 Кто содела и сотвори сия, призва ю призываяй ю от начала родов. Аз Бог первый, и в грядущая Аз есмь. 5 Видеша языцы и убояшася, концы земнии приближишася и приидоша вкупе. 6 Судяй кийждо ближнему, и брату помощи, и речет: 7 превозможе муж древоделатель и ковачь бияй млатом, вкупе проковаяй: овогда убо речет: спаяние добро есть, утвердиша я гвоздьми, положат я, и не подвигнутся. 8 Ты же, Израилю, рабе Мой, Иакове, егоже избрах, семя Авраамле, егоже возлюбих, 9 егоже поях от конец земли, и от стражб ея призвах тя, и рекох ти: раб Мой еси, избрах тя, и не оставих тебе: 10 не бойся, с тобою бо есмь, не прельщаю: Аз бо есмь Бог твой, укрепивый тя, и помогох ти, и утвердих тя десницею Моею праведною: 11 се, постыдятся и посрамятся вси сопротивляющиися тебе, будут бо яко не сущии, и погибнут вси соперницы твои: 12 взыщеши их, и не обрящеши человеков, иже поругаются тебе: будут бо аки не бывшии и не будут ратующии тебе. 13 Яко Аз Бог твой держай десницу твою, глаголяй тебе: 14 не бойся, Иакове, малый Израилю, Аз помогох ти, глаголет Бог твой, Избавляяй тя Святый Израилев: 15 се, сотворих тя аки колеса колесничная новая, стирающая аки пила, и сотреши горы, и истончиши холмы, и аки прах положиши, 16 и извееши, и ветр возмет я, и буря развеет я: ты же возвеселишися во Святых Израилевых. 17 И возрадуются убозии и неимущии: поищут бо воды, и не будет, язык их от жажди изсше. Аз Господь Бог, Аз услышу их, Бог Израилев, и не оставлю их, 18 но отверзу на горах реки и среди поля источники, сотворю пустыню в луги водныя и жаждущую землю в водотечы, 19 положу в безводную землю кедр и смерчие, и мирсину и кипарис и тополю: 20 да узрят и уразумеют, и помыслят и уведят вкупе, яко рука Господня сотвори сия вся, и Святый Израилев показа. 21 Приближается суд ваш, глаголет Господь Бог: приближишася совети ваши, глаголет Царь Иаковль. 22 Да приближатся и возвестят вам, яже сбудутся, или яже прежде быша, рцыте: и приставим ум и уразумеем, что последняя и будущая: рцыте нам, 23 возвестите нам грядущая на последок, и увемы, яко бози есте: благо сотворите и зло сотворите, и почудимся и узрим вкупе. 24 Яко откуду есте вы, и откуду дело ваше? От земли мерзость избраша вас. 25 Аз же возставих, иже от севера и иже от восток солнечных прозовутся именем Моим: да приидут князи, и яко брение скудельника и яко скудельник топчущь брение, тако попрани будете. 26 Кто бо возвестит, яже исперва, да увемы, яже напреди, и речем, яко истинна суть? Несть предглаголющаго, ни слышащаго словес ваших. 27 Начало Сиону дам и Иерусалима утешу на пути. 28 От язык бо, се, ни един и от кумир их несть возвещаяй. И аще вопрошу их, откуду есте? Не отвещают ми. 29 Суть бо творящии вас и всуе прельщающии вас. === 42 === 1 Иаков Отрок Мой, восприиму и: Израиль избранный Мой, прият Его душа Моя, дах дух Мой Нань, суд языком возвестит: 2 не возопиет ниже ослабит, ниже услышится вне глас Его: 3 трости сокрушены не сотрет и льна курящася не угасит, но во истину изнесет суд: 4 возсияет и не потухнет, дондеже положит на земли суд, и на имя Его языцы уповати имут. 5 Тако глаголет Господь Бог, сотворивый небо и водрузивый е, утверждей землю и яже на ней, и даяй дыхание людем, иже на ней, и дух ходящым на ней: 6 Аз Господь Бог призвах Тя в правде, и удержу за руку Твою и укреплю Тя: и дах Тя в завет рода Израилева, во свет языков, 7 отверсти очи слепых, извести от уз связанныя и из дому темницы и седящыя во тме. 8 Аз Господь Бог, сие Мое есть имя, славы Моея иному не дам, ниже добродетелей Моих истуканным. 9 Иже из начала, се, приидоша, и новая, яже Аз возвещу, и прежде неже возвестити, явишася вам. 10 Воспойте Господеви песнь нову: началство Его, прославите имя Его от конец земли, сходящии в море и плавающии по нему, острови и живущии на них. 11 Возвеселися, пустыне, и веси ея, придвория, и живущии в Кидаре: возвеселятся живущии на камени, от края гор возопиют, 12 дадят Богу славу, добродетели Его во островех возвестят. 13 Господь Бог Сил изыдет и сокрушит рать, воздвигнет рвение и возопиет на враги Своя со крепостию. 14 Молчах, еда и всегда умолчу и потерплю? Терпех яко раждающая, истреблю и изсушу вкупе, 15 опустошу горы и холмы, и всяку траву их изсушу, и положу реки во островы, и луги изсушу: 16 и наведу слепыя на путь, егоже не видеша, и по стезям, ихже не знаша, ходити сотворю им: сотворю им тму во свет и стропотная в правая: сия глаголголы сотворю, и не оставлю их. 17 Тии же возвратишася вспять: посрамитеся стыдением, уповающии на изваянная, глаголющии слиянным: вы есте бози наши. 18 Глусии, услышите, и слепии, прозрите видети. 19 И кто слеп, разве раби Мои? И глуси, разве владеющии ими? И ослепоша раби Божии. 20 Видесте многажды, и не сохранисте: отверсты ушы (имуще), и не слышасте. 21 Господь Бог восхоте, да оправдится и возвеличит хвалу. 22 И видех, и быша людие расхищени и разграблени: пругло бо в ложах везде, и в домех вкупе, идеже скрыша я, быша в плен: и не бысть изимаяй разграбления и не бе глаголющаго: отдаждь. 23 Кто в вас, иже внушит сия? И услышит во грядущая. 24 Кто даде на разграбление Иакова, и Израиля пленяющым его? Не Бог ли, Емуже согрешиша и не восхотеша в путех Его ходити, ни слушати закона Его? 25 И наведе на ня гнев ярости Своея, и укрепися на ня рать, и палящии их окрест, и не уведеша кийждо их, ниже положиша на уме. === 43 === 1 И ныне сице глаголет Господь Бог сотворивый тя, Иакове, и создавый тя, Израилю: не бойся, яко избавих тя, прозвах тя именем твоим: Мой еси ты. 2 И аще преходиши сквозе воду, с тобою есмь, и реки не покрыют тебе: и аще скозе огнь пройдеши, не сожжешися, и пламень не опалит тебе, 3 яко Аз Господь Бог твой, Святый Израилев, Спасаяй тя: сотворих премену твою Египет и Ефиопию, и Соину за тя. 4 Отнелиже честен был еси предо Мною, прославился еси, и Аз тя возлюбих, и дам человеки за тебе и князи за главу твою. 5 Не бойся, яко с тобою есмь: от восток приведу семя твое и от запад соберу тя: 6 реку северу: приведи: и ливу: не возбраняй, приведи сыны Моя от земли дальния и дщери Моя от краев земных, 7 всех, елицы нарицаются именем Моим: во славе бо Моей устроих его и создах его и сотворих и. 8 И изведох люди слепы, и очи суть такожде слепы, и глуси ушы имущии. 9 Вси языцы собрашася вкупе, и соберутся князи от них. Кто возвестит сия? Или яже исперва кто возвестит вам? Да приведут свидетели своя и оправдятся, и да услышат и да рекут истину. 10 Будите Ми свидетелие, и Аз свидетель, глаголет Господь Бог, и отрок Мой, егоже избрах, да увесте и веруете Ми и уразумеете, яко Аз есмь: прежде Мене не бысть ин Бог, и по Мне не будет. 11 Аз Бог, и несть разве Мене Спасаяй. 12 Аз возвестих и спасох, укорих, и не бе в вас чуждий: вы Мне свидетелие, и Аз свидетель, глаголет Господь Бог, 13 еще от начала, и несть изимаяй от руку Моею: сотворю, и кто отвратит е? 14 Тако глаголет Господь Бог, Избавляяй вас, Святый Израилев: вас ради послю в Вавилон и воздвигну вся бежащыя, и Халдее в кораблех свяжутся. 15 Аз Господь Бог Святый ваш, показавый Израиля Царя вашего. 16 Сице глаголет Господь, даяй путь по морю и по воде сильне стезю: 17 изводяй колесницы и кони и народ силен: но успоша и не востанут, угасоша аки лен угашен. 18 Не поминайте первых, и ветхих не помышляйте, 19 се, Аз творю новая, яже ныне возсияют, и увесте я: и сотворю в пустыни путь и в безводней реки. 20 Возблагословят Мя зверие селнии, сирини и дщери струфовы: яко дах в пустыни воду и реки в безводней, напоити род Мой избранный, 21 люди Моя, яже снабдех, добродетели Моя поведати. 22 Не ныне призвах тебе, Иакове, ниже трудитися сотворих тя, Израилю. 23 Не принесл еси Мне овец твоих всесожжения твоего, ни в жертвах твоих прославил Мя еси, не поработих тя в жертвах, ниже утруждена сотворих тя в Ливане: 24 не купил еси Мне на сребро фимиама, ниже тука треб твоих возжелах, но во гресех твоих стал еси предо Мною и в неправдах твоих. 25 Аз есмь, Аз есмь заглаждаяй беззакония твоя Мене ради и грехи твоя, и не помяну. 26 Ты же помяни, и да судимся: глаголи ты беззакония твоя прежде, да оправдишися. 27 Отцы ваши первии согрешиша, и князи ваши беззаконноваша на Мя. 28 И оскверниша князи святая Моя, и дах погубити Иакова и Израиля во укоризну. === 44 === 1 Ныне же слыши, рабе Мой Иакове, и Израилю, егоже избрах. 2 Сице глаголет Господь Бог сотворивый тя и создавый тя из утробы: еще поможет ти: не бойся, рабе Мой Иакове, и возлюбленный Израилю, егоже избрах. 3 Яко Аз дам воду в жажду ходящым в безводней, наложу дух Мой на семя твое и благословения Моя на чада твоя, 4 и прозябнут аки трава посреде воды и яко верба при воде текущей. 5 Сей речет: Божий есмь: и сей возопиет о имени Иаковли, и другий напишет рукою своею: Божий есмь: и о имени Израилеве возопиет. 6 Сице глаголет Бог Царь Израилев, и Избавлей его Бог Саваоф: Аз первый и Аз по сих, кроме Мене несть Бога: 7 кто якоже Аз? Да станет и да призовет, и да возвестит и да уготовит Ми, отнележе сотворих человека во век, и грядущая прежде неже приити им, да возвестят вам. 8 Не укрывайтеся, ниже заблуждайте: не исперва ли внушисте, и возвестих вам? Свидетелие вы есте, аще есть Бог разве Мене. 9 И не послушаша тогда созидающии, и ваяющии вси тщетни, творящии желания своя, яже не упользуют их: 10 но посрамятся вси созидающии бога и ваяющии вси неполезная. 11 И вси, отнюдуже быша, изсхоша: и глусии от человек да соберутся вси и да станут вкупе, и да посрамятся и устыдятся вкупе. 12 Яко наостри древоделатель сечиво, теслою содела оное, и свердлом состави е, и длатом издолбе е, и содела е крепостию мышцы своея: и взалчет, и изнеможет, и не напиется воды. 13 И избрав древоделя древо, постави в меру, и клеем сострои е, и сотвори е аки образ мужеск и аки красоту человечу, поставити е в дому. 14 Посече древо в дубраве, еже насади Господь, сосну, и дождь возрасти, 15 да будет человеком на жжение: и взяв от него, согреся, и изжегше я, испекоша ими хлебы, из оставшаго же сотвориша боги и покланяются им: сотвори е изваянное, и прекланяется им. 16 Пол его сожже огнем, и пол его сожже на углие, и испече в них хлебы, и на них испече мясо, и яде, и насытися, и согревся рече: сладко мне, яко согрехся и видех огнь. 17 Из оставшаго же сотвори бога изваянна, прекланяется ему и покланяется, и молится ему глаголя: избави мя, яко бог мой еси ты. 18 Не уведаша смыслити, яко отемнеша очи их еже видети и разумети сердцем своим. 19 И не помысли в души своей, ни уведе смышлением, яко пол его сожже огнем, и испече на углиех его хлебы, и испек мяса снеде, и оставшее его в мерзость сотвори, и покланяются ему. 20 Увеждь, яко пепел есть сердце их, и прельщаются, и ни един может души своея избавити: видите, не рцыте, яко лжа в деснице моей. 21 Помяни сия, Иакове и Израилю, яко раб Мой еси ты, сотворих тя раба Моего, и ты, Израилю, не забывай Мене. 22 Се бо, отях яко облак беззакония твоя и яко примрак грехи твоя: обратися ко Мне, и избавлю тя. 23 Возвеселитеся, небеса, яко помилова Бог Израиля: вострубите, основания земная, возопийте, горы, веселие, холми и вся древеса, яже на них: яко избави Бог Иакова, и Израиль прославится. 24 Сице глаголет Господь избавляяй тя и создавый тя от чрева: Аз Господь совершаяй вся, распрострох небо един и утвердих землю. 25 Кто ин разсыплет знамения чревоволшебников и волшбы от сердца, отвращаяй мудрыя вспять и советы их обуяяй, 26 и уставляя глагол раба Своего, и совет вестников Своих истинен творяй? Глаголяй Иерусалиму: населишися: и градом Иудейским: возградитеся, и пустыни его просияют, 27 глаголяй бездне: опустееши, и реки твоя изсушу, 28 глаголяй Киру смыслити, и вся воли Моя сотворит: глаголяй Иерусалиму: возградишися, и храм святый мой осную. === 45 === 1 Сице глаголет Господь Бог помазанному Моему Киру, егоже удержах за десницу, повинути пред ним языки, и крепость царей разрушу, отверзу пред ним врата, и гради не злтворятся: 2 Аз пред тобою пойду и горы уравню, врата медяная сокрушу и вереи железныя сломлю, 3 и дам ти сокровища темная сокровенная: невидимая отверзу тебе, да увеси, яко Аз Господь Бог твой прозывая имя твое, Бог Израилев. 4 Ради раба Моего Иакова и Израиля избраннаго Моего, Аз прозову тя именем твоим и прииму тя: 5 ты же не познал еси Мене, яко Аз Господь Бог, и несть разве Мене еще Бога: укрепих тя, и не познал еси Мене, 6 да быша уведели, иже от восток солнечных и иже от запад, яко несть Бог разве Мене: Аз Господь Бог, и несть еще. 7 Аз устроивый свет и сотворивый тму, творяй мир и зиждяй злая, Аз Господь Бог, творяй сия вся. 8 Да возрадуется небо свыше, и облацы да кропят правду: да прозябнет земля, и да прорастит милость, и правду да прозябнет вкупе: Аз есмь Господь создавый тя. 9 Что лучшее устроих яко глину скудельничу? Еда оряй орати будет землю весь день? Еда речет брение скудельнику: что твориши, яко не делаеши, ниже имаши рук? Еда отвещает здание создавшему е? 10 Еда глаголет отцу: что родиши? И матери: что чревоболиши? 11 Яко тако глаголет Господь Бог, Святый Израилев, Сотворивый грядущая: вопросите Мене о сынех Моих и о дщерех Моих, и о делех руку моею заповедите Мне. 12 Аз сотворих землю и человека на ней, Аз рукою Моею утвердих небо, Аз всем звездам заповедах. 13 Аз возставих его со правдою царя, и вси путие его правы: сей созиждет град Мой и пленение людий Моих возвратит, не по мзде, ни по даром, рече Господь Саваоф. 14 Тако глаголет Господь Саваоф: утрудися Египет и купли Ефиопския, и Саваимстии мужие высоцыи к тебе прейдут и тебе будут раби, и вслед тебе пойдут связани узами ручными, и прейдут к тебе и поклонятся тебе, и в тебе помолятся, яко в тебе Бог есть, и рекут: несть Бога разве тебе: 15 Ты бо еси Бог, и не ведехом, Бог Израилев Спас. 16 Постыдятся и посрамятся вси противящиися ему и пойдут в студе: обновляйтеся ко мне, острови. 17 Израиль спасается от Господа спасением вечным: не постыдятся, ни посрамятся даже до века ктому. 18 Зане тако глаголет Господь сотворивый небо, Сей Бог показавый землю и сотворивый ю, Той раздели ю, не вотще сотвори ю, но на вселение созда ю: Аз есмь Господь, и несть ктому. 19 Не отай глаголах, ни в темне месте земли: не рекох племени Иаковлю: суетнаго взыщите. Аз есмь, Аз есмь Господь глаголяй правду и возвещаяй истину. 20 Соберитеся и приидите, совещайтеся вкупе, спасаемии от язык. Не разумеша воздвижущии древо изваяние свое и молящеся богом, иже не спасают. 21 Аще возвестят, да приближатся, да уведят вкупе, кто слышана сотвори сия исперва? Тогда возвестися вам: Аз Бог, и несть иного разве Мене, праведен и Спаситель, несть кроме Мене. 22 Обратитеся ко Мне и спасетеся, иже от края земнаго: Аз есмь Бог, и несть иного. 23 Кленуся Мною Самим, аще не изыдет изо уст Моих правда, словеса Моя не возвратятся: яко Мне поклонится всяко колено, и исповестся всяк язык Богови, глаголя: 24 правда и слава к Нему приидет: и посрамятся вси отлучающиися. 25 От Господа оправдятся, и о Бозе прославится все семя сынов Израилевых. === 46 === 1 Паде Вил, сокрушися Дагон, быша ваяния их во звери и скоты: носите я связана яко бремя труждающемуся и разслабевшу, 2 и алчущу и не могущу вкупе, иже не возмогут спастися от рати, сами же пленени приведошася. 3 Послушайте Мене, доме Иаковль и весь останок Израилев, носимии от чрева и наказуемии от детска даже до старости: 4 Аз есмь, и дондеже состареетеся, Аз есмь, Аз терплю вам, Аз сотворих и Аз понесу, Аз подиму и спасу вы. 5 Кому Мя уподобисте? Видите, ухитрите, заблуждающии, 6 слагающии злато из меха, и сребро весом поставляют в мериле, и наемше златаря сотвориша рукотворенная, и преклоншеся покланяются им: 7 воздвижут я на рамех и ходят: аще же положат я на месте своем, ту лежат, ниже подвижутся: и иже аще возопиет к ним, не услышат, от бед не спасут его. 8 Помяните сия и возстените, покайтеся, прельстившиися, обратитеся сердцем 9 и помяните первая от века, яко Аз есмь Бог, и несть еще разве Мене: 10 возвещаяй первее последняя, прежде неже быти им, и абие сбышася: и рекох: весь совет Мой станет, и вся, елика совещах, сотворю. 11 Призываяй от восток птицу, и от земли издалеча, о нихже совещах: рекох и приведох, создах и сотворих, приведох и и благопоспеших путь его. 12 Послушайте Мене, погубльшии сердце, сущии далече от правды: 13 приближих правду Мою, и не удалится, и спасение, еже от Мене, не умедлю: дах в Сионе спасение Израилю во прославление. === 47 === 1 Сниди, сяди на земли, дево, дщи Вавилоня, вниди во тму, дщи Халдейска, яко не приложиши ксему прозыватися мягка и юна. 2 Возми жерновы, мели муку, открый покрывало твое, открый седины, возсучи голени, прейди реки: 3 открыется студ твой, явятся укоризны твоя, праведное от тебе возму, ктому не предам человеком. 4 Рече Избавивый тя Господь Саваоф, имя Ему Святый Израилев: 5 сяди умилена, вниди во тму, дщи Халдейска, ксему не прозовешися крепость царства. 6 Разгневахся на люди Моя, осквернила еси наследие Мое: Аз вдах я в руку твою, ты же не дала им милости, старчий ярем отягчила еси зело 7 и рекла еси: в век буду владычица: не помыслила еси сих в сердцы твоем, ниже помянула еси последних: 8 ныне же слыши сие, юная, седящая, уповающая, глаголющая в сердцы своем: аз есмь, и несть иныя, не сяду вдовою и не познаю сиротства. 9 Ныне же приидут на тя два сия внезапу во един день, безчадие и вдовство внезапу приидет на тя, в волшебстве твоем и в крепости волхвов твоих зело, 10 в надеянии злобы твоея: ты бо рекла еси: аз есмь, и несть иныя: увеждь, яко смышление сих и блужение твое будет тебе срам: и рекла еси сердцем своим: аз есмь, и несть иныя. 11 И приидет на тя пагуба, и не увеси, пропасть, и впадеши в ню: и приидет на тя печаль, и не возможеши чиста быти: и приидет на тя внезапу пагуба, и не увеси. 12 Стани ныне с волхвы твоими и со многими чары твоими, имже научилася еси из юности твоея, аще возмогут ти помощи. 13 Утрудилася еси в советех твоих: да станут ныне и спасут тя звездочетцы небесе, смотряющии звезд, да возвестят ти, что имать на тя приити. 14 Се, вси яко хврастие огнем погорят и не изимут души своея из пламене, понеже имаши углие огненное, сяди на них. 15 Сии будут тебе помощь: трудилася еси в преложении от юности, человек сам в себе прельстися, тебе не не будет спасения. === 48 === 1 Услышите сия, доме Иаковль, прозваннии именем Израилевым и изшедшии из Иуды, кленущиися именем Господа Бога Израилева, поминающии не со истиною, ниже со правдою, 2 и придержащиися имени града святаго, и о Бозе Израилеве подтверждающиися: Господь Саваоф имя Ему. 3 Преждняя еще возвестих, и из уст Моих изыдоша, и слышано бысть: внезапу сотворих, и найде. 4 Вем, яко жесток еси, и жила железна выя твоя, и чело твое медяно. 5 И возвестих ти, яже древле, прежде неже приити на тя: слышана тебе сотворих, да не когда речеши, яко идоли мне сия сотвориша, и не рцы, яко изваянная и слиянная заповедаша мне. 6 Слышасте вся, и вы не разуместе: но и слышана тебе сотворих новая отныне, яже имут быти: 7 и не рекл еси: ныне бывают, а не прежде, и не в преждния дни слышал еси сия: не рцы: ей, вем сия. 8 Не ведел еси, ниже разумел еси, ниже исперва отверзох ушеса твоя: ведех бо, яко отвергая отринеши и беззаконник еще от чрева прозовешися. 9 Имене Моего ради покажу ти ярость Мою, и славная Моя наведу на тя, да не потреблю тебе. 10 Се, продах тя не сребра ради: изях же тя из пещи убожества. 11 Мене ради сотворю ти, яко Мое имя оскверняется, и славы Моея иному не дам. 12 Послушай Мене, Иакове и Израилю, егоже Аз призываю: Аз есмь первый и Аз есмь во век. 13 И рука Моя основа землю, и десница Моя утверди небо: призову я, и станут вкупе, 14 и соберутся вси и услышат: кто им возвести сия? Любя тя сотворих волю твою над Вавилоном, еже отяти племя Халдейско. 15 Аз глаголах, Аз призвах, приведох и, и благопоспешит путь его. 16 Приступите ко Мне и слышите сия, исперва не отай глаголах: егда бываху, тамо бех, и ныне Господь Господь посла Мя и Дух Его. 17 Тако глаголет Господь, Избавивый тя, Святый Израилев: Аз есмь Господь Бог твой, научих тя, еже обрести тебе путь, по немуже пойдеши. 18 И аще бы еси послушал заповедий Моих, то был бы убо аки река мир твой, и правда твоя яко волна морская, 19 и было бы яко песок семя твое, и изчадия чрева твоего яко персть земли: ниже ныне потребишися, ниже погибнет имя твое предо Мною. 20 Изыди от Вавилона, бежай от Халдеев: глас радости возвестите, и да слышано будет сие, возвестите даже до последних земли, глаголите: избави Господь раба Своего Иакова. 21 И аще вжаждут, пустынею проведет их и воду из камене изведет им: разсядется камень, и потечет вода, и испиют людие Мои. 22 Несть радоватися нечестивым, глаголет Господь. === 49 === 1 Послушайте Мене, острови, и внемлите, языцы. Временем многим стояти будет, глаголет Господь: от чрева матере Моея нарече имя Мое, 2 и положи уста Моя яко мечь остр, и под кровом руки Своея скры Мя: положи Мя яко стрелу избранну, и в туле своем скры Мя, 3 и рече Ми: раб Мой еси Ты, Израилю, и в Тебе прославлюся. 4 Аз же рекох: вотще трудихся, всуе и ни во что дах крепость Мою: сего ради суд Мой пред Господем и труд Мой пред Богом Моим. 5 И ныне тако глаголет Господь, создавый Мя от чрева раба Себе, еже собрати Иакова к Нему и Израиля: соберуся и прославлюся пред Господем, и Бог Мой будет Мне крепость. 6 И рече Ми: велие Ти есть, еже назватися Тебе рабом Моим, еже возставити племена Иаковля и разсеяние Израилево обратити: се, дах Тя в завет рода, во свет языком, еже быти Тебе во спасение даже до последних земли. 7 Тако глаголет Господь, Избавивый Тя Бог Израилев: освятите уничижающаго душу Свою, гнушаемаго от язык рабов княжеских: царие узрят Его, и востанут князи и поклонятся Ему Господа ради, яко верен есть Святый Израилев, и избрах Тя. 8 Тако глаголет Господь: во время приятно послушах Тебе и в день спасения помогох Ти, и сотворих Тя и дах Тя в завет вечный языков, еже устроити землю и наследити наследия пустыни, 9 глаголюща сущым во узах: изыдите, и сущым во тме: открыйтеся. На всех путех пастися будут, и на всех стезях пажить их: 10 не взалчут, ниже вжаждут, ниже поразит их зной, ниже солнце, но Милуяй их утешит их и сквозе источники водныя проведет их. 11 И положу всяку гору в путь и всяку стезю в паству им. 12 Се, сии издалеча приидут, сии от севера и от моря, инии же от земли Персския. 13 Радуйтеся, небеса, и веселися, земле, да отрыгнут горы веселие и холми правду, яко помилова Бог люди Своя и смиренныя людий Своих утеши. 14 Рече же Сион: остави мя Господь, и Бог забы мя. 15 Еда забудет жена отроча свое, еже не помиловати изчадия чрева своего? Аще же и забудет сих жена, но Аз не забуду тебе, глаголет Господь. 16 Се, на руках Моих написах стены твоя, и предо Мною еси присно, 17 и вскоре возградишися, от нихже разорился еси, и опустошившии тя изыдут из тебе. 18 Возведи окрест очи твои и виждь вся, се, собрашася приидоша к тебе, живу Аз, глаголет Господь: яко всеми ими аки в красоту облечешися и обложиши себе ими яко утварию невеста. 19 Понеже пустая твоя и разсыпаная и падшая ныне утеснеют от обитающих, и удалятся от тебе поглощающии тя. 20 Рекут бо во ушы твои сынове твои, ихже был погубил еси: тесно ми место, сотвори ми место, да вселюся. 21 И речеши в сердцы своем: кто мне породи сих? Аз же безчадна и вдова, сих же кто воспита мне? Аз же остахся едина, сии же мне где быша? 22 Тако глаголет Господь Господь: се, воздвизаю на языки руку Мою и на островы воздвигну знамение Мое, и приведут сыны твоя в лоне и дщери твоя на плещах возмут. 23 И будут царие кормителие твои, и княгини их кормилицы твоя: до лица земли поклонятся тебе и прах ног твоих оближут, и увеси, яко Аз Господь Бог, и не посрамятся терпящии Мя. 24 Еда возмет кто от исполина корысти? И аще кто пленит неправедне, спасетлися? 25 Зане тако глаголет Господь: аще кто пленит исполина, возмет корысти: вземляй же от крепкаго спасется: Аз же прю твою разсужду и Аз сыны твоя избавлю: 26 и оскорбившии тебе снедят плоть свою и испиют яко вино ново кровь свою, и упиются: и увесть всяка плоть, яко Аз Господь Избавивый тя и заступаяй крепость Иаковлю. === 50 === 1 Тако глаголет Господь: кая книга отпущения матере вашея, еюже отпустих ю? Или коему заимодавцу продах вы? Се, грехми вашими продастеся, и беззаконий ради ваших отпустих матерь вашу. 2 Что яко приидох, и не бяше человека? Звах, и не бе послушающаго? Еда не может рука Моя избавити, или не могу изяти? Се, запрещением Моим опустошу море и положу реки пусты, и изсхнут рыбы их не сущей воде и умрут жаждею: 3 облеку небо во тму и положу аки вретище одежду его. 4 Господь Господь дает Мне язык научения, еже разумети, егда подобает рещи слово: положи Мя утро утро, приложи Ми ухо, еже слышати, 5 и наказание Господне отверзает ушы Мои: Аз же не противлюся, ни противоглаголю. 6 Плещы Мои вдах на раны и ланите Мои на заушения, лица же Моего не отвратих от студа заплеваний, 7 и Господь Господь помощник Ми бысть: сего ради не усрамихся, но положих лице Свое аки твердый камень и разумех, яко не постыждуся: 8 зане приближается оправдавый Мя. Кто пряйся со Мною? Да сопротивостанет Мне купно. И кто судяйся со Мною? Да приближится ко Мне. 9 Се, Господь Господь поможет Ми: кто озлобит Мя? Се, вси вы яко риза обетшаете, и яко молие изяст вы. 10 Кто в вас бояйся Господа? Да послушает гласа Отрока Его. Ходящии во тме, и несть им света, надейтеся на имя Господне и утвердитеся о Бозе. 11 Се, вси вы огнь раждизаете и укрепляете пламень: ходите светом огня вашего и пламенем, егоже разжегосте. Мене ради быша сия вам, в печали успнете. === 51 === 1 Послушайте Мене, гонящии правду и взыскающии Господа, воззрите на твердый камень, егоже изсекосте, и в юдоль потока, юже ископасте. 2 Воззрите на Авраама отца вашего и на Сарру породившую вы: яко един бе, и призвах его, и благослових его, и возлюбих его, и умножих его. 3 И тебе ныне утешу, Сионе, и утеших вся пустыни его, и поставлю пустыню его яко рай, и яже ко западом его аки рай Господень: радость и веселие обрящут в нем, исповедание и глас хваления. 4 Послушайте Мене, людие Мои, послушайте, и царие, ко Мне внушите: яко закон от Мене изыдет, и суд Мой во свет языком. 5 Приближается скоро правда Моя, и изыдет яко свет спасение Мое, и на мышцу Мою языцы надеятися будут: Мене острови ожидати и на мышцу Мою уповати будут. 6 Воздвигните на небо очи ваши и воззрите на землю долу, понеже небо яко дым утвердися, и земля яко риза обетшает, живущии же на земли якоже сия изомрут, спасение же Мое во век будет, и правда Моя не оскудеет. 7 Послушайте Мене, ведящии суд, людие Мои, имже закон Мой в сердцы вашем, не бойтеся укорения человеча и похулению их не покаряйтеся. 8 Якоже бо риза снедена будет временем, и яко сукно изястся мольми, правда же Моя во веки будет и спасение Мое в роды родов. 9 Востани, востани, Иерусалиме, и облецыся во крепость мышцы твоея, востани яко в начале дне, яко род века: не ты ли еси победил гордаго и расторгнул змиа? 10 Не ты ли еси опустошаяй море, воду бездны многу? Положивый глубины морския путь прохода изятым и избавленым? 11 Господем бо возвратятся и приидут в Сион с радостию и со веселием вечным: на главе бо их веселие и хвала, и радость приимет я: отбеже болезнь и печаль и воздыхание. 12 Аз есмь, Аз есмь Утешаяй тя: разумей, кто сый убоялся еси человека смертна и сына человеча, иже яко трава изсхоша, 13 и забыл еси Бога Создавшаго тя, Сотворшаго небо и основавшаго землю: и боялся еси присно во вся дни лица ярости стужающаго тебе: како бо восхоте взяти тя, и ныне где ярость стужающаго тебе? 14 Внегда бо спастися тебе, не станет, ниже умедлит: 15 яко Аз Бог твой, возмущаяй море и творяй шум волнам его: Господь Саваоф имя Мне. 16 Положу словеса Моя во уста твоя и под сению руки Моея покрыю тя, еюже поставих небо и основах землю: и речет Сиону: людие Мои есте вы. 17 Востани, востани, воскресени, Иерусалиме, испивый чашу ярости от руки Господни: чашу бо падения, фиал ярости испил и истощил еси, 18 и не бысть утешаяй тебе от всех чад твоих, яже родил еси, и не бысть подемлющаго руки твоея, ниже от всех сынов твоих, ихже вознесл еси. 19 Два сия противна тебе, кто сожалеет тебе? Падение и сокрушение, глад и мечь, кто утешит тя? 20 Сынове твои обнищавшии, седяще на краи всякаго исхода, яко свекла недовареная, исполнени ярости Господни, разслаблени Господем Богом. 21 Сего ради слыши, смиренный и упивыйся не вином: 22 тако глаголет Господь Бог судяй людем Своим: се, взях от руки твоея чашу падения, фиал ярости Моея, и не приложиши ксему пити ея: 23 и вложу ю в руце преобидевших тя и смиривших тя, иже рекоша души твоей: преклонися, да минем: и положил еси равно земли плещы твоя отвне мимоходящым. === 52 === 1 Востани, востани, Сионе, облецыся во крепость твою, Сионе, и ты облецыся во славу твою, Иерусалиме, граде святый, ктому не приложит проити сквозе тя необрезанный и нечистый. 2 Истряси прах и востани, сяди, Иерусалиме, совлецы узу выи твоея, плененая дщи Сионя. 3 Яко сия глаголет Господь: туне продани бысте, и не сребром избавитеся. 4 Тако глаголет Господь: во Египет снидоша людие Мои прежде, еже пришелцем быти тамо, и во Ассирию нуждею отведошася. 5 И ныне что зде есте? Сия глаголет Господь: яко взяшася людие Мои туне, чудитеся и плачитеся. Тако глаголет Господь: вас ради присно имя Мое хулится во языцех. 6 Сего ради познают людие Мои имя Мое в той день, яко Аз есмь Сам глаголяй, ту есмь. 7 Коль красны на горах ноги благовествующих мир, благовествующих благая, яко слышано сотворю спасение твое, глаголя: Сионе, воцарится Бог твой. 8 Яко глас хранящих тя вознесеся, и гласом вкупе возрадуются: яко очи ко очесем воззрят, егда помилует Господь Сиона. 9 Да отрыгнут веселие вкупе пустыни Иерусалимския, яко помилова Господь людий Своих и избави Иерусалима: 10 и открыет Господь мышцу Свою святую пред всеми языки, и узрят вси концы земли спасение, еже от Бога нашего. 11 Отступите, отступите, изыдите отсюду и нечистоте не прикасайтеся, изыдите от среды его, отлучитеся, носящии сосуды Господни: 12 яко не с мятежем изыдете, ниже убежанием пойдете: пойдет бо пред вами Господь, и собираяй вы Господь Бог Израилев. 13 Се, уразумеет отрок Мой и вознесется и прославится зело. 14 Якоже ужаснутся о Тебе мнози, тако обезславится от человек вид Твой, и слава Твоя от сынов человеческих. 15 Тако удивятся языцы мнози о Нем, и заградят царие уста своя: яко, имже не возвестися о Нем, узрят, и иже не слышаша, уразумеют. === 53 === 1 Господи, кто верова слуху нашему, и мышца Господня кому открыся? 2 Возвестихом, яко отроча пред Ним яко корень в земли жаждущей, несть вида Ему, ниже славы: и видехом Его, и не имяше вида, ни доброты: 3 но вид Его безчестен, умален паче всех сынов человеческих: человек в язве сый и ведый терпети болезнь, яко отвратися лице Его, безчестно бысть, и не вменися. 4 Сей грехи нашя носит и о нас болезнует, и мы вменихом Его быти в труде и в язве от Бога и во озлоблении. 5 Той же язвен бысть за грехи нашя и мучен бысть за беззакония наша, наказание мира нашего на Нем, язвою Его мы изцелехом. 6 Вси яко овцы заблудихом: человек от пути своего заблуди, и Господь предаде Его грех ради наших. 7 И Той, зане озлоблен бысть, не отверзает уст Своих: яко овча на заколение ведеся, и яко агнец пред стригущим его безгласен, тако не отверзает уст Своих. 8 Во смирении Его суд Его взятся: род же Его кто исповесть? Яко вземлется от земли живот Его, ради беззаконий людий Моих ведеся на смерть. 9 И дам лукавыя вместо погребения Его и богатыя вместо смерти Его: яко беззакония не сотвори, ниже обретеся лесть во устех Его. 10 И Господь хощет очистити Его от язвы: аще дастся о гресе, душа ваша узрит семя долгоживотное. 11 И хощет Господь рукою Своею отяти болезнь от души Его, явити Ему свет и создати разумом, оправдати праведнаго благо служаща многим, и грехи их Той понесет. 12 Сего ради Той наследит многих и крепких разделит корысти, зане предана бысть на смерть душа Его, и со беззаконными вменися, и Той грехи многих вознесе и за беззакония их предан бысть. === 54 === 1 Возвеселися, неплоды, нераждающая возгласи и возопий, нечревоболевшая, яко многа чада пустыя паче, нежели имущия мужа. 2 Рече бо Господь: разшири место, кущи твоея и покровов твоих, водрузи, не пощади, продолжи ужя твоя и колие твое укрепи, 3 еще на десно и на лево простри: и семя твое языки наследит, и грады опустевшыя населиши. 4 Не бойся, яко посрамлена еси, ниже устыдися, яко укорена еси: понеже срамоту вечную забудеши и укоризны вдовства твоего не помянеши ктому. 5 Яко Господь Творяй тя, Господь Саваоф имя Ему: и Избавивый тя Святый Бог Израилев, всей земли прозовется. 6 Не яко жену оставлену и малодушну призва тя Господь, ниже яко жену из юности возненавидену, рече Бог твой. 7 На время мало оставих тя, а с милостию великою помилую тя: 8 во ярости мале отвратих лице Мое от тебе, но милостию вечною помилую тя, рече Избавивый тя Господь. 9 От воды, яже при Нои, сие Ми есть, якоже кляхся Ему во время оно на землю, не разгневатися о тебе ктому, ниже во прещении твоем 10 горы преставити, и холми твои не предвигнутся: тако ниже, яже от Мене к тебе, милость оскудеет, ниже завет мира твоего преставится: рече бо милостив к тебе Господь. 11 Смиренная и колеблемая не имела еси утешения: се, Аз уготовляю тебе анфракс камень твой и на основание твое сапфир: 12 и положу забрала твоя иаспис, и врата твоя камение кристалла, и ограждение твое камение избранное, 13 и вся сыны твоя научены Богом, и во мнозе мире чада твоя. 14 И правдою возградишися: удалися от неправеднаго, и не убоишися, и трепет не приближится тебе. 15 Се, пришелцы приидут к тебе Мною и вселятся у тебе и к тебе прибегнут. 16 Се, Аз создах тя, не якоже кузнец раздуваяй углие и износя сосуд на дело: Аз же создах тя не на пагубу, еже истлити. 17 Всяк сосуд соделан на тя не благопоспешу, и всяк глас, иже на тя востанет на прю, одолееши им всем: повиннии же твои будут в нем есть наследие служащым Господеви, и вы будете Мне праведни, глаголет Господь. === 55 === 1 Жаждущии, идите на воду, и елицы не имате сребра, шедше купите, и ядите (и пийте) без сребра и цены вино и тук. 2 Вскую цените сребро не в хлебы, и труд ваш не в сытость? Послушайте Мене, и снесте благая, и насладится во благих душа ваша. 3 Внемлите ушима вашима и последуйте путем Моим: послушайте Мене, и жива будет во благих душа ваша, и завещаю вам завет вечен, преподобная Давидова верная. 4 Се, свидетелство во языцех дах Его, князя и повелителя языком. 5 Се, языцы, иже не ведяху тебе, призовут тя, и людие, иже не познаша тебе, ко тебе прибегнут ради Господа Бога твоего, Святаго Израилева, яко прослави тя. 6 Взыщите Господа, и внегда обрести вам Того, призовите: егда же приближится к вам, 7 да оставит нечестивый пути своя, и муж беззаконен советы своя, и да обратится ко Господу, и помилован будет, яко попремногу оставит грехи вашя. 8 Не суть бо совети Мои якоже совети ваши, ниже якоже путие ваши путие Мои, глаголет Господь. 9 Но якоже отстоит небо от земли, тако отстоит путь Мой от путий ваших, и помышления ваша от мысли Моея. 10 Якоже бо аще снидет дождь или снег с небесе, и не возвратится, дондеже напоит землю, и родит, и прозябнет, и даст семя сеющему и хлеб в снедь: 11 тако будет глаголгол Мой, иже аще изыдет из уст Моих, не возвратится ко Мне тощь, дондеже совершит (вся), елика восхотех, и поспешу пути твоя и заповеди Моя. 12 Со веселием бо изыдете и с радостию научитеся: горы бо и холми возскачут ждуще вас с радостию, и вся древеса селная восплещут ветвьми: 13 и вместо драчия взыдет кипарис, и вместо кропивы взыдет мирсина: и будет Господь во имя и во знамение вечное, и не оскудеет. === 56 === 1 Сия глаголет Господь: сохраните суд и сотворите правду, приближися бо спасение Мое приити и милость Моя открытися. 2 Блажен муж творяй сия, и человек держайся их, и храняй субботы не оскверняти, и блюдый руце свои не творити неправды. 3 Да не глаголет иноплеменник приложивыйся ко Господеви: еда отлучит мя Господь от людий Своих? И да не глаголет каженик, яко аз есмь древо сухо. 4 Сия глаголет Господь кажеником: елицы сохранят субботы Моя и изберут яже Аз хощу и содержат завет Мой, 5 дам им в дому Моем и во ограде Моей место именито, лучшее от сынов и дщерей, имя вечно дам им, и не оскудеет: 6 и иноплеменником приложившымся Господеви работати Ему и любити имя Господне, еже быти Ему в рабы и рабыни, и вся снабдящыя субботы Моя не оскверняти и держащыя завет Мой, 7 введу я в гору святую Мою и возвеселю я в дому молитвы Моея: всесожжения их и жертвы их будут приятны на требнице Моем: дом бо Мой дом молитвы наречется всем языком, 8 глаголет Господь, собираяй разсеяныя Израилевы, яко соберу к нему собор. 9 Вси зверие дивии, приидите, ядите, вси зверие дубравнии. 10 Видите, яко вси ослепоша, не разумеша смыслити, вси пси немии не возмогут лаяти, видяще сны на ложи, любяще дремати, 11 и пси безстуднии душею, не ведяще сытости: и суть лукави, не ведяще смысла, вси путем своим последоваша, кийждо уклонишася в лихоимство свое, от перваго и до последняго. 12 Приидите, да возмем вино и наполнимся пиянства, и будет яко днесь, тако и заутра, и много множае. === 57 === 1 Видите, како праведный погибе, и никтоже не приемлет сердцем, и мужие праведнии вземлются, и никтоже разумеет: от лица бо неправды взяся праведный. 2 Будет с миром погребение его, взяся от среды. 3 Вы же приидите семо, сынове беззаконнии, семя прелюбодеев и блудницы: 4 в чем услаждастеся и на кого отверзосте уста ваша? И на кого изсунусте язык ваш? Не вы ли есте чада пагубы, семя беззаконно, 5 молящиися кумиром под древием частым, закалающе чада своя в дебрех посреде камения? 6 То твоя часть, сей твой жребий, и тем пролиял еси возлияния, и тем принесл еси жертвы: о сих убо не разгневаюся ли? 7 На горе высоце и превознесенне, тамо твое ложе, и тамо вознесл еси требы твоя: 8 и за подвоями дверий твоих положил еси память твою: мыслил еси, яко аще от Мене отступиши, более нечто возимееши: возлюбил еси спящыя с тобою, 9 и умножил еси блужение твое с ними, и многи сотворил, иже далече от тебе, и послал еси послы за пределы твоя, и смирился еси даже до ада. 10 Многими путьми твоими трудился еси, и не рекл еси: престану крепящься, яко сотворил еси сия, сего ради не помолился ми еси ты. 11 Кого благопочет убоялся еси, и солгал Ми, и не помянул еси Мене, ниже приял Мя еси во ум, ниже в сердце твое? И Аз тя видя, презираю, и не убоялся еси Мене. 12 И аз возвещу правду твою и злобы твоя, яже не успеют тебе: 13 егда возопиеши, да избавят тя во печалех твоих: сия бо вся ветр возмет, и отнесет буря: а держащиися Мене стяжут землю и наследят гору святую Мою. 14 И рекут: очистите пред лицем его пути и отимите претыкания от пути людий Моих. 15 Сия глаголет Господь Вышний, Иже живет во высоких во век, Святый во святых имя Ему, Вышний, во святых почиваяй, и малодушным даяй долготерпение и даяй живот сокрушеным сердцем: 16 не во век отмщу вам, ни всегда гневатися буду на вы: дух бо от Мене изыдет, и всякое дыхание Аз сотворих. 17 За грех мало что опечалих его и поразих его и отвратих лице Мое от него: и опечалися и пойде дряхл во путех своих. 18 Пути его видех и изцелих его, и утеших его и дах ему утешение истинно, 19 мир на мир далече и близ сущым: и рече Господь: изцелю я. 20 Неправеднии же возволнуются и почити не возмогут. 21 Несть радоватися нечестивым, рече Господь Бог. === 58 === 1 Возопий крепостию и не пощади: яко трубу возвыси глас твой и возвести людем Моим грехи их и дому Иаковлю беззакония их. 2 Мене день от дне ищут и разумети пути Моя желают, яко людие правду сотворившии и суда Бога своего не оставившии: просят ныне у Мене суда праведна и приближитися ко Господу желают, глаголюще: 3 что яко постихомся, и не увидел еси? Смирихом душы нашя, и не уведел еси? Во дни бо пощений ваших обретаете воли вашя, и вся подручныя вашя томите: 4 аще в судех и сварех поститеся и биете пястьми смиреннаго, вскую Мне поститеся якоже днесь, еже услышану быти с воплем гласу вашему? 5 Не сицеваго поста Аз избрах и дне, еже смирити человеку душу свою: ниже аще слячеши яко серп выю твою, и вретище и пепел постелеши, ниже тако наречете пост приятен. 6 Не таковаго (бо) поста Аз избрах, глаголет Господь: но разрешай всяк соуз неправды, разрушай обдолжения насильных писаний, отпусти сокрушенныя во свободу и всякое писание неправедное раздери: 7 раздробляй алчущым хлеб твой и нищыя безкровныя введи в дом твой: аще видиши нага, одей, и от свойственных племене твоего не презри. 8 Тогда разверзется рано свет твой, и изцеления твоя скоро возсияют, и предидет пред тобою правда твоя, и слава Божия оымет тя. 9 Тогда воззовеши, и Бог услышит тя, и еще глаголющу ти, речет: се, приидох. Аще отимеши от себе соуз и рукобиение и глагол роптания 10 и даси алчущему хлеб от души твоея и душу смиренную насытиши, тогда возсияет во тме свет твой, и тма твоя будет яко полудне, 11 и будет Бог твой с тобою присно: и насытишися, якоже желает душа твоя, и кости твоя утучнеют, и будут яко вертоград напоен, и яко источник, емуже не оскуде вода: и кости твоя прозябнут яко трава, и разботеют, и наследят роды родов. 12 И созиждутся пустыни твоя вечныя, и будут основания твоя вечная родом родов: и прозовешися здатель оград, и стези твоя посреде упокоиши. 13 Аще отвратиши ногу твою от суббот, еже не творити хотений твоих в день святый, и прозовеши субботы сладостны, святы Богови твоему: не воздвигнеши ноги своея на дело, ниже возглаголеши словесе во гневе из уст твоих, 14 и будеши уповая на Господа, и возведет тя на благоты земныя, и ухлебит тя наследием Иакова отца твоего: уста бо Господня глаголаша сия. === 59 === 1 Еда не может рука Господня спасти? Или отягчил есть слух Свой, еже не услышати? 2 Но греси ваши разлучают между вами и между Богом, и грех ради ваших отврати лице Свое от вас еже не помиловати. 3 Руце бо ваши осквернене кровию, и персты ваши во гресех, устне же ваши возглаголаша беззаконие, и язык ваш неправде поучается. 4 Никтоже глаголет правды, ниже есть суд истинен: уповают на суетная и глаголют тщетная, яко зачинают труд и раждают беззаконие. 5 Яица аспидска разбиша и постав паучинный ткут, и хотяй от яиц их ясти, разбив запорток (его), обрете и в нем василиска. 6 Постав их не будет на ризу, и не одеждутся от дел своих: дела бо их дела беззакония. 7 Нозе же их на зло текут, скори пролияти кровь, и мысли их мысли о убийствах: сокрушение и бедность во путех их, 8 и пути мирнаго не познаша, и несть суда во путех их: стези во их развращены, по нихже ходят и не ведят мира. 9 Того ради отступи от них суд, и не постигнет их правда: ждущым им света, бысть им тма, ждуще зари во мраце ходиша. 10 Осяжут яко слепии стену, яко суще без очес осязати будут, и падутся в полудни яко в полунощи, яко умирающе возстенут 11 яко медведь, и яко голубь вкупе пойдут. Ждахом суда, и несть, спасение далече отступи от нас. 12 Много бо беззаконие наше пред Тобою, и греси наши противу сташа нам: беззакония бо наша в нас, и неправды нашя уразумехом: 13 нечествовахом и солгахом и отступихом от последования Бога нашего: глаголахом неправду и не покорихомся, во утробе зачахом и поучихомся от сердца нашего словесем неправедным: 14 и оставихом созади суд, и правда далече отступи от нас: яко изнеможе во путех их истина, и правым (путем) не возмогоша прейти: 15 и истина взяся, и преставиша ум свой еже смыслити. И виде Господь и негодова, яко не бяше суда: 16 и виде, и не бяше мужа, и помысли, и не бяше избавляющаго: и мсти им мышцею Своею, и помилованием утверди. 17 И одеяся правдою яко щитом, и возложи шлем спасения на главу, и облечеся в ризу отмщения, и одеждею Своею: 18 яко воздаваяй воздаяние укоризну супостатом. 19 И убоятся, иже от запад, имене Господня, и иже от восток солнца, имене Его славнаго: приидет бо яко река насильная гнев от Господа, приидет со яростию. 20 И приидет Сиона ради Избавляяй, и отвратит нечестие от Иакова. 21 И сей им иже от Мене завет, рече Господь: Дух Мой, иже есть в тебе, и глаголголы, яже Аз дах во уста твоя, не оскудеют от уст твоих и от уст семене твоего: рече бо Господь отныне и во век. === 60 === 1 Светися, светися Иерусалиме, прииде бо твой свет, и слава Господня на тебе возсия. 2 Се, тма покрыет землю, и мрак на языки, на тебе же явится Господь, и слава Его на тебе узрится. 3 И пойдут царие светом твоим, и языцы светлостию твоею. 4 Возведи окрест очи твои и виждь собраная чада твоя: се, приидоша вси сынове твои издалеча, и дщери твоя на рамех возмутся. 5 Тогда узриши и возрадуешися, и убоишися и ужаснешися сердцем, яко преложится к тебе богатство морское и языков и людий: 6 и приидут к тебе стада велблюд, и покрыют тя велблюди Мадиамстии и Гефарстии: вси от Савы приидут, носяще злато, и Ливан принесут и камень честен, и спасение Господне благовозвестят: 7 и вся овцы Кидарския соберутся тебе, и овни Навеофстии приидут к тебе, и вознесутся приятная на жертвенник Мой, и дом молитвы Моея прославится. 8 Кии суть, иже яко облацы летят, и яко голубие со птенцы ко мне? 9 Мене острови ждаша, и корабли Фарсийстии во первых, привести чада твоя издалеча, и сребро и злато их с ними, имене ради Господня Святаго, и за еже Святому Израилеву славну быти. 10 И созиждут сынове инороднии стены твоя, и царие их предстояти будут тебе: за гнев бо Мой поразих тя и за милость Мою возлюбих тя. 11 И отверзутся врата твоя присно, день и нощь не затворятся, ввести к тебе силу язык и цари их ведомыя. 12 Языцы бо и царие, иже не поработают ти, погибнут, и языцы запустением запустеют. 13 И слава Ливанова к тебе приидет, кипарисом и певгом и кедром вкупе, прославити место святое Мое, и место ногу Моею прославлю. 14 И пойдут к тебе боящеся сынове смиривших тя и раздраживших тя, и поклонятся следам ногу твоею вси прогневавшии тя, и наречешися град Господень, Сион Святаго Израилева. 15 За сие, яко был еси оставлен и возненавиден и не бе помагающаго ти, положу тя в радость вечную, веселие родом родов. 16 И изссеши млеко языков и богатство царей снеси, и уразумееши, яко Аз Господь Спасаяй тя и Избавляяй тя Бог Израилев. 17 И вместо меди принесу ти злато, и вместо железа принесу ти сребро, и вместо древес принесу ти медь, и вместо камения железо: и вдам князи твоя в мир и надзиратели твоя в правду. 18 И не услышится посем неправда в земли твоей, ни сокрушение ни бедность во пределех твоих, но прозовется спасение забрала твоя и врата твоя хвала. 19 И не будет тебе ктому солнце во свет дне, ниже восход луны просветит твою нощь, но будет тебе Господь свет вечный и Бог слава твоя. 20 Не зайдет бо солнце тебе, и луна не оскудеет тебе: будет бо Господь тебе свет вечный, и исполнятся дние рыдания твоего. 21 И людие твои вси праведнии в век наследят землю, храняще сад дела руку Его в славу. 22 Малый будет в тысящы, а малейший во язык велик: Аз Господь по времени соберу их. === 61 === 1 Дух Господень на Мне, Егоже ради помаза Мя, благовестити нищым посла Мя, изцелити сокрушенныя сердцем, проповедати пленником отпущение и слепым прозрение, 2 нарещи лето Господне приятно и день воздаяния, утешити вся плачущыя, 3 дати плачущым Сиона славу вместо пепела, помазание веселия плачущым, украшение славы вместо, духа уныния: и нарекутся родове правды насаждение Господне во славу. 4 И созиждут пустыни вечныя, запустевшыя прежде воздвигнут: и обновят грады пустыя, опустошенныя в роды. 5 И приидут инороднии, пасущии овцы твоя, и иноплеменницы орателие и виноградарие ваши: 6 вы же священницы Господни наречетеся, служителие Бога вашего, речется вам: крепость язык снесте и в богатстве их чудни будете. 7 Сице землю свою вторицею наследят, и веселие вечное над главою их. 8 Аз бо есмь Господь любяй правду и ненавидяй грабления от неправды: и дам труд их праведником и завет вечен завещаю им. 9 И познается во языцех семя их, и внуцы их посреде людий: всяк видяй я познает я, яко сии суть семя благословено от Бога, и радостию возрадуются о Господе. 10 Да возрадуется душа моя о Господе: облече бо мя в ризу спасения и одеждею веселия (одея мя): яко на жениха возложи на мя венец, и яко невесту украси мя красотою. 11 И яко земля растящая цвет свой, и яко вертоград семена своя прозябает: тако возрастит Господь Господь правду и веселие пред всеми языки. === 62 === 1 Сиона ради не умолчу и Иерусалима ради не попущу, дондеже изыдет яко свет правда моя, и спасение мое яко светило разжжется. 2 И узрят языцы правду твою, и царие славу твою, и прозовут тя именем новым, имже Господь наименует е. 3 И будеши венец доброты в руце Господни и диадима царствия в руце Бога твоего: 4 и не прозовешися ктому оставлен, и земля твоя ктому не наречется пуста: тебе бо прозовется воля Моя, и земля твоя вселенная, яко благоволи Господь в тебе, и земля твоя вкупе населится. 5 И якоже живяй юноша с девою, тако поживут сынове твои с тобою: и будет якоже радуется жених о невесте, тако возрадуется Господь о тебе. 6 И на стенах твоих, Иерусалиме, приставих стражы весь день и всю нощь, иже до конца не премолкнут поминающе Господа. 7 Несть бо вам подобен: аще исправиши и сотвориши, Иерусалиме, радование на земли. 8 Клятся Господь десницею Своею и крепостию мышцы Своея: аще ктому отдам пшеницу твою и пищу твою врагом твоим, и аще ктому испиют вино твое сынове чуждии, о немже трудился еси: 9 но собирающии снедят я и похвалят Господа, и оымающии испиют я во дворех святых Моих. 10 Идите враты Моими и путь сотворите людем Моим, и камение, еже на пути, размещите: воздвигните знамение на языки. 11 Се бо, Господь слышано сотвори до последних земли: рцыте дщери Сионове: се, Спаситель твой грядет, имеяй с Собою мзду и дело Свое пред лицем Своим. 12 И прозовет я люди святы, избавлены Господем: ты же прозовешися взыскан град и не оставлен. === 63 === 1 Кто Сей пришедый от Едома, червлены ризы Его от Восора, Сей красен во утвари, зело с крепостию? Аз глаголю правду и суд спасения. 2 Почто червлены ризы Твоя и одежды Твоя яко от истоптания точила? 3 Исполнен истоптания, и от язык несть мужа со Мною: и попрах я яростию Моею, и сотрох я яко персть, и сведох кровь их в землю и вся ризы Моя омочих: 4 день бо воздаяния прииде на них, и лето избавления приспе: 5 и воззрех, и не бе помощника: и помыслих, и никтоже заступи: и избави я мышца Моя, и ярость Моя наста: 6 и попрах я гневом Моим и сведох кровь их в землю. 7 Милость Господню помянух, добродетели Господни во всех, имиже нам воздает: Господь, судия благ дому Израилеву, наводит нам по милости Своей и по множеству правды Своея. 8 И рече: не людие ли Мои? Чада, и не отвергнутся. И бысть им во спасение и всякия скорби их. 9 Не ходатай, ниже Ангел, но Сам Господь спасе их, зане любит их и щадит их: Сам избави их и восприят их и вознесе их во вся дни века. 10 Тии же не покоришася и разгневаша Духа Святаго Его, и обратися им на вражду, и Той воева на ня. 11 И помяну дни вечныя: где возведый от земли пастыря овец Своих? Где есть вложивый в них Духа Святаго? 12 Возведшая десницею Моисеа, мышца славы Его раздели воду пред лицем его сотворити Ему имя вечно, 13 проведе их сквозе бездну, якоже коня сквозе пустыню, и не утрудишася, 14 и яко скоты по полю, и сниде Дух от Господа и настави их: тако провел еси люди Твоя сотворити Тебе Самому имя славно. 15 Обратися, Господи, от небесе и виждь от дому святаго Твоего и славы Твоея: где есть ревность Твоя и крепость Твоя? Где есть множество милости Твоея и щедрот Твоих, яко терпел еси нам? 16 Ты бо еси Отец наш, понеже Авраам не уведе нас, и Израиль не позна нас, но Ты, Господи, Отец наш, избави ны, исперва имя Твое на нас есть. 17 Что уклонил еси нас, Господи, от пути Твоего? И ожесточил еси сердца наша, еже не боятися Тебе? Обратися ради раб Твоих, ради племен достояния Твоего, 18 да (поне) мало наследим горы святыя Твоея. Противницы наши попраша святыню Твою: 19 быхом яко исперва, егда не владел еси нами, ниже бе наречено имя Твое на нас. === 64 === 1 Аще отверзеши небо, трепет приимут от Тебе горы и растают, 2 яко тает воск от лица огня, и попалит огнь супостаты, и явлено будет имя Твое в сопротивных Твоих: от лица Твоего языцы возмятутся: 3 егда сотвориши славная, трепет приимут от Тебе горы. 4 От века не слышахом, ниже очи наши видеша бога, разве Тебе, и дела Твоя, яже сотвориши ждущым милости. 5 Милость бо срящет творящих правду, и пути Твоя помянутся: се, Ты разгневался еси, и мы согрешихом. 6 Сего ради заблудихом и быхом яко нечисти вси мы, якоже порт нечистыя вся правда наша, и отпадохом яко листвие беззаконий ради наших: тако ветр восхитит нас. 7 И несть призываяй имя Твое и помянувый удержати Тя: яко отвратил еси лице Твое от нас и предал ны еси беззаконий ради наших. 8 И ныне, Господи, Отец наш еси Ты, мы же брение, дела руку Твоею вси: 9 не прогневайся на ны зело и не помяни во время беззаконий наших, и ныне призри, яко людие Твои вси мы. 10 Град святилища Твоего бысть пуст, Сион якоже пустыня бысть, Иерусалим на проклятие: 11 дом святый наш и слава, юже благословиша отцы наши, бысть огнем пожжен, и вся славная наша купно падоша. 12 И о всех сих терпел еси, Господи, и молчал, и смирил еси ны зело. === 65 === 1 Явлен бых не ищущым Мене, обретохся не вопрошающым о Мне, рекох: се, есмь: языку, иже не призваша имене Моего. 2 Прострох руце Мои весь день к людем не покаряющымся и противу глаголющым, иже не ходиша путем истинным, но вслед грехов своих. 3 Людие сии разгневляющии Мя пред лицем Моим присно: тии жертвы приносят в вертоградех и кадят во чрепех бесом, иже не суть, 4 и во гробех и во пещерах лежат соний ради, иже ядят мяса свиная и юху треб, осквернени сосуди их вси: 5 иже глаголют: отиди от мене, не прикоснися мне, яко чист есмь. Сей дым ярости Моея, огнь горит в нем вся дни. 6 Се, написася предо Мною: не умолчу, дондеже отдам в недра им грехи их и грехи отец их глаголет Господь: 7 иже кадяху на горах и на хомех укориша Мя, отдам дела их в недра им. 8 Тако глаголет Господь: имже образом обретается ягода на грезне, и рекут: не погуби его, яко благословение есть в нем: тако сотворю служащаго Ми ради, не имам всех погубити ради его: 9 и изведу из Иакова семя и из Иуды, и наследит гору святую Мою, и наследят избраннии Мои и раби Мои и вселятся тамо. 10 И будут во дубраве ограды стадом, и юдоль Ахорская в покоище говядов людем Моим, иже взыскаша Мене. 11 Вы же, оставившии Мя и забывающии гору святую Мою, и уготовлящии демону трапезу и исполняющии щастию растворение, 12 Аз предам вас под мечь, вси закланием падете: яко звах вас и не послушасте, глаголах, и преслушасте и сотвористе лукавое предо Мною и яже не хотех избрасте. 13 Сего ради тако глаголет Господь: се, работающии Ми ясти будут, вы же взалчете: се, работающии Ми пити будут, вы же возжаждете: 14 се, работающии Ми возрадуются, вы же посрамитеся: се, работающии Ми возвеселятся в веселии сердца, вы же возопиете в болезни сердца вашего и от сокрушения духа восплачетеся. 15 Оставите бо имя ваше в насыщение избранным Моим, вас же избиет Господь: работающым же Мне наречется имя новое, 16 еже благословится на земли, благословят бо Бога истиннаго: и кленущиися на земли клятися будут Богом истинным, забудут бо печаль свою первую, и не взыдет им на сердце. 17 Будет бо небо ново и земля нова, и не помянут прежних, ниже взыдут на сердце их, 18 но радость и веселие обрящут на ней, яко се, Аз творю веселие Иерусалиму и людем Моим радость. 19 И возвеселюся о Иерусалиме и возрадуюся о людех Моих, и ксему не услышится в нем глас плача, ни глас вопля, 20 ниже будет тамо младенец, ни старец, иже не исполнит лет своих: будет бо юный ста лет, умираяй же грешник ста лет и проклят будет. 21 И созиждут домы и сами вселятся, и насадят винограды и сами снедят плоды их. 22 Не созиждут, да инии вселятся, и не насадят, да инии снедят: якоже бо дние древа жизни, будут дние людий Моих: дела бо трудов их обетшают. 23 Избраннии же мои не имут трудитися вотще, ниже породят чад на проклятие, яко семя благословено есть Богом, и внуцы их с ними будут. 24 И будет, прежде неже воззвати им, Аз услышу их, еще глаголющым им, реку: что есть? 25 Тогда волцы и агнцы имут пастися вкупе, и лев яко вол снесть плевы, и змия землю яко хлеб: не повредят, ниже погубят на горе святей Моей, глаголет Господь. === 66 === 1 Тако глаголет Господь: небо престол Мой, земля же подножие ногу Моею: кий дом созиждете Ми, и кое место покоища Моего? 2 Вся бо сия сотвори рука Моя, и сия суть вся Моя, глаголет Господь. И на кого воззрю, токмо на кроткаго и молчаливаго и трепещущаго словес Моих? 3 Беззаконник же жряй ми телца, яко убиваяй пса: и приносяй семидал, яко кровь свиную: даяй ливан в память, аки хулник. И тии избраша пути своя, и мерзости их, яже душа их изволи. 4 И Аз изберу поругания их и грехи их воздам им: яко звах их, и не послушаша Мене, глаголах, и преслушаша и сотвориша злое предо Мною, и яже не хотех избраша. 5 Услышите глаголгол Господень, трепещущии словесе Его: рцыте, братия, ненавидящым вас и гнушающымся, да имя Господне прославится и явится во веселии их, и они посрамятся. 6 Глас вопля от града, глас от храма, глас Господа воздающаго воздаяние сопротивящымся. 7 Прежде неже чревоболети ей, роди, прежде неже приити труду чревоболения, избеже и породи мужеск пол. 8 Кто слыша сицевое, и кто виде сице? Аще родила земля с болезнию во един день? Или и родися язык весь купно, яко поболе и роди Сион дети своя? 9 Аз же дах чаяние сие, и не помянул еси Мене, рече Господь. Не се ли, Аз родящую и неплодную сотворих? Рече Бог твой. 10 Веселися, Иерусалиме, и торжествуйте в нем, вси любящии его и живущии в нем: радуйтеся вкупе с ним радостию, вси елицы плакасте о нем, 11 да ссете и насытитеся от сосца утешения его, да ссавше насладитеся от входа славы его. 12 Яко сия глаголет Господь: се, Аз укланяю на ня аки реку мира, и аки поток наводняемый славу языков: дети их на рамена взяты будут и на колену утешатся. 13 Якоже аще кого мати утешает, тако и Аз утешу вы, и во Иерусалиме утешитеся 14 и узрите, и возрадуется сердце ваше, и кости вашя яко трава прозябнут: и познается рука Господня боящымся Его, и запретит непокаряющымся. 15 Се бо, Господь яко огнь приидет, и яко буря колесницы Его, воздати яростию отмщение Свое и прещение во пламени огненне: 16 огнем бо Господним судитися будет вся земля, и мечем Его всяка плоть: мнози язвени будут от Господа. 17 Очищающиися и освящающиися во вертоградех и в преддвериих ядущии мясо свиное и мерзости и мышы вкупе погибнут, рече Господь. 18 И Аз дела их и помышление их вем, и гряду собрати вся народы и языки, и приидут и узрят славу Мою: 19 и оставлю на них знамение, и послю от них спасеных во языки, во Фарсис и в Фуд, и в Луд и в Мосох, и в Фовель и во Елладу, и во островы дальния, иже не слышаша имене Моего, ниже видеша славу Мою: и возвестят славу Мою во языцех, 20 и приведут братию вашу от всех язык дар Господеви, с коньми и колесницами и с носилами мсков, под сеньми во святый град Иерусалим, рече Господь, аки бы принесли сынове Израилевы жертвы своя Мне со псалмы в дом Господень: 21 и от тех поиму себе жерцы и левиты, рече Господь. 22 Якоже бо небо ново и земля нова, яже Аз творю, пребывают предо Мною, глаголет Господь, тако станет семя ваше и имя ваше: 23 и будет месяц от месяца, и суббота от субботы, приидет всяка плоть поклонитися предо Мною во Иерусалим, рече Господь: 24 и изыдут и узрят трупы человеков преступивших Мне: червь бо их не скончается, и огнь их не угаснет, и будут в позор всяцей плоти. == Книга пророка Иеремии == === 1 === 1 Слово Божие, еже бысть ко Иеремии сыну Хелкиеву от священник, иже обиташе во Анафофе, в земли Вениаминове, 2 якоже бысть слово Господне к нему, во дни Иосии сына Амоса царя Иудина, в третиенадесять лето царства его, 3 и бысть во дни Иоакима сына Иосии царя Иудина, даже до первагонадесять лета Седекии сына Иосии царя Иудина, даже до пленения Иерусалимскаго в месяц пятый. 4 И бысть слово Господне ко мне глаголя: 5 прежде неже мне создати тя во чреве, познах тя, и прежде неже изыти тебе из ложесн, освятих тя, пророка во языки поставих тя. 6 И рекох: о, Сый Владыко Господи, се, не вем глаголати, яко отрок аз есмь. 7 И рече Господь ко мне: не глаголи, яко отрок аз есмь, ибо ко всем, к нимже послю тя, пойдеши, и вся, елика повелю тебе, возглаголеши: 8 не убойся от лица их, яко с тобою Аз есмь, еже избавити тя, глаголет Господь. 9 И простре Господь руку Свою ко мне и прикоснуся устом моим, и рече Господь ко мне: се, дах словеса Моя во уста твоя: 10 се, поставих тя днесь над языки и над царствы, да искорениши и разориши, и расточиши и разрушиши, и паки созиждеши и насадиши. 11 И бысть слово Господне ко мне глаголя: что ты видиши Иеремие? И рекох: жезл ореховый (аз вижду). 12 И рече Господь ко мне: благо видел еси, понеже бдех Аз над словесы Моими, еже сотворити я. 13 И бысть слово Господне вторицею ко мне глаголя: что ты видиши? И рекох: коноб поджигаемый (аз вижду) и лице его от лица севера. 14 И рече Господь ко мне: от лица севера возгорятся злая на всех обитающих на земли, 15 зане се, Аз созову вся царства земная от севера, рече Господь и приидут и поставят кийждо престол свой в преддвериих врат Иерусалимских и на всех стенах окрест его и на всех градех Иудиных: 16 и возглаголю к ним с судом о всяцей злобе их, како оставиша Мя и пожроша богом чуждим и поклонишася делом рук своих. 17 Ты же препояши чресла твоя, и востани и глаголи к ним вся, елика заповедаю тебе: не убойся от лица их, ниже устрашися пред ними, яко с тобою есмь, еже избавити тя, глаголет Господь: 18 се, положих тя днесь аки град тверд и в столп железный, и аки стену медяну, крепку всем царем Иудиным и князем его, и священником его и людем земли: 19 и ратовати будут на тя и не премогут тя, понеже с тобою Аз есмь, да избавлю тя, рече Господь. === 2 === 1 И бысть слово Господне ко мне глаголющее: иди и вопий во ушы Иерусалиму, рекий: сия глаголет Господь: 2 помянух милость юности твоея и любовь совершенства твоего, егда последовал еси в пустыни ненасеянней Святому Израилеву, глаголет Господь. 3 Свят Израиль Господеви, начаток плодов Его: вси поядающии его согрешат, злая приидут на них, рече Господь. 4 Услышите слово Господне, доме Иаковль и вся племена дому Израилева. 5 Сия глаголет Господь: кое обретоша отцы ваши во Мне погрешение, яко удалишася от Мене и ходиша вслед суетных и осуетишася, 6 и не рекоша: где есть Господь, изведый нас от земли Египетския, преведый нас по пустыни, по земли необитанней и непроходней, по земли безводней и неплодней, по земли, по нейже не ходил муж никогдаже и не обитал человек тамо? 7 И введох вас в землю Кармил, да снесте плоды его и благая того: и внидосте, и осквернили есте землю Мою, и достояние Мое поставили есте в мерзость. 8 Священницы не рекоша: где есть Господь? И держащии закон не ведеша Мя, и пастырие нечествоваша на Мя, и пророцы пророчествоваша в Ваала и идолом последоваша. 9 Сего ради еще судом претися имам с вами, рече Господь, и с сыны вашими препрюся. 10 Того ради приидите во островы Хеттим и видите, и в Кидар послите и разсмотрите прилежно и видите, аще сотворена быша таковая? 11 Аще премениша языцы боги своя, и тии не суть бози? Людие же Мои премениша славу свою на то, от негоже не упользуются. 12 Ужасеся небо о сем и вострепета попремногу зело, глаголет Господь. 13 Два бо зла сотвориша людие Мои: Мене оставиша источника воды живы, и ископаша себе кладенцы сокрушеныя, иже не возмогут воды содержати. 14 Еда раб есть Израиль, или домочадец есть? Вскую бысть в пленение? 15 На него рыкаша львове и издаша глас свой, иже поставиша землю его в пустыню, и грады его сожжени суть, еже не обитати в них. 16 И сынове Мемфиса и Тафны познаша тя и поругашася тебе. 17 Не сия ли сотвори тебе то, яко оставил еси Мене? Глаголет Господь Бог твой. 18 И ныне что тебе и пути Египетскому, еже пити воду Геонскую? И что тебе и пути Ассирийскому, да пиеши воду речную? 19 Накажет тя отступление твое и злоба твоя обличит тя и увеждь и виждь, яко зло и горько ти есть, еже оставити мя, глаголет Господь Бог твой: и не благоволих от тебе, глаголет Господь Бог твой. 20 Понеже от века сокрушил еси иго твое и растерзал еси узы твоя и рекл еси: не имам тебе служити, но пойду на всякий холм высокий и под всяким древом лиственным тамо разлиюся в блуде моем. 21 Аз же насадих тя виноград плодоносен, весь истинен: како превратился еси в горесть, виноград чуждий? 22 Аще умыешися нитром и умножиши себе травы борифовы, порочен еси во беззакониих твоих предо Мною, рече Господь Бог. 23 Како речеши: не осквернихся и вслед Ваала не ходих? Виждь пути твоя на месте многогробищнем и увеждь, что сотворил еси. В вечер глас его рыдаше, 24 пути своя разшири на воды пустынныя, в похотех души своея ветром ношашеся, предан бысть, кто обратит его? Вси ищущии его не утрудятся, во смирении его обрящут его. 25 Отврати ногу твою от пути стропотна и гортань твой от жажди. И рече: возмужаюся, яко возлюби чуждих и вслед их хождаше. 26 Якоже стыд татю, егда ят будет, тако постыдятся сынове Израилевы, тии и царие их, и началницы их и священницы их и пророцы их. 27 Древу рекоша: яко отец мой еси ты: и камени: ты мя родил еси: и обратиша ко Мне хребты, а не лица своя: и во время озлобления своего рекут: востани и избави нас. 28 И где суть бози твои, яже сотворил еси тебе? Да востанут и избавят тя во время озлобления твоего: по числу бо градов твоих быша бози твои, Иудо, и по числу путий Иерусалимских жряху Ваалу. 29 Вскую глаголете ко Мне? Вси вы нечествовасте и вси вы беззаконновасте ко Мне, глаголет Господь. 30 Всуе поразих чада ваша, наказания не приясте, мечь пояде пророки вашя, аки лев погубляяй, и не убоястеся. 31 Слышите слово Господне, тако глаголет Господь: еда пустыня бых Израилю, или земля неплодна? Вскую реша людие Мои: обладаеми не будем и потом не приидем к Тебе? 32 Еда забудет невеста красоту свою, и дева мониста персий своих? Людие же Мои забыша Мене дни безчисленны. 33 Что еще добро ухитриши на путех твоих, еже взыскати любве? Не тако: но и ты лукавновала еси, еже осквернити пути твоя, 34 и в руках твоих обретеся кровь душ (убогих) неповинных: не в ровех обретох их, но во всяцей дубраве. 35 И рекла еси: неповинна есмь, но да отвратится ярость Твоя от мене. Се, Аз суждуся с тобою, внегда рещи тебе: не согреших: 36 понеже презрела еси зело, еже повторити пути твоя: и от Египта постыдишися, якоже постыдена еси от Ассура: 37 яко и оттуду изыдеши, и руце твои на главе твоей: яко отрину Господь надеяние твое, и не благопоспешится тебе в нем. === 3 === 1 Аще отпустит муж жену свою, и отидет от него и будет мужу иному, еда возвращающися возвратится к нему паки? Еда непорочна будет и неосквернена жена та? Ты же соблудила еси с пастырьми многими, и возвращалася еси и ко Мне, глаголет Господь. 2 Воздвигни очи твои на правоту и виждь, где не смесилася еси? На путех сидела еси аки врана особящаяся и осквернила еси землю в любодеяниих и в лукавствех твоих, 3 и имела еси пастырей многих в претыкание себе: лице жены блудницы бысть тебе, не хотела еси постыдетися ко всем. 4 Не аки ли домом Мене нарекла еси и Отцем и вождем девства твоего? 5 Еда пребудет во век, или сохранится в победу? Сия глаголала еси, и сотворила еси злая, и возмогла еси. 6 И рече Господь ко мне во дни Иосии царя: видел ли еси, яже сотвори ми дом Израилев? Поидоша на всяку гору высоку и под всяко древо листвяно и соблудиша тамо. 7 И рекох по внегда прелюбодействовати ему во всех сих: ко Мне обратися. И виде преступление его преступница Иудеа сестра его.. 8 И видех, яко о всех (изобличен есть), в нихже ят бысть, в нихже любодействова дом Израилев: сего ради отпустих и и дах ему книгу распустную в руце его. Обаче не убояся преступница Иудеа (сестра его), но иде и соблудила есть и та: 9 и бысть ни во что блуд ея, и оскверни землю, и соблудила есть с каменем и со древом. 10 И во всех сих не обратися ко Мне преступница сестра ея Иудеа от всего сердца своего, но во лжи, рече Господь. 11 И рече Господь ко мне: оправда душу свою отступница Израиль, паче преступницы Иудеи: 12 иди, и прочти словеса та к северу, и речеши: обратися ко мне, доме Израилев, рече Господь: и не утвержду лица Моего на вас, яко милостив Аз есмь, рече Господь, и не прогневаюся на вы во веки. 13 Обаче веждь беззаконие твое, яко в Господа Бога твоего преступила еси, и расточила еси пути твоя чуждим под всяким древом листвяным, гласа же Моего не послушала еси, рече Господь. 14 Обратитеся, сынове отступившии, глаголет Господь: яко Аз возобладаю вами и поиму вы единаго от града и двух от племене, и введу вас в Сион 15 и дам вам пастыри по сердцу Моему, и упасут вас разумом и учением. 16 И будет, егда умножитеся и возрастете на земли, глаголет Господь, во дни оны не рекут ктому: кивот завета Святаго Израилева: не взыдет на сердце, ни воспомянется, ниже посетится, ниже сотворится ктому. 17 Во дни оны нарекут Иерусалима престол Господень, и соберутся к нему вси языцы во имя Господне во Иерусалим, и не пойдут ктому вслед похотей сердца своего злейшаго. 18 Во днех тех приидет дом Иудин ко дому Израилеву, и пойдут вкупе от земли северныя и от всех стран к земли, юже дах в наследие отцем их. 19 Аз же рех: да будет, Господи, яко положу тя в чада и дам тебе землю избранную, достояние Бога Вседержителя языков: и рекох: отцем наречете Мя и от Мене не отвратитеся. 20 Обаче якоже отвергается жена сожителя своего, тако отвержеся от Мене дом Израилев, рече Господь. 21 Глас из устен слышан бысть плача и моления сынов Израилевых, яко беззаконноваша в путех своих, забыша Господа Бога святаго своего. 22 Возвратитеся, сынове возвращаюшиися, и изцелю сокрушения ваша. Се, рабы мы будем Тебе, Ты бо еси Господь Бог наш. 23 Истинно лживи быша холми и множество гор, токмо Господем Богом нашим спасение Израилево. 24 Студ же пояде труды отец наших, от юности нашея, овцы их и телцы их, и сыны их и дщери их. 25 Уснухом в постыдении нашем, и покры нас безчестие наше, яко Господу Богу нашему согрешихом, мы и отцы наши, от юности нашея даже до сего дне, и не послушахом гласа Господа Бога нашего. === 4 === 1 Аще обратишися, Израилю, глаголет Господь, ко Мне обратися: и аще отимеши мерзости твоя от уст твоих, и от лица Моего убоишися, 2 и кленешися, живет Господь, во истине и в суде и в правде, и благословят в Нем языцы и в Нем восхвалят Бога во Иерусалиме. 3 Сия бо глаголет Господь мужем Иудиным и обитателем Иерусалимлим: поновите себе поля и не сейте на тернии: 4 обрежитеся Богу вашему и обрежите жестосердие ваше, мужие Иудины и обитающии во Иерусалиме, да не изыдет яко огнь ярость Моя, и возгорится, и не будет угашаяй, ради лукавства начинаний ваших. 5 Возвестите во Иудеи, и да услышится во Иерусалиме: глаголите, воспойте трубою на земли, возопийте зело и рцыте: соберитеся, и внидем во грады тверды. 6 Воздвигше (знамение) бежите в Сион, потщитеся, не стойте, яко злая Аз навожду от севера и сотрение велико. 7 Взыде лев от ложа своего, и погубляяй языки воздвижеся и изыде от места своего, да положит землю твою в пустыню, и гради твои разорятся, оставшии без обитателей. 8 О сих препояшитеся во вретища и плачите и рыдайте, яко не отвратися гнев ярости Господни от вас. 9 И будет в день той, глаголет Господь, погибнет сердце царево и сердце началников, и священницы ужаснутся, и пророцы удивятся. 10 И рекох: о, Владыко Господи, еда обольстил еси люди сия и Иерусалима, рекий: мир будет вам? И се, пройде мечь даже до души их. 11 Во время оно речется людем сим и Иерусалиму: дух заблуждения в пустыни, путь дщере людий Моих, не ко очищению, ниже во святое: 12 дух исполнения от сих приидет Мне, и ныне Аз возглаголю суды Моя к ним. 13 Се, яко облак взыдет, и яко вихрь колесницы его, быстрее орлов кони его: горе нам, яко бедствуем. 14 Омый от лукавства сердце твое, Иерусалиме, да спасешися: доколе будут в тебе помышления бед твоих? 15 Глас бо возвещающаго от Дана приидет, и слышана будет болезнь от горы Ефремли. 16 Рцыте языком: се, приидоша: возвестите во Иерусалиме: полцы идут от земли дальния и даша на грады Иудины глас свой, 17 аки стражы селнии быша над ним окрест: яко пренебрегл Мя еси, глаголет Господь. 18 Пути твоя и начинания твоя сотвориша тебе сия: сие лукавство твое, понеже горько, яко прикоснуся сердцу твоему. 19 Чрево мое, чрево мое болит мне, и чувства сердца моего, смущается душа моя, терзается сердце мое: не умолчу, яко глас трубы услышала душа моя, вопль рати и беды: 20 сотрение (на сотрение) призывается, понеже опустела вся земля, внезапу опусте жилище мое, расторгошася кожы моя. 21 Доколе зрети имам бежащих, слышащь гласы трубныя? 22 Понеже вождеве людий Моих Мене не познаша: сынове буии суть и безумни, мудри суть, еже творити злая, благо же творити не познаша. 23 Воззрех на землю, и се, ничтоже, и на небо, и не бе света его. 24 Видех горы, и трепетаху, и вси холми возмутишася. 25 Воззрех, и се, не бе человека, и вся птицы небесныя ужасахуся. 26 Видех, и се, Кармил пуст, и вси гради сожжени огнем от лица Господня, и от лица гнева ярости Его погибоша. 27 Сия глаголет Господь: пуста будет вся земля, скончания же не сотворю. 28 О сих да плачет земля, и да помрачится небо свыше: понеже глаголах, и не раскаюся: устремихся и не отвращуся от него. 29 От гласа яздящих и напряженна лука побеже всяка страна: внидоша в разселины и в дубравы сокрышася и на камение взыдоша: вси гради оставлени суть, не обитает в них человек. 30 Ты же, запустелая, что сотвориши? Аще облечешися во багряницу и украсишися монисты златыми, аще намажеши стивием очи твои, всуе украшение твое: отринуша тя любовницы твои, души твоея ищут. 31 Глас бо яко родящия слышах стенания твоего: аки первородящия глас дщере Сиони истает, и опустит руце свои: горе мне, яко изчезает душа моя над убиенными. === 5 === 1 Обыдите пути Иерусалимския и воззрите, и познайте и поищите на стогнах его, аще обрящете мужа творящаго суд и ищуща веры: и милосерд буду ему, глаголет Господь. 2 Живет Господь, глаголют, сего ради не во лжах ли кленутся? 3 Господи, очи Твои (зрят) на веру: бил еси их, и не поболеша, сокрушил еси их, и не восхотеша прияти наказания: ожесточиша лица своя паче камене и не хотеша обратитися. 4 Аз же рех: негли убози суть (и буии), того ради не возмогоша, яко не уведаша пути Господня и суда Бога своего. 5 Пойду ко державным и возглаголю им, тии бо познаша путь Господень и суд Бога своего. И се, единодушно сии сокрушиша иго, расторгоша узы. 6 Сего ради порази их лев от дубравы, и волк даже до домов погуби их, и рысь бдяше над градами их: вси исходящии от них будут яти, яко умножиша нечестия своя, укрепишася во отвращениих своих. 7 О чем от сих милосерд буду тебе? Сынове твои оставиша Мя и кляшася теми, иже не суть бози: насытих их, и прелюбодействоваша и в домех блудниц обиташа, 8 кони женонеистовни сотворишася, кийждо ко жене искренняго своего ржаше. 9 Еда о сих не посещу? Рече Господь: или языку сицевому не мстит душа Моя? 10 Взыдите на стены его и разорите, окончания же не сотворите: оставите подпоры его, яко Господни суть. 11 Преступлением бо преступил есть на Мя дом Израилев и дом Иудин глаголет Господь. 12 Солгаша Господу своему и рекоша: не суть сия, ниже приидут на нас злая и меча и глада не узрим: 13 пророцы наши быша на ветр, и слово Господне не бе в них, тако будет им. 14 Сего ради тако глаголет Господь Сил: занеже глаголали есте слово сие, се, Аз даю словеса Моя во уста твоя огнь, и люди сия древа, и пояст их. 15 Се, Аз наведу на вас язык издалеча, доме Израилев, рече Господь, язык сильный, язык старый, егоже языка не увеси, (ни уразумееши, что глаголет): 16 тул его яко гроб отверст, вси крепцыи и поядят жатву вашу 17 и хлебы вашя, и поядят сынов ваших и дщерей ваших, и снедят овец ваших и телцев ваших, и поядят винограды вашя и смокви вашя и масличия ваша, и сокрушат грады вашя твердыя, на нихже вы уповасте, мечем. 18 Обаче во днех онех, глаголет Господь Бог твой, не сотворю вас во истребление. 19 И будет, егда речете: почто сотвори Господь Бог наш нам сия вся? И речеши к ним: яко остависте Мя и послужисте богом чуждим в земли вашей, тако послужите богом чуждим в земли не вашей. 20 Возвестите сия дому Иаковлю и слышано сотворите в дому Иудине (рекуще): 21 слышите сия, людие буии и не имущии сердца, иже, имеюще очи, не видите, и ушы, и не слышите: 22 Мене ли не убоитеся? Рече Господь: или от лица Моего не устыдитеся? Иже положих песок предел морю, заповедь вечну, и не превзыдет его, и возмутится и не возможет: и возшумят волны его, и не прейдут того. 23 Людем же сим бысть сердце непослушно и непокориво, и уклонишася и поидоша, 24 и не рекоша в сердцы своем: убоимся Господа Бога нашего, дающаго нам дождь ранний и поздный во время исполнения повеления жатвы и хранящаго нам. 25 Беззакония наша уклониша сия, и греси наши отринуша благая от нас. 26 Яко обретошася в людех Моих нечестивии, и сети поставиша, еже погубити мужы, и уловиша. 27 Аки клетка поставлена полна птиц, тако домы их полни лести: сего ради возвеличишася и обогатишася: 28 утыша и утолстеша и преступиша словеса Моя злейшии: прю вдовицы не судиша, суда сира не управиша и суда убогим не судиша. 29 Еда сих ради не посещу? Рече Господь: или языку сицевому не отмстит душа Моя? 30 Ужас и страшная содеяшася на земли: 31 пророцы пророчествоваша неправедная, и священницы восплескаша руками своими, и людие Мои возлюбиша таковая. И что сотворите в последняя сих? === 6 === 1 Укрепитеся, сынове Вениаминовы, посреде Иерусалима, и в Фекуи вострубите трубою, и над Вефахармом воздвигните хоругвь: яко злая произникоша от севера, и сотрение велико бывает: 2 и отимется высота твоя, дщи Сионя. 3 К ней приидут пастырие и стада их, и поставят на ней кущы окрест, и упасут кийждо рукою своею. 4 Уготовитеся на ню на крань, востаните и взыдем на ню о полудни: горе нам, яко уклонися день, яко изчезают сени дневныя. 5 Востаните и взыдем на ню нощию и расточим основания ея. 6 Яко сия глаголет Господь Сил: посецы древа его, излий на Иерусалим силу: о, граде лживый, всякое насильство в нем! 7 Якоже студену творит кладязь воду свою, тако студену творит ю злоба ея: нечестие и пакости услышатся в нем над лицем его всегда. 8 Немощию и язвою накажешися, Иерусалиме: да не отступит душа Моя от тебе, да не сотворю тя непроходну, землю необитанну. 9 Яко сия глаголет Господь Сил: обирайте, обирайте, аки виноград, останки Израилевы, обратитеся аки обиратель на кошницу свою. 10 Кому возглаголю и (кому) засвидетельствую, и услышит? Се, необрезана ушеса их, и слышати не возмогут: се, слово Господне бысть к ним в поношение, и не восприимут того. 11 И ярость Мою исполних, и терпех, и не скончах их: излию на младенцы отвне и на собрание юнош вкупе: муж бо и жена яти будут, старец со исполненным дний. 12 И прейдут домы их ко иным, поля и жены их такожде, яко простру руку Мою на обитающих на земли сей, глаголет Господь. 13 Понеже от меншаго и даже до болшаго вси совершиша беззаконная, от священника и даже до лжепророка вси сотвориша ложная 14 и целяху сотрение людий Моих, уничижающе и глаголюще: мир, мир: и где есть мир? 15 Постыдешася, яко оскудеша: и ниже аки посрамляеми постыдешася и безчестия своего не познаша: сего ради падут падением своим и во время посещения своего погибнут, рече Господь. 16 Сия глаголет Господь: станите на путех и видите, и вопросите о стезях Господних вечных и видите, кий есть путь благ, и ходите по нему и обрящете очищение душам вашым. И рекоша: не пойдем. 17 И поставих над вами стражы: слышите глас трубы. И рекоша: не послушаем. 18 Сего ради услышаша языцы и пасущии стада своя. 19 Слыши, земле: се, Аз навожду на люди сия злая, плод отвращения их, яко словес Моих не послушаша и закон Мой отвергоша. 20 Вскую Мне кадило от Савы приносите и кинамон от земли дальния, всесожжения ваша не суть приятна, и жертвы вашя не усладиша Мя. 21 Сего ради тако глаголет Господь: се, Аз дам на люди сия болезнь, и изнемогут отцы и сынове вкупе, сосед и искренний его погибнут. 22 Сия глаголет Господь: се, людие грядут от севера, и язык велик востанет от конец земли, 23 лук и щит возмут: мучителен есть и не умилосердится: глас его, яко море шумящее: на конех и колесницах ополчится аки огнь на брань на тя, дщи Сионя. 24 Слышахом слух его, ослабеша руце наши, скорбь объят нас, болезни яко родящия. 25 Не исходите на нивы и на пути не ходите, понеже мечь вражий обитает окрест. 26 Дщи людий моих, препояшися вретищем и посыплися пепелом, плачь возлюбленнаго сотвори тебе рыдание горько, понеже внезапу приидет запустение на вас. 27 Искусителя дах тя в людех искусных, и увеси Мя, внегда искусити Ми путь их: 28 вси непослушни ходящии строптиво: медь и железо, вси растлени суть. 29 Оскуде мех от огня, истле олово: всуе ковачь сребро кует, лукавства бо их не истаяша. 30 Сребро отриновено нарцыте их, яко Господь отверже их. === 7 === 1 Слово, еже бысть ко Иеремии от Господа, глаголющее: 2 стани во вратех дому Господня и проповеждь тамо слово то и глаголи: слышите слово Господне, вся Иудеа, ходящии сквозе врата сия, да поклонитеся Господу: 3 сия глаголет Господь Сил, Бог Израилев: исправити пути вашя и начинания ваша, и вселю вы на месте сем. 4 Не надейтеся на себе во словесех лживых, понеже весьма не упользуют вас, глаголюще: храм Господень, храм Господень, храм Господень есть. 5 Яко аще исправляюще исправите пути ваша и умышления ваша, и творяще сотворите суд посреде мужа и посреде искренняго его, 6 и пришелцу и сиру и вдовице не сотворите насилия, и крове неповинныя не излиете на месте сем, и вслед богов чуждих не пойдете на зло вам, 7 вселю вас на месте сем, в земли, юже дах отцем вашым от века даже и до века. 8 Аще же вы надеетеся на словеса лживая, отюнудуже не будет вам пользы, 9 и крадете и убиваете, и блудствуете и кленетеся лживо, и жрете Ваалу и ходите вслед богов чуждих, ихже не весте, яко во зло вам суть, 10 и приидосте и стасте предо Мною в дому сем, в немже призвано есть имя Мое, и рекли есте: удалихомся, еже не творити вся мерзости сия: 11 еда вертеп разбойником есть дом Мой, в немже призвася имя Мое тамо во очию вашею? И се, Аз видех, глаголет Господь. 12 Сего ради идите к месту Моему, еже в Силоме, идеже вселих имя Мое от начала, и видите, что сотворих ему лукавств ради людий Моих Израиля. 13 И ныне, понеже сотвористе вся дела сия, рече Господь, и глаголах к вам рано востающь и глаголющь, и не услышасте Мене, и звах вас, и не отвещасте: 14 убо и Аз сотворю дому сему, в немже призвано есть имя Мое, на негоже вы уповасте, и месту, еже дах вам и отцем вашым, якоже сотворих Силому. 15 И отвергу вас от лица Моего, якоже отвергох всю братию вашу, все семя Ефремово. 16 Ты же не молися о людех сих и не проси еже помилованым быти им, и не моли, ниже приступай ко Мне о них, яко не услышу тя. 17 Еда не видиши, что сии творят во градех Иудиных и на путех Иерусалимских? 18 Сынове их собирают дрова, и отцы их зажигают огнь, и жены их месят муку, да сотворят опресноки воинству небесному, и возлияша возлияния богом чуждим, да прогневают Мя. 19 Мене ли тии прогневляют? Глаголет Господь: еда не себе самих? Да постыдятся лица их. 20 Сего ради тако глаголет Господь: се, гнев и ярость Моя лиется на место сие и на люди, и на скоты и на всяко древо страны их и на плоды земныя, и возжжется и не угаснет. 21 Сия глаголет Господь Сил, Бог Израилев: всесожжения ваша соберите со жертвами вашими и изядите мяса: 22 яко не глаголах ко отцем вашым и не заповедах им в день, в оньже изведох их от земли Египетския, о всесожжениих и жертвах, 23 но (токмо) слово сие заповедах им, рекий: услышите глас Мой, и буду вам в Бога, и вы будете Мне в люди, и ходите во всех путех Моих, в нихже повелех вам, да благо будет вам. 24 И не услышаша Мене, и не внят ухо их: но поидоша в похотех и стропотстве сердца своего лукаваго, и сотворишася на задняя, а не на предняя, 25 от дне, в оньже изыдоша отцы их от земли Египетския, и даже до дне сего: и послах к вам вся рабы Моя пророки, в день и рано востая и посылая: 26 и не услышаша Мя, ни приклониша ухо свое, но ожесточиша выю свою паче отец своих. 27 И речеши к ним вся словеса сия, и не услышат тя, и воззовеши их, и не отвещают тебе. 28 И речеши к ним: сей язык, иже не послуша гласа Господа Бога своего, ни восприят наказания: погибе вера и отята есть от уст их. 29 Остризи главу твою и отметни, и восприими во устне рыдание, яко отверже Господь и отрину род творяй сия. 30 Понеже сотвориша сынове Иудины лукавое во очию Моею, рече Господь: поставиша мерзости своя в дому, в немже призвано есть имя Мое, да осквернят его, 31 и создаша требище Тафефу, еже есть во юдоли сына Енномля, да сожигают сыны своя и дщери своя огнем, егоже не повелех им, ниже помыслих в сердцы Моем: 32 сего ради се, дние грядут, глаголет Господь, и не рекут ктому: требище Тафефово и юдоль сына Енномля, но юдоль закланых: и погребутся во Тафефе, занеже несть места. 33 И будут трупие людий сих во снедь птицам небесным и зверем земным, и не будет отгоняющаго. 34 И упраздню от градов Иудиных и от путий Иерусалимлих глас радующихся и глас веселящихся, глас жениха и глас невесты, во опустении бо будет вся земля. === 8 === 1 Во время оно, глаголет Господь, извергут кости царей Иуды и кости князей его, и кости священников и кости пророков и кости обитающих во Иерусалиме из гробов их 2 и повергут их противу солнца и луны и противу всех звезд небесных и противу всего воинства небеснаго, ихже возлюбиша и имже служиша и вслед их ходиша, и ихже держахуся и имже поклонишася: неоплакани и непогребени будут и в пример на лицы земли будут: 3 яко избраша паче смерть, неже живот, и всем, иже осташа от племене сего строптиваго во всех местех, аможе изрину их рече Господь Сил. 4 И речеши к ним: понеже сия глаголет Господь: еда падаяй не востает, или отврашаяйся не обратится? 5 Вскую отвратишася людие Мои сии во Иерусалиме отвращением безстудным и укрепишася во произволении своем и не восхотеша обратитися? 6 Внимайте и слушайте: не тако ли возглаголют: несть человек творяй покаяние о гресе своем, глаголя: что сотворих? Изнеможе бежай от течения своего, аки конь утружден во ржании своем. 7 Еродиа на небеси позна время свое, горлица и ластовица селная, врабие сохраниша времена входов своих: людие же Мои сии не познаша судеб Господних. 8 Како речете, яко мы мудри есмы и закон Господень с нами есть? Истинно всуе бысть трость лживая книжником. 9 Постыдешася премудрии, и устрашени и поимани быша, слово бо Господне отвергоша: кая мудрость есть в них? 10 Сего ради дам жены их иным и села их наследником, понеже от мала даже до велика вси златолюбию последуют и от пророка даже до священника вси творят лжу, 11 и изцеляху сотрения дщере людий Моих, ко безчестию глаголюще: мир, мир. И не бе мира. 12 Постыждени суть, яко гнусство сотвориша и постыдением не постыдешася и посрамитися не ведеша: сего ради падут между падающими, во время посещения своего падут рече Господь. 13 И соберут плоды их, глаголет Господь: несть грозда на лозе, и не суть смокви на смоковницах, и листвие отпадоша: и дах им, и мимоидоша их. 14 Почто мы седим? Совокупитеся и внидем во грады тверды и повержемся тамо, яко Господь Бог наш отрину нас и напои нас водою желчи, согрешихом бо пред Ним. 15 Ждахом мира, и не бяху благая: времене уврачевания, и се, боязнь. 16 От Дана слышано бысть ржание коней его, от гласа ржания яждения коней потрясеся вся земля: и приидет и пожрет землю и исполнение ея, град и обитающих в нем: 17 яко се, Аз послю на вас змии умерщвляющыя, имже несть обаяния, и угрызут вас, рече Господь, 18 неизцельно со болезнию сердца вашего изчезающаго. 19 Се, глас вопля и дщере людий Моих от земли издалеча: еда Господь несть в Сионе? Или Царя несть в нем? Понеже прогневаша Мя во изваянных своих и в суетных чуждих. 20 Пройде жатва, мимоиде лето, и мы несмы спасени. 21 Над сокрушением дщере людий моих сокрушен есмь и скорбен: во ужасе объяша мя болезни аки раждающия. 22 Или ритины несть в Галааде? Или врача несть тамо? Чесо ради несть изцелена рана дщере людий моих? === 9 === 1 Кто даст главе моей воду и очесем моим источник слез? И плачуся день и нощь о побиенных дщере людий моих. 2 Кто даст мне в пустыни виталище последнее? И оставлю люди моя и отиду от них: понеже вси любодействуют, соборище преступников. 3 И налякоша язык свой яко лук: лжа и неверство укрепишася на земли, ибо от злых во злая произыдоша и Мене не познаша, рече Господь. 4 Кийждо от искренняго своего да стрежется, и на братию свою не уповайте, ибо всяк брат запинанием запнет, и всяк друг льстивно наскочит. 5 Кийждо другу своему посмеется, истины не возглаголют: научиша язык свой глаголати лжу, неправдоваша и не восхотеша обратитися. 6 Лихва на лихву и лесть на лесть: не восхотеша уведети Мене, рече Господь. 7 Сего ради тако глаголет Господь Сил: се, Аз разжегу их и искушу их: что бо ино сотворю от лица лукавства дщери людий Моих? 8 Стрела уязвляющая язык их, льстивии глаголы уст их: приятелю своему глаголет мирная, внутрь же себе имеет вражду. 9 Еда на сих не посещу? Рече Господь: или людем таковым не отмстит душа Моя? 10 На горах восприимите плачь и тужение и на стезях пустыни рыдание, яко оскудеша, за еже не быти человеком преходящым: не слышаша гласа обитания от птиц небесных и даже до скотов, ужасошася, отидоша. 11 И дам Иерусалим в преселение и в жилище змием и грады Иудины положу в разорение, яко не будет обитающаго. 12 Кто муж премудр, и уразумеет сие? И к немуже слово уст Господних, да возвестит вам, чесо ради погибе земля, сожжена есть яко пустыня, еяже никтоже проходит? 13 И рече Господь ко мне: понеже оставиша закон Мой, егоже дах пред лицем их, и не послушаша гласа Моего и не ходиша по нему, 14 но поидоша по изволению сердца своего лукаваго и вслед идолов, имже научиша их отцы их: 15 сего ради тако глаголет Господь Сил, Бог Израилев: се, Аз напитаю люди сия теснотами и в питие дам им воду желчную, 16 и расточу их во языки, ихже не знаша тии и отцы их, и послю на них мечь, дондеже истлятся. 17 Сия рече Господь Сил: призовите плачевниц, и да приидут, и ко женам премудрым послите, и да вещают 18 и да приимут над вами плачь, и да изведут очи ваши слезы, и вежди ваши да излиют воду: 19 зане глас плача слышан бысть во Сионе: како бедни быхом, постыждени зело, яко оставихом землю и отринухом жилища наша? 20 Темже слышите, жены, слово Господне, и приимите ушима вашима словеса уст Его, и научите дщери вашя рыданию, и каяждо искреннюю свою плачу: 21 понеже взыде смерть сквозе окна ваша и вниде в землю вашу погубити отрочата отвне и юношы от стогн. 22 (Глаголи:) сия рече Господь: и будут мертвии человецы в пример на лицы поля земли вашея, яко сено созади жнущаго, и не будет собирающаго. 23 Тако глаголет Господь: да не хвалится мудрый мудростию своею, и да не хвалится крепкий крепостию своею, и да не хвалится богатый богатством своим: 24 но о сем да хвалится хваляйся, еже разумети и знати, яко Аз есмь Господь творяй милость и суд и правду на земли, яко в сих воля Моя, глаголет Господь. 25 Се, дние грядут, глаголет Господь, и посещу на всех, иже обрезаную имут плоть свою: 26 на Египет и на Идумею, и на Едом и на сыны Аммони, и на сыны Моавли и на всякаго остризающаго власы по лицу своему, обитающыя в пустыни, яко вси языцы необрезани плотию, весь же дом Израилев необрезани суть сердцы своими. === 10 === 1 Слышите слово Господне, еже глагола Господь на вас, доме Израилев. 2 Сия глаголет Господь: по путем языков не учитеся и от знамений небесных не страшитеся, яко их боятся языцы. 3 Понеже законы языков суетни суть: древо есть от леса изсеченое, дело тектонское и слияние: 4 сребром и златом украшена суть, и млатами и гвоздьми утвердиша я, да не движутся: 5 сребро изваяно есть, не глаголют, носими носятся, понеже ходити не возмогут: не убойтеся их, яко не сотворят зла, и блага несть в них. 6 Несть подобен Тебе, Господи: велик еси Ты и велико имя Твое в крепости. 7 Кто не убоится Тебе, о, Царю языков! Твоя бо честь между всеми премудрыми языков, и во всех царствах их ни един есть подобен Тебе. 8 Купно буии и безумнии суть, учение суетных их древо есть: 9 сребро извито от Фарсиса приходит, злато от Офаза, и рука златарей, дела вся художников: в синету и багряницу одеют их, дела умоделников вся сия. 10 Господь же Бог истинен есть, Той Бог живый и Царь вечный, от гнева Его подвигнется земля, и не стерпят языцы прещения Его. 11 Тако рцыте им: бози, иже небесе и земли не сотвориша, да погибнут от земли и от сих, иже под небесем суть. 12 Господь сотворивый землю во крепости Своей, устроивый вселенную в премудрости Своей, и разумом Своим простре небо. 13 Ко гласу Своему дает множество вод на небеси: и возведе облаки от последних земли, блистания в дождь сотвори и изведе ветр от сокровищ Своих. 14 Буй сотворися всяк человек от ума (своего), постыдеся всяк златоделник во изваяниих своих, яко ложная слия, несть духа в них: 15 суетна суть дела, смеху достойна, во время посещения своего погибнут. 16 Несть сицевая часть Иакову, яко Создавый вся Той есть, и Израиль жезл достояния Его, Господь Сил имя Ему. 17 Собра отвне имение, обитающее во избранных, 18 понеже тако глаголет Господь: се, Аз отвергу обитатели земли сея в скорби и смущу их, яко да обрящется язва твоя. 19 Горе во сокрушении твоем, болезненна язва твоя: аз же рех: воистинну сия болезнь моя (есть) и объят мя, жилище мое опусте, погибе: 20 скиния моя опусте, погибе, и вся кожи моя растерзашася: сынов моих и овец моих несть, несть ктому места скинии моей, места кожам моим: 21 понеже обуяша пастырие и Господа не взыскаша, сего ради не уразуме все стадо и расточено бысть. 22 Глас слышания, се, грядет и трус велий от земли северныя, да положит грады Иудины в запустение и во обитание змием. 23 Вем, Господи, яко несть человеку путь его, ниже муж пойдет и исправит шествие свое. 24 Накажи нас, Господи, обаче в суде, а не в ярости, да не умаленых нас сотвориши. 25 Излий гнев Твой на языки не знающыя Тя и на племена, яже имене Твоего не призваша, яко поядоша Иакова и потребиша его и пажить его опустошиша. === 11 === 1 Слово еже бысть от Господа ко Иеремии, глаголющее: 2 слышите словеса завета сего и глаголите ко мужем Иудиным и ко обитателем Иерусалимским, 3 и речеши к ним: сия глаголет Господь Бог Израилев: проклят муж, иже не послушает словес завета сего, 4 егоже заповедах отцем вашым в день, в оньже изведох их от земли Египетския, от пещи железныя, глаголя: услышите глас Мой и сотворите вся, елика заповедаю вам, и будете Мне в люди, и Аз буду вам в Бога: 5 да утвержду клятву Мою, еюже кляхся отцем вашым, еже дати им землю точащую млеко и мед, якоже есть день сей. И отвещах и рекох: буди, Господи. 6 И рече Господь ко мне: прочти вся словеса сия во градех Иудиных и вне Иерусалима, рекий: слышите словеса завета сего и сотворите та: 7 яко свидетелствуя засвидетелствовах отцем вашым в день, в оньже изведох их от земли Египетския, даже до дне сего, заутра востая засвидетелствовах глаголя: слышите глас Мой. 8 И не слышаша, ни приклониша уха своего, но идоша кийждо в стропотстве сердца своего злаго: и наведох на них вся словеса завета сего, егоже заповедах да сотворят, и не сотвориша. 9 И рече Господь ко мне: обретено есть совещание (на зло) в мужех Иудиных и во обитающих во Иерусалиме: 10 возвратишася ко беззаконием первым отец своих, иже не хотеша слышати словес Моих, и се, тии поидоша по бозех чуждих, да служат им: и разори дом Израилев и дом Иудин завет Мой, егоже завещах со отцы их. 11 Сего ради сия глаголет Господь: се, Аз наведу на них злая, от нихже изыти не возмогут, и возопиют ко Мне, и не услышу их: 12 и пойдут грады Иудины и обитателе Иерусалима и возопиют ко богом, имже тии кадят, иже не спасут их во время скорбей их. 13 По числу бо градов твоих беху бози твои, Иудо, и по числу путий Иерусалимских постависте олтари студныя, олтари на каждение Ваалу. 14 Ты же не молися о людех сих и не проси о них в мольбе и молитве: не услышу бо во время вопля их ко Мне и во время озлобления их. 15 Почто возлюбленная в дому Моем сотвори мерзости (многи)? Еда обеты и мяса святая отимут от тебе лукавства твоя, или сими избежиши? 16 Маслину благосенну, красну зраком нарече Господь имя твое, ко гласу обрезания ея: разгореся огнь в ней, велика скорбь на тебе, непотребны быша ветви ея. 17 И Господь Сил, иже насади тебе, глаголал есть на тя зло за злая дому Израилева и дому Иудина, елика сотвориша себе ко прогневанию Мене кадяще Ваалу. 18 Господи, скажи ми, и уразумею: тогда видех начинания их. 19 Аз же, яко агня незлобиво ведомо на заколение, не разумех, яко на мя помыслиша помысл лукавый, глаголюще: приидите и вложим древо во хлеб его и истребим его от земли живущих, и имя его да не помянется ктому. 20 Господь Саваоф, судяй праведно, испытуяй сердца и утробы, да вижду мщение Твое на них, яко к Тебе открых оправдание мое. 21 Сего ради сия глаголет Господь на мужы Анафофски ищущыя души моея, глаголющыя: да не пророчествуеши о имени Господни, аще ли же ни, умреши в руках наших. 22 Сего ради сия глаголет Господь Сил: се, Аз посещу на них: юноши их мечем умрут, и сынове их и дщери их скончаются гладом, 23 и останка не будет от них, наведу бо злая на живущыя во Анафофе в лето посещения их. === 12 === 1 Праведен еси, Господи, яко отвещаю к Тебе: обаче судбы возглаголю к Тебе: что, яко путь нечестивых спеется, угобзишася вси творящии беззакония? 2 Насадил еси их, и укоренишася, чада сотвориша и сотвориша плод: близ еси Ты уст их, далече же от утроб их. 3 И Ты, Господи, разумееши мя, видел мя еси и искусил еси сердце мое пред Тобою: собери их яко овцы на заколение и очисти их в день заколения их. 4 Доколе плакати имать земля, и трава вся селная изсхнет от злобы живущих на ней? Погибоша скоти и птицы, яко рекоша: не узрит Бог путий наших. 5 Нозе твои текут и разслабляют тя: како уготовишися с коньми? И в земли мира твоего уповал еси, како сотвориши в шуме Иорданстем? 6 Понеже и братия твоя и дом отца твоего, и сии отвергошася тебе и тии возопиша, созади тебе собрашася: не веруй им, егда глаголати будут тебе благая. 7 Оставих дом Мой, оставих достояние Мое, дах возлюбленную душу Мою в руки врагов ея: 8 бысть Мне достояние Мое яко лев в дубраве, даде противу Мене глас свой: сего ради возненавидех е. 9 Не вертеп ли иенин достояние Мое Мне, или пещера окрест его? Идите, соберите вся звери селныя, и да приидут снести е. 10 Пастырие мнози растлиша виноград Мой, оскверниша часть Мою, даша часть желаемую Мою в пустыню непроходную, 11 положиша в потребление пагубы: Мене ради разорением разорена есть вся земля, яко ни един есть, иже размышляет сердцем. 12 Во всякий путь пустыни приидоша опустошающии, яко мечь Господень пояст от края земли даже до края ея: несть мира всяцей плоти. 13 Посеясте пшеницу, а терние пожасте: достояния их не полезна будут им: постыдитеся стыдением от похваления вашего, от поношения пред Господем. 14 Яко сия глаголет Господь о всех соседех лукавых, прикасающихся наследию Моему, еже разделих людем Моим Израилю: се, Аз исторгну их от земли их и дом Иудин извергну от среды их: 15 и будет, егда исторгну их, обращуся и помилую их, и вселю их когождо в достояние свое и когождо в землю свою: 16 и будет, аще учащеся научатся путем людий Моих, еже клятися именем Моим, жив Господь, якоже научиша людий Моих клятися Ваалом, и созиждутся посреде людий Моих: 17 аще же не послушают, исторгну язык оный исторганием и погублением, рече Господь. === 13 === 1 Сия глаголет Господь ко мне: иди и стяжи себе чресленик льняный и препояши того на чреслех твоих, и в воду да не внесеши того. 2 И стяжах чресленик по словеси Господню и обложих окрест чресл моих. 3 И бысть слово Господне ко мне вторицею, рекущее: 4 возми чресленик, егоже стяжал еси, иже есть окрест чресл твоих, и востани и иди ко Евфрату, и скрый того тамо во разселине каменне. 5 И идох и скрых того во Евфрате, якоже заповеда мне Господь. 6 И бысть по днех мнозех, и рече Господь ко мне: востани и иди ко Евфрату, и возми оттуду чресленик, егоже заповедах тебе скрыти тамо. 7 И идох ко Евфрату и раскопах, и взях чресленик от места, идеже скрых его, и се, изгнил бе (чресленик), яко ни на чтоже быти потребну ему. 8 И бысть слово Господне ко мне, рекущее: сия глаголет Господь: 9 тако согнити сотворю гордыню Иудину и гордыню Иерусалимлю, многую гордыню сию людий сих строптивых, 10 иже не хотят послушати словес Моих, ходящих во строптивстве сердца своего и шедших вслед богов чуждих, да служат им и да покланяются им: и будут якоже чресленик той, иже ни к чему потребен. 11 Зане, якоже придержится чресленик ко чреслом мужа, тако прилепих Мне (весь) дом Израилев и весь дом Иудин, рече Господь: да будут Мне в люди имениты, и в хвалу и в славу, и не послушаша Мене. 12 И речеши к людем сим словеса сия: тако рече Господь Бог Израилев: всяк мех исполнится вина. И будет, аще рекут к тебе: еда ведяще не увемы, яко всяк мех исполнится вина? 13 И речеши к ним: сия глаголет Господь: се, Аз исполню всех обитателей земли сея, и царей их седящих от колена Давидова на престоле их, и священники и пророки, и Иуду и всех обитающих во Иерусалиме пиянством, 14 и расточу их, мужа и брата его, и отцы их и сыны их вкупе: не пожелаю, рече Господь, не пощажу, и не умилосердюся, еже не погубити их. 15 Слышите и внемлите, и не возноситеся, яко Господь глаголал есть. 16 Дадите Господу Богу вашему славу прежде даже не смеркнется и прежде даже не преткнутся нозе ваши ко горам темным: и пождете света, и тамо сень смертная, и положени будут во мрак. 17 Аще же не послушаете, в тайне восплачется душа ваша от лица гордыни и плачя восплачет, и изведут очи ваши слезы, яко сотрено есть стадо Господне. 18 Рцыте царю и владыкам: смиритеся, сядите, яко взятся от главы вашея венец славы вашея. 19 Грады южнии затворени суть, и несть отверзаяй: преведен есть весь Иуда, совершиша преселение совершенное. 20 Воздвигни очи твои, Иерусалиме, и виждь приходящыя от севера: где стадо даное тебе, овцы славы твоея? 21 Что речеши, егда посетят тя? И ты научил еси их на тя учением в началство: еда не оымут тя болезни яко жену родящую? 22 Аще же речеши в сердцы твоем: почто приидоша ми сия? За множество беззакония твоего откровена суть задняя твоя, да обруганы будут стопы твоя. 23 Аще пременит Ефиоплянин кожу свою, и рысь пестроты своя, и вы можете благотворити научившеся злу. 24 И развею их, яко стеблие носимое ветром в пустыню. 25 Сей жребий твой и часть непокорства твоего на Мя, глаголет Господь, яко забыл еси Мя и надеялся на лжу: 26 темже и аз обнажу бедры твоя противу лица твоего, и явится срамота твоя 27 и прелюбодейство твое, и ржание твое и отчуждение блуда твоего: на горах и на селех видех мерзости твоя. Горе тебе, Иерусалиме, яко не очистился еси, последуя мне. Доколе еще? === 14 === 1 И бысть слово Господне ко Иеремии о бездождии. 2 Рыдала Иудеа, и врата ея разрушишася, и отемнишася на земли, и вопль Иерусалима взыде. 3 И вельможи его послаша менших своих к воде: приидоша на кладязи и не обретоша воды, и отнесоша сосуды своя тщы: постыждени суть и посрамлени, и покрыша главы своя. 4 И дела земли оскудеша, яко не бяше дождя на землю: постыждени суть земледелцы, покрыша главы своя. 5 И еленицы на ниве родиша и оставиша, яко не бе травы. 6 Онагри сташа на камениих, браша в себе ветр яко змиеве, оскудеша очи их, яко не бе травы. 7 Беззакония наша противусташа нам: Господи, сотвори нам ради имене Твоего, яко мнози греси наши пред Тобою, Тебе согрешихом. 8 Ожидание Израилево, Господи, Спасителю наш во время скорби! Вскую яко пришлец еси на земли и яко путник укланяющься во виталище? 9 Еда будеши якоже человек спяй, или аки муж не могий спасти? Ты же в нас еси, Господи, и имя Твое призвано бысть на нас, не забуди нас. 10 Сия глаголет Господь людем сим: возлюбиша подвизати нозе свои и не упокоишася, и Бог не благопоспеши в них, ныне воспомянет беззакония их и посетит грехи их. 11 И рече Господь ко мне: не молися о людех сих во благо: 12 егда поститися будут, не услышу прошения их, и аще принесут всесожжения и жертвы, не благоволю в них: яко мечем и гладом и мором Аз скончаю их. 13 И рекох: сый Господи Боже, се, пророцы их прорицают и глаголют: не узрите меча, и глад не будет вам, но истину и мир дам на земли и на месте сем. 14 И рече Господь ко мне: лживо пророцы прорицают во имя Мое, не послах их, ни заповедах им, ни глаголал есмь к ним: понеже видения лжива и гадания и волшебства и произволы сердца своего тии прорицают вам. 15 Сего ради сия глаголет Господь о пророцех, иже пророчествуют во имя Мое ложная, и Аз не послах их, иже глаголют: мечь и глад не будет на земли сей: смертию лютою умрут и гладом скончаются пророцы тии. 16 И людие, имже тии пророчествуют, будут извержени на путех Иерусалима от лица меча и глада, и не будет погребаяй их, и жены их и сынове их и дщери их, и излию на них злая их. 17 И речеши к ним слово сие: да изведут очи ваши слезы день и нощь, и да не престанут, яко сотрением великим сотрена (дева) дщерь людий моих и язвою злою зело. 18 Аще изыду на поле, и се, заклани мечем: и аще вниду во град, и се, истаявшии гладом: яко пророк и священник отидоша в землю, еяже не ведяху. 19 Еда отмещущь отвергл еси Иуду, и от Сиона отступи душа Твоя? Вскую поразил еси нас, и несть нам изцеления? Ждахом мира, и не бяху благая: времене уврачевания, и се, боязнь. 20 Познахом, Господи, грехи нашя, беззакония отец наших, яко согрешихом пред Тобою. 21 Престани ради имене Твоего, не погуби престола славы Твоея: воспомяни, не разори завета Твоего иже с нами. 22 Еда есть во изваянных языческих, иже дождит? Или небеса могут дати влагу свою? Не Ты ли еси, Господи Боже наш? И пождем Тебе, Господи, Ты бо сотворил еси вся сия. === 15 === 1 И рече Господь ко мне: аще станут Моисей и Самуил пред лицем Моим, несть душа Моя к людем сим: изрини тех (от лица Моего), и да изыдут. 2 И будет, аще рекут к тебе: камо изыдем? И речеши к ним: сия глаголет Господь: иже ко смерти, ко смерти: и иже к мечу, к мечу: и иже ко гладу, ко гладу: и иже ко пленению, ко пленению. 3 И отмщу им четырьми образы, рече Господь: мечь на заклание, и пси на растерзание, и птицы небесе и зверие земли на пожрения и расхищение. 4 И предам их во утеснение всем царствам земным, ради Манассии сына Езекиина царя Иудина за вся, яже сотвори во Иерусалиме. 5 Кто умилосердится к тебе, Иерусалиме? И кто поскорбит о тебе, или кто пойдет молити о мире тебе? 6 Ты оставил Мя еси, рече Господь, вспять пошел еси: и простру руку Мою на тя и убию тя, и ктому не пощажу их 7 и расточу их расточением во вратех людий Моих: обезчадеша, погубиша людий Моих злобами своими, и не обратишася. 8 Умножишася вдовицы их паче песка морскаго: наведох на матерь юношы, бедность о полудни, навергох на ню внезапу страх и трепет. 9 Праздна бысть родившая седмь, оскуде душа ея, зайде ей солнце еще среде полудне, постыждена бысть и укорена: прочыя их в мечь дам пред враги их, рече Господь. 10 Горе мне, мати (моя), вскую мя родила еси мужа прителнаго и судимаго по всей земли? Не заях, ниже заят у мене кто: сила моя оскуде от кленущих мя, (рече Господь). 11 Буди, Владыко, исправляющым им: аще не притекох ко Тебе во время озлобления их и во время скорби их, во благая на врага. 12 Еда познается железо? И одеяние медяно крепость твоя. 13 И сокровища твоя в расхищение дам, измену за вся грехи твоя, и во всех пределех твоих: 14 и порабощу тя окрест врагом твоим, в земли, еяже не веси: яко огнь возжжеся от ярости Моея, на вас горети будет. 15 Ты веси, Господи, воспомяни мя и посети мя и защити мя от гонящих мя, не в долготерпение Твое восприими мя: веждь, яко приях Тебе ради поношение от отвергающих словеса Твоя: 16 скончай их, и будет слово Твое мне в радость и во веселие сердца моего, яко призвано есть имя Твое на мне, Господи Боже Сил. 17 Не седох в сонме их играющих, но бояхся от лица руки Твоея: на едине седях, яко горести исполнихся. 18 Вскую оскорбляющии мя возмогают на мя? Язва моя тверда, откуду изцелюся? Бысть мне яко вода лживая, не имущая верности. 19 Сего ради сия глаголет Господь: аще обратишися, возставлю тя, и пред лицем Моим станеши: и аще изведеши честное от недостойнаго, яко уста Моя будеши: и обратятся тии к тебе, и ты не обратишися к ним. 20 И дам тя людем сим аки стену крепку, медяну: и поратуют на тя и не возмогут на тя, яко Аз с тобою есмь, да спасу тя и избавлю тя, рече Господь: 21 избавлю тя от рук злейших и искуплю тя от рук губителей. === 16 === 1 И бысть слово Господне ко мне, рекущее: и ты да не поймеши жены, 2 и не родится тебе сын, ниже дщерь на месте сем. 3 Яко сия глаголет Господь от сынех и дщерех, иже родятся на месте сем, и о матерех их, яже родиша их, и о отцех их родивших я в земли сей: 4 смертию лютою изомрут, не оплачутся и не погребутся: во образ на лицы земли будут и мечем падут и гладом скончаются, и будут трупие их во снедь птицам небесным и зверем земным. 5 Сия глаголет Господь: да не внидеши в дом их пирный, ни да ходиши плакати, ниже да рыдаеши их, понеже отях мир Мой от людий сих, рече Господь, милость и щедроты. 6 И умрут велицыи и малии в земли сей: не погребутся, ни оплачутся, ниже терзание о них будет, ниже обриются ради их, 7 и не преломят хлеба во стенании их ко утешению над мертвым, и не дадут им пития чаши ко утешению над отцем и материю их. 8 И в дом пирный да не внидеши седети с ними, еже ясти и пити. 9 Понеже сия глаголет Господь Сил, Бог Израилев: се, Аз отиму от места сего во очию вашею и во днех ваших глас радости и глас веселия, глас жениха и глас невесты. 10 И будет, егда возвестиши людем сим вся словеса сия, и рекут к тебе: вскую глаголал есть Господь на нас вся злая сия? Кая неправда наша? И кий грех наш, имже согрешихом Господу Богу нашему? 11 И речеши к ним: понеже оставиша Мя отцы ваши, глаголет Господь, и идоша вслед богов чуждих, и послужиша им и поклонишася им, Мене же оставиша и закона Моего не сохраниша: 12 и вы горше деласте, неже отцы ваши, и се, вы ходите кийждо вслед похотей сердца вашего лукаваго, еже не слушати Мене: 13 и изрину вас от земли сея в землю, еяже не весте вы и отцы ваши, и послужите тамо богом чуждим день и нощь, иже не дадут вам милости. 14 Сего ради, се, дние грядут, глаголет Господь, и не рекут ктому: жив Господь, иже изведе сынов Израилевых от земли Египетския: 15 но: живет Господь, иже изведе сынов Израилевых от земли северныя и от всех стран, аможе извержени быша: и возвращу их в землю их, юже дах отцем их. 16 Се, Аз послю рыбари многи, рече Господь, и уловят их: и посем послю многи ловцы, и уловят их на всяцей горе и на всяцем холме и от пещер каменных. 17 Яко очи Мои на всех путех их, не сокровени суть от лица Моего, и не утаена суть беззакония их от очию Моею. 18 И воздам первее сугубая беззакония и грехи их, имиже оскверниша землю Мою в мертвечинах мерзостей своих и в беззакониих своих, имиже наполниша достояние Мое. 19 Господи, Ты крепость моя и помощь моя и прибежище мое во днех злых: к Тебе языцы приидут от последних земли и рекут: воистинну лживых стяжаша отцы наши идолов, и несть в них пользы. 20 Еда сотворит себе человек боги, и тии не суть бози? 21 Сего ради, се, Аз покажу им во время сие руку Мою и знаему сотворю им силу Мою, и познают, яко имя Мне Господь. === 17 === 1 Грех Иудин написан есть писалом железным на ногти адамантове, начертан на скрижали сердца их и на розех олтарей их. 2 Егда воспомянут сынове их олтари своя и дубравы своя при древе лиственне и на холмех высоких, 3 о, нагорный (жителю)! Крепость твою и сокровища твоя в расхищение дам, и высокая твоя, грех ради твоих, яже во всех пределех твоих, 4 и останешися един от наследия твоего, еже дах тебе: и служити тя сотворю врагом твоим в земли, еяже не веси: яко огнь разжегл еси в ярости Моей, даже во век горети будет. Сия глаголет Господь: 5 проклят человек, иже надеется на человека и утвердит плоть мышцы своея на нем, и от Господа отступит сердце его: 6 и будет яко дивия мирика в пустыни и не узрит, егда приидут благая, и обитати будет в сухоте и в пустыни, в земли сланей и необитаемей. 7 И благословен человек, иже надеется на Господа, и будет Господь упование его: 8 и будет яко древо насажденное при водах, и во влаге пустит корение свое: не убоится, егда приидет зной, и будет на нем стеблие зелено, и во время бездождия не устрашится и не престанет творити плода. 9 Глубоко сердце (человеку) паче всех, и человек есть, и кто познает его? 10 Аз Господь испытуяй сердца и искушаяй утробы, еже воздати комуждо по пути его и по плодом изобретений его. 11 Возгласи ряб, собра, ихже не роди, творяй богатство свое не с судом: в преполовении дний своих оставит е и на последок свой будет безумен. 12 Престол славы возвышен от начала, место святыни нашея. 13 Чаяние Израилево, Господи! Вси оставляющии Тя да постыдятся, отступающии (от Тебе) на земли да напишутся, яко оставиша источник живых вод, Господа. 14 Изцели мя, Господи, и изцелею: спаси мя, и спасен буду, яко хвала моя Ты еси. 15 Се, тии глаголют ко мне: где есть слово Господне? Да приидет. 16 Аз же не утрудихся, Тебе (пастырю) последуяй, и дне человеча не пожелах: Ты веси исходящая от устен моих, пред лицем Твоим суть: 17 не буди ми во отчуждение, упование мое Ты в день лют. 18 Да постыдятся гонящии мя, аз же да не постыждуся: да устрашатся тии, аз же да не устрашуся: наведи на них день озлобления, сугубым сокрушением сотри их. 19 Сия глаголет Господь ко мне: иди и стани во вратех сынов людий твоих, имиже входят царие Иудины и исходят, и во всех вратех Иерусалимских и речеши к ним: 20 слышите слово Господне, царие Иудины и вся Иудеа и весь Иерусалим, входящии во врата сия. 21 Сия глаголет Господь: сохраните душы вашя и не носите бремен в день суббот, и не исходите враты Иерусалима, 22 и не износите бремен из домов ваших в день субботный, и всякаго дела не творите: освятите день субботный, якоже заповедах отцем вашым: 23 и не услышаша, ни приклониша уха своего, но ожесточиша выи своя паче отец своих, да не услышат мя и да не приимут наказания. 24 И будет, аще послушаете Мене, глаголет Господь, еже не вносити бремен во врата града сего в день субботный, и святити день субботный, не творити в онь всякаго дела, 25 и внидут во врата града сего царие и началницы, седящии на престоле Давидове и восходящии на колесницах и конех своих, тии и началницы их, мужие Иудины и обитателие Иерусалима: и обитати будут во граде сем во веки: 26 и приидут от градов Иудиных и от окрестных Иерусалима, и от земли Вениамини и от польных, и от горних и от юга, носяще всесожжения и жертву, и фимиам и манау и ливан, носяще хвалу в дом Господень. 27 И будет, аще не послушаете Мене еже святити день субботный и не носити бремен, ниже входити вратами Иерусалима в день субботный, то зажгу огнь во вратех его, и пожрет домы Иерусалимли и не угаснет. === 18 === 1 Слово, еже бысть ко Иеремии от Господа, рекущее: 2 востани и сниди в дом скудельничь, и тамо услышиши словеса Моя. 3 И снидох в дом скудельничь, и се, той творяше дело на каменех. 4 И разбися сосуд, егоже той творяше от глины рукама своима: и паки той сотвори из него иный сосуд, якоже угодно во очию его творити. 5 И бысть слово Господне ко мне, рекущее: 6 еда, якоже скудельник сей, не возмогу сотворити вас, доме Израилев? Рече Господь: се, якоже брение в руку скудельника, тако вы есте, доме Израилев, в руку Моею: 7 наконец возглаголю на язык и на царство, да искореню их и разорю и расточу я: 8 и аще обратится язык той от всех лукавств своих, то раскаюся о озлоблениих, яже помыслих сотворити им: 9 и наконец реку на язык и царство, да возсозижду и насажду я, 10 и аще сотворят лукавая пред очима Моима, еже не послушати гласа Моего, то раскаюся о благих, яже глаголах сотворити им. 11 И ныне рцы ко мужем Иудиным и обитателем Иерусалима, рекий: сия рече Господь: се, Аз творю на вас злая и мышлю на вас умышление: да обратится убо кийждо от пути своего лукаваго, и исправите пути вашя и умышления ваша. 12 И рекоша: укрепимся, ибо по развращением нашым пойдем, и кийждо угодное сердца своего лукаваго сотворим. 13 Сего ради сия глаголет Господь: вопросите ныне языков, кто слыша сицевая страшная, яже сотвори зело дева Израилева? 14 Еда оскудеют от камене сосцы, или снег от Ливана? Еда уклонится вода зелно ветром носимая? 15 Понеже забыша Мене людие Мои всуе жруще, и изнемогут на путех своих и на стезях вечных, еже взыти на стези не имущыя пути на хождение, 16 еже положити землю свою в запустение и во звиздание вечное: всяк, иже прейдет по ней, почудится и покивает главою своею: 17 якоже ветр палящь разсею их пред враги их, хребет, а не лице покажу им в день погибели их. 18 И рекоша: приидите и умыслим на Иеремию совет, ибо не погибнет закон от священника, ни совет от премудраго, ни слово от пророка: приидите и поразим его языком, и не вонмем всем словесем его. 19 Вонми, Господи, мне и услыши глас оправдания моего. 20 Еда воздаются злая за благая? Яко глаголаша словеса на душу мою и мучителство свое сокрыша ми. Помяни стоявшаго мя пред Тобою, еже глаголати за них благая, да отвращу гнев Твой от них. 21 Сего ради даждь сыны их в глад и собери их в руце меча: да будут жены их безчадны и вдовы, и мужие их да будут убиени смертию, и юноши их да падут мечем на рати: 22 да будет вопль в домех их: наведи на них разбойники внезапу, понеже совещаша слово, да имут мя, и сети скрыша на мя. 23 Ты же, Господи, веси весь совет их на мя в смерть: да не очистиши беззакония их и грехов их от лица Твоего да не изгладиши: да будет болезнь их пред Тобою, и во время ярости Твоея сотвори им. === 19 === 1 Сия рече Господь ко мне: иди и стяжи сосуд скудельничь жжен, и приведи от старец людских и от старец священнических: 2 и изыди в место многогробищное сынов Енноних, еже есть близ придверия врат Харсифских, и прочти тамо вся словеса, яже Аз возглаголю тебе, 3 и речеши им: слышите слово Господне, царие Иудины и мужие Иудины, и обитателие Иерусалима и входящии вратами сими: сия глаголет Господь Сил, Бог Израилев: се, Аз наведу злая на место сие, яко всякому слышащему сия зазвучит во ушию его: 4 понеже оставиша Мя, и чужде сотвориша место сие, и пожроша на нем богом чуждим, ихже не ведеша тии и отцы их: и царие Иудины наполниша место сие крове неповинных 5 и создаша высокая Ваалу на сожжение сынов своих огнем, во всесожжение Ваалу, яже не заповедах ни глаголах, ниже взыдоша на сердце Мое. 6 Сего ради, се, дние грядут, глаголет Господь, и не прозовется ктому место сие Падение и место многогробищное сынов Енноних, но место многогробищное заклания: 7 и расточу совет Иудин и совет Иерусалима в месте сем, и превращу их мечем пред враги их и в руку ищущих душ их: и дам трупие их в ядь птицам небесным и зверем земным: 8 и поставлю град сей в разорение и во звиздание: всяк, иже мимоидет, о нем почудится и позвиждет о всей язве его: 9 и снедят плоти сынов своих и плоти дщерей своих, и кийждо плоти подруга своего снесть во обстоянии и в тесноте, в нейже запрут их врази их, ищущии души их. 10 И да сокрушиши сосуд пред очима мужей исходящих с тобою 11 и речеши к ним: сия глаголет Господь Сил: тако сокрушу люди сия и град сей, якоже сокрушается сосуд скудельный, иже не может ктому изцелитися: и в Тофефе погребутся того ради, яко не будет иного места на погребение. 12 Тако сотворю месту сему, глаголет Господь, и обитателем его, да поставлю град той яко Падающь. 13 И будут домы Иерусалима и домы царей Иудиных, якоже место Падающее, от нечистот своих во всех домех, в нихже жряху на кровех своих всему воинству небесному и приношаху возлияния богом чуждим. 14 И прииде Иеремиа от (места) Падения, аможе посла его Господь пророчествовати, и ста во дворе дому Господня и рече ко всем людем: 15 сия глаголет Господь Сил, Бог Израилев: се, Аз наведу на град сей и на вся грады его и на вся села его вся злая, яже глаголал есмь нань: яко ожесточиша выи своя, еже не слышати заповедий Моих. === 20 === 1 И услыша Пасхор сын Еммеров священник, иже поставлен бе началник в дому Господни, Иеремию пророчествующа словеса сия: 2 и удари Пасхор Иеремию пророка и вверже его в кладу, яже бе во вратех Вениаминих вышних в дому Господни. 3 Бывшу же утру, изведе Пасхор Иеремию от клады. И рече к нему Иеремиа: не Пасхор нарече (Господь) имя твое, но Преселника Отвсюду. 4 Понеже сия глаголет Господь: се, Аз дам тя в преселение и всех другов твоих: и падут мечем враг своих, и очи твои узрят, и тебе и всего Иуду дам в руки царя Вавилонска, и преведут их в Вавилон и побиют их мечьми. 5 И дам всю силу града сего и вся труды его и вся сокровища царя Иудина дам в руки врагов его, и расхитят их и возмут и отведут в Вавилон. 6 Ты же, Пасхор, и вси обитателие дому твоего, отидете во пленение, и в Вавилон приидеши и тамо умреши, тамо же и погребешися ты и вси друзие твои, имже пророчествовал еси лжу. 7 Прельстил мя еси, Господи, и прельщен есмь, креплейший мене еси и превозмогл еси: бых в посмех весь день, вси ругаются мне. 8 Понеже горьким словом моим посмеюся, отвержение и бедность наведу, яко бысть в поношение мне слово Господне и в посмех весь день. 9 И рекох: не воспомяну имене Господня, ниже возглаголю ктому во имя Его. И бысть в сердцы моем яко огнь горящь, палящь в костех моих, и разслабех отвсюду, и не могу носити: 10 слышах бо досадителства многих собравшихся окрест: нападите, нападим нань, вси мужие друзие его: наблюдайте помышление его, аще (како) прельстится, и преможем нань и сотворим отмщение наше ему. 11 Господь же со мною есть яко борец крепкий: сего ради погнаша и уразумети не могоша: постыдешася зело, яко не разумеша безчестия своего, еже во век не забвено будет. 12 И Ты, Господи сил, искушаяй праведная, ведаяй утробы и сердца, (молютися,) да вижду мщение Твое на них, Тебе бо открых прю мою. 13 Пойте Господу, хвалите Господа, яко избави душу убогаго от руки лукавых. 14 Проклят день, в оньже родихся: день, в оньже породи мя мати моя, да не будет благословен. 15 Проклят муж, иже возвести отцу моему, рекий: родися тебе отрок мужеск, и яко радостию возвесели его. 16 Да будет человек той якоже гради, яже преврати Господь яростию и не раскаяся: да слышит вопль заутра и рыдание во время полуденное: 17 яко не убил мене в ложеснах матере, и была бы мне мати моя гроб мой и ложесна зачатия вечнаго. 18 Вскую изыдох из ложесн, да вижду труды и болезни, и скончашася в постыдении дние мои? === 21 === 1 Слово, еже бысть от Господа ко Иеремии, егда посла к нему царь Седекиа Пасхора сына Мелхиина и Софонию сына Васаиева, священника, глаголя: 2 вопроси о нас Господа, яко Навуходоносор царь Вавилонский воста на нас: сотворит ли Господь с нами по всем чудесем Своим, и отидет от нас? 3 И рече Иеремиа к ним: тако рцыте Седекии: сия глаголет Господь Бог Израилев: 4 се, Аз обращаю оружия бранная, яже суть в руках ваших, имиже вы ополчаетеся на царя Вавилонска и Халдейска, иже обстоят вас окрест вне стен: и соберу та посреде града сего, 5 и поборю Аз по вас рукою простертою и мышцею крепкою с яростию и гневом великим, 6 и побию всех обитающих во граде сем, человеки и скоты, губителством великим, и измрут. 7 И по сих, тако глаголет Господь, дам Седекию царя Иудина и рабы его, и люди его и оставльшыяся во граде сем от губителства и глада и меча, в руку Навуходоносора царя Вавилонска и в руку врагов их и в руку ищущих душ их, и побиет их острием меча: и не пощажу их, ниже милостив буду им. 8 И к людем сим речеши: сия глаголет Господь: се, Аз даю пред вами путь живота и путь смерти: 9 иже обитает во граде сем, умрет мечем и гладом и губителством, а исходяй, иже прибежит ко Халдеом обстоящым вас, жив будет, и будет душа его в плен, и жив будет. 10 Утвердих бо лице Мое на град сей во злая, а не во благая, рече Господь: в руки царя Вавилонска предастся, и сожжет его огнем. 11 Доме царя Иудина, слышите слово Господне: 12 доме Давидов, сия глаголет Господь: судите заутра суд и исправите, и избавите силою угнетенаго от руки обидящаго и, да не зажжется яко огнь ярость Моя и возгорится, и не будет угашающаго, ради лукавых умышлений ваших. 13 Се, Аз к тебе обитающему во крепце и польне удолии, рече Господь, иже глаголете: кто побиет нас? Или кто внидет в домы нашя? 14 И посещу на вас по лукавым начинанием вашым, рече Господь, и возжгу огнь в лесе его, и пояст вся, яже окрест его. === 22 === 1 Сия рече Господь: иди и вниди в дом царя Иудина и рцы тамо слово сие, 2 и речеши: слыши слово Господне, царю Иудин, иже седиши на престоле Давидове, ты и дом твой, и раби твои и людие твои и входящии дверьми сими: 3 сия глаголет Господь: творите суд и правду, и избавите силою угнетена от руку обидящаго и, и пришелца и сира и вдовицы не оскорбляйте, не угнетайте беззаконно, и крове неповинныя не изливайте на месте сем. 4 Аще бо творяще сотворите слово сие, то внидут вратами дому сего царие седящии на престоле Давидове и вседающии на колесницы и на кони, тии и раби их и людие их. 5 Аще же не послушаете словес сих, Сам Собою закляхся, рече Господь, яко в пустыню будет дом сей. 6 Понеже тако глаголет Господь на дом царя Иудина: Галаад ты Мне, глава Ливанская, аще не поставлю тебе в пустыню, во грады необитанны, 7 и наведу на тя убивающа мужа и секиру его, и посекут избранныя кедры твоя и вергут на огнь. 8 И пройдут языцы мнози сквозе град сей, и речет кийждо искреннему своему: вскую сотвори Господь тако граду сему великому? 9 И отвещают: сего ради, яко оставиша завет Господа Бога своего и поклонишася богом чуждим и послужиша им. 10 Не плачите мертваго, ниже рыдайте о нем: плачите плачем о исходящем, яко не возвратится ктому, ниже увидит земли рождения своего. 11 Понеже сия рече Господь к Селлиму сыну Иосиину царю Иудину царствующему вместо Иосии отца своего, иже изшел есть от места сего: не возвратится ктому семо, 12 но на месте том, аможе преведох его, тамо умрет и земли сея не узрит ктому. 13 Горе созидающему дом свой с неправдою и горницы своя не в суде, у негоже ближний его делает туне, и мзды его не воздаст ему: 14 иже рече: созижду себе дом пространен, и горницы широки со отверстыми окнами и своды кедровыми, и расписаны червленцем. 15 Еда царствовати будеши, яко ты поощряешися о ахазе отце твоем? Не ядят, ниже пиют: лучше тебе было творити суд и правду благу. 16 Не познаша, не судиша суда смиренных, ниже суда нища: не сие ли тебе есть, еже не знати тебе Мене, рече Господь? 17 Се, не суть очи твои, ниже сердце твое благо, но к сребролюбию твоему и крове неповинныя пролиянию, и ко обидам и ко убийству, еже творити я. 18 Сего ради сия рече Господь ко Иоакиму сыну Иосиину царю Иудину: горе мужу сему, не оплачут его: горе, брате! Ниже возрыдают о нем: увы мне, господине! 19 Погребением ослим погребется, влачимь извержен будет вне врат Иерусалима. 20 Взыди на Ливан и возопий, и в Васан даждь глас твой, и возопий на он пол моря, яко сотрени суть вси любовнии твои. 21 Глаголах к тебе в падении твоем, и рекл еси: не услышу. Сей путь твой от юности твоея, яко не послушал еси гласа Моего. 22 Всех пастырей твоих упасет ветр, и любовнии твои во пленение пойдут, и тогда постыдишися и посрамишися от всех любящих тя: 23 иже седиши в Ливане и гнездишися в кедрех, возстенеши, егда приидут к тебе болезни, яко раждающия. 24 Живу Аз, рече Господь, аще будет Иехониа сын Иоакима царь Иудин, перстень на руце десней Моей, оттуду исторгну тя 25 и предам тя в руки ищущих души твоея и в руки, ихже ты боишися лица, и в руки Навуходоносора царя Вавилонска и в руки Халдеом, 26 и отвергу тя и матерь твою, яже роди тя, в землю чужду, в нейже несте рождени, и тамо умрете: 27 а в землю, в нюже тии желают душами своими возвратитися, не возвратятся. 28 Обезчестися Иехониа, аки сосуд непотребен, яко отриновен бысть той и семя его, и извержен в землю, еяже не ведяше. 29 Земле, земле, земле, слыши слово Господне! 30 Сия рече Господь: напиши мужа сего отвержена, мужа, иже во днех своих не предуспеет: ниже бо будет от семене его муж, иже сядет на престоле Давидове, и власть имеяй ктому во Иуде. === 23 === 1 Горе пастырем, иже погубляют и расточают овцы паствы Моея, рече Господь. 2 Сего ради сия рече Господь Бог Израилев к пасущым людий Моих: вы расточили есте овцы Моя, и отвергосте я, и не посетисте их, се, Аз посещу на вас по лукавству умышлений ваших, рече Господь: 3 и Аз соберу останки стада Моего от всех земель, в няже извергох их тамо, и возвращу их к селением их, и возрастут и умножатся. 4 И возставлю над ними пастыри, и упасут их, и не убоятся ктому, ниже ужаснутся, и ни един погибнет от числа, рече Господь. 5 Се, дние грядут, глаголет Господь, и возставлю Давиду Восток праведный, и царствовати будет Царь и премудр будет и сотворит суд и правду на земли: 6 во днех Его спасется Иуда, и Израиль пребудет в надежди, и сие имя Ему, имже нарекут Его: Господь праведен наш. 7 Сего ради, се, дние грядут, рече Господь, и не рекут ктому: живет Господь, иже изведе сыны Израилевы от земли Египетския: 8 но: живет Господь, иже изведе и преведе семя дому Израилева от земли северски и от всех земель, в няже изверже их тамо, и обитати имут в земли своей. 9 О пророцех сотрено есть сердце мое во мне, вострепеташа вся кости моя, бых яко муж пиян и яко человек, егоже одоле вино, от лица Господня и от лица благолепия славы Его. 10 Яко прелюбодеяньми исполнена есть земля, яко от лица их плакася земля, изсхоша пажити пустынныя: и бысть течение их лукаво, и крепость их такожде. 11 Понеже пророк и священник осквернишася, и в дому Моем обретох лукавство их, рече Господь: 12 того ради путь их будет им ползок во тме, и поткнутся и падут в нем: наведу бо на них злая в лето посещения их, рече Господь. 13 И во пророцех Самарийских видех беззакония: пророчествоваху чрез Ваала и прельщаху люди Моя Израиля. 14 И во пророцех Иерусалимских видех ужасная, прелюбодействующих и ходящих во лжи и скрепляющих руки строптивым, да не отвратится кийждо от пути своего лукаваго: быша Мне вси аки Содом, и обитающии в нем яко Гоморр. 15 Сего ради тако рече Господь Сил ко пророком: се, Аз напитаю их пелынем и напою их желчию, от пророков бо Иерусалимских изыде осквернение на всю землю. 16 Сия глаголет Господь Сил: не слушайте словес пророков, иже пророчествуют вам и прельщают вас: видение от сердца своего глаголют, а не от уст Господних. 17 Глаголют отвергающым Мя: глагола Господь, мир будет вам: и всем, иже ходят в похотех своих, и всякому, ходящему в строптивстве сердца своего, рекоша: не приидут на вас злая. 18 Кто бо бысть в совете Господни, и виде и слыша словеса Его? Кто внят слово Его и слыша? 19 Се, буря от Господа и ярость исходит в сотрясение, устремившися приидет на нечестивыя. 20 И ктому не возвратится ярость Господня, дондеже сотворит сие и дондеже совершит помышление сердца Своего. В последния дни уразумеете совет Его. 21 Не посылах пророки, а они течаху: не глаголах к ним, и тии пророчествоваху. 22 И аще бы стали в совете Моем, слышана сотворили бы словеса Моя и отвратили бы людий Моих от пути их лукаваго и от начинаний их лукавых. 23 Бог приближаяйся Аз есмь, глаголет Господь, а не Бог издалеча. 24 Аще утаится кто в сокровенных, и Аз не узрю ли его? Рече Господь. Еда небо и землю не Аз наполняю? Рече Господь. 25 Слышах, яже глаголют пророцы, пророчествующе во имя Мое лжу и глаголюще: видех сон, (видех сон). 26 Доколе будет в сердцы пророков прорицающих лжу и пророчествующих льщения сердца своего, 27 мыслящих, да забвен будет закон Мой в сониих их, яже вещают кийждо искреннему своему, якоже забыша отцы их имя Мое ради Ваала? 28 Пророк, иже имать сновидение, да вещает сновидение свое, а иже имать слово Мое, да глаголет слово Мое во истине. Что плевы ко пшенице? Тако слово Мое, рече Господь. 29 Еда словеса Моя не суть якоже огнь горящь, рече Господь, и яко млат сотрыющь камень? 30 Сего ради, се, Аз ко пророком, рече Господь, иже крадут словеса Моя кийждо от искренняго своего. 31 Се, Аз на пророки, глаголет Господь, износящыя пророчествия языком и дремлющыя дремание свое. 32 Се, Аз на пророки, прорицающыя соние лживо, рече Господь, и провещаша та, и прельстиша люди Моя во лжах своих и во прелестех своих, Аз же не послах их, ни заповедах им, и пользою не упользуют людий сих, (рече Господь). 33 И аще вопросят людие сии, или пророк, или священник, рекуще: кое (есть) бремя Господне? И речеши к ним: вы есте бремя, и повергу вас, рече Господь. 34 И пророк, и священник, и людие, иже рекут: бремя Господне, посещу местию на мужа того и на дом его. 35 Сице рцыте кийждо ко искреннему и ко брату своему: что отвеща Господь? И что глагола Господь? 36 И бремя Господне не помянется ктому, ибо бремя будет комуждо слово его: и превратисте словеса Бога живаго, Господа Сил, Бога нашего. 37 Сия рцы ко пророку: что отвеща тебе Господь? И что глагола Господь? 38 Аще же речете: бремя Господне: сего ради тако рече Господь: понеже рекли есте глагол сей бремя Господне, и послах к вам, рекий: не глаголите бремя Господне: 39 сего ради, се, Аз возму и повергу вас и град, егоже дах вам и отцем вашым, от лица Моего, 40 и дам вас в поношение вечное и в срамоту вечную, яже никогда забвением загладится. === 24 === 1 Показа мне Господь, и се, две кошницы полны смоквий поставлены пред храмом Господним, повнегда преведе Навуходоносор царь Вавилонский Иехонию сына Иоакимова, царя Иудина, и началников его и художников, и узников и богатых от Иерусалима, и преведе их в Вавилон. 2 Кошница едина смоквий добрых зело, яко обычай смоквам быти первых времен, и кошница другая смоквий злых зело, ихже ясти не возможно за худость их. 3 И рече Господь ко мне: что ты видиши, Иеремие? И рекох: смокви, смокви добрыя, добры зело: и злыя, злы зело, ихже ясти не возможно за худость их. 4 И бысть слово Господне ко мне, рекущее: 5 сия глаголет Господь Бог Израилев: якоже смокви сия благи, тако познаю преселеных Иудеев, ихже послах от места сего в землю Халдейску во благая: 6 и утвержу очи Мои на них во благая и преведу их паки в землю сию во благая: и возсозижду их и не разорю, и насажду их и не исторгну: 7 и дам им сердце, да уведят Мя, яко Аз есмь Господь, и будут Мне в люди, и Аз буду им в Бога: понеже обратятся ко Мне всем сердцем своим. 8 И якоже смокви злыя, ихже ясти не возможно за худость их, сия рече Господь, тако предам Седекию царя Иудина и началники его и останок от Иерусалима, иже осташа во граде сем и иже обитают во земли Египетстей, 9 и дам их в расточение и озлобление всем царствам земным, и будут в поношение и в притчу, и в ненависть и в проклятие во всех местех, в няже извергох их: 10 и послю на них мечь и глад и пагубу, дондеже изчезнут от земли, юже дах им и отцем их. === 25 === 1 Слово, еже бысть ко Иеремии на вся люди Иудины, в лето четвертое Иоакима сына Иосиина, царя Иудина: то лето первое Навуходоносора царя Вавилонскаго: 2 еже глагола Иеремиа пророк ко всем людем Иудиным и ко всем обитателем Иерусалима, рекий: 3 в третиенадесять лето Иосии сына Амосова, царя Иудина, и даже до дне сего, сие двадесять третие лето, бысть слово Господне ко мне, и глаголах к вам, заутра востая и глаголя: и не слышасте. 4 И посылаше Господь к вам всех раб Своих пророк, востая заутра и посылая: и не слышасте, ни приклонисте ушес ваших, да слышите, егда глаголаше: 5 отвратитеся кийждо от пути своего злаго и от злейших умышлений ваших, и обитати будете в земли, юже Господь даде вам и отцем вашым, от века даже и до века: 6 и не ходите вслед богов чуждих, еже служити им и покланятися им, да не прогневаете Мя в делех рук ваших, еже озлобити вас. 7 И не послушасте Мя, рече Господь, еже не подвизати Мя ко гневу в делех руку вашею на зло вам. 8 Сего ради сия глаголет Господь Сил: понеже не послушасте словес Моих, 9 се, Аз послю и возму вся племена северска, (рече Господь,) и Навуходоносора царя Вавилонска раба Моего: и приведу их на землю сию и на обитатели ея и на вся языки, иже окрест ея, и убию их и поставлю их во ужас и во звиздание и в поношение вечное: 10 и погублю от них глас радости и глас веселия, глас жениха и глас невесты, благоухание мира и свет светилника: 11 и будет вся земля сия в запустение и во ужас, и поработают сии во языцех царю Вавилонску седмьдесят лет. 12 Егда же исполнени будут седмьдесят лет, посещу на царя Вавилонска и на язык оный, рече Господь, беззакония их, и на землю Халдейску, и положу тую в запустение вечное, 13 и наведу на землю ону вся словеса Моя, яже глаголах на ню, вся писанная в книзе сей, и елика пророчествова Иеремиа на вся языки: 14 яко работаша им, егда беша языцы мнози и царие велицы, и воздам им по делом их и по творению рук их, 15 елико прорече Иеремиа до всех стран: тако бо глаголет Господь Бог Израилев: возми чашу вина нераствореннаго от руки Моея, да напоиши вся языки, к нимже Аз послю тя. 16 И испиют и изблюют, и обуяют от лица меча, егоже Аз послю среде их. 17 И взях чашу от руки Господни и напоих вся языки, к нимже посла мя Господь: 18 Иерусалима и грады Иудины, и цари его и князи его, яко положити я во опустение и в непрохождение, и во звиздание и в проклятие, яко день сей, 19 и фараона царя Египетскаго и отроков его, и вельможы его и вся люди его 20 и вся примесники его, и вся цари земли Ус и вся цари иноплеменников, Аскалона и Газу, и Аккарона и останок Азота, 21 и Идумею и Моавитиду и сыны Аммони, 22 и вся цари Тирски и цари Сидонски и цари, иже об ону страну моря, 23 и Дедана и Фемана, и Роса и всякаго остриженаго по лицу его, 24 и вся цари Аравии и вся смесники обитающыя в пустыни, 25 и вся цари Замврийския и вся цари Еламския, и вся цари Персския 26 и вся цари от восточия, дальния и ближния, коегождо ко брату его, и вся царства, яже на лицы земли, и царь Сесах испиет последи их. 27 И речеши им: тако рече Господь Сил, Бог Израилев: пийте и упийтеся, и изблюйте и падите, и не востаните от лица меча, егоже Аз послю среде вас. 28 И будет, егда не восхотят прияти чаши от руки твоея, еже пити, речеши к ним: тако рече Господь: пиюще пийте. 29 Яко во граде, в немже именовася имя Мое, Аз начну озлобляти, и вы очищением не очиститеся: понеже мечь Аз призываю на вся седящыя на земли, рече Господь Сил. 30 Ты же проречеши на них вся словеса сия и речеши: Господь с высоты суд воздаст, от святаго Своего даст глас Свой, слово проречет на место Свое, сии же яко объемлюще виноград отвещают: и на вся седящыя на земли прииде пагуба, 31 на часть земли, яко суд во языцех Господу: судитися имать Той со всякою плотию, нечестивии же предани быша мечу, глаголет Господь. 32 Тако глаголет Господь: се, злая грядут от языка на язык, и вихорь велик исходит от конца земли. 33 И будут язвении от Господа в день Господень, от края земли и до края земли: не оплачутся, ниже соберутся и не погребутся, в гной на лицы земли будут. 34 Воскликните, пастуси и возопийте, и восплачите, овни овчии, яко исполнишася дние ваши на заколение, и падете якоже овни избраннии, 35 и изгибнет бегство от пастухов и спасение от овнов овчих. 36 Глас вопля пастырска и кличь овец и овнов, яко потреби Господь пажити их: 37 и умолкнут останцы мира от лица ярости гнева Господня. 38 Остави якоже лев виталище Свое, яко бысть земля их в непрохождение от лица меча великаго. === 26 === 1 В начале царства Иоакима сына Иосиина бысть слово сие от Господа: 2 тако рече Господь: стани во дворе дому Господня и проповеждь всем Иудеом, входящым кланятися в дом Господень, вся словеса, яже завещах тебе проповедати им, не уйми словесе: 3 негли послушают и отвратятся кийждо от пути своего злаго, и почию от зол, яже помышляю сотворити им злых ради начинаний их. 4 И речеши: тако рече Господь: аще не послушаете Мене, еже ходити в законех Моих, яже дах пред лицем вашим, 5 в послушание словес отрок Моих пророков, ихже Аз посылаю к вам из утра, и послах, и не послушасте Мене, 6 и дам дом сей якоже Силом, и град сей дам в клятву всем языком всея земли. 7 И слышаша жерцы и лжепророцы и вси людие Иеремию глаголюща словеса сия в дому Господни. 8 И бысть, егда Иеремиа преста глаголати вся, елика завеща ему Господь глаголати всем людем, и яша Иеремию жерцы и лжепророцы и вси людие, глаголюще: смертию да умрет, 9 яко прорече имеием Господним, глаголя: якоже Силом будет сей дом, и град сей опустеет от живущих. И собрашася вси людие на Иеремию в дому Господни. 10 И слышаша князи Иудины словеса сия, и взыдоша от дому царева в дом Господень и седоша во преддверии врат дому Господня новых. 11 И реша жерцы и лжепророцы князем и всем людем, глаголюще: суд смертный человеку сему, яко прорече на сей град, якоже слышасте во ушы ваши. 12 И рече Иеремиа ко всем князем и ко всем людем, глаголя: Господь посла мя прорещи на дом сей и на град сей вся словеса, яже слышасте: 13 и ныне лучшыя сотворите пути вашя и дела ваша и послушайте гласа Господа Бога вашего, и престанет Господь от зол, яже глагола на вы: 14 и се, аз в руках ваших, сотворите ми якоже угодно и якоже лучше вам является: 15 но разумеюще да уразумеете, яко аще убиете мя, кровь неповинну дадите сами на ся и на град сей и на живущыя в нем: яко поистинне посла мя Господь к вам глаголати во ушы ваши вся словеса сия. 16 И реша князи и вси людие ко жерцем и ко лжепророком: несть человеку сему суд смертный, яко во имя Господа нашего глагола к нам. 17 И восташа мужие от старейшин земских и реша всему собору людскому, глаголюще: 18 Михеа Морафитский бе пророчествуя во дни Езекии царя Иудина и рече всем людем Иудиным, глаголя: тако рече Господь: Сион яко нива изорется, и Иерусалим яко в путь непроходный будет, и гора храма будет в луг дубравный. 19 Еда убивая уби его Езекиа царь Иудин и вси людие Иудины? Не убояшалися убо Господа? И понеже помолишася лицу Господню, и почи Господь от зол, яже глаголаше на ня: и мы сотворихом злобы велики на душы нашя. 20 И бе человек прорицая именем Господним, Уриа сын Самеов от Кариафиарима, и прорече на град сей и о земли сей по всем словесем Иеремииным. 21 И слыша царь Иоаким и вси князи вся словеса его и искаху убити его: и слыша Уриа и убояся, и бежа и прииде во Египет. 22 И посла царь Иоаким мужы во Египет, Елдафана сына Ахорова и мужы с ним во Египет, 23 и изведоша его оттуду и приведоша его ко царю, и порази его мечем и вверже его во гроб сынов людий своих. 24 Обаче рука Ахикама сына Сафаниина бе со Иеремиею, еже не предати его в руце людий, да не убиют его. === 27 === 1 В начале царства Иоакима сына Иосиина, царя Иудина, бысть слово сие ко Иеремии от Господа глаголя: 2 тако рече Господь: сотвори себе узы и клады и возложи на выю свою, 3 и да послеши я ко царю Идумейску и ко царю Моавску и ко царю сынов Аммоних, и ко царю Тирску и ко царю Сидонску, в руку послов их идущих сретением своим во Иерусалим ко Седекии царю Иудину, 4 и завещай им ко господем их рещи: тако рече Господь Бог Израилев: тако рцыте ко господем своим: 5 Аз сотворих землю и человека и скоты, яже на лицы земли, крепостию Моею великою и мышцею Моею высокою, и дам ю, емуже будет угодно пред очима Моима. 6 И ныне Аз дах всю землю сию в руце Навуходоносору царю Вавилонску, да ему работают, и звери селныя дах делати ему: 7 и послужат ему вси языцы и сыну его и сыну сына его, дондеже приидет время земли его и его самого, и послужат ему мнози народи и царие велицы: 8 страна же и царство, елицы аще не поработают царю Вавилонску и елицы не вдежут выи своея в ярем царя Вавилонска, мечем и гладом посещу их, рече Господь, дондеже скончаются в руце его. 9 Вы же не слушайте лжепророк ваших и волхвующих вам и видящих сония вам, ни чарований ваших, ни обаятелей ваших глаголющих: не послужите царю Вавилонскому: 10 яко лжу прорицают тии вам, еже бы удалитися вам от земли вашея, извергнути вас и еже погибнути вам. 11 Страна же, яже склонит выю свою под ярем царя Вавилонска и послужит ему, оставлю ю на земли своей, глаголет Господь: и орати будет ю и вселится на ней. 12 И ко Седекии царю Иудину глаголах по всем словесем сим, глаголя: склоните выи вашя под иго царя Вавилонска и служите ему и людем его, и живи будете: 13 почто умираете, ты и людие твои, мечем и гладом и мором, якоже рече Господь ко странам, не хотевшым служити царю Вавилонску? 14 Не послушайте слов пророков глаголющих вам: не послужите царю Вавилонску: 15 яко неправедно тии прорицают вам: яко не послах их, рече Господь, тии же прорицают именем Моим о неправде, еже бы погубити вас, и погибнете вы и пророцы ваши, прорицающии вам о неправде ложная. 16 Вам и всем людем сим и жерцем глаголах, рекий: тако рече Господь: не слушайте словес пророческих, прорицающих вам лжу и глаголющих: се, сосуди дому Господня возвратятся от Вавилона ныне вскоре: яко лжу прорицают вам, 17 не послушайте их, но служите царю Вавилонскому, да живи будете. Вскую даете град сей в запустение? 18 Аще суть пророцы и есть слово Господне в них, да предстанут Господу Вседержителю, да не отидут сосуди, оставшиися в дому Господни и в дому царя Иудина и во Иерусалиме, в Вавилон. 19 Тако бо глаголет Господь Вседержитель о столпех и о умывалнице, и о подставах и о прочих сосудех оставшихся во граде сем, 20 ихже не взя Навуходоносор царь Вавилонский, егда пресели Иехонию сына Иоакимова, царя Иудина, из Иерусалима в Вавилон, и вся старейшины Иудины и Иерусалимли. 21 Тако бо глаголет Господь Вседержитель Бог Израилев о сосудех оставшихся в дому Господни и в дому царя Иудина и в Иерусалиме: 22 в Вавилон принесутся и тамо будут даже до дне посещения своего, глаголет Господь: и повелю принести я и возвратити на место сие. === 28 === 1 И бысть в четвертое лето, царствующу Седекии царю Иудину, в пятый месяц, рече ми Ананиа сын Азоров лживый пророк Гаваонитский в дому Господни, пред очима жерцев и всех людий, глаголя: 2 тако рече Господь Вседержитель Бог Израилев: сокруших ярем царя Вавилонска: 3 еще два лета дний, возвращу Аз на место сие вся сосуды дому Господня, яже взя Навуходоносор царь Вавилонский от места сего и пренесе я до Вавилона, 4 и Иехонию сына Иоакимова царя Иудина, и все преселение Иудино вшедшее в Вавилон возвращу в место сие, глаголет Господь, яко сокрушу ярем царя Вавилонска. 5 И рече Иеремиа пророк ко Анании лжепророку пред очима жерцев и пред очима всех людий стоящих в дому Господни, 6 и рече Иеремиа: поистинне тако да сотворит Господь, да утвердит Господь слово твое, еже ты прорицаеши, еже возвратити сосуды дому Господня и вся преселенныя из Вавилона на место сие: 7 обаче слышите слово сие, еже аз глаголю во ушы ваши и во ушы всех людий: 8 пророцы, бывшии прежде мене и прежде вас от века, прорекоша на многи земли и на царства велика о рати и о погублении и о гладе: 9 пророк прорекий мир, пришедшу слову познают пророка, егоже посла им Господь в вере. 10 И взя Ананиа пред очима всех людий клады от выи Иеремиины и сокруши я. 11 И рече Ананиа пред очима всех людий глаголя: сице рече Господь: тако сокрушу ярем Навуходоносора царя Вавилонска еще два лета дний со выи всех языков. И отиде Иеремиа на путь свой. 12 И бысть слово Господне ко Иеремии, по сокрушении Ананиине клад со выи его, глаголя: 13 иди и рцы ко Анании глаголя: тако рече Господь: клады древяныя сокрушил еси и сотвориши вместо тех клады железны, 14 яко тако рече Господь: ярем железен возложих на выи всех языков, служити Навуходоносору царю Вавилонску, и послужат ему: ктому и звери земныя дах ему. 15 И рече Иеремиа пророк ко Анании: слыши, Анание: не посла тебе Господь, ты же сотворил еси людий сих уповати на неправду. 16 Того ради сице рече Господь: се, Аз отпущу тя от лица земли, в сем лете умреши, яко на Господа (Бога) глаголал еси. 17 И умре Ананиа лжепророк в сем лете месяца седмаго. === 29 === 1 И сия словеса книги, юже посла Иеремиа из Иерусалима ко старейшинам преселеным и ко жерцем и лживым пророком и всем людем, ихже пресели Навуходоносор из Иерусалима до Вавилона, 2 последи изшедшу Иехонии царю и царице, и кажеником и всякому свободну, и художнику и юзнику из Иерусалима, 3 рукою Елеаса сына Сафаня и Гамариа сына Хелкиина, егоже посла Седекиа царь Иудин ко царю Вавилонску в Вавилон, глаголя: 4 тако рече Господь Бог Израилев о преселеных, ихже пресели из Иерусалима в Вавилон: 5 соградите храмины и вселитеся, и насадите вертограды и ядите плоды их, 6 и поимите жены и чадотворите сыны и дщери, и приведите сыном вашым жены и дщери вашя дадите за мужы, и да раждают сыны и дщери, и умножайтеся, а не умаляйтеся: 7 и взыщите мира земли, на нюже преселих вас тамо, и молите Господа за ня, яко в мире их будет мир вам. 8 Яко тако рече Господь Сил, Бог Израилев: да не препирают вас лживии пророцы, иже в вас, и да не препирают вас волсви ваши, и не послушайте соний своих, яже вы видите во сне, 9 яко неправедне тии прорицают вам во имя Мое, а не послах их, рече Господь. 10 Яко тако рече Господь: егда исполнятся в Вавилоне седмьдесят лет, посещу вас и уставлю словеса Моя на вас, еже возвратити люди Моя на место сие: 11 и помышлю на вы помышление мира, а не злая, еже дати вам сия: 12 и помолитеся ко Мне, и послушаю вас, 13 и взыщете Мене, и обрящете Мя: и егда взыщете Мене всем сердцем вашим, 14 и явлюся вам, глаголет Господь, и возвращу узники вашя и соберу вас от всех стран и от всех градов, в няже изгнах вас, глаголет Господь: и возвратитися повелю вам на место откуду превести вас повелех. 15 Понеже рекосте: возстави нам Господь пророки в Вавилоне. 16 Тако бо рече Господь ко царю седящу на престоле Давидове и ко всем людем живущым во граде том, и братиям вашым, не изшедшым с вами в плен, 17 тако глаголет Господь Вседержитель: се, Аз послю на ня мечь и глад и мор, и положу я яко смоквы худыя, ихже немощно ясти, понеже зело худы быша: 18 и сотру я мечем и гладом и мором, и дам я в погубление всем царствам земным и в проклятие, и во удивление и в посмех и в поругание всем языком, к нимже извергох я: 19 занеже не послушаша словес Моих, глаголет Господь, яже послах к ним рабы Моими пророки, рано востая и посылая, и не послушасте, глаголет Господь. 20 Вы убо слышите слово Господне, все преселение, еже выслах из Иерусалима в Вавилон. 21 Тако глаголет Господь Вседержитель Бог Израилев на Ахиава сына Колиева и на Седекию сына Маасиева, иже прорицают вам во имя Мое лживо: се, Аз предаю я в руце Навуходоносора царя Вавилонска, и побиет я пред очима вашима: 22 и возмется от них проклятие всему преселению Иудину, еже в Вавилоне, глаголюще: да сотворит ти Господь якоже Седекии сотвори и якоже Ахиаву, ихже сожже царь Вавилонский во огни, 23 беззакония ради, еже сотвориша во Иерусалиме, и любодеяху с женами граждан своих и слово глаголаша во имя Мое лживо, егоже не повелех им, Аз же есмь судия и послух, глаголет Господь. 24 И к Самеи Еламитину речеши: 25 тако глаголет Господь Вседержитель, Бог Израилев: понеже послал еси во имя твое послания ко всем людем, иже во Иерусалиме, и ко Софонии сыну Маасеову жерцу и ко всем жерцем, глаголя: 26 Господь даде тя жерца вместо Иодаа жерца, быти приставнику в дому Господни, всякому человеку прорицающу и всякому человеку неистовующу, и вдаси его в затвор и в кладу. 27 И ныне почто не запретисте Иеремии, иже от Анафофа, прорицающему вам? 28 Яко того ради посла к нам в Вавилон, глаголя: долгое есть время, соградите храмины и вселитеся, и насадите вертограды и ядите плоды их. 29 И прочте книгу сию Софониа во ушы Иеремии пророка. 30 И бысть слово Господне ко Иеремии глаголя: 31 посли ко преселником глаголя: тако рече Господь на Самею Еламитина: понеже прорече вам Самеа, Аз же не послах его, и сотвори вас уповати на неправду: 32 того ради сице рече Господь: се, Аз посещу на Самею и на род его, и не будет ему человека посреде вас, еже видети благая, яже Аз сотворю вам, глаголет Господь, зане отступление глагола на Господа. === 30 === 1 Слово бывшее ко Иеремии от Господа глаголя: 2 тако рече Господь Бог Израилев глаголя: впиши вся словеса в книги, яже глаголах к тебе. 3 Яко се, дние грядут, рече Господь, и возвращу преселение людий Моих Израиля и Иуды, рече Господь Вседержитель, и возвращу я на землю, юже дах отцем их, и овладеют ею. 4 И сия словеса, яже глагола Господь о Израили и о Иуде. 5 Тако рече Господь: глас страха услышите: страх, и несть мира. 6 Вопросите и видите, аще раждает мужеск пол? И о страсе, в немже имети будут чресла и спасение? Понеже видех всякаго человека, и руце его на чреслех его аки раждающия: обратишася лица в желтую болезнь. 7 О, люте! Яко бысть велик день той и несть подобна ему: и время тесно есть Иакову, и от того спасется. 8 В той день, рече Господь, сокрушу ярем со выи их и узы их расторгну: и не послужат тии ктому чуждим, 9 но послужат тии Господу Богу своему: и Давида царя их возставлю им. 10 Сего ради ты не бойся, рабе Мой Иакове, глаголет Господь, ни устрашайся, Израилю: яко се, Аз спасу тя из земли дальния и семя твое из земли пленения их: и возвратится паки Иаков и почиет и всякаго добра исполнен будет, и не будет устрашаяй тя. 11 Яко Аз с тобою есмь, глаголет Господь, спасаяй тя: яко сотворю скончание во всех языцех, в няже разсеях тя: тебе же не сотворю во скончание, но накажу тя в суде и очищая не очищу тя. 12 Тако бо глаголет Господь: возставих сокрушение твое, болезненна есть язва твоя, 13 несть судяй суда твоего, на болезнь врачевался еси, пользы несть тебе: 14 вси друзие твои забыша тя, ниже вопросят тя, яже о мире твоем: яко язвою вражиею поразих тя, наказанием твердым: множества ради неправды твоея превозмогоша греси твои. 15 Что вопиеши о сокрушении твоем? Неизцельна есть болезнь твоя множества ради неправды твоея, и твердых ради грехов твоих сотворих ти сия (вся). 16 Того ради вси ядущии тя изядени будут, и вси врази твои плоть их всю изядят: во множестве неправды твоея умножишася греси твои, сотвориша сия тебе: и будут разграбляющии тя в разграбление, и всех пленяющих тя дам во пленение. 17 Яко обяжу язву твою и от ран твоих уврачую тя, рече Господь: яко расточенным называху тя, Сионе ловитва наша есть, яко несть взыскающаго его. 18 Тако глаголет Господь: се, Аз возвращу преселение Иаковле и пленники его помилую, и возградится град в высоту свою, и храм по чину своему утвердится: 19 и изыдут из него поющии и глас играющих, и умножу я, и не умалятся. 20 И внидут сынове их якоже и прежде, и свидения их пред лицем Моим исправятся: и посещу на вся стужающыя им, 21 и будут крепльшии его на ня, и князь его из него изыдет: и соберу я, и обратятся ко Мне: кто бо есть той, иже приложит сердце свое обратитися ко Мне? Рече Господь. 22 И будете Ми в люди, и Аз вам буду в Бога. 23 Яко гнев Господень изыде яр, изыде гнев обращаемь, на нечестивыя приидет. 24 Не отвратится гнев ярости Господни, дондеже сотворит и дондеже исполнит умышление сердца Своего: в последния дни познаете я. === 31 === 1 Во время оно рече Господь, буду в Бога роду Израилеву, и тии будут Ми в люди. 2 Тако рече Господь: обретох теплоту в пустыни со изгибшими от меча: идите и не потребите Израиля, 3 Господь издалеча явится ему: любовию вечною возлюбих тя, того ради вовлекох тя в щедроты. 4 Яко возгражду тя, и возградишися, дево Израилева: возмеши тимпаны своя и изыдеши с собором играющих. 5 Еще насадите винограды в горе Самарийстей, насаждающе насадите и похвалите. 6 Яко есть день воззвания отвещавающих в горах Ефремовых: востаните и взыдите в Сион ко Господеви Богу нашему: 7 яко тако рече Господь Иакову: возвеселитеся веселием и воскликните на главу языков: слышано сотворите и похвалите, рцыте: спасе Господь люди Своя, останок Израилев. 8 Се, Аз веду их от севера и соберу их от конец земли в праздник Пасхи: и чадородит народ мног, и возвратятся семо. 9 С плачем изыдоша, а со утешением возведу я, проводя чрез ровенники вод по пути праву, и не заблудят по нему: яко Аз бех Израилеви во отца, и Ефрем первенец Ми есть. 10 Слышите, языцы, слово Господне, и возвестите во островех дальних и рцыте: Развеявый Израиля соберет его и снабдит его, яко пастырь стадо свое. 11 Яко избави Господь Иакова и изят его от руки сильнейших его. 12 И приидут и возвеселятся в горе Сион, и приидут ко благотам Господним, на землю пшеницы и вина и плодов, и скотов и овнов: и будет душа их якоже древо плодовито, и не взалчут ктому. 13 Тогда возрадуются девицы в собрании юношей, и старцы возрадуются: и обращу плачь их на радость, и утешу их, и сотворю их веселы. 14 Возвеличу и упою душу жерцев сынов Левииных, и людие Мои благот Моих насытятся. 15 Тако рече Господь: глас в Раме слышан бысть плача и рыдания и вопля: Рахиль плачущися чад своих, и не хотяше утешитися, яко не суть. 16 Тако рече Господь: да почиет глас твой от плача и очи твои от слез, яко есть мзда делом твоим, глаголет Господь, и возвратятся от земли вражия: 17 и есть надежда последним твоим, (глаголет Господь,) и возвратятся сынове твои в пределы своя. 18 Слышя слышах Ефрема плачуща: наказал мя еси, (Господи,) и наказахся: аз якоже телец не научихся: обрати мя, и обращуся, яко Ты еси Господь Бог мой: 19 понеже последи пленения моего покаяхся и последи разумения моего возстенах в день посрамления и показах тебе, яко приях укоризну от юности моея. 20 Сын любезен Мне, Ефрем, отроча питеющееся, понеже словеса Моя в нем, памятию воспомяну и: того ради потщахся о нем, милуяй помилую его, рече Господь. 21 Постави себе самого, Сионе, стражу, сотвори мучение, направи сердце твое на путь прав, имже ходил еси: возвратися, девице Израилева, обратися во грады твоя рыдающи. 22 Доколе отвращаешися, дщи обезчествованая? Яко созда Господь спасение в насаждение ново, в немже спасении обыдут человецы. 23 Яко тако рече Господь: еще рекут слово сие в земли Иудейстей и во градех ея, егда возвращу преселение его: благословен Господь на праведней горе святей своей: 24 и живущии во градех Иудиных и во всей земли его, купно со земледельцем, и вознесется во стаде. 25 Яко упоих всяку душу жаждущу и всяку душу алчущу насытих. 26 Того ради востах от сна и видех, и сон ми сладок бысть. 27 Се, дние грядут, глаголет Господь, и всею Израиля и Иуду семя человечо и семя скотское. 28 И будет, якоже бдех на ня потребити и озлобити, тако бдети буду о них, еже созидати и насаждати, рече Господь. 29 В тыя дни не рекут ктому: отцы ядоша кислая, а зубы детем оскомнишася: 30 но кийждо своим грехом умрет, и ядшему кислая оскоменятся зубы его. 31 Се, дние грядут, глаголет Господь, и завещаю дому Израилеву и дому Иудину завет нов, 32 не по завету, егоже завещах отцем их в день, в оньже емшу ми за руку их, извести я от земли Египетския, яко тии не пребыша в завете Моем, и Аз небрегох их, глаголет Господь. 33 Яко сей завет, егоже завещаю дому Израилеву по днех онех, глаголет Господь: дая законы Моя в мысли их, и на сердцах их напишу я, и буду им в Бога, и тии будут Ми в люди: 34 и не научит кийждо ближняго своего и кийждо брата своего, глаголя: познай Господа: яко вси познают Мя от мала даже и до великаго их: яко милостив буду неправдам их и грехов их не помяну ктому. 35 Аще возиесется небо на высоту, рече Господь, и аще смирится испод земли низу, и Аз не отвергу рода Израилева о всех, яже сотвориша, глаголет Господь. 36 Тако рече Господь, давый солнце во свет дне, луну и звезды на свет нощи, и вопль на мори, и возшумеша волны его, Господь Вседержитель имя Ему. 37 Аще премолкнут законы сии от лица Моего, рече Господь, то и род Израилев престанет быти язык пред лицем Моим во вся дни. 38 Се, дние грядут, рече Господь, и созиждется град Господеви от столпа Анамеиля до врат уголных: 39 и изыдет размерение его противу ему до могил Гарив, и оымется окрест избранным камением, 40 и всю юдоль мертвых и пепела, и весь Ассаримоф даже до водотечи Кедрския, даже до угла коний врат восточных, освящение Господеви, и ктому не исторгнется и не потребится даже до века. === 32 === 1 Слово бывшее от Господа ко Иеремии в десятое лето Седекии, царя Иудина, то лето осмоенадесять Навуходоносору царю Вавилонску. 2 И тогда сила царя Вавилонска острог обложи окрест Иерусалима, Иеремиа же стегомь бяше во дворе темничнем, иже есть во дворе царя Иудина, 3 в нейже заключи его Седекиа царь, глаголя: почто ты прорицаеши, глаголя: тако рече Господь: се, Аз даю сей град в руце царя Вавилонска, и возмет его, 4 и Седекиа царь Иудин не спасется от руки Халдейски, яко преданием предастся в руце царя Вавилонска, и соглаголет усты своими ко устом его, и очи его очи его узрят, 5 и в Вавилон внидет Седекиа и ту будет, дондеже посещу его, глаголет Господь: аще же воевати будете на Халдеи, ничесоже успеете? 6 И рече Иеремиа: бысть слово Господне ко мне глаголя: 7 се, Аиамеил, сын Саломль, брата отца твоего, идет к тебе, глаголя: прикупи себе село мое, еже во Анафофе, яко тебе суд ужичества прияти во притяжание. 8 И прииде ко мне Анамеил, сын Саломль, брата отца моего, по словеси Господню во двор темничный и рече ми: прикупи себе село мое, еже во Анафофе в земли Вениамини: яко тебе суд прикупити е, ты бо старей. И разумех, яко слово Господне есть, 9 и прикупих село Анамеиле, сына брата отца моего, от Анафофа, и поставих ему седмьнадесять сикль сребра, 10 и вписах в книгу и запечатах, и засвидетелствовах послухи и поставих сребро на весах. 11 И взях книгу купления прочтену и запечатану. 12 И дах книгу купления Варухови сыну Нириину, сына Маассеова, пред очима Анамеила сына брата отца моего, и пред очима стоящих послух и вписавших в книги купления, и пред очима всех Иудеов, седящих во дворе темничнем. 13 И завещах Варуху пред очима их, глаголя: 14 тако рече Господь Вседержитель Бог Израилев: возми книгу сию купления запечатленну и книгу прочтеную и вложи ю в сосуд глинян, да пребудет дни множайшыя. 15 Яко тако рече Господь Вседержитель Бог Израилев: еще притяжутся храмины и села и винограды на сей земли. 16 И молихся ко Господеви по отдании книги прикупления Варуху сыну Нириину, глаголя: 17 о, сый Господи Боже! Ты сотворил еси небо и землю крепостию Твоею великою и мышцею Твоею высокою, не утаится от Тебе ничтоже, 18 творяй милость в тысящы и отдаяй грехи отчи в недра чад их по них: Бог великий и крепкий, 19 Бог велика совета и силен делесы, Бог великий Вседержитель и великоименит Господь: очи Твои отверсты на вся пути сынов человеческих, дати комуждо по пути его и по плоду начинаний его: 20 иже сотворил еси знамения и чудеса во земли Египетстей, даже до сего дне и во Израили и в людех, и сотворил еси имя Себе, якоже день сей, 21 и извел еси люди Твоя Израиля из земли Египетския знамении и чудесы, рукою крепкою и мышцею высокою и видении великими, 22 и дал еси им сию землю, еюже клялся еси отцем их, землю кипящую медом и млеком. 23 И внидоша и прияша ю, и не послушаша гласа Твоего и в заповедех Твоих не ходиша: вся, яже заповедал еси им (творити), не сотвориша, и сотвориша, да сбудутся им вся злая сия. 24 Се, народ идет на сей град взяти его, и град предан есть в руце Халдеев воюющих нань от лица меча и глада и мора. Якоже глаголал еси, тако и бысть: и се, Ты зриши. 25 А Ты ко мне глаголеши: притяжи себе село сребром: и вписах в книгу, и запечатах, и засвидетелствовах послухи, град же предастся в руце Халдейсте. 26 И бысть слово Господне ко мне глаголя: 27 Аз Господь Бог всея плоти, еда от Мене утаится что? 28 Сего ради тако рече Господь Бог Израилев: отдан предастся сей град в руце царя Вавилонска, и возмет его, 29 и приидут Халдее воюющии на сей град, и пожгут его огнем, и храмины сожгут, в нихже кадиша на кровех своих Ваалу и возливаша возлияния богом инем, ко еже разгневати Мя. 30 Понеже беша сынове Израилевы и сынове Иудины едини творяще зло пред очима Моима от юности своея, сынове Израилевы подвизают Мя на гнев в делех рук своих, рече Господь. 31 Яко на гнев Мой и на ярость Мою бе град сей, от негоже дне соградиша его и даже до сего дне, яко отставити его от лица Моего, 32 злобы ради всякия сынов Израилевых и Иудиных, яко сотвориша разгневати Мя тии и царие их, и князи их и вельможи их, и жерцы их и пророцы их, мужие Иудины и живущии во Иерусалиме, 33 и обратиша хребет ко мне, а не лице: и наказах я из утра, и не послушаша прияти наказания, 34 и положиша осквернения своя в дому, идеже наречеся имя Мое, в нечистотах своих: 35 и соградиша требища Ваалу, яже в дебри сына Енномля, еже возносити сыны своя и дщери своя Молоху, ихже не заповедах им, и не взыде на сердце Мое, еже сотворити мерзость сию на согрешение Иуде. 36 И ныне тако рече Господь Бог Израилев ко граду, о немже ты глаголеши: предан будет в руце царя Вавилонска мечем и гладом и мором. 37 Се, Аз соберу я от всея земли, идеже разсеях я во гневе Моем и ярости Моей и в преогорчении велием, и обращу я на сие место, и посажду я во уповании, 38 и будут Ми в люди, и Аз буду им в Бога: 39 и дам им путь ин и сердце ино, боятися Мене вся дни, на благоту им и чадом их по них: 40 и завещаю им завет вечный, егоже не отвращу последи их, и страх Мой дам в сердце их, ко еже не отступити им от Мене: 41 и посещу еже ублажити я и насажду я в сей земли с верою и со всем сердцем Моим и со всею душею Моею. 42 Яко тако рече Господь: якоже наведох на люди сия вся злая сия великая, тако Аз наведу на них вся благоты, яже Аз глаголах к ним. 43 И возобладают паки селы на земли, о нейже ты глаголеши: непроходна будет от человек и скота, и предашася в руце Халдейсте. 44 И притяжут села сребром: и впишеши в книги, и запечатаеши, и опослушиши послухи в земли Вениамини и окрест Иерусалима, и во градех Иудиных и во градех горних, и во градех польных и во градех нагев и: яко возвращу преселения их, глаголет Господь. === 33 === 1 И бысть слово Господне ко Иеремии вторицею, тойже бяше еще связан во дворе темничнем, глаголя: 2 тако рече Господь, творяй землю и устрояяй ю, еже исправити ю, Господь имя Ему: 3 возопий ко Мне, и отвещаю ти и возвещу тебе великая и крепкая, ихже не разумел еси. 4 Яко тако рече Господь Бог Израилев о домех града сего и о храмех царя Иудина, растерзанных на остроги и на забрала, 5 еже противитися ко Халдеем, и наполню его мертвыми человеки, ихже поразих во гневе Моем и в ярости Моей, и отвратих лице Мое от них всех ради злоб их. 6 Се, Аз наведу на ня срастение язвы и изцеление, и изврачую я и явлю им, еже слушати, и изцелю я и сотворю им мир и веру: 7 и обращу преселение Иудино и преселение Израилево, и согражду я, якоже и прежде, 8 и очищу я от всех неправд их, имиже согрешиша Ми, и милостив буду всем неправдам их, имиже отступиша от Мене. 9 И будет в веселие и во хвалу и в величие всем людем земли, иже услышат вся благоты, яже Аз сотворю им, и убоятся, и огорчатся о всех благотах и о всем мире, егоже Аз сотворю им. 10 Тако рече Господь: еще услышится в сем месте, о немже вы глаголете: пусто есть от человек и от скот, во градех Иудиных и вне Иерусалима, опустевших, понеже несть человека, ни скота, 11 глас веселия и глас радости, глас жениха и глас невесты, глас глаголющих: исповедайтеся Господеви Вседержителю, яко благ Господь, яко в век милость Его: и принесут дары похваления в дом Господень, яко возвращу все преселение земли тоя по прежнему, рече Господь. 12 Тако глаголет Господь Сил: еще будут на сем месте пустем, за еже не быти человеку, ни скоту, во всех градех его обиталища пастухов пасущих овцы, 13 во градех горних и во градех польных, и во градех нагев и в земли Вениамини, и во окрестных Иерусалима и во градех Иудиных, еще пойдут овцы к руце изчисляющаго, глаголет Господь. 14 Се, дние грядут, рече Господь, и возставлю слово благо, еже глаголах к дому Израилеву и к дому Иудину. 15 Во днех онех и в то время произрастити сотворю Давиду Отрасль правды, и сотворит суд и правду на земли. 16 Во днех онех спасен будет Иуда, и Иерусалим пребудет в надежди: и сие есть имя, имже нарекут Его: Господь праведен наш. 17 Тако бо рече Господь: не оскудеет от Давида муж седяй на престоле дому Израилева: 18 и от жерцев и от левитов не погибнет муж от лица Моего, приносяй всесожжения и дар и творяй жертвы по вся дни. 19 И бысть слово Господне ко Иеремии глаголя: 20 тако глаголет Господь: может ли разоритися завет Мой со днем и завет Мой с нощию, еже не быти дню и нощи во время свое? 21 То и завет Мой разорится с Давидом рабом Моим, еже не быти от него сыну царствующу на престоле его, и с левиты и священники рабы Моими. 22 Якоже сочтены быти не могут звезды небесныя, ни измерен быти песок морский, тако умножу семя раба Моего Давида и левиты служители Моя. 23 И бысть слово Господне ко Иеремии глаголя: 24 еда не видел еси, что рекоша людие сии, глаголюще: два народа, ихже избра Господь, и се, отверже я: и преогорчиша людий Моих, (сего ради) яко да не будет ктому народ пред ними? 25 Тако рече Господь: не положих ли убо завета Моего между днем и нощию и законов небеси и земли? 26 Тогда и семя Иаковле и Давида раба Моего отвергу, еже не прияти от семене его князей семене Авраама и Исаака и Иакова: яко паки возвращу плен их и помилую их. === 34 === 1 Слово, еже бысть ко Иеремии от Господа, егда Навуходоносор царь Вавилонский и вси вои его, и вся земля власти его и вси людие воеваху на Иерусалим и на вся грады Иудины, глаголя: 2 тако рече Господь Бог Израилев: иди ко Седекии царю Иудину и речеши ему: тако рече Господь: преданием предастся сей град в руце царя Вавилонска, и возмет его и пожжет его огнем: 3 и ты не уцелееши от руку его, и ят будеши, и в руце его предасися: и очи твои очи его узрят, и уста его со усты твоими соглаголют, и в Вавилон внидеши. 4 Но обаче слыши слово Господне, Седекие, царю Иудин! Тако глаголет Господь к тебе: не умреши от меча, но в мире умреши: 5 и якоже плакаша отцев твоих царствовавших прежде тебе, восплачутся и тебе: увы, господи, и: увы, господи! Восплачутся и тебе, яко слово Аз соглаголах, рече Господь. 6 И глагола Иеремиа пророк ко Седекии царю Иудину вся словеса сия во Иерусалиме. 7 И сила царя Вавилонска воева на Иерусалим и на грады Иудины оставшыяся: на Лахис и на Азику, яко тии осташася во градех Иудиных грады тверды. 8 Слово бывшее ко Иеремии от Господа, повнегда скончати царю Седекии завет к людем, иже во Иерусалиме, еже нарещи им отпущение, 9 еже отпустити комуждо раба своего и комуждо рабыню свою, Евреанина и Евреаныню, свободны, да не работает муж от Израиля. 10 И обратишася вси вельможи и вси людие вступившии в завет еже отпустити комуждо раба своего и комуждо рабу свою свободны и ктому не владети ими. Слышаша убо и отпустиша. 11 И обратишася по сих вспять и удержаша паки рабы и рабыни своя, ихже отпустиша свободных, и взяша в рабы и рабыни. 12 И бысть слово Господне ко Иеремии от Господа глаголя: 13 тако рече Господь Бог Израилев: Аз завещах завет ко отцем вашым в день, в оньже избавих я от земли Египетския, из дому работы, глаголя: 14 егда скончаются шесть лет, да отпустиши брата своего Евреанина, иже продан есть тебе: и да делает ти шесть лет, и да отпустиши его свободна от себе. И не послушаша Мене отцы ваши, ни приклониша уха своего. 15 И обратистеся вы днесь сотворити правая пред очима Моима, еже нарещи комуждо отпущение ближняго своего: и совершисте завет пред лицем Моим в дому, идеже наречеся имя Мое в нем: 16 и отвратистеся, и осквернисте завет Мой, еже возвратити комуждо раба своего и комуждо рабу свою, ихже отпустисте свободны душею их: и покористе их, якоже быти у вас в рабы и в рабыни. 17 Того ради сице рече Господь: вы не послушасте Мене, нарещи отпущения кийждо брату своему и кийждо ближнему своему: се, Аз нарицаю отпущение вам на мечь и на смерть и на глад, и дам вы на разсыпание всем царствам земным: 18 и дам мужы преступившыя завет Мой и не хранящыя словес завета Моего, емуже соизволиша пред лицем Моим: телца егоже разсекоша на две части и ходиша между разделенными частьми его: 19 князи Иудины и князи Иерусалимли, и вельможы и жерцы и вся люди земли ходящыя между разделеным телцем, 20 и дам я в руки врагом их и в руки ищущих души их, и будут трупи их в ядь птицам небесным и зверем земным: 21 и Седекию царя Иудейска и князи его дам в руце врагов их и в руку ищущих души их и в руку воинства царя Вавилонска, отбегающих от них. 22 Се, Аз завещаю, рече Господь, и возвращу я в землю сию, и повоюют на ню, и возмут ю, и пожгут ю огнем и грады Иудины: и дам я в непроходны от живущих. === 35 === 1 Слово бывшее ко Иеремии от Господа, во дни Иоакима сына Иосиина, царя Иудина, глаголя: 2 иди в дом Рихавль и призови я и веди я в дом Господень, во един от дворов, и напоиши я вином. 3 И изведох Иезонию сына Иеремиина, сына Хавасиина, и братию его, и сыны его, и весь дом Рихавль, 4 и введох я в дом Господень, во хранилище имения сынов Анании, сына Годолиина, человека Божия, иже есть близ дому князей, выше дому Маасеова, сына Селомля, стрегущаго двор. 5 И поставих пред ними корчаг вина и чашы, и рекох: пийте вино. 6 И рекоша: не пием вина, яко Ионадав сын Рихавль, отец наш, заповеда нам, глаголя: не пийте вина вы и сынове ваши до века: 7 и храмин да не соградите, и семене не сейте, и виноград да не будет вам, но в кушах да живете вся дни живота вашего, да поживете дни многи на земли, на нейже обитаете вы. 8 И послушахом словесе Ионадава отца нашего, еже не пити вина вся дни живота нашего, мы и жены нашя, и сынове наши и дщери нашя, 9 и еже не сограждати храмин жити тамо: и винограда и нивы и семене не бысть нам. 10 И жихом в кущах, и послушахом и сотворихом по всем, елика заповеда нам Ионадав отец наш. 11 И бысть, егда прииде Навуходоносор царь Вавилонский на землю нашу, и рекохом: вшедше да внидем во Иерусалим от лица Халдейска и от лица силы Ассирийския: и вселихомся ту. 12 И бысть слово Господне ко Иеремии глаголя: 13 тако глаголет Господь Сил, Бог Израилев: иди и рцы человеку Иудину и живущым во Иерусалиме: еда не восприимете наказания послушати словес Моих? 14 Утвердиша слово сынове Ионадава, сына Рихавля, еже заповеда сыном своим, еже не пити вина, и не пиша даже до дне сего, яко послушаша заповеди отца своего: Аз же глаголах к вам заутра, и не послушасте Мене: 15 и посылах к вам рабы Моя пророки, утренюя и глаголя: обратитеся кийждо от пути своего злаго, и лучше сотворите дела своя, и не ходите вслед богов инех, еже служити им, и вселитеся на земли, юже дах вам и отцем вашым: и не приклонисте ушес ваших и не послушасте. 16 И уставиша сынове Ионадавли, сына Рихавля, заповедь отца своего, юже заповеда им: а людие Мои не послушаша Мене. 17 Сего ради сице рече Господь Сил, Бог Израилев: се, Аз наведу на Иуду и на вся живущыя во Иерусалиме вся злая, яже соглаголах на ня: понеже глаголах к ним, и не послушаша, призывах я, и не отвещаша Ми. 18 Дому же Рихавлю рече Иеремиа: тако рече Господь Бог Вседержитель: понеже послушаша сынове Ионадава, сына Рихавля, заповеди отца своего, творити, елика заповеда им отец их: 19 сего ради сия глаголет Господь Сил, Бог Израилев: не оскудеет муж от сынов Ионадавлих, сына Рихавля, стояй пред лицем Моим, вся дни земли. === 36 === 1 И бысть в лето четвертое Иоакима, сына Иосиина, царя Иудина, бысть слово Господне ко Иеремии глаголя: 2 возми себе свиток книжный и напиши в нем вся словеса, яже соглаголах к тебе на Израиля и на Иуду и на вся языки, от негоже дне глаголах к тебе, от дне Иосии царя Иудина и до сего дне: 3 негли услышит дом Иудин вся злая, яже Аз помышляю сотворити им, да отвратятся от пути своего злаго, и милостив буду неправдам их и грехом их. 4 И призва Иеремиа Варуха, сына Нириина: и вписа Варух от уст Иеремииных вся словеса Господня, яже соглагола к нему, во свиток книжный. 5 И заповеда Иеремиа Варуху глаголя: мене стрегут, и не могу внити в дом Господень, 6 ты убо вниди и прочти во свитце сем, в немже написал еси от уст моих словеса Господня, во ушы людий в дому Господни в день поста и во ушы всему дому Иудину, приходящым от градов своих, да прочтеши им: 7 негли падет молитва их пред лицем Господним, и отвратятся от пути своего злаго: яко велика ярость и гнев Господень, егоже соглагола на люди сия. 8 И сотвори Варух сын Нириин но всему, елика заповеда ему Иеремиа пророк прочести во книзе словеса Господня в дому Господни. 9 И бысть в пятое лето Иоакима царя Иудина, в девятый месяц, заповедаша пост пред лицем Господним всем людем во Иерусалиме и всему множеству, еже снидеся от градов Иудиных во Иерусалим. 10 И прочте Варух во книзе словеса Иеремиина в дому Господни, в дому Гамариеве, сына Сафаня книгочия, во дворе вышнем, во преддверии врат дому Господня новых, во ушы всех людий. 11 И слыша Михей сын Гамариев, сына Сафаня, вся словеса Господня от книги. 12 И сниде в дом царев, в дом книжника, и се, тамо вси князи седяху, Елисам книгочий и Далеа сын Селемиев, и Нафан сын Аховоров и Гамариа сын Сафань, и Седекиа сын Ананиин и вси князи, 13 и возвести им Михей вся словеса, яже слыша чтуща Варуха во ушы людем. 14 И послаша вси князи ко Варуху сыну Нириину, Иудину сыну Нафаниину, сына Селемиина, сына Хусиина, глаголюще: книгу, юже ты чтеши во ушы людем, возми ю в руку свою и прииди. И взя Варух сын Нириин книгу в руку свою и сниде к ним. 15 И рекоша ему: паки прочти во ушы наши. И прочте Варух во ушы их. 16 И бысть яко услышаша вся словеса, совещашася кийждо со ближним своим и реша Варуху: возвещающе возвестим царю вся словеса сия. 17 И вопросиша Варуха, глаголюще: откуду еси вписал вся словеса сия? 18 И рече Варух: от уст своих поведа ми Иеремиа вся словеса сия, аз же писах в книгу. 19 И рекоша князи Варуху: иди и скрыйся ты и Иеремиа, и человек да не увесть, где вы. 20 И внидоша ко царю во двор, книгу же вдаша хранити в дому Елисама книгочия, и возвестиша царю вся словеса сия. 21 И посла царь Иудина взяти книгу. И взя ю от дому Елисамы книгочия, и прочте Иудин во ушы царевы и во ушы всех князей стоящих окрест царя. 22 Царь же седяше во храмине зимней, в девятый месяц, и поставлено бе пред ним огнище со огнем. 23 И бысть чтущу Иудину третий лист и четвертый, раздроби я бритвою книгочия и возметаше на огненное огнище, дондеже скончася весь свиток на огненнем огнищи. 24 И не ужасошася и не растерзаша риз своих царь и вси отроцы его, слышавшии вся словеса сия. 25 Елнафан же и Далеа, и Гамариа и Годолиа глаголаша царю, еже бы не сожещи свитка. И не послуша их. 26 И повеле царь Иеремеилу сыну цареву и Сараеви сыну Езриилеву и Селемию сыну Авдеилеву, да изымают Варуха книгочия и Иеремию пророка. Но сокры я Господь. 27 И бысть слово Господне ко Иеремии, егда сожже царь свиток, вся словеса, яже вписа Варух от уст Иеремииных, глаголя: 28 паки возми ты свиток другий и впиши вся словеса бывшая во свитце, яже сожже царь Иоаким: 29 и ко Иоакиму царю Иудину речеши: тако рече Господь: ты сожегл еси сию книгу, глаголя: почто вписал еси в ней, глаголя: входя внидет царь Вавилонский и потребит землю сию, и потребятся от нея человецы и скоти? 30 Того ради сице рече Господь на Иоакима царя Иудина: не будет ему седящаго на престоле Давидове, и будет тело его мертвое повержено на знои дневнем и на мразе нощнем: 31 и посещу нань и на его род и на отроки его, и наведу нань и на живущыя во Иерусалиме и на землю Иудину вся злая, яже соглаголах на ня, и не послушаша. 32 И взя Варух свиток другий и вписа в нем от уст Иеремииных вся словеса книги, яже сожже Иоаким царь Иудин: и еще приложишася ему словеса множайша неже первая. === 37 === 1 И царствова Седекиа сын Иосиин вместо Иехонии сына Иоакимова, егоже постави Навуходоносор царь Вавилонский царствовати во Иудеи. 2 И не послуша той и отроцы его и людие земли словес Господних, яже глагола рукою Иеремииною. 3 И посла царь Седекиа Иоахала сына Селемиина и Софонию сына Массеа жерца ко Иеремии пророку, глаголя: молися за ны ко Господу Богу нашему. 4 Иеремиа же свободен прихождаше и прохождаше среде града, не введоша бо его во храмину темничную. 5 И сила фараоня изыде из Египта, и слышавше Халдее облегшии Иерусалим слух их, отступиша от Иерусалима. 6 И бысть слово Господне ко Иеремии глаголя: 7 тако рече Господь Бог Израилев: тако речеши царю Иудину, пославшему к тебе вопросити Мя: се, сила фараоня, изшедшая вам на помощь, возвратится паки до земли Египетския, 8 и возвратятся Халдее и повоюют град сей, и возмут его и пожгут его огнем. 9 Яко тако рече Господь: не прельщайте душ своих, глаголюще: отходяше отидут от нас Халдее: яко не отидут. 10 И аще побиете всю силу Халдеев воюющих на вы, и останут нецыи язвени, кийждо на месте своем, сии востанут и пожгут град сей огнем. 11 И бысть егда взыде сила Халдейска от Иерусалима, от лица силы фараони, 12 изыде Иеремиа из Иерусалима ити в землю Вениаминю, еже купити оттуду посреде людий. 13 Внегда же быти ему во вратех Вениаминих, и (бысть) тамо человек, у негоже обита Саруиа сын Селемиин, сына Ананиина, и взя Иеремию, глаголя: ко Халдеем ты бежиши. 14 И рече Иеремиа: лжа, не ко Халдеем аз бегу. И не послуша его. И взя Саруиа Иеремию и приведе его ко князем. 15 И разгневашася князи на Иеремию и биша его, и послаша его в дом Ионафана книгочия, яко той сотвориша храминою темничною. 16 И прииде Иеремиа в дом рва и в херет, и седе ту дни многи. 17 И посла Седекиа царь и призва его, и вопрошаше его царь отай, аще есть слово от Господа? И рече ему Иеремиа: есть. И рече: в руце царя и Вавилонска предан будеши. 18 И рече Иеремиа царю: чим преобидех тя и отроки твоя и люди сия, яко ты вдаеши мя в дом темничный? 19 И где суть пророцы ваши прорицавшии вам, глаголюще, яко не приидет царь Вавилонский на вас и на землю сию? 20 Ныне же послушай, молютися, господи мой, царю, да падет моление мое пред лицем твоим: и не посылай мя паки в дом Ионафана книгочия, да не умру тамо. 21 И повеле царь, и ввергоша его во храмину темничную, и даяху ему хлеб един на день извне, идеже пекут, дондеже скончашася хлебы из града. И седяше Иеремиа во дворе темничнем. === 38 === 1 И слыша Сафаниа сын Нафань и Годолиа сын Пасхоров, и Иоахал сын Селемиин и Фасхор сын Мелхиев словеса, яже Иеремиа глагола ко всем людем, глаголя: 2 тако рече Господь: седяй во граде сем умрет мечем и гладом и мором, исходяй же ко Халдеем жив будет, и будет душа его на обретение, и жив будет. 3 Яко тако рече Господь: преданием предастся град сей в руце силы царя Вавилонска, и возмет его. 4 И рекоша царю: да умрет человек той, яко сей разслабляет руце мужей воюющих оставшихся во граде и руки всех людий, глаголя к ним по словесем сим: яко человек сей не проповедает людем сим мира, но токмо злая. 5 И рече царь Седекиа: се, той в руках ваших. Понеже не можаше царь противу им. 6 И взяша Иеремию и ввергоша его в ров Мелхиин, сына царева, иже бяше во дворе темничнем: и свесиша его ужами в ров, в рове же не бяше воды, но тина, и бяше в тине Иеремиа. 7 И слыша Авдемелех Мурин, и той бяше во дворе цареве, яко ввергоша Иеремию в ров: царь же (в той час) седяше во вратех Вениаминих. 8 И изыде Авдемелех от дому царева и рече ко царю глаголя: 9 злосотворил еси, яже сотворил еси, убивая человека сего от лица глада, яко несть хлеба во граде ктому. 10 И повеле царь Авдемелеху, глаголя: поими с собою отсюду тридесять мужей и извлецы Иеремию из рова, да не умрет. 11 И поят Авдемелех мужы, и прииде в дом царев подземный, и взя оттуду ветхи порты и ветхия ужы, и вверже я ко Иеремии в ров, и рече к нему: 12 положи сия под ужы. И сотвори Иеремиа сице. 13 И извлекоша его ужами и изяша его из рова. И седе Иеремиа во дворе темничнем. 14 И посла царь, и призва к себе Иеремию в дом Аселисиль, иже в дому Господни. И рече ему царь: вопрошаю тя словесе (единаго), и не утай от мене словесе. 15 И рече Иеремиа царю: аще повем ти, то не смертию ли умориши мя? И аще совещаю ти, то не послушаеши мене. 16 И клятся ему царь, глаголя: жив Господь, иже сотвори нам душу сию, аще убию тя и аще предам тя в руце человек сих ищущих души твоея (на смерть). 17 И рече ему Иеремиа: тако рече Господь Сил, Бог Израилев: аще изыдый изыдеши к воеводам царя Вавилонска, жива будет душа твоя, и град сей не пожжется огнем, и жив будеши ты и дом твой: 18 аще же не изыдеши ко князем царя Вавилонска, предастся град сей в руце Халдейсте, и пожгут его огнем, и ты не спасешися от руки их. 19 И рече царь Иеремии: аз опасение имам от Иудеев избежавших ко Халдеем, да не предадут мя (Халдее) в руце их, и поругаются ми. 20 И рече Иеремиа: не предадят тебе: послушай убо словесе Господня, еже аз глаголю тебе, и лучше ти будет, и жива будет душа твоя: 21 и аще не восхощеши ты изыти, сие слово, еже сказа мне Господь: 22 и се, вся жены, оставшыяся в дому царя Иудина, изведутся ко князем царя Вавилонска: и тыя глаголаху: прельстиша тя и премогоша тя мужие мирницы твои, и ослабиша во поползновениих ногу твою и отвратишася от тебе: 23 и жены твоя и чада твоя изведут ко Халдеем, и ты не уцелееши, яко рукою царя Вавилонска ят будеши, и град сей пожжется. 24 И рече ему царь: человек да не увесть словес сих, и да не умреши ты. 25 И аще услышат князи, яко глаголах с тобою, и приидут к тебе и рекут ти: повеждь нам, что глагола к тебе царь? Не утай от нас, и не убием тебе: и что глагола к тебе царь? 26 И речеши им: повергох аз моление мое пред лицем царевым, яко да не возвратит мене в дом Ионафань, умрети ми тамо. 27 И приидоша вси князи ко Иеремии и вопросиша его. И поведа им по всем словесем сим, яже заповеда ему царь. И умолкнуша, яко несть слышано слово господне. 28 И седяше Иеремиа во дворе темничнем, дондеже взяша Иерусалим. === 39 === 1 И бысть в девятое лето Седекии царя Иудина, в месяц десятый, прииде Навуходоносор царь Вавилонский и вся сила его на Иерусалим, и воеваху нань. 2 И в первоенадесять лето Седекии, в месяц четвертый, в девятый день месяца, разседеся град. 3 И внидоша вси князи царя Вавилонска и седоша во вратех средних, Ниргелсарасар, Самагад, Навусахар, Навусарис, Нагаргас, Насерравамаг, и прочии воеводы царя Вавилонскаго. 4 И бысть егда узре я Седекиа царь Иудин и вси мужие ратнии, и избегоша, и изыдоша в нощи от града по пути вертограда царева и сквозе врата, яже беша между стеною и предстением: и изыдоша в путь пустыни. 5 И гнаша вслед их воинство Халдейско, и постигоша Седекию и поли пустыни Иерихонския, и емше приведоша к Навуходоносору царю Вавилонску во Ревлаф, иже в земли Емаф, и глагола к нему с судом. 6 И изби царь Вавилонский сыны Седекиины во Ревлафе пред очима его, и вся вельможы Иудины поби царь Вавилонский. 7 И очи Седекии изят, и окова его путы, и отведе его в Вавилон. 8 Дом же царев и домы всех людий пожгоша Халдее огнем и стену Иерусалимску превратиша: 9 и останок людий, и оставших во граде, и убегшыя, иже утекоша ко царю Вавилонску, и останок людий, и оставших пресели Навузардан воевода в Вавилон: 10 а от людий убогих, ничтоже имущих, остави Навузардан воевода воинств в земли Иудине, и даде им винограды и нивы в той день. 11 И заповеда Навуходоносор царь Вавилонский о Иеремии пророце Навузарданови воеводе воинств и рече: 12 возми его и положи нань очи твои и ничтоже ему сотвори зла: но якоже восхощет, тако сотвори ему. 13 Посла убо Навузардан воевода воинства и Навузезван, и Рапсарис и Ниргел, и Сарасар и Фавман, и вси воеводы царя Вавилонска: 14 и послаша, и пояша Иеремию от двора темничнаго, и даша его Годолии сыну Ахикамову, сына Сафаня, и изведоша его, и седе среде людий. 15 И ко Иеремии бысть слово Господне ко дворе темничнем глаголя: 16 иди и рцы ко Авдемелеху Мурину, глаголя: тако рече Господь Бог Израилев: се, Аз приношу словеса Моя на град сей во злая? А не во благая: и будут пред лицем твоим в той день: 17 и избавлю тя в той день, и не дам тебе в руце человек, ихже ты боишися от лица их: 18 яко избавляя спасу тя, и мечем не падеши: и будет душа твоя на обретение, яко уповал еси на Мя, рече Господь. === 40 === 1 Слово бывшее ко Иеремии от Господа, повнегда отпусти его Навузардан архимагир из Рамы, егда взя его связанаго путы от среды, от Иерусалима и от Иуды преселения, ведомых в Вавилон. 2 И взя его архимагир и рече ему: Господь Бог твой соглаголал есть злая сия на место сие: 3 и приведе, и сотвори Господь, якоже рече, зане согрешисте Ему и не послушасте гласа Его, и бысть вам глагол сей. 4 И се, ныне разреших тя от уз, яже на руку твоею: аще ти есть добро ити со мною в Вавилон, поиди, и положу очи мои на тя: аще же ни, остани зде: се, вся земля пред лицем твоим есть: что изволиши, и аможе восхощеши ити, тамо иди: 5 и возвратися ко Годолии, сыну Ахикамову, сыну Сафаню, егоже постави царь Вавилонский в земли Иудине, и живи с ним среде людий, во всех благих пред очима твоима, еже ходити, и ходи. И даде ему архимагир пищу и дары и отпусти его. 6 И прииде Иеремиа ко Годолии сыну Ахмикамову в Массифаф и седе среде людий своих оставшихся на земли. 7 И егда услышаша вси воеводы силы яже на селе, тии и силы их, яко поставил есть царь Вавилонский Годолию сына Ахикамова (властелина) над землею, и яко предаде ему мужы и жены и дети, и от убогих земли, иже не преведени быша в Вавилон: 8 приидоша ко Годолии в Массифаф Исмаил сын Нафаниин и Иоанан, и Ионафан сын Кариев и Сареа сын Фанаемефов, и сынове Офи, иже беша из Нетофафы, и Иезониа сын Махафы, тии и мужие их. 9 И клятся им Годолиа и мужем их, глаголя: не убойтеся от лица отрок Халдейских: вселитеся на земли и служите царю Вавилонску, и лучше вам будет: 10 и се, аз сежу в Массифафе, стати противу лицу Халдейску, иже аще приидут на вас: вы же соберите вино и овощь, и соберите масло, и влийте в сосуды своя, и вселитеся во грады, яже удержасте. 11 И вси Иудее, иже в земли Моавли и в сынех Аммоних, и иже во Идумеи и иже во всей земли, услышаша, яко дал есть царь Вавилонский останок во Иуде и яко поставил есть над ними Годолию сына Ахикамова, сына Сафанова. 12 И приидоша вси Иудее от всех мест, в няже бяху убегли, и приидоша ко Годолии в землю Иудину в Массифаф, и собраша вино и овощь и масло много зело. 13 Иоанан же сын Кариев и вси воеводы силы, иже на селех, приидоша ко Годолии в Массифаф 14 и рекоша ему: веси ли, яко Велиса царь сынов Аммоних посла к тебе Исмаила сына Нафаниева поразити душу твою? И не верова им Годолиа сын Ахикамль. 15 Иоанан же сын Кариев рече ко Годолии отай в Массифафе, глаголя: да иду убо и побию Исмаила, сына Нафаниина: и никтоже да увесть, да не како поразит душу твою, и разсыплется весь Иуда собраный к тебе, и погибнет останок Иудин. 16 И рече Годолиа ко Иоанану сыну Кариеву: не сотвори дела сего, яко лжу ты глаголеши на Исмаила. === 41 === 1 И бысть в седмый месяц, прииде Исмаил сын Нафаниин сына Елисамова, от рода царева, и вельможи царевы десять мужей с ним ко Годолии в Массифаф, и ядоша ту вкупе хлеб. 2 И воста Исмаил и десять мужей иже с ним, и поразиша Годолию мечем, и убиша, егоже постави царь Вавилонский над землею, 3 и всех Иудеев, иже беша с ним в Массифафе, и всех Халдеев, иже обретошася тамо, и мужей военных изби Исмаил. 4 И бысть во вторый день по убиении Годолиеве, и человек не уведе. 5 И приидоша мужие от Сихема и от Салима и от Самарии осмьдесят мужей, обритыми брадами и растерзаными ризами, плачущеся, и дары и фимиам в руку их, еже внести в дом Господень. 6 И изыде противу им Исмаил сын Нафаниев от Массифы: тии же идяху и плакахуся: и егда сретеся с ними, рече к ним: внидите ко Годолии. 7 И бысть, вшедшым им среде града, изсече я Исмаил у кладязя, той и мужие, иже беша с ним. 8 И обретошася десять мужей ту и реша Исмаилу: не убий нас, яко суть нам имения на нивах, пшеница и ячмень, и мед и масло. И мину их и не уби их посреде братий их. 9 И кладязь, в оньже вверже Исмаил вся, яже изби, сей кладязь велик есть, егоже сотвори царь Аса, от лица Ваасы царя Израилева, сей наполни Исмаил убиенными. 10 И обрати Исмаил вся люди оставшыя в Массифафе и дщери царевы, яже вручил архимагир Годолии сыну Ахикамову, и взя их Исмаил сын Нафань: и отиде на ону страну сынов Аммоних. 11 И слыша Иоанан сын Кариев и вси воеводы силы, иже с ним, вся злая, яже сотвори Исмаил сын Нафаниев, 12 и приведоша вся воя своя и идяху воевати нань, и обретоша его при воде мнозе во Гаваоне. 13 И бысть, егда увидеша вси людие, иже со Исмаилом, Иоанана сына Кариева и вся воеводы силы, иже быша с ним, возрадовашася: 14 и возвратишася вси людие, ихже плени Исмаил от Массифы, и возвратившеся отидоша ко Иоанану сыну Кариеву. 15 Исмаил же уцеле со осмию мужи от лица Иоананя и иде ко сыном Аммоним. 16 И взя Иоанан и вси воеводы силы, иже с ним, вся оставшыяся люди, ихже возврати от Исмаила сына Нафаня из Массифафа, повнегда уби Годолию, сына Ахикамля, мужы сильны на рати, и жены, и останки, и каженики, ихже обрати от Гаваона, 17 и идоша, и седоша на земли Вирофоамли, яже ко Вифлеему, еже ити и внити во Египет от лица Халдейска: понеже убояшася от лица их: 18 яко уби Исмаил Годолию, егоже постави царь Вавилонский на земли Иудине. === 42 === 1 И приидоша вси воеводы силы, и Иоанан сын Кариев и Азариа сын Маасеев, и вси людие от мала и до велика 2 ко Иеремии пророку и рекоша ему: да падет молитва наша пред лицем твоим, и помолися о нас ко Господеви Богу твоему о оставшихся сих: яко остася мало нас от многих, якоже очи твои видят: 3 и да возвестит нам Господь Бог твой путь, по немуже пойдем, и слово, еже сотворим. 4 И рече им Иеремиа пророк: слышах: се, аз помолюся о вас Господеви Богу нашему по словесем вашым: и будет, слово, еже отвещает Господь, повем вам и не потаю от вас словесе. 5 Тии же рекоша Иеремии: буди Господь в нас послух правдив и верен, яко по всему слову, еже аще послет Господь к нам, тако сотворим: 6 аще добро и аще зло, гласа Господа нашего, к Немуже мы посылаем тя, послушаем, да лучше нам будет, яко послушаем гласа Господа Бога нашего. 7 И егда скончашася десять дний, бысть слово Господне ко Иеремии. 8 И призва Иоанана сына Кариева и воеводы силы, иже с ним быша, и вся люди от мала и до велика, 9 и рече им: тако рече Господь Бог Израилев, к Немуже посыласте мя, да простру молитвы вашя пред Ним: 10 аще седяще сядете на земли сей, то созижду вас, а не разорю, и насажду вас, а не исторгну, яко престах от зол, яже сотворих вам. 11 Не убойтеся от лица царя Вавилонска, егоже вы боитеся: от лица его не убойтеся, рече Господь: яко Аз с вами есмь, еже избавляти вас и спасати вас от руки его: 12 и дам вам милость и помилую вас и возвращу вас на землю вашу. 13 Аще же речете вы: не сядем на земли сей, еже не слышати гласа Господа Бога нашего, 14 глаголюще: никако, но в землю Египетску внидем, и не узрим рати, и гласа трубнаго не услышим, и о хлебех не взалчем, и тамо вселимся: 15 того ради слышите слово Господне, оставшии Иудины, тако рече Господь Вседержитель, Бог Израилев: аще вы дадите лице ваше во Египет и внидете тамо жити, 16 и будет, мечь, егоже вы боитеся от лица его, обрящет вы во Египте, и глад, от негоже вы опасение имате от лица его, постигнет вы вслед вас во Египте, и тамо измрете вы. 17 И будут вси мужие и вси иноплеменницы положившии лице свое на землю Египетску жити тамо, оскудеют гладом и мечем, и будет от них ни един спасаемь от зол, яже Аз наведу на ня. 18 Яко тако рече Господь Сил, Бог Израилев: якоже вскапа ярость Моя на живущыя во Иерусалиме, тако вскаплет ярость Моя на вас, вшедшым вам во Египет: и будете в непроходимая и подручни, и в клятву и во укоризну, и не узрите ктому места сего. 19 Сия глагола Господь на вас оставшихся от Иуды: не входите во Египет. И ныне ведяще уведаете, яко засвидетелствовах вам днесь: 20 яко слукавновасте в душах ваших, пославше мя ко Господу Богу вашему, глаголюще: помолися о нас Господеви: и по всему, елико возглаголет тебе Господь Бог наш, тако возвести нам, и сотворим. 21 И возвестих вам днесь, и не послушасте гласа Господа Бога вашего во всем, егоже посла к вам: 22 и ныне ведуще ведайте, яко мечем и гладом и мором изчезнете на месте, на неже хощете ити жити тамо. === 43 === 1 И бысть, егда преста Иеремиа глаголя к людем вся словеса Господня, яже посла Господь к ним, 2 и рече Азариа сын Маасеев и Иоанан сын Кариев и вси мужие презорливии ко Иеремии, глаголюще: лжеши, не посла тя к нам Господь Бог наш глаголати: не входите во Египет жити тамо: 3 но Варух сын Нириин подущает тя на нас, да нас вдаси в руце Халдейсте уморити нас и превести нас в Вавилон. 4 И не послуша Иоанан и вси воеводы силы и вси людие (не послушаша) гласа Господня, еже жити на земли Иудине. 5 И взя Иоанан и вси воеводы силы вся оставшыя Иудины, возвращеныя от всех языков, аможе разсеяни быша, еже жити на земли Иудине, 6 мужы сильныя и жены, и младенцы и дщери царевы, и душы, яже остави Навузардан воевода силы со Годолием сыном Ахикамовым сына Сафанова, и Иеремию пророка, и Варуха сына Нириина, 7 и внидоша во Египет, яко не послушаша гласа Господня, и внидоша во Тафнас. 8 И бысть слово Господне ко Иеремии во Тафнасе глаголя: 9 возми себе камени велики и скрый я пред враты дому фараоня во Тафнасе пред очима мужей Иудиных, и речеши к ним: 10 тако глаголет Господь Сил, Бог Израилев: се, Аз послю и приведу Навуходоносора царя Вавилонска раба Моего, и поставит престол свой на камениих сих, ихже скрыл еси, и воздвигнет оружие свое на ня, 11 и внидет и поразит землю Египетску: ихже на смерть, на смерть, и ихже на преселение, на преселение, а ихже под мечь, под мечь: 12 и пожжет огнем домы богов их, и пожжет я, и преселит я, и покрыет землю Египетскую, якоже покрывается пастух ризою своею: и изыдет оттуду с миром 13 и сокрушит столпы Илиуполя, иже во Египте, и домы богов Египетских пожжет огнем. === 44 === 1 Слово бывшее ко Иеремии (от Господа) и ко всем Иудеем сущым в земли Египетстей и седящым во Магдале и во Тафнасе, и во Мемфисе и в земли Пафурсте, глаголя: 2 тако глаголет Господь Бог Израилев: вы видесте вся злая, яже наведох на Иерусалим и на грады Иудины: и се, пусти суть ныне от живущих, 3 от лица злобы их, юже сотвориша разгневати Мя, ходяще кадити богом чуждим, ихже не ведесте вы сами и отцы ваши. 4 И послах к вам отроки Моя пророки заутра, и посылах я, глаголя: не творите дела осквернения сего, егоже возненавидех. 5 И не послушаша Мене, ни приклониша уха своего обратитися от злоб своих, еже не кадити богом инем. 6 И вскапа ярость Моя и гнев Мои и разгореся во вратех Иудиных и вне Иерусалима: и быша во опустение и в непроходимую до сего дне. 7 И ныне сице рече Господь Вседержитель, Бог Израилев: вскую вы творите злобы велики на душы своя, еже изсещи вам мужы и жены, младенца и ссущаго от среды Иуды, да не останется ни един от вас, 8 разгневати Мя в делех рук ваших, кадити богом инем в земли Египетстей, в нюже приидосте жити тамо, да изсечени будете и в проклятие да будете и на укоризну во всех языцех земли? 9 Еда забысте злобы отец ваших и злобы царей Иудиных, и злобы князей ваших и злобы вашя, и злобы жен ваших, яже сотвориша в земли Иудине и вне Иерусалима? 10 И не престаша даже до сего дне и не убояшася и не держахуся законов Моих и повелений Моих, яже дах пред лицем вашим и пред очима отец ваших. 11 Того ради тако глаголет Господь Сил, Бог Израилев: се, Аз приставлю лице Мое на вы во зло, еже погубити вся люди Иудины: 12 и возму останки Иудины, иже поставиша лица своя, еже внити в землю Египетску и жити тамо, и изчезнут вси в земли Египетстей, и падут мечем и гладом, и изчезнут от мала даже до велика: и будут на укоризну и в пагубу и в проклятие: 13 и посещу на седящих в земли Египетстей, якоже посетих на Иерусалим, мечем и гладом и смертию, 14 и не будет уцелевша ни единаго же от оставших Иудиных, обитающих в земли Египетстей, еже возвратитися на землю Иудину, к нейже тии надеются душами своими возвратитися тамо: не возвратятся, разве избегшии. 15 И отвещаша Иеремии вси мужие разумеющии, яко кадят жены их богом иным, и вся жены собор велик, и вси людие седящии в земли Египетстей, в земли Пафурсте, глаголюще: 16 слово, еже глаголал еси к нам во имя Господне, не послушаем тебе, 17 яко творяще сотворим всякое слово, еже изыдет из уст наших, кадити царице небесней и возливати ей возлияния, якоже сотворихом мы и отцы наши, и царие наши и князи наши во градех Иудиных и вне Иерусалима: и насытихомся хлебов, и благо нам бысть, и зла не видехом. 18 И егда престахом кадити царице небесней и возливати возлияния, оскудехом хлебы вси мы, и мечем и гладом скончахомся. 19 И егда кадихом мы царице небесней и возливахом ей возлияния, еда без мужей наших творихом ей опресноки и возливахом ей возлияния? 20 И рече Иеремиа всем людем сильным и всем женам и всем людем отвещавшым ему словеса, глаголя: 21 не каждение ли, еже кадисте во градех Иудиных и внеуду Иерусалима вы и отцы ваши, и царие ваши и князи ваши и людие земли, помяну Господь, и взыде на сердце Его? 22 И не можаше Господь терпети ктому от лица злобы деяний ваших и от гнусностей, яже сотвористе: и бысть земля ваша во опустение и в непрохождение и в клятву, еже не быти живущым, якоже есть день сей, 23 от лица сих, имже кадисте (идолом) и имиже согрешисте Господеви: и не послушасте гласа Господня, и в повелениих Его и в законе и во свидениих Его не ходисте, и постигнуша вы злая сия, якоже день сей. 24 И рече Иеремиа людем и женам: слышите слово Господне, весь Иуда, иже есте в земли Египетстей: 25 тако рече Господь Вседержитель, Бог Израилев, глаголя: вы и жены вашя усты вашими соглаголасте и руками вашими исполнисте, глаголюще: творяще сотворим исповедания наша, яже обещахом кадити царице небесней и возливати возлияния ей: пребывающе пребысте во обетех ваших и творяще сотвористе я. 26 Того ради слышите слово Господне, весь Иуда, седящии в земли Египетстей: се, кляхся именем Моим великим, рече Господь, аще будет ктому имя Мое во устех всего Иуды, еже рещи, жив Господь Бог, во всей земли Египетстей. 27 Яко се, Аз возбудихся на ня озлобити их, а не благосотворити, и изчезнут весь Иуда живущии в земли Египетстей мечем и гладом, дондеже скончаются. 28 И уцелевшии от меча возвратятся на землю Иудину малым числом: и уведят оставшии Иудины, преселившиися в землю Египетску обитати тамо, слово чие пребудет, Мое, или их? 29 И сие вам знамение, глаголет Господь, яко посещу Аз на вы на месте сем, да уведите, яко воистинну исполнятся словеса Моя на вас во злая. 30 Тако рече Господь: се, Аз предаю фараона Вафриа царя Египетска в руце врага его и в руце ищущих души его, якоже дах Седекию царя Иудина в руце Навуходоносора царя Вавилонска врага его и ищущаго души его. === 45 === 1 Слово, еже глагола Иеремиа пророк к Варуху сыну Нириеву, егда вписа словеса сия в книгу от уст Иеремииных, в четвертое лето Иоакима, сына Иосиина, царя Иудина, глаголя: 2 тако глаголет Господь Вседержитель о тебе, Варуше: 3 яко рекл еси: о, люте мне! О, люте мне! Яко приложи Господь труд к болезни моей, успох с стенанием, покоя не обретох. 4 Рцы ему, сице глаголет Господь: се, яже Аз соградих, Аз разорю: и яже насадих Аз, исторгну, и всю землю Мою. 5 И Ты ли взыщеши себе великих? Не ищи: яко се, Аз наведу злая на всяку плоть, глаголет Господь, и дам душу твою в корысть во всяцем месте, аможе аще пойдеши. === 46 === 1 Слово, еже бысть ко Иеремии пророку от Господа на языки, 2 ко Египту противу силы фараона Нехао царя Египетскаго, иже бысть над рекою Евфратом во Кархамисе, егоже порази Навуходоносор царь Вавилонский, в лете четвертем Иоакима сына Иосиина, царя Иудина. 3 Возмите оружие и щиты и идите на брань, 4 оседлайте кони и вседайте, всадницы, и станите во шлемех ваших, уставите копия и облецытеся в броня вашя. 5 Что убо видех их страшливых и хребты обращающих? Крепцыи их избити, побегоша скоро и не озрешася вспять, отвсюду страх, глаголет Господь. 6 Не утечет легкий, ниже возможет избавитися крепкий на полунощь: близ реки Евфрата побеждени суть и падоша. 7 Кто есть той, иже яко река восходит, и яко реки воздвижутся волны его? 8 Воды Египта аки река взыдут, и аки река восколеблются воды его. И рече: взыду и покрыю землю, и погублю град и живущыя в нем. 9 Возсядите на кони и устройте колесницы, изыдите, сильнии Муринстии, и Ливиане вооруженнии щитами, и Лидяне, взыдите наляцающе лук. 10 День сей Господа Бога Вседержителя, день отмщения, да отмстит врагом Своим, и пожрет я мечь Господень и насытится и упиется кровию их, яко жертва Господу Вседержителю в земли полунощней, близ реки Евфрата. 11 Взыди в Галаад и возми ритину, дево, дщи Египетска! Всуе умножила еси врачевания твоя, и цельбы несть тебе. 12 Услышаша языцы глас, и плачь твой наполни землю: яко сильный сретеся с сильным, и оба вкупе изнемогоста и падоста. 13 Слово, еже глагола Господь ко Иеремии пророку о сем: яко име приити Навуходоносор царь Вавилонский и поразити землю Египетску. 14 Возвестите Египту и разгласите во Магдалу, и возопийте во Мемфисе и во Тафнасе поведите: стой и уготовися, яко пожрет мечь сия, яже окрест тебе суть. 15 Почто убежа от тебе апис? Телец избранный твой не пребысть, яко Господь разруши его. 16 И множество твое изнеможе и паде, и кийждо ко ближнему своему глаголаху: востаним и возвратимся к людем нашым и в землю рождения нашего от лица меча Еллинскаго. 17 Назовите имя фараона Нехао царя Египетска, смятение преведе время. 18 Живу Аз, глаголет Царь, Господь Вседержитель имя Его: ибо, якоже Фавор на горах и якоже Кармель в мори, приидет. 19 Сосуды пленения сотвори себе, живущая дщи Египетска, яко Мемфис в запустение будет, и наречется, увы! И не будут в нем жити. 20 Юница (избранна и) украшена Египет, разорение от полунощи прииде на ню, 21 и наемницы его, живущии посреде его, якоже телцы тучнии питаеми в нем: зане и тии обратишася и побегоша вкупе, и не могоша стати, яко день погибели их прииде на ня и время отмщения их. 22 Глас их, якоже змиа звиздающаго, понеже с силою пойдут, со секирами приидут на него. 23 Яко древие секуще посекут лес его, глаголет Господь Бог: ибо не может сочтен быти, яко умножишася паче пругов, и несть им числа. 24 Посрамленна есть дщи Египетска и дана в руце людем полунощным. 25 Рече Господь Вседержитель, Бог Израилев: се, Аз посещу на Аммона сына ея, и на фараона и на Египет, и на боги его и на цари его, и на фараона и на уповающыя нань, 26 и дам их в руце ищущих души их, и в руку Навуходоносора царя Вавилонска, и в руце слуг его: и посем поживут якоже и первее, глаголет Господь. 27 Ты же не убойся, рабе мой Иакове, ни устрашайся, Израилю: се бо, Аз тебе спасена сотворю издалеча и семя твое от земли пленения их: и возвратится Иаков и почиет и благоуспеет, и не будет устрашаяй его. 28 Не бойся, рабе Мой Иакове, глаголет Господь, яко с тобою есмь Аз: яко сотворю скончание во всех языцех, в няже извергох тя, тебе же не сотворю оскудети, но накажу тя судом и обезвиняя не обезвиню тя. === 47 === 1 Слово Господне, еже бысть ко Иеремии пророку на иноплеменники, прежде нежели порази фараон Газу. 2 Тако глаголет Господь: се, воды восходят от севера и будут яко поток наводняяй, и потопят землю и исполнение ея, град и живущыя в нем: и возопиют людие и восплачутся вси живущии на земли, 3 от шума устремления его, от оружия ног его и от гремения колесниц его и от звука колес его: не обратишася отцы ко сыном своим, опустивше руце свои, 4 в день находящь, еже погубити вся иноплеменники: и разорю Тир и Сидон со всеми прочими помощники их, яко истребит Господь Филистины, останки островов Каппадокийских. 5 Прииде плешь на Газу, отвержен бысть Аскалон и останцы енакимли. 6 Доколе сещи будеши, о, мечу Божий! Доколе не упокоишися? Вниди в ножны твоя, почий и вознесися. 7 Како упокоится? Понеже Господь заповеда ему на Аскалона и на сущыя при мори, на прочыя востати. === 48 === 1 О Моаве тако рече Господь Вседержитель, Бог Израилев: о, люте Нававу, яко погибе, взяся Кариафаим, посрамися Масигаф и побежден есть. 2 Несть ктому целение в Моаве, веселие во Есевоне, помыслиша нань злая: приидите и потребим я от язык: (сего ради) молчя умолкнеши, пойдет за тобою мечь. 3 Глас вопля от Оронаима, погубление и сотрение велико. 4 Сотреся Моав, возвестите вопль малых его. 5 Яко исполнися Алаоф плача: взыдет рыдая путем Оронаима, врази, вопль сотрения слышасте. 6 Бежите и спасите душы вашя, и будете яко осел дивий в пустыни. 7 Понеже имел еси надежду во оградах твоих и в сокровищих твоих, и ты ят будеши: и пойдет Хамос во преселение, и священницы его и князи его вкупе. 8 И приидет губитель на всяк град, и не избавится ни един град, и погибнут удолия, и погубятся поля, якоже рече Господь. 9 Дайте знамение Моаву, яко прикосновением прикосновен будет, и вси гради его будут пусти и без живущих. 10 Проклят (человек) творяй дело Господне с небрежением, и проклят возбраняяй мечу своему от крове. 11 Почиваше Моав от младости своея и бе уповая на славу свою: не прелияся от сосуда в сосуд и во преселение не отиде: сего ради пребысть вкус его в нем, и воня его несть пременена. 12 Сего ради, се, дние грядут, глаголет Господь, и послю ему преселители, и преселят его, и сосуды его истощат и роги его сокрушат: 13 и посрамится Моав от Хамоса, якоже посрамлен есть дом Израилев от Вефиля, в немже имяху надежду. 14 Како глаголете: сильни есмы и мужие крепцы во бранех? 15 Погибе Моав, град его, и избраннии юноши его снидоша под мечь, глаголет Царь, Господь Вседержитель имя Его. 16 Близ день Моавль, еже приити, и зло его скоро зело. 17 Утешайте его вси, иже окрест его, и вси ведящии имя его: рцыте, како сокрушися жезл крепости, палица славна? 18 Сниди от славы и сяди, во влаге живущая, дщи Дивоня, яко губитель Моавский взыдет на тя разрушаяй ограды твоя. 19 На пути стани и воззри, живущая во Ароире, и вопроси бежащаго и избегшаго, и рцы: что се бысть? 20 Посрамися Моав, зане побежден есть: рыдайте и вопийте, возвестите во Арноне, яко погибе Моав, 21 и суд прииде на землю напольную, на Хелон и на Рефас и на Мофаф, 22 и на Девон и на Наво и на дом Девлафаим, 23 и на Кариафаим и на Вефгамул и на дом Маонов, 24 и на Кариоф и на Восора и на вся грады Моавли, иже далече и иже близ суть. 25 Отсечен есть рог Моавль, и мышца его сокрушися, глаголет Господь: 26 упойте его, яко на Господа возвеличися, и приразит Моав руку свою (о блевотину), и будет в посмех и сам. 27 И аще не в посмех бысть тебе Израиль, аще в татстве твоем обретеся, яко воевал еси его: преселишися инамо. 28 Оставите грады и пребывайте на камени, живущии в Моаве, и будите якоже голуби гнездящиися в каменех, во устех скважни. 29 Слышахом гордость Моавлю, горд бе зело: презорство его и кичение его, возношение и воздвижение сердца его. 30 Аз же вем дела его, глаголет Господь: не доволство ли его тако сотвори? 31 Сего ради над Моавом возрыдайте всюду, возопийте над мужи Кирады смущения. 32 Яко плачем Иазировым восплачуся о тебе, винограде Асеримль! Леторасли твоя проидоша море, градов Иазировых коснушася, на жатву твою и на винное собирание твое хищник нападе. 33 Отята есть радость и веселие от Кармила и от земли Моавли, и вино от точил отях: никакоже изгнетаяй винну ягоду по обычаю песни воспоет. 34 От вопля Есевонска даже до Елеала и Иаса грады их даша глас свой, от Сигора даже до Оронаима, и юница трилетная, понеже и воды Немрим во сожжение будут. 35 И отиму Моава, глаголет Господь, жрущаго на горах и кадящаго богом своим. 36 Того ради сердце Моава, яко цевницы звяцати будут, и сердце мое к мужем Кирады яко цевница звяцати будет: сего ради, яже пристяжа, погибоша от человек. 37 Всяка бо глава на всяцем месте острижена будет, и всяка брада оброснется, и всяка рука посечена будет, и на всяцем чресле вретище, 38 и на всех храминах Моавских и на стогнах его всяк плачь, понеже сокруших Моава, якоже сосуд непотребен, глаголет Господь. 39 Како изменися? Возрыдаша, како обрати хребет Моав и посрамися? И бысть Моав в посмех и в ненависть всем окрест себе. 40 Яко тако глаголет Господь: се, якоже орел полетит и распрострет криле свои на Моава, 41 взят есть Кариоф, и ограды его обстоимы суть: и будет сердце сильных Моавских в той день, яко сердце жены родящия. 42 И погибнет Моав от людий, яко на Господа возвеличися. 43 Страх и пропасть и сеть на тя, о, живущий в Моаве, глаголет Господь. 44 Иже убежит от лица страха, впадет в пропасть: и излазяй из пропасти имется сетию: понеже наведу сия на Моава в лето посещения их, глаголет Господь. 45 Во стени Есевонстей сташа от силы избегше, огнь бо изыде от Есевона и пламень от среды Сеона, и пожже часть Моава и верх сынов смятения. 46 Горе тебе, Моаве! Погибоша людие Хамоса, яко отведошася сынове твои и дщери твоя в плен. 47 И возвращу плен Моавль в последния дни, глаголет Господь. До зде суд Моавль. === 49 === 1 К сыном Аммоним тако глаголет Господь: еда не суть сынове Израилевы, или наследника несть им? Почто убо прия наследие Мелхом Гада, и людие его во градех его живяху? 2 Сего ради, се, дние грядут, глаголет Господь, и оглашу на Равваф сынов Аммоних ратный звук, и будет в непроходная и в пагубу, и требища его огнем сожжена будут, и восприимет Израиль власть свою, глаголет Господь. 3 Возопий, Есевоне, яко погибе Гай: возопийте, дщери Раввафски, препояшитеся вретищами, рыдайте и бегайте по забралом, яко Мелхом во плен отведется, священницы и князи его вкупе. 4 Что хвалишися во удолиих? Стече удолие твое, дщи безстудная, уповающая на богатства своя, глаголющи: кто приидет на мя? 5 Се, Аз наведу на тя страх, глаголет Господь Вседержитель, от всех сущих окрест тебе: и разсеетеся вси от лица его, и не будет собирающаго бежащих. 6 И посем возвращу пленники сынов Аммоних, глаголет Господь. 7 Ко Идумеи сия глаголет Господь Вседержитель: еда есть ктому мудрость во Фемане? Погибе совет от разумных, непотребна бысть мудрость их, 8 попрано бысть место их: снидите в пропасть к седению, живущии во Дедане: яко жестокая сотвори: (погибель Исавлю) наведох нань во время, в неже посетих его. 9 Яко оымателие вина приидоша на тя, не оставят тебе останков: аки татие в нощи возложат руки своя. 10 Яко (Аз) обнажих Исава, открых тайная его, не возможет утаитися, погибе рукою брата своего и соседа своего, 11 и несть остатися сироте твоей, да живет: Аз же сотворю жити, и вдовицы на Мя уповаша. 12 Тако бо глаголет Господь: се, имже не бе закона пити чашу, пиюще испиют: и ты ли аки неповинный останешися? Не будеши неповинен, но пия испиеши. 13 Собою бо кляхся, глаголет Господь, яко в пустыню и в поругание и в посмех и в проклятие будеши посреде его, и вси гради его будут в пустыню вечную. 14 Слух слышах от Господа, и послов во языки посла: соберитеся и идите противу ему и востаните на ополчение. 15 Се, мала дах тя во языцех и поругаема в людех. 16 Играние твое прельсти тя, безстудие сердца твоего обиташе в разселинах каменных, похити крепость холма высокаго: егда вознесеши яко орел гнездо свое, оттоле свергу тя, глаголет Господь. 17 И будет Идумеа в запустение, всяк ходяй чрез ню подивится и позвиждет над всякою язвою ея. 18 Якоже превращена есть Содома и Гоморра и соседи ея, глаголет Господь, не поживет тамо муж, ниже пребудет тамо сын человечь. 19 Се, якоже лев изыдет от среды Иордана на место сильнаго, яко скоро сотворю им бежати от него, и кто будет избран, егоже поставлю над ним? Кто бо подобен Мне? И кто противостанет Ми? И кто есть сей пастырь, иже сопротивится лицу Моему? 20 Сего ради слышите совет Господень, егоже совеща на Едома, и умышление Его, еже умысли на живущих во Фемане, не свергут ли их малая от стад, и не разметано ли будет на них жилище их? 21 От гласа бо падения их потрясеся земля, и вопль на мори Чермнем слышася гласа их. 22 Се, яко орел взыдет и возлетит и прострет криле свои над твердыньми его: и будет сердце сильных Идумейских в той день, яко сердце жены родящия. 23 К Дамаску: посрамися Емаф и Арфаф, яко слух зол слышаша, ужасошася, возмутишася на мори, (за попечение) упокоитися не могут. 24 Расторжеся Дамаск, обратися на бежание, трепет объят и, скорбь и болезнь одержаша его яко раждающую. 25 Како не оставиша града славнаго, крепости любезныя? 26 Сего ради падут юноши на стогнах твоих, и вси мужие воинстии падут в той день, глаголет Господь Вседержитель. 27 И возжгу огнь на стене Дамаска, и пожжет стены сына Адерова. 28 К Кидару, царице двора, егоже порази Навуходоносор царь Вавилонский, тако глаголет Господь: востаните и взыдите на Кидар и погубите сыны восточныя. 29 Селения их и стада их возмут: одежды их и вся сосуды их и велблюды их возмут себе, и призовут на ня страх окрест. 30 Бежите и отидите вскоре, в пропастех сядите, живущии во дворе, глаголет Господь: яко совеща на вы Навуходоносор царь Вавилонский совет и помысли на вас умышление. 31 Востаните и внидите к людем упокоеным, живущым в прохладе, глаголет Господь: иже ни дверий, ниже заворов имут, едини обитают. 32 И будут велблюды их в расхищение и множество скота их в разграбление, и развею я всяким ветром остриженых окрест, и от всех окрестных их приведу на ня погибель, глаголет Господь. 33 И будет двор в жилище змием и пуст даже до века, не поживет тамо муж, ниже будет живяй в нем сын человечь. 34 Слово Господне, еже бысть ко Иеремии пророку на Елам, в начале царства Седекии царя Иудина, глаголя: 35 тако глаголет Господь Вседержитель: се, Аз сокрушу лук Еламль, начало силы их, 36 и наведу на Елам четыри ветры от четырех стран небесных и развею я во вся ветры тыя, и не будет языка, в оньже бы не пришли бежащии Еламитяне. 37 И устрашу их пред враги их и пред лицем ищущих души их, и наведу на ня злая, по гневу ярости Моея, глаголет Господь: и послю вслед их мечь Мой, дондеже сотру их: 38 и поставлю престол Мой во Еламе, и иждену оттуду царя и князи, глаголет Господь: 39 и будет в последния дни, возвращу плен Еламль, глаголет Господь. === 50 === 1 Слово, еже рече Господь на Вавилон и на землю Халдейскую Иеремиею пророком. 2 Возвестите во языцех и слышано сотворите, воздвигните знамение, возопийте и не скрывайте, рцыте: пленен бысть Вавилон, посрамися Вил, победися Меродах, посрамишася изваяния его, сокрушишася кумиры их. 3 Яко прииде нань язык от севера, той положит землю его в запустение, и не будет живяй в ней от человека даже и до скота: подвигнушася, отидоша. 4 В тыя дни и в то время, глаголет Господь, приидут сынове Израилевы, тии и сынове Иудины вкупе ходяще и плачуще пойдут и Господа Бога своего взыщут. 5 Во Сион испытают стези, тамо бо обративше лица своя приидут и приложатся ко Господу заветом вечным, иже забвению не предастся. 6 Овцы погибшыя быша людие Мои, пастырие их совратиша их и сотвориша я крытися по горам: с горы на холм ходиша. 7 Забыша ложа своего, вси обретающии их снедаху их, и врази их рекоша: не пощадим их, зане согрешиша Господу, пажить правды, собирающему отцев их Господу. 8 Отидите от среды Вавилона и от земли Халдейски изыдите, и будите яко козлища пред овцами. 9 Яко се, Аз воздвигну и приведу на Вавилон собрания языков великих от земли полунощныя, и ополчатся нань: оттуду пленен будет, якоже стрела мужа сильна искусна и возвратится праздна. 10 И будет земля Халдейска в разграбление, вси грабителе ея наполнятся глаголет Господь: 11 зане веселистеся и велеречивасте, расхищающе наследие Мое, скакасте бо яко телцы на траве и бодосте якоже волы. 12 Поругана бысть мати ваша зело, и посрамися родившая вас: се, последняя во языцех пуста и непроходна и суха. 13 От гнева Господня не поживут во век: но будет весь в запустение, и всяк ходяй сквозе Вавилон подивится и позвиждет над всякою язвою Его. 14 Ополчитеся на Вавилон, вси окрестнии наляцающии лук, стреляйте нань, не щадите стрел ваших, понеже пред Господем согреши, 15 возмите его: ослабеша руце его, падоша основания его, сокрушишася забрала его, яко месть Господня есть: отмстите ему, якоже сотвори, сотворите ему: 16 потребите семя от Вавилона, и держащаго серп во время жатвы от лица меча Еллинска, кийждо к людем своим обратится, и кийждо в землю свою убежит. 17 Овча заблуждающее Израиль, львове изнуриша е: первее яде его царь Ассур, сей же последний и кости оглода ему Навуходоносор царь Вавилонский. 18 Сего ради тако глаголет Господь Вседержитель, Бог Израилев: се, Аз посещу на царя Вавилонска и на землю его, якоже посетих на царя Ассурска, 19 и возведу паки Израиля на пажить его, и упасется в Кармиле и Васане, и в горе Ефремли и в Галааде, и насытится душа его. 20 В тыя дни и в той час, глаголет Господь, поищут неправды Израилевы, и не будет, и грехов Иудиных, и не обрящутся: яко милостив буду им оставшымся. 21 На землю владеющих взыди и на живущих в ней посети, разори и убий сущыя по них, глаголет Господь, и сотвори вся, елика заповедаю тебе. 22 Глас брани и сотрение велико в земли Халдейстей. 23 Како сокрушися и сотреся млат всея земли? Како обратися в пустыню Вавилон во языцех? 24 Взыдут на тя, и пленен будеши, и не познаеши, яко Вавилон еси: обретен и ят еси, понеже разгневал еси Господа. 25 Отверзе Господь сокровища Своя и изнесе сосуды гнева Своего, яко дело есть Господу Вседержителю в земли Халдейстей: 26 яко приидоша времена его: отверзите хранилища его и испытайте и, аки вертеп, и погубите его, да не будет останка его. 27 Изсушите вся плоды его, и да снидут в заклание: горе им, яко прииде день их и час отмщения их. 28 Глас бежащих и избегших от земли Вавилонския, да возвестят в Сионе отмщение Господа Бога нашего, отмщение храма Его. 29 Возвестите на Вавилон многим, всем наляцающым лук, ополчитеся нань окрест: да не убежит ни един из него: воздайте ему по делом его, по всему, елика сотвори, сотворите ему, яко воста на Господа Бога Святаго Израилева. 30 Сего ради падут юноши его на стогнах его, и вси мужие воинстии его низвержени будут в той день, глаголет Господь. 31 Се, Аз на тя, горде, глаголет Господь Бог Вседержитель, яко прииде день твой и час посещения твоего: 32 и падет гордыня твоя и разрушится, и не будет возставляяй ю: и возжгу огнь в дубраве его, и пояст вся окрестная его. 33 Тако глаголет Господь Вседержитель: порабощение терпят сынове Израилевы и сынове Иудины, вкупе вси пленившии их поработиша их, не хощут бо отпустити их. 34 Избавитель же их сильный, Господь Вседержитель имя Ему, судом судити имать супостаты своя, яко да избавит землю, и потрясет жительми Вавилонскими. 35 Мечь на Халдеев, глаголет Господь, и на жители Вавилонския, и на князи и на мудрыя его, 36 мечь на обаятели его, и буии будут, и мечь на сильныя его, и ослабеют: 37 мечь на кони его и на колесницы его, и на вся прочыя люди, иже суть посреде его, и будут яко жены: мечь на сокровища его, и расхитятся: 38 мечь на воды его, и постыдятся, яко земля изваянных есть, и во островех хваляхуся. 39 Сего ради поживут мечты во островех, и поживут в нем дщери сиринов, и не будет живуща в нем ктому во веки, ниже соградится от рода в род. 40 Якоже преврати Господь Содома и Гоморра и окрестныя грады их, глаголет Господь, не пребудет тамо муж, ниже поживет в нем сын человечь. 41 Се, людие идут от севера, и язык велик, и царие мнози востанут от конец земли, 42 луки и щиты имуще, грозни суть и немилостиви: глас их яко море возшумит, на кони возсядут, уготовани якоже огнь на брань противу тебе, дщи Вавилоня. 43 Услыша царь Вавилонский слух их, и ослабеша руце его, скорбь объят его и болезни, яко раждающую. 44 Се, яко лев изыдет от рыкания Иорданова на место Ефана, яко скоро отмщу их от него, и всякаго юношу над ним поставлю. Кто бо подобен Мне? И кто может стояти противу Мене? И кто есть пастырь сей, иже воспротивится лицу Моему? 45 Темже слышите совет Господень, егоже совеща на Вавилон, и умышления Его, яже умысли на землю Халдейску: аще не исторгнутся агнцы овец их, аще не будет разметана (вкупе с ними) пажить их. 46 От гласа бо пленения Вавилонскаго потрясется земля, и вопль во языцех слышан будет. === 51 === 1 Тако глаголет Господь: се, Аз воздвигну на Вавилон и на живущыя Халдеи ветр зноен губителный: 2 и послю на Вавилон ругатели, и студно поругаются ему и истлят землю его: понеже горе на Вавилон окрест в день озлобления его. 3 Да наляцает наляцаяй лук свой, и да облечется в броня своя, и не пощадите юнош его, и побийте все воинство его. 4 И падут избиеннии в земли Халдейстей и язвеннии во странах ея. 5 Понеже не овдове Израиль и Иуда от Бога Своего, от Господа Вседержителя, яко земля их наполнися неправды от Святых Израилевых. 6 Бежите от среды Вавилона и спасите кийждо душу свою и не погибнете в неправде его, зане время отмщения его есть от Господа, воздаяние Той воздаст ему. 7 Чаша златая Вавилон в руце Господни, напаяющи всю землю, от вина его пиша (вси) языцы, сего ради потрясошася. 8 Внезапу паде Вавилон и сокрушися: плачите по нем, возмите масти к болезни его, да изцелится. 9 Врачевахом Вавилона, и не изцеле: оставим его и отидем кийждо в землю свою, взыде бо к небеси суд его и воздвижеся даже до звезд. 10 Изнесе Господь суд Свой: приидите и возвестим в Сионе дела Господа Бога нашего. 11 Наострите стрелы, наполните тулы: воздвиже Господь дух царей Мидских, яко противу Вавилона гнев Его, да погубит и, понеже отмщение Господне есть, отмщение людий Его. 12 На стенах Вавилонских воздвигните знамя, поставите стражи, уготовите стражей, уготовите оружие: яко умысли Господь, и сотворит, яже рече на живущыя в Вавилоне, 13 живый над водами многими и богат в сокровищих своих: прииде конец твой истинно во утробы твоя. 14 Клятся бо Господь Сил мышцею Своею, яко наполню тебе людьми, якоже акридами, и возгласят над тобою низходящии. 15 Господь сотворивый землю в силе Своей и устроивый вселенную в мудрости Своей, и разумением Своим распростре небеса, 16 егда Он даст глас, умножатся воды на небеси, воздвизаяй облаки от конец земли, молнию в дождь сотвори, изводяй свет от сокровищ Своих. 17 Обуя всяк человек от разума, посрамися всяк слиятель от изваяний своих, яко ложная слияния его, и несть духа в них: 18 суетна суть дела и смеху достойна, в час посещения своего погибнут. 19 Не такова часть Иаковля, яко Сотворивый всяческая Той есть, (а Израиль) жезл достояния Его, Господь Вседержитель имя Его. 20 Сокрушаеши ты Мне сосуды бранныя, и Аз сокрушу в тебе языки и погублю в тебе царствия: 21 и избию в тебе кони и всадники их, и избию в тебе колесницы и вседающих на них: 22 и избию в тебе мужа и жену, и избию в тебе стара и отрока, и избию в тебе юношу и деву: 23 и избию в тебе пастыря и стада его, и избию в тебе орюща и работна скота его, и избию в тебе воеводы и правители. 24 И воздам Вавилону и всем жителем Халдейским вся злобы их, яже сотвориша над Сионом пред очима вашима, глаголет Господь. 25 Се, Аз на тя, горо смертоносная, глаголет Господь, растлевающая всю землю, и простру руку Мою на тя и извергу тя из каменей, и дам тя в гору сожженую: 26 и не возмут от тебе камене во угл и камене во основание, яко потребишися во веки, глаголет Господь. 27 Воздвигните знамя на земли, вострубите трубою во языцех, освятите нань языки, возвестите нань царствам Араратским от Мене и Асханазеом: утвердите над ним стрельницы, возведите нань кони, яко акридов множество. 28 Возведите нань языки, царя Мидска и всея земли, воевод его и всех воев его и всея земли области его. 29 И потрясеся земля и смутися, зане воста на Вавилон умышление Господне, еже положити землю Вавилонску пусту и ненаселену. 30 Оскудеша крепцыи Вавилонстии еже ратовати: сядут тамо во ограде, погибе храбрость их, и быша яко жены: пожжена суть селения, сотрены заворы его. 31 Гоняй во сретение текуща постигнет, и вестник сретит посла, да возвестит царю Вавилонску, яко взят бысть град его. 32 От края прехождений его яти быша, и твердыни его зажжены огнем, и мужие его воинстии исходят. 33 Тако бо глаголет Господь Вседержитель, Бог Израилев: домове царя Вавилонскаго яко гумно зрело измлачени будут: еще мало, и приидет жатва его. 34 Снеде мя, раздроби мя, прият мя тма тонка, Навуходоносор царь Вавилонский пожре мя, яко змий наполни чрево свое сладостию моею: и извергоша мя. 35 Труды мои и беды моя на Вавилон, речет живущая в Сионе, и кровь моя на живущыя в Халдеех, речет Иерусалим. 36 Сего ради тако глаголет Господь: се, Аз судити буду соперника твоего и отмщу отмщение твое, и пусто сотворю море его и изсушу потоки его. 37 И будет Вавилон в запустение, жилище змием, в чудо и позвиздание, понеже не будет живущаго. 38 Вкупе аки львы востанут и аки скимни львов. 39 В горячести их дам питие им и упою я, да спят и уснут сном вечным и не востанут, глаголет Господь. 40 И низведу я яко агнцы на заклание и яко овны с козлы. 41 Како взяся Сесах, и ята слава всея земли? Како бысть во удивление Вавилон во языцех? 42 Взыде на Вавилон море в шуме волн своих, и покрыся. 43 Быша гради его в запустение, земля безводна и пуста, земля, в нейже никтоже поживет, и ниже будет витати в нем сын человечь. 44 И посещу на Вила в Вавилоне, и извергу то, еже поглоти, от уст его, и не соберутся вящше к нему языцы, зане и стены Вавилонския падут. 45 Изыдите от среды его, людие Мои, да спасет кийждо душу свою от гнева ярости Господни. 46 Да не когда умягчится сердце ваше, и убоитеся ради слуха, иже услышится на земли, и приидет в лето слышание, и по лете слышание, бедность и неправда на землю, и властелин на властелина. 47 Сего ради, се, дние грядут, и посещу на изваяныя Вавилона: и вся земля его посрамится, и вси язвении его падут посреде его. 48 И возвеселятся над Вавилоном небеса и земля и вся сущая в них: от полунощи бо приидут нань всегубителие, глаголет Господь: 49 и якоже сотвори Вавилон падати язвеным во Израили, тако в Вавилоне падут язвении всея земли. 50 Избегшии меча, идите, не стойте: иже издалече, помяните Господа, и Иерусалим да взыдет на сердце ваше. 51 Посрамихомся, зане слышахом ругание наше, покры срамота лице наше, яко приидоша чуждии во святая наша в дом Господень. 52 Сего ради, се, дние грядут глаголет Господь, и посещу на изваяния его, и по всей земли его падут язвении. 53 Яко аще взыдет Вавилон на небо и аще утвердит на высоте крепость свою, от Мене приидут губителие его, глаголет Господь. 54 Глас вопля Вавилонска, и сотрение велико в земли Халдейстей: 55 яко погуби Господь Вавилона и сотре от него глас велий шумящь яко воды многи, даде в пагубу глас его: 56 яко прииде на Вавилон хищник, яти быша сильнии его, увяде лук их, яко Бог воздает им, 57 Господь воздает ему воздаяние: и упоит князи его и мудрыя его, и воеводы его и вои его и сильныя его, и уснут сном вечным и не возбудятся, глаголет Царь, Господь Вседержитель имя Его. 58 Тако глаголет Господь Вседержитель: стена Вавилонска сия преширока, подкопанием подкопана будет, и врата его высока огнем сожжена будут, и будут трудитися людие вотще, и языцы в начале погибнут. 59 Слово, еже заповеда Господь Иеремии пророку, рещи Сарею сыну Нириину, сына Маассеова, егда иде от Седекии царя Иудина в Вавилон, в четвертое лето царства его: Сарей же бе началник даров. 60 И написа Иеремиа вся злая, яже имяху приити на Вавилон, во едину книгу вся словеса сия, яже писана суть на Вавилон. И рече Иеремиа к Сарею: 61 егда внидеши в Вавилон, и узриши и прочтеши вся словеса сия, и речеши: 62 Господи, Ты рекл еси противу места сего погубити е, и да не будет живяй в нем от человека и до скота, и да будет в вечную пустыню: 63 и будет, егда прочтеши книгу сию, привяжи к ней камень и вверзи ю посреде Евфрата и рцы: 64 тако потопится Вавилон и не востанет от лица зол, яже Аз наведу нань, и разорится. Даже до зде словеса Иеремиина. === 52 === 1 Сущу двадесяти и единому лету Седекии, внегда нача царствовати, и царствова во Иерусалиме единонадесять лет: и имя матери его Амиталь, дщи Иеремиина, от Ловны. 2 И сотвори лукавое пред очима Господнима по всему, елико творяше Иоаким: 3 яко ярость Господня бысть на Иерусалим и на Иуду, дондеже отверже их от лица Своего: и отступи Седекиа от царя Вавилонска. 4 И бысть в девятое лето царства его, в десятый месяц, в десятый день месяца, прииде Навуходоносор царь Вавилонский и вся сила его на Иерусалим, и облегоша его и сотвориша окрест его острог от четвероуголных камений. 5 И бысть во облежении град даже до первагонадесяте лета царства Седекиина. 6 Месяца же четвертаго в девятый день, утвердися глад во граде, и не бяше хлеба людем земли. 7 И просекоша град, и вси мужие воинстии изыдоша нощию путем врат, иже есть между двема стенама, иже бяше прямо вертограду цареву, Халдее же добываху град окрест лежаще, и отидоша путем в пустыню. 8 И погна сила Халдейска вслед царя и постиже его об ону страну Иерихона, и вси отроцы его разсыпашася от него. 9 И яша царя и приведоша и ко царю Вавилонскому в Девлаф, иже есть в земли Емаф, и глагола ему с судом. 10 И изсече царь Вавилонский сыны Седекиины пред очима его, и вся князи Иудины изсече в Девлафе. 11 Очи же Седекии изят, и связа его оковами, и приведе его царь Вавилонский в Вавилон и вдаде его в дом жерновный до дне, в оньже умре. 12 В десятый же день пятаго месяца (лето сие девятоенадесять Навуходоносору царю Вавилонску) прииде Навузардан архимагир, стоящь пред лицем царя Вавилонска, во Иерусалим, 13 и сожже храм Господень и дом царев, и вся домы градския и всяк дом велик сожже огнем, 14 и всяку стену Иерусалимлю окрест разори сила Халдейска, яже бяше со архимагиром. 15 И от убогих людий, и останок людий, и оставшихся во граде и избегших, иже убежаша ко царю Вавилонску, и прочий народ пресели Навузардан воевода: 16 прочиих же остави людий убогих в делатели винограда и земледелцев. 17 Столпы же медяныя, иже во храме Господни, и подставы, и море медяное, еже во храме Господни, сокрушиша Халдее, и взяша медь их, и отнесоша в Вавилон: 18 и венец и чашы, и вилицы и вся сосуды медяныя, в нихже служаху, 19 и фимиамники и чашы, и умывалницы и свещники, и кадилницы и чашицы, яже бяху златая и яже бяху сребряная, взя архимагир. 20 И столпа два и море едино, и телцев дванадесять медяных под морем, яже сотвори царь Соломон во храме Господни, не бе веса меди сосуд тех. 21 Столп же кийждо осминадесяти лактей бе в высоту, вервь же дванадесяти лактей окрест его обдержаше, и толстота его четырех перст окрест, 22 и глава на них медяна, пять лакот высота главы единыя, и мрежа, и шипки на венце окрест, все бяше медяно: такожде бысть и вторый столп. 23 И бяше шипков девятьдесят и шесть едина страна, и бяше всех шипков над мрежею окрест сто. 24 И взя архимагир Сареа жерца старейшаго и жерца Софонию втораго и триех стрегущих путь. 25 И от града взя каженика единаго, иже бе приставник людий воинских, и седмь мужей нарочитых, иже пред лицем царевым обретошася во граде, и книгочия сил учащаго людий земли, и шестьдесят мужей от людий земли, иже обретошася среде града: 26 и взя их Навузардан архимагир и приведе я ко царю Вавилонску в Девлаф. 27 И изби я царь Вавилонский в Девлафе в земли Емаф: и преселен бысть Иуда от земли своея. 28 Сии суть людие, ихже пресели Навуходоносор в седмое лето, Иудеев три тысящы и двадесять и три: 29 во осмоенадесять лето Навуходоносор из Иерусалима душ осмь сот тридесять и две пресели. 30 В двадесять третие лето Навуходоносора пресели Навузардан архимагир Иудеев душ седмь сот и четыредесять пять, всех же душ четыре тысящы и шесть сот. 31 И бысть в тридесять седмое лето преселения Иоакима царя Иудина, в двадесять пятый день месяца вторагонадесять, вознесе Евилмеродах царь Вавилонский в первое лето царства своего главу Иоакима царя Иудина, и изведе его из храма, в немже стрежашеся, и глагола ему благая: 32 и даде престол его выше царей, иже с ним, в Вавилоне, 33 и измени ризы его темничныя, и ядяше хлеб всегда пред лицем его во вся дни живота своего: 34 и урок ему даяшеся всегда от царя Вавилонска, даже до дне, в оньже умре, во вся дни живота его. == Книга плач Иеремии == === 1 === И бысть, повнегда в плен отведен бе Израиль, и Иерусалим опустошен бяше, сяде Иеремиа пророк плачущь, и рыдаше рыданием сим над Иерусалимом и глаголаше: 1 Алеф. Како седе един град умноженный людьми: бысть яко вдовица, умноженный во языцех, владяй странами бысть под данию. 2 Беф. Плачя плакася в нощи, и слезы его на ланитех его, и несть утешаяй его от всех любящих его: вси дружащиися с ним отвергошася его, быша ему врази. 3 Гимель. Преселися Иуда ради смирения своего и ради множества работы своея: седе во языцех, не обрете покоя. Вси гонящии его постигнуша и среде стужающих ему. 4 Далеф. Путие Сиони рыдают, яко несть ходящих по них в праздник, вся врата его разорена, жерцы его воздыхают, девицы его ведомы, и сам огорчеваемь в себе. 5 Ге. Быша стужающии ему во главу, и врази его угобзишася, яко Господь смири его за множество нечестия его: младенцы его отидоша пленени пред лицем стужающаго. 6 Вав. И отяся от дщере Сиони вся лепота ея: быша князи ея яко овни не имущии пажити, и хождаху не с крепостию пред лицем гонящаго. 7 Заин. Помяну Иерусалим дни смирения своего и отриновений своих, вся вожделения своя, яже имеяше от дний первых, егда падоша людие его в руце стужающаго, и не бе помагающаго ему: видевше врази его посмеяшася о преселении его. 8 Иф. Грехом согреши Иерусалим, того ради в мятеж бысть: вси славящии его смириша и, видеша бо срам его: сей же стенящь обратися вспять. 9 Теф. Нечистота его пред ногама его, не помяну последних своих и низведеся пречудно: несть утешаяй его. Виждь, Господи, смирение мое, яко возвеличися враг. 10 Иод. Руку свою простре стужаяй на вся вожделенная его, виде бо языки вшедшыя во святыню свою, имже повелел еси не входити во церковь Твою. 11 Каф. Вси людие его воздыхающе ищут хлеба: даша вожделенная своя за пищу, еже бы обратити душу. Виждь, Господи, и призри, яко бых безчестен. 12 Ламед. Вси, иже к вам проходящии путем, обратитеся и видите, аще есть болезнь, яко болезнь моя, яже бысть: глаголавый о мне смири мя Господь в день гнева ярости Своея. 13 Мем. С высоты Своея посла огнь, в кости моя сведе его: простре сеть ногама моима, обрати мя вспять, даде мя Господь в погубление, весь день болезнующа. 14 Нун. Бдяше на нечестия моя, в руку моею сплетошася: взыдоша на выю мою, изнеможе крепость моя, яко даде Господь в руце мои болезни, не возмогу стати. 15 Самех. Отя вся крепкия моя Господь от среды мене, призва на мя время, еже сокрушити избранныя моя: точило истопта Господь девице, дщери Иудине: о сих аз плачу. 16 Аин. Очи мои излиясте воду, яко удалися от мене утешаяй мя, возвращаяй душу мою: погибоша сынове мои, яко возможе враг. 17 Фи. Возде руце свои Сион, несть утешаяй его. Заповеда Господь на Иакова, окрест его врази его: бысть Иерусалим яко осквернена кровоточением в них. 18 Цади. Праведен есть Господь, яко уста Его огорчих. Слышите убо, вси людие, и видите болезнь мою: девицы моя и юноты отидоша в плен. 19 Коф. Позвах любители моя, и тии прельстиша мя: жерцы мои и старцы мои во граде оскудеша, яко взыскаша пищи себе, да укрепят душы своя, и не обретоша. 20 Реш. Виждь, Господи, яко скорблю, утроба моя смятеся во мне, и превратися сердце мое, яко горести исполнихся: отвне обезчади мене мечь, аки смерть в дому. 21 Шин. Слышаша убо, яко воздыхаю аз, несть утешающаго мя. Вси врази мои слышаша злая моя и порадовашася, яко Ты сотворил еси: привел еси день, призвал еси время, и будут подобни мне. 22 Фав. Да приидет вся злоба их пред лице Твое, и отреби их, якоже сотвориша отребление о всех гресех моих, яко многа суть стенания моя, и сердце мое скорбит. === 2 === 1 Алеф. Како омрачи во гневе Своем Господь дщерь Сионю: сверже с небесе на землю славу Израилеву, и не помяну подножия ногу Своею в день гнева и ярости Своея. 2 Беф. Погрузи Господь и не пощаде: вся красная Иаковля разори яростию Своею, твердыни дщере Иудины изверже на землю, оскверни царя ея и князи ея, 3 гимель. Сокруши во гневе ярости Своея весь рог Израилев, обрати вспять десницу его от лица врага, разжже во Иакове яко огнь пламы, и потреби вся окрест, 4 далеф. Напряже лук Свой яко ратник противный, утверди десницу Свою яко супостат и изби вся красная очию моею во селениих дщере Сиони, излия яко огнь ярость Свою. 5 Ге. Бысть Господь аки враг, погрузи Израиля, погрузи вся домы его, разсыпа вся стены его и умножи дщери Иудине смирена и смирену, 6 вав. И разверзе аки виноград селение Свое, разсыпа праздники Его: забы Господь, яже сотвори в Сионе праздники и субботы, и озлоби прещением гнева Своего царя и князя и жерца. 7 Заин. Отрину Господь жертвенник Свой, оттрясе святыню Свою, сокруши рукою вражиею стену забралов его: глас даша в дому Господни яко в день праздника. 8 Иф. Обратися Господь разсыпати стену дщере Сиони: протяже меру, не отврати руки Своея от попрания: и сетова предградие, и ограда вкупе изнеможе. 9 Теф. Врастоша в землю врата ея, погуби и сокруши вереи ея, царя ея и князи ея во языцех, несть закона, и пророцы ея не видеша видения от Господа. 10 Иод. Седоша на земли, умолкоша старейшины дщере Сиони, посыпаша персть на главы своя, препоясашася во вретища, низведоша в землю старейшин дев Иерусалимских. 11 Каф. Оскудеша очи мои в слезах, смутися сердце мое, излияся на землю слава моя о сокрушении дщере людий моих, внегда оскуде младенец и ссущий на стогнах градских. 12 Ламед. Матерем своим рекоша: где пшеница и вино? Внегда разслабленым быти им, яко язвеным на стогнах градских, егда изливахуся души их в лоно матерей их. 13 Мем. Что ти засвидетелствую? Или что уподоблю тебе, дщи Иерусалимля? Кто тя спасет и кто тя утешит, девице, дщи Сионя? Яко возвеличися чаша сокрушения твоего, кто тя изцелит? 14 Нун. Пророцы твои видеша тебе суетная и безумие и не открыша о неправде твоей, еже возвратити пленение твое, и видеша тебе словеса суетная и изриновения. 15 Самех. Восплескаша рукама о тебе вси минующии путем, позвиздаша и покиваша главою своею о дщери Иерусалимли, рекуще: сей ли град, венец славы, веселие всея земли? 16 Аин. Отверзоша на тя уста своя вси врази твои, позвиздаша и поскрежеташа зубы своими и реша: поглотим ю: обаче сей день, егоже чаяхом, обретохом его, видехом. 17 Фи. Сотвори Господь, яже помысли, сконча словеса Своя, яже заповеда от дний первых: разори и не пощаде, и возвесели о тебе врага, вознесе рог стужающаго ти. 18 Цади. Возопи сердце их ко Господу, стены дщере Сиони да излиют якоже водотеча слезы день и нощь: не даждь покоя себе, и да не умолкнет зеница очию твоею. 19 Коф. Востани, поучися в нощи в начале стражбы твоея, пролий яко воду сердце твое пред лицем Господним, воздвигни к Нему руце твои о душах младенец твоих, разслабленых гладом в начале всех исходов. 20 Реш. Виждь, Господи, и призри, кого еси отребил сице? Еда снедят жены плод утробы своея? Отребление сотвори повар, избиют ли младенцев ссущих сосцы? Убиеши ли во святыни Господни жерца и пророка? 21 Шин. Успоша на исходищих отрок и старец: девицы моя и юноты мои отидоша в плен, мечем и гладом избил еси, в день гнева Твоего сварил еси, не пощадел. 22 Фав. Призвал еси яко день праздника пришелствия моя окрест, и не бысть в день гнева Господня уцелевый и оставыйся, яко сотворих возмощи и умножих враги моя вся. === 3 === 1 Алеф. Аз муж видя нищету (мою) в жезле ярости Его на мя: 2 поят мя и отведе мя во тму, а не во свет. 3 Обаче на мя обрати руку Свою весь день, 4 беф. Обетши плоть мою и кожу мою, кости моя сокруши: 5 согради на мя и объя главу мою и утруди, 6 в темных посади мя, якоже мертвыя века: 7 гимель. Согради на мя, и не изыду, отяготи оковы моя, 8 и егда воскричу и возопию, загради молитву мою: 9 возгради пути моя, загради стези моя, возмяте. 10 Далеф. Бысть яко медведь ловяй, (приседяй ми) яко лев в сокровенных, 11 гна отступившаго, и упокои мя, положи мя погибша: 12 напряже лук Свои, и постави мя яко знамение на стреляние, 13 ге. Пусти в лядвия моя стрелы тула Своего. 14 Бых в смех всем людем моим, песнь их весь день. 15 Насыти мя горести, напои мя желчи 16 вав. И изя каменем зубы моя, напита мя пепелом 17 и отрину от мира душу мою. Забых благоты 18 и рех: погибе победа моя и надежда моя от Господа. 19 Заин. Помяни нищету мою и гонение мое. 20 Горесть и желчь мою помяну, и стужит во мне душа моя. 21 Сия положу в сердцы моем, сего ради потерплю. 22 Иф. Милость Господня, яко не остави мене, не скончашася бо щедроты Его: пребываяй во утриих, помилуй, Господи, яко не погибохом, не скончашася бо щедроты Твоя. 23 Новая во утриих, многа есть вера Твоя. 24 Часть моя Господь, рече душа моя: сего ради пожду Его. 25 Теф. Благ Господь надеющымся Нань: 26 души ищущей Его благо (есть), и надеющейся с молчанием спасения Божия. 27 Благо есть мужу, егда возмет ярем в юности своей: 28 иод. Сядет на едине и умолкнет, яко воздвигну на ся: 29 положит во прахе уста своя, негли како будет надежда: 30 подаст ланиту свою биющему, насытится укоризн. 31 Каф. Яко не во век отринет Господь, 32 яко смиривый помилует по множеству милости Своея, 33 не отрину от сердца Своего и смири сыны мужеския. 34 Ламед. Еже смирити под нозе его вся узники земныя, 35 еже уклонити суд мужа пред лицем Вышняго, 36 осудити человека, внегда судитися ему, Господь не рече. 37 Мем. Кто есть той, иже рече, и быти, Господу не повелевшу? 38 Из уст Вышняго не изыдет зло и добро. 39 Что возропщет человек живущь, муж о гресе своем? 40 Нун. Изыскася путь наш и испытася, и обратимся ко Господу. 41 Воздвигнем сердца наша с руками к Богу высокому на небеси. 42 Мы согрешихом и нечествовахом, сего ради не помиловал еси: 43 самех. Покрыл еси яростию и отгнал еси нас, убил и не пощадел еси: 44 покрылся еси облаком, да не дойдет к Тебе молитва, 45 сомжити очи мои и отринути, положил еси нас посреде людий. 46 Аин. Отверзоша на ны уста своя вси врази наши. 47 Страх и ужас бысть нам, надмение и сокрушение: 48 исходища водная излиет око мое о сокрушении дщере людий моих. 49 Фи. Око мое погрязну: и не умолкну, еже не быти ослаблению, 50 дондеже приклонится и увидит Господь с небесе. 51 Око мое закрывается о души моей, паче всех дщерей града. 52 Цади. Ловяще уловиша мя яко врабия врази мои туне: 53 умориша в рове жизнь мою и возложиша на мя камень. 54 Возлияся вода выше главы моея: рех: отриновен есмь. 55 Коф. Призвах имя Твое, Господи, из рова преисподняго: 56 глас мой услышал еси: не покрый ушес Твоих на мольбу мою: 57 на помощь мою приближился еси, в день, в оньже призвах Тя, рекл ми еси: не бойся. 58 Реш. Судил еси, Господи, прю души моея, избавил еси жизнь мою: 59 видел еси, Господи, смятения моя, разсудил еси суд мой: 60 веси все отмщение их и вся помышления их на мя. 61 Шин. Слышал еси укоризны их, вся советы их на мя, 62 устне востающих на мя и поучение их на мя весь день, 63 седение их и востание их: призри на очи их. 64 Фав. Воздаси им, Господи, воздаяние по делом руку их: 65 воздаси им заступление, сердца моего труд. 66 Ты их проженеши во гневе и потребиши их под небесем, Господи. === 4 === 1 Алеф. Како потемне злато, изменися сребро доброе: разсыпашася камыцы святыни в начале всех исходов. 2 Беф. Сынове Сиони честнии, одеянии златом чистым, како вменишася в сосуды глиняны, дела рук скудельничих. 3 Гимель. Еще же змиеве обнажиша сосцы, воздоиша скимни их дщерей людий моих в неизцеление, якоже птица во пустыни. 4 Далеф. Прильпе язык ссущаго к гортани его в жажди, младенцы просиша хлеба, и несть им разломляющаго. 5 Ге. Ядуще сладостная погибоша во исходех, питаемии на багряницах одеяшася в гной. 6 Вав. И возвеличися беззаконие дщере людий моих паче беззакония Содомска, превращенныя во окомгновении, и не поболеша о ней руками. 7 Заин. Очистишася назорее ея паче снега и просветишася паче млека, чермни быша, паче камене сапфира усечение их. 8 Иф. Потемне паче сажи вид их, не познани быша во исходех: прильпе кожа их костем их, изсхоша, быша яко древо. 9 Теф. Лучше быша язвении мечем, нежели погублени гладом: сии бо истлеша от неплодности земли. 10 Иод. Руце жен милосердых свариша дети своя, быша в ядь им, в сокрушении дщере людий моих. 11 Каф. Сконча Господь ярость Свою, излия ярость гнева Своего и возжже огнь в Сионе, и пояде основания его. 12 Ламед. Не вероваша царие земстии и вси живущии во вселенней, яко внидет враг и стужаяй сквозе врата Иерусалимская, 13 мем. Ради грех пророков его и неправд жерцев его, проливающих кровь праведну посреде его. 14 Нун. Поколебашася бодрии его на стогнах, осквернишася в крови, внегда немощи им, прикоснушася одежд своих. 15 Самех. Отступите от нечистых, призовите их: отступите, отступите, не прикасайтеся, яко возжгошася и восколебашася: рцыте во языцех: не приложат, еже обитати (с ними). 16 Аин. Лице Господне часть их, не приложит призрети на них: лица жреческа не устыдешася, старых не помиловаша. 17 Фи. Еще сущым нам оскудеша очи наши, на помощь нашу всуе смотрящым нам, внегда надеяхомся на язык не спасающь. 18 Цади. Уловиша малых наших еже не ходити на стогнах наших, приближися время наше, исполнишася дние наши, настоит конец наш. 19 Коф. Скорейшии быша гонящии ны паче орлов небесных, на горах гоняху нас, в пустыни приседоша нам. 20 Реш. Дух лица нашего, помазанный Господь ят бысть в растлениих их, о немже рехом: в сени его поживем во языцех. 21 Шин. Радуйся и веселися, дщи Идумейска, живущая на земли, и на тебе приидет чаша Господня, и упиешися и излиеши. 22 Фав. Скончася беззаконие твое, дщи Сионя, не приложит ктому преселити тя: посетил есть беззакония твоя, дщи Едомля, откры нечестия твоя. === 5 === 1 Молитва Иеремии пророка. Помяни, Господи, что бысть нам: призри и виждь укоризну нашу: 2 достояние наше обратися к чуждим и домы нашя ко иноплеменником: 3 сири быхом, несть отца, матери нашя яко вдовы. 4 Воду нашу за сребро пихом, дрова наша за цену куповахом: 5 на выя нашя гоними быхом, трудихомся, не почихом. 6 Египет даде руку, Ассур в насыщение их. 7 Отцы наши согрешиша, и несть их, мы же беззакония их подяхом. 8 Раби обладаша нами, избавляющаго несть от руку их. 9 В душах наших носихом хлеб наш, от лица меча в пустыни. 10 Кожа наша аки пещь обгоре, разседошася от лица бурей глада. 11 Жен в Сионе смириша, девиц во градех Иудиных. 12 Князи в руках их повешени быша, старейшины не прославишася. 13 Избраннии плачь подяша, и юноши в кладе изнемогоша. 14 И старцы от врат оскудеша, избраннии от песней своих умолкоша. 15 Разсыпася радость сердец наших, обратися в плачь лик наш, 16 спаде венец со главы нашея: горе нам, яко согрешихом. 17 О сем смутися сердце наше, о сем померкнуша очи наши. 18 На горе Сионе, яко погибе, лисицы ходиша. 19 Ты же, Господи, во веки вселишися, престол Твой в род и род. 20 Вскую во веки забываеши нас, оставиши ли нас в продолжение дний? 21 Обрати ны, Господи, к Тебе, и обратимся, и вознови дни нашя якоже прежде. 22 Яко отревая отринул еси нас, разгневался еси на ны зело. == Послание Иеремии == === 1 === 1 Списание послания ко отводимым пленником в Вавилон от царя Вавилонскаго, еже посла Иеремиа, возвестити им, якоже повелено бысть ему от Бога. 2 Грех ради, имиже согрешисте пред Богом, отведетеся в Вавилон пленени Навуходоносором царем Вавилонским. 3 Вшедше убо в Вавилон, будете тамо лета многа и время долго, до седми родов: потом же изведу вас оттуду с миром. 4 Ныне же узрите в Вавилоне боги сребряны и златы, и каменны и древяны на раменах носимы, показующыя страх языком. 5 Блюдитеся убо, да не и вы иноплеменником уподобитеся, и страх приимет вас от них: видевше народ напреди и созади их кланяющься им, рцыте убо во уме: Тебе лепо есть кланятися, Владыко! 6 Ангел бо Мой с вами есть, сей взыскует душ ваших. 7 Язык бо их изстроган есть древоделею, тии же позлащени и посребрени, лживи же суть и не могут глаголати, 8 и якоже девице красотолюбивей вземлюще злато, устрояют венцы на главы богов своих. 9 Темже украдают от них жерцы злато и сребро и себе употребляют. 10 Дадят же от них и блудницам сущым в дому, а боги украшают аки человеков ризами, боги златыя и сребряныя и древяныя. 11 Тии же не уцелеют от ржи и молия, одеют же я в багряницу. 12 Отирают лица им праха ради, иже от храма, иже есть множайший на них. 13 И скипетр имут, яко человек и яко судия страны, иже согрешающаго к себе не убиет. 14 Имать же и мечь в деснице и секиру, сам же себе от рати и от разбойник не отимет: отсюду знаеми суть, яко не суть бози: не убойтеся убо их. 15 Якоже бо сосуд человеческ сокрушен непотребен бывает, 16 тацы суть бози их: егда же поставлени будут в домех, очи их полны суть праха от ногу входящих. 17 И якоже кому преобидевшу царя, заключени бывают дворы, или яко на смерть отводиму, храмы их утверждают жерцы дверьми и замками и заворами, да от разбойник окрадени не будут. 18 Светила жгут им, и множае неже себе, от нихже ни едино могут видети. 19 Суть убо яко бервна в дому, сердца же их точат черви, иже от земли, и одежду их, они же не чувствуют сего. 20 Очернело есть лице их от дыма храмины: 21 по телесем их и по главе парят нетопыри нощнии, и ластовицы и птицы, такожде и котки (скачут). 22 От того увесте, яко не суть бози не убойтеся убо их. 23 Злато бо лежащее на них на красу, аще не очистит кто от ржи, не возблистают: егда бо сливаху их, не чувствоваша. 24 За всяку цену куплени суть, в нихже несть духа. 25 Без ног на рамех носятся, являюще свое безчестие человеком, осрамляются же и служащии им: 26 занеже, егда когда падутся на землю, и не могут сами востати: и аще кто поставит я прямо, не могут поступити, и аще преклонятся, не могут исправити себе, но яко мертвецем дары им полагают. 27 Требы же их продающе жерцы на зло употребляют: такожде и жены их варят от них, ни единому же убогу, ни немощну подают: 28 треб их нечистыя и кровоточныя жены прикасаются. Уразумевше убо от сих, яко не суть бози, не бойтеся их. 29 Откуду бо прозовутся бози, яко жены служат богом сребряным и златым и древяным? 30 И во храмех их жерцы седают, имуще ризы растерзаны и главы и брады обриты, ихже главы не покровены суть: 31 ревут же вопиюще пред боги своими, якоже нецыи на вечери мертвеца. 32 От риз их вземлюще жерцы, одевают жены своя и дети. 33 И аще от кого зло постраждут или добро, не могут отдати: ни царя могут поставити, ни отяти: 34 такожде ни богатства ни меди могут дати. Аще кто им что обещав не отдаст, не воспросят. 35 От смерти человека не избавят, ни менша от крепка не отимут: 36 человека слепа к видению не навратят, в нужди человеку не помогут, 37 вдовы не помилуют и сироте добра не сотворят. 38 Подобни суть камению нагорному бози их древяни и каменни, и позлащени и посребрени, служащии же им посрамятся. 39 Како убо мощно мнети или прозвати я богами? 40 Ктому же и сами тии Халдее не чтут их: иже егда узрят нема не могуща глаголати, приносят его к Вилу, емуже молятся, да глаголет, аки сильну сущу почути. 41 И не могут тии разумевше сие оставити я, чувства бо не имут. 42 Жены же обложены ужами на распутиих седят, кадящя отребы. 43 Егда же которая от них привлечена от некоего мимоходяща будет с ним, ближнюю укаряет, яко не сподобилася якоже и она, ни уже ея преторгнулося. 44 Вся бываемая в них лжива суть: како убо мощно мнети или прозывати я богами быти? 45 Древоделями и златари сотворени суть: ничтоже ино бывают, но еже хотят художницы, то бывают. 46 И сами, иже их творят, не бывают долговечни. 47 Како убо сотворенная ими могут быти бози? Оставиша бо по себе лжу и укоризну потом будущым: 48 егда бо приидет на них рать и злая, совещавают между собою жерцы, где скрыются с ними. 49 Како убо несть чувствовати, яко не суть бози, иже не избавляют себе от рати, ни от зла? 50 Древяни суще и каменни, и позлащени и посребрени, познаются потом языком всем, яко лжа суть: и царем явни будут, яко не суть бози, но дела рук человеческих, и ни едино дело Божие в них есть: 51 кому убо несть разумно, яко не суть бози? 52 Царя бо стране не поставляют, ни дождя человеком подают, 53 ни суда разсудят и не избавят от обиды, немощни суще: 54 якоже бо враны между небом и землею суть: и егда падет огнь на храме богов древяных или каменных, или позлащеных или посребреных, жерцы их избегнут и уцелеют, они же яко бервна посреде сгорят. 55 Царю же и ратным не станут противу: убо како мощно мнети или прияти, яко бози суть? 56 Ни от разбойник, ни от татей избавят себе бози древяни и каменни, и посребрени и позлащени. 57 Ухже преодолевше и вземше злато и сребро и ризы их, отидут, ниже сами себе помогут. 58 Темже лучше есть царь показуяй свое мужество, или сосуд в дому потребен, егоже употребляет владяй им, нежели лживии бози: или дверь в дому стрегущи яже в нем, нежели лживии бози: и древяный столп в дому царстем, нежели лживии бози. 59 Солнце бо и луна и звезды, светлы суще и посылаемы на потребу, благопослушливы суть. 60 Такожде и молния, егда блистает, благовидна есть: такожде и ветр во всей стране веет. 61 И облаком егда повелится от Бога ити на всю вселенную, совершают повеленное. 62 Огнь же пущен свыше истребити горы и дубравы творит повеленное: сии же ни образом, ниже силам их уподоблени суть. 63 Темже ни мнети мощно, ни прозывати их быти боги, не сильным им сущым ни прю разсудити, ни добра сотворити человеком. 64 Разумевше убо, яко не суть бози, не бойтеся их. 65 Ни царей бо прокленут, ниже благословят. 66 Знамения же на небеси и во языцех не покажут: ни просветят яко солнце, ни осветят яко луна. 67 Зверие лучше их суть, иже могут, избеге под кров, себе пользовати. 68 Ни единым убо образом есть нам яве, яко суть бози: темже не бойтеся их. 69 Якоже бо во овощнице пужало ничесоже хранит, такожде и бози их суть древяни и каменни, и посребрени и позлащени. 70 Тем же образом и хвраст, иже во ограде, на немже вся птицы седают: такожде и мертвецу повержену во тме подобни суть бози их, древяни, позлащени и посребрени. 71 От багряницы, (в нюже одеяни,) и от мрамора, иже на них плеснивеет, познайте, яко не суть бози: тии бо последи изядени будут от червия и будут во укоризну во стране. 72 Лучше убо есть человек праведен не имеяй кумиров, будет бо далече от укоризны. == Книга пророка Варуха == === 1 === 1 Сия словеса книги, юже написа Варух сын Нириин, сына Маасеева, сына Седекиина, сына Асадеева, сына Хелкиина в Вавилоне, 2 в пятое лето, в седмый день месяца, во время, в неже взяша Халдее Иерусалим и пожгоша его огнем. 3 И прочте Варух словеса книги сея во ушы Иехонии сына Иоакима царя Иудина и во ушы всех людий приходящих ко книзе, 4 и во ушы сильных и сынов царских и во ушы старейшин, и во ушы всех людий от мала и до велика их, всех живущих в Вавилоне при реце Суд. 5 И плакахуся, и постяхуся, и моляхуся молитвами пред Господем, 6 и собраша сребро, якоже когождо можаше рука, 7 и послаша во Иерусалим ко Иоакиму жерцу великому, сыну Хелкиину сына Саломля и ко жерцем и ко всем людем, иже обретошася с ним во Иерусалиме, 8 внегда взя сосуды храма Господня изнесеныя от храма возвратити на землю Иудину, в десятый день месяца Сиван, сосуды сребряны, яже сотвори Седекиа сын Иосиин царь Иудин, 9 повнегда пресели Навуходоносор царь Вавилонский Иехонию и князи, и узники и сильныя и люди земли от Иерусалима, и введе я (связаны) в Вавилон. 10 И рекоша: се, послахом к вам сребро, да купите на сребре всесожжения за грех и фимиам, и сотворите жертву и вознесите на жертвенник Господа Бога нашего, 11 и молитеся за житие Навуходоносора царя Вавилонскаго и за житие Валтасара сына его, да будут дние их, якоже дние небеснии, на земли. 12 И да даст Господь крепость нам и да просветит очи наши, и да живем под сению Навуходоносора царя Вавилонска и под сению Валтасара сына его, да работаем им дни многи и обрящем благодать пред ними. 13 И молитеся за нас ко Господеви Богу нашему, яко согрешихом Господеви Богу нашему, и не отвратися ярость Господня и гнев Его от нас до сего дне. 14 И прочтите книгу сию, юже послахом к вам, исповедати в дому Господни в день праздника, во дни годовыя, 15 и да речете: Господу Богу нашему правда, а нам стыдение лиц, якоже день сей, человеку Иудину и живущым во Иерусалиме, 16 и царем нашым и князем нашым, и жерцем нашым и пророком нашым и отцем нашым: 17 понеже согрешихом пред Господем 18 и не покорихомся Ему и не послушахом гласа Господа Бога нашего ходити в повелениих Его, яже даде пред лицем нашим. 19 От дне, в оньже изведе Господь отцы нашя от земли Египетски, и до сего дне бехом не покаряющеся Господеви Богу нашему и отметахомся, еже не послушати гласа Его. 20 И прильпе к нам зло и клятва, юже сочини Господь Моисею отроку Своему в день, в оньже изведе Господь отцы нашя от земли Египетския, дати нам землю кипящую млеком и медом, якоже день сей. 21 И не послушахом гласа Господа Бога нашего по всем словесем пророческим, яже посла к нам, 22 и хождахом кийждо нас по разуму сердца своего злаго работати богом инем, творити злая пред очима Господа Бога нашего. === 2 === 1 И устави Господь слово Свое, еже глагола на нас и на судий наших, судивших во Израили, и на цари нашя и на князи нашя, и на всякаго человека Израилева и Иудина, 2 навести на ны зло велие, еже не сотворися под всем небесем, якоже сотворися во Иерусалиме, по писанным в законе Моисеове, 3 еже ясти нам плоть человеческу сына своего и плоть человеческу дщере своея. 4 И даде я подручны всем царствам, яже окрест нас, на укоризну и в непрохождение во всех людех, иже окрест нас, аможе их разсея Господь. 5 И быхом во исподи, а не в верху, яко согрешихом Господеви Богу нашему, не слушающе гласа Его. 6 Господеви Богу нашему правда, нам же и отцем нашым стыдение лиц, якоже день сей. 7 Иже глагола Господь на нас вся злая, сия приидоша на ны, 8 зане не молихомся лицу Господню, еже отвратитися комуждо от мыслей сердца своего злаго. 9 И убудися Господь о злобах и наведе на нас сия, (яже постигоша ны,) яко праведен Господь во всех делех Своих, яже заповеда нам. 10 И не послушахом гласа Его ходити в повелениих Его, яже даде пред лицем нашим. 11 И ныне, Господи Боже Израилев, иже извел еси люди Твоя из земли Египетския рукою крепкою и мышцею высокою, знамении и чудесы и силою великою, и сотворил еси Себе имя, якоже день сей, 12 согрешихом, нечествовахом, неправдовахом, Господи Боже наш, во всех оправданиих Твоих. 13 Да отвратится убо от нас ярость Твоя, яко остася нас мало во языцех, аможе разсеял ны еси. 14 Услыши, Господи, молитву нашу и прошение наше, и избави нас Тебе ради, и даждь нам благодать пред лицем преселивших нас: 15 да увесть вся земля, яко Ты Господь Бог наш, и яко имя Твое призвася на Израили и на племени его. 16 Господи, призри из дому святаго Твоего на нас и вонми нам, и приклони ухо Твое и услыши нас. 17 Отверзи, Господи, очи Твои и виждь, яко не умершии, иже во аде, ихже взяся дух их от утроб их, воздадят Тебе славу и оправдание Господеви: 18 но душа сетующая о величестве зла, иже ходит слячен и боляй, и очи оскудевающии, и душа алчущая воздадят Тебе славу и правду, Господи! 19 Яко не по оправданием отец наших, ни царей наших (изливаем молитвы) мы, и предлагаем молитвы нашя пред лицем Твоим, Господи Боже наш! 20 Яко послал еси ярость Твою и гнев Твой на нас, якоже глаголал еси рукою отрок Твоих пророк, глаголя: 21 тако рече Господь: приклоните рамена ваша и послужите царю Вавилонскому, и седите на земли, юже дах отцем вашым: 22 и аще не послушаете гласа Господня, еже работати царю Вавилонску, оскудение сотворю из градов Иудиных и внеуду Иерусалима, 23 и отиму (от вас) глас веселия и глас радования, глас жениха и глас невесты, и будет вся земля в непрохождение от живущих. 24 И не послушахом гласа Твоего служити царю Вавилонску: и уставил еси словеса Твоя, яже глаголал еси рукою отрок Твоих пророков, еже изнести кости царей наших и кости отец наших от места их. 25 И се, суть извержены зною дневному и студени нощней, и изомроша болезньми злыми, гладом и мечем и затчением. 26 И положил еси дом Твой, в немже наречеся имя Твое, якоже день сей, злобы ради дому Израилева и дому Иудина. 27 И сотворил еси в нас, Господи Боже наш, по всей тихости Твоей и по всем щедротам Твоим великим, 28 якоже глаголал еси рукою раба Твоего Моисеа в день, в оньже заповедал еси ему вписати закон Твой пред сыны Израилевыми, глаголя: 29 аще не послушаете гласа Моего, множество сие великое и многое обратится в мал язык во языцех, аможе Аз разсею я: 30 разумех бо, яко не имут послушати Мене, яко людие жестоковыйни суть, и обратятся к сердцу своему на земли преселения своего, 31 и уведят, яко Аз Господь Бог их: и дам им сердце, (и уразумеют,) и ушы, и услышат, 32 и похвалят Мя на земли преселения своего, и помянут имя Мое, 33 и обратятся от хребта своего жестокаго и от злоб своих, яко помянут путь отец своих согрешивших пред Господем: 34 и возвращу я на землю, еюже кляхся отцем их, Аврааму и Исааку и Иакову, и возобладают ею: и умножу я, и не умалятся: 35 и уставлю им завет вечен, еже быти Мне им в Бога, и тии будут Мне людие: и не подвигну ктому людий Моих Израиля и земли, юже дах им. === 3 === 1 Господи Вседержителю, Боже Израилев, душа в тесноте и дух в стужении возопи к Тебе: 2 услыши, Господи, и помилуй, яко еси Бог милосерд, и помилуй нас, яко согрешихом пред Тобою: 3 яко Ты пребываяй во век, мы же погибающии во век. 4 Господи Вседержителю, Боже Израилев, услыши молитву умерших Израилевых и сынов согрешивших пред Тобою, иже не послушаша гласа Господа Бога своего, и прильпоша нам злая. 5 Не помяни неправд отец наших, но помяни руку Твою и имя Твое в сие время, 6 яко Ты Господь Бог наш, и похвалим Тя, Господи: 7 яко того ради дал еси страх Твой в сердце наше, еже призывати имя Твое, и похвалим Тя во преселении нашем, яко отвратихом от сердца нашего всю неправду отец наших согрешивших пред Тобою. 8 Се, мы днесь во преселении нашем, аможе ны разсыпал еси на укоризну и на клятву и на удержание, по всем неправдам отец наших, иже отступиша от Тебе, Господи Боже наш. 9 Слыши, Израилю, заповеди живота, внуши разумети смышление. 10 Что есть, Израилю? Что яко еси на земли вражии? Обетшал еси на земли чуждей, осквернился еси с мертвыми, 11 вменился еси с сущими во аде, 12 оставил еси источника премудрости. 13 Аще бы путем Божиим ходил еси, жил бы в мире во время вечное. 14 Научися, где есть смышление, где есть крепость, где есть мудрость? Еже разумети купно, где есть долгожитие и жизнь, где есть свет очес и мир? 15 Кто обрете место ея, и кто вниде в сокровища ея? 16 Где суть князи язычестии и владеющии зверьми сущими на земли, играющии птицами небесными 17 и хранящии злато и сребро, на неже уповаша человецы, и несть конца стяжанию их? 18 Яко делающии сребро и пекущиися, и несть изобретения дел их. 19 Погибоша и во ад снидоша, и инии вместо их восташа. 20 Юнейшии видеша свет и вселишася на земли, пути же хитрости не уведеша, 21 ни разумеша стезь ея, ниже прияша ея сынове их, от пути своего далече быша. 22 И не слышася в Ханаане, ниже явися во Фемане: 23 сынове Агарини взыскующии разума, иже на земли, купцы Мерани и Фемани, и баснословцы и взыскателие разума, пути премудрости не уведеша, ниже помянуша стезь ея. 24 О, Израилю, коль велик дом Божий и пространно место селения его! 25 Велико и не имать конца, высоко и безмерно. 26 Тамо быша исполини именитии, бывшии исперва зело велицы, умеюще воевати. 27 Не сих избра Бог, ни пути хитростнаго даде им, 28 и погибоша, занеже не имеша мудрости, погибоша за безсоветие свое. 29 Кто взыде на небо, и взя ю, и снесе ю от облак? 30 Кто прейде на ону страну моря, и обрете ю, и возмет ю за злато избранно? 31 Несть ведущаго путь ея, ни помышляющаго стезь ея: 32 но Ведый вся весть ю, изобрете ю смыслом Своим: Сотворивый землю в вечное время наполни ю скотом двоножным и четвероножным. 33 Посылаяй свет, и идет: призва его, и послуша Его со трепетом. 34 Звезды же возсияша во хранилищих своих и возвеселишася. 35 Призва я, и рекоша: приидохом: возсияша с веселием Сотворшему я. 36 Сей Бог наш, не вменится ин к Нему. 37 Изобрете всяк путь хитрости и даде ю Иакову отроку Своему и Израилю возлюбленному от Него. 38 Посем на земли явися и с человеки поживе. === 4 === 1 Сия книга повелений Божиих и закон сый во век: вси держащиися ея в живот (внидут), оставившии же ю умрут. 2 Обратися, Иакове, и имися ея, ходи ко сиянию прямо света ея. 3 Не даждь иному славы твоея, и полезных тебе языку чуждему. 4 Блажени есмы, Израилю, яко угодная Богу нам разумна суть. 5 Дерзайте, людие мои, память Израилева. 6 Продани бысте языком не на пагубу: понеже разгневасте Бога, предани бысте супостатом, 7 преогорчисте бо Сотворшаго вас, (Бога вечнаго,) пожерше бесом, а не Богу: 8 забысте бо Господа питающаго вас, опечалисте же и воспитавшаго вас Иерусалима. 9 Виде бо нашедший вам гнев от Бога и рече: слышите, приселницы Сиони, наведе бо ми Господь сетование велико, 10 видех бо пленение людий сынов моих и дщерей, еже наведе им Вечный. 11 Питах бо я с веселием, испустих же я с плачем и рыданием. 12 Никтоже да радуется о мне вдовице и оставленней от многих, опустех за грехи чад моих, понеже уклонишася от закона Божия, 13 и оправданий Его не познаша, и не ходиша в путех заповедий Божиих, ниже стезьми наказания в правде Его ступаша. 14 Да приидут окрестнии Сиони, и помяните пленение сынов моих и дщерей, еже наведе им Вечный: 15 наведе бо на ня язык издалеча, язык безстудный и иноязычный: 16 понеже не усрамишася старца, ни помиловаша отрочате, и отведоша любезных вдовичих, и от дщерей едину опустошиша. 17 Аз же како мощен помощи вам? 18 Наведый бо вам злая избавит вас от руки враг ваших. 19 Идите, чада, идите: аз бо остахся пуста, 20 совлекохся ризы мирныя, облекохся же во вретище моления моего: возопию к Вечному во дни моя. 21 Дерзайте, чада, возопийте к Богу, и избавит вас от насилия руки вражия. 22 Аз бо (исперва) надеяхся на Вечнаго о спасении вашем: и прииде ми радость от Святаго в помиловании, еже приидет вам вскоре от Вечнаго Спаса нашего. 23 Испустих бо вас с рыданием и плачем, отдаст же ми Бог вас с радостию и веселием в век. 24 Якоже бо ныне видеша приселницы Сиони ваше пленение (от Бога), такожде узрят вскоре спасение ваше от Бога, еже приидет вам со славою великою и со освещением Вечнаго. 25 Чада, долготерпите иже от Бога нашедший вам гнев, гонил бо тя враг твой, и узриши пагубу его вскоре и на выю его наступиши. 26 Младии мои ходиша в пути жестоки, восхищени суть, якоже стадо похищено врагами. 27 Дерзайте, чада, и возопийте к Богу, будет бо вам от Наведшаго память. 28 Якоже бо бысть ум ваш заблудити вам от Бога, тако ныне десятижды усугубите обратившеся взыскати Его: 29 Наведый бо вам злая наведет вам вечное веселие со спасением вашим. 30 Дерзай, Иерусалиме, утешит тя нарекий тебе. 31 Окаянни озлобившии тя и радовавшиися о падении твоем, (мщение будет над ними). 32 Окаянни гради, имже поработаша чада твоя, окаянна приимшая сыны твоя. 33 Якоже бо порадовася о твоем падении и возвеселися о разорении твоем, такожде опечалится о своем запустении. 34 И отсеку от нея веселие многонародства, и величание ея будет в рыдание. 35 Огнь и найдет на ню от Вечнаго во дни многи, и населится бесами на множайшее время. 36 Воззри на восток, Иерусалиме, и виждь веселие грядущее тебе от Бога. 37 Се, грядут сынове твои, ихже испустил еси, грядут собрани от восток даже до запад словом Святаго, радующеся о славе Божией. === 5 === 1 Совлецы, Иерусалиме, ризы плачевныя и озлобления твоего и облецыся в лепоту славы, яже тебе бысть от Бога во век. 2 Облецыся во одежду правды, яже от Бога, возложи венец на главу твою славы Вечнаго. 3 Бог бо явит всей поднебесней твою светлость. 4 Наречется бо от Бога имя твое во веки: мир правды и слава богочестия. 5 Востани, Иерусалиме, и стани на высоце, и поглядай на востоки, и виждь собраная чада твоя от восток солнца до запада словом Святаго, радующаяся Божиею памятию. 6 Изыдоша бо от тебе пеши ведоми от врагов, введет же я Бог к тебе несомых со славою, яко сыны царства. 7 Совеща бо Бог смиритися всяцей горе высоцей и холмом вечным, и юдолиям наполнитися в равень земную, да идет Израиль утвержен славою Божиею. 8 Осениша же и дубравы и всяко древо благовонством Израилю, повелением Божиим. 9 Предидет бо Бог Израилеви со веселием, светом славы Своея, с помилованием и правдою, яже от Него. == Книга пророка Иезекииля == === 1 === 1 И бысть в тридесятое лето, в четвертый месяц, в пятый день месяца, и аз бых посреде пленения при реце Ховар: и отверзошася небеса, и видех видения Божия. 2 В пятый день месяца, сие лето пятое пленения царя Иоакима, 3 и бысть слово Господне ко Иезекиилю сыну Вузиеву, священнику, в земли Халдейстей при реце Ховар. И бысть на мне рука Господня, 4 и видех, и се, дух воздвизаяйся грядяше от севера, и облак великий в нем, и свет окрест его, и огнь блистаяйся: 5 и посреде его яко видение илектра посреде огня, и свет в нем: и посреде яко подобие четырех животных. И сие видение их, яко подобие человека в них: 6 и четыри лица единому, и четыри крила единому, 7 и голени их правы, и пернаты ноги их, и искры яко блистающаяся медь, и легка крила их, 8 и рука человеча под крилами их на четырех странах их: 9 и лица их, и крила их четырех держащаяся друг друга, лица же их четырех не обращахуся внегда ходити им: коеждо прямо лица своего хождаху. 10 И подобие лиц их, лице человечее и лице львово одесную четырем, и лице телчее ошуюю четырем, и лице орлее четырем: 11 (и лица их) и крила их простерта свыше четырем, коемуждо два сопряжена друг ко другу, и два покрываху верху телесе их, и коеждо прямо лицу своему идяше: 12 идеже аще бяше дух шествуяй, идяху и не обращахуся. 13 И посреде животных видение, яко углия огня горящаго, яко видение свещ сообращающихся посреде животных, и свет огня, и от огня исхождаше яко молния: 14 и животная течаху и обращахуся, яко видение везеково. 15 И видех, и се, коло едино на земли держащееся животных четырех: 16 и видение колес и сотворение их, яко видение Фарсиса, и подобие едино четырем: и дело их бяше, якоже аще бы было коло в колеси: 17 на четыри страны их шествоваху: не обращахуся, внегда шествовати им, 18 ниже хребты их, и высота бяше им. И видех та, и плеща их исполнена очес окрест четырем: 19 и внегда шествовати животным, шествоваху и колеса держащеся их: и внегда воздвизатися животным от земли, воздвизахуся и колеса. 20 Идеже аще бяше облак, тамо бяше и дух, еже шествовати: шествоваху и животная, и колеса воздвизахуся с ними, зане дух жизни бяше в колесех. 21 Внегда идяху сия, идяху (и колеса), и внегда стояти им, стояху (и колеса с ними), и егда воздвизахуся от земли, воздвизахуся с ними (и колеса), яко дух жизни бяше в колесех. 22 И подобие над главою животных яко твердь, яко видение кристалла, простертое над крилами их свыше: 23 и под твердию крила их простерта, паряще друг ко другу, комуждо два спряжена, прикрывающе телеса их. 24 И слышах глас крил их, внегда паряху, яко глас вод многих, яко глас Бога Саддаи: и внегда ходити им, глас слова яко глас полка: и внегда стояти им, почиваху крила их. 25 И се, глас превыше тверди сущия над главою их: внегда стояти им, низпускахуся крила их. 26 И над твердию, яже над главою их, яко видение камене сапфира, подобие престола на нем, и на подобии престола подобие якоже вид человечь сверху. 27 И видех яко видение илектра, яко видение огня внутрь его окрест: от видения чресл и выше и от видения чресл даже до долу видех видение огня, и свет его окрест: 28 яко видение дуги, егда есть на облацех в день дождя, тако стояние света окрест. === 2 === 1 Сие видение подобие славы Господни. И видех, и падох ниц, и слышах глас Глаголющаго, и рече ко мне: сыне человечь, стани на ноги твоя, и возглаголю тебе. 2 И прииде на мя дух, и взя мя, и воздвиже мя, и постави мя на ногах моих, и слышах Его глаголюща ко мне. 3 И рече (Господь) ко мне: сыне человечь, послю тя Аз к дому Израилеву, огорчевающым Мя, иже огорчиша Мя: сами и отцы их отвергошася Мене до днешняго дне: 4 и сынове жестоколичнии и твердосердечнии. Аз послю тя к тем, и речеши к ним: тако глаголет Адонаи Господь: 5 аще убо услышат, или убоятся, зане дом огорчеваяй есть, и познают, яко пророк еси ты посреде их. 6 И ты, сыне человечь, да не убоишися их, ни ужасайся от лица их: зане разсверепеют и обыдут тя окрест, посреде бо скорпиев ты живеши: словес их не убойся и от лица их не ужасайся, зане дом огорчеваяй есть: 7 и возглаголеши словеса Моя к ним, аще убо услышат, или убоятся, зане дом прогневаяй есть. 8 И ты, сыне человечь, послушай Глаголющаго к тебе, не буди огорчеваяй, якоже дом преогорчеваяй: отверзи уста твоя и снеждь, яже Аз даю тебе. 9 И видех, и се, рука простерта ко мне, и в ней свиток книжный: 10 и разви его предо мною, и в том писана быша предняя и задняя: и вписано бяше в нем рыдание и жалость и горе. === 3 === 1 И рече ко мне: сыне человечь, снеждь свиток сей, и иди и рцы сыном Израилевым. 2 И отверзох уста моя, и напита мя свитком сим 3 и рече ко мне: сыне человечь, уста твоя снедят, и чрево твое насытится свитка сего даннаго тебе. И снедох его, и бысть во устех моих яко мед сладок. 4 И рече ко мне: сыне человечь иди и вниди в дом Израилев, и глаголи словеса Моя к ним: 5 яко не к людем глубокоречивым и косноязычным посылаемь еси, к дому Израилеву, 6 ниже к людем многим иноязычным, иноречивым, ни тяжким языком сущым, ихже не разумел бы еси словес: аще же и к тацем послал бых тя, то и тии послушали быша тебе: 7 а дом Израилев не восхощет послушати тебе, понеже не хотят слушати Мене, яко весь дом Израилев непокориви суть и жестокосерди: 8 и се, дах лице твое сильно противу лица их, и прю твою укреплю противу при их: 9 и будет, всегда крепчае камене дах прю твою: не убойся их, ни ужасайся лица их, зане дом разгневаяй есть. 10 И рече ко мне: сыне человечь, вся словеса, яже глаголах с тобою, возми в сердце твое и ушима твоима послушай: 11 и шед вниди в плен к сыном людий твоих, и речеши к ним и возглаголеши к ним: тако глаголет Адонаи Господь: аще убо послушают и аще убо повинутся. 12 И взя мя дух, и слышах глас за собою труса велика, глаголющих: благословена слава Господня от места Его. 13 И видех глас крил животных скриляющихся друг ко другу, и глас колес держащься их, и глас труса велика. 14 И дух воздвиже мя и взя мя, и поидох вознесен во устремлении духа моего, и рука Господня бысть на мне крепкая. 15 И внидох в пленники вознесен, и обыдох живущыя на реце Ховар, и седох ту седмь дний, ходя посреде их. 16 И бысть по седмих днех слово Господне ко мне глаголя: 17 сыне человечь стража дах тя дому Израилеву, да слышиши слово от уст Моих и воспретиши им от Мене. 18 Внегда глаголати Ми беззаконнику: смертию умреши: и не возвестиши ему, ни соглаголеши, еже остатися беззаконнику и обратитися от пути своего, еже живу быти ему: беззаконник той в беззаконии своем умрет, крове же его от руки твоея взыщу. 19 И ты аще возвестиши беззаконнику, и не обратится от беззакония своего и от пути своего (беззаконна): той беззаконник во беззаконии своем умрет, а ты душу твою избавиши. 20 И егда совратится праведник от правд своих и сотворит согрешение: и дам муку пред ним, той умрет, яко ты не воспретил еси ему, и во гресех своих умрет, зане не помянутся правды его, яже сотвори: крове же его от руки твоея взыщу. 21 Ты же аще возвестиши праведному, еже не согрешити, и той не согрешит: праведный жизнию поживет, яко воспретил еси ему, и ты твою душу избавиши. 22 И бысть на мне рука Господня, и рече ко мне: востани и изыди на поле, и тамо возглаголется к тебе. 23 И востах и изыдох на поле: и се, тамо слава Господня стояше, якоже видение и якоже слава Господня, юже видех на реце Ховар, и падох на лицы моем. 24 И прииде на мя дух и постави мя на ногу моею: и глагола ко мне и рече ми: вниди и затворися среде дому твоего. 25 И ты, сыне человечь, се, дашася на тя узы, и свяжут тя ими, и не изыдеши от среды их: 26 и язык твой привяжу к гортани твоему, и онемееши и не будеши им в мужа обличения, понеже дом разгневаяй есть: 27 и внегда глаголати Ми к тебе, отверзу уста твоя, и речеши к ним: сия глаголет Адонаи Господь: слышай да слышит, и не покаряяйся да не покаряется, зане дом преогорчеваяй есть. === 4 === 1 И ты, сыне человечь, возми себе плинфу и положи ю пред лицем твоим, и да напишеши на ней град Иерусалим, 2 и да даси окрест его ограждение, и да соградиши над ним забрала и обложиши его острогом, и да поставиши окрест его полки и да учиниши поставления стрельниц окрест: 3 ты же возми себе сковраду железну, и да положиши ю в стену железну между тобою и между градом, и да уготовиши лице твое нань, и будет в затворе, и затвориши и: знамение сие есть сыном Израилевым. 4 Ты же да спиши на левем боку твоем, и да положиши неправды дому Израилева на нем, по числу дний пятьдесят и сто, в няже поспиши на нем, и возмеши неправды их. 5 И Аз дах тебе две неправды их в число дний, в девятьдесят и сто дний, и возмеши неправды дому Израилева. 6 И совершиши сия, и поспиши на десных ребрех твоих второе, и возмеши неправды дому Иудина четыредесять дний, день за едино лето положих тебе. 7 И на заключение Иерусалима да уготоваеши лице твое, и мышцу твою утвердиши, и пророчествовати будеши на него. 8 И се, Аз дах на тя узы, и не превратишися от ребр твоих на ребра твоя, дондеже скончаются дние заключения твоего. 9 Ты же (сыне человечь) возми себе пшеницу и ячмень, и боб и лящу, и просо и пыро, и вложиши я в сосуд един глинян: и сотвориши я себе в хлебы, и по числу дний, в няже спиши на ребрех твоих, девятьдесят и сто дний ясти будеши оныя. 10 Ядь же твоя, юже ясти будеши, весом двадесять сикль на день, от времене до времене снеси сия. 11 И воду мерою пити будеши, и шестую часть ина от времене до времене испиеши. 12 И опреснок ячменный снеси я, в лайне мотыл человечих сокрыеши я пред очима их 13 и речеши: сия глаголет Господь Бог Израилев: тако снедят сынове Израилевы хлеб свой нечист во языцех, аможе разсыплю я. 14 И рех: никакоже, Господи Боже Израилев! Се, душа моя не осквернилася в нечистоте, и мертвечины и звероядины не ядох от рождения моего даже доныне, ниже вниде во уста моя всякое мясо мерзко и сквернаво. 15 И рече ко мне: се, дах тебе мотыла говяжая вместо мотыл человечих, и сотвориши хлебы себе в них. 16 И рече ко мне: сыне человечь, се, Аз сотру утверждение хлебное во Иерусалиме, и снедят хлеб весом и во оскудении, и воду мерою и в пагубе испиют, 17 яко да скудни будут хлебом и водою: и погибнет человек и брат его, и истают в неправдах своих. === 5 === 1 Ты же, сыне человечь, возми себе мечь остр паче бритвы стригущаго, притяжи его себе и возложи его на главу твою и на браду твою: и возми превес весов, и размериши я. 2 Четвертую часть да сожжеши на огни среде града по исполнению дний затворения: 3 и да возмеши четвертую часть и сожжеши ю среде града, четвертую же часть содробиши мечем окрест его, и четвертую часть разсыплеши ветром: и мечь извлеку вслед их. 4 И возмеши оттуду мало их числом и ввяжеши я во одежду твою: и от техже возмеши еще и ввержеши я среде огня и сожжеши я на огни: и от того изыдет огнь на весь дом Израилев. И речеши всему дому Израилеву: 5 сия глаголет Адонаи Господь: сей Иерусалим, посреде языков положих его, и страны, яже окрест его. 6 И речеши: измени оправдания Моя паче языков, и законы Моя паче стран, яже окрест его: понеже оправдания Моя отринуша и по законом Моим не ходиша в них. 7 Сего ради тако глаголет Адонаи Господь: понеже вина ваша паче язык, иже окрест вас, и не ходисте и законех Моих и оправданий Моих не сотвористе, но и по судом языческим, яже окрест вас, не сотвористе: 8 сего ради сия глаголет Адонаи Господь: се, Аз на тя, и сотворю среде тебе суд пред языки, 9 и сотворю среде тебе, ихже не сотворих и ихже не сотворю подобных им ктому, по всем мерзостем твоим. 10 Сего ради отцы снедят чад среде тебе, и чада снедят отцев: и сотворю в тебе суды, и разсею вся оставшая от тебе по всему ветру. 11 Сего ради живу Аз, глаголет Адонаи Господь, воистинну понеже святая Моя осквернил еси всеми мерзостьми твоими, и Аз отрину тя, и не пощадит око Мое, и Аз не помилую тя. 12 Четверть тебе смертию потребится, и четверть тебе гладом скончается среде тебе, четверть же тебе падет мечем окрест тебе, четверть же тебе разсыплю по всему ветру, и мечь извлеку вслед их. 13 И скончается ярость Моя и гнев Мой на них, и утешуся, и уведят, яко Аз Господь глаголах во рвении Моем, внегда скончати ми гнев Мой на них. 14 И положу тя в пустыню и во укоризну языком сущым окрест тебе и пред всяким проходящим. 15 И будеши во стенание и ужас, наказанием и пагубою во языцех, иже окрест тебе, егда сотворю в тебе суды во гнев и в ярость и во отмщение ярости Моея: Аз Господь глаголах: 16 и егда послю стрелы глада на ня, и будут во скончание, и послю растлити вы, и глад соберу на вы, и сотру утверждение хлеба твоего, 17 и испущу на тя глад и звери люты, и умучу тя, смерть же и кровь пройдут сквозе тя, и мечь наведу на тя окрест: Аз Господь глаголах. === 6 === 1 И бысть слово Господне ко мне глаголя: 2 сыне человечь, утверди лице твое к горам Израилевым и прорцы к ним, 3 и речеши: горы Израилевы, слышите слово Господне, сия глаголет Адонаи Господь горам и холмом, и каменем и дебрем: се, Аз наведу на вы мечь, и потребятся высоты вашя: 4 и сокрушатся требища ваша и кумирницы вашя, и повергу язвеных ваших пред кумиры вашими: 5 и дам трупы сынов Израилевых пред кумиры их и расточу кости вашя окрест требищ ваших. 6 И во всем селении вашем опустеют грады, и высокая ваша погибнут, яко да потребятся требницы ваши и сокрушатся, и престанут кумиры ваши, и отвергутся кумирницы вашя, и потребятся дела ваша: 7 и падут язвении посреде вас, и познаете, яко Аз Господь. 8 И оставлю еже быти от вас избегшым от меча во языцех, и в разсыпании вашем во странах, 9 и помянут Мя уцелевшии от вас во языцех, аможе быша пленени: кляхся бо сердцу их блудившему и отставшему от Мене и очесем их блудившым вслед начинаний их: и бити имут лица своя о злобах, яже твориша во всех мерзостех своих, 10 и познают, яко Аз Господь не туне глаголах сотворити им вся злая сия. 11 Тако глаголет Адонаи Господь: восплещи рукою и вострепли ногою и рцы: благоже, благоже о всех мерзостех злобы дому Израилева: яко мечем и гладом и смертию падут. 12 Дальнии смертию скончаются, а ближнии мечем падут: оставшии же и обдержимии гладом скончаются: и скончаю гнев Мой на них, 13 и увесте, яко Аз Господь, егда будут язвении ваши среде кумир ваших окрест требищ ваших, на всяцем холме высоцем и на всех версех горних, и под дубом сенным и под всяким древом чащным, идеже даяху воню благоухания всем кумиром своим. 14 И простру руку Мою на ня, и положу землю в пагубу и в потребление от пустыни Девлафа, от всего селения их: и познаете, яко Аз Господь. === 7 === 1 И бысть слово Господне ко мне глаголя: 2 и ты, сыне человечь, рцы: сия глаголет Господь: земли Израилеве конец прииде, конец прииде на четыри краи земли. 3 Пришел есть конец, ныне конец тебе, и испущу ярость Мою на тя, и отмщу тебе по путем твоим, и дам на тя вся мерзости твоя. 4 Не пощадит око Мое на тя, и не помилую, зане путь твой на тя дам, и мерзости твоя среде тебе будут, и увеси, яко Аз Господь. 5 Темже сия глаголет Адонаи Господь: зло едино зло, се, идет. 6 Конец пришел есть, прииде конец, воста на тя, се, прииде. 7 Прииде плетение на тя живущаго на земли: прииде время, приближися день, не с молвою, ниже с болезньми. 8 Ныне изблизу излию гнев Мой на тя и скончаю ярость Мою на тебе, и осужду тя по путем твоим и дам на тя вся мерзости твоя. 9 Не пощадит око Мое, и не помилую, зане пути твоя на тя дам, и мерзости твоя посреде тебе будут, и познаеши, яко Аз Господь бияй. 10 Се, день Господень приходит, се, конец пришел есть, изыде плетение, и процвете жезл, 11 прозябе укоризна, и сокрушит утверждение беззаконника: и не с плищем, ни с потщанием: и не от них суть, и несть красы в них. 12 Прииде время, приближися день: купуяй да не радуется, и продаяй да не плачется, яко гнев на все множество их. 13 Занеже притяжаваяй ко продающему ктому не возвратится, и еще в жизни живущему, яко видение на все множество их не возвратится, и человек во очесех жизни своея не укрепится. 14 Вострубите трубою и разсудите вся, и не будет грядущаго на рать, яко гнев Мой на все множество их. 15 Рать отвне с мечем, глад же и смерть извнутрь: иже на поли мечем скончается, сущих же во граде глад и смерть скончает. 16 И уцелеют спасеннии от них и будут на горах яко голубицы скорбяще: и всех избию, коегождо в неправдах его. 17 Вся руки разслабеют, и вся стегна окаляются мокростию. 18 И препояшутся во вретища, и покрыет я ужас: и на всяцем лицы срам на них, и на всяцей главе плешь. 19 Сребро их на стогнах повержется, и злато их презрено будет: сребро их и злато не возможет избавити их в день гнева Господня, души их не насытятся, и чрева их не наполнятся, зане казнь неправостей их бысть. 20 Избранныя утвари в гордыню положиша я, и образы мерзостей своих и гнусности сотвориша от них: сего ради дах оная им в нечистоту. 21 И предам я в чуждия руце, еже разграбити я, и губителем земли в корысти, и осквернят я. 22 И отвращу лице Мое от них, и осквернят стражбу Мою, и внидут в ня неопасно, и осквернят я: 23 и сотворят мятеж, понеже земля полна суда крове, и град полн беззакония. 24 И приведу злыя языки, и наследят домы их: и отвращу величание крепости их, и осквернятся святая их. 25 И моление приидет, и взыщет мира, и не будет. 26 Горе на горе будет, и весть на весть будет, и не будет видение от пророка, и закон погибнет от жерца и совет от старец. 27 Царь восплачется, и князь облечется в пагубу, и руки людий земли разслабеют: по путем их сотворю им и по судом их отмщу им, и уразумеют, яко Аз Господь. === 8 === 1 И бысть в лето шестое в шестый месяц, в пятый день месяца, аз седех в дому моем, и старейшины Иудины седяху предо мною, и бысть на мне рука Адоная Господа. 2 И видех, и се, подобие мужа, от чресл его и даже до низу огнь, от чресл же его в верх его якоже видение зари и яко взор илектра. 3 И простре подобие руки и взя мя за верх главы моея, и взя мя дух среде земли и среде небесе и веде мя во Иерусалим в видении Божии на преддверие врат внутреннейших зрящих на север, идеже бе столп и образ ревности притяжавающаго. 4 И се, ту бяше слава Господа Бога Израилева по видению, еже видех на поли. 5 И рече ко мне: сыне человечь, воззри очима твоима на север. И воззрех очима моима на север, и се, от севера ко вратом зрящым на восток требника, идеже образ рвения сего во входе. 6 И рече ко мне: сыне человечь, видел ли еси, что сии творят? Беззакония велика дом Израилев творит зде, еже удалятися от святынь Моих: и еще обратився узриши болшая беззакония. 7 И введе мя ко предвратию двора, и видех, и се, скважня едина в стене. 8 И рече ко мне: сыне человечь, раскопай стену. И раскопах, и се, дверь едина. 9 И рече ко мне: вниди и виждь беззакония злая, яже творят сии зде. 10 И внидох и видех, и се, всякое подобие гада и скота, суетная гнушения и всяцыи кумиры дому Израилева написани быша на стене всюду около. 11 И седмьдесят мужей от старейшин дому Израилева, и Иезониа сын Сафанов посреде их стояше пред лицем их, и кийждо кадилницу свою имеяше в руце своей, и дым кадила восхождаше. 12 И рече ко мне: видел ли еси, сыне человечь, яже старцы дому Израилева творят зде, кийждо их на ложи тайнем своем, зане реша: не видит Господь, оставил Господь землю. 13 И рече ко мне: еще обратися, и узриши беззакония болшая, яже сии творят. 14 И введе мя в преддверие врат дому Господня зрящих на север: и се, тамо жены седящыя плачущяся о Фаммузе. 15 И рече ко мне: сыне человечь, видел еси, и еще узриши мерзости их болшыя сих. 16 И введе мя во двор дому Господня внутренний, и в преддверие храма Господня, между Еламом и между жертвенником, яко двадесять и пять мужей, задняя своя давших ко храму Господню, и лица их прямо к востоку: и сии покланяются на восток солнцу. 17 И рече ко мне: видел еси, сыне человечь, еда мало дому Иудину, еже творити беззакония, яже сотвориша зде? Понеже наполниша землю беззакония, и обратишася разгневати Мя: и се, сии простирают лозу аки ругающеся Мне: 18 и Аз сотворю им с яростию: не пощадит око Мое, и не помилую: и воззовут во ушы Мои гласом великим, и не услышу их. === 9 === 1 И возопи во ушы мои гласом великим, глаголя: приближися отмщение града: и кийждо имеяше сосуды истребления в руце своей. 2 И се, шесть мужей идоша от пути врат высоких зрящих на север, и коемуждо секира (погубления) в руце его: и муж един посреде их облечен в подир, и пояс от сапфира о чреслех его: и внидоша и сташа близ жертвенника медянаго. 3 И слава Бога Израилева взыде от Херувимов сущая на них в непокровенное дому: и призва мужа оболчена в подир, иже имеяше на чреслех своих пояс. 4 И рече Господь к нему: пройди среде града Иерусалима и даждь знамения на лица мужей стенящих и болезнующих о всех беззакониих бывающих среде их. 5 И сим рече, слышащу мне: идите во град вслед его, изсецыте и не пощадите очима вашима и не помилуйте: 6 старца и юношу и деву, и младенцы и жены избийте в потребление: а ко всем, на нихже есть знамение, не прикасайтеся: от освященных Моих начните. И начаша от мужей старых, иже беша внутрь в дому. 7 И рече к ним: оскверните дом, и наполните пути мертвецев исходяще, и изсецыте (сущих во граде). 8 И бысть внегда сечаху их, остах аз и падох ниц, и возопих и рех: горе, (горе,) о, люте мне, Адонаю Господи! Еда потребляеши Ты останки Израилевы, егда разливаеши ярость Твою на Иерусалим? 9 И рече ко мне: неправда дому Израилева и Иудина возвеличися зело зело, яко наполнися земля людий многих, и град наполнися неправд и нечистот, яко реша: оставил есть Господь землю и не видит Господь. 10 И Аз есмь, и не пощадит око Мое, ни помилую, пути их на главы их дах. 11 И се, муж, оболченый в подир и препоясан поясом о чреслех своих, отвещаваше, глаголя: сотворих, якоже заповедал ми еси. === 10 === 1 И видех, и се, верху тверди сущия над главою Херувимов, яко камень сапфировый, подобие престола на них. 2 И рече к мужу облеченому во утварь: вниди среде колес, яже под Херувимами, и наполни горсти твоя углия огненнаго от среды Херувимов и разсыпли на град. И вниде предо мною: 3 Херувими же стояху одесную дому, внегда вхождаше муж, и облак наполни двор внутренний. 4 И воздвижеся слава Господня от Херувимов в непокровение дому, и наполни дом облак, и двор наполнися сияния славы Господни: 5 и глас крил Херувимских слышашеся даже до внешняго двора, якоже глас Бога Саддаи глаголющаго. 6 И бысть внегда заповедаше мужу облеченому во утварь святую, глаголя: возми огнь от среды колес, иже среде Херувимов. И вниде и ста близ колес. 7 И простре Херувим руку свою в средину огня сущаго среде Херувимов, и взя и вдаде в руце оболченому во утварь святую, и взя и изыде. 8 И видех Херувимы, и се, подобие рук человечих под крилы их. 9 И видех, и се, четыри колеса стояху держащеся Херувимов: коло едино держашеся единаго Херувима, и коло едино держашеся другаго Херувима: взор же колес якоже взор камения анфракса: 10 и взор их подобие едино четырем, акибы было коло в колеси: 11 внегда идяху, на четыри части их идяху, и не обращахуся внегда идяху: яко, на неже место аще зряше начало едино, идяху (вслед его), и не обращахуся, внегда ити им. 12 Вся же телеса их и хребты их, и руце их и крила их и колеса полна очес окрест четырех колес. 13 Колесам же сим воззвася гелгель, слышащу мне. 14 Четыри же лица коемуждо их: единому лице херувимле, лице же другому лице человечо, третие же лице львово и четвертое лице орлее. 15 И взяшася Херувими: сие есть животное, еже видех на реце Ховар. 16 И егда идяху Херувими, идяху и колеса их, и сии держахуся их: и внегда воздвизаху Херувими крила своя, еже возвыситися от земли, не обращахуся колеса их, и та держахуся их: 17 егда стояху тии, стояху и они, и внегда возвышахуся тии, возвышахуся и они с ними: зане дух жизни бе в них. 18 И изыде слава Господня от непокровения дому и взыде на Херувимы. 19 И воздвигоша Херувими крила своя и возвысишася от земли предо мною: егда изыдоша тии, и колеса держахуся их: и сташа над преддверием врат Дому Господня, яже противу востоку, и слава Господа Бога Израилева бе над ними свыше. 20 Сие животное есть, еже видех под Богом Израилевым на реце Ховар, и познах, яко Херувими суть. 21 Четыри лица единому, и четыри крила единому, и подобие рук человечих под крилы их. 22 И подобие лиц их: сия лица суть, яже видех под славою Бога Израилева при реце Ховар воззрение их: и сия кождо прямо лицу своему идяху. === 11 === 1 И воздвиже мя дух и возведе мя ко вратом дому Господня, яже прямо зрят на восток: и се, пред преддверием врат яко двадесять и пять мужей: и видех среде их Иехонию сына Иазерова и Фалтию Ванеова, старейшины людския. 2 И рече Господь ко мне: сыне человечь, сии мужие помышляющии суетная и совет творящии лукав во граде сем, 3 глаголющии: не в нове ли соградишася домове? Сей есть коноб, мы же мяса. 4 Сего ради прорцы на ня, прорцы, сыне человечь. 5 И нападе на мя Дух Господень и рече ко мне: глаголи, сия глаголет Господь: тако рекосте, доме Израилев, и умышления духа вашего Аз вем: 6 умножисте мертвецы вашя во граде сем и наполнисте пути его язвенных. 7 Того ради тако глаголет Адонаи Господь: мертвецы ваши, яже избисте среде его, тии суть мяса, а сей коноб есть, и вас изведу от среды его. 8 Меча боитеся, и мечь наведу на вас, глаголет Адонаи Господь: 9 и изведу вас от среды его и предам вас в руце чуждих и сотворю в вас суд: 10 мечем падете, на горах Израилевых сужду вам, и увесте, яко Аз Господь: 11 той не будет вам в коноб, и вы не будете посреде его в мяса: на горах Израилевых сужду вам, 12 и увесте, яко Аз Господь, яко по заповедем Моим не ходисте и судов Моих не сотвористе, но по обычаем языков сущих окрест вас сотвористе. 13 И бысть внегда прорицати ми, и Фалтиа сын Ванеов умре: и падох ниц и возопих гласом великим, глаголя: горе мне, люте мне, Адонаю Господи! На скончание ли твориши Ты останки Израилевы? 14 И бысть слово Господне ко мне глаголя: 15 сыне человечь, братия твоя и мужие плена твоего и весь дом Израилев скончася, имже рекоша живущии во Иерусалиме: далече удалитеся от Господа, нам дана есть земля в наследие. 16 Сего ради рекох: сия глаголет Адонаи Господь: яко отрину я во языки и разсею я по всей земли, и буду им во освящение мало во странах, аможе внидут тамо. 17 Сего ради рцы: сия глаголет Адонаи Господь: и прииму я от язык и соберу я от стран, идеже разсеях я в них, и дам им землю Израилеву: 18 и внидут тамо и отвергут вся мерзости ея и вся беззакония ея от нея: 19 и дам им сердце ино и дух нов дам им, и исторгну каменное сердце от плоти их и дам им сердце плотяно, 20 яко да в заповедех Моих ходят и оправдания Моя сохранят и сотворят я: и будут Ми в люди, и Аз им буду в Бога. 21 А ихже сердце по гнусностем их и по беззаконием их ходит, пути тех на главы их положу, глаголет Адонаи Господь. 22 И воздвигоша Херувими крила своя, и колеса держащаяся их: слава же Бога Израилева бе на них свыше их. 23 И взыде слава Господня от среды града и ста на горе, яже бяше прямо града на восток. 24 И дух взя мя и принесе мя на землю Халдейску в пленники, в видении, Духом Божиим. 25 И взыдох от видения, еже видех, и глаголах ко пленником вся словеса Господня, яже показа мне. === 12 === 1 И бысть слово Господне ко мне глаголя: 2 сыне человечь, посреде неправд их ты живеши, иже очи имут видети, и не видят, и ушы имут, еже слышати, и не слышат, зане дом преогорчеваяй есть. 3 И ты, сыне человечь, сотвори себе сосуды пленнически, и пленен буди днем пред ними, и преселен буди от места твоего на место другое пред ними, яко да видят, зане дом прогневляяй есть. 4 И да изнесеши сосуды твоя, яко сосуд пленнический, днем пред очима их: ты же изыдеши в вечер пред ними, якоже исходит пленник. 5 Прокопай себе стену, и да изыдеши сквозе ю пред ними. 6 На раменех взят будеши и покровен изыдеши, лице твое покрыеши, и да не видиши земли, понеже чудо тя дах дому Израилеву. 7 И сотворих тако все, елико ми заповеда Господь: и сосуды изнесох яко сосуды пленничы днем, и в вечер прокопах себе стену рукою, и отай изыдох, и на рамена взят бых пред ними. 8 И бысть слово Господне заутра ко мне глаголя: 9 сыне человечь, не реша ли к тебе дом Израилев, дом прогневляяй: что ты твориши? 10 Рцы к ним: тако глаголет Господь Бог: ко князю и старейшинам Иерусалимлим, и всему дому Израилеву, иже суть среде их, 11 рцы, яко аз чудеса творю, якоже сотворих, сице им будет: во преселении и во пленении изыдут. 12 И князь среде их на рамена взят будет, и отай изыдет сквозе стену, и прокопает, еже ему изыти сквозе ю, лице свое покрыет, да не видимь будет очесы, и сам земли не узрит. 13 И простру мрежу Мою нань, и ят будет во одержании Моем, и введу его в Вавилон в землю Халдейску, и не узрит ея, и тамо скончается. 14 И вся, иже окрест его, помощники его, и вся заступающыя его разсею по всем ветром, и мечь излию вслед их: 15 и уведят, яко Аз Господь, егда разсыплю я во языки и разсею я по странам: 16 и оставлю от них мужы в число от меча и от глада и от смерти, яко да поведят вся беззакония их во языцех, аможе внидут: и уведят, яко Аз Господь. 17 И бысть слово Господне ко мне глаголя: 18 сыне человечь, хлеб твой с болезнию снеси и воду твою со страданием и скорбию испиеши. 19 И речеши к людем земли: сия глаголет Адонаи Господь живущым в Иерусалиме на земли Израилеве: хлебы своя с недостатком снедят и воду свою с пагубою испиют: яко да погибнет земля со исполнением своим, в нечестии бо вси живущии в ней. 20 И гради их населеннии опустеют, и земля их в погибель будет, и увесте, яко Аз Господь. 21 И бысть слово Господне ко мне глаголя: 22 сыне человечь, кая притча сия вам на земли Израилеве, глаголющым: долги дни, погибе всякое видение? 23 Сего ради рцы к ним: тако глаголет Адонаи Господь: отвращу притчу сию, и потом не рекут притчи тоя дом Израилев, яко речеши к ним: приближишася дние и слово всякаго видения. 24 Зане не будет ктому всякое видение ложное, и волхвуяй угодная среде сынов Израилевых. 25 Яко Аз Господь возглаголю словеса Моя, возглаголю и сотворю и не продолжу ктому: во дни вашя, доме прогневаяй, реку слово и сотворю, глаголет Адонаи Господь. 26 И бысть слово Господне ко мне глаголя: 27 сыне человечь, се, дом Израилев преогорчеваяй глаголюще глаголют: видение, еже сей видит, на дни многи, и на времена долга сей прорицает. 28 Сего ради рцы к ним: сия глаголет Господь Бог: не продолжатся ктому вся словеса Моя, яже возглаголю: яко возглаголю слово и сотворю, глаголет Адонаи Господь. === 13 === 1 И бысть слово Господне ко мне глаголя: 2 сыне человечь, прорцы на пророки Израилевы прорицающыя и речеши пророком прорицающым от сердца своего, и прорцы и речеши к ним: слышите слово Господне, 3 сия глаголет Адонаи Господь: люте прорицающым от сердца своего, ходящым вслед духа своего, а отнюд не видящым. 4 Якоже лисицы в пустыни, (тако) пророцы твои (быша), Израилю! 5 Не сташа на тверди и собраша стада к дому Израилеву: не восташа глаголющии в день Господень, 6 видящии ложная и волхвующии суетная, глаголюще: тако глаголет Господь, Господь же не посла их, и начаша возставляти слово. 7 Не ложное ли убо видение видесте и волхвования суетная рекосте? И глаголете, рече Господь: Аз же не глаголах. 8 Сего ради рцы: сия глаголет Адонаи Господь: понеже словеса ваша лжива и волхвования ваша суетна, того ради, се, Аз на вы, глаголет Адонаи Господь, 9 и простру руку Мою на пророки видящыя лжу и провещавающыя суетная: в наказании людий Моих не будут, и в писании дому Израилева не впишутся, и в землю Израилеву не внидут, и уведят, яко Аз Адонаи Господь. 10 Понеже прельстиша людий Моих, глаголюще: мир, мир: и не бяше мира: и сей сограждает стену, а они помазуют ю, падется. 11 Глаголи к помазующым ю: падется, и будет туча потопляющая, и дам камение стрельное в свузы их, и падутся, и ветр воздвижущь размещет, и разсядется. 12 И се, падеся стена, и не рекут ли к вам: где есть помазание ваше, имже помазасте? 13 Того ради сия глаголет Адонаи Господь: и навергу бурю разоряющую со яростию, и туча потопляющи гневом Моим будет, и камение стрельное наведу яростию во скончание: 14 и раскопаю стену, юже помазасте, и падется, и положу ю на земли, и открыются основания ея, и падется, и скончаетеся со обличением и познаете, яко Аз Господь: 15 и скончаю ярость Мою на стене и на помазующих ю, и падет. И рекох к вам: несть стены, ни помазующих ея, 16 пророцы Израилевы, прорицающии на Иерусалим и видящии ему мир, и несть мира, глаголет Адонаи Господь. 17 И ты, сыне человечь, утверди лице твое на дщери людий твоих, на прорицающыя от сердца своего, и прорцы на них, 18 и речеши: сия глаголет Адонаи Господь: горе сшивающым возглавийцы под всякий лакоть руки и сотворяющым покрывала над всякую главу всякаго возраста, еже развратити душы: души развратишася людий Моих, и душ снабдеваху: 19 и осквернавляху Мя у людий Моих, горсти ради ячмене и ради укруха хлеба, еже избити душы, имже не подобаше умрети, и оживити душы, имже не подобаше жити, провещающе людем Моим, послушающым лживых провещаний. 20 Сего ради сия глаголет Господь: се, Аз на возглавия ваша, имиже вы развращаете душы тамо: и отторгну я от мышцей ваших, и послю душы, яже вы развращасте душы их на разсыпание, 21 и растерзаю покрывала ваша, и отиму люди Моя от руки вашея, и ктому не будут в руках ваших на развращение, и познаете, яко Аз Господь: 22 понеже развращасте сердце праведнаго неправедно, Аз же не развращах его, и укреплясте руце беззаконнику, еже отнюд не обратитися ему от пути его злаго и живу быти ему, 23 сего ради не узрите лжи, и волхвования ктому не имате волхвовати: и избавлю люди Моя от рук ваших, и увесте, яко Аз Господь. === 14 === 1 И приидоша ко мне мужие от старец Израилевых и седоша предо мною. 2 И бысть слово Господне ко мне глаголя: 3 сыне человечь, мужие сии положиша помышления своя на сердцах своих и мучение неправд своих поставиша пред лицем своим: аще отвещаяй отвещаю им? 4 Сего ради глаголи к ним и речеши им: сия глаголет Адонаи Господь: человек человек от дому Израилева, иже аще положит мысли своя в сердцы своем и мучение неправды своея учинит пред лицем своим и приидет ко пророку, Аз Господь отвещаю ему о сих, имиже держится мысль его: 5 яко да уклонят дом Израилев по сердцам их удаленым от Мене помышленьми их. 6 Сего ради рцы дому Израилеву: сия глаголет Господь Бог: обратитеся и отвратитеся от начинаний ваших и от всех нечестий ваших, и обратите лица ваша ко мне: 7 зане человек человек от дому Израилева и от пришелцев пришедших ко Израилеви, иже аще удалится от Мене и положит мысли своя на сердцы своем и мучение неправды своея учинит пред лицем своим и приидет ко пророку еже вопросити ему Мене, Аз Господь отвещаю ему, в немже держится он, 8 и утвержу лице Мое на человека того и положу его в погибель и в потребление и извергу его от среды людий Моих, и увесте, яко Аз Господь. 9 И пророк аще прельстится и речет слово, Аз Господь прельстих пророка того, и простру руку Мою нань и потреблю его от среды людий Израилевых. 10 И приимут неправду свою по неправде вопрошающаго, и по неправде такожде пророку будет, 11 яко да не прельщается ктому дом Израилев от Мене, и да не оскверняются ктому во всех гресех своих, и будут Ми в люди, Аз же буду им в Бога, глаголет Адонаи Господь. 12 И бысть слово Господне ко мне глаголя: 13 сыне человечь, земля аще согрешит Ми, еже пастися грехом, и простру руку Мою на ню и сотру утверждение хлебное и пущу на ню глад и возму с нея человеки и скоты, 14 и аще будут сии трие мужие среде ея, Ное и Даниил и Иов, тии во правде своей спасутся, глаголет Адонаи Господь: 15 аще и звери злыя напущу на землю и умучу ю, и будет в пагубу, и не будет проходящаго сквозе ю от лица зверей, 16 и аще будут трие сии мужие среде ея, живу Аз, глаголет Адонаи Господь, ни сынове, ни дщери их спасутся, но токмо сии едини спасутся, а земля в потребление будет: 17 аще же наведу на ту землю мечь и реку: мечь да пройдет землю, и возму от нея человека и скота, 18 и трие мужие сии будут среде ея, живу Аз, глаголет Адонаи Господь, не избавят ни сынов, ни дщерей своих, но тии едини спасутся: 19 аще же и смерть пущу на землю ону и излию ярость Мою на ню в крови, еже потребити от нея человеки и скоты, 20 Ное же и Даниил и Иов будут посреде ея, живу Аз, глаголет Адонаи Господь, ни сынове, ни дщери не останут им, тии же во правде своей спасутся и избавят душы своя. 21 Сия глаголет Адонаи Господь: аще же и четыри мести Моя лютыя пущу на Иерусалима, мечь и глад, и звери люты и смерть, еже потребити от него человеки и скоты, 22 и се, оставлени в нем спасеннии от него, сии изведут сыны и дщери: се, тии изыдут к вам, и узрите пути их и помышления их, и раскаетеся о злых, яже наведох на Иерусалим, вся злая, яже наведох нань, 23 и утешат вас: понеже узрите пути их и помышления их, и уразумеете, яко не всуе сотворил есмь вся, елика сотворих в нем, глаголет Адонаи Господь. === 15 === 1 И бысть слово Господне ко мне глаголя: 2 сыне человечь, что было бы древо лозное от всех древес гроздных, сущих во древесех дубравных? 3 Аще возмут от него древо, еже сотворити дело? И аще возмут кол от него, еже обесити на нем кий либо сосуд? 4 Разве еже огневи предастся на потребление, летнее очищение его потребляет огнь, и изчезает до конца: еда потребно будет на дело? 5 И еще целу ему сущу не будет на дело, кольми паче аще огнь е попалит до конца, будет ли на дело потом? 6 Сего ради рцы: сице глаголет Господь Бог: якоже лоза виноградная во древех дубравных, юже дах на потребление огневи, тако дам живущыя во Иерусалиме: 7 и дам лице Мое на ня, от огня изыдут, и огнь пояст я: и уведят, яко Аз Господь, егда утвержду лице Мое на них: 8 и дам землю в пагубу, зане впадоша в грех, глаголет Адонаи Господь. === 16 === 1 И бысть слово Господне ко мне глаголя: 2 сыне человечь, засвидетелствуй Иерусалиму беззакония его 3 и речеши: сия глаголет Адонаи Господь дщери Иерусалимстей: корень твой и бытие твое от земли Хананейски: отец твой Аморреанин и мати твоя Хеттеаныня: 4 и рождение твое, в оньже день родилася еси, не обязаша сосец твоих, и водою не омыша тя на спасение, ни солию осолиша, ниже пеленами повиша: 5 и не пощаде тебе око Мое, еже сотворити тебе едино от всех сих, пострадати что о тебе, и отвержена была еси на лице поля стропотством души твоея, в день в оньже родилася еси. 6 И проидох сквозе тя и видех тя смешену во крови твоей и рекох ти: от крове твоея жива буди: и рекох тебе: во крови твоей живот твой: 7 умножайся, якоже прозябение селное дах тя, и умножилася еси и возвеличилася и вошла еси во грады градов: сосцы твои возрастоша, и власи твои просветлеша, ты же была еси нага и без красы. 8 И проидох сквозе тя и видех тя: и се, время твое, яко время витающих: и прострох криле Мои на тя и прикрых студ твой, и кляхся тебе и внидох в завет с тобою, глаголет Адонаи Господь, и была еси Мне: 9 и омых тя водою и ополосках кровь твою от тебе и помазах тя елеем, 10 и облекох тя в пестроты и обух тя в червлены, и препоясах тя виссоном и возложих на тя трихаптон, 11 и украсих тя утварию и возложих запястие на руце твои и гривну на выю твою, 12 и дах усерязи на ноздри твоя и колца во ушы твои и венец хвалы на главу твою: 13 и украшенна была еси златом и сребром, и одежды твоя виссонны и трихапты и испещрения, семидал и мед и масло яла еси, и была еси добра зело зело, и управилася еси на царство: 14 и изыде имя твое во языки в доброте твоей, зане совершенно бе лепотою в красоте, юже учиних на тебе, глаголет Адонаи Господь. 15 Ты же уповала еси на доброту твою и соблудила еси во имени твоем и излияла еси блужение твое на всякаго мимоходящаго, тому была еси, емуже не подобаше: 16 и взяла еси от риз твоих и сотворила себе кумиры сошвеныя и соблудила еси с ними, и не внидеши, и не будет. 17 И взяла еси сосуды хвалы твоея от сребра Моего и злата Моего, от нихже дах тебе, и сотворила себе образы мужески, и соблудила еси в них. 18 И взяла еси ризы своя испещренныя и одеялася еси в ня, и масло Мое и фимиам Мой положила еси пред лицем их, 19 и хлебы Моя, яже дах тебе, семидалом и маслом и медом напитах тя, и положила еси та пред лицем их в воню благоухания. И бысть по сих, глаголет Адонаи Господь, 20 и взяла еси сыны твоя и дщери твоя, яже родила еси, и заклала еси им в потребление. Еда мало соблудила еси? 21 И заклала еси чада твоя и дала еси я, внегда принесла еси их на жертву им. 22 Сие паче всякаго блуда твоего и гнусностей твоих: и не помянула еси дний младенства твоего, егда была еси нага и безобразна, и смешена во крови твоей жила еси. 23 И бысть по всех злобах твоих, горе горе тебе, глаголет Адонаи Господь, 24 и создала еси себе храм блуднический и сотворила себе полагания на всех стогнах: 25 и в начале всякаго пути создала еси блудилища своя и растлила доброту твою, и разложила голени твоя всякому мимоходящему и умножила еси блуд твой: 26 и соблудила с сынми Египетскими соседы твоими дебелоплотными, и многажды блудила еси, еже разгневати Мя. 27 И се, простру руку Мою на тя и отвергу законы твоя и предам тя душам ненавидящым тебе, дщерем иноплеменников, совращающым тя с пути твоего, имже нечествовала еси. 28 И соблудила еси с сынми Ассировыми и ниже тако насытилася еси: и соблудила и не насытилася, 29 и умножила заветы твоя ко земли Хананейстей, Халдейстей, и ниже в сих насытилася еси. 30 Что сотворю сердцу твоему, глаголет Адонаи Господь, внегда твориши вся сия дела жены блудницы продерзыя? И соблудила еси трегубо во дщерех твоих. 31 Егда соградила еси блудилище твое в начале всякаго пути и высокая твоя сотворила еси на всех стогнах, и не была яко блудница собирающая наем. 32 Жена любодейница подобна тебе, от мужа своего вземлющи наем, 33 всем блудившым с нею даяше наем: и ты дала еси наем всем рачителем твоим и обременяла их, еже приходити им к тебе отвсюду в блужения твоя. 34 И бысть в тебе сопротивно обычаю женску во блужении твоем, и с тобою соблудившым, вместо еже бы дати тебе наем, и наем не дадеся тебе, и бысть в тебе сопротивно. 35 Сего ради слыши, блуднице, слово Господне. 36 Сия глаголет Адонаи Господь: зане излияла еси медь твою, и открыется срам твой во блужении твоем ко рачителем твоим, и во вся помышления беззаконий твоих, и во крови чад твоих, яже дала еси им: 37 сего ради, се, Аз на тя соберу вся похотники твоя, с нимиже смесилася еси, и всех, ихже любила еси, со всеми, ихже ненавидела еси: и соберу я на тя отвсюду и открыю злобы твоя к ним, и узрят весь срам твой. 38 И отмщу ти отмщением любодейцы и проливающия кровь, и положу тя во крови ярости и рвения, 39 и предам тя в руце их, и раскопают блудилище твое и разорят высокая твоя, и совлекут с тебе ризы твоя и возмут сосуды хвалы твоея, и оставят тя нагу и безстудну: 40 и приведут на тя народы, и побиют тебе камением и изсекут тя мечьми своими, 41 и запалят домы твоя огнем и сотворят в тебе отмщение пред женами многими: и обращу тя от блужения, и найма ктому не даси. 42 И послю ярость Мою на тя, и отимется рвение Мое от тебе: и почию и ктому не попекуся. 43 Понеже не помянула еси дний младенства твоего и опечалила Мя во всех сих: и се, Аз пути твоя на главу твою дах, глаголет Адонаи Господь: и тако сотворила еси нечестие по всем беззаконием твоим. 44 Сия суть вся, елика рекоша на тя в притчи, глаголюще: якоже мати, тако и дщерь. 45 Дщерь матере твоея ты еси, отринувшая мужа своего и чада своя: и сестры сестр твоих, отринувшыя мужей своих и чад своих: мати ваша Хеттеаныня, а отец ваш Аморрей: 46 сестра ваша старейшая Самариа, та и дщери ея живущыя ошуюю тебе: и сестра твоя меншая, живущая одесную тебе, Содома и дщери ея. 47 Но ниже по путем их ходила еси, ниже сотворила по беззаконием их поне мало, и превозшла еси их во всех путех твоих. 48 Живу Аз, глаголет Адонаи Господь, не сотворила Содома сия сестра твоя и дщери ея, якоже ты сотворила и дщери твоя. 49 Обаче сие беззаконие Содомы сестры твоея, гордость в сытости хлеба и во изюбилии вина, и сластолюбствоваша та и дщери ея: сие бяше ей и дщерем ея: и руки убогому и нищему не подаяху, 50 и величахуся, и сотвориша беззакония предо Мною: и отвергох я якоже видех. 51 Самариа же пол грехов твоих не согреши: и умножила еси беззакония твоя паче онех, и оправдала еси сестры твоя во всех беззакониих твоих, яже сотворила еси. 52 И ты приими мучение твое, в немже растлила еси сестры твоя во гресех твоих, имиже беззаконновала паче тех, и оправдала их паче тебе: и ты посрамися и приими безчестие твое, внегда оправдати тебе сестры твоя. 53 И обращу обращения их, обращение Содомы и дщерей ея, и обращение Самарии и дщерей ея, и обращу обращение твое среде их, 54 яко да приимеши мучение твое и безчестна будеши от всех, яже сотворила еси во разгневании моем. 55 И сестра твоя Содома и дщери ея возставятся, якоже беша исперва: и Самариа и дщери ея возставятся, якоже беша исперва: и ты и дщери твоя возставитеся, якоже бесте прежде. 56 И не была Содома сестра твоя во слышание во устех твоих во днех гордыни твоея, 57 прежде откровения злоб твоих, якоже ныне укоризна еси дщерей Сирских и всех сущих окрест ея дщерей иноплеменничих одержащих тя окрест: 58 нечестия твоя и беззакония твоя ты понесла еси я, глаголет Господь. 59 Сия глаголет Адонаи Господь: и сотворю в тебе, якоже сотворила еси, якоже презрела еси еже преступити завет Мой: 60 и воспомяну Аз завет Мой, иже с тобою во днех младенства твоего, и возставлю тебе завет вечный: 61 и помянеши пути твоя и безчестна будеши, внегда поймеши сестры твоя старейшыя со юнейшими твоими, и дам я тебе на созидание, но не от завета твоего: 62 и возставлю Аз завет Мой с тобою, и увеси, яко Аз Господь: 63 яко да помянеши и усрамишися, и не будет тебе ктому отверсти уст твоих от лица безчестия твоего, егда милостив буду тебе по всем, елика сотворила еси, глаголет Адонаи Господь. === 17 === 1 И бысть слово Господне ко мне глаголя: 2 сыне человечь, повеждь повесть и рцы притчу на дом Израилев, 3 и речеши: сия глаголет Адонаи Господь: орел великий, великокрилый, долгий протяжением, исполнь ногтей, иже имать повеление внити в Ливан, и взя избранныя кедра, 4 и верхи мягкости острога, и принесе я в землю Хананейску, во граде огражденнем положи я: 5 и взя от семене земнаго и даде е на поли плодне, (да утвердит корение) над водами многими, видено учини е: 6 и прозябе и бысть в виноград немощен и мал величеством, еже являтися лозию его на нем, и корение его под ним бяше: и бысть в виноград, и сотвори розги, и простре отрасли своя. 7 И бысть орел другий велик, великокрилный, мног ногтьми, и се, виноград сей оплетаяся об нем: и корение его к нему, и лозие свое испусти ему, еже напаяти себе со грудием сада своего. 8 На поли добре, на воде мнозе питается той, еже сотворити прозябения и приносити плод, еже быти в виноград велик. 9 Сего ради рцы: сия глаголет Адонаи Господь: еда исправится? Не корение ли мягкоты его и плод изгниет? И изсхнут вся леторасли его, и не мышцею ли великою, ни людьми многими еже исторгнути его из корения его? 10 И се, тыет: еда успеет? Не абие ли, егда коснется ему ветр знойный, посхнет сухотою? Со грудием прозябения своего изсхнет. 11 И бысть слово Господне ко мне глаголя: 12 сыне человечь, рцы ко дому прогневляющему мя: не весте ли, что суть сия? Рцы им: се, грядет царь Вавилонск на Иерусалим, и возмет царя его и князя его, и отведет я к себе в Вавилон: 13 и поймет от племене царска, и завещает с ним завет, и введет его в клятве, и старейшины земли возмет, 14 еже быти в царство немощно, еже весьма не возноситися, (но) хранити завет его и стояти в нем: 15 и отвержется от него посылая послы своя во Египет дати ему кони и люди многи: еда исправит? Спасется ли творяй сопротивная? И преступаяй завет спасется ли? 16 Живу Аз, глаголет Адонаи Господь, аще не на месте, идеже царь воцаривый его, иже похули клятву Мою и иже преступи завет Мой, с ним среде Вавилона скончается. 17 И не в силе велицей, ниже в народе мнозе сотворит с ним фараон брань во острозе и в сограждении стрельниц, еже изяти душы многи. 18 И похули клятву, еже преступити завет, и се, даде руку свою и вся сия сотвори ему: не спасется. 19 Сего ради рцы: сия глаголет Адонаи Господь: живу Аз, аще не клятву Мою, юже похули, и завет Мой, егоже преступи, дам на главу его: 20 и простру мрежу Мою нань, и ят будет во одержании ея: и приведу его в Вавилон и разсуждуся с ним тамо о неправде его, еюже неправдова ко Мне: 21 и вси избегшии его и вси избраннии со всеми ополчении его мечем падут, и вся оставшая их разсею по всему ветру, и увесте, яко Аз Господь глаголах. 22 Сего ради сия глаголет Адонаи Господь: и возму Аз от избранных кедра высокаго от верха и дам от главы отраслей его, сердца их остружу и насажду аз на горе высоце: 23 и повешу и в горе высоце Израилеве и насажду и, и прорастит отрасль и сотворит плод и будет в кедр велик: и почиет под ним всяк зверь, и под сению его почиет всяка птица, и лозие его паки устроятся: 24 и увесть всяко древо полевое, яко Аз Господь смиряяй древо высокое и возносяй древо смиренное, и изсушаяй древо зеленое и проращаяй древо сухое: Аз Господь глаголах и сотворю. === 18 === 1 И бысть слово Господне ко мне глаголя: 2 сыне человечь, что вам притча сия на земли Израилеве, глаголющым: отцы ядоша терпкое, а зубом чад их оскомины быша? 3 Живу Аз, глаголет Адонаи Господь, аще будет еще глаголема притча сия во Израили. 4 Яко вся душы Моя суть, якоже душа отча, тако и душа сыновня, Моя суть: душа, яже согрешит, та умрет, и зобавшаго пародки зубы оскоминны будут. 5 Человек же, иже есть праведен творяй суд и правду, 6 на горах не снесть и очес своих не воздвигнет на кумиры дому Израилева, и жены ближняго своего не осквернавит и к жене в месячных сущей не приближится, 7 и человеку не насильствует, залог должнику отдаст и хищением не восхитит, хлеб свой алчному даст и нагаго облечет в ризу, 8 и сребра своего в лихву не даст и прибытка не возмет, и от неправды отвратит руку свою и суд сотворит между мужем и ближним своим, 9 и в заповедех Моих ходил и оправдания Моя снабдел, еже творити та: праведен сей есть, жизнию жити имать, глаголет Адонаи Господь. 10 И аще родит сына губителя, проливающаго кровь и творяща грехи, 11 в путь отца своего праведнаго не ходил, но и на горах пожре, и жену ближняго своего осквернавил, 12 и убогаго и нищаго преобиде, и хищением восхитил и залога не отдал, и к кумиром положи очи свои, беззакония сотвори, 13 с лихвою даде и с примножением приял, сей жизнию не поживет: вся сия беззакония сотвори, смертию умрет, кровь его на нем будет. 14 Аще же родит сына, он же увидит вся грехи отца своего, яже сотворил есть, и убоится и не сотворит по ним, 15 на горах не снесть и очес своих не положит к кумиром дому Израилева, и жены подруга своего не осквернавит 16 и человека не насильствует, и залога не удержит и хищением не восхитит, хлеб свои алчному даст и нага одеет ризою, 17 и от неправды отвратит руку свою, лихвы и примножения не возмет, правду сотворит и в заповедех Моих ходити будет: не скончается в неправдах отца своего, (но) жизнию поживет. 18 Отец же его аще скорбию оскорбит и хищением восхитит, сопротивная сотворит посреде людий Моих, и умрет в неправдах своих. 19 И речете: что яко не взя сын неправды отца своего? Понеже сын правду и милость сотвори, вся законы Моя соблюде и сотвори я, жизнию поживет. 20 Душа же согрешающая, та умрет: сын не возмет неправды отца своего, и отец не возмет неправды сына своего: правда праведнаго на нем будет, и беззаконие беззаконника на нем будет. 21 И беззаконник аще обратится от всех беззаконий своих, яже сотворил, и сохранит вся заповеди Моя и сотворит суд и правду и милость, жизнию поживет и не умрет: 22 вся согрешения его, елика сотворил, не помянутся ему: но в правде своей, юже сотворил, жив будет. 23 Еда хотением восхощу смерти грешника, глаголет Адонаи Господь, а не еже обратитися ему от пути зла и живу быти ему? 24 И аще совратится праведник от правды своея и сотворит неправду по всем беззаконием, яже сотворил беззаконник, вся правды его, яже сотворил есть, не помянутся: в преступлении своем, имже преступи, и во гресех своих, имиже согреши, в них умрет. 25 И рекосте: не управится путь Господень. Слышите убо, весь дом Израилев, еда путь мой не управится? Ваш ли путь убо управится? 26 Егда совратится праведник от правды своея и сотворит грех, и умрет в преступлении, еже сотворил, в том умрет. 27 И егда обратится беззаконник от беззакония своего, еже сотворил, и сотворит суд и правду, той душу свою снабдел есть: 28 и виде и обратися от всех беззаконии своих, яже сотвори, жизнию поживет и не умрет. 29 И глаголет дом Израилев: не управится путь Господень. Еда путь Мой не управляется? О, доме Израилев, убо ваш ли путь управляется? 30 (Сего ради) комуждо по пути его сужду вам, доме Израилев, глаголет Адонаи Господь: обратитеся и отвержитеся от всех нечестий ваших, и не будут вам неправды в мучение: 31 отвержите от себе вся нечестия ваша, имиже нечествовасте ко Мне, и сотворите себе сердце ново и дух нов, и сотворите вся заповеди Моя: и вскую умираете, доме Израилев? Глаголет Господь. 32 Понеже не хощу смерти грешника умирающаго, глаголет Адонаи Господь, но еже обратитися ему от пути своего и жити души его, глаголет Адонаи Господь: обратитеся убо, и живи будете. === 19 === 1 Ты же, сыне человечь, возми плачь на князи Израилевы, 2 и речеши: почто мати твоя львица среде львов почи, посреде львов умножи львичища своя? 3 И отскочи един от львичищ ея и бысть лев, и научися восхищати восхищения и человеки снеде. 4 И слышаша о нем языцы, и ят бысть в растлении их, и приведоша его во узде во Египет. 5 И виде, яко отведен бысть от нея, и погибе чаяние ея: и взя инаго от львичищ своих и львом учини его, 6 и живяше посреде львов, бысть лев и научися восхищати восхищения: человеки изяде, 7 и пасяшеся в лютости своей, и грады их пусты постави, и погуби землю и исполнение ея гласом рыкания своего. 8 И даша нань языцы окрест от стран и простроша нань мрежи своя, и в погублении их ят бысть. 9 И положиша его во узде и в клети, приведоша его ко царю Вавилонску и ввергоша его в темницу, яко да не слышится глас его ктому на горах Израилевых. 10 Мати твоя яко виноград и яко цвет шипчан на воде насажден, плод его и отрасль его бысть от воды многи. 11 И бысть ему жезл крепости над племенем старейшин, и вознесеся в величии своем среде лозия: и виде величество свое во множестве лозия своего, 12 и обломися в ярости, и на землю повержен бысть, и ветр знойный изсуши плоды его: увядоша, и изсше жезл крепости его: огнь потреби его. 13 И ныне насадиша его в пустыни, на земли безводне. 14 И изыде огнь от жезла избранных его и пояде и, и не бе в нем жезла крепости его: племя в притчу плача есть, и будет плачь. === 20 === 1 И бысть в лето седмое, в пятый месяц, в десятый день месяца, приидоша мужие от старейшин дому Израилева вопросити Господа и седоша пред лицем моим. 2 И бысть слово Господне ко мне глаголя: 3 сыне человечь, глаголи ко старейшинам дому Израилева и речеши к ним: тако глаголет Адонаи Господь: еда вопросити Мене вы приходите? Живу Аз, аще отвещаю вам, глаголет Адонаи Господь. 4 Аще отмщением отмщу им: сыне человечь, беззакония отец их засвидетелствуй им, 5 и речеши к ним: сия глаголет Адонаи Господь: от негоже дне избрах дом Израилев, и уведен бых племени дому Иаковля и познан бых им во земли Египетстей, и приях я рукою Моею глаголя: Аз Господь Бог ваш: 6 в той день подях я рукою Моею, еже извести я из земли Египетския в землю, юже уготовах им, землю кипящую млеком и медом, сот есть паче всех земель, 7 и рекох к ним: кийждо мерзости от очес своих отвержите и во творениих Египетских не оскверняйтеся, Аз Господь Бог ваш. 8 И отвергошася Мене и не хотеша послушати Мя: кийждо мерзостей от очес своих не отвергоша и творений Египетских не оставиша. И рекох, еже излияти ярость Мою на ня и скончати гнев Мой на них среде земли Египетския. 9 И сотворих, яко да имя Мое весьма не осквернится пред языки, в нихже суть тии среде их, в нихже познан бых им пред лицем их, еже извести я из земли Египетския. 10 И изведох я из земли Египетския и введох я в пустыню, 11 и дах им заповеди Моя, и оправдания Моя явих им, яже аще сотворит человек, жив будет в них: 12 и субботы Моя дах им, еже быти в знамение между Мною и между ими, еже разумети им, яко Аз Господь освящаяй их. 13 И глаголах ко дому Израилеву в пустыни: в заповедех Моих ходите и оправдания Моя сохраните, еже творити я, яже сотворит человек и жив будет в них. И разгнева Мя дом Израилев в пустыни: в заповедех бо Моих не ходиша и оправдания Моя отвергоша, яже сотворит человек и жив будет в них: и субботы Моя оскверниша зело. И рекох, еже излияти ярость Мою на ня в пустыни, еже потребити их. 14 И сотворих, яко да весьма имя Мое не осквернится пред языки, из нихже изведох я пред очима их. 15 И Аз воздвигох руку Мою на ня в пустыни весьма, еже не ввести их в землю, юже дах им, в землю текущую млеком и медом, сот есть паче всея земли: 16 понеже судбы Моя отвергоша и в заповедех Моих не ходиша, и субботы Моя оскверниша и вслед помышлений сердца своего хождаху. 17 И пощаде я око Мое, еже потребити их, и не сотворих им скончания в пустыни. 18 И рекох ко чадом их в пустыни: в законех отец ваших не ходите и оправданий их не храните, и ко творением Египетским не примешайтеся и не оскверняйтеся: 19 Аз Господь Бог ваш: в заповедех Моих ходите, и оправдания Моя снабдите и творите я, 20 и субботы Моя освящайте и будет в знамение между Мною и между вами, еже ведети вам, яко Аз Господь Бог ваш. 21 И разгневаша Мя, и чада их в заповедех Моих не ходиша и оправданий Моих не снабдеша, еже творити я: сия бо сотворив человек жив будет в них: и субботы Моя оскверниша зело. И рекох: излию ярость Мою на ня, еже скончати гнев Мой на них в пустыни. 22 И сотворих, яко да имя Мое весьма не осквернавится пред языки, от нихже изведох я пред очима их. 23 И Аз воздвигох руку Мою на ня в пустыни, еже расточити я во языцех и разсеяти я во странах, 24 понеже оправданий Моих не сотвориша и заповеди Моя отринуша и субботы Моя оскверниша, и вслед кумиров отец их быша очеса их. 25 И дах им заповеди не добры и оправдания, в нихже не будут живи: 26 и оскверню я в даяниих их, внегда проводити (им) всякое разверзающее ложесна, да погублю их, да уразумеют, яко Аз Господь. 27 Сего ради глаголи к дому Израилеву, сыне человечь, и речеши к ним: сия глаголет Адонаи Господь: даже до сего разгневаша Мя отцы ваши во гресех своих, имиже согрешиша ко Мне: 28 и введох я в землю, в нюже воздвигох руку Мою, еже дати ю им: и видеша всяк холм высок и всяко древо присенное, и пожроша тамо богом своим и учиниша тамо ярость даров своих, и положиша тамо воню благовония своего и возлияша тамо возлияния своя. 29 И рекох к ним: что суть Аввама, яко вы входите тамо? И прозваша имя ему Аввама даже до днешняго дне. 30 Сего ради рцы к дому Израилеву: сия глаголет Адонаи Господь: аще во беззакониих отец ваших вы оскверняетеся и вслед мерзостей их вы соблуждаете, 31 и в приношении даров ваших и в нароцех ваших, егда проходят чада ваша сквозе огнь: вы оскверняетеся во всех кумирех ваших даже до днешняго дне, и Аз отвещаю ли вам, доме Израилев? Живу Аз, глаголет Адонаи Господь, аще отвещаю вам и аще взыдет на дух ваш сие. 32 И не будет, якоже вы глаголете: будем, якоже языцы и якоже племена земная, служити древу и камению. 33 Сего ради живу Аз, глаголет Адонаи Господь, аще не рукою крепкою и мышцею высокою и в ярости излиянней царствовати буду над вами: 34 и изведу вы от людий и прииму вы от стран, в нихже бесте разсеяни, рукою крепкою и мышцею высокою и яростию излиянною, 35 и приведу вас в пустыню людскую и разсуждуся с вами тамо лицем к лицу: 36 якоже судихся со отцы вашими в пустыни земли Египетския, тако сужду и вам, глаголет Адонаи Господь: 37 и проведу вы под жезлом моим и введу вы в числе завета, 38 и изберу от вас нечестивыя и отвергшыяся: из земли бо обитания их изведу я, и в землю Израилеву не внидут, и познаете, яко Аз Господь Бог. 39 Вы же, доме Израилев, сице глаголет Адонаи Господь: кийждо кумиры своя отимите, и потом аще послушаете Мене, и имене Моего святаго не осквернавите ксему в дарех ваших и рукотворениих ваших: 40 понеже на горе Моей святей, на горе высоце Израилеве, глаголет Адонаи Господь, тамо послужат Ми весь дом Израилев до конца на земли, и тамо прииму я и тамо присещу на приношения ваша и начатки обетов ваших во всех освященных ваших. 41 В воню благовония прииму вы, егда изведу вы из людий и прииму вы от стран, в няже расточени бысте, и освящуся в вас пред очима людскима: 42 и увесте, яко Аз Господь, егда введу вы в землю Израилеву, в землю, на нюже воздвигох руку Мою дати ю отцем вашым: 43 и помянете тамо пути вашя и вся мерзкия грехи вашя, в нихже осквернистеся, и посрамите лица ваша во всех злобах ваших, яже сотвористе: 44 и познаете, яко Аз Господь, егда сотворю вам тако, яко да имя Мое не осквернится по путем вашым злым и по рукотворением вашым растленным, доме Израилев, глаголет Адонаи Господь. 45 И бысть слово Господне ко мне глаголя: 46 сыне человечь, утверди лице твое на юг и воззри на дарома, и прорцы на дубраву старейшину нагева 47 и речеши дубраве нагевове: слыши слово Господне, сия глаголет Адонаи Господь: се, Аз возгнещу в тебе огнь, и пожжет в тебе всяко древо зеленое и всяко древо сухое, не угаснет пламень разжженый, и изгорит в нем всяко лице от полудне до севера, 48 и увесть всяка плоть, яко Аз Господь разжегох его, и не угаснет. 49 И рекох: никакоже, Господи, Господи! Сии глаголют ко мне: не притча ли есть сия глаголема? === 21 === 1 И бысть слово Господне ко мне глаголя: 2 сего ради прорцы, сыне человечь, и утверди лице твое на Иерусалим и воззри на святыни их, и прорцы на землю Израилеву, 3 и речеши ко земли Израилеве: сия глаголет Адонаи Господь: се, Аз на тя, и извлеку мечь Мой из ножен его, и потреблю от тебе неправеднаго и беззаконнаго. 4 Понеже потреблю от тебе неправеднаго и беззаконника, тако изыдет мечь Мой из ножен своих на всяку плоть от юга даже до севера, 5 и увесть всяка плоть, яко Аз Господь извлекох мечь Мой из ножен его, и ктому не возвратится. 6 И ты, сыне человечь, воздохни в сокрушении чресл твоих и в болезнех возстени пред очима их. 7 И будет, аще рекут к тебе: чесо ради ты стенеши? И речеши: о возвещении, яко грядет: и сокрушится всяко сердце, и ослабеют вся руки, и издшет всяка плоть и всяк дух, и вся стегна осквернавятся мокротою: се, грядет и будет, глаголет Адонаи Господь. 8 И быти слово Господне ко мне глаголя: 9 сыне человечь, прорцы и речеши: сия глаголет Адонаи Господь: рцы: мечу, мечу! Изострися и разярися, 10 яко да изсечеши сечения: изострися, яко да будеши в блещание и готов на разсыпание: сецы, изничтожай, отрини всякое древо. 11 И даде его уготованна, еже держати в руках его: наострился мечь, готов есть, еже дан быти в руце секущаго. 12 Возопий и восплачися, сыне человечь, яко сей бысть в людех Моих, сей во всех старейшинах Израилевых: обитающии близ под мечь быша с людьми Моими: сего ради восплещи рукама твоима, 13 яко оправдася. И что, аще и племя отринется? Не будет, глаголет Адонаи Господь. 14 И ты, сыне человечь, прорцы и восплещи рукама и усугуби мечь: третий мечь язвеным есть, мечь язвеным велик, и ужасиши я, 15 яко да сокрушится сердце их, и умножатся немощнии во всех вратех их, предаются на усечение мечное: благо остр бысть на сечение, благо бысть на блистание. 16 Проходи яко молния, острися одесную и ошуюю, аможе аще лице твое востанет: 17 и Аз восплещу рукою Моею к руце Моей и напущу ярость Мою, Аз Господь глаголах. 18 И бысть слово Господне ко мне глаголя: 19 и ты, сыне человечь, учини себе пути два, еже внити мечу царя Вавилонска, от страны единыя изыдут начала два, и руку уготовают в начале пути града, от начала пути учиниши, 20 яко внити мечу на Равваф сынов Аммоних и на Иудею и на Иерусалим среде его. 21 Понеже станет царь Вавилонск на старем пути, на начале обоих путий, еже волхвовати волхвованием, якоже вскипети жезлу, и вопрошати ваяных и вражити во утробах. 22 И бысть одесную его волшебство на Иерусалим, еже обставити острог и еже отверсти уста с воплем и возвысити глас со глашением трубным, и яко поставити острог пред враты его и насыпати персти и поставити стрелницы. 23 И той аки волхвуя им волхвование пред ними, уседмеряя седмерицы, и той воспоминаяй неправды его помянути. 24 Того ради сия глаголет Адонаи Господь: понеже воспомянусте неправды вашя, внегда открышася нечестия ваша, яко явитися грехом вашым во всех беззакониих ваших и во всех начинаниих ваших, понеже воспомянусте, в тех яти будете. 25 И ты, сквернаве, беззаконниче, старейшино Израилев, егоже грядет день во время неправды, конец: 26 сия глаголет Господь: сними кидар и отложи венец, сей не таков будет, смирил еси высокое и вознесл смиренное: 27 неправду, неправду, неправду положу его, и той не таков будет, дондеже приидет, Емуже достоит, и предам Ему. 28 И ты, сыне человечь, прорцы и речеши: се глаголет Адонаи Господь к сыном Аммоним и ко укоризне их, и речеши: мечу, мечу извлеченый на сечение, извлеченый на скончание, двигнися, яко да блистаеши: 29 в видении твоем суетнем, и внегда вражбити тебе ложная, егда предаешися ты на выи язвеных беззаконников, ихже день приспе во время неправды, конец: 30 возвратися в ножны твоя и не стани на месте сем, в немже родился еси, на земли твоей имам тя судити: 31 и излию на тя гнев Мой, во огни гнева Моего дуну на тя и предам тя в руце мужей варвар, творящих пагубу: 32 огню будеши ядь, кровь твоя будет посреде земли твоея: не будет твоея памяти, занеже Аз Господь глаголах. === 22 === 1 И бысть слово Господне ко мне глаголя: 2 и ты, сыне человечь, аще судити будеши граду кровей, и яви ему вся беззакония его, 3 и речеши: сия глаголет Адонаи Господь: о, граде проливаяй кровь среде себе, еже приити времени его, и творяй кумиры на себе, еже осквернитися самому: 4 в крови их, юже излиял еси, согрешил еси, и в кумирех твоих, яже творил, осквернился еси, и сократил еси дни твоя, и привед время лет твоих: сего ради дах тя на укоризну языком и на поругание всем странам, 5 близ тебе и далече от тебе сущым, и поругаются тебе и возопиют на тя: о, нечистый, пресловутый и мног во беззакониих! 6 Се, старейшины дому Израилева, кийждо ко своим ужикам смесишася в тебе, яко да пролиют кровь: 7 отцу и матери злословяху в тебе и ко пришелцу обращахуся неправдами в тебе: сироту и вдовицу преобидяху в тебе: 8 и святая Моя уничижаху и субботы Моя оскверняху в тебе: 9 мужие разбойницы беша в тебе, яко да пролиют в тебе кровь, и на горах ядяху в тебе и скверны творяху в тебе: 10 стыд отчий открыша в тебе, и в нечистоте седящую обругаша в тебе: 11 кийждо на жену подруга своего беззаконноваша, и кийждо невестку свою оскверняше в нечестии, и кийждо сестру свою, дщерь отца своего, обругаваше в тебе: 12 мзды взимаху в тебе, яко да пролиют кровь, лихву и избыток взимаху в тебе: и скончал еси скончание злобы твоея яже в насилии, Мене же забыл еси, глаголет Адонаи Господь. 13 Се убо, ударю рукою Моею о руку Мою на та, яже совершил еси и яже сотворил еси, и на крови твоя бывшыя посреде тебе: 14 аще устоит сердце твое, и аще преодолеют руце твои во днех, в няже Аз творю в тебе? Аз Господь глаголах, и сотворю. 15 И разсыплю тя во языцех и разсею тя в странах, и оскудеет нечистота твоя из тебе, 16 и владети буду тобою пред очима языков, и познаеши, яко Аз Господь. 17 И бысть слово Господне ко мне глаголя: 18 сыне человечь, се, быша Мне дом Израилев смешани вси с медию и железом, и со оловом чистым и со свинцем, среде пещи сребро смешено суть. 19 Сего ради рцы: сия глаголет Адонаи Господь: понеже бысте вси во смешение едино, сего ради, се, Аз прииму вас во средину Иерусалима: 20 якоже приемлется сребро и медь, и железо и свинец и олово чистое во средину пещи, еже дунути на ня огню, да слиются, тако прииму вас во гневе Моем и в ярости Моей, и соберу и слию вас, 21 и дуну на вы во огни гнева Моего, и слияни будете среде его: 22 якоже сливается сребро среде пещи, тако слиетеся посреде его и познаете, яко Аз Господь излиях ярость Мою на вас. 23 И бысть слово Господне ко мне глаголя: 24 сыне человечь, рцы ему: ты еси земля неодождимая, ниже дождь бысть на тя в день ярости. 25 Егоже старейшины среде его, яко львы рыкающе, восхищающе восхищения, душы изядающе насилием, богатство и честь приемлюще, и вдовицы твоя умножишася посреде тебе: 26 и жерцы его отвергошася закона Моего и оскверниша святая Моя: между святым и сквернавым не разлучаху, и между нечистым и чистым не разделяху, и от суббот Моих покрываху очи свои, и оскверняху Мя посреде себе: 27 князи его среде его яко волцы восхищающе похищения, еже пролияти кровь и погубити душы, яко да лихоимством лихоимствуют: 28 и пророцы его помазующии их падут, видящии суетная, волхвующии ложная, глаголюще: сия глаголет Адонаи Господь: а Господь не глагола. 29 Людий земли утесняюще неправдою и восхищающе восхищения, нища и убога насильствующе и со пришелцем не живуще судом. 30 И исках от них мужа живуща право и стояща цело пред лицем Моим во время гнева Моего, еже бы не до конца погубити его, и не обретох. 31 И излиях нань ярость Мою во огни гнева Моего, еже скончати я: пути их на главы их дах, глаголет Адонаи Господь. === 23 === 1 И бысть слово Господне ко мне глаголя: 2 сыне человечь, две жене бесте дщери матере единыя 3 и соблудисте во Египте, в юности своей соблудисте: тамо спадоша сосцы их, и тамо растлисте девство. 4 Имена же има: Оола старейшая, Оолива же меншая сестра ея: и бысте Мне и родисте сыны и дщери: имена же има: Самариа Оола, и Иерусалим Оолива. 5 И соблуди Оола от Мене и возложися на похотники своя, на Ассирианы приближающыяся ей, 6 облеченныя в червленицы, старейшины и воеводы: юноши избраннии, вси конницы яздящии на конех: 7 и даде блужение свое к ним: избранным сыном Ассирийским всем, и ко всем, на няже возлагашеся, во всех нечистотах их оскверняшеся: 8 и блужения своего, еже из Египта, не остави, яко с нею спаху в юности ея, и тии растлиша девство ея и излияша блужение свое на ню. 9 Того ради предах ю в руце похотником ея, в руце сыном Ассирийским, на нихже возлагашеся. 10 Тии открыша стыд ея, сыны и дщери ея пояша и самую мечем усекнуша: и бысть поношение в женах, и отмщение сотвориша в ней во дщерех ея. 11 И виде сестра ея Оолива, и растли возложение свое паче ея, и блуд свой паче блуда сестры своея умножи: 12 на сынов Ассирийских возложися, на старейшины и воеводы, иже близ ея, облеченны во благоистканны, на конники яздящыя на конех, юноши избранни вси. 13 И видех, яко осквернися путь един обою. 14 И приложи ко блужению своему, и виде мужы написаны на стене, образы Халдейски написаны шарами, 15 препоясаны пестротами о чреслех своих, и превои крашеннии на главах их, вид троякий всех, подобие сынов Вавилонских, Халдейских, земли отечества их: 16 и возложися на ня зрением очей своих, и посла послы к ним в землю Халдейску. 17 И приидоша к ней сынове Вавилонстии на ложе витающих и оскверниша ю в блужении ея, и осквернися в них, и отступи душа ея от них: 18 и откры блужение свое и откры срамоту свою. И отступи душа Моя от нея, якоже отступи душа Моя от сестры ея. 19 И умножила еси блужение твое, еже помянути дни юности твоея, в няже блудила еси во Египте, 20 и возлегла еси на Халдеи, ихже плоти быша аки плоти осли, и яко лона конская лона их, 21 и посетила еси беззаконие юности твоея, яже творила еси во Египте во виталищи твоем, идеже сосцы юности твоея спадоста. 22 Того ради, Ооливо, сия глаголет Адонаи Господь: се, Аз воздвигну похотники твоя на тя, от нихже отступи душа твоя, и наведу их на тя окрест, 23 сынов Вавилонских и всех Халдеев, Факуда и Суда и Куда, и вся сыны Ассирийски с ними, юношы избранны, старейшины и воеводы, вся тристаты и нарочитыя, конники на конех вси. 24 И приидут на тя вси от севера, колесницы и колеса со многим народом, щиты и сулицы и шлемы, и поставят стражбу окрест тебе, и дам пред лицем их суд, и отмстят ти в судех своих: 25 и дам рвение Мое в тебе, и сотворят с тобою гнев ярости Моея, ноздри твоя и ушы твои обрежут, и оставших твоих мечем изсекут: тии сынов твоих и дщерей твоих возмут, и оставших твоих потребит огнь: 26 и совлекут с тебе ризы твоя и возмут сосуды хвалы твоея. 27 И отвращу нечестия твоя от тебе и блуд твой от земли Египетския: и не воздвигнеши очес твоих на них и Египта не помянеши ктому. 28 Понеже сия глаголет Адонаи Господь: се, Аз предаю тя в руце, ихже ненавидиши, от нихже отступи душа твоя: 29 и сотворят в тебе в ненависти, и возмут вся труды твоя и дела твоя, и будеши нага и посрамлена, и открыется студ блуда твоего и нечестие твое. 30 И блужение твое сотвори сия тебе, егда блудила еси вслед языков и осквернялася в кумирех их: 31 в пути сестры твоея ходила еси, и дам чашу ея в руце твои. 32 Сия глаголет Адонаи Господь: чашу сестры твоея испиеши глубокую и широкую, и будет на смех и подражнение, изюбилную ко совершению пиянства, 33 и разслабления наполнишися: чаша же потребления и погубления чаша сестры твоея Самарии: 34 и испиеши ю и истощиши, и чреп ея ядущи потребиши, и сосца твоя отторгнеши: и праздники и новомесячия твоя отвращу: понеже Аз глаголах, рече Адонаи Господь. 35 Сего ради сия глаголет Адонаи Господь: понеже забыла Мя еси и отвергла Мене назад тела твоего, и ты возми нечестие твое и блуд твой. 36 И рече Господь ко мне: сыне человечь, не будеши ли судити Ооле и Ооливе, и возвестиши ли има беззакония ею? 37 Яко любодействовасте, и кровь в руках ею, и в кумирех ею прелюбодействовасте, и чада своя, яже родисте Мне, провождасте им сквозе огнь. 38 Даже и сия сотвористе Ми, осквернясте святая Моя в той день, и субботы Моя осквернясте: 39 и внегда закаласте чада своя кумиром своим, и вхождасте во святая Моя в той день, еже сквернити я: и се, тако творясте среде дому Моего: 40 и посыласте ко мужем грядущым издалеча, к нимже послов посыласте. И егда приходити им, абие умывалася еси и утваряла еси очи твои и украшалася утварию, 41 и седела еси на одре постлане, и трапеза украшенна пред лицем ея, и фимиам Мой и елей Мой предлагала пред ними, и веселяхуся в них: 42 и гласом сличным возглашаху, и ко мужем от множества человеча приходящым от пустыни, и даяху перстни на руки их и венец хвалы на главы их. 43 И рекох: не в сих ли прелюбодействуют? И дела блудницы, и сама соблуди. 44 И вхождаху к ней: якоже влазят к жене блуднице, тако влазяху ко Ооле и ко Ооливе, женам беззаконницам, еже сотворити беззаконие. 45 Мужие же праведнии, тии и отмстят има отмщением любодейниц и отмщением проливающих кровь, яко любодейцы суть, и кровь в руках их. 46 Сия глаголет Адонаи Господь: приведи на них народы и даждь на них мятеж и разграбление, 47 и вержи камение на них, камение народов, и да избодут их мечьми своими: сыны их и дщери их избиют и домы их огнем сожгут: 48 и отвращу нечестие от земли, и накажутся вся жены и не сотворят по нечестием их: 49 и дастся нечестие ваше на вы: и (вся) грехи кумир ваших приимете и уразумеете, яко Аз Адонаи Господь. === 24 === 1 И бысть слово Господне ко мне, в девятое лето, в месяц десятый, в десятый день месяца, глаголя: 2 сыне человечь, напиши себе имя дне сего, от негоже укрепися царь Вавилонский на Иерусалим, от сего дне, иже днесь, 3 и рцы притчу к дому прогневляющему, и речеши к ним: сия глаголет Адонаи Господь: настави коноб, настави и влий в онь воду, 4 и верзи в онь на двое разсеченая, всякое разсечение доброе, голень и рамо, обрезана от костей, 5 от избранных скотов взятая, и подгнещай костьми под ними: возвре и воскипе, и сваришася кости его посреде его. 6 Того ради сия глаголет Адонаи Господь: о, граде кровей! Конобе, в немже есть яд, и яд не изыде из него: по удом его изнесе, не паде на нем жребий. 7 Яко кровь его среде его есть, на гладцем камени вчиних ю: не пролиях ея на землю, еже покрыти ю землею, 8 еже навести ярость Мою (на ню), во отмщение еже отмстити: дах кровь его на гладцем камени, еже не покрыти ея. 9 Того ради сия глаголет Адонаи Господь: о, люте, граде кровей! Аз же возвеличу главню 10 и умножу дрова и возгнещу огнь, яко да истают мяса, и оскудеет юха, и кости истают, 11 и станет на главнях его, (тощь) разгореся, яко да изгорит, и распалится и сгорит медь его, и истает среде его нечистота его, и оскудеет яд его: 12 да смирится яд его, и не изыдет из него многий яд его, и посрамится яд его: 13 в нечистоте твоей укроп, понеже осквернялся еси ты и не очистился от нечистоты твоея: и что будет аще не очистишися по сем, дондеже исполню ярость Мою в тебе? 14 Аз Господь глаголах, и приидет, и сотворю, и не укосню, и не пощажу, и не буду умолен: по путем твоим и по помыслом твоим сужду тебе, глаголет Адонаи Господь: сего ради, се, Аз сужду тебе по кровем твоим и по помыслом твоим сужду тебе, нечисте, пресловуте и великий на разгневание. 15 И бысть слово Господне ко мне глаголя: 16 сыне человечь, се, Аз вземлю от тебе желания очес твоих в поражении, не восплачи, ниже возрыдай, ниже да приидут тебе слезы, 17 возстени молчя: стенание крове, чресл плачь есть: да будут власи твои сплетени на тебе, и сапози твои на ногах твоих, и да не утешишися устнами их, и хлеба мужей да не снеси. 18 И глаголах к людем заутра, якоже заповеда ми, и умре жена моя в вечер, и сотворих заутра, якоже повелеся ми. 19 И рекоша ко мне людие: не возвестиши ли нам, что суть сия, яже ты твориши? 20 И рекох к ним: слово Господне бысть ко мне глаголя: 21 рцы к дому Израилеву, сия глаголет Адонаи Господь: се, Аз оскверню святая Моя, величания крепости вашея, желания очес ваших, и ихже щадят души вашя: и сынове ваши и дщери вашя, яже остависте, мечем падут: 22 и сотворите, якоже аз сотворих: от уст их не утешитеся и хлеба мужей не снесте, 23 и власи ваши на главах ваших, и сапози ваши на ногах ваших: не будете терзатися, ниже плакати, и истаете в неправдах ваших, и не утешите кийждо брата своего. 24 И будет вам Иезекииль в чудо: по всему елика сотворих, сотворите: егда приидут сия, и уразумеете, яко Аз Адонаи Господь. 25 И ты, сыне человечь, не в день ли той, егда возму от них крепость их, вознесение хвальбы их, желания очию их и возношение души их, сыны их и дщери их: 26 в той день приидет уцелевый к тебе возвестити тебе во ушы, 27 в той день отверзутся уста твоя ко уцелевшему, и возглаголеши и не премолчиши ктому, и будеши им в чудо: и уведят, яко Аз Адонаи Господь. === 25 === 1 И бысть слово Господне ко мне глаголя: 2 сыне человечь, утверди лице твое на сыны Аммони и прорцы на ня, 3 и речеши сыном Аммоним (глаголя): слышите слово Господа Адоная, сия глаголет Адонаи Господь: понеже порадовастеся о святых Моих, яко осквернена быша, и о земли Израилеве, яко погибе, и о дому Иудине, яко отиде в пленение: 4 того ради, се, Аз предаю вас сыном Кедемлим в наследие, и вселятся со имением своим в тебе и поставят в тебе селения своя: тии поядят плоды твоя, и тии испиют тук твой: 5 и дам град Аммонь паствы велблюдов и сыны Аммони на паству овец, и уразумеете, яко Аз Адонаи Господь. 6 Сего ради тако глаголет Господь Бог: понеже восплескал еси рукою твоею и потоптал ногою твоею и порадовался еси душею твоею о земли Израилеве, 7 того ради, се, Аз простру руку Мою на тя и дам тя в разграбление языком, и потреблю тя от людий и погублю тя от стран пагубою, и увеси, яко Аз Адонаи Господь. 8 Сия глаголет Адонаи Господь: понеже рече Моав и Сиир: се, якоже вси языцы, дом Израилев и Иуда, 9 сего ради, се, Аз разслаблю мышцу Моавлю от градов крайних его, избранную землю, Дом Иасимуфов над источником града приморскаго (Ваелмона и Кариафаима): 10 сыны Кедемли на сыны Аммони дах я в наследие, яко да не будет памяти сынов Аммоних во языцех: 11 и в Моаве сотворю отмщение, и уведят, яко Аз Господь. 12 Сия глаголет Адонаи Господь: понеже сотвори Идумеа, егда отмстиша тии отмщением (во гневе) дому Иудову, и памятозлобствоваша и отмстиша прю от них: 13 того ради сия глаголет Адонаи Господь: простру руку Мою на Идумею и потреблю от нея человеки и скот и поставлю ю пусту, и от Феман гоними мечем падут: 14 и дам отмщение Мое на Идумею рукою людий Моих Израиля, и сотворят во Идумеи по гневу Моему и по ярости Моей, и уведят отмщение Мое, глаголет Адонаи Господь. 15 Сего ради сия глаголет Адонаи Господь: понеже сотвориша иноплеменницы во отмщении и возставиша месть радующеся всею душею еже потребити даже до века, 16 того ради сия глаголет Адонаи Господь: се, Аз простру руку Мою на иноплеменники, и потреблю Критян, и погублю оставшыя живущыя на примории, 17 и сотворю в них отмщение велико, во обличениих ярости Моея, и уразумеют, яко Аз Адонаи Господь, егда дам отмщение Мое на ня. === 26 === 1 И бысть во единонадесятое лето, в первый день месяца, бысть слово Господне ко мне глаголя: 2 сыне человечь, понеже рече Сор на Иерусалима: благоже, сокрушися, погибоша языцы, обратися ко мне, иже бе исполненый, опусте: 3 того ради сия глаголет Адонаи Господь: се, Аз на тя, Сор, и приведу на тя языки многи, якоже восходит море волнами своими. 4 И обвалят стены Сора и разорят столпы твоя, и развею прах его из него и дам его во гладок камень. 5 Сушение мрежей будет среде моря, яко Аз глаголах, глаголет Адонаи Господь: и будет на пленение языком, 6 и дщери его, яже на поли, мечем убиены будут, и уведят, яко Аз Господь. 7 Яко сия глаголет Адонаи Господь: се, Аз наведу на тя, Сор, Навуходоносора царя Вавилонска от севера, царь царем есть, с коньми и колесницами и с конниками и собранием многих языков зело: 8 сей дщери твоя на поли мечем избиет, и приставит на тя стражбу и оградит тя, и окопает тя ровом и сотворит окрест тебе острог, и обставит оружием и копия своя прямо тебе поставит, 9 стены твоя и пирги твоя разорит оружием своим: 10 от множества коней его покрыет тя прах их, и от ржания коней его и от колес колесниц его потрясутся стены твоя, входящу ему во врата твоя, аки входящу во град с поля: 11 копытами коней своих поперут вся стогны твоя: люди твоя мечем изсечет, и состав крепости твоея на земли повержет, 12 и пленит силу твою, и возмет имения твоя, и разсыплет стены твоя, и домы твоя вожделенныя разорит, и древа твоя и камение твое и персть твою среде моря ввержет, 13 и упразднит множество мусикий твоих, и глас певниц твоих не услышится в тебе ктому. 14 И дам тя во камень гладок, сушение мрежное будеши, не соградишися ктому, яко Аз глаголах, глаголет Адонаи Господь. 15 Яко сия глаголет Адонаи Господь Сору: не от гласа ли падения твоего, егда возстенут язвении твои, егда извлечется мечь посреде тебе, потрясутся острови? 16 И снидут со престол своих вси князи язык морских, и свергут венцы со глав своих, и ризы своя испещренныя совлекут с себе, ужасом ужаснутся: на земли сядут, и убоятся погибели своея, и возстенут о тебе, 17 и приимут о тебе плачь, глаголюще: како погибл и разсыпался еси от моря, граде хвалимый, иже был еси крепок на мори, ты и живущии в тебе, иже даял еси страх твой всем живущым в тебе? 18 И убоятся (вси) острови от дне падения твоего, и смятутся острови в мори от исхода твоего. 19 Яко сия глаголет Адонаи Господь: егда дам тя град опустевшь, якоже грады ненаселены никогдаже, внегда возведу на тя бездну, и покрыет тя вода многа: 20 и сведу тя к низходящым в пропасть к людем века, и вселю тя во глубинах земных, яко пустыню вечную с низходящими в пропасть, яко да не населишися, ниже востанеши на земли живота: 21 на пагубу тя отдам, и не будеши ктому, и взыщешися и не обрящешися во век, глаголет Адонаи Господь. === 27 === 1 И бысть слово Господне ко мне глаголя: 2 и ты, сыне человечь, возми на Сор плачь, 3 и речеши Сору населенному на морстем входе, торжищу людий от островов многих, сия глаголет Адонаи Господь Сору: ты рекл еси: аз сам возложих на мя мою доброту, 4 в сердцы морстем веелиму, и сынове твои возложиша на тя доброту. 5 Кедр от Санира истесася тебе, тонкия доски кипарисныя от Ливана взяты быша, еже сотворити тебе ядрила елова: 6 от Васанитиды сотвориша весла твоя: святилища твоя состроиша от слоновых (костей), домы древяны от островов Хеттиимских: 7 виссон со испещрением от Египта бысть тебе постеля, еже обложити тебе славу и облещи тя в синету и во багряницу от островов Елиссе, и бысть одежда твоя. 8 И князи твои живущии во Сидоне и Арадиане быша весленицы твои: премудрии твои, Сор, иже быша в тебе, сии кормчии твои. 9 Старейшины Вивлийстии и премудрии их, иже быша в тебе, тии укрепляху совет твой: и вси корабли морстии и весленицы их быша в тебе ко западом западов. 10 Персяне и Лидяне и Ливиане беша в силе твоей, мужие доблии твои щиты и шлемы повесиша в тебе, сии даша славу твою. 11 Сынове Арадийстии и сила твоя на забралех твоих окрест: но и Мидяне во пиргах твоих быша стражие, тулы своя обесиша на забралех твоих окрест: сии совершиша твою доброту. 12 Кархидоняне купцы твои, от множества силы твоея, сребро и злато, и медь и железо, и чистое олово и свинец даша куплю твою. 13 Еллада вся и ближнии твои продаяху в тебе душы человечы, и сосуды медяны даша куплю твою. 14 От дому Форгамова кони и конники и мщята даша куплю твою. 15 Сынове Родийстии купцы твои от островов умножиша куплю твою, зубы слоновы, и вводимым воздавал еси мзды твоя. 16 Человеки куплю твою от множества примешенца твоего, стакти и пестроты и синету от Фарсиса, и рамоф и хорхор даша куплю твою. 17 Иуда и сынове Израилевы, сии купцы твои: продаянием пшеницы и миров и касии, и первый мед и елей и ритину даша примешенцу твоему. 18 Дамаск купцы твои от множества всея силы твоея, вино от Хелвона, и волну блещащуся от Милита, и вино Деданово и Ионаново и Меозелево в куплю твою даша. 19 От ассиила железо деланое и колеса в примесницех твоих суть. 20 Дедан купцы твои со скоты избранными в колесницы. 21 Аравиа и вси князи Кидарстии, сии купцы рукою твоею, велблюды и овны и агнцы в тебе продадят, имиже куплю творят. 22 Купцы Савы и Раммы, тии купцы твои с первыми сладостьми и со камением драгим, и злато даша куплю тебе. 23 Харран, Ханаа и Дедан, сии купцы твои: Сава, Ассур и Харман купцы твои, 24 приносяще куплю синету и червленицу, и испещренная и сокровища избранная связана ужами, и кипарисная. 25 Корабли, в тех купля твоя, (корабли) Кархидонстии купцы твои, во множестве смесник твоих, и насытился еси, и отягчал зело в сердцах морских. 26 В воде мнозе привождаху тя весленицы твои: ветр южный сокруши тя в сердцы морстем. 27 Быша силы твоя и мзда твоя от смесник твоих, и весленицы твои и кормчии твои, и советницы твои и смесницы от смесников твоих, и вси мужие твои доблии в тебе и весь сонм твой падут среде тебе в сердцы морстем, в день падения твоего. 28 От гласа вопля твоего кормчии твои страхом убоятся. 29 И снидут с кораблей своих вси весленицы твои, и всадницы и ловцы морстии на земли станут: 30 и воскликнут на тя гласом своим, и воскричат горце, и возложат землю на главы своя, и прах постелют: 31 и оплешивеют над тобою плешьми, и облекутся во вретище, и восплачутся о тебе в горести души, и плачем горьким ужаснутся: 32 и возмут о тебе сынове их плачь, возрыдают плаканием о тебе: кто якоже Тир умолкнувый среде моря? Колику обрел еси мзду от моря? 33 Наполнил еси страны от множества твоего и от смесник твоих обогатил еси вся цари земныя. 34 Ныне же сокрушился еси в мори, во глубинах водных смесницы твои, и весь сонм твой среде тебе падоша, и вси весленицы твои. 35 Вси же живущии во островех уныли по тебе, и царие их ужасом ужасошася, и прослезися лице их. 36 Купцы от язык позвиждут о тебе, в погибель был еси, и ктому не будеши в век, глаголет Господь Бог. === 28 === 1 И бысть слово Господне ко мне глаголя: 2 и ты, сыне человечь, рцы князю Тирску: сия глаголет Адонаи Господь: понеже вознесеся сердце твое, и рекл еси: аз есмь бог, в селение божие вселихся в сердцы морстем: ты же человек еси, а не Бог, и положил еси сердце твое яко сердце Божие. 3 Еда премудрее ты еси Даниила? Премудрии не наказаша тебе хитростию своею. 4 Еда хитростию твоею или смыслом твоим сотворил еси себе силу и притяжал еси сребро и злато в сокровищих твоих? 5 Или во мнозей хитрости твоей и в купли твоей умножил еси силу твою? Вознесеся сердце твое в силе твоей. 6 Того ради сия глаголет Адонаи Господь: понеже дал еси сердце свое яко сердце Божие, 7 вместо сего, се, Аз наведу на тя чуждыя губители от язык, и извлекут мечы своя на тя и на доброту хитрости твоея, и постелют доброту твою в погубление, 8 и сведут тя, и умреши смертию язвеных в сердцы морстем. 9 Еда речеши глаголя пред убивающими тя: бог есмь аз? Ты же человек еси, а не бог, в руце убивающих тя. 10 Смертьми необрезаных умреши в руках чуждих: яко Аз рекох, глаголет Адонаи Господь. 11 И бысть слово Господне ко мне глаголя: 12 сыне человечь, возми плачь на князя Тирска и рцы ему: сия глаголет Адонаи Господь: ты еси печать уподобления, исполнен премудрости и венец доброты, 13 в сладости рая Божия был еси, всяким камением драгим украсился еси, сардием и топазием, и смарагдом и иакинфом, и анфраксом и сапфиром, и иасписом и сребром и златом, и лигирием и ахатом, и амефистом и хрисолифом, и вириллием и онихом и златом наполнил еси сокровища твоя и житницы твоя, от негоже дне создан еси. 14 Ты, с херувимом вчиних тя в горе святей Божии, был еси среде каменей огненных. 15 Был еси ты непорочен во днех твоих, от негоже дне создан еси, дондеже обретошася неправды в тебе. 16 От множества купли твоея наполнил еси сокровища твоя беззакония, и согрешил еси, и уязвлен еси от горы Божия: и сведе тя херувим осеняяй от среды камыков огненных. 17 Вознесеся сердце твое в доброте твоей, истле хитрость твоя с добротою твоею: множества ради грехов твоих на землю повергох тя, пред цари дах тя во обличение. 18 Множества ради грехов твоих и неправд купли твоея, осквернил еси святая твоя, и изведу огнь от среды твоея, сей снесть тя: и дам тя во прах на земли пред всеми видящими тя. 19 И вси ведящии тебе во языцех возстенут по тебе: пагуба учинен еси, и не будеши ктому во век. 20 И бысть слово Господне ко мне глаголя: 21 сыне человечь, утверди лице твое на Сидона и прорцы о нем и рцы: 22 сия глаголет Адонаи Господь: се, Аз на тя, Сидоне, и прославлюся в тебе, и уразумееши, яко Аз есмь Господь, егда сотворю в тебе суд и освящуся в тебе: 23 и послю на тя смерть, и кровь в стогнах твоих будет, и падут язвении среде тебе мечем, в тебе и окрест тебе, и уведят, яко Аз Господь: 24 и не будет ктому дому Израилеву остен горести и терн болезни от всех окрестных его обезчестивших их, и уразумеют, яко Аз есмь Адонаи Господь. 25 Тако глаголет Адонаи Господь: и соберу дом Израилев от язык, идеже разсыпашася тамо, и освящуся в них пред людьми и языки: и вселятся на земли своей, юже дах рабу Моему Иакову, 26 и населятся на ней с надеждею, и созиждут домы, и насадят винограды, и вселятся на ней с надеждею, егда сотворю суд во всех, иже укориша я во окрестных их: и уразумеют, яко Аз Господь Бог их и Бог отцев их. === 29 === 1 В десятое лето, в десятый месяц, (в первый день) месяца, бысть слово Господне ко мне глаголя: 2 сыне человечь, утверди лице твое на фараона царя Египетска и прорцы нань и на Египет весь: 3 глаголи и рцы: сице глаголет Адонаи Господь: се, Аз наведу на тя, фараоне, царю Египетский, змиа великаго, седящаго среде рек своих, глаголющаго: моя суть реки, и аз сотворих я. 4 Аз же дам узду в челюсти твоя, и прилеплю рыбы реки твоея ко крилома твоима, и возведу тя от среды реки твоея, и к чешуям твоим прильпнут: 5 и низвергу тя вскоре и вся рыбы реки твоея: на лицы поля падеши, и не соберешися, и не оградишися, зверем земным и птицам небесным дах тя во снедь. 6 И уведят вси живущии во Египте, яко Аз есмь Господь: зане был еси жезл тростян дому Израилеву: 7 егда яся тебе рукою своею, сокрушился еси, и егда восплеска на них всяка рука, и егда почиша на тебе, стерлся еси и сломил еси их вся чресла. 8 Сего ради тако глаголет Адонаи Господь: се, Аз наведу на тя мечь и погублю от тебе человеки и скоты, 9 и будет земля Египетска в погибель и во опустение, и уразумеют, яко Аз есмь Господь. Понеже глаголал еси, яко реки моя суть, и аз сотворих я: 10 того ради, се, Аз на тя и на и вся реки твоя, и дам землю Египетску во опустение и в мечь и в погибель, от Магдола и Сиины и даже до предел Ефиопских: 11 не пройдет сквозе ея нога человеча, ни нога скотия не поступит по ней, и не населится четыредесять лет: 12 и дам землю его в пагубу среде земли опустелыя, и гради его среде градов опустевших будут, в разорении будут четыредесять лет: и разсею Египта во языцех, и развею я по странам. 13 Сия глаголет Адонаи Господь: по четыредесятих летех соберу Египтяны от язык, аможе разсыпашася, 14 и возвращу пленники Египетския и вселю я в землю Фафорскую, в землю, отюнудуже взяти быша, и будет власть смиренна: 15 паче всех властей будет смиренна, и не вознесется ктому над языки, и умалены сотворю я, еже не быти им многим во языцех. 16 И не будут ктому дому Израилеву в надежду воспоминающую беззаконие, внегда последовати им по них: и уразумеют, яко Аз есмь Господь. 17 И бысть в двадесять седмое лето, во един день месяца перваго, бысть слово Господне ко мне глаголя: 18 сыне человечь, Навуходоносор царь Вавилонск поработи силу свою работою великою на Тира, всяка глава плешива и всяко рамо наго: и мзда не бысть ему ни силе его на Тира, за работу, еюже работаша нань. 19 Того ради сице глаголет Адонаи Господь: се, Аз даю Навуходоносору царю Вавилонску землю Египетску, и возмет множество ея, и пленит плен ея, и расхитит корысти ея, и будет мзда силе его: 20 за службу его, еюже послужи на Тира, дах ему землю Египетску, зане послужи Мне, сия глаголет Адонаи Господь. 21 В той день взыдет рог всему дому Израилеву, и тебе дам уста отверста среде их, и уведят, яко Аз есмь Господь. === 30 === 1 И бысть слово Господне ко мне глаголя: 2 сыне человечь, прорцы и рцы: сия глаголет Адонаи Господь: 3 возрыдайте: оле, оле день! Яко близ день Господень, и приближается день облака, и конец языков будет: 4 и приидет мечь на Египтяны, и будет мятеж во Ефиопии, и падут язвении во Египте, и взято будет множество их, и падутся основания его: 5 Персяне и Критяне, и Лидяне и Ливиане, и Мурини (и вся Аравиа) и вси примесницы, и сынове, иже от завета Моего, в нем мечем падут с ним. 6 Сия глаголет Господь: и падут подпоры Египта, и снидет укоризна крепости его от Магдола даже до Сиины, мечем падут в нем, глаголет Адонаи Господь. 7 И опустеют среде стран погибших, и гради их среде градов опустевших будут: 8 и уразумеют, яко Аз есмь Господь, егда дам огнь на Египет, и сокрушатся вси помагающии ему. 9 В той день приидут вестницы от лица Моего в сиеим тщащеся погубити надежду Муринския земли, и будет им мятеж в день Египетск, яко се, приспе. 10 Сия глаголет Адонаи Господь: и погублю множество Египтян рукою Навуходоносора царя Вавилонска, 11 самаго и людий его с ним, губителие от язык послани погубити землю: и извлекут вси мечы своя на Египта, и наполнится земля язвеными. 12 И дам реки их во опустение и отдам землю в руце злых, и погублю землю и исполнение ея руками чуждих, Аз Господь глаголах. 13 Яко сия глаголет Адонаи Господь: погублю кумиры и испражню вельможы от Мемфиса и старейшины от земли Египетския, и не будут ктому: и дам страх во земли Египетстей. 14 И погублю землю Фафорскую, и дам огнь на Таниса, и сотворю отмщение в Диосполи, 15 и излию ярость Мою на Саин крепость Египетску, и погублю множество Мемфы. 16 И дам огнь на Египта, и мятежем возмятется Саис, и в Диосполи будет разселина, и разлиются воды. 17 Юноши Илиуполя и Вуваста мечем падут, и жены в плен пойдут: 18 и в Тафнесе помрачится день, егда сокрушу тамо скипетры Египетски, и погибнет тамо укоризна крепости его, и того покрыет облак, и дщери его во пленение отведутся. 19 И сотворю суд во Египте, и уразумеют, яко Аз есмь Господь. 20 И бысть во единонадесятое лето, в первый месяц, в седмый день месяца, бысть слово Господне ко мне глаголя: 21 сыне человечь, мышцы фараона царя Египетска сотрох, и се, не помолися, еже дати ему цельбу, приложити ему пластырь, (обязати,) дати силу, да возмет мечь. 22 Того ради сия глаголет Адонаи Господь: се, Аз на фараона царя Египетска, и сокрушу мышцы его крепкия и протяженыя и сотреныя, и изрину мечь его из руки его: 23 и разсею Египта во языки и развею их во страны: 24 и укреплю мышцы царя Вавилонска и дам мечь Мой в руку его, и наведет его на Египта, и пленит пленение его, и возмет корысти его: 25 и укреплю мышцы царя Вавилонска, мышцы же фараони падут: и уведят, яко Аз есмь Господь, егда дам мечь Мой в руце царя Вавилонска, и прострет его на землю Египетску, 26 и разсею Египта во языки и развею их во страны: и уведят вси, яко Аз есмь Господь. === 31 === 1 И бысть во единонадесятое лето, в третий месяц, во един день месяца, бысть слово Господне ко мне глаголя: 2 сыне человечь, рцы фараону царю Египетску и множеству его: кому уподобил еси себе в высоте твоей? 3 Се, Ассур кипарис в Ливане, добр отрасльми и высок величеством и част покровом, и среде облак бысть власть его: 4 вода воспита его, бездна вознесе его, реки своя приведе окрест садов своих, и составы своя испусти во вся древеса полевая. 5 Сего ради вознесеся величество его паче всех древес польных, разширишася ветвие его, и вознесошася отрасли его от воды многи, егда протяжеся. 6 Во отраслех его возгнездишася вся птицы небесныя, и под ветвьми его раждахуся вси зверие польнии, под сению его вселися все множество языков. 7 И бысть добр в высоте своей множества ради ветвий своих, яко беша корение его в воде мнозе. 8 И кипариси не таковы в раи Божии, и сосны неподобны отраслем его, и елие не бысть подобно ветвиям его: всякое древо, еже в раи Божии, не бысть подобно ему в доброте его, множества ради ветвий его. 9 Добра сотворих его во множестве ветвий его, и возревноваша ему древеса райская Сладости Божия. 10 Того ради сия глаголет Адонаи Господь: понеже был еси велик величеством и дал еси власть свою во средину облак, и вознесеся сердце его в высоте его, и видех, егда вознесеся: 11 и предах его в руце князя языческа, и сотвори пагубу его, по нечестию его. 12 И изгнах его Аз, и потребиша его чуждии губителие от язык, и повергоша его на горах: и во всех дебрех падоша ветви его, и сотрошася отрасли его на всяцем поли земнем, и снидоша от покрова его вси людие языков и разориша его. 13 Во падении его почиша вся птицы небесныя, и на стеблиех его быша вси зверие селнии, 14 яко да не возносятся величеством своим вся древеса, яже в воде, и не дадят власти своея среде облак, и не станут в высоте их к нему вси пиющии воду, вси отдани быша во смерть во глубину земли, среде сынов человеческих к низходящым в пропасть. 15 Сия глаголет Адонаи Господь: в оньже день сведеся во ад, плакася о нем бездна: и удержах реки ея и возбраних множеству вод, и померче о нем Ливан, и вся древеса полевая о нем разслабишася: 16 от гласа падения его потрясошася языцы, егда свождах его во ад со снизходящими в ров, и утешаху его в земли долнейшей вся древеса Сладости, и избранная и добрая Ливанова, вся пиющая воду: 17 и та бо сведошася с ним во ад со язвеными от меча, и семя его, и живущии под покровом его среде жизни своея погибоша. 18 Кому уподобился еси силою и славою и величеством во древесех Сладости? Слези и сниди со древесами Сладости во глубину земную: среде необрезаных успнеши со язвеными мечем: тако фараон и все множество крепости его, глаголет Адонаи Господь. === 32 === 1 И бысть во второенадесять лето, во вторыйнадесять месяц, во един день месяца, 2 бысть слово Господне ко мне глаголя: сыне человечь, возми плачь на фараона царя Египетска и речеши ему: льву языков уподобился еси ты, и яко змий великий, иже в мори, и бил еси рогами в реках твоих, и возмущал еси воду ногама твоима, и попирал еси реки твоя. 3 Сия глаголет Адонаи Господь: и возложу на тя сети Моя в собрании людий многих, 4 и изведу тя удою моею, и простру тя на земли: поля наполнятся тебе, и посажду на тебе вся птицы небесныя, и насыщу тобою вся звери всея земли: 5 и повергу плоти твоя на горах, и наполню кровию твоею всю землю, 6 и напиется земля от гноя твоего, от множества твоего на горах: и дебри наполню от тебе, 7 и покрыю небо, егда угаснеши, и помрачу звезды его, солнце во облаце сокрыю, и луна не явит света своего: 8 вся светила небесная помрачу на тя и дам тму на землю твою, глаголет Адонаи Господь. 9 И разгневаю сердца людий многих, егда изведу пленники твоя во языки, в землю, еяже не знал еси. 10 И уныют о тебе языцы мнози, и царие их ужасом ужаснутся о тебе, егда налетит мечь Мой на лица их, чающе падения своего от дне падения твоего. 11 Яко сия глаголет Адонаи Господь: мечь царя Вавилонска приидет тебе, мечьми исполинов, и поражу крепость твою: 12 губителие от язык вси, и погубят укоризну Египетску, и сокрушится вся крепость его. 13 И погублю вся скоты его от воды многи, и не возмутит ея нога человеческа ктому, и стопа скотия не ступит на ню. 14 Тако тогда умолкнут воды их, и реки их яко елей потекут, глаголет Адонаи Господь, 15 егда дам Египта в пагубу, и опустеет земля с полнотою своею, егда разсею вся живущыя на ней, и уведят, яко Аз есмь Господь. 16 Плачь есть, и восплачешися о нем, и дщери языческия восплачутся о нем, над Египтом и над всею силою Его восплачутся, глаголет Адонаи Господь. 17 И бысть во второенадесять лето, перваго месяца в пятыйнадесять день, бысть слово Господне ко мне глаголя: 18 сыне человечь, восплачися о крепости Египетстей (прекланяя преведи его): и сведут дщерей его мертвых языцы во глубину земную ко низходящым в пропасть. 19 От вод благолепно сниди и поспи с необрезаными. 20 Среде язвеных мечем падут с ним, и успнет вся крепость его. 21 И рекут ти исполини: во глубине пропасти буди, кого лучши еси ты? Сниди и лязи с необрезаными среде язвеных мечем. 22 Тамо Ассур и весь сонм его, и вси язвении тамо дашася, и гроб их во глубине пропасти, и быти сонм его окрест гроба его, вси язвении падшии мечем, 23 иже даша гробы его во стегнех рва, и бысть сонм его окрест гроба его, вси тии язвении падающии мечем, иже даша страх свой на земли живых. 24 Тамо Елам и вся сила его окрест гроба его, вси язвении падшии мечем и низходящии необрезани во глубину земную, давшии страх свой на земли живых: 25 и прияша мучение свое с низходящими в пропасть, среде язвеных. 26 Тамо дашася Мосох, и Фовель, и вся сила его, окрест гроба его, вси необрезаннии язвении от меча, давшии страх свой на земли жизни. 27 И успоша со исполины падшими от века, иже снидоша во ад во оружии воинстем и положиша мечы своя под главы своя, и быша беззакония их на костех их, яко устрашиша всех во житии своем, и страх сильным быша на земли живущым. 28 И ты посреде необрезанных сокрушишися и поспиши со язвеными мечем. 29 Тамо Едом и царие его и вси князи Ассуровы, давшии крепость свою на язву мечную: сии со язвеными успоша, с низходящими в ров. 30 Тамо князи северстии вси, тамо вси воеводы Ассуровы, иже сведени быша со язвеными со страхом своим и со крепостию своею стыдящеся, успоша необрезаннии со язвеными мечем, и прияша мучение свое с низходящими в пропасть. 31 Тех узрит царь фараон и утешится от всей крепости их: фараон и язвении мечем и вся сила его, глаголет Адонаи Господь. 32 Яко дах страх Мой на земли жизни, и успнет среде необрезанных со язвеными мечем фараон, и все множество его с ним, глаголет Адонаи Господь. === 33 === 1 И быти слово Господне ко мне глаголя: 2 сыне человечь, глаголи ко сыном людий твоих и речеши к ним: земля, на нюже Аз аще наведу мечь, и поймут людие земли человека единаго от себе и поставят его себе во стража, 3 и узрит мечь грядущь на землю, и вострубит трубою, и проповесть людем, 4 и услышит услышавый глас трубы, а не сохранится, и найдет мечь и постигнет его, кровь его на главе его будет: 5 яко слыша глас трубы и не сохранися, кровь его на нем будет: а сей, понеже сохранися, душу свою избавил. 6 И страж, аще увидит мечь грядущь, и не вострубит трубою, (и не проповесть людем,) и людие не охранят себе, и нашед мечь возмет от них душу, та убо беззакония ради своего взяся, а крове ея от руки стража взыщу. 7 И ты, сыне человечь, во стража дах тя дому Израилеву, и услышиши от уст Моих слово, и проповеси им от Мене. 8 Егда реку грешнику: грешниче, смертию умреши: и не будеши глаголати (грешнику), еже сохранитися нечестивому, (еже обратитися ему) от пути своего (и живу быти ему), той беззаконник во беззаконии своем умрет, а крове его от руки твоея взыщу. 9 Аще же ты проповеси нечестивому путь его, еже обратитися от него, и не обратится с пути своего, той в нечестии своем умрет, а ты душу твою избавил еси. 10 И ты, сыне человечь, рцы дому Израилеву: сице ресте глаголюще: прелести нашя и беззакония наша в нас суть, и мы в них таем, и како нам живым быти? 11 Рцы им: живу Аз, глаголет Адонаи Господь, не хощу смерти грешника, но еже обратитися нечестивому от пути своего и живу быти ему: обращением обратитеся от пути вашего злаго: и вскую умираете, доме Израилев? 12 И ты, сыне человечь, рцы ко сыном людий твоих: правда праведника не избавит его, в оньже день прельстится: и беззаконие беззаконника не убиет, в оньже день обратится от беззакония своего: и праведник не может спастися в день греха своего. 13 Егда реку праведнику: жизнию жив будеши: сей же уповая на правду свою и сотворит беззаконие, вся правды его не воспомянутся, в неправде своей, юже сотвори, в той умрет. 14 И егда реку нечестивому: смертию умреши: и обратится от греха своего и сотворит суд и правду, 15 и залог отдаст и восхищеное возвратит, беззаконник в заповедех жизни ходити будет, еже не сотворити неправды, жизнию жив будет и не умрет: 16 вси греси его, яже согреши, не помянутся: понеже суд и правду сотвори, жив будет в них. 17 И рекут сынове людий твоих: неправ путь Господень. И се, путь их неправ. 18 Егда совратится праведник от правды своея и сотворит беззаконие, и умрет в нем. 19 И егда грешник возвратится от беззакония своего и сотворит суд и правду, той жив будет в них. 20 И се есть, еже рекосте: неправ путь Господень. Комуждо по путем его сужду вам, доме Израилев. 21 И бысть во второенадесять лето, месяца вторагонадесять, в пятый день месяца пленения нашего, прииде ко мне от Иерусалима уцелевый глаголя: пленен бысть град. 22 И рука Господня бысть на мне в вечер, прежде пришествия его, и отверзе уста моя, дондеже прииде ко мне заутра: и отверзшаяся уста моя не затворишася ктому. 23 И бысть слово Господне ко мне глаголя: 24 сыне человечь, живущии на опустевших местех во земли Израилеве глаголют: един бяше Авраам и одержаше землю, а мы множайшии есмы, нам дана есть земля во одержание. 25 Того ради рцы им: сице глаголет Адонаи Господь: понеже с кровию ясте и очи ваши воздвигосте ко кумиром и кровь проливаете, и землю ли наследите? 26 Стасте с мечем вашим, сотвористе мерзости, и кийждо жену ближняго своего осквернисте, и тако ли землю имате наследити? 27 Того ради рцы им: сия глаголет Адонаи Господь: живу Аз, яко падут мечем сущии во опустевших, и иже на лицы поля, зверем польным предадутся на изядение, и сущыя во градех и иже в пещерах смертию поражу, 28 и дам землю на опустение, и погибнет гордость крепости ея, и опустеют горы Израилевы, занеже не будет проходящаго: 29 и уведят, яко Аз Господь: и сотворю землю их пусту, и опустеет всех ради мерзостей их, яже сотвориша. 30 И ты, сыне человечь, сынове людий твоих глаголющии о тебе у забрал и во вратех дворов, и глаголют кийждо ко ближнему своему и кийждо ко брату своему, глаголюще: соберимся и услышим исходящая от уст Господних. 31 И приходят к тебе, якоже сходятся людие, и седят людие Мои пред тобою, и послушают глаголов твоих, и не сотворят их: понеже лжа во устех их, и вслед скверн их сердце их ходит. 32 И будеши им яко глас песнивца сладкогласнаго благосличнаго, и услышат глаголы твоя, и не сотворят их. 33 И егда приидеши, рекут: се, прииде. И уведят, яко пророк бе среде их. === 34 === 1 И бысть слово Господне ко мне глаголя: 2 сыне человечь, прорцы на пастыри Израилевы, прорцы и рцы пастырем: сия глаголет Адонаи Господь: 3 оле, пастырие Израилевы! Еда пасут пастырие самих себе? Не овец ли пасут пастырие? Се, млеко ядите и волною одеваетеся и тучное закалаете, а овец Моих не пасете: 4 изнемогшаго не подясте и болящаго не уврачевасте, и сокрушеннаго не обязасте и заблуждающаго не обратисте, и погибшаго не взыскасте и крепкое оскорбисте трудом и властию наказасте я и наруганием. 5 И разсыпашася овцы Моя, понеже не имеяху пастырей, и быша на изядение всем зверем селным. 6 И расточишася овцы Моя по всем горам и (заблудиша) по всем холмом высоким, и на лицы всея земли разсыпашася овцы Моя, и не бе взыскающаго, ни обращающаго. 7 Того ради, о, пастырие, слышите слово Господне: 8 живу Аз, глаголет Адонаи Господь, понеже учинена суть стада Моя в расхищение, и овцы Моя быша во снедение всем зверем селным, занеже несть пастырей, и не поискаша пастырие овец Моих, но пасоша пастырие самих себе, а овец Моих не пасоша: 9 сего ради, пастырие, слышите слово Господне, 10 сия глаголет Адонаи Господь: се, Аз на пастыри, и взыщу овец Моих от рук их, и отставлю я от паствы овец Моих, и не будут пасти их пастырие: ниже самих себе имут пасти, и отиму овцы Моя из уст их, и ктому не будут им на изядение. 11 Сего ради сия глаголет Адонаи Господь: се, Аз взыщу овец Моих и присещу их: 12 якоже присещает пастух паству свою в день, егда есть облачен и мглян, среде овец своих разлученых, тако взыщу овец Моих и избавлю я от всякаго места, аможе суть разсыпаны в день облачен и примрачен. 13 И изведу я от язык и соберу и от стран, и введу я в землю их и упасу я на горах Израилевых и в дебрех и во всем селении земли, 14 на пажити блазе упасу я, на горе высоце Израилеве: и будут ограды их тамо, и успнут и почиют тамо в пищи блазе, и на пажити тучне упасутся на горах Израилевых. 15 Аз упасу овцы Моя и Аз упокою я, и уразумеют, яко Аз есмь Господь. 16 Сия глаголет Адонаи Господь: погибшее взыщу и заблудившее обращу, и сокрушенное обяжу и немощное укреплю, и крепкое снабдю и упасу я с судом. 17 И вы, овцы Моя, сия глаголет Адонаи Господь: се, Аз разсужду между овцею и овцею, и овном и козлом. 18 Не доволно ли вам, яко на блазей пажити пасостеся, и останок пажити вашея ногами вашими попирасте, и устоявшуюся воду пивасте, и останок ногами вашими возмущасте, 19 и овцы Моя попранием ног ваших живяху, и возмущенную воду ногами вашими пияху? 20 Того ради сия глаголет Адонаи Господь: се, Аз разсужду между овчатем сильным и между овчатем немощным. 21 Ребрами и плещами вашими реясте и рогами вашими бодосте, и всякое немощное пхасте, дондеже изгнасте я вон: 22 и спасу овцы Моя, и ктому не будут на разграбление, и разсужду между овчатем и овчатем, и между овном и овном: 23 и возставлю им пастыря единаго, и упасет я, раба Моего Давида, той упасет я, (и той упокоит я,) и будет им пастырь, 24 Аз же Господь буду им в Бога, и раб Мой Давид князь среде их: Аз Господь глаголах. 25 И завещаю Давидови завет мирный, и потреблю звери злы от земли, и вселятся в пустыни, уповающе успнут в дубравах. 26 И дам им окрест горы Моея благословение, и испущу дождь вам во время свое, дождь благословения. 27 И древеса на поли дадят плод свой, и земля даст силу свою, и вселятся на земли своей с надеждею мира, и уведят, яко Аз есмь Господь, егда сокрушу узы ига их: и избавлю я из руки поработивших я, 28 и не будут ктому во пленение языком, и зверие земнии не поядят их ктому: и вселятся с надеждею, и не будет устрашаяй их. 29 И возставлю им сад мирен, и не будут ктому малы числом на земли, и не будут погублени гладом на земли, и не приимут ктому укорения от язык: 30 и уведят, яко Аз есмь Господь Бог их с ними, а тии людие Мои дом Израилев, глаголет Адонаи Господь: 31 вы же овцы Моя и овцы паствы Моея есте, и Аз Господь Бог ваш, глаголет Адонаи Господь. === 35 === 1 И бысть слово Господне ко мне глаголя: 2 сыне человечь, обрати лице твое к горе Сеир и прорцы на ню и рцы ей: 3 сия глаголет Адонаи Господь: се, Аз на тя, горо Сеир, и простру руку Мою на тя и поставлю тя пусту, и опустееши, 4 и во градех твоих пустыню сотворю, и ты в пустыню будеши, и уразумееши, яко Аз есмь Господь. 5 Понеже бысть в тебе вражда вечная, и приседела еси дому Израилеву лукавством, рукою врагов с мечем во время печали их и во время неправды, на последок: 6 сего ради живу Аз, глаголет Адонаи Господь, понеже в крови согрешила еси, и кровь поженет тя, кровь возненавидела еси, и кровь ижденет тя. 7 И поставлю гору Сеир пусту и опустевшу, и погублю от нея человеки и скоты, (и приходяща и отходяща:) 8 и наполню язвеными твоими холмы твоя и дебри твоя, и на всех полех твоих язвении мечем падут в тебе: 9 и пусту во век поставлю тя, и гради твои не населятся ктому, и уразумееши, яко Аз есмь Господь. 10 Понеже рекла еси: оба языка и обе стране мои будут, и возму их в наследие, а Господь тамо есть: 11 сего ради живу Аз, глаголет Адонаи Господь, и сотворю тебе по вражде твоей и по ревности твоей, юже сотворила еси от ненавидения к ним, и познан буду тобою, егда имам тебе судити, и уразумееши, яко Аз есмь Господь. 12 Слышах глас всех хулений твоих, яже глаголала еси: горы Израилевы пусты даны нам во снедь: 13 и велеречила еси на Мя усты твоими и умножила на Мя словеса, Аз же услышах. 14 Сего ради тако глаголет Адонаи Господь: во веселии всея земли пусту тя сотворю: 15 якоже порадовалася еси о наследии дому Израилева, яко погибе, тако сотворю тебе: пуста будеши, горо Сеир, и вся Идумеа потребится, и уведят, яко Аз есмь Господь Бог их. === 36 === 1 И ты, сыне человечь, прорцы на горы Израилевы и рцы: 2 горы Израилевы, слышите слово Господне, сия глаголет Адонаи Господь: понеже рече враг на вы: благоже, пустыня вечная во одержание нам бысть: 3 того ради прорцы и рцы: тако глаголет Адонаи Господь: зане быти вам погубленым и безчестным и возненавиденым от язык окрестных вам, еже быти вам во одержание прочым языком, и взыдосте и бысте в поношение устен и во укоризну странам: 4 сего ради, горы Израилевы, слышите слово Господне, сия глаголет Адонаи Господь горам и холмом, и потоком и дебрем, и полянам и опустошеным, и разореным и градом оставленым, иже быша в пленение и в попрание оставшым языком окрестным. 5 Того ради сия глаголет Адонаи Господь: аще не во огни рвения Моего глаголах на прочыя языки и на Идумею всю, яко даша землю Мою себе во одержание со веселием (от всего сердца), обезчестивше душы, еже потребити повоеванием: 6 того ради прорцы на землю Израилеву и рцы горам и холмом, и полянам и дебрем: сия глаголет Адонаи Господь: се, Аз во рвении Моем и в ярости Моей глаголах, за укоризну, юже приясте от язык. 7 Того ради сия глаголет Адонаи Господь: се, Аз воздвигну руку Мою на языки, иже окрест вас, тии безчестие свое приимут. 8 Ваше же гроздие и плод ваш, горы Израилевы, поядят людие Мои, яко надеются приити. 9 Яко се, Аз к вам, и призрю на вы, и возделаете и насеете: 10 и умножу в вас человеки, весь дом Израилев до конца, и населятся гради, и пустыни оградятся: 11 и умножу вас людьми и скотом, и умножатся и возрастут, и вселю вас якоже прежде, и благо сотворю вам якоже бывшым прежде вас, и уразумеете, яко Аз есмь Господь: 12 и нарожду в вас человеки люди Моя Израиля, и наследят вас, и будете им во одержание, и не приложите ктому безчадни быти от них. 13 Сия глаголет Адонаи Господь: понеже глаголаша тебе: земля поядающая человеки ты еси, и безчадная от языка твоего была еси: 14 того ради человеков ктому не пояси и языка твоего не обезчадиши ктому, глаголет Адонаи Господь. 15 И не услышится в вас ктому безчестие языков, и укоризны людий не приимете ктому, и язык твой не будет без чад ктому, глаголет Адонаи Господь. 16 И бысть слово Господне ко мне глаголя: 17 сыне человечь, дом Израилев вселися на земли своей, и оскверниша ю путем своим и кумирми своими и нечистотами своими, и по нечистоте месячная имущия бысть путь их пред лицем Моим: 18 и излиях ярость Мою на ня, крови ради, юже пролияша на землю, и кумирми своими оскверниша ю, 19 и разсыпах я во языки и развеях я во страны: по пути их и по начинанию их судих им. 20 И внидоша во языки, в няже внидоша тамо, и оскверниша имя Мое святое, внегда глаголатися им: людие Господни сии и от земли своея изыдоша. 21 И пощадих я имене ради Моего святаго еже оскверниша дом Израилев во языцех, аможе внидоша. 22 Того ради рцы дому Израилеву: сия глаголет Адонаи Господь: не вам Аз творю, доме Израилев, но имене Моего ради святаго, еже осквернисте во языцех, тамо аможе внидосте. 23 И освящу имя Мое великое, оскверненное во языцех, еже осквернисте среде их, и уразумеют языцы, яко Аз есмь Господь, глаголет Адонаи Господь, внегда освящуся в вас пред очима их. 24 И возму вы от язык и соберу вы от всех земель, и введу вы в землю вашу, 25 и воскроплю на вы воду чисту, и очиститеся от всех нечистот ваших и от всех кумиров ваших, и очищу вас. 26 И дам вам сердце ново и дух нов дам вам, и отиму сердце каменное от плоти вашея и дам вам сердце плотяно, и дух Мой дам в вас: 27 и сотворю, да в заповедех Моих ходите, и суды Моя сохраните и сотворите я. 28 И вселитеся на земли, юже дах отцем вашым, и будете Ми в люди, Аз же буду вам в Бога. 29 И спасу вы от всех нечистот ваших (и очищу вы от грех ваших всех), и призову пшеницу и умножу ю, и не дам на вы глада: 30 и распложу плод древесный и плоды селныя, яко да не приимете ктому гладныя укоризны во языцех. 31 И помянете пути своя злыя и начинания ваша не благая, и вознегодуете пред лицем их о беззакониих ваших и о мерзостех ваших. 32 Не вас ради Аз творю, доме Израилев, глаголет Адонаи Господь, вестно да будет вам, (доме Израилев:) постыдитеся и усрамитеся от путий ваших, доме Израилев. 33 Сия глаголет Адонаи Господь: во оньже день очищу вы от всех беззаконий ваших и населю грады, и соградятся пустыни, 34 и земля погибшая возделается вместо того, яко погублена бысть пред очима всякаго мимоходящаго: 35 и рекут: земля оная погибшая бысть яко вертоград Сладости, и гради опустевшии и разореннии и раскопаннии, забралы утвержденни сташа: 36 и уразумеют языцы, елицы останутся окрест вас, яко Аз Господь возградих разоренныя и насадих погубленныя: Аз Господь глаголах и сотворю. 37 Сия глаголет Адонаи Господь: се, еще обрящуся дому Израилеву, еже сотворити им: умножу их яко овцы, человеки яко овцы святыя, 38 яко овцы Иерусалимли во праздниках его, тако будут гради опустевшии полни стад человеческих: и уразумеют, яко Аз Господь. === 37 === 1 И бысть на мне рука Господня, и изведе мя в дусе Господни и постави мя среде поля: се же бяше полно костей человеческих: 2 и обведе мя окрест их около, и се, многи зело на лицы поля, и се, сухи зело. 3 И рече ко мне: сыне человечь, оживут ли кости сия? И рекох: Господи Боже, Ты веси сия. 4 И рече ко мне: сыне человечь, прорцы на кости сия и речеши им: кости сухия, слышите слово Господне: 5 се глаголет Адонаи Господь костем сим: се, Аз введу в вас дух животен 6 и дам на вас жилы, и возведу на вас плоть и простру по вам кожу, и дам дух Мой в вас, и оживете и увесте, яко Аз есмь Господь. 7 И прорекох, якоже заповеда ми Господь. И бысть глас внегда ми пророчествовати, и се, трус, и совокупляхуся кости, кость к кости, каяждо ко составу своему. 8 И видех, и се, быша им жилы, и плоть растяше, и восхождаше (и протяжеся) им кожа верху, духа же не бяше в них. 9 И рече ко мне: прорцы о дусе, прорцы, сыне человечь, и рцы духови: сия глаголет Адонаи Господь: от четырех ветров прииди, душе, и вдуни на мертвыя сия, и да оживут. 10 И прорекох, якоже повеле ми, и вниде в ня дух жизни, и ожиша и сташа на ногах своих, собор мног зело. 11 И рече Господь ко мне глаголя: сыне человечь, сия кости весь дом Израилев есть, тии бо глаголют: сухи быша кости нашя, погибе надежда наша, убиени быхом. 12 Того ради прорцы (сыне человечь) и рцы к ним: сия глаголет Адонаи Господь: се, Аз отверзу гробы вашя и изведу вас от гроб ваших, людие Мои, и введу вы в землю Израилеву: 13 и увесте, яко Аз есмь Господь, внегда отверсти Ми гробы вашя, еже возвести Ми вас от гробов ваших, людие Мои: и дам дух Мой в вас, и живи будете, 14 и поставлю вы на земли вашей, и увесте, яко Аз Господь: глаголах и сотворю, глаголет Адонаи Господь. 15 И бысть слово Господне ко мне глаголя: 16 сыне человечь, возми себе жезл един и напиши на нем Иуду и сыны Израилевы прилежащыя к нему: и жезл вторый возми себе и напиши на нем Иосифа, жезл Ефремов, и вся сыны Израилевы приложившыяся к нему: 17 и совокупи я друг ко другу себе в жезл един, еже связати я, и будут (вкупе) в руце твоей: 18 и будет, егда рекут к тебе сынове людий твоих, вопрошающе: не возвестиши ли нам ты, что суть сия тебе? 19 И речеши к ним: сия глаголет Адонаи Господь: се, Аз поиму племя Иосифово, еже есть в руце Ефремове, и племена Израилева прилежащая к нему, и дам я в племя Иудино, и будут в жезл един в руце Иудине. 20 И будут жезли, на нихже писати будеши, в руце твоей пред очима их, 21 и речеши к ним: сия глаголет Адонаи Господь: се, Аз поемлю весь дом Израилев от среды языков, аможе внидоша, и соберу я от всех сущих окрест их и введу их в землю Израилеву, 22 и дам я во язык на земли Моей и в горах Израилевых: и Князь един будет во всех сих царем, и не будут ктому в два языка, ни разделятся ктому на два царства, 23 да не оскверняются ктому в кумирех своих и в мерзостех своих и во всех нечестиих своих: и избавлю я от всех беззаконий их, имиже согрешиша, и очищу я, и будут Ми в люди, и Аз буду им в Бога. 24 И раб Мой Давид Князь среде их и Пастырь един будет всех, яко в заповедех Моих ходити будут и суды Моя сохранят и сотворят я, 25 и вселятся на земли своей, юже дах рабу Моему Иакову, на нейже жиша тамо отцы их, и вселятся на ней тии и сынове их и сынове сынов их даже до века: и Давид раб Мой князь их будет во век. 26 И утвержу им завет мирен, и завет вечен будет с ними, и укореню я и умножу, 27 и дам освящение Мое посреде их во век, и будет вселение Мое в них, и буду им Бог, а они будут Ми людие: 28 и уведят языцы, яко Аз есмь Господь освящаяй я, внегда будут святая Моя среде их во век. === 38 === 1 И бысть слово Господне ко мне глаголя: 2 сыне человечь, утверди лице твое на Гога и на землю Магога князя Рос, Мосоха и Фовеля, и прорцы нань, 3 и рцы ему: сия глаголет Адонаи Господь: се, Аз на тя, Гог, и на князя Рос, Мосоха и Фовеля, 4 и обращу тя окрест, и вложу узду в челюсти твоя, и соберу тя и всю силу твою, кони и конники оболчены во броня вся, собор мног, шлемы и мечы и щиты вси тии имуще: 5 Персяне и Муряне, и Лидяне и Ливиане, вси сии щиты и шлемы имуще: 6 Гомер и вси иже окрест его, дом Форгамань от конец севера и вси иже окрест его, и языцы мнози с тобою. 7 Уготовися, уготовися сам ты и весь сонм твой собраный с тобою, и будеши ми в преднюю стражбу. 8 От дний множайших уготовишися, и в последняя лета приидеши, и приидеши на землю низвращенную от меча, собраных от язык многих на землю Израилеву, яже бысть пуста весьма: и тии от язык изыдоша, и вселятся с миром вси. 9 И взыдеши аки дождь и приидеши аки облак, покрыти землю, и падеши ты и вси иже окрест тебе, и языцы мнози с тобою. 10 Сия глаголет Адонаи Господь: и будет в той день, взыдут глаголы на сердце твое, 11 и помыслиши помышления злая и речеши: взыду на землю отверженую, прииду на молчащыя в тишине и живущыя мирно, на вся живущыя на земли, на нейже несть ограды, ни дверий, ни верей, 12 еже пленити плен и взяти корысти их, еже обратити руку мою на землю опустошеную, яже населися, и на язык собраный от языков многих, сотворивших притяжания имений и живущих на пупе земли. 13 Сава и Дедан и купцы Кархидонстии и вся веси их рекут тебе: еда на пленение, еже пленити, ты грядеши, и взяти корысти? И собрал еси люди твоя взяти сребро и злато, отвести притяжания и имения, еже пленити плен велик. 14 Того ради прорцы, сыне человечь, и рцы Гогу: сия глаголет Адонаи Господь: не в той ли день, егда жити будут людие Мои Израиль с миром, востанеши? 15 И приидеши от места своего от конца севера, и языцы мнози с тобою: конницы на конех вси, собор велик и сила многа, 16 и взыдеши на люди Моя Израиля, яко облак покрыти землю: в последния дни будет, и возведу тя на землю Мою, да Мя уведят вси языцы, егда освящуся в тебе пред ними, (о, Гог!) 17 сия глаголет Адонаи Господь Гогу: ты еси, о немже глаголах во дни первыя рукою раб Моих пророк Израилевых, прорекших в оныя дни и лета, еже привести тя на ня. 18 И будет в той день, в оньже приидет Гог на землю Израилеву, глаголет Адонаи Господь, взыдет ярость Моя во гневе Моем 19 и рвения Моя во огни гнева Моего: глаголах, аще не будет в той день трус велик на земли Израилеве: 20 и потрясутся от лица Господня рыбы морския и птицы небесныя, и зверие польнии и вси гади ползающии по земли, и вси человецы иже на лицы земли, и расторгнутся горы и падут дебри, и всяка стена на землю падет. 21 И призову нань весь страх мечный, глаголет Адонаи Господь: мечь человека на брата его будет. 22 И отсужду ему смертию и кровию, и дождем потопляющим и камением градным, огнь и камень горящь одождю нань и на вся сущыя с ним и на языки многия с ним: 23 и возвеличуся и освящуся, и прославлюся и уведан буду пред языки многими, и уведят, яко Аз есмь Господь. === 39 === 1 И ты, сыне человечь, прорцы на Гога и рцы: сия глаголет Адонаи Господь: се, Аз на тя, Гог, князя Рос, Мосоха и Фовеля, 2 и соберу тя и наставлю тя, и возведу тя от конца севера и возведу тя на горы Израилевы: 3 и исторгну лук твой от руки твоея левыя и стрелы твоя от руки твоея десныя, 4 и поражу тя на горах Израилевых, и падеши ты и вси иже окрест тебе, и языцы иже с тобою отдадятся во множество птиц всякому парящему, и всем зверем польным дах тя на изядение: 5 на лицы поля падеши, яко Аз глаголах, глаголет Адонаи Господь. 6 И пущу огнь на Магога, и населятся острови с миром, 7 и уведят, яко Аз есмь Господь, и имя Мое святое вестно будет среде людий Моих Израиля, и не осквернится имя Мое святое ктому, и уведят вси языцы, яко Аз есмь Господь Святый среде Израиля. 8 Се, приспе, и увеси, яко будет, глаголет Адонаи Господь: се есть день, о немже глаголах, 9 и изыдут живущии во градех Израилевых, и пожгут оружие, и щиты и копия, и луки и стрелы, и жезлы ручныя и сулицы, и раждегут ими огнь седмь лет: 10 и не возмут древес с поля, ни изсекут от дубравы, но оружием раждегут огнь, и пленят пленившыя их и расхитят расхитивших я, глаголет Адонаи Господь. 11 И будет, в той день дам Гогу место нарочито, гроб во Израили, многопогребателно, пришедших на восток моря, и заградят устие дебри и погребут тамо Гога и все множество его, и прозовется та дебрь: многопогребателное Гога. 12 И закопают я дом Израилев, да очистится земля в седмь месяц, 13 и погребут я вси людие земли, и будет им именито, в оньже день прославлюся, глаголет Адонаи Господь. 14 И мужей всегда поставят обходити всю землю, еже погребсти оставшихся на лицы земли и очистити ю по седми месяцех, и взыщут опасно. 15 Всяк проходяй землю и узревый кость человечу сотворит у нея знамение, дондеже погребут ю погребающии в дебри, многопогребателнем Гогове. 16 Ибо имя месту (прозовется) Падение многопогребателное: и очистится земля. 17 И ты, сыне человечь, рцы: сия глаголет Адонаи Господь: рцы всяцей птице парящей и ко всякому зверю селному: соберитеся и приидите от всех окрестных его на заколение Мое, еже заклах вам, заклание велие на горах Израилевых, ядите мяса и пийте кровь: 18 мяса исполинов изясте и кровь князей земных испиете, овны и телцы, и козлы и волы тучнии вси: 19 и да ясте тук до сытости и испиете кровь до пиянства от заклания Моего, еже заклах вам: 20 и насытитеся от трапезы Моея, от коня и всадника, исполина и всякаго мужа воинскаго, глаголет Адонаи Господь. 21 И дам славу Мою в вас, и узрят вси языцы суд Мой, егоже сотворих, и руку Мою, юже наведох на ня, 22 и увесть дом Израилев, яко Аз есмь Господь Бог их от сего дне и в прочыя. 23 И уведят вси языцы, яко грехов ради своих пленени быша дом Израилев, понеже отвергошася Мене, и отвратих лице Мое от них и предах я в руце врагов их, и падоша мечем вси: 24 по нечистотам их и по беззаконием их сотворих им и отвратих лице Мое от них. 25 Того ради сия глаголет Адонаи Господь: ныне возвращу пленение Иаковле и помилую дом Израилев, и возревную имене ради Моего святаго: 26 и возмут безчестие свое и всякую неправду свою, еюже неправдоваша, егда вселятся на земли своей с миром и не будет устрашающаго, 27 внегда возвращу я от язык и соберу я от стран языческих и освящуся в них пред языки: 28 и уведят, яко Аз есмь Господь Бог их, внегда явлюся им во языцех и соберу я на землю их и не оставлю от них тамо ктому: 29 и не отвращу лица Моего ктому от них, зане излиях ярость Мою на дом Израилев, глаголет Адонаи Господь. === 40 === 1 И бысть во двадесять пятое лето пленения нашего, перваго месяца, в десятый день месяца, в четвертоенадесять лето но пленении града, в той день бысть на мне рука Господня: и веде мя тамо, 2 в видении Божии веде мя на землю Израилеву и постави мя на горе высоце зело, на нейже яко сограждение града прямо (полудне), 3 и введе мя тамо: и се, муж, и зрак его бяше, яко видение меди блещащияся, и в руце его бяше вервь зиждущих и трость мерителная. Той же стояше у врат 4 и рече ко мне: видел ли еси, сыне человечь? Виждь очима твоима и ушима твоима слыши, и учини в сердцы твоем вся, елика аз показую тебе, зане того ради вшел еси семо, да покажу тебе, и покажеши ты вся, елика видиши, дому Израилеву. 5 И се, ограда внеуду окрест храма, и в руце мужа мера тростяна шести лакот в лакоть шестодланный, и измери предстение ширину равно трости, и высоту его равно трости. 6 И вниде во врата зрящая на восток седмию степеньми, и измери фее, шесть о сию страну, шесть же об ону, и елам дверный равно трости. 7 И фее равно трости в долготу и равно трости в широту, и аилам среде феилаф шести лакот. И фее второе равно трости в широту и равно трости в долготу, елам же пяти лакот. 8 И фее третие равно трости в долготу и равно трости в широту, 9 елам же вратный, иже близ елама двернаго осми лакот, аилев же двою лактей: и елам дверный внутрьуду. 10 И фее дверныя прямо фее, три о сию страну и три об ону, мера же едина трием: и мера едина аилам сюду и сюду. 11 И размери широту входа вратнаго десяти лактей, широту же вратную тринадесяти лактей, 12 и лакоть един сводимь прямо фееим лактя единаго и лактя единаго, предел сюду и сюду, и фее шести лактей о сию страну и шести лактей об ону страну. 13 И размери врата от стены фее до стены фее, широта двадесяти и пяти лактей: сия врата ко вратом, 14 и непокровенное елама врат шестидесяти лактей, (двадесяти пяти) и фее двора окрест, 15 и непокровенное врат отвне в непокровенное (врат) елама врат внутрьуду пятьдесят лактей. 16 И оконца сокровена фееим и в аилам внутрь врат двора окрест: такожде и елам оконца внутрьуду окрест, и на аилам финики сюду и сюду (изваяны). 17 И введе мя во двор внутренний, и се, преграждения и междустолпия окрест двора, преграждений же тридесять в междустолпиих, 18 и притворы противу задней стране врат, по долготе врат междустолпие нижнее. 19 И размери широту двора от непокровенаго врат внешних внутрь ко непокровеному врат зрящих вне, лактей сто зрящих на восток: и введе мя на север, 20 и се, врата зрящая на север двору внешнему, и размери я, долготу их и широту. 21 И фее три о сию страну, три же об ону, и аилев, и еламы, и финики их: и бысть по мере врат зрящих на восток, пятидесяти лактей долгота их, а широта их двудесяти и пяти лактей: 22 и оконца их, и еламы, и финики их, якоже врата зрящая на восток: и седмию восходами восхождаху на ня, и еламы внутрьуду. 23 И врата двору внутреннему зрящая ко вратом северным, якоже врата зрящая на восток: и размери двор от врат до врат лактей сто. 24 И веде мя к югу, и се, врата зрящая на юг, и размери я, и фее, и аилева, и еламы, по темжде мерам. 25 И оконца их и еламы окрест якоже и оконца елаг, пятидесяти лактей долгота их, а широта двудесяти и пяти лактей, 26 и седмь восходов им, и еламы внутрьуду, и финики их, един о сию страну, а другий об ону над аилев. 27 И врата прямо вратом двора внутренняго на юг: и размери двор от врат до врат на юг, сто лактей в широту. 28 И введе мя во двор внутренний врат, яже на юг, и размери врата, яже на юг, по темжде мерам: 29 и фее, и аилев, и еламы по темжде мерам. 30 И оконца их и еламы окрест, пятидесяти лактей долгота их, а широта двудесяти и пяти лактей. 31 Еламы же во двор внешний, и финики аилев, и осмь восходов. 32 И введе мя во врата зрящая на восток, и размери я по темжде мерам, и фее и аилев и еламы по темжде мерам. 33 И оконца им, и еламы и окрест, пятидесяти лактей долгота их, а широта их двудесяти и пяти лактей. 34 И еламы во двор внутренний, и финики на аилев сюду и сюду, и осмь восходов им. 35 И введе мя во врата яже на север, и размери по темжде мерам, 36 и фее и аилев и еламы, и оконца им окрест, пятидесяти лактей долгота их, а широта двудесяти и пяти лактей, 37 и еламы во внешний двор, и финики аилеву сюду и сюду, и осмь восходов им. 38 И преграды их, и двери их, и еламы их пред враты их вторыми сток, тамо измывают всесожжения. 39 Во еламе же врат, две трапезы о сию страну, две же об ону, еже закалати на них всесожжения, яже за грехи и яже за неведение. 40 И созади стока всесожжений дверий зрящих на север две трапезы на восток противу задней стране (дверий) вторых, и противу елама врат две трапезы на восток. 41 Четыри о сию страну, четыри же об ону противу задней стране врат, на тех закалают заколения: прямо осми трапез заколений: 42 четыри же трапезы всесожжений каменны истесаны, в широту лактя единаго и пол, в долготу двух лактей и пол, а в высоту лакоть един: на тыя возлагают орудия, имиже закалают тамо всесожжения и заколения. 43 И имеют ограждение мало истесано на длань внутрьуду окрест, верху же трапезы покров, еже покрыватися им от дождя и зноя. 44 И введе мя во двор внутреннейший, и се, две преграды во внутреннейшем дворе, едина противу задней стране врат зрящих на север, вводящая на юг, а другая противу задней стране врат сущих на юг, зрящих же к северу. 45 И рече ко мне: преграда сия, яже зрит на юг, жерцем есть, иже стрегут стражбу храма: 46 а преграда, яже зрит к северу, жерцем есть стрегущым стражу требника: тии суть сынове Садуковы, приступающии от Левиа ко Господеви, еже служити Ему. 47 И размери двор ста лактей в долготу и в широту ста лактей, на четыри страны его, и требник прямо храму. 48 И введе мя во елам храма: и размери аил елама пяти лактей широту о сию страну, пяти же лактей об ону, широта же дверная четырехнадесяти лактей, и бока дверная елама три лакти о сию страну, три же об ону. 49 Долгота же елама двадесять лактей, а широта дванадесять лактей: и десятию степеньми восхождаху к нему, и столпи бяху у аилама, един о сию страну, а другий об ону. === 41 === 1 И введе мя во храм, и размери аилам, шести лактей широта о сию страну и шести лактей широта аилам об ону, 2 и широта врат десять лактей, и бока врат пяти лактей о сию страну и пяти об ону: и измери долготу их четыредесять лактей, а широту двадесять лактей. 3 И вниде во двор внутренний, и размери аилам дверий двух лактей, и двери шести лактей, бока же дверная седми лактей о сию страну и седми об ону. 4 И размери долготу дверий четыредесять лактей, а широту двадесять лактей пред лицем храма, и рече ко мне: сие Святое Святых. 5 И размери стену храма шести лактей и широту страны четырех лактей окрест, 6 страны же страна до страны тридесять и три дващи: и разстояние в стене храма во странах окрест, еже на прозрак быти входящым, да отнюд не прикасаются ко стенам храма. 7 Широта же вышния страны по приложению от стены к вышней окрест храма, яко да разширяется свыше, и да от долних восходят на горняя, а от средних на трекровная. 8 И видех храма высоту окрест разстояние стран равно трости шести лактей разстояния, 9 широта же стены страны внеуду пяти лактей, и прочая между странами храма, 10 и между преградами широта двадесяти лактей, окружность окрест храма. 11 Двери же преград ко прочему дверий единых яже к северу: и дверь едина к югу, широта же света прочаго пяти лактей широта окрест. 12 Раздел же противу прочему аки к морю седмьдесят лактей, широта стены разделяющия, широта окрест пять лактей, и долгота ея девятьдесят лактей. 13 И размери противу храма долготу сто лактей, и прочая и разделяющая, и стены их в долготу сто лактей. 14 И широта противу храма, и прочая противу ста лактей. 15 И размери долготу разделу противу лицу прочему созади храму тому, и прочая о сию страну и об ону ста лактей долготу: храм же и углы, и елам внешний, доски постланы. 16 И окна решетчатая свещения окрест трием (странам) еже приницати: храм же и яже близ его устлана древом окрест, и помост, и от помоста до окон: окна же отворяема трояко на приницание, 17 и даже до дому внутренняго и до внешняго, и на всей стене окрест внутренней и внешней меры, 18 и изваяннии херувими и финики: финик посреде херувима и херувима: два лица херувиму: 19 лице человеческо к финику сюду и сюду, и лице львово к финику сюду и сюду, изваян весь храм окрест. 20 От помоста даже до свода херувими и финики изваяни. 21 Святое же и храм отверзаемь на четыри страны, пред лицем святых видение яко зрак требника древяна, 22 три лакти высота его, а долгота дву лактей, и широта такожде: имеяше же роги, и основание его и стены его древяны. И рече ко мне: сия трапеза, яже пред лицем Господним: 23 двои же двери храму и двои двери святому, 24 двоим дверем вращающымся: две вереи единым, и две вереи вторым дверем. 25 И ваяния над ними и над дверьми храма херувим и финики, по ваянию святых, и древеса потребна пред лицем елама от внеуду, 26 и окна сокровена. И размери сюду и сюду в покровех елама, и страны храма древами сопряжены. === 42 === 1 И введе мя во двор внешний на востоки, прямо врат яже к северу, и введе мя (внутрь), и се, преград пять держащыяся прочаго и держащыяся предела к северу, 2 противу лица ста лактей долгота к северу, а широта пятьдесят лактей, 3 расписаны якоже врата двора внутренняго, и якоже междустолпия внешняго двора чинорасположены, прямоличны притворы три. 4 И прямо преградам проход десяти лактей в широту, во внутренняя пути единаго лактя на сто лактей долгота, и двери их к северу. 5 И проходи горничнии такожде, яко изницаше междустолпие из него, от долнаго междустолпия, и разстояние: сице междустолпие и разстояние, 6 и сице притворы: понеже трегубы бяху и столпов не имеша, якоже столпи преград: того ради изницаху из нижних и средних от земли. 7 И свет внеуду, якоже преграды двора внешняго, зрящыя противу преградам, яже к северу, долгота пятидесяти лактей. 8 Зане долгота преград зрящих во двор внешний бяше пятидесяти лактей, и тыя суть прямоличны тем: все же (бе) ста лактей. 9 Двери же преград тех входа, иже на востоки, еже входити ими от двора внешняго, 10 по свету сущаго в начале прохода: и к югу на лице юга, и прямо прочему, и прямо разделения, и преграды, 11 и проход противу лицу их, по мерам преград яже к северу и по долготе их и по широте их, и по всем исходом их и по всем вращением их, и по светом их и по дверем их, 12 преград яже к югу, и по дверем от начала прохода аки к свету разстояния трости, и на восток еже входити ими. 13 И рече ко мне: преграды, яже к северу, и преграды, яже к югу, сущыя противу лицу разстояний, сия суть преграды святаго, в нихже ядят жерцы сынове Садуковы, иже приступают ко Господеви, Святая святых, и тамо положат Святая святых и жертву, и яже за грехи и яже за неведение, понеже место свято есть. 14 Да не входят тамо, кроме жерцев, и да не изходят от святаго во двор внешний, яко да присно святи будут приносящии, и да не прикасаются ризам их, в нихже служат, понеже свята суть, но да облекутся в ризы ины, егда прикасаются людем. 15 И совершися размерение храма внутрьуду. И изведе мя по пути врат зрящих на восток, и размери подобие храма окрест чинорасположением. 16 И ста созади врат зрящих на восток, и размери пять сот тростию мерною. 17 И обратися на север, и размери на лице севера лактей пять сот тростию мерною. 18 И обратися к морю, и размери на лице моря пять сот лактей тростию мерною. 19 И обратися на юг, и размери противу югу пять сот тростию мерною. 20 Четыри страны тоюжде тростию: и расположи его, и ограду окрест ему, пять сот лактей (долготу) на восток, и пять сот лактей широту, еже разлучати между святыми и между предстением сущим в чинорасположении храма. === 43 === 1 И веде мя ко вратом зрящым на востоки и изведе мя: 2 и се, слава Бога Израилева грядяше по пути врат зрящих на востоки, и глас полка аки глас усугубляющих многих, и земля светяшеся аки свет от славы Его окрест. 3 И видение, еже видех, по видению, еже видех, егда вхождах помазати град: и видение колесницы, юже видех, подобяшеся видению, еже видех на реце Ховар. И падох на лице мое. 4 Слава же Господня вниде во храм по пути врат зрящих на восток. 5 И взя мя дух и введе мя во двор внутренний: и се, полн славы дом Господень. 6 И стах, и се, глас от храма глаголющаго ко мне, и муж стояше близ мене 7 и рече ко мне: сыне человечь, видел ли еси место престола Моего и место стопы ног Моих, идеже вселится имя Мое среде дому Израилева во век? И не осквернят ктому имене Моего святаго дом Израилев, тии и старейшины их во блужении своем и во убийствах старейшин своих среде себе, 8 внегда полагаху преддверие Мое во преддвериих своих и праги Моя близ прагов своих: и даша стену Мою яко держащуюся Мене и онех, и оскверниша имя Мое святое в беззакониих своих, яже творяху: и скончах я в ярости Моей и во избиении: 9 и ныне да отринут блужение свое и убийства старейшин своих от Мене, и вселюся среде их во век. 10 Ты же, сыне человечь, покажи дому Израилеву храм, и да престанут от грехов своих: и видение его, и чиноположение его, 11 и тии приимут казнь свою о всех, яже сотвориша: и распишеши храм и уготование его, и исходы его и входы его, и бытие его и вся повеления его и вся законы его возвестиши им и да впишеши пред ними, и снабдят вся оправдания Моя и вся повеления Моя и сотворят я. 12 И расписание храма на верху горы: вси пределы его окрест Святая Святых суть. 13 Сей закон храма, и сия мера требника, в лакоть лактя и длани, недро глубины лакоть на лакоть и лакоть в широту, и ограждение устия ему окрест, пяди. 14 И сия высота требника, и от глубины начала вдоления его ко очистилищу великому, еже внизу, двух лактей, широта же лакоть: а от очистилища малаго ко очистилищу великому лакти четыри, и широта лакоть. 15 И ариил четырех лактей, а от ариила и выше рогов лакоть: 16 ариил же дванадесять лактей в долготу и дванадесять лактей в широту, четвероуголен на четыри части своя. 17 И очистилище четыренадесять лактей в долготу и четыренадесять лактей в широту, четвероуголно на четыри части своя: и ограждение ему окрест окружающее его пол лактя, и обдержание его лакоть окрест, и степени его зрящыя на восток. 18 И рече ко мне: сыне человечь, сия глаголет Господь Бог Израилев: сия заповеди требника в день сотворения его, еже возносити на нем всесожжения и возливати нань кровь. 19 И даси жерцем и левитом, иже суть от семене Садукова, приступающым ко Мне, глаголет Господь Бог, еже служити Мне, телца от говяд за грех: 20 и да возмут от крове его и да возложат на четыри роги требника и на четыри части очистилища и на основание окрест, и окропиши е, и очистят е: 21 и да возмут телца, иже за грех, и да сожжется во отлученнем храме вне святых. 22 А во вторый день да возмут два козлища от коз непорочных за грех и да очистят требник, якоже очистиша телцем. 23 И егда скончают очищение, да принесут телца от говяд непорочна и овна от овец непорочна, 24 и да принесете пред Господа: и да возвергут на ня жерцы соль и да вознесут я Господеви всесожжения. 25 Седмь дний да сотвориши козлище за грех по вся дни, и телца от говяд и овна от овец непорочна, да сотворят седмь дний: 26 и да очистят требник и освятят его, и наполнят руки своя. 27 И скончают седмь дний, и будет от осмаго дне и потом, сотворят жерцы на жертвеннице всесожжения ваша и яже спасения вашего: и прииму вы, глаголет Господь. === 44 === 1 И обрати мя на путь врат святых внешних, зрящих на востоки: и сия бяху затворенна. 2 И рече Господь ко мне: сия врата заключенна будут и не отверзутся, и никтоже пройдет ими: яко Господь Бог Израилев внидет ими, и будут заключенна. 3 Зане старейшина сей сядет в них ясти хлеб пред Господем: по пути елама врат внидет и по пути его изыдет. 4 И введе мя по пути врат яже к северу, прямо храму: и видех, и се, полн славы дом Господень. И падох ниц на лицы моем. 5 И рече Господь ко мне: сыне человечь, сложи в сердцы твоем, и виждь очима твоима и ушима твоима слыши вся, елика Аз глаголю с тобою, по всем повелением храма Господня и по всем узаконением его: и устроиши сердце твое на вход храма по всем исходам его во всех святых. 6 И речеши к дому прогневляющему мя, к дому Израилеву: сия глаголет Господь Бог: да довлеет вам от всех беззаконий ваших, доме Израилев, 7 еже вводити вам сыны иноплеменничы необрезаны сердцем и необрезаны плотию, еже бывати им во святых Моих, и оскверняху я, егда приносите вы хлебы, тук и мяса и кровь: и преступасте завет Мой во всех беззакониих ваших, 8 и не снабдесте хранити стражбы во святых Моих, и постависте стражей стрещи стражбы святых Моих себе. 9 Того ради сице глаголет Адонаи Господь: всяк сын иноплеменничь необрезан сердцем и необрезан плотию да не внидет во святая Моя во всех сынех иноплеменничих, иже суть среде дому Израилева: 10 но и левити, иже отвергошася Мене, егда заблуждаше Израиль, иже заблудиша от Мене вслед помыслов своих, и возмут неправду свою 11 и будут служаще во святых Моих, вратари у дверий храма и служащии храму: тии да закалают жертвы и всесожжения людем и тии да станут пред людьми, еже служити им. 12 Понеже служиша им пред лицем кумиров своих, и бысть дому Израилеву в мучение неправды: того ради воздвигох на ня руку Мою, глаголет Господь Бог (Израилев), и возмут беззаконие свое, 13 и не приступят ко Мне служити Мне, ни приносити ко святым сынов Израилевых, ниже ко Святым Святынь Моих, и возмут безчестие свое в заблуждении, в немже прельстишася: 14 и учинят я стрещи стражбы храма на вся дела его 15 и на вся, елика сотворят жерцы и левити, сынове Садуковы, иже сохраниша стражбы святынь Моих (и пути Моя), егда заблуждаше дом Израилев от Мене: сии приступят ко Мне, еже служити Мне, и станут пред лицем Моим, еже приносити Мне жертву, тук и кровь, глаголет Адонаи Господь. 16 Сии внидут во святая Моя и сии приступят ко трапезе Моей, еже служити Мне, и сохранят стражбы Моя. 17 И будет внегда входити им во врата двора внутренняго, в ризы льняны да облекутся, а да не облекутся в волняны, внегда служити им от врат двора внутренняго. 18 И клобуки льняны да имут на главах своих, и опоясания льняна да имут о чреслех своих, и да не препоясуются крепко: 19 и егда исходят к людем во внешний двор, да совлекутся риз своих, в нихже тии служат, и да положат я в преградах святых, и облекутся в ризы ины, и да не освятят людий в ризах своих: 20 и глав своих да не обриют, и влас своих да не растят, покрывающе покрыют главы своя. 21 И вина да не пиет всяк жрец, егда входит во внутренний двор. 22 И вдовицы и пущеницы да не поемлют себе в жену, но токмо девицу от племене дому Израилева: и аще будет вдова жерча, да оную поймут. 23 И люди Моя да научат разлучати между святым и сквернавым, и между чистым и нечистым возвестят им. 24 И на суде крове тии да стоят, еже разсуждати: оправдания Моя да оправдят и суды Моя да судят, и законы Моя и повеления Моя во всех праздницех Моих сохранят, и субботы Моя освятят. 25 И над душу человека не приидут осквернитися, но точию над отцем и материю, и сыном и дщерию, и братом и сестрою своею, яже не посягла за мужа, осквернится. 26 И по очищении своем седмь дний да сочтет себе. 27 И во оньже день входят во двор внутренний, еже служити во святилищи, да принесут очищение, глаголет Господь Бог. 28 И будет им в наследие: Аз им наследие, и одержание им не дастся в сынех Израилевых, яко Аз одержание их. 29 Жертвы же и яже за грехи и за неведение сии да ядят: и всякое отлученное во Израили тем да будет: 30 начатки всех и первенцы всех и участия вся, от всех начатков ваших жерцем да будут: и начатки жит ваших да дасте жерцу, еже положити благословения в домех ваших. 31 И всякия мертвечины и звероядины, от птиц и от скот да не ядят жерцы. === 45 === 1 И егда разделяти вам землю в наследие, отлучите начаток Господеви, свято от земли, в долготу двудесяти и пяти тысящ, а в широту десяти тысящ, свято да будет во всех пределех их окрест. 2 И да будут от того на святое пять сот, по пяти сот четвероуголно окрест, разстояние же их пятьдесят лактей окрест. 3 И от сего размерения да размериши в долготу двадесять пять тысящ, а в широту десять тысящ: и в том да будет освящение, Святая Святых. 4 Свято от земли да будет жерцем служащым во святем и да будет приступающым служити Господеви, и будет им место на домы отлученны освящению их, 5 двадесять пять тысящ в долготу и двадесять тысящ в широту да будет, левитом служащым храму, тем во одержание грады ко обитанию. 6 И одержание града да даси в широту пять тысящ, а в долготу двадесять пять тысящ, якоже начаток святых всему дому Израилеву да будет 7 и старейшине от того: и от сего в начатки святых, во одержание града по лицу начатков святынь и по лицу одержания града, яже к морю, и от сущих к морю, яже на восток: долгота же яко едина часть от предел иже к морю, и долгота ко пределом иже на восток земли. 8 И будет ему во одержание во Израили, и да не насилуют ктому старейшины Израилевы людем Моим, и землю да наследят дом Израилев по племеном своим. 9 Сия глаголет Господь Бог: да довлеют вам, старейшины Израилевы, неправду и озлобление отвержите, суд же и правду сотворите: изымите насилие от людий Моих, глаголет Господь Бог. 10 Вес праведный и мера праведна и хиникс праведен да будут вам в меры: 11 и хиникс такожде един да будет вам, еже приимати, десятая часть гомора хиникс, и десятая часть гомора ефи, мера к гомору да будет равна. 12 И вес, двадесять оволи сикль, и двадесять пять сиклей, и двадесять сиклей, и пятьнадесять сиклей мнас будет вам. 13 И сей начаток, егоже отлучите, шестую часть меры от гомора пшеницы и шестую часть ефи от кора ячменя. 14 Заповедь же о елеи, меру елеа от десяти мер, понеже десять мер суть гомор. 15 И овча едино от десяти овец участие от всех отечеств Израилевых, на жертвы и на всесожжения и на спасение, еже умолити о вас, глаголет Господь Бог. 16 Вси же людие земли да дадят сей начаток старейшине Израилеву, 17 и старейшиною да бывают всесожжения: и жертвы и возлияния будут в праздники и в новомесячия, и в субботы и во вся праздники дому Израилева: той сотворит яже за грехи и жертву, и всесожжения и яже спасения, еже умоляти о доме Израилеве. 18 Тако глаголет Господь Бог: в первый месяц, во един день месяца, да возмете телца от говяд непорочна, еже очистити святое: 19 и да возмет жрец от крове очищения и да возлиет на праги храма и на четыри углы святилища, и на жертвенник и на праги врат двора внутренняго. 20 И сице да сотвориши в седмый месяц: во един (день) месяца возмеши от коегождо неведущаго и от младенца, и очистите храм. 21 В первый месяц, четвертагонадесять дне месяца, да будет вам Пасха праздник: седмь дний да ясте опресноки. 22 И сотворит старейшина в той день за ся и за дом и за вся люди земли, телца за грех: 23 в седмь же дний праздника да сотворит всесожжения Господеви седмь телцев и седмь овнов непорочных по всяк день седми дний: и за грех козлище от коз на всяк день, и жертву, 24 и опресноки телцу и опресноки овну да сотвориши, и елеа ин опресноку. 25 В седмый же месяц, в пятыйнадесять день месяца, в празднице сотвориши по томужде, седмь дний, якоже и за грех, и якоже всесожжения, и якоже дар, и якоже масло древяное. === 46 === 1 Сия глаголет Господь Бог: врата, яже во дворе внутреннем зрящая на восток, да будут затворена на шесть дний делных: в день же субботный да отверзаются, и в день новомесячия да отверзутся. 2 И внидет старейшина по пути елама врат внешних и да станет у преддверия врат, и да сотворят жерцы всесожжения его и яже спасения его: 3 и да поклонится у преддверия врат и изыдет, врата же да не заключатся до вечера, и да покланяются людие земли у преддверия врат тех в субботы и в новомесячия пред Господем. 4 И всесожжения да принесет старейшина в день субботный Господеви, шесть агнцев непорочных и овна непорочна, 5 и манау, опреснок овну, и агнцем жертву, дар руки своея, и елеа ин опресноку. 6 И в день новомесячия телец от стада непорочен и шесть агнцев и овен непорочен да будет, 7 и опреснок телцу и опреснок овну да будет манаа, и агнцем, якоже постигнет рука его, и масла ин опресноку. 8 И егда входит старейшина, по пути елама врат да внидет и по пути врат да изыдет. 9 И егда входят людие земли пред Господа в праздники, входящии по пути врат зрящих на север поклонитися, да исходят по пути врат яже на юг: и иже входят по пути врат яже на юг, да исходят по пути врат яже на север, да не возвращаются во врата, имиже внидоша, но прямо им да изыдут. 10 И старейшина посреде их, егда тии входят, да внидет с ними, и егда исходят, да изыдет. 11 И в праздники и в торжества да будет манаа опреснок телцу и опреснок овну, и агнцем, якоже постигнет рука его, и елеа ин опресноку. 12 Аще же сотворит старейшина исповедание, всесожжение спасения Господеви, и отворит себе врата зрящая на восток и сотворит всесожжение свое и яже спасения своего, якоже есть обычай творити в день субботный: и да изыдет и затворит двери по исхождении своем: 13 агнца же единолетнаго непорочна да сотворит во всесожжение на всяк день Господеви, заутра да сотворит его. 14 И манаа да сотворит над ним заутра заутра, шестую часть меры, и елеа третию часть ина, еже смесити семидал манаа Господеви, заповедь вечная присно. 15 Да сотворите агнца, и манаа, и масло древяно да сотворите заутра всесожжение присно. 16 Сия глаголет Господь Бог: аще даст старейшина даяние единому от сынов своих от наследия своего, сие сыном его да будет: одержание их сие в наследие. 17 Аще же даст даяние единому от раб своих, да будет ему до лета отпущения, и да воздаст старейшине: обаче наследие сынов его им да будет. 18 И да не вземлет старейшина от наследия людий еже насилити им, от одержания своего даст наследие сыном своим: яко да не расточатся людие Мои кийждо от одержания своего. 19 И введе мя во вход врат, яже к югу, в преграду святых жерцев, зрящую на север: и се, тамо место отлучено. 20 И рече ко мне: сие место есть, идеже варят жерцы, яже за неведение и яже за грехи, и тамо да пекут манау весьма, еже не износити во двор внешний освящати люди. 21 И изведе мя во двор внешний и обведе мя на четыри части двора: и се, двор по углам двора. 22 По углу двор, на четырех углех двора, двор малый в долготу лактей четыредесять, а в широту лактей тридесять, мера едина четырем. 23 И преграды окрест в них, окрест четырем: и поварни устроеныя под преградами окрест. 24 И рече ко мне: сии домове поваров, идеже варят служащии храму заколения людская. === 47 === 1 И введе мя ко преддверию храма, и се, вода исхождаше из под непокровеннаго храма на восток, яко лице храма зряше на восток, и исхождаше вода от страны десныя, от юга к жертвеннику. 2 И изведе мя по пути врат яже на север и обведе мя путем вратным внеуду ко вратом двора, зрящаго на восток, и се, вода исхождаше от страны десныя, 3 якоже исход мужа противу: и мера в руце его: и измери тысящу мерою, и прейде водою воду оставления. 4 И (паки) измери тысящу, и преведе мя чрез воду, и взыде вода до колен: и размери тысящу, и взыде вода даже до чресл. 5 И размери тысящу, поток, и не возможе прейти, яко кипяше вода, аки шум поточный, егоже не прейдут. 6 И рече ко мне: видел ли еси, сыне человечь? И веде мя и обрати мя на брег речный, во обращении моем: 7 и се, на брезе речнем древеса многа зело сюду и сюду. 8 И рече ко мне: вода сия текущая в Галилею, яже на восток, и низхождаше ко Аравии, и грядяше до моря к воде исхода, и изцелит воды: 9 и будет всяка душа животных вреющих, на вся, на няже найдет тамо река, жива будут: и будут тамо рыбы многи зело, яко приидет тамо вода сия и изцелит, и живо будет всякое, на неже аще приидет река, тамо живо будет. 10 И станут тамо рыбарие от Ингадда до Ингалима: сушило мрежам будет, о себе будет: и рыбы ея яко рыбы моря великаго, множество много зело. 11 И во исходе ея и во обращении ея и в возвышении ея мелины ея не изцелятся, в соль вдадутся: 12 и над реку взыдет, и на брезе ея оба полы, всякое древо ядомое не обетшает у нея, ни оскудеет плод его, новости своея первый плод принесет, ибо воды их сия от святых исходят, и будет плод их в снедь и прозябение их во здравие. 13 Сице глаголет Господь Бог: сия пределы наследите земли, двунадесяти племеном сынов Израилевых приложение ужа. 14 И наследите ю кийждо, якоже брат его, на нюже воздвигох руку Мою, еже дати ю отцем их, и падет земля сия вам в наследие. 15 И сии пределы земли на север, от моря великаго сходящаго и отделяющаго вход Имаселдам, 16 Маавфирас, Еврамилиам среде предел Дамасковых и среде предел Имафовых, дворы Савнани, иже суть выше предел Авранитидских. 17 Сии пределы от моря: от двора Енанова, пределы Дамасковы, и яже к северу, и предел Емафов, и предел северск. 18 И яже на востоки: между Авранитидою и между Дамаском, и между Галаадитидою и между землею Израилевою, Иордан делит к морю, еже на востоки фиников: сия на востоки. 19 И яже к югу и ливу: от Фемана и фиников даже до воды Маримоф-Кадим, продолжающееся к морю великому. 20 Сия страна юга и лива, сия страна моря великаго разделяет даже прямо входу Имаф, даже до входа его: сия суть яже к морю Имаф. 21 И разделите землю вам, племеном Израилевым. 22 Расположите ю жребием вам и пришелцем обитающым среде вас, иже родиша сыны посреде вас, и будут вам яко туземцы в сынех Израилевых: с вами да ядят во участии среде племен Израилевых, 23 и будут в племени пришелцев, в пришелцех иже с ними: тамо дадите участие им,, глаголет Господь. === 48 === 1 Сия же имена племен от начала еже к северу, по стране схождения разделяющаго ко входу Имафову двора Енаня, предел Дамасков к северу по стране Имафова двора: и будут им яже на востоки, даже до моря, Даново едино. 2 И от предел Дановых к востоком даже до моря, Асирово едино. 3 И от предел Асировых, от сущих к востоком, даже до моря, Неффалимле едино. 4 От предел же Неффалимлих от страны восточныя даже до страны моря, Манассиино едино. 5 От предел же Манассииных, сущих на востоки, даже до сущих к морю, Ефремле едино. 6 От предел же Ефремлих, иже на восток, даже до моря, Рувимле едино. 7 От предел же Рувимлих, иже на востоки, даже до моря, Иудино едино. 8 А от предел Иудиных, иже к востоком, даже до моря, будет начаток уделения двадесяти и пяти тысящ широта, и долгота якоже едина от частей сущих к востоком, и даже до тех яже к морю: и будет святое посреде их. 9 Начаток, егоже отделят Господеви, в долготу двадесять и пять тысящ и в широту двадесять и пять тысящ. 10 От сих будет начаток святых жерцем, к северу (в долготу) двадесять и пять тысящ, и к морю в широту десять тысящ, и к востоку десять тысящ, и на юг в долготу двадесять и пять тысящ: и гора святых будет посреде его 11 жерцем, освященным сыном Садуковым, стрегущым стражбы храма, иже не прельстишася во прельщение сынов Израилевых, якоже прельстишася левити. 12 И будет им начаток даемый от начатков земли, святое святых от предел левитских. 13 Левитом же ближняя пределов жреческих, двадесяти и пяти тысящ в долготу, а в широту десяти тысящ: вся долгота двадесяти и пяти тысящ, а широта десяти тысящ. 14 Да не продастся от него, ни заменится, ниже отимутся первая жита земли, яко свято есть Господеви. 15 Пять же тысящ избыточных в широте двадесяти и пяти тысящей, предградие да будет граду на вселение и в разстояние его: и да будет град среде его. 16 И сия меры его: от севера четыре тысящы и пять сот, и от юга четыре тысящы и пять сот, и от восток четыре тысящы и пять сот, и от моря четыре тысящы и пять сот. 17 И да будет разстояние граду к северу двусту и пятидесяти, и к югу двусту и пятидесяти, и на восток двусту и пятидесяти, и к морю двусту и пятидесяти. 18 Избыток же долготы держащься начатков святых десять тысящ к востоком и десять тысящ к морю: и будут начатки святаго, и будут жита ея во хлебы делающым град. 19 Делающии же град да делают его от всех племен Израилевых. 20 Весь начаток двадесяти и пяти тысящ на двадесять и пять тысящ: четвероуголно отделите от него начаток святаго, от одержания градскаго, 21 а избыток старейшине от сего: и от онаго, от начатков святаго и во участие града, спреди на двадесять и пять тысящ долгота, до предел, иже к морю и к востоком, спреди на двадесять и пять тысящ, до предел, иже к морю, близ частей старейшины: и да будет начаток святых и освящение храма среде его. 22 От участия же левитска и от участия града, среде старейшин, будет среде предел Иудиных и среде предел Вениаминих, и старейшин да будет. 23 А избыточное племен от сущих к востоком даже до сущих к морю, Вениаминово едино. 24 От предел же Вениаминих к востоком даже до страны яже к морю, Симеоне едино. 25 От предел же Симеоних, от страны яже на восток даже до страны яже к морю, Иссахарово едино. 26 А от предел Иссахаровых, от востоков даже до моря, Завулоне едино. 27 От предел же Завулоних, от востока даже до страны моря, Гадово едино. 28 От предел же Гадовых, от востока даже до ливы: и будут пределы его от юга, и воды Варимоф-Кадиса, наследия даже до моря великаго. 29 Сия земля, юже расположите жребием племеном Израилевым: и сии разделы их, глаголет Господь Бог. 30 И сии исходы града, иже к северу, четыре тысящы и пять сот мерою: 31 врата же града по именом племен Израилевых: врата троя на север: врата Рувимля едина, врата же Иудина едина и врата Левиина едина: 32 и на восток четыре тысящы и пять сот, и врата троя: врата едина Иосифова, врата же едина Вениаминя и врата Данова едина: 33 и яже к югу четыре тысящы и пять сот мерою, и врата троя: врата едина Симеону, врата же едина Иссахару и врата едина Завулону: 34 и яже к морю четыре тысящы и пять сот мерою: врата троя: врата едина Гадова, и врата Асирова едина и врата Неффалимова едина. 35 Округлость же осминадесяти тысящ: имя же граду, от негоже дне будет, Господь тамо будет имя ему. == Книга пророка Даниила == === 1 === 1 В лето третие царства Иоакима царя Иудина, прииде Навуходоносор царь Вавилонск на Иерусалим и воеваше нань. 2 И даде Господь в руце его Иоакима царя Иудина и от части сосудов храма Божия. И принесе я в землю Сеннаар в дом бога своего и сосуды внесе в дом сокровищный бога своего. 3 И рече царь ко Асфанезу, старейшине евнухов своих, ввести от сынов плена Израилева и от племене царска и от князей 4 юношы, на нихже несть порока, и добры зраком и смыслены во всяцей премудрости, и ведущыя умение и размышляющыя разум, и имже есть крепость в них, еже предстояти в дому пред царем и научити я книгам и языку Халдейску. 5 И повеле им (даяти) царь по вся дни от трапезы царевы и от вина пития своего и кормити их лета три, и потом стати пред царем. 6 И бысть в них от сынов Иудиных Даниил и Ананиа, и Азариа и Мисаил. 7 И возложи им имена старейшина евнухов: Даниилу Валтасар, и Анании Седрах, и Мисаилу Мисах, Азарии же Авденаго. 8 И положи Даниил на сердцы своем, еже не осквернитися от трапезы царевы и от вина пития его, и моли старейшину евнухов, яко да не осквернится. 9 И вдаде Бог Даниила в милость и в щедроты пред старейшиною евнухов. 10 И рече старейшина евнухов Даниилу: боюся аз господина моего царя, заповедавшаго о пищи вашей и питии вашем, да не когда увидит лица ваша уныла паче отроков сверстников ваших, и осудите главу мою царю. 11 И рече Даниил ко Амелсару, егоже пристави старейшина евнухов к Даниилу и Анании, и Азарии и Мисаилу: 12 искуси отроки твоя до десяти дний, и да дадят нам от семен земных, да ядим, и воду да пием: 13 и да явятся пред тобою лица наша и лица отроков ядущих от трапезы царевы, и якоже узриши, сотвори со отроки твоими. 14 И послуша их и искуси я до десяти дний. 15 По скончании же десятих дний, явишася лица их блага и крепка плотию паче отроков ядущих от трапезы царевы. 16 И бысть Амелсар отемля яди их и вино пития их и даяше им семена. 17 И четырем отроком сим им даде им Бог смысл и мудрость во всяцей книжней премудрости: Даниил же разумен бысть во всяцем видении и сониих. 18 И по скончании тех дний, в няже рече царь привести я, введе я старейшина евнухов пред Навуходоносора. 19 И беседова с ними царь, и не обретошася от всех их подобни Даниилу и Анании, и Азарии и Мисаилу: и сташа пред царем. 20 И во всяцем глаголе премудрости и умения, о нихже вопрошаше от них царь, обрете я десятерицею паче всех обаятелей и волхвов сущих во всем царстве его. 21 И бысть Даниил даже до перваго лета Кира царя. === 2 === 1 В лето второе царства Навуходоносорова, соние виде Навуходоносор, и ужасеся дух его, и сон его отступи от него: 2 и рече царь призвати обаятелей и волхвов, и чародеев и Халдеев, еже возвестити царю сон его. И приидоша и сташа пред царем. 3 И рече им царь: видех сон, и ужасеся дух мой, еже уразумети сон. 4 И глаголаше Халдее сирски цареви: царю, во веки живи: ты повеждь сон рабом твоим, и сказание его возвестим ти. 5 Отвеща же царь Халдеом и рече: слово отступило есть от мене: аще убо не возвестите ми сна и сказания его, в пагубу будете, и домове ваши разграбятся: 6 аще же сон и сказание его возвестите мне, даяния и дары и честь многу приимете от мене: точию сон и сказание его возвестите мне. 7 И отвещаша второе и реша: царь да повесть сон рабом своим, и сказание его возвестим ему. 8 И отвеща царь и рече: поистинне вем аз, яко время вы (точию) искупуете, понеже видите, яко отступило есть слово от мене: 9 аще убо сна не возвестите мне, вем, яко слово ложно и растленно совещастеся рещи предо мною, дондеже время минет: сон мой поведите мне, и увем, яко и сказание его возвестите мне. 10 Отвещаша же паки Халдее пред царем и реша: несть человека на земли, иже слово царево возможет возвестити, яко всяк царь великий и князь не вопрошает ссиеваго словесе обаятеля, волхва и Халдеа: 11 понеже слово, егоже вопрошает царь, тяжко, и несть другаго, иже возвестит е пред царем, но точию бози, ихже несть житие со всякою плотию. 12 Тогда царь в ярости и во гневе мнозе рече погубити вся мудрыя Ваввилонския. 13 И изыде повеление, и мудрии убивахуся: и взыскаша Даниила и другов его убити я. 14 Тогда Даниил отвеща совет и разум Ариоху архимагиру царску, иже изыде убити мудрых Вавилонских, 15 и вопрошаше и глаголя: княже царев, о чесом изыде изречение безстудное от лица царева? Возвести же Ариох слово Даниилу. 16 Даниил же вниде и моли царя, яко да время даст ему, и сказание его возвестит царю. 17 И вниде Даниил в дом свой и возвести слово Анании и Азарии и Мисаилу, другом своим: 18 и щедрот прошаху у Бога небеснаго отайне сей, яко да не погибнут Даниил и друзие его со прочиими мудрыми Вавилонскими. 19 Тогда Даниилу во сне нощию тайна открыся: и благослови Даниил Бога небеснаго 20 и рече: буди имя Господа Бога благословено от века и до века, яко премудрость и смысл и крепость Его есть, 21 и Той пременяет времена и лета, поставляет цари и преставляет, даяй премудрость мудрым и разум ведущым смышление: 22 Той открывает глубокая и сокровенная, сведый сущая во тме и свет с Ним есть: 23 Тебе, Боже отцев моих, исповедаюся и хвалю, яко премудрость и силу дал ми еси и возвестил ми еси, яже просихом у Тебе, и видение царево возвестил ми еси. 24 И прииде Даниил ко Ариоху егоже пристави царь погубити мудрыя Вавилонския, и рече ему: мудрых Вавилонских не погубляй, но введи мя пред царя, и сказание сна возвешу ему. 25 Тогда Ариох с потщанием введе Даниила пред царя и рече ему: обретох мужа от пленник жидовских, иже сказание царю возвестит. 26 И отвеща царь и рече Даниилу, емуже имя Валтасар: можеши ли ми возвестити сон, егоже видех, и сказание его? 27 И отвеща Даниил пред царем и рече: тайны, еяже царь вопрошает, несть мудрых, волхвов, ниже обаятелей газаринов (сила) возвестити царю: 28 но есть Бог на небеси открываяй тайны и возвести царю Навуходоносору, имже подобает быти в последния дни. Сон твой и видение главы твоея на ложи твоем сие есть, царю: 29 помышления твоя на ложи твоем взыдоша, чесому подобает быти по сих, и Открываяй тайны яви тебе, имже подобает быти: 30 и мне не премудростию сущею во мне паче всех живущих тайна сия открыся, но ради того, яко да возвещу сказание царю, да уразумееши размышления сердца твоего. 31 Ты, царю видел еси: и се, тело едино, велие тело оно, и обличие его высоко, стоящо пред лицем твоим, и образ его страшен: 32 тело, егоже глава от злата чиста, руце и перси и мышцы его сребряны, чрево и стегна медяна, 33 голени железны, нозе, часть убо некая железна и часть некая скудельна: 34 видел еси, дондеже отторжеся камень от горы без рук, и удари тело в нозе железны и скудельны, и истни их до конца: 35 тогда сотрошася вкупе скудель, железо, медь, сребро и злато, и бысть яко прах от гумна летня: и взят я премногий ветр, и место не обретеся им: камень же поразивый тело бысть гора велика и наполни всю землю. 36 Сей есть сон, а сказание его речем пред царем. 37 Ты, царю, царь царей, емуже Бог небесный царство даде крепко и державно и честно: 38 во всяцем месте, идеже живут сынове человечи и зверие польстии, и птицы небесныя и рыбы морския дал есть в руку твою и поставил тя властелина всем: ты еси глава златая. 39 И последи тебе востанет царство другое меншее тебе, еже есть сребро, царство же третие, еже есть медь, еже соодолеет всей земли, 40 и царство четвертое, еже будет крепко аки железо: якоже железо стончевает и умягчает вся, такожде и то истончит и истнит вся. 41 А яко видел еси нозе и персты, часть убо некую железну, часть же некую глиняну, царство разделено будет, и от корене железна будет в нем, якоже видел еси железо смешено с глиною: 42 и персты ножнии, часть убо некая железна, часть же некая глиняна, часть некая царства будет крепка и от него будет сокрушена. 43 Яко видел еси железо смешено со глиною, смешены будут во племени человечи, и не будут прилепляющеся сей к сему, якоже железо не смешается со глиною. 44 И во днех царей тех возставит Бог небесный царство, еже во веки не разсыплется, и царство Его людем инем не останется, истнит и развеет вся царства, тое же станет во веки, 45 якоже видел еси, яко отсечеся от горы камень без рук и истни глину, железо, медь, сребро, злато. Бог великий возвести царю, имже подобает быти по сих: и истинен сон, и верно сказание его. 46 Тогда царь Навуходоносор паде на лице и поклонися Даниилу, и рече дары и благовония возлияти ему. 47 И отвещав царь рече Даниилу: поистинне Бог ваш Той есть Бог богов и Господь господей и Царь царей, открываяй тайны, понеже возмогл еси открыти тайну сию. 48 И возвеличи царь Даниила, и дары велики и многи даде ему, и постави его над всею страною Вавилонскою и князя воеводам, над всеми мудрыми Вавилонскими. 49 И Даниил проси у царя и пристави над делы страны Вавилонския Седраха, Мисаха и Авденаго. Даниил же бяше во дворе цареве. === 3 === 1 В лето осмонадесятое Навуходоносор царь сотвори тело злато, высота его лактий шестидесяти и широта его лактий шести, и постави е на поли Деире во стране Вавилонстей. 2 И посла (Навуходоносор царь) собрати ипаты и воеводы и местоначалники, вожди же и мучители, и сущыя на властех и вся князи стран, приити на обновление кумира, егоже постави Навуходоносор царь. 3 И собрашася местоначалницы, ипатове, воеводы, вождеве, мучителие велицыи, иже над властьми, и вси началницы стран на обновление тела, еже постави Навуходоносор царь: и сташа пред телом, еже постави Навуходоносор царь. 4 И проповедник вопияше со крепостию: вам глаголется, народи, людие, племена, языцы: 5 в оньже час аще услышите глас трубы, свирели же и гусли, самвики же и псалтири и согласия, и всякаго рода мусикийска, падающе покланяйтеся телу златому, еже постави Навуходонсор царь: 6 и иже аще не пад поклонится, в той час ввержен будет в пещь огнем горящую. 7 И бысть егда услышаша людие глас трубы, свирели же и гусли, самвики же и псалтири и согласия, и всякаго рода мусикийска, падающе вси людие, племена, языцы, покланяхуся телу златому, еже постави Навуходоносор царь. 8 Тогда приступиша мужие Халдейстии и оболгаша Иудеев, 9 отвещавше реша Навуходоносору цареви: царю, во веки живи: 10 ты, царю, положил еси повеление, да всяк человек, иже аще услышит глас трубы, свирели же и гусли, самвики же и псалтири и согласия, и всякаго рода мусикийска, 11 и не пад поклонится телу златому, ввержен будет в пещь огнем горящую. 12 Суть убо мужие Иудее, ихже поставил еси над делы страны Вавилионския, Седрах, Мисах и Авденаго, иже не послушаша заповеди твоея, царю, и богом твоим не служат и телу златому, еже поставил еси, не покланяются. 13 Тогда Навуходоносор в ярости и гневе рече привести Седраха, Мисаха и Авденаго. И приведени быша пред царя. 14 И отвеща Навуходоносор и рече им: аще воистинну, Седрах, Мисах и Авденаго, богом моим не служите и телу златому, еже поставих, не покланяетеся? 15 Ныне убо аще есте готови, да егда услышите глас трубы, свирели же и гусли, самвики же и псалтири и согласия, и всякаго рода мусикийска, падше поклонитеся телу златому, еже сотворих: аще же не поклонитеся, в той час ввержени будете в пещь огнем горящую: и кто есть Бог, иже измет вы из руки моея? 16 И отвещаша Седрах, Мисах и Авденаго, глаголюще царю Навуходоносору: не требе нам о глаголе сем отвещати тебе: 17 есть бо Бог наш на небесех, Емуже мы служим, силен изяти нас от пещи огнем горящия и от руку твоею избавити нас, царю: 18 аще ли ни, ведомо да будет тебе, царю, яко богом твоим не служим и телу златому, еже поставил еси, не кланяемся. 19 Тогда Навуходоносор исполнися ярости, и зрак лица его изменися на Седраха, Мисаха и Авденаго, и рече: разжжите пещь седмерицею, дондеже до конца разгорится. 20 И мужем сильным крепостию рече: оковавше Седраха, Мисаха и Авденаго, вверзите в пещь огнем горящую. 21 Тогда мужие онии оковани быша с гащами своими и покрывалы, и сапогми и со одеждами своими, и ввержени быша посреде пещи огнем горящия. 22 Понеже глагол царев превозможе, и пещь разжжена бысть преизлишше: и мужей оных, иже ввергоша Седраха, Мисаха и Авденаго, уби пламень огненный. 23 И мужие тии трие, Седрах, Мисах и Авденаго, падоша посреде пещи огнем горящия оковани, 24 и хождаху посреде пламене поюще Бога и благословяще Господа. 25 И став с ними Азариа помолися сице и отверз уста своя посреде огня рече: 26 Благословен еси, Господи, Боже отец наших, хвально и прославлено имя Твое во веки, 27 яко праведен еси о всех, яже сотворил еси нам, и вся дела Твоя истинна, и прави путие Твои, и вси суди Твои истинни: 28 и судбы истинны сотворил еси по всем, яже навел еси на ны и на град святый отец наших Иерусалим: яко истиною и судом навел еси сия вся на ны грех ради наших. 29 Яко согрешихом и беззаконновахом отступивше от Тебе, и прегрешихом во всех, 30 и заповедий Твоих не послушахом, ниже соблюдохом, ниже сотворихом, якоже заповедал еси нам, да благо нам будет. 31 И вся, елика сотворил еси нам, и вся, елика навел еси на ны, истинным судом сотворил еси, 32 и предал еси нас в руки врагов беззаконных, мерзких отступников, и царю неправедну и лукавнейшу паче всея земли. 33 И ныне несть нам отверзти уст: студ и поношение быхом рабом Твоим и чтущым Тя. 34 Не предаждь убо нас до конца имене Твоего ради, и не разори завета Твоего, 35 и не отстави милости Твоея от, нас, Авраама ради возлюбленнаго от Тебе, и за Исаака раба Твоего и Израиля святаго Твоего, 36 имже глаголал еси умножити семя их, яко звезды небесныя и яко песок вскрай моря. 37 Яко, Владыко, умалихомся паче всех язык, и есмы смирени по всей земли днесь грех ради наших, 38 и несть во время сие князя и пророка и вожда, ниже всесожжения, ниже жертвы, ниже приношения, ниже кадила ни места, еже пожрети пред Тобою 39 и обрести милость: но душею сокрушенною и духом смиренным да прияти будем. 40 Яко во всесожжениих овних и юнчих и яко во тмах агнец тучных, тако да будет жертва наша пред Тобою днесь, и да совершится по Тебе, яко несть студа уповающым на Тя. 41 И ныне возследуем всем сердцем и боимся Тебе и ищем лица Твоего: 42 не посрами нас, но сотвори с нами по кротости Твоей и по множеству милости Твоея, 43 и изми нас по чудесем Твоим, и даждь славу имени Твоему, Господи. 44 И да посрамятся вси являющии рабом Твоим злая, и да постыдятся от всякия силы, и крепость их да сокрушится, 45 и да разумеют, яко Ты еси Господь Бог един и славен по всей вселенней. 46 И не престаша ввергшии их слуги царевы, жгуще пещь наффою и смолою, и изгребьими и хврастием: 47 и разливащеся пламень над пещию на лактий четыредесять девять, 48 и обыде и пожже, ихже обрете окрест пещи Халдейския. 49 Ангел же Господень сниде купно с сущими со Азариею в пещь 50 и оттрясе пламень огненный от пещи и сотвори среднее пещи яко дух росы шумящь: и не прикоснуся их отнюд огнь и не оскорби, ниже стужи им. 51 Тогда тии трие яко едиными усты пояху и благословляху и славляху Бога в пещи, глаголюще: 52 Благословен еси, Господи, Боже отец наших, и препетый и превозносимый во веки, и благословено имя славы Твоея святое, и препетое и превозносимое во веки. 53 Благословен еси во храме святыя славы Твоея, и препетый и превозносимый во веки. 54 Благословен еси, видяй бездны, седяй на Херувимех, и препетый и првозносимый во веки. 55 Благословен еси на престоле славы царствия Твоего, и препетый и превозносимый во веки. 56 Благословен еси на тверди небесней, и препетый и превозносимый во веки. 57 Благословите, вся дела Господня, Господа, пойте и превозносите Его во веки. 58 Благословите, Ангели Господни, Господа, пойте и превозносите Его во веки. 59 Благословите, небеса, Господа, пойте и превозносите Его во веки. 60 Благословите, воды вся, яже превыше небес, Господа, пойте и превозносите Его во веки. 61 Благословите, вся силы Господни, Господа, пойте и превозносите Его во веки. 62 Благословите, солнце и луна, Господа, пойте и превозносите Его во веки. 63 Благословите, звезды небесныя, Господа, пойте и превозносите Его во веки. 64 Благословите, всяк дождь и роса, Господа, пойте и превозносите Его во веки. 65 Благословите, вси дуси, Господа, пойте и превозносите Его во веки. 66 Благословите, огнь и вар, Господа, пойте и превозносите Его во веки. 67 Благословите, студь и зной, Господа, пойте и превозносите Его во веки. 68 Благословите, росы и иней, Господа, пойте и превозносите Его во веки. 69 Благословите, нощи и дние, Господа, пойте и превозносите Его во веки. 70 Благословите, свет и тма, Господа, пойте и превозносите Его во веки. 71 Благословите, лед и мраз, Господа, пойте и превозносите Его во веки. 72 Благословите, сланы и снези, Господа, пойте и превозносите Его во веки. 73 Благословите, молния и облацы, Господа, пойте и превозносите Его во веки. 74 Да благословит земля Господа, да поет и превозносит Его во веки. 75 Благословите, горы и холми, Господа, пойте и превозносите Его во веки. 76 Благословите, вся прозябающая на земли, Господа, пойте и превозносите Его во веки. 77 Благословите, источницы, Господа, пойте и превозносите Его во веки. 78 Благословите, моря и реки, Господа, пойте и превозносите Его во веки. 79 Благословите, кити и вся движущаяся в водах, Господа, пойте и превозносите Его во веки. 80 Благословите, вся птицы небесныя, Господа, пойте и превозносите Его во веки. 81 Благословите, зверие и вси скоти, Господа, пойте и превозносите Его во веки. 82 Благословите, сынове человечестии, Господа, пойте и превозиосите Его во веки. 83 Да благословит Израиль Господа, пойте и превозносите Его во веки. 84 Благословите, иерее Господни, Господа, пойте и превозносите Его во веки. 85 Благословите, раби Господни, Господа, пойте и превозносите Его во веки. 86 Благословите, дуси и души праведных, Господа, пойте и превозносите Его во веки. 87 Благословите, преподобнии и смиреннии сердцем, Господа, пойте и превозносите Его во веки. 88 Благословите, Ананиа, Азариа и Мисаил, Господа, пойте и превозносите Его во веки: яко изят ны от ада и спасе ны от руки смерти, и избави ны от среды пещи и горяща пламене, и от среды огня избави ны. 89 Исповедайтеся Господеви, яко благ, яко в век милость Его. 90 Благословите, вси чтущии Господа, Бога богов, пойте и исповедайтеся, яко во век милость Его. 91 Навуходоносор же слыша поющих их, и почудися, и воста со тщанием, и рече вельможам своим: не триех ли мужей ввергохом среде огня связаных? И реша цареви: воистинну, царю. 92 И рече царь: се, аз вижду мужы четыри разрешены и ходящя среде огня, и истления несть в них, и зрак четвертаго подобен сыну Божию. 93 Тогда прииде Навуходоносор ко устию пещи огнем разжженныя и рече: Седрах, Мисах, Авденаго, раби Бога Вышняго, изыдите и приидите. И изыдоша Седрах, Мисах, Авденаго от среды огня. 94 И собрашася князи и воеводы, и местоначалницы и вельможи царевы, и видяху мужей, яко не одоле огнь телесем их и власа главы их не опали, и ризы их не изменишася, и вони огненны не бяше в них. 95 И поклонися пред ними царь Богу, и отвеща Навуходоносор царь и рече: благословен Бог Седрахов, Мисахов и Авденаго, Иже посла Ангела Своего и изя отроки Своя, яко уповаша на Него: и слово царево премениша, и предаша телеса своя во огнь, яко да не послужат, ни поклонятся всякому богу иному, но точию Богу своему: 96 и аз заповедаю заповедь: вси людие, племя, язык, аще речет хулу на Бога Седрахова и Мисахова и Авденаго, в пагубу будут, и домове их в разграбление: понеже несть бога другаго, иже возможет избавити сице. 97 Тогда царь постави Седраха, Мисаха и Авденаго во стране Вавилонстей, и возвеличи их, и сподоби их старейшинства Иудеев всех сущих во царстве его. 98 Навуходоносор царь всем людем, племеном и языком сущым во всей земли, мир вам да умножится. 99 Знамения и чудеса, яже сотвори со мною Бог Вышний, угодно бысть предо мною возвестити вам, 100 коль великая и крепкая: царство Его царство вечное, и власть Его в роды и роды. === 4 === 1 Аз Навуходоносор обилуяй бех в дому моем и благоцветый на престоле моем: 2 сон видех, и устраши мя, и смятохся на ложи моем, и видения главы моея смятоша мя: 3 и мною положися повеление, привести пред мя вся мужы мудрыя Вавилонския, да сказание сна возвестят мне. 4 И вхождаху обаятелие, волсви, газарини, Халдее, и сон аз рех пред ними, и сказания его не возвестиша ми, 5 дондеже вниде (пред мя) Даниил, емуже имя Валтасар, по имения бога моего, иже духа Божия свята имать в себе, и сон пред ним рех: 6 Валтасаре, княже обаятелей, егоже аз разумех, яко дух Божий святый имаши, и всякая тайна не изнемогает пред тобою, слыши видение сна моего, еже видех, и сказание его повеждь мне. 7 И видение главы моея на ложи моем зрех, и се, древо среде земли, и высота его велика: 8 и возвеличися древо то и укрепися, и высота его досязаше до небесе, и величина его до конец земли всея, 9 листвие его прекрасное, и плод его мног, и пища всех в нем, и под ним вселяхуся вси зверие дивии, и в ветвех его живяху (вся) птицы небесныя, и от него питашеся всяка плоть. 10 Видех во сне нощию на ложи моем, и се, Бодрый и Святый от небесе сниде 11 и возгласи крепце и тако рече: посецыте древо и обийте ветви его, и оттрясите листвие его и разсыплите плод его, да позыблются зверие под ним и птицы с ветвий его: 12 точию отрасль корения его в земли оставите, и во узе железне и медне, и во злаце внешнем и в росе небесней вселится, и со зверьми (дивиими) часть его во траве земней: 13 сердце его от человек изменится, и сердце зверино дастся ему, и седмь времен изменятся над ним: 14 изречением Бодраго слово, и глагол Святых прошение: да уведят живущии, яко владеет Вышний царством человеческим, и емуже восхощет, даст е, и уничтоженное человеков возставит над ним. 15 Сей сон, егоже видех аз Навуходоносор царь: ты же, Валтасаре, сказание его повеждь, яко вси мудрии царства моего не могут сказания его поведати мне, ты же, Данииле, можеши, яко дух Божий свят в тебе. 16 Тогда Даниил, емуже имя Валтасар, ужасеся аки на един час, и размышления его смущаху его. И отвеща царь и рече: Валтасаре, сон мой и сказание его да не смущает тебе. И отвеща Валтасар и рече: господине, да будет сон сей ненавидящым тя, и сказание его врагом твоим. 17 Древо, еже видел еси возвеличившееся и укрепившееся, егоже высота досязаше до небесе и величина его на всю землю, 18 и листвие его благоцветное и плод его мног, и пища всем в нем, под ним живяху зверие дивии, и в ветвех его угнездяхуся птицы небесныя: 19 ты еси, царю, яко возвеличился еси и укрепел, и величество твое возвеличися и досяже небесе, и власть твоя до конец земли. 20 И яко виде царь Бодраго и Святаго сходяща с небесе, и рече: посецыте древо и разсыплите е, точию проничение корения его в земли оставите, и во узе железне и медяне и во злаце внешнем и в росе небесней водворится, и со зверьми дивиими часть его, дондеже седмь времен пременятся над ним: 21 сие сказание его, царю, и изречение Вышняго есть, еже приспе на господина моего царя: 22 изженут тя от человек, и с дивиими зверьми будет житие твое, и травою аки вола напитают тя, и от росы небесныя тело твое оросится, и седмь времен изменятся над тобою, дондеже увеси, яко владеет Вышний царством человеческим, и емуже восхощет, даст е. 23 А еже рече: оставите проничение корения древа (в земли): царство твое тебе будет, отнележе увеси власть небесную. 24 Сего ради, царю совет мой да будет тебе угоден, и грехи твоя милостынями искупи и неправды твоя щедротами убогих: негли будет долготерпелив грехом твоим Бог. 25 Сия вся постигоша Навуходоносора царя. 26 По двоюнадесяти месяцех в дому царства своего, в Вавилоне бе ходя, 27 отвеща царь и рече: несть ли сей Вавилон великий, егоже аз соградих в дом царства, в державе крепости моея, в честь славы моея? 28 Еще слову сущу во устех каря, глас с небесе бысть: тебе глаголется, Навуходоносоре царю: цартво твое прейде от тебе, 29 и от человек отженут тя, и со зверьми дивиими житие твое, и травою аки вола напитают тя и седмь времен изменятся на тебе, дондеже увеси, яко владеет Вышний царством человеческим, и емуже восхощет, даст е. 30 В той час слово скончася на цари Навуходоносоре, и от человек отгнася, и траву аки вол ядяше, и от росы небесныя тело его оросися, дондеже власи ему яко льву возрастоша и ногти ему аки птицам. 31 И по скончании тех дний, аз Навуходоносор очи свои на небо воздвиг, и ум мой ко мне возвратися, и Вышняго благослових, и Живущаго во веки похвалих и прославих, яко власть Его власть вечна, и царство Его в роды и роды, 32 и вси живущии на земли ни во чтоже вменишася, и по воли Своей творит в силе небесней и в селении земнем: и несть, иже воспротивится руце Его и речет Ему: что сотворил еси? 33 В то время ум мой возвратися ко мне, и в честь царства моего приидох, и зрак мой возвратися ко мне, и началницы мои и вельможи мои искаху мене: и в царстве моем утвердихся, и величество изюбилнее приложися мне. 34 Ныне убо аз Навуходоносор хвалю и превозношу и славлю Царя Небеснаго, яко вся дела Его истинна, и путие Его судбы, и вся ходящыя в гордости может смирити. === 5 === 1 Валтасар царь сотвори вечерю велию вельможам своим тысящи мужем, 2 пред тысящею же вино, и пия Валтасар рече при вкушении вина, еже принести сосуды златы и сребряны, яже изнесе Навуходоносор отец его из храма (Господа Бога), иже во Иерусалиме, и да пиют в них царь и вельможи его, и наложницы его и возлежащыя (окрест) его. 3 И принесоша сосуды златыя и сребряныя, яже изнесе (Навуходоносор царь) из храма Господа Бога, иже во Иерусалиме: и пияху ими царь и вельможи его, и наложницы его и возлежащыя (окрест) его: 4 пияху вино и похвалиша боги златыя и сребряныя, и медяныя и железныя, и древяныя и каменныя, а Бога вечнаго не благословиша, имущаго власть духа их. 5 В той час изыдоша персты руки человечи и писаху противу лампады на поваплении стены дому царева, и царь видяше персты руки пишущия. 6 Тогда царю зрак изменися, и размышления его смущаху его, и соузы чресл его разслабляхуся, и колена его сражастася: 7 и возопи царь силою, еже ввести волхвов, Халдеев, газаринов: и рече царь мудрым Вавилонским: иже прочтет писание сие и разум его возвестит мне, той в багряницу облечется, и гривна златая на выю его, и третий во царстве моем обладати начнет. 8 И вхождаху вси мудрии ко царю и не можаху писания прочести, ни разума царю возвестити. 9 Царь же Валтасар возмятеся, и зрак его изменися на нем, и вельможи его смущахуся. 10 И вниде царица в дом пирный, и рече царица: царю во веки живи: да не смущают тебе размышления твоя, и зрак твой да не изменяется: 11 есть муж во царстве твоем, в немже дух Божий: и во дни отца твоего бодрость и смысл обретеся в нем, и царь Навуходоносор отец твой князя постави его волхвом, обаятелем, Халдеем, газарином, 12 яко дух преизюбилный (бяше) в нем, и премудрость и смысл (обретеся) в нем, сказуя сны и возвещая сокровенная и разрешая соузы, Даниил, и царь нарече имя ему Валтасар: ныне убо да призовется, и сказание его возвестит тебе. 13 Тогда Даниил введен бысть пред царя. И рече царь Даниилу: ты лиеси Даниил, от сынов пленник Иудейских, ихже приведе Навуходоносор царь отец мой? 14 Слышах о тебе, яко дух Божий в тебе, и бодрость и смысл и премудрость изюбилна обретеся в тебе: 15 и ныне внидоша пред мя мудрии, волсви, газарини, да писание сие прочтут и сказания его возвестят ми, и не могоша возвестити мне: 16 аз же слышах о тебе, яко можеши суды сказати: ныне убо аще возможеши ппсание сие прочести и сказание его возвестити мне, в багряницу облечешися, и гривна златая на выи твоей будет, и третий во царстве моем обладати будеши. 17 Тогда отвеща Даниил и рече пред царем: даяния: твоя с тобою да будут, и дар дому твоего иному даждь, аз же писание прочту царю и сказание его возвещу тебе. 18 Царю! Бог Вышний царство и величество, и честь и славу даде Навуходоносору отцу твоему, 19 и от величества, еже ему даде, вси людие, племена, языцы бяху трепещуще и боящеся от лица его: ихже хотяше убиваше, и ихже хотяше бияше, и ихже хотяше возвышаше, и ихже хотяше, той смиряше: 20 и егда вознесеся сердце его и утвердися дух его еже презорствовати, сведеся от престола царства, и слава и честь отяся от него, 21 и от человек отгнася, и сердце его со зверьми отдася, и житие его со дивиими ослы, и травою аки вола питаху его, и от росы небесныя оросися тело его, дондеже уразуме, яко владеет Бог Вышний царством человеческим, и емуже хощет, даст е. 22 И ты убо, сыне его Валтасаре, не смирил еси сердца твоего пред Господем: не вся ли сия ведал еси? 23 Но на Господа Бога небеснаго вознеслся еси, и сосуды храма Его принесоша пред тебе, ты же и вельможи твои, и наложницы твоя и возлежащыя (окрест) тебе, вино пиясте ими: и боги златыя и сребряныя, и медяныя и железныя, и каменныя и древяныя, иже ни видят, ни слышат, ни разумеют, похвалил еси, а Бога, у Негоже дыхание твое в руце Его, и вси путие твои, Того не прославил еси. 24 Сего ради от лица Его послани быша персты ручнии и писание сие вчиниша. 25 Се же есть писание вчиненое: мани, фекел, фарес. 26 Се сказание глагола: мани, измери Бог царство твое и сконча е: 27 фекел, поставися в мерилех и обретеся лишаемо: 28 фарес, разделися царство твое и дадеся Мидом и Персом. 29 И рече Валтасар: (облецыте и). И облекоша Даниила в багряницу, и гривну златую возложиша на выю его, и проповеда о нем, еже быти ему князю третиему во царстве его. 30 Валтасара царя Халдейска убиша в ту нощь, 31 Дарий же Мидянин прия царство, сый шестидесяти и двою лет. === 6 === 1 И бысть угодно пред царем, и постави во царстве князей сто и двадесять, еже быти им во всем царстве его, 2 над ними же три чиновники, от нихже бе Даниил един, дабы отдавали им князи слово, яко да царю не стужают. 3 И бе Даниил над ними, яко дух бяше преизюбилен в нем, и царь постави его над всем царством своим. 4 Чиновницы же и князи искаху вины обрести на Даниила: и всякия вины и соблазна и греха не обретоша на него, яко верен бяше. 5 И реща чиновницы не обрящем на Даниила вины, аще не в законех Бога его. 6 Тогда чиновницы и князи предсташа царю и реша ему: Дарие царю, во веки живи: 7 совещаша вси иже во царстве твоем воеводы и князи, ипати и обладающии странами, еже уставити устав царский и укрепити предел, яко аще кто попросит прошения от всякаго бога и человека до дний тридесяти, разве точию от тебе, царю, да ввержен будет в ров левский: 8 ныне убо, царю, устави предел и положи писание, яко да не изменится заповедь Мидска и Персска, (да никтоже преступит ея). 9 Тогда царь Дарий повеле вписати заповедь. 10 Даниил же егда уведе, яко заповедь вчинися, вниде в дом свой: дверцы же отверсты ему в горнице его противу Иерусалима, в три же времена дне бяше прекланяя колена своя, моляся и исповедаяся пред Богом своим, якоже бе творя прежде. 11 Тогда мужие онии наблюдоша и обретоша Даниила просяща и молящася Богу своему, 12 и пришедше реша пред царем: царю, не вчинил ли еси ты предела, яко да всяк человек, иже аще попросит у всякаго бога и человека прошения до тридесяти дний, но точию у тебе, царю, да ввержется в ров левск? И рече царь: истинно слово, и заповедь Мидска и Персска не мимоидет. 13 Тогда отвещаша пред царем и глаголаша: Даниил, иже от сынов плена Иудейска, не покорися заповеди твоей (и не раде) о пределе, егоже вчинил еси: в три бо времена дне просит у Бога своего прошений своих. 14 Тогда царь, яко слышав слово сие, зело опечалися о нем, и о Данииле пряшеся еже избавити его, и бе даже до вечера пряся еже избавити его. 15 Тогда мужие онии глаголаша царю: веждь, царю яко Мидом и Персом не леть есть пременити всякаго предела и устава, егоже царь уставит. 16 Тогда царь рече, и приведоша Даниила и ввергоша его в ров левск. И рече царь Даниилу: Бог твой, Емуже ты служиши присно, Той избавит тя. 17 И принесоша камень един и возложиша на устие рва, и запечата царь перстнем своим и перстнем вельмож своих, да не изменится деяние о Данииле. 18 И отиде царь в дом свой и ляже без вечери, и яди не внесоша к нему: и сон отступи от него. И заключи Бог уста львом, и не стужиша Даниилу. 19 Тогда царь воста заутра на свете и со тщанием прииде ко рву левску. 20 И егда приближися ко рву, возопи гласом крепким: Данииле, рабе Бога живаго! Бог твой, Емуже ты служиши присно, возможе ли избавити тя из уст львовых? 21 И рече Даниил цареви: царю, во веки живи: 22 Бог мой посла Ангела Своего и затвори уста львов, и не вредиша мене, яко обретеся пред Ним правда моя, и пред тобою, царю, согрешения не сотворих. 23 Тогда царь вельми возвеселися о нем и рече Даниила извести из рва. И изведен бысть Даниил из рва, и всякаго тления не обретеся на нем яко верова в Бога своего. 24 И рече царь, и приведоша мужы оклеветавшыя Даниила и в ров левск ввергоша я и сыны их и жены их: и не доидоша дна рва, даже соодолеша им львы и вся кости их истончиша. 25 Тогда Дарий царь написа всем людем, племеном, языком, живущым во всей земли: мир вам да умножится: 26 от лица моего заповедася заповедь сия во всей земли царства моего, да будут трепещуще и боящеся от лица Бога Даниилова, яко Той есть Бог живый и пребываяй во веки, и царство Его не разсыплется, и власть Его до конца: 27 подемлет и избавляет, и творит знамения и чудеса на небеси и на земли, иже избави Даниила от уст львовых. 28 Даниил же управляше во царстве Дариеве и во царстве Кира Персянина. === 7 === 1 В первое лето Валтасара царя Халдейска, Даниил сон виде и видения главы его на ложи его, и сон свой вписа: 2 аз Даниил видех в видении моем нощию: и се, четыри ветри небеснии налегоша на море великое, 3 и четыри зверие велицыи исхождаху из моря, различни между собою: 4 первый аки львица имый криле, криле же его аки орли, зрях, дондеже исторжена быша крила его, и воздвижеся от земли, и на ногу человечу ста, и сердце человечо дадеся ему: 5 и се, зверь вторый подобен медведице, и на стране единей ста, и три ребра во устех его, среде зубов его, и сице глаголаху ему: востани, яждь плоти многи: 6 созади сего видех: и се, зверь ин аки рысь, томуже крила четыри птичия над ним и четыри главы зверю, и власть дадеся ему: 7 созади сего видех: и се, зверь четвертый страшен и ужасен и крепок излиха, зубы же его железни велии, ядый и истончевая, останки же ногама своима попираше, тойже различаяся излиха паче всех зверей прежних, и рогов десять ему: 8 разсмотрях в розех его, и се, рог другий мал взыде среде их, и трие рози преднии его исторгнушася от лица его, и се, очи аки очи человечи в розе том, и уста глаголюща великая. 9 Зрях дондеже престоли поставшася, и Ветхий денми седе, и одежда Его бела аки снег, и власи главы Его аки волна чиста, престол Его пламень огнен, колеса Его огнь палящь: 10 река огненна течаше исходящи пред Ним: тысящя тысящ служаху Ему, и тмы тем предстояху Ему: судище седе, и книги отверзошася. 11 Видех тогда от гласа словес великих, яже рог оный глаголаше, дондеже убися зверь и погибе, и тело его дадеся во сожжение огненно: 12 и прочих зверей преставися власть, и продолжение жития дадеся им до времене и времене. 13 Видех во сне нощию, и се, на облацех небесных яко Сын человечь идый бяше и даже до Ветхаго денми дойде и пред Него приведеся: 14 и Тому дадеся власть и честь и царство, и вси людие, племена и языцы Тому поработают: власть Его власть вечная, яже не прейдет, и царство Его не разсыплется. 15 Вострепета дух мой в состоянии моем, аз Даниил, и видения главы моея смущаху мя. 16 И приидох ко единому от стоящих и известия просих от него научитися о всех сих. И поведа ми известие и сказание словес возвести ми: 17 сии зверие велицыи четыри, четыри царства востанут на земли, 18 яже возмутся: и преймут царство святии Вышняго и содержати будут оное даже до века веков. 19 И вопрошах испытно о звери четвертем, яко бяше различен паче всякаго зверя, страшен вельми, зубы его железни и ногти его медяни, ядый и истончевая, останки же ногама своима попираше: 20 и о десяти розех его иже на главе его, и о друзем возшедшем и истрясшем первыя три, рог же той емуже очи и уста глаголюща великая, и видение его более прочиих: 21 зрях, и рог той творяше рать со святыми и укрепися на них, 22 дондеже прииде Ветхий денми и суд даде святым Вышняго: и время приспе, и царство прияша святии. 23 И рече: зверь четвертый царство четвертое будет на земли, еже превзыдет вся царства и пояст всю зеемлю, и поперет ю и посечет: 24 и десять рогов его десять царей востанут, и по них востанет другий, иже превзыдет злобами всех прежних и три цари смирит, 25 и словеса на Вышняго возглаголет и святых Вышняго смирит, и помыслит пременити времена и закон, и дастся в руку его даже до времене и времен и полувремене: 26 и судище сядет, и власть его преставят еже потребити и погубити до конца: 27 царство же и власть и величество царей, иже под всем небесем, дастся святым Вышняго: и царство Его царство вечное, и вся власти Тому работати будут и слушати. 28 До зде скончание словесе. Аз Даниил, надолзе размышления моя смущаху мя, и зрак мой пременися на мне, и глагол в сердцы моем соблюдох. === 8 === 1 В лето третие царства Валтасара царя видение явися мне, аз Даниил, по явльшемся мне прежде. 2 И бех в Сусех граде, иже есть во стране Еламстей, и видех в видении, и бех на Увале, 3 и воздвигох очи мои и видех: и се, овен един стоя пред увалом емуже рози, рози же высоцы, един же вышше другаго, и вышший восхождаше последи. 4 И видех овна бодуща на запад и на север, и на юг и на восток: и вси зверие не станут пред ним, и не бе избавляюща из руки его, и сотвори по воли своей, и возвеличися. 5 Аз же бех размышляя, и се козел от коз идяше от лива на лице всея земли и не бе прикасаяся земли, и козлу тому рог видимь между очима его: 6 и прииде до овна имущаго рога егоже видех стояща пред увалом, и тече к нему в силе крепости своея. 7 И видех его доходяща до овна, и разсвирепе на него, и порази овна, и сокруши оба рога его: и не бе силы овну, еже стати противу ему: и поверже его на землю и попра его, и не бе избавляяй овна от руки его. 8 И козел козий возвеличися до зела: и внегда укрепися, сокрушися рог его великий, и взыдоша друзии четыри рози под ним, по четырем ветром небесным: 9 и от единаго их взыде рог един крепок, и возвеличися вельми к югу и к востоку и к силе, 10 и возвеличися даже до силы небесныя: и сотвори пасти на землю от силы небесныя и от звезд, и попра я: 11 и дондеже Архистратиг избавит пленники, и Его ради жертва смятеся, и благопоспешися Ему, и святое опустеет: 12 и дадеся на жертву грех, и повержеся правда на землю: и сотвори, и благопоспешися. 13 И слышах единаго святаго глаголюща. И рече един святый другому некоему глаголющему: доколе видение станет, жертва отятая, и грех опустения данный, и святое и сила поперется? 14 И рече ему: даже до вечера и утра дний две тысящы и триста, и очистится святое. 15 И бысть, егда видех аз Даниил видение и взысках ведения, и се, ста предо мною аки образ мужеск, 16 и слышах глас мужеск среде Увала, и призва и рече: Гаврииле, скажи видение оному. 17 И прииде и ста близ стояния моего: и егда прииде ужасохся и падох на лице мое. И рече ко мне: разумей, сыне человечь, еще бо до скончания времене видение. 18 И егда глаголаше со мною, падох ниц на земли, и прикоснуся мне, и постави мя на ноги моя, и рече: 19 се, аз возвещаю тебе будущая на последок гнева (сыном людий твоих): еще бо до конца времене видение. 20 Овен, егоже видел еси имуща рога, царь Мидский и Персский: 21 а козел козий царь Еллинский есть: рог же великий, иже между очима его, той есть царь первый: 22 сему же сокрушившуся восташа четыри рози под ним: четыри царие востанут от языка его, но не в крепости его, 23 и на последок царства их, исполняющымся грехом их, востанет царь безсрамен лицем и разумея гадания, 24 и державна крепость его, не в крепости же своей, и чудесно растлит и управит и сотворит, и разсыплет крепкия и люди святы, 25 и ярем вериг своих исправит: лесть в руце его, и в сердцы своем возвеличится, и лестию разсыплет многих, и на пагубу многим возстанет, и яко яица рукою сокрушит. 26 И видение вечера и утра реченнаго истинно есть: ты же назнаменай видение, яко на дни многи. 27 Аз же Даниил успох и изнемогах на дни (многи), и востах и творях дела царева, и почудихся видению, и не бяше разумевающаго. === 9 === 1 В первое лето Дариа сына Ассуирова, от племене Мидска, иже царствова во царстве Халдейстем, 2 в лето первое царства его, аз Даниил разумех в книгах число лет, о немже бысть слово Господне ко Иеремии пророку, на скончание опустения Иерусалимля седмьдесят лет. 3 И дах лице мое к Господу Богу, еже взыскати молитвы и прошения в посте и во вретищи и пепеле, 4 и молихся ко Господу Богу моему и исповедахся и рех: Господи, Боже великий и чудный, храняй завет Твой и милость Твою любящым Тя и хранящым заповеди Твоя: 5 согрешихом, беззаконновахом, нечествовахом и отступихом и уклонихомся от заповедий Твоих и от судов Твоих 6 и не послушахом раб Твоих пророков, иже глаголаша во имя Твое ко царем нашым и князем нашым, и отцем нашым и всем людем земли. 7 Тебе, Господи, правда, нам же стыдение лица, якоже день сей, мужу Иудину, и живущым во Иерусалиме, и всему Израилю, и ближним и дальним во всей земли, идеже разсеял еси я тамо, во отвержении их, имже отвергошася Тебе, Господи. 8 Тебе, Господи, есть правда, нам же стыдение лица, и царем нашым и князем нашым и отцем нашым, иже согрешихом Тебе. 9 Господу же Богу нашему щедроты и очищения, яко отступихом от Господа 10 и не послушахом гласа Господа Бога нашего, ходити в законех Его, ихже даде пред лицем нашим рукою раб Своих пророков. 11 И весь Израиль преступи закон Твой, и уклонишася еже не послушати гласа Твоего: и прииде на ны клятва и заклятие вписаное в законе Моисеа раба Божия, яко согрешихом Ему. 12 И устави словеса Своя, яже глагола на ны и на судии нашя, иже судиша нам, навести на ны злая великая, яковых не бысть под всем небесем, по (всем) бывшым во Иерусалиме, 13 якоже есть писано в законе Моисеове, вся злая сия приидоша на ны: и не помолихомся лицу Господа Бога нашего, отвратитися от неправд наших, и еже смыслити во всей истине Твоей (Господи). 14 И убудися Господь Бог на злобу нашу и наведе сия на ны, яко праведен Господь Бог наш во всем деянии Своем, еже сотвори, и не послушахом гласа Его. 15 И ныне, Господи, Боже наш, иже извел еси люди Твоя от земли Египетския рукою крепкою и сотворил еси Себе Самому имя, якоже день сей, согрешихом, беззаконновахом. 16 Господи, всем помилованием Твоим да отвратится ярость Твоя и гнев Твой от града Твоего Иерусалима, от горы святыя Твоея: яко согрешихом неправдами нашими и беззаконием отец наших, Иерусалим и людие Твои во укоризну быша во всех окрестных нас. 17 И ныне, Господи, Боже наш, услыши молитву раба Твоего и прошение его, и яви лице Твое на святилище Твое опустевшее, Тебе ради, Господи. 18 Приклони, Господи, Боже мой, ухо Твое и услыши, отверзи очи Твои и виждь потребление наше и града Твоего, в немже призвася имя Твое, яко не на нашя правды (уповающе) повергаем моление наше пред Тобою, но на щедроты Твоя многия, Господи. 19 Услыши, Господи, очести, Господи, вонми, Господи, и сотвори, и не закосни Тебе ради, Боже мой, яко имя Твое призвася во граде Твоем и в людех Твоих. 20 Еще же ми глаголющу и молящуся и исповедающу грехи моя и грехи людий моих Израиля, и припадающу с молением моим пред Господем Богом моим о горе святей Его: 21 и еще глаголющу ми в молитве, и се, муж Гавриил, егоже видех в видении моем в начале, парящь, и прикоснуся мне, аки в час жертвы вечерния, 22 и вразуми мя, и глагола ко мне, и рече: Данииле, ныне изыдох устроити тебе разум: 23 в начале молитвы твоея изыде слово, и аз приидох возвестити тебе, яко муж желаний еси ты, размысли о словеси и разумей во явлении. 24 Седмьдесят седмин сократишася о людех твоих и о граде твоем святем, яко да обетшает согрешение, и скончается грех, и запечатаются греси, и загладятся неправды, и очистятся беззакония, и приведется правда вечная: и запечатается видение и пророк, и помажется Святый святых. 25 И увеси и уразумееши от исхода словесе, еже отвещати и еже соградити Иерусалим, даже до Христа Старейшины седмин седмь и седмин шестьдесят две: и возвратится, и соградится стогна и забрала, и истощатся лета. 26 И по седминах шестидесяти двух потребится помазание, и суд не будет в нем: град же и святое разсыплется со старейшиною грядущим, и потребятся аки в потопе, и до конца рати сокращенныя чином, погибельми. 27 И утвердит завет мнозем седмина едина: в пол же седмины отимется жертва и возлияние, и во святилищи мерзость запустения будет, и даже до скончания времене скончание дастся на опустение. === 10 === 1 В лето третие Кира царя Персскаго, слово открыся Даниилу, емуже прозвася имя Валтасар: истинно же слово и сила велика и разум дадеся ему в видении. 2 В тыя дни аз Даниил бех рыдая три седмицы дний: 3 хлеба вожделеннаго не ядох, и мясо и вино не вниде во уста моя, и мастию не помазахся до исполнения триех седмиц дний. 4 В день двадесять четвертый перваго месяца аз бех близ реки великия, яже есть Тигр Еддекель, 5 и воздвигох очи мои и видех, и се, муж един облечен в ризу льняну, и чресла его препоясана златом светлым: 6 тело же его аки фарсис, лице же его аки зрение молнии, очи же его аки свещы огнены, и мышцы его и голени аки зрак меди блещащияся, глас же словес его аки глас народа. 7 И видех аз Даниил един явление, а мужие, иже со мною, не видеша явления, но ужас великий нападе на них, и отбегнуша во страсе. 8 Аз же остах един и видех явление великое сие, и не оста во мне крепость, и слава моя обратися в разсыпание, и не удержах крепости. 9 И слышах глас словес его. И внегда слышах, бех сокрушен, лице же мое на земли: 10 и се, рука прикасающися мне, и возстави мя на колена моя и на длани рук моих. 11 И рече ко мне: Данииле, мужу желаний, разумей во словесех сих, яже аз глаголю к тебе, и стани на стоянии своем, яко ныне послан есмь к тебе. И егда возглагола слово сие ко мне, востах трепетен. 12 И рече ко мне: не бойся, Данииле, яко от перваго дне, в оньже подал еси сердце твое, еже разумети и трудитися пред Господем Богом твоим, услышана быша словеса твоя, аз же приидох во словесех твоих: 13 князь же царства Персскаго стояше противу мне двадесять и един день: и се Михаил един от старейшин первых прииде помощи мне, и того оставих тамо со князем царства Персскаго, 14 и приидох сказати тебе, елика срящут людий твоих в последния дни, яко еще видение на дни. 15 И егда глагола со мною по словесем сим, дах лице мое на землю и умилихся. 16 И се, аки подобие сына человеча прикоснуся устнам моим, и отверзох уста моя и глаголах, и рех ко стоящему предо мною: господи, в видении твоем обратися утроба моя во мне, и не имех силы: 17 и како возможет раб твой господи, глаголати с господем сим моим? Аз бо изнемогох, и отныне не станет во мне крепость, (сила бо) и дыхание не оста во мне. 18 И приложи, и прикоснуся мне яко зрак человечь, и укрепи мя, 19 и рече ми: не бойся, мужу желаний, мир тебе: мужайся и крепися и егда глагола со мною, укрепихся и рех: да глаголет господь мой яко укрепил мя еси. 20 И рече: веси ли, почто приидох к тебе? И ныне возвращуся, еже ратися со князем Персским: аз же исхождах, князь же Еллинский грядяше: 21 но да возвешу ти вчиненое в писании истины, инесть ни единаго помогающаго со мною о сих, но точию Михаил князь ваш. === 11 === 1 Аз же в первое лето Кирово стах в державу и крепость. 2 И ныне истину возвещу тебе се, еще трие царие востанут в Персиде четвертый же разбогатеет богатством великим паче всех и по одержании богатства своего востанет на вся царства Еллинская: 3 и востанет царь силен, и обладает властию многою, и сотворит по воли своей. 4 И егда станет царство его сокрушится и разделится на четыри ветры небесныя, и не в последняя своя, ниже по власти своей, еюже совладе, понеже исторгнется царство его и другим кроме сих отдастся. 5 И укрепится царь южский, и от князей их един укепеет нань и обладает властию многою над властию его. 6 И по летех его смесятся, и дщи царя южска внидет к северску царю, еже сотворити завет с ним, и не удержит крепости мышцы, и не станет племя ея, и предастся та и приведшии ю, и дева и укрепляяй ю во временех. 7 И востанет от цвета корене ея на уготование его и приидет в силу, и внидет во утверждения царя северскаго и сотворит в них и одержит: 8 и боги их со слиянными их, вся сосуды их вожделенны сребра и злата с пленники принесет во Египет, и той востанет паче царя северска: 9 и внидет в царство царя южскаго, и возвратится на свою землю. 10 И сынове его соберут народ силен мног, и внидет грядый и потопляяй: и мимо прейдет и сядет, и даже до крепости его снидется. 11 И разсвирепеет царь южский, и изыдет и брань сотворит с царем северским, и поставит народ мног, и предастся народ в руце его. 12 И возмет народы, и возвысится сердце его, и соодолеет тмам, и не укрепеет. 13 И возвратится царь северский и приведет народ мног паче прежняго: и на конец времен лет приидет входом в силе велицей и со имением многим. 14 И в лета она мнози востанут на царя южска, и сынове губителей людий твоих воздвигнутся, еже поставити видение, и изнемогут. 15 И внидет царь северский и сотворит окоп и возмет грады тверды, мышцы же царя южскаго не станут и востанут избраннии его, и не будет крепости еже стати. 16 И сотворит входяй к нему по воли своей, и несть стоящаго противу лица его: и станет на земли савеи, и скончается в руце его. 17 И вчинит лице свое внити в силе всего царства своего, и праве вся сотворит с ним: и дщерь жен даст ему еже растлити ю, и не пребудет, и не будет ему. 18 И обратит лице свое на островы, и возмет многи, и погубит князи укоризны своея, обаче укоризна его возвратится ему. 19 И обратит лице свое в крепость земли своея, и изнеможет, и падется, и не обрящется. 20 И востанет от корене его сад царства на уготование его производяй творяй славу царства: и в тыя дни еще сокрушится, и не в лицах, ни в рати: 21 станет во уготовании его уничижися, и не даша нань славы царства: и приидет со обилием и соодолеет царству лестьми, 22 и мышцы потопляющаго потопятся от лица его и сокрушатся и старейшина завета. 23 И от совокуплений к нему сотворит лесть, и взыдет, и преодолеет их в мале языце: 24 и во обилие и в тучныя страны приидет, и сотворит, яже не сотвориша отцы его и отцы отцев его: пленение и корысти и имение им расточит, и на Египта помыслит мыслию даже до времене. 25 И востанет крепость его, и сердце его на царя южскаго в силе велице, царь же южский сотворит с ним сечь силою великою и крепкою зело, и не станут: яко помышляют нань помышления 26 и изядят потребная его и сокрушат его, и силы разсыплет, и падут язвении мнози. 27 И оба царя, сердца их на лукавство, и на трапезе единей возглаголют лжу, и не предуспеет, яко еще конец на время. 28 И возвратится на свою землю со имением многим, и сердце его на завет святый, и сотворит, и возвратится на свою землю. 29 На время возвратится и приидет на юг, и не будет якоже первая и последняя. 30 И внидут с ним исходящии Китяне, и смирится, и возвратится, и возярится на завет святый: и сотворит, и возвратится, и умыслит на оставльшыя завет святый. 31 И мышцы и племена от него востанут и осквернят святыню могутства и преставят жертву всегдашнюю и дадят мерзость запустения, 32 и беззаконнующии завет наведут со прелестию: людие же ведуще Бога своего премогут и сотворят, 33 и смысленнии людие уразумеют много, и изнемогут в мечи и в пламени, и в пленении и в разграблении дний. 34 И егда изнемогут, поможется им помощию малою, и приложатся к ним мнози со прелестию. 35 И от смысливших изнемогут, еже разжещи я и избрати, и еже открыти даже до конца времене, яко еще на время. 36 И сотворит по воли своей, и царь возвысится и возвеличится над всяким богом, и на Бога богов возглаголет тяжкая, и управит, дондеже скончает гнев, в скончание бо бывает. 37 И о всех бозех отцев своих не смыслит, и рачении жен, и о всяцем бозе не уразумеет, понеже паче всех возвеличится. 38 И бога маозима на месте своем прославит, и бога, егоже не ведеша отцы его, почтит сребром и златом и камыком честным и похотьми, 39 и сотворит тверделем убежищ с богом чуждим, егоже познает, и умножит славу, и покорит им многи, и землю разделит в дары. 40 И на конец времене сразится ратию с царем южским: и соберется на него царь северский с колесницами и с конники и с корабли многими, и внидет в землю, и сокрушит, и мимоидет, 41 и внидет на землю саваимску, и мнози изнемогут: сии же спасутся от руки его, Едом и Моав и начало сынов Аммоних. 42 И прострет руку свою на землю, и земля Египетска не будет во спасение. 43 И владети начнет в сокровенных злата и сребра и во всех вожделенных Египта и Ливиев и Ефиопов, в тверделех их. 44 И слышания и поткщания возмутят его от восток и от севера: и приидет во ярости мнозе, еже погубити многи. 45 И поткнет кущу свою ефадано между морями, на горе святей савеи, приидет даже до части ея, и несть избавляяй его. === 12 === 1 И во время оно востанет Михаил князь великий стояй о сынех людий твоих: и будет время скорби, скорбь, якова не бысть, отнележе создася язык на земли, даже до времене онаго: и в то время спасутся людие твои вси, обретшиися вписани в книзе, 2 и мнози от спящих в земней персти востанут, сии в жизнь вечную, а онии во укоризну и в стыдение вечное. 3 И смыслящии просветятся аки светлость тверди, и от праведных многих аки звезды во веки и еще. 4 Ты же, Данииле, загради словеса и запечатай книги до времене скончания, дондеже научатся мнози, и умножится ведение. 5 И видех аз Даниил, и се, два инии стояху, един о сию страну устия реки, а другий об ону страну устия реки. 6 И рече к мужу оболченному в ризу льняну, иже бяше верху воды речныя: доколе окончание чудес, яже рекл еси? 7 И слышах от мужа оболченнаго в ризу льняну, иже бяще верху воды речныя, и воздвиже десницу свою и шуйцу свою на небо и клятся Живущим во веки, яко во время и во времена и в пол времене, егда скончается разсыпание руки людий освященных, и уведят сия вся. 8 Аз же слышах, и не разумех, и рех: господи, что последняя сих? 9 И рече: гряди, Данииле, яко заграждена словеса и запечатана даже до конца времене: 10 избранни будут и убелятся, и аки огнем искусятся и освятятся мнози: и собеззаконнуют беззаконницы, и не уразумеют вси нечестивии, но умнии уразумеют: 11 от времене же пременения жертвы всегдашния, и дастся мерзость запустения на дни тысяща двести девятьдесят: 12 блажен терпяй и достигнувый до дний тысящи трех сот тридесяти пяти: 13 ты же иди и почивай: еще бодние суть и часы во исполнение скончания, и почиеши, и востанеши в жребий твой, в скончание дний. === 13 === 1 И бе муж живый в Вавилоне, имя же ему Иоаким. 2 И поя жену, ейже имя Сосанна, дщерь Хелкиева, добра зело и боящися Бога. 3 Родителя же ея праведна, и научиста дщерь свою по закону Моисеову. 4 Бе же Иоаким богат зело, и бе ему вертоград близ двора его: и схождахуся к нему Иудее, понеже той бяше славнее всех. 5 И избрана быста два старца от людии в судии в то лето, о нихже глагола Владыка, яко изыде беззаконие из Вавилона от старец судий, иже мняхуся управляти людий. 6 Сия прихождаста часто в дом Иоакимль, и прихождаху к нима вси прящиися. 7 И бысть, внегда отхождаху людие о полудни, вхождаше Сосанна и хождаше во вертограде мужа своего. 8 И смотряста ея оба старца по вся дни входящую и исходящую, и быста в похотении ея, 9 и развратиста ум свой, и уклоноста очи свои, еже не взирати на небо, ниже поминати судеб праведных. 10 И беста оба уязвлена похотию на ню, и не возвестиста дру другу болезни своея, 11 понеже стыдястася исповедати вожделение свое, яко хотяста быти с нею. 12 И наблюдаста жадающа по вся дни зрети ю, и реста друг ко другу: 13 пойдем убо в дом, яко обеда час есть. И изшедша разыдостася друг от друга, 14 и возвращшася приидоста во едино (место), и истязавша друг от друга вины, исповедаста друг другу похотение свое, и тогда обще устависта время, когда возмогут оную обрести едину. 15 И бысть егда наблюдаста дне угоднаго, вниде Сосаниа, якоже вчера и третияго дне, со двема точию отроковицами, и восхоте мытися во вертограде, яко зной бяше. 16 И не бяше никогоже тамо, кроме двою старцев сокровенных и стрегущих ея. 17 И рече отроковицам: принесите ми масло и мыло и двери вертоградныя затворите, да измыюся. 18 И сотвористе якоже рече, и затвористе двери вертоградныя, и изыдосте задними дверьми принести повеленное има, и не видесте старцев, понеже бяста сокровенна. 19 И бысть, егда изыдосте отроковицы, востаста оба старца, и текоста к ней, и реста: 20 се, двери оградныя затворишася, и никтоже видит нас, а в похотении твоем есмы: сего ради соизволи нам, и буди с нами: 21 аще же ни, то послушествуем на тя, яко бе с тобою юноша, и того ради отпустила еси отроковиц от тебе. 22 И возстена Сосанна и рече: тесно ми отвсюду: аще бо сие сотворю, смерть ми есть: аще же не сотворю, не избегну от рук ваших: 23 изволение ми есть не сотворившей впасти в руце ваши, нежели согрешити пред Богом. 24 И возопи гласом великим Сосанна: возописта же и оба старца противу ей, 25 и тек един, отверзе двери вертоградныя. 26 Егда же услышаша кличь во вертограде домашнии, вскочиша задними дверьми видети случившееся ей. 27 Егда же поведаста старцы словеса своя, устыдешася раби ея зело, яко николиже речеся таково слово о Сосанне. 28 И бысть наутрие, егда собрашася людие к мужу ея Иоакиму, приидоста и оба старца полна беззаконнаго помышления на Сосанну, еже уморити ю, 29 и реста пред людьми: послите по Сосанну дщерь Хелкиеву, яже есть жена Иоакимля. Они же послаша. 30 И прииде та и родителя ея, и чада ея и вси ужики ея. 31 Сосанна же бяше млада зело и добра образом. 32 Беззаконнии же повелеста открыти ю, бяше бо покровена, яко да насытятся доброты ея. 33 Плакаху же сущии при ней и вси знающии ю. 34 Воставша же оба старца посреде людий, возложиста руце на главу ея. 35 Сия же плачущи воззре на небо, яко бяше сердце ея уповая на Господа. 36 Реста же оба старца: ходящым нам обоим во вертограде, вниде сия со двема отроковицами, и затвори двери вертоградныя, и отпусти отроковицы, 37 и прииде к ней юноша, иже бяше сокровен, и возлеже с нею: 38 мы же суще во угле вертограда, видевше беззаконие, текохом на ня: 39 и видевше их смешающихся, онаго убо не могохом яти понеже паче нас можаше, и отверз двери вертоградныя изскочи: 40 сию же емше, вопрошахом, кто бе юноша? И не восхоте поведати нам: о сем послушествуем. 41 И верова има сонм аки старцем людским и судиям, и осудиша ю на умертвие. 42 И возопи Сосанна гласом великим и рече: Боже вечный и сокровенных ведателю, сведый вся прежде бытия их! 43 Ты веси, яко лжу послушествоваста на мя, и се, умираю, не сотворши ничесоже, о нихже сии слукавноваста на мя. 44 И послуша Господь гласа ея, 45 и ведомей ей на погубление, воздвиже Бог духом святым отрока юна, емуже имя Даниил: 46 и возопи гласом великим: чист аз от крове сея. 47 Обратишажеся вси людие к нему и реша: что слово сие, еже ты глаголеши? 48 Сей же став среде их рече: сице ли юродиви, сынове Израилевы, не испытавше, ни истины разумевше, осудисте дщерь Израилеву? 49 Возвратитеся на судище: лжу бо сии послушествоваста на ню. 50 И возвратишася вси людие с потщанием. И реша ему старцы: гряди, сяди посреде нас и возвести нам, яко тебе даде Бог старейшинство. 51 И рече к ним Даниил: разведите я друг от друга далече, и вопрошу их. 52 Егда же разведоша единаго от другаго, призва единаго от них и рече к нему: обетшалый злыми денми, ныне приспеша греси твои, яже творил еси прежде, 53 судя суды неправедны и неповинныя убо осуждаж, прощая же повинныя, глаголющу Богу: неповинна и праведна не убивай: 54 ныне убо сию аще еси видел, рцы, под киим древом видел еси их беседующих к себе? Он же рече: под терном. 55 Рече же Даниил: право солгал еси на твою главу: се бо, Ангел Божий приим ответ от Бога, расторгнет тя полма. 56 И отпустив его повеле привести другаго и рече ему: племя Ханаане, а не Иудино, доброта прельсти тя, и похотение разврати сердце твое: 57 сице творили есте дщерем Израилевым, оныя же бояшяся живяху с вами, но (ныне) дщерь Иудина не претерпе беззакония вашего: 58 ныне убо глаголи ми: под киим древом видел еси сих беседующих к себе? Он же рече: под чресминою. 59 Рече же ему Даниил: право солгал еси и ты на свою главу: ждет бо Ангел Божий мечем разсещи тя полма, яко да потребит вы. 60 И возопи весь сонм гласом великим и благослови Бога спасающаго надеющыяся на Него. 61 И восташа на оба старца, яко обличи их Даниил от уст их, лжу послушествовавших. 62 И сотвориша има якоже слукавноваста ближнему, сотворити по закону Моисеову: и убиша их, и спасеся кровь неповинна в той день. 63 Хелкиа же и жена его похвалиша Бога о дщери своей Сосанне со Иоакимом мужем ея и со ужиками всеми, яко не обретеся в ней студная вещь. 64 Даниил же бысть велик пред людьми от дне того и потом. === 14 === 1 И царь Астиаг приложися к отцем своим: и прия Кир Персянин царство его. 2 И бяше Даниил сожителствующь со царем и славен паче всех другов его. 3 И бяше кумир Вавилоняном, емуже имя Вил, и иждиваху ему на кийждо день муки семидалны артавас дванадесять и овец четыредесять и вина мер шесть. 4 И царь почиташе его и хождаше по вся дни кланятися ему: Даниил же кланяшеся Богу своему. И рече ему царь: почто не покланяешися Вилу? 5 Он же рече: понеже не покланяюся кумиром руками сотворенным, но живому Богу сотворщему небо и землю и владущему всеми. 6 И рече ему царь: не мнится ли ти Вил быти жив бог? Или не видиши, колико яст и пиет по вся дни? 7 И рече Даниил посмеявся: не прельщайся, царю! Той бо внутрьуду прах есть, а внеуду медь, и не яде, ни пи никогдаже. 8 И разгневався царь приза жерцы своя и рече им: аще не повесте ми, кто яст брашно сие, то умрете: 9 аще же покажете, яко Вил снедает е, умрет Даниил, яко похулил есть Вила. И рече Даниил царю: буди по глаголу твоему. 10 Бяше же жерцев Виловых седмьдесят, кроме жен и детей. 11 И прииде царь со Даниилом во храм Вилов. И реша жерцы Виловы: се, мы изыдем вон, ты же, царю, постави яди, и вино начерпав постави, заключи же двери и запечатай перстнем своим: 12 и пришед заутра, аще не обрящеши всего изядена Вилом, тогда измрем, или Даниил солгавый на ны. 13 Тии же пренебрегаху, понеже сотвориша под трапезою сокровен вход и вхождаху тем всегда и изядаху тая. 14 И бысть, егда изыдоша они, и царь постави брашно Вилу: и повеле Даниил отроком своим, и принесоша пепел и посыпаша весь храм пред царем единым: и изшедше заключиша двери, и запечаташа перстнем царевым, и отидоша. 15 Жерцы же внидоша нощию по обычаю своему, и жены их и чада их, и поядоща вся и испиша. 16 И урани царь заутра, и Даниил с ним. 17 И рече царь: целы ли суть печати, Данииле? Он же рече: целы, царю. 18 И бысть абие, егда отверзоша двери, воззрев царь на трапезу, возопи гласом великим: велик еси, Виле, и несть льсти в тебе ни единыя. 19 И посмеяся Даниил, и удержа царя, еже бы не внити ему внутрь, и рече: виждь убо помост и уразумей, чия суть стопы сия? 20 И рече царь: вижду стопы мужески и женски и детски. 21 И разгневався царь, ят тогда жерцы и жены их и дети их, и показаша ему сокровенныя двери имиже вхождаху и поядаху яже на трапезе. 22 И изби я царь и даде Вила в руце Даниилу, и разби его и храм его разори. 23 И бяше змий великий на месте том, и почитаху его Вавилоняне. 24 И рече царь Даниилу: еда и сему речеши, яко медь есть? Сей жив есть, и яст и пиет: не можеши рещи, яко несть сей бог жив: убо поклонися ему. 25 И рече Даниил: Господу Богу моему поклонюся, яко Той есть Бог жив: 26 ты же, царю, даждь ми власть, и убию змиа без меча и без жезла. И рече царь: даю ти. 27 И взя Даниил смолу и тук и волну, и возвари вкупе, и сотвори гомолу, и ввеже во уста змию, и изяд разседеся змий. И рече Даниил: зрите чтилища ваша. 28 И бысть, егда услышаша Вавилоняне, возропташа зело и обратишася на царя и реша: Иудеанин бысть царь, Вила расторже, и змиа уби, и жерцы изсече. 29 И реша пришедше ко царю: предаждь нам Даниила: аще ли ни, то убием тя и дом твой. 30 И виде царь, яко налегают на него зело, и принужден предаде им Даниила. 31 Тии же ввергоша его в ров левск, и бе тамо дний шесть. 32 Бяху же в рове седмь львов, и даяху им на день два тела и две овцы: тогда же не даша им, да снедят Даниила. 33 Аввакум же пророк бяше во Иудеи, и той свари варение и вдроби хлебы в нощвы, и идяше на поле донести жателем. 34 И рече Ангел Господень Аввакуму: отнеси обед, егоже имаши, в Вавилон Даниилу, в ров левск. 35 И рече Аввакум: господи, Вавилона не видех, и рва не вем, где есть. 36 И ят его Ангел Господень за верх его, и держа за власы главы его, и постави его в Вавилоне верху рва шумом духа своего. 37 И возопи Аввакум глаголя: Данииле, Данииле! Возми обед, егоже посла тебе Бог. 38 И рече Даниил: помянул бо мя еси, Боже, и неси оставил любящих Тя. 39 И востав Даниил яде: Ангел же Божий паки постави Аввакума внезапу на месте его. 40 Царь же прииде в седмый день жалети Даниила, и прииде над ров, и воззре и се, Даниил седя. 41 И возопи царь гласом великим и рече: велик еси, Господи, Боже Даниилов, и несть иного разве Тебе. 42 И исхити его, повинныя же пагубе его вверже в ров, и изядени быша абие пред ним. == Книга пророка Осии == === 1 === 1 Слово Господне, еже бысть ко Осии сыну Веириину, во днех Озии и Иоафама, и Ахаза и Иезекии царей Иудиных, и во дни Иеровоама сына Иоасова царя Израилева. 2 Начало словесе Господня ко Осии. И рече Господь ко Осии: иди, поими себе жену блужения, (и роди) чада блужения: понеже блудящи соблудит земля от Господа. 3 И иде и поя Гомерь дщерь Девилаимлю: и зачат и роди ему сына. 4 И рече Господь к нему: прозови имя ему Иезраель: зане еще мало, и отмщу кровь Иезраелеву на дому Иудове и упокою царство дому Израилева: 5 и будет в той день, сокрушу лук Израилев во удоле Иезраелеве. 6 И зачат еще и роди дщерь. И рече ему (Господь): прозови имя ей Непомилована: зане не приложу ксему помиловати дому Израилева, но противляяся возсопротивлюся им: 7 сыны же Иудины помилую и спасу я о Где Бозе их: и не спасу их луком, ни мечем, ни бранию, ни коньми, ниже конниками. 8 И отдои Непомилованную: и зачат паки и роди сына. 9 И рече (Господь): прозови имя ему Не Людие Мои: зане вы не людие Мои, и Аз несмь Бог ваш: 10 и будет число сынов Израилевых аки песок морский, иже не измерится, ни изочтется: и будет, на месте, на немже речеся им: не людие Мои вы: сии тамо прозовутся сынове Бога живаго. 11 И соберутся сынове Иудины и сынове Израилевы вкупе, и поставят себе власть едину, и изыдут от земли, яко велик день Иезраелев. === 2 === 1 Рцыте брату своему: людие Мои: и сестре своей: Помилованная. 2 Судитеся с материю своею, судитеся, яко та не жена Моя, и Аз не муж ея: и отвергу блужения ея от лица Моего и любодейство ея от среды сосцу ея: 3 яко да совлеку ю нагу и поставлю ю якоже в день рождения ея, и положу ю яко пустыню, и учиню ю яко землю безводну, и убию оную жаждею: 4 и чад ея не помилую, яко чада блужения суть, 5 яко соблуди мати их, посрамися родившая их, рече бо: пойду вслед похотников моих, дающих мне хлебы моя и воду мою, и ризы моя и плащаницы моя, и масло мое и вся, елика мне достоят. 6 Сего ради, се, Аз загражду путь ея тернием и возгражду распутия ея, и стези своея не обрящет: 7 и поженет похотники своя и не постигнет их, и взыщет их и не обрящет, и речет: пойду и возвращуся к мужу моему первому, яко добрее ми бе тогда, нежели ныне. 8 Но та не уразуме, яко Аз дах ей пшеницу и вино и масло, и сребро умножих ей: сия же сребряны и златы сотвори Ваалу. 9 Сего ради обращуся и возму пшеницу Мою во время ея и вино Мое во время его, и отиму ризы Моя и плащаницы Моя, да не покрывает студа своего: 10 и ныне открыю нечистоту ея пред похотниками ея, и никтоже отимет ея от руки Моея: 11 и отвращу вся веселия ея и праздники ея, и новомесячия ея и субботы ея и вся празднества ея, 12 и погублю виноград ея и смоквы ея, о нихже рече: мзды ми суть сия, яже даша мне похотницы мои: и положу я в свидение, и поядят я зверие селнии и птицы небесныя и гади земнии: 13 и отмщу на ней дни Ваалимовы, в няже требы кладяше им, и вдеваше усерязи своя и мониста своя, и хождаше вслед похотников своих, а Мене забы, глаголет Господь. 14 Сего ради, се, Аз соблажню ю, и учиню ю яко пустыню, и возглаголю в сердце ея, 15 и дам ей притяжание ея оттуду и поляну Ахорову, отверсти смысл ея: и смирится тамо по днем детства своего и по днем изведения своего от земли Египетски. 16 И будет в той день, наречет Мя муж мой, глаголет Господь, а не прозовет Мене ктому Ваалим. 17 И отвергу имена Ваалимля от уст ея, и не воспомянутся ксему имена их. 18 И завещаю им завет в той день со зверьми селными и со птицами небесными и с гады земными, и лук и мечь и брань сокрушу от земли, и вселю я со упованием: 19 и обручу тя Себе во век и обручу тя Себе в правде и в суде и в милости и в щедротах: 20 и обручу тя Себе в вере, и увеси Господа. 21 И будет в той день, глаголет Господь, послушаю небесе, а оное послушает земли, 22 и земля послушает пшеницы и вина и масла, и сии послушают Иезраеля: 23 и всею оную Себе на земли и помилую Непомилованную: и реку не людем Моим: людие Мои есте вы: и тии рекут: Господь Бог наш Ты еси. === 3 === 1 И рече Господь ко мне: еще иди и возлюби жену любящую зло и любодейцу, якоже любит Бог сыны Израилевы: сии же взирают к богом чуждим и любят варения с коринками. 2 И наях себе оную пятиюнадесять сребрениками и гомором ячменя и невелем вина, 3 и рекох ей: дни многи да седиши у мене и аз у тебе, и не соблудиши, ни будеши мужу иному: 4 зане дни многи сядут сынове Израилевы, не сущу царю, ни сущу князю, ни сущей жертве, ни сущу жертвеннику, ни жречеству, ниже явлением: 5 и посем обратятся сынове Израилевы и взыщут Господа Бога своего и Давида царя своего, и почудятся о Господе и о благостех Его в последния дни. === 4 === 1 Слышите слово Господне, сынове Израилевы, яко суд Господеви к живущым на земли: зане несть истины, ни милости, ни ведения Божия на земли: 2 клятва и лжа, и убийство и татьба и любодеяние разлияся по земли, и кровь с кровьми мешают. 3 Сего ради восплачется земля и умалится со всеми вселившимися на ней, со зверьми польскими и с гады земными и со птицами небесными, и рыбы морския оскудеют: 4 яко да никтоже не прится, ни обличается никтоже: людие же мои аки пререкаемый жрец, 5 и изнеможет во днех, и изнеможет пророк с тобою: нощи уподобих матерь твою. 6 Уподобишася людие Мои аки не имуще умения: яко ты умение отвергл еси, отвергу и Аз тебе, еже не жречествовати Мне, и забыл еси закон Бога своего, забуду и Аз чада твоя. 7 По множеству их тако согрешиша Мне: славу их в безчестие положу. 8 Грехи людий Моих снедят и в неправдах их возмут душы их. 9 И будет якоже людие, тако и жрец: и отмщу на них пути их, и умышления их воздам им. 10 И будут ясти и не насытятся: соблудиша и не исправятся: понеже Господа оставиша еже снабдети. 11 Блуд и вино и пиянство прият сердце людий Моих. 12 В знамениих вопрошаху и в жезлех своих поведаху тем: духом блужения прельстишася и соблудиша от Бога своего: 13 на версех гор кадяху и на холмех жряху под дубом и под елию и под древом ветвенным, яко добр кров: сего ради соблудят дщери вашя, и невесты вашя возлюбодеют. 14 И не присещу на дщери вашя, егда соблудят, и на невесты вашя, егда возлюбодеют: яко и тии со блудницами смесишася и со блудниками требы жряху, и людие смыслящии со блудницею сплетахуся. 15 Ты же, Израилю, не не разумевай, и Иудо: не входите в Галгалу и не восходите в Дом Онов, и не кленитеся Господем живым. 16 Зане якоже юница стрекалом стречема разсвирепе Израиль: ныне упасет я Господь, яко агнца на пространстве. 17 Причастник кумиром Ефрем положи себе соблазны, 18 избра Хананеов: блудяще возблудиша, возлюбиша безчестие от хрепетания своего. 19 Вихр духа возсвищет в крилех своих, и посрамятся от требищ своих. === 5 === 1 Слышите сия, жерцы, и вонмите, доме Израилев, и доме царев, внушите, понеже к вам есть суд: яко пругло бысте стражбе, и якоже мрежа распростерта на Итавирии, 2 юже ловящии лов поткнуша, Аз же наказатель вам: 3 Аз познах Ефрема, и Израиль не отступи от Мене, зане ныне соблуди Ефрем, и осквернися Израиль: 4 не положиша помышлений своих, еже возвратитися к Богу своему, яко дух блужения есть в них, и Господа не уведеша. 5 И смирится укоризна Израилева в лице ему, и Израиль и Ефрем изнемогут в неправдах своих, изнеможет же и Иуда с ними. 6 Со овцами и телцы пойдут взыскати Господа и не обрящут Его, уклонися бо от них. 7 Яко Господа оставиша, яко чада чужда породиша себе: ныне пояст я ржа, и причастия их. 8 Вострубите трубою на холмех, возгласите на высоких, проповедите в Дому Онове, ужасеся Вениамин, 9 Ефрем в пагубу бысть во дни наказания: в племенех Израилевых показах верная. 10 Быша князи Иудины яко прелагающе пределы: на ня излию яко воду гнев Мой. 11 Соодоле Ефрем соперника своего, попра суд, яко нача ходити вслед суетных. 12 Аз же яко мятеж Ефремови и яко остен дому Иудину. 13 И виде Ефрем немощь свою и Иуда болезнь свою: и иде Ефрем ко Ассирием и посла послы ко царю Иариму: и той не возможе изцелити вас, и не престанет от вас болезнь. 14 Зане Аз есмь яко панфирь Ефремови и яко лев дому Иудину: и Аз восхищу, и пойду, и возму, и не будет изимаяй: 15 пойду и возвращуся на место Свое, дондеже погибнут, и взыщут лица Моего. === 6 === 1 В скорби своей утреневати будут ко Мне, глаголюще: идем и обратимся ко Господу Богу нашему, 2 яко Той поби ны, и изцелит ны: уязвит, и уврачует ны: 3 изцелит ны по двою дню, в день третий воскреснем и живи будем пред ним, и увемы: поженем, еже уведети Господа: яко утро готово обрящем Его, и приидет нам яко дождь ранний и поздный земли. 4 Что ти сотворю, Ефреме? Что ти сотворю, Иудо? Милость бо ваша яко облак утренний и яко роса рано падающая. 5 Сего ради пожах пророки вашя, убих я словесем уст Моих, и суд Мой яко свет изыдет. 6 Зане милости хощу а не жертвы, и уведения Божия, нежели всесожжения. 7 Сии же суть яко человек преступаяй завет: тамо презреша Мя. 8 Галаад град делаяй суетная, мутяй воду, 9 а крепость твоя яко мужа морскаго разбойника: скрыша жерцы путь Господень, убиша Сикиму, яко беззаконие сотвориша. 10 В дому Израилеве видех грозная: тамо блужение Ефремово: осквернися Израиль и Иуда. 11 Начни оымати виноград себе, егда возвращу пленение людий Моих. === 7 === 1 Егда изцелю Израиля, и открыется неправда Ефремова и злоба Самарийска, яко соделаша лжу: и тать к нему внидет, совлачаяй разбойник на пути его: 2 яко да воспоют вкупе, аки поющии сердцем своим. Вся злобы их помянух: ныне обыдоша их совети их, противу лицу Ми быша. 3 Злобами своими возвеселиша царя и лжами своими князей. 4 Вси любодеющии, яко пещь жегома на печение сожжения от пламене, от примешения тука, дондеже вскиснет то все. 5 Во дни царей ваших начаша князи яритися от вина, простроша руки своя с губительми: 6 зане разгорешася яко пещь сердца их, внегда устремлятися им: всю нощь сна Ефрем насытися, заутра бысть, и разгореся яко пламень огненный. 7 Вси согреяшася, яко пещь жегома, и огнь пояде судий их: вси царие их падоша, не бе в них моляйся ко Мне. 8 Ефрем в людех своих сам смесяшеся, Ефрем бысть опреснок необращаемь. 9 И снедоша чуждии крепость его, сей же не разуме: и седины явишася на нем, он же не позна. 10 И смирится укоризна Израилева в лице ему: и не возвратишася ко Господу Богу своему и не взыскаша Его во всех сих. 11 И бяше Ефрем яко голубь безумный, не имый сердца: Египта моляше, и во Ассирианы отидоша. 12 Якоже идут, возложу на ня мрежу Мою, якоже птицы небесныя свергу я, накажу я в слух скорбения их. 13 Горе им, яко отскочиша от Мене: боязливи суть, яко нечествоваша ко Мне: Аз же избавих я, сии же возглаголаша на Мя лжу. 14 И не возопиша ко Мне сердца их, но плакахуся на ложах своих: о пшенице и вине сечахуся. 15 Накажутся Мною, Аз же укрепих мышцу их, и на Мя помыслиша злая. 16 Совратишася ни во чтоже, быша яко лук напряжен: падутся князи их мечем ради ненаказания языка своего. Сие ругание их в земли Египетстей. === 8 === 1 В недре их, яко земля непроходима, яко орел в дому Господни: понеже преступиша завет Мой и на закон Мой нечествоваша. 2 Ко Мне воззовут: Боже, познахом Тя, 3 яко Израиль отвратися благих, врага прогнаша. 4 Сами себе царя поставиша, а не Мною, началствоваша, и не явиша Ми: от сребра своего и от злата своего сотвориша себе кумиры, яко да потребятся. 5 Сокруши телца твоего, Самарие, разгневася ярость Моя на ня: доколе не могут очиститися, иже во Израили? 6 И то древодель сотвори, и несть бог: зане льстяй бяше телец твой, Самарие. 7 Яко ветром истлено всеяша, и разрушение их приимет я: рукоять не имущая силы еже сотворити муку, аще же и сотворит, то чуждии поядят ю. 8 Поглощен бысть Израиль, ныне бысть во языцех яко сосуд непотребен, 9 понеже тии взыдоша ко Ассирианом: процвете о себе Ефрем, дары возлюби. 10 Сего ради предадутся во языки: ныне восприиму их, и почиют мало еже помазати царя и князи. 11 Яко умножи Ефрем требища, во грехи быша ему требища возлюбленная. 12 Впишу ему множество, и законная его в чуждая вменишася требища возлюбленная. 13 Темже аще и пожрут жертву и снедят мяса, Господь не приимет их: ныне помянет неправды их и отмстит грехи их: тии во Египет возвратишася и во Ассирии нечистая снедят. 14 И забы Израиль Сотворшаго и и возгради требища, и Иуда умножи грады утверждены: но послю огнь на грады его, и потребит основания его. === 9 === 1 Не радуйся, Израилю, ни веселися якоже людие, понеже соблудил еси от Господа Бога твоего: возлюбил еси даяния на всяцем гумне пшеницы. 2 Гумно и точило не позна их, и вино солга им. 3 Не вселишася на земли Господни: вселися Ефрем во Египте, и во Ассириах снедят нечистая. 4 Не возлияша Господеви вина, и не усладишася Ему требы их, яко хлеб жалости им: вси ядущии тыя осквернятся: понеже хлебы их душ их, не внидут в дом Господень. 5 Что сотворите во днех торжества и в день праздника Господня? 6 Сего ради, се, пойдут от труда Египетска, и приимет их Мемфис, и погребет я махмас: сребро их пагуба наследит, терние во дворех их. 7 Приспеша дние отмщения твоего, приидоша дние воздаяния твоего, и озлобится Израиль, якоже пророк изумленный, человек духом носимый: от множества неправд твоих умножися изумление твое. 8 Страж Ефрем с Богом, пророк пругло строптиво на всех путех его: изумление в дому Божии утвердиша. 9 Растлешася по днем холма: воспомянет неправды их, отмстит грехи их. 10 Якоже грезн в пустыни обретох Израиля и яко стража на смоковнице ранняго увидех отцы их: тии внидоша ко Веельфегору и отчуждишася на стыдение, и быша мерзостнии якоже возлюбленнии. 11 Ефрем яко птица отлете, славы их от порождений и болезней и от зачатий. 12 Темже аще и воскормят чада своя, безчадны будут от человек: понеже и люте им есть, (зане оставих я,) плоть моя от них. 13 Ефрем, якоже видех, в ловитву предпоставиша чада своя, и Ефрем еже извести на заколение чада своя. 14 Даждь им, Господи: что даси им? Даждь им утробу неплодящую и сосцы сухи. 15 Вся злобы их во Галгалех, яко тамо их возненавидех за злобы начинаний их: из дому Моего изжену я, (ксему) не приложу любити их: 16 вси князи их непокориви. Поболе Ефрем: корение его изсхоша, плода ксему да не принесет: понеже аще и породят, побию вожделенная утроб их. 17 Отринет я Бог, яко не послушаша Его, и будут заблуждающии в языцех. === 10 === 1 Виноград благолозен Израиль, плод обилен его: по множеству плодов его умножи требища, по благотам земли его возгради капища. 2 Разделиша сердца своя, ныне погибнут: Сам раскопает требища их, сокрушатся кумиры их. 3 Темже ныне рекут: несть царя в нас, яко не бояхомся Господа: царь же что сотворит нам? 4 Глаголяй словеса извинения ложная завещает завет: прозябнет суд аки троскот на лядине селней. 5 У телца Дому Онова возобитают живущии в Самарии, яко плакашася людие его о нем: и якоже разгневаша его, порадуются о славе его, яко преселися от них. 6 И связавше его, во Ассирию отведоша в дар царю Иариму: в дар Ефрем приимется, и усрамится Израиль о совете своем. 7 Отверже Самариа царя своего, аки хврастие на лицы воды. 8 Извергутся требища Онова согрешения Израилева, терние и волчец возникнут на требищих их: и рекут к горам: покрыйте ны: и холмом: падите на ны. 9 Отнележе холми, согреши Израиль: тамо сташа: не постигнет их на холме рать, на чада неправды. 10 Прииде наказати их по желанию Моему: и соберутся людие на ня, внегда наказатися им во двою неправдах своих. 11 Ефрем юница наученая, еже любити прение: Аз же найду на доброту выи ея, наступлю на Ефрема, умолчу о Иуде, укрепится себе Иаков. 12 Сейте себе в правду, соберите плод живота, просветите себе свет ведения, дондеже время, взыщите Господа, дондеже приидут вам жита правды. 13 Вскую премолчасте нечестие, и неправды его оымасте, изядосте плод лжив? Яко уповал еси на оружие твое, во множестве силы твоея. 14 И востанет пагуба в людех твоих, и вся ограды твоя погибнут, якоже (погибе) князь Саламан от дому Иеровоамля, во дни ратны матерь о чада разбиша: 15 тако сотворю вам, Доме Израилев, от лица неправды злоб ваших. === 11 === 1 Заутра отвергошася, отвержеся царь Израилев, понеже младенец Израиль, и Аз возлюбих его и из Египта воззвах сына Моего. 2 Якоже призвах я, такожде отхождаху от лица Моего: тии Ваалиму требу жряху и изваяным кадяху. 3 Аз же связах Ефрема, взях его на мышцу Мою, и не разумеша, яко изцелих я. 4 Во истлении человечесте привлекох я узами любления моего, и буду им яко ударяяй человек по челюстем его: и воззрю к нему и премогу ему. 5 Вселися Ефрем во Египте, Ассур же сам царь его, яко не восхоте возвратитися. 6 И изнеможе оружие во градех его, и умолче в руку его: и снедят от умышлений своих. 7 И людие его висяще от обитания своего: и Бог на честная его разгневается, и не вознесет его. 8 Что тя устрою, Ефреме? Защищу ли тя, Израилю? Что тя положу? Якоже Адаму устрою тя, и якоже Севоим, превратися сердце Мое в Нем, смятеся раскаяние Мое. 9 Не сотворю по гневу ярости Моея, не оставлю еже потребитися Ефремови, зане Бог Аз есмь, а не человек: в тебе Свят, и не вниду во град. 10 Вслед Господа имам ходити: яко лев возревет, понеже Той возревет, и ужаснутся чада вод, 11 и приидут яко птица из Египта и яко голубь от земли Ассирски: и возставлю я в домех их, глаголет Господь. 12 Обыде Мя лжею Ефрем, и нечестиями дом Израилев и Иуда: ныне позна я Бог, и людие святи прозвашася Богови. === 12 === 1 Ефрем же зол дух, гоняше зной весь день: тщетная и суетная умножи, и завет со Ассирианы завеща, и елей во Египет посылаше. 2 И суд Господеви ко Иуде, еже отмстити Иакова: по путем его и по начинанием его воздаст ему. 3 Во утробе запя брата своего и труды своими укрепе к Богу: 4 и укрепе со Ангелом и превозможе. Плакашася и молишася ми: в дому Онове обретоша мя, и ту глаголася к ним. 5 Господь же Бог Вседержитель будет память Его. 6 И ты о Бозе своем обратишися, милость и суд снабди, и приближайся к Богу своему присно. 7 Ханаан, в руце его мерило неправды, насильствовати возлюби. 8 И рече Ефрем: обаче обогатех, обретох прохлаждение себе: вси труды его не обрящутся ему ради неправд, имиже согреши. 9 Аз же Господь Бог твой, изведох тя из земли Египетски: еще вселю тя в кущах, якоже во дни праздника. 10 И глаголах ко пророком, и аз видения умножих, и в руках пророческих уподобихся. 11 Аще не Галаад есть, убо ложни быша во Галгалех князи требы кладуще, и требища их якоже желви на целизне польстей. 12 И отиде Иаков на поле Сирийско, и работа Израиль о жене и о жене снабде. 13 И пророком изведе Господь Израиля из земли Египетския, и пророком снабдеся. 14 Разгнева Мя Ефрем и возяри Мя: и кровь его на нем пролиется, и укоризну его воздаст ему Господь. === 13 === 1 По словеси Ефремову оправдания прия сей во Израили, и положи я Ваалови, и умре. 2 И ныне приложиша согрешати и сотвориша себе слияние от злата и сребра своего по образу идолов, дела художников совершена: им сии глаголют: пожрите человеков, оскудеша бо телцы. 3 Сего ради будут яко облак утренний, якоже роса утренняя идущи, якоже плевы с тока (и прах с ветвия) развеваемый вихром, якоже дым из трубы. 4 Аз же Господь Бог твой утверждаяй небо и созидаяй землю, Егоже руце создасте все воинство небесное, и не показах ти их, еже ходити вслед их: и Аз изведох тя из земли Египетския, и бога разве Мене да не познаеши, и спасающаго несть разве Мене. 5 Аз пасох тя в пустыни на земли ненаселенней, 6 на пажитех их, и насытишася до исполнения, и вознесошася сердца их, сего ради забыша Мя. 7 И буду им яко панфирь, и яко рысь на пути Ассириев: 8 и срящу их аки медведица лишаема, и разрушу соключение сердец их: и поядят я скимни дубравнии, и зверие польстии расторгнут я. 9 В погибели твоей, Израилю, кто поможет тебе? 10 Где царь твой сей? Той да спасет тя во всех градех твоих: и да судит ти, о немже глаголал еси: даждь ми царя и князя. 11 И дах тебе царя во гневе Моем, и утвержахся в ярости Моей. 12 Согромаждение неправды Ефрем, сокровен грех его: 13 болезни аки раждающия приидут ему: сей сын немудрый, зане ныне не устоит в сокрушении чад. 14 От руки адовы избавлю я и от смерти искуплю я: где пря твоя, смерте? Где остен твой, аде? Утешение скрыся от очию Моею: 15 зане сей между братиями разлучит: наведет Господь ветр зноен из пустыни нань, и изсушит жилы его и опустошит источники его: сей изсушит землю его и вся сосуды его любимыя. === 14 === 1 Погибнет Самариа, яко сопротивися и Богу своему: оружием падут сами, и младенцы их разбиются, и во утробе имущыя их разсядутся. 2 Обратися, Израилю, ко Господу Богу твоему, зане изнемогл еси в неправдах твоих. 3 Возмите с собою словеса и обратитеся ко Господу Богу вашему, рцыте Ему: (можеши всяк отврещи грех:) яко да не приимете неправды, но да приимете благая, и воздадим плод устен наших. 4 Ассур не спасет нас, на кони не взыдем, ксему не речем: 5 бози наши, делам рук наших: яко в Тебе помилуется сирота. Изцелю селения их, возлюблю я явленно, яко отвратися гнев Мой от них. 6 Буду якоже роса Израилю, процветет яко крин и прострет корение свое якоже Ливан. 7 Пойдут ветви его, и будет якоже маслина плодовита, и обоняние его аки Ливана: 8 обратятся и сядут под кровом его, поживут и утвердятся пшеницею, и процветет яко виноград память его, якоже вино Ливаново. 9 Ефремови что ему еще и кумиром? Аз смирих его, Аз и укреплю его: аки смерчие учащеное, от Мене обретеся плод твой. 10 Кто премудр и уразумеет сия? И смыслен, и увесть сия? Яко правы путие Господни, и праведнии пойдут в них, а нечестивии изнемогут в них. == Книга пророка Иоиля == === 1 === 1 Слово Господне, иже бысть ко Иоилю сыну Вафуилеву. 2 Слышите сия, старцы, и внушите, вси живущии на земли: аще быша сицевая во днех ваших или во днех отец ваших? 3 О сих чадом своим поведите, а чада ваша чадом своим, а чада их роду другому: 4 останок гусениц поядоша прузи, и останок пругов поядоша мшицы, и останок мшиц поядоша сиплеве. 5 Утрезвитеся, пиянии, от вина своего и плачитеся: рыдайте, вси пиющии вино до пиянства, яко отяся от уст ваших веселие и радость. 6 Понеже язык взыде на землю Мою крепок и безчислен: зубы его (якоже) зубы львовы, и членовныя его якоже львичища: 7 положи виноград Мой в погубление и смоквы Моя в сломление: взыскуя обыска и и сверже, обели лозие его. 8 Восплачися ко мне паче невесты препоясаныя во вретище по мужи своем девственнем. 9 Извержеся жертва и возлияние из дому Господня: плачитеся, жерцы, служащии жертвеннику Господню, 10 яко опустеша поля. Плачися, земле, яко пострада пшеница, и изсше вино, умалися елей, 11 посрамишася земледелателе. Плачитеся, села, по пшенице и по ячмени, яко погибе обымание от нивы, 12 виноград изсше, и смоквы умалишася: шипки, и финикс, и яблонь, и вся древа польская изсхоша, яко посрамиша радость сынове человечи. 13 Препояшитеся и бийтеся, жерцы, плачитеся, служащии жертвеннику: внидите, поспите во вретищих, служащии Богу, яко отяся от дому Бога вашего жертва и возлияние: 14 освятите пост, проповедите цельбу, соберите старейшины вся живущия на земли в дом Бога вашего и воззовите ко Господу усердно: 15 увы мне, увы мне, увы мне в день! Яко близ есть день Господень, и яко беда от беды приидет: 16 яко пред очима вашима пищи взяшася и от дому Бога вашего веселие и радость. 17 Вскочиша юницы у яслей своих, погибоша сокровища, раскопашася точила, яко посше пшеница. 18 Что положим себе? Восплакашася стада волов, яко не бе пажити им, и паствы овчия погибоша. 19 К Тебе, Господи, возопию, яко огнь потреби красная пустыни, и пламень пожже вся древа польская, 20 и скоти польстии воззреша к Тебе, яко посхоша источницы воднии, и огнь пояде красная пустыни. === 2 === 1 Вострубите трубою в Сионе, проповедите в горе Моей святей, и да смятутся вси живущии на земли, яко предстоит день Господень, яко близ, 2 день тмы и бури, день облака и мглы: якоже утро разлиются по горам людие мнози и крепцы, подобни им не быша от века, и по них не приложится до лет в род и род: 3 яже пред ним огнь потребляяй, и яже за ним возгараяся пламень: якоже рай Сладости земля пред лицем его, и яже созади его поле пагубы, и спасающагося не будет им: 4 якоже вид конский вид их, и якоже конницы, тако проженут: 5 якоже глас колесниц на верхи гор востекут, и яко глас пламене огненна попаляюща тростие, и яко людие мнози и крепцы воополчающиися на брань. 6 От лица их сокрушатся людие: всякое лице аки опаление горнца. 7 Якоже борцы потекут, и якоже мужие храбри взыдут на ограды: и кийждо в путь свой пойдет, и не совратят путий своих, 8 и кийждо от брата своего не отступит: отягощени оружии своими пойдут и в стрелах своих падут, но не скончаются. 9 Града имутся, и на забрала востекут, и на храмины взлезут, и оконцами внидут, якоже татие. 10 Пред лицем его смятется земля и потрясется небо: солнце и луна померкнут, и звезды угасят свет свой. 11 И Господь даст глас Свой пред лицем силы Своея, яко мног есть зело полк Его, яко крепка дела словес Его: зане велик день Господень, велик и светел зело, и кто будет доволен ему? 12 И ныне глаголет Господь Бог ваш: обратитеся ко Мне всем сердцем вашим в посте и в плачи и в рыдании, 13 и расторгните сердца ваша, а не ризы ваша, и обратитеся ко Господу Богу вашему, яко милостив и щедр есть, долготерпелив и многомилостив и раскаявайся о злобах. 14 Кто весть, обратится ли, и раскается, и оставит за собою благословение и жертву и возлияние Господу Богу вашему? 15 Вострубите трубою в Сионе, освятите пост, проповедите цельбу, 16 соберите люди, освятите церковь, изберите старейшины, совокупите младенцы ссущия сосцы: да изыдет жених от ложа своего, и невеста от чертога своего. 17 Между степеньми жертвенника восплачутся жерцы служащии Господу и рекут: пощади, Господи, люди Твоя и не даждь достояния Твоего на укоризну, да не обладают ими языцы, да не рекут во языцех: где есть Бог их? 18 И возревнова Господь о земли Своей и пощаде люди Своя. 19 И отвеща Господь людем Своим и рече: се, Аз вам послю пшеницу и вино и масло древяное, и насытитеся их, и не дам вас ксему на поругание во языцех: 20 и сущаго от севера отжену от вас и отрину его на землю безводную, и погублю лице его в мори первем и задняя его в мори последнем, и взыдет гнилость его, и взыдет смрад его, яко возвеличи дела своя. 21 Дерзай, земле, радуйся и веселися, яко возвеличи Господь, еже сотворити. 22 Дерзайте, скоти польстии, яко прозябнуша поля пустыни, яко древо принесе плод свой, виноград и смокви даша силу свою. 23 И чада Сионя, радуйтеся и веселитеся о Господе Бозе вашем, яко даде вам пищу в правду и одождит вам дождь ранний и поздный, якоже и прежде: 24 и наполнятся гумна ваша пшеницы, и преизлиются точила вином и елеем. 25 И воздам вам вместо лет, в няже поядоша прузи и мшица, и сиплеве и гусеницы, сила Моя великая, юже послах на вы: 26 и снесте ядуще и насытитеся, и похвалите имя Господа Бога вашего, Яже сотвори с вами чудеса: и не посрамятся людие Мои во век. 27 И уведите, яко посреде Израиля Аз есмь, и Аз Господь Бог ваш, и несть иного разве Мене: и не посрамятся ктому людие Мои во век. 28 И будет по сих, и излию от Духа Моего на всяку плоть, и прорекут сынове ваши и дщери ваша, и старцы ваши сония узрят, и юноты ваши видения увидят: 29 ибо на рабы Моя и на рабыни Моя во дни оны излию от Духа Моего: 30 и дам чудеса на небеси и на земли, кровь и огнь и курение дыма: 31 солнце обратится во тму, и луна в кровь, прежде неже приити дню Господню великому и просвещенному: 32 и будет, всяк иже призовет имя Господне, спасется: яко в горе Сионе и во Иерусалиме будет спасаемый, якоже рече Господь, и благовествуемии, ихже Господь призва. === 3 === 1 Яко се, Аз во дни тыя и во время оно, егда возвращу пленники Иудины и Иерусалимли, 2 и соберу вся языки, и сведу я на юдоль Иосафатову, и разсуждуся с ними ту о людех Моих и о наследии Моем Израили, иже разсеяшася во языцех, и землю Мою разделиша. 3 И на люди Моя вергоша жребия, и даша отрочища блудницам, и отроковицы продаяху на вине и пияху. 4 И что вы Мне, Тире и Сидоне и вся Галилеа иноплеменников? Еда воздаяние вы воздаете Мне? Или памятозлобствуете вы на Мя? Остро и быстро воздам воздаяние ваше на главы ваша, 5 понеже сребро Мое и злато Мое взясте, и избранная Моя и добрая внесосте в требища ваша, 6 и сыны Иудины и сыны Иерусалимли продасте сыном Еллинским, яко да ижденете я от предел их. 7 И се, Аз возставлю я от места, в неже продасте я тамо, и воздам воздаяние ваше на главы ваша: 8 и отдам сыны ваша и дщери ваша в руце сынов Иудиных, и продадят я в плен во страну далече сущу, яко Господь глагола. 9 Проповедите сия во языцех, освятите рать, возставите сечцы, приведите и восходите, вси мужие воинстии, 10 разсецыте рала ваша на мечи и серпы ваша на копия: немощный да глаголет, яко могу аз: 11 совокупляйтеся и входите, вси языцы окрест, и соберитеся ту: кроткий да будет храбр. 12 Да востанут и взыдут вси языцы на юдоль Иосафатову, яко тамо сяду разсудити вся языки яже окрест. 13 Испустите серпы, яко предстоит обымание винограда: внидите, топчите, яко исполнь точило, изливаются подточилия, яко умножишася злобы их. 14 Гласи прогласишася на поли судебнем, яко близ день Господень на юдоли судебней. 15 Солнце и луна померкнут, и звезды скрыют свет свой. 16 Господь же от Сиона воззовет и от Иерусалима даст глас Свой, и потрясется небо и земля: Господь же пощадит люди Своя и укрепит (Господь) сыны Израилевы. 17 И увесте, яко Аз Господь Бог ваш, вселяяся в Сионе в горе Моей святей: и будет Иерусалим свят, и иноплеменницы не пройдут сквозе его ктому. 18 И будет в той день, искаплют горы сладость, и холми источат млеко, и вси источницы Иудины источат воды, и источник от дому Господня изыдет и напоит водотечь Сития. 19 Египет в погибель будет, и Идумеа в поле погибели будет за озлобление сынов Иудиных, понеже пролияша кровь праведную на земли своей: 20 Иудеа же во веки населится, и Иерусалим в роды родов. 21 И взыщу крови их и не обезвиню: и Господь вселится в Сионе. == Книга пророка Амоса == === 1 === 1 Словеса Амосова, яже быша в Кариафиариме от Фекуи, яже виде о Иерусалиме во дни Озии царя Иудина и во дни Иеровоама сына Иоасова царя Израилева, прежде двою лет труса. 2 И рече: Господь от Сиона возглагола и от Иерусалима даде глас Свой: и сетоваша пажити пастырей, и изсше верх Кармиль. 3 И рече Господь: за три нечестия Дамаска и за четыри не отвращуся его, понеже растроша пилами железными имущыя во утробе сущих в Галааде: 4 и послю огнь в дом Азаиль, и пояст основание сына Адерова: 5 и сокрушу вереи Дамасковы, и потреблю живущыя с поля Онова, и посеку племя от мужей Харраних, и пленятся людие Сирстии нарочитии, глаголет Господь. 6 Сия глаголет Господь: за три нечестия Газы и за четыри не отвращуся их, за еже пленити им пленение Соломоне, еже заключити во Идумею: 7 и послю огнь на забрала Газы, и пояст основание ея: 8 и потреблю живущыя из Азота, и извержется племя из Аскалона, и наведу руку Мою на Аккарона, и погибнут остаточнии иноплеменников, глаголет Господь. 9 Сия глаголет Господь: за три нечестия Тирова и за четыри не отвращуся его, понеже заключиша пленники Соломони во Идумею и не помянуша завета братня: 10 и послю огнь на забрала Тирова, и пояст основания его. 11 Сия глаголет Господь: за три нечестия Идумейска и за четыри не отвращуся их, понеже прогнаша брата своего мечем и растлиша матерь на земли, и восхити во свидение грозу свою, и устремление свое снабде на победу: 12 и послю огнь в Феман, и пояст основания оград его. 13 Сия глаголет Господь: за три нечестия сынов Аммоних и за четыри не отвращуся их, понеже распоряху имущыя во утробе Галаадитов, яко да разширят пределы своя: 14 и разжегу огнь на забрала Раввафы, и пояст основания ея с воплем в день рати, и потрясется в день скончания своего: 15 и пойдут царие ея в плен, жерцы их и князи их вкупе, глаголет Господь. === 2 === 1 Сия глаголет Господь: за три нечестия Моавля и за четыри не отвращуся его, понеже сожгоша кости царя Идумейска в пепел: 2 и послю огнь на Моава, и пояст основания градов его, и умрет со безсилием Моав, с воплем и гласом трубным: 3 и потреблю судию из него и вся князи его избию с ним, глаголет Господь. 4 Сия глаголет Господь: за три нечестия сынов Иудиных и за четыри не отвращуся их, понеже отринуша закон Господень и повелений Его не сохраниша, и прельстиша их суетная их, яже сотвориша, имже последоваша отцы их вслед их: 5 и послю огнь на Иуду, и пояст основания Иерусалимля. 6 Сия глаголет Господь: за три нечестия Израиля и за четыри не отвращуся его, понеже продаша праведнаго на сребре и убогаго на сапозех, 7 ходящих на прасе земнем, и бияху пястию во главы убогих, и путь смиренных совращаху: и сын и отец его влазяста ко единей рабыни, яко да осквернавят имя Бога своего: 8 и ризы своя связующе ужами, и завесы творяху держащыяся требища, и вино от оболганий пияху в дому бога своего. 9 Аз же отвергох Аморреа от лица их, егоже бе высота якоже высота кедрова, и крепок бяше якоже дуб, и изсуших плод его с верха и корение его из низу. 10 Аз же изведох вы из земли Египетския и обводих вы в пустыни четыредесять лет, еже прияти в наследие землю Аморрейску. 11 И поях от сынов ваших во пророки и от юнот ваших во освящение: еда несть сих, сынове Израилевы? Глаголет Господь. 12 И напаясте освященныя вином и пророком заповедасте глаголюще: не прорицайте. 13 Сего ради, се, Аз повращу под вами, якоже вратится колесница полна тростия: 14 и погибнет бегство от скоротекущаго, и крепкий не удержит крепости своея, и храбрый не спасет души своея, 15 и стреляяй из лука не постоит, и быстрый ногама своима не уцелеет, и конник не спасет души своея, 16 и крепкий не обрящет сердца своего в силах, наг побегнет в той день, глаголет Господь. === 3 === 1 Слышите слово сие, еже глагола Господь на вы, доме Израилев, и на все племя, еже изведох из земли Египетския, рекий: 2 вас точию познах от всех племен на земли, сего ради отмщу на вас вся грехи вашя. 3 Еда пойдут два вкупе всяко, аще не познают себе? 4 Или возревет лев из дубравы своея, ловитвы не имый? Или испустит глас свой львичищь из ложа своего всяко, аще не похитит чесого? 5 Или падет птица на землю без ловца? Или спадет пругло на землю, аще не имет ничесоже? 6 Или возгласит труба во граде, и не убоятся людие? Или будет зло во граде, еже Господь не сотвори? 7 Понеже не сотворит Господь Бог дела, аще не открыет наказания Своего к рабом Своим пророком. 8 Лев возревет, и кто не убоится? Господь Бог глагола, и кто не проречет? 9 Поведите странам во Ассирианех и во странах Египетских и рцыте: соберитеся на гору Самарийскую и видите чудесная многа среде ея и насильство еже в ней. 10 И не уразуме, яже будут противу ей, глаголет Господь, сокровищствующии неправду и страсть в селех своих. 11 Сего ради сия глаголет Господь Бог: Тире, окрест земля твоя опустеет, и отимет от тебе крепость твою, и разграбятся страны твоя. 12 Сия глаголет Господь: якоже пастух, егда исторгнет от уст львовых две голени, или обушие уха, тако исторгнутся сынове Израилевы живущии в Самарии прямо племене и в Дамасце. 13 Жерцы, послушайте и засвидетелствуйте дому Иаковлю, глаголет Господь Бог Вседержитель: 14 понеже в день, егда отмщу нечестия Израилева на нем, и отмщу на требищих Вефилих, и раскопаю роги требища, и падутся на землю: 15 сокрушу и поражу дом с преклеты с домом летним, и погибнут домове кости слоновыя, и потребятся и друзии домове мнози, глаголет Господь. === 4 === 1 Слышите слово сие, юницы Васанитидския, яже в горе Самарийстей, преобидящыя убогих и попирающыя нищих, глаголющыя господем своим: подадите нам, да пием. 2 Клятся Господь святыми Своими, яко се, дние грядут на вы, и возмут вы во оружии, и сущих с вами ввергут в конобы подгнещаемыя огненнии губителие: 3 и извержены будете наги прямо друг друга и отвержетеся в гору Ремман, глаголет Господь. 4 Внидосте в Вефиль и беззаконновасте, и в Галгалех умножисте еже нечествовати, и принесосте заутра требы вашя, в треденство десятины вашя: 5 и прочтоша извне закон и призваша исповедание: возвестите, яко сия возлюбиша сынове Израилевы, глаголет Господь Бог. 6 Аз же дам вам оскомину зубом во всех градех ваших и недостаток хлеба во всех местех ваших: и не обратистеся ко Мне, глаголет Господь. 7 И аз удержах дождь от вас прежде триех месяцев жатвы, и надождю на един град, а на другий (един) не надождю: часть едина надождится, и часть, на нюже не надождю, изсохнет: 8 и соберутся два и три града во град един пити воду и не насытятся: и не обратистеся ко Мне, глаголет Господь. 9 Побих вы раждежением и златеницею: умножисте вертограды вашя, винограды вашя и смоквы вашя и масличия ваша: сия поядоша гусеницы: и ниже тако обратистеся ко Мне, глаголет Господь. 10 Послах на вы смерть на пути Египетстем, и избих оружием юношы вашя, с пленом коней твоих, и изведох во огни Полки вашя во гневе Моем: и ниже тако обратистеся ко Мне, глаголет Господь. 11 Разорих вы, якоже разори Бог Содому и Гоморру, и бысте яко главня исторжена из огня: и ниже тако обратистеся ко Мне, глаголет Господь. 12 Сего ради сице сотворю ти, Израилю: обаче, яко сице сотворю ти, уготовися призывати Бога твоего, Израилю. 13 Се, Аз утвержаяй гром и созидаяй ветр и возвещаяй в человецех Христа Своего, творяй утро и мглу и восходяй на высокая земли: Господь Бог Вседержитель имя Ему. === 5 === 1 Слышите слово Господне, имже аз приемлю на вы плачь: дом Израилев падеся и ктому не приложит востати: 2 девица Израилева повержена на земли своей, несть возставляющаго ю. 3 Понеже сия глаголет Господь Бог: из града, из негоже исхождаше тысяща, останется в нем сто: и из негоже исхождаше сто, останет в нем десять дому Израилеву. 4 Понеже сия глаголет Господь к дому Израилеву: взыщите Мене и поживете: 5 а не взыскуйте Вефиля и в Галгалу не входите и ко кладязю клятвы не ходите, яко Галгала пленяема пленится, и Вефиль будет аки не быв. 6 Взыщите Господа и поживете, яко да не возжжется яко огнь дом Иосифов, и пояст его, и не будет угашающаго дому Израилева. 7 Господь творяй в высоту суд и правду на земли положи: 8 творяй вся и претворяяй, и обращаяй во утро сень смертную и день в нощь помрачаяй, призываяй воду морскую и разливаяй ю на лице земли: 9 Господь Бог Вседержитель имя Ему: разделяяй сокрушение на крепость и бедство на твердыню наводяй. 10 Возненавидеша у врат наказующаго, и словом праведным возгнушашася. 11 Сего ради понеже пястьми биете убогих и дары избранны приясте от них: домы украшены соградисте, и не вселитеся в них, винограды вожделенны насадисте, и не имате пити вина от них. 12 Яко уведех многа нечестия ваша, и крепцы греси ваши, попирающе праведнаго, приемлюще премены и убогия от врат отреяюще. 13 Сего ради смысляй в то время премолчит, яко время лукаво есть. 14 Взыщите добра, а не зла, яко да поживете, и будет тако с вами Господь Бог Вседержитель, якоже ресте: 15 возненавидехом злая и возлюбихом добрая: и возставите у врат суд, яко да помилует Господь Бог Вседержитель оставшая Иосифова. 16 Сего ради сия глаголет Господь Бог Вседержитель: на всех стогнах (будет) плачь, и на всех путех речется: увы люте, увы люте! Призовется земледелец на плачь и на рыдание, и на ведящих плачь, 17 и на всех путех плачь, понеже пройду среде тебе, рече Господь. 18 Увы люте желающым дне Господня! Вскую вам сей день Господень? Сей бо есть тма, а не свет: 19 якоже аще убежит человек от лица льва, и нападет нань медведица: и вскочит в дом и опрется рукама своима о стену, и усекнет его змия. 20 Несть ли день Господень тма, а не свет, и мгла не имущи света своего? 21 Возненавидех и отвергох праздники вашя и не обоняю жертв в сонмех ваших: 22 зане аще принесете Ми всесожжения и жертвы вашя, не прииму, и на спасителная явления вашего не призрю. 23 Отстави от Мене глас песней твоих, и песни органов твоих не послушаю. 24 И повалится якоже вода суд, и правда якоже водотеча непроходна. 25 Еда заколения и требы принесосте Ми в пустыни лет четыредесять, доме Израилев? 26 И восприясте скинию Молохову и звезду бога вашего Ремфана, образы, яже сотвористе себе. 27 И преселю вы далее Дамаска, глаголет Господь: Бог Вседержитель имя Ему. === 6 === 1 Люте уничижающым Сиона и уповающым на гору Самарийскую: оымаша начатки языков, и внидоша к ним дом Израилев. 2 Мимоидите Халану вси и видите, и прейдите оттуду во Емаф великий и снидите оттуду в Геф иноплеменников, крепчайшыя от всех царств сих, аще болши суть пределы их предел ваших? 3 Приходящии в день зол, приближающиися и прикасающиися субботам лживым, 4 спящии на одрех от костей слоновых и ласкосердствующии на постелех своих, ядущии козлища от паств и телцы млеком питаемы от среды стад: 5 плещущии ко гласу пищалей, аки стояща мнеша, а не яко бежаща: 6 пиющии процеженое вино и первыми вонями мажущиися, и не страдаху ничесоже в сокрушении Иосифове. 7 Сего ради ныне пленницы будут от начала сильных, и отимется ржание конско от Ефрема. 8 Яко клятся Господь Собою, глаголет Господь Бог Сил: понеже гнушаюся аз всею укоризною Иакова и села его возненавидех, и отвергу град со всеми живущими в нем. 9 И будет, аще останутся десять мужей во единем дому, умрут, и останутся остаточнии: 10 и возмут свои их, и понудятся изнести кости их из дому. И речет настоятелем дому: еще ли есть у тебе? И речет: несть еще. И речет: молчи, не именования ради имене Господня. 11 Понеже, се, Господь заповедает и побиет дом великий толчением и дом малый разседением. 12 Аще поженут в камениях кони? И аще умолкнут в женстем полу? Яко обратисте на гнев суд, и плод правды на горесть, 13 веселящиися ни о единем слове блазе, глаголющии: не крепостию ли нашею имамы роги? 14 Темже, се, Аз воздвигну на вы, доме Израилев, язык, глаголет Господь Бог Сил, и сокрушат вас еже не внити во Емаф и до водотечи западов. === 7 === 1 Сице показа ми Господь Бог, и се, приплод пружий идый утренний, и се, гусеница, един Гог царь. 2 И будет, аще скончает ядый траву земную, и рех: Господи, Господи, милостив буди, кто возставит Иакова? Яко мал есть. 3 Раскайся о сем, Господи: и сие не будет, глаголет Господь. 4 Сице показа ми Господь, и се, призва прю во огни Господь Бог, и пояде бездну многу, и пояде часть. 5 И рех: Господи, Господи, престани ныне, кто возставит Иакова? Яко мал есть. 6 Раскайся о сем, Господи: и сие не будет, глаголет Господь. 7 Сице показа ми Господь: и се, Муж стояй на ограде адамантове, и в руце Его адамант. 8 И рече Господь ко мне: что ты видиши, Амосе? И рех: адамант. И рече Господь ко мне: се, Аз учиню адаманта среде людий Моих Израиля, ктому не приложу, еже мимоити его: 9 и потребятся требища смеха, и требы Израилевы опустеют, и востану на дом Иеровоамль со оружием. 10 И посла Амасиа жрец Вефильский ко Иеровоаму царю Израилеву глаголя: развраты творит на тя Амос среде дому Израилева, не возможет земля подяти всех словес его, 11 понеже сия глаголет Амос: оружием скончается Иеровоам, Израиль же пленен отведется от земли своея. 12 И рече Амасиа ко Амосови: видяй гряди и отиди ты на землю Иудину, и тамо живи, и тамо да прорицаеши: 13 а в Вефили посем не приложи прорицати, яко освящение царя есть и дом есть царства. 14 И отвеща Амос и рече ко Амасии: не бех пророк аз, ниже сын пророчь, но пастырь бех и ягодичия обирая: 15 и поя мя Господь от овец и рече ко мне: иди и прорцы на люди Моя Израиля. 16 И ныне слыши слово Господне: ты глаголеши: не прорицай на Израиля и не возмущай народа на дом Иаковль: 17 сего ради сия глаголет Господь: жена твоя во граде соблудит, сынове же твои и дщери оружием падут, и земля твоя ужем измерится, и ты на земли нечистей скончаешися, и Израиль пленен отведется от земли своея. === 8 === 1 Сице показа ми Господь Бог: и се, сосуд птицеловца. 2 И рече (Господь): что ты видиши, Амосе? И рех: сосуд птицеловца. И рече Господь ко мне: приспе конец на люди Моя Израиля, не приложу ксему еже мимоити его. 3 И восплачутся стропове храма в той день, глаголет Господь Бог: мнози падшии во всем месте, навергу молчание. 4 Слышите убо сия, сокрушающии из утра убогаго и насильствующии нищих от земли, 5 глаголющии: когда прейдет месяц, и продамы, и (когда прейдут) субботы, и отверзем сокровища наша, еже сотворити меру малу, и увеличити мерило, и сотворити вес неправеден, 6 яко да притяжем убогия сребром и нищаго за сапоги, и от всякаго жита куплю сотворим? 7 Кленется Господь на презорство Иаковле, аще забудет в конец вся дела ваша: 8 и о сих не возмятется ли земля, и восплачется всяк живяй на ней? И взыдет яко река скончание (ея), и снидет якоже река Египетская. 9 И будет в той день, глаголет Господь Бог, зайдет солнце в полудне, и померкнет на земли в день свет: 10 и превращу праздники вашя в жалость и вся песни вашя в плачь, и возложу на всяк хребет вретище и на всяку главу плешь, и положу его яко жалость любимаго и сущыя с ним яко день болезни. 11 Се, дние грядут, глаголет Господь, и послю глад на землю, не глад хлеба, ни жажду воды, но глад слышания слова Господня: 12 и поколеблются воды от моря до моря и от севера до восток, и обтекут ищуще словесе Господня, и не обрящут. 13 В той день оскудеют девы добрыя и юноши в жажди, 14 кленущиися очищением Самарийским и глаголющии: жив бог твой, Дане, и жив бог твой, Вирсавее. И падут и не востанут ктому. === 9 === 1 Видех Господа стояща на жертвеннице, и рече: порази очистилище, и поколеблются преддверия, и пресецы в главы всех: и оставшыя их оружием избию, не убежит от них бежай, и не уцелеет от них уцелеваяй: 2 аще сокрыются во аде, то и оттуду рука Моя исторгнет я, и аще взыдут на небо, то и оттуду свергу я: 3 и аще скрыются на версе Кармила, то и оттуду взыщу и возму я, и аще погрузятся от очию Моею во глубинах морских, то и тамо повелю змиеви, и угрызет я: 4 и аще пойдут в плен пред лицем враг своих, и тамо повелю оружию, и избиет их: и утвержу очи Мои на них во злая, а не во благая. 5 И Господь Бог Вседержитель прикасаяйся земли и колебля ею, и возрыдают вси живущии на ней, и взыдет яко река скончание ея, и снидет яко река Египетская: 6 сотворяяй на небо восход Свой и обещание Свое на земли основаяй, призываяй воду морскую и проливаяй ю на лице земли: Господь Бог Вседержитель имя Ему. 7 Не якоже ли сынове Ефиопстии вы есте Мне, сынове Израилевы? Глаголет Господь. Не Израиля ли изведох из земли Египетския и иноплеменники из Каппадокии и Сиряны из Рова? 8 Се, очи Господа Бога на царство грешных, и отвергу е от лица земли: обаче не в конец отвергу дом Израилев, глаголет Господь. 9 Понеже, се, Аз заповедаю и развею дом Израилев во вся языки, якоже веется на веяле, и не падет сотрение на землю. 10 Оружием скончаются вси грешнии людий Моих, глаголющии: не приближатся, ни приидут на нас злая. 11 В той день возставлю скинию Давидову падшую, и возгражду падшая ея, и раскопаная ея возставлю, и возгражду ю якоже дние века: 12 яко да взыщут мене оставшиися человецы и вси языцы, в нихже призвася имя Мое в них, глаголет Господь творяй сия вся. 13 Се, дние грядут, глаголет Господь, и постигнет жатва оымание винограда, и созреет гроздие в сеятву, и искапают горы сладость, и вси холми насаждени будут: 14 и возвращу плен людий Моих Израиля, и возградят грады разореныя, и населятся, и насадят винограды и испиют вино их, и сотворят вертограды и снедят плод их: 15 и насажду я на земли их, и не исторгнутся ктому от земли своея, юже дах им, глаголет Господь Бог Вседержитель. == Книга пророка Авдия == === 1 === 1 Видение Авдиино: сия глаголет Господь Бог Идумеи: слух слышах от Господа, известие во языки посла: востаните, и востанем на ню ратию. 2 Се, мала дах тя во языцех, безчестен ты еси зело. 3 Презорство сердца твоего воздвиже тя живущаго в пещерах каменных: возвышаяй храмину свою, глаголяй в сердцы своем: кто мя свержет на землю? 4 Аще вознесешися якоже орел и аще положиши гнездо твое среде звезд, и оттуду свергу тя, глаголет Господь. 5 Аще бы татие влезли к тебе, или разбойницы нощию, камо бы повержен был еси? Еда не украли бы доволных себе? Или аще бы объемлющии виноград влезли к тебе, еда бы не оставили гроздия? 6 Како обыскася Исав, и взята быша сокровенная его? 7 Даже до предел испустиша тя: вси мужие завета твоего сопротивишася ти, премогоша тя мужие мирницы твои: (ядущии с тобою) положиша лесть под тобою, несть смысла в них. 8 В той день, глаголет Господь, погублю премудрыя от Идумеи и смысл от горы Исавовы: 9 и убоятся воини твои, иже от Феман, да отимется человек от горы Исавовы. 10 Посечения ради и нечестия, еже на брата твоего Иакова, покрыет тя студ, и отвержен будеши во век. 11 От негоже дне сопротивился еси во дни пленяющих иноплеменников силу его, и чуждии внидоша во врата его и о Иерусалиме вергоша жребия, и ты был еси яко един от них. 12 И да не презриши дне брата твоего в день чуждих, и да не порадуешися о сынех Иудиных в день погибели их, и да не велеречиши в день скорби: 13 и не входи во врата людий Моих в день болезни их, и не презри и ты сонма их в день потребления их, и не совещайся на силу их в день погибели их: 14 ниже настой на исходы их потребити избегающыя их, ниже заключай бежащыя их в день скорби. 15 Понеже близ день Господень на вся языки: якоже сотворил еси, сице будет ти, воздаяние твое воздастся на главу твою. 16 Понеже якоже еси пил на горе Моей святей, испиют вси языцы вино, испиют и снидут, и будут яко не бывшии. 17 В горе же Сиони будет спасение, и будет свята: и наследят дом Иаковль наследивших я. 18 И будет дом Иаковль огнь, дом же Иосифов пламень, а дом Исавов в тростие, и возгорятся на них и поядят я, и не будет избегаяй дому Исавову, яко Господь глагола. 19 И наследят иже во нагеве гору Исавову, и иже в раздолии иноплеменники: и возмут гору Ефремову и поле Самарийско, и Вениамина и Галаадитиду. 20 И преселения начало сие сыном Израилевым, земля Хананейска до Сарепты: преселение же Иерусалимле до Ефрафа: и наследят грады Нагевовы. 21 И взыдут спасаемии от горы Сиони, еже отмстити гору Исавлю, и будет царство Господеви. == Книга пророка Ионы == === 1 === 1 И бысть слово Господне ко Ионе сыну Амафиину, глаголя: 2 востани и иди в Ниневию град великий и проповеждь в нем, яко взыде вопль злобы его ко Мне. 3 И воста Иона, еже бежати в Фарсис от лица Господня и сниде во Июппию и обрете корабль идущь в Фарсис, и даде наем свой и вниде в онь плыти с ними в Фарсис от лица Господня. 4 И Господь воздвиже ветр велий на мори, и бысть буря великая в мори, и корабль бедствоваше еже сокрушитися. 5 И убояшася корабельницы, и возопиша кийждо к богу своему, и изметание сотвориша сосудов иже в корабли в море, еже облегчитися от них: Иона же сниде во дно корабля и спаше ту и храпляше. 6 И прииде к нему кормчий и рече ему что ты храплеши? Востани и моли Бога твоего, яко да спасет ны Бог, да не погибнем. 7 И рече кийждо ко искреннему своему приидите, вержим жребия и уразумеем, кого ради есть зло сие на нас? И метнуша жребия, и паде жребий на Иону. 8 И реша к нему возвести нам, кого ради сие зло на нас, что твое делание есть, и откуду грядеши и камо идеши, и от коея страны и от киих людий еси ты? 9 И рече к ним раб Господень есмь аз и Господа Бога небеснаго аз чту, иже сотвори море и сушу. 10 И убояшася мужие страхом великим и реша к нему что сие сотворил еси? Зане разумеша мужие, яко от лица Господня бежаше, яко возвести им. 11 И реша к нему: что тебе сотворим, и утолится море от нас? Зане море восхождаше и воздвизаше паче волнение. 12 И рече к ним Иона: возмите мя и вверзите в море, и утолится море от вас понеже познах аз, яко мене ради волнение сие великое на вы есть. 13 И нуждахуся мужие, возвратитися к земли, и не можаху, яко море восхождаше и воздвизашеся паче на них. 14 И возопиша ко Господеви и реша: никакоже, Господи, да не погибнем души ради человека сего, и не даждь на нас крове праведныя: зане Ты, Господи, якоже восхотел, сотворил еси. 15 И взяша Иону и ввергоша его в море, и преста море от волнения своего. 16 И убояшася мужие страхом великим Господа и пожроша жертву Господеви и помолишася молитвами. === 2 === 1 И повеле Господь киту великому пожрети Иону. И бе Иона во чреве китове три дни и три нощи. 2 И помолися Иона ко Господу Богу своему от чрева китова 3 и рече: возопих в скорби моей ко Господу Богу моему, и услыша мя из чрева адова вопль мой, услышал еси глас мой: 4 отвергл мя еси во глубины сердца морскаго, и реки обыдоша мя вся высоты Твоя и волны Твоя мне преидоша. 5 И аз рех: отринуся от очию Твоею: еда приложу призрети ми ко храму святому Твоему? 6 Возлияся на мя вода до души моея, бездна обыде мя последняя, понре глава моя в разселины гор, 7 снидох в землю, еяже вереи ея заклепи вечнии: и да взыдет из истления живот мой к Тебе, Господи Боже мой. 8 Внегда скончаватися от мене души моей, Господа помянух, и да приидет к Тебе молитва моя ко храму святому Твоему. 9 Хранящии суетная и ложная милость свою оставиша: 10 аз же со гласом хваления и исповедания пожру Тебе, елика обещах, воздам Тебе во спасение мое Господеви. 11 И повеле Господь китови, и изверже Иону на сушу. === 3 === 1 И бысть слово Господне ко Ионе вторицею глаголя: 2 востани и иди в Ниневию град великий, и проповеждь в нем по проповеди преждней, юже Аз глаголах тебе. 3 И воста Иона и иде в Ниневию, якоже глагола Господь. Ниневиа же бяше град велик Богу, яко шествия пути триех дний. 4 И начат Иона входити во град, яко шествие пути дне единаго, и проповеда и рече: еще три дни, и Ниневиа превратится. 5 И вероваша мужие Ниневийстии Богови, и заповедаша пост, и облекошася во вретища от велика их даже до мала их. 6 И дойде слово ко царю Ниневийскому, и воста с престола своего и сверже ризы своя с себе, и облечеся во вретище и седе на пепеле. 7 И проповедася и речено бысть в Ниневию от царя и вельмож его глаголющих: человецы и скоти, и волове и овцы да не вкусят ничесоже, ни да пасутся, ниже воды да пиют. 8 И облекошася во вретища человецы и скоти и возопиша прилежно к Богу, и возвратися кийждо от пути своего лукаваго и от неправды сущия в руках их, глаголюще: 9 кто весть, аще раскается и умолен будет Бог, и обратится от гнева ярости Своея, и не погибнем? 10 И виде Бог дела их, яко обратишася от путий своих лукавых, и раскаяся Бог о зле, еже глаголаше сотворити им, и не сотвори. === 4 === 1 И опечалися Иона печалию великою и смутися, 2 и помолися ко Господу и рече: о Господи, не сия ли убо словеса моя, яже глаголах, еще сущу ми на земли моей? Сего ради предварих бежати в Фарсис, зане разумех, яко милостив Ты еси и щедр, долготерпелив и многомилостив, и каяйся о злобах (человеческих): 3 и ныне, Владыко Господи, приими душу мою от мене, яко уне ми умрети, нежели жити. 4 И рече Господь ко Ионе: аще зело опечалился еси ты? 5 И изыде Иона из града и седе прямо града, и сотвори себе кущу и седяще под нею в сени, дондеже увидит, что будет граду. 6 И повеле Господь Бог тыкве, и возрасте над главою его, еже осенити его от злых его. И возрадовася Иона о тыкве радостию великою. 7 И повеле Господь Бог червию раннему во утрие, и подяде тыкву, и изсше. 8 И бысть вкупе внегда возсияти солнцу, и повеле Бог ветру знойну жегущу, и порази солнце на главу Ионину, и малодушствоваше и отрицашеся души своея и рече: 9 уне ми умрети, нежели жити. И рече Господь Бог ко Ионе: зело ли опечалился еси ты о тыкве? И рече (Иона): зело опечалихся аз даже до смерти. 10 И рече Господь: ты оскорбился еси о тыкве, о нейже не трудился еси, ни воскормил еси ея, яже родися об нощь и об нощь погибе: 11 Аз же не пощажду ли Ниневии града великаго, в немже живут множайшии неже дванадесять тем человек, иже не познаша десницы своея, ниже шуйцы своея, и скоти их мнози? == Книга пророка Михея == === 1 === 1 Слово Господне, еже бысть ко Михею Морасфитину, во дни Иоафама и Ахаза и Езекии царей Иудиных, о нихже виде о Самарии и о Иерусалиме. 2 Слышите, людие вси, словеса, и внемли, земле и вси иже на ней, и будет Господь Бог в вас в послушествование, Господь от дому святаго Своего. 3 Понеже, се, Господь исходит от места Своего, и снидет и наступит на высоты земныя, 4 и поколеблются горы под Ним, и юдоли растают яко воск от лица огня и яко вода сходящи со устремлением. 5 Нечестия ради Иаковля вся сия и греха ради дому Израилева. Кое нечестие дому Иаковлю? Не Самариа ли? И кий грех дому Иудина? Не Иерусалим ли? 6 И положу Самарию во овощное хранилище селное и в сад винограда, и развергу в пропасть камение ея, и основания ея открыю: 7 и вся изваянная ея сокрушат, и вся мзды ея запалят огнем, и вся кумиры ея положу в пагубу: понеже от найма блуда собра и от найма блужения соврати. 8 Сего ради возрыдает и восплачется, пойдет боса и нага, сотворит плачь аки змиев и рыдание аки дщерей сиринских: 9 яко одержа язва ея, понеже прииде даже до Иуды и коснуся до врат людий моих даже до Иерусалима. 10 Уже в Гефе, не величайтеся, и Иенакимляне, не сограждайте из дому на посмеяние, перстию посыплите посмеяние ваше. 11 Обитающая добре во градех своих, не изыде живущая в Сеннааре, плачитеся дому (сущаго) близ ея, приимет от вас язву болезней. 12 Кто нача во благая вселившейся в болезнех, яко снидоша злая от Господа на врата Иерусалимля, 13 шум колесниц и конников: живущая в Лахисе началница греха та есть дщери Сиони, яко в тебе обретошася нечестия Израилева. 14 Сего ради даст посылаемыя даже до наследия Гефова, домы суетны, вотще быша царем Израилевым, 15 дондеже наследники приведу тебе, живущая в Лахисе, наследие даже до Одоллама приидет, слава дщере Сиони. 16 Оброснися и остризися по чадех своих младых: разшири оброснение твое яко орел, понеже пленени быша от тебе. === 2 === 1 Быша помышляюще труды и делающе злая на ложах своих, и купно со днем совершаху тая, понеже не воздвигоша к Богу рук своих: 2 и желаху сел, и грабляху сирот, и домы отимаху, и расхищаху мужа и дом его, и мужа и наследие его. 3 Сего ради сия глаголет Господь: се, Аз помышляю на племя сие злая, от нихже не подвигнете вый ваших и не пойдете прости внезапу, яко время зло есть. 4 В той день приимется на вы притча, и восплачется плачь с песнию, глаголющь: бедство пострадахом: часть людий моих измерися ужем, и не бе возбраняяй его, еже отвратитися: села ваша разделена быша. 5 Сего ради не будет тебе вмещущь ужа в жребии в сонме Господни. 6 Не плачитеся слезами, ниже да слезят о сих: не отвержет бо укоризны 7 глаголяй: дом Иаковль разгнева Дух Господень: не сия ли суть начинания Его? Не словеса ли Его суть добра с ним, и правии ходиша? 8 И прежде людие Мои во вражду сопротивишася, противу миру своему: кожу его одраша, еже отяти упование, сокрушение ратное: 9 сего ради старейшины людий Моих извергутся из домов сладости своея, злых ради начинаний своих отриновени быша. Приближитеся горам вечным: 10 востани и пойди, яко несть тебе сей покой: нечистоты ради, истлесте тлением, 11 прогнастеся ни кимже гоними: дух постави лжу, искапа тебе в вино и пиянство: и будет, от капли людий сих, 12 собираемь соберется Иаков со всеми: приемяй прииму оставших Израилевых, вкупе положу возвращение его, аки овцы в скорби, яко паству посреде ложа их: изскочат от человек. 13 Взыди просечением пред лицем их: просекоша, и проидоша врата, и изыдоша ими. И изыде царь их пред лицем их, Господь же Вождь их будет. === 3 === 1 И речет: слышите убо сия, власти дому Иаковля и оставшии дому Израилева: не вам ли есть еже разумети суд? 2 Ненавидящии добра, а ищущии зла, похищающии кожы их с них и плоти их от костей их: 3 якоже объядоша плоти людий Моих, и кожы их от костей их одраша, и кости их столкоша и содробиша яко плоти в коноб и яко мяса в горнец: 4 тако возопиют ко Господу, и не послушает их и отвратит лице Свое от них в то время, понеже слукавноваша в начинаниих своих на Ня. 5 Сия глаголет Господь на пророки льстящыя людий Моих, угрызающыя зубы своими и проповедающыя мир на них, и не вдася во уста их, возставиша на них рать: 6 сего ради нощь будет вам от видения, и тма будет вам от волхвования, и зайдет солнце на пророки, и померкнет на ня день: 7 и усрамятся видящии сония, и посмеяни будут волсви, и возглаголют на них вси сии, зане не будет послушаяй их. 8 Аще аз не наполню силы Духом Господним и судом и силою, еже возвестити Иакову нечестия его и Израилеви грехи его. 9 Слышите сия, старейшины дому Иаковля и оставшии дому Израилева, гнушающиися судом и вся правая развращающии, 10 созидающии Сиона кровьми и Иерусалима неправдами: 11 старейшины его на дарех суждаху, и жерцы его на мзде отвещаваху, и пророцы его на сребре волхвоваху, и на Господе почиваху, глаголюще: не Господь ли в нас есть? Не приидут на ны злая. 12 Сего ради вас дела Сион якоже нива изорется, и Иерусалим яко овощное хранилище будет, и гора дому якоже луг дубравный. === 4 === 1 И будет в последния дни явлена гора Господня, уготована над верхи гор, и вознесется выше холмов, и потщатся к ней людие, 2 и приидут языцы мнози и рекут: приидите, взыдем на гору Господню и в дом Бога Иаковля: и покажут нам путь Его, и пойдем по стезям Его: яко от Сиона изыдет закон, и слово Господне из Иерусалима, 3 и разсудит среде людий многих и изобличит языки крепки даже до земли дальния: и раскуют мечы своя на рала и сулицы своя на серпы, и не ктому возмет язык на язык меча, и не научатся ксему воевати. 4 И почиет кийждо под лозою своею и кийждо под смоковницею своею, и не будет устрашающаго, зане уста Господа Вседержителя глаголаша сия. 5 Яко вси людие пойдут кийждо в путь свой, а мы пойдем во имя Господа Бога нашего в век и далечае. 6 В той день, глаголет Господь, соберу сокрушенную, и отриновенную прииму, и ихже отринух: 7 и положу сокрушенную во останок и отриновенную в язык крепок, и воцарится Господь над ними в горе Сионе отныне и до века. 8 И ты, столпе паствы мгляный, дщи Сионя, к тебе приидет и внидет власть первая, царство из Вавилона дщери Иерусалимли. 9 И ныне вскую познала еси зло? Не бе ли тебе царя? Или совет твой погибе, яко обыдоша тя болезни, аки раждающия? 10 Болезнуй и мужайся и приближайся, дщи Сионя, яко раждающая: зане ныне изыдеши из града и вселишися на поли и дойдеши Вавилона: оттуду изимет тя и оттуду избавит тя Господь Бог твой от руки враг твоих. 11 И ныне собрашася на тя языцы мнози глаголющии: порадуемся: и воззрят на Сион очи наши. 12 Сии же не разумеша помышления Господня и не домыслишася совета Его, яко собра их аки снопы гуменныя. 13 Востани и измлати их, дщи Сионя, яко роги твоя положу железны и пазнокти твоя положу медяны, и истончиши люди многи, и возложиши Господеви множество их и крепость их Господеви всея земли. === 5 === 1 Ныне оградится дщи Ефремова ограждением, рать учини на вы, жезлом поразят о челюсть племен Израилевых. 2 И ты, Вифлееме, доме Ефрафов, еда мал еси, еже быти в тысящах Иудиных? Из тебе бо Мне изыдет Старейшина, Еже быти в Князя во Израили, исходи же Его из начала от дний века. 3 Сего ради даст я, до времене раждающия породит, и прочии от братии их обратятся к сыном Израилевым. 4 И станет, и узрит, и упасет паству Свою крепостию Господь, и в славе имене Господа Бога Своего пребудут: зане ныне возвеличится даже до конец земли. 5 И будет Сей мир, егда Ассур приидет на землю вашу, и егда взыдет на страну вашу, и востанут нань седмь пастырей и осмь язв человеческих, 6 и упасут Ассура оружием и землю Невродову копиями ея, и избавит от Ассура, егда приидет на землю вашу и егда вступит на пределы вашя. 7 И будет останок Иаковль в языцех среде людий многих, аки роса от Господа падающи и яко агнцы на злаце, яко да не соберется ни един, ниже постоит в сынех человеческих. 8 И будет останок Иаковль в языцех среде людий многих, аки лев в скотех в дубраве и яко львичищь в стадех овчих, якоже егда пройдет, и отлучив восхитит, и не будет изимающаго. 9 Вознесется рука твоя на оскорбляющыя тя, и вси врази твои потребятся. 10 И будет в той день, глаголет Господь, потреблю кони твоя из среды твоея и погублю колесницы твоя, 11 и потреблю грады земли твоея и развергу вся твердыни твоя, 12 и отвергу волхвования твоя от руку твоею, и волхвующии не будут в тебе: 13 и потреблю изваянная твоя и кумиры твоя из среды тебе, и посем да не поклонишися делом рук твоих: 14 и посеку дубравы от среды тебе и погублю грады твоя: 15 и сотворю со гневом и с яростию месть языком, понеже не послушаша Мене. === 6 === 1 Слышите, яже глагола Господь: востани, судися с горами, и да слышат холми глас твой. 2 Слышите, горы, суд Господень, и дебри основания земли, яко суд Господень к людем Его, и со Израилем претися имать. 3 Людие Мои, что сотворих вам, или чим оскорбих вас, или чим стужих вам? Отвещайте Ми. 4 Зане изведох вас из земли Египетския и из дому работы избавих вас, и послах пред вами Моисеа и Аарона и Мариам. 5 Людие Мои, помяните убо, что совеща на вы Валак царь Моавитский, и что ему отвеща Валаам сын Веоров, от Сития до Галгал? Яко да познается правда Господня. 6 В чем постигну Господа, срящу Бога моего Вышняго? Срящу ли Его со всесожжением, телцы единолетными? 7 Еда приимет Господь в тысящах овнов, или во тмах козлищ тучных? Дам ли первенцы моя о нечестии моем, плод утробы моея, за грехи души моея? 8 Возвестися бо тебе, человече, что добро, или чесого Господь ищет от тебе, разве еже творити суд и любити милость и готову быти еже ходити с Господем Богом твоим? 9 Глас Господень граду призовется, и спасет боящыяся имене Его: послушай, племя, и кто украсит град? 10 Еда огнь и дом беззаконнаго собирая имения беззаконная и со укоризною неправды? 11 Еда оправдится в мериле беззаконник и во вретищи меры неправыя, 12 от нихже богатство свое нечестия наполниша? И живущии в ней глаголаху лжу, и язык их вознесеся во устех их. 13 И Аз начну поражати тя и погублю тя во гресех твоих. 14 Ты ясти будеши и не насытишися, и померкнет в тебе, и совратишися, и не спасешися: и елицы аще избудут, оружию предадятся. 15 Ты посееши, но не пожнеши: ты изгнетеши масличие, но не помажешися маслом: и насадите вино, и не испиете: и погибнут законы людий Моих. 16 И хранил еси оправдания Замвриина и вся дела дому Ахаавля, и ходисте в советех их, яко да предам тя в пагубу, и живущыя в ней во звиздание, и укоризны людий приимете. === 7 === 1 У, люте мне! Понеже бых аки собираяй сламу на жатве, и яко пародок во оымании винограда не сущу гроздию, еже ясти первоплодная, яже вожделе душа моя. 2 У, люте мне, душе! Яко погибе благочестивый от земли, и исправляющаго в человецех несть: вси во кровех прятся, кийждо ближняго своего озлобляет озлоблением, 3 на зло руки своя уготовляют: князь просит, и судия мирная словеса глаголет, желание души его есть: и отиму благая их, 4 яко моль поядаяй, и ходяй по правилам в день стражбы. У, люте! У, люте! Отмщения Твоя приспеша, ныне будут плачы их. 5 Не верите другом, ни надейтеся на старейшины, и от сожителницы твоея хранися, еже сказати ей что: 6 понеже сын безчестит отца, дщерь востанет на матерь свою и невеста на свекровь свою, врази вси мужу домашнии его. 7 Аз же ко Господеви воззрю, потерплю Бога спаса моего, услышит мя Бог мой. 8 Не радуйся о мне, враждебница моя, яко падох, и востану: зане аще сяду во тме, Господь осветит мя. 9 Гнев Господень стерплю, яко согреших Ему, дондеже оправдит прю мою и сотворит суд мой: и изведет мя на свет, и узрю правду Его. 10 И узрит враждебница моя, и облечется в студ глаголющая ко мне: где есть Господь Бог твой? Очи мои воззрят на ню, ныне будет в попрание аки кал на путех. 11 День глаждения плинфа: изглаждение твое день оный, и сотрет законы твоя день оный. 12 И гради твои приидут на поравнение и в разделение Ассирийско, и гради твои твердии в разделение от Тира даже до реки Сирския, и от моря даже до моря, и от горы даже до горы, дние воды и молвы. 13 И будет земля в пагубу со живущими на ней, от плодов начинаний их. 14 Паси люди Твоя жезлом Твоим, овцы наследия Твоего, вселяющыяся едины в дубраве среде Кармила, попасут Васанитиду и Галаадитиду, якоже дние века. 15 И по днем исхода твоего из Египта узрите чудесная. 16 Узрят языцы и усрамятся от всея крепости своея, руце возложат на уста своя, и уши их оглохнут, 17 полижут персть яко змиеве плежуще по земли, смятутся во облежении своем: о Господе Бозе нашем ужаснутся и убоятся от Тебе. 18 Кто Бог якоже Ты, отемляй беззакония и оставляяй нечестия останком наследия Своего? И не удержа гнева Своего во свидение, яко Волитель милости есть. 19 Той обратит и ущедрит ны, и погрузит неправды нашя и ввержет в глубины морския вся грехи нашя, 20 даст истину Иакову, (и) милость Аврааму, якоже клялся еси отцем нашым во дни первыя. == Книга пророка Наума == === 1 === 1 Пророчество о Ниневии: книга видения Наума сына Елкесеева. 2 Бог ревнив и мстяй Господь, мстяй Господь с яростию, Господь мстяй сопостатом Своим и потребляяй сам враги Своя. 3 Господь долготерпелив, и велика крепость Его, и очищаяй не очистит Господь: в скончании и трусе путь Его, и облацы прах ног Его: 4 запрещаяй морю и изсушаяй е и вся реки опустошаяй. Умалися Васанитида и Кармил, и процветающая Ливана оскудеша: 5 горы потрясошася от Него, и холми поколебашася, и ужасеся земля от лица Его, вселенная и вси живущии на ней. 6 От лица гнева Его кто постоит? И кто сопротивится во гневе ярости Его? Ярость Его растаевает власти, и камение сотрошася от Него. 7 Благ Господь терпящым Его в день скорбения, и знаяй боящыяся Его: 8 и в потопе пути скончание сотворит: востающыя и враги Его поженет тма. 9 Что помышляете на Господа? Скончание Сам сотворит, не отмстит дважды купно в скорби: 10 понеже до основания своего оляденеет, и аки блющь и оплетающься снеден будет, и аки трость сухоты полна. 11 Из тебе изыдет помысл на Господа злый, совещаваяй сопротивная. 12 Сия глаголет Господь: обладаяй водами многими, и сице разступятся, и слух твой не услышится ктому: 13 и ныне сокрушу жезл его от тебе и узы твоя расторгну. 14 И заповесть о тебе Господь, не разсеется от имене твоего ктому: от дому бога твоего потреблю изваянная и слиянная положу гроб твой, яко скори (есте). 15 Се, на горах ноги благовествующаго и возвещающаго мир: празднуй, Иудо, праздники твоя, воздаждь обеты твоя, зане не приложат ктому еже проити сквозе тебе во обетшание: скончася и извержеся. === 2 === 1 Взыде вдыхаяй в лице твое, отемляй от оскорбления: усмотри путь, укрепи чресла, возмужай крепостию зело: 2 понеже отврати Господь укоризну Иаковлю, якоже укоризну Израилеву: зане отрясающии отрясоша я и лозы их растлиша. 3 Оружия силы их от человек, мужы сильныя играющыя во огни: брозды колесниц их в день уготования его, и конницы возмятутся на путех, 4 и смятутся колесницы и сплетутся на стогнах: вид их яко свещы огненны, и яко молния протекающая. 5 И помянутся старейшины их, и побегнут в день, и изнемогут в пути своем, и потщатся на забрала его, и уготовят предния стражбы своя. 6 Врата градная отверзошася, и царства падоша, и имение открыся. 7 Сия же восхождаше, и рабыни ея ведяхуся, яко голубицы воркующя в сердцах своих: 8 и Ниневиа, аки купель водная воды ея, и тии бежаще не сташа, и не бе взирающаго. 9 Расхищаху сребро, расхищаху злато, и не бяше конца имения ея: отяготишася паче всех сосудов вожделенная ея. 10 Истрясение и вострясение, и воскипение и сердца сокрушение, и разслабление колен и болезни по всем чреслом, и лице всех, аки опаление котла. 11 Где есть виталище львов и пажить сущая львичищем? Камо иде лев, еже влезти тамо львичищу, и не бяше устрашающаго. 12 Лев восхити доволная львичищем своим и удави львицам своим, и наполни ловитвы гнездо свое и виталище свое похищения. 13 Се, Аз на тя, глаголет Господь Вседержитель, и пожгу дымом множество твое, и львы твоя пояст оружие: и потреблю от земли ловитву твою, и не услышатся ктому дела твоя. === 3 === 1 О, граде кровей, весь лживый, полн неправды! Не осяжется ловитва. 2 Глас бичей и глас труса колес, и коня текуща и колесницы шумящия, 3 и конника едуща, и блистающа меча и блистающих оружий, и множества язвеных и тяжкаго падения, и не бяше конца языком ея: и изнемогут в телесех своих от множества блужения. 4 Блудница добра и приятна, началница волхвований, продающая языки во блужении своем и племена в чародеяниих своих. 5 Се, Аз на тя, глаголет Господь Бог Вседержитель, и открыю задняя твоя к лицу твоему, и покажу языком срамоту твою и царствам безчестие твое, 6 и возвергу на тя огнушение по нечистотам твоим, и положу тя в притчу. 7 И будет, всяк видяй тя снидет с тебе и речет: окаянная Ниневиа, кто постенет по ней? Откуду взыщу утешение ей? 8 Уготовити часть, устроити струну, уготовити часть Аммону, живущая в реках, вода окрест ея, ейже начало море, и вода забрала ея: 9 и Ефиопиа крепость ея и Египет, и несть конца бегству твоему: и Фуд и Ливиане быша помощницы ея. 10 И сия в преселение пойдет пленница, и младенцы ея разбиют в началех всех путий ея, и о всех славных ея вергут жребия, и вси воеводы ея свяжутся путы. 11 И ты упиешися и будеши презрена, и ты сама себе взыщеши помощи от враг. 12 Вся твердели твоя яко смоквичие стражу имущее: аще поколеблются, впадут во уста ядущаго. 13 Се, людие твои, яко жены в тебе: врагом твоим отворяема отворятся врата земли твоея, и пояст огнь вереи твоя. 14 Воду одержания восхити себе сама и утверди твердели твоя: влези в брение и поперися в плевах, утверди паче плинфа. 15 Тамо пояст тя огнь, потребит тя мечь, поядят тя аки прузи, и отягчаеши аки мшица. 16 Умножила еси купли твоя паче звезд небесных: мшицы устремишася и возлетеша. 17 Возскочи аки пруг смесник твой, аки акрида восходящая на ограду в день студеный: солнце взыде, и отлете, и не познася место ея: люте им! 18 Воздремашася пастуси твои, царь Ассирийск успи сильныя твоя, воздвигошася людие твои на горы, и не бяше приемлющаго. 19 Несть цельбы сокрушению твоему, разгореся язва твоя: вси слышащии весть твою восплещут руками о тебе: понеже на кого не найде злоба твоя всегда? == Книга пророка Аввакума == === 1 === 1 Видение, еже виде Аввакум пророк. 2 Доколе, Господи, воззову, и не услышиши? Возопию к Тебе обидимь, и не избавиши? 3 Вскую мне показал еси труды и болезни, смотрити страсть и нечестие? Противу мне бысть суд, и судия вземлет. 4 Сего ради разорися закон, и не производится в совершение суд: яко нечестивый преобидит праведнаго, сего ради изыдет суд развращен. 5 Видите, презорливии, и смотрите, и чудитеся чудесем и изчезните: понеже дело Аз делаю во днех ваших, емуже не имате веровати, аще кто исповесть вам. 6 Зане, се, Аз возставляю Халдеи, язык горький и борзый, ходящий по широтам земли, еже наследити селения не своя: 7 страшен и явлен есть, от него суд его будет, и взятие его от него изыдет: 8 и изскочат паче рысей кони его и быстрее волков аравийских, и поедут конницы его и устремятся издалеча и полетят аки орел готов на ядь. 9 Скончание на нечестивыя приидет, сопротивляющыяся лицам их противу, и соберет яко песок пленники. 10 И той над царьми посмеется, и мучителие играние его, и той над всякою тверделию поругается, и обложит вал, и возобладает ею. 11 Тогда пременит дух и прейдет и помолится: сия крепость богу моему. 12 Неси ли Ты искони, Господи Боже, Святый мой? И не умрем. Господи, на суд учинил еси его, и созда мя обличати наказание его. 13 Чисто око еже не видети зла и взирати на труды болезненныя: вскую призираеши на презорливыя? Премолчаваеши, егда пожирает нечестивый праведнаго? 14 И сотвориши человеки яко рыбы морския и яко гады не имущыя старейшины. 15 Скончание удою восхити и привлече его мрежею и собра его сетьми своими: сего ради возвеселится и возрадуется сердце его: 16 сего ради пожрет мрежи своей и покадит сеть свою, яко теми разблажи часть свою и пищи своя избранныя: 17 сего ради прострет мрежу свою и присно избивати языков не пощадит. === 2 === 1 На стражи моей стану, и взыду на камень, и посмотрю еже видети, что возглаголет во мне и что отвещаю на обличение мое. 2 И отвеща Господь ко мне и рече: впиши видение, и яве на дске, яко да постигнет читаяй я. 3 Зане еще видение на время, и просияет в конец, а не вотще: аще умедлит, потерпи ему, яко идый приидет и не умедлит. 4 Аще усумнится, не благоволит душа моя в нем: праведник же (мой) от веры жив будет. 5 Презорливый же и обидливый муж и величавый ничесоже скончает: иже разшири аки ад душу свою, и сей яко смерть ненасыщен: и соберет к себе вся языки и приимет к себе вся люди. 6 Не сия ли вся на него притчу приимут и гадание в повесть его? И рекут: горе умножающему себе не сущая его, доколе? И отягчающему узу свою тяжце. 7 Яко внезапу востанут угрызающии его, и ободрятся наветницы твои, и будеши в разграбление им. 8 Понеже ты пленил еси страны многи, пленят тя вси оставшии людие крове ради человечи и нечестия земли и града и всех живущих на ней. 9 Горе лихоимствующым лихоимство злое дому своему, еже учинити на высоте гнездо свое, еже исторгнути от руки злых. 10 Умыслил еси стыдение дому своему, скончал еси люди многи, и согреши душа твоя. 11 Зане камень из стены возопиет, и хрущь от древа возглаголет сия: 12 у, люте созидающему град кровьми и уготовляющему град неправдами. 13 Не сия ли суть от Господа Вседержителя? И оскудеша людие мнози огнем, и языцы мнози изнемогоша: 14 яко наполнится вся земля ведения славы Господни, якоже вода многа в мори покрыет я. 15 Горе напаяющему подруга своего развращением мутным, и упоявающему, яко да взирает к пещерам их. 16 Сытость безчестия от славы испий и ты: сердце, поколеблися и сотряснися: обыде о тебе чаша десницы Господни, и собрася безчестие на главу твою. 17 Занеже нечестие Ливаново покрыет тя, и страсть зверей престрашит тя, крове ради человечи и нечестия земли и града и всех живущих на ней. 18 Что пользует изваяное, яко изваяша е? Создаша слияние, мечтание ложное, яко упова создавый на создание свое, сотворити кумиры немыя. 19 У, люте глаголющему ко древу: ободрися, востани: и камению: возвысися: и то есть мечтание, и сие есть скование злата и сребра, и всякаго духа несть в нем. 20 Господь же во храме святем Своем: да убоится от лица Его вся земля. === 3 === 1 Молитва Аввакума пророка с песнию. Господи, услышах слух Твой и убояхся: 2 Господи, разумех дела Твоя и ужасохся: посреде двою животну познан будеши: внегда приближитися летом, познаешися: внегда приити времени, явишися: внегда смутитися души моей во гневе, милость (Твою) помянеши. 3 Бог от юга приидет, и Святый из горы Приосененныя чащи: покры небеса добродетель Его, и хваления Его исполнь земля. 4 И сияние Его яко свет будет: рози в руках Его, и положи любовь державну крепости Своея. 5 Пред лицем Его предидет слово, и изыдет на поле при ногу Его. 6 Ста, и подвижеся земля: призре, и растаяша языцы: стрышася горы нуждею, и растаяша холми вечнии, шествия вечная Его, 7 за труд видеша селения Ефиопская, убоятся и кровы земли Мадиамския. 8 Еда в реках прогневаешися, Господи? Еда в реках ярость Твоя? Или в мори устремление Твое? Яко всядеши на кони Твоя, и яждение Твое спасение. 9 Наляцая налячеши лук Твой на скиптры, глаголет Господь: реками разсядется земля. 10 Узрят тя и поболят людие, расточая воды шествия Его: даде бездна глас свой, высота привидения своя: 11 воздвижеся солнце, и луна ста в чине своем: во свете стрелы Твоя пойдут, в блистании молний оружий Твоих. 12 Прещением умалиши землю и яростию низложиши языки. 13 Изшел еси во спасение людий Твоих, спасти помазанныя Твоя, вложил еси во главы беззаконных смерть, воздвигл еси узы даже до выи в конец: 14 разсекл еси во изступлении главы сильных, сотрясутся в ней: разверзут узды своя яко снедаяй нищий тай. 15 И навел еси на море кони Твоя, смущающыя воды многи. 16 Сохранихся, и убояся сердце мое от гласа молитвы устен моих, и вниде трепет в кости моя, и во мне смятеся крепость моя: почию в день скорби моея, да взыду в люди пришелствия моего. 17 Зане смоковь не плодопринесет, и не будет рода в лозах: солжет дело маслинное, и поля не сотворят яди: оскудеша овцы от пищи, и не будет волов при яслех. 18 Аз же о Господе возрадуюся, возвеселюся о Бозе спасе моем. 19 Господь Бог мой сила моя, и учинит нозе мои на совершение, и на высокая возводит мя, еже победити ми в песни Его. == Книга пророка Софонии == === 1 === 1 Слово Господне, иже бысть к Софонии сыну Хусиину, сыну Годолиину, Амориину, Езекиину, во дни Иосии сына Амоня, царя Иудина. 2 Оскудением да оскудеют вся от лица земли, глаголет Господь: 3 да оскудеет человек и скоти, да оскудеют птицы небесныя и рыбы морския, и да изнемогут нечестивии, и изиму беззаконныя от лица земли, глаголет Господь. 4 И простру руку Мою на Иуду и на вся живущыя во Иерусалиме: и изиму от места сего имена Ваалова и имена жреческа со жерцами, 5 и покланяющихся на покровех воинству небесному и кленущихся Господем и кленущихся царем своим, 6 и укланяющихся от Господа и не ищущих Господа и не придержащихся Господа. 7 Убойтеся от лица Господа Бога, зане близ день Господень, яко уготова Господь жертву Свою и освяти званныя Своя. 8 И будет в день жертвы Господни: и отмщу на князи и на дом царский и на вся оболченныя во одеяния чуждая, 9 и отмщу яве на вся предвратныя в день той, исполняющыя храм Господа Бога своего нечестием и лестию. 10 И будет в день он, глаголет Господь, глас вопля от врат избодающих и плачь от вторых и сотрение велие от холмов. 11 Плачите, живущии в посеченней, яко уподобишася вси людие ханаану, и потребишася вси величающиися сребром. 12 И будет в той день, изыщу Иерусалима со светилником и отмщу на мужы нерадящыя о стражбах своих, глаголющыя в сердцах своих: не имать блага сотворити Господь, ниже имать озлобити. 13 И будет сила их в расхищение и домы их в разорение: и созиждут жилища и не имут пожити в них, и насадят винограды и не имут пити вина их: 14 яко близ день Господень великий, близ и скор зело, глас дне Господня горек и жесток учинися. 15 Силен день гнева день той, день скорби и нужды, день безгодия и изчезновения, день тмы и мрака, день облака и мглы, 16 день трубы и вопля на грады твердыя и на углы высокия. 17 И оскорблю человеки, и пойдут яко слепи, зане Господеви прегрешиша, и излиется кровь их яко персть, и плоти их яко лайна: 18 и сребро их и злато их не возможет изяти их в день гнева Господня, и огнем рвения Его поядена будет вся земля: зане скончание и тщание сотворит на вся живущыя на земли. === 2 === 1 Соберитеся и свяжитеся, язык ненаказанный, 2 прежде неже быти вам якоже цвету мимоходящу в день, прежде неже приити на вы гневу Господню, прежде неже приити на вы дню ярости Господни. 3 Взыщите Господа, вси смиреннии земли, суд содевайте и правды взыщите, (взыщите кротости) и отвещайте я, яко да покрыетеся в день гнева Господня. 4 Зане Газа расхищена будет, и Аскалон во изчезновение будет: и Азот в полудни отвержется, и Аккарон искоренится. 5 Горе живущым на ужи морстем, пришелцы Критстии: слово Господне на вас, Ханаане, земле иноплеменников, и погублю вы от жилища: 6 и будет Крит пажить стадам и ограда овцам, 7 и будет уже морское оставшым дому Иудина: на них пожируют в домех Аскалоних, к вечеру витати имут от лица сынов Иудиных, яко присети их Господь Бог их и возврати плен их. 8 Слышах поношения Моавля и укоризны сынов Аммоних, о нихже поношаху людем Моим и величахуся на пределы Моя. 9 Сего ради живу Аз, глаголет Господь Сил, Бог Израилев: зане Моав яко Содома будет, и сынове Аммони яко Гоморра, и Дамаск оставлен яко стог гуменный и разорен во век: и прочии людий Моих расхитят я, и оставшии языка Моего наследят их. 10 Сие им за досаждение их, зане поносиша и возвеличишася на люди Господа Вседержителя. 11 Явится Господь на них и потребит вся боги языков земных: и поклонятся Ему кийждо от места своего, вси острови язычестии. 12 И вы, Мурини, язвени оружием Моим будете. 13 И прострет руку Свою на север и погубит Ассирианина, и положит Ниневию во изчезновение безводно, яко пустыню: 14 и пожируют посреде ея стада и вси зверие земнии, и хамелеоны и ежеве во гнездах ея вогнездятся: и зверие возвыют в разселинах ея, и вранове во вратех ея, зане кедр возношение ея. 15 Сей град презорливый, живяй на уповании, глаголяй в сердцы своем: аз есмь, и несть по мне еще: како бысть во изчезновение, пажить зверем? Всяк мимоходяй сквозе его позвиждет и воздвигнет руце свои. === 3 === 1 О, светлый и избавленный граде, голубице! 2 Не услыша гласа, не прият наказания, на Господа не упова и к Богу своему не приближися. 3 Князи его в нем, яко львы рыкающе, судии его яко волцы аравийстии, не оставляху на утро. 4 Пророцы его ветроносцы, мужие презорливи: священницы его сквернят святая и нечествуют в закон. 5 Господь же праведен посреде его и не имать сотворити неправды: утро утро даст суд Свой в свет: и не укрыся, и не весть неправды во истязании, ниже в распри обиды. 6 В растление низложих величавыя, изчезоша углы их: опустошу пути их весьма, еже не проходити: изчезоша гради их, занеже ни единому быти, ни жити. 7 Рех: обаче убойтеся Мене и приимите наказание, и не имате потребитися от очию его, за вся елика отмстих на нем: готовися, утренюй, истле все листвие их. 8 Сего ради потерпи Мене, глаголет Господь, в день воскресения моего во свидетелство: зане суд Мои в сонмища языков еже прияти царей, еже излияти на ня гнев Мой весь, гнев ярости Моея: зане огнем рвения Моего поядена будет вся земля. 9 Яко тогда обращу к людем язык в род его, еже призывати: всем имя Господне, работати Ему под игом единем. 10 От конец рек Ефиопских прииму молящыя Мя, в разсеянных Моих принесут жертвы Мне. 11 В день он не имаши постыдитися от всех начинаний твоих, имиже нечествовал еси в Мя: яко тогда отиму от тебе укоризны досаждения твоего, и ктому не имаши приложити величатися на горе святей Моей. 12 И оставлю в тебе люди кротки и смиренны, и будут благоговети о имени Господни 13 останцы Израилевы, и не сотворят неправды, и не возглаголют суетных, и не обрящется в устех их язык льстив: зане тии пожируют и угнездятся, и не будет устрашаяй их. 14 Радуйся, дщи Сионова, зело, проповедуй, дщи Иерусалимова, веселися и преукрашайся от всего сердца твоего, дщи Иерусалимля: 15 отят Господь неправды твоя, избавил тя есть из руки враг твоих: воцарится Господь посреде тебе, и не узриши зла ктому. 16 Во время оно речет Господь Иерусалиму: дерзай, Сионе, да не ослабеют руце твои. 17 Господь Бог твой в тебе, Сильный спасет тя, наведет на тя веселие и обновит тя в любви Своей, и возвеселится о тебе во украшении, яко в день праздника. 18 И соберу сотреныя твоя: горе, кто приимет нань поношение? 19 Се, Аз сотворю в тебе тебе ради, глаголет Господь, во время оно: и спасу утисненную и отриновенную прииму, и положу я в похваление и имениты по всей земли. 20 И постыдятся во время оно, егда добро вам сотворю, и во время, егда прииму вы: зане дам вы имениты и в похваление во всех людех земли, внегда возвращати ми пленение ваше пред вами, глаголет Господь. == Книга пророка Аггея == === 1 === 1 Во второе лето, при Дарии цари, в шестый месяц, в первый (день) месяца, бысть слово Господне рукою Аггеа пророка глаголя: рцы к Зоровавелю Салафиилеву от колена Иудова и ко Иисусу сыну Иоседекову, иерею великому, глаголя: 2 сице глаголет Господь Вседержитель глаголя: людие сии глаголют: не прииде время создати храм Господень. 3 И бысть слово Господне рукою Аггеа пророка глаголя: 4 аще время убо вам есть жити в домех ваших истесаных, храм же мой сей запусте? 5 И ныне сице глаголет Господь Вседержитель: устройте сердца ваша в пути вашя. 6 Сеясте много, и взясте мало: ядосте, и не в сытость: писте, и не в пиянство: облекостеся, и не согрестеся в них: и собираяй мзды собра во влагалище дираво. 7 Сице глаголет Господь Вседержитель: положите сердца ваша в пути вашя, 8 взыдите на гору и усецыте древа, и принесите и созиждите храм, и благоволю в нем и прославлюся, рече Господь. 9 Призресте на многа, и быша мала, и внесосте я в храм, и отдунух я: сего ради сице глаголет Господь Вседержитель: зане храм Мой есть пуст, вы же течете кийждо в дом свой, 10 сего ради удержится небо от росы, и земля оскудит изношения своя, 11 и наведу мечь на землю и на горы, и на пшеницу и на вино и на елей, и на вся, елика износит земля, и на человеки и на скоты и на вся труды рук их. 12 И слыша Зоровавель Салафиилев от колена Иудова, и Иисус Иоседеков, иерей великий, и вси прочии людие глас Господа Бога своего и словеса Аггеа пророка, якоже посла его Господь Бог их к ним, и убояшася людие от лица Господня. 13 И рече Аггей вестник Господень в вестницех Господних людем, глаголя: Аз есмь с вами, глаголет Господь. 14 И воздвиже Господь дух Зоровавеля Салафиилева от колена Иудова и дух Иисуса Иоседекова, иереа великаго, и дух прочиих всех людий: и внидоша и творяху дела во храме Господа Вседержителя Бога своего. === 2 === 1 В двадесять четвертый день месяца шестаго, во второе лето, при Дарии цари, 2 в седмый месяц, в двадесять первый месяца, глагола Господь рукою Аггеа пророка глаголя: 3 рцы ныне к Зоровавелю Салафиилеву от колена Иудова и ко Иисусу сыну Иоседекову, иерею великому, и ко всем прочиим людем, глаголя: 4 кто от вас, иже виде храм сей в славе его прежней? И како вы видите его ныне якоже не суща пред вами? 5 И ныне укрепляйся, Зоровавелю, глаголет Господь, и укрепляйся, Иисусе, сыне Иоседеков, иерею великий, и да укрепляются вси людие земли, глаголет Господь (Вседержитель), и творите: зане Аз с вами есмь, глаголет Господь Вседержитель: 6 слово, еже завещах с вами, егда исходисте из земли Египетския, и дух Мой настоит посреде вас: дерзайте, зане сице глаголет Господь Вседержитель: 7 еще единою Аз потрясу небом и землею, и морем и сушею, 8 и сотрясу вся языки, и приидут избранная всех языков: и исполню храм сей славы, глаголет Господь Вседержитель. 9 Мое сребро и Мое злато, глаголет Господь Вседержитель: 10 зане велия будет слава храма сего последняя паче первыя, глаголет Господь Вседержитель: и на месте сем дам мир, глаголет Господь Вседержитель, и мир души в снабдение всякому зиждущему, еже возставити церковь сию. 11 В двадесять четвертый девятаго месяца, во второе лето при Дарии цари, бысть слово Господне ко Аггею пророку глаголя: 12 сице глаголет Господь Вседержитель: вопроси иереев закона глаголя: 13 аще приимет человек мясо свято вскрай ризы своея, и коснется край ризы его хлеба, или варива, или вина, или масла, или всякаго брашна, еда освятится? И отвещаша священницы и реша: ни. 14 И рече Аггей: аще прикоснется оскверненый или нечистый душею всякому сих, еда осквернится? И отвещаша иерее и реша: осквернится. 15 И отвеща Аггей и рече: сице людие сии, и сице язык сей предо Мною, глаголет Господь, и сице вся дела рук их: и иже аще приближится тамо, осквернится за приятия их утренняя, поболят от лица лукавств своих, и ненавидесте во вратех обличающаго. 16 И ныне положите на сердцах ваших от дне сего и выше, прежде неже положити камень на камени в храме Господни. 17 Кто бысте, егда влагасте в мех ячмене двадесять сат, и быша ячмене десять сат? И входисте в подточилие черпати пятьдесят мер, и быша двадесять. 18 Поразих вы неплодием и ветротлением и градом вся дела рук ваших, и не обратистеся ко Мне, глаголет Господь. 19 Устройте же сердца ваша от сего дне и далее, от двадесять четвертаго дне девятаго месяца и от дне, в оньже основася церковь Господня: положите в сердцах ваших, 20 аще еще познается на гумне, и аще еще виноград, и смокви, и яблонь, и древа масличная не творящая плода? От дне сего благословлю. 21 И бысть слово Господне вторицею ко Аггею пророку в двадесять четвертый месяца глаголя: 22 рцы к Зоровавелю сыну Салафиилеву от колена Иудова глаголя: Аз потрясу небом и землею, и морем и сушею, 23 и превращу престолы царей, и потреблю силу царей языческих, и превращу колесницы и всадники, и снидут кони и всадницы их, кийждо во оружии на брата своего. 24 В той день, глаголет Господь Вседержитель, прииму тя, Зоровавелю Салафиилев, рабе Мой, глаголет Господь, и положу тя яко печать, понеже тя избрах, глаголет Господь Вседержитель. == Книга пророка Захарии == === 1 === 1 Во осмый месяц, втораго лета, при Дарии, бысть слово Господне ко Захарии Варахиину, сыну Аддову, пророку, глаголя: 2 прогневася Господь на отцы вашя гневом велиим, 3 и речеши к ним: сице глаголет Господь Вседержитель: обратитеся ко Мне, глаголет Господь Сил, и обращуся к вам, глаголет Господь Сил. 4 И не будите, якоже отцы ваши, ихже обличаху пророцы прежнии, глаголюще: сице глаголет Господь Вседержитель: отвратитеся от путий ваших лукавых и от начинаний ваших злых: и не послушаша и не вняша послушати Мене, глаголет Господь (Вседержитель). 5 Отцы ваши где суть и пророцы? Еда во век поживут? 6 Обаче словеса Моя и законы Моя приемлете, елика Аз заповедаю в Дусе Моем рабом Моим пророком, иже постигнуша отцев ваших. И отвещаша и реша: якоже устави Господь Вседержитель сотворити нам по путем нашым и по начинанием нашым, тако сотвори нам. 7 В двадесять четвертый первагонадесять месяца, сей есть месяц Сават, во второе лето, при Дарии, бысть слово Господне ко Захарии Варахиину, сыну Аддову, пророку, глаголя: 8 видех нощию, и се, муж всед на коня рыжа, и сей стояше между горами осеняющими, и за ним кони рыжы и сери, и пестри и бели, 9 и рех: что сии, господи? И рече ко мне Ангел глаголяй во мне: аз покажу ти, что суть сия. 10 И отвеща муж стояй между горами и рече ко мне: сии суть, ихже посла Господь оыти землю. 11 И отвещаша Ангелу Господню стоящему между горами и реша: обыдохом всю землю, и се, вся земля населена есть и молчит. 12 И отвеща Ангел Господень и рече: Господи Вседержителю, доколе не имаши помиловати Иерусалима и грады Иудовы, яже презрел еси, сие седмьдесятое лето? 13 И отвеща Господь Вседержитель Ангелу глаголющему во мне глаголголы добры и словеса утешна. 14 И рече ко мне Ангел глаголяй во мне: возопий глаголя: сице глаголет Господь Вседержитель: ревновах по Иерусалиму и Сиону рвением великим, 15 и гневом велиим Аз гневаюся на языки нападающыя: зане Аз убо прогневахся мало, они же налегоша во злая. 16 Сего ради сице глаголет Господь: обращуся ко Иерусалиму щедротами, и храм Мой созиждется в нем, глаголет Господь Вседержитель, и мера протягнется во Иерусалиме еще. 17 И рече ко мне Ангел глаголяй во мне: еще возопий глаголя: сице глаголет Господь Вседержитель: еще прелиятися имут гради благими, и помилует Господь еще Сиона и изберет еще Иерусалима. 18 И возведох очи мои и видех, и се, четыри рози, 19 и рех ко Ангелу глаголющему во мне: что суть сия, господи? И рече ко мне: сии рози расточившии Иуду и Израиля и Иерусалима. 20 И показа ми Господь четыри древоделя. 21 И рех: что сии грядут сотворити, (господи)? И рече: сии рози расточившии Иуду, и Израиля сокрушиша, и никтоже от них воздвиже главы: и изыдоша сии поострити я в руках своих четыри рози, языцы возносящии рог на землю Господню, еже расточити ю. === 2 === 1 И возведох очи мои и видех, и се, муж, и в руце его уже землемерно. 2 И рех к нему: камо грядеши ты? И рече ко мне: размерити Иерусалима, еже видети, колика широта его есть и колика долгота. 3 И се, Ангел глаголяй во мне стояше, и ин Ангел исхождаше во сретение ему 4 и рече к нему глаголя: тецы и рцы к юноши оному глаголя: плодовито населится Иерусалим от множества человеков и скотов, иже посреде его: 5 и Аз буду ему, глаголет Господь, стена огнена окрест и в славу буду посреде его. 6 О, о, бежите от земли северныя, глаголет Господь, зане от четырех ветров небесных соберу вы, глаголет Господь: 7 в Сион спасайтеся, живущии во дщери Вавилонстей. 8 Зане сице глаголет Господь Вседержитель: вслед славы посла Мя на языки пленившыя вас, зане касаяйся вас яко касаяйся в зеницу ока Его: 9 зане, се, Аз наношу руку Мою на ня, и будут корысть работающым им, и уразумеете, яко Господь Вседержитель посла Мя. 10 Красуйся и веселися, дщи Сионя, зане, се, Аз гряду и вселюся посреде тебе, глаголет Господь. 11 И прибегнут языцы мнози ко Господу в той день и будут Ему в люди и вселятся посреде тебе, и уразумееши, яко Господь Вседержитель посла Мя к тебе. 12 И наследит Господь Иуду, участие Свое на земли святей, и изберет еще Иерусалима. 13 Да благоговеет всяка плоть от лица Господня, яко воста из облак святых Своих. === 3 === 1 И показа ми Господь Иисуса, иереа великаго, стояща пред лицем Ангела Господня, и диавол стояше одесную его, еже противитися ему. 2 И рече Господь ко диаволу: да запретит Господь тебе, диаволе, и да запретит Господь тебе, избравый Иерусалима: не се ли, сие яко главня исторжена из огня? 3 Иисус же бе оболчен в ризы гнусны и стояше пред лицем Ангела. 4 И отвеща и рече к стоящым пред лицем его глаголя: отимите ризы гнусныя от него. И рече к нему: се, отях от тебе беззакония твоя и грехи твоя очищу, и облецыте его в подир 5 и возложите кидар чист на главу его. И возложиша кидар чист на главу его и облекоша его в ризы. И Ангел Господень стояше, 6 и засвидетелствоваше Ангел Господень ко Иисусу глаголя: 7 сице глаголет Господь Вседержитель: аще в путех Моих пойдеши и повеления Моя сохраниши, и ты разсудиши храм Мой: и аще сохраниши двор Мой, и дам ти сообращающыяся посреде стоящих сих. 8 Послушай убо, Иисусе, иерею великий, ты и искреннии твои седящии пред лицем твоим, зане мужие дивозрителие суть: зане, се, Аз ввожду раба Моего Востока: 9 зане камень, егоже дах пред лицем Иисусовым, на камени единем седмь очес суть: се, Аз изрыю ров, глаголет Господь Вседержитель, и осяжу всю обиду земли оныя в день един. 10 В день оный, глаголет Господь Вседержитель, созовете кийждо искренняго своего под виноград и под смоковницу. === 4 === 1 И обратися Ангел глаголяй во мне и возведе мя, якоже егда востанет человек от сна своего, 2 и рече ко мне: что ты видиши? И рех: видех, и се, свещник злат весь, и светилце верху его, и седмь светилник верху его, и седмь чашиц светилником верхним его, 3 и две маслины верху его, едина одесную светилца его и едина ошуюю. 4 И вопросих и рех ко Ангелу глаголющему во мне глаголя: что суть сия, господи? 5 И отвеща Ангел глаголяй во мне и рече ко мне глаголя: не разумееши ли, что суть сия? И рех: ни, господи. 6 И отвеща и рече ко мне глаголя: сие слово Господне к Зоровавелю глаголя: не в силе велицей, ни в крепости, но в Дусе Моем, глаголет Господь Вседержитель. 7 Что ты еси, горо великая, пред лицем Зоровавеля, еже исправити? И изнесу камень наследия, равенство благодати, благодать его. 8 И бысть слово Господне ко мне глаголя: 9 руце Зоровавелевы основаша храм сей и руце его совершат его: и уразумееши, яко Господь Вседержитель посла Мя к вам: 10 зане кто укорил тя есть во дни малы? И возрадуются, и увидят камень, иже от чистаго олова, в руку Зоровавеля: седмь сия очеса Господня суть, призирающая на всю землю. 11 И отвещах и рех к нему: что суть две маслины сия, яже одесную свещника и ошуюю? 12 И вопросих вторицею и рех к нему: что суть две ветви масличны, яже в руку двух усекалниц златых возливающих и возношающих чашицы златыя? 13 И рече ко мне глаголя: не веси ли, что суть сия? И рех: ни, господи. 14 И рече: сии два сынове тучности, яже предстоят Господеви всея земли. === 5 === 1 И обратихся и возведох очи мои и видех, и се, серп летящь. 2 И рече ко мне: что ты видиши? И рех: аз вижду серп летящь, в долготу лактей двадесять и в широту десяти лактей. 3 И рече ко мне: сия клятва исходящая на лице всея земли: зане всяк тать от сего даже до смерти отмщен будет, и всяк кленыйся во лжу от сего до смерти отмстится. 4 И изнесу его, глаголет Господь Вседержитель, и внидет в дом татя и в дом кленущагося именем Моим во лжу, и вселится посреде дому его, и скончает его и древа его и камение его. 5 И изыде Ангел глаголяй во мне и рече ко мне: воззри очима твоима и виждь исходящее сие. И рех: 6 что есть? И рече: сия мера исходящая. И рече: сия неправда их по всей земли. 7 И се, талант оловян вземляйся, и се, жена едина седяше посреде меры. 8 И рече: сия есть беззаконие. И верже ю в средину меры и вверже камень оловяный во уста ея. 9 И возведох очи мои и видех, и се, две жены исходящыя, и дух в крилех их, и те имяху крила, яко криле вдодовы: и взяша меру между землею и между небом. 10 И рех ко Ангелу глаголющему во мне: камо сия относят меру? 11 И рече ко мне: создати ей храмину в земли Вавилонстей и уготовати, и положат ю тамо на уготование свое. === 6 === 1 И обратихся и возведох очи мои и видех, и се, четыри колесницы исходящыя из средины двоих гор, горы же те беша горы медяны: 2 в колеснице первей кони рыжы, и в колеснице вторей кони врани, 3 и в колеснице третией кони бели, и в колеснице четвертей кони пестри скори. 4 И отвещах и рех ко Ангелу глаголющему во мне: что суть сия, господи? 5 И отвеща Ангел глаголяй во мне и рече: сия суть четыри ветри небеснии, иже исходят предстати Господу всея земли. 6 В нейже беху кони врани, исхождаху на землю северскую, и белии исхождаху вслед их, и пестрии исхождаху на землю южную, 7 и скории исхождаху и озираху еже оыти землю. И рече: идите, обыдите землю. И обыдоша землю. 8 И возопи и рече ко мне глаголя: се, исходящии на землю северскую упокоиша ярость Мою на земли северстей. 9 И бысть слово Господне ко мне глаголя: 10 приими, яже от плена от князей и от ключимых его и от разумевших его, и внидеши ты в день он в дом Иосии Софониина, грядущаго от Вавилона, 11 и приимеши сребро и злато, и сотвориши венцы, и возложиши на главу Иисусу Иоседекову, иерею великому, 12 и речеши к нему: сице глаголет Господь Вседержитель: се, Муж, Восток имя Ему, и под Ним возсияет, и созиждет храм Господень: 13 и той приимет добродетель, и сядет и возобладает на престоле Своем, и будет иерей одесную Его, и совет мирен будет между обема, 14 а венец будет терпящым и ключимым Ему и разумевшым Его, и в благодать сыну Софониину, и в псалом во храме Господни: 15 и издалеча от сих приидут и созиждут во храме Господни, и уразумеете, яко Господь Вседержитель посла мя к вам: и будет, аще слушающе послушаете гласа Господа Бога вашего. === 7 === 1 И бысть в четвертое лето, при Дарии цари, бысть слово Господне ко Захарии в четвертый месяца девятаго, иже есть Хаселев. 2 И посла в Вефиль Сарасар и Арвесеер царь и мужие его молити Господа, 3 глаголя ко священником, иже во храме Господа (Бога) Вседержителя, и пророком, глаголя: аще вниде зде в пятый месяц святыня, (плачя или постяся,) якоже сотворих уже многа лета. 4 И бысть слово Господа Вседержителя ко мне глаголя: 5 рцы ко всем людем земли и ко священником глаголя: аще постистеся или плачевопльствисте в пятинах или седминах (месяца), и се, седмьдесят лет, постом ли постистеся Ми? 6 И аще ясте или пиете, не вы ли ясте и пиете? 7 Не сия ли суть словеса, яже глагола Господь руками пророков прежних, егда бе Иерусалим населен и гобзующь, и гради его окрест, и нагорная и подольная населена бяху? 8 И бысть слово Господне ко Захарии глаголя: 9 сице глаголет Господь Вседержитель: суд праведен судите и милость и щедроты творите кийждо ко брату своему, 10 а вдовицы и сира, и пришелца и убога не насильствуйте, и злобы кийждо брата своего да не помнит в сердцах своих. 11 И не покоришася, еже внимати, и даша плещы презирающыя, и ушеса своя отяготиша, еже не слышати, 12 и сердце свое учиниша непокориво, не послушати закона Моего и словес, яже посла Господь Вседержитель Духом Своим рукою пророков прежних: и бысть гнев великий от Господа Вседержителя. 13 И будет, якоже рече, и не услышаша Его: сице возопиют, и не имам услышати, глаголет Господь Вседержитель: 14 и отвергу я во вся языки, иже не разумеша, и земля запустеет последи их от проходящаго и от возвращающагося: и учиниша избранную землю в запустение. === 8 === 1 И бысть слово Господа Вседержителя (ко мне) глаголя: 2 сице глаголет Господь Вседержитель: ревновах по Иерусалиме и Сионе рвением великим и яростию велиею ревновах по нем. 3 Тако глаголет Господь: обращуся к Сиону и вселюся посреде Иерусалима, и наречется Иерусалим град истинный, и гора Господа Вседержителя гора святая. 4 Сице глаголет Господь Вседержитель: еще сядут старцы и старицы на путех Иерусалимских, кийждо жезл свой имый в руце своей от множества дний: 5 и путие града исполнятся отрочищ и отроковиц играющих на путех его. 6 Сице глаголет Господь Вседержитель: аще изнеможет пред останком людий сих во онех днех, еда и предо Мною изнеможет? Глаголет Господь Вседержитель. 7 Сице глаголет Господь Вседержитель: се, Аз спасу люди Моя от земли восточныя и от земли западныя 8 и введу их (в землю их), и вселюся посреде Иерусалима, и будут Ми в люди, и Аз буду им в Бога во истине и в правде. 9 Сице глаголет Господь Вседержитель: да укрепятся руце вас слышащих во днех сих словеса сия от уст пророческих, от негоже дне основася храм Господа Вседержителя, и церковь отнележе создася. 10 Зане прежде дний онех мзда человеком не бе во успех, и мзда скотом не бяше, и исходящему и входящему не бе мира от печали, и послю вся человеки коегождо на искренняго своего. 11 И ныне не по днем онем прежним Аз сотворю останку людий сих, глаголет Господь Вседержитель, 12 но покажу мир: виноград даст плод свой, и земля даст жита своя, и небо даст росу свою, и наследити сотворю останком людий Моих сих вся сия. 13 И будет, яко бесте в клятве во языцех, доме Иудов и доме Израилев, тако спасу вы, и будете в благословении: дерзайте и укрепляйтеся руками вашими. 14 Зане сице глаголет Господь Вседержитель: якоже помыслих озлобити вы, внегда прогневаша Мя отцы ваши, глаголет Господь Вседержитель, и не раскаяхся: 15 тако уставих и умыслих во дни сия добро сотворити Иерусалиму и дому Иудову: дерзайте. 16 Сия словеса, яже сотворите: глаголите истину кийждо искреннему своему, истину и суд мирен судите во вратех ваших, 17 и кийждо злобы искренняго своего не помышляйте в сердцах ваших, и клятвы лживыя не любите, зане вся сия возненавидех, глаголет Господь Вседержитель. 18 И бысть слово Господа Вседержителя ко мне глаголя: 19 сице глаголет Господь Вседержитель: пост четвертый и пост пятый, и пост седмый и пост десятый будут дому Иудову в радость и в веселие и в праздники благи: и возвеселитеся и истину и мир возлюбите. 20 Сице глаголет Господь Вседержитель: еще людие мнози приидут и живущии во градех многих: 21 и снидутся живущии во пяти градех во един град, глаголюще: грядим помолитися лицу Господню и взыскати лице Господа Вседержителя: иду и аз. 22 И приидут людие мнози и языцы мнози взыскати лица Господа Вседержителя во Иерусалиме и умолити лице Господне. 23 Сице глаголет Господь Вседержитель: во оны дни имется десять мужей от всех племен языческих, и имутся за ризу мужа Иудеанина, глаголюще: пойдем с тобою, зане слышахом, яко Бог с вами есть. === 9 === 1 Пророчество словесе Господня в земли Седраха и Дамаска жертвы его: зане Господь призирает на человеки и на вся колена Израилева, 2 и во Имафе в пределех его Тир и Сидон, яко умудреша зело. 3 И созда Тир твердыни себе и собра сребро яко персть и злато яко брение путий. 4 Сего ради Господь наследит я и поразит в море силу его, и той огнем поястся. 5 Увидит Аскалон и убоится, и Газа и поболит зело, и Аккарон, яко постыдеся о уповании своем: и погибнет царь от Газы, и Аскалон не имать населитися. 6 И вселятся иноплеменницы во Азоте, и разрушу досаждение иноплеменников, 7 и изму кровь их из уст их и мерзости их из средины зубов их, и оставятся и сии Богу нашему и будут яко тысящник во Иуде, и Аккарон якоже Иевусей. 8 И подставлю храму Моему воздвижение, еже не сквозе ходити, ниже возвращатися, и ктому не имать приити на ня изгоняяй: яко ныне видех очима Моима. 9 Радуйся зело, дщи Сионя, проповедуй, дщи Иерусалимля: се, Царь твой грядет тебе праведен и спасаяй, той кроток и всед на подяремника и жребца юна. 10 И потребит колесницы от Ефрема и кони от Иерусалима, и потребит лук бранный, и множество, и мир от языков: и обладает водами от моря до моря и от рек до исходищ земли. 11 И ты в крови завета твоего испустил еси узники твоя от рова не имуща воды. 12 Сядите в тверделех, связани сонмища, и за един день пришелствия твоего сугубо воздам ти. 13 Занеже напрягох тя Себе, Иудо, яко лук, исполних Ефрема, и воздвигну чада твоя, Сионе, на чада Еллинска, и осяжу тя яко мечь ратника. 14 И Господь на них явится, и изыдет яко молния стрела Его: и Господь Бог Вседержитель в трубу вострубит и пойдет в шуме прещения своего. 15 Господь Вседержитель защитит их, и поядят я, и посыплют их камением пращным, и испиют кровь их яко вино, и исполнят окрины яко жертвенник. 16 И спасет я Господь Бог их в день он, яко овцы люди Своя: зане камение свято валяется на земли Его. 17 Аще что благо его, и аще что добро его, пшеница юношам и вино благоуханно девам. === 10 === 1 Просите от Господа дождя во время ранняго и поздняго: Господь сотвори привидения, и дождь зимен даст им, комуждо злак на селе. 2 Зане провещающии глаголаша труды, и вражбителие видения ложна и сония лжива глаголаху, суетными утешаху: сего ради изсхоша яко овцы, и озлоблени быша, понеже не бе изцеления. 3 На пастырей прогневася ярость Моя, и на агнцы посещу: и посетит Господь Бог Вседержитель стадо Свое, дом Иудин, и учинит я аки коня благолепна Своего во брани. 4 И от него призре, и от него учини, и от него лук в дусе ярости, и от него изыдет всяк изгоняяй в том. 5 И будут яко ратницы попирающе брение на путех во брани, и ополчатся, яко Господь с ними, и постыдятся всадницы коннии. 6 И укреплю дом Иудов и дом Иосифов спасу, и вселю я, понеже возлюбих я, и будут аки бы не отвратих их: зане Аз Господь Бог их и услышу я. 7 И будут яко ратницы Ефремовы, и возрадуется сердце их аки от вина: и чада их увидят и возвеселятся, и возрадуется сердце их о Господе. 8 Возвещу им и прииму я, зане искуплю их, и умножатся, якоже бяху мнози: 9 и всею я в людех, и дальнии помянут Мя, и воспитают чада своя, и обратятся: 10 и возвращу я от земли Египетския и от Ассириан прииму я, и в Галаадит и в Ливан введу я, и не имать остати от них ни един. 11 И пройдут морем узким и поразят в мори волны, и изсякнут вся глубины речныя, и отимется всяко досаждение Ассирийско, и скиптр Египетск отимется. 12 И укреплю я о Где Бозе их, и о имени Его восхвалятся, глаголет Господь. === 11 === 1 Разверзи, Ливане, двери твоя, и да пояст огнь кедры твоя: 2 да плачевопльствит питис, зане паде кедр, яко вельможи вельми обеднеша. Восплачевопльствите, дуби Васанитидстии, яко посечеся дубрава насажденная. 3 Глас плачущих пастырей, яко возбедствова величие их: глас рыкающих львов, яко озлоблено бысть шатание Иорданово. 4 Сице глаголет Господь Вседержитель: пасите овцы заколения, 5 яже стяжавшии закалаху и не раскаявахуся, и продающии я глаголаху: благословен Господь, и обогатихомся: и пастырие их не печахуся ни чимже о них. 6 Сего ради не пощажду ктому на живущих на земли, глаголет Господь: и се, Аз предам человеки, коегождо в руце искреннему его и в руце царю своему: и изсекут землю, и не имам изяти от руки их. 7 И упасу овцы заколения в земли Ханаани: и прииму Себе два жезла, единаго нарекох доброту, а другаго нарекох уже, и упасу овцы. 8 И погублю три пастыри в месяц един, и отягчает душа Моя на ня: ибо души их рыкаху на Мя. 9 И рех: не имам пасти вас: умирающее да умрет, и изчезающее да изчезнет, и прочая да пояст кийждо плоть ближняго своего. 10 И прииму жезл Мой добрый и отвергу его еже разорити завет Мой, егоже завещах ко всем людем: 11 и разорится в день оный, и уразумеют Хананее овцы хранимыя Мне, зане слово Господне есть. 12 И реку к ним: аще добро пред вами есть, дадите мзду Мою, или отрецытеся. И поставиша мзду Мою тридесять сребреник. 13 И рече Господь ко мне: вложи я в горнило и смотри, аще искушено есть, имже образом искушен бых о них. И приях тридесять сребреник и вложих их в храм Господень в горнило. 14 И отвергох жезл вторый уже, еже разорити завет иже посреде Иуды и посреде Израиля. 15 И рече Господь ко мне: еще приими себе сосуды пастырски, пастыря неискусна: 16 зане, се, Аз воздвигну пастыря на землю: погибающаго не посетит и расточеннаго не имать взыскати, и сокрушеннаго не имать изцелити и здраваго не имать направити, и мяса избранных пояст и глезны их извиет. 17 О, пасущии суетная и оставльшии овец! Мечь на мышцу его и на око ему десное: мышца его изсыхающи изсхнет, и око ему десное ослепая ослепнет. === 12 === 1 Пророчество словесе Господня на Израиля, глаголет Господь, прострый небо и основаяй землю и созидаяй дух человека в нем: 2 се, Аз полагаю Иерусалима яко преддверия движимая всем людем окрест, и во Иудеи будет обседение на Иерусалима: 3 и будет в день оный, положу Иерусалима камень попираемый всеми языки: всяк попираяй его ругаяся поругается, и соберутся нань вси языцы земли. 4 В день он, глаголет Господь Вседержитель, поражу всякаго коня во ужас и всадника его в безумие: и на дом Иудов отверзу очи Мои и вся кони людий поражу во ослепление. 5 И рекут тысящницы Иудины вси в сердцах своих: обрящем себе живущыя во Иерусалиме о Господе Вседержители Бозе их. 6 В день он положу тысящники Иудины яко главню огненну в дровах и яко свещу огненну в стеблии, и поядят одесную и ошуюю вся люди окрест: и населится Иерусалим еще по себе во Иерусалиме: 7 и спасет Господь селения Иудова якоже исперва, яко да не величается похвала дому Давидова и величания живущих во Иерусалиме на Иуду. 8 И будет в день он, защитит Господь живущих во Иерусалиме: и будет немощный в них в той день яко Давид, а дом Давидов яко дом Божий, якоже Ангел Господень пред ними. 9 И будет в день он, взыщу изяти вся языки грядущыя на Иерусалим, 10 и излию на дом Давидов и на живущыя во Иерусалиме дух благодати и щедрот, и воззрят Нань, Егоже прободоша, и восплачутся о Нем плаканием яко о возлюбленнем, и поболят о Нем болезнию яко о первенце. 11 В день он возвеличится плачевопльствие во Иерусалиме, яко плачевопльствие Ададримона на поли Магедоне. 12 И восплачется земля по племеном племеном: колено о себе, и жены их о себе: колено дому Давидова о себе и жены их о себе: 13 колено дому Нафанова о себе, и жены их о себе: колено дому Левиина о себе, и жены их и себе: колено Симеоне о себе, и жены их о себе: 14 вся прочая колена, колено и колено о себе, и жены их о себе. === 13 === 1 В день он будет всяко место отверзаемо дому Давидову и живущым во Иерусалиме в предвижение и разделение. 2 И будет в день он, глаголет Господь Саваоф, потреблю имена идолов от земли, и ктому не будет их памяти: и лживыя пророки и духа нечистаго изму от земли. 3 И будет, аще проречет человек еще, и речет к нему отец его и мати его, рождшии его, внегда пророчествовати ему: не жив будеши, яко лжу глаголал еси во имя Господне: и запнут ему отец его и мати его, родившии его, егда пророчествовати начнет. 4 И будет в день он, постыдятся пророцы, кийждо от видения своего, внегда пророчествовати ему, и облекутся в кожу власяную, зане солгаша. 5 И речет: несмь пророк аз, яко человек делаяй землю аз есмь, зане человек роди мя от юности моея. 6 И реку к нему: что язвы сия посреде руку твоею? И речет: имиже уязвлен бых в дому возлюбленнаго моего. 7 Мечу, востани на пастыря Моего и на мужа гражданина Моего, глаголет Господь Вседержитель: порази пастыря, и расточатся овцы стада: и наведу руку Мою на (малыя) пастыри. 8 И будет в день он на всей земли, глаголет Господь, две части ея потребятся и изчезнут, а третия останется на ней: 9 и проведу третию часть сквозе огнь, и разжгу я, якоже разжизается сребро, и искушу я, якоже искушается злато: той призовет имя Мое, и Аз услышу его и реку: людие Мои сии суть. И тии рекут: Господь Бог мой. === 14 === 1 Се, дние Господни грядут, и разделятся корысти твоя в тебе: 2 и соберу вся языки на Иерусалим в брань, и пленится град, и расхитятся домове, и жены осквернятся: и изыдет пол града в пленение, а останок людий Моих не потребятся от града. 3 И изыдет Господь и ополчится на языки оны, якоже день ополчения его в день брани. 4 И станут нозе Его в день он на горе Елеонстей, яже есть прямо Иерусалиму на восток: и разделится гора Елеонская, пол ея к востоком и пол ея к морю, пропасть велия зело: и уклонится пол горы на север и пол ея на юг: 5 и засыплется дебрь гор Моих, и прильпнет дебрь горняя даже до Асаила и наполнится, якоже наполнися от лица труса во днех Озии царя Иудова: и приидет Господь Бог мой, и вси святии с Ним. 6 И будет в день он, не будет свет, но зима и мраз: 7 и будет день един, и день той знаемь будет Господеви, и не день и не нощь, и при вечере будет свет. 8 И в день он изыдет вода жива из Иерусалима, пол ея в море первое и пол ея в море последнее: и в жатву и в весну будет тако. 9 И будет Господь в Царя по всей земли: в день он будет Господь един, и имя Его едино, 10 обходя всю землю и пустыню, от Гаваи и до Реммона, на юг Иерусалиму: и вознесется на месте и пребудет от врат Вениаминих до места врат первых, даже до врат уголных и до столпа Анамеиля и до подточилия царева. 11 И вселятся в нем, и анафема не будет ктому, и вселится Иерусалим надеяйся. 12 И сие будет падение, имже изсечет Господь вся люди, елицы воеваша на Иерусалим: истают плоти их стоящих на ногах своих, и очеса им истекут из обочий их, и язык их истает во устех их. 13 И будет в день он ужас Господень велий на них: и имутся кийждо за руку ближняго своего, и соплетется рука его к руце ближняго своего. 14 И Иуда ополчится во Иерусалиме и соберет крепость всех людий окрест, злато и сребро и ризы во множество зело. 15 И сие будет падение конем и мском, и велблюдом и ослом, и всем скотом сущым в полцех онех, по падению сему. 16 И будет, елицы аще останутся от всех язык пришедших на Иерусалим, и взыдут на всякое лето покланятися Царю Господу Вседержителю и праздновати праздник скинопигии. 17 И будет, елицы аще не взыдут от всех племен земли во Иерусалим поклонитися Царю Господу Вседержителю, и сии онем приложатся, не будет на них дождя. 18 Аще же колено Египетское не взыдет, ни приидет, и на сих будет язва, еюже поразит Господь вся языки, елицы аще не взыдут, еже праздновати праздник скинопигии. 19 Сей будет грех Египту и грех всем языком, елицы аще не взыдут, еже праздновати праздник скинопигии. 20 В день он будет еже во узде коня, свято Господу Вседержителю: и будут коноби в дому Господни яко чашы пред лицем олтаря, 21 и будет всяк коноб во Иерусалиме и во Иуде свят Господеви Вседержителю: и приидут вси жрущии и приимут от них и сварят в них, и не будет Хананей ктому во храме Господа Вседержителя в день он. == Книга пророка Малахии == === 1 === 1 Пророчество словесе Господня на Израиля рукою ангела Его: положите убо на сердцах ваших. 2 Возлюбих вы, глаголет Господь. И ресте: о чем возлюбил еси ны? Не брат ли бе Исав Иакову? Глаголет Господь: и возлюбих Иакова, Исава же возненавидех, 3 и учиних пределы его во изчезновение и достояние его в нырища пустынна. 4 Зане аще речет: Идумеа разорися, и обратимся и возсозиждем опустевшая ея: сице глаголет Господь Вседержитель: тии созиждут, и Аз разорю, и нарекутся им пределе беззакония, и людие, на няже ополчися Господь до века. 5 И очеса ваша увидят, и вы речете: возвеличися Господь превыше предел Израилевых. 6 Сын славит отца, и раб господина своего убоится: и аще Отец есмь Аз, то где слава Моя? И аще Господь есмь Аз, то где есть страх Мой? Глаголет Господь Вседержитель. Вы священницы презирающии имя Мое. И ресте: о чесом презрехом имя Твое? 7 Приносяще ко олтареви Моему хлебы скверны. И ресте: о чесом осквернихом я? Внегда глаголати вам: трапеза Господня осквернена есть: и возложенная брашна уничижили есте. 8 Зане аще приведете слепо на жертву, не зло ли? И аще приведете хромо или недужно, то не зло ли? Приведи е князю твоему, еда приимет е? Еда приимет лице твое? Глаголет Господь Вседержитель. 9 И ныне умилостивите лице Бога вашего и помолитеся Ему, (да помилует вы). В руках ваших быша сия, аще прииму от вас лица ваша? Глаголет Господь Вседержитель. 10 Зане и в вас затворятся двери, и не возгнетите огня олтареви Моему туне: несть воля Моя в вас, глаголет Господь Вседержитель, и жертвы не прииму от рук ваших. 11 Зане от восток солнца и до запад имя Мое прославися во языцех, и на всяцем месте фимиам приносится имени Моему и жертва чиста: зане велие имя Мое во языцех, глаголет Господь Вседержитель. 12 Вы же скверните е глаголюще: трапеза Господня осквернена есть, и возлагаемая брашна его уничтожена быша. 13 И ресте: сия от злострадания суть. И отдунух я, глаголет Господь Вседержитель. И внесосте хищения и хромая и недужная, и приведете я на жертву, еда прииму их от рук ваших? Глаголет Господь Вседержитель. 14 И проклят, иже бе силен, и бе ему в стаде его мужеск пол, и обет его на нем, и жрет растленное Господеви: зане Царь велий Аз есмь, глаголет Господь Вседержитель, и имя Мое светло во языцех. === 2 === 1 И ныне заповедь сия к вам, священницы: 2 аще не услышите и аще не положите на сердцах ваших, еже дати славу имени Моему, глаголет Господь Вседержитель, то послю на вы клятву и проклену благословение ваше и оклену е: и разорю благословение ваше, и не будет в вас, зане вы не влагаете в сердца ваша. 3 Се, Аз отлучу вам рамо, и раскидаю требухи на лица ваша, требухи праздников ваших, и прииму вы вкупе: 4 и уразумеете, яко Аз Господь послах к вам заповедь сию, еже быти завету Моему к Левитом, глаголет Господь Вседержитель. 5 Завет Мой бе с ним жизни и мира, и дах ему боязнию боятися Мене и от лица имене Моего устрашатися ему. 6 Закон истины бе во устех его, и неправда не обретеся во устнах его: в мире исправляяй иде со Мною и многи обрати от неправды. 7 Понеже устне иереовы сохранят разум, и закона взыщут от уст его: яко ангел Господа Вседержителя есть. 8 Вы же уклонистеся от пути и изнемоществисте многих в законе, растлисте завет Левиин, глаголет Господь Вседержитель. 9 И Аз дах вы уничижены и отвержены во вся языки, зане вы не сохранисте путий Моих, но лиц обинустеся в законе. 10 Не Отец ли един всем вам? Не Бог ли един созда вас? Что яко остависте кийждо брата своего, осквернити завет отец ваших? 11 Оставлен бысть Иуда, и мерзость бысть во Израили и во Иерусалиме: зане оскверни Иуда святая Господня, яже возлюби, и прейде к богом чуждим. 12 Потребит Господь человека творящаго сия, дондеже смирится от селений Иаковлих и от приносящих жертву Господу Вседержителю. 13 И сия, яже ненавидех, твористе: покрывасте слезами олтарь Господень, и плачем и воздыханием от трудов: еще ли достойно призрети на жертву (вашу), или прияти приятно из рук ваших? 14 И ресте: чесо ради? Яко Господь засвидетелствова между тобою и между женою юности твоея, юже оставил еси, и та общница твоя и жена завета твоего: 15 и не добро ли сотвори, и останок духа его? И ресте: что ино кроме семене ищет Бог? И сохраните духом вашим и жены юности твоея да не оставиши: 16 но аще возненавидев отпустиши ю, глаголет Господь Бог Израилев, и покрыет нечестие помышления твоя, глаголет Господь Вседержитель: и сохраните духом вашим и не оставите. 17 Прогневляющии Бога словесы вашими, и ресте: о чесом прогневахом Его? Зане ресте: всяк творяй зло добр пред Господем, и в них Сам благоволи: и где есть Бог правды? === 3 === 1 Се, Аз посылаю Ангела Моего, и призрит на путь пред лицем Моим: и внезапу приидет в церковь Свою Господь, Егоже вы ищете, и Ангел завета, Егоже вы хощете: се, грядет, глаголет Господь Вседержитель. 2 И кто стерпит день пришествия Его? И кто постоит в видении Его? Зане Той входит яко огнь горнила и яко мыло перущих. 3 И сядет разваряя и очищая яко сребро и яко злато, и очистит сыны Левиины, и прелиет я яко злато и яко сребро: и будут Господеви приносяще жертву в правде. 4 И угодна будет Господеви жертва Иудова и Иерусалимля, якоже дние века и якоже лета преждняя. 5 И прииду к вам с судом, и буду свидетель скор на чародеи и на прелюбодейцы, и на кленущыяся именем Моим во лжу и на лишающыя мзды наемника, и на насильствующыя вдовиц и пхающыя сирыя, и на укланяющыя суд пришелца и на небоящыяся Мене, глаголет Господь Вседержитель: 6 зане Аз Господь Бог ваш, и не изменяюся, и вы сынове Иаковли не удаляетеся от грех отец ваших. 7 Уклонистеся от законов Моих и не сохранисте: обратитеся ко Мне, и обращуся к вам, глаголет Господь Вседержитель. И ресте: в чесом обратимся? 8 Еда обольстит человек Бога? Зане вы обольщаете Мя. И ресте: в чесом обольстихом Тя? Яко десятины и начатцы с вами суть. 9 И взирающе вы взираете, и Мене вы обольщаете. 10 Лето скончася, и внесосте вся плоды в сокровища, и будет расхищение Его в дому Его: обратитеся убо о сем, глаголет Господь Вседержитель: аще не отверзу вам хлябий небесных и излию вам благословение Мое, дондеже удовлитеся: 11 и разделю вам в брашно, и не имам истлити вам плодов земных, и не изнеможет ваш виноград на селе, глаголет Господь Вседержитель: 12 и ублажат вы вси языцы, зане будете вы земля пожеланная, глаголет Господь Вседержитель. 13 Отяготисте на Мя словеса ваша, глаголет Господь (Вседержитель). И ресте: о чем клеветахом на Тя? 14 Ресте: суетен работаяй Богу, и что более, яко сохранихом хранения Его и яко идохом молитвенницы пред лицем Господа Вседержителя? 15 И ныне мы блажим чуждих, и созидаются вси творящии беззаконная, сопротивишася Богови и спасошася. 16 Сия рекоша боящиися Господа, кийждо ко искреннему своему: и внят Господь, и услыша, и написа книгу памяти пред Собою боящымся Господа и благоговеющым имя Его. 17 И будут Ми, глаголет Господь Вседержитель, в день, егоже Аз творю в снабдение, и изберу я, имже образом избирает человек сына своего (добре) работающа ему. 18 И обратитеся и увидите между праведным и между беззаконным, и между служащим Богови и не служащим Ему. === 4 === 1 Яко се, день грядет горящь яко пещь и попалит я, и будут вси иноплеменницы и вси творящии беззаконная яко стеблие: и возжжет я день Господень грядый, глаголет Господь Вседержитель, и не останется от них корень ниже ветвь. 2 И возсияет вам боящымся имене Моего Солнце правды и изцеление в крилех Его: и изыдете и взыграете, якоже телцы от уз разрешени: 3 и поперете беззаконники, и будут пепел под ногами вашими в день, в оньже Аз сотворю, глаголет Господь Вседержитель. 4 Помяните закон Моисеа раба Моего, якоже повелех ему в Хориве ко всему Израилю повеления и оправдания. 5 И се, Аз послю вам Илию Фесвитянина, прежде пришествия дне Господня великаго и просвещеннаго, 6 иже устроит сердце отца к сыну и сердце человека ко искреннему его, да не пришед поражу землю в конец. == Первая книга Маккавейская == === 1 === 1 И бысть, егда поражаше Александр Македонский сын Филиппа, иже изыде от земли Хеттиим, порази и Дариа царя Персскаго и Мидскаго, и воцарися вместо его первый во Елладе, 2 и состави брани многи, и одержа твердыни многи, и уби цари земския, 3 и пройде даже до краев земли, и взя корысти многих языков. И умолче земля пред ним. И возвысися, и вознесеся сердце его. 4 И собра силу крепку зело, и началствова над странами и языки и мучительми, и быша ему в данники. 5 И по сих паде на ложе и позна, яко умирает: 6 и созва отроки своя благородныя, иже с ним бяху совоспитани от юности его, и раздели им царство свое еще жив сый. 7 И царствова Александр лет дванадесять и умре. 8 И обладаша отроцы его кийждо в месте своем. 9 И возложиша вси диадимы по смерти его, и сынове их по них лета многа, и умножиша злая на земли. 10 И изыде от них корень греха Антиох Епифан, сын Антиоха царя, иже бе залогом в Риме: и царствова в лете сто тридесять седмем царства Еллинскаго. 11 Во днех тех изыдоша от Израиля сынове беззаконнии и наустиша многих глаголюще: пойдем и завещаем завет с языки, иже окрест нас, яко отнележе отлучихомся от них, обретоша нас многа злая. 12 И благоувидеся слово во очию их: 13 и предизбрашася нецыи от людий и идоша ко царю: и даде им власть творити оправдания языческая. 14 И создаша (себе) училище во Иерусалиме по законом языческим. 15 И сотвориша себе необрезание, и отступиша от завета святаго, и сопрягошася языком, и продашася еже творити лукавое. 16 И уготовася царство пред Антиохом: и умысли царствовати во Египте, яко да царствует над двема царствома. 17 И вниде во Египет в народе тяжце, на колесницах и на слонех, и на всадниках и на кораблех многих. 18 И состави брань на Птоломеа царя Египетскаго: и убояся Птоломей от лица его и побеже, и падоша язвени мнози. 19 И взяша грады тверды в земли Египетстей: и взя корысти земли Египетския. 20 И обратися Антиох, повнегда порази Египта во сто четыредесять третие лето: и взыде на Израиля и на Иерусалим в народе тяжце, 21 и вниде во святилище с гордынею, и взя олтарь златый и светилник свещный и вся сосуды его, 22 и трапезу предложения и возлиялники, и фиалы и кадилницы златыя, и катапетасму и венцы и украшение златое, еже на лицы церкви (бяше), и сокруши вся: 23 и взя сребро и злато и сосуды вожделенныя: и взя сокровища тайная, ихже обрете. 24 И взем вся отиде в землю свою, и сотвори убийство, и глагола в гордости велицей. 25 И бысть плачь велик во Израили на всяцем месте их. 26 И возстенаша началницы и старейшины, девы и юноши изнемогоша, и красота женская изменися. 27 Всяк жених прия плачь, и седящая на одре брачне бысть в печали. 28 И потрясеся земля на обитающих на ней, и весь дом Иаковль облечеся студом. 29 И по двою лету дний посла царь началника данем во грады Иудины. И прииде во Иерусалим с народом великим 30 и глагола к ним словеса мирная во льсти. И вероваша ему. И нападе на град внезапу и порази его язвою великою и погуби люди многи от Израиля: 31 и взя корысти града и сожже его огнем, и разори домы его и стены его окрест: 32 и плениша жен и чад, и скоты разделиша, 33 и оградиша град Давидов стеною великою и крепкою и башнями крепкими, и бысть им в крепость: 34 и посадиша тамо людий грешников, мужей беззаконных, и возмогоша в ней: 35 и положиша оружия и брашна, и собираху корысти Иерусалимския, и полагаху тамо: и быша в сеть велику, 36 и бысть в ловителство святыни и в диавола лукаваго Израилю выну. 37 И пролияша кровь неповинную окрест святилища и оскверниша святыню. 38 И бежаша обитающии во Иерусалиме их ради, и бысть обитание чуждим: и бысть чуждо семени рождения своего, и чада его оставиша его. 39 Святыня его разорена яко пустыня, праздницы его обращени суть во плачь, субботы его в поношение, честь его во уничижение: 40 по славе его умножися безчестие его, и высота его обращена бысть во плачь. 41 И писа царь Антиох всему царству своему, да будут вси людие едино, 42 и оставит кийждо закон свой. И соизволиша вси языцы по слову царя (Антиоха). 43 И мнози от Израиля изволиша служению его и пожроша идолом и оскверниша субботу. 44 И посла царь книги рукою вестников во Иерусалим и во грады Иудины, да пойдут вслед законов чуждих земли 45 и возбранят всесожжения и жертву и возлияние от святыни, и омерзят субботы и праздники, 46 и осквернят святыню и святых, 47 и созиждут требища и капища и кумирницы, и да жрут мяса свиная и скоты общыя: 48 и да оставят сыны своя необрезаны, еже осквернити душы их во всяцей нечистоте и осквернении, 49 яко да забудут закон и изменят вся оправдания (Божия). 50 И иже аще не сотворит по глаголу цареву, да умрет. 51 По всем словесем сим написа всему царству своему и пристави надзиратели над всеми людьми: и повеле градом Иудиным жрети во всяцем граде. 52 И собрашася мнози от людий к ним, всяк оставивый закон Господень: и сотвориша лукавая на земли 53 и положиша Израиля в тайных во всяцем убежищи их. 54 И в пятыйнадесять день месяца Хаслева, в лето сто четыредесять пятое создаша мерзость запустения на олтари (Божии), и во градех Иудиных окрест создаша требища. 55 И пред дверьми домов и на стогнах кадяху, 56 и книги закона (Божия), ихже обретоша, сожгоша огнем, раздирающе (их). 57 И идеже обреташеся у кого книга завета Господня, и аще кто соизволяше закону Господню, по повелению цареву закалаху его. 58 В силе своей творяху сице людем Израилевым, обретающымся во всяцем месяце и месяце во градех. 59 И в двадесять пятый день месяца жряху в капищи, еже бе на олтари. 60 И жен обрезавших чада своя закалаша по повелению (цареву), 61 и обешаху детища за шии их, домы их расхищаху, и обрезавших я умерщвляху. 62 И мнози от людий Израилевых удержашася и утвердишася в себе, еже не ясти скверных, 63 и избраша паче умрети, неже осквернитися брашны, и не хотеша преступити закона Божия святаго: и заклани быша. 64 И бысть гнев велий на Израиля зело. === 2 === 1 Во днех тех воста Маттафиа сын Иоаннов, сына Симеоня, священник от сынов Иоаривлих от Иерусалима, и седе во Модине. 2 И имяше сынов пять: Иоанна, иже проименовашеся Гаддис, 3 и Симона, иже проименовашеся Фассис, 4 Иуду, иже звашеся Маккавей, 5 Елеазара, иже проименовашеся Аваран, и Ионафана, иже проименовашеся Апфус. 6 И виде хуления бывающая во Иудеи и во Иерусалиме, 7 и рече: увы мне! Почто рожден есмь видети сотрение людий моих и сотрение града святаго, и седети зде, внегда предаватися ему в руце врагов и святыни в руки чуждих? 8 Бысть храм его яко человек безчестен, 9 сосуды славы его пленени отнесени суть, побиени суть младенцы его на стогнах, и юношы его падоша мечем вражиим: 10 кий язык не наследова царства его и не одержа корыстей его? 11 Вся утварь его взята есть, вместо свободнаго бысть в раба: 12 и се, святая наша и красота наша и слава наша опусте, и оскверниша я языцы: 13 почто убо нам еще жити? 14 И растерза ризы своя Маттафиа и сынове его, и облекошася во вретища, и плакаша зело. 15 И приидоша от царя принуждающии ко отступлению во град Модин, да пожрут. 16 И мнози от Израиля приложишася к ним: Маттафиа же и сынове его собрашася. 17 И отвещаша посланнии от царя и реша Маттафии глаголюще: князь и преславный и велий еси во граде сем, и утвержден в сынех и братиих: 18 ныне убо приступи первый и сотвори повеление царево, якоже сотвориша вси языцы и мужие Иудины и оставшии во Иерусалиме, и будеши ты и дом твой посреде другов царевых: и ты и сынове твои прославитеся в сребре и злате и в дарех мнозех. 19 И отвеща Маттафиа и рече гласом велиим: аще и вси языцы в дому царствия царя слушают его, еже отступити комуждо от служения отец своих, и соизволиша в заповедех его: 20 но аз и сынове мои и братия моя повинуемся закону отец наших: 21 милостив нам (буди, Боже), еже оставити закон и оправдания: 22 словес царевых не послушаем, еже преступити служение наше на десно или на шуее. 23 И яко преста глаголати словеса сия, приступи муж Иудеанин пред очима всех жрети в капищи, еже в Модине, по повелению цареву. 24 И виде Маттафиа и возревнова, и вострепеташа внутренняя его, и возжжеся ярость его по суду (закона), и наскочив разсече его в капищи. 25 И мужа, егоже царь посла, иже принуждаше жрети, уби во время оно и капище разори. 26 И возревнова о законе, якоже же сотвори Финеес Замврию сыну Саломлю. 27 И возопи Маттафиа во граде гласом велиим глаголя: всяк ревнуяй о законе и стояй в завете да изыдет вслед мене. 28 И отбежа сам и сынове его в горы, и оставиша, елика имеяху во граде. 29 Тогда снидоша мнози ищуще суда и правды в пустыню, 30 и седоша ту сами, и сынове их и жены их, и скоти их, яко умножишася на них злая. 31 И возвещено бысть мужем царевым и силам, иже бяху во Иерусалиме граде Давидове, яко отидоша мужие нецыи, иже разориша заповедь царску, в места тайная в пустыню. 32 И текоша вслед их мнози, и постигше их ополчишася на них, и составиша противу их брань в день субботный, 33 и рекоша к ним: доныне доволно, изыдите и сотворите по слову цареву, и живи будете. 34 И реша: не изыдем, ни сотворим по слову цареву, еже осквернити день субботный. 35 И ускориша на них брань. 36 И не отвещаша им, ниже камене вергоша на них, ниже заградиша мест тайных, рекуще: 37 умрем вси в простоте нашей, свидетеле будут на нас небо и земля, яко неправо погубляете нас. 38 И восташа на них в брани в субботы, и умроша сии и жены их, и сынове их и скоти их, даже до тысящи душ человек. 39 И позна Маттафиа и друзи его, и плакашася о них зело. 40 И рече муж искреннему своему: аще вси сотворим, якоже братия наша сотвориша, и не воополчимся на языки о душах наших и оправданиих наших, ныне нас скоро искоренят от земли. 41 И умыслиша в день он глаголюще: всяк человек, иже аще приидет к нам на брань в день субботный, ополчимся противу его, и не умрем вси, якоже умроша братия наша в тайных. 42 Тогда собрася к ним сонмище Иудейское крепцыи в силе от Израиля, всяк соизволяяй закону: 43 и вси иже бежаша от злых, приложишася им и быша им во утверждение. 44 И собраша воев и побиша грешных во гневе своем и мужей беззаконных в ярости своей: прочии же бежаша во языки спастися. 45 И обыде Маттафиа и друзи его, и разориша капища, 46 и обрезаша отроки необрезаныя, еликих обретоша в пределех Израилевых в силе, 47 и погнаша сынов гордыни, и успе дело в руку их: 48 и удержаша закон от руки языков и от руки царей, и не даша рога грешнику. 49 И приближишася дние Маттафии умрети, и рече сыном своим: ныне укрепися гордыня и обличение, и время низвращения и гнев ярости: 50 и ныне, чада, возревнуйте закону и дадите душы вашя за завет отцев наших. 51 Помяните дела отец наших яже сотвориша в родех своих, и приимете славу велию и имя вечное. 52 Авраам не во искушении ли обретен есть верен, и вменися ему в правду? 53 Иосиф во время тесноты своея сохрани заповедь и бысть господин Египту. 54 Финеес отец наш внегда возревнова ревностию, прият завет священства вечнаго. 55 Иисус, егда исполни слово, бысть судия во Израили. 56 Халев, егда засвидетелствова в церкви, восприя земли наследие. 57 Давид во своей милости наследова престол царствия во век века. 58 Илиа, егда возревнова ревностию закона, взяся даже на небо. 59 Ананиа, Азариа, Мисаил верующе спасошася от пламене. 60 Даниил в простоте своей изятся от уст львовых. 61 И тако помышляйте по роду и роду, яко вси уповающии Нань не изнемогут. 62 И от словес мужа грешна не убойтеся, понеже слава его в мотыла и в червие: 63 днесь вознесется, а утре не обрящется, яко обратися в персть свою, и помышление его погибе. 64 И вы, сынове, укрепитеся и мужайтеся в законе, яко в нем прославитеся. 65 И се, Симеон брат ваш, вем, яко муж совета есть, того послушайте вся дни, той будет вам во отца. 66 И Иуда Маккавей, сей крепок в силе от юности своея, сей будет вам началник воинства и сотворит брань людем. 67 И вы приведите к себе вся творцы закона и отмстите мщение людий ваших: 68 воздайте воздаяние языком и внемлите в заповеди закона. 69 И благослови их: и приложися ко отцем своим. 70 И умре в лето сто четыредесять шестое: и погребоша его сынове его во гробех отец его в Модине, и плакаша его весь Израиль плачем велиим. === 3 === 1 И воста Иуда нарицаемый Маккавей сын его вместо его. 2 И помогаху ему вси братия его и вси елицы прилепишася ко отцу его, и ополчахуся ополчением Израиль с веселием. 3 И распространи славу людем своим: и облечеся в броня яко исполин и препоясася оружием своим бранным, и состави рати, защищая ополчения мечем своим, 4 и уподобися льву в делех своих, и яко скимен рыкающь в ловитве: 5 и погна беззаконныя изследуяй, и смущающих люди его пожже пламенем. 6 И слякошася беззаконнии от страха его, и вси делателе беззакония смятошася, и благопоспешно быти спасение рукою его. 7 И огорчи цари многи и возвесели Иакова в делех своих, и даже до века память его во благословение: 8 и пройде грады Иудины, и погуби нечестивых от них, и отврати гнев от Израиля, 9 и именит бысть даже до последних земли, и собра погибающих. 10 Аполлоний же собра языки и от Самарии силу велию, еже ратовати на Израиля. 11 И уведа Иуда и изыде во сретение ему, и порази его и уби того: и падоша язвении мнози, а прочии убегоша. 12 И взя корысти их, и мечь Аполлониев отя Иуда, и бысть воюя им вся дни. 13 И услыша Сирон началник воев Сирских, яко собра Иуда совокупление и церковь верных с ним исходящих на брань, 14 и рече: сотворю себе имя, и прославлюся в царствии, и поборю Иуду и сущих с ним и уничижающих слово царево. 15 (И уготовася) и приложи еже взыти: и взыде с ним полк нечестивых крепок помощи ему и сотворити отмщение на сынех Израилевых. 16 И приближися даже до восхода Вефоронска: и изыде Иуда во сретение ему в мале. 17 Егда же увидеша полк грядущий во сретение им, реша Иуде: како можем в мале суще ополчатися противу множества толикаго крепкаго? И мы утруждени есмы постом днесь. 18 И рече Иуда: удобь есть объяти многих рукою малых: и несть разнствия пред Богом небесным спасти во многих или в малых: 19 яко не во множестве воев одоление брани есть, токмо от небесе крепость: 20 сии грядут к нам во множестве укоризны и беззакония, еже исторгнути нас и жены нашя и чада наша, еже взяти корысти нашя, 21 мы же ополчаемся за душы нашя и законы нашя: 22 и Сам Господь сокрушит их пред лицем нашим, вы же не устрашитеся их. 23 Якоже преста глаголати, и наскочи на них внезапу, и сотреся Сирон и вои его пред ним: 24 и погна его в низхождение Вефорона даже до поля: и падоша от них яко осмь сот мужей, прочии же побегоша в землю Филистимлю. 25 И нападе страх Иудин и братии его и боязнь на вся языки, яже окрест их. 26 И дойде до царя имя его, и о ополчениих Иудиных поведаху вси языцы. 27 Егда же услыша царь Антиох словеса сия, разгневася яростию, и послав собра силы вся царства своего, полк крепок зело: 28 и отверзе сокровище свое, и даде оброки воином своим на лето, и заповеда им в лето быти готовым на всяку потребу. 29 И виде, яко оскуде сребро от сокровищ, и дани от стран малы, ради несогласия и язвы, яже сотвори на земли, да возмет законная, яже бяху от первых дний. 30 И устрашися, да не вознеимеет единою и дважды в росходы и даяния, яже даяше прежде пространною рукою, и избыточествова паче царей бывших прежде. 31 И смятеся душею своею зело, и умысли ити в Персиду и прияти дани от стран и собрати сребра много. 32 И остави Лисию человека славна и от рода царска над вещьми царскими, от реки Евфрата даже до предел Египетских: 33 и питати Антиоха сына своего, дондеже возвратится сам. 34 И предаде ему пол силы и слонов и заповеда ему о всех, ихже совеща, и о обитающих во Иудеи и Иерусалиме, 35 послати на них силу, еже сокрушити и исторгнути крепость Израилеву и останок Иерусалима, и отяти память их от места, 36 и вселити сынов инородных во всех пределех их, и по жребию разделити землю их. 37 И царь взя пол силы оставших и изыде от Антиохии от града царства своего, лета сто четыредесять седмаго: и прейде Евфрат реку и прохождаше в вышния страны. 38 И избра Лисиа Птоломеа сына Дорименова, и Никанора, и Горгию мужы сильныя от другов царевых. 39 И посла с ними четыредесять тысящ мужей и седмь тысящ конников, еже ити в землю Иудину и растлити ю по словеси царску. 40 И отидоша со всею силою своею, и приидоша, и ополчишася близ Аммаума на земли полевой. 41 И слышаша купцы страны тоя имя их, и взяша сребро и злато много зело и отроки: и приидоша в станы, да возмут сынов Израилевых в рабы, и приложишася к ним вои Сирския и земли иноплеменников. 42 И виде Иуда и братия его, яко умножишася злая, и вои ополчахуся в пределех их: и познаша словеса царева, яже повеле людем сотворити в погубление и скончание. 43 И рече кийждо ко искреннему своему: востанем за истребление людий наших и ополчимся за люди нашя и святыя. 44 И собрася сонм еже быти готовым на брань и еже молитися и просити милости и щедрот. 45 И Иерусалим бе необитаемь аки пустыня: не бе входяй и исходяй от порождений его, и святыня попрана, и сынове инородных в краеградии, бысть обиталище языком: и взяся веселие от Иакова, и оскуде (ту) сопель и гусли. 46 И собрашася и приидоша в Массифу прямо Иерусалиму, понеже место молитвы в Массифе первее Израилю. 47 И постишася того дне, и облекошася во вретища, и пепел посыпаша на главы своя, и растерзаша одеяния своя, 48 и распростроша книгу закона, о нихже испытаху языцы написати на них подобия идол своих, 49 и принесоша ризы святителския и первородная и десятины: и воздвигнуша назиреев, иже наполниша дни, 50 и возопиша гласом (велиим) на небо, рекуще: что сотворим сим и камо их отведем? 51 И Святая Твоя попрашася и осквернишася, и священницы Твои в скорби и в смирении: 52 и се, языцы собрашася на ны, да расторгнут нас: Ты веси, яже помышляют на нас: 53 како возможем стати пред лицем их, аще не Ты поможеши нам? 54 И вострубиша трубами и возопиша гласом велиим. 55 И посем постави Иуда воеводы людий, тысящники и сотники, и пятьдесятники и десятоначалники. 56 И рекоша созидающым домы и обручающым жены, и насаждающым винограды и боязливым возвратитися комуждо в дом свой по закону. 57 И воздвижеся полк и ополчися на юг Аммаума. 58 И рече Иуда: препояшитеся, и будите в сыны сильны, и будите готови в заутрие ополчитися на языки сия, иже собрашася на ны растерзати нас и святая наша: 59 яко лучше есть нам умрети в брани, неже видети злая людий наших и святых: 60 и якоже воля будет на небеси, тако сотворит. === 4 === 1 И взя Горгиа пять тысящ мужей и тысящу конник избранных, и подвигоша полк нощию, 2 еже напасти на полк Иудейский и побити их внезапу, и сынове краеградия быша ему вождеве. 3 И услыша Иуда, и воста сам и сильнии, побити силу цареву, яже в Еммауме: 4 еще бо силы расточены быша от полка. 5 И прииде Горгиа в полк Иудин нощию и ни единаго обрете: и искаше их в горах, понеже рече: бежат сии от нас. 6 И вкупе со днем явися Иуда на поли со тремя тысящами мужей: обаче щитов и мечей не имяху, якоже хотяху. 7 И видеша полк языческий крепок вооружен и конники окрест его, и сии научени брани. 8 И рече Иуда мужем, иже с ним бяху: не убойтеся множества их и устремления их не ужасайтеся: 9 помяните, како спасени быша отцы наши в мори Чермнем, егда гоняше их фараон с вои многими: 10 и ныне возопиим на небо, негли како умилосердится на ны и помянет завет отцев наших и сокрушит полк сей пред лицем нашим днесь: 11 и уведят вси языцы, яко есть Избавляяй и Спасаяй Израиля. 12 И возведоша иноплеменницы очи свои и видеша их грядущих сопротиву, 13 и изыдоша из полка на брань и вострубиша иже со Иудою. 14 И сразишася: и сотрени быша языцы и побегоша в поле, 15 последнии же вси падоша мечем: и прогнаша их даже до Ассаримофа и даже до поль Идумейских и Азотских и Иамнийских, и падоша от них до триех тысящ мужей. 16 И возвратися Иуда и вои его от гонения вслед их, 17 и рече к людем: не вожделейте корыстей, понеже брань противу нас: 18 и Горгиа и вои его близ нас на горе: но стойте ныне противу врагов наших и поборите их, и по сих возмете корысти без боязни. 19 И еще глаголющу Иуде сия, се, явися часть некая приницающая с горы. 20 И виде, яко в бег обратишася, и зажгоша полк, иже суть со Иудою, дым бо зримый являше бывшее. 21 Смотрящии же сия убояшася зело: видяще же ополчение Иудино в поли готово на брань, бежаша вси в землю иноплеменников. 22 И обратися Иуда на корысти ополчения: 23 и взя злата много и сребра, и иакинфа и порфиры морския, и богатства велика. 24 И возвращающеся песнь пояху и благословляху Бога небеснаго, яко благ есть, яко в век милость Его. 25 И бысть спасение велико Израилю в день он. 26 Елицы же от иноплеменников уцелеша, пришедше возвестиша Лисии вся случившаяся. 27 Он же слышав уны душею и опечалися, яко не яже хотяше, такова быша Израилю, и не какова заповеда ему царь, сицевая сбышася. 28 И во грядущее лето собра Лисиа мужей избранных шестьдесят тысящ и конников пять тысящ, да побиет Иерусалим. 29 И приидоша во Идумею и ополчишася во Вефсурех, и срете их Иуда с десятию тысящьми мужей. 30 И виде полк крепок, и помолися, и рече: благословен еси, Спасе Израилев, сокрушивый стремление сильнаго рукою раба Твоего Давида, и предал еси полк иноплеменных в руки Ионафана сына Сауля и носящаго оружие его: 31 заключи полк сей рукою людий Твоих Израиля, и да постыдятся о силе и коннице своей: 32 даждь им боязнь и растай дерзость силы их, и да поколеблются сотрением своим: 33 низложи их мечем любящих Тя, и да восхвалят Тебе вси ведущии имя Твое в песнех. 34 И составиша брань, и падоша от полка Лисии до пяти тысящ мужей, и падоша пред ними. 35 Видя же Лисиа своего ополчения бывшее бежание, а Иудину бывшую дерзость, и яко готови суть или жити, или умрети храбро, отиде во Антиохию и собираше чуждих воев: и умножив бывшее воинство, умысли паки приити на Иудею. 36 Рече же Иуда и братия его: се, сотрени суть врази наши, взыдем ныне очистити святая и обновити. 37 И собрася весь полк и взыдоша на гору Сион: 38 и видеша святыню опустошену, и жертвенник осквернен, и врата сожжена, и в притворех возрастоша древие аки в дубраве, или аки во единей от гор, и пастофориа разбиена. 39 И растерзаша ризы своя и плакаша плачем велиим, и возложиша пепел на главы своя, 40 и падоша лицем на землю, и вострубиша трубным знамением, и возопиша на небо. 41 Тогда повеле Иуда мужем ратовати сущих в краеградии, дондеже очистит святая. 42 И избра священники непорочны волители закона Божия: 43 и очистиша святая и отвергоша камение осквернения в место нечисто: 44 и советоваша о жертвеннице всесожжения оскверненем, что ему сотворят: 45 и нападе им совет благ разорити его, да не когда будет им в поношение, яко оскверниша его языцы. И разориша жертвенник, 46 и положиша камение на горе храма на месте приличнем, дондеже приидет пророк отвещати о них: 47 и взяша камение цело по закону и создаша жертвенник нов по прежнему. 48 И создаша святая и вся яже внутрь храма, и притворы освятиша, 49 и сотвориша сосуды святыя новы, и внесоша светилник и жертвенник всесожжений и фимиамов и трапезу во храм, 50 и кадиша на жертвеннице, и возжгоша светилники, яже на подсвещнице, и светяху во храме, 51 и положиша на трапезе хлебы и простроша катапетасмы, и скончаша вся дела, яже творяху. 52 И зело рано восташа в пятый и двадесятый день месяца девятаго: сей месяц Хаслев, сто четыредесять осмаго лета. 53 И принесоша жертву по закону на олтарь всесожжений новый, егоже сотвориша: 54 по времени и по дни, в оньже оскверниша его языцы, во он обновися в песнех и гуслех и кинирех и в кимвалех. 55 И падоша вси людие на лице свое и поклонишася, и благословиша на небо Благопоспешившаго им: 56 и сотвориша обновление олтаря дний осмь, и принесоша всесожжения с веселием, и пожроша жертву спасения и хваления, 57 и украсиша сущее пред лицем храма венцы златыми и щитами, и обновиша врата и пастофориа, и поставиша двери. 58 И бысть веселие в людех велико зело, и отвращено бысть поношение языков. 59 И устави Иуда и братия его и весь собор Израилев, да празднуются дние обновления олтаря во времена своя на всяко лето дний осмь, от двадесять пятаго дне месяца Хаслев с веселием и радостию. 60 И создаша во время оно гору Сион, окрест стены высокия и пирги крепки, да не когда пришедше языцы поперут я, якоже прежде сотвориша. 61 И посади ту воев хранити ю, и утвердиша ю хранити Вефсуру, еже имети людем в твердыню противу лица Идумеи. === 5 === 1 И бысть егда услышаша языцы окрест, яко создася олтарь и обновися святыня якоже прежде, и разгневашася зело: 2 и совещашася погубити род Иаковль, иже беху посреде их, и начаша убивати в людех и истребляти. 3 И ратоваше Иуда на сыны Исавовы во Идумеи, яже во Акраватине, понеже обседяху Израиля: и порази их язвою великою, и утесни их, и взя корысти их. 4 И помяну злобу сынов Веаних, иже беху людем в сеть и в соблазн, во еже ловити им на путех. 5 И затворишася от него в пиргех, и наступи на них, и прокля их, и зажже пирги их огнем, со всеми яже в них бяху. 6 И пройде на сыны Аммони, и обрете руку крепку и люди многи, и Тимофеа вожда их. 7 И состави на них брани многи, и сотрени суть пред лицем его, и поби их, 8 и взя Иазира и дщери его, и возвратися во Иудею. 9 И собрашася языцы иже в Галаадитиде противу Израилтяном сущым в пределех их, да избиют их. И побегоша в Дафему твердыню. 10 И послаша писание ко Иуде и братии его, рекуще: собрашася на ны языцы, иже окрест нас, избити нас, 11 и готовятся приити и взяти твердыню, в нюже вбегохом, и Тимофей есть воевода сил их: 12 ныне убо пришед избави нас от руки их, яко паде множество от нас: 13 и вси братия наша сущии в местех Тувииних убиени суть, и плениша жен их и чад их и имения их, и погубиша тамо яко тысящу мужей. 14 И еще писания чтяхуся, и се, инии вестницы приидоша от Галилеи в раздраных ризах, возвещающе по словесем сим, рекуще: 15 собрашася на нас от Птолемаиды и Тира, и Сидона и всея Галилеи иноплеменник, еже искоренити нас. 16 Егда же услыша Иуда и людие словеса сия, собрася собор велик усоветовати, что сотворят братиям своим сущым в скорби и воюемым от них. 17 И рече Иуда Симону и брату своему: избери себе мужы и иди, и избави братию твою сущую в Галилеи: аз же и брат мой Ионафан пойдем в Галаадит. 18 И остави Иосифа сына Захариина и Азарию воеводы людем с прочими воины во Иудеи на хранение, 19 и заповеда им, глаголя: прилежите людем сим и не сотворите брани на языки, дондеже мы возвратимся. 20 И отделиша Симону мужей три тысящы, да идет в Галилею, Иуде же осмь тысящ мужей в Галаадит. 21 И иде Симон в Галилею и состави брани многи на языки, и сотрошася языцы от лица его, 22 и погна вслед их даже до врат Птолемаиды: и падоша от язык яко три тысящы мужей, и взя корысти их, 23 и поят сущих в Галилеи и во Арваттисех с женами и чады, и вся елика бяху им, и приведе во Иудею с веселием велиим. 24 И Иуда Маккавей и Ионафан брат его преидоша Иордан, и идоша путь триех дний в пустыни, 25 и сретоша Наватеев, и прияша их мирно, и поведаша им вся, яже случишася братии их в Галаадитиде, 26 и яко мнози от них заключени суть в Восоре и Восор, во Алемисех, Хасфоре, Македе и Карнаине: сии вси гради тверди и велицы: 27 и в прочиих градех Галаадитиды суть затворени, и во утрие строятся ополчитися на твердыни и яти и избити всех сих во един день. 28 И возвратися Иуда и вои его в путь в пустыню в Восор внезапу: и взя град, и уби всяк мужеск пол усты меча, и взя вся корысти их, и сожже его огнем: 29 и воста оттуду нощию и иде даже до твердыни. 30 И бысть пред зарею, и воздвигоша очи свои, и се, людие мнози, имже не бе числа, несуще лествицы и миханы взяти твердыню, и ратоваху их. 31 И виде Иуда, яко начася брань, и вопль града взыде даже до небесе трубами и гласом велиим, 32 и рече мужем силы: бийтеся днесь за братию вашу. 33 И изыде тремя началы созади их: и вострубиша трубами и возопиша в молитве. 34 И позна полк Тимофеов, яко Маккавей есть, и отбежа от лица его, и поби их язвою велиею, и падоша от них в день он яко осмь тысящ мужей. 35 И обратися (Иуда) в Масфу и повоева ю и взя ю, и уби весь мужеск пол ея и взя корысти ея, и сожже ю огнем: 36 оттуду пойде и взя Хасфор, Макед и Восор и прочыя грады Галаадитиды. 37 И по сих словесех собра Тимофей полк ин и ополчися к лицу Рафона об ону страну потока. 38 И посла Иуда соглядати полк. И возвестиша ему глаголюще: собрани суть к нему вси языцы, иже окрест нас, сила велия зело: 39 и Аравлян наяша в помощь себе, и ополчаются об ону страну потока, готови приити на тя на брань. И иде Иуда во сретение их. 40 И рече Тимофей началником воев своих: егда приближится Иуда и полк его к потоку водному, аще приидет к нам прежде, не можем постояти противу его, яко могий возможет противу нас: 41 аще же устрашится и ополчится об ону страну реки, прейдем к нему и возможем противу его. 42 Егда же приближися Иуда к потоку водному, постави книжники людий при потоце и повеле им глаголя: не оставляйте всякаго человека остатися в полце, но да грядут вси на брань. 43 И прейде на них прежде, и вси людие вслед его. И сотрени суть вси языцы пред лицем его, и повергоша оружия своя, и бежаша в капище, еже к Карнаине. 44 И взяша град, и капище сожгоша огнем со всеми, яже в нем: и побежден бысть Карнаин и не возможе ктому стати противу лица Иудина. 45 И собра Иуда всех Израилтян, иже беху в Галаадитиде, от мала даже до велика, и жены их и чада их и имения, полк велик зело, приити в землю Иудину. 46 И приидоша даже до Ефрона, и сей град велий на входе тверд зело: и не бе уклонитися от него на десно или шуее, но токмо сквозе его проити. 47 И заключишася, иже бяху в граде, и заградиша врата камением. И посла к ним Иуда со словесы мирными, глаголя: 48 пройдем по земли вашей, еже отити в землю нашу, и никтоже вас изобидит, токмо ногами пройдем. И не восхотеша отверсти ему. 49 И повеле Иуда проповедати в полце ополчитися коемуждо, в немже кто есть месте. 50 И ополчишася мужие силы и ратоваша град той весь день и всю нощь. И предадеся град в руки его. 51 И поби всяк мужеск пол усты меча и искорени его, и взя корысти его и пройде сквозе град по убиеным. 52 И преидоша Иордан в поле великое противу лицу Вефсана. 53 И бе Иуда собирая дальнейших и увещаваше людий по всему пути, дондеже приидут в землю Иудину. 54 И взыдоша на гору Сион с веселием и радостию и принесоша всесожжения, яко не паде от них ни един, дондеже возвратишася в мире. 55 И во дни, в няже бысть Иуда и Ионафан в Галааде, и Симон брат его в Галилеи противу лицу Птолемаиды, 56 слыша Иосиф Захариин сын и Азариа, началницы силы, о вещех благосодеянных и о бранех, яже сотвориша, 57 и реша: сотворим и мы себе имя и пойдем ратовати на языки, иже окрест нас. 58 И возвестиша сущым от силы яже с ними и идоша на Иамнию. 59 И изыде Горгиа из града и мужие его во сретение им на брань. 60 И побежден бысть Иосиф и Азариа, и гнани быша даже до предел Иудиных: и падоша в день он от людий Израилевых яко две тысящы мужей. И бысть язва велика в людех Израилевых, 61 понеже не послушаша Иуды и братий его, мнящеся храбри быти: 62 тии же не бяху от семене мужей онех, имиже дадеся спасение Израилю рукою их. 63 И муж Иуда и братия его прославишася зело пред всем Израилем и языки всеми, идеже слышашеся имя их. 64 И совокупишася к ним благо глаголющии. 65 И изыде Иуда и братия его, и ратоваху сынов Исавлих в земли яже к югу, и порази Хеврона и дщери его, и разори твердыни его, и столпы его пожже окрест. 66 И воздвижеся ити в землю иноплеменников и прохождаше Самарию. 67 В день он падоша священницы на брани, хотящии храбрее быти, внегда изыти им на брань без совета (его). 68 И уклонися Иуда во Азот в землю иноплеменников, и разори капища их, и изваяния богов их сожже огнем, и взя корысти от градов, и возвратися в землю Иудину. === 6 === 1 И царь Антиох прохождаше вышния страны и слыша, яко есть Елимаис в Персиде град славен богатством, сребром и златом, 2 и храм в нем богат зело, и ту запоны златы, и броня и оружия, яже остави ту Александр сын Филиппов, царь Македонский, иже царствова первый во Еллинех. 3 И прииде и искаше взяти град и пленити его, и не возможе, яко познася слово сущым во граде. 4 И восташа противу ему на брань, и побеже оттуду, и иде со скорбию велиею, и возвратися в Вавилон. 5 И прииде возвещаяй ему некто в Персиду, яко отбегоша полцы ходившии во Иудею. 6 И ходи Лисиа с силою крепкою в первых, и прогнан бысть от лица их, и возмогоша оружиями и силами и корыстьми многими, яже взяша от полков, ихже избиша. 7 И разориша мерзость, юже созда на олтари во Иерусалиме, и святыню, якоже прежде окружиша стенами высокими, и Вефсуру град его. 8 И бысть яко услыша царь словеса сия, устрашися и смутися зело: и паде на ложе и впаде в недуг от печали, понеже не сбыстся ему, якоже помышляше. 9 И бе ту дни многи, понеже обновися на нем печаль велика, и мняше, яко умрет. 10 И созва вся други своя и рече им: отиде сон от очию моею, и испадох сердцем от печали, 11 и рех в сердцы моем: до коликия скорби доидох и волны велия, в нейже ныне есмь? Яко благ и любимь бых во власти моей: 12 ныне же поминаю злая, яже сотворих во Иерусалиме, и взях вся сосуды златы и сребряны в нем, и послах изяти обитающих во Иудеи вотще: 13 познах убо, яко сих ради обретоша мя злая сия: и се, гибну скорбию велиею в земли чуждей. 14 И призва Филиппа единаго от другов своих, и постави его над всем царством своим, 15 и даде ему диадиму и ризу свою и перстень, еже водити Антиоха сына его и воспитати его еже царствовати. 16 И умре тамо Антиох царь в лето сто четыредесять девятое. 17 И позна Лисиа, яко умре царь. И постави царствовати Антиоха сына его вместо его, егоже воспита юношу, и нарече имя ему Евпатор. 18 И сущии во краеградии заключиша Израиля окрест святых и искаху им злая всегда и утверждение языком. 19 И умысли Иуда изгнати их: и созва вся люди, да обстоят их. 20 И собрашася вкупе и обседоша их в лето сто пятьдесятое, и сотвори на них стрелостоятелницы и миханы. 21 И изыдоша от них из заключения, и прилепишася тем нецыи нечестивии от Израиля, 22 и идоша ко царю и реша: доколе не сотвориши суда и отмстиши братию нашу? 23 Мы благоволим служити отцу твоему и ходити в заповедех его и последовати повелением его: 24 и облежени суть во краеградии сынове людий наших, сего ради и отчуждаются от нас: и елицы обретахуся от нас, погубляхуся, и наследия наша расхищаема бяху: 25 и не на нас токмо простроша руку, но и на вся пределы нашя: 26 и се, ополчишася днесь на краеградие во Иерусалиме, еже взяти его и святыню, и Вефсуру утвердиша: 27 и аще не предвариши их скорее, болшая сих сотворят, и не возможеши удержати их. 28 И прогневася царь, егда услыша, и собра вся други своя и началники силы своея и иже над конники: 29 и от царств иных и от островов морских приидоша к нему силы наемницы: 30 и бысть число сил его сто тысящ пешцев и двадесять тысящ конников, и слонов тридесять два ведящих брань. 31 И приидоша сквозе Идумею и ополчишася в Вефсуре, и ратоваху дни многи и сотвориша миханы: и изыдоша и пожгоша их огнем и бишася мужественне. 32 И отиде Иуда от краеградия и ополчися в Вефсахарии противу полка царева. 33 И воста царь зело рано и воздвиже ополчение во устремлении его по пути Вефсахарии: и устроишася силы на брань, и вострубиша трубами, 34 и слоном показаша кровь гроздову и ягоды, еже поострити их на брань: 35 и разлучиша зверей на полки и приставиша коемуждо слону тысящу мужей облеченных в броня железом соплетены, и шлемы медяни на главах их, и пять сот конников вчиненых коемуждо зверю избранных. 36 Сия беша прежде времене, идеже аще бе зверь: и идеже аще идяше, идяху вкупе и не отступаху от него. 37 И пирги древяни на них крепцы защищающии на коемждо звери, препоясани на нем миханами, и на коемждо мужей силы тридесять два воюющих на них, и Индианин управитель его. 38 И прочыя конники сюду и сюду поставиша на две части полка, побуждающе и заграждающе в дебрех. 39 Егда же возсия солнце на щиты златыя и медяныя, обсияша горы от них и облисташа яко лампады огненныя. 40 И отлучися часть некая от полка царева на горы высоки, и нецыи на нижшая, и идяху крепце и чинно. 41 И поколебашася вси слышащии глас множества их, и путьшествия многих, и сражения оружий: бе бо ополчение велико зело и крепко. 42 И приближися Иуда и полк его на брань, и падоша от полка царева шесть сот мужей. 43 И увиде Елеазар сын Саварань единаго от зверей облечена в броню царску, и бяше выше прочиих зверей, и возмнеся ему, яко на нем есть царь: 44 и вдадеся сам еже избавити люди своя и сотворити себе имя вечное, 45 и тече к нему с дерзостию в средину полка, и побиваше одесную и ошуюю, и разделяхуся от него сюду и сюду: 46 и вниде под слона, и подложися ему, и уби его, и паде на землю верху его, и умре ту. 47 И видеша силу царства и устремление воев, и уклонишася от них. 48 Сущии же от полка царева взыдоша противу их на Иерусалим: и ополчися царь на Иудею и на гору Сион. 49 И сотвори мир с сущими в Вефсурех: и изыдоша из града, яко не бе им тамо пищи, еже затворитися в нем, понеже суббота бяше земли. 50 И взя царь Вефсуру и постави ту стражу хранити ю. 51 И ополчися на место святыни дни многи, и постави ту стрелостоятелницы и миханы, и огнеметницы и каменометницы и скорпионы, еже бы метати стрелы и пращы. 52 Сотвориша же и тии миханы противу михан их, и брашася дни многи. 53 Пища же не бяше во граде, занеже седмое лето бе, и избежавшии во Иудею от язык поядоша останок сокровения. 54 И осташася во святилищи мужей мало, яко объят их глад, и расточени быша кийждо в место свое. 55 И слыша Лисиа, яко Филипп, егоже постави царь Антиох, еще жив сый, да воспитает Антиоха сына его, во еже царствовати ему, 56 возвратися от Персиды и Мидии, и вои царстии ходившии с ним, и яко ищет прияти вещы: 57 и потщася поити от краеградия и глаголати ко царю и воеводам силы и к мужем: оскудеваем на всяк день, и пища нам мала (есть), и место, еже обстоим, утверждено, и надлежит нам (строити) яже о царстве: 58 ныне убо дадим десницу человеком тем и сотворим с ними мир и со всеми людьми их, 59 и уставим им, да ходят в законех своих, якоже прежде: ради бо законов своих, яже разрушихом, прогневашася и сотвориша вся сия. 60 И угодно бысть слово пред царем и началники, и посла к ним мир сотворити. И прияша. 61 И клятся им царь и началницы: о сих изыдоша из твердыни. 62 И вниде царь в гору Сион и виде твердыню места: и отвержеся клятвы, еюже клятся, и повеле разорити стену окрест. 63 И отиде тщателно и возвратися во Антиохию, и обрете Филиппа господствующа над градом, и воева нань, и взя град нуждею. === 7 === 1 Лета сто пятьдесят перваго, изыде Димитрий Селевкиев сын от Рима, и взыде с малыми людьми во град приморский, и воцарися тамо. 2 И бысть, егда вхождаше в дом царства отец своих, яша силы Антиоха и Лисию привести их к нему. 3 И уведана бысть ему вещь, и рече: не покажите ми лиц их. 4 И убиша их воини, и седе Димитрий на престоле царства своего. 5 И приидоша к нему вси мужие беззаконнии и нечестивии от Израиля, и Алким предвождаше их, хотяй жречествовати: 6 и оклеветаша людий пред царем, глаголюще: погуби Иуда и братия его всех другов твоих и нас расточи от земли нашея: 7 ныне убо посли мужа, емуже вериши, да идет и видит истребления вся, яже сотвори нам и стране царстей, и да мучит их и всех помогающих им. 8 И избра царь Вакхида друга царска, иже господствоваше об ону страну реки, и великаго в царстве и верна цареви, 9 и посла его и Алкима нечестиваго, и устави ему жречество, и повеле ему сотворити отмщение в сынех Израилевых. 10 И отидоша и приидоша с силою велиею в землю Иудину: и посла вестники ко Иуде и братии его словесы мирными с лестию. 11 И не вняша словесем их: видеша бо, яко приидоша с силою велиею. 12 И собрашася ко Алкиму и Вакхиду собрания книжник изыскати праведная. 13 И первии Асидее беху в сынех Израилевых, и искаху от них мира. 14 Рекоша бо: человек жрец от семене Аароня прииде в силах и не изобидит нас. 15 И глагола с ними словеса мирна и клятся им, глаголя: не воздам вам злая, ниже другом вашым. И вероваша ему. 16 И поима от них шестьдесят мужей и уби их во един день по словесех, якоже писано есть: 17 плоти преподобных Твоих и крови их пролияша окрест Иерусалима, и не бе погребаяй их. 18 И нападе страх их и трепет на вся люди, яко рекоша: несть в них истины и суда: преступиша бо уставление и клятву, еюже кляшася. 19 И воздвижеся Вакхид от Иерусалима и ополчися в Визефе, и посла и ят многих отступивших от него мужей и некиих от людий, и закла их, (и) в кладязь велик (вверже): 20 и вручи страну Алкиму и остави силу в помощь ему: и отиде Вакхид ко царю. 21 И подвизашеся Алким о архиерействе. 22 И собрашася к нему вси возмущающии люди своя, и одержаша землю Иудину, и сотвориша язву велику во Израили. 23 И виде Иуда вся злая, яже сотвори Алким, и иже с ним бяху, сыном Израилевым паче языков. 24 И изыде во вся пределы Иудейския по окрест и сотвори отмщение на мужех отторгшихся, и престаша ходити во страну. 25 Егда же увиде Алким, яко укрепися Иуда и иже с ним, и позна, яко не может противостояти им, и возвратися ко царю и оклевета их лукавне. 26 И посла царь Никанора, единаго от началник своих славных, и ненавидящаго и враждующаго на Израиля, и повеле ему избити люди. 27 И прииде Никанор во Иерусалим с силою великою и посла ко Иуде и братии его с лестию словесы мирными, глаголя: 28 да не будет брань между мною и вами: прииду с мужы малыми, да вижду лица ваша с миром. 29 И прииде ко Иуде, и поздравляху друг друга мирно: и воини уготовани бяху восхитити Иуду. 30 И познася слово Иуде, яко с лестию прииде к нему: и устрашися от него и не восхоте ктому видети лица его. 31 И позна Никанор, яко открыся совет его, и изыде во сретение Иуде бранию близ Харфарсарама. 32 И падоша от сущих при Никаноре яко пять тысящ мужей, и бежаша во град Давидов. 33 И по словесех сих взыде Никанор на гору Сион: и изыдоша от иереев от святых и от старейшин людских поздравити его мирно и показати ему всесожжение приносимое за царя. 34 И поругася им и посмеяся им, и оскверни их и глагола гордо. 35 И клятся с яростию, рекий: аще не предастся Иуда и воини его в руки моя ныне, и будет, егда возвращуся в мире, сожгу храм сей. И изыде с яростию велиею. 36 И внидоша жерцы и сташа пред лицем олтаря и храма и плачуще рекоша: 37 Ты, Господи, избрал еси храм сей, нарещися имени Твоему в нем, да будет храм молитвы и прошения людем Твоим: 38 сотвори отмщение на человеце сем и на воех его, и да падут мечем: помяни хуления их и не даждь им обиталища. 39 И изыде Никанор от Иерусалима и ополчися в Вефороне и срете его сила Сирска. 40 Иуда же приближися во Адасу с тремя тысящьми мужей. И помолися Иуда и рече: 41 иже послани бяху от царя Ассирийскаго (Сеннахирима), Господи, егда похулиша Тя, изыде Ангел Твой и порази от них сто осмьдесят пять тысящ: 42 тако сокруши ополчение сие пред нами днесь, и да познают прочии, яко зло глагола на святая Твоя, и суди ему по злобе его. 43 И сотвориша воини брань в третийнадесять день месяца Адара, и сотреся ополчение Никанорово, и паде сам первый во брани. 44 Егда же увидеша вои его, яко паде Никанор, повергше оружия своя бежаша. 45 И гнаша их путь дне единаго от Адаса, дондеже приити в Газир, и трубами трубиша вслед их со знаменами. 46 И изыдоша от всех сел Иудейских окрест и заключиша их рогами, и возвращахуся тии к ним и падоша вси мечем, и не оста от них ни един. 47 И взяша корысти их и плен, и главу Никанорову отсекоша, и десницу его, юже простре гордо, и принесоша и повесиша противу Иерусалима. 48 И возвеселишася людие зело, и сотвориша день той день веселия великаго, 49 и уставиша праздновати на всяко лето день той третийнадесять месяца Адара. 50 И умолче земля Иудина на дни малы. === 8 === 1 И слыша Иуда имя Римлян, яко суть сильни крепостию, и тии благоволят о всех приложившихся к ним, и елицы приидут к ним, составляют с ними дружбу, и яко суть сильни крепостию. 2 И поведаша ему брани их и мужества блага, яже творят в Галатех, и яко одержаша их и приведоша их под дань: 3 и колика сотвориша во стране Испанийстей, еже удержати руды сребра и злата, еже тамо: и одержаша всяко место советом своим и долготерпением, 4 и место бе далече отстоящо от них зело: и царей нашедших на них от края земли сотроша, и поразиша их язвою великою, прочии же дают им дань по вся лета: 5 и Филиппа и Персеа Китиейскаго царя, и воставших на них сокрушиша их в брани и одержаша их: 6 и Антиоха великаго царя Асийскаго, шедшаго противу их на брань, имущаго сто двадесять слонов, конники и колесницы и силу велию зело, и сотрен бысть от них: 7 и яша его жива, и уставиша, да дает им той и царствующии по нем дань велику, и даяти залог и уставление, 8 и страну Индийску и Мидию, и Лидию и от предобрых стран их, и взявше их от него даша я Евмению царю: 9 и яко совещаша сущии от Еллады приити и взяти их: и уведано бысть слово тем, 10 и послаша на них воеводу единаго и воеваша на них, и падоша от них язвении мнози, и плениша жен их и чад их, и разграбиша их и землю их одержаша, и разориша твердыни их и поработиша их даже до сего дне: 11 и прочая царства и островы, иже некогда противишася им, истребиша и поработиша их: 12 с други же своими и примиряющимися к ним сохраняху дружбу, и одержаху царства ближняя и дальняя, и елицы слышаху имя их, бояхуся от них: 13 елицем же аще хотят помогати и воцаряти, царствуют: и ихже аще хотят, пременяют: и вознесошася зело: 14 и во всех сих не возлагаше ни един от них диадимы, ни облачашеся в порфиру, еже возвеличитися о ней: 15 и советную палату сотвориша себе, и на всяк день советоваху в ней о множестве (народов) еже благоустрояти их: 16 и вверяют единому человеку началство свое по лету, и господствовати всею землею их, и вси повинуются единому, и несть зависти ниже рвения в них. 17 И избра Иуда Евполемона сына Иоаннова, сына Аккосова, и Иасона сына Елеазарова, и посла их в Рим, составити с ними дружбу и споборение, 18 и еже отяти от них иго их, понеже видеша царство Еллинское порабощающее Израиля в работу. 19 И идоша в Рим, путь же велий зело, и внидоша в палату советную, и отвещаша и реша: 20 Иуда Маккавей и братия его и множество Иудейское послаша нас к вам составити с вами дружбу и мир и вписати нас споборниками и другами вашими. 21 И угодно бысть слово пред ними. 22 И сие списание послания, еже восписаша на дщицах медяных и послаша во Иерусалим быти у них тамо в память мира и споборства: 23 благо да будет Римляном и языку Иудейску на мори и на земли в век, оружие же и врази далече да будут от них: 24 аще же наступит брань Римляном первее или всем споборником их во всем господстве их, 25 споборет язык Иудейский, якоже время определит им, сердцем полным: 26 и ратующым не дадут, ниже ссудят пшеницею, оружием, сребром, кораблями, якоже угодно Римляном, и сохранят заповеди их ничтоже вземлюще: 27 такожде аще и языку Иудейску прежде случится брань, помогут Римляне от души, якоже им время определит: 28 и споборающым не дастся пшеница, оружие, сребро, корабли, якоже угодно Римляном: и сохраняти заповеди их, и без лести. 29 По сим словесем уставиша Римляне людем Иудейским. 30 Аще же по словесех сих совещаются сии и онии приложити или отяти нечто, сотворят от произволения своего, и еже аще приложат или отимут, будут тверда. 31 А о злобах, яже царь Димитрий творит в них, писахом ему, глаголюще: вскую отяготил еси иго твое на други нашя споборники Иудеи? 32 Аще убо паки прибегнут к нам на тя, сотворим им суд и ополчимся на тя морем и землею. === 9 === 1 И слыша Димитрий, яко паде Никанор и силы его во брани, и приложи Вакхида и Алкима паки послати во Иудею, и десный рог с ними. 2 И идоша путем, иже (ведет) в Галгалы, и ополчишася на Месалоф, иже есть во Арвилех, и взяша его, и побиша душ человеческих много. 3 И в месяц первый лета сто пятьдесят втораго, приступиша воини ко Иерусалиму, 4 и восташа и идоша в Верею в двадесяти тысящах мужей и две тысящы конников. 5 Иуда же бе ополчен во Елаасе, и три тысящы мужей избранных с ним. 6 И видеша множество сил, яко многи суть, и устрашишася зело: и избегоша мнози от полка, и не остася от них токмо осмь сот мужей. 7 И виде Иуда, яко расточися полк его, и брань оскорбляше его: и сокрушися сердцем, яко не имеяше времене собрати их, 8 и ослабе и рече оставшым: востанем и взыдем на супостаты нашя, аще можем ратовати противу их. 9 И отвращаху его рекуще: не можем, но спасем токмо душы своя ныне, и возвратимся со братиею нашею, и ополчимся на них: мы же мали. 10 И рече Иуда: не буди ми сотворити вещь сию, еже бежати от них: и аще приближися время наше, умрем мужественно ради братии нашея и не оставим вины славе нашей. 11 И воздвижеся сила от полка и ста во сретение им, и разлучишася конницы на две части, и пращницы и стрелцы предидяху силе, и предподвижницы вси сильнии. 12 Вакхид же бе на деснем розе, и приближися полк от двою страну, и возглашаху трубами. 13 И вострубиша, иже бяху от страны Иудины, и тии трубами: и поколебася земля от гласа ополчений. И бысть брань сражена от утра даже до вечера. 14 И виде Иуда, яко Вакхид и крепость полка в десных: и собрашася к нему вси крепцыи сердцем: 15 и сотреся десный рог от них, и гнаше вслед их даже до горы Азота. 16 И сущии в левем розе видеша, яко сотреся десный рог, и обратишася по стопам Иудиным и сущих с ним созади. 17 И отягчися брань, и падоша язвени мнози от сих и от тех: 18 и Иуда паде, прочии же бежаша. 19 И взяста Ионафан и Симон Иуду брата своего и погребоста его во гробе отец его в Модине. 20 И плакашася о нем и рыдаше его весь Израиль плачем велиим, и сетоваху дни многи и рекоша: 21 како паде сильный спасаяй Израиля? 22 Прочая же словес и браней Иудиных и благих мужеств, ихже сотвори, и величества его, не суть писана: многа бо бяху зело. 23 И бысть по преставлении Иудине, проникоша беззаконнии во всех пределех Израилевых, и прозябоша вси делающии беззаконие. 24 Во дни оны бысть глад велик зело, и отступи страна с ними. 25 И избра Вакхид нечестивых мужей и постави их господиями страны. 26 И искаху и испытаху другов Иудиных и привождаху тех к Вакхиду: и мстяше им и посмевашеся им. 27 И бысть скорбь велика во Израили, яже не бысть от дний, в нихже не явися пророк во Израили. 28 И собрашася вси друзи Иудины и рекоша Ионафану: 29 отнележе брат твой Иуда скончася, и муж подобен ему несть изыти противу врагов и Вакхида и враждующих языку нашему: 30 ныне убо тебе днесь избрахом, еже быти вместо его нам в началника и вожда, еже ратовати во брани нашей. 31 И прия Ионафан во время оно началство и воста вместо Иуды брата своего. 32 И позна Вакхид и искаше его убити. 33 И позна Ионафан и Симон брат его и вси иже с ним (бяху), и побегоша в пустыню Фекуе, и ополчишася при воде рва Асфара. 34 И позна Вакхид в день суббот, и прейде сам и вси вои его об ону страну Иордана. 35 И посла Ионафан брата своего вожда народу и моли Наватеов другов своих представити им приготовление их многое. 36 И изыдоша сынове Иамвриины от Мидавы, и яша Иоанна и вся елика име, и отидоша имуще та. 37 По словесех же сих возвестиша Ионафану и Симону брату его, яко сынове Иамвриины творят брак великий и ведут невесту от Надавафа, дщерь единаго от великих вельмож Ханаанских, с гордостию велиею. 38 И помянуша Иоанна брата своего, и взыдоша, и скрышася под сению горы: 39 и воздвигнуша очи свои и видеша, и се, плищь и уготование многое, и жених изыде и друзи его и братия его бо сретение им с тимпаны и мусикиами и оружии многими: 40 и восташа на них от засады иже при Ионафане и убиша их, и падоша язвени мнози, прочии же бегоша в гору: и взяша вся корысти их. 41 И обратися брак в сетование, и глас мусикии их в плачь. 42 И отмстиша отмщение крове брата своего и возвратишася на брег Иорданский. 43 И слыша Вакхид и прииде в день субботный даже до брегов Иорданских с силою многою. 44 И рече ко своим Ионафан: востанем ныне и ополчимся за душы нашя, несть бо днесь якоже вчера и третияго дне: 45 се бо, брань противу нас и созади нас: вода же Иорданская сюду и сюду, и блато и лес, и несть места, еже уклонитися: 46 ныне убо возопийте на небо, да избавитеся от рук врагов ваших. И сразися брань. 47 И простре Ионафан руку свою убити Вакхида, и уклонися и него вспять. 48 И вскочи Ионафан и иже с ним во Иордан, и преплываху на об ону страну, и не преидоша по них Иордана. 49 И падоша от страны Вакхидины дне онаго яко тысяща мужей. 50 И возвратися во Иерусалим и созда грады тверды во Иудеи, твердыню во Иерихоне и яже во Еммауме и Вефороне, и Вефили и Фемнафе, и Фарафоне и Тефоне, со стенами высокими и вратами и заворами, 51 и постави стражу в них, еже враждовати Израилю: 52 и утверди град иже в Вефсуре, и Газару, и краеградие, и постави в них силы и предложение брашен: 53 и взя сыны вождов страны в залог и посади их в краеградии во Иерусалиме под стражею. 54 И в лето сто пятьдесят третие месяца втораго, заповеда Алким разорити стену двора святых внутренняго, и разори дела пророков, и нача разоряти. 55 Во время оно поражен бысть Алким, и воспятишася дела его, и заградишася уста его, и разслабе и не можаше ктому глаголати слова и заповедати о доме своем. 56 И умре Алким во время оно с мукою велиею. 57 И виде Вакхид, яко умре Алким, и возвратися ко царю. И умолча земля Иудина лета два. 58 И совещаша вси беззаконницы рекуще: се, Ионафан и иже с ним в покои обитают уповающе: ныне убо наведем Вакхида, и поимает их всех во едину нощь. 59 И шедше совещашася с ним. 60 И воста ити с силою многою и посла епистолии тай всем споборителем его, иже во Иудеи, да имут Ионафана и сущих с ним. И не возмогоша, яко познася им совет их. 61 И яша от мужей страны началников злобы пятьдесят мужей и убиша их. 62 И отиде Ионафан и Симон и иже с ними в Вефвасию, яже в пустыни, и созда разореная ея и укрепи ю. 63 И позна Вакхид, и собра все множество свое, и сущым от Иудеи возвести. 64 И шед ополчися на Вефвасию, и воеваше ю дни многи, и сотвори миханы. 65 И остави Ионафан Симона брата своего во граде, и изыде во страну, и изыде в числе. 66 И порази Одомира и братию его и сынов Фасироних в жилищих их, и нача избивати и восходити в силах. 67 Симон же и иже с ним изыдоша из града и пожгоша миханы, 68 и ратоваху противу Вакхида, и сотреся от них, и озлобляху его зело, яко бе совет его и поход его вотще. 69 И прогневася яростию на мужей беззаконных, советовавших ему приити во страну, и уби от них многих, и совещася отити в землю свою. 70 И позна Ионафан и посла к нему старейшин составити мир с ним и отдати им плен. 71 И прия, и сотвори по словесем его, и клятся ему не искати ему зла во вся дни живота его. 72 И отдаде ему плен, егоже прежде плени от земли Иудины: и возвращься отиде в землю свою и не приложи ктому приити в пределы их. 73 И преста мечь от Израиля. И обита Ионафан в Махмасе: и нача Ионафан судити люди и истреби нечестивых от Израиля. === 10 === 1 И в лето сто шестьдесятое взыде Александр сын Антиохов Епифан и одержа Птолемаиду: и прияша его, и царствова тамо. 2 И слыша Димитрий царь, и собра воев много зело, и изыде противу ему на брань. 3 И посла Димитрий ко Ионафану епистолии словесы мирными, величая его. 4 Рече бо: предварим сотворити мир с ним, прежде неже сотворит со Александром противу нас: 5 воспомянет бо вся злая, яже сотворихом на него и на братию его и на язык его. 6 И даде ему власть собирати воины и уготовляти оружия, и быти ему другом его, и залог, иже бе в краеградии, повеле отдати ему. 7 И прииде Ионафан во Иерусалим и прочте епистолии во услышание всем людем и иже от краеградия. 8 И устрашишася страхом велиим, егда услышаша, яко даде ему царь власть собирати воины. 9 И предаша иже от краеградия Ионафану залог, и отдаде их родителем их. 10 И обита Ионафан во Иерусалиме, и нача созидати и обновляти град, 11 и рече ко творящым дела созидати стены и гору Сион окрест от камений четвероуголных ко утверждению, и сотвориша сице. 12 И побегоша иноплеменницы, иже бяху в твердынех, яже созда Вакхид: 13 и остави кийждо место свое и отиде в землю свою. 14 Обаче в Вефсуре осташася нецыи от оставльших закон и заповеди (Божия): бе бо им убежище. 15 И слыша Александр царь обещания, елика посла Димитрий Ионафану, и поведаша ему брани и мужества, яже сотвори той и братия его, и труды, яже имеху. 16 И рече: еда обрящем коего мужа такова? И ныне сотворим его в друга и споборника нашего. 17 И написа епистолии и посла ему по словесем сим, глаголя: 18 царь Александр брату Ионафану радоватися: 19 слышахом о тебе, яко муж силен еси крепостию и угоден еси быти нам друг: 20 и ныне поставихом тя днесь архиереа языка твоего, и еже другом царевым нарицатися (и посла ему порфиру и венец злат), и мудрствовати таяжде с нами и снабдевати дружбу к нам. 21 И облечеся Ионафан во святую ризу седмаго месяца лета сто шестьдесятаго, в день праздника сенопотчения, и собра силы и уготова оружия многа. 22 И слыша Димитрий словеса сия, и опечалися зело, и рече: 23 что сие сотворихом, яко предвари нас Александр составити дружбу со Иудеи во утверждение? 24 Напишу и аз им словеса просителная и возвышения и дары, яко да будут со мною в помощь. 25 И написа им по словесем сим: Царь Димитрий языку Иудейскому радоватися: 26 понеже сохранисте заветы к нам и пребывасте в дружбе нашей и не приступисте ко врагом нашым, слышахом и радовахомся: 27 и ныне пребывайте еще сохранити к нам веру, и воздадим вам благая, ихже ради творите с нами, 28 и оставим вам дани многи, и дадим вам дары: 29 и ныне свободных творю вас и оставляю всем Иудеом дани и цену от соли и от венцев: 30 и еже вместо третины семене и вместо половины плода древеснаго надлежащаго ми взяти, оставляю от днесь и потом, еже не взимати от земли Иудины и от триех стран прилежащих ей, от Самарии и Галилеи, и от днешняго дне и в вечное время: 31 и Иерусалим да будет свят и свободен со пределы своими, и десятины и дани: 32 оставляю и власть краеградия еже во Иерусалиме, и даю архиерею, да поставит в нем мужы, ихже аще изберет сам, хранити его: 33 и всяку душу Иудейскую, яже пленена есть от земли Иудины, во всем царстве моем оставляю свободну туне, и вси да оставятся от даней и скотов своих: 34 и вси праздницы и субботы и новомесячия и дние вчиненнии, и три дни прежде праздника и три дни по празднице, да будут вси дние свободы и оставления всем Иудеом сущым во царствии моем: 35 и никто имети будет власти делати и стужати кому от них о всяцей вещи: 36 и да напишутся от Иудей в воины царския до тридесяти тысящ мужей, и да дадутся им оброцы, якоже подобает всем воем царским: 37 и да поставятся от них в твердынех царских велиих, и от сих поставятся на потребы царства сущыя в верность: и сущии над ними и началницы да будут от них, и да ходят в законех своих, якоже повеле царь в земли Иудине: 38 и три пределы, прилежащии Иудеи от страны Самарийския, да приложатся ко Иудеи, да вменятся быти под единым, еже не послушати иныя власти, но токмо архиереа: 39 Птолемаиду и пределы ея дах в дар святым, сущым во Иерусалиме, на приличное иждивение святым, 40 и аз дам на коеждо лето пятьнадесять тысящ сикль сребра от сокровищ царских от мест прилежащих: 41 и всякое излишнее, еже не воздаша от потреб, якоже в первых летех, отныне дадут в дела храму: 42 и свыше сих пять тысящ сиклей сребра, ихже взимаху от потреб святилища, якоже в прежних летех от собрания на всякое лето, и сия оставляются, понеже надлежат сия жерцем служащым: 43 и елицы аще прибегнут к церкви сущей во Иерусалимех и во всех пределех его, одолжени суще царскими и всякою вещию, да отрешаются, и вся елика суть им во царствии моем: 44 и созидати и обновляти дела святых, и иждивение дастся от сокровища царскаго: 45 и еже созидати стены Иерусалима и утвердити окрест, и иждивение дастся от собрания царска, и еже создати стены во Иудеи. 46 Егда же услыша Ионафан и людие словеса сия, не вероваша им, ниже прияша, яко помянуша злобу велию, юже сотвори во Израили, и оскорби их зело. 47 И благоволиша о Александре, яко сей бысть им началник словес мирных, и споборяху ему во вся дни. 48 И собра царь Александр силу велию и ополчися противу Димитриа. 49 И сотвориша брань два царя, и побеже полк Димитриев, и гна его Александр и укрепися на них. 50 И превозможе брань зело, дондеже зайде солнце, и паде Димитрий в день он. 51 И посла Александр ко Птоломею царю Египетскому послы по словесем сим, рекий: 52 понеже возвратихся в землю царства моего, и седох на престоле отец моих, и одержах началство, и сокруших Димитриа, и возобладах страною нашею, 53 и составих противу его рать, и сокрушися той и ополчение его от нас, и седохом на престоле царства его: 54 и ныне составим между нами дружбу, и ныне даждь мне дщерь твою в жену, и буду зять твой, и дам тебе дары, и ей достойная тебе. 55 И отвеща царь Птоломей глаголя: благ день, в оньже возвратился еси в землю отец твоих и сел еси на престоле царства их: 56 и ныне сотворю ти, яже писал еси: но срящися во Птолемаиде, яко да видим друг друга, и будеши ми зять, якоже рекл еси. 57 И изыде Птоломей от Египта сам и Клеопатра дщи его, и внидоша во Птолемаиду лета сто шестьдесят втораго. 58 И срете его Александр царь: и даде ему Клеопатру дщерь свою и сотвори брак ея во Птолемаиде, якоже царие во славе велицей. 59 И написа Александр царь Ионафану приити во сретение ему. 60 И иде со славою во Птолемаиду и срете оба царя: и даде има сребро и злато и другом их, и дары многи, и обрете благодать пред нима. 61 И собрашася нань мужие губителе от Израиля, мужие беззаконнии клеветати нань. И не внят им царь. 62 И повеле царь совлещи Ионафана с риз его и облещи его в порфиру. И сотвориша тако. 63 И посади его царь с собою и рече началником своим: изыдите с ним на среду града и проповедите ни единому клеветати нань ни о единей вещи, и ни един ему да стужит о всяцем глаголе. 64 И бысть егда увидеша клеветницы славу его, якоже проповедаша, и облечена его порфирою, и бежаша вси. 65 И прослави его царь, и написа его в первых друзех, и постави его воеводу и участника началства. 66 И возвратися Ионафан во Иерусалим с миром и веселием. 67 И в лето сто шестьдесят пятое прииде Димитрий сын Димитриев от Крита в землю отец своих. 68 И слыша Александр царь, и опечалися зело, и возвратися во Антиохию. 69 И постави Димитрий Аполлониа сущаго от Килисирии: и собра силу велию, и ополчися во Иамнии, и посла ко Ионафану архиерею, глаголя: 70 ты ли един возносишися на ны, аз же бых в посмех и в поношение тебе ради: и чесо ради ты властелствуеши над нами в горах? 71 Ныне убо, аще надеешися в силах твоих, изыди к нам на поле и искусимся ту между собою, яко со мною есть сила градов: 72 вопроси и научися, кто есмь? И прочии помогающии нам, и глаголют: несть вам стояния ноги пред лицем нашим, яко дващи в бег обратишася отцы твои в земли их: 73 и ныне не возможеши стерпети конника и силы таковыя в поли, идеже несть камене, ни стены, ни места к бежанию. 74 Егда же услыша Ионафан словеса Аполлониева, подвижеся мыслию, и избра десять тысящ мужей, и изыде из Иерусалима, и снидеся с ним Симон брат его в помощь ему. 75 И ополчися на Июппию, и заступиша ему от града, яко стража Аполлониева в Июппии бысть, и ратоваша ю. 76 И убоявшеся отверзоша иже из града, и облада Ионафан Июппиею. 77 И слыша Аполлоний, и собра три тысящы конник и силу велию, и иде во Азот аки путьшествуя, и абие изыде на поле, зане имеяше множество конник и надеяшеся на них. 78 И гна Ионафан вслед его во Азот, и сразишася полцы на рать. 79 И остави Аполлоний тысящу конник созади их в тайне. 80 И позна Ионафан, яко есть засада созади его. И окружиша полк его и стреляху на люди от утра даже до вечера, 81 людие же стояша, якоже заповеда Ионафан: и утрудишася кони их. 82 И приведе Симон силу свою и нападе на полк: конницы бо утруждени бяху, и сокрушишася от него и побегоша, 83 и конницы расточишася по полю и бегоша во Азот, и внидоша в Вифдагон капище его, еже уцелети. 84 И пожже Ионафан Азот и грады иже беху окрест его, и взя корысти их и капище Дагоново, и вбегших в не пожже огнем. 85 И бысть падших мечем с сожжеными яко осмь тысящ мужей. 86 И отиде оттуду Ионафан и прииде во Аскалон, и изыдоша от града во сретение ему в славе велицей. 87 И возвратися Ионафан во Иерусалим с сущими с ним, имуще корысти многи. 88 И бысть егда услыша Александр царь словеса сия, и приложи прославити Ионафана: 89 и посла ему гривну златую якоже обычай есть даяти сродником царевым, и даде ему Аккарон и вся пределы его во одержание. === 11 === 1 И царь Египетский собра силу многу аки песок, иже вскрай моря, и корабли многи: и искаше обладати царство Александрово лестию и приложити е к царству своему. 2 И изыде в Сирию словесы мирными, и отверзаху ему иже от градов и сретаху его, яко заповедь бе Александра царя сретати его, зане бяше тесть его. 3 Егда же вхождаше во грады, Птоломей поставляше силы на стражу в коемждо граде. 4 Егда же приближися ко Азоту, показаша ему капище Дагоново сожжено, и Азот и окрестныя грады его разорены, и телеса повержена, и побиеных, ихже поби во брани: сметаша бо я в купы их при пути его. 5 И поведаша царю, яже сотвори Ионафан, еже бы возненавидети его. И умолча царь. 6 И срете Ионафан царя во Июппии со славою, и целоваста друг друга и почиста ту. 7 И иде Ионафан со царем даже до реки нарицаемыя Елевфера, и возвратися во Иерусалим. 8 Царь же Птоломей огосподствова грады приморскими даже до Селевкии приморския и размышляше на Александра советы лукавы. 9 И посла старейшин к Димитрию царю, глаголя: прииди, составим между нама завет, и дам тебе дщерь мою, юже имать Александр, и царствовати имаши во царствии отца твоего: 10 раскаяхся бо дав ему дщерь мою, искаше бо мя убити. 11 И похули его ради похотения царства его. 12 И отяв дщерь свою, даде ю Димитрию и отчуждися от Александра, и явися вражда их. 13 И вниде Птоломей во Антиохию и возложи две диадимы на главу свою, Асийскую и Египетскую. 14 Александр же царь бе в Киликии во времена она, понеже отметахуся иже от мест оных. 15 И слыша Александр и прииде нань бранию: и изведе Птоломей силу, и срете его рукою крепкою, и прогна его. 16 И побеже Александр во Аравию защититися тамо: царь же Птоломей вознесеся. 17 И усекну Завдииль Аравитин главу Александрову и посла Птоломею. 18 И царь Птоломей умре в третий день, и сущии в твердынех погибоша от сущих в твердынех. 19 И воцарися Димитрий в лето сто шестьдесят седмое. 20 Во дни оны собра Ионафан сущих от Иудеи, да воюют краеградие, еже во Иерусалиме, и сотвори на оное миханы многи. 21 И идоша нецыи ненавидящии языка их, мужие беззаконницы, ко царю Димитрию и возвестиша ему, яко Ионафан обстоит краеградие. 22 И слышав разгневася: егда же слыша, скоро прииде во Птолемаиду и написа ко Ионафану, да не обстоит краеградия, но да идет во сретение ему тщателно во Птолемаиду, еже беседовати с ним. 23 Егда же услыша Ионафан, повеле обстояти, и избра от старейшин Израилевых и иереев, и вдадеся в бедство: 24 и взяв злато и сребро и ризы и ины дары многи, иде ко царю во Птолемаиду и обрете благодать пред ним. 25 И клеветаху на него нецыи беззаконнии от языка (его). 26 И сотвори ему царь, якоже сотвориша ему, иже прежде его быша, и возвыси его пред всеми други своими, 27 и постави его началника священству, и елика ина имеяше прежде честная, и сотвори его в первых друзех быти. 28 И моли Ионафан царя сотворити Иудею безданну, и три топархии, и Самарию, и обеща ему триста талант. 29 И угодно бысть царю, и написа Ионафану епистолии о всех сих, имеющыя образ сицевый: 30 царь Димитрий брату Ионафану радоватися и языку Иудейскому: 31 списание епистолии, юже писахом Ласфену сроднику нашему о вас, писахом и к вам, да весте: 32 царь Димитрий Ласфену отцу радоватися: 33 языку Иудейску другом нашым и сохраняющым яже к нам праведная судихом благосотворити, ради благоприятства их к нам: 34 уставихом убо им пределы Иудейския и три страны, Аферему, Лидду и Рамафем, иже приложишася Иудеи от Самарии, и вся надлежащая к ним, всем жрущым во Иерусалиме, вместо царских, ихже взимаше царь от них первее на всяко лето от жит земли и от овощей древесных, 35 и ина надлежащая нам отныне десятин и даней надлежащих нам, и соли точила, и принадлежащих нам венцев, 36 вся щедро оставляем им, и ничтоже от сих отимется отныне и в вечное время: 37 ныне убо прилежите сотворити сих списание, и да дастся Ионафану и да положится в горе святей в месте честне. 38 И виде Димитрий царь, яко утишися земля пред ним, и ничто ему противится, и отпусти вся вои своя коегождо в место свое, кроме чуждих сил, ихже собра от островов языческих, и враждоваху ему вся силы отцев его. 39 Трифон же бе от Александровых первее, и виде, яко вся силы ропщут на Димитриа, и иде ко Емалкую Аравитину, иже воспита Антиоха детище Александрово: 40 и прилежаше ему, яко да даст ему е, да воцарит вместо отца его: и возвести ему, елика сотвори Димитрий, и вражду, еюже враждуют нань силы его, и пребысть ту дни многи. 41 И посла Ионафан ко Димитрию царю, да ижденет сущих во краеградии из Иерусалима и иже в твердынех: бяху бо воююще Израиля. 42 И посла Димитрий ко Ионафану глаголя: не токмо сия сотворю тебе и языку твоему, но и славою прославлю тя и язык твой, аще благовременство получу: 43 ныне убо право сотвориши, аще послеши ми мужей споборающих, яко отступиша вси вои мои. 44 И посла ему Ионафан три тысящы мужей сильных крепостию во Антиохию, и приидоша ко царю, и возвеселися царь о пришествии их. 45 И собрашася иже от града в средину града сто двадесять тысящ мужей и совещахуся убити царя. 46 И бежа царь во двор, и объяша иже беху от града пути градския, и начаша битися. 47 И призва царь Иудеов на помощь, и собрашася вси вкупе к нему: и расточишася вси по граду, 48 и убиша во граде в той день сто тысящ мужей, и сожгоша град, и взяша корысти многи во он день и избавиша царя. 49 И видеша иже бяху от града, яко одержаша Иудее град, якоже хотеша, и изнемогоша мысльми своими, и возопиша ко царю с молением, глаголюще: 50 даждь нам десницу, и да престанут Иудее ратовати нас и град. 51 И повергоша оружия своя и сотвориша мир. И прославишася Иудее пред царем и пред всеми иже во царствии его, и возвратишася во Иерусалим имеюще корысти многи. 52 И седе Димитрий царь на престоле царства своего, и упокоися земля пред ним. 53 И солга вся елика рече, и отчуждися Ионафана, и не воздаде ему по благотворением, яже воздаде ему, и оскорби его зело. 54 По сих же возвратися Трифон и Антиох с ним отрочищь юный: и воцарися и возложи диадиму. 55 И собрашася к нему вси вои, ихже расточи Димитрий, и ратоваша противу его, и побеже и побежден бысть. 56 И взя Трифон звери и одержа Антиохию. 57 И писа Антиох юный Ионафану, глаголя: уставляю тебе архиерейство и поставляю тебе над четырми странами, и будеши в друзех царских. 58 И посла ему сосуды златыя и служение, и даде ему власть пити из злата и быти в порфире и имети гривну злату. 59 И Симона брата его постави воеводою от страны Тира даже до предел Египта. 60 И изыде Ионафан и прохождаше об ону страну реки и во градех, и собрашася к нему вся силы Сирския в помощь, и прииде во Аскалон, и сретоша его честно от града. 61 И иде оттуду в Газу, и заключишася иже в Газе, и обстояше ю, и пожже окрестныя грады ея огнем, и плени я. 62 И молиша Ионафана иже от Газы, и даде им десницу, и взя сыны началников их в залог, и посла их во Иерусалим, и пройде страну даже до Дамаска. 63 И слыша Ионафан, яко суть началницы Димитриевы в Кадисе, иже в Галилеи, с силою многою, хотяще изринути его от страны. 64 И сретеся с ними, брата же своего Симона остави во стране. 65 И ополчися Симон на Вефсуру, и ратоваша ю дни многи, и заключи ю. 66 И просиша у него десницу прияти, и даде им, и изгна их оттуду, и взя град, и постави в нем стражу. 67 Ионафан же и полк его приидоша к воде Геннисар: 68 и идоша утро рано на поле насор, и се, полк иноплеменников срете его на поли, и поставиша нань ловителство в горах, сами же сретоша отсупротиву. 69 Ловителе же восташа от мест своих и составиша рать, 70 и побегоша иже со Ионафаном вси, и ни един остася от них, токмо Маттафиа сын Авессаломов, и Иуда сын Халфиев, началницы воинских сил. 71 И растерза Ионафан ризы своя, и возложи землю на главу свою, и помолися: 72 и обратися на них бранию и победи их, и бегоша. 73 И видеша свои бежавшии от него, и обратишася к нему, и гнаша с ним даже до Кадиса, даже до полка их, и ополчишася тамо. 74 И падоша от иноплеменник в день той три тысящы мужей. И возвратися Ионафан во Иерусалим. === 12 === 1 И виде Ионафан яко время ему споспешествует, и избра мужы и посла их в Рим составити и обновити с ними дружбу, 2 и ко Спартиатом и ко иным местом посла епистолии, по томужде образу. 3 И идоша в Рим и внидоша в советный дом и рекоша: Ионафан архиерей и язык Иудейский послаша нас обновити дружбу с вами и споборение по прежнему. 4 И даша епистолии им к ним по месту, да проводят их в землю Иудину с миром. 5 И сие списание епистолий, ихже писа Ионафан ко Спартиатом: 6 Ионафан архиерей и старейшины людий, и жерцы и прочии людие Иудейстии, Спартиатом братии радоватися: 7 еще прежде посланы бяху епистолии ко Онии архиерею от Дариа царствовавшаго в вас, яко есте братия наша, якоже списание содержит: 8 и прия Ониа мужа посланаго славно и прият епистолии, в нихже завещано о споборении и дружбе: 9 и мы убо не требующе сих, утешение имуще святыя книги, яже в руках наших, 10 покусихомся послати к вам обновити братство и дружбу, еже бы не отчуждитися вас: многа бо времена проидоша, отнележе посласте к нам: 11 мы убо во всяко время непрестанно и в праздники и в прочих подобающих днех воспоминаем вас в жертвах, яже приносим, и в молитвах, якоже подобает и лепо есть воспоминати братию: 12 веселимся убо о славе вашей: 13 нас же обыдоша многи скорби и многи брани, и ратоваша нас царие, иже окрест нас: 14 не хотехом убо стужати вам и прочиим споборником и другом нашым во бранех сих, 15 имеем бо с небесе помощь помогающую нам, и избавихомся от враг наших, и смиришася врази наши: 16 избрахом убо Нуминиа Антиохова сына и Антипатра Иасонова, и послахом к Римляном обновити с ними дружбу и споборение прежнее: 17 заповедахом убо им и к вам поити и поздравити вас, и дати вам от нас послания о обновлении и о братстве нашем: 18 и ныне добре сотворите отвещавающе нам на сия. 19 И сие списание посланий, ихже посла онии: 20 Дарий царь Спартиатов Онии священнику великому радоватися: 21 обретеся в писаниих о Спартиатех и Иудеех, яко суть братия и яко суть от рода Авраамля: 22 и ныне, отнележе сия познахом, добре сотворите пишуще нам о мире вашем: 23 и мы же восписахом вам: скоти ваши и имение ваше наша суть, и яже наша ваша суть: повелехом убо, да возвестят вам сия. 24 И слыша Ионафан, яко возвратишася началницы Димитриевы с силою многою, паче неже прежде, ратовати нань, 25 и изыде из Иерусалима, и срете их во Амафитстей стране: не бо даде им времене, да внидут во страну его: 26 и посла созиратели в полк их: и возвратишася и возвестиша ему, яко сице устрояются напасти на ня нощию. 27 Егда же зайде солнце, заповеда Ионафан своим бдети и быти во оружии и готовитися на брань всю нощь, и постави стражы окрест полка. 28 И слышаша супостати, яко готов есть Ионафан со своими на брань, и убояшася и ужасошася сердцем своим, и возжгоша огни в полце своем и отидоша. 29 Ионафан же и иже с ним беша, не познаша даже до утра: видяху бо огни горящыя. 30 И погна Ионафан вслед их и не достиже их, преидоша бо Елевферу реку. 31 И обратися Ионафан на Аравы, иже нарицахуся Заведее, и порази их, и взя корысти их. 32 И востав иде в Дамаск и прохождаше всю страну ту. 33 Симон же изыде и прииде даже до Аскалона и ближних твердынь, и уклонися во Июппию и взя ю. 34 Слыша бо, яко совещашася твердыню предати стране Димитриеве, и постави тамо стражу, да стрегут ю. 35 И возвратися Ионафан, и собра старейшины людския, и совещася с ними созидати твердыни во Иудеи 36 и возвысити стены Иерусалимския и воздвигнути высоту велию между краеградием и градом, еже бы отлучити оное от града, да будет сие на уединении, яко да ни купуют, ниже продают. 37 И собрашася созидати град, паде бо стена потока, яже от востока, и уготоваша нарицаемое Хафенафа. 38 И Симон созда Адиду в Сефиле и утверди врата и заворы. 39 И взыска Трифон царствовати во Асии и возложити диадиму и прострети руку на Антиоха царя, 40 и убояся, да не когда не попустит ему Ионафан и ратовати будет на него, и взыска пути, еже яти Ионафана и убити его: и востав прииде в Вефсан. 41 И изыде Ионафан во сретение ему с четыредесятию тысящию мужей избранных на ополчение и прииде в Вефсан. 42 И виде Трифон, яко прииде Ионафан с вои многими, и прострети нань руку убояся: 43 и восприят его честно, и постави его пред всеми други своими, и даде ему дары, и заповеда всем силам своим послушати его яко себе. 44 И рече Ионафану: вскую утрудил еси вся люди сия, брани не настоящей нам? 45 И ныне отпусти их в домы своя, избери же себе мужей мало, иже будут с тобою, и прииди со мною во Птолемаиду, и предам тебе ю и прочыя твердыни и силы прочыя, и всех иже над потребами, и возвращься отиду: сего бо ради приидох. 46 И веровав ему, сотвори, якоже рече, и отпусти силы, и отидоша в землю Иудину. 47 Остави же с собою три тысящы мужей, ихже две тысящы остави в Галилеи, тысяща же идоша с ним. 48 Егда же вниде Ионафан во Птолемаиду, заключиша врата градская во Птолемаиде, и яша его, и всех вшедших с ним убиша мечем. 49 И посла Трифон вои и конники в Галилею и на поле великое, еже погубити всех другов Ионафановых. 50 И познаша, яко ят бысть Ионафан и убиен и вси иже с ним, и увещаша сами себе и идоша уготовани на брань. 51 И видеша гонящии, яко о души им есть, и возвратишася. 52 И приидоша вси с миром в землю Иудину, и плакашася Ионафана и сущих с ним, и убояшася зело, и плакаше весь Израиль плачем велиим. 53 И взыскаша вси языцы, иже окрест их, сокрушити их, реша бо: 54 не имеют началника и помогающаго: ныне убо поратуем их и отимем от человек память их. === 13 === 1 И слыша Симон, яко собра Трифон силу многу приити в землю Иудину и сокрушити ю, 2 и виде люди, яко суть в страсе и трепете, и взыде во Иерусалим и собра люди, 3 и увеща их и рече им: вы весте, елика аз и братия моя и дом отца моего сотворихом и о законех и о святых, и брани и тесноты, ихже видехом: 4 сего ради погибоша братия моя вси ради Израиля, и остах аз един: 5 и ныне не буди ми пощадити души моея во всяко время скорбей, не бо лучший есмь братии моея: 6 обаче отмщу о языце моем и о святых и о женах и чадех наших: яко собрашася вси языцы сотрети нас вражды ради. 7 И возгорешася духом людие вкупе послушати словес сих 8 и отвещаша гласом велиим, глаголюще: ты еси вождь наш вместо Иуды и Ионафана брата твоего: 9 побори брань нашу, и вся, елика аще речеши нам, сотворим. 10 И собра вся мужы бранники и ускори совершити вся стены Иерусалимския и утверди его окрест: 11 и посла Ионафана сына Авессаломова и с ним силу доволную во Июппию, и изгна сущих в ней и пребысть тамо в ней. 12 И воздвижеся Трифон от Птолемаиды с силою велиею внити в землю Иудину, и Ионафан с ним в стражи. 13 Симон же ополчися во Адиде на лицы поля. 14 И позна Трифон, яко воста Симон вместо брата своего Ионафана и яко сразитися с ним хощет бранию, 15 посла к нему послы глаголя: сребра ради, еже должен брат твой Ионафан царю, потреб ради, ихже имеяше, содержим его: 16 и ныне посли сребра талантов сто и два сына его в залог, яко да не отпущен отступит от нас, и отпустим его. 17 И позна Симон, яко лестию глаголют к нему, и посла сребро и отроки, да не когда вражду приимет велию от людий, глаголющих: 18 яко не посла ему сребра и отроков, и погибе. 19 И посла отроки и сто талант. И солга и не отпусти Ионафана. 20 И по сих прииде Трифон, да внидет во страну и сотрет ю, и обыде путь, иже ведет во Адору: а Симон и полк его противоидяше ему на всяко место, аможе идяше. 21 Сущии же от краеградия послаша к Трифону послов понуждающих его, да потщится приити к ним пустынею и послати им пищы. 22 И уготова Трифон вся конники своя, еже приити в нощь оную. И бе снег велий зело, и не прииде снега ради: и воста и отиде в Галаадитиду. 23 Егда же приближися к Васкаме, уби Ионафана, и погребен быти тамо. 24 И возвратися Трифон и иде в землю свою. 25 И посла Симон и взя кости Ионафана брата своего и погребе я в Модине граде отец своих. 26 И плакаша его весь Израиль плачем велиим и рыдаху его дни многи. 27 И созда Симон над гробом отца своего и братий своих, и вознесе его видением, камением тесаным созади и сопреди, 28 и постави на них седмь пирамид, едину противу единоя, отцу и матери и четырем братиям: 29 и сим сотвори ограды, и обложи столпы великия, и сотвори на столпех всеюружия в память вечную, и при всеюружиих корабли изваянныя, во еже видимым быти от всех плавающих на мори. 30 Сей гроб, егоже сотвори в Модине, даже до сего дне. 31 Трифон же хождаше лестию со Антиохом царем юным, и уби его, 32 и воцарися вместо его, и возложи на ся диадиму Асийскую, и сотвори язву великую на земли. 33 И созда Симон твердыни Иудейския, и огради столпами высокими и стенами велиими, и вратами и заворами, и положи пищы в твердынех. 34 И избра Симон мужы и посла ко Димитрию царю, да сотворит ослабление стране, яко вся дела Трифонова беша хищения. 35 И посла ему Димитрий царь по словесем сим, и отвеща ему, и написа ему епистолию сицеву: 36 царь Димитрий Симону архиерею и другу царей и старейшинам и языку Иудейску радоватися: 37 венец златый и перстень, яже послал еси, восприяхом, и готови есмы сотворити с вами мир велик и писати к сущым над даньми, еже оставити вам дани: 38 и елика уставихом вам, крепка суть, и твердыни, яже создасте, да будут вам: 39 отпущаем же неведения и согрешения даже до днешняго дне, и венец, егоже должни бысте, и аще кая иная дань бе во Иерусалиме, ктому да не будут даваемая: 40 и аще нецыи угодни от вас вписатися к нашым, да впишутся, и да будет между нами мир. 41 Лета сто седмьдесятаго отято бысть иго языческое от Израиля, 42 и начаша людие Израилевы писати в писаниих и в совещаниих: лета перваго при Симоне архиереи велицем и воине и вожди Иудейстем. 43 Во днех онех прииде Симон в Газу и окружи ю полками, и сотвори миханы и приближися ко граду, и изби столп един и взя. 44 И вскачаху во град иже бяху в михане, и бысть смятение велие в граде. 45 И взыдоша иже беху во граде с женами и чады на стену, растерзаны имуще ризы своя, и возопиша гласом велиим, моляще Симона десницу им дати, 46 и рекоша: не сотвори нам по лукавством нашым, но по милости твоей. 47 И умилостивися им Симон, не воева их, и изгна их от града: и очисти домы, в нихже бяху идоли, и тако вниде в онь с песньми благословя Господа: 48 и изверже из него всякую нечистоту, и всели в нем мужы, иже закон творят, и утверди его, и сотвори себе в нем обитание. 49 Сущым же от краеградия во Иерусалиме возбраняшеся исходити и входити во страну, и куповати и продавати: и взалкаша зело, и мнози от них гладом погибоша. 50 И возопиша к Симону десницу прияти, и даде им, и изгна их оттуду и очисти краеградие от осквернений. 51 И вниде в не в двадесять третий день втораго месяца, лета сто седмьдесят перваго с хвалением и ваиями, и в гуслех и кимвалех и сопелех, и в песнех и пениих, яко сокрушися враг велий от Израиля. 52 И устави на всякое лето провождати день той с веселием, и утверди гору святилища, яже близ краеградия, и вселися ту сам и иже с ним. 53 И виде Симон Иоанна сына своего, яко муж есть, и постави его вожда сил всех, и вселися в Газарех. === 14 === 1 И в лето сто седмьдесят второе, собра царь Димитрий силы своя и иде в Мидию собрати помощь себе, яко да ратует противу Трифона. 2 И слыша Арсак царь Персский и Мидский, яко прииде Димитрий в пределы его, и посла единаго от началник своих яти его жива. 3 И иде и порази ополчение Димитриево, и ят его и приведе его ко Арсаку: и всади его в темницу. 4 И умолча земля Иудина во вся дни Симоновы, и взыска благая языку своему, и угодна бысть им власть его и слава его во вся дни. 5 И со всею славою своею взя Июппию в пристанище и сотвори вход островом морским, 6 и распростре пределы языку своему, и одержа страну, 7 и собра пленение много, и господствова над Газары и Вефсуры и краеградием, и отят нечистоты от него, и не бысть противляющагося ему. 8 И кийждо делаше землю свою с миром, и земля даяше жита своя, и древеса польская плод свой. 9 Старейшины на стогнах седяху и вси о благих беседоваху, и юноши облачахуся славою и ризами ратными. 10 Градом даяше пищы и вчиняше их в сосуды утверждения, донележе именовася имя славы его даже до края земли. 11 Сотвори мир на земли, и возвеселися Израиль веселием велиим. 12 И седе кийждо под виноградом своим и смоковницею своею, и не бысть устрашающаго их. 13 И оскуде ратуяй их на земли, и царие сотрошася во дни оны. 14 И укрепи всех смиренных людий своих: закона взыска и отят всяко беззаконие и лукавство, 15 святая прослави и умножи сосуды святых. 16 И слышано бе в Риме, яко умре Ионафан, и даже до Спартии слышася, и оскорбишася зело. 17 Егда же услышаша, яко Симон брат его бысть вместо его архиерей и одержа всю страну и грады в ней, 18 писаша к нему на дщицах медяных, еже обновити с ним дружбу и споборение, яже сотвориша со Иудою и Ионафаном братиею его. 19 И прочтошася пред церковию во Иерусалиме. 20 И сей образ посланий, ихже послаша Спартиаты: Спартиатов началницы и град Симону иерею великому и старейшинам, и жерцем и прочым людем Иудейским братии радоватися: 21 послы, иже послани суть к людем нашым, возвестиша нам о вашей славе и чести, и возвеселихомся о приходе их, 22 и списахом яже от них речена в советех людий сице: Нуминий сын Антиохов и Антипатр Иасонов, послы Иудейстии, приидоста к нам возновляюща с нами дружбу: 23 и угодно бысть людем прияти мужы славно и положити восписание словес их во особыя людския книги, да будет память людем Спартиатов: образ же тех писахом Симону архиерею. 24 По сих посла Симон Нуминиа в Рим, имущаго щит злат велик весом мнас тысяща на уставление с ними дружбы. 25 Егда же услышаша людие словеса сия, реша: кую благодать воздадим Симону и сыном его? 26 Утверди бо сам и братия его и дом отца его, и поби враги Израилевы от них, и уставиша ему свободу. 27 И написаша на дсках медяных и поставиша на столпе в горе Сионе. И сей есть образ писания: во осмыйнадесять день месяца Елул, лета сто седмьдесят втораго, и сие третие лето при Симоне архиереи, в Сарамели, 28 в собрании велицем жерцев и людий, и князей языка и старейшин страны возвестися нам: понеже многащи быша брани в стране, 29 Симон же сын Маттафиев, сын сынов Иаривовых, и братия его вдаша себе в бедство, и противосташа сопостатом языка своего, яко да стоят святая их и закон, и славою великою прославиша люди своя: 30 и собра Ионафан люди своя, и бысть им архиерей, и приложися к людем своим: 31 и хотеша врази их внити в страну их, еже сокрушити страну их и простерти руку на святая их, 32 тогда воста Симон и брася за люди своя, и разда сребреников много своим, и вооружи мужы сильныя языка своего, и даде им оброки, 33 и утверди грады Иудейския и Вефсуру, яже в пределех Иудейских, идеже бяху оружия бранников прежде, и постави тамо на стражу мужы Иудейския: 34 и Июппию утверди, яже на примории, и Газару, яже в пределех Азота, в нейже врази прежде обитаху, и насели тамо Иудеи, и елика потребна бяху на управление сих, положи в них: 35 и видеша людие действо Симоново и славу, юже умысли сотворити языку своему, и поставиша его в вожда своего и архиереа, занеже сотвори сия вся, и правду и веру, юже соблюде языку своему, и взыска всяким образом вознести люди своя: 36 и во дни его благоуспеваше в руку его, еже изяти языки от страны их, и иже во граде Давидове беху во Иерусалиме, иже сотвориша себе краеградие, из негоже исхождаху и скверняху окрест святых и творяху язву велию в чистоте, 37 и насели в нем мужы Иудейски и утверди ко укреплению страны и града и возвыси стены во Иерусалиме: 38 и царь Димитрий устави ему началство жречества, 39 по сим сотвори его друга своего и прослави его славою великою: 40 слыша бо, яко наречени суть Иудее от Римлян друзи и споборницы и братия, и яко прияша послов Симоновых преславно: 41 и яко благоволиша Иудее и жерцы быти Симону вождом и архиереем в век, дондеже востанет Пророк верен: 42 и да будет над ними воевода, и яко да радеет о святых поставляти их над делами их и над страною, и над оружием и над твердынями, 43 и яко да радеет о святых, и да слушают его вси, и да пишутся на имя его вся писания во стране, и да облачится в порфиру и златую ризу, 44 и не леть будет ни комуже от людий и от жрец отврещи что от сих и вопреки глаголати от него реченым, или совокупити сонм во стране без него и облещися в порфиру и носити гривну злату: 45 а иже аще сотворит кроме сих, или отвержет что сих, повинен будет. 46 И угодно бысть всем людем уставити Симону и сотворити по словесем сим. 47 И прия Симон, и благоволи архиерействовати, и быти воеводою и началником языка Иудейска и жерцем, и началствовати над всеми. 48 И писание сие реша водрузити во дщицах медяных и поставити их в притворе святых, в месте славне, 49 списание же сих положити в газофилакии, яко да имать Симон и сынове его. === 15 === 1 И посла царь Антиох сын Димитриа царя послания от островов морских Симону архиерею и началнику языка Иудейска и всему языку. 2 И бяху содержаще образ сей: царь Антиох Симону жерцу великому и языка началнику и языку Иудейскому радоватися: 3 понеже мужие губителе одержаша царствия отец наших, хощу же снабдети царство, да устрою е якоже бе прежде, и от стран собрах множество сил и сотворих корабли воинския, 4 хощу же изыти во страну, да отмщу растлившым страну нашу и опустошившым грады многи в царствии (моем), 5 ныне убо утверждаю тебе вся оставления даней, яже оставиша тебе бывшии прежде мене царие, и елики ины дары оставиша тебе, 6 и попустих тебе творити кование особых пенязей во стране твоей, 7 Иерусалиму же и святынем быти свободным: и вся оружия, елика уготовал еси, и твердыни, ихже создал еси, ихже держиши, да будут тебе: 8 и весь долг царев, и яже подобают цареви, отныне и во все время да оставятся тебе: 9 егда же одержим царство наше, прославим тебе и люди твоя и святилище славою великою, яко да явленна будет слава ваша по всей земли. 10 Лета сто седмьдесят четвертаго изыде Антиох в землю отец своих, и собрашася к нему вси вои, яко малым быти оставшым со Трифоном. 11 И гнаше его Антиох царь, и прииде бежащь в Дору, яже при мори: 12 ведяше бо, яко собрашася злая нань и оставиша его воини. 13 И ополчися Антиох на Дору, и с ним дванадесять тем мужей бранных и осмь тысящ конников: 14 и обступи град, и корабли от моря приидоша, и оскорбляше град от земли и моря, и не остави ни единаго изыти и внити. 15 Прииде же Нуминий и иже с ним от Рима, имуще послание царем и странам, в нихже написана сия: 16 Левкий ипат Римский Птоломею царю радоватися: 17 послы Иудейстии приидоша к нам друзи наши и споборницы, обновляюще прежнюю дружбу и споборение, послани от Симона архиереа и людий Иудейских, 18 принесоша же и щит златый мнас тысящи: 19 угодно убо бысть нам писати ко царем и странам, да не наносят им зол и да не ратуют их, ни градов их, ни страны их, и да не споборают ратующым противу их: 20 и изволися нам прияти от них щит: 21 аще убо нецыи губителе пребежаша от страны их к вам, предайте их Симону архиерею, да отмстит им по закону своему. 22 Таяжде написа Димитрию царю и Атталу, и Ариарафу и Арсаку, 23 и во вся страны, и Сампсаку и Спартиатом, и в Дилон и в Миндон, и в Сикион и в Карию, и в Самон и в Памфилию, и в Ликию и в Аликарнас, и в Род и в Фасилиду, и в Кою и в Сидину, и в Арад и в Гортину, и в Книд и в Кипр и в Киринию. 24 Списание же их написаша Симону архиерею. 25 Антиох же царь ополчися на Дору вторицею, наводя выну на ню руки и миханы творя, и заключи Трифона еже не входити ниже исходити. 26 И посла ему Симон две тысящы мужей избранных в помощь ему и сребро и злато и сосуды многи. 27 И не восхоте их прияти, но отверже вся, елика завеща ему прежде, и отчуждися от него. 28 И посла к нему Афиновиа единаго от другов своих, да побеседует с ним, глаголя: вы держите Июппию и Газару и краеградие еже во Иерусалиме, грады царства моего, 29 пределы их опустошисте, и сотвористе язву велику на земли, и господствовасте местами многими в царствии моем: 30 ныне убо отдадите грады, ихже взясте, и дани мест, имиже огосподствовасте вне пределов Иудейских: 31 аще же ни, дадите место сих пять сот талантов сребра, и за опустошение, имже опустошисте, и за дани градов другия пять сот талантов: аще же ни, пришедше поратуем вас. 32 И прииде Афиновий друг царский во Иерусалим, и виде славу Симонову, и сокровище злата и сребра, и устроение доволно, и ужасеся, и возвести ему словеса царска. 33 И отвещав Симон, рече ему: ниже чуждую землю прияхом, ниже чуждая одержахом, но наследие отец наших, от враг же наших в некое время неправедно удержася: 34 мы же время имуще восприяхом наследие отец наших: 35 о Июппии же и Газарех, ихже просиши, сии творяху в людех язву велию в стране нашей, от сих дадим талант сто. И не отвеща ему Афиновий словесе. 36 Возвратися же с яростию ко царю и возвести ему словеса сия и славу Симонову и вся елика виде. И прогневася царь гневом велиим. 37 Трифон же всед к корабль, отбеже во Орфосиаду. 38 И постави царь Кендевеа воеводою приморским и силы пехотныя и конныя даде ему. 39 И повеле ему ополчитися противу лица Иудейска, и заповеда ему создати Кедрон и утвердити врата, и да ратует люди. Царь же гоняше Трифона. 40 И прииде Кендевей во Иамнию и нача раздражати люди и входити во Иудею и пленити люди и убивати: и созда Кедрон 41 и постави тамо конники и силы, яко да исходяще проходят пути Иудейския, якоже повеле ему царь. === 16 === 1 И взыде Иоанн от Газаров и возвести Симону отцу своему, яже сотвори Кендевей. 2 И призва Симон два сыны своя старейшыя Иуду и Иоанна и рече има: аз и братия моя и дом отца моего поборахом враги Израилевы от юности даже и до сего дне, и благопоспешествовася в руках наших избавити Израиля многащи: 3 ныне же состарехся и вы милостию (Бога) доволни есте в летех: будите вместо мене и брата моего, и изшедше поборствуйте за язык наш, помощь же с небесе с вама да будет. 4 И избра от страны двадесять тысящ мужей военных и конников, и идоша на Кендевеа и обнощеваша в Модине. 5 И воставше заутра идоша на поле, и се, сила велия во сретение им, пешая и конная, и бе поток среде их. 6 И ополчися противу лица их сам и людие его: и виде люди боящыяся прейти поток и прейде первый, и видеша его мужие и преидоша вслед его. 7 И раздели людий и конников посреде пеших: конницы же врагов мнози зело. 8 И вострубиша трубами, и побежден бысть Кендевей и полк его, и падоша от них язвени мнози: прочии же бегоша в твердыню. 9 Тогда уязвен бысть Иуда брат Иоаннов: Иоанн же гна их, дондеже прииде в Кедрон, егоже созда. 10 И побегоша даже до столпов сущих на селех Азотских, и зажже его огнем, и падоша от них две тысящы мужей: и возвратися в землю Иудину в мире. 11 И Птоломей сын Авувов поставлен бысть воеводою в поли Иерихона и имяше сребра и злата много: 12 бе бо зять архиереов. 13 И вознесеся сердце его, и восхоте одержати страну, и помышляше лестно на Симона и сынов его, погубити их. 14 Симон же прохождаше грады, яже во стране Иудейстей, попечение имея о прилежании их, и сниде во Иерихон сам и Маттафиа, и Иуда и сынове его, лета сто седмьдесят седмаго месяца первагонадесять, сей есть месяц Сават. 15 И прия их сын Авувов в твердыню, нарицаемую Док, с лестию, юже созда, и сотвори им пир велик, и сокры тамо мужы. 16 И егда упися Симон и сынове его, воста Птоломей и иже с ним, и взяша оружия своя, и внидоша к Симону на пир, и убиша его и два сына его и некиих от отрок его. 17 И сотвори прелесть велику во Израили и воздаде злая за благая. 18 И писа сия Птоломей и посла ко царю, да послет ему воев в помощь, и предаст ему страну их и грады. 19 И посла иныя в Газару погубити Иоанна, и тысящником посла послания, да приидут к нему, да даст им сребро и злато и дары. 20 И иныя посла объяти Иерусалима и гору святилища. 21 И предтек некий возвести Иоанну в Газаре, яко погибе отец его и братия его, и яко посла и тебе убити. И слышав ужасеся зело. 22 И ят мужы, иже приидоша погубити его, и уби их: позна бо яко ищут его убити. 23 И прочая словес Иоанновых и браней его и благих мужеств его, имиже благомужествова, и созидания стен, ихже созда, и деяний его, 24 се, сия писана суть в книзе дний архиерейства его, отнележе бысть архиерей по отце своем. == Вторая книга Маккавейская == === 1 === 1 Братии сущей во Египте Иудеом радоватися: братия иже во Иерусалиме Иудее и иже во стране Иудейстей, мира благаго: 2 и да благосотворит вам Бог и да помянет завет Свой иже ко Аврааму и Исааку и Иакову рабом Своим верным, 3 и да даст вам сердце всем во еже чествовати Его и творити хотения Его сердцем великим и душевным изволением, 4 и да отверзет сердца ваша в законе Своем и в повелениих, и мир да сотворит, 5 и да услышит молитвы вашя и умилится вам и не оставит вас во время лукаво. 6 И ныне зде есмы молящеся о вас. 7 Царствующу Димитрию лета сто шестьдесят девятаго, мы Иудее писахом вам в скорби и в горести нашедшей нам в летех сих, отнележе отступи Иасон и иже с ним от святыя земли и царства, 8 и пожгоша врата, и пролияша кровь неповинну: и молихомся Господеви, и услышани есмы, и принесохом жертву и семидал, и возжгохом светилники, и предложихом хлебы. 9 И ныне празднуйте дни скинопигии Хаслева месяца. 10 Лета сто осмьдесят осмаго, иже во Иерусалиме и иже во Иудеи, и старейшины и Иуда Аристовулу учителю Птоломеа царея сущему же от помазанных иереев рода, и сущым во Египте Иудеом, радоватися и здравствовати. 11 От великих бедств Богом спасени, вельми благодарим Ему, аки на царя ополчающиися. 12 Сей бо изведе ополчающихся на святый град: 13 в Персиду бо быв вождом, и при нем нестерпимая мнящаяся быти сила, посечени быша в капищи Нанеи, прельщения употребившым жерцем сущым при Нанеи. 14 Аки бо спребывати хотя ей, прииде на место Антиох и иже с ним друзи, взятия ради сребреников под именем вена: 15 и предложившым сия жерцем Нанеи, и оному вшедшу с малыми в притвор капища, заключивше капище, 16 егда вниде Антиох, отверзше свода сокровенную дверь, метающе камение побиша игемона и сущих с ним, и разделивше на уды и главы отсекше изметаша к сущым вне. 17 О всех благословен наш Бог, Иже предаде нечествовавших. 18 Хотяще убо праздновати двадесять пятаго дне месяца Хаслева очищение церкве, потребно непщевахом известити вам, да и вы празднуете день скинопигии и огня, егда Неемиа создав церковь и олтарь, принесе жертву. 19 Ибо егда в Персиду ведяхуся отцы наши, тогда жерцы боящиися Бога вземше от огня олтарнаго отай, скрыша во юдоль кладязя дно имеюща безводное, и в нем соблюдоша, яко всем неведому быти месту. 20 Преминувшым же летом многим, егда изволися Богу, посланный Неемиа от царя Персидскаго, внуки жерцев сокрывших посла на взыскание огня: и якоже поведаша нам, не обретоша огня, но воду густу, 21 повеле им черпати и принести: егда же принесена быша жертвенная, повеле жерцем Неемиа покропити водою дрова и лежащая на них. 22 Егда же бысть сие, и время прииде, егда солнце возсия прежде облачно сущо, возжжеся огнь велик, яко дивитися всем. 23 Молитву же творяху жерцы, егда горяще жертва, и жерцы и вси Ионафану начинающу, прочым же отвещающым, якоже Неемии. 24 Бе же молитва имеющи образ сей: Господи, Господи Боже, всех Творче, страшный и крепкий, и праведный и милостивый, единый Царю и благий, 25 единый дателю, едине праведне и Вседержителю и вечный, спасаяй Израиля от всякаго зла, сотворивый отцы избранны и освятивый их, 26 приими жертву за вся люди Твоя Израиля и сохрани часть Твою и освяти: 27 собери расточение наше, избави работающих языком, на уничижениых и мерзких призри, и да уведят языцы, яко Ты еси Бог наш: 28 показни насилующих и досаждающих в гордыни: 29 насади люди Твоя на месте святем Твоем, якоже рече Моисей. 30 Жерцы же пояху пения. 31 Егда же сгореша жертвенная, оставшею водою Неемиа повеле камение большее полити. 32 Егда же сие бысть, пламень возгореся, и от олтаря облиставшу свету, сгоре. 33 Егда же явлена бысть вещь, и возвещено бысть царю Персску, яко на месте, в немже огнь скрыша преселеннии жерцы, вода явися, отнележе Неемиа и сущии с ним очистиша жертвы, 34 оградив же царь свято сотвори (место то), искушаяй вещь. 35 И имже дароваше царь, многи дары взимаше и преподаяше. 36 Прозва же Неемиа и иже с ним место то Неффарь, еже сказуется очищение, нарицается же у многих Неффай. === 2 === 1 Обретается же во описаниих Иеремии пророка, яко повеле огня взяти преселяющымся, якоже знаменовася, 2 и якоже заповеда преселяющымся пророк, дав им закон, да не забывают повелений Господних и да не прельстятся умы, видяще идолы златы и сребряны и сущую окрест их утварь. 3 И ина такова глаголя, моляше, да не отступит закон от сердца их. 4 Бе же в писании, яко скинии и кивоту повеле пророк по Божественному ответу бывшему ему последствовати, дондеже взыде в гору на нюже Моисей возшед, виде Божие наследие. 5 И пришед Иеремиа обрете пещеру и жилище, и скинию и кивот, и олтарь фимиама внесе тамо, и двери загради. 6 И приступиша нецыи от последствующих, да назнаменают себе путь, и не могоша обрести. 7 Егда же позна Иеремиа, укорив их, рече: яко неведомо будет место, дондеже соберет Бог собрание людий и милостив будет: 8 и тогда Господь покажет сия, и явится слава Господня и облак, якоже и при Моисеи являшеся, якоже и Соломон моли, да место освятится вельми. 9 Являшеся же, и яко премудрость имея вознесе жертву обновления и совершения церкве. 10 Якоже и Моисей моляшеся ко Господу, и сниде огнь с небесе и пояде жертвы: такожде и Соломон молися, и сниде огнь с небесе и пожже всесожжения. 11 И рече Моисей: понеже не снедено бысть сущее за грех, попалися. 12 Такожде и Соломон осмь дний празднова. 13 Поведашася же и в написаниих и в памятописаниих бывших при Неемии таяжде: и како строящь книгоположницу собра книги, яже о царех и о пророцех и о Давиде, и епистолии царей о приношениих. 14 Такожде и Иуда, падшая бранию бывшею нам, собра вся, и суть при нас. 15 Сих убо аще требуете, приносящих вам послите. 16 Хотяще убо праздновати очищение, писахом вам: благо убо сотворите празднующе дни. 17 Бог же спасый вся люди Своя и воздавый наследие всем и царствие, и священство и освящение, 18 якоже обеща в законе: уповаем бо на Бога, яко скоро нас помилует и соберет от поднебесныя в место святое: 19 изят бо нас от великих бед и место очисти. 20 Дела же Иуды Маккавеа и братий его, и церкве великия очищение, и обновление жертвенника: 21 еще же и о бранех на Антиоха Епифана и сына его Евпатора: 22 и о явлениих с небесе бывших благомужествовавшым Иудейства ради любочестно, яко всю страну мали суще опустошаху, и варваров множество прогоняху, 23 и преславную во всей вселенней церковь возсоздаша, и град избавиша, и хотящыя разоритися законы исправляху, Господу со всякою кротостию милостиву бывающу им: 24 яже от Иасона Киринеа извещена пятию книгами, покусимся единым сочинением сократити. 25 Созерцающе бо многое число (вещей) и сущее неудобство хотящым приступити к повести истории множества ради вещества, 26 попекохомся, дабы хотящии читати имели души утешение, любомудрствующии же удобее приимали на память, вси же чтущии пользу. 27 И нам убо приявшым труд сокращения неудобно, пота же и бдения дело (творим): 28 якоже уготовляющему пир и ищущему иных пользы не легко убо, обаче за благодарение многих сладце труд потерпим. 29 Испытность убо о киихждо списателю попустивше, последовати примеру сокращения потщимся. 30 Якоже бо новыя храмины архитектону о всем здании пещися подобает, и живописати начинающему приличных ко украшению искати, тако мню и о нас. 31 Еже убо глубочае испытовати и о всех творити слово и любопытствовати о коемждо подробну, повести сочинителю достоит. 32 Сокращению же речений последовати и тонкаго испытания вещей бегати, сокращение творящему попущати должно. 33 Отсюду убо начним повесть предреченным толико присовокупивше: неразумно бо предисловие истории умножати, самую историю сокращати. === 3 === 1 Егда убо святый град обитаемь бе во всяцем мире, и законы еще изрядно храняхуся, Онии архиереа благочестия ради и ненавидения лукавства, 2 случашеся и самим царем почитати место и церковь великими дары прославляти, 3 яко и Селевк Асийский царь подаяше от своих доходов вся, яже ко служением жертв надлежащая иждивения. 4 Симон же некий от колена Вениаминя настоятель церкви поставленный, пряшеся со архиереем о началстве еже во граде. 5 Но егда премощи Онии не можаше, прииде ко Аполлонию Фрасееву, иже во оно время бяше воевода Килисирии и Финикии, 6 и возвести ему, яко богатствы неизчетными наполнено есть во Иерусалиме сокровищное хранилище, яко множеству сокровищ безчислену быти, и яко не надлежат сия к вине жертв, быти же мощно, да под власть цареву подпадут вся сия. 7 Егда же прииде ко царю Аполлоний, о возвещеиных ему богатствах изяви: он же избрав Илиодора, иже бе над делами его, посла заповедав, да предреченная богатства принесет. 8 Скоро же Илиодор творяше шествие, под видом убо акибы грады Килисирийския и Финикийския проходя, самою же вещию царево повеление исполнити хотящь. 9 Пришед же во Иерусалим и любомудренно от архиереа градскаго прият, поведа о бывшем изявлении, и чесо ради прииде, сказа: вопрошаше же, аще истинно сия тако суть. 10 Тогда архиерей показа положена быти сия вдов и сирот, 11 некая же быти и Ириана сына Товиина мужа зело честна, а не якоже бе оболгаяй нечестивый Симон, всего же сребра талант четыреста, а злата двесте: 12 обидети же вверивших места святыни, и честности и безопасству честныя по всему миру церкве, весьма не возможно есть. 13 Илиодор же, царских ради повелений, ихже имяше, глаголаше, яко всячески подобает взяти сия в царское сокровище. 14 Определив же день, вхождаше, присмотрение о сих хотя сотворити: бе же не мало по всему граду смятение. 15 Священницы же пред олтарем в священнических ризах повергше себе, призываху с небесе Давшаго закон о положенных, дабы положившым сия цело сохранил. 16 Бе же зрящему лице архиереево узвлятися мыслию: зрак бо и вид изменен являше душевную тугу. 17 Облия бо мужа боязнь некая и страх телесный, имиже явленна бысть зрящым сердца настоящая болезнь. 18 Инии же купно из домов истекаху на всенародную молитву, зане хотяше приити место в поругание. 19 Жены же препоясавшяся по персем власяницами на путех умножахуся: заключеныя же девицы едины убо прибегаху ко вратом, иныя же на стены, некия же оконцами приницаху. 20 Вси же воздевающе руце на небо моляхуся. 21 Умилително же бе множества смешеное падение и зело бедствующаго архиереа чаяние. 22 И сии убо призываху Вседержителя Бога, да вверенная вверившым цела сохранит со всяким безопасством. 23 Илиодор же еже умысли, совершаше: таможе ему со копиеносцы в газофилакию уже пришедшу, 24 (Вседержитель) отцев Господь и всякия власти Обладатель явление велие сотвори, яко всем дерзнувшым совнити ужаснувшымся Божия силы, во ослабление и во ужас пременитися. 25 Явися бо им некий конь страшна имея всадника и предобрым покровом украшен, напад же со устремлением вонзе во Илиодора предняя копыта: седяй же на нем являшеся злато оружие имея. 26 Инии же два явистася ему юноши силою благолепни, предобри славою, украшени же одеянием: иже и обступльща его от обоих стран, бияста его непрестанно, многи налагающа ему раны. 27 Внезапу же (Илиодора) падша на землю и многою тмою объята восхитивше и на носило положивше, 28 того, иже недавно со многим ристанием и со всяким дориношением в предреченную вниде газофилакию, изношаху безпомощна себе суща, явно Божию силу познавше. 29 И той убо божественным действом безгласен и всякаго упования и спасения лишен повержен бяше. 30 Сии же Господа благословляху прославльшаго Свое место: и малым прежде страха и смятения полная церковь, Вседержителю явльшуся Господу, радости и веселия исполнися. 31 Скоро же нецыи от другов Илиодоровых моляху Онию призвати Вышняго, да живот дарует ему весьма в последнем издыхании лежащему. 32 Помыслив же архиерей, да не когда царь мнение возимеет, яко злодейство некое на Илиодора Иудее сотвориша, принесе жертву о спасении мужа. 33 Егда же архиерей моляшеся, тиижде юноши паки явистася Илиодору темижде одеяньми облечена и ставша реста: многая Онии архиерею благодарения воздаждь, его бо ради Господь тебе живот дарова: 34 ты же от Него биен возвести всем величие Божие и державу. И сия рекша невидими быста. 35 Илиодор же жертву принес Господеви, и обеты превеликия обещав живот Даровавшему, и Онии возблагодарив, возвратися ко царю с воины, 36 свидетелствоваше же всем, яже виде очима дела превеликаго Бога. 37 Егда же царь вопрошаше Илиодора, кто был бы ключимь еще единою во Иерусалимли послан быти, отвеща: 38 аще коего имаши врага, или царству твоему наветника, посли его онамо, и язвена его приимеши, аще и спасется: зане в месте том истинно есть Божия некая сила: 39 Той бо обитание на небеси имеяй надзиратель есть и помощник месту тому, и грядущих на озлобление поражает и погубляет. 40 И сия убо яже о Илиодоре и о хранении газофилакии сице имеются. === 4 === 1 Предреченный же Симон, иже о сребреницех и отечестве доноситель сотворися, злословяше Онию, акибы той Илиодора и поощрял к сим и злоб содетелю был. 2 И благодетеля граду и защитника своих людий и ревнителя законов (Божиих) дерзаше нарицати наветником вещей. 3 Вражде же в толико происходящей, яко чрез некоего от другов Симоновых и убийства совершахуся, 4 созерцая Ониа лютость прения, и Аполлониа неистовствовати, яко Килисирии и Финикии воеводу, умножающа злобу Симонову, ко царю отиде, 5 не бываяй граждан клеветник, но пользу во обществе и на едине всему множеству промышляя: 6 видяше бо, яко без царева промысла не мощно получити мира ктому вещем, и яко Симон не отставит буйства. 7 Оставльшу же житие Селевку и приемшу царство Антиоху, иже нарицашеся Епифан, желаше Иасон брат Ониин архиерейства, 8 вниде ко царю, обещавая ему сребра талант триста шестьдесят и от приходов некиих иных талант осмьдесят. 9 К сим же обещаваше и иных написати сто пятьдесят, аще подастся властию его училище юных ему поставити и сущих во Иерусалиме Антиохианами писати. 10 Соизволившу же царю, и началство одержав, абие на языческий обычай единоплеменныя своя преводити нача. 11 И уставленная Иудеом человеколюбия царская чрез Иоанна отца Евполема, иже бяше послом о дружбе и споборении к Римляном, отрину: и законныя убо гражданския разоряя уставы, беззаконныя обычаи нововвождаше. 12 Тщателне бо под самым краеградием училище постави, и изряднейших юнош покорив, под петас ввождаше. 13 И сице бе усердие некое ко Еллинству и успех языческаго жителства, ради безмернаго, нечестиваго, а не архиереа Иасона, беззакония. 14 Яко не ктому о службах олтарных усердни бяху жерцы, но храм убо презирающе и о жертвах нерадяще, тщахуся причастницы быти палестре беззаконнаго предания, по произзывании игралищнаго круга. 15 И отеческия убо чести ни во чтоже вменяху, Еллинския же славы предобры быти мняху: 16 ихже ради объят я лютое обстояние, и о ихже ревноваху наставлениих, и весьма им хотяху уподобитися сих врагов и мучителей имеяху. 17 Нечествовати бо в Божественных заонех неудобь: но сия последующее время известит. 18 Бывшу же пятолетному тризнищу в Тире и царю сущу тамо, 19 посла Иасон студных смотрителей из Иерусалима Антиохианы сущыя, несущыя сребра дидрахм триста в жертву Ираклиеву, о ихже и моляху принесшии, да не употребляют в жертву, яко не достоит, но во иныя росходы их отложити. 20 Посла убо сия ради пославшаго в жертву Ираклиеву, ради же принесших на строение кораблецей тривеселных. 21 Послану же бывшу во Египет Аполлонию сыну Менестеову ко Птоломею Филометеру царю, торжества ради восприятия престола, возмнев Антиох чужда его быти своих вещей, о своем безопасстве печашеся: того ради во Июппию пришед, достиже во Иерусалим. 22 Великолепно же от Иасона и града прият, со свещьми светлыми и хвалами вниде: таже сице в Финикию с воинством пойде. 23 По трелетнем же времени посла Иасон Менелаа брата предреченнаго Симона несуща царю сребреники и о вещех нужных представление совершити имущаго. 24 Он же представ царю и возвеличив его в лице власти ради, на себе восторже архиерейство, положив свыше Иасона талант сребра триста. 25 Приемь же от царя повеления прииде, ничтоже убо нося достойно архиерейства, ярость же жестокаго мучителя и зверя лютаго гнев имея. 26 И Иасон убо, иже своего брата кознию улови, сам кознию уловлен от инаго, беглец во Аманитскую страну изгнан бысть. 27 Менелай же началство убо одержа, о сребрениех же цареви обещанных ничтоже радяше: 28 творящу же истязание сострату краеградия епарху, к сему бо надлежаще даней дело, тоя ради вины оба ко царю призвани. 29 И Менелай убо остави архиерейства преемника Лисимаха брата своего, Сострат же Кратита, иже бе над Кипряны. 30 И егда сия деяхуся, случися Тарсяном и Малотом крамолу воздвигнути, сего ради, яко Антиохиде наложнице цареве в дар отдани быша. 31 Скоро убо царь прииде укротити вещы, оставя наместника Андроника единаго от князей своих. 32 Возмнев же Менелай восприяти себе время благополучно, златыя иекия сосуды от церкве украд дарова Андронику и ина продаде в Тир и во окрестныя грады. 33 Иже явно познав Ониа, обличаше его, отшед в место безопасное, в Дафнию близ Антиохии лежащую. 34 Оттуду Менелай взем на едине Андроника, моляше да убиет Онию. Он же пришед ко Онии, и увещав лестию, и десницу с клятвою дав, аще и в подозрении бе, усоветова из безопаснаго места изыти, егоже и абие заключив уби, не устыдевся правды. 35 Сея же ради вины не токмо Иудее, но мнози и от иных языков негодоваху и скорбяху о неправедньм мужа убийстве. 36 Возвратившуся же царю от Киликийских мест, сущии во граде Иудее приступиша просяще (суда) купно с ненавидящими беззакония Еллинами о безвиннем убийстве Ониине. 37 Оскорбився убо душею Антиох (Онии ради) и преклонив на милость, и слезы излияв о целомудрии скончавшагося и о мнозем благонравии 38 и разярився душею, абие со Андроника порфиру совлек и одежды ободрав, по всему граду повелев обводити, на томже месте, идеже Онию нечестиво уби, тамо убийцу погуби, Господу достойную ему казнь воздающу. 39 Егда же многа священнограбителства во граде соделана быша от Лисимаха со Менелаевым советом, и изыде весть вне, собрася множество на Лисимаха, многим уже златым сосудом изнесеным бывшым. 40 Народом же востающым и гнева исполненным, вооружив Лисимах три тысящы, нача беззаконными руками обидети, предводителствующу некоему мучителю престаревшуся возрастом, паче же безумием. 41 Уразумевше же и усилие Лисимахово, инии камение, инии дреколия толстая восхитиша, нецыи же близ лежащий прах вземше, на сущих окрест Лисимаха меташа. 42 Сея ради вины многих убо от них уязвиша, некиих же и низложиша, всех же в бег обратиша: самаго же священнограбителя при сокровищнем хранилищи убиша. 43 О сих же суд на Менелаа настояше. 44 Егда же прииде царь в Тир, к нему судебное дело принесоша посланнии три мужа от старейшин. 45 И уже премогаемь Менелай обеща Птоломею сыну Дорименову многи сребреники дати на утоление царя. 46 Поят убо особь Птоломей в некий притвор аки прохлаждаюшася царя, преврати, 47 и всея убо злобы виновнаго Менелаа свободи от вины, а бедных, иже аще бы и пред Скифы глаголали, отпущени были быша неосуждени, сих на смерть осуди. 48 Скоро убо неправедну казнь претерпеша иже о граде и людех и о священных сосудех доносившии. 49 Сея ради вины и Тиряне, вознегодовавще о беззаконии, на погребение их щедро преподаша. 50 Менелай же ради лихоимства обладающих пребываше во власти, возрастающь злобою, великий гражданом наветник сотворився. === 5 === 1 В сие же время вторый поход уготова Антиох во Египет. 2 Случися же по всему граду, едва не чрез четыредесять дний являтися на воздусе ристающих конников златыя одежды имущих и копиями по полком вооруженных, 3 и собрания коней чинно устроенных, исхождения творимая и сражения от обоих стран, и щитов движения и сулиц множество, и мечей исторжения и стрел метания, и златых одежд блистания и всякия брони. 4 Темже вси моляхуся, да явление во благо будет. 5 Бывши же вести лживей, акибы Антиох от жития отшел, взем Иасон не менши тыящи мужей, внезапу на град сотвори нападение гражданом же на стену востекшым, и наконец уже вземлему сущу граду, Менелай во краеградие убеже. 6 Иасон же творяше заклания граждан своих нещадно, не помышляя, яко благовременство, еже на ужики, злополучие есть превелие: мня над врагами, а не над единоязычными победителная прияти, 7 началства убо не одержа, кончину же навета студ приемь, беглец паки во Аманитиду отиде. 8 Конец убо злаго жития получи, заключен у Ареты Аравскаго мучителя, бегая от града во град, гонимь от всех и ненавидимь аки законов отступник, и огнушаемь, яко отечеству и гражданом враг, во Египет изгнан бысть. 9 И иже многих от отечества изгнавый, странствуя погибе к Лакедемоняном отшед, аки сродства ради прибежище хотящь имети. 10 И иже множество непогребенных изверже, (сам) не оплакан бысть, и погребения ни какова сподобися, ниже отеческому гробу приобщися. 11 Возвестившым же царю о бывших, усумнеся (царь), да не отступит Иудеа: и того ради пришед из Египта разярен душею, взя град оружием 12 и повеле воином сещи нещадно сретающихся и в домы входящих закалати. 13 Быша же убиения юнош и старцев, мужей и жен и чад истребления, дев же и отроков заклания. 14 Осмьдесят же тысящ во всех триех днех избиени: и четыредесять убо тысящ пленени, не менши же убиеных продани быша. 15 Не доволен же быв и сими, дерзну внити в церковь всея земли святейшую, имеяй Менелаа предводителя, бывша законов и отечества предателя. 16 И скверныма рукама вземля священныя сосуды и яже от иных царей положенная на умножение и славу места и честь, скверныма рукама прикасаяся подаяше. 17 И вознесеся мыслию Антиох, не помышляя, яко грех ради обитающих во граде мало прогневася Владыка, того ради бысть о месте презрение: 18 аще же бы не случилося им многими грехи быти объятым, якоже бе Илиодор посланный от Селевка царя ко осмотрению сокровищнаго хранилища, сей пришед внезапу биен быв отвратился бы от дерзости. 19 Но не ради места язык, но языка ради место Господь избра. 20 Темже убо и сие место сопричастно бысть людских зол случивишихся, последи же благодеянием от Господа приобщися, и оставленое во гневе Вседержителя, паки в примирении великаго Владыки со всякою славою исправися. 21 Убо Антиох из церкве взем тысящу осмь сот талантов, скоро во Антиохию возвратися, чая от гордыни землю убо плавателну, а море пешеходно положити от возвышения сердца. 22 Остави же и приставники ко озлоблению людий, во Иерусалиме убо Филиппа родом Фригеанина, нрав жесточайший имущаго неже поставльший (его), 23 в Гаризине же Андроника: и к сим Менелаа, иже злее иных озлобляше граждан, 24 ненавистное же ко гражданом Иудейским имеяй сердце, посла ненавистнаго началника Аполлониа со двадесятию двема тысящьми воинства, повелев ему всех в возрасте сущих погубити, жены же и юношы продаяти. 25 Сей же пришед во Иерусалим и аки мир себе притворив, удержася даже до дне святыя субботы: и улучив празднующих Иудеов, вооружитися своим повеле, 26 и изшедших всех на позор закла, и во град со оружии вскочив, людий многое множество погуби. 27 Иуда же Маккавей, иже десятый быв, и отшед в пусто место, звериным образом в горах живяше с сущими с ним, и травную пищу ядуще пребываху, еже бы не причастися осквернению. === 6 === 1 Не по мнозе же времени посла царь старца (некоего) Афинеанина понуждати Иудей, дабы отступили от отеческих преданий и по Божетвенным законом не жителствовали, 2 осквернити же и во Иерусалиме храм и нарещи Диа Олимпийскаго, и сущий в Гаризине, якоже обитающии бяху на месте онем, Диа Странноприимца. 3 Люто же и всему народу бе и тяжко нападение злобы, 4 ибо церковь любодеяния и козлогласования бе полна от язык живущих со блудницами и во священных притворех к женам приближающихся и неподобающая внутрь вносящих. 5 Олтарь такожде полн бе возбраненными от законов. 6 Бяше же не возможно суббот хранити, ни праздников отеческих содержати, ниже весьма кому себе Иудеанином именовати. 7 Ведяхужеся с горькою нуждею на всяк месяц в день рождения царева в жертве: бывшу же Дионосову празднику, понуждахуся Иудее киссы имуще хвалити Диониса. 8 Повеление же изыде в ближния грады Еллинския, Птоломею подустившу, да тогожде уставления противу Иудеев употребляют, и жертву приносят, 9 не изволяющих же прейти на Еллинския уставы да убивают: бе убо видети настоящую бедность. 10 Две бо жены оклеветаны бысте обрезавшыя чада своя: сих привесивше има к сосцам младенцы и пред народом обводивше их по граду, со стены свергоша. 11 Инии же в ближния стекшеся пещеры, тайно день субботный праздновати, егда возвещено бысть Филиппу, сожжени быша, зане ради чести праздничнаго дне бояхуся помогати себе. 12 Молю убо чтущих книгу сию не устрашатися напастей, мнети же мучеия сия не к погублению, но к наказанию рода нашего быти. 13 Ибо на много время не попускати злочествующым, но абие впадати им в мучения, великаго благодеяния есть знамение. 14 Не бо якоже на иных языцех ждет долготерпеливый Владыка, дондеже достигших ко исполнению грехов мучит, тако и на нас суди быти: 15 да не до конца достигшым грехом нашым, последи нам отмстит. 16 Сего ради никогдаже от нас милосердие Свое отемлет: наказуяй же бедствами не оставляет людий Своих. 17 Но сия ко увещанию нам речена суть: малыми же подобает внити в повесть. 18 Елеазар некий от первенствующих книжников, муж уже состаревся летами и зраком лица благолепен сый, отверстыми усты принуждаемь бяше ясти свиная мяса. 19 Он же со славою смерть паче, нежели ненавистный живот предизбрав, волею идяше на муку: 20 плюнув же (на тая), имже образом подобаше приходити хотящым терпети мучение, яже не леть бе ясти ради любления живота. 21 Ко беззаконней же приставленнии жертве, древняго ради к мужу знания, вземше его на едине моляху, да принесеная мяса, яже ясти ему леть бяше, его ради уготована, притворит себе аки ядуща повеленная от царя жертвенная мяса: 22 да сие соделав избавится от смерти и древния ради к ним дружбы получит человеколюбие. 23 Он же мысль благу восприемь и достойну возраста и старости преимущества, и пристяжаныя лепотныя седины и издетска предобраго воспитания, паче же святаго и Богоданнаго закона, последовно отвеща, скоро глаголя: изволяю послан быти во ад, 24 не бо возрасту нашему достойно есть лицемерити, да мнози от юных непщующе Елеазара девятидесятилетна прейти к жителству иноплеменных, 25 и они моего ради лицемерия и маловременнаго живота прельстятся мене ради, и ненависть и порок старости моей сотворю: 26 аще бо нынешния муки человеческия и избавлюся, но руки Всемогущаго ни жив, ни умерый избегу: 27 темже мужественне ныне разлучився живота, старости убо достоин явлюся, 28 юным же образ доблий оставлю, еже усердно и добльственно за честныя и святыя законы умирати. И сия рек, со тщанием на муку пойде. 29 Ведущии же его, бывшую мало прежде благоприятность к нему в свирепость премениша предреченных ради словес, яже сии мняху безумство быти. 30 Хотя же ранами скончатися, возстенав рече: Господеви святый разум имущему явно есть, яко от смерти могущь избавитися, жестокия терплю на теле болезни уязвляемь, на души же сладце страха ради Его сия стражду. 31 И сей убо сим образом живот сконча, не токмо юношам, но и премногим языка свою смерть во образ доблести и в память добродетели оставив. === 7 === 1 Случися же и седмим братиям вкупе с материю ятым, понуждаемым быти от царя ясти противу правил мяса свиная, бичми и жилами волуями мучимым. 2 Един же от них, иже бе первый, тако рече: что хощеши вопрошати и научитися от нас? Готови бо есмы умрети, нежели преступити отеческия законы. 3 Разгневався же царь повеле сковрады и конобы разжещи. 4 Умже скоро разжженным бывшым, повеле сущему от них предводителю слова отрезати язык, и со всего кожу содравше, краи удов телесных отсещи, прочиим братиям и матери смотрящым. 5 И егда уже неключимь сотворен бысть всеми (удесы), повеле огню предати еще дышуща и пещи на сковраде: пару же умножающуся от сковрады, (прочии купно) с материю друг друга поощряху умрети мужественно, глаголюще сице: 6 Господь Бог зрит и о истине нашей утешается, якоже пред лицем свидетелствующею песнию изяви Моисей глаголя: и о рабех Своих утешится. 7 Умершу же первому сим образом, втораго изводяху на поругание: и кожу со главы его со власы содравше, и вопрошаху: будеши ли ясти прежде неже умучено будет все тело по удам. 8 Он же отвещав отеческим гласом, рече: ни. Темже и сей по ряду прият мучение, якоже и первый. 9 В последнем же издыхании быв, рече: ты убо, окаяннейший, от настоящаго живота нас погубляеши, Царь же мира умерших нас Своих ради законов воскресит нас в воскресение живота вечнаго. 10 По сем же третий поругаемь бе, и языка испрошен, абие издаде и руце дерзостне простре и мужественне рече: 11 от небесе сия притяжах, и Его ради законов презираю сия, и от Него сия паки уповаю восприяти. 12 Яко и сам царь и сущии с ним удивляхуся юнаго великодушию, яко ни во чтоже полагаше муки. 13 И сему скончавшуся, и четвертаго такожде мучаху мучителе. 14 И егда уже бысть к смерти тако рече: лучше убиваемым от человек упования чаяти от Бога, паки имущым воскрешеным быти от Него, тебе же воскресение в живот не будет. 15 По сем же пятаго приведше мучиша. И он воззрев нань, рече: 16 власть в человецех имея тленен сый, еже хощеши, твориши: не мни же роду нашему от Бога оставлену быти: 17 ты же потерпи и зри велию державу Его, како тебе и семя твое умучит. 18 По сем приведоша шестаго. И той умрети начинающь рече: не прельщайся суетно, мы бо себе ради сия страждем согрешающе к Богу нашему, сего ради достойная удивления быша: 19 ты же да не возмниши неповинен быти, богоборствовати начен. 20 Безмерно же мати дивная и благия памяти достойная, яже погибающих седми сынов единаго дне и времене видящи, благодушно терпяше ради упования на Господа, 21 и коегождо их увещаваше отеческим гласом, доблия исполнена мудрости и женское помышление мужескою душею воздвизающи, глаголаше к ним: 22 не вем, яко во чреве моем явистеся, ниже бо аз дух и живот дах вам, и коегождо уды не аз составих, 23 но мира Творец, Создавый род человечь и всех изобретый рождение, и дух и жизнь вам паки воздаст с милостию, яко ныне сами себе презираете ради законов Его. 24 Антиох же непщуяй уничижен быти и поношающь глас презрев, еще юнейшему живу сущу, не токмо словесы творяше увещание, но и клятвою подкрепляше, богата купно и блажена сотворити, преведеннаго от отеческих законов, и друга возимети, и дела вверити ему. 25 Сим же юноше ни какоже внемлющу, призвав царь матерь увещаваше, да будет юноше советница на спасение. 26 Много же ему увещавающу, обещала советовати сыну своему. 27 Приклонившися же к нему, посмеяся жестокому мучителю и сице рече отеческим гласом: сыне, помилуй мя носившую тя во чреве девять месяцей и млеком питавшую тя лета три, и воскормившую тя и приведшую в возраст сей, и болезни воспитания понесшую: 28 молю тя, чадо, да воззриши на небо и землю, и вся, яже в них, видящь уразумееши, яко от не сущих сотвори сия Бог, и человечь род тако бысть: 29 не убойся плоторастерзателя сего, но достоин быв братии твоея, восприими смерть, да в милости с братиею твоею восприиму тя. 30 Еще же сия ей глаголющей, юноша рече: кого ожидаете? Не слушаю повеления царева, но повеления закона слушаю даннаго отцем нашым чрез Моисеа: 31 ты же всякия злобы изобретатель быв на Иудеи, не избежиши рук Божиих: 32 мы бо за грехи нашя сия страждем: 33 аще же ради устрашения и наказания живый Господь наш мало прогневася, но паки примирится рабом Своим: 34 ты же, о, беззаконниче и всех человек сквернавейше, не возносися суетно кичася тщетным упованием, на небесныя рабы Его возносящь руку: 35 не у бо Вседержителя и Всевидца Бога суда избегл еси: 36 братия бо наша мало ныне болезни потерпевше по завету Божию вечный живот получиша: ты же судом Божиим праведную казнь гордыни (твоея) восприимеши: 37 аз же, якоже братия моя, душу и тело мое предаю за отеческия законы, призывая Бога милостива вскоре быти Израилю: ты же с мучением и биением исповеси, яко един токмо Бог есть: 38 на мне и на братии моей престанет Вседержителя гнев нанесенный праведно всему роду нашему. 39 Тогда царь разярися яростию нань паче иных лютее, горце терпящь посмеяние. 40 И сей убо чист от жития пременися, по всему на Господа уповая. 41 Последи же сынов и мати скончася. 42 Сия убо о жертвах и о превосходящих мучителствах толико известишася. === 8 === 1 Иуда же Маккавей и иже с ним, входяще тайно в села, созываху сродники и пребываюших во Иудействе приемлюще собраша до шести тысящ мужей. 2 И призываху Господа призрети на люди от всех попираемых, ущедрити же и храм от нечестивых человек осквернен 3 помиловати же и разореный град и имеющь равно со землею быти, и глас кровей вопиющих к Нему услышати, 4 помянути же и безгрешных младенцев беззаконное погубление и бывшая хуления на имя Его, и возненавидети лукавства. 5 Собрав же множество, Маккавей нестерпимь яже языком бысть, гневу Господню в милость обратившуся. 6 И нападая на веси и грады нечаянно сожигаше, и благовременна места взимающь, не мало супостат побеждаше убивая, 7 наипаче же нощы на таковая нападения в помощь приемляше: и слава некая мужества его прохождаше всюду. 8 Виде же Филипп по малу в предуспеяние грядуща мужа, частее же во благоденствиих успевающа, ко Птоломею воеводе Килисирии и Финикии писа, дабы помогал в царских делех. 9 Он же скоро избрав Никанора, сына Патроклова от первейших другов посла, подчинив ему от всяких языков вооруженных виев не менше двадесяти тысящ, да весь Иудейский род избиет: придаде же ему и Горгию мужа стратига и в ратных делех искусство имуща. 10 Устави же Никанор дань царю, яже Римляном даяшеся, две тысящы талантов от пленения Иудейскаго наполнити. 11 Абие же в поморских грады посла, созывая на куплю Иудейских пленников, обещаяся девятьдесят пленников за талант дати, не чая мщения хотящаго последовати ему от Вседержителя. 12 Иуде же возвещено бе о приществии Никанорове: и егда он возвести сущым с собою о пришествии воинства, 13 ужасшеся и не веровавше Божию отмщению разбегахуся и от места своего отступаху: 14 инии же оставшая вся продаяху, купно же Господа моляху, да избавит от нечестиваго Никанора проданых, прежде даже снитися, 15 и аще не их ради, то ради завета, иже бысть ко отцем их, и призывания ради честнаго и великолепаго имене Своего на них. 16 Собрав же Маккавей сущих окрест его числом шесть тысящ, моляше, да не ужаснутся от супротивников, ниже да устрашатся неправедно грядущих на ня языков множества, но мужественно да подвизаются, 17 пред очима имеюще беззаконно на место святое соделанную от них укоризну и посмеяннаго града обиду, еще же и прародителнаго жителства разрушение. 18 Они бо на оружие надеются купно и на дерзость, рече: мы же на Вседержителя Бога могущаго и грядущих мгновением низложити надеемся. 19 Воспомянув же им и бывшая заступления при прародителех, и яко под Сеннахиримом сто осмьдесят пять тысящь погибоща, 20 и в Вавилоне на Галатов бывшее ополчение, како вси, егда на брань приидоша, осмь тысящ с четырию тысящами Македонян, Македоняном отчаявшымся, едини осмь тысящ побиша сто двадесять тысящ помощию данною им от небесе, и пользу многу взяша. 21 Сими (воспомяновении) дерзостны оныя поставив и готовы умрети за законы и отечество, четверочастно воинство постави: 22 учинив и братию свою воеводами обоего ополчения, Симона и Иосифа и Ионафана, поддав коемуждо тысящу и пять сот, 23 еще же и Елеазару (повелев) чести святую книгу и дав знамение помощи Божию, первому полку сам предводителствуя сразися с Никанором. 24 Бывшу же им Вседержителю споборнику, убиша супостатов более девяти тысящ, язвеных же и безчленных болшую часть сотворища воев Никаноровых, всех же в бегство понудиша. 25 Сребреники же от пришедших на куплю их взяша. 26 Гонивше же их зелне, возвратишася от времене заключени: бе бо (день) пред субботою, сея ради вины не продолжиша гоняще их. 27 Оружия же их собирающе и корысти от супостат отемлюще, субботу праздноваху попремногу благословяще и исповедаюшеся Господеви спасшему их в день сей, начало милости учинившему им. 28 По субботе же немощным и сиротам, и вдовам (и обидимым) разделивше от корыстей, прочая сами и отроцы разделиша. 29 Сия же содеявше и общую молитву сотворше, милосердаго Господа моляху, в конец примиритися рабом Своим. 30 И от сущих с Тимофеем и Вакхидом противных множае двадесяти тысящ убиша и твердыни зело высокия одержаша, и многия корысти разделиша, равночастне себе и немощным, и сиротам и вдовам, еще же и старейшинам сотворше. 31 Собравше же оружия их, прилежне вся положиша в местех благовременных, прочыя же корысти во Иерусалим принесоша. 32 И филарха Тимофеева убиша мужа беззаконнейшаго и вельми Иудеов озлобившаго, 33 иобедителная же празднующе во отечестве, зажегших свяшенная врата, Калисфена и некиих иных сожгоша убегших во едину храмину, иже достойную мзду нечестия восприяша. 34 Треклятейший же Никанор, иже тысящу купцев на куплю Иудеов приведый, 35 смирен помощию Господнею от тех, ихже противу себе за ничтоже вменяше, славную отложив ризу, чрез средиземное (море) беглеца образом уединена себе сотворь, прииде во Антиохию презелне неблагополучен о погублении воинства. 36 И иже обеща Римляном дань воздати от пленения Иерусалимскаго, проповедаше, яко защитителя Бога имеют Иудеи, и сего ради не уязвляеми суть Иудее, зане последуют законом от Того уставленым. === 9 === 1 Того же времене Антиох с безчестием возвратися от Персиды. 2 Вниде бо во град глаголемый Персеполь и покусися расхитити храм и град обдержати: того ради множеству устремившуся, к помощи оружий обратишася: и тако случися прогнаному Антиоху от градожителей со срамом возвратитися. 3 Сущу же ему при Екватане, возвестишася ему содеянная при Никаноре и Тимофеи. 4 Вознесся же яростию, мняше и прогнавших его злобу нанести на Иудеи: сего ради повеле вознице непрестанно гонящему совершати шествие, небесному суду понуждающу его, сице бо горделиве рече: гробищное место Иудеем Иерусалим, пришед тамо, сотворю. 5 Всевидец же Господь Бог Израилев порази его неизцельною и невидимою язвою: изрекшуся бо его слову, абие объят его утробная неизельная болебзнь и горькия внутренния муки, 6 зело праведне, яко многими и странными напастьми иных утробы мучи. Он же никакоже от кичения (своего) преста: 7 еще же и гордыни исполняшеся, огнем дышущь ярости на Иудеи и заповедав ускорити шествие: случися же и пасти ему от колесницы со устремлением идущия, и лютым падением падшему вся уды плоти сокрушити. 8 Он же, иже мало прежде мняй волнам морским повелевати, от гордости паче человечи, и мерилом высоту гор мняся измерити, до земли смирен на носиле носяшеся, явную Божию силу всем показуя: 9 яко и от телесе нечестиваго червию кипети, и живущу в болезнех и в мучениих, плоти его излиятися от смрада же его и гноя вси воини гнушахуся. 10 И мало прежде небесных звезд касатися мнящаго никтоже можаше носити, смрада ради лютаго. 11 Отсюду убо нача от многия гордыни своея преставати уязвлен и в познание приходити (научен) Божиею язвою повсечастно умножее болезни своея приемля. 12 И егда ниже сам смрада своего терпети можаше, тако рече: праведно есть повинутися Богови, и смертну сущу равная Богови не мудрствовати горде. 13 Моляшеся же скверный ко никогда хотящему помиловати его Владыце, тако глаголя: 14 святый убо град, егоже тщахся пришед во прах обратити и место гробищное создати, свободен оставлю, 15 Иудеев же, ихже хотех ниже погребение сподобите, но птицем зверем на растерзание предати со младенцы, всех их равных Афинеом сотворю: 16 храм же святый, егоже прежде ограбих, предобрыми дары украшу, и священныя сосуды много болше вся воздам, и подобающая к жертвам иждивению от своих доходов подам: 17 к сим же и Иудеанином быти, и всякое место обитаемо проходити, и проповедати Божию державу имам. 18 Но никакоже престающым болезнем, найде бо нань праведный Божий суд, о себе отчаявся, писа ко Иудеом ниженаписанное послание, моления чин имущее, содержащее же сия: 19 предобрым гражданом Иудеом зело радоватися и здравствовати и благоденствовати, царь Антиох и стратиг: 20 аще здравствуете и чада, и (имения) вашя но мысли вам суть, благодарю убо Богу великим благодарением, на небо упование имея: 21 аз же в немощи лежащь, вашу честь и благоприятство воспоминах любезно: возвращаяся от Персидских мест и впад в болызнь тяжку, нужно возмнех попечение возимети о общем всех утверждении: 22 не отчаяваяся о себе, но упование много имея избежати недуга, 23 зря же, яко и отец мой, в няже времена в вышних местех воева, показа имущаго прияти по нем началство, 24 да аще что противно случится или возвестится что бедственно, ведуще сущии по странам, кому власть вверена, не смутятся: 25 к сим же помышляю прилежащих могутников и соседей царствию времене усмотряющих и случая ожидающих, оеявих сына моего Антиоха царем, егоже многаши обходящь вышний сатрапии многим от вас препоручах и представлях, писах же к нему, яже нижае писана суть: 26 молю убо вас и прошу, да помняще благодеяния во обще и особно, кийждо содержите сущее благоприятство ко мне и сыну моему: 27 уповаю бо, яко он кротце и человеколюбне, последующь моему произволению, сообщатися вам будет. 28 Мужеубийца убо и хульник злейшаяе пострадав, якоже иным сотвори, в странстве, на горах бедною смертию изчезе. 29 Пренесе же тело его Филипп сверстник его: иже и убоявся сына Антиохова ко Птоломею Филомитору во Египет отиде. === 10 === 1 Маккавей же и иже с ним бяху, Господу их защищающу, храм убо и град восприяша: 2 капища же от иноплеменников на торжищи устроенная, еще же и требища раскопаша, 3 и очистивше храм, ин олтарь сотвориша, и разжегше камение и вземше огнь от них, принесоша жертву по двою лету и шести месяцех, и фимиам и свещники, и хлебов предложение сотвориша. 4 Сия же сотворше, моляху Господа падше ниц, да не ктому в сицевая злая впадут, но аще когда и согрешат, от Него с кротостию да наказуются, а не варваром и хульным языком предадятся. 5 И в оньже день храм от иноплеменник осквернися, случися в той же день очищению быти храма, двадесять пятаго дне месяца, иже есть Хаслев. 6 И с веселием праздноваху дний осмь по образу сеней, поминающе, яко прежде малаго времене праздник сенниц в горах и в пещерах звериным образом бяху провождающе. 7 Сего ради фирси и ветви зеленыя, еще же и финики имеюще, песни приношаху Благопоспешившему очестити место Свое. 8 И узакониша общим повелением и уставлением всему языку Иудейску по вся лета праздновати дни сия. 9 И Антиох убо, иже проименовашеся Епифан, кончину тако име. 10 Ныне же яже о Евпаторе Антиохе, сыне нечестиваго бывшем, речем, сокращающе злаая, яже во бранех сотворена суть. 11 Сей бо восприяв царствие, постави над делами царскими Лисию некоего, Килисирии же и Финикии воеводу первоначалнаго. 12 Птоломей бо нарицаемый Макрон правду соблюдати произволив ко Иудеом бывшая ради к ним обиды, покушашеся яже к ним мирно препроводити. 13 Темже оклеветан от другов ко Евпатору и часто нарицаемь акибы предатель, понеже Кипр вверенный от Филомитора остави и ко Антиоху Епифану отиде, ниже честныя власти имущь, от печали отравив себе живот сконча. 14 Горгиа же быв воевода над местами, собираше чуждих воев и непрестанно на Иудеи ратоваше. 15 С ним же купно и Идумеане обдержаще крепкия твердыни обучаху Иудеов, и изгоняемых из Иерусалима приемлюще, ратовати начинаху. 16 Сущии же со Маккавеом сотворше молитву и моливше Бога споборника им быти, на Идумейския твердыни устремишася. 17 К ним же и приступивше мужественно одержаша места, всем же на стене ратующым отмстиша и сретающихся закалаху, убиша же не менше двадесяти тысящ. 18 Избегшым же иекиим не менши девяти тысящ в две пирги крепки зело и вся, яже противу облежения, имущыя, 19 Маккавей оставив Симона и Иосифа, еще же и Закхеа и иже с ним доволных ко облежению их, на нуждная места сам отиде. 20 Сущии же с Симоном сребролюбивии от некиих, иже в пиргах, сребром прельщени, и седмьдесят тысящ драхм вземше, оставиша некиих избежати. 21 Егда же возвестися Маккавею о бывшем, собрав началники людий, порицаше, яко за сребро продаша братию, супостатов на них отпустивше. 22 Сих убо предателей бывших уби и внезапу две пирги разруши. 23 Оружием же во всех и руками благоуспевая, погуби в дву твердынех более двадесяти тысящ. 24 Тимофей же, иже прежде от Иудей бысть поражен, собрав воев странных множество, и во Асии бывщих конников собрав не мало, прииде аки оружием Иудею хотящь взяти. 25 Маккавей же и сущии с ним, приближающуся тому, ко молитве Божий обратишася, главы землею посыпавше и чресла вретищами препоясавше, 26 пред олтарным прагом ниц падше, моляху милостива им быти, враждовати же враждующым на них и супостатом противится яко закон глаголет. 27 Бывше же по молитве, восприемше оружия далече из града изыдоша: приближшежеся к супостатом, о себе сташа. 28 Солнцу же возсиявающу, обои сразишася: сии убо споручника имуще благополучия и победы с добродетелию ко Господу прибежище, они же воеводу браней учинища ярость. 29 Пребывающей же крепцей брани, явишася супостатом от небесе мужие пять на конех златы узды имущих, благолепни, и правяще Иудеов два: 30 и Маккавеа среде себе вземше и защищающе своим всеоружием невредима сохраняху, на супостаты же стрелы и молнии метаху: темже смесившеся невидением сечахуся мятежа исполнени. 31 Убиенных же бысть двадесять тысящ и пятсоть сот, конных же шесть сот. 32 Сам же Тимофей побебже в Газару глаголемую твердыню, зело крепкую, воеводствующу тамо Херею. 33 Маккавей же и сущии с ним весело обседоша крепость дни четыри. 34 Сущии же внутрь на твердость места уповающе, паче меры хуляху и словеса беззаконная изношаху. 35 Явльшужеся пятому дню двадесять юношей, иже с Маккавеем беху, разжегшеся яростию хуления ради, приближившеся ко стене, мужественно и зверообразною яростию прилучившихся разсецаху. 36 Инии же подобне возшедше с нуждею к сущым внутрь, зажигаху пирги, и возжегше огнища, живых хульников сожгоша. 37 Инии же врата разсекоша, и впустивше прочий полк, взяша град, и Тимофеа скрывшагося в некоем рве заклаша, и брата его Хереа и Аполлофана. 38 Сия же сотворше с песньми и исиоведаньми благословляху Господа благодетеля великаго Израилю и победу им давшаго. === 11 === 1 По мале же весьма времени Лисиа, наместник царев и сродник и к делом приставник, зело тяжце снося бывшая, 2 собрав аки осмьдесят тысящ и конники вся, прииде на Иудеев, помышляя убо град Еллином обиталище, 3 храм же среброданен сотворити, якоже и прочиих язык капища, и по вся лета продавати архиерейство, 4 никакоже помышляю Божию державу безумно уповая на тмы пешцев и на тысящы конников и на осмьдесят слонов. 5 Вшед же во Иудею и приближився ко Вефсуре, к месту убо крепкому сущу, от Иерусалима же отстоящему яко стидий пять, сие утесняше. 6 Егда же позна Маккавей и иже с ним ратующа его твердыни, с плачем и слезами моляху Господа со всем народом, благаго Ангела послати ко спасению Израиля. 7 Сам же Маккавей первый взяв оружие увещаваше прочих вкупе с ним бедство подяти, еже помогати братии своей: вкупе же и со усердм устремишася. 8 Тамо же, и близ Иерусалима сущым, явися предводяй их конник во одежди беле всеюружие златое потрясающь. 9 Вкупе же вси благословиша милосердаго Бога и укрепишася душами, не точию человеков, но и зверей лютейших и стены железны сокрушати суще готови, 10 идяху во устроении с небесе споборника имеюще, милующу их Господу: 11 львообразно же устремившеся на супостаты, положиша от них единонадесять тысящ пешцев, конников же тысщу и шесть сот, 12 всехе же понудиша бежати: мнози же от них язвени нази уцелеша, и сам Лисиа студно бежав спасеся. 13 Не без ума же сый, размышляя в себе бывшее на себе поражение и уразумев непобедимых быти Евреов, всемогущему Богу споборствующему им, послав 14 увещаваше, яко имать примиритися во всех праведных и яко советуя прекли царя, да будет им друг. 15 Соизволи же Маккавей о всех, о нихже Лисиа моляше, о полезных радящь: елика бо Маккавей даде Лисиа на писме о Иудеех, соизволи царь. 16 Беша бо писания Иудеем посланая от Лисии, имущая образ сицев, Лисиа множеству Иудейску радоватися: 17 Иоанн и Авессалом, иже послани суть от вас, дающа написанный ответ, прошаста о назнаменанных в нем: 18 елика убо подобаше царю предложити, известих, и яже бяху приятна, соизволи: 19 аще убо в делех верность соблюдете, то и в прочее покушуся виновен вам быти благих: 20 о сих же подробну заповедах сима и посланным от мене побеседовати с вами: 21 здравствуйте. Лета сто четыредесять осмаго, (месяца) Диоскоринфиа, дне двадесять четвертаго. 22 Царское же послание содержаше сия: царь Антиох Лисии брату радоватися: 23 отцу нашему в боги пременшуся, мы хотяще во царствии сущих безмятежных быти и о своих прилежати, 24 слышахом Иудей не соблаговоляющих отца моего повелению, еже пременитися им на Еллинския законы, но изволяющих держати своя заповеди и того ради молящих, да даруются им законная их: 25 хотяще убо и сему языку без мятежа быти, судихом и храм им возвратити и жити по прародителским их обычаем: 26 благо убо сотвориши, аще послеши к ним и десницу даси, яко да познавше наше произволение, благодушни будут и безпечально пребудут ко своему охранению. 27 Ко Иудеом же царское послание сицево бе: Царь Антиох старейшинам Иудейским и прочым Иудеом радоватися: 28 аще здравствуете, да будет якоже хощем, и сами здравствуем: 29 изяви нам Менелай, яко хощете отшедше быти с вашими: 30 приходящым убо даже до дне тридесятаго месяца Ксанфика, дадим десницу без опасения: 31 еже употребляти Иудеом своих брашен и законов, якоже и прежде, и ни един им ни по единому образу стужити имать о содеянных в неведении: 32 послахом же и Менелаа имущаго утешити вас: 33 здравствуйте. Лета сто четыредесять осмаго, Ксанфика (месяца), пятагонадесять дне. 34 Послаша же и Римляне к ним послание имеющее сия: Квинт Меммий и Тит Манлий, старейшины Римстии, людем Иудейским радоватися: 35 о нихже Лисиа сродник царев соизволи вам, и мы соблаговоляем: 36 а яже суди предложити царю, скорее послите кого созирающе о сих, да уставит, якоже подобает вам, мы бо идем ко Антиохии: 37 сего ради ускорите и послите некиих, да и мы увемы, коея есте мысли: 38 здравствуйте. Лета сто четыредесять осмаго, пятагонадесять дне (месяца) Ксанфика. === 12 === 1 Содеянным же бывшым заветом сим, Лисиа убо отиде ко царю, Иудее же в земледелии упражняхуся. 2 От сущих же по местом воевод, Тимофей и Аполлоний сын Генеов, еще же Иероиим и Димофон, к сим же и Никанор Киприарх, не оставляху их благостояти и в покои быти. 3 Июппиане же толико сотвориша нечестие, умоливше Иудей с ними живущих внити во представленыя от них ладии с женами и чады, акибы ни единей вражде между ими настоящей: 4 на общее же уставление градское и сим соизволившым, яко мир имети хотящым и ничтоже подозрения имущым, отвезше их погрузиша, сущих не мнее дву сот. 5 Познав же Иуда бывшую на сродники своя жестокость, возвестив мужем иже с ним и призвав праведнаго судию Бога, 6 прииде на скверноубийц братий его, и пристанища нощию сожже, и ладии попали, избегших же от огня закла. 7 Стране же заключене бывшей отиде, яко паки приити имущь и все Июппиан искоренити гражданство. 8 Уразумев же, яко и во Амнии живущий хотят обитающым Иудеом темже образом сотворити, 9 и на Иамнитян нощию напад, зажже пристанище с кораблями яко явитися зарям огня во Иерусалиме, стадиям сущым двум стам четыредесяти. 10 Оттуду же отшедшым девять стадий, творящым путь на Тимофеа, сразишася с ним Аравлян множае пяти тысящ мужей и конник пять сот. 11 Бывшей же крепцей брани, и сущым при Иуде помощию Божиею преуспевающым, напольнии Аравляне одолени, прошаху от Иуды десницы себе, обещающе и пажить дати и во прочиих пользовати их. 12 Иуда же уразумев, яко истинно во многих они потребни, обеща мир содержати с ними: взявше же десницу, отидоша в кущы своя. 13 Нападе же и на некий град мостами тверд и стенами огражден, иже от всяких смешеных языков обитаемый, емуже имя Каспин. 14 Сущии же внутри надеющеся на крепость стен и на уготовление брашен, нерадиво пребываху, проклинающе сущих при Иуде, и ктому хуляще, и глаголюще, яже не подобает. 15 Сущии же со Иудою призвавше великаго Обладателя мира, Иже без овнов и механических орудий во времена Иисуса разруши Иерихон, нападоша зверообразно на стену. 16 И вземше град Божиею волею, безчисленна заклания сотвориша, яко прилежащему езеру, в широту имущему стадии две, текущею (убиенных) кровию исполнену явитися. 17 Оттуду же отшедше стадий седмь сот пятьдесят, приидоша в Харак, ко глаголемым Тувиином Иудеом. 18 И Тимофеа убо на местех не достигоша, ни едино дело совершивша от мест отшедша, оставльша же стражу в некоем месте зело тверду: 19 Досифей же и Сосипатр сущии от воевод, иже со Маккавеом, изшедше погубиша от Тимофеа оставших в твердыни более десяти тысящ мужей. 20 Маккавей же устроив воя своя по полком, постави их над полками, и на Тимофеа пойде имущаго с собою сто двадесять тысящ пешец, конник же две тысящы и пять сот. 21 Познав же Тимофей пришествие Иудино, посла жены и дети и прочая уготования в твердыню нарицаемую Карнию: бе бо непреборима и ко всходу неудобна ради тесноты всех мест. 22 Егда же полк Иудин первый явися, и бысть ужас на супостаты и страх от явления Всевидящаго бывшаго на них, в бегство устремишася един от другаго бежащь, яко множицею от своих повредишася и оружии своими прободахуся. 23 Творяше же Иуда гонение прилежно, убивая иноплеменников, и изби от них тридесять тысящ мужей. 24 Сам же Тимофей впад между сущих со Досифеем и Сосипатром, со многим ухищрением моляше, да жив отпустится: зане многих убо (от Иудей) родителей и некиих братию имеяше (у себе), и сим зло случится, аще умрет. 25 Егда же многими словесы вероятен сотвори обет, еже возвратити оных невредных, пустиша его ради спасения братии. 26 Изшед же (Маккавей) на Карнию и на Атаргатию, уби двадесять пять тысящ. 27 По победе же сих и погублении обрати Иуда воинство и на Ефрон, град твердый, в немже живяше Лисиа и множество разных язык: юноши же сильнии стояще пред стенами крепко противуратоваху, в немже беху орудия и стрел многое уготовление. 28 Призвавше же Всесильнаго с державою сокрушающаго ратных силы, взяша град под руку и убиша сущих внутрь двадесять пять тысящ: 29 и отшедше оттуду устремишася на Скифский град, отстоящь от Иерусалима стадий шесть сот. 30 Освидетелствовавшым же живущым тамо Иудеом о Скифских гражданех, яко имеют к ним благоприятство и во времена злополучная кротцы пребываху, 31 благодаривше им и умоливше, дабы и в прочее к роду их благоприятни были, приидоша во Иерусалим, дню великаго праздника седмиц настоящу. 32 По глаголемей же Пентикостии, идоша противу Горгиа стратига Идумейска. 33 Изыде же с пешцы треми тысящьми, и конник четыре ста, 34 и сотворшым брань, случися пасти малым от Иудей. 35 Досифей же некто от Вакинора, конный муж и крепок, ят Горгию, и взем его за хламиду, ведяше его крепко, и хотящь проклятаго взяти жива, некто от Фракийских конник нападе нань и рамо отсече, Горгиа же избеже во Марису. 36 Воином же Горгиевым на мнозе борющымся и утружденным бывшым, призвав Иуда Господа спомощника, да будет и воевода брани, 37 начат гласом отеческим с песньми вопль, возопив и нечаянне на воя Горгиевы напад, в бегство их обрати. 38 Иуда же собрав воя прииде во град Одоллам: и егда седмый день прмииде, по обычаю очистившеся в том месте субботу праздноваша. 39 На утрие же прииде со своими Иуда, да, якоже подобаше, телеса падших возмет и со сродниками положит во гробех отеческих. 40 Обретоша же у коегождо от умерших под ризами убиенных от даров идолских, яже во Иамнии, о нихже закон запрещаше Иудеом, всем же яве бысть, яко сея ради вины тии падоша. 41 Вси убо благословивше правый суд Господень, яко тайная сотвори явлена, 42 к молению обратишася моливше, да сотвореный грех весьма изгладится: добльственный же Иуда моляше людий, да сохранят себе от греха, очима видяще бывшая падших за грех. 43 И сотворив от мужей собрание утварей, яко две тысящы драхм сребра, посла во Иерусалим принести за грех (мертвых) жертву, предобре и благочестно творя, о воскресении помышляя. 44 Аще бо падшым востати не чаял бы, излишно было бы и всуе о мертвых молитися. 45 Ктому взирающь, яко во благочестии усопшым изряднейшая уготовася благодать: 46 преподобное и благочестивое помышление: отонуду же за умерших моление сотвори, яко да от греха очистятся. === 13 === 1 Лета сто четыредесять девятаго, позна Иуда, яко Антиох Евпатор грядет со множеством на Иудею, 2 и с ним Лисиа наместник ему и над делами старейший, кийждо имуща (с собою) силу Еллинску пешцев сто десять тысящ и конник пять тысящ и триста, и слонов двадесять два и колесниц с косами триста. 3 Примесися же к ним и Менелай, и с великою лестию моляше Антиоха, не ради отечеству спасения но надеяся в началство поставлен быти. 4 Царь же царей воздвиже ярость Антиохову на нечестиваго, и Лисии показавшу сего быти виновна всех злых, повеле, якоже обычай есть, на месте убити, приведшым его в Вирсавию. 5 Бе же на том месте столп пятидесяти лакот полн пепела, сей же имеяше орудие окрест вращающееся устремителное в пепел. 6 Тамо священнотатству повинна суща, или и иных некиих злоб превосходство сотворшаго, вси вреяют в погибель. 7 Сицевою смертию законопреступнику случися умрети, ниже погребения получившему Менелаю 8 зело праведне: понеже бо многа согрешения на олтарь Божий соверши, егоже огнь и пепел бе свят, (и он) в пепеле смерть восприя. 9 Но царь умом необуздан грядяше, горшая при отце его бывших показати хотящь Иудеом. 10 Уведав же Иуда о сих, повеле людем день и нощь молити Господа, негли, якоже иногда, и ныне поможет 11 имущым закона и отечества и святаго храма лишитися, и мало прежде почивших людий не оставит злохульным языком подручных быти. 12 Всем же тожде вкупе сотворшым и просившым от Господа милосердия с плачем и постами и простертием (на землю) по три дни непрестанно, укрепив их Иуда повеле ити. 13 Особь же быв Иуда со старейшины, советова, прежде нежели внидут вои царстии во Иудею и одержат град, изшедше сразитися (за вещы святыя) Господнею помощию. 14 Вдав же попечение Создателю мира и умолив своих мужественне подвизатися даже до смерти за законы, за святилище, за град, за отечество, за гражданство, окрест Модина воинство постави. 15 Дав же сущым с ним знамение Божия победы, с юношами крепчайшими избранными напад нощию на царский двор, во стану уби четыре тысящы мужей и болшаго слона с сущими на нем порази: 16 и на конец весь полк страха и смятения исполниша и изыдоша благополучно. 17 Являющуся же уже дню, сие содеяся, помогающу ему Господню покровению. 18 Царь же приемь вкус храбрости Иудейския, испытова хитростию места. 19 И ко Вефсуре крепцейи твердыни Иудейстей прииде, и отгонимь бе, ударяшеся, умаляшеся. 20 Сущым же внутрь, Иуда потребная посла. 21 Возвести же тайная супостатом Родок от Иудейских воинов: взыскан же бысть и ят и заключен. 22 Повтори же царь слово со Вефсуряны, десницу даде, прия, отиде, 23 состави брань со Иудою и преможен бысть: егда же позна отмещущася Филиппа во Антиохии поставленнаго над делами, смятеся и моли Иудеов, повинуся и кляся о всех праведных, примирися и жертву принесе, почте храм и ущедри место. 24 И Маккавеа прият, постави стратига от Птолемаиды даже до Герринов князем, 25 прииде во Птолемаиду: скорбяху Птолемаидяне о заветех, негодоваху бо о примирениих, яже хотеша отринути. 26 Взыде на судище Лисиа, отвеща по возможности, увеща, (люди) утиши, благоприятны сотвори, возвратися во Антиохию. Сице бысть царско исхождение и возвращение. === 14 === 1 По триех же летех увебда Иуда, яко Димитрий Селевков сын вплыве сквозе пристанище, еже при Триполи, со множеством крепким и кораблями, 2 и одержа страну и уби Антиоха и его наместника Лисию. 3 Алким же некто бывый прежде архиерей, волею же осквернивыйся во времена смешения, помыслив, яко ни киим образом небсть ему спасения, ниже прихождения ко святому олтарю, 4 прииде ко царю Димитрию сто пятьдесят перваго лета, принося ему венец злат и финик, к сим же и цветы, иже мняхуся церковнии быти: и в день оный молчаше. 5 Получив же время безумию своему содействующее, призван бысть Димитрием на собор и вопрошен, в коем состоянии и совете стоят Иудее? 6 К сим рече: глаголемии от Иудей Асидее, ихже вождь Иуда Маккавей, брани строят и распри воздвизают, не допускающе царству благостояния получити: 7 сего ради отлучен прародителския славы, сиречь священноначалства, семо ныне приидох, 8 первое убо о надлежащих царю верность содержащь, второе же и о своих гражданех промышляя: предреченных бо безсловесием весьма род наш не мало страждет: 9 каяждо же сих познав, ты, царю, о стране и о обстоянии рода нашего проуразумей по человеколюбию, еже имаши ко всем благопреклонное: 10 донележе бо Иуда жив есть, невозможно мира получити вещем. 11 Сицевым же реченным бывшым от него, абие прочии друзи, вражду имущии на Иуду, разжегоша Димитриа. 12 Призвав же скоро Никанора старейшину над слонами и воеводою поставив Иудеею, посла, 13 дав заповедь, самаго убо Иуду убити, сущих же с ним расточити, поставити же Алкима архиереем превеликаго храма. 14 Тогда языцы убегшии из Иудеи от Иуды, стадами прихождаху к Никанору, Иудейская злополучия и бедства себе благополучия мняще быти. 15 Слышавще же (Иудее) Никанорово пришествие и нападение языков, посыпавшеся землею, моляху Поставившаго даже до века люди Своя и присно с явлением Защищающаго Свою часть. 16 Повелевшу же воеводу, скоро оттуду двигнушася и смесишася с ними при градце Десавли. 17 Симон же брат Иудин сразився с Никанором, мало же устрашився внезапнаго ради нахождения супостатов. 18 Обаче же слышав Никанор мужесто при Иуде сущих и благодушие, имже подвизаются за отечество, убояся суд кровию сотворити: 19 сего ради посла Посидониа и Феодота и Маттафию дати и взяти десницу. 20 Многу же о сем бывшу совету и воеводе людем возвестившу и бывшу единогласному всех изволению, соизволиша на мирная 21 и нарекоша день, в оньже особно снидутся купно. И прииде. И поставиша различная седалища. 22 Повеле же Иуда вооруженным быти готовым в местех приличных, да не когда от супостат внезапу злодеяние будет, и подобающую беседу обще сотвориша. 23 Пребываше же Никанор во Иерусалиме и ни коегоже зла сотвори, стада же народов собранных отпусти. 24 Имеяше же Иуду всегда в лицы, душевно к мужу преклонися: 25 моли же его оженитися и чада сотворити. Оженися, благо поживе, общежителствоваше. 26 Алким же видя между ими благоприятство и бывшая совещания познав, иде к Димитрию и глаголаше, яко Никанор о вещех чуждая мудрствует: Иуду бо, наветника царству, преемника восприя себе. 27 Царь же возярився и прелукавыми оклеветании его разсверепев, писа Никанору глаголя: о совещаниих сих тяжко (ми есть) носити: повелеваю ти Маккавеа связана послати скоро во Антиохию. 28 Уведав же о сих Никанор, смятеся и тяжко терпяше завещанная отринути, ни чимже его мужу обидевшу. 29 Но понеже царю сопротивитися не бе возможно, благовременства наблюдаше хитростию военною сие совершити. 30 Маккавей же видя над собою грознее деюща Никанора и обыкновенное сретение свирепее имуща, уразумев не от блага быти суровству сему, собрав не мало сущих окрест себе, скрыся от Никанора. 31 Познав же другий, яко добльственно от мужа хитростию предварен, пришед к великому и святому храму, священником подобающыя жертвы приносящым повеле предати мужа. 32 Сим же с клятвою рекшым, яко не ведят, где есть искомый, простер десницу на церковь, сими клятся: 33 аще не предадите ми связана Иуду, то Божий храм равен со землею сотворю, и олтарь раскопаю, и капище Дионису славное возставлю зде. 34 И сия рек отиде. Жерцы же воздеюще руце на небо, призываху Сущаго всегда Споборника языку Своему, сия рекуще: 35 Ты, Господи всех, не требуяй ничтоже, благоволил еси храму обитания Твоего быти в нас: 36 и ныне, о, Святе, всякаго освящения Господи, сохрани во век несквернен сей храм недавно очищенный, загради же всяка уста неправедна. 37 Разий же некто от старейшин Иерусалимских оклеветан бысть Никанору, муж любитель граждан и зело добре словущь и по благопамятству отец Иудеом именуемый: 38 бяше бо внесый в прежних временех несмешения суд во Иудействе, и тело и душу за Иудейство предаяше со всяким усердием. 39 Хотящь же Никанор явну сотворити ненависть, юже име на Иудеи, посла воинов более пяти сот яти его. 40 Мняше бо, яко онаго поимав, сим соделает беду. 41 Множеству же народа хотящу столп обдержати и дворовыя двери разрушающу, и повелевшу огнь принести и двери зажещи, объят отвсюду быв, мечем поразися, 42 лучше добльственно хотящь умрети, нежели беззаконником подручник быти и свое благородство недостойне обезчестити. 43 Скорости же ради подвига несмертна язва бысть, и народом внутрь дверий вреявшымся, востек дерзостно на стену, сверже сам себе мужественно на народы. 44 Оным же скоро разбегшымся и бывшу разстоянию, паде срединою чрева посреде их: 45 еще же дышущь и разжжен душею, востав, крови его потоком текущей и тяжчайшым ранам сущым, бежащь сквозе народы пройде, 46 и став на некоем камени стремниннем, весьма уже без крови быв, исторгнув внутренняя (своя) и взем обема рукама верже на народы: и призвав Владеющаго животом и духом, да сия ему паки воздаст, и сим образом живот сконча. === 15 === 1 Никанор же уведав, яко Иуда в местех Самарийских, умысли со всем устремлением в день субботный на них напасти. 2 По нужди же последующии ему Иудее глаголаху: никакоже сице зверски и варварски да погубляеши, но славу воздаждь предпочтенному от Всевидящаго со святынею дневи. 3 Нечестивыи же вопроси: еда есть Сильный на небеси, иже повеле праздновати день субботный? 4 Онем же отвещавшым: есть Господь живый Сей на небеси силен, иже повеле праздновати седмый день. 5 Он же рече: и аз силен есмь на земли, повелеваяй взимати оружия и царския потребы исполняти. Обаче не одержа и совершити окаяннаго своего совета. 6 И Никанор убо великою гордынею воздвижен умысли общую победу составити на Иуду. 7 Маккавей же всегда надеяшеся со всем упованием заступление от Господа получити 8 и утешаше своих, да не убоятся пришествия языков, да имеют же во уме преждебывшую им от небесе помошь, и ныне да чают от Вседержителя быти себе победе и помощи: 9 и наказав их от закона и пророков, воспомянув же им преждебывшыя подвиги, усерднейших их сотвори: 10 и душами воздвигнув их, увещаваше, вкупе показав им языческая льщения и клятвопреступление: 11 и коегождо их вооружив не тако щитов и копий утверждением, яко словес благих утешением, и сказав сон достоверен, утробы всех возвесели. 12 Бысть же его сицево видение: Онию бывшаго архиереа, мужа добраго и благаго, благоговейна видением, кротка же нравом и беседою благолепна, и от детства обучившагося всем добродетелем, сего руце воздеюща и молящася за вся люди Иудейския (виде). 13 И яко посем явися ин муж сединами и славою дивен, чудно же некое и великолепнейшее окрест его преизящество. 14 Отвещав же Ониа рече: сей есть братолюбец, иже много молится о людех и о святем граде, Иеремиа Божий пророк. 15 Простер же Иеремиа десницу, даяше Иуде мечь злат, дающь же возгласи сия: 16 приими святый мечь дар от Бога, имже сокрушиши супостаты. 17 Укрепившежеся Иудиными словесы преблагими и могущими к мужеству устремити и душы юнош исправити, умыслиша не ополчатися, но храбро напасти и со всякою доблестию сшедшымся сразитися за вещы святыя, понеже и град и святая и святилище бедствуют. 18 Бе бо о женах и чадех еще же и о братии и ужиках менший им подвиг, величайший же и первый страх о освященнем храме. 19 Такожде и во граде оставленным не малая печаль, мятущымся о сражении на поли хотящем быти. 20 И всем уже чающым имущаго быти сражения и супостатом уже смесившымся, и воинству чинно расположенну сущу и зверем в приличней стране поставленым и коннице по углам учиненней, 21 разсуждая Маккавей множества пришествие и оружия различное уготовление и свирепство зверей, простер руце на небо, призываше чудотворящаго и призирающаго Господа, ведая, яко не оружием победа, но якоже угодно Ему, достойным дает одоление. 22 Рече же призывая сим образом: Ты, Владыко, послал еси Ангела твоего при Езекии цари Иудине и убил еси от воев Сеннахиримовых сто осмьдесят пять тысящ: 23 и ныне, Владыко сильный на небесех, посли Ангела твоего благаго пред нами в страх и трепет им: 24 величеством мышцы Твоея да убоятся иже с хулением пришедшии на святыя люди Твоя. И сей убо сице помолися. 25 Никанор же и иже с ним с трубами и песньми приближахуся. 26 Иуда же и сущии с ним в призывании и молитвах смесишася с супостаты: 27 и руками убо борющеся, сердцами же к Богу молящеся, постлаша не менши тридесяти пяти тысящ, явлением Божиим зело возрадовавшеся. 28 Преставше же от битвы и с радостию возвращающеся, познаша Никанора падша со всеюружии (своими). 29 Бывшу же воплю и смятению, благословляху Сильнаго отеческим гласом. 30 И повеле, иже весьма телом и душею первоподвижник за граждан, иже возраста благоприятство к своему народу сохранивый Иуда, Никанорову главу и руку со рамом отсещи и принести во Иерусалим. 31 Пришед же тамо и созвав единоязычных своих и священников, пред олтарем став, призва сущих от краеградия 32 и показа им сквернаго Никанора главу и руку хульникову, юже простре на храм святый Вседержителев возносяся: 33 и язык нечестиваго Никанора отрезав, рече, яко на раздробление птицам имать дати, и сия в возмездие безумия противу храма повеси. 34 Вси же на небо благословиша Господа явленаго, рекуще: благословен Сохранивый место Свое не осквернено. 35 Повеси же Никанорову главу на краеградии во известное всем и явное Господни помощи знамение. 36 И узакониша вси общим советом никакоже оставити без празднования день сей: 37 имети же праздник сей в третийнадесять день вторагонадесять месяца, иже глаголется Сирийским гласом Адар, пред единым днем Мардохеева дне. 38 И сия убо, яже о Никаноре, имеются сице: и от тех времен одержан бысть град от еврей, и аз зде оставляю слово. 39 И аще убо благо и прилично сочинению, сего и сам хотех: аще же малоценно и мерно, сие по возможности моей бе. 40 Якоже бо вино особно пити, такожде и воду паки, сопротивно есть: но имже образом вино с водою смешенное сладко и веселую благодать совершает, такожде и сочинение (и украшение) слова веселит слухи чтущих историю. Зде же да будет и конец.